COV ZAJ NYEEM NRUAB LIS PIAM XYOO II, 2015-2016

**Mim** 1st December 2015, 7:49 pm

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°1

COV ZAJ NYEEM NRUAB LIS PIAM XYOO II, 2015-2016

Post Mim 1st December 2015, 7:49 pm

NYOB ZOO XYOO TEEV NTUJ TSHIAB RAU NEJ SAWV DAWS

Nag hmo tim 29 lub 11 hlis, 2015 yog thawj hnub pib peb lub xyoo teev ntuj tshiab. Vim li no peb thiaj nyob rau hauv xyoo teev ntuj tshiab lawm. Lub xyoo tshiab no yog Xyoo C, hais txog Hnub Chiv, tiam sis yog Xyoo II, hais txog nruab lis piam. Thawj hnub hauv xyoo teev ntuj tshiab yeej niaj xyoo yog Thawj Hnub Chiv hauv Caij Tos Huab Tais.

TIM 30 LUB 11 HLIS 2015

Hnub Ob Thawj Lis Piam Caij Tos Huab Tais

Hnub Hwm tus Hauv Paus Xa Lus Leej Ntshiab As Nres, tuag ua Tim Khawv

Zaj Nyeem Ib: LOS MAS 10: 9-18

9 Yog koj di ncauj lees tias Yes Xus yog Huab Tais, thiab koj lub siab ntseeg tias Tswv Ntuj tau tsa Yes Xus tuag sawv rov los, mas koj yuav txais kev cawm neeg. 10 Vim lub siab uas ntseeg tiag tau kev ncaj ua nws tug, lub ncauj uas lees ntseeg tau txais kev cawm. Muaj ntawv sau cia tias : ‘Tus ntseeg txog nws, yuav tsis poob ntsej muag.’ 12 Li ntawd, txhob hais tias cov Yus Das thiab cov Hes Las sib txawv, sawv daws muaj ib tug Huab Tais xwb, yog tus Huab Tais pub paj tshab ntau rau cov neeg hu txog nws. 13 Vim Ntawv yeej sau cia tias : ‘Leej twg hu txog Huab Tais lub npe, nws yuav ntsib kev cawm neeg.’ 14 Cov uas tsis tau ntseeg txog Huab Tais, mas lawv yuav ua cas hu txog nws ? Cov tsis tau hnov Huab Tais lo lus, mas lawv yuav ua cas ntseeg ? Yog tsis muaj neeg tshaj Ntuj lus, luag yuav ua li cas hnov tau Ntuj lo lus ? 15 Yog tsis muaj tus xa yus mus tshaj Ntuj lus mas yus yuav ua li cas tshaj ? Ntawv sau cia tias : ‘Cov neeg xa moo zoo, mas lawv ko taw zoo nkauj.’ 16 Tab sis tsis yog sawv daws tau mloog lub moo zoo. Vim His Xais hais tias : ‘Huab Tais, leej twg mloog cov lus peb tshaj ?’ 17 Li ntawd, kev ntseeg yug ntawm kev tshaj Ntuj lus los. Kev tshaj Ntuj lus yog kev tshaj Leej Pleev lo lus. 18 Ces kuv nug tias : ‘Tej zaus, cov His Xas Lais tsis tau hnov Ntuj Lo Lus ? Tab sis Ntawv hais tias : ‘Cov tub tshaj Ntuj lus lub suab ntxhe mus thoob ntiaj teb. Lawv cov lus nrov mus txog tim npoo ntuj.’

Nkauj Paj Nruag 19: 8, 9, 10, 11

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los:
Txais: (Zam 6:63) Koj cov lus, Huab Tais, yog ntsuj plig thiab yog txoj sia.

HUAB TAIS txoj cai zoo tas nrho,
nws ntxiv siav rau ntsuj plig;
HUAB TAIS tus txhooj yog qhov tseeb,
nws ua kom tus neeg ruam thoob tsib tuaj.

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los:
Txais: (Zam 6:63) Koj cov lus, Huab Tais, yog ntsuj plig thiab yog txoj sia.

HUAB TAIS cov lus qhuab qhia yog lus ncaj
ua kom neeg lub siab kaj.
HUAB TAIS lo lus qhia ntshiab si,
ua kom neeg pom kev.

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los:
Txais: (Zam 6:63) Koj cov lus, Huab Tais, yog ntsuj plig thiab yog txoj sia.

Kev hwm HUAB TAIS yog kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
yog lus ncaj ncees.

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los:
Txais: (Zam 6:63) Koj cov lus, Huab Tais, yog ntsuj plig thiab yog txoj sia.

HUAB TAIS cov lus tsim nyog ntshaw dua kub,
los ib txhab tseem kub,
qab dua zib ntab,
los zib nas muv.

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los:
Txais: (Zam 6:63) Koj cov lus, Huab Tais, yog ntsuj plig thiab yog txoj sia.

As Les Lus Yas MT 4: 19

Txais: As les lus yas, as les lus yas.

Huab Tais hais tias: Nej raws kuv mus,
Kuv yuav tsa nej ua cov tub puav neeg.

Txais: As les lus yas, as les lus yas.

Ntawv Moo Zoo: MT 4: 18-22

18 Yes Xus mus ko taw taug ntug dej ntuj Nkas Lis Lais, nws pom ob kwv tij : Xis Moos uas hu ua Pob Zeb, thiab nws tus kwv As Nres. Nkawd tseem tab tom pov vas ntses rau hauv dej ntuj, vim nkawd yog tub puav ntses. 19 Yes Xus hais rau nkawd tias : "Neb raws kuv mus, kuv yuav tsa neb ua tub puav neeg." 20 Nkawd tso plhuav cov vas ntses tam sis ntawd, nkawd raws Yes Xus mus. 21 Yes Xus mus ntxiv, nws ho pom ob kwv tij ntxiv : Yas Kos, uas yog Ntxes Npes Dais tus tub, thiab Zam uas yog Yas Kos tus kwv, nkawd nrog nkawd txiv Ntxes Npes Dais nyob hauv nkoj, lawv tseem tab tom ntxiv lawv cov vas ntses. Yes Xus hu nkawd. 22 Tam sis ntawd, nkawd tso plhuav lub nkoj thiab nkawd txiv tseg, nkawd raws Yes Xus mus.

Last edited by Mim on 2nd December 2015, 6:34 am; edited 1 time in total

**Mim** 1st December 2015, 7:51 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°2

COV ZAJ NYEEM NRUAB LIS PIAM XYOO ii 2015-2016

Post Mim 1st December 2015, 7:51 pm

TIM 1 LUB 12 HLIS 2015

Hnub Peb Thawj Lis Piam Caij Tos Huab Tais Xyoo II

Zaj Nyeem Ib: HIS XAIS 11: 1-10

1 Ib tug ceg yuav hlav ntawm Yes Xes lub hauv paus los, ib tug ntsuag yuav hlav ntawm Yes Xes cov cag los. 2 HUAB TAIS lub tswv yim yuav nyob txawm saum nws. Yog ib lub tswv yim thoob tsib thiab ntse, ib lub tswv yim pab xav tom ntej tom qab thiab pab ua siab loj, ib lub tswv yim paub txuj thiab hwm HUAB TAIS. 3 Nws txoj kev zoo siab yog kev hwm HUAB TAIS. Nws yuav tsis txiav txim raws li qhov muag pom sab nraud, nws yuav tsis xaiv kev taug raws li hnov lus moo cua hais. 4 Nws yuav txiav txim ncaj rau cov tsis muaj zog, nws yuav muab kev ncaj ncees rau cov neeg hauv txheej qis nyob hauv lub teb chaws, nws lub ncauj yuav ua rab pas nplawm cov neeg siab ceev, nws di ncauj yuav tshuab pa tua cov lim hiam. 5 Kev ncaj yuav yog nws txoj siv sia duav, kev hais qhov muaj tseeb yuav yog nws txoj siv sia ntawm ntsag. 6 Tus hma yuav nrog tus thav yaj nyob, tus tsov pom txwv yuav nrog tus thav tshis pw ua ke. Tus xyuas nyuj thiab tus tsov ntxhuav yuav ua ke nog zaub, ib tug me nyuam tub yuav coj nkawd. 7 Tus maum nyuj thiab tus maum dais yuav nyob sib ze, nkawd cov me nyuam yuav pw ua ke; tus tsov ntxhuav yuav noj quav nplej xws li tus nyuj. 8 Tus me nyuam mos yuav ua si nyob ze ntawm tus nab liab tsaig lub chaw, tus me nyuam me yuav cev tes mus rau hauv nab ntsuab lub qhov. 9, Yuav tsis ua phem tsis ua nkhaus nyob saum kuv lub roob ntshiab, vim kev paub HUAB TAIS yuav nyob puv ntiaj teb, ib yam li dej puv lub hiav txwv. 10 Hnub ntawd, Yes Xes tus cag yuav sawv ua ib lub cim rau cov haiv neeg, cov coj dab qhuas yuav nrhiav nws; nws lub tsev yuav muaj hwj chim nto moo lug.

Nkauj Paj Nruag 72: 1-2, 7-8, 12-13, 17

Txais: (7) Lub caij nws ua vaj, txoj kev ncaj yuav tawg paj, yuav muaj kev thaj yeeb thoob ntuj.

Tswv Ntuj, muab koj txoj kev txawj txiav txim rau tus vaj,
pub koj txoj kev ncaj rau vaj ntxwv leej tub.
Nws thiaj yuav tswj koj haiv neeg raws kev ncaj,
koj cov me neeg txom nyem raws kev haum pheej.

Txais: (7) Lub caij nws ua vaj, txoj kev ncaj yuav tawg paj, yuav muaj kev thaj yeeb thoob ntuj.

Lub caij nws ua vaj, txoj kev ncaj yuav tawg paj,
yuav muaj kev thaj yeeb mus txog thaum tsis muaj hli xiab hli nqig ntxiv.
Nws yuav ua vaj kav ib lub hiav txwv dhau ib lub hiav txwv,
Thiab Kav txij tus Niam Dej mus txog tim npoo ntiaj teb.

Txais: (7) Lub caij nws ua vaj, txoj kev ncaj yuav tawg paj, yuav muaj kev thaj yeeb thoob plaws.

Nws yuav npo tus pluag uas hu txog nws,
Yuav npo tus txom nyem uas tsis muaj chaw khaub zig.
Nws yuav hlub tus neeg me thiab tus pluag,
nws yuav cawm tus pluag txoj sia :

Txais: (7) Lub caij nws ua vaj, txoj kev ncaj yuav tawg paj, yuav muaj kev thaj yeeb thoob plaws.

Thov kom nws lub npe nto koob meej mus li.
Kom nws lub npe ncha mus txog thaum tsis muaj lub hnub.
Ib tsoom haiv neeg yuav muaj hmoov zoo vim nws lub npe.
Ib tsoom kuj cuab yuav tshaj tias nws txoj hmoov zoo.

Txais: (7) Lub caij nws ua vaj, txoj kev ncaj yuav tawg paj, yuav muaj kev thaj yeeb thoob plaws.

As Les Lus Yas

Txais: As les lus yas, as les lus yas.

Ntsia saib, peb tus Huab Tais yuav tuaj muaj hwj huam ntxiag,
Nws yuav ua kom nws cov tub txib qhov muag pom kev tuaj.

Txais: As les lus yas, as les lus yas.

Ntawv Moo Zoo LK 10: 21-24

21 Lub sij hawm ntawd, Yes Xus zoo siab tas nrho nyob hauv Leej Ntuj Plig Ntshiab, nws hais tias : "Txiv, kuv cav lus zoo txog koj, Huab Tais kav ntuj kav teb, koj tau zais qhov ntawd rau cov neeg thoob tsib thiab cov neeg ntse, koj qhib rau cov neeg me, Txiv, vim koj nyiam ua li ntawd. 22 Kuv Txiv muab tas ib puas tsav yam rau kuv. Tsis muaj leej twg paub tias Leej Tub yog tus twg, kawg yog Leej Txiv thiaj paub. Tsis muaj leej twg paub tias Leej Txiv yog tus twg, kawg yog Leej Tub thiaj paub, thiab yog tus uas Leej Tub xav qhia rau kom paub." 23 Yes Xus tig los rau nws cov thwj tim, thaum lawv nyob rau ib cag, nws hais rau lawv tias : "Ob lub qhov muag uas pom tej yam nej pom no tau txoj hmoov zoo ! 24 Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis tsis tau hnov."

**Mim** 2nd December 2015, 4:51 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°3

Re: COV ZAJ NYEEM NRUAB LIS PIAM XYOO II, 2015-2016

Post Mim 2nd December 2015, 4:51 am

TIM 2 LUB 12 HLIS 2015

Hnub Plaub Thawj Lis Piam Caij Tos Huab Tais Xyoo II

Zaj Nyeem Ib: HIS XAIS 25: 6-10A

6 Nyob saum lub roob no, tsoom tub rog tus HUAB TAIS yuav ua ib rooj nqaij ib rooj hno rau tas cov haiv neeg huv tib si, yog ib rooj qav muaj txhiam laj txhiam xws zoo, muaj cawv qab, yam muaj kua yam muaj roj, yam cawv qab. 7 Nyob saum lub roob no, nws yuav rhuav daim ntaub vov tas tsoom haiv neeg tib si, thiab lub vas uas qhwv tas tsoom kuj cuab. 8 Nws yuav rhuav txoj kev tuag mus ib txhiab ib txhis. HUAB TAIS Tswv Ntuj yuav so cov kua muag ntws saum sawv daws lub ntsej muag, nws yuav tshem nws haiv neeg chaw txaj muag nyob thoob ntiaj teb, vim HUAB TAIS tau hais li ntawd. 9 Hnub ntawd yuav muaj lus hais tias : "Nej ntsia peb tus Tswv Ntuj uas peb vam tias nws yuav cawm peb, yog tus HUAB TAIS uas peb tos. Peb kav tsij hom khaj thiab zoo siab tias nws tau cawm peb! 10 Vim HUAB TAIS yuav tso nws txhais tes rau saum lub roob no.

Nkauj Paj Nruag 23: 1-3A, 3B-4, 5, 6

Txais: (6cd) Kuv yuav nyob hauv Huab Tais tsev txhua hnub hauv kuv lub neej.

HUAB TAIS yog kuv tus tswv zov yaj, kuv tsis tshaib tsis nqhis.
Nws cia kuv so nyob hauv tej tshav zaub ntsuab xiab;
nws coj kuv mus nyob zentawm cov dej tus yees.
Nws rov ntxiv siav rau kuv tus plig.

Txais: (6cd) Kuv yuav nyob hauv Huab Tais tsev txhua hnub hauv kuv lub neej.

Nws coj kuv mus taug txoj kev ncaj,
vim nws lub npe.
Tab yog kuv taug kev hauv lub kwj ha tsaus nti,
kuv tsis ntshai dab tsi phem, vim koj nyob ntawm kuv ib sab,
koj rab qws, thiab koj rab pas nrig
yog kuv chaw tso siab.

Txais: (6cd) Kuv yuav nyob hauv Huab Tais tsev txhua hnub hauv kuv lub neej.

Koj npaj ib roog qav rau ntawm kuv xub ntiag,
rau cov neeg ntxub kuv ntsia,
koj muab roj tsw qab pleev kuv taub hau.
Kuv lub khob puv cawv phwj yaws.

Txais: (6cd) Kuv yuav nyob hauv Huab Tais tsev txhua hnub hauv kuv lub neej.

Kev ua zoo thiab kev hlub nrog nraim kuv
txhua hnub hauv kuv lub neej.
Kuv yuav nyob hauv HUAB TAIS tsev
Ntev niaj ntau xyoo ntxiv.

Txais: (6cd) Kuv yuav nyob hauv Huab Tais tsev txhua hnub hauv kuv lub neej.

As Les Lus Yas

Txais: As les lus yas, as les lus yas.

Ntsia saib, Huab Tais tuaj cawm nws haiv neeg;
cov uas npja rawv tos yuav ntsib nws lawv txoj hmoov zoo.

Txais: As les lus yas, as les lus yas.

Ntawv Moo Zoo MT 15: 29-37

29 Yes Xus mus dhau qhov chaw ntawd lawm, nws tuaj txog ntawm ntug dej ntuj Nkas Lis Lais. Nws nce mus saum roob, nws zaum. 30 Tej pab neeg coob tuaj cuag nws, lawv coj tej tus ceg tawv, tej tus tuag ceg, tej tus dig muag, tej tus nplaig txhav, thiab tseem coj lwm cov mob tuaj tso ntawm Yes Xus ko taw, Yes Xus kho sawv daws zoo tas huv tib si. 31 Ib zeej tsoom sawv daws qhuas kawg, vim lawv pom cov nplaig txhav hais tau lus, cov tuag ceg rov muaj zog, cov deeg pauv rov mus taus kev, hos cov dig muag rov pom kev tuaj. Ces lawv cav txog His Xas Lais tus Tswv Ntuj lub koob meej. 32 Yes Xus hu cov thwj tim los cuag nws, nws hais rau lawv tias : “Kuv hlub pab neeg no, vim lawv twb nrog kuv nyob tau peb hnub lawm, lawv tsis muaj dab tsi noj. Kuv tsis xav cia lawv tshaib plab rov mus tsev. Tsam lawv tsaus muag tom kev." 33 Cov thwj tim hais rau nws tias : "Peb yuav nrhiav mov qhov twg hauv lub teb chaws quav poj no kom txaus ib pab neeg coob npaum no noj ?" 34 Yes Xus hais rau lawv tias : Nej muaj pes tsawg lub ncuav mov ? Lawv teb tias : Muaj xya lub thiab ob peb tug me nyuam ntses. 35 Yes Xus kom tsoom sid zaum pem teb. 36 Nws tuav xya lub ncuav mov thiab cov ntses, nws ua Ntuj tsaug. Nws muab cov ncuav mov ntais, nws cev rau cov thwj tim, ces cov thwj tim coj mus faib rau tsoom sid. 37 Thaum sawv daws noj tsau tas, lawv khaws tej sab mov seem puv xya tawb !

