Hnub ua hmoov hawm yes Xus lub Plawv Ntshiab

Hnub ua hmoov hawm Yes Xus lub Plawv Ntshiab (Feast of the Sacred Heart/Fete du Sacre Coeur)

Xyoo no, hnub tim 1 lub 7 hli no, yog Thawj Hnub Rau hauv lub hlis(first Friday of the month) thiab kuj yog hnub peb hawm Yes Xus lub Plawv Ntshiab (Siab Ntshiab). Txoj kev hawm Yes Xus lub Plawv li no yog los qhov twg los?

Niaj xyoo, yim hnub tom qab lub Hmoov hawm Yes Xus lub Cev thiab Cov Ntshav (Corpus Christi) yog lub hmoov hawm Yes Xus lub Plawv Ntshiab (lus Hmoob yog peb hais tias Yes Xus lub Siab Ntshiab mas tej zaum yuav raug Hmoob lub tswv yim dua). Yog li ntawd lub hnub nyoog ua hmoov hawm Yes Xus lub Plawv Ntshiab no ib xyoos txawv ib xyoos, tsis niaj xyoo raug rau ib hnub nkaus xwb. Qho ntau yog raug rau lub 6 hli thaum yuav tas. Xyoo no yog raug lig, thiaj raug rau tim 1 lub 7 hli.
Thiab xyoo no, peb ua ob yam ua ke: Peb ua hmoov hawm Yes Xus lub Plawv Ntshiab rau Hnub Rau (Friday), thiab hnub ntawd kuj yog Thawj Hnub Rau hauv lub hlis uas peb mus koom thaj txi ntuj txais Yes Xus lub Cev los ua kev kho Yes Xus lub Plawv Ntshiab (Communion of Reparation of the First Friday of the month).

Puag thaum ntxov los, nyob hauv Koom Txoos Kas Tos Liv, yeej muaj tej tus leej ntshiab los tej tus neeg nyiam ua kev hawm HT Yes Xus lub Plawv Ntshiab, tiam sis thaum ntawd vaj qhia tsis tau muab tsa ua ib lub hmoov kom tas tsoom neeg ntseeg nyob thoob ntiaj teb yuav tsum ua. Tom qab no vaj qhia kuj tau muab tsa ua ib lub hmoov rau tas lub Koom Txoos Kas Tos Liv nyob thoob ntiaj teb, vim Yes Xus tau tshwm sim los thov kom muaj ib lub hmoov zoo li ntawd.

HT Yes Xus tau tshwm sim los hais txog qhov ntawd rau leej ntshiab Marguerite-Marie Alacoque (1647-1690). Leej ntshiab Marguerite-Marie xeeb los muaj lub siab nyiam Tswv Ntuj txij thaum yau yau los. Luag tej
me nyuam yaus nyiam mus dhia ua si hos nws li nws nyiam mus nyob ntsiag to teev ntuj. Thaum nws muaj 9 yoos, nws mus txais Yes Xus lub Cev thawj zaug thiab nws pib xyaum ua tej yam nyuaj los them txim txhaum. Nws raug mob loj ib zaug, ua rau nws pw tau plaub xyoos. Ces nws cog lus rau Niam Mab Liab tias nws lub neej nws yuav tsis yuav txiv, tiam sis nws yuav ua lub neej tab seeb qee rau ntuj. Nws cog lus li ntawd tas, nws cia li zoo hlo lawm. Tiam sis hmoov tsis muaj, nws txiv tuag tso lawv tseg, ces luag saib tsis taus nws niam thiab nws tsev neeg. Nws nrhiav tau txoj kev nplig siab ntawm Yes Xus nyob hauv lub Cim Yug. Nws nquag mus hawm Yes Xus hauv lub Cim Yug. Ces Yes Xus nquag tshwm sim raug txom nyem ntoo lub kauj pos tuaj rau nws pom, tuaj nrog nws tham. Nws tsis paub tias neeg feem coob tsis pom Yes Xus, nws xav tias sawv daws pom ib yam li nws.

