COV ZAJ NYEEM NRUAB LIS PIAM XYOO A 2019-2020

TIM 22 LUB 6 HLI 2020

Hnub Ob Lis Piam Kaum Ob Nruab Xyoo A Nruab Lis Piam Xyoo II

Hwm LN John Fisher, Tswv Qhia tuag ua Tim KHawv; LN Thomas More, tuag ua Tim Khawv
Hwm LN Paulinus nyob Nola, ua Tswv Qhia

Zaj Nyeem Ib: 2 VAJ 17: 5-8, 13-15A, 18

5 Xas Mas Nas Xas, cov As Xis Lias tus vaj, tuaj nkag rau hauv lub teb chaws tas nrho, thiab nws tuaj ntaus Xas Mas Lias teb tau peb xyoos nkaus. 6 Yog xyoo cuaj uas Hos Xias ua vaj kav His Xas Lais, ces tus vaj As Xis Lias ntaus yeej Xas Mas Lias, ces nws coj cov His Xas Lais mus nyob txim nyob As Xis Lias teb. Nws coj lawv mus nyob Has Las, thiab nyob ntawm tus ntug dej Has Npos hauv lub xeev Nkos Xas, thiab nyob hauv cov nroog Mes Dias.
7 Cov xwm tshwm sim zoo li ntawd yog vim cov His Xas Lais ua txhaum rau HUAB TAIS lawv tus Tswv Ntuj, uas yog tus tau coj lawv tawm ntawm Hais Nkws Tos teb los, kom lawv tau dim ntawm Fas Las Oos tus vaj Hais Nkws Tos tes; thiab vim lawv mus teev lwm cov tswv ntuj, 8 lawv mus coj lwm haiv neeg uas HUAB TAIS tau ntiab khiav tawm ntawm cov His Xas Lais mus tej kev cai; thiab lawv tau coj tej kev cai uas cov vaj His Xas Lais tau tsa thiab.
13 HUAB TAIS twb tau kom cov Yaj Saub xub ceeb toom rau His Xas Lais thiab rau Yus Das tias : "Nej tso nej tus yam ntxwv phem pov tseg, nej tig los coj kuv cov lus qhia thiaj kuv tej lij choj, raws nraim li txoj cai kuv tau ceeb toom rau nej cov yawg koob thiab raws li kuv tau kom kuv cov tub txib Yaj Saub tuaj qhia rau nej." 14 Tab sis lawv tsis mloog, lawv ua caj qwb txhav qhi xws li lawv cov poj yawm txwv koob uas tsis ntseeg HUAB TAIS lawv tus Tswv Ntuj. 15 Lawv tsis mloog nws cov kev cai lij choj thiab lo lus nws tau nrog lawv cov yawg koob cog; lawv tsis mloog HUAB TAIS cov lus ceeb toom rau lawv.
18 Vim li ntawd, HUAB TAIS npau taws heev rau cov His Xas Lais, nws thiaj muab lawv tshem mus deb ntawm nws ntsej muag; tsuas tshuav kiag tib lub xeem Yus Das lawm xwb.

NPN 60: 3, 4-5, 12-13

Txais: (7b) Thov koj muab koj txhais tes xis los pab peb,
Huab Tais, thov koj teb peb mas.

Tswv Ntuj, koj tau tso peb tseg, koj ua kom peb tawg tas,
koj tau npau taws rau peb, thov koj rov los coj peb mas !

Txais: (7b) Thov koj muab koj txhais tes xis los pab peb,
Huab Tais, thov koj teb peb mas.

Koj ua lub teb chaws qeeg tas, ua kom av tawg tej kab pleb :
thov koj txhub cov kab pleb ntawd rau, vim teb chaws ua zog koog.
Koj tau cia koj haiv neeg raug kev nyuaj loj;
koj muab ib co cawv rau peb haus kom peb taub hau kiv pes lees.

Txais: (7b) Thov koj muab koj txhais tes xis los pab peb,
Huab Tais, thov koj teb peb mas.

Tswv Ntuj, puas yog koj tso peb tseg lawm
Koj thiaj tsis kam nrog peb cov tub rog
tawm mus ntaus tsam ntxiv?
Thov koj tuaj pab peb ntaus cov uas tawm tsam peb,
vim neeg txoj kev pab tsis zoo dab tsi rau peb.

Txais: (7b) Thov koj muab koj txhais tes xis los pab peb,
Huab Tais, thov koj teb peb mas.

As Les Lus Yas: HN 4: 12

Txais: As les lus yas, as les lus yas.

Tswv Ntuj lo lus muaj txoj sia thiab ua tau hauj lwm,
nws tsom tau neeg tej kev xav thiaj tej zaj tswv yim hauv nruab siab.

Txais: As les lus yas, as les lus yas.

Ntawv Moo Zoo: MT 7: 1-5

Yes Xus hais rau nws cov thwj tim tias:
1 "Nej tsis txhob txiav txim rau luag, Ntuj thiaj yuav tsis txiav txim rau nej ;
2 vim tias, nej txiav txim li cas rau luag, Ntuj kuj yuav txiav txim ib yam li ntawd rau nej;
nej luj li cas rau luag, Ntuj kuj yuav luj li ntawd rau nej.
3 Ua cas koj pom tus quav nplej nyob hauv koj tus kwv tij qhov muag,
tab sis tus nqaj ntoo nyob hauv koj qhov muag, koj ho tsis pom?
4 Koj ua cas hais tau rau koj tus kwv tij tias : ‘Cia kuv rho tus quav nplej hauv koj qhov muag pov tseg,’
tab sis ib tug niag nqaj twb nyob hauv koj qhov muag?
5 Neeg ua zoo sab nraud, koj xub rho tus nqaj hauv koj qhov muag pov tseg tso,
koj thiaj li yuav pom kev tseeb rho tau tus quav nplej hauv koj tus kwv tij qhov muag.”

TIM 23 LUB 6 HLI 2020

Hnub Peb Lis Piam Kaum Ob Nruab Xyoo A Nruab Lis Piam Xyoo II

Zaj Nyeem Ib: 2 VAJ 19: 9B-11, 14-21, 31-35A, 36

9b Xes Nas Kes Lis, cov As Xis Lias tus vaj, rov qab tso dua ib co tiam lis tuaj cuag Es Xes Kais, nws hais cov lus no rau lawv: 10 "Nej mus hais zoo li no rau Es Xes Kais cov Yus Das tus vaj: ‘Koj tsis txhob cia koj tus Tswv Ntuj uas koj tso tso siab rau dag koj tias Yes Lus Xas Les yuav tsis poob rau hauv tus vaj As Xis Lias tes. 11 Koj twb paub txog tej yam uas cov vaj As Xis Lias tau ua rau tas txhua lub teb chaws kom lawv puas ntsoog tas tib si lawm. Koj puas xav tias koj yuav dim ?”
14 Es Xes Kais txais tau tsab ntawv ntawm cov tiam lis, nws muab los nyeem. Ces nws mus pem HUAB TAIS lub Tuam Tsev, nws nthuav tsab ntawv tso rau ntawm HUAB TAIS xub ntiag. 15 Ces Es Xes Kais thov HUAB TAIS zoo li no: "HUAB TAIS, His Xas Lais tus Tswv Ntuj, koj zaum saum koj lub theej kiab nyob saum cov Tshiab Kes Lus Npis, koj tib leeg yog tus Tswv Ntuj kav tas ib puas xyeem teb chaws muaj vaj nyob ntiaj teb no. Koj yog tus tau tsim lub ntuj lub teb. 16 HUAB TAIS, thov koj tig ntsej los mloog, thov koj qhib qhov muag los saib. Koj tau hnov Xes Nas Kes Lis cov lus lawm, nws tso neeg tuaj hais lus thuam tus Tswv Ntuj muaj txoj sia. 17 HUAB TAIS, yeej muaj tseeb tias cov vaj As Xis Lias tau rhuav kom cov haiv neeg thiab lawv cov teb chaws tau ploj mus lawm. 18 Lawv tau muab luag cov dab qhuas pov rau hauv hluav taws, vim cov dab ntawd tsis yog ib co tswv ntuj, lawv yog neeg txhais tes txua xwb, lawv yog ntoo, yog pob zeb xwb, cov vaj As Xis Lias thiaj tau muab rhuav tas tib si lawm. 19 Tab sis nyem no, HUAB TAIS, peb tus Tswv Ntuj, kuv thov koj cawm peb dim ntawm Xes Nas Kes Lis tes. Ces txhua lub teb chaws muaj vaj ntxwv nyob ntiaj teb no thiaj yuav paub tias koj tib leeg yog Tswv Ntuj, HUAB TAIS !"
20 Ces His Xais, As Mos tub, xa lus mus rau Es Xes Kais tias : " HUAB TAIS , His Xas Lais tus Tswv Ntuj hais li no : ‘Kuv tau hnov koj zaj thov ntuj uas koj hais txog tus vaj As Xis Lias, Xes Nas Kes Lis lawm.’
21 Cov lus no yog Huab Tais cov lus uas nws hais txog Xes Nas Kes Lis:
‘Tus ntxhais nkauj xwb Xis Yoos ntxub koj thiab thuam koj; tus ntxhais Yes Lus Xas Les co hau nto tsis pom zoo nyob tom koj nrob qaum.
31 Vim tias yuav muaj ib pab seem tawm hauv Yes Lus Xas Les los, thiab ib co neeg ciaj yuav dim tawm ntawm lub roob Xis Yoos los. HUAB TAIS Xas Npas Os txoj kev mob siab yuav ua tau qhov ntawd.’
32 HUAB TAIS hais txog tus vaj As Xis Lias li no tias: ‘Nws yuav tsis tau chaws mus hauv lub nroog, nws yuav tsis tau tua ib xib xub mus rau hauv, nws yuav tsis tau tuav leem phiaj mus ntaus lub nroog, nws yuav tsis tau tsa ntsa vij lub nroog. 33 Nws tuaj txoj kev twg tuaj, nws yuav rov taug txoj kev ntawd rov qab, nws yuav tsis tau chaws mus hauv lub nroog no li.’” HUAB TAIS hais l ntawd. 34 “Kuv yuav txuag thiab yuav cawm Yes Lus Xas Les, vim kuv tus kheej thiab vim kuv tus tub txib Das Vis.”
35 Hmo ntawd HUAB TAIS tus Tshiab tawm mus, nws mus ntaus ib puas yim caum tsib txhiab leej neeg As Xis Lias tuag nyob hauv lawv lub yeej. 36 Ces Xes Nas Kes Lis, tus vaj As Xis Lias, tso lub yeej tseg, nws khiav rov mus tsev mus nyob Nis Nis Vas.

NPN 48: 2-3AB, 3CD-4, 10-11

Txais: (9d) Tswv Ntuj txuag nws lub tsheej kom nyob mus li.

HUAB TAIS loj tas nrho, yeej tsim nyog peb cav txog nws
nyob hauv peb tus Tswv Ntuj lub tsheej.
Nws lub roob ntshiab, uas zoo tshaj txhua lub roob,
yog txoj kev zoo siab rau tas ntiaj teb neeg

Txais: (9d) Tswv Ntuj txuag nws lub tsheejkom nyob mus li.

Roob Xis Yoos, thaj chaw dai siab nyob qaum teb,
yog tus tuam vaj loj lub tsheej,
Tswv Ntuj saib raws nws tej vaj tej loog,
nws nto moo lug tias nws yog koj lub ntsa loog zeb.

Txais: (9d) Tswv Ntuj txuag nws lub tsheej kom nyob mus li.

Tswv Ntuj, peb xav txog koj txoj kev hlub
nyob hauv koj lub tuam tsev.
Ib yam li koj lub npe, Tswv Ntuj, koj lub koob meej
kuj ncha mus txog npoo ntiaj teb kawg.
Txoj kev ncaj ncees nyob puv nkaus koj txhais tes xis.

Txais: (9d) Tswv Ntuj txuag nws lub tsheej kom nyob mus li.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: Kuv yog qhov pom kev kaj lub ntiaj teb,
leej twg los raws kuv mas nws yuav tauj qhov pom kev uas pub txoj sia.

Txais: As les lus yas, as les lus yas.

Ntawv Moo Zoo: MT 7: 6, 12-14

Yes Xus hais rau nws cov thwj timn tias:
6 "Nej tsis txhob muab tej yam ntshiab pub rau dev noj, txhob muab nej cov hlaws npliag deg
pov rau ntawm npua xub ntiag, tsam npua muab tsuj ces npua tig rov los dua nej.
12 "Nej yuav ua rau luag tej tas ib puas tsav yam uas nej xav kom luag ua rau nej.
Txoj Cai thiab cov Yaj Saub yog li ntawd.
13 “Nej chaws ntawm lub qhov rooj nqaim mus mog. Vim lub qhov rooj loj thiab txoj kev kev dav
yog txoj coj neeg mus rau lub qhov tuag, muaj coob leej taug txoj kev ntawd.
14 Hos lub qhov rooj nqaim nqaim thiab txoj kev ti ti thiaj yog txoj coj neeg mus txog txoj sia. Muaj tsawg leej nrhiav tau txoj kev ntawd taug.”

TIM 24 LUB 6 HLI 2020

Hnub Plaub Lis Piam Kaum Ob Nruab Xyoo A Nruab Lis Piam Xyoo II

Hwm LN Zam Ntxuav Plig Hnub Yug Los – Thaj Txi Ntuj Nruab Hnub

Zaj Nyeem Ib: HIS XAIS 49: 1-6

1 Cov pov txwv, nej mloog kuv hais ! Cov haiv neeg nyob deb, nej cuab pob ntseg mloog kuv ! HUAB TAIS yeej hu kuv txij thaum kuv tseem nyob hauv kuv niam plab, nws yeej tuav kuv npe txij thaum kuv tseem nyob hauv kuv niam nrog cev lawm. 2 Nws muab kuv lub ncauj ua ib rab ntaj ntse zuag plias; nws muab kuv zais rau hauv nws txhais tes qhov ntxoov. Nws muab kuv ua ib xib xub vos ntse ntse, muab kuv ntim hauv nws lub raj xub. 3 HUAB TAIS hais rau kuv tias : "His Xas Lais, koj yog kuv tus tub txib, kuv yuav nto koob meej nyob hauv koj." 4 Hos kuv hais tias : "Kuv tau siv zog khwv, tab sis tsis tau dab tsi li, kuv nkim kuv lub zog tas dawb xwb. Tsis kav kuv muaj cai nyob ntawm HUAB TAIS, kuv tus nqi zog yog nyob ntawm kuv tus Tswv Ntuj.
5 Nyem no, HUAB TAIS uas yog tus puab kuv nyob hauv kuv niam nrog cev nws tau hais kom kuv ua nws tus tub txib, kom tau mus coj Yas Kos rov los cuag nws, kom tau coj His Xas Lais rov los nrog nws ua ke. Ces kuv yuav muaj koob meej nyob ntawm HUAB TAIS xub ntiag; kuv tus Tswv Ntuj yog kuv lub zog." 6 Nws tseem hais tias : "Tsis tsim nyog koj ua kuv tus tub txib xwb kom tau rov tsa cov xeem Yas Kos sawv, thiab kom tau coj cov His Xas Lais seem rov qab los, kuv tseem xaiv koj kom koj yog lub teeb ci ntsa kaj cov kuj cuab, ces kuv txoj kev cawm thiaj yuav ri mus txog cov npoo ntiaj teb kawg tib si.”

NPN 139: 1B-3, 13-14AB, 14C-15

Txais: (14) Kuv cav txog koj vim koj puab kuv tau zoo tas nrho.

HUAB TAIS, koj tsom tshab kuv, koj paub kuv :
koj paub thaum kuv zaum thiab thaum kuv sawv ;
koj nyob deb paub tas tej kuv xav.
Koj saib nraim kuv thaum kuv mus kev los thaum kuv so,
koj paub txhua yam kuv ua.

Txais: (14) Kuv cav txog koj vim koj puab kuv tau zoo tas nrho.

Koj yog tus tsim kuv lub tswv yim tej plab plaw ;
koj xaws kuv ntxiv kuv hauv kuv niam plab.
Kuv ua koj tsaug, vim koj puab tau kuv txaus ntshai txaus qhuas :
koj tsim kuv zoo ua luaj, koj cov dej num zoo tas nrho

Txais: (14) Kuv cav txog koj vim koj puab kuv tau zoo tas nrho.

Koj paub kuv tus ntsuj plig txhij txhua thoob plaws.
koj pom thaum kuv cov pob txha pib tsheej xeeb los,
thaum koj puab kuv nyob hauv qhov chaw nraim,
thaum koj xaws kuv tsheej zuj zus puag hauv tej nruab a.

Txais: (14) Kuv cav txog koj vim koj puab kuv tau zoo tas nrho.

Zaj Nyeem Ob: HAUJ LWM 13: 22-26

Paj Lug hais lus, nws hais tias:
22 “Tswv Ntuj muab Xas Ws xyeeb pov tseg, nws tsa Das Vis ua lawv tus vaj. Tswv Ntuj ua pov thawj txog Das Vis li no: ‘Kuv nrhiav tau Das Vis, Yes Xes tus tub. Nws yog tus neeg ntxim kuv siab, nws yuav ua raws li kuv lub siab xav tas huv si.’ 23 Nyob hauv Das Vis cov xeeb ntxwv, Tswv Ntuj tau tsa ib tug cawm seej tuaj pab tsoom His Xas Lais, raws li nws tau cog lus lawm, yog Yes Xus. 24 Zam xub tuaj ua ntej, nws tuaj tshaj rau haiv His Xas Lais kom tas sawv daws txais cov kab ke ntxuav los thov txhaum. 25 Thaum Zam ua nws txoj hauj lwm yuav tiav, nws nug tias : ‘Nej xav hais tias kuv yog leej twg? Kuv tsis yog tus uas nej xav. Tiam sis tus lawv kuv qab, nws twb tuaj lawm; tus ntawd mas kuv tsis tsim nyog daws nws txoj hlua khau.’
26 Cov kwv tij, nej cov uas yog Has Nplas Has cov tub, thiab nej cov uas hwm Tswv Ntuj, lo lus tshaj txog txoj kev cawm seej no twb tuaj txog peb lawm.”

