HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


COV ZAJ NYEEM NRUAB LIS PIAM XYOO A 2019-2020 - Page 13 Empty

Latest topics

» COV ZAJ NYEEM NRUAB LIS PIAM XYOO II 2021-2022
by Mim Today at 5:18 am

» COV ZAJ NYEEM NRUAB LIS PIAM CAIJ TOS HUAB TAIS
by Mim Yesterday at 1:55 pm

» COV ZAJ NYEEM NRUAB LIS PIAM XYOO B 2020-2021
by Mim 27th November 2021, 8:14 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 25th November 2021, 4:54 am

» Vaj Pov Hmoob tus Vaj
by Maiv Tooj 25th November 2021, 4:31 am

» Cov zaj nyeem Hnub Chiv Xyoo B 2020-2021
by NrhiavTswvNtuj 17th November 2021, 5:09 am

» XH. Yaj Zoov Ntxheb lub Tsev THOOB TSIB
by Maiv Tooj 17th November 2021, 5:02 am

» KEV CAI KHI TES
by Maiv Tooj 17th November 2021, 4:57 am

» Thaj yeeb nyab xeeb rau hmoov Tsuj Xeeb Yes Xus Yug
by Mim 10th November 2021, 12:49 pm

» Zaj 546- VAJ HMOOB YUAV NQES LOS.
by Maiv Tooj 4th November 2021, 5:12 am

» Txiv Plig Vaj Xwm ( Pere Lucien Bouchard - Father Lucien Bouchard)
by NrhiavTswvNtuj 4th November 2021, 5:03 am

» Leej Ntshiab Npus Nos ( Saint Bruno)
by Maiv Tooj 5th October 2021, 5:05 pm

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO A 2019-2020

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 13th November 2020, 6:14 pm

    Tim 14 lub 11 Hlis 2020

    Hnub Xya Lis Piam Peb Caug Ob Nruab Xyoo A Nruab Lis Piam Xyoo II
    Lectionary: 496

    Zaj Nyeem Ib: 3 Zam 1: 5-8


    Zam sau ntawv rau Nkas Yus tias:
    5 Tus zoo nyiad, koj yog ib tug neeg ua ncaj nyob hauv txhua yam koj ua pab rau cov kwv tij, txawm tias lawv yog ib co pej kum neeg xwb. 6 Lawv tau zeem tseeb txog koj txoj kev nyiam kev hlub nyob ntawm lub Koom Txoos xub ntiag lawm. Li ntawd, yog ib qho zoo kom koj xa lawv mus ncig raws li ib txog kev uas phim rau Tswv Ntuj. 7 Yog vim Tswv Ntuj lub npe, mas lawv thiaj tau sawv kev tawm mus ncig, lawv tsis kam txais dab tsi ntawm cov neeg teev dab qhuas li. 8 Ua li mas peb yuav mob siab txhawb cov neeg zoo li ntawd, peb thiaj tau nrog lawv koom tes ua txoj hauj lwm tshaj txoj kev tseeb.

    NPN 112: 1-2, 3-4, 5-6

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nws muaj hmoov zoo tus uas hwm HUAB TAIS,
    thiab nyiam coj Huab Tais cov lus qhia tas siab tas ntsws.
    Nws caj ces yuav muaj hwj chim nyob ntiaj teb;
    tiam neeg siab ncaj yuav tau txais txiaj ntsim koob hmoov.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Kev nplua nuj muaj nyiaj muaj txiaj yuav puv nws lub tsev;
    Nws txoj kev ua siab dav yuav nyob ruaj nreb mus li.
    Nws ci hauv qhov tsaus ntuj tuaj kaj cov neeg siab ncaj,
    nws muaj lub siab zoo, khuv leej luag, thiab ua ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Tus neeg txawj hlub luag thiab qiv rau luag nws tau hmoov zoo.
    Nws tswj nws tej nyiaj txiag raws kev ncaj.
    Tus neeg ncaj yuav nyob ruaj nreb,
    sawv daws yuav nco ntsoov txog nws mus li.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    As Les Lus Yas: 2 TXLN 2: 14

    Txais: As les lus yas, as les lus yas.

    Tswv Ntuj hu peb nyob hauv lub Moo Zoo,
    kom peb tau txais peb tus Huab Tais Yes Xus Pleev lub koob meej.


    Txais: As les lus yas, as les lus yas.

    Ntawv Moo Zoo: LK 18: 1-8

    1 Yes Xus hais ib zag paj lug rau nws cov thwj tim, nws qhia lawv tias yuav tsum teev Ntuj tsis tseg, txhob ntaus siab yau. Nws hais tias : 2 “Nyob hauv ib lub nroog, muaj ib tug txwj laus txiav txim, nws tsis ntshai Tswv Ntuj thiab tsis hwm leej twg li. 3 Muaj ib tug poj ntsuam nyob hauv lub nroog ntawd tuaj cuag tus txwj laus txiav txim, nws hais tias: "Thov koj pab txiav txim tsa kuv cai, tiv tus neeg ntxub kuv." 4 Tus txwj laus tsis quav ntsej li, nws pheej muab ncua thiab ncua. Tab sis thaum kawg nws xav tias: "Tab yog kuv tsis ntshai Tswv Ntuj thiab tsis hwm ib tug neeg twg li los, 5 vim tus poj ntsuam ntawd tuaj txob kuv dhau, ces kuv yuav txiav txim ncaj rau nws, vim ntshai tsam thaum kawg nws rov tuaj ua kuv nyuaj siab dua."
    6 Ces Huab Tais hais tias: "Nej mloog tus txwj laus txiav txim siab tsis ncaj ntawd cov lus saib. 7 Yog Tswv Ntuj cov uas nws xaiv ua hnub ua hmo hu txog nws tsis tseg, nws puas yuav tsis tsa lawv cai li? Nws puas yuav tos ntev ntev mam teb lawv? 8 Kuv hais rau nej tias, Tswv Ntuj yeej yuav tsa lawv cai sai sai. Tab sis thaum Neeg Leej Tub rov los, nws puas yuav pom muaj kev ntseeg nyob ntiaj teb ?"

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 15th November 2020, 5:41 pm

    Tim     16     lub     11     Hlis     2020

    Hnub Ob Lis Piam Peb Caug Peb Nruab Xyoo A Nruab Lis Piam Xyoo II
    Lectionary: 497

    Hwm LN Margaret nyob Scotland; los hwm LN Gertrude

    Zaj Nyeem Ib:      QYTN  1: 1-4; 2:1-5


    1 Yes Xus Pleev txoj kev qhia txog yav tom ntej uas yog Tswv Ntuj qhia rau nws, kom nws qhia rau nws cov tub txib txog tej yam tshuav tsis ntev yuav tshwm sim tuaj. Nws xa nws tus Tshiab tuaj qhia cov lus ntawd rau nws tus tub txib Zam paub.
    2  Zam ua tim khawv zeem tseeb txog Tswv Ntuj Lo Lus thiab txog Yes Xus Pleev cov lus pov thawj uas yog tej yam nws tau yees pom.
    3 Tus nyeem cov lus saub no thiab cov uas mloog cov lus no thiab coj raws li tau sau rau hauv no, lawv tau txoj hmoov zoo, vim lub caij los txog ze ze lawm!
    4 Kuv Zam sau ntawv rau xya lub Koom Txoos nyob As Xias: Thov kom nej tau txais lub txiaj ntsim thiab txoj kev thaj yeeb tuaj ntawm Tus Nyob, Tus Ib Txwm Nyob, thiab Tus Tab Tom Los tuaj, thiab tuaj ntawm xya leej tswv yim uas nyob ntawm hauv ntej ntawm nws lub theej kiab tuaj.
    (Huab Tais hais rau kuv tias):
    2   1 “Koj sau ntawv rau tus Tshiab hauv lub Koom Txoos nyob Es Fes Xos tias:
    Tus uas nws tuav xya lub hnub qub nyob hauv nws txhais tes xis, thiab nws mus kev hauv nruab nrab xya tus ncej txawb teeb kub hais li no:
    2 Kuv paub koj covhauj lwm, paub koj txoj kev khwv, thiab koj lub siab ruaj siab tawv, thiab kuv paub tias koj tsis nyiam cov neeg siab phem. Koj tau sim cov uas lawv hais tias lawv yog hauv paus xa lus, tab sis lawv twb tsis yog, ces koj pom tias lawv yog ib co hauv paus xa lus cuav xwb.
    3 Koj yog ib tug muaj lub siab loj siab tawv qhawv, koj tau raug txom nyem vim kuv lub npe, los koj tsis ntaus siab me li.
    4 Tsis kav, kuv muaj ib qho tsis zoo siab rau koj, yog qhov koj tau ua koj txoj kev nyiam kuv yav thaum nyuam qhuav pib ploj lawm.
    5 Koj yuav xav saib koj poob deb npaum li cas lawm; koj yuav thov txhaum, thiab koj rov ua cov hauj lwm yav thaud koj ua mog. Yog koj tsis ua li ntawd, koj tsis thov txhaum, mas kuv yuav tuaj rho koj tus ncej txawb teeb ntawm nws qhov chaw mus.”

    NPN     1: 1-2, 3, 4+6

    Txais:    (QYTN  2:17) Cov uas ntaus rog yeej, kuv yuav muab tsob ntoo muaj txoj sia los yug lawv.

    Muaj hmoov zoo yog tus uas tsis coj
    raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS txoj cai nruab hnub hmo ntuj.

    Txais:    (QYTN  2:17) Cov uas ntaus rog yeej, kuv yuav muab tsob ntoo muaj txoj sia los yug lawv.

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj zeeg li.
    Nws ua yam twg tau yam ntawd.

    Txais:    (QYTN  2:17) Cov uas ntaus rog yeej, kuv yuav muab tsob ntoo muaj txoj sia los yug lawv.

    Cov neeg phem tsis zoo li ntawd, lawv tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais:    (QYTN  2:17) Cov uas ntaus rog yeej, kuv yuav muab tsob ntoo muaj txoj sia los yug lawv.

    As Les Lus Yas:     ZAM  8: 12

    Txais:    As les lus yas, as les lus yas.

    Huab Tais hais tias:  "Kuv yog qhov pom kev kaj lub qab ntuj neeg.
    Leej twg lawv kuv qab, nws yuav tau qhov pom kev uas coj mus rau txoj sia.

    Txais:    As les lus yas, as les lus yas.

