HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM NRUAB LIS PIAM XYOO II,  2015-2016 - Page 10 Empty

Latest topics

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Maiv Tooj Yesterday at 11:22 pm

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

Suav neeg tuaj saib, txij hnub 17/09/2010 los mus.


2 posters

    COV ZAJ NYEEM NRUAB LIS PIAM XYOO II, 2015-2016

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 7th August 2016, 4:32 pm

    TIM     8    LUB    8    HLI     2016

    Hnub Ob Lis Piam Kaum Cuaj Nruab Xyoo C Nruab Lis Piam Xyoo II

    Hwm LN Dominic, ua Leej Choj

    Zaj Nyeem Ib:     ES XES KIAS  1:   2-5, 24-28C


    2 Hnub xiab tsib hauv lub plaub hlis ntawm xyoo tsib uas tus vaj Yuas Kees mus nyob txim rau pej kum teb,  3 HUAB TAIS hais lus rau tus Leej Choj Es Xes Kias uas yog Npus Xis tub, nyob hauv cov Kas Des lub teb chaws, nyob ze tus dej Kes Npas. Nyob ntawd, HUAB TAIS txhais tes los nyob saum kuv. 4 Kuv ntsia ntsoov: muaj ib nthwv cua hlob tshuab sab pej fab tuaj, pom ib twv huab loj loj uas muaj ib qho pom kev ci hob ncig, hauv twv huab muaj ib lub cub tawg txawj cig plaws tuag ntais cig plaws tuag ntais, lub plawv cub tawg muaj ib qho ci ntsa daj rhuv. 5 Nyob hauv plawv, kuv pom ib yam yog zoo li plaub tug ciaj sia. Cov ciaj sia ntawd zoo li no:  lawv muaj ib lub cev xws li tib neeg.
    24 Ces kuv hnov lawv cov tis nrov, hnov nroo ntws cuag dej hlob nphau, cuag li yog Tus Muaj Hwj Huam Loj lub suab nroo. Thaum lawv mus kev, hnov  nrov deeg daws cuag li yog ib pab tub rog taug kev. Thaum lawv nres, lawv nkaum lawv cov tis. 25 Kuj hnov ib lub suab nrov saum txheej saum lub qaum ru tsev tuaj thiab.  26 Nyob saum lub ru tsev ncaj saum lawv taub hau muaj ib yam zoo li ib lub pob zeb pov haum xiav uas yog ib lub theej kiab, nyob saum lub theej kiab, saum qhov siab saud,  muaj ib tug zoo li tib neeg. 27 Txij ntawm qhov zoo li yog nws lub duav rov saud kuv pom ib qho ci cuag li nyiaj thiab kub, zoo li yog ib qho hluav taws nyob ib ncig tas nrho;  txij ntawm qhov zoo li yog nws lub duav rov hauv, kuv pom ib yam zoo li hluav taws, thiab muaj ib qho ci ntsa iab pom kev nyob ib ncig tas nrho. 28 Qhov pom kev ci ntsa iab ntawd  zoo xws li zaj sawv saum ntuj thaum los nag tas. Qhov kuv pom uas yog HUAB TAIS lub hwj chim yog zoo li no.

    NPN      148:   1-2, 11-12, 13, 14

    Txais:    Lub ntuj thiab lub ntiaj teb puv nkaus koj lub hwj chim.
    los:    As les lus yas.

    Nej nyob saum ntuj cav txog Huab Tais,
    nej nyob saum tej chaw siab cav txog nws.
    Nws cov tshiab, nej cav txog nws,
    nws cov peeb zeej, nej cav txog nws.

    Txais:    Lub ntuj thiab lub ntiaj teb puv nkaus koj lub hwj chim.
    los:    As les lus yas.

    Kom tas cov vaj ntxwv nyob ntiaj teb thiab tas txhua haiv neeg,
    tas cov tub nom tub tsw thiab cov nom txiav txim nyob ntiaj teb,
    cov tub nraug hluas thiab ntxhais nkauj xwb,
    cov laus thiab cov me nyuam yaus,

    Txais:    Lub ntuj thiab lub ntiaj teb puv nkaus koj lub hwj chim.
    los:    As les lus yas.

    Kom lawv cia li cav txog Huab Tais lub npe ,
    vim nws tib lub npe thiaj loj siab dua cov;
    nws lub hwj xyeej nyob siab tshaj lub ntiaj teb thiab lub ntuj.

    Txais:    Lub ntuj thiab lub ntiaj teb puv nkaus koj lub hwj chim.
    los: As les lus yas.

    Nws tsa nws haiv neeg lub peev xwm kom siab :
    Vim li no kom cov ntseeg nws, uas yog cov tub ki His Xas Lais
    uas yog haiv neeg nyob ze nws, sawv daws yuav tsum cav txog nws.

    Txais:     Lub ntuj thiab lub ntiaj teb puv nkaus koj lub hwj chim.
    los:    As les lus yas.

    As Les Lus Yas:      2 TXLN  2:   14

    Txais:    As les lus yas, as les lus yas.      

    Tswv Ntuj hu nej nyob hauv lub Moo Zoo,
    kom nej tau txais peb tus Huab Tais Yes Xus Pleev lub koob meej.

    Txais:    As les lus yas, as les lus yas.

    Ntawv Moo Zoo:     MT  17:   22-27

    22 Muaj ib zaug Yes Xus thiab nws cov thwj tim lawv mus rau Nkas Lis Lais, nws hais rau lawv tias : "Neeg Leej Tub yuav raug muab muag rau hauv tib neeg txhais tes. 23 Lawv yuav muab nws tua, hnub peb nws yuav sawv rov los." Tas cov thwj tim sawv daws ntxhov siab.  
    24 Thaum Yes Xus lawv rov qab los rau Kas Fas Naus, cov sau se rau lub Tuam Tsev Teev Ntuj tuaj cuag Pob Zeb, lawv hais rau nws tias : "Nej tus xib hwb puas them se pab lub Tuam Tsev Teev Ntuj ?" 25 Pob Zeb teb tias : "Nws them." Thaum Pob Zeb los txog hauv tsev, mas Yes Xus xub ua ntej nug Pob Zeb tias : "Xis Moos, koj xav li cas ? Cov vaj kav ntiaj teb sau se ntawm leej twg ? Ntawm lawv cov tub los ntawm luag tej qhua ?" 26 Pob Zeb teb tias : "Lawv sau se ntawm luag tej qhua." Yes Xus hais rau Pob Zeb tias : "Yog li, mas cov tub tsis them se. 27 Tab sis, wb yuav tsis txhob ua kom luag to taub yuam kev. Ua li mas, koj mus nram dej ntuj, koj pov nuv mus rub thawj tug ntses tawm tuaj. Koj nthos nkaus nws. Koj rua nws lub qhov ncauj : Koj yuav pom ib lub txiaj nyiag uas raug ob tug nqe se, koj muab lub txiaj ntawd rau lawv kom tau them se rau kuv thiab rau koj."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 8th August 2016, 8:08 am

    TIM     9    LUB    8    HLI     2016

    Hnub Peb Lis Piam Kaum Cuaj Nruab Xyoo C Nruab Lis Piam Xyoo II

    Hwm LN Theresa Benedicta of the Cross (Edith Stein)

    Zaj Nyeem Ib:     ES XES KIAS  2:   8—3:4


    Huab Tais TSWV NTUJ hais rau kuv tias:
    8 “Neeg leej tub, koj mloog kuv hais, koj tsis txhob tawv ncauj li cov neeg ntxeev siab hauv lub tsev no,  koj rua ncauj noj qhov kuv yuav muab rau koj noj.”  9 Ces kuv ntsia pom ib txhais tes cev los rau kuv, muaj ib kauj ntawv nyob hauv txhais tes ntawd. 10 Nws muab phau ntawv nthuav rau kuv saib, phau ntawv ntawd sau sab saud thiab sab nraud huv si. Cov lus sau rau hauv yog : "Suab quaj, suab nyiav, suab ntsaj."
    3    1 Nws hais rau kuv tias : "Neeg leej tub, koj noj qhov kuv cev rau koj no, koj noj kauj ntawv no thiab koj mus hais lus rau cov His Xas Lais." 2 Kuv rua qhov ncauj ces nws muab kauj ntawv rau kuv noj. 3 Nws hais rau kuv tias : "Neeg leej tub, koj noj kauj ntawv no, noj kom tsau koj plab." Ces kuv noj kauj ntawv, nws qab cuag zib ntab nyob hauv kuv qhov ncauj. 4 Nws hais rau kuv tias : "Neeg leej tub, koj mus cuag His Xas Lais tsev neeg. Koj mus hais kuv cov lus rau lawv."

    NPN      119:   14, 24, 72, 103, 111, 131

    Txais:    (103a) Cov lus koj tau cog tseg qab zib ua luaj rau kuv qhov ncauj!

    Kuv zoo siab taug txoj kev ua raws li koj lo lus,
    Zoo siab tshaj ua neeg nplua nuj muaj txhij txhua.

    Txais:    (103a) Cov lus koj tau cog tseg qab zib ua luaj rau kuv qhov ncauj!

    Koj cov lus qhia ua rau kuv zoo siab,
    Koj cov lus pab tswv yim rau kuv.

    Txais:    (103a) Cov lus koj tau cog tseg qab zib ua luaj rau kuv qhov ncauj!

    Txoj Cai uas tawm hauv koj lub ncauj los,
    muaj nqe rau kuv dua ib txhab nyiaj ib txhab kub.

    Txais:    (103a) Cov lus koj tau cog tseg qab zib ua luaj rau kuv qhov ncauj!

    Cov lus koj tau cog tseg qab zib ua luaj rau kuv tus nplaig,
    qab dua zib ntab zib mu nyob hauv kuv qhov ncauj !

    Txais:    (103a) Cov lus koj tau cog tseg qab zib ua luaj rau kuv qhov ncauj!

    Koj cov lus qhia yog kuv lub cuab tam mus li,
    yog kuv txoj kev sov siab.

    Txais:    (103a) Cov lus koj tau cog tseg qab zib ua luaj rau kuv qhov ncauj!

    Kuv huas pa laws rua ncauj txog siav,
    Vim kuv tshaib nqhis koj cov lus qhia.

    Txais:    (103a) Cov lus koj tau cog tseg qab zib ua luaj rau kuv qhov ncauj!

    As Les Lus Yas:     MT  11:  29AB

    Txais:    As les lus yas, as les lus yas.

    Nej txais kuv tus quab kwv, nej kawm ntawm kuv mog,
    vim kuv ua neeg me, kuv siab tsis muab hlob

    Txais:    As les lus yas, as les lus yas.

    Ntawv Moo Zoo:     MT  18:   1-5, 10, 12-14

    1 Lub caij ntawd cov thwj tim los cuag Yes Xus, lawv hais rau nws tias : “Leej twg yog tus loj dua nyob hauv Ntuj lub Ceeb Tsheej ?” 2 Yes Xus hu ib tug me nyuam los ntawm nws, nws coj tus me nyuam los nyob hauv nruab nrab lawv, 3 nws hais tias : “Kuv hais tseeb rau nej, yog nej tsis hloov rov los ua xws li ib co me nyuam, mas nej yuav mus tsis tau hauv Ntuj lub Ceeb Tsheej. 4 Leej twg rov saib nws me xws li tus me nyuam no, tus ntawd yog tus loj dua nyob hauv Ntuj lub Ceeb Tsheej. 5 Leej twg txais ib tug me nyuam zoo li tus no, vim kuv lub npe, mas yog nws txais kuv.”
    10 Nej ceev faj, tsis txhob thuam ib tug me nyuam yaus li : kuv hais rau nej li ntawd, vim nyob saum ntuj, cov Tshiab zov lawv ntsia ntsoov kuv Txiv nyob saum ntuj lub ntsej muag mus li.”
    12 “Raws li nej xav, yog ib tug neeg muaj ib puas tus yaj, ib tug mus poob zoo lawm. Nws puas yuav tsis tso cuaj caum cuaj tug ntawd cia saum roob, mus nrhiav tus uas poob zoo lawd ? 13 Kuv hais tseeb rau nej, thaum nws nrhiav tau tus yaj poob zoo, mas nws zoo siab rau tus ntawd tshaj rau cuaj caum cuaj tug uas tsis tau poob zoo. 14 Nej Txiv nyob saum ntuj, kuj zoo ib yam li ntawd thiab : nws tsis xav kom ib tug me nyuam yaus no ploj li.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 10th August 2016, 4:06 pm

    TIM 10 LUB 8 HLI 2016

    Hnub Plaub Lis Piam Kaum Cuaj Nruab Xyoo C Nruab Lis Piam Xyoo II

    Hwm LN Lawrence, leej Tsob Hwb, tuag ua Tim Khawv

    Zaj Nyeem Ib: 2 KOS LIS NTHOS 9: 6-10


    Cov kwv tij nkauj muam aw:
    6 Nej yuav nco ntsoov tias, tus tseb nplej tsawg, nws kuj yuav sau tau tsawg, tus tseb nplej ntau nws yuav sau tau ntau.
    7 Nej nyias yuav pub raws li nyias tau txiav nyob hauv siab lawm. Nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab hlo pub. 8 Tswv Ntuj muaj hwj huam, nws yuav pub tas ib puas tsav yam txiaj ntsim rau nej, kom nej muaj txhua yam tas mus li thiab txhua sij hawj, thiab tseem yuav seem ib co txaus nej ua cov hauj lwm zoo pab luag. 9 Raws li Ntawv sau tseg tias : ‘Nws tau ua siab dav, nws pub rau cov pluag ; nws txoj kev ua neeg ncaj yuav nyob mus li. 10 Tus uas muab noob nplej rau tus tswv teb tau cog, thiab muab mov los yug nws, nws haj yam yuav muab noob qoob noob loo ntau rau nej, nws yuav ua kom nej txoj kev ncaj loj tuaj thiab txi txiv ntau.

    NPN 112: 1-2, 5-6, 7-8, 9

    Txais: (5) Tus neeg txawj hlub luag, thiab qiv rau luag, nws txoj hmoov zoo.

    Tus hwm HUAB TAIS, nws txoj hmoov zoo :
    Nws nyiam Huab Tais cov lus qhia tas siab nrho,
    Nws caj ce yuav muaj zog nyob ntiaj teb,
    ntuj yuav foom hmoov zoo rau tiam neeg siab ncaj.

    Txais: (5) Tus neeg txawj hlub luag, thiab qiv rau luag, nws txoj hmoov zoo.

    Tus neeg txawj hlub luagthiab qiv rau luag, nws txoj hmoov zoo.
    Nws ua nws tej hauj lwm raws kev ncaj.
    Nws yuav tsis qaug ib zaug, yuav nyob rua mus lij;
    sawv daws yuav nco ntsoov mus li txog tus neeg ncaj.

    Txais: (5) Tus neeg txawj hlub luag, thiab qiv rau luag, nws txoj hmoov zoo.

    Nws yuav tsis ntshai cov lus cuav hais phem txog nws ;
    nws lub siab nyob ruaj nreb, nws tso siab lug rau HUAB TAIS.
    Nws ua siab tawv qhawv, nws yuav tsis txhawj,
    nws yuav tsa hauv pliaj siab ntsia rau saum nws cov yeeb ncuab.

    Txais: (5) Tus neeg txawj hlub luag, thiab qiv rau luag, nws txoj hmoov zoo.

    Nws pub ntau rau cov pluag :
    nws txoj kev ua siab dav yuav nyob mus li,
    nws yuav tau ntsej muag, yuav nto koob meej lug,

    Txais: (5) Tus neeg txawj hlub luag, thiab qiv rau luag, nws txoj hmoov zoo.

    As Les Lus Yas: ZAM 8: 12BC

    Txais: As les lus yas, as les lus yas.

    Huab Tais hais tias:
    Leej twg lawv kuv qab, nws yuav tsis mus kev hauv qhov tsaus ntuj.
    Nws yuav tau qhov pom kev uas coj mus rau txoj sia."

    Txais: As les lus yas, as les lus yas.

    Ntawv Moo Zoo: ZAM 12: 24-26

    Yes Xus hais rau nws cov thwj tim tias:
    24 Kuv hais qhov muaj tseeb tiag rau nej : Yog ib lub noob nplej tsis poob rau hauv av thiab tsis tuag, mas nws nyob nws xwb. Hos yog nws tuag, mas nws txi txiv ntau. 25 Tus twg nyiam nws txoj sia, mas nws plam nws txoj sia. Hos tus twg tsis khuv xim nws txoj sia nyob hauv lub ntiaj teb no, mas nws yuav ceev tau nws txoj sia kom ciaj nyob mus li. 26 Tus twg tsob hwb kuv, mas nws yuav tsum los raws kuv. Kuv nyob qhov twg, kuv tus tub txib kuj yuav nyob qhov ntawd thiab. Tus twg tsob hwb kuv, mas Leej Txiv kuj yuav hwm nws.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 10th August 2016, 6:02 pm

    TIM 11 LUB 8 HLI 2016

    Hnub Tsib Lis Piam Kaum Cuaj Nruab Xyoo C Nruab Lis Piam Xyoo II

    Hwm LN Clare, Nkauj Dawb Huv

    Zaj Nyeem Ib: EXK 12: 1-12


    1 HUAB TAIS lo lus nrov tuaj rau kuv li no: 2 "Neeg leej tub, koj nyob hauv nruab nrab ib tsav neeg ntxeev siab, uas lawv muaj qhov muag pom, tab sis lawv tsis pom li, lawv muaj pob ntseg hnov, tab sis lawv tsis hnov li, vim lawv yog ib tsav neeg ntxeev siab. 3 Neeg leej tub, koj ris ib nras khoom zoo li ib tug neeg mus nyob txim lawm pej kum teb, ces koj sawv kev mus rau lawv pom. Koj tsiv ntawm qhov chaw koj nyob mus rau lwm qhov chaw, rau lawv qhov muag pom. Ces tej zaum lawv yuav lees tias lawv yog ib tsav neeg ntxeev siab. 4 Nruab hnub, koj yuav nog nra xws li ib tug neeg yuav mus nyob txim rau lawv pom, thaum tsaus ntuj, koj yuav tawm mus xws li ib tug neeg mus nyob txim rau lawv pom. 5 Koj tho ib lub qhov nyob ntawm phab ntsa rau lawv pom, yog lub qhov koj yuav tawm mus. 6 Koj kwv koj lub nra saum xub pwg rau lawv ntsia thiab koj maub tawm mus. Koj yuav npog ntsej muag kom tsis txhob pom lub teb chaws, vim kuv muab koj los ua ib lub cim qhia tsoom His Xas Lais." 7 Ces kuv ua raws li cov lus ceeb toom ntawd. Nruab hnub kuv nog nra xws li ib tug neeg yuav mus nyob txim pej kum teb. Thaum tsaus Ntuj, kuv xuas tes tho ib lub qhov nyob ntawm phab ntsa. Thaum tsaus ntuj nti lawm kuv maub tawm mus, kuv kwv kuv pob khoom saum xub pwg rau lawv pom.
    8 Ces thaum sawv ntxov, HUAB TAIS hais rau kuv zoo li no : 9 "Neeg leej tub, His Xas Lais tsev neeg, tsav neeg ntxeev siab ntawd puas tau hais rau koj tias : Koj ua dab tsi li ntawd ? 10 Koj hais rau lawv tias : HUAB TAIS Tswv Ntuj hais li no : cov lus ceeb toom no yog hais rau Yes Lus Xas Les thiab rau tas His Xas Lais tsev neeg. 11 Koj hais tias : Kuv yog ib lub cim qhia nej paub. Kuv tau ua li cas mas lawv yuav raug li cas. Lawv yuav tau mus nyob txim lawm pej kum teb. 12 Tus ua vaj nyob hauv lawv yuav kwv nws pob khoom saum xub pwg, nws yuav maub tsaus ntuj nti tawm ntawm lub qhov tho ntawm phab ntsa, nws yuav npog ntsej muag kom tsis txhob pom lub teb chaws."

