COV ZAJ NYEEM NRUAB LIS PIAM XYOO II, 2015-2016

TIM     9    LUB    7    HLI     2016

Hnub Xya Is Piam Kaum Plaub Nruab Xyoo C Nruab lis Piam Xyoo II

Hwm LN  Augustine Zhai Rong thiab nws cov phooj ywg

Zaj Nyeem Ib:     HIS XAIS  6:   1-8

1 Xyoo tus vaj Os Xias tuag, kuv pom Huab Tais zaum saum ib lub theej kiab siab siab muaj hwj chim. Nws lub tw tsho dauv mus puv nkaus lub Tuam Tsev tas huv tib si. 2 Nyob ntawm nws txheej saud, muaj ib co Tshiab Xes Las Fis sawv ntsug. Lawv ib leeg muaj rau txhais tis, ob txhais thaiv ntsej muag, ob txhais vov ko taw, ob txhais cia ya. 3 Lawv ib leeg hu qw nrov nrov rau ib leeg tias :  "Tsoom tshiab tus HUAB TAIS ntshiab, ntshiab, ntshiab. Nws lub koob meej nyob puv lub ntiaj teb." 4 Lub suab ntawd nrov ua cov ncej qhov rooj ua zog koog, pa taws ncho puv lub tsev. 5 Kuv hais tias : "Kuv hmoov phem ! Kuv yuav tuag lau! Vim kuv yog ib tug neeg di ncauj tsis huv, kuv nyob nruab nrab ib haiv neeg di ncauj tsis huv. Txawm li ntawd los kuv qhov muag tau pom tus Vaj, tus HUAB TAIS kav tsoom tshiab lawm tiag !" 6 Ces ib tug tshiab Xes Las Fis ya ntxiag los txog ntawm kuv, nws txhais tes tuav ib lub ncaig kub lug uas nws xuas ib rab ciaj tais ntawm lub thaj txi Ntuj los. 7 Nws coj lub ncaig ntawd los so kuv di ncauj, nws hais tias : "Saib ! Qhov no twb chwv koj di ncauj lawm, nws tshem koj qhov phem mus lawm, thiab koj cov txhaum muab ntxuav tas lawm." 8 Ces kuv hnov Huab Tais lub suab hais tias : "Kuv yuav xa leej twg mus ? Leej twg yuav sawv peb cev mus ?" Kuv teb tias : "Kuv nyob ntawm no. Koj xa kuv mus."

NPN    93:   1AB, 1CD-2, 5

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Huab Tais ua vaj, nws hnav hwj chim ci ntsa iab,
Nws hanv lub tsho muaj zog thiab sia siv khov kho.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Nws tsim Lub ntiaj teb nyob ruaj nreb, txav tsis tau chaw.
Koj lub theej kiab yeej teem tau ruaj khov kho txij puag thaum ub los.
Huab Tais, koj yeej ib txwm nyob txhiab niag tim puas xyoo mus li.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Koj cov cai lij choj tseeb khov tas nrho,
Huab Tais, txoj kev ntshiab tsab koj lub tsev
kom zoo nkauj mus li lawm yav tom ntej.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

As Les Lus yas:      1 POB ZEB  4:   14

Txais:    As les lus yas, as les lus yas.  

Yog nej raug luag tsawm, vim Leej Pleev lub npe, mas nej txoj hmoov zoo,
vim Tswv Ntuj Leej Tswv Yim tuaj roos nej

Txais:    As les lus yas, as les lus yas.

Ntawv Moo Zoo:     MT  10:   24-33

Yes Xus hais tias:
24 "Tus thwj tim tsis loj dua nws tus xib hwb, tus tub txib tsis loj dua nws tus tswv. 25 Tus thwj tim txaus siab heev thaum nws zoo cuag li nws tus xib hwb. Tus tub txib txaus siab heev thaum nws zoo cuag li nws tus tswv. Yog lawv hu tus tswv tsev ua Npes Ntxes Npus, mas lawv yuav hu nws tsev neeg li cas !  26 "Nej txhob ntshai luag hem ! Vim tsis muaj ib yam npog rawv uas yuav tsis qhib tawm, tsis muaj ib yam zais ntshis uas yuav tsis tawm los rau sawv daws paub. 27 Tej yam uas kuv hais rau nej hauv qhov tsaus ntuj, nej yuav hais tawm nruab hnub nrig. Hos yam nej hnov ntxhi rau hauv nej pob ntseg, mas nej yuav nce mus tshaj saum ruv tsev. 28 "Nej txhob ntshai cov neeg tua nej lub cev, tab sis lawv tua tsis tau nej tus plig. Nej yuav ntshai tus muaj peev xwm rhuav nej lub cev thiab tus plig hauv hav hluav taws. 29 Ob tug noog tsig txhuv, luag tsuas muag tau ib npib xwb. Tsis kav, tsis muaj ib tug poob hauv av tau, yog nej Txiv tsis tso lus. 30 Nej kuj ib yam li ntawd, tab yog nej cov plaub hau, nej Txiv yeej suav tas huv si lawm. 31 Nej tsis txhob ntshai dab tsi mog, nej muaj nqis tshaj tej pab tsig txhuv coob coob ua ke. 32 "Leej twg lees rau sawv daws tias nws paub kuv, mas kuv kuj lees rau kuv Txiv nyob saum Ntuj tias kuv paub nws. 33 Hos tus tsis lees rau sawv daws tias nws paub kuv, kuv kuj yuav tsis lees rau kuv Txiv nyob saum ntuj tias kuv paub nws.

TIM 11 LUB 7 HLI 2016

HNub Ob Lis Piam Kaum Tsib Nruab Xyoo C Nruab Lis Piam Xyoo II

Hwm LN Benedict, Thawj Coj hauv covTxiv Twj Cuab

Zaj Nyeem Ib: HIS XAIS 1: 10-17

10 Cov nom tswv tswj Xos Dos Mas, nej mloog Huab Tais cov lus mas ! Pej xeem nyob Nkos Mos Las, nej mloog peb tus Tswv Ntuj cov lus qhia! 11 HUAB TAIS hais tias : "Nej cov txim txi Ntuj txawm yuav ntau npaum twg tsis muaj nqes dab tsi rau kuv. Kuv dhuav nej cov laug tshis uas nej muab los hlawv kheej rau kuv, thiab dhuav cov roj ntawm nej cov nyuj rog; Kuv tsis zoo siab pom cov thav nyuj, thav yaj thiab thav tshis tej roj ntsha.
12 Thaum nej tuaj nyob ntawm kuv xub ntiag, yog leej twg kom nej coj tej ntawd tuaj rau kuv? Nej tsis txhob tuaj tsuj kuv lub tsev ntxiv, 13 tsis txhob nqa tej txim tsis muaj nqes tuaj hlawv rau kuv ! yog ib co pa ntxhiab uas kuv tsis xav hnia. Nej tej hli xiab tshiab, nej cov hnub xas npas tos, nej cov txoos, nej cov hnub nyoog nqaum paj nqaum nruas tsis ncaj ncees, mas kuv nyiaj tsis taus lawm. 14 Nej tej hli xiab tshiab, nej tej kev nqaum paj nqaum nruas teev Ntuj, kuv ntxub tas siab nrho, hnyav kuv ua luaj, Kuv ceeb laj ris kawg nkaus. 15 Thaum nej tsa tes hu txog kuv, kuv kaw qhov muag. Txawm nej hais nej tej zaj teev Ntuj ntau npaum li cas los kuv tsis mloog li. Nej txhais tes puv ntshav tas! 16 Nej rov ntxuav nej kom nej huv tuaj mas ! Nej tshem nej tej hauj lwm phem mus kom kuv qhov muag txhob pom; tso txoj kev ua phem tseg ! 17 Nej xyaum ua qhov zoo, nej nrhiav kev ncaj ncees, nej pab tus raug luag ua phem rau, nej muab kev ncaj rau tus tub ntsuag, nej tuaj tus poj ntsuam tog."

NPN 50:8-9, 16BC-17, 21 + 23

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis muab ib tug heev nyuj tawm hauv koj tsev mus,
los ib tug laug tshis tawm hauv koj pab tsiaj mus.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom..

Tim li cas nej lub ncauj thiaj qog kuv cov kev cai lij choj,
thiab hais kuv cov lus kuv tau nrog nej cog,
tiam sis nej ntxub kuv tej lus qhia
thiab muab kuv tej lus ua ntia pov tom nej qab xwb?

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Thaum nej ua tej yam zoo li no, kuv puas yuav tsum nyob ntsiag to?“
Nej puas xav tias kuv zoo nkaus li nej thiab?
Kuv yuav qhuab qhia nej, yuav qhia lub ntsiab tawm plaws rau nej.
Tus neeg twg tuaj ua kuv tsaug yog nws cav txog kuv lub koob meej;
kuv yuav muab Tswv Ntuj txoj kev cawm neeg rau tus neeg ncaj pom.

As Les Lus Yas: MT 5: 10

Txais: As les lus ays, as les lus yas.

Cov tau txoj hmoov zoo, yog cov raug luag hiam vim txoj kev ncaj,
Ntuj lub Ceeb Tsheej yog lawv tug

Txais: As les lus ays, as les lus yas.

Ntawv Moo Zoo: MT 10: 34-11: 1

Yes Xus hais tias:
34 "Nej txhob xav tias kuv coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj. 35 Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj. 36 Ua li mas yus cov yeeb ncuab yog cov neeg nyob hauv yus tsev. 37 Tus nyiam nws niam nws txiv dua kuv, nws tsis tsim nyog nrog kuv; tus nyiam nws tej tub tej ntxhais dua kuv, mas nws tsis tsim nyog nrog kuv. 38 Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv. 39 Tus nrhiav tau nws txoj sia, nws ua nws txoj sia ploj, hos tus ua nws txoj sia ploj vim kuv, mas nws yuav nrhiav tau nws txoj sia. 40 Tus txais nej, mas yog nws txais kuv. Tus txais kuv, mas yog nws txais Tus xa kuv tuaj. 41 Tus txais ib tug yaj saub, vim tus ntawd yog yaj saub, nws yuav txais koob haum phim tus yaj saub. Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj. 42 Kuv hais tseeb rau nej, leej twg pub ib khob dej txias rau ib tug neeg me me no haus, vim nws yog ib tug thwj tim, mas nws yeej yuav tsis poob nws qhov koob haum li."
11 1 Thaum Yes Xus qhia nws kaum ob leeg thwj tim li no tas lawd, nws tso qhov chaw ntawd tseg, nws mus qhia thiab nthuav lub Moo Zoo rau hauv lawv cov nroog.

TIM 12 LUB 7 HLI 2016

Hnub Peb Lis Piam Kaum Tsib Nruab Xyoo C Nruab Lis Piam Xyoo II

Zaj Nyeem Ib: HIS XAIS 7: 1-9

1 lub caij As Kas ua vaj kav Yus Das, uas yog Yos Tas tub, uas yog Os Xias tub, mas tus vaj Las Xoos uas kav As Las teb nrog tus vaj Pes Kas uas kav His Xas Lais teb, nws yog Les Mas Lias tub, nkawd mus pem Yes Lus Xas Les. Nkawd xav ntaus Yes Lus Xas Les, tab sis nkawd ntaus tsis tau. 2 Luag tuaj qhia Das Vis tsev neeg paub tias tus vaj As Las tsa yeej tub rog nyob hauv lub xeev Es Fais lawm. Ces tus vaj thiab tsoom pej xeem lub siab tshee cuag li cov nplooj ntoos hauv hav zoov raug cua tshuab. 3 HUAB TAIS hais rau His Xais tias : "Koj tawm mus cuag As Kas, koj thiab koj tus tub Ses Yas Sus neb mus, neb mus lawm pem lub hauv kwj deg uas ntws mus rau lub pas dej nyob pem toj, ntawm txoj kev mus rau daim teb ntxhua seb. 4 Koj hais rau As Kas tias : ‘Koj ceev faj, koj ua siab tus yees txhob ntshai. Txhob ua siab me nyob ntawm ob ya hluav ncaig ncho pa ntawd, yog vim Las Xoos thiab cov As Las txoj kev npau taws thiab vim Les Mas Lias tus tub txoj kev npau taws. 5 Vim As Las, Es Fais, thiab Les Mas Lias tus tub npaj siab ua phem rau koj, lawv tau hais tias : 6 ‘Peb mus lawm ped, peb ntaus kom yeej Yus Das, thiab muab nws yuam los zwm rau peb. Peb tsa Tas Npes Ees tus tub ua vaj kav lawv.’
7 HUAB TAIS Tswv Ntuj hais li no : ‘Yuav tsis muaj li ntawd. Yuav tsis yog li ntawd. 8 Lub tuam nroog nyob As Las teb yog Das Mas, hos tus ua thawj nyob Das mas yog Las Xoos. 9 Lub tuam nroog nyob Es Fais yog Xas Mas Lias, hos tus ua thawj nyob Xas mas Lias yog Les Mas Lias tus tub. Tab sis tos 65 xyoos saum no mas lawv yuav tsoo Es Fais, Es Fais yuav tsis yog ib haiv neeg ntxiv. Yog nej tsis ntseeg ruaj mas nej yuav nyob tsis taus ntxiv.

NPN 48: 2-3A, 3B-4, 5-6, 7-8

Txais: (9d) Tswv Ntuj ua kom nws lub tsheej ruaj khov mus li.

HUAB TAIS yog tus loj, thiab tsim nyog qhuas
Nyob hauv Tswv ntuj lub tsheej.
Nws lub roob ntshiab, zoo nkauj tshaj lwm lub,
Yog ntiaj teb lub chaw zoo siab.

Txais: (9d) Tswv Ntuj ua kom nws lub tsheej ruaj khov mus li.

Roob Xis Yoos, pem qaum tsheej kawg nkaus,
yog tus Vaj loj lub tsheej.
Tswv Ntuj nyob hauv nws cov tsev vaj loog,
Neeg cav txog nws yog lub yeej ntsa zeb.

Txais: (9d) Tswv Ntuj ua kom nws lub tsheej ruaj khov mus li.

Ntsia saib, cov vaj teem caij sib sau ;
lawv tib txhij sawv kev tuaj mus.
Lawv pom dheev, ib sij huam lawv ceeb tas.
lawv ntshai kawg, lawv tso tes khiav.

Txais: (9d) Tswv Ntuj ua kom nws lub tsheej ruaj khov mus li.

Av qeeg ua rau lawv ceeb nkaus rau ntawm chaw,
lawv mob npaum li tus poj niam yuav daws cev,
Yog zoo li cov cua toob fab ntsawj tuaj
ua kom cov nkoj nyob Tas Sis ntsoog ntxaws tas.

Txais: (9d) Tswv Ntuj ua kom nws lub tsheej ruaj khov mus li.

As Les Lus yas: NPN 95: 8

Txais: As les lus ays, as les lus yas.

Yogh nub no nej hnov nws lub suab,
nej tsis txhob ua nej lub siab tawv ncauj.
Txais: As les lus ays, as les lus yas.

Ntawv Moo Zoo: MT 11: 20-24

20 Yes Xus cem cov nroog uas tau pom nws ua hwj huam yees ntxwv ntau tshaj, tab sis lawv tsis hloov siab. 21 Kos Las Ntxis, koj txoj hmoov phem ! Npes Xais Das, koj txoj hmoov phem ! Vim tias, cov hwj huam yees ntxwv uas kuv tau ua hauv neb, kheev lam yog ua nyob Tws Los thiab nyob Xis Doos, mas ob lub nroog ntawd twb hnav ntaub tsaj thiab muab plua tshauv los nphoo lawv, lawv twb hloov siab lawm ntxov. 22 Kuv hais meej rau neb, hnub txiav txim, Tws Los thiab Xis Doos yuav raug txim sib dua neb. 23 Thiab koj, Kas Fas Naus, koj xav tias koj yuav sawv siab txij ntuj puas yog ? Koj twb nqes yuav txog tub tuag teb lawm. Vim tias cov hwj huam yees ntxwv kuv tau ua nyob hauv koj, kheev lam yog ua nyob Xos Dos Mas, mas lub nroog ntawd tseem yuav nyob txog tav no. 24 Kuv hais meej rau koj, hnub txiav txim, Xos Dos Mas teb yuav raug txim sib dua koj."

Nyob zoo sawv daws.  Kuv tsis tau tuaj tso cov zaj nyeem niaj hnub taum kaum tawm hnub no lawm, vim tias kuv lub computer  cia li tuag lawm ces kuv tsis tau kev tuaj.  hnub no mam li kho tau los siv. Ntshai yuav siv ntau hnub mam li yuav caum tau lub caij nyoog. Thov sawv daws ua siab ntev thiab.


Tim 13 lub 7 hli 2016

Hnub Plaub Lis Piam Kaum Tsib Nruab Xyoo C Nruab Lis Piam Xyoo II

Hwm LN Henry

Zaj Nyeem Ib:      HIS XAIS  10:   5-7, 13B-16

Huab Tais hais li no:
5 As Xws yuav raug txoj hmoov phem ! Nws yog kuv lub siab npau taws rab pas, yog rab qws uas kuv txhais tes tuav thaum kuv npau taws. 6 Kuv xa As Xws mus ntaus lub kuj cuab tsis hwm Ntuj. Kuv tso nws mus His Xais, Zaj 7, 9 thiab 10 9 10 415 ntaus haiv neeg kuv npau taws rau, mus lwg lawv cov toob xib poob pem teb, nws khaws puas tsav yam cov tub rog txeeb tau, nws tsuj haiv neeg ntawd xws li cov av nkos nyob ntawm tej kev hauv nroog. 7 Tab sis As Xws tsis xav ua li ntawd, nws lub siab tsis xav zoo li ntawd. Nws tsuas rau siab tua neeg kom tu noob, nws xav rhuav ntau lub kuj cuab. 13 As Xws hais tias : yog kuv txhais tes muaj zog thiaj ua tau tej hauj lwm ntawd, yog kuv lub tswv yim ua tej ntawd, vim kuv ntse ! Kuv tau nam cov haiv neeg ciam teb, kuv tau lwg cov toob xib lawv tshwj zias cia. Kuv ua tus muaj peev xwm, kuv thawb cov vaj zaum saum theej kiab kom poob qis. 14 Kuv txhais tes nthos nkaus cov haiv neeg tes nyiaj txiag xws ib lub zes, xws li sau cov qe hauv lub zes luag tso pov tseg. Kuv tau khaws tas ntiaj teb los ua kuv tug, tsis muaj leej twg nthuav tis, rua ncauj los quaj ib suab. 15 Rab taus puas khav tiv tus tuav nws ? Rab kaw puas tig los kaw tus siv nws ? Puas yog rab pas ua kom tus tsa nws ua tau zog ? Puas yog rab qws muab zog rau tus tuav nws ? 16 Yog vim tej ntawd tus HUAB TAIS kav tsoom tub rog yuav ua kom cov muaj zog tshaj mob tas huv si. Tas txhua yam yuav swb nws lub hwj chim thiab yuav kub hnyiab tas.