    Ntawv Moo Zoo:     LK  18: 35-43

    35 Thaum Yes Xus tuaj yuav txog Yes Lis Kos, muaj ib tug dig muag zaum thov khawv ntawm ntug kev. 36 Nws hnov ib pab neeg taug kev, nws nug saib yog muaj dab tsi. 37 Lawv qhia nws tias:  “Yog Yes Xus Nas Xas Les hla tuaj mus.” 38 Ces nws tsa suab hu nrov nrov tias : "Yes Xus, Das Vis Leej Tub, thov koj khuv leej kuv !" 39 Cov uas mus kev tom hauv ntej cem nws kom ua twj ywm, tab sis nws haj yam hu nrov tias : "Das Vis Leej Tub, thov koj khuv leej kuv !” 40 Ces Yes Xus nres, nws kom lawv coj tus dig muag los rau nws. Thaum tus dig muag los txog ze lawm, Yes Xus nug nws tias : 41 "Koj xav kom kuv ua dab tsi rau koj ?" Tus dig muag teb tias : "Huab Tais, thov ua kom kuv pom kev." 42 Ces Yes Xus hais rau nws tias : "Koj rov pom kev mas ! Koj lub siab ntseeg cawm koj lawm." 43 Tam sis ntawd, tus dig muag rov pom kev, ces nws raws Yes Xus qab mus, nws cav txog Tswv Ntuj. Tas tsoom pej xeem pom qhov ntawd, lawv cav lus zoo txog Tswv Ntuj.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 16th November 2020, 6:54 am

    Tim 17 lub 11 Hlis 2020

    Hnub Peb Lis Piam Peb Caug Peb Nruab Xyoo A Nruab Lis Piam Xyoo II
    Lectionary: 498

    Hwm LN Elizabeth nyob Hungary, ua leej phauj

    Zaj Nyeem Ib: QYTN 3: 1-6, 14-22


    Zam hnov Huab Tais hais tias:
    1 “Koj sau ntawv rau tus Tshiab hauv lub Koom Txoos nyob Xas Dis tias: Tus uas muaj Tswv Ntuj xya leej tswv yim thiab xya lub hnub qub nws hais li no : Kuv paub koj cov hauj lwm koj ua; koj muaj lub koob lub npe tias koj ciaj sia, tiam sis koj twb tuag lawm. 2 Kav tsij ceev faj zoo; koj cia li ua kom koj qhov seem uas tseem tshuav txoj sia thiab twb yuav tu siav rov muaj zog tuaj. Vim kuv tsis pom tias koj tau ua koj cov hauj lwm tiav log nyob ntawm kuv tus Tswv Ntuj qhov muag pom li. 3 Koj nco ntsoov txog tias koj tau muaj siab txais thiab hnov Lo Lus npaum li cas; cia li muab khaws cia, thiab los lees txhaum mas! Yog koj tsis ceev faj zoo, mas kuv yuav los xws li ib tug tub sab, koj yuav tsis paub lub sij hawm twg kuv los txog ntawm koj li. 4 Tab sis, nyob Xas Dis, koj tseem muaj ob peb leeg uas lawv tsis tau ua lawv cov tsoos tsho dub. Lawv yuav hnav dawb nrog kuv taug kev, vim lawv tsim nyog nrog kuv. 5 Tus twg ntaus tsam yeej, mas nws yuav hnav dawb; tsis muaj kev txhawj txog tias kuv yuav tshem nws lub npe tawm hauv phau ntawv muaj txoj sia mus li; kuv yuav lees paub nws lub npe nyob ntawm kuv Txiv thiab ntawm cov Tshiab xub ntiag.
    6 Leej twg muaj pob ntseg, kom nws kav tsij mloog cov lus uas Leej Ntuj Plig hais rau cov Koom Txoos.
    14 Koj sau ntawv rau tus tshiab hauv lub Koom Txoos nyob Laus Dis Xes Yas tias : Tus As Mees, tus Tim Khawv pheej xeeb thiab tseeb, tus ua hauv paus chiv Tswv Ntuj tej hauj lwm tsim lub sim ceeb, nws hais li no : 15 Kuv paub koj cov hauj lwm koj ua, koj tsis txias, tsis kub li. Kheev lam koj yuav txias txawm txias kiag, koj yuav kub txawm kub kiag mas! 16 Vim koj sov ntem ntauv, koj tsis kub tsis txias, mas kuv yuav ntuav koj tawm hauv kuv qhov ncauj mus. 17 Koj hais tias : ‘Kuv nplua nuj, kuv muaj koob nto npe, kuv tsis ntshaw dab tsi li,’ tab sis koj twb tsis pom tias koj txom nyem, koj kob huam, koj pluag, koj dig muag, koj liab qab li! 18 Kuv pab koj tswv yim li no: koj muas kub ntawm kuv uas yog cov kub nchuav tawm hauv hluav taws los, koj thiaj yuav nplua nuj tuaj; koj muas cov tsoos tsho dawb ntawm kuv los hnav npog koj qhov liab qab txaj muag; koj muas tshuaj ntawm kuv mus pleev koj qhov muag kom koj thiaj pom kev tuaj. 19 Kuv qhuab ntuas thiab rau txim rau cov neeg uas kuv nyiam. Kav tsij kub siab tig los lees txhaum mog !
    20 Ntsia saib, kuv sawv ntawm qhov rooj lawm, thiab khob qhov rooj. Leej twg hnov kuv lub suab thiab qhib qhov rooj, mas kuv yuav chaws mus hauv nws tsev, kuv yuav nrog nws noj mov, nws kuj yuav nrog kuv noj mov thiab. 21 Leej twg ntaus tsam yeej, mas kuv yuav pub kom nws tau nrog kuv zaum saum kuv lub theej kiab, ib yam li thaum kuv tau ntaus tsam yeej thiab tau nrog kuv Txiv zaum saum nws lub Theej Kiab.
    22 Leej twg muaj pob ntseg, kom nws kav tsij mloog cov lus uas Leej Ntuj Plig hais rau cov Koom Txoos.”

    NPN 15: 2-3A, 3BC-4AB, 5

    Txais: (QYTN 3:21) Kuv yuav cia tus uas ntaus tsam yeej zaum ntawm kuv ib sab saum kuv lub theej kiab.

    Yog tus uas coj tus yeeb yam tsis muaj chaw xyeej thiab ua ncaj,
    Tus uas xav qhov tseeb nyob hauv nws nruab siab,
    Thiab nws tsis cia nws tus nplaig hais lus dag.

    Txais: (QYTN 3:21) Kuv yuav cia tus uas ntaus tsam yeej zaum ntawm kuv ib sab saum kuv lub theej kiab.

    Nws tsis ua phem rau lwm tus neeg
    Nws tsis nrhiav lus rau tus nyob ze nws.
    Nws ntxub tus neeg ua phem.
    Nws hwm cov neeg hwm HUAB TAIS.

    Txais: (QYTN 3:21) Kuv yuav cia tus uas ntaus tsam yeej zaum ntawm kuv ib sab saum kuv lub theej kiab.

    Nws qiv nyiaj txiag, nws tsis tsuam paj.
    Nws tsis txais luag cov nyiaj xiab
    kom muab txim rau tus tsis txhaum.
    Leej twg ua li hais no, mas nws yuav nyob ruaj nreb mus li.

    Txais: (QYTN 3:21) Kuv yuav cia tus uas ntaus tsam yeej zaum ntawm kuv ib sab saum kuv lub theej kiab.

    As Les Lus Yas: 1 ZAM 4: 10b

    Txais: As les lus yas, as ;es lus yas.

    Tswv Ntuj hlub peb, nws xa nws Leej Tub tuaj
    ua nqi txhiv peb ntawm peb cov txhaum.

    Txais: As les lus yas, as ;es lus yas.

    Ntawv Moo Zoo: LK 19: 1-10

    1 Yes Xus mus hauv Yes Lis Kos, nws taug kev hla lub tsheej. 2 Muaj ib tug neeg lub npe hu ua Ntxas Kais, nws yog ib tug nom sau se, nws yog neeg nplua nuj. 3 Nws nrhiav kom tau kev pom saib Yes Xus yog leej twg, tab sis nws tsis tau kev pom, vim neeg coob dhau, thiab nws yog neeg qig taub. 4 Ces nws khiav mus ua ntej, nws nce saum ib tsob ntoo xis kas mos kom tau pom Yes Xus, vim Yes Xus yuav hla ntawd mus. 5 Thaum Yes Xus los txog ntawm qhov chaw ntawd, nws tsa muag ntsia saud, nws hais tias: "Ntxas Kais, koj nqes los sai sai, vim hnub no kuv yuav tsum mus so hauv koj tsev." 6 Ntxas Kais nqes nrawm nroos los, nws zoo siab hlo txais Yes Xus. 7 Sawv daws pom li ntawd, lawv yws yws hais tias: "Nws mus so hauv ib tug neeg txhaum lub tsev lawm!" 8 Hos Ntxas Kais sawv ntsug, nws hais rau Huab Tais tias: "Huab Tais, kuv yuav muab kuv tej cuab yeej cuab tam ib nrab pub rau cov pluag. Yog kuv tau ua tsis ncaj rau leej twg lawm, mas kuv yuav muab plaub npaug pauj rau nws." 9 Yes Xus hais rau Ntxas Kais tias: "Hnub no, txoj kev cawm los txog hauv lub tsev no lawm, vim tias tus no kuj yog Has Nplas Has ib leeg tub thiab. 10 Vim Neeg Leej Tub tuaj yog tuaj nrhiav thiab tuaj cawm yam uas ploj lawm."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 17th November 2020, 4:49 pm

    Tim     18     lub     11     Hlis     2020

    Hnub Plaub Lis Piam Peb Caug Peb Nruab Xyoo A Nruab Lis Piam Xyoo II
    Lectionary: 499

    Ua kev nco txog Hnub Foom Hmoov Zoo Qhib lub Tuam Tsev teev ntuj LN Pob Zeb thiab Paj Lug, nyob Los Mas; Hwm LN Rose Philippine Duchesne, ua Nkauj Xwb;