    NPN 78: 56-57, 58-59, 61-62

    Txais: (7b) Nej yuav nco ntsoov Huab Tais cov hauj lwm cia.

    Lawv ntxeev siab, lawv sim tus Tswv Ntuj Nyob Siab,
    lawv tsis hwm Tswv Ntuj cov cai lij choj.
    Lawv ncaim, lawv ntxeev siab xws li lawv phaj txiv,
    lawv lem cees xws rab hneev nkhaus.

    Txais: (7b) Nej yuav nco ntsoov Huab Tais cov hauj lwm cia.

    Lawv ua tub qaug nws vim lawv tej chaw siab,
    Lawv ua khib nws vim lawv cov mlom.
    Tswv Ntuj hnov lawv, nws npau taws ceev,
    nws muab His Xas Lais xyeeb hlo pov tseg.

    Txais: (7b) Nej yuav nco ntsoov Huab Tais cov hauj lwm cia.

    Nws cia His Xas Lais lub zog swb rau luag,
    tso His Xas Lais lub hwj chim rau yeeb ncuab txhais tes.
    Nws tso nws haiv neeg rau hniav ntaj hlais,
    nws npau taws rau nws lub cuab tam.

    Txais: (7b) Nej yuav nco ntsoov Huab Tais cov hauj lwm cia.

    As Les Lus Yas: NPN 119: 135

    Txais: As les lus yas, as les lus yas.

    Thov cia koj lub ntsej muag ci tuaj rau koj tus tub txib :
    koj qhia koj cov lij choj rau kuv kawm.

    Txais: As les lus yas, as les lus yas.

    Ntawv Moo Zoo: MT 18: 21–19:1

    21 Pob Zeb txav los hais rau Yes Xus tias : “Huab Tais, yog kuv tus kwv ua txhaum rau kuv, kuv yuav zam pes tsawg zaus rau nws ? Kuv puas yuav zam txog xya zaus ?” 22 Yes Xus hais rau Pob Zeb tias : “Kuv tsis hais rau koj tias 'xya zaus'. Kuv hais rau koj tias, 'xya caum xya zaus'.”
    23 “Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. 24 Thaum lawv pib txheeb, ces luag coj ib tug tub txib uas tshuav nuj nqis ib vam nras nyiaj, tuaj rau tus vaj. 25 Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. 26 Tus tub txib txhos caug ntua ntawm tus tswv ko taw, nws pe tus tswv, nws hais tias : “Thov koj ua siab ntev rau kuv, kuv yuav them kom tas rau koj.” 27 Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. 28 Thaum tus tub txib tawm rov qab mus, nws ntsib nws ib tug npawg, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab, zawm tus npawg caj pas, thiab hais tias : “Them koj cov nqi.” 29 Nws tus npawg txhos caug ntua ntawm nws ko taw thov tias : “Thov koj ua siab ntev rau kuv, kuv yuav them rau koj.” 30 Tab sis tus tub txib ntawd tsis kam li, nws kom luag muab nws tus npawg kaw hauv tsev loj faj mus txog hnub tus npawg them nuj nqis tas huv tib si rau nws.
    31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv. 32 Ces tus vaj hu tus tub txib tuaj, nws hais rau tus tub txib ntawd tias : “Tub txib siab phem dab tsi ! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. 33 Ua cas koj tsis hlub koj tus npawg zoo li kuv tau hlub koj ?" 34 Ces tus vaj npau taws heev, nws muab tus tub txib rau cov tub hiam neeg mus txog hnub nws them nws cov nuj nqis tas huv tib si. 35 Nej txhua tus, yog nej tsis zam hauv nruab siab rau nej ib tug kwv tij, mas kuv Txiv nyob saum Ntuj kuj yuav ua ib yam li ntawd rau nej thiab.
    9 1 Thaum Yes Xus hais cov lus ntawd tas, nws tso Nkas Lis Lais teb tseg, nws mus rau Yus Das teb sab dej Yos Las Das tim ub.



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 11th August 2016, 7:24 am

    TIM 12 LUB 8 HLI 2016

    Hnub Rau Lis Piam Kaum Cuaj Nruab Xyoo C Nruab Lis Piam Xyoo II

    Hwm LN Jane Frances de Chantal/ste Jeanne Francis de Chantal

    Zaj Nyeem Ib: EXK 16: 1-15, 60, 63


    1 HUAB TAIS lo lus nrov tuaj rau kuv li no : 2 "Neeg leej tub, koj hais rau Yes Lus Xas Les kom nws paub txog nws tej txhaum loj kawg nkaus. 3 HUAB TAIS Tswv Ntuj hais li no rau Yes Lus Xas Les: Koj lub keeb yug los thiab koj lub teb chaws yog lub teb chaws Kas Nas Has. Koj txiv yog ib tug neeg As Mos, koj niam yog ib tug neeg His Tis. 4 Hnub koj yug los, tsis muaj neeg txiav koj hlab ntaws, tsis muaj tus muab dej ntxuav koj los muab roj pleev koj li, tsis muaj tus muab ntsev txhuam koj, tsis muaj tus muab ntaub qhwv koj li. 5 Tsis muaj ib tug neeg tig ntsej muag ntsia koj thiab hlub koj tu koj li. Hnub koj yug los, lawv muab koj pov tseg rau nraum zoov vim koj yogi b yam qias lawv.
    6 Kuv hla ze ntawd, kuv pom koj nti luj luam lo ntshav li. Ces kuv hais rau koj tias : 'Koj ciaj mus nyob hauv koj cov ntshav mog !' 7 Thiab koj kav tsij hlob mos nyoos tuaj xws li nroj nyob nruab liaj nruab teb.’ Ces koj hlob tuaj siab tuaj, koj hlob mus tiav nkauj, koj ob lub mis pib o, koj plaub hau ntau tuaj. Tab sis koj nyob liab qab ploog xwb. 8 Kuv rov hla tuaj ze ntawm koj, kuv saib koj; yog koj lub caij txawj muab kev hlub lawm. Kuv nthuav kuv lub tsho tshaj sab los npog koj qhov liab qab. Kuv cog lus rau koj, kuv nrog koj sib cog lus ces koj ua kuv tug lawm. Yog HUAB TAIS Tswv Ntuj lo lus. 9 Kuv muab koj da dej, kuv ntxuav cov ntshav lo koj, kuv muab roj los pleev koj. 10 Kuv muab ris tsho paj ntaub rau koj hnav, muab khau tawv zoo nkauj rau koj rau, muab siv ntaub maj los pav koj thiab muab tsho tsuj tsho npuag rau koj npua. 11 Kuv muab npauj nyiag npauj kub rau koj coj, muab kauj npab kub rau koj coj ntawm tes, muab saw rau koj coj ntawm caj dab. 12 Kuv ntxig ib lub kauj rau ntawm koj qhov ntswg, ib co npauj rau koj pob ntseg, kuv txawb ib lub mom teev kub ci ntsais plias rau saum koj taub hau. 13 Koj ua zam tsuj zam npuag coj nyiaj coj kub xwb, koj tej tsoos tsho yog ntaub tsuj ntaub npuag zoo nkauj thiab yog paj ntaub xwb. Koj muaj hmoov nplej mos mos noj, muaj zib ntab zib mu haus thiab muaj roj siv. Koj loj zoo nkauj rhib, phim sawv ciaj ib tug poj vaj. 14 Koj lub koob meej ncha mus txog cov haiv neeg, sawv daws cav txog koj qhov zoo nkauj, uas yeej zoo tiag tiag, vim kuv muab kuv lub hwj chim rau koj hnav. Yog HUAB TAIS Tswv Ntuj lo lus.
    15 Tab sis koj khav koj lub meej mom zoo nkauj, koj coj koj lub koob meej mus taug txoj kev lwj liam, koj muab koj lub cev muag rau txhua leej txhua tus neeg taug kev. 60 Txawm li ntawd los kuv yuav nco ntsoov lo lus kuv tau nrog koj cog thaum koj tseem hluas, kuv yuav nrog koj cog ib lo lus ruaj nyob mus li. 63 Ces thaum kuv zam koj cov txhaum tas nrho rau koj , koj yuav rov nco txog thiab yuav xav tsis thoob, koj yuav ua twj ywm nyob ntsiag to vim koj txaj muag dhau ." Yog HUAB TAIS Tswv Ntuj lo lus.

    Los: EXK 16: 59-63

    59 HUAB TAIS hais li no: Kuv yuav ua rau koj raws li koj tau ua; koj tau ntxub lo lus koj tau cog thiab rhuav koj lo lus. 60 Txawm li ntawd los kuv yuav nco ntsoov kuv lo lus kuv tau nrog koj cog thaum koj tseem me nyuam ntxhais, thiab kuv yuav nrog koj cog ib lo lus uas yuav nyob mus li. 61 Ces koj yuav rov nco txog koj txoj kev ua phem thiab yuav txaj muag
    thaum kuv muab koj ob tug viv ncaus, tus hlob koj thiab tus yau koj, los rau koj ua koj ob tug ntxhais, txawm tias tsis muaj nyob hauv kuv lo lus kuv tau nrog koj cog. 62 Kuv yuav rov qab nrog koj cog lus dua, kom koj paub tias kuv yog HUAB TAIS, kom koj rov nco txog thiab xav tsis thoob, thiab kom koj nyob ntsiag to vim koj txaj muag dhau thaum kuv zam koj cov txhaum tas nrho rau koj. Yog Huab Tais TSWV NTUJ lo lus.

    NPN His Xais 12: 2-3, 4bcd, 5-6

    Txais: (1c) Koj tau thim koj txoj kev npau taws.

    Tswv Ntuj yog tus cawm kuv tiag,
    Kuv tso siab rau nws, kuv tsis txhawj.
    Kuv lub zog thiab kuv lub peev xwm yog HUAB TAIS,
    Nws yog tus tau cawm kuv.
    Nej yuav zoo siab luag ntxhi mus
    ce dej hauv cov qhov dej cawm neeg.

    Txais: (1c) Koj tau thim koj txoj kev npau taws..

    Nej ua HUAB TAIS tsaug, nej cav txog nws lub npe !
    Nej tshaj nws tej hauj lwm loj rau cov haiv neeg paub,
    nej hais rau lawv paub tias nws lub npe zoo tas nrho.

    Txais: (1c) Koj tau thim koj txoj kev npau taws.

    Nej ntaus paj nruag cav txog HUAB TAIS cov hauj lwm loj,
    kom nws lub hwj chim loj nrov ncha ntws puv ntiaj teb.
    Nroog Xis Yoos, kojj nqua suab zoo siab,
    vim His Xas Lais tus Ntshiab yog tus loj nyob hauv koj.

    Txais: (1c) Koj tau thim koj txoj kev npau taws.

    As Les Lus Yas: 1 TXLN 2: 13

    Txais: As les lus yas, as les lus yas.

    Nej yuav txais Tswv Ntuj Lo Lus, txhob txais xws li yog neeg lo lus ;
    Tiam sis nej txais raws li yeej yog Tswv Ntuj Lo Lus tiag tiag.

    Txais: As les lus yas, as les lus yas.

    Ntawv Moo Zoo: MT 19: 3-12

    3 Ib co Fas Lis Xais txav los ntawm Yes Xus, lawv xav sim nws, lawv hais rau nws tias : “ ib tug txiv neej puas muaj cai nrauj nws poj niam vim qhov ub qhov no ? ” 4 Yes Xus teb tias : “Nej tsis tau nyeem lod tias thaum chiv lub keeb, tus Tswv Tsim, nws tsim kom muaj txiv neej thiab poj niam, 5 thiab nws hais tias : Vim qhov ntawd, mas txiv neej yuav tso nws niam nws txiv tseg mus koom nrog nws poj niam, ob tug ntawd yuav ua ib lub cev nqaij xwb ? 6 Yog li nkawd tsis yog ob leeg lawm, nkawd yog ib lub cev nqaij lawm xwb. Qhov uas Tswv Ntuj sau los ua ke, mas neeg tsis txhob muab sib cais.” 7 Lawv teb rau Yes Xus tias : “Vim li cas Mais Xes ho hais kom ua ntawv nrauj rau yus poj niam ces muab nws tso mus?" 8 Yes Xus hais rau lawv tias : “Yog vim nej lub siab twm xeeb, ces Mais Xes thiaj kheev kom nej nrauj poj niam. Tab sis thaum chiv lub keeb, mas tsis yog li ntawd. 9 Kuv hais rau nej : tus twg nrauj nws poj niam, nws ho rov yuav dua ib tug, nws ua qhov txhaum uas ib tug muaj txij nkawm mus deev hluas. Qhov no tsis hais txog tus poj niam uas mus nrog lwm tus txiv neej ua dev ua npua.” 10 Cov thwj tim hais rau Yes Xus tias: “Yog txiv neej ua zoo li ntawd rau nws poj niam, nws twb ua txhaum mas txhob yuav poj niam zoo dua." 11 Yes Xus hais rau lawv tias : “Tsis yog sawv daws yuav to taub cov lus no, tsuas yog cov uas Ntuj pub rau, mas lawv thiaj to taub. 12 Muaj ib co neeg nyob tab seeb, vim lawv yug los ua tsis taus txiv neej. Muaj ib co nyob tab seeb, vim neeg muab lawv sam. Hos muaj ib co neeg txhob txwm nyob tab seeb vim Ntuj lub Ceeb Tsheej. Leej twg txawj to taub qhov no, mas cia nws to taub.



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 12th August 2016, 4:15 pm

    TIM 13 LUB 8 HLI 2016

    Hnub Xya Lis Piam Kaum Cuaj Nruab Xyoo C Nruab Lis Pia, Xyoo II

    Hwm Niam Mab Liab; hwm LN Pontian thiab LN Hippolytus;

    Zaj Nyeem Ib: ES XES KIAS 18: 1-10, 13B, 30-32


    1 HUAB TAIS lo lus nrov tuaj rau kuv li no: 2 Neeg leej tub, nej niaj hnub hais zaj paj lug no nyob His Xas Lais teb, nws lub ntsiab yog dab tsi? "Vim phaj txiv noj cov txiv cawv ntsuab, ces phaj tub thiaj rhiab hniav tas." 3 HUAB TAIS Tswv Ntuj hais tias: Kuv yog tus muaj sia nyob, kuv cog lus tias txij no mus lawm yav tod, nej yuav tsis txhob hais zaj paj lug ntawd ntxiv nyob His Xas Lais teb lawm. 4 Vim txhua tus txoj sia puav leej yog kuv tug tib si, phaj txiv txoj sia kuj yog kuv tug, phaj tub txoj sia kuj yog kuv tug. Tus twg ua txhaum mas tus ntawd xwb thiaj yuav tuag. 5 Ib tug neeg siab ncaj, nws coj raws txoj kev ncaj kev ncees. 6 Nws tsis noj tej txhiam xws saum cov roob, nws tsis tsa muag ntsia cov mlom uas His Xas Lais tsev neeg teb teev, nws tsis zes tsis deev luag poj luag sev. Nws caiv txaj tas lub caij tus poj niam cev tsis huv. 7 Nws tsis hiam leej twg; luag muab yam twg tuaj yuam nuj nqe cia mas nws xa rov qab tib si. Nws tsis ua tub sab tub nyiag. Nws pub nws cov mov rau cov neeg tshaib noj, pub ris tsho rau tus neeg liab qab hnav. 8 Nws txais nyiaj rau luag, nws tsis noj paj, nws tsis tsuam paj hnyav hnyav. Nws nkaum nws txhais tes kom txhob tau ua ib yam phem. Nws txiav txim ncaj kom haum ob tog. 9 Nws ua lub neej haum kuv txoj cai lij choj, nws mloog kuv cov lub qhia. Ib tug neeg ua li no mas nws yog ib tug neeg coj zoo tiag tiag, nws yeej yuav tau txoj sia xwb. Yog HUAB TAIS Tswv Ntuj lo lus. 10 Tab sis yog tus neeg zoo ntawd nws yug tau ib tug tub uas yog neeg tub sab, neeg tua neeg, los yog qiv nyiaj tsuam paj hnyav hnyav, 13 mas tus tub ntawd yuav tsis ciaj, vim nws ua tej yam phem ntawd mas nws yuav tsum tuag; nws txoj kev tuag yuav rov poob rau ris xwb.
    30 HUAB TAIS Tswv Ntuj hais li no : Tsev neeg His Xas Lais, kuv yuav muab txim rau nej raws li nyias txoj kev. Nej cia li tig los yuav lub siab tshiab thiab tso nej tej kev ua txhaum pov tseg tas huv si, kom tsis txhob muaj kev rau nej ua phem ntxiv. 31 Nej muab nej cov txhaum uas nej tau ua tso pov tseg kom tas, nej rov yuav dua ib lub siab tshiab thiab ib lub tswv yim tshiab! Tsev neeg His Xas Lais, vim li cas nej thiaj li yuav xaiv txoj kev tuag ? 32 Vim kuv yeej tsis zoo siab pom ib tug neeg twg tuag li! Nej kav tsij tig rov los kom nej tau txoj sia!" Yog HUAB TAIS Tswv Ntuj lo lus.

    NPN 51: 12-13, 14-15, 18-19

    Txais: (12a) Tswv Ntuj, thov koj tsim ib lub siab huv lis si rau kuv.

    Tswv Ntuj, thov koj tsim ib lub siab huv lis si rau kuv,
    thiab rov muab ib lub tswv yim nyob ruaj nreb rau kuv.
    Koj tsis txhob muab kuv ntiab mus deb ntawm koj,
    thiab txhob rho koj leej Tswv Yim Ntshiab tawm ntawm kuv mus.

    Txais: (12a) Tswv Ntuj, thov koj tsim ib lub siab huv lis si rau kuv.

    Koj ua kom kuv rov zoo siab nyob hauv koj txoj kev cawm;
    koj muab ib lub tswv yim txawj xav dav rau kuv.
    Kuv yuav qhia koj txoj kev rau cov neeg yuam kev,
    ces cov neeg txhaum yuav tig rov los cuag koj.

    Txais: (12a) Tswv Ntuj, thov koj tsim ib lub siab huv lis si rau kuv.

    Vim koj tsis zoo siab txais cov kev txi ntuj;
    yog kuv hlawv tsiaj txi ntuj, koj yuav tsis txais.
    Kuv txoj kev txi ntuj, Tswv Ntuj, yog muaj ib lub siab xav lees txhaum;
    muaj ib lub siab xav lees txhaum thiab ua neeg me, Tswv ntuj, koj yuav tsis thuam.

    Txais: (12a) Tswv Ntuj, thov koj tsim ib lub siab huv lis si rau kuv.

    As Les Lus Yas: MT 11: 25

    Txais: As les lus yas, as les lus yas.

    Peb cav txog koj, Leej Txiv, tus Huab Tais kav lub ntuj lub teb,
    vim koj qhib cov txuj txog lub Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo: MT 19: 13-15

    13 Thaum ntawd, muaj neeg coj ib co me nyuam yaus tuaj rau Yes Xus kom Yes Xus tsa tes thov Ntuj rau lawv, tab sis cov thwj tim cem cov neeg ntawd. 14 Yes Xus thiaj hais tias : “Nej cia cov me nyuam no tuaj cuag kuv mas, nej txhob txwv lawv ; vim cov yuav tau Ntuj lub Ceeb Tsheej yog cov neeg zoo li cov me nyuam no.” 15 Ces Yes Xus tsa tes rau saum cov me nyuam ntawd tas, nws mam mus ntxiv.



