COV ZAJ NYEEM NRUAB LIS PIAM XYOO A 2019-2020

Tim 16 lub 10 Hli 2020

Hnub Rau Lis Piam Nees Nkaum Yim Nruab Xyoo A Nruab Lis Piam Xyoo II

Hwm LN Hedwig, ua leej phauj; LN Margaret Mary Alacoque, nkauj xwb

Zaj Nyeem Ib: ES FES XOS 1: 11-14

Cov kwv tij nkauj muad,
11 Peb kuj tau raug xaiv nyob hauv Leej Pleev, tau raug qee raws li lub hom phiaj ntawm tus uas nws ua txhua tsav txhua yam kom haum nws lub siab xav, 12 ces peb thiaj tshwm sim los kom tau cav txog nws lub koob meej, vim peb yog cov xub tso siab rau Leej Pleev. 13 Nyob hauv Leej Pleev, nej cov uas tau hnov Lo Lus qhia qhov tseeb uas yog lub Moo Zoo muab txoj kev cawm rau nej, thiab nej tau ntseeg, mas nej kuj tau txais lub thwj pub Leej Tswv Yim Ntshiab raws li tau muaj lus cog tseg tias yuav pub. 14 Leej Tswv Yim Ntshiab yog thawj yam nyob hauv lub cuab tam uas peb yuav tau txais ua peb tug; nws ua hauj lwm txhiv peb los ua Tswv Ntuj tug kom peb ua cov cav txog nws lub hwj chim.

NPN 33: 1-2, 4-5, 12-13

Txais: (12) Haiv neeg Huab Tais xaiv ua nws tug lawv txoj hmoov zoo.

Cov neeg siab ncaj, nej cia li zoo siab nyob hauv HUAB TAIS,
txoj kev qhuas Huab Tais phim tus neeg siab ncaj.
Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws.


Txais: (12) Haiv neeg uas Huab Tais xaiv ua nws tug lawv txoj hmoov zoo.

HUAB TAIS lo lus yog lus ncaj,
nws tej num yog num tsim nyog ntseeg.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (12) Haiv neeg uas Huab Tais xaiv ua nws tug lawv txoj hmoov zoo.

Haiv neeg uas lawv tus Tswv Ntuj yog HUAB TAIS, lawv txoj hmoov zoo!
Haiv neeg uas Huab Tais xaiv los ua nws lub cuab tam, lawv txoj hmoov zoo!
HUAB TAIS nyob txheej ntuj saud dauv muag los ntsia,
nws pom tas nrho ib tsoom neeg.

Txais: (12) Haiv neeg uas Huab Tais xaiv ua nws tug lawv txoj hmoov zoo.

As Les Lus Yas: NPN 33: 22

Txais: As les lus yas, as les lus yas.

HUAB TAIS, thov kom koj lub siab zoo roos peb,
vim koj yog peb qhov chaw tso siab.

Txais: As les lus yas, as les lus yas.

Ntawv Moo Zoo: LK 12: 1-7

1 Thaum ntawd, neeg coob coob, muaj txog ntau txhiab leej tuaj sib txoos ua tsheej pawg, sawv daws nyob sib tsub sib nias ib leeg tsuj ib leeg taw. Yes Xus pib hais lus, nws xub hais rau nws cov thwj tim tias : "Nej yuav ceev faj txog cov poov xab– uas yog txoj kev lam ua zoo sab nraud – ntawm cov Fas Lis Xais. 2 Tsis muaj ib yam zais ntshis uas yuav tsis qhib tawm los, tsis muaj ib yam npog cia uas yuav tsis muaj neeg paub. 3 Yog vim li ntawd, tej yam uas nej hais nyob hauv qhov tsaus ntuj nti, yuav nrov rau luag hnov nruab hnub nrig; yam uas nej ntxhi rau hauv luag pob ntseg nyob hauv tej chav kaw nti, yuav muaj tus tuaj saum ru tsev muab tshaj tawm.
4 Kuv cov phooj ywg, kuv hais rau nej : Nej tsis txhob ntshai cov uas tua tau neeg lub cev, thaum lawv tua tas, lawv ua tsis tau dab tsi ntxiv rau lawm. 5 Kuv qhia rau nej tias nej yuav tsum ntshai leej twg : nej yuav ntshai tus uas tua lub cev tas, tseem muaj peev xwm yuav muab nej pov rau hauv dab phem teb thiab. Kuv hais rau nej tias, tus ntawd mas nej yuav tsum ntshai nws tiag tiag.
6 Tsib tug noog tsig txhuv tsuas muag tau ob lub txiaj toog xwb, puas yog ? Tsis kav, tsis muaj ib tug tsig txhuv uas Tswv Ntuj yuav tsis nco txog. 7 Tab yog nej cov plaub hau los Tswv Ntuj yeej suav tas huv si lawm. Nej tsis txhob txhawj mog : nej muaj nqis dua tej pab tsig txhuv coob coob.”

Tim 17 lub 10 Hli 2020

Hnub Xya Lis Piam Nees Nkaum Yim Nruab Xyoo A Nruab Lis Piam Xyoo II

Hwm LN Ignatius nyob Antioch, Tswv Qhia tuag ua Tim Khawv

Zaj Nyeem Ib: ES FES XOS 1: 15-23

Cov kwv tij nkauj muad:
15 Thaum kuv hnov tej lus zoo cav txog nej txoj kev ntseeg nyob hauv Huab Tais Yes Xus, thiab txog nej muaj lub siab nyiam tas tsoom ntshiab, 16 mas kuv ua Ntuj tsaug tsis tseg vim nej, thiab kuv nco ntsoov txog nej thaum kuv teev Ntuj. 17 Kuv thov kom peb tus Huab Tais Yes Xus Pleev tus Tswv Ntuj, uas yog Leej Txiv tus muaj koob meej, pub ib lub tswv yim thoob tsib thiab txawj paub ntau yam rau nej, kom nej paub Tswv Ntuj zoo, 18 kom nej cov qhov muag hauv nruab siab pom kev tuaj, nej thiaj yuav paub tias txoj kev tso siab uas los ntawm txoj kev nws hu nej los ntseeg yog dab tsi, thiab kom nej paub tias txoj kev nplua nuj muaj hwj chim nyob hauv nws lub cuab tam uas nej yuav nrog tsoom n tshiab txais yog dab tsi; 19 thiab paub tias nws lub hwj huam pab peb cov uas ntseeg nws loj npaum li cas, raws li nws twb tau siv nws lub zog uas muaj peev xwm heev; 20 nws tau siv lub zog ntawd nyob hauv Leej Pleev thaum nws tsa Leej Pleev sawv hauv cov tub tuag rov los thiab nws tsa Leej Pleev zaum ntawm nws sab xis nyob saum cov txheej ntuj saud, 21 nyob siab tshaj cov Tuam Tshiab, siab tshaj cov Tshiab muaj hwj huam, siab tshaj cov Tshiab muaj zog, siab tshaj cov Tshiab tswj luag, siab tshaj txhua lub npe uas neeg siv, tsis yog hauv lub zim txwv no xwb tiam sis tseem nyob rau tiam tom ntej huv tib si. 22 Tswv Ntuj tso tas ib puas tsav yam rau hauv Leej Pleev qab xib taws; nws tsa Leej Pleev ua tus Hau saib txhua yam nyob hauv lub Koom Txoos, 23 uas yog nws lub Cev thiab yog nws tus kheej tas nrho nyob puv txhua tsav txhua yam thiab puv qhov txhia chaw.

NPN 8: 2-3AB, 4-5, 6-7

Txais: (7) Koj tsa koj leej Tub kav txhua yam koj txhais tes tau tsim los.

HUAB TAIS, peb tus HUAB TAIS, cas koj lub npe
muaj hwj chim ua luaj, nws ci mus roos tas saum ntiaj teb!
Koj tau tsa koj lub hwj xyeej nyob siab dua cov txheej ntuj saud.
Koj ua kom cov me nyuam yaus thiab cov me nyuam mos lub ncauj
Txawj cav lus zoo txog koj vim koj cov yeeb ncuab.

Txais: (7) Koj tsa koj leej Tub kav txhua yam koj txhais tes tau tsim los.

Thaum kuv ntsia lub ntuj uas koj ntiv tes tau tsim los,
lub hli thiab cov hnub qub uas koj muab txawb rau nyias qhov chaw,
tib neeg yog dab tsi, koj thiaj nco txog nws?
neeg leej tub yog tus tsi, koj thiaj txhawj txog nws?

Txais: (7) Koj tsa koj leej Tub kav txhua yam koj txhais tes tau tsim los.

Koj tsim neeg los nyob nyob qis zog me ntsis cov tshiab
Koj muab koob meej thiab muab hwj chim rau neeg ntoo.
Koj tsa neeg kav txhua yam koj txhais tes tau tsim los,
koj tso tas puas tsav puas yam rau hauv neeg qab xib taws.

Txais: (7) Koj tsa koj leej Tub kav txhua yam koj txhais tes tau tsim los.

As Les Lus Yas: ZAM 15: 26B, 27A

Txais: As les lus yas, as les lus yas.

Huab Tais hais tias: “Leej Tswv Yim qhia qhov tseeb
yuav ua tim khawv txog kuv thiab nej kuj yuav ua tim khawv thiab.”

Txais: As les lus yas, as les lus yas.

Ntawv Moo Zoo: LK 12: 8-12

Yes Xus hais rau nws cov thwj tim tias:
8 “Kuv hais rau nej tias, yog leej twg lees paub kuv nyob ntawm tsoom neeg xub ntiag, mas Neeg Leej Tub kuj yuav lees paub nws nyob ntawm Tswv Ntuj tsoom tshiab xub ntiag thiab. 9 Yog leej twg tsis lees paub kuv nyob ntawm tsoom neeg xub ntiag, mas kuj yuav tsis muaj tus lees paub nws nyob ntawm Tswv Ntuj tsoom Tshiab xub ntiag thiab.
10 Leej twg hais ib lo lus cem Neeg Leej Tub, mas Ntuj yuav zam rau nws. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws li.
11 Thaum luag coj nej mus sawv hauv cov tsev txoos, ntawm cov thawj tswj, thiab ntawm cov nom tswv xub ntiag, mas nej txhob txhawj tias yuav teb li cas yuav ua li cas los nej yuav hais dab tsi nej thiaj yeej; 12 vim lub sij hawm ntawd, Leej Ntuj Plig Ntshiab mam li yuav qhia kom nej hais dab tsi."

Tim 19 lub 10 Hli 2020

Hnub Ob Lis Piam Nees Nkaum Cuaj Nruab Xyoo A Nruab Lis Piam Xyoo II

Hwm LN John der Brebeuf, Isaac Jogues, thiab cov…, tuag ua tim khawv

Zaj Nyeem Ib: ES FES XOS 2: 1-10

Cov kwv tij nkauj muad,
1 Thaud, nej yog neeg tuag nyob hauv nej txoj kev yuam kev thiab kev txhaum, 2 uas nej coj ua nej lub neej, vim nej mloog raws lub qab ntuj neeg, thiab mloog raws tus kav lub hwj huam ntawm tej huab cua; zaum no tus dab ntawd ua nws tej hauj lwm nyob hauv cov neeg uas ntxeev siab rau Tswv Ntuj. 3 Yav thaud peb txhua leej txhua tus kuj yog neeg coj ib yam li ntawd thiab : peb tau ua lub neej mloog lub cev nqaij txoj kev ntshaw, peb ua ywj peb lub cev tej kev xav kev nqhis, thiab ywj peb lub siab xav ua qhov phem, ces peb thiaj yog ib co me nyuam poob rau hauv txoj kev npau taws xws li sawv daws. 4 Tab sis, Tswv Ntuj uas nws nplua nuj txoj kev khuv leej, nws hlub peb loj tas nrho. 5 Txawm tias peb twb tuag nyob hauv peb txoj kev txhaum lawm los, nws tseem ua kom peb nrog Leej Pleev rov muaj txoj sia tuaj – nco ntsoov tias yog nws lub txiaj ntsim cawm nej. 6 Tswv Ntuj tsa peb nrog Leej Pleev sawv rov los, nws coj peb los zaum nrog nws saum cov txheej ntuj saud nyob hauv Yes Xus Pleev. 7 Nws ua li ntawd kom tau qhia rau cov tiam tom ntej pom nws lub txiaj ntsim nplua nuj loj tas nrho nyob hauv nws txoj kev ua zoo rau peb nyob hauv Yes Xus Pleev. 8 Yog Tswv Ntuj lub txiaj ntsim cawm nej nyob hauv txoj kev ntseeg; qhov ntawd tsis yog tuaj ntawm nej tuaj, hos yog ib qho paj tshab tuaj ntawm Tswv Ntuj tuaj. 9 Nws kuj tsis yog tuaj ntawm cov hauj lwm tuaj thiab, kom tsis txhob muaj ib tug tau kev khav. 10 Peb yog cov hauj lwm tawm ntawm Tswv Ntuj txhais tes los ; nws tsim peb los nyob hauv Yes Xus Pleev, kom peb ua cov hauj lwm zoo uas nws yeej ib txwm xub npaj tseg rau peb ua nyob hauv peb lub neej lawm.

NPN 100: 1B-2, 3, 4AB, 4C-5

Txais: (3b) Nws tsim peb los, peb yog nws tug.

Tas lub ntiaj teb, nej zoo siab hu nkauj rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag

Txais: (3b) Nws tsim peb los, peb yog nws tug.

Nej cia li lees tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog pab yaj nws saib.

Txais: (3b) Nws tsim peb los, peb yog nws tug.

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws

Txais: (3b) Nws tsim peb los, peb yog nws tug.

Nej ua nws tsaug, nej foom lus zoo rau nws lub npe,
vim HUAB TAIS muaj lub siab zoo;
nws txoj kev ua zoo yuav nyob mus li,
nws ua siab ncaj rau peb txheej dhau txheej.

Txais: (3b) Nws tsim peb los, peb yog nws tug.

As Les Lus Yas: MT 5: 3

Txais: As les lus yas, as les lus yas.

Cov cov pluag hauv nruab siab tau txoj hmoov zoo,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv Moo Zoo: LK 12: 13-21

13 Muaj ib tug neeg hauv tsoom sid hais rau Yes Xus tias : "Xib Hwb, koj hais kom kuv tij laug faib peb lub cuab tam rau kuv thiab." 14 Yes Xus hais rau nws tias : "Npawg, leej twg tsa kuv ua tus txiav txim los tus faib cuab tam rau neb ?" 15 Ces Yes Xus hais rau sawv daws tias : "Nej ceev faj, nej yuav txuag kom nej txhob muaj kev ntshaw, vim tias neeg txawm nplua nuj npaum twg, los nws txoj sia tsis yog tas rau nws lub cuab tam." 16 Yes Xus hais zaj paj lug no rau lawv : "Muaj ib tug neeg nplua nuj, nws cov teb ntsu qoob loo kawg. 17 Nws nug nws tus kheej tias : 'Kuv yuav ua li cas, vim kuv tsis muaj chaw rau kuv cov qoob ?' 18 Ces nws hais tias : 'Kuv yuav ua li no : kuv yuav rhuav kuv cov txhab, yuav rov ua ib co txhab loj dua, kuv yuav sau kuv cov nplej thiab kuv tej qoob loo huv si los tso rau hauv. 19 Ces kuv yuav hais rau kuv tus plig tias : 'Me ntsuj plig, koj muaj qoob loo ntau yam kav koj ntev niaj ntau xyoo lawm, koj so mog, koj noj, koj haus, koj ua si lom zem xauv npo mog.’ 20 Tab sis Tswv Ntuj hais rau nws tias : 'Neeg vwm ! hmo no kiag, luag yuav nug koj txog koj tus ntsuj plig. Tej yam uas koj npaj tau, yuav yog leej twg tug ?’ 21 Ua li mas, tus uas khaws nyiaj txiag ntau ntau tseg rau nws tib leeg kheej kuj yuav zoo li ntawd thiab, vim nws tsis nrhiav kev nplua nuj nyob hauv yam uas Tswv Ntuj saib muaj nqes."

Tim     20     lub     10     Hli     2020

Hnub Peb Lis Piam Nees Nkaum Cuaj Nruab Xyoo A Nruab Lis Piam Xyoo II
Lectionary: 474

Zaj Nyeem Ib:   EFX 2:  12-22

Cov kwv tij nkauj muad:
12 Nej nco tias thaum lub caij ntawd mas nej tsis muaj Leej Pleev, nej tsis koom nrog His Xas Lais ua ib pab ib pawg, nej yog ib co qhua tsis muaj feem nyob hauv txoj kev cog lus, tsis muaj kev tso siab, thiab tsis muaj Tswv Ntuj nrog nej nyob ntiaj teb no. 13 Tab sis nyem no, nyob hauv Leej Pleev, nej cov uas thaud nyob deb, nws cov ntshav coj nej los nyob ze lawm. 14 Vim Leej Pleev yog peb txoj kev thaj yeeb, nws yog tus muab ob tog los koom ua ke, nws rhuav lub laj kab cais sawv daws uas yog txoj kev sib ntxub pov tseg. 15 Leej Pleev muab cov lus qhia thiab tej txhooj hauv Txoj Cai rhuav nyob hauv nws lub cev nqaij, ces nws muab ob tug neeg los tsim dua ua ib tug neeg tshiab nyob hauv nws, kom tsa tau txoj kev thaj yeeb, 16 kom nws tus Ntoo Cuam sau ob tog los nrog Tswv Ntuj sib haum xeeb nyob hauv tib lub Cev xwb, ces nws thiaj ua tau kom kev sib ntxub ploj mus. 17 Leej Pleev tuaj, nws tshaj txoj kev thaj yeeb rau nej cov uas nyob deb, thiab tshaj kev thaj yeeb rau lawv cov uas nyob ze. 18 Vim nyob hauv Leej Pleev, mas peb ob pab neeg mus cuag tau Leej Txiv nyo hauv ib tug Leej Tswv Yim xwb. 19 Li ntawd, nej tsis yog ib co pej kum neeg los ib co qhua ntxiv,  nej nrog cov ntshiab koom ua ib haiv neeg xwb, thiab nej yog Tswv Ntuj tsev neeg, 20 uas txhim rau saum cov Hauv Paus Xa Lus thiab cov Yaj Saub ua cov taw ntsa, Yes Xus Pleev yog lub pob zeb txheem tas lub tsev. 21 Nyob hauv Leej Pleev, lub tsev sib dhos zoo thiab hlob ua ib lub Tuam Tsev teev Ntuj Ntshiab rau Huab Tais. 22 Nyob hauv Leej Pleev, nej kuj raug muab txhim ua Tswv Ntuj lub tsev nyob nyob hauv Leej Ntuj Plig thiab.

