COV ZAJ NYEEM - Xyoo B 2011-12 )

**NrhiavTswvNtuj** 25th November 2011, 8:18 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°1

COV ZAJ NYEEM - Xyoo B 2011-12 )

Post NrhiavTswvNtuj 25th November 2011, 8:18 pm

( Hnub Chiv 1 Tos Huab Tais - Xyoo B )

COV ZAJ NYEEM - Xyoo B 2011-12 ) 20111112

Zaj nyeem 1 : Tsab Ntawv His Xais 63, 16b-17.19b ; 64, 2b-7
Thov kom Tswv Ntuj rov hlub nws haiv neeg.

16 HUAB TAIS, koj yog peb
txiv. Has Nplas Has tsis paub
peb lawm. His Xas Lais zeem tsis tau
peb. HUAB TAIS, tus ua peb txiv yog
koj. Txij txheej thaud los, koj lub npe hu
ua "Tus txhiv peb."
17 HUAB TAIS, yog vim li cas koj thiaj
ua kom peb poob zoo nyob deb ntawm
koj txoj kev ? Yog vim li cas koj thiaj ua
kom peb lub siab tawv thiab tsis xav hwm
koj ? Thov koj rov los mas, vim koj cov
tub txib thiab cov xeem neeg ua koj lub cuab tam.
19 Tau ntev los lawm peb yog cov neeg
uas koj tsis tswj, peb yog cov neeg tsis
tuav koj lub npe hu txog koj.
Ab ! Kheev lam koj nqes los, mas cov
roob yuav muaj dej ntws ua ntshua niab.
3 Tsis muaj ib lub pob ntseg tau
hnov, tsis muaj ib lub qhov muag
tau pom lwm tus Tswv Ntuj ua zoo
npaum li koj rau cov neeg tso siab rau
koj. Koj mus cuag cov neeg, mus taug
kev ncaj thiab nco nraim koj tej kev.
Saib, koj tau npau taws, peb tau ua
txhaum. Tau ntev los peb tsis npuab koj.
5 Peb sawv daws tau ua zoo li tus neeg
tsis huv. Peb tej num zoo li ib co khaub
ncaws tsuas. Peb sawv daws ntsws xws li
cov nplooj ziab tshav. Peb cov txhaum
ntsawj peb xws li cua.
6 Tsis muaj leej twg hu txog koj lub npe,
tsis muaj leej twg tsim dheev los nyob
khov kho hauv koj. Vim koj muab koj lub
ntsej muag zais, koj tso peb zwm rau peb cov txhaum.
7 Tsis kav, HUAB TAIS koj yog peb
txiv. Peb yog av luaj, koj yog tus puab
peb. Yog koj txhais tes puab peb sawv daws.
8 HUAB TAIS, koj txhob npau taws
heev dhau. Koj txhob nco txog peb cov
txhaum mus li. Thov koj ntsia mas ! Peb
sawv daws yog koj haiv neeg.

Zaj nyeem 2 : 1 Kos Lis Nthos 1, 3-9 COV LUS QHIB NTAWV

3 Thov kom peb Txiv Tswv Ntuj thiab
Huab Tais Yes Xus Pleev pub txiaj ntsim
thiab kev thaj yeeb rau nej.
4 Kuv ua Tswv Ntuj tsaug tsis tseg, vim
lub txiaj ntsim uas Tswv Ntuj tau pub rau
nej, nyob hauv Yes Xus Pleev. 5 Vim
nej nplua nuj nyob hauv Yes Xus : nej tau
Lo Lus muaj nqe li nyiaj, nej tau zaj txuj
ci muaj nqe li kub, 6 vim li ntawd, nej
tej hauj lwm ua Leej Pleev tim khawv
muaj zog tuaj. 7 Tsis tshuav ib lub txiaj
ntsim uas nej tsis tau txais, thaum nej tos
peb tus Huab Tais Yes Xus Pleev yuav
tawm los rau pom xyeem. 8 Nws yuav
ua kom nej nyob ruaj nreb txog qhov
kawg, kom hnub uas peb tus Huab Tais
Yes Xus Pleev rov los txog, mas tsis muaj
ib qho xyeej nyob hauv nej. 9 Tswv Ntuj
yog tus pheej xeeb : yog nws hu nej kom
los nrog nws Leej Tub, peb tus Huab Tais
Yes Xus Pleev koom ib txog hmoov

Mas Kos Ntawv Moo Zoo 13, 33-37,
Yuav zov hmo tos

33 Nej ceev faj, nej zov hmo, vim nej tsis
paub tias thaum twg thiaj yog lub sij
hawm. 34 Zoo li ib tug neeg tawm rooj
mus deb : Nws tso nws vaj tse cia, nws
muab cai rau cov tub txib, nws faib ib
leeg ib txog hauj lwm. Nws kom tus zov
qhov rooj zov hmo. 35 Nej zov hmo
mog, vim nej tsis paub thaum twg tus
tswv tsev yuav rov los, puas yog thaum
tsaus ntuj, los thaum ib tag hmo, thaum
qaib qua los thaum kaj ntug. 36 Tsam
nws los txog thaum nej tsis nco faj, nws
pom nej tsaug zog. 37 Qhov kuv hais rau
nej no, kuv kuj hais rau tas sawv daws
huv si : "Nej zov hmo mog !"

COV ZAJ NYEEM - Xyoo B 2011-12 ) Z4ed0910

Rau hnub tim 27 lub 11 hli 2011

Tsoom ntseeg thiab phooj ywg mloog Tswv Ntuj lus,

Hnub no, tas nrho lub Koom Txoos Kav Tos Liv thoob ntiaj teb pib dua lub xyoo teev ntuj tshiab, xyoo 2, lub caij tos Huab Tais Yes Xus Hmoov Tsuj Xeeb. Vim li ntawd, peb yuav hais tsis tag cov ntsiab lus zov hmo peb hnov hnub no. Peb tsuas nthuav 3 lub ntsiab lus raws li nram no : Tej yam tsis phim thiab tsis yog kev zov hmo ; txoj kev zov hmo raws li Yes Xus qhia ; peb txoj dej num zov hmo zim txwv no.

1-Tej yam tsis phim thiab tsis yog kev zov hmo. Txoj kev zov hmo, tsis zoo li hmoob nkauj tso tshav nraug tso nras nthuav kwv txhiaj lus taum nyob laug niaj ; kuj tsis yog noj xob yem laug nyoog tos xyoo tshiab sib huas dej ntshiab. Txoj kev zov hmo hauv peb kev ntseeg Tswv Ntuj yog hloov siab coj neej tshiab lawv peb tus Huab Tais Yes Xus qab. Peb twb paub, dua li ntawm Tswv Ntuj, tsis muaj lwm tus dab thiab lwm tus huab tais twg muaj hwj huam tshaj Tswv Ntuj. Yus los taug txoj kev ua neeg ntseeg Tswv Ntuj, cav tsis muaj twg yuam, yus yeem yus. Yus los teev Tswv Ntuj lawm, txiav meej tsis coj lub qub siab, txhob cia kev ntshaw lub neej qhov noj qhov hnav, tej nyiaj txiag lom yus qaug quav raws tib neeg ntiaj teb. Tsis tas li ntawd, txhob cia lub neej txhawj xeeb, kev mob kev ntsaj, kev ploj kev tuag auv sis niab yus tej niag ntshua siab : “Kuv hais rau nej tias : Nej txhob txhawj nej txoj sia, qhov noj thiab nej lub cev yuav hnav. Nej txoj sia tsis loj tshaj txhiam xws, lub cev tshaj tej tsoos hnav lod ?…27 Nej leej twg kev txhawj puas rub tau nws txoj sia kom ntev ib tshim ntxiv MT 6,25-27” Peb twb ntseeg Tswv Ntuj yog tsis mloog Yes Xus lus, peb tsis zov hmo, peb pauv tsis ntxiv tus tub sab los tus neeg teev dab qhuas. Yog peb tseem txhawj qhov noj qhov haus npaum lawv, peb kuj yuav zoo li lawv, txawm peb twb noj tsis tag haus tsis nqig los tseem siab hlob xav kom muaj ntau dua ntxiv tsis kum peb yees. Tseem muaj lwm yam kev ntshaw yuav laum peb ntxiv. Peb yuav nrog luag sib txeeb ua nom ua tswv. Txoj kev ua nom kuj yuav rub peb mus haub, mus dag, ntxias peb yuam kev ntawm Tswv Ntuj. Vim lub ncauj hais tias tus nom thiab tus pej xeem muaj cai sib luag. Tiam sis, tus ua nom, yeej muaj cai dua tej pej xeem huab hwm. Vim qhov tsam rau nom, nws twb yuav kheej ; qhov yuav ua rau nom poob peev, nws faib ua nuj ua se rau sawv daws them. Vim li ntawd, peb tus neeg teev Yes Xus dej num zov hmo tsis yog ua tej yam zoo li no.

2-Txoj kev zov hmo raws li Yes Xus qhia. Muaj ntau zaus, Yes Xus hais txog phau ntawv Cog Qub Lus (Ancien Testament) hauv nws kev qhuab qhia : Hauv Paus, Kev Tsiv, Txoj Cais Ob, Nkauj Ntxuag Qeej, Paj Lug...puav leej hais txog His Xais Lais tej poj yawm txwv koob Npas Npis Los tus txhooj tus cai, kev teev hawm, tej txuj ci, kwv huam. Npas Npis Los thiab Hais Nkws Tos yog tej teb chaws xub vam meej ntev niaj ntau tiam txheej puag thaum ub lawm. Luag tsim muaj txhooj muaj cai kav teb chaws. Thaum ze xyoo 1750 ua Yes Xus ntej, vaj ntxwv Hammurabi nyob Npas Npis Los tau tsa ib tug ncej zeb dub, muaj 1 puag siab 2,50 m, txaug tau 282 tug txhooj tswj hwm tsoom pej xeem:
-129.Yog ib tug poj niam muaj txiv tab tom deev hluas luag ntes tau, nkawd ob leeg yuav raug khi pov hauv dej ; tiam sis, tus txiv muaj cai zam rau nws poj niam tam zoj vaj ntxwv zam rau nws tus qhev.
-137.Yog ib tug txiv neej nrauj nws poj niam…nws yuav tsum thim nws poj niam nqe mis nqe hno (Tus nqe poj niam tas dawb)…Tus poj niam xav mus ua dua neej ywj siab.
-145.Yog ib tug txiv neej tus poj niam tsis muaj taus me nyuam, nws mus yuav niam yau ; nws coj los tau hauv tsev, tiam sis niam yau cai tsis luaj niam loj cai.
-196.Yog ib leej twg ua lwm tug neeg qhov muag dig, nws lub yuav tsum dig.
-201.Yog ib leej twg ua tus neeg dim kev ciaj qhev hniav lov, nws yuav tsum them ib feem peb kub rau tus ntawd.
Ntev xyoo tom qab, thaum Mai Xes coj His Xais Laws hla hav suab puam, nws kuj sau Huab Tais 10 lo lus qhia ua txhooj tseg. Yog peb mloog phau Ntawv Cog Qub Lus, muaj ntau yam hauv ntawv Cog Qub Lus hais txog txheej laus thaum ub tej kab ke. Zoo li thaum Has Nplas Has thiab Xas Las nkawd tsis muaj me nyuam, Has Nplas Has yuav tus poj qhev As Nkas ua niam yau yug tau Is Mas Es. Muaj ib hnub ob niam tub tso tes khiav txog tog kev, Tswv Ntuj tso nws tus tshiab tuaj raws nkawd : “Neb rov mus thawj neb tus niam tsev zwm nws HP 16,9.” Has Nplas Has thiab Xas Las nkawd yeej coj raws li lawv cov yawg koob tus txhooj 145 li hais saud. Ntawm kev sib qaws ua neej, Huab Tais Yes Xus qhia li no rau cov Fas Lis Xais : “Mai Xes pub kom nws xa nws poj niam yog nws teev muaj daim ntawv sib nrauj." 5 Yes Xus teb tias : “Yog vim nej lub siab dub twm xeeb nws thiaj teev txoj cai li ntawd…nkawd ob leeg yuav los ua ib ke. Nkawd tsis yog ob tug lawm, nkawd yuav ua tib tug xwb.9 Yog li, yam Tswv Ntuj muab sau los ua ke, kom neeg tsis txhob muab sib cais MK 10,4-9.” Yes Xus tsis tuaj qhia tib neeg nyob ntiaj teb tseev kom qog tej laus tus txhooj tsim muaj cia teeb tseg. Thaum Yes Xus pib tshaj nws lub Moo Zoo, Yes Xus qhuab qhia zeej tsoom neeg saum roob, Yes Xus hais tias : “38 Nej twb hnov luag hais : Qhov muag pauj qhov muag, hniav pauj hniav. 39 Hos kuv, kuv hais rau nej : Tsis txhob cav tus siab phem ; tiam sis tus ncuav pias koj sab plhu xis, tig sab tod rau nws thiab MT 5,38-39” Yes Xus qhia kom neeg tswv yim thiab siab ntsws nthuav loj dua tus txhooj tus cai sau tseg. Luag ua txhaum yus ib, ces pauj kom tau ib hauv txoj cai. Tiam sis yog peb mloog Yes Xus lus, muaj ib yam tshiab loj dua zoo nkauj dua ntxiv txoj cai. Yes Xus qhia kom peb hwm txoj cai thiab ua kom tau qhov zoo nkauj thiab loj ntxiv txoj cai. Qhov zoo nkauj thiab loj ntxiv txoj cai, yog txoj kev tshiab Yes Xus qhia nthuav loj thiab dav tsis txawj kawg. Yes Xus ua paj lug qhia tias : tus ncuav pias koj sab plhu xis, tig sab tod rau yog hais dab tsi ? Puas yog cev caj dab rau luag hlais ? Tsis yog. Tiam sis, tej zaum yog qhia kom yus tsis txhob pauj, yog qhia kom yus ua siab ntev, yog qhia kom yus lub siab ua ntsuas kub ceev dhau, yog qhia kom yus hla dhau yus lub siab nqaim, coj tau lub siab dav siab zoo cuag peb tus Huab Tais. Tej zaum yog tej txoj kab ntawd, Yes Xus caw kom peb nrog Yes Xus zov hmo : “Kuv ntsuj plig chim tas npaud, nej nyob ntawm no nrog kuv zov hmo.” 39 Nws txav mus deb zog, nws nyo ntsej muag ti av teev ntuj hais tias : “Kuv Txiv, yog lam tau, cia lub ntim no hla mus deb ntawm kuv ! Tab sis, tsis ua raws li kuv xav, hos raws li koj xav.”40 Nws rov los ntawm cov thwj tim, ntsib lawv tsaug zog nris, nws hais rau Pob Zeb : “Ua li, nej thev tsis taus ib teev nrog kuv zov hmo ? Mt 26,38-40.” Dab ntub laum peb tsaug zog, zoo tam zoj peb lub siab me, siab nqaim, ua neeg ntseeg tsis pov khawv, tsis tau hauj lwm.

3-Peb txoj dej num zov hmo zim txwv no. Peb twb txiav siab ua neeg teev Tswv Ntuj, peb yuav tsum tuav ruaj ruaj yus lo lus cog rau Tswv Ntuj hnub yus los ntxuav plig ua Tswv Ntuj neeg thiaj muaj koob hmoov. Vim peb noob neej ntiaj teb tsis muaj leej twg txawj plhis. Hmoob hais tias : “Thaum peb los, peb nyias nqa nyias ntawv los ua neej. Hnub twg peb ntawv tag, peb yuav tso ntiaj teb tseg.” Txog leej twg caij leej twg yug, txog leej twg hnub leej twg rov. Yus tsuas paub hnub nyob tsis paub hnub rov. Vim li ntawd, Leej Ntuj Plig Ntshiab tshoj peb, peb thiaj los ua neeg ntseeg Tswv Ntuj, teev Tswv Ntuj. Peb yuav nco ntsoov Yes Xus cov lus : “Kom nej lub teeb ci ntawm tib neeg xub ntiag, kom xwv lawv pom nej cov dej num zoo thiab lawv cav txog nej Txiv tus nyob saum ntuj. 19 Yog leej twg yuam ib los me npaum li cas hauv cov lus no thiab qhia tib neeg kom ua, yuav yog tus me tshaj saum qaum ntuj ; leej twg yoog tau thiab qhia ncaj, yuav yog tus ntawd tus loj hauv qaum ntuj. MT 5,16.19.” Yes Xus cov lus no muaj tseeb, ua tau hwj huam pub cov neeg siab loj siab dav, siab zoo ua tej lub cim loj rau peb qhov muag pom xyeem. Peb txoj dej num zov hmo zoo li ntsev las tau neeg ntiaj teb kom qab. Peb tsis txhob ua neeg ntseeg kom luag qhuas peb tiam sis kom neeg qhuas Tswv Ntuj, vim Tswv Ntuj qiv peb lub ncauj hais lus, qiv peb tes plhws tus me nyuam ntsuag, hlub ntiaj teb neeg txom nyem. Txoj num dab tsis peb ua, kom zoo cuag li Yes Xus ua.

Ib tsoom phooj ywg, Yes Xus caw peb nrog Yes Xus zov hmo, peb yuav tsum coj li Yes Xus, tos txais txhua tus tib neeg tsis txhem, tsis cais leej twg li. Peb txhob coj li tej txhia neeg ntseeg xaiv txoj kab nqaim taug txoj kev ti, niaj hnub sib cav sib ceg txog tej nyuag kab ke teev hawm : txhob seev suab Hmoob teev ntuj, txhob hlawv xyab ntaw, txhob qhuab ke, txhob foom kom…tej ntawd yog ua dab. Yuav tsum seev luag suab, hais luag lus, ntaus luag thaj cheej, khob luag nruas thiaj yog teev ntuj. Koj tus neeg paub tab nrog Yes Xus zov hmo, koj nrog lub Koom Txoos Kav Tos Liv tho txoj ke dav rau ntiaj teb neeg txhua tus taug mus cuag Huab Tais Tswv Ntuj tus siab loj siab dav. Peb tus Tswv Ntuj mloog tas ntiaj teb neeg txhua tus lus, mloog tus neeg txhaum, mloog tus teev dab qhuas thiab mloog tus neeg teev ntuj lub suab seev thiab zaj lus thov nws. Peb nrog Yes Xus zov hmo, peb yuav xyaum ua siab loj siab dav lawv Yes Xus qab.

24.11.2011 Cwj Vuam Chiv

**NrhiavTswvNtuj** 2nd December 2011, 7:09 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°2

COV ZAJ NYEEM HNUB 04/12/2011 ( Hnub Chiv 2 Tos Huab Tais - Xyoo B )

Post NrhiavTswvNtuj 2nd December 2011, 7:09 am

COV ZAJ NYEEM HNUB 04/12/2011
( Hnub Chiv 2 Tos Huab Tais - Xyoo B )

COV ZAJ NYEEM - Xyoo B 2011-12 ) 70658010

Zaj nyeem Ib: His Xais 40, 1-5.9-11
1 Nej tus Tswv Ntuj hais tias :
"Nej nplij kuv haiv neeg, nej nplij
lawv mas ! 2 Nej hais lus rau hauv Yes
Lus Xas Les nruab siab. Nej hais nrov
nrov rau nws tias nws lub caij ua qhev
dhau lawm. Nws them txim txhaum tas
lawm. Cov xwm uas nws txais ntawm
HUAB TAIS txhais tes los them nws cov
txhaum twb tshaj nws cov txhaum ob npaug lawm."
3 Muaj ib lub suab qw tias :
"Nej npaj ib txog kev hauv teb chaws
suab puam rau Tswv Ntuj taug. Nej
ncaws ib txog kev ncaj hauv cov teb
chaws quav poj rau peb tus Tswv Ntuj.
4 Nej txhub cov hav tob kom siab, kom
cov roob thiab cov hauv toj cia li qis, kom
cov tiaj muaj pov toj, hloov ua hav tiaj tus
yees, kom cov toj ntxhab hloov ua tshav
puam. 5 HUAB TAIS lub hwj chim
yuav tawm los. Txhua tus muaj lub cev
nqaij puav leej yuav pom lub hwj chim,
vim HUAB TAIS lub ncauj tau hais lus.
9 Koj yog tus fi tsab xov zoo no mus rau
Xis Yoos. Koj nce mus saum ib lub roob
siab, koj tsa suab qw nrov nrov mas ! Koj
yog tus fi tsab xov zoo mus rau Yes Lus
Xas Les, koj txhob ntshai cuab suab. Koj
hais rau cov nroog Yus Das tias :
"Ntsia ntawm no saib, yog nej tus Tswv Ntuj."
10 Saib HUAB TAIS Tswv Ntuj nyob
ntawm no. Nws tuaj txog, nws muaj hwj
huam ! Nws txhais npab ua tswv kav
sawv daws. Nej ntsia tus nqi zog nrog
nws. Cov nyiaj nws them nyob ntawm
nws xub ntiag.

Zaj nyeem Ob: 2Pob Zeb: 3, 8-14
8 Cov zoo nyiam, nej tsis txhob ua zoo ib
yam li nej tsis to taub tias, nyob ntawm
Huab Tais xub ntiag, ib hnub yog zoo li
ib txhiab xyoo, ib txhiab xyoo yog zoo ib
yam li ib hnub. 9 Huab Tais tsis ncua lo
lus nws cog xws li qee leej uas lawv
thuam tias Huab Tais ua yam twg mas
nws ua qeeb qeeb. Tab sis, yog vim
Huab Tais ua siab ntev rau nej, nws tsis
xav kom ib tug ploj li, nws tsuas xav kom
sawv daws nyob mus txog hnub uas lawv
tig los hloov lub siab tshiab.
10 Huab Tais lub Hnub Nyoog yuav los
txog xws li ib tug tub sab. Hnub ntawd,
ib lub suab xuav nrov nrov, yuav ua
txheej ntuj yaj tas nrho, txhua tsav txhua
yam yuav kub hnyiab thiab yuav yaj tas,
lub ntiaj teb thiab tas ib puas tsav yam dej
num hauv ntiaj teb yuav kub hnyiab thiab yaj tas.
11 Yog vim txhua yam yuav yaj tas li
ntawd, mas nej yuav tsum coj tus yam
ntxwv ntshiab, thiab yuav teev Ntuj tsis
tseg. 12 Vim nej tos Tswv Ntuj lub
Hnub Nyoog, mas nej xav kom Tswv
Ntuj lub Hnub Nyoog los txog sai dua.
Hnub ntawd cov txheej ntuj yuav kub
hnyiab thiab yuav plam tas, hluav taws
yuav kub txhua tsav txhua yam yaj tas huv tib si.
13 Peb tos txog ib lub ntuj tshiab thiab ib
lub ntiaj teb tshiab, raws li Tswv Ntuj tau
cog lus tias : txoj kev ncaj yuav nyob
txawm hauv lub ntuj tshiab thiab lub ntiaj teb tshiab ntawd.
14 Cov zoo nyiam, lub caij nej tos no,
nej yuav rau siab ua kom Tswv Ntuj pom
tias nej tsis tsuas ib tee qias, thiab tsis
muaj ib qho xyeej, ces thaum Huab Tais
los txog, nws yuav pom nej nyob hauv
txoj kev kaj siab lug.

Ntawv moo Zoo: Mas kos 1, 1-8

Zam Ntxuav Plig qhuab qhia.

1 Cov lus chiv lub Moo Zoo hais
txog Yes Xus Pleev, Tswv Ntuj Leej Tub.
2 Muaj raws li cov lus nyob hauv yaj
saub His Xais phau ntawv, nws hais tias :
Kuv xa kuv tus tub tshaj xo mus ua koj
ntej. Nws yuav npaj koj txoj kev.
3 Tus qw hauv teb chaws quav poj lub
suab hais tias : Nej npaj txoj kev rau
Huab Tais, nej kho nws cov hauv kev kom ncaj.
4 Zam, tus ua kab ke Ntxuav, tawm tuaj
nyob teb chaws quav poj, nws tshaj ib co
kab ke ntxuav pab hloov siab kom Ntuj
zam txhaum. 5 Tas cov neeg hauv teb
chaws Yus Das thiab tas cov nyob Yes
Lus Xas Les tuaj cuag nws. Lawv lees
txhaum, ces Zam ntxuav lawv nyob hauv
tus dej Yos Las Das.
6 Zam hnav plaub ntxhuav, nws sia ib
daim tawv tsiaj ncig nws lub duav. Nws
noj kooj thiab zib mu qus. 7 Zam tshaj
tias : "Tus lawv kuv qab tuaj, nws muaj
zog dua kuv; kuv tsis tsim nyog khoov
daws nws txoj hlua khau. 8 Ntawm kuv,
kuv muab dej los ntxuav nej, hos nws mas
nws yuav ntxuav nej nyob hauv Leej Ntuj Plig Ntshiab.

COV ZAJ NYEEM - Xyoo B 2011-12 ) Preach10

COV ZAJ NYEEM - Xyoo B 2011-12 ) Z4edbd10

Rau hnub tim 04 lub 12 hli 2011

Ib tsoom ntseeg thiab phooj ywg khaub zig Tswv Ntuj,

Peb nyob hauv lub lis piam 2 lub caij tos Huab Tais nqes los ciaj neeg. Peb caw ib tsoom phooj ywg nej txhua leej txhua tus nyob thoob ntiaj teb txij hnub tuaj txog hnub poob, nrog peb mloog ob lub ntsiab lus hauv cov zaj nyeem hnub no : Tus tseem Tswv Ntuj ib tug tub ntxhais txib ; rhawv kab rhawv kev tos peb tus Huab Tais Yes Xus.

1-Tus tseem Tswv Ntuj ib tug tub ntxhais txib. Muaj ntau txoj kab txoj ke rau peb txhua leej taug ua neeg teev ntuj hwm ntuj, ua Tswv Ntuj tub ntxhais txib. Vim muaj ntau hom kab ke, peb thiaj li yuav tsum xaiv hom zoo. Thaum peb xaiv tau lub Koom Txoos zoo lawm, peb yuav tsum tuav kom ruaj khov tam yus lub cuab lub yig, yus nkawm niam txiv sib ceg tag tsis nrauj txag, ua cav lwj sis ib nyob. Tsis txhob ua hom neeg ntseeg loj leeb nuam yaj ncig txhua txhia lub koom txoos. Peb yuav tsum paub, muaj tej lub koom txoos yog tej nyuag koom txoos dai phiaj ntawv sab nraud teev Yes Xus, tiam sis nruab siab zais ntshis tho nej qab nas tshau. Hnub nej qab nas du, ces lub ntuj lub teb txawm kaj nrig los nej tej siab ntsws yeej tsaus nti. Vim li ntawd, yus ob lub qhov muag yuav tsum txhob cia qi, yus lub tswv yim txhob cia qhwv. Yuav tsum rua qhov muag los ntsia, nthuav tswv yim xav kom txhij txhua. Hauv tas txhua hom kev cai teev hawm Tswv Ntuj nej pom muaj luam taw, tsis zoo tas txhua txoj. Tsuas muaj tib txoj xwb thiaj yog txoj qhia ncaj ncees Huab Tais Yes Xus rau nej paub hauv paus nto hauv ntsis tsis zais tsis dag leej twg. Yog nej hmoov zoo nej thiaj li yuav ntsib tau txoj loj txoj tseeb ntawd, nej tsis tshawb tsis nrhiav tiag, nej yeej tsis ntsib thiab tod ! Peb twb pom xeeb zoo siab ua neeg ntseeg Tswv Ntuj, peb yuav tsum nrhiav txoj tseeb, txoj muaj txiaj ntsim pab tau peb, coj tau peb mus ntsib Huab Tais Tswv Ntuj raws li peb lub siab ntshaw tiag. Yog peb tsis pom qab xaiv txoj twg hauv tas txhua txoj npaum li, leej twg puas pab tau peb ? Tsis txhob txhawj, nej muab cov koom txoos teev Yes Xus no los piv rau ib cuab kwv tij ces nej thiaj li pom qab cia siab. Nej niam nej txiv yug tau nej ib cuab kwv tij. Nej twb pom ntsoov ntawm qhov muag, uas cas hauv nej cuab kwv tij, muaj ib tug txawj hlub nej niam nej txiv dua cov, nej twb yog tib cuab kwv tij xwb ned, ua cas nyias sib txawv nyias ? Hauv cov koom txoos teev Yes Xus pawg lug nyob ib ncig ntawm nej kuj tib yam li ntawd, nyias sib txawv nyias. Qhov txawv yog txawv ntawm txoj kev ntseeg (La foi), ntawm txoj kab ke teev hawm (Le culte liturgique), ntawm kev coj thiab cwj pwm (Le comportement moral)...sib txawv deb kawg. Yus los teev Yes Xus, yus yuav tsum nrhiav taug kom tau pawg hauv paus thiaj tag yus lub siab, paub kev teev Yes Xus chiv li cas tuaj mus. Tsis txhob cia yus txoj kev teev Yes Xus npuab nyuag ceg, nyuag kav, nyuag nplooj hauv txoj kev teev hawm thiaj muaj txiaj ntsim tau koob hmoov tsis nkim zog rau yus. Tus me nyuam twg txawj hlub nws niam nws txiv, nws yeej tau koob tau hmoov. Lub Koom Txoos qhuab qhia Yes Xus ncaj ncees, raws lub hauv paus, raws keeb kwm cov thwj tim coj thiab qhia kom ua yeej tau txais Yes Xus txiaj ntsim tsis zoo li tej me nyuam koom txoos ceg ncau, kav hlav thiab nplooj ntxhov tsis tawg paj txi txiv : “10 Saib Huab Tais Tswv Ntuj : Nws tuaj muaj hwj huam tas nrho thiab nws muaj peev xwm puv nkaus npab. Tej tsoos phij tsab nrog nws lub zog heev ua ke tuaj, khoom phij cuam nws lub nqe zog tuaj ua nws ntej.” Saub qhia tias Huab Tais Tswv Ntuj xav kom peb txhua tus hlob yau, laus hluas txais Tswv Ntuj tsoos phij tsab hauv peb kev teev hawm thiab muaj Tswv Ntuj khoom phij cuam ntawm peb tes qav num, muaj Tswv Ntuj hwj huam. Tus tseem Tswv Ntuj tub ntxhais txib yeej muab kev teev hawm Tswv Ntuj ua nws nas nyiaj nas kub hauv nws lub neej. Cov leej ntshiab yeej muaj koob hmoov, lawv tes plhws neeg ua tau hwj huam hlub khaub dab ntsoj ntsuag teev kua muag, lawv ncauj lus yog dej tshuaj ua Tswv Ntuj ntej kho neeg pluag, neeg txom nyem siab loj thiab kaj tuaj. Huab Tais Tswv Ntuj pub kom peb nyuag tib neeg muaj txhaum ua tau hwj huam cuag Tswv Ntuj tus kheej. Tej no, yog Tswv Ntuj tej tsoos phij tsab, khoom phij cuam peb qhov muag pom rau peb cov leej ntshiab hauv lub tseem Koom Txoos taug Yes Xus roj hneev thaum chiv keeb txog zim txwv no. Yog peb leej twg paub li ntawd, peb txoj hmoo zoo, peb yuav nco ntsoov ua Huab Tais Yes Xus tsaug lub sij hawm caij nyoog tos Huab Tais no. Vim peb pauj tsis tau tej koob hmoov Yes Xus muab tuaj rau cov leej ntshiab, cov tseem Tswv Ntuj tub ntxhais txib hauv peb lub Koom Txoos ntxim Yes Xus siab nyiam.

2- Rhawv kab rhawv kev tos peb tus Huab Tais Yes Xus. Tib neeg ntiaj teb tsis teev, tsis hwm, tsis khaub zig Tswv Ntuj los Tswv Ntuj tsis quaj. Tiam sis, yog tib neeg tus yuav quaj pos muag nti tuaj cuag Tswv Ntuj xwb. Leej twg lees nrhiav Tswv Ntuj, tus ntawd tus nrog Tswv Ntuj tho kev rau ntiaj teb neeg teev hawm thiab ntseeg Tswv Ntuj. Zam Ntxuav Plig, yog Huab Tais tus tub txib tho kev rau tsoom His Xais Lais taug los teev hawm Tswv Ntuj. Txij Mos Xes los tav li ntawd, His Xais Lais teev hawm Tswv Ntuj raws li Mos Xes tus txhooj tus cai sau tseg. Tswv Ntuj xa Zam Ntxuag Plig tuaj rhawv kab rhawv kev, coj His Xais Lais hloov siab tshiab, yoog zaj tswv yim tshiab. Kev hloov siab tshiab, yoog zaj tswv yim tshiab tsis yog nrauj Mos Xes tus txhooj tus cai pov tseg puag qab roob qab ha. Kev hloov siab tshiab, yog hloov His Xais Lais lub siab neeg los npuab Tswv Ntuj lub siab, hloov His Xais Lais lub siab dub siab noj kheej yuav kheej los rau lub siab dawb siab hlub neeg li Tswv Ntuj. Kev yoog zaj tswv yim tshiab yog qhia His Xais Lais lub qub tswv yim qog Mos Xes tus txhooj yaug tes yaug taw huv nraum daim tawv tsis cuag hloov lub tswv yim lim hiam, tswv yim nkaus pov tseg los yoog Huab Tais Yes Xus kev hlub neeg thiab zam neeg tej txhaum rau neeg : “nej npaj Huab Tais txoj kev, nej kho nws txoj hau kev kom ncaj.4 Txawm muaj Zam Ntxuav Plig tshwm tuaj nyob hav suab puam tshaj txoj kab ke ntxuav thim los txais kev zam txhaum.” Zam Ntxuav Plig yog tus rhawv kab rhawv kev rau His Xais Lais hloov ua neeg teev ntuj hwm ntuj raws Yes Xus kev qhuab qhia teev ntuj hwm ntuj. Kev rhawv kab ke tos peb tus Huab Tais Yes Xus tsis tag rau hnub peb txais lub Cim Ntxuav, kuj tsis tag rau lub caij npaj ua Hmoov Tsuj Xeeb xwb, yog rau tas nrho peb sim neej nyob ntiaj teb no. Peb yuav ua li Zam Ntxuav Plig ua Yes Xus tub ntxhais txib hauv peb lub cuab lub yig, rau ntawm peb lub luag dej luag num, rau hauv peb lub Koom Txoos…Peb niaj hnub coj peb lub neej kom phim tus neeg teev Yes Xus : “6 Zam hnav ib ce plaub ntxhuav, sia siv tawv ncig nws duav, noj kab kooj thiab zib mu.” Peb ua neej nyob ntiaj teb no, cov txom nyem, cov pluag, cov raug luag ntxub, raug thuam muaj coob leej ntau tus. Tej zaum peb kuj yog ib tug hauv cov neeg zoo li no. Peb yuav tsis txhob ua siab me. Hauv yus lub neej txom nyem, yus nco ntsoov txog Tswv Ntuj. Yus mus txoj ke twg, Tswv Ntuj yauv lawv yus qab tuaj pab yus. Zam mus txoj ke twg, Tswv Ntuj tiv thaiv Zam ua Zam ntej thiab tuaj tom qab. Tswv Ntuj muab kooj kab thiab zib mu cuab tom kev cawm Zam txoj sia. Ntiaj teb neeg txom nyem muaj coob leej ntau tus. Lawv hu txog yus, thov yus pab daws lawv kev tshaib kev nqhis. Tsis txhob tos yus muaj tej txhab qoob los tej txhab nyiaj mam cev tes hlub cov neeg txom nyem. Yus muab kooj kab thiab zib mu yus tau txom ncauj cawm yus txoj sia los pub rau luag : yus yus cev tes plhws tus neeg pluag neeg txom nyem raws li yus txoj kev pluag. Tsis tag li ntawd, vim yus pluag, yus thiaj li yuav siv zog khaub zig Tswv Ntuj kom tuaj hlub peb neeg txom nyem. Yog peb ntseeg li ntawd tiag, peb kuj yuav pom Tswv Ntuj lub zog loj tshaj tej nyiaj tej kub tuaj pab peb neeg txom nyem.

Ib tsoom phooj ywg sawv daws, peb nco ntsoov peb tus Huab Tais Tswv Ntuj tej tsoos phij tsab khoom phij cuam sis lauj sis lug tsis txawj tu, Tswv Ntuj xav pub rau peb txhua tus. Vim li ntawd, thov kom lub caij tos Huab Tais no pub peb txais Tswv Ntuj cov txiaj ntsim ntawd hauv peb txoj kev nquag khaub zig thiab teev Tswv Ntuj.

01.12.2011 Cwj Vuam Chiv

**NrhiavTswvNtuj** 10th December 2011, 9:37 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°3

COV ZAJ NYEEM HNUB 11/12/2011 ( Hnub Chiv 3 Tos Huab Tais - Xyoo B )

Post NrhiavTswvNtuj 10th December 2011, 9:37 am

COV ZAJ NYEEM - Xyoo B 2011-12 ) Z4ee3b12

( Hnub Chiv 3 Tos Huab Tais - Xyoo B )

Zaj nyeem 1 : His Xais 61, 1-2a.10-11, Tus Yaj Saub txoj hauj lwm.

1 HUAB TAIS Tswv Ntuj lub
tswv yim nyob saum kuv, vim HUAB
TAIS pleev kuv. Nws tso kuv xa lub
Moo Zoo rau cov neeg txheej qis, tshaj
kev cawm rau cov thoj nam nyob pej kum
teb, tshaj kev twj lij rau cov neeg nyob hauv tsev loj faj.
2 HUAB TAIS xa kuv mus tshaj HUAB
TAIS ib lub xyoo pub txiaj ntsim, tshaj
tias muaj ib hnub uas peb tus Tswv Ntuj
yuav rob caub. HUAB TAIS xa kuv mus
nplij cov neeg ntoo xyom kom sawv.
10 Kuv zoo siab tag nrho, kuv dhia daj
dhia luag nyob hauv HUAB TAIS. Kuv
tus plig dhia hom khaj nyob hauv kuv tus
Tswv Ntuj, vim Tswv Ntuj muab kev
cawm cov tsoos rau kuv hnav, nws muab
kev yeej lub tsho tshaj sab qhwv kuv, xws
li tus nraug vauv tshiab kho nws hauv
phuam, xws li tus nkauj nyab muab npauj
kub npauj nyiag los coj.
11 Piv li daim av ua tau noob qoob nthaw kaus,
daim teb ua noob tsa nrhau cag, Huab Tais kuj
ua tau qhov ncaj nthaw kaus thiab
lub koob meej rau txhia xeem neeg pom.

Zaj nyeem 2 : 1 Tes Xas Los Nis 5, 16-24

16 Nej ua siab kaj lug mus li. 17 Nej
teev Ntuj tsis tseg. 18 Tab txawm muaj
xwm dab tsi tshwm sim tuaj, los nej yuav
ua Ntuj tsaug mus li. Tswv Ntuj lub siab
xav kom nej ua li ntawd nyob hauv Yes Xus Pleev.
19 Nej txhob tua Leej Ntuj Plig xws li tua
teeb. 20 Nej txhob thuam lub txiaj ntsim
ua Yaj Saub. Nej hnov yam twg, mas nej
tshuaj saib puas tseeb tso : yam twg zoo,
mas nej khaws tseg.
22 Nej caiv txhua txoj kev phem mog.
23 Thov kom tus Tswv Ntuj siab kaj lug
ua kom nej ntshiab tuaj. Thov kom nej
txuag tau nej lub tswv yim, nej tus plig,
kom nej lub cev txhob muaj chaw xyeej,
mus txog lub caij peb tus Huab Tais Yes
Xus Pleev rov los. 24 Tus hu nej, nws
pheej xeeb : nws yuav ua xws li kuv hais saum no.

Zam Ntawv Moo Zoo 1, 6-8.19-28

6 Muaj ib tug neeg tuaj, yog Tswv Ntuj
xa nws tuaj. Nws lub npe hu ua Zam.
7 Nws yog ib tug tim khawv tuaj ua pov
thawj txog qhov pom kev, kom txhua leej
txhua tus ntseeg vim nws. 8 Tus ntawd
tsis yog qhov pom kev, tab sis nws yuav
ua tim khawv txog qhov pom kev.
19 Thaum cov Yus Das xa ib co leej choj
thiab ib co les vis tuaj ntawm Yes Lus
Xas Les mus nug Zam hais tias :
"Koj yog leej twg ?"
Mas Zam ua tim khawv zoo li no :
20 Zam lees, nws tsis zais, nws lees tias :
"Kuv tsis yog Leej Pleev."

COV ZAJ NYEEM - Xyoo B 2011-12 ) Z4ee3b14

Rau hnub tim 11 lub 12 hli 2011

Ib tsoom ntseeg thiab phooj ywg txhua leej,

Peb nyob hauv lis piam 3 lub caij tos Huab Tais. Hnub no, lub Koom Txoos caw tas peb cov neeg teev Yes Xus npaj peb tej siab ntsws thiab peb lub neej tos txais peb tus Huab Tais Yes Xus tuaj nrog peb nyob. Vim li ntawd, peb yuav tig mus ntsia peb cov yawg koob lawv kev npaj tos Huab Tais thiab peb ne, peb yuav npaj dab tsi tos peb tus Huab Tais zim txwv no ?

1-Peb cov yawg koob kev npaj tos Huab Tais. Txij thaum Tswv Ntuj tshoj tas ntiaj teb neeg, Tswv Ntuj xaiv raug haiv His Xais Lais ua Tswv Ntuj haiv neeg. Tswv Ntuj pom tias yuav tsum qhuab qhia His Xais Lais kom txawj coj haum Tswv Ntuj siab nyiam. Vim li ntawd, Tswv Ntuj thiaj li tshoj kom muaj tej tus poj niam los tej tus txiv neej sawv los qhuab qhia Tswv Ntuj tej lus rau tsoom His Xais Lais. Es Xais (His Xais) yog ib tug sawv los qhuab qhia Tswv Ntuj lus ze ntawm 760-700 xyoo ua ntej Yes Xus yug los. Es Xais yog ib tug saub loj kawg. Es Xais loj rau nws cov lus nws hais puav leej tshwm sim tsheej xeeb rau tib neeg pom. Peb yuav piav tsis tag saub Es Xais cov lus rau sawv daws mloog hnub no. Peb tsuas khaws nws lo puav lus hauv tsab ntawv no ua tshuaj xwb. Muaj ib yam tseem ceeb, peb yuav tsum paub qhov txawv ntawm tej saub Hmoob thiab Tswv Ntuj tej saub sib txawv deb kawg, tsis zoo tib yam. Vim peb los hwm, los ntseeg Tswv Ntuj lawm, peb yuav tsum ua li Tswv Ntuj qhia rau His Xais Lais. Peb tsis txhob coj li qub, raws li Hmoob kev cai teev dab qhuas, tiam sis coj li Tswv Ntuj cov saub qhia kom ua. Peb yuav tau tig mus ntsia peb cov pog koob yawg koob saub lus qhuab qhia.
Saub Hmoob:Thaum Hmoob piav dab neeg hais txog: “Mus nug saub”, vim Hmoob tsis pom qab ua zaj twg, ntsia kev tws lawm ces taug kev “Mus nug saub.” Hmoob ntseeg tias saub pom yav tom ntej, yuav pab tau Hmoob. Yog leej twg nyuaj siab, kev tws lawm, saub yuav qhia kev tshwm rau tus ntawd taug. Hmoob cov poj saub yawm saub yog cov neeg txhais npau suav, saib kab teg, saib ko taw qaib, saib qhov muag qaib, tsawv qe, khi ncau…txawm leej thiab tsis leej los Hmoob ntseeg kawg nkaus. Tseem muaj tej tus poj niam los txiv neej Hmoob, niaj hnub no, ncig toj ncig pes ua saub kho neeg ncig zej ncig zos. Tus puav saub Hmoob tseem muaj cuab kav hais tias lawv no tseem loj tshaj thiab paub tshaj Yes Xus. Tsis tas li ntawd xwb, tseem muaj neeg mus npuab tej nyuag saub no qab tshob thiab. Peb yuav tsum ceev faj kom zoo tiag tiag, xav tswv yim kom txaus: Ua cas liv xwm Hmoob tsis muaj, tej laus Hmoob tsis hais ib zaug txog tus saub Hmoob twg npe, nws tej lus nws hais thaum tiam neej no, lo lus nws hais yog lo no, muaj hwj huam txog niaj hnub no...Tsis pom muaj ib tug saub Hmoob loj li no. Hais tau tias cov saub Hmoob ploj thaum twg ces num tag thaum ntawd. Tsis kawg saub Hmoob thiaj zoo li ntawd xwb, lwm haiv neeg tej saub, cov saub cuav kuj chaws tib lub dawm, mus tib txog kab li ntawd.
Tswv Ntuj cov saub:
Cov saub Tswv Ntuj tshoj xws li Es Lias, Mos Xes, Es Xais, Yes Les Mias, Os Xes, As Mos, Zas Kas Lias, Xos Fos Nias, Zam Ntxuav Plig, Pob Zeb, Paj Lug…cov tseem saub tej lus muaj hwj huam mus ib txhis tiam dhau tiam txog niaj hnub no. Leej twg ntseeg Tswv Ntuj cov saub, yeej txais koob hmoov quj qees tsis txawj tag. Cov leej ntshiab hauv Koom Txoos Kav Tos Liv yog cov pov thawj txais saub tej koob hmoov no, vim Tswv Ntuj yog tus muab tej koob hmoov ntawd rau tus neeg mloog saub lus: “1 Huab Tais Tswv Ntuj Ntsuj Plig nyob saum kuv, vim Tswv Ntuj tau pleev kuv; nws xa kuv mus tshaj xo rau cov pluag, mus qhwv tej siab ntsws ntsoog lis ntxaws, qhia kev tshwm rau cov neeg loj faj thiab kev cawm rau cov nyob qhov taub 2 Tshaj Tswv Ntuj xyoo txiaj ntsim thiab peb tus Tswv Ntuj hnub pauj tuaj nplij tag cov neeg muaj kev tu siab” Saub Es Xais cov lus hais tau 700 xyoo ua ntej tsheej xeeb rau Yes Xus. Vim saub lus, yog Tswv Ntuj lus. Es Xais tsuas ua Tswv Ntuj tub txib hais Tswv Ntuj lus txhawb tus neeg ncaj neeg ntshiab txheej dhau txheej. Leej twg cuab ntsej mloog Es Xais txawm muaj Tswv Ntuj lub zog ua neej, txawm nws lub cev ntaj ntsug yuav raug kev txhawj xeeb loj npaum cas, nws kev ntseeg Tswv Ntuj tsis ntaug tsis thim ib qho me me. Peb tseem nco, thaum Yes Xus qhib ncauj tshaj nws lub Moo Zoo qhuab qhia ib zeej tsoom neeg, Yes Xus hais rau lawv tias saub cov lus no tsheej xeeb ntawm lawv qhov muag. Vim Yes Xus tau kho cov mob ruas, cov dig muag, cov tuag ceg, cov raug dab, cov neeg tuag…dim lawv kev tsaus ntuj raug txom nyem. Tswv Ntuj kev pauj neeg txom nyem, tsis yog ua kom tus txom nyem yim txom nyem loj ntxiv, tiam sis pauj tus raug txom nyem loj npaum twg muaj kev zoo siab yim loj tsis kawg. Vim li, tus mob ruas, tus dig muag, tus tuag ceg zoo siab npaum li ntawd rau Yes Xus kev cawm. Txoj kev zoo siab ntawd, saub Es Xais ua tus hais tseg ua ntej. Yes Xus yog tus ua tsheej xeeb rau cov txom nyem.