    Zaj Nyeem Ib:       QYTN  4:   1-11


    1 Kuv Zam tseem pom ib qho dua: yog  ib lub qhov rooj qhib lug rau saum ntuj. Ces lub suab uas thaum xub thawj kuv tau hnov nrov xws li lub hom, nws hais rau kuv tias : “Koj nce los saum no, kuv yuav qhib tej yam uas yuav tshwm sim yav tom qab ntawd rau koj saib .” 2 Tam sis ntawd, kuv lub tswv yim yuj plaws mus lawm. Ua ciav pom ib lub theej kiab txawb saum ntuj, hos muaj ib tug zaum saum lub theej kiab ntawd. 3 Tus zaum ntawd nws ci xws li ib co pob zeb pov haum muaj nqes liab thiab daj liab. Pom ib tug zaj sawv ci ntsuab xiab li cov pov haum ntsuab vij lub theej kiab. 4 Muaj nees nkaum plaub lub rooj zaum txawb ncig lub theej kiab ; muaj nees nkaum plaub tug laus neeg hnav dawb thiab ntoo ib leeg ib lub mom teev kub saum taub hau zaum saum cov rooj ntawd. 5 Ntawm lub theej kiab, muaj kab xob laim ci dawb vog, muaj xob nroo xob quaj nrov nroo ntsws. Nyob ntawm lub theej kiab hauv ntej, muaj xya teg tsau cig cig uas yog Tswv Ntuj xya leej tswv yim. 6 Nyob ntawm lub theej kiab hauv ntej, yog zoo li ib lub hiav txwv tsom iav uas pom lam thab thab. Nyob hauv plawv thiab nyob ib ncig lub theej kiab, muaj plaub leeg ciaj sia, lawv muaj ntau lub qhov muag nyob ntawm sab xub ntiag thiab nraum sab nraub qaum tib si. 7 Thawj leeg ciaj sia zoo li ib tug tsov ntxhuav; tus ob zoo li ib tug heev nyuj mos; tus peb muaj ib lub ntsej muag xws li tib neeg; tus plaub zoo li ib tug dav tab tom ya. 8 Plaub leeg ciaj sia ntawd muaj ib leeg rau txhais tis, thiab muaj qhov muag nyob puv sab hauv thiab sab nraud huv tib si. Lawv cav lus zoo tsis tseg tas hnub tas hmo tias: “Huab Tais Tswv Ntuj tus muaj hwj huam, nws Ntshiab, Ntshiab, Ntshiab! Nws yog tus ib txwm nyob, tus tab tom nyob, tus tab tom tuaj!” 9 Thaum twg plaub leeg ciaj sia ntawd cav txog tus zaum saum lub theej kiab, uas yos tus muaj txoj sia nyob mus li ib txhiab ib txhis, nws lub koob meej, lub hwj chim thiab lawv ua nws tsaug, 10 mas nees nkaum plaub tug laus neeg txhos caug pe ntawm tus zaum saum lub theej kiab xub ntiag, lawv pe hawm nws uas yog tus nyob mus li ib txhiab ib txhis. Lawv muab lawv cov mom teev kub hle pov mus rau ntawm hauv ntej lub theej kiab, lawv qw hais tias : 11 “Huab Tais peb tus Tswv Ntuj, koj tsim nyog txais lub hwj chim, lub koob meej thiab lub hwj huam, vim koj yog tus tau tsim txhua tsav txhua yam; koj lub siab xav kom muaj, ces txhua tsav txhua yam cia li muaj tuaj thiab cia li tsim tawm los."

    NPN       150:   1B-2, 3-4, 5-6

    Txais:   (1b) Ntshiab, ntshiab, Huab Tais ntshiab, Tswv Ntuj muaj hwj huam!

    Nej cav txog Huab Tais nyob hauv nws Kem Tsev Ntshiab ;
    Nej cav txog nws nyob hauv lub ntuj uas qhia txog nws lub zog loj;
    Nej cav txog nws vim nws cov hauj lwm muaj hwj xyeej ;
    nej cav txog nws vim nws lub meej mom loj tas nrho.

    Txais:   (1b) Ntshiab, ntshiab, Huab Tais ntshiab, Tswv Ntuj muaj hwj huam!

    Nej tshuab hom nrov ncha ntws cav txog nws,
    Nej ntaus thaj cheej ntaus nkauj nog ncas cav txog nws,
    Nej ntaus nruas, nej dhia zoo siab cav txog nws;
    Nej qoj hlua thiab tshuab qeej cav txog nws.

    Txais:   (1b) Ntshiab, ntshiab, Huab Tais ntshiab, Tswv Ntuj muaj hwj huam!

    Nej ntaus nruas npuaj nrov doog diaj cav txog nws ;
    nej ntaus nruas npuaj nrov ncha ntws cav txog nws.
    Kom txhua tsav txhua yam uas txawj ua pa
    kav tsij cav txog HUAB TAIS ! As les lus yas !

    Txais:   (1b) Ntshiab, ntshiab, Huab Tais ntshiab, Tswv Ntuj muaj hwj huam!

    As Les Lus Yas:       ZAM  15:   16

    Txais:    As les lus yas, as les lus yas.

    Huab Tais hais tias: “kuv tau xaiv nej hauv lub ntiaj teb los,  
    kom nej mus thiab txi ib co txiv uas yuav nyob ruaj.

    Txais:    As les lus yas, as les lus yas.

    Ntawv Moo Zoo:      LK  19:    11-28

    11 Thaum cov neeg tab tom mloog Yes Xus hais lus, nws tseem hais dua ib zag paj lug rau lawv thiab, vim nws nyob ze ze Yes Lus Xas Les, thiab sawv daws xav hais tias Tswv Ntuj lub Ceeb Tsheej yuav tawm los sai sai nyob Yes Lus Xas Les. 12 Yes Xus thiaj hais tias : "Muaj ib tug neeg yog caj ces ua nom, nws mus txais lub hwj chim ua vaj nyob ib lub teb chaws deb deb, nws mam rov qab los. 13 Nws hu nws kaum leej tub txib tuaj, nws muab kaum choj nyiag rau lawv, nws hais rau lawv tias : ‘Nej coj mus ua lag ua luam mus txog hnub kuv rov los txog.’ 14 Tab sis cov pej xeem ntxub nws, lawv xa ib pab tiam lis lawv qab mus tshaj tawm tias : ‘Peb tsis xav kom tus neeg no ua peb tus vaj.’
    15 Thaum nws txais lub hwj chim ua vaj lawm, nws rov los txog, nws hu cov tub txib uas nws tau muab nyiaj rau tuaj, kom paub saib nyias tau ua nyias lag luam li cas lawm. 16 Thawj tug tuaj txog, nws hais tias : ‘Huab Tais, koj choj nyiaj ntxeev tau kaum choj ntxiv lawm.’ Tus vaj hais rau nws tias : 17 ‘Zoo kawg, tub txib zoo. Vim koj tau muaj lub siab pheej xeeb ua tej yam me me li no, ua li mas koj txais lub hwj chim kav kaum lub nroog.’ 18 Tus ob tuaj txog, nws hais tias : ‘Huab Tais, koj choj nyiaj ntxeev tau tsib choj ntxiv lawm.’19 Tus vaj kuj hais rau tus ntawd tias : "Koj thiab, koj yuav tswj tsib lub nroog.’ 20 Hos muaj ib tug tuaj txog, nws hais tias : ‘Huab Tais, qho no yog koj choj nyiaj, kuv tau muab qhwv rau hauv ib daim ntaub cia; 21 vim kuv ntshai koj, vim tias koj yog ib tug neeg coj nruj, koj khaws xyeem yuav tej yam uas koj tsis tau muab tshwj tseg, koj sau cov qoob uas koj tsis tau tseb.’ 22 Tus vaj hais rau nws tias: ‘Tub txib phem dab tsi, kuv txiav txim rau koj raws nraim li koj lub ncauj tau hais. Koj twb paub tias kuv yog ib tug neeg coj nruj, kuv khaws xyeem yuav tej yam uas kuv tsis tau muab tshwj tseg, kuv sau cov qoob uas kuv tsis tau tseb, 23 vim li cas koj tsis coj kuv choj nyiaj mus tso hauv cov tsev ceev nyiaj? Thaum kuv rov los txog, kuv thiaj tau rho kuv choj nyiag nrog ib qho paj.’  24 Ces tus vaj hais rau cov neeg nyob ntawd tias: ‘Nej rho nws choj nyiaj tawm, nej muab rau tus uas muaj kaum choj.’ Ces lawv hais rau tus vaj tias: 25 ‘Huab Tais, nws twb muaj kaum choj lawm.’  26 Tus vaj teb tias:  ‘Kuv hais rau nej:  tus uas muaj lawm, luag yuav pub ntxiv rau nws; hos tus uas tsis muaj, mas luag tseem yuav muab qhov uas nws muaj tshem mus thiab. 27 Hos kuv cov yeeb ncuab, uas tsis kam kuv ua lawv tus vaj, nej coj lawv los ntawm no, nej muab lawv txiav caj dab tas huv si rau ntawm kuv xub ntiag.’”
    28 Thaum Yes Xus hais cov lus ntawd tas, nws sawv kev mus, nws taug kev ua ntej mus rau pem Yes Lus Xas Les lawm.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 19th November 2020, 9:42 am

    Tim 19 lub 11 Hlis 2020

    Hnub Tsib Lis Piam Peb Caug Peb Nruab Xyoo A Nruab Lis Piam Xyoo II
    Lectionary: 500

    Zaj Nyeem Ib: QYTN 5: 1-10


    1 Kuv Zam pom ib phau ntawv kauv nyob hauv tus zaum saum lub theej kiab txhais tes xis. Phau ntawv no sau sab hauv thiab sab nraud huv si; muaj xya lub thwj pav kaw phau ntawv cia. 2 Ces kuv pom ib tug Tshiab muaj hwj chim tshaj tawm nrov nrov tias: “Leej twg thiaj tsim nyog qhib phau ntawv no thiab daws cov thwj?” 3 Tab sis tsis muaj leej twg nyob ntiaj teb, nyob saum ntuj, los nyob nruab yeeb tsim nyog qhib los saib phau ntawv li. 4 Ces kuv quaj heev rau qhov tias tsis muaj ib tug tsim nyog qhib los saib phau ntawv. 5 Ib tug hauv pab laus neeg thiaj hais rau kuv tias : “Tsis txhob quaj! Tus Tsov Ntxhuav xeem Yus Das, tus Cag hlav ntawm Das Vis tuaj, nws twb yeej lawm, ces nws yuav qhib tau phau ntawv thiab xya lub thwj.”
    6 Ces kuv pom ib tug Yaj sawv ntsug hauv nruab nrab ntawm lub theej kiab thiab plaub leeg ciaj sia thiab cov laus neeg. Zoo li nws raug luag muab tua txi ntuj lawm; nws tuaj xya tus kub, thiab muaj xya lub qhov muag, uas yog Tswv Ntuj xya leej tswv yim uas nws xa mus ua hauj lwm nyob thoob ntiaj teb. 7 Nws mus txais phau ntawv ntawm tus zaum saum lub theej kiab txhais tes xis. 8 Thaum tus Yaj txais tau phau ntawv lawm, mas plaub leeg ciaj sia thiab nees nkaum plaub tug laus neeg txhos caug pe ntawm nws xub ntiag. Lawv ib leeg tuav ib rab nkauj nog ncas thiab ib co tais kub ntim tshuaj tsw qab puv nkaus; cov tshuaj tsw qab no yog cov ntshiab cov zaj thov Ntuj. 9 Lawv hu ib zag nkauj tshiab tias: “Koj tsim nyog txais phau ntawv thiab qhib nws cov thwj, vim koj raug luag tua koj txi rau ntuj, koj muab koj cov ntshav los them nqi muas cov nyob hauv tas txhua xeem neeg, txhua xeem lus, txhua haiv neeg thiab txhua lub kuj cuab rau Tswv Ntuj. 10 Koj tsa lawv ua ib lub Ceeb Tsheej, thiab ib co Leej Choj tsob hwb peb tus Tswv Ntuj; lawv yuav ua vaj kav lub ntiaj teb.”

    NPN 149: 1B-2, 3-4, 5-6A+9B

    Txais: (QYTN 5: 10) Leej Yaj tau muab peb tsa ua ib lub ceeb tsheej
    muaj leej choj los tsob hwb peb tus Tswv Ntuj.
    los: As les lus yas.