**Mim** 2nd December 2015, 6:32 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°4

Re: COV ZAJ NYEEM NRUAB LIS PIAM XYOO II, 2015-2016

Post Mim 2nd December 2015, 6:32 am

TIM 3 LUB 12 HLIS 2015

Hnub Tsib Lis Piam Ib Caij Tos Huab Tais Xyoo II

Hwm Leej Ntshiab Francis Xavier, ua Leej Choj

Zaj Nyeem Ib: HIS XAIS 26: 1-6

1 Hnub ntawd, nyob Yus Das teb lawv yuav hu zaj nkauj no : "Peb muaj ib lub tsheej ruaj khov, Huab Tais tsa ntsa zeb ntsa tsua thiab tsa phab ntsa siab thaiv peb. 2 Nej qhib cov rooj loog mas ! Cia lub kuj cuab siab ncaj thiab muaj kev ntseeg chaws los rau hauv. 3 Nws muaj lub hom phiaj khov, koj cia nws nyob thaj yeeb, nyob thaj yeeb vim nws tso siab rau koj. 4 Nej tso siab rau HUAB TAIS mus ib txhiab ib txhis ! Vim HUAB TAIS yog lub tsua nyob tiam dhau tiam. 5 Nws txo kom cov nyob chaw siab poob rau qhov qis, nws txo kom lub tsheej nyob saum qhov siab poob rau qhov qis, nws txo kom poob ti hauv pem teb, kom yaj ua plua tshauv. 6 Kom cov neeg me thiab neeg pluag tsuj ntiag rau hauv ko taw."

Nkauj Paj Nruag 118: 1 + 8-9, 19-21, 25-27A

Txais: (26a) Tus tuaj ntawm Huab Tais lub npe tuaj nws nto koob meej.

Nej cav lus zoo txog HUAB TAIS, vim nws siab zoo,
nws hlub peb tas ib txhiab ib txhis.
Khiav los nkaum hauv HUAB TAIS, zoo dua tso siab rau neeg !
Khiav los nkaum hauv HUAB TAIS, zoo dua tso siab rau cov muaj peev xwm.

Txais: (26a) Tus tuaj ntawm Huab Tais lub npe tuaj nws nto koob meej.

Nej qhib cov rooj vag mus hauv txoj kev nca rau kuv,
kuv yuav chaws mus, kuv yuav ua HUAB TAIS tsaug.
Ntawm no yog HUAB TAIS lub rooj vag;
cov neeg ncaj yuav nkag nov mus.
Kuv yuav ua koj tsaug, vim koj tau teb kuv, koj yog tus cawm kuv.

Txais: (26a) Tus tuaj ntawm Huab Tais lub npe tuaj nws nto koob meej.

HUAB TAIS, thov pub kev cawm rau peb!
HUAB TAIS, thov pub kev yeej rau peb!
Tus tuaj ntawm HUAB TAIS lub npe tuaj, nws nto koob meej.
Peb nyob hauv HUAB TAIS tsev foom koob hmoov rau nej.
HUAB TAIS yog Tswv Ntuj, nws pub qhov pom kev rau peb..

Txais: (26a) Tus tuaj ntawm Huab Tais lub npe tuaj nws nto koob meej.

As Les Lus Yas HIS XAIS 55: 6

Txais: As les lus yas, as les lus yas

Nrhiav HUAB TAIS thaum nej tseem nrhiav tau nws;
hu nws thaum nws tseem nyob ze.

Txais: As les lus yas, as les lus yas

Ntawv Moo Zoo: MT 7: 21, 24-27

21 “Tsis yog cov hu kuv tias : "Huab Tais, Huab Tais," thiaj yuav tau mus hauv Ntuj lub Ceeb Tsheej. Tiam sis yog cov ua raws li kuv Txiv nyob saum ntuj lub siab nyiam. 24 Leej twg mloog cov lus uas kuv nyuam qhuav hais, thiab ua raws li cov lus no, mas tus neeg ntawd piv tau rau ib tug neeg xyuam xim uas nws txhim tsev rau saum tsua. 25 Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog rau saum tsua. 26 Hos leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam txhim tsev rau saum av xuab zeb. 27 Thaum los nag hlob, dej sab siv huam, cua tshuab ntsawj lub tsev, ces lub tsev vau. Nws raug xwv txheej loj.”

**Mim** 4th December 2015, 5:38 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°5

Re: COV ZAJ NYEEM NRUAB LIS PIAM XYOO II, 2015-2016

Post Mim 4th December 2015, 5:38 pm

TIM 4 LUB 12 HLIS 2015

Thawj Hnub Rau Hauv lub Hlis: Hwm Yes Xus lub Plawv (Siab) Ntshiab

Thawj Lis Piam Caij Tos Huab Tais Xyoo II

Zaj Nyeem Ib: HIS XAIS 29: 17-24

17 Puas muaj tseeb tias tshuav tsis ntev ntxiv, ces teb chaws Lis Npaas yuav rov hloov ua ib lub vaj txiv ntoo zoo heev, zoo cuag li yog ib lub hav zoov nuj txeeg? 18 Hnub ntawd, cov neeg lag ntseg yuav hnov cov lus nyob hauv phau ntawv, cov dig muag qhov muag yuav pom kev, yuav dim ntawm qhov tsaus ntuj dub nciab. 19 Cov neeg me yuav zoo siab loj nyob hauv HUAB TAIS, cov pluag tshaj tej yuav dhia zoo siab nyob hauv His Xas Lais tus Ntshiab. 20 Tus neeg siab phem yuav tsis muaj ntxiv, tus thuam luag yuav ploj ntais, cov neeg nyas ntshis ua kev phem yuav raug tshem tawm tas: 21 Yog cov neeg uas hais lus kom luag raug txim, cov neeg cuab ntxiab rau tus txiav txim nyob ntawm lub rooj loog, thiab nrhiav kev ua kom tus siab ncaj txhob tau kev txiav txim ncaj ncees. 22 Vim li ntawd, HUAB TAIS, Yas Kos tsev neeg tus Tswv Ntuj, tus cawm Has Nplas Has dim nws hais li no : Txij no mus, Yas Kos yuav tsis raug kev txaj muag ntxiv, yuav tsis ua ntsej muag puas nyas ntxiv. 23 Vim thaum nws pom nws cov me nyuam, uas yog kuv ob txhais tes tsim, nyob hauv nws tsev, nws yuav cav txog kuv lub npe ntshiab. Nws yuav tshaj tias Yas Kos tus Ntshiab yeej Ntshiab tiag. Nws yuav hwm His Xas Lais tus Tswv Ntuj . 24 Cov neeg tswv yim yuam kev yuav rov muaj kev to taub. Cov neeg yws taus yuav mloog lus qhuab qhia.

NPN 27:1, 4, 13-14

Txais: Huab Tais yog kuv qhov pom kev thiab kuv txoj kev cawm.

Huab Tais yog kuv qhov pom kev thiab kuv txoj kev cawm;
Kuv yuav ntshau leej twg?
Huab Tais yog kuv qhov chaw nkaum hauv kuv lub neej,
Kuv yuav ntshai leej twg?

txais....

Kuv tsuas thov ib yam ntawm Huab Tais; qhov kuv nrhiav yog:
kom tau nyob hauv Huab Tais lub tsev niaj hnub hauv kuv lub neej;
Kom kuv tau ntsia ntsoov Huab Tais txoj kev zoo thiab tau pom nws lub tuam tsev.

Txais…

Kuv ntseeg hais tias kuv yuav tau pom Huab Tais txoj kev nplua mias nyob hauv cov neeg ciaj sia lub teb chaws.
Ua siab loj tos ntsoov Huab Tias;
ua siab tawv qhawv tos ntsoov Huab Tais.
Txais…

As Les Lus Yas

Txais: As les lus yas, As les lus yas.

Ntsia saib, peb tus Huab Tais yuav tuaj muaj hwj huam ntxiag;
nws yuav ua kom nws cov tub txib qhov muag pom kev

Txais: As les lus, As les lus yas.

Ntawv Moo Zoo: Mas Tais 9: 27-31

27 Thaum Yes Xus tawm ntawm qhov chaw ntawd mus, muaj ob tug neeg dig muag raws nws qab. Nkawd qw qw hais tias : "Das Vis Leej Tub, thov koj khuv leej wb." 28 Thaum Yes Xus los txog hauv tsev, ob tug dig muag los ze Yes Xus, ces Yes Xus hais rau nkawd tias : "Neb puas ntseeg tias kuv ua tau qhov ntawd ?" Nkawd teb tias : “Huab Tais, wb ntseeg.” 29 Ces Yes Xus kov nkawd qhov muag, nws hais tias : "Xav kom muaj tuaj rau neb raws li neb ntseeg." 30 Ces nkawd qhov muag qhib plho. Yes Xus txwv nkawd nruj nruj tias : "Neb ceev faj ! Kom txhob muaj neeg paub txog!" 31 Tab sis, thaum nkawd tawm mus lawm, nkawd tshaj rau ib cheeb tsam ntawd paub tas huv si.

**Mim** 4th December 2015, 5:41 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°6

Re: COV ZAJ NYEEM NRUAB LIS PIAM XYOO II, 2015-2016

Post Mim 4th December 2015, 5:41 pm

Tim 5 lub 12 hlis 2015

Thawj Hnub Xya hauv thawj Lis Piam Tos Huab Tais.

Zaj Nyeem Ib: His Xais 30: 19-21, 23-26

19 Muaj tseeb, Xis Yoos tsoom neeg uas nyob Yes Lus Xas Les, nej yuav tsis quaj ntxiv : vim nws yuav ua zoo rau nej thaum nws hnov nej lub suab quaj. Nws hnov kiag nej hu, ces nws yuav teb ntua tam sid. 20 Huab Tais yuav muab cov mov txhawj xeeb thiab cov dej iab dej daw rau nej, tiam sis tus qhuab qhia nej yuav tsis nyob deb nej ntxiv, nej qhov muag yuav pom tus qhuab qhia nej. 21 Nej pob ntseg yuav hnov ib lo lus ntawm nej nraub qaum tuaj tias : "Ntawm no yog txoj kev, nej taug mus, txawm nej mus sab xis los sab laug kuj tau." 23 Nws yuav pub nag los ywg cov noob qoob nej tseb rau hauv av. Ces cov mov uas tawm hauv av los yuav qab rog thiab zoo yug nej lub cev. Hnub ntawd, nej cov tsiaj yuav nog zaub hauv tej lub tiaj zaub dav. 24 Cov heev nyuj thiab cov luj uas ua txoj hauj lwm laij teb yuav noj cov zaub uas yog xuas duav hlau thiab duav nkaug daus rau noj. 25 Saum tej toj roob ntseg ntsees thiab tej pov roob siab, yuav muaj dej txhawv thiab dej ntws sis lug, yog txog hnub sib tua loj thiab cov vaj loog zeb yuav vau tas. 26 Ces lub hli yuav ci pom kev npaum lub hnub hos lub hnub yuav ci pom kev tshaj xya npaug ntxiv, ib yam li yog xya hnub qhov pom kev ua ib hnub ci, hnub ntawd HUAB TAIS yuav qhwv nws haiv neeg cov qhov txhab thiab yuav kho lawv cov nqaij ntuag uas yog raug luag nplawm.

NPN 147:1-2, 3-4, 5-6

Txais: (His Xais 30:18d) Txhua tus uas tos Huab Tais tau txoj hmoov zoo.

Nej cav txog Huab Tais, vim nws siab zoo
nej hu nkauj cav txog peb tus Tswv Ntuj, vim nws hlub neeg;
tsim nyog peb cav txog nws.
HUAB TAIS rov tsa Yes Lus Xas Les;
nws sau His Xas Lais cov neeg tawg tas rov los ua ke.

Txais…

Nws kho cov neeg mob siab mob ntsws
thiab qhwv lawv tej qhov txhab.
Nws suav cov hnub qub;
nws tis lawv cov npe ib lub zuj zus.

Txais…

Peb tus HUAB TAIS loj thiab muaj hwj huam tas nrho;
nws txoj kev thoob tsib tsis muaj qhov txawj tag.
HUAB TAIS tsa cov neeg me cai;
nws thawb cov siab phem ntog hauv av.
Txais…

As Les Lus Yas (His Xai 33: 22)

Txais: As les lus yas, As les lus yas

HUAB TAIS yog tus txiav txim rau peb, yog tus kav peb, yog peb tus vaj; nws yog tus yuav cawm peb dim.
.
Txais: As les lus yas, As les lus yas

Zaj Ntawv Moo Zoo: Mas Tais 9: 35-10:1, 5A, 6-8

35 Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si. 36 Yes Xus pom tsoom pej xeem, nws hlub lawv, vim lawv sawv daws sab thiab qaug zog zoo li ib co yaj tsis muaj tsw zov. 37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg. 38 Nej thov tus tswv qoob kom nws xa ib co tub zog tuaj sau nws cov qoob."
10 1 Yes Xus hu nws kaum ob leeg thwj tim los cuag nws. Nws muab hwj huam kom lawv ntiab tau dab tawm, thiab kho tau tej txiab xeeb thiab tej mob nkeeg kom thim. 5 Yes Xus xa kaum ob leeg no mus tshaj lub Moo Zoo, nws qhia lawv tias : 6 “Nej xub mus cuag cov yaj ploj hauv haiv His Xas Lais. 7 Thaum nej mus kev, nej ceeb toom tias Ntuj lub Ceeb Tsheej tuaj txog ze lawm.
8 Nej kho cov mob kom zoo, nej tsa cov tuag kom ciaj rov los, nej kho cov mob ruas kom huv, nej ntiab dab kom khiav. Nej tau txais dawb, nej yuav pub dawb.

**Mim** 7th December 2015, 5:59 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°7

Re: COV ZAJ NYEEM NRUAB LIS PIAM XYOO II, 2015-2016

Post Mim 7th December 2015, 5:59 pm

TIM 7 LUB 12 HLIS 2015

Hnub Ob Lis Piam Ob Caij Tos HuabTais Xyoo II

Hwm Leej Ntshiab Ambrose, ua Tswv Qhia

Zaj Nyeem Ib: HIS XAIS 35: 1-10

1 Kom cov teb chaws suab puam thiab tej teb av qhuav yuav tsum dhia zoo siab. Lub teb chaws av phem yuav tsum zoo siab thiab tawg paj. 2 Nws yuav tsum tawg paj ncw nra paug thiab yuav qw zoo siab; nws yuav tau txais Lis Npas lub koob meej thiab roob Kas Mes thiab Sas Los qhov zoo nkauj. Lawv yuav pom HUAB TAIS lub hwj chim, peb tus Tswv Ntuj lub meej mom ci ntsa iab. 3 Nej ua kom cov tuag tes rov muaj zog, kom cov hauv caug ntshaus raws rov khov tuaj. 4 Nej hais rau cov siab me tias : "Nej ua siab loj ! Nej txhob ntshai ! Ntsia saib, nej tus Tswv Ntuj tuaj lawm !" Kev ua pauj tab tom tuaj, yog Tswv Ntuj kev rau txim. Nws yog tus tuaj cawm peb. 5 Ces cov dig muag ob lub qhov muag yuav rua hlo, cov pob ntseg lag yuav qhib plho. 6 Tus neeg ceg tawv yuav dhia nrawm xws tus muas lwj, tus nplaig txhav yuav qw suab zoo siab. Vim ib co dej txhawv tawm hauv cov teb chaws suab puam los, tej tus dej ntws tawm hauv cov teb chaws av phem los. 7 Thaj av qhuav qhawv yuav hloov ua pas dej, lub teb chaws tshaib dej yuav txhawv dej ntws lug tawm los, thaj chaw uas hma nyob yuav hloov ua hav iav muaj tauj deg thiab muaj ncaug ua ntawv. 8 Nyob ntawd, yuav muaj ib txog kev rau lawv taug, ib txog kev loj tis npe hu ua "txoj Kev Ntshiab." Tus neeg tsis huv yuav mus tsis tau txoj kev ntawd; Nws yog tus yuav taug txoj kev ntawd pub rau lawv; cov neeg vwm yuav tsis yuam kev mus taug txoj kev ntawd. 9 Yuav tsis muaj tsov, tsis muaj tsiaj tsiv tsaim, yuav tsis pom ib tug nyob ntawd li, tsuas yog cov uas Ntuj txhiv lawv thiaj tau taug xwb. 10 Vim cov neeg uas HUAB TAIS txhiv yuav rov qab los, lawv yuav chaws mus hauv Xis Yoos thiab nqua suab zoo siab ntag yees, ib txog kev zoo siab mus ib txhiab ib txhis roos lawv taub hau. Kev zoo siab thiab luag ntxhwb ntxhi ua lawv luag, kev iab siab thiab kev ntsaj ploj ntais mus.

Nkauj Paj Nruag 85: 9AB + 10, 11-12, 13-14

Txais: (His Xais 35:4f) Peb tus Tswv Ntuj yog tus yuav tuaj cawm peb! Our God will come to save us!