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 14th August 2016, 5:59 pm

    TIM     15    LUB    8    HLI     2016

    Hnub Ob lis Piam Nees Nkaum Nruab Xyoo C Nruab Lis Piam Xyoo II

    Hwm Niam Mab Liab Nce Mus Saum Ntuj Nrog Nws lub Cev – Thaj Txi Ntuj Hmo Ua Ntej


    COV ZAJ NYEEM NRUAB LIS PIAM XYOO II,  2015-2016 - Page 10 Assumption_of_Mary


    Zaj Nyeem Ib:       1 XWM  15:   3-4, 15-16; 16:1-2


    3 Das Vis hu tas tsoom His Xas Lais tuaj sib sau nyob Yes Lus Xas Les; lawv yuav kwv HUAB TAIS lub Xab Cog Lus mus rau hauv qhov chaw uas nws tau npaj tseg. 4 Das Vis kuj hu As Loos cov tub thiab hu cov Les Vis tuaj.
    15 Cov Les Vis muab ib co nqaj kwv Tswv Ntuj lub Xab Cog Lus nyob saum lawv xub pwg, xws li Mais Xes tau ceeb toom tseg raws li HUAB TAIS lo lus. 16 Ces Das Vis hais rau cov ua thawj nyob hauv cov Les Vis kom xaiv ib co kws hu nkauj nyob hauv lawv cov kwv tij, thiab kom lawv ntaus lawv cov twj ua paj nruag, nkauj nog ncas thiab nruas npuaj, kom nrov nrov ua ib lub ntees zoo siab lom zem loj.
    16   1 Lawv coj Tswv Ntuj lub Xab Cog Lus los rau sawv daws pom thiab coj mus tso rau hauv nruab nrab lub Tsev Tsam Phooj uas Das Vis txhob txwm tsa cia txais lub Xab. Lawv hlawv tsiaj txi rauTswv Ntuj thiab lawv ua tej thaj txi Ntuj noj cov txim.  2 Thaum Das Vis hlawv tsiaj txi Ntuj thiab ua cov thaj txi Ntuj noj cov txim tas nws tuav txog HUAB TAIS lub npe, thiab nws foom hmoov zoo rau tsoom sid.

    NPN      132:   6-7, 9-10, 13-14

    Txais:   (Cool HUAB TAIS, koj sawv mus nyob pem koj lub chaw so, koj thiab lub Xab uas muaj koj txoj kev ntshiab.

    Peb hnov txog qhov ntawd nyob Es Fas Tas,
    peb nrhiav tau nws tom cov nras teb Yas As.
    Peb kav tsij nkag mus hauv nws lub tsev,
    peb txhos caug pe ntawm nws lub rooj tiag taw.

    Txais:   (Cool HUAB TAIS, koj sawv mus nyob pem koj lub chaw so, koj thiab lub Xab uas muaj koj txoj kev ntshiab.

    Thov kom koj cov leej choj hnav txoj kev ncaj,
    kom cov hwm koj qw zoo siab lom zem.
    Vim koj tus tub txib Das Vis,
    Thov koj mloog tus koj tau pleev cov lus thov.

    Txais:   (Cool HUAB TAIS, koj sawv mus nyob pem koj lub chaw so, koj thiab lub Xab uas muaj koj txoj kev ntshiab.

    HUAB TAIS tau xaiv Xis Yoos,
    nws yeem yuav Xis Yoos los ua nws chaw nyob.
    Xis Yoos yog kuv qhov chaw so mus ib txhiab ib txhis,
    kuv yuav nyob txawm saum Xis Yoos, vim kuv xaiv nws.

    Txais:   (Cool HUAB TAIS, koj sawv mus nyob pem koj lub chaw so, koj thiab lub Xab uas muaj koj txoj kev ntshiab.

    Zaj Nyeem Ob:    1 KLN  15:   54B-57

    54 Thaum yam uas txawj lwj hnav tau txoj kev tsis txawj lwj lawm thiab thaum yam uas txawj tuag hnav tau txoj kev tsis txawj tuag lawm, mas yuav muaj raws li lo lus nyob hauv Ntawv hais tias : “Txoj kev tuag tog tas rau hauv txoj kev yeej lawm. 55 Kev tuag, koj txoj kev yeej nyob qhov twg ? Kev tuag, koj tus ple muaj taug nyob qhov twg ?”
    56 Kev tuag tus ple muaj taug yog kev txhaum. Kev txhaum lub zog yog txoj cai. 57 Tiam sis peb ua Tswv Ntuj tsaug, vim nws pub kev yeej rau peb nyob hauv peb tus Huab Tais Yes Xus Pleev.

    As Les Lus Yas:      LK  11: 28

    Txais:   As les lus yas, as les lus yas.

    Cov muaj hmoov zoo yog cov uas mloog Tswv Ntuj lo lus
    thiab coj raws nraim li ntawd.      

    Txais:   As les lus yas, as les lus yas.

    Ntawv Moo Zoo:      LK  11:   27-28

    27 Thaum Yes Xus tseem hais tej lus ntawd, muaj ib tug poj niam nyob hauv nruab nrab tsoom sid tsa suab hais nrov nrov rau Yes Xus tias : "Lub plab uas tau nqa koj thiab lub xub ntiag uas pub mis rau koj tau txoj hmoov zoo !"
    28 Yes Xus teb tias : "Cov uas mloog Tswv Ntuj Lo Lus thiab ua raws li Tswv Ntuj Lo Lus, mas lawv thiaj yog cov tau txoj hmoov zoo."


    *********************************

    TIM     15    LUB    8    HLI     2016

    Hwm Niam Mab Liab Nce Mus Saum Ntuj Nrog Nws lub Cev – Thaj Txi Ntuj Thaum Nruab Hnub


    COV ZAJ NYEEM NRUAB LIS PIAM XYOO II,  2015-2016 - Page 10 Mirmary


    Zaj Nyeem Ib:     QYTN  11:   19A; 12:1-6A, 10AB


    19 Ces Tswv Ntuj lub Tuam Tsev nyob saum ntuj qhib los, yus pom tau nws Lub Xab Cog Lus nyob hauv lub tuam tsev.
    12   1 Muaj ib lub cim loj tas nrho tshwm nyob saum ntuj : ib tug Poj Niam hnav lub hnub, lub hli nyob hauv nws qab xib taws, Kaum ob lub hnub qub ua ib lub mom teev kub nyob saum nws taub hau. 2 Tus Poj Niam ntawd xeeb tub lawm. Nws ntsaj mob, vim nws tab tom daws cev. 3 Tseem muaj dua ib lub cim tshwm tuaj nyob saum ntuj : ib tug niag Zaj loj kawg, liab ploog cuag hluav taws. Nws muaj xya lub taub hau thiab kaum tus kub. Xya lub taub hau ntoo xya lub kaus mom kub. 4 Nws tus ko tw cheb cov hnub qub saum ntuj poob tas lawm ib feem peb; nws muab cuam pov los rau hauv ntiaj teb. Ces tus Zaj mus sawv ntawm tus poj niam uas tab tom daws cev xub ntiag, npaj nqos tus me nyuam uas tus poj niam yuav yug. 5 Tus Poj Niam yug tau tus me nyuam, yog ib tug me tub : yog tus yuav tuav ib rab cwj hlau coj tas txhua haiv neeg. Luag nqa hlo tus me nyuam mus rau ntawm Tswv Ntuj thiab ntawm nws lub theej kiab lawm. 6 Hos tus Poj Niam khiav mus nyob hauv teb chaws suab puam : nws mus nyob hauv qhov chaw uas Tswv Ntuj npaj rau nws.
    10 Ces kuv hnov ib lub suab nrov loj loj saum ntuj tuaj tias : “Zaum no, kev yeej, kev muaj hwj huam, peb tus Tswv Ntuj txoj kev ua Vaj, thiab nws Leej Pleev lub hwj huam los txog lawm.

    NPN     45:   10, 11, 12, 16

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.  

    Muaj ib co ntxhais vaj ntxwv nyob hauv koj pab niam nkauj ntsuab,
    tus poj vaj hnav kub Os Fis sawv ntawm koj sab xis.

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

    Me ntxhais, koj mloog mog ! Koj ntsia, koj tig ntsej los mloog :
    Koj txhob nco koj haiv neeg, koj niam koj txiv lub tsev ntxiv.

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

    Tus vaj qaug siab hlo nyiam koj txoj kev zoo nkauj !
    Nws yog koj tus huab tais, koj mus txhos caug pe ntawm nws xub ntiag.

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

    Lawv ua ib pab muaj kev zoo siab sib law sib liag,
    chaws mus hauv tus vaj lub tuam tsev.

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

    Zaj Nyeem Ob:      1  KLN  15:   20-27

    20 Leej Pleev sawv hauv cov tuag rov los lawm; nws yog thawj tug sawv rov los nyob hauv ib tsoom neeg uas mus pw tsaug zog lawm.  21 Tim ib tug neeg, ces txoj kev tuag thiaj muaj tau, kuj yog tim ib tug neeg ces txoj kev sawv hauv cov tuag rov los thiaj muaj tau thiab. 22 Ib yam li sawv daws tuag nyob hauv As Das, sawv daws kuj yuav ciaj rov los nyob hauv Leej Pleev thiab. 23 Tiam sis nyias muaj nyias lub sij hawm: Ua ntej dua cov yog Leej Pleev, tus xub sawv rov los, ces thaum txog lub hnub nyoog Leej Pleev rov tawm tuaj, mas Leej Pleev cov neeg yuav sawv rov los. 24 Ces mam yog lub caij kawg: Thaum ntawd Leej Pleev yuav muab nws txoj kev ua vaj cob rau Leej Txiv Tswv Ntuj, tiam sis yuav yog tom qab uas nws rhuav txhua txoj kev ua vaj, txhua txoj kev ua tus tswj, thiab txhua tus muaj hwj huam tas lawm tso. 25 Vim Leej Pleev yuav tsum ua vaj mus txog lub caij Leej Txiv tso tsoom yeeb ncuab tas tib si rau hauv nws qab xib taws. 26 Tus yeeb ncuab kawg, uas nws yuav rhuav, yog txoj kev tuag. 27 Vim nws tau muab tas puas tsav yam rau hauv nws qab xib taws lawm.

    As Les Lus Yas:  

    Txais:   As les lus yas, as les lus yas.

    Mab Liab nce mus saum ntuj,
    ib pab tshiab hu nkauj zoo siab.

    Txais:   As les lus yas, as les lus yas.

    Ntawv Moo Zoo:       LK  1:   39-56

    39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !"
    46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub roos cov neeg hwm nws tiam dhau tiam. 51 Nws sab npab nthuav nws lub zog rau sawv daws pom. Cov neeg uas lub siab muab hlob, Huab Tais ua kom lawv tawg. 52 Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab. 53 Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav. 54 Huab Tais pab nws tus tub txib His Xas Lais, vim nws nco ntsoov tias nws lub siab hlub neeg, 55 nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis."
    56 Mab Liab nrog Es Lis Xas Npes nyob peb lub hlis tej, ces nws rov mus tsev.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 15th August 2016, 1:22 pm

    TIM 16 LUB 8 HLI 2016

    Hnub Peb Lis Piam Nees Nkaum Nruab Xyoo C Nruab Lis Piam Xyoo II

    Hwm LN Stephen nyob Hungary

    Zaj NYeem Ib: ES XES KIAS 28: 1-10


    1 HUAB TAIS lo lus nrov tuaj rau kuv li no : 2 "Neeg leej tub, koj hais rau tus vaj nyob Tws Los tias : HUAB TAIS Tswv Ntuj hais li no : Vim koj lub siab muab hlob, koj hais tias: ‘Kuv yog ib tug tswv ntuj, kuv nyob txawm hauv ib lub tsev phim rau huab tais, nyob hauv plawv lub hiav txwv.' Tab sis koj tsuas yog ib tug neeg xwb, koj tsis yog tswv ntuj, txawm koj xav tias koj yog ib tug tswv ntuj. 3 Koj xav tias koj thoob tsib dua Das Nias lawm, tsis muaj ib yam zais ntshis uas koj yuav paub tsis tau. 4 Koj kev thoob tsib thiab kev ntse ua kom koj yog ib tug neeg nplua nuj. Koj tej nyiaj tej kub, koj muab khaws cia puv txhab. 5 Koj tau cuab yeej cuab tam ntau nplua mias, vim koj kev thoob tsib qhia kom koj txawj ua luam loj tas nrho ! Ces koj ua neeg muaj lub siab muab hlob vim koj nplua nuj. 6 Vim li ntawd, HUAB TAIS Tswv Ntuj hais li no : Vim koj xav tias koj lub tswv yim ntse li ib tug Tswv Ntuj lub, 7 vim li ntawd mas kuv yuav xa ib co pej kum neeg tuaj ntaus koj, yog lub kuj cuab nyoos tshaj tej. Lawv yuav rho ntaj tuaj tawm tsam koj txoj kev thoob tsib, lawv yuav txo koj lub hwj chim. 8 Lawv yuav muab koj thawb rau hauv qab tsuas; nyob ntawd koj yuav tuag npau ntshav dhi rau hauv qab tiv txwv. 9 Thaum ntawd koj puas tseem yuav hais rau cov tua koj tias : ‘kuv yog ib tug tswv ntuj ?’ Koj yeej tsis hais li; koj tsuas yog ib tug tib neeg xwb, koj tsis yog ib tug tswv ntuj, koj nyob hauv cov neeg tua koj lawv xib teg. 10 Koj yuav tuag zoo li cov neeg tsis tau txais lub cim txiav, yog cov pej kum neeg yuav muab koj tua. Kuv tau hais li no lawm; kuv yog Huab Tais TSWV NTUJ."

    NPN TXOJ CAI OB 32: 26-27AB, 27CD-28, 30, 35CD-36AB

    Txais: (39c) Kuv yog tus ua kom tuag thiab ua kom ciaj sia tau.

    Kuv twb xav hais li no: “Kuv yuav ua kom lawv tu noob,
    kuv yuav ua kom neeg txhob nco txog lawv lub npe ntxiv.”
    Tiam sis kuv ntshai tsam lawv cov yeeb ncuab tau kev thuam muaj plhus ntxiag,
    tsam cov yeeb ncuab ntawd tau kev khav qhuas ntxhias tias:.

    Txais: (39c) Kuv yog tus ua kom tuag thiab ua kom ciaj sia tau.

    “Yog peb txhais tes mus ntaus yeej lawv,
    HUAB TAIS tsis tau pab peb dab tsi li.”
    Vim lawv yog ib haiv neeg tsis txawj xav,
    tsis muaj ib lub tswv yim txawj to taub.

    Txais: (39c) Kuv yog tus ua kom tuag thiab ua kom ciaj sia tau.

    Vim li cas ib tug neeg ua tau kom ib txhiab leej swb,
    vim li cas ob tug neegcaum tau ib vam leej khiav?
    Yuav tsum yog vim lawv lub Tsua muab lawv muag,
    lawv tus HUAB TAIS muab lawv tso rau luag teb xwb.

    Txais: (39c) Kuv yog tus ua kom tuag thiab ua kom ciaj sia tau.

    Hnub uas lawv yuav raug rhuav los txog ze lawm,
    txoj kev puas ntsoog khiav nrawm nroos los rau saum lawv!
    Muaj tseeb, HUAB TAIS yuav muab kev ncaj rau nws haiv neeg;
    nws yuav muab kev khuv leej rau nws cov tub txib.

    Txais: (39c) Kuv yog tus ua kom tuag thiab ua kom ciaj sia tau.

    As Les Lus Yas: 2 KLN 8: 9

    Txais: As les lus yas, as les lus yas.

    Yes Xus Pleev yog tus nplua nuj, tab sis nws ua kom nws pluag,
    kom xwv nws lub neej pluag ua nej nplua nuj tuaj.

    Txais: As les lus yas, as les lus yas.

    Ntawv Moo Zoo: MT 19: 23-30

    23 Yes Xus hais rau nws cov thwj tim tias : “Kuv hais tseeb rau nej : ib tug neeg nplua nuj yuav ceeb laj nkag mus hauv Ntuj lub Ceeb Tsheej. 24 Kuv tseem rov hais dua rau nej ntxiv : ib tug ntxhuav yuav nkag hauv ib lub qhov koob, mas tseem yooj yim dua ib tug neeg nplua nuj mus hauv Ntuj lub Ceeb Tsheej.” 25 Cov thwj tim hnov cov lus ntawd, lawv yoob tas, lawv hais tias : “Yog li leej twg thiaj yuav tau txais kev cawm ?” 26 Yes Xus ntsia lawv tseeb tseeb, nws hais rau lawv tias : “Yog neeg ua neeg xwb mas yeej tsis tau li. Tab sis, ntawm Tswv Ntuj, mas nws ua tau tas ib puas tsav yam.” 27 Ces Pob Zeb teb rau Yes Xus tias : “Peb ne, peb tau tso ib puas tsav yam tseg, peb los raws koj, peb yuav tau dab tsi ?” 28 Yes Xus hais rau lawv tias : “Kuv hais tseeb rau nej cov uas raws kuv : lub zim txwv uas txhua tsav txhua yam yuav rov plhis tshiab, mas Neeg Leej Tub yuav zaum saum nws lub theej kiab muaj hwj chim, ces nej kuj yuav zaum saum kaum ob lub theej kiab, txiav txim rau kaum ob lub xeem His Xas Lais thiab. 29 Tus uas tau tso vaj tse, kwv tij, nkauj muam, niam txiv, me tub me nyuam thiab tso liaj teb tseg, vim kuv lub npe, mas tus ntawd yuav tau txais ib puas npaug tshaj qhov nws tau tso tseg, thiab nws tseem yuav tau txoj sia nyob mus li los ua nws tug. 30 Muaj coob leej cov ua ntej yuav tuaj tom qab ; hos muaj coob leej cov tuaj tom qab yuav tau ua ntej.”



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 16th August 2016, 6:35 pm

    TIM    17    LUB    8    HLI     2016

    Hnub Plaub Lis Piam Nes Nkaum Nruab Xyoo C Nruab Lis Piam Xyoo II

    Zaj Nyeem Ib:     ES XES KIAS  34:   1-11


    1 HUAB TAIS lo lus nrov tuaj rau kuv li no : 2 Neeg leej tub, koj ua yaj saub cem cov tswv zov yaj saib His Xas Lais, koj ua yaj saub tshaj rau lawv tias: "Cov tswv zov yaj, HUAB TAIS hais li no : cov tswv zov yaj saib His Xas Lais txoj hmoov yuav phem, vim lawv tsuas rov nrhiav zaub rau lawv noj xwb. Cov tswv zov yaj puas yog lawv yuav tsum coj pab yaj mus nog zaub lost sis yog ?" 3 Nej tau haus yaj cov mis, hnav yaj cov plaub, muab cov yaj rog tua, tab sis nej tsis tau coj pab yaj mus nog zaub. 4 Nej tsis tau txhawb zog rau cov tsis muaj zog, tsis tau kho cov muaj mob kom zoo, tsis tau qhwv cov raug mob lub qhov txhab. Nej tsis tau mus coj tus mus yuam kev kom rov los, tsis tau mus nrhiav kom tau tus poob zoo. Nej tsuas yog ua siab heev tsuj ntiag lawv thiab ua phem rau lawv xwb. 5 Ces lawv tau tawg mus rau ub rau no vim tsis muaj tus tswv zov yaj saib lawv, lawv thiaj mus poob rau tsiaj qus ncauj tsiaj qus lo.  6 Kuv pab yaj tau ncaim mus, lawv tawg mus nyob puv tej roob thiab pem tej toj siab qhov txhia chaw;  kuv pab yaj tawg ua lwj ua liam mus nyob puv lub teb chaws, tsis muaj leej twg yuav saib xyuas lawv, tsis muaj leej twg yuav mus nrhiav lawv.
    7 Cov tswv zov yaj, nej tig ntsej los mloog HUAB TAIS lo lus kom zoo. 8 HUAB TAIS Tswv Ntuj hais tias: Kuv cog lus rau ntawm kuv txoj sia tias : Vim kuv pab yaj tau raug luag tuaj lwg, tau poob rau tsiaj qus lub  ncauj lub lo,  rau qhov tsis muaj tus tswv saib lawv. Kuv cov tswv zov yaj tsis saib tsis xyuas kuv pab yaj, lawv mus nog lawv zaub, lawv tsis coj kuv pab yaj mus nog zaub. 9 Cov tswv zov yaj, nej tig ntsej los mloog HUAB TAIS lo lus kom zoo.  10 HUAB TAIS Tswv Ntuj hais li no : Zaum no, kuv yuav npau taws rau cov tswv zov yaj, kuv yuav rov mus coj kuv pab yaj ntawm lawv tes los,  kuv yuav txwv tsis pub lawv coj kuv pab yaj mus nog zaub ntxiv. Ces lawv yuav tsis tau mus nog zaub rau lawv tus kheej ntxiv. Kuv yuav thau kuv cov yaj ntawm lawv qhov ncauj, kom kuv cov yaj tsis txhob yog ib co tsiaj rau lawv tau noj nqaij ntxiv.  11 HUAB TAIS Tswv Ntuj hais li no : Zaum no, tus yuav tsob hwb kuv pab yaj yog kuv,  kuv yuav saib xyuas lawv mus.