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    Kom His Xas Lais zoo siab nyob hauv tus uas tsim lawv,
    kom Xis Yoos cov me nyuam luag ntxhi nyob hauv lawv tus vaj.

    Txais: (QYTN 5: 10) Leej Yaj tau muab peb tsa ua ib lub ceeb tsheej
    muaj leej choj los tsob hwb peb tus Tswv Ntuj.
    los: As les lus yas.

    Kom lawv ua kev lom zem yoj cev cav txog nws lub npe,
    kom lawv hu nkauj cav txog nws nrog suab nruas suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej ua zam npua cov neeg me.

    Txais: (QYTN 5: 10) Leej Yaj tau muab peb tsa ua ib lub ceeb tsheej
    muaj leej choj los tsob hwb peb tus Tswv Ntuj.
    los: As les lus yas.

    Kom cov muaj lub siab ntseeg hom khaj nyob hauv txoj kev nto koob meej;
    kom lawv hu nkauj zoo siab hauv lawv tej chaw nyob;
    kom lawv lub qa tsuas muaj qw suab cav txog Tswv Ntujj.
    Cov uas ntseeg txog nws lawv lub koob meej yog zoo li no. As les lus yas.

    Txais: (QYTN 5: 10) Leej Yaj tau muab peb tsa ua ib lub ceeb tsheej
    muaj leej choj los tsob hwb peb tus Tswv Ntuj.
    los: As les lus yas.

    As Les Lus Yas: NPN 95: 8

    Txais: As les lus yas, as les lus yas.

    Yog hnub no nej hnov nws lub suab,
    nej tsis txhob cia nej lub siab tawv ncauj.

    Txais: As les lus yas, as les lus yas.

    Ntawv Moo Zoo: LK 19: 41-44

    41 Thaum Yes Xus tuaj yuav txog Yes Lus Xas Les, nws pom lub nroog, nws quaj rau lub nroog,
    42 nws hais tias : "Hnub no, kheev lam koj to taub txog tias koj yuav ua li cas koj thiaj muaj kev thaj yeeb mas! Tab sis, tej ntawd nyob zais ntshis rau koj qhov muag.
    43 Vim tias, yuav muaj ib hnub uas koj cov yeeb ncuab yuav tsa ib cov ntsa laj kab vij koj, lawv yuav puav koj, yuav nias qees qhov txhia chaw tuaj.
    44 Lawv yuav tsoo koj tawq tas rau hauv av, thiab tsuj koj cov me nyuam uas nyob hauv koj. Lawv yuav tsis tseg ib lub pob zeb tshooj ib lub nyob hauv koj, yog vim koj tsis kam lees lub caij uas Tswv Ntuj tuaj xyuas koj.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 19th November 2020, 10:43 am

    Tim 20 lub 11 Hlis 2020

    Hnub Rau Lis Piam Peb Caug Peb Nruab Xyoo A Nruab Lis Piam Xyoo II
    Lectionary: 501

    Zaj Nyeem Ib: QYTN 10: 8-11


    Zam piav li no:
    8 Lub suab uas kuv tau hnov nrov saum ntuj tuaj rov qab hais rau kuv tias : “Koj mus nqa phau ntawv uas qhib nthuav nyob hauv tus Tshiab sawv ntsug saum hiav txwv thiab saum av txhais tes.” 9 Ces kuv mus txog ntawm tus Tshiab, kuv kom nws muab phau ntawv me me rau kuv. Tus Tshiab hais rau kuv tias : “Koj txais mus, koj muab noj. Phau ntawv yuav iab koj lub plab, tab sis hauv koj qhov ncauj mas nws yuav qab cuag zib ntab.” 10 Kuv txais phau ntawv ntawm tus Tshiab txhais tes los, ces kuv muab noj. Thaum nyob hauv kuv qhov ncauj, mas kuv hnov qab cuag zib ntab, tab sis thaum kuv nqos tas mas kuv lub plab iab tas nrho. 11 Ces luag hais rau kuv tias: “Koj yuav tsum rov qab ua Yaj Saub dua hais txog ntau haiv neeg, ntau lub kuj cuab, ntau xeem lus, thiab ntau tus vaj ntxwv.”

    NPN 119: 14, 24, 72, 103, 111, 131

    Txais: (103a) Lo lus koj tau cog tseg qab zib ua luaj rau kuv qhov ncauj!

    Kuv zoo siab taug txoj kev ua raws li koj lo lus qhia,
    Zoo siab npaum ua neeg nplua nuj muaj txhij txhua.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Koj cov lus qhia ua rau kuv zoo siab,
    Koj cov lus pab tswv yim rau kuv.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Txoj Cai uas tawm hauv koj lub ncauj los,
    muaj nqe rau kuv dua ib txhab nyiaj ib txhab kub.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Cov lus koj tau cog tseg qab zib ua luaj rau kuv tus nplaig,
    qab dua zib ntab zib mu nyob hauv kuv qhov ncauj !

    Txais: (103a) Lo lus koj tau cog tseg qab zib ua luaj rau kuv qhov ncauj!

    Koj cov lus qhia yog kuv lub cuab tam mus li,
    yog kuv txoj kev zoo siab.

    Txais: (103a) Cov lus koj tau cog tseg qab zib ua luaj rau kuv qhov ncauj!

    Kuv huas pa xyu rua ncauj,
    Vim kuv tshaib nqhis koj cov lus qhia.

    Txais: (103a) Cov lus koj tau cog tseg qab zib ua luaj rau kuv qhov ncauj!

    As Les Lus Yas: Zam 10: 27

    Txais: As les lus yas, as les lus yas.

    Huab Tais hais tias: “Kuv cov yaj mloog kuv lub suab,
    kuv paub kuv cov yaj, kuv cov yaj raws kuv qab nraim.

    Txais: As les lus yas, as les lus yas.

    Ntawv Moo Zoo: LK 19: 45-48

    45 Yes Xus chaws mus hauv lub Tuam Tsev Teev Ntuj, nws ntiab cov neeg muag toob xib tawm, nws hais rau lawv tias:
    46 "Ntawv sau hais tias : Kuv lub tsev yog tsev teev Ntuj, tab sis nej muab ua ib qho chaw rau tub sab nkaum."
    47 Yes Xus niaj hnub qhia nyob hauv lub Tuam Tsev Teev Ntuj; hos cov thawj Leej Choj, cov Kws Ntawv Ntshiab, thiab pej xeem cov thawj coj nrhiav kev muab nws tua.
    48 Tab sis lawv nrhiav tsis tau kev yuav ntes nws li cas, vim tas tsoom pej xeem mloog nws hais lus mas lawv ntsia dai ncuv rau nws lub qhov ncauj xwb.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 20th November 2020, 7:37 am

    Tim 21 lub 11 Hlis 2020

    Hnub Xya Lis Piam Peb Caug Peb Nruab Xyoo A Nruab Lis Piam Xyoo II
    Lectionary: 502

    Hwm Niam Mab Liab raug fij rau hauv lub Tuam Tsev Teev Ntuj

    Zaj Nyeem Ib: QYTN 11: 4-12


    Kuv Zam hnov lub suab hais saum ntuj tuaj rau kuv tias: “Kuv yuav xa kuv ob tug tim khawv tuaj.
    4 Ob tug no yog ob tsob txiv ntoo roj thiab ob tug ncej txawb teeb uas sawv ntawm tus Huab Tais kav lub ntiaj teb xub ntiag. 5 Yog leej twg xav ua phem rau nkawd, mas hluav taws yuav tawm hauv nkawd qhov ncauj los hlawv nkawd cov yeeb ncuab; kom yog leej twg xav ua phem rau nkawd, mas nws yuav tsum raug tuag xwb. 6 Ob tug no muaj hwj huam kaw tau lub ntuj kom txhob los nag, mus txog hnub nkawd ua yaj saub tas tso. Thiab nkawd kuj muaj hwj huam hloov tau dej los ua ntshav, thiab tso tas puas tsav yam xwv txheej rau lub ntiaj teb thaum twg los tau ywj nkawd siab.
    7 Tthaum nkawd ua tim khawv tas lawm, mas tus tsiaj uas tawm hauv lub qhov ntuj tob los, yuav tuaj ua rog rau nkawd; nws yuav yeej nkawd thiab yuav muab nkawd tua. 8 Nkawd ob lub cev yuav nyob nraum tshav puam ntawm txoj kev loj hauv lub Tuam Tsheej, uas luag muab hu piv txiv rau Xos Dos Mas, los Hais Nkws Tos, nyob ntawm thaj chaw uas nkawd tus Huab Tais raug muab dai saum ntoo cuam. 9 Cov tib neeg tuaj ntawm txhua haiv txhua xeem neeg, txhua hom lus, txhua lub teb chaws tuaj yuav ntsia ntsoov nkawd ob lub cev li peb hnub thiab ib tog hnub. Luag yuav tsis pub coj nkawd ob lub cev mus zwm ntxa li. 10 Cov neeg nyob ntiaj teb yuav hom khaj vim nkawd thiab yuav zoo siab loj; lawv yuav sib pub paj tshab ib leeg rau ib leeg, vim tias ob tug Yaj Saub no tau ua kom cov neeg nyob ntiaj teb ntxhov siab loj. 11 Tab sis dhau peb hnub thiab ib tog hnub lawm, mas ib txog pa muaj sia yuav tawm ntawm Tswv Ntuj tuaj nyob hauv nkawd, ces nkawd yuav sawv tsees tau los nyob sawv ntsug saum nkawd ob txhais taw. Cov neeg uas ntsia nkawd, yuav tau ntshai loj kawg nkaus. 12 Ces lawv yuav hnov ib lub suab hais nrov nrov saum ntuj tuaj rau nkawd tias : “Neb nce los saum no !” Nkawd thiaj li nce saum tauv huab mus rau saum ntuj lawm, rau nkawd cov yeeb ncuab qhov muag ntsia ntsoov.

    NPN 144: 1, 2, 9-10

    Txais: (1) Thov kom HUAB TAIS nto koob meej, nws yog kuv lub tsua!

    Thov kom HUAB TAIS nto koob meej, nws yog kuv lub tsua,
    nws qhia kuv ob txhais tes kom txawj ntaus rog,
    kuv ntiv tes kom txawj ntaus tsam.

    Txais: (1) Thov kom HUAB TAIS nto koob meej, nws yog kuv lub tsua!

    Nws yog tus ua zoo rau kuv, yog kuv lub yeej ntsa zeb,
    Yog kuv lub loog ruaj nreb, yog tus cawm kuv dim,
    Yog kuv daim leem phiaj, kuv tso siab rau nws ;
    nws qhau kuv cov neeg kom los zwm rau kuv.

    Txais: (1) Thov kom HUAB TAIS nto koob meej, nws yog kuv lub tsua!

    Tswv Ntuj, kuv yuav hu ib zag nkauj tshiab rau koj,
    Kuv yuav ntaus lub thaj cheej kaum txoj hlua cav txog koj.
    Koj yog tus pub kev yeej rau cov ua vaj,
    Yog tus cawm koj tus tub txib Das Vis ntawm rab ntaj tua neeg.