2-Peb yuav npaj dab tsi tos peb tus Huab Tais zim txwv no ?

Lub caij tos Huab Tais, tsis zoo li tus neeg mus zaum tos tsheb tsis muaj dab tsi ua ; kuj tsis zoo li ib leej niam mus sawv nraum qhov rooj ntseg ntsees tos nws tus me nyuam tawm hauv tsev kawm ntawv coj los tsev. Peb kev tos peb tus Huab Tais, peb yuav sis zog ntsos rau tej dej num npau xi hauv peb lub neej teev Tswv Ntuj, peb yuav nrhiav li cas kom peb paub Huab Tais Tswv Ntuj zoo dua yav tag los, kom peb swm Tswv Ntuj li ib tug phooj ywg, kom peb zoo siab pom, zoo siab ntsib Tswv Ntuj li peb mus txoj kev deb tos ntshi yuav los ntsib peb lub cuab lub yig. Twb muaj tej tug neeg ntseeg Tswv Ntuj ua tau tej yam rau yus pom pab yus txoj kev ntseeg loj hlob, muaj zog ib thawj. Lawv tsis yog yuav ua tej yam muaj muaj ceem rau teb rau chaw cav lawv lub npe tshwm hauv xyam los hauv xov tooj cua. Tiam sis, lawv lub pliaj plhu, lawv lo lus, lawv kev nquag, lawv lub siab ntev…txhab tau txoj kev ntseeg Tswv Ntuj muaj ceem nyob ib ncig ntawm lawv, yam lub cub tawg muaj ceem neeg xav los ntsauv. Zoo li Zam tus cwj pwm thiab Zam lo lus muaj kuab, nqus neeg tuaj ntsauv, lawv xav pom, muaj lus xav nug ntau yam rau Zam : “25 Lawv nug nws ntxiv dua ib los tias : “Koj twb tsis yog Leej Pleev, tsis yog Es Lias, tsis yog tus yaj saub loj, vim li cas koj thiaj muab tib neeg ntxuav ?”26 Zam teb rau lawv tias : “Kuv ntxuav neeg hauv dej. Hos muaj ib tug nyob nruab nrab hauv nej, tiam sis nej tsis paub tus ntawd 27 Nws lawv kuv qab tuaj, kuv twb tsis tsim nyog daws nws txoj hlua khau.” Peb leej twg muab Tswv Ntuj lo lus tswj peb lub neej, coj peb kev ua neej, yeej ua rau cov neeg nyob ib ncig ntawm peb pom kev dua qub. Yus tej dej num kuj dib tau lawv tej siab ntsws kom hloov. Vim li ntawd, peb yuav tau ceev faj, lub caij tos Huab Tais, yog lub caij nyoog rau peb yoog Zam, tsis txhob txeeb Yes Xus lub chaw li tej saub cuav muaj cuab kav hais tias lawv tseem loj dua, paub dua Yes Xus. Kawg Yes Xus xwb thiaj loj thiab muaj tsim tas nrho, peb twb pe tsis nyog Yes Xus ko taw. Zam muab dej ntxuav neeg, ua lub cim ntxuav neeg cov txhaum nraum daim tawv kom huv. Tiam sis, Yes Xus yog tus loj, tus Huab Tais, tus muaj peev xwm muab tau ntsuj plig tshiab cog rau peb thiab ua kom peb dawb huv tau rau Leej Txiv Tswv Ntuj.

Ib tsoom phooj ywg, xov kom cov zaj nyeem hnub no coj tau peb ua neeg nyiam Tswv Ntuj, ntshaw nrog Tswv Ntuj ua ke, nyob npuab Tswv Ntuj kom tag peb lub siab lub ntsws.

08.12.2011 Cwj Vuam Chiv

**NrhiavTswvNtuj** 16th December 2011, 11:35 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°4

COV ZAJ NYEEM HNUB 18/12/2011 ( Hnub Chiv 4 Tos Huab Tais - Xyoo B )

Post NrhiavTswvNtuj 16th December 2011, 11:35 am

COV ZAJ NYEEM - Xyoo B 2011-12 ) 13240710

( Hnub Chiv 4 Tos Huab Tais - Xyoo B )

Zaj nyeem Ib: 2 Xm 7, 1-5.8b-12.14a.16

1 Thaum Das Vis tuaj nyob hauv
nws tsev thiab HUAB TAIS pab
nws rhuav cov yeeb ncuab nyob ib ncig
ntawm nws tib si, ces tus vaj Das Vis hais
rau tus Yaj Saub Nas Taas tias :
"Koj ntsia saib ! Kuv nyob hauv ib lub
tsev ntoo faj khaum, hos Tswv Ntuj lub
Xab Cog Lus nyob hauv ib lub Tsev Tsam Phooj xwb!"
3 Nas Taas teb rau tus vaj tias :
"Koj ua raws li koj siab nyiam, vim
HUAB TAIS nrog koj nyob."
4 Hmo ntawd, Nas Taas hnov Tswv Ntuj lo lus no :
5 "Koj mus hais rau kuv tus tub txib Das
Vis tias HUAB TAIS hais li no : Puas yog
koj yuav txhim ib lub tsev rau kuv nyob txawm hauv ?
8 Nas Taas, nyem no koj mus hais rau
kuv tus tub txib Das Vis tias :
HUAB TAIS Xas Npas Os hais li no :
Kuv yog tus tau rho koj hauv cov tshav
zaub thiab hauv nruab nrab pab yaj los tsa
ua tus tswv saib kuv tsoom pej xeem His
Xas Lais.
9 Kuv tau nrog koj ua tas puas tsav yam
hauj lwm. Kuv tau rhuav koj cov yeeb
ncuab tib si nyob ntawm koj xub ntiag.
Kuv yuav pub kom koj lub npe nto moo
loj cuag li cov vaj loj tshaj nyob thoob tas
ntiaj teb. 11 HUAB TAIS yuav ua kom
koj loj. HUAB TAIS yuav tsim ib tsev
neeg los pub rau koj.
12 Thaum koj sim neej dua tas koj yuav
mus nrog koj cov poj yawm txwv koob
pw, kuv yuav cia koj ib tug xeeb ntxwv
tawm ntawm koj roj ntsha los hloov koj
ua vaj. Kuv yuav nres nws txoj kev ua
vaj kom nyob ruaj nreb.
14 Kuv yuav ua nws txiv, nws yuav yog
kuv leej tub. Yog nws ua qhov phem,
kuv yuav xuas ib tug pas los muab txim
rau nws, kuv yuav ntaus nws xws li neeg
ntaus neeg. 15 Tab sis kuv yuav tsis thau
kuv lub txiaj ntsim ntawm nws los xws li
kuv tau thau tus xub ua vaj dua koj.
16 Koj tsev neeg thiab koj txoj kev ua
vaj yuav nyob mus li nyob ntawm kuv
xub ntiag. Koj lub theej kiab yuav nyob
ruaj nreb mus ib txhis."

Zaj nyeem Ob: Lmas 16, 25-27

Cav txog Tswv Ntuj. 16 : 25 - 27.
25 Tswv Ntuj yog tus muaj hwj huam,
nws ua kom peb nyob ruaj nreb, raws li
lub Moo Zoo kuv xa tuaj, thiab raws li tus
Yes Xus Pleev uas kuv tshaj txog. Yog
txoj kev qhib ib yam tob, uas Ntuj muab
zais tob tob txij lub hauv paus los.
26 Tiam sis, nyem no, Ntuj muab rau
sawv daws pom xyeem. Cov Ntawv twb
xub hais txog cov txuj ci tob tob zais
ntshis ntawd. Tswv Ntuj yeej ib txwm
txiav tias, yuav ceeb toom cov txuj ci tob
tob ntawd rau txhua haiv neeg paub, kom
rub tau sawv daws los ua neeg mloog lus
nyob hauv txoj kev ntseeg.
27 Tswv Ntuj ua li ntawd, vim nws tib
leeg yog tus thoob tsib. Thov kom Tswv
Ntuj muaj koob meej nyob hauv Yes Xus
Pleev, mus txog txhiab niag tim puas xyoo.
Ua li !

Nyeem Ntawv Moo Zoo: LK 1, 26-38

Nkas Nplias xa xov tuaj rau Mab Liab.
26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis. Hos tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.

NTHUAV NTAWV NTSHIAB

Rau hnub tim 18 lub 12 hli 2011

Ib tsoom ntseeg thiab phooj ywg nrhiav Tswv Ntuj,

Cov zaj nyeem hnub no yog ib co lus koob lus hmoov txhawb peb txhua leej, xav kom peb txhua tus khaws tau cov koob hmoov no pab peb ua neeg txawj hlub Tswv Ntuj npaum li vaj ntxwv Das Vis thiab nkauj xwb Mab Liab nkawd.

Peb yuav xub piam ob peb los txog vaj ntxwv Das Vis. Thaum Tswv Ntuj coj lawv dim kev ciaj qhev nyob Hais Nkws Tos teb los ua neeg twj lij rau Kas Nas Has teb, lub teb chaws Tswv Ntuj cog lus muab pub rau lawv. His Xais Lais pib huam nroo ntws xws xub ntab, vam ntws xws xub mu. Lawv los khwv tau noj tsis tshaib, haus tsis nqhis, sau qoob puv txhab, tu tsiaj puv nkuaj, muaj nyiaj puv nas. Lawv kev teev hawm Tswv Ntuj pib muaj teeb meem sawv tuaj. Tej xeeb leej xeeb ntxwv tsis nco Tswv Ntuj txiaj ntsim Tswv Ntuj tau cawm lawv cov yawg koob dim kev ua qhev los ciaj neeg twj lij. Lawv tsis xwb fab txoj kev teev hawm Tswv Ntuj cuag lawv kev xwb fab nrhiav nyiaj txiag thiab nrhiav ua nom ua tswv. Lawv mus yoog luag pej kum teev luag dab (Lawv txhim tej chaw rau npas hlawv lawv tej tub ki hauv hluav taws txi rau npas…YLM 19,5) nrauj kev teev hawm Huab Tais Tswv Ntuj. Lawv tuaj yeem tsa nyuag tib neeg (Xas Ws) ua lawv tus vaj ntxwv kav lawv raws li tej teb chaws nyob ib ncig, tso Tswv Ntuj lawv tus tseem Vaj Ntxwv muaj hwj huam pov tseg. Tiam sis, Tswv Ntuj kuj ua ib siab, tsuas yog Tswv Ntuj pab xaiv Das Vis sawv ua vaj ntxwv kav His Xais Lais taj Xas Ws. Muaj ib hnub, Das Vis txawm seev xav kom tsoom pej xeem His Xais Lais muaj ib lub chaw pe hawm Tswv Ntuj, muaj tsev los tiam los txi Tswv Ntuj : “2 Vaj ntxwv hais rau saub Nas Tas: “Saib yom ! kuv nyob tsev ntoo ciab, hos Tswv Ntuj lub xab nyob nyuag tsev tsam phooj ntaub !” 3 Nas Tas hais rau vaj ntxwv : “Muaj li cas hauv koj siab, mus ua kom tau, vim Huab Tais nrog koj nyob.” Das Vis txhim tsev zeb tsev tsua, xov tsev ntoo ciab ntoo thuv nyob muaj tub mab tub qhe tiam, muaj peeb zov keeb, zov rooj paim rooj txuas, zov vaj loog, muaj tub rog xab txheeb tiv thaiv ciam dej ciam av sib nrawg tsis ntshaw luag pej kum huab tais vaj ntxwv kav teb kav chaw, ua rau pej xeem His Xais Lais tau ntsej muag. Tiam sis, Das Vis siab tsis nqig vim tshuav Tswv Ntuj lub xab rau Mos Xes txoj cai daim phiaj zeb txaug Tswv Ntuj lo lus nyob nyuag tsev tsam phooj ntaub li txheej laus thaum ub hla hav suab puam. Tswv Ntuj pom Das Vis yog Tswv Ntuj ib tug tub txib siab loj siab dav, tsis mom luag txheej, hlub Tswv Ntuj, hwm Tswv Ntuj. Vim li ntawd, Tswv Ntuj thiaj li tshoj saub Nas Tas kom qhuab qhia Das Vis paub, Huab Tais Tswv Ntuj yog tus coj Das Vis nyuag tub zov tsiaj nog zaub nyob tshav puam sawv ciaj vaj ntxwv tswj kav His Xais Lais nyob tsev vaj loog xov zeb xov ntoo. Yog Huab Tais tsis tho kev ua ntej thiab tsis txhawb Das Vis sawv tsis tau ib leeg taj Xas Ws lub chaw ua vaj ntxwv. Huab Tais Tswv Ntuj tsis yog ntshaw nyob lub tsev zeb tsev tsua Das Vis npaj txhim rau Tswv Ntuj hauv nruab siab, tiam sis kom Das Vis paub npaum li cas Tswv Ntuj yuav roos Das Vis lub teb chaws (son royaume) thiab nws lub theej kiab (son trône) kom nyob mus ib txhiab ib txhis : “16 Koj lub tsev yuav ruaj nreb thiab koj lub teb chaws vaj ntxwv nyob ib txhis ntawm koj xub ntiag koj lub theej kiab yuav nyob ib txhis.” Yog yam Tswv Ntuj xav pub kom Das Vis muaj rau Tswv Ntuj tsis yog tej tsev zeb tsev tsua. Tswv Ntuj lus yog koob hmoov hais li cas tsheej xeeb li ntawd.
Tsoom tub ki His Xais Lais cov muaj pluaj siab dai lias teev Tswv Ntuj tib leeg, kuj muaj coob leej ntau tus poj niam txiv neej laus thiab hluas. Lawv txawm yuav raug cua daj cua dos ntsawj npaum twg, lawv siab ntsws tsis qaij tsis qaug qab ke qaum kev hauv txoj xub kab npuab Tswv Ntuj. Mab Liab, yog ib tug me ntxhais nyuam qhuav hlob tiav nkauj muaj pluaj siab npuab Tswv Ntuj. Vim Mab Liab yeej tos rhw Tswv Ntuj tej lus saib tav twg yuav tsheej xeeb hauv nws lub neej thiab nws siab yeej dai ncuv rau Tswv Ntuj li Es Lis Xas Npes, Zas Kas Lias, As Nas thiab Xis Mes Oos. Thaum tub hlob tiav nraug, ntxhais hlob tiav nkauj, yuav tsum muaj txig muaj nkawm thiaj tsheej cuab. Yos Xes tau ntoj tau thuv, taug kev tuaj qhaib Mab Liab mus ua Yos Xes nyab. Thaum ntawd, yog ib lub zoo caij zoo nyoog rau Tswv Ntuj tshoj Mab Liab. Tswv Ntuj xa tshiab Nkas Nplias tuaj tshaj ib tsab xo rau Mab Liab : “Zoo siab, tus xis siab tshaj ! Huab Tais nrog nraim koj.” Tshiab Nkas Nplias tsab xo qhia npaum li cas Mab Liab pluaj siab npuab Tswv Ntuj tau koob hmoov rau Mab Liab, rau tas ib zeej tsoom neeg teev Tswv Ntuj thiab rau tas txhua leej cov neeg hwm Tswv Ntuj. Yog ib lub moo zoo ua rau Mab Liab ceeb tag. Mab Liab to taub, thaum lub hauv paus, As Das thiab Es Vas nkawd ntseeg dab phem thiaj ua rau nkawd qaug rau dab phem zaj. Tswv Ntuj tau tsawm yuav cia txoj kev sib tiv rau ntawm tus nab thiab tus poj niam. Ziag no, Nkas Nplias tuaj tshab xo qhia Tswv Ntuj lub hom phiaj ua txiaj ntsim rau Mab Liab. Thaum ntej Mab Liab tsuas npaj nrog Yos Xes ua neej. Tiam sis, Mab Liab ntseeg tias Tswv Ntuj twb xub qhaib Mab Liab hauv Tswv Ntuj lawm : “Mab Liab, koj txhob txhawj, vim koj muaj txiaj ntsim rau ntawm Tswv Ntuj 31 Koj cev yuav xeeb tub thiab koj yuav yug ib tug tub, koj yuav tis lub npe Yes Xus rau nws 32 Nws yuav hlob yuav loj, luag yuav hu nws ua tus Siab Tshaj Leej Tub. Huab Tais Tswv Ntuj yuav muab nws txiv Das Vis lub theej kiab rau nws.” Mab Liab pom tias lub hom phiaj xub npaj nrog Yos Xes ua neej rais los ua Tswv Ntuj lub hom phiaj Tswv Ntuj tau npaj tseg thaum ntej thaum ntxov rau Mab Liab. Tsis tas li ntawd, leej twg pluaj siab ib txwm npuab Tswv Ntuj kuj puav leej muaj txiaj ntsim tsheej xeeb hauv tus ntawd lub neej : “Tej ntawd yuav zoo li cas, kuv twb tsis paub ib tug txiv neej li?” 35 Tshiab teb nws tias : “Ntsuj Plig Ntshiab yuav tshwm saum koj, tus Siab Tshaj lub hwj huam yuav roos koj. Yog vim li, tus yuav yug los thiaj li hu ua Ntshiab, Tswv Ntuj Leej Tub.36 Saib ! Es Lis Xas Npes, koj tus viv ncaus nws kuj xeeb tub muaj rau hli lawm, luag hu nws ua pog khab seeb.”

Ib tsoom phooj ywg hmov thiab tshua, peb txawm muaj leej twg tau lub neej txom nyem, muaj kev txob txhawj loj npaum twg, peb tsis txhob poob siab cov phooj ywg. Vim hmoov zoo kawg, peb twb los ntseeg peb tus Huab Tais Tswv Ntuj tus hlub peb tas nrho, nws thiaj tso nws Leej Tub Yes Xus tuaj cawm peb ntawm tas txhua txoj xub ke. Peb tus Huab Tais twb pab tau Das Vis, nyuag tub hluas zov tsiaj sawv los ua vaj ntxwv, pub tau Mab Liab xeeb Tswv Ntuj Leej Tub Yes Xus, pub tau Es Lis Xas Npes xeeb nws tus tub thaum nws yav laus. Tswv Ntuj kuj yuav pab kom tau peb kev txhob txhawj, kev txom nyem, kev tshaib nqhis niaj hnub no rau peb yog peb muab tag peb lub siab los npuab Tswv Ntuj li Das Vis, Mab Liab thiab Es Lis Xas Npes. Vim li ntawd, leej twg pom nws yog tus txom nyem tshaj, nws yuav tau txais cov koob hmoov hauv cov zaj nyeem hnub no, kom nws los khaub zig Tswv Ntuj.

16.12.2011 Cwj Vuam Chiv

**NrhiavTswvNtuj** 23rd December 2011, 9:53 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°5

COV ZAJ NYEEM HNUB 24/12/2011 ( Hmo Tsuj Xeeb - Xyoo B )

Post NrhiavTswvNtuj 23rd December 2011, 9:53 am

COV ZAJ NYEEM - Xyoo B 2011-12 ) 13246712

( Hmo Tsuj Xeeb - Xyoo B )

COV ZAJ NYEEM - Xyoo B 2011-12 ) George11

Zaj nyeem 1 : Es Xais (His Xais) 9, 1-6:
Ib tug yug los ua vaj kav Tswv Ntuj haiv neeg.

1 Thaum ntawd tsoom pej xeem
uas lawv maub hauv qhov tsaus ntuj,
lawv pom ib qho pom kev loj. Ib qho
pom kev ci tuaj rau saum cov nyob hauv
lub teb chaws tsaus ntuj nti.
2 HUAB TAIS, koj tau ua kom kev hom
khaj hlob mus, kom muaj chaw zoo siab
ntau. Sawv daws zoo siab nyob ntawm
koj xub ntiag, ib yam li cov sau qoob loo
zoo siab, ib yam li co tub rog sib faib cov
toob xib lawv txeeb tau lawv dhia lom
zem. 3 Tus quab uas tsuam lawv, tus
ntas nyob saum lawv xub pwg, tus zov
cov neeg nyob txim rab qws, koj muab
tsuj, xws li thaum Mas Dias lub hnub
nyoog. 4 Cov suab khau tub rog nrov
ncha tas huv si, cov tsho tshaj sab lo
ntshav tas huv si, nplaim taws yuav noj,
hluav taws yuav hlawv.
5 Vim ib tug me nyuam yug los rau peb,
Ntuj pub ib tug tub rau peb. Lub tuam teb
nyob saum nws xub pwg. Luag tis nws
npe hu ua : tus qhia tswv yim zoo tas
nrho, tus Tswv Ntuj siab loj, tus vaj
txheeb pub kev thaj yeeb.
6 Das Vis lub theej kiab thiab lub teb
chaws nws yuav kav yog ib lub tuam teb
dav thiab nyob thaj yeeb tsis muaj caij
kawg. Nws yuav muab Txoj Cai thiab
kev ncaj los tsa thiab nres nws lub tuam
teb, txij no mus txog ib txhiab ib txhis.
Tus HUAB TAIS kav tsoom tub rog nws
lub siab hlub muaj khib yuav ua tej ntawd.

Zaj nyeem 2 : Tis Tos 2, 11-14
Vim li cas sawv daws thiaj yuav coj tus yam ntxwv zoo.

11 Sawv daws yuav coj tus yam ntxwv
zoo, vim Tswv Ntuj lub txiaj ntsim yog
lub qhov dej uas txhawv txoj kev cawm
txhua leej txhua tus. Tswv Ntuj lub txiaj
ntsim tawm los rau sawv daws pom
xyeem. 12 Tswv Ntuj lub txiaj ntsim
qhia peb kom tso kev tsis hwm Ntuj pov
tseg, tso txoj kev ntshaw txog lub sim
ceeb no tseg, kom tiam neej no, peb ua
neej nyob hauv txoj kev cheem peb lub
siab, hauv txoj kev ncaj, thiab kev hwm
Ntuj. 13 Vim peb tos thiab peb vam
ntsoov txoj kev kaj siab lug. Peb tos kom
peb tus Tswv Ntuj loj, Yes Xus Pleev uas
yog tus cawm peb lub hwj chim tawm los
rau qhov muag pom xyeem.
14 Yes Xus Pleev, nws muab nws rau
luag ntes, kom nws txhiv tau peb ntawm
txhua txoj kev phem. Nws ntxuav ib haiv
neeg kom huv los ua nws tug, thiab kub
siab ua cov dej num zoo.

Lus Kas Ntawv Moo Zoo 2, 1-14
Yes Xus yug los

1 Lub zwj ceeb ntawd, vaj ntxwv
Xes Ntxas Aus Nkus Tus tshaj lus
ceeb toom kom tas ntiaj teb txheeb tsoom
mej hwm. 2 Thaum txheeb tsoom mej
hwm thawj zaug no, yog lub caij Kis Lis
Nyus ua nom tswj Xis Lias teb.
3 Txhua leej txhua tus sawv kev mus,
nyias mus sau nyias npe hauv nyias lub
nroog. 4 Yos Xes kuj sawv kev hauv lub
nroog Nas Xas Les, xeev Nkas Lis Lais
mus pem Das Vis lub nroog hu ua Npes
Les Hes, nyob hauv xeev Yus Das, vim
Yos Xes yog Das Vis tsev neeg thiab Das
Vis caj ces. 5 Yos Xes xav muab Mab
Liab lub npe sau nrog nws lub npe, vim
Mab Liab yog tus nws qhaib
thiab Mab
Liab cev hnyav lawm. 6 Thaum nkawd
nyob Npes Les Hes, txog lub caij Mab
Liab yuav daws cev. 7 Nws yug nws tus
tub, nws muab ntaub qhwv, thiab muab
tso pw hauv ib lub dab nyuj, vim lub tsev
txais qhua tsis muaj chaw rau nkawd so.
8 Nyob thaj tsam ntawd, muaj ib co neeg
zov yaj. Lawv nyob nruab teb. Hmo ntuj,
lawv nyob zov lawv pab yaj. 9 Huab
Tais tus Tshiab tawm los rau lawv pom,
Huab Tais lub hwj chim ci dawb paug
ncig lawv, lawv ntshai kawg. 10 Tus
Tshiab hais rau lawv tias :
"Nej txhob ntshai, vim kuv tuaj xa ib tsab
xov zoo uas yuav ua kom nej zoo siab
thiab ib tsoom neeg zoo siab. 11 Hnub
no, nyob hauv Das Vis lub nroog, tus
Cawm nej yug los lawm, nws yog Leej
Pleev, thiab yog Huab Tais. 12 Lub cim
yuav ua kom nej paub yog lub cim no :
nej yuav pom ib tug me nyuam mos qhwv
ntaub pw hauv ib lub dab nyuj."
13 Ib sij huam, txawm muaj ib pab
Tshiab coob coob tuaj nrog tus Tshiab xa
xov cav lus zoo txog Tswv Ntuj tias :
14 "Nyob saum cov txheej ntuj siab,
Tswv Ntuj nto meej nto moo, nyob ntiaj
teb, tsoom neeg Tswv Ntuj nyiam, nyob thaj yeeb.

COV ZAJ NYEEM - Xyoo B 2011-12 ) 13246713

Rau Hmo tim 24 lub 12 hli 2011

Ib tsoom ntseeg thiab phooj ywg,

Hnub no zoo hnub, hmo no zoo hmo, tas nrho lub Koom Txoos Kav Tos Liv nyob ntiaj teb nco txog peb tus Huab Tais Yes Xus lub hmoov Tsuj Xeeb. Vim li ntawd, peb yuav los piav ob peb los txog lub txiaj ntsim hmoov Tsuj Xeeb raws li nram qab no.
Tus neeg ntseeg Tswv Ntuj Kav Tos Liv niaj xyoo nco txog Huab Tais Yes Xus lub hmoov Tsuj Xeeb, muaj txiaj ntsim tus dab tsi rau nws ? Yog peb tsis teev Tswv Ntuj, tsis ntseeg Tswv Ntuj, txawm peb nco thiab tsis nco lub hmoov Tsuj Xeeb, nws tsis ntxiv nuj nqes dab tsi rau peb. Tiam sis, yog peb leej twg teev Tswv Ntuj, peb leej twg hwm Tswv Ntuj tiag, Yes Xus lub hmoov Tsuj Xeeb muaj nuj nqes tshaj nyiaj thiab kub, muaj txiaj ntsim tshaj tej laus, tej niam txiv thiab poj yawm tej txiaj ntsim. Ib txwm peb Hmoob yeej ntseeg hais tias tej laus muaj txiaj ntsim, tej laus tso tau koob hmoov rau tej hluas; tej niam tej txi, tej poj yawm tso tau koob hmoov rau tej me nyuam rau tej tub ki. Yeej muaj raws li Hmoob kev hwm niam hwm txiv, hwm poj koob yawm txwv. Tus twg hlub nws niam nws txiv, hwm nws tej poj yawm, tus ntawd yeej taus txais koob hmoov tiag tiag. Peb txoj kev teev Tswv Ntuj, hwm Tswv Ntuj raws li Koom Txoos Kav Tos Liv kev qhuab qhia nws loj dua thiab tseem ceeb dua peb txoj kev teev dab qhuas. Vim li ntawd, txoj kev teev hawm Tswv Ntuj tau txais Tswv Ntuj tej koob hmoov loj tshaj thiab zoo tshaj tas nrho tib neeg ntiaj teb txhua txoj kev teev hawm tib si, muaj koob hmoov tshaj plaws peb tej poj yawm tej koob hmoov tib si los ua ke. Vim peb tej poj yawm yog neeg, tsuas muab tau tib neeg koob hmoov rau peb; kev teev Tswv Ntuj tau Huab Tais Tswv Ntuj koob hmoov, nws loj dua tib neeg koob hmoov. Yes Xus lub hmoov Tsuj Xeeb yog Huab Tais Tswv Ntuj txiaj ntsim pub rau cov neeg hwm Tswv Ntuj thiab teev Tswv Ntuj. Cov tau txais Tswv Ntuj txiaj ntsim yog cov teev Tswv Ntuj : Has Nplas Has, Mos Xes, cov saub, Es Lis Xas Npes, Mab Liab, Pob Zeb, Paj Lug, cov leej ntshiab...Cov neeg txais Tswv Ntuj txiaj ntsim tsis yog txais txij li Yes Xus los txog niaj hnub no. Cov neeg tau txais Tswv Ntuj txiaj ntsim, puav leej yog cov neeg teev Tswv Ntuj, hwm Tswv Ntuj puag thaum chiv keeb, ua ntej Yes Xus piv li Has Nplas Has txog rau Yes Xus txog yav tom qab los txog niaj hnub no thiab mus txog hnub ntiaj teb kawg. Vim li ntawd, kev teev Tswv Ntuj muaj txiaj ntsim loj tshaj plaws tshaj peb lub siab xav tau. Saub Es Xais twb xub txais Tswv Ntuj lub txiaj ntsim hwm Tswv Ntuj. Es Xais thiaj xub ceeb toom qhia rau tsoom neeg teev Tswv Ntuj nrog saub Es Xais ua ke txhawb lawv kev hwm Tswv Ntuj : “5 Vim ib tug me nyuam yug los rau peb, pub tau ib tug tub tuaj rau peb, hwj chim nyob rawv saum nws xwb pwg, luag yuav hu ua : Tuav xam zoo, Tswv Ntuj muaj zog, Leej Txiv nyob mus li, tus vaj txheeb thaj yeeb.” Saub Es Xais cov lus no ua dej ua tshuaj cawm cov neeg ntseeg Tswv Ntuj tso siab rau Tswv Ntuj tiam dhau tiam los txog lub caij tus me tub Yes Xus yug los. Muaj coob tus neeg teev Tswv Ntuj tos Tswv Ntuj ua hnub ua hmo, tos xyoo dhau xyoo, tiam dhau tiam mus txog hnub zoo hnub, hmo zoo hmo : “…muaj ib co neeg zov yaj nyob nruab tshav nruab nrag hmo ntuj zov lawv tej tsiaj 9 Huab Tais tus tshiab txav los rau lawv pom…hais rau lawv tias : “Nej txhob ntshai, kuv tuaj xa ib lub moo zoo rau nej, ib txoj kev zoo siab rau tsoom neeg 11 Hnub no, tus Cawm neeg yug los rau nej, nyob hauv Das Vis lub nroog. Yog Leej Pleev, yog Huab Tais 12 Muaj ib lub cim qhia pub rau nej: nej yuav pom ib tug me nyuam mos qhwv ntaub pw hauv ib lub dab zaub.” Lub txiaj ntsim hmoov Tsuj Xeeb xub tshwm tuaj rau cov teev Tswv Ntuj hwm Tswv Ntuj nyob nruab liaj nruab teb zov tsiaj nog zaub pom ua ntej. Nyob hauv tsoom His Xais Lais, muaj vaj ntxwv Hes Los, muaj cov thawj leej choj Fas Lis Xais, muaj cov tub txawj tub ntse tuav ntaub ntawv, muaj tub lag luam, muaj tej poj ntsuam, muaj cov neeg liaj neeg teb yug tsiaj txhu nyob roob nyob ha. Cov zov tsiaj yog cov pluag hauv tsoom pej xeem. Lawv yog cov khwv ciaj khwv tuag kom muaj noj muaj haus. Lawv yog cov pej xeem raug teb chaws thuam tshaj, txom nyem, tshaib plab, nrog tsiaj pw nruab tshav nruab nrag, tsis da dej, luag saib tsis tshua tau pes tsawg. Tiam sis, Tswv Ntuj xub xa tshiab tuaj tshaj lub moo zoo rau lawv : tus Cawm neeg yug los rau lawv. Tus Cawm neeg kuj yug los zoo li lawv thiab, tsis muaj tsev, tsis muaj txaj chaw zoo. Muaj ib lub cim yuav qhia rau lawv paub tus Cawm neeg, tsis pw txuam zooj muaj txaj chaw mos nyoos. Tiam sis : “nej yuav pom ib tug me nyuam mos qhwv ntaub pw hauv ib lub dab zaub.” Cov zov tsiaj tau lub cim ntawd ua pov thawj qhia rau lawv : tus me nyuam qhwv ntaub pw hauv dab zaub yog lawv tus Huab Tais, yog Leev Pleev. Thaum lawv tuaj txog chaw, muaj raws li cov lus tshiab qhia rau lawv.

Peb txoj kev teev Tswv Ntuj txawv txoj kev ua nom ua tswv, txawv txoj kev nrhiav suab nrhiav npe nrhiav koob meej. Vim li ntawd, tus vaj ntxwv, tus nom tswv, tus nplua nuj, tus pluag, tus neeg raug txim loj faj, tus neeg mob nkeeg da luj luam…sawv daws puav leej muaj nuj nqes tag nrho. Tswv Ntuj hlub tag nrho tus neeg liam txwv thiab tus neeg muaj tsim, tus neeg qhev thiab tus vaj ntxwv, tus teev dab qhuas thiab tus teev Tswv Ntuj. Tiam sis, tsis yog vim Tswv Ntuj hlub ces peb yuav rau siab ua neeg liam txwv, plhom moj los rau siab mus tiam dab. Peb los teev Tswv Ntuj, peb yuav coj li cov zov tsiaj, tsis txhob nyob peb lub qub chaw, peb yuav nrog cov zov tsiaj mus nrhiav tus Cawm neeg yug los rau peb. Cov zov tsiaj tsis plhis ua tub lag luam, tsis plhis ua nom ua tswv. Lawv mus nrhiav tus Cawm neeg li lawv tus neeg zov tsiaj. Peb los teev ntuj li peb tus Hmoob muab qhov zoo tshaj hauv peb Hmoob los teev, los hawm, los qhuas Tswv Ntuj, txhob ua txuj plhis ua lwm haiv neeg xav tias ntshai Tswv Ntuj yuav qhuas dua li tej txhia xib hwb qhia rau sawv daws hnov. Cov zov tsiaj tsis ua neeg muab hlob khav theeb saib tsis taus luag tej li tej nom tswv thiab cov thawj leej choj Fas Lis Xais. Tswv Ntuj thiaj xub qhia Tswv Ntuj lub txiaj ntsim rau cov zov tsiaj tseg cov nom tswv thiab cov Fas Lis Xais : “Nyob saum txheej ntuj siab, Tswv Ntuj nto meej nto moo, tsoom tib neeg Tswv Ntuj nyiam, thaj yeeb nyab xeeb nyob ntiaj teb.”

Ib tsoom phooj ywg, peb los teev Tswv Ntuj, ntiaj teb tib neeg yog Tswv Ntuj tug, Tswv Ntuj hlub tsis txawj tag. Vim li ntawd, Tswv Ntuj thiaj li xa Tswv Ntuj Leej Tub Yes Xus los cawm tag ntiaj teb neeg. Lub txiaj ntsim hmoov Tsuj Xeeb yog muab rau tag ib tsoom neeg teev Tswv Ntuj kom qhuab qhia rau tas ntiaj teb neeg cov pluag, cov txom nyem kom paub npaum li cas lawv yog tsoom tib neeg Tswv Ntuj hlub thiab nyiam dua tej tib si. Vim li ntawd, Tswv Ntuj Leej Tub thiaj yug los nrog lawv ua kwv ua tij, ua phooj ua ywg, muaj lub neej txom nyem, tsis muaj vag muaj tsev nyob ib yam peb neeg txom nyem. Yog peb leej twg tshaib thiab nqhis, raug luag ntxub, raug luag thuam, peb txhob poob siab, Huab Tais Yes Xus tuaj cawm peb, nws nrog peb tshaib thiab nqhis, raug neeg ntxub, raug neeg thuam kom coj tau peb muaj Leej Txiv lub hwj chim. Niaj hnub no, thov kom lub txiaj ntsim hmoov Tsuj Xeeb txhawb kom peb tso siab rau Huab Tais Tswv Ntuj ruaj thiab khov.

22.12.2011 Cwj Vuam Chiv

**NrhiavTswvNtuj** 23rd December 2011, 1:01 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°6

COV ZAJ NYEEM HNUB 25/12/2011 ( Hnub Tsuj Xeeb - Xyoo B )

Post NrhiavTswvNtuj 23rd December 2011, 1:01 pm

COV ZAJ NYEEM - Xyoo B 2011-12 ) 13246710

( Hnub Tsuj Xeeb - Xyoo B )

COV ZAJ NYEEM - Xyoo B 2011-12 ) 20111212

Zaj nyeem 1: Es Xais(His Xais) 52, 7-10:
Cav lus zoo txog tus tshaj tias HUAB TAIS rov tsa Xis Yoos.

7 Tus xa lub Moo Zoo pem hauv
sab tuaj, nws ob txhais taw zoo
nkauj. Nws tshaj tias kev thaj yeeb tuaj
lawm ! Nws qhia sawv daws paub tias
kev noj qab nyob zoo tuaj txog lawm,
nws tuaj tshaj kev cawm neeg.
Nws hais rau Xis Yoos tias :
"Koj tus Tswv Ntuj ua vaj !"
8 Koj mloog mas ! Koj cov neeg zov
keeb tsa suab, lawv ua ke qw zoo siab
vim lawv pom xyeem ntawm qhov muag,
HUAB TAIS rov qab los nyob Xis Yoos.
9 Yes Lus Xas Les cov tsev uas tau pob
tas, nej sawv daws luag ua suab ntas ntua,
vim HUAB TAIS nplij nws haiv neeg,
nws txhiv Yes Lus Xas Les.
10 Tus HUAB TAIS Ntshiab loj npab
ntshuas nyob ntawm txhua haiv neeg xub
ntiag. Npoo ntuj npoo ntiaj teb pom peb
tus Tswv Ntuj txoj kev cawm neeg.

Zaj Nyeem Ob: Tsab Ntawv Rau Cov Hes Nplaws (Hes Nplaws) 1, 1-6

Tswv Ntuj xa nws Leej Tub tuaj cev nws cov lus rau peb.

1 Puag thaum ub, Tswv Ntuj kom
cov Yaj Saub siv ntau txoj kev los
cev nws cov lus rau peb cov yawg koob ntau zaus kawg.
2 Lub zim txwv no, txog lub zwj ceeb
kawg lawm, Tswv Ntuj thiaj tso nws Leej
Tub tuaj cev nws cov lus rau peb. Tswv
Ntuj tsa Leej Tub ua tus txais lub cuab
tam tas huv tib si, thiab nws nrog Leej Tub tsim lub sim ceeb.
3 Leej Tub yog Tswv Ntuj lub hwj chim
ci ntsa iab, yog Tswv Ntuj tus duab. Leej
Tub lo lus muaj zog, Leej Tub nres tas
lub sim ceeb huv tib si. Nws ntxuav
txhua txoj kev txhaum pov tseg huv tib si,
ces nws zaum ntawm tus Tswv Ntuj muaj
hwj huam sab xis nyob txheej ntuj saud.
4 Nws loj dua ib tsoom Tshiab, vim nws
tau txais ib lub npe zoo, lub npe muaj hwj
chim loj dua cov Tshiab tej npe huv tib si.
5 Nej xav saib puas muaj ib tug Tshiab
uas Tswv Ntuj tau hais rau nws tias :
“Koj yog kuv Leej Tub, hnub no kuv xeeb koj.”
Thiab Tswv Ntuj tseem hais rau nws tias :
“Kuv yog nws Txiv, nws yog kuv Leej Tub.”
6 Thaum Tswv Ntuj xa nws Leej Tub
tuaj ua tus Xub Yug los nyob hauv lub
sim ceeb no, mas nws tseem rov qab hais dua tias :
“Kuv xav kom tas Tswv Ntuj tsoom Tshiab hawm nws.”

Zam Ntawv Moo Zoo 1,1-18: Leej Lo Lus lub hwj chim.

1 Thaum lub hauv paus, Leej Lo
Lus yeej nyob txawm lawm. Leej Lo
Lus nyob ze Tswv Ntuj. Leej Lo Lus yog
Tswv Ntuj. 2 Thaum lub hauv paus, Leej
Lo Lus nyob ze Tswv Ntuj. 3 Tas ib
puas tsav yam tshwm los vim nws. Yog
tsis muaj nws, mas tsis muaj ib yam dab
tsi tshwm tau los nyob.
4 Txoj sia xeeb txawm nyob hauv nws.
Txoj sia yog neeg qhov pom kev.
5 Ces qhov pom kev ci hauv qhov tsaus
ntuj, qhov tsaus ntuj thaiv tsis tau qhov pom kev.
6 Muaj ib tug neeg tuaj, yog Tswv Ntuj
xa nws tuaj. Nws lub npe hu ua Zam.
7 Nws yog ib tug tim khawv tuaj ua pov
thawj txog qhov pom kev, kom txhua leej
txhua tus ntseeg vim nws. 8 Tus ntawd
tsis yog qhov pom kev, tab sis nws yuav
ua tim khawv txog qhov pom kev.
9 Qhov pom kev uas yog qhov tseeb, ci
tuaj ziab txhua leej tib neeg, nws tuaj
nyob hauv lub sim ceeb. 10 Nws yeej
nyob txawm hauv lub sim ceeb no. Yog
nws ua kom muaj lub sim ceeb no tshwm
los, tsis kav lub sim ceeb tsis paub nws.
11 Nws los nyob hauv nws tsev, tsis kav
nws cov neeg tsis txais nws. 12 Tab sis,
cov neeg uas txais nws thiab ntseeg txog
nws lub npe, mas nws pub hwj huam rau
lawv kom los ua Tswv Ntuj cov me
nyuam tas huv tib si. 13 Cov ntawd, yog
cov uas tsis yug ntawm ntshav los, tsis
yog lub cev nqaij xav kom lawv yug los,
thiab kuj tsis yog neeg lub siab xav kom
lawv yug los. Lawv yog cov yug ntawm
Tswv Ntuj los. 14 Ces Leej Lo Lus xeeb
los ua ib lub cev neeg, nws nrog peb
nyob. Peb tau ntsia ntsoov nws lub hwj
chim. Yog lub hwj chim uas Leej Tub
twm zeej tau ntawm Leej Txiv los. Leej
Tub muaj txiaj ntsim thiab qhov tseeb nyob puv hauv nws.
15 Zam ua tim khawv txog Leej Lo
Lus : Zam tshaj hais tias :
"Tus no yog tus kuv hais txog tias, tus uas
lawv kuv qab tuaj, mus ua kuv ntej lawm,
vim nws xub nyob dua kuv."
16 Peb puav leej tau txais qhov txhawv
nphau nphwv hauv nws los : peb txais
txiaj ntsim sis laub sis lug. 17 Txoj Cai
yog Mais Xes muab, hos lub txiaj ntsim
thiab txoj kev tseeb yog Yes Xus Pleev coj tuaj.
18 Tsis muaj leej twg tau pom Tswv Ntuj
ib zaug. Tab sis Leej Tub Twm Zeej uas
yug ntawm Tswv Ntuj los, thiab nws
nyob nraim hauv Leej Txiv lub xub ntiag,
nws ua kom peb paub Tswv Ntuj.

**NrhiavTswvNtuj** 31st December 2011, 2:03 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°7

COV ZAJ NYEEM HNUB 01/01/2012 ( Mab Liab Tswv Ntuj Leej Niam - Xyoo B )

Post NrhiavTswvNtuj 31st December 2011, 2:03 am

COV ZAJ NYEEM - Xyoo B 2011-12 ) Coollo17

( Mab Liab Tswv Ntuj Leej Niam - Xyoo B )

Zaj nyeem 1 : Xam Phaj 6,22-27 Zaj foom hmoov zoo.

22 HUAB TAIS hais cov lus no rau MaiS Xes :
23 "Koj hais lus rau As Loos thiab nws
cov tub, koj hais rau lawv tias : Nej yuav
foom hmoov zoo rau cov His Xas Lais,
nej yuav foom lus zoo li no rau lawv :
24 'Thov kom HUAB TAIS foom hmoov
zoo rau koj thiab pov hwm koj ! 25 Thov
kom HUAB TAIS lub ntsej muag ci ntsa
iab rau saum koj thiab pub nws lub txiaj
lub ntsim rau koj ! 26 Thov kom HUAB
TAIS qhib nws lub ntsej muag rau koj
pom thiab pub kev thaj yeeb rau koj !'
27 Koj qhia kom lawv siv kuv lub npe
rau saum cov His Xas Lais li no, ces kuv
yuav foom hmoov zoo rau lawv."

Zaj nyeem 2 : Nkas Las Tais 4,3-7

3 Peb kuj zoo li ntawd thiab ; thaum peb
tseem yau, mas peb zoo li ib co qhev
nyob hauv lub qab ntuj no. 4 Tiam sis
nyem no, txog lub caij Ntuj teem, Tswv
Ntuj tso nws Leej Tub tuaj yug ntawm ib
tug poj niam los. Nws zwm rau Mais Xes Txoj Cai.
5 Nws tuaj txhiv cov uas zwm rau Mais
Xes Txoj Cai, kom nws rub tau peb los ua
Ntuj cov Tub. 6 Vim nej yog Ntuj cov
tub, mas Tswv Ntuj thiaj xa nws Leej Tub
lub tswv yim tuaj nyob hauv peb lub
siab, nws qw hauv peb nruab siab tias :
‘As Npas, Txiv !’ 7 Ua li mas koj tsis
yog ib tug tub qhev lawm. Koj yog ib
leeg tub cag, mas koj kuj yog tus yuav
txais Tswv Ntuj lub cuab tam, vim Tswv Ntuj pub li ntawd.