NPN     94:   5-6, 7-8, 9-10, 14-15

Txais:     (14a) Huab Tais yuav tsis tso nws haiv neeg pov tseg..

HUAB TAIS, lawv tsuj koj haiv neeg !
Lawv ua koj lub cuab tam poob ntsej muag.
Lawv tua tus poj ntsuam thiab tus vaim kum neeg,
lawv txo cov ntsuag nos siav.

Txais:     (14a) Huab Tais yuav tsis tso nws haiv neeg pov tseg..

Lawv hais tias : "HUAB TAIS tsis txawj pom,
Yas Kos tus Tswv Ntuj tsis txawj paub dab tsi li.
Tsoom neeg ruam, nej yuav tsum paub !
Tsoom neeg hlwb tsis nthuav, hnub twg nej mam yuav to taub ?

Txais:     (14a) Huab Tais yuav tsis tso nws haiv neeg pov tseg..

Tus cog pob ntseg rau neeg, nws tsis txawj hnov lus lod ?
Tus puab qhov muag rau neeg, nws tsis txawj pom lod ?
Tus cob ib tsoom kuj cuab, nws tsis txawj nplua txim lod ?
Twb yog nws pub kev txawj ntse rau neeg.

Txais:     (14a) Huab Tais yuav tsis tso nws haiv neeg pov tseg..

Vim HUAB TAIS tsis nrauj nws haiv neeg,
nws tsis muab nws lub cuab tam laim pov tseg.
Sawv daws yuav rov txiav txim raws kev haum pheej,
tas tsoom siab ncaj yuav mus raws kev haum pheej.

Txais:     (14a) Huab Tais yuav tsis tso nws haiv neeg pov tseg..

As Les Lus Yas:     MT  11:   25

Txais:     As les lus yas, as les lus yas..

Leej Txiv, Huab Tais kav lub ntuj lub teb, ua kom koj nto koob meej,
Koj tau qhia rau cov neeg me kom lawv paub txog lub Ceeb tsheej. .

Txais:     As les lus yas, as les lus yas.

Ntawv Moo Zoo:     MT  11:   25-27

25 Lub caij ntawd, Yes Xus hais tias : "Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov me nyuam yaus. 26 Muaj tseeb tiag, Txiv, koj lub siab nyiam li ntawd. 27 Kuv Txiv muab tas ib puas tsav yam rau kuv. Tsis muaj leej twg paub Leej Tub, tsuas kawg Leej Txiv thiaj paub. Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub.



(Tsis tau kho)

TIM 14 LUB 7 HLI 2016

Hnub Tsib Lis Piam Kaum Tsib Nruav Xyoo C Nruab Lis Piam Xyoo II

Hwm LN Kateri Tekakwitha

Zaj Nyeem Ib: HIS XAIS 26: 7-9, 12, 16-19

7 Tus siab ncaj txoj kev yog txoj kev ua ncaj. Koj leem kom kev tiaj rau tus neeg siab ncaj taug. 8 Muaj tseeb tiag ! Peb tos koj, Huab Tais, nyob ntawm txoj kev koj tau txiav rau peb taug; peb tus plig ntshaw koj lub npe thiab ntshaw nco txog koj. 9 Hmo ntuj, kuv tus plig nqhis txog koj, kuv lub tswv yim nrhiav koj nyob hauv qhov tob tob hauv kuv nruab siab. Thaum koj txiav txim rau lub ntiaj teb, mas cov neeg nyob hauv lub qab ntuj kawm txog txoj kev ncaj.
12 Huab Tais, koj ntsuas kev thaj yeeb pub rau peb; tej yam peb tau ua los koj yog tus ua pub rau peb.
16 HUAB TAIS, peb raug txom nyem vim koj rau txim rau peb; peb hu txog koj thov koj nyob hauv peb txoj kev nyuaj siab. 17 Peb zoo li tus poj niam cev xeeb tub tab tom yuav daws cev nyob ntawm koj xub ntiag, Huab Tais, uas nws ntsaj thiab ntswj ib ces vim nws zaj mob. 18 Peb tau xeeb tub, peb ntsaj mob daws cev, peb tsuas yug tau cua, peb tsis tau coj kev cawm rau lub ntiaj teb, cov neeg nyob hauv lub qab ntuj ua tsis tau kom nws tshwm sim los. 19 Koj cov neeg tuag yuav ciaj rov los, lawv lub cev yuav sawv rov los. Tsoom tib neeg pw nyob hauv av, nej kav tsij tsim dheev los, nej seev suab hu nkauj. Vim koj cov lwg yog lwg pom kev kaj lug, hos lub teb chaws tsaus ntuj txawj daws cev yug me nyuam.

NPN 102: 13-14AB + 15, 16-18, 19-21

Txais: (20b) Huab Tais nyob saum ntuj dauv muag los saib lub ntiaj teb.

Koj, HUAB TAIS, zaum ua vaj mus li,
txhua tiam neeg yuav nco txog koj.
Koj yuav sawv, koj yuav hlub Xis Yoos,
vim txog caij koj yuav khuv leej nws lawm.
Koj cov tub txib nyiam Xis Yoos cov pob zeb,
lawv hlub Xis Yoos cov plua tshauv.

Txais: (20b) Huab Tais nyob saum ntuj dauv muag los saib lub ntiaj teb.

Cov kuj cuab yuav hawm koj HUAB TAIS lub npe,
tas cov vaj nyob ntiaj teb yuav hawm koj lub hwj chim,
Thaum HUAB TAIS rov txhim Xis Yoos,
sawv daws yuav pom nws nyob hauv nws lub hwj chim;
nws yuav tig los mloog cov neeg txom nyem tej lus thov,
nws yuav tsis thuam lawv zaj teev ntuj.

Txais: (20b) Huab Tais nyob saum ntuj dauv muag los saib lub ntiaj teb.

Nej sau qhov no cia rau phaj tub ki uas yuav los yav tom ntej,
ces ib haiv neeg tshiab yuav cav txog Tswv Ntuj :
Nws nyob saum nws lub tsev ntshiab dauv muag los saib;
HUAB TAIS nyob saum txheej ntuj siab ntsia ntiaj teb,
Kom tau mloog cov neeg nyob txim lub suab ntsaj,
kom tau tso cov yuav raug tua dim.

Txais: (20b) Huab Tais nyob saum ntuj dauv muag los saib lub ntiaj teb.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Tas nej sawv daws uas nej khwv thiab ris nra hnyav,
nej tuaj cuag kuv mog. Kuv yuav cia nej so los siav.

Txais: As les lus yas, as les lus yas.

Ntawv Moo Zoo: MT 11: 28-30

Yes Xus hais tias:
28 "Tas nej sawv daws uas nej khwv, thiab ris nra hnyav, nej tuaj cuag kuv mog ! Kuv yuav cia nej so los siav. 29 Nej txais kuv tus quab. Nej kawm ntawm kuv mog, vim kuv siab zoo, kuv tsis muab hlob, nej tus plig yuav nrhiav tau chaw so los siav. 30 Vim kuv tus quab kwv yooj yim, thiab kuv lub nra sib.

[size=18]TIM    15   LUB   7   HLI    2016[/size]

Hnub Rau Lis Piam Kaum Tsib Nruab Xyoo C Nruab lis piam Xyoo II  

Hwm  LN  Bonaventure

Zaj Nyeem Ib:     HIS XAIS  38: 1-6, 21-22, 7-8

1 Muaj ib hnub, tus vaj Es Xes Kias tau ib tug mob hnyav, Yaj Saub His Xais uas yog As Mos tub tuaj xyuas nws, His Xais hais rau nws tias : “HUAB TAIS hais li no : koj tu koj lub tsev, vim koj yuav tuag, koj yuav tsis zoo rov los ntxiv.” 2 Ces Es Xes Kias tig hlo rau tim phab ntsa, nws thov HUAB TAIS tias : 3 "Ab ! HUAB TAIS, thov koj nco ntsoov tias kuv tau taug kev nyob ntawm koj xub ntiag, kuv npuab koj, tsis ua ntau lub siab, kuv tau ua yam uas koj pom zoo." Es Xes Kias quaj tu siab nrho. 4 HUAB TAIS lo lus nrov tuaj rau His Xais tias : 5 "Koj mus hais rau Es Xes Kias tias : HUAB TAIS koj txiv Das Vis tus Tswv ntuj hais li no : Kuv tau hnov koj zaj thov ntuj, kuv tau pom koj cov kua muag lawm. Kuv yuav kho koj kom zoo; peb hnub saum no koj yuav nce mus pem Huab Tais lub tuam tsev.  Kuv yuav ntxiv kaum tsib xyoos rau koj lub hnub nyoog. 6 Kuv yuav npo koj thiab npo lub tsheej no kom dim ntawm tus vaj As Xws txhais tes. Kuv yuav pov hwm lub tsheej no."
21 His Xais thiaj hais tias : "Nej muab ib pob tshuaj txiv ncuav pias los npuab lub qhov txhab, ces nws yuav zoo." 22 Es Xes Kias hais tias : "Yuav muaj lub cim twg ua kom kuv paub tias kuv yuav mus pem HUAB TAIS lub tsev ?"
7 His Xais teb tias : "HUAB TAIS yuav ua lub cim no qhia rau koj paub tias nws yuav ua raws li lo lus nws tau hais:  8 “Kuv yuav ua kom lub hnub tus duab ntxoov ntxoo nyob ntawm cov theem ntaiv nce mus saum As Kas lub qaum ru tsev rov thaub qab kaum theem ntaiv uas nws tau nce mus ntxoov.”  Ces lub hnub cia li thaub rov qab kaum theem ntaiv uas nws tau nce mus ntxoov.

NPN:     HIS XAIS  38:   10, 11, 12ABCD, 16

Txais:   (17b) Huab Tais, koj tau cawm kuv txoj sia lawm, kuv yuav tsis tuag.

Thaum tav su nrig hauv kuv lub neej, kuv yuav tsum ncaim mus.    
Kuv yuav tsum mus nyob hauv cov qhov rooj hauv ntuj txias teb tsaus    
kom tas kuv lub neej mus ntxiv.

Txais:   (17b) Huab Tais, koj tau cawm kuv txoj sia lawm, kuv yuav tsis tuag.

Kuv hais tias: “Kuv yuav tsis pom HUAB TAIS ntxiv      
nyob hauv cov neeg ciaj lub teb chaws.    
Kuv yuav tsis tshua txog leej twg  ntxiv    
nyob hauv cov neeg uas nyob ntiaj teb.    

Txais:   (17b) Huab Tais, koj tau cawm kuv txoj sia lawm, kuv yuav tsis tuag..

Kuv lub tsev raug muab rhuav pov tseg deb ntawm kuv
Zoo xws li  cov yug yaj lub tsev tsam phooj.
Koj muab kuv txoj sia tais cia xws li
tus ntos ntaub muab txoj xov kawg txiav.  

Txais:   (17b) Huab Tais, koj tau cawm kuv txoj sia lawm, kuv yuav tsis tuag.e.

Cov uas Huab Tais txuag lawv muaj txoj sia nyob;  
koj txoj sia yog kuv tus ntsuj plig txoj sia.      
Koj tau muab kev noj qab nyob zoo thiab txoj sia rau kuv.      

Txais:   (17b) Huab Tais, koj tau cawm kuv txoj sia lawm, kuv yuav tsis tuag.

As Les Lus Yas:     ZAM  10:  27

Txais:   As les lus yas, as les lus yas.

Huab Tais hais tias: Kuv cov yaj mloog kuv lub suab,
Kuv paub lawv, lawv caum kuv qab.

Txais:   As les lus yas, as les lus yas.

Ntawv Moo Zoo:     MT  12:   1-8

1 Muaj ib hnub Xas Npas Tos, Yes Xus hla ib co teb npleg. Cov thwj tim tshaib plab, ces lawv pib de tej hnab nplej los noj. 2 Cov Fas Lis Xais pom qhov ntawd, lawv hais rau Yes Xus tias : "Saib, koj cov thwj tim ua tej yam txwv tsis pub ua hnub Xas Npas Tos !" 3 Tab sis, Yes Xus hais rau lawv tias : "Nej tsis tau nyeem qhov Das Vis ua thaum Das Vis thiab nws cov npawg tshaib plab lod ? 4 Lawv tau chaws mus hauv Tswv Ntuj lub tsev li cas, thiab lawv noj cov ncuav mov txi Ntuj, tab sis Das Vis thiab nws cov npawg noj tsis nyog cov mov ntawd, kawg yog cov leej choj xwb thiaj noj tau ? 5 Nej puas tau nyeem hauv Txoj Cai tias, hnub Xas Npas Tos, cov leej choj uas nyob hauv lub Tuam Tsev Teev Ntuj tsis caiv hnub Xas Npas Tos, tsis kav lawv tsis txhaum. 6 Kuv qhia meej rau nej, nyob ntawm no, muaj ib yam loj dua lub Tuam Tsev Teev Ntuj. 7 Lo Lus hais tias : Qhov kuv xav yuav, yog txoj kev khuv leej, tsis yog thaj txi Ntuj. Yog nej paub lo lus no lub ntsiab, mas nej yuav tsis muab txim rau cov neeg tsis txhaum. 8 Vim tias, Neeg Leej Tub yog tus tswv kav hnub Xas Npas Tos."

TIM 16 LUB 7 HLI 2016

Hnub Xya Lis Piam Kaum tsin Nruab Xyoo C Nruab Lis Piam Xyoo II

Hwm Leej Niam nyob Kas Mes

Zaj NYeem Ib: MIS KES 2:1-5

1 Cov neeg nrhiav kev ua hauj lwm lim hiam thiab npaj ua phem thaum lawv tseem pw hauv txaj, mas lawv txoj hmoov phem. Ntuj nyuam qhuav kaj lawv twb ua phem lawm, vim lawv txhais tes ua tau. 2 Yog lawv ntshaw luag tej liaj teb mas lawv cia li mus txeeb, yog lawv ntshaw luag tej vaj tse mas lawv cia li mus huab ua lawv tug. Lawv ntes tus tswv tsev, nrog nws lub tsev, ntes tus neeg nrog nws tej cuab yeej cuab tam. 3 Vim li ntawd HUAB TAIS thiaj hais li no : "Kuv npaj tso ib txoj kev txom nyem los raug tsav neeg no, yog ib txog kev txom nyem uas nej yuav tsis tau kev thau nej lub caj dab kom dim. Nej yuav mus kev tsa taub hau siab tsis tau, vim yog lub caij raug txom nyem lawm. 4 Hnub ntawd, luag yuav sau tej zaj thuam nej. Neeg yuav hu ib zag nkauj seev hais tias : “Peb tsis tshuav dab tsi li lawm. Lawv ntsuas peb tej liaj teb faib rau cov tswv uas tuaj ntes peb tas lawm. Peb haiv neeg cov liaj teb raug muab faib tas lawm tsis muaj leej twg yuav mus muab tau rov los li.” 5 Ces nej yuav tsis muaj leej twg mus ntsuas ib thaj av uas yuav pub rau cov nyob hauv HUAB TAIS tsoom neeg lawm."

NPN 10: 1-2, 3-4, 7-8, 14

Txais: (12b) Huab Tais, thov koj tsis txhob hnov qab cov neeg pluag.

HUAB TAIS, ua cas koj nyob deb deb?
Lub caij peb ntsib kev txhawj xeeb, ua cas koj tsiv nraim, ?
Tus neeg phem lub siab muab hlob tsim tus neeg txom nyem;
nws mag rooj ntxiab uas tus phem cuab.

Txais: (12b) Huab Tais, thov koj tsis txhob hnov qab cov neeg pluag.

Tus tsis hwm Ntuj rov qhuas nws txog nws lub siab kev ntshaw.
Tus siab hlob thuam thiab tsis saib Huab Tais rau nqes.
Tus tsis hwm Ntuj tsis nrhiav kom deb,
nws tsuas xav hais tias : "Tsis muaj Tswv Ntuj !"

Txais: (12b) Huab Tais, thov koj tsis txhob hnov qab cov neeg pluag.

Nws lub ncauj hais tej lus foom phem, lus dag, lus cuav.
Nws tus nplaig tsuas hais kev lim hiam, kev ua phem rau luag.
Nws nraim nkoos ntawm tej ntug zos,
nyiag muab tus tsis txhaum tua ntawm nws qhov chaw nkaum;
nws qhov muag nyas ntshis tus txom nyem.

Txais: (12b) Huab Tais, thov koj tsis txhob hnov qab cov neeg pluag.

HUAB TAIS, koj twb pom tej kev nyuaj kev tu siab lawm.
Koj txhais tes tuav tas txhia yam ntawd.
Tus txom nyem tso siab rau koj,
Tus ntsuag nos vam koj pab nws.