    Txais: (1) Thov kom HUAB TAIS nto koob meej, nws yog kuv lub tsua!

    As Les Lus Yas: 2 TM 1: 10

    Txais: As les lus yas, as les lus yas.

    Peb tus Cawm Seej Yes Xus Pleev tau rhuav txoj kev tuag,
    thiab tau ua kom txoj sia ci tawm tuaj vim lub Moo Zoo.

    Txais: As les lus yas, as les lus yas.

    Ntawv Moo Zoo: LK 20: 27-40

    27 Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los. 28 Lawv nug Yes Xus tias : "Xib Hwb, Mais Xes sau cia rau peb tias : Yog leej twg tus kwv tij tuag lawm, tseg poj niam cia tsis tau muaj me nyuam li, mas tus kwv yuav tsum qaws nws tus poj niam kom tsa tau nws lub keeb sawv. 29 Yog tias muaj xya leej kwv tij; thawj tug yuav poj niam, nws tuag tsis tau muaj tub ki li, 30 ces tus ob, 31 thiab tus peb kuj yuav tus poj niam ntawd, thiab tas lawv xya leej puav leej ua ib yam li ntawd, lawv tuag tas tsis muaj tub ki li. 32 Thaum kawg, tus poj niam kuj tuag lawm thiab. 33 Ua li mas lub zim txwv uas neeg tuag sawv rov los, tus poj niam ntawd yuav yog leej twg poj niam? Vim lawv xya leej tau yuav nws ua poj niam tib si." 34 Yes Xus thiaj hais rau lawv tias: "Cov tub ki hauv tiam no lawv yuav poj niam thiab yuav txiv. 35 Tab sis cov uas tiam tom ntej lawv tsim nyog txais kev sawv hauv cov tuag rov los, mas lawv tsis yuav poj niam thiab tsis yuav txiv li; 36 Lawv kuj yuav tsis txawj tuag ntxiv lawm, vim lawv yuav zoo ib yam li cov tshiab lawm xwb; thiab lawv yog Tswv Ntuj cov tub, yog cov tub ki tawm ntawm txoj kev sawv rov los los. 37 Hais txog tias cov tuag yuav sawv rov los, mas Mais Xes twb qhia txog qhov ntawd nyob hauv zaj piav txog tsob pos, thaum nws hu Huab Tais ua Has Nplas Has tus Tswv Ntuj, His Xas Has tus Tswv Ntuj, thiab Yas Kos tus Tswv Ntuj. 38 Tswv Ntuj tsis yog cov tuag tus Tswv Ntuj, nws yog cov neeg ciaj tus Tswv Ntuj; vim tias rau Tswv Ntuj mas tas sawv daws muaj txoj sia tib si." 39 Ob peb tug Kws Ntawv Ntshiab qhib ncauj hais tias : "Xib Hwb, koj hais tau zoo kawg." 40 Ces lawv tsis muaj cuab kav yuav nug Yes Xus ib lo lus ntxiv.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 22nd November 2020, 1:14 pm

    Tim 23 lub 11 Hlis 2020

    Hnub Ob Lis Piam Peb Caug Plaub Nruab Xyoo A Nruab Lis Piam Xyoo II

    Hwm LN Clement I, ua Vaj Qhia; hwm LN Columban; hwm tus tau Hmoov Zoo Miguel Agustin Pro

    Zaj Nyeem Ib: QYTN 14: 1-5


    1 Kuv Zam ntsia pom tus Yaj sawv ntsug saum lub roob Xis Yoos, thiab nrog nws, muaj ib puas plaub caug plaub txhiab leej neeg uas lawv muaj nws lub npe thiab nws Txiv lub npe sau rau saum lawv hauv pliaj. 2 Ces kuv hnov ib lub suab nrov saum ntuj tuaj xws li ib lub suab dej loj loj nrov, lthiab kuj xws li lub suab xob quaj ib rhe muaj ceem. Lub suab kuv hnov kuj nrov zoo li yog ib co tub ntaus thaj cheej tab tom ntaus lawv cov thaj cheej. 3 Lawv hu ib zag nkauj tshiab nyob ntawm lub theej kiab hauv ntej, thiab nyob ntawm plaub leeg ciaj sia thiab ntawm cov laus neeg xub ntiag. Tsis muaj leej twg kawm tau zaj nkauj ntawd li, tsuas yog ib puas plaub caug plaub txhiab leej uas Ntuj tau txhiv lawv ntawm lub ntiaj teb los xwb thiaj kawm tau. 4b Cov ntawd yog cov raws nraim Leej Yaj mus tas qhov txhia chaw. Lawv yog cov uas Ntuj txhiv ntawm ib tsoom neeg los ua Tswv Ntuj thiab Leej Yaj thawj phaum txiv. 5 Tsis muaj leej twg nrhiav tau ib lo lus dag nyob hauv lawv lub ncauj, tsis muaj ib qho xyeej nyob hauv lawv li.

    NPN 24: 1BC-2, 3-4AB, 5-6

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Lub ntiaj teb thiab puas tsav yam nyob hauv yog HUAB TAIS li,
    lub sim ceeb thiab cov nyob hauv yog nws tug.
    Vim nws yog tus tsim lub ntiaj teb los txawb rau saum cov hiav txwv
    thiab muab tso rau saum cov dej ntws.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Leej twg thiaj yuav nce tau mus rau saum HUAB TAIS lub roob?
    Los leej twg thiaj yuav mus sawv taus nyob hauv nws thaj chaw ntshiab?
    Yog tus uas txhais tes tsis muaj txhaum, lub siab dawb huv,
    tus uas tsis ntshaw tej yam tsis muaj nij nqes.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Nws yuav txais ib lo lus foom koob hmoov tuaj ntawm HUAB TAIS tuaj. ,
    yog paj tshab tuaj ntawm Tswv Ntuj tus cawm nws tuaj.
    Lawv yuav zoo li no, haiv neeg uas nrhiav Tswv Ntuj,
    cov uas nrhiav Yas Kos tus Tswv Ntuj lub ntsej muag.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    As Les Lus Yas: MT 24: 42A, 44

    Txais: As les lus yas, as les lus yas.

    Nej kav tsij zov hmo,
    vim nej tsis paub thaum twg Neeg Leej Tub yuav los.

    Txais: As les lus yas, as les lus yas.

    Ntawv Moo Zoo: LK 21: 1-4

    1 Yes Xus tsa muag ntsia, nws pom cov neeg nplua nuj tso nyiaj pub ua paj tshab rau hauv lub txhab ceev nyiaj.
    2 Nws kuj pom ib tug poj ntsuam pluag pluag tso tau ob lub txiaj toog rau hauv thiab,
    3 ces nws hais tias : "Kuv hais tseeb rau nej tias, tus poj ntsuam pluag no tso nyiaj ntau tshaj sawv daws huv tib si.
    4 Vim tias tas cov neeg ntawd, lawv rho lawv cov nyiaj seem los pub ua paj tshab xwb. Tab sis tus poj ntsuam ntawd nws rho nyiaj raws nws txoj kev pluag, nws muab tas nrho qhov nws yuav siv muas noj muas haus los tso rau hauv."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 23rd November 2020, 6:08 am

    Tim 24 lub 11 Hlis 2020

    Hnub Peb Lis Piam Peb Caug Plaub Nruab Xyoo A Nruab Lis Piam Xyoo II
    Lectionary: 504

    Hwm LN Andrew Dung-Lac, Leej Choj tuag ua Tim Khawv thiab cov…

    Zaj Nyeem Ib: QYTN 14: 14-19


    14 Kuv Zam pom ib twv huab dawb dawb; muaj ib tug zoo xws li Neeg ib Leeg Tub zaum saum twv huab. Nws ntoo ib lub mom teev kub uas yog kub, thiab tuav ib rab liag ntse zuag plias ntawm tes. 15 Muaj dua ib tug tshiab tawm hauv lub Tuam Tsev Ntshiab tuaj; nws qw nrov nrov rau tus zaum saum twv huab tias: “Koj nrom koj rab liag mus sau qoob. Txog lub caij sau qoob lawm. Vim cov qoob loo nyob ntiaj teb siav tas lawm.” 16 Ces tus zaum saum twv huab pov nws rab liag mus rau ntiaj teb, mus sau cov qoob nyob ntiaj teb tas huv si.
    17 Muaj dua ib tug tshiab tawm hauv lub Tuam Tsev Ntshiab saum ntuj tuaj, nws kuj tuav ib rab liag ntse zuag plias. 18 Thiab lwm tus tshiab ntxiv tawm ntawm lub thaj txi Ntuj los, nws yog tus tshiab uas tswj cov hluav taws. Nws qw nrov nrov rau tus tshiab tuav rab liag ntse zuag plias tias : “Koj nrom koj rab liag ntse mus hlais cov ntwg txiv cawv nyob ntiaj teb; cov txiv cawv siav lawm.” 19 Tus tshiab thiaj pov rhees nws rab liag mus rau ntiaj teb, mus txiav cov txiv cawv nyob ntiaj teb tas huv si; nws muab coj los ntim rau hauv lub tshuab zom txiv ua cawv uas rau Tswv Ntuj tej kev chim kev npau taws.

    NPN 96: 10, 11-12, 13

    Txais: (13b) Huab Tais tuaj txiav txim rau lub ntiaj teb.

    Hais rau txhua haiv neeg tias: HUAB TAIS yog vaj ntxwv;
    Nws tsim lub ntiaj teb kom nyob ruaj, tshem tsis tau;
    Nws tswj tsoom haiv neeg raws kev ncaj ncees.

    Txais: (13b) Huab Tais tuaj txiav txim rau lub ntiaj teb.

    Kom lub ntuj thiab lub ntiaj teb zoo siab;
    kom dej hiav txwv thiab txhua yam nyob hauv dej qw nroo ntws;
    kom cov tiaj nras thiab txhua yam nyob hauv tiaj luag ntxhi!
    Thiab kom txhua tus ntoo hauv hav zoov hom khaj.

    Txais: (13b) Huab Tais tuaj txiav txim rau lub ntiaj teb.

    Lawv yuav dhia zoo siab ntawm HUAB TAIS xub ntiag,
    vim nws tuaj txog lawm, nws tuaj kav lub ntiaj teb.
    Nws yuav tswj lub ntiaj teb raws kev ncaj ncees,
    thiab cov haiv neeg raws kev haum pheej.

    Txais: (13b) Huab Tais tuaj txiav txim rau lub ntiaj teb.

    As Les Lus Yas: QYTN 2: 10C

    Txais: As les lus yas, as les lus yas.

    Koj nyob ruaj nreb txog hnub tuag mog !
    Ces kuv yuav muab txoj sia ua mom teev kub rau koj ntoo.

    Txais: As les lus yas, as les lus yas.