NPN   85:  9AB-10, 11-12, 13-14

Txais: (9) Huab Tais tshaj kev thaj yeeb rau nws haiv neeg.  

Kuv mloog saib HUAB TAIS Tswv Ntuj yuav hais dab tsi.
Huab Tais yuav tshaj kev thaj yeeb.
Vim nws txoj kev cawm los txog ze cov hwm nws lawm.
Nws lub hwj chim yuav tsa tsev nyob hauv peb lub teb chaws.

Txais: (9) Huab Tais tshaj kev thaj yeeb rau nws haiv neeg.

Kev ua zoo thiab kev tseeb yuav los sib ntsib,
kev ncaj thiab kev thaj yeeb yuav los sib qawg.
Kev Tseeb yuav txhawv hauv ntiaj teb los,
hos kev ncaj yuav dauv muag saum ntuj los saib.

Txais: (9) Huab Tais tshaj kev thaj yeeb rau nws haiv neeg.

HUAB TAIS yuav pub nws tej txiaj ntsim,
peb cov av yuav ntsu qoob loo.
Txoj kev ncaj yuav mus ua Huab Tais ntej,
Txoj kev cawm yuav taug raws nws tej hneev taw

Txais: (9) Huab Tais tshaj kev thaj yeeb rau nws haiv neeg.

As Les Lus Yas:   LK 21: 36

Txais: As les lus yas, as les lus yas.

Nej ua ib co neeg xyuam xim tas mus li, nej teev Ntuj tsis tseg,
nej thiaj yuav muaj zog sawv taus ntseg ntawm Neeg Leej Tub xub ntiag.

Txais: As les lus yas, as les lus yas.

Ntawv Moo Zoo:   LK 12:  35-38

Yes Xus hais rau nws cov thwj tim tias:
35 "Nej sia siv khov kho thiab taws teeb tos,
36 zoo li ib co tub txib uas tos lawv tus tswv mus ua tshoob yuav rov los. Thaum tus tswv rov los txog, nws yuav khob qhov rooj, ces lawv yuav qhib rau nws tam sis ntawd.
37 Cov tub txib uas thaum tus tswv los txog, nws pom lawv tseem zov hmo, mas lawv txoj hmoov zoo. Kuv hais tseeb rau nej tias, tus tswv yuav sia siv, yuav kom cov tub txib ntawd zaum ntawm rooj mov, nws yuav rau rooj thiab yuav nqa zaub nqa mov los rau lawv noj.
38 Txawm tias, tus tswv yuav los txog thaum ib tag hmo los thaum qaib qua los xij, yog nws pom lawv zov hmo zoo li ntawd, mas cov tub txib ntawd txoj hmoov zoo

Tim 21 lub 10 Hli 2020

Hnub Plaub Lis Piam Nees Nkaum Cuaj Nruab xyoo A nruab Lis Piam Xyoo II
Lectionary: 475

Zaj Nyeem Ib: ES FES XOS 3: 2-12

Cov kwv tij nkauj muad:
2 Nej yeej tau hnov lawm tias Tswv Ntuj tau muab txoj hauj lwm saib xyuas txog nws lub txiaj ntsim rau kuv tuav, kom kuv pab tau nej. 3 Nws tau qhib tej yam zais tob rau kuv paub raws liu kuv tau yees pom xyeem thiab tau xub piav me ntsis ua ntej rau nej lawm. 4 Thaum nej twm kuv cov lus, nej yuav pom tias kuv kuj muaj kev to taub txog tej yam zais tob hais txog Leej Pleev thiab. 5 Nws tsis tau muab qhib tawm rau cov tiam neeg txheej thaud paub li, nyuam qhuav muab qhib tawm rau nws cov Hauv Paus Xa Lus ntshiab paub, thiab rau nws cov Yaj Saub nyem no paub nyob hauv Leej Tswv Yim xwb, 6 yog qhov tias cov haiv neeg teev pej kum dab yeej nrog sawv daws koom txais ib lub cuab tam thiab koom ua ib lub Cev xwb, thiab lawv kuj nrog sawv daws koom tau txais raws nraim li cov lus cog tseg nyob hauv Yes Xus Pleev raws li lub Moo Zoo.
7 Kuv tau los ua ib tug tub tsob hwb lub Moo Zoo ntawd vim Tswv Ntuj lub txiaj ntsim uas nws lub hwj huam pub dawb rau kuv tau txais. 8 Kuv yog tus me tshaj cov nyob hauv tas tsoom ntshiab; nws pub lub txiaj ntsim no rau kuv, kom kuv tshaj txog Leej Pleev txoj kev nplua nuj loj uas neeg ntsuas tsis tau, rau cov haiv neeg teev pej kum dab tau hnov txog, 9 thiab kom kuv qhia sawv daws paub tseeb tias lub ntsiab ntawm tej yam zais tob yog dab tsi; cov txuj no nyob zais ntshis txij puag txheej thaud los lawm nyob hauv Tswv Ntuj tus tsim tas ib puas tsav yam, 10 kom nyem no cov tuam tshiab thiab cov Tshiab muaj hwj huam nyob saum cov txheej ntuj siab paub txog Tswv Ntuj txoj kev thoob tsib ua tau ntau yam nyob hauv lub Koom Txoos. 11 Tej no yeej yog raws nraim li Tswv Ntuj lub hom phiaj nws ib txwm npaj puag ntxov los lawm uas nws tau ua nyob hauv peb tus Huab Tais Yes Xus Pleev, 12 nyob hauv nws peb muaj cuab kav hais lus tseeb thiab peb muaj kev tso siab lug txav los ze nws vim peb ntseeg txog nws.

NPN: HX 12: 2-3, 4BCD, 5-6

Txais: (3) Nej yuav zoo siab luag ntxhi mus ce dej hauv cov dej txhawv muaj kev cawm neeg.

Tswv Ntuj yog tus cawm kuv tiag.
Kuv tso siab rau nws, kuv tsis ntshai dab tsi.
Kuv lub zog thiab kuv lub peev xwm yog HUAB TAIS.
Nws yog tus tau cawm kuv.
Nej yuav zoo siab luag ntxhi mus ce dej
hauv tus dej txhawv muaj kev cawm neeg."

Txais: (3) Nej yuav zoo siab luag ntxhi mus ce dej hauv cov dej txhawv muaj kev cawm neeg.

Nej ua HUAB TAIS tsaug, nej cav txog nws lub npe.
Nej tshaj nws tej hauj lwm loj rau cov haiv neeg paub,
Nej cav txog tias nws lub npe zoo tas nrho.

Txais: (3) Nej yuav zoo siab luag ntxhi mus ce dej hauv cov dej txhawv muaj kev cawm neeg.

Nej hu nkauj rau HUAB TAIS cav txog nws cov hauj lwm
muaj hwj huam, kom tas ntiaj teb paub txhua nrho.
Tsoom neeg nyob Xis Yoos, nej seev suab qw zoo siab,
vim tus loj nyob hauv nej yog His Xas Lais tus Ntshiab!

Txais: (3) Nej yuav zoo siab luag ntxhi mus ce dej hauv cov dej txhawv muaj kev cawm neeg.

As Les Lus Yas: MT 24: 42A, 44

Txais: As les lus yas, as les lus yas.

Nej yuav tsis txhob tsaug zog!
Vim nej twb tsis paub lub caij twg Neeg Leej Tub yuav los.

Txais: As les lus yas, as les lus yas.

Ntawv Moo Zoo: LK 12: 39-48

Yes Xus hais rau nws cov thwj tim tias:
39 “Nej yuav tsum paub tias: Yog tus tswv tsev paub lub sij hawm twg tub sab yuav tuaj, mas nws yuav tsis cia tub sab tho qhov tsev. 40 Nej kuj yuav tsum npaj ib yam li ntawd thiab, vim yog lub sij hawm uas nej tsis nco faj, mas Neeg Leej Tub thiaj yuav los."
41 Ces Pob Zeb hais tias : "Huab Tais, koj hais zaj paj lug no, puas yog koj hais rau peb xwb , los hais rau sawv daws ?" 42 Huab Tais teb tias : "Leej twg yog tus tub txib pheej xeeb thiab xyuam xim, uas tus tswv tsev yuav tsa nws saib tus tswv cov tub txib, kom thaum txog caij, nws yuav faib txhiam laj txhiam xws kom haum rau lawv ? 43 Tus tub txib uas tus tswv rov los txog, nws pom tab tom lis dej num zoo li no, mas tus tub txib ntawd txoj hmoov zoo. 44 Kuv hais tseeb rau nej tias, tus tswv yuav tsa nws saib tus tswv lub cuab tam tas huv si. 45 Tab sis yog tus tub txib twg xav hauv siab tias 'kuv tus Tswv yuav los lig,' ces nws pib muab tus tswv tej tub txib ntxhais txib ntaus, nws noj nws haus thiab nws haus kom qaug, 46 mas tus tub txib no tus tswv yuav los txog ib hnub uas nws tsis nco faj, thiab lub sij hawm uas nws tsis paub; ces tus tswv yuav rau txim hnyav rau tus tub txib thiab yuav ntiab nws mus nrog cov neeg tsis hwm Ntuj nyob. 47 Tus tub txib uas nws yeej paub qhov uas tus tswv xav kom ua, tab sis nws tsis npaj dab tsi li, thiab tsis ua raws li qhov tus tswv xav kom ua, mas tus tub txib ntawd yuav raug nplawm sa kawg nkaus. 48 Hos tus tub txib uas yeej tsis paub qhov uas tus tswv xav kom ua li, ces nws kuj tau ua tej yam tsim nyog nplawm kom sab, tiam sis nws yuav raug nplawm sib sib xwb. Txhua tus uas luag pub ntau rau, mas luag kuj yuav taij ntau ntawm nws rov qab. Yog muaj tus luag tseem pub ntau tshaj rau nws thiab, mas luag haj yam yuav taij ntau tshaj ntawm nws rov qab.”

Tim 22 lub 10 Hli 2020

Hnub Tsib Lis Piam Nees Nkaum Cuaj Nruab Xyoo A Nruab Lis Piam Xyoo II
Lectionary: 476

Hwm LN Zam Paj Lug II, ua vaj qhia

Zaj Nyeem Ib: ES FES XOS 3: 14-21

Cov kwv tij nkauj muad:
14 Vim tej uas tau hais no, mas kuv txhos caug nyob ntawm Leej Txiv xub ntiag, 15 yog Leej Txiv uas tas txhua txoj kev ua txiv nyob saum ntuj thiab nyob ntiaj teb no, txais lub npe ntawd ntawm nws los. 16 Kuv thov kom Leej Txiv pub kom nej tau txais raws li nws lub hwj chim plua nuj, lub zog loj zog nchav nyob hauv nws Leej Tswv Yim, los pab txhawb nej tus neeg sab hauv, 17 thiab kuv thov kom Leej Pleev los nyob txawm hauv nej lub siab vim nej ntseeg, ces nej yuav nrhau cag thiab yuav cog nej lub siab ruaj rau hauv txoj kev nyiam. 18 Nej thiaj yuav muaj lub zog pab kom nej nrog tas tsoom neeg ntshiab to taub tias qhov dav thiab qhov ntev, qhov siab thiab qhov tob yog li cas, 19 ces nej thiaj yuav paub Leej Pleev txoj kev hlub uas loj tshaj txhua txoj kev paub txuj, thiab nej thiaj yuav muaj Tswv Ntuj tas nrho los nyob puv nkaus hauv nej.
20 Tus Tswv muaj hwj huam yog tus ua hauj lwm nyob hauv peb, nws ua tau ntau tshaj ob peb npaug qhov peb thov, thiab qhov peb xav tau hauv peb lub tswv yim. 21 Vim li ntawd, lub koob meej nyob hauv lub Koom Txoos, thiab hauv Yes Xus Pleev, yog nws tug mus tas txhua tiam mus li ib txhiab ib txhis ! Ua li !

NPN 33: 1-2, 4-5, 11-12, 18-19

Txais: (5b) Huab Tais txoj kev hlub nyob puv nkaus lub ntiaj teb.

Cov neeg siab ncaj, nej cia li zoo siab nyob hauv HUAB TAIS,
txoj kev qhuas nws phim tus neeg siab ncaj.
Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws. .

Txais: (5b) Huab Tais txoj kev hlub nyob puv nkaus lub ntiaj teb.

HUAB TAIS lo lus yog lus ncaj,
nws tej num yog num tsim nyog ntseeg.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (5b) Huab Tais txoj kev hlub nyob puv nkaus lub ntiaj teb.

Tej yam HUAB TAIS npaj yuav nyob mus li,
Yam nws lub siab xav ua yuav nyob txheej dhau txheej.
Tau txoj hmoov zoo yog haiv neeg uas
lawv tus Tswv Ntuj yog HUAB TAIS, ,
yog haiv neeg Huab Tais xaiv los ua nws lub cuab tam.

Txais: (5b) Huab Tais txoj kev hlub nyob puv nkaus lub ntiaj teb.

HUAB TAIS lub qhov muag saib ntsoov cov neeg hwm nws,
ntsia ntsoov cov uas tso siab rau nws txoj kev hlub,
tias nws yuav npo lawv dim ntawm kev tuag,
thiab yuav txuag lawv txoj sia thaum muaj kev tshaib plab.

Txais: (5b) Huab Tais txoj kev hlub nyob puv nkaus lub ntiaj teb.

As Les Lus Yas: FLP 3: 8-9

Txais: As les lus yas, as les lus yas.

kuv saib txhua yam tsis muaj nqis dab tsi,
vim kuv xav tau Leej Pleev thiab xav nyob hauv nws.

Txais: As les lus yas, as les lus yas.

Ntawv Moo Zoo: LK 12: 49-53

Yes Xus hais rau nws cov thwj tim tias:
49 "Kuv coj ib co hluav taws tuaj zes rau lub ntiaj teb, kuv xav kom cov hluav taws ntawd twb cig lam lug lawm.
50 Muaj ib co kab ke ntxuav uas kuv yuav tsum txais. Kuv ntxhov siab loj kawg mus txog hnub uas tej ntawd tiav tas lawm.
51 Nej puas xav tias kuv coj kev thaj yeeb tuaj rau ntiaj teb no? Kuv hais rau nej tias, kuv tsis coj kev thaj yeeb tuaj, kuv coj kev sib ncaim sib tawg tuaj.
52 Txij no mus, ib tse neeg muaj tsib leeg yuav sib tawg, peb leeg yuav tiv ob leeg, ob leeg yuav tiv peb leeg.
53 Lawv yuav sib tawg, txiv yuav tiv tub, tub yuav tiv txiv, niam yuav tiv ntxhais, ntxhais yuav tiv niam, poj yuav tiv nyab, nyab yuav tiv poj."

Tim     23     lub     10     Hli     2020

Hnub Rau Lis Piam Nees Nkaum Cuaj Nruab Xyoo A Nruab Lis Piam Xyoo II
Lectionary: 477

Hwm LN John Capistrano, ua Leej Choj

Zaj Nyeem Ib: ES FES XOS 4: 1-6

Cov kwv tij nkauj muad:
1 Kuv, tus neeg raug txim vim Huab Tais, kuv thov nej, kom nej coj ib lub neej phim txoj kev uas Ntuj hu nej los taug. 2 Nej yuav ua neeg tsis muab hlob, ua neeg siab mos siab zoo, ua neeg siab ntev; nej yuav ib leeg txhawb ib leeg nyob hauv txoj kev nyiam.
3 Nej yuav siv zog txuag txoj kev sib koom siab koom ib lub tswv yim xwb, nyob hauv txoj kev thaj yeeb nej muaj ib leeg nrog ib leeg.
4 Tsuas muaj ib lub Cev thiab ib lub Tswv Yim xwb, ib yam li Ntuj hu nej los taug ib txoj kev tso siab xwb;
5 tsuas muaj ib tug Huab Tais, ib txoj kev ntseeg, ib lub cim ntxuav,
6 ib tug Tswv Ntuj ua tas sawv daws Txiv xwb, nws nyob siab dua sawv daws, nws hla hauv sawv daws, thiab nws nyob hauv sawv daws.

NPN 24: 1-2, 3-4ab, 5-6

Txais: (6) Huab Tais, ntawm no yog haiv neeg uas ntshaw pom koj lub ntsej muag.

Lub ntiaj teb thiab puas tsav yam nyob hauv yog HUAB TAIS li,
lub sim ceeb thiab cov nyob hauv yog nws tug.
Vim nws yog tus tsim lub ntiaj teb txawb rau saum cov hiav txwv
thiab muab tso rau saum cov dej ntws.

Txais: (6) Huab Tais, ntawm no yog haiv neeg uas ntshaw pom koj lub ntsej muag.

