Cov zaj nyeem Hnub Chiv Xyoo A. 2022-2023

Tim 6/04/2023

Hnub Tsib Ntshiab

THAJ TXI NTUJ NCO TXOG YES XUS NOJ PLUAS HMO KAWG yav tsaus ntuj

Zaj Nyeem Ib: KEV TSIV 12: 1-8, 11-14

1 HUAB TAIS hais rau Mais Xes thiab As Loos nyob Hais Nkws Tos teb tias: 2 "Lub hlis no nej yuav muab suav ua thawj lub hlis ua ntej cov, nej yuav muab ua lub ib hlis qhib lub xyoo tshiab. 3 Neb hais rau ib tsoom pej xeem His Xas Lais tias: ‘Lub hlis no xiab kaum, mas nej txhua yim neeg nyias yuav tsum npaj nyias ib tug tsiaj me, txhua lub tsev yuav tsum npaj ib tug tsiaj me. 4 Yog tsev neeg twg tsawg dhau noj tsis tas ib tug tsiaj me, mas nej yuav mus koom nrog lwm tsev neeg uas nyob ze nej dua cov kom muaj neeg coob txaus. Nej yuav xaiv ib tug tsiaj kom txaus nkaus sawv daws noj tsis seem. 5 Nej yuav xaiv ib tug tsiaj zoo nkauj tsis muaj chaw xyeej, muaj hnub nyoog ib xyoos; nej yuav xaiv ib tug thav tshis los tau ib tug thav yaj los tau.
6 Nej yuav ceev tus tsiaj no cia mus txog lub hlis no hnub xiab kaum plaub; hmo ntawd, tas tsoom His Xas Lais nyias yuav tua nyias tus tsiaj thaum hnub poob qho kiag. 7 Nej yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag mus hauv lub tsev uas nej noj tus tsiaj ntawd. 8 Hmo ntawd, nej yuav muab cov nqaij txhiab hauv hluav taws noj, nej yuav noj ntxuag ib co ncuav mov tsis xyaw poov xab, thiab ib cov zaub iab.
11 Nej yuav noj mov zoo li no : Nej sia siv khov kho ntawm duav, nej rau khau tib si, thiab tuav rawv nej rab pas nrig ntawm tes. Nej yuav tsuag tsuag noj nrawm nroos, vim yog HUAB TAIS hmo hla. 12 Hmo ntawd, kuv yuav hla mus thoob Hais Nkws Tos teb, kuv yuav ntaus cov ua tub hlob nyob hauv Hais Nkws Tos teb tib si kom tuag, tsis hais tib neeg los tsiaj txhu li, thiab kuv yuav txiav txim rau cov dab Hais Nkws Tos, kuv yog HUAB TAIS!
13 Cov ntshav yuav yog ib lub cim txuag nej hauv cov tsev uas nej nyob. Kuv pom lub cim ntawd, kuv yuav hla dhau plaws mus, ces nej yuav tsis raug qhov xwv txheej loj ntawd, hmo uas kuv ntaus Hais Nkws Tos teb.
14 Nej yuav cim ntsoov hnub ntawd cia ua ib hnub tshwj xeeb rau nej, nej yuav muab ua ib hnub cav txog HUAB TAIS, yuav yog ib hnub nej ua koob tsheej tiam dhau tiam, yog ib txog cai nej yuav coj mus li.




Zaj Nyeem Ob: 1 KLN 11: 23-26

Cov kwv tij nkauj muad:
23 Cov lus kuv qhia rau nej no, yog cov lus kuv tau txais ntawm Huab Tais los: Hmo Huab Tais Yes Xus raug muag, nws tuav ib lub ncuav mov,
24 nws ua Ntuj tsaug, nws muab lub ncuav mov ntais, nws hais tias : “Qhov no yog kuv lub cev uas cia rau nej; Nej ua qhov no kom nej nco txog kuv.”
25 Thaum noj hmo tas kuj ib yam, nws tuav lub ntim cawv, nws hais tias : “Lub ntim cawv no yog zaj cog lus tshiab nyob hauv kuv cov ntshav ; nej haus lub ntim no thaum twg, mas nej haus kom nej nco txog kuv.”
26 Vim li no, niaj zaus thaum nej noj lub ncuav mov no thiab nej haus cov cawv no, mas yog nej tshaj Huab Tais txoj kev tuag mus txog hnub Huab Tais rov los.

Zaj Cav lub Moo Zoo: ZAM 13: 34

Huab Tais hais tias: Kuv muab ib lo lus qhia tshiab rau nej:
nej yuav sib nyiam sib hlub ib yam li kuv tau nyiam thiab hlub nej.

Ntawv Moo Zoo: ZAM 13: 1-15

1 Thaum yuav txog lub Ntees Hla, Yes Xus paub tias txog nws lub caij hla lub ntiaj teb no rov mus cuag Leej Txiv lawm. Nws hlub nws cov neeg uas nyob hauv lub qab ntuj no, mas nws hlub lawv mus txog thaum kawg. 2 Thaum lawv tab tom noj hmo, dab phem twb xub nkag ua ntej mus tshoj Yus Das Kas Lis Yaus, Xis Moos tus tub, lub siab lawm kom muab Yes Xus rau luag ntes. 3 Yes Xus paub tias Leej Txiv tso tas ib puas tsav yam rau hauv nws txhais tes, nws paub tias nws tuaj ntawm Tswv Ntuj tuaj, thiab nws yuav rov mus cuag Tswv Ntuj,
4 Ces nws sawv ntawm lub rooj mov mus, nws hle tsho, nws muab ib daig ntaub khi rau ntawm nws duav. 5 Nws hliv dej rau hauv ib lub phiab, ces nws pib ntxuav cov thwj tim ko taw. Nws muab daim ntaub khi ntawm duav los so lawv ko taw. 6 Yes Xus los txog ntawm Xis Moos Pob Zeb, Pob Zeb hais rau Yes Xus tias : "Huab Tais, koj yuav ntxuav kuv ko taw lod ?" 7 Yes Xus teb rau Pob Zeb tias : "Qhov uas kuv ua, mas tam sis no koj tsis to taub, tiam sis yav tom ntej koj yuav to taub." 8 Pob Zeb hais rau Yes Xus tias : "Koj txhob ntxuav kuv ko taw, kuv tsis kam ib zaug li." Yes Xus teb rau Pob Zeb tias : "Yog kuv tsis ntxuav koj, mas koj yuav tsis muaj cuab tam nrog kuv li."
9 Xis Moos Pob Zeb hais rau Yes Xus tias : "Huab Tais, yog li mas tsis yog ntxuav taw xwb, koj ntxuav kuv tes thiab kuv taub hau huv tib si." 10 Yes Xus hais rau Pob Zeb tias : "Tus uas nws da dej lawm mas tsis tas yuav ntxuav ntxiv, tsuas ntxuav ko taw xwb, vim nws ib ce huv tas tib si lawm; nej kuj huv lawm thiab, tab sis huv tsis tas txhua leej." 11 Yes Xus yeej paub tus twg yog tus yuav muab nws rau luag, vim li ntawd nws thiaj hais tias : "Nej huv tsis tas txhua leej."
12 Thaum Yes Xus ntxuav lawv ko taw tas, nws rov hnav nws lub tsho, nws rov los zaum ntawm rooj mov, nws thiaj hais rau lawv tias : "Nej puas to taub qhov uas kuv ua rau nej ? 13 Nej hu kuv ua : Xib Hwb thiab Huab Tais. Nej hu raug lawm, vim kuv yeej yog tiag. 14 Yog tias kuv uas yog Xib Hwb thiab yog Huab Tais, kuv twb ntxuav nej ko taw, mas nej ib tug kuj yuav tsum rov ntxuav ib tug ko taw thiab. 15 Qhov kuv tau ua yog ib tug piv txwv rau nej, kom nej ua raws li kuv tau ua rau nej.”

Zaj nyeem Ib: His Xais 52,13-53,12.
13  Nej ntsia kuv tus tub txib Saib !  Nws yuav  vam  meej.  Nws yuav  nce  mus, nws yuav sawv siab.  Sawv daws yuav cav lus zoo txog nws. 14    Coob  leej  pom  nws,  lawv  yuav  nyob hab  nuv,  vim  nws  lub  cev  puas  tas,  nws tsis  zoo  li  neeg  lawm.    Nws  lub  cev  ntaj ntsug  tsis  zoo  xws  leej  tib  neeg  cov  tub lub cev.   15  Li ntawd, nws yuav ua kom ntau  lub  kuj  cuab  ceeb  nkaus.  Cov  vaj yuav  nyob  qhov  ncauj  kaw  ntom  nti  rau ntawm  nws  xub  ntiag,  vim  lawv  pom  ib yam  uas  tsis  muaj  leej  twg  tau  piav  rau lawv, lawv  hnov  ib  yam uas lawv tsis tau hnov hais txog. 1  Leej twg  yuav  ntseeg tau qhov peb hnov hais no ?   HUAB TAIS lub  hwj  huam  tawm  los  nyob  saum  leej twg ? 2    Tus  tub  txib  tau  loj  hlob  nyob  ntawm HUAB  TAIS  lub  xub  ntiag,  xws  li  ib  tug
cag  nrhau  mus  rau  hauv  thaj  av  qhuav, nws  tsis  muaj  lub  meej  mom  zoo  saib, nws tsis muaj tus yam ntxwv zoo nyiam.   3  Tib neeg thuam nws, tso nws pov tseg. Nws  yog  ib  tug  neeg  txom  nyem  thiab nquag  raug  mob.    Nws  zoo  li  ib  tug  neeg uas  yus  qhov  muag  pom  dheev,  yus  pos qhov muag.  Nws raug sawv daws thuam, peb  tsis  quav  ntsej  nws.    4    Tab  sis,  yam nws  ris  yog  peb  tej  kev  mob,  yam  nws nqa  yog  peb  tej  kev  ntsaj.    Peb  xav  tias Tswv  Ntuj  ntaus  nws,  thiab  ua  kom  nws raug mob, ua kom nws poob hwj chim.   5    Tab  sis  tus  tub  txib  raug  luag  nkaug, yog  vim  peb  tej  hauj  lwm  phem.    Nws raug  luag  tsuj,  yog  vim  peb  cov  txhaum.  Lub txim uas nyob saum nws, yog tus nqi nws  them  kom  peb  tau  nyob  thaj  yeeb.  Nws  tej  thaj  doog  ua  kom  peb  tej  mob nkeeg zoo  hlo. 6      Peb  sawv  daws  zoo  li  ib  co  yaj  poob zoo,   peb   nyias   taug   nyias   txoj   kev.  HUAB TAIS ua kom txoj kev txhaum uas peb  sawv  daws  taug  rov  los  poob  rau saum tus tub txib.   7  Tus tub txib raug luag hiam heev kawg, tab sis nws yeem ua tus me, nws tsis qhib ncauj.  Nws ua zoo li tus yaj uas luag cab mus rau lub tsev tua tsiaj.  Nws  nyob twj ywm xws li tus yaj uas luag txiav nws cov  plaub.    Nws  ua  siab  ntev  nyiaj,  nws  tsis qhib ncauj li.  8    Luag  yuam,  luag  txiav  txim  kom  tau rhuav  tus  tub  txib  pov  tseg,  leej  twg  tau xav tswv yim txog nws txoj hmoo ?  Luag muab  nws  tshem  tawm  hauv  tsoom  neeg ciaj lub ntiaj teb.   Luag muab tus tub txib tua, vim peb tej kev txhaum.  9    Luag  muab  nws  zwm  ntxa  xyaw  cov neeg  phem,  muab  nws  faus  ze  cov  neeg nkhaus.    Tab  sis  nws  tsis  tau  ua  nruj  ua tsiv  rau  leej  twg.    Nws  lub  ncauj  tsis  tau hais ib lo lus dag.   10  HUAB TAIS pom zoo  tsuj  nws  tus  tub  txib,  nws  ua  kom nws  tus  tub  txib  raug  mob  raug  nkees. Yog tus tub txib muab nws lub neej los ua ib thaj txi Ntuj kho kev txhaum, nws yuav muaj  xeeb  zeej  xeeb  ntxwv,  nws  ua  kom nws lub  hnub nyoog  kav  ntev, nws txhais tes yuav ua tau raws li HUAB TAIS xav.          11  Vim nws tus plig tau raug txom nyem, nws  yuav  pom  txoj  kev  pom  kev,  nws yuav lub siab puv npo vim nws paub txuj.  Kuv  tus  tub  txib  siab  ncaj  yuav  ua  kom ntau leej ncaj tuaj.  Tus yuav ris lawv cov txhaum yog nws.  12  Yog vim  li ntawd, kuv thiaj  yuav pub kom  muaj  ib  feem  ua  nws  tug  nyob  hauv cov  loj,  nws  yuav  nrog  cov  muaj  hwj xyeej  txais  cov  yeeb  ncuab  lub  cuab  tam ib  feem.    Vim  nws  tau  ris  coob  leej  cov txhaum,  thiab  nws  pab  thov  kev  zam  rau cov neeg txhaum




Zaj nyeem Ob: Hes Nplaws 4,14-16. 5,7-9
Peb yuav npuab Leej Pleev uas yog tus tuam Leej Choj.  
14    Vim  peb  muaj  Tswv  Ntuj  Leej  Tub Yes Xus ua Tuam Leej Choj thiab ua Vaj, nws  hla  dhau  yim  txheej  cuaj  txheej  ntuj, mas  peb  yuav  nyob  ruaj  nreb  hauv  txoj kev lees ntseeg.   15    Peb  tus  Tuam  Leej  Choj  tsis  yog  ib tug  Leej  Choj  tsis  txawj  hlub  peb  cov neeg  zog  me,  rau  qhov  nws  tau  raug  txoj kev  sim  siab  txhij  txhua  ib  yam  li  peb.  Tsuas  tshuav  txoj  kev  txhaum  xwb,  nws thiaj tsis raug.   16  Peb kav tsij rhais ruam mus lawm tom ntej.    Peb  tso  siab  lug  mus  kom  txog  lub theej  kiab  muaj  txiaj  ntsim,  kom  peb  tau txais  kev  khuv  leej,  kev  zam,  thiab  kev pab ntawm lub theej kiab.
7    Leej  Pleev,  thaum  nws  ua  neej  nyob hauv  nws  lub  cev  nqaij,  nws  tau  tsa  suab quaj  thov  tus  muaj  peev  xwm  cawm  tau nws  ntawm  txoj  kev  tuag.    Leej  Txiv mloog   Leej   Pleev   lus   thov,   vim   Leej Pleev yog tus hwm Leej Txiv zoo.   8    Txawm  tias  Leej  Pleev  twb  yog  tus Tub  cag,  tsis  kav  nws  tuaj  yeem  raug txom  nyem.    Nws  tau  kawm  tias  kev mloog lus yog dab tsi.   9  Nyem  no, Leej Pleev  yog tus zoo txhij zoo  txhua.    Leej  Pleev  los  ua  lub  hauv paus  uas  cawm  cov  neeg  mloog  nws  lus mus li.  10  Vim Tswv Ntuj tsa Leej Pleev ua  Tuam  Leej  Choj  raws  li  Mes  Kis  Xes Des txoj kev.


Ntawv Moo Zoo: Zam 18, 1-19,42.

8,1-40.
Lawv ntes Yes Xus hauv lub hav Kes Nroos sab tim ub.  
1   Yes Xus  hais  li  ntawd tas, ces nws  nrog  nws  cov  thwj  tim  mus rau  tus  kwj  deg  Kes  Nroos  sab  tim  ub.  Muaj  ib  lub  vaj  nyob  ntawd.      Yes  Xus thiab cov thwj tim mus hauv lub vaj.   2      Yus  Das,  tus  uas  muab  Yes  Xus  rau luag,  kuj  paub  qhov  chaw  ntawd  thiab, vim  Yes  Xus  thiab  cov  thwj  tim  sib  sau ntau  zaus  nyob  ntawd.    3    Yus  Das  coj pab  peeb  zeej  thiab  ib  co  zov  keeb  tuaj.  Yog cov thawj leej choj thiab cov Fas Lis Xais sau cov zov keeb ntawd.  Lawv taws teeb,  taws  tsau  thiab  nqa  ntaj  nqa  riam tuaj.  4    Yes  Xus  paub  ib  puas  tsav  yam  uas yuav  tshwm  sim  tuaj  raug  nws,  ces  nws tawm los hais rau lawv tias :  "Nej nrhiav leej twg ?"   5  Lawv  teb rau nws tias :  "tus Yes Xus Nas Xas Les."   Yes Xus hais rau lawv tias :  "Yog kuv."  Yus Das, tus muab Yes Xus rau luag nrog  lawv sawv ua ke.  6  Thaum Yes Xus hais rau  lawv  tias  :  "Yog  kuv",  mas  lawv thaub qab thiab lawv ntog pem teb.
7  Yes Xus rov nug lawv dua tias :  "Nej nrhiav leej twg ?"   Lawv hais tias :  "Yes Xus Nas Xas Les."   8  Yes Xus teb tias :  "Kuv twb  hais rau nej tias yog  kuv.   Yog nej nrhiav kuv, mas nej cia cov no mus."   9    Qhov  no  tshwm  sim  raws  li  lo  lus  uas nws xub hais tseg tias :  "Cov  uas  koj  muab  rau  kuv,  mas  kuv  tsis ua ib tug ploj li."   10    Xis  Moos  Pob  Zeb  muaj  ib  rab  ntaj.  Nws  rho  hlo  nws  rab  ntaj  tib  ntag  rau  tus thawj  leej  choj  tus  qhev,  txiav  raug  nwssab  pob  ntseg  xis  lub  qia  ntsej  tu  nrho.  Tus qhev no hu ua Mas Kws. 11  Yes Xus hais rau Pob Zeb tias :  "Koj  ntxig  ntaj  rau  hauv  hnab.    Lub  ntim uas  Leej  Txiv  muab  rau  kuv,  kuv  yuav tsis haus lod ?"

Lawv coj Yes Xus mus rau Kais Fais.  Pob Zeb tsis lees Yes Xus.
12    Pab  peeb  zeej  nrog  tus  lwm  txheeb, thiab  cov  zov  keeb  Yus  Das  ntes  Yes Xus.  Lawv muab Yes Xus khi.  13  Lawv xub  coj  nws  mus  tim  As  Nas  tsev.    As Nas  yog  Kais  Fas  yawm  txiv.    Xyoo ntawd yog Kais Fas ua tuam leej choj.   14    Kais  Fas  yog  tus  tau  tawm  tswv  yim rau  cov  Yus  Das  hais  tias  :  "Cia  ib  tug neeg  this  tsoom  pej  xeem  tuag  mas  zoo dua." 15  Xis Moos Pob Zeb thiab lwm tus thwj tim  raws  Yes  Xus  qab.    Tus  thwj  tim ntawd  yog  tus  tuam  leej  choj  ib  tug  swm neeg, ces nws tau nrog Yes Xus chaws  mus  hauv    tus  tuam  leej  choj  lub  tshav loog.    16    Hos  Pob  Zeb  nyob  sab  nraud, nws sawv ze  ntawm  qhov rooj.  Lwm tus thwj tim uas swm tus tuam leej choj tawm los,  nws  hais  lus  rau  tus  ntxhais  txib  zov qhov  rooj,  ces  nws  kom  Pob  Zeb  chaws mus hauv.  17  Tus ntxhais txib zov  qhov rooj hais rau Pob Zeb tias :  "Koj  tsis  yog  tus  neeg  ntawd  ib  tug  thwj tim lod ?"   Pob Zeb hais tias :  "Kuv tsis yog."   18  Cov tub qhev thiab cov zov keeb rauv ib  cub  taws  thee,  vim  lub  caij  ntawd  no no.  Lawv nyob ntawd nte taws.  Pob  Zeb kuj nrog lawv nyob ntawd nte taws thiab. 19  Tus tuam  leej choj  nug  Yes Xus txog nws  cov  thwj  tim  thiab  nws  cov  lus  qhia. 20  Yes Xus teb rau tus tuam leej choj  tias :  "Kuv  tab  meeg  hais  lus  rau  lub  qab  ntuj neeg.  Kuv  niaj  hnub qhia nyob  hauv cov tsev  txoos  thiab  hauv   lub  Tuam  Tsev Teev Ntuj uas tas tsoom  Yus Das tuaj sib txoos.  Kuv tsis tau nyiag hais ib yam dab tsi.  21  Tim li cas koj nug kuv ?  Koj nug cov  uas  tau  hnov  tej  lus  kuv  hais  rau lawv.    Cov  ntawd  paub  tias  kuv  tau  hais dab tsi."   22    Thaum  Yes  Xus  hais  li  ntawd,  mas cov zov keeb uas sawv ntsug nyob ntawd,  muaj  ib  tug  ib  tawg  ncuav  rau  Yes  Xus, nws hais rau Yes Xus tias :  "Koj    teb  li  ntawd    rau  tus  tuam  leej  choj lod !"   23    Yes  Xus  teb  rau  tus  zov  keeb  tias  : "Yog kuv hais lus phem, koj ua pov thawj qhia  saib  qhov  twg  phem.    Hos  yog  kuv hais raug  lawm, vim  li cas  koj thiaj ntaus kuv ?”   24  As Nas xa Yes Xus mus rau tuam leej choj Kais Fas.  Yes Xus tseem khi rawv li qub. 25    Xis  Moos  Pob  Zeb  nyob  ntawd  nte taws.  Lawv hais rau nws tias :  "Koj  tsis  yog  nws  ib  tug  thwj  tim  lod  ?"  Pob Zeb tsis lees, nws hais tias : “Kuv tsis yog.”   26    Tus  tuam  leej  choj  muaj  ib  tug  qhev, nws  yog  ib  tug  txheeb  ze  tus  qhev  uas raug  Pob  Zeb  txiav  ib  sab  qia  ntsej,  nws hais tias :  "Kuv  twb  pom  koj  nrog  nws  nyob  hauv lub vaj los tsis sub ?"   27  Pob Zeb rov qab tsis  lees, ces tam sis ntawd ib tug qaib qua.