Lus Kas Ntawv Moo Zoo 2, 16-21

16 Ces lawv maj zeeg tuaj mus. Lawv
pom Mab Liab thiab Yos Xes, thiab pom
tus me nyuam mos pw hauv dab nyuj.
17 Thaum lawv pom li ntawd, lawv piav
lo lus uas tus Tshiab tau qhia rau lawv
txog tus me nyuam. 18 Tus twg hnov, tus
twg kuj qhuas txog tej lus uas cov zov yaj
hais rau lawv. 19 Hos Mab Liab, nws ua
tib zoo khaws tej lus no huv si cia rau
nruab siab. 20 Cov zov yaj rov mus tsev,
lawv foom koob meej thiab cav lus zoo
txog Tswv Ntuj vim tas txhua yam lawv
tau pom thiab tau hnov raws li Ntuj qhia lawv.
21 Thaum dhau lub caij yim hnub lawm,
txog hnub ua lub cim txiav, lawv tis npe
rau tus me nyuam hu ua Yes Xus, yog lub
npe uas tus Tshiab tau qhia Mab Liab
thaum nws tsis tau xeeb tub.

COV ZAJ NYEEM - Xyoo B 2011-12 ) Coollo18

Rau hnub tim 01 lub 01 hli 2012

Tsoom ntseeg sawv daws thiab phooj ywg txhua leej,

Hnub no yog xiab ib hauv lub xyoo tshiab, yog ib hnub ntshiab hnub huv, thov Huab Tais Tswv Ntuj cov koob hmoov rau tas txhua leej txhua tus kom ntsib kev noj qab nyob zoo muaj lub cev nquag plias, siab ntsws thiab ntsuj plig nyob kaj lug mus puv lub xyoo tshiab. Tsis tas li, kuj yog ib hnub ua hmoov loj hwm leej ntshiab Mab Liab Tswv Ntuj leej niam. Cov neeg ntseeg hauv Koom Txoos Kav Tos Liv, peb yuav tsum paub peb lub Koom Txoos tus txhooj tus cai, kev coj thiab nws keeb kwm tej liv xwm. Vim li ntawd, peb yuav piav ob peb los txog kev hwm Mab Liab Tswv Ntuj leej niam hauv Koom Txoos Kav Tos Liv thiab nthuav ob peb los cov ntsiab lus hauv cov zaj nyeem hnub no.

Lub keeb hwm Mab Liab Tswv Ntuj leej niam. Tus neeg ntseeg Kav Tos Liv, peb yuav tsum paub hwm, thiab yoog mus raws li peb lub Koom Txoos Kav Tos Liv qhia rau peb. Yam li peb tsis txhob mus xyaum, txhob mus qog lwm pab lwm pawg neeg ntseeg Yes Xus kev coj peb thiaj tsis nrog lawv yuam kev. Koj tus tsis yuam kev, yuav tau ceev faj thiab txuag koj. Vim nej twb nyob hauv Koom Txoos Kav Tos Liv, lub Koom Txoos Niam, nej yuav tsum tso siab rau nej lub Koom Txoos Niam zaj lus qhuab qhia. Tsis txhob ua neeg cav ncauj cam thawj li luag tej. Nej twb paub ntsoov, tus maum tsawb nej muab cog hauv av, nws yeej xub txhawv, nej xub tau tus maum noj dua tus me nyuam, puas yog li ntawd ? Hauv txoj kev teev Yes Xus, kuj piv tau zoo li ntawd. Lub Koom Txoos Niam yeej coj txhij dua, ua haum kab haum kev dua, nws muaj txiaj ntsim dua cov me nyuam koom txoos qhia tsis raug kab, taug tsis ncaj ke. Vim li ntawd, tus Kav Tos Liv yuav tsum rua muag los ntsia, qhib ntsej los mloog, tso siab rau lub Koom Txoos Kav Tos Liv kev coj qhia. Tus tsis mloog lub Koom Txoos qhia, nws kawg yuam kev. Tus yuam kev lub Koom Txoos Niam mus rau lub me nyuam, nws yuam loj tshaj thiab yuav pluag txiaj ntsim mus txog qhov kawg. Hos tus neeg yuam kev los nrhiav tau lub Koom Txoos Niam, tus ntawd, muaj txiaj ntsim. Vim li ntawd, tus Kav Tos Liv yuav tsum ceev faj kom zoo tiag tiag txhob cia nws yuam kev.
Peb yuav tau tig mus ntsia peb lub Koom Txoos hla dhau txhiab pua xyoo, coj qhia txhiab pua tiam neeg teev hawm Tswv Ntuj los txog txij no. Lub Koom Txoos hais dab tsi rau cov neeg cam thawj thiab yuam kev ? Hnub xiab 21 lub 6 hli xyoo 431, cov thawj coj lub Koom Txoos tau sib sau ua lub Tuam Rooj Ncauj Lus (Concile Ephèse, aujourd’hui Selçuk, Turquie) hauv lub nroog Mab Liab tau ncaim ntiaj teb mus dua qaum ntuj lawm. Lub Rooj Ncauj Lus Ephèse tau sab laj txog Nestorius, ib tug neeg qhia kev teev hawm Yes Xus yuam kev rau ib zeej tsoom neeg. Nws tsis ntseeg Yes Xus yog tseem Tswv Ntuj. Vim nws tsis kam lees paub Mab Liab yog Tswv Ntuj leej niam (Θεοτόκος.) Nestorius tsis ntseeg tias Mab Liab yug tau Tswv Ntuj Leej Tub. Yog nws tsis hwm Mab Liab, nws kuj tsis ntseeg tau tias Yes Xus yog Tswv Ntuj Leej Tub. Thaum zoo li ntawd, nws tsis ntseeg mus raws lub Koom Txoos kev ntseeg, nws koom tsis tau lub Koom Txoos , nws yuav tsum tawm hauv Koom Txoos (Excommunication) : “Si certains, évêques, clercs ou laïcs, étaient convaincus d'accepter, de partager ou d'enseigner les doctrines contenues dans l'exposé du prêtre Charisius au sujet de l'Incarnation du Fils unique de Dieu, ou bien encore celles, néfastes et déformées de Nestorius... qu'ils tombent sous le coup de la sentence de ce saint concile œcuménique 266 DH” Lub Rooj Ncauj Lus Ephèse tau txiav meej txoj cai no qhuab qhia tsoom ntseeg los txog niaj hnub no, peb tus neeg Kav Tos Liv tsis muaj leej twg cam dhau tus txhooj no : “Nous confessons donc notre Seigneur Jésus-Christ, Fils unique de Dieu, Dieu parfait et homme parfait, fait d'une âme raisonnable et d'un corps, engendré du Père avant les siècles en sa divinité, et à la fin des jours le même pour nous et pour notre salut, né de la Vierge Marie en son humanité ; le même consubstantiel au Père en sa divinité et consubstantiel à nous en son humanité. Car des deux natures l'union s'est faite ; c'est pourquoi nous confessons un seul Christ, un seul Fils, un seul Seigneur. Et à cause de cette notion d'une union sans mélange, nous confessons que la sainte vierge est Mère de Dieu, parce que le Verbe de Dieu s'est fait chair et s'est fait homme, et que dès la conception il s'est uni le Temple qu'il a pris d'elle 272 DH ” Yes Xus yog tseem Tswv Ntuj thiab yog tseem tib neeg…Mab Liab yog Tswv Ntuj leej niam. Tsis yog thaud xwb, niaj hnub no, yeej muaj ib txhia neeg teev Yes Xus tseem cam qees tsis kam ntseeg tias Mab Liab yug tau Tswv Ntuj Leej Tub li thaum ub Nestorius. Tiam sis, kom tus neeg Kav Tos Liv nco ntsoov peb cov yawg koob lus qhuab qhia hwm Mab Liab yog Tswv Ntuj leej niam.

Hnub no, xiab ib lub xyoo tshiab, yog hnub lub Koom Txoos Kav Tos Liv hwm Mab Liab Tswv Ntuj leej niam. Peb yuav nco ntsoov lub Koom Txoos kev qhuab qhia peb thiaj tsis yuam kev li tej txhia neeg teev Yes Xus niaj hnub no. Qhov peb tsis yuam kev pub peb txais tau cov txiaj ntsim Tswv Ntuj pub rau nws lub Koom Txoos. Cov txiaj ntsim no yog Tswv Ntuj kev thaj yeeb. Tswv Ntuj kev thaj yeeb yog zoo li cas ? Thaum tib neeg tau cam hla dhau Tswv Ntuj lus mus mloog dab phem lus, tib neeg ntxeev siab rau Tswv Ntuj, tib neeg siab ntsws tsis npuab Tswv Ntuj, tib neeg tsis muaj kev thaj yeeb lawm, yog tib neeg kev txhoj kev txhaum. Vim Mab Liab mloog Tswv Ntuj lus, ces Tswv Ntuj lus xeeb txawm hauv Mab Liab cev. Mab Liab yug tau Tswv Ntuj Leej Tub, Mab Liab yog Tswv Ntuj leej niam. Yes Xus yog tseem Tswv Ntuj thiab yog tseem tib neeg coj Tswv Ntuj kev thaj yeeb tuaj cog rau tas txhua tus tib neeg kom txhua tus tib neeg muaj Tswv Ntuj kev thaj yeeb ua Tswv Ntuj tub ki : “6 Vim nej yog tub ki, Tswv Ntuj xa nws Leej Tub txoj sia tuaj rau peb siab ntsws peb thiaj muaj cuab kav hu : As Npas, Leej Txiv.7 Kom xwv koj tsis yog qhev, hos tub ki ; koj twb yog tub ki, koj yuav txais cuab tam vim Tswv Ntuj.” Peb tus twg tsis hwm Mab Liab Tswv Ntuj leej niam, tus ntawd yuav ua cas txais Tswv Ntuj lub cuab tam kev thaj yeeb Mab Liab yog tus txais tus muaj Tswv Ntuj cuab tam kev thaj yeeb yuav pab tau peb ? Tsis tas li ntawd, hnub xiab ib tsis yog hnub xiab lub xyoo tshiab xwb. Yog ib hnub dawb hnub huv, txiv vaj qhia Benoît 16, tus sawv Pob Zeb lub chaw, caw tag lub ntiaj teb neeg los tsim kev thaj yeeb kev cog phooj ywg nyob ntiaj teb no. Peb tib neeg nyob ntiaj teb, yuav tau sib yoog, tso kev sib cav sib ceg, tso kev sib chim sib ntxub pov tseg. Nyias muaj nyias kab lis kev cai teev hawm, nyias muaj nyias txuj ci, tiam sis tas sawv daws puav leej nyiam zoo, ntshaw qhov zoo. Kev cog phooj ywg yog muab yam zoo hauv nyias kev teev hawm, hauv nyias txuj ci los rhawv kev thaj yeeb : “La paix est une aspiration profonde et irrépressible, présente dans le cœur de toute personne, au-delà des identités culturelles spécifiques.Journée mondiale de la paix 1.1.2006 Benoît 16”

Ib tsoom phooj ywg sawv daws, hmoob poj yawm txwv koob kev qhuab qhia tub ki hwm niam hwm txiv, txawm hmoob tsis paub, hmoob twb coj thiab ua raws li Tswv Ntuj siab nyiam. Peb los teev Tswv Ntuj, tiam sis, peb yuav nco ntsoov hauv peb nruab siab peb poj yawm txwv koob tej lus koob lus hmoov. Yam li cov zov tsiaj tuaj xyuas Mab Liab, lawv hais tau ib co lus txog nws tus me tub Yes Xus, Mab Liab nco nraim lawv cov lus hauv nws nruab siab.

29.12.2011 Cwj Vuam Chiv

**NrhiavTswvNtuj** 6th January 2012, 1:16 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°8

COV ZAJ NYEEM HNUB 08/01/2012 ( Huab Tais tawm tuaj - Xyoo B )

Post NrhiavTswvNtuj 6th January 2012, 1:16 pm

COV ZAJ NYEEM - Xyoo B 2011-12 ) 13258910

( Huab Tais tawm tuaj - Xyoo B )

COV ZAJ NYEEM - Xyoo B 2011-12 ) 20120111

Zaj nyeem 1 : His Xais 60,1-6 Yav tom ntej Yes Lus Xas Les yuav muaj koob meej.

1 Yes Lus Xas Les, koj sawv !
Kom koj qhov pom kev ci ntsa iab
mas ! Vim koj qhov pom kev tuaj txog,
thiab HUAB TAIS lub hwj chim sawv los ziab koj.
2 Ntsia saib ! Qhov tsaus ntuj vov tas
lub ntiaj teb. Ib twv huab dub vov cov
haiv neeg. Tab sis HUAB TAIS lub hwj
chim nyob hauv koj.
3 Cov kuj cuab taug kev mus, nyob hauv
koj qhov pom kev. Koj yog lub hnub
tawm tuaj kaj cov vaj kom lawv pom kev mus.
4 Koj tsa muag ntsia nyob ncig koj mog !
Koj yuav pom sawv daws sib sau tuaj
cuag koj. Koj cov tub tuaj tej teb chaws
deb tuaj, lawv ris koj cov ntxhais ntawm duav.
5 Koj pom li ntawd, koj yuav ua ntsej
muag luag ntxhi. Koj lub plawv yuav
dhia paj paws, koj lub siab yuav nthuav.
Tej txhab kub nram dej ntuj tuaj thawj
koj. Cov kuj cuab tej nyiaj tej kub tuaj nyob hauv koj.
6 Cov ntxhuav tuaj ua npoj ntws. Cov
thauj tuaj ntawm Mas Dias thiab Es Fais.
Lwm cov tuaj Ses Npas tuaj, lawv thauj
kub thiab txab txiv yoov tuaj, lawv tshaj
HUAB TAIS cov hauj lwm loj.

Zaj nyeem 2 : Es Fes Xos 3,2-3a.5-6

2 Kuv xav tias nej yeej tau hnov piav
txog qhov Tswv Ntuj pub txiaj ntsim zoo
li cas rau kuv, kom kuv tau kev pab nej.
3 Tswv Ntuj qhib nws cov txuj ci zais
tob tob los rau kuv pom xyeem : yog cov
lus kuv nyuam qhuav piav me ntsis rau
nej ntawd. 4 Nej twm kuv cov lus no, nej
yuav pom tias, kuv kuj to taub Leej Pleev
cov txuj zais tob tob thiab.
5 Ntuj tsis tau qhib cov txuj zais tob no
rau txheej laus thaud, xws li nws nyuam
qhuav qhib rau nws cov Hauv Paus Xa
Lus ntshiab, thiab rau nws cov Yaj Saub,
nyob hauv Leej Ntuj Plig : 6 yog qhov
tias cov neeg teev pej kum dab txais ib
lub cuab tam xws luag, lawv ua tes taw
nyob hauv tib lub Cev, lawv txais Ntuj
cov lus cog ib yam li luag, nyob hauv Yes
Xus Pleev, vim lawv mloog lub Moo Zoo.

Mas Tais Ntawv Moo Zoo 2,1-12 Cov kws hnub qub tuaj hawm Yes Xus.

Yes Xus yug los nyob Npes Les Hes,
Yus Das teb, yog lub caij Hes Los ua vaj.
Muaj ib co kws hnub qub tuaj Toob Fab
tuaj txog Yes Lus Xas Les. 2 Lawv nug tias :
"Tus vaj Yus Das uas nyuam qhuav yug
los nyob qhov twg ? Peb pom nws lub
hnub qub tawm nyob Toob Fab, peb tuaj hawm nws."
3 Tus vaj Hes Los hnov li ntawd, nws lub
siab nphau npog. Tas Yes Lus Xas Les
kuj nrog nws ua siab nphau npog thiab. 4
Hes Los hu cov thawj leej choj thiab pej
xeem cov kws ntawv tuaj tas huv tib si.
Nws nug lawv txog qhov chaw uas Leej
Pleev yuav yug los. 5 Lawv teb tias :
"Nyob Npes Les Hes, Yus Das teb, vim
tus yaj saub sau tseg tias :
6 Koj, Npes Les Hes, Yus Das thaj av,
koj tsis yog lub zos Yus Das me tshaj cov,
vim ib tug thawj coj yuav tawm hauv koj
los, nws yuav zov kuv haiv His Xas Lais."
7 Hes Los hu cov kws hnub qub twj ywm
tuaj. Nws kom lawv qhia meej lub sij
hawm uas lub hnub qub tau tawm tuaj.
8 Ces nws cia lawv mus Npes Les Hes.
Hes Los hais rau lawv tias :
"Nej mus tshuaj tus me nyuam kom meej,
thaum nej nrhiav tau nws, nej xa xov qhia
kuv paub, vim kuv xav mus hawm nws thiab."
9 Tus vaj tso lus li ntawd, ces lawv sawv
kev mus. Thaum ntawd, lub hnub qub uas
lawv tau pom nyob Toob Fab rov mus ua
lawv ntej. Nws mus nres saum qhov chaw
uas tus me nyuam nyob. 10 Lawv rov
pom lub hnub qub, mas lawv zoo siab
kawg. 11 Lawv chaws mus hauv tsev,
lawv pom tus me nyuam thiab nws niam
Mab Liab, lawv pe, lawv hawm nws.
Lawv qhib lawv cov phij xab, lawv cev
kub, cev txab ntoo xyab, thiab cev txab
txiv yoov ua paj tshab rau nws.
12 Ntuj qhia lawv hauv npau suav kom
txhob rov qab mus pem Hes Los tsev.
Ces lawv taug dua ib txog kev rov mus
lawv teb chaws.

COV ZAJ NYEEM - Xyoo B 2011-12 ) 13258911

Rau hnub tim 08 lub 01 hli 2012

Tsoom ntseeg thiab phooj ywg txhua leej,

Hnub no, tas nrho tsoom neeg teev Tswv Ntuj hauv lub Koom Txoos Kav Tos Liv ua lub hmoov (Ἐπιφάνεια, manitestation de Dieu) txhais lus hmoob : Huab Tais Tswv Ntuj tshwm sim rau ntiaj teb neeg txhua leej txhua tus. Ua li lub hmoov no muaj txiaj ntsim tus dab tsi rau ib tug neeg teev Tswv Ntuj ? Peb yuav khaws ob lub ntsiab lus hauv cov zaj nyeem hnub no ua tshuaj cawm peb txoj kev ntseeg :

Peb xub mloog saub Es Xais cov lus txhawb txhim. Ua neej nyob, dua ntawm kev ntshaw noj haus thiab nyiaj txiag, txoj sia yog yam tib neeg ntshaw tshaj plaws. Vim li ntawd, txoj sia ua chaw rau tib neeg txhawj xeeb khuv xim tshaj dua tej tag tib si. Txoj sia yog Tswv Ntuj tug, Tswv Ntuj faib tuaj rau daim av, tej nroj tsuag, kab ntsaum, tsiaj txhu nruab deg nruab nqhuab, lub hnub, lub hli, tej hnub qub thiaj ciaj sia. Rau peb tib neeg kuj tib yam. Tib neeg yog tsav Tswv Ntuj tsim muaj siab muaj ntsws nrog tau Tswv Ntuj txuas lus, ua rau Tswv Ntuj hlub thiab tshua dua tag tib si. Tswv Ntuj tos ntshi saib puas muaj leej tib neeg twg mloog lus, mob siab ua raws li Tswv Ntuj nyiam. Yam li leej twg puas ua tsau pom kev rau tej neeg nyuaj siab nyob tsaus ntuj nti, ua teeb kaj nrig rau cov neeg txhawj xeeb tsis pom qab ua neej. Rau luag tus noj qab nyob zoo, ces cav tsis txawj nyuaj siab. Yus tus txhawj xeeb cas yuav ceeb laj tag npaud, hnub tam li niaj, hmo tam li xyoo ; ib hnub tsis txawj tsaus ntuj, ib hmo tsis txawj kaj ntug. Lub neej cas yuav nyuaj siab tsis txawj tag, kheev lam muaj tus pab tau yus ris yus txoj kev txhawj xeeb ntshai yus siav yuav loj tuaj. Saub Es Xais thiaj hais tias : “2 Ntsia saib ! ntuj tsaus ntais qhwv tas daim av thiab teb tsaus nti qhwv cov haiv neeg ; tab sis Huab Tais sawv los saum koj thiab nws lub hwj chim ci tuaj saum koj.3 Tej teb chaws yuav sawv kev tuaj cuag koj txoj kev pom kev thiab tej vaj ntxwv cuag koj kev kaj ntug” Ntiaj teb kev teev dab qhuas los teev lwm yam kev cai, tsuas ua leg cav tsis muaj hwj huam cawm neeg tam lub ntuj tsaus tav twg li yuav kaj. Sawv daws yuav los koom His Xais Lais pe hawm tus tseem Huab Tais Tswv Ntuj, tus nyob saum lub yis ntuj ua Vaj Ntxwv muaj hwj huam loj kav txhiab niag tim puas xyoo, tus tseem Vaj Ntxwv zaum lub yis teb mus ib txhis thiaj tseem kev kaj lug. Tswv Ntuj thiaj xeeb ua neeg kom cawm tau tus neeg ncaj ncees, mloog lus kom dim tas txhua yam kev tsaus ntuj, yog Yes Xus : “5 Koj yuav pom, koj yuav luag ntxhi…Thooj nyiaj kub sab dej hiav txwv nraum ub yuav sis laub sis lug tuaj cuag koj nrog cov teb chaws nplua nuj…Tas cov neeg Ses Npas nqa kub thiab xyab ntaw tuaj cav lus zoo txog Huab Tais.” Vim Tswv Ntuj tshua thiab hlub tas ntiaj teb tib neeg, kom txhua tus muaj kev kaj siab nyob luag ntxhi ntawm Tswv Ntuj. Tsis yog Tswv Ntuj cawm cov neeg hwm Tswv Ntuj xwb, Tswv Ntuj xav cawm kom tag txhua leej tus phem tus zoo, teev dab qhuas, teev mlom, txawm lim hiam, luab tsuab ua dev npua, rov taw tuam ntuj los yog Tswv Ntuj me nyuam…Nyias yuav tsum nrauj nyias txoj kev phem pov tseg, nyias thiaj li yuav muaj kev nyab xeeb tiag tiag saum daim av thiab hnub kawg nrog tau Tswv Ntuj ciaj sia ib txhis ua ke saum lub yis ntuj.

Hauv Mas Tais tsab ntawv Moo Zoo peb mloog hnub no qhia hais tias : Yes Xus yog Tswv Ntuj Leej Tub ib leeg kheej, tshwm tuaj rau tag ntiaj teb neeg. Tsis yog npau suav, Yes Xus yog tseem tseem lub cim Tswv Ntuj cawm tib neeg hauv kev ciaj qhev ua txhaum los ua neeg dawb huv, dim kev txom nyem los ua neej nyab xeeb kaj lug, tsis muaj txob txhawj. Txhua tus neeg ncaj ncees puav leej muaj hmoo. Vim li ntawd, cov txiv muam tseem yog cov xub pom tus me nyuam mos Yes Xus : “Muaj ib co txiv muam sab Toob Fab tuaj txog Yes Lus Xas Les. 2 Lawv hais tias : "Cov Yus Das tus vaj ntxwv nyuam qhuav yug los nws nyob qhov twg ? Nyob Toob Fab, peb pom nws lub hnub qub, peb tuaj pe hawm nws.” Cov txiv muam no yog neeg pej kum teev dab qhuas, tsis yog neeg teev ntuj li His Xais Lais. Tiam sis, lawv yog neeg ncaj ncees, hwm neeg thiab hwm ntuj ua haum Tswv Ntuj siab nyiam. Tswv Ntuj thiaj pub tej lub cim rau lawv pom deev siab, cia hnub qub coj lawv kev tuaj nrhiav tus vaj ntxwv Yus Das nyuam qhuav yug los, txawm lawv tsis paub tias yog Tswv Ntuj Leej Tub. Lawv tsis tuaj tes dawb tes npliag li tej txhia neeg tsis paub cai. Lawv ntim paj tshab yam muaj nqes tshaj plaws tuaj pe tuaj hawm cov Yus Das tus vaj ntxwv. Lawv tsis thuam tus me nyuam, lawv saib nws rau nqe, tsis zoo li vaj Hes Los, cov Yus Das, cov thawj leej choj, cov neeg nyob Yes Lus Xas Les. Cov ntawd, yog cov khib ciaj khib tuag rau tus me nyuam yug los tshiab tsam tuaj txeeb lawv tus nom, txeeb lawv lub koob meej. Vim li ntawd, peb to taub ua cas Tswv Ntuj xub qhia cov txiv muam neeg pej kum no tuaj mus pom, mus pe hawm me nyuam Yes Xus. Lawv yog neeg ncaj ncees, tsis muaj pluaj siab lim hiam, khib npaj tua neeg, nrhiav hwj chim. Lawv nqa nyiaj nqa kub, nqa xyab ntaw tuaj thov koob hmoov. Hos vaj Hes Los thiab cov nyob Yes Lus Xas Les yog lawv lam paub, lawv yuav tsis nqa nyiaj nqa kub thiab xyab ntaw mus hawm, yuav nqa ntaj nqa riam mus ua kom tus me nyuam ploj xwb.

Ib tsoom phooj ywg, lub hmoov hwm Huab Tais Tswv Ntuj tawm tuaj no yog Tswv Ntuj tuaj rau tag ntiaj teb neeg tus phem tus zoo, tus lim hiam, tus ncaj ncees, tus txom nyem tus tau zoo…Cov kwv tij, nej cov nyob hauv cov teb chaws txom nyem, nyob roob nyob hav, tsis tshuav av, tsis pom qab ua noj ; tsis muaj tus pab nej tej me tub me nyuam kawm txuj kawm ci. Tej nom tswv tsis quav ntsej, tsis hlub tsis pab nej hlo. Luag tseem tswj hwm kav nej nruj nreem nti tsis taus, soj ntsuam nej ncauj xub ke mus los, tsis tseev nej teev hawm Tswv Ntuj, tsis tseev kom nej seev kev txom nyem ib los rau leej twg mloog. Tiam sis, cov phooj ywg, nej yog cov Tswv Ntuj hlub thiab tshua li cov txiv muam tuaj pe hawm Huab Tais Yes Xus muab nej kev txom nyem ua paj tshab, vim kev txom nyem yog nej tug. Tswv Ntuj yuav pauj tuaj rau nej, qhib txoj kev dav nom tswv tsis paub rau nej taug, luag yuav kaw tsis tau nej kev, luag peev xwm yuav tsis luaj Tswv Ntuj lub peev xwm. Nej sawv daws ua siab loj, txhob poob siab, Huab Tais Yes Xus yog tus nyob ze nej, nej yog cov yuav xub pom.

Tim 05.01.2012
Cwj Vuam Chiv

**NrhiavTswvNtuj** 14th January 2012, 8:41 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°9

COV ZAJ NYEEM HNUB 15/01/2012 ( Hnub chiv 2 Nruab xyoo - Xyoo B )

Post NrhiavTswvNtuj 14th January 2012, 8:41 am

COV ZAJ NYEEM - Xyoo B 2011-12 ) Z4f11c10

( Hnub chiv 2 Nruab xyoo - Xyoo B )

Zaj nyeem 1 : Xaws Mus Es(Xas Muas)3,3b-10.19

Xas Muas pw hauv HUAB
TAIS Kem Ntshiab uas Tswv Ntuj lub
Xab Cog Lus nyob.
4 HUAB TAIS hu Xas Muas tias :
"Xas Muas ! Xas Muas !"
Tus me nyuam teb tias :
"Kuv nyob ntawm no !"
5 Ces nws khiav mus hais rau Es Lis tias :
"Koj hu kuv, kuv thiaj los."
Es Lis hais tias :
"Tub, kuv tsis tau hu koj. Koj rov mus pw."
Xas Muas rov mus pw.
6 HUAB TAIS rov hu nws dua tias :
"Xas Muas ! Xas Muas !"
Ces Xas Muas mus txog ntawm Es Lis,
nws hais rau Es Lis tias :
"Koj hu kuv, kuv thiaj los ntawm no."
Es Lis hais tias :
"Tub, kuv tsis tau hu koj. Koj rov mus pw."
7 Xas Muas tseem tsis tau paub HUAB
TAIS. Vim tsis tau muaj leej twg qhia
HUAB TAIS lo lus rau nws.
8 HUAB TAIS rov hu Xas Muas zaum
peb. Xas Muas sawv mus txog ntawm
Es Lis, nws hais tias :
"Koj hu kuv, kuv thiaj los ntawm no."
9 Ces Es Lis thiaj mam to taub tias yog
HUAB TAIS hu tus me nyuam ntawd. Es
Lis hais rau Xas Muas tias :
"Koj mus pw. Yog muaj tus hu koj mas
koj yuav hais tias : HUAB TAIS, koj hais
lus mas. Koj tus tub txib mloog koj !"
Ces Xas Muas rov mus pw qhov chaw
qub. 10 HUAB TAIS tuaj nyob ntawd.
HUAB TAIS hu nws xws li thawj peb
zaug ua ntej tias :
"Xas Muas ! Xas Muas !"
Xas Muas teb tias :
"Koj hais lus mas ! Koj tus tub txib mloog koj !"
19 Xas Muas hlob. HUAB TAIS nrog
nws nyob. HUAB TAIS tau hais dab tsi
rau Xas Muas lawm mas HUAB TAIS
tsis ua yam ntawd poob li ! 20 Txij Daas
mus txog Npes Xas Npes mas, tas tsoom
His Xas Lais paub tias Xas Muas yog tus
yuav nce ua HUAB TAIS tus Yaj Saub.

Zaj nyeem 2 : 1 Kos Lis Nthos 6,13b-15a.17-20

13 Tswv Ntuj yuav rhuav kom lub no thiab tej ntawd ploj tas;
txhob cia lub cev luab tsuab ua dev,
tiam sis cia rau Huab Tais thiab Huab Tais rau lub cev.
Lub cev yog tshwj tseg rau Huab Tais,
thiab Huab Tais kuj tshwj zias nws tseg rau lub cev.
14 Tswv Ntuj uas nws tau tsa Huab Tais
sawv rov los, nws lub hwj huam kuj yuav
tsa peb sawv rov los thiab.
15 Nej tsis paub tias nej lub cev yog Leej
Pleev cov tes taw lod ?
17 Hos tus npuab Huab Tais, nws
nrog Huab Tais koom ib lub tswv yim xwb.
18 Nej txav deb ntawm txoj kev ua dev
ua npua mog. Tas puas tsav yam txhaum
neeg ua, mas tsuas yog txhaum tuaj sab
nraud tuaj rau hauv neeg lub cev. Hos tus
ua dev ua npua, mas nws ua txhaum rau
nws lub cev kiag.
19 Nej tsis paub tias nej lub cev yog
Leej Ntuj Plig Ntshiab lub tsev nyob lod ?
Nws nyob hauv nej ; nej txais nws ntawm
Tswv Ntuj los. Tab sis nej tsis paub tias
nej tsis yog nej tug. 20 Vim muaj tus tau
muas nej tiag ! Li ntawd mas nej kav tsij
ua kom Tswv Ntuj muaj koob meej nyob
hauv nej lub cev mog !

Zam Ntawv Moo Zoo 1,35-42, Thawj pab thwj tim.

35 Hnub tom qab, Zam nrog nws ob tug
thwj tim rov sawv ntsug nyob ntawd dua.
36 Nws ntsia Yes Xus hla tuaj mus, nws hais tias :
"Neb ntsia ! Tswv Ntuj tus Yaj."
37 Ob tug thwj tim hnov Zam hais li
ntawd, nkawd raws Yes Xus qab mus.
38 Yes Xus tig los, nws pom nkawd raws
nws, ces Yes Xus hais rau nkawd tias :
"Neb nrhiav dab tsi ?"
Nkawd hais rau Yes Xus tias :
"Las Npis, lo lus no txhais tias Xib Hwb,
koj tsev nyob qhov twg ?"
39 Yes Xus hais rau nkawd tias :
"Neb tuaj, neb yuav pom."
Ces nkawd mus, nkawd pom qhov chaw
Yes Xus nyob. Hnub ntawd, nkawd nrog
Yes Xus nyob. Thaum ntawd kwv yees
plaub teev hnub qaij.
40 Ob tug thwj tim uas hnov Zam hais li
ntawd thiab nkawd raws Yes Xus qab
mus, ib tug yog As Nres, Xis Moos Pob
Zeb tus kwv. 41 As Nres xub ntsib nws
tus tij laug Xis Moos, nws hais rau Xis Moos tias :
"Wb ntsib tus Mes Xias lawm," -lo lus
no txhais tias Leej Pleev-
42 As Nres coj Xis Moos mus cuag Yes
Xus. Yes Xus ntsia Xis Moos, nws hais tias :
"Koj yog Xis Moos, Zam tus tub, koj lub
npe yuav hu ua Kes Fas," -lo lus no
txhais tias- : Pob Zeb.

2012/01/15-Homélie - Nthuav ntawv Ntshiab

COV ZAJ NYEEM - Xyoo B 2011-12 ) Z4f11c11

Rau hnub tim 15 lub 01 hli 2012

Ib tsoom ntseeg thiab phooj ywg txhua leej,
Hnub no, peb nkag rau hnub chiv 2 lub caij nruab xyoo. Tiam sis, kuj yog ib hnub ua hmoov loj nyob hauv lub Koom Txoos Kav Tos Liv. Nej twb paub, cov ntseeg Kav Tos Liv, peb muaj ib tug tswj saib peb, peb yuav mloog nws thiab hwm nws. Peb tus tswj yog txiv vaj qhia Benoît 16, nws yog peb txiv, nws sawv Huab Tais Yes Xus npe tswj peb lub Koom Txoos Kav Tos Liv. Hnub no, nws caw tag nrho ib tsoom ntseeg sawv daws ua lub hmoov nco txog ib tsoom neeg tsiv teb tsaws chaw thiab thoj nam : “La journée mondiale des Migrants et des Réfugiés, World day of Migrants and Refugees” Vim li ntawd, peb yuav los cev txiv vaj qhia thiab cov tswv qhia tej lus hais txog lub hnub nyoog no qhia rau sawv daws paub, nws muaj txiaj ntsim tus dab tsi hauv peb kev teev hawm Tswv Ntuj ? Nej yuav pom kev nco tib neeg ntiaj teb tsiv teb tsaws chaw thiab thoj nam muaj txiaj ntsim loj kawg rau peb tus neeg teev Tswv Ntuj.

Txiv vaj qhia Benoît 16 cov lus, nws hais tias : Cov kwv tij thiab cov muam,
Kev tshaj Yes Xus Pleev, tus Cawm lub qab ntuj neeg “Yog lub Koom Txoos txoj dej num tseem ceeb lub Koom Txoos yim huab yuav txhawj xeeb txog vim ntiaj teb neeg muaj ntau yam xwm txawv txav loj” (Exhort. apost. Evangelii nuntiandi, n.14). Twb yog cov lus vaj qhia Paj Lug 6 tau hais hnub xiab 8.12.1975, ze 40 xyoo los no lawm. Zim txwv no, peb puav leej pom zoo tib yam nkaus yuav tsum tau maj raus tes kom sai los tshaj lub moo zoo rau lub ntiab teb no, muaj tej yam xwm tshiab tawm tuaj ua rau tib neeg ntiaj teb tsis pom qab nyob muaj ciam dej ciam av ; ntau haiv neeg yuav los sib xyaws ua kwv ua tij vim txoj kev mus los nkoj lum nkoj deg dhau dhuv, khiav nruab nqhuab thiab lub nkoj cua ya nruab ntug yooj yim rau sawv daws thiab tej xov tooj cab tshab plaws tim ub tim no, ib suab hu qab ntug hauv ntuj hnov thoob.

Kuv xaiv lub ntsiab lub tshaj tawm hnub no : tsiv teb tsaws chaw thiab tshaj moo zoo “Migrations et nouvelle évangélisation” vim tej xwm zoo li no tshwm tuaj zuj zuj nyob ntiaj teb. Lub Koom Txoos yuav nrhiav txoj kab txoj ke los tshaj lub moo zoo rau sawv daws paub kom dhos rau ntiaj teb neeg zim txwv no, tsis hais cov teb chaws txais kev ntseeg tshiab thiab txawm yog cov teb chaws laus ib txwm ntseeg ntev los lawm.

Txiv tswv qhia Claude Schockert, tus saib ib tsoom neeg thoj nam nyob rau Fab Kis teb kuj tau hais cov lus no : xyoo no, yog 98 xyoo nkaus, lub Koom Txoos ua lub hnub nyoog nco txog tib neeg kev tsiv teb tsaws chaw. Lub ntsiab lus, raws li txiv vaj qhia Zam Pag Lug 2 tau hais xyoo 2000 : “tsis yog yuav tsim ib txoj kab ib txoj ke tshiab los tshaj lub moo zoo rau peb tiam neej no. Yog txoj kab txoj ke ib txwm muaj nyob rau ntawd, raws peb tej poj yawm tus roj tus hnee kev tshaj lub moo zoo. Kev tshaj moo zoo, yog qhia Leej Pleev tus kheej rau leej tib neeg paub, qhia neeg nyiam, qhia neeg yoog, kom neeg tig los nrog Leej Pleev hloov tib neeg lub neej los rau qhov zoo mus txog hnub kawg hnub peb nkag mus hauv lub Yes Lus Xas Les saum qaum ntuj kom neeg nrog Leej Pleev koom tib txoj sia.”

Txoj kev peb yuav taug, yog tshaj lub moo zoo. Tib neeg lub neej tom ntej yuav tsum kawg rov los nrhiav kom tau lub moo zoo txoj kab txoj lw taug. Hnub no yog ib hnub qhia rau peb tus neeg ntseeg Tswv Ntuj kom nco ntsoov « Peb yog tib neeg taug kev xwb », peb txoj kev taug tsis tau kawg, peb zoo li yawg koob Has Nplas Has, Mos Xes thiab Yes Xus cov thwj tim Tswv Ntuj hu peb sawv kev tsees mus rau ib lub teb chaws peb tsis tau paub dua.

Peb cov thawj tswj : txiv vaj qhia, cov tswv qhia lawv hais li ntawd rau peb mloog hnub no. Vim txoj kev ntseeg Tswv Ntuj yog ib lo lus, yog ib lub suab hu peb, caw peb sawv kev, taug kev, coj peb lub neej raws li Yes Xus qhia, lawv Yes Xus qab. Nyob hauv zaj nyeem hnub no, ob tug thwj tim mloog Zam Ntxuav Plig lus, nkawd mus nrhiav Yes Xus. Hnub ntawd, nkawd pom Yes Xus lub chaw nyob : “38 Yes Xus tig lees ntsia pom nkawd raws nws, nws hais rau nkawd : “Neb nrhiav tus tsi ?” Nkawd hais rau nws : “Las Npis, txhais tias : Xib Hwb, koj lub chaw nyob qhov twg ?” 39 Nws hais rau nkawd : “Neb tuaj ces neb yuav pom.” Nkawd txawm mus nkawd pom nws lub chaw nyob, nkawd nrog nws nyob hnub ntawd ; yog sij hawm rau teeb.” Nkawd cim ntsoov hauv nruab siab hnub nkawd pom Yes Xus lub chaw nyob, ua rau nkawd zoo siab tshaj plaws tsis muaj dab tsi pauv tau. As Nres thiaj mus qhia nws tus kwv tij Xis Moos, coj Xis Moos tuaj xyuas Yes Xus thiab.

Ib tsoom phooj ywg, nco ntsoov tias hnub no, yog ib hnub ua hmoov loj nco txog tib neeg kev tsiv teb tsaws chaw. Txawm yog peb tus kheej, peb tej kwv tij neej tsa, peb paub muaj tib neeg ntau leej ntau tus tsiv teb tsaws chaw nyob saum daim av niaj hnub no. Ib txhia mus nyob muaj teb muaj chaw, tau lub neej ua ; ib txhia mus poob qho tej tog kev, vim nkoj tog, tsheb nchuav, raug tub sab tua tuag ; ib txhia raug tej tub ceev xwm ntes kaw hauv nkuaj li tej neeg raug txim tsis pom qab ua neej. Kom peb nco tias daim av yog tib neeg lub chaw thoj nam, chaw nyob ib ntus xwb. Vim li ntawd, tsis phim ib txhia tib neeg muaj noj seem noj so, muaj lwm cov tshaib thiab nqhis vau duj de tuag kus. Tus neeg ntseeg Tswv Ntuj tsis txhob ua neeg mom txheej, huab noj huab haus rau nws tus kheej lub plab. Peb yuav faib peb mov rau tus neeg tshaib noj, cev tes plhws cov neeg tsis muaj leej twg hlub li niam nkauj xwb Teresa ua tsev coj cov neeg pw tshav puam los nyob. Peb yuav nco ntsoov txiv vaj qhia leej ntshiab Zam Paj Lug 2 cov lus : “Peb yuav noj Tswv Ntuj lus, peb thiaj li yuav ciaj tau Leej Lo Lus cov tub ntxhais txib hauv kev tshaj moo zoo.”

10.01.2012 Cwj Vuam Chiv

**NrhiavTswvNtuj** 21st January 2012, 3:12 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°10

COV ZAJ NYEEM HNUB 22/01/2012 ( Hnub chiv 3 Nruab xyoo - Xyoo B )

Post NrhiavTswvNtuj 21st January 2012, 3:12 am

COV ZAJ NYEEM - Xyoo B 2011-12 ) 13271510

( Hnub chiv 3 Nruab xyoo - Xyoo B )

Zaj nyeem 1 : Yos Nas 3,1-5.10

1 Huab Tais lo lus txawm tuaj zaum ob hais rau Yos Nas tias :
2 “Koj sawv tsees mus ntawm lub nroog loj Nis Ves thiab nthe nqho qhia nws yam kuv hais rau koj.”
3 Yos Nas thiaj sawv tsees, nws mus ntawm Nis Ves raws li Huab Tais lo lus; rau Tswv Ntuj Nis Ves yog ib lub nroog loj li peb hnub ke.
4 Yos Nas pib ua tib hnub ke mus hauv lub nroog, nws nthe nqho hais tias : “Tsuas tshuav plaub caug hnub ces Nis Ves yuav puas tsuaj.”
5 Cov neeg hauv Nis Ves ntseeg Tswv Ntuj, sawv daws qw qog qees kom caiv thiab muab ntaub pag los npua txij tus hlob txog tus yau.
10 Tswv Ntuj pom lawv tes num lawv thim ntawm lawv txoj kev phem ces Tswv Ntuj khuv leej tsis nplua lawv yam xwv txheej nws tau hais tseg.

Zaj nyeem 2 : 1 Kos Lis Nthos 7,29-31

29 Kwv tij sawv daws, kuv hais
rau nej tias, tsis tshuav zim txwv ntev
lawm. Li ntawd cov muaj poj niam yuav
coj lub neej xws li lawv tsis muaj poj
niam. 30 Cov neeg quaj yuav ua xws li
lawv tsis muaj chaw quaj. Cov nyob
hauv txoj kev lom zem, yuav ua xws li
lawv tsis lom zem. Cov muas tau cuab
yeej, yuav ua zoo li lawv tsis muaj dab tsi
ua lawv tug. 31 Cov uas siv tej twj nyob
ntiaj teb no, lawv yuav ua zoo li lawv tsis
siv. Vim ntiaj teb lub ntsej muag yuav dua.

Mas Kos Ntawv Moo Zoo 1,14-20

14 Thaum luag ntes Zam lawm, ces Yes
Xus mus Nkas Lis Lais teb. Nws tshaj
lub Moo Zoo qhia txog Tswv Ntuj, nws hais tias :
15 "Txog lub caij teem lawm, Tswv Ntuj
lub Ceeb Tsheej los txog ze lawm : nej
hloov siab, nej ntseeg txog lub Moo Zoo mog."
16 Yes Xus taug ntug dej ntuj Nkas Lis
Lais, nws pom Xis Moos, thiab Xis Moos
tus kwv As Nres. Nkawd tab tom pov vas
rau hauv dej ntuj, vim nkawd yog tub
puav ntses. 17 Yes Xus hais rau nkawd tias :
"Neb raws kuv mus, kuv yuav muab neb
hloov ua tub puav neeg."
18 Nkawd tso plhuav cov vas puav ntses
tseg tam sis ntawd, nkawd raws Yes Xus mus.
19 Yes Xus mus ntxiv me ntsis tom ntej,
nws pom Yas Kos, uas yog Ntxes Npes
Dais tus tub, thiab Yas Kos tus kwv Zam.
Nkawd kuj nyob hauv nkoj thiab, nkawd
tseem tab tom ntxiv cov vas ntses. 20
Yes Xus hu nkawd. Ces nkawd tso
plhuav nkawd txiv Ntxes Npes Dais tam
sis ntawv thiab cov tub zog rau hauv nkoj,
nkawd raws Yes Xus mus.

COV ZAJ NYEEM - Xyoo B 2011-12 ) 13271511

COV ZAJ NYEEM - Xyoo B 2011-12 ) Semain10

Rau hnub tim 22 lub 01 hli 2012

Tsoom ntseeg thiab phooj ywg txhua leej,

Peb nyob hauv lis piam hnub chiv 3 lub caij nruab xyoo. Lub lis piam no, yog lub lis piam thov ntuj rau tag cov koom txoos teev Yes Xus nyob ntiaj teb kom rov los sib haum xeeb (Semaine de prière pour l’unité des chrétiens). Peb yuav piav ob peb los txog txoj kev rub cov koom txoos teev Yes Xus ncaim npoj rov los poo npoj, cais pab cais pawg kom rov los ua ib pab ib pawg. Peb mam nthuav ob peb los txog cov zaj nyeem Huab Tais Yes Xus hais rau peb hnov hnub no.