As Les Lus Yas: LK 1: 76

Txais: As les lus yas, as les lus yas.

Koj, me tub, luag yuav hu koj ua Leej Nyob Siab tus yaj saub,
vim koj yuav mus ua Huab Tais ntej, koj yuav npaj nws txoj kev.

Txais: As les lus yas, as les lus yas.

Ntawv Moo Zoo: LK 1: 57-66, 80

57 Thaum txog Es Lis Xas Npes lub caij daws cev, mas nws yug tau ib tug tub. 58 Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes kawg nkaus, mas lawv nrog nws zoo siab. 59 Thaum txog hnub yim, lawv tuaj ua lub cim txiav rau tus me nyuam. Lawv xav tis nws npe hu ua Ntxas Kas Lias raws li nws txiv. 60 Tab sis nws niam hais tias : "Tsis yog, tus me nyuam no yuav hu ua Zam." 61 Lawv hais rau leej niam tias: "Tsis muaj ib tug hauv koj cov txheeb ze hu li ntawd." 62 Ces lawv piav tes rau leej txiv saib nws xav kom lawv tis tus me nyuam npe hu li cas. 63 Leej txiv kom lawv muab ib daim txiag los, nws sau ntawv rau saud tias : " Zam yog nws lub npe." Sawv daws ceeb tas. 64 Tam sis ntawd, leej txiv lub ncauj qhib plho, tus nplaig muag nthas, nws hais tau lus, nws cav txog Tswv Ntuj. 65 Tsoom neeg nyob ze ntawd sawv daws tau ntshai kawg. Hos nyob pem toj siab hauv xeev Yus Das, sawv daws tham txog tej xwm ntawd. 66 Cov uas tau hnov luag tham txog tej xwm no, muab khaws cia rau nruab siab, lawv hais tias : "Tus me nyuam ntawd yuav yog ib tug zoo li cas ?" Huab Tais txhais tes yeej nrog nraim tus me nyuam ntawd.
80 Tus me nyuam hlob tuaj, nws lub tswv yim muaj zog zuj zus. Nws nyob hauv teb chaws suab puam mus txog hnub nws tawm los rau cov His Xas Lais pom.

TIM 25 LUB 6 HLI 2020

Hnub Tsib Lis Piam Kaum Ob Nruab Xyoo A Nruab Lis Piam II

Zaj Nyeem Ib: 2 VAJ 24: 8-17

8 Yes Hos Yas Kis muaj kaum yim xyoo thaum nws sawv ua vaj, nws kav nyob Yes Lus Xas Les tau peb hlis. Nws niam hu ua Nes Hus Tas, yog Es Nas Thas nyob Yes Lus Xas Les tus ntxhais. 9 Yes Hos Yas Kis ua tsis ntxim HUAB TAIS siab ib yam li nws txiv tau ua los lawm.
10 Thaum lub caij ntawd, tus vaj Nas Npws Kos Dos Nos Xos nyob Npas Npis Los cov tub rog tuaj ntaus Yes Lus Xas Les. Lawv tuaj vij lub nroog tas. 11 Tus vaj Nas Npws Kos Dos Nos Xos nyob Npas Npis Los tuaj txog ntawm lub nroog thaum nws cov tub rog tab tom vij lub nroog. 12 Ces tus vaj Yus Das, Yes Hos Yas Kis nrog nws niam, nws cov thawj tub rog, nws cov tub nom tub tswv thiab nws cov neeg sam sawv daws mus zwm rau tus vaj Npas Npis Los; tus vaj Npas Npis Los thiaj coj nws mus, yog xyoo yim uas nws ua vaj.
13 Nas Npws Kos Dos Nos Xos nqa tas cov nyiaj cov kub uas nyob hauv HUAB TAIS lub Tuam Tsev, thiab nyob hauv tus vaj Yus Das lub tsev loog mus, thiab nws muab tej twj nyiaj twj kub uas His Xas Lais tus vaj Xas Los Moos tau nchuav los siv rau hauv HUAB TAIS lub Tuam Tsev txiav ua daim tas, thiaj muaj raws li HUAB TAIS lo lus ceeb toom tseg lawm. 14 Nws coj tas lub nroog Yes Lus Xas Lus tsoom nom tswv, cov thawj tub rog thiab cov tub rog mus nyob txim txog li kaum txhiab leej neeg, thiab nws coj tas cov kws ntaus nyiaj ntaus hlau tib si mus, tsuas tseg cov neeg pluag neeg txom nyem nyob hauv lub teb chaws xwb. 15 Nws coj tus vaj Yes Hos Yas Kis mus nyob txim nyob Npas Npis Los; nws kuj coj tus vaj niam, tus vaj cov poj niam, cov tub nom tub tswv leg dej num, cov neeg tseem ceeb huv si mus. 16 Kuj tseem muaj cov tub rog yog xya txhiab leej, cov kws ntaus nyiaj ntaus hlau yog ib txhiab leej, cov no yeej tau xyaum ua tub rog txawj tuav riam tuav phom huv tib si, tas sawv daws raug tus vaj Npas Npis Los coj lawv mus nyob txim nyob npas Npis Los tib si.
17 Tus vaj Npas Npis Los tsa Yes Hos Yas Kis tus txiv ntxawm hu ua Mas Tas Nais Yas ua vaj hloov Yes Hos Yas Kis, thiab muab Mas Tas Nais Yas lub npe hloov hu ua Xes Des Kias.

NPN 79: 1B-2, 3-5, 8, 9

Txais: (9) Huab Tais, thov koj cawm peb kom koj lub npe nto koob meej.

Tswv Ntuj, cov kuj cuab tuaj txeeb koj lub cuab tam lawm,
lawv ua tsis zoo rau koj lub tuam tsev ntshiab,
lawv tsoo rhuav Yes Lus Xas Les pob tag.
Lawv muab koj cov tub txib lub cev pub rau cov noog ya saum ntuj noj,
muab cov ntseeg txog koj lub cev pub rau ntiaj teb cov tsiaj qus dua.

Txais: (9) Huab Tais, thov koj cawm peb kom koj lub npe nto koob meej.

Lawv nchuav koj cov ntseeg tej ntshav zoo li dej
Uas ntws sis laub sis lug ncig Yes Lus Xas Les,
tsis muaj leej twg yuav faus lawv lub cev.
Cov neeg nyob ze peb ua tub qaug peb,
cov nyob ncig peb thuam peb luag peb.
HUAB TAIS, koj yuav npau taws hov ntev?
Koj puas yuav npau mus li?
Koj txoj kev khib puas yuav kub cuag hluav taws?

Txais: (9) Huab Tais, thov koj cawm peb kom koj lub npe nto koob meej.

Thov koj txhob nco txog peb cov yawg koob tej txhaum yav tas los ,
muab koj lub siab khuv leej neeg tuaj pab peb sai sai,
vim peb poob rau qhov qis kawg nkaus lawm

Txais: (9) Huab Tais, thov koj cawm peb kom koj lub npe nto koob meej..

Tswv Ntuj peb tus cawm seej, thov koj pab peb,
vim koj lub npe nto koob meej lug;
Thov cawm peb thiab zam peb cov txhaum rau peb
vim koj lub npe zoo.

Txais: (9) Huab Tais, thov koj cawm peb kom koj lub npe nto koob meej.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As les lus yas, as les lus yas.

Ntawv Moo Zoo: MT 7: 21-29

Yes Xus hais rau nws cov thwj tim tias:
21 “Tsis yog cov uas hu kuv ua : ‘Huab Tais, Huab Tais,’ yuav tau mus hauv Ntuj lub Ceeb Tsheej tas tus, tsuas yog tus ua raws li kuv Txiv nyob saum ntuj lub siab nyiam xwb thiaj tau mus. 22 Hnub ntawd, yuav muaj coob leej hais rau kuv tias : ‘Huab Tais, Huab Tais, peb twb tau tuav koj lub npe ua yaj saub ne ? Peb twb tau tuav koj lub npe ntiab dab ne ? Peb twb tau tuav koj lub npe ua hwj huam yees ntxwv ne ?’ 23 Ces kuv yuav tab meeg teb rau lawv tias : ‘Kuv tsis tau paub nej dua! Nej txav mus deb ntawm kuv, cov niag neeg ua phem.’
24 Leej twg mloog kuv cov lus uas kuv hais no, thiab nws ua raws li ntawd, mas nws piv tau rau ib tug neeg xyuam xim uas txhim tsev rau saum tsua. 25 Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog ruaj khov rau saum tsua. 26 Hos leej twg hnov kuv cov lus kuv hais no, tab sis nws tsis ua raws li ntawd, mas nws piv tau rau ib tug neeg ruam txhim tsev rau saum tej av suab puam. 27 Thaum los nag hlob, dej sab siv huam, cua tshuab ntsawj lub tsev, ces lub tsev vau tas puas tas tib si.”
28 Thaum Yes Xus hais cov lus ntawd tas, tsoom sid qhuas nws cov lus qhia kawg, 29 vim nws qhia lawv zoo li ib tug neeg muaj peev xwm, tsis zoo li lawv cov Kws Ntawv Ntshiab.

TIM     26     LUB     6     HLI     2020

Hnub Rau Lis Piam Kaum Ob Nruab Xyoo A Nruab Lis Piam Xyoo II

Zaj Nyeem Ib:  2 VAJ 25:  1-12

1 Xyoo cuaj Xes Des Kias ua vaj, thaum txog lub kaum hli hnub tim kaum, Nas Npws Kos Dos Nos Xos, tus vaj Npas Npis Los, coj tas nws tsoom tub rog tuaj ntaus Yes Lus Xas Les thiab vij Yes Lus Xas Les. Lawv tuaj tsa yeej vij ib ncig lub nroog tas tib si. 2 Lub nroog raug vij li ntawd mus txog xyoo kaum ib uas Xes Des Kias ua vaj. 3 Thaum lub plaub hlis xiab cuaj, lub nroog tshaib plab loj kawg nkaus, tsoom pej xeem tsis muaj dab tsi noj li lawm. 4 Ces lawv tho ib qho chaw tawm ntawm lub nroog mus; hmo ntuj tus vaj nrog nws cov tub rog khiav; lawv tawm ntawm lub qhov rooj vag nyob kis nruab nrab ob lub phab ntsa, nyob ze ntawm tus vaj lub vaj mus; vim cov neeg Kas Ntes twb puav lub nroog tas lawm, ces tus vaj thiab nws cov tub rog taug txoj kev mus rau nram lub hav As Las Npas. 5 Tiam sis cov tub rog Kas Ntes caum tus vaj qab mus, lawv mus caum tau nws nram lub tiaj Yes Lis Kos. Ces tus vaj cov tub rog tawg khiav ncaim tus vaj tas lawm.  6 Cov Kas Ntes thiaj ntes tus vaj, lawv coj nws los rau tus vaj Npas Npis Los nyob Lis Nplas, ces tus vaj Npas Npis Los txiav txim hnyav kawg rau nws. 7 Lawv muab tus vaj Xes Des Kias cov tub txiav caj dab rau nws ntsia, lawv muab Xes Des Kias qhov muag tshum kom dig, ces lawv muab nws khi, thiab coj nws mus nyob txim rau Npas Npis Los.
8 Thaum txog xyoo cuaj uas Nas Npws Kos Dos Nos Xos ua vaj nyob Npas Npis Los, lub tsib hlis xiab xya, tus thawj tub rog Nes Npws Xas Las Das, uas yog tus vaj Npas Npis Los ib tug tub txib, mus hauv lub tsheej Yes Lus Xas Les. 9 Nws hlawv HUAB TAIS lub Tuam Tsev, hlawv tus vaj lub tsev thiab tas cov tsev nyob hauv Yes Lus Xas Les; txhua lub tsev tseem ceeb raug muab hlawv tas huv tib si. 10 Cov tub rog Kas Ntes uas nrog tus thawj tub rog muab lub ntsa zeb xov lub tsheej Yes Lus Xas Les rhuav huv si. 11 Ces cov neeg tseem nyob hauv lub nroog thiab cov ntxeev siab mus caum tus vaj Npas Npis Los  thiab tas nrho ib tsoom neeg huv si raug tus thawj tub rog Nes Npws Xas Las Das coj lawv sawv daws mus nyob txim nyob Npas Npis Los. 12 Tiam sis nws tseg ib co neeg ua liaj ua teb uas pluag tshaj cov nyob, kom lawv tu cov vaj txiv cawv thiab ua liaj ua teb.

NPN  137:  1-2, 3, 4-5, 6

Txais: (6ab) Kom kuv tus nplaig ruam yog kuv tsis nco qab koj!

Peb zaum ze ntawm cov ntug dej nyob Npas Npis Los,
peb zaum quaj vim peb nco txog Xis Yoos.
Peb muab peb tej nkauj nog ncas dai rau
saum tej ceg lwg zaj uas nyob ib ncig ntawd.

Txais: (6ab) Kom kuv tus nplaig ruam yog kuv tsis nco qab koj!

Nyob ntawd, cov neeg uas ntes peb taij kom
peb qhia cov lus hauv peb cov nkauj rau lawv;
cov neeg uas coj peb mus, taij kom peb ua lom zem,
lawv hais tias: "Nej seev cov nkauj Xis Yoos rau peb mloog saib!"

Txais: (6ab) Kom kuv tus nplaig ruam yog kuv tsis nco qab koj!

Peb yuav ua cas seev tau HUAB TAIS
ib zaj nkauj nyob pej kum teb ?
Yes Lus Xas Les, yog kuv hnov qab koj,
thov kom kuv txhob nco qab kuv sab tes xis!

Txais: (6ab) Kom kuv tus nplaig ruam yog kuv tsis nco qab koj!

Thov kom kuv tus nplaig kum rau saum qab yiag,
yog tias kuv tsis nco txog koj ntxiv,
yog kuv tsis muab Yes Lus Xas Les
ua kuv qhov chaw zoo siab ua ntej tshaj cov.

Txais: (6ab) Kom kuv tus nplaig ruam yog kuv tsis nco qab koj!

As Les Lus Yas:   MT 8:  17

Txais: As les lus yas, as les lus yas.

Leej Pleev tshem peb tej kev ceg tawv mus,
nws ris peb tej kev mob kev ntsaj.

Txais: As les lus yas, as les lus yas.

Ntawv Moo Zoo:   MT 8:  1-4

1 Thaum Yes Xus nqes saum roob los, ib pab neeg coob coob raws nws.
2 Ces ib tug neeg mob ruas txav los ze, nws pe ntawm Yes Xus xub ntiag, nws hais tias :
“Huab Tais, yog koj xav, mas koj ua tau kom kuv rov huv tuaj.”
3 Yes Xus cev tes mus kov tus mob ruas, nws hais tias :
"Kuv xav.  Kom koj lub cev rov huv tuaj." Nws tus mob ruas zoo hlo tam sis ntawd.
4 Yes Xus hais rau nws tias : “Koj tsis txhob qhia qhov ntawd rau leeg twg.
Tiam sis koj mus thws koj lub cev rau leej choj saib,
thiab koj mus cev paj tshab raws li Mais Xes qhia, ces yuav yog ib qho puav pheej rau lawv.”

TIM 27 LUB 6 HLI 2020

Hnub Xya Lis Piam Kaum Ob Nruab Xyoo A Nruab Lis Piam Xyoo II

Hwm LN Cyril nyob Alexandria, Tswv Qhia ua Kws cov Txuj Ntshiab

Zaj Nyeem Ib: SEEV 2: 2, 10-14, 18-19

2 HUAB TAIS hlawv Yas Kos cov vaj tse tas huv si, nws tsis hlub lawv li;
nws npau taws, nws tsoo cov yeej ntsa zeb thaiv tus ntxhais Yus Das tawg tas;
nws ua kom lub teb chaws thiab cov tswj teb chaws poob ntsej muag ti av nkaus.
10 Cov neeg laus hauv tus ntxhais Xis Yoos zaum ntsiag to hauv av,
lawv nphoo plua tshauv rau lawv taub hau, lawv npua hnab tsaj.
Cov ntxhais nyob Yes Lus Xas Les nyo hau rau hauv av.
11 Kuv quaj ua rau kuv qhov muag puas tas, kuv plab plaw mob ntswj lees;
kuv siab ntsws si mus ntxaum av vim tus ntxhais nyob hauv kuv haiv neeg puas ntsoog tas lawm,
ua rau cov me nyuam yau thiab cov me nyuam mos tsaus muag ntog pawg lug hauv tej tshav puam hauv lub Tsheej.
12 Lawv quaj nug lawv niam tias : "Mov nyob qhov twg cawv ne ?”
Lawv tsaus muag zoo li cov neeg raug mob hnyav nyob ntawm
tej tshav puam hauv nroog, ces lawv tas txoj sia nyob hauv lawv niam xub ntiag.
13 Kuv yuav piav li cas txog koj, yuav muab koj piv rau dab tsi os Ntxhais Yes Lus Xas Les?
Kuv yuav hais tias koj zoo dab tsi, kuv thiaj yuav nplij tau koj os Ntxhais nkauj xwb Xis Yoos?
Vim koj txoj kev puas kev ntsoog loj cuag li lub hiav txwv, leej twg thiaj yuav kho tau koj ?
14 Koj cov yaj saub tau pom tej yam cuav tsis muaj tseeb txog koj, ua kom fam koj qhov muag;
lawv tsis hais koj cov txhaum meej rau koj thiaj yuav pab tau koj mus rau txoj hmoov zoo.
Lawv tsuas pom tej yam cuav uas tau coj koj mus yuam kev xwb.
18 Lawv quaj hu txog HUAB TAIS… Me Ntxhais Xis Yoos lub ntsa loog zeb,
nruab hnub hmo ntuj, koj ua kua muag poob, cia kom ntws zoo li ib tug dej,
tsis txhob pub koj tau so, tsis txhob cia koj qhov muag tau qi.
19 Hmo ntuj koj sawv, koj tsa suab quaj, raws txhua txhua lub caij pib zov hmo;
qhib koj lub siab cia tawm ntws lug li dej nyob ntawm HUAB TAIS xub ntiag;
tsa koj ob txhais tes rau nws, thov kom nws pab koj cov me nyuam txoj sia,
vim lawv tshaib plab tsaus muag tas rau ntawm txhua txoj hau kev.

