SAJ YES XUS KEV TXOM NYEM

**Bao X Mary** 25th March 2017, 1:41 pm

Bao X Mary: Phooj Ywg; Messages : 168
Date d'inscription : 2011-07-09

Post n°1

SAJ YES XUS KEV TXOM NYEM

Post Bao X Mary 25th March 2017, 1:41 pm

Saj Yes Xus txoj kev txom nyem.

Nyob zoo ib tsoom phooj ywg sawv daws uas hmov thiab tshua nyob hauv lub qab ntuj no. Ntawm no, kuv yog Npaub niam Nom Phooj Koo, nyob lub nroog Greenbay, xeev Wisconsin, As Mes Lis Kas teb.

Hnub no, kuv thov muab kuv zaj dab neeg uas tau tshwm sim thaum lub caij kuv nrog ib pab neeg mus tsham teb chaws Ntshiab (Holy Land), nyob hauv lub nroog Yes Lus Xas Les, hnub tim 11 txog 21 lub 2 hlis xyoo 2017 no. Peb cov mus ua ke muaj li ntawm 26 leej uas mus tsham teb chaws Ntshiab. Txiv Plig Tshaj Xwm Thoj nyob Thaib teb yog tus ua thaj txi Ntuj rau peb. Kuj muaj Leej Tsob Hwb Swm Yeeb Vaj yog tus pab Txiv Plig ua thaj txi Ntuj thiab. Xib Hwb Choo Thoj yog tus npaj cov txheej txheem thov Ntuj, npaj cov zaj hu nkauj thiab yog tus txhais lus.
Tswv Ntuj pub koob hmoov rau peb txhua tus thiab peb tau txais Leej Ntuj Plig Ntshiab rau nyias tus kheej sib txawv. Ib leeg tau txais ib yam, ua rau peb lub siab kaj lug thiab puv npo tuaj.

Thaum peb mus txog kiag lub teb chaws thaj av Ntshiab uas Tswv Ntuj Leej Tub tau yug los. Peb pom tej chaw nws tshaj lub Moo Zoo, tej chaws nws yug los, tej chaw lawv muab nws tua nyob saum Ntoo Cuam thiab sawv rov los. Tej chaw nws ua hwj huam yees ntxwv thiab kho cov neeg mob nrog rau ntau qhov chaw Ntshiab ntxiv. Pom tej ntawd, mas peb sawv daws lub siab kaj lug thiab zoo siab kawg.
Thaum peb mus kwv ntoo cuam taug txoj kev uas thaum ub lawv yuam Huab Tais Yes Xus kwv ntoo cuam taug kev mus txog saum lub roob Nkos Nkos Tas. Kuv lub siab mob thiab peb txhua tus quaj tag nrho. Thaum peb mus txog qhov chaw uas lawv muab Yes Xus lub Cev tso nyob haud, peb mus ze zuj zus kuv lub siab kuj mob zuj zus tuaj. Thaum mus yuav txog kuv cia li ib ce zooj nyoos thiab cia li yuav vau, ces muaj ib tug poj niam yog peb cov ntseeg uas nrog peb ua ke txawm tuav nkaus kuv thiab kuv tus tub Laj Lim los puag nkaus kuv, ces kuv thiaj tsis ntog tiv hauv pem teb.
Thaum ntawd, ob peb leeg hais rau kuv tus tub hais tias : “Koj niam yuav vau lawm, ntshe nws sab lawm, txhob pub nws mus rau hauv Yes Xus qhov chaw, koj hwj nws mus lwm qhov.” Thaum ntawd kuv lub siab mob yuj plaws thiab ntshaw xav mus pom Huab Tais lub Cev. Kuv twb mus tsis taus thiab feeb tsis tshua meej lawm, tab sis kuv hais rau lawv tias : “Nej cia li coj kuv mus saib nws, nej cia li coj kuv mus saib nws xwb, nws lub cev nyob qhov twg ? Kuv xav mus saib nws !”

Thaum ntawd, kuv hnov kuv tus ntsuj plig ntshaw Huab Tais Yes Xus, mas ntshaw tshaj qhov hais tau, kuv tus ntsuj plig nqhis txog Tswv Ntuj txoj kev dawb huv thiab lub zog tas nrho. Kuv thiaj peem lwj peem liam kom kuv tau mus txog qhov chaw lawv tso Yes Xus lub Cev. Ces tus Txiv Plig saib thaj chaw Ntshiab ntawd cia li kom cov ua ntej zam kev rau kuv mus, ces kuv tus tub coj kuv mus txog kiag hauv qhov chaw uas lawv tso Yes Xus lub Cev. Kuv txhos caug ntua pw nthi hauv av thiab tsa suab hlo quaj. Kuv muab ib daim ntaub dawb los so nws qhov chaw Ntshiab. Kuv quaj heev heev, thaum ntawd kuv pom Huab Tais Yes Xus txoj kev hlub thiab kev zam txim, yog yam kev dawb huv loj tas nrho tsis muaj dab tsi yuav piv tau. Kuv tu siab rau kuv tej txhaum yav tag los, tab sis nws yog tus muab ris tas, nws hlub kuv tshaj tas puas tsav yam. Kuv thiaj tsa suab hlo quaj nrov nrov.
Paj nruag
Txiv Plig pom kuv quaj heev kuv tsis paub tawm los lawm. Nws qw kom lawv mus pab coj kuv tawm los, ces kuv tus tub thiaj hu ib tug txiv neej uas coj peb mus ntawd los rub kuv tawm. Kuv tus txiv thiab kuv tus tub thiaj tuav kuv mus rau tom lub tsev teev Ntuj uas peb yuav mus ua thaj txi Ntuj nyob ntawd. Thaum nkawd muab kuv coj mus zaum kiag ntawm cov rooj uas neeg tuaj zaum teev Ntuj, mas kuv hnov ib lub zog tuaj nyob hauv kuv. Nws txawm ua rau kuv nti thiab poob rooj kiag thiab ntsaj ib suab nrov nrov, kuv hnov mob kuv ib ce. Kuv ob txhais npab cia li xyab kiag zoo li thaum Huab Tais Yes raug ntsia nyob saum Ntoo Cuam, hos kuv 2 txhais taw xyab kiag ncaj ncaj. Kuv hnov zoo li lawv muab kuv ntaus thiab muab kuv ntsia saum Ntoo Cuam. Kuv quaj thiab ntsaj qw tias mob kuv, lawv ntaus kuv, lawv muab kuv nplawm, lawv tsis hlub kuv. Ces kuv cia li hais ib cov lus zoo li no tias :
“Lub qab ntuj neeg ua txhaum ntau dhau lawm os, lub qab ntuj neeg ua txhaum ntau dhau lawm os ! Nej txhob ua txhaum ntxiv, nej mus ua tim khawv tshaj rau lub qab ntuj neeg kom hloov siab hloov ntsws thiab lees lawv tej txhaum, es sawv daws thiaj yuav mus tau hauv Ntuj lub Ceeb Tsheej, nej txhob ua txhaum ntxiv lawm mog !”