Txais: (12b) Huab Tais, thov koj tsis txhob hnov qab cov neeg pluag.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib haum xeeb nyob hauv Leej Pleev
Thiab nws muab lub moo zoo txog kev sib haum xeeb cob rau peb.

Txais: As les lus yas, as les lus yas.


Ntawv Moo Zoo: MT 12: 14-21

14 Cov Fas Lis Xais tawm mus sab laj nrhiav saib yuav muab Yes Xus tua zoo li cas. 15 Yes Xus paub qhov lawv xav ua, ces nws tawm mus. Muaj neeg coob raws nws, Yes Xus kho lawv sawv daws zoo tas. 16 Nws txwv tsis pub lawv qhia leej twg paub. 17 Ua li mas, muaj raws li Yaj Saub His Xais tau hais tseg tias : 18 Nej ntsia, tus Tub Txib uas kuv xaiv, nws yog tus kuv nyiam, kuv lub siab nyiam nyob hauv nws. Kuv yuav tso kuv lub Tswv Yim rau saum nws. Nws yuav tshaj Txoj Kev Ncaj rau tsoom kuj cuab. 19 Nws yuav tsis cav, tsis nthe nrov, tsis muaj leej twg hnov nws lub suab tom tej tshav puam. 20 Tus tauj qaug, nws tsis muab lov, tus teeb xeeb cig qauj les, nws tsis muab tshuab. Nws yuav ua li ntawd mus txog hnub nws coj Txoj Kev Ncaj mus txais kev yeej. 21 Tsoom kuj cuab tso siab lug rau nws lub npe.
22 Thaum ntawd, luag coj ib tug neeg raug dab tuaj rau Yes Xus, nws yog ib tug dig muag thiab nplaig txhav. Yes Xus kho nws, ces tus neeg nplaig txhav hais lus tau thiab pom kev tuaj.

TIM 18 LUB 7 HLI 2016

Hnub Ob Lis Piam Kaum Rau Nruab Xyoo C Nruab Lis Piam Xyoo II

Hwm LN Camillus nyob Lellis

Zaj Nyeem Ib: MIS KES 6: 1-4, 6-8

1 Nej mloog HUAB TAIS cov lus nws hais: “Nej sawv tsees mas ! Nej tuaj hais nej cov lus rau ntawm cov toj roob kom tej hauv pes hnov nej lub suab.” 2 Toj roob, nej mloog HUAB TAIS nrog nws haiv neeg sib hais. Ntiaj teb cov taw ntsa khov, nej cuab pob ntseg mloog ! Vim HUAB TAIS nrog nws haiv neeg sib hais, nws nrog His Xas Lais hais plaub.
3 Kuv haiv neeg, kuv tau ua dab tsi rau nej ? Kuv tau ua dab tsi kom nej ceeb laj? Nej teb kuv mas ! 4 Kuv tau ua kom nej tawm hauv Hais Nkws Tos teb los, kuv tau txhiv nej kom nej dim ntawm lub tsev nej ua qhev los. Kuv tau xa Mais Xes, As Loos thiab Mis Lias tuaj rau nej.
6 Kuv yuav muab dab tsi mus cev rau HUAB TAIS, tus Tswv Ntuj nyob saum ntuj, thaum kuv mus pe hawm nws ? Kuv puas yuav muab cov xyuas nyuj muaj ib xyoos los hlawv ? 7 Tab yog kuv txi ntau txhiab tus laug yaj los hliv roj ntau cuag li dej ntws nws puas yuav zoo siab ? Kuv puas yuav tsum muab kuv tus tub hlob los them nqe txhaum ? Kuv puas yuav tsum cev tus tawm ntawm kuv cev nqaij los them kuv tus ntsuj plig qhov txhaum ?
8 Leej tib neeg, Ntuj twb qhia qhov zoo rau koj paub lawm thiab qhov uas HUAB TAIS xav kom koj ua: tsuas yog yuav tsum ua raws txoj kev ncaj, yuav tsum nyiam txoj kev ua siab zoo rau luag, thiab muaj lub siab ua neeg me nrog koj tus Tswv Ntuj taug kev xwb.

NPN 50: 5-6, 8-9, 16BC-17, 21 + 23

Txais: (23b) Kuv yuav pub kom tus neeg ncaj paub Tswv Ntuj txoj kev cawm neeg.

"Nej hu cov ntseeg kuv tuaj sib sau nyob ntawm kuv,
cov uas tau tua tsiaj txi ntuj nrog kuv cog lus.”
Lub ntuj tshaj nws txoj kev ncaj tias:
“ Tswv Ntuj yog tus txiav txim.”

Txais: (23b) Kuv yuav pub kom tus neeg ncaj paub Tswv Ntuj txoj kev cawm neeg.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis muab ib tug heev nyuj tawm hauv koj tsev mus,
los ib tug laug tshis tawm hauv koj pab tsiaj mus.

Txais: Kuv yuav pub kom tus neeg ncaj paub Tswv Ntuj txoj kev cawm neeg.

Tim li cas nej lub ncauj thiaj qog kuv cov kev cai lij choj,
thiab hais kuv cov lus kuv tau nrog nej cog,
tiam sis nej ntxub kuv tej lus qhia
thiab muab kuv tej lus ua ntia pov tom nej qab xwb?

Txais: Kuv yuav pub kom tus neeg ncaj paub Tswv Ntuj txoj kev cawm neeg.

Thaum nej ua tej yam zoo li no, kuv puas yuav tsum nyob ntsiag to?“
Nej puas xav tias kuv zoo nkaus li nej thiab?
Kuv yuav qhuab qhia nej, yuav qhia lub ntsiab tawm plaws rau nej.
Tus neeg twg tuaj ua kuv tsaug yog nws cav txog kuv lub koob meej;
kuv yuav muab Tswv Ntuj txoj kev cawm neeg rau tus neeg ncaj pom.

Txais: Kuv yuav pub kom tus neeg ncaj paub Tswv Ntuj txoj kev cawm neeg.

As Les Lus Yas: NPN 95: 8

Txais: As les lus ays, as les lus yas.

Yog hnub no koj hnov nws lub suab,
tsis txhob ua koj lub siab tawv ncauj.

Txais: As les lus ays, as les lus yas.

Ntawv Moo Zoo: MT 12: 38-42

38 Ib co Kws Ntawv Ntshiab thiab ib co Fas Lis Xais hais rau Yes Xus tias : "Xib Hwb, peb xav kom koj ua ib lub cim rau peb pom." 39 Yes Xus teb rau lawv hais tias : "Tiam neeg phem thiab fav xeeb ! Lawv taij ib lub cim, tab sis lub cim uas lawv yuav pom, kawg yog Yaj Saub Yos Nas lub cim xwb. 40 Raws nkaus li Yos Nas tau nyob peb hnub peb hmos hauv tus vaj ntses lub plab, Neeg Leej Tub kuj yuav nyob hauv plawv av peb hnub peb hmos thiab. 41 Hnub Txiav Txim, cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim thaum Yos Nas ntuas lawv, lawv hloov siab. Hos nyob ntawm no twb muaj loj dua Yos Nas ! 42 Hnub Txiav Txim, tus poj huab tais nyob Qab Teb kuj yuav nrog phaj neeg no sawv los, nws yuav muab txim rau lawv, vim nws tuaj tim npoo ntiaj teb tuaj mloog Xas Los Moos cov lus thoob tsib. Hos nyob ntawm no, twb muaj loj dua Xas Los Moos diam!

TIM 19 LUB 7 HLI 2016

Hnub Peb Lis Piam Kaum Rau Nruab Xyoo C Nruab Lis Piam Xyoo II

Zaj Nyeem Ib: MIS KES 7: 14-15, 18-20

14 Koj cia koj haiv neeg nog zaub, koj rab pas zov lawv. Pab yaj uas koj qee los ua koj cuab tam, lawv nyob twj cuab hauv tej hav khaub hav tsuag, nyob hauv cov vaj txiv ntoo. Kheev lam lawv tau kev rov los nog zaub nyob Npas Sas thiab nyob Nkas Las As, xws li yav thaum ub ! 15 Xws li lub caij thaum koj coj lawv tawm Hais Nkws Tos teb los koj ua hwj huam loj rau peb pom . 18 Tus Tswv Ntuj twg thiaj yuav ntxuav txhaum thiab zam txhaum rau pab seem nyob hauv nws tug zoo li koj ? Tus Tswv Ntuj twg thiaj yuav tsis npau taws mus li thiab yeem muab kev khuv leej rau peb thiab yuav rov hlub peb dua, yuav muab peb lub txim tsuj ntiag rau ntawm taw xws li koj ? 19 Thov koj hlub peb ib zaug ntxiv thiab! Koj muab peb tej kev yuam kev tsuj pov tseg hauv av, muab tas peb cov txhaum pov rau hauv qab tiv txwv. 20 Thov koj nco ntsoov Yas Kos, koj pub koj lub txiaj ntsim rau Has Nplas Has, zoo li koj tau cog lus rau peb cov yawg koob thaum ntxov ub lawm.

NPN 85: 2-4, 5-6, 7-8

Txais: (8a) Huab Tais, thov koj khuv leej peb thiab hlub pe.

HUAB TAIS, koj nyiam koj lub teb chaws !
Koj coj Yas Kos cov neeg nyob txim pej kum teb rov qab los.
Koj zam koj haiv neeg qhov yuam kev rau lawv,
Koj muab lawv cov txhaum npog tas tib si.
Koj tshem koj lub siab npau taws, koj thim koj lub siab ceev tawm.

Txais: (8a) Huab Tais, thov koj khuv leej peb thiab hlub pe.

Tswv Ntuj, tus cawm peb, thov koj coj peb rov qab los !
Koj tso koj txoj kev chim rau peb pov tseg.
Koj puas yuav npau taws rau peb mus li,
puas yuav npau rau peb mus tiam dhau tiam?

Txais: (8a) Huab Tais, thov koj khuv leej peb thiab hlub pe.

Thov koj tsuas ua kom peb muaj sia muaj zog xwb.
Ntshai cia koj haiv neeg zoo siab nyob hauv koj yuav zoo dua.
HUAB TAIS, thov koj ua kom peb pom koj hlub peb mas !
Koj pub koj txoj kev cawm rau peb !

Txais: (8a) Huab Tais, thov koj khuv leej peb thiab hlub pe.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws;
kuv Txiv wb yuav los nyob hauv nws.

Txais: As les lus yas, as les lus yas.

Ntawv Moo Zoo: MT 12: 46-50

46 Yes Xus tseem tab tom hais lus rau tej pab neeg, ces Yes Xus niam thiab nws cov kwv tij tuaj sawv nraum zoov, lawv xav nrog nws txuas lus. [47 Muaj ib tug hais rau Yes Xus tias : koj niam thiab koj cov kwv tij tuaj txog nraud, lawv xav nrog koj txuas lus.] 48 Yes Xus teb rau tus neeg tuaj qhia nws tias : "Leej twg yog kuv niam, thiab leej twg yog kuv cov kwv tij ?" 49 Yes Xus taw tes rau nws cov thwj tim, nws hais tias : "Kuv niam thiab kuv kwv tij yog cov ntawd. 50 Vim tias tus twg ua raws kuv Txiv nyob saum ntuj lub siab, tus ntawd yog kuv ib tug kwv, ib tug muam, los ib leeg niam."

TIM 20 LUB 7 HLI 2016

Hnub Plaub Lis Piam Kaum rau Nruab Xyoo C Nruab Lis Piam Xyoo II

Zaj Nyeem Ib: YES LES MIAS 1: 1, 4-10

1 Yes Les Mias, His Kis Yas Hus tub, nyob As Nas Tos, hauv Npes Yas Mis teb chaws, nws cov lus.
4 HUAB TAIS lo lus nrov tuaj rau kuv li no: 5 "Thaum koj tseem tsis tau xeeb hauv koj niam plab, kuv twb paub koj lawm. Koj tseem tsis tau yug los, kuv twb xaiv koj, kuv twb tsa koj ua Yaj Saub qhia cov kuj cuab lawm." 6 Kuv hais tias : "HUAB TAIS, kuv tsis txawj hais lus, kuv hnub nyoog tseem hluas dhau!" 7 HUAB TAIS hais tias : "Koj tsis txhob hais tias : 'Kuv tseem hluas dhau !' Koj yuav tsum mus cuag cov neeg uas kuv xa koj mus. Thiab koj yuav hais txhua yam kuv qhia kom koj hais. 8 Koj tsis txhob ntshai nyob ntawm lawv xub ntiag, vim kuv nrog koj nraim, kuv yuav cawm koj.” Yog HUAB TAIS lo lus ceeb toom. 9 Ces HUAB TAIS cev tes tuaj chwv kuv qhov ncauj, nws hais rau kuv tias : "Ntsia saib : Kuv muab kuv cov lus rau hauv koj qhov ncauj. 10 Hnub no kuv tsa koj rau saum cov kuj cuab thiab cov ceeb tsheej. Koj yuav rho thiab yuav ntov. Koj yuav txo thiab yuav rhuav, koj yuav txhim tsa thiab yuav cog.

NPN 71: 1-2, 3-4A, 5-6AB, 15 + 17

Txais: (15ab) Kuv yuav hu nkauj cav txog koj txoj kev cawm neeg.

Huab Tais, kuv tuaj nkaum nyob hauv koj,
thov tsis txhob cia kuv raug kev txaj muag ib zaug li.
Thov tuaj pab kub nyob hauv koj txoj kev ncaj, thov tso kuv dim;
cuab koj lub pob ntseg khoov los mloog kuv, thov cawm kuv.

Txais: (15ab) Kuv yuav hu nkauj cav txog koj txoj kev cawm neeg.

Thov koj yog lub tsua rau kuv ua chaw nkaum,
yog lub yeej thaiv kuv ntawm xwv txheej,
vim koj yeej yog kuv lub tsua thiab lub yeej ntsa zeb.
Kuv tus Tswv Ntuj, thov npo kuv ntawm cov neeg phem txhais tes.

Txais: (15ab) Kuv yuav hu nkauj cav txog koj txoj kev cawm neeg.

Huab Tais, koj yog kuv txoj kev cia siab,
Tswv Ntuj koj yog tus kuv ntseeg siab txij thaum hluas los.
Kuv tso siab rau koj txij thaum kuv yug los,
txij thaum kuv nyob hauv kuv niam plab los, koj yeej yog kuv lub zog.

Txais: (15ab) Kuv yuav hu nkauj cav txog koj txoj kev cawm neeg.

Kuv lub ncauj yuav tshaj koj txoj kev ncaj,
thiab koj txoj kev cawm neeg hnub dhau hnub.
Tswv Ntuj, koj tau qhuab qhia kuv txij thaum yau los,
txog hnub no, kuv tshaj tawm koj cov hauj lwm txaus qhuas.

Txais: (15ab) Kuv yuav hu nkauj cav txog koj txoj kev cawm neeg.

As Les Lus Yas

Txais: As les lus yas, as les lus yas.

Lub noob nplej yog Tswv Ntuj lo lus, Leej Pleev yog tsev nplej;
Txhia leej uas tuaj cuag nws yuav ciaj nyob mus li.

Txais: As les lus yas, as les lus yas.

Ntawv Moo Zoo: MT 13: 1-9

1 Muaj ib hnub, Yes Xus tawm hauv tsev mus zaum ntawm ntug dej ntuj. 2 Tej pab neeg coob tuaj ntsauv nws, ces nws nce mus zaum hauv ib lub nkoj, hos tas tsoom neeg nyob ntawm ntug dej. 3 Yes Xus ua paj lug qhia lawv txog ntau yam. Zaj paj lug txog tus tseb nplej. 13 : 4 - 9. Yes Xus hais li no : "Tus tseb nplej tawm mus tseb. 4 Thaum nws tseb, muaj ib co noob poob ntawm ntug kev, noog ya tuaj noj tas huv si lawm. 5 Ib co noob poob rau hauv cov av pob zeb, nyob ntawd tsis muaj av ntau, ces noob tuaj kaus sai, vim av tsis tob. 6 Thaum hnub tuaj, tshav ziab, cov yub nkig, vim tsis muaj cag ces cov yub qhuav tas. 7 Tseem muaj ib co noob poob hauv cov pos. Pos hlob tuaj laum cov yub. 8 Hos muaj ib co noob poob rau hauv thaj av zoo, cov noob ntawd txhawv hnab, tej lub noob txi ib puas lub, tej lub txi rau caum lub, tej lub txi peb caug lub. 9 Leej twg muaj pob ntseg, cia nws mloog."

TIM 21 LUB 7 HLI 2016

Hnub Tsib Lis Piam Kaum Rau Nruab Xyoo C Nruab Lis Piam Xyoo II

Hwm LN Lawrence nyob Brindisi

Zaj Nyeem Ib: YES LES MIAS 2: 1-3, 7-8, 12-13

1 HUAB TAIS hais nws lo lus rau kuv li no: 2 "Koj mus qw rau Yes Lus Xas Les kom lawv hnov, koj hais tias: “Huab Tais li no: Kuv nco txog thaum koj hluas, koj npuab kuv nyiam kuv, koj hlub kuv li tus nkauj nyab tshiab; koj raws kuv mus hla teb chaws suab puam, hauv lub teb chaws tseb tsis tau qoob. 3 His Xas Lais yog lub cuab tam HUAB TAIS qee, yog HUAB TAIS thawj phaum qoob siav. Leej twg noj cov qoob ntawd mas nws yuav raug xwv txheej. Yog HUAB TAIS lo lus ceeb toom.
7 Kuv tau coj nej los nyob hauv ib lub teb chaws muaj av zoo, kom nej tau noj cov txiv qab thiab tau tej yam zoo. Tab sis nej los nyob tsis ntev nej twb ua kuv lub teb chaws tsis huv tas phem tas, nej muab kuv lub cuab tam hloov ua ib yam phem tsiv saib. 8 Cov Leej Choj tsis nug txog tias: ‘HUAB TAIS nyob qhov twg?’ li. Cov ceev Txoj Cai twb tsis paub kuv li. Cov tswv zov yaj ntxeev siab rau kuv. Cov yaj saub tuav txog Npas Has lub npe ua yaj saub, lawv mus raws tej mlom twb tsis muaj hwj huam nyob hauv lawv.
12 Cuaj txheej ntuj e, nej pom tej no nej ceeb nkaus mas ! Nej tshee, nej nyob hab nuv mas ! Yog HUAB TAIS lo lus ceeb toom. 13 Kuv haiv neeg tau ib txhij ua ob yam phem: Lawv tso kuv pov tseg, kuv uas yog lub qhov dej txhawv muaj txoj sia, thiab lawv mus khawb dua tej lub qhov dej tshiab, uas yog cov qhov dej to qab ntim tsis tau dej."

