COV ZAJ NYEEM NRUAB LIS PIAM XYOO A 2019-2020

TIM 17 LUB 9 HLIS 2020

Hnub Tsib Lis Piam Nees Nkaum Plaub Nruab Xyoo A Nruab Lis Piam Xyoo II

Hwm LN Robert Bellarmine, ua Tswv Qhia thiab Kws cov Txuj Ntshiab

Zaj Nyeem Ib: 1 KLN 15: 1-11

1 Kwv tij sawv daws, kuv rov qab hais kom nej nco ntsoov txog lub Moo Zoo uas kuv tau tshaj rau nej; nej tau txais thiab nej kuj nyob ruaj nreb hauv lub Moo Zoo ntawd. 2 Yog nej ntseeg raws nraim li kuv tau tshaj rau nej, mas nej yuav txais kev cawm nyob hauv lub Moo Zoo. Tsis li ntawd mas yog nej lam ntseeg dag xwb. 3 Qhov tseem ceeb dua cov uas kuv tau qhia rau nej kuj yog qhov kuv tus kheej tau txais los thiab, uas yog qhov tias Yes Xus yeem tuag vim peb cov txhaum, raws li Ntawv xub hais tseg lawm; 4 lawv muab nws mus zwm rau hauv ntxa; hnub peb, nws sawv rov qab los raws li Ntawv xub hais tseg lawm; 5 nws yees tawm los rau Pob Zeb pom tas, ces nws kuj tawm tuaj rau pab kaum ob leeg pom thiab. 6 Tom qab ntawd, nws tseem yees tawm los rau ib pab kwv tij muaj tsib puas leej ib txhij pom; cov ntawd, cov coob tseem ua neej nyob los txog tav no, hos muaj qee leej kuj tuag lawm. 7 Tom qab ntxiv, Yes Xus tseem tawm los rau Yas Kos pom, thiab rau tas nws cov Hauv Paus Xa Lus huv tib si pom. 8 Kuv yog tus puag tom tw, kuv zoo xws li ib tug me nyuam yug los tsis haum caij, nws kuj tawm tuaj rau kuv pom thiab. 9 Kuv yog tus me tshaj cov nyob hauv cov Hauv Paus Xa Lus. Kuv tsis tsim nyog hu ua Hauv Paus Xa Lus, vim kuv tau hiam Tswv Ntuj lub Koom Txoos. 10 Tiam sis Tswv Ntuj lub txiaj ntsim tau ua kom kuv yog tus neeg zoo li tam sis no. Nws lub txiaj ntsim nyob hauv kuv, nws tsis nyob dag. Kuv yog tus tau siv zog ua hauj lwm heev tshaj lawv sawv daws huv tib si. Tab sis tsis yog kuv ua, yog Tswv Ntuj lub txiaj ntsim uas nrog kuv nyob ua cov hauj lwm ntawd. 11 Li ntawd txawm yog kuv los yog lawv kuj xij, peb tshaj li cas rau nej ces nej ntseeg li ntawd.

NPN 118: 1B-2, 16AB-17, 28

Txais: (1) Nej ua HUAB TAIS tsaug, vim nws siab zoo.

Nej ua HUAB TAIS tsaug, vim nws siab zoo,
Nws hlub peb tas mus li ib txhiab ib txhis.
Tsev neeg His Xas Lais yuav tsum hais tias :
“Nws hlub peb tas mus li ib txhiab ib txhis.”

Txais: (1) Nej ua HUAB TAIS tsaug, vim nws siab zoo.

“HUAB TAIS txhais xis tsim nyog peb qhuas txog!
HUAB TAIS txhais xis ntaus tsam muaj zog loj!”
Kuv yuav tsis tuag, kuv yuav muaj txoj sia nyob,
kuv yuav tshaj txog HUAB TAIS cov dej num.

Txais: (1) Nej ua HUAB TAIS tsaug, vim nws siab zoo.

Koj yog kuv tus Tswv Ntuj, kuv ua koj tsaug.
Kuv tus Tswv Ntuj, kuv cav tas zog txog koj.

Txais: (1) Nej ua HUAB TAIS tsaug, vim nws siab zoo.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Tas nej sawv daws uas nej khwv thiab ris nra hnyav,
nej tuaj cuag kuv mas, kuv yuav cia nej so los siav.”

Txais: As les lus yas, as les lus yas.

Ntawv Moo Zoo: LK 7: 36-50

36 Muaj ib tug Fas Lis Xais caw Yes Xus mus nrog nws noj mov. Yes Xus chaws mus hauv tus Fas Lis Xais tsev, nws zaum xyab ntawm rooj mov. 37 Muaj ib tug poj niam nyob hauv lub nroog ntawd, yog ib tug neeg txhaum, nws hnov tias Yes Xus noj mov hauv tus Fas Lis Xais ntawd tsev, ces nws nqa ib hwj tshuaj tsw qab tuaj. 38 Nws tuaj nyob ntawm Yes Xus sab nraub qaum, nram Yes Xus ko taw, nws quaj ua kua muag poob los ywg Yes Xus ko taw, ces nws muab nws cov plaub hau saum nws taub hau los so, nws nwj Yes Xus ko taw tsis tseg, thiab muab tshuaj tsw qab los pleev Yes Xus ko taw. 39 Tus Fas Lis Xais uas caw Yes Xus tuaj, pom li ntawd, nws xav hauv siab tias : "Yog tias tus neeg no yog ib tug yaj saub, mas phim nws yuav tsum paub tias tus poj niam uas kov nws ntawd yog leej twg thiab yog ib tug neeg zoo li cas, vims nws yog ib tug neeg txhaum !" 40 Ces Yes Xus tsa ncauj teb rau tus Fas Lis Xais tias : "Xis Moos, kuv muaj ib lo lus xav hais rau koj." Tus Fas Lis Xais teb tias : "Xib Hwb, koj hais mas !" 41 “Muaj ob tug neeg tshuav nqi ntawm ib tug tswv qiv nyiaj. Thawj tug tshuav nqi txog tsib puas lub txiaj nyiag ; lwm tus tshuav nqi txog tsib caug lub txiaj nyiag. 42 Nkawd ob leeg tsis muaj dab tsi them rov qab, ces tus tswv qiv nyiaj cia li zam rau nkawd ob leeg. Ob tug ntawd, tus twg yuav nyiam tus tswv qiv nyiaj dua ?" 43 Xis Moos teb tias : "Kuv xav mas yog tus uas tus tswv qiv nyiaj zam nuj nqis ntau dua rau." Yes Xus hais rau Xis Moos tias : "Koj txiav raug lawm." 44 Yes Xus tig mus ntsia tus poj niam, nws hais rau Xis Moos tias : "Koj puas pom tus poj niam no ? Kuv los hauv koj tsev, koj tsis tau hliv dej los ntxuav kuv ko taw; hos, tus poj niam no, nws muab kua muag los ywg kuv ko taw, thiab nws muab plaub hau los so kuv ko taw. 45 Koj tsis tau nwj kuv, hos tus poj niam no, txij thaum kuv chaws los hauv no, mas nws nwj kuv ko taw tsis tseg. 46 Koj tsis tau pleev roj rau saum kuv taub hau, hos tus poj niam no hliv tshuaj tsw qab pleev kuv ko taw. 47 Yog vim qhov ntawd, mas kuv hais rau koj : tus poj niam no tau ua txhaum ntau, tab sis nws cov txhaum daws tas lawm, vim nws muaj kev nyiam loj kawg nkaus; hos tus uas luag zam rau nws tsawg, mas nws kuj nyiam tsawg thiab." 48 Ces Yes Xus hais rau tus poj niam tias : "Koj cov txhaum daws tas lawm." 49 Cov neeg nrog Yes Xus koom rooj mov, nyias xav nyias twj ywm tias : "Tus ntawd yog leej twg, ua cas nws yuav daws txhaum tau ?" 50 Yes Xus hais rau tus poj niam tias : "Koj lub siab ntseeg cawm koj lawm. Koj rov mus nyob kaj siab lug mog."

TIM 18 LUB 9 HLIS 2020

Hnub Rau Lis Piam Nees Nkaum Plaub Nruab Xyoo A Nruab Lis Piam Xyoo II

Zaj Nyeem Ib: 1 KLN 15: 12-20

12 Yog peb twb tshaj tias Leej Pleev sawv hauv cov tuag rov los lawm, vim li cas, ho muaj tej tus hauv nej hais tias tsis muaj kev sawv hauv cov tuag rov los ? 13 Yog cov tuag tsis muaj kev sawv rov los, mas Leej Pleev kuj tsis tau sawv rov los thiab. 14 Yog Leej Pleev tsis tau sawv rov los, mas peb txoj kev tshaj Ntuj Lus kuj tsis muaj qa hau dab tsi li, nej txoj kev ntseeg los kuj yog ib txoj kev tsis muaj qab hau dab tsi li thiab. 15 Ces peb yog Tswv Ntuj ib co tim khawv cuav, vim peb tau tshaj meej tias Tswv Ntuj tau tsa nws Leej Pleev sawv rov los lawm, yog tias nws twb tsis tau tsa thiab yog tias cov tuag yeej tsis sawv rov los li. 16 Vim tias yog cov tuag tsis sawv rov los tseeb tiag, mas Leej Pleev los kuj tsis tau sawv rov los li thiab. 17 Yog Leej Pleev tsis sawv rov los, ces nej txoj kev ntseeg yog ib txoj kev dag, hos nej kuj tseem nyob hauv nej cov txhaum li qub xwb. 18 Thiab cov uas tau mus tsaug zog nyob hauv Leej Pleev lawd, mas lawv kuj ploj mus tag lawm xwb. 19 Ces peb cov uas nyob hauv tiam neej no peb tsuas tso siab rau Leej Pleev xwb, mas peb yog cov neeg txom nyem tshaj ib tsoom tib neeg tas huv tib si.
20 Tab sis tsis yog li ntawd; Leej Pleev yeej sawv hauv cov tuag rov los lawm tiag tiag. Nws yog thawj phaum txiv ntawm kev sawv rov los nyob hauv ib tsoom neeg uas mus tsaug zog lawd.

NPN 17: 1BCD, 6-7, 8B+15

Txais: (15b) Huab Tais, thaum koj lub hwj chim tawm tuaj,
kuv yuav muaj kev zoo siab puv nkaus.

HUAB TAIS, thov koj mloog ib rooj plaub ncaj ncees;
Koj cuab pom ntseg rau kuv lub suab quaj,
Koj tig ntsej los rau kuv lo lus thov; kuv di ncauj tsis hais lus dag.

Txais: (15b) Huab Tais, thaum koj lub hwj chim tawm tuaj,
kuv yuav muaj kev zoo siab puv nkaus.

Tswv Ntuj, kuv hu txog koj, vim koj yeej yuav teb kuv xwb;
thov koj qaij pob ntseg los rau kuv, thiab mloog kuv lo lus.
Thov qhib koj lub siab hlub loj rau peb pom,
vim koj yog tus cawm seej uas cov neeg khiav los nkaum
hauv koj phab xis, kom lawv dim ntawm cov neeg ntxub lawv.

Txais: (15b) Huab Tais, thaum koj lub hwj chim tawm tuaj,
kuv yuav muaj kev zoo siab puv nkaus.

Thov koj zais kuv rau hauv koj phab tis qhov ntxoov,
Kuv yeej yuav tau pom koj lub ntsej muag nyob hauv txoj kev ncaj;
kuv tsim dheev los, kuv yuav zoo siab hlo tau nyob ze ntawm koj.

Txais: (15b) Huab Tais, thaum koj lub hwj chim tawm tuaj,
kuv yuav muaj kev zoo siab puv nkaus.

As Les Lus yas: MT 11: 25

Txais: As les lus yas, as les lus yas.

Txiv, kuv cav lus zoo txog koj, Huab Tais kav lub ntuj lub teb,
vim koj qhib tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 8: 1-3

1 Yes Xus taug kev ntawm ib lub nroog los ib lub zos mus rau lwm lub, nws qhia thiab tshaj lub Moo Zoo txog Tswv Ntuj lub Ceeb Tsheej rau sawv daws. Pab Kaum Ob leeg nrog Yes Xus mus, 2 thiab tseem muaj ib co poj niam uas Yes Xus tau kho lawv zoo hlo, lawv dim ntawm dab phem thiab dim ntawm lawv tus mob lawm, muaj Mab Liab uas luag hu ua Mas Ntas Las, yog tus uas Yes Xus tau ntiab xya tus dab phem tawm hauv nws mus, 3 muaj Yos As Nas, uas yog Tshus Xas, Hes Los tus tim xyoob tus poj niam, muaj Xus Xas Nas thiab coob leej ntxiv. Lawv muab lawv lub cuab tam los tsob hwb Yes Xus thiab nws cov neeg.

Tim 19 lub 9 Hlis 2020

Hnub Xya Lis Piam Nees Nkaum Plaub Nruab Xyoo A Nruab Lis Piam Xyoo II

Hwm LN Januarius, Tswv Qhia tuag ua Tim Khawm

Zaj Nyeem Ib: 1 KLN 15: 35-37, 42-49

Cov kwv tij nkauj muad:
35 Ib txhia yuav nug tias : “Cov neeg tuag yuav sawv rov los zoo li cas ? Lawv yuav muaj ib lub cev zoo li cas thaum lawv sawv rov los ?” 36 Neeg vwm! Yam koj tseb, yog nws tsis tuag, mas nws yuav tsis rov muaj txoj sia li. 37 Yam koj tseb, tsis tau muaj lub cev zoo li yam uas twb hlob tiav lawm, koj tsuas tseb ib lub noob qhuav xwb, xws li ib lub noob nplej los lwm yam noob xwb.
42 Cov tuag yuav sawv rov los kuj yuav yog zoo li ntaw thiab: thaum tseb mas yog ib lub cev txawj lwj, thaum sawv rov los nws tsis txawj lwj ntxiv. 43 Thaum tseb yog ib lub cev nyob hauv txoj kev poob ntsej muag, thaum sawv rov los, yog ib lub cev muaj hwj chim. Thaum tseb yog ib lub cev tsis muaj zog, thaum sawv rov los yog ib lub cev muaj peev xwm. 44 Thaum tseb yog ib lub cev nqaij tawv, thaum sawv rov los yog ib lub cev nyob sab ntsuj plig lawm. Yog muaj ib lub cev nqaij tiag, mas kuj yuav tsum muaj ib lub cev nyob sab ntsuj plig thiab.
45 Muaj lus sau tseg tias : “Thawj tug tib neeg, As Das, yog ib tug xwm zeej tshwm los ciaj sia.” Tus As Das tom qab no, yog ib tug ntsuj plig pub tau txoj sia. 46 Tab sis, tsis yog tus neeg sab ntsuj plig xub tawm los; yog tus sab nqaij tawv xub tawm los, ces tus sab ntsuj plig mam tawm los tom qab. 47 Thawj tus tib neeg, nws tawm ntawm av los, nws yog ntiaj teb tug. Hos tus neeg tim ob, nws tawm saum ntuj los. 48 Tus neeg ntiaj teb zoo li cas, mas cov neeg ntiaj teb kuj zoo li ntawd; hos tus neeg qaum ntuj zoo li cas, mas cov neeg qaum ntuj kuj zoo li ntawd thiab. 49 Ib yam li peb xub hnav tus neeg ntiaj teb tus duab, peb kuj yuav tau hnav tus neeg qaum ntuj tus duab thiab.

NPN 56: 10C-12, 13-14

Txais: (14) Kuv yuav taug kev ntawm Tswv Ntuj xub ntiag
nyob hauv tsoom neeg ciaj txoj kev kaj.

Zaum no kuv paub lawm tias Tswv Ntuj nrog nraim kuv.
Kuv lub koob meej yog nyob hauv Tswv Ntuj,
Kuv tso siab rau Tswv Ntuj, kuv tsis ntshai;
Leej tib neeg yuav ua tau dab tsi rau kuv?

Txais: (14) Kuv yuav taug kev ntawm Tswv Ntuj xub ntiag
nyob hauv tsoom neeg ciaj txoj kev kaj.

Tswv Ntuj, kuv nco ntsoov cov yeem kuv tau fiv rau koj,
Kuv yuav ua cov thaj cav lus zoo ua tsaug pauj rau koj.
Vim koj tau cawm kuv dim ntawm lub qhov tuag,
koj tau hwj kuv ko taw kom txhob ntog,
kom kuv tau taug kev ntawm Tswv Ntuj xub ntiag
nyob hauv tsoom neeg ciaj txoj kev kaj.

Txais: (14) Kuv yuav taug kev ntawm Tswv Ntuj xub ntiag
nyob hauv tsoom neeg ciaj txoj kev kaj.

As Les Lus yas: LK 8: 15

Txais: As les lus yas, as les lus yas.