Kuv nco ntsoov kuv hais cov lus li nod ! Cov ua tim khawv nyob lub sij hawm ntawd, los lawv yeej hnov thiab pom tib yam li ntawd.
Lub sij hawm ntawd kuv tus txiv muab ib qhov dej hliv rau kuv haus, ces kuv tib tshuab cov dej tawm plaws los, ua rau lawv ntshai tas. Vim lub sij hawm ntawd Leej Ntuj Plig Ntshiab tseem tab tom ua nws cov hauj lwm nyob hauv kuv lub cev. Ces cov dej yuav mus tsis tau hauv kuv lub cev. Thaum ntawd mas kuv hnov kuv lub cev muaj zog heev li. Kuv hnov lawv nthe zom zaws thiab hnov Txiv Plig Tshaj Xwm ua Ntoo Cuam lub Cim rau saum kuv hauv pliaj, nws muab ib cov tshuaj ntsim ntsim pleev kuv qhov ntswg.
Kuv tus txiv thiab kuv tus tub quaj tas, txhua tus pom ua rau lawv ceeb ntshai thiab tsis paub tias yog ua li cas lawm. Sawv daws puav leej nqa tshuab thau duab, tab sis tsis muaj leej twg nco thau duab li, vim sawv daws yoob tas. Muaj ib co hais tias kom coj kuv mus tsev kho mob tam sim ntawd, tab sis thaum lawv hnov kuv hais cov lus tias :

“Lub qab ntuj neeg ua txhaum ntau dhau lawm os, lub qab ntuj neeg ua txhaum ntau dhau lawm os ! Nej txhob ua txhaum ntxiv, nej mus ua tim khawv tshaj rau lub qab ntuj neeg kom hloov siab hloov ntsws thiab lees lawv tej txhaum, es sawv daws thiaj yuav mus tau hauv Ntuj lub Ceeb Tsheej, nej txhob ua txhaum ntxiv lawm mog !”

Txiv Plig Tshaj Xwm thiab ib tug txiv neej nkawd paub tias yog Leej Ntuj Plig Ntshiab siv kuv lub cev los ua nws cov hauj lwm xwb, ces nkawd tsis ntshai.
Tus txiv neej uas nrog Txiv Plig Tshaj Xwm nyob ntawd thiaj muab dej los ntov rau kuv lub ntsej muag 2 zaug thiab thov Ntuj tshuab pa rau kuv, nws hu kuv nrov nrov kom kuv rua muag thiab ua pa. Kuv hnov nws hu, kuv thiaj sib zog qhib qhov muag thiab ua pa. Kuv pom nws lub ntsej muag, kuv thiaj xeev hlo los. Kuv lub siab kaj lug, kuv txawm hais ib lo lus tias : “Tswv Ntuj hlub nej, Tswv Ntuj hlub nej !”
Kuv hais cov lus ntawd, mas kuv lub ntsej muag luag ntxhi thiab lub siab kaj lug. Thaum kuv qhib qhov muag los thiab feeb meej lawm, ces Txiv Plig Tshaj Xwm thiab Leej Tsob Hwb Swm Yeeb, Xib Hwb Choo lawv thiaj li pib ua thaj txi Ntuj. Kuv mus txais lub Cim Yug tas, kuv thiaj rov muaj zog zuj zus tuaj. Dhau ntawd, peb rov mus ncig tsham tej chaw Ntsiab ntxiv mus.