Lawv coj Yes Xus mus rau Pis Las Tos.  
28    Lawv  coj  Yes  Xus  tim  Kais  Fas  tsev mus rau hauv lub tsev txiav txim.  Thaum ntawd    kaj  ntug  lawm.    Tab  sis  cov  Yus Das  tsis  mus  hauv  lub  tsev  txiav  txim, kom lawv txhob tsuas yam tsis  huv, lawv thiaj yuav noj tau pluas Hla.  29   Pis Las Tos thiaj li tawm tuaj cuag lawv, nws hais tias :  "Nej  muaj  lus  dab  tsi,  nej  thiaj  tuaj  kom tus neeg ntawd ?"   30    Lawv  teb  rau  Pis  Las  Tos  hais  tias  : "Yog  tus  neeg  no  txhob  yog  neeg  phem, mas peb yuav tsis coj nws tuaj rau koj."   31  Pis Las Tos hais rau lawv tias :  "Nej coj  nws  mus, nej txiav txim rau nws raws li nej txoj cai."   Cov  Yus  Das  hais  rau  Pis  Las  Tos  tias  : "Txoj  cai  tsis  pub  peb  muab  ib  tug  neeg tua."   32  Qhov no tshwm sim raws li lo lus Yes Xus tau xub hais qhia tias nws yuav tsum tuag zoo  li cas.  33  Pis Las Tos thiaj rov chaws  mus  hauv  lub  tsev  txiav  txim,  nws hu Yes Xus los, nws hais tias :  "Koj puas yog cov Yus Das tus vaj ?"   34  Yes Xus teb tias :  "Puas  yog  koj  hais  koj,  los  yog  luag  tej hais txog kuv li ntawd rau koj ?"   35  Pis Las Tos teb tias :  "Kuv puas yog ib tug Yus Das ?  Koj haiv neeg thiab cov thawj leej choj coj koj tuaj rau  kuv.    Koj  tau  ua  dab  tsi  ?"    36    Yes Xus teb tias :  "Kuv  lub  Ceeb  Tsheej  tsis  nyob  hauv  lub qab  ntuj  no.    Yog  kuv  lub  Ceeb  Tsheej nyob  hauv  lub  qab  ntuj  no,  mas  kuv  cov neeg  yuav  sawv  ntaus  rog  thaiv  kom  kuv txhob  poob  rau  hauv  cov  Yus  Das  txhais tes.    Tab  sis,  kuv  lub  Ceeb  Tsheej  tsis nyob hauv lub qab ntuj no."   37    Pis  Las  Tos  hais  rau  Yes  Xus  tias  :  "Ua li koj yog vaj lod ?"   Yes Xus teb hais tias :  "Yog  koj  hais tias kuv  yog  vaj.   Yog  vim qhov  ntawd  kuv  thiaj  yug  los,  thiab  yog vim  qhov  ntawd  kuv thiaj tuaj  nyob  hauv lub  qab  ntuj  no  :    kuv  tuaj  ua  tim  khawv txog  qhov  tseeb.    Leej  twg  yog  txoj  kev tseeb tug, mas nws mloog kuv lub suab."   38    Pis  Las  Tos  hais  rau  Yes  Xus  tias  : "Qhov tseeb yog dab tsi ?" Thaum  Pis  Las  Tos  hais  li  no  tas,  nws tawm  rov  mus  cuag  cov  Yus  Das,  nws hais rau lawv tias :  "Kuv  tsis  pom  ib  yam  tsim  nyog  raug txim  nyob hauv tus  neeg  ntawd.  39  Tab sis raws li nej kev cai, mas txog lub Ntees Hla  kuv  tso  ib  tug  neeg  mus.    Nej  puas xav kom kuv tso cov Yus Das tus vaj ?"   40  Lawv rov qab nthe nrov tias :  "Txhob  tso  nws,  tso  Npas  Las  Npas  !"  Npas Las Npas yog ib tug tub sab.

19,1-42
Lub kauj pos.  
1    Ces  Pis  Las  Tos  coj  Yes  Xus mus, nws kom lawv nplawm Yes Xus.  2  Cov tub rog xuas ib co pos ntxias ua  ib  lub  kauj,  lawv  muab  tso  saum  Yes Xus  taub  hau.    Lawv  muab  ib  lub  tsho ntev liab tshiab rau Yes Xus hnav. 3    Lawv  txav  los  ze  nws,  lawv  hais  tias  : "Nyob kaj lug, cov Yus Das tus vaj,"  ces lawv ntaus nws tej niag teg.

Pis Las Tos txiav txim.
4  Pis Las Tos rov tawm mus nraum zoov, nws hais rau lawv tias :  "Nej  saib,  kuv  coj  tus  neeg  no  tawm  los rau nej, kom nej paub tias kuv tsis pom ib yam   tsim   nyog   raug   txim   nyob   hauv nws."   5  Yes Xus tawm los sab nraud, nws ntoo lub kauj pos thiab hnav  lub tsho  ntev liab tshiab, ces Pis Las Tos hais rau lawv tias :  "Nej ntsia tus neeg no."   6    Thaum  cov  thawj  leej  choj  thiab  cov zov  keeb  pom  Yes  Xus,  lawv  nthe  nthe hais tias :  "Muab  dai  saum  ntoo  cuam  !    Muab  dai saum ntoo cuam !"   Pis Las Tos hais rau lawv tias :  "Nej  coj  nws  mus,  nej  muab  nws  dai saum  ntoo  cuam.    Vim  tias  kuv  tsis  pom ib  yam  tsim  nyog  raug  txim  nyob  hauv nws."   7  Cov Yus Das teb rau Pis Las Tos tias : "Peb  muaj  ib  Txoj  Cai,  raws  li  Txoj  Cai ntawd, mas nws yuav tsum tuag, vim nws tsa nws ua Tswv Ntuj Leej Tub." 8  Thaum Pis Las Tos  hnov  lo  lus  ntawd, mas  nws  haj  yam  ntshai.    9   Ces  nws  rov chaws mus hauv lub tsev txiav txim.  Nws hais rau Yes Xus tias :  "Koj nyob qhov twg tuaj ?"   Tab sis Yes Xus tsis teb ib  lo lus rau nws li.  10  Pis Las Tos thiaj hais rau Yes Xus tias :  "Koj tsis hais lus rau kuv.  Koj puas paub hais  tias  kuv  muaj  hwj  huam  tso  tau  koj mus,  thiab  muaj  hwj  huam  muab  koj  dai saum ntoo cuam ?"   11  Yes Xus teb hais tias :  "Yog  koj  tsis  tau  txais  hwj  huam  saum ntuj  los,  mas  koj  yuav  ua  tsis  tau  dab  tsi rau kuv.  Vim  li ntawd, tus muab kuv rau koj, nws muaj ib qho txhaum loj dua."      12    Txij  ntawd  los,  Pis  Las  Tos  nrhiav kev  tso  Yes  Xus.    Tab  sis  cov  Yus  Das nthe nthe hais tias :  "Yog koj tso tus neeg ntawd mus, mas koj tsis  yog  Xes  Ntxas  phooj  ywg.    Leej  twg tsa  nws  ua  vaj,  mas  nws  sawv  tiv  Xes Ntxas."   13    Thaum  Pis  Las  Tos  hnov  cov  lus  no, nws  kom  lawv  coj  Yes  Xus  tawm  mus sab  nraud.    Ces  Pis  Las  Tos  mus  zaum saum  lub  theej  kiab  txiav  txim,  ntawm qhov  chaw  hu  ua  Tshav  Txiag  Zeb,  lus Hes Nplaws hais tias Nkas Npas Thas.   14    Hnub  ntawd,  yog  Hnub  Npaj  ua  lub Ntees  Hla.    Thaum  ntawd  kwv  yees  ze kaum ob teev tav su.  Pis Las Tos hais rau cov Yus Das tias :  "Nej ntsia nej tus vaj."   15  Cov Yus Das nthe nrov nrov tias :  "Muab tua !  Muab tua !  Muab dai saum ntoo cuam !"   Pis Las Tos hais rau lawv tias :  "Kuv  yuav  muab  nej  tus  vaj  dai  saum ntoo cuam lod ?"   Cov thawj leej choj teb hais tias :  "Peb tsuas muaj Xes Ntxas ua peb tus vaj xwb."   16      Ces  Pis  Las  Tos  muab  Yes  Xus  rau lawv,  kom  lawv  coj  nws  mus  dai  saum ntoo cuam.

Lawv muab Yes Xus dai saum ntoo cuam.  
22. Lawv thiaj li coj Yes Xus mus.   17    Yes  Xus  kwv  nws  tus  ntoo  cuam.  Nws  tawm  mus  txog  qhov  chaw  hu  ua "Khauj  Khaum  Taub  Hau",  uas  lus  Hes Nplaws hu ua "Nkos Nkos Thas." 18    Lawv  muab  nws  dai  rau  saum  ntoo cuam  nyob  ntawd.    Lawv  muab  ob  tug neeg  dai  saum  ntoo  cuam  xws  li  nws thiab,  ib  tug  nyob  ib  sab,  Yes  Xus  nyob nruab  nrab.    19    Pis  Las  Tos  sau  ntawv rau  saum  ib  daim  txiag  ;  nws  kom  muab tso  saum  tus  ntoo  cuam.    Cov  npe  ntawv saum  daim  txiag  sau  hais  tias  :  Yes  Xus Nas Xas Les, cov Yus Das tus vaj.   20    Coob  leej  Yus  Das  nyeem  cov  lus saum  daim  txiag,  vim  qhov  chaw  uas lawv  muab  Yes  Xus  dai  saum  ntoo  cuam nyob ze lub  nroog,  thiab  lawv sau ua lus Hes  Nplaws,  lus  Las  Tis  Nas,  thiab  lus Hes  Las.    21    Cov  thawj  leej  choj  Yus Das hais rau Pis Las Tos tias :  "Koj tsis txhob sau tias :  Cov  Yus  Das  tus  vaj,  yuav  tsum  sau  tias "Tus  ntawd  hais  tias  :  Kuv  yog  cov  Yus Das tus vaj."   22  Pis Las Tos teb hais tias :  "Qhov  kuv  sau,  mas  twb  sau  tas  lawm."  

Lawv sib faib Yes Xus cov ris tsho.
23  Thaum cov tub rog muab Yes Xus dai saum  ntoo cuam tas, lawv  muab Yes  Xus cov  ris  tsho  faib  ua  plaub  tsw,  ib  tsw  rau ib tug tub rog.   Lawv  muab lub tsho  ntev faib,  tab  sis  lub  tsho  ntev  tsis  muaj  leej leeg,  yog  tsho  ntos  ua  ib  daig  xwb  mus rau  nram  taw.    24    Cov  tub  rog  sib  tham tias :  "Peb  txhob  muab  lub  tsho  ntev  dua,  peb twv   saib   leej   twg   yuav   tau   lub   tsho ntawd."   Ua  li  mas  tshwm  sim  raws  li  Ntawv  sau cia  tias  : Lawv  sib  faib  kuv  cov  khaub ncaws,  lawv  twv  saib  leej  twg  yuav  tau kuv cov ris tsho.
Cov tub rog tau ua  li ntawd.

Yes Xus thiab nws niam.  
  25    Yes  Xus  niam  thiab  nws  niam  tus niam hluas, nrog Mab Liab uas yog Khos Pas  poj  niam,  thiab  Mab  Liab  Mas  Ntas Las,  lawv sawv ze tus ntoo cuam.   26    Yes  Xus  pom  nws  niam,  thiab  pom tus  thwj  tim  uas  nws  nyiam  sawv  ze  nws niam, ces nws hais rau nws niam tias :  "Niad, tus ntawd yog koj tus tub."   27    Thiab  Yes  Xus  hais  rau  tus  thwj  tim tias :  "Tus ntawd yog koj niam."   Txij lub sij  hawm  ntawd  los, tus thwj tim coj Mab Liab mus nyob hauv nws tsev.

Yes Xus txoj sia tu.  
28    Ua  li  ntawd  tas,  nws  paub  tias  zaum no  ib  puas  tsav  yam  tiav  tas  lawm,  nws hais  tias  :  "Kuv  nqhis  dej",    kom  xwv muaj raws li Ntawv sau tseg.  29  Muaj ib hub  kua  qaub  puv  nkaus  nyob  ntawd.  Lawv  muab  ib  thooj  rwb  tub  kua  qaub chob rau ib tug ntsis pas nroj his xaus cev mus rau Yes Xus qhov ncauj.  30  Thaum Yes  Xus  haus  qhov  kua  qaub  tas,  nws hais tias :  "Ib puas tsav yam tiav tas lawm."   Ces  Yes  Xus  nyo  taub  hau,  nws  tso  nws tus ntsuj plig tawm mus.

Lawv nkaug Yes Xus hauv siab.  
31  Hnub ntawd yog Hnub Npaj, mas cov Yus Das tsis xav cia cov tuag  lub cev  dai saum ntoo cuam hnub Xas Npas Tos, vim tias hnub Xas Npas Tos ntawd  yog  ib lub hnub  nyoog  loj.    Cov  Yus  Das  thov  Pis Las  Tos  kom  muab  cov  neeg  dai  saum ntoo  cuam  ob  sab  ceg  lov  thiab  muab lawv lub cev txo nqes los. 32  Cov tub rog thiaj tuaj muab thawj tug ob  sab  ceg  lov,  thiab  muab  lwm  tus  uas nrog  nws  dai saum  ntoo cuam  ob sab ceg lov.  33  Thaum lawv los txog ntawm Yes Xus, lawv pom  nws twb tuag lawm, lawv tsis muab nws ob sab ceg lov,  34  tab sis ib  tug  tub  rog  xuas  nws  rab  hmuv  hno Yes  Xus  phab  tav,  tam  sis  ntawd  ib  co ntshav thiab ib co dej tawm los.   35    Tus  uas  tau  pom  qhov  ntawd  ua  pov thawj  hais.  Nws ua tim  khawv  hais  qhov tseeb,  nws  paub  tias  qhov  nws  hais  muaj tiag.  Nws  hais tej  ntawd  kom  nej  ntseeg.  36    Tej  xwm  no  tshwm  sim  kom  muaj raws li Ntawv sau cia tias :  Nws cov pob txha tsis lov ib tug li. 37    Tseem  muaj  lwm  lo  lus  hauv  Ntawv hais tias :  Lawv yuav ntsia tus uas lawv nkaug.

Lawv muab Yes Xus lub cev zwm ntxa.  
38  Thaum tej xwm ntawd tshwm tuaj tas, Yos  Xes  nyob  As  Lis  Mas  Tias  tuaj  thov Pis Las Tos kom  kheev  nws txo  Yes  Xus lub cev.  Pis Las Tos tso lus rau Yos Xes.  Ces  Yos  Xes  mus  txo  Yes  Xus  lub  cev.  Yos Xes yog Yes Xus ib tug thwj tim, tab sis  nws  tsis  pub  luag  tej  paub  vim  nws ntshai  cov  Yus  Das.    39    Nis  Kos  Des Mos kuj tuaj thiab.  Nis Kos Des Mos yog tus  uas  thaum  chiv  thawj,  nws  tuaj  cuag Yes Xus hmo ntuj.  Nws nqa ib cov tshuaj qhwv tuag tuaj : yog txab txiv yoov xyaw txab xyab phij, kwv yees hnyav li ib puas choj.  40   Lawv txo  Yes Xus  lub  cev  los, lawv   xuas   tej   pluaj   hlab   ntaub   pleev tshuaj  tsw  qab  los  qhwv  nws  lub  cev,  raws  li  cov  Yus  Das  kev  cai  tu  zam.    41  Nyob  ntawm  thaj  chaw  uas  luag  muab Yes Xus dai saum ntoo cuam, muaj ib lub vaj.  Nyob hauv lub vaj ntawd muaj ib lub ntxa  tshiab  uas  tseem  tsis  tau  tso  ib  tug tuag  rau  hauv  li.    42      Vim  tias  hnub ntawd yog cov Yus Das Hnub Npaj, thiab lub  ntxa  ntawd    nyob  ze,  ces  lawv  muab Yes Xus zwm rau hauv lub ntxa ntawd.[/quote]