    NPN      23:   1-3A, 3B-4, 5, 6

    Txais:    (1) Huab Tais yog tus tswv zov yaj saib kuv, kuv yuav tsis tshaib dab tsi li.  

    HUAB TAIS  yog kuv tus tswv zov yaj, kuv yuav tsis tshaib txog dab tsi.  
    Nws cia kuv so nyob hauv tej tshav zaub mos ntsuab xiab;  
    Nws coj kuv mus nyob ze cov dej tus yees;  
    nws ua kom kuv tus ntsuj plig muaj zog.  

    Txais…

    Nws coj kuv mus taug txoj kev ncaj, vim nws lub npe.
    Txawm kuv taug kev hauv ib lub hav tsaus nti,
    kuv tsis ntshai dab tsi phem; vim koj nyob rawv ntawm kuv ib sab,
    koj rab nplawm thiab rab pas nrig ua kuv luag.

    Txais…

    Koj rau ib rooj mov rau ntawm kuv xub ntiag
    rau kuv cov yeeb ncuab ntsia ntsoov;
    koj muab roj pleev kuv taub hau;
    kuv lub ntim puv phwj yaws.

    Txais…

    Txiaj ntsim thiab kev zoo siab raws kuv nraim
    niaj hnub hauv kuv lub neej;
    Kuv lub chaw  nyob yog hauv HUAB TAIS tsev
    mus kom tas cov hnub nyoog.

    Txais…

    As Les Lus Yas:     HES NPLAWS  4: 12

    Txais:   As les lus yas, as les lus yas.

    Tswv Ntuj lo lus muaj txoj sia thiab ua tau hauj lwm,
    Nws paub tau tej tswv yim thiab tej kev xav nyob hauv nruab siab.

    Txais:   As les lus yas, as les lus yas.

    Ntawv Moo Zoo:      MT  20:   1-16

    Yes Xus hais tias:
    1 Ntuj lub Ceeb Tsheej piv tau rau ib tug tswv teb uas thaum kaj ntug, nws tawm mus nrhiav tub zog tuaj ua nws daim teb txiv cawv. 2 Nws nrog cov tub zog hais haum ib hnub ib lub txiaj nyiag, ces nws xa lawv mus tom daim teb txiv cawv. 3 Ze cuaj teev, nws tawm mus ncig, nws pom ib co neeg nyob dag tom tshav puam. 4 Nws hais rau lawv tias : “Nej mus ua num tom kuv daim teb txiv cawv, kuv yuav muab nqi kom haum nej.” 5 Ces lawv mus. Kwv yees tav su, nws rov tawm mus ncig, thaum hnub qaij peb teev nws rov mus ua li qub. 6 Thaum hnub qaij ze li tsib teev, nws rov tawm mus ncig dua, nws tseem pom ib co nyob dag, nws hais rau lawv tias : “Vim li cas nej nyob dag tas hnub ntawm no, tsis ua num dab tsi li ?” 7 Lawv hais rau nws tias : “Vim tsis muaj neeg ntiav peb.” Tus tswv hais tias : “Nej mus ua num tom kuv daim teb txiv cawv thiab mas.” 8 Thaum tsaus ntuj, tus tswv teb hais rau tus tswj nyiaj txiag tias : “Koj hu cov tub zog los, koj muab nyias tus nqe zog rau nyias. Koj xub hu cov tuaj tom qab zuj zus los xaus rau cov xub tuaj.” 9 Cov tub zog uas tuaj thaum tsib teev hnub qaij los txog, lawv ib leeg tau ib lub txiaj nyiag. 10 Cov xub tuaj los txog, lawv xav tias lawv yuav tau txais nqi zog ntau dua, tab sis lawv ib leej kuj tau ib lub txiaj nyiag thiab. 11 Thaum lawv txais lawv tus nqi, lawv yws rau tus tswv teb tias : 12 “Cov tuaj tom qab ua num ib teev xwb, koj muab rau lawv ib yam li muab rau peb, hos peb, mas peb kwv nra thiab tiv tshav ib hnub.” 13 Ces tus tswv teb hais rau cov xub tuaj ib tug tias : “Npawg, kuv tsis tau ua tsis ncaj rau koj : wb tsis tau hais haum tias ib hnub ib lub txiaj nyiag no lod ? 14 Txais koj tus nqi zog, koj cia li mus. Kuv xav muab rau tus tuaj tom qab no, ib yam li muab rau koj : 15 kuv tsis muaj cai rho kuv tej nyiaj txiag raws kuv siab lod ? Los yog koj khib vim kuv siab zoo ?" 16 Cov tuaj tom qab yuav tau ua ntej, hos cov ua ntej yuav tuaj tom qab zoo li no.


    Last edited by Mim on 23rd August 2016, 12:27 pm; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 17th August 2016, 3:48 pm

    TIM 18 LUB 8 HLI 2016

    Hnub Tsib Lis Piam Nees Nkaum Nruab Xyoo C Nruab Lis Piam Xyoo II

    Zaj Nyeem Ib: ES XES KIAS 36: 23-28


    23 Huab Tais hais tias: Kuv yuav ua kom kuv lub npe loj ntshiab tuaj, vim cov kuj cuab tau thuam kuv lub npe, vim nej tau ua kom kuv lub npe puas nyob hauv cov kuj cuab thaum nej tuaj nyob. Ces cov kuj cuab yuav paub tias kuv yog HUAB TAIS thaum kuv ua kom kuv txoj kev ntshiab ci tuaj rau lawv qhov muag pom vim nej. 24 Thaum ntawd kuv yuav thau nej hauv cov kuj cuab los, kuv yuav sau nej ntawm pej kum teb los nyob ua ke, kuv yuav coj nej rov los nyob hauv nej thaj av. 25 Kuv yuav nchos dej ntshiab rau saum nej, kom ntxuav tas tej yam tsis huv nyob hauv nej mus kom tas. Kuv yuav sau nej tej mlom dab pov tseg kom nej huv tuaj. 26 Kuv yuav pub ib lub siab tshiab thiab ib lub tswv yim tshiab rau nej, kuv yuav dawj nej lub siab tawv li zeb pov tseg, thiab yuav cog ib lub siab muag li nqaij nyob hauv nej lub cev. 27 Kuv yuav muab kuv lub tswv yim rau hauv nej. Kuv yuav ua kom nej coj raws kuv tej cai lij choj, thiab kom nej ua raws kuv tej kev cai. 28 Nej yuav tau nyob hauv lub teb chaws uas kuv muab rau nej phaj txiv thiab phaj yawg. Nej yuav yog kuv haiv neeg. Kuv yuav yog nej tus Tswv Ntuj."

    NPN 51: 12-13, 14-15, 18-19

    Txais: (EXK 36:25) Kuv yuav ywg dej ntshiab rau nej kom ntxuav nej cov txhaum tas tib si.

    Tswv Ntuj, thov koj tsim ib lub siab huv lis si rau kuv,
    thiab rov muab ib lub tswv yim nyob ruaj nreb rau kuv.
    Koj tsis txhob muab kuv ntiab mus deb ntawm koj,
    thiab txhob rho koj leej Tswv Yim Ntshiab tawm ntawm kuv mus.

    Txais: (EXK 36:25) Kuv yuav ywg dej ntshiab rau nej kom ntxuav nej cov txhaum tas tib si.

    Koj ua kom kuv rov zoo siab nyob hauv koj txoj kev cawm;
    koj muab ib lub tswv yim txawj xav dav rau kuv.
    Kuv yuav qhia koj txoj kev rau cov neeg yuam kev,
    ces cov neeg txhaum yuav tig rov los cuag koj.

    Txais: (EXK 36:25) Kuv yuav ywg dej ntshiab rau nej kom ntxuav nej cov txhaum tas tib si.

    Vim koj tsis zoo siab txais cov kev txi ntuj;
    yog kuv hlawv tsiaj txi ntuj, koj yuav tsis txais.
    Kuv txoj kev txi ntuj, Tswv Ntuj, yog muaj ib lub siab xav lees txhaum;
    muaj ib lub siab xav lees txhaum thiab ua neeg me, Tswv ntuj, koj yuav tsis thuam.

    Txais: (EXK 36:25) Kuv yuav ywg dej ntshiab rau nej kom ntxuav nej cov txhaum tas tib si.

    As Les Lus Yas: NPN 95: 8

    Txais: As les lus yas, as les lus yas.
    .
    Hnub no yog nej hnov nws lus suab,
    nej yuav tsis txhob ua lub siab tawv ncauj.

    Txais: As les lus yas, as les lus yas.

    Ntawv Moo Zoo: MT 22: 1-14

    1 Yes Xus tsa ncauj rov ua paj lug hais rau lawv ntxiv tias : 2 “Ntuj lub Ceeb Tsheej zoo li ib tug vaj uas nws ua tshoob rau nws tus tub. 3 Nws xa tub txib mus nqua hu neeg tuaj noj tshoob, tab sis lawv tsis xav tuaj. 4 Nws rov xa dua ib pab tub txib mus, nws hais li no : “Nej hais rau cov raug caw tias : Nej saib, kuv twb npaj kuv rooj qav tiav tas, kuv tej heev nyuj thiab cov tsiaj rog puav leej tua tas lawm. Txhua yam npaj txhij tas. Nej kav tsij tuaj nrog noj tshoob !” 5 Tab sis cov neeg ntawd tsis quav ntsej, lawv nyias mus nyias : ib tug mus tom teb, ib tug mus ua luam. 6 Hos lwm cov tseem nthos nkaus cov tub txib ntes, hiam lawv, muab lawv tua pov tseg. 7 Tus vaj npau taws, nws xa nws cov tub rog mus tua cov neeg txo luag siav ntawd thiab hlawv lawv lub nroog. 8 Ces nws hais rau nws cov tub txib tias : “Rooj tshoob npaj tau txhij, tab sis cov neeg kuv caw tsis tsim nyog noj. 9 Nej mus tom tej ncauj ke, nej pom tsawg leej, nej nqua hu kom tuaj noj rooj tshoob.” 10 Cov tub txib mus txhua txoj kev, lawv sau tas txhua leej txhua tus uas lawv ntsib, cov phem cov zoo tuaj huv tib si. Neeg tuaj puv nkaus lub tsev noj tshoob. 11 Tus vaj chaws los xyuas cov neeg tuaj koom lub ntees tshoob. Nyob ntawd, nws pom ib tug tsis hnav tsoos noj tshoob. 12 Tus vaj hais rau nws tias : “Npawg, koj tsis hnav tsoos noj tshoob, ua cas koj los hauv no ?” Tus neeg ntawd nyob ntsiag to. 13 Ces tus vaj hais rau cov tub txib tias : “Nej muab nws pav tes pav taw, muab nws pov rau nraum zoov, hauv qhov tsaus ntuj : nyob ntawd, yuav quaj tom hniav nkawv.” 14 Vim tias Ntuj hu ntau leej tuaj, tab sis tsawg leej raug xaiv.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 18th August 2016, 1:38 pm

    TIM     19    LUB   8    HLI     2016

    Hnub Rau Lis Piam Nes Nkaum Nruab Xyoo C Nruab Lis Piam Xyoo II

    LN John Eudes

    Zaj Nyeem Ib:     ES XES KIAS  37:   1-14


    1 HUAB TAIS txhais tes nyob saum kuv thiab nws lub tswv yim coj kuv mus tso rau hauv ib lub vos hav uas muaj pob txha puv nkaus. 2 HUAB TAIS kom kuv mus mus los los txhua qhov txhia chaw hauv nruab nrab cov pob txha. Cov pob txha ntau kawg puv ntia saum tej npoo av hauv lub vos hav. Yog ib co pob txha qhuav qhuav xwb. 3 HUAB TAIS hais rau kuv tias : "Neeg leej tub, cov pob txha ntawd puas yuav rov muaj txoj sia tau ?" Kuv teb tias : "HUAB TAIS Tswv Ntuj, koj thiaj paub xwb." 4 Nws hais rau kuv tias : "Koj ua yaj saub tshaj lus rau cov pob txha ntawd, koj hais rau lawv tias : Pob txha qhuav, nej mloog HUAB TAIS lo lus !  5 HUAB TAIS Tswv Ntuj hais rau cov pob txha li no : Kuv yuav ua kom muaj tswv yim mus nyob hauv nej ces nej yuav ciaj sia tuaj. 6 Kuv yuav muab leeg los lo rau nej, kuv yuav ua kom nej tej nqaij hlav, kuv yuav muab tawv los qhwv nej, kuv yuav muab tswv yim rau nej, ces nej yuav muaj sia, nej thiaj yuav paub tias kuv yog HUAB TAIS."
    7 Kuv ua yaj saub tshaj raws li Tswv Ntuj qhia, ces thaum kuv tab tom ua yaj saub tshaj lus, mas kuv txawm hnov nrov nrov; yog cov pob txha sib tsoo nrov thaum cov pob txha txav los mus sib dhos. 8 Kuv ntsia pom lawv cov leeg hlav tuaj thiab lawv cov nqaij xeeb tuaj, thiab muaj tawv hlav tuaj qhwv lawv tas. Tab sis tsis muaj tswv yim nyob hauv lawv. 9 Tswv Ntuj hais rau kuv tias : "Neeg leej tub, koj ua yaj saub tshaj lus rau lub tswv yim mas ! Koj ua yaj saub, koj hais li no rau lub tswv yim tias : 'HUAB TAIS Tswv Ntuj hais lo lus no : Tswv yim, koj ya tuaj ntawm plaub ceg kaum ntuj tuaj ! Koj tuaj tshuab pa rau saum cov tuag no kom lawv muaj txoj sia."
    10 Kuv ua yaj saub tshaj raws li Tswv Ntuj qhia. Ces lub tswv yim tuaj nyob hauv lawv. Lawv muaj sia tuaj thiab lawv sawv los nyob ntseg ntsees, zoo li ib npoj tub rog coob tas nrho. 11 Tswv Ntuj hais rau kuv tias : "Neeg leej tub, cov pob txha no yog tas nrho tsev neeg His Xas Lais. Lawv niaj hnub hais tias : 'Peb cov pob txha qhuav tas ! Peb txoj kev tso siab yaj tas ! Peb ces tas li no !' 12 Vim li ntawd, koj yuav ua yaj saub tshaj rau lawv, koj hais rau lawv tias : HUAB TAIS Tswv Ntuj hais li no :  Kuv haiv neeg, kuv yuav qhib nej cov ntxa, kuv yuav ua kom nej sawv hauv nej cov ntxa los, kuv yuav coj nej rov mus nyob rau His Xas Lais thaj av. 13 Kuv haiv neeg, thaum kuv qhib nej cov ntxa thiab kuv tsa nej sawv hauv qhov ntxa los, mas nej yuav paub tias kuv yog HUAB TAIS. 14 Kuv yuav tso kuv lub tswv yim rau hauv nej ces nej yuav rov muaj txoj sia. Kuv yuav tsa nej kom nyob txawm hauv nej thaj av. Nej thiaj yuav paub tias kuv yog HUAB TAIS.  Kuv tau hais li cas mas kuv yuav ua kom tau. Yog HUAB TAIS lo lus."

    NPN       107:   2-3, 4-5, 6-7, 8-9

    Txais:   (1) Nej ua Huab Tais tsaug vim nws txoj kev hlub yuav nyob mus li.  

    Cov uas HUAB TAIS tau npo lawv dim yuav hais li ntawd,
    cov uas nws npo lawv dim ntawm cov neeg quab yuam txhais tes,
    cov uas nws tau sau lawv ntawm pej kum teb rov los,
    txij sab hnub tuaj mus txog sab hnub poob, txij qaum teb mus txog  qab teb.

    Txais:   (1) Nej ua Huab Tais tsaug vim nws txoj kev hlub yuav nyob mus li.

    Lawv tau mus poob zoo rau teb chaws suab puam,
    lawv nrhiav tsis tau kev mus  rau ib lub zos muaj neeg nyob.
    Lawv tshaib tshaib plab nqhis nqhis dej,
    Ua rau lawv txoj sia twb yuav yaj ntawm lawv mus.

    Txais:   (1) Nej ua Huab Tais tsaug vim nws txoj kev hlub yuav nyob mus li.

    Ces lawv quaj hu HUAB TAIS thaum lawv txom nyem,
    nws cawm lawv ntawm lawv kev nyuaj siab.
    Nws coj lawv mus taug txoj kev uas ncaj qha
    Mus kom txog ib lub tsheej muaj neeg nyob.

    Txais:   (1) Nej ua Huab Tais tsaug vim nws txoj kev hlub yuav nyob mus li.

    Kom lawv cav lus zoo ua HUAB TAIS tsaug, vim nws hlub
    thiab nws ua hwj huam yees ntxwv loj tas nrho pab neeg,
    Vim tias nws pub rau tus nqhis qhuav siab qhawv tau haus zoo siab hlo,
    thiab rau tus tshaib plab qaug zog zis tau noj tsau npo.

    Txais:   (1) Nej ua Huab Tais tsaug vim nws txoj kev hlub yuav nyob mus li.

    As Les Lus Yas:      NPN   25:   4B, 5A

    Txais:    As les lus yas, as les lus yas.

    Kuv tus Tswv Ntuj, thov koj qhia koj txoj kev rau kuv taug,  
    thov koj coj kuv mus taug koj txoj kev tseeb.  

    Txais:    As les lus yas, as les lus yas.

    Ntawv Moo Zoo:     MT  22:   34-40

    34 Cov Fas Lis Xais hnov tias Yes Xus teb rau cov Xas Dus Kais tws lus, ces lawv sib sau sab laj. 35 Lawv ib tug tuaj sim Yes Xus, nws yog ib tug kws lij choj, nws nug tias : 6 “Xib Hwb, nyob hauv Txoj Cai, lo lus qhia twg loj dua cov ? 37 Yes Xus hais rau nws tias : “Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj . 38 Lo lus qhia no yog lo lus qhia loj tshaj cov, yog thawj lo lus qhia. 39 Lo lus qhia ob kuj zoo ib yam thiab : koj yuav nyiam tus nyob ze koj ib yam nkaus li koj nyiam koj. 40 Tas Txoj Cai thiab cov Yaj Saub puav leej dai ncuv rau ob lo lus qhia no."