    Ntawv Moo Zoo: LK 21: 5-11

    5 Thaum ntawd, muaj ib txhia hais tias lub Tuam Tsev Teev Ntuj txhim tau pob zeb zoo nkauj rau thiab muaj cov paj tshab ua Ntuj tsaug zoo saib. Yes Xus hais tias : 6 “Tej uas nej qhov muag pom ntawm no, muaj ib hnub luag yuav muab rhuav tsis tseg ib lub pob zeb tshooj ib lub seem li uas tseem nyob sib tshooj.”
    7 Lawv nug Yes Xus tias : “Xib Hwb, thaum twg tej ntawd mam li tshwm sim, thiab yuav muaj lub cim dab tsi thaum tej ntawd yuav tshwm sim tuaj?” 8 Yes Xus thiaj hais tias : “Nej yuav ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias : 'Yog kuv', thiab yuav hais tias : 'Lub zim txwv twb los txog ze ze lawm'. Mas nej txhob mus raws lawv qab. 9 Thaum nej hnov luag tham txog kev tsov rog thiab kev kub ntxhov, mas nej tsis txhob ntshai. Vim tias tej ntawd yuav tsum tshwm sim tuaj tso, tab sis tsis tau txog lub zim txwv kawg tam sis ntawd.” 10 Yes Xus tseem hais rau lawv ntxiv tias : “Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws, 11 yuav muaj av qeeg loj kawg nkaus; nyob tej qhov chaw yuav muaj tshaib plab thiab muaj mob aws; yuav muaj tej yam xwm txaus ntshai kawg, thiab tej lub cim loj tuajb saum ntuj tuaj.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 24th November 2020, 6:50 pm

    Tim 25 lub 11 Hlis 2020

    Hnub Plaub Lis Piam Peb Caug Plaub Nruab Xyoo A Nruab Lis Piam Xyoo II
    Lectionary: 505

    Hwm LN Catherine nyob Alexandria, nkauj xwb tuag ua Tim Khawv

    Zaj Nyeem Ib: QYTN 15: 1-4


    1 Kuv Zam tseem rov pom dua ib lub cim ntxiv; yog ib lub cim loj thiab txaus ntshai tas nrho nyob saum ntuj: muaj xya tus Tshiab nqa xya yam mob aws uas yog xya yam kawg yuav muaj tuaj raws li Tswv Ntuj lub siab npau taws ua kom muaj.
    2 Ces kuv pom zoo li ib lub hiav txwv zoo li yog tsom iav xyaw hluav taws. Cov neeg uas tau yeej tus Tsiaj, yeej nws tus duab thiab nws lub npe tus zauv, mas lawv sawv ntsug saum lub hiav txwv tsom iav. Lawv tuav Tswv Ntuj cov thaj cheej ntawm tes.
    3 Lawv hu Tswv Ntuj tus tub txib Mais Xes zaj nkauj thiab Leej Yaj zaj nkauj tias : “Huab Tais Tswv Ntuj Muaj Hwj Huam, koj cov hauj lwm loj thiaj zoo tas nrho! Vaj kav cov haiv neeg, koj tej kev yog kev ncaj thiab kev tseeb.
    4 Huab Tais, leeg twg thiaj yuav tsis hwm koj, thiab tsis cav lus zoo txog koj lub npe? Vim koj tib leeg thiaj yog Tus Ntshiab. Tas txhua haiv neeg yuav tuaj pe hawm koj, vim koj tau qhia koj cov hauj lwm ncaj rau sawv daws paub.”

    NPN 98: 1, 2-3AB, 7-8, 9

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    Thiab nws sab npab ntshiab.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    HUAB TAIS tau ua kom sawv daws paub txog nws txoj kev cawm,
    nws muab nws txoj kev ncaj rau cov kuj cuab pom.
    Nws rov nco txog nws txoj kev ua zoo thiab
    kev ua siab ncaj rau tsev neeg His Xas Lais.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    Kom dej hiav txwv thiab cov tsiaj uas nyob puv hauv ua nrov nroo ntws,
    Kom lub ntiaj teb thiab tsoom neeg nyob hauv ua lom zem ntsuag qees;
    Kom cov niam dej npuaj teg,
    Kom cov roob nrog lawv qw zoo siab,

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    nyob ntawm HUAB TAIS xub ntiag, vim nws tab tom tuaj,
    nws tuaj tswj kav lub ntiaj teb.
    Nws yuav tswj kav lub qab ntuj neeg raws kev ncaj,
    Nws yuav tswj kav cov haiv neeg raws kev haum pheej.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    As Les Lus Yas: QYTN 2: 10C

    Txais: As les lus yas, as les lus yas.

    Koj ntseeg ruaj nreb mus txog hnub tuag mog !
    Ces kuv yuav muab txoj sia rau koj ntoo.

    Txais: As les lus yas, as les lus yas.

    Ntawv Moo Zoo: LK 21: 12-19

    Yes Xus hais rau tsoom neeg tias:
    12 “Luag yuav ntes nej thiab yuav hiam nej, luag yuav coj nej mus kom rau cov tsev txoos thiab tsev loj faj. Luag yuav coj nej mus rau ntawm cov vaj thiab cov nom tswj teb chaws xub ntiag vim kuv lub npe.
    13 Tej ntawd yuav pub ib lub zoo sij hawm rau nej ua tim khawv.
    14 Nej nco ntsoov tias nej yuav tsis txhob xub npaj ib co lus teb kom nej tau cai.
    15 Vim kuv yuav muab ib lub ncauj thiab ib txog kev thoob tsib rau nej, ces cov ntxub nej yuav tsis muaj lus teb tau thiab cav tau nej.
    16 Cov yuav muab nej rau luag ntes ces yog nej niam nej txiv, nej cov kwv tij, cov txheeb ze, thiab cov phooj ywg. Luag yuav muab nej ib txhia tua.
    17 Tas sawv daws yuav ntxub nej vim kuv lub npe.
    18 Tab sis tsis muaj ib txoj plaub hau saum nej taub hau yuav ploj.
    19 Nej ua siab ruaj kom tom thawj, ces nej yuav cawm tau nej txoj sia."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 25th November 2020, 1:26 pm

    Tim 26 lub 11 Hlis 2020

    Hnub Tsib Lis Piam Peb Caug Plaub Nruab Xyoo A Nruab Lis Piam Xyoo II
    Lectionary: 506

    Hnub ua Tswv Ntuj Tsaug (Thanksgiving Day)


    Niaj xyoo nyob rau USA mas lub 11 hlis Hnub Tsib hauv lub lis piam peb los plaub, peb muaj kev ua Tswv Ntuj tsaug (Thanksgiving). Xyoo no raug rau tim 26. Vim li ntawd, kuv yuav xub tso cov zaj nyeem rau hnub no ua ntej, vim nyob lwm teb chaws tsis muaj Thaksgiving, ces lawv yuav mus nyeem cov tsab ntawv uas yog cov rau hnub no. Hos cov zaj nyeem rau Thanksgiving nyob nram qab.

    Zaj Nyeem Ib: QYTN 18: 1-2, 21-23; 19: 1-3, 9A

    18 1 Kuv Zam pom dua ib tug Tshiab nqes saum ntuj los, nws muaj peev xwm loj, nws lub hwj chim ci ntsa iab rau lub ntiaj teb.
    2 Nws qw muaj zog nrov nrov tias : “Lub sheej loj Npas Npis Los poob lawm, poob lawm lau. Npas Npis Los hloov ua dab phem lub chaw nyob lawm, ua lub nkuaj kaw cov dab tsis huv, ua lub nkuaj kaw txhua hom noog tsis huv, thiab ua lub nkuaj kaw txhua hom tsiaj tsis huv uas luag ntxub.”
    21 Ces ib tug Tshiab muaj zog khaws tau ib lub pob zeb zoo li ib lub zeb zom loj loj, nws muab cuam loo mus rau hauv dej hiav txwv, nws hais tias : “Ib yam li no, ib sij huam xwb, lub tsheej loj Npas Npis Los yuav raug siv zog muab cuam pov tseg, ces yuav nrhiav tsis pom ib zaug ntxiv.
    22 Ces yuav tsis hnov cov suab ntaus nkauj nog ncas thiab suab ntaus paj nruag nrov ntxiv, yuav tsis hnov suab raj, suab hom nrov nyob hauv koj ib zaug ntxiv; yuav tsis pom muaj cov kws tes txawj tes nkiag txawj ua ntau yam toob xib nyob hauv koj ib zaug ntxiv; yuav tsis hnov zom zeb nrov hauv koj ib zaug ntxiv.
    23 Yuav tsis pom teeb yuav tsis ci nyob hauv koj ib zaug ntxiv. Yuav tsis hnov nkauj nyab nraug vauv lub suab sib hu nyob hauv koj ib zaug ntxiv. Vim tias koj cov tub lag tub luam yog cov nom loj nyob ntiaj teb, ces koj txoj kev ua khawv koob thiaj dag kom tas txhua haiv neeg mus yuam kev.”
    19 1 Dhau tej no lawm, kuv hnov zoo li ib lub suab nrov loj kawg tuaj ntawm ib pab neeg coob coob nyob saum ntuj tuaj, lawv qw tias : “As Les Lus Yas! Txoj kev cawm neeg, lub koob meej, lub hwj huam yog peb tus Tswv Ntuj tug.
    2 Vim nws txoj kev txiav txim yog qhov tseeb thiab qhov ncaj, nws tau txiav txim rau tus Poj Ntiav loj lawm, uas coj lub ntiaj teb mus rau kev phem kev lwj liam vim nws txoj kev ua niam ntiav, thiab nws tau ua pauj rau nws cov tub txib cov roj ntsha vim tus poj ntiav lawm.”
    3 Ces pab neeg rov hais zaum ob tias : “As Les Lus Yas! Pa taws yuav ncho ntawm tus Poj Ntiav tuaj mus tas ib txhiab ib txhis!”
    9 Tus Tshiab hais rau kuv tias: “Koj sau qhov no: Cov tau txoj hmoov zoo yog cov uas raug caw tuaj noj Leej Yaj rooj tshoob rooj hno .”

    NPN 100: 1B-2, 3, 4, 5

    Txais: (QYTN 19:9a) Cov tau hmoov zoo yog cov raug caw mus noj Leej Yaj rooj tshoob rooj hno.

    Txhua lub teb chaws, nej zoo siab hu nkauj rau HUAB TAIS !
    Nej xyiv fab hlo luag ntxhi tsob hwb HUAB TAIS ;
    nej hu nkauj zoo siab chaws los ntawm nws xub ntiag

    Txais: (QYTN 19:9a) Cov tau hmoov zoo yog cov raug caw mus noj Leej Yaj rooj tshoob rooj hno.

    Nej yuav tsum paub tias HUAB TAIS yog Tswv Ntuj.
    Nws tsim peb los, peb yog nws tug,
    peb yog nws haiv neeg, yog pab yaj nws saib.

    Txais: (QYTN 19:9a) Cov tau hmoov zoo yog cov raug caw mus noj Leej Yaj rooj tshoob rooj hno.

    Nej chaws mus hauv nws cov rooj loog, nej ua nws tsaug,
    Nej mus hauv nws cov tshav loog, nej cav txog nws ;
    nej ua nws tsaug, nej foom lus zoo rau nws lub npe.