1/ Hauv Paus 1, 1 – 2, 2 ;
Thawj zag piav txog Tswv Ntuj tsim ntuj tsim teb

1 Thaum chiv lub keeb, Tswv Ntuj
tsim lub ntuj thiab lub ntiaj teb,
2 mas lub ntiaj teb tseem tsis tau tsheej
ntiaj teb thiab tsis muaj dab tsi nyob hauv
li. Qhov tsaus ntuj nti npog lub qhov ntuj
dub nciab. Tswv Ntuj nthwv cua kiv
nplawm ntws saum nplaim dej.
3 Tswv Ntuj hais tias :
"Kom muaj qhov pom kev." Ces txawm
muaj qhov pom kev tuaj.
4 Tswv Ntuj pom tias qhov pom kev
ntawd zoo. Tswv Ntuj cais qhov pom kev
ntawm qhov tsaus ntuj. 5 Tswv Ntuj hu
qhov pom kev ua "nruab hnub" thiab hu
qhov tsaus ntuj ua "hmo ntuj." Txawm
muaj tsaus ntuj thiab muaj kaj ntug : yog
thawj hnub. 6 Tswv Ntuj hais tias :
"Kom muaj ib lub ntuj ntsuab nyob hauv
nruab nrab cov dej thiab kom nws quas
cov dej ntawm cov dej". Ces txawm muaj li ntawd tuaj.
7 Tswv Ntuj ua lub ntuj ntsuab los quas
cov dej nyob hauv qab ntuj ntsuab ntawm
cov dej nyob saum qaum ntuj ntsuab.
8 Tswv Ntuj hu lub ntuj ntsuab ua "ntuj."
Txawm muaj tsaus ntuj thiab muaj kaj ntug : yog hnub ob.
9 Tswv Ntuj hais tias :
"Kom cov dej uas nyob hauv qab lub ntuj
ntsuab sib sau los ua ib pawg xwb, thiab
kom av qhuav tshwm los." Ces txawm
muaj li ntawd tuaj.
10 Tswv Ntuj hu cov av qhuav ua "ntiaj
teb" thiab hu cov dej ua "hiav txwv."
Tswv Ntuj pom tias qhov ntawd zoo.
11 Tswv Ntuj hais tias :
"Kom lub ntiaj teb tuaj nroj tsuag ntsuab
xiab : kom muaj nroj tsuag txawj muaj
noob, thiab kom muaj ntoo txi txiv nyias
txi nyias hom txiv, nyias muaj nyias hom
noob." Ces txawm muaj li ntawd tuaj.
12 Ntiaj teb tuaj nroj tsuag ntsuab xiab :
tej nroj tsuag nyias txawj txi nyias hom
noob thiab tej ntoo nyias txawj txi nyias
hom txiv, nyias muaj nyias hom noob.
Tswv Ntuj pom hais tias qhov ntawd zoo.
13 Txawm muaj tsaus ntuj thiab muaj kaj
ntug : yog hnub peb.
14 Tswv Ntuj hais tias :
"Kom muaj tej lub ci ci nyob saum lub
ntuj ntsuab saud, cais nruab hnub thiab
hmo ntuj, thiab cia ua tej lub cim xam
hnub xam nyoog thiab suav hnub suav
xyoo, 15 kom tej lub ci ci nyob saum lub
ntuj ntsuab ua kom ntiaj teb pom kev."
Ces txawm muaj li ntawd tuaj. 16 Tswv
Ntuj ua ob lub ci ci loj dua cov, lub ci ci
loj yog lub kav nruab hnub, lub ci ci me
yog lub kav hmo ntuj, thiab cov hnub qub.
17 Tswv Ntuj muab lawv txawb rau saum
lub ntuj ntsuab saud kom ntiaj teb pom
kev, 18 cia kav nruab hnub thiab hmo
ntuj, thiab cia cais qhov pom kev ntawm
qhov tsaus ntuj. Tswv Ntuj pom tias qhov
ntawd zoo. 19 Txawm muaj tsaus ntuj
thiab muaj kaj ntug : yog hnub plaub.
20 Tswv Ntuj hais tias :
"Kom muaj tej tsiaj muaj sia npau xi nyob
hauv cov dej, thiab kom muaj noog ya
saum npoo ntiaj teb, saum ib nta ntuj
ntsuab." Ces txawm muaj li ntawd tuaj.
21 Tswv Ntuj tsim cov nab hiav txwv loj
loj thiab tas puas tsav yam tsiaj muaj sia
uas txawj ntab hauv dej, coob coob npau
xi nyias muaj raws nyias hom, thiab tsim
cov noog muaj tis, nyias muaj raws nyias
hom. Tswv Ntuj pom tias qhov ntawd
zoo. 22 Tswv Ntuj foom lus zoo rau awv tias :
"Nej yeej meem tsim noob, yeej meem
huam vam mus nyob puv cov dej hauv
hiav txwv, kom cov noog yeej meem
huam vam mus puv ntiaj teb."
23 Txawm muaj tsaus ntuj thiab muaj kaj ntug : yog hnub tsib.
24 Tswv Ntuj hais tias :
"Kom lub ntiaj teb txawj muaj tej yam
tsiaj muaj sia, nyias muaj raws nyias hom
: tsiaj nyeg, kab ntsaum, tsiaj qus, nyias
muaj raws nyias hom." Ces txawm muaj li ntawd tuaj.
25 Tswv Ntuj ua tej tsiaj qus kom nyias
muaj nyias hom, tej tsiaj nyeg kom nyias
muaj nyias hom, thiab tas txhua yam kab
ntsaum kom nyias muaj nyias hom. Tswv
Ntuj pom tias qhov ntawd zoo.
26 Tswv Ntuj hais tias :
"Peb yuav ua tib neeg raws li peb tus
duab, kom zoo li peb me ntsis. Kom lawv
ua tswv kav cov ntses nyob hauv hiav
txwv, cov noog ya saum ntuj, cov tsiaj
nyeg, tas txhua yam tsiaj qus thiab txhua
yam kab ntsaum nkag hauv av.
27 Ces Tswv Ntuj tsim tib neeg raws li
nws tus duab. Yog raws li Tswv Ntuj tus
duab, mas nws thiaj tau tsim tib neeg.
Nws tsim nkawd ua txiv neej thiab ua poj
niam. 28 Tswv Ntuj foom lus zoo rau
nkawd thiab hais rau nkawd tias :
"Neb yeej meem tsim noob, yeej meem
huam vam mus puv ntiaj teb thiab tswj
ntiaj teb. Neb kav cov ntses nyob hauv
hiav txwv, cov noog ya saum ntuj thiab
tas puas tsav yam tsiaj uas nkag hauv av."
29 Tswv Ntuj hais tias :
"Kuv muab tas puas tsav yam nroj tsuag
muaj noob uas tuaj nyob saum npoo av,
kuv muab tas puas tsav yam ntoo txi txiv
thiab muaj noob rau neb : tej ntawd yuav
yog neb tej txhiam laj txhiam xws.
30 Kuv muab tas txhua yam nroj ntsuab
rau cov tsiaj qus, cov noog ya saum ntuj,
tas txhua yam nkag hauv av thiab ciaj sia,
kuv muab rau lawv ua txhiam xws noj."
Ces txawm muaj li ntawd tuaj.
31 Tswv Ntuj ntsia tas txhua yam nws
tau ua : txhua yam ntawd zoo kawg.
Txawm muaj tsaus ntuj thiab muaj kaj
ntug : yog hnub rau.

2,1-2.
1 Lub ntuj thiab lub ntiaj teb yog
tsim los zoo li no, thiab tas txhua
yam nyob rau hauv. 2 Tswv Ntuj ua nws
txoj num tiav tas rau hnub xya. Ces hnub
xya nws thiaj so, vim nws ua nws txoj num tiav tas.




2/Hauv Paus 22,1-18.
Has Nplas Has txi Ntuj.

1 Thaum tej xwm no dhau tas
lawm, Tswv Ntuj sim Has Nplas
Has siab. Nws hu tias :
"Has Nplas Has ! Has Nplas Has !"
Has Nplas Has teb tias :
"Kuv nyob ntawm no !"
2 Tswv Ntuj hais tias :
"Coj koj leej tub twm zeej His Xas Has
uas koj hlub kawg, koj coj nws mus kom
txog lub teb chaws Mos Lis Yas. Nyob
ntawd koj yuav muab nws txi rau kuv
saum ib lub roob uas kuv yuav qhia rau koj."
3 Tag kis, Has Nplas Has sawv ntxov,
nws nog nra rau nws tus luj, nws coj ob
tug tub txib thiab nws tus tub His Xas
Has nrog nws mus. Nws phua ib co taws
npaj mus ua thaj txi ntuj, ces nws sawv
kev mus rau thaj chaw uas Tswv Ntuj qhia rau nws.
4 Hnub peb, Has Nplas Has tsa muag
ntsia pom thaj chaw ntawd tseem nyob deb.
5 Has Nplas Has hais rau nws ob tug tub txib tias :
"Neb nrog tus luj nyob ntawm no. Kuv
tus me nyuam wb mus kom txog tid, wb
yuav hawm Ntuj, wb mam rov los ntawm neb."
6 Has Nplas Has muab cov taws txi Ntuj
nog rau nws tus tub His Xas Has ris, hos
nws nqa cov hluav taws thiab rab riam,
ces nkawd ob leeg ua ke mus.
7 His Xas Has nug nws txiv Has Nplas Has tias : "Kuv txiv !"
Has Nplas Has teb tias :
"Me tub, koj hais dab tsi !"
His Xas Has hais ntxiv tias :
"Ua cas pom hluav taws thiab cov taws
xwb, ua li tus yaj yuav coj los hlawv txi
Ntuj nyob qhov twg ?"
8 Has Nplas Has teb tias :
"Me tub, Tswv Ntuj mam li muab tus yaj
uas yuav txi Ntuj rau wb."
Ces nkawd ob leeg taug kev mus ntxiv.
9 Thaum nkawd tuaj txog thaj chaw uas
Tswv Ntuj tau qhia nws, Has Nplas Has
tsa ib lub thaj rau ntawd thiab nws muab
cov taws mus teeb rau saud. Nws muab
nws tus tub His Xas Has pav, ces nws
muab tso rau saum cov taws saum lub thaj
txi Ntuj. 10 Has Nplas Has tsa tes mus
nthos rab riam yuav coj los tua nws tus
tub. 11 Tiam sis HUAB TAIS tus Tshiab
hu saum ntuj tuaj rau nws tias :
"Has Nplas Has ! Has Nplas Has !"
Has Nplas Has teb tias :
"Kuv nyob ntawm no !"
12 Tus Tshiab hais tias :
"Txhob tsa koj txhais tes rau saum tus me
nyuad ! Txhob ua dab tsi phem rau nws !
Zaum no kuv paub hais tias koj hwm
Tswv Ntuj tiag, vim koj tsis yig, koj
tseem muab koj leej tub twm zeej los txi rau kuv."
13 Has Nplas Has tsa muag ntsia pom ib
tug laug tshis uas ob tug kub daig hauv ib
koog pos. Ces nws mus muab tus laug
tshis los hlawv txi Ntuj hloov nws tus tub
chaw. 14 Has Nplas Has tis npe rau thaj
chaw ntawd hu ua "HUAB TAIS yuav
pub.” Ces zaum no thiaj muaj lo lus hais
kam tias "Saum lub roob HUAB TAIS yuav pub."
15 HUAB TAIS tus Tshiab rov hu zaum
ob saum ntuj tuaj rau Has Nplas Has, 16 nws hais tias :
"HUAB TAIS hais tias : Kuv tuav txog
kuv lub npe cog lus rau koj tias : vim koj
tau ua li ntawd, koj tsis yig, koj tuaj yeem
muab koj leej tub twm zeem los txi rau
kuv, 17 mas kuv yuav foom hmoov zoo
ntau rau koj, kuv yuav ua kom koj tsoom
xeeb zeej xeeb ntxwv coob npaum cov
hnub qub saum ntuj thiab ntau npaum cov
xuab zeb uas nyob ntawm ntug hiav txwv.
Koj tsoom xeeb zeej xeeb ntxwv yuav ua
tswv kav lawv cov yeeb ncuab tej qhov
rooj loog. 18 Tas txhua haiv neeg nyob
ntiaj teb yuav tuav txog koj tsoom xeeb
ntxwv lub npe los sib foom hmoov zoo,
vim koj tau mloog kuv lus."




3/ Kev Tsiv 14, 15-31-15, 1a.
Cov His Xas Lais hla Dej Ntuj Liab.

15 HUAB TAIS hais rau Mais Xes tias :
"Vim li cas koj thiaj hu kuv cuag li
ntawd ? Koj hais rau cov His Xas Lais
kom lawv rov sawv kev mus ntxiv.
16 Koj yuav tsa koj rab pas thiab xyab koj
txhais tes rau saum dej ntuj, koj yuav faib
dej ua ob sab, kom cov His Xas Lais tau
taug kev qhuav qhawv hauv qab thu dej
mus. 17 Kuv yuav ua kom cov Hais
Nkws Tos lub siab tawv qhawv tuaj, lawv
yuav caum cov His Xas Lais qab hla hauv
qab thu dej mus thiab, ces kuv yuav siv
Fas Las Oos thiab nws cov tub rog, nws
cov tsheb rog thiab cov tsav tsheb los ua
kom kuv nto koob meej. 18 Thaum kuv
siv Fas Las Oos thiab nws cov tsheb rog
thiab cov tsav tsheb ua kom kuv nto koob
meej lawd, cov Hais Nkws Tos mam
yuav paub tias kuv yog HUAB TAIS tiag."
19 Tswv Ntuj tus Tshiab uas mus ua
tsoom His Xas Lais ntej, hloov chaw mus
thaiv tom lawv qab : ces tus ncej huab
nyob ntawm lawv hauv ntej txav chaw
mus nyob tom lawv qub qab. 20 Nws
mus nyob nruab nrab kem tog Hais Nkws
Tos ntawm tog His Xas Lais. Twv huab
dub nciab tsaus nti ib hmos thaiv lawv,
ces hmo ntawd ib hmos, ib tog txav tsis ti
ib tog li. 21 Mais Xes tsa tes rau saum
dej ntuj, ces HUAB TAIS ua cua hlob
hlob ntsawj toob fab tuaj thawb cov dej ib
hmos, qab thu dej tawm qhuav qhawv los,
hos dej faib ua nyob ob sab. 22 Cov His
Xas Lais nkag hauv hiav txwv, lawv tsuj
av qhuav qhawv mus, nyob ntawm lawv
sab xis thiab sab laug muaj ob lub phab
ntsa dej. 23 Cov Hais Nkws Tos caum
lawv qab : Fas Las Oos cov nees, cov
tsheb rog thiab cov tsav tsheb nkag mus
hauv dej ntuj caum cov cov His Xas Lais.
24 Thaum yuav kaj ntug, HUAB TAIS
nyob saum tus ncej huab hluav taws, ntsia
pom cov Hais Nkws Tos. Nws ua kom
cov Hais Nkws Tos tau ntshai kawg.
25 Nws ua kom lawv cov log tsheb daig
thiab ntog qeeb qeeb. Cov Hais Nkws Tos hais tias :
"Peb khiav mus deb ntawm cov His Xas
Lais vim HUAB TAIS pab lawv tawm
tsam ntaus cov Hais Nkws Tos !"
26 HUAB TAIS hais rau Mais Xes tias :
"Koj tsa tes rau saum dej ntuj, kom dej
ntws rov los nyab cov Hais Nkws Tos
thiab lawv cov tsheb rog thiab cov tsav tsheb tib si."
27 Mais Xes tsa tes rau saum dej ntuj,
ces thaum pib kaj ntug, dej ntws rov los
nyob qhov qub chaw. Cov Hais Nkws
Tos tig khiav rov qab, tiam sis dej nphau
nphwv los npog lawv, HUAB TAIS ua
kom lawv ntxeev zom zaws rau hauv dej
ntuj. 28 Cov dej nphau rov los nyob
qhov qub, los npog cov tsheb thiab cov
tsav tsheb Hais Nkws Tos uas tau nkag
mus hauv qab thu dej caum cov His Xas
Lais, tsis dim ib tug li. 29 Hos cov His
Xas Lais tau taug kev qhuav nyob hauv
plawv dej ntuj, cov dej ua ob sab phab
ntsa nyob ntawm lawv sab xis thiab sab
laug. 30 Hnub ntawd, HUAB TAIS
cawm cov His Xas Lais dim ntawm cov
Hais Nkws Tos txhais tes. Cov His Xas
Lais pom cov Hais Nkws Tos tuag pawg
lug ntawm ntug dej ntuj. 31 Cov His Xas
Lais pom HUAB TAIS lub peev xwm uas
nws siv los tiv yeej cov Hais Nkws Tos.
Tsoom pej xeem sawv daws hwm HUAB
TAIS. Lawv tso siab rau HUAB TAIS
thiab rau nws tus tub txib Mais Xes.
1 Ces Mais Xes thiab tsoom tub
ki His Xas Lais hu nkauj cav txog HUAB TAIS.

cantique ex.15,1b.2.3-4.5-6.17-18.



4/ His Xais 54, 5-14.

5 Vim koj tus txiv yog tus tsim koj. Nws
lub npe yog tus HUAB TAIS Nyob Siab.
Tus txhiv koj yog His Xas Lais tus
Ntshiab, nws hu ua Tswv Ntuj kav lub ntiaj teb.
6 Muaj tseeb ! Koj tus plig nyob hauv
txoj kev lwj siab, xws li tus poj niam uas
luag tso pov tseg. HUAB TAIS rov hu
koj. Tus Tswv Ntuj hais tias :
"Tus poj niam uas yus yuav thaum hluas,
yus puas yuav ntiab tau nws ? 7 Kuv tso
koj tseg ib nyuag me ntsis, tab sis kuv lub
siab hlub koj heev, kuv rov sau koj.
8 Kuv tau npau taws heev rau koj, kuv
thiaj nraim kuv lub ntsej muag ib nyuag
chim, tab sis kuv lub siab npuab koj mus
tas ib txhis, kuv khuv leej koj. Tus
HUAB TAIS txhiv koj, hais li ntawd.
9 Thaum Nos Hes tseem nyob, kuv cog
lus tias dej yuav tsis nyab ntiaj teb ntxiv.
Nyem no, kuv rov cog lus zoo li ntawd,
kuv yuav tsis npau taws rau koj, Yes Lus
Xas Les kuv yuav tsis tso hem thawj rau koj.
10 Cov roob txawj txav mus, cov hauv
toj txawj vau, tab sis kuv lub siab npuab
koj yuav tsis nrug deb koj, kuv kev cog
lus nyob thaj yeeb yuav tsis ntshaus. Tus
HUAB TAIS khuv leej koj hais li ntawd."
11 Yes Lus Xas Les, koj tau raug kev
txom nyem loj kawg ! Cov cua daj cua
dub tuaj nplawm koj. Tsis muaj leej twg
nplij koj. Koj ntsia saib ! Kuv yuav
muab pob zeb ci ua ntsa zeb xov koj,
yuav muab pob zeb xia los ua taw ntsa,
yuav muab pob zeb dawb ua cov qhov rooj.
12 Kuv yuav muab nyiaj muab kub los
ua ib lub yeej xov koj. Kuv yuav muab
tsom iav los ua koj cov rooj loog. 13 Koj
cov tub sawv daws ua HUAB TAIS thwj
tim. Koj cov tub yuav nyob hauv txoj
kev thaj yeeb loj. 14 Kev ncaj yuav ua
kom koj nyob khov kho. Koj yuav nyob
deb ntawm txoj kev raug luag quab yuam.
Koj yuav tsis muaj kev txhawj xeeb ntxiv.
Kev txhawj ntshai yuav tsis txav los ze ntawm koj.




5/ His Xais 55,1-11
1 Nej sawv daws uas nej nqhis
dej, nej tuaj cuag lub qhov dej.
Nej cov uas tsis muaj nyiaj txiag, nej tuaj
mas ! Nej muas nplej los ua ncuav mov !
Nej noj, tsis tas yuav them nyiaj. Nej
muas cawv txiv ntoo muas mis nyuj, tsis
tas yuav them dab tsi.
2 Ua cas nej yuav siv nyiaj los muas tej
yam tsis yog mov noj ? Ua cas nej siv
cov nyiaj nqe zog los muas tej yam tsis ua
kom nej tsau plab ? Nej mloog kuv mas !
Ces nej yuav tau noj tej yam qab, nej
yuav tau tej yam txhiam xws qab xis nej
lub ncauj. 3a Nej tig ntsej los mloog kuv
mog ! Nej mloog kuv, ces nej tus plig
yuav muaj txoj sia nyob.
3b Kuv yuav nrog nej cog ib lo lus nyob
mus ib txhiab ib txhis, raws li cov txiaj
ntsim kuv hais ruaj tias kuv yuav muab rau Das Vis.
4 Yam li kuv tau tsa Das Vis los ua ib
tug tim khawv rau cov haiv neeg, ua ib
tug ntaus thawj qhia cov haiv neeg.
5 Yog zoo li no, Yes Lus Xas Les, koj
yuav hu ib lub kuj cuab uas koj tseem tsis
tau paub, ces lub kuj cuab ntawd yuav
khiav tuaj cuag koj, yog vim HUAB
TAIS koj tus Tswv Ntuj, yog vim His
Xas Lais tus Ntshiab, nws ua kom koj nto koob meej.

6 Nej nrhiav HUAB TAIS mog ! Nyem
no yog lub caij zoo ntsib nws. Nws nyob
ze lawm, nej hu txog nws mog !
7 Tus siab phem, nws yuav tso nws txoj
kev phem tseg. Tus siab nkhaus tso nws
lub tswv yim lim hiam tseg. Nws yuav
tig los cuag HUAB TAIS. HUAB TAIS
yuav khuv leej nws. Nws cia li los cuag
Tswv Ntuj, vim Tswv Ntuj lub siab zam dav.
8 Nej zaj tswv yim tsis zoo li kuv zaj.
Nej txoj kev tsis zoo li kuv txoj kev. Yog
HUAB TAIS lus ceeb toom.
9 Lub ntuj nyob siab dua lub ntiaj teb,
kuv txoj kev nyob siab dua nej txoj kev
npaum li ntawd. Thiab kuv zaj tswv yim
nyob siab dua nej zaj tswv yim.
10 Cov nag, cov daus uas poob saum ntuj
los, yog lawv tsis tau pub dej rau ntiaj teb
haus, mas lawv tsis rov mus saum ntuj.
Cov nag thiab cov daus ua kom cov noob
lwj thiab nthaw kaus, ua kom lub ntiaj teb
txi txiv rau tus tseb, pub mov rau neeg
noj, ces cov nag mam rov mus lawm saum ntuj.
11 Cov lus tawm ntawm kuv lub ncauj
los kuj zoo li ntawd thiab. Nws tsis tau
ua hauj lwm, mas nws tsis rov los cuag
kuv. Kuv lo lus tsis tau leg qhov kuv xav,
mas nws tsis rov los cuag kuv. Kuv lo lus
tsis tau ua tiav qhov kuv xa nws mus ua,
mas nws tsis rov los cuag kuv."