Nej sawv daws twb paub thaum chiv keeb, tsuas muaj tib lub Koom Txoos teev Yes Xus raws li 12 leeg thwj tim coj thiab qhuab qhia. Lub sij hawm ntawd, cov neeg teev Yes Xus koom tib cuab ua tib yig, sawv daws tseem hais tib xeem lus Hes Las (Grec). Thaum cov thwj tim laus zuj zus pib dua toj tag, lub Koom Txoos teev Yes Xus huam vam ri mus txog ntau lub teb chaws, muaj ntau haiv neeg hais ntau xeem lus nkag los teev hawm Tswv Ntuj. Lub Koom Txoos teev Yes Xus muaj zog, vim neeg los teev hawm Tswv Ntuj coob zuj zus tuaj. Tiam sis, neeg yim coob, teeb meem yim loj thiab ntxhov zuj zus nyob hauv Koom Txoos teev Yes Xus. Vim li cas ? Vim cov los nkag tshiab hauv Koom Txoos, nyias coj nyias kab lis kev cai nrog nyias los teev hawm Tswv Ntuj thiab nyias hais nyias xeem lus. Cov qub xav teev Tswv Ntuj raws lus Hes Las (Grec) li qub, cov los tshiab xav teev Tswv Ntuj raws lus Las Tis Nas (Latin), lawv coob zuj zus tuaj. Tsis tas li ntawd, tseem muaj tej tus neeg nyob hauv Koom Txoos ua neeg cav ncauj, ua neeg cam thawj, qhuab qhia kev ntseeg yuam kev rau sawv daws (Hérésie) tsis haum lub Koom Txoos teev Yes Xus lub ntsiab kev ntseeg, coj tsis yog ua tsis raws cov thwj tim lus qhuab qhia (Schisme). Lub Koom Txoos thiaj tau rub cov Tuam Rooj Ncauj Lus (Concile) ntiab cov neeg yuam kev no tawm hauv Koom Txoos (Excommunication). Cov neeg yuam kev no kuj tsis yib, tsis khiav twj ywm xwb, lawv mus haub mus hawv tsim dua tej pab neeg teev Yes Xus tshiab, rhawv cov me nyuam koom txoos teev hawm Yes Xus ywj lawv siab. Lub Koom Txoos Niam yuav tsum tuav rawv, txuag zias cov thwj tim tej lus qhuab qhia, raws nraim Huab Tais Yes Xus tus roj tus hneev. Cov me nyuam koom txoos teev Yes Xus txhawv los ntawm cov neeg cam thawj yuam kev raug lub Koom Txoos Niam ntiab tawm no, tseem rov txia ua loj cov kem tsuab pab pawg neeg teev Yes Xus : yam li pawg As Li Ws (Arianisme), pawg Nes Tos Li Ws (Nestorianisme), pawg Plos Tes Taas (Protestantisme), As Nkis Kas (Anglicanisme)… niaj hnub no tseem tshwm tej pab neeg teev Yes Xus tshiab ncau coj ncau ces quj qees hauv tej lub teb chaws ywj pheej (Freedom). Xyoo 1962, lub Tuam Rooj Ncauj Lus Vas Tis Kas 2 tau muab ib nqe lus (Oecuménisme) los tham txog tsoom neeg teev Yes Xus loj cov kem tsuab no. Niaj lub xyoo, hnub xiab 18-25 lub 1 hlis ntuj, tas nrho cov neeg teev Yes Xus sib koom muab 7 hnub los ua ke thov Tswv Ntuj lub txiaj ntsim pab kom sawv daws rov los koom ua ib cuab ib yig : “21 Kom xwm sawv daws koom ua tib tug hauv wb tam li koj, Leej Txiv, hauv kuv thiab kuv hauv koj, kom lub sim ceeb ntseeg tias koj xa kuv tuaj Z 17,21”

Xyoo 2012 no, lub ntsiab lus cev rau sawv daws thov Tswv Ntuj yog li no : Tas sawv daws yuav plhis tau vim peb tus Huab Tais Yes Xus muaj yeej tag nrho (Tous, nous serons transformés par la Victoire de notre Seigneur Jésus Christ 1 Co 15,51-58.)
Tus thwj tim Paj Lug hais txog peb tib neeg kev plhis, tib neeg lub cev ntaj ntsug yuav plhis ua lub cev ntsuj plig thaum txog hnub kawg. Tiam sis, peb lub neej yuav tsum plhis dua tshiab thaum tseem ciaj sia hauv ntiaj teb no.
Hauv peb kev thov Tswv Ntuj xyoo 2012 no, peb yuav ntseeg cov lus peb tau hais los saum no : “Tas sawv daws yuav plhis tau vim peb tus Huab Tais Yes Xus muaj yeej tag nrho” Yes Xus kev muaj yeej tag nrho yog yeej kev phem, kev yeeb ncuab, kev txhaum, yeej kev tuag sawv tsees rov ciaj sia. Ntawv Ntshiab caw peb tus neeg ntseeg Tswv Ntuj kom ntsia peb tib neeg lub neej nyob saum daim av sib txawv : txawv kev noj haus, txawv kab lis kev cai, xeem lus, txuj ci…txawm sib txawv loj npaum twg, tib neeg yuav hloov tau, plhis tau los ua ib ke. Peb txawm muaj ntau pab ntau pawg neeg teev Yes Xus, peb yuav koom rov los ua tau ib cuab ib yig. Tiam sis, peb yuav tig mus yoog kev ua tub txib li Leej Pleev, raws nws qab, raws Leej Pleev kev ua vaj ntxeem kev quab yuam, ua daj npab ncuv tuag saum ntoo cuam thiab sawv tsees hauv lav tuag rov ciaj taus sia.

Thaum cov thwj tim sis txeeb zom zaws ua tus thawj, Yes Xus tsuas hais cov lus no rau lawv mloog : “Yog leej twg xav ua tus thawj, nws yuav ua tus tuaj tom sawv daws qab thiab ua sawv daws tus tub txib MK 9,35.” Yes Xus qhia rau nws cov thwj kom muaj yeej tag nrho li Yes Xus, yog lawv taug txoj kev ua tub txib li Yes Xus qhia. Rau tas tsoom neeg teev Yes Xus, yog peb tig mus nrhiav Yes Xus hauv nws tes qav num, mloog nws kev qhuab qhia, nrog nws ua ke raug hiam, nrog nws tuag, peb kuj yuav nrog Yes Xus muaj yeej tag tib si thiab sawv tsees hauv lub lav tuag rov muaj sia li Yes Xus.

Huab Tais Yes Xus tuaj nrhiav nws cov thwj tim ntawm ntug dej, hauv cov neeg puav ntses : “17 Yes Xus hais rau nkawd : “Neb tuaj caum kuv, kuv yuav ua rau neb los ua cov puav neeg.”18 Nkawd txawm tso plhuav cov vas tam sid mus caum nws.” Peb pom cov neeg puav ntses no lub neej, lawv hloov plhis los ua ib cov neeg xa lub Moo Zoo, ua nyog Yes Xus thiab leej tib neeg cov tub txib. Yes Xus xa lawv mus tshaj nws lub Moo Zoo txog plaub ceg kaum ntuj. Tsoom phooj ywg, thov kom Huab Tais Yes Xus cov lus hnub no coj tau peb los ua neeg hlub Tswv Ntuj thiab hlub peb leej tib neeg kom kawg peb lub siab lub ntsws, vim Yes Xus tuaj cawm tag nrho ntiaj teb neeg.

18.01.2012 Cwj Vuam Chiv

**NrhiavTswvNtuj** 28th January 2012, 12:02 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°11

COV ZAJ NYEEM HNUB 29/01/2012 ( Hnub chiv 4 Nruab xyoo - Xyoo B )

Post NrhiavTswvNtuj 28th January 2012, 12:02 pm

COV ZAJ NYEEM - Xyoo B 2011-12 ) 13277910

( Hnub chiv 4 Nruab xyoo - Xyoo B )

Zaj nyeem 1 : Txoj Cai Ob 18,15-20

15 Koj tus HUAB TAIS Tswv Ntuj yuav
tshoj ib tug neeg hauv nruab nrab nej,
hauv koj tsoom kwv tij, kom nws sawv
ua Yaj Saub zoo li kuv. Nej yuav mloog
nws hais. 16 Qhov ntawd, yog qhov uas
koj tau thov ntawm HUAB TAIS koj tus
Tswv Ntuj thaum tsoom His Xas Lais ua
lub txoos nyob saum roob Hos Les, koj hais tias :
"Kuv tsis xav hnov HUAB TAIS, kuv tus
Tswv Ntuj lub suab ntxiv, kuv tsis xav
ntsia lub cub tawg loj loj ntawd ntxiv
lawm, tsam kuv tuag."
17 HUAB TAIS thiaj hais rau kuv tias :
"Lawv hais yog lawm. 18 Kuv yuav tsa
ib tug Yaj Saub zoo li koj, hauv nruab
nrab lawv tsoom kwv tij los. Kuv yuav
muab kuv cov lus tso rau hauv nws lub
ncauj, ces nws yuav hais tas puas tsav
yam rau lawv raws li kuv qhia. 19 Yog
leej twg tsis mloog kuv cov lus uas tus
Yaj Saub hais, mas kuv yuav nug nws
txog qhov ntawd. 20 Yog tus Yaj Saub
twg muaj cuab kav tuav txog kuv lub npe
hais tej lo lus kuv tsis tau qhia kom hais,
los yog nws tuav txog lwm tus tswv ntuj
lub npe los hais lus, mas tus Yaj Saub
ntawd yuav tuag xwb.

Zaj nyeem 2 : 1 Kos Lis Nthos 7,32-35

32 Kuv xav pom nej ua ib co neeg tsis
muaj chaw ntxhov siab. Tus txiv neej uas
nws tsis muaj poj niam, nws muab siab
rau leg Huab Tais cov hauj lwm, nws
nrhiav txoj kev ua xis Huab Tais siab. 33
Tus yuav poj niam lawm, nws muab siab
rau leg ntiaj teb cov hauj lwm, nws nrhiav
txoj kev ua xis nws poj niam siab. Ces
nws lub siab fab rau ob tog huv tib si.
34 Tus poj niam tsis muaj txiv, xws li tus
nkauj xwb, nws kuj muab siab rau leg
Huab Tais cov hauj lwm, nws nrhiav txoj
kev ua kom nws lub cev thiab nws lub
tswv yim ntshiab tuaj. Hos tus yuav txiv
lawm, nws muab siab rau leg ntiaj teb cov
hauj lwm, nws nrhiav kev kom ua xis nws
tus txiv lub siab.
35 Kuv hais qhov ntawd, vim yog ib yam
zoo rau nej ; tsis yog kuv xav cuab ntxiab
rau nej. Kuv xav coj nej mus cuag tej
yam tsim nyog, tej yam khi nej rau Huab Tais tib leeg.

Mas Kos Ntawv Moo Zoo 1,21-28

21 Yes Xus lawv mus hauv Kas Fas
Naus. Hnub Xas Npas Tos, Yes Xus mus
hauv lub tsev txoos, nws qhia sawv daws
tam sim ntawd. 22 Zeej tsoom qhuas nws
cov lus qhia, vim nws qhia lawv xws li
neeg muaj peev xwm, tsis zoo li cov kws Ntawv Ntshiab.
23 Nyob hauv lawv lub tsev txoos, tam
sim ntawd, muaj ib tug neeg raug ib tug
dab tsis huv nthe nthe tias :
24 "Yes Xus Nas Xas Les, koj xav ua
dab tsis rau wb ? Puas yog koj tuaj rhuav
wb ? Kuv paub koj yog leej twg : koj yog Tswv Ntuj tus Ntshiab."
25 Yes Xus cem nws tias :
"Ua twj ywm, koj cia li tawm hauv tus neeg no mus."
26 Dab tsis huv siv zog muab tus neeg
ntawd co heev heev, nws nthe ib suab nrov
nrov ces nws tawm hauv tus neeg mus.
27 Tas sawv daws ntshai, lawv sib nug
zom zaws tias : qhov ntawd yog dab tsi ?
Puas yog ib txog kev qhuab qhia tshiab
muaj peev xwm ? Tab yog dab tsis huv,
los nws tswj lawv, ces lawv mloog nws
lus. 28 Ces ib sij huam, Yes Xus lub
moo nto lug rau txhua qhov, mus thoob ib
cheeb tsam hauv xeev Nkas Lis Lais.

COV ZAJ NYEEM - Xyoo B 2011-12 ) 13277911

COV ZAJ NYEEM - Xyoo B 2011-12 ) Jasus-10 Rau hnub tim 29 lub 01 hli 2012

Ib tsoom ntseeg thiab phooj ywg teev Tswv Ntuj,

Peb nyob hauv lis piam hnub chiv 4 lub caij nruab xyoo. Peb xav nrog nej khaws 3 lub ntsiab lus hauv cov zaj nyeem hnub no :

1-Peb xav hais txog kev tuag ciaj tsis taus ua Tswv Ntuj tub ki. Peb tib neeg txhua tus puav leej ntshaw noj ntshaw haus, ntshaw kom muaj tus hlub yus nyob saum daim npoo av. Tiam sis, yam loj muaj nqes peb ntshaw tshaj tej, yog txoj sia. Tus neeg tshaib thiab nqhis peb faib tau rau noj, peb cawm tau tus neeg txom nyem. Hos tib neeg txoj sia peb faib tsis tau rau leej twg. Thaum tib neeg siav yuav tu, peb pab tsis tau, peb cawm tau rau nws. Vim li ntawd, peb thiaj li khuv xim txoj sia, txuag txoj sia zoo tshaj tej. Txoj sia thiaj ua rau peb tib neeg txhawj xeeb tshaj plaws. Peb yuav vam txog tus muaj hwj huam tshaj peb daws peb kev txhawj xeeb no. Leej twg thiaj cawm tau peb ? Kawg Huab Tais Tswv Ntuj tib leeg. Tswv Ntuj yog peb Niam peb Txiv hlub peb, peb yuav tsum hwm yuav tsum thov Tswv Ntuj pab peb. Yog peb txoj kev ua neeg ntseeg Tswv Ntuj. Yam peb yuav txhawj, yog txhawj peb kev thuam tsis teev tsis hwm Tswv Ntuj : zoo li tus me nyuam tawv ncauj, niam txiv qhia tsis pub kov riam tsam raug tes, los nws cam dhau plaws niam txiv mus kov riam txiav tes tu, ua rau niam txiv txuas tsis tau, pab tsis tau tus me nyuam. Tus neeg thuam Tswv Ntuj kuj zoo li ntawd : “20 Tus saub muaj plhus hais lus ua kuv npe tiam sis, kuv tsis tau kom hais thiab tseem hais ua lwm cov dab npe, tus saub ntawd kawg tuag.” Tus neeg cam thawj los tus saub cuav, yog neeg thuam ntuj. Nej twb hnov dua tej saub cuav tej lus hais : “Qaum ntuj tso kuv los kho neeg…Kuv tseem loj tshaj Yes Xus…” Tus neeg muaj cuab kav hais lus li no, tus neeg ntawd tsis ntshai tub qaug Tswv Ntuj thiaj hais tej lus no. Tus me nyuam tsis mloog niam txiv lus, riam yeej hlais tes. Peb tib neeg tus tsis hwm Tswv Ntuj yeej kawg yuav txom nyem. Tus neeg txhaum tsis thov lees nws tej txhaum, yuav ua li cas txais Tswv Ntuj kev zam txhaum rau nws ? Vim kev txhaum ua peb ntsuj duab ntsuj plig tuag mus ib sid. Peb yog me nyuam tib neeg xwb, peb yuav mloog peb niam peb txiv tej lus qhuab qhia tsis txhob twv ntuj twv teb. Peb twb los teev Tswv Ntuj lawm, peb yuav mloog Tswv Ntuj lus peb thiaj yuav muaj Tswv Ntuj txoj sia nyob ib txhiab niaj ib txhis.

2-Peb kev txhawj xeeb txog Huab Tais. Paj Lug cov lus nws hais rau peb hnub no yog hais rau tag sawv daws cov laus cov hluas, cov muaj txig muaj nkawm thiab cov tab seeb, hais rau tas ib tsoom neeg teev Yes Xus txhua leej. Cav cuag ib nkawm niam txiv : tus txiv twb paub yuav coj li cas thiaj ntxim nws poj niam lub siab nyiam. Tus poj niam los twb paub yuav ua niam tsev li cas thiaj ntxim nws tus txiv lub siab nyiam. Ntawm tus neeg ntseeg Tswv Ntuj kuj tib yam nkaus, peb paub yuav ua dab tsis thiaj ntxim Tswv Ntuj lub siab nyiam. Muaj ntau txoj dej num peb yuav ua tau ntxim Tswv Ntuj siab. Muab piv li leej ntshiab Elisabeth de Hongrie, yog ib tug poj vaj, nws tus txiv yog tus vaj ntxwv Louis IV de Thuringe. Nws yog ib tug poj vaj txawv lwm tus poj vaj, nws txawj hlub cov neeg pluag. Nws tsis ua tej yam dab tsi loj kom neeg qhuas nws. Elisabeth nquag mus ko taw kom tau ntsib tsoom pej xeem pluag hauv nroog. Nws tus txiv tsis nyiam mus taw kiag li. Muaj ib hnub, nws zais tau ib tsuas mov ci ntsaws hauv nws lub tsho loj taug kev mus faib rau cov neeg tshaib plab noj. Nws tus txiv txawm ntsib nws ntawm kev, cem npau taws nki hais tias : “Koj zais dab tsi hauv koj lub tsho ? Nws xub teb tias : Kuv nqa ib tsuas paj ntoos-Ces nws mam qhia ncaj rau nws tus txiv : Kuv nqa ib tsuas mov ci mus faib rau cov neeg tshaib noj.” Nws tus txiv kom cia li nthuav nws lub tsho. Thaum nws nthuav hlo nws lub tsho, ua ciav yog ib tsuas paj ntoos. Tej lub hwj huam no qhia hais tias tus poj vaj Elisabeth txhawj xeeb cov neeg tshaib yog txhawj xeeb txog Huab Tais Tswv Ntuj.

3-Dab phem ntshai Yes Xus. Tas ntiaj teb neeg sawv daws puav leej xyeej qhov phem xaiv qhov zoo. Tus neeg lim hiam thiab siab phem los yeej nyiam zoo, tiam sis yog nws tsis xav ua neeg zoo nyiam. Tsis yog tus neeg teev Tswv Ntuj thiaj nyiam zoo xwb. Peb nyiam zoo los peb tib neeg tsis muaj zog ua zoo. Vim li ntawd, Tswv Ntuj yog ntiaj teb neeg tus phem tus zoo, tus teev dab, teev mlom los tus teev ntuj tas sawv daws Niam thiab Txiv. Tswv Ntuj hlub tag nrho ntiaj teb neeg txhua tus. Tswv Ntuj thiaj li xa Tswv Ntuj Leej Tub Yes Xus tuaj cawm ntiaj teb neeg dim ntawm txoj kev phem. Huab Tais Yes Xus yog tus cawm peb tib neeg dim peb lub txim txhaum ; lub txim txhaum loj yog kev ploj tuag nqus peb ntsuj duab ntsuj plig tuag mus ib sid. Tus mloog Yes Xus lus thim xav, nrauj nws lub siab phem hloov tau ua neeg ntshiab thiab huv, hnub kawg nws nrog Yes Xus sawv ciaj sia tshiab ua Tswv Ntuj tub ki : “Muaj tus tsi rau peb thiab koj, Yes Xus Nas Xas Les ? Koj tuaj kom peb ploj mus ? Kuv paub koj yog leej twg, Tswv Ntuj Leej Ntshiab.”25 Yes Xus cheem zoj hais rau nws tias : “Tswm seeb, tawm khiav ntawm nws.”26 Tus ntsuj plig qias ncho ntho tus neeg, qw suab tawg ntho tawm plaws khiav ntawm nws.” Ib txwm, dab phem yog tus tiv Tswv Ntuj, yog tus tsim kev tuag, ntxias neeg ua txhaum. Yes Xus tuaj qhuab qhia neeg nrauj kev phem tig los sib haum xeeb, sib hlub. Tus mloog Yes Xus lus ntaus rog sawv tiv dab phem. Vim li ntawd, dab phem pom Yes Xus tuaj tshwm twb ua rau dab phem ntshai. Yes Xus tseem tsa ncauj hais ib los thiab ua rau dab phem qw tej niag suab tawm khiav hauv tus neeg raug dab qias. Yog peb tsis niaj hnub teev Yes Xus, tsis mloog Yes Xus lus, dab phem kuj yuav tsis sawv khiav hauv peb lub siab lub ntsws.

Ib tsoom ntseeg thiab phooj ywg, peb txoj kev sib haum xeeb, peb txoj kev sib hlub, peb lub dag zog khuv leej cov neeg pluag raws li Yes Xus qhia tsis nkim dag, yog txoj num yuav coj peb mus ntsib tau Huab Tais Yes Xus lub pliaj plhu nyob ntiaj teb no.

26.01.2012 Cwj Vuam Chiv

**NrhiavTswvNtuj** 4th February 2012, 11:27 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°12

COV ZAJ NYEEM HNUB 05/02/2012 ( Hnub chiv 5 Nruab xyoo - Xyoo B )

Post NrhiavTswvNtuj 4th February 2012, 11:27 am

COV ZAJ NYEEM HNUB 05/02/2012

( Hnub chiv 5 Nruab xyoo - Xyoo B )

Zaj nyeem 1 : Yob 7, 1-4.6-7: Yob yws, vim nws raug txom nyem.

1 "Ib tug neeg ua hauj lwm nyob
ntiaj teb no, nws tsis zoo li ib tug
tub txib xwb lod ? Nws lub neej tsis zoo
li ib tug neeg ntiav zog xwb lod ?
2 Kuv zoo li ib tug qhev ntshaw mus so
nyob hauv qhov ntxoov ntxoo. Kuv zoo
li ib tug tub zog tos nws tus nqi zog.
3 Kuv tos ntev hli, kuv tsis tau raws li
kuv tos. Kuv nyob ntau hmo hauv kev
txom nyem.
4 Yog kuv pw saum kuv daim lev, kuv
hais tias thaum twg thiaj yuav kaj ntug ?
Kuv nyuam qhuav sawv, kuv hais tias :
ceeb laj tos txog tsaus ntuj. Kuv lub tswv
yim ntxhov, xav ub xav no mus txog
thaum lub hnub poob qho.
7 HUAB TAIS, thov koj nco tias kuv lub
neej tsuas ntev li nqus ib pas cua xwb.
Thov koj nco tias kuv yuav tsis tau rov
pom txoj kev noj qab nyob zoo. 8 Txij
no mus, neeg qhov muag yuav pom tsis
tau kuv ntxiv, kuv yuav ploj mus. Tsuas
tshuav koj lub qhov muag thiaj yuav ntsia
ntsoov kuv xwb."

Zaj nyeem 2 : 1Kos Lis Nthos 9, 16-19.22-23

16 Tsis yog vim kuv xav nto
koob meej, kuv thiaj tshaj lub Moo Zoo.
Tshaj lub Moo Zoo yog tes dej num kuv
yuav tsum ua. Yog kuv tsis tshaj lub
Moo Zoo, mas kuv txoj hmoov phem.
17 Yog kuv ua tus xaiv txoj hauj lwm
tshaj lub Moo Zoo, mas kuv yuav muaj
cai txais koob haum ; tab sis tsis yog kuv
xaiv, yog txoj hauj lwm uas Ntuj muab
rau kuv ua.
18 Li ntawd mas kuv yuav txais koob
haum dab tsi ? Kuv cov koob haum yog
pub lub Moo Zoo dawb rau luag txais,
kuv tsis noj tej yam uas lub Moo Zoo pub
rau kuv noj.
19 Kuv yog ib tug neeg twj lij, tsis zwm
rau leej twg, tab sis kuv txhob txwm xaiv
txoj kev ua sawv daws qhev, vim kuv xav
yaum neeg coob coob.
22 Thaum kuv nrog cov neeg tsis muaj
zog, kuv ua neeg tsis muaj zog, kom rub
tau cov tsis muaj zog. Kuv npuab txhua
leej txhua tus, vim kuv xav cawm kom
tau ib txhia. 23 Kuv ua txhua yam rau
lub Moo Zoo, kom kuv tau txais ib feem
nyob hauv lub Moo Zoo cov txiaj ntsim.

Mas Kos Ntawv Moo Zoo 1,29-39

29 Tam sim ntawd, Yes Xus tawm hauv tsev txoos, nws nrog Yas Kos thiab Zam nkawd mus hauv Xis Moos thiab As Nres nkawd tsev. 30 Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub. 31 Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces nws tsob hwb lawv. 32 Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus. 33 Tas lub nroog sau nthwv tuaj nyob ua ke ntawm nws qhov rooj. 34 Yes Xus kho neeg coob coob, cov uas nyias raug nyias hom mob, thiab nws tseem ntiab ntau tus dab tawm. Nws tsis pub dab hais lus li, vim cov dab paub nws. 35 Thaum sawv ntxov, thaum tseem tsaus ntuj nti, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd. 36 Xis Moos thiab nws cov npawg raws Yes Xus qab. 37 Thaum lawv nrhiav tau Yes Xus, lawv hais rau nws tias : "Sawv daws nrhiav koj." 38 Yes Xus hais rau lawv tias : "Peb mus lwm qhov chaw, hauv cov zej zog nyob tsis deb ntawm no, kom kuv tau kev tshaj lus nyob ntawd thiab, yog vim li ntawd, kuv thiaj tawm tuaj". 39 Ces Yes Xus mus thoob lub xeev Nkas Lis Lais, nws tshaj lus nyob hauv cov tsev txoos, thiab nws ntiab dab phem.

NTHUAV NTAWV NTSHIAB

COV ZAJ NYEEM - Xyoo B 2011-12 ) Media-10

Rau hnub tim 05 lub 02 hli 2012

Ib tsoom ntseeg thiab phooj ywg nyiam mloog Tswv Ntuj lus,

Yog lis piam hnub chiv 5 lub caij nruab xyoo, hnub teev hawm Tswv Ntuj. Peb tsuas khaws 2 lub ntsiab lus ua koob ua hmoov pauj Tswv Ntuj tej txiaj ntsim Tswv Ntuj pub peb txais tsis muaj caij kawg thiab pab peb daws peb tej kev txhawj xeeb kom ploj kom yaj mus.

1-Pauj Tswv Ntuj tej txiaj ntsim. Leej tib neeg txhua tus yug los hauv lub sim ceeb puav leej ntsib kev nyuaj siab, muaj kev txob txhawj. Vim li ntawd, tus neeg muaj mob thiaj paub npaum li cas nws txhawj tsam vuag tsis tau nws txoj sia nyob. Cov neeg txom nyem tsis muaj liaj teb, tsis muaj qav num ua, tshaib nqhis thawm hnub thawm hmo thiaj paub kev txob txhawj yog dab tsi. Ib txwv keeb, kev txob txhawj yeej xeeb txawm muaj nyob hauv tib neeg lub siab lub ntsws thiab lub tswv yim. Tsuav hu ua neeg, yeej paub txhawj tas tus : “3 Kuv tsuas tau lub hli qhuav rau kuv thiab cov hmo txhawj los ua kuv tug 4 Kuv nyuam qhuav pw twb xav zoj ntshai yuav tau sawv, ib hmos dab ntub tsis tau tuaj twb kaj ntug 6 Kuv lub neej dua toj sai cuag lub liag xov kiv qab xo los txog” Yob pom nws lub neej khwv tas npaum li no los tsis dim txoj kev txom nyem. Tiam sis, Yob pom muaj lwm txoj kev yuav pab tau Yob ua neej kaj siab lug nyob ntiaj teb no. Txawm peb los teev Tswv Ntuj, peb zoo li Yob, peb coj tas peb kev txhawj xeeb nrog peb. Tus neeg teev Tswv Ntuj yog tus tso tau siab rau Tswv Ntuj, nws yog peb tus tswv. Vim lub ntuj thiab daim av muaj tsw, txawm peb tsis pom tus tswv lub pliaj plhu. Tej dej peb haus dawb, tej xyoob ntoo sawv daws siv luam thuam tsis paub khuv xim, tas txhua yam toob xib tooj thiab hlau, nyiaj thiab kub…muaj tsw faib rau peb tib neeg txhua tus tau siv, tsis txhob ua neeg siab kheej. Tsuas kawg tus neeg mom txheej thiaj tsis pom tias lub ntuj tiab daim av muaj tsw. Tiam sis, tus neeg teev Tswv Ntuj txhob ua neeg mom luag txheej : “16 Kuv tshaj Moo Zoo tsis yog ua kom kuv tau ntsej muag, vim kev tseem ceeb yuam kuv ; yog kuv tsis tshaj Moo Zoo, yuav khaum kuv” Peb twb lees ua neeg ntseeg, peb yuav qee sij hawm los teev Tswv Ntuj. Peb puas ntshai khaum, yog peb twb tsis teev ntuj li ? Nej sim xav, Tswv Ntuj hlub peb tib neeg npaum li cas, 1 hnub peb muab 1 sij hawm los teev Tswv Ntuj twb pauj tsis tau Tswv Ntuj kev hlub peb. Yog peb tseem qee tsis tau 1 h hauv ib lis piam los teev Tswv Ntuj thiab, peb puas zoo tsa ncauj thov Tswv Ntuj pab txuag peb ? Lis piam twg los peb nyob dawb nyob ncaj; hli twg los peb tsis muaj caij nyoog mus teev hawm Tswv Ntuj, ho tuaj yeem mus quav yeeb, quav dej quav cawv, mus twv txiaj yuam pov. Xyoo tag xyoo tuaj, peb kev lim hiam tseem yim phem cuag tus tub sab tua neeg txov luag siav, tsis teev tsis hwm ntuj. Thaum zoo li ntawd, peb puas tseem muaj nuj nqes dab tsi lawm? Muaj ib txhia yuav xav tias yus tsis tau tub sab, tsis tua neeg, yus nyob yus vaj yus tsev tsis ua tub qaug leej twg, tus phem tsis yog yus. Tias sis, ntawm Tswv Ntuj, tus neeg phem yog yus thiab ntag vim yus twb tsis hwm, tsis ntshai Tswv Ntuj li tus neeg phem. Yog Paj Lug tsis tshaj lub Moo Zoo yuav khaum nws ; peb tus neeg ntseeg lam yuav npe ua neeg hwm ntuj, sim neej tsis teev ntuj kuj yuav khaum peb tib yam. Peb yuav tig ntsej mloog Paj Lug hais, raug hnyav Tswv Ntuj yog peb Niam peb Txiv, muab caij nyoog pe hawm pauj Tswv Ntuj txiaj ntsim thiaj tsis khaum peb.

2-Yes Xus tuaj daws tib neeg kev txob kev txhawj. Peb yog haiv neeg teev Yes Xus nyob thoob ntiaj teb nrog ntau haiv neeg tsis paub teev hawm Tswv Ntuj nyob ua ke. Piv li hauv tej zos Hmoob, muaj cov yim neeg teev Yes Xus nrog cov kwv tij neej tsa teev dab qhuas sawv daws nyob ua ke koom zos. Cov teev Yes Xus, nej sib sau ua Thaj Txi Ntuj twb yog tshaj Yes Xus lub Moo Zoo rau cov kwv tij neej tsa tsis paub tsis teev Tswv Ntuj. Tsis tas li ntawd, nej tseem yuav ua lwm yam dej num ntxiv kev teev ntuj : Yam li tsis txhob cais, tsis txhob thuam nej cov kwv tij neej tsa teev dab qhuas. Nej yuav nrhiav kev zam nej tus yeeb ncuab tsis txhob pauj, nej thiaj nrog Yes Xus tshaj lub Moo Zoo ib ncig ntawm nej nyob. Yes Xus tsis qhia neeg sib cais sib thuam sib ntxub. Yes Xus qhia kom neeg sib pab, sib txhawb, sib hlub. Cov neeg nyob hauv tej nroog kuj tib yam nkaus tsis txhob sib cais, txhob sib thuam, lub nroog thiaj yuav nyob thaj yeeb. Xyov, lub nroog neeg yim coob ua rau neeg yim dhuav neeg, niaj hnub sib phoom taug tib txoj kev, twb tsis sib hu, tsis sib paub thiab : “35 Tag kis kaj ntug txoog, nws sawv los, nws tawm mus teev ntuj ntawm ib thaj suab puam deb tsawv 36 Xis Moos thiab nws cov kwv luag tuaj nrhiav nws 37 Lawv nrhiav tau nws thiab hais rau nws tias : “Sawv daws nrhiav koj.” 38 Nws hais rau lawv : “Peb mus hauv lwm tej zej zog kom kuv qhuab qhia lawv thiab; vim li ntawd kuv thiaj tuaj.” Peb pom Yes Xus nquag teev ntuj tsis tseg, hnub tsis tau tawm, Yes Xus twb mus teev ntuj nyob tej thaj chaw xu kev. Teev ntuj tag, Yes Xus mam coj nws cov thwj tim nrog nws mus qhuab qhia lub Moo Zoo kom txhua nrho tej zej zog. Peb kev tub nkeeg teev ntuj, kev sib cais sib thuam los kev dhuav neeg tsis ua raws lub Moo Zoo li Yes Xus qhia. Tej ntawd, yog kab mob ntxooj rau peb lub siab, lub tswv yim thiab rau peb ntsuj plig. Kawg Huab Tais Yes Xus xwb thiaj pab peb kho tau tej kab mob no zoo. Tib neeg yeej tsis muaj tshuaj tub nkeeg rau tus neeg nkees noj kom nquag tuaj, tsis muaj tshuaj kho cov kab mob sib cav sib ceg, sib ntxub, sib ntaus sib tua, ua plees ua yis, lim hiam, tub sab tub nyiag. Peb tib neeg liam txwv loj leeb, xyob txhiaj, tshoj cuab yig puas tsuaj, raug kaw qhov taub vim peb lub siab lub ntsws thiab ntsuj plig raug tej kab mob, tej dab no lwm thiab vij : “33 Tas lub nroog tuaj ntsauv nws ntawm qhov rooj 34 Nws kho zoo coob tus muaj mob ntau yam mob thiab ntiab tawm ntau tus dab phem, tsis cia dab phem hais lus vim lawv paub nws.” Kawg Yes Xus lub Moo Zoo thiaj li yuav cawm tau peb. Yog peb tig mus ntsia peb lub neej qub thaum tseem teev dab qhuas thiab lub neej teev Tswv Ntuj zim txwv no, ua rau peb muaj kev kaj siab ntau npaum li cas. Txij peb nrog Yes Xus taug kev peb tsis nco poob plig, tsis ntshai dab lawm ; txij peb los teev Yes Xus hauv Koom Txoos Kav Tos Liv, peb muaj cov leej ntshiab tej koob hmoov txhawb peb thiab peb muaj kwv tij nyob thoob ntiaj teb suav tsis txheeb. Peb ntseeg tias peb tus Huab Tais Yes Xus daws tau peb txoj kev txhawj xeeb pov tseg, nws nrog peb nyob pov hwm peb.

Ib tsoom phooj ywg, nej tus muaj kev nyuaj siab tsis pom qab hais qhia leej twg, nej coj tag nej kev txhawj xeeb mus thov Huab Tais Yes Xus pab. Yog nej teev hawm nws, nej yuav pom nws lub zog roos nej. Cov tsis tau paub teev Yes Xus, nej ho qhib qhov muag ntsia cov neeg teev Yes Xus, lawv dim plhuav txoj kev ua dab qhev puag ntxov lawm.

31.01.2012 Cwj Vuam Chiv

**Npuagtub** 6th February 2012, 2:25 pm

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°13

Re: COV ZAJ NYEEM - Xyoo B 2011-12 )

Post Npuagtub 6th February 2012, 2:25 pm

Nyob zoo os Nrhiav Tswv Ntuj,

Ua tsaug koj tso zaj lus qhuab ntuas video nrog cov zaj nyeem ua tau zoo heev li os nawv, thov Tswv ntuj foom koob hmoov rau koj os...

**NrhiavTswvNtuj** 10th February 2012, 9:12 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°14

COV ZAJ NYEEM HNUB 12/02/2012 ( Hnub chiv 6 Nruab xyoo - Xyoo B )

Post NrhiavTswvNtuj 10th February 2012, 9:12 pm

COV ZAJ NYEEM - Xyoo B 2011-12 ) 13289410

( Hnub chiv 6 Nruab xyoo - Xyoo B )

Zaj nyeem 1 : Les Vis 13, 1-2.44-46. Cov neeg mob ruas.

1 HUAB TAIS hais rau Mais
Xes thiab As Loos nkawd tias :
2 "Yog ib tug neeg daim tawv xoo pob,
voos kiav txhab, los tej tawv nqaij pheej
txaij, mas yuav ceev faj tsam yog mob ruas.
44 Tus mob ruas yog ib tug neeg paug,
leej choj yuav hais rau nws neeg paug khov kev
txhab saum nws taub hau.
45 Yog ib tug neeg mob ruas
lawm, mas nws yuav tsum hnav tej ris
tsho khaub hlab, cia plaub hau ntxhov,
nws yuav npog nws sab di ncauj saud,
thiab nws yuav qw tias :
'Tsis huv! Tsis huv!'
46 Nws mob ntev li cas, mas nws tsis
huv ntev li ntawd, vim nws tsis huv, mas
nws yuav nyob twm zeej, nws yuav tsum
tawm mus nyob sab yeej nraud."

Zaj nyeem 2 : 1 Kos Lis Nthos 10, 31–11, 1. Cov lus xaus

31 Txawm yog nej noj, nej haus, los nej
ua yam twg kuj xij, nej yuav ua los cav
txog Tswv Ntuj lub koob meej.
32 Li ntawd, nej txhob ua kom cov Yus
Das, cov Hes Las, los Tswv Ntuj lub
Koom Txoos muaj chaw yuam kev.
33 Kuv los kuj ib yam li ntawd : kuv ua
yam twg mas kuv muab siab rau ua kom
haum sawv daws siab. Kuv tsis nrhiav
yam zoo rau kuv. Kuv nrhiav yam zoo
rau sawv daws, kom lawv tau txais kev cawm.
1 Nej yuav yoog raws li kuv tus
lwj lwm, ib yam li kuv yoog raws
li Leej Pleev tus lwj lwm.

Mas Kos Ntawv Moo Zoo 1,40-45. Yes Xus kho ib tug mob ruas zoo.

40 Muaj ib tug neeg mob ruas tuaj cuag
Yes Xus, nws thov Yes Xus, nws txhos caug taij tias :
"Yog koj xav, mas koj yeej ua tau kom kuv rov huv."
41 Yes Xus hlub tus neeg ntawd, Yes
Xus cev tes tuav nws thiab hais rau nws tias :
"Kuv xav. Koj rov huv mas."
42 Tam sim ntawd, tus mob ruas tso tus
neeg ntawd tseg, nws cia li huv hlo. 43
Yes Xus qhuab qhia nws nruj nruj thiab
kom nws rov mus tam sis ntawd.
44 Yes Xus hais rau nws tias :
"Koj ua twj ywm, txhob qhia dab tsi rau
leej twg li. Koj mus thws koj lub cev rau
tus leej choj saib, thiab mus cev paj tshab
ntxuav koj raws li Mais Xes qhia, ua puav pheej rau luag pom."
45 Tab sis tus neeg ntawd tawm plaws
mus, nws pib tshaj tej ntawd thiab mus
hais rau txhua qhov. Ces Yes Xus tsis tau
kev tab meeg mus hauv ib lub nroog li.
Nws nyob sab nroog nraud, ntawm tej
qhov chaw tsis muaj neeg. Neeg tseem
tuaj tas qhov txhia chaw tuaj cuag nws.

COV ZAJ NYEEM - Xyoo B 2011-12 ) 13289411

COV ZAJ NYEEM - Xyoo B 2011-12 ) Lepreu10 Rau hnub tim 12 lub 02 hli 2012

Tsoom niam txiv kwv tij phooj ywg,

Leej tib neeg puav leej ntshaw lub neej zoo, neej nplua nuj, muaj noj tsis tshaib haus tsis nqhis. Peb los ntseeg Tswv Ntuj lawm, xav kom peb kub siab fim Tswv Ntuj loj tshaj peb tej kev ntshaw ib lub neej zoo rau peb. Hnub twg, hmo twg kev txhawj xeeb tuaj nphav, yus thiaj pom Tswv Ntuj lub txiaj ntsim txuag yus. Hnub no, peb yuav piav txog txoj cai qub thaum ub thiab cov lus tshiab Yes Xus tuaj qhuab qhia hais txog tus neeg raug txom nyem mob ruas.

Txoj cai qub thaum ub hais txog tus mob ruas. Peb tus neeg ntseeg Tswv Ntuj, peb yuav tsum paub phau Ntawv Ntshiab kom thoob kom ti txha. Muaj lus dab tsi nyob hauv phau Ntawv Ntshiab ? Muaj cov lus qub yog Tswv Ntuj cov lus cog tseg thaum ub rau Mos Xes thiab cov yaj saub ua ntej Huab Tais Yes Xus Tswv Ntuj Leej Tub yug los ua neeg. Muaj cov lus tshiab Huab Tais Yes Xus tau cog tseg rau nws cov thwj tim thiab cov thwj tim cov lus qhia txog Yes Xus rau sawv daws paub. Ua li mas Yes Xus cov thwj tim, peb cov yawg koob, muab Tswv Ntuj cov lus qub thiab muab Yes Xus cov lus qhuab qhia tshiab sau ua ib phau, peb hu ua phau Ntawv Ntshiab (La Sainte Bible). Vim li ntawd, tus nyeem phau Ntawv Ntshiab, yuav tsum paub zaj lus nws nyeem yog zaj lus twg, qub los tshiab. Phau Ntawv Ntshiab zoo li txoj kev neeg taug mus teb. Phau Ntawv Ntshiab qhia kev rau peb taug ntiaj teb no mus lawm qaum ntuj. Niaj lub lis piam hauv Thaj Txi Ntuj, lub Koom Txoos muab ib zaj lus qub thiab ob zaj lus tshiab hauv phau Ntawv Ntshaib los qhuab qhia tsoom ntseeg.
Zaj lus qub peb mloog hnub no, hauv phau ntawv Les Vis, hais txog tus txhooj Tswv Ntuj qhia rau Mos Xes thiab As Loos yuav coj tus mob ruas li cas rau li cas : “45 Tus ruas khub kev txhab yuav hnav tsoos khaub hlab, cia do hau thiab npog hwj txwv rau qw hais tias : “Neeg paug, neeg paug no !” 46 Lub caij nws khub kev txhab nws yog neeg paug, nws mus nyob twj cuab sab ntug zos nraud.” Phau ntawv Les Vis yog ib co txhooj, ib co cai sau rau cov leej choj tuav tswj hwm tsoom ntseeg sawv daws. Muab piv tau rau peb lub Koom Txoos Kav Tos Liv cov txhooj tswj hwm tsoom neeg ntseeg niaj hnub no (le droit canon de l’Eglise). Yav thaud, ruas yog ib yam mob tsiv mob phem, kis neeg thiab tsis muaj tshuaj kho tau. Ruas ua neeg lub cev sawv hlwv ib txheej lwj ua kua yig, ntiv tes ntiv taws nqws tas, pob ntseg, qhov muag qhov ntswg thiab di ncauj khis tag. Tib neeg ntshai ruas cuag ntshai dab. Vim li ntawd, tsis pub tus ruas nyob hauv zos, muab khaub hlab rau npua, ntiab xa mus nrauj zoo, kom nws qw taug kev, neeg paug neeg qias, ceeb toom rau luag paub. Tus ruas twb mob txom nyem ti txha nkaus los neeg tseem ntxub thiab ntshai tus ruas kawg kiag. Vim, yeej tsis pom qab ua li cas rau tus ruas. Cov leej choj xwb thiaj muaj cai txiav txim txhem tus mob ruas xa mus ua twj cuab thiab yog ruas zoo, tso cai rov los ciaj neeg hauv zos. Vim li ntawd, neeg lub ncauj tsis hais los siab ntsws yeej xav twj ywm tim khaum thiaj raug nplua ua mob phem cuag li ntawd. Tus mob ruas los cia li poob siab thiab ntseeg tias tim nws txhaum loj nws thiaj khaum : “3 Tus leej choj tawm sab ntug zos nraud, yog leej choj pom tus ruas cov kev txhaj zoo lawm tiag 4 Leej choj hais rau tus neeg zoo ruas kom nqa ob tug noog ciaj huv huv thiab ib tsuag taws thuv…mus txi Lv14,3-4” Kev muab nkawm noog los tua txi ntuj yog ib lub cim zeem tseeb, nws zoo tu qab lawm tiag, nws muaj cai los ciaj ua neeg nrog sawv daws.

Cov lus tshiab Yes Xus tuaj qhia txog tus mob ruas. Peb yog neeg teev Yes Xus nyob thoob ntiaj teb. Peb yuav tsum paub cov lus qub thiab cov lus tshiab, mloog Yes Xus cov lus qhia. Tus neeg teev Yes Xus yog Yes Xus ib tug thwj tim yuav tshaj Yes Xus tej lus rau zeej tsoom neeg. Vim li ntawd, tus neeg teev Yes Xus yuav tsum paub phau Ntawv Ntshiab, mus kawm kom muaj kws, muaj xib hwb qhia. Cov xib hwb, cov kws qhia yuav tsum muaj hauv paus tso cai, muab cai rau lawv qhia Yes Xus lub Moo Zoo thiaj yog cov tseeb. Nej yuav ceev faj cov xib hwb qus sawv tsim lawv pawg ntseeg zoo li tus tub sab txeem los hauv nkuaj li Yes Xus hais, muab Yes Xus lub Moo Zoo ua kev lag kev luam nrog nej xwb. Yog nej xav paub Huab Tais Yes Xus tseeb tiag, nej xav kom nej kev teev hawm Yes Xus tau txiaj ntsim, nej yuav taug kom tau lub hauv paus, kom tau poj yawm, lawv thiaj yog cov tim khawv tau noj tau haus nrog Yes Xus, nej mloog lawv lus nej thiaj tsis yuam kev. Thaum nej nrhiav tau cov cag lub hauv paus lawm, cog nej txoj kev ntseeg npuab lawv kom ruaj khov, nej thiaj tau koob hmoov. Nej tso siab rau lub Koom Txoos Kav Tos Liv, nws yog lub hauv paus, yog nej Niam. Nej txhob mus txuas nplooj, nplooj yuav zeeg ; txhob mus txuas kav, kav yuav qhuav. Nej yuav txuas hauv paus kom ruaj khov nej thiaj ciaj sia. Peb ntseeg tias Huab Tais Yes Xus ua lub Koom Txoos Kav Tos Liv taub hau coj nws kev. Peb pom Yes Xus kho tau tus mob ruas zoo, tus mob ruas tau Huab Tais Yes Xus txiaj ntsim. Peb yog neeg muaj txhaum, tiam sis Yes Xus pub peb cov neeg txhaum qee leej dawb thiab huv ntshiab si tuaj. Cov leej ntshiab yog cov txais Huab Tais Yes Xus txiaj ntsim : “43 Yes Xus hais ntsees tam sid rau nws kom nws cia li tawm mus 44 Hais rau nws tias : “Koj pom, txhob hais ib los rau leej twg, tiam sis mus thws koj tus kheej rau leej choj thiab nqa yam Mos Xes tau kom ua rau koj qhov huv tuaj no ua pov thawj rau lawv.” Yes Xus cawm tus mob ruas ntawm nws tus mob qias mob phem thiab pub ib lub neej tshiab rau nws nrog luag ua. Vim li ntawd, nws kev teev ntuj, kev txi ntuj tsuas pauj Tswv Ntuj txiaj ntsim raws txoj cai. Leej choj ua tim khawv zeem tseeb Tswv Ntuj lub txiaj ntsim kho tus ruas zoo lawm tiag. Rau peb cov neeg ntseeg Tswv Ntuj, peb cov txhaum yog kev paug kev qias Tswv Ntuj lis ruas qias peb. Tiam sis, peb ntseeg tias Yes Xus kev hlub peb loj tshaj peb cov txhaum. Yog peb tuaj teev, pe thiab tsa ncauj thov, peb yuav txais Yes Xus cov txiaj ntsim ntxuav peb dawb huv thiab ntshia si tuaj li tus mob ruas.