Leej twg thiaj yuav nce tau saum HUAB TAIS lub roob?
Los leej twg thiaj yuav mus sawv taus nyob hauv nws thaj chaw ntshiab?
Yog tus uas txhais tes tsis muaj txhaum, lub siab dawb huv,
tus uas tsis ntshaw tej yam tsis muaj qab hau.

Txais: (6) Huab Tais, ntawm no yog haiv neeg uas ntshaw pom koj lub ntsej muag.

HUAB TAIS yuav foom koob hmoov rau nws. ,
yog paj tshab tuaj ntawm Tswv Ntuj tus cawm nws tuaj.
Lawv yuav zoo li no, tsav neeg uas nrhiav Huab Tais,
cov uas nrhiav Yas Kos tus Tswv Ntuj lub ntsej muag.

Txais: (6) Huab Tais, ntawm no yog haiv neeg uas ntshaw pom koj lub ntsej muag.

As Les Lus Yas: MT 11: 25

Txais: As les lus yas, as les lus yas.

Txiv, kuv cav lus zoo txog koj, Huab Tais kav lub ntuj lub teb,
vim koj qhib tej yam zais tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo LK 12: 54-59

54 Yes Xus hais rau tsoom neeg sawv daws tias : "Thaum nej pom huab sawv ntxoov sab hnub poob, tam sis ntawd, nej hais tias ntuj yuav los nag, ces kuj los nag tiag.
55 Thaum nej hnov cua tshuab sab qab teb tuaj, nej hais tias ntuj yuav sov, mas muaj li ntawd tuaj tiag.
56 Neeg zoo sab nraud, nej twb paub ntsuas lub ntuj lub teb tus yam ntxwv, ua cas nej ntsuas tsis tau lub zim txwv no li?
57 Vim li cas nej tsis txiav txim nej tus kheej tias qhov ncaj yog qhov twg ?
58 Yog koj nrog tus ntxub koj mus cuag nom, mas thaum koj tseem txog ib tog kev, koj yuav ua tib zoo nrog nws hais kom haum, tsam nws coj koj mus rau tus nom txiav txim, ces tus nom txiav txim muab koj cob nkaus rau tub ceev xwm, ces tub ceev xwm muab koj pov rau hauv tsev loj faj.
59 Kuv hais rau koj : Koj yuav tsis tau tawm hauv tsev loj faj los mus txog thaum koj rho nyiaj qab nas txog npib kawg los them kom tas tso.”

Tim 24 lub 10 Hli 2020

Hnub Xya Lis Piam Nees Nkaum Cuaj Nruab Xyoo A Nruab Lis Piam Xyoo II
Lectionary: 478

Hwm LN Anthony Mary Claret, ua Tswv Qhia

Zaj Nyeem Ib: EFX 4: 7-16

Cov kwv tij nkauj muad:
7 Peb nyias tau txais txiaj ntsim raws li Leej Pleev luj pub dawb rau nyias. 8 Li ntawd thiaj muaj lus hais tias : ‘Nws nce mus rau saum qhov siab, nws coj txoj kev raug txim mus kaw, nws pub paj tshab rau leej tib neeg.’ 9 Lo lus hais tias : ‘nws nce mus’, yog txhais li cas? Yog txhais tias nws twb tau xub nqes mus txog hauv yeeb ceeb lawm thiab . 10 Tus tau nqes mus kuj yog tus nce mus nyob siab dua cov txheej ntuj saud tib si thiab, kom nws thiaj nyob puv hauv txhua qhov txhia chaw tas nrho hauv lub sim ceeb.
11 Thiab nws yog tus tau pub kom ib txhia ua Hauv Paus Xa Lus, ib txhia ua Yaj Saub, ib txhia ua tub tshaj lub Moo Zoo, ib txhia ua tswv zov yaj, ib txhia ua xib hwb; 12 nws tsa li no kom cov ntshiab thiaj pom qab ua txoj hauj lwm tshaj lub Moo Zoo, kom lawv tau kev txhim Leej Pleev lub Cev, 13 mus txog thaum tas peb sawv daws los koom tau ib txoj kev ntseeg thiab ib txoj kev paub Tswv Ntuj Leej Tub xwb; thiab mus txog thaum peb hlob tiav ib tug tib neeg laus phim Leej Pleev lub Cev uas hlob tiav log puv ntoob lawm. 14 Ces peb yuav tsis yog ib co me nyuam yaus ntxiv, peb yuav tsis raug txhua yam tswv yim tawm hauv neeg lub siab phem los thiab tawm hauv neeg lub tswv yim xav ntxias kom luag yuam kev los, muab peb ntsawj thiab muab peb pus rau sab ub sab no. 15 Peb yuav coj raws qhov tseeb nyob nraim hauv txoj kev nyiam; peb yuav hlob nyob hauv txhua yam txhua txoj kev kom peb zoo zuj zus li Leej Pleev, tus uas yog lub Taub Hau. 16 Nws yog tus ua kom lub Cev tas huv tib si txawj sib dhos sib haum zoo ua ib lub vim muaj ntau txoj leeg yug raws li nyias txoj hauj lwm nyias ua kom zoo, kom lub cev thiaj hlob tuaj thiab rov txhim kho nws tus kheej kom loj hlob nyob hauv txoj kev nyiam.

NPN 122: 1-2, 3-4AB, 4CD-5

Txais: (1) Tuaj peb zoo siab hlo mus pem Huab Tais tsev.
los: As les lus yas.

Kuv zoo siab vim lawv hais rau kuv tias:.
"Peb yuav nce mus lawm pem Huab Tais tsev.”
Nim no, peb txhais taw tau tsuj hauv
koj cov rooj vag lawm os Yes Lus Xas Les.

Txais…

Yes Lus Xas Les, txhim los zoo li ib lub nroog
Uas zoo tau xwm yeem.
Cov xeem neeg nce mus pem nws,
Yog Huab Tais cov xeem neeg

Txais…

Lawv nce mus raws li txoj cai qhia rau His Xas Lais,
Kom tau cav txog Huab Tais lub Npe.
Nyob ntawd muaj ib co rooj txiav txim teeb tau tseg,
Yog cov rooj cia rau Das Vis tsev neeg.

Txais…

As Les Lus Yas: EXK 33: 11

Txais: As les lus yas, as les lus yas.

Huab Tais hais tias: “Kuv tsis zoo siab pom tus neeg siab phem tuag,
Kuv xav pom nws hloov siab ua qhov zoo kom nws muaj txoj sia nyob.”

Txais: As les lus yas, as les lus yas.

Ntawv Moo Zoo: LK 13: 1-9

1 Tib lub zim txwv ntawd, muaj ib co neeg tuaj piav rau Yes Xus txog cov Nkas Lis Lais uas Pis Las Tos tau muab lawv cov ntshav hliv xyaw rau cov ntshav tsiaj uas lawv muab txi Ntuj. 2 Ces Yes Xus thiaj hais rau lawv tias : "Nej puas xav tias cov Nkas Lis Lais ntawd tau ua txhaum loj dua lwm cov neeg nyob Nkas Lis Lais huv si, lawv thiaj raug tsim txom zoo li ntawd ? 3 Lawv tsis tau ua txhaum loj dua li! Tiam sis kuv hais rau nej tias yog nej tsis tig los hloov siab, mas nej yuav tuag ib yam li ntawd thiab. 4 Hos kaum yim leej neeg uas tus pej thuam Xis Los Es vau los tsuam lawv tuag tas, mas nej puas xav tias lawv tau ua txhaum loj dua ib tsoom neeg nyob Yes Lus Xas Les huv si ? 5 Lawv yeej tsis tau ua txhaum loj dua li! Tab sis kuv hais rau nej tias yog nej tsis xav tig los hloov dua siab tshiab, mas nej yuav tuag ib yam li ntawd thiab."
6 Yes Xus tseem hais zaj paj lug no tias : "Muaj ib tug neeg cog tau ib tsob txiv ncuav pias rau hauv nws lub vaj txiv ntoo. Nws tuaj de txiv ncuav pias, tab sis tsis pom muaj txiv li. 7 Ces nws hais rau tus tub txib zov vaj tias : "Koj saib ! Tau peb xyoos no kuv tuaj de txiv ncuav pias, kuv yeej tsis pom ib lub txiv li. Koj muab tsob ntoo ncuav pias ntov. Yuav cia nws nyob nkim av ua dab tsi ?" 8 Tus tub txib teb rau tus tswv vaj tias : "Tus Tswv, thov koj cia tsob ntoo nyob xyoo no ntxiv. Kuv yuav khawb av ncig lub hauv paus ntoo thiab npoog chiv rau. 9 Tej zaum yav tom ntej, tsob ntoo yuav txi txiv. Yog tsis txi, koj mam muab ntov."

Tim 26 lub 10 Hli 2020

Hnub Ob Lis Piam Peb Caug Nruab Xyoo C Nruab Lis Pia, Xyoo II
Lectionary: 479

Zaj Nyeem Ib: ES FES XOS 4: 32–5:8

Cov kwv tij nkauj muad:
32 Nej sawv daws yuav rov sib ua zoo, sib nyiam sib hlub, nej yuav ib leeg zam rau ib leeg, ib yam li Tswv Ntuj zam rau nej nyob hauv Leej Pleev.
5 1 Nej yuav yoog Tswv Ntuj, vim nej yog nws cov me nyuam nws hlub tshua. 2 Nej yuav ua neej nyob hauv txoj kev nyiam, xws li Leej Pleev tau nyiam peb, nws tau muab nws tus kheej rau luag ntes kom tau pab peb, nws muab nws tus kheej fij xws li ib tug tsiaj hlawv txi Ntuj tsw qab ntxiag mus rau Tswv Ntuj. 3 Hais txog kev tsis tsim txiaj, kev ua phem ua qias txhua yam, los kev ntshaw nyiaj txiag los ntshaw ntau yam heev dhau, mas nej yuav tsis txhob tham ib los txog nyob hauv nej li, thiaj phim ib co neeg ntshiab dawb huv, 4 uas tsis muaj tej lus dev, tej lus ruam ruam, tej lus plhom moj, los txhua yam tsis zoo mloog ntawd li, tiam sis tsuas muaj tej zaj lus ua Ntuj tsaug xwb. 5 Nej yuav tsum paub tseeb tias, tus ywj nws lub cev ua dev ua npua, tus ua phem ua qias, tus ntshaw nyiaj ntshaw txiaj ntshaw ntau yam dhau, (uas yog ib txog kev teev dab teev mlom), mas nws yuav tsis tau txais lub cuab tam nyob hauv Yes Xus Pleev thiab Tswv Ntuj lub Ceeb Tsheej ua nws tug li.
6 Nej tsis txhob cia luag tej cov lus dag lus ntxias haub tau nej; yog vim tej kev dag kev ntxias ntawd, mas Tswv Ntuj thiaj li npau taws rau cov neeg tsis mloog nws lus. 7 Nej tsis txhob nrog cov neeg zoo li ntawd sib koom tes. 8 Vim yav dhau los, nej yog qhov tsaus ntuj nti, tiam sis zaum no nej yog qhov pom kev nrig nyob hauv Huab Tais lawm, mas nej yuav tsum coj tus cwj pwm raws li cov me nyuam muaj qhov pom kev.

NPN 1: 1-2, 3, 4 + 6

Txais: (EFX 5:1) Nej yuav yoog raws li Tswv Ntuj,
nej thiaj yog nws cov me nyuam uas nws hlub.

Muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (EFX 5:1) Nej yuav yoog Tswv Ntuj,
nej thiaj yog nws cov me nyuam uas nws hlub.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd.

Txais: (EFX 5:1) Nej yuav yoog Tswv Ntuj,
nej thiaj yog nws cov me nyuam uas nws hlub.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (EFX 5:1) Nej yuav yoog Tswv Ntuj,
nej thiaj yog nws cov me nyuam uas nws hlub.

As Les Lus Yas: ZAM 17: 17B, 17A

Txais: As les lus yas, as les lus yas.

Huab Tais, koj lo lus yog qhov tseeb;
thov koj muab peb cog rau hauv txoj kev tseeb.

Txais: As les lus yas, as les lus yas.

Ntawv Moo Zoo: LK 13: 10-17

10 Muaj ib zaug, Yes Xus qhia nyob hauv ib lub tsev txoos hnub Xas Npas Tos. 11 Nyob ntawd muaj ib tug poj niam raug ib tug dab tau kaum yim xyoo. Tus dab ua kom nws lub cev tsis zoo, nws khoov nkoos, yeej sawv tsis tau ntseg li. 12 Yes Xus pom tus poj niam ntawd, Yes Xus hu nws, hais rau nws tias : "Tus poj niam, zaum no koj dim ntawm koj txoj kev txom nyem lawm." 13 Ces Yes Xus tsa nws txhais tes rau saum tus poj niam ntawd. Tam sis ntawd, tus poj niam khoov duav sawv taus ntseg, ces nws cav txog Tswv Ntuj. 14 Tiam sis tus tswj lub tsev txoos tsis txaus siab rau qhov Yes Xus kho neeg hnub Xas Npas Tos, nws thiaj qhib ncauj hais rau tsoom sid tias : "Muaj rau hnub uas sawv daws yuav tsum ua hauj lwm; nej tuaj kom luag kho nej tej hnub ntawd, txhob tuaj hnub Xas Npas Tos!" 15 Huab Tais teb rau tus tswj lub tsev txoos tias : "Neeg lam zoo sab nraud ! Hnub Xas Npas Tos, nej txhua leej txhua tus twb daws nej tus nyuj los tus luj ntawm lub dab zaub cab mus haus dej los tsis yog? 16 Has Nplas Has tus ntxhais no, Xas Tas twb muab khi tau kaum yim xyoo lawm, nws haj yam yuav tsum muaj cai txais kev dim ntawm nws txoj kev txom nyem hnub Xas Npas Tos los tsis sub?" 17 Thaum Yes Xus hais li ntawd, cov neeg ntxub Yes Xus tau txaj muag kawg, hos tas tsoom sid zoo siab rau txhua yam hauj lwm loj uas Yes Xus tau ua.

Tim 27 lub 10 Hli 2020

Hnub Peb Lis Piam Peb Caug Nruab Xyoo A Nruab Lis Piam Xyoo II
Lectionary: 480

Zaj Nyeem Ib: ES FES XOS 5: 21-33

Cov kwv tij nkauj muad:
21 Nej yuav rov sib mloog, ib leeg mloog ib leeg, vim nej hwm Leej Pleev. 22 Cov poj niam yuav mloog lawv tus txiv lus, ib yam li yog mloog Huab Tais lus. 23 Vim tus txiv yog tus poj niam lub taub hau, ib yam li Leej Pleev yog lub taub hau rau lub Koom Txoos, nws muab nws tus kheej los ua tus cawm lub Cev. 24 Ib yam lu lub Koom Txoos mloog Leej Pleev lus, ua li mas cov poj niam kuj yuav mloog lawv tus txiv lus nyob hauv txhua yam. 25 Nej cov ua txiv, nej yuav hlub nej cov poj niam xws li Leej Pleev hlub lub Koom Txoos, nws muab nws rau luag ntes los pab lub Koom Txoos. 26 Leej Pleev ua kom lub Koom Txoos dawb huv tuaj nyob hauv txoj kev da dej thiab lo lus, 27 kom nws tau muab lub Koom Txoos ci ntsa iab tsis tsuas ib tee, tsis muaj ib kab txoom, los tej yam zoo li ntawd, rov cev rau nws tus kheej, ces lub Koom Txoos thiaj li yuav ntshiab huv thiab tsis muaj ib qho xyeej li. 28 Ua li mas, cov ua txiv yuav hlub lawv cov poj niam, ib yam li yog lawv lub cev kiag; tus uas nyiam nws tus poj niam, yog nws rov nyiam nws ntag. 29 Tsis muaj leej twg yuav ntxub nws lub cev li, tiam sis txhua leej yug nws lub cev thiab tu kom zoo xwb; Leej Pleev ua zoo ib yam li ntawd rau lub Koom Txoos, 30 uas yog nws lub cev; peb yog tswv cuab nyob hauv lub Cev ntawd. 31 Vim li ntawd, ‘Tus txiv neej yuav tso nws niam nws txiv tseg, mus koom nrog nws poj niam; ces nkawd ob leeg yuav ua ib lub cev xwb’. 32 Lo lus no muaj ib lub ntsiab tob, uas yog kuv piav hais txog Leej Pleev thiab lub Koom Txoos. 33 Tiam sis qhov loj hais rau nej, mas yog kom nyias yuav hlub nyias tus poj niam ib yam li nws hlub nws tus kheej, hos tus poj niam los kuj yuav tsum hwm nws tus txiv thiab.

NPN 128: 1-2, 3, 4-5

Txais: (1a) Cov uas hwm Huab Tais tau txoj hmoov zoo.

Nej cov hwm HUAB TAIS, nej txoj hmoov zoo,
vim nej taug raws nws txoj kev!
Nej yuav tau noj lub txiv ntawm nej tej hauj lwm,
nej yuav tau hmoov zoo thiab nws yuav nyiam nej.

Txais: (1a) Cov uas hwm Huab Tais tau txoj hmoov zoo.

Nej tus poj niam yuav zoo li ib txoj hmab txiv cawv txi txiv ncw hna
nyob rau hauv koj tej kaum vaj kaum tsev,
nej cov me nyuam yuav zoo li ib co ntoo txiv roj
nyob ncig lees nej lub phaj tsum.

Txais: (1a) Cov uas hwm Huab Tais tau txoj hmoov zoo.

Nej saib, tus neeg muaj txoj hmoov zoo
yog tus ntshai HUAB TAIS.
HUAB TAIS yuav nyob saum roob Xis Yoos foom koob hmoov rau nej,
kom nej tau pom Yes Lus Xas Les vam meej niaj hnub hauv nej lub neej.