Kuv tau nug txhua tus neeg uas lawv pom kuv ua li ntawd, lawv ntshai tas thiab lawv pom xyeem ntawm qhov muag uas yog Huab Tais Yes lub hwj huam, yog Huab Tais Yes Xus txoj kev txom nyem tuaj nyob hauv kuv ib pliag. Ua rau sawv daws ceeb ntshai, vim tsis tau pom dua ib zaug zoo li ntawd thiab yog thawj zaug uas txawv tshaj plaws. Kuv ua Ntuj tsaug uas Huab Tais Yes Xus tseem xaiv kuv. Tab txawm kuv yog ib tug neeg me thiab muaj txhaum, tsis kav Huab Tais Yes Xus xaiv kuv ua nws tim khawv zeem tseeb txog nws txoj kev txom nyem nyob ntawm thaj chaw Ntshiab. Kom xwv kuv tau ua tim khawv txog nws txoj kev hlub thiab kev khuv leej lub qab ntuj neeg mus li.
Qhov tim khawv ntawd qhia tau hais tias : “Huab Tais Yes tiv kev txom nyem yog vim peb, thiab nws hlub peb npaum li cas. Vim li ntawd, peb yuav tau hloov siab hloov ntsws los ua neeg zoo. Peb yuav zoo siab hlo lees peb tej txhaum, kom xwv txog hnub kawg peb thiaj tau mus hauv Ntuj lub Ceeb Tsheej. Peb kuj yuav ua tim khawv thiab tshaj rau lub qab ntuj neeg kom txhua tus paub txog Huab Tais Yes Xus txoj kev hlub neeg.”
Huab Tais Yes Xus peb tus Cawm Seej, kuv ua koj tsaug uas koj tau siv tus neeg me thiab muaj txhaum li kuv, los saj koj txoj kev txom nyem thiab kev hlub. Yog ib lub sij hawm luv luv ib pliag ntshis rau kuv, kom kuv ua tim khawv zeem tseeb txog koj rau lub qab ntuj neeg. Koj yog tus Tswv Ntuj muaj txoj sia, tus ib txwm nyob, tus muaj hwj huam, muaj hwj chim thiab muaj kev hlub kev zam, kev khuv leej neeg loj tas nrho. Peb thov koj khuv leej peb thiab zam rau peb, kom xwv txog hnub kawg peb tau txais txoj sia tshiab nyob ntawm koj xub ntiag mus li, ua li !
Kwv tij Hmoob sawv daws ! Kuv zaj dab neeg los xaus li no xwb, vim nws yog Ntuj lub txiaj ntsim uas tau poob los rau saum kuv ib pliag. Tab sis kuv zoo siab txais qhov Ntuj xaiv kuv. Kawg no, thov Tswv Ntuj ua nej siab kaj lug thiab nrog nraim nej nyob mus li hauv peb tus Huab Tais Yes Xus Pleev lub npe !

Npaub, niam Nom Phooj Koo.

**Mim** 27th March 2017, 8:17 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°2

Re: SAJ YES XUS KEV TXOM NYEM

Post Mim 27th March 2017, 8:17 am

Nyob zoo os Npaub,

Zoo siab tau hnov koj tuaj piav txog nej txoj kev tau txais txiaj ntsim zoo nyob tim Yes Xus tej chaw ntshiab.

Kuv yog ib tug uas tau xav nrog nej mus kawg, tiam sis kuv cov sij hawm tsis haum rau nej lub sij hawm mus ces kuv cia li tsis tau mus lawm. Txawm li cas los nrog koj zoo siab heev txog qhov uas HT Yes Xus tau siv koj los tshaj ib cov los tseem ceeb heev rau peb cov neeg ua neej nyob rau lub sij hawm no, thiab nws pub kom koj tau saj me me txog nws txoj kev txom nyem cawm peb sawv daws. Yog ib qho zoo kawg nkaus li. Kuv yuav nrog koj ua nws tsaug rau lub txiaj ntsim zoo ntawd nawb mog.

Kuv xav nug koj ib los hais tias, thaum lub 6 hli tim 17-18 no, yuav muaj ib thaj txi ntuj ua Ntuj tsaug rau lawv cov 17 leej tuag ua tim khawv nyob Nplog teb, uas vaj qhia tau tso lus muab lawv tsa ua cov tau txoj hmoov zoo tsaib no lawm, ua li nej cov ntseeg puas npaj tuaj koom thiab los tsis tuaj li?

Nyob hauv lawv cov ntawd muaj peb ib tug Hmoob uas yog XH Xyooj Thoj. Nws yog Hmoob Thoj, npe hu ua Xyooj no. Nws tau tuag vim nws nrog TP Txhiaj Tshaj, ib tug TP Is Tas Lis, mus tshaj Ntuj lus rau ib lub zos Hmoob, ces cov neeg tuaj kos mws niv tog muab nkawd ob leeg tua lawm.

Ntawm kuv mas kuv yuav npaj mus, vim hais tias lub Koom Txoos twb muab peb Hmoob tso rau qhov siab, lub Koom Txoos thiaj pom zoo muab peb ib tug neeg Hmoob coj los tsa ua ib tug tau hmoov zoo, tshuav ib kauj ruam ntxiv ces nws yuav tau lub npe ua Leej Ntshiab nyob hauv Koom Txoos kas Tos Liv lawm, mas phim peb cov Hmoob yuav tsum zoo siab rau qhov no. Yog peb tsis mus koom li mas cuag li yog peb tsis txaus siab kom peb muaj ib tug Hmoob nyob rau hauv tsoom leej ntshiab.

Kuv tu siab hais tias cas zoo li peb tsoom Hmoob Kas Tos Liv tsis nrhiav kev los sib kho thiab sib haum, hos nrhiav kom muaj kev sib ciav sib cais, es zoo li muaj coob leej cia li tsis kam mus koom thaj txi ntuj ntawd li. Koj yog ib tug tau HT Yes Xus lub txiaj ntsim, koj yuav tau thov nws kom nws pab peb muaj kev sib to taub thiab sib haum thiab sib poog, es tsis txhob muab nws lub cev hlais ua ntau daim faib ua ntau pab li no. Kuv kuj tsis paub tias puas yog li kuv hais, tiam sis kuv yeej pom zem zuag hais tias zoo li no, mas ua rau kuv tu siab kawg li.

Hnub no kuv tsuas hais li no rau koj xwb, mam sib ntsib rau lwm zaus.