NPN 36: 6-7AB, 8-9, 10-11

Txais: (10a) Huab Tais, koj yog lub pas dej txhawv muaj txoj sia.

HUAB TAIS, koj txoj kev khuv leej siab txij lub ntuj,
koj lub siab pheej xeeb sawv siab txij saum huab.
Koj txoj kev ncaj siab li Tswv Ntuj cov roob,
koj txoj kev txiav txim tob li qab thu hiav txwv

Txais: (10a) Huab Tais, koj yog lub pas dej txhawv muaj txoj sia.

Tswv Ntuj, koj txoj kev khuv leej muaj nuj nqis ua luaj !
Me nyuam neeg tuaj nkaum hauv koj qab tis ntxoov ntxoo.
Lawv tau noj seem noj sotej yam qab tshaj hauv koj tsev,
koj pub lawv haus koj tus dej qab tsis txawj dhuav.

Txais: (10a) Huab Tais, koj yog lub pas dej txhawv muaj txoj sia.

Vim koj yog lub pas dej txhawv muaj txoj sia,
koj qhov pom kev ua kom peb pom qhov kev.
Thov koj hlub cov neeg paub koj mus li,
koj pub kev haum pheej rau cov neeg siab ncaj.

Txais: (10a) Huab Tais, koj yog lub pas dej txhawv muaj txoj sia.

As Les Lus Yas: MT 11: 25

Txais: As les lus yas, as les lus yas..

Leej Txiv, Huab Tais kav lub ntuj lub teb, kuv cav txog koj,
vim koj tau qhia rau cov neeg me kom lawv paub txog lub Ceeb tsheej. .

Txais: As les lus yas, as les lus yas

Ntawv Moo Zoo: MT 13: 10-17

10 Cov thwj tim txav los ze Yes Xus, lawv hais rau nws tias : "Vim li cas koj ua paj lug hais rau lawv ?" 11 Yes Xus teb rau lawv tias : "Vim Ntuj pub kom nej paub tej yam tob hauv Ntuj lub Ceeb Tsheej, tab sis Ntuj tsis tau pub rau cov ntawd. 12 Tus uas twb muaj lawm, mas Ntuj yuav pub rau nws kom nws muaj ntau tshaj. Hos ntawm tus tsis muaj, ces Ntuj tseem yuav thau qhov nws muaj tawm mus. 13 Vim li ntawd, kuv thiaj ua paj lug hais rau lawv : vim tias lawv ntsia, los lawv tsis pom, lawv hnov, los lawv tsis mloog, thiab tsis to taub. 14 Li ntawd, thiaj muaj raws li cov lus uas Yaj Saub His Xais xub hais tseg tias : Nej pob ntseg hnov, los nej yuav tsis to taub ; nej ntsia, tab sis nej yuav tsis pom. 15 Yog vim haiv neeg no lub siab qhwv lawm : lawv pob ntseg tsis hnov lus thiab lawv qi qhov muag, vim lawv ntshai tsam lawv qhov muag pom, tsam lawv pob ntseg hnov, ces lawv lub siab to taub ces lawv yuav tsum hloov siab, thiab kuv yuav kho tau lawv zoo. 16 Hos nej, mas nej qhov muag tau txoj hmoov zoo, vim nej qhov muag pom kev. Nej pob ntseg tau txoj hmoov zoo, vim nej pob ntseg hnov lus. 17 Kuv hais tseeb rau nej, cov yaj saub thiab cov neeg siab ncaj thaud coob leej ntshaw pom yam uas nej pom, tab sis lawv tsis tau pom, ntshaw hnov yam uas nej hnov, tab sis lawv tsis tau hnov !

TIM 22 LUB 7 HLI 2016

Hnub Rau Lis Piam Kaum Rau Nruab Xyoo C Nruab Lis Piam Xyoo II

Hwm LN Mab Liab Mas Ntas Las

Zaj Nyeem Ib: KWV TXHIAJ 3: 1-4B

1 Ntuj teb tag hmo, kuv nrhiav tus uas kuv lub siab nyiam saum kuv lub lav. Kuv nrhiav nws, tab sis kuv nrhiav tsis tau. 2 Kuv sawv mus ncig lub nroog. Kuv nrhiav ntawm tej kev, ntawm tej tshav puam. Kuv nrhiav tus uas kuv lub siab nyiam. Kuv nrhiav, tab sis nrhiav tsis tau. 3 Cov tub zov keeb ncig mus ncig los, lawv ntsib kuv: "Nej puas pom tus kuv lub siab nyiam ?" 4 Kuv nyuam qhuav mus dhau plaws ntawm lawv, ces kuv nrhiav tau tus kuv lub siab nyiam.

Los: 2 KOS LIS NTHOS 5: 14-17

14 Leej Pleev txoj kev nyiam yuav ua rau peb xav tsis tag, yog tias peb to taub meej tias muaj ib tug neeg tuag pub rau peb sawv daws, ces sawv daws kuj tau nrog nws tuag thiab. 15 Leej Pleev yog tus tuag pub rau peb sawv daws, kom cov neeg ciaj nyob txhob ua neej nco txog lawv xwb, tiam sis kom lawv nco txog tus uas tau tuag thiab tau sawv rov pub rau lawv lawm. 16 Li ntawd, txij nyem no mus, peb yuav tsis saib neeg raws li lawv lub cev sab nraud lawm. Txawm peb tau pom Leej Pleev nyob hauv nws lub cev, mas nyem no peb tsis pom nws zoo li ntawd lawm. 17 Nyem no, yog leej twg los nyob hauv Leej Pleev, mas nws yog ib tug uas Ntuj tsim dua tshiab lawm: tus qub neeg dua tas, ib tug neeg tshiab sawv los nyob lawm.

NPN 63: 2, 3-4, 5-6, 8-9

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Tswv Ntuj, koj yog kuv tus Tswv Ntuj, yog tus kuv nrhiav;
kuv tus plig nqhis txog koj, kuv lub cev seev txog koj
zoo puav tam li av qhuav qhawv, nkig nkuav, tsis tau dej.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Kuv mus saib koj nyob hauv lub tuam tsev,
kuv pom koj lub hwj huam thiab koj lub hwj chim.
Koj txoj kev hlub muaj nqis dua txoj sia,
kuv di ncauj yuav cav lus zoo txog koj.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Kuv yuav cav txog koj tas kuv sim neej,
kuv yuav tsa tes thov ntuj nyob hauv koj lub npe.
Kuv tus ntsuj plig yuav txaus siab hlo li tus tau noj nqaig noj hno,
kuv di ncauj yuav zoo siab, kuv lub ncauj yuav qhuas txog koj.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Koj yog tus pab kuv mus li;
kuv qw zoo siab hauv koj phab tis qhov ntxoov.
Kuv tus ntsuj plig dai dhuam rau ntawm koj,
koj txhais tes xis hwj kuv nraim.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

As Les Lus Yas:

Txais: As les lus yas, as les lus yas.

Mab Liab, koj qhia rau peb saib, koj pom dab tsi ntawm kev?
Kuv pom Leej Pleev sawv rov los lub hwj chim, kuv pom nws lub ntxa qhuav.

Txais: As les lus yas, as les lus yas.

Ntawv Moo Zoo: ZAM 20: 1-2, 11-18

1 Thawj hnub pib lub lis piam, thaum sawv ntxov, ntuj tsis tau kaj, Mab Liab Mas Ntas Las mus tom ntxa. Nws pom daim txiag zeb tshem ntawm lub ntxa lawm. 2 Mab Liab Mas Ntas Las khiav mus cuag Xis Moos Pob Zeb thiab lwm tus thwj tim, uas yog tus Yes Xus nyiam. Nws hais rau nkawd tias : "Lawv nqa Huab Tais tawm hauv ntxa lawm, peb tsis paub xyov lawv coj nws mus tso qhov twg lawm."
11 Mab Liab sawv ze lub ntxa sab nraud, nws quaj. Thaum nws quaj, nws khoov rau hauv lub ntxa. 12 Ces nws pom ob tug Tshiab hnav dawb zaum hauv qhov chaw uas lawv tso Yes Xus lub cev, ib tug zaum pem yav taub hau, ib tug zaum nram yav ko taw. 13 Ob tug Tshiab hais rau Mab Liab tias: "Phauj, ua cas koj quaj ?" Mab Liab hais rau nkawd tias : "Vim lawv nqa kuv tus Huab Tais lawm, kuv tsis paub lawv muab nws tso qhov twg." 14 Hais li ntawd tas, Mab Liab tig ntsia tom qab. Nws pom Yes Xus sawv ntsug nyob ntawd. Tab sis nws tsis paub tias yog Yes Xus. 15 Yes Xus hais rau Mab Liab tias : "Phauj, ua cas koj quaj ? Koj nrhiav leej twg ?" Mab Liab xav tias yog tus saib lub vaj, ces Mab Liab hais rau nws tias : "Huab tais, yog koj nqa nws lub cev lawm no, koj qhia kuv saib koj muab tso qhov twg lawm, kuv yuav mus nqa nws los." 16 Yes Xus hais rau Mab Liab tias : "Mab Liab !" Mab Liab tig hlo mus, nws ua lus Hes Nplaws hais tias : "Las Npus Nis !" Txhais tias : Xib Hwb. 17 Yes Xus hais rau Mab Liab tias : "Koj txhob tuav kuv, vim kuv tseem tsis tau nce mus cuag Leej Txiv. Koj mus cuag kuv cov kwv tij, koj hais rau lawv tias : Kuv nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj." 18 Mab Liab Mas Ntas Las thiaj los tshaj rau cov thwj tim hais tias : "Kuv pom Huab Tais lawm, nws hais cov lus no rau kuv."

TIM 23 LUB 7 HLI 2016

Hnub Xya Lis Piam Kaum Rau Nruab Xyoo C Nruab Lis Piam Xyoo II

Hwm LN Bridget; Hwm Niam Mab Liab

Zaj Nyeem Ib: YES LES MIAS 7: 1-11

1 HUAB TAIS lo lus nws hais rau Yes Les Mias muaj li no : 2 "Koj mus sawv nyob ntawm lub qhov rooj chaws mus hauv HUAB TAIS lub tuam tsev, koj tshaj lo lus no nyob ntawd : cov Yus Das sawv daws uas nej chaws cov qhov rooj no mus teev HUAB TAIS, nej mloog HUAB TAIS lo lus no: 3 “Tus HUAB TAIS Xas Npas Os, His Xas Lais tus Tswv Ntuj hais li no: Nej kho nej tus yeeb yam thiab nej tej hauj lwm kom zoo, kuv thiaj yuav cia nej nyob hauv thaj chaw no. 4 Nej tsis txhob cia siab rau lo lus dag tias : ‘Lub tsev no yog HUAB TAIS lub, yog HUAB TAIS lub tsev ! Yog Huab Tais lub tsev!’ 5 Yog nej kho nej tus yeeb yam thiab nej tej hauj lwm kom zoo tiag tiag, yog nej txhua tus ua ncaj rau cov neeg nyob ze nej, 6 yog nej tsis yuam cov pej kum neeg, cov me nyuam ntsuag thiab cov poj ntsuam, yog nej tsis ua kom cov neeg tsis muaj txhaum ntshav nrog, yog nej tsis mus teev lwm cov tswv ntuj kom nej tau hmoov phem, 7 mas kuv thiaj yuav ua kom nej tau nyob hauv thaj chaw no, hauv lub teb chaws uas kuv ib txwm tau muab rau nej cov yawg koob nyob mus li puag thaum ub los lawm. 8 Tab sis nej tso siab rau tej lus dag, tej lus tsis muaj nqes dab tsi rau nej. 9 Puas tsim nyog nej ua tub sab, nej tua neeg, nej zes luag poj luag sev, nej tsa tes rau ntuj kom nej tau kev dag, nej hlawv xyab hlawv ntawv rau Npas Has, nej teev lwm cov tswv ntuj uas nej tsis paub? 10 Nej ua li ntawd tas, nej tseem tuaj nyob ntawm kuv xub ntiag hauv lub Tuam Tsev no, uas yog lub tsev ris kuv lub npe, nej tseem hais tias : "Peb tsis ntshai raug dab tsi, peb yeej ua tau tas puas tsav yam phem tsiv saib ntawd huv tib si !" 11 Puas yog nej saib tias lub Tuam Tsev uas ris kuv lub npe no ces tsuas yog tub sab lub chaw nkaum xwb no lod? Ntawm kuv mas kuv pom txhua yam tseeb kawg. Yog HUAB TAIS lo lus ceeb toom.

NPN 84: 3, 4, 5-6A + 8A, 11

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv tus plig ntshaw seev yees yuj plaws
rau HUAB TAIS cov tshav loog.
Kuv lub siab lub cev quaj qw hu
txog tus Tswv Ntuj muaj txoj sia.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Tab cov me noog ntxias nrhiav tau chaw nyob,
noog luv nrhiav tau zes puag nws cov me nyuam,
ntawm koj cov thaj txi ntuj, HUAB TAIS kav tsoom tshiab,
kuv tus vaj, kuv tus Tswv Ntuj!

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Cov neeg nyob hauv koj tsev lawv txoj hmoov zoo :
lawv tau kev cav txog koj mus li tsis tseg.
Cov uas saib koj yog lawv lub zog, lawv txoj hmoov zoo.
Lawv yim mus kev lawv lub zog yim loj tuaj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv yeem nyob ib hnub hauv koj cov tshav puam
zoo dua nyob ib txhiab hnub lwm qhov chaw,
kuv yeem nyob ntawm kuv tus Tswv Ntuj taw rooj
zoo dua nyob hauv tus neeg phem lub tsev tsam phooj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

As Les Lus Yas: YAS KOS 1: 21BC

Txais: As les lus yas, as les lus yas.

Nej qhib ib lub siab me txais Lo Lus uas Ntuj muab cog rau hauv nej lawm.
Lo Lus ntawd yuav cawm tau nej tus plig.

Txais: As les lus yas, as les lus yas.

Ntawv Moo Zoo: MT 13: 24-30

24 Yes Xus tseem hais dua ib zag paj lug tias : "Ntuj lub Ceeb Tsheej zoo li ib tug neeg tseb ib co noob zoo rau hauv nws daim teb. 25 Thaum sawv daws tsaug zog tas, nws tus yeeb ncuab tuaj tseb ib co noob nroj rau hauv cov nplej tas ces nws rov qab mus. 26 Txij thaum nplej hlob txog nplej txhawv, nroj kuj tawm tuaj thiab. 27 Cov tub txib tuaj hais rau tus tswv qoob tias : "Huab Tais, koj tau tseb ib co noob qoob zoo rau hauv koj daim teb los tsis sub ? Vim li cas thiaj muaj nroj ?" 28 Tus tswv qoob teb rau lawv tias : "Yog ib tug yeeb ncuab ua qhov ntawd." Cov tub txib hais rau tus tswv tias : "Koj puas xav kom peb mus dob cov nroj pov tseg ?" Tus tswv teb tias : 29 "Kuv tsis xav ! Tsam thaum nej dob nroj, nej rho tau nplej nrog thiab. 30 Nej cia nroj nrog nplej hlob ua ke mus txog lub caij sau nplej. Thaum txog caij sau qoob, kuv mam hais rau cov sau nplej tias : Nej xub sau cov nroj pav ua tej teg cia hlawv, hos nej sau cov nplej mus rau hauv kuv lub txhab."

TIM 25 LUB 7 HLI 2016

Hnub Ob Lis piam Kaum Xya Nruab Xyoo C Nruab Lis Piam Xyoo II

Hwm LN Yas Kos, tus Hauv Paus Xa Lus

Zaj Nyeem Ib: 2 KLN 4: 7-15

7 Txoj kab xwm muaj nqis loj no, peb muab tso rau hauv tej lub tais av, kom sawv daws pom tseeb tias, lub hwj huam loj ntawd yog tuaj ntawm Tswv Ntuj tuaj, tsis yog tawm hauv peb los. 8 Luag txiv peb qhov txhia chaw tuaj, tab sis peb tsis raug luag tsuj; peb tsuas paub tias yuav tso siab lug xwb, tsis muaj qhov tas kev cia siab li. 9 Peb raug luag hiam, tab sis Ntuj tsis tso peb pov tseg; peb raug luag thawb rau hauv pem teb, tab sis peb tsis raug luag rhuav. 10 Peb mus txog qhov twg, peb ris rawv Yes Xus txoj kev txom nyem kev tuag nyob hauv peb lub cev, kom Yes Xus txoj sia tawm tuaj rau neeg pom xyeem nyob hauv peb lub cev. 11 Txawm tias peb tseem muaj txoj sia los peb niaj hnub yuav raug tua vim Yes Xus, kom xwv Yes Xus txoj sia tawm tuaj rau sawv daws pom xyeem nyob hauv peb lub cev txawj tuag. 12 Li ntawd txoj kev tuag lis rawv nws lub luag hauj lwm nyob hauv peb, hos txoj sia lis rawv nws lub luag hauj lwm nyob hauv nej. 13 Li ntawd peb muaj tib lub tswv yim ntseeg xwb, raws li ntawv sau tseg tias : ‘Kuv ntseeg, kuv thiaj hais tawm. Peb kuj ib yam, peb ntseeg, peb thiaj hais tawm. 14 Peb paub tseeb tias, tus tsa Huab Tais Yes Xus sawv rov los, nws kuj yuav tsa peb nrog Yes Xus sawv, thiab yuav coj peb thiab nej mus nyob ze Yes Xus. 15 Tas txhua yam yog ua los pab nej xwb, kom neeg tau txais txiaj ntsim ntau zuj zus tuaj , ces yuav muaj neeg coob kawg nkaus ua Ntuj tsaug, kom Tswv Ntuj muaj koob meej.