Cov uas muaj lub siab loj siab dav coj Lo Lus, lawv txoj hmoov zoo,
lawv txi txiv vim lawv coj ruaj nreb tsis tso tseg.

Txais: As les lus yas, as les lus yas.

Ntawv Moo Zoo: LK 8: 4-15

4 Thaum ntawd muaj tej pab neeg coob coob tuaj sib sau ua ke, lawv tuaj txhua lub nroog tuaj cuag Yes Xus. Ces nws ua paj lug hais lus li no : 5 "Tus tseb nplej tawm mus tseb nws cov noob nplej. Thaum nws tseb, muaj ib co noob poob rau ntawm txoj kev; cov noob ntawd raug muab tsuj tas, thiab noog ya saum ntuj los muab khaws noj tas huv si lawm. 6 Muaj ib co noob poob rau saum av pob zeb, cov noob ntawd tuaj yub, tab sis cov yub cia li qhuav tas, vim av tsis noo. 7 Muaj ib co noob poob rau hauv cov pos, cov pos nrog cov yub nplej hlob ua ke, tab sis cov pos laum cov nplej tuag tas. 8 Muaj ib co noob poob rau hauv thaj av zoo, cov yub nplej hlob tuaj, cov nplej txi txiv txog pua lub." Yes Xus hais cov lus no tas, nws hais nrov nrov tias : "Leej twg muaj pob ntseg mloog, yuav tsum mloog !"
9 Ces Yes Xus cov thwj tim nug nws saib zaj paj lug no lub ntsiab yog dab tsi. 10 Yes Xus hais tias : "Ntuj pub kom nej paub tej txuj ci tob tob txog Tswv Ntuj lub Ceeb Tsheej, tab sis rau luag tej, mas tsuas yog lus ua paj lug hais xwb kom xwv lawv ntsia los lawv tsis pom, lawv hnov los lawv tsis to taub.
11 Zaj paj lug ntawd lub ntsiab txhais li no : Cov noob, yog Tswv Ntuj Lo Lus. 12 Cov noob uas poob ntawm txoj kev, yog cov uas tau hnov, tab sis dab phem tuaj ces nws rho Lo Lus tawm hauv lawv lub siab mus, kom lawv txhob ntseeg, tsam lawv tau txais kev cawm. 13 Cov uas poob rau saum pob zeb, yog cov neeg uas thaum lawv hnov Lo Lus, lawv zoo siab hlo txais. Tab sis lawv tsis muaj cag, lawv tsuas ntseeg ib ntus xwb, lub caij lawv raug kev sim siab, lawv cia li tso tseg. 14 Cov noob uas poob rau hauv hav pos, yog cov neeg uas tau hnov Lo Lus, tab sis nyob hauv lawv lub neej, muaj tej kev txhawj xeeb, tej kev nyiam nyiaj txiag, tej kev nyiam ua lom zem kom zoo lub siab lub cev los laum Lo Lus, ces Lo Lus txi tsis taus txiv. 15 Hos cov noob poob hauv thaj av zoo, yog cov uas tau hnov Lo Lus, lawv khaws Lo Lus rau hauv lawv lub siab loj siab dav, ces lawv txi txiv vim lawv coj ruaj nreb raws li lo lus tsis tso tseg li."

Tim 21 lub hlis 2020

Hnub Ob Lis Piam Nees Nkaum Tsibb Nruab Xyoo A Nruab Lis Piam Xyoo II

Hwm LN Mas Tais, tus Hauv Paus Xa Lus

Zaj Nyeem Ib: ES FES XOS 4: 1-7, 11-13

Cov kwv tij nkauj muad:
1 Kuv, ib tug neeg raug txim nyo hauv Huab Tais, kuv thov txhawb nej, kom nej coj ib lub neej phim txoj kev uas Ntuj hu nej los taug. 2 Nej yuav ua neeg tsis muab hlob ua neeg siab mos siab zoo, nej yuav ua siab ntev ib leeg txhawb ib leeg nyob hauv txoj kev nyiam. 3 Nej yuav siv zog txuag kom nej muaj kev koom siab koom ib tug Leej Tswv Yim xwb nyob hauv txoj kev thaj yeeb, 4 kom tsuas muaj tib lub Cev thiab tib tug Leej Tswv Yim xwb, ib yam li nej raug hu los taug tib txog kev tso siab raws li Ntuj tau hu nej; 5 kom tsuas muaj tib tug Huab Tais, tib txoj kev ntseeg, tib lub cim ntxuav, 6 tib tug Tswv Ntuj ua sawv daws Txiv, tus nyob siab dua sawv daws, nws hla ntawm sawv daws tuaj, thiab nws nyob hauv sawv daws. 7 Peb nyias tau txais txiaj ntsim npaum li Leej Pleev yeem pub rau nyias.
11 Nws pub kom ib txhia ua Hauv Paus Xa Lus, ib txhia ua Yaj Saub, ib txhia ua tub tshaj lub Moo Zoo, ib txhia ua tswv zov pab yaj thiab ua xib hwb, 12 kom muaj ntau txoj kev nyob hauv cov ntshiab los leg Tswv Ntuj tes dej num, kom tau txhawb txhim Leej Pleev lub Cev, 13 mus txog thaum peb sawv daws los koom tau ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, ces peb yuav yog tus tib neeg hlob tiav txiv tiav txuj tiav ci, zoo raws nraim li Leej Pleev lub Cev uas loj hlob tiav log, siab txaus thiab puv ntoob lawm.

NPN 19: 2-3, 4-5

Txais: (5) Lawv lo lus xa moo nrov mus thoob ntiaj teb.

Cov txheej ntuj saud tshaj txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo nrov txog tim npoo ntiaj teb kawg.

Txais: (5) Lawv lo lus xa moo nrov mus thoob ntiaj teb.

As Les Lus Yas - Te Deum

Txais: As les lus yas, as les lus yas.

Tswv Ntuj, peb cav txog koj,
peb qw tshaj tias koj yog Huab Tais;
Npoj Hauv Paus Xa Lus uas
muaj koob meej lawv cav txog koj.

Txais: As les lus yas, as les lus yas.

Ntawv Moo Zoo: MT 9: 9-13

9 Yes Xus tawm mus, thaum nws tab tom mus kev, nws pom ib tug neeg hu ua Mas Tais, zaum ntawm lub rooj sau se. Yes Xus hais rau nws tias : "Koj raws kuv mus !" Ces tus neeg ntawd sawv tsees raws Yes Xus mus.
10 Thaum Yes Xus zaum noj mov hauv Mas Tais tsev, muaj coob leej neeg sau se thiab neeg txhaum tuaj nrog Yes Xus thiab cov thwj tim noj mov. 11 Cov Fas Lis Xais pom li ntawd, ces lawv hais rau cov thwj tim tias : "Vim li cas nej tus Xib Hwb nrog cov sau se thiab cov neeg txhaum noj mov ?" 12 Tab sis Yes Xus twb hnov qhov lawv hais lawm, nws thiaj teb tias : "Tsis yog cov neeg noj qab nyob zoo thiaj yuav vam txog kws kho mob, tsuas yog cov neeg mob thiaj vam txog xwb. 13 Nej yuav mus kawm lo lus no lub ntsiab : 'Qhov kuv xav tau yog txoj kev khuv leej, tsis yog thaj txi ntuj.' Vim kuv tsis yog tuaj hu cov neeg ncaj, kuv tuaj hu cov neeg txhaum.”

Tim 22 lub 9 Hlis 2020

Hnub Peb Lis Piam Nees Nkaum Tsib Nruab Xyoo A Nruab Lis Piam Xyoo II

Zaj Nyeem Ib: COV PAJ LUG 21: 1-6, 10-13

1 Tus vaj lub siab zoo puav tam li ib tug dej ntws uas nyob hauv HUAB TAIS lub xib teg,
nws xav kom nkhaus mus li cas los nws ua tau tas.
2 Ib tug neeg saib nws tej kev yeej ncaj tas txhua txoj,
tiam sis HUAB TAIS yog tus yuav luj neeg lub siab.
3 Ua raws li qhov zoo thiab qhov ncaj mas
ntxim HUAB TAIS siab dua muab tsiaj los hlawv txi ntuj rau nws.
4 Lub qhov muag saib tsis taus luag, lub siab muab hlob,
lub teeb taws rau cov neeg phem, tej no yog kev txhaum.
5 Tus neeg mob siab rau, nws npaj yam twg yuav tau yam ntawd,
6. Txoj kev siv tus nplaig dag los nrhiav kev nplua nuj,
mas yog ib lub npuas cua thiab yog ib rooj ntxiab coj mus rau kev tuag.
10 Tus neeg siab phem tus ntsuj plig tsuas xav txog kev ua phem xwb;
tus neeg nyob ze ntawm nws nrhiav tsis tau kev khuv leej ntawm nws li.
11 Thaum tus neeg khav theeb raug txim, mas tus neeg me thiaj yog tus thoob tsib,
Thaum muaj neeg qhia tus neeg thoob tsib, mas nws paub ntau yam tuaj.
12 Tus neeg ncaj ncees saib ntsoov tus neeg phem lub tsev;
tus neeg phem yuav poob rau kev puas ntsoog.
13 Tus neeg uas pos pob ntseg kom txhob hnov tus pluag lub suab quaj,
Nws kuj yuav tau quaj thiab yuav tsis muaj neeg hnov nws ib yam.

NPN 119: 1, 27, 30, 34, 35, 44

Txais: (35) Huab Tais, thov koj coj kuv kev mus taug raws koj cov lus qhia.

Cov tau txoj hmoov zoo yog cov neeg coj tus cwj pwm zoo tsis chaw xyeej,
yog cov ua raws nraim HUAB TAIS Txoj Cai.

Txais: (35) Huab Tais, thov koj coj kuv kev mus taug raws koj cov lus qhia.

Thov koj ua kom kuv to taub txoj kev coj raws koj cov lus qhuab qhia,
kuv yuav xav ntsoov txog koj cov dej num muaj hwj chim.

Txais: (35) Huab Tais, thov koj coj kuv kev mus taug raws koj cov lus qhia.

Kuv tau xaiv txoj kev tseeb taug,
kuv tau muab koj txoj cai tso nyob rawv ntawm kuv hauv ntej.

Txais: (35) Huab Tais, thov koj coj kuv kev mus taug raws koj cov lus qhia.

Thov koj ua kom kuv muaj kev to taub, ces kuv thiaj yuav coj koj Txoj Cai,
thiab kuv yuav muab tas kuv lub siab lub ntsws los mloog koj Txoj Cai.

Txais: (35) Huab Tais, thov koj coj kuv kev mus taug raws koj cov lus qhia.

Thov koj coj kuv kev mus taug raws koj cov lus qhia,
vim kuv txaus siab nyob hauv koj cov lus qhia

Txais: (35) Huab Tais, thov koj coj kuv kev mus taug raws koj cov lus qhia.

Kuv yuav khaws koj Txoj Cai coj tas mus li,
tsis muaj caij tag tsis muaj caij kawg mus ib txhiab ib txhis.

Txais: (35) Huab Tais, thov koj coj kuv kev mus taug raws koj cov lus qhia.

As Les Lus Yas: LK 11: 28

Txais: As les lus yas, as les lus yas.

Cov muaj txoj hmoov zoo yog cov mloog Tswv Ntuj Lo Lus,
thiab coj raws nraim li ntawd.

Txais: As les lus yas, as les lus yas.

Ntawv Moo Zoo: LK 8: 19-21

19 Yes Xus niam thiab nws cov kwv tij tuaj, tab sis lawv tuaj cuag nws tsis tau vim muaj neeg coob.
20 Muaj neeg hais rau Yes Xus tias : "Koj niam thiab koj cov kwv tij tuaj sawv nraud, lawv xav pom koj."
21 Tab sis Yes Xus teb rau lawv tias : "Kuv niam thiab kuv cov kwv tij yog cov uas mloog Tswv Ntuj Lo Lus thiab coj raws nraim li ntawd.”

Tim 23 lub 9 Hlis 2020

Hnub Plaub Lis Piam Nees Nkaum Tsib Nruab Xyoo A Nruab Lis Piam Xyoo II

Hwm LN Padre Pio nyob Pietrelcina

Zaj Nyeem Ib: COV PAJ LUG 30: 5-9

5 Tswv Ntuj txhua lo lus raug sim tas tib si; nws yog daim leem phiaj thaiv cov uas tuaj vam khom nws.
6 Nej tsis txhob ntxiv dab tsi rau nws cov lus, tsam nws rhuav nej ces nej yuav tau lub npe tias nej yog nees dag.
7 Kuv thov ob yam ntawm koj, thov koj tsis txhob tsis kam pub rau kuv ua ntej kuv lub caij tuag:
8 Thov koj tshem txoj kev cuav thiab kev dag mus deb ntawm kuv; koj tsis txhob ua kom kuy pluag los kuv nplua nuj, koj tsuas pub kom kuv muaj noj muaj haus raws li qhov kuv yuav tsum muaj xwb,
9 Tsam yog kuv muaj noj dhau, ces kuv yuav tsis lees koj, kuv yuav hais tias: “Huab Tais yog leej twg?” Los tsam yog kuv ho pluag dhau ces kuv ua tub sab thiab tsis hwm kuv tus Tswv Ntuj lub npe.

NPN 119: 29, 72, 89, 101, 104, 163

Txais: (105) Huab Tais, koj lo lus yog lub teeb ci rau kuv ko taw pom kev.

Thov koj tshem txoj kev dag mus deb kuv,
koj muab koj Txoj Cai pub ua txiaj ntsim rau kuv.

Txais: (105) Huab Tais, koj lo lus yog lub teeb ci rau kuv ko taw pom kev.

Txoj Cai uas tawm hauv koj lub ncauj los
muaj nqe rau kuv dua ib txhab kub ib txhab nyiaj.

Txais: (105) Huab Tais, koj lo lus yog lub teeb ci rau kuv ko taw pom kev.

HUAB TAIS, koj lo lus nyob mus li,
nws nyob ruaj nreb zoo li cov txheej ntuj saud.

Txais: (105) Huab Tais, koj lo lus yog lub teeb ci rau kuv ko taw pom kev.

Kuv cheem kuv ko taw ntawm txhua txoj kev phem,
kom kuv coj tau raws koj cov lus.

Txais: (105) Huab Tais, koj lo lus yog lub teeb ci rau kuv ko taw pom kev.

Vim koj cov lus qhuab qhia, kuv thiaj txawj xav tom ntej tom qab,
kuv thiaj ntxub tej kev dag kev cuav tas huv si.

Txais: (105) Huab Tais, koj lo lus yog lub teeb ci rau kuv ko taw pom kev.

kuv tsis nyiam kev dag li, kuv ntxub tas nrho,
qhov kuv nyiam yog koj Txoj Cai.

Txais: (105) Huab Tais, koj lo lus yog lub teeb ci rau kuv ko taw pom kev.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej nyob ze lawm,
Nej cia li lees txhaum thiab ntseeg lub Moo Zoo.

Txais: As les lus yas, as les lus yas.

Ntawv Moo Zoo: LK 9: 1-6

1 Yes Xus hu Pab Kaum Ob los, nws muab hwj huam thiab peev xwm yuam tau txhua tus dab thiab kho tau tej kev mob nkeeg kom zoo rau lawv.
2 Nws xa lawv mus tshaj Tswv Ntuj lub Ceeb Tsheej thiab kho cov neeg mob kom zoo hlo.
3 Yes Xus hais rau lawv tias : "Nej tsis txhob nqa dab tsi taug kev li, txhob nqa pas nrig, txhob ris hnab, txhob ntim mov, txhob nqa nyiaj li; thiab nej tsis txhob muaj leej twg yuav nqa ob lub tsho li.
4 Nej chaws mus hauv lub tsev twg, nej yuav nyob hauv lub tsev ntawd mus txog hnub nej rov qab ntawd mus.
5 Hos cov neeg uas tsis txais nej, mas thaum nej tawm hauv lub nroog ntawd mus, mas nej nchos tej plua av lo nej ko taw huv si tseg, kom tau ua pov thawj tsis zoo txog lawv."
6 Ces cov thwj tim mus ib lub zos dhau ib lub zos, lawv tshaj lub Moo Zoo thiab kho cov mob zoo tas nyob txhua qhov chaw tib si.

