COV ZAJ NYEEM NRUAB LIS PIAM XYOO II, 2015-2016

TIM 6 LUB 9 HLIS 2016

Hnub Peb Lis Piam Nees Nkaum Peb Nruab Xyoo C Nruab Lis Piam Xyoo II

Zaj Nyeem Ib: 1 KLN 6: 1-11

1 Thaum nej ib tug nrog lwm tus muaj plaub muaj ntug, cas nws muaj cuab kav mus hais plaub tim cov neeg tsis ncaj, ua cas tsis mus cuag cov neeg ntshiab ? 2 Nej tsis paub tias cov yuav txiav txim rau lub ntiaj teb yog cov ntshiab no lod? Yog nej twb yuav txiav txim rau lub ntiaj teb, ua cas nej ho tsis tsim nyog yuav txiav txim rau tej yam me ? 3 Nej tsis paub tias peb yuav txiav txim rau Ntuj cov Tshiab no lod ? Yog li peb haj yam yuav txiav txim tau rau tej yam nyob saum yaj no. 4 Ua cas, thaum nej muaj plaub muaj ntug, nej yuav mus cuag tej tus neeg uas lub Koom Txoos tsis nyiam, kom lawv txiav txim rau nej? 5 Kuv hais tej no rau nej kom saib nej puas txaj muag. Nyob hauv nej txawm tsis muaj ib tug neeg thoob tsib, uas yuav txiav txim tau rau cov kwv tij li lod ? 6 Nej yeem cia tus kwv mus kom tus tij rau tom tsoom neeg tsis ntseeg puas yog? 7 Li cas los thaum nej sib ua plaub ua ntug ib leeg rau ib, yog nej swb rau kev phem lawm ! Ua cas nej tsis ua tiag nyiaj cia luag ua tsis ncaj rau nej? Thiab cia luag dag nej ? 8 Tab sis nej yog cov ua tsis ncaj thiab yog cov dag, tseem yog ua rau nej cov kwv tij thiab xwb. 9 Nej tsis paub tias cov neeg tsis ncaj yuav tsis txais Tswv Ntuj lub Ceeb Tsheej ua lawv tug no lod ? Nej txhob xav yuam kev ! Vim cov neeg nyiam sib dee, cov teev dab teev mlom, cov zes luag txij luag nkawm, cov ua txiv ntiav niam ntiav, cov txiv neej nrog txiv neej ua dev ua npua, 10 cov ua tub sab tub nyiag, cov ntshaw tau ntau, cov quav dej quav cawv, cov neeg dag liam rau luag, cov noj luag, lawv puav leej yuav tsis tau txais Tswv Ntuj lub Ceeb Tsheej los ua lawv tug. 11 Yav tas los, nej qee leej tau ua li tau hais ntawd thiab. Tab sis, nyem no, nej ntxuav nej tas lawm, mas nej ntshiab tuaj lawm. Huab Tais Yes Xus Pleev lub npe thiab peb tus Tswv Ntuj Leej Tswv Yim ua kom nej ncaj ncees tuaj lawm.

NPN 149: 1B-2, 3-4, 5-6A + 9B

Txais: (4a) Huab Tais zoo siab nyob hauv nws haiv neeg.

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav zoo siab nyob hauv tus uas tsim lawv,
Xis Yoos cov me nyuam yuav luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej ua zam npua cov neeg me.

Txais: (4a) Huab Tais zoo siab nyob hauv nws haiv neeg.

Cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Cov uas ntseeg nws lawv lub koob meej yog li no. As les lus yas.

Txais: (4a) Huab Tais zoo siab nyob hauv nws haiv neeg.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: kuv xaiv nej hauv lub ntiaj teb los,
kom nej mus txi ib co txiv uas yuav nyob ruaj,

Txais: As les lus yas, as les lus yas.

Ntawv Moo Zoo: LK 6: 12-19

12 Yes Xus nce mus teev Ntuj pem roob, nws teev Tswv Tswv Ntuj ib hmos. 13 Thaum kaj ntug, nws hu nws cov thwj tim los, nws xaiv kaum ob leeg, nws hu lawv ua Hauv Paus Xa Lus. 14 Yog Xis Moos, uas nws tis npe hu ua Pob Zeb, As Nres, Pob Zeb tus kwv, Yas Kos, Zam, Fis Lis Pos, Npas Tos Los Mas Yos, 15 Mas Tais, Tos Mas, Yas Kos uas yog As Fas Yos tus tub, Xis Moos Siab Kub, 16 Yus Das, Yas Kos tus tub, thiab Yus Das Kas Lis Yaus, uas yog tus ntxeev siab.
17 Yes Xus nrog cov Hauv Paus Xa Lus nqes los, nws sawv saum ib qho chaw tiaj. Muaj Yes Xus ib tsoom thwj tim thiab ib pab neeg coob kawg tuaj ntawm xeev Yus Das, ntawm Yes Lus Xas Les, ntawm ntug dej ntuj Tws Los thiab Xis Doos tuaj. 18 Lawv tuaj mloog Yes Xus thiab thov nws kho lawv cov mob. Cov uas raug tej tus dab tsis huv tsim lawv, puav leej rov zoo tas. 19 Ces tas tsoom sid nrhiav kom tau kev chwv Yes Xus, vim muaj ib lub zog tawm hauv nws los kho sawv daws zoo tas huv si.

TIM 7 LUB 9 HLIS 2016

Hnub Plaub Lis Piam Nees Nkaum Peb Xyoo C Nruab Lis Piam Xyoo II

Zaj Nyeem Ib: 1 KLN 7: 25-31

25 Hais txog cov ntxhais nkauj xwb, kuv tsis muaj Huab Tais ib lo lus qhia txog, tab sis kuv yuav hais ib lo lus raws li kuv xav vim nyob hauv Huab Tais txoj kev khuv leej kuv yog ib tug neeg nej ntseeg tau. 26 Kuv xav tias, vim lub zim txwv no muaj kev ntxhov hnyo, mas qhov zoo yog nej yuav tsum coj raws li txoj kev nej tau xaiv lawm. 27 Yog koj muaj poj niam lawm, mas koj txhob nrhiav kev ncaim ntawm koj tus poj niam. Hos yog koj tsis tau muaj poj niam, mas koj txhob nrhiav yuav poj niam. 28 Tab sis yog koj ho yuav poj niam los koj tsis ua txhaum, thiab yog ib tus ntxhais nkauj xwb yuav txiv, los nws kuj tsis txhaum, tab sis vim cov yuav poj niam yuav txiv yuav paub kev txom nyem nyob hauv lawv lub neej ntiaj teb, mas kuv xav pab lawv kom txhob raug txoj kev ntawd xwb. 29 Cov kwv tij, kuv hais rau nej tias, tsis tshuav zim txwv ntev lawm. Li ntawd mas cov muaj poj niam yuav coj lub neej xws li lawv tsis muaj poj niam, 30 Cov neeg quaj ntsuag yuav coj xws li lawv tsis muaj chaw quaj, cov muaj kev lom zem, yuav ua xws li lawv tsis lom zem, cov muas tau cuab yeej cuab tam yuav ua zoo li lawv tsis muaj dab tsi ua lawv tug li, 31 cov uas siv lub ntiaj teb yuav ua zoo li lawv tsis siv. Vim ntiaj teb uas zoo xws li qhov peb paub no yuav dua mus sai sai.

NPN 45: 11-12, 14-15, 16-17

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Me ntxhais, koj mloog mog ! Koj ntsia, koj tig ntsej los mloog :
Koj txhob nco koj haiv neeg, koj niam koj txiv lub tsev ntxiv.
Tus vaj qaug siab hlo nyiam koj txoj kev zoo nkauj !
Nws yog koj tus huab tais, koj yuav txhos caug pe hawm nws.

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Tus ntxhais vaj nkag los nws muaj hwj chim kawg,
Nws hnav ib ce zam yog tiab paj ntaub ntos xov kub.
Nws hnav zam paj ntaub tuaj ces lawv coj nws mus cob rau tus vaj;
ib pab nkauj xwb lawv nws qab, luag coj lawv mus rau tus vaj thiab.

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Lawv ua ib pab muaj kev zoo siab sib law sib liag,
chaws mus hauv tus vaj lub tuam tsev.
Koj cov tub yuav los sawv phaj txiv chaw,
koj yuav tsa lawv ua vaj txheeb kav ntiaj teb

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

As Les Lus Yas: LK 6: 23AB

Txais: As les lus yas, as les lus yas.

Nej yuav zoo siab, nej yuav dhia hom khaj,
vim nej yuav tau txais koob haum loj nyob saum ntuj.

Txais: As les lus yas, as les lus yas.

Ntawv Moo Zoo: LK 6: 20-26

20 Yes Xus tsa muag ntsia nws cov thwj tim, nws hais tias : "Nej cov uas yog neeg pluag, nej txoj hmoov zoo, vim Tswv Ntuj lub Ceeb Tsheej yog nej tug. 21 Nej cov uas nyem no nej tshaib, nej txoj hmoov zoo, vim nej yuav tau noj txaus siab. Nej cov uas nyem no nej quaj, nej txoj hmoov zoo, vim nej yuav luag. 22 Thaum muaj neeg ntxub nej, thaum luag ntiab nej, los luag cem nej, los xyav lus phem txog nej lub npe vim Neeg Leej Tub, mas nej txoj hmoov zoo. 23 Hnub ntawd, nej yuav zoo siab, nej yuav dhia hom khaj, vim nej yuav tau txais koob haum loj nyob saum ntuj. Txheej thaud, lawv cov yawg koob kuj tau ua li ntawd rau cov Yaj Saub tiab.”
24 “Hos nej cov uas yog neeg nplua nuj, mas nej txoj hmoov phem, vim nej twb txais kev nplij nej lawm. 25 Nej cov uas nyem no tau noj tsau, nej txoj hmoov phem, vim nej yuav tshaib. Nej cov uas nyem no nej luag, nej txoj hmoov phem, vim nej yuav quaj thiab yuav nyiav. 26 Thaum zeej tsoom cav lus zoo txog nej, mas nej txoj hmoov phem. Txheej thaud, lawv cov yawg koob kuj ua li ntawd rau cov yaj saub cuav thiab.

TIM     8    LUB    9    HLIS     2016

Hnub Tsib Lis Piam Nees Nkaum Peb Nruab Xyoo C nruab Lis Piam Xyoo II  

Hwm Hnub Niam Mab Liab Yug Los  


Zaj Nyeem Ib:     Mis Kes  5:   1-4a

Huab Tais hais tias:
1 Npes Les Hes, Es Fas Tas, koj yog lub zos me dua cov tsis phim nyob hauv cov xeem Yus Das. Tus yuav kav His Xas Lais yuav tawm ntawm koj los rau kuv. Nws lub keeb yeej nyob puag thaum ntxov ub los lawm, nws los ntawm puag txheej thaud los. 2 Yog vim li ntawd mas Huab Tais yuav tso lawv pov tseg ib ntus, mus txog lub caij uas tus yuav yug me nyuam yug tau nws tus me nyuam lawm. Ces nws cov kwv tij seem yuav rov los nyob nrog His Xas Lais cov me nyuam. 3 Nws  yuav sawv ruaj nreb, nws yuav zov nws pab yaj nog zaub, nyob HUAB TAIS lub hwj huam,  nyov hauv Huab Tais nws tus Tswv Ntuj lub npe muaj hwj chim. Ces lawv yuav nyob ruaj vim thaum ntawd nws yuav nto moo loj mus txog tim npoo ntiaj teb,  4 thiab nws yuav yog tus muab kev thaj yeeb.

Los:   Los Mas  8:   28-30

Cov kwv tij,
28 Peb paub tias Tswv Ntuj nrog cov uas nyiam nws ua txhua yam hauj lwm kom lawv tau qhov zoo, raws li nws hu lawv thiab raws qhov nws npaj rau lawv. 29 Cov neeg uas nws ib txwm npaj hu lawv lawm, nws kuj pub txoj hmoov rau lawv kom lawv yoog tau raws li nws Leej Tub tus duab,  ces nws Leej Tub thiaj ua tij, tus xub yug dua tas ib tsoom kwv coob coob. 30 Cov uas Tswv Ntuj ib txwm npaj hu, mas nws hu lawv; cov uas nws hu, mas nws ua kom lawv ncaj tuaj; cov uas nws ua kom ncaj tuaj, mas nws kuj muab hwj chim rau lawv thiab.

NPN      13:   6ab, 6c

Txais:    (HX  61:  10)   Kuv txaus siab thiab zoo siab nyob hauv Huab Tais.    

Vim kuv tso siab lug rau koj txoj kev hlub ruaj ,
Thov cia kuv lub siab zoo siab hlo nyob hauv koj txoj kev cawm.    

Txais:    (HX  61:  10)   Kuv txaus siab thiab zoo siab nyob hauv Huab Tais.

Cia kuv hu nkauj cav txog HUAB TAIS tias:
“Nws tau ua zoo kawg rau kuv.”

Txais:    (HX  61:  10)   Kuv txaus siab thiab zoo siab nyob hauv Huab Tais.

As Les Lus yas

Txais:   As les lus yas, as les lus yas.

Koj tau txoj hmoov zoo, Nkauj Dawb Huv Mab Liab,
Tsim nyog sawv daws qhuas koj;
Lub hnub pub txoj kev ncaj tawm hauv koj tuaj,
yog Leej Pleev peb tus Tswv Ntuj.

Txais:   As les lus yas, as les lus yas.

Ntawv Moo Zoo:     Mt  1:   1-16, 18-23

1 Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub : 2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij. 3 Yus Das poj niam hu ua Thas Mas yug Fas Les thiab Ntxas Las. Fas Les yug Es Xas Los, Es Xas Los yug As Las, 4 As Las yug As Mis Nas Das, As Mis Nas Das yug Nas As Xoos, Nas As Xoos yug Xas Moos, 5 Xas Moos poj niam hu ua Las Has yug Npuag Oos, Npuag Oos poj niam hu ua Luv yug Os Npes, Os Npes yug Yes Xes, 6 Yes Xes yug tus vaj Das Vis. Das Vis yuav Us Lis tus poj niam, nws yug Xas Los Moos, 7 Xas Los Moos yug Los Npuag, Los Npuag yug As Npias, As Npias yug As Xas, 8 As Xas yug Yos Xa Fas, Yos Xas Fas yug Yos Las, Yos Las yug Os Xias, 9 Os Xias yug Yos As Thas, Yos As Thas yug As Kas, As Kas yug Es Xes Kias, 10 Es Xes Kias yug Mas Nas Xes, Mas Nas Xes yug As Moos, As Moos yug Yos Xias, 11 Yos Xias yug Yes Kos Nias thiab Yes Kos Nias cov kwv tij. Thaum ntawd yog lub caij raug txim nyob Npas Npis Los. 12 Dhau lub caij raug txim nyob Npas Npis Los lawm, Yes Kos Nias yug Xas Las Thias, Xas Las Thias yug Ntxos Los Npas Npes, 13 Ntxos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos, 14 As Ntxos yug Xas Dos, Xas Dos yug As Khis, As Khis yug Es Lis Us, 15 Es Lis Us yug Es Les As Ntxas, Es Les As Ntxas yug Mas Thas, Mas Thas yug Yas Kos, 16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
18 Yes Xus Pleev lub keeb chiv zoo li no : Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. 20 Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : "Tswv Ntuj nrog peb nyob".

Los:   MT  1:   18-23

18 Yes Xus Pleev lub keeb chiv zoo li no : Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. 20 Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23  “Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es,”  txhais tias : ‘Tswv Ntuj nrog peb nyob.’