**Maiv Tooj** 27th March 2017, 9:59 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°3

Re: SAJ YES XUS KEV TXOM NYEM

Post Maiv Tooj 27th March 2017, 9:59 am

Nyob zoo Npaub thiab Mim,

Npaub,

Zoo siab rau cov txiaj ntsim koj au txais mog. Tswv Ntuj txog Kev Hlub muaj zog tas nrho, yog NWS pub yus saj ib qho me me mas yus yuav zoo siab tshaj plaws. Kuv nrog koj zoo siab rau lub txiaj ntsim koj tau txais. Txawm neeg yuav ua txhaum ntau ntau los Tswv Ntuj yuav tshwj nrees ib cov yeej noob cia, peb yuav txhob poob siab rau cov uas tsis tau paub txog Tswv Ntuj txoj kev HLUB.

Kuv xav xav mus Thaj Av Ntshiab ib zaug kawg nkaus li thiab. Cia seb ib hnub tom ntej puas yuav npaj tau mus. Kuv nyeem koj cov lus ua rau kuv nrog koj zoo siab, kuv los kua muag. Kuv xav txog cov uas Tswv Ntuj hu mas lawv tso tau tag puas tsav yam cia li mus caum Tswv Ntuj lawm.

Mim,
Yeej tus siab heev uas cov ntsia Yes Xus twb tsis muaj Yes Xus lub tsho dua, lawv tseem cia ua ib lub kheej, peb tsoom ntseeg haj tseem muab Yes Xus lub Cev faib ua ntau pawg. Kuv pom tias peb tsis muab txoj kev Ntseeg los tso rau hauv nruab nrab peb, peb tsis nrhiav Koob Meej rau Tswv Ntuj, peb muab Tswv Ntuj lub NPE los nrhiav koob meej thiab hwj chim rau peb. Kuv pom cov npe uas lawv pab nyiaj tuaj ua lub koob tsheej 17-18/06 mas kuj tu siab heev. Sawv daws nyob ib lub Tuam Teb Chaws yuav tau coj tus cwj pwm kom phim lub teb chaws uas yus nyob thiaj tsim nyog.

Last edited by Maiv Tooj on 30th March 2017, 7:19 am; edited 1 time in total

**Bao X Mary** 28th March 2017, 10:46 am

Bao X Mary

Bao X Mary: Phooj Ywg; Messages : 168
Date d'inscription : 2011-07-09

Post n°4

NYOB ZOO MIM THIAB MAIV TOOJ

Post Bao X Mary 28th March 2017, 10:46 am

Nyob zoo Mim thiab Maiv Tooj,

Ua tsaug rau neb cov lub txhawb me yaus thiab peb cov mus Teb Chaws Ntshiab. Nws yog ib lub Txiaj Ntsim uas muaj nqes tas nrho uas Huab Tais Yes Xus tau siv tus neeg me thiab muaj txhaum li me yaus no los saj nws txoj kev txom nyem ib pliag thiab hais cov lus tim khawv rau peb sawb daws. Yog ib zaug nyob hauv lub neej uas tsis tau muaj dua.

Maiv Tooj thiab Mim lwm hnub peb mam rov mus dua os. Kuv npaj tias kuv tseem yuav rov mus zaum ob thiab,vim tias mus zaum ib ces zoo li npau suav xwb pom tsis tseeb. Lwm hnub peb mus ua ke os. Thaj Chaws Ntshiab ntawd nws ntshiab tiag vim thaum yus mus txog mas yus yeej hnov ib lub zog tuaj rau yus thiab kaj siab lug tiag tiag li. Txhawb zog kawg nkaus, zoo li yus txoj kev ntseeg cia li hloov thiab ciaj sia lawm. Ua rau yus nyob ze Huab Tais Yes Xus tshaj qub lawm.

Mim hais txog qhov tuaj mus koom lub Thaj Txi Ntuj rau xwb hwb Thoj Xyooj thiab cov raug xaiv tsa ua Leej Ntshiab ntawd mas kuv tuaj tsis tau, tab sis peb muaj li 6 leej tuaj hauv peb lub zos tuaj thiab.

Mim thiab Maiv Tooj hais txog qhov uas peb tsoom Kas Tos Liv kuv los kuv yeej ua tsis tau raws siab xav thiab:

“ Kuv tu siab hais tias cas zoo li peb tsoom Hmoob Kas Tos Liv tsis nrhiav kev los sib kho thiab sib haum, hos nrhiav kom muaj kev sib ciav sib cais, es zoo li muaj coob leej cia li tsis kam mus koom thaj txi ntuj ntawd li. Koj yog ib tug tau HT Yes Xus lub txiaj ntsim, koj yuav tau thov nws kom nws pab peb muaj kev sib to taub thiab sib haum thiab sib poog, es tsis txhob muab nws lub cev hlais ua ntau daim faib ua ntau pab li no. Kuv kuj tsis paub tias puas yog li kuv hais, tiam sis kuv yeej pom zem zuag hais tias zoo li no, mas ua rau kuv tu siab kawg li.”

Mim,
Yeej tus siab heev uas cov ntsia Yes Xus twb tsis muaj Yes Xus lub tsho dua, lawv tseem cia ua ib lub kheej, peb tsoom ntseeg haj tseem muab Yes Xus lub Cev faib ua ntau pawg. Kuv pom tias peb tsis muab txoj kev Ntseeg los tso rau hauv nruab nrab peb, peb tsis nrhiav Koob Meej rau Tswv Ntuj, peb muab Tswv Ntuj lub NPE los nrhiav koob meej thiab hwj chim rau peb. Kuv pom cov npe uas lawv pab nyiaj tuaj ua lub koob tsheej 17-18/06 mas kuj tu siab heev. Sawv daws nyob ib lub Tuam Teb Chaws yuav tau coj tus cwj pwm kom phim lub teb chaws uas yus nyob thiaj tsim nyog.