NPN 126: 1BC-2AB, 2CD-3, 4-5, 6

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Thaum HUAB TAIS coj Xis Yoos cov neeg nyob txim rov los,
peb zoo li ib co neeg ua npau suav.
Peb lub ncauj muaj suab luag nqhua,
peb tus nplaig qw nkauj zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Tej pej kum cuab hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab loj tas nrho.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

HUAB TAIS, thov koj sau peb cov neeg rov qab los
xws li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev lom zem.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Thaum mus, lawv quaj,
vim lawv ris cov seev noob,
thaum lawv rov los, lawv hu nkauj,
vim lawv ris cov res nplej tshiab los.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: kuv xaiv nej tawm ntawm ntiaj teb los
kom nej mus txi ib co txiv uas yuav nyob ntev.

Txais: As les lus yas, as les lus yas.

Ntawv Moo Zoo: MT 20: 20-28

20 Ntxes Npes Dais ob tug tub leej niam nrog nws ob tug tub txav los ze Yes Xus, nws txhos caug thov ib yam ntawm Yes Xus. 21 Yes Xus hais rau nws tias : “Koj xav tau dab tsi ?” Leej niam hais rau Yes Xus tias : “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.” 22 Yes Xus teb tias : “Nej tsis paub qhov nej thov. Neb puas haus taus lub ntim uas kuv yuav haus ?” Nkawd teb tias : “Wb haus taus.” 23 Yes Xus hais rau nkawd tias : “Kuv lub ntim, mas neb yuav haus, tab sis qhov yuav tau zaum ntawm kuv sab xis thiab sab laug, tsis yog kuv yuav muab rau neb. Kuv Txiv npaj qhov ntawd rau leej twg, mas yog leej twg tug."
24 Kaum leej thwj tim hnov cov lus thov ntawd, lawv npau taws rau nkawd ob kwv tij. 25 Ces Yes Xus hu lawv kom txav los ze nws, nws hais tias : “Nej paub tias cov thawj tswj tsoom kuj cuab kav pej xeem nruj, cov loj ua kom luag pom tias lawv muaj peev xwm tswj pej xeem. 26 Tab sis nyob hauv nej, mas yuav tsis txhob muaj li ntawd : leej twg xav ua tus loj nyob hauv nej, mas nws yuav ua nej tus tub txib. 27 Leej twg xav ua nej tus thawj, mas nws yuav ua nej tus qhev. 28 Yog vim li ntawd, Neeg Leej Tub tsis tuaj nyob ntiaj teb no kom luag tsob hwb nws. Nws tuaj tsob hwb sawv daws, thiab muab nws txoj sia los ua nqi txhiv coob leej.”

TIM     26    LUB    7    HLI     2016

Hnub Peb Lis Piam Kaum Xya Nruab Xyoo C Nruab Lis Piam Xyoo II

Hwm LN Yuas Kis thiab As Nas, Niam Mab Liab niam thiab txiv

Zaj Nyeem Ib:      YES LES MIAS  14:   17-22

17 Koj yuav hais lo lus no rau lawv : "Kuv kua muag poob tsis tseg, tsis hais nruab hnub los hmo ntuj ! Vim kuv haiv neeg tus ntxhais nkauj xwb tsim txiaj raug mob loj, nws muaj ib lub qhov txhab mob hnyav. 18 Yog kuv tawm mus nruab liaj nruab teb, mas kuv pom neeg raug ntaj tua. Yog kuv mus hauv nroog, mas kuv pom neeg txom nyem tuag tshaib tuag nqhis. Tab yog cov Yaj Saub thiab cov Leej Choj, uas lawv mus ncig ib qho dhau ib qho, tsis kav lawv tsis to taub lawm ! 19 HUAB TAIS, koj puas txiav tu nrho xyeeb hlo Yus Das pov tseg ? Puas yog vim Xis Yoos dhuav koj dhau ? Ua cas koj thiaj cia peb raug ntaus li no, tsis muaj kev yuav kho tau peb tus mob li ? Peb tos txoj kev thaj yeeb, tab sis peb tsis tau dab tsi zoo li. Peb tos lub caij peb tus mob yuav zoo, tab sis peb tsuas pom kev ntshai tuav plig rawv xwb. 20 HUAB TAIS, peb paub tias peb lub siab phem, peb paub peb cov yawg koob tej txhaum, peb tau ua txhaum rau koj lawm tiag. 21 Thov koj txuag koj lub npe, koj tsis txhob ntiab peb.  Koj tsis txhob tsis hwm lub theej kiab txawb koj lub hwj chim. Thov koj nco ntsoov, koj txhob rhuav lo lus koj nrog peb cog. 22 Nyob hauv tsoom neeg tej dab qhuas, puas muaj ib tug txawj ua kom nag poob los ? Puas yog lub ntuj tso nag los nws tus kheej? HUAB TAIS peb tus Tswv Ntuj, tsis yog koj tso nag los lod ? Peb tso siab rau koj, vim tas puas tsav yam ntawd yog koj xwb  thiaj ua tau."

NPN    79:   8, 9, 11 + 13

Txais:   (9) Huab Tais, thov koj cawm peb, kom koj lub npe  nto koob meej.  

Thov koj txhob nco txog peb txheej thaud tej txhaum ntxiv;
coj koj txoj kev khuv leej tuaj rau peb sai sai,
vim peb poob rau qhov qis kawg nkaus lawm.

Txais:   (9) Huab Tais, thov koj cawm peb, kom koj lub npe  nto koob meej.

Thov koj pab peb, Tswv Ntuj peb tus cawm seej,
vim koj lub npe muaj koob meej loj;
Thov cawm peb thiab zam peb cov txhaum rau peb
vim koj lub npe zoo..

Txais:   (9) Huab Tais, thov koj cawm peb, kom koj lub npe  nto koob meej.

Thov koj cia cov neeg nyob txim lub suab ntsaj tuaj txog koj;
koj siv koj lub hwj huam loj los cawm cov neeg poob rau kev tuag.
Ces peb, uas yog koj haiv neeg thiab pab yaj nyob hauv koj lub nras zaub
yuav ua koj tsaug mus li tsis muaj caij kawg;
tiam dhau tiam peb yuav cav txog koj lub koob meej.

Txais:   (9) Huab Tais, thov koj cawm peb, kom koj lub npe  nto koob meej.

As Les Lus yas:  

Txais:   As les lus yas, as les lus yas.

Lub noob nplej yog Tswv Ntuj lo lus, Leej Pleev yog tsev nplej;
Txhia leej uas tuaj cuag nws yuav ciaj nyob mus li.

Txais:   As les lus yas, as les lus yas.

Ntawv Moo Zoo:     MT  13:   36-43

36 Yes Xus tso tsoom sid tseg, nws rov los tsev. Cov thwj tim txav los hais rau nws tias : "Koj txhais zaj paj lug hais txog nroj tuaj hauv daim teb rau peb saib." 37 Yes Xus teb rau lawv tias : "Tus tseb cov noob zoo, yog Neeg Leej Tub. 38 Daim teb, yog lub qab ntuj neeg. Cov noob zoo, yog cov tub hauv lub Ceeb Tsheej. Cov nroj, yog tus Phem cov tub. 39 Tus yeeb ncuab uas tseb cov noob nroj, yog Dab Phem. Lub caij sau nplej, yog lub zim txwv kawg. Cov tub sau nplej, yog cov Tshiab. 40 Ib yam li cov nroj tsuas kawg yuav raug muab sau los hlawv hauv hluav taws, lub zim txwv kawg kuj yuav zoo ib yam li ntawd : 41 Neeg Leej Tub yuav xa nws cov Tshiab tuaj, lawv yuav sau txhua yam kev coj neeg ua txhaum thiab cov neeg ua phem tas huv si tawm hauv nws lub Ceeb Tsheej mus,  42 thiab yuav muab lawv pov rau hauv lub qhov hluav taws uas kub ntaiv;  nyob hauv, sawv daws yuav quaj thiab yuav tom hniav nkawv. 43 Ces cov neeg siab ncaj yuav ci ntsa iab zoo li lub hnub nyob hauv lawv Txiv lub Ceeb Tsheej. Leej twg muaj pob ntseg, yeej meem mloog.”

TIM    27   LUB   7   HLI     2016

Hnub Plaub Lis Piam Kaum Xya Nruab Xyoo C Nruab Lis Piam Xyoo II

Zaj Nyeem Ib:     YES LES MIAS  15:   10, 16-21

10 "Kuv niad, cas koj yug kuv los, kuv txoj hmoov phem! koj yug kuv los ua kom lub teb chaws sib cav sib ceg tsis sib haum. Kuv tsis tau qiv tsis tau txais dab tsi, tsis kav sawv daws ntxub kuv.
16 Thaum kuv hnov koj cov lus, kuv muab siab rau mloog. Koj cov lus yog kuv txoj kev lom zem, yog kuv txoj kev zoo siab nyob puag hauv nruab plaw, vim kuv ris koj lub npe, HUAB TAIS tus Tswv Ntuj kav tsoom tshiab. 17 Kuv tsis tau zaum nrog cov neeg nyiam hais lus thuam luag, kuv cia koj txhais tes tuav kuv, kuv zaum kuv ib cag, vim koj ua kom kuv npau taws rau lawv. 18 Vim li cas kuv lub mob thiaj yuav tsis muaj caij xaus ? Vim li cas kuv lub qhov txhab kho tsis tau kom rov zoo, los tsis kam zoo li? Koj puas yog ib tug dej ntxias kuv xwb ? Koj puas yog ib co dej uas tso siab tsis tau rau ? 19 Ces HUAB TAIS teb li no : "Yog koj tig rov qab los, mas kuv yuav hu koj rov los tsob hwb kuv. Yog koj hais tej lo lus tsim txiaj, tsis hais cov lus tsis muaj nqes, mas koj yuav yog kuv lub qhov ncauj. Lawv yuav rov los cuag koj, koj yuav tsis txhob mus cuag lawv ! 20 Kuv yuav muab koj los ua ib lub ntsa tooj uas lawv ntaus tsis vau. Lawv yuav tsa rog ntaus koj, tab sis lawv yuav tsis yeej koj, vim kuv nrog koj nyob, kuv cawm koj thiab npo koj dim. Yog HUAB TAIS lo lus ceeb toom. 21 Kuv yuav npo koj ntawm cov neeg siab phem txhais tes, kuv yuav chua koj tawm ntawm cov neeg siab heev xub ntiag los."

NPN    59:   2-3, 4, 10-11, 17, 18

Txais:   (17d) Hnub muaj kev nyuaj siab, Tswv ntuj yog kuv qhov chaw nkaum.

Kuv tus Tswv Ntuj, thov koj npo kuv dim ntawm kuv cov yeeb ncuab ;
thov koj txuag kuv ntawm cov tuaj tua kuv.
Thov npo kuv ntawm cov neeg ua phem rau kuv,
cawm kuv ntawm cov neeg siab nyoos.

Txais:   (17d) Hnub muaj kev nyuaj siab, Tswv ntuj yog kuv qhov chaw nkaum.

Ntsia saib, lawv tuaj nyas tua kuv,
cov neeg muaj hwj chim loj tuaj ntaus kuv.
HUAB TAIS, kuv twb tsis tau ua ib qho yuam kev, los ib qho txhaum li.

Txais:   (17d) Hnub muaj kev nyuaj siab, Tswv ntuj yog kuv qhov chaw nkaum..

Tswv Ntuj, koj yog kuv lub zog, kuv ntsia ntsoov koj.
Vim koj Tswv Ntuj yog kuv lub yeej ntsa zeb ;
Thov kom kuv tusTswv Ntuj txoj kev hlub mus ua kuv ntej;
Nws yuav cia kuv pom kuv cov yeeb ncuab swb.

Txais:   (17d) Hnub muaj kev nyuaj siab, Tswv ntuj yog kuv qhov chaw nkaum.

Ntawm kuv, kuv yuav hu nkauj cav txog koj lub zog,
sawv ntxov tsees, kuv zoo siab hlo nyob hauv koj txoj kev hlub,
vim koj yog kuv lub yeej ntsa zeb,
yog kuv qhov chaw nkaum hnub kuv muaj kev txom nyem,.

Txais:   (17d) Hnub muaj kev nyuaj siab, Tswv ntuj yog kuv qhov chaw nkaum.

Kuv lub zog! Kuv yuav hu nkauj cav txog koj.
Tswv Ntuj, koj yog kuv lub yeej ntsa zeb,
yog kuv tus Tswv Ntuj muaj kev khuv leej neeg.

Txais:   (17d) Hnub muaj kev nyuaj siab, Tswv ntuj yog kuv qhov chaw nkaum.

As Les Lus Yas:     ZAM  15:   15B

Txais:   As les lus yas, as les lus yas.  

Huab Tais hais tias: Kuv hu nej ua phooj ywg,
vim tas ib puas tsav yam Leej Txiv hais rau kuv, mas kuv qhia nej paub tas huv si.

I call you my friends, says the Lord,
for I have made known to you all that the Father has told me.

Txais:   As les lus yas, as les lus yas.

Ntawv Moo Zoo:     MT  13:   44-46

Yes Xus hais tias:
44 Ntuj lub Ceeb Tsheej zoo li ib hub nyiaj faus rau hauv ib daim teb. Muaj ib tug neeg mus nrhiav tau. Nws rov muab zais, nws zoo siab, nws muag nws lub cuab tam, ces nws mus muas daim teb ntawd. 45 "Ntuj lub Ceeb Tsheej tseem zoo li ib tug tub luam nrhiav cov hlaws npliag deg zoo nkauj. 46 Thaum nws nrhiav tau ib lub hlaws nphiag deg muaj nqi loj, nws mus muag nws lub cuab tam tas huv si, ces nws mus muas lub hlaws npliag deg ntawd.

TIM 28 LUB 7 HLI 2016

Hnub Tsib Lis Piam Kaum Xya Nruab Xyoo C Nruab Lis Piam Xyoo II

Zaj Nyeem Ib: YES LES MIAS 18: 1-6

1 HUAB TAIS lo lus nrov tuaj txog Yes Les Mias li no : 2 "Koj sawv tsees ! Koj mus nram tus puab lauj kaub av tsev. Thaum koj nyob nrad, kuv yuav hais kuv cov lus rau koj.” 3 Ces kuv mus nram tus puab lauj kaub av tsev, nws tab tom ua hauj lwm kiv lub kauj puab lauj kaub. 4 Thaum muaj ib lub lauj kaub nws puab tsis tau zoo, raws li kev cai yeej muaj, mas nws rov muab cov av ntawd puab dua lwm lub xws li cov puab lauj kaub ua kam. 5 Ces kuv hnov HUAB TAIS lo lus hais rau kuv li no : 6 "His Xas Lais tsev neeg, yog kuv xav ua rau nej xws li tus puab lauj kaub ntawd tsis tau lod? Ntawm no yog Huab Tais hais lus. Nej nyob hauv kuv txhais tes xws li cov av nyob hauv tus puab lauj kaub txhais tes ntag, His Xas Lais tsev neeg e."

NPN 146: 1B-2, 3-4, 5-6AB

Txais: (5a) Tus uas muaj Yas Kos tus Tswv Ntuj pab nws mas nws txoj hmoov zoo.
los: As les lus yas.

Kuv tus plig, koj cav lus zoo txog HUAB TAIS !
Kuv yuav cav txog HUAB TAIS tas kuv sim neej,
kuv yuav hu nkauj cav txog kuv tus Tswv Ntuj thaum kuv tseem muaj sia nyob.

Txais: (5a) Tus muaj Yas Kos tus Tswv Ntuj pab nws mas nws txoj hmoov zoo.
los: As les lus yas.

Nej txhob tso siab rau cov ua nom ua tswv,
Los rau ib tug tib neeg, nws tsis muaj hwj huam cawm tau nej :
Nws txoj pa tu nrho, nws kawg rov mus ua av luaj,
thaum ntawd, tas puas tsav yaj nws xav ua kuj ploj mus tas.

Txais: (5a) Tus uas muaj Yas Kos tus Tswv Ntuj pab nws mas nws txoj hmoov zoo.
los: As les lus yas.

Tus tau Yas Kos tus Tswv Ntuj nres nws mas nws txoj hmoov zoo,
nws tso siab rau HUAB TAIS nws tus Tswv Ntuj,
uas yog tus tsim lub ntuj tsim lub ntiaj teb,
tsim dej ntuj thiab ib puas tsav yam nyob hauv dej.

Txais: (5a) Tus uas muaj Yas Kos tus Tswv Ntuj pab nws mas nws txoj hmoov zoo.
los: As les lus yas.

As Les Lus Yas: HAUJ LWM 16: 14B

Txais: As les lus yas, as les lus yas.

Huab Tais, thov koj qhib peb lub siab
Kom peb mloog koj Leej Tub cov lus.

Txais: As les lus yas, as les lus yas.