TIM 9 LUB 9 HLIS 2016

Hnub Rau Lis Piam Nees Nkaum Peb Nruab Xyoo C Nruab Lis Piam Xyoo II

Hwm LN Peter Claver, ua Leej Choj

Zaj Nyeem Ib: 1 KLN 9: 16-19, 22B-27

16 Tsis yog vim kuv tshaj lub Moo Zoo ces kuv txawm tau kev khav, vim tshaj lub Moo Zoo yog kuv tes dej num uas kuv yuav tsum tau ua, yog kuv tsis tshaj, mas kuv yuav tau hmoov phem. 17 Yog kuv txaus siab hlo tshaj lub Moo Zoo, mas kuv yuav muaj cai tau txais koob haum ; tab txawm kuv tsis txaus siab, los yeej yog txoj hauj lwm uas Ntuj muab rau kuv lawm. 18 Li ntawd mas kuv yuav txais koob haum dab tsi ? Kuv cov koob haum yog pub lub Moo Zoo dawb rau luag, tsis txhob noj tus nqe zog uas kuv muaj cai noj vim lub Moo Zoo. 19 Kuv yog ib tug neeg twj lij tsis zwm rau leej twg, tab sis kuv txhob txwm xaiv txoj kev ua sawv daws qhev, vim kuv xav yaum kom tau neeg coob li coob tau nrog kuv.
22 Kuv muab kuv ua txhua yam rau txhua leej txhua tus, vim kuv xav cawm kom tau ib txhia. 23 Kuv ua txhua yam rau lub Moo Zoo, kom kuv tau txais ib feem cuam ntawm lub Moo Zoo cov txiaj ntsim. 24 Nej twb paub tias cov neeg sib tw khiav nyob hauv ib lub tshav, sawv daws khiav, tiam sis tsuas muaj tib leeg yeej thiab tau paj tshab xwb, puas yog? Nej kav tsij khiav tiag kom nej yeej mog ! 25 Cov neeg sib tw txhob txwm yoo ntau yam; lawv ua li ntawd kom lawv yeej thiab tau ib co paj tshab txawj ploj; hos ntawm peb, peb kuj yuav yoo, kom peb tau ib co paj tshab tsis txawj ploj. 26 Li ntawd thaum kuv khiav, kuv tsis yog lam khiav dag; thaum kuv ntsuas zog tsis yog xws li ib tug neeg lam ntaus cua xwb. 27 Kuv quab thiab yuam kuv lub cev nruj tiag, vim nyob tsam thaum kuv qhuab qhia luag tej tas, kuv ho tsis tsim nyog txais paj tshab lawm.

NPN 84: 3, 4, 5-6, 12

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv tus plig ntshaw seev yees yuj plaws
rau HUAB TAIS cov tshav loog.
Kuv lub siab lub cev quaj hu
txog tus Tswv Ntuj muaj txoj sia.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Tab cov me noog ntxias nrhiav tau chaw nyob,
noog luv nrhiav tau zes puag nws cov me nyuam,
ntawm koj cov thaj txi ntuj, HUAB TAIS kav tsoom tshiab,
kuv tus vaj, kuv tus Tswv Ntuj!

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Cov neeg nyob hauv koj tsev lawv txoj hmoov zoo :
lawv tau kev cav txog koj mus li tsis tseg.
Cov uas saib koj yog lawv lub zog, lawv txoj hmoov zoo.
Lawv yim mus kev lawv lub zog yim loj tuaj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Vim HUAB TAIS Tswv Ntuj yog lub hnub, yog daim leem phiaj thaiv ;
nws pub txiaj ntsim thiab koob meej,
nws tsis tshem txoj koob hmoov
ntawm cov neeg taug txoj kev zoo mus.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

As Les Lus Yas: ZAM 17: 17B, 17A

Txais: As les lus yas, as les lus yas.

Huab Tais, koj los lus yog qhov tseeb,
thov koj muab peb cog rau hauv txoj kev tseeb.

Txais: As les lus yas, as les lus yas.

Ntawv Moo Zoo: LK 6: 39-42

39 Yes Xus hais dua ib zag paj lug li no : "Ib tug dig muag puas coj tau lwm tus dig muag kev ? Nkawd ob leeg yuav tsis ua ke mus poob qhov lod ? 40 Tus thwj tim tsis loj dua nws tus xib hwb. Tus thwj tim uas kawm tiav tas, nws yuav zoo li nws tus xib hwb. 41 Vim li cas koj ntsia tus quav nplej uas nyob hauv koj tus kwv lub qhov muag ? Hos tus nqaj uas nyob hauv koj lub qhov muag, koj ho tsis pom ? 42 Ua cas koj thiaj muaj cuab kav hais rau koj tus kwv tias : ‘Kwv ntxawg, koj cia kuv rho tus quav nplej hauv koj qhov muag pov tseg’, hos koj twb tsis pom tus nqaj hauv koj qhov muag. Neeg zoo nraum daim tawv, koj rho tus nqaj hauv koj qhov muag pov tseg tso ; koj thiaj yuav pom kev dig tus quav nplej hauv koj tus kwv lub qhov muag.

TIM 10 LUB 9 HLIS 2016

Hnub Xya Lis Piam Nees Nkaum Peb Xyoo C Nruab Lis Piam Xyoo II

Hwm Niam mab Liab

Zaj Nyeem Ib: 1 KLN 10: 14-22

14 Kuv cov zoo nyiad, nej txav deb ntawm txoj kev teev dab teev mlom mog. 15 Kuv hais lus rau nej li hais rau ib co neeg paub tab. Nej yuav tsum muab kuv cov lus coj los xav. 16 Lub ntim foom koob hmoov uas peb cav txog, puas ua kom peb koom siab nyob hauv Leej Pleev cov ntshav los tsis ua ? Cov mov uas peb muab ntais, puas ua kom peb koom siab nyob hauv Leej Pleev lub cev los tsis ua ? 17 Ib yam li muaj tib lub ncuav mov xwb, peb sawv daws, txawm peb muaj coob leej, kuj koom ua ib lub cev thiab xwb, vim peb sawv daws koom noj tib lub ncuav mov. 18 Nej ntsia cov His Xas Lais raws li nyob sab nqaij tawv : cov uas noj cov txim, lawv puas koom nrog lub thaj txi Ntuj los tsis koom ? 19 Qhov kuv hais no yog txhais li cas ? Puas txhais tias cov nqaij txi dab yog ib yam uas muaj nqes ? Los puas txhais tias cov dab ntawd muaj nqes? 20 Kuv tsis hais li ntawd. Tab sis, tej yam uas lawv muab los txi, mas yog txi rau ib co dab phem, tsis yog txi rau Tswv Ntuj. Kuv tsis xav kom nej nrog cov dab phem sib fim. 21 Nej ib txhij haus Huab Tais lub ntim thiab dab phem lub ntim tsis tau. Nej ib txhij noj Huab Tais rooj qav thiab dab phem rooj qav tsis tau. 22 Los puas yog peb xav txhob txwm ua kom Huab Tais khib ? Peb puas muaj zog dua Huab Tais ?

NPN 116: 12-13, 17-18

Txais: (17) Txais: (17a) Huab Tais, kuv yuav cev ib co txim los cav txog koj.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
kuv yuav hu txog HUAB TAIS, yuav tuav txog nws lub npe.

Txais: (17) Txais: (17a) Huab Tais, kuv yuav cev ib co txim los cav txog koj.

Kuv yuav cev ib co txim los ua koj tsaug,
kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm nws haiv neeg xub ntiag,

Txais: (17) Txais: (17a) Huab Tais, kuv yuav cev ib co txim los cav txog koj.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav los nyob hauv nws.

Txais: As les lus yas, as les lus yas.

Ntawv Moo Zoo: LK 6: 43-49

Yes Xus hais rau nws cov thwj tim tias:
43 "Tsis muaj ib tsob ntoo zoo nkauj yuav txi ib co txiv lwj, tsis muaj ib tsob ntoo lwj yuav txi ib co txiv zoo nkauj. 44 Xav paub tsob ntoo, mas yuav ntsia nws lub txiv. Luag tsis de txiv ncuav pias saum tej pos kaus ntsaj, luag tsis de txiv cawv saum ib tsob txiv pos tshauv. 45 Ib tug neeg zoo ua tau tej yam zoo uas yog tawm hauv nws lub siab zoo los. Ib tug neeg phem ua tau tej yam phem uas yog tawm hauv nws lub siab phem los. Vim tias yam uas lub ncauj hais tawm, yog phwj hauv lub siab tuaj.
46 "Vim li cas nej hu kuv tias 'Huab Tais, Huab Tais', tab sis nej tsis ua raws li kuv hais ? 47 Kuv yuav qhia nej tias tus tuaj cuag kuv, mloog kuv tej lus thiab ua raws li kuv qhia, mas nws yog ib tug neeg zoo li cas. 48 Nws zoo xws li ib tug neeg txhim tsev, uas khawb av kom tob, thiab puab cov taw ntsa rau saum pob zeb pob tsuas. Thaum dej sab siv huam, dej dag nphau nphwv tuaj ntsawj lub tsev, tab sis ua tsis tau kom lub tsev ua zog, vim lub tsev ntawd txhim tau ruaj. 49 Hos tus mloog kuv cov lus, tab sis nws tsis ua raws, nws zoo xws li tus neeg txhim tsev rau saum npoo av, tsis muaj taw ntsa, thaum dej sab siv tuaj ntsawj lub tsev, lub tsev vau tam sis ntawd, ces lub tsev raug puas tsuaj tas tib si."

TIM 12 LUB 9 HLIS 2016

Hnub Ob Lis Piam Nees Nkaum Plaub Nruab Xyoo C Nruab Lis Piam Xyoo II

Zaj Nyeem Ib: 1 KLN 11: 17-26, 33

17 Nyob hauv cov lus kuv hais ntuas nej no, mas kuv tsis qhuas nej, vim thaum nej tuaj ua lub txoos, mas nej tsis ua kom zoo rau nej, hos nej ua kom phem rau nej xwb. 18 Thawj yam kuv hnov mas yog qhov hais tias, thaum nej sib sau ua lub Txoos, nej sib ncaim ua ob peb pab : kuv ntseeg tej lus ntawd ib nrab. 19 Yeej yuav tsum muaj chaw sib ncaim ces sawv daws thiaj yuav paub tias nyob hauv nej, leej twg yog tus tseeb. 20 Thaum nej tuaj sib sau ua lub txoos, mas zoo li tsis yog nej tuaj noj Huab Tais Rooj Qav li. 21 Vim thaum txog caij noj, mas nej nyias taus nyias huas nyias noj, ces tus tseem tshaib plab kuj muaj, tus twb qaug cawv lawm los muaj. 22 Nej tsis muaj tej tsev rau nej noj mov haus cawv li lod ? Los yog nej xav thuam Tswv Ntuj lub Koom Txoos ? Los yog vim nej xav ua kom cov neeg pluag txaj muag ? Kuv yuav hais dab tsi rau nej ? Kuv puas yuav qhuas nej ? Hais txog qhov ntawd, mas kuv yuav qhuas tsis tau ntag.
23 Vim cov lus kuv tau qhia rau nej, yog cov lus kuv tau txais ntawm Huab Tais los, xws li qhov tias, hmo lawv muab Huab Tais Yes Xus rau luag ntes, nws tuav ib lub ncuav mov, 24 nws ua Ntuj tsaug, nws muab lub ncuav mov ntais, nws hais tias : ‘Qhov no yog kuv lub cev uas muab cia rau nej; nej ua qhov no kom nej nco txog kuv.’ 25 Ib yam li ntawd, thaum noj hmo tas nws tuav lub ntim cawv, nws hais tias : ‘Lub ntim cawv no yog kev cog lus tshiab nyob hauv kuv cov ntshav ; nej haus lub ntim no thaum twg, mas nej haus kom nej nco txog kuv.’ 26 Vim li ntawd, thaum twg nej noj lub ncuav mov thiab nej haus lub ntim cawv, mas nej tshaj Huab Tais txoj kev tuag, nej yuav ua li no kom mus txog hnub Huab Tais rov los.
33 Li no mas, kuv cov kwv tij, thaum nej sib sau los noj Rooj Qav, mas nej yuav tsum sib tos, ib leeg tos ib leeg.

NPN 40: 7-8A, 8B-9, 10, 17

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

Koj tsis ntshaw tsiaj los txhiam xws txi rau koj,
tiam sis koj muab pob ntseg rau kuv kom kuv cuab ntsej mloog lus.
Koj tsis xav tau tsiaj hlawv txi ntuj los tsiaj hlawv them txim txhaum,
kuv thiaj hais tias: “Kuv nyob ntawm no, cia kuv tuaj.”

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

Nyob hauv kauj ntawv muaj lus hais tseg rau kuv tias:
Ua ywj koj lub siab, kuv tus Tswv Ntuj, yog yam ntxim kuv siab,
koj txoj cai nyob rawv hauv kuv nruab plaw!”

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

Kuv tau tshaj tawm koj txoj kev ncaj rau tsoom neeg coob tuaj sib txoos,
kuv tsis tau kaw kuv lub qhov ncauj, HUAB TAIS, koj yeej paub.

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

Thov kom txhua leej uas nrhiav koj
zoo siab hom khaj nyob hauv koj,
thiab kom cov uas nyiam koj txoj kev cawm
cav tsis tseg tias: “HUAB TAIS nto koob meej.”

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

As Les Lus Yas: ZAM 3: 16

Txais: As les lus yas, as les lus yas.

Vim Tswv Ntuj nyiam lub qab ntuj neeg npaum no :
nws thiaj muab nws Leej Tub twm zeej rau lawv,
kom xwv tus ntseeg txog nws muaj txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 1-10

1 Thaum Yes Xus hais nws cov lus rau tsoom sid mloog tas, nws mus hauv Kas Fas Naus. 2 Ib tug xab txheeb muaj ib tug tub txib uas nws nyiam tab tom mob hnyav, yuav tuag. 3 Thaum tus xab txheeb hnov hais txog Yes Xus, nws xa ob peb tug laus neeg Yus Das tuaj thov Yes Xus kom mus cawm nws tus tub txib. 4 Thaum cov laus neeg tuaj txog ntawm Yes Xus, lawv thov Yes Xus tas zog rau tus xab txheeb tias : "Tsim nyog koj yuav ua qhov ntawd rau nws, 5 nws nyiam peb haiv neeg, thiab nws yog tus tau txhim lub tsev txoos rau peb." 6 Yes Xus nrog lawv taug kev mus. Thaum lawv tuaj yuav txog lub tsev, tus xab txheeb xa ib pab phooj ywg tuaj hais rau Yes Xus tias : "Huab Tais, txhob ua nyuaj koj, vim kuv tsis tsim nyog koj chaws los hauv kuv (qab ru) tsev, 7 thiab kuv saib kuv tsis tsim nyog tuaj cuag koj. Tab sis koj hais ib lo lus kom kuv tus tub txib zoo hlo. 8 Vim tias, txawm kuv yog ib tug neeg zwm rau ib tug loj, kuj muaj ib co tub rog uas kuv tswj lawv, yog kuv hais rau ib tug tias 'Mus !' ces nws cia li mus ; hos kuv hais rau lwm tus tias : 'Los !', mas nws cia li los. Kuv hais rau kuv tus tub txib tias 'Ua qhov no !' ces nws cia li ua". 9 Yes Xus hnov cov lus no, nws qhuas tus xab txheeb. Yes Xus tig ntsia tom qab, nws hais rau cov neeg lawv nws qab hais tias : "Kuv hais rau nej, nyob hauv tsoom His Xas Lais, kuv tsis tau pom ib lub siab ntseeg npaum li no." 10 Thaum cov neeg uas tuaj tos Yes Xus rov mus txog tsev, lawv pom tus tub txib twb zoo neej lawm.

Hnub tim 12 lub 9 hlis, niaj xyoo peb muaj cai xaiv ua Thaj Txi Ntuj raws li lub caij Nruab Xyoos los xaiv ua kev hwm Niam Mab Liab lub Npe Ntshiab.  Yog li ntawd kuv thiaj tuaj ntxiv cov zaj nyeem rau Thaj Txi ntuj hwm Niam Mab Liab lub Npe Ntshiab thiab.

Tim     12     lub     9     Hlis

Hwm Niam Mab Liab lub Npe Ntshiab

Zaj Nyeem Ib:        Nkas Las Tias  4:   4-7

Cov kwv tij nkauj muam,
4 Thaum puv caij puv nyoog lawm, Tswv Ntuj tso nws Leej Tub tuaj yug ntawm ib tug poj niam,  zwm rau Txoj Cai,  5 kom tau txhiv cov uas zwm rau Txoj Cai, ces nws thiaj rub tau peb los ua ib co tub sau. 6 Qhov zeem tau tias peb yog ib co tub, mas yog qhov tias Tswv Ntuj xa nws Leej Tub lub tswv yim tuaj nyob hauv peb lub siab, nws qw hauv peb tuaj tias : ‘As Npas, Txiv !’ 7 Ua li mas koj tsis yog ib tug tub qhev lawm,  koj yog ib leeg tub cag lawm, mas koj kuj yog tus yuav txais lub cuab tam, raws li Tswv Ntuj pub.