Kuv los yeej pom tib yam li neb hais thiab. Kuv los yeej tu siab thiab. Yog peb los sim koom kho kom peb loj hlob nyob hauv txoj kev ntseeg thiab kev sib nyiam sib hlub li Tswv Ntuj cov lus qhia mas peb yuav loj hlob dua nov lawm.
Tab sis peb yog neeg ces ib leeg xav ib yam, ib leeg nyiam ib yam, nyias xav ua li nyias nyiam xwb. Peb sawv daws puav leej yog neeg ntseeg tab sis tsawg leej thiaj coj tau raws li Tswv Ntuj cov lus qhia xwb. Txawm li cas los peb nyias ua nyias txoj hauj lwm kom tiav thiab ua li peb ua tau xwb, es thaum txog hnub kawg Tswv Ntuj yuav luj raws li nyias rov rau nyias xwb os. Tswv Ntuj hlub lub qab neeg npaum li cas tab sis peb zoo li cov me nyuam tawv ncauj thiab tsis mloog lus li. Nyiam txhoj pob, tsis sib haum, tsis sib hlub, tsis sib txhawb, tsis ntseeg ruaj, ua xyem xyav.Xav ua tus loj, xav kom yus lub npe nto koob meej. Niam txiv tsis sib hlub, kwv tij tsis sib haum, me nyuam tsis hwm niam txiv.

Lub sij hawm thaum Leej Ntuj Plig Ntshiab siv me yaus los saj Yes Xus Kev Txom ib pliag ntawd mas mob me yaus ib ce lwj ntsuav ntsaj qaws tsis pom qab rau siav. Hnov lawv ntaus me yaus thiab nplawm tsis txuag txoj siav li. Tsi pom qab rau siav rau qhov twg li. Thaum me yaus xyab ua daj teg thiab xyab taw li ntsia saum ntoo cuam mas ntawm me yaus sab hauv pliaj sab xis cia li los ntshav saum hauv pliaj ti nram qab pob tsaig tib si, sab plhu xis ntsuab thiab to zoo li raug ntaus to. Lub sij hawm ntawd qhia tau tias lub qab ntuj neeg tej kev txhaum li tam sim no peb niaj hnub nyob thiab ua tsis muaj kev sib haum xeeb sib tawg, txhua yam kev txhaum muab peb tus Cawm Seej tsim txom nws ib ce mob lwj ntsuav thiab muab nws ntsia saum ntoo cuam. Nws tej mob, kev txom nyem mas loj tas nrho yog peb tej kev txog kev txhaum xwb.

Thaum peb hais lus siab ib tug neeg, saib tsis tau lwm tus, ua tsis ncaj rau luag, ntshaw meej mom, ntshaw nto koob meej, muab lwm tus nrhuav kom luag poob ntsej muag los poob tsim. Kom luag tau kev txom nyem. Tej no mas peb muab peb tus Cawm Seej hno nws lub siab hno kiag, peb muab nws nplawm, thiab muab nws ntaus tsis txuag txoj sia. Thaum peb ua yam txhaum loj mas peb muab nws ntsia kiag saum ntoo cuam.
Peb tus Cawm Seej nws tos nhrw peb txog hnub peb hloov siab hloov ntsws los ua neeg ncaj neeg zoo, los lees peb tej kev txog kev txhaum, kom xwv thaum txog hnub kawg peb tau mus txog nws lub Ceeb Tsheej, nrog nws koom noj rooj qab ua ke nyob luag ntxhi tsis txawj kawg .
Leej niam muaj ib pab me nyuam, muaj ib tug tsis mloog lus thiab txhoj pob heev, ua kev txhaum tas li, mob leej niam lub siab kawg nkaus thiab leej niam hlub nws tus me nyuam tas siab nrho. Leej niam tos nrhw txog hnub leej niam tus me nyuam tig los ua neeg zoo. Tswv Ntuj tos peb npaum li cas!

Ntawm me yaus tus kheej nrog peb cov ntseeg sawv daws, peb rau siab thov Ntuj tiag kom xwv Tswv Ntuj tshoj peb sawv daws lub siab kom peb yeej dab phem kev haub kev ntxias. Kom peb hloov siab los koom ua ib pab pawg coj ncaj coj zoo, los tsob hwb peb tus Tswv Ntuj ib leeg thiab ua tim khawv txog nws txoj kev cawm neeg rau txhua leej txhua tus rau hauv lub qab ntuj no .

Huab Tais Yes Xus peb tus Cawm Seej, peb ua koj tsaug uas koj tuaj yeem tuag nyob saum ntoo cuam, raug mob,raug ntsaj, rau luag ntaus, raug luag nkaug thiab tsim txom yog vim peb tej txhaum.

Peb thov koj zam rau peb, thov koj tshoj peb lus siab kom tsim dheev. Thov Koj los kav peb lub siab, coj peb lub neej, thov koj pab kom peb muaj zog nyob hauv koj txoj kev sib nyiam sib hlub, txoj kev sib haum xeeb hauv peb tsoom ntseeg Kas Liv nyob hauv qab ntuj no. Thov koj pab kom peb yeej txoj kev yuav kev, txoj kev ua txhaum uas tsis haum Leej Txiv nyob saum ntuj lub siab.
Huab Tais Yes Xus, peb ntseeg tias koj nyiam thiab hlub peb tas nrho, peb thov koj tshoj peb lub siab kom peb txawj nyiam thiab hlub koj li koj nyiam thiab hlub peb.