Ntawv Moo Zoo: MT 13: 47-53

47 "Ntuj lub Ceeb Tsheej tseem zoo li ib lub vas uas luag pov rau hauv dej ntuj. Lub vas puav tau ntau tsav ntau hom ntses. 48 Thaum lub vas puv lawd, cov tub puav ntses rub lub vas los tim ntug nqhuab, lawv zaum, lawv mam li xaiv cov zoo rau hauv tawb, hos muab cov tsis zoo pov tseg. 49 Thaum lub zim txwv kawg, kuj yuav zoo ib yam li ntawd thiab : cov tshiab tuaj txog, lawv yuav cais cov neeg phem ntawm cov neeg ncaj. 50 Lawv yuav muab cov neeg phem pov tseg rau hauv lub qhov hluav taws : nyob hauv, sawv daws yuav quaj tom hniav nkawv. 51 "Nej puas to taub tas ib puas tsav yam ntawd ?" Lawv teb rau Yes Xus tias : "Peb to taub." 52 Yes Xus hais rau lawv tias : “Ua li mas, thaum ib tug Kws Ntawv Ntshiab los ua thwj tim hauv Ntuj lub Ceeb Tsheej, nws zoo li ib tug tswv tsev uas rho tau tej yam qub thiab tej yam tshiab hauv nws lub cuab tam los.” 53 Thaum Yes Xus hais cov paj lug no tas, nws tso qhov chaw ntawd tseg.

TIM 29 LUB 7 HLI 2016

Hnub Rau Lis Piam Kaum Xya Nruab Xyoo C Nruab lis Piam Xyoo II

Hwm LN Mas Thas (Martha), Mab Liab Mas Ntas Las tus niam laus.

Zaj Nyeem Ib: YLM 26: 1-9

1 Thaum Zos Yas Kis, Yos Xias tub, pib ua vaj nyob Yus Das teb, HUAB TAIS ceeb toom ib lo lus li no tuaj rau Yes Les Mias : 2 "HUAB TAIS hais li no : koj mus sawv ntsug ntawm lub tshav puam nyob hauv HUAB TAIS lub tuam tsev. Koj hais kuv cov lus rau tas tsoom sid uas tuaj ntawm cov tsheej Yus Das tuaj pe HUAB TAIS nyob hauv HUAB TAIS tuam lub tsev. Koj yuav hais cov lus kuv qhia tas huv si, txhob tso ib lo tseg. 3 Nyaj tej zaud lawv yuav mloog, ces nyias yuav tso nyias txoj kev phem pov tseg, ces cov xwv txheej uas kuv npaj xa tuaj rau lawv vim lawv txoj kev ua phem, kuv yuav tsis xa tuaj. 4 Koj yuav hais tias HUAB TAIS hais zoo li no : 'Yog nej tsis mloog kuv, nej tsis taug txoj kev cai kuv tsa nyob ntawm nej xub ntiag, 5 yog nej tsis mloog kuv cov tub txib Yaj Saub tej lus uas kuv xa tuaj rau nej tsis tseg, vim nej yeej tsis mloog lawv li, 6 mas kuv yuav ua rau lub tuam tsev teev Ntuj no ib yam li kuv tau ua rau Xis Laus, kuv yuav ua kom lub tsheej no hloov ua ib qho chaw uas txhua lub kuj cuab sib foom hmoov phem."
7 Cov Leej Choj, cov Yaj Saub thiab tas tsoom sid tau hnov Yes Les Mias hais cov lus ceeb toom ntawd nyob hauv HUAB TAIS lub tsev. 8 Thaum Yes Les Mias hais cov lus uas HUAB TAIS kom nws hais rau tsoom sid tas lawm, mas cov Leej Choj thiab cov Yaj Saub ntes Yes Lis Mias. Lawv qw rau nws tias : 9 "Koj yuav tsum tuag! Vim li cas koj tuav txog HUAB TAIS lub npe los ceeb toom tias lub tsev no yuav zoo li Xis Laus thiab lub tsheej no yuav puas tas, yuav tsis tshuav neeg nyob hauv ntxiv?" Ces tas tsoom pej xeem txav los ntsauv vij vog Yes Les Mias nyob hauv HUAB TAIS lub tuam tsev.

NPN 69: 5, 8-10, 14

Txais: (14c) Huab tais, thov koj teb kuv vim koj muaj kev hlub loj tas nrho.

Cov neeg ntxub kuv ntau tshaj kuv cov plaub hau saum taub hau,
lawv ntxub kuv tsis muaj hauv paus hauv ntsis.
Cov neeg uas xav muab kuv tua muaj coob;
Kuv cov yeeb ncuab liam tej yam cuav rau kuv.
Yam kuv tsis tau nyiag, kuv puas yuav tsum xa rov qab?

Txais: (14c) Huab tais, thov koj teb kuv vim koj muaj kev hlub loj tas nrho.

Yog vim koj kuv thiaj raug luag tsawm,
yog vim koj, kuv thiaj tau txaj muag.
Kuv cov kwv tij saib kuv yog ib tug qhua,
kuv niam cov tub saib kuv yog pej kum neeg.
Vim kuv kub siab rau koj lub tsev,
Yog lawv thuam koj, lawv tej lus thuam poob los rau saum kuv.

Txais: (14c) Huab tais, thov koj teb kuv vim koj muaj kev hlub loj tas nrho..

Ntawm kuv, HUAB TAIS, kuv teev ntuj thov txog koj
Thaum lub caij zoo sij hawm rau koj.
Tswv Ntuj, koj lub siab hlub loj tas nrho, thov koj teb kuv,
vim koj yog txoj kev cawm tsis muaj qhov dag.

Txais: (14c) Huab tais, thov koj teb kuv vim koj muaj kev hlub loj tas nrho.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: "Kuv yog qhov pom kev kaj lub qab ntuj neeg;
Leej twg lawv kuv qab, yuav tau qhov pom kev uas coj mus rau txoj sia."

Txais: As les lus yas, as les lus yas.

Ntawv Moo Zoo: Zam 11: 19-27

19 Cov Yus Das coob leej tuaj xyuas Mas Tas thiab Mab Liab nkawd, lawv tuaj nplij nkawd vim nkawd tus nus tuag lawm. 20 Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev. 21 Mas Tas hais rau Yes Xus tias : "Huab Tais, yog koj ntxov tuaj txog ntawm no, mas kuv tus nus yuav tsis tuag. 22 Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj." 23 Yes Xus hais rau Mas Tas tias : "Koj tus nus yuav sawv rov los." 24 Mas Tas hais rau Yes Xus tias : "Kuv paub tias thaum txog Hnub Kawg, lub caij leej tib neeg lub cev ciaj rov los, mas nws yuav sawv rov los." 25 Yes Xus hais rau Mas Tas tias : "Kuv yog Txoj Kev Sawv Rov Los thiab yog Txoj Sia : tus ntseeg txog kuv, tab yog nws tuag lawm, nws yuav muaj txoj sia nyob. 26 Leej twg muaj txoj sia nyob thiab ntseeg txog kuv, nws yuav tsis tuag ib zaug li. Koj puas ntseeg qhov ntawd ?" 27 Mas Tas hais rau Yes Xus tias : "Huab Tais, kuv ntseeg. Kuv ntseeg hais tias koj yog Leej Pleev, yog Tswv Ntuj Leej Tub, tus uas yuav tuaj nyob hauv lub qab ntuj no."


Los LK 10: 38-42

38 Thaum Yes Xus lawv taug kev, lawv mus txog hauv ib lub zos. Ib tug poj niam hu ua Mas Tas txais Yes Xus los hauv nws tsev. 39 Tus poj niam ntawd muaj ib tug niam hluas hu ua Mab Liab. Mab Liab zaum ntawm Huab Tais ko taw, nws mloog Huab Tais hais lus. 40 Hos Mas Tas rau siab ntso lis ntau yam qav num. Ces Mas Tas los hais rau Yes Xus tias : "Huab Tais, koj tsis quav ntsej tias kuv tus niam hluas cia kuv tib leeg lis qav lis num xwb lod ? Koj hais kom nws pab kuv thiab mas !" 41 Tab sis Huab Tais teb rau Mas Tas tias : "Mas Tas, Mas Tas, koj txhawj thiab ua siab fab txog ntau yam, 42 tab sis yuav tsum txhawj txog tib yam xwb. Mab Liab xaiv tau qhov zoo tshaj lawm, yuav tsis txhob muab tshem ntawm nws mus."

TIM 30 LUB 7 HLI 2016

Hnub Xya Lis Piam Kaum Xya Nruab Xyoo C Nruab Lis Liam Xyoo II

Zaj Nyeem Ib: YLM 26: 11-16, 24

11 Cov Leej Choj thiab cov Yaj Saub hais rau cov ntaus thawj thiab rau tas tsoom pej xeem tias : "Tus neeg ntawd tsim nyog raug lub txim tuag, vim nws ua yaj saub hais tej lo lus phem txog lub tsheej no. Nej pob ntseg twb tau hnov tas lawm." 12 Yes Les Mias hais rau tsoom pej xeem thiab rau cov ntaus thawj tias : "Yog HUAB TAIS xa kuv tuaj ceeb toom cov lus txog lub tsev no thiab txog lub nroog no xws li nej tau hnov. 13 Nyiam no nej yuav tsum kho nej tus yeeb yam thiab nej tej hauj lwm kom zoo tuaj ! Nej mloog nej tus HUAB TAIS Tswv Ntuj lub suab mog ! Ces HUAB TAIS yuav tso tseg tsis ua yam phem uas nws xav ua rau nej lawm. 14 Ntawm kuv, mas kuv nyob hauv nej xib tes, nej ua rau kuv raws li nej pom tias zoo thiab yog qhov ncaj. 15 Tab sis, kom nej paub meej tias yog nej muab kuv tua mas nej lob ib co ntshav tsis muaj txhaum rau saum nej, rau saum lub nroog no thiab rau cov pej xeem nyob hauv lub nroog no. Vim tias yeej yog HUAB TAIS xa kuv tuaj cuag nej tiag, kom xwv kuv tau hais tej lus ntawd tas huv si rau nej tau hnov." 16 Ces cov ntaus thawj thiab tas tsoom pej xeem hais rau cov Leej Choj thiab cov Yaj Saub tias : "Tus neeg ntawd tsis tsim nyog raug lub txim tuag, vim nws tuav txog HUAB TAIS peb tus Tswv Ntuj lub npe los hais lus rau peb."
24 Ces As His Kas, uas yog Xas Fas tub, thiaj pab Yes Les Mias, ces lawv tsis muab Yes Les Mias rau hauv cov neeg uas xav muab nws tua txhais tes.

NPN 69: 15-16, 30-31, 33-34

Txais: (14c) Huab Tais, koj muaj kev hlub loj kawg nkaus, thov koj teb kuv.

Thov koj rub kuv tawm ntawm cov av nyam, kom kuv txhob zom av.
Thov koj rub kuv dim ntawm cov ntxub kuv,
thiab dim ntawm cov dej tob;
Kom cov dej ceev txhob ntsawj kuv mus,
kom kuv txhob poob rau hauv lub qhov ntuj uas yuav nqos kuv,
kom lub qhov ntuj txhob qos ncauj kaw nkaus kuv rau hauv.

Txais: (14c) Huab Tais, koj muaj kev hlub loj kawg nkaus, thov koj teb kuv.

Kuv poob rau kev txom nyem thiab kev tu siab lawm,
Tswv Ntuj,thov kom koj txoj kev cawm txuag kuv cia.
Kuv yuav hu ib zag nkauj cav txog Tswv Ntuj lub npe,
kuv yuav ua nws tsaug kom nws nto koob meej loj.

Txais: (14c) Huab Tais, koj muaj kev hlub loj kawg nkaus, thov koj teb kuv.

Cov neeg me pom, lawv yuav zoo siab :
Nej cov uas nrhiav Tswv Ntuj, thov kom nej lub siab rov tuaj zog.
Vim HUAB TAIS pub rau cov pluag raws li lawv thov;
thaum nws cov neeg raug luag ntes nws tsis tso lawv pov tseg.

Txais: (14c) Huab Tais, koj muaj kev hlub loj kawg nkaus, thov koj teb kuv.

As Les Lus Yas: MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo: MT 14: 1-12

1 Yes Xus lub moo nto ncha mus txog vaj txheeb Hes Los pob ntseg, 2 ces Hes Los hais rau nws cov tub txib tias : "Tus ntawd yog Zam Ntxuav Plig ! Nws sawv hauv cov tuag rov los lawm : vim li ntawd cov hwj huam yees ntxwv thiaj tawm hauv nws los. 3 Ua ntej ntawd, Hes Los tau kom lawv ntes Zam, thiab xuas saw hlau khi Zam mus kaw hauv tsev loj faj, vim Hes Los Dias uas yog Hes Los tij laug Fis Lis Pos tus poj niam pom zoo. 4 Vim Zam tau hais rau Hes Los tias : "Koj tsis muaj cai yuav tus poj niam ntawd." 5 Hes Los twb xav muab Zam tua, tab sis nws ntshai tsoom pej xeem, vim sawv daws saib Zam yog ib tug yaj saub. 6 Tiam sis thaum txog Hes Los hnub tsuj xeeb, Hes Los Dias tus ntxhais tuaj dhia seev cev rau sawv daws saib, nws dhia tau ntxim Hes Los siab kawg, 7 Hes Los thiaj cog lus tias yuav pub yam nws thov rau nws. 8 Leej niam cob tus ntxhais, ces tus ntxhais hais tias : "Thov koj muab Zam Ntxuav Plig lub taub hau txawb hauv ib lub phaj nqa los rau kuv ntawm no." 9 Tus vaj tu siab, tab sis vim nws tau cog lus lawm, thiab cov qhua tuaj koom rooj qav kuj tau hnov, ces tus vaj thiaj txib kom lawv muab rau tus ntxhais raws li nws thov. 10 Ces tus vaj xa neeg mus txiav Zam caj dab hauv tsev loj faj. 11 Lawv muab Zam lub taub hau txawb hauv ib lub phaj cev rau tus ntxhais, tus ntxhais nqa mus cev rau nws niam. 12 Zam cov thwj tim tuaj nqa Zam lub cev mus faus. Ces lawv mus hais qhia rau Yes Xus paub.

TIM 1 LUB 8 HLI 2016

Hnub Ob Lias Piam kaum Yim Nruab Xyoo C Nruab Lis Piam Xyoo II

Hwm LN Alphonsus Liguori, Tswv Qhia thiab Kws Txuj Ntshiab

Zaj Nyeem Ib: YES LES MIAS 28: 1-17

1 Thaum tus vaj Xes Des Xias nyuam qhuav ua vaj kav Yus Das teb tau plaub xyoos, xyoo ntawd thaum lub tsib hlis, tus yaj saub As Nas Nias, As Xws tub, tuaj Nkas Npoos tuaj, hais rau Yes Les Mias nyob hauv HUAB TAIS lub tsev, nyob ntawm cov leej choj thiab tas tsoom pej xeem xub ntiag tias: 2 "Tus Huab Tais kav tsoom tshiab, His Xas Lais tus Tswv Ntuj hais li no : Kuv yuav muab tus vaj nyob Npas Npis Los tus quab dam pov tseg. 3 Ob xyoos ntxiv ces kuv yuav nqa cov twj taig uas cia siv rau hauv HUAB TAIS lub tuam tsev no rov qab los rau ntawm no, cov uas Nas Npws Kos Dos Nos Xos, tus vaj Npas Npis Los tau lwg nqa mus rau Npas Npis Los lawm. 4 Kuv kuj yuav coj Yes Kos Nias uas yog Yuas Kis tub thiab yog tus vaj Yus Das, thiab tas cov Yus Das mus nyob txim nyob Npas Npis Los lawd, kuv yuav coj lawv rov qab los nyob ntawm no. Vim kuv yuav muab tus vaj Npas Npis Los tus quab dam pov tseg! Yog HUAB TAIS lus ceeb toom." 5 Ces tus yaj saub Yes Les Mias hais rau tus yaj saub As Nas Nias nyob ntawm cov Leej Choj thiab tas tsoom sid xub ntiag nyob hauv HUAB TAIS lub tsev hnov tias : 6 "Ua li los mas ! Thov kom HUAB TAIS ua raws li koj hais! Kom muaj tuaj raws li koj tau ua saub hais, kom tej twj taig nyob hauv HUAB lub tsev thiab cov neeg nyob txim nyob Npas Npis Los kom sawv daws rov qab los nyob rau ntawm no. 7 Tab sis koj mloog zoo zoo cov lus kuv yuav hais rau koj pob ntseg, thiab rau tas tsoom sid pob tseg hnov. 8 Cov yaj saub txheej thaud, cov ua koj thiab kuv wb ntej, mas sawv daws tsuas ua yaj saub hais txog kev ua tsov ua rog, kev txom nyem thiab kev yuav muaj txom fav los raug ntau haiv neeg, ntau lub teb chaws uas muaj hwj chim loj xwb. 9 Tus yaj saub twg ua saub tshaj tias yuav muaj kev thaj yeeb, mas yog thaum twg tshwm sim raws li nws cov lus lawm mas thiaj paub tseeb tias nws yog ib tug tseem yaj saub uas HUAB TAIS xa tuaj tiag." 10 Ces yaj saub As Nas Nias chua ntia tus quab saum yaj saub Yes Les Mias caj qwb los tsoo pov tseg thiab nws hais rau tsoom sid hnov tias : 11 "HUAB TAIS hais li no : ob xyoos ntxiv mas kuv yuav tsoo Nas Npws Kos Dos Nos Xos tus vaj Npas Npis Los, nws tus quab ib yam li no, yuav muab tshem saum cov kuj cuab lub caj qwb los tsoo pov tseg" Ces Yes Les Mias mus lawm.
12 Thaum yaj saub As Nas Nias tsoo tus quab ntawm yaj saub Yes Les Mias caj qwb li ntawd tas ib ntus tom qab, HUAB TAIS hais rau Yes Les Mias tias : 13 "Koj mus hais rau As Nas Nias tias: ‘HUAB TAIS hais li no : Koj tsoo quab ntoo pov tseg, tiam sis koj ntaus quab hlau los hloov ! 14 Tus HUAB TAIS kav tsoom tshiab, His Xas Lais tus Tswv Ntuj hais li no : Kuv yuav muab ib tug quab hlau rau tas cov haiv neeg uas zwm rau Nas Npws Kos Dos Nos Xas, tus vaj Npas Npis Los, coj tib si, lawv yuav tsob hwb nws; tab yog cov tsiaj nyob nruab liaj nruab teb, kuv yuav muab rau nws huv tib si."
15 Yaj saub Yes Les Mias hais rau yaj saub As Nas Nias tias : "As Nas Nias, koj mloog zoo zoo. HUAB TAIS tsis tau xa koj tuaj, koj tuaj ua kom tsoom sid muaj siab ntseeg tej yam tsis tseeb. 16 Vim li ntawd HUAB TAIS hais li no : Kuv ntiab koj kom txhob nyob hauv lub ntiaj teb no ntxiv. Xyoo no kiag koj yuav tuag, vim koj qhia kom sawv daws ntxeev siab rau HUAB TAIS." 17 Xyoo ntawd, thaum lub xya hli As Nas Nias cia li tuag lawm tiag.