Txais: (1a) Cov uas hwm Huab Tais tau txoj hmoov zoo.

As Les Lus yas: MT 11: 25

Txais: As les lus yas, as les lus yas.

Txiv, kuv cav lus zoo txog koj, Huab Tais kav lub ntuj lub teb,
vim koj qhib tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 13: 18-21

18 Yes Xus thiaj hais tias : "Tswv Ntuj lub Ceeb Tsheej yog zoo li cas ? Kuv yuav muab piv rau dab tsi ?
19 Tswv Ntuj lub Ceeb Tsheej zoo li ib lub noob zaub roj uas ib tug neeg nqa mus cog rau hauv nws lub vaj. Thaum lub noob hlob tuaj lawm, nws loj tsheej ib tsob me nyuam ntoo, ces cov noog saum ntuj ya los nkaum hauv nws cov ceg."
20 Yes Xus tseem hais ntxiv tias : "Kuv yuav muab Tswv Ntuj lub Ceeb Tsheej piv rau dab tsi ?
21 Tswv Ntuj lub Ceeb Tsheej yog zoo li ib co poov xab uas ib tug poj niam muab do rau peb kawg hmoov nplej mus txog thaum cov hmoov su tuaj tas huv si."

Tim 28 lub 10 Hli 2020

Hnub Plaub Lis Piam Peb Caug Nruab Xyoo A Nruab Lis Piam Xyoo II

Hwm LN Xis Moos thiab Yus Das(Jude), ob tug Hauv Paus Xa Lus
Lectionary: 666

Zaj Nyeem Ib: EFX 2: 19-22

Cov kwv tij nkauj muad:
9 Nej tsis yog ib co pej kum neeg, los ib co qhua ntxiv lawm, tiam sis nej koom ua ib cuab nrog cov neeg ntshiab thiab nej yog Tswv Ntuj tsev neeg,
20 uas yog txhim rau saum cov Hauv Paus Xa Lus thiab cov Yaj Saub ua cov taw ntsa, Yes Xus Pleev yog lub pob zeb txheem tas lub tsev.
21 Nyob hauv Leej Pleev, lub tuam tsev sib dhos zoo thiab hlob ua ib lub tuam tsev teev ntuj ntshiab nyob hauv Huab Tais.
22 Nyob hauv Leej Pleev, nej kuj raug muab teeb ua ke tsim tsa ua ib lub tsev rau Tswv Ntuj nyob, nyob hauv Leej Ntuj Plig.

NPN 19: 2-3, 4-5

Txais: (5) Lawv lo lus xa moo nrov mus thoob ntiaj teb.

Cov txheej ntuj saud piav txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tau ua.
Nruab hnub hais lo lus rau nruab hnub hnov,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo yeej nrov txog tim npoo ntiaj teb kawg.

Txais: (5) Lawv lo lus xa moo nrov mus thoob ntiaj teb.

As Les Lus Yas: Te Deum

Txais: As les lus yas, as les lus yas.

Tswv Ntuj, peb cav txog koj,
peb tshaj tias koj yog Huab Tais;
tsoom Hauv Paus Xa Lus uas
muaj koob meej lawv cav txog koj.

Txais: As les lus yas, as les lus yas.

Ntawv Moo Zoo: LK 6: 12-16

12 Ob peb hnub ntawd, Yes Xus nce mus pem roob mus teev Ntuj, nws teev Tswv Ntuj ib hmos nkaus.
13 Thaum kaj ntug, nws hu nws cov thwj tim los ntawm nws, nws xaiv kaum ob leeg nyob hauv lawv, nws hu cov ntawd ua Hauv Paus Xa Lus.
14 Muaj Xis Moos, uas nws tis npe hu ua Pob Zeb rau, As Nres, Pob Zeb tus kwv, Yas Kos, Zam, Fis Lis Pos, Npas Tos Los Mas Yos,
15 Mas Tais, Tos Mas, Yas Kos uas yog As Fas Yos tub, Xis Moos Siab Kub,
16 Yus Das, Yas Kos tub, thiab Yus Das Kas Lis Yaus, uas yog tus ntxeev siab.

Tim 29 lub 10 Hli 2020

Hnub Tsib Lis Piam Peb Caug Nruab Xyoo A Nruab Lis Piam Xyoo II
Lectionary: 482

Zaj Nyeem Ib: ES FES XOS 6: 10-20

Cov kwv tij nkauj muad:
10 Nej yuav ua kom nej muaj zog nyob hauv Huab Tais thiab nyob hauv nws lub hwj huam loj lub zog. 11 Nej yuav hnav Tswv Ntuj lub tsho hlau nej thiaj tiv yeej dab phem tej kev haub kev ntxias. 12 Vim tias peb tsis yog tsa rog ntaus ib co muaj nqaij muaj ntshav, hos peb tsa rog ntaus cov vaj dab, cov dab muaj hwj huam, cov dab kav lub sim ceeb hauv kev tsaus ntuj, cov tim tswv phem uas nyob saum cov txheej ntuj saud. 13 Vim li ntawd, nej thiaj yuav tsum hnav Tswv Ntuj lub tsho hlau, kom txog hnub phem, nej thiaj tiv yeej; thaum nej ua tas txhua yam lawm, nej thiaj yuav nyob ruaj nreb.
14 Nej yuav sawv ntsug nyob khov kho, nej muab qhov tseeb los ua siv sia duav, muab txoj kev ncaj ua tsho hlau thaiv hauv siab, 15 thiab muab lub siab kub lug mus tshaj lub Moo Zoo xa txoj kev thaj yeeb los ua khau rau. 16 Nyob hauv txhua sij hawm, nej yuav tuav rawv txoj kev ntseeg ntawm tes xws li ib daig leem phiaj, ces nej yuav tua yeej tus Phem cov xub tswm faj. 17 Nej kuj tseem yuav tsum ntoo txoj kev cawm los ua kaus mom hlau, thiab tuav rawv Leej Tswv Yim ua rab ntaj, uas yog Tswv Ntuj lo lus.
18 Nej yuav teev Ntuj thiab thov Ntuj tsis tseg, txhua sij hawm thiab txhua caij nyoog nyob hauv Leej Tswv Yim. Nej yuav ceev faj nraim thiab yuav teev Ntuj tsis paub sab tsis paub nkees pab rau tas ib tsoom ntshiab. 19 Thiab nej yuav thov Ntuj rau kuv thiab, kom kuv txawj hais lus thiab tsis ntshai qhib ncauj tshaj cov txuj zais tob tob hauv lub Moo Zoo, 20 vim kuv yog tus tiam lis ntawm lub Moo Zoo, tus uas raug cov saw hlau khi rawv, kom kuv txhob ntshai hais tej lus uas kuv yuav tsum hais.

NPN 144: 1B, 2, 9-10

Txais: (1) Thov kom HUAB TAIS nto koob meej, nws yog kuv lub tsua!

Thov kom HUAB TAIS nto koob meej, nws yog kuv lub tsua,
nws qhia kuv ob txhais tes kom txawj ntaus tsam,
kuv ntiv tes kom txawj ntaus rog.

Txais: (1) Thov kom HUAB TAIS nto koob meej, nws yog kuv lub tsua!

Nws yog kuv qhov chaw nkaum, yog kuv lub yeej ntsa zeb,
Yog kuv lub loog ruaj nreb, yog tus cawm kuv dim,
Yog kuv daim leem phiaj, kuv tso siab rau nws ;
nws rub kuv cov neeg kom los zwm rau kuv.

Txais: (1) Thov kom HUAB TAIS nto koob meej, nws yog kuv lub tsua!

Tswv Ntuj, kuv yuav hu ib zag nkauj tshiab rau koj,
Kuv yuav ntaus lub thaj cheej kaum txoj hlua cav txog koj.
Koj yog tus pub kev yeej rau cov ua vaj,
Yog tus cawm koj tus tub txib Das Vis ntawm rab ntaj phem.

Txais: (1) Thov kom HUAB TAIS nto koob meej, nws yog kuv lub tsua!

As Les Lus Yas: LK 19: 38; 2: 14

Txais: As les lus yas, as les lus yas.

Kom tus Vaj uas tuaj ntawm Huab Tais lub npe tuaj nto koob meej.
Nyob saum cov txheej ntuj siab, kom Tswv Ntuj nto meej nto moo,
nyob ntiaj teb, kom tsoom neeg Tswv Ntuj nyiam nyob thaj yeeb lug.

Txais: As les lus yas, as les lus yas.

Ntawv Moo Zoo: LK 13: 31-35

31 Lub zim txwm ntawd, muaj ib co Fas Lis Xais txav los hais rau Yes Xus tias : "Koj khiav ntawm no mus, vim Hes Los xav muab koj tua." 32 Yes Xus hais rau lawv tias: "Nej mus hais rau tus hma ntawd tias : ‘Hnub no thiab tag kis, kuv ntiab dab phem thiab kho cov neeg mob, hos hnub peb, kuv yuav ua txoj hauj lwm kuv tuaj ua kom tiav. 33 Tab sis hnub no, tag kis thiab nag kis, kuv yuav tsum taug kuv txoj kev mus ntxiv, vim tias ib tug yaj saub yuav tuag nyob Yes Lus Xas Les sab nraud tsis tau.’
34 Yes Lus Xas Les, Yes Lus Xas Les, koj yog tus muab cov yaj saub tua, koj xuas pob zeb txawb cov uas raug xa tuaj cuag koj. Muaj pes tsawg zaus kuv xav sau koj cov me nyuam xws li ib tug poj qaib sau nws cov me nyuam qaib rau hauv nws ob phab tis, tab sis koj tsis yeem! 35 Ntsias saib, koj lub tsev yuav nphob xuav cia tsis muaj neeg nyob. Kuv hais rau kojj tias, koj yuav tsis pom kuv ntxiv mus txog hnub uas koj hais tias: ‘Kom tus tuaj ntawm Huab Tais lub npe tuaj nto koob meej.’ "

Tim 30 lub 10 Hli 2020

Hnub Rau Lis Piam Peb Caug Nruab Xyoo A Nruab Lis Piam Xyoo II
Lectionary: 483

Zaj Nyeem Ib: FLP 1: 1-11

1 Paj Lug thiab Tis Mos Tes, uas yog Yes Xus Pleev ob tug tub txib, sau ntawv tuaj rau cov ntshiab nyob hauv Yes Xus Pleev, uas nyob Fis Lis Pos, nrog rau cov tswv qhia thiab cov tub tsob hwb huv si. 2 Thov kom nej tau txais txiaj ntsim thiab kev thaj yeeb tuaj ntawmTswv Ntuj peb Leej Txiv, thiab ntawm Huab Tais Yes Xus Pleev tuaj..
3 Kuv ua kuv tus Tswv Ntuj tsaug txhua txhua lub sij hawm uas kuv nco txog nej. 4 Niaj zaus thaum kuv thov ntuj mas kuv zoo siab hlo thov Ntuj rau nej, 5 vim tias txij thawj hnub los txog tav no, nej tau koom tes nrog kuv tshaj lub Moo Zoo. 6 Kuv ntseeg tias, tus tau pib ua ib txoj hauj lwm zoo kawg nyob hauv nej, nws yeej yuav ua mus txog Yes Xus Pleev hnub kom tiav log. 7 Yeej tsim nyog kom kuv xav tau li no txog nej sawv daws, vim tias kuv puag rawv nej sawv daws rau hauv kuv nruab siab, thaum saw hlau khi rawv kuv los thaum kuv hais lus khav txog lub Moo Zoo thiab zeem tseeb txog lub Moo Zoo; thaum ntawd nej nrog kuv koom ib lub siab txais Tswv Ntuj lub txiaj ntsim. 8 Tswv Ntuj ua kuv tus tim khawv tias kuv hlub tshua nej ib yam li Yes Xus Pleev hlub nej. 9 Kuv zaj thov Ntuj yog li no, kom nej txoj kev nyiam loj zuj zus nyob hauv txoj kev paub txuj thiab txoj kev txawj mem tau ntau yam, 10 kom nej thiaj li yuav pom tau qhov tseem ceeb, ces nej yuav ua ib co neeg siab dawb siab huv tsis muaj chaw xyeej thaum txog Leej Pleev lub Hnub Nyoog, 11 nej yuav tau txais puv npo cov txiv muaj txoj kev ncaj, uas tuaj ntawm Leej Pleev tuaj kom Tswv Ntuj tau txais koob meej,thiab lo lus cav txog nws.

NPN 111: 1B-2, 3-4, 5-6

Txais: (2) Huab Tais cov hauj lwm yuav loj ua luaj!

Kuv yuav ua HUAB TAIS tsaug tas kuv lub siab lub ntsws
nyob hauv tsoom neeg siab ncaj lu rooj si sau los ua lub txoos.
HUAB TAIS cov hauj lwm loj tas nrho,
zoo saib zoo ntxim siab kawg nkaus.

Txais: (2) Huab Tais cov hauj lwm yuav loj ua luaj!

HUAB TAIS cov hauj lwm muaj hwj xyeej thiab muaj hwj chim,
nws txoj kev ncaj yuav nyob ib txhiab ib txhis.
Nws nto koob meej lug vim nws cov hwj huam yees ntxwv ;
HUAB TAIS muaj lub siab zoo thiab khuv leej neeg.

Txais: (2) Huab Tais cov hauj lwm yuav loj ua luaj!

Nws muab txhiam laj txhiam xws rau cov hwm nws tau noj.
Nws yuav nco ntsoov mus li txog tias nws tau cog lus.
Nws ua kom nws haiv neeg paub txog nws tej hauj lwm muaj hwj huam,
Nws muab cov haiv neeg lub cuab tam pub rau lawv ua lawv tug.

Txais: (2) Huab Tais cov hauj lwm yuav loj ua luaj!

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub kuv cov yaj, kuv cov yaj raws nraim kuv qab mus.

Txais: As les lus yas, as les lus yas.

Ntawv Moo Zoo: LK 14: 1-6

1 Muaj ib zaug, hnub Xas Npas Tos, Yes Xus tuaj noj ib pluag mov nyob hauv ib tug thawj coj Fas Lis Xais tsev; lawv soj ntshis Yes Xus.
2 Tab tom muaj ib tug neeg mob plab zag nyob ntawm nws xub ntiag.
3 Ces Yes Xus hais rau cov Kws Lij Choj thiab cov Fas Lis Xais tias: "Hnub Xas Npas Tos, txoj cai puas kheev kho mob los tsis kheev?"
4 Lawv nyob ntsiag to xwb; ces Yes Xus mus tuav tus mob plab zag, Yes Xus kho nws zoo hlo, ces Yes Xus kom nws rov mus tsev.
5 Yes Xus thiaj hais rau lawv tias: "Yog nej ib tug twg tus tub los tus nyuj poob rau hauv ib lub qhov tim thaj hnub xas npas tos, nej puas cia li tsis mus rub nws tawm los tam sis ntawd li?”
6 Lawv teb tsis tau dab tsi rau nws lo lus nug no li.

Tim 31 lub 10 Hli 2020

Hnub Xya Lis Piam Peb Caug Nruab Xyoo A Nruab Lis Piam Xyoo II
Lectionary: 484

Zaj Nyeem Ib: FIS LIS POS 1: 18-26

Cov kwv tij nkauj muad:
18 Txawm li cas los xij. Txawm tias muaj tus lam ua zoo sab nraud xwb los puas ho muaj tus ua lub siab ncaj tiag tiag los xij, tsuav yog muaj kev tshaj txog Leej Pleev xwb ces kuv zoo siab lawm. Kuv tseem yuav zoo siab mus ntxiv, 19 vim kuv paub tias, tej ntawd yuav pab cawm kuv, vim nej thov Ntuj pab kuv, thiab Yes Xus Pleev Leej Tswv Yim yuav pab kuv. 20 Kuv tos ntsoov thiab tso siab tas zog tias: yuav tsis muaj dab tsi ua tau kom kuv poob ntsej muag; kuv yuav muaj lub siab ruaj nreb, thiab zaum no xws li txhia zaus, Leej Pleev yuav nto koob meej nyob hauv kuv lub cev, txawm kuv yuav ciaj txawm kuv yuav tuag los xij. 21 Ntawm kuv mas kuv saib tias kuv txoj sia yog Leej Pleev, thiab txoj kev tuag tsis yog ib qho poob peev rau kuv. 22 Tsis kav, yog tias kuv ua neej nyob ntxiv, kuv tseem yuav tau ua tej yam hauj lwm uas yuav tawg paj txi txiv ntxiv, ces kuv tsis paub txiav txim xaiv txoj twg li... 23 Kuv lub siab ua xyem xyav muab kuv dua ua ob sab: ib lub siab ntshaw tso lub neej tseg mus nrog Leej Pleev nyob; qhov ntawd yog qhov kuv nyiam tshaj. 24 Tiam sis, yog kuv ua neej nyob ntxiv, mas yuav zoo dua rau nej. 25 Li ntawd, kuv tsis ua xyem xyav lawm, kuv paub meej tias kuv yuav tsum ua neej nyob ntxiv, yuav tsob hwb nej sawv daws, pab kom nej hlob nce ib kauj ruam ntxiv thiab muaj kev zoo siab nyob hauv txoj kev ntseeg, 26 kom nej tau kev khav ntau nyob hauv Yes Xus Pleev vim kuv, thaum kuv rov tuaj txog nej dua.

NPN 42: 2, 3, 5CDEF

Txais: (3) Kuv tus plig nqhis qhuav siab qhawv txog tus Tswv Ntuj muaj txoj sia.

Xws li tus kauv nqhis cov dej ntws lug,
kuv tus plig nqhis txog koj, Tswv Ntuj.