    Last edited by Mim on 27th August 2016, 3:27 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 20th August 2016, 5:53 am

    TIM 20 LUB 8 HLI 2016

    Hnub Xya Lis Piam Nees Nkaum Nruab Xyoo C Nruab Lis Piam Xyoo II

    Hwm LN Bernard

    Zaj Nyeem Ib: ES XES KIAS 43: 1-7AB


    1 Tus txiv neej coj kuv mus rau ntawm lub qhov rooj vag uas tig rau sab hnub tuaj. 2 Nyob ntawd kuv pom cov His Xas Lais tus Tswv Ntuj lub hwj chim tawm tim phab hnub tuaj tuaj; nws tuaj nrog ib lub suab nrov nroo ntws xws li suab dej loj loj nrov thiab nws lub hwj chim ua rau lub ntiaj teb ci ntsa iab. 3 Qhov kuv pom no zoo ib yam li qhov uas kuv tau pom thaum nws tuaj rhuav lub tsheej thiab kuj zoo li qhov kuv tau pom nyob ntawm tus niam dej Kes Npas, uas kuv tau khoov pe ntsej muag ti av. 4 HUAB TAIS lub hwj chim hla ntawm lub qhov rooj vag uas tig rau sab hnub tuaj mus rau hauv lub Tuam Tsev Teev Ntuj. 5 Lub tswv yim nqa kuv coj kuv mus txog hauv lub plawv tsev. Kuv pom HUAB TAIS lub hwj chim ci puv lub Tuam Tsev. 6 Ces kuv hnov ib lub suab hais lus rau kuv tuaj hauv Tuam Tsev tuaj, hos tus neeg sawv ntawm kuv ib sab. 7 Lub suab hais rau kuv tias : "Neeg leej tub, qhov chaw no yog qhov kuv yuav txawb kuv lub theej kiab rau, thaj chaw no yog thaj kuv yuav tiag kuv xib taws rau; kuv yuav nyob ntawm no nrog tsoom tub ki His Xas Lais mus li txheej dhau txheej.”

    NPN 85: 9AB+10, 11-12, 13-14

    Txais: 10b) HUAB TAIS lub koob meej yuav nyob txawm hauv peb teb chaws.

    Kuv mloog saib HUAB TAIS Tswv Ntuj hais dab tsi:
    Yog nws foom kev thaj yeeb rau nws haiv neeg thiab cov ntseeg nws.
    Nws txoj kev cawm los txog ze cov hwm nws lawm,
    Nws lub koob meej yuav tsa tsev nyob hauv peb teb chaws.

    Txais: 10b) HUAB TAIS lub koob meej yuav nyob txawm hauv peb teb chaws.

    Kev hlub thiab kev tseeb yuav los sib ntsib,
    Kev ncaj ncees thiab kev thaj yeeb los sib qawm.
    Kev tseeb yuav txhawv tawm hauv ntiaj teb los,
    kev ncaj ncees yuav dauv muag ntsia saum ntuj tuaj.

    Txais: 10b) HUAB TAIS lub koob meej yuav nyob txawm hauv peb teb chaws.

    HUAB TAIS kiag yuav pub kev vam meej,
    peb cov av yuav ntsu qoob ntsu loo,
    Kev ncaj ncees yuav mus ua Huab Tais ntej,
    txoj kev cawm yuav taug nws hneev taw.

    Txais: 10b) HUAB TAIS lub koob meej yuav nyob txawm hauv peb teb chaws.

    As Les Lus Yas: MT 23: 9B, 10B

    Txais: As les lus yas, as les lus yas.

    Nej tsuas muaj tib leeg Txiv xwb, yog tus nyob saum ntuj
    nej tsuas muaj tib tug Coj xwb, yog Leej Pleev. .

    Txais: As les lus yas, as les lus yas.

    Ntawv Moo Zoo: MT 23: 1-12

    1 Yes Xus qhia tsoom sid thiab nws cov thwj tim. Nws hais tias : 2 “Cov Kws Ntawv Ntshiab thiab cov Fas Lis Xais zaum Mais Xes lub theej kiab lawm. 3 Nej ua tas txhua yam lawv qhia nej, thiab nej khaws huv tib si tseg, tab sis nej txhob ua raws li lawv. Vim lawv qhia, tab sis lawv tsis ua raws. 4 Lawv nog tej lub nra hnyav yuam rau tsoom sid xwb pwg, tab sis lawv tsis kam cev ib tug ntiv tes los kov. 5 Lawv ua txhua tsav txhua yam kom luag qhuas. Yog li ntawd, lawv thiaj coj tej txws ntim Txoj Cai dav dav, thiab dai tej tw ntxhoo ntev ntev. 6 Thaum lawv mus noj nqaij haus cawv, lawv nyiam zaum thawj lub rooj. Nyob hauv cov tsev txoos, lawv nyiam zaum cov rooj pem hauv ntej. 7 Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”. 8 Hos nej, mas nej txhob cia luag hu nej ua “Xib Hwb”, vim nej tsuas muaj tib tug Xib Hwb xwb, thiab nej sawv daws yog ib co kwv tij. 9 Nej txhob hu leej twg nyob ntiaj teb no ua “Txiv”, vim nej tsuas muaj tib leeg Txiv xwb, yog tus nyob saum ntuj. 10 Nej txhob cia luag hu nej ua “Tus Coj”, vim nej tsuas muaj tib tug Coj xwb, yog Leej Pleev. 11 Tus loj dua cov nyob hauv nej, yuav ua nej tus tub txib. 12 Tus twg tsa nws siab, Ntuj yuav txo nws qis. Tus twg txo nws qis, Ntuj yuav tsa nws siab.



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 21st August 2016, 3:41 pm

    TIM 22 LUB 8 HLI 2016

    Hnub Ob Lis Piam Nees Nkaum Ib Nruab Xyoo C Nruab Lis Piam Xyoo II
    Hwm Niam Mab Liab txoj Kev Ua Poj Vaj Kav saum ntuj thieb kav ntiaj teb.

    Zaj Nyeem Ib: 2 TES XAS LOS NIS 1: 1-5, 11-12


    1 Paj Lug, nrog Xis Vas Nus, thiab Tis Mos Tes sau ntawv tuaj rau lub Koom Txoos nyob Tes Xas Los Nis, uas nyob hauv Tswv Ntuj peb leej Txiv, thiab nyob hauv Huab Tais Yes Xus Pleev. 2 Thov kom Tswv Ntuj peb Leej Txiv thiab Huab Tais Yes Xus Pleev pub txiaj ntsim thiab kev thaj yeeb rau nej.
    3 Kwv tij, peb yuav tsum ua Tswv Ntuj tsaug tsis tseg vim nej ; tsim nyog peb yuav ua tsaug kawg, vim nej txoj kev ntseeg hlob mus zoo, thiab nej sawv daws txawj sib nyiam sib hlub zoo zuj zus. 4 Li ntawd mas peb muaj ntsej muag khav txog nej nyob hauv Tswv Ntuj cov tsev txoos, vim tias, tab txawm nej raug luag hiam thiab raug txom nyem loj, los nej nyob ruaj nreb thiab nej ntseeg ruaj nreb. 5 Qhov zeem tseeb tau txog Tswv Ntuj txoj kev txiav txim ncaj yog qhov tias nej raug txom nyem vim Tswv Ntuj lub Ceeb Tsheej, mas nej tsim nyog mus hauv lub Ceeb Tsheej ntawd.
    11 Peb thov Ntuj rau nej tsis tseg kom nws ua kom nej tsim nyog mloog nws hu nej, kom nws lub hwj huam pab nej ua qhov zoo, thiab pab nej kub siab ua cov hauj lwm phim kev ntseeg. 12 Ces peb tus Huab Tais Yes Xus lub npe yuav muaj koob meej nyob hauv nej, thiab nej yuav muaj koob meej nyob hauv nws, raws li peb tus Tswv Ntuj thiab Huab Tais Yes Xus Pleev lub txiaj ntsim.

    NPN 96: 1-2A, 2B-3, 4-5

    Txais: (3) Nej tshaj Tswv Ntuj cov hauj lwm loj rau txhua haiv neeg paub.

    Nej hu ib zag nkauj tshiab rau HUAB TAIS,
    tas lub ntiaj teb, nej hu nkauj rau HUAB TAIS;
    Nej hu nkauj rau HUAB TAIS, nej foom koob meej rau nws lub npe.

    Txais: (3) Nej tshaj Tswv Ntuj cov hauj lwm loj rau txhua haiv neeg paub.

    Hnub dhau hnub, nej tshaj nws txoj kev cawm.
    Nej cav nws lub koob meej rau tsoom kuj cuab paub,
    piav nws cov dej num nto moo rau tsoom haiv neeg hnov.

    Txais: (3) Nej tshaj Tswv Ntuj cov hauj lwm loj rau txhua haiv neeg paub.

    HUAB TAIS loj tas nrho, tsim nyog sawv daws cav txog nws,
    nws zoo kawg nkaus, zoo tshaj ib tsoom dab tas huv si .
    Tas tsoom dab uas lwm cov haiv neeg teev, tsis muaj nqi dab tsi.
    Hos HUAB TAIS yog tus tsim yim txheej cuaj txheej ntuj.

    Txais: (3) Nej tshaj Tswv Ntuj cov hauj lwm loj rau txhua haiv neeg paub.

    As Les Lus Yas: ZAM 10: 27

    Txais: As les lus yas, as les lus yas.

    Huab Tais hais tais: Kuv cov yaj mloog kuyv lub suab;
    kuv paub lawv, lawv tuaj raws kuv qab.

    Txais: As les lus yas, as les lus yas.

    Ntawv Moo Zoo MT 23: 13-22

    Yes Xus hais tias:
    13 Tsoom Kws Ntawv Ntshiab thiab tsoom Fas Lis Xais uas zoo nraum daim tawv, nej txoj hmoov phem, nej muab Ntuj lub Ceeb Tsheej kaw kom neeg txhob mus tau ! Nej tsis chaws mus hauv, nej kuj tsis pub kom cov xav mus, tau kev chaws mus hauv. [14] 15 Tsoom Kws Ntawv Ntshiab thiab tsoom Fas Lis Xais uas zoo nraum daim tawv, nej txoj hmoov phem, nej hla hiav txwv, hla tej tuam teb mus nrhiav kom tau ib tug neeg los hwm ntuj. Thaum nej tau ib tug lawd, nej ua kom nws tsim nyog mus hauv dab phem cov hluav taws tshaj nej ob npaug. 16 Neeg dig muag coj kev, nej txoj hmoov phem, vim nej hais tias : “Yog tus twg tuav txog lub tuam tsev teev Ntuj los cog lus, mas nws tsis ua raws lo lus nws cog kuj tau. Tab sis tus twg tuav txog cov kub hauv lub tuam tsev teev Ntuj los cog lus, mas nws yuav tsum ua raws li lo lus nws tau cog.” 17 Neeg vwm thiab dig muag, dab tsi muaj nqes dua ? Puas yog kub los yog lub tuam tsev teev Ntuj uas ua kom cov kub ntshiab tuaj ? 18 Nej tseem hais tias : “Yog tus twg tuav txog lub thaj txi Ntuj los cog lus, mas nws tsis ua raws lo lus nws cog kuj tau. Tab sis yog tus twg muab cov txim saum thaj txi Ntuj los cog lus, mas nws yuav ua raws li lo lus nws tau cog.” 19 Neeg dig muag, qhov twg yog qhov loj tshaj ? Puas yog cov txim los yog lub thaj txi Ntuj uas ua kom cov txim ntawd ntshiab ? 20 Tus tuav txog lub thaj txi Ntuj los cog lus, kuj yog tuav txog lub thaj thiab tas txhia yam uas nyob saum lub thaj huv si. 21 Tus tuav txog lub tuam tsev teev Ntuj los cog lus, kuj yog tuav txog lub tuam tsev thiab Tus nyob hauv lub tuam tsev ntawd tib si. 22 Tus tuav txog lub ntuj los cog lus, kuj yog tuav txog Tswv Ntuj lub theej kiab thiab Tus zaum saum lub theej kiab ntawd tib si.




    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 23rd August 2016, 12:30 pm

    TIM     23    LUB    8    HLI     2016

    Hnub Peb Lis Piam Nees Nkaum Ib Nruab Xyoo C Nruab Lis Piam Xyoo II

    Hwm LN  Rose de Lima

    Zaj Nyeem Ib:     2 TES XAS LOS NIS  2:   1-3A, 14-17


    1 Kwv tij sawv daws, peb thov hais rau nej tias, hais txog lub caij thaum peb tus Huab Tais Yes Xus Pleev yuav los, thiab peb yuav sib sau nyob ze nws,  2 mas thov kom nej txhob vwm sai sai txog; thiab  nej yuav tsis txhob ntxhov siab, yog tias muaj tej yam txawv txav uas yog tuaj ntawm Leej Tswv Yim Ntshiab tuaj, los  muaj tej cov lus los tej tsab ntawv uas luag hais tias yog tuaj ntawm peb tuaj; tej lus ntawd yuav ua kom nej xav tias twb txog Huab Tais lub Hnub Nyoog lawm.  3 Tiam sis nej ceev faj txhob cia leej twg ua kom nej yuam kev li.
    14 Tswv Ntuj hu nej los txais kev ntseeg thiab kev cawm nyob hauv peb lub Moo Zoo, kom nej tau txais peb tus Huab Tais Yes Xus Pleev lub hwj chim. 15 Li ntawd mas, cov kwv tij, nej nyob ruaj nreb, nej coj ruaj nreb raws li tej lus thiab tej kev cai nej tau ib txwm coj thiab txais ntawm peb los, (tsis hais cov lus ntawm peb lub ncauj kiag, los ntawm peb cov tsab ntawv).
    16 Thov kom peb tus Huab Tais Yes Xus Pleev thiab peb leej Txiv Tswv Ntuj uas yog tus hlub peb, pub lub txiaj ntsim rau peb kom peb muaj kev nplig siab mus li, thiab muaj kev zoo siab tso siab lug, 17 thov kom nkawd nplij nej lub siab thiab txhawb nej lub zog thaum nej ua tej hauj lwm zoo thiab thaum nej hais lus.

    NPN       96:   10, 11-12, 13

    Txais:   (13b) Huab Tais tuaj txiav txim rau lub ntiaj teb.

    Hais rau txhua haiv neeg tias: HUAB TAIS yog vaj ntxwv.;
    Nws tsim lub ntiaj teb kom nyob ruaj, kom txhob muaj leej twg muab txav;
    Nws tswj tsoom pej xeem nrog kev ncaj ncees.

    Txais:   (13b) Huab Tais tuaj txiav txim rau lub ntiaj teb.

    Kom lub ntuj zoo siab, lub ntiaj teb hom khaj;
    kom dej hiav txwv thiab txhua yam nyob hauv tsa suab nrov nrov;
    kom cov tiaj nras thiab txhua yam nyob hauv luag ntxhi!
    Thiab kom txhua tus ntoo hauv hav zoov zoo siab.

    Txais:   (13b) Huab Tais tuaj txiav txim rau lub ntiaj teb.

    Lawv yuav dhia zoo siab ntawm HUAB TAIS xub ntiag,
    vim nws tuaj txog lawm, nws tuaj kav lub ntiaj teb.
    Nws yuav tswj lub ntiaj teb raws kev ncaj ncees,
    thiab cov haiv neeg raws kev pheej xeeb.

    Txais:   (13b) Huab Tais tuaj txiav txim rau lub ntiaj teb.

    As Les Lus Yas:       HES NPLAWS  4:   12


    Txais:    As les lus yas, as les lus yas.

    Tswv Ntuj lo lus muaj txoj sia thiab ua tau hauj lwm,
    Nws paub tau tej tswv yim thiab tej kev xav nyob hauv nruab siab.

    Txais:   As les lus yas, as les lus yas.

    Ntawv Moo Zoo:      MT  23:   23-26

    23 Nej tsoom Kws Ntawv Ntshiab thiab tsoom Fas Lis Xais, neeg zoo nraum daim tawv, nej txoj hmoov phem, vim nej them se ib feem kaum rau cov pum hub, zaub txhwb nyug  thiab txheej txhaim, tab sis nej tso tej yam loj nyob hauv Txoj Cai pov tseg : yam li kev ncaj, kev hlub luag, thiab kev coj zoo. Yuav tsum xub muab siab rau coj tej no ua ntej, thiab kuj tsis tso tej  tod tseg. 24 Neeg dig muag coj kev, nej lim tus yoov tshaj cum tawm, nej ho cia li nqos tus ntxhuav. 25 Nej tsoom Kws Ntawv Ntshiab thiab tsoom Fas Lis Xais, neeg zoo nraum daim tawv, nej txoj hmoov phem.  Nej ntxuav khob ntxuav phaj sab nraud, tab sis kev tub sab thiab kev hu dab nyob puv nkaus sab hauv. 26 Fas Lis Xais dig muag, koj ntxuav khob sab hauv tso, ces sab nraud thiaj yuav huv thiab.


    Last edited by Mim on 27th August 2016, 3:46 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 23rd August 2016, 3:10 pm

    TIM     24    LUB    8    HLI     2016

    Hnub Plaub Lis Piam Nees Nkaum Ib Nruab Xyoo C Nruab Lis Piam Xyoo II

    Hwm LN Bartholomew, ib tug Hauv Paus Xa Lus; Muaj coob leej hais tias Bartholomew thiab Nathanael (Nas Tas Nais) yog tib tug xwb.

    Zaj Nyeem Ib:     QYTN   21:   9B-14


    Ib tug tshiab los hais rau kuv tias : “Koj los, kuv yuav coj koj mus saib tus Nkauj Nyab, uas yog Leej Yaj tus Poj Niam.” 10 Ces nws nqa hlo kuv lub tswv yim mus saum ib lub roob loj roob siab, nws muab lub tsheej Ntshiab Yes Lus Xas Les uas nqes saum ntuj, pem Tswv Ntuj los rau kuv saib. Lub tsheej muaj Tswv Ntuj lub hwj chim. 11 Nws ci ntsa iab xws li ib lub pob zeb muaj nqi kawg, xws li ib lub pob zeb dawb ci lam lug xws tsom iab. 12 Muaj ib lub ntsa zeb loj thiab siab xov lub tsheej. Lub ntsa zeb muaj kaum ob lub qhov rooj vag, muaj kaum ob tug Tshiab zov cov qhov rooj ntawd. Muaj ib co npe sau rau ntawm cov qhov rooj : yog cov tub hauv kaum ob lub xeem His Xas Lais cov npe. 13 Sab Toob Fab muaj peb lub qhov rooj, Pej Fab muaj peb lub qhov rooj, Naj Fab muaj peb lub qhov rooj, Xib Fab muaj peb lub qhov rooj. 14 Lub ntsa zeb xov lub tsheej txawb rau saum kaum ob txheej taw ntsa. Muaj kaum ob lub npe sau rau saum cov taw ntsa. Yog Leej Yaj kaum ob leeg Hauv Paus Xa Lus cov npe.

    NPN       145:   10-11, 12-13, 17-18

    Txais:         (12) Huab Tais, koj cov phooj ywg tshaj tawm txog
    koj lub Ceeb Tsheej muaj hwj chim ci ntsa iab.  

    HUAB TAIS, cia tas koj cov hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    thiab piav txog koj lub hwj huam loj.

    Txais:         (12) Huab Tais, koj cov phooj ywg tshaj tawm txog
    koj lub Ceeb Tsheej muaj hwj chim ci ntsa iab.

    Cia lawv qhia rau neeg paub txog koj lub hwj huam loj
    thiab koj lub Ceeb Tsheej  muaj hwj chim ci ntsa iab.
    Koj lub Ceeb Tsheej yog ib lub Ceeb Tsheej txais tas cov hlob nrog cov yau,
    thiab koj txoj kev tswj kav yuav nyob mus txheej dhau txheej.

    Txais:         (12) Huab Tais, koj cov phooj ywg tshaj tawm txog
    koj lub Ceeb Tsheej muaj hwj chim ci ntsa iab.

    Huab Tais tej kev yog kev ncaj
    nws tej dej num yog kev hlub.
    Huab Tais nyob ze cov hu txog nws,
    cov uas muaj lub siab hu txog nws tiag.