Kuv mloog saib Tswv Ntuj hais dab tsi.
Huab Tais nws tshaj txog kev thaj yeeb rau nws haiv neeg.
Nws txoj kev cawm los txog ze ze cov hwm nws.
nws lub hwj chim yuav nyob txawm hauv peb lub teb chaws.

Txais: (His Xais 35:4f) Peb tus Tswv Ntuj yog tus yuav tuaj cawm peb!

Kev ua zoo thiab kev tseeb yuav sib ntsib,
kev ncaj thiaj kev thaj Yeeb yuav los sib puag.
Kev Tseeb yuav nthaw kaus tawm hauv ntiaj teb los,
kev Haum Pheej yuav dauv muag saum ntuj los.

Txais: (His Xais 35:4f) Peb tus Tswv Ntuj yog tus yuav tuaj cawm peb!

HUAB TAIS yuav pub kev zoo siab puv npo,
peb cov av yuav ntsu qoob loo.
Kev Haum Pheej yuav mus ua nws ntej,
Kev cawm yog raws txoj kev nws hneev taw rhawv.

Txais: (His Xais 35:4f) Peb tus Tswv Ntuj yog tus yuav tuaj cawm peb!

As Les Lus Yas

Txais: As les lus yas, as les lus yas.

Tus vaj yuav tuaj, yog tus Huab Tais kav ntiaj teb,
nws yuav daws lub nra uas zoj peb.

Txais: As les lus yas, as les lus yas.

Ntawv Moo Zoo: LK 5: 17-26

17 Tseem muaj ib hnub, thaum Yes Xus tab tom qhia sawv daws, muaj ib cov Fas Lis Xais thiab ib co Kws Txoj Cai tuaj ntawm tej lub zos hauv xeev Nkas Lis Lais, xeev Yus Das, thiab tuaj Yes Lus Xas Les tuaj. Lawv sawv daws zaum nyob ntawd. Huab Tais lub hwj huam ua kom Yes Xus kho tau cov neeg mob zoo. 18 Muaj ib pab neeg kwv ib tug tuag ceg saum ib lub txaj tuaj. Lawv nrhiav kev nqa tus tuag ceg mus hauv tsev, coj nws mus tso ntawm Yes Xus xub ntiag. 19 Tab sis lawv tsis tau kev nqa tus tuag ceg mus rau sab hauv, vim neeg coob dhau. Ces lawv nce mus saum ruv tsev, lawv dawj cov thwv cib vov tsev, lawv dauv tus tuag ceg pw hauv nws lub txaj nqes mus hauv nruab nrab, rau ntawm Yes Xus xub ntiag. 20 Yes Xus pom lawv ntseeg, nws hais tias : "Ntawm koj, mas koj cov txhaum daws tas lawm." 21 Cov Kws Ntawv Ntshiab thiab cov Fas Lis Xais xav twj ywm rau nruab siab tias : "Tus neeg ntawd yog leej twg, nws thiaj thuam Ntuj ? Leej twg yuav daws txhaum tau ? Kawg yog Tswv Ntuj tib leeg xwb." 22 Yes Xus twb paub qhov lawv xav hauv nruab siab, nws hais rau lawv tias : "Vim li cas nej thiaj xav tej zaj tswv yim li ntawd hauv nej siab ? 23 Lo lus twg yog lo hais yooj yim dua, lo lus tias : 'Kuv daws koj cov txhaum,' los yog lo lus tias : 'Koj sawv, koj mus kev ?' 24 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb. Ces Yes Xus hais rau tus tuag ceg tias : 'Kuv hais rau koj : koj sawv, koj nqa koj lub txaj, koj rov mus tsev." 25 Tam sis ntawd, tus tuag ceg sawv tsees ntawm sawv daws xub ntiag, nws nqa lub txaj uas thaum tuaj nws pw, nws rov mus tsev, nws cav txog Tswv Ntuj. 26 Sawv daws yoob tas, lawv cav txog Tswv Ntuj. Lawv ntshai kawg, lawv hais tias : "Hnub no, peb pom tej yam txawv heev !"

**Mim** 7th December 2015, 6:23 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°8

Re: COV ZAJ NYEEM NRUAB LIS PIAM XYOO II, 2015-2016

Post Mim 7th December 2015, 6:23 pm

Hnub no peb hwm txog Niam Mab Liab xeeb los tsis lo neeg lub keeb txhaum. Yog ib hnub uas lub Koom Txoos saib ua ib hnub tseem ceeb. Kev cai tiag peb yuav tsum txhua tus mus teev ntuj ib yam nkaus li Hnub Chiv thiab. Yog peb tsis mus ces peb ua txhaum hla txoj cai tias tsis tau mus teev ntuj rau ib hnub tseem ceeb lawm.

COV ZAJ NYEEM NRUAB LIS PIAM XYOO II, 2015-2016 Immaculate-conception TIM 8 LUB 12 HLIS 2015

Hnub Peb Lis Piam Ob Caij Tos Huab Tais Xyoo II

Peb Hwm Niam Mab Liab Xeeb Los Tsis Lo Neeg lub Keeb Txhaum.

Zaj Nyeem Ib: HAUV PAUS 3: 9-15, 20

9 HUAB TAIS Tswv Ntuj hu tus txiv neej hais tias : "Koj nyob qhov twg ?" 10 Tus txiv neej teb tias : "Kuv hnov koj tshais ruam hauv lub vaj. Kuv ntshai vim kuv liab qab, kuv thiaj khiav tsiv nraim." 11 Tswv Ntuj rov hais ntxiv tias : "Leej twg qhia koj tias koj liab qab ? Yog koj noj lub txiv uas kuv txwv tsis pub noj lawm puas yog ?" 12 Tus txiv neej teb tias : "Yog tus poj niam uas koj tso nyob ze kuv, muab lub txiv rau kuv, ces kuv thiaj noj !" 13 HUAB TAIS Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj." 14 Ces HUAB TAIS Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam

Nkauj Paj Nruag 98: 1, 2-3AB, 3CD-4

Txais: (1) Nej hui b zaj nkauj tshiab rau Huab Tais, vim nws tau ua tej yam txaus qhuas

Nej hu ib zaj nkauj tshiab rau Huab Tais, vim nws tau ua tej yam txaus qhuas;
Nws txhais tes xis tau muaj yeej, thiab nws txhais npab dawb huv.

Txais…

HUAB TAIS tau qhia nws txoj kev cawm seej rau sawv daws paub;
nws tau qhia nws txoj kev ncaj rau cov haiv neeg pom.
Nws tau nco qab txog nws lub siab zoo thiab nws lub siab pheej xeeb
rau His Xas Lais tsev neeg.

Txais...

Tim daim npoo ntiaj teb txhua qhov tau pom peb tus Tswv Ntuj txoj kev cawm seej lawm.
Tas cov teb chaws daim av, nej hu nkauj zoo siab luag ntxhi rau HUAB TAIS;
Cia li seev suab hu nkauj, cia li hu nkauj qhuas.

Txais…

Zaj Nyeem 2 ES FES XOS 1:3-6, 11-12

3 Kuv cav lus zoo txog Tswv Ntuj, peb tus Huab Tais Yes Xus Pleev Leej Txiv, tus uas tau foom txhua yam txiaj ntsim koob hmoov nyob saum ntuj pub rau peb, nyob hauv Leej pleev. 4 Thaum tseem tsis tau tsim lub ntuj lub teb, Tswv Ntuj twb xaiv peb nyob hauv Leej Pleev lawm, kom peb ntshiab huv, tsis muaj chaw xyeej rau ntawm nws xub ntiag nyob hauv txoj kev nyiam, 5 nws yeej xub npaj peb los ua nws cov tub sau ntxhais sau nyob hauv Yes Xus Pleev thaum ntxov lawm. Nws lub siab nyiam yeej xav kom ua zoo li ntawd, 6 kom tau cav txog nws lub txiaj ntsim koob meej, uas yog yam khoom plig nws pub dawb rau peb nyob hauv leej Zoo Nyiam.
11 Kuj yog nyob hauv nws, peb raug xaiv cia ua ntej, muab txhem rau ib cag, raws li tus uas coj tas txhua yam haum li nws siab nyiam tus txheej txheem, 12 kom peb ua cov uas xub tso siab rau Leej Pleev ua ntej kom tau cav txog nws lub koob meej.

As Les Lus Yas (LUS KAS 1:28)

Txais: As les lus yas, As les lus yas.

Koj nyob zoo, Mab Liab, koj tau txiaj ntsim puv siab, Huab Tais Ntuj nrog koj nyob;
koj tau koob tau hmoov tshaj ib tsoom poj niam tib si.

Txais: As les lus yas, As les lus yas.

Zaj Ntawv Moo Zoo LUS KAS 1:26-38

26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis. Hos tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.

**Mim** 8th December 2015, 5:54 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°9

Re: COV ZAJ NYEEM NRUAB LIS PIAM XYOO II, 2015-2016

Post Mim 8th December 2015, 5:54 am

Tim 9 lub 12 Hlis 2015

Hnub Plaub Lis Piam Ob Caij Tos Huab Tais Xyoo II

Hwm Leej Ntshiab Juan Diego

Zaj Nyeem Ib: His Xais 40: 25-31

25 Tus Ntshiab hais tias : nej yuav muab kuv piv rau leej twg tias kuv loj ib yam li ntawd ? 26 Nej tsa muag ntsia puag saum qhov siab ces nej thiaj yuav pom tias leej twg tau tsim tej ntawd: Nws ua kom lawv tawm los raws ib tug cai, nws tuav lawv npe hu ib yam zuj zus : nws lub hwj huam loj tas nrho, nws lub zog hnyav kawg nkaus yeej tsis muaj ib yamb uas tsis mloog nws lus. 27 Yas Kos, vim li cas koj hais tau li no, His Xas Lais, vim li cas koj thiaj hais tsis tseg tias : "Kuv txoj kev nyob nraim, HUAB TAIS tsis pom, kuv tus Tswv Ntuj tsis quav ntsej txog tias kuv muaj cai"? 28 Puas yog koj tseem tsis tau paub? Puas yog koj tseem tsis tau hnov txog? HUAB TAIS yog tus Tswv Ntuj nyob mus ib txhiab ib txhis, nws tsim cov npoo ntiaj teb kawg. Nws tsis qaug zog tsis sab. Neeg ntsuas tsis tau nws txoj kev ntse. 29 Tswv Ntuj ntxiv zog rau tus neeg qaug zog, nws ntxiv zog ntau npaug rau tus zog tab. 30 Cov me nyuam hluas txawj sab txawj qaug zog, cov tiav hluas dawm kev thiab ntog. 31 Tab sis cov neeg cia siab rau HUAB TAIS yuav rov muaj zog tuaj, lawv yuav muaj tis xws li dav, lawv khiav los tsis paub sab, lawv mus kev los tsis paub qaug zog.

NPN 103:1-2, 3-4, 8-10

Txais: (1) Kuv tus ntsuj plig, koj cia li cav txog Huab Tais!

Kuv tus ntsuj plig, cia li cav txog HUAB TAISs,;
tas nrho kuv tus kheej, cia li cav txog nws lub npe ntshiab.
Kuv tus ntsuj plig, cia li cav txog HUAB TAISs,
thiab tsis txhob hnov qab nws tej txiaj ntsim koob hmoov.

Txais…

Nws zam tas nrho koj cov txhaum rau koj,
nws kho tas koj tej mob nkeeg kom zoo.
Nws txhiv koj txoj sia ntawm lub kwj tob los,
nws muab txoj kev hlub thiab lub siab muag rau koj ntoo.

Txais…

HUAB TAIS khuv leej thiab hlub neeg,
nws npau taws qeeb, nws muaj kev hlub loj.
Nws tsis ua rau peb kom phim peb tej txhaum,
nws tsis ua pauj kom phim peb txoj kev ua phem.

Txais…

As Les Lus Yas

Txais: As les lus yas, As les lus yas

Nej ntsia, Huab Tais tuaj cawm nws haiv neeg;
cov uas npaj rawv tos yuav ntsib nws, lawv txoj hmoov zoo.

Txais: As les lus yas, As les lus yas

Zaj Ntawv Moo Zoo: Mas Tais 11: 28-30

Yes Xus hais rau cov neeg coob coob tias: 28 "Tas nej sawv daws uas nej khwv, thiab ris nra hnyav, nej tuaj cuag kuv mog ! Kuv yuav cia nej so los siav. 29 Nej txais kuv tus quab mus kwv, nej kawm ntawm kuv, vim kuv siab zoo, kuv tsis muab hlob, nej tus plig yuav nrhiav tau chaw so los siav. 30 Vim kuv tus quab kwv yooj yim, thiab kuv lub nra sib.

Last edited by Mim on 10th December 2015, 7:17 pm; edited 2 times in total

**Mim** 9th December 2015, 6:25 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°10

Re: COV ZAJ NYEEM NRUAB LIS PIAM XYOO II, 2015-2016

Post Mim 9th December 2015, 6:25 pm

Tim 10 lub 12 Hlis 2015

Hnub Tsib Lis Piam Ob Caij Tos Huab Tais Xyoo II

Zaj Nyeem Ib His Xais 41: 13-20

13 Vim tias kuv yog HUAB TAIS, koj tus Tswv Ntuj, kuv tuav koj txhais tes xis, kuv hais rau koj tias : koj txhob ntshai, kuv yuav pab koj. 14 Koj txhob txhawj ! tus cuav nab Yas Kos, tus kas His Xas Lais, kuv yuav pab koj; yog lo lus Huab Tais tau hais; koj tus Cawm Seej yog His Xas Lais tus Ntshiab. 15 Koj saib, kuv muab koj los ua ib daig hlau zom tshiab tshiab muaj ob leej hniav. Koj yuav zom cov roob kom ua hmoov. Koj yuav muab cov hauv roob txiav ua xim quav nyab. 16 Thaum koj ntxuaj, cua yuav pus cov quav nplej mus; cua daj cua dub yuav muab ntsawj mus rau qhov txhia chaw. Ntawm koj mas koj yuav zoo siab nyob hauv HUAB TAIS, koj yuav muaj koob meej nyob hauv His Xas Lais tus Ntshiab. 17 Cov neeg txom nyem thiab cov neeg pluag nrhiav dej haus, tab sis lawv nrhiav tsis tau dab tsi li. Lawv tus nplaig qhuav vim lawv nqhis dej. Kuv yog HUAB TAIS, kuv yuav mloog lawv cov lus thov ; kuv yog His Xas Lais tus Tswv Ntuj, kuv yuav tsis tso lawv pov tseg. 18 Kuv yuav ua kom muaj tej tus dej ntws lug nyob saum cov hauv roob do cuas, kom muaj qhov dej txhawv nyob hauv cov hav tiaj. Kuv yuav ua kom lub hav suab puam txia ua pas dej, thiab cov av qhuav muaj dej txhawv. 19 Nyob hauv cov teb chaws suab puam kuv yuav cog ntoo ciab, cog ntoo kua dis nplej, cog ntoo tawg paj li paj huab poob, thiab cog txiv ntoo roj rau; nyob hauv cov av phem, kuv yuav cog ntoo thuv, ntoo txi txiv, thiab ntoo me rau. 20 Kom tib neeg pom thiab paub, kom lawv saib thiab to taub tias HUAB TAIS txhais tes tau ua tej yam ntawd, His Xas Lais tus Ntshiab tau tsim tej ntawd.

NPN 145: 1 + 9, 10-11, 12-13AB

Txais: ( Huab Tais siab zoo thiab khuv leej neeg; nws npau taws qeeb, thiab nws siab zoo kawg nkaus.

Kuv yuav qhuas txog koj, kuv tus Tswv Ntuj kuv tus Vaj,
thiab kuv yuav cav txog koj lub npe mus li ib txhis.
HUAB TAIS ua siab zoo rau txhua leej
Thiab nws hlub txhua yam nws tau tsim los.

Txais…

HUAB TAIS, cia koj txhua yam hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab piav txog koj lub hwj huam loj.

Txais…

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej txais tas cov hlob nrog cov yau,
thiab koj txoj kev tswj kav yuav nyob mus txheej dhau txheej.

Txais…

As Les Lus Yas HIS XAIS 45:8

Txais: As les lus yas, As les lus yas

Thov kom cov huab tso tus Neeg Ncaj ncees poob los li nag,
thiab kom ntiaj teb daim av yug tus Cawm Seej tawm los.

Txais: As les lus yas, As les lus yas

Zaj Ntawv Moo Zoo Mas Tais 11: 11-15

11 Kuv hais tseeb rau nej, tas cov tub uas tsoom poj niam yug huv tib si, tsis muaj ib tug sawv loj dua Zam Ntxuav Plig. Tab sis, tus me tshaj hauv Ntuj lub Ceeb Tsheej, tseem loj dua Zam thiab. 12 Txij Zam Ntxuav Plig los txog tav no, Ntuj lub Ceeb Tsheej raug luag sib txeeb : cov neeg siab ceev txeeb lub Ceeb Tsheej. 13 Cov yaj saub thiab Txoj Cai puav leej tau ceeb toom lo lus los txog lub caij Zam tuaj. 14 Nej ntseeg kuv mog ! Zam yog tus Es Lias uas yuav rov los. 15 Leej twg muaj pob ntseg, cia nws mloog."