Txais: Kuv tus plig nqhis qhuav siab qhawv txog tus Tswv Ntuj muaj txoj sia.

Kuv tus plig nqhis txog Tswv Ntuj, tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Txais: Kuv tus plig nqhis qhuav siab qhawv txog tus Tswv Ntuj muaj txoj sia.

kuv mus koom pab neeg coob coob,
kuv coj lawv taug kev mus pem Tswv Ntuj lub tsev,
sawv daws qw suab zoo siab thiab cav lus zoo ua nws tsaug,
peb yog ib pab neeg suav tsis txheeb mus ua koob tsheej lom zem.

Txais: Kuv tus plig nqhis qhuav siab qhawv txog tus Tswv Ntuj muaj txoj sia.

As Les Lus yas: MT 11: 29AB

Txais: As les lus yas, as les lus yas.

Nej txais kuv tus quab mus kwv, nej kawm ntawm kuv,
vim kuv muaj lub siab ua neeg me tsis muab hlob.

Txais: As les lus yas, as les lus yas.

Ntawv Moo Zoo: LK 14: 1, 7-11

1 Muaj ib hnub Xas Npas Tos, Yes Xus mus noj mov nyob hauv ib tug thawj coj Fas Lis Xais tsev. Cov neeg nyob ntawd soj ntshis Yes Xus.
7 Yes Xus hais ib zag paj lug rau cov neeg tuaj noj mov mloog, vim nws pom lawv xaiv cov rooj tseem ceeb los zaum. Nws hais tias : 8 "Thaum luag caw koj mus noj tshoob, koj tsis txhob mus zaum thawj cov rooj, tsam luag caw ib tug muaj meej mom dua koj tuaj thiab. 9 Ces tsam tus tswv tsev uas tau caw neb tuaj lam los hais rau koj tias : 'Koj cia qhov chaw kod rau tus no.' Ces koj yuav sawv tus txaj txaj muag mus zaum lub rooj puag nram qab kawg. 10 Thaum luag caw koj, mas koj yuav mus zaum lub rooj puag nram qab, kom thaum tus caw koj los txog, nws hais rau koj tias : 'Npawg, koj nce los pem toj no.' Ces koj yuav tau ntsej muag nyob ntawm cov neeg tuaj nrog koj koom rooj qav xub ntiag. 11 Vim tias tus uas nws tsa nws siab, mas Ntuj yuav txo nws qis, hos tus uas nws txo nws qis, mas Ntuj yuav tsa nws siab.”

Tim     2     lub     11     Hlis     2020

Hnub Ob Lis Piam Peb Caug Ib Nruab Xyoo A Nrua Lis Piam Xyoo II

Nco txog ib tsoom neeg tau tas sim neej lawm (All Souls/Fête des Morts)
Lectionary: 668

Zaj Nyeem Ib:   THOOB TSIB 3:  1-9

1 Cov neeg ncaj tus ntsuj plig nyob hauv Tswv Ntuj txhais tes, tsis muaj ib yam kev txom nyem dab tsi yuav raug tau lawv. 2 Lawv zoo li yog tuag lawm rau cov neeg tsis muaj tswv yim, luag saib lawv txoj kev tas lub neej yog ib yam kev txom nyem loj, 3 thiab saib lawv txoj kev ncaim peb mus yog ib txog kev puas tsuaj loj tas nrho. Tab sis cov neeg ncaj ntawd nyob hauv kev thaj yeeb lawm. 4 Tib neeg xav tias lawv mus raug txim lawm; tab sis ntawm lawv mas lawv tso siab lug tias lawv yuav muaj txoj sia nyob mus li. 5 Lawv raug ib lub txim sib sib xwb, ces lawv yuav txais txiaj ntsim koob hmoov loj, vim Tswv Ntuj tau sim lawv, nws pom tias lawv tsim nyog ua nws tug. 6 Tswv Ntuj tau sim cov neeg siab ncaj zoo li sim kub nyob hauv lub yeej vub, nws tau pom zoo txais lawv los ua nws li zoo li tej cov txim nyob saum lub thaj txi Ntuj. 7 Thaum txog lub caij Tswv Ntuj tuaj xyuas lawv, mas lawv yuav ci ntsa iab; lawv yuav khiav nrawm cuag li hluav taws ri mus kis tej roob nqeeb qhuav. 8 Lawv yuav txiav txim rau cov kuj cuab, lawv yuav tswj cov haiv neeg, Huab Tais yuav yog lawv tus vaj mus ib txhis. 9 Cov neeg tso siab rau Huab Tais yuav to taub txoj kev tseeb, cov neeg npuab Huab Tais yuav nyob ze nws hauv txoj kev nyiam: Vim Huab Tais tshwj zias nws lub txiaj ntsim thiab nws txoj kev khuv leej rau nws cov ntshiab, thiab nws txoj kev hlub tshua rau nws cov xaiv.

NPN   23:  1-3A, 3B-4, 5, 6

Txais: (1) Huab Tais yog tus tswv zov yaj saib kuv,
kuv yuav tsis tshaib txog dab tsi li.
Los: (4) Txawm kuv taug kev hauv ib lub hav tsaus nti,
los kuv tsis ntshai dab tsi phem, vim koj nrog nraim kuv.

HUAB TAIS yog tus tswv zov yaj saib kuv,
kuv yuav tsis tshaib txog dab tsi li.
Nws cia kuv so nyob hauv tej tshav zaub mos ntsuab xiab;
Nws coj kuv mus nyob ze cov dej tus yees;
nws ua kom kuv tus ntsuj plig rov muaj zog tuaj.

Txais…

Nws coj kuv mus taug tej kev ncaj, vim nws lub npe.
Txawm kuv taug kev hauv ib lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab,
koj rab nplawm thiab rab pas nrig ua kuv luag.

Txais…

Koj rau ib rooj qav rau ntawm kuv xub ntiag
rau kuv cov yeeb ncuab ntsia ntsoov;
koj muab roj pleev kuv taub hau;
kuv lub ntim puv phwj yaws.

Txais…

Txiaj ntsim thiab kev zoo raws kuv nraim
niaj hnub hauv kuv lub neej;
Kuv lub chaw nyob yog nyob hauv HUAB TAIS tsev
mus ntev niaj ntau xyoo lawm yav tom ntej.

Txais…

Zaj Nyeem Ob:   LOS MAS 5:  5-11

Cov kwv tij nkauj muad:
5 Kev tso siab tsis ua kom peb muaj kev tu siab , vim Leej Ntuj Plig Ntshiab, uas peb tau txais, tau hliv Tswv Ntuj txoj kev nyiam rau hauv peb nruab siab lawm.
6 Lub caij peb tseem tsis tau muaj tus tuaj pab peb, thaum txog lub zoo caij nyoog, Leej Pleev tau tuag kom tau pab cov neeg tsis hwm Ntuj. 7 Yog yuav tsum tuag kom tau pab ib tug neeg ncaj, mas yus twb txiav txim siab nyuaj; yog yuav tuag kom tau pab ib tug neeg siab zoo mas nyaj tej zaum yus yuav muaj peev xwm zog. 8 Tiam sis qhov uas Tswv Ntuj qhia tias nws hlub peb yog qhov tias thaum peb tseem yog neeg txhaum, Leej Pleev twb tuag kom tau pab peb lawm. 9 Yog tias nyem no peb twb muaj kev ua neeg ncaj nyob hauv Leej Pleev cov roj ntsha lawm, mas nws haj yam yuav cawm peb ntawm Ntuj txoj kev npau taws xwb. 10 Yog tias thaum peb tseem ua yeeb ncuab rau Tswv Ntuj, nws Leej Tub txoj kev tuag twb ua kom peb nrog Tswv Ntuj rov sib haum xeeb, mas nyem no thaum peb nrog Tswv Ntuj rov sib haum xeeb lawm, mas Tswv Ntuj Leej Tub txoj sia haj yam yuav cawm tau peb. 11 Tsis tas li xwb, peb tseem khav tau tias peb nyob hauv Tswv Ntuj vim peb tus Huab Tais Yes Xus Pleev, tus uas tau ua kom zaum no peb muaj kev haum xeeb nrog Tswv Ntuj.

Los:     LM 6:  3-9

Cov kwv tij nkauj muad:
3 Nej puas paub txog tias thaum peb tau txais lub Cim Ntxuav nyob hauv Yes Xus Pleev, mas kuj yog peb sawv daws tau txais lub Cim Ntxuav nyob hauv Yes Xus txoj kev tuag thiab? 4 Li ntawd, nyob hauv lub Cim Ntxuav peb kuj nrog nws tuag mus zwm ntxa thiab, kom ib yam li Leej Pleev tau sawv hauv cov tub tuag rov los vim Leej Txiv lub hwj huam tau tsa nws sawv, peb kuj yuav muaj  dua ib lub neej tshiab thiab.
5 Vim tias yog peb nrog Leej Pleev koom ua ib tug nyob hauv txoj kev tuag zoo li nws txoj, mas peb kuj yuav nrog Leej Pleev koom ib txoj kev sawv rov los thiab. 6 Peb yuav tsum to taub tias peb tus qub neeg raug muab ntsia nrog Yes Xus dai saum ntoo cuam lawm, kom peb lub cev uas xib rau kev txhaum tsis txhob ciaj sia ntxiv, ces peb thiaj tsis ua kev txhaum cov qhev ntxiv. 7 Vim tias tus neeg tuag tau txais kev zam nws cov txhaum tas lawm; 8 ua li mas yog peb tau nrog Leej Pleev tuag, mas peb ntseeg tias peb kuj yuav tau nrog nws muaj txoj sia nyob thiab. 9 Peb paub tias Leej Pleev tau sawv hauv qhov tuag los lawm, nws yuav tsis tuag ntxiv; txoj kev tuag tsis muaj cuab kav tuaj raug nws ntxiv lawm.

As Les Lus Yas:   MT 25:  34

Txais: As les lus yas, as les lus yas.

Nej los mog ! Nej cov uas kuv Txiv pub txoj hmoov zoo rau nej,
los txais lub Ceeb Tsheej uas yeej npaj tseg rau nej
txij puag thaum pib tsim lub sim ceeb los lawm ua nej tug.

Txais: As les lus yas, as les lus yas.

Ntawv Moo Zoo:   ZAM 6:  37-40

Yes Xus hais rau pab neeg coob coob tias:
37 “Txhua yam uas kuv Txiv muab rau kuv yuav los cuag kuv. Hos tus tuaj cuag kuv, kuv yuav tsis ntiab nws rau nraum zoov.
38 Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab.
39 Tus Xa kuv tuaj lub siab xav yog zoo li no : Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los.
40 Qhov uas kuv Txiv nyiam yog zoo li no : kom leej twg pom Leej Tub thiab ntseeg txog Leej Tub, mas nws yuav muaj txoj sia nyob mus li, thiab Hnub Kawg, kuv yuav tsa nws sawv rov los."

Tim 3 lub 11 Hlis 2020

Hnub Peb Lis Piam Peb Caug Ib Nruab Xyoo A Nruab Lis Piam Xyoo II
Lectionary: 486

Hwmn LN Martin de Porres

Zaj Nyeem Ib: FLP 2: 5-11

Cov kwj tij nkauj muad:
5 Nej sawv daws yuav tsum coj tus cwj zoo li no, uas kuj yog Yes Xus Pleev tus cwj pwm thiab. 6 Yes Xus Pleev twb yog Tswv Ntuj, tiam sis nws tsis nrhiav kev ua tseev kom nws tau nrog Tswv Ntuj loj sib luag. 7 Nws muab nws lub hwj chim hle, nws yeem ua ib tug qhev, yug los ua tib neeg; luag pom nws tus yam ntxwv yog yam ntxwv tib neeg. 8 Nws txo nws kom qis; nws tuaj yeem ua neeg mloog lus mus txog qhov tuag, thiab tseem yog txoj kev tuag nyob saum ntoo cuam. 9 Vim li ntawd, mas Tswv Ntuj thiaj tsa Yes Xus ua tus loj tshaj tas nrho txhua leej txhua tus, thiab muab lub npe uas nyob siab dua tas lwm cov npe huv tib si rau nws, 10 kom xwv txhua leej uas hnov tuav txog lub npe Yes Xus, yuav tsum kim caug hawm, tsis hais nyob saum cov txheej ntuj saud, los nyob ntiaj teb no, los nyob nruab yeeb. 11 Thiab txhua xeem lus yuav tsum cav tias Yes Xus Pleev yog Huab Tais, ces thiaj yuav ua kom Leej Txiv Tswv Ntuj muaj koob meej nto moo lug.

NPN 22: 26B-27, 28, 29-30AB, 31-32

Txais: (26a) Huab Tais, Kuv yuav cav txog koj nyob hauv koj haiv neeg lub txoos.

Kuv yuav pauj yeem nyob ntawm cov neeg hwm Huab Tais xub ntiag.
Tus neeg pluag yuav tau noj seem noj so;
cov uas nrhiav HUAB TAIS yuav cav txog nws.
Thov kom nej lub siab muaj sia nyob mus li!

Txais: (26a) Huab Tais, Kuv yuav cav txog koj nyob hauv koj haiv neeg lub txoos.

Tas cov npoo ntiaj teb kawg yuav rov nco txog HUAB TAIS
thiab tig lawv lub siab mus rau nws.
Tas cov xeem neeg hauv cov haiv neeg yuav khoov pe hawm nws.

Txais: (26a) Huab Tais, Kuv yuav cav txog koj nyob hauv koj haiv neeg lub txoos.

Txoj kev tswj kev kav yog HUAB TAIS tug;
Nws yuav kav tas cov haiv neeg.
Tas cov neeg uas mus pw tsaug nyob hauv av lawm
yuav khoov pe hawm nws ib leeg.

Txais: (26a) Huab Tais, Kuv yuav cav txog koj nyob hauv koj haiv neeg lub txoos.

Kuv tus plig yuav ciaj sia nyob hauv HUAB TAIS;
kuv cov xeeb leej xeeb ntxwv yuav tsob hwb nws.
Yuav tsum qhia kom tiam neeg yuav tuaj no paub txog HUAB TAIS,
ces lawv thiaj yuav tshaj rau tiam neeg yuav yug los yav tom ntej
kom lawv paub txog nws txoj kev cawm neeg ncaj ncees.

Txais: (26a) Huab Tais, Kuv yuav cav txog koj nyob hauv koj haiv neeg lub txoos.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Nej tuaj cuag kuv mas, tas nej sawv daws
uas nej khwv thiab ris nra hnyav! Kuv yuav cia nej so los siav.

Txais: As les lus yas, as les lus yas.

Ntawv Moo Zoo: LK 14: 15-24

15 Muaj ib tug neeg uas nyob ntawm lub rooj mov hnov Yes Xus cov lus, nws hais rau Yes Xus tias: "Tus uas yuav tau noj mov nyob hauv Tswv Ntuj lub Ceeb Tsheej, mas nws txoj hmoov zoo." 16 Yes Xus hais rau nws tias : "Muaj ib tug neeg ua ib roog qav loj loj, nws caw neeg coob coob tuaj noj. 17 Thaum txog caij noj, nws xa nws tus tub txib mus nqua hu cov neeg nws caw tias : 'Nej tuaj, vim nyem no npaj tau txhij tas lawm.' 18 Tab sis cov raug caw, tus twg los muaj chaw tab kaum tas huv tib si. Thawj tug hais rau tus tub txib tias : 'Kuv yuav tau ib daim teb, kuv yuav tsum mus xyuas. Thov koj zam rau kuv.' 19 Hos lwm tus hais tias : 'Kuv yuav tau tsib nkawg txiv nyuj, kuv tab tom sawv kev yuav mus sim kuv cov nyuj. Thov koj zam rau kuv.' 20 Tseem muaj lwm tus ntxiv hais tias : 'Kuv nyuam qhuav yuav kiag poj niam, kuv tuaj tsis tau.' 21 Tus tub txib rov los qhia tej ntawd rau nws tus tswv. Ces tus tswv npau taws, nws hais rau tus tub txib tias : 'Koj ceev nrooj mus lawm tom tej tshav puam thiab tej kev hauv nroog, koj coj cov pluag, thiab cov tu tes tu taw, cov dig muag, thiab cov ceg tawv tuaj rau hauv no.' 22 Ces tus tub txib hais tias : Tus Tswv, kuv twb ua raws li koj hais tas lawm, tiam sis tseem tshuav chaw seem thiab.' 23 Tus tswv hais rau tus tub txib tias : 'Koj tawm mus taug tej kev, taug tej laj kab, koj coj kom tau neeg tuaj, kom kuv lub tsev puv nkaus. 24 Kuv hais rau koj tias cov neeg uas raug caw, yuav tsis muaj ib tug tau saj kuv rooj qav li.’"