NPN 119: 29, 43, 79, 80, 95, 102

Txais: (68b) Huab Tais, thov koj qhia koj cov kev cai lij choj rau kuv.

Thov koj tshem txoj kev cuav mus deb ntawm kuv,
koj muab koj Txoj Cai pub ua txiaj ntsim rau kuv.

Txais: (68b) Huab Tais, thov koj qhia koj cov kev cai lij choj rau kuv.

Koj txhob rho koj lo lus tseeb ntawm kuv lub ncauj mus,
vim kuv tso siab rau koj cov cai tswj siab.

Txais: (68b) Huab Tais, thov koj qhia koj cov kev cai lij choj rau kuv.

Thov kom cov neeg hwm koj tig los cuag kuv,
lawv thiaj yuav paub koj txoj cai.

Txais: (68b) Huab Tais, thov koj qhia koj cov kev cai lij choj rau kuv.

Thov kom kuv coj raws nraim koj cov cai lij choj,
Ces kuv yuav tsis poob ntsej muag.

Txais: (68b) Huab Tais, thov koj qhia koj cov kev cai lij choj rau kuv.

Cov tsis hwm ntuj nyas yuav tua kuv,
hos kuv rau siab ntso mloog koj cov lus qhia.

Txais: (68b) Huab Tais, thov koj qhia koj cov kev cai lij choj rau kuv.

Kuv tsis ncaim ntawm cov lus koj tau txiav,
vim koj yog tus qhia rau kuv paub.
A
Txais: (68b) Huab Tais, thov koj qhia koj cov kev cai lij choj rau kuv.

As Les Lus Yas: MT 4: 4

Txais: As les lus yas, as les lus yas.

Neeg tsis kawg muab mov xwb los yug siav,
neeg tseem muab txhua lo lus tawm ntawm Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo: MT 14: 13-21

13 Yes Xus hnov tias lawv muab Zam Ntxuav Plig tua lawm, nws caij nkoj mus rau ib qhov chaw xu kev, tsis muaj neeg. Zeej tsoom hnov, lawv tawm hauv tej nroog, mus ko taw raws nws qab. 14 Thaum Yes Xus nqes nkoj, nws pom ib pab neeg coob, ces nws hlub lawv ; nws kho lawv cov neeg uas muaj mob muaj nkeeg. 15 Yuav tsaus ntuj, cov thwj tim txav los hais rau nws tias : "Thaj tsam no, tsis muaj neeg nyob, thiab lig lawm ; koj tso tsoom neeg rov mus hauv tej zos kom lawv tau kev mus muas mov noj." 16 Yes Xus teb rau lawv tias : "Tsis tas lawv yuav mus qhov twg li : yog nej yuav muab rau lawv noj." 17 Cov thwj tim hais rau Yes Xus tias : “Ntawm no, peb tsuas muaj tsib lub ncuav mov thiab ob tug ntses xwb.” Yes Xus hais tias : 18 "Nej nqa los rau kuv." 19 Yes Xus kom cov thwj tim hais sawv daws zaum saum tej nroj tsuag. Ces Yes Xus tuav tsib lub ncuav mov thiab ob tug ntses, nws tsa muag ntsia saum ntuj, nws hais zaj foom hmoov zoo, nws muab cov ncuav mov ntais. Nws cev rau cov thwj tim, kom lawv muab rau sawv daws. 20 Sawv daws noj tsau tas, lawv khaws tej sab mov seem puv kaum ob tawb ! 21 Cov neeg noj mov ntawd muaj ze ntawm tsib txhiab leej txiv neej, tsis xam poj niam me nyuam li.

TIM 2 LUB 8 HLI 2016

Hnub Peb Lis Piam Kaum Yim Nruab Xyoo C Nruab Lis Piam Xyoo II

Hwm LN Eusebius nyob Vercelli thiab PN Peter Julian Eymard

Zaj Nyeem Ib: YES LES MIAS 30: 1-2, 12-15, 18-22

1 HUAB TAIS lo lus nrov tuaj rau Yes Les Mias zoo li no : 2 " HUAB TAIS His Xas Lais tus Tswv Ntuj hais li no : Cov lus kuv tau hais rau koj, koj muab sau rau hauv ib phau ntawv."
12 “HUAB TAIS hais li no tiag : Koj qhov mob yuav zoo tsis taus, koj lub qhov txhab yuav tsis txawj zoo li. 13 Tsis muaj leej twg tuaj koj tog, tsis muaj tshuaj yuav kho tau koj lub qhov txhab, koj yuav tsis zoo. 14 Koj cov phooj ywg hlub tsis nco txog koj lawm, lawv tsis nrhiav koj li ! Kuv ntaus koj zoo li kuv yog koj tus yeeb ncuab, kuv rau txim hnyav rau koj vim koj cov txhaum muaj ntau, koj txoj kev ua phem loj kawg nkaus. 15 Vim li cas koj thiaj qw ntsaj txog koj qhov mob? Koj yeej yuav tsis txawj zoo li. Tos kuv tau ua li ntawd rau koj yog vim koj qhov txhaum hnyav kawg nkaus thiab koj ua txhaum ntau kawg li.
18 HUAB TAIS hais li no : "Kuv yuav rov tsa Yas Kos cov tsev tsam phooj. Kuv yuav khuv leej lawv tej vaj tse; lawv yuav rov qab txhim lub tsheej nyob saum pov roob, yuav rov kho lawv cov tsev loj kom zoo li qub. 19 Lawv yuav rov hu tej zaj nkauj cav txog Ntuj, lawv yuav rov luag lom zem. Kuv yuav ua kom lawv huam vam tuaj, lawv yuav tsis tsawg. Kuv yuav ua kom lawv muaj koob meej, lawv yuav tsis raug thuam ntxiv. 20 Lawv cov xeeb zeej xeeb ntxwv yuav rov zoo li txheej thaud, lawv tsoom neeg yuav nyob ruaj nreb ntawm kuv xub ntiag. Kuv yuav muab txim rau cov haiv neeg hiam lawv. 21 Tus ua tswv saib lawv yog ib tug tawm hauv lawv los, lawv tus vaj tawm ntawm lawv haiv neeg los. Kuv yuav hu nws tuaj ntsib kuv ces nws yuav tuaj cuag kuv. Yog kuv tsis hu, leej twg thiaj yuav muaj peev xwm tuaj cuag kuv tau? Huab Tais lus ceeb toom.
22 Nej yuav ua kuv haiv neeg, kuv yuav yog nej tus Tswv Ntuj."

NPN 102: 16-18, 19-21, 29 +22-23

Txais: (17) Huab Tais yuav rov tsa Xis Yoos kom sawv, nws yuav tawm tuaj muaj hwj chim loj.

HUAB TAIS, cov kuj cuab yuav hawm koj lub npe,
tas cov vaj nyob ntiaj teb yuav hawm koj lub hwj chim,
Thaum HUAB TAIS rov txhim Xis Yoos,
sawv daws yuav pom nws nyob hauv nws lub hwj chim;
nws yuav tig los mloog cov neeg txom nyem tej lus thov,
nws yuav tsis thuam lawv zaj teev ntuj.

Txais: (17) Huab Tais yuav rov tsa Xis Yoos kom sawv, nws yuav tawm tuaj muaj hwj chim loj.

Nej sau qhov no cia rau phaj tub ki uas yuav los yav tom ntej,
ces ib haiv neeg tshiab yuav cav txog HUAB TAIS :
Nws nyob saum nws lub tsev ntshiab dauv muag los saib;
HUAB TAIS nyob saum txheej ntuj siab ntsia ntiaj teb,
Kom tau mloog cov neeg nyob txim lub suab ntsaj,
kom tau tso cov yuav raug tua dim kev tuag.

Txais: (17) Huab Tais yuav rov tsa Xis Yoos kom sawv, nws yuav tawm tuaj muaj hwj chim loj.

Koj cov tub txib tej me nyuam yuav nyob ruaj,
lawv cov xeeb ntxwv yuav nyob ntawm koj xub ntiag mus li.
Sawv daws yuav tshaj HUAB TAIS lub npe nyob Xis Yoos,
Thiab yuav cav lus zoo txog nws nyob Yes Lus Xas Les.
Cov haiv neeg yuav sib sau los nyob ua ke,
cov ceeb tsheej yuav sib txoos los tsob hwb HUAB TAIS.

Txais: (17) Huab Tais yuav rov tsa Xis Yoos kom sawv, nws yuav tawm tuaj muaj hwj chim loj.

As Les Lus Yas: ZAM 1: 49B

Txais: As les lus yas, as les lus yas.

Las Npis, koj yog Tswv Ntuj Leej Tub,
koj yog His Xas Lais tus Vaj.

Txais: As les lus yas, as les lus yas.

Ntawv Moo Zoo: MT 14: 22-36

22 Tam sis ntawd, Yes Xus txhib cov thwj tim kom nce nkoj ua nws ntej mus lawm sab ntug dej tim ub, hos nws nyob xa tsoom sid rov qab. 23 Thaum Yes Xus xa zeej tsoom rov qab mus tas lawd, nws nce mus saum roob, rau ib qho chaw xu kev, ces nws teev Ntuj. Thaum tsaus ntuj, tshuav nws tib leeg xwb. 24 Lub nkoj twb mus deb ntawm ntug nqhuab lawm ntau ntsua muag. Dej nphau nphwv tuaj nplawm lub nkoj, vim cua tshuab tom hauv ntej tuaj. 25 Thaum yuav kaj ntug, Yes Xus mus ko taw saum nplaim dej, nws tuaj caum cov thwj tim. 26 Lawv pom Yes Xus mus ko taw saum dej ntuj, lawv ib ce xob : lawv hais tias : "Yog poj ntxoog". Lawv ntshai kawg, ces lawv qw qw. 27 Tam sis ntawd Yes Xus hais rau lawv tias : "Nej tso siab mas ! Yog kuv ! Txhob ntshai." 28 Pob Zeb teb rau Yes Xus tias : "Huab Tais, yog koj tiag no, koj kheev kom kuv tsuj nplaim dej tuaj cuag koj." 29 Yes Xus teb tias : "Tuaj mas !" Ces Pob Zeb nqes nkoj tso ko taw tsuj saum nplaim dej mus cuag Yes Xus. 30 Tab sis nws pom cua hlob, nws ntshai, ces nws pib tog hauv dej, nws qw tias : "Huab Tais, cawm kuv mas !" 31 Yes Xus cev tes tam sis ntawd tuav Pob Zeb, nws hais rau Pob Zeb tias : "Neeg ntseeg tsawg, ua cas koj ua xyem Mas Tais, Zaj 14 thiab 15 537 xyav ?" 32 Thaum Yes Xus nkawd nce hlo rau hauv nkoj, ces cua tu nrho. 33 Cov nyob hauv nkoj pe Yes Xus, lawv hais tias : "Koj yog Tswv Ntuj Leej Tub tiag !" Yes Xus kho neeg mob nyob Zes Nes Xas Les. 14 : 34 - 36. 34 Yes Xus lawv hla dhau dej, lawv mus nqes rau Zes Nes Xas Les. 35 Cov neeg nyob txawm ntawd cim tau Yes Xus, ces lawv mus qhia ib thaj tsam ntawd paub. Sawv daws coj lawv cov neeg mob tuaj rau Yes Xus. 36 Lawv thov Yes Xus kom nws cia cov neeg mob kov Yes Xus tw tsho. Txhua tus uas tau kov, puav leej dim ntawm lawv tus mob.


Los: MT 15:1-2, 10-14

1 Ib co Fas Lis Xais thiab ib co Kws Ntawv Ntshiab nyob Yes Lus Xas Les tuaj cuag Yes Xus, lawv hais rau Yes Xus tias : 2 "Vim li cas koj cov thwj tim hla cov yawg koob tej kab ke ? Vim thaum lawv noj mov, lawv tsis xub ntxuav tes tso?"
10 Yes Xus hu tsoom sid kom txav los ze, nws hais rau lawv tias : "Nej mloog kom nej to taub ! 11 Tsis yog tej yam nkag hauv neeg lub ncauj mus ua kom neeg tsis huv ; yog tej yam uas tawm hauv lub ncauj los ua kom neeg tsis huv." 12 Cov thwj tim txav los ze Yes Xus, lawv hais tias : "Koj puas paub tias cov Fas Lis Xais hnov koj hais li ntawd, mas lawv tsis txaus siab ?" 13 Yes Xus teb tias : "Tus yub twg tsis yog kuv Txiv nyob saum ntuj cog, mas yuav muab dob pov tseg. 14 Cia lawv chim lawv : lawv yog ib co neeg dig muag coj ib pab dig muag kev ! Vim tias yog ib tug dig muag coj lwm tus dig muag kev, mas nkawd ob leeg yuav ua ke mus poob qhov xwb."

TIM 3 LUB 8 HLI 2016

Hnub Plaub Lis Piam Kaum Yim Nruab Xyoo C Nruab Lis Piam Xyoo II

Zaj Nyeem Ib: YLM 31: 1-7

1 Huab Tais hais tias: Lub caij ntawd kuv yuav yog tas txhua xeem His Xas Lais tus Tswv Ntuj, lawv yuav yog kuv haiv neeg. 2 Huab Tais kuj hais li no tias: Haiv neeg uas maim dhau rab ntaj, lawv mus nrhiav tau ib lub txiaj ntsim zoo nyob teb chaws suab puam. His xas Lais taug kev mus rau lub chaw nws yuav tau so.
3 Huab Tais nyob deb tshwm sim rau nws pom: Kuv tau hlub koj, kuv txoj kev hlub yeej nyob puag taum ntxov los lawm; kuv tau khaws rawv kuv txoj kev khuv leej koj cia. 4 Tus nkauj xwb tsim txiaj His Xas Lais e, kuv yuav rov kho koj dua, ces koj yuav raug txhim dua tshiab. Koj yuav rov hnav zam ntaus paj nruag dhia taug kev ua kev lom zem dua. 5 Nej yuav rov cog hmab txiv cawv nyob saum cov roob Xas Mas Lias dua. Cov khwv cog yuav tau txiv noj. 6 Ces hnub ntawd, cov zov keeb yuav qw nyob saum lub roob Es Fais tias: “Nej kav tsij sawv tsees los, peb mus lawm pem Xis Yoos, pem Huab Tais peb tus Tswv Ntuj.”
7 Vim Huab Tais hais li no: Nej qw zoo siab rau Yas Kos, nej cav txog haiv neeg loj dua cov. Nej yeej meem hais kom luag hnov, yeej meem cav txog, yeej meem tshaj tawm tias: Huab Tais cawm nws haiv neeg lawm, yog cov His Xas Lais seem.

NPN YLM 31: 10, 11-12AB, 13

Txais: (10d) Huab Tais yuav zov peb li tus tswv zov nws pab yaj.

Cov haiv neeg, nej mloog Huab Tais lo lus,
nej muab tshaj tawm rau cov pov txwv nyob deb paub, nej hais tias:
Tus uas tau ua kom His Xas Lais tawg mus rau ntau qhov, rov sau lawv los ua ke,
nws zov lawv li tus tswv zov nws pab yaj.

Txais: (10d) Huab Tais yuav zov peb li tus tswv zov nws pab yaj.

HUAB TAIS yuav txhiv Yas Kos rov los,
nws yuav tso Yas Kos kom dim ntawm tus muaj zog txhais tes.
Lawv yuav ke qw zoo siab ke nce mus pem lub roob Xis Yoos,
lawv yuav tuaj laub lug mus txais HUAB TAIS lo lus zoo.

Txais: (10d) Huab Tais yuav zov peb li tus tswv zov nws pab yaj.

Cov nkauj xwb dhia lom zem zoo siab,
cov tub hluas thiab cov neeg laus kuj yuav dia.
Kuv yuav muab lawv txoj kev tu siab siab ntxeev ua kev zoo siab
Kuv yuav nplij lawv kom lawv zoo siab, txhob nyuaj siab ntxiv.