    Txais:         (12) Huab Tais, koj cov phooj ywg tshaj tawm txog
    koj lub Ceeb Tsheej muaj hwj chim ci ntsa iab.

    As Les Lus Yas:      ZAM  1:   49B

    Txais:    As les lus yas, as les lus yas.

    Las Npis, koj yog Tswv Ntuj Leej Tub,
    koj yog cov His Xas Lais tus vaj.

    Txais:    As les lus yas, as les lus yas.

    Ntawv Moo Zoo:      ZAM  1:   45-51

    45 Fis Lis Pos ntsib Nas Tas Nais, nws hais rau Nas Tas Nais tias : "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib lawm, yog Yes Xus, Yos Xes nyob Nas Xas Les tus tub." 46 Ces Nas Tas Nais hais rau Fis Lis Pos tias : "Puas yuav muaj ib yam zoo tawm hauv Nas Xas Les tuaj tau ?" Fis Lis Pos hais rau Nas Tas Nais tias : "Koj tuaj, koj yuav pom." 47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis zais siab li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau Nas Tas Nais tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub ! Koj yog His Xas Lais tus Vaj." 50 Yes Xus hais rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg. Koj yuav pom tej yam loj dua no." 51 Ces Yes Xus hais rau Nas Tas Nais tias : "Kuv hais qhov muaj tseeb tiag rau nej: Nej yuav pom ntuj qhib los, thiab pom Tswv Ntuj cov Tshiab nce mus thiab nqes los saum Neeg Leej Tub."


    Last edited by Mim on 27th August 2016, 3:53 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 26th August 2016, 2:55 pm

    TIM     25    LUB    8    HLI     2016

    Hnub Tsib Lis Piam Nees Nkaum Ib Nruab Xyoo C Nruab Lis Piam Xyoo II  

    Hem LN Louis, tus vaj Fab Kis, thiab LN Yos Xes Calasanz

    Zaj Nyeem Ib:      1 KLN  1:   1-9


    1 Kuv, Paj Lug, tus uas Tswv Ntuj pom zoo hu los ua Yes Xus Pleev ib tug Hauv Paus Xa Lus,  2 thiab tus kwv Xos Thes Nos wb sau ntawv tuaj rau Tswv Ntuj lub Koom Txoos nyob Kos Lis Nthos, rau nej cov uas tau hloov ua neeg dawb huv nyob hauv Yes Xus Pleev lawm, uas Ntuj hu nej los ua neeg ntshiab, nrog tas txhua leej nyob qhov txhia chaw uas tuav txog peb tus Huab Tais Yes Xus Pleev lub npe, uas nws yog lawv tus Huab Tais thiab yog peb tus Huab Tais. 3 Thov kom peb Txiv Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb rau nej.
    4 Kuv ua kuv tus Tswv Ntuj tsaug tsis tseg vim nej, vim Tswv Ntuj lub txiaj ntsim uas nws tau pub rau nej nyob hauv Yes Xus Pleev,  5 ces nej ua neeg nplua nuj nyob hauv tas txhua yam : nej muaj kev txawj hais lus, nej muaj kev paub txuj paub ci, 6 ces nej yog ib qho tim khawv zeem tseeb txog Leej Pleev. 7 Kom tsis txhob muaj ib lub txiaj ntsim uas nej tsis tau txais, thaum nej nyob tos peb tus Huab Tais Yes Xus Pleev yuav tawm los rau neeg pom xyeem. 8 Nws yuav pab kom nej nyob ruaj nreb mus txog qhov kawg, kom thaum txog peb tus Huab Tais Yes Xus Pleev hnub, mas tsis muaj ib qho xyeej nyob hauv nej. 9 Tswv Ntuj yog tus pheej xeeb : nws yog tus  hu nej kom los nrog nws Leej Tub, peb tus Huab Tais Yes Xus Pleev muaj kev phooj ywg kev sib haum xeeb.

    NPN      145:   2-3, 4-5, 6-7

    Txais:    (1)  Huab Tais, kuv yuav cav txog koj lub npe mus li.

    Kuv yuav niaj hnub cav txog koj lub koob meej,
    kuv yuav cav lus zoo txog koj lub npe mus li ib txhiab ib txhis.
    HUAB TAIS loj tas nrho, tsim nyog cav txog nws ;
    nws loj tas nrho, neeg ntsuas tsis tau.

    Txais:    (1)  Huab Tais, kuv yuav cav txog koj lub npe mus li.

    Sawv daws yuav qhuas txog koj tej hauj lwm txheej dhau txheej,
    Lawv yuav tshaj koj txoj kev muaj hwj xyeej rau neeg paub.
    Koj cov hauj lwm qhia txog koj lub hwj huam hwj chim loj ci ntsa iab,
    kuv yuav hais tsis tseg txog koj cov dej num tsim nyog qhuas.

    Txais:    (1)  Huab Tais, kuv yuav cav txog koj lub npe mus li.

    Neeg yuav hais txog koj tej hauj lwm muaj  hwj huam txaus ntshai,
    thiab yuav tshaj koj lub hwj huam loj kawg nkaus.
    Neeg yuav cav txog koj lub siab zoo siab dav tas nrho,
    thiab yuav qw ntsuag qees cav txog koj lub siab ncaj.

    Txais:    (1)  Huab Tais, kuv yuav cav txog koj lub npe mus li.

    As Les Lus Yas:       MT  24:   42A, 44

    Txais:   As les lus yas, as les lus yas.

    Nej zov hmo mas!
    Vim nej tsis paub thaum twg Neeg Leej Tub yuav los.

    Txais:   As les lus yas, as les lus yas.

    Ntawv Moo Zoo:     MT  24:   42-51

    Yes Xus hais tias:
    42 “Nej zov hmo! Vim nej tsis paub hnub twg nej tus Huab Tais yuav los. 43 Nej yeej paub tseeb tias : yog tus tswv tsev paub tias hmo ntuj, lub sij hawm twg tub sab yuav tuaj, mas nws yuav zov hmo, tsis cia tub sab tho qhov tsev. 44 Nej kuj yuav ua li ntawd, nej yuav npaj kom txhij cia, vim Neeg Leej Tub yuav lo sib lub sij hawm uas nej tsis nco faj.
    45 “Leej twg yog tus tub txib pheej xeeb thiab xyuam xim, uas tus tswv tsev tsa nws ua tus saib nws tsev neeg, kom thaum txog caij no movj, nws faib txhiam xws rau sawv daws noj ? 46 Tus tub txib uas tus tswv tsev rov los pom tab tom lis tej num li ntawd, yuav tau txoj hmoov zoo. 47 Kuv hais tseeb rau nej, tus tswv yuav tsa nws ua tus saib tus tswv lub cuab tam tas huv si. 48 Tab sis yog tus tub txib ntawd siab phem nws xav tias : “Kuv tus tswv yuav los lig.” 49 Ces nws muab lwm cov tub txib nrog nws nyob ntaus, nws mus nrog cov quav dej quav cawv noj thiab haus,  50 Nws tus tswv yuav rov los ib hnub uas nws tsis nco faj, thiab ib lub sij hawm uas nws tsis paub. 51 Tus tswv yuav rau txim loj rau nws, yuav ntiab nws mus nyob ib qho chaw nrog cov neeg uas zoo nraum daim tawv xwb. Nyob ntawd, sawv daws yuav quaj yuav qw tom hniav nkawv.


    Last edited by Mim on 27th August 2016, 4:00 am; edited 2 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 26th August 2016, 5:41 pm

    TIM     26    LUB    8     HLI     2016

    Hnub Rau Lis Piam Nees Nkaum Ib Nruab Xyoo C Nruab Lis Piam Xyoo II    

    Hwm LN  Monica, LN Augustine niam

    Zaj Nyeem Ib:      1  KLN  1:   17-25


    Cov kwv tij:
    17 Leej Pleev tsis xa kuv mus ua lub Cim Ntxuav, nws xa kuv mus tshaj lub Moo Zoo ; nws tsis ua kom kuv txawj hais tej lo lus thoob tsib zoo mloog, kom kuv txhob saib Leej Pleev tus ntoo cuam yog ib qho tsis muaj nuj nqis. 18 Cov neeg taug txoj kev ploj, lawv saib zaj tswv yim tuaj ntawm ntoo cuam tuaj yog ib zag vwm. Tab sis peb cov neeg uas txais kev cawm, peb saib ntoo cuam zaj tswv yim yog Tswv Ntuj lub hwj huam. 19 Vim muaj lus sau tseg tias : ‘Kuv yuav rhuav cov neeg thoob tsib txoj kev thoob tsib, kuv yuav tshem cov neeg ntse txoj kev txawj ntse tawm.' 20 Tus neeg thoob tsib nyob qhov twg ? Tus neeg txawj sau ntawv dua qhov twg lawm ? Tus neeg txawj nrog luag sib cav hais tswv yim tiam neej no nyob qhov twg? Tswv Ntuj tsis tau ua kom ntiaj teb txoj kev thoob tsib yog kev vwm lod ?  21 Vim ntiaj teb txoj kev thoob tsib mas ntiaj teb thiaj zeem tsis tau Tswv Ntuj nyob hauv Tswv Ntuj txoj kev thoob tsib, vim li ntawd Tswv Ntuj thiaj pom zoo muab txoj kev vwm hauv lub Moo Zoo peb tshaj los cawm cov neeg ntseeg. 22 Vim tias cov Yus Das taij hwj huam yees ntxwv ; cov Hes Las nrhiav kev thoob tsib,  23  hos peb, mas peb tshaj Leej Pleev dai saum ntoo cuam : yog ib qho phem kawg nkaus rau cov Yus Das , yog ib zag vwm rau cov neeg teev dab qhuas. 24 Tab sis cov uas Ntuj hu lawv, tsis hais Yus Das los Hes Las, mas lawv saib Yes Xus yog Leej Pleev, yog Tswv Ntuj lub hwj huam, yog Tswv Ntuj txoj kev Thoob Tsib. 25 Vim tias Tswv Ntuj txoj kev vwm, mas tseem thoob tsib dua neeg kev thoob tsib, thiab Tswv Ntuj txoj kev tsis muaj zog, mas tseem muaj zog dua neeg kev muaj zog

    NPN      33:   1-2, 4-5, 10-11

    Txais:   (5) Lub ntiaj teb puv nkaus Huab Tais txoj kev hlub.

    Cov neeg siab ncaj, nej cia li zoo siab nyob hauv HUAB TAIS,
    txoj kev qhuas Huab Tais phim tus neeg siab ncaj.
    Nej ntaus nkauj nog ncas ua HUAB TAIS tsaug,
    nej ntaus thaj cheej kaum txoj hlua cav txog nws.

    Txais:   (5) Lub ntiaj teb puv nkaus Huab Tais txoj kev hlub.

    HUAB TAIS lo lus yog lus ncaj,
    nws tej num yog num tseeb.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    Txais:   (5) Lub ntiaj teb puv nkaus Huab Tais txoj kev hlub

    HUAB TAIS ua kom cov hauj lwm tsoom kuj cuab npaj mus tsis taus,
    Nws ua kom cov haiv neeg zaj tswv yim tsheej xeeb tsis tau.
    Cov hauj lwm HUAB TAIS npaj yuav nyob mus li,
    Zaj tswv yim nws lub siab xav tau yuav nyob txheej dhau txheej.

    Txais:   (5) Lub ntiaj teb puv nkaus Huab Tais txoj kev hlub.

    As Les Lus Yas:      LK  21:   36

    Txais:   As les lus yas, as les lus yas.

    Nej ua ib co neeg feeb meej tas mus li, nej teev Ntuj tsis tseg,
    nej thiaj yuav muaj zog sawv taus ntseg ntawm Neeg Leej Tub xub ntiag.

    Txais:   As les lus yas, as les lus yas.

    Ntawv Moo Zoo:    MT  25:   1-13

    Yes Xus hais zaj paj lug no rau nws cov thwj tim:
    1 “Ntuj lub Ceeb Tsheej yuav zoo xws li kaum leej ntxhais hluas taws teeb tawm mus tos nraug vauv. 2 Nyob hauv lawv, muaj tsib leeg ruam, hos tsib leeg xyuam xim. 3 Cov ruam nqa teeb, tab sis tsis nqa roj nrog. 4 Hos cov xyuam xim nqa teeb thiab ntim roj rau hauv hwj nrog. 5 Nraug vauv los lig lig, ces lawv qaug dab ntub. Sawv daws tsaug zog tas. 6 Thaum ib tag hmo, ib lub suab nthe tias : “Nraug vauv los txog lawm ! Nej tawm los txais nws !” 7 Ces tas cov ntxhais hluas sawv los npaj teeb. 8 Cov ruam hais rau cov xyuam xim tias : “Nej pub ib qho roj rau peb mas, peb cov teeb tuag lawm." 9 Tab sis cov xyuam xim teb rau cov ruam tias : “Ntshai roj yuav tsis txaus rau nej thiab rau peb. Nej mus muas roj tom cov tub luam rau nej.” 10 Thaum cov ntxhais ruam mus muas roj lawm, ces nraug vauv los txog. Cov uas tau npaj txhij tos, nrog nraug vauv chaws mus hauv chav tsev ua tshoob, ces luag kaw qhov rooj rau. 11 Thaum kawg, lwm cov ntxhais los txog thiab, lawv hais tias : “Huab Tais, Huab Tais, thov koj qhib qhov rooj rau peb.” 12 Tab sis nraug vauv teb tias : “Kuv hais tseeb rau nej, kuv tsis paub nej yog leej twg !” 13 Ua li mas nej zov hmo mog, vim nej tsis paub hnub twg los lub sij hawm twg.”


    Last edited by Mim on 27th August 2016, 4:12 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 27th August 2016, 3:19 am

    TIM 27 LUB 8 HLI 2016

    Hnub Xya Lis Piam Nees Nkaum Ib Nruab Xyoo C Nruab Lis Piam Xyoo II

    Hwm LN Monica – Nyeem nws lub neej: https://hmongcatholique.forumdediscussions.com/t1380-leej-ntshiab-mos-nis-kas

    Zaj Nyeem Ib: 1 KLN 1: 26-31


    26 Kwv tij sawv daws, nej yuav rov xav txog tias Ntuj xaiv nej zoo li cas : nyob hauv nej, yeej tsis muaj ntau leej uas neeg saib muaj kev thoob tsib, tsis muaj ntau leej muaj hwj chim, tsis muaj ntau leej yug los ua tub huab tais. 27 Tiam sis cov neeg uas lub ntiaj teb saib lawv ruam, mas Tswv Ntuj xaiv lawv, kom cov neeg thoob tsib poob ntsej muag. Cov neeg uas lub ntiaj teb saib lawv tsis muaj peev xwm, mas Tswv Ntuj xaiv lawv, kom cov muaj peev xwm poob ntsej muag. 28 Thiab cov neeg uas lub ntiaj teb saib lawv qis qis thiab ntxub lawv, thiab cov uas luag saib tsis tsim txiaj, mas Tswv Ntuj xaiv lawv kom cov tsim tsim txiaj poob ua neeg tsis tsim txiaj dab tsi ntxiv. 29 Ua li mas tsis muaj ib tug neeg yuav khav tau txog nws tus kheej nyob ntawm Tswv Ntuj xub ntiag. 30 Yog Tswv Ntuj tsa kom nej nyob hauv Yes Xus Pleev : Yes Xus yog peb txoj kev thoob tsib tuaj ntawm Tswv Ntuj tuaj, yog peb txoj kev ncaj, peb txoj kev ntshiab, thiab peb txoj kev cawm, 31 kom thiaj muaj raws nraim li Ntawv hais tias : ‘Tus twg xav khav mas nws yuav tsum khav nyob hauv Huab Tais nkaus xwb.’

    NPN 33: 12-13, 18-19, 20-21

    Txais: (12) Haiv neeg Huab Tais xaiv ua nws tug lawv txoj hmoov zoo.

    Haiv neeg uas lawv tus Tswv Ntuj yog HUAB TAIS, lawv txoj hmoov zoo!
    Haiv neeg uas nws xaiv ua nws lub cuab tam, lawv txoj hmoov zoo!
    Nyob txheej ntuj saud, HUAB TAIS dauv muag los ntsia,
    nws pom tas nrho ib tsoom neeg.

    Txais: (12) Haiv neeg Huab Tais xaiv ua nws tug lawv txoj hmoov zoo.

    HUAB TAIS lub qhov muag saib ntsoov cov neeg hwm nws,
    saib ntsoov cov tso siab rau nws txoj kev hlub;
    nws yuav npo lawv dim ntawm kev tuag,
    thiab yuav txuag lawv txoj sia thaum muaj kev tshaib plab.

    Txais: (12) Haiv neeg Huab Tais xaiv ua nws tug lawv txoj hmoov zoo.

    Peb tus ntsuj plig tos ntsoov HUAB TAIS:
    nws yog tus pab peb, nws yog peb daim leem phiaj !
    Vim nyob hauv Huab Tais peb muaj kev zoo siab,
    nws lub npe ntshiab yog peb chaw tso siab.

    Txais: (12) Haiv neeg Huab Tais xaiv ua nws tug lawv txoj hmoov zoo.

    As Les Lus Yas: ZAM 13: 34

    Txais: As les lus yas, as les lus yas.

    Kuv muab ib lo lus qhia tshiab rau nej :
    Nej yuav rov sib nyiam sib hlub ib yam li kuv tau nyiam tau hlub nej.

    Txais: As les lus yas, as les lus yas.