**Mim** 10th December 2015, 5:59 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°11

Re: COV ZAJ NYEEM NRUAB LIS PIAM XYOO II, 2015-2016

Post Mim 10th December 2015, 5:59 pm

TIM 11 LUB 12 HLIS 2015

Hnub Rau Lis Piam Ob Caij Tos Huab Tais Xyoo II

Zaj Nyeeem Ib: HIS XAIS 48: 17-19

17 HUAB TAIS, tus txhiv koj thiab His Xas Lais tus Ntshiab, nws hais li no : "Kuv yog koj tus HUAB TAIS, koj tus Tswv Ntuj, kuv qhia yam yuav zoo rau koj kom koj paub, thiab kuv coj koj mus taug txoj kev koj yuav tsum taug. 18 Kheev lam koj muab siab rau mloog kuv cov lus qhia, mas koj txoj kev zoo siab yuav ntws lug xws li ib tug dej thiab koj txoj kev ncaj yuav ntas ntua zoo li cov dej nyob hauv hiav txwv. 19 Koj caj ces yuav ntau npaum li cov suab zeb, cov tawm hauv koj los yuav coob npaum li cov tsig zeb. Lawv lub npe yuav tsis raug muab txiav tawm los tshem tawm ntawm kuv mus li.

NPN 1: 1-2, 3, 4 + 6

Txais: (Zam 8: 12) Cov uas raws koj qab, Huab Tais, lawv yuav muaj kev kaj lub neej.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (Zam 8: 12) Cov uas raws koj qab, Huab Tais, lawv yuav muaj kev kaj lub neej.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd.

Txais: (Zam 8: 12) Cov uas raws koj qab, Huab Tais, lawv yuav muaj kev kaj lub neej.

Tus neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (Zam 8: 12) Cov uas raws koj qab, Huab Tais, lawv yuav muaj kev kaj lub neej.

As Les Lus Yas

Txais: As les lus yas, as les lus yas.

Huab Tais yuav tuaj, kav tsij tawm mus ntsib nws!
Nws yog tus vaj muaj kev thaj yeeb.

Txais: As les lus yas, as les lus yas.

Ntawv Moo Zoo: MT 11: 16-19

Yes Xus hais tias:
16 "Kuv yuav muab tiam neeg no piv rau leej twg ? Tiam neeg no zoo li ib pab me nyuam yaus zaum tom tshav puam ; lawv rov sib hu tias : 17 "Peb twb tshuab raj rau nej, nej tsis dhia li! Peb cuab suab nqua nkauj tuag, los nej tsis nyiav li !" 18 Zam tuaj, nws tsis noj mov, tsis haus cawv, luag hais tias : ‘Nws raug dab !’ 19 Neeg Leej Tub tuaj, nws noj mov haus cawv, luag hais tias : "Saib tus ntawd ! Nws hu dab thiab quav cawv, nws nrog cov sau se thiab cov neeg txhaum ua phooj ywg !" Tab sis, kev Thoob Tsib cov hauj lwm ua kom nws tau txais kev ncaj ncees lawm. “

**Mim** 10th December 2015, 7:08 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°12

Re: COV ZAJ NYEEM NRUAB LIS PIAM XYOO II, 2015-2016

Post Mim 10th December 2015, 7:08 pm

TIM 12 LUB 12 HLIS 2015

Hnub Xya Lis Piam Ob Caij Tos Huab Tais Xyoo II

Hwm Leej Niam nyob Nkuas Das Lus Pes (Guadalupe)

Zaj Nyeem Ib: Xaiv: Ntxas Kas Lias los Qhib Yav Tom Ntej

Ntxes Kas Lias 2: 14-17

14 Leej Ntxhais Xis Yoos, koj hu nkauj, koj zoo siab mog ! Koj ntsia kuv tuaj lawm, kuv tuaj nyob hauv koj; HUAB TAIS hais li ntawd. 15 Hnub ntawd, ntau haiv neeg yuav khaub zig HUAB TAIS; lawv yuav yog nws haiv neeg. Lawv yuav tuaj nyob hauv koj ces koj yuav paub tias tus HUAB TAIS kav tsoom peeb zeej xa kuv tuaj rau koj. 16 Huab Tais yuav tauYus Das los ua nws tug nyob hauv lub teb chaws ntshiab thiab nws yuav rov xaiv Yes Lus Xas Les. 17 Txhua tus muaj lub cev nqaij, nej nyob ntsiag to ntawm HUAB TAIS xub ntiag, vim nws nti sawv los nyob hauv nws lub tsev ntshiab.

Los Qhib Yav Tom Ntej 11: 19a; 12: 1-6a, 10ab

19 Ces Tswv Ntuj lub Tuam Tsev nyob saum ntuj qhib plho, pom lub Xab Cog Lus tshwm los nyob hauv lub tuam tsev.
12 1 Muaj ib lub cim loj tas nrho tshwm nyob saum ntuj : yog ib tug Poj Niam hnav lub hnub. Lub hli nyob hauv nws qab xib taws. Kaum ob lub hnub qub vij nws taub hau zoo li lub mom teev kub. 2 Tus Poj Niam ntawd xeeb tub lawm. Nws ntsaj mob, vim nws tab tom daws cev. 3 Tseem muaj dua ib lub cim tshwm tuaj nyob saum ntuj : ib tug niag Zaj loj kawg, liab ploog cuag hluav taws, nws muaj xya lub taub hau thiab kaum tus kub. Txhua lub taub hau ntoo ib lub kauj kub. 4 Nws tus ko tw cheb cov hnub qub saum ntuj tas lawm ib feem peb. Nws muab pov los rau hauv ntiaj teb. Tus Zaj sawv ntsug ntawm tus poj niam uas tab tom daws cev xub ntiag, npaj nqos tus me nyuam uas tus poj niam yuav yug. 5 Tus Poj Niam yug tau tus me nyuam, yog ib tug me tub : yog tus yuav tuav ib rab cwj hlau coj tas txhua haiv neeg. Luag nqa tus me nyuam mus rau Tswv Ntuj, nyob ze ntawm Tswv Ntuj lub theej kiab. 6 Hos tus Poj Niam khiav mus nyob hauv teb chaws suab puam : nws mus nyob hauv qhov chaw uas Tswv Ntuj npaj rau nws. 10 Ces kuv hnov ib lub suab nrov saum ntuj tuaj tias : “Zaum no, kev yeej, kev muaj hwj huam los txog lawm, thiab peb tus Tswv Ntuj txoj kev ua Vaj, thiab nws Leej Pleev lub hwj huam.”

NPN YUS DIS 13:18BCDE, 19

Txais: (15:9d) Koj yog tus ua kom luag muab peb haiv neeg saib rau qhov siab tshaj plaws.

Me ntxhais, thov kom koj tau txais koob hmoov ntawm Tswv Ntuj tus Nyob Siab
ntau tshaj tas ib tsoom poj niam nyob ntiaj teb no.
Kom txhua leej cav txog HUAB TAIS Tswv Ntuj
tus tsim lub ntuj thiab lub ntiaj teb.

Txais…

Txoj kev tso siab koj tau qhia rau peb
yuav tsis ploj ntawm tib neeg lub tswv yim mus li,
lawv yuav nco ntsoov tas mus li txog Tswv Ntuj lub hwj huam loj.

Txais…

As Les Lus Yas

Txais: As les lus yas, As les lus yas

Leej Ntshiab Mab Liab, nkauj tsim txiaj dawb huv, tus tsim nyog txhua leej qhuas,
Yes Xus Pleev peb tus Tswv Ntuj yog lub Hnub pub kev ncaj ncees uas tawm ntawm koj tuaj.

Txais: As les lus yas, As les lus yas

Ntawv Moo Zoo Xaiv: Lus Kas 1: 26-38 los Lus Kas 1: 39-41

Lus Kas 1: 26-38

26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis. Hos tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.

Los Lus Kas 1: 39-47

39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !" 46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv.

Thov nej rov mus nyeem zaj tshwm sim no:
https://hmongcatholique.forumdediscussions.com/t206-niam-mab-liab-guadalupe-tshwm-sim-nyob-mexico

**Mim** 17th December 2015, 10:04 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°13

Re: COV ZAJ NYEEM NRUAB LIS PIAM XYOO II, 2015-2016

Post Mim 17th December 2015, 10:04 am

TIM 14 LUB 12 HLIS 2015

Hnub Ob Lis Piam Peb Caij Tos Huab Tais

Hwm leej Ntshiab John of the Cross/Jean de la Croix, ua Leej Choj

Zaj Nyeem Ib: XAM PHAJ 24: 2-7, 15-17A

2 Npas Laas tsa muag ntsia, nws pom cov His Xas Lais nyob ua tej pawg, raws lawv cov xeem. Tswv Ntuj lub tswv yim los nyob hauv nws, 3 ces nws hais nws cov lus paj huam li no : "Npas Las Has, uas yog Npes Os tub, nws tshaj nws cov lus, tus uas pom kev tob tshaj nws cov lus, 4 tus mloog Tswv Ntuj hais, tshaj nws cov lus. Nws pom raws li Sas Dais pub nws pom, nws hnov Tswv Ntuj lo lus teb, ces nws qhov muag qhib plho. 5 Cas koj cov tsev tsam phooj yuav zoo tis ua zoo, Yas Kos, thiab koj tej vaj tej tsev, His Xas Lais! 6 Zoo cuag li tej lub tiaj dav, cuag li tej lub vaj nyob ntawm ntug dej, zoo cuag li tej hav tshuaj as laus uas HUAB TAIS cog cia, zoo nkauj puav tam li cov ntoo ciab uas txawm nyob ze dej ! 7 Muaj ib tug thawj sawv hauv koj tsoom xeeb ntxwv los, nws yuav kav ntau haiv ntau xeem neeg . Nws tus vaj loj dua vaj As Nkas, nws lub hwj chim ua vaj yuav sawv siab.”

15 Ces Npas Laas rov hais nws zaj paj huam li no: “Npas Laas, uag yog Npes Os tub, nws tshaj nws cov lus, tus uas pom kev tob nws tshaj nws cov lus, tus uas mloog Tswv Ntuj lo lus, tus uas paub tus Nyob Siab txoj kev ntse, nws tshaj nws cov lus. Nws pom raws li Sas Dais pub nws pom, nws hnov Tswv Ntuj lo lus teb, ces nws qhov muag qhib plho. 17 Kuv pom nws, tab sis tsis yog tam sis no, kuv ntsia nws, tab sis tsis yog nyob ze ze . Ib lub hnub qub yuav tawm hauv Yas Kos los ua ib tug tswj, ib rab cwj ua vaj yuav sawv hauv His Xas Lais los.

NPN 25:4-5AB, 6 + 7BC, 8-9

Txais: (4) Huab Tais, thov koj qhia koj txoj kev rau kuv taug.

HUAB TAIS, cia kuv paub koj txoj kev,
qhia koj txoj kev rau kuv taug,
Coj kuv mus raws koj qhov tseeb thiab qhia rau kuv paub,
vim koj yog Tswv Ntuj, kuv tus Cawm Seej.

Txais…

HUAB TAIS, nco ntsoov tias koj txoj kev hlub
thiab koj lub siab zoo yeej nyob puag thaum ub los.
HUAB TAIS, thov koj ua siab zoo nco txog kuv,
vim koj muaj siab zoo.

Txais…

HUAB TAIS siab zoo siab ncaj;
nws qhia txoj kev rau cov neeg txhaum taug,
nws coj tus neeg txo hwj chim mus rau txoj kev ncaj,
Nws qhia nws txoj kev rau tus neeg tsis muab hlob.

Txais…

As Les Lus Yas NPN 85:8

Txais: As les lus yas, As les lus yas

HUAB TAIS, cia peb pom koj txoj kev hlub,
thiab muab koj txoj kev cawm neeg rau peb.

Txais: As les lus yas, As les lus yas

Ntawv Moo Zoo Mas Tais 21: 23-27

23 Yes Xus mus hauv lub Tuam Tsev Teev Ntuj. Thaum nws qhia sawv daws, cov thawj leej choj thiab pej xeem cov laus neeg txav los ze Yes Xus, lawv hais rau nws tias : “Koj muaj cai qhov twg los, koj thiaj ua tej ntawd ? Leej twg pub cai rau koj ua li ntawd ?” 24 Yes Xus teb lawv tias : “Hos ntawm kuv, mas kuv kuj yuav nug nej ib los thiab. Yog nej teb kuv, kuv mam yuav qhia nej tias leej twg pub cai rau kuv ua li ntawd. 25 Zam lub cim ntxuav tuaj qhov twg tuaj ? Puas tuaj ntawm Ntuj tuaj los tuaj ntawm neeg tuaj ?” Cov thawj leej choj thiab cov laus neeg xav tswv yim hauv siab tias : 26 “Yog peb hais tias 'tuaj ntawm Ntuj tuaj' ; nws yuav nug peb tias : “Yog li, uas cas nej tsis ntseeg nws ?” Hos yog peb hais tias 'Tuaj ntawm neeg tuaj,' peb kuj ntshai tsoom pej xeem, vim sawv daws saib Zam yog ib tug yaj saub.” 27 Ces lawv teb rau Yes Xus li no : “Peb tsis paub.” Yes Xus teb rau lawv tias : “Kuv kuj ib yam, kuv tsis qhia nej tias kuv tau cai ntawm leej twg los ua tej ntawd.”

**Mim** 17th December 2015, 10:08 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°14

Re: COV ZAJ NYEEM NRUAB LIS PIAM XYOO II, 2015-2016

Post Mim 17th December 2015, 10:08 am

TIM 15 LUB 12 HLIS 2015

Hnub Peb Lis Piam Peb Caij Tos Huab Tais

Zaj Nyeem Ib: Xos Fos Nias 3: 1-2, 9-13

HUAB TAIS hais li no:
1 Hmoov phem rau lub nroog ntxeev siab, lub nroog vuab tsuab, nroog quab yuam tib neeg! 2 Nws tsis tau mloog lub suab hu nws, nws tsis tau nyo hau mloog lo lus qhuab qhia, nws tsis tau tso siab rau HUAB TAIS, tsis tau txav los ze nws tus Tswv Ntuj.
9 Yog li kuv yuav ntxuav cov haiv neeg di ncauj kom dawb huv, kom lawv tau hu txog HUAB TAIS lub npe thiab tsob hwb nws raws tib tug quab. 10 Cov teev kuv yuav hla cov dej nyob Nus Npias teb sab tim ub tuaj, lawv yuav nqa txim tuaj txi rau kuv. 11 Hnub ntawd koj yuav tsis txaj muag ntxiv rau koj tej kev phem koj tau ntxeev siab ua rau kuv, vim kuv yuav ntiab cov neeg muab hlob khav theeb tawm hauv koj mus; koj yuav tseg tsis ua tus muaj plhus ntxiag saum kuv lub roob ntshiab ntxiv. 12 Cov neeg kuv yuav cia nyob hauv koj lub loog ntxiv yog ib haiv neeg tsis muab hlob, tsis khav theeb; lawv yuav nrhiav chaw vam khom nyob hauv HUAB TAIS lub npe: 13 Pab Seem His Xas Lais; lawv yuav tsis coj kev nkhaus ntxiv, lawv yuav tsis hais lus dag ntxiv lawm; yuav tsis pom ib tug nplaig dag nyob hauv lawv ntxiv. Lawv yuav tau kev nog zaub tau kev so tsis muaj leej twg yuav ua ntxhov lawv siab.

NPN 34:2-3, 6-7, 17-18, 19, 23

Txais: (7a) Huab Tais mloog cov pluag lub suab quaj.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig tau koob meej nyob hauv HUAB TAIS;
kom tus neeg me hnov thiab zoo siab.

Txais…

Tig koj ntsej muag mus rau HUAB TAIS, koj ntsej muag yuav ci ntsa iab,
koj ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog
thiab yuav cawm nws dim ntawm nws tej kev nyuaj ntxhov.

Txais…

HUAB TAIS tig ntsej muag mus tiv cov neeg phem,
rhuav kom txhob muaj chaw nco txog lawv nyob ntiaj teb ntxiv.
Thaum cov neeg ncaj hu, HUAB TAIS mloog lawv,
thiab npo lawv dim ntawm tas lawv txoj kev nyuaj siab.

Txais…

HUAB TAIS nyob ze ze tus neeg muaj kev tu siab;
nws pab cov neeg tag kev cia siab.
HUAB TAIS cawm nws cov tub txib txoj sia;
Tsis muaj Ib tug uas vam khom nws yuav raug txim.

Txais…

As Les Lus Yas

Txais: As les lus yas, As les lus yas.

Huab Tais, tsuag tsuag tuaj, tsis txhob ncua ntxiv;
Thov koj zam koj haiv neeg tej txhaum.

Txais: As les lus yas, As les lus yas.

Ntawv Moo Zoo Mas Tais 21: 28-32

Yes Xus hais rau cov thawj leej choj thiab cov thawj coj tias:
28 “Nej sim hais saib nej xav li cas. Ib tug neeg muaj ob tug tub. Nws hais rau thawj tug tias : “Me tub, hnub no koj mus ua num tom teb txiv cawv.” 29 Tus tub ntawd teb tias : “Kuv tsis xav mus.” Tab sis, ib me ntsis, nws khuv xim, ces nws cia li mus ua teb. 30 Leej txiv kuj hais rau lwm tus tub ib yam li rau thawj tug thiab. Tus tub ntawd teb tias : “Huab tais, kuv yuav mus.” Tab sis nws tsis mus. 31 Ob tug tub no, tus twg tau ua raws li leej txiv xav kom ua ? Lawv teb tias : “Yog thawj tug.” Yes Xus hais rau lawv tias: “Kuv hais tseeb rau nej, cov sau se thiab cov niam ntiav xub mus hauv Ntuj lub Ceeb Tsheej dua nej. 32 Vim tias, Zam tuaj qhia Txoj Kev ncaj rau nej, tab sis nej tsis ntseeg nws. Hos cov sau se, thiab cov niam ntiav ntseeg nws. Tab txawm nej pom lawv tus qauv zoo, tom qab no, nej kuj tsis hloov siab los ntseeg nws.”