Tim 4 lub 11 Hlis 2020

Hnub Plaub Lis Piam Peb Caug Ib Nruab Xyoo A Nruab Lis Piam Xyoo II
Lectionary: 487

Hwm LN Charles Borromeo, ua Tswv Qhia

Zaj Nyeem Ib: PHIL 2:12-18

12 Kuv cov kwv tij zoo nyiad, ib yam li nej tau ua neeg mloog lus tas mus li los txog tav no, tsis yog nej yuav mloog lus thaum kuv nrog nej nyob xwb, zaum kuv tsis nrog nej nyob lawm, mas nej haj yam yuav mloog lus zoo; nej yuav ntshai tshee na tsam nej tsis tau txais kev cawm, ces nej yuav rau siab ntso ua kom nej tau txais txoj kev cawm mog. 13 Tswv Ntuj yog tus ua hauj lwm nyob hauv nej, tshoj nej raws li nws lub hom phiaj, kom nej txaus siab thiab kom nej ua tau raws li nws nyiam. 14 Nej ua yam dej num twg los nej tsis txhob yws, tsis txhob cav ncauj; 15 nej thiaj ua tau ib co neeg siab dawb tsis muaj qhov dub, nej thiaj yog Tswv Ntuj cov me nyuam tsis muaj chaw xyeej, nyob xyaw ib tiam neeg siab nkhaus thiab xib rau kev phem; ces nej yuav zoo li tej lub teeb ci pom kev kaj lub ntiaj teb. 16 Yog nej coj ruaj nreb raws lo lus pub txoj sia, mas yog nej ua kom thaum txog lub Hnub Nyoog Leej Pleev rov los, kuv tau koob meej, vim txhais tias kuv tsis tau khiav dag, thiab tsis tau nkim zog khwv. 17 Tab yog kuv cov ntshav yuav tsum ntws tawm los ua ib co txim txi Ntuj kom tau pab nej ntseeg, los kuv zoo siab, thiab kuv nrog tas nej sawv daws zoo siab. 18 Ntawm nej kuj ib yam, nej yuav tsum zoo siab thiab nej nrog kuv zoo siab thiab.

NPN 27: 1, 4, 13-14

Txais: (1a) Huab Tais yog kuv qhov pom kev thiab yog tus cawm kuv.

HUAB TAIS yog kuv qhov pom kev, nws yog tus cawm kuv.
Kuv yuav ntshai leej twg?
HUAB TAIS yog lub yeej ntsa zeb thaiv kuv lub neej,
kuv yuav ntshai tshee na ntawm leej twg xub ntiag?

Txais: (1a) Huab Tais yog kuv qhov pom kev thiab yog tus cawm kuv.

Muaj ib yam kuv thov ntawm HUAB TAIS; yam kuv nrhiav yog:
kom kuv tau nyob hauv HUAB TAIS tsev niaj hnub hauv kuv lub neej,
kom kuv tau nuam ntsia ntsoov HUAB TAIS txoj kev zoo,
thiab tau ntsuam xyuas nws lub tuam tsev.

Txais: (1a) Huab Tais yog kuv qhov pom kev thiab yog tus cawm kuv.

Kuv ntseeg tias kuv yuav tau pom HUAB TAIS lub siab zoo
nyob hauv tsoom neeg ciaj lub teb chaws.
Koj ua siab loj loj tos ntsoov HUAB TAIS mog,
kav tsij ua siab tawv qhawv nyob tos HUAB TAIS.

Txais: (1a) Huab Tais yog kuv qhov pom kev thiab yog tus cawm kuv.

As Les Lus yas: 1 POB ZEB 4: 14

Txais: As les lus yas, as les lus yas.

Yog nej raug luag tsawm vim Leej Pleev lub npe, mas nej txoj hmoov zoo,
vim Tswv Ntuj Leej Tswv Yim nyob rawv saum nej.

Txais: As les lus yas, as les lus yas.

Ntawv Moo Zoo: LK 14:25-33

25 Tej pab neeg coob coob nrog Yes Xus taug kev; Yes Xus tig los hais rau lawv tias : 26 "Leej twg los raws kuv, yog nws tsis ntxub nws niam nws txiv, nws poj niam me nyuam, nws cov kwv tij thiab cov muam, thiab yog nws tsis ntxub nws txoj sia dua kuv, mas tus ntawd ua tsis tau kuv thwj tim. 27 Leej twg tsis kwv nws tus ntoo cuam thiab los lawv kuv qab, mas nws ua tsis tau kuv thwj tim.
28 Puas muaj nej leej twg xav txhim ib tug pej thuam, nws yuav tsis xub zaum xam saib yuav siv nyiaj npaum li cas, kom nws paub tias nws puas muaj nyiaj txaus ua kom tiav? 29 Tsam nws pib txhim cov taw ntsa tas, nws ho ua tsis tau kom tiav, ces tas cov neeg tuaj pom yuav luag nws thiab thuam nws. 30 Lawv yuav hais tias: ‘Saib! Tus neeg ntawd pib txhim, ho tsis muaj peev txaus ua kom tiav!’
31 Los puas muaj ib tug vaj twg, yuav sawv kev mus ua rog ntaus lwm tus vaj, nws yuav tsis xub zaum xam saib nws muaj kaum txhiab leej tub rog, nws puas yuav tiv yeej tus vaj uas coj nees nkaum txhiab leej tuaj? 32 Yog nws paub tias yuav tiv tsis yeej, mas thaum lwm tus vaj tseem tuaj txog deb, nws yuav xa ib pab tiam lis mus nrog sib tham hais haum kom cia lub teb chaws nyob thaj yeeb.
33 Nej kuj ib yam li ntawd, yog nej leej twg tsis tso nws lub cuab tam tseg, mas nws ua tsis tau kuv thwj tim.”

Tim 5 lub 11 Hlis 2020

Hnub Tsib Lis Piam Peb Caug Ib Nruab Xyoo A Nruab Lis Piam Xyoo II
Lectionary: 488

Zaj Nyeem Ib: FIS LIS POS 3: 3-8A

Cov kwvv tij nkauj muad:
3 Peb thiaj yog cov txais lub cim txiav tiag, vim peb muaj kev teev hawm raws li Tswv Ntuj Leej Tswv Yim qhia, thiab peb tau ntsej muag yog nyob hauv Yes Xus Pleev, peb tsis muab peb txoj kev tso siab cog rau tib neeg xwb. 4 Tsis kav yog hais txog tib neeg mas twb phim kuv muaj cai tso siab rau tib neeg kawg; yog muaj tej tus xav tias, lawv muaj cai tso siab rau tib neeg, mas kuv yog tus haj yam muaj cai. 5 Yug los puv yim tag kis xwb, kuv twb txais lub cim txiav lawm; kuv yug hauv haiv neeg His Xas Lais, hauv lub xeem Npes Yas Mis; kuv yog ib tug neeg Hes Nplaws, yug ntawm niam txiv neeg Hes Nplaws los; hais txog ntawm Txoj Cai, kuv yog ib tug Fas Lis Xais; 6 kuv yog ib tug tau kub siab hiam lub Koom Txoos kawg nkaus; hais txog txoj kev ncaj raws li Txoj Cai kom ua, mas kuv yog ib tug neeg coj tau zoo tshaj plaws.
7 Tiam sis tej paj tshab uas kuv tau txais ntawm tej kuv tau ua ntawd, mas nyem no kuv saib yog tej yam ua rau kuv poob peev nyob hauv Leej Pleev. 8 Tseem tshaj ntawd thiab, nyem no kuv saib txhua yam yeej tsis muaj nuj nqis dab tsi li, yog muab piv rau yam uas muaj nuj nqe loj tshaj tas nrho, uas yog txoj kev paub Yes Xus Pleev, kuv tus Huab Tais.

NPN 105: 2-3, 4-5, 6-7

Txais: (3b) Cov uas muaj lub siab nrhiav Huab Tais yuav muaj kev zoo siab.

Nej hu nkauj rau nws, nej hu nkauj cav txog nws,
nej tshaj tawm txog tej yam loj nws tau ua.
Nej txais koob meej nyob hauv nws lub npe,
nej cia li zoo siab, nej cov uas muaj lub siab nrhiav HUAB TAIS!

Txais: (3b) Cov uas muaj lub siab nrhiav Huab Tais yuav muaj kev zoo siab.

Nej nrhiav Huab Tais thiab nws lub zog,
nej nrhiav kom tau tsob hwb nws txhua sij hawm.
Nej nco ntsoov txog cov hwj huam txaus qhuas nws tau ua,
nws cov hauj lwm loj, thiab cov lus txiav txim nws lub ncauj tau hais.

Txais: (3b) Cov uas muaj lub siab nrhiav Huab Tais yuav muaj kev zoo siab.

Nej yog Has Nplas Has tsoom xeeb ntxwv, nws cov tub txib,
yog Yas Kos cov tub, nws pab neeg nws tau xaiv!
Huab Tais nws yog peb tus Tswv Ntuj,
tas ntiaj teb yuav raws li nws cov cai nws txiav.

Txais: (3b) Cov uas muaj lub siab nrhiav Huab Tais yuav muaj kev zoo siab.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Tas nej sawv daws uas nej khwv
thiab ris nra hnyav, nej tuaj cuag kuv, kuv yuav cia nej so los siav.

Txais: As les lus yas, as les lus yas.

Ntawv Moo Zoo: LK 15: 1-10

1 Cov neeg sau se thiab cov neeg txhaum sawv daws txav los ze kom tau mloog Yes Xus hais lus. 2 Tiam sis cov Fas Lis Xais thiab cov Kws Ntawv Ntshiab pib yws zom zaws tias : "Tus neeg ntawd txais cov neeg txhaum thiab nws tseem nrog lawv noj mov tib si thiab!" 3 Yes Xus thiaj hais zaj paj lug no rau lawv tias: 4 " Nej puas muaj leej twg, yog nws muaj ib puas tus yaj, tab sis ib tug ploj lawm, nws yuav tsis tso cuaj caum cuaj tug tseg rau tom hav suab puam, thiab mus nrhiav kom tau tus uas ploj lawd? 5 Thaum nws nrhiav tau tus yaj ploj lawm, nws muab kwv hlo saum xwb pwg, nws zoo siab tas nrho. 6 Nws los txog tsev, nws yuav nqua hu nws cov phooj ywg thiab cov nyob ze nws tuaj, nws hais rau lawv tias : 'Nej nrog kuv zoo siab, vim kuv nrhiav tau kuv tus yaj poob zoo lawm.' 7 Ib yam li ntawd, kuv hais rau nej tias, nyob saum ntuj kuj yuav muaj kev zoo siab loj tshaj rau ib tug neeg txhaum uas hloov siab los ua zoo dua rau cuaj caum cuaj leeg siab ncaj uas tsis tas yuav hloov siab los ua zoo.
8 Los puas muaj ib tug poj niam twg uas nws muaj kaum lub txiaj nyiag, yog ib lub poob lawm, nws yuav tsis taws teeb cheb tsev, ua tib zoo nrhiav kom tau nws lub txiaj nyiag? 9 Thaum nws nrhiav tau lawm, nws nqua hu nws cov phooj ywg thiab cov nyob ze nws tuaj, nws hais tias: ‘Nej nrog kuv zoo siab mas! Vim kuv nrhiav tau kuv lub txiaj uas poob lawm!’ 10 Ib yam li ntawd, kuv hais rau nej tias, yuav muaj kev zoo siab loj nyob hauv Tswv Ntuj tsoom Tshiab, yog tias ib tug neeg txhaum hloov siab tig los ua zoo.”

Tim 6 lub 11 Hlis 2020

Thawj Hnub Rau Lis Piam Peb Caug Ib Nruab Xyoo A Nruab Lis Piam Xyoo II
Lectionary: 489

Zaj Nyeem Ib: FIS LIS POS 3: 17—4:1


17 Cov kwv tij nkauj muad, nej yuav yoog raws li kuv tus lwj lwm mog, nej saib ntsoov cov neeg uas coj raws nraim li peb tus piv txwv. 18 Vim tias, raws li kuv twb tau hais rau nej ntau zaus los lawm thiab kuv tseem rov hais dua rau nej hnub no ntxuag lub kua muag tias, muaj coob leej coj xws li yog ib co yeeb ncuab ntxub Leej Pleev tus ntoo cuam. 19 Cov neeg ntawd, kawg yuav xaus rau kev poob phem. Lawv tus tswv ntuj yog lawv lub plab. Lawv txoj kev nto koob meej yog nyob hauv lawv qhov kev txaj muag. Lawv lub tswv yim tsuas xav ntsoov txog tej yam nyob ntiaj teb no nkaus xwb. 20 Tiam sis ntawm peb, mas peb muaj ntaub ntawv ua neeg qaum ntuj; ces peb tos ntsoov tus cawm seej Huab Tais Yes Xus Pleev yuav los saum ntuj los cawm peb. 21 Nws yuav muab peb lub cev txom nyem no hloov ua ib lub cev muaj hwj chim xws li nws lub, raws li lub zog muaj hwj huam uas nws siv los muab txhua tsav txhua yam zwm rau nws tus kheej.
4 1 Li ntawd, kuv cov kwv tij zoo nyiam thiab hmov tshua, nej yog kuv qhov chaw zoo siab yog kuv lub koob meej, nej yuav nyob ruaj nreb hauv Huab Tais mog, kuv cov mi kwv tij zoo nyiad.

NPN 122: 1-2, 3-4AB, 4CD-5

Txais: (1) Nej tuaj peb zoo siab hlo mus lawm pem Huab Tais tsev.

Kuv zoo siab vim lawv hais rau kuv tias:.
"Peb yuav nce mus lawm pem Huab Tais tsev.”
Nyem no, peb txhais taw tau tsuj
koj cov rooj loog lawm tiag os Yes Lus Xas Les.

Txais…

Yes Lus Xas Les, luag txhim zoo li ib lub nroog
uas zoo tau xwm yeem.
Cov xeem neeg nce mus rau pem nws,
Yog Huab Tais cov xeem neeg

Txais…

Lawv nce mus raws li txoj cai qhia rau His Xas Lais,
Kom tau ua tsaug cav txog Huab Tais lub Npe.
Nyob ntawd muaj ib co rooj txiav txim teeb tau tseg,
Yog cov rooj cia rau Das Vis tsev neeg.

Txais…

As Les Lus Yas: 1 ZAM 2: 5

Txais: As les lus yas, as les lus yas.

Yog tus twg coj Leej Pleev cov lus qhia,
mas txoj kev nyiam Tswv Ntuj loj tiav log nyob hauv nws lawm.

Txais: As les lus yas, as les lus yas.

Ntawv Moo Zoo: LK 16: 1-8

1 Yes Xus tseem hais rau cov thwj tim tias : "Muaj ib tug neeg nplua nuj, nws muaj ib tug tim xyoob xam txiaj. Luag qhia tus tswv tias tus tim xyoob muab nws tej nyiaj txiag siv lwj siv liam. 2 Tus tswv hu tus tim xyoob tuaj, nws hais rau tus tim xyoob tias : ‘Kuv hnov hais dab tsi li no txog koj ? Koj qhia txog tas puas tsav yam rau kuv saib koj tuav kuv cov nyiaj txiag li cas rau li cas. Txij no mus, koj yuav tsis tau ua kuv tus tim xyoob xam txiaj ntxiv.’ 3 Tus tim xyoob xav zoj rau nruab siab tias : Kuv yuav ua li cas, vim kuv tus tswv yuav tshem txoj hauj lwm xam txiaj ntawm kuv mus? Mus ncaws teb? Kuv tsis muaj zog. Mus thov khawv? Kuv kuj txaj muag... 4 Kuv paub lawm tias kuv yuav ua dab tsi, kom thaum luag tshem kuv ntawm txoj hauj lwm xam txiaj lawm, thiaj yuav muaj neeg txais kuv mus nyob hauv lawv tsev. 5 Ces tus tim xyoob hu cov neeg tshuav nqi ntawm tus tswv ib tug zuj zus tuaj. Nws hais rau thawj tug tias: ‘Koj tshuav nuj nqi ntawm kuv tus tswv npaum li cas?’ 6 Tus tshuav nqi teb tias : ‘Ib puas hub roj.’ Tus tim xyoob hais rau nws tias: 'Muab koj daim ntawv tshuav nqi los, koj zaum, koj sau sai sai rau ua tsib caug hub.' 7 Tus tim xyoob hais rau lwm tus tias: ‘Koj ne, koj tshuav nqi pes tsawg?’ Nws hais tias : ‘Ib puas tawb nplej.’ Tus tim xyoob hais rau nws tias: 'Muab koj daim ntawv tshuav nqi los, koj sau ua yim caum rau.'
8 Ces tus tswv qhuas txog tus tim xyoob siab tsis ncaj tias nws txawj ua neeg xyuam xim. Vim tias ntiaj teb neeg cov tub txawj ua neeg xyuam xim thaum lawv nrog cov neeg nyob hauv lawv tiam neej sib fim dua kev kaj cov tub.”

Tim 7 lub 11 Hlis 2020

Thawj Hnub Xya Lis Piam Peb Caug Ib Nruab Xyoo A Nruab Lis Piam Xyoo II

Hwm Niam Mab Liab

Zaj Nyeem Ib: FLP 4: 10-19

Cov kwv tij nkauj muad:
10 Kuv zoo siab kawg nkaus nyob hauv Huab Tais, vim zaum no nej rov kub siab xav pab kuv dua. Nej yeej ib txwm xav pab kuv, tab sis yog nej nrhiav tsis tau ib txog kev pab kuv xwb. 11 Kuv hais li no, tsis yog vim kuv tsis muaj txaus noj txaus siv; kuv mus txog qhov twg kuv yeej tau xyaum ua neeg siv raws li yus muaj xwb. 12 Kuv txawj coj raws li lub caij thaum tsis muaj txawm peem, kuv kuj txawj coj raws li lub caij thaum muaj ntau ntws lug. Nyob hauv txhua yam thiab txhua lub caij nyoog, kuv tau xyaum yoog raws lub sij hawm, xws li kuv txawj noj kom tsau plab, los puas txawj nyiaj tshaib yoo nqhis, kuv txawj coj tus yam ntxwv phim lub caij nplua nuj los tus yam ntxwv phim lub caij txom nyem. 13 Kuv ua tau tas puas tsav yam yog nyob hauv Tus uas ua kom kuv muaj zog. 14 Txawm li cas los yog ib qho zoo kawg uas nej tau txhawb kuv hauv kuv txoj kev txom nyem.
15 Nej cov nyob Fis Lis Pos nej yeej paub zoo lawm tias thaum lub hauv paus pib lub Moo Zoo, thaum kuv tau sawv kev ntawm Mas Xes Dos Nias tuaj, mas tsis muaj ib pawg ntseeg twg yuav kam koom tes nrog kuv qhib ib qho kev sib pab kom muaj los siv thiab tau kev khaws cia li, tsuas muaj nej nkaus xwb. 16 Tab yog thaum kuv tseem nyob Tes Xas Los Nis los nej tau xa tej yam uas kuv yuav tsum muaj tuaj rau kuv siv, tsis yog ib zaub xwb, nej tau xa ob zaug diam. 17 Kuv tsis yog nrhiav kom tau txais ntau yam, tiam sis yog kuv xav kom nej tsim tau ib co paj tshab tseg rau nej kom txawj ntau zuj zus tuaj xwb. 18 Kuv tau txais txhua yam, thiab kuv muaj ntau tshaj kuv tej kev siv lawm. Kuv tsis muaj kev ntshaw dab tsi ntxiv li txij thaum Es Pas Fos Dis muab nej cov paj tshab rau kuv lawm; nej cov paj tshab yog zoo li ib co tshuaj tsw qab, thiab ib thaj txi Ntuj uas Tswv Ntuj txais, thiab xis nws siab. 19 Kuv tus Tswv Ntuj yeej yuav pauj rau nej thiab yuav muab txhua yam nej xav tau rau nej, raws li nws txoj kev nplua nuj nto koob meej nyob hauv Yes Xus Pleev.