Los:         Es Fes Xos  1:   3-6, 11-12

Cov kwv tij nkauj muam,
3 Thov kom Tswv Ntuj, peb tus Huab Tais Yes Xus Pleev Leej Txiv, nto koob meej, vim nws foom tas puas tsav yam koob hmoov zoo tuaj saum ntuj tuaj rau peb tuaj yug peb tus ntsuj plig nyob hauv Leej Pleev.  4 Thaum tseem tsis tau tsim lub ntuj lub teb, Tswv Ntuj twb xaiv peb nyob hauv Leej Pleev lawm, kom peb ntshiab huv, tsis lo txhaum nyob ntawm nws xub ntiag, thiab nyob hauv txoj kev nyiam,  5 nws yeej ib txwm xaiv peb ua nws cov tub ki tshiab, nyob hauv Yes Xus Pleev lawm. Nws lub siab yeej nyiam li ntawd, 6 kom nws lub txiaj ntsim muaj hwj chim nto koob meej, lub txiaj ntsim uas nws pub dawb rau peb nyob hauv tus Zoo Nyiam.
11 Kuj yog nyob hauv nws, Ntuj xaiv peb thiab ib txwm qee peb, raws li Tswv Ntuj tus txheej txheem uas nws ib txwm tsa los coj txhua tsav txhua yam kom haum nws lub siab nyiam,  12 kom peb los cav txog nws lub koob meej, los ua pab neeg xub tso siab rau Leej Pleev.

NPN      LK  1:   46-47, 48-49, 50-51, 52-53, 54-55

Txais:   Tus Muaj Hwj Huam tau ua tej yam loj rau kuv, nws lub npe ntshiab.
los:
Txais:   Nkauj Tsim Txiaj Mab Liab, koj tau nqa Leej Txiv nyob mus li Leej Tub.  

"Kuv tus plig cav txog Huab Tais lub hwj chim loj,
kuv lub tswv yim hom khaj nyob hauv Tswv Ntuj, tus Cawm kuv.

Txais…

Vim nws dauv muag ntsia nws tus ntxhais txib nyob txheej qis,
txij no mus, txhua tiam neeg yuav hais tias kuv txoj hmoov zoo,
vim tus Muaj Hwj Huam ua tej yam loj rau kuv, nws lub npe Ntshiab.

Txais…

Nws lub siab hlub cov neeg hwm nws tiam dhau tiam.
Nws sab npab nthuav nws lub zog rau sawv daws pom.
Cov neeg uas lub siab muab hlob,
Huab Tais ua kom lawv sib tawg tas.

Txais…

Huab Tais nchuav cov muaj hwj chim poob ntawm lawv lub theej kiab.
Nws tsa cov neeg hauv txheej qis kom siab.
Nws pub tej yam zoo rau cov neeg tshaib noj seem noj so,
nws ntiab cov neeg muaj rov qab mus tes qhuav.

Txais…

Huab Tais pab nws tus tub txib His Xas Lais,
vim nws nco ntsoov tias nws tau cog lus yuav hlub lawv,
nws ua raws li nws tau cog lus rau peb cov yawg koob,
rau Has Nplas Has thiab nws cov tub ki mus ib txhiab ib txhis.

Txais…

As Les Lus Yas:       LK  1:   45

Txais: As les lus yas, as les lus yas.

Las tees: Beata es, Virgo Maria, quae credidisti quoniam perficientur ea quae dicta sunt tibi a Domino..

Nkauj Tsim Txiaj Mab Liab, koj txoj hmoov zoo vim koj ntseeg
tias cov lus Huab Tais hais rau koj yuav tsheej xeeb tau.

Txais: As les lus yas, as les lus yas.

Ntawv Moo Zoo:           LK  1:   39-47

39 Lub caij ntawd, Mab Liab sawv kev mus, nws rau siab ntso mus pem toj siab, mus rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab cov lus, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv nws. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas hmoov dab tsi kuv tus Huab Tais leej niam thiaj tuaj txog kuv? 44 Vim thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Muaj tseeb tiag, tus tau ntseeg tias cov lus Huab Tais hais rau nws yuav tsheej xeeb tau, mas nws txoj hmoov zoo !" 46 Ces Mab Liab hais tias : "Kuv tus plig cav txog Huab Tais lub hwj chim loj, 47 kuv lub tswv yim hom khaj nyob hauv Tswv Ntuj, tus Cawm kuv,

TIM 13 LUB 9 HLIS 2016

Hnub Peb Lis Piam Nees Nkaum Plaub Nruab Xyoo C Nruab Lis Piam Xyoo II

Hwm LN John Chrysostom, ua Tswv Qhia

Zaj Nyeem Ib: 1 KLN 12: 12-14, 27-31A

12 Ib yam li neeg lub cev, tsuas muaj tib lub cev xwb, tab sis muaj ntau yam ntau ces; txhua yam ntawd yog lub cev, txawm tias muaj ntau ces, los yeej yog tib lub cev xwb. Nyob hauv Leej Pleev kuj zoo li ntawd. 13 Vim tias peb sawv daws tau txais lub Cim Ntxuav nyob hauv Leej Ntuj Plig tib leeg, peb koom ua lub Cev xwb. Tsis hais cov Yus Das los cov Hes Las, cov qhev los cov twj lij, peb sawv daws puav leej tau haus ib tug Leej Ntuj Plig xwb. 14 Lub cev tsis yog ib ceg xwb : lub cev muaj ntau ces.
27 Ntawm nej, mas nej yog Leej Pleev lub cev, nyias muaj nyias tug nyob rau hauv. 28 Muaj tej tus neeg, Tswv Ntuj tsa lawv ua Hauv Paus Xa Lus nyob hauv lub Koom Txoos, muaj tej tus nws tsa lawv ua Yaj Saub, tej tus ua Xib Hwb, tseem muaj cov ua hwj huam yees ntxwv, cov tau lub txiaj ntsim kho mob, cov tsob hwb luag, cov tuav kev tswj fwm, thiab cov paub ntau xeem lus. 29 Sawv daws puas yog Hauv Paus Xa Lus ? Sawv daws puas yog Yaj Saub, los Xib Hwb ? Sawv daws puas ua hwj huam yees ntxwv ? 30 Sawv daws puas txawj kho mob kom zoo ? Sawv daws puas paub ntau xeem lus ? Sawv daws puas txhais tau ntau xeem lus ?
31 Xav kom nej yuav tsum nrhiav cov txiaj ntsim uas loj dua cov.

NPN 100: 1B-2, 3, 4, 5

Txais: (3) Peb yog nws haiv neeg, peb yog nws pab yaj.

Tas lub ntiaj teb, nej zoo siab hu nkauj rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag

Txais: (3) Peb yog nws haiv neeg, peb yog nws pab yaj.

Nej cia li lees tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog pab yaj nws saib.

Txais: (3) Peb yog nws haiv neeg, peb yog nws pab yaj.

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais: (3) Peb yog nws haiv neeg, peb yog nws pab yaj.

Vim HUAB TAIS muaj lub siab zoo,
nws txoj kev ua zoo yuav nyob mus li,
nws ua ncaj rau peb txheej dhau txheej.

Txais: (3) Peb yog nws haiv neeg, peb yog nws pab yaj.

As Les Lus Yas: LK 7:16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo: LK 7: 11-17

11 Yes Xus mus hauv ib lub nroog hu ua Nas Ees. Yes Xus cov thwj tim thiab ib pab neeg coob nrog Yes Xus ua ke mus. 12 Thaum Yes Xus tuaj yuav txog lub qhov rooj loog nkag hauv lub nroog, luag tab tom kwv ib tug tuag tawm tuaj txog ntawd. Yog ib leeg tub twm zeej, hos leej niam yog ib tug poj ntsuam. Ib pab neeg coob hauv nroog nrog leej niam tawm tuaj. 13 Huab Tais pom tus poj ntsuam, Huab Tais khuv leej nws. Huab Tais hais rau nws tias : "Koj txhob quaj." 14 Yes Xus txav los tuav lub hleb, cov kwv hleb nres. Ces Yes Xus hais tias : "Tus hluas, kuv hais koj : Koj sawv !" 15 Ces tus tuag sawv zaum, thiab nws pib hais lus. Yes Xus muab tus tub hluas ntawd cob rau nws niam. 16 Tas sawv daws ntshai tas nrho. Lawv cav txog Tswv Ntuj tias : "Ib tug yaj saub loj sawv los nyob hauv peb, Tswv Ntuj tuaj xyuas nws haiv neeg lawm." 17 Cov lus hais txog tus hluas ntawd ncha mus thoob tas xeev Yus Das thiab ib ncig lub teb chaws ntawd.

TIM     14    LUB    9    HLIS     2016

Hnub Plaub Lis Piam Nees Nkaum Plaub Nruab Xyoo C Nruab Lis Piam Xyoo II

Hawm Yes Xus tus Ntoo Cuam  


Zaj Nyeem Ib:      XAM PHAJ  21:   4B-9

4 Cov His Xas Lais mus txog ib tog kev, lawv npau taws. 5 Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb los kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau hwv lawm !" 6 Tswv Ntuj thiaj rau txim rau lawv, nws tso ib cov nab muaj taug tuaj tom lawv. Cov nab ntawd tom cov His Xas Lais tuag coob leej. 7 Tsoom pej xeem thiaj  mus hais rau Mais Xes tias : "Peb ua txhaum lawm vim peb tau cem HUAB TAIS thiab cem koj. Koj thov kom HUAB TAIS zam rau peb, kom nws ntiab cov niag nab ntawd khiav mus deb peb." Ces Mais Xes thiaj thov kom Ntuj zam rau lawv. 8 HUAB TAIS hais rau Mais Xes tias : "Koj xuas tooj nchuav ib tug nab muaj taug, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag." 9 Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.

NPN         78:   1BC-2, 34-35, 36-37, 38

Txais:    (7b) Nej yuav nco ntsoov Huab Tais cov hauj lwm loj.  

Kuv haiv neeg, nej mloog kuv tej lus qhuab qhia;
Nej tig ntsej los mloog cov lus tawm ntawm kuv lub ncauj los.
Kuv yuav qhib ncauj hais ib zag paj lug,
Kuv yuav hais tej zaj lus tob uas yeej muaj txheej thaud los lawm.

Txais:    (7b) Nej yuav nco ntsoov Huab Tais cov hauj lwm loj.

Thaum Tswv Ntuj rhuav lawv, ces lawv nrhiav nws ;
lawv hloov siab thiab tig rov los nrhiav nws.
Lawv rov nco tias Tswv Ntuj yog lawv lub tsua,
yog tus Tswv Ntuj Nyob Siab  tus txhiv lawv.

Txais:    (7b) Nej yuav nco ntsoov Huab Tais cov hauj lwm loj.

Tab sis lawv lam ntxias nws ntawm ncauj,
lawv tus nplaig hais lus dag nws.
Lawv lub siab tsis npuab nws ruaj,
lawv tsis coj raws cov lus nws tau cog rau lawv.

Txais:    (7b) Nej yuav nco ntsoov Huab Tais cov hauj lwm loj.

Tab sis, Tswv Ntuj lub siab hlub neeg zam rau lawv qhov txhaum,
nws tsis rhuav lawv popv tseg,
Nws cheem nws lub siab npau tsis tseg,
nws tsis pub kom nws lub siab ceev tsim los.

Txais:    (7b) Nej yuav nco ntsoov Huab Tais cov hauj lwm loj.

Zaj Nyeem Ob:   FIS LIS POS   2:   6-11

Cov kwv tij nkauj muam,
6 Yes Xus Pleev yog Tswv Ntuj, tiam sis nws tsis cia nws lub hwj chim ua Tswv Ntuj rau luag hawm,  7 nws muab nws lub hwj chim hle. Nws yeem ua ib tug qhev, nws yug los ua neeg xws li ib tsoom neeg. Luag pom nws tus yam ntxwv yog yam ntxwv tib neeg. 8 Nws txo nws qis, nws tuaj yeem mloog Ntuj lus mus txog qhov tuag, thiab tseem xaiv txoj kev tuag saum ntoo cuam. 9 Vim li ntawd, mas Tswv Ntuj thiaj tsa Yes Xus ua ib tug loj nyob qhov siab. Tswv Ntuj muab lub npe uas nyob siab dua lwm cov npe rau nws.  10 Li ntawd, tus twg hnov tuav txog Yes Xus lub npe, tsis hais nyob saum cov txheej ntuj, los nyob ntiaj teb no, los nyob nruab yeeb, mas tus ntawd cia li txhos caug hawm. 11 Txhua xeem lus yuav tsum cav tias Yes Xus Pleev yog Huab Tais, ces Leej Txiv Tswv Ntuj thiaj muaj koob meej nto moo lug.

As Les Lus Yas  
 
Txais:   As les lus yas, as les lus yas.

Leej Pleev, peb pe hawm koj, thiab peb cav txog txog,
vim koj tau cawm qab ntuj neeg nyob saum koj tus Ntoo Cuam.

Txais:   As les lus yas, as les lus yas.

Ntawv Moo Zoo:      ZAM  3:   13-17

Yes Xus hais rau Nis Kos Des Mos tias:
13 Tsis muaj leej twg tau nce mus saum ntuj, tsuas yog tus tau nqes saum ntuj los xwb, uas yog Neeg Leej Tub. 14  Ib yam li Mais Xes tsa tus nab nyob teb chaws suab puam, Neeg Leej Tub kuj yuav tsum raug luag tsa nws siab,  15 kom xwv tus ntseeg txog nws, muaj txoj sia nyob mus li.”
16 Vim Tswv Ntuj nyiam lub qab ntuj neeg npaum no, nws thiaj muab nws Leej Tub twm zeej rau lawv, kom xwv tus ntseeg txog nws txhob tuag, tab sis kom nws muaj txoj sia nyob mus li. 17 Tswv Ntuj tsis tau xa nws Leej Tub tuaj hauv lub qab ntuj kom nws muab txim rau lub qab ntuj neeg, tiam sis kom qab ntuj neeg tau txais kev cawm nyob hauv nws.

TIM 15 LUB 9 HLIS 2016

Hnub Tsib Lis Piam Nees Nkaum Plaub Nruab Xyoo C Nruab Lis Piam Xyoo II

Hwm Niam Mab Liab Txoj Kev Txom Nyem (Memorial of Our Lady of Sorrows)


Zaj Nyeem Ib: 1 KLN 15: 1-11

1 Kwv tij sawv daws, kuv rov qab hais kom nej nco ntsoov txog lub Moo Zoo uas kuv tau tshaj rau nej; nej tau txais thiab nej kuj nyob ruaj nreb hauv lub Moo Zoo ntawd. 2 Yog nej ntseeg raws nraim li kuv tau tshaj rau nej, mas nej yuav txais kev cawm nyob hauv lub Moo Zoo. Yog lub Moo Zoo cawm tsis tau nej, mas nej ntseeg dag xwb. 3 Qhov tseem ceeb kuv tau qhia rau nej, mas yog qhov kuv tus kheej xub tau txais, yam li tias Yes Xus yeem tuag kom tau ntxuav peb cov txhaum pov tseg, raws li Ntawv Ntshiab xub hais; 4 lawv muab nws zwm rau hauv ntxa; hnub peb, nws sawv rov qab los raws li Ntawv xub hais; 5 nws yees tawm los rau Pob Zeb pom tas, ces nws kuj tawm tuaj rau pab kaum ob leeg pom. 6 Tom qab ntawd, nws tseem yees tawm los rau ib pab kwv tij muaj tsib puas leej ib txhij pom; cov ntawd, muaj qee leej twb tuag lawm, tiam sis cov coob tseem ua neej nyob txog tav no. 7 Tom qab ntxiv, Yes Xus tseem tawm los rau Yas Kos pom, thiab rau tas nws cov Hauv Paus Xa Lus huv tib si pom. 8 Kuv yog tus puag tom tw, xws li ib tug me nyuam yug los tsis haum caij, nws kuj tawm tuaj rau kuv pom thiab. 9 Vim kuv yog tus me tshaj cov nyob hauv cov Hauv Paus Xa Lus. Kuv tsis tsim nyog hu ua Hauv Paus Xa Lus, vim kuv tau hiam Tswv Ntuj lub Koom Txoos. 10 Tiam sis Tswv Ntuj lub txiaj ntsim ua kom kuv yog tus neeg zoo li tam sis no. Tswv Ntuj lub txiaj ntsim nyob hauv kuv, nws tsis nyob dag. Kuv tau siv zog ua hauj lwm heev tshaj sawv daws tib si. Tab sis tsis yog kuv ua : yog Tswv Ntuj lub txiaj ntsim uas nrog kuv nyob ua cov hauj lwm ntawd. 11 li ntawd txawm yog kuv los yog lawv, qhov peb tshaj tawm yog li cas ces nej ntseeg li ntawd.

NPN 118: 1B-2, 16AB-17, 28

Txais: (1) Nej ua HUAB TAIS tsaug, vim nws siab zoo.

Nej ua HUAB TAIS tsaug, vim nws siab zoo,
Nws hlub peb tas ib txhiab ib txhis.
Xav kom His Xas Lais rov hais tias : Nws hlub peb tas ib txhiab ib txhis

Txais: (1) Nej ua HUAB TAIS tsaug, vim nws siab zoo.

HUAB TAIS txhais xis tsim nyog qhuas !
HUAB TAIS txhais xis ntaus muaj zog loj!
Kuv yuav tsis tuag, kuv yuav muaj txoj sia nyob,
kuv yuav tshaj txog HUAB TAIS cov dej num

Txais: (1) Nej ua HUAB TAIS tsaug, vim nws siab zoo.