NPN 74: 1-2, 3-5, 6-7, 20-21

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

Tswv Ntuj, vim li cas koj muab peb tso pov tseg ntev ua luaj?
Vim li cas koj ua kev npau taws ncho pa lug rau koj pab yaj nyob hauv koj lub nras zaub?
Thov koj rov nco txog koj pab yaj uas koj tau tu txij thaum ub los lawm,
koj haiv neeg uas koj tau txhiv los ua koj lub cuab tam,
lub roob Xis Yoos uas koj xaiv los ua koj lub chaw nyob.

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

Thov tig koj ko taw tshais ruam mus ncig tej qub vaj tse uas vau tas.
Mus ncig koj lub tsev ntshiab uas yeeb ncuab tau ua phem npaum li cas rau.
Lawv tuaj qw ntshos tsuam tias lawv yeej lawm nyob hauv koj lub tuam tsev;
lawv tsa lawv tus chij rau ntawd ua cim nco txog lawv txoj kev yeej.
Lawv ua zoo li ib pab neeg nqa taus yuav tuaj ntov ib koog zoov.

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

Lawv xuas txaug thiab rauj tsoo koj lub tsev ntshiab cov phab ntsa tawg tas,
Lawv xuas taws hlawv koj lub tsev ntshiab kom kub hnyiab,
ua kom nws vau ti av; lawv tau thuam lub tsev teev koj lub npe.

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

Thov koj nco txog lo lus koj tau cog rau peb!
vim tej qhov tsua hauv lub teb chaws hloov ua chaw sib nkaug sib tua tas.
Thov kom tus uas raug luag tsuj tsis txhob poob ntsej muag ntxiv,
kom tus neeg me thiab tus txom nyem cav lus zoo txog koj lub npe !

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

As Les lus Yas: MT 8: 17

Txais: As les lus yas, as les lus yas.

Leej Pleev tshem peb tej kev ceg tawv mus,
nws ris peb tej kev mob kev ntsaj.

Txais: As les lus yas, as les lus yas.

Ntawv Moo Zoo: MT 8: 5-17

5 Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias : 6 "Huab Tais, kuv tus tub txib pw tom tsev, nws tes taw tuag tas. Nws mob hnyav heev." 7 Yes Xus teb tias : "Kuv yuav mus kho nws." 8 Tus xab txheeb hais ntxiv tias : "Huab Tais, kuv tsis tsim nyog koj chaws los hauv kuv tsev, tsuav yog koj hais ib lo lus xwb ces kuv tus tub txib yuav zoo hlo. 9 Txawm tias kuv yog ib tug neeg zwm rau tus loj, los kuv kuj muaj ib co tub rog zwm rau kuv thiab. Yog kuv hais rau ib tug tias : 'Koj mus !' nws cia li mus, kuv ho hais rau lwm tus tias : 'Koj los,' nws kuj cia li los. Kuv hais rau kuv tus tub txib tias : 'Koj ua qhov no !' nws cia li ua.’" 10 Yes Xus hnov nws hais li ntawd, Yes Xus qhuas. Yes Xus hais rau cov neeg raws nws tias : "Kuv hais tseeb rau nej, kuv tsis tau pom ib tug neeg yuav ntseeg npaum li ntawd hauv cov His Xas Lais li. 11 Kuv hais rau nej, yuav muaj neeg coob tuaj Toob Fab thiab Xib Fab tuaj nrog Has Nplas Has, nrog His Xas Has thiab Yas Kos noj rooj qav hauv Ntuj lub Ceeb Tsheej. 12 Hos Ntuj yuav muab cov tub hauv Ceeb Tsheej rho mus pov rau hauv qhov tsaus ntuj nraum zoov: nyob nraud, sawv daws yuav quaj tom hniav nkawv.” 13 Yes Xus hais rau tus xab txheeb tias : "Koj rov mus ! Koj yuav tau raws li koj lub siab ntseeg !" Ces tam sis ntawd, tus tub txib zoo hlo.
14 Yes Xus mus hauv Pob Zeb tsev. Nws pom Pob Zeb niam tais pw saum txaj, mob kub cev. 15 Yes Xus tuav nws txhais tes, tus mob kub cev thim hlo. Ces Pob Zeb niam tais sawv los, nws tsob hwb Yes Xus.
16 Yav tsaus ntuj, luag coj ib co neeg raug dab coob leej tuaj cuag Yes Xus. Nws hais ib lo lus los ntiab cov dab ntawd tawm thiab nws kho cov neeg mob zoo tas huv si. 17 Ua li mas muaj raws li Yaj Saub His Xais lo lus tias : “ Nws tshem peb tej kev ceg tawv mus, nws ris peb tej kev mob kev ntsaj.”

TIM 29 LUB 6 HLI 2020

Hnub Ob Lis Piam Kaum Peb Nruab Xyoo A Nruab Lis Piam Xyoo II

Hwm ob tug Hauv Paus Xa Lus LN Pob Zeb thiab LN Paj Lug – Thaj Txi Ntuj hnub ntawd

Zaj Nyeem Ib: HAUJ LWM 12: 1-11

1 Lub caij ntawd, tus vaj Hes Los ntes ib co neeg nyob hauv lub Koom Txoos thiab tsim txom lawv. 2 Nws xuas ntaj tua Yas Kos uas yog Zam tus tij laug. 3 Thaum nws pom tias cov Yus Das zoo siab rau qhov nws ua ntawd, nws kuj tso neeg mus ntes Pob Zeb thiab; thaum ntawd yog lub caij noj cov ncuav mov tsis rau poov xab. 4 Thaum Hes Los ntes tau Pob Zeb lawm, nws coj Pob Zeb mus kaw hauv tsev loj faj. Nws kom plaub pab tub rog zov rawv, ib pab muaj plaub leeg. Hes Los npaj tias thaum ua lub Ntees Hla tas nrho, mas nws yuav coj Pob Zeb tawm los rau ntawm tsoom pej xeem xub ntiag. 5 Ces Pob Zeb thiaj raug kaw hauv tsev loj faj; tiam sis lub Koom Txoos mob siab thov Tswv Ntuj tsis tseg rau Pob Zeb.
6 Thaum yuav txog hnub Hes Los coj Pob Zeb tawm los, hmo ua ntej kiag xwb, Pob Zeb pw tsaug zog nyob nruab nrab ob tug tub rog, muaj ob txog saw khi rawv nws cia, hos tseem muaj ib co zov qhov rooj nyob sab nraud saib lub tsev loj faj thiab. 7 Ib sij huam, Huab Tais tus Tshiab cia li los sawv nyob ze ntawm Pob Zeb, thiab muaj ib qho ci ua kom kem tsev pom kev. Tus Tshiab diaj Pob Zeb ntawm ib sab, tsa kom nws sawv, thiab hais rau nws tias : "Koj sawv tsees tam sis no !" Cov saw khi Pob Zeb ob lub caj dab teg cia li plam plaws tas. 8 Tus Tshiab hais ntxiv tias : "Muab koj txoj siv los sia thiab rau koj nkawm khau !" Pob Zeb ua li ntawd tas, tus Tshiab hais tias : "Muab koj lub tsho ntev los kauv koj ces koj lawv kuv qab !" 9 Ces Pob Zeb lawv tus Tshiab qab tawm mus. Pob Zeb tsis paub tias qhov tus tshiab ua ntawd yog tiag, nws xav tias yog nws ua yog toog pom xwb. 10 Nkawd mus hla thawj pab zov keeb, thiab tseem mus dhau pab ob ntxiv thiab, nkawd thiaj mus txog ntawm lub rooj vag hlau uas yuav tawm sab nraud mus rau hauv nroog. Lub rooj vag hlau cia li qhib plho nws tus kheej rau nkawd, nkawd tawm plaws mus taug ib txog kev, ces tus Tshiab cia li ploj ntais ncaim mus lawm. 11 Pob Zeb thiaj tsim dheev feeb meej tuaj, nws hais tias : "Zaum no, kuv paub tseeb lawm tias Huab Tais tau xa nws tus Tshiab tuaj pab kuv kom kuv dim ntawm Hes Los txhais tes thiab ntawm qhov uas cov Yus Das vam vam yuav tau pom."

NPN 34: 2-3, 4-5, 6-7, 8-9

Txais: Huab Tais tus tshiab yuav tuaj cawm cov uas hwm nws.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig yuav muaj koob meej nyob hauv HUAB TAIS;
tus neeg me yuav hnov kuvg thiab yuav zoo siab.

Txais: Huab Tais tus tshiab yuav tuaj cawm cov uas hwm nws.

Nej nrog kuv cav txog HUAB TAIS,
peb sawv daws ua ke qhuas txog nws lub npe.
Kuv nrhiav HUAB TAIS, ces nws teb kuv,
Nws cawm kuv dim ntawm tas kuv tej kev ntshai.

Txais: Huab Tais tus tshiab yuav tuaj cawm cov uas hwm nws..

Nej vam txog HUAB TAIS, ces nej yuav ci ntsa iab vim kev zoo siab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog
thiab yuav cawm nws ntawm tas nws tej kev nyuaj siab.

Txais: Huab Tais tus tshiab yuav tuaj cawm cov uas hwm nws.

HUAB TAIS tus tshiab tsa tsev tsam phooj nyob
ncig cov neeg hwm HUAB TAIS, nws cawm lawv.
Nej saj ces nej yuav pom tias HUAB TAIS siab zoo npaum li cas.
Tus tau txoj hmoov zoo yog tus muab
HUAB TAIS ua nws lub chaw nkaum.

Txais: Huab Tais tus tshiab yuav tuaj cawm cov uas hwm nws.

Zaj Nyeem Ob: 2 TMT 4: 6-8, 17-18

6 Ntawm kuv, Paj Lug, mas kuv twb zoo li cov cawv raug muab hliv los txi Ntuj lawm, ces twb txog lub caij kuv yuav mus lawm. 7 Kuv tau sib tw khiav zoo txaus, ces kuv khiav mus txog chaw lawm; kuv tau ceev txoj kev ntseeg cia. 8 Txij nyem no mus, lub mom teev kub muaj kev ncaj nyob tos kuv lawm xwb. Yog Huab Tais tus txiav txim ncaj yuav muab ua paj tshab rau kuv thaum txog hnub ntawd; tsis yog muab rau kuv ib leeg xwb, nws tseem yuav muab rau tas ib tsoom neeg nyiam nws thiab tos ntsoov lub caij nws yuav los.
17 Huab Tais yog tus tau pab kuv thiab muab nws lub zog rau kuv kom kuv tshaj lo lus kom lo lus nrov mus txog cov neeg teev pej kum dab pob ntseg. Nws tau npo kuv dim ntawm tsov ntxhuav lub qhov ncauj. 18 Huab Tais yuav npo kuv dim ntawm txhua yam kev phem thiab yuav txuag kuv kom kuv mus txog nws lub Ceeb Tsheej nyob saum Ntuj. Thov kom Huab Tais nto koob meej mus ib txhiab ib txhis. Ua li.

As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, kuv yuav txhim kuv lub Koom Txoos rau saum lub pob zeb no,
dab phem teb cov rooj vag yuav tiv tsis yeej lub pob zeb no.

Txais: As les lus yas, as les lus yas.

Ntawv Moo Zoo: MT 16: 13-19

13 Thaum Yes Xus tuaj txog cheeb tsam ntawm Xes Ntxas Les Fis Lis Pos, nws nug cov thwj tim tias : "Luag tej hais tias Neeg Leej Tub yog leej twg ?" 14 Lawv teb tias : “Ib txhia hais tias Zam Ntxuav Plig, ib txhia hais tias Es Lias, tseem muaj lwm cov hais tias Yes Les Mias los ib tug hauv cov yaj saub.” Yes Xus hais rau lawv tias : 15 "Nej ne, nej hais tias kuv yog leej twg ?" 16 Xis Moos Pob Zeb teb tias : "Koj yog Leej Pleev, yog tus Tswv Ntuj Muaj Txoj Sia Leej Tub." 17 Yes Xus teb rau Pob Zeb tias : "Xis Moos, Yos Nas tub, koj txoj hmoov zoo, vim tsis yog nqaij thiab ntshav qhia koj paub txog qhov no, yog kuv Txiv nyob saum ntuj qhia koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no, ces dab phem teb cov rooj vag yuav tiv tsis yeej nws. 19 Kuv yuav muab cov yawj sij qhib Ntuj lub Ceeb Tsheej rau koj tuav. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj."

TIM 30 LUB 6 HLI 2020

Hnub Peb Lis Piam Kaum Peb Nruab Xyoo A Nruab Lis Piam Xyoo II

Hwm Thawj cov Tuag ua Tim Khawv Hauv lub Koom Txoos

Zaj Nyeem Ib: AM 3: 1-8; 4: 11-12

3 1 “Cov tub kis His Xas Lais, nej mloog lo lus no,
yog lo lus HUAB TAIS hais tsawm nej,
tsawm tas nrho tsev neeg kuv tau coj tawm hauv Hais Nkws Tos teb los.
2 Hauv tas cov tsev neeg nyob ntiaj teb, kuv tsuas ua zoo rau nej xwb;
vim li ntawd, kuv thiaj yuav rau txim rau nej vim nej cov txhaum tas tib si.
3 Ob tug neeg tsis tau xub teem caij, nkawd puas yuav ua ke taug kev ?
4 Tus tsov ntxhuav nyob hauv hav zoov, yog nws tsis pom nqaij, nws puas yuav nyooj ?
Tus me nyuam tsov ntxhuav nyob hauv nws lub qhov,
yog nws tsis tau tom dab tsi nws puas yuav quaj ?
5 Yog tsis rau w mas noog puas yuav mag rooj ntxiab nyob hauv av ?
Yog ib rooj ntxiab tsis mag dab tsi nws puas yuav txawj txhais?
6 Yog muaj tus tshuab hom nyob hauv lub nroog
mas tsoom pej xeem puas yuav nyob twj ywm tsis ntshai li ?
Puas yuav muaj ib yam xwv txheej tshwm tuaj raug lub tsheej,
yog tias HUAB TAIS tsis tau tso tuaj?
7 Yeej tseeb tias, HUAB TAIS Tswv Ntuj nws tsis lam ua ib yam
uas nws tsis tau xub qhia rau nws cov tub txib yaj saub paub tso.
8 Hnov tsov ntxhuav nyooj, puas yuav muaj neeg uas tsis ntshai li?
Hnov HUAB TAIS Tswv Ntuj hais lus, leej twg thiaj yuav tsis kam ua saub ?
4 11 Kuv rhuav nej loj zoo li thaud Tswv Ntuj rhuav Xos Dos Mas thiab Nkos Mos Las;
nej zoo li ib ya ntoo kub hnyiab rho hauv hluav taws los xwb,
tsis kav nej tseem tsis kam los cuag kuv li.”
HUAB TAIS hais li ntawd.
12 “Li ntawd, His Xas Lais, kuv yuav npaj ua li no rau nej;
vim kuv yuav ua li ntawd rau nej, mas His Xas Lais,
nej kav tsij npaj siab yuav tau ntsib nej tus Tswv Ntuj nawb!”

NPN 5: 4B-6A, 6B-7, 8

Txais: (9a) Huab Tais, thov coj kuv mus taug koj txoj kev ncaj.

Sawv ntxov tsees, kuv tuaj thov koj, kuv vam tias koj yuav teb.
Vim koj, Tswv Ntuj, tsis nyiam txoj kev phem;
Tus neeg phem tuaj nyob tsis taus ntawm koj xub ntiag;
Cov neeg thuam luag sawv tsis taus ntsug rau koj saib.

Txais: (9a) Huab Tais, thov coj kuv mus taug koj txoj kev ncaj..

Koj ntxub tas tsoom neeg nrhiav ua phem;
Koj rhuav tas cov neeg hais lus dag;
Cov neeg nyiam tua neeg thiab cov neeg ua cuav,
mas HUAB TAIS ntxub lawv tas siab.

Txais: (9a) Huab Tais, thov coj kuv mus taug koj txoj kev ncaj.

Ntawm kuv mas, vim koj muaj kev khuv leej loj tas nrho,
kuv yuav tau nkag los hauv koj lub tsev,
Kuv yuav tau pe hawm hauv koj lub tuam tsev ntshiab,
kuv yuav ntshai yuav hwm koj, HUAB TAIS.

Txais: (9a) Huab Tais, thov coj kuv mus taug koj txoj kev ncaj.

As Les Lus Yas: NPN 130: 5

Txais: As les lus yas, as les lus yas.

Kuv tso siab rau HUAB TAIS,
kuv tus ntsuj plig tso siab rau nws lo lus.

Txais: As les lus yas, as les lus yas.