NPN 112: 1B-2, 5-6, 8A+9

Txais: Tus hwm Huab Tais, nws txoj hmoov zoo.
los: As les lus yas.

Tus hwm HUAB TAIS, nws txoj hmoov zoo :
Nws nyiam Huab Tais cov lus qhia tas siab nrho,
Nws caj ces yuav muaj peev xwm nyob ntiaj teb,
Tiam neeg siab ncaj yuav tau txoj hmoov zoo.

Txais: Tus hwm Huab Tais, nws txoj hmoov zoo.
los: As les lus yas.

Tus neeg txawj hlub luag thiab qiv rau luag, nws hmoov zoo.
Nws ua nws tej hauj lwm raws kev ncaj.
Nws yuav tsis qaug ib zaug, yuav nyob ruaj mus lij;
sawv daws yuav nco ntsoov tas mus li txog tus neeg ncaj.

Txais: Tus hwm Huab Tais, nws txoj hmoov zoo.
los: As les lus yas.

Nws ua siab tawv qhawv, nws yuav tsis txhawj li.
Nws pub ntau rau cov pluag :
nws txoj kev ua siab dav yuav nyob mus li,
nws yuav tau ntsej muag, yuav nto koob meej lug,

Txais: Tus hwm Huab Tais, nws txoj hmoov zoo.
los: As les lus yas.

As Les Lus Yas: 2 KLN 8: 9

Txais: As les lus yas, as les lus yas.

Yes Xus Pleev yeem ua neeg pluag, txawm tias nws yog tus nplua nuj,
kom xwv nws txoj kev pluag ua nej nplua nuj tuaj.

Txais: As les lus yas, as les lus yas.

Ntawv Moo Zoo: LK 16: 9-15

Yes Xus hais rau nws cov thwj tim tias:
9 Kuv hais rau nej tias: Nej kav tsij ua phooj ywg nrog tej nyiaj txiag uas muaj kev tsis ncaj ncees, kom thaum tej nyiaj ntawd tsis muaj nuj nqes lawm, luag yuav txais nej mus nyob hauv cov tsev tsam phooj uas nyob mus li.
10 Leej twg ua ncaj thaum nws saib xyuas tej yam me, nws kuj yuav ua ncaj thaum nws saib xyuas tej yam loj thiab. Leej twg ua tsis ncaj thaum nws saib xyuas tej yam me, kuj yuav ua tsis ncaj thaum nws saib xyuas tej yam loj thiab. 11 Yog nej twb ua tsis ncaj thaum nej saib xyuas tej nyiaj txiag uas muaj kev tsis ncaj ncees, mas leej twg thiaj yuav muab yam zoo tseem ceeb tiag rau nej saib xyuas? 12 Thaum nej saib xyuas yam uas yog luag tug, yog nej ua tsis ncaj, mas leej twg thiaj yuav muab yam uas yog nej tug rau nej tuav?
13 Tsis muaj ib tug tub txib yuav tsob hwb ob tug tswv tau. Nws yeej yuav tsum ntxub ib tug, nyiam lwm tus, los nws yuav tsum npuab ib tug, thuam lwm tus xwb. Nej yuav ua Tswv Ntuj tub txib thiab ua nyiaj txiag tub txib tsis tau.
14 Cov Fas Lis Xais uas yog neeg nyiam nyiaj txiag, lawv hnov cov lus ntawd, lawv thuam Yes Xus. 15 Ces Yes Xus hais rau lawv tias : "Nej yog cov uas rov qhuas nej rau ntawm neeg xub ntiag tias nej ncaj, tab sis Tswv Ntuj paub nej lub siab; vim tias yam uas neeg muab saib hlob, mas yog ib yam phem kawg nyob ntawm Tswv Ntuj qhov muag pom."

Tim 9 lub 11 Hlis

Nco txog Hnub Foom Hmoov Zoo rau lub Tuam Tsev Teev Ntuj Lateran nyob Los Mas

Zaj Nyeem Ib: EXK 47: 1-2, 8-9, 12

1 Tus tshiab coj kuv rov los txog ntawm lub qhov rooj txuas nkag mus hauv lub Tuam Tsev Teev Ntuj, ua ciav kuv pom dej ntws hauv lub qab taw rooj los mus dua sab hnub tuaj lawm, vim lub Tuam Tsev tig sab qhov rooj txuas mus rau sab hnub tuaj. Dej txhawv ntawm lub tuam tsev sab xis uas yog nram sab naj lub thaj txi Ntuj los. 2 Nws coj kuv tawm ntawm lub qhov rooj nyob sab pej los rau sab nraud, thiab coj kuv ncig sab Tuam Tsev nraud los txog ntawm lub rooj vag uas tig mus rau sab hnub tuaj. Nyob ntawd, kuv thiaj pom dej ntws tawm ntawm sab xis los.
8 Nws hais rau kuv tias: "Cov dej no ntws mus rau thaj tsam sab toob fab, mus rau nram lub hav As Las Npas, yuav mus tshwm rau hauv lub hiav txwv, mus ua kom cov dej hiav txwv ntshiab huv tuaj. 9 Tus dej no ntws txog qhov twg mas tas puas tsav yam muaj txoj sia uas txawj mus mus los los yuav ciaj nyob hauv cov dej no. Yuav muaj ntses ntau heev, vim tus dej no ntws mus txog qhov twg mas nws ua kom cov dej hiav txwv ntshiab huv tuaj, ces txhua yam yuav ciaj sia tau hauv tej qhov chaw tus dej no ntws mus txog.
12 Nyob ntawm ob sab ntug dej yuav tuaj tas puas tsav yam ntoo txi txiv; lawv cov nplooj yuav tsis zeeg li thiab lawv yuav txi txiv mus li. Niaj lub hli, lawv yuav txi ib phaum txiv tshiab, vim muaj cov dej uas ntws ntawm thaj chaw ntshiab los yug lawv. Lawv cov txiv yuav yog ib co txhiam xws, hos lawv cov nplooj yuav yog ib co tshuaj."

NPN 46: 2-3, 5-6, 8-9

Txais: (5) Cov dej hauv tus niam dej ua kom Tswv Ntuj lub tsheej zoo siab,
lub tsheej ntawd yog tus Nyob Siab qhov chaw nyob.

Tswv Ntuj yog peb chaw nkaum yog peb lub zog,
yog tus pab peb mus li thaum peb ntsib kev nyuaj.
Vim li no, peb tsis ntshai, txawm ntiaj teb yuav ua zog koog
thiab toj roob hauv pes yuav nphau nphwv rau hauv qab tiv txwv.

Txais: (5) Cov dej hauv tus niam dej ua kom Tswv Ntuj lub tsheej zoo siab,
lub tsheej ntawd yog tus Nyob Siab qhov chaw nyob.

Muaj ib tug dej, nws ncau ceg mus ua kom Tswv Ntuj lub tsheej zoo siab,
lub tsheej ntawd yog tus Nyob Siab qhov chaw nyob.
Tswv Ntuj nyob hauv lub tsheej, nws yuav tsis ntsib kev nyuaj ntxhov,
Tswv Ntuj yuav tuaj pab nws thaum kaj ntug txoog.

Txais: (5) Cov dej hauv tus niam dej ua kom Tswv Ntuj lub tsheej zoo siab,
lub tsheej ntawd yog tus Nyob Siab qhov chaw nyob.

Tus Huab Tais kav tsoom tshiab nrog peb nyob;
peb lub yeej ntsa zeb yog Yas Kos tus Tswv Ntuj.
Nej tuaj xyuas HUAB TAIS cov hauj lwm saib,
xyuas tej yam loj tas nrho nws tau ua nyob ntiaj teb.

Txais: (5) Cov dej hauv tus niam dej ua kom Tswv Ntuj lub tsheej zoo siab,
lub tsheej ntawd yog tus Nyob Siab qhov chaw nyob.

Zaj Nyeem Ob: 1 KLN 3: 9C-11, 16-17

Cov kwv tij nkauj muad:
9c “Nej yog Tswv Ntuj lub Tuam Tsev. 10 Kuv ua raws li lub txiaj ntsim uas Tswv Ntuj pub rau kuv. Kuv zoo li ib tug neeg txhim tsev, kuv pib txhim tau cov taw ntsa, ces lwm tus tuaj txhim ntxiv rau saud. Tab sis nyias yuav muab siab rau saib nyias txoj kev txhim tsev saib yuav txhim li cas. 11 Vim tias tsis muaj leej twg yuav txhim tau ib tug taw ntsa txawv tus uas ib txwm nyob : tus taw ntsa ntawd yog Yes Xus Pleev.
16 Nej puas paub tias nej yog Tswv Ntuj lub Tuam Tsev, thiab Tswv Ntuj Leej Tswv Yim nyob txawm hauv nej? 17 Yog leej twg rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev yog ib yam ntshiab; nej yog lub tuam tsev ntawd.

As Les Lus Yas: 2 XWM 7: 16

Txais: As les lus yas, as les lus yas.

Huab Tais hais tias: “Kuv tau xaiv thiab tau tshwj lub tsev no
cia rau kuv lub npe kom nyob ntawd tas mus li.”

Txais: As les lus yas, as les lus yas.

Ntawv Moo Zoo: ZAM 2: 13-22

13 Yuav txog cov Yus Das lub Ntees Hla, ces Yes Xus mus pem Yes Lus Xas Les. 14 Nyob hauv lub Tuam Tsev Teev Ntuj, nws pom cov tub luam muag nyuj, muag tshis, thiab muag nquab, thiab pom cov neeg pauv nyiaj zaum nyob ntawd. 15 Nws muab ib co hlua los ua ib rab nplawm, nws ntiab sawv daws huv tib si tawm hauv lub Tuam Tsev Teev Ntuj, nrog cov yaj thiab cov nyuj mus; nws nchuav cov pauv nyiaj tej nyiaj, thiab nws muab lawv tej rooj ntxeev. 16 Nws hais rau cov muag nquab tias : "Nej tshem tej ntawd tawm hauv no mus. Nej tsis txhob muab kuv Txiv lub Tsev los ua ib lub tsev lag tsev luam ntxiv." 17 Yes Xus cov thwj tim nco txog lo lus uas Ntawv sau tseg tias : “Kev mob siab rau koj lub Tsev ua kom kuv lub siab kub lug.” 18 Cov Yus Das thiaj hais rau nws tias : "Koj yuav ua lub cim dab tsi rau peb pom, peb thiaj to taub qhov koj ua no?” 19 Yes Xus teb rau lawv tias : "Nej rhuav lub tuam tsev no, ces peb hnub tom qab, mas kuv yuav rov txhim tiav tas.” 20 Cov Yus Das thiaj hais tias : "Lawv ua hauj lwm plaub caug rau xyoo diam thiaj txhim tau lub tuam tsev no, hos koj li, koj ua peb hnub xwb, koj yuav rov txhim tau no lod?" 21 Tab sis Yes Xus hais txog lub tuam tsev uas yog nws lub cev. 22 Thaum Yes Xus sawv hauv cov tuag rov los lawm, nws cov thwj tim thiaj rov nco txog tias nws twb tau hais li ntawd lawm, ces lawv ntseeg txog Phau Ntawv thiab ntseeg txog lo lus uas Yes Xus tau hais.

Tim     10     lub     11     Hlis     2020

Hnub Peb Lis Piam Peb Caug Ob Nruab Xyoo A Nruab Lis Piam Xyoo II
Lectionary: 492

Hwm LN vaj qhia Leo tus Loj, ua kws cov Txuj Ntshiab

Zaj Nyeem Ib:   TIS TOS 2: 1-8, 11-14

Paj Lug sau ntawv rau Tis Tos tias:
1 “Ntawm koj, mas koj yuav qhuab qhia kom haum raws txoj kev ntseeg tseem ceeb, 2 qhia cov txiv neej laus kom txawj cheem lawv txhob haus dej haus cawv kom qaug, kom lawv ua neeg coj tus, txawj xav tom ntej tom qab, nyob ruaj nreb hauv txoj kev ntseeg, txoj kev nyiam, thiab txoj kev tsis txhob thim. 3 Koj yuav qhia ib yam nkaus rau cov poj niam laus kom lawv coj ib tug yam ntxwv phim tej yam ntshiab, tsis txhob hais lus xaiv, txhob quav cawv, thiab txawj qhia qhov zoo rau lwm tus. 4 Lawv coj li ntawd, mas lawv thiaj yuav pab qhia tau cov poj niam tseem hluas kom txawj hlub lawv tus txiv thiab lawv cov me nyuam, 5 kom tsis txhob ua neeg plees, ua neeg tsim txiaj, ua niam tsev nyob hauv lub vaj lub tsev, ua neeg zoo, mloog tus txiv lus, ces luag thiaj tsis thuam Tswv Ntuj lo lus. 6 Koj yuav qhuab ntuas cov hluas kom lawv coj tus yam ntxwv ua neeg thoob tsib nyob hauv txhua yam lawv ua. 7 Koj tus kheej yuav ua ib tug piv txwv zoo los qhia txog txhua yam dej num zoo, xws li kev qhia ib txoj kev cai raws qhov yog tsis yuam kev, kev ua neeg muaj tsim, 8 kev hais lus ncaj lus meej pem kom luag thuam tsis tau, ces tus neeg xav tiv peb yuav poob ntsej muag vim nws hais tsis tau dab tsi phem txog peb.
11 Vim tias Tswv Ntuj tus cawj seej, nws lub txiaj ntsim tau tawm los rau tsoom neeg sawv daws pom xyeem lawm. 12 Lub txiaj ntsim ntawd qhia kom peb tso tej kev tsis hwm Ntuj pov tseg, tso txoj kev ntshaw ntau yam raws lub ntiaj teb pov tseg, thiab kom peb ua neej nyob hauv txoj kev meej pem txawj xav tom ntej tom qab, hauv txoj kev ncaj, thiab txoj kev hwm Ntuj nyob hauv tiam peb nyob no. 13 Peb tos ntsoov tias yuav tau raws peb txoj kev tso siab kaj siab lug, thiab yuav tau pom peb tus Tswv Ntuj loj tas nrho thiab peb tus cawm seej Yes Xus Pleev lub hwj chim tawm los rau qhov muag pom xyeem. 14 Yes Xus Pleev tau muab nws rau luag ntes kom tau cawm peb dim ntawm txhua txoj kev txhaum, thiab kom tau ntxuav ib haiv neeg uas nws tau xaiv kom dawb huv los ua nws tug, uas yog ib haiv neeg kub siab ua cov hauj lwm zoo.

NPN   37: 3-4, 18+23, 27+29

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws thiab muaj noj nrog kev tso siab.
Nej zoo siab nyob hauv HUAB TAIS,
ces nws yuav pub rau nej raws nej lub siab ntshaw.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

HUAB TAIS saib xyuas cov neeg coj ncaj ncees lub neej;
lawv lub cuab tam yuav nyob mus li.
HUAB TAIS ua kom ib tug neeg tshais taus ruam mus kev khov kho,
txoj kev nws taug xis Huab Tais siab.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Koj lug txoj kev phem, koj ua qhov zoo,
koj thiaj yuav tau nyob mus li.
Cov neeg ncaj yuav tau thaj av ua lawv tug,
lawv yuav tau nyob hauv thaj av mus li.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

As Les Lus Yas:   ZAM 14: 23

Txais: As les lus yas, as les lus yas.

Yog leej twg nyiam kuv, mas nws yuav coj rawv kuv lo lus,
ces kuv Txiv yuav nyiam nws;
kuv Txiv wb yuav los nyob hauv nws.

Txais: As les lus yas, as les lus yas.