Cantique: IS.12,2,4bcd.5-6.



6/ Npas Lws 3, 9-15.32 – 4, 4
(Tshuav ib txhia tsis tau txhais ces kuv tso qhov uas muaj xwb)
32 Tab sis tus paub tas ib puas tsav yam
nws kuj paub kev thoob tsib. Nws lub
tswv yim to taub kev thoob tsib. Nws yog
tus tu lub ntiaj teb thiab muab tej tsiaj los nyob kom puv.
33 Nws yog tus xa qhov pom kev tuaj.
Thaum nws hu qhov pom kev rov los,
mas qhov pom kev ntshai tshee na mloog nws lus rov los.
34 Cov hnub qub ci luag nyav thaum hmo ntuj.
35 Nws hu cov hnub qub, ces lawv teb
tias : "Peb nyob ntawm no !"
Lawv ci luag nyav rau tus tsim lawv.
36 Peb tus Huab Tais yog tus ntawd.
Tsis muaj lwm tus uas peb yuav muab los piv rau nws tau.
37 Huab Tais tau tsom pom thoob plaws
txoj kev paub txuj paub ci. Nws tau qhia
kev paub txuj rau nws tus tub txib Yas
Kos, rau tus tub zoo nyiam His Xas Lais paub.
38 Txoj kev paub txuj paub ci uas li
ntawd tas, mas nws tawm tuaj rau yaj
ceeb pom, nws nrog tib neeg nyob."





7/ Es Xes Kia 36, 16-17a.18-28

16 Kuv txais HUAB TAIS ib lo
lus li no : 17 Neeg leej tub,
thaud, tsoom His Xas Lais nyob txawm
hauv lawv teb chaws.
18 Kuv thiaj tau tso kuv lub siab npau
rau lawv, vim lawv ua luag roj ntsha ntws
nyob hauv lawv teb chaws, lawv muab tej
tus mlom dab los ua kom lawv teb chaws sw.
19 Kuv ua kom cov His Xas Lais sib
ncaim mus nyob hauv nruab nrab cov kuj
cuab. Kuv muab lawv w mus rau pej
kum teb. Kuv tau txiav txim rau lawv
raws lawv tus yam ntxwv thiab lawv tes dej num.
20 Lawv tuaj nyob pej kum teb, lawv
tseem ua puas kuv lub npe ntshiab. Lawv
ua kom pej kum haiv neeg hais tias : Yog
HUAB TAIS haiv neeg, lawv tawm hauv
nws lub teb chaws tuaj nyob qhov no."
21 Tab sis kuv txuag kuv lub npe
ntshiab, uas His Xas Lais ua kom puas
rau hauv cov kuj cuab ua lawv tuaj nyob.
22 Koj mus hais rau tsoom His Xas Lais tias :
"Huab Tais Tswv Ntuj hais li no : His
Xas Lais tsev neeg, tsis yog vim nej ces
kuv thiaj ua zoo li no, yog vim kuv lub
npe ntshiab uas nej tau ua puas nyob hauv
cov kuj cuab uas nej tuaj nyob. 23 Kuv
yuav ua kom kuv lub npe loj ntshiab tuaj,
vim nej tau ua kom kuv lub npe puas
nyob hauv cov kuj cuab nej tuaj nyob.
Cov kuj cuab thiaj yuav paub tias kuv yog
HUAB TAIS. HUAB TAIS Tswv Ntuj
hais zoo li ntawd. Kuv yuav ua kom kuv
lub siab ntshiab ci tuaj rau lawv qhov
muag pom. 24 Thaum ntawd kuv yuav
thau nej hauv cov kuj cuab los, kuv yuav
sau nej ntawm pej kum teb los nyob ua
ke, kuv yuav coj nej rov los nyob hauv
nej thaj av. 25 Kuv yuav hliv dej ntshiab
ntws tuaj saum nej, ces nej yuav huv tuaj.
Kuv yuav so nej tej yam sw thiab nej tej
mlom dab pov tseg kom nej huv tuaj.
26 Kuv yuav pub ib lub siab tshiab rau
nej, kuv yuav dawj nej lub siab tawv li
zeb, kuv yuav cog ib lub siab muag li
nqaij nyob hauv nej lub cev.
27 Kuv yuav muab kuv lub tswv yim rau
hauv nej. Kuv yuav ua kom nej mus raws
kuv tej lij choj, thiab kom nej coj kuv tej
kev cai. 28 Nej yuav tau nyob hauv lub
teb chaws uas kuv muab rau nej phaj txiv
thiab phaj yawg. Nej yuav yog kuv haiv
neeg. Kuv yuav yog nej tus Tswv Ntuj."




8/ Los Mas 6, 3-11
3 Peb cov uas tau txais lub Cim
Ntxuav nyob hauv Yes Xus Pleev, mas
yog peb txais lub Cim Ntxuav nyob hauv
Yes Xus txoj kev tuag. 4 Thaum peb
txais lub Cim Ntxuav peb nrog Yes Xus
tuag, peb nrog nws mus hauv nws lub ntxa.
5 Ua li mas peb yuav coj ib lub neej
tshiab xws li Leej Pleev sawv hauv yeeb
ceeb rov los, vim Leej Txiv lub hwj huam
tau tsa nws. 6 Peb nrog Leej Pleev
koom. Peb nrog Leej Pleev tuag, peb
thiaj yuav nrog nws sawv rov los. Peb
paub tseeb tias peb muab peb tus qub
neeg nrog Yes Xus ntsia saum ntoo cuam,
vim peb xav muab peb lub cev xib rau
kev txhaum tua. Mas peb thiaj tsis ua
kev txhaum cov qhev ntxiv. 7 Vim tias
tus neeg tuag, tsis zwm rau txoj kev txhaum ntxiv.
8 Tab sis, yog peb nrog Leej Pleev tuag
mas peb ntseeg tias peb yuav nrog nws
muaj txoj sia. 9 Peb paub tias Leej Pleev
sawv hauv qhov tuag los lawm, nws yuav
tsis rov tuag dua, txoj kev tuag tsis muaj
cuab kav tuaj raug nws ib zaug ntxiv.
10 Nws tuag ib zaug kom txoj kev
txhaum tuag. Nyem no, nws ciaj rov los
nws npuab Tswv Ntuj mus li.
11 Nej, mas nej kuj zoo li ntawd thiab :
nej yuav saib tias nej tus neeg txhaum
tuag lawm, tshuav nej tus neeg tshiab
npuab Tswv Ntuj uas muaj txoj sia nyob
hauv Huab Tais Yes Xus Pleev mus li.




Mas Tais 28,1-10
Lub ntxa khoob. Ntuj Tus Tshiab xa xov.

1 Dhau hnub Xas Npas Tos
lawm, yog thawj hnub hauv lub lis
piam, thaum sawv ntxov, Mab Liab Mas
Ntas Las thiab lwm tus Mab Liab nkawd
mus xyuas lub ntxa. 2 Ib sij huam, av
qeeg loj kawg : Huab Tais tus Tshiab nqes
saum ntuj los dov daim txiag zeb, nws
zaum saud. 3 Nws ib ce ci li xob laim,
nws cev tsoos tsho dawb li daus. 4 Cov
zov keeb pom, lawv ceeb, lawv ntshai
tshee na, zoo li lawv tuag lawm. 5 Tus
Tshiab hais rau ob tug poj niam tias :
"Neb txhob ntshai mog : kuv paub tias neb
nrhiav Yes Xus, tus tuag saum ntoo cuam.
6 Nws tsis nyob ntawm no lawm, nws
sawv rov los raws li nws tau hais. Neb los
xyuas qhov chaw lawv tso nws lub cev
saib mas ! 7 Neb maj zeeg mus hais rau
nws cov thwj tim tias : 'Nws sawv hauv
cov tuag los lawm, nws ua nej ntej mus
Nkas Lis Lais ; nej yuav pom nws nyob
ped.' Kuv hais li no rau neb xwb."
8 Ob tug poj niam tso plhuav lub ntxa
tseg. Nkawd ntshai thiab zoo siab tas
nrho. Nkawd khiav mus xa lub moo ntawd rau cov thwj tim.
9 Yes Xus tuaj tos ob tug poj niam kev, nws hais tias :
"Neb nyob kaj lug".
Ces nkawd txav los ze Yes Xus, nkawd
puag Yes Xus ko taw, nkawd pe nws.
10 Yes Xus hais rau nkawd tias :
"Neb txhob ntshai mog, neb mus qhia kuv
cov kwv tij kom lawv mus lawm Nkas Lis
Lais teb, lawv yuav pom kuv nyob ntawd."

Zaj nyeel 1 Hauj Lwm 10,34a.37-43

34 Ces Pob Zeb pib hais tias :
"Nyem no, kuv paub tseeb tias Tswv Ntuj
tsis kws leej twg cai.
37 Nej twb tau hnov txog tej xwm uas
tshwm sim tuaj nyob hauv xeev Yus Das :
yam li thaum Zam tshaj tias sawv daws
yuav txais lub cim ntxuav, mas nej kuj
hnov hais txog Yes Xus nyob Nas Xas
Les. Nws pib qhia hauv xeev Nkas Lis
Lais. 38 Tswv Ntuj tau pleev nws. Tswv
Ntuj muab Leej Ntuj Plig Ntshiab thiab
muab hwj huam rau nws. Nws mus ncig
teb ncig chaw, nws ua zoo rau sawv daws.
Nws kho cov neeg poob hauv dab phem
tes kom lawv zoo. Vim Tswv Ntuj nrog nws nyob.
39 Peb ua tim khawv pom tas puas tsav
yam Yes Xus tau ua nyob hauv cov Yus
Das lub teb chaws thiab nyob Yes Lus
Xas Les. Cov Yus Das tau ua phem rau
nws : lawv muab nws dai saum ib tug
ncej kom nws tuag. 40 Tab sis, hnub tim
peb, Tswv Ntuj tsa nws sawv rov qab los
lawm thiab pub kom nws tawm los xyuas
cov tim khawv uas nws xub tau xaiv ua
ntej. 41 Tsis yog tas tsoom pej xeem tau
pom nws. Cov tau pom nws yog peb.
Thaum nws sawv hauv cov tub tuag rov
los, mas peb tau nrog nws noj thiab haus
ua ke. 42 Nws qhia peb kom peb tshaj
rau tsoom pej xeem thiab ua pov thawj
zeem tias nws yog tus uas Tswv Ntuj tsa
los txiav txim rau cov neeg ciaj thiab cov neeg tuag.
43 Tas cov yaj saub ua tim khawv txog
Yes Xus tias leej twg ntseeg txog nws,
mas leej twg cov txhaum yuav daws tas
nyob hauv nws lub npe."




Zaj nyeem 2 Kos Los Xais 3, 1-4
Peb npuab Yes Xus peb thiaj tau txoj sia tshiab.

1 Nej pom xeeb nrog Leej Pleev
sawv rov los lawm, mas nej nrhiav
tej yam nyob txheej saud, vim txheej saud
yog Leej Pleev qhov chaw nyob, nws
zaum ntawm Tswv Ntuj phab xis. 2 Nej
lub siab yuav dai dhuam rau tej yam nyob
txheej saud, txhob dai rau tej yam nyob
ntiaj teb no. 3 Vim tias, nej tuag lawm,
hos nej txoj sia nrog Leej Pleev tsiv nraim
hauv Tswv Ntuj. 4 Leej Pleev yog nej
txoj sia : thaum nws yuav tawm los rau
pom xyeem, mas nej kuj yuav nrog nws
tawm los muaj hwj chim.

Sequence.

To the Easter Victim,
Christians, offer the sacrifice of praise.

The Lamb redeemed the sheep;
the innocent Christ has reconciled
sinful man with the Father.

Death and life collided
in a prodigious duel.
The Master of Life died; alive, he reigns.

“Tell us, Mary Magdalene,
what did you see on the way? »

“I saw the sepulcher of the living Christ,
I have seen the glory of the Risen One.

I have seen the angels his witnesses,
the shroud and the vestments.

Christ, my hope, is risen!
He will precede you into Galilee. »

We know: Christ
has truly risen from the dead.

victorious king,
pity us all!
Amen.

Séquence.
À la Victime pascale,
chrétiens, offrez le sacrifice de louange.

L’Agneau a racheté les brebis ;
le Christ innocent a réconcilié
l’homme pécheur avec le Père.

La mort et la vie s’affrontèrent
en un duel prodigieux.
Le Maître de la vie mourut ; vivant, il règne.

« Dis-nous, Marie Madeleine,
qu’as-tu vu en chemin ? »

« J’ai vu le sépulcre du Christ vivant,
j’ai vu la gloire du Ressuscité.

J’ai vu les anges ses témoins,
le suaire et les vêtements.

Le Christ, mon espérance, est ressuscité !
Il vous précédera en Galilée. »

Nous le savons : le Christ
est vraiment ressuscité des morts.

Roi victorieux,
prends-nous tous en pitié !
Amen.


Zam 20, 1-9

1 Thawj hnub pib lub lis piam,
thaum sawv ntxov, ntuj tsis tau
kaj, Mab Lias Mas Ntas Las mus tom
ntxa. Nws pom daim txiag zeb tshem
ntawm lub ntxa lawm. 2 Mab Liab Mas
Ntas Las khiav mus cuag Xis Moos Pob
Zeb thiab lwm tus thwj tim, uas yog tus
Yes Xus nyiam. Nws hais rau nkawd
tias : "Lawv nqa Huab Tais tawm hauv
ntxa lawm, peb tsis paub xyov lawv coj
nws mus tso qhov twg lawm."
3 Pob Zeb tawm plaws mus, lwm tus
thwj tim kuj tawm plaws thiab, nkawd
mus tom ntxa. 4 Nkawd ob leeg ua ke
khiav mus, tab sis lwm tus thwj tim
khiav nrawm dua Pob Zeb, nws khiav ua
ntej, nws xub mus txog tom ntxa. 5 Nws
khoov mus xauj, nws pom tej hlab ntaub
nyob ntawd ; tab sis nws tsis chaws mus
hauv. 6 Ces Xis Moos Pob Zeb lawv tus
thwj tim qab mus txog, nws chaws mus
hauv lub ntxa. Nws pom cov hlab ntaub
nyob ntawd, 7 hos daim ntaub qhwv
taub hau kauv cia nyob lwm qhov, tsis
xyaw cov hlab ntaub. 8 Ces lwm tus
thwj tim uas xub mus txog ntawm lub
ntxa mam li chaws mus hauv. Nws pom
ces nws ntseeg. 9 Vim lawv tseem tsis
tau to taub tias Yes Xus yuav sawv hauv
cov tuag rov los raws li Ntawv qhia.

Zaj nyeem 1: Hauj Lwm 2,42-47
Thawj pab ntseeg nyob li cas.
42 Lawv nquag tuaj mloog cov Hauv
Paus Xa Lus qhia lawv. Sawv daws
koom siab ua ib pab kwv tij, ua kab ke
lov ncuav mov thiab teev ntuj ua ke.
43 Tas tsoom sid hwm, vim cov Hauv
Paus Xa Lus ua ntau hom dej num zoo
kawg thiab ua ib co cim ntau. 44 Cov
ntseeg muab lawv lub cuab tam los tso ua
ke. 45 Lawv muab lawv tej cuab yeej
cuab tam muag, lawv muab tus nqi los
faib rau sawv daws raws li nyias tej chaw
siv. 46 Lawv niaj hnub koom ua ib lub
siab, lawv nquag mus tom lub Tuam Tsev
Teev Ntuj. Lawv ua kab ke ntais ncuav
mov nyob hauv lawv cov tsev, sawv daws
noj luag ntxhwb ntxhi, nyob muaj siab kaj lug.

47 Lawv cav lus zoo txog Tswv Ntuj.
Tsoom pej xeem pom lawv zoo. Huab
Tais niaj hnub coj cov neeg uas Ntuj
cawm tau lawv los ntxiv rau lub txoos.

Zaj nyeem 2: 1 Pob Zeb 1,3-9
Cov ntseeg txoj kev tso siab.
3 Peb cav lus zoo txog Tswv Ntuj, uas
yog peb tus Huab Tais Yes Xus Pleev Leej Txiv.

Leej Txiv lub siab khuv leej neeg kawg,
nws thiaj ua kom peb rov yug los tshiab,
thiab muaj chaw tso siab nyob hauv Yes
Xus Pleev txoj kev sawv ntawm cov tub tuag rov los.

4 Tswv Ntuj xav pub lub cuab tam uas
tsis txawj lwj, tsis tsuas, thiab tsis txawj
nphob rau peb. Tswv Ntuj tshwj zias lub
cuab tam ntawd rau peb nyob saum Ntuj.
5 Yog vim nej ntseeg, mas Tswv Ntuj
lub hwj huam thiaj txuag nej, kom nej tau
txais txoj kev cawm neeg, uas yuav tawm tuaj hnub kawg.

6 Vim tej ntawd, mas tab nej txawm raug
txom nyem, nej muaj kev tu siab, los nej
raug sim siab ib ntus ntxiv, los nej tseem
zoo siab luag ntxhwb ntxhi. 7 Ntuj sim
nej txoj kev ntseeg zoo li luag sim tej kub
txawj puas nyob hauv hluav taws. Nej
txoj kev ntseeg muaj nqi dua kub, hnub
Yes Xus Pleev yuav los, mas Ntuj yuav
cav lus zoo txog nej, Ntuj yuav pub koob
meej rau nej, thiab yuav muab hwj chim rau nej.

8 Nej tseem tsis tau pom Yes Xus Pleev,
tsis kav nej twb nyiam nws. Nej tsis tau
pom nws, tab sis nej ntseeg, mas nej yuav
tau ib txog kev zoo siab uas piav tsis tau,
ua li mas nej hom khaj mog, nej twb muaj
koob meej, 9 vim nej txais kev ntseeg
tus nqi, uas yog txoj kev cawm nej tus plig.

Zam 20, 19-31
Yes Xus tawm los rau cov thwj tim
pom thaum Tos Mas tsis nyob.
19 Tib hnub ntawd thaum tsaus ntuj, uas
yog thawj hnub pib lub lis piam, cov
qhov rooj hauv qhov chaw cov thwj tim
nyob kaw tas, vim lawv ntshai cov Yus
Das. Yes Xus los sawv hauv nruab nrab,
nws hais rau lawv tias :
"Nej nyob kaj lug."
20 Thaum Yes Xus hais lo lus ntawd tas,
nws muab nws ob txhais tes thiab nws
phab tav rau lawv saib. Cov thwj tim
pom Huab Tais, lawv zoo siab kawg.
21 Yes Xus rov hais rau lawv tias :
"Nej nyob kaj lug ! Kuv xa nej mus xws li
Leej Txiv xa kuv tuaj."
22 Yes Xus hais li tas, nws tshuab pa rau
lawv, nws hais rau lawv tias :
"Nej txais Leej Ntuj Plig Ntshiab.
23 Nej daws txhaum rau leej twg, mas
nws cov txhaum yuav daws. Nej tsis
daws leej twg cov txhaum, mas nws cov
txhaum yuav nyob."