**Mim** 18th December 2015, 4:23 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°15

Re: COV ZAJ NYEEM NRUAB LIS PIAM XYOO II, 2015-2016

Post Mim 18th December 2015, 4:23 am

TIM 16 LUB 12 HLIS 2015

Hnub Plaub Lis Piam Peb Caij Tos Huab Tais

Zaj Nyeem Ib: HIS XAIS 45:6C-8, 18, 21B-25

6c Kuv yog HUAB TAIS, tsis muaj dua lwm tus ntxiv. 7 Kuv puab qhov pom kev, kuv tsim qhov tsaus ntuj, kuv tsim kev noj qab nyob zoo, kuv tsim kev txom nyem. Kuv, HUAB TAIS, tsim tag txhua yam ntawd. 8 Cuaj txheej ntuj, nej tso txoj kev ncaj nqes txheej saud los xws li cov lwg, kom cov huab tso nws poob los xws li dej nag; kom lub ntiaj teb av tawg pleb, ces txoj kev cawm neeg yuav hlav tawm tuaj, thiab kev ncaj yuav nthaw kaus; kuv HUAB TAIS, tau tsim nws los.
18 HUAB TAIS tus tsim cuaj txheej ntuj nws hais tias, leej twg yog Tswv Ntuj, leej twg puab thiab tsim lub ntiaj teb, leej twg txawb lub ntiaj teb kom ruaj khov, tsis tsim kom yog ib qho chaw ntxhov tiam sis yog ib qho chaw xis nyob. Kuv yog HUAB TAIS, tsis muaj dua lwm tus ntxiv.
21b Leej twg tau hais txog tej no yav thaum ub? Leej twg tau tshaj tawm txog yav thaum i ? Puas yog kuv, uas yog HUAB TAIS? Tsis muaj dua lwm tus tswv ntuj ntxiv kuv lawm, uas yog ib tug Tswv Ntuj ncaj ncees thiab tus cawm neeg; tsis muaj dual wm tus ntxiv kuv lawm. 22 Cov npoo ntiaj teb, nej tig los rau kuv, nej thiaj yuav dim! Vim kuv yog Tswv Ntuj, tsis muaj dua lwm tus ntxiv. 23 Kuv cog lus rau kuv tus kheej tias : lo lus kuv lub ncauj hais tawm los yog lo lus tseeb tiag, yog ib lo lus uas thim tsis tau. Txhua lub hauv caug yuav txhos nyob ntawm kuv xub ntiag, txhua xeem lus yuav tuav txog kuv lub npe los cog lus li no : 24 ‘Tsuas yog nyob hauv HUAB TAIS thiaj muaj kev yeej thiab kev muaj zog.’ Cov uas yav tas lawv npau taws rau nws, lawv puav leej tuaj cuag nws, lawv txaj muag tas nrho. 25 Tas His Xas Lais tsoom xeeb ntxwv yuav yeej thiab yuav nto koob meej nyob hauv HUAB TAIS.

NPN 85: 9AB+10, 11-12, 13-14

Txais: (HX 45: 8 ) Kom cov huab tso tus Siab Ncaj poob los li nag, thiab kom lub ntiaj teb nti tus Cawm Seej tawm los.

Kuv yuav hnov Tswv Ntuj tshaj tawm txog dab tsi;
Huab Tais, nws tshaj tawm txog kev thaj yeeb rau nws haiv neeg.
Cov neeg hwm HUAB TAIS tau nws txoj kev cawm nyob ze ze lawv,
nws lub hwj chim yuav nyob txawm hauv peb lub teb chaws.

Txais: (HX 45: 8 ) Kom cov huab tso tus Siab Ncaj poob los li nag, thiab kom lub ntiaj teb nti tus Cawm Seej tawm los.

Kev siab zoo thiab thiab kev tseeb yuav tuaj sib ntsib,
kev ncaj thiab kev thaj yeeb yuav los sib puag.
Kev tseeb yuav tawm hauv av los,
thiab kev ncaj yuav dauv muag ntsia saum ntuj los

Txais: (HX 45: 8 ) Kom cov huab tso tus Siab Ncaj poob los li nag, thiab kom lub ntiaj teb nti tus Cawm Seej tawm los.

HUAB TAIS yuav pub txoj kev nplua nuj,
hos peb lub teb chaws yuav ntsu qoob.
Kev ncaj yuav taug kev ua nws ntej,
kev cawm yuav taug raws nws txoj lw.

Txais: (HX 45: 8 ) Kom cov huab tso tus Siab Ncaj poob los li nag, thiab kom lub ntiaj teb nti tus Cawm Seej tawm los.

As Les Lus yas HIS XAIS 40: 9-10

Txais: As les lus yas, as les lus yas.

Nej qw suab nrov nrov tshaj lub Moo Zoo;
ntsia saib, peb tus HUAB TAIS Tswv ntuj tuaj muaj hwj huam ntxiag.

Txais: As les lus yas, as les lus yas.

Ntawv Moo Zoo LK 7: 18B-23

18b Ces Zam hu nws ob leeg thwj tim, 19 nws xa nkawd mus nug Huab Tais tias : "Koj puas yog tus yuav tuaj, los peb yuav tos dua lwm tus ?" 20 Thaum ob tug thwj tim tuaj txog ntawm Yes Xus, nkawd hais tias : "Zam Ntxuav Plig xa wb tuaj nug koj tias : "Koj puas yog tus yuav tuaj, los peb yuav tos dua lwm tus ?" 21 Lub sij hawm ntawd, Yes Xus nyuam qhuav kho coob leej muaj txiab nkeeg, raug mob, raug dab phem, thiab nws ua Lus Kas, Zaj 7 620 kom ntau tus dig muag rov pom kev. 22 Ces Yes Xus teb rau ob tug uas Zam xa tuaj tias : " Neb rov mus qhia Zam txog qhov neb tau pom thiab tau hnov : Cov dig muag rov pom kev, cov tuag ceg mus taus kev, cov mob ruas rov huv, cov lag ntseg hnov lus, cov tuag sawv rov los, hos lub Moo Zoo tuaj txog cov neeg pluag. 23 Tus uas yuav tsis ntog vim kuv, mas nws txoj hmoov zoo."

**Mim** 18th December 2015, 4:37 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°16

Re: COV ZAJ NYEEM NRUAB LIS PIAM XYOO II, 2015-2016

Post Mim 18th December 2015, 4:37 am

Tim 17 lub 12 Hlis 2015

Hnub Tsib Lis Piam Peb Caij Tos Huab Tais

Zaj Nyeem Ib: HAUV PAUS 49: 1A-2, 8-10

1 Yas Kos hu nws cov tub los, nws hais rau lawv tias : 2 Nej sib sau ua ke ntawm no, nej mloog, Yas Kos cov tub, nej mloog nej txiv His Xas Lais hais.
8 Yus Das, koj cov kwv tij yuav cav txog koj, koj txhais tes yuav ntsiab rawv koj cov yeeb ncuab lub xwb qwb, hos koj txiv cov tub yuav khoov cev hwm koj. 9 Yus Das yog ib tug thav tsov. Me tub, koj mus tom nqaij , koj rov qab los. Nws los zaum quav ceg thiab pw zoo li ib tug tsov, zoo li ib tug maum tsov, leej twg yuav muaj cuab kav tsa nws ? 10 Tus cwj ua vaj yuav tsis ncaim ntawm Yus Das txhais tes, rab pas tswj luag yuav tsis txav ntawm nws ko taw, mus txog thaum lawv nqa nyiaj txiag tuaj hawm nws, thiab thaum cov haiv neeg mloog nws lus.

NPN 72:1-2, 3-4AB, 7-8, 17

Txais: (7) Txoj kev ncaj yuav tawg paj lub caij nws ua vaj thiab kev thaj yeeb yuav nyob mus li.

Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj tus tub.
Nws thiaj yuav tswj koj haiv neeg raws kev ncaj ncees
thiab yuav txawj txiav txim ncaj rau koj cov neeg me.

Txais…

Cov roob siab thiab cov pov roob
nej muab kev thaj yeeb rau tsoom pej xeem,
Nws yuav txiav txim ncaj rau cov pluag hauv tsoom pej xeem,
nws yuav cawm cov txom nyem tej me nyuam.

Txais…

Kev ncaj ncees yuav tawg paj lub caij nws ua vaj,
thiab yuav muaj kev thaj yeeb lug mus txog thaum tsis muaj lub hli ntxiv.
Thov kom nws kav txij ib lub hiav txwv mus rau lwm lub,
txij tus niam dej mus txog tim npoo ntiaj teb.

Txais…

Thov kom nws lub npe nto moo lug mus li,
kom nws lub npe nyob ntev npaum lub hnub.
Nyob hauv nws txhua haiv neeg nyob ntiaj teb yuav tau hmoov zoo,
txhua teb chaws yuav cav txog nws lub koob meej.

Txais..

As Les Lus Yas

Txais: As les lus yas, As les lus yas

Peb tus Tswv Ntuj nyob siab txoj kev Thoob Tsib,
koj hwj tas txhua yam koj lub hwj huam thiab kev hlub tau tsim los,
thov koj tuaj qhia txoj kev txawj ntse rau peb!

Txais: As les lus yas, As les lus yas

Ntawv Moo Zoo MAS TAIS 1:1-17

1 Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub : 2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij. 3 Yus Das poj niam hu ua Thas Mas yug Fas Les thiab Ntxas Las. Fas Les yug Es Xas Los, Es Xas Los yug As Las, 4 As Las yug As Mis Nas Das, As Mis Nas Das yug Nas As Xoos, Nas As Xoos yug Xas Moos, 5 Xas Moos poj niam hu ua Las Has yug Npuag Oos, Npuag Oos poj niam hu ua Luv yug Os Npes, Os Npes yug Yes Xes, 6 Yes Xes yug tus vaj Das Vis. Das Vis yuav Us Lis tus poj niam, nws yug Xas Los Moos, 7 Xas Los Moos yug Los Npuag, Los Npuag yug As Npias, As Npias yug As Xas, 8 As Xas yug Yos Xa Fas, Yos Xas Fas yug Yos Las, Yos Las yug Os Xias, 9 Os Xias yug Yos As Thas, Yos As Thas yug As Kas, As Kas yug Es Xes Kias, 10 Es Xes Kias yug Mas Nas Xes, Mas Nas Xes yug As Moos, As Moos yug Yos Xias, 11 Yos Xias yug Yes Kos Nias thiab Yes Kos Nias cov kwv tij. Thaum ntawd yog lub caij raug txim nyob Npas Npis Los. 12 Dhau lub caij raug txim nyob Npas Npis Los lawm, Yes Kos Nias yug Xas Las Thias, Xas Las Thias yug Ntxos Los Npas Npes, 13 Ntxos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos, 14 As Ntxos yug Xas Dos, Xas Dos yug As Khis, As Khis yug Es Lis Us, 15 Es Lis Us yug Es Les As Ntxas, Es Les As Ntxas yug Mas Thas, Mas Thas yug Yas Kos, 16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev. 17 Tas cov tiam neeg huv tib si : txij Has Nplas Has los txog Das Vis, muaj kaum plaub tiam ; txij Das Vis los txog lub caij raug txim nyob Npas Npis Los, muaj kaum plaub tiam ; txij lub caij raug txim nyob Npas Npis Los txog lub caij Leej Pleev tuaj, muaj kaum plaub tiam.

**Mim** 18th December 2015, 4:46 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°17

Re: COV ZAJ NYEEM NRUAB LIS PIAM XYOO II, 2015-2016

Post Mim 18th December 2015, 4:46 am

TIM 18 LUB 12 HLIS 2015

Hnub Rau Lis Piam Peb Caij Tos Huab tais Xyoo II

Zaj Nyeem Ib: YES LES MIAS 23:5-8

5 HUAB TAIS ceeb toom li no : "Nej ntsia saib ! Twb txog lub caij uas kuv yuav tsa ib tug kaus siab ncaj nyob hauv Das Vis tsev neeg lawm. Nws yuav ua vaj, nws yuav xyuam xim, nws yuav ua raws kev ncaj kev ncees nyob hauv lub teb chaws. 6 Lub caij nws ua vaj mas Yus Das teb yuav txais txoj kev dim, His Xas Lais yuav tau nyob nyab xeeb. Lub npe uas luag yuav tis rau nws yog : "HUAB TAIS peb txoj kev ncaj." 7 HUAB TAIS ceeb toom li no : "Ntsia saib ! Nyem no txog lub caij yuav tsis hais ntxiv tias : 'Xws li tus HUAB TAIS muaj txoj sia nyob, uas tau coj tsoom tub ki His Xas Lais tawm ntawm Hais Nkws Tos teb los.' 8 Tab sis sawv daws yuav hais tias : 'Xws li tus HUAB TAIS muaj txoj sia nyob, uas sau His Xas Lais cov xeeb leej xeeb ntxwv nyob teb chaws qaum teb thiab nyob txhua teb chaws uas lawv tawg mus nyob kom rov los nyob hauv lawv thaj av dua."

NPN 72:1-2, 12-13, 18-19

Txais: (7) Txoj kev ncaj yuav tawg paj lub caij nws ua vaj thiab kev thaj yeeb yuav nyob mus li.

Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj tus tub.
Nws thiaj yuav tswj koj haiv neeg raws kev ncaj ncees
thiab yuav txawj txiav txim ncaj rau koj cov neeg me.

Txais…

Ces nws yuav pab tus pluag thaum nws quaj hu,
thiab tus txom nyem uas tsis muaj leej twg pab.
Nws yuav hlub cov neeg me thiab cov pluag.
Nws yuav cawm cov pluag txoj sia.

Txais…

Kom His Xas Lais tus HUAB TAIS Tswv Ntuj lub koob meej nto moo,
nws tib leeg ua tej yam txaus qhuas.
Kom nws lub npe nto moo lug mus li;
kom nws lub hwj chim nyob puv tas lub ntiaj teb.

Txais…

As Les Lus Yas

Txais: As les lus yas, As les lus yas

Tus thawj coj His Xas Lais tsev neeg,
tus muab txoj cai rau Mais Xes nyob saum roob Xis Nais,
thov koj muab koj lub hwj huam loj tuaj pab cawm peb.

Txais: As les lus yas, As les lus yas

Ntawv Moo Zoo MAS TAIS 1:18-25

18 Yes Xus Pleev lub keeb chiv zoo li no : Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. 20 Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : "Tswv Ntuj nrog peb nyob". 24 Thaum Yos Xes tsim los, nws ua raws li Huab Tais tus Tshiab qhia rau nws : nws coj nws poj niam los nyob hauv nws tsev. 25 Nws tsis paub nws poj niam mus txog hnub Mab Liab yug Mab Liab tus tub. Nws tis tus tub npe hu ua Yes Xus.

**Mim** 18th December 2015, 5:10 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°18

Re: COV ZAJ NYEEM NRUAB LIS PIAM XYOO II, 2015-2016

Post Mim 18th December 2015, 5:10 am

TIM 19 LUB 12 HLIS 2015

Hnub Xya Lis Piam Peb Caij Tos Huab Tais Xyoo II

Zaj Nyeem Ib: Txwj Laus Tiv Thaiv 13: 2-7, 24-25A

2 Muaj ib tug txiv neej xeem Daas nyob Xos Les As, nws hu ua Mas Nos As. Nws poj niam tsis muaj me nyuam. 3 HUAB TAIS tus Tshiab tuaj xyuas tus poj niam thiab hais rau nws tias :"Koj yog poj khab seeb tsis tau muaj me nyuam li, tab sis koj yuav xeeb me nyuam thiab yuav yug ib tug tub. 4 Txij nyem no mus, koj yuav ceev faj. Koj yuav tsis txhob haus cawv txiv ntoo los cawv txhuv, tsis txhob noj tej yam tsis huv. 5 Koj yuav xeeb me nyuam thiab yuav yug ib tug tub. Koj yuav tsis txhob chais nws plaub hau ib zaug li. Tus me nyuam ntawd, txij nruab thiab los, nws yuav ua Tswv Ntuj ib tug Nas Xis. Yog nws yuav cawm cov His Xas Lais ntawm cov Fis Lis Tis." 6 Tus poj niam thiaj mus hais rau nws tus txiv tias :"Tswv Ntuj ib tug neeg tau hais lus rau kuv, zoo li yog ib tug Tshiab, vim nws tus yam ntxwv muaj hwj chim kawg. Kuv tsis tau nug nws tias nws tuaj qhov twg tuaj. Nws tsis tau qhia nws npe rau kuv paub. 7 Tab sis nws hais rau kuv tias : Koj yuav xeeb me nyuam, koj yuav yug ib tug tub. Mas koj yuav txhob haus cawv txiv ntoo los cawv txhuv li. Tsis txhob noj tej yam tsis huv. Koj tus me nyuam, txij nruab thiab los, nws yuav ua Tswv Ntuj ib tug Nas Xis mus txog hnub tuag !"
24 Tus poj niam yug tau ib tug tub, nws tis npe rau hu ua Xas Xoos. Tus tub hlob zuj zus. HUAB TAIS pub txoj hmoov zoo
rau nws. 25 HUAB TAIS lub tswv yim tuaj tshoj nws.