Tim 24 lub 9 Hlis 2020

Hnub Tsib Lis Piam Nees Nkaum Tsib Nruab Xyoo A Nruab Lis Piam Xyoo II

Zaj Nyeem Ib: KOS ES LES 1: 2-11

2 Kos Es Les hais tias : "Yam yaj ntshis ntawm tej yam yaj ntshis, yam yaj ntshis ntawm tej yam yaj ntshis! Txhua yam yog yaj ntshis!
3 Tib neeg tau tus qab hau dab tsi ntawm nws txoj kev khwv ciaj khwv tuag, tiv tshav kub hauv lub qab hnub?
4 Ib tiam neeg dhau lawm, lwm tiam tuaj, hos lub ntiaj teb nws nyob nws li qub.
5 Lub hnub tawm tuaj, lub hnub poob qho, ces nws maj nroos mus rau qhov chaw uas nws tawm tuaj dua.
6 Cua nplawm mus rau naj fab, cua tshuab mus lawm pej fab, cua kiv thiab kiv ncig lees, cua rov qab mus pib nplawm ntawm nws qhov qub chaw tuaj.
7 Tus dej twg kuj ntws mus hauv hiav txwv, tab sis lub hiav txwv tsis txawj puv li; cov dej kuj ntws tas zog mus rau qhov qub chaw uas lawv ntws mus rau.
8 Txhua yam nyuaj hais tawm; tsis muaj ib yam yus yuav txawj piav tau. Qhov muag ntsia ntsoov los yeej ntsia tsis txaus yees, pob ntseg mloog ntsoov los yeej mloog tsis pov khawv.
9 Qhov twb muaj lawm tseem yuav muaj dua tuaj; qhov twb ua lawm tseem yuav ua dua ntxiv. Tsis muaj ib yam tshiab nyob hauv lub qab hnub no li.
10 Muaj tej yam uas yus hais tias : "Qhov no yog ib qho tshiab !" Tab sis yam ntawd twb muaj tau ntau tiam ua ntej yus lawm.
11 Yus tsis nco txog tiam neeg thaum ub li lawm; lwm hnub cov uas yuav los lawv qab tiam tom ntej no kuj yuav tsis nco txog lawv lawm thiab.

NPN 90: 3-4, 5-6, 12-13, 14+17BC

Txais: (1) Nyob hauv txhua tiam, Huab Tais, koj yog peb qhov chaw nkaum.

Koj cia neeg hloov rov mus ua plua av,
koj hais tias: “Me nyuam neeg, nej rov mus.”
Ib txhiab xyoo rau koj zoo li yog nag hmo xwb,
vim nws dhau mus lawm,
los tsuas zoo li ib lub caij zov keeb thaum hmo ntuj xwb.

Txais: (1) Nyob hauv txhua tiam, Huab Tais, koj yog peb qhov chaw nkaum.

Koj ua kom lawv tas thaum nyob nruab dab ntub,
tag kis sawv ntxov lawv zoo li cov nroj tsuag pib hloov:
thaum hnub tuaj nroj tsuag sawv ntsuab xiab,
tiam sis yav tsaus ntuj nws twb ntsws tas nphob tas.

Txais: (1) Nyob hauv txhua tiam, Huab Tais, koj yog peb qhov chaw nkaum.

Thov koj qhia peb txawj suav peb cov hnub cov hmo kom zoo,
kom peb txawj muaj kev thoob tsib hauv nruab siab.
HUAB TAIS, thov koj rov qab los mas! Yuav tos koj hov ntev?
Thov koj khuv leej koj cov tub txib mas!

Txais: (1) Nyob hauv txhua tiam, Huab Tais, koj yog peb qhov chaw nkaum.

Sawv ntxov tsees, thov koj muab koj txoj kev ua zoo rau peb kom puv npo,
ces peb yuav qw zoo siab hom khaj txhua hnub hauv peb lub neej.
Thov koj ua kom cov hauj lwm peb txhais tes ua vam meej tuaj,
Thov koj ua kom cov hauj lwm peb txhais tes khwv vam meej mus!

Txais: (1) Nyob hauv txhua tiam, Huab Tais, koj yog peb qhov chaw nkaum.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: "Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis hla ntawm kuv mus.”

Txais: As les lus yas, as les lus yas.

Ntawv Moo Zoo: LK 9: 7-9

7 Vaj txheeb Hes Los hnov txog txhua yam tshwm sim, nws tsis pom qab xav, vim ib txhia hais tias : "Yog Zam sawv hauv cov tuag rov los lawm."
8 Qee leej hais tias : "Yog Es Lias tawm tuaj." Lwm cov tseem hais tias : "Ib tug yaj saub thaum ub sawv rov los."
9 Tab sis Hes Los hais tias : "Zam, mas kuv kom luag txiav nws caj dab lawm. Ua li tus uas kuv hnov hais tias nws ua tej yam loj li ntawd yog leej twg?" Ces Hes Los nrhiav kom tau kev pom Yes Xus.

Tim 25 lub 9 Hlis 2020

Hnub Rau Lis Piam Nees Nkaum Tsib Nruab Xyoo A Nruab Lis Piam Xyoo II

Zaj Nyeem Ib: KOS ES LES 3: 1-11

1 Nyob hauv lub qab ntuj no, muaj ib lub sij hawm teem cia rau tas puas tsav yam, thiab muaj ib lub caij cia ua tas puas tsav yam. 2 Muaj ib lub caij yug los, thiab ib lub caij tuag; muaj ib lub caij cog, thiab ib lub caij rho;
3 muaj ib lub caij muab tua, thiab ib lub caij kho kom zoo; muaj ib lub caij rhuav, thiab ib lub caij txhim tsa;
4 muaj ib lub caij quaj, thiab ib lub caij luag; muaj ib lub caij nyiav, thiab ib lub caij dhia lom zem;
5 muaj ib lub caij txawb pob zeb, thiab ib lub caij khaws pob zeb; muaj ib lub caij sib puag, thiab ib lub caij txav deb ntawm txoj kev sib puag;
6 muaj ib lub caij nrhiav, thiab ib lub caij ploj; muaj ib lub caij muab khaws cia, thiab ib lub caij muab pov tseg;
7 muaj ib lub caij dua ntaub, thiab ib lub caij xaws ntaub; muaj ib lub caij nyob ntsiag to, thiab ib lub caij hais lus.
8 Muaj ib lub caij nyiam, thiab ib lub caij ntxub; muaj ib lub caij ua tsov ua rog, thiab ib lub caij nyob thaj yeeb.
9 Tus neeg uas siv zog khwv ciaj khwv tuag nws puas tau tus dab tsi tshaj?
10 Kuv tau xav txog txoj hauj lwm uas Tswv Ntuj muab rau tib neeg cov tub kom lawv ua lawm.
11 Tswv Ntuj tau ua txhua yam kom zoo phim nyias lub sij hawm; nws muab yam uas tsis muaj caij kawg tso rau hauv neeg nruab siab, tab sis neeg yeej nrhiav tsis tau li tias xyov Tswv Ntuj ua dab tsi txij thaum lub hauv paus mus txog thaum lub ntsis.

NPN 144: 1B+2ABC, 3-4

Txais: (1) Thov kom HUAB TAIS, uas yog kuv lub tsua, nto koob meej!

Thov kom HUAB TAIS, uas yog kuv lub tsua, nto koob meej,
Nws yog kuv qhov chaw muaj kev khuv leej, yog kuv lub yeej ntsa zeb,
Yog kuv lub loog ruaj nreb, yog tus cawm kuv dim,
Nws yog kuv daim leem phiaj, kuv tso siab rau nws .

Txais: (1) Thov kom HUAB TAIS, uas yog kuv lub tsua, nto koob meej!

HUAB TAIS, leej tib neeg yog dab tsi koj thiaj saib nws,
neeg leej tub yog leej twg koj thiaj nco txog nws?
Leej tib neeg zoo li ib nyuag qhov pa cua xwb,
nws lub neej zoo li tus duab ntxoov ntxoo uas dua mus.

Txais: (1) Thov kom HUAB TAIS, uas yog kuv lub tsua, nto koob meej!

As Les Lus Yas: MK 10: 45

Txais: As les lus yas, as les lus yas.

Neeg Leej Tub tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: LK 9: 18-22

18 Muaj ib zaug, Yes Xus mus teev Ntuj nws ib leeg, tsuas muaj nws cov thwj tim nrog nws xwb, Yes Xus nug lawv tias : "Cov neeg coob hais tias kuv yog leej twg ?"
19 Cov thwj tim teb tias : "Ib txhia hais tias yog Zam Ntxuav Plig, ib txhia hais tias yog Es Lias, tseem muaj lwm cov hais tias yog ib tug yaj saub thaum ub sawv rov los lawm."
20 Yes Xus hais rau lawv tias : "Nej ne, nej hais tias kuv yog leej twg ?" Pob Zeb teb tias : "Koj yog Tswv Ntuj Leej Pleev."
21 Ces Yes Xus cheem thiab txwv lawv kom txhob hais qhov ntawd rau leej twg li.
22 Nws hais tias : "Neeg Leej Tub yuav tsum raug txom nyem loj. Cov txwj laus, cov Thawj Leej Choj, thiab cov Kws Ntawv Ntshiab yuav xyeej tsis kam txais nws, ces nws yuav raug luag tua, tab sis hnub peb nws yuav sawv rov los."

Tim 26 lub 9 Hlis 2020

Hnub Xya Lis Piam Nees Nkaum Tsib Nruab Xyoo A Nruab Lis Piam Xyoo II

Hwm LN Cosmas thiab LN Damian, tuag ua Tim Khawv

Zaj Nyeem Ib: KOS ES LES 11: 9—12:8

9 Me tub hluas, koj kav tsij muaj kev lom zem thaum koj lub caij hluas, ces koj yuav muaj kev zoo siab thaum koj tseem hluas mog. Koj mus raws koj lub siab pus koj mus, koj mus raws koj qhov muag pom. Tab sis koj yuav tsum paub tias Tswv Ntuj yuav txiav txim rau koj txog tej ntawd tas tib si. 10 Koj muab kev tu siab tshem mus deb ntawm koj lub siab, koj muab kev phem tshem mus deb ntawm koj lub cev, vim lub caij hluas thiab lub caij pib sawv ua neej yuav yaj ntshis mus.
12 1 Koj yuav nco txog tus tsim koj los thaum koj tseem hluas mog, thaum tseem tsis tau muaj cov hnub cov hmo uas koj raug kev txom nyem, thiab thaum tsis tau txog cov xyoo uas koj hais tias : "Kuv tsis nyiam lub caij ntawd kiag li;"
2 thaum lub hnub thiab qhov pom kev, lub hli thiab cov hnub qub tseem tsis tau tsaus, thaum ntuj los nag tas huab tseem tsis tau rov sawv;
3 thaum tsis tau txog hnub uas cov saib lub vaj lub tsev yuav tshee na, cov txiv neej muaj zog cus plaws yuav khoov nkoos; cov poj niam zom zeb yuav tseg tsis zom zeb ntxiv vim lawv tsawg dhau lawm; hos cov ntsia ntawm qhov rai yuav nyob tsaus ntuj nti,
4 thiab cov qhov rooj qhib mus rau nraum txoj kev yuav raug muab kaw; lub suab zom zeb yuav nrov yau yau; yus tsim los vim muaj noog quaj, hos cov ntxhais hu nkauj lub suab ntsiag zuj zus lawm.
5 Thaum lawv yuav ntshai tej yam nyob siab thiab txhawj txog tej yam nyob ntawm kev; thaum tsob ntoo txiv plauj yuav tawg paj; tus kooj txig yuav mus tsis taus ntxiv; thiab cov txiv xyab txob yuav tsuag tas. vim tus tib neeg mus rau qhov chaw nws yuav zwm av mus li, hos cov quaj cov nyiav yuav quaj taug tej kev;
6 thaum txoj xov nyiaj tseem tsis tau tu nrho, lub ntim kub tsis tau tawg rhe, lub hub ce dej tsis tau ntais ntawm lub qhov dej, lub log hlua rub dej tsis tau poob rau hauv qhov dej;
7 thaum cov plua av tseem tsis tau rov mus ua av li qhov qub, thiab thaum tus ntsuj plig tseem tsis tau rov mus cuag tus Tswv Ntuj uas pub txoj pa.
8 Kos Es Les hais tias : "Yam yaj ntshis ntawm tej yam yaj ntshis, tas puas tsav yam tsuas yog yaj ntshis."

NPN 90: 3-4, 5-6, 12-13, 14+17

Txais: (1) Nyob hauv txhua tiam, Huab Tais, koj yog peb qhov chaw nkaum.

Koj muab neeg hloov rov mus ua plua av,
koj hais tias: “Me nyuam neeg, nej rov mus.”
Vim tias ib txhiab xyoo rau koj zoo li yog nag hmo xwb,
vim nws dhau tas lawm, los tsuas zoo li
ib lub caij zov keeb thaum hmo ntuj xwb.

Txais: (1) Nyob hauv txhua tiam, Huab Tais, koj yog peb qhov chaw nkaum.

Koj ua kom lawv tas thaum nyob nruab dab ntub,
tag kis sawv ntxov lawv zoo li cov nroj tsuag pib hloov:
thaum hnub tuaj, nroj tsuag sawv ntsuab xiab,
tiam sis yav tsaus ntuj nws twb ntsws tas yaj tas.

Txais: (1) Nyob hauv txhua tiam, Huab Tais, koj yog peb qhov chaw nkaum.

Thov koj qhia peb txawj suav peb cov hnub cov hmo kom zoo,
kom peb txawj muaj kev thoob tsib hauv nruab siab.
HUAB TAIS, thov koj rov qab los mas! Yuav tos hov ntev?
Thov koj khuv leej koj cov tub txib!

Txais: (1) Nyob hauv txhua tiam, Huab Tais, koj yog peb qhov chaw nkaum.

Sawv ntxov tsees, thov koj muab koj txoj kev hlub rau peb kom puv npo,
ces peb yuav qw zoo siab hom khaj txhua hnub hauv peb lub neej.
Thov kom Huab Tais peb tus Tswv Ntuj txoj kev hlub yog peb tug.
Thov koj ua kom cov hauj lwm peb txhais tes ua vam meej rau peb!
Thov koj ua kom cov hauj lwm peb txhais tes ua vam meej!

Txais: (1) Nyob hauv txhua tiam, Huab Tais, koj yog peb qhov chaw nkaum.

As Les Lus Yas: 2 TM 1: 10

Txais: As les lus yas, as les lus yas..

Peb tus Cawm Seej Yes Xus Pleev tau rhuav kev tuag,
thiab nws lub Moo Zoo tau ua kom txoj sia nyob mus li ci tawm tuaj.

Txais: As les lus yas, as les lus yas.

Ntawv Moo Zoo: LK 9: 43B-45

43b Sawv daws yoob tas rau qhov Yes Xus tau ua, ces nws hais rau nws cov thwj tim tias :
44 "Nej ua tib zoo cuab pob ntseg mloog kuv cov lus kuv hais rau nej no: Neeg Leej Tub yuav raug luag muab nws cob rau hauv tsoom neeg txhais tes."
45 Tab sis cov thwj tim tsis to taub lo lus ntawd li. Zoo li muaj dab tsi ntis lub ntsiab lawm kom lawv txhob to taub, tiam sis lawv kuj ntshai nug Yes Xus txog lo lus ntawd thiab.

Tim 28 lub 9 Hlis 2020

Hnub Ob Lis Piam Nees Nkaum Rau Nruab Xyoo A Nruab Lis Piam Xyoo II

Hwm LN Lawrence Ruiz thiab Cov, tuag ua Tim Khawv; LN Wenceslaus, tuag ua Tim Khawv

Zaj Nyeem Ib: YOB 1: 6-22

6 Muaj ib hnub Tswv Ntuj cov tshiab tuaj cuag HUAB TAIS, Xas Tas kuj nrog lawv tuaj thiab. 7 HUAB TAIS hais rau Xas Tas tias : "Koj mus qhov twg lod ?" Xas Tas teb tias : "Kuv mus ncig mus ncig los thiab mus taug kev mus mus los los hauv ntiaj teb los." 8 HUAB TAIS hais rau Xas Tas tias : "Koj puas pom kuv tus tub txib Yob ? Nyob ntiaj teb, tsis muaj lwm tus zoo li nws li. Nws yog ib tug neeg ncaj, nws tsis muaj ib qho xyeej thiab nws hwm Tswv Ntuj, nws txav deb ntawm txoj kev ua phem!" 9 Ces Xas Tas teb zoj tias : "Tos Yob hwm Tswv Ntuj los puas yog nws lam hwm dawb hwm do xwb? 10 Puas yog koj twb xov laj kab thaiv ncig nws thiab nws tej vaj tse thiab tas puas tsav yam nws muaj tib si? Koj twb foom hmoov zoo rau nws tej hauj lwm, nws cov tsiaj huam vam puv lub teb chaws. 11 Yog zaum no koj tsa tes rhuav nws lub cuab tam tas huv si, mas nws yeej yuav thuam Ntuj, nws yuav tab meeg tsawm koj lub ntsej muag xwb." 12 HUAB TAIS hais rau Xas Tas tias : "Yog li mas koj xav ua dab tsi rau nws lub cuab tam tas huv si kuj tau nyob ntawm koj siab, tab sis koj tsis txhob kov nws nkaus xwb." Ces Xas Tas tawm ntawm Huab Tais xub ntiag mus lawm.