Ib tsoom ntseeg thiab phooj ywg, yog tus mob ruas thov Yes Xus kho tau nws huv tuaj tos tau nws nkag los hauv zos, peb cov txhaum ua peb paug thiab qias tsis zoo nyiam li ruas, tsim nyog cia peb nyob dab teb li tus mob ruas nyob nraum ntug zos. Tiam sis, yog peb tuaj thov Huab Tais Yes Xus zam peb cov txhaum, nws yuav zam thiab ua kom peb ntshiab huv, tos peb mus ua lub neej tshiab ciaj sia ib txhiab ib txhis lawm qaum ntuj. Yog peb mloog lub Koom Txoos kev qhuab qhia nquag mus daws txhaum, tig los yuav lub siab tshiab thiab hlub neeg kuj yog peb mloog Huab Tais Yes Xus.

07.02.2012 Cwj Vuam Chiv

**NrhiavTswvNtuj** 19th February 2012, 9:29 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°15

COV ZAJ NYEEM HNUB 19/02/2012 ( Hnub chiv 7 Nruab xyoo - Xyoo B )

Post NrhiavTswvNtuj 19th February 2012, 9:29 am

COV ZAJ NYEEM - Xyoo B 2011-12 ) Z4f41510

( Hnub chiv 7 Nruab xyoo - Xyoo B )

Zaj nyeem 1 : Es Xais 43, 18-19.21-22.24b-25

18 “Txhob tshua txog thaum ub lawm, txhob ntshaw yav dhau los, txhob khuv xim.
19 Saib mas ! Kuv ua dua yam tshiab, tus kaus twb nthaw, nej puas paub ? Kuv rhawv ib txoj kev hauv suab puam, ua dej ntws hauv thaj chaw qhuav.
21 Haiv neeg kuv cob qhia ua kuv tug yuav qhuas kuv lub koob meej.
22 Yas Kos koj tsis nquag hu kuv, His Xais Lais koj tseem dhuav kuv.
24 Cov roj koj muab los txi twb tsis npaum li koj tej txhaum koj ua rau kuv thiab koj kev lim hiam koj ua kuv dhuav.
25 Hos kuv li kuv zam koj lub siab luv tsuas nros kuv thiab uv tag koj tej txhaum.

Zaj nyeem 2 : 2 Kos Lis Nthos 1, 18-22

18 Peb cov lus hais rau nej tsis lam haws thiab tsis haws, Tswv Ntuj lav tas.
19 Vim peb cov tuaj qhia Yes Xus Pleev Tswv Ntuj Leej Tub rau nej, kuv thiab Xis Vas Nus thiab Tis Mos Tes tsis lam haws thiab tsis haws, puav leej haws tag nrho hauv nws.
20 Vim nws yog lo haws tag ntawm Tswv Ntuj tej lus cog tseg; lo lus As Mees peb qhuas Tswv Ntuj lub hwj chim vim yog nws;
21 Tus lav peb nrog nej hauv Leej Pleev thiab muab peb pleev yog Tswv Ntuj,
22 Thiab Tswv Ntuj tus muab nws cim hom peb thiab pub Leej Ntuj Plig lub txiaj ntsim rau peb lub siab.

Mas Kos Ntawv Moo Zoo 2, 1-12

1 Ob peb hnub tom qab, Yes Xus rov tuaj hauv Kas Fas Naus, hnov tias nws nyob hauv tsev.
2 Coob leej tuaj ntsauv ua rau tsis muaj chaw tas, ntawm qhov rooj kuj tib yam. Nws thiaj cev lus rau lawv.
3 Plaub leeg kwv tau ib tug tuag tes taw tuaj ntawm nws.
4 Lawv nqa nws hla tsis txeem npoj neeg, lawv qhib ib lub qhov saum ru tsev ncaj ntawm nws, dauv lub txaj tus tuag tes taw tseem pw pav ca los.
5 Yes Xus pom lawv kev ntseeg hais rau tus tuag tes taw : “Me nyuam, koj cov txhaum zam tas.”
6 Ib txhia thoob xwm zaum nyob ntawd txawm xav twj ywm hauv lawv siab :
7 “Tim li cas tus neeg no hais li ntawd ? Nws thuam ntuj ; leej twg zam txhaum tau, kawg Tswv Ntuj tib leeg ?
8 Tam sis ntawd, Yes Xus paub ntsoov hauv nws siab tias lawv xav li ntawd hauv lawv kheej hais rau lawv : “Tim li cas nej xav li ntawd hauv nej siab ?
9 Dab tsi yooj yim dua, hais rau tus tuag tes taw : koj tej txhaum zam tas los hais tias : sawv los, nqa koj lub txaj thiab mus kev ?
10 Kom nej paub tias neeg Leej Tub muaj peev xwm zam txhaum tau saum daim av.” Nws hais rau tus tuag te taw :
11 “Kuv hais rau koj : sawv los, tshem koj lub txaj thiab rov mus koj tsev.”
12 Tam sis ntawd, nws sawv tseem tshem nws lub txaj tawm ntawm sawv daws mus ua rau sawv daws ntshai thiab qhuas Tswv Ntuj hais tias : “Tsis tau pom dua ib zaug.”

COV ZAJ NYEEM - Xyoo B 2011-12 ) 13296710

COV ZAJ NYEEM - Xyoo B 2011-12 ) P_270210 Rau hnub tim 19 lub 02 hli 2012

Ib tsoom kwv tij neej tsa nquag fim Tswv Ntuj,

Hnub no lis piam hnub chiv 7 nruab xyoo, lub ntsiab lus peb yuav hais txog yog lub neej tshiab, Huab Tais Tswv Ntuj muab pub rau peb nrog nws Leej Tub Yes Xus.

Lub neej tshiab nrog Huab Tais Yes Xus. Peb yuav tham me ntsis txog lub qub neej, peb thiaj li yuav to taub lub neej tshiab. Tib neeg lub neej muaj yav dhau los, lub zim txwv no thiab tag kis, yav lawm tom ntej. Ua li mas peb tsis paub lub neej lawm tom ntej txij tag kis mus yuav zoo li cas. Peb tsuas paub hnub no, txoj dej num peb ua, pluas noj pluas haus, tej lus zoo peb xav hais rau luag hnub no. Yav tag los li nag hmo, peb tseem nco tau. Tiam sis, yav dhau los txheej thaud ub, peb tsis paub lawm. Piv li tej kwv huam, peb tsuas nco tej laus hais dab neeg txog tej poj yawm khiav suav rog. Lawv hla toj tuag tshaib dawm tuag no, raug txom nyem thiab tshaib li tshaib; tej txhia tau muab me nyuam pauv ncuav pias noj taug kev los. Nyias haiv neeg muaj nyias kwv huam piav txog nyias poj koob yawm txwv.
His Xais Lais kuj muaj His Xais Lais liv xwm. Lawv cov pog yawg Has Nplas Has tawm puag Npas Npis Los teb (Iraque) thoj nam tuaj txog Kas Nas Has teb. Vim lub ntuj qhuav, teb chaws Kas Nas Has tshaib plab, lawv thiaj mus nyob Hais Nkws Tos teb (Egypte). Tswv Ntuj tau tshoj Mos Xes kom mus coj lawv rov los lawv teb chaws. Muaj tej lub cim ua rau His Xais Lais ntseeg Tswv Ntuj ruaj thiab khov : zoo li Tswv Ntuj qhib kev rau lawv hla qab thu hiav txwv thiab Tswv Ntuj tseem yug kuam cej kuam xua mas nas rau lawv noj tuav siav 40 xyoo nyob hav suab puam thiab muab txhooj muab cai rau lawv kawm ua neeg teev hawm Tswv Ntuj. Huab Tais muab 10 lo lus qhia ua txhooj hwm neeg, hwm niam hwm txiv, txhob tua neeg, txhob thab luag txij nkawm, txhob tub sab. Saub Es Xais hais rau His Xais Lais kom txhob khuv xim tej hwj huam yav dhau los ntawd : “18 Txhob tshua txog thaum ub lawm, txhob ntshaw yav dhau los, txhob khuv xim 19 Saib mas ! Kuv ua dua yam tshiab, tus kaus twb nthaw, nej puas paub ? Kuv rhawv ib txoj kev hauv suab puam, ua dej ntws hauv thaj chaw qhuav 21 Haiv neeg kuv cob qhia ua kuv tug yuav qhuas kuv lub koob meej 22 Yas Kos koj tsis nquag hu kuv, His Xais Lais koj tseem dhuav kuv” Lub neej tshiab His Xais Lais yuav npaj rau niaj hnub no, yog kev txi ntuj thiab qhuas Tswv Ntuj txiaj ntsim, txhob dhuav Tswv Ntuj li tus neeg tub nkeeg, txhob mus yoog mus kawm ua neeg qias neeg phem, ua plees ua yis, lim hiam, huab noj huab haus, txeeb liaj txeeb teb, txeeb nom li tej neeg tsis paub tsis hwm ntuj.
Rau peb tus neeg teev Yes Xus niaj hnub no kuj tib yam nkaus. Yav thaud, peb tej poj yawm tseem teev dab qhuas, lawv yuav tsum tiam dab, txi dab tas lub neej txhob cia dab tshaib dab thiaj tsis los ua mob ua ntsaj rau neej. Txij peb los teev Yes Xus, peb tsis laig dab ib daim nqaij los ib dia kua lawm. Tej dab cia li yoo tau, tsis txawj tshaib plab li thaum ub los xyov yog peb tsis laig es dab tuag tshaib tas lawm. Peb lub neej los npuab Tswv Ntuj, teev Tswv Ntuj tau nyob nyab xeeb, ua neej tshav ntuj nrig. Peb pom ntsoov muaj tseeb, kev teev Yes Xus pub ib lub neej tshiab rau peb tiag. Tiam sis, lub neej tshiab raws li Yes Xus lub Moo Zoo, tsis yog ua kom peb lub cev noj qab nyob zoo, ua rau peb dim kev dhuav neeb dhuav yaig xwb. Lub neej tshiab raws li Yes Xus qhia, yog siab ntsws, tswv yim thiab ntsuj plig tau nyob kaj nrig phim lub cev. Yes Xus qhia rau peb pom 2 yam zoo li no hauv nws lub Moo Zoo. Tus neeg teev Yes Xus yuav tau kam thiab yoog :
1-Kev zam txhaum. Hu ua tib neeg, txoj kev zam txhaum tsis yooj yim rau leej twg. Ntiaj teb tsis muaj kev sib zam. Leej twg ua txhaum kawg raug nplua ; tus tub sab tua neeg, txhaum loj txhaum hnyav, kawg raug tua pov tseg, tib neeg thiaj zoo siab. Ntiaj teb tsis zam tus neeg lim hiam. Tiam sis, peb tus Huab Tais Yes Xus lub Moo Zoo qhia tib neeg hais tias muaj kev rau peb sib pab, sib hlub thiab muaj kev rau peb sib zam txhaum. Tos ntiaj teb ua tsov rog, neeg sib ntaus sib tua, sib ntxub ua neej tsaus ntuj nti, vim neeg tsis sib zam txhaum. Peb cov txhaum lo peb lub siab lub ntsws thiab ntsuj plig li tus tuag tes taw nrug tsis tau nws lub txaj : “5 Yes Xus pom lawv kev ntseeg hais rau tus tuag tes taw : “Me nyuam, koj cov txhaum zam tas.” 6 Ib txhia thoob xwm zaum nyob ntawd txawm xav twj ywm hauv lawv siab : 7 “Tim li cas tus neeg no hais li ntawd ? Nws thuam ntuj ; leej twg zam txhaum tau, kawg Tswv Ntuj tib leeg ?” Peb leej twg lam ua npe teev Yes Xus, tsis hloov siab ntsws los mloog Yes Xus lub Moo Zoo, tsis zam leej twg, ua neeg cib nyeej, khav theeb, peb zoo li cov thoob xwm no, lam ua neeg teev ntuj dag, peb thuam Yes Xus ib yam cov neeg phem ib txwm tsis teev Yes Xus thiab.
2-Kho tus neeg tuag tes taw zoo hlo sawv tsees. Yes Xus tsis yog zam txhaum ntawm ncauj thiab kho ntsuj plig kom huv xwb. Yes Xus ua tau tus tuag tes taw zoo hlo sawv mus kev. Yam num peb ua tau, peb yuav tsum ua, yuav tsum nquag teev ntuj, txhob dhuav Tswv Ntuj. Peb noj tsis tshaib haus tsis nqhis, muaj cov neeg txom nyem tshaib plab, peb yuav hlub yuav pab lawv kom dim kev tshaib kev nqhis. Peb tsis muaj liaj teb, ua neej txom nyem, pluag, raug luag ntxub, raug luag thuam. Tsis muaj neeg pab tau peb dim peb lub neej txom nyem. Peb nti tsis taus li tus tuag tes taw. Peb yuav nrhiav kev kom ntsib tau Yes Xus ib yam li tus tuag tes taw tsis nyob twj ywm hauv tsev, nkaum hauv txaj. Nws muaj peev xwm nrhiav tau kev ntsib dheev Yes Xus. Muaj neeg nyob ntom nti thaiv kev tag, nws kom lawv dauv nws saum ru tsev los ntsib Yes Xus. Yog peb coj tag peb kev txom nyem mus ntsib Yes Xus, peb yuav dim plaws ib puas tsav yam kev iab kev daw, kev txhawj xeeb, rov los vaj los tsev ua lub neej tshav ntuj nrig. Yam peb ntshaw, peb ua tsis tau, Huab Tais Yes Xus yuav muab tuaj pub rau peb : “11 Kuv hais rau koj : sawv los, tshem koj lub txaj thiab rov mus koj tsev.” Lub txiaj ntsim Yes Xus pub rau peb pom no tsis txawj nqhuab, tsis txawj tag. Leej twg nquag nrhiav ces nws yuav tau txais Yes Xus lub Moo Zoo.

Ib tsoom phooj ywg, peb los teev Yes Xus lawm, peb yuav tso siab lug rau Huab Tais Yes Xus lub Moo Zoo. Tsis muaj ib lub txiaj ntsim zoo tshaj thiab loj tshaj peb txoj kev mloog Huab Tais Yes Xus lub Moo Zoo. Yog vim peb tsis muaj zog hlub tau, peb tsis muaj peev xwm zam tau peb tus yeeb ncuab, peb yim huab yuav siv zog nrhiav kom tau kev ntsib peb tus Huab Tais Yes Xus, nws yuav ua kom peb sawv tau lawv nws qab.

14.02.2012 Cwj Vuam Chiv

**NrhiavTswvNtuj** 25th February 2012, 4:29 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°16

COV ZAJ NYEEM HNUB 26/02/2012 ( Hnub chiv 1 Caij 40 - Xyoo B )

Post NrhiavTswvNtuj 25th February 2012, 4:29 am

COV ZAJ NYEEM - Xyoo B 2011-12 ) 13301710

( Hnub chiv 1 Caij 40 - Xyoo B )

Zaj nyeem 1 : Hauv Paus 9, 8-15

8 Tswv Ntuj hais li no rau Nom Hes thiab nws cov tub nrog nws :
9 “Ntawm no, kuv tsa kuv lo lus cog cia nrog nej thiab nej cov xeeb leej xeeb ntxwv puag tom qab,
10 Thiab nrog tas cov ntsuj ciaj sia nyob nrog nej, tej noog, tej tsiaj tas nrho cov tsiaj saum daim av nrog nej, rau tas txhua tsav tsiaj tawm hauv nkoj nyob saum av.
11 Kuv yuav txhim kuv lo lus cog cia sawv los nrog nej : dej yuav tsis nyab lub cev nqaij ntxiv thiab dej yuav tsis nyab rhuav daim av ntxiv.”
12 Tswv Ntuj hais li no : “Nov, lub cim ntawm kuv lo lus cog cia ntawm kuv thiab nej thiab rau tas cov ntsuj ciaj sia nrog nej, rau tej xeeb ntxwv mus li.
13 Kuv ua kom zaj sawv tuaj saum huab, nws yog lub cim cog lus ntawm kuv thiab daim av.
14 Thaum kuv ua twv huab, yuav pom zaj sawv hauv twv huab saum npoo av,
15 Kuv yuav nco ntsoov txog kuv lo lus cog cia ntawm kuv thiab nej thiab rau tas cov ntsuj ciaj sia hauv txhua lub cev, dej yuav tsis nyab rhuav lub cev nqaij ntxiv.”

Zaj nyeem 2 : 1 Pob Zeb 3,18-22

18 Tej txhaum this Leej Pleev txom nyem ib zaug, nws ncaj ncees rau cov nkhaus kom coj nej cuag tau rau Tswv Ntuj, lub cev txawm tuag los ntsuj plig nyob cus plaws;
19 Li ntawd, nws thiaj mus qhia tau rau cov ntsuj plig nyob hauv nkuaj,
20 Cov cam thawj thaum ub Tswv Ntuj tos Nom Hes txua tau nkoj ntim tau yim leej ntsuj duab dim dej xwb,
21 Yog ua piv txwv lub cim ntxuav cawm nej tam sis no, tsis yog tshem nej nqaij ntsu kauv, yuav coj tag nrho nej lub siab zoo rau ntawm Tswv Ntuj, vim Yes Xus Pleev sawv tsees ciaj sia,
22 Mus dua saum qaum ntuj, nws zaum ntawm Tswv Ntuj sab xis, tus tswj tas tsoom tshiab, tej peev xwm thiab tej hwj huam.

Mas Kos Ntawv Moo Zoo 1,12-15

12 Leej Ntuj Plig coj nws tawm tam sid mus rau hav suab puam.
13 Nws nyob hauv hav suab puam plaub caug hnub raug Xas Tas haub, nws nrog tej tsiaj qus ua ke thiab cov tshiab tiam nws.
14 Tom qab luag ntes Zam lawm, Yes Xus tuaj hauv Nkas Lis Lais tshaj Tswv Ntuj lub Moo Zoo,
15 Hais tias : sij hawm los txog, Tswv Ntuj qaum ntuj nyob ze ze kom thim xav thiab ntseeg lub Moo Zoo.

COV ZAJ NYEEM - Xyoo B 2011-12 ) 13301711

Rau hnub tim 26 lub 02 hli 2012

Ib tsoom ntseeg thiab phooj ywg mloog Tswv Ntuj lus,

Hnub no, tag nrho tsoom ntseeg hauv Koom Txoos Kav Tos Liv peb nkag hauv lub caij 40. Yog ib lub caij nyoog rau peb txhua tus neeg Kav Tos Liv thim nyias kev poob zoo thiab nyias kev twm xeeb los ua neeg tsob hwb mloog Yes Xus lub Moo Zoo. Peb yuav los piav ob peb los txog lub caij 40 thiab cov zaj nyeem hnub no ua txiaj ntsim pab peb nrog peb tus Huab Tais Yes Xus tiv dab Xas Tas.

Txawm peb ntxuav plig tas, peb txhob xav yooj yim tias peb los ua neeg teev Yes Xus nrog lub Koom Txoos Kav Tos Liv lawm, ntshai peb yuav dawb thiab huv txaus, muaj ntsej muag ntawm Tswv Ntuj dua cov tseem teev dab qhuas thiab cov neeg tsis ntseeg tsis hwm ntuj. Peb yuav tau ceev faj, nws tsis yooj yim npaum li ntawd. Vim muaj tej txhia lub ncauj tsis hais los siab xav li ntawd, lawv thiaj muaj ntsej muag thuam thiab muaj plhus txiav txim rau cov neeg teev dab qhuas tias cov teev dab yuav mus lawm ntxwg nyoog teb. Tseem muaj lwm cov xav hauv lawv tus kheej tias twb kawm kev ntseeg txaus, paub teev ntuj, paub phau Ntawv Ntshiab thiab ntxuav plig tag lawm ces hauj lwm ua neeg ntseeg tag li ntawd, tsis tas yuav teev teev ntuj lawm. Kev teev ntuj ua leg dhau rau lawv lub neej thiab tab kaum lawv kev noj haus, kev tawm rooj mus tsham kwv tij neej tsa thiab mus twv txiaj yuam pov…Kev ua neeg teev Yes Xus nws tsis mus li peb lub ncauj hais thiab peb zaj tswv yim xav tau no. Vim li ntawd, lub caij 40 yog ib lub caij nyoog rau peb txhua tus neeg teev Yes Xus thim xav tsis txhob coj li cov neeg tswv yim tws tswv yim nqaim. Peb yuav muab lub caij 40 no ua chaw ntoj chaw thuv peb tus Huab Tais Yes Xus ua peb lub chaw cuab zog nrauj peb lub qub siab peb coj kam, kov kam mus pov tseg. Hnub 4 peb txais tshauv qhib lub caij 40, lub Koom Txoos thiaj muab cov zaj nyeem rau peb mloog kom pab peb lub tswv yim tws tswv yim nqaim kom txawj nthuav dav, qhib peb qhov muag kom pom kev deb. Vim li cas peb thiaj mus txais tshauv ? Vim tshauv yog ib lub cim them txim txhaum. Hnub peb txais tshauv, txiv plig tsuab ib txaum tshauv ntaus cim ntawm peb hauv pliaj hais rau peb tias : “Thim xav los ntseeg lub Moo Zoo, Convertissez-vous et croyez à la Bonne Nouvelle” Peb zoo siab hlo thim txoj xub ke coj peb ua neeg phem los mloog Huab Tais Yes Xus lub Moo Zoo txhawb peb ua neeg zoo. Piv li lub Cim Ntxuav muaj txiaj ntsim cawm tau tus neeg txhaum thim los ris siab ua neeg zoo. Peb cov txhaum zoo li dej nyab ntiaj teb nyab peb lub neej puas tsuaj thiab nyam peb tuag mus ciaj dab ncav tsis cuag Tswv Ntuj txoj sia. Tus neeg siab zoo, tus neeg ncaj, yog tus neeg mloog lus thiab xyuam xim, nws tsis ua tub qaug leej twg, nws tsis dhuav Tswv Ntuj. Nom Hes yog neeg siab zoo, neeg ncaj mloog Tswv Ntuj lus. Tswv Ntuj hais rau Nom Hes kom txua nkoj, tus neeg tub nkeeg muab nws lub caij nyoog mus laug, mus loj leeb. Thaum dej los nyab ntiaj teb, lub nkoj cawm tau Nom Hes tsev neeg dim 8 leej ciaj sia nrog cov tsiaj txhu nyob hauv nkoj. Lub Cim Ntxuav zoo li lub nkoj cawm peb cov neeg mloog Yes Xus lub Moo Zoo qhia peb lug kev txhaum, kev phem txhob ua; peb yuav tiv tas zog Xas Tas kev haub kev ntxias tuaj nyab peb lub neej li dej nyab ntiaj teb thaum Nom Hes tseem ua neej : “Lub cim ntxuav cawm nej tam sis no, tsis yog yaug nej nqaij ntsu kauv, yuav coj tag nrho nej lub siab zoo rau ntawm Tswv Ntuj, vim Yes Xus Pleev sawv tsees ciaj sia,22 Mus dua saum qaum ntuj, nws zaum ntawm Tswv Ntuj sab xis” Tus neeg txais lub Cim Ntxuav tiam sis nyob tej tug tuag luav tas sim neej, tsis paub hauj lwm ua neeg ntseeg Tswv Ntuj, tsis hloov nws lub siab nkhaus, tsis hloov nws lub siab twm xeeb los ua neeg zoo, yuav ua cas muaj txiaj ntsim qhov twg los pab nws. Ib tug me nyuam niam txiv yug tau, niam txiv hlub hlub qhuab qhia tas zog kom ua neeg nquag, ua neeg tsim txiaj los tus me nyuam ntawd yeej yuav nws lub siab twm xeeb tsis mloog niam txiv lus. Thaum hlob tiav neeg, nws lub siab tseem yim tawv tuaj, mus tub sab tub nyiag, tua neeg raug luag ntes tua pov tseg thiaj tag. Tus me nyuam no yeej xam tsis pom niam txiv kev khwv tu nws hlob, yeej tsis ris niam txiv txiaj ntsim kev hlub tu nws da quav da zis hlob. Tus neeg lam ntxuav plig, lam ua neeg teev Yes Xus tsis hloov nws lub siab nkhaus, siab twm xeeb ib qho, tsis xyaum ua zoo kuj tib yam nkaus tus me nyuam cam thawj tuag kus no.

Peb tuaj yeem los teev Yes Xus peb tus kheej, tsis muaj neeg yuam peb los. Peb yuav tig mus mloog Yes Xus lub Moo Zoo qhia peb kom peb txawj ua neeg paub tab, txawj xav, ua neeg ncaj ncees hauv paus nto plaws ntsis. Yes Xus txais lub cim ntxuav tas ntawm Zam, Leej Ntuj Plig coj Yes Xus mus 40 hnub hauv hav suab puam, raug tshaib raug nqhis. Peb los ntxuav plig ua neeg teev Yes Xus, Leej Ntuj Plig kuj coj peb kev hla hav suab puam tag peb sim neej. Yes Xus raug dab Xas Tas haub thiab ntxias 40 hnub hauv hav suab puam. Tiam sis, ntuj cov tshiab nrog Yes Xus nyob ib ncig tiam Yes Xus. Peb lub neej suab puam tsis yog dab tsi : yog tsis muaj noj muaj haus txuas pluas, tsis muaj nyiaj txiag nrog luag siv, pom luag vaj tse zoo nrog luag ntshaw; pom luag txij nkawm zoo, xav thab ua kom luag lub neej puas tsuaj; pom luag muaj qoob loo zoo, khib thiab ntshaw, mus nyiag; pom luag tej teb chaws kev plees kev yis ua dev ua npua, tsis cheem tiag yus lub siab mus kawm mus yoog luag. Cov neeg teev Yes Xus kuj raug dab Xas Tas haub ntxias tag sim neej. Peb yuav vam cov neeg ncaj neeg zoo nyob ib ncig ntawm peb, pab peb, tiam peb, peb yuav mloog lawv lus : “Yes Xus tuaj hauv Nkas Lis Lais tshaj Tswv Ntuj lub Moo Zoo,15 Hais tias : sij hawm los txog, Tswv Ntuj qaum ntuj nyob ze ze kom thim xav thiab ntseeg lub Moo Zoo.”

Ib tsoom phooj ywg, peb yuav tsum xyiv fab muab lub caij 40 no ua peb lub chaw cuab zog teev ntuj thov peb tus Huab Tais Yes pab peb nrauj peb lub siab phem thiab lub tswv yim nkhaus pov tseg. Vim peb thawj tus dab Xas Tas yog peb lub siab dub siab nkhaus thiab lub tswv yim lim hiam, peb yuav tsum ntiab tawm, nrauj peb lub siab phem kom tu taw. Yog peb tsis hloov siab tshiab, peb yuav mus ciaj dab ntxwg nyoog xeeb ntxwv ua ntej cov neeg teev dab qhuas. Kawg lub Moo Zoo Yes Xus tshaj thiaj cawm tau peb.

23.02.2012 Cwj Vuam Chiv

**NrhiavTswvNtuj** 3rd March 2012, 7:01 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°17

COV ZAJ NYEEM HNUB 04/03/2012 ( Hnub chiv 2 Caij 40 - Xyoo B )

Post NrhiavTswvNtuj 3rd March 2012, 7:01 am

COV ZAJ NYEEM - Xyoo B 2011-12 ) 13307911

( Hnub chiv 2 Caij 40 - Xyoo B )

Zaj nyeem 1 : Hauv Paus 22,1-2.9a.10-13.15-18

lawm, Tswv Ntuj sim Has Nplas
Has siab. Nws hu tias :
"Has Nplas Has ! Has Nplas Has !"
Has Nplas Has teb tias :
"Kuv nyob ntawm no !"
2 Tswv Ntuj hais tias :
"Coj koj leej tub twm zeej His Xas Has
uas koj hlub kawg, koj coj nws mus kom
txog lub teb chaws Mos Lis Yas. Nyob
ntawd koj yuav muab nws txi rau kuv
saum ib lub roob uas kuv yuav qhia rau koj."
9 Thaum nkawd tuaj txog thaj chaw uas
Tswv Ntuj tau qhia nws, Has Nplas Has
tsa ib lub thaj rau ntawd thiab nws muab
cov taws mus teeb rau saud. Nws muab
nws tus tub His Xas Has pav, ces nws
muab tso rau saum cov taws saum lub thaj txi Ntuj.
10 Has Nplas Has tsa tes mus
nthos rab riam yuav coj los tua nws tus
tub. 11 Tiam sis HUAB TAIS tus Tshiab
hu saum ntuj tuaj rau nws tias :
"Has Nplas Has ! Has Nplas Has !"
Has Nplas Has teb tias :
"Kuv nyob ntawm no !"
12 Tus Tshiab hais tias :
"Txhob tsa koj txhais tes rau saum tus me
nyuad ! Txhob ua dab tsi phem rau nws !
Zaum no kuv paub hais tias koj hwm
Tswv Ntuj tiag, vim koj tsis yig, koj
tseem muab koj leej tub twm zeej los txi rau kuv."
13 Has Nplas Has tsa muag ntsia pom ib
tug laug tshis uas ob tug kub daig hauv ib
koog pos. Ces nws mus muab tus laug
tshis los hlawv txi Ntuj hloov nws tus tub chaw.
15 HUAB TAIS tus Tshiab rov hu zaum
ob saum ntuj tuaj rau Has Nplas Has,
16 nws hais tias :
"HUAB TAIS hais tias : Kuv tuav txog
kuv lub npe cog lus rau koj tias : vim koj
tau ua li ntawd, koj tsis yig, koj tuaj yeem
muab koj leej tub twm zeem los txi rau
kuv, 17 mas kuv yuav foom hmoov zoo
ntau rau koj, kuv yuav ua kom koj tsoom
xeeb zeej xeeb ntxwv coob npaum cov
hnub qub saum ntuj thiab ntau npaum cov
xuab zeb uas nyob ntawm ntug hiav txwv.
Koj tsoom xeeb zeej xeeb ntxwv yuav ua
tswv kav lawv cov yeeb ncuab tej qhov
rooj loog. 18 Tas txhua haiv neeg nyob
ntiaj teb yuav tuav txog koj tsoom xeeb
ntxwv lub npe los sib foom hmoov zoo,
vim koj tau mloog kuv lus."

Zaj nyeem 2 : Los Mas 8,31-34

31 Peb hais tau dab tsi rau tej yam no : Yog Tswv Ntuj tuaj peb tog, leej twg yuav tiv peb ?
32 Nws li, nws twb tsis qee nws Leej Tub kheej muab laub tuaj rau peb sawv daws, dab tsi tag nrho nws yuav pub tsis tau rau peb nrog nws Leej Tub ?
33 Leej twg, tus muab txim rau cov Tswv Ntuj xaiv,Tswv Ntuj tus ua ncaj ?
34 Leej twg yuav txiav tau txim ? Leej Pleev tus tuag nthi, tus sawv lis tsees, tus nyob ntawm Tswv Ntuj sab xis thiab tus thov ntuj rau peb

Mas Kos Ntawv Moo Zoo 9,2-10

2 Rau hnub tom qab, Yes Xus txawm coj Pob Zeb, Yas Kos thiab Zam lawv nkaus mus ib cag nce saum ib lub roob siab. Nws txawm txia ntshis ntawm lawv xub ntiag,
3 Nws tej tsoos tsho txawm ci hob dawb paug tam li paj xo, saum av no tsis muaj tus tsi yuav dawb npaud.
4 Ua ciav Es Lias thiab Mos Xes tshwm plaws rau lawv, nkawd nrog Yes Xus tham tuj taws.
5 Pob Zeb cia li tsa ncauj hais rau Yes Xus : “Las Npis, cas yuav zoo tas npaum li rau peb nyob ntawm no, tsa zoj peb lub tsev tsam phooj ib lub rau koj, ib lub rau Mos Xes thiab ib lub rau Es Lias.
6 Xyov nws tsis paub yuav hais dab tsi vim lawv yeej ntshai kawg.
7 Ib twv huab tuaj qhwv nkaus lawv, ib lub suab tuaj hauv twv huab tuaj : “Tus no kuv Leej Tub zoo hlub, nej mloog ntsoov nws.”
8 Ib sij huam, lawv xam ncig lees pawv neeg tas, tshuav Yes Xus tib leeg nrog lawv nkaus.
9 Lawv nqes saum roob los, nws hais ntsees rau lawv kom txhob tham yam lawv pom ntawd rau leej twg mus txog thaum neeg leej tub tuag thiab sawv ciaj sia.
10 Lawv nco ntsoov lo lus ntawd thiab lawv sib hais qees saib tus yuav sawv ciaj sia hauv tsoom tuag yog dab tsi.

COV ZAJ NYEEM - Xyoo B 2011-12 ) 13307912

Rau hnub tim 04 lub 03 hli 2012

Ib tsoom ntseeg thiab phooj ywg cia siab ntsoov rau Huab Tais Tswv Ntuj,

Peb ib txhia twb ntseeg Tswv Ntuj tau ntev xyoo, ib txhia los ntseeg tau xyoo puav lawm, hos cov los tshiab tej zaum tseem niaj hnub kawm kev ntseeg kom paub Tswv Ntuj raws li Huab Tais Yes Xus cov thwj tim qhuab qhia tseg hauv peb lub Koom Txoos Kav Tos Liv. Hnub no, yog hnub Chiv 2 lub caij plaub caug, peb yuav hais txog tus neeg ntseeg kev cia siab rau Huab Tais Tswv Ntuj raws Koom Txoos Kav Tos Liv kev coj ib tsoom ntseeg.

Hauv tib neeg lub neej, yuav tsum muaj piv txwv rau sawv daws yoog, tib neeg thiaj li txawj ua neej. Tus neeg txawj hais lus, tus neeg nquag, tus neeg thoob tsib ua ib tug qauv zoo qhia teb chaws yoog. Hauv kev ntseeg Tswv Ntuj, tus neeg mloog Tswv Ntuj lus thiab cia siab rau Tswv Ntuj kuj ua piv txwv zoo rau tas tsoom ntseeg sawv daws yoog. Cov zaj nyeem hnub no tseem ceeb kawg rau peb kom txawj cia siab ntseeg Tswv Ntuj ruaj thiab khov li Has Nplas Has thiab cov thwj tim. Peb nyias xav txog nyias tus kheej saib, peb kev cia siab rau Huab Tais Tswv Ntuj puas phim tus neeg teev Tswv Ntuj los tsis phim. Vim li ntawd, peb yuav cuab ntsej mloog kom zoo zaj nyeem hais txog peb yawg koob Has Nplas Has no, nws tsis yog ib zag dab neeg hais laug caij laug nyoog, hos yog Tswv Ntuj zaj lus. Xav kom Tswv Ntuj zaj lus sim Has Nplas Has siab no ua txiaj ntsim pab peb lub siab ntseeg ncuj ncee kom ruaj, hloov peb lub siab dub siab kheej thiab nrauj peb lub siab lim hiam pov tseg, tig los ua ib tug Has Nplas Has tshiab mloog Tswv Ntuj lus. Txij li Tswv Ntuj tshoj Has Nplas Has nrauj dab qhuas los ntseeg Tswv Ntuj, Has Nplas Has pom xyeem Tswv Ntuj lub hwj huam pab nws. Yam li nws lub neej txom nyem yug tsis muaj tub ki xws teb xws chaw, Huab Tais Tswv Ntuj pub nws yug tau tub ki txhaws tau nws kev lwj siab. Tiam sis, Has Nplas Has kev cia siab rau Tswv Ntuj tob tshaj nws lub neej raug txom nyem, pluag tub ki, nrog luag ntshaw tub ki. Peb kev cia siab rau Tswv Ntuj ne, puas yog vim peb vam Tswv Ntuj daws peb kev lwj siab thiab pab tshem peb kev txom nyem xwb ? Tswv Ntuj tos Has Nplas Has kev cia siab rau Tswv Ntuj, yog tos saib Has Nplas Has lub siab yuav npuab Tswv Ntuj txij li cas, txog txij twg. Thaum Has Nplas Has txom nyem, Has Nplas Has vam Tswv Ntuj pab, ua tus mloog Tswv Ntuj lus. Ziag no Tswv Ntuj pab Has Nplas Has daws tau nws kev txom nyem, pub tub ki txhaws nws lub siab ntshaw, nws puas mloog Tswv Ntuj lawm. Vim li ntawd, Tswv Ntuj kom Has Nplas Has thim nws tus tub rov qab, muab ua txim txi rau Tswv Ntuj saum ncov roob Mos Lis Yas. Has Nplas Has ua siab txhib ib tsuag taws muab nog rau nws tus tub kwv nce roob. Ob txiv tub tuaj txog ntawm thaj chaw Tswv Ntuj teem nkawd. Thaum ntawd, Has Nplas Has mam paub lub txiaj ntsim thiab koob hmoov sis laub sis lug Tswv Ntuj pub rau nws : “18 Tas txhua haiv neeg saum daim av yuav tau koob hmoov ntawm koj tsoom xeeb ntxwv vim koj mloog kuv lub suab.” Tswv Ntuj zoo siab npaum li cas rau Has Nplas Has kev cia siab npuab Tswv Ntuj ciaj zoo siab nrog Tswv Ntuj ciaj, tuag zoo siab tuag rau Tswv Ntuj. Tus cia tau siab rau Tswv Ntuj, Tswv Ntuj yuav tus ntawd sawv Tswv Ntuj chaw. Tswv Ntuj zoo siab yuav Has Nplas Has ua piv txwv rau Tswv Ntuj Leej Tub ib leeg kheej txi rau peb. Tswv Ntuj Leej Tub Yes Xus tus kheej kwv ntoo cuam nce lub roob khauj khaum taub hau (Golgotha) pub nws txoj sia txhaws tib neeg kev txhaum.

Leej twg cia siab rau Tswv Ntuj txawm yog Has Nplas Has, Yes Xus peb tug thwj tim los peb leej twg, nws yuav pom Tswv Ntuj hwj huam. Hauv Mas Kos zaj Ntawv Moo Zoo hnub no, Yes Xus pub ib lub cim rau Pob Zeb, Yas Kos thiab Zam lawv peb leeg pom xwb. Tim li cas Tswv Ntuj ua tej lub cim rau qee leej pom xwb, tshuav coob leej tsis pom ? Yog peb tig ntsia Has Nplas Has, Tswv Ntuj ua tej lub cim rau Has Nplas Has pom. Peb ne, peb puas yuav muaj hmoo pom tej lub cim li Tswv Ntuj ua rau Has Nplas Has ? Peb sim xav, txoj kev teev ntuj xwb peb twb nkees, ceeb laj teev ntuj, mus koom teev ntuj tsis cuag ncua. Lub txiaj ntsim teev ntuj loj npaum li ntawd, peb twb saib tsis muaj nuj nqes, luaj thuam lub txiaj ntsim teev ntuj cuag nkaus tsis zoo dab tsi. Peb lam ua neeg teev Tswv Ntuj, peb lub qub siab dub thiab nkhaus twb tsis hloov kiag li. Peb lam ntseeg Tswv Ntuj sab nraud, yuav ntsej muag, kom hnub twg qaij qaug los txog thiaj muaj tus tu qab tu kev ua peb chaw cob cuab. Peb ua neeg ntseeg Tswv Ntuj, peb puas mob siab tiam Tswv Ntuj li peb muaj peev xwm ua tau tiag. Peb tus kheej, hnub peb ntsib kev txhawj xeeb, peb cia siab tshaj rau dab tus peb ntshai los peb cia siab rau Huab Tais Tswv Ntuj tus hlub peb ? Tswv Ntuj twb paub, pom peb nruab siab. Yog Tswv Ntuj tseem kom peb muab peb ib tug tub los ib tug ntxhais txi Tswv Ntuj thiab, xyov lauj, peb puas tshuav txog ob leeg kam mloog Tswv Ntuj lawd : “Tus no kuv Leej Tub zoo hlub, nej mloog ntsoov nws.” Pob Zeb, Yas Kos thiab Zam lawv mloog Yes Xus lus, tiam sis lawv yeej tsis paub mloog Yes Xus lus yuav zoo dab tsi rau lawv. Tej lub sij hawm zoo li no, lawv mam paub kev raws Yes Xus qab qhib tej txoj kev sim neej ntiaj teb tsis tau pom dua : kev mloog Yes Xus ua tau lawv pom xyeem lawv cov yawg koob txheej thaud ciaj sia ua rau lawv zoo siab los zoo siab, ntshai los ntshai. Tiam sis lawv tseem xav tsis tau thoob, tsis tau paub lub ntsiab lus yog tim li cas lawv thiaj muaj hmoo pom lawv cov yawg koob. Twb yog puag tom qab no, lub caij Yes Xus tuag Pob Zeb thiab Zam nkawd pom Yes Xus lub ntxa qhuav qhawv tsis paub xyov Yes Xus dua twg lawm, nkawd mam to taub thiab ntseeg tias Yes Xus sawv ciaj sia tsis nyob hauv ntxa lawm.

Ib tsoom phooj ywg thiab tsoom ntseeg sawv daws, peb yuav hwm Huab Tais Yes Xus loj tshaj tas txhia tsav puas yam, muab tag peb lub siab los khi tuag nthi rau Huab Tais Yes Xus, tuag los zoo siab nrog Huab Tais Yes Xus tuag vim peb yuav qaij qaug ib hnub twg. Huab Tais Yes Xus xwb yog tus yuav tsa peb sawv tsees ciaj sia nrog nws ciaj nyob txhiab niaj puas xyoo ib yam li Es Lias thiab Mos Xes nrog Yes Xus tham tuj taws.

29.02.2012 Cwj Vuam Chiv

**NrhiavTswvNtuj** 9th March 2012, 9:11 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°18

COV ZAJ NYEEM HNUB 11/03/2012 ( Hnub chiv 3 Caij 40 - Xyoo B )

Post NrhiavTswvNtuj 9th March 2012, 9:11 pm

COV ZAJ NYEEM HNUB 11/03/2012
( Hnub chiv 3 Caij 40 - Xyoo B )

Zaj nyeem 1 : Kev Tsiv 20,1-3.7-8.12-17: Tswv Ntuj kaum lo lus qhia.

1 Tswv Ntuj hais cov lus no :
2 "Kuv yog HUAB TAIS, koj tus
Tswv Ntuj, yog tus ua kom koj dim
ntawm Hais Nkws Tos teb los, dim
ntawm txoj kev ua luag qhev.
3 Koj yuav tsis txhob muaj dua lwm tus tswv ntuj.
7 Kojyuav tsis txhob hu txog koj tus HUAB
TAIS Tswv Ntuj lub npe mus ua tej yam
tsis zoo, vim HUAB TAIS yuav tsis zam
txim rau tus neeg uas tuav txog nws lub npe dog dig.
8 Koj yuav nco ntsoov caiv
hnub xas npas tos, koj yuav muab saib ua ib hnub ntshiab.
12 Koj yuav hwm koj niam thiab koj
txiv, koj thiaj yuav tau nyob ntev niaj
ntau xyoo hauv lub ntiaj teb uas koj tus
HUAB TAIS Tswv Ntuj muab pub rau koj.
13 Koj yuav tsis txhob tua neeg. 14 Koj
yuav tsis txhob zes luag txij luag nkawm.
15 Koj yuav tsis txhob ua tub sab tub nyiag.
16 Koj yuav tsis txhob liam rau luag tej.
17 Koj yuav tsis txhob ntshaw txeeb
luag vaj luag tsev. Koj yuav tsis txhob
ntshaw txeeb luag tus poj niam, luag tus
tub txib, luag tus ntxhais txib, luag tus
nyuj los tus luj, los ib yam dab tsi uas yog
luag tug."

Zaj nyeem 2 : 1 Kos Lis Nthos 1,22-25

22 Vim tias cov Yus Das taij hwj huamyees ntxwv ; cov
Hes Las nrhiav kev thoob tsib. 23 Hos
peb, mas peb tshaj ib tug Pleev tuag
saum ntoo cuam : cov Yus Das thuam tias
yog ib zag dawm taw kom yus ua txhaum.
Cov neeg teev dab thuam tias yog ib zag
vwm. 24 Tab sis cov uas Ntuj hu lawv,
tsis hais Yus Das los Hes Las, mas lawv
saib Yes Xus yog Leej Pleev, yog Tswv
Ntuj lub hwj huam, yog Tswv Ntuj txoj kev Thoob Tsib.
25 Vim tias txoj kev uas Tswv Ntuj saib
yog kev vwm, mas tseem thoob tsib dua
neeg kev thoob tsib. Txoj kev uas Tswv
Ntuj saib yog kev tsis muaj zog, mas
tseem muaj zog dua neeg kev muaj zog.

Zam Ntawv Moo Zoo 2,13-25.
Yes Xus mus pem Yes Lus Xas Les. Nws ntiab cov tub luam hauv lub Tuam Tsev Teev Ntuj.