    (QYTN 19:9a) Cov tau hmoov zoo yog cov raug caw mus noj Leej Yaj rooj tshoob rooj hno.

    Vim HUAB TAIS muaj lub siab zoo,
    nws txoj kev ua siab zoo yuav nyob mus li,
    nws yuav ua siab ncaj rau txhua txhua tiam.

    Txais: (QYTN 19:9a) Cov tau hmoov zoo yog cov raug caw mus noj Leej Yaj rooj tshoob rooj hno.

    As Les Lus Yas: LK 21: 28

    Txais: As les lus yas, as les lus yas.

    Nej sawv kom ntseg, nej yuav tsa taub hau,
    vim txoj kev txhiv nej los txog ze lawm.

    Txais: As les lus yas, as les lus yas.

    Ntawv Moo Zoo: LK 21: 20-28

    Yes Xus hais rau nws cov thwj tim tias:
    20 "Thaum nej pom tej pab tub rog tuaj vij Yes Lus Xas Les, mas nej yuav to taub tias Yes Lus Xas Les txoj kev puas ntsoog nyob ze lawm.
    21 Thaum ntawd mas, cov nyob hauv xeev Yus Das kav tsij cia li khiav mus lawm pem roob, cov nyob hauv nroog yuav tsum khiav tawm mus kom deb, hos cov uas nyob tom tej teb txhob mus hauv nroog.
    22 Vim yog lub caij raug txim lawm, uas txhua tsav txhua yam sau tseg lawd yuav tsum tshwm sim tuaj.
    23 Lub caij ntawd, cov poj niam cev hnyav thiab cov uas muaj me nyuam mos noj mis yuav raug txom nyem loj, vim tias yuav muaj xwv txheej phem los raug ntiaj teb, thiab yuav muaj kev npau taws loj rau txim rau haiv neeg no.
    24 Lawv yuav ntog vim raug hniav ntaj tua thiab luag yuav ntes lawv mus nyob txim rau hauv txhua haiv neeg uas teev pej kum dab, ces cov haiv neeg teev pej kum dab yuav tsuj Yes Lus Xas Les mus txog hnub tas cov neeg teev pej kum dab lub caij lawm.
    25 Yuav muaj ib co cim nyob saum lub hnub, lub hli thiab cov hnub qub. Nyob ntiaj teb, ib tsoom haiv neeg yuav raug kev txhawj xeeb loj, yuav nyuaj siab kawg nkaus vim yuav hnov dej hiav txwv ntas ntua thiab nphau nphwv tuaj.
    26 Neeg yuav ntshai ntshai tuag kus, thaum lawv xav txog tej yam yuav tuaj raug lub qab ntuj neeg, vim tej yam muaj hwj huam nyob txheej ntuj saud yuav co ua zog koog.
    27 Ces thaum ntawd, sawv daws yuav pom Neeg Leej Tub muaj hwj huam thiab muaj hwj chim loj kawg nkaus, los saum ib tw huab los.
    28 Thaum tej ntawd pib tshwm sim tuaj, mas nej yuav sawv kom ntseg, nej yuav tsa taub hau siab, vim txoj kev txhiv nej los txog ze lawm."

    ++++++++++++++++++++++++
    ++++++++++++++++++++++++

    Thanksgiving Day - Hnub Ua Tswv Ntuj Tsaug - nyob USA

    Lectionary: 943-947
    Hnub Tsib Lis Piam Peb Caug Peb los Peb Caug Plaub hauv Nruab Xyoo

    Zaj Nyeem Ib: Npes Xis Las 50: 22-24


    22 Zaum no, nej cia li cav txog tus Tswv Ntuj uas yog sawv daws tus, yog tus tau ua tej yam loj tas nrho nyob qhov txhia chaw; nws yog tus ua kom peb txawj loj hlob txij puag thaum peb tseem nyob hauv leej niam plab los, thiab nws ua rau peb raws li nws txoj kev hlub kev khuv leej.
    23 Thov nws pub kom peb muaj kev zoo siab thiab kom muaj kev thaj yeeb lug lub caij peb ua neej nyob His Xas Lais xws li lub caij yav thaum ub..
    24 Thov kom nws pub nws txoj kev khuv leej rau peb thiab kom nws cawm peb hauv peb lub neej.

    NPN 145: 2-3, 4-5, 6-7, 8-9, 10-11

    Txais: (1) Kuv yuav cav txog koj lub npe mus li, Huab Tais.

    Kuv yuav niaj hnub cav txog koj lub koob meej,
    kuv yuav cav lus zoo txog koj lub npe mus li ib txhiab ib txhis.
    HUAB TAIS loj tas nrho, tsim nyog cav txog nws ;
    nws loj tas nrho, neeg ntsuam tsis tau.

    Txais: (1) Kuv yuav cav txog koj lub npe mus li, Huab Tais.

    Txheej dhau txheej yuav qhuas txog koj tej hauj lwm,
    Lawv yuav tshaj koj txoj kev muaj hwj huam..
    Lawv piav txog koj lub hwj chim loj ci ntsa iab,
    thiab hais txog koj cov dej num zoo tas nrho.

    Txais: (1) Kuv yuav cav txog koj lub npe mus li, Huab Tais.

    Neeg yuav hais txog koj lub hwj huam ua tej yam txaus ntshai,
    lawv yuav tshaj koj lub hwj huam loj kawg nkaus.
    Neeg yuav tshaj txog koj lub koob meej muaj siab zoo tas nrho,
    thiab yuav qw ntsuag qees cav txog koj lub siab ncaj.

    Txais: (1) Kuv yuav cav txog koj lub npe mus li, Huab Tais.

    HUAB TAIS lub siab hlub thiab khuv leej neeg,
    nws npau taws qeeb, nws lub siab zoo tas nrho.
    HUAB TAIS ua siab zoo rau txhua leej txhua tus,
    nws lub siab khuv leej tas puas tsav yam nws tau tsim.

    Txais: (1) Kuv yuav cav txog koj lub npe mus li, Huab Tais.

    HUAB TAIS, cia koj txhua yam hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim,
    thiab cav txog koj lub hwj huam.

    Txais: (1) Kuv yuav cav txog koj lub npe mus li, Huab Tais.

    Zaj Nyeem Ob: 1 KLN 1: 3-9

    Cov kwv tij nkauj muad,
    3 Thov kom nej tau txais txiaj ntsim thiab kev thaj yeeb tuaj ntawm Tswv Ntuj peb leej Txiv thiab ntawm Huab Tais Yes Xus Pleev tuaj.
    4 Kuv ua Tswv Ntuj tsaug tas mus li vim nej, rau lub txiaj ntsim uas Tswv Ntuj tau pub rau nej nyob hauv Yes Xus Pleev,
    5 ces nej nplua nuj nyob hauv txhua yam, nej txawj hais lus txog txhua yam thiab paub txhua yam txuj;
    6 txoj kev ua tim khawv txog Leej Pleev kuj tau cog ruaj khov kho nyob hauv nej lawm,
    7 ces nej tsis tshuav ib lub txiaj ntsim rau sab ntsuj plig uas nej tsis tau txais, thaum lub caij nej tseem tos ntsoov peb tus Huab Tais Yes Xus Pleev yuav tshwm sim los.
    8 Nws yuav ua kom nej ntseeg ruaj nreb mus txog qhov kawg, kom hnub uas peb tus Huab Tais Yes Xus Pleev rov los txog, mas tsis muaj ib qho xyeej nyob hauv nej.
    9 Tswv Ntuj yog tus pheej xeeb, nws tau hu nej kom los nrog nws Leej Tub, peb tus Huab Tais Yes Xus Pleev muaj kev sib raug zoo.

    As Les Lus Yas: 1 TXLN 5: 18

    Txais: As les lus yas, as les lus yas.

    Txawm nej yuav raug dab tsi los nej yuav ua Ntuj tsaug,
    Vim Tswv Ntuj lub siab yeej xav kom nej ua li ntawd nyob hauv Yes Xus Pleev.

    Txais: As les lus yas, as les lus yas.

    Ntawv Moo Zoo: LK 17: 11-19

    11 Thaum Yes Xus taug kev mus Yes Lus Xas Les, nws hla hauv Xas Mas Lias thiab Nkas Lis Lais teb.
    12 Thaum nws yuav mus rau hauv ib lub zos, muaj kaum tus mob ruas tuaj ntsib nws, lawv nres deb ntawm nws.
    13 Lawv tsa suab hais nrov nrov rau nws tias : "Xib Hwb Yes Xus, thov koj khuv leej peb!"
    14 Thaum Yes Xus pom lawv, nws hais rau lawv tias: “Nej mus thws nej lub cev rau cov Leej Choj saib." Thaum lawv tab tom mus, lawv lub cev cia li huv tuaj.
    15 Muaj ib tug hauv pab ntawd pom tias nws lub cev zoo lawm, nws tig hlo rov qab los, nws tsa suab nrov nrov cav txog Tswv Ntuj.
    16 Nws khoov ti av pe ntawm Yes Xus ko taw, nws ua Yes Xus tsaug. Nws yog ib tug neeg Xas Mas Lias.
    17 Yes Xus thiaj tsa ncauj teb tias : “Tsis yog muaj kaum leej rov huv tuaj lawm lod? Tshuav cuaj leeg ne, dua qhov twg lawm?
    18 Ua cas tsuas muaj tus qhua no xwb thiaj rov los ua tsaug cav txog Tswv Ntuj?"
    19 Ces Yes Xus hais rau nws tias: "Koj sawv, koj mus tsev, koj lub siab ntseeg cawm tau koj lawm."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 27th November 2020, 12:03 pm

    Tim     27     lub     11     Hlis     2020

    Hnub Rau Lis Piam Peb Caug Plaub Nruab Xyoo A Nruab Lis Piam Xyoo II
    Lectionary: 507