24 Tos Mas yog ib tug hauv pab Kaum
Ob, nws tseem hu ua Dis Dws Mos thiab.
Thaum Yes Xus tawm los, mas nws tsis
nrog cov thwj tim nyob. 25 Lwm cov
thwj tim hais rau nws tias :
"Peb pom Huab Tais lawm !"
Ces Tos Mas hais rau lawv tias :
"Yog kuv tsis pom lub qhov txhab ntsia
hlau nyob hauv nws ob txhais tes, yog
kuv tsis muab kuv tus ntiv tes ntxig lub
qhov ntsia hlau, thiab yog kuv tsis muab
kuv txhais tes rau ntawm nws phab tav,
mas kuv tsis ntseeg."
26 Yim hnub tom qab, cov thwj tim rov
nyob hauv tsev dua. Tos Mas kuj nrog
lawv nyob thiab. Cov qhov rooj puav leej
kaw tas. Yes Xus tawm los sawv hauv
nruab nrab, nws hais rau lawv tias :
"Nej nyob kaj lug !"
27 Ces Yes Xus hais rau Tos Mas tias :
"Cev koj ntiv tes rau ntawm no, koj ntsia
kuv ob txhais tes. Cev koj txhais tes los,
muab rau hauv kuv phab tav. Koj txhob
ua neeg tsis ntseeg ntxiv, koj ntseeg mog."
28 Tos Mas teb rau Yes Xus tias :
"Kuv tus Huab Tais, Kuv tus Tswv Ntuj."
29 Yes Xus hais rau Tos Mas tias :
"Vim koj pom kuv, mas koj thiaj ntseeg.
Cov uas tsis tau pom tab sis lawv ntseeg,
mas lawv txoj hmoov zoo."

Zaj nyeem 1 Hauj Lwm 2, 14.22-33
14 Pob Zeb nrog Pab Kaum Ib leeg sawv
ntsug, nws hais cov lus no nrov nrov tias :
"Cov Yus Das, thiab tas nej cov uas nyob
hauv Yes Lus Xas Les, nej yuav tsum
paub qhov no, nej tig ntsej los mloog kuv cov lus mog.
22 "Cov His Xas Lais, nej mloog cov lus
no mog : Yes Xus Nas Xas Les yog tus
uas Tswv Ntuj pom zoo kom nws ua hwj
huam yees ntxwv, ua cov dej num nto
moo, thiab ua ib co cim nyob hauv nej.
Yog Tswv Ntuj pub kom nws ua tau li
ntawd. 23 Tus neeg ntawd, luag muab
nws muag rau nej, raws nraim li Tswv
Ntuj tau teem tseg nyob hauv nws txoj
kev paub yav tom ntej. Nej kom cov neeg
tsis hwm txoj cai xuas lawv txhais tes
mus tua nws, thiab muab nws ntsia saum
ntoo cuam. 24 Tswv Ntuj tsa nws sawv
rov los, thiab npo nws ntawm txoj kev
mob hauv qhov tuag. Vim tias kev tuag
tsis muaj hwj huam tuav tau nws cia.
25 Das Vis twb hais txog nws tias :
Kuv pom Huab Tais nyob ntawm kuv xub ntiag
tsis tseg. Huab Tais nyob ntawm kuv sab
xis, kom kuv txhob qaij txhob qaug. 26
Yog vim li ntawd kuv lub plawv thiaj xyiv
fab hlo, kuv tus nplaig hom khaj. Kuv
cev nqaij muaj sia nyob hauv txoj kev tso
siab. 27 Vim koj yuav tsis tso kuv tus
plig pov tseg rau hauv ntuj txias teb tsaus,
koj yuav tsis cia koj tus Ntshiab lub cev
lwj. 28 Koj ua kom kuv paub cov kev
mus hauv txoj sia. Koj cia kuv pom koj
lub ntsej muag kom kuv xyiv fab.
29 Kwv tij sawv daws, kuv thov hais
meej rau nej txog tus yawg koob Das Vis
tias : nws tuag thiab nws mus zwm av
lawm. Nws lub ntxa tseem nyob rau peb
pom txog niaj hnub no. 30 Tiam sis Das
Vis yog ib tug yaj saub, mas nws paub
tias Tswv Ntuj twb cog lus rau nws yuav
cia nws ib tug xeeb ntxwv uas yog nws
cov roj ntsha zaum nws lub theej kiab.
31 Das Vis twb xub pom tias Leej Pleev
yuav sawv rov los, ces nws thiaj qhia
tias : Ntuj yuav tsis tso nws pov tseg rau
hauv tub tuag teb, thiab nws lub cev nqaij yuav tsis lwj.
32 Tus Yes Xus ntawd, Tswv Ntuj tsa
nws sawv rov los lawm. Peb ua taus tim
khawv. 33 Nyem no Tswv Ntuj sab xis
tsa Yes Xus nyob siab. Nws tau txais
Leej Ntuj Plig Ntshiab ntawm Leej Txiv,
vim Leej Txiv yeej tau cog lus li ntawd.
Yes Xus thiaj tso Leej Ntuj Plig los rau
sawv daws : yog qhov uas nej pom thiab nej hnov.




Zaj nyeem ob: 1 Pob Zeb 1,17-21
17 Tus tsis tsa leej twg cai, thiab nws
txiav txim rau nyias raws li nyias cov
hauj lwm, mas nej hu tus ntawd ua Txiv,
lub caij uas nej ua neeg thoj nam nyob yaj
ceeb no, nej yuav coj tus yam ntxwv hwm ntuj.
18 Nej paub tias, tus txhiv nej ntawm tus
yam ntxwv nej txais ntawm nej poj
yawm txwv koob los, mas nws tsis muab
nyiaj, tsis muab kub, los muab tej yam
txawj ploj los txhiv. 19 Tus nqi txhiv nej
yog ib co ntshav muaj nqi loj. Yog tus
yaj huv, tsis muaj chaw xyeej, tsis tsuas
ib tee, yog Leej Pleev cov ntshav.
20 Thaum Ntuj tsis tau tsim, teb tsis tau
raug, Tswv Ntuj twb xaiv Leej Pleev.
Thaum txog lub zwj ceeb kawg, Tswv
Ntuj tso Leej Pleev tawm los vim nej.
21 Yog nyob hauv Leej Pleev, mas nej
thiaj tau kev ntseeg txog Tswv Ntuj, uas
yog tus tsa Leej Pleev sawv hauv cov
tuag los, thiab tus muab hwj chim rau
Leej Pleev. Vim li ntawd, nej txoj kev
ntseg, thiab kev tso siab thiaj nyob hauv Tswv Ntuj.

Ntawv Moo Zoo: Lus Kas 24,13-35
Yes Xus nrog ob tug thwj tim mus Es Mas Ws tham.
13 Tib hnub ntawd, ob leeg hauv cov
thwj tim taug kev mus rau ib lub zos hu
ua Es Mas Ws, deb li rau caum ncuas kev
ntawm Yes Lus Xas Les. 14 Nkawd sib
tham txog txhua tsav yam xwm uas tau
tshwm sim tuaj. 15 Thaum nkawd piav
thiab sib tham txog tej ntawd, Yes Xus
caum tau nkawd, nws nrog nkawd mus
kev. 16 Tab sis nkawd qhov muag zeem
tsis tau Yes Xus. 17 Ces Yes Xus hais rau nkawd tias :
"Neb sib tham txog tej lus dab tsi taug kev ?"
Ces nkawd nres, nkawd ntsej muag
ntshaus tas. 18 Tus hu ua Khes Os Fas
qhib ncauj hlo hais tias :
"Tas cov neeg tuaj pem Yes Lus Xas Les,
ntshai koj tib leeg xwb thiaj tsis paub
txog qhov uas tau tshwm sim ob peb hnub no !"
19 Yes Xus hais rau nkawd tias :
"Muaj dab tsi ?"
Nkawd hais rau Yes Xus tias :
"Tej xwm uas hais txog Yes Xus Nas Xas
Les. Nws yog ib tug yaj saub ua tau tej
hauj lwm thiab hais tau tej lus muaj hwj
huam, nyob ntawm Tswv Ntuj thiab
tsoom pej xeem xub ntiag. 20 Tab sis
peb cov Thawj Leej Choj thiab peb cov
nom tswv ntes nws rau luag, kom luag
txiav lub txim tuag rau nws thiab muab
nws dai saum ntoo cuam.
21 Peb mas peb vam tias nws yog tus
yuav txhiv His Xas Lais. Tsis tag li
ntawd, tej xwm no tshwm sim tau peb
hnub, 22 ces ob peb tug poj niam uas
yog peb cov neeg, tseem ua rau peb poob
siab tas. Tag kis no, lawv sawv ntxov
mus tom ntxa, 23 lawv nrhiav tsis tau
nws lub cev. Lawv rov los hais rau peb
tias ib cov Tshiab tawm los rau lawv
pom. Cov Tshiab hais tias Yes Xus muaj
txoj sia nyob. 24 Cov nrog peb, ob peb
leeg kuj tau mus txog tom lub ntxa, lawv
pom txhua yam raws li cov poj niam hais,
tab sis lawv kuj tsis pom nws lub cev thiab."
25 Ces Yes Xus hais rau nkawd tias :
"Ua cas nej lub siab yuav ruam ua luaj,
thiab yuav ntseeg qeeb ua luaj txog tas
txhua yam uas cov Yaj Saub tau tshaj
los ! 26 Tej ntawd tsis yog txoj kev tsim
txom uas Leej Pleev yuav tsum raug tso,
nws mam li mus hauv nws lub koob meej lod ?"
27 Yes Xus txhais cov Ntawv uas sau
txog nws, txij Mais Xes los txog cov Yaj
Saub tas huv tib si rau nkawd.
28 Thaum lawv tuaj yuav txog lub zos
uas ob tug thwj tim mus, Yes Xus ua txuj
yuav mus ntxiv. 29 Tab sis nkawd
cheemYes Xus tias :
"Nrog wb nyob mas ! Yuav tsaus ntuj,
lub hnub twb yuav poob qho."
Yes Xus thiaj chaws mus hauv tsev, nws
nrog nkawd nyob. 30 Thaum nws nrog
nkawd zaum ntawm rooj mov, nws tuav
lub ncuav mov, nws hais zaj foom hmoov
zoo, nws muab lub ncuav mov ntais, nws cev rau nkawd.
31 Ces nkawd qhov muag qhib plho,
nkawd zeem tau Yes Xus... Tab sis Yes
Xus ploj ntais ntawm nkawd xub ntiag
lawm. 32 Ces nkawd rov sib tham tias :
"Thaum nws hais lus rau wb tom kev,
thiab nws txhais Ntawv rau wb, mas wb
lub siab kub lug hauv nrog cev, puas yog ?"
33 Ces nkawd sawv tsees tam sis ntawd,
rov mus Yes Lus Xas Les. Nkawd los
pom Pab Kaum Ib nrog lawv cov npawg
sib txoos ua ke. 34 Lawv hais tias :
"Huab Tais sawv rov los lawm tiag, nws
tawm los rau Xis Moos pom !"
35 Ces nkawd piav qhov uas tshwm tuaj
nyob tom kev, thiab piav tias Huab Tais
ua dab tsi, nkawd thiaj zeem tau nws
thaum nws ntais lub ncuav mov.

Zaj nyeem 1: Hauj Lwm 2, 14a.36-41
14 Pob Zeb nrog Pab Kaum Ib leeg sawv
ntsug, nws hais cov lus no nrov nrov tias :
"Cov Yus Das, thiab tas nej cov uas nyob
hauv Yes Lus Xas Les, nej yuav tsum paub qhov no.
36 "Tsoom His Xas Lais, nej yuav paub
meej tias : Tswv Ntuj tsa tus Yes Xus uas
nej tau dai saum ntoo cuam, ua Huab
Tais thiab ua Leej Pleev."

37 Cov lus ntawd raug sawv daws lub
siab. Ces lawv hais rau Pob Zeb thiab rau
cov Hauv Paus Xa Lus tias :
"Kwv tij, peb yuav ua dab tsi ?"
38 Pob Zeb teb rau lawv tias :
Nej yuav thov txhaum, thiab nej txhia leej
txhia tus yuav txais lub cim ntxuav nyob
hauv Yes Xus Pleev lub npe kom Ntuj
zam txhaum rau nej. Ces nej yuav txais
Leej Ntuj Plig Ntshiab cov paj tshab.
39 Vim thaum Ntuj cog lus, mas yog nws
cog lus yuav muab rau nej, thiab rau nej
cov me nyuam, rau cov neeg nyob deb,
thiab rau tsoom neeg coob coob uas Huab
Tais peb tus Tswv Ntuj yuav hu lawv los."
40 Pob Zeb tseem hais ntau lo lus qhuab
qhia thiab ntuas lawv. Nws hais tias :
"Nej khiav kom nej dim ntawm tiam neeg
xib rau kev phem no."
41 Cov neeg ntawd mloog Pob Zeb cov
lus, lawv txais lub cim ntxuav. Hnub
ntawd, muaj ze ntawm peb txhiab leej los
ntxiv cov thwj tim.




Zaj nyeem 2: 1 Pob Zeb 2,20b-25
Hos thaum yus ua zoo rau luag, tab sis yus tseem raug
luag hiam thiab, mas qhov ntawd yog ib
lub txiaj ntsim nyob ntawm Tswv Ntuj xub ntiag.

21 Ntuj hu nej kom nej ua li ntawd, vim
Leej Pleev kuj tau raug txom nyem los
pab nej : nws ua piv txwv rau nej taug.
22 Nws tsis tau ua txhaum li. Tsis muaj
ib lo lus nkhaus tawm hauv nws lub
ncauj los. 23 Luag cem nws, los nws tsis
cem luag ; nws raug txom nyem, los nws
tsis ua rau luag ntshai li. Nws tso siab rau
tus txiav txim raws txoj kev ncaj.
24 Nyob saum ntoo cuam, nws ris peb
cov txhaum, kom peb lub siab nyiam ua
txhaum tuag, ces peb thiaj muaj txoj sia
nyob hauv txoj kev ncaj. Nws cov qhov
txhab kho peb zoo hlo.
25 Yav thaud, nej yog ib co yaj poob
zoo, nyem no, nej tig rov los cuag tus
tswv zov yaj uas zov nej txoj sia.



NTAWV MOO ZOO: Zam 10, 1-10
Tus Zoo Tswv Zov Yaj.
1 "Kuv hais qhov muaj tseeb
tiag rau nej : Tus tsis nkag
ntawm qhov rooj mus hauv lub nkuaj yaj,
hos nws nce lwm qhov chaw mus rau
hauv, mas nws yog ib tug tub sab tuaj
nyiag thiab tuaj lwg. 2 Tus uas nkag
ntawm qhov rooj mus yog ib tug tswv zov
yaj. 3 Tus zov rooj loog qhib qhov rooj
rau nws, cov yaj mloog nws lub suab.
Nws hu nws cov yaj, nws tuav lawv ib
leeg zuj zus lub npe, nws coj lawv mus.
4 Thaum nws coj cov yaj tawm tas lawm,
nws mus ua ntej, cov yaj lawv nws qab,
vim lawv paub nws lub suab. 5 Cov yaj
yuav tsis mus raws lwm tus, lawv yuav
khiav ntawm lwm tus, vim lawv tsis paub
luag tej lub suab."
6 Yes Xus hais zaj paj lug no rau lawv,
tab sis lawv tsis paub tias nws hais txog dab tsi rau lawv.
7 Yes Xus rov qab hais tias :
"Kuv hais qhov muaj tseeb tiag rau nej
tias kuv yog cov yaj lub qhov rooj. 8 Tas
cov uas tuaj ua kuv ntej yog ib co tub sab
tuaj nyiag thiab tuaj lwg, tab sis cov yaj
kuj tsis mloog lawv. 9 Kuv yog lub qhov
rooj : tus twg nkag ntawm kuv mus, nws
yuav txais kev cawm, nws yuav nkag tau
rau hauv thiab tawm tau los, nws yuav
nrhiav tau lub tshav zaub. 10 Tus tub sab
tsuas tuaj nyiag, tuaj lwg, thiab tuaj txo
txoj sia xwb. Hos kuv, mas kuv tuaj ua
kom lawv tau txoj sia, thiab kom lawv tau
txoj sia loj zuj zus.

Zaj nyeem 1 Hauj Lwm 6,1-7
Lawv tsa ib co tub tsob hwb.
1 Lub caij ntawd, cov thwj tim
huam vam coob zuj zus. Ces cov
Hes Las yws yws cov Hes Nplaws. Lawv
hais tias niaj hnub thaum faib mov mas
tsis muaj neeg nco txog cov poj ntsuam
Hes Las. 2 Pab Kaum Ob hu cov thwj
tim tuaj sab laj, lawv hais tias :
"Tsis phim peb yuav tso Tswv Ntuj lo lus
tseg, mus saib cov rooj noj mov. 3 Kwv
tij, nej nrhiav nyob hauv nej, xya leej
txiv neej nto moo zoo, uas yog neeg
thoob tsib, thiab muaj Leej Ntuj Plig nyob
puv hauv lawv. Peb yuav tsa lawv tuav
txoj hauj lwm ntawd. 4 Hos peb, mas
peb yuav muab siab hlo npuab txoj kev
teev ntuj thiab tsob hwb Lo Lus.”
5 Cov lus no haum lub txoos siab, ces
lawv xaiv Tes Fas Nos, uas nws yog ib
tug neeg ntseeg ruaj, thiab muaj Leej Ntuj
Plig Ntshiab nyob puv hauv nws.
Fis Lis Pos, Plos Kos Los, Nis Kas Nos,
Tis Moos, Pas Mes Nas, thiab Nis Kos
Las uas yog ib tug neeg ntseeg nyob As
Nthias Kias tuaj. 6 Lawv coj cov neeg
no los rau cov Hauv Paus Xa Lus. Cov
Hauv Paus Xa Lus thov ntuj tas, ces lawv
tsa tes rau saum xya leej ntawd.
7 Huab Tais lo lus hlob zuj zus. Cov
thwj tim huam vam coob kawg nyob Yes
Lus Xas Les. Muaj ib co leej choj coob
kawg los mloog txoj kev ntseeg.





Zaj nyeem 2: 1Pob Zeb 2, 4-9
Kev ua leej choj raws txoj kev tshiab.
4 Nej kav tsij txav los ze Huab Tais mog,
nws yog lub pob zeb muaj txoj sia, uas
zeej tsoom muab pov tseg, tab sis Tswv
Ntuj xaiv nws, thiab saib nws muaj nqi
kawg. 5 Nej kuj zoo li ib co pob zeb
muaj sia, nej yeej meem rov sib txhim ua
ib lub Tuam Tsev muaj sia cia rau txoj
kev ua Leej Choj ntshiab, nej yuav cev ib
co txim muaj txoj sia rau Ntuj, kom xis
Tswv Ntuj lub siab, nyob hauv Yes Xus
Pleev. 6 Vim muaj lo lus no nyob Ntawv Ntshiab :
“Nej ntsia ! kuv txawb lub pob zeb muaj
nqis, uas kuv xaiv rau pem Xis Yoos, yog
lub pob zeb txheem tsev : leej twg tso siab
rau lub pob zeb ntawd, mas nws yuav tsis poob ntsej muag.”
7 Vim li ntawd, nej cov ntseeg yuav
muaj koob meej. Hos cov tsis ntseeg,
mas lub pob zeb uas yog lub txheem tsev
8 yuav ua chaw dawm lawv ko taw kom
lawv ntog, vim cov txhim tsev muab lub
pob zeb ntawd xyeeb pov tseg. Lawv
dawm lub pob zeb, vim lawv tsis ntseeg
txog Lo Lus. Lawv raug txoj hmoov ntawd.

9 Tab sis nej yog tsav neeg Ntuj xaiv,
yog tsoom Leej Choj ua vaj, yog haiv
neeg ntshiab, yog tsoom pej xeem Ntuj
txhiv, kom nej tau tshaj lus txog tus hu
nej ntawm qhov tsaus ntuj los nyob hauv
nws qhov pom kev zoo saib.

Zam 14,1-12
Txoj kev mus cuag Leej Txiv.
1 Nej tsis txhob ntxhov siab
mog. Nej ntseeg txog Tswv
Ntuj, nej ntseeg txog kuv thiab mog.
2 Nyob hauv kuv Txiv tsev, muaj ntau
chav. Yog tsis muaj, mas kuv yuav tsis
hais rau nej tias kuv mus npaj ib qho
chaw rau nej. 3 Thaum kuv mus npaj tau
ib qho chaw rau nej lawm, kuv yuav rov
los coj nej mus nyob ze kuv, kom xwv
kuv nyob qhov twg, nej nrog kuv nyob
qhov ntawd. 4 Nej paub txoj kev mus
txog qhov chaw kuv yuav mus.
5 Tos Mas hais rau Yes Xus tias : "Huab
Tais, peb tsis paub koj yuav mus qhov
twg. Peb yuav ua cas paub txoj kev ?"
6 Yes Xus hais rau Tos Mas tias :
"Kuv yog Txoj Kev, yog Qhov Tseeb,
thiab yog Txoj Sia. Tsis muaj leej twg
mus cuag Leej Txiv tau, yog nws tsis los
ntawm kuv. 7 Yog nej paub kuv, mas
nej kuj paub kuv Txiv thiab. Nyem no,
nej twb paub nws thiab twb pom nws lawm."