Peb ua koj tsaug peb tus Tswv Ntuj zoo nyiam.

NPaub

**Mim** 30th March 2017, 4:23 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°5

Re: SAJ YES XUS KEV TXOM NYEM

Post Mim 30th March 2017, 4:23 am

Nyob zoo Npaub,

Kuv yeej nrog koj zoo siab kawg li tias Tswv Ntuj tau pub ib lub txiaj ntsim loj kawg nkaus rau koj, thiab kuv nrog koj ua Tswv Ntuj tsaug kawg li. Kuv pom tau hais tias yeej yog ib lub txiaj ntsim tseeb vim nws qhia rau koj rov paub tias koj yog ib tug neeg me neeg txhaum. Qhov ntawd yog ib qho zoo heev, ua rau kuv zoo siab kawg nkaus.

Npaub, yog thaum twg koj rov mus dua no ces hais tuaj rau kuv paub thiab os, es saib Tswv Ntuj puas pub lub txiaj ntsim kom kuv ho tau mus pom nws tej hneev tes hneev taw thiab os. Yog ib qho uas yus xav kom tau mus pom ib zaug nyob hauv yus lub neej kawg tiag.

Npaub koj yog ib tug tau txais txiaj ntsim loj, tej zaum koj yeej yuav to taub ntau yam tshaj peb cov uas tsis tau txais, yog li ntawd koj muaj lus dab tsi hais txog HT Yes Xus txoj kev hlub, kav tsij tuaj piav thiab hais es peb thiaj li yuav to taub zuj zus tuaj os nawb.

**Maiv Tooj** 30th March 2017, 8:30 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°6

Re: SAJ YES XUS KEV TXOM NYEM

Post Maiv Tooj 30th March 2017, 8:30 am

Nyob zoo Mim thiab Npaub,

Npaub,
Kuv los hais ib yam li Mim hais, kuv nrog koj zoo siab rau lub txiaj ntsim koj tau txais nov thiab ua Tswv Ntuj tsaug uas tau pub txiaj ntsim rau ib tug Hmoob kom tau ua tim khawv cav txog Nws Txoj kev Hlub rau haiv neeg Hmoob.

Zaum no peb muaj ib tug tim khawv ntshiab nyob hauv lub Koom Txoos, txhais tau tias Peb haiv Hmoob muaj feem puv npo nyob hauv lub Koom Txoos lawm tiag. Thov Tswv Nuj pub txiaj ntsim los qheb coob rtus siab ntxiv, kom peb ua ib cov neeg ntseeg uas ua neej nyob hauv txoj kev ntseeg tiag tiag, txhob ua ib cov ntseeg tsis qab tsis tsuag, ib cov ntseeg tsis ntshai kev txhoj kev txhaum.

Npaub wrote:Kuv los yeej pom tib yam li neb hais thiab. Kuv los yeej tu siab thiab. Yog peb los sim koom kho kom peb loj hlob nyob hauv txoj kev ntseeg thiab kev sib nyiam sib hlub li Tswv Ntuj cov lus qhia mas peb yuav loj hlob dua nov lawm.
Tab sis peb yog neeg ces ib leeg xav ib yam, ib leeg nyiam ib yam, nyias xav ua li nyias nyiam xwb. Peb sawv daws puav leej yog neeg ntseeg tab sis tsawg leej thiaj coj tau raws li Tswv Ntuj cov lus qhia xwb. Txawm li cas los peb nyias ua nyias txoj hauj lwm kom tiav thiab ua li peb ua tau xwb, es thaum txog hnub kawg Tswv Ntuj yuav luj raws li nyias rov rau nyias xwb os. Tswv Ntuj hlub lub qab neeg npaum li cas tab sis peb zoo li cov me nyuam tawv ncauj thiab tsis mloog lus li. Nyiam txhoj pob, tsis sib haum, tsis sib hlub, tsis sib txhawb, tsis ntseeg ruaj, ua xyem xyav.Xav ua tus loj, xav kom yus lub npe nto koob meej. Niam txiv tsis sib hlub, kwv tij tsis sib haum, me nyuam tsis hwm niam txiv.

Npaub, Tswv Ntuj txoj Kev Hlub loj tas nrho, tsis xav kom ib ug twg poob rau kev txiav txim thaum kawg, xav kom peb tau nyob ntiaj teb nov zoo li nyob saum Ntuj thiab kom txhua leej tau pom Tswv Ntuj lub ntsej muag, Tswv Ntuj txoj kev Hlub nkaus xwb. Yuav ua txhij toob puaj yam seb puas yuav cawm sawv daws kom txhob luj tau suav tej yam nws tau ua dhau los; vim thaum ntawd ces yuav muaj kev txom nyem quaj ntsuag.

**Bao X Mary** 30th March 2017, 2:49 pm

Bao X Mary

Bao X Mary: Phooj Ywg; Messages : 168
Date d'inscription : 2011-07-09

Post n°7

Mim thiab Maiv Tooj

Post Bao X Mary 30th March 2017, 2:49 pm

Mim,

Lwm hnub kuv npaj mus ces kuv yuav rov yaum kom tau koj nrog peb mus xwb os.