NPN 71: 3-4A, 5-6AB, 16-17

Txais: ( 8 ) Kuv lub ncauj yuav puv nkaus kev qhuas txog koj
thiab kuv yuav hu nkauj cav txog koj lub koob meej !

Thov koj ua lub tsua rau kuv ua chaw nkaum,
ua lub yeej khov kho thaiv kuv,
vim koj yog kuv lub tsua thiab kuv lub yeej ntsa zeb.
Kuv tus Tswv Ntuj, thov cawm kuv ntawm tus phem txhais tes.

Txais…

Huab Tais, koj yog kuv lub chaw vam khom,
Tswv Ntuj, koj yog kuv lub chaw cia siab txij thaum hluas los.
Txij thaum kuv yug los kuv vam koj ib leeg;
thaum kuv tseem nyob hauv kuv niam plab, koj yeej yog kuv lub zog.

Txais…

Kuv yuav qhuas txog HUAB TAIS cov hauj lwm muaj hwj huam;
Tswv Ntuj, kuv yuav qhia txog koj txoj kev ncaj ncees uas yog txoj tseem.
Tswv Ntuj, koj tau qhuab qhia kuv txij thaum hluas los,
txog zwj ceeb no, kuv tseem cav txog koj cov hauj lwm muaj hwj huam.

Txais…

As Les Lus Yas

Txais: As les lus yas, As les lus yas.

Yes Xes lub hauv paus tus cag, koj yog lub cim qhia txog
Tswv Ntuj txoj kev hlub nws haiv neeg,
thov tsuag tsuag tuaj cawm peb tsis txhob ncua ntxiv!

Txais: As les lus yas, As les lus yas.

Ntawv Moo Zoo: LUS KAS 1: 5-25

5 Lub zim txwv Hes Los ua vaj kav Yus Das teb, muaj ib tug Leej Choj hu ua Ntxas Kas Lias, nws yog phiaj Leej Choj As Npias. Nws poj niam hu ua Es Lis Xas Npes, yog As Loos ib tug ntxhais xeeb ntxwv. 6 Nkawd ob niam txiv yog neeg ncaj nyob ntawm Tswv Ntuj xub ntiag. Nkawd ua raws nraim li Huab Tais cov lus qhia thiab cov cai tas huv si, tsis muaj ib qho xyeej. 7 Nkawd tsis muaj me nyuam li, vim Es Lis Xas Npes xeeb tub tsis tau, thiab nkawd hnub nyug kuj laus lawm. 8 Muaj ib hnub, Ntxas Kas Lias tab tom leg Leej Choj txoj kab xwm nyob ntawm Tswv Ntuj xub ntiag, vim txog lub caij nws phiaj Leej Choj rov leg kab xwm.9 Lawv ntaus txheeb raws li cov LeejChoj kev cai ua kam, ces Ntxas Kas Liasraug ua tus chaws mus hlawv xyab hauv Huab Tais Kem Ntshiab. 10 Lub caij hlawv xyab, tas tsoom pej xeem teev Ntuj nyob sab nraud. 11 Huab Tais tus Tshiab tawm tuaj sawv ntsug nyob ntawm lub thaj xyab sab xis rau nws pom. 12 Ntxas Kas Lias pom dheev, nws ua siab nphau npog, nws ntshai kawg. 13 Tab sis tus Tshiab hais rau Ntxas Kas Lias tias :"Ntxas Kas Lias, koj txhob ntshai, vim Ntuj mloog koj cov lus thov. Koj poj niam Es Lis Xas Npes yuav yug ib tug tub rau koj, koj yuav tis nws npe hu ua Zam. 14 Nws yuav ua kom koj kaj siab thiab zoo siab tas nrho. Thaum nws yug los, coob leej kuj yuav zoo siab. 15 Vim nws yuav yog ib tug loj nyob ntawm Huab Tais xub ntiag. Nws yuav tsis haus kua txiv cawv, tsis haus cawv ntsim. Txij nruab thiab los, Leej Ntuj Plig Ntshiab yuav nyob puv hauv nws. 16 Nws yuav coj coob leej tub His Xas Lais rov los rau Huab Tais, lawv tus Tswv Ntuj. 17 Nws yuav taug kev mus ntawm Huab Tais hauv ntej. Nws yuav tau Es Lias lub tswv yim thiab lub hwj huam, kom nws coj cov ua txiv lub siab rov los rau lawv cov me nyuam, coj cov neeg qig lus rov los taug cov neeg ncaj txoj kev thoob tsib. Nws yuav npaj ib haiv neeg qhib siab lug tos Huab Tais. 18 Ntxas Kas Lias hais rau tus Tshiab tias :"Dab tsi yuav ua kom kuv paub tias yuav muaj tuaj li ntawd ? Vim kuv yog ib tug neeg laus, hos kuv poj niam kuj muajhnub nyoog lawm." 19 Tus Tshiab teb tias :"Kuv yog Nkas Nplias. Kuv sawv nraim ntawm Tswv Ntuj xub ntiag. Nws xa kuv tuaj hais lus rau koj thiab fi tsab xov zoono rau koj. 20 Vim koj tsis ntseeg kuv cov lus uas thaum txog sij hawm yuav tsheej xeeb, mas koj yuav nyob ntsiag to hais tsis tau lus mus txog hnub tej xwm ntawd tshwm sim tuaj." 21 Tsoom pej xeem tos Ntxas Kas Lias, lawv xav tsis thoob tias vim li cas Ntxas Kas Lias thiaj nyob ntev hauv kem ntshiab. 22 Thaum nws tawm los, nws hais tsis tau lus rau lawv, ces lawv to taub tias nyob hauv kem ntshiab nws tau pom ib yam yees tawm tuaj. Ntxas Kas Lias piav tes rau lawv, nws hais tsis tau lus. 23 Thaum tas nws lub sij hawm leg kab xwm lawm, ces nws rov mus tsev. 24 Tsis ntev tom qab, Ntxas Kas Lias poj niam Es Lis Xas Npes xeeb tub. Es Lis Xas Npes tsiv nraim nyob hauv tsev tau tsib hlis. Nws hais tias :25 "Huab Tais ua qhov no rau kuv, txog caij nws dauv muag ntsia kuv, nws thau kuv txoj kev txaj muag ntawm zeej tsoom."

**Mim** 22nd December 2015, 8:07 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°19

Re: COV ZAJ NYEEM NRUAB LIS PIAM XYOO II, 2015-2016

Post Mim 22nd December 2015, 8:07 am

TIM 21 LUB 12 2015

Hnub Ob Lis Piam Plaub Caij Tos Huab Tais Xyoo II

Hwm Leej Ntshiab Peter Canisius

Zaj Nyeem Ib: KWV TXHIAJ 2: 8-14

8 Kuv hnov tus kuv hlub. Nws tuaj lawm, nws dhia hla toj roob hauv pes khiav tuaj. 9 Tus kuv hlub zoo puav tam li tus kauv, puav tam li tus muas lwj. Ntsia saib ! Nws tuaj sawv nraum ntsa loog. Nws xauj nraum qhov rais tuaj, nws nyob nraum laj kab ntsia ntsoov tuaj. 10 Tus kuv hlub tsa suab hais rau kuv tias : "Koj sawv tsees los os, kuv tus hlub, kuv tus neeg zoo nkauj, los mas. 11 Nyem no lub caij ntuj no dhau lawm, ntuj nag twb tu lawm. 12 Paj tawg puv tas lub teb chaws. Yog lub caij seev lus paj lus taum lom zem, tus nquab tsug twb pib quaj hauv peb lub teb chaws. 13 Cov txiv cev ua cos ntsuab vog, cov paj txiv cawv tsw qab ntxiag. Sawv tsees los mas, kuv tus hlub, kuv tus neeg zoo nkauj, sawv los ! 14 Kuv me nkauj nquab, koj nkaum hauv tej qhov tsua, hauv tej ntsa zeb. Cev koj lub ntsej muag los rau kuv pom yuad ! Pub kuv hnov koj lub suab mas ! Vim koj lub suab zoo mloog, koj lub ntsej muag zoo nyiam !"

Los: XOS FOS NIAS 3:14-18A

14 Leej me ntxhais Xis Yoos, koj cia li seev suab qw lom zem! Tsoom His Xas Lais, nej cia li qw kom nrov ! Me ntxhais Yes Lus Xas Les, koj cia li zoo siab, cia li dhia hom khaj tas koj lub siab ntsws! 15 HUAB TAIS tshem koj lub txim lawm: nws ntiab koj cov yeeb ncuab kom khiav mus deb. Huab Tais, Hias Xas Lais tus vaj tuaj nyob nruab nrab hauv koj, koj yuav tsis ntshai raug kev txom nyem ntxiv. 16 Txog hnub ntawd, Yes Lus Xas Les yuav hnov cov lus no : “Xis Yoos, koj txhob ntshai, txhob ua koj ob txhais tes tuag tas ! 17 HUAB TAIS koj tus Tswv Ntuj nyob nruab nrab hauv koj, nws yog tus muaj hwj huam cawm koj. Nws yuav zoo siab tas nrho vim koj. Nws txoj kev hlub yuav ua kom koj rov tshiab tuaj. Nws yuav dhia zoo siab vim koj, 18 xws li yog ib hnub lom zem.”

NPN: 33: 2-3, 11-12, 20-21

Txais: (1a; 3a) Cia li zoo siab nyob hauv Huab Tais, nej cov ua ncaj! Nej hu ib zaj nkauj tshiab rau nws.

Nej ntaus nkauj nog ncas ua HUAB TAIS tsaug.
Nej ntaus kauj ncas kaum txoj hlua rau nws!
Nej hu ib zag nkauj tshiab rau nws,
nej muab siab rau qoj cov hlua ncas nrog suab qw zoo siab.

Txais: (1a; 3a) Cia li zoo siab nyob hauv Huab Tais, nej cov ua ncaj! Nej hu ib zaj nkauj tshiab rau nws.

Tej yam HUAB TAIS npaj nyob mus li,
Yam nws lub siab xav ua nyob txheej dhau txheej.
Haiv neeg uas tau HUAB TAIS los uaTswv Ntuj, lawv txoj hmoov zoo,
Huab Tais xaiv haiv neeg ntawd los ua nws lub cuab tam.

Txais: (1a; 3a) Cia li zoo siab nyob hauv Huab Tais, nej cov ua ncaj! Nej hu ib zaj nkauj tshiab rau nws.

Ntawm peb, peb tos ntsoov HUAB TAIS:
nws yog tus pab peb, nws yog peb daim leem phiaj.
Peb muaj kev zoo siab yog nyob hauv nws,
peb chaw tso siab yog nyob hauv nws lub npe ntshiab.

Txais: (1a; 3a) Cia li zoo siab nyob hauv Huab Tais, nej cov ua ncaj! Nej hu ib zaj nkauj tshiab rau nws.

As Les Lus Yas

Txais: As les lus yas, as les lus yas.

Es Mas Nus Es, koj yog peb tus Vaj thiab tus Cai,
thov koj tuaj cawm peb, HUAB TAIS, peb tus Tswv Ntuj!

Txais: As les lus yas, as les lus yas.

Ntawv Moo Zoo : LK 1: 39-45

39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !"

**Mim** 22nd December 2015, 8:20 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°20

Re: COV ZAJ NYEEM NRUAB LIS PIAM XYOO II, 2015-2016

Post Mim 22nd December 2015, 8:20 am

TIM 22 LUB 12 2015

Hnub Peb Lis Piam Plaub Caij Tos Huab Tais Xyoo II

Zaj Nyeem Ib 1 XAS MUAS 1:24-28

24 Thaumtus me nyuam cais mis lawm, As Nas coj tus me nyuam nrog ib tug heev nyuj muaj peb xyoos, ib tawb hmoov nplej thiab ib hnab tawv cawv, mus fij rau ntuj hauv HUAB TAIS lub tuam tsev uas nyob XisLaus; tus me nyuam tseem me me kawg li. 25 Lawv muab tus heev nyuj tua txi Ntuj ces lawv coj tus me nyuam mus rau Es Lis. 26 Nws hais tias: "Tus tswv, kuv thov koj! Tseeb ib yam li koj muaj txoj sia, tus tswv, kuv yog tus poj niam uas tau txhos caug nyob ze koj ntawm no thov HUAB TAIS. 27 Tus me nyuam no yog tus uas kuv tau thov kom Ntuj pub rau kuv. HUAB TAIS tau muab rau kuv raws li kuv thov lawm. 28 Mas nyem no kuv xav muab nws pub rau HUAB TAIS kom tas nws sim neej. Kuv muab nws rau HUAB TAIS." Ces nkawd ob niam tub txhos caug ntawd nyob ntawm HUAB TAIS xub ntiag.

NPN: 1 XAS MUAS 2: 1, 4-5, 6-7, 8ABCD

Txais: (1a) Kuv lub siab hom khaj nyob hauv Huab Tais, tus Cawm kuv

Kuv lub siab hom khaj nyob hauv HUAB TAIS,
kuv tus kub sawv siab nyob hauv kuv tus Tswv Ntuj.
Kuv rua ncauj dav fo tsis txuag kuv cov yeeb ncuab,
kuv zoo siab vim koj pab kuv.

Txais…

Cov neeg muaj zog loj rab hneev dam,
hos tus tsis muaj zog lub zog loj tuaj.
Cov neeg tau noj tsau yuav tsum ua zog thiaj tau noj,
hos tus tshaib plab tsis khwv los tau noj lawm.
Tus poj khab seeb yuav muaj xya leej tub,
hos tus muaj tub coob yuav tsis muaj ib tug li lawm.

Txais…

HUAB TAIS ua kom txawj tuag thiab pub kom muaj txoj sia;
nws muab pov rau ntuj txias teb tsaus,
nws rub kom sawv tau rov los.
HUAB TAIS ua kom pluag thiab ua kom muaj,
Nws txo kom qis, thiab nws muab txawb rau qhov siab.

Txais…

Nws tsa cov neeg pluag hauv plua tshauv los,
nws rub cov txom nyem hauv qhov chaw qias
los nrog cov nom tswv zaum,
nws muab ib lub rooj zaum nto koob meej rau lawv.

Txais…

As Les Lus Yas

Txais: As les lus yas, as les lus yas

Tus Vaj kav tas txhua haiv neeg thiab lub pob zeb txheem lub Koom Txoos,
thov koj tuaj cawm tib neeg uas koj tau muab av los puab!

Txais: As les lus yas, as les lus yas

Ntawv Moo Zoo: LUS KAS 1: 46-56

46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub roos cov neeg hwm nws tiam dhau tiam. 51 Nws sab npab nthuav nws lub zog rau sawv daws pom. Cov neeg uas lub siab muab hlob, HuabTais ua kom lawv tawg. 52 Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab. 53 Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav. 54 HuabTais pab nws tus tub txib His Xas Lais, vim nws nco ntsoov tias nws lub siab hlub neeg, 55 nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis." 56 Mab Liab nrog Es Lis Xas Npes nyob peb lub hlis tej, ces nws rov mus tsev.

**Mim** 22nd December 2015, 8:31 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°21

Re: COV ZAJ NYEEM NRUAB LIS PIAM XYOO II, 2015-2016

Post Mim 22nd December 2015, 8:31 am

TIM 23 LUB 12 HLIS 2015

Hnub Plaub Lis Piam Plaub Caij Tos Huab tais Xyoo II

Zaj Nyeem Ib: MAL 3:1-4, 23-24

Huab Tais Tswv Ntuj hais li no:
1 Kuv yuav xa kuv tus tub tshaj xov mus kho kev ua kuv ntej. Ib sij huam, tus Huab Tais uas nej nrhiav nws yuav chaws los hauv nws lub tsev ntshiab, tus tub tshaj xo txog kev cog lus uas nej nyiam nws tuaj txog ntawd lawm ! Tus HUAB TAIS Xas Npas Aus hais li ntawd : 2 Leej twg yuav nyob taus hnub nws tuaj ? Leej twg yuav sawv taus ntsug thaum nws tawm plaws los? Nws yuav zoo li cov hluav taws nchuav nyiaj nchuav kub, thiab zoo li tshuaj ntxhua xov kom dawb. 3 Nws yuav zaum ua tus nchuav nyiaj nchuav kub thiab tus ntxhua xov. Nws yuav ntxhua kom Les Vis cov tub huv tuaj, thiab yuav muab lawv nchuav kom tau cov tseem kub tseem nyiaj, ces lawv yuav yog cov cev thaj txi ntuj rau HUAB TAIS raws kev ncaj ncees. 4 Ces HUAB TAIS yuav pom zoo txais Yus Das thiab Yes Lus Xas Les thaj txi Ntuj ib yam li thaum ub, thaum pib thawj ob peb xyoos.
23 Kuv yuav xub xa yaj saub Es Lias tuaj rau nej ua ntej hnub loj txaus ntshai uas HUAB TAIS yuav tuaj. 24 Nws yuav rub tau leej txiv lub siab rov mus hlub nws cov tub thiab cov tub lub siab rov mus hlub lawv txiv, thiaj cheem tau kuv kom tsis txhob tso kev puas tsua puas ntsoog tuaj raug lub teb chaws.

NPN 25: 4-5AB, 8-9, 10 + 14

Txais: (saib Lus Kas 21:28) Tsa nej taub hau, vim nej txoj kev dim nyob ze ze lawm.

HUAB TAIS, ua kom kuv paub koj tej kev,
qhia koj tej kev rau kuv kawm.
Coj kuv mus taug koj txoj kev tseeb, thov qhia rau kuv,
vim koj yog Tswv Ntuj tus cawm kuv.