Ntawv Moo Zoo: MT 8: 23-27

23 Yes Xus nce mus hauv nkoj, cov thwj tim lawv nws qab nce mus thiab.
24 Ces cua daj cua dub sawv hauv dej ntuj tuaj; cov nplaim dej nphau tej niag twv tuaj npog nkaus lub nkoj. Hos Yes Xus tsaug zog lawm.
25 Cov thwj tim los ntawm Yes Xus, lawv tsa nws tias : "Huab Tais, koj cawm peb mas, peb yuav tuag !"
26 Yes Xus hais rau lawv tias : "Vim li cas nej ntshai, ua cas nej ntseeg me ua luaj ?" Ces Yes Xus sawv ntsug, nws txwv cua thiab dej ntuj. Dej cia li rov tus yees tuaj.
27 Cov neeg ntawd nyob hab nuv cia ; lawv sib hais zom zaws tias : "Tus ntawd yog leej twg ? Tab yog cua thiab dej ntuj los yeej mloog nws lus !"

TIM 1 LUB 7 HLI 2020

Hnub Plaub Lis Piam Kaum Peb Nruab Xyoo A Nruab Lis Piam Xyoo II

Hwm LN Junipero Serra, ua Leej Choj

Zaj Nyeem Ib: AM 5: 14-15, 21-24

14 Nej kav tsij nrhiav qhov zoo, tsis txhob nrhiav qhov phem, kom nej muaj txoj sia. Ces HUAB TAIS, tus Tswv Ntuj kav tsoom tshiab, thiaj yuav nrog nej nyob, zoo li nej hais.
15 Nej ntxub qhov phem nyiam qhov zoo thiab nej ua kom muaj kev ncaj ncees nyob ntawm lub rooj loog . Ces nyaj tej zaud HUAB TAIS, tus Tswv Ntuj kav tsoom tshiab, yuav khuv leej pab seem nyob hauv Yos Xes tsev neeg.
21 Huab Tais hais tias: “Kuv ntxub, kuv tsis nyiam nej tej hnub nyoog ua ntees nqaum paj nqaum nruas, thiab kuv tsis txaus siab rau nej tej kev tuaj sib txoos ua ke loj.
22 Thaum nej ua tej thaj hlawv tsiaj txi ntuj thiab cev qoob loo txi ntuj, kuv yuav tsis txais; kuv yuav tsis ntsia nej tej tsiaj rog uas nej muab txi ntuj los thov kev thaj yeeb.
23 Nej tshem nej tej suab nkauj mus deb ntawm kuv; kuv tsis xav hnov nej tej twj nkauj paj nruag !
24 Xav kom nej cia txoj kev ncaj txhawv yaws li tus dej txhawv, thiab cia txoj kev ua zoo ntws lug li ib tug dej txhawv tsis txawj tu.

NPN 50: 7, 8-9, 10-11, 12-13, 16BC-17

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Kuv haiv neeg, nej mloog mog, kuv yuav hais lus.
His Xas Lais, kuv yuav hais lus tib nej :
Kuv yog Tswv Ntuj, yog nej tus Tswv Ntuj.

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Kuv cem nej tsis yog vim cov tsiaj nej txi rau kuv ;
cov tsiaj nej hlawv txi Ntuj nyob ntawm kuv xub ntiag tsis tseg.
Kuv tsis xav yuav ib tug heev nyuj hauv nej tsev,
tsis xav yuav ib tug tshis hauv nej nkuaj li.

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Vim tas cov tsiaj nyob hauv hav zoov,
thiab cov tsiaj nog zaub pem tej hauv toj yog kuv li.
Kuv paub txhua tsav noog ya saum tej huab cua tib si.
Txhua tus tsiaj txawj ua zog nyob hauv tej tiaj nras yog kuv tug.

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Yog kuv tshaib plab, tsis tas kuv yuav hais qhia nej,
Vim lub qab ntuj khwb thiab tas ib puas tsav yam nyob hauv, yog kuv tug.
Kuv puas noj tej heev nyuj muaj zog tej nqaij,
los puas muab tej ntshav tshis ua dej haus?

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Nej qog kuv cov lus qhia ua dab tsi?
Nej lub ncauj lam lees kuv txoj kev cog lus ua dab tsi?
Yog nej twb ntxub kuv tej kev qhuab qhia,
thiab muab kuv cov lus pov tseg rau tom nej nraub qaum xwb.

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

As Les Lus Yas: YK 1: 18

Txais: As les lus yas, as les lus yas.

Leej Txiv zoo siab ua kom peb yug los nyob hauv lo lus qhia qhov tseeb,
kom peb yog thawj cov txiv txi hauv txhua yam uas nws tsim los.

Txais: As les lus yas, as les lus yas.

Ntawv Moo Zoo: MT 8: 28-34

28 Thaum Yes Xus tuaj txog sab ntug dej tim ub, txog rau cov Nkas Das Las teb chaws, muaj ob tug neeg raug dab tawm hauv cov toj ntxas tuaj cuag Yes Xus. Nkawd tsiv tsaim kawg, tsis muaj leeg twg muaj cuab kav taug txoj kev ntawd li.
29 Ob tug ntawd qw nrov nrov tias : "Tswv Ntuj Leej Tub, koj xav ua dab tsi rau peb? Tsis tau txog lub caij teem, koj txawm siv yuav tuaj tsim txom peb ntawm no lawm lod ?"
30 Nyob ib qho deb tsis heev ntawd, muaj ib pab npua coob tab tom noj zaub.
31 Cov dab thov Yes Xus tias : "Yog koj ntiab peb tawm, thov koj cia peb mus nyob hauv pab npua ntawd."
32 Yes Xus teb tias : "Kav tsij mus." Cov dab tawm plaws nkag mus nyob hauv cov npua, ces tas pab npua dhia puag saum tsag tob mus rau hauv dej ntuj, pab npua mus tuag tas rau hauv dej.
33 Cov tub zov npua tso tes khiav mus tas, thaum lawv mus txog hauv nroog, lawv mus piav tas txhua yam uas tshwm sim tuaj, thiab piav txog tias muaj dab tsi tshwm tuaj rau ob tug neeg raug dab ntawd.
34 Ces tas lub nroog tawm tuaj ntsib Yes Xus. Thaum lawv pom nws, lawv thov kom nws tawm hauv lawv lub teb chaws mus.

TIM 2 LUB 7 HLI 2020

Hnub Tsib Lis Piam Kaum Peb Nruab Xyoo A Nruab Lis Piam Xyoo II

Zaj Nyeem Ib: AM 7: 10-17

10 As Mas Xias, tus Leej Choj nyob Npes Thes, tso neeg mus hais rau Yes Los Npuag tus vaj His Xas Lais tias : "As Mos ntxias tsev neeg His Xas Lais kom lawv ntxeev siab rau koj. Lub teb chaws nyiaj tsis taus nws tej lus ntxiv lawm. 11 Vim As Mos hais zoo li no : ‘Yes Los Npuag yuav raug ntaj tua, thiab tsoom His Xas Lais yuav raug xa tawm mus nyob deb ntawm lawv lub teb chaws.’"
12 Ces As Mas Xias hais rau As Mos tias : "Niag neeg txawj ua saub, koj cia li khiav, koj khiav mus nyob Yus Das teb! Koj mus nrhiav noj nrhiav haus nyob nrad, thiab ua Saub nyob nrad. 13 Koj tsis txhob ua Saub nyob Npes Thes ib zaug ntxiv, vim yog tus vaj qhov chaw ntshiab thiab yog lub teb chaws ib lub tuam tsev teev Ntuj."
14 As Mos teb rau As Mas Xias tias : "Kuv ib txwm tsis yog saub, los yog saub ib tug tub. Kuv ib txwm yog neeg zov yaj thiab neeg tu cov ntoo xis kas mos xwb. 15 Tiam sis HUAB TAIS tau tuaj hu kuv ntawm kuv pab yaj, nws hais rau kuv tias: ‘Koj mus ua Yaj Saub rau kuv haiv His Xas Lais.’
16 Ces myem no koj yuav tsum mloog HUAB TAIS lo lus. Koj hais tias kom kuv txhob ua Yaj Saub cem His Xas Lais, kom kuv txhob hais lus rhuav His Xas Has tsev neeg. 17 Mas zaum no HUAB TAIS hais li no : ‘Koj tus poj niam yuav tab meeg mus ua poj ntiav nyob hauv nroog, thiab koj cov tub koj cov ntxhais yuav raug ntaj tua; koj tej liaj tej teb yuav raug luag muab kos ua tej kab sib faib yuav; koj tus kheej yuav mus tuag nyob hauv ib lub teb chaws tsis huv. His Xas Lais yuav raug xa tawm mus nyob deb ntawm lawv lub teb lawv chaws.’"

NPN 19: 8, 9, 10, 11

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog yuav,
nws ua kom tus neeg ruam thoob tsib tuaj.

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus qhia meej kawg nkaus,
ua kom qhov muag pom kev.

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
Txhua lo lus nws txiav yog qhov ncaj.

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

Nws cov lus txiav txim muaj nqes dua kub,
Tsim nyog ntshaw dua ib txhab tseem kub,
qab zib dua ib co kua zib,
los cov zib mu ntawm daim nas muv.

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb neeg nrog nws rov sib haum xeeb nyob hauv Leej Pleev,
nws txib kom peb tshaj tawm txog lub moo zoo ntawm txoj kev sib haum xeeb ntawd.

Txais: As les lus yas, as les lus yas.

Ntawv Moo Zoo: MT 9: 1-8

1 Yes Xus nce mus hauv nkoj, nws hla dej rov los txog nws lub nroog.
2 Thaum ntawd, luag nqa ib tug tuag ceg pw saum ib lub txaj tuaj rau Yes Xus. Yes Xus pom lawv ntseeg, nws hais rau tus tuag ceg tias : "Me tub, koj tso siab mog! Koj cov txhaum daws tas lawm."
3 Thaum ntawd, muaj ob peb tug Kws Ntawv Ntshiab xav twj ywm hauv nruab siab tias : ‘Tus neeg ntawd thuam Ntuj.’
4 Tab sis Yes Xus paub qhov lawv xav, nws hais tias : "Vim li cas nej xav tej yam phem rau nruab siab ?
5 Lo lus twg hais yooj yim dua, puas yog lo tias : 'Koj cov txhaum daws tas lawm,' los yog lo tias 'Koj sawv mus kev.’ ? 6 Tiam sis kom nej paub tias Neeg Leej Tub muaj lub hwj huam daws txhaum tau nyob ntiaj teb no," cesYes Xus hais rau tus tuag ceg tias : "Koj sawv, nqa koj lub txaj, koj rov mus tsev".
7 Ces tus tuag ceg sawv, thiab nws rov mus nws lub tsev.
8 Tsoom sid pom li ntawd, sawv daws qhuas kawg. Lawv cav txog Tswv Ntuj vim nws pub lub hwj huam loj npaum li no rau tib neeg.

TIM     3     LUB     7     HLI     2020

Thawj Hnub Rau Lis Piam Kaum Peb Nruab Xyoo A Nruab Lis Piam Xyoo II

Hwm LN Tos Mas, tus Hauv Paus Xa Lus.




Zaj Nyeem Ib:        EFX  2:   19-22

Paj Lug sau ntawv tias:
19 Li ntawd, nej tsis yog ib co pej kum neeg, los ib co qhua ntxiv : nej nrog cov ntshiab ua pej xeem koom ib lub teb chaws thiab nej yog Tswv Ntuj tsev neeg,
20 uas yog ib lub tuam tsev txhim rau saum cov Hauv Paus Xa Lus thiab cov Yaj Saub ua lub taw ntsa, Yes Xus Pleev ua lub pob zeb txheem tas lub tsev.
21  Leej Pleev ua kom tas lub tuam tsev sib dhos zoo sib tuav ruaj thiab hlob ua ib lub Tuam Tsev Ntshiab nyob hauv Huab Tais.
22 Nyob hauv Leej Pleev, nej sawv daws kuj puav leej ua ke raug muab tsa ua ib lub tuam tsev cia rau Tswv Ntuj nyob, nyob  hauv Leej Ntuj Plig.

NPN        117:   1BC, 2

Txais:  (Mas Kos 16:15) Nej mus thoob qab ntuj, nej mus tshaj lub Moo Zoo.
los: As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais:  (Mas Kos 16:15) Nej mus thoob qab ntuj, nej mus tshaj lub Moo Zoo.
los: As les lus yas.

Huab Tais lub siab hlub peb nyob ruaj nreb,
nws lub siab pheej xeeb mus ib txhiab ib txhis.

Txais:  (Mas Kos 16:15) Nej mus thoob qab ntuj, nej mus tshaj lub Moo Zoo.
los: As les lus yas.

As Les Lus Yas:        ZAM  20:   29

Txais: As les lus yas, as les lus yas.

Huab Tais hais tias: "Tos Mas, koj ntseeg vim koj pom kuv.
Cov uas tsis tau pom tab sis lawv ntseeg, mas lawv txoj hmoov zoo!"

Txais: As les lus yas, as les lus yas.

Ntawv Moo Zoo:       ZAM  20:   24-29

24 Tos Mas, tseem hu ua Dis Dws Mos thiab, yog ib tug hauv pab Kaum Ob; thaum Yes Xus yees tawm los, nws tsis nrog lawv nyob. 25 Ces lawv hais rau nws tias: "Peb pom Huab Tais lawm!" Tab sis Tos Mas hais rau lawv tias: "Yog kuv tsis pom cov qhov ntsia hlau nyob ntawm nws ob txhais tes, yog kuv tsis tau muab kuv tus ntiv tes ntxig rau cov qhov ntsia hlau ntawd, thiab yog kuv tsis tau muab kuv txhais tes ntxig ntawm nws phab tav, mas kuv tsis ntseeg li."
26 Yim hnub tom qab, cov thwj tim rov nyob ua ke hauv tsev dua, Tos Mas kuj nrog lawv nyob thiab. Cov qhov rooj puav leej xauv tas, Yes Xus cia li tshwm plaws los sawv hauv nruab nrab lawv, nws hais rau lawv tias: "Nej nyob kaj lug!" 27 Ces Yes Xus hais rau Tos Mas tias : "Cev koj ntiv tes rau ntawm no, koj ntsia kuv ob txhais tes saib; cev koj txhais tes los, muab ntxig rau hauv kuv phab tav. Koj txhob ua neeg tsis ntseeg ntxiv, koj ntseeg mog."
28 Tos Mas teb rau Yes Xus tias : "Kuv tus Huab Tais, kuv tus Tswv Ntuj." 29 Yes Xus hais rau Tos Mas tias : "Koj ntseeg vim koj pom kuv puas yog? Cov uas tsis tau pom tab sis lawv ntseeg, mas lawv txoj hmoov zoo."

TIM      4     LUB     7     HLI     2020

Thawj Hnub Xya Lis Piam Kaum Peb Nruab Xyoo A Nruab Lis Piam II

Nco Txog As Mes Lis Kas Teb Tau Txais Kev Twj Lij

Zaj Nyeem Ib: AM 9: 11-15

Huab Tais hais tias:
11 “Hnub ntawd kuv yuav rov tsa Das Vis lub khaub tsev, kuv yuav rov kho nws tej phab ntsa ntuag, kuv yuav rov tsa nws tej vaj tse uas vau tas; kuv yuav rov txhim kom rov zoo li yav thaud dua. 12 Ces lawv yuav tau txais cov seem nyob hauv Es Dos thiab cov kuj cuab uas ris kuv lub npe los ua lawv tug. Kuv HUAB TAIS hais cov lus no, kuv yuav ua raws li ntawd.”
13 HUAB TAIS hais tias : “Yuav muaj ib lub caij tom ntej,  uas tus laij teb yuav mus huas tus sau qoob ntej, tus tsuj txiv cawv yuav huas cov tseb noob ntej. Cov cawv qab yuav txhawv pem tej hauv roob los thiab yuav ntws lug nyob saum tej pov roob. 14 Kuv yuav rov tsa kuv haiv His Xas Lais kom vam meej; lawv yuav rov txhim tsa lawv cov tsheej uas vau tas, lawv yuav rov los nyob hauv cov tsheej ntawd; lawv yuav cog tej vaj txiv cawv, thiab yuav tau cawv haus; lawv yuav cog vaj zaub, thiab yuav tau zaub noj. 15 Kuv yuav cog kuv haiv neeg rau hauv lawv thaj av, ces tsis muaj leej twg yuav tuaj rho tau lawv tawm ntawm thaj av kuv tau muab rau lawv ntxiv.” HUAB TAIS, koj tus Tswv Ntuj hais li ntawd.

NPN 85: 9AB+10, 11-12, 13-14

Txais: (9b) Huab Tais hais txog kev thaj yeeb rau nws haiv neeg.

Kuv yuav mloog saib Tswv Ntuj hais dab tsi:
HUAB TAIS nws tshaj kev thaj yeeb rau nws haiv neeg.
Nws txoj kev cawm los txog ze ze cov hwm nws lawm,
nws lub koob meej tsa tsev nyob hauv peb lub teb chaws.

Txais: (9b) Huab Tais hais txog kev thaj yeeb rau nws haiv neeg.

Kev ua siab zoo thiab kev tseeb yuav los sib ntsib,
Kev ncaj ncees thiab kev thaj yeeb yuav los sib qawg.
Kev tseeb yuav txhawv tawm hauv ntiaj teb los,
kev ncaj ncees yuav dauv muag ntsia saum ntuj tuaj.

Txais: (9b) Huab Tais hais txog kev thaj yeeb rau nws haiv neeg.

HUAB TAIS yuav pub kev vam meej,
hos peb cov av yuav ntsu qoob ntsu loo,
Kev ncaj ncees yuav mus ua Huab Tais ntej,
kev cawm yuav taug raws txoj kev nws cov hneev taw tsuj.