8 Fis Lis Pos hais rau Yes Xus tias :
"Huab Tais, koj pub peb pom Leej Txiv,
mas peb thiaj txaus siab."
9 Yes Xus hais rau Fis Lis Pos tias :
"Fis Lis Pos, kuv nrog nej nyob ntev
npaum no, koj tseem tsis paub kuv thiab
lod ? Tus twg pom kuv, mas nws pom
Leej Txiv. Ua cas koj thiaj hais tau tias :
'Koj pub peb pom Leej Txiv' ? 10 Koj
tsis ntseeg tias kuv nyob hauv Leej Txiv,
thiab Leej Txiv nyob hauv kuv lod ? Cov
lus uas kuv hais rau nej, tsis yog kuv hais
kuv ; yog Leej Txiv uas nyob txawm
hauv kuv nws ua nws cov hauj lwm.
11 Nej ntseeg kuv mog : kuv nyob hauv
Leej Txiv, thiab Leej Txiv nyob hauv
kuv. Txawm li cas, los nej yuav tsum
ntseeg, vim kuv cov hauj lwm.

12 "Kuv hais qhov muaj tseeb tiag rau
nej : Tus ntseeg txog kuv, nws kuj yuav
ua cov hauj lwm kuv ua. Nws tseem
yuav ua tej yam loj dua, vim kuv mus
cuag Leej Txiv.

Zaj nyeem 1 Hauj Lwm 8,5-8.14-17
Fis Lis Pos nyob Xas Mas Lias teb

5 Yog vim li ntawd, mas Fis Lis Pos thiaj li mus rau
nram ib lub nroog nyob Xas Mas Lias teb.
Nws tshaj lus txog Yes Xus nyob ntawd.
6 Tas tsoom sid koom siab koom ntsws
npuab cov lus uas Fis Lis Pos hais, vim
sawv daws hnov txog cov cim uas Fis Lis
Pos ua thiab pom nws ua. 7 Vim tias cov
neeg raug dab phem coob leej rov zoo
los : cov dab phem ntawd tawm hauv cov
neeg mus, dab qw tej suab nrov nrov.
Cov tuag ceg thiab cov ceg tawv coob leej
kuj cia li zoo hlo. 8 Nyob hauv lub nroog
ntawd, mas sawv daws zoo siab tas nrho.
14 Cov Hauv Paus Xa Lus nyob Yes Lus
Xas Les, lawv hnov tias Xas Mas Lias teb
txais Tswv Ntuj lo lus lawm, mas lawv xa
Pob Zeb thiab Zam nkawd mus Xas Mas
Lias teb. 15 Nkawd nqes mus nram cov
Xas Mas Lias, ces nkawd thov Ntuj rau
lawv kom Ntuj pub Leej Ntuj Plig rau
lawv. 16 Vim tias Leej Ntuj Plig tseem
tsis tau poob los rau saum leej twg li.
Lawv tsuas kawg tau txais lub cim ntxuav
nyob hauv Huab Tais Yes Xus lub npe
xwb. 17 Pob Zeb thiab Zam nkawd tsa
tes rau saum lawv, ces lawv thiaj tau txais
Leej Ntuj Plig Ntshiab.




Zaj nyeem 2 1Pob Zeb 3,15-18
Lub caij raug luag hiam.

15 Nej yuav hwm Huab Tais Pleev nyob hauv nej
nruab siab. Thaum luag nug nej saib yog
vim li cas nej tso siab rau Ntuj, mas nej
yuav npaj kom nej txawj teb mus li.
16 Nej yuav teb mos nyoos rau luag,
thiab yuav hwm luag. Nej ua li ntawd
kom cov neeg hais lus xaiv txog nej, pom
nej tus cwj pwm zoo nyob hauv Leej
Pleev, ces lawv yuav poob ntsej muag.
17 Yog Tswv Ntuj pom zoo cia yus raug
txom nyem vim yus ua ncaj, mas qhov
ntawd zoo dua yus raug txom nyem vim yus ua phem.
18 Leej Pleev tuag ib zaug, vim peb cov
txhaum. Nws yog tus siab ncaj uas tuag
mus cawm cov neeg tsis ncaj, vim nws
xav coj peb rov los rau Tswv Ntuj. Luag
tua nws lub cev nqaij tuag lawm, tab sis
nws rov muaj txoj sia nyob hauv lub tswv yim

Zam 14,15-21
Yes Xus yuav xa Leej Nplij Neeg los.

. 15 "Yog nej nyiam kuv, mas nej yuav coj
rawv kuv cov lus qhia. 16 Kuv yuav
thov Leej Txiv, ces nws yuav xa dua ib
leeg Nplij neeg los nrog nej nyob mus li.
17 Tus ntawd yog Leej Ntuj Plig qhia
qhov tseeb. Lub qab ntuj neeg txais tsis
tau nws, vim qab ntuj neeg tsis pom nws
thiab tsis paub nws. Hos nej, mas nej
paub nws, vim nws tsa tsev nyob ze nej,
thiab nws yuav los nyob hauv nej."
18 "Kuv yuav tsis cia nej ua ntsuag.
Kuv los cuag nej. 19 Tshuav me ntsis
ces lub qab ntuj neeg yuav tsis pom kuv
ntxiv. Tab sis nej yuav pom kuv, vim kuv
muaj txoj sia nyob, nej kuj yuav muaj txoj
sia nyob thiab. 20 Hnub ntawd, nej yuav
paub tias kuv nyob hauv kuv Txiv, nej
nyob hauv kuv, thiab kuv nyob hauv nej.
21 Tus muaj kuv cov lus qhia, thiab nws
coj rawv kuv cov lus qhia, nws thiaj yog
tus nyiam kuv. Tus nyiam kuv, mas kuv
Txiv yuav nyiam nws, kuv kuj yuav
nyiam nws thiab, kuv yuav muab kuv rau nws pom."

COV ZAJ NYEEM HNUB TIM 18/5/2023

HUAB TAIS YES XUS MUS SAUM NTUJ.

Muaj ntau lub zos los ntau lub tev chaws muab hnub Huab Tais
Yes Xus mus saum Ntuj no ncua mus rau hnub Chiv 7 Caij Hla




Zaj nyeem ib Hauj Lwm 1,1-11
Yes Xus nrog cov thwj tim tham zaum kawg

1 Tes Os Fis Los, nyob hauv kuv
thawj phau ntawv, kuv twb sau txog
tas ib puas tsav yam uas Yes Xus tau ua
thiab tau qhia txij lub hauv paus los, 2
mus txog hnub uas Ntuj nqa nws mus
saum ntuj. Thaum nws yuav mus, Leej
Ntuj Plig Ntshiab tshoj kom nws xub qhia
cov Hauv Paus Xa Lus uas nws tau xaiv.
3 Thaum nws raug luag tsim txom tas,
nws yees tawm los xyuas cov Hauv Paus
Xa Lus. Nws ua ntau yam zeem tseeb tias
nws muaj txoj sia, nws tawm los rau lawv
pom plaub caug hnub, nws tham txog
Tswv Ntuj lub Ceeb Tsheej rau lawv.
4 Thaum Yes Xus nrog lawv nyob, nws
hais rau lawv kom tsis txhob tawm hauv
Yes Lus Xas Les mus, kom lawv nyob tos
Leej Txiv lo lus cog tseg :
"Lo lus uas nej hnov kuv hais tias :
5 Zam ua kab ke ntxuav nyob hauv dej.
Hos nej, mas tshuav hnub puav xwb, nej
yuav txais kab ke ntxuav nyob hauv Leej Ntuj Plig Ntshiab."
6 Thaum cov Hauv Paus Xa Lus nyob ua
ke, lawv nug Yes Xus tias :
"Huab Tais, nyem no puas yog lub sij
hawm koj yuav rov tsa tus vaj His Xas Lais ?"
7 Yes Xus hais rau lawv tias :
"Tsis yog nej hauj lwm yuav paub txog
lub zim txwv thiab lub sij hawm uas Leej
Txiv siv nws lub hwj huam los teem cia.
8 Tab sis, Leej Ntuj Plig Ntshiab yuav
nqes los saum nej, ces nej yuav txais hwj
huam, nej yuav ua kuv cov tim khawv
nyob Yes Lus Xas Les, nyob thoob lub
xeev Yus Das, thiab Xas Mas Lias, mus
txog puag tim npoo ntiaj teb."
9 Yes Xus hais cov lus no tas, nws nce
zuj zus ntawm lawv qhov muag. Muaj ib
tw huab los thaiv ces lawv tsis pom nws
lawm. 10 Thaum Yes Xus nce mus saum
ub lawm, mas lawv nyob ntsia ntsoov lub
ntuj, ces muaj ob tug neeg hnav tsoos
dawb los cuag lawv. 11 Nkawd hais tias :
"Cov Nkas Lis Lais, vim li cas nej nyob
ntsia ntsoov lub ntuj zoo li no ? Tus Yes
Xus uas Ntuj nqa nws hauv nej mus rau
saum ntuj lawd, nws yuav rov los zoo
nkaus li nej pom nws nce mus saum ntuj thiab."




Zaj nyeem 2 Es Fes Xos 1,17-23
Yes Xus yog tus yeej, yog tus nyobsiab dua lub sim ceeb.

17 Kuv thov kom peb tus
Huab Tais Yes Xus Pleev tus Tswv Ntuj,
Leej Txiv muaj koob meej, pub ib lub
tswv yim thoob tsib, thiab ib lub tswv
yim txawj mem tau tej yam uas Ntuj qhib
tawm los, nej thiaj yuav paub Tswv Ntuj
tiag. 18 Kuv thov Tswv Ntuj tso qhov
pom kev ci tuaj rau hauv nej lub siab,
kom nej pom tias txoj kev tso siab uas
Ntuj hu nej los nyob hauv, zoo npaum li
cas, kom nej pom tias lub cuab tam nto
koob meej nplua nuj npaum li cas nyob
hauv cov ntshiab. 19 Nej tseem yuav
pom Tswv Ntuj lub hwj huam uas peb
ntsuas tsis tau. Nej thiaj yuav pom tias lub
hwj huam no pab peb cov ntseeg heev
npaum li cas, vim nws lub zog muaj peev xwm loj.
20 Tswv Ntuj nthuav nws lub zog nyob
hauv Leej Pleev : nws tsa Leej Pleev
sawv hauv cov tuag los, nws kom Leej
Pleev zaum ntawm nws sab xis, nyob
saum cov txheej ntuj, 21 nyob siab dua
cov Tshiab ua vaj, siab dua cov Tshiab
muaj hwj huam, siab dua cov Tshiab
muaj zog, siab dua cov Tshiab ua huab
tais, siab dua txhua leej nto npe, hauv lub
zim txwv no mus dhau txhiab tiam yav tom ntej.
22 Tswv Ntuj tso tas puas tsav yam rau
hauv Leej Pleev qab xib taws. Tswv Ntuj
tsa Leej Pleev ua lub Koom Txoos tus
Hau siab dua txhua leej : 23 lub Koom
Txoos yog nws lub Cev. Leej Pleev lub
Cev Hlob Tiav, nws nyob puv hauv txhua
leej txhua tus, nws nyob puv lub sim ceeb.

Mas Tais 28,16-20
Yes Xus xa cov thwj tim kom musthoob ntiaj teb

16 Pab Kaum Ib leeg mus txog Nkas Lis
Lais teb. Lawv mus saum lub roob uas
Yes Xus teem rau lawv. 17 Lawv pom
Yes Xus, lawv pe ; ib txhia tseem ua
xyem xyav. 18 Yes Xus txav los ze
lawv, nws hais cov lus no rau lawv :
"Ntuj pub ib puas tsav yam hwj huam rau
kuv nyob saum ntuj thiab nyob ntiaj teb
no. 19 Nej mus, nej ua kom tas ib tsoom
haiv neeg los ua kuv thwj tim. Nej hu
txog Leej Txiv, Leej Tub thiab Leej Ntuj
Plig Ntshiab lub npe, nej ntxuav lawv.
20 Nej qhia kom lawv coj tas puas tsav
yam uas kuv qhia rau nej. Hos kuv, mas
kuv niaj hnub nrog nej nyob mus txog lub
zim txwv ntiaj teb kawg.

Zaj nyeem 1: Hauj Lwm 1,12-14
Cov thwj tim nyob saum chav tsev siab

12 Cov thwj tim nqes pem lub roob uas
hu ua "Txiv Ntoo Roj" rov mus rau Yes
Lus Xas Les. Lub roob ntawd nyob ze
ntawm Yes Lus Xas Les li ntu kev uas
hnub Xas Npas Tos kheev mus.
13 Thaum lawv rov los txog, lawv nce
mus saum chav tsev siab uas yog lawv
qhov chaw nyob : muaj Pob Zeb thiab Zam,
Yas Kos thiab As Nres,
Fis Lis Pos thiab Tos Mas,
Npas Tos Los Mas Yos thiab Mas Tais,
Yas Kos uas yog As Fas Yos tus tub,
thiab Xis Moos Siab Kub,
Yus Das uas yog Yas Kos tus tub.
14 Tas lawv cov no sawv daws koom ib lub siab, lawv kub siab teev ntuj. Muaj
ob peb tug poj niam nrog lawv thiab.
Nyob hauv cov poj niam ntawd, muaj
Mab Liab uas yog Yes Xus niam, thiab
muaj Yes Xus cov kwv tij.




Zaj nyeem ob 1Pob Zeb 4,13-16
Rov hais txog kev raug luag hiam.

13 Nej nrog Leej Pleev raug txom
nyem npaum li cas, nej yuav zoo siab
npaum li ntawd thiab, ces thaum nws lub
hwj chim yuav tawm los rau pom xyeem,
mas nej yuav tau nyob hauv txoj kev kaj
siab lug, nej yuav lom zem. 14 Yog nej
raug luag tsawm, vim Leej Pleev lub npe,
mas nej txoj hmoov zoo, vim Leej Ntuj
Plig muaj hwj chim, uas yog Tswv Ntuj
Leej Tswv Yim tuaj roos nej.
15 Nej yuav tsis txhob muaj ib tug uas
nws raug tsim txom vim nws tua neeg, los
nws ua tub sab, los ua phem rau luag, los
nws mus kom luag. 16 Hos yog nej ib
tug raug tsim txom vim nws yog ib tug
Pleev, mas nws tsis txhob txaj muag :
nws yuav cav txog Tswv Ntuj, vim Tswv
Ntuj pub lub npe ‘Pleev’ rau nws.

Zam 17,1b-11a
Yes Xus yog tus Leej Choj thov Leej
Txiv rau cov thwj tim.

1b.
"Txiv, txog sij hawm lawm ! Koj ua kom
koj Leej Tub muaj koob meej mas. Ces
koj Leej Tub yuav ua kom koj muaj koob
meej, 2 vim koj muab hwj huam rau nws
kav tas txhua leej txhua tus, kom nws pub
txoj sia nyob mus li rau txhua leej uas koj
muab rau nws. 3 Txoj sia nyob mus li
yog zoo li no : kom lawv paub koj, uas
yog tus tseem Tswv Ntuj, thiab paub Yes
Xus Pleev uas yog tus koj xa tuaj. 4 Kuv
ua kom koj muaj koob meej nyob ntiaj
teb no, vim tias cov hauj lwm uas koj
muab rau kuv ua, mas kuv ua tiav lawm.
5 Txiv, nyem no koj ua kom kuv muaj
koob meej nyob ntawm koj xub ntiag,
yog lub koob meej uas kuv muaj txawm
rau ntawm koj xub ntiag thaum lub sim
ceeb tsis tau xeeb los nyob.

6 "Cov neeg koj rho hauv lub qab ntuj
los pub rau kuv, mas kuv ua kom lawv
pom xyeem koj lub Npe. Cov neeg no
yog koj tug, koj muab lawv pub rau kuv,
ces lawv coj rawv koj lo lus. 7 Nyem no
lawv paub tias tas txhua yam uas koj
muab rau kuv yog tuaj ntawm koj tuaj.
8 Vim tias cov lus uas koj muab rau kuv,
mas kuv muab pub rau lawv lawm. Lawv
txais koj cov lus, ces lawv paub tseeb tias
kuv tuaj ntawm koj tuaj, thiab lawv
ntseeg tias yog koj xa kuv tuaj. 9 Kuv
thov koj rau lawv. Kuv tsis thov koj rau
lub qab ntuj neeg, kuv thov koj rau cov
uas koj muab pub rau kuv, vim lawv yog
koj tug. 10 Txhua yam uas yog kuv tug,
kuj yog koj tug ; txhua yam uas yog koj
tug, kuj yog kuv tug thiab. Kuv muaj
koob meej nyob hauv lawv.
11 Kuv tsis nyob hauv lub qab ntuj no
ntxiv lawm, tab sis lawv tseem nyob hauv
lub qab ntuj no.

Zaj nyeem ib Hauj Lwm 2,1-11
Leej Tswv Ntuj Plig nqes los

1 Thaum txog lub Hnub Nyoog
Tsib Caug, tas cov thwj tim huv tib
si tuaj sib txoos ua ke. 2 Ib sij huam,
txawm muaj ib lub suab nrov saum ntuj
tuaj xws li ib nthwv cua hlob hlob ntsawj,
lub suab ntawd nrov thoob plaws lub tsev
uas lawv nyob. 3 Ces lawv pom tej
ntshua nplaim zoo li nplaim taws, ncau ua
tej tus nplaim me ya tuaj tsaws saum cov
thwj tim txhua tus. 4 Lawv sawv daws
tau txais Leej Ntuj Plig Ntshiab puv hauv
lawv, ces lawv pib hais ntau xeem lus
raws li Leej Ntuj Plig pub kom lawv hais tau.
5 Thaum ntawd, muaj ib co Yus Das kub
siab ntseeg tuaj ntawm tas cov teb chaws
hauv lub qab ntuj khwb tuaj nyob Yes
Lus Xas Les. 6 Thaum lawv hnov lub
suab nrov, tas ib tsoom neeg tuaj ntsauv
vij vog. Sawv daws ua siab poob nthav
vim tias thaum cov thwj tim hais lus, mas
lawv nyias hnov hais nyias xeem lus.
7 Lawv ceeb tas nrho, xav tsis thoob,ces lawv hais tias :
"Tas cov neeg uas hais lus ntawd, lawv
tsis yog ib co Nkas Lis Lais lod ? 8 Ua
li cas peb thiaj nyias hnov lawv hais nyias xeem lus ?
9 Peb yog ib co neeg Pas Tos, Mes Dias, Es Las Mias,
peb nyob Mes Xos Pos Tas Mias tuaj, Yus Das, Kas
Pas Dos, Poos Tus, As Xias, 10 Fis Zias,
Pas Fis Lias, nyob Hais Nkws Tos thiab
Lis Npias teb chaws uas ze Xis Les Nas,
peb yog neeg Los Mas tuaj nyob ntawm no.
11 Peb yog ib co Yus Das thiab ib co teev dab txais kev ntseeg,
ib co Khes Tas, As Las Npias, peb puav leej hnov lawv
hais peb xeem lus cav txog Tswv Ntuj lub hwj chim."





Zaj nyeem ob 1Kos Lis Nthos 12,3b-7.12-13
Cov txiaj ntsim Ntuj pub rau neeg lub tswv yim.