Txais…

HUAB TAIS yog txoj kev siab zoo thiab siab ncaj,
nws qhia cov neeg txhaum rov los taug txoj kev zoo.
nws coj cov neeg me mus rau txoj kev ncaj,
nws qhia nws txoj kev rau cov neeg me kawm.

Txais…

Tas HUAB TAIS tej kev yog kev hlub thiab kev tseeb
rau cov neeg coj raws nraim li nws tau cog lus thiab nws txoj cai.
Cov neeg hwm HUAB TAIS xwb thiaj paub nws lub siab,
thiab lawv thiaj to taub txog nws txoj kev cog lus.

Txais…

As Les Lus Yas

Txais: As les lus yas, As les lus yas

Vaj kav tas txhua haiv neeg thiab lub pob zeb txheem lub Koom Txoos,
thov koj tuaj cawm tib neeg uas koj tau muab av los puab!

Txais: As les lus yas, As les lus yas

Ntawv Moo Zoo: LK 1: 57-66

57 Ntawm Es Lis Xas Npes, mas txog lub caij nws daws cev, nws yug tau ib tug tub. 58 Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes loj kawg. Lawv nrog Es Lis Xas Npes zoo siab. 59 Thaum txog hnub yim, lawv tuaj ua lub cim txiav rau tus me nyuam. Lawv xav tis nws npe raws li nws txiv Ntxas Kas Lias lub npe. 60 Nws niam hais tias : "Tsis yog. Tus me nyuam yuav hu ua Zam." 61 Lawv hais rau leej niam tias : "Tsis muaj ib tug hauv koj cov txheeb ze hu li ntawd." 62 Ces lawv piav tes rau leej txiv saib nws xav kom lawv tis tus me nyuam npe li cas. 63 Leej txiv kom lawv muab ib daim txiag los, nws sau ntawv tias : "Nws lub npe hu ua Zam." Sawv daws ceeb tas. 64 Tam sis ntawd, leej txiv lub ncauj qhib plho, tus nplaig muag nthas, nws hais tau lus, nws cav txog Tswv Ntuj. 65 Tsoom neeg nyob ze nkawd sawv daws tau ntshai kawg. Hos nyob pem toj siab hauv xeev Yus Das, sawv daws tham txog tej xwm ntawd. 66 Cov uas tau hnov luag tham txog tej xwm no, muab khaws cia rau nruab siab, lawv hais tias : "Tus me nyuam ntawd yuav yog ib tug zoo li cas ?" Huab Tais txhais tes yeej nrog nraim tus me nyuam ntawd tiag.

**Mim** 22nd December 2015, 8:49 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°22

Re: COV ZAJ NYEEM NRUAB LIS PIAM XYOO II, 2015-2016

Post Mim 22nd December 2015, 8:49 am

TIM 24 LUB 12 HLIS 2015

Hnub Tsib Lis Piam Plaub Caij Tos Huab Tais Xyoo II

Zaj Nyeem Ib: 2 XM 7:1-5, 8B-12, 14A, 16

1 Thaum tus vaj tshais los nyob hauv nws lub tsev loog lawm thiab HUAB TAIS pub nws so ntawm nws cov yeeb ncuab nyob ib ncig ntawm nws lawm, tus vaj hais rau tus Yaj Saub Nas Taas tias : "Koj ntsia saib, kuv nyob hauv ib lub tsev ntoo ciab, hos Tswv Ntuj lub Xab Cog Lus nyob hauv ib lub Tsev Tsam Phooj xwb!" 3 Nas Taas teb rau tus vaj tias : "Koj mus ua raws li koj siab nyiam, vim HUAB TAIS nrog nraim koj." 4 Tiam sis hmo ntawd, Tswv Ntuj lo lus nrov tuaj rau Nas Taas tias : 5 "Koj mus hais rau kuv tus tub txib Das Vis tias HUAB TAIS hais li no : Puas yog koj yuav txhim ib lub tsev rau kuv nyob?
8b Kuv tau rho koj hauv tsiaj cov tshav zaub thiab hauv txoj kev lawv tsiaj los ua tus tswj kav kuv haiv His Xas Lais. 9 Koj mus txog twg kuv tau nrog koj nraim, thiab tau txo koj cov yeeb ncuab ntawm koj hauv ntej. Kuv yuav ua kom koj lub npe nrov ib yam li cov neeg tseem ceeb tshaj nyob ntiaj teb. 10 Kuv yuav hwm ib thaj av rau kuv haiv neeg His Xas Lais thiab kuv yuav muab lawv coj mus cog rau ntawd kom lawv nyob ntawd; lawv yuav tsis ntsib kev nyuaj siab ib zaug ntxiv, cov neeg phem yuav tsis tsuj lawv ib zaug ntxiv xws li yav thaum pib hauv paus, 11 thiab xws li txij hnub kuv tau tsa muaj cov txwj laus los coj kuv haiv neeg His Xas Lais. Kuv yuav cia koj tau so ntawm koj cov yeev ncuab. HUAB TAIS tseem hais ntxiv rau koj tias HUAB TAIS yuav npaj ib lub tse neeg rau ko: 12 thaum koj lub caij dua lawm, thiab koj mus so nrog koj cov yawg koob lawm, kuv yuav tsa koj ib tug xeeb leej xeeb ntxwv tawm ntawm koj roj koj ntshav, sawv lawv koj qab; kuv yuav tsa nws ua vaj nyob ruaj nreb.
14 Kuv yuav yog nws txiv, nws yuav yog kuv tus tub. 16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag; koj lub theej kiab yuav nyob ruaj nreb mus ib txhis."

NPN 89: 2-3, 4-5, 27+29

Txais: (2) Kuv yuav hu nkauj mus li cav txog HUAB TAIS lub siab zoo.

Kuv yuav hu nkauj mus li cav txog HUAB TAIS tej kev zoo,
kuv lub ncauj yuav tshaj txog koj txoj kev pheej xeeb mus tiam dhau tiam.
Vim koj tau hais tias: “Kuv lub siab zoo yuav nyob ruaj mus li;”
nyob saum ntuj koj tau cog koj txoj kev pheej xeeb kom ruaj nreb.

Txais…

“Kuv tau cog lus nrog tus neeg kuv tau xaiv,
kuv tau cog lus ruaj rau kuv tus tub txib Das Vis tias:
kuv yuav tsa koj tsoom xeeb leej xeeb ntxwv nyob ruaj nreb mus li,
thiab koj lub theej kiab yuav nyob khov kho mus tiam dhau tiam,”

Txais…

“Nws yuav hais rau kuv tias, ‘Koj yog kuv txiv,
kuv tus Tswv Ntuj, kuv lub tsua, kuv tus cawm seej.’
Kuv yuav ua siab zoo rau nws mus tas ib txhis,
thiab kuv txoj kev nrog nws cog lus yuav nyob ruaj nreb.”

Txais…

As Les Lus Yas

Txais: As les lus yas, as les lus yas

Qhov Kaj Ntug ci ntsa iab,
Qhov pom kev ci ntsa paug mus li, lub hnub muaj kev ncaj ncees,
thov koj tuaj ci kaj cov neeg nyob hauv kev tsaus ntuj thiab hauv txoj kev tuag tus duab ntxoov ntxoo.

Txais: As les lus yas, as les lus yas

Ntawv Moo Zoo: LK 1: 67-79

67 Ces Leej Ntuj Plig Ntshiab los nyob puv hauv tus me nyuam leej txiv Ntxas Kas Lias, nws ua yaj saub hais tias: 68 "His Xas Lais tus Huab Tais Tswv Ntuj nto koob meej, vim nws tuaj xyuas thiab tuaj npo nws haiv neeg. 69 Nws tsa ib txog kev cawm muaj zog rau peb nyob hauv nws tus tub txib Das Vis tsev neeg. 70 Nws ua raws li nws kom cov yaj saub ntshiab txheej thaud xub qhia tias : 71 nws yuav cawm peb ntawm peb cov yeeb ncuab, thiab ntawm cov neeg ntxub peb txhais tes. 72 Nws tau hlub peb cov yawg koob. Nws nco ntsoov txog cov lus ntshiab nws nrog lawv cog, 73 nws nco ntsoov txog lo lus nws cog rau peb txiv Has Nplas Has tias : 74 nws yuav ua kom peb txhob ntshai, nws yuav npo peb ntawm peb cov yeeb ncuab txhais tes, 75 peb thiaj tau kev tsob hwb nws hauv txoj kev ntshiab thiab txoj kev ncaj nyob ntawm nws xub ntiag tas peb sid. 76 Hos koj, me tub, luag yuav hu koj ua Leej Nyob Siab tus yaj saub. Koj yuav mus tom Huab Tais hauv ntej, koj yuav npaj nws txoj kev. 77 Koj yuav qhia nws haiv neeg paub txoj kev cawm, uas tawm ntawm txoj kev zam txhaum los. 78 Peb tus Tswv Ntuj lub siab hlub mos nyoos, nws xa lub hnub saum txheej siab tuaj xyuas peb. 79 Nws kaj cov neeg zaum hauv qhov tsaus ntuj thiab cov nyob hauv kev tuag tus duab ntxoo. Nws hwj peb txhais taw mus taug txoj kev thaj yeeb."

**Mim** 22nd December 2015, 11:01 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°23

Re: COV ZAJ NYEEM NRUAB LIS PIAM XYOO II, 2015-2016

Post Mim 22nd December 2015, 11:01 am

Nram no kuv yuav tuaj tso cov zaj nyeem rau Hmo Yes Xus Yug los thiab rau hnub Yes Xus yug los huv si. Muaj plaub lub sij hawm ua tahj txi ntuj, thawj zaug yog Hnub Tsib yav tsaus ntuj zuag, zaum ob yog thaum ib tag hmo, zaum peb yog thaum kaj ntug txoog, thiab zaum plaub yog thaum yav sawv ntxov thaum nruab hnub.
Tiam sis peb yeej tsis siv tas cov zaj nyeem no, thiab peb kuj tsis ua plaub thaj txi ntuj li muaj tseg. Kuv tsuas yog tso kom peb tau nyeem txog xwb.
Qhov ntau peb tsuas ua ib thaj txi ntuj thaum tsaus ntuj zuag thiab ib thaj thaum yav sawv ntxov nruab hnub xwb. Cov zaj nyeem mas nyob ntawm yus tus txiv plig xaiv saib nws nyiam kom nyeem zaj twg xwb. Nyob li peb mas peb nyiam siv cov zaj nyeem thaum ib tag hmob ntau xwb. Peb siv cov zaj nyeem ntawd rau hmo tsaus ntuj thiab rau thaum yav nruab hnub sawv ntxov tib si.

HMO 24 LUB 12 HLIS 2015

HMO YES XUS YUG LOS - Thaj Txi Ntuj Tsaus Ntuj

Zaj Nyeem Ib: HIS XAIS 62: 1-5

1 Vim Xis Yoos, kuv yuav tsis nyob ntsiag to, vim Yes Lus Xas Les, kuv yuav
tsis nyob twj ywm, mus txog lub caij nws txoj kev zoo tawm plaws xws li
qhov kaj ntug, nws txoj kev yeej tawm plaws xws li ib teg tsau cig cig.
2 Cov kuj cuab yuav pom koj txoj kev zoo, tas cov vaj huv si yuav pom
koj lub hwj chim. Koj yuav muaj ib lub npe tshiab,
HUAB TAIS lub ncauj yuav tis rau koj.
3 Koj yuav zoo li ib lub mom teev kub muaj hwj chim nyob hauv HUAB
TAIS tes, zoo li ib lub kaus mom ua vaj nyob hauv koj tus Tswv Ntuj xib teg.
4 Luag yuav tsis hais ntxiv txog koj tias : "Tus luag tso pov tseg;" koj yuav
hu ua : "Kuv lub chaw zoo siab;" koj thaj av yuav hu ua:
"Nkauj nyab tshiab." Vim koj yog HUAB TAIS chaw zoo siab,
nws muab koj thaj av yuav ua nws tus nkauj nyab tshiab.
5 Xws li ib tug nraug xwb mus yuav ib tug nkauj xwb,
tus tsim koj yuav qaws koj ua nws txij nkawm;
Koj yuav yog koj tus Tswv Ntuj chaw zoo siab,
xws li tus nkauj nyab yog nraug vauv
lub chaw sov siab zoo siab.

NPN: 89: 4-5, 16-17, 27+29

Txais: (2a) Kuv yuav hu nkauj mus li cav txog HUAB TAIS lub siab zoo.

Kuv tau cog ib lo lus nrog tus kuv xaiv,
kuv tau cog lus khov rau kuv tus tub txib Das Vis tias :
Kuv yuav tsa koj caj ces kom nyob ruaj mus li,
kuv yuav txhim ib lub theej kiab rau koj zaum tiam dhau tiam.

Txais: (2a) Kuv yuav hu nkauj mus li cav txog HUAB TAIS lub siab zoo.

Hmoov zoo rau Haiv neeg uas paub lub suab qw zoo siab;
Koj lub ntsej muag yuav ci kaj lawv txoj kev.
Lawv hnov koj lub npelawv yuav dhia zoo siab tas hnub.
Koj txoj kev ncaj yuav tsa lawv nyob rau qhov siab.

Txais: (2a) Kuv yuav hu nkauj mus li cav txog HUAB TAIS lub siab zoo.

Nws yuav hu kuv tias : "Koj yog kuv txiv,
Kuv tus Tswv Ntuj, kuv Phab Tsua, tus cawm kuv."
Kuv yuav hlub nws mus li,
Kuv lo lus kuv nrog nws cog yuav nyob ruaj khov.

Txais: (2a) Kuv yuav hu nkauj mus li cav txog HUAB TAIS lub siab zoo.

Zaj Nyeem Ob: HAUJ LWM 13: 16-17, 22-25

Thaum Paj Lug mus txog As Nthias Kias
nyob Pis Xis Dias teb, nws mus hauv lub tsev txoos,
16 nws sawv, nws tsa tes, thiab nws hais tias : "Kwv tij His Xas Lais,
thiab nej cov uas hwm Tswv Ntuj sawv daws, nej mloog.
17 Tus Tswv Ntuj saib peb haiv neeg, tus Tswv Ntuj saib His Xas Lais,
nws xaiv peb cov yawg koob thaud. Lub caij peb haiv neeg khuam
nyob Hais Nkws Tos teb, Tswv Ntuj ua kom peb haiv neeg huam vam.
Tiam sis nws tso nws lub zog tuaj pab lawv
tawm ntawm lub teb chaws ntawd los.
22 Tswv Ntuj muab Xas Ws xyeeb pov tseg, Tswv Ntuj thiaj tsa Das Vis
ua lawv tus vaj. Tswv Ntuj ua pov thawj txog Das Vis tias :
"Kuv nrhiav tau Das Vis, Yes Xes tus tub. Nws yog tus neeg ntxim
kuv siab, nws yuav ua raws li kuv lub siab xav tas huv si."
23 Nyob hauv Das Vis cov xeeb ntxwv, Tswv Ntuj tsa
Yes Xus ua tus cawm neeg los pab His Xas Lais.
24 Zam xub tuaj ua ntej. Nws xub npaj kev rau Yes Xus yuav tuaj.
Nws tshaj rau haiv His Xas Lais kom lawv
sawv daws txais kab ke ntxuav thiab lees txhaum.
25 Thaum Zam ua nws txoj hauj lwm yuav tiav, nws hais tias :
"Kuv tsis yog tus uas nej xav. Tiam sis tus lawv kuv qab,
mas nyem no nws tuaj lawm. Tus ntawd mas
kuv tsis tsim nyog daws nws txoj hlua khau."

As Les Lus Yas

Txais: As les lus yas, as les lus yas.

Tag kis lub ntiaj teb txoj kev phem yuav raug rhuav pov tseg tas:
tus tuaj cawm lub sim ceeb yuav ua vaj tswj peb.

Txais: As les lus yas, as les lus yas.