Koj yog kuv tus Tswv Ntuj, kuv ua koj tsaug.
Kuv tus Tswv Ntuj kuv cav tas zog txog koj.

Txais: (1) Nej ua HUAB TAIS tsaug, vim nws siab zoo.

As Les Lus Yas

Txais: As les lus yas, as les lus yas.

Nkauj Tsim Txiaj Mab Liab,
koj tsis tau hla kev tuag tiam sis koj tau txais lub mom ua tim khawv
thaum koj sawv hauv qab ntawm tus Ntoo Cuam.

Txais: As les lus yas, as les lus yas.

Ntawv Moo Zoo: ZAM 19: 25-27

25 Yes Xus niam thiab nws niam tus viv ncaus Mab Liab uas yog Khos Pas poj niam, thiab Mab Liab Mas Ntas Las, lawv sawv ze ntawm tus ntoo cuam. 26 Yes Xus pom nws niam, thiab pom tus thwj tim uas nws nyiam sawv ze ntawd, ces nws hais rau nws niam tias : "Niad, tus ntawd yog koj tus tub." 27 Thiab Yes Xus hais rau tus thwj tim tias : "Tus ntawd yog koj niam." Txij lub sij hawm ntawd los, tus thwj tim coj Mab Liab mus nyob hauv nws tsev.

Los: LK 2: 33-35

33 Yes Xus niam thiab txiv qhuas cov lus nkawd hnov hais txog tus me nyuam. 34 Xis Mes Oos foom hmoov zoo rau lawv, nws hais rau Mab Liab, Yes Xus niam tias : "Tus me nyuam no yuav ua chaw rau ntau leej His Xas Lais ntog thiab ntau leej sawv tuaj. Nws yuav yog ib lub cim ua kom sawv daws sib cav. 35 Hos ntawm koj, mas ib rab ntaj yuav chob koj tus ntsuj plig, kom xwv tej lus uas coob leej xav tuaj nruab siab tawm los rau sawv daws paub.”

TIM     16    LUB    9    HLIS      2016

Hnub Rau Lis Piam Nees Nkaum Plaub Nruab Xyoo C Nruab Lis Piam Xyoo II

Hwm LN  Cornelius, ua Vaj Qhia, thiab LN Cyprian, ua Tswv Qhia, ob leeg tuag ua tim khawv

Zaj Nyeem Ib:     1  KLN  15:   12-20

12 Yog peb twb tshaj tias Leej Pleev sawv hauv cov tuag rov los lawm, vim li cas, ho muaj tej tus hauv nej hais tias tsis muaj kev sawv hauv cov tuag rov los ? 13 Yog cov tuag tsis muaj kev sawv rov los, mas Leej Pleev kuj tsis tau sawv rov los thiab. 14 Yog Leej Pleev tsis tau sawv rov los, mas peb txoj kev tshaj Ntuj Lus kuj yog dag xwb, nej txoj kev ntseeg los kuj yog ib txoj kev dag thiab xwb. 15 Ces peb yog Tswv Ntuj ib co tim khawv cuav, vim peb tau tshaj meej tias Tswv Ntuj tau tsa nws Leej Pleev sawv rov los, yog tias nws twb tsis tau tsa thiab yog tias cov tuag yeej tsis sawv rov los li. 16 Vim tias yog cov tuag tsis sawv rov los tseeb tiag, mas Leej Pleev los  kuj tsis tau sawv rov los li thiab. 17 Yog Leej Pleev tsis sawv rov los, ces nej txoj kev ntseeg yog ib txoj kev dag, hos nej kuj tseem nyob hauv nej cov txhaum. 18 Thiab cov uas tau mus tsaug zog nyob hauv Leej Pleev lawd, mas lawv kuj ploj mus tag lawm xwb. 19 Peb cov uas tso siab rau Leej Pleev, yog peb tsuas muaj kev cia siab nyob hauv tiam neej no xwb, mas peb yog cov neeg txom nyem tshaj ib tsoom tib neeg tas huv si.

20 Tab sis tsis yog li ntawd;  Leej Pleev yeej sawv hauv cov tuag rov los lawm tiag tiag. Nws yog thawj phaum txiv nyob hauv ib tsoom neeg uas mus tsaug zog lawm.

NPN      17:  1BCD, 6-7, 8B+15

Txais:     (15b) Huab Tais, thaum koj lub hwj chim tawm tuaj,
kuv txoj kev zoo siab yuav puv nkaus.

HUAB TAIS, thov koj mloog ib zag lus ncaj ncees;
Koj cuab pom ntseg rau kuv lub suab quaj,
Koj tig ntsej los rau kuv lo lus thov; kuv di ncauj tsis hais lus dag.

Txais:     (15b) Huab Tais, thaum koj lub hwj chim tawm tuaj,
kuv txoj kev zoo siab yuav puv nkaus.

Tswv Ntuj, kuv hu txog koj, vim koj yeej yuav teb kuv;
thov koj qaij pob ntseg los rau kuv, thiab mloog kuv lo lus.
Thov qhib koj lub siab hlub loj rau peb pom,
koj uas yog tus cawm seej rau cov neeg khiav los nkaum
hauv koj phab xis, kom lawv dim ntawm cov neeg ntxub lawv.

Txais:     (15b) Huab Tais, thaum koj lub hwj chim tawm tuaj,
kuv txoj kev zoo siab yuav puv nkaus.

Thov koj txuag kuv xws li txuag koj lub ntsiab muag,
Thov koj zais kuv rau hauv koj phab tis qhov ntxoov,
Kuv yeej yuav tau pom koj lub ntsej muag, Vim yog kev ncaj.
Kuv tsim dheev los, kuv yuav zoo siab hlo tau nyob ze ntawm koj.

Txais:     (15b) Huab Tais, thaum koj lub hwj chim tawm tuaj,
kuv txoj kev zoo siab yuav puv nkaus.

As Les Lus yas:      MT  11:   25

Txais:    As les lus yas, as les lus yas.

Txiv, kuv cav lus zoo txog koj, Huab Tais kav lub ntuj lub teb,
vim koj qhib tej yam tob txog lub Ceeb Tsheej rau cov neeg me.

Txais:    As les lus yas, as les lus yas.

Ntawv Moo Zoo:      LK  8:   1-3

1 Yes Xus taug kev mus ib lub nroog lo sib lub  zos mus rau lwm lub, nws qhia thiab tshaj lub Moo Zoo txog Tswv Ntuj lub Ceeb Tsheej rau sawv dawsj. Pab Kaum Ob leeg nrog Yes Xus mus,  2 thiab tseem muaj ib co poj niam uas Yes Xus tau kho lawv zoo hlo, lawv dim ntawm dab phem thiab dim ntawm lawv tus mob lawm, yog Mab Liab uas luag hu ua Mas Ntas Las, yog tus uas Yes Xus tau ntiab xya tus dab phem tawm hauv nws mus, 3  Yos As Nas, uas yog Sus Ntxas, Hes Los tus tim xyoob tus poj niam,  Xus Xas Nas thiab coob leej ntxiv. Lawv muab lawv lub cuab tam los tsob hwb Yes Xus thiab cov thwj tim.

TIM 17 LUB 9 HLIS 2016

Hnub Xya Lis Piam Nees Nkaum Plaub Nruab Xyoo C Nruab Lis Piam Xyoo II

Hwm LN Robert Bellarmine; Hwm Niam Mab Liab.

Zaj Nyeem Ib: 1 KLN 15: 35-37, 42-49

35 Ib txhia nug tias : ‘Cov neeg tuag yuav sawv rov los zoo li cas ? Lawv yuav muaj ib lub cev zoo li cas thaum lawv sawv rov los ?’ 36 Ruam ua luaj ! Yam koj tseb, yog nws tsis tuag, mas nws tsis rov muaj txoj sia. 37 Yam koj tseb, tsis tau yog lub cev yav tom ntej. Koj tsuas tseb ib lub noob, zoo li lub noob nplej los lwm yam noob xwb.
42 Cov tuag yuav sawv rov los kuj yuav yog zoo li ntawd : thaum tseb mas yog ib lub cev txawj lwj, thaum sawv rov los nws tsis txawj lwj. 43 Thaum tseb yog ib lub cev nyob hauv txoj kev txaj muag, thaum sawv rov los, yog ib lub cev muaj hwj chim. Thaum tseb yog ib lub cev tsis muaj zog, thaum sawv rov los yog ib lub cev muaj zog. 44 Thaum tseb yog ib lub cev nqaij tawv, thaum sawv rov los yog ib lub cev ntsuj plig. Yog muaj ib lub cev nqaij tiag, mas kuj yuav muaj ib lub cev ntsuj plig thiab.
45 Muaj lus sau tseg tias : ‘Thawj tug tib neeg, As Das, yog ib tug xwm zeej ciaj sia.’ Tus As Das tshiab tom qab no, yog ib tug ntsuj plig pub txoj sia. 46 Tab sis, tsis yog sab ntsuj plig xub tawm los, Yog sab nqaij tawv xub tawm los, ces sab ntsuj plig mam tawm los tom qab. 47 Thawj tus neeg, nws tawm ntawm av los, nws yog ntiaj teb tug. Tus neeg tshiab tom qab no, tawm pem qaum ntuj los. 48 Tus neeg ntiaj teb zoo li cas, mas cov neeg ntiaj teb kuj zoo li ntawd, hos tus neeg qaum ntuj zoo li cas, mas cov neeg qaum ntuj kuj zoo li ntawd thiab. 49 Ib yam li peb xub hnav tus neeg ntiaj teb tus duab, peb kuj yuav tau hnav tus neeg qaum ntuj tus duab thiab.

NPN 56: 10C-12, 13-14

Txais: (14) Kuv yuav taug kev ntawm Tswv Ntuj xub ntiag
nyob hauv txoj kev kaj tsoom neeg ciaj.

Kuv paub tias Tswv Ntuj tuaj kuv tog.
Kuv lub koob meej yog nyob hauv Tswv Ntuj,
Kuv tso siab rau Tswv Ntuj, kuv tsis ntshai;
Leej twg yuav ua tau dab tsi rau kuv?

Txais: (14) Kuv yuav taug kev ntawm Tswv Ntuj xub ntiag
nyob hauv txoj kev kaj tsoom neeg ciaj.

Tswv Ntuj, kuv nco ntsoov cov yeem kuv tau fiv rau koj,
Kuv yuav ua cov thaj cav lus zoo ua tsaug pauj rau koj.
Vim koj tau cawm kuv dim ntawm lub qhov tuag,
tau hwj kuv ko taw kom txhob ntog,
kom kuv tau taug kev ntawm koj xub ntiag
nyob hauv txoj kev kaj tsoom neeg ciaj.

Txais: (14) Kuv yuav taug kev ntawm Tswv Ntuj xub ntiag
nyob hauv txoj kev kaj tsoom neeg ciaj.

As Les Lus yas: LK 8: 15

Txais: As les lus yas, as les lus yas.

Cov khaws Lo Lus rau hauv lawv lub siab loj siab dav, lawv txoj hmoov zoo,
lawv txi txiv vim lawv coj ruaj nreb tsis tso tseg.


Txais: As les lus yas, as les lus yas.

Ntawv Moo Zoo: LK 8: 4-15

4 Thaum ntawd muaj tej pab neeg coob coob tuaj sis sau ua ke, lawv tuaj txhua lub nroog tuaj cuag Yes Xus. Ces nws ua paj lug hais li no : 5 "Tus tseb nplej tawm mus tseb nws cov noob qoob. Thaum nws tseb, muaj ib co noob poob rau ntawm ntug kev. Luag tsuj cov noob ntawd, thiab noog ya saum ntuj los noj tas huv si lawm. 6 Muaj ib co noob poob rau saum pob zeb, cov yub nplej hlob, tab sis cov yub cia li qhuav tas, vim av tsis noo. 7 Muaj ib co noob poob rau hauv cov pos, cov yub nplej nrog pos hlob ua ke, tab sis pos laum nplej tuag tas. 8 Muaj ib co noob poob rau hauv thaj av zoo, cov yub nplej hlob, cov nplej txi txiv txog pua lub." Yes Xus hais cov lus no tas, nws hais nrov nrov tias : "Leej twg muaj pob ntseg mloog, yuav tsum mloog !"
9 Yes Xus cov thwj tim nug nws saib zaj paj lug no lub ntsiab yog dab tsi. 10 Yes Xus hais tias : "Ntuj pub kom nej paub tej txuj ci tob tob hauv Tswv Ntuj lub Ceeb Tsheej, tab sis rau luag tej, mas tsuas yog lus ua paj lug kom xwv lawv ntsia, los lawv tsis pom, lawv hnov, los lawv tsis to taub. 11 Zaj paj lug ntawd lub ntsiab txhais li no : Cov noob, yog Tswv Ntuj Lo Lus. 12 Cov noob uas poob ntawm ntug kev, yog cov uas tau hnov, tab sis dab phem tuaj ces nws rho Lo Lus tawm hauv lawv lub siab mus, kom lawv txhob ntseeg, thiab txhob tau txais kev cawm. 13 Cov uas poob rau saum pob zeb, yog cov neeg uas thaum lawv hnov Lo Lus, lawv zoo siab hlo txais. Tab sis lawv tsis muaj cag, lawv tsuas ntseeg ib ntus xwb, lub caij sim lawv siab, lawv cia li tso tseg. 14 Cov noob uas poob rau hauv hav pos, yog cov neeg uas tau hnov Lo Lus, tab sis thaum lawv taug lawv txoj kev ua neej, muaj tej kev txhawj xeeb, tej kev nyiaj txiag, tej kev ntxias neeg lub siab lub cev laum Lo Lus, ces Lo Lus hlob tsis taus txi tsis taus txiv li. 15 Hos cov noob poob hauv thaj av zoo, yog cov uas tau hnov Lo Lus, lawv khaws Lo Lus rau hauv lawv lub siab loj siab dav, ces lawv txi txiv vim lawv coj ruaj nreb tsis tso tseg li.

TIM 19 LUB 9 HLIS 2016

Hnub Ob Lis Piam Nees Nkaum Tsib Nruab Xyoo C Nruab Lis Piam Xyoo II

Hwm LN Januarius

Zaj Nyeem Ib: PAJ LUG 3: 27-34

27 Koj tsis txhob ua tus tsis kam ua ib qho zoo rau tus neeg tsim nyog tau yam ntawd, yog tias koj muaj txoj kev yuav pab tau nws. 28 Koj tsis txhob hais rau tus nyob ze ntawm koj tias : "Koj rov mus. Tag kis koj rov tuaj kuv mam muab rau koj," yog tias koj twb muab tau rau nws tam sis ntawd. 29 Koj tsis txhob nrhiav ua phem rau tus nyob ze ntawm koj vim nws twb muaj kev tso siab rau koj. 30 Koj tsis txhob lam taus lam nrog ib tug neeg sib cav sib ceg, yog nws twb tsis tau ua ib qho phem rau koj. 31 Koj tsis txhob ntshaw ua xws li tus siab ceev, koj txhob yoog nws tus piv txwv ib zaug li. 32 HUAB TAIS saib tus neeg nkhaus yog ib qho phem kawg nkaus; nws yuav cov neeg siab ncaj los ua nws cov swm phooj ywg. 33 Huab Tais lo lus foom phem poob rau saum tus neeg siab phem lub tsev, tiam sis nws foom lus zoo rau saum cov neeg ncaj lub tsev. 34 Huab Tais ua tsiv rau tus neeg saib tsis taus luag tej, nws ua zoo rau tus neeg txo hwj chim.

NPN 15: 2-3A, 3BC-4AB, 5

Txais: (1) Huab Tais, tus neeg ncaj yuav nyob saum koj lub roob ntshiab.

Tus uas coj tus yeeb yam tsis muaj chaw xyeej thiab ua ncaj,
Tus uas xav qhov tseeb nyob nruab siab,
Thiab nws tsis cia nws tus nplaig hais lus dag.

Txais: (1) Huab Tais, tus neeg ncaj yuav nyob saum koj lub roob ntshiab.

Nws tsis ua phem rau luag,
Nws tsis nrhiav lus rau tus nyob ze nws.
Nws tsis nrog ntxub tus uas HUAB TAIS muab xyeeb pov tseg.
Nws hwm cov neeg hwm HUAB TAIS.

Txais: (1) Huab Tais, tus neeg ncaj yuav nyob saum koj lub roob ntshiab.

Nws qiv nyiaj txiag, nws tsis tsuam paj.
Nws tsis txais luag cov nyiaj xiab kom muab txim rau tus tsis txhaum.
Leej twg ua li hais los no, mas nws yuav nyob ruaj nreb.