13 Muaj ib hnub Yob cov tub thiab cov ntxhais tab tom mus noj mov haus cawv tom lawv tus tij laug hlob tsev, 14 txawm muaj ib tug neeg khiav tuaj fi xov rau Yob tias : "Koj cov nyuj tseem tab tom laij teb, cov luj nog zaub nyob ntawm ib sab, 15 ib sij huam cov neeg Xas Npes cia li tuaj puav thiab muab cab mus tas lawm. Lawv xuas ntaj tua koj cov tub txib tas huv si lawm, tshuav kuv ib leeg thiaj dim khiav los hais rau koj xwb." 16 Tus xa xov tseem hais lus, txawm siv muaj lwm tus khiav los txog ntua, nws hais tias : "Tswv Ntuj cov hluav taws poob saum Ntuj los hlawv koj cov yaj thiab cov tub zov yaj tuag tas lawm, tshuav kuv ib leeg thiaj dim los hais rau koj xwb." 17 Tus ntawd tseem hais lus txawm siv muaj dua ib tug los hais tias : "Muaj ib co neeg Kas Ntes, lawv faib ua peb pab tuaj, lawv tuaj ntes koj cov ntxhuav cab mus tas lawm. Lawv xuas ntaj tua cov tub tu ntxhua tuag tas, tshuav kuv ib leeg dim los hais rau koj xwb." 18 Nws tseem hais lus, twb muaj dua ib tug khiav los hais tias : "Koj cov tub thiab cov ntxhais tseem tab tom noj mov haus cawv tom lawv tus tij laug hlob tsev, 19 ib sij huam txawm muaj ib nthwv cua hlob hlob tuaj tom hav suab puam tuaj cia li tuaj ntsawj plaub ces kaum tsev, ces tsev vau los tsuam cov hluas ces lawv tuag tas lawm, tshuav kuv ib leeg dim los hais rau koj paub xwb."

20 Ces Yob sawv tsees dua rhe nws lub tsho, nws muab plaub hau chais tas, nws mus txhos caug ntua khoov ti hauv av, nws hais tias : 21 "Kuv tawm hauv kuv niam plab los liab qab, kuv yuav rov mus lawm hauv av liab qab. HUAB TAIS pub txhua yam, Huab Tais sau txhua yam rov qab, kom HUAB TAIS lub npe nto koob meej !"
22 Yob raug kev txom nyem npaum li no los nws tsis ua txhaum, tsis hais ib lo lus phem txog Tswv Ntuj li.

NPN 17: 1BCD, 2-3, 6-7

Txais: (6) Thov koj tig pob ntseg los thiab mloog kuv lo lus thov koj.

HUAB TAIS, thov koj mloog ib zag lus txheem plaub ntug ncaj ncees;
Koj cuab pom ntseg rau kuv lub suab quaj,
Koj tig ntsej los mloog kuv lo lus thov ntuj; kuv di ncauj tsis hais lus dag.

Txais: (6) Thov koj tig pob ntseg los thiab mloog kuv lo lus thov koj.

Cia koj ua tus txiav txim rau kuv,
vim koj qhov muag pom qhov ncaj!
koj txawm sim kuv siab, koj tuaj tsom kuv thaum hmo ntuj;
koj txawm sim kuv siab nyob hauv hluav taws,
los koj yuav tsis pom dab tsi phem nyob hauv kuv.

Txais: (6) Thov koj tig pob ntseg los thiab mloog kuv lo lus thov koj.

Tswv Ntuj, kuv hu txog koj, vim koj yeej yuav teb kuv;
thov koj qaij pob ntseg los rau kuv, thiab mloog kuv lo lus thov.
Thov koj qhib koj lub siab muaj kev khuv leej loj rau peb pom;
koj yog tus cawm seej rau cov neeg khiav los nkaum hauv
koj phab xis, kom lawv dim ntawm cov neeg ntxub lawv.

Txais: (6) Thov koj tig pob ntseg los thiab mloog kuv lo lus thov koj.

As Les Lus Yas: MK 10: 45

Txais: As les lus yas, as les lus yas.

Neeg Leej Tub tuaj tsob hwb sawv daws
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: LK 9: 46-50

46 Cov thwj tim muaj lus sib cav tias: Nyob hauv lawv, leej twg yog tus loj dua cov. 47 Yes Xus paub qhov lawv xav hauv nruab siab, nws thiaj rub ib tug me nyuam yaus los tso nyob ze ntawmnws, 48 ces nws hais rau lawv tias : "Leej twg txais tus me nyuam no vim kuv lub npe, mas yog nws txais kuv. Hos leej twg txais kuv mas yog nws txais Tus xa kuv tuaj. Vim tus me tshaj nyob hauv nej sawv daws yog tus loj dua cov." 49 Zam tsa ncauj teb tias : "Xib Hwb, peb pom ib tug neeg hu txog koj lub npe ntiab dab. Peb tau txwv nws, vim nws tsis nrog peb pab uas raws koj." 50 Yes Xus hais rau Zam tias: "Nej tsis txhob txwv nws, vim tus twg tsis tiv nej, nws yog nej tog.”

Tim 29 lub 9 Hlis 2020

Hnub Peb Lis Piam Nees Nkaum Rau Nruab Xyoo A Nruab Lis Piam Xyoo II

Hwm cov Tuam Tshiab LN Miv Kas (Michael), Nkas Nplias (Gabriel), thiab Las Fais (Raphael)

Zaj Nyeem Ib: DN 7: 9-10, 13-14

9 Kuv ntsia ntsoov, kuv pom thaum lawv muab ib co theej kiab los txawb rau ntawd, ces tus Laus los zaum saum nws lub theej kiab; nws cov ris tsho dawb cuag daus, nws cov plaub hau saum taub hau dawb paug cuag plaub yaj. Nws lub theej kiab cig ib co nplaim taws, muaj ib co log hluav taws cig nplaim ntsa iab. 10 Muaj ib tug dej nplaim taws txhawv ntws ntawm qhov chaw ntawm nws xub ntiag los. Txhiab txhiab leej tsob hwb nws, vam vam leej sawv ntsug nyob ntawm nws xub ntiag. Lub rooj txiav txim zaum txhij vog, tej ntaub ntawv twb nthuav tas lawm.
13 Thaum hmo ntuj kuv yees pom, kuv ntsia ntsoov pom zoo li no: Tuaj saum cov huab tuaj zoo li yog ib tug Neeg leej Tub. Nws tuaj mus rau ntawm tus Laus, ces lawv coj nws mus qhia rau tus Laus. 14 Ces tus Neeg Leej Tub txais lub hwj chim tswj kav, lub koob meej thiab kev ua vaj. Tas txhia haiv neeg, txhia kuj cuab, txhia xeem lus yuav tsum tsob hwb nws. Nws txoj kev tswj kav yog ib txog kev tswj kav nyob mus li yuav tsis txawj kawg. Nws txoj kev ua vaj yuav tsis muaj leej twg rhuav tau.

Los QYTN 12: 7-12ab

7 Muaj ib nthwv rog nyob saum ntuj : yog Miv Kas thiab nws cov Tshiab ua rog ntaus tus Zaj; tus Zaj thiab nws cov dab kuj ua rog tiv lawv thiab. 8 Tab sis tus Zaj tsis yeej, ces tus Zaj thiab nws cov dab tsis tau kev nyob saum ntuj ntxiv. 9 Niag Zaj loj loj, niag nab txheej thaud uas tseem hu ua Dab Phem thiab hu ua Xas Tas, uas yog tus ntxias tas ntiaj teb neeg , nws raug muab cuam pov rau hauv ntiaj teb thiab nws cov dab kuj raug pov nrog nws huv tib si.
10 Ces kuv hnov ib lub suab nrov loj loj nyob saum ntuj tias : “Zaum no, peb tus Tswv Ntuj txoj kev cawm, lub hwj huam, thiab txoj kev ua vaj los txog lawm, thiab nws leej Pleev txoj kev tswj kav los txog lawm. Vim tus niag uas liam rau peb cov kwv tij raug muab laij tawm lawm, nws yog tus liam rau lawv nyob ntawm peb tus Tswv Ntuj xub ntiag nruab hnub hmo ntuj. 11 Lawv tau ntaus yeej nws vim Leej Yaj cov ntshav, thiab vim lawv lo lus ua tim khawv; lawv tsis khuv xim lawv txoj sia mus txog qhov tuag. 12 Vim li ntawd mas cov txheej ntuj thiab tas cov uas nyob saum ntuj, nej cia li zoo siab!”

NPN 138: 1-2AB, 2CDE-3, 4-5

Txais: (1) HUAB TAIS, kuv yuav cav txog koj nyob ntawm tsoom tshiab xub ntiag.

Kuv yuav ua koj tsaug tas kuv lub siab ntsws, HUAB TAIS,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm tsoom tshiab xub ntiag;
kuv yuav tuaj pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

Vim koj lub siab zoo thiab koj txoj kev tseeb,
koj tau muab koj lub npe thiab koj txoj kev cog lus
ua qhov loj tshaj tas txhua yam.
Thaum kuv hu, koj teb kuv,
koj ntxiv zog rau kuv kom kuv muaj zog tuaj.

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

HUAB TAIS, tas ib tsoom vaj nyob ntiaj teb yuav ua koj tsaug,
thaum lawv hnov koj cov lus koj lub ncauj tau hais.
Lawv yuav cav lus zoo txog HUAB TAIS tej kev tias :
"HUAB TAIS lub hwj chim loj tas nrho !”

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

As Les Lus Yas: NPN 103: 21

Txais: As les lus yas, as les lus yas.

Tas ib tsoom tshiab, nej cav lus zoo txog Huab Tais,
Nej yog nws cov tub khiav dej num ua ywj nws lub siab.

Txais: As les lus yas, as les lus yas.

Ntawv Moo Zoo: ZAM 1: 47-51

47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis zais siab li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau Nas Tas Nais tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub tiag ! Koj yog His Xas Lais tus Vaj." 50 Yes Xus hais rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg. Koj yuav pom tej yam loj dua no ntxiv." 51 Ces Yes Xus hais rau Nas Tas Nais tias : "Kuv hais qhov muaj tseeb tiag rau nej: Nej yuav pom lub ntuj qhib los, thiab pom Tswv Ntuj cov Tshiab nce mus thiab nqes los nyob saum Neeg Leej Tub.”

Tim 30 lub 9 Hlis 2020

Hnub Plaub Lis Piam Nees Nkaum Rau Nruab Xyoo A Nruab Lis Piam Xyoo II

Hwm LN Jerome, ua Leej Choj thiab Kws cov Txuj Ntshiab

Zaj Nyeem Ib: YOB 9: 1-12, 14-16

1 Ces Yob teb rau lawv, nws hais li no :
2 "Kuv paub tias qhov ntawd yeej yog qhov tseeb, tab sis ib tug tib neeg yuav ua li cas nws thiaj yog tus neeg ncaj nyob ntawm Tswv Ntuj xub ntiag?
3 Yog leej twg xav khav mus nrog Tswv Ntuj sib cav saib, ib txhiab zaus nws twb tsis muaj lus teb tau ib zaug.
4 Tswv Ntuj lub siab thoob tsib, nws lub zog loj, puas muaj leej twg tau nrog nws sib cav dua thiab hais yeej nws lawd?
5 Tswv Ntuj yog tus ua kom tej roob cia li tshais chaw, lawv twb tsis paub; nws yog tus muab lawv nphau thaum nws npau taws.
6 Nws yog tus diaj lub ntiaj teb kom txav tawm ntawm nws qhov chaw, ces cov ncej txheem lub ntiaj teb co ua voj ua viag.
7 Nws yog tus txwv lub hnub ces lub hnub tsis tawm tuaj; nws thaiv kom cov hnub qub tsis txhob ci.
8 Nws ib leeg yog tus nthuav lub ntuj kom dav, yog tus tsuj saum cov ntsis nplaim dej ntas siab siab nyob hauv hiav txwv.
9 Tswv Ntuj tsim lub hnub qub kaj ntug, thiab tsim txhiaj txiv mim, nws tsim cov hnub qub ples yas thiab ntsauv hnub qub nyob sab naj.
10 Nws yog tus tsim tej yam loj tas nrho yus paub tsis txog, nws tsim ntauj yam zoo tas nrho, suav tsis thoob.
11 Ntsia saib, nws hla ntawm kuv, los kuv yeej tsis pom nws; nws mus dhau lawm los kuv yeej tsis paub li.
12 Tab nws txeeb ib yam nqa mus, los tsis muaj leej twg yuav cheem tau, tsis muaj leej twg yuav muaj cuab kav hais tias : ‘koj ua dab tsi li ntawd?’
14 Ntshai kuv yuav tsis yeem teb nws, yuav tsis xaiv ib co lus los hais tiv kom yeej nws.
15 Tab kuv txawm muaj cai npaum twg, los kuv yuav tsis teb dab tsi, kuv tsuas kawg yuav thov tus uas txiav txim rau kuv kom nws hlub kuv xwb.
16 Yog kuv hu txog Tswv Ntuj, es nws teb kuv, mas kuv yuav ntseeg tsis tau tias cas nws tseem mloog kuv cov lus thov thiab."

NPN 88: 10BC-11, 12-13, 14-15

Txais: (3) Huab Tais, thov cia kuv cov lus thov nce tuaj txog koj.

HUAB TAIS, kuv niaj hnub hu txog koj,
kuv tsa kuv txhais tes tuaj thov koj.
Koj puas yuav ua hwj huam los pab cov neeg tuag?
Cov duab ntxoov ntxoo puas yuav sawv los ua koj tsaug?

Txais: (3) Huab Tais, thov cia kuv cov lus thov nce tuaj txog koj.

Nyob hauv qhov ntxa, lawv puas tshaj txog koj lub siab hlub neeg?
Nyob hauv lub qhov ploj qhov tuag lawv puas hais txog koj txoj kev ua ncaj?
Nyob teb chaws tsaus ntuj, lawv puas paub txog tej yam txaus qhuas koj ua?
Hauv teb chaws tsis Hnov Qab, lawv puas paub txog koj txoj kev ncaj?

Txais: (3) Huab Tais, thov cia kuv cov lus thov nce tuaj txog koj.

HUAB TAIS, ntawm kuv, mas kuv hu txog koj;
thaum sawv ntxov, kuv vam txog koj nyob hauv kuv zaj thov ntuj.
HUAB TAIS, vim li cas koj xyeeb kuv tawm?
Vim li cas koj zais koj ntsej muag ntawm kuv?

Txais: (3) Huab Tais, thov cia kuv cov lus thov nce tuaj txog koj.

As Les Lus Yas: FLP 3: 8-9

Txais: As les lus yas, as les lus yas.

Kuv saib tas puas tsav yam tsis muaj nqes dab tsi,
kom kuv thiaj tau Leej Pleev ua kuv tug thiab tau nyob hauv nws .

Txais: As les lus yas, as les lus yas.

Ntawv Moo Zoo: LK 9: 57-62

57 Thaum Yes Xus thiab nws cov thwj tim lawv taug kev nyob ntawm kev, muaj ib tug neeg hais rau Yes Xus tias : "Koj mus qhov twg los kuv yuav raws koj mus."
58 Yes Xus hais rau nws tias : "Hma muaj hma lub qhov nkaum, hos tej noog ya saum ntuj los lawv muaj lawv lub zes. Tab sis Neeg Leej Tub tsis muaj chaw rau ncoo li."
59 Yes Xus ho hais rau lwm tus neeg tias : "Koj raws kuv mus." Tiam sis tus ntawd hais tias : "Thov koj cia kuv mus faus kuv txiv tso."
60 Yes Xus hais rau nws tias : "Koj cia cov tuag faus lawv cov tuag, hos koj, mas koj mus tshaj Tswv Ntuj lub Ceeb Tsheej."
61 Tseem muaj ib tug hais tias : "Huab Tais, kuv yuav raws koj mus, tab sis thov koj cia kuv rov mus hais ib lo lus yuav sib ncaim rau kuv tsev neeg tso."
62 Yes Xus hais rau nws tias : "Leej twg cev tes tuav rab khais lawm, nws tseem tig ntsia tej yam nws tso tseg rov tom qab, mas nws tsis phim txais Tswv Ntuj lub Ceeb Tsheej."