    Ntawv Moo Zoo: MT 25: 14-30

    Yes Xus hais zaj paj lug no rau lawv tias:
    14 “Yog zoo li ib tug neeg uas yuav mus tawm rooj deb, nws hu nws cov tub txib los, nws muab nws lub cuab tam rau lawv ceev. 15 Nws muab tsib nras nyiaj rau thawj tug, muab ob nras rau tus ob, hos muab ib nras xwb rau tus peb. Nws muab rau lawv raws li lawv lub peev xwm, ces nws mus tawm rooj mus deb lawm. Tam sis ntawd, 16 tus uas tau txais tsib nras nyiaj, nqa cov nyiaj ntawd mus ntxeev, nws tau paj tsib nras ntxiv. 17 Tus tau txais ob nras kuj ua li ntawd thiab, nws tau paj ob nras ntxiv. 18 Hos tus tau txais ib nras xwb mus khawb ib lub qhov rau hauv av, nws muab tus tswv nras nyiaj coj mus faus rau hauv. 19 Ib lub sij hawm ntev loo tom qab, cov tub txib tus tswv rov los txog. Nws nrog lawv txheeb nws cov nyiaj. 20 Tus uas tau txais tsib nras nyiaj tuaj txog. Nws cev tsib nras ntxiv, nws hais tias : “Huab Tais, tsib nras nyiaj no yog koj muab rau kuv, hos ntawm no yog tsib nras uas kuv coj mus ntxeev tau paj ntxiv.” 21 Tus tswv hais rau nws tias : “Zoo kawg, tub txib siab zoo siab ncaj, thaum koj saib tej yam tsawg, koj ua ncaj, kuv yuav tsa koj los saib ntau yam. Koj los nyob hauv koj tus huab tais txoj kev zoo siab mog.” 22 Ces tus tau txais ob nras tuaj txog, nws hais tias : “Huab Tais, ob nras nyiaj no yog koj muab rau kuv : hos ntawm no yog ob nras uas kuv coj mus ntxeev tau paj ntxiv.” 23 Nws tus tswv hais rau nws tias : “Zoo kawg, tub txib siab zoo siab ncaj, thaum koj saib tej yam tsawg li no, koj ua ncaj, kuv yuav tsa koj los saib ntau yam. Koj los nyob hauv koj tus huab tais txoj kev zoo siab mog.” 24 Tus tub txib uas tau txais ib nras nyiaj xwb tuaj txog, nws hais tias : “Huab Tais, kuv paub tias koj yog ib tug neeg siab heev. Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau. 25 Kuv ntshai, kuv thiaj coj koj nras nyiaj mus faus rau hauv av. Saib ntawm no, koj rov tau yam uas yog koj tug.” 26 Ces tus tswv teb rau nws tias : “Tub txib siab phem thiab tub nkeeg, koj twb paub tias kuv hlais nplej hauv tej teb uas kuv tsis tau tseb, thiab kuv sau qoob hauv tej chaw uas kuv tsis tau pov noob rau, 27 tsim nyog koj yuav nqa kuv cov nyiaj mus rau cov tub ceev nyiaj, thaum kuv rov los, kuv yuav tau kuv cov nyiaj nrog cov paj. 28 Nej rho nras nyiaj ntawm nws mus, nej muab rau tus uas muaj kaum nras lawm. 29 Vim tias Ntuj yuav pub rau tus uas twb muaj lawm, ces nws yuav tau ntau ntxiv. Hos tus uas tsis muaj, Ntuj yuav thau qhov me me uas nws muaj. 30 Nej muab tus tub txib tsis tsim txiaj ntawd pov rau nraum zoov hauv qhov tsaus ntuj : nyob ntawd yuav muaj kev quaj vwm leg thiab tom hniav nkawv.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 28th August 2016, 8:18 am

    TIM 29 LUB 8 HLI 2016

    Hnub Ob Lis Piam Nees Nkaum Ob Nruab Xyoo C Nruab Lis Piam Xyoo II

    Nco Txog LN Zam Ntxuav Plig Txoj Kev Raug Txom Nyem

    Zaj Nyeem Ib: 1 KLN 2: 1-5


    1 Cov kwv tij, ntawm kuv mas, thaum kuv tuaj tim nej, kuv tsis tau siv ib co lus muaj hwj chim thiab lus thoob tsib los tshaj lub ntsiab tob txog Tswv Ntuj rau nej. 2 Thaum kuv nrog nej nyob, kuv xav ua tus tsis paub dab tsi li, tsuas paub txog Yes Xus Pleev ib leeg xwb, tus Yes Xus Pleev uas tuag nyob saum ntoo cuam nkaus. 3 Kuv ua tus neeg tsis muaj peev xwm, tus neeg ntshai ntshai thiab txhawj tshee na rau nej pom xwb. 4 Kuv tej lus kuv tuaj hais thiaj tuaj tshaj rau nej tsis yog ib co lus thoob tsib ntse ntsuav hais los ntxias neeg. Kuv tej lus yog ib zag txuj tawm hauv lub tswv tim thiab lub hwj huam los, 5 kom nej txoj kev ntseeg tsis txhob txawb rau saum neeg kev thoob tsib tiam sis txawb rau saum Tswv Ntuj lub hwj huam.

    NPN 119: 97, 98, 99, 100, 101, 102

    Txais: (97) Huab Tais, kuv nyiam koj cov lus qhia.

    Huab Tais, kuv nyiam koj Txoj Cai tas nrho,
    kuv muab coj los xav tuaj nruab siab tas hnub.

    Txais: (97) Huab Tais, kuv nyiam koj cov lus qhia.

    Koj lo lus qhia ua kom kuv thoob tsib dua kuv cov yeeb ncuab,
    kuv muab khaws los ua kuv tug mus li.

    Txais: (97) Huab Tais, kuv nyiam koj cov lus qhia.

    Kuv to taub ntau dua kuv cov xib hwb huv si,
    vim kuv muab koj cov lus qhia coj los xav los kawm.

    Txais: (97) Huab Tais, kuv nyiam koj cov lus qhia.

    Kuv txawj xav tom ntej tom qab dua cov txwj laus,
    vim kuv coj koj cov lus qhia nraim.

    Txais: (97) Huab Tais, kuv nyiam koj cov lus qhia.

    Kuv maim txhua txoj kev phem,
    kom kuv coj tau raws koj cov lus.

    Txais: (97) Huab Tais, kuv nyiam koj cov lus qhia.

    Kuv tsis ncaim ntawm txoj cai koj tau txiav,
    vim koj yog tus cob qhia kuv.

    Txais: (97) Huab Tais, kuv nyiam koj cov lus qhia.

    As Les Lus yas: MT 5: 10

    Txaiz: As les lus yas, as les lus yas.

    Cov tau txoj hmoov zoo yog cov raug luag hiam vim txoj kev ncaj,
    Ntuj lub Ceeb Tsheej yog lawv tug.

    Txaiz: As les lus yas, as les lus yas.

    Ntawv Moo Zoo: MK 6: 17-29

    17 Yog tim Hes Los Dias, mas Hes Los thiaj xa neeg mus ntes Zam thiab muab saw hlau khi Zam rau hauv tsev loj faj. Hes Los Dias yog Hes Los tij laug Fis Lis Pos tus poj niam, tab sis Hes Los yuav los ua nws poj niam. 18 Zam hais rau Hes Los tias : "Koj tsis muaj cai yuav koj tij laug tus poj niam." 19 Ces Hes Los Dias cia li ntxub Zam tas siab tas ntsws, nws xav muab Zam tua, tab sis nws tua tsis tau, 20 vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas ua rau nws ntxhov siab, tab sis nws kuj nyiam mloog Zam thiab. 21 Muaj ib lub zoo sij hawm los txog, yog hnub tsuj xeeb Hes Los yug. Hes Los ua ib roog qav caw cov nom tswv hauv nws lub loog, cov thawj tub rog, thiab cov nom loj hauv xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev. Nws dhia tau ntxim Hes Los thiab cov qhua koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav yuav dab tsi, kuv yuav muab rau koj." 23 Ces tus vaj cog lus rau tus ntxhais tias : "Koj thov yam twg, mas kuv yuav muab rau koj, tab yog ib nrab ntawm lub teb chaws kuv kav !" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sim ntawd, tus ntxhais rov ntsuj los ntawm tus vaj, nws hais tias : "Kuv xav kom koj muab Zam Ntxuav Plig lub taub hau tso hauv ib lub phaj, cev rau kuv tam sim no." 26 Tus vaj tu siab kawg, tab sis vim nws tau cog lus thiab vim muaj cov qhua, nws thiaj tsis xav thim nws lo lus. 27 Ces tus vaj txib ib tug zov keeb tam sim ntawd, kom mus nqa Zam lub taub hau los. 28 Tus zov keeb mus txiav Zam caj dab hauv tsev loj faj, nws nqa Zam lub taub hau txawb hauv ib lub phaj los cev rau tus ntxhais. Tus ntxhais muab rau nws niam. 29 Zam cov thwj tim hnov li ntawd, lawv tuaj kwv Zam lub cev mus tso rau hauv ib lub ntxa.




    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 29th August 2016, 1:02 pm

    TIM 30 LUB 8 HLI 2016

    Hnub Peb Lis Piam Nees Nkaum Ob Nruab Xyoo C Nruab Lis Piam Xyoo II

    Zaj Nyeem Ib: 1 KLN 2: 10B-16


    10 Leej Ntuj Plig tsom tau tas puas tsav yam, nws tsom tau tej yam tob nyob hauv Tswv Ntuj tib si. 11 Nyob hauv ib tsoom neeg, leej twg thiaj paub tau yam zais puag hauv neeg nruab siab ? Tsuas yog tus neeg ntawd lub tswv yim uas nyob hauv nws xwb thiaj paub. Nyob hauv Tswv Ntuj kuj zoo ib yam, tsis muaj leej twg paub tej yam zais nyob hauv Tswv Ntuj, tsuas yog Tswv Ntuj Leej Tswv Yim xwb thiaj paub.
    12 Ntawm peb, mas lub tswv yim uas peb txais tsis yog ntiaj teb lub tswv yim ; peb txais Leej Tswv Yim uas tuaj ntawm Tswv Ntuj tuaj, kom peb to taub cov txiaj ntsim uas Tswv Ntuj tau pub dawb paug rau peb. 13 Thaum peb hais txog cov txiaj ntsim ntawd, mas peb tsis siv cov lus uas neeg kev thoob tsib qhia, peb siv cov lus uas Leej Tswv Yim qhia, peb thiaj paub siv ib co lus sab ntsuj plig los qhia txog tej yam nyob sab ntsuj plig.
    14 Tib neeg nqaij tawv tsis xav txais tej yam tuaj ntawm Tswv Ntuj Leej Tswv Yim tuaj, nws xav tias yog ib zag vwm xwb; nws tsis to taub tej ntawd li, vim yuav tsum siv lub tswv yim los xav thiaj to taub. 15 Tus neeg siv tswv yim los xav, mas nws txiav txim tau rau tas txhua yam, tiam sis tsis muaj leej twg txiav txim tau rau nws. 16 Vim tias “leej twg thiaj yuav paub tau Huab Tais zaj tswv yim, kom nws pab tau tswv yim rau Huab Tais ?” Ntawm peb mas peb muaj Leej Pleev zaj tswv yim.

    NPN 145: 8-9, 10-11, 12-13AB, 13CD-14

    Txais: (17) Huab Tais tej kev yog kev ncaj tas tib si.

    Huab Tais yog txoj kev hlub mos thiab khuv leej neeg,
    nws npau taws qeeb, nws lub siab puv kev hlub.
    Huab Tais ua zoo rau txhua leej txhua tus,
    nws muab nws txoj kev hlub mos rau txhua yam nws tau tsim.

    Txais: (17) Huab Tais tej kev yog kev ncaj tas tib si.

    HUAB TAIS, cia koj txhua yam hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    thiab piav txog koj lub hwj huam loj.

    Txais: (17) Huab Tais tej kev yog kev ncaj tas tib si.

    Cia lawv qhia rau neeg paub txog koj lub hwj huam loj
    thiab koj lub Ceeb Tsheej muaj hwj chim ci ntsa iab.
    Koj lub Ceeb Tsheej yog ib lub Ceeb Tsheej txais tas cov hlob nrog cov yau,
    thiab koj txoj kev tswj kav yuav nyob mus txheej dhau txheej.

    Txais: (17) Huab Tais tej kev yog kev ncaj tas tib si.

    Huab Tais tej lus yog qhov tseeb,
    nws tej dej num yog kev hlub.
    Huab Tais rub cov ntog kom sawv taus los,
    nws tsa cov khoov nkoos kom sawv taus ntseg.

    Txais: (17) Huab Tais tej kev yog kev ncaj tas tib si.

    As Les Lus Yas: LK 7: 16

    Txais: As les lus yas, as les lus yas.

    Ib tug yaj saub loj sawv los nyob hauv peb,
    Yog Tswv Ntuj tuaj xyuas nws haiv neeg.

    Txais: As les lus yas, as les lus yas.

    Ntawv Moo Zoo: LK 4: 31-37

    31 Yes Xus nqes mus nram Kas Fas Naus uas yog ib lub nroog nyob hauv xeev Nkas Lis Lais. Hnub Xas Npas Tos, nws qhia lawv, 32 sawv daws qhuas txog nws cov lus qhia, vim nws hais lus muaj hwj chim. 33 Nyob hauv lub tsev txoos ntawd, muaj ib tug neeg raug ib tug dab tsis huv, nws qw nrov nrov tias : 34 "Yes Xus Nas Xas Les, koj xav ua dab tsis rau peb ? Puas yog koj tuaj muab peb rhuav ? Kuv paub koj yog leej twg : koj yog Tswv Ntuj tus Ntshiab." 35 Yes Xus cem nws tias : "Ua twj ywm ! Koj tawm ntawm nws mus!" Ces dab tsis huv muab tus neeg thawb ntiag rau hauv av nyob ntawm sawv daws xub ntiag, ces nws tawm hauv tus neeg mus, tsis ua xwv txheej dab tsi rau tus neeg ntawd. 36 Tas lawv sawv daws yoob tag, lawv sib hais zom zaws tias : "Nws lo lus muaj dab tsi ? Cas nws siv hwj huam thiab hwj chim yuam dab tsis huv, ces dab cia li tawm mus lawm." 37 Ib lub moo qhuas txog Yes Xus thiaj li nrov mus rau tas txhua lub zos nyob ib ncig thaj tsam ntawd


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 30th August 2016, 1:30 pm

    TIM 31 LUB 8 HLI 2016

    Hnub Plaub Lis Piam Nees Nkaum Ob Nruab Xyoo C Nruab Lis Piam Xyoo II

    Zaj Nyeem Ib: 1 KLN 3: 1-9


    1 Cov kwv tij, thaum kuv hais lus rau nej yog kuv hais xws li hais rau ib co neeg uas yog tswv yim mas tsis tau, kuv hais lus rau nej tsuas hais li hais rau ib co neeg muaj lub cev nqai xwbj, thiab xws li hais rau ib co me nyuam mos nyob hauv Leej Pleev xwb. 2 Yav tas, kuv muab kua mis pub rau nej haus, tsis tau muab txhiam xws khov rau nej noj, vim nej txais tsis tau. Tab nyem no los nej tseem txais tsis tau tau, vim nej tseem zwm rau lub cev nqaij. 3 Nyob hauv nej, thaum nej muaj chaw sib khib thiabnej sib muaj lus, mas zoo li yog vim nej yog neeg nqaij tawv los tsis sub, thiab zoo li yog nej coj tus yam ntxwv uas yog neeg tus yam ntxwv xwb los tsis yog ? 4 Thaum nej muaj ib tug hais tias : ‘Kuv yog Paj Lug tog,’ los tseem muaj lwm tus hais tias : ‘Kuv yog As Pos Los tog,’ mas tej lus ntawd tsis yog tib neeg nqaij tawv tej lus xwb lod ? 5 As Pos Los ho yog leej twg ? Paj Lug ho yog leej twg ? Nkawd yog ob tug tub tshaj Ntuj lus rau nej ces nej thiaj tau los ua neeg ntseeg; nkawd nyias tshaj raws li Tswv Ntuj pub rau nyias. 6 Kuv yog tus cog, As Pos Los ywg dej rau, tiam sis Tswv Ntuj yog tus ua kom hlob. 7 Li ntawd, tus cog tsis tseem ceeb dab tsi ; tus ywg dej los kuj tsis tseem ceeb dab tsi ; Tswv Ntuj uas yog tus ua kom hlob, nws thiaj yog tus tseem ceeb xwb. 8 Tus cog thiab tus ywg dej, nkawd ob leeg yog ib tug nkaus xwb; tab sis nyias yuav txais nyias nqe zog raws li nyias kev khwv. 9 Vim tias peb yog cov nrog Tswv Ntuj ua hauj lwm ; nej yog Tswv Ntuj daim teb, nej yog Tswv Ntuj lub tsev.

    NPN 33: 12-13, 14-15, 20-21

    Txais: (12) Haiv neeg Huab Tais xaiv ua nws tug lawv txoj hmoov zoo.

    Haiv neeg uas lawv tus Tswv Ntuj yog HUAB TAIS, lawv txoj hmoov zoo!
    Haiv neeg uas nws xaiv ua nws lub cuab tam, lawv txoj hmoov zoo!
    Nyob txheej ntuj saud, HUAB TAIS dauv muag los ntsia,
    nws pom tas nrho ib tsoom neeg.

    Txais: (12) Haiv neeg Huab Tais xaiv ua nws tug lawv txoj hmoov zoo.

    Nws zaum saum nws lub rooj tsis ua zog,
    nws ntsia pom ib tsoom neeg nyob ntiaj teb.
    Nws yog tus puab txhua leej txhua tus lub siab,
    nws soj ntsuam txhua txoj hauj lwm lawv ua.

    Txais: (12) Haiv neeg Huab Tais xaiv ua nws tug lawv txoj hmoov zoo.

    Peb tus ntsuj plig tos ntsoov HUAB TAIS:
    nws yog tus pab peb, nws yog peb daim leem phiaj !
    Vim nyob hauv Huab Tais peb muaj kev zoo siab,
    nws lub npe ntshiab yog peb chaw tso siab.

    Txais: (12) Haiv neeg Huab Tais xaiv ua nws tug lawv txoj hmoov zoo.

    As Les Lus Yas: LK 4: 18

    Txais: As les lus yas, as les lus yas.

    Huab Tais xa kuv mus tshaj lub Moo Zoo rau cov pluag
    Thiab mus ceeb toom rau cov nyob txim tias lawv yuav dim.

    Txais: As les lus yas, as les lus yas.

    Ntawv Moo Zoo: LK 4: 38-44

    38 Yes Xus tawm hauv lub tsev txoos mus, nws nkag hauv Xis Moos lub tsev. Xis Moos niam tais muaj mob kub cev heev, ces lawv thov kom Yes Xus mus saib Xis Moos niam tais. 39 Yes Xus thiaj khoov mus saib niam tais, nws cem tus mob kub cev, ces tus mob tso plhuav niam tais tseg. Niam tais sawv tsees tam sis ntawd, nws pib txais tos lawv.
    40 Thaum lub hnub poob qho, cov uas muaj neeg raug tej hom mob, sawv daws coj lawv cov neeg mob tuaj rau Yes Xus. Ces Yes Xus tsa tes rau saum lawv ib leeg zuj zus, nws kho sawv daws zoo tas huv si. 41 Ib co dab phem kuj tawm hauv coob leej mus, dab phem qw qw tias : "Koj yog Tswv Ntuj Leej Tub." Tab sis Yes Xus cem lawv, nws txwv tsis pub lawv hais lus, vim lawv paub tias nws yog Leej Pleev.
    42 Thaum kaj ntug, Yes Xus tawm mus rau ib qho chaw tsis muaj neeg. Tsoom sid nrhiav nws, lawv tuaj txog ntawm nws, lawv xav cheem Yes Xus kom txhob mus deb ntawm lawv. 43 Tab sis Yes Xus hais rau lawv tias : "Kuv yuav tsum tshaj lub Moo Zoo hais txog Tswv Ntuj lub Ceeb Tsheej rau lwm cov nroog thiab. Yog vim qhov ntawd, Ntuj thiaj xa kuv tuaj." 44 Ces Yes Xus mus qhuab qhia nyob hauv cov tsev txoos nyob Yus Das teb.




    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 31st August 2016, 9:38 am

    TIM 1 LUB 9 HLIS 2016

    Hnub Tsib Lis Piam Nees Nkaum Ob Nruab Xyoo C Nruab Lis Piam Xyoo II

    Zaj Nyeem Ib: 1 KLN 3: 18-23


    Cov kwv tij,
    18 Nej txhob yuam kev. Yog nyob hauv nej, leej twg xav tias tiam no nws yog neeg thoob tsib, mas nws yuav tsum ua neeg vwm, kom nws thoob tsib tuaj. 19 Vim Tswv Ntuj saib ntiaj teb txoj kev thoob tsib yog ib txog kev vwm. Muaj ib lo lus sau tseg tias : ‘Tswv Ntuj ua kom cov thoob tsib rov mag lawv txoj kev ntse.’ Tseem muaj dua ib los sau tias : 20 “Huab Tais paub cov neeg thoob tsib xav dab tsi : nws paub tias lawv zaj tswv yim tsis muaj nuj nqes.” 21 Li ntawd, nej txhob muaj ib tug nrhiav koob meej nyob hauv tib neeg. 22 Vim tas txhia yam yog nej tug, tsis hais Paj Lug, los As Pos Los, los Kes Fas, los lub ntiaj teb, los txoj sia, los txoj kev tuag, los lub zim txwv no, los yav tom ntej : tas txhua yam ntawd yog nej tug. 23 Tab sis nej yog Leej Pleev tug, Leej Pleev yog Tswv Ntuj tug.

    NPN 24: 1BC-2, 3-4AB, 5-6

    Txais: (1) Lub ntiaj teb thiab puas tsav yam nyob hauv yog HUAB TAIS li.

    Lub ntiaj teb thiab puas tsav yam nyob hauv yog HUAB TAIS li,
    lub sim ceeb thiab cov nyob hauv yog nws tug.
    Vim nws yog tus tsim lub ntiaj teb los txawb rau saum cov hiav txwv
    thiab muab tso rau saum cov dej ntws.