Txais: (9b) Huab Tais hais txog kev thaj yeeb rau nws haiv neeg.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab,
Kuv paub kuv cov yaj, kuv cov yaj caum kuv qab mus.

Txais: As les lus yas, as les lus yas.

Ntawv Moo Zoo: MT 9: 14-17

14 Zam cov thwj tim tuaj cuag Yes Xus, lawv hais tias : "Peb yoo mov, cov Fas Lis Xais kuj yoo, vim li cas koj cov thwj tim tsis yoo ?" 15 Yes Xus teb tias : “Cov qhua tuaj noj tshoob puas yuav ntoo xyom thaum nraug vauv tseem nrog lawv nyob? Muaj ib hnub, thaum luag coj nraug vauv mus lawm, mas lawv mam li yuav yoo mov.
16 Tsis muaj leej twg ntxiv ib daim ntaub tshiab rau ib lub qub tsho, vim daim ntaub ntxiv ntawd yuav caws rub lub qub tsho, ces haj yam ntuag loj. 17 Luag kuj tsis xuas hnab tawv qub los ntim cawv tshiab ; vim cov hnab tawv qub yuav tawg, ces cawv yuav nchuav tas, cov hnab kuj yuav puas tas. Luag thiaj muab cawv tshiab ntim hauv cov hnab tshiab, ces cov hnab thiab cov cawv thiaj yuav kav ntev.”

TIM 6 LUB 7 HLI 2020

Hnub Ob Lis Piam Kaum Plaub Nruab Xyoo A Nruab Lis Piam Xyoo II

Hwm LN Maria Goretti, Ib tug Ntxhais truag ua Tim Khawv

Zaj Nyeem Ib: OS XES 2: 16, 17C-18, 21-22

Huab Tais hais tias:
16 "Kuv yuav ntxias kom nws rov nyiam kuv, kuv yuav coj nws mus hauv teb chaws suab puam, kuv yuav hais lus rau nws lub siab mloog. 17c Nyob ntawd, nws yuav teb kuv zoo li thaum nws tseem hluas, zoo li thaum nws tawm hauv Hais Nkws Tos teb los."
18 HUAB TAIS hais zoo li no : "Hnub ntawd, koj yuav hu kuv tias : 'Kuv tus txiv.' Koj yuav tsis hu kuv ntxiv tias : 'Kuv tus Npas Has.'
21 Kuv yuav qhaib koj rau kuv tas ib sid. Kuv yuav qhaib koj nyob hauv txoj kev ncaj thiab txoj cai, txoj kev sib nyiam sib hlub thiab txoj kev khuv leej. 22 Kuv yuav qhaib koj nyob hauv txoj kev ua siab ncaj, ces koj yuav paub HUAB TAIS."

NPN 145: 2-3, 4-5, 6-7, 8-9

Txais: (8a) HUAB TAIS muaj kev hlub mos thiab kev khuv leej neeg.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws ;
nws loj tas nrho, neeg ntsuas tsis tau.

Txais: (8a) HUAB TAIS yog kev hlub mos thiab kev khuv leej neeg.

Sawv daws yuav qhuas txog koj tej hauj lwm txheej dhau txheej,
Lawv yuav tshaj koj lub hwj huaj hwj xyeej.
Lawv yuav piav txog koj lub hwj huam hwj chim loj ci ntsa iab,
thiab yuav hais txog koj cov dej num tsim nyog qhuas.

Txais: (8a) HUAB TAIS yog kev hlub mos thiab kev khuv leej neeg.

Neeg yuav hais txog koj lub hwj huam txaus ntshai,
lawv yuav tshaj koj lub hwj huam loj kawg nkaus.
Neeg yuav cav txog koj lub siab zoo siab dav tas nrho,
thiab yuav qw ntsuag qees cav txog koj lub siab ncaj.

Txais: (8a) HUAB TAIS yog kev hlub mos thiab kev khuv leej neeg.

HUAB TAIS lub siab hlub mos thiab khuv leej neeg,
nws npau taws qeeb, nws lub siab hlub neeg tas nrho.
HUAB TAIS ua siab zoo rau txhua leej txhua tus,
nws lub siab khuv leej tas puas tsav yam nws tau tsim.

Txais: (8a) HUAB TAIS yog kev hlub mos thiab kev khuv leej neeg.

As Les Lus Yas: 2 TM 1: 10

Txais: As les lus yas, as les lus yas.

Peb tus Huab Tais Yes Xus Pleev tau rhuav txoj kev tuag lawm,
thiab nws lub Moo Zoo ua kom txoj sia ci tawm tuaj.

Txais: As les lus yas, as les lus yas.

Ntawv Moo Zoo: MT 9: 18-26

18 Yes Xus tseem tab tom hais lus rau lawv, muaj ib tug nom tuaj txog, nws txhos caug ntua ntawm Yes Xus, nws thov tias : "Kuv tus ntxhais txoj sia nyuam qhuav tu. Thov koj tuaj tsa tes rau saum nws, ces nws yuav rov muaj txoj sia." 19 Yes Xus sawv tsees, nws lawv tus nom qab mus, nws cov thwj tim kuj mus thiab. 20 Muaj ib tug poj niam tsob ntshav tau kaum ob xyoos lawm, nws txav los ze ntawm Yes Xus nraub qaum, nws kov Yes Xus lub tw tsho. 21 Vim nws xav hauv siab tias : ‘Tsuav yog kuv kov tau nws lub tsho xwb, mas kuv yuav dim.’ 22 Yes Xus tig loo ntsia, nws pom tus poj niam, ces nws hais rau tus poj niam tias : "Tus ntxhais, koj tso siab, koj lub siab ntseeg cawm koj lawm." Tus poj niam cia li dim plaws ntawm tus mob txij thaum ntawd los.
23 Yes Xus tuaj txog tus nom lub tsev, nws pom cov txiv tshuab raj thiab pom neeg coob coob ua ntxhov hnyo. Yes Xus hais tias : "Nej tawm mus. Tus me ntxhais tsis tuag, nws tsaug zog xwb." Sawv daws luag Yes Xus zom zaws. 25 Thaum cov neeg tawm nraum zoov tas, Yes Xus chaws mus hauv, nws tuav tus ntxhais txhais tes, ces tus ntxhais sawv los. 26 Ces lub moo ntawd nto mus thoob lub teb chaws ntawd.

TIM 7 LUB 7 HLI 2020

Hnub Peb Lis Piam Kaum Plaub Nruab Xyoo A Nruab Lis Piam Xyoo II

Zaj NYeem Ib: OS XES 8: 4-7, 11-13

Huab Tais hais li no tias:
4 Lawv tau tsa lawv cov vaj kav His Xas Lais, tab sis kuv tsis tau tso cai; lawv tau tsa lawv cov tswj, tab sis kuv tsis tau pom zoo. Lawv muab lawv tej nyiaj tej kub los nchuav ua mlom rau lawv teev; li ntawd lawv rov ua kom lawv raug kev puas tsuaj puas ntsoog. 5 Xas Mas Lias, kuv ntxub koj tus mlom nyuj. Kuv lub siab npau taws heev rau lawv. Yuav hov ntev lawv thiaj mam ua tau neeg ntshiab huv? 6 Yog vim nyob hauv His Xais Lais, muaj tus kws txawj puab puab tawm los xwb, tsis yog ib tug tswv ntuj . Qhov tseeb, tus mlom nyuj Xas Mas Lias yuav tawg ua hmoov tas xwb.
7 Vim lawv tseb cua, ces lawv yuav sau cua daj cua dub. Lawv cov nplej yuav tsis txhawv hnab nplej, ces yuav tsis qoos tsis muaj hmoov nplej. Yog qoos taus, ces cov pej kum neeg yuav tuaj noj tas.
11 Cov Es Fais tau tsa ntau lub thaj txi Ntuj los daws txhaum. Tab sis lawv tsuas siv cov thaj ntawd los ua txhaum xwb. 12 Kuv txawm sau ntau txhiab lo lus qhia rau lawv coj, los lawv tsuasw saib zoo li yog ib co lus txawv txawv xwb. 13 Lawv nyiam tua tsiaj txi Ntuj, lawv yeej txi ntuj thiab noj tej nqaij, tab sis HUAB TAIS tsis txaus siab rau tej ntawd. Nyem no, HUAB TAIS yuav nco txog lawv cov txhaum, nws yuav rau txim rau lawv; ces lawv yuav rov qab mus nyob Hais Nkws Tos teb dua.

NPN 115: 3-4, 5-6, 7AB-8, 9-10

Txais: (9a) His Xas Lais tsev neeg tso siab rau Huab tais.

Peb tus Tswv Ntuj nyob txheej ntuj saud ;
Nws xav ua dab tsi, nws ua tau tas.
Lawv cov dab yog mlom nyiaj mlom kub,
Yog neeg ob txhais tes puab tawm los xwb.

Txais: (9a) His Xas Lais tsev neeg tso siab rau Huab tais..

Lawv muaj qhov ncauj, tab sis tsis txawj hais lus ;
Lawv muaj qhov muag, tab sis tsis pom kev.
Lawv muaj pob ntseg, tab sis lawv tsis hnov lus ;
Lawv muaj qhov ntswg, tab sis tsis hnov ntxhiab ;

Txais: (9a) His Xas Lais tsev neeg tso siab rau Huab tais.

Lawv muaj ob txhais tes, tab sis tsis txawj kov dab tsi ;
Lawv muaj ob txhais taw, tab sis tsis txawj mus kev ;
Cov neeg puab lawv los yuav zoo ib yam li lawv,
Cov tso siab rau lawv kuj yuav zoo ib yam li ntawd.

Txais: (9a) His Xas Lais tsev neeg tso siab rau Huab tais.

His Xas Lais tsev neeg, nej tso siab rau Huab Tais,
Nws yog tus tuaj pab peb tus tuaj thaiv peb.
As loos tsev neeg, nej tso siab rau Huab Tais,
Nws yog tus tuaj pab peb tus tuaj thaiv peb.

Txais: (9a) His Xas Lais tsev neeg tso siab rau Huab tais.

As Les Lus Yas: Zam 10: 14A

Txais: As les lus yas, as les lus yas.

Huab Tais hais tias: Kuv yog tus zoo tswv zov yaj;
kuv paub kuv cov yaj, kuv cov yaj paub kuv.

Txais: As les lus yas, as les lus yas.

Ntawv Moo Zoo: MT 9: 32-38

32 Lawv nyuam qhuav tawm mus xwb, luag twb coj ib tug neeg tsis txawj hais lus tuaj cuag Yes Xus, vim nws raug ib tug dab phem. 33 Yes Xus ntiab tus dab tawm, ces tus neeg cia li txawj hais lus tuaj. Tas tsoom sid qhuas kawg, lawv hais tias : "Tsis tau pom dua tej yam zoo li ntawd nyob hauv haiv His Xas Lais ib zaug li." 34 Tab sis cov Fas Lis Xais hais tias : "Nws hu tus Tuam Thawj dab tuaj ntiab dab."
35 Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, thiab nws tseem kho sawv daws tej txiab xeeb thiab tej mob nkeeg zoo tas huv si. 36 Yes Xus pom tej pab neeg coob coob, nws hlub lawv, vim sawv daws muaj kev nyuaj thiab tsis muaj tus pab, lawv zoo li ib co yaj tsis muaj tswv zov. 37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg. 38 Nej thov tus Tswv qoob kom nws xa ib co tub zog tuaj sau nws cov qoob."

TIM     8     LUB     7     HLI     2020

Hnub Plaub Lis Piam Kaum Plaub Nruab Xyoo A Nruab Lis Piam Xyoo II

Zaj Nyeem Ib:  OS XES 10:  1-3, 7-8, 12

1 His Xas Lais yog ib tsob hmab txiv cawv zoo zoo, txi txiv ncw ncw kawg. Nws yim txi txiv ntau, nws yim txhim thaj txi dab ntau tuaj. nws lub teb chaws yim npluaj nuj tuaj, nws yim tsa ncej teev dab ntau ntxiv. 2 Lawv muaj ob lub siab, li ntawd mas nyem no lawv yuav tsum raug txim vim lawv qhov txhaum. Huab Tais yuav muab lawv tej thaj txi dab ntxeev, yuav rho lawv tej ncej teev dab pov tseg. 3 Ces lawv yuav hais tias: "Peb tsis muaj vaj ntxwv, vim peb tsis tau hwm HUAB TAIS; tiam sis txawm peb muaj vaj los nws yuav ua tau dab tsi pab peb?"
7 Hais txog ntawm Xas Mas Lias teb, mas nws tus vaj yuav ploj mus xws cov npuas ntab saum nplaim dej. 8 Cov chaw teev mlom saum cov roob As Vees yog His Xas Lais chaw ua txhaum; lawv yuav raug muab rhuav pov tseg. Pos thiab nrhab yuav hlob tuaj laum lawv cov thaj txi dab. Lawv yuav hais rau cov hauv roob tias: "Nej vau los vov peb mas!" thiab hais rau cov hauv toj tias: "Nej vau los tsuam peb mas !"
12 Nej kav tsij tseb cov noob muaj kev ncaj ncees rau nej, thiab kav tsij sau cov qoob muaj kev ua siab zoo mas; nej cia li mus cog nej cov teb uas nej muab tso tseg lawm,  vim txog caij nej nrhiav HUAB TAIS lawm, mus txog hnub nws los ywg txoj kev ncaj rau saum nej.

NPN 105:  2-3, 4-5, 6-7

Txais: (4b) Nej yuav nrhiav Huab Tais lub ntsej muag mus li.

Nej hu nkauj rau nws, nej ntaus suab paj nruag cav txog nws,
nej tshaj tawm txog tej yam loj nws tau ua.
Nej txais koob meej nyob hauv nws lub npe,
nej cia li zoo siab, nej cov uas muaj lub siab nrhiav HUAB TAIS!

Txais: (4b) Nej yuav nrhiav Huab Tais lub ntsej muag mus li.

Nej nrhiav Huab Tais thiab nws lub zog,
nej nrhiav kom tau tsob hwb nws mus li.
Nej nco ntsoov txog cov hwj huam txaus qhuas nws tau ua,
nws cov hauj lwm loj, thiab cov lus txiav txim nws lub ncauj tau hais.

Txais: (4b) Nej yuav nrhiav Huab Tais lub ntsej muag mus li.

Has Nplas Has tsoom xeeb ntxwv, nej yog nws cov tub txib,
Yas Kos cov tub, nej yog nws pab neeg nws tau xaiv!
Huab Tais nws yog peb tus Tswv Ntuj;
tas ntiaj teb coj raws li nws txiav.

Txais: (4b) Nej yuav nrhiav Huab Tais lub ntsej muag mus li.

As Les Lus Yas:  MK 1:  15

Txais: As les lus yas, as les lus yas.

Tswv Ntuj lub Ceeb Tsheej nyob ze ze lawm:
Nej cia li thov txhaum thiab ntseeg lub Moo Zoo.

Txais: As les lus yas, as les lus yas.

Ntawv Moo Zoo:  MT 10:  1-7

1 Yes Xus hu nws kaum ob leeg thwj tim los ntawm nws, nws muab lub hwj huam ntiab tau cov dab tsis huv tawm thiab kho tau txhua yam kev mob nkeeg kev txiab xeeb kom zoo hlo rau lawv. 2 Kaum ob leeg Hauv Paus Xa Lus muaj npe li no : 3 Tus ib, Xis Moos uas tseem hu ua Pob Zeb, ces As Nres, Xis Moos tus kwv, Yas Kos, Ntxes Npes Dais tub, Zam, Yas Kos tus kwv, Fis Lis Pos thiab Npas Tos Los Mas Yos, Tos Mas thiab Mas Tais, tus sau se, Yas Kos, uas yog As Fas Yos tub, tiab Thas Dais Yos, 4 Xis Moos tus Ntxes Los, thiab Yus Das Kas Lis Yaus tus muab Yes Xus muag rau luag.
5 Yes Xus xa kaum ob leeg no mus tshaj lub Moo Zoo, nws qhia lawv tias :
"Nej tsis txhob mus cuag cov neeg teev dab, txhob mus hauv ib lub nroog Xas Mas Lias li. 6 Nej mus cuag cov yaj ploj hauv haiv His Xas Lais tso. 7 Thaum nej taug kev, nej ceeb toom tias: ‘Ntuj lub Ceeb Tsheej tuaj txog ze lawm.’”

TIM 9 LUB 7 HLI 2020

Hnub Tsib Lis Piam Kaum Plaub Nruab Xyoo A Nruab Lis Piam Xyoo II

Hwm LN Augustine Zhao Rong thiab Cov Nrog Nws Tuag Ua Tim Khawv

Zaj Nyeem Ib: OS XES 11: 1-4, 8E-9

Huab Tais hais tias:
1 Thaum His Xas Lais tseem yog ib tug me nyuam yaus, kuv nyiam nws, kuv tau hu kuv tus tub kom tawm Hais Nkws Tos teb los.
2 Tab sis kuv yim hu lawv mas lawv yim txav mus deb kuv. Lawv txi cov dab Npas Has, lawv hlawv xyab rau cov mlom dab.
3 Kuv twb yog tus uas tau hwj Es Fais xyaum mus kev, kuv tuav rawv lawv txhais npab; tiam sis lawv tsis paub tias kuv yog tus kho lawv zoo.
4 Kuv xuas ib co hlua tib neeg cab lawv mus, yog ib co hlua muaj kev hlub. Kuv tu lawv zoo li cov neeg uas nqa hlo lawv tus me nyuam los npuab lawv sab plhu. Kuv khoov cev mus rau lawv pub mov rau lawv noj.
8e Kuv lub siab lub plawv ntxeev tas nphau tas, kuv txoj kev hlub ua rau kuv txoj kev thim xav sawv tuaj.
9 Kuv yuav tsis ua raws kuv lub siab npau taws ceev, kuv yuav tsis rov tuaj rhuav Es Fais dua ntxiv; vim kuv yog Tswv Ntuj, kuv tsis yog tib neeg; kuv yog tus Ntshiab nyob nruab nrab hauv nej; kuv yuav tsis tuaj rhuav nej.