Ntawv Moo Zoo:   LK 17: 7-10

Yes Xus hais rau nws cov Hauv Paus Xa Lus tias:
7 "Nyob hauv nej, yog nej tus tub txib mus laij teb los mus zov tsiaj tom teb los txog ntua, nej puas muaj leej twg yuav hais rau nws tias : ‘Koj tsuag tsuag los ntawm no, los zaum noj mov ?’
8 Ntshai yuav yog li no dua los tsis sub: Nws yuav hais rau tus tub txib tias : ‘Koj los ua mov rau kuv noj tso. Kav tsij sia daim ntaub npua cev, koj nqa zaub nqa mov los rau kuv noj. Thaum kuv noj kuv haus tas lawm, koj mam noj mam haus tom qab.’
9 Tus tub txib ua raws li nws tus tswv txib, tus tswv puas pom nws txiaj ntsim ?
10 Nej kuj zoo ib yam li ntawd thiab: thaum nej ua tas txhua yam raws li luag txib nej lawm, mas nej yuav hais tias : ‘Peb yog ib co tub txib tsis muaj nqis ; peb tau ua qhov uas peb yuav tsum ua xwb.’ "

Tim 11 lub 11 Hlis 2020

Hnub Plaub Lis Piam Peb Caug Ob Nruab Xyoo A Nruab Lis Piam Xyoo II
Lectionary: 493

Hwm LN Martin nyob Tours, ua Tswv Qhia

Zaj Nyeem Ib: Tis Tos 3: 1-7

Tus zoo nyiad:
1 Koj hais rau sawv daws kom nco ntsoov hwm kev nom kev tswv, kom lawv mloog lus thiab npaj siab rawv yuav ua txhua yam hauj lwm zoo. 2 Lawv yuav tsis txhob hais lus rhuav leej twg, tsis txhob nyiam nrog luag sib cav sib ceg, yuav ua siab ntev zam rau lwm tus, yuav ua zoo tas nrho rau txhua leej txhua tus. 3 Vim tias yav tas los peb kuj yog ib co neeg tsis paub tab, neeg tawv ncauj, neeg yuam kev, neeg ua qhev zwm rau ntau yam kev ntshaw thiab kev nyiam lom zem; peb ua neeg muaj lub siab phem thiab khib ntshaw luag; peb ua neeg ntxim ntxub thiab peb ib leeg ntxub ib leeg. 4 Tab sis, thaum tus Tswv Ntuj uas cawm peb qhib nws lub siab zoo thiab nws txoj kev nyiam tsoom tib neeg tawm los rau peb pom xyeem, 5 uas tsis yog vim peb tau ua ib co hauj lwm ncaj ncees, tiam sis yog vim nws lub siab khuv leej neeg, mas nws tau cawm peb nyob hauv cov dej ntxuav neeg kom rov yug los dua tshiab, thiab kom rov tshiab tuaj nyob hauv Leej Ntuj Plig Ntshiab, 6 tus uas nws tau tso los nyob puv phwj yaws rau hauv peb, nyob hauv Yes Xus Pleev, peb tus cawm seej. 7 Li ntawd, Leej Pleev lub txiaj ntsim ua kom peb ntshiab tuaj, ces peb tau ua ib co tub uas yuav txais lub cuab tam nyob hauv txoj kev tso siab tias yuav muaj txoj sia nyob mus li.

NPN 23: 1b-3a, 3bc-4, 5, 6

Txais: (1) Huab Tais yog tus tswv zov yaj saib kuv,
kuv yuav tsis tshaib txog dab tsi li.

HUAB TAIS yog tus tswv zov yaj saib kuv,
kuv yuav tsis tshaib txog dab tsi li.
Nws cia kuv so nyob hauv tej tshav zaub mos ntsuab xiab;
Nws coj kuv mus nyob ze cov dej tus yees;
nws ua kom kuv tus ntsuj plig rov muaj zog tuaj.

Txais…

Nws coj kuv mus taug tej kev ncaj, vim nws lub npe.
Txawm kuv taug kev hauv ib lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab,
koj rab nplawm thiab rab pas nrig ua kuv luag.

Txais…

Koj rau ib rooj qav rau ntawm kuv xub ntiag
rau kuv cov yeeb ncuab ntsia ntsoov;
koj muab roj pleev kuv taub hau;
kuv lub ntim puv phwj yaws.

Txais…

Txiaj ntsim thiab kev zoo raws kuv nraim
niaj hnub hauv kuv lub neej;
Kuv lub chaw nyob yog nyob hauv HUAB TAIS tsev
mus ntev niaj ntau xyoo lawm yav tom ntej.

Txais…

As Les Lus Yas: 1 TXLN 5: 18

Txais: As les lus yas, as les lus yas.

Txawm nej yuav raug dab tsi los nej yuav ua tsaug mus li,
vim Tswv Ntuj lub siab xav kom nej ua li ntawd nyob hauv Yes Xus Pleev.

Txais: As les lus yas, as les lus yas.

Ntawv Moo Zoo: Lk 17: 11-19

11 Thaum Yes Xus taug kev mus pem Yes Lus Xas Les, nws hla hauv Xas Mas Lias thiab Nkas Lis Lais teb mus. 12 Thaum nws tab tom yuav mus rau hauv ib lub zos, muaj kaum tus txiv neej mob ruas tuaj ntsib nws; lawv nres nyob nrug deb. 13 Lawv tsa suab hais nrov nrov tias: "Xib Hwb Yes Xus, thov koj khuv leej peb." 14 Yes Xus pom lawv, nws hais rau lawv tias: “Nej mus thws nej lub cev rau cov Leej Choj saib." Thaum lawv tab tom mus, lawv lub cev cia li huv tuaj lawm. 15 Muaj ib tug hauv lawv pab ntawd pom tias nws lub cev zoo lawm, ces nws tig hlo rov qab los, nws tsa suab nrov cav txog Tswv Ntuj. 16 Nws los khoov pe ntsej muag ti av rau ntawm Yes Xus ko taw, nws ua Yes Xus tsaug. Tus no yog ib tug Xas Mas Lias. 17 Yes Xus thiaj tsa ncauj hais tias: “Tsis yog muaj kaum leej tau rov huv tuaj lod? Tshuav cuaj leeg ne, lawv dua twg lawm? 18 Ua cas tsis pom lawv rov los cav txog Tswv Ntuj li, tsuas pom tus qhua no xwb?" 19 Ces Yes Xus hais rau nws tias : "Koj sawv mus, koj lub siab ntseeg cawm koj lawm."

Tim 12 lub 11 Hlis 2020

Hnub Tsib Lis Piam Peb Caug Ob Nruab Xyoo A Nruab Lis Piam Xyoo II
Lectionary: 494

Hwm LN Josaphat, Tswv Qhia tuag ua Tim Khawv

Zaj Nyeem Ib: FIS LES MOOS 1: 7-20

Tus zoo nyiad:
7 Kuv muaj kev zoo siab loj thiab muaj kev nplig siab ntau los ntawm koj txoj kev hlub los, vim tias koj tau txhawb cov ntshiab lub siab os, me kwv.
8 Li ntawd, txawm tias kuv yeej muaj cai yuam koj nyob hauv Leej Pleev, kom koj yuav tsum coj li cas thiaj yog, 9 los kuv tsis yuam, kuv tsuas thov koj nyob hauv txoj kev nyiam kev hlub xwb; kuv Paj Lug, uas nyem no laus lawm, thiab tseem yog ib tug neeg raug txim pub rau Yes Xus Pleev, 10 kuv thov koj rau kuv tus tub Os Nes Xis Mus, uas kuv tau yug nws los ntawm cov saw hlau khi kuv nyob hauv nkuaj. 11 Yav dhau los, nws yog ib tug neeg tsis muaj nqis rau koj, tab sis, nyem no, nws yuav muaj nqis rau koj, ib yam li nws muaj nqis loj rau kuv. 12 Kuv xa nws rov qab los rau koj; nws yog kuv nplooj siab ntag. 13 Kuv twb xav cia nws nyob ze kuv, kom nws sawv koj chaw pab kuv nyob hauv kuv txoj kev raug cov saw hlau khi vim lub Moo Zoo. 14 Tab sis, kuv tsis xav ua ib yam uas kuv tsis tau xub nug koj lus pom zoo tso, kom xwv yam zoo uas koj yuav ua, tsis yog vim koj raug yuam tiam sis yog koj yeej txaus siab ua koj. 15 Tos Os Nes Xis Mus tau ncaim ntawm koj mus ib ntus, los ntshai yog vim Ntuj xav ua kom koj rov tau nws los nrog koj nyob mus li, 16 tsis yog nws yuav rov los ua koj ib tug qhev lawm, tiam sis nws yuav zoo tshaj ib tug qhev, nws yuav yog ib tug kwv tij uas koj hlub rau koj - nws twb yog kuv ib tug kwv uas kuv hlub kawg nkaus, tiam sis nws haj yam yuav yog koj ib tug kwv tij uas koj hlub raws li kev cai neeg ntiaj teb thiab raws li nyob hauv Huab Tais.
17 Li ntawd, yog koj saib tias wb yog ob tug neeg muaj kev sib hlub, mas koj yuav txais nws ib yam li txais kuv. 18 Yog nws tau ua tub qaug koj li cas lawm, los yog nws tshuav koj nuj nqis dab tsi, mas koj cia kuv ua tus ris. 19 Kuv, Paj Lug, muab kuv ob txhais tes sau ntawv cog lus tias: kuv yog tus yuav them rov qab. Kuv tsis hais txog li tias, cov nuj nqis uas koj tshuav ntawm kuv yog koj tus kheej kiag. 20 Me kwv, kuv tso siab tias koj yuav ua qhov ntawd pub rau kuv nyob hauv Huab Tais os; koj ua kom kuv lub siab kaj nyob hauv Leej Pleev mog.

NPN 146: 7, 8-9A, 9BC-10

Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

HUAB TAIS tsa cov raug luag quab yuam cai.
nws pub mov rau cov neeg tshaib noj.
HUAB TAIS tso cov neeg raug txim kom lawv dim.

Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

HUAB TAIS qhib cov dig muag qhov muag,
HUAB TAIS tsa cov khoov nkoos kom sawv ntseg,
HUAB TAIS nyiam cov neeg siab ncaj.
HUAB TAIS pov hwm cov pej kum neeg.

Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

Nws txhawb tus ntsuag nos thiab tus poj ntsuam,
nws ua kom tus siab phem plam qhov nws nyiam.
HUAB TAIS yuav ua vaj nyob mus li;
Xis Yoog, koj tus Tswv Ntuj yuav ua vaj txheej dhau txheej ! As les lus yas!

Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

As Les Lus Yas: ZAM 15: 5

Txais: As les lus yas, as les lus yas.

Huab Tais hais tias: “Kuv yog tsob hmab txiv cawv, nej yog cov ceg;
tus twg nyob hauv kuv thiab kuv nyob hauv nws, mas nws yuav txi txiv ncw.

Txais: As les lus yas, as les lus yas.

Ntawv Moo Zoo: LK 17: 20-25

20 Cov Fas Lis Xais nug Yes Xus tias thaum twg Tswv Ntuj lub Ceeb Tsheej thiaj li los txog, Yes Xus teb rau lawv tias : "Tswv Ntuj lub Ceeb Tsheej yog ib yam uas neeg qhov muag tsom tsis tau. 21 Tsis muaj leej twg yuav hais tsis tau tias 'Ntuj lub Ceeb Tsheej nyob ntawm no', los ‘nyob tod', vim tias Tswv Ntuj lub Ceeb Tsheej yog nyob nruab nrab hauv nej.”
22 Yes Xus hais rau cov thwj tim tias : "Yuav muaj tej lub sij hawm uas nej ntshaw pom ib hnub hauv lub caij uas Neeg Leej Tub tseem nrog nej nyob, tab sis nej yuav tsis pom. 23 Luag yuav hais rau nej tias : ‘Nws nyob tod', los 'Nws nyob ntawm no'; mas nej tsis txhob mus, tsis txhob tso sas ntws khiav mus caum. 24 Vim tias ib yam li ib kab xob laim ci dawb vog ib ceg kaum ntuj mus rau lwm ces, Neeg Leej Tub lub zim txwv kuj yuav zoo li ntawd thiab. 25 Tab sis nws yuav tsum xub raug txom nyem loj kawg thiab raug tiam neeg no muab xyeeb pov tseg tso.”

Tim 13 lub 11 Hlis 2020

Hnub Rau Lis Piam Peb Caug Ob Nruab Xyoo A Nruab Lis Piam Xyoo II
Lectionary: 495

Hwm LN Frances Xavier Cabrini, nkauj xwb

Zaj NYeem Ib: 2 ZAM 1: 4-9

Zam sau ntawv rau ib tug niam tsev tias:
4 Kuv zoo siab heev tau ntsib koj cov me nyuam uas mus taug txoj kev tseeb, raws li Leej Txiv lo lus qhia rau peb. 5 Zaum no, kuv thov koj tus ua niam tias, kuv tsis yog sau ib lo lus qhia tshiab tuaj rau koj, kuv tsuas sau lo lus qhia uas peb yeej muaj txij puag thaum lub hauv paus los lawm xwb, kuv thov koj tias kom peb yuav tsum sib nyiam sib hlub. 6 Txoj kev sib nyiam sib hlub yog li no: kom peb yuav tsum ua neej raws li nws lo lus qhia. Lo lus qhia ntawd, raws li nej yeej tau hnov txij thaum lub hauv paus los lawm, yog qhov tias kom nej yuav tsum ua neej coj raws nraim li ntawd.
7 Muaj coob tus neeg dag tau ncig mus nyob thoob qab ntuj lawm. Lawv tsis ntseeg txog tias Yes Xus Pleev yug los ua tib neeg muaj ib lub cev nqaij. Lawv yog tus dag ntxias neeg, tus tiv Leej Pleev. 8 Nej yuav ceev faj kom nej tsis txhob plam yam uas peb tau khwv ua pub rau nej lawm, tiam sis kom nej tau txais cov paj tshab tuaj ntawm qhov ntawd tuaj tas huv tib si. 9 Tus twg qhia ib txog kev tshiab mas nws tsis nyob hauv Leej Pleev lo lus qhia, nws tsis muaj Tswv Ntuj nyob hauv nws. Tus uas nyob hauv Leej Pleev lo lus qhia, mas nws muaj Leej Txiv thiab Leej Tub nyob hauv nws.

NPN 119: 1, 2, 10, 11, 17, 18

Txais: (1b) Cov tau hmoov zoo yog cov ua raws nraim HUAB TAIS Txoj Cai.

Cov tau txoj hmoov zoo yog cov neeg taug txoj kev zoo,
lawv ua raws nraim li HUAB TAIS Txoj Cai.

Txais: (1b) Cov tau hmoov zoo yog cov ua raws nraim HUAB TAIS Txoj Cai.

Cov tau txoj hmoov zoo yog cov ua raws li HUAB TAIS lo lus,
Lawv nrhiav nws tas lawv siab lawv ntsws.

Txais: (1b) Cov tau hmoov zoo yog cov ua raws nraim HUAB TAIS Txoj Cai.

Kuv nrhiav koj tas kuv siab kuv ntsws,
Thov koj txhob cia kuv ncaim mus deb koj cov lus qhia.

Txais: (1b) Cov tau hmoov zoo yog cov ua raws nraim HUAB TAIS Txoj Cai.

Kuv khaws koj cov lus koj cog rau nruab siab
kom kuv thiaj tsis txhob ua txhaum rau koj.

Txais: (1b) Cov tau hmoov zoo yog cov ua raws nraim HUAB TAIS Txoj Cai.

Thov koj ua zoo rau koj tus tub txib,
kuv thiaj yuav muaj txoj sia, thiab yuav khaws koj cov lus.

Txais: (1b) Cov tau hmoov zoo yog cov ua raws nraim HUAB TAIS Txoj Cai.

Thov koj qhib kuv qhov muag, kuv thiaj yuav pom
tias koj Txoj Cai zoo tas nrho.

Txais: (1b) Cov tau hmoov zoo yog cov ua raws nraim HUAB TAIS Txoj Cai.

As Les Lus Yas: LK 21: 28

Txais: As les lus yas, as les lus yas.

Nej yuav sawv kom ntseg, nej yuav tsa taub hau,
vim txoj kev txhiv nej los txog ze lawm.

Txais: As les lus yas, as les lus yas.

Ntawv Moo Zoo: LK 17: 26-37

Yes Xus hais fau nws cov thwj tim tias:
26 “Lub caij Nos Hes ua neej nyob zoo li cas, mas kuj yuav zoo ib yam li ntawd thaum txog Neeg Leej Tub lub caij. 27 Thaum ntawd sawv daws noj sawv daws haus, sawv daws yuav poj niam thiab muab tshoob muab kos, mus txog ntua hnub uas Nos Hes chaws mus rau hauv lub nkoj lawm, ces dej los nyab ua kom sawv daws tuag tas. 28 Thiab kuj yuav zoo li lub zim txwv uas Los ua neej nyob thiab: Sawv daws noj sawv daws haus, sawv daws muas los sawv daws muag mus, sawv daws cog qoob loo, sawv daws txhim vaj txhim tsev. 29 Hnub uas Los tawm plaws khiav ntawm Xos Dos Mas mus, hluav taws thiab leej faj poob saum ntuj los kub sawv daws tuag tas huv si. 30 Hnub uas Neeg Leej Tub yuav tawm los rau qhov muag pom kuj yuav zoo ib yam li ntawd thiab. 31 Hnub ntawd, tus uas nyob txheej saum ru tsev, tab sis nws cov cuab yeej cuab tam nyob hauv tsev lawm, mas nws yuav tsis txhob nqes mus nqa. Tus nyob tom teb kuj ib yam, nws yuav tsis txhob tig rov mus rau tom qab. 32 Nej nco ntsoov txog Los poj niam. 33 Leej twg nrhiav kev txuag nws txoj sia, mas nws yuav plam nws txoj sia, hos leej twg plam nws txoj sia, mas nws yuav cawm tau txoj sia nyob. 34 Kuv hais rau nej tias, hmo ntawd, muaj ob leeg pw ib txag, luag yuav coj ib tug mus, tseg ib tug. 35 Muaj ob tug poj niam ua ke zom zeb, luag yuav coj ib tug mus, tseg ib tug nyob." [36...] 37 Ces cov thwj tim teb rau Yes Xus tias: “Coj mus qhov twg, Huab Tais?" Yes Xus hais rau lawv tias : "Lub cev nyob qhov twg, cov dav kuj yuav sib sau ntsauv nyob qhov ntawd."