Tim 1 lub 10 Hli 2020

Hnub Tsib Lis Piam Nees Nkaum Rau Nruab Xyoo A Nruab Lis Piam Xyoo II

Hwm LN Thérèse de l’Enfant Jésus, nkauj xwb ntshiab thiab Kws cov Txuj Ntshiab

Zaj Nyeem Ib: YOB 19: 21-27

Yob hais tias:
21 Nej uas yog kuv cov phooj ywg, thov nej hlub kuv mas, thov nej hlub kuv thiab mas, vim Tswv Ntuj txhais tes tau ntaus kuv.
22 Vim li cas nej ua phem rau kuv zoo li yog Tswv Ntuj ua, cas nej tsis txaus siab rau kuv lub cev nqaij?
23 Kheev lam muaj tus sau kuv cov lus cia! Kheev lam lawv muab sau rau hauv ib phau ntawv cia!
24 Kom lawv muab rab txaug hlau thiab tus cwj mem los kos kuv cov lus rau saum phab tsua kom nyob mus li.
25 Tiam sis kuv paub tias kuv tus cawm seej muaj txoj sia nyob, thiab thaum kawg nws yuav tawm los sawv saum cov plua av.
26 Thaum kuv daim tawv nqaij rov los npog kuv lawm, mas kuv yuav tau pom Tswv Ntuj nyob hauv kuv lub cev nqaij.
27 Kuv yuav tau pom nws tiag, kuv qhov muag yuav ntsia ntsoov nws, tsis yog lwm tus qhov muag yuav ntsia nws. Qhov no yog qhov kuv lub siab vam ntsoov txog.

NPN 27: 7-8A, 8B-9ABC, 13-14

Txais: (13) Kuv ntseeg tias kuv yuav tau pom Huab Tais
Lub siab zoo nyob hauv cov neeg ciaj lub teb chaws.

HUAB TAIS, thov koj mloog kuv lub suab hu koj,
Thov koj hlub kuv, thiab teb kuv mas!
Kuv lub siab xav txog koj,
Kuv nrhiav koj lub ntsej muag.

Txais: (13) Kuv ntseeg tias kuv yuav tau pom Huab Tais
Lub siab zoo nyob hauv cov neeg ciaj lub teb chaws.

HUAB TAIS, kuv nrhiav kom tau pom koj.
Thov txhob muab koj lub ntsej muag zais ntawm kuv,
Txhob npau taws txhob xyeej koj tus tub txib;
Koj yog tus pab kuv, txhob ntiab kuv khiav ntawm koj mus.

Txais: (13) Kuv ntseeg tias kuv yuav tau pom Huab Tais
Lub siab zoo nyob hauv cov neeg ciaj lub teb chaws.

Kuv ntseeg tias kuv yuav tau pom HUAB TAIS lub siab zoo
nyob hauv tsoom neeg ciaj lub teb chaws.
Koj ua siab loj loj tos ntsoov HUAB TAIS,
kav tsij ua siab tawv qhawv nyob tos HUAB TAIS !

Txais: (13) Kuv ntseeg tias kuv yuav tau pom Huab Tais
Lub siab zoo nyob hauv cov neeg ciaj lub teb chaws.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej nyob ze lawm,
Nej cia li lees txhaum thiab ntseeg lub Moo Zoo.

Txais: As les lus yas, as les lus yas.

Ntawv Moo Zoo: LK 10: 1-12

1 Dhau ntawd lawm, Huab Tais tseem xaiv xya caum ob leeg, nws xa lawv mus tej pab ob leeg, ua nws ntej mus rau hauv cov nroog thiab tej qhov chaw uas nws yuav mus. 2 Nws hais rau lawv tias : "Qoob loo zoo sau muaj ntau kawg, tab sis cov tub zog muaj tsawg. Nej thov tus Tswv qoob kom nws xa ib co tub zog tuaj sau nws cov qoob. 3 Nej mus mog ! Kuv xa nej zoo li ib co yaj mus nyob hauv nruab nrab ib cov hma. 4 Nej tsis txhob nqa nas nyiaj, txhob ris hnab, txhob rau khau, txhob hais lus hu leej twg ntawm kev. 5 Nej chaws mus hauv lub tsev twg, mas nej yuav xub hais tias : ‘Kom lub tsev no nyob kaj lug!’ 6 Yog muaj txoj kev kaj lug ib tug tub nyob ntawd, mas nej txoj kev kaj lug yuav roos nws. Yog tsis muaj, mas nej txoj kev kaj lug yuav rov los rau nej. 7 Nej nyob hauv lub tsev ntawd, nej noj nej haus tej yam uas lawv muaj hauv tsev, vim tus tub zog tsim nyog txais nqi zog. Nej txhob tawm hauv ib lub tsev mus nyob rau lwm lub. 8 Nej mus hauv lub nroog twg, yog luag txais nej, nej noj tej yam uas luag muab rau nej. 9 Nej kho cov neeg mob hauv lub nroog ntawd kom zoo, thiab nej hais rau lawv tias : ‘Tswv Ntuj lub Ceeb Tsheej tuaj txog ze nej lawm.’ 10 Tab sis yog nej mus hauv lub nroog twg, luag tsis txais nej, nej tawm mus nraum tej tshav puam nej hais tias : 11 ‘Tab yog cov plua av uas lo peb ko taw hauv nej lub nroog no, peb muab nchos tseg cia ua pov thawj txog nej huv tib si. Tab sis, nej yuav tsum paub tias Tswv Ntuj lub Ceeb Tsheej tuaj txog ze lawm.’ 12 Kuv hais rau nej tias, thaum txog hnub ntawd mas lub nroog Xos Dos Mas yuav raug txim sib dua lub nroog ntawd.”

Tim 2 lub 10 Hli 2020

Thawj Hnub Rau Lis Piam Nees Nkaum Rau Nruab Xyoo A Nruab Lis Piam Xyoo II

Hwm cov Tshiab Pov Hwm (Guardian Angels)

Zaj Nyeem Ib: YOB 38: 1, 12-21; 40: 3-5

38 1 HUAB TAIS nyob hauv nag xob nag cua teb rau Yob tias :
12 “Nyob hauv koj lub neej, koj puas tau tswj qhov sawv ntxov ib zaug thiab qhia kom qhov kaj ntug yuav tsum paub nws qhov haujh lwm,13 kom nws yuav tsum tuav daim npoo ntiaj teb kawg nchos kom cov neeg siab phem tawm mus kom tas? 14 Ces lub ntiaj teb yuav hloov tas zoo li cov av siv ua lub thwj thiab yuav raug muab zas ua tsos tas zoo li zas tsoos tsho. 15 Tiam sis qhov pom kev yuav tsis ci mus rau cov neeg phem thiab txhais npab uas tsa siab yuav raug muab dam.
16 Koj puas tau mus txog qhov chaw dej hiav txwv txhawv tawm los, thiab puas tau mus taug kev tshuaj ntsuam hauv tej qab thu tob tob? 17 Luag puas tau qhia koj txog cov qhov rooj mus hauv tub tuag teb, thiab koj puas tau pom cov qhov rooj vag mus hauv lub teb chaws tsaus ntuj nti? 18 Koj puas paub txog tias lub ntiaj teb dav npaum li cas ? Yog koj paub tas tej no, mas koj hais saib. 19 Qhov pom kev lub chaw nyob yog nyob sab twg, qhov tsaus ntuj lub chaw nyob yog nyob qhov twg ? 20 Koj coj puas tau nyias mus rau nyias thaj tsam, koj taw puas tau nyias txoj kev rau nyias taug rov mus nyias lub chaw? 21 Yog koj paub tej ntawd mas yog vim koj xub yug los dua lawv thiab koj nyob tau ntev niaj ntau xyoo kawg li!”
40 3 Yob teb rau HUAB TAIS tias : "Kuv yog neeg tsis muaj nqes dab tsi, kuv yuav teb dab tsi rau koj ? 4 Kuv yuav muab tes los pos qhov ncauj. 5 Kuv tau hais lus ib zaug lawm, kuv yuav tsis hais lus ntxiv. Zaum ob, kuv yuav tsis hais dab tsi ntxiv."

NPN 139: 1-3, 7-8, 9-10, 13-14AB

Txais: (24b) Huab Tais, thov koj coj kuv mus taug txoj kev yuav nyob mus li.

HUAB TAIS, koj ntsia pom tshab hauv kuv, koj paub kuv :
koj paub thaum kuv zaum thiab thaum kuv sawv ;
koj nyob deb tsom pom tas tej kuv xav.
kuv mus kev los kuv so, koj saib ntsoov kuv,
koj paub txhua txoj kev kuv taug.

Txais: (24b) Huab Tais, thov koj coj kuv mus taug txoj kev yuav nyob mus li.

Kuv yuav mus qhov twg thiaj nraim tau ntawm koj lub tswv yim?
Kuv yuav khiav lawm ces twg, thiaj nyob deb ntawm koj?
Yog kuv nce mus saum ntuj, koj twb nyob saud lawm!
Yog kuv nqes lawm puag ntuj txias teb tsaus, koj kuj nyob hauv thiab!

Txais: (24b) Huab Tais, thov koj coj kuv mus taug txoj kev yuav nyob mus li.

Yog kuv ya raws lub caij kaj ntug ob phab tis mus,
yog kuv mus nyob puag tim sab dej ntuj kawg nkaus tim ub,
los tseem yog koj txhais tes coj kuv taug kev,
yog koj sab tes xis hwj kuv kom kuv nyob ruaj nreb.

Txais: (24b) Huab Tais, thov koj coj kuv mus taug txoj kev yuav nyob mus li.

Koj yeej yog tus tsim kuv tej plab plaw tiag ;
koj xaws koj ntxiv kuv hauv kuv niam plab.
Kuv cav lus zoo ua koj tsaug, vim koj tsim kuv tau zoo ua luaj :
koj tej dej num zoo tas nrho thiab txaus ntshai kawg nkaus.

Txais: (24b) Huab Tais, thov koj coj kuv mus taug txoj kev yuav nyob mus li.

As Les Lus Yas: NPN 95: 8

Txais: As les lus yas, as les lus yas.

Hnub no, yog nej hnov nws lub suab,
Nej tsis txhob ua nej lub siab tawv ncauj .

Txais: As les lus yas, as les lus yas.

Ntawv Moo Zoo: LK 10: 13-16

Yes Xus tsa suab hais tias:
13 “Kos Las Ntxis, koj txoj hmoov phem ! Npes Xais Das, koj txoj hmoov phem ! Cov hwj huam yees ntxwv uas tshwm sim nyob hauv neb, yog lam tshwm sim nyob Tws Los thiab Xis Doos, mas lawv twb hnav ntaub tsaj thiab zaum nphoo tshauv rau lawv lawm ntxov, thiab twb hloov siab tig los ua zoo lawm. 14 Txog hnub Txiav Txim, mas Tws Los thiab Xis Doos yuav raug txim sib dua neb. 15 Hos koj, Kas Fas Naus, koj xav tias koj lub hwj chim yuav siab txij ntuj no lod? Koj ces kawg yuav nqes mus lawm hauv ntuj txias teb tsaus xwb!
16 Leej twg mloog nej, mas yog nws mloog kuv. Leej twg xyeej nej, mas kuj yog nws xyeej kuv. Leej twg xyeej kuv, mas yog nws xyeej tus xa kuv tuaj."

Tim 3 lub 10 2020

Thawj Hnub Xya Lis Piam Nees Nkaum Rau Nruab Xyoo A Nruab Lis Piam Xyoo II

Zaj Nyeem Ib: YOB 42: 1-3, 5-6, 12-17

1 Yob teb HUAB TAIS tias : 2 "Kuv paub tias koj ua tau tas txhua yam, tsis muaj ib yam uas koj npaj lawm yuav tshwm sim tsis tau. 3 ‘Leej twg yog tus zais tej yam pab yus tswv yim vim nws tsis paub txog?’ Kuv tau hais li no txog tej yam uas kuv tsis to taub, tej yam loj dhau zoo dhau rau kuv thiab kuv tsis paub txog.
5 Yav tas los, kuv tsuas yog hnov luag tej hais txog koj xwb, tab sis nyem no, kuv tau pom koj kiag ntawm qhov muag lawm. 6 Ua li mas kuv rov ntxub kuv tus kheej, kuv mus them kuv lub txim txhaum nyob hauv plua av thiab plua tshauv."
12 Ces HUAB TAIS foom hmoov zoo rau Yob lub neej yav laus ntau dua yav hluas. Yob muaj nto kaum plaub txhiab tus yaj, rau txhiab tus ntxhuav, ib txhiab nkawm nyuj thiab ib txhiab tus luj. 13 Nws yug tau xya leej tub thiab peb leeg ntxhais. 14 Tus ntxhais hlob nws muab hu ua Ntses Mis Mas(Jemi’mah), tus nrab hu ua Kes Xias(Kezi’ah), tus peb hu ua Kes Les Has Pus(Keren-hap’puch). 15 Nyob thoob hauv lub teb chaws tsis muaj ib tug poj niam zoo nkauj npaum li Yob cov ntxhais li. Lawv txiv kuj faib cuab tam rau lawv ib yam li faib rau lawv cov nus thiab. 16 Tom qab tej no lawm, Yob tseem ua neej ntev txog ib puas plaub caug xyoo, thiab nws tau pom nws cov tub, thiab pom nws tej xeeb leej xeeb ntxwv mus txog phaj plaub. 17 Thaum Yob tuag, nws tau ua neej nyob laus nkoos, tau ntau niaj ntau xyoo ntev txaus nkaus.

NPN 119: 66, 71, 75, 91, 125, 130

Txais: (135) Huab Tais, ua kom koj lub ntsej muag ci tuaj rau kuv.

Thov koj qhia kev thoob tsib thiab kev txawj ntse rau kuv,
vim kuv tso siab rau koj cov lus qhia.

Txais: (135) Huab Tais, ua kom koj lub ntsej muag ci tuaj rau kuv.

Txoj kev txom nyem dhau los yog ib qho zoo rau kuv,
vim nws ua kom kuv kawm tau koj cov cai lij choj.

Txais: (135) Huab Tais, ua kom koj lub ntsej muag ci tuaj rau kuv.

HUAB TAIS, kuv paub tias cov cai koj txiav yog cai ncaj ncees,
thaum koj cia kuv raug txom nyem, yog koj xav ua zoo rau kuv.

Txais: (135) Huab Tais, ua kom koj lub ntsej muag ci tuaj rau kuv.

Tas ib puas tsav yam nyob khov kho los txog tav no,
raws li koj tau teem, vim txhua tsav yam tsob hwb koj.

Txais: (135) Huab Tais, ua kom koj lub ntsej muag ci tuaj rau kuv.

Kuv yog koj tus tub txib, thov koj pub kom kuv txawj to taub,
ces kuv yuav paub txoj cai koj tau txiav.

Txais: (135) Huab Tais, ua kom koj lub ntsej muag ci tuaj rau kuv.

Thaum kuv paub koj cov lus lawm, kuv pom kev tuaj,
koj cov lus ua kom cov neeg me muaj kev to taub.

Txais: (135) Huab Tais, ua kom koj lub ntsej muag ci tuaj rau kuv.

As Les Lus Yas: MT 11: 25

Txais: As les lus yas, as les lus yas.

Leej Txiv, kuv cav lus zoo txog koj, Huab Tais kav lub ntuj lub teb,
vim koj qhib tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 10: 17-24

17 Pab xya caum ob leeg thwj tim rov qab los txog, lawv zoo siab kawg, lawv hais rau Yes Xus tias : "Huab Tais, tab yog cov dab phem, tsis kav lawv swb rau peb vim koj lub npe." 18 Yes Xus hais rau lawv tias : "Kuv twb pom Xas Tas poob saum ntuj los zoo li ib kab xob laim lawm! 19 Nej saib ! Kuv pub hwj huam rau nej kom nej tsuj tau nab, tsuj tau kab lij tshooj, tsuj tau Yeeb Ncuab lub hwj huam tib si, tsis muaj dab tsi yuav ua xwv txheej tau rau nej. 20 Tiam sis nej tsis txhob zoo siab vim cov dab swb rau nej, nej yuav zoo siab vim nej lub npe raug muab sau cia rau saum ntuj lawm.”
21 Lub sij hawm ntawd, Yes Xus zoo siab tas nrho nyob hauv Leej Ntuj Plig Ntshiab, nws hais tias : "Txiv, kuv cav lus zoo txog koj, Huab Tais kav lub ntuj lub teb, koj tau zais tej ntawd ntawm cov neeg thoob tsib thiab cov neeg ntse, koj muab qhib tawm rau cov neeg me paub. Txiv, vim koj yeej nyiam ua li ntawd. 22 Kuv Txiv muab tas ib puas tsav yam rau kuv. Tsis muaj leej twg paub tias Leej Tub yog tus twg, kawg yog Leej Txiv thiaj paub xwb. Tsis muaj leej twg paub tias Leej Txiv yog tus twg, kawg yog Leej Tub thiaj paub xwb, thiab tus uas Leej Tub xav qhia rau kom nws paub."
23 Yes Xus tig los rau nws cov thwj tim, thaum lawv nyob rau ib cag, nws hais rau lawv tias: "Lub qhov muag uas pom tej yam nej pom no tau txoj hmoov zoo kawg! 24 Kuv hais rau nej tias coob tus yaj saub thiab coob tus vaj yav tas los xav pom qhov uas nej pom, tab sis lawv tsis tau pom, xav hnov tej uas nej hnov, tab sis lawv tsis tau hnov."