Ntawv Moo Zoo: Zaj ntev: MT 1: 1-25

1 Phau ntawv qhia txog Yes Xus Pleev lub keeb,
uas yog Das Vis leej tub thiab yog Has Nplas Has leej tub :
2 Has Nplas Has yug Is Xas Has, Is Xas Has yug Yas Kos,
Yas Kos yug Yus Das thiab nws cov kwv tij.
3 Yus Das poj niam hu ua Thas Mas yug Fas Les thiab Ntxas Las.
Fas Les yug Es Xas Los, Es Xas Los yug As Las,
4 As Las yug As Mis Nas Das, As Mis Nas Das
yug Nas As Xoos, Nas As Xoos yug Xas Moos,
5 Xas Moos poj niam hu ua Las Has yug Npuag Oo, Npuag Oo
poj niam hu ua Luv yug Os Npes, Os Npes yug Yes Xes,
6 Yes Xes yug tus vaj Das Vis. Das Vis yuav
Us Lis tus poj niam, nws yug Xas Los Moos,
7 Xas Los Moos yug Los Npuag, Los Npuag
yug As Npias, As Npias yug As Xas,
8 As Xas yug Yos Xa Fas, Yos Xas Fas yug Yos Las, Yos Las yug Os Xias,
9 Os Xias yug Yos As Thas, Yos As Thas
yug As Kas, As Kas yug Es Xes Kias,
10 Es Xes Kias yug Mas Nas Xes, Mas Nas Xes
yug As Moos, As Moos yug Yos Xias,
11 Yos Xias yug Yes Kos Nias thiab Yes Kos Nias cov kwv tij.
Thaum ntawd yog lub caij raug txim nyob Npas Npis Los.
12 Dhau lub caij raug txim nyob Npas Npis Los lawm, Yes Kos Nias
yug Xas Las Thias, Xas Las Thias yug Ntxos Los Npas Npes,
13 Ntxos Los Npas Npes yug As Npis Yus,
As Npis Yus yug Es Lias Kis, Es Lias Kis yug As Ntxos,
14 As Ntxos yug Xas Dos, Xas Dos yug As Khis, As Khis yug Es Lis Us,
15 Es Lis Us yug Es Les As Ntxas, Es Les As Ntxas
yug Mas Thas, Mas Thas yug Yas Kos,
16 Yas Kos yug Yos Xes uas yog Mab Liab tus txiv.
Mab Liab yug Yes Xus, uas luag hu nws ua Leej Pleev.
17 Tas cov tiam neeg huv tib si : txij Has Nplas Has los txog Das Vis,
muaj kaum plaub tiam ; txij Das Vis los txog lub caij raug txim
nyob Npas Npis Los, muaj kaum plaub tiam ; txij lub caij raug txim nyob
Npas Npis Los txog lub caij Leej Pleev tuaj, muaj kaum plaub tiam.
18 Yes Xus Pleev lub keeb chiv zoo li no : Mab Liab uas yog Yes Xus niam,
lawv muab qhaib rau Yos Xes lawm. Thaum nkawd tseem tsis tau
los nyob ua ke, Leej Ntuj Plig Ntshiab ua kom Mab Liab xeeb tub.
19 Yos Xes uas yog Mab Liab tus txiv, yog ib tug neeg ncaj,
nws tsis xav kom zeej tsoom hais lus xaiv txog Mab Liab,
ces nws txiav siab nrauj Mab Liab twj ywm.
20 Thaum nws txiav siab nrauj li ntawd, Huab Tais tus Tshiab tawm los
ua npau suav rau nws, thiab hais rau nws tias : "Yos Xes, Das Vis leej tub,
koj txhob ntshai coj Mab Liab, koj tus poj niam, los nyob hauv
koj tsev. Yog Leej Ntuj Plig Ntshiab ua kom nws xeeb tub.
21 Nws yuav yug ib tug tub, koj yuav tis nws npe hu ua Yes Xus :
vim nws yuav cawm nws haiv neeg ntawm lawv cov txhaum."
22 Tas ib puas tsav yam ntawd tshwm sim raws li lo lus
uas Huab Tais kom tus yaj saub xub hais tseg tias :
23 Tus ntxhais nkauj xwb yuav xeeb tub, nws yuav yug ib tug tub. Luag
yuav tis nws npe hu ua Es Mas Nus Es, txhais tias : "Tswv Ntuj nrog peb nyob".
24 Thaum Yos Xes tsim los, nws ua raws li Huab Tais tus Tshiab qhia rau nws :
nws coj nws poj niam los nyob hauv nws tsev.
25 Nws tsis paub nws poj niam mus txog hnub Mab Liab yug
Mab Liab tus tub. Nws tis tus tub npe hu ua Yes Xus.

Los Zaj luv : MT 1:18-25

18 Yes Xus Pleev lub keeb chiv zoo li no : Mab Liab uas yog Yes Xus niam,
lawv muab qhaib rau Yos Xes lawm. Thaum nkawd tseem tsis tau
los nyob ua ke, Leej Ntuj Plig Ntshiab ua kom Mab Liab xeeb tub.
19 Yos Xes uas yog Mab Liab tus txiv, yog ib tug neeg ncaj,
nws tsis xav kom zeej tsoom hais lus xaiv txog Mab Liab,
ces nws txiav siab nrauj Mab Liab twj ywm.
20 Thaum nws txiav siab nrauj li ntawd, Huab Tais tus Tshiab tawm los
ua npau suav rau nws, thiab hais rau nws tias : "Yos Xes, Das Vis leej tub,
koj txhob ntshai coj Mab Liab, koj tus poj niam, los nyob hauv
koj tsev. Yog Leej Ntuj Plig Ntshiab ua kom nws xeeb tub.
21 Nws yuav yug ib tug tub, koj yuav tis nws npe hu ua Yes Xus :
vim nws yuav cawm nws haiv neeg ntawm lawv cov txhaum."
22 Tas ib puas tsav yam ntawd tshwm sim raws li lo lus
uas Huab Tais kom tus yaj saub xub hais tseg tias :
23 Tus ntxhais nkauj xwb yuav xeeb tub, nws yuav yug ib tug tub. Luag
yuav tis nws npe hu ua Es Mas Nus Es, txhais tias : "Tswv Ntuj nrog peb nyob".
24 Thaum Yos Xes tsim los, nws ua raws li Huab Tais tus Tshiab qhia rau nws :
nws coj nws poj niam los nyob hauv nws tsev.
25 Nws tsis paub nws poj niam mus txog hnub Mab Liab yug
Mab Liab tus tub. Nws tis tus tub npe hu ua Yes Xus.

Last edited by Mim on 23rd December 2015, 1:28 pm; edited 1 time in total

**Mim** 23rd December 2015, 8:59 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°24

Re: COV ZAJ NYEEM NRUAB LIS PIAM XYOO II, 2015-2016

Post Mim 23rd December 2015, 8:59 am

HMO 24-25 LUB 12 2015

THAJ TXI NTUJ THAUM IB TAG HMO

Zaj Nyeem Ib: HIS XAIS 9:1-6

1 Tsoom neeg uas maub hauv qhov tsaus ntuj lawv pom ib qho pom kev loj.
Muaj ib qho pom kev ci tuaj rau saum cov nyob hauv lub teb chaws tsaus ntuj nti.
2 Koj tau ua kom lawv muaj kev zoo siab ntau, kom lawv kev zoo siab loj ntxiv.
Lawv zoo siab nyob ntawm koj xub ntiag, ib yam li cov sau qoob loo zoo siab,
ib yam li co tub rog sib faib cov toob xib lawv txeeb tau lawv dhia lom zem.
3 Vim tus quab uas tsuam lawv, tus ntas uas nyob saum lawv xub pwg,
tus zov cov neeg nyob txim rab qws, koj muab dam pov tseg,
xws li thaud lub caij cov Mas Dias nyob.
4 Vim tas cov khau tub rog, tas cov tsho lo ntshav,
nplaim taws yuav kub, hluav taws yuav hlawv ua hluav.
5 Vim muaj ib tug me nyuam yug los rau peb lawm, Ntuj pub ib tug tub rau peb,
thiab txoj kev tswj fwm poob rau saum nws xub pwg. Luag tis nws npe hu ua :
tus Pab Tswv Yim Zoo Tas Nrho, tus Tswv Ntuj Zog Loj,
Leej Txiv Mus Li, tus Vaj Txheeb Pub Kev Thaj Yeeb.
6 Nws kev tswj fwm ri mus deb thiab nyob thaj yeeb lug tsis muaj caij kawg;
nws zaum saum Davis lub theej kiab, nws txoj kev ua vaj muaj hwj huam loj,
vim nws tsa kom nyob ruaj nreb hauv txoj kev txiav txim ncaj thiab txoj kev ncaj ncees,
txij no mus txog ib txhiab ib txhis. Tus HUAB TAIS Xas Npas Os
nws lub siab hlub muaj khib yuav ua tej ntawd.

NPN: 96: 1-2, 2-3, 11-12, 13

Txais: (Lk 2:11) Hnub no tus Cawm peb yug los lawm, nws yog Leej Pleev, peb tus Huab Tais.

Nej hu ib zag nkauj tshiab rau HUAB TAIS,
tas lub ntiaj teb, nej hu nkauj rau HUAB TAIS;
Nej hu nkauj rau HUAB TAIS,
nej foom lus zoo rau nws lub npe!

Txais: (Lk 2:11) Hnub no tus Cawm peb yug los lawm, nws yog Leej Pleev, peb tus Huab Tais.

Hnub dhau hnub, nej tshaj nws txoj kev cawm.
Nej ceeb toom txog nws lub koob meej rau tsoom kuj cuab paub,
piav nws cov dej num nto moo rau tsoom haiv neeg !

Txais: (Lk 2:11) Hnub no tus Cawm peb yug los lawm, nws yog Leej Pleev, peb tus Huab Tais.

Kom lub ntuj zoo siab, lub ntiaj teb dhia lom zem,
kom cov dej ntuj thiab cov tsiaj uas nyob hauv luag ua suab ntas ntua !
Kom cov liaj cov teb thiab txhua yam nyob hauv zoo siab,
kom txhua hom xyoob ntoo tom hav zoov nqua suab lom zem

Txais: (Lk 2:11) Hnub no tus Cawm peb yug los lawm, nws yog Leej Pleev, peb tus Huab Tais.

Lawv yuav zoo siab ntawm HUAB TAIS xub ntiag, vim nws tuaj lawm,
nws tuaj tswj kav lub ntiaj teb,
nws yuav tswj kav lub sim ceeb raws kev haum pheej,
nws yuav tswj cov haiv neeg nyob hauv txoj kev ncaj.

Txais: (Lk 2:11) Hnub no tus Cawm peb yug los lawm, nws yog Leej Pleev, peb tus Huab Tais.

Zaj Nyeem Ob: TIS TOS 2:11-14

Cov hmov tshua,
11 Tswv Ntuj lub txiaj ntsim tawm tuaj lawm, nws tuaj muab kev cawm rau txhua leej txhua tus.
12 Lub txiaj ntsim ntawd qhia peb sawv daws kom tso tus yam ntxwv tsis coj peb
mus cuag Tswv Ntuj pov tseg thiab tso txoj kev ntshaw tej yam hauv ntiaj teb no pov tseg;
kom ua ib lub neej coj tus cheem peb lub siab, coj ncaj, thiab hwm Ntuj rau tiam neej no,
13 uas peb tos thiab vam ntsoov yuav tau txais tej txiaj ntsim koob hmoov uas hnub peb tus
Tswv Ntuj loj, thiab tus cawm seej Yes Xus Pleev yuav tshwm los muaj hwj chim rau peb pom xyeem.
14 Nws muab nws rau luag ntes, kom tau txhiv peb ntawm txhua txoj kev phem
thiab tau ntxuav ib haiv neeg kom huv los ua nws tug,
uas yog haiv neeg muaj kev kub siab ua cov dej num zoo nkaus xwb.

As Les LusYas: LK 2:10-11

Txais: As les lus yas, as les lus yas.

Kuv tuaj tshaj ib lub moo zoo rau nej uas yuav ua kom neeg zoo siab:
Hnub no, tus Cawm peb yug los lawm, nws yog Leej Pleev, peb tus Huab Tais.

Txais: As les lus yas, as les lus yas.

Ntawv Moo Zoo: LK 2:1-14

1 Lub zwj ceeb ntawd, vaj ntxwv Xes Ntxas Aus Nkus Tus tshaj
lus ceeb toom kom tas ntiaj teb txheeb tsoom mej hwm.
2 Thaum txheeb tsoom mej hwm thawj zaug no, yog lub caij Kis Lis Nyus ua nom tswj Xis Lias teb.
3 Txhua leej txhua tus sawv kev mus, nyias mus sau nyias npe hauv nyias lub nroog.
4 Yos Xes kuj sawv kev hauv lub nroog Nas Xas Les,
xeev Nkas Lis Lais mus pem Das Vis lub nroog hu ua Npes Les Hes, nyob hauv xeev Yus Das,
vim Yos Xes yog Das Vis tsev neeg thiab Das Vis caj ces.
5 Yos Xes xav muab Mab Liab lub npe sau nrog nws lub npe,
vim Mab Liab yog tus nws qhaib thiab Mab Liab cev hnyav lawm.
6 Thaum nkawd nyob Npes Les Hes, txog lub caij Mab Liab yuav daws cev.
7 Nws yug nws tus tub, nws muab ntaub qhwv, thiab muab tso pw hauv ib lub dab nyuj,
vim lub tsev txais qhua tsis muaj chaw rau nkawd so. 8 Nyob thaj tsam ntawd, muaj ib co neeg zov yaj.
Lawv nyob nruab teb. Hmo ntuj, lawv nyob zov lawv pab yaj.
9 Huab Tais tus Tshiab tawm los rau lawv pom, Huab Tais lub hwj chim ci dawb paug ncig lawv, lawv ntshai kawg.
10 Tus Tshiab hais rau lawv tias : "Nej txhob ntshai, vim kuv tuaj xa
ib tsab xov zoo uas yuav ua kom nej zoo siab thiab ib tsoom neeg zoo siab.
11 Hnub no, nyob hauv Das Vis lub nroog, tus Cawm nej yug los lawm, nws yog Leej Pleev, thiab yog Huab Tais.
12 Lub cim yuav ua kom nej paub yog lub cim no : nej yuav pom ib tug
me nyuam mos qhwv ntaub pw hauv ib lub dab nyuj."
13 Ib sij huam, txawm muaj ib pab Tshiab coob coob tuaj nrog tus Tshiab xa xov cav lus zoo txog Tswv Ntuj tias :
14 "Nyob saum cov txheej ntuj siab, Tswv Ntuj nto meej nto moo, nyob ntiaj teb,
tsoom neeg Tswv Ntuj nyiam, nyob thaj yeeb.

**Mim** 23rd December 2015, 12:24 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°25

Re: COV ZAJ NYEEM NRUAB LIS PIAM XYOO II, 2015-2016

Post Mim 23rd December 2015, 12:24 pm

TIM 25 LUB 12 HLIS 2015

HNUB RAU YES XUS YUG LOS - THAJ TXI NTUJ THAUM KAJ NTUG

Zaj Nyeem Ib: HIS XAIS 62: 11-12

11 HUAB TAIS tshaj lus kom nrov mus txog npoo ntiaj teb tias:
"Nej hais rau tus me ntxhais Xis Yoos li no, tus cawm koj tuaj lawm. Ntawm no yog nws cov khoom plig uas nws nqa tuaj,
cov paj tshab uas nws nqa nrog nraim nws "
12 Luag yuav hu lawv ua : "Haiv neeg Ntshiab,
cov neeg uas HUAB TAIS txhiv." Luag yuav hu koj tias :
"Muaj neeg coob tuaj xyuas,” lub tsheej uas Ntuj tsis tso pov tseg."

NPN: 97: 1+ 6, 11-12

Txais: Ib qho pom kev ci tuaj rau peb hnub no:
Huab Tais yug los vim peb.

HUAB TAIS ua vaj, kom lub ntiaj teb hom khaj,
kom tas cov pov txwv dhia zoo siab.
Yim txheej cuaj txheej ntuj tau tshaj nws txoj kev ncaj,
Thiab tas txhua haiv neeg tau pom nws lub hwj chim :

Txais: Ib qho pom kev ci tuaj rau peb hnub no: Huab Tais yug los vim peb.

Qhov pom kev sawv los ci rau tus neeg ncaj ;
kev kaj siab sawv los ci rau cov siab dawb.
Cov neeg ncaj, nej zoo siab nyob hauv HUAB TAIS,
nej ua tsaug rau nws lub npe ntshiab.

Txais: Ib qho pom kev ci tuaj rau peb hnub no: Huab Tais yug los vim peb.

Zaj Nyeem Ob: TIS TOS 3: 4-7

4 Tab sis, hnub uas tus Tswv Ntuj cawm peb
qhib nws lub siab zoo tawm los thiab nws txoj kev nyiam
tsoom sid tawm los rau qhov muag pom xyeem,
5 mas nws tsis tshuaj tias peb puas tau
ua cov dej num ncaj los tsis tau.
Nws tsuas mloog nws lub siab khuv leej neeg.
Nws cawm peb nyob hauv cov dej ntxuav neeg,
kom peb rov yug los tshiab, thiab rov tshiab
tuaj nyob hauv Leej Ntuj Plig Ntshiab.
6 Tswv Ntuj tso Leej Ntuj Plig los nyob puv hauv peb ntau kawg, nyob hauv Yes Xus Pleev, tus cawm peb.
7 Leej Pleev lub txiaj ntsim ua kom peb ntshiab tuaj,
ces peb tso siab tau tias peb yuav txais txoj sia
nyob mus li los ua peb lub cuab tam.

As Les Lus Yas: LK 2: 14

Txais: As les lus yas, as les lus yas.

Tswv Ntuj nto meej nto moo nyob saum cov txheej ntuj siab,
nyob ntiaj teb, tsoom neeg Tswv Ntuj nyiam, nyob thaj yeeb.

Txais: As les lus yas, as les lus yas.

Ntawv Moo Zoo: LK 2: 15-20

15 Thaum cov Tshiab tso cov zov yaj tseg rov mus
saum ntuj lawm, cov zov yaj sib yaum tias : "Peb mus
Npes Les Hes, mus xyuas yam xwm uas
Huab Tais tuaj qhia peb ntawd saib."
16 Ces lawv maj zeeg tuaj mus. Lawv pom Mab Liab thiab
Yos Xes, thiab pom tus me nyuam mos pw hauv dab nyuj.
17 Thaum lawv pom li ntawd, lawv piav lo lus uas tus Tshiab
tau qhia rau lawv txog tus me nyuam.
18 Tus twg hnov, tus twg kuj qhuas txog tej lus
uas cov zov yaj hais rau lawv.
19 Hos Mab Liab, nws ua tib zoo khaws
tej lus no huv si cia rau nruab siab.
20 Cov zov yaj rov mus tsev, lawv foom koob meej
thiab cav lus zoo txog Tswv Ntuj vim tas txhua yam
lawv tau pom thiab tau hnov raws li Ntuj qhia lawv.