    Txais: (1) Lub ntiaj teb thiab puas tsav yam nyob hauv yog HUAB TAIS li.

    Leej twg thiaj yuav nce tau saum HUAB TAIS lub roob?
    Los leej twg thiaj yuav mus sawv taus nyob hauv nws thaj chaw ntshiab?
    Yog tus uas txhais tes tsis muaj txhaum, lub siab dawb huv,
    tus uas tsis ntshaw tej yam tsis muaj qab hau.

    Txais: (1) Lub ntiaj teb thiab puas tsav yam nyob hauv yog HUAB TAIS li.

    HUAB TAIS yuav foom koob hmoov rau nws. ,
    yog paj tshab tuaj ntawm Tswv Ntuj tus cawm nws tuaj.
    Lawv yuav zoo li no, tsav neeg uas nrhiav Tswv Ntuj,
    cov uas nrhiav Yas Kos tus Tswv Ntuj lub ntsej muag.

    Txais: (1) Lub ntiaj teb thiab puas tsav yam nyob hauv yog HUAB TAIS li.

    As Les Lus Yas: MT 4: 19

    Txais: As les lus yas, as les lus yas.

    Huab Tais hais tias: Nej raws kuv mus,
    kuv yuav tsa nej ua cov tub puav neeg.

    Txais: As les lus yas, as les lus yas.

    Ntawv Moo Zoo: LK 5: 1-11

    1 Muaj ib zaug, Yes Xus nyob ntawm ntug pas dej Nkes Nes Xas Les, muaj ib pab neeg coob tuaj txiv Yes Xus kom tau mloog Tswv Ntuj Lo Lus ntawm nws. 2 Yes Xus pom ob lub nkoj nres ntawm ntug dej. Cov tub puav ntses nqes nkoj tas lawm, lawv tseem ntxhua lawv cov vas. 3 Yes Xus nce mus hauv ib lub nkoj, yog Xis Moos lub, nws kom Xis Moos nquam nkoj mus deb ntawm ntug dej me ntsis, ces nws zaum hauv nkoj qhia tsoom sid. 4 Thaum Yes Xus hais lus tas, nws hais rau Xis Moos tias : "Koj nquam nkoj mus lawm tom qhov dej tob, nej tso nej cov vas nqes mus puav ntses." 5 Xis Moos teb tias : "Xib Hwb, peb twb khwv ib hmos tsis tau dab tsi. Tab sis yog vim koj hais, mas kuv yuav pov cov vas nqes mus." 6 Ces thaum lawv ua li ntawd, lawv puav tau ntses ntau kawg ua lawv cov vas txam kiag. 7 Lawv co tes rau lawv cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog. 8 Xis Moos Pob Zeb pom li ntawd, nws txhos caug ntua pe Yes Xus, nws hais tias "Huab Tais, koj txav mus deb kuv, vim kuv yog ib tug neeg txhaum." 9 Xis Moos ntshai kawg, cov nrog Xis Moos ua ke puav leej ntshai, vim lawv puav tau ntses ntau, 10 Yas Kos thiab Zam, uas yog Ntxes Npes Dais ob tug tub, thiab yog Xis Moos ob tug npawg, nkawd kuj ntshai ib yam thiab. Yes Xus hais rau Xis Moos tias : "Koj txhob ntshai, txij no mus, koj yuav puav neeg." 11 Ces lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus.




    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 2nd September 2016, 10:51 am

    TIM 2 LUB 9 HLIS 2016

    Thawj Hnub Rau Lis Piam Nees Nkaum Ob Nruab Xyoo C Nruab Lis Piam Xyoo II

    Zaj Nyeem Ib: 1 KLN 4: 1-5


    1 Xav kom sawv daws saib peb yog Yes Xus Pleev cov tub txib, thiab yog cov tuav txoj dej num cob qhia txog tej yam ntsiab tob nyob hauv Tswv Ntuj. 2 Qhov uas sawv daws tos ntawm lawv yog kom lawv ua ib co neeg sawv daws tso siab rau tau. 3 Nej yuav txiav txim rau kuv, los ib pab txwj laus yuav txiav txim rau kuv, kuj tau nyob ntawm nej ! Kuv tsis rov txiav txim rau kuv tus kheej. 4 Kuv tsis pom tias kuv muaj txim, tiam sis kuv hais tsis tau tias kuv tsis muaj txim. Tus yuav txiav txim rau kuv kawg yog Huab Tais xwb. 5 Li ntawd mas nej tsis txhob maj txiav txim rau luag ua ntej lub caij teem tseg, uas yog lub caij Huab Tais yuav los. Ces nws yuav qhib tej yam zais nyob hauv qhov tsaus ntuj kom tawm los, nws yuav ua kom sawv daws pom yam npog nyob hauv neeg lub siab. Thaum ntawd peb nyias yuav txais Tswv Ntuj lo lus qhuas txog nyias.

    NPN 37: 3-4, 5-6, 27-28, 39-40

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Nej tso siab rau HUAB TAIS thiab ua qhov zoo,
    ces nej yuav tau nyob hauv lub teb chaws thiab muaj noj nrog kev tso siab.
    Nej zoo siab nyob hauv HUAB TAIS,
    ces nws yuav peb rau nej raws nej lub siab ntshaw.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Muab nej txoj kev taug tso rau HUAB TAIS ua tus saib;
    nej tso siab rau nws ces nws yuav pab. .
    Nws yuav ua kom txoj kev ncaj ncees sawv tuaj ziab nej li qhov pom kev;
    ces nej txoj kev yeej yuav ci npaum thaum tav su nrig.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Koj tso txoj kev phem tseg mus ua qhov zoo,
    koj yuav nyob ruaj nreb hauv qhov zoo mus li.
    Vim HUAB TAIS nyiam txoj kev ncaj,
    nws tsis tso cov neeg ntseeg nws pov tseg.
    Cov neeg siab phem yuav raug luag muab txo kom ploj mus,
    cov tsis hwm Ntuj tsoom tub ki yuav raug luag muab rho tawm.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Txoj kev cawm tus neeg ncaj tuaj ntawm HUAB TAIS tuaj,
    nws yog lawv lub chaw nkaum thaum lawv ntsib kev nyuaj.
    HUAB TAIS pab lawv thiab tso lawv dim,
    nws tso lawv dim ntawm tus phem thiab cawm lawv,
    vim lawv tuaj nkaum hauv nws.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    As Les Lus Yas: ZAM 8: 12

    Txais: As les lus yas, as les lus yas.

    Huab Tais hais tias: "Kuv yog qhov pom kev kaj lub qab ntuj neeg.
    Leej twg lawv kuv qab, nws yuav tau qhov pom kev uas coj mus rau txoj sia."

    Txais: As les lus yas, as les lus yas.

    Ntawv Moo Zoo: LK 5: 33-39

    33 Copv thoob xwm ntawv thiab cov Fas Lis Xais hais rau Yes Xus tias : "Zam cov thwj tim nquag yoo mov thiab hais cov zaj teev Ntuj, cov Fas Lis Xas cov thwj tim kuj ua ib yam li ntawd thiab, hos koj cov thwj tim mas lawv noj thiab lawv haus tas li." 34 Yes Xus hais rau lawv tias : "Nej puas hais kom nraug vauv cov phooj ywg yoo mov thaum nraug vauv tseem nrog lawv nyob ? 35 Yuav muaj ib lub zim txwv uas luag coj nraug vauv lawm, thaum ntawd, lawv mam li yoo mov."
    36 Yes Xus tseem hais ib zag paj lug rau lawv tias : "Tsis muaj leej twg yuav dua ib daig ntaub ntawm lub tsho tshiab los ntxiv rau lub khaub tshos. Vim ua li ntawd ces lub tshiab yuav ntuag, hos daim ntaub dua los kuj tsis phim lub khaub tshos thiab.
    37 Thiab kuj tsis muaj leej twg yuav ntim cov cawv tshiab rau hauv tej qub hnab tawv. Vim tias cov cawv tshiab yuav ua kom cov hnab tawv tawg, ces cawv yuav txeej tas, hos cov hnab tawv los kuj yuav piam sij tas. 38 Ua li mas, yuav tsum muab cawv tshiab ntim rau hauv cov hnab tawv tshiab thiab. 39 Kuj tsis muaj ib tug neeg uas tau haus cawv laus tas, yuav xav haus cawv tshiab, vim Luag yeej hais tias : ‘cawv laus thiaj qab.’"



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 2nd September 2016, 3:00 pm

    TIM 3 LUB 9 HLIS 2016

    Thawj Hnub Xya Lis Piam Nees Nkaum Ob Nruab Xyoo C Nruab Lis Piam Xyoo II

    Hwm LN Gregory tus Loj, ua Vaj Qhia

    Zaj Nyeem Ib: 1 KLN 4: 6B-15


    6 Cov kwv tij, nej yuav tsum kawm ntawm kuv thiab As Pos Los wb , kuv muab wb los ua piv txwv rau kom nej ua raws li lo lus hais tias : “Txhob hais tshaj cov lus nyob hauv Ntawv.” Ces nej thiaj yuav tsis muaj leej twg xav ua neeg khav theeb tuaj ib tug tog thiab thuam lwm tus. 7 Leej twg yog tus muab koj tsa rau qhov siab ? Puas muaj ib yam koj muaj uas koj tsis tau txais ntawm luag tej los ? Yog koj tau txais los, ua cas koj thiaj khav xws li tsis yog koj tau txais los ? 8 Nej yeej muaj noj muaj haus tsau npo, nej yeej muaj txiag nplua nuj kawg lawm; txawm tsis muaj peb los nej yeej tau huab tais ua lawm ! Qhov tseeb tiag, kheev lam nej tau ua huab tais mas, kom peb tau nrog nej ua huab tais thiab !
    9 Vim raws li kuv pom mas Tswv Ntuj muab peb cov uas yog Hauv Paus Xa Lus tso tuaj puag tom tw, xws li ib co neeg raug lub txim tuag; peb raug coj mus sawv ua phiaj rau lub ntiaj teb, rau tsoom Tshiab thiab rau tib neeg ntsia. 10 Peb ua ib co neeg vwm vim Leej Pleev, hos nej ua neeg xyuam xim nyob hauv Leej Pleev. Peb tsis muaj zog ; hos nej muaj zog. Luag saib taus nej, hos peb raug luag thuam. 11 Los txog lub caij nyem no, peb tshaib plab, peb nqhis dej, peb khaub hlab, peb raug luag tsim txom, peb mus rau ub rau no tsis muaj chaw nyob; 12 peb khwv, peb ob txhais tes ua hauj lwm sab. Lawv foom lus phem rau peb, peb foom lus zoo rau lawv. Lawv hiam peb, peb ua siab ntev nyiaj. Lawv hais lus phem txog peb, peb hais lus zoo rau lawv. 13 Los txog niaj hnub no, ntiaj teb neeg saib peb yog tej yam tsis zoo siv tsuas zoo muab pov tseg, thiab yog ib cov npuas tsis huv uas neeg muab yim pov tseg.
    14 Kuv sau tsab ntawv zoo li no tuaj rau nej, tsis yog kuv xav ua kom nej txaj muag, tiam sis yog kuv xav ntuas nej zoo li ib co me nyuam uas kuv hlub xwb. 15 Txawm tias nej muaj txhiab tus xib hwb tuaj qhia nej coj nej mus nyob hauv Leej Pleev los nej tsis muaj ntau leej ua nej txiv : kuv yog nej txiv nyob hauv Yes Xus Pleev, vim kuv xa lub Moo Zoo tuaj rau nej.

    NPN 145: 17-18, 19-20, 21

    Txais: (18) Huab Tais nyob ze txhua leej uas hu txog nws.

    Huab Tais tej kev yog kev ncaj
    nws tej dej num yog kev hlub.
    Huab Tais nyob ze cov hu txog nws,
    cov uas muaj lub siab hu txog nws tiag.

    Txais: (18) Huab Tais nyob ze txhua leej uas hu txog nws.

    Nws pub rau cov neeg hwm nws raws li lawv ntshaw,
    nws hnov lawv lub suab quaj, nws cawm lawv.
    HUAB TAIS txuag cov neeg nyiam nws,
    nws rhuav tshem cov neeg phem tas huv tib si.

    Txais: (18) Huab Tais nyob ze txhua leej uas hu txog nws.

    Kom kuv lub ncauj yeej meem cav txog HUAB TAIS,
    kom txhua yam muaj lub cev nqaij foom lus zoo
    rau nws lub npe ntshiab mus li ib txhiab ib txhis !

    Txais: (18) Huab Tais nyob ze txhua leej uas hu txog nws.

    As Les Lus Yas: ZAM 14: 6

    Txais: As les lus yas, as les lus yas.

    Huab Tais hais tias: "Kuv yog Txoj Kev, Qhov Tseeb, thiab Txoj Sia.
    Tsis muaj leej twg mus cuag Leej Txiv tau, yog nws tsis mus ntawm kuv mus.

    Txais: As les lus yas, as les lus yas.

    Ntawv Moo Zoo: LK 6: 1-5

    1 Muaj ib hnub Xas Npas Tos, Yes Xus hla ib thaj teb npleg, Yes Xus cov thwj tim zaws tej hnab nplej los mos ntawm tes noj. 2 Muaj ib co Fas Lis Xas hais tias : "Vim li cas nej ua tej yam uas hnub Xas Npas Tos yuav tsum caiv ?" 3 Yes Xus teb rau lawv tias : "Nej tsis tau nyeem zaj piav txog qhov Das Vis ua thaum nws thiab cov nrog nws lawv tshaib plab lod ? Nej tsis tau nyeem txog tias Das Vis nkag mus rau hauv Tswv Ntuj lub tsev, mus muab cov ncuav mov txi Ntuj noj, cov mov uas cov leej choj xwb thiaj muaj cai noj, nws muab los noj thiab nws tseem muab rau nws cov kwv luag noj thiab, puas yog ?."
    5 Ces Yes Xus hais rau lawv tias : “Neeg Leej Tub yog tus tswv Hnub Xas Npas Tos."


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 5th September 2016, 5:01 pm

    TIM     5     LUB     9 HLIS     2016

    Hnub Ob Lis Piam Nees Nkaum Peb Nruab Xyoo C Nruab Lis Piam Xyoo II

    Hwm LN Teresa nyob Calcutta, uas Vaj Qhia nyuam qhuav tsa ua Leej Ntshiab nag hmo tim 4 lub 9 hlis 2016

    Zaj Nyeem Ib:     1  KLN  5:   1-8


    1 Peb tau hnov hais tias, nyob tim nej, muaj kev ua dev ua npua qias kawg, tab yog cov neeg teev pej kum dab, lawv tsis ua qias npaum li ntawd:  Yog qhov tias nej ib tug nrog nws txiv tus poj niam ua neej ! 2 Tsis kav nej tseem khav theeb thiab muab hlob kawg nkaus! Twb phim nej yuav tu siab loj kom luag rho tus ua phem li no tawm hauv nej mus.
    3 Ntawm kuv, mas kuv lub cev tsis nrog nej nyob, tab sis kuv lub tswv yim nrog nej nyob;  kuv twb txiav txim nyob hauv Huab Tais Yes Xus lub npe rau tus ua qhov txhaum ntawd lawm, zoo li kuv nrog nej nyob ntag. 4 Thaum nej tuaj sib txoos ua ke thiab kuv lub tswv yim koom nrog nej nyob hauv Huab Tais Yes Xus lub hwj huam, peb yuav muab tus neeg ntawd tso rau Xas Tas kom nws lub cev nqaij raug puas tsuaj tas, tiam sis kom thaum txog Huab Tais Hnub, nws tus ntsuj plig thiaj yuav tau kev dim.
    6 Nej cov lus khav theeb tsis zoo mloog kiag li! Nej puas paub tias, ib qho poov xab me me ua kom tas cov hmoov nplej su tuaj ? 7 Nej ntxuav cov qub poov xab pov tseg, kom nej txia ua ib co hmoov nplej nyuam qhuav do tshiab tshiab, cia ua cov mov tsis xyaw poov xab. Vim Leej Pleev, peb tus Yaj Hla twb tuag txi Ntuj lawm. 8 Li ntawd peb ua lub Ntees Hla, peb tsis txhob siv cov qub poov xab, uas ua kom kev lim hiam thiab kev phem sawv tuaj, tiam sis peb yuav siv cov mov tsis xyaw poov xab, uas ua kom muaj kev dawb huv thiab kev tseeb.

    NPN     5:   5-6, 7, 12

    Txais:   (9) Huab Tais, thov koj coj kuv raws koj txoj kev ncaj.

    Tswv Ntuj, koj tsis zoo siab pom txoj kev phem.
    Tus neeg phem yuav nyob tsis taus nrog koj.
    Tus neeg saib tsis taus luag yuav sawv tsis taus rau koj pom.
    Koj ntxub tas tsoom neeg nrhiav kev ua phem.

    Txais:   (9) Huab Tais, thov koj coj kuv raws koj txoj kev ncaj.

    Koj txo kom cov neeg hais lus cuav ploj mus tag.
    Cov neeg txo luag roj ntsha thiab cov neeg dag,
    HUAB TAIS ntxub lawv tas siab nrho.

    Txais:   (9) Huab Tais, thov koj coj kuv raws koj txoj kev ncaj.

    Kom cov tuaj nkaum hauv koj
    zoo siab thiab hom khaj mus li;
    thov koj txuag lawv, kom cov neeg nyiam
    koj lub npe muaj koj ua lawv kev zoo siab.

    Txais:   (9) Huab Tais, thov koj coj kuv raws koj txoj kev ncaj.

    As Les Lus Yas:    ZAM  10:   27

    Txais:    As les lus yas, as les lus yas.

    Huab Tais hais tias: Kuv cov yaj mloog kuv lub suab;
    kuv paub lawv, lawv raws nraim  kuv qab mus.

    Txais:    As les lus yas, as les lus yas.

    Ntawv Moo Zoo:     LK  6:   6-11

    6 Tseem muaj ib hnub Xas Npas Tos dua, Yes Xus mus hauv lub tsev txoos, nws qhia sawv daws. Nyob ntawd, muaj ib tug neeg uas sab tes xis qhuav. 7 Cov Kws Ntawv Ntshiab thiab cov Fas Lis Xais nyas ntsia twj ywm saib Yes Xus puas kho neeg mob rau hnub Xas Npas Tos, xwv lawv thiaj tau kev nrhiav lus rau Yes Xus. 8 Tiam sis Yes Xus twb paub qhov lawv xav lawm, ces nws hais rau tus neeg qhuav tes tias : "Koj sawv ntsug nyob hauv nruab nrab." Ces tus qhuav tes sawv ntsug rau ntawd. 9 Yes Xus hais rau lawv tias : « Kuv nug nej:  Hnub Xas Npas Tos, puas yog txoj cai kheev kom ua zoo tsis kheev ua phem los tsis yog? Puas yog kheev kom cawm ib txog sia tsis kheev cia ib txog sia ploj los tsis yog? » 10 Ces Yes Xus ntsia ib ncig lawv sawv daws tas, nws hais rau tus qhuav tes tias : "Koj xyab tes." Tus neeg ntawd xyab tes, nws txhais tes cia li zoo hlo. 11 Tab sis lawv npau taws heev kawg, ces lawv sib tham saib lawv yuav ua li cas tau rau Yes Xus.


    Last edited by Mim on 5th September 2016, 7:21 pm; edited 1 time in total

    Sponsored content


    COV ZAJ NYEEM NRUAB LIS PIAM XYOO II,  2015-2016 - Page 10 Empty Re: COV ZAJ NYEEM NRUAB LIS PIAM XYOO II, 2015-2016

    Post  Sponsored content


      Current date/time is 28th March 2024, 6:09 pm