13 Yuav txog cov Yus Das lub Ntees
Hla, ces Yes Xus mus pem Yes Lus Xas
Les. 14 Nyob hauv lub Tuam Tsev Teev
Ntuj, Yes Xus pom cov tub luam muag
nyuj, muag tshis, muag nquab, thiab cov
neeg pauv nyiaj zaum ntawm lawv cov
rooj. 15 Nws muab ib co hlua ua ib rab
nplawm, nws ntiab sawv daws huv tib si
tawm hauv lub Tuam Tsev Teev Ntuj,
nws caum cov yaj thiab cov nyuj. Nws
nchuav cov pauv nyiaj tej nyiaj, nws
ntxeev lawv tej rooj. 16 Nws hais rau
cov muag nquab tias :
"Nej tshem tej ntawd tawm hauv no mus.
Nej tsis txhob muab kuv Txiv lub Tsev
los ua ib lub tsev ua luam ntxiv." 17 Yes
Xus cov thwj tim nco txog lo lus uas
Ntawv sau tseg tias : Kev mob siab rau
koj lub Tsev ua kuv lub siab kub lug.
18 Cov Yus Das thiaj qhib ncauj hais rau nws tias :
"Koj tau ua li no, koj yuav muab lub cim
dab tsi rau peb pom ?
19 Yes Xus teb rau lawv, nws hais tias :
"Nej rhuav lub Tsev Ntshiab no. Peb
hnub tom qab, mas kuv rov txhim tau.”
20 Cov Yus Das thiaj hais tias :
"Lawv ua hauj lwm plaub caug rau xyoo
thiaj txhim tau lub Tsev Ntshiab no. Hos
koj, koj ua peb hnub, koj yuav rov txhim
tau !" 21 Tab sis Yes Xus hais txog nws
lub Cev uas yog lub Tsev Ntshiab.
23 Thaum tab tom nqaum paj nqaum
nruas ua lub Ntees Hla, Yes Xus nyob
Yes Lus Xas Les. Muaj coob leej ntseeg
txog nws lub Npe, vim lawv tau pom cov
cim nws ua. 24 Tab sis Yes Xus tsis tso
siab rau lawv, vim nws paub lawv tas huv
si, 25 tsis tas yuav muaj leej twg qhia
txog neeg rau Yes Xus. Vim nws paub
neeg lub siab sab hauv.

THUAV NTAWV NTSHIAB

COV ZAJ NYEEM - Xyoo B 2011-12 ) 551e-s10 Rau hnub tim 11 lub 03 hli 2012

Tsoom ntseeg thiab phooj ywg txhua leej,

Peb nyob hauv lis piam hnub Chiv 3 lub caij 40. Cov ntsiab lus hnub no peb xav hais txog yog Tswv Ntuj tus txhooj tus cai qhia rau tsoom tub ki His Xais Lais thiab Yes Xus kev meem txom rau cov neeg tuaj muab lub tuam tsev teev ntuj ua kiab khw lub chaw lag luam.

Tas lub ntiaj teb neeg puav leej yog Tswv Ntuj tsim, yog Tswv Ntuj me nyuam. Tiam sis, hauv tas tsoom me nyuam, Tswv Ntuj ntshaw kom muaj ib haiv neeg los coj kev teev hawm Tswv Ntuj raws txhooj raws cai. His Xais Lais raug xaiv ua haiv neeg ntseeg thiab teev Tswv Ntuj. Yuav ua cas qhia His Xais Lais kom paub Tswv Ntuj cai ? Yog li, Tswv Ntuj yuav tsum coj His Xais Lais tawm ntawm nws lub qub neej (ua Hais Nkws Tos qhev) mus hla hav suab puam, muab 40 xyoo los kawm kev teev ntuj, nyiaj tshaib yoo nqhis, noj kuam cej kuam xua mas nas tuav siav rawv taug Tswv Ntuj tus roj tus hneev. Thaum Tswv Ntuj tshoj peb los teev Tswv Ntuj, peb kuj yuav tau tso lub qub neej nrog kwv tij koom dab koom qhua, ua dab qhev pov tseg, mus taug 2 xyoos kev ntseeg kawm kom paub teev hawm Tswv Ntuj. Peb txoj kev raug tshaib raug nqhis, noj kuam cej kuam xua yog peb kev mob siab tig pob ntseg mloog xib hwb thiab txiv plig qhuab qhia Huab Tais Tswv Ntuj rau peb, kom peb paub cia siab rau Tswv Ntuj. Tus ntseeg tshiab yuav tsum kawm kom paub teev ntuj, kom cog tau kev cia siab ciaj rau ntawm Tswv Ntuj, tsis txhob cia siab rau txiv neeb txiv muam, nrauj yus txoj kev ntshai poob plig kom tu taw hauv yus lub qub siab mus. Tus neeg ntseeg yuav tseg ncua txhob ntshaw kev ua neeb ua yaig li qub, nws pab tsis tau, kho tsis tau peb tus mob tus ntsaj. Peb los ib taws ua neeg teev Tswv Ntuj, peb txhob thaub qab ob taws nyiag kev rov tig pob ntseg mus npuab tej nyuag txiv neeb txiv muam, tej nyuag saub cuav teem caij teem nyoog saib yaig ntxiv. Hnub peb muaj dab ntub npau suav phem, ntsib keb txhawj xeeb, muaj mob dia hau, peb cia siab ntsoov rau Huab Tais Tswv Ntuj, tus muaj hwj huam, cog peb kev cia siab tuag nthi rau Tswv Ntuj : “3 Tsis txhob muaj lwm cov tswv ntuj rau koj ntawm kuv xub ntiag. 7 Koj tsis txhob muab koj tus Huab Tais Tswv Ntuj npe mus lem, vim Huab Tais yuav tsis pom zoo rau tus muab nws npe mus lem. 8 Nco ntsoov ua kom hnub xas npas ntshiab huv.” Nej twb pom muaj coob tus ntseeg, cov neeg siab me, nyiag kev thaub qab rov mus thawj txiv neeb txiv muam, ua neeb kho tag kuj tsis nyab xeeb tshaj. Peb twb ntshai dab looj koov, ntshai dab kawg nkaus los peb tseem pheej ua ib siab cev caj dab rau dab caij, cia dab zawm caj pas kom tuag. Tswv Ntuj tus muaj hwj huam, tus hlub peb, tus yuav pab tau peb, peb cav tsis kam khauj zig kom tom thawj, tsis pe, tsis thov tsis txi thiab tsis quav ntsej teev Tswv Ntuj pab li. Peb yeem nyiag kev rho nyiaj mus muas tsiaj txhu qaib npuas, xyab ntaw rau txiv neeb kho yus niag mob (hypertension, cancer…) thaum kawg yus tus neeg mob laug, mob hypertension thiab mob canser ntoog txog hnub nws ntawv nyob tag, qaij qaug nws mus nws lawm. Nkim yus tej nqe npaum li yuav tsiaj kho tas tsis tau. Yus lam ua neeg teev ntuj, yus twb tsis vam, twb tsis ntseeg Tswv Ntuj kom tom thawj. Yus hais tias puam chawj, xij peem Tswv Ntuj. Tiam sis, haj tseem yog Tswv Ntuj puam chawj yus. Luag yog Huab Tais muaj hwj huam, tus pluag yog yus, yus cav muaj plhus hais tias puam chawj luag. Peb yuav ceev faj txhob yuam kev li cov neeg siab me ib ncig ntawm peb nyob.

Yes Xus coj nws cov thwj tim nrog nws ua ke mus teev ntuj hauv lub tuam ceeb Yes Lus Xas Les. Nws pom neeg tuaj teev ntuj, lawv coj tej tsiaj txhu nplawg ntias los hauv tsev teev ntuj, teeb rooj tog thiab muab nyiaj txiag los tum pawg lug saum rooj tos pauv ua lag luam. Sawv daws coj kam ua kam li ntawd, tsis npaj siab teev ntuj hwm ntuj. Hnub xas npas tos, hnub Chiv, sawv daws lam tuaj ntsawm nkaus tsev teev ntuj, tsis yog tuaj teev ntuj, sawv daws tuaj qw nthe ua qog qees. Sawv daws coj tej tsiaj txhu tuaj tham plis plos khom nqe hauv lub chaw ntshiab, saib tsis taus Tswv Ntuj, ua rau Yes Xus meem txom : “15 Nws xuas cov hluas ua ib rab nplawm caum yaj thiab nyuj thiab cov pauv nyiaj tawm hauv tuam tsev, nchuav tej txiaj thiab ntxeev lawv cov rooj,16 Nws hais rau cov muag nquab : “Tshem tej ntawd ntawm no, txhob ua kuv txiv lub tsev ib lub tsev khw.”17 Nws cov thwj tim thiaj ras tias muaj lus sau tseg : “Kev tshua koj lub tsev hlawv kuv ua hluav.” Peb los ua neeg teev Tswv Ntuj, peb yuav tsum hloov tus qub cai, hloov lub qub siab thiab hloov tus qub neeg. Peb tus qub cai, tsis yog peb txoj kev teev dab qhuas hmoob, los kev muab tsiaj txhu tua ua neeb ua yaig, tua txi dab li peb siab xav xwb. Peb tus qub cai, kuj yog tej yam peb kov kam ua kam. Piv li tus poj niam los txiv neej nyiam ua plees ua yis nws yeej kov kam ua kam li ntawd; tus neeg thab plaub thab tus ub tus no kov kam ua kam plaub. Peb tso peb tus qub cai yog tso yam peb ua kam kov kam pov tseg. Tus neeg los teev Tswv Ntuj xyaum nrauj nws lub qub siab cib nyeej, muaj khib, siab kheej, siab lim hiam pov tseg, xyaum ua neeg siab ncaj, siav dav, siab loj li Yes Xus qhia rau peb coj. Peb yuav sib zam txhaum, xyaum hlub neeg, khuv leej neeg, xyaum ua neeg me txhob ua neeg muab hlob khav theeb li yav tas los. Tus qub neeg txawm teev dab qhuas, txawm teev ntuj yeej tsiv tsaim, nkhaus thiab lim hiam. Peb yuav tau hloov peb tus qub neeg no pov tseg.

Ib tsoom phooj ywg sawv daws, kev tig los ua ib tug neeg tshiab raws li Huab Tais Yes Xus lub Moo Zoo, tsis yog ua ib zaug yuav tau, yuav tau siv zog tas txhua hnub hauv yus lub neej. Peb yuav tau ceev faj txhob tos Yes Xus meem txom thiab rho nplawm rau peb li tej tsiaj txhu thiab cov neeg tuaj muab lub tsev teev ntuj ua kiab khw chaw lag luam. Peb tib neeg lub cev ntaj ntsug ntshiab huv yog Tswv Ntuj tsev, tsis txhob cia peb lub cev ua dev ua npua, txhob txov luag siav, txhob hiam neeg. Peb muab lub caij 40 no ua peb txoj hau kev hloov siab tshiab, muab peb txoj kev tub nkeeg teev ntuj nrauj tshem pov tseg. Txij no mus, peb nquag khaub zig Huab Tais Yes Xus tsis txhob quab yuam tus tib neeg twg. Thov Huab Tais Yes Xus pab peb txuag peb lub cev ntaj ntsug kom ntshiab huv.

06.03.2012 Cwj Vuam Chiv

**NrhiavTswvNtuj** 16th March 2012, 8:18 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°19

COV ZAJ NYEEM HNUB 18/03/2012 ( Hnub chiv 4 Caij 40 - Xyoo B )

Post NrhiavTswvNtuj 16th March 2012, 8:18 pm

COV ZAJ NYEEM HNUB 18/03/2012

( Hnub chiv 4 Caij 40 - Xyoo B )

Zaj Nyeem Ib: 2 Xwm 36, 14-16.19-23 :

Tsoom His Xas Lais ua txhaum
ntau, lawv raug txim ib ntus. Tswv
Ntuj cog lus rov tsa lawv.

14 Lub caij ntawd nyob Yus Das
teb, cov Thawj Leej Choj, thiab
tsoom pej xeem sawv daws ua tsis ncaj
rau Tswv Ntuj. Lawv ua tej yam phem
xws li cov pej kum haiv neeg. Lawv ua
ntau yam tsis huv rau lawv cov yawg
koob tus HUAB TAIS Tswv Ntuj lub
Tuam Tsev uas Tswv Ntuj qee ua nws tug
nyob Yes Lus Xas Les.
15 Lawv cov yawg koob tus HUAB
TAIS Tswv Ntuj xa ib co tiam lis tuaj tsis
tseg rau lawv, vim nws xav txuag nws
haiv neeg thiab nws lub Tuam Tsev.
16 Lawv luag cov neeg uas nws xa tuaj.
Lawv thuam nws cov lus. Lawv hnyos nws cov Yaj Saub.
Ces Tswv Ntuj lub siab thiaj npau tsis
muaj dab tsi yuav cheem tau nws.
19 Tswv Ntuj xa tus vaj Kas Ntes tuaj
hlawv Tswv Ntuj lub Tuam Tsev, lawv
rhuav lub ntsa zeb xov Yes Lus Xas Les,
lawv zes hluav taws hlawv cov tuam tsev
kom kug tas, lawv muab tej toob xib muaj
nqis kim kim ua piam tseem tas.
20 Ces cov uas lawv tau dim ntawm
ntsis ntaj ntsis hmuv mas Nas Npws Kos
Dos Nos Xos coj lawv mus nyob txim
nyob Npas Npis Los teb.
Ces His Xas Lais ua tus vaj Npas Npis
Los qhev, lawv tseem ua nws cov tub
thiab nws cov xeeb ntxwv qhev los txog
lub caij uas cov vaj Pes Xis tuaj nyob Npas Npis Los.
22 Thawj xyoos uas Kws Los ua vaj Pes
Xis mas Tswv Ntuj tuaj tshoj Kws Los
siab. Ces Kws Los ua raws li lo lus uas
HUAB TAIS qhia rau Yes Les Mias.
Kws Los tshaj lus ceeb toom mus thoob
nws lub teb chaws tias :
23 "Tus vaj Pes Xis Kws Los hais li
no : HUAB TAIS, tus Tswv kav lub ntuj,
nws tso tas txhua haiv neeg nyob ntiaj teb
no rau hauv kuv xib teg. Nws muab txoj
hauj lwm no rau kuv ua, kuv yuav txhim
ib lub Tuam Tsev teev nws nyob Yes Lus
Xas Les nyob Yus Das teb.
Li ntawd, nyob hauv kuv tsoom pej xeem,
leej twg yog haiv His Xas Lais mas kom
Tswv Ntuj nrog nws nyob, thiab kom
nws rov mus pem Yes Lus Xas Les mas !"

Zaj Nyeem Ob: EFX 2, 4-10:
Txoj kev cawm uas Ntuj pub dawb
nyob hauv Leej Pleev.

4 Tab sis, Tswv Ntuj lub siab zam
txhaum dav tis ua dav, nws muab nws
txoj kev nyiam los hlub peb. 5 Li ntawd,
txawm tias peb twb tuag lawm, vim peb
cov txhaum, tsis kav, Tswv Ntuj ua kom
peb nrog Leej Pleev rov muaj txoj sia :
qhov no, yog Ntuj lub txiaj ntsim cawm
peb. 6 Tswv Ntuj tsa peb nrog Leej
Pleev sawv rov los, nws coj peb los zaum
saum cov txheej ntuj, nyob hauv Yes Xus Pleev.
7 Tswv Ntuj xav qhia meej rau cov tiam
tom ntej pom tias nws lub txiaj ntsim
nplua nuj tas nrho, nyob hauv Yes Xus
Pleev, ces nws thiaj ua siab zoo rau peb.
8 Yog lub txiaj ntsim cawm peb tiag, vim
peb ntseeg. 9 Txoj kev cawm tsis tuaj
hauv peb tuaj, vim txoj kev cawm yog
Tswv Ntuj pub ua paj tshab rau peb. Txoj
kev cawm kuj tsis tuaj ntawm cov hauj
lwm tuaj thiab, kom tsis txhob muaj ib
tug tau kev khav. 10 Peb yog cov hauj
lwm tawm ntawm Tswv Ntuj txhais tes
los ; Tswv Ntuj tsim peb nyob hauv Yes
Xus Pleev, kom peb ua cov hauj lwm zoo,
uas Tswv Ntuj ib txwm npaj rau peb ua.
Cov Yus Das thiab cov teev pej

Ntawv Moo Zoo: Zam 3, 14-21

14 Neeg Leej Tub yuav tsum raug
luag tsa nws siab xws li Mais Xes tsa tus
nab nyob teb chaws suab puam, 15 kom
xwv tus ntseeg txog nws, muaj txoj sia nyob mus li.

16 Vim Tswv Ntuj nyiam lub qab ntuj
neeg npaum no : nws thiaj muab nws
Leej Tub twm zeej rau, kom xwv tus
ntseeg txog Leej Tub txhob tuag, tab sis
kom nws muaj txoj sia nyob mus li.
17 Tswv Ntuj tsis xa Leej Tub tuaj hauv
lub qab ntuj kom nws muab txim rau lub
qab ntuj neeg, nws xa Leej Tub tuaj
cawm lub qab ntuj neeg. 18 Tus ntseeg
txog Leej Tub, nws tsis raug txiav txim.
Tus tsis ntseeg, nws twb raug txiav txim
lawm, vim nws tsis ntseeg txog Tswv
Ntuj Leej Tub twm zeej lub npe. 19 Kev
txiav txim yog zoo li no : Qhov pom kev
tuaj nyob hauv lub qab ntuj neeg, tab sis
tsoom neeg nyiam qhov tsaus ntuj dua
qhov pom kev, vim lawv cov hauj lwm phem.

20 Tus twg ua qhov phem, mas nws
ntxub qhov pom kev, ces nws tsis los
nyob hauv qhov pom kev, vim nws ntshai
tsam cov hauj lwm phem yuav qhib los.
21 Hos tus ua qhov tseeb, mas nws los
nyob hauv qhov pom kev, kom luag pom
tias nws ua nws cov hauj lwm nyob hauv Tswv Ntuj."

NTHUAV NTAWV NTSHIAB.

Rau hnub tim 18 lub 03 hli 2012

Ib tsoom ntseeg thiab phooj ywg sawv daws,

Zoo siab peb rov tuaj sib fim mloog Huab Tais Tswv Ntuj lus ua ke. Peb ua Tswv Ntuj tsaug kawg nkaus vim Tswv Ntuj cawm tag lub qab ntuj neeg txhua leej, tus muaj lub sim xeeb vam khom Tswv Ntuj, yeej tau txais Tswv Ntuj lub txiaj ntsim pab nws.

Peb yuav tsum paub, Huab Tais Tswv Ntuj tsis cawm cov neeg teev Tswv Ntuj nkaus xwb. Tswv Ntuj cawm tag txhua tsav puas yam Tswv Ntuj tsim tau los : cawm lub sim ceeb qhov muag pom thiab lub sim ceeb qhov muag pom tsis tau, cawm neej thiab ntsuj, tsiaj txhu, xyoob ntoo, daim av, hnub thiab hli tej hnub qub…tus neeg teev dab qhuas los teev lwm txoj kev teev hawm, tus ncaj ncees siab zoo, tsis ua neeg lim hiam siab nkhaus, Huab Tais Tswv Ntuj yeej hlub tag nrho. Tswv Ntuj tsis muaj khib rau tus teev dab qhuas los teev lwm txoj kev teev hawm. Peb tib neeg, koj khib rau kuv vim kuv hlub lwm tus dua hlub koj ; los kuv khib rau koj vim kuv pheej pom koj hlub lwm tus tshaj hlub kuv. Tswv Ntuj tsis khib rau Hmoob vim Hmoob teev dab qhuas tsis los teev Tswv Ntuj. Vim Tswv Ntuj siab loj siab dav tsis zoo li peb tib neeg siab nqaim, muaj khib. Tswv Ntuj lub tswv yim loj thiab tob heev ntsia saum tawv tshab nruab plawv, pom saum yaj ti nruab yeeb. Hmoob kev teev dab qhuas kuj muaj yam thoob tsib thiab zoo nyiam ntxim Tswv Ntuj siab. Thaum Hmoob poj yawm fiv lub ntuj, Tswv Ntuj kuj mloog thiab pub txiaj ntsim cawm poj yawm Hmoob thiab. Vim li ntawd, peb los ntseeg Tswv Ntuj, teev Tswv Ntuj, peb yuav mloog Tswv Ntuj lus, ua siab loj siab dav cuag Tswv Ntuj, txhob ua neeg siab nqaim siab ti li tej txhia neeg teev Tswv Ntuj hais tej lus no sawv daws hnov : “Los ntseeg Tswv Ntuj lawm, kom muab hmoob tej kab ke txiav pov tseg ; tsis txhob hlawv xyab, tsis txhob hlawv ntawv, yog ua dab ; tsis txhob pe niam pe txiv, pe neeg ces ua txhaum Tswv Ntuj lawm, cuag Tswv Ntuj muaj khib npaum li neeg ; kom qog luag kab ke teev hawm npuab luag qab tshob, no ces yog tseem kab ke teev ntuj, hos siv kab ke hmoob no ces yog ua dab.” Thaum Hmoob fiv yeem ntuj, Hmoob siv kab ke hmoob, twb tsis txhaum Tswv Ntuj thiab sad. Ua ntej, tus yuav tsa ncauj thuam kev cai hmoob, nws puas xav tswv yim kom txaus, nws puas xam pom tej txiaj ntsim Tswv Ntuj tau pab poj yawm Hmoob pes tsawg tiam los lawm ? Tim li cas, teev ntuj raws kab ke hmoob ho txhaum Tswv Ntuj, yog qog mab sua kab ke ho tsis txhaum Tswv Ntuj ? Xyov tej zaj tswv yim ntawd yog tswv yim dab tsi tiag !
Hnub no peb hnov tsab ntawv hais txog tej xwm tshwm tuaj rau His Xais Lais cov yawg koob thaum ub pom. Haiv neeg Fas Las (Perse) kuj yog cov neeg teev dab qhuas thaud. Tswv Ntuj kuj tshoj thiab pov hwm cov neeg Fas Las teev dab qhuas tib yam nkaus li His Xais Lais, haiv neeg teev Tswv Ntuj : “23 Kos Les cov Fas Las tus vaj ntxwv hais li no : Huab Tais Tswv Ntuj saum ntuj muab cov teb chaws saum daim av rau kuv, nws tau txib kom kuv txhim ib lub tsev rau nws nyob Yes Lus Xas Les ntawm Yus Das, nej leej twg yog nws haiv neeg, cia li mus Huab Tais nws tus Tswv Ntuj nrog nws.” Sawv daws twb paub ntsoov, tas txhua txoj kev thoob tsib, kev zoo tus cag thiab lub hauv paus yog Tswv Ntuj. Hmoob kev cai dab qhuas muaj fab qhuab qhia tub ki, xeeb leej xeeb ntxwv kom tsim txiaj, ua neeg zoo, hwm niam hwm txiv, hwm poj koob yawm txwv : nyuj tuag los tshuav nyuj kub, poj yawm dua nra los tshuav poj yawm tub ki tseem tos poj yawm tus txiaj tus ntsig. Hmoob kab ke teev dab qhuas yog teev poj yawm txwv txoob ntsuj duab ntsuj plig pov hwm tub ki, xeeb leej xeeb ntxwv nyob tom qab, kom txhiab niaj tsis muaj mob, puas xyoo tsis muaj nkeeg, ua neej nyab xeeb. Hmoob tej kab ke tsis yog siv rau dab xwb, kuj siv rau fab kev ua neej nyob sib hlub : leej tij leej viv tam niam tam txiv, niam txiv tam lub ntuj. Yog dab tsi ? Yog kev qhuab qhia hwm niam hwm txiv, hwm kwv hwm tij, hwm neej hwm tsav. Txawm Hmoob tsis teev Tswv Ntuj los Hmoob hwm Tswv Ntuj l0 lo lus qhia thaum ntej thaum ntxov los lawm : Hwm lub ntuj thiab hwm niam hwm txiv. Thaum Hmoob pauj yeem, Hmoob ua lub ntuj tsaug, vim Hmoob txais lub ntuj kev cawm. Yog kev hwm ntuj raws kab ke hmoob : “16 Tswv Ntuj hlub lub ntiaj teb npaum li ntawd, nws thiaj pub nws Leej Tub tus kheej kom xwv tus ntseeg nws tsis txhob ploj, tiam sis muaj txoj sia nyob ib txhis.17 Vim Tswv Ntuj tsis xa Leej Tub tuaj hauv ntiaj teb kom muab txim rau ntiaj teb, tiam sis ntiaj teb txais txoj kev cawm vim nws.” Thaum T.P Nyiaj Pov tuaj qhia Yes Xus lub Moo Zoo rau Hmoob, T.P twb pom Tswv Ntuj lus coj Hmoob ua neej puag ntxov los lawm, tshuav Hmoob tsis tau paub lub ntuj npe. T.P zoo siab muab tag T.P lub neej los tshaj Yes Xus lub Moo Zoo qhia Hmoob thiab siv zog ntsos khaws tej txuj hmoob tseg txhob cia ploj. Hnub T.P qaij qaug T.P thov kom Hmoob nta T.P lub paj xau raws li Hmoob kab ke, tsis yog kom ua dab rau T.P. Tiam sis, vim T.P nyiam Hmoob kab ke, nco poj yawm tej koob hmoov txhawb tub ki ua neej, txhob ua neeg mom txheej, txawj nco niam txiv kev iab kev daw, muab caj npab ua hauv ncoo, ncej puab ua tog zaum. Tsis yog T.P Nyiaj Pov xwb thiaj nyiam Hmoob kab ke. Leej Ntuj Plig yog tus tshoj tej kab ke rau Hmoob siv, qhia Hmoob ua lub neej ntsuag tsis nrog luag muaj teb muaj chaw. Vim li ntawd, Hmoob kev teev dab qhuas tsis ua khib Tswv Ntuj qhov twg.

Ib tsoom phooj ywg sawv daws, peb los ntseeg Tswv Ntuj, teev Tswv Ntuj, peb tsis nrauj tsis txiav peb tej kab ke hwm niam hwm txiv hwm poj yawm txwv txoob pov tseg. Vim peb lub Koom Txoos Kav Tos Liv yeej ib txwm hwm tag tej poj yawm txwv txoob ntshiab, qhia peb yoog lawv tus roj tus hneev ua neeg siab dawb siab ntshuab cuag li Tswv Ntuj thiab hlub txhua tus tib neeg ib ncig ntawm peb nyob. Tiam sis, peb yuav tsis xa tej ntsuj duab ntsuj plig mus cuag poj cuag yawm li thaum Hmoob tsis tau paub lub ntuj npe. Ziag no, peb paub lub ntuj npe, peb thov Tswv Ntuj txais peb tej ntsuj duab ntsuj plig nrog Tswv Ntuj nyob thiab hnub kawg pub kom peb lub cev thiab ntsuj plig sawv ciaj sia nrog Huab Tais Yes Xus nyob niaj ib txhiab ib txhis.

16.3.2012 Cwj Vuam Chiv

**NrhiavTswvNtuj** 23rd March 2012, 7:28 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°20

COV ZAJ NYEEM HNUB 25/03/2012 ( Hnub chiv 5 Caij 40 - Xyoo B )

Post NrhiavTswvNtuj 23rd March 2012, 7:28 pm

COV ZAJ NYEEM HNUB 25/03/2012
( Hnub chiv 5 Caij 40 - Xyoo B )

Yes Les Mias: 31, 31-34 HUAB TAIS yuav nrog nws haiv neeg rov cog lus.

31 HUAB TAIS ceeb toom lo lus no :
"Lub hnub nyoog uas kuv yuav
nrog His Xas Lais thiab Yus Das cog lus
tshiab tuaj yuav txog. 32 Tsis yog cov
lus zoo li kuv tau nrog lawv cov yawg
koob cog, hnub uas kuv tau tuav lawv tes
coj lawv tawm hauv Hais Nkws Tos teb
los. Lawv nrauj lo lus kuv nrog lawv cog
ntawd lawm. Kuv yog lawv tus tswv, tab
sis lawv nrauj kuv lo lus. 33 Tab sis kuv
yuav rov nrog His Xas Lais cog lus dua.
Thaum ntawd mas kuv yuav ua zoo li no :
Kuv yuav muab kuv Txoj Cai cog rau
hauv lawv. Kuv yuav sau kuv Txoj Cai
nyob hauv lawv nruab siab.
Ces kuv yuav yog lawv tus Tswv Ntuj,
lawv yuav yog kuv haiv neeg.
34 Thaum ntawd, tsis tas lawv yuav
sib qhia, tsis tas ib tug hais rau ib tug tias :

"Koj yuav tsum paub HUAB TAIS mas !"
Hos thaum ntawd lawv yuav paub kuv tas
huv tib si, tsis hais cov yau los cov hlob.
Vim kuv yuav zam rau lawv, kuv yuav
tsis nco txog lawv cov txhaum ntxiv lawm.

Hes Nplaws: 5, 7-9 Leej Pleev yog tus Tuam Leej Choj khuv leej neeg.

7 Leej Pleev, thaum nws ua neej nyob
hauv nws lub cev nqaij, nws tau tsa suab
quaj thov tus muaj peev xwm cawm tau
nws ntawm txoj kev tuag. Leej Txiv
mloog Leej Pleev lus thov, vim Leej
Pleev yog tus hwm Leej Txiv zoo.
8 Txawm tias Leej Pleev twb yog tus
Tub cag, tsis kav nws tuaj yeem raug
txom nyem. Nws tau kawm tias kev mloog lus yog dab tsi.

9 Nyem no, Leej Pleev yog tus zoo txhij
zoo txhua. Leej Pleev los ua lub hauv
paus uas cawm cov neeg mloog nws lus mus li.

Zam: 12, 20-33 Yes Xus qhia tias nws txoj kev tuag yog nws lub koob meej.

20 Nyob hauv tsoom neeg nce tuaj teev
Ntuj lub caij nqaum paj nqaum nruas,
muaj ob peb tug Hes Las. 21 Cov Hes
Las ntawd txav los ze Fis Lis Pos uas yog
tus tuaj hauv Npes Xais Das, xeev Nkas
Lis Lais tuaj, lawv thov nws tias :
"Huab tais, peb xav ntsib Yes Xus."
22 Fis Lis Pos mus hais rau As Nres.
Ces As Nres thiab Fis Lis Pos nkawd mus
hais rau Yes Xus. 23 Yes Xus teb rau lawv hais tias :

"Txog lub sij hawm uas Neeg Leej Tub
yuav txais koob meej. 24 Kuv hais qhov
muaj tseeb tiag rau nej : Yog lub noob
nplej uas poob rau hauv av tsis tuag, mas
nws nyob nws, ua ib lub noob twm zeej.
Hos yog nws tuag, mas nws txi txiv ntau.
25 Tus twg nyiam nws txoj sia, mas nws
plam nws txoj sia. Hos nyob hauv lub
qab ntuj no, tus twg tsis khuv xim nws
txoj sia, mas nws yuav ceev nws txoj sia
kom ciaj nyob mus li. 26 Tus twg tsob
hwb kuv, mas nws yuav tsum los raws
kuv. Kuv nyob qhov twg, kuv tus tub
txib kuj yuav nyob qhov ntawd thiab.
Tus twg tsob hwb kuv, mas Leej Txiv
yuav saib nws muaj tsim. 27 Nyem no
kuv lub siab ntxhov tas nrho. Kuv yuav
hais dab tsi ? Puas yuav hais tias : Txiv,
thov koj cawm kuv ntawm lub sij hawm
no ! Tab sis twb yog vim lub sij hawm no
kuv thiaj li tuaj. 28 Txiv, ua kom koj
lub npe nto koob meej mas." Ces muaj
ib lub suab nrov saum ntuj tuaj tias :
"Kuv twb ua kom kuv lub Npe nto koob
meej lawm. Kuv tseem yuav ua kom rov nto koob meej dua."

29 Cov neeg nyob ntawd hnov lub suab,
lawv hais tias yog xob nthe. Ib txhia hais
tias : Yog ib tug Tshiab hais lus rau Yes
Xus. 30 Yes Xus teb rau lawv hais tias :
"Lub suab nrov ntawd tsis yog tuaj pab kuv, yog tuaj pab nej.
31 Nyem no yog
lub caij txiav txim rau lub qab ntuj neeg
lawm. Zaum no, tus Thawj Tswj lub qab
ntuj no yuav raug ncaws pov tseg rau
nraum zoov. 32 Hos kuv, thaum luag tsa
kuv siab rau saum ntiaj teb, mas kuv yuav
rub tas ib tsoom neeg los cuag kuv."
33 Yes Xus hais li ntawd qhia tias nws
yuav raug txoj kev tuag zoo li cas.

NTHUAV NTAWV NTSHIAB.

COV ZAJ NYEEM - Xyoo B 2011-12 ) Images14 Rau hnub tim 25 lub 03 hli 2012

Ib tsoom niam txiv kwv tij neej tsa phooj ywg txhua leej,

Zoo caij zoo nyoog peb tau tuaj sib fim dua tshiab hauv lub txoos Txi Ntuj ua Tswv Ntuj tsaug thiab txais nws cov lus koob lus hmoov coj peb ua neej hauv ntiaj teb no. Vim li ntawd, peb yuav nco ntsoov peb tus Huab Tais Yes Xus zaj lus qhia rau hauv nruab siab.

Huab Tais Yes Xus zaj lus hnub no, yog ib zag lus kaj peb txhua leej txhua tus lub neej. Peb twb hnov tej laus Hmoob kev qhuab qhia niaj txhis piv txoj lus tias : ua neej nyob, leej twg los xav muaj xwb tsis xav pluag, xav ciaj xwb tsis xav tuag. Peb yug los ua neeg, Tswv Ntuj muab peb ib leeg ib lub cev thiab ib tug ntsuj plig rau peb. Tswv Ntuj tsim tau leej tib neeg zoo tshaj tas txhua tsav txhua yam, ua rau Tswv Ntuj zoo siab heev thiab hlub peb tshaj dua tej : “34 Yes Xus teb rau lawv : “Puas yog sau tseg hauv nej txoj cai : kuv hais tias nej yog tswv ntuj Z 10,34” Kev ua neeg teev Tswv Ntuj, yog kev coj leej tib neeg ciaj ua Tswv Ntuj neeg. Ib hnub twg los txog, peb lub cev thiab ntsuj plig yuav ciaj Tswv Ntuj sia ib txhiab ib txhis. Zim txwv no, peb tseem nrog plua av plua tshauv sib tw ncho hauv ntiaj teb. Peb yuav tau txuag peb lub cev cuag li txuag peb tus ntsuj plig. Yog peb lub cev muaj mob dias hau, peb yuav nrhiav dej nrhiav tshuaj kho peb lub cev kom tus mob tus ntxhia xam thiab ploj mus. Thaum peb pab tsis tau peb lub cev ua peb txoj sia yaj thiab tu, peb lub neej saum daim av mam tag thaum ntawd. Vim li ntawd, peb tsis muaj tug xav pub peb lub cev thiab txoj sia yaj saum daim npoo av mus. Tus muaj hmoo siav ntev npaum li cas yeej tsis txaus nws siab. Tsuas kawg thaum neeg muaj kev chim siab loj dhau, tim kev txhaum plaub, los kev khib siab, los kev kho siab, los kev txom nyem ua rau tej txhia tag tswv yim, tag kev cia siab, neeg thiaj txo neeg txoj sia kom tu. Cov neeg rov txo lawv txoj sia, yeej tsis muaj ib tug twg zoo siab tuag, tsuas tuag nrog kev chim, kev kho siab, los kev mob siab xwb. Yeej tsis lam muaj leej twg xav tuag, zoo siab luag ntxhi hais tias yog hnub tuag. Yeej tsis muaj hnub zoo tuag rau tus tib neeg twg li.
Peb tus neeg ntseeg Tswv Ntuj, teev Tswv Ntuj, peb yuav mloog Huab Tais Yes Xus lus, peb thiaj pom qab ua neej nyob ntiaj teb no. Ua li, kev ua neej raws li Yes Xus qhia yog ua lub neej zoo li cas ? Vim peb tsis txawj ua lub neej raws li Yes Xus qhia, peb yuav xyiv fab mloog Yes Xus lus kom xwv peb thiaj txawj. Tsis txhob yoog tej txhia neeg ntseeg lam mloog Yes Xus lus thaum tshiab, li tej tus nkauj nyab tshiab nquag thawj peb tag kis xwb. Lub neej raws li Yes Xus qhia, tsis yog kev muaj noj muaj haus, muaj nyiaj muaj txiaj los kev ua nom ua tswv raws ntiaj teb tib neeg lub siab ntshaw. Yes Xus qhia kom peb xyiv fab faib peb mov rau tus tshaib plab noj, xyiv fab sib zam txhaum, kom ob niam txiv xyiv fab sib hlub niam ncoo txiv puab, txiv ncoo niam pu, niam mloog txiv qhuab, txiv mloog niam hu, kom tas tsoom ntseeg ua tib lub siab li Leej Txiv thiab Leej Tub ua tib lub siab. Lub neej raws li Yes Xus qhia, tsis yog hais ntawm ncauj yuav tau. Peb yuav muab peb lub siab nkhaus thiab lub tswv yim lim hiam zoj rau ntawm Yes Xus zaj lus qhia ua peb tus tswg thiab ua laj kab thaiv peb lub cev txhob pub ua txiv pwj nyug dhia nkuaj. Peb tsis txhob yoog lub ntiaj teb ua neej. Huab Tais Yes Xus yog peb lub pov haum, peb thooj nyiaj thooj kub, peb txoj sia : “23 Yes Xus hais rau nkawd tias : Txog sij hawm neeg Leej Tub nto koob meej lawm.24 Kuv hais tseeb tseeb rau nej, yog lub noob nplej poob hauv av tsis tuag, nws yuav nyob ib lub kheej ; yog nws tuag, nws yuav txi txiv ntau. 25 Leej twg nyiam nws txoj sia yuav ua nws ploj, tus ntxub nws txoj sia hauv ntiaj teb no yuav khaws tau txoj sia ib txhis cia.” Tsis hais tiam neej twg, peb lub cev thiab txoj sia yog yam loj tshaj, muaj nqes tshaj plaws. Hu ua neeg, yeej tsis muaj tus xav tuag, tsuas muaj tus xav ciaj nyob ntsia lub ntuj lub teb zoo nkauj, ciaj nrog yus niam yus txiv nyob tsis dhuav, hlub yus me tub me nyuam xeeb leej xeeb ntxwv tsis tau kawg. Tus neeg mob nkeeg da luj luam xwb los yog kho tau nws zoo, nws yeej zoo siab hlo ua lub neej luag ntxhi. Yeej xav kom txhob txawj tuag li. Tsuas kawg tus neeg caij nkoj, nkoj tog, caij dav hlau poob dav hlau tuag cawm tsis tau thiaj tseg : “Muaj ib hnub, tus niam poj Hmoob no hu xov tuaj tham nws kev kho siab, kev quaj ntsuag. Nws tsuas yug tib tug ntxhais kheej twb muaj 3 xyoos, lwm cov puav leej yog tub, 5 leeg. Hnub ntawd, kuj yog ib hnub tshav ntuj nrig. Tus me ntxhais txawm pheej nqhis nqhis yuav noj dej khov qab zib txias. Muaj tib tug ntxhais xwb ces nws kuj hlub hlub li. Leej niam txawm coj nws nrog ib tug nus nto hluas, lawv peb niam tub nqes pem zos mus yuav dej khov nram nroog noj tag rov los tsev. Txoj kev sawv daws taug hla ib ntus kwj ha. Xyov ua cas, ib nthwv dej cia li nphau nphwv kuav kwj ha tsuag lug los muab lawv nyab ntawg ntiag, ntsawj lawv ib tug rau ib qho. Leej niam thiab tus nus peem tau rau tim ntug, tshuav tus muam ploj pliag lias nrog dej lawm, xyov dua twg lawm. Leej niam siab mob tsheej rhem quaj suab tawg ntho los pab tsis tau tus me ntxhais. Twb yog ob hnub tom qab, lawv thiaj li mus nrhiav tau. Lawv lam muab tus me ntxhais zais rau ntawm ntug kwj ha. Leej niam siab mob tau 3 lub xyoos no yeej tsis nqawm, chim tag mus li tsis zoo siab hlo…Txiv Plig, tu kuv siab npaum luaj no, tsis xav ua neej nyob, mus dai tuag los yuav tsis zoo, koj yuav hais dab tsis rau kuv os ! Cas nrog koj tu siab ua luaj no, niam Xeeb ! Tiam sis, txawm koj quaj tag koj kua muag los koj me ntxhais yuav tsis sawv os mog ; yog koj ho tuag lawm, leej twg yuav los hlub koj 5 tug tub, ua neej quaj ntsuag nco koj thiab…” Txawm yog tus me ntxhais hmoob no, los leej twg kuj xij, yeej tsis muaj tus xav tuag, tsis zoo siab tuag li. Leej niam no quaj kua muag puv pes tsawg nphoov tes lawm, tshuav siav tsis tu xwb, nws yeej chim tav li no tsis xav ua neej nyob.
Yog peb tus neeg ntseeg tsis mloog Huab Tais Yes Xus cov lus qhia, peb yuav peb zaj tswv nqaim tswv yim yim tws, nyias yuav nyias siab xwb, peb sib hlub sib zam tsis tau, lub ncauj lam ua neeg ntseeg, peb pauv tsis ntxiv tej neeg teev pej kum dab qhuas. Peb tus tuag yuav tsis zoo siab tso nws cov txheeb ze tseg rov tom qab. Tiam sis, yog peb mloog Yes Xus lus, peb kev tuag nrog Yes Xus tuag muaj txiaj ntsim : “26 Yog leej twg tiam kuv, kom nws raws kuv, ntawm qhov chaw kuv nyob, kuv tus tub txib yuav nyob ntawd thiab ; yog leej twg tiam kuv, Leej Txiv yuav hwm nws. 27 Ziag no, xyov kuv ntsuj plig ua cas thiab kuv yuav hais zaj twg ? Txiv, cawm kuv ntawm sij hawm no, tiam sis, twb yog sij hawm no kuv thiaj tuaj ” Peb kev cia siab rau Huab Tais Yes Xus cawm peb tag txhua txoj xub ke : cawm tau peb ntawm kev quaj ntsuag, kev chim, kev kho siab, kev cib nyeej sib ntxub, cawm tau peb ntawm lub caij nyoog tsis tau xav tuag. Yes Xus tsis tau xav tuag, tiam sis Yes Xus kev mloog Leej Txiv cawm Yes Xus. Peb kev mloog Yes Xus pub peb nrog Yes Xus txais Leej Txiv kev cawm.

Ib tsoom niam tsoom txiv, tsoom phooj ywg, peb txoj kev nyuaj siab ua rau peb tsis pom qab ua neej nyob. Peb yuav muab peb kev nyuaj siab los txawb rau ntawm Huab Tais Yes Xus xub ntiag. Yes Xus yog peb tus Huab Tais hlub peb, Yes Xus yuav npo peb lub nra hla lub ntiaj teb no lawv nws qab.

23.03.2012 Cwj Vuam Chiv

**NrhiavTswvNtuj** 30th March 2012, 7:13 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°21

COV ZAJ NYEEM HNUB CHIV 01/04/1/2012 (Hnub Chiv Nqaum Nplooj Xyoo B)

Post NrhiavTswvNtuj 30th March 2012, 7:13 pm

COV ZAJ NYEEM HNUB CHIV 01/04/1/2012

( Hnub Chiv Nqaum Nplooj Xyoo B)

(Mc 11, 1-10 : Nyob Yes Lus Xas Les, lawv txais Yes Xus xws li Leej Pleev.ou Za 12, 12-16 )

1 Thaum lawv tuaj yuav txog Yes
Lus Xas Les, ntsia pom Npes Fas
Zes thiab Npes Tas Nias, ze lub Roob
Txiv Ntoo Roj, Yes Xus xa ob tug thwj tim mus ua ntej.

2 Nws hais rau nkawd tias :
"Neb mus hauv lub zos tom neb hauv ntej.
Thaum neb nyuam qhuav mus txog hauv
zos, neb yuav pom ib tug me nyuam luj
uas tseem tsis tau muaj neeg caij ib zaug
li, khi nyob ntawd. Neb daws txoj hlua,
neb cab los. 3 Yog muaj neeg hais rau neb tias :
"Neb ua dab tsi li ntawd ?"
Mas neb teb tias :

"Yog Huab Tais yuav siv. Ib me ntsis nws yuav xa rov qab los."

4 Ob tug thwj tim mus, nkawd pom ib tug
me nyuam luj khi nraum zoov, ze ib lub
qhov rooj ntawm ntug kev. Nkawd daws
tus me nyuam luj. 5 Muaj ob peb tug
neeg nyob ntawd nug nkawd tias :
"Neb daws tus me nyuam luj no ua dab tsi?"

6 Nkawd teb rau lawv raws li Yes Xus
xub qhia, ces lawv cia nkawd daws
nkawd. 7 Nkawd coj tus me nyuam luj los
rau Yes Xus. Nkawd muab nkawd cov
tsho ntev pov rau saum me nyuam luj
nraub qaum, ces Yes Xus caij. 8 Muaj
neeg coob muab lawv cov tsho ntev pua
txoj kev, ib txhia xuas cov nplooj ntoos
ntsuab uas lawv txiav tom teb los pua kev.
9 Cov neeg ua Yes Xus ntej thiab lawv
Yes Xus qab sawv daws qw tias :

"Thov koj cawm peb mas !
Tus uas Huab Tais xa tuaj muaj koob
meej. 10 Lub Ceeb Tsheej uas tab tom
los, muaj koob meej, yog peb txiv Das Vis
lub Ceeb Tsheej. Tus nyob saum cov
txheej ntuj siab, thov koj cawm peb."

COV ZAJ NYEEM - Xyoo B 2011-12 ) Dsc04713

COV ZAJ NYEEM - Xyoo B 2011-12 ) Dsc04713

Zaj Nyeem Ib: His Xais 50, 4-7 :Lus paj huam cav txog Tswv Ntuj tus tub txib. Zaj peb.