Txais: (1) Huab Tais, tus neeg ncaj yuav nyob saum koj lub roob ntshiab.

As Les Lus Yas: MT 5: 16

Txais: As les lus yas, as les lus yas.

Nej lub teeb yuav tsum ci nyob ntawm zeej tsoom xub ntiag,
kom lawv pom nej cov dej num zoo, ces lawv yuav cav txog nej Txiv nyob saum ntuj.

Txais: As les lus yas, as les lus yas.

Ntawv Moo Zoo: LK 8: 16-18

Yes Xus hais tias:
16 "Tsis muaj leej twg taws tau ib lub teeb, yuav muab ib lub thoob los khwb, los yuav muab txawb rau hauv qab txag. Luag tsuas muab txawb saum tus ncej teeb, kom xwv cov neeg los hauv tsev pom kev. 17 Vim tias tsis muaj ib yam zais ntshis uas yuav tsis tshwm los, tsis muaj ib yam npog uas yuav tsis qhib los rau sawv daws paub thiab pom tseeb. 18 Nej ceev faj saib, thaum nej mloog, nej ua li cas. Vim tias tus uas twb muaj lawm, Ntuj yuav pub ntxiv rau nws. Hos tus tsis muaj, tab yog qhov nws xav tias nws muaj, mas Ntuj yuav rho ntawm nws mus."

TIM     20    LUB    9    HLIS     2016

Hnub Peb Lis Piam Nees Nkaum Tsib Nruab Xyoo C Nruab Lis Piam Xyoo II  

Hwm cov LN Andrew Kim Tae-gŏn, thiab Paul Chŏng Ha-sang, thiab lwm cov, ib co Tim Khawv Kaus Lim

Zaj Nyeem Ib:     PAJ LUG  21:   1-6, 10-13

1  Tus vaj lub siab zoo tam li ib tug dej ntws uas nyob hauv HUAB TAIS lub xib teg,
nws xav kom nkhaus mus li cas los tau tas.  
2  Ib tug neeg saib nws tej kev yeej ncaj tas txhua txoj,  
tiam sis HUAB TAIS yog tus yuav luj raws nws lub siab.  
3  Ua raws li qhov zoo thiab qhov ncaj mas
ntxim HUAB TAIS siab dua muab tsiaj los hlawv txi ntuj rau nws.
4  Lub qhov muag saib tsis taus luag, lub siab muab hlob,
lub teeb taws rau cov neeg phem,  tej no yog kev txhaum.
5  Tus neeg xyuam xim xub npaj ua ntej lawm yuav ua kom nws tau paj,
Tus neeg maj maj lam taus lam ua kawg yuav poob rau kev pluag
6  Tus neeg siv nws tus nplaig dag los nrhiav kev nplua nuj,
Mas yog nws caum ib lub npuas pa cua yuav coj nws mus mag ntxiab tuag.

10  Tus neeg nkhaus tus ntsuj plig tsuas xav ua phem xwb,
Tus uas nyob ze ntawm nws nrhiav tsis tau kev hlub ntawm nws li.
11  Thaum tus neeg khav theeb raug nplua, mas tus neeg tswv yim me thoob tsib tuaj,
Thaum muaj kev qhia tus neeg thoob tsib, mas nws paub ntau yam tuaj.
12  Tus uas Ncaj Ncees saib ntsoov tus neeg phem lub tsev;
Nws yuav ua kom tus neeg phem poob rau kev txom nyem.
13  Tus uas pos pob ntseg kom txhob hnov tus pluag lub suab quaj,
Nws kuj yuav tau quaj thiab tsis muaj neeg hnov nws ib yam.

NPN      119:   1, 27, 30, 34, 35, 44

Txais:    (35) Huab Tais, thov koj coj kuv kev mus taug raws koj cov lus qhia.    

Cov tau txoj hmoov zoo yog cov neeg coj tus cwj pwm ncaj ncees,
yog cov ua raws nraim HUAB TAIS Txoj Cai.

Txais:    (35) Huab Tais, thov koj coj kuv kev mus taug raws koj cov lus qhia.

Thov koj ua kom kuv to taub txoj kev coj raws koj cov lus qhuab qhia,
kuv yuav nybo twj ywm xav txog koj cov dej num muaj hwj chim.

Txais:    (35) Huab Tais, thov koj coj kuv kev mus taug raws koj cov lus qhia.

Kuv tau xaiv txoj kev tseeb taug,
kuv tau muab koj txoj cai tso tas mus li rau ntawm kuv hauv ntej.

Txais:    (35) Huab Tais, thov koj coj kuv kev mus taug raws koj cov lus qhia.

Thov koj ua kom kuv muaj kev to taub, ces kuv yuav coj koj Txoj Cai,
kuv yuav muab tas kuv lub siab lub ntsws los mloog koj Txoj Cai.

Txais:    (35) Huab Tais, thov koj coj kuv kev mus taug raws koj cov lus qhia.

Thov koj coj kuv kev mus taug raws koj cov lus qhia,
vim kuv txaus siab nyob hauv koj cov lus qhia

Txais:    (35) Huab Tais, thov koj coj kuv kev mus taug raws koj cov lus qhia.

Kuv yuav khaws koj Txoj Cai tas mus li,
tsis muaj caij tas tsis muaj caij kawg mus ib txhiab ib txhis.

Txais:    (35) Huab Tais, thov koj coj kuv kev mus taug raws koj cov lus qhia.

As Les Lus Yas:      LK  11:   28

Txais:   As les lus yas, as les lus yas.

Cov muaj txoj hmoov zoo yog cov mloog Tswv Ntuj lo lus,
thiab coj raws nraim li ntawd.  

Txais:   As les lus yas, as les lus yas.

Ntawv Moo Zoo:      LK  8:   19-21

19 Yes Xus niam thiab nws cov kwv tij tuaj, tab sis lawv tuaj cuag nws tsis tau vim muaj neeg coob. 20 Muaj neeg hais rau Yes Xus tias : "Koj niam thiab koj cov kwv tij tuaj sawv nraud, lawv xav pom koj." 21 Tab sis Yes Xus teb rau lawv tias : "Kuv niam thiab kuv cov kwv tij yog cov uas mloog Tswv Ntuj Lo Lus thiab lawv ua raws nraim li Tswv Ntuj Lo Lus.“

TIM      21     LUB     9     HLIS      2016

Hnub Plaub Lis Piam Nees Nkaum Tsib Nruab Xyoo C Nruab Lis Piam Xyoo II

Hwm LN  Hauv Paus Xa Lus Mas Tais, tus sau Ntawv Moo Zoo

Zaj Nyeem Ib:    ES FES XOS  4:   1-7, 11-13

1 Kuv yog tus neeg raug txim nyob hauv Huab Tais, kuv thov nej, kom nej coj ib lub neej phim txoj kev uas Ntuj hu nej los taug. 2 Nej yuav ua neeg tsis muab hlob, ua neeg siab mos siab zoo;  nej yuav ua siab ntev, ib leeg txhawb ib leeg nyob hauv txoj kev nyiam;  3 nej yuav siv zog txuag kom nej muaj kev koom siab koom ib tug Leej Tswv Yim nyob hauv txoj kev thaj yeeb.  4 Tsuas muaj ib lub Cev thiab ib lub Tswv Yim xwb ib yam li tsuas muaj ib txog kev cia siab nyob hauv txoj kev uas Ntuj hu nej thiab nej tau txais;  5 tsuas muaj ib tug Huab Tais, ib txoj kev ntseeg, ib lub cim ntxuav xwb,  6 tsuas muaj ib tug Tswv Ntuj ua sawv daws Txiv xwb, nws nyob siab dua sawv daws, nws tuaj ntawm sawv daws tuaj, nws nyob hauv sawv daws. 7 Tiam sis peb nyias tau txais Ntuj lub txiaj ntsim raws li Leej Pleev luj pub rau nyias.
11 Nws yog tus pub kom ib txhia ua Hauv Paus Xa Lus, ib txhia ua Yaj Saub, ib txhia ua tub tshaj lub Moo Zoo, ib txhia ua tswv zov yaj, ib txhia ua xib hwb,  12 nws ua li ntawd kom xwv cov ntshiab thiaj ua tau Tswv Ntuj tes dej num kom lawv txhim tsa tau Leej Pleev lub Cev,  13 ces thaum kawg peb sawv daws yuav ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, peb yuav yog tus tib neeg zoo txhij xoo txhua hlob tiav txuj tiav ci, raws li Leej Pleev lub Cev uas hlob tiav lawm.

NPN     19:   2-3, 4-5

Txais: (5) Lawv lo lus xa moo nrov mus thoob ntiaj teb.

Cov txheej ntuj saud piav txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim los.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo yeej nrov txog tim npoo ntuj.

Txais: (5) Lawv lo lus xa moo nrov mus thoob ntiaj teb.

As Les Lus Yas  -  Te Deum

Txais:    As les lus yas, as les lus yas.    

Tswv Ntuj, peb cav txog koj,    
peb tshaj tias koj yog Huab Tais;
tsoom Hauv Paus Xa Lus uas
muaj koob meej lawv cav txog koj.  

Txais:    As les lus yas, as les lus yas.

Ntawv Moo Zoo:    MT  9:   9-13

9 Yes Xus tawm mus, thaum nws tab tom mus kev, nws pom ib tug neeg hu ua Mas Tais, zaum ntawm lub rooj sau se. Yes Xus hais rau nws tias : "Koj raws kuv mus !" Ces tus neeg ntawd sawv tsees raws Yes Xus mus.
10 Thaum Yes Xus zaum noj mov hauv (Mas Tais) tsev, muaj ib co neeg sau se thiab ib co neeg txhaum coob tuaj nrog Yes Xus thiab cov thwj tim noj mov. 11 Cov Fas Lis Xais pom li ntawd, ces lawv hais rau cov thwj tim tias : "Vim li cas nej tus Xib Hwb nrog cov sau se thiab cov neeg txhaum noj mov ?" 12 Tab sis Yes Xus twb hnov qhov lawv hais lawm, nws thiaj teb tias : "Tsis yog cov neeg noj qab nyob zoo thiaj yuav vam txog kws kho mob, tsuas yog cov neeg mob thiaj vam txog xwb. 13 Nej yuav kawm lo lus no lub ntsiab : 'Qhov kuv xav yuav yog txoj kev khuv leej, tsis yog thaj txi ntuj.' Vim kuv tsis tuaj hu cov neeg ncaj, kuv tuaj hu cov neeg txhaum."

TIM 22 LUB 9 HLIS 2016

Hnub Tsib Lis Piam Nees Nkaum Tsib Nruab Xyoo C Nruab Lis Piam Xyoo II

Zaj Nyeem Ib: KOS ES LES 1: 2-11

2 Kos Es Les hais tias : "Yam yaj ntshis ntawm tej yam yaj ntshis, yam yaj ntshis ntawm tej yam yaj ntshis! Txhua yam yog yaj ntshis!
3 Tib neeg tau tus qab hau dab tsi ntawm nws txoj kev khwv ciaj khwv tuag, tiv tshav kub hauv lub qab hnub?
4 Ib tiam dhau lawm, lwm tiam tuaj, hos lub ntiaj teb nws nyob nws li qub.
5 Lub hnub tawm tuaj, lub hnub poob qho, ces nws maj nroos mus rau qhov chaw uas nws tawm tuaj.
6 Cua nplawm mus rau naj fab, cua tshuab mus lawm pej fab, cua kiv thiab kiv ncig lees, cua rov qab mus pib nplawm ntawm nws qhov qub chaw tuaj.
7 Tus dej twg kuj ntws mus hauv hiav txwv, tab sis lub hiav txwv tsis txawj puv li; cov dej kuj ntws tas zog mus rau qhov qub uas lawv ntws mus rau.
8 Txhua lo lus nyuaj hais tawm; tsis muaj ib yam yus yuav txawj piav tau. Qhov muag ntsia ntsoov los yeej ntsia tsis txaus yees, pob ntseg mloog ntsoov los yeej mloog tsis pov khawv.
9 Qhov twb muaj lawm tseem yuav muaj dua tuaj; qhov twb ua lawm tseem yuav ua dua ntxiv. Tsis muaj ib yam tshiab nyob hauv lub qab hnub no li.
10 Muaj tej yam uas yus hais tias : "Qhov no yog ib qho tshiab !" Tab sis yam ntawd twb muaj tau ntau tiam ua ntej yus lawm.
11 Yus tsis nco txog tiam neeg thaum ub li lawm; lwm hnub cov uas yuav los lawv qab tiam tom ntej no kuj yuav tsis nco txog lawv lawm thiab.

NPN 90: 3-4, 5-6, 12-13, 14 + 17BC

Txais: (1) Nyob txhua tiam, Huab Tais, koj yog peb qhov chaw nkaum.

Koj cia neeg hloov rov mus ua plua av,
koj hais tias: “Me nyuam neeg, nej rov mus.”
Vim tias ib txhiab xyoo rau koj zoo li yog nag hmo xwb,
vim nws dhau tas lawm, los tsuas zoo li
ib lub caij zov keeb thaum hmo ntuj xwb.

Txais: (1) Nyob txhua tiam, Huab Tais, koj yog peb qhov chaw nkaum.

Koj ua kom lawv tas thaum nyob nruab dab ntub,
tag kis sawv ntxov lawv zoo li cov nroj tsuag pib hloov:
thaum hnub tuaj nroj tsuag sawv ntsuab xiab,
tiam sis yav tsaus ntuj nws twb ntsws tas yaj tas.

Txais: (1) Nyob txhua tiam, Huab Tais, koj yog peb qhov chaw nkaum.

Thov koj qhia peb txawj suav peb cov hnub cov hmo kom zoo,
kom peb txawj muaj kev thoob tsib hauv nruab siab.
HUAB TAIS, thov koj rov qab los! Yuav tos hov ntev?
Thov koj khuv leej koj cov tub txib!

Txais: (1) Nyob txhua tiam, Huab Tais, koj yog peb qhov chaw nkaum.

Sawv ntxov tsees, thov koj muab koj txoj kev hlub rau peb kom puv npo,
ces peb yuav qw zoo siab hom khaj txhua hnub hauv peb lub neej.
Thov koj ua kom cov hauj lwm peb txhais tes ua sawv ruaj ntseg tuaj,
Thov koj ua kom cov hauj lwm peb txhais tes khwv nyob ruaj ntseg mus!

Txais: (1) Nyob txhua tiam, Huab Tais, koj yog peb qhov chaw nkaum.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: "Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis hla ntawm kuv mus.

Txais: As les lus yas, as les lus yas.

Ntawv Moo Zoo: LK 9: 7-9

7 Vaj txheeb Hes Los hnov txog txhua yam tshwm sim, nws tsis pom qab xav, vim ib txhia hais tias : "Yog Zam sawv hauv cov tuag rov los." 8 Qee leej hais tias : "Yog Es Lias tawm los." Lwm cov tseem hais tias : "Ib tug yaj saub thaum ub sawv rov los." 9 Tab sis Hes Los hais tias : "Zam, mas kuv kom luag txiav nws caj dab lawm. Ua li tus uas kuv hnov hais tias nws ua tej yam txawv li ntawd yog leej twg ?" Ces Hes Los nrhiav kom tau kev pom Yes Xus.

TIM 23 LUB 9 HLIS 2016

Hnub Rau Lis Piam Nees Nkaum Tsib Nruab Xyoo C Nruab Lis Piam Xyoo II

Hwm LN (Padre) Pio, ua Leej Choj

Zaj Nyeem Ib: KOS ES LES 3: 1-11

1 Nyob hauv lub qab ntuj no, muaj ib lub sij hawm teem rau tas puas tsav yam, muaj ib lub caij cia ua tas puas tsav yam. 2 Muaj ib lub caij yug los, thiab ib lub caij tuag; muaj ib lub caij cog, thiab ib lub caij rho qoob;
3 muaj ib lub caij muab tua, thiab ib lub caij kho kom zoo; muaj ib lub caij rhuav, thiab ib lub caij txhim tsa;
4 muaj ib lub caij quaj, thiab ib lub caij luag; muaj ib lub caij nyiav, thiab ib lub caij dhia lom zem;
5 muaj ib lub caij txawb pob zeb, thiab ib lub caij khaws pob zeb; muaj ib lub caij sib puag, thiab ib lub caij tsis txhob sib puag;
6 muaj ib lub caij nrhiav, thiab ib lub caij ploj; muaj ib lub caij muab khaws cia, thiab ib lub caij muab pov tseg;
7 muaj ib lub caij dua ntaub, thiab ib lub caij xaws ntaub; muaj ib lub caij nyob twj ywm, thiab ib lub caij hais lus.
8 Muaj ib lub caij nyiam, thiab ib lub caij ntxub; muaj ib lub caij ua rog, thiab ib lub caij nyob thaj yeeb.
9 Tus neeg uas siv zog khwv ciaj khwv tuag nws tau tus qab hau dab tsi ?
10 Kuv tau xav tswv yim txog txoj hauj lwm Tswv Ntuj muab rau tib neeg cov tub ua lawm.
11 Tswv Ntuj tau ua txhua yam kom dhos rau nyias lub sij hawm; nws muab lub sij hawm uas tsis txawj kawg tso rau hauv neeg lub siab, tab sis neeg yeej tsis to taub txog tias Tswv Ntuj ua dab tsi txij thaum lub hauv paus mus txog thaum kawg li.