Tim 5 lub 10 Hli 2020

Hnub Ob Lis Piam Nees Nkaum Xya Nruab Xyoo A Nruab Lis Piam Xyoo II

Hwm LN Faustina Kowalska, nkauj xwb tsim txiaj;
los hwm tus tau hmoov zoo(TTHmZ) Francis Xavier Seelos, ua Leej Chooj

Zaj Nyeem Ib: NKAS LAS TIAS 1: 6-12

Cov kwv tij nkauj muad:
6 Kuv poob siab tas tias cas nej tso tus uas tau hu nej nyob hauv Leej Pleev lub txiaj ntsim pov tseg sai tas npaud, nej cia li mus ntseeg lwm lub moo zoo lawm, 7 txawm tias twb tsis muaj lwm lub moo zoo li; tiam sis yog muaj ib co neeg xav ua kom ntxhov quav niab nyob hauv nej thiab yog lawv xav muab Leej Pleev lub Moo Zoo ntxeev xwb. 8 Tab yog peb los yog Ntuj ib tug Tshiab nqes saum ntuj los qhia ib lub moo zoo txawv lub peb tau tshaj rau nej lawm, mas thov kom tus ntawd tau hmoov phem. 9 Peb twb tau hais rau nej los lawm, hnub no kuv rov hais dua rau nej tias, yog muaj neeg qhia ib lub moo zoo txawv lub nej tau txais lawm, mas thov kom tus ntawd tau hmoov phem.
10 Nyem no, kuv puas nrhiav ua kom neeg nyiam kuv, los kom Tswv Ntuj nyiam kuv ? Kuv puas nrhiav ua kom xis neeg siab ? Yog kuv xav ua xis neeg siab xwb, mas kuv yuav tsis yog Leej Pleev ib tug tub txib li.
11 Cov kwv tij, nej yuav tsum paub tias lub Moo Zoo uas kuv tuaj qhia rau nej, mas tsis yog tuaj ntawm tib neeg tuaj. 12 Kuv tsis tau txais thiab tsis tau kawm lub Moo Zoo ntawd ntawm ib tug tib neeg twg los, tiam sis yog Yes Xus Pleev tau yees tawm tuaj qhia rau kuv paub.

NPN 111: 1B-2, 7-8, 9+10C

Txais: (5) Huab Tais yuav nco ntsoov nws cov lus nws tau cog tas mus li.

Kuv yuav ua HUAB TAIS tsaug tas siab tas ntsws
nyob hauv cov neeg ncaj lub rooj sib sau ua lub txoos.
HUAB TAIS cov hauj lwm loj tas nrho,
zoo ntxim cov neeg nyiam Huab Tais siab kawg nkaus.

Txais: (5) Huab Tais yuav nco ntsoov nws cov lus nws tau cog tas mus li.

Cov hauj lwm nws txhais tes ua yog qhov tseeb thiab qhov ncaj.
Nws cov lus qhia yog cov lus tsim nyog tso siab rau,
Yog cov lus yuav nyob ruaj mus li ib txhia ib txhis.
xab xeeb rau hauv kev tseeb thiab kev ncaj ncees.

Txais: (5) Huab Tais yuav nco ntsoov nws cov lus nws tau cog tas mus li.

Nws xa kev cawm tuaj rau nws haiv neeg,
nws tau ceeb toom kom lo lus nws tau cog nyob mus li.
Nws lub npe ntshiab muaj hwj xyeej tas nrho.
Lo lus cav txog HUAB TAIS yuav nyob mus txheej dhau txheej.

Txais: (5) Huab Tais yuav nco ntsoov nws cov lus nws tau cog tas mus li.

As Les Lus Yas: ZAM 13: 34

Txais: As les lus yas, as les lus yas.

Kuv muab ib lo lus qhia tshiab rau nej :
nej yuav sib nyiam sib hlub ib yam li kuv tau nyiam tau hlub nej.

Txais: As les lus yas, as les lus yas.

Ntawv Moo Zoo: LK 10: 25-37

25 Lub sij hawm ntawd, ib tug Kws Lij Choj sawv, nws xav sim Yes Xus ces nws nug tias: "Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam?" 26 Yes Xus hais rau nws tias : "Nyob hauv Txoj Cai muaj dab tsi sau tseg? Koj nyeem txog dab tsi? 27 Tus Kws Lij Choj teb tias: "Koj yuav nyiam Huab Tais, koj tus Tswv Ntuj, tas koj siab ntsws, tas koj tus ntsuj plig, tas koj lub zog, tas koj lub tswv yim, thiab koj yuav nyiam tus nyob ze koj ib yam li koj nyiam koj.” 28 Yes Xus hais rau tus Kws Lij Choj tias: "Koj teb raug lawm. Koj ua li ntawd, ces koj yuav muaj txoj sia." 29 Tab sis tus Kws Lij Choj xav kom nws tau cai ces nws hais rau Yes Xus tias : "Leej twg yog tus nyob ze kuv?” 30 Yes Xus thiaj hais ntxiv tias : "Muaj ib tug neeg nqes ntawm Yes Lus Xas Les mus rau nram Yes Lis Kos, nws ntsib ib pab tub sab. Lawv muab nws tej ris tsho hle, muab nws ntaus sab kawg, ces lawv khiav mus lawm, tso nws tseg tshuav txoj sia xwb. 31 Muaj ib tug Leej Choj taug txoj kev ntawd nqes tuaj tom thawj, nws pom tus raug mob, nws lug kev hla mus lawm. 32 Muaj ib tug Les Vis ho tuaj txog ntawd, nws pom tus raug mob, nws kuj lug kev hla mus lawm thiab. 33 Tab sis ib tug Xas Mas Lias mus tawm rooj tuaj txog ntawd, nws pom tus neeg raug mob, nws hlub kawg nkaus. 34 Nws txav los ntawm tus raug mob, nws hliv roj thiab hliv cawv rau cov qhov txhab, nws muab qhwv. Nws tsaws tus raug mob caij nws tus luj, thiab coj nws mus txog tom lub tsev txais qhua, nws tu tus raug mob nyob ntawd. 35 Hnub tom qab, nws rho tau ob lub txiaj nyiag rau tus tswv tsev txais qhua, nws hais tias : ‘Koj tu tus neeg mob no, yog koj siv tshaj lawm, thaum kuv rov qab los, kuv yuav them rov rau koj.’ 36 Raws li koj xav, lawv peb leeg no, leej twg yog tus nyob ze tus neeg uas poob rau hauv tub sab txhais tes?" 37 Tus Kws Lij Choj hais tias : "Yog tus uas tau khuv leej tus raug mob." Ces Yes Xus hais rau nws tias : "Koj mus, koj yuav ua ib yam li ntawd thiab."

Tim     6     lub     10     Hli     2020

Hnub Peb Lis Piam Nees Nkaum Xya Nruab Xyoo B Nruab Lis Piam Xyoo II

Hwm LN Bruno, ua leej choj; los hwm TTHmZ Marie-Rose Durocher, nkauj xwb

Zaj Nyeem Ib: NKAS LAS TIAS 1: 13-24

Cov kwv tij nkauj muad:
13 Nej yeej tau hnov lawm tias kuv tau coj li cas thaum kuv tseem nyob hauv cov Yus Das txoj kev ntseeg; tias kuv hiam Tswv Ntuj lub Koom Txoos heev kawg nkaus, thiab kuv tau nrhiav ua kom lub Koom Txoos ploj mus. 14 Kuv tau nce siab nyob hauv txoj kev ntseeg Yus Das tshaj coob leej hauv kuv phaum neeg hauv kuv haiv neeg, vim kuv kub siab lug rau peb cov poj yawm txwv koob tej kab lis kev cai. 15 Tiam sis tus uas tau xaiv kuv txij thaum kuv tseem nyob hauv kuv niam plab los lawm, thiab tau hu kuv nyob hauv nws lub txiaj ntsim, 16 nws tau txaus siab cia nws Leej Tub tshwm los rau kuv pom, kom kuv mus tshaj txog nws rau cov neeg teev pej kum dab paub. Tam sim ntawd, kuv tsis tau nrhiav tib neeg muaj nqaij tawv thiab roj ntsha lub tswv yim, 17 kuv tsis mus cuag cov xub ua Hauv Paus Xa Lus dua kuv nyob Yes Lus Xas Les li, kuv ncaj qha mus rau As Las Npias teb, ces kuv mam rov los rau Das Mas dua xwb. 18 Peb xyoos tom qab, kuv thiaj mus pem Yes Lus Xas Les, mus ntsib Pob Zeb. Kuv nrog nws nyob tau kaum tsib hnub. 19 Kuv tsis tau ntsib lwm tus Hauv Paus Xa Lus li, tsuas tau ntsib Yas Kos, uas yog Huab Tais tus kwv tij xwb. 20 Kuv sau cov lus no tuaj rau nej, mas kuv ua taus tim khawv rau ntawm Tswv Ntuj xub ntiag tias kuv tsis dag.
21 Tom qab ntawd kuv mus rau Xis Lias teb, thiab Xis Lis Xias teb. 22 Cov Koom Txoos hauv Yus Das teb, uas nyob hauv Leej PLeev, mas lawv tsis paub kuv ntsej muag li, 23 lawv tsuas yog hnov tias, “tus uas yav thaud hiam peb mas nyem no nws tshaj txoj kev ntseeg uas yav nram ntej nws xav muab rhuav pov tseg.” 24 Ces lawv cav txog Tswv Ntuj vim kuv.

NPN 139: 1B-3, 13-14AB, 14C-15

Txais: (24b) Huab Tais, thov koj coj kuv mus taug txoj kev muaj sia nyob mus li.

HUAB TAIS, koj ntsia pom tshab hauv kuv, koj paub kuv :
koj paub thaum kuv sawv thiab thaum kuv zaum ;
koj nyob deb tsom paub tas tej kuv xav.
kuv mus kev los kuv pw, koj saib ntsoov,
koj paub txhua txoj kev kuv taug.

Txais: (24b) Huab Tais, thov koj coj kuv mus taug txoj kev muaj sia nyob mus li.

Koj yeej yog tus tsim kuv tej plab plaw tiag ;
koj xaws koj ntxiv kuv hauv kuv niam plab.
Kuv cav lus zoo ua koj tsaug, vim koj lub hwj huam
loj tas nrho tsim tau kuv zoo ua luaj,
koj tej dej num zoo kawg nkaus.

Txais: (24b) Huab Tais, thov koj coj kuv mus taug txoj kev muaj sia nyob mus li.

Koj paub kuv tus ntsuj plig zoo heev;
koj pom kuv cov pob txha tas huv tib si
thaum uas kuv xeeb los nyob hauv qhov chaw nraim,
thaum kuv raug puab nyob puag hauv nruab a.

Txais: (24b) Huab Tais, thov koj coj kuv mus taug txoj kev muaj sia nyob mus li.

As Les Lus Yas: LK 11: 28

Txais: As les lus yas, as les lus yas.

Cov uas mloog Tswv Ntuj Lo Lus thiab ua raws li ntawd,
mas lawv txoj hmoov zoo."

Txais: As les lus yas, as les lus yas.

Ntawv Moo Zoo: LK 10: 38-42

38 Thaum Yes Xus lawv taug kev, lawv mus txog hauv ib lub zos; ib tug poj niam hu ua Mas Tas txais Yes Xus los hauv nws tsev. 39 Nws muaj ib tug niam hluas hu ua Mab Liab, uas zaum rawv ntawm Huab Tais ko taw, nws mloog Huab Tais hais lus. 40 Mas Tas fab taws ntsos ua ntau yam dej num tos txais qhua, ces nws los hais rau Yes Xus tias : "Huab Tais, koj tsis quav ntsej tias kuv tus niam hluas cia kuv ib leeg lis qav lis num xwb lod? Koj hais kom nws pab kuv thiab mas!" 41 Tab sis Huab Tais teb rau Mas Tas tias : "Mas Tas, Mas Tas, koj ua siab fab thiab txhawj txog ntau yam, 42 tab sis tsuas muaj ib yam uas yuav tsum xaiv xwb. Mab Liab xaiv tau yam zoo tshaj lawm, yuav tsis txhob muab tshem ntawm nws mus."

Tim 7 lub 10 Hli 2020

Hnub Plaub Lis Piam Nees Nkaum Xya Nruab Xyoo A Nruab Lis Piam Xyoo II

Hwm Niam Mab Liab tus qhia peb teev txoj Saw Mab Liab

Zaj Nyeem Ib: NKAS LAS TIAS 2: 1-2, 7-14

Cov kwv tij nkauj muad::
1 Kaum plaub xyoos tom qab, kuv tau rov mus pem Yes Lus Xas Les dua, nrog Npas Nas Npes thiab kuv kuj coj Tis Tos nrog wb mus thiab. 2 Tos kuv mus ped, yog vim kuv tau muaj ib qho kev yees pom qhia kom kuv mus, ces kuv thiaj mus piav txog lub Moo Zoo uas kuv qhia rau cov pej kum neeg rau lawv paub; kuv coj cov neeg tseem ceeb mus nyob rau ib qho kuv piav tshwj xeeb rau lawv nkaus xwb, kom kuv txhob lam khiav kev los puas tau khiav kev dag xwb.
7 Cov Txwj Laus tau pom tias yog Tswv Ntuj tsa kuv tshaj lu Moo Zoo rau cov pej kum neeg, ib yam li Tswv Ntuj tau tsa Pob Zeb ua tus tshaj lu Moo Zoo rau cov txais lub cim txiav. 8 Vim tus ua hauj lwm hauv Pob Zeb los tsa Pob Zeb ua Hauv Paus Xa Lus rau cov txais lub cim txiav, kuj ua hauj lwm ib yam li ntawd hauv kuv thiab tsa kuv ua Hauv Paus Xa Lus rau cov pej kum neeg. 9 Thaum lawv zeem tseeb tias kuv tau txais lub txiaj ntsim ntawd lawm, Yas Kos thiab Pob Zeb thiab Zam, uas lawv yog cov ncej tseem ceeb, lawv kuj tuav kuv thiab Npas Nas Npes wb tes ua lub cim tias peb koom siab koom ntsws koom ib txog dej num : wb yuav mus cuag cov pej kum neeg, lawv yuav mus cuag cov txais lub cim txiav, 10 tsuav yog wb nco ntsoov txog cov pluag xwb; qhov no yog qhov kuv twb yeej muab siab rau ua lawm.
11 Thaum Pob Zeb tuaj hauv As Nthias Kias, kuv tau tab meeg tib nws, vim kuv pom tseeb tias nws ua yuam kev. 12 Thaum cov neeg uas nrog Yas Kos nyob tseem tuaj tsis tau txog, mas Pob Zeb nrog cov pej kum neeg noj mov. Tab sis thaum Yas Kos cov neeg tuaj txog lawm, mas Pob Zeb cia li tseg tsis nrog lawv noj mov ntxiv, nws txav deb ntawm cov pej kum neeg, vim nws ntshai cov txais lub cim txiav. 13 Ces cov Yus Das sawv daws yoog li Pob Zeb, lawv ua txoj tsis kam nrog cov pej kum neeg lawm thiab. Ces Npas Nas Npes los kuj cia li ua txoj coj li lawv lawm thiab. 14 Thaum kuv pom lawv ua tsis yog li ntawd, tsis raws li qhov tseeb hauv lub Moo Zoo lawm, mas kuv hais rau Pob Zeb nyob ntawm sawv daws xub ntiag, tias : “Koj twb yog ib tug Yus Das, ua cas koj ua xws li cov pej kum neeg, koj tsis ua xws li ib tug Yus Das, koj yuav ua cas muaj peev xwm yuam tau cov pej kum neeg kom lawv coj raws li cov Yus Das ?”

NPN 117: 1BC, 2

Txais: (Mas Kos 16:15) Nej mus kom thoob qab ntuj, nej tshaj lub Moo Zoo rau lawv.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais: (Mas Kos 16:15) Nej mus kom thoob qab ntuj, nej tshaj lub Moo Zoo rau lawv.

Vim nws lub siab xav ua zoo rau peb nyob ruaj nreb,
ces HUAB TAIS ua ncaj rau peb mus ib txhiab ib txhis.

Txais: (Mas Kos 16:15) Nej mus kom thoob qab ntuj, nej tshaj lub Moo Zoo rau lawv.

As Les Lus Yas: LOS MAS 8: 15BC

Txais: As les lus yas, as les lus yas.

Nej tau txais ib lub tswv yim ua tub ki tshiab,
thiaj ua kom peb hu Tswv Ntuj tias : ‘As Npas ! Txiv !

Txais: As les lus yas, as les lus yas.