Txais: (10d) Huab Tais yuav zov peb li tus tswv zov nws pab yaj.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo: MT 15: 21-28

21 Yes Xus tawm ntawm qhov chawd ntawd mus, nws mus rau Tws Los thiab Xis Doos teb. 2 Muaj ib tug poj niam Kas Nas Has nyob hauv teb chaws ntawd tuaj, nws hu nrov nrov tias: “Huab Tais, Das Vis leej Tub, thov koj khuv leej kuv! Kuv tus ntxhais raug ib tug dab phem tsim txom nws. 23 Tiam sis Yes Xus tsis teb ib los li. Cov thwj tim txav los hais rau nws tias: “Koj kuj pab nws saib, vim nws pheej hu nrov nrov caum peb qab.” 24 Yes Xus teb rau lawv tias: “Kuv raug xa tuaj pab cov yaj ploj hauv His Xas Lais tsev neeg xwb.” 25 Tab sis tus poj niam twb tuaj txog lawm, nws txhos caug thov Yes Xus tias: “Huab Tais, thov koj pab kuv.” 26 Yes Xus teb rau nws tias: Tsis phim yuav muab me nyuam tej mov pov rau me nyuam dev noj.” 27 Tus poj niam hais tias: “Thov koj, Huab Tais, vim tias cov me nyuam dev twb noj cov tsig mov uas poob saum lawv tus tswv lub rooj los xwb.” Ces Yes Xus hais rau nws tias: “Tus poj niam, koj muaj lub siab ntseeg loj kawg nkaus! Kom koj tau raws li koj lub siab xav.” Ces nws tus ntxhais zoo hlo txij lub caij ntawd los lawm.

TIM     4    LUB    8    HLI     2016

Hnub Tsib Lis Piam Kaum Yim Nruab Xyoo C Nruab Lis Piam Xyoo II

Hwm LN John Vianney, ua Leej Choj

Zaj Nyeem Ib:     YES LES MIAS   31:   31-34

31  Huab Tais ceeb toom hais tias: Lub hnub nyoog tuaj yuav txog, uas kuv yuav nrog His Xas Lais tsev neeg thiab thiab Yus Das tsev neeg cog lus dua tshiab.  32  Yuav tsis yog cog lus zoo li kuv tau nrog lawv cov yawg koob cog lus thaum lub caij kuv tau tuav lawv tes coj lawv tawm ntawm Hais Nkws Tos teb los lawm, vim lawv tau rhuav kuv lo lus cog txawm tias kuv yog lawv tus Huab Tais. Yog Huab Tais lus ceeb toom. 33 Tab sis kuv yuav rov nrog His Xas Lais tsev neeg cog lus dua zoo li no, thaum dua lub caij ntawd lawm. Yog Huab Tais lus ceeb toom. Kuv yuav muab kuv txoj cai cog kiag rau hauv lawv, yuav muab sau kiag rau hauv lawv nruab siab; ces kuv yuav yog lawv tus Tswv Ntuj thiab lawv yuav yog kuv haiv neeg.  34 Lawv yuav tsis tas qhia rau tus nyob ze lawv los rau lawv tus kwv tij tias: “Koj yuav tsum paub Huab Tais mas.” Tas sawv daws, tsis hais tus hlob tus yau, yuav paub kuv, yog Huab Tais lo lus, vim kuv yuav zam lawv tej kev ua phem rau lawv thiab kuv yuav tsis nco qab lawv cov txhaum ntxiv lawm.

NPN      51:   12-13, 14-15, 18-19

Txais:    (12a) Tswv Ntuj, thov koj tsim ib lub siab huv lis si rau kuv.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,  
thiab txhob rho koj leej Tswv Yim Ntshiab tawm ntawm kuv mus.

Txais:    (12a) Tswv Ntuj, thov koj tsim ib lub siab huv lis si rau kuv.

Koj ua kom kuv rov zoo siab nyob hauv koj txoj kev cawm;
koj muab ib lub tswv yim txawj xav dav rau kuv.
Kuv yuav qhia koj txoj kev rau cov neeg yuam kev,
ces cov neeg txhaum yuav tig rov los cuag koj.    

Txais:    (12a) Tswv Ntuj, thov koj tsim ib lub siab huv lis si rau kuv.

Vim koj tsis zoo siab txais cov kev txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj,  yog muaj ib lub siab xav lees txhaum;
muaj ib lub siab xav lees txhaum thiab ua neeg me, Tswv ntuj, koj yuav tsis thuam.

Txais:    (12a) Tswv Ntuj, thov koj tsim ib lub siab huv lis si rau kuv.

As Les Lus Yas:      MT  16:   18

Txais:   As les lus yas, as les lus yas.  

Koj yog Pob Zeb, nyob saum lub pob zeb no kuv yuav txhim kuv lub Koom Txoos,  
dab phem teb cov qhov rooj yuav tiv tsis yeej lub pob zeb no.

Txais:   As les lus yas, as les lus yas.

Ntawv Moo Zoo:       MT  16:   13-23

13  Yes Xus tuaj txog cheeb tsam ntawm Xes Ntxas Les Fis Lis Pos, ces nws nug coy thwj tim li no : "Luag tej hais tias Neeg Leej Tub yog leej twg ?" 14 Lawv teb tias : “lb txhia hais tias : Yog Zam Ntxuav Plig. lb txhia hais tias, yog Es Lias. Tseem muaj lwm coy hais tias yog Yes Les Mias los yog ib tug hauv coy yaj saub.” Yes Xus hais tias : 15 "Nej ne, nej hais tias kuv yog leej twg ?"
16 Xis Moos Pob Zeb teb tias : "Koj yog Leej Pleev, yog tus Tswv Ntuj Muaj Txoj Sia Leej Tub."  17 Yes Xus teb rau Pob Zeb tias : "Xis Moos, Yos Nas tus tub, koj txoj hmoov zoo, vim qhov koj paub no, tsis yog nqaij thiab ntshav qhia koj. Yog kuv Txiv nyob saum ntuj qhia koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb coy qhov rooj yuav tiv tsis taus lub pob zeb no. 19 Kuv yuav muab Ntuj lub Ceeb Tsheej cov yawm sij rau koj. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj."
20 Ces Yes Xus txwv cov thwj tim tsis pub qhia leej twg tias nws yog Leej Pleev.  21 Txij hnub ntawd los, Yes Xus pib qhia nws cov thwj tim tias nws yuav tsum mus Yes Lus Xas Les. Nyob ped, nws yuav raug cov txwj laus, cov thawj leej choj thiab cov Kws Ntawv Ntshiab tsim nws. Lawv yuav muab nws tua. Hnub peb, nws yuav sawv rov los. 22 Pob Zeb rub Yes Xus los ntawm nws, nws nroo rau Yes Xus tias : "Huab Tais, thov kom Tswv Ntuj txuag koj ! Tsis pub kom tej yam ntawd tuaj raug koj !"
23 Tab sis, Yes Xus fee hlo, nws hais rau Pob Zeb tias :  "Xas Tas, koj lawv kuv qab. Koj thaiv kuv kev. Vim qhov koj xav, tsis yog qhov Tswv Ntuj xav, yog tej yam neeg xav xwb."

TIM     5     LUB    8    HLI     2016

Thawj Hnub Rau lis piam Kaum Yim Nruab Xyoo C Nruab Lis Piam Xyoo II  

Nco txog Hnub Foom Hmoov Zoo Tsa lub Tuam Tsev Teev Ntuj  St. Mary Major

Zaj Nyeem Ib:     NAS HWS  2:   1, 3; 3:   1-3, 6-7

2   1 Ntsia saib, tus xa xov txog ib lub moo zoo tuaj saum cov roob tuaj, nws tshaj tawm txog kev thaj yeeb. Yus Das, kav tsij ua koj cov koob tsheej, kav tsij pauj koj cov yeem; tus neeg phem yuav tsis tuaj tsuj koj ib zaug ntxiv lawm, vim nws swb lawm.
3 HUAB TAIS yuav rov cog Yas Kos cov vaj txiv cawv, His Xas Lais cov vaj txiv ntoo, uas cov neeg phem tau tuaj muab txiav ua cov ceg dam tam tas.
3  1 Hmoov phem rau lub nroog uas nyiam ua luag ntshav nrog, nyiam hais lus dag, nyiam txeeb luag tug,  mus lwg luag tsis muaj caij tsum; 2 hlua nplawm neeg nrov nplib nlpob,  log tsheb khiav nkag qees, nees rag ntws khiav, tsheb rog nrov nroo ntws, 3 cov caij nees khiav rag ntws mus sib tua, ntaj cig liab vog, hmuv cig laim txias, coob leej raug mob ntog, tej pawg qauv nco lug, neeg tuag puv txhia chaw tsis pom qab tsuj taw!
6 Kuv yuav w tej yam qias los npog koj, yuav tso hmoov phem los rau koj thiab yuav ua kom koj tau txaj muag, mus txog thaum txhua leej txhua tus pom koj lawv yuav khiav koj, thiab yuav hais tias: “Nis Nis Vas puas ntsoog tas; leej twg yuav xav khuv leej nwd? Puas yuav nrhiab tau ib tug neeg nyob qhov twg los nplij nws?”

NPN:    TXOJ CAI OB  32:   35CD-36AB, 39ABCD, 41

Txais:   (39c) Kuv yog tus ua kom tuag thiab ua kom ciaj sia tau.    

Hnub uas lawv yuav raug rhuav los txog ze lawm,
txoj kev puas ntsoog khiav nrawm nroos los rau saum lawv!    
Muaj tseeb, HUAB TAIS yuav muab kev ncaj rau nws haiv neeg;
nws yuav muab kev khuv leej rau nws cov tub txib.        

Txais:   (39c) Kuv yog tus ua kom tuag thiab ua kom ciaj sia tau.

Nej yuav paub tias tsuas muaj kuv ib leeg thiaj yog Tswv Ntuj,  
tsis muaj dua lwm tus tswv ntuj dhau ntawm kuv lawm.    
Kuv yog tus ua kom txoj sia tu thiab ua kom ciaj sia tib si.
Kuv yog tus ua kom txawj mob thiab ua kom txawj zoo.    

Txais:   (39c) Kuv yog tus ua kom tuag thiab ua kom ciaj sia tau.

Kuv yuav hov kuv rab ntaj ci hob kom ntse zuag plias,
kuv txhais tes yuav tuav nkaus txoj kev txiav txim,    
Kuv yuav ua pauj  rov rau kuv cov yeeb ncuab,    
thiab kuv yuav ua nkaus li lawv ua rau cov ntxub kuv.  

Txais:   (39c) Kuv yog tus ua kom tuag thiab ua kom ciaj sia tau.

As Les Lus Yas:    MT  5:   10

Txais:    As les lus yas, as les lus yas.    

Cov tau txoj hmoov zoo, yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais:    As les lus yas, as les lus yas.

Ntawv Moo Zoo:     MT  16:   24-28

24 Yes Xus hais rau nws cov thwj tim tias : “Yog leej twg xav los raws kuv, nws yuav tsum txhob xav txog nws, nws yuav kwv nws tus ntoo cuam, nws yuav lawv kuv qab. 25 Vim leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv, mas nws yuav rov tau nws txoj sia. 26 Yog ib tug neeg txeeb tau tas lub ntiaj teb huv tib si los ua nws tug, tab sis yog nws txoj sia ploj lawm, mas nws tau dab tsi ? Neeg yuav muab dab tsi los pauv tau nws txoj sia ? 27 Vim tias Neeg Leej Tub yuav nrog nws cov Tshiab los muaj Leej Txiv lub hwj chim, ces nws yuav pauj rau nyias raws li nyias cov hauj lwm. 28 Kuv hais tseeb rau nej : nej ib txhia uas nyob ntawm no, yuav tsis tau saj txoj kev tuag, lawv yuav xub tau pom Neeg Leej Tub nrog nws lub Ceeb Tsheej los txog tso.”

TIM 6 LUB 8 HLI 2016

Hnub Xya Lis Piam Kaum Yim Nruab Xyoo C Nruab Lis Piam Xyoo II

Nco txog Yes Xus lub Hwj Chim tawm los rau nws cov Thwj Tim Pom.

Zaj Nyeem Ib: DN 7: 9-10, 13-14

9 Kuv ntsia, kuv txawm pom luag muaj ib co theej kiab los txawb rau ntawd, ces tus neeg laus los zaum saum nws lub theej kiab. Nws cov ris tsho dawb paug ci cuag daus, nws cov plaub hau dawb cuag plaub yaj. Nws lub theej kiab yog nplaim taws, muaj ib co log hluav taws. 10 Muaj ib tug dej hluav taws txhawv ntws lug ntawm qhov chaw nws zaum los. Txhiab vam leej tsob hwb nws, pua txhiab vam leej tiam nws. Lawv qhib lub rooj txiav txim, tej ntaub ntawv twb nthuav tas rau ntawd lawm.
13 Hmo ntuj kuv tseem yees pom ntxiv zoo li no: Muaj ib tug zoo xws li tib neeg ib leeg Tub, nws tuaj saum cov huab saum ntuj tuaj; nws txav los rau ntawm tus Laus, ces lawv coj nws qhia rau tus Laus. 14 Ces tus uas zoo xws li tib neeg ib leeg Tub txais lub hwj huam, lub koob meej thiab kev ua vaj. Tas txhia haiv neeg, txhia lub kuj cuab, txhia xeem lus tsob hwb nws. Nws lub hwj huam yog ib lub hwj huam nyob mus li tsis txawj kawg; yuav tsis muaj leej twg txeeb ntawm nws mus tau. Nws txoj kev ua vaj yuav tsis raug leej twg muab rhuav.

NPN 97: 1-2, 5-6, 9

Txais: (1a +9a) Huab Tais ua vaj, nws yog tus loj tshaj kav tas lub ntiaj teb.

HUAB TAIS yog vaj ntxwv, lub ntiaj teb zoo siab;
ntau lub pov txwv luag ntxhi.
Cov huab thiab qhov tsaus nyob ncig nws,
kev ncaj ncess thiab kev txiav txim yog lub taw ncej txheem nws lub theej kiab.

Txais: (1a +9a) Huab Tais ua vaj, nws yog tus loj tshaj kav tas lub ntiaj teb.

Cov roob yaj tas xws li ciab ntab yaj nyob Huab Tais xub ntiag,
ntawm tus HUAB TAIS kav tas lub ntiaj teb xub ntiag.
Lub ntuj cav txog nws txoj kev ncaj ncees,
tas txhua haiv neeg pom nws lub hwj chim.

Txais: (1a +9a) Huab Tais ua vaj, nws yog tus loj tshaj kav tas lub ntiaj teb.

HUAB TAIS, vim koj yog tus nyob siab dua cov saib tas lub ntiaj teb.
koj loj tshaj tas ib tsoom tswv ntuj.

Txais: (1a +9a) Huab Tais ua vaj, nws yog tus loj tshaj kav tas lub ntiaj teb.

Zaj Nyeem Ob: 2 PZ 1: 16-19

16 Peb tsis tau ntseeg raws li tej zaj dab neeg uas cov neeg ncauj npliag tau xev; pebtuaj qhia nej tsuas tau qhia kom nej paub txog peb tus Huab Tais Yes Xus Pleev lub hwj huam, thiab paub tias nws yuav rov los. Peb yog ib co tim khawv tau pom xyeem nws lub hwj chim ntawm peb qhov muag. 17 Leej Pleev tau txais koob meej thiab txais hwj chim ntawm Leej Txiv Tswv Ntuj, yog hnub uas Leej Txiv lub suab muaj hwj xyeej nrov tuaj hais tias : ‘Tus no yog kuv Leej Tub, tus kuv nyiam, nws ua ntxim kuv lub siab tas nrho.’ 18 Lub suab ntawd, peb tau hnov nrov saum ntuj tuaj, hnub uas peb nrog Yes Xus nyob saum lub roob ntshiab. 19 Peb kuj tseem muaj cov Yaj Saub tej lus uas yog ib co lus tsim nyog peb ntseeg. Nej yuav tsum mob siab ntseeg tej lus ntawd thiab, uas yog ib co lus zoo li ib lub teeb ci hauv qhov tsaus ntuj rau nej mus txog lub caij uas lub hnub tawm tuaj thiab lub hnub qub kaj ntug ci tuaj rau hauv nej nruab siab.

As Les Lus Yas: MT 17: 5C

Txais: As les lus yas, as les lus yas.

"Tus no, yog kuv leej tub uas kuv nyiam, nws yog kuv qhov chaw zoo siab,
nej cia li mloog nws hais.

Txais: As les lus yas, as les lus yas.

Ntawv Moo Zoo: LK 9: 28b-36

28 Yes Xus coj Pob Zeb, Zam, thiab Yas Kos nrog nws, ces nws nce mus teev Ntuj saum roob. 29 Thaum Yes Xus teev Ntuj, nws lub ntsej muag hloov, nws cev ris tsho ci dawb paug ntsa iab. 30 Ib sij huam, muaj ob tug neeg nrog Yes Xus tham : yog Mais Xes thiab Es Lias. 31 Nkawd tawm los muaj hwj chim, nkawd nrog Yes Xus tham txog txoj hauj lwm uas nws yuav sawv kev mus lis kom tiav nyob Yes Lus Xas Les. 32 Pob Zeb thiab nws cov npawg qaug dab ntub. Tab sis lawv meej pem kawg. Ces lawv pom Yes Xus lub hwj chim thiab pom ob tug neeg uas nrog Yes Xus ua ke. 33 Thaum ob tug ntawd yuav ncaim ntawm Yes Xus, mas Pob Zeb hais rau Yes Xus tias : "Xib Hwb, peb nyob ntawm no mas zoo kawg ! Cia peb tsa peb lub tsev tsam phooj, ib lub rau koj, ib lub rau Mais Xes, ib lub rau Es Lias." Pob Zeb tsis paub nws hais dab tsi. 34 Thaum Pob Zeb tab tom hais li ntawd, mas muaj ib twv huab tuaj vov nkaus lawv. Thaum lawv nyob hauv twv huab, lawv ntshai kawg. 35 Muaj ib lub suab nrov hauv twv huab tuaj tias : "Tus no yog kuv Leej Tub, yog tus kuv Xaiv, nej mloog nws mog." 36 Thaum lub suab hais li ntawd tas, tshuav Yes Xus tib leeg lawm xwb. Lub caij ntawd, cov thwj tim ua twj ywm tsis qhia dab tsi rau leej twg txog qhov lawv tau pom.