NPN 80: 2AC+3B, 15-16

Txais: (4b) Huab Tais, cia peb pom koj lub ntsej muag ces peb yuav tau txais kev cawm.

His Xas Lais tus tswv zov yaj e, thov cuab pob ntseg mloog.
Koj zaum saum cov tshiab kes lus npis, thov koj ci ntsa tuaj.
Koj tsa koj lub hwj huam kom tsim dheev.

Txais: (4b) Huab Tais, cia peb pom koj lub ntsej muag ces peb yuav tau txais kev cawm.

HUAB TAIS kav ib tsoom tshiab,
thov koj dauv muag saum ntuj los saib dua, ces koj yuav pom.
Thov koj los tu tsob txiv cawv no,
thov koj txuag yam uas koj txhais tes xis tau cog,
yog neeg tus tub uas koj tau ua kom muaj zog.

Txais: (4b) Huab Tais, cia peb pom koj lub ntsej muag ces peb yuav tau txais kev cawm.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej nyob ze ze lawm,
Nej cia li lees txhaum thiab ntseeg lub Moo Zoo.

Txais: As les lus yas, as les lus yas.

Ntawv Moo Zoo: MT 10: 7-15

Yes Xus hais rau nws cov thwj tim tias:
7 “Thaum nej taug kev, nej ceeb toom tias: ‘Ntuj lub Ceeb Tsheej tuaj txog ze lawm.’
8 Nej kho cov muaj mob kom zoo, nej tsa cov tuag kom ciaj rov los, nej kho cov mob ruas kom huv tuaj, nej ntiab dab kom khiav tawm. Nej tau txais dawb, nej yuav rov pub dawb.
9 Nej txhob muab kub, muab nyiaj, los xim nyiaj qhwv rau hauv duav siv.
10 Txhob ris hnab taug kev, txhob nqa ob lub tsho, txhob nqa khau los nrig pas; tus tub zog yeej tsim nyog txais nws pluas mov los noj.
11 Nej mus hauv lub nroog los lub zos twg, nej nug kom tau ib tug neeg muaj meej mom, nej nyob hauv nws tsev mus txog hnub nej rov qab.
12 Thaum nej chaws mus hauv ib lub tsev, nej foom key kaj lug rau lub tsev ntawd.
13 Yog lub tsev ntawd tsim nyog txais, mas nej txoj key kaj lug yuav nqes los nyob hauv lawv. Yog lub tsev ntawd tsis tsim nyog txais, ces nej txoj key kaj lug yuav rov los roos nej.
14 Yog leej twg tsis txais nej, thiab tsis mloog nej cov lus, nej cia li tawm hauv lub tsev ntawd los lub nroog ntawd mus. Nej yuav nchos cov plua av lo nej ko taw pov tseg.
15 Kuv hais tseeb rau nej : Txog Hnub Txiav Txim, teb chaws Xos Dos Mas thiab Nkos Mos Las yuav raug txim hnyav tsis cuag li lub nroog ntawd.”

TIM 10 LUB 7 HLI 2020

Hnub Rau Lis Piam Kaum Plaub Bruab Xyoo A Nruab Lis Piam Xyoo II

Zaj Nyeem Ib: OS XES 14: 2-10

Huab Tais hais tias:
2 “Cov His Xas Lais, nej rov qab los cuag HUAB TAIS nej tus Tswv Ntuj mas ! Nej tau ua txhaum, nej thiaj raug kev puas ntsoog. 3 Nej npaj ib co lus nrog nej ces nej yuav rov mus cuag HUAB TAIS; nej yuav hais rau nws tias : ‘Thov koj tshem tej yam phem pov tseg, koj tsuas yuav qhov zoo xwb, ces peb yuav muab peb di ncauj los ua cov heev nyuj txi rau koj. 4 As Xws yuav cawm tsis tau peb. Peb yuav tsis caij nees ntxiv, peb yuav tsis hais ntxiv rau tej yam uas yog peb txhais tes puab tias : ‘Peb tus Tswv Ntuj !’ Vim tsuas yog nyob ze ntawm koj xwb tus me nyuam ntsuag thiaj tau txais kev hlub.’"
5 Ces HUAB TAIS hais tias : "Kuv yuav kho lawv txoj kev ntxeev siab kom lawv zoo hlo. Kuv lub siab yuav hlub lawv, tsis tas leej twg yuam kuv, vim kuv tsis npau taws rau lawv ntxiv. 6 Kuv yuav zoo li ib co dej lwg los ywg His Xas Lais, nws yuav nthaw cos tuaj zoo li lub paj , nws yuav nrhau cag tob xws li tus ntoo ciab nyob Lis Npaas. 7 Nws cov ceg yuav ncau mus deb, nws yuav zoo saib xws li ib tsob txiv ntoo roj, yuav tsw qab xws li ib tsob ntoo ciab Lis Npaas.
8 Cov uas nyob hauv nws yuav rov los nkaum hauv nws qhov ntxoov ntxoo; lawv yuav ua kom rov muaj qoob muaj loo; lawv yuav tawg paj xws li cov hmab txiv cawv thiab yuav ua kom nws nto moo xws li cov cawv nyob Lis Npaas.
9 Es Fais yuav hais tias: ‘Kuv tseem yuav mus teev mlom ntxiv ua dab tsi?’ Vim kuv yog tus mloog lawv tej lus thov, kuv saib xyuas lawv. Kuv zoo puav tam li ib tug ntoo thuv ntsuab mus li. Yog vim kuv, nej thiaj txi txiv tau.
10 Leej twg yog tus neeg thoob tsib? Cia kom nws txawj to taub txog tej yam no; leej twg yog tus neeg ntse? Cia kom nws paub zoo txog tej no. HUAB TAIS tej kev yog kev ncaj; cov neeg siab ncaj yuav taug nws tej kev, hos cov neeg txhaum yuav ntog hauv tej kev ntawd.

NPN 51: 3-4, 8-9, 12-13, 14+17

Txais: (17b) Kuv lub ncauj yuav tshaj txog koj lub koob meej.

Tswv Ntuj, thov koj khuv leej kuv, vim koj lub siab zoo;
thov koj so kuv qhov txhaum pov tseg, vim koj kev hlub loj tas nrho.
Thov koj ntxuav kuv lub txim pov tseg kom tas,
thiab koj muab kuv qhov txhaum tshem mus kom kuv dawb huv tuaj.

Txais: (17b) Kuv lub ncauj yuav tshaj txog koj lub koob meej.

Koj nyiam ib lub siab tsis muaj kev dag,
koj qhia kev thoob tsib rau kuv puag hauv kuv nruab siab
Koj muab his xos ntxuav kuv qhov txhaum ces kuv yuav huv tuaj;
Koj ntxuav kuv mas kuv yuav dawb dua daus.

Txais: (17b) Kuv lub ncauj yuav tshaj txog koj lub koob meej.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (17b) Kuv lub ncauj yuav tshaj txog koj lub koob meej.

Thov koj pub kom kuv rov zoo siab nyob hauv koj txoj kev cawm
thiab ua kom kuv muaj ib lub tswv yim xav mloog koj.
HUAB TAIS, thov qhib kuv di ncauj,
ces kuv lub ncauj yuav tshaj koj lub koob meej.

Txais: (17b) Kuv lub ncauj yuav tshaj txog koj lub koob meej.

As Les Lus Yas: ZAM 16: 13A; 14: 26D

Txais: As les lus yas, as les lus yas.

Thaum Leej Tswv Yim qhia qhov tseeb tuaj txog,
Nws yuav coj nej mus rau qhov tseeb tas huv si
Thiab yuav pab kom nej rov nco txog txhua yam kuv tau hais rau nej.

Ntawv Moo Zoo: MT 10: 16-23

Yes Xus hais rau nws cov thwj tim tias:
16 “Kuv xa nej mus xws li ib co yaj mus nyob hauv nruab nrab ib co hma. Mas nej yuav ua neeg xyuam xim kawg nkaus xws li nab, ua siab ncaj ncees xws li nquab. 17 Nej ceev faj nraim txog tib neeg : vim lawv yuav mus kom nej rau cov rooj txwj laus txiav txim, lawv yuav nplawm nej hauv cov tsev txoos. 18 Luag yuav coj nej mus rau cov nom thiab cov vaj ntxwv vim kuv, kom nej tau ua tim khawv txog kuv nyob ntawm cov nom tswv thiab cov teev pej kum dab xub ntiag. 19 Thaum luag ntes nej, mas nej tsis txhob txhawj tias yuav hais li cas thiab yuav teb dab tsi. Thaum txog sij hawm teb, Ntuj yuav muab cov lus teb rau nej. 20 Li ntawd, yuav tsis yog nej hais lus, yog nej Txiv tus Ntsuj Plig yuav hais tawm hauv nej los.
21 Tus tij yuav muab tus kwv rau luag tua, leej txiv yuav muab nws tus me nyuam rau luag. Tej me nyuam yuav sawv tiv niam thiab txiv, thiab yuav muab rau luag tua. 22 Sawv daws yuav ntxub nej vim kuv lub npe. Tab sis, tus twg ua siab ntev nyiaj mus txog qhov kawg, mas nws yuav txais kev cawm.
23 "Yog luag caum nej hauv lub nroog no, mas nej khiav mus rau lwm lub. Kuv hais tseeb rau nej, nej tseem khiav ncig tsis tau txhua cov nroog hauv His Xas Lais teb, ces Neeg Leej Tub twb los txog lawm.”

TIM 11 LUB 7 HLI 2020

Hnub Xya Lis Piam Kaum Plaub Nruab Xyoo A Nruab lis Piam Xyoo II

Hwm LN Benedict, ua Txiv Twj Cuab

Zaj Nyeem Ib: HIS XAIS 6: 1-8

1 Xyoo tus vaj Os Xias tuag, kuv pom Huab Tais zaum saum ib lub theej kiab loj siab kawg li. Nws lub tw tsho dauv mus puv nkaus lub Tuam Tsev tas huv tib si. 2 Nyob ntawm nws txheej saud, muaj ib co Tshiab Xes Las Fis sawv ntsug saud. Lawv ib leeg muaj rau txhais tis, ob txhais thaiv ntsej muag, ob txhais thaiv ko taw, ob txhais cia ya mus mus los los.
3 Lawv ib leeg hu qw nrov nrov rau ib leeg tias : "Tsoom tshiab tus HUAB TAIS ntshiab, ntshiab, ntshiab. Nws lub hwj chim nyob puv lub ntiaj teb." 4 Thaum lub suab ntawd nrov, ua rau cov ncej qhov rooj ua zog koog, pa taws ncho puv lub tsev.
5 Ces kuv hais tias : "Kuv hmoov phem ! Kuv yuav tuag lau! Vim kuv yog ib tug neeg di ncauj tsis huv, kuv nyob nruab nrab ib haiv neeg di ncauj tsis huv. Tsis kav kuv qhov muag tau pom tus Vaj, tus HUAB TAIS kav tsoom tshiab tiag !"
6 Ces ib tug tshiab Xes Las Fis ya ntxiag los txog ntawm kuv, nws txhais tes tuav ib lub ncaig kub lug uas nws xuas ib rab ciaj tais ntawm lub thaj txi Ntuj los. 7 Nws coj lub ncaig ntawd los so kuv di ncauj, nws hais tias : "Saib ! Qhov no twb chwv koj di ncauj lawm, nws tshem koj qhov phem mus lawm, thiab koj cov txhaum raug muab ntxuav tas lawm."
8 Ces kuv hnov Huab Tais lub suab hais tias : "Kuv yuav xa leej twg mus ? Leej twg yuav sawv peb cev mus ?" Kuv teb tias : "Kuv nyob ntawm no. Koj xa kuv mus."

NPN 93: 1AB, 1CD-2, 5

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Huab Tais ua vaj, nws hnav hwj chim ci ntsa iab,
Nws hnav lub tsho muaj zog thiab sia siv khov kho.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Nws tsim Lub ntiaj teb nyob ruaj nreb, txav tsis tau chaw.
Koj lub theej kiab yeej teem tau ruaj khov kho txij puag thaum ub los.
Huab Tais, koj yeej ib txwm nyob txhiab niag tim puas xyoo mus li.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Koj cov cai lij choj tsim nyog ntseeg tas nrho;
Huab Tais, txoj kev ntshiab tsab koj lub tsev
kom zoo nkauj mus li lawm yav tom ntej.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

As Les Lus yas: 1 POB ZEB 4: 14

Txais: As les lus yas, as les lus yas.

Yog nej raug luag tsawm vim Leej Pleev lub npe, mas nej txoj hmoov zoo,
vim Tswv Ntuj Leej Tswv Yim tuaj roos nej.

Txais: As les lus yas, as les lus yas.

Ntawv Moo Zoo: MT 10: 24-33

Yes Xus hais rau nws cov thwj tim tias:
24 "Tus thwj tim tsis loj dua nws tus xib hwb, tus tub txib tsis loj dua nws tus tswv. 25 Tus thwj tim txaus siab heev thaum nws zoo li nws tus xib hwb lawm. Tus tub txib txaus siab heev thaum nws zoo li nws tus tswv kawm. Yog lawv twb hu tus tswv tsev ua Npes Ntxes Npus mas lawv haj yam yuav hu cov neeg hauv nws tsev li ntawd!
26 Ua li mas nej txhob ntshai cov neeg ntawd ! Vim tsis muaj ib yam npog rawv uas yuav tsis muab qhib tawm, tsis muaj ib yam zais ntshis uas yuav tsis muab thws rau sawv daws paub. 27 Tej yam uas kuv hais rau nej hauv qhov tsaus ntuj, nej yuav muab hais tawm thaum nruab hnub nrig. Hos yam nej hnov ntxhi rau hauv nej pob ntseg, mas nej yuav nce mus tshaj rau saum tej ru tsev.
28 Nej txhob ntshai cov neeg tua tau lub cev, tab sis lawv tua tsis tau tus ntsuj plig. Nej yuav ntshai tus muaj peev xwm tua tau lub cev thiab tus ntsuj plig huv si nyob hauv lub pas hluav taws.
29 Ob tug noog tsig txhuv, luag tsuas muag tau ib npib xwb. Tsis kav, tsis muaj ib tug poob hauv av tau, yog nej Txiv tsis tso lus. 30 Ntawm nej, tab yog nej cov plaub hau saum taub hau yeej raug suav tas huv si lawm. 31 Li ntawd, nej tsis txhob ntshai dab tsi vim nej muaj nqis tshaj tej pab tsig txhuv coob coob ua ke.
32 Leej twg lees rau sawv daws tias nws paub kuv, mas kuv kuj yuav lees rau kuv Txiv nyob saum Ntuj tias kuv paub nws. 33 Hos tus tsis lees rau sawv daws tias nws paub kuv, kuv kuj yuav tsis lees rau kuv Txiv nyob saum ntuj tias kuv paub nws thiab.”

TIM 13 LUB 7 HLI 2020

Hnub Ob Lis Piam Kaum Tsib Nruab Xyoo A Nruab Lis Piam Xyoo II

Hwm LN Henry

Zaj Nyeem Ib: HIS XAIS 1: 10-17

10 Cov nom tswv tswj Xos Dos Mas, nej mloog Huab Tais cov lus mas ! Pej xeem nyob Nkos Mos Las, nej mloog peb tus Tswv Ntuj cov lus cob qhia! 11 HUAB TAIS hais tias : "Nej puas xav tias kuv saib qhov nej ua thaj txi Ntuj ntau ntau yog ib qho muaj nqes rau kuv? Kuv dhuav nej cov laug tshis uas nej muab los hlawv kheej txi rau kuv, thiab dhuav cov roj ntawm nej cov tsiaj rog kawg li; kuv tsis zoo siab txais cov thav nyuj, thav yaj thiab thav tshis tej roj ntsha.
12 Thaum nej tuaj nyob ntawm kuv xub ntiag, yog leej twg kom nej coj tej ntawd tuaj tsuj kuv tej chaw? 13 Tsis txhob nqa tej txim tsis muaj nqes tuaj hlawv rau kuv ntxiv! Nej cov pa xyab yog ib qho kuv tsis nyiam kiag li. Nej tej hli xiab, nej cov hnub xas npas tos, nej cov kev tuaj sib txoos, mas kuv nyiaj tsis taus tej kev ua phem thiab tej kev ua txoos loj ntawd lawm. 14 Nej tej hli xiab thiab nej tej hnub nyoog teem ua koob tsheej mas kuv ntxub tas siab nrho, yog tej yam ua nra hnyav rau kuv ua luaj, kuv ceeb laj ris kawg nkaus. 15 Thaum nej tsa tes hu txog kuv, kuv yuav qi qhov muag tsis ntsia nej. Txawm nej hais nej tej zaj teev Ntuj ntau npaum li cas los kuv yuav tsis mloog. Nej txhais tes puv nkaus ntshav xwb! 16 Nej rov ntxuav nej kom nej huv tuaj mas ! Nej tshem nej tej hauj lwm phem mus kom kuv qhov muag txhob pom; nej tso txoj kev ua phem tseg mas! 17 Nej xyaum ua qhov zoo, nej nrhiav kev ncaj ncees, nej ntuas tus muaj lub siab quab yuam neeg; nej muab kev ncaj rau tus tub ntsuag, nej tuaj tus poj ntsuam tog."

NPN 50: 8-9, 16BC-17, 21+23

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis muab ib tug heev nyuj tawm hauv koj tsev mus,
los ib tug laug tshis tawm hauv koj pab tsiaj mus.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom..