4 HUAB TAIS Tswv Ntuj tau
muab cov thwj tim tus nplaig rau
kuv. Nws qhia kuv kom kuv txawj hais
ib lo lus nplij tus qaug zog. Niaj tag kis
nws tsa kuv pob ntseg kom kuv tsim
dheev, kom kuv mloog xws li cov thwj tim mloog.
5 HUAB TAIS Tswv Ntuj qhib kuv pob
ntseg, mas kuv tsis npau taws, kuv tsis
yig, kuv tsis thaub qab.
6 Lawv ntaus kuv, mas kuv tig kuv nraub
qaum rau lawv ntaus. Lawv xav rho kuv
cov hwj txwv, mas kuv tig kuv sab plhu
rau lawv. Lawv xav ib tawg ncuav rau
kuv thiab xav nto qaub ncaug rau kuv
ntsej muag, los kuv tsis fee plhu rau lawv.
7 Tab sis HUAB TAIS Tswv Ntuj tsom
kwm kuv, vim qhov ntawd mas kuv tsis
poob ntsej muag. Ces kuv ua kuv ntsej
muag tawv li pob zeb. Kuv

Zaj Nyeem Ob: FLPos 2, 6-11

6 Yes Xus Pleev yog Tswv Ntuj,
tiam sis nws tsis cia nws lub hwj
chim Tswv Ntuj rau luag hawm :
nws muab nws lub hwj chim hle.
7 Nws yeem ua ib tug qhev,
nws yug los ua neeg xws li ib tsoom
neeg. Luag pom nws tus yam ntxwv
yog yam ntxwv tib neeg.
8 Nws txo nws qis :
nws tuaj yeem mloog Ntuj lus mus
txog qhov tuag, thiab tseem xaiv txoj
kev tuag saum ntoo cuam.
9 Vim li ntawd, mas Tswv Ntuj thiaj tsa
Yes Xus ua ib tug loj nyob siab siab.
Tswv Ntuj muab lub npe uas nyob
siab dua lwm cov npe rau nws.
Fis Lis Pos, Zaj 1 thiab 2
10 Li ntawd, tus twg hnov tuav txog
Yes Xus lub npe, tsis hais nyob
saum cov txheej ntuj, los nyob ntiaj
teb no, los nyob nruab yeeb, mas tus
ntawd cia li txhos caug hawm.
11 Txhua xeem lus yuav tsum cav tias
Yes Xus Pleev yog Huab Tais :
Leej Txiv Tswv Ntuj thiaj muaj koob
meej nto moo lug.

Ntawv Moo Zoo: Mas Kos: 14,1-72; 15,1-47

Lawv tuav xam muab Yes Xus tua.
14 : 1 - 2.

1 Thaum tshuav ob hnub yuav
txog lub ntees Hla thiab lub hnub
nyoog noj cov mov tsis xyaw poov xab,
mas cov thawj leej choj thiab cov kws
Ntawv Ntshiab nrhiav ib txog kev nyas
ntes Yes Xus, thiab muab nws tua.
2 Lawv sib tham tias :
"Tsis txhob ntes thaum tab tom nqaum paj
nqaum nruas, tsam cov pej xeem ua
ntxhov hnyo."

Pleev tshuaj tsw qab rau Yes Xus nyob Npes Tas Nias. 14 : 3 - 9.

3 Thaum Yes Xus nyob Npes Tas Nias,
hauv tus Xis Moos mob ruas tsev, lub caij
uas Yes Xus tab tom zaum ntawm rooj
mov, muaj ib tug poj niam nqa ib hwj zeb
dawb ntim cov tseem tshuaj tsw qab muaj
nqi kawg. Nws muab lub hwj dam, nws
hliv tshuaj tsw qab rau saum Yes Xus
taub hau. 4 Muaj ib co neeg nyob ntawd
tsis zoo siab, lawv rov sib hais tias :
"Ua cas yuav nkim tej tshuaj li ntawd ?
5 Cov tshuaj ntawd yog muab muag mas
yuav tau tshaj peb puas lub txiaj nyiag los pub rau cov pluag."
Ces lawv cem tus poj niam. 6 Tab sis Yes Xus hais tias :
"Cia nws ua nws. Vim li cas nej ua ntxhov
nws siab ? Nws ua ib txog hauj lwm zoo
nkauj rau kuv. 7 Vim nej yuav muaj cov
pluag nrog nej nyob mus li, nej xav ua zoo
rau lawv thaum twg kuj tau. Tab sis kuv,
mas nej yuav tsis muaj kuv nrog nej nyob
mus li. 8 Nws ua qhov uas nws ua tau.
Nws xub pleev tshuaj tsw qab rau kuv,
npaj kuv lub cev mus zwm ntxa. 9 Kuv
hais tseeb rau nej, nej tshaj lub Moo Zoo
kom thoob qab ntuj, nej mus txog qhov
twg, sawv daws yuav rov hais txog qhov
nws nyuam qhuav ua no, kom nco txog nws."

Yus Das ntxeev siab. 14 : 10 - 11.

10 Yus Das Kas Lis Yaus, yog ib tug
nyob hauv Pab Kaum Ob, nws mus cuag
cov thawj leej choj, nws yuav muab Yes
Xus muag rau lawv. 11 Lawv hnov Yus
Das hais li ntawd, mas lawv zoo siab, ces
lawv lees tias yuav muab nyiaj rau Yus
Das. Ces Yus Das nrhiav saib yuav ua li
cas kom tau ib lub sij hawm zoo cob Yes Xus rau lawv.

Npaj noj pluas Hla.
14 : 12 - 16.

12 Thaum txog thawj hnub noj cov mov
tsis muaj poov xab, lawv tua tus Yaj Hla,
cov thwj tim hais rau Yes Xus tias :
"Koj xav kom peb mus npaj pluas Hla rau
koj noj nyob qhov twg ?
13 Ces Yes Xus xa nws ob tug thwj tim,
nws hais rau nkawd tias :

"Neb mus hauv nroog, yuav muaj ib tug
neeg kwv ib hub dej tuaj ntsib neb. Neb
raws nws mus. 14 Nws chaws mus hauv
lub tsev twg, mas neb yuav hais rau tus
tswv tsev ntawd tias : “Xib Hwb hais
tias kem tsev uas kuv yuav nrog kuv cov
thwj tim noj pluas Hla nyob qhov twg ?”
15 Ces nws yuav qhia ib kem tsev dav
rau neb nyob theem saud, muaj rooj tog,
thiab tu txhij tas. Neb npaj txhua yam kom tiav rau peb."
16 Ob tug thwj tim mus. Thaum nkawd
mus txog hauv nroog, nkawd pom txhua
yam raws li Yes Xus tau hais rau nkawd,
ces nkawd npaj pluas Hla.

Yes Xus qhia tias Yus Das yuav ntxeev siab. 14 : 17 - 21.

17 Yav tsaus ntuj, Yes Xus nrog Pab
Kaum Ob tuaj txog. 18 Thaum lawv zaum
ntawm rooj, lawv tab tom noj mov, Yes Xus hais tias :

"Kuv hais tseeb rau nej, muaj ib tug nyob
hauv nej yuav muab kuv muag rau luag,
yog ib tug uas nrog kuv noj mov."
19 Tas cov thwj tim ntxhov siab, lawv
nug zom zaws tias : "Puas yog kuv ?"

20 Yes Xus hais rau lawv tias :
"Yog ib tug hauv Pab Kaub Ob, yog tus
uas nrog kuv cev tes ntsw hauv lub phaj.
21 Neeg Leej Tub rov mus raws li Ntawv
sau txog nws. Tab sis tus uas muab Neeg
Leej Tub muag, mas nws txoj hmoov
phem. Txhiaj khoov tus neeg ntawd tsis txhob yug los.

Yes Xus tsim lub Cim Cav Txiaj Ntsim. 14 : 22 - 25.

22 Thaum lawv tab tom noj mov, Yes
Xus tuav lub ncuav mov, nws hais zaj
foom hmoov zoo rau, nws muab ntais,
thiab muab faib rau nws cov thwj tim, nws hais tias :

"Nej txais, qhov no yog kuv lub cev."
23 Yes Xus tuav ib lub ntim, nws ua Ntuj
tsaug, nws muab cev rau cov thwj tim, ces
sawv daws haus hauv lub ntim ntawd. 24
Yes Xus hais rau lawv tias :

"Qhov no yog kuv cov ntshav, yog cov
ntshav cog lus, cov ntshav no yuav ntws
mus cawm coob leej. 25 Kuv hais tseeb
rau nej : txij no mus, kuv yuav tsis haus
cov kua txiv cawv no ntxiv, mus txog
hnub kuv rov haus cov cawv tshiab nyob
hauv Tswv Ntuj lub Ceeb Tsheej."

Yes Xus qhia tias Pob Zeb yuav
tsis lees Yes Xus. 14 : 26 - 31.
26 Yes Xus lawv hu cov nkauj paj nruag
tas, ces lawv tawm mus pem roob Txiv
Ntoo Roj. 27 Yes Xus hais rau lawv tias
:
"Nej sawv daws yuav ntog, vim Ntawv
sau cia tias : Kuv yuav ntaus tus zov yaj,
ces pab yaj yuav tawg. 28 Tab sis,
thaum kuv rov sawv, kuv yuav ua nej ntej mus Nkas Lis Lais."

29 Pob Zeb hais rau Yes Xus tias :
"Txawm yog sawv daws ntog tas, los kuv
yuav tsis ntog !"
30 Yes Xus hais rau Pob Zeb tias :

"Kuv hais tseeb rau koj : Ntawm koj, mas
hnub no, hmo no kiag, thaum qaib tsis tau
qua ob tsig, koj twb yuav tsis lees kuv peb zaug."
31 Tab sis Pob Zeb haj yam hais heev dua tias :

"Txawm tias kuv yuav tsum nrog koj
tuag, los kuv yeej lees koj."
Tas sawv daws puav leej hais zoo li
ntawd.

Nyob Nkes Txes Mas Nis. 14 : 32 - 42.

32 Yes Xus lawv tuaj txog ib thaj chaw
hu ua Nkes Txes Mas Nis, Yes Xus hais
rau nws cov thwj tim tias :

"Nej zaum ntawm no, kuv yuav teev Ntuj."
33 Ces Yes Xus coj Pob Zeb, Yas Kos
thiab Zam nrog nws mus. Nws pib ntshai
heev thiab txhawj kawg. 34 Ces Yes Xus
hais rau lawv tias :

"Kuv tus plig ntxhov siab yuav tuag, nej
nyob ntawm no, nej zov hmo."
35 Yes Xus txav mus deb me ntsis, nws
khooj hauv pem teb, ces nws thov saib lub
sij hawm ntawd hla mus deb nws puas
tau. 36 Yes Xus hais tias :

"As Npas, Txiv ! Koj ua tau tas ib puas
tsav yam : thov koj tshem lub ntim no mus
deb kuv. Tab sis, txhob ua raws li kuv
xav, koj ua raws li koj xav !"
37 Yes Xus los pom peb leeg thwj tim tab
tom tsaug zog, nws hais rau Pob Zeb tias :
"Xis Moos, koj tsaug zog lod ? Koj tsis
muaj peev xwm zov hmo ib teev lod ? 38
Nej zov hmo, thiab nej teev Ntuj kom nej
txhob nkag mus rau hauv txoj kev ntxias :

lub tswv yim kub lug, tab sis cev nqaij tsis muaj zog."
39 Ces Yes Xus rov mus, nws rov qab
teev Ntuj, nws rov hais tib co lus li qub.
40 Yes Xus rov qab los pom cov thwj tim
tsaug zog, vim lawv qhov muag tawv,
lawv tsis paub teb dab tsi rau Yes Xus.
41 Yes Xus rov los zaum peb, nws hais rau lawv tias :

"Nej tseem tsaug zog thiab tseem so lod ?
Nej tsum mog. Txog caij lawm. Neeg
Leej Tub yuav poob rau hauv cov neeg
txhaum txhais tes. 42 Nej sawv ! Peb
mus ! Tus muab kuv muag tuaj yuav txog.

Lawv ntes Yes Xus. 14 : 43 - 52.

43 Thaum Yes Xus tseem tab tom hais li
ntawd, ces Yus Das tuaj txog. Nws yog
ib tug hauv Pab Kaum Ob. Nws coj ib

tuaj ntawm cov thawj leej choj, cov kws
Ntawv Ntshiab thiab cov txwj laus tuaj.
44 Tus ntxeev siab twb xub teem rau
lawv tias : ‘Yes Xus yog tus kuv yuav
nwj. Nej ntes, nej coj nws mus, nej saib
nws nruj.’ 45 Thaum Yus Das tuaj txog
ntua, nws txav los hais rau Yes Xus tias :
"Xib Hwb", ces nws nwj Yes Xus.
46 Pab neeg nrog Yus Das tuaj cev tes
tuav nkaus Yes Xus, lawv ntes nws.
47 Cov neeg nyob ntawd, muaj ib tug
rho hlo nws rab ntaj, tib ntag rau tus tuam
Leej Choj tus tub txib, txiav raug nws ib
ya pob ntseg tu nrho.
48 Yes Xus hais rau cov tuaj ntes nws tias:

"Nej nqa ntaj nqa qws tuaj ntes kuv xws li
ib tug tub sab ! 49 Kuv niaj hnub qhia
hauv lub Tuam Tsev Teev Ntuj, kuv nrog
nej nyob ua ke, thaum ntawd nej ho tsis
ntes kuv. Tab sis nej ua li no kom xwv
tshwm sim raws li Ntawv sau cia."
50 Cov thwj tim tso Yes Xus pov tseg,
sawv daws khiav tas. 51 Muaj ib tug
hluas raws Yes Xus qab, nws tsuas npua
ib daim ntaub xwb, tsis hnav ris tsho, luag
los tuav nkaus nws, 52 ces nws tso
plhuav nws daim ntaub pov tseg, nws cia li khiav liab qab."

Yes Xus sawv ntawm cov Txwj
Laus Txiav Txim. 14 : 53 - 65.

53 Lawv coj Yes Xus mus hauv tus tuam
leej choj lub tsev. Tas cov thawj leej choj,
cov txwj laus thiab cov kws Ntawv
Ntshiab tuaj sib sau nyob hauv. 54 Pob
Zeb nyas deb raws Yes Xus qab mus txog
hauv tus tuam leej choj lub loog. Nws
nrog cov tub zov keeb zaum nte taws ntawm lub cub tawg.

55 Cov thawj leej choj thiab cov txwj
laus xas nes nrees nrhiav ib zag liam rau
Yes Xus kom tau kev muab nws tua, tab
sis lawv nrhiav tsis tau. 56 Muaj coob
leej tuaj liam cuav rau Yes Xus, tab sis
lawv cov zaj liam tsis sib haum.
57 Muaj ob peb tug sawv los liam cuav rau Yes Xus tias :
58 "Peb hnov tus ntawd hais tias : Kuv
yuav rhuav lub Tsev Ntshiab no, uas yog
neeg txhais tes ua, kuv ua peb hnub txhim
tau lub uas tsis yog neeg txhais tes ua."
59 Tab yog zaj liam no, lawv cov lus kuj
tsis sib haum thiab. 60 Ces tus tuam leej
choj sawv ntsug hauv nruab nrab sawv
daws, nws nug Yes Xus tias :
“Koj tsis teb dab tsi lod ? Cov neeg no ua
pov thawj liam dab tsi rau koj ?”
61 Tab sis Yes Xus nyob ntsiag to, tsis
teb ib lo lus. Tus tuam leej choj rov nug Yes Xus tias :
"Koj puas yog Leej Pleev, puas yog tus Nto Moo Zoo Leej Tub ?"
62 Yes Xus hais tias :
"Kuv yog. Nej tseem yuav pom Neeg Leej
Tub zaum ntawm tus Muaj Hwj Huam
sab xis, thiab nrog cov huab nqes saum ntuj los."
63 Ces tus tuam leej choj dua nws tej tsho, nws hais tias :

"Peb tseem yuav nrhiav tim khawv ua dab
tsi ? 64 Nej twb hnov nws cov lus thuam
Ntuj lawm, nej xav li cas ?"
Sawv daws txiav txim tias nws tsim nyog
tuag. 65 Muaj ib txhia nto aub ncaug rau
Yes Xus. Lawv muab ib daim ntaub vov
nws ntsej muag. Lawv xuas nrig ntaus
nws. Lawv hais rau nws tias :
"Koj ua yaj saub mas !"
Ces cov tub mab tub qhe xuas nrig ntaus Yes Xus.

Pob Zeb tsis lees Yes Xus.
14 : 66 - 72.

66 Thaum Pob Zeb nyob hauv lub loog,
tus tuam leej choj ib tug ntxhais txib los
txog ntawd. 67 Nws pom Pob Zeb nte
taws, nws ntsia ntsoov Pob Zeb, nws hais tias :
"Koj ne, koj nrog Yes Xus Nas Xas Les
ua ke thiab !"
68 Tab sis Pob Zeb tsis lees, nws hais
tias:
"Kuv tsis paub, kuv tsis to taub koj hais dab tsi."
Ces Pob Zeb tawm mus rau nraum qhov
rooj, thaum ntawd ib tug qaib qua.
69 Tus ntxhais txib uas tau pom Pob Zeb
rov qab hais rau cov neeg nyob ntawd tias :

"Tus ntawd, yog ib tug nrog Yes Xus !"
70 Tab sis Pob Zeb rov qab tsis lees dua.
Ib me ntsis ntxiv, cov neeg nyob ntawd
tseem hais rau Pob Zeb tias :
"Koj yeej yog lawv ib tug neeg xwb tiag.
Txawm li cas los koj yog ib tug Nkas Lis Lais."
71 Tab sis Pob Zeb twv yeej twv swb tias:

"Kuv tsis paub tus neeg nej hais ntawd."
72 Thaum ntawd, ib tug qaib tab tom qua
tsig ob. Pob Zeb nco dheev txog lo lus
uas Yes Xus hais rau nws tias : ‘Qaib tsis
tau qua ob tsig, koj twb tsis lees kuv peb
zaug.’ Ces Pob Zeb quaj."

Yes Xus sawv ntawm Pis Las Tos
xub ntiag. 15 : 1 - 15.

1 Thaum nyuam qhuav kaj ntug txoog,
cov thawj leej choj nrog cov laus neeg,
cov kws Ntawv Ntshiab thiab lub rooj
txwj laus xas nes nrees tuav xam. Lawv
muab Yes Xus khi, lawv coj nws mus rau
Pis Las Tos.
2 Pis Las Tos nug Yes Xus tias :
"Koj puas yog cov Yus Das tus vaj ?"
Yes Xus teb rau Pis Las Tos tias :
"Yog koj hais li ntawd."
3 Cov thawj leej choj hais ntau zaj liam
rau Yes Xus. 4 Ces Pis Las Tos rov nug Yes Xus tias :

"Koj tsis teb dab tsi lod ? Saib ! lawv liam
npaum no rau koj !"
5 Tab sis Yes Xus tsis teb dab tsi ntxiv.
Mas Pis Las Tos xav tsis thoob.
6 Niaj xyoo, thaum ua lub Ntees Hla, Pis
Las Tos tso ib tug neeg raug txim mus,
nws tso tus uas sawv daws taij. 7 Thaum
ntawd, muaj ib tug nyob hauv tsev loj faj,
hu ua Npas Las Npas, nws nrog ib pab
ntxeev siab raug kaw, vim nws tua neeg
thaum lawv sawv ntxeev siab. 8 Tsoom
pej xeem nce mus taij Pis Las Tos kom
nws ua rau lawv xws li nws ua kam.
9 Pis Las Tos teb rau lawv tias :
"Nej puas xav kom kuv tso cov Yus Das tus vaj ?"
10 Pis Las Tos yeej paub tias yog vim
cov thawj leej choj khib, lawv thiaj coj
Yes Xus tuaj kom rau nws. 11 Cov thawj
leej choj haub tsoom sid kom taij Pis Las
Tos tso Npas Las Npas mus. 12 Pis
Las Tos rov qab hais rau tsoom pej xeem tias :
"Kuv yuav ua dab tsi rau tus uas nej hu
nws ua cov Yus Das tus vaj ?"
13 Tsoom sid rov qw qw dua tias :
"Muab nws dai saum ntoo cuam !"
14 Ces Pis Las Tos hais rau lawv tias :
"Nws tau ua dab tsi phem ?"
Tiam sis lawv haj yam qw nrov tias :
"Muab nws dai saum ntoo cuam !"
15 Pis Las Tos xav kom tsoom pej xeem
zoo siab, ces nws tso Npas Las Npas mus.
Nws kom lawv nplawm Yes Xus, ces nws
muab Yes Xus rau lawv coj mus dai saum
ntoo cuam.

Lub kauj pos. 15 : 16 - 22.

16 Cov tub rog coj Yes Xus mus rau
hauv lub plawv loog , uas yog lub tshav
txiav txim. Lawv hu tas nrho pab peeb
zeej tuaj. 17 Lawv muab ib daim ntaub
liab dub rau Yes Xus hnav. Lawv muab
pos los sib qhaib ua ib lub kauj, lawv
muab tso saum Yes Xus taub hau.
18 Ces lawv hawm nws tias :
"Nyob kaj lug, cov Yus Das tus vaj !"
19 Lawv xuas ib rab pas tauj ntaus nws
taub hau, lawv nto aub ncaug rau nws,
lawv kim caug hawm nws. 20 Thaum
lawv thuam Yes Xus tas, lawv hle daim
ntaub liab dub, lawv rov muab nws cov
ris tsho rau nws hnav. Ces lawv coj Yes
Xus tawm mus sab nraud kom tau muab
nws dai saum ntoo cuam.
21 Lawv yuam ib tug neeg dua kev kwv
Yes Xus tus ntoo cuam. Tus ntawd yog
Xis Moos nyob Xis Les Nas, nws mus ua
teb rov los txog ntawd. Xis Moos nyob
Xis Les Nas yog As Les Xas Nros thiab
Luj Fus nkawd txiv. 22 Ces lawv coj Yes
Xus mus txog ib qho chaw hu ua Nkos
Nkos Tas, txhais tias chaw Khauj Khaum Taub Hau.

Lawv tsa Yes Xus saum ntoo cuam.
15 : 23 - 32.

23 Lawv muab ib co cawv tov me ntsis
txab txiv yoov rau Yes Xus haus, tab sis
nws tsis haus. 24 Ces lawv muab nws tsa
saum ntoo cuam. Lawv muab Yes Xus
cov ris tsho los sib faib, lawv twv saib leej
twg yuav tau daim twg.
25 Thaum lawv tsa Yes Xus rau saum
ntoo cuam, mas tav li cuaj teev sawv
ntxov. 26 Lawv sau ib co npe ntawv piav
txog Yes Xus lub txim li no : ‘Cov Yus
Das tus vaj.’ 27 Lawv kuj muab ob tug
tub sab dai nrog Yes Xus rau saum ntoo
cuam thiab, ib tug nyob sab xis, ib tug
nyob sab laug. [28...]
29 Cov neeg dua kev co taub hau tsawm
Yes Xus tias :
"Haj ! Koj yog tus yuav rhuav lub Tsev
Ntshiab thiab peb hnub, rov txhim tau li
qub. 30 Koj rov cawm koj mas ! Koj
nqes saum ntoo cuam los saib !"
31 Cov thawj leej choj nrog cov kws
Ntawv Ntshiab ua ke hnyos tias :
"Nws cawm tau luag tej, nws rov cawm
tsis tau nws ! 32 Leej Pleev, Vaj His Xas
Lais ! Kom nws nqes saum ntoo cuam los
rau peb pom, peb thiaj ntseeg !"
Tab yog ob tug tub sab uas dai saum ntoo
cuam zoo li Yes Xus, kuj thuam Yes Xus.

Yes Xus txoj sia tu. 15 : 33 - 41.

33 Thaum tav su, tas lub ntiaj teb tsaus
ntuj nti mus txog peb teev. 34 Thaum
peb teev Yes Xus qw ib suab nrov nrov
tias : "Es los is, Es los is, las mas xas
npas thas nis," txhais tias : Kuv tus Tswv
Ntuj, kuv tus Tswv Ntuj, ua cas koj tso
kuv pov tseg? 35 Muaj tus puav nyob ze
ntawd hnov, lawv hais tias :
"Saib, nws hu Es Lias".
36 Muaj ib tug neeg khiav ceev mus
muab ib daim ntaub tub dej qaub, nws
muab chob rau ib tog ntsis pas tauj, nws
cev rau Yes Xus haus, nws hais tias :
"Tos saib ! Peb puas pom Es Lias tuaj
txo nws nqes los."
37 Ces Yes Xus qw ib suab nrov, nws
txoj sia tu. 38 Thaum ntawd, daim ntaub
hauv Kem Ntshiab ntuag rhe saud rau
hauv, ua ob sab. 39 Tus xab txheeb sawv
ntsug ntawm Yes Xus xub ntiag pom Yes
Xus txoj sia tu li ntawd, nws hais tias :
"Tus no yog Tswv Ntuj Leej Tub tiag !"
40 Muaj ib co poj niam nyob nrug deb
ntsia. Nyob hauv cov poj niam ntawd,
muaj Mab Liab Mas Ntas Las, Mab Liab
uas yog Yas Kos me thiab Yos Xes nkawd
niam, thiab Xas Los Mes. 41 Cov poj
niam ntawd raws Yes Xus thiab tsob hwb
Yes Xus thaum nws nyob Nkas Lis Lais.
Thiab tseem muaj ntau leej poj niam uas
nrog Yes Xus nce tuaj rau pem Yes Lus Xas Les.

Lawv muab Yes Xus lub cev zwm
ntxa. 15 : 42 - 47.

42 Thaum tsaus ntuj, yog Hnub Npaj,
yam li yog hmo yuav pib hnub Xas Npas
Tos. 43 Yos Xes nyob As Lis Mas Thias
tuaj. Nws yog ib tug muaj meej mom
nyob hauv Rooj Sab Laj, nws tos ntshis
Tswv Ntuj lub Ceeb Tsheej, nws muaj
cuab kav mus cuag Pis Las Tos, nws thov
Yes Xus lub cev. 44 Pis Las Tos ceeb
tias Yes Xus txawm siv tuag lawm. Nws
hu tus xab txheeb los, nws nug tus xab
txheeb saib Yes Xus tuag tau hov ntev lawm.
45 Thaum Pis Las Tos paub ntawm tus
lwm txheeb tias Yes Xus tuag lawm tiag,
ces Pis Las Tos tso lus rau Yos Xes mus
txo Yes Xus lub cev. 46 Yos Xes muas
tau ib daim ntaub qhwv tuag, nws txo Yes
Xus lub cev nqes los, nws muab daim
ntaub qhwv Yes Xus, ces nws tso Yes
Xus lub cev rau hauv ib lub ntxa txaug
rau hauv pob tsuas. Nws dov ib daim
txiag zeb los kaw lub rooj ntxas.
47 Mab Liab Mas Ntas Las thiab Mab
Liab uas yog Yos Xes niam, nkawd ntsia
ntsoov qhov chaw uas lawv tso Yes Xus lub cev.

**NrhiavTswvNtuj** 1st April 2012, 9:55 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°22

Re: COV ZAJ NYEEM - Xyoo B 2011-12 )

Post NrhiavTswvNtuj 1st April 2012, 9:55 am

NTHUAV NTAWV NTSHIAB.

COV ZAJ NYEEM - Xyoo B 2011-12 ) 010b-r10 Rau hnub NQUAM NPLOOJ, tim 01 lub 04 hli 2012

Ib tsoom niam txiv, kwv tij neej tsa phooj ywg nquag mloog Tswv Ntuj lus,

Hnub no, tas nrho zeej tsoom neeg teev Yes Xus hauv Koom Txoos Kav Tos Liv thoob ntiaj teb ua lub hmoov nqaum nplooj qhib lub lis piam ntshiab. Peb zoo siab caw tas sawv daws mloog Mas Kos zaj ntawv Moo Zoo piav txog Yes Xus lub neej kawg. Yog ib zaj lus ntev hauj sim, peb yuav piav tsis tag zaj lus no. Tiam sis, peb thov Leej Ntuj Plig Ntshiab coj sawv daws kev, qhib sawv daws lub siab los npuab Huab Tais Yes Xus. Peb tsuas nthuav tib lub ntsiab lus tseg ua piv txwv txhawb peb lub neej nyob ntiaj teb no. Vim ib hnub twg los txog, peb lub neej yuav xaus yuav kawg nyob ntiaj teb no. Txoj kev Huab Tais Yes Xus rhawv ua Vaj Ntxwv rau peb taug ua peb ntej lawm, peb yuav taug Yes Xus hneev, peb thiaj tsis mus ciaj dab phem tub ki, mus tshwm qaum ntuj txais Tswv Ntuj txiaj tsim ciaj noob vaj ntxwv lawv Yes Xus qab.

Thaum Huab Tais Yes Xus tseem ua neej nyob, nws coj nws cov thwj tim tuaj mus koom lub hmoov hla nyob saum lub tuam ceeb Yes Xus Xas Les. Lawv tuaj txog ze ze ntug nroog lawm, lawv tseem so hauv lub zos Npes Tas Nis, hauv ib yig neeg mob ruas Xis Moos tsev. Yog thawj zaug thiab yog zaum kawg, muaj ib tug poj niam hlub Yes Xus tag npaum li ntawd : “muaj ib tug poj niam chaws los, nqa tau ib hwj tshuaj tsw qab hom zoo tshaj tej thiab tus nqe hnyav kawg, muab lub hwj tsoo, nws muab hliv rau saum Yes Xus taub hau. 4 Ces qees leej yws zom zaws : “Nkim tej tshuaj tsw qab no ua tus tsi ? 5 Yog muab muag ces twb tau peb puas lub txiaj nyiag thiab pab tau tej pluag lawm.” Lawv tau yws tus poj niam. 6 Yes Xus thiaj hais lawv tias : “Cia nws ua nws ! Pheej yuav ua ntxhov nws siab ? Yog nws kev khuv leej nws ua rau kuv…8 Nws ua tag nrho li nws muaj peev xwm ua. Nws tsuag kuv lub cev tsw qab log kuv ua ntej.” Tsuas kawg Yes Xus tib leeg thiaj paub lub caij kawg los txog rau nws lawm. Yes Xus hla lub zos Npes Tas Nis no zaum kawg. Tshuav tsis ntev, Yes Xus yuav hla lub ntiaj teb thiab, tsis muaj lwm zaus rau tus poj niam no hlub Yes Xus, nws hwj tshuaj tsw qab (300 txiaj thaum ub yog ze 900 €) coj los tshuag Yes Xus no, yog lub cim khee tag nws kev hlub Yes Xus. Vim thaum Yes Xus sawv ciaj rov los, Yes Xus tsis noj tej txhiam xws ntiaj teb no lawm, nyiaj txiag los tsis siv thiab tej tshuaj tsw qab no los tsis muaj txiaj ntsim lawm. Tib yam nkaus rau Yes Xus kev hlub nws cov thwj tim thiab hlub lub ntiaj teb neeg, peb puas rua muag pom Yes Xus khee tag Yes Xus kev hlub lub ntiaj teb neeg hauv nws cov hnub kawg. Yog peb tsis pom Yes Xus kev hlub peb, lub lis piam ntshiab no yuav tsis ntxiv nuj nqes dab tsi rau peb txoj kev ua neeg teev ntuj, hwm ntuj. Tsis txhob ua li Yus Das, tseem yog tus ntxeev siab muab Yes Xus muag 30 lub txiaj rau cov txwj laus, vim Yes Xus kev hlub Yus Das tsis muaj txiaj ntsim rau Yus Das : “Kuv hais tseeb rau nej : ib leeg hauv nej, nrog kuv noj mov, nws yuav muab kuv rau luag.” 19 Sawv daws ntshaus tag, lawv ib leeg zuj zus nug nws : “Puas yog kuv ?” 20 Nws teb lawv tias : “Yog ib leeg hauv pab kaum ob, nws nrog kuv koom tib taig.” Yes Xus cawm cov thwj tim dim kev tuag hauv paj dej Tis Npes Lias nplaim dej nphau khwb lawv nkoj yuav tog, Yes Xus cheem tau cua thiab dej tus yees ua lawv siav dim. Zoo li pab 12 no yeej tsis xeev pom Yes Xus tej txiaj ntsim no li. Ziag no, Yes Xus raug teeb meem, tus twg los tus hle, nyias tso nyias tes khiav ntshiab tag. Pob Zeb, tus thawj ntawm pab 12 twb tsis kam lees paub Yes Xus.
Luag tej ob cag, lwm cov sab nraud, cov thawj leej choj, cov thoob xwm thiab cov txwj laus tuaj mloog Yes Xus lus qhuab qhia, tsis yog tuaj qhib siab los ntseeg Yes Xus hwm Yes Xus. Lawv tuaj npaj thuam Yes Xus tej hwj huam kho neeg dig muag, kho neeg zuav ces, kho neeg mob ruas vim Yes Xus tsis caiv xas npas. Lawv ntsia Yes Xus kev hlub cov pluag loj tsis npaum li lawv kev caiv xas npas. Tiam sis, tsoom pej xeem ntseeg Yes Xus coob zuj zus, qhuas Yes Xus yog tus Mes Xias, tus Pleev muaj hwj huam tsa tau neeg tuag rov ciaj sia, ua rau cov thawj coj mob siab thiab khib. Lawv hais tais Yes Xus txw neeg yuam kev, lawv yim ntxub Yes Xus heev, vim Yes Xus tsis ua li lawv zaj. Ziag no, zoo caij zoo nyoog, lawv ntes tau Yes Xus hauv lawv tes lawm, lawv yuav tsis tso Yes Xus tseg : “60 Tus thawj leej choj thiaj sawv tsees hauv nruab nrab nug Yes Xus hais tias : “Koj tsis teb dab tsi rau lawv cov no tej lus hais koj ?”61 Nws nyob ntsiag to tsis teb ib los. Tus thawj leej choj rov nug nws dua hais tias : “Leej Pleev, tus nto koob meej Leej Tub yog koj lod ?” 62 Yes Xus hais tias : “ Yog kuv, thiab nej yuav pom neeg Leej Tub zaum ntawm tus muaj hwj huam sab xis tuaj nrog twv huab saum ntuj tuaj.”63 Tus thawj leej choj dua rhe nws lub tsho tshaj sab hais tias : “Peb tseem nrhiav pov thawj ntxiv li cas ? 64 Nej twb hnov ntsoov nws rov taw tuam ntuj, nej xav li cas ?” Tas nrho cov ntawd txiav txim rau nws tsim nyog tuag.” Ib txwm keeb, neeg kev sib ntxub kawg ua nqaij ntuag ntshav nrog. Txawm ob kwv tij xwb los yeej kawg sib rhuav, nkawm niam txiv los yeej yuav tsum sib nrauj, tej yeeb ncuab los kawg sib tua, tej teb chaws los kawg ua tsov ua rog. Kev sib ntxub yog kev tuag, kev txhaum, kev ciaj dab phem tub ki.

COV ZAJ NYEEM - Xyoo B 2011-12 ) 010a-p10
Tsuas muaj tib txoj kev pab tau peb dim kev sib ntxub, yog kev npuab Yes Xus kev ua Vaj Ntxwv. Yes Xus kev ua Vaj Ntxwv yog kev hlub neeg (La charité). Yes Xus kev ua Vaj Ntxwv tsis zoo li ntiaj teb kev ua huab tais vaj ntxwv cia tub mab tub qhe thiaj yus tiam yus, noj pej xeem huab hwm dag zog. Yes Xus kev ua Vaj Ntxwv yog tiam ntiaj teb neeg, tuaj hu ntiaj teb neeg mus lawm qaum ntuj. Yes Xus tuaj hu ntiaj teb neeg ua Yes Xus thwj tim. Hauv cov thwj tim, kuj muaj tus sawv tiv Yes Xus los Yes Xus nrog nws tus yeeb ncuab thwj tim ua phooj ywg, tos ntsoov hnub yeeb ncuab thim xav hloov nws lub siab dub siab lim hiam. Yes Xus paub ntsoov Yus Das yog tus thwj tim lim hiam ; Yes Xus paub ntsoov Pob Zeb yog neeg tais caus ; Yes Xus paub peb sawv daws txhua leej, ib txhia siab dub, ib txhia siab hlob, ib txhia siab ntse rov qwb tsi ntse rov hniav…txawm peb zoo li ntawd los Yes Xus xaiv peb los ua nws thwj tim, koom tsum thiab koom tais, koom ib cuab ib yig ua nws haiv neeg ntseeg. Yes Xus niaj hnub tos saib peb puas thim xav li Pob Zeb, hloov siab tshiab ; los peb yuav ua neeg twm xeeb li Yus Das yeem mus dai tuag, tsis yeem hloov siab tshiab. Yes Xus tsis siv tej hwj huam Yes Xus muaj los hlawv tej yeeb ncuab kom yaj ua plua tshauv, tsis nqa riam phom tua tej yeeb ncuab kom tu noob nhro. Yes Xus kev ua Vaj Ntxwv tsis muaj ntxub tej yeeb ncuab, tsuas muaj hlub xwb, tsuas muaj hlub tus neeg txhaum, hlub tus pluag, hlub tag ntiaj teb neeg txhua leej txhua tus. Yes Xus kev ua Vaj Ntxwv tsi hla tib neeg kev ploj tuag, tiam sis tuag theej tus neeg phem lub txim txhaum thiab tuag nrog cov neeg raug txim ua ib nqag : “31 Cov thawj leej choj ib leeg dhau ib leeg hnyos nrog cov thoob xwm : “Nws pom xeeb cawm tau luag, nws ho cawm tsis tau nws tus kheej; 32 Kom Leej Pleev His Xas lais tus vaj ntxwv nqes nroos saum ntoo cuam ziag no rau peb pom kom peb ntseeg.” Yog nej tus me nyuam nej hlub hlub ntxeev siab nqa phom los muab nej tua, nej yuav nrog nej tus me nyuam sib hais tim li cas nws thiaj xav tua nej. Tiam sis, yog nws yuam qhi muab nej tua, nej kuj tsis pom qab cheem tau nws thiab nej txoj kev hlub nws yeej tsis tu. Yes Xus kuj tau thov Tswv Ntuj tshem lub nra raug txom nyem hauv Yes Xus lub neej. Peb yuav tsis txhob to taub yuam kev tias Yes Xus nrhiav kev raug txom nyem. Tim li cas Tswv Ntuj nyob ntsiag to thaum Yes Xus hu txog Tswv Ntuj tuaj pab : “Es Los His, Es Los His, Les Mas Xas Npas Thas Nis, txhais tias : Kuv tus Tswv Ntuj, kuv tus Tswv Ntuj, ua cas koj tso kuv tseg ?” Peb ua neej nyob, muaj tej lub caij nyoog, thaum peb raug kev txhawj xeeb, peb hu niam hu txiv pab, hu ntuj pab : “Niam aw! Pab aw ! Ntuj aw ! Pab aw !” Niam txiv los pab tsis tau, ntuj teb los nyob ntsiag to tsis pom kev pab tuaj txog. Yog tim li cas ? Peb yuav tig mus mloog cov neeg siab dawb lus qhuab qhia : “Hmo tsaus tshaj tej, txhawj xeeb thiab tshaib kev hlub, Awb ! Hmoov zoo kawg ! Kuv tawm rooj tsis muaj tug pom, Tiam sis kuv chaw nyob thaj yeeb lug, Hauv hmo zoo ntawd, Kuv nraim twj ywm tseg, tsis muaj tug pom, Kuv kuj tsis pom tus tsi, Tshuav qhov pom kev cig hauv kuv nruab siab coj kuv kev. Nws coj kuv kev tau zoo tshaj nruab hnub nrig, mus rau thaj chaw tus hlub kuv nyob tos kuv, Tsis muaj lwm tus yuav pom tau. Awb kev tsaus tus coj kuv ! Awb kev tsaus zoo hlub dua kev kaj ! Awb kev tsaus qaws tus hlub nrog tus tshua ua rau tus tshua plhis hauv tus hlub ! Par une nuit profonde, Étant pleine d'angoisse et enflammée d'amour, Oh! l'heureux sort! Je sortis sans être vue, Tandis que ma demeure était déjà en paix. Dans cette heureuse nuit, Je me tenais dans le secret, personne ne me voyait, Et je n'apercevais rien, Pour me guider que la lumière Qui brûlait dans mon cœur. Elle me guidait, Plus sûrement que la lumière du midi, Au but où m'attendait, Celui qui m'aimait, Là où nul autre ne se voyait. O nuit qui m'avez guidée! O nuit plus aimable que l'aurore! O nuit qui avez uni, L'aimé avec sa bien-aimée, Qui a été transformée en lui! La nuit obscure Saint Jean de la Croix 1578” Txawm peb kev hu ntuj hu teb ntsiag qas to, ua tsaus peb ntuj npaum twg, yuav ua rau peb txhawj npaum li cas, kom peb txhob poob siab. Cov leej ntshiab thiab Huab Tais Yes Xus puav leej mus tib txoj kab chaws tib lub dawm ua peb ntej, peb tsuas taug lawv qab, kom peb cim ntsoov Huab Tais Yes Xus kev hlub peb rau nruab siab. Peb yog tus nws tshua yuav plhis tau hauv Huab Tais tus hlub peb xub ntiag.

Ib tsoom niam txiv kwv tij neej tsa, lub lis piam ntshiab no qhia rau peb kom peb pom tias Yes Xus lub neej kawg, kuj yog peb txoj kev kawg ib hnub twg nyob ntiaj teb no. Peb kev tig los mloog cov zaj nyeem hauv lub lis piam ntshiab yuav cawm tau peb, pab tau peb zoo siab ris peb lub nra thiab ua peb tuaj zog kwv peb tus ntoo cuam lawv Yes Xus qab : “21 Lawv yuam Xis Moos Kws Les Nais, As Les Xas Nrais thiab Lus Fus nkawd txiv, mus teb los hla ntawd, kom kwv nws tus ntoo cuam.”

29.03.2012 Cwj Vuam Chiv

**NrhiavTswvNtuj** 6th April 2012, 11:39 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°23

COV ZAJ NYEEM HNUB 08/04/2012 ( Hnub chiv Hla - Xyoo B )

Post NrhiavTswvNtuj 6th April 2012, 11:39 am

COV ZAJ NYEEM HNUB 08/04/2012

( Hnub chiv Hla - Xyoo B )

Zaj nyeem 1 : Hauj Lwm 10,34a.37-43

34 Ces Pob Zeb pib hais tias :
"Nyem no, kuv paub tseeb tias Tswv Ntuj
tsis kws leej twg cai. 37 Nej twb tau hnov txog tej xwm uas
tshwm sim tuaj nyob hauv xeev Yus Das :
yam li thaum Zam tshaj tias sawv daws
yuav txais lub cim ntxuav, mas nej kuj
hnov hais txog Yes Xus nyob Nas Xas
Les. Nws pib qhia hauv xeev Nkas Lis
Lais. 38 Tswv Ntuj tau pleev nws. Tswv
Ntuj muab Leej Ntuj Plig Ntshiab thiab
muab hwj huam rau nws. Nws mus ncig
teb ncig chaw, nws ua zoo rau sawv daws.
Nws kho cov neeg poob hauv dab phem
tes kom lawv zoo. Vim Tswv Ntuj nrog nws nyob.

39 Peb ua tim khawv pom tas puas tsav
yam Yes Xus tau ua nyob hauv cov Yus
Das lub teb chaws thiab nyob Yes Lus
Xas Les. Cov Yus Das tau ua phem rau
nws : lawv muab nws dai saum ib tug
ncej kom nws tuag. 40 Tab sis, hnub tim
peb, Tswv Ntuj tsa nws sawv rov qab los
lawm thiab pub kom nws tawm los xyuas
cov tim khawv uas nws xub tau xaiv ua
ntej. 41 Tsis yog tas tsoom pej xeem tau
pom nws. Cov tau pom nws yog peb.
Thaum nws sawv hauv cov tub tuag rov
los, mas peb tau nrog nws noj thiab haus
ua ke. 42 Nws qhia peb kom peb tshaj
rau tsoom pej xeem thiab ua pov thawj
zeem tias nws yog tus uas Tswv Ntuj tsa
los txiav txim rau cov neeg ciaj thiab cov neeg tuag.

43 Tas cov yaj saub ua tim khawv txog
Yes Xus tias leej twg ntseeg txog nws,
mas leej twg cov txhaum yuav daws tas
nyob hauv nws lub npe."

Zaj nyeem 2 : Kos Los Xais 3, 1-4 : Peb npuab Yes Xus peb thiaj tau txoj sia tshiab.
Nej pom xeeb nrog Leej Pleev
sawv rov los lawm, mas nej nrhiav
tej yam nyob txheej saud, vim txheej saud
yog Leej Pleev qhov chaw nyob, nws
zaum ntawm Tswv Ntuj phab xis. 2 Nej
lub siab yuav dai dhuam rau tej yam nyob
txheej saud, txhob dai rau tej yam nyob
ntiaj teb no. 3 Vim tias, nej tuag lawm,
hos nej txoj sia nrog Leej Pleev tsiv nraim
hauv Tswv Ntuj. 4 Leej Pleev yog nej
txoj sia : thaum nws yuav tawm los rau
pom xyeem, mas nej kuj yuav nrog nws
tawm los muaj hwj chim.

Zam Ntawv Moo Zoo 20,1-9, Lub ntxa qhuav.

1 Thawj hnub pib lub lis piam,
thaum sawv ntxov, ntuj tsis tau
kaj, Mab Lias Mas Ntas Las mus tom
ntxa. Nws pom daim txiag zeb tshem
ntawm lub ntxa lawm. 2 Mab Liab Mas
Ntas Las khiav mus cuag Xis Moos Pob
Zeb thiab lwm tus thwj tim, uas yog tus
Yes Xus nyiam. Nws hais rau nkawd
tias : "Lawv nqa Huab Tais tawm hauv
ntxa lawm, peb tsis paub xyov lawv coj
nws mus tso qhov twg lawm."
Pob Zeb thiab Zam mus tom ntxa.
20 : 3 - 10.
3 Pob Zeb tawm plaws mus, lwm tus
thwj tim kuj tawm plaws thiab, nkawd
mus tom ntxa. 4 Nkawd ob leeg ua ke
khiav mus, tab sis lwm tus thwj tim
khiav nrawm dua Pob Zeb, nws khiav ua
ntej, nws xub mus txog tom ntxa. 5 Nws
khoov mus xauj, nws pom tej hlab ntaub
nyob ntawd ; tab sis nws tsis chaws mus
hauv. 6 Ces Xis Moos Pob Zeb lawv tus
thwj tim qab mus txog, nws chaws mus
hauv lub ntxa. Nws pom cov hlab ntaub
nyob ntawd, 7 hos daim ntaub qhwv
taub hau kauv cia nyob lwm qhov, tsis
xyaw cov hlab ntaub. 8 Ces lwm tus
thwj tim uas xub mus txog ntawm lub
ntxa mam li chaws mus hauv. Nws pom
ces nws ntseeg. 9 Vim lawv tseem tsis
tau to taub tias Yes Xus yuav sawv hauv
cov tuag rov los raws li Ntawv qhia.
10 Ob tug thwj tim rov qab mus tsev.