    Zaj Nyeem Ib:   QYTN 20: 1-4, 11-21:2


    1 Kuv Zam pom ib tug Tshiab nqes saum ntuj los, nws tuav tus yawm sij qhib lub Qhov Ntuj tob, thiab tuav ib txog saw hlau loj loj ntawm tes.
    2 Nws nthos nkaus tus zaj, uas yog tus nab txheej thaud, thiab yog tus Dab Phem los yog Xas Tas. Nws muab khi nkaus cia kom puv ib txhiab xyoo.
    3 Nws muab tus zaj nrom sis rau hauv lub qhov ntuj tob, nws kaw nkaus rau, muab xauv kom ruaj ruaj, kom nws tsis tau kev mus ntxias cov haiv neeg ntxiv, mus txog hnub puv ib txhiab xyoo lawm. Tom qab ntawd, mas nws yuav raug muab tso tawm rov los li ib ntus tsis ntev.
    4 Ces kuv pom ib co theej kiab. Cov neeg zaum saum cov theej kiab ntawd tau txais txoj cai ua tus txiav txim. Kuv tseem pom cov neeg uas raug luag txiav caj dab cov ntsuj plig thiab, vim lawv ua tim khawv txog Yes Xus thiab txog Tswv Ntuj lo lus, lawv tsis tau teev hawm tus tsiaj los nws tus duab, thiab tsis tau txais tus tsiaj lub cim rau saum lawv hauv pliaj los saum lawv txhais tes. Lawv rov muaj txoj sia dua tuaj, ces lawv nrog Leej Pleev ua vaj ib txhiab xyoo.
    11 Kuv tseem pom ntxiv yog ib lub theej kiab loj kawg, dawb paug, thiab pom tus zaum saum lub theej kiab. Lub ntiaj teb thiab lub ntuj khiav mus deb ntawm nws lub ntsej muag, tsis muaj chaw rau lub ntiaj teb thiab lub ntuj nyob lawm.
    12 Ces kuv pom cov tuag, cov neeg loj, cov neeg me huv tib si, sawv daws sawv ntsug nyob ntawm lub theej kiab hauv ntej. Lawv nthuav tej phau ntawv cia; lawv tseem nthuav dua ib phau ntxiv thiab, yog phau ntawv txoj sia. Ces ib tsoom neeg tuag raug txiav txim raws li muaj sau tseg rau hauv cov phau ntawv ntawd, raws li cov hauj lwm uas lawv tau ua.
    13 Lub hiav txwv xa cov tuag uas nyob hauv nws tawm los; txoj Kev Tuag thiab Tub Tuag Teb kuj xa cov tuag  nyob hauv lawv rov los. Lawv nyias raug txiav txim raws li nyias cov hauj lwm.
    14 Ces txoj Kev Tuag thiab Tub Tuag Teb raug muab cuam pov rau hauv lub pas hluav taws; lub pas hluav taws no yog txoj kev tuag zaum ob.
    15 Tus twg lub npe tsis pom sau nyob hauv phau ntawv txoj sia, mas nws raug luag muab pov rau hauv lub pas hluav taws ntawd.
    21  1 Ces kuv pom ib lub ntuj tshiab thiab ib lub ntiaj teb tshiab. Thawj lub ntuj thiab thawj lub ntiaj teb dua tas lawm, hiav txwv kuj tsis muaj ntxiv lawm.
    2 Kuv kuj pom lub Nroog Ntshiab, uas yog lub Yes Lus Xas Les tshiab, nqes saum ntuj, pem Tswv Ntuj los; nws hnav zam xws li tus nkauj nyab tshiab ntim zam sees tos nraug vauv.

    NPN   84: 3, 4, 5-6A+8A

    Txais: (QYTN 21:3b) Ntawm no, Tswv Ntuj nrog nws haiv neeg nyob.

    Kuv tus plig ntshaw qhuav siab qhawv
    txog HUAB TAIS cov tshav loog.
    Kuv lub siab lub cev quaj qw hu
    txog tus Tswv Ntuj muaj txoj sia.

    Txais: (QYTN 21:3b) Ntawm no, Tswv Ntuj nrog nws haiv neeg nyob.

    Tab cov me noog liaj nrhiav tau chaw nyob,
    noog luv nrhiav tau zes puag nws cov me nyuam
    ntawm koj cov thaj txi ntuj, HUAB TAIS kav tsoom tshiab,
    kuv tus vaj, kuv tus Tswv Ntuj!

    Txais: (QYTN 21:3b) Ntawm no, Tswv Ntuj nrog nws haiv neeg nyob.

    Cov neeg nyob hauv koj tsev lawv txoj hmoov zoo :
    lawv tau kev cav txog koj mus li tsis tseg.
    Cov neeg uas saib koj yog lawv lub zog, lawv txoj hmoov zoo.
    Lawv yim mus lawv lub zog yim loj tuaj.

    Txais: (QYTN 21:3b) Ntawm no, Tswv Ntuj nrog nws haiv neeg nyob.

    As Les Lus Yas:   LK 21: 28

    Txais: As les lus yas, as les lus yas.

    Nej yuav sawv kom ntseg, nej yuav tsa taub hau siab,
    Vim txoj kev txhiv nej los txog ze lawm.

    Txais: As les lus yas, as les lus yas.

    Ntawv Moo Zoo:   LK 21: 29-33

    29 Yes Xus hais ib zag paj lug rau nws cov thwj tim tias:
    "Nej ntsia tsob txiv ncuav pias thiab tas cov ntoo huv tib si.
    30 Thaum lawv cov cos nplooj pib nthuav, mas nej pom thiab nej to taub tias ntuj sov los yuav txog.
    31 Ib yam li ntawd, thaum nej pom tej xwm ntawd tshwm sim tuaj, mas nej yuav paub tias Tswv Ntuj lub Ceeb Tsheej los yuav txog.
    32 Kuv hais tseeb rau nej tias, tiam neeg no yuav tsis dua mus, mus txog thaum tas ib puas tsav yam ntawd xub tshwm sim tuaj tso.
    33 Lub ntuj thiab lub ntiaj teb yuav dua mus, tab sis kuv cov lus yuav tsis dua.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 27th November 2020, 2:22 pm

    Tim 28 lub 11 Hlis 2020

    Hnub Xya Lis Piam Peb Caug Plaub Nruab Xyoo C Nruab Lis Piam Xyoo II

    Lectionary: 508

    Zaj Nyeem Ib: QYTN 22: 1-7

    Zam sau tias:
    1 Tus Tshiab qhia tus dej muaj txoj sia rau kuv pom, dej mas ntshiab cuag tsom iav; nws txhawv ntawm Tswv Ntuj thiab Leej Yaj lub theej kiab los.
    2 Nyob hauv plawv ntawm lub tshav puam thiab ntawm tus dej sab tid thiab sab no, tuaj tus ntoo pub txoj sia. Nws txi kaum ob phaum txiv, ib hlis txi ib phaum. Cov nplooj ntawm tsob ntoo zoo tshuaj kho cov haiv neeg.
    3 Tas txhua yam lus foom phem yuav tsis muaj ntxiv. Tswv Ntuj thiab Leej Yaj lub theej kiab yuav txawb nyob ntawd; Tswv Ntuj cov tub txib yuav teev hawm Tswv Ntuj.
    4 Lawv yuav ntsia ntsoov Tswv Ntuj lub ntsej muag; Tswv Ntuj lub npe yuav sau rau saum lawv hauv pliaj.
    5 Yuav tsis muaj hmo ntuj ntxiv lawm. Lawv yuav tsis tas siv teeb los lub hnub ua kom lawv pom kev, vim Huab Tais Tswv Ntuj yuav ci pom kev nrig rau lawv. Lawv yuav ua vaj nyob mus li txheej dhau txheej.
    6 Ces tus Tshiab hais rau kuv tias : “Cov lus no yog lus txaus ntseeg thiab lus tseeb. Huab Tais, tus Tswv Ntuj uas tshoj cov Yaj Saub, nws tau xa nws tus Tshiab tuaj qhia kom nws cov tub txib paub txog cov xwm uas yuav tshwm sim tuaj tsis ntev tom ntej no.
    7 Ntsia saib ! Kuv twb yuav los sai sai. Tus tau txoj hmoov zoo yog tus khaws cov lus saub qhia txog yav tom ntej uas nyob hauv phau ntawv no.”

    NPN 95: 1-2, 3-5, 6-7AB

    Txais: (1 KLN 16: 22b, QYTN 22: 20c) Marana tha! Kav tsij los mas, Huab Tais Yes Xus!

    Nej tuaj ! Peb qw nkauj zoo siab rau HUAB TAIS,
    peb cav txog lub Tsua uas cawm peb ;
    Peb txav los ntawm nws xub ntiag, peb ua nws tsaug,
    peb nqua suab hu tej xaj nkauj cav txog nws.

    Txais: Marana tha! Kav tsij los mas, Huab Tais Yes Xus!

    Vim HUAB TAIS yog tus Tswv Ntuj loj,
    thiab tus vaj loj nyob siab dua tas txhua tus tswv ntuj.
    Nyob hauv nws txhais tes, nws tuav lub ntiaj teb qhov tob;
    Tej ncov roob siab yog nws li;
    Cov hiav txwv yog nws tug, vim nws yog tus tsim tsim,
    tej thaj av qhuav yog nws li, yog nws ob txhais tes puab.

    Txais: Marana tha! Kav tsij los mas, Huab Tais Yes Xus!

    Nej chaws los! Peb khoov cev pe hawm nws;
    peb txhos caug pe tus HUAB TAIS uas tsim peb los.
    Vim nws yog peb tus Tswv Ntuj, peb yog nws haiv neeg
    nws zov nraim, yog pab yaj uas nws coj rawv.

    Txais: Marana tha! Kav tsij los mas, Huab Tais Yes Xus!

    As Les Lus Yas: LK 21: 36

    Txais: As les lus yas, as les lus yas.

    Nej yuav ceev faj nraim txhua lub sij hawm thiab yuav thov ntuj,
    kom nej thiaj muaj zog sawv taus ntseg ntawm Neeg Leej Tub xub ntiag.

    Txais: As les lus yas, as les lus yas.

    Ntawv Moo Zoo: LK 21: 34-36

    Yes Xus hais rau nws cov thwj tim tias:
    34 “Nej yuav ceev faj nraim txog nej tus kheej mog, kom nej lub siab tsis txhob qaug rau txoj kev lom lom vab vab, thiab kev luab dej luab cawv, thiab rau lub neej tej kev txob kev txhawj, tsam thaum nej tsis faj txog, lub zim txwv ntawd poob nthav los rau saum nej
    35 xws li ib lub vas los cuab nej. Vim tias lub zim txwv ntawd yuav los raug txhua leej txhua tus uas nyob saum ntiaj teb daim npoo av.
    36 Nej yuav tsum ceev faj nraim tas mus li, thiab yuav thov Ntuj kom nej thiaj muaj zog hla dhau ib puas tsav yam xwm txheej uas yuav tshwm sim tuaj, thiab nej thiaj yuav sawv taus ntseg nyob ntawm Neeg Leej Tub xub ntiag."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3217
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim 27th November 2020, 2:32 pm

    Nyob zoo cov kwv tij neej tsa phooj ywg sawv daws,

    Hnub no ces yog hnub xaus peb lub xyoo teev ntuj xyoo 2019-2020 lawm os. Txij tag kis mus ces peb pib xyoo teev ntuj tshiab lawm nawb, yog xyoo 2020-2021 lawm.

    Thov kom Tswv Ntuj tso nws Leej Tswv Yim Ntshiab los tshoj los txhib peb sawv daws lub siab kom mob siab kub siab nrhiav Tswv Ntuj, ntseeg Tswv Ntuj, nyiam Tswv Ntuj thiab tso siab rau Tswv Ntuj nawb.

    Sponsored content


    COV ZAJ NYEEM NRUAB LIS PIAM XYOO A 2019-2020 - Page 13 Empty Re: COV ZAJ NYEEM NRUAB LIS PIAM XYOO A 2019-2020

    Post  Sponsored content


      Current date/time is 29th November 2021, 4:19 pm