NPN 144: 1B + 2ABC, 3-4

Txais: (1) Thov kom HUAB TAIS, kuv lub tsua, nto koob meej!

Thov kom HUAB TAIS, kuv lub tsua, nto koob meej,
Nws yog kuv qhov chaw nkaum, yog kuv lub yeej ntsa zeb,
Yog kuv lub loog ruaj nreb, yog tus cawm kuv dim,
Nws yog kuv daim leem phiaj, kuv tso siab rau nws .

Txais: (1) Thov kom HUAB TAIS, kuv lub tsua, nto koob meej!

HUAB TAIS, neeg yog dab tsi koj thiaj saib nws,
neeg leej tub yog leej twg koj thiaj nco txog nws?
Leej tib neeg zoo li ib nyuag qhov pa cua xwb,
nws lub neej zoo li tus duab ntxoov ntxoo uas dua mus.

Txais: (1) Thov kom HUAB TAIS, kuv lub tsua, nto koob meej!

As Les Lus Yas: MK 10: 45

Txais: As les lus yas, as les lus yas.

Neeg Leej Tub tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: LK 9: 18-22

18 Muaj ib zaug, Yes Xus mus teev Ntuj nws ib leeg, tsuas muaj nws cov thwj tim nrog nws xwb, Yes Xus nug lawv tias : "Tsoom sid hais tias kuv yog leej twg ?" 19 Cov thwj tim teb tias : "Ib txhia hais tias yog Zam Ntxuav Plig, ib txhia hais tias yog Es Lias, tseem muaj lwm cov hais tias yog ib tug yaj saub thaum ub sawv rov los lawm." 20 Yes Xus hais rau lawv tias : "Nej ne, nej hais tias kuv yog leej twg ?" Pob Zeb teb tias : "Koj yog Tswv Ntuj Leej Pleev." 21 Ces Yes Xus cheem thiab txwv lawv kom txhob hais qhov ntawd rau leej twg li. 22 Nws tseem hais tias : "Neeg Leej Tub yuav tsum raug txom nyem loj. Cov txwj laus, cov Thawj Leej Choj, thiab cov Kws Ntawv Ntshiab yuav muab nws xyeeb pov tseg. Ces nws yuav raug luag tua, tab sis hnub peb nws yuav sawv rov los."

TIM 24 LUB 9 HLIS 2016

Hnub Xya Lis Piam Nees Nkaum Tsib Nruab Xyoo C Nruab Lis Piam Xyoo II

Hwm Niam Mab Liab (Txhua Hnub Xya yog tsis muaj lwm yam ces peb hwm Niam Mab Liab)

Zaj Nyeem Ib: KOS ES LES 11: 9—12:8

11 9 Me tub hluas, koj yuav xyiv fab rau koj lub caij hluas, koj yuav ua lub siab kaj lug thaum koj tseem hluas. Koj mus raws koj lub siab pus koj mus, koj mus raws koj qhov muag pom. Tab sis koj yuav tsum paub tias Tswv Ntuj yuav txiav txim rau koj txog tej ntawd tib si. 10 Koj muab kev tu siab tshem mus deb ntawm koj lub siab, koj muab kev mob nkeeg tshem mus deb ntawm koj lub cev, vim lub caij hluas thiab lub caij plaub hau dub yuav yaj ntshis mus.
12 1 Koj yuav nco txog tus tsim koj los thaum koj tseem hluas, thaum tseem tsis tau muaj cov hnub cov hmo uas koj raug kev txom nyem, thiab thaum tsis tau txog cov xyoo uas koj hais tias : "Tej ntawd tsis zoo dab tsi rau kuv ntxiv;"
2 thaum lub hnub thiab qhov pom kev, lub hli thiab cov hnub qub tseem tsis tau tsaus, thaum ntuj los nag tas huab tseem tsis tau rov sawv;
3 thaum tsis tau txog hnub uas cov saib vaj saib tsev yuav tshee na, cov txiv neej cus plaws yuav khoov nkoos; cov poj niam yuav tseg zuj zus ib tug dhau ib tug yuav tsis zom zeb ntxiv; cov ntsia ntawm qhov rai yuav pom tsaus ntuj zuj zus tsis pom kev ntxiv,
4 thiab cov qhov rooj qhib mus nraum txoj kev yuav raug muab kaw; thiab lub suab zom zeb yuav ntsiag to; thaum yus tsim dheev vim me noog quaj; thaum cov suab kwv txhiaj ntsiag tas;
5 thaum yus ntshai txoj kev nce toj thiab txhawj txog yuav taug txoj kev; thaum tsob txiv as moos(almond/amandier) tseem tawg paj paug; thaum me kooj tshuab lub zog tseem tsis tau ntaug, thiab thaum cov txiv xyab txob (?) tseem tsis tau tsuag; thaum tus tib neeg tseem tsis tau mus rau qhov chaw yuav zwm av mus li, thiab cov quaj cov nyiav tseem tsis tau nyiav taug kev;
6 thaum txoj xov nyiaj tseem tsis tau tu nrho, lub ntim kub tseem tsis tau tawg rhe, lub hub ce dej hauv qhov dej tsis tau ntais, lub log hlua rub dej tseem tsis tau puas ntawm qhov dej,
7 thaum av luaj tseem tsis tau rov mus ua av li qhov qub, thiab thaum txoj pa tseem tsis tau rov mus cuag tus Tswv Ntuj uas pub txoj pa.
8 Kos Es Les hais tias : "Yam yaj ntshis ntawm tej yam yaj ntshis, tas puas tsav yam tsuas yog yaj ntshis."

NPN 90: 3-4, 5-6, 12-13, 14 + 17

Txais: (1) Nyob txhua tiam, Huab Tais, koj yog peb qhov chaw nkaum.

Koj cia neeg hloov rov mus ua plua av,
koj hais tias: “Me nyuam neeg, nej rov mus.”
Vim tias ib txhiab xyoo rau koj zoo li yog nag hmo xwb,
vim nws dhau tas lawm, los tsuas zoo li
ib lub caij zov keeb thaum hmo ntuj xwb.

Txais: (1) Nyob txhua tiam, Huab Tais, koj yog peb qhov chaw nkaum.

Koj ua kom lawv tas thaum nyob nruab dab ntub,
tag kis sawv ntxov lawv zoo li cov nroj tsuag pib hloov:
thaum hnub tuaj nroj tsuag sawv ntsuab xiab,
tiam sis yav tsaus ntuj nws twb ntsws tas yaj tas.

Txais: (1) Nyob txhua tiam, Huab Tais, koj yog peb qhov chaw nkaum.

Thov koj qhia peb txawj suav peb cov hnub cov hmo kom zoo,
kom peb txawj muaj kev thoob tsib hauv nruab siab.
HUAB TAIS, thov koj rov qab los! Yuav tos hov ntev?
Thov koj khuv leej koj cov tub txib!

Txais: (1) Nyob txhua tiam, Huab Tais, koj yog peb qhov chaw nkaum.

Sawv ntxov tsees, thov koj muab koj txoj kev hlub rau peb kom puv npo,
ces peb yuav qw zoo siab hom khaj txhua hnub hauv peb lub neej.
Thov koj ua kom cov hauj lwm peb txhais tes ua sawv ruaj ntseg tuaj,
Thov koj ua kom cov hauj lwm peb txhais tes khwv nyob ruaj ntseg mus!

Txais: (1) Nyob txhua tiam, Huab Tais, koj yog peb qhov chaw nkaum.

As Les Lus Yas: 2 TM 1: 10

Txais: As les lus yas, as les lus yas..

Peb tus Cawm Seej Leej Pleev Yes Xus rhuav kev tuag,
thiab nws lub Moo Zoo ua kom txoj sia nyob mus li ci tawm tuaj.

Txais: As les lus yas, as les lus yas.

Ntawv Moo Zoo: LK 9: 43B-45

43b Sawv daws yoob tas rau qhov Yes Xus tau ua, ces nws hais rau cov thwj tim tias :
44 "Nej ua tib zoo cuab pob ntseg mloog kuv cov lus kuv hais rau nej no: Neeg Leej Tub yuav raug luag muab nws cob rau hauv tsoom neeg txhais tes."
45 Tab sis cov thwj tim tsis to taub lo lus ntawd li. Yog zoo li dab tsi ntis lub ntsiab lawm kom lawv txhob to taub, thiab lawv kuj ntshai nug Yes Xus txog lo lus ntawd.

TIM 26 LUB 9 HLIS 2016

Hnub Ob Lis Piam Nees Nkaum Rau Nruab Xyoo C Nruab Lis Piam Xyoo II

Hwm LN Cosmas thiab LN Damian

Zaj Nyeem Ib: YOB 1: 6-22

6 Muaj ib hnub Tswv Ntuj cov tub tuaj cuag HUAB TAIS, Xas Tas kuj nrog lawv tuaj thiab. 7 HUAB TAIS hais rau Xas Tas tias : "Koj mus qhov twg lod ?" Xas Tas teb tias : "Kuv mus ncig ua si hauv ntiaj teb los." 8 HUAB TAIS hais tias : "Koj puas nco pom kuv tus tub txib Yob ? Nyob ntiaj teb, tsis muaj lwm tus zoo cuag li nws. Nws yog ib tug neeg ncaj, nws tsis muaj ib qho xyeej thiab nws hwm Tswv Ntuj, nws tsis ua phem !" 9 Ces Xas Tas teb zoj tias : "Tos Yob hwm Tswv Ntuj puas yog nws lam hwm dawb hwm do? 10 Puas yog koj twb xov laj kab thaiv ncig nws thiab nws tej vaj tse thiab tas puas tsav yam nws muaj tib si? Koj foom hmoov zoo rau nws tej hauj lwm, nws cov tsiaj huam vam puv lub teb chaws. 11 Yog zaum no koj tsa tes rhuav nws lub cuab tam tas huv si, mas kuv cog lus tias nws yeej yuav thuam Ntuj, nws yuav tsawm koj nyob ntawm koj xub ntiag." 12 HUAB TAIS hais rau Xas Tas tias : "Ua li lod ! Koj xav ua dab tsi rau nws lub cuab tam kuj tau nyob ntawm koj siab, tab sis koj tsis txhob kov nws nkaus xwb." Ces Xas Tas tawm ntawm Huab Tais xub ntiag mus lawm.

13 Muaj ib hnub Yob cov tub thiab cov ntxhais tab tom mus noj nqaij haus cawv tom tus tub hlob tsev, 14 muaj ib tug neeg khiav tuaj fi xov rau Yob tias : "Koj cov nyuj tseem tab tom laij teb, cov luj nog zaub nyob ntawm ib sab, 15 ib sij huam cov Xas Npes cia li tuaj puav thiab muab cab mus tas lawm. Lawv xuas ntaj tua koj cov tub txib tas, tshuav kuv ib leeg thiaj dim khiav los hais rau koj xwb." 16 Tus xa xov tseem hais lus, txawm siv muaj lwm tus khiav los txog ntua, nws hais tias : "Tswv Ntuj tso hluav taws poob saum Ntuj los hlawv koj cov yaj thiab koj cov neeg tuag tas, tshuav kuv ib leeg thiaj dim los hais rau koj xwb." 17 Tus ntawd tseem hais lus txawm siv muaj dua ib tug los hais tias : "Muaj ib co neeg Kas Ntes, lawv faib ua peb pab tuaj, lawv tuaj ntes koj cov ntxhuav cab mus tas lawm. Lawv xuas ntaj tua koj cov tub txib tuag tas, tshuav kuv ib leeg dim los hais rau koj xwb." 18 Nws tseem hais lus, twb muaj dua ib tug khiav los hais tias : "Koj cov tub thiab cov ntxhais tseem tab tom noj nqaij haus cawv tom koj tus tub hlob tsev, 19 muaj ib nthwv cua hlob hlob ntsawj tom hav suab puam tuaj cia li tuaj ntsawj plaub ces kaum tsev, ces tsev vau los tsuam cov hluas ces lawv tuag tas lawm, tshuav kuv ib leeg dim los hais rau koj paub xwb."

20 Ces Yob sawv tsees dua rhe nws lub tsho, nws muab plaub hau chais tas, nws mus khoov ti nkaus hauv av, nws hais tias : 21 "Kuv tawm hauv kuv niam plab los liab qab, kuv yuav rov mus liab qab. HUAB TAIS pub txhua yam, Huab Tais rov qab sau mus tas, HUAB TAIS lub npe nto koob meej !"
22 Yob raug kev txom nyem npaum li no los nws tsis ua txhaum li, tsis kam cem ib lo lus phem txog Tswv Ntuj li.

NPN 17: 1BCD, 2-3, 6-7

Txais: (6) Thov koj tig pob ntseg los rau kuv los mloog kuv lo lus thov.

HUAB TAIS, thov koj mloog ib zag lus ncaj ncees;
Koj cuab pom ntseg rau kuv lub suab quaj,
Koj tig ntsej los rau kuv lo lus thov; kuv di ncauj tsis hais lus dag.

Txais: (6) Thov koj tig pob ntseg los rau kuv los mloog kuv lo lus thov.

Cia koj ua tus txiav txim rau kuv,
kom koj qhov muag pom qhov ncaj!
koj pom hauv kuv nruab siab, koj tuaj xyuas kuv thaum hmo ntuj;
koj sim kuv siab nyob hauv hluav taws, koj yuav tsis pom dab tsi phem.

Txais: (6) Thov koj tig pob ntseg los rau kuv los mloog kuv lo lus thov.

Tswv Ntuj, kuv hu txog koj, vim koj yeej yuav teb kuv;
thov koj qaij pob ntseg los rau kuv, thiab mloog kuv lo lus.
Thov qhib koj lub siab hlub loj rau peb pom,
koj uas yog tus cawm seej rau cov neeg khiav los nkaum
hauv koj phab xis, kom lawv dim ntawm cov neeg ntxub lawv.

Txais: (6) Thov koj tig pob ntseg los rau kuv los mloog kuv lo lus thov.

As Les Lus Yas: MK 10: 45

Txais: As les lus yas, as les lus yas.

Neeg Leej Tub tuaj tsob hwb sawv daws
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: LK 9: 46-50

46 Cov thwj tim muaj ib zag tswv yim xav tias nyob hauv lawv, leej twg yog tus loj dua cov ? 47 Yes Xus paub qhov lawv xav hauv nruab siab, nws thiaj rub ib tug me nyuam los nyob ze nws, 48 ces nws hais rau lawv tias : "Leej twg txais tus me nyuam no vim kuv lub npe, mas yog nws txais kuv. Hos leej twg txais kuv mas yog nws txais Tus xa kuv tuaj. Vim tus me tshaj nyob hauv nej sawv daws yog tus loj dua cov." 49 Zam tsa ncauj hais tias : "Xib Hwb, peb pom ib tug neeg hu txog koj lub npe ntiab dab. Peb twb xav txwv nws, vim nws tsis nrog peb raws koj." 50 Yes Xus hais rau Zam tias : "Nej txhob txwv nws, vim tus twg tsis tiv nej, nws yog nej tog.”