NTHUAV NTAWV NTSHIAB.

Rau hnub tim 08 lub 04 hli 2012

Tas zeej tsoom ntseeg thiab phooj ywg,

Hnub no yog ib hnub txawv txhia hnub, yog ib hnub muaj txiaj ntsim loj dua tej rau peb tus neeg ntseeg Tswv Ntuj teev Tswv Ntuj. Vim li ntawd, peb yuav los nthuav ob peb los txog Huab Tais Yes Xus lub txiaj ntsim Hmoov Hla no.

Ib tsoom phooj ywg, peb yuav pauj tsis tau lub txiaj ntsim peb tus Huab Tais Yes Xus muab pub rau peb noob neej hauv lub hnub nyoog Hmoov Hla no. Peb yuav ua neeg ntsej lag muag dig tsis paub tsis pom lub txiaj ntsim Hmoov Hla li tej nyuag me nyuam koom txoos teev Yes Xus tsis tau. Yog peb tsis lauj zias lub caij lub nyoog teev hawm Huab Tais Yes Xus sawv ciaj sia hauv lub caij nyoog Hmoov Hla, peb ua tsis nyog ib tug neeg teev Tswv Ntuj hwm Tswv Ntuj. Lub Koom Txoos Kav Tos Liv saib kev teev hawm Huab Tais Yes Xus sawv ciaj Tswv Ntuj sia nyob ib txhiab ib txhis loj kawg. Peb yuav xyiv fab mloog peb lub Koom Txoos Niam qhia txhij qhia txhua Huab Tais Yes Xus cov lus rau peb kom peb txawj ua neeg hwm ntuj thiab hwm neeg nyob ntiaj teb no. Peb txhob lam mloog tej nyuag koom txoos teev Yes Xus loj cov kem tsuab tsis paub teev hawm Yes Xus raws caij raws nyoog. Peb yuav mloog thiab raws kom cuag lub Koom Txoos Niam tej lus qhuab qhia, tsis txhob yuam kev tawm hauv lub Koom Txoos Niam mus : “49 Zam txawm teb hais tias : “Xib Hwb, peb pom muaj ib tug ua koj npe ntiab dab phem, peb xav txwv nws, vim nws twb tsis caum peb.”50 Yes Xus hais rau nws : “Nej txhob txwv, tus twg tsis tiv nej yog tuaj nej tog Lk 9,49-50.” Tus neeg ncaim thiab tiv lub Koom Txoos Niam, nws kuj ncaim thiab tiv kev teev hawm thiab plam txoj kev ntseeg lub ntsiab (le dogme). Tus plam txoj kev ntseeg lub ntsiab zoo li lub thoob tshau qab cug dej tsis tau dej, pluag tsis muaj tej txiaj ntsim Yes Xus muab tuaj rau tsoom ntseeg hauv Koom Txoos Kav Tos Liv. Tsis tas li ntawd, tsis yog nws tus kheej yuam kev xwb, nws tseem pus luag tej ob cag yuam kev nrog nws thiab. Tus neeg teev Tswv Ntuj, hwm Tswv Ntuj raws kev raws cai li Koom Txoos Kav Tos Liv qhia, nws mloog Huab Tais Yes Xus lus qhia. Tus neeg cam thawj tsis mloog thiab tsis hwm lub Koom Txoos Kav Tos Liv, kuj yog tsis mloog Huab Tais Yes Xus cov lus qhia : “18 Kuv hais rau koj, koj yog Pob Zeb, saum lub pob zeb no, kuv yuav txhim kuv lub koom txoos Mt 16,18” Nej sim xav, peb ntseeg thiab peb vam tias cov neeg teev Yes Xus muaj Yes Xus txiaj ntsim. Yog muaj tseeb li ntawd tiag, tus mloog thiab hwm Yes Xus tej lus tag nws lub siab lub ntsws, tag tswv yim, tus ntawd yeej txais Yes Xus txiaj ntsim ntau tshaj tej. Vim li ntawd, cov leej ntshiab, yog cov neeg muaj Huab Tais Yes Xus txiaj ntsim tshaj sawv daws, Huab Tais Yes Xus pub lawv ua tau tej lub cim muaj hwj chim loj tib neeg ua tsis tau. Cov leej ntshiab yog cov neeg teev hawm Yes Xus raws kab raws ke, raws li cov thwj tim qhia.
Hnub no, tag ib tsoom neeg ntseeg Kav Tos Liv thoob ntiaj teb ua lub Hmoov Hla, hawm Huab Tais Yes Xus sawv tsees ciaj Tswv Ntuj sia raws li cov thwj tim qhia tseg : “6 Xis Moos Pob Zeb lawv nws qab tuaj txog, nws chaws mus hauv lub ntxa. Nws xam pom cov hlab ntaub nyob ntawd, 7 Daim ntaub, daim qhwv nws taub hau, tsis xyaw cov hlab ntaub nyob ntawd, tiam sis kauv cia rau ib qho nyob nws ib cag. 8 Lwm tus thwj tim, tus xub tuaj txog tom ntxa, chaws los thiab nws pom nws ntseeg…” Peb txoj kev ntseeg Tswv Ntuj, peb txais ntawm cov thwj tim los, peb tsis lam xev coj qhia sawv daws teev ntuj. Peb nco ntsoov cov thwj tim tej txiaj ntsim, vim lawv yog cov qhia kev ntseeg Tswv Ntuj, teev Tswv Ntuj rau peb. Vim li ntawd, peb tsis muaj cuab kav thuam vaj qhia thiab cov tswv qhia, cov sawv los taj cov thwj tim chaw. Peb kev qhia neeg ntseeg Tswv Ntuj yuav tsum mus raws li zaj ntseeg (le credo) lub Koom Txoos tau sau tseg. Peb tsis paub yuav ua cas piav Yes Xus raug hiam dai saum nkhib ntoo cuam tuag lawm, nws ua li cas sawv tsees ciaj sia. Cov thwj tim yog cov mus pom daim ntaub qhwv tuag tais zoo zoo tseg, tsis pom Huab Tais lub cev lawm. Yog lub cim zeem tias Yes Xus ua Huab Tais ciaj Tswv Ntuj sia lawm. Lub neej sawv ciaj Tswv Ntuj sia, tsis yog yuav rov los thawj thiab khee lub qub neej ua, hnav tej tsoos tsho, noj tej txhiam xws, tej zaub mov li qub lawm. Lub neej sawv ciaj Tswv Ntuj sia yog lub neej tshiab tag nrho : txoj sia, tsoos tsho, txhiam xws, lub cev…tag txhua yam tshiab tag nrho peb qhov muag pom tsis tau thiab tsis muaj lo lus yuav piav tau. Cov thwj tim pom Huab Tais Yes Xus sawv cia sia tuaj ntsib lawv, muaj lub cev thiab ntsuj plig nyob nruab nrab hauv lawv, nrog lawv noj, nrog lawv haus, tiam sis lawv txhais tes vuag tsis tau Huab Tais Yes Xus li yav tag los. Neeg ntiaj teb, muaj nqaij, muaj txha, koj pom koj kov tau. Huab Tais Yes Xus sawv ciaj sia muaj nqaij muaj txha, tiam sis koj pom koj kov tsis tau vuag tsis tau. Lawv pom Huab Tais Yes Xus nyob thoob txhua txhia lub nroog, thoob teb chaws. Ib sij huam, Huab Tais tshwm plaws rau lawv pom dheev nws nyob nruab nrab hauv lawv, nrog lawv ua ke thiab ploj ntais ntawm lawv xub ntiag lawm.
Lub txiaj ntsim Hmoov Hla yog lub txiaj ntsim Leej Txiv Tswv Ntuj muab pub rau peb tib neeg ntiaj teb, kom peb muaj Huab Tais Yes Xus txiaj ntsim nrog Huab Tais Yes Xus ciaj Tswv Ntuj sia. Nej sim xav, nws yog ib lub txiaj ntsim zoo tag npaum li ntawd, tim li cas peb tseem ua tej tug neeg tsis paub cai, twb tsis txawj vam tsis txawj ntshaw lub txiaj ntsim ntawd. Vim lub txiaj ntsim Hmoov Hla, peb tib neeg ntiaj teb ploj tuag tsis mus ua dab los ua tsov li Hmoob tej laus hais ; peb kuj tsis mus thawj thiab ua kab npauj kab xi, ua mab ua suav yuav rov yug dua los khee lub qub neej ua ; peb kuj tsis zoo li tej txhia neeg lam yuav npe teev Yes Xus, ib sim neej tsis paub cai teev hawm Yes Xus muaj caij muaj nyoog. Txog caij nyoog ua Hmoov Tsuj Xeeb Yes Xus los tsis paub ua Hmoov Tsuj Xeeb li ; txog lub caij nyoog hawm Huab Tais Tswv Ntuj Peb Leeg los tsis paub cai mus hawm luag ; txog lub lis piam ntshiab Yes Xus raug txom nyem theej yus tej kev txhoj kev txhaum los tsis paub cai mus pe mus thov txim ntawm luag ; txog Hmo Hla nco Huab Tais Yes Xus sawv tsees hauv kev ploj tuag los nqus peb tib neeg ciaj Tswv Ntuj sia nyob niaj txhiab ib txhis los ua tib co neeg nyob dawb dawb ncaj ncaj xwb ; txog hnub nyoog hawm Leej Ntuj Plig Ntshiab nqes los coj yus kev ua neeg thoob tsib, ua neeg siab loj siab dav phim tus neeg teev ntuj hwm ntuj los tsis paub kev cai hawm Leej Ntuj Plig Ntshiab li…Ntshai yog li ntawd, cov neeg lam ua “Church” teev Yes Xus xwb, pluag txiaj ntsim thiab tej siab ntsws thiaj twm xeeb npaum li ntawd. Cov neeg pluag txiaj ntsim no tseem muaj ntsej muag thuam Nkauj Xwb Mab Liab tus siab dawb thiab thuam ib tsoom leej ntshiab. Peb yuav zam kev deb tsis txhob npuab cov neeg pluag txiaj ntsim no. Tsis tas li ntawd, peb yuav tsis txhob muab peb txoj dej num saib hlob, cia peb tej dej num khuam peb tseg, mus tsis tau teev hawm Huab Tais Yes Xus sawv ciaj sia : “42 Nws tau ceeb toom rau peb kom mus tshaj rau zeej tsoom thiab ua pov thawj zeem tias nws yog tus Tswv Ntuj tsa los txiav txim rau cov ciaj thiab cov tuag. 43 Tas cov yaj saub twb ua tim khawv txog tus ntawd : tus ntseeg nws, txais tau kev daws txhaum vim nws lub npe.”

Ib tsoom phooj ywg thiab ib zeej tsoom neeg mloog Tswv Ntuj lus, peb thov kom Huab Tais Yes Xus kev sawv tsees ciaj Tswv Ntuj sia txhawb peb cov neeg raug kev nyuaj siab ntxhov plawv, pub kev kaj siab lug rau peb txhua leej. Ib hnub twg los txog, kom peb txhob muaj ib tug twg mus ciaj dab xas tas tub ki, tiam sis, kom Huab Tais Yes Xus kev yeej txoj kev ploj tuag nqus peb nrog Huab Tais Yes Xus ciaj Tswv Ntuj sia mus niaj txhiab ib txhis, ua Tswv Ntuj tub ki.

05.04.2012 Cwj Vuam Chiv

**NrhiavTswvNtuj** 14th April 2012, 12:02 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°24

COV ZAJ NYEEM HNUB 15/04/2012 ( Hnub Chiv 2 Hla - Xyoo B )

Post NrhiavTswvNtuj 14th April 2012, 12:02 am

COV ZAJ NYEEM HNUB 15/04/2012

( Hnub Chiv 2 Hla - Xyoo B )

Zaj nyeem 1 : Hauj Lwm 4, 32-35: Thawj pab ntseeg kub siab coj cov kev cai tshiab.

32 Tas ib tsoom ntseeg coob coob sawv
daws muaj ib lub siab, ib lub tswv yim
xwb. Tej yam uas yog nws li, tsis kav
tsis muaj leej twg yuav hais tias yog nws
tug xwb. Nyias muab nyias tug los ua
sawv daws tug. 33 Cov Hauv Paus Xa
Lus muaj hwj huam loj, lawv ua tim
khawv txog Huab Tais Yes Xus sawv rov
los. Tsoom sid pom lawv zoo kawg.
34 Nyob hauv lawv, tsis muaj ib tug yuav
tshaib nqhis dab tsi : vim tias cov uas
muaj liaj muaj teb, muaj vaj tse, muab
muag tas huv si, 35 lawv nqa tus nqi uas
muag tau tuaj tso ntawm cov Hauv Paus
Xa Lus ko taw. Lawv mam muab faib rau
sawv daws kom nyias tau txaus nyias siv.

Zaj nyeem 2 : 1 Zam 5, 1-6
Tus ntseeg txog Yes Xus, nws yeej lub ntiaj teb.

1 Leej twg ntseeg tias Yes Xus yog
Leej Pleev, mas tus ntawd yug
ntawm Tswv Ntuj los. Leej twg nyiam
tus xeeb Leej Tub, mas nws kuj nyiam tus
yug ntawm Tswv Ntuj los thiab.
2 Peb paub tias peb nyiam Tswv Ntuj
cov me nyuam, vim peb nyiam Tswv
Ntuj, thiab peb coj nws cov lus qhia.
3 Kev nyiam Tswv Ntuj yog kev coj
nws cov lus qhia, vim Tswv Ntuj cov lus
qhia tsis hnyav. 4 Vim yam twg yug
ntawm Tswv Ntuj los, mas yam ntawd
yeej lub qab ntuj neeg. Lub zog yeej lub
qab ntuj neeg yog peb txoj kev ntseeg.
5 Tus yeej lub qab ntuj neeg yog tus
ntseeg tias Yes Xus yog Tswv Ntuj Leej Tub.

6 Tus tuaj nyob hauv dej thiab nyob hauv
ntshav, yog Yes Xus. Nws tsis tuaj nyob
hauv dej xwb, nws tuaj nyob hauv dej
thiab nyob hauv ntshav, yog Leej Ntuj
Plig ua tim khawv zeem li ntawd, vim
Leej Ntuj Plig yog qhov tseeb.

Zam ntawv Moo Zoo 20, 19-31

Yes Xus tawm los rau cov thwj tim
pom thaum Tos Mas tsis nyob.
20 : 19 - 23.

19 Tib hnub ntawd thaum tsaus ntuj, uas
yog thawj hnub pib lub lis piam, cov
qhov rooj hauv qhov chaw cov thwj tim
nyob kaw tas, vim lawv ntshai cov Yus
Das. Yes Xus los sawv hauv nruab nrab,
nws hais rau lawv tias :
"Nej nyob kaj lug."

20 Thaum Yes Xus hais lo lus ntawd tas,
nws muab nws ob txhais tes thiab nws
phab tav rau lawv saib. Cov thwj tim
pom Huab Tais, lawv zoo siab kawg.
21 Yes Xus rov hais rau lawv tias :
"Nej nyob kaj lug ! Kuv xa nej mus xws li
Leej Txiv xa kuv tuaj."

22 Yes Xus hais li tas, nws tshuab pa rau
lawv, nws hais rau lawv tias :
"Nej txais Leej Ntuj Plig Ntshiab.
23 Nej daws txhaum rau leej twg, mas
nws cov txhaum yuav daws. Nej tsis
daws leej twg cov txhaum, mas nws cov txhaum yuav nyob."

Yes Xus yees tawm los rau cov
thwj tim pom thaum Tos Mas nyob.
20 : 24 - 29.

24 Tos Mas yog ib tug hauv pab Kaum
Ob, nws tseem hu ua Dis Dws Mos thiab.
Thaum Yes Xus tawm los, mas nws tsis
nrog cov thwj tim nyob. 25 Lwm cov
thwj tim hais rau nws tias :
"Peb pom Huab Tais lawm !"
Ces Tos Mas hais rau lawv tias :
"Yog kuv tsis pom lub qhov txhab ntsia
hlau nyob hauv nws ob txhais tes, yog
kuv tsis muab kuv tus ntiv tes ntxig lub
qhov ntsia hlau, thiab yog kuv tsis muab
kuv txhais tes rau ntawm nws phab tav,
mas kuv tsis ntseeg."
26 Yim hnub tom qab, cov thwj tim rov
nyob hauv tsev dua. Tos Mas kuj nrog
lawv nyob thiab. Cov qhov rooj puav leej
kaw tas. Yes Xus tawm los sawv hauv
nruab nrab, nws hais rau lawv tias :
"Nej nyob kaj lug !"
27 Ces Yes Xus hais rau Tos Mas tias :
"Cev koj ntiv tes rau ntawm no, koj ntsia
kuv ob txhais tes. Cev koj txhais tes los,
muab rau hauv kuv phab tav. Koj txhob
ua neeg tsis ntseeg ntxiv, koj ntseeg mog."

28 Tos Mas teb rau Yes Xus tias :
"Kuv tus Huab Tais, Kuv tus Tswv Ntuj."

29 Yes Xus hais rau Tos Mas tias :
"Vim koj pom kuv, mas koj thiaj ntseeg.
Cov uas tsis tau pom tab sis lawv ntseeg,
mas lawv txoj hmoov zoo."

Cov lus xaus lub Moo Zoo.
20 : 30 - 31.

30 Yes Xus tseem tau ua lwm cov cim
ntau nyob ntawm cov thwj tim xub ntiag,
uas tsis tau muab sau rau hauv phau
ntawv no. 31 Tau muab cov cim no sau
tseg kom nej ntseeg tias Yes Xus yog
Leej Pleev, Tswv Ntuj Leej Tub. Nej
ntseeg ces nej yuav muaj txoj sia nyob
hauv nws lub npe.

NTHUAV NTAWV NTSHIAB.

COV ZAJ NYEEM - Xyoo B 2011-12 ) Thomas10 Rau hnub tim 15 lub 04 hli 2012

Ib zeej tsoom neeg ntseeg teev Huab Tais Yes Xus thiab phooj ywg,

Peb nyuam qhuav ua lub Hmoov Hla, nco txog peb tus Huab Tais Yes Xus qaij qaug mus zwm av sawv tsees ciaj Tswv Ntuj sia. Ntawm no mus, peb yuav piav ob peb los txog Huab Tais Yes Xus kev ciaj sia.

Ib tsoom phooj ywg, xav kom nej txhua leej txhua tus paub tseeb qhov no : Huab Tais Yes Xus yug los ciaj neeg nyob ntiaj teb no kom pab tau peb tib neeg lim hiam, neeg txhaum. Huab Tais thiaj raug txom nyem, raug ntxub, raug tua tuag, nrog peb noob neej ploj thiab tuag mus zwm av. Yog Huab Tais Yes Xus tsis sawv ciaj Tswv Ntuj sia, peb txoj kev ntseeg teev Yes Xus tsis txawv thiab tsis tsim nuj nqes dab tsi tshaj ntiaj teb neeg tej kev teev dab qhuas, kev teev mlom, kev teev Mas Hos Mes los lwm yam kev teev hawm. Vim Huab Tais Yes Xus hla dhau plaws kev ploj tuag, sawv tsees ciaj Tswv Ntuj sia nyob niaj txhiab ib txhis. Vim li ntawd, peb txoj kev ntseeg Yes Xus thiab teev Yes Xus muaj txiaj ntsim dua tej kev teev hawm tib si. Tag txhua txoj kev teev hawm hauv ntiaj teb puav leej zoo, tiam sis zoo tsis txaus. Tag cov thawj neeg rhawv tej kev cai teev hawm no puav leej yog neeg zoo neeg thoob tsib, txawj coj, txawj qhuab qhia, tiam sis, lawv dua toj tag tsis muaj ib tug yuav hla dhau kev ploj tuag. Tsuas yog Yes Xus tib tug xwb thiaj sawv tsees hauv kev ploj tuag ciaj sia.
Phus Thas, tus tsim kev cai hauj sam, nws yog ib tug neeg thoob tsib, siab dawb siab ncaj txawj hlub neeg. Tiam sis, nws tsuas muab tau nws cov lus thoob tsib qhia neeg, coj neeg kom siab dawb siab ncaj li nws. Phus Thas txhiv tsis tau lwm leej lwm tus neeg mob nkeeg thiab tsis nws muaj hwj huam cawm tau tib neeg tuag kom lub cev thiab ntsuj plig sawv ciaj sia. Phus Thas tus kheej tseem khuam ntiaj teb no li tej tib neeg.
Mas Hos Mes, tus tsim kev teev hawm Mawv Xim Lim, tsuas qhia kev thoob tsib kom tib neeg txawj sib hlub, sib haum xeeb. Nws kuj tsis muaj rab peev xwm muab tau hwj huam rau leej tib neeg twg kom ua tau hwj huam.
Peb tej poj yawm txwv txoob muaj koob hmoov pub rau peb tej ua xeeb leej xeeb ntxwv. Tiam sis, lawv kuj tsis muaj zog yuav tiv thaiv roos tau peb cov ua xeeb leej xeeb ntxwv. Vim li ntawd, peb tej poj yawm kuj tseem qhia kom peb fiv lub ntuj tuaj pov tuaj roos peb ntxiv poj yawm lub hwj xyeej thiab.
Peb thiaj hais tau tias, tag txhua txoj kev teev hawm nyob ntiaj teb no zoo los zoo tsis kawg thiab zoo tsis txaus. Tsuas kawg nkaus txoj kev teev Yes Xus thiaj txawv tag nrho lwm txoj kev teev hawm tib si. Txoj kev teev Yes Xus yog txoj zoo dua tej, zoo txij ntiaj teb no tshab plaws puag qaum ntuj. Yog txhais li cas ? Txhais tias kev teev Yes Xus zoo npaum no : tus tib neeg lim hiam, muaj txhaum, tiam sis, yos nws hloov tau siab ua neeg ncaj, ua neeg me, tsis txhob khav theeb, tsis txhob muab hlob, Tswv Ntuj pub tau kom tus neeg ntawd ntshiab huv tuaj, ciaj tau Tswv Ntuj tub ki thiab ua tau tej yam hwj huam neej thiab dab tsis muaj peev xwm ua tau. Tsuas kawg Tswv Ntuj thiaj pub tau tib neeg muaj Tswv Ntuj txiaj ntsim ua tej lub cim loj txaus ntshai txaus qhuas, txaus neeg hwm. Vim li ntawd, cov neeg ncaj neeg zoo muaj Tswv Ntuj hwj huam tiag tiag, yam li leej ntshiab Martin de Tours : “Muaj ib hnub, ze ntawm xyoo 389-391, Martin tseem rhuav ib lub thaj txi dab pov tseg, npoj neeg teev dab qhuas pom, ua rau lawv meem txom heev, sawv daws khiav nplawg ntia los muab nws mos. Muaj ib niag txawm rho loo tau nws rab ntaj hauv hnab los. Martin txawm muab nws lub tsho loj ua ntia pem teb, cev caj dab qoos qoos tos tus hniav ntaj. Tus yawm ntawd txawm tsa loo nws sab tes tuav ntaj, tiam sis nws cuab tau tes siab dhau ua rau nws ntxeev tiaj hlo rov qab ; nws cia li ntshai Tswv Ntuj tshee na, sawv tau los, nws thiaj los thov txhaum ntawm tswv qhia Martin.” Tej hwj huam Huab Tais Tswv Ntuj muab tuaj rau Martin no yog Tswv Ntuj kev hlub peb ntiaj teb neeg lim hiam, siab phem kom ntiaj teb muaj hwj huam npaum li saum qaum ntuj. Tus yawm ntawd ntxeev tiaj hlo rov qab ua nws siab nqig kiag ; Martin tau txais Tswv Ntuj txiaj ntsim tiv thaiv nws tsis raug hniav ntaj. Peb tib neeg ntiaj teb leej twg ntshaw, leej twg thov Tswv Ntuj txiaj ntsim ces tus ntawd yuav tau txais Huab Tais Yes Xus kev cawm. Cov neeg siab dawb siab ntshiab yog cov neeg me, neeg pluag tos rawv Huab Tais Yes Xus kev cawm. Huab Tais Yes Xus cawm tau Martin hnub ntawd. Huab Tais Yes Xus kuj yuav cawm tau peb tib yam. Txoj kev teev Yes Xus yog txoj zoo coj tau neeg ntiaj teb ciaj ua Tswv Ntuj neeg : “4 Vim tag cov yug ntawm Tswv Ntuj los yeej tuag nthi lub ntiaj teb : peb lub siab ntseeg ntawd yog kev yeej tuag nthi lub ntiaj teb.5 Leej twg yog tus yeej lub ntiaj teb, kawg tus ntseeg tias Yes Xus yog Tswv Ntuj Leej Tub.” Nej sim xav, puas muaj lwm txoj kev teev hawm dua ntawm txoj kev teev Yes Xus, yuav nqus peb neeg ntiaj teb lub cev thiab ntsuj plig mus tshwm qaum ntuj, nrog Tswv Ntuj nyob, ciaj Tswv Ntuj sia ? Dua ntawm txoj kev teev Yes Xus, tsis muaj lwm txoj kev yuav pab tau thiab cawm tau peb neeg ntiaj teb mus ciaj Tswv Ntuj sia nyob niaj txhiab ib txhis li Tswv Ntuj. Peb puas tso tau siab, puas ntseeg tau tias peb tib neeg yuav ciaj tau Tswv Ntuj sia ? Yog peb muab xav rau peb tib neeg ntiaj teb xwb, peb yuav ntseeg tsis tau. Peb leej tib neeg tsis muaj leej twg hla dhau txoj kev tuag. Tab txawm yog cov neeg ntseeg teev Yes Xus los kawg ploj tuag thiaj tag, tsis pom leej twg yuav sawv tsees ciaj sia. Tiam sis, tos peb hais tias peb tib neeg yuav sawv ciaj tau Tswv Ntuj sia, vim peb txoj kev teev Huab Tais Yes Xus qhia rau peb : “26 Yim hnub tom qab, nws cov thwj tim tseem nyob rawv sab hauv thiab Tos Mas nrog lawv ua ke. Cov qhov rooj puav leej kaw tas, Yes Xus tshwm plaws tuaj sawv hauv nruab nrab, nws hais : “Nyob thaj yeeb nej sawv daws !” 27 Thiab hais rau Tos Mas : “Cev koj ntiv tes ntawm no ntsia kuv cov tes thiab cev koj txhais tes ntawm kuv phab tav thiab txhob ua tus tsis ntseeg, tiam sis ua tus ntseeg.” 28 Tos Mas teb rau nws : “Kuv tus Huab Tais thiab kuv tus Tswv Ntuj.” Peb txoj kev teev Yes Xus qhia peb ntseeg tias, txawm peb lub cev qaij qaug ib hnub twg yuav ciab zib yaj ua plua av, plua tshauv, txhob poob siab. Huab Tais Yes Xus yuav pub peb lub cev thiab ntsuj plig sawv ciaj sia muaj hwj chim nrog Huab Tais Yes Xus hla dhau rooj ntxa. Cov neeg mloog Yes Xus lus muaj Yes Xus txiaj ntsim tiag tiag.
Peb sim xav rau ntawm peb Hmoob, peb twb ntseeg peb tej poj yawm tej lus qhuab qhia. Thaum ib tug laus qaij qaug txwm caij txwm nyoog, Hmoob twb ua kab ke tso plig kom ntsuj plig tau kev mus thawj thiab. Yog peb Hmoob ntseeg tias ntsuj plig yuav rov los thawj thiab ua kab ua ntsaum, ua nyuj ua nees rau luag thauj, ua mab ua sua, ua noob nom noob tsw…peb tej poj yawm yog nyuag tib neeg tsis muaj hwj huam, peb twb ntseeg lawv tej lus qhia. Huab Tais Yes Xus yog Tswv Ntuj Leej Tub, tus muaj hwj huam yeej tuag nthi kev ploj tuag cog lus pub peb yeej tuag nthi kev ploj tuag thiab pub peb nrog nws ciaj Tswv Ntuj sia nyob ib txhis, peb yim huab yuav ntseeg Huab Tais Yes Xus. Tsis tag li ntawd, tos peb ntseeg tias peb tib neeg yuav sawv tsees lawv Yes Xus qab ciaj Tswv Ntuj sia ua Tswv Ntuj neeg, vim peb leej niam Nkauj Xwb Mab Liab, yog peb ntiaj teb neeg thawj thawj tug lub cev thiab ntsuj plig mus dua qaum ntuj ua peb ntej tseeb tiag. Nkauj Xwb Mab Liab twb tshwm sim rau coob leej ntau tus neeg siab dawb siab ncaj pom : tshwm rau ib tug txiv neej Mev, Juan Diego, Mexico xyoo 1531, tshwm rau Catherine Labouré, Rue du Bac, Paris 1830, tshwm rau Bernardette Soubirous, Lourdes 1858…thiab tseem tshwm nyob ntau thaj chaw ntxiv. Peb txoj kev ntseeg Huab Tais Yes Xus sawv ciaj sia muaj txiag muaj ntsig rau peb tus neeg ntseeg. Niaj hnub no, Huab Tais Yes Xus sawv ciaj sia nyob nruab nrab hauv peb nrog peb ua ke, peb txhob txhawj.

Ib tsoom phooj ywg sawv daws, peb twb muaj lub txiaj ntsim nrog Huab Tais Yes Xus sawv ciaj sia ua Tswv Ntuj tub ki, peb yuav tsis txhob ua neeg nkees, peb yuav nrauj peb txoj kev lim hiam pov tseg, tig los nrhiav Huab Tais Yes Xus tag peb lub siab, muab peb lub neej cog rau hauv Huab Tais Yes Xus xib teg.

11.4.2012 Cwj Vuam Chiv

**NrhiavTswvNtuj** 20th April 2012, 9:15 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°25

COV ZAJ NYEEM HNUB 22/04/2012 ( Hnub chiv 3, lub caij Hla - Xyoo B )

Post NrhiavTswvNtuj 20th April 2012, 9:15 am

COV ZAJ NYEEM HNUB 22/04/2012

( Hnub chiv 3, lub caij Hla - Xyoo B )

Zaj nyeem Ib: Hauj Lwm 3, 13-15.17-19

13 Yog Has Nplas Has, His
Xas Has, thiab Yas Kos tus Tswv Ntuj,
thiab peb cov yawg koob tus Tswv Ntuj
muab koob meej rau nws tus tub txib Yes
Xus, uas nej muab nws ntes. Thaum Pis
Las Tos xav tso nws mus, mas nej tsis
kam lees nws. 14 Nej tsis lees tus siab
Ntshiab thiab siab Ncaj. Nej thov kom
luag zam rau ib tug tua neeg. 15 Hos nej
muab tus Tswv pub txoj sia tua. Tiam sis
Tswv Ntuj tsa nws sawv hauv cov tub
tuag rov los lawm. Peb ua tim khawv pom.

17 Kwv tij sawv daws, kuv paub hais tias
thaum nej ua li ntawd, nej yeej tsis paub
dab tsi. Nej cov nom los kuj tsis paub
thiab. 18 Li ntawd, Tswv Ntuj ua raws li
nws tau xuas cov Yaj Saub lub ncauj xub
hais ntxov los tias nws Leej Pleev yuav
raug luag tsim.

19 Ua li mas nyem no, nej yuav thov
txhaum thiab nej yuav tig los hloov ib lub
siab tshiab kom Ntuj so nej cov txhaum.

Zaj nyeem Ob: 1 Za 2, 1-5a

1 Kuv cov me nyuam, kuv sau tej
yam ntawd tuaj rau nej, kom nej tsis
txhob ua txhaum. Txawm tias yog muaj
ib tug tau ua txhaum lawm, los peb muaj
ib tug cev lus rau peb nyob ze Leej Txiv,
tus ntawd yog Yes Xus Pleev, tus siab ncaj.

2 Yes Xus tuag vim nws muab nws los
ua nqi txhiv peb ntawm peb cov txhaum.
Tsis yog txhiv peb xwb, nws txhiv tas lub
qab ntuj neeg ntawm lawv cov txhaum huv tib si.

3 Qhov ua kom peb pom tias peb paub
Leej Txiv, yog qhov no : yog peb coj
nws cov lus qhia. 4 Tus hais tias :
“Kuv paub Leej Txiv,” tab sis nws tsis
coj Leej Txiv cov lus qhia, mas nws yog
ib tug neeg dag, qhov tseeb tsis nyob hauv nws.

5 Hos tus coj Leej Txiv lo lus, mas txoj
kev nyiam Tswv Ntuj hlob tiav nyob hauv nws.

Lus Kas Ntawv Moo Zoo: 24, 35-48

35 Ces nkawd piav qhov uas tshwm tuaj
nyob tom kev, thiab piav tias Huab Tais
ua dab tsi, nkawd thiaj zeem tau nws
thaum nws ntais lub ncuav mov.

36 Thaum lawv tseem sib tham txog tej
lus ntawd, Yes Xus sawv ntsug hauv
nruab nrab lawv, nws hais rau lawv tias :
"Nej nyob kaj lug."

37 Cov thwj tim ceeb nkaus, lawv ntshai
kawg, lawv xav tias lawv pom ib tug dab.
38 Ces Yes Xus hais rau lawv tias :

"Vim li cas nej poob siab ? Vim li cas tej
zaj ua xyem xyav li ntawd sawv los nyob
hauv nej lub siab ? 39 Nej ntsia kuv ob
txhais tes thiab ob txhais taw : yog kuv
tiag ! Nej xuas kuv saib ! Nej ntsia mas :
dab tsis muaj nqaij tsis muaj pob txha,
xws li nej pom kuv muaj."

40 Yes Xus hais li ntawd tas, nws muab
nws ob txhais tes ob txhais taw rau lawv
saib. 41 Lawv zoo siab dhau, lawv tseem
tsis tau xav ntseeg. Lawv yoob tas. Yes
Xus hais rau lawv tias :
"Nyob ntawm no, nej muaj dab tsi noj ?"
42 Lawv muab ib ya ntses txhiab rau Yes
Xus. 43 Yes Xus tuav, nws noj yav ntses
ntawd nyob ntawm lawv xub ntiag.

44 Yes Xus hais rau lawv tias :
"Thaum kuv tseem nrog nej nyob, kuv
hais cov lus no rau nej : Tas ib puas tsav
yam uas Mais Xes Txoj Cai, cov Yaj
Saub, thiab cov Nkauj Paj Nruag sau txog
kuv, yuav tsum tshwm sim kom tiav."
45 Ces Yes Xus qhib lawv lub tswv yim
kom lawv to taub Ntawv.

46 Nws hais rau lawv tias :
"Ntawv sau hais tias Leej Pleev yuav raug
luag tsim txom. Hnub peb, nws yuav
sawv hauv cov tuag rov los. 47 Thiab
Ntawv tseem hais tias yuav tsum tshaj
txoj kev tig los hloov siab ntxub kev
txhaum kom Ntuj zam txhaum rau ib
tsoom haiv neeg nyob hauv Leej Pleev
lub Npe. Yuav xub tshaj nyob Yes Lus
Xas Les. 48 Nej yuav ua tim khawv txog tej ntawd.

NTHUAV NTAWV NTSHIAB

Rau hnub tim 22 lub 4 hlis 2012

Ib zeej tsoom ntseeg thiab phooj ywg,

Muaj lus zoo siab peb rov tuaj sib fim dua hauv lub caij nyoog Hmoov Hla Huab Tais Yes Xus sawv ciaj sia, yog ib lub txiaj ntsim txhawb peb ua neeg ntseeg thiab teev hawm Tswv Ntuj. Tim li cas Huab Tais Yes Xus kev sawv ciaj sia muaj txiaj ntsim rau peb txoj kev ntseeg Tswv Ntuj ?

Huab Tais Yes Xus kev sawv hauv tsoom tub tuag los ciaj sia nyob ib txhis qhib peb tsoom ntseeg teev Tswv Ntuj lub qhov muag los xam pom tib neeg ntiaj teb txhua txoj kev teev hawm, qhib peb neeg ntiaj teb lub siab txhawj xeeb, txom nyem, maub kev tsaus ntuj los mus rau txoj kev kaj lug nyob nyab xeeb thiab qhib peb lub tswv yim tsawg no kom loj tuaj, muaj ib lub tswv yim zoo thiab tshiab rau peb.
Peb sim rua qhov muag ntsia, tas txhua haiv neeg nyob thoob ntiaj teb puav leej muaj txhua yam kab ke teev hawm. Hauv peb Hmoob kev teev dab qhuas, peb teev dab niam dab txiv, dab caj dab ces. Tsis tas li ntawd, Hmoob kuj ntseeg tias muaj ntuj. Hmoob hais tias : ntuj tsim teb raug. Hmoob ntseeg tias lub ntuj tsim lub teb thiaj raug tau, txawm tau los nyob. Tiam sis, Hmoob tsuas paub teev dab niam dab txiv, teev dab caj dab ces raws poj yawm txwv txoob qhia. Hmoob tsis teev lub ntuj, vim poj yawm tsis qhia Hmoob teev lub ntuj.
Hauv txhua txoj kev cai teev hawm saum ntiaj teb no, tib neeg puav leej hwm ib tug huab tais ua tus loj, muaj hwj chim. Tib neeg muab tus ntawd saib hlob, hu nws ua saub thiab ua huab tais. Tib neeg mloog nws lus, teev nws, txi nws, hawm nws, tuaj khauv zig vam khom nws. Vim muaj ntau ntau tus huab tais thiaj muaj ntau txoj kab ke teev hawm saum daim npoo av. Nyias txoj kab ke qhia nyias teev hawm nyias tus huab tais. Vim li ntawd, peb pom muaj ntau ntau tus huab tais. Tiam sis, hauv txhua txoj kab ke tib neeg teev thiab hawm no, tsuas muaj tib txog thiaj yog txoj tseem kev cai teev hawm tseeb. Lwm txoj kev cai teev hawm, tsuas lam teev lwm tej huab tais tsis muaj hwj huam. Tsuas muaj tib txoj kev teev hawm thiaj yog txoj tseem thiab teev Huab Tais Tswv Ntuj tus muaj hwj huam. Vim Tswv Ntuj tib leeg xwb thiaj yog Huab Tais muaj hwj huam, txoj kab ke teev hawm Tswv Ntuj thiaj yog txoj tseem tiag.
Yog peb tig ntsia haiv neeg ib txwm teev hawm Tswv Ntuj, haiv His Xais Lais, peb kuj pom lawv ua ntau pab ntau pawg thiab : muaj cov Fas Lis Xais, cov Xas Dus Kais, cov Hes Los Dais…lawv kuj nyias ua nyias pab nyias pawg neeg teev Tswv Ntuj. Cov thwj tim, kuj yog neeg His Xais Lais, txij li lawv tig los mloog Yes Xus lus qhia, los ua Yes Xus thwj tim, lawv yog cov teev hawm Tswv Ntuj tiag. Peb mloog Pob Zeb qhuab qhia nws cov kwv tij neej tsa His Xais Lais, Pob Zeb hais li no rau lawv : “15 Nej muab tus chiv txoj sia tua, Tswv Ntuj tsa nws sawv tsees hauv qhov tuag los, peb yog nws cov tim khawv. 17 Kwv tij, kuv paub tias nej thiab nej cov thawj tau ua li ntawd vim nej tsis paub dab tsi.” Zim txwv no, peb twb pom muaj ntau pab ntau pawg neeg teev Yes Xus nyob thoob ntiaj teb. Hauv tas txhua pawg neeg teev hawm Yes Xus peb pom no, tsuas yog tsoom ntseeg Kav Tos Liv thiaj yog cov neeg teev hawm Yes Xus raws keeb kwm thiab hwm tus cag lub hauv paus kev ntseeg nto plaws ntsis. Lwm pab lwm pawg neeg teev Yes Xus tsis muaj qhia kev ntseeg raws kev raws cai chiv hauv paus kev teev hawm Yes Xus los mus nto ntsis. Tej txhia neeg lam sawv xib hwb qhuab qhia kev teev hawm Yes Xus raws li lawv zaj tswv yim lawv xav xwb, tsis txawj qhia raws lub hauv paus kev ntseeg. Lawv tej lus qhia kev ntseeg tsis raug thiab tsis dhos lub ntsiab kev teev hawm Tswv Ntuj (Le dogme). Lub Koom Txoos Kav Tos Liv thiaj li muab lawv ntiab tawm hauv Koom Txoos (Excommunication). Cov neeg raug ntiab tawm hauv Koom Txoos Kav Tos Liv yog cov neeg cav ncauj thiab cam thawj. Cov neeg no nyias mus rhawv nyias ib pab neeg teev Yes Xus, xaiv dua npe ua hom neeg teev Yes Xus tshiab. Niaj hnub no, muaj txog txhiab hom neeg teev Yes Xus. Tiam sis, lam teev Yes Xus tsis muaj paus tsis muaj ntsis, tsis muaj qab hau li. Lawv tsis muaj zwm rau vaj qhia thiab cov tswv qhia, cov tseem lub hauv paus tuav kev teev hawm Tswv Ntuj raws nraim Yes Xus cov thwj tim kev qhuab qhia. Hmoob twb hais tias : tsiaj tsis hwm tswv, tsiaj yuav tuag, tub ki tsis hwm niam hwm txiv tub ki yuav pluag. Hom neeg tsis mloog thiab tsis hwm vaj qhia no tsis yog pluag nyiaj txiag, tseem pluag yam loj tshaj nyiaj txiag, yam li pluag txiaj ntsim, vim kev cam thawj tsis tau koob hmoov. Hmoob twb niaj txhis piv txoj lus tias : Muaj qoob loo noj thawm niaj, luag thiaj qhuas tias neeg tsim txiaj ; muaj qoob loo noj thawm xyoo, luag thiaj qhuas tias yog neeg muaj hmoo. Koom Txoos Kav Tos Liv hwm vaj qhia ua leej txiv roos, muaj tswv qhia ua tswv saib, teev hawm Yes Xus raws caij raws nyoog. Tej caij nyoog teev hawm Yes Xus no pub txiaj ntsha, txhua yam kev coj qhia pub txiaj ntsim. Vim li ntawd, lub hnub nyoog Hmoov Hla no pub txiaj ntsim npaum li rau peb cov tuaj khaub zig Huab Tais Yes Xus : “4 Tus hais tau tias : kuv paub nws, tiam sis tsis khaws nws cov lus qhia, yog ib tug dag, qhov tseeb tsis nyob hauv tus ntawd. 5 Leej twg khaws nws cov lus, Tswv Ntuj kev hlub tsheej xeeb tiag hauv tus ntawd” Lub Koom Txoos Kav Tos Liv xav pab kom peb muab siab rau thiab raug hnyav rau txoj kev teev hawm Yes Xus raws caij raws nyoog, raws kev raws cai, tsis txhob lam teev Yes Xus nyuag dog dig. Peb tsis muaj cuab kav lam muab nyuag kua txiv hmab txiv ntoo los txi, saib tsis taus Huab Tais Yes Xus, ua tsis nyog Yes Xus lub cev thiab cov ntshav. Hauv lub Thaj Txi Ntuj, peb yuav saib Yes Xus lub cev thiab cov ntshav muaj txiaj ntsim, tso rau lub zoo sam xeeb. Tsis txhob lam ua Thaj Txi Ntuj dog dig li tej txhia neeg teev Yes Xus tsis muaj paus muaj ntsis, thiaj tau koob tau hmoov. Tsoom leej ntshiab yog Koom Txoos Kav Tos Liv cov me nyuam tau txais Huab Tais Yes Xus cov koob hmoov : “46 Yes Xus hais lawv tias : “Muaj tseeb raws li Ntawv sau tseg, Leej Pleev kev raug hiam, nws kev sawv tsees hnub peb hauv tsoom tub tuag ciaj sia los, 47 Thiab kev ua nws npe mloog lus, zam tau txim txhaum, mus tshaj qhia kom ntiaj teb neeg paub thoob pib ntawm Yes Lus Xas Les ua ntej tuaj mus. 48 Nej yog cov ua tim khawv txog tej ntawd.” Tsoom leej ntshiab yog Yes Xus kev tsa Koom Txoos Kav Tos Liv tub ki ciaj Tswv Ntuj tub ki muaj koob meej, tsa Koom Txoos kev teev hawm muaj nuj nqes thiab saib Koom Txoos kev qhuab qhia ua Yes Xus tus kheej kev qhuab qhia. Vaj qhia tej lus tshaj tawm rau ib tsoom ntseeg tam ntua Yes Xus lus tshaj tawm rau ib tsoom ntseeg. Vim li ntawd, tsoom leej ntshiab hauv Koom Txoos Kav Tos Liv yog cov cim Huab Tais Yes Xus ua tshwm tuaj tias Huab Tais Yes Xus tus kheej yog tus tsav thiab coj Koom Txoos Kav Tos Liv kev nyob ntiaj teb no. Peb kev sib zam txhaum raws li Koom Txoos Kav Tos Liv qhia, yog mloog Yes Xus lus qhia sib zam txhaum.

Ib tsoom phooj ywg, yog peb tsis mloog peb lub Koom Txoos tej lus qhia, yog peb tsa ncauj thuam txiv vaj qhia tej lus, tsis mloog cov tswv qhia thiab cov txiv plig tej lus qhub, tsis yog peb tsis hwm txiv vaj qhia, tsis hwm cov tswv qhia thiab cov txiv plig xwb, yog Huab Tais Yes Xus tus kheej peb thuam thiab tsis hwm. Peb twb tsis muab siab rau teev hawm Yes Xus, tsis kub siab ua Thaj Txi Ntuj, tsis kub siab daws txhaum, tsis paub kev cai teev hawm, lam teev Yes Xus dog dig phis phais lais, xav mus thaum twg li mus, tsis xav mus ces ib xyoos twb tsis tshwm ib taws hauv tsev teev ntuj. Yus tus kheej twb tsis paub txhawj kub siab tu yus txoj kev ntseeg kom txhob muaj mob, tsam lam ploj, lam yaj thiab tuag mus. Peb yuav tau thov lub txiaj ntsim Hmoov Hla ua tshuaj kho peb txoj kev ntseeg kom txhob muaj mob thiab daws peb tej txhaum, peb thiaj yuav nrog Huab Tais Yes Xus ciaj Tswv Ntuj sia nyob ib txhis.

18.4.2012 Cwj Vuam Chiv