Maiv Tooj aw... yog li koj hais os Tswv Ntuj txoj kev hlub loj tas nrho nws thiaj tuaj yeem muab nws Leej Tub twm zeej los tuag thiab raug kev txom nyem kom xwb tau cawm tas lub qab ntuj neeg. Peb txoj hauj lwm ces ua zaj ua ntxeev thov Ntuj tas zog thiab ua tim khawv tshaj rau lub qab ntuj neeg kom xwv txhua tus paub txog nws txoj kev cawm thiab kom Tswv Ntuj zam rau peb. Kom peb nyob ntiaj teb no li nyob saum ntuj mus li tsis txawj kawg hauv peb tus Huab Tais Yes Xus Pleev lub npe.Kom xwv thaum kawg peb txhua leej nyob ntiaj teb tau pom Tswv Ntuj lub ntsej muag thiab tau nrog nws koom rooj qab ua ke.

**Maiv Tooj** 26th April 2017, 5:49 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°8

Re: SAJ YES XUS KEV TXOM NYEM

Post Maiv Tooj 26th April 2017, 5:49 am

TP Tshaj Xwm Holy Land 2017

**Mim** 15th August 2017, 10:11 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°9

Re: SAJ YES XUS KEV TXOM NYEM

Post Mim 15th August 2017, 10:11 am

Nyob zoo os Npaub,

Ua cas es tau ib ntus ntev loo no lawm tsis hnov koj xov li lawm es koj puas tseem tuaj xyuas peb pab neeg tsawg tsawg hauv no thiab os? Rov tuaj nrog peb tham thiab mas lod?
Koj puas muaj xwm dab tsi tshwm tshiab lawm os? Koj puas muaj tej cov lus tseem ceeb dab tsi no ces tuaj hais rau peb mloog thiab mas?

**Bao X Mary** 11th April 2018, 10:40 am

Bao X Mary

Bao X Mary: Phooj Ywg; Messages : 168
Date d'inscription : 2011-07-09

Post n°10

SAJ YES XUS KEV TXOM NYEM ZAUM 2

Post Bao X Mary 11th April 2018, 10:40 am

NUB 6 NTSHIAB

3 / 30 / 18

SAJ YES XUS KEV TXOM NYEM ZAUM 2.

Nyob zoo ib tsoom phooj ywg uas hmov thiab tshua sawv daws ! Ntawm no kuv yog Npaub, niam Nom Phooj Koo. Zaj hais txog saj Yes Xus kev txom nyem zaum 2 no, yog tshwm sim nyob hauv Hnub 6 Ntshiab, hauv lub tsev teev Ntuj hwm Leej Ntshiab Patrick, nroog Green Bay, xeev Wisconsin. Kuv thov muab tham qhia pub rau peb sawv daws ib tsoom phooj ywg tau paub thiab txhawb sawv daws txoj kev ntseeg.
Hnub 6 Ntshiab uas yog hnub tim 30 lub 3 hlis xyoo 2018 no, kuv nrog kuv 2 tug tub mus koom thaj txi Ntuj hais txog Yes Xus raug kev txom nyem ua lus Mes Kas.
Thaum nyeem zaj Nyeem ob tas, thiab yuav pib nyeem zaj ntawv Moo Zoo hais txog Yes Xus raug kev txom nyem, mas kuv cia li tsaus muag kiag thiab kuv xaub luav rau hauv qab rooj. Thaum ntawd kuv hnov ib co poj niam Mes Kas lawv qw zom zaws tias :
“Ua cas, ua cas ?”
Tos kuv nco xwb lawv twb muab 2 daim ntaub ntub dej txias txias coj los npuab kuv hauv siab thiab kuv hauv pliaj lawm. Lawv qw zom zaws tias : “Hu tsheb kho mob tuaj, hu tsheb kho mob tuaj.” Thaum ntawd kuv sab heev li, tab sis muaj ib lub zog pab kom kuv hais tias :“Nej muab kuv pw hauv av thiab muab kuv tso qhov chaw dav, kuv thiaj ua tau kuv txoj hauj lwm.” Lawv thiaj muab kuv nqa tawm mus rau nram qab tsev teev Ntuj thiab muab kuv tso pw hauv av. Thaum ntawd, kuv ib ce nriaj thiab xyab hlo, 2 txhais npab ua daj kiag, kuv 2 txhais taw xyab ncaj ncaj. Kuv sab heev li, kuv mloog zoo li kuv dai nyob saum ntoo cuam, kuv ib ce mob lwj ntsuav. Thaum ntawd, Leej Ntuj Plig Ntshiab qhib kuv lub ncauj hais ib co lus tias : “Kuv cov me nyuam uas kuv hlub, kuv txoj hauj lwm hnyav heev, thiab kuv yuav tsum raug kev txom nyem kom xwv tau cawm lub qab ntuj neeg. Kuv cov me nyuam uas kuv hlub e ! Nej hloov siab mog ! Nej hloov siab mog ! Kuv tsis xav kom nej ib tug poob rau dab phem lub teb chaws, kuv xav kom nej txhua tus los nrog kuv nyob ntawm kuv Txiv lub Tuam Tsev. Kuv thiaj yuav tsum txais txoj kev txom nyem no, kuv txoj kev txom nyem yog txais rau lub qab ntuj neeg sawv daws. Thov nej hloov siab tiag tiag li.”
Lub sij hawm ntawd, mob kuv ib ce npaum nkaus leej twg muab ntaus lwj tas, txoj sia zoo li yuav tu. Kuv hnov muaj ib tug neeg muab ib tug ntoo cuam me me uas yog xuas nplooj kav theej ua tso rau kuv txhais tes. Thaum ntawd kuv zeem tau kiag tias yog tus ntoo cuam. Kuv muab coj los hnia thiab muab puag kiag ntawm kuv hauv siab. Thaum kuv tau tus me nyuam ntoo cuam me me ntawd, mas kuv zoo siab tshaj plaws. Kuv mloog zoo li kuv nyob ze ze Huab Tais Xus thiab kuv nyiam nws tshaj plaws. Kuv hnov lawv hais zom sawv tias : “Yog lawm, qhov koj xav tau yog qhov ntawm ko ntag, yog tus me nyuam ntoo cuam.” Lub sji hawm ntawd, kuv mloog zoo li kuv sab heev, zoo li kuv txoj sia yuav tu. Kuv xav tias sab npaum no, ces kuv tso plhuav kuv txoj sia rau Tswv Ntuj. Kuv thiaj hais ib co lus li no : “Kuv tus Tswv Ntuj, kuv tus Huab Tais, kuv thov muab kuv tus ntsuj plig rau hauv koj txhais tes.” Thaum ntawd kuv lub hauv siab nqa hlo siab siab thiab ua ib pas loj loj tso kiag pa ces zoo li kuv txoj sia tu lawm." Ces kuv cias li rov ntsiag to pw kiag rov qab hauv av lawm. Thaum ntawd kuv mloog li kuv txoj pa nkaum lawm. Kuv hnov lawv qw zom saws thiab lawv hu kuv kom kuv qhib qhov muag. Ces kuv ua tiag qhib qhov muag thiab lawv qhia kom kuv ua pa nqus pa. Kuv ua tiag ua pa thiab qhib qhov muag kom pom lawv, kuv hais tias :
“Tswv Ntuj hlub nej tshaj plaws ! Tswv Ntuj hlub nej tshaj plaws li.”
Kuv pom Tswv Ntuj txoj kev hlub ntiaj teb neeg loj tas nrho. Ces kuv lub ncauj cia li hais cov lus ntawd rau sawv daws uas nyob ib ncig kuv.