Ntawv Moo Zoo: LK 11: 1-4

1 Muaj ib zaug, Yes Xus teev Ntuj nyob ib qho chaw. Thaum nws teev Ntuj tas lawm, nws ib tug thwj tim hais rau nws tias : "Huab Tais, koj qhia peb teev Ntuj xws li Zam qhia nws cov thwj tim thiab."
2 Yes Xus hais rau lawv tias : “Thaum nej teev Ntuj, nej hais li no :
Txiv, ua kom koj lub Npe ntshiab nto moo lug,
3 kom koj lub Ceeb Tsheej los txog; thov koj niaj hnub pub mov rau peb noj txwm hnub.
4 Thov koj zam peb cov txhaum rau peb zoo li peb zam rau cov tshuav nuj nqes ntawm peb .
Thiab koj txhob tso peb mus raug txoj kev ntxias.”

Tim 8 lub 10 Hli 2020

Hnub Tsib Lis Piam Nees Nkaum Xya Nruab Xyoo A Nruab Lis Piam Xyoo II

Zaj Nyeem Ib: NKAS LAS TIAS 3: 1-5

Paj Lug sau ntawv tias:
1 Aub ! Cov Nkas Las Tias tsis muaj tswv yim aw! Leej twg tso dab tuaj mooj tau nej lawm os? Nej qhov muag twb tau pom peb piav qhia meej txog tias Yes Xus Pleev dai saum ntoo cuam zoo li cas lawm los sad? 2 Kuv tsuas xav paub qhov no ntawm nej xwb : puas yog vim nej coj Txoj Cai, nej thiaj tau txais Leej Tswv Yim, los yog vim nej ntseeg txog qhov nej tau hnov? 3 Nej puas ruam npaum li ntawd? Ua cas chiv thawj, nej twb pib coj raws leej Tswv Yim, tab sis nyem no, nej ho coj raws lub cev nqaij ? 4 Nej puas yog lam tau hnov tau pom ntau yam dag xwb? Yog tias yeej muaj kev lam hnov lam pom dag. 5 Tus uas coj Leej Tswv Yim tuaj rau nej thiab ua hwj huam yees ntxwv rau nej pom, nws puas ua tej ntawd vim Txoj Cai los vim txoj kev ntseeg txog tej yam nej tau hnov ?

NPN: LK 1: 69-70, 71-72, 73-75

Txais: (68) Kom Huab Tais, His Xas Lais tus Tswv Ntuj nto koob meej,
nws tuaj xyuas nws haiv neeg lawm.

Nws tsa tau ib tug cawm seej muaj zog rau peb
Tawm ntawm nws tus tub txib Das Vis tsev neeg los,
Raws li nws tau siv nws cov yaj saub ntshiab
Lub ncauj los hais txij puag thaum ub los lawm.

Txais: (68) Kom Huab Tais His Xas Lais tus Tswv Ntuj nto koob meej,
nws tuaj xyuas nws haiv neeg lawm.

Nws tau hais tias nws yuav cawm peb ntawm peb cov yeeb ncuab,
thiab ntawm cov neeg ntxub peb txhais tes.
Nws tau cog lus tias yuav hlub peb cov yawg koob
Thiab yuav nco ntsoov txog cov lus ntshiab nws nrog lawv cog,

Txais: (68) Kom Huab Tais His Xas Lais tus Tswv Ntuj nto koob meej,
nws tuaj xyuas nws haiv neeg lawm.

Nws tau cog lus rau peb txiv Has Nplas Has tias :
nws yuav npo peb dim ntawm peb cov yeeb ncuab txhais tes,
peb thiaj tau kev tsob hwb nws tsis muaj kev nthsai,
hauv txoj kev ntshiab thiab txoj kev ncaj
nyob ntawm nws xub ntiag tas peb sid.

Txais: (68) Kom Huab Tais His Xas Lais tus Tswv Ntuj nto koob meej,
nws tuaj xyuas nws haiv neeg lawm.

As Les Lus Yas: HAUJ LWM 16: 14B

Txais: As les lus yas, as les lus yas.

Huab Tais, thov koj qhib peb lub siab
kom peb mloog koj Leej Tub cov lus.

Txais: As les lus yas, as les lus yas.

Ntawv Moo Zoo: LK 11: 5-13

5 Yes Xus hais rau nws cov thwj tim tias : "Yog nej leej twg muaj ib tug phooj ywg, nej mus cuag nws thaum ib tag hmo thiab hais rau nws tias : 'Phooj ywg, koj txais peb lub ncuav mov rau kuv, 6 vim kuv ib tug npawg mus tawm rooj los so hauv kuv tsev, kuv tsis muaj dab tsi rau nws noj.' 7 Hos tus nyob hauv tsev teb tias : 'Txhob txob txob kuv; lub qhov rooj twb xauv lawm, kuv cov me nyuam peb twb pw tas lawm, kuv sawv tsis taus los muab dab tsi rau koj.' 8 Kuv hais rau nej tias, tab yog nws tsis sawv los muab vim tus ntawd yog nws phooj ywg, los nws yeej yuav tsum sawv los muab rau tus ntawd raws li nws thov, vim nws pheej taij tsis tseg.
9 Li ntawd, kuv hais rau nej tias: Nej thov, ces luag yuav muab rau nej; nej nrhiav, ces nej yuav ntsib; nej khob, ces lub qhov rooj yuav qhib rau nej. 10 Vim tias leej twg thov, nws yuav tau txais, leej twg nrhiav, nws yuav ntsib, hos leej twg khob qhov rooj, luag yuav qhib rau nws. 11 Nyob hauv nej, leej txiv twg, yog nws tus tub taij ib tug ntses, nws tsis muab ntses rau hos muab ib tug nab rau ? 12 Los yog nws tus tub taij ib lub qe, nws yuav muab ib tug kab lij tshooj rau? 13 Yog tias, txawm nej yog neeg phem, tsis kav nej twb txawj pub tej yam zoo rau nej cov me nyuam, ua li mas Leej Txiv nyob saum ntuj haj yam yuav pub Leej Tswv Yim Ntshiab rau cov uas thov nws!"

Tim     9     lub     10     Hli     2020

Hnub Rau Lis Piam Nees Nkaum Xya Nruab Xyoo A Nruab Lis Piam Xyoo II

Hwm LN Denis, ua Tswv Qhia, thiab Cov, tuag ua Tim Khawv;
Hwm LN John Leonardi, ua Leej Choj

Zaj Nyeem Ib:      NKAS LAS TIAS  3:   7-14

Cov kwv tij nkauj muad:
7 Nej yuav tsum to taub zoo tias, cov neeg muaj kev ntseeg thiaj yog Has Nplas Has cov me nyuam. 8 Ntawv Ntshiab xub pom ua ntej tias Tswv Ntuj yuav ua kom cov pej kum neeg txais kev ntshiab nyob hauv txoj kev ntseeg, ces Ntawv Ntshiab thiaj xub qhia lub Moo Zoo rau Has Nplas Has tias : “Txhua haiv neeg yuav tau txoj hmoov zoo nyob hauv koj.” 9 Li ntawd, txhua leej txhua tus uas muaj kev ntseeg yuav nrog Has Nplas Has tus muaj kev ntseeg txais txoj hmoov zoo.
10 Txhua tus neeg uas saib txoj kev coj raws nraim Txoj Cai yog qhov loj, mas lawv yuav tau hmoov phem; vim muaj Ntawv sau cia tias : “Tus tsis mob siab niaj hnub ua raws txhua lo lus sau tseg nyob hauv phau Ntawv Txoj Cai, mas nws yuav raug hmoov phem.” 11 Yeej pom tseeb tias Txoj Cai ua tsis tau kom ib tug neeg ntshiab tuaj nyob ntawm Tswv Ntuj xub ntiag, vim tias “tus uas txoj kev ntseeg ua kom nws ncaj ncees, mas tus ntawd yuav muaj txoj sia nyob.” 12 Nyob hauv txoj Cai mas tsis hais txog kev ntseeg li, txoj cai tsuas qhia tias “tus twg mloog txoj cai mas nws yuav tsum coj raws nraim li txoj cai hais” xwb. 13 Leej Pleev tau txhiv peb dim ntawm Txoj Cai txoj hmoov phem lawm, yog thaum nws txia ua tus tau hmoov phem kom tau pab peb, raws li cov lus sau tseg tias: “Tus tau hmoov phem yog tus raug luag muab dai rau saum tus ntoo.” 14 Ua li ntawd kom nyob hauv Yes Xus Pleev, lo lus foom hmoov zoo rau Has Nplas Has thiaj yuav ri mus txog cov neeg teev pej kum dab, kom peb thiaj tau txais Leej Tswv Yim raws li lo lus tau cog lawm vim peb ntseeg.

NPN     111:   1B-2, 3-4, 5-6

Txais: (5) Huab Tais yuav nco ntsoov mus tas ib txhis tias nws tau cog lus.

Kuv yuav ua HUAB TAIS tsaug tas kuv lub siab lub ntsws
nyob hauv tsoom neeg siab ncaj lu rooj si sau los ua lub txoos.
HUAB TAIS cov hauj lwm loj tas nrho,
zoo saib zoo ntxim siab kawg nkaus.

Txais: (5) Huab Tais yuav nco ntsoov mus tas ib txhis tias nws tau cog lus.

HUAB TAIS cov hauj lwm muaj hwj xyeej thiab muaj hwj chim,
nws txoj kev ncaj yuav nyob ib txhiab ib txhis.
Nws nto koob meej lug vim nws cov hwj huam yees ntxwv ;
HUAB TAIS muaj lub siab zoo thiab khuv leej neeg.

Txais: (5) Huab Tais yuav nco ntsoov mus tas ib txhis tias nws tau cog lus.

Nws muab txhiam xws rau cov hwm nws tau noj.
Nws yuav nco ntsoov mus li txog tias nws tau cog lus.
Nws ua kom nws haiv neeg paub txog nws tej hauj lwm muaj hwj huam,
Nws muab cov haiv neeg lub cuab tam pub rau lawv.

Txais: (5) Huab Tais yuav nco ntsoov mus tas ib txhis tias nws tau cog lus.

As Les Lus yas:      Zam  12:   31b-32

Txais:   As les lus yas, as les lus yas.    

Huab Tais hais tias:  Zaum no, tus tswj lub qab ntuj neeg
yuav raug ncaws tawm, hos thaum luag tsa kuv siab
rau saum ntiaj teb, mas kuv yuav rub tas txhua leej los cuag kuv.

Txais:   As les lus yas, as les lus yas.

Ntawv Moo Zoo:       LK  11:   15-26

Yes Xus ntiab ib tug dab phem tawm,
15 ces muaj ib txhia nyob hauv cov neeg hais tias : "Nws hu txog tus vaj dab phem Npes Ntxes Npus, nws thiaj ntiab tau dab." 16 Tseem muaj ib txhia xav sim Yes Xus, lawv thov kom Yes Xus ua ib lub cim tawm saum ntuj tuaj. 17 Tab sis Yes Xus paub qhov lawv xav, nws hais rau lawv tias : "Lub teb chaws twg muaj kev sib tawm tsam, mas nws kawg raug kev puas tsuaj; tej vaj tse ib lub yuav vau tsuam ib lub. 18 Yog tias Xas Tas rov tawm tsam Xas Tas, mas nws lub teb chaws yuav ua cas nyob taus ruaj ? Vim nej hais tias kuv hu txog Npes Ntxes Npus los ntiab dab no.  19 Yog tias kuv vam txog Npes Ntxes Npus los ntiab dab tiag mas nej cov neeg ne ho vam txog leej twg los ntiab dab ? Ua li mas, nej cov neeg yuav txiav txim rau nej. 20 Tiam sis yog tias kuv tuav txog Tswv Ntuj tus ntiv tes los ntiab dab, mas yog vim tias Tswv Ntuj lub Ceeb Tsheej los txog nej lawm.
21 Thaum ib tug neeg muaj zog tuav ntaj tuav hmuv zov nws lub tsev vaj loog, mas nws lub cuab tam nyob nyab xeeb. 22 Tab sis, thaum twg lwm tus muaj zog dua nws tuaj ntaus yeej nws, mas tus ntawd yuav txeeb nws cev ris tsho hlau uas yog nws lub chaw tso siab mus, thiab yuav muab nws tej cuab yeej cuab tam los sib faib. 23 Leej twg tsis nrog kuv, mas yog nws tiv kuv. Leej twg tsis nrog kuv muab khaws cia, mas yog nws muab ua kom ploj.”
24 "Thaum dab tsis huv tawm hauv ib tug neeg mus, nws mus ua loj leeb rau hauv tej teb chaws quav poj, nrhiav ib lub chaw so, tab sis nrhiav tsis tau, ces nws hais tias : 'Kuv yuav rov mus nyob hauv lub tsev uas kuv tawm los.' 25 Thaum dab tsis huv rov qab los txog, nws pom lub tsev cheb huv si thiab tu du lug cia. 26 Ces tus dab ntawd mus coj xya tus dab tseem phem dua nws nkag los nyob hauv lub tsev ntawd. Ces thaum kawg, tus neeg ntawd lub neej phem tshaj qhov qub tuaj xwb."

Tim 10 lub 10 Hli 2020

Hnub Xya Lis Piam Nees Nkaum Xya Nruab Xyoo A Nruab Lis Piam Xyoo II

Zaj Nyeem Ib: NKAS LAS TIAS 3: 22-29

Cov kwv tij nkauj muad:
22 Ntawv Ntshiab tau muab tas ib puas tsav yam zwm rau hauv txoj kev txhaum, kom xwv nyob hauv txoj kev ntseeg txog Yes Xus Pleev, cov neeg ntseeg tau txais raws li tau muaj lus cog tseg lawm.
23 Thaum tsis tau muaj txoj kev ntseeg, mas Txoj Cai tuav peb thiab kaw peb mus txog hnub uas txoj kev ntseeg tawm tuaj.
24 Li ntawd, Txoj Cai yog tus kav tus tswj peb npaj tos Leej Pleev tuaj, kom peb dawb huv tuaj tau nyob hauv txoj kev ntseeg.
25 Nyem no, txoj kev ntseeg tuaj txog lawm mas peb tsis zwm rau ib tug kav ib tug tswj peb ntxiv.
26 Vim txoj kev ntseeg mas nej sawv daws puav leej yog Tswv Ntuj cov me nyuam huv tib si nyob hauv Yes Xus Pleev.
27 Nej sawv daws uas tau txais lub cim ntxuav nyob hauv Leej Pleev, mas nej hnav Leej Pleev lawm.
28 Tsis muaj neeg Yus Das los Hes Las, tsis muaj tus qhev los tus twj lij, tsis muaj txiv neej los poj niam ntxiv lawm, vim nej sawv daws koom ua ib leeg xwb nyob hauv Yes Xus Pleev.
29 Yog tias nej yog Leej Pleev neeg, mas nej kuj yog Has Nplas Has tsoom xeeb ntxwv thiab, ces nej yog cov yuav txais lub cuab tam raws li lo lus tau cog tseg lawm.

NPN 105: 2-3, 4-5, 6-7

Txais: (8a) Huab Tais nco ntsoov tas mus li tias nws tau cog lus.

Nej hu nkauj rau nws, nej hu nkauj cav txog nws,
nej tshaj tawm txog tej yam loj nws tau ua.
Nej txais koob meej nyob hauv nws lub npe.
Nej cia li zoo siab, nej cov uas muaj lub siab nrhiav HUAB TAIS!

Txais: (8a) Huab Tais nco ntsoov tas mus li tias nws tau cog lus.

Nej vam txog Huab Tais thiab nws lub zog,
nej nrhiav nws lub ntsej muag mus li.
Nej nco ntsoov txog cov hwj huam txaus qhuas nws tau ua,
nws cov hauj lwm loj, thiab cov lus txiav txim nws lub ncauj tau hais.

Txais: (8a) Huab Tais nco ntsoov tas mus li tias nws tau cog lus.

Nej Has Nplas Has tsoom xeeb ntxwv, yog nws cov tub txib,
Nej Yas Kos cov tub, yog nws pab neeg nws tau xaiv!
Huab Tais nws yog peb tus Tswv Ntuj,
tas ntiaj teb coj raws nws tej lus txiav txim.

Txais: (8a) Huab Tais nco ntsoov tas mus li tias nws tau cog lus.

As Les Lus Yas: LK 11: 28

Txais: As les lus yas, as les lus yas.

Cov tau hmoov zoo yog cov mloog Tswv Ntuj lo lus
thiab coj raws nraim li ntawd.

Txais: As les lus yas, as les lus yas.

Ntawv Moo Zoo: LK 11: 27-28

27 Thaum Yes Xus tseem hais tej lus ntawd, muaj ib tug poj niam nyob hauv nruab nrab tsoom sid tsa suab hais nrov nrov rau Yes Xus tias: "Lub plab uas tau nqa koj thiab lub xub ntiag uas pub mis rau koj tau txoj hmoov zoo !"
28 Tab sis Yes Xus hais tias: "Tseeb tiag, cov tau txoj hmoov zoo mas yog cov uas mloog Tswv Ntuj Lo Lus thiab ua raws li ntawd,."