3 Leej Ntuj Plig tsis qhib ib tug qhov ncauj
Kom tus ntawd hais tau tias Yes Xus yog ib tug phem
Thiab thaum ib tug hais tias Yes Xus yog Huab Tais
Mas yog Leej Ntuj Plig qhia nws, nws thiaj hais tau li ntawd
4 Ntuj pub ntau yam txiaj ntsim, tiam sis
yog tuaj ntawm Leej Plig tib leeg
tuaj xwb. 5 Muaj ntau txoj kab xwm, tab
sis yog tuaj ntawm tib tug Huab Tais tuaj.
6 Muaj ntau txoj hauj lwm, tab sis yog
tib tug Tswv Ntuj ua cov hauj lwm ntawd
nyob hauv txhua leej tib neeg.
7 Ntuj pub Leej Ntuj Plig rau peb kom
peb pab tau tsoom sid.
12 Ib yam li neeg lub cev : neeg muaj tib
lub cev xwb : tab sis muaj tes, muaj taw,
muaj ntau yam : txhua yam yog lub cev,
txawm tias muaj ntau ces, los yeej yog tib
lub cev xwb. Nyob hauv Leej Pleev kuj
zoo li ntawd. 13 Vim tias peb sawv daws
tau txais lub Cim Ntxuav nyob hauv Leej
Ntuj Plig tib leeg, thiab nyob hauv tib lub
cev xwb. Tsis hais cov Yus Das los cov
Hes Las, cov qhev los cov twj lij, peb
sawv daws puav leej tau haus txaus siab
ntawm Leej Ntuj Plig tib leeg.

Zam 20,19-23
Yes Xus tawm los rau cov thwj tim pom thaum Tos Mas tsis nyob.

19 Tib hnub ntawd thaum tsaus ntuj, uas
yog thawj hnub pib lub lis piam, cov
qhov rooj hauv qhov chaw cov thwj tim
nyob kaw tas, vim lawv ntshai cov Yus
Das. Yes Xus los sawv hauv nruab nrab,
nws hais rau lawv tias : "Nej nyob kaj lug."
20 Thaum Yes Xus hais lo lus ntawd tas,
nws muab nws ob txhais tes thiab nws
phab tav rau lawv saib. Cov thwj tim
pom Huab Tais, lawv zoo siab kawg.
21 Yes Xus rov hais rau lawv tias :
"Nej nyob kaj lug ! Kuv xa nej mus xws li Leej Txiv xa kuv tuaj."
22 Yes Xus hais li tas, nws tshuab pa rau
lawv, nws hais rau lawv tias : "Nej txais Leej Ntuj Plig Ntshiab.
23 Nej daws txhaum rau leej twg, mas nws cov txhaum yuav daws.
Nej tsis daws leej twg cov txhaum, mas nws cov
txhaum yuav nyob."

Zaj nyeem ib: Txoj Cai Ob 8,2-3+14-15
Tswv Ntuj sim neeg siab.

Zaj nyeem ib no thiab cov ntsiab lus yog muab los ntawm phau ntawv:
cov zaj nyeem hauv cov txoos teev ntuj hnub chiv

Lub ntsiab lus: Lub Cim Yug yog cov mov pab hla lub ntiaj teb,
Pab tiv tas puas tsav yam xwv txheej.

2 His Xais Lais koj nco ntsoov txog txoj kev
uas HUAB TAIS koj tus Tswv
Ntuj kom koj taug tau plaub caug xyoo
nyob hauv teb chaws suab puam. Vim
nws xav cob qhia koj kom ua neeg me,
nws xav sim koj thiab xav paub koj lub
siab kom thoob ; nws xav paub saib koj
puas coj nraim nws cov lus qhia los tsis coj.
3 Nws tau cia koj poob ntsej muag, tau
cia koj tshaib plab, nws tau muab mov
Mas Nas rau koj noj, ib co mov uas koj
thiab koj cov yawg koob tsis tau pom dua li.
Nws ua li ntawd qhia kom koj paub
tias neeg tsis kawg yuav noj mov los yug
nws txoj sia xwb, neeg tseem yuav tsum
txais tas puas tsav yam uas tawm ntawm
HUAB TAIS lub ncauj los yug nws txoj sia thiab
14 Li ntawd mas koj yuav nco ntsoov tias
Huab Tais Tswv Ntuj tau coj tawm hauv Hais Nkws Tos teb los
Tawm hauv teb chaws ua qhev los
15 Nws coj koj mus hla lub teb chaws suab puam dav thiab txaus ntshai.
Yog lub teb chaws muaj cov nab thiab cov laum kib tshooj.
Yog lub teb chaws tshaib dej.
Nyob hauv lub teb chaws qhuav qhawv tsis muaj dej,
Yog Tswv Ntuj ua kom dej txhawv los rau nej haus,
Ua kom dej txhawv saum lub pob tsuas tawv los.





Zaj nyeem ob: 1 Kos Lis Nthos 10,16-17

Lub ntsiab lus: Lub Cim Yug yog lub cim tshaj tias peb cov neeg ntseeg
Koom siab koom ntsws nyob hauv Yes Xus.

16 Lub ntim foom hmoov, uas peb cav
txog, tsis ua kom peb koom siab nyob
hauv Leej Pleev cov ntshav lod ? Cov
mov uas peb muab ntais, tsis ua kom peb
koom siab nyob hauv Leej Pleev lub cev lod ?
17 Muaj tib lub ncuav mov xwb,
peb sawv daws koom ua ib lub cev xwb.
Peb sawv daws koom ua ib lub cev, vim
peb sawv daws txais tib lub ncuav mov.  


Zam 6,51-58
Cov mov pub txoj sia yog Yes Xus.

Lub ntsiab lus: Lub Cim Yug pub txoj sia rau peb.Yog vim peb niaj hnub tuaj txais lub Cim Yug
peb thiaj nyob ruaj nreb hauv kev ntseeg.

51 Kuv yog cov mov muaj txoj sia nqes saum ntuj los.
Leej twg noj cov mov no, nws yuav ciaj nyob mus li.
Cov mov uas kuv yuav muab pub rau lub qab ntuj neeg noj
kom lawv muaj txoj sia, yog kuv lub cev nqaij."
52 Ces cov Yus Das sib cav zom zaws tias :
"Tus neeg ntawd yuav ua li cas muab tau
nws cev nqaij los rau peb noj ?"
53 Yes Xus thiaj hais rau lawv tias :
"Kuv hais qhov tseeb tiag rau nej : Yog
nej tsis noj Neeg Leej Tub lub cev nqaij
thiab tsis haus nws cov ntshav, mas nej
yuav tsis muaj txoj sia nyob hauv nej.
54 Hos tus noj kuv lub cev nqaij thiab
haus kuv cov ntshav, nws muaj txoj sia
nyob mus li. Hnub kawg, kuv yuav tsa
nws sawv rov qab los. 55 Vim kuv lub
cev nqaij yog ib co tseem txhiam xws noj,
thiab kuv cov ntshav yog ib yam zoo haus.
56 Tus noj kuv cev nqaij thiab haus kuv cov ntshav,
nws nyob hauv kuv thiab kuv nyob hauv nws.
57 Leej Txiv uas nws muaj txoj sia, nws xa kuv tuaj,
ces kuv muaj txoj sia vim Leej Txiv.
Li ntawd, tus noj kuv, nws kuj yuav muaj txoj sia, vim kuv.
58 Cov mov nqes saum ntuj los yog zoo li ntawd.
Cov mov no tsis zoo li cov uas cov yawg koob tau
noj, tab sis lawv tuag tas lawm.
Hos tus noj cov mov no, mas nws yuav ciaj nyob mus li."

Zaj nyeem 1 Kev Tsiv 19,2-6a.
2 Lawv sawv kev Les Fis Dis los, lawv
los txog lub hav suab puam Xis Nais, ces
lawv tsa tsev nyob hauv lub hav suab
puam, cov His Xas Lais tsa tsev ncaj
ntawm lub roob Xis Nais sab tid.

3 Ces Mais Xes nce mus ntsib Tswv Ntuj
saum lub roob. HUAB TAIS hu saum
roob tuaj rau Mais Xes tias :
"Koj yuav hais li no rau Yas Kos tsev
neeg, koj yuav tshaj rau cov His Xas Lais
tias : 4 Nej tau pom ntawm nej qhov
muag tias kuv tau ua li cas rau cov Hais
Nkws Tos, thiab kuv tau coj nej tawm
xws li yog ya saum dav ob phab tis, kuv
tau coj nej los cuag kuv. 5 Txij no mus,
yog nej mloog kuv lus thiab nej khaws
nraim kuv lo lus kuv cog rau nej, mas kuv
yuav saib nej yog kuv tug nyob hauv tas
txhua haiv neeg, vim lub ntiaj teb yog kuv
li tas huv si. 6 Kuv yuav saib nej yog ib
haiv neeg ua leej choj thiab yog ib haiv
neeg qee rau Ntuj.



Zaj nyeem 2. 5,6-11.
6 Vim li ntawd, lub sij hawm peb tsis
muaj zog, thaum txog lub hnub nyoog
teem, Leej Pleev thiaj raug luag tua kom
tau pab cov neeg tsis hwm Ntuj. 7 Yus
yuav luag tsis kam tuag kom tau pab ib
tug neeg ncaj ; nyaj tej zaus yus yuav
muaj peev xwm tuag kom tau pab ib tug
neeg siab zoo. 8 Yam uas zeem tseeb
tias Tswv Ntuj nyiam peb yog qhov tias
thaum peb tseem yog neeg txhaum, Leej
Pleev tuag kom tau pab peb.
9 Nyem no peb twb ncaj tuaj nyob hauv
Leej Pleev cov roj ntsha lawm, mas nws
haj yam yuav cawm peb ntawm kev npau
taws. 10 Thaum peb tseem ua yeeb
ncuab rau Tswv Ntuj, nws Leej Tub kev
tuag ua kom peb nrog Tswv Ntuj rov sib
haum xeeb ; nyem no peb nrog Tswv Ntuj
rov sib haum xeeb lawm, mas Tswv Ntuj
Leej Tub txoj sia haj yam cawm peb.
11 Peb qhuas tau tias tam sim no, peb tau
kev rov sib haum xeeb nyob hauv Tswv
Ntuj, vim peb tus Huab Tais Yes Xus Pleev.


Ntawv Moo Zoo: Mas Tais 9, 36-10,8.
36 Yes Xus pom tsoom pej xeem, nws hlub lawv, vim
lawv sawv daws sab thiab qaug zog zoo li
ib co yaj tsis muaj tsw zov. 37 Yes Xus
thiaj hais rau nws cov thwj tim tias :
"Qoob loo ntau kawg, tab sis cov tub zog
tsawg. 38 Nej thov tus Tswv qoob kom
nws xa ib co tub zog tuaj sau nws cov qoob."
10.
1 Yes Xus hu nws kaum ob leeg
thwj tim los cuag nws. Nws muab
hwj huam kom lawv ntiab tau dab tawm,
thiab kho tau tej txiab xeeb thiab tej mob
nkeeg kom thim.
2 Kaum ob leeg Hauv Paus Xa Lus muaj npe li no :
3 thawj tug, yog Xis Moos uas sawv
daws hu nws ua Pob Zeb,
As Nres, Xis Moos tus kwv,
Yas Kos, yog Ntxes Npes Dais tus tub,

Zam, Yas Kos tus kwv, Fis Lis Pos,
thiab Npas Tos Los Mas Yos,Tos Mas,
thiab Mas Tais, tus sau se.
Yas Kos, uas yog As Fas Yos tub, Thas Dais Yos,
4 Xis Moos, tus Ntxes Los,
Yus Das Kas Lis Yaus, tus muab Yes Xus
muag rau luag.
5 Yes Xus xa kaum ob leeg no mus tshaj
lub Moo Zoo, nws qhia lawv tias :
“Nej tsis txhob mus cuag cov neeg teev
dab, txhob mus hauv ib lub nroog Xas
Mas Lias li. 6 Nej xub mus cuag cov yaj
ploj hauv haiv His Xas Lais. 7 Thaum
nej mus kev, nej ceeb toom tias Ntuj lub
Ceeb Tsheej tuaj txog ze lawm. 8 Nej
kho cov mob kom zoo, nej tsa cov tuag
kom ciaj rov los, nej kho cov mob ruas
kom huv, nej ntiab dab kom khiav. Nej
tau txais dawb, nej rov pub dawb.

COV ZAJ NYEEM HNUB CHIV TIM 25/06//2023

Chiv 12 Nruab Xyoo A

Zaj nyeem 1: Yes Les Mias 20,10-13
10 Kuv hnov ntau leej hais tej yam ntais
ntuj txog kuv tias :
"Peb kav tsij tso hem thawj rau nws tsis
tseg mas ! Peb mus kom nws rau cov nom !"
Cov uas thaud lawv yog kuv cov phooj
ywg, lawv nyas saib kuv puas yuav ntog. Lawv hais tias :
"Nyaj tej zaus, nws yuav mloog cov neeg
ntxias. Ces peb yuav yeej nws, peb yuav tau kev rob caub."
11 Tab sis HUAB TAIS tsa kuv cai,
HUAB TAIS yog zoo li ib tug peeb zeej
zog nchav. Kuv cov yeeb ncuab yuav
ntog, lawv yuav tsis yeej. Lawv yuav nco
ntsoov ib txhiab ib txhis txog hnub lawv poob ntsej muag.
12 HUAB TAIS, koj yog tus kav tsoom
tub rog, koj tsom tau tus neeg siab ncaj,
koj pom nyob hauv neeg nruab siab. Kuv
vam tias kuv yuav pom koj rob caub rau
lawv, vim kuv tso kuv rooj plaub rau hauv koj tes.
13 Nej hu nkauj rau HUAB TAIS, nej
cav lus zoo txog HUAB TAIS, vim nws
npo tus neeg pluag tus plig ntawm cov
neeg phem txhais tes los.




Zaj nyeem 2: Los Mas 5,12-15

12 His Xais hais tias :
‘Yes Xes tus xeeb ntxwv yuav tawm tuaj.
Nws yuav sawv los kav tas ib tsoom haiv
neeg. Txhua haiv neeg yuav tso siab rau nws.’
13 Kuv thov tus Huab Tais pub kev tso
siab, kom nws muab kev zoo siab nyob
hauv txoj kev ntseeg, kuv thov kom nws
pub lub siab kaj lug rau nej, ces nej yuav
muaj chaw tso siab loj, vim Leej Ntuj Plig
Ntshiab lub zog tuaj nres nej.
14 Kuv cov kwv tij, nyob hauv kuv
nruab siab kuv paub tseeb tias nej lub siab
xav ua tej yam zoo xwb, nej muaj lub
txiaj ntsim sib qhuab sib qhia, nej txawj sib ntuas.
15 Tsis kav kuv tseem muaj cuab kav sau
tej yam ntxhib me ntsis rau nej, yog vim
kuv xav kom nej rov nco tej ntawd meej.

Mas Tais 10, 26-33
Txhob ntshai, tab meeg hais.
26 "Nej txhob ntshai luag hem ! Vim tsis
muaj ib yam npog rawv uas yuav tsis
qhib tawm, tsis muaj ib yam zais ntshis
uas yuav tsis tawm los rau sawv daws
paub. 27 Tej yam uas kuv hais rau nej
hauv qhov tsaus ntuj, nej yuav hais tawm
nruab hnub nrig. Hos yam nej hnov ntxhi
rau hauv nej pob ntseg, mas nej yuav nce
mus tshaj saum ruv tsev.
28 "Nej txhob ntshai cov neeg tua nej lub
cev, tab sis lawv tua tsis tau nej tus plig.
Nej yuav ntshai tus muaj peev xwm rhuav
nej lub cev thiab tus plig hauv hav hluav taws.
29 Ob tug noog tsig txhuv, luag tsuas
muag tau ib npib xwb. Tsis kav, tsis muaj
ib tug poob hauv av tau, yog nej Txiv tsis
tso lus. 30 Nej kuj ib yam li ntawd, tab
yog nej cov plaub hau, nej Txiv yeej suav
tas huv si lawm. 31 Nej tsis txhob ntshai
dab tsi mog, nej muaj nqis tshaj tej pab
tsig txhuv coob coob ua ke.
32 "Leej twg lees rau sawv daws tias nws
paub kuv, mas kuv kuj lees rau kuv Txiv
nyob saum Ntuj tias kuv paub nws. 33
Hos tus tsis lees rau sawv daws tias nws
paub kuv, kuv kuj yuav tsis lees rau kuv
Txiv nyob saum ntuj tias kuv paub nws.

ZAJ NYEEM HNUB CHIV TIM 02/07/2023
Chiv 13 Nruab Xyoo A

Zaj nyeem 1: 2 Vaj 4 : 8 - 11 + 14 - 16.
Tus poj niam nyob Xws Nes xeeb tub.
8 Muaj ib hnub, Es Lis Xais mus so
nyob Xws Nes. Muaj ib tug poj niam
nyob txawm ntawd tuaj hu Es Lis Xais
mus noj mov. Txij hnub ntawd los,
thaum twg Es Lis Xais hla lub zos ntawd
mas nws mus so noj mov hauv tus poj
niam ntawd lub tsev.
9 Tus poj niam hais rau nws tus txiv tias :
"Koj ntsia saib, tam li kuv xav mas tus
niaj zaus tuaj so hauv wb tsev, nws yeej
yog Tswv Ntuj ib tug neeg siab ntshiab
xwb. 10 Cia wb ua ib kem tsev me me
nyob saum ru tsev rau nws tau so. Wb
muab ib lub txaj, ib lub rooj ua hauj lwm,
ib lub rooj zaum thiab ib lub teeb rau
hauv kem tsev ntawd. Thaum twg nws
tuaj ces cia nws so nyob hauv kem tsev ntawd."
11 Muaj ib hnub, Es Lis Xais rov tuaj so
ntawd, nws thiaj mus pw nyob saum kem tsev siab.
14 Es Lis Xais pom tus poj niam ua zoo
rau nws, nws tso nws tus tub txib mus
nug tus poj niam Xws Nes tias :
"Kuv yuav pab dab tsi rau koj ?"
Tus tub txib Zes Has Xis coj tus poj niam
lo lus teb los hais tias :
"Nws tsis muaj tub ki, thiab nws tus txiv twb laus lawm."
15 Es Lis Xais hais tias :
"Koj mus hu nws los saib !"
Tus tub txib mus hu tus poj niam los sawv ntawm qhov rooj.
Es Lis Xais hais rau nws tias :
"Lwm xyoo rov txog lub caij no mas koj
yuav tau ib tug tub los puag."
Tus poj niam teb tias :
"Tswv Ntuj tus neeg, koj txhob tso dag
rau koj tus ntxhais txib mas !"
16 Xyoo ntawd tus poj niam xeeb tub,
rov txog lub caij uas Es Lis Xais hais mas
nws yug tau ib tug tub.

ZNQ: (88 (89), 2-3, 16-17, 18-19)

Zaj nyeem 2: Los Mas 6, 3-4. 8-11
3 Peb cov uas tau txais lub Cim
Ntxuav nyob hauv Yes Xus Pleev, mas
yog peb txais lub Cim Ntxuav nyob hauv
Yes Xus txoj kev tuag. 4 Thaum peb
txais lub Cim Ntxuav peb nrog Yes Xus
tuag, peb nrog nws mus hauv nws lub ntxa.
8 Tab sis, yog peb nrog Leej Pleev tuag
mas peb ntseeg tias peb yuav nrog nws
muaj txoj sia. 9 Peb paub tias Leej Pleev
sawv hauv qhov tuag los lawm, nws yuav
tsis rov tuag dua, txoj kev tuag tsis muaj
cuab kav tuaj raug nws ib zaug ntxiv.
10 Nws tuag ib zaug kom txoj kev
txhaum tuag. Nyem no, nws ciaj rov los
nws npuab Tswv Ntuj mus li.
11 Nej, mas nej kuj zoo li ntawd thiab :
nej yuav saib tias nej tus neeg txhaum
tuag lawm, tshuav nej tus neeg tshiab
npuab Tswv Ntuj uas muaj txoj sia nyob
hauv Huab Tais Yes Xus Pleev mus li.