TIM     27    LUB    9    HLIS     2016

Hnub Peb Lis Piam Nees Nkaum Rau Nruab Xyoo C Nruab Lis Piam Xyoo II

Hwm LN Vincet de Paul, ua Leej Choj

Zaj Nyeem Ib:      YOB  3:   1-3, 11-17, 20-23

1 Yob qhib ncauj tsawm hnub nws yug los. 2 Yob hais tias : 3 "Kheev lam hnub kuv yug los ploj mus, thiab hmo uas qhia tias ib tug tub nyuam qhuav xeeb los ploj mus.
11 Cas kuv tsis tuag thaum yug los, cas kuv txoj sia tsis tu thaum yug poob nthav? 12 Tim li cas thiaj muaj ob lub hauv caug los cug kuv, ob lub mis los pub rau kuv noj? 13 Yog txhob muaj li ntawd mas ntshai nyem no kuv twb pw kaj siab lug, tau zoo tsaug zog tau zoo so lawm, 14 tau nrog ntiaj teb tej vaj, tej nom tej tswv nyob hauv lawv tej ntxa zeb ntxa tsua lawm, 15 los tau nrog cov tub huab tais nyob hauv lawv cov  ntxa muaj nyiaj muaj kub ntau lawm. 16 Los kheev lam kuv zoo li tus me nyuam nchuav lawm ces lawv muab mus zais thiab zoo li cov me nyuam uas tsis tau pom lub ntuj. 17 Nyob ntawd cov neeg phem tseg tsis ua phem ntxiv,  cov neeg muaj kev ceeb laj lawv tau kev so.
20 Tus neeg raug txom nyem loj cas tseem hu nws los pom qhov pom kev, thiab tus neeg muaj kev tu siab loj cas yuav hu nws los muaj txoj sia ? 21 Xav tuag los tuag tsis taus, ntshaw hnub tuag mas tseem ntshaw tshaj ib thooj kub. 22 Yog thaum twg pom ib pawg av mas yuav zoo siab tshaj plaws, hnub twg yuav mus hauv lub qhov ntxa mas yuav zoo plawv kawg li. 23 Tim li cas thiaj muab txoj sia rau tus neeg uas nrhiav tsis tau kev tawm, uas Tswv Ntuj tsa laj kab kaw ncig nws tas ? "

NPN    88:   2-3, 4-5, 6, 7-8

Txais:    (3) Huab Tais, thov cia kuv cov lus thov nce tuaj txog koj.

HUAB TAIS, tus Tswv Ntuj cawm kuv,
hmo ntuj, kuv quaj hu txog koj.
Thov cia kuv cov lus thov nce tuaj txog koj,
thov koj tig ntsej los mloog kuv lub suab nroo.

Txais:    (3) Huab Tais, thov cia kuv cov lus thov nce tuaj txog koj.

Vim kev nyuaj tsuam hnyav kawg rau kuv tus ntsuj plig,
kuv txoj sia tshuav yaj mus rau ntuj txias teb tsaus.
Luag suav kuv nrog cov neeg mus nkag qhov av lawm,
Kuv zoo li tus neeg uas luag pab tsis tau ntxiv.

Txais:    (3) Huab Tais, thov cia kuv cov lus thov nce tuaj txog koj.

Kuv pw hauv cov tub tuag lub lav,
zoo li tus uas luag muab tua pov rau hauv qhov ntxa,
tus uas koj twb tsis nco qab nws lawm,
vim nws ploj mus deb ntawm koj lawm.

Txais:    (3) Huab Tais, thov cia kuv cov lus thov nce tuaj txog koj.

Koj pov kuv mus rau hauv lub qhov tob tob,
nyob hauv lub qhov ntuj tsaus ntuj nti.
Koj txoj kev npau taws tsuam kuv hnyav,
koj hliv koj cov dej nphau nphwv los nyab kuv.

Txais:    (3) Huab Tais, thov cia kuv cov lus thov nce tuaj txog koj.

As Les Lus Yas:      MK  10: 45

Txais:   As les lus yas, as les lus yas.

Neeg Leej Tub tuaj tsob hwb sawv daws
thiab muab nws txoj sia los ua nqi txhiv coob leej.

Txais:   As les lus yas, as les lus yas.

Ntawv Moo Zoo:     LK  9:   51-56

51 Lub sij hawm uas Yes Xus yuav ncaim lub ntiaj teb los yuav txog, ces nws ua siab tawv qhawv mus pem Yes Lus Xas Les. 52 Yes Xus xa ib co ua ntej mus fi xov. Cov neeg fi xov sawv kev mus, lawv mus hauv ib lub zos Xas Mas Lias kom tau npaj txhua yam rau Yes Xus. 53 Tab sis cov Xas Mas Lias tsis txais Yes Xus, vim Yes Xus yuav mus pem Yes Lus Xas Les. 54 Ob tug thwj tim Yas Kos thiab Zam nkawd pom li ntawd, nkawd hais tias : "Huab Tais, koj puas xav kom peb hu ib co hluav taws nqes saum ntuj los hlawv lawv ?" 55 Tab sis Yes Xus tig los cem nkawd. 56 Ces lawv mus ntxiv rau lwm lub zos.

TIM      28     LUB     9     HLIS      2016

Hnub Plaub Lis Piam Nees Nkaum Rau Nruab Xyoo C Nruab Lis Piam Xyoo II    

Hwm LN Wenceslaus, LN Lawrence Ruiz, thiab cov

Zaj Nyeem Ib:       YOB  9:   1-12, 14-16

1 Yob qhib ncauj nws hais li no :
2 "Qhov tseeb tiag mas kuv paub tias yeej yog li ntawd: tib neeg puas yuav cav tau kom nws yeej Tswv Ntuj?
3 Leej twg sim khav mus nrog Tswv Ntuj sib cav saib, ib txhiab zaus nws twb teb tsis taus teb ib zaug.
4 Tswv Ntuj lub siab thoob tsib, nws lub zog loj, leej twg yuav cav yeej nws thiab tsis raug xwv txheej ?
5 Tswv Ntuj ua kom tej roob twb tshais chaw tau, nws tsis xub nug lawv. Thaum nws npau taws, nws muab lawv nphau. 6 Nws diaj lub ntiaj teb kom dhia tawm ntawm nws qhov chaw, nws ua kom cov ncej txheem lub ntiaj teb ua voj ua viag.
7 Yog nws txwv lub hnub mas lub hnub yuav tsis tawm tuaj. Nws yuav thaiv cov hnub qub tsis pub lawv ci.
8 Nws ib leeg yog tus nthuav lub ntuj kom dav, yog tus tsuj cov dej ntas siab siab nyob hauv hiav txwv.
9 Tswv Ntuj tsim lub hnub qub kaj ntuj, thiab tsim txhiaj txiv mim, nws tsism cov hnub qub ples yas thiab ntsauv hnub qub sab naj.
10 Yog nws tsim tej yam loj tas nrho yus ntsuas tsis tau, nws tsim ntauj yam zoo tas nrho, yus suav tsis thoob.
11 Tab yog nws hla saum kuv, los kuv pom tsis tau nws, kuv hnov tsis tau nws chwv kuv.
12 Tab nws txeeb ib yam nqa mus, leej twg yuav cheem tau, tsis muaj leej twg muaj cuab kav hais tias : koj ua dab tsi li ntawd?
14 Kuv puas tseem yuav nrhiav ib co lus hais kom kuv tau cai, los xaiv ib co lus hais tiv kom yeej nws ?
15 Tab kuv txawm muaj cai npaum twg, los kuv yuav tsis teb dab tsi. Kuv kawg yuav thov tus uas txiav txim rau kuv kom nws hlub kuv xwb.
16 Yog kuv hu txog Tswv Ntuj, es nws teb kuv, mas kuv yuav ntseeg tsis tau tias cas nws tseem mloog kuv cov lus thov thiab."

NPN      88:   10BC-11, 12-13, 14-15

Txais:    (3) Huab Tais, thov cia kuv cov lus thov nce tuaj txog koj.

HUAB TAIS, kuv niaj hnub hu koj,
kuv cev kuv txhais tes tuaj rau koj.
Koj puas yuav ua hwj huam loj pab cov neeg tuag?
Cov duab ntxoov ntxoo puas yuav sawv los cav txog koj?

Txais:    (3) Huab Tais, thov cia kuv cov lus thov nce tuaj txog koj.

Nyob hauv qhov ntxa, lawv puas tshaj txog koj lub siab hlub neeg?
Nyob hauv lub qhov ploj lawv puas hais txog koj lub siab ncaj?
Nyob teb chaws tsaus ntuj, lawv puas paub txog tej yam txaus qhuas koj ua?
Hauv teb chaws Hnov Qab, lawv puas paub txog koj txoj kev ncaj?

Txais:    (3) Huab Tais, thov cia kuv cov lus thov nce tuaj txog koj.

HUAB TAIS, ntawm kuv, mas kuv hu txog koj;
thaum sawv ntxov, kuv zaj thov ntuj xub nce tuaj txog koj.
HUAB TAIS, vim li cas koj xyeeb kuv tawm?
Vim li cas koj zais koj ntsej muag ntawm kuv?

Txais:    (3) Huab Tais, thov cia kuv cov lus thov nce tuaj txog koj.

As Les Lus Yas:      FLP  3:   8-9

Txais:    As les lus yas, as les lus yas.

kuv saib tas puas tsav yam tsis muaj qab hau,
vim kuv xav tau Leej Pleev thiab xav nyob hauv nws.

Txais:    As les lus yas, as les lus yas.

Ntawv Moo Zoo:       LK  9:   57-62

57 Thaum Yes Xus thiab nws cov thwj tim lawv mus, nyob ntawm kev, muaj ib tug neeg hais rau Yes Xus tias : "Koj mus qhov twg los kuv yuav raws koj mus." 58 Yes Xus hais rau nws tias : "Hma muaj hma lub qhov nkaum, hos tej noog ya saum ntuj los lawv muaj lawv lub zes. Tab sis Neeg Leej Tub tsis muaj chaw rau ncoo." 59 Yes Xus tseem hais rau lwm tus neeg tias : "Koj raws kuv mus." Tiam sis tus ntawd hais tias : "Thov koj cia kuv mus faus kuv txiv tso." 60 Tab sis Yes Xus hais rau nws tias : "Koj cia cov tuag faus lawv cov neeg tuag, hos koj, mas koj mus tshaj Tswv Ntuj lub Ceeb Tsheej." 61 Tseem muaj ib tug hais tias : "Huab Tais, kuv yuav raws koj mus, tab sis thov koj cia kuv rov mus hais ib lo lus yuav sib ncaim rau kuv tsev neeg tso." 62 Yes Xus hais rau nws tias : "Leej twg cev tes tuav rab khais lawm, nws tseem tig ntsia tej yam nws tso tseg rov tom qab, mas nws tsis phim mus Tswv Ntuj lub Ceeb Tsheej."

TIM     29    LUB    9    HLIS     2016

Hnub Tsib Lis Piam Nees Nkaum Rau Nruab Xyoo C Nruab Lis Piam Xyoo II

Hwm cov Tuam Tshiab LN  Mis Kas(Michael), Nkas Nplias(Gabriel), thiab Las Fais(Raphael),




Zaj Nyeem Ib:      DN  7:   9-10, 13-14

9 Kuv ntsia, kuv txawm pom muaj ib co theej kiab txawb ntawd, thiab muaj ib tug Laus los zaum saum nws lub theej kiab. Nws cov ris tsho dawb ci cuag daus, nws cov plaub hau dawb cuag plaub yaj. Nws lub theej kiab yog nplaim taws, muaj ib co log hluav taws cig lam lug. 10 Muaj ib tug dej yog hluav taws txhawv ntws lug ntawm nws xub ntiag los. Txhiab txhiab leej tsob hwb nws, vam vam leej sawv ntsug nyob ntawm nws xub ntiag. Cov uas yog lub rooj txiav txim zaum nyob ntawd, tej ntawv twb nthuav tas lawm.
13 Thaum hmo ntuj kuv tseem yees pom tej yam zoo li no:  Tuaj nyob saum cov huab zoo li yog ib tug Neeg Leej Tub;  thaum nws los txog ze ntawm tus Laus lawm, lawv coj nws mus txog ntua ntawm tus Laus xub ntiag. 14 Ces Neeg Leej Tub txais lub hwj huam, lub koob meej thiab kev ua vaj. Tas txhia haiv neeg, txhia kuj cuab, txhia xeem lus tsob hwb nws. Nws lub tuam teb yog ib lub tuam teb nyob mus li tsis txawj kawg. Nws lub teb chaws yuav tsis raug kev piam tseem li.

Los      QYTN  12:   7-12AB

7 Muaj ib nthwv rog nyob saum ntuj : Mis Kas thiab nws cov Tshiab ua rog ntaus tus Zaj. Tus Zaj thiab nws cov dab kuj ua rog tiv lawv thiab. 8 Tab sis tus Zaj swb lawm. Ces tus Zaj thiab nws cov dab tsis tau kev nyob saum ntuj ntxiv. 9  Niag Zaj loj loj, niag nab txheej thaud uas tseem hu ua Dab Phem thiab Xas Tas, uas yog tus ntxias tas ntiaj teb neeg , nws raug muab cuam pov rau hauv ntiaj teb thiab nws cov dab kuj raug pov nrog nws huv tib si.  
10 Ces kuv hnov ib lub suab nrov saum ntuj tuaj tias : “Zaum no, kev yeej, kev muaj hwj huam, thiab kev ua vaj yog peb tus Tswv Ntuj ntiag tug, thiab kev txiav txim yog nws Leej Pleev li. Vim tus niag uas liam rau peb cov kwv tij nruab hnub hmo ntuj nyob ntawm Tswv Ntuj xub ntiag, nws raug muab cuam poob rau puag hauv lawm. 11 Lawv yeej nws vim Leej Yaj cov ntshav, thiab vim lawv lo lus ua tim khawv. Lawv tsis khuv xim lawv txoj sia, lawv yeem tuag. 12 Vim li ntawd mas lub ntuj thiab tas cov uas nyob saum ntuj, nej zoo siab mog !”

NPN      138:   1-2AB, 2CDE-3, 4-5

Txais:    (1) HUAB TAIS, kuv yuav cav txog koj nyob ntawm cov tshiab xub ntiag.  

Kuv yuav ua koj tsaug, HUAB TAIS, tas kuv lub siab ntsws,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm cov tshiab xub ntiag;
kuv yuav tuaj pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais:    (1) HUAB TAIS, kuv yuav cav txog koj nyob ntawm cov tshiab xub ntiag.

Vim koj lub siab zoo thiab koj txoj kev tseeb,
koj tau muab koj lub npe thiab koj txoj kev cog lus
ua qhov loj tshaj tas txhua yam.
Thaum kuv hu, koj teb kuv,
koj ntxiv zog rau kuv kom kuv lub zog loj tuaj.

Txais:    (1) HUAB TAIS, kuv yuav cav txog koj nyob ntawm cov tshiab xub ntiag.

HUAB TAIS, tas ib tsoom vaj ntxwv nyob ntiaj teb ua koj tsaug,
vim lawv hnov koj cov lus koj lub ncauj tau cog.
Lawv cav lus zoo txog HUAB TAIS tej kev tias :
"HUAB TAIS lub koob meej loj tas nrho !

Txais:    (1) HUAB TAIS, kuv yuav cav txog koj nyob ntawm cov tshiab xub ntiag.

As Les Lus Yas:       NPN  103:   21

Txais:   As les lus yas, as les lus yas.

Cia li cav lus zoo txog HUAB TAIS,  nej uas yog nws tsoom tshiab,
nej yog nws cov tub txib ua ywj nws lub siab xav.

Txais:   As les lus yas, as les lus yas.

Ntawv Moo Zoo:     ZAM  1:   47-51

47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem tub His Xas Lais uas tsis zais siab li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau Nas Tas Nais tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub tiag ! Koj yog His Xas Lais tus Vaj." 50 Yes Xus hais rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg. Koj yuav pom tej yam loj dua no." 51 Ces Yes Xus hais rau Nas Tas Nais tias : "Kuv hais qhov muaj tseeb tiag rau nej: Nej yuav pom lub ntuj qhib los, thiab pom Tswv Ntuj cov Tshiab nce thiab nqes los saum Neeg Leej Tub."

TIM 30 LUB 9 HLIS 2016

Hnub Rau Lis Piam Nees Nkaum Rau Nruab Xyoo C Nruab Lis Piam Xyoo II

Hwm LN Jerome, ua Leej Choj thiab Kws Kev Ntseeg (Doctor)

Zaj Nyeem Ib: YOB 38: 1, 12-21; 40: 3-5

38 1 HUAB TAIS nyob hauv nag xob nag cua teb rau Yob tias :
12 Nyob hauv koj lub neej, koj puas tau hais ib zaug kom sawv ntxov tawm los? Koj puas tau qhia kom lub hnub tawm thaum yog nws lub caij tawm, 13 kom nws tuav lub ntiaj teb tus ntug nchos kom cov neeg siab phem tawm mus? 14 Ces lub ntiaj teb yuav hloov tas zoo li cov av luag ntaus thwj rau thiab yuav raug muab zas tas zoo li zas tsoos tsho. 15 Tiam sis qhov pom kev yuav tsis ci mus rau cov neeg phem thiab txhais npab tsa lub nrig yuav raug muab dam.
16 Koj puas tau mus txog lub hauv dej hiav txwv tawm txhawv los, thiab puas tau mus yos ncig hauv tej qab thu tob tob? 17 Koj puas tau pom cov qhov rooj mus hauv tub tuag teb los koj puas tau pom cov qhov rooj vag mus hauv teb chaws tsaus ntuj ? 18 Koj puas paub txog tias lub ntiaj teb dav npaum li cas ? Yog koj paub tas tej no, mas koj hais saib: 19 Qhov pom kev lub chaw nyob yog nyob sab twg, qhov tsaus ntuj lub chaw nyob yog nyob qhov twg ? 20 Koj coj puas tau qhov pom kev, thiab qhov tsaus ntuj rov mus rau lawv tej ciam teb ciam av, koj taw puas tau nyias txoj kev rau nyias taug rov mus nyias lub chaw? 21 Yog koj paub txog tej ntawd, mas yog vim koj xub yug los thiab koj nyob tau ntev niaj ntau xyoo kawg li!
40 3 Yob teb rau HUAB TAIS tias : "Kuv lam tau lam hais lus xwb ! Kuv yuav teb dab tsi rau koj ? 4 Kuv yuav muab tes los pos kuv qhov ncauj. 5 Kuv tau hais lus ib zaug lawm, kuv yuav tsis hais ntxiv. Zaum ob, kuv yuav tsis hais dab tsi ntxiv."