Thaum nws muaj 17 xyoo, nws niam txhob kom nws kav tsij npaj mus yuav txiv tsa nws lub neej. Nws txawm mloog nws niam hais, nws pib mus xyaum ua kev lom zem, xyaum las voos, tiam sis tib lub caij ntawd, nws kuj ua tej yam kev them txim txhaum nyuaj nyuaj nrog thiab. Muaj ib zaug Yes Xus tshwm sim rau nws pom tab tom raug lawv nplawm sab sab. Nws yws Marguerite tias ua cas nws siab phem ua luaj tsis ua raws nws lo lus. Marguerite thiaj txiav txim siab mus ua phauj raws li thaum yau nws tau cog lus lawm.

Tim 25 lub 5 hlis xyoo 1671, nws muaj 20 xyoo, nws nkag mus ua phauj hauv lub koom haum cov phauj Visitation nyob Paray-le-Monial, Fab Kis teb. Lawv tsis ntseeg nws siab, ces lawv nrhiav kev nyuaj rau nws. Thaum txog caij cog lus, lawv tsis pub nws cog lus, tiam sis ob peb hlis tom qab, lub 11 hlis 1672, nws kuj tau cog lus ua phauj lawm. Lub caij nws raug kev nyuaj siab kev txom nyem li ntawd, HT Yes Xus nquag tuaj nplij nws. Tiam sis Cov kev tshwm sim uas hais txog Yes Xus lub plawv Ntshiab, mas yog pib thaum lub 12 hlis 1673.

Tim 27 lub 12 hlis 1673 ntawd, yog hnub ua hmoov hwm tus hauv paus xa lus leej ntshiab Zam (ST. John). Yes Xus tshwm sim tuaj hais rau Marguerite-Marie kom muab nws taub hau ib rau ntawm Yes Xus hauv siab li thaud Zam tau ua. Nws qhib nws lub siab hlub neeg npaum li cas rau Marguerite-Marie paub, nws xav kom tas txhua tus neeg paub txog nws txoj kev hlub lawv, thiab nws tso txoj hauj lwm tshaj tawm txog nws lub Plawv hlub neeg ntawd rau leej ntshiab Marguerite-Marie ua.

Thaum lub 6 hli los 7 hli, 1674, Yes Xus rov tshwm sim tuaj xyuas leej ntshiab Marguerite-Marie dua. Zaum ntawd nws hais tias nws xav kom peb cov ntseeg mus koom thaj txi ntuj thawj Hnub Rau hauv lub hlis (First Friday of the month) txais Yes Xus lub Cev los kho nws lub Plawv (Communion of Reparation).

Thaum lub 6 hli tim 16, 1675, Yes Xus rov tuaj dua zaum peb. Nws hais cov lus no rau leej ntshiab Marguerite-Marie: “Koj saib lub plawv ntawm no uas tau hlub neeg loj kawg nkaus… Phim kuv yuav tau txais kev nco txiaj ntsim, tiam sis qhov tseeb, kuv tsuas tau txais kev tsis nco txiaj ntsim ntawm cov neeg coob xwb…” Ces Yes Xus thiaj tau thov kom muaj ib lub hmoov hawm thiab kho nws lub Plawv Ntshiab. Nws xav kom ua rau Hnub Rau (Friday) uas yog yim hnub tom qab lub hmoov hawm nws lub Cev thiab cov Ntshav.

Twb yog xyoo 1856 lawm, vaj qhia Pius IX mam li tsa lub hmoov hawm HT Yes Xus lub Plawv Ntshiab raws li nws tau thov thiab hais rau leej ntshiab Marguerite-Marie.

Yog li niaj xyoo, thaum txog hnub Hawm Yes Xus lub Plawv Ntshiab, peb yuav tau qee sij hawm mus koom thaj txi ntuj, txais Yes Xuslub Cev los kho nws thiab ris nws txiaj ntsim.