Mas Tais: 10,37-42
37 "Tus nyiam nws niam nws txiv dua
kuv, nws tsis tsim nyog nrog kuv. Tus
nyiam nws tej tub tej ntxhais dua kuv, mas
nws tsis tsim nyog nrog kuv.
38 Tus tsis kwv nws tus ntoo cuam thiab
tsis raws kuv qab, mas nws tsis tsim nyog
nrog kuv. 39 Tus nrhiav nws txoj sia,
nws ua nws txoj sia ploj, hos tus ua nws
txoj sia ploj vim kuv, mas nws nrhiav tau
nws txoj sia lawm.
40 "Tus txais nej, mas yog nws kuj txais
kuv. Tus txais kuv, mas yog nws txais
Tus xa kuv tuaj. 41 Tus txais ib tug yaj
saub, vim tus ntawd yog yaj saub, nws
yuav txais koob haum phim tus yaj saub.
Tus txais ib tug neeg ncaj, vim tus ntawd
yog neeg ncaj, mas nws yuav txais koob
haum phim tus neeg ncaj.
42 "Kuv hais tseeb rau nej, leej twg pub
dej rau ib tug neeg me me no haus, vim
tus no yog ib tug thwj tim, tab yog ib khob
dej txiag xwb, tsis kav, nws yuav tau txais koob haum."

COV ZAJ NYEEM HNUB TIM 09/07//2023
Chiv 14 Nruab Xyoos, Xyoo A

Zaj nyeem ib Ntxas Kas Lias 9,9-10
Lub ntsiab lus: Yes Xus yog tus tuaj ua kom lub ntiaj teb nyob hauv txoj kev thaj yeeb.
Cov neeg ntseeg kuj yuav tshaj txoj kev thaj yeeb ntawd nyob ntiaj teb no.

9 Tsoom pej xeem nyob Xis Yoos, nej ua tej pab lom zem hom khaj mas !
Tsoom pej xeem nyob Yes Lus Xas Les, nej qw tej suab zoo siab mas !
Nej ntsia saib nej tus Vaj tuaj txog nej lawm.
Nws yog tus ua ncaj thiab yeej tsoom yeeb ncuab.
Nws tsis muab hlob, nws caij ib tug me nyuam luj.
10 Nws yuav rhuav cov Es Fais lawv tej tsheb rog.
Nws yuav rhuav cov Yes Lus Xas Les lawv tej tsheb ua rog.
Rab hneev ua rog,nws yuav tsis pub muaj ntxiv.
Nws yuav ceeb toom kev thaj yeeb rau txhia haiv neeg.
Nws yuav kav teb chaws txij ib lub hiav txwv mus txog rau lwm lub.
Txij tus niam dej mus txog npoo ntiaj teb kawg.

ZNQ. ( 144 (145), 1-2, 8-9, 10-11, 13cd-14)

Zaj nyeem ob Los Mas 8,9+11-13
Lub ntsiab lus: Peb niaj hnub tiv peb lub siab tsis zoo:
peb kaj tsij ua siab loj mloog Leej Tswv Yim Ntshiab mus txog hnub kawg.

9 Ntawm nej, mas nej tsis zwm rau lub cev, nej zwm rau lub tswv yim, vim Tswv
Ntuj Leej Tswv Yim nyob txawm hauv nej. Tus twg tsis muaj Leej Pleev lub
tswv yim nyob hauv nws mas nws tsis yog Leej Pleev tug.
11 Yog tus tau tsa Yes Xus tuag sawv rov los, nws lub tswv yim
nyob txawm hauv nej, mas nws yuav pub txoj sia rau nej lub cev tuag,
vim Leej Ntuj Plig nyob txawm hauv nej.
12 Kuv cov kwv tij, yog li ntawd mas peb tshuav luag nuj nqis,
tab sis peb tsis tshuav lub cev nuj nqis. Tsis tas peb yuav ua neej mloog lub cev.
13 Yog nej ua neej mloog lub cev mas nej yuav tuag.
Tab sis yog nej cia Leej Ntuj Plig muab lub cev cov hauj lwm tua pov tseg,
mas nej yuav muaj txoj sia.

Mas Tais 11,25-30
Qhib lub Moo Zoo rau cov me
neeg. Leej Txiv thiab Leej Tub.

Hnub no lub Koom Txoos rov muab Mas Tais 11,25-30 uas peb nyuam qhuav nyeem hnub hwm Yes Xus lub Siab Ntshiab rau peb nyeem dua,
Thiab lub Koom Txoos muab lub ntsiab lus ib nyuag txawv me ntsis los cev rau peb kom pab peb to taub tias nyob hauv txhua zaj nyeem yeej muaj ntau los lus los yog ntau lub ntsiab lus pab peb coj peb lub neej.

Lub ntsiab lus: Yes Xus hu cov neeg me, cov neeg tsis muaj,los ua nws cov thwj tim.
Nws qhia Leej Txiv cov txuj rau lawv paub. Nws pub Leej Txiv lub zog rau lawv txais.

25 Lub caij ntawd, Yes Xus hais tias :
"Txiv, kuv cav lus zoo txog koj, Huab
Tais kav lub ntuj lub teb, vim koj zais tej
yam ntawd rau cov neeg thoob tsib thiab
cov neeg ntse, koj ho qhib rau cov me nyuam yaus.
26 Muaj tseeb tiag, Txiv, koj lub siab nyiam li ntawd.
27 Kuv Txiv muab tas ib puas tsav yam rau kuv.
Tsis muaj leej twg paub Leej Tub, tsuas kawg Leej Txiv thiaj paub.
Kuj tsis muaj leej twg paub Leej Txiv, tsuas kawg Leej Tub thiaj paub,
thiab tus uas Leej Tub pom zoo qhia rau kom paub.
28 "Tas nej sawv daws uas nej khwv, thiab ris nra hnyav,
nej tuaj cuag kuv mog ! Kuv yuav cia nej so los siav.
29 Nej txais kuv tus quab. Nej kawm ntawm kuv mog,
vim kuv siab zoo, kuv tsis muab hlob, nej tus plig yuav nrhiav tau chaw so los siav.
30 Vim kuv tus quab kwv yooj yim, thiab kuv lub nra sib.

COV ZAJ NYEEM HNUB TIM 16/07//2023
Chiv 15 Nruab Xyoos

Zaj nyeem ib His Xais 55,10-11
Huab Tais zaj tswv yim txawv neeg zaj tswv yim.
Lub ntsiab lus: Tswv Ntuj lo lus ua hauj lwm nyob hauv neeg lub siab.
Yog vim peb ntseeg qhov ntawd mas peb thiaj zoo siab tshaj Ntuj lus rau tsoom sid.

10 Cov nag, cov daus uas poob saum ntuj
los, yog lawv tsis tau pub dej rau ntiaj teb
haus, mas lawv tsis rov mus saum ntuj.
Cov nag thiab cov daus ua kom cov noob
lwj thiab nthaw kaus, ua kom lub ntiaj teb
txi txiv rau tus tseb, pub mov rau neeg
noj, ces cov nag mam rov mus lawm saum ntuj.
11 Cov lus tawm ntawm kuv lub ncauj
los kuj zoo li ntawd thiab. Nws tsis tau
ua hauj lwm, mas nws tsis rov los cuag
kuv. Kuv lo lus tsis tau leg qhov kuv xav,
mas nws tsis rov los cuag kuv. Kuv lo lus
tsis tau ua tiav qhov kuv xa nws mus ua,
mas nws tsis rov los cuag kuv."

ZNQ: (64 (65), 10abcd, 10e-11, 12-13, 14)

Zaj nyeem ob Los Mas 8,18-22
Peb yuav txais Tswv Ntuj lub hwj chim
Lub ntsiab lus: Peb pom lub ntiaj teb raug txom nyem thiab zwm rau kev tuag,
tab sis peb tso siab tias kev txom nyem kev tuag ntawd yog txoj kev yug lub ntuj lub teb tshiab.

18 Kuv pom tias txoj kev txom nyem
uas peb ris lub caij no, yuav muab los piv
tsis tau rau lub hwj chim uas yuav tawm
tuaj rau luag pom xyeem nyob hauv peb.
19 Tas puas tsav yam uas Ntuj tsim los
tos ntshis txog lub caij Tswv Ntuj cov me
nyuam yuav tawm los rau sawv daws pom xyeem.
20 Tas puas tsav yam Ntuj tsim los puav leej zwm rau kev cuav :
tsis yog vim lawv txhob txwm xav zwm rau cuav ;
yog vim muaj ib tug coj lawv mus zwm rau kev cuav.
21 Tas puas tsav yam Ntuj tsim los, tso siab tias lawv kuj
yuav dim ntawm txoj kev ua qhev thiab txoj kev ploj :
lawv tso siab tias lawv yuav tau kev twj lij mus hauv
Tswv Ntuj tsoom tub ki lub hwj chim.
22 Peb paub tias, los txog tav no, tas puas tsav yam ntuj tsim los
ntsaj xws li ib tug poj niam daws cev.
23 Tsis yog tas puas tsav yam ntsaj xwb ; tab txawm peb
twb tau txais Leej Ntuj Plig cov txiaj ntsim los ua peb tug,
tsis kav peb tseem ntsaj nyob hauv nruab siab thiab,
vim peb tos lub caij txhiv peb lub cev

Mas Tais 13,1-23
Yes Xus zaum hauv nkoj qhia sawv daws.
Lub ntsiab lus: Ntuj lo lus uas cov tub tshaj Ntuj lus cev rau tsoom sid yog zoo li cov noob nplej uas luag tseb, qee zaum nws tsis txi txiv, qee zaum nws txi txiv zoo

1 Muaj ib hnub, Yes Xus tawm hauv tsev mus zaum ntawm ntug dej ntuj.
2 Tej pab neeg coob tuaj ntsauv nws, ces nws nce mus zaum hauv ib lub nkoj,
hos tas tsoom neeg nyob ntawm ntug dej.
3 Yes Xus ua paj lug qhia lawv txog ntau yam. Yes Xus hais li no :
"Tus tseb nplej tawm mus tseb.
4 Thaum nws tseb, muaj ib co noob poob
ntawm ntug kev, noog ya tuaj noj tas huv si lawm.
5 Ib co noob poob rau hauv cov av pob zeb, nyob ntawd
muaj av ntau, ces noob tuaj kaus sai, vim av tsis tob
6 Thaum hnub tuaj, tshav ziab, cov yub nkig,
vim tsis muaj cag ces cov yub qhuav tas.
7 Tseem muaj ib co noob poob hauv cov pos. Pos hlob tuaj laum cov yub.
8 Hos muaj ib co noob poob rau hauv thaj av zoo,
cov noob ntawd txhawv hnab, tej lub noob txi ib puas lub,
tej lub txi rau caum lub, tej lub txi peb caug lub. poob saum ntuj
los, yog lawv tsis tau pub dej rau ntiaj teb
haus, mas lawv tsis rov mus saum ntuj.
Cov nag thiab cov daus ua kom cov noob
lwj thiab nthaw kaus, ua kom lub ntiaj teb
txi txiv rau tus tseb, pub mov rau neeg
noj, ces cov nag mam rov mus lawm saum ntuj.
11 Cov lus tawm ntawm kuv lub ncauj
los kuj zoo li ntawd thiab. Nws tsis tau
ua hauj lwm, mas nws tsis rov los cuag
kuv. Kuv lo lus tsis tau leg qhov kuv xav,
mas nws tsis rov los cuag kuv. Kuv lo lus
tsis tau ua tiav qhov kuv xa nws mus ua,
mas nws tsis rov los cuag kuv."

ZNQ: (64 (65), 10abcd, 10e-11, 12-13, 14)

Zaj nyeem ob Los Mas 8,18-22
Peb yuav txais Tswv Ntuj lub hwj chim
Lub ntsiab lus: Peb pom lub ntiaj teb raug txom nyem thiab zwm rau kev tuag,
tab sis peb tso siab tias kev txom nyem kev tuag ntawd yog txoj kev yug lub ntuj lub teb tshiab.

18 Kuv pom tias txoj kev txom nyem
uas peb ris lub caij no, yuav muab los piv
tsis tau rau lub hwj chim uas yuav tawm
tuaj rau luag pom xyeem nyob hauv peb.
19 Tas puas tsav yam uas Ntuj tsim los
tos ntshis txog lub caij Tswv Ntuj cov me
nyuam yuav tawm los rau sawv daws pom xyeem.
20 Tas puas tsav yam Ntuj tsim los puav leej zwm rau kev cuav :
tsis yog vim lawv txhob txwm xav zwm rau cuav ;
yog vim muaj ib tug coj lawv mus zwm rau kev cuav.
21 Tas puas tsav yam Ntuj tsim los, tso siab tias lawv kuj
yuav dim ntawm txoj kev ua qhev thiab txoj kev ploj :
lawv tso siab tias lawv yuav tau kev twj lij mus hauv
Tswv Ntuj tsoom tub ki lub hwj chim.
22 Peb paub tias, los txog tav no, tas puas tsav yam ntuj tsim los
ntsaj xws li ib tug poj niam daws cev.
23 Tsis yog tas puas tsav yam ntsaj xwb ; tab txawm peb
twb tau txais Leej Ntuj Plig cov txiaj ntsim los ua peb tug,
tsis kav peb tseem ntsaj nyob hauv nruab siab thiab,
vim peb tos lub caij txhiv peb lub cev

Mas Tais 13,1-23
Yes Xus zaum hauv nkoj qhia sawv daws.
Lub ntsiab lus: Ntuj lo lus uas cov tub tshaj Ntuj lus cev rau tsoom sid yog zoo li cov noob nplej uas luag tseb, qee zaum nws tsis txi txiv, qee zaum nws txi txiv zoo

1 Muaj ib hnub, Yes Xus tawm hauv tsev mus zaum ntawm ntug dej ntuj.
2 Tej pab neeg coob tuaj ntsauv nws, ces nws nce mus zaum hauv ib lub nkoj,
hos tas tsoom neeg nyob ntawm ntug dej.
3 Yes Xus ua paj lug qhia lawv txog ntau yam. Yes Xus hais li no :
"Tus tseb nplej tawm mus tseb.
4 Thaum nws tseb, muaj ib co noob poob
ntawm ntug kev, noog ya tuaj noj tas huv si lawm.
5 Ib co noob poob rau hauv cov av pob zeb, nyob ntawd
muaj av ntau, ces noob tuaj kaus sai, vim av tsis tob
6 Thaum hnub tuaj, tshav ziab, cov yub nkig,
vim tsis muaj cag ces cov yub qhuav tas.
7 Tseem muaj ib co noob poob hauv cov pos. Pos hlob tuaj laum cov yub.
8 Hos muaj ib co noob poob rau hauv thaj av zoo,
cov noob ntawd txhawv hnab, tej lub noob txi ib puas lub,
tej lub txi rau caum lub, tej lub txi peb caug lub.
9 Leej twg muaj pob ntseg, cia nws mloog."
10 Cov thwj tim txav los ze Yes Xus, lawv hais rau nws tias :
"Vim li cas koj ua paj lug hais rau lawv ?"
11 Yes Xus teb rau lawv tias :
"Vim Ntuj pub kom nej paub tej yam tob
hauv Ntuj lub Ceeb Tsheej, tab sis Ntuj
tsis tau pub rau cov ntawd.
12 Tus uas twb muaj lawm, mas Ntuj yuav pub
rau nws kom nws muaj ntau tshaj.
Hos ntawm tus tsis muaj, ces Ntuj tseem yuav
thau qhov nws muaj tawm mus.
13 Vim li ntawd, kuv thiaj ua paj lug hais rau lawv :
tias lawv ntsia, los lawv tsis pom, lawv mloog,
los lawv tsis hnov, thiab tsis to taub.
14 Li ntawd, thiaj muaj raws li cov lus uas Yaj Saub
His Xais xub hais tseg tias : Nej pob ntseg hnov,
los nej yuav tsis to taub ; nej ntsia, tab sis nej yuav tsis pom.
15 Yog vim haiv neeg no lub siab qhwv lawm :
lawv pos pob ntseg, lawv qi qhov muag,
lawv ntshai tsam lawv qhov muag pom,
tsam lawv pob ntseg hnov, ces lawv lub siab to taub.
tsam lawv yuav tsum hloov siab, thiab kuv yuav kho tau lawv zoo
16 Hos nej, mas nej qhov muag tau txoj hmoov zoo,
vim nej qhov muag pom kev. Nej pob ntseg tau txoj hmoov zoo,
vim nej pob ntseg hnov lus.
17 Kuv hais tseeb rau nej, cov yaj saub thiab cov neeg siab
ncaj thaud coob leej ntshaw pom yam uas
nej pom, tab sis lawv tsis tau pom, ntshaw
hnov yam uas nej hnov, tab sis lawv tsis tau hnov !
18 Nej mloog zaj paj lug hais txog tus tseb nplej lub ntsiab.
19 Tus neeg uas tau hnov Lo Lus qhia txog Ntuj lub Ceeb Tsheej,
nws tsis to taub, tus Phem tuaj txog, nws txeeb
yam uas Ntuj tseb hauv tus ntawd lub siab :
tus ntawd yog tus txais cov noob poob ntawm ntug kev.
20 Cov noob poob rau hauv cov av pob zeb,
yog tus neeg uas thaum nws hnov Ntuj Lo Lus, nws zoo siab txais.
21 Tab sis nws tsis muaj cag nyob hauv nws,
vim nws yog neeg tsis ruaj : thaum muaj kev
txom nyem, los muaj kev raug luag hiam
vim Lo Lus, ces nws ntog tam sis ntawd.
22 Cov noob uas poob rau hauv cov pos,
yog tus uas hnov Lo Lus, tab sis ntiaj teb
kev txob xeeb, nyiaj txiag tej kev ntxias
laum Lo Lus, ces Lo Lus txi tsis taus txiv.
23 Cov noob uas poob rau hauv cov av zoo,
tus uas hnov Lo Lus, nws to taub Lo Lus ntawd, ces nws txi txiv.
Ib tug txi ib puas lub, ib tug txi rau caum lub, hos lwm tus txi peb caug lub.

]size=24]

Cov zaj nyeem Hnoob Chiv 23.07.2023
Nruab Xyoo A [/size]

Zaj nyeem ib Thoob Tsib 12,13+16-19

Lub ntsiab lus: Tswv Ntuj lub peev xwm loj kawg.
Tab sis nws siab zoo, nws tsis yuam neeg.
Nws nyiam zam rau sawv daws, nyiam pab sawv daws tig los yuav lub siab tshiab.

13 Tswv Ntuj,
Tsis muaj lwm tus yuav saib xyuas txhia leej txhua tus li koj,
Tas sawv daws pom tias koj txiav txim ncaj.
16 Yog vim koj lub peev xwm loj koj thiaj yog tus siab ncaj.
Yog vim koj ua Vaj kav tas txhia leej koj thiaj hlub sawv daws tau.
17 Yog muaj tej tus neeg tsis ntseeg koj lub peev xwm loj
Mas koj muab tau koj lub zog rau lawv pom.
Yog muaj neeg muaj cuab kav hla koj mas koj qhau lawv.
18 Tiam sis koj txawj cheem koj lub zog, koj txiav txim tsis hnyav rau peb.
Koj kav peb, tiam sis koj tsis tswj peb nruj.
Tsuas yog koj xav ua yam twg mas koj lub peev xwm ua tau.
19 Yog vim koj ua li ntawd mas koj thiaj tau qhia koj haiv neeg tias
Tus siab ncaj nws yuav hlub zeej tsoom tib si.
Koj cov tub ki thiaj tso siab tias tab yog peb ua txhaum lawm
Mas koj tseem txawj pab peb tig los yuav lub siab tshiab.

(ZNQ 85 (86), 5-6, 9ab.10, 15-16ab)

Zaj nyeem ob Los Mas 8,26-27
Peb ua Tswv Ntuj me nyuam vim Leej Ntuj Plig.

Lub ntsiab lus: Thaum peb ntsia lub ntiaj teb neeg peb tsis to taub tias
Tswv Ntuj coj lub ntiaj teb neeg zoo li cas mus rau qhov twg.
Tab sis peb tsos siab tias Leej Ntuj Plig pab peb thov tej yam haum Tswv Ntuj siab.

26 Leej Ntuj Plig tuaj nres peb cov neeg
tsis muaj zog. Peb tsis paub thov dab tsi
kom peb txoj kev teev Ntuj ntxim Tswv Ntuj siab.
Tab sis Leej Ntuj Plig sawv peb chaw thov Ntuj rau peb :
nws hais cov lus uas neeg piav tsis tau.
27 Tus Tswv Ntuj uas tsom hauv neeg nruab siab,
nws paub tias Leej Ntuj Plig xav kom tau dab tsi :
vim li no, Leej Ntuj Plig sawv cov ntshiab chaw thov Ntuj
raws nraim li Tswv Ntuj lub siab xav.