Tom qab ntawd me ntsis, lawv hais tias kuv zoo lawm, lawv muab kuv tuav mus zaum ntawm ib lub rooj, tab sis txoj kev txom nyem kev mob hauv kuv lub cev yeej tsis ntaug kiag li. Kuv pheej hais cov lus tias : “Kuv txoj kev txom nyem nov yog ua rau tas lub qab ntuj neeg.” Kuv pheej hais cov lus li ntawd tas zog. Kuv lam qhib qhov muag xwb, tab sis kuv yeej tsis tau feeb meej thiab mob kuv ib ce kawg nkaus. Kuv hnov lawv hais tias coj kuv mus tsev tshuaj, tab sis kuv hais tias kuv yuav tsum nyob ntawm thaj chaw Ntshiab no, uas yog lub tsev teev Ntuj. Thaum twg lub thaj txi Ntuj tag, mas kuv tus mob mam zoo. Muaj ib lub zog pheej txhib kom kuv hais cov lus ntawd tsis tseg. Ces thaum sawv daws txais lub Cim Yug, mas kuv lub suab ntsaj thiab kuv tus mob ntaug zuj zus. Kuv kuj rov feeb meej zuj zus thiab. Kuv thiaj xav ntsib tus Txiv Plig ua lub thaj txi Ntuj hnub ntawd, ces kuv tus tub mus hu Txiv Plig los ntsib kuv thiab nrog kuv tham, Txiv Plig thov Ntuj rau kuv. Dhau ntawd los, ces kuv rov feeb meej lawm. Kuv 2 tug tub thiaj coj peb rov qab los tsev, tab sis kuv lub duav tseem mob tsuj tsawv.

Ib tsoom phooj ywg uas hmov thiab tshua ! Kuv hais rau nej tias : kuv yog ib tug neeg muaj txhaum thiab neeg me, kuv tsis xav tias yuav muaj tej yam loj li ntawd tshwm sim rau kuv kiag li. Tab sis Leej Ntuj Plig Ntshiab tau pub kuv saj Yes Xus txoj kev txom nyem uas yog zaum 2. Nws yog ib lub nra hnyav kawg nkaus, tab sis kuv zoo siab txais thiab ua raws li Leej Ntuj Plig Ntsiab lub txiaj ntsim uas nws tau pub rau kuv.
Ua tsaug rau koj tus uas tau muab lub sij hawm los nyeem kuv zaj hais txog : “Saj Yes Xus Kev Txom Nyem zaum 2.” Thov kom Tswv Ntuj txoj Kev thaj yeeb nrog nraim koj mus li tsis txawj kawg, thiab nyob ruaj nreb hauv Leej Pleev tus muaj txoj kev hlub, kev khuv leej neeg loj tas nrho, uas yog peb tus Huab Tais Tswv Ntuj ! Ua li.

Npaub Niam Nom Phooj Koo

**Mim** 11th April 2018, 2:32 pm

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°11

Re: SAJ YES XUS KEV TXOM NYEM

Post Mim 11th April 2018, 2:32 pm

Nyob zoo Npaub,

Zoo siab tau hnov koj moo thiab tau hnov tias koj rov tau saj HT Yes Xus txoj kev txom nyem dua zaum 2. Yog ib lub txiaj ntsim zoo heev uas Tswv ntuj pub rau koj. Peb nrog koj ua Tswv Ntuj tsaug.

**Maiv Tooj** 12th April 2018, 2:36 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°12

Re: SAJ YES XUS KEV TXOM NYEM

Post Maiv Tooj 12th April 2018, 2:36 am

Zoo kawg uas Tswv Ntuj pub lub txiaj ntsim rau peb haiv Hmoob saj Tswv Ntuj txoj kev nyiam kev hlub zuj zus kom peb qhov muag pom kev tuaj.

Bao, koj muaj txoj hmoov zoo, peb nrog koj zoo siab mog. Thov ua Yes Xus tsaug.