NPN 139: 1-3, 7-8, 9-10, 13-14AB

Txais: (24b) Huab Tais, thov koj coj kuv mus taug txoj kev muaj sia nyob mus li.

HUAB TAIS, koj ntsia pom tshab hauv kuv, koj paub kuv :
koj paub thaum kuv sawv thiab thaum kuv zaum ;
koj nyob deb tsom pom tas tej kuv xav.
kuv mus kev los kuv pw, koj saib ntsoov,
koj paub txhua txoj kev kuv taug.

Txais: (24b) Huab Tais, thov koj coj kuv mus taug txoj kev muaj sia nyob mus li.

Kuv yuav mus qhov twg thiaj nraim ntawm koj lub tswv yim?
Kuv yuav khiav lawm ces twg, thiaj nyob deb ntawm koj?
Yog kuv nce mus saum ntuj, koj twb nyob saud !
Yog kuv nqes lawm puag ntuj txias teb tsaus, koj kuj nyob hauv !

Txais: (24b) Huab Tais, thov koj coj kuv mus taug txoj kev muaj sia nyob mus li.

Yog kuv ya raws lub caij kaj ntug ob phab tis mus,
kuv mus nyob puag dej ntuj sab kawg nkaus tim ub,
los tseem yog koj txhais tes coj kuv mus,
yog koj sab tes xis hwj kuv kom kuv nyob ruaj nreb.

Txais: (24b) Huab Tais, thov koj coj kuv mus taug txoj kev muaj sia nyob mus li.

Koj yeej yog tus tsim kuv tej plab plaw tiag ;
koj xaws koj ntxiv kuv hauv kuv niam plab.
Kuv cav lus zoo ua koj tsaug, vim koj lub hwj huam loj tas nrho :
koj tsim kuv zoo ua luaj, koj tej dej num zoo nkauj kawg nkaus.

Txais: (24b) Huab Tais, thov koj coj kuv mus taug txoj kev muaj sia nyob mus li.

As Les Lus Yas: NPN 95: 8

Txais: As les lus yas, as les lus yas.
.
Hnub no, yog nej hnov nws lub suab,
Nej tsis txhob ua nej lub siab tawv ncauj .

Txais: As les lus yas, as les lus yas.

Ntawv Moo Zoo: LK 10: 13-16

Yes Xus tsa suab hais tias:
13 Kos Las Ntxis, koj txoj hmoov phem ! Npes Xais Das, koj txoj hmoov phem ! Cov hwj huam yees ntxwv uas Ntuj ua hauv neb, yog lam ua nyob Tws Los thiab Xis Doos, mas lawv twb hnav ntaub tsaj thiab nphoo tshauv rau lawv los ua kev thov txhaum lawm ntxov. 14 Txog hnub Txiav Txim, Tws Los thiab Xis Doos yuav raug txim sib dua neb. 15 Hos koj, Kas Fas Naus, koj xav tias koj lub hwj chim yuav siab txij ntuj no lod? Koj ces kawg yuav nqes mus lawm hauv dab phem teb xwb.
16 Leej twg mloog nej, mas yog nws mloog kuv. Leej twg xyeej nej, mas kuj yog xyeej kuv. Leej twg xyeej kuv, mas yog nws xyeej tus xa kuv tuaj."

TIM 1 LUB 10 HLI 2016

Hnub Xya Lis Piam Nees Nkaum Rau Nruab Xyoo C Nruab Lis Piam Xyoo II

Hwm LN Tes Les Xas nyob Lisieux (nws tseem muaj ob peb lub npe ntxiv, xws li: Thérèse of the Child Jesus and of the Holy Face / Thérèse de l’Enfant Jesus et de la Sainte Face, Thérèse the Little Flower/ Thérèse la Petite Fleur),

Zaj Nyeem Ib: YOB 42: 1-3, 5-6, 12-17

1 Yob teb HUAB TAIS tias : 2 "Kuv paub tias koj muaj hwj huam tas nrho. Koj xav dab tsi koj ua tau tas tib si. 3 Kuv hais txog tej yam loj tas nrho, kuv hais ib co lus tsis muaj ntsiab; kuv lam kwv yees hais tej yam uas kuv tsis to taub thiab kuv tsis paub txog.
5 Yav tas los, kuv paub koj vim kuv hnov luag tej hais xwb. Tab sis nyem no, kuv paub koj vim kuv tau pom koj lawm. 6 Ua li mas kuv rov thim kuv cov lus kuv tau hais, kuv them txim nyob hauv plua av thiab plua tshauv."
12 Ces HUAB TAIS foom hmoov zoo rau Yob lub neej yav laus kom tau zoo dua yav thaud. Yob muaj nto kaum plaub txhiab tus yaj, rau txhiab tus ntxhuav, ib txhiab nkawm nyuj thiab ib txhiab tus luj. Nws yug tau xya leej tub thiab peb leeg ntxhais. 14 Tus ntxhais hlob hu ua Me Nkauj Nquab, tus nrab hu ua Me Tsw Qab, tus peb hu ua Me Kub Rau Tshuaj. 15 Nyob thoob hauv lub teb chaws tsis muaj ib tug poj niam zoo nkauj npaum li Yob cov ntxhais. Lawv txiv kuj faib cuab tam rau lawv ib yam li faib rau lawv cov nus. 16 Tom qab tej no lawm, Yob tseem ua neej ntev txog ib puas plaub caug xyoo ntxiv. Nws tau pom nws cov tub, pom nws cov tub xeeb ntxwv mus txog phaj plaub. 17 Nws tau ua neej nyob laus nkoos tau ntau niaj ntau xyoo txaus nkaus, ces nws mam li tuag.

NPN 119: 66, 71, 75, 91, 125, 130

Txais: (135) Huab Tais, ua kom koj lub ntsej muag ci tuaj rau kuv.

Koj qhia kev thoob tsib thiab kev txawj ntse rau kuv,
vim kuv tso siab rau koj cov lus qhia.

Txais: (135) Huab Tais, ua kom koj lub ntsej muag ci tuaj rau kuv.

Kev txom nyem yog ib qho zoo rau kuv,
vim nws ua kom kuv kawm koj cov kev cai lij choj.

Txais: (135) Huab Tais, ua kom koj lub ntsej muag ci tuaj rau kuv.

HUAB TAIS, kuv paub tias cov cai koj txiav yog cai ncaj ncees,
thaum koj cia kuv raug txom nyem, yog koj xav ua zoo rau kuv.

Txais: (135) Huab Tais, ua kom koj lub ntsej muag ci tuaj rau kuv.

Tas ib puas tsav yam nyob khov kho los txog tav no,
raws li koj tau teem, vim txhua tsav yam yuav koj lus.

Txais: (135) Huab Tais, ua kom koj lub ntsej muag ci tuaj rau kuv.

Kuv yog koj tus tub txib, thov koj pub kom kuv txawj to taub,
ces kuv yuav paub txoj cai koj tau txiav.

Txais: (135) Huab Tais, ua kom koj lub ntsej muag ci tuaj rau kuv.

Thaum kuv paub koj cov lus lawm, kuv pom kev tuaj,
koj cov lus ua kom cov neeg me muaj kev to taub.

Txais: (135) Huab Tais, ua kom koj lub ntsej muag ci tuaj rau kuv.

As Les Lus Yas: MT 11: 25

Txais: As les lus yas, as les lus yas.

Leej Txiv, kuv cav lus zoo txog koj, Huab Tais kav lub ntuj lub teb,
vim koj qhib tej yam tob txog lub Ceeb Tsheej rau cov neeg me paub.


Txais: As les lus yas, as les lus yas.

Ntawv Moo Zoo: LK 10: 17-24

17 Pab xya caum ob leeg rov qab los txog, lawv zoo siab kawg, lawv hais rau Yes Xus tias : "Huab Tais, tab yog cov dab phem, tsis kav lawv nyoo peb vim koj lub npe." 18 Yes Xus hais rau lawv tias : "Kuv twb pom Xas Tas poob saum ntuj los zoo li ib kab xob laim lawm! 19 Nej saib ! Kuv pub hwj huam rau nej kom nej tsuj tau nab, tsuj tau kab lij tshooj, tsuj tau Yeeb Ncuab lub hwj huam tib si, tsis muaj dab tsi yuav ua xwv txheej tau rau nej. 20 Nej tsis txhob zoo siab vim dab nyoo nej. Nej yuav zoo siab vim nej lub npe raug muab sau cia saum ntuj lawm.” 21 Lub sij hawm ntawd, Yes Xus zoo siab tas nrho nyob hauv Leej Ntuj Plig Ntshiab, nws hais tias : "Txiv, kuv cav lus zoo txog koj, Huab Tais kav lub ntuj lub teb, koj tau zais qhov ntawd rau cov neeg thoob tsib thiab cov neeg ntse, koj qhib tawm rau cov neeg me paub, Txiv, vim koj nyiam ua li ntawd. 22 Kuv Txiv muab tas ib puas tsav yam rau kuv. Tsis muaj leej twg paub tias Leej Tub yog tus twg, kawg yog Leej Txiv thiaj paub xwb. Tsis muaj leej twg paub tias Leej Txiv yog tus twg, kawg yog Leej Tub thiaj paub xwb, thiab tus uas Leej Tub xav qhia rau kom nws paub." 23 Yes Xus tig los rau nws cov thwj tim, thaum lawv nyob rau ib qho, nws hais rau lawv tias : "Lub qhov muag uas pom tej yam nej pom no tau txoj hmoov zoo kawg! 24 Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis lawv tsis tau hnov."

TIM 3 LUB 10 HLI 2016

Hnub Ob Lis Piam Nees Nkaum Xya Nruab Xyoo C Nruab Lis Piam Xyoo II

Zaj Nyeem Ib: NKAS LAS TIAS 1: 6-12

Paj Lug sau ntawv tias:
6 Kuv poob siab tas tias cas nej tso tus uas tau hu nej vim Leej Pleev lub txiaj ntsim pov tseg sai tas npaud, nej cia li mus rau lwm yam moo zoo lawm, 7 txawm tias tsuas muaj ib lub moo zoo xwb; tiam sis yog muaj ib co neeg xav ua kom ntxhov quav niab nyob hauv nej : lawv xav muab Leej Pleev lub Moo Zoo ntxeev. 8 Nej yuav tsum paub tias, tab yog peb los yog Ntuj ib tug Tshiab nqes saum ntuj los qhia ib lub moo zoo txawv lub peb tau tshaj rau nej lawm, mas thov kom tus ntawd tau hmoov phem. 9 Peb twb tau hais rau nej lawm, hnub no, kuv rov hais dua tias : yog muaj neeg qhia ib lub moo zoo txawv lub nej tau txais lawm, mas thov kom tus ntawd raug txoj hmoov phem. 10 Nyem no, kuv puas nrhiav kom neeg nyiam kuv, los kom Tswv Ntuj nyiam kuv ? Kuv puas yog nrhiav kom ua xis neeg siab ? Yog kuv xav ua xis neeg siab xwb, mas kuv yuav tsis yog Leej Pleev ib tug tub qhe li. 11 Cov kwv tij, nej yuav tsum paub tias lub Moo Zoo uas kuv tuaj qhia rau nej, mas neeg lub tswv yim tsis duav li. 12 Kuv tsis tau txais thiab tsis tau kawm lub Moo Zoo ntawm ib tug neeg los : yog Yes Xus Pleev yees tawm tuaj qhia rau kuv paub.

NPN 111: 1B-2, 7-8, 9 + 10C

Txais: (5) Huab Tais yuav nco ntsoov nws cov lus nws tau cog tas mus li.

Kuv yuav ua HUAB TAIS tsaug tas siab tas ntsws
nyob hauv cov neeg ncaj lub rooj tuav xam thiab hauv lub txoos.
HUAB TAIS cov hauj lwm loj tas nrho,
Cov neeg nyiam HUAB TAIS cov hauj lwm, lawv kawm nws tej dej num.

Txais: (5) Huab Tais yuav nco ntsoov nws cov lus nws tau cog tas mus li.

Cov hauj lwm nws txhais tes ua yog hauj lwm tseeb thiab ncaj nces.
Nws cov lus qhuab qhia yog cov lus tsim nyog tso siab rau,
Yog cov lus yuav nyob ruaj mus li ib txhis,
xab xeeb rau hauv kev tseeb thiab kev ncaj ncees.

Txais: (5) Huab Tais yuav nco ntsoov nws cov lus nws tau cog tas mus li.

Nws xa kev cawm dim tuaj rau nws haiv neeg,
nws tau tshaj kom lo lus nws tau cog nyob mus li.
Nws lub npe ntshiab muaj hwj xyeej tas nrho.
Lo lus cav txog HUAB TAIS nyob mus txheej dhau txheej.

Txais: (5) Huab Tais yuav nco ntsoov nws cov lus nws tau cog tas mus li.

As Les Lus Yas: ZAM 13: 34

Txais: As les lus yas, as les lus yas.

Kuv muab ib lo lus qhia tshiab rau nej :
nej yuav sib nyiam sib hlub ib yam li kuv tau nyiam tau hlub nej.

Txais: As les lus yas, as les lus yas.

Ntawv Moo Zoo: LK 10: 25-37

25 Lub sij hawm ntawd, ib tug Kws Lij Choj sawv, nws xav sim Yes Xus ces nws nug tias : "Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam ?" 26 Yes Xus hais rau nws tias : "Nyob hauv Txoj Cai muaj dab tsi sau tseg ? Koj nyeem txog dab tsi ? 27 Tus Kws Lij Choj teb tias : "Koj yuav nyiam Huab Tais, koj tus Tswv Ntuj, tas koj siab ntsws, tas koj tus ntsuj plig, tas koj lub zog, tas koj lub tswv yim, thiab koj yuav nyiam tus nyob ze koj ib yam li koj nyiam koj.” 28 Yes Xus hais rau tus Kws Lij Choj tias : "Koj teb raug lawm. Koj ua li ntawd, koj yuav muaj txoj sia." 29 Tab sis tus Kws Lij Choj xav kom nws tau cai ces nws hais rau Yes Xus tias : "Leej twg yog tus nyob ze kuv ?” 30 Yes Xus thiaj hais ntxiv tias : "Muaj ib tug neeg nqes ntawm Yes Lus Xas Les mus rau nram Yes Lis Kos. Nws ntsib ib pab tub sab, lawv muab nws tej ris tsho hle, muab nws ntaus to tas, ces lawv mus lawv lawm, tso nws tseg, tshuav txoj sia xwb. 31 Muaj ib tug Leej Choj taug txoj kev ntawd nqes tuaj tom thawj, nws pom tus raug mob, nws lug kev hla mus. 32 Muaj ib tug Les Vis ho tuaj txog ntawd, nws pom tus raug mob, nws kuj lug kev hla mus. 33 Tab sis ib tug Xas Mas Lias mus tawm rooj tuaj txog ze tus raug mob, nws pom tus neeg raug mob, nws hlub. 34 Nws txav los Lus Kas, Zaj 10 630 ntawm tus raug mob, nws hliv roj thiab hliv cawv rau cov qhov txhab, nws muab qhwv. Nws tsaws tus raug mob caij nws tus luj, ces nws coj tus raug mob mus txog lub tsev txais qhua, nws tu tus raug mob ntawd. 35 Hnub tom qab, nws rho tau ob lub txiaj nyiag rau tus tswv tsev txais qhua, nws hais tias : ‘Koj tu tus neeg mob no, yog koj siv tshaj lawd, thaum kuv rov qab los, kuv yuav them rov rau koj.’ 36 Raws li koj xav, lawv peb leeg no, leej twg yog tus nyob ze tus neeg uas poob rau hauv tub sab txhais tes ?" 37 Tus Kws Lij Choj hais tias : "Yog tus uas tau khuv leej tus raug mob." Ces Yes Xus hais rau nws tias : "Koj mus, koj yuav ua ib yam li ntawd thiab."