Tim li cas nej lub ncauj thiaj qog kuv cov kev cai lij choj,
thiab lees kuv cov lus kuv tau nrog nej cog ntawm di ncauj,
tiam sis nej ntxub txoj kev coj nruj coj zoo
thiab muab kuv tej lus ua ntia pov tom nej qab xwb?

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Thaum nej ua tej yam zoo li no, kuv puas yuav tsum ua ntsej lag muag dig?
Nej puas xav tias kuv zoo nkaus li nej thiab?
Kuv yuav qhuab qhia nej, yuav qhia lub ntsiab tawm plaws rau nej pom.
Tus neeg twg tuaj cav txog kuv yog nws ua kom kuv nto koob meej;
tus neeg uas taug txoj kev ncaj kev zoo,
kuv yuav muab Tswv Ntuj txoj kev cawm neeg rau nws pom.

As Les Lus Yas: MT 5: 10

Txais: As les lus ays, as les lus yas.

Cov tau txoj hmoov zoo, yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus ays, as les lus yas.

Ntawv Moo Zoo: MT 10: 34-11: 1

Yes Xus hais rau nws cov thwj tim tias:
34 "Nej txhob xav tias kuv coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj. 35 Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj. 36 Ua li mas yus cov yeeb ncuab yog cov neeg nyob hauv yus tsev.
37 Tus nyiam nws niam nws txiv dua kuv, mas nws tsis tsim nyog nrog kuv; tus nyiam nws tej tub tej ntxhais dua kuv, mas nws tsis tsim nyog nrog kuv. 38 Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv. 39 Tus nrhiav tau nws txoj sia, nws ua nws txoj sia ploj, hos tus ua nws txoj sia ploj vim kuv, mas nws yuav nrhiav tau nws txoj sia.
40 Tus txais nej, mas yog nws txais kuv. Tus txais kuv, mas yog nws txais Tus xa kuv tuaj. 41 Tus txais ib tug yaj saub, vim tus ntawd yog yaj saub, nws yuav txais koob haum phim tus yaj saub. Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj. 42 Kuv hais tseeb rau nej, leej twg pub ib khob dej txias rau ib tug neeg me li no haus, vim nws yog kuv thwj tim, mas nws yeej yuav tsis poob nws qhov koob haum li."
11 1 Thaum Yes Xus ceeb toom rau nws kaum ob leeg thwj tim li no tas lawm, nws tso qhov chaw ntawd tseg, nws mus qhia thiab nthuav lub Moo Zoo rau hauv lawv cov nroog.

TIM 14 LUB 7 HLI 2020

Hnub Peb Lis Piam Kaum Tsib Nruab Xyoo A Nruab Lis Piam Xyoo II

Hwm LN Tekakwitha, ib tug Nkauj Tsim Txiaj

Zaj Nyeem Ib: HIS XAIS 7: 1-9

1 Lub caij As Kas, uas yog Yos Tas tub, uas yog Os Xias tub, ua vaj kav Yus Das teb, mas Las Xoos, tus vaj kav As Las teb, nce mus pem Yes Lus Xas Les nrog Pes Kas, tus vaj kav His Xas Lais teb, uas yog Les Mas Lias tub, nkawd mus ntaus Yes Lus Xas Les, tab sis nkawd ntaus tsis tau. 2 Luag tuaj qhia Das Vis tsev neeg paub tias “tus vaj kav As Las tuaj koom tes nrog lub xeev Es Fais lawm.” Ces tus vaj Yus Das thiab tsoom pej xeem lub siab ntshai tshee cuag li cov nplooj ntoos hauv hav zoov co thaum raug cua tshuab.
3 HUAB TAIS hais rau His Xais tias : "Koj tawm mus cuag As Kas, koj thiab koj tus tub Ses Yas Sus neb mus, neb mus lawm pem tus kwj deg uas ntws mus rau lub pas dej nyob pem toj ntawm qhov kawg, ntawm txoj kev mus rau hauv tus ntxhua seb daim teb. 4 Koj hais rau As Kas tias : ‘Koj yuav ceev faj, yuav ua siab tus tus; koj tsis txhob ntshai, txhob ntaus siab me rau ob ya cav taws ncho pa lug ntawd, vim Las Xoos thiab cov As Las thiab Les Mas Lias tus tub npau taws heev, 5 yog vim As Las, nrog rau Es Fais, thiab Les Mas Lias tus tub, npaj siab ua phem rau koj, nws tau hais tias : 6 ‘Peb mus lawm ped, peb mus ntaus kom yeej Yus Das, thiab muab nws yuam los zwm rau peb. Ces peb tsa Tas Npis tus tub los ua vaj kav lawv.’
7 HUAB TAIS hais li no : ‘Yuav tsis muaj li ntawd. Yuav ua tsis tau li ntawd. 8 Lub taub hau nyob As Las teb yog Das Mas, hos tus ua hau nyob Das Mas yog Las Xoos. Tshuav 65 xyoos tom ntej no xwb ces Es Fais yuav tawg tas, yuav tsis yog ib haiv neeg ntxiv lawm. 9 Lub taub hau nyob Es Fais yog Xas Mas Lias, hos tus ua hau nyob Xas Mas Lias yog Les Mas Lias tus tub. Yog nej tsis ntseeg ces nej yuav nyob tsis taus ruaj ntxiv.’”

NPN 48: 2-3A, 3B-4, 5-6, 7-8

Txais: (9d) Tswv Ntuj txuag kom nws lub tsheej nyob ruaj khov mus li.

HUAB TAIS yog tus loj, thiab tsim nyog qhuas kawg nkaus
Nyob hauv peb tus Tswv Ntuj lub tsheej.
Lub roob nws txoj kev ntshiab zoo nkauj tshaj lwm lub roob,
Yog ntiaj teb lub chaw zoo siab.

Txais: (9d) Tswv Ntuj txuag kom nws lub tsheej nyob ruaj khov mus li.

Roob Xis Yoos, pem qaum teb qhov kawg,
yog tus vaj loj lub tsheej.
Tswv Ntuj nyob hauv lub tsheej cov tsev vaj loog,
Luag paub nws yog lub yeej ntsa zeb txeem tsis tau thaiv lub tsheej.

Txais: (9d) Tswv Ntuj txuag kom nws lub tsheej nyob ruaj khov mus li.

Ntsia saib, cov vaj tuaj sib sau ua ke;
lawv tib txhij sawv kev tuaj mus tsuj.
Thaum lawv pom dheev, tam sis ntawd lawv ceeb tas.
lawv ntshai kawg, lawv npaj tso tes khiav.

Txais: (9d) Tswv Ntuj txuag kom nws lub tsheej nyob ruaj khov mus li.

Lawv ntshai tshee na nyob ntawm chaw,
lawv mob npaum li tus poj niam yuav daws cev.
Nyob hauv cov cua ntsawj toob fab tuaj,
koj ua kom cov nkoj nyob Tas Sis ntsoog ntxaws tas.

Txais: (9d) Tswv Ntuj txuag kom nws lub tsheej nyob ruaj khov mus li.

As Les Lus Yas: NPN 95: 8

Txais: As les lus ays, as les lus yas.

Yog hnub no nej hnov nws lub suab,
nej tsis txhob ua nej lub siab tawv ncauj.

Txais: As les lus ays, as les lus yas.

Ntawv Moo Zoo: MT 11: 20-24

20 Yes Xus pib tsawm cov nroog uas tau pom nws ua hwj huam yees ntxwv ntau tshaj, tab sis lawv tsis hloov siab:
21 “Kos Las Ntxis, koj txoj hmoov phem ! Npes Xais Das, koj txoj hmoov phem ! Vim tias, cov hwj huam yees ntxwv uas kuv tau ua nyob hauv neb, lam yog ua nyob Tws Los thiab nyob Xis Doos, mas lawv twb hloov siab lawm ntxov thiab twb hnav ntaub tsaj thiab nphoo plua tshauv rau lawv lawm.
22 Kuv hais meej rau neb, txog hnub txiav txim, Tws Los thiab Xis Doos yuav raug txim sib dua neb.
23 Thiab koj, Kas Fas Naus, koj xav tias koj yuav raug tsa siab txij ntuj no lod? Koj yuav nqes mus lawm tub tuag teb mog. Vim tias cov hwj huam yees ntxwv kuv tau ua nyob hauv koj, lam yog ua nyob Xos Dos Mas, mas lub nroog ntawd tseem yuav nyob txog tav no.
24 Kuv hais meej rau koj, txog hnub txiav txim, Xos Dos Mas yuav raug txim sib dua koj."

TIM 15 LUB 7 HLI 2020

Hnub Plaub Lis Piam Kaum Tsib Nruab Xyoo A Nruab Lis Piam Xyoo II

Hwm LN Bonaventure, Tswv Qhia ua Kws cov Txuj Ntshiab

Zaj Nyeem Ib: HIS XAIS 10: 5-7, 13B-16

Huab Tais hais li no:
5 “As Xws txoj hmoov phem ! Nws yog rab pas thaum kuv npau taws, thiab yog rab qws thaum kuv tsis txaus siab.
6 Kuv xa nws mus ntaus ib lub kuj cuab tsis hwm Ntuj. Kuv kom nws mus ntaus haiv neeg kuv npau taws rau, kom nws mus lwg lawv cov toob xib, mus txeeb lawv lub cuab tam, kom nws mus tsuj haiv neeg ntawd xws li cov av nkos nyob ntawm tej kev. 7 Tab sis nws tsis npaj ua li ntawd, nws lub siab tsis xav li ntawd. Nws tsuas xav ntsoov yuav rhuav kom puas ntsoog, thiab kom ntau lub kuj cuab ploj ntais mus xwb.
13 Nws hais tias : ‘Yog kuv txhais tes muaj zog pab kuv ua tau tej ntawd, thiab yog kuv lub tswv yim thoob tsib ua kom kuv ntse. Kuv tau rhuav cov haiv neeg tej ciam dej ciam av; kuv tau lwg lawv tej cuab yeej cuab tam; kuv yog tus loj muaj zog ua kom cov zaum saum theej kiab poob ntawm lawv qhov chaw zaum. 14 Kuv txhais tes nrhiav tau cov haiv neeg tej nyiaj txiag xws li nrhiav tau ib lub zes qe, thiab kuv tau khaws tas ntiaj teb los ua kuv tug, xws li khaws ib co qe luag muab tso tseg, tsis muaj leej twg co ib tis, tsis muaj leej twg rua ncauj los quaj ib suab.’
15 Rab taus puas yuav khav yeej tus tsa nws los txiav ? Los rab kaw puas yuav khav yeej tus qoj nws los kaw? Cuag li yog rab pas ua tau kom tus tsa nws ua zog, los cuag li yog rab qws ua tau kom tus neeg tsis yog ntoo tsa tau siab! 16 Yog vim li ntawd Huab Tais, tus HUAB TAIS kav tsoom tshiab, yuav ua kom nws cov neeg rog cia li yuag tuaj, thiab nws lub hwj chim yuav ua kom muaj ib qho cig hlob, xws li hluav taws cig.

NPN 94: 5-6, 7-8, 9-10, 14-15

Txais: (14a) Huab Tais yuav tsis tso nws haiv neeg pov tseg..

HUAB TAIS, lawv tsuj koj haiv neeg !
Lawv ua kom koj lub cuab tam raug txom nyem.
Lawv tua tus poj ntsuam thiab tus pej kum neeg,
lawv txo cov ntsuag nos siav.

Txais: (14a) Huab Tais yuav tsis tso nws haiv neeg pov tseg..

Lawv hais tias : "HUAB TAIS tsis txawj pom,
Yas Kos tus Tswv Ntuj tsis txawj paub dab tsi li.”
Cov neeg ruam hauv tsoom pej xeem, nej yuav tsum paub !
Cov neeg vwm, hnub twg nej mam yuav thoob tsib ?

Txais: (14a) Huab Tais yuav tsis tso nws haiv neeg pov tseg..

Tus puab pob ntseg, nws tsis txawj hnov lus lod ?
Tus puab qhov muag, nws tsis txawj pom lod ?
Tus coj ib tsoom haiv neeg, nws tsis txawj qhuab ntuas lod ?
Nws twb yog tus qhia kev paub kev txawj rau tib neeg.

Txais: (14a) Huab Tais yuav tsis tso nws haiv neeg pov tseg..

HUAB TAIS tsis nrauj nws haiv neeg,
nws tsis muab nws lub cuab tam laim pov tseg.
Kev txiav txim thiaj yuav rov muaj kev ncaj ncees,
tas ib tsoom neeg siab ncaj yuav coj raws kev ncaj ncees.

Txais: (14a) Huab Tais yuav tsis tso nws haiv neeg pov tseg..

As Les Lus Yas: MT 11: 25

Txais: As les lus yas, as les lus yas..

Kuv cav txog koj, Leej Txiv, Huab Tais kav lub ntuj lub teb,
Koj tau qhia kom cov neeg me paub txog lub Ceeb Tsheej.

Txais: As les lus yas, as les lus yas.

Ntawv Moo Zoo: MT 11: 25-27

25 Lub caij ntawd, Yes Xus tsa suab hais tias : "Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov neeg coj li me nyuam yaus paub.
26 Yog li tiag, Txiv, koj lub siab yeej nyiam li ntawd.
27 Kuv Txiv muab tas ib puas tsav yam cob rau kuv. Tsis muaj leej twg paub Leej Tub, tsuas kawg Leej Txiv thiaj paub. Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom nws paub xwb.”

TIM 16 LUB 7 HLI 2020

Hnub Tsib Lis Piam Kaum Tsib Nruav Xyoo A Nruab Lis Piam Xyoo II

Hwm Niam Mab Liab nyob saum Roob Kas Mes

Zaj Nyeem Ib: HIS XAIS 26: 7-9, 12, 16-19

7 Tus neeg siab ncaj txoj kev yog txoj kev ncaj; koj kho kom kev ncaj rau tus neeg siab ncaj taug. 8 Muaj tiag, Huab Tais , nyob hauv txoj kev coj raws li koj tau txiav, peb tos ntsoov koj; peb tus plig ntshaw tkoj lub npe thiab ntshaw nco ntsoov txog koj. 9 Hmo ntuj, kuv tus plig nqhis txog koj, kuv lub tswv yim nrhiav koj nyob hauv qhov tob tob hauv kuv nruab siab. Vim thaum koj txiav txim rau lub ntiaj teb, mas cov neeg nyob hauv lub qab ntuj yuav paub txog txoj kev ncaj.
12 Huab Tais, koj yog tus muab kev thaj yeeb rau peb; peb tej hauj lwm los yog koj ua pub rau peb tib si.
16 HUAB TAIS, thaum lawv raug txom nyem, lawv tuaj nrhiav koj; lawv tsa suab thov koj vim yog koj rau txim rau peb. 17 Zoo li tus poj niam cev xeeb tub, thaum txog caij nws tab tom yuav daws cev, nws mob plab, nws ntsaj thiab quaj qw vim nws zaj mob; peb kuj zoo li ntawd nyob ntawm koj xub ntiag, Huab Tais. 18 Peb tau xeeb tub, peb ntsaj mob zoo li yuav daws cev, peb tsuas yug tau cua xwb, peb coj sis tau kev cawm rau lub ntiaj teb li, thiab peb ua tsis tau kom neeg los nyob hauv ntiaj no li. 19 Tiam sis koj cov neeg tuag yuav ciaj rov los; kuv cov cev tuag yuav sawv rov los. Nej cov uas pw nyob hauv av, nej kav tsij tsim dheev los, nej cia li hu nkauj zoo siab. Vim koj cov lwg yog lwg pom kev kaj lug, ces koj yuav cia poob mus rau hauv lub teb chaws tsaus ntuj.

NPN 102: 13-14AB+15, 16-18, 19-21

Txais: (20b) Huab Tais nyob saum ntuj dauv muag los saib lub ntiaj teb.

Koj, HUAB TAIS, yuav nyob tas mus li ib txhis,
txhua tiam neeg yuav nco txog koj tiam dhau tiam.
Koj yuav sawv, koj yuav hlub Xis Yoos,
vim txog caij koj yuav khuv leej nws lawm.
Nws cov pob zeb, ua rau koj cov tub txib tshua txog nws,
nws cov plua tshauv ua kom lawv lub siab hlub nws.

Txais: (20b) Huab Tais nyob saum ntuj dauv muag los saib lub ntiaj teb.

Cov haiv neeg yuav hwm koj lub npe, HUAB TAIS,
tas cov vaj nyob ntiaj teb yuav hwm koj lub hwj chim.
Thaum HUAB TAIS rov txhim tau Xis Yoos lawm,
sawv daws yuav pom nws nyob hauv nws lub hwj chim;
nws yuav tig los mloog cov neeg txom nyem tej lus thov,
nws yuav tsis ntxub lawv zaj thov ntuj.

Txais: (20b) Huab Tais nyob saum ntuj dauv muag los saib lub ntiaj teb.

Nej sau qhov no cia rau tiam neeg uas yuav los tom ntej,
ces cov neeg Tswv Ntuj yuav tsim los yav tom ntej yuav cav txog nws :
Nws nyob saum nws lub tsev ntshiab dauv muag los saib;
HUAB TAIS nyob saum txheej ntuj siab ntsia rau ntiaj teb,
Kom tau mloog cov neeg nyob txim lub suab nroo,
kom tau tso cov neeg zwm rau kev tuag dim.

Txais: (20b) Huab Tais nyob saum ntuj dauv muag los saib lub ntiaj teb.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Tas nej sawv daws uas nej khwv thiab ris nra hnyav,
nej tuaj cuag kuv mas kuv yuav cia nej so los siav.”

Txais: As les lus yas, as les lus yas.

Ntawv Moo Zoo: MT 11: 28-30

Yes Xus hais tias:
28 "Tas nej sawv daws uas nej khwv, thiab ris nra hnyav,
nej tuaj cuag kuv mas kuv yuav cia nej so los siav.
29 Nej txais kuv tus quab mus kwv, nej kawm ntawm kuv,
vim kuv muaj lub siab mos siab muag, kuv tsis muab hlob,
nej tus plig yuav nrhiav tau chaw so los siav.
30 Vim kuv tus quab kwv yooj yim, thiab kuv lub nra sib.”

TIM 17 LUB 7 HLI 2020

Hnub Rau Lis Piam Kaum Tsib Nruab Xyoo A Nruab lis piam Xyoo II

Zaj Nyeem Ib: HIS XAIS 38: 1-6, 21-22, 7-8

1 Muaj ib hnub, tus vaj Es Xes Kias tau ib tug mob hnyav, Yaj Saub His Xais uas yog As Mos tub tuaj xyuas nws, His Xais hais rau nws tias : “HUAB TAIS hais li no : Koj tu koj lub tsev kom zoo, vim koj yuav tuag, koj yuav tsis zoo rov los ntxiv lawm.” 2 Ces Es Xes Kias tig hlo rau tim phab ntsa, nws thov HUAB TAIS tias : 3 "HUAB TAIS aw, thov koj nco ntsoov tias kuv tau taug kev nyob ntawm koj xub ntiag, kuv npuab koj, tsis ua ntau lub siab, kuv tau ua yam uas koj pom zoo." Es Xes Kias quaj ua kua muag ntws sis.
4 HUAB TAIS lo lus nrov tuaj rau His Xais tias : 5 "Koj mus hais rau Es Xes Kias tias : HUAB TAIS koj txiv Das Vis tus Tswv Ntuj hais li no : Kuv tau hnov koj zaj thov ntuj, kuv tau pom koj cov kua muag lawm. Kuv yuav kho koj kom zoo; peb hnub saum no koj yuav nce mus pem HAB TAIS lub tuam tsev. Kuv yuav ntxiv kaum tsib xyoos rau koj lub hnub nyoog. 6 Kuv yuav npo koj thiab npo lub tsheej no kom dim ntawm tus vaj As Xws txhais tes. Kuv yuav pov hwm lub tsheej no."
21 His Xais thiaj hais tias : "Nej muab ib pob tshuaj txiv ncuav pias los npuab lub qhov txhab, ces nws yuav zoo." 22 Es Xes Kias hais tias : "Yuav muaj lub cim twg ua kom kuv paub tias kuv yuav mus pem HUAB TAIS lub tsev ?"
7 His Xais teb tias : "HUAB TAIS yuav ua lub cim no qhia rau koj paub tias nws yuav ua raws li lo lus nws tau hais: 8 Koj yuav pom, kuv yuav ua kom lub hnub tus duab ntxoov ntxoo nyob ntawm cov theem ntaiv nce mus saum As Kas chav tsev rov thaub qab kaum theem ntaiv uas nws tau nqes los ntxoov.” Ces lub hnub tus duab ntxoov ntxoo ntawm tus ntaiv cia li rov thaub qab kaum theem ntaiv ntawd.

NPN: HIS XAIS 38: 10, 11, 12ABCD, 16

Txais: (17b) Huab Tais, koj tau cawm kuv txoj sia lawm, kuv yuav tsis tuag.

Kuv hais tias: Thaum tav su nrig hauv kuv lub neej, kuv yuav tsum ncaim mus.
Kuv raug mus hla hauv cov qhov rooj hauv ntuj txias teb tsaus,
kuv yuav tsis tau ua kuv lub neej mus ntxiv kom tas.

Txais: (17b) Huab Tais, koj tau cawm kuv txoj sia lawm, kuv yuav tsis tuag.

Kuv hais tias: Kuv yuav tsis pom HUAB TAIS ntxiv
nyob hauv cov neeg ciaj lub teb chaws lawm.
Kuv yuav tsis pom kuv cov phooj ywg
nyob hauv cov neeg uas nyob ntiaj teb no ntxiv.

Txais: (17b) Huab Tais, koj tau cawm kuv txoj sia lawm, kuv yuav tsis tuag.

Kuv lub tsev raug muab rhuav coj mus tso deb ntawm kuv
Zoo xws li cov yug yaj lub tsev tsam phooj lawm.
Xws li tus ntos ntaub, kuv muab kuv txoj sia kauv ua ib thooj;
Ces nws muab kuv cov tw xov txiav tawm ntawm lub ntos mus.

Txais: (17b) Huab Tais, koj tau cawm kuv txoj sia lawm, kuv yuav tsis tuag.

Cov uas Huab Tais txuag, lawv muaj txoj sia nyob.
Koj yog kuv tus ntsuj plig txoj sia;
Koj tau muab kev noj qab nyob zoo thiab txoj sia rau kuv.

Txais: (17b) Huab Tais, koj tau cawm kuv txoj sia lawm, kuv yuav tsis tuag.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab,
Kuv paub kuv cov yaj, kuv cov yaj raws li nraim kuv qab.

Txais: As les lus yas, as les lus yas.

Ntawv Moo Zoo: MT 12: 1-8

1 Muaj ib hnub Xas Npas Tos, Yes Xus hla ib co teb npleg. Cov thwj tim tshaib plab, ces lawv pib de tej hnab nplej los noj. 2 Cov Fas Lis Xais pom li ntawd, lawv hais rau Yes Xus tias : "Saib, koj cov thwj tim ua tej yam txwv tsis pub ua hnub Xas Npas Tos !"
3 Tab sis, Yes Xus hais rau lawv tias : "Nej tsis tau nyeem qhov uas Das Vis ua thaum Das Vis thiab nws cov neeg tshaib plab, 4 tias nws tau chaws mus hauv Tswv Ntuj lub tsev li cas, thiab nws thiab nws cov neeg tau noj cov ncuav mov txi Ntuj, uas kev cai lawv noj tsis tau, kawg yog cov leej choj xwb thiaj noj tau lod? 5 Los nej puas tau nyeem hauv Txoj Cai tias, hnub Xas Npas Tos, cov leej choj ua hauj lwm nyob hauv lub Tuam Tsev Teev Ntuj, lawv tsis caiv raws txoj cai l0s lawv tsis txhaum no?
6 Kuv qhia meej rau nej tias, nyob ntawm no muaj ib tug loj dua lub Tuam Tsev Teev Ntuj. 7 Yog nej to taub lo Lus hais tias : ‘Qhov kuv xav yuav, yog txoj kev khuv leej, tsis yog thaj txi Ntuj,’ mas nej yuav tsis muab txim rau cov neeg tsis txhaum no. 8 Vim tias, Neeg Leej Tub yog tus tswv ntawm hnub Xas Npas Tos."

TIM 18 LUB 7 HLI 2020

Hnub Xya Lis Piam Kaum tsin Nruab Xyoo A Nruab Lis Piam Xyoo II

Hwm LN Camillus de Lellis

Zaj NYeem Ib: MIS KES 2: 1-5

1 Hmoov phem yuav poob rau cov neeg nrhiav kev ua phem thiab npaj tswv yim tias yuav ua li cas thaum lawv tseem pw saum txaj. Ntuj nyuam qhuav kaj, lawv twb mus ua qhov lawv npaj lawm, vim lawv txhais tes muaj peev xwm ua tau. 2 Yog lawv ntshaw luag tej liaj teb mas lawv cia li mus txeeb, yog lawv ntshaw luag tej vaj tse mas lawv cia li mus huab yuav; lawv mus ntes tus tswv tsev nrog nws lub tsev, ntes tus neeg nrog nws tej cuab yeej cuab tam tib si. 3 Vim li ntawd HUAB TAIS thiaj hais li no : "Kuv npaj tso kev txom nyem los raug tsev neeg no, yog ib txog kev txom nyem uas nej yuav tsis tau kev thau nej lub caj dab kom dim; thiab nej yuav tsis muaj cuab kav taug kev tsa nej lub taub hau kom siab, vim yog lub caij raug txom nyem lawm.
4 Hnub ntawd, luag yuav hais tej zaj lus paj huam thuam nej, yuav muaj tej zaj nkauj seev tu siab tias : “Peb raug luag lwg peb tas mus lawm du lug. Huab Tais muab peb haiv neeg lub cuab tam faib, nws muab thau ntawm kuv mus lawm; peb haiv neeg cov liaj teb raug muab faib tas rau tus tuaj ua phem rau peb lawm.” 5 Li ntawd nej yuav tsis muaj leej twg mus ntsuas ib qho av rau nej nyob hauv HUAB TAIS lub koom txoos lawm.

NPN 10: 1-2, 3-4, 7-8, 14

Txais: (12b) Huab Tais, thov koj tsis txhob hnov qab cov neeg pluag.

HUAB TAIS, ua cas koj nyob nrug deb ua luaj?
Lub caij peb ntsib kev txhawj xeeb, ua cas koj tsiv nraim, ?
Tus tsis hwm ntuj lub siab muab hlob tsim tus neeg txom nyem;
tus txom nyem mag rooj ntxiab uas tus siab phem cuab tos.

Txais: (12b) Huab Tais, thov koj tsis txhob hnov qab cov neeg pluag.

Tus tsis hwm Ntuj rov qhuas nws txog nws tej kev ntshaw.
Tus siab hlob thuam thiab tsis saib Huab Tais rau nqes.
Tus tsis hwm Ntuj khav tias: “Huab Tais yuav tsis ua pauj li.”
Vim nws xav tias: “Yeej tsis muaj Tswv Ntuj kiag!"

Txais: (12b) Huab Tais, thov koj tsis txhob hnov qab cov neeg pluag.

Nws lub ncauj puv tej lus foom phem, lus dag, lus cuav.
Nws tus nplaig tsuas hais kev lim hiam, kev ua phem.
Nws nyas nraim nkoos ntawm tej ntug zos;
nws nyiag ua tub sab muab tus tsis txhaum tua;
nws qhov muag soj ntshis tus txom nyem.

Txais: (12b) Huab Tais, thov koj tsis txhob hnov qab cov neeg pluag.

Huab Tais, koj yeej pom tej kev txom nyem kev tu siab,
Koj txhais tes tuav tas txhia yam ntawd.
Tus txom nyem tso siab rau koj,
Tus ntsuag nos vam koj pab nws.

Txais: (12b) Huab Tais, thov koj tsis txhob hnov qab cov neeg pluag.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib haum xeeb nyob hauv Leej Pleev
Thiab nws muab txoj kev tshaj lub moo zoo txog kev sib haum xeeb cob rau peb.

Txais: As les lus yas, as les lus yas.


Ntawv Moo Zoo: MT 12: 14-21

14 Cov Fas Lis Xais tawm mus sab laj nrhiav saib yuav muab Yes Xus tua zoo li cas.
15 Yes Xus paub li ntawd, ces nws tawm ntawm qhov chaw ntawd mus. Muaj neeg coob raws nws, Yes Xus kho lawv sawv daws zoo tas. 16 Nws txwv tsis pub lawv qhia nws rau neeg paub, 17 ces thiaj muaj raws li Yaj Saub His Xais tau hais tseg tias :
18 “Nej ntsia, kuv tus Tub Txib uas kuv xaiv, nws yog tus kuv nyiam, kuv tus plig zoo siab nyob hauv nws. Kuv yuav tso kuv lub Tswv Yim rau saum nws. Nws yuav tshaj Txoj Kev Ncaj rau tsoom kuj cuab. 19 Nws yuav tsis cav, tsis nthe nrov, tsis muaj leej twg hnov nws lub suab tom tej tshav puam. 20 Tus tauj qaug, nws tsis muab lov, tus teeb xeeb tseem ncho pa liab pliv, nws tsis muab tua. Nws yuav ua li ntawd mus txog hnub nws coj Txoj Kev Ncaj mus txais kev yeej lawm. 21 Ces tsoom neeg teev pej kum dab yuav tso siab lug rau nws lub npe.”

TIM     20     LUB     7     HLI     2020

Hnub Ob Lis Piam Kaum Rau Nruab Xyoo A Nruab Lis Piam Xyoo II

Hwm LN Apollinaris, Tswv Qhia Tuag ua Tim Khawv

Zaj Nyeem Ib:  MIS KES 6:  1-4, 6-8

1 Nej mloog saib HUAB TAIS hais dab tsi:
“Nej cia li sawv, nej tuaj hais nej cov lus rau ntawm cov toj roob siab, kom cov toj roob qis hnov nej lub suab. 2 Cov toj roob, nej mloog HUAB TAIS cov lus tsis zoo siab, ntiaj teb cov taw ntsa uas ruaj khov, nej cuab pob ntseg mloog ! Vim HUAB TAIS muaj lus tsis zoo siab rau nws haiv neeg, nws yuav nrog His Xas Lais sib hais.
3 Kuv haiv neeg, kuv tau ua dab tsi rau nej ? Kuv tau ua dab tsi kom nej ceeb laj? Nej teb kuv mas ! 4 Kuv tau coj nej tawm hauv Hais Nkws Tos teb los, kuv tau txhiv nej kom dim ntawm lub tsev nej ua qhev los. Kuv tau xa Mais Xes, As Loos thiab Mis Lias tuaj pab nej.”
6 –“Kuv yuav nqa dab tsi mus cev rau HUAB TAIS, tus Tswv Ntuj nyob siab, thaum kuv mus pe hawm nws ? Kuv puas yuav coj ib co txim mus hlawv, coj ib co thav nyuj muaj ib xyoos mus txi rau nws? 7 Tab yog kuv txi ntau txhiab tus laug yaj los hliv roj ntws cuag li kaum txhiab tus dej ntws nws puas yuav zoo siab ? Kuv puas yuav tsum muab kuv tus tub hlob los them kuv lub txim, kuv puas yuav tsum muab tus tawm ntawm kuv cev nqaij los mus them kuv tus ntsuj plig qhov txhaum ?”
8 -“Leej tib neeg, Ntuj twb qhia qhov zoo rau koj paub lawm thiab qhia qhov uas HUAB TAIS xav kom koj ua lawm: tsuas kom yuav tsum ua raws txoj kev ncaj, thiab yuav tsum nyiam txoj kev ua siab zoo rau luag, thiab muaj lub siab ua neeg me nrog koj tus Tswv Ntuj taug kev xwb.”

NPN  50:  5-6, 8-9, 16BC-17, 21+23

Txais: (23b) Kuv yuav ua kom tus neeg ncaj paub Tswv Ntuj txoj kev cawm neeg.

"Nej hu cov ntseeg kuv tuaj sib sau nyob ntawm kuv xub ntiag,
cov uas tau ua thaj txi ntuj nrog kuv cog lus.”
Lub ntuj tshaj txog Tswv Ntuj txoj kev ncaj,
vim Tswv Ntuj yog tus txiav txim.

Txais: (23b) Kuv yuav ua kom tus neeg ncaj paub Tswv Ntuj txoj kev cawm neeg.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis tau muab ib tug heev nyuj tawm hauv koj tsev los,
los ib tug laug tshis tawm hauv koj pab tsiaj los.

Txais: Kuv yuav ua kom tus neeg ncaj paub Tswv Ntuj txoj kev cawm neeg.

Tim li cas nej thiaj qog kuv cov kev cai lij choj,
thiab nej hais kuv cov lus kuv tau nrog nej cog ntawm di ncauj,
tiam sis nej ntxub txoj kev coj kom zoo,
thiab muab kuv tej lus fiav sis rau tom nej nrob qaum xwb?

Txais: Kuv yuav ua kom tus neeg ncaj paub Tswv Ntuj txoj kev cawm neeg.

Thaum nej ua tej yam zoo li no, kuv puas yuav tsum nyob ntsiag to?
Nej puas xav tias kuv zoo li nej thiab xwb?
Kuv yuav qhuab ntuas nej, yuav ua kom nej pom meej txog tej ntawd.
Tus twg cav txog kuv los ua cov txim cev rau kuv mas yog nws ua kom kuv nto koob meej.
Tus uas mus taug txoj kev ncaj mas kuv yuav muab Tswv Ntuj txoj kev cawm rau nws pom.

Txais: Kuv yuav ua kom tus neeg ncaj paub Tswv Ntuj txoj kev cawm neeg.

As Les Lus Yas:  NPN 95:  8

Txais: As les lus ays, as les lus yas.

Yog hnub no koj hnov nws lub suab,
tsis txhob ua koj lub siab tawv ncauj.

Txais: As les lus ays, as les lus yas.

Ntawv Moo Zoo:  MT 12:  38-42

38 Ib co kws Ntawv Ntshiab thiab ib co Fas Lis Xais hais rau Yes Xus tias : "Xib Hwb, peb xav kom koj ua ib lub cim rau peb pom." 39 Yes Xus teb rau lawv hais tias : "Tiam neeg phem thiab fav xeeb no taij ib lub cim, tab sis yuav tsis muaj ib lub cim rau lawv, tsuas kawg muaj yaj saub Yos Nas lub cim xwb. 40 Raws nkaus li Yos Nas tau nyob peb hnub peb hmos hauv tus vaj ntses lub plab, Neeg Leej Tub kuj yuav nyob hauv plawv av peb hnub peb hmos thiab.
41 Thaum txog hnub Txiav Txim mas cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim thaum Yos Nas ntuas lawv, lawv hloov siab. Hos nyob ntawm no twb muaj ib tug loj dua Yos Nas !
42 Thaum trxog hnub txiav txim mas tus poj vaj nyob Qab Teb kuj yuav nrog tiam neeg no sawv los thiab, nws yuav muab txim rau lawv, vim nws tuaj puag tim npoo ntiaj teb kawg tuaj mloog Xas Los Moos cov lus thoob tsib. Hos nyob ntawm no, twb muaj ib tug loj dua Xas Los Moos.”