Tim 12 lub 10 Hli 2020

Hnub Ob Lis Piam Nees Nkaum Yim Nruab Xyoo A Nruab Lis Piam Xyoo II

Zaj Nyeem Ib: NKAS LAS TIAS 4: 22-24, 26-27, 31–5:1

Cov kwv tij nkauj muad:
22 Ntawv sau tias Has Nplas Has muaj ob tug tub, ib tug yug ntawm tus ntxhais qhev los, ib tug yug ntawm tus poj niam twj lij los. 23 Tus ntxhais qhev tus tub yug ntawm nqaij tawv los raws li kev cai. Hos tus poj niam twj lij tus tub yug los vim muaj kev cog lus. 24 Ob tug poj niam ntawd yog ib zag paj lug. Nkawd qhia txog ob txog kev cog lus : Ib tug yog txoj kev cog lus nyob saum lub roob Xis Nais, nws yug ib co me nyuam los ua qhev : Yog As Nkas.
26 Tab sis lub tsheej Yes Lus Xas Les saum txheej siab, yog ib lub tsheej twj lij ; nws yog peb niam. 27 Twb muaj ntawv sau txog hais li no tias : “Koj kav tsij zoo siab, poj khab seeb uas tsis tau yug dua me nyuam; koj kav tsij luag ua suab nrov ntas ntua, koj tus tsis tau paub dua kev mob plab yug me nyuam; vim tus poj niam uas luag muab tso pov tseg cov me nyuam coob dua tus poj niam muaj txiv cov.”
31 Cov kwv tij, peb tsis yog tus ntxhais qhev cov me nyuam, peb yog tus poj niam twj lij cov me nyuam.
5 1 Leej Pleev tau cawm peb dim kom peb tau txais kev twj lij. Li ntawd, mas nej yuav tsum nyob ruaj nreb tsis txhob rov mus zwm rau tus quab ua qhev.

NPN 113: 1B-2, 3-4, 5A+6-7

Txais: (2) Thov kom Huab Tais lub npe nto koob meej mus li.

HUAB TAIS cov tub txib, nej cav txog nws,
nej cav txog HUAB TAIS lub npe.
Kom HUAB TAIS lub npe nto moo lug,
txij no mus tsis muaj caij kawg!

Txais: (2) Thov kom Huab Tais lub npe nto koob meej mus li.

Txij thaum hnub tawm txog thaum hnub poob qho,
kom HUAB TAIS lub npe nto koob meej.
HUAB TAIS nyob siab tshaj ib tsoom kuj cuab,
nws lub koob meej nyob siab dua txheej ntuj saud.

Txais: (2) Thov kom Huab Tais lub npe nto koob meej mus li.

Leej twg thiaj zoo li HUAB TAIS, peb tus Tswv Ntuj?
Nws tsa muag ntsia rau saum lub ntuj
thiab dauv muag ntsia lub ntiaj teb nyob rau hauv.
Nws tsa tus neeg me tawm hauv plua tshauv los,
nws rub tus txom nyem tawm hauv qhov qias los.

Txais: (2) Thov kom Huab Tais lub npe nto koob meej mus li.

As Les Lus Yas: NPN 95: 8

Txais: As les lus yas, as les lus yas.

Yog hnub no nej hnov nws lub suab,
nej tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: LK 11: 29-32

29 Thaum neeg tseem tuaj ntxiv tas zog rau tej pab neeg coob coob nyob ua ke, Yes Xus hais cov lus no rau lawv tias : "Tiam neeg no yog ib tiam neeg phem. Lawv taij kom pom ib lub cim, tab sis yuav tsis muaj ib lub cim rau lawv pom, lawv tsuas kawg yuav pom Yos Nas lub cim xwb. 30 Xws li Yos Nas yog ib lub cim rau cov neeg nyob Nis Nis Vas, Neeg Leej Tub kuj yuav yog ib lub cim rau tiam neeg no thiab. 31 Hnub txiav txim, tus poj vaj nyob Naj Fab yuav nrog tiam neeg no sawv los, nws yuav muab txim rau lawv, vim nws tuaj puag tim npoo ntiaj teb tuaj mloog Xas Los Moos cov lus thoob tsib, hos nyob ntawm no, twb muaj tus loj dua Xas Los Moos ! 32 Hnub txiav txim, cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thov txhaum, hos nyob ntawm no twb muaj tus loj dua Yos Nas!"

Tim 13 lub 10 Hli 2020

Hnub Peb Lis Piam Nees Nkaum Yim Nruab Xyoo B Nruab Lis Piam Xyoo II

Zaj Nyeem Ib: GAL 5: 1-6

Cov kwv tij nkauj muad:
1 Leej Pleev tau cawm peb dim, kom peb tau kev twj lij. Li ntawd, mas nej yuav tsum nyob ruaj nreb tsis txhob rov mus zwm rau tus quab ua qhev. 2 Ntawm no kuv, Paj Lug, hais rau nej tias, yog nej cia lawv ua lub cim txiav rau nej, mas Leej Pleev tsis muaj qab hau dab tsi tshaj rau nej. 3 Kuv rov hais dua tias, tus twg cia luag ua lub cim txiav rau nws, mas nws yuav tsum coj Txoj Cai kom txhij txhua. 4 Nej cov uas nrhiav kev ncaj nyob hauv Txoj Cai, mas yog nej ncaim ntawm Leej Pleev, nej tsis tau lub txiaj ntsim ntxiv. 5 Ntawm peb mas, yog nyob hauv Leej Tswv Yim, vim txoj kev ntseeg, peb thiaj tos ntsoov tias yuav tau txais kev ncaj. 6 Vim nyob hauv Yes Xus Pleev, txawm ua lub cim txiav thiab tsis ua los tsis muaj nqes dab tsi, qhov muaj nqes tsuas yog txoj kev ntseeg uas ua hauj lwm nyob hauv txoj kev nyiam xwb.

NPN 119: 41, 43, 44, 45, 47, 48

Txais: (41a) Huab Tais, thov xa koj txoj kev khuv leej tuaj rau kuv.

Huab Tais, thov tso koj txoj kev khuv leej tuaj rau kuv,
Muab koj txoj kev cawm rau kuv raws li koj tau cog lus.

Txais: (41a) Huab Tais, thov xa koj txoj kev khuv leej tuaj rau kuv.

Koj txhob rho lo lus tseeb ntawm kuv lub ncauj mus,
vim kuv txoj kev tso siab yog koj cov cai lij choj.

Txais: (41a) Huab Tais, thov xa koj txoj kev khuv leej tuaj rau kuv.

Kuv yuav khaws koj Txoj Cai mus li
tsis muaj caij tag tsis muaj caij kawg.

Txais: (41a) Huab Tais, thov tso koj txoj kev khuv leej tuaj rau kuv.

Kuv yuav taug kev hauv kev twj lij,
vim kuv nrhiav koj cov cai lij choj.

Txais: (41a) Huab Tais, thov xa koj txoj kev khuv leej tuaj rau kuv.

Kuv zoo siab tas nrho nyob hauv koj cov lus qhia,
uas kuv nyiam tas siab tas ntsws.

Txais: (41a) Huab Tais, thov xa koj txoj kev khuv leej tuaj rau kuv.

Kuv tsa tes rau koj cov lus qhia uas kuv nyiam,
thiab kuv ua tib zoo xav txog koj cov cai lij choj.

Txais: (41a) Huab Tais, thov xa koj txoj kev khuv leej tuaj rau kuv.

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj txoj sia thiab ua tau hauj lwm,
Nws mem tau neeg lub tswv yim thiab tej zaj xav hauv nruab siab.

Txais: As les lus yas, as les lus yas.

Ntawv Moo Zoo: LK 11: 37-41

37 Thaum Yes Xus hais lus tas lawm, muaj ib tug Fas Lis Xais caw Yes Xus mus noj mov tim nws tsev. Yes Xus chaws mus hauv tsev, nws mus xyab ntawm rooj mov.
38 Tus Fas Lis Xas pom, ces nws poob siab rau qhov Yes Xus tsis xub ntxuav tes tso mam noj mov.
39 Ces Huab Tais hais rau tus Fas Lis Xais ntawd tias : "Nej cov Fas Lis Xais ntawm ko, nej ntxuav khob ntxuav phaj sab nraud kom huv, tab sis muaj kev tub sab thiab kev phem nyob puv nkaus nej sab hauv.
40 Neeg vwm ! Tus tsim sab nraud, nws tsis tau tsim sab hauv thiab lod ?
41 Nej yuav tsum muab yam nyob sab hauv pub rau cov txom nyem, ces txhua yam yuav huv tuaj rau nej.”

Tim 14 lub 10 Hli 2020

Hnub Plaub Lis Piam Nees Nkaum Yim Nruab Xyoo A Nruab Lis Piam Xyoo II

Hwm LN Callistus I, Vaj Qhia tuag ua Tim Khawm

Zaj Nyeem Ib: NKAS LAS TIAS 5: 18-25

Cov kwj tij nkauj muad:
18 Yog nej cia Leej Ntuj Plig coj nej, mas nej tsis zwm rau Txoj Cai. 19 Cov hauj lwm los ntawm lub cev los mas yeej pom tseeb kawg: yog kev sib daj sib dee, kev ua phem ua qias, kev quav dej quav cawv luab sab, 20 kev teev dab teev mlom, kev siv khawv koob, kev sib ntxub, kev sib ciav sib cais, kev sib khib, kev npau lwj npau liam, kev sib tw kom yeej, kev sib tawg sib ntxub, kev sib ncaim nyias mus nyias, 21 kev khib luag ntshaw luag, kev haus dej haus cawv kom qaug, kev ua luaj thuam luab sab, thiab lwm yam phem zoo li no ntxiv. Kuv thiaj li ceeb toom rau nej, ib yam li kuv twb tau ceeb toom dua los lawm tias, cov neeg uas ua tej yam zoo li ntawd yuav tsis tau txais Tswv Ntuj lub Ceeb Tsheej los ua lawv tug.
22 Hos cov txiv uas txi ntawm Leej Tswv Yim los mas yog kev nyiam, kev zoo siab, kev thaj yeeb, kev ua siab ntev, kev ua zoo rau luag, kev ua siab zoo, kev ntseeg, 23 kev ua siab mos siab muag, thiab kev txawj tswj yus tus kheej zoo. Tsis muaj ib txog cai yuav txwv tej yam kev ua zoo no. 24 Cov uas yog Yes Xus Pleev tug mas lawv yuav tsum muab lawv lub cev nqaij nrog lub cev tej kev xav kev ntshaw ntsia rau saum ntoo cuam.
25 Yog peb muaj sia nyob hauv Leej Tswv Yim, mas peb yuav tsum cia Leej Tswv Yim coj peb taug kev ua neej.

NPN 1: 1-2, 3, 4+6

Txais: (Zam 8:12) Huab Tais, cov raws koj qab yuav tau txoj kev pom kev uas pu txoj sia.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (Zam 8:12) Huab Tais, cov raws koj qab yuav tau txoj kev pom kev uas pu txoj sia.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd.

Txais: (Zam 8:12) Huab Tais, cov raws koj qab yuav tau txoj kev pom kev uas pu txoj sia.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (Zam 8:12) Huab Tais, cov raws koj qab yuav tau txoj kev pom kev uas pu txoj sia.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub kuv cov yaj, kuv cov yaj raws nraim kuv qab mus.

Txais: As les lus yas, as les lus yas.

Ntawv Moo Zoo: LK 11: 42-46

Huab Tais hais tias:
42 “Nej tsoom Fas Lis Xais txoj hmoov phem! Vim nej them se ib feem kaum ntawm cov pum hub, cov zaub txhwb nyug dub, thiab ntawm txhua yam zaub, tab sis nej tsis mob siab txog txoj kev txiav txim ncaj thiab txoj kev nyiam Tswv Ntuj. Nej trwb yuav tsum tau ua qhov no, thiab tsis txhob tso qhov tod pov tseg.
43 Nej tsoom Fas Lis Xais txoj hmoov phem! Vim nej nyiam zaum thawj lub rooj kim txwv hauv cov tsev txoos, thiab nyiam kom luag hawm nej tom tej tshav puam.
44 Nej txoj hmoov phem! Vim nej zoo li tej ntxa uas luag tsis paub tias yog ntxa, ces sawv daws mus tsuj saud.
45 Ces ib tug Kws Lij Choj hais rau Yes Xus tias : "Xib Hwb, koj hais tej ntawd mas kuj tub qaug peb thiab." 46 Yes Xus thiaj hais tias : "Nej cov Kws Lij Choj, nej kuj tau txoj hmoov phem thiab! Vim nej nog tej lub nra ceeb laj ris kawg rau zeej tsoom sawv daws, tab sis nej twb tsis xuas nej ib tug nyuag ntiv tes mus kov tej nra ntawd.“

Tim 15 lub 10 Hli 2020

Hnub Tsib Lis Piam Nees Nkaum Yim Nruab Xyoo A Nruab Lis Piam Xyoo II

Hwm LN Teresa of Jesus, nkauj xwb ua Kws cov Txuj Ntshiab

Zaj Nyeem Ib: ES FES XOS 1: 1-10

1 Kuv, Paj Lug, tus uas Tswv Ntuj pom zoo tsa ua Yes Xus Pleev ib tug Hauv Paus Xa Lus, sau ntawv tuaj rau cov ntshiab nyob Es Fes Xos thiab rau cov neeg ntseeg ruaj nyob hauv Yes Xus Pleev. 2 Thov kom peb Txiv Tswv Ntuj, thiab Huab Tais Yes Xus Pleev pub txiaj ntsim thiab kev thaj yeeb rau nej.
3 Kom peb tus Huab Tais Yes Xus Pleev tus Tswv Ntuj thiab nws Leej Txiv tau txais koob meej; nws yog tus tau foom hmoov zoo rau peb nyob hauv Leej Pleev, kom peb tau txais txhua yam txiaj ntsim nyob saum ntuj los yug peb sab ntsuj plig. 4 Nws yog tus tau xaiv peb nyob hauv Leej Pleev txij puag thaum tseem tsis tau tsim lub ntuj lub teb los lawm, kom peb ua neeg ntshiab huv tsis muaj chaw xyeej nyob ntawm nws xub ntiag, nyo hauv txoj kev nyiam. 5 Nws yeej ib txwm xub npaj peb los ua nws cov tub ki tshiab nyob hauv Yes Xus Pleev lawm, raws li nws lub siab nyiam txoj kev pom zoo ua li ntawd, 6 kom nws lub txiaj ntsim muaj hwj chim tau koob meej, yog lub txiaj ntsim uas nws pub dawb paug rau peb nyob hauv tus nws nyiam tas nrho.
7 Nyob hauv Leej Pleev, tus nws nyiam, peb tau txais kev cawm nyob hauv nws cov roj ntsha, thiab kev daws peb cov txhaum vim nws lub txiaj ntsim muaj nqes nplua nuj, 8 uas Tswv Ntuj pub ntws lug los rau peb nyob hauv txoj kev thoob tsib thiab kev txawj xav. 9 Nws tau qhia yam zais tob piav tsis tau ntawm nws lub siab xav rau peb paub, raws li lub hom phiaj uas nws yeej npaj nyob hauv Leej Pleev lawm; 10 yog lub hom phiaj nws npaj rau thaum txog lub caij teem, nws yuav coj kom tas txhua tsav yam txhua leej los koom ua ib tug xwb nyob hauv Leej Pleev, txawm yuav yog cov nyob saum ntuj los cov nyob ntiaj teb tas huv tib si.

NPN 98: 1, 2-3AB, 3CD-4, 5-6

Txais: (2a) HUAB TAIS ua kom sawv daws paub txog nws txoj kev cawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais: (2a) HUAB TAIS ua kom sawv daws paub txog nws txoj kev cawm.

HUAB TAIS ua kom sawv daws paub txog nws txoj kev cawm,
nws muab nws txoj kev ncaj qhia rau cov haiv neeg pom.
Nws rov nco txog nws txoj kev ua zoo thiab ua ncaj
rau tsev neeg His Xas Lais.

Txais: (2a) HUAB TAIS ua kom sawv daws paub txog nws txoj kev cawm.

Tas cov npoo ntuj npoo ntiaj teb kawg tau pom
peb tus Tswv Ntuj txoj kev cawm neeg lawm.
Tas txhua teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais: (2a) HUAB TAIS ua kom sawv daws paub txog nws txoj kev cawm.

Nej ntaus nkauj nog ncas cav txog Huab Tais,
nej ntaus nkauj nog ncas nrog tej zaj nkauj zoo mloog.
Nej tshuab hom ntxuag suab kub nyuj,
nej hu nkauj zoo siab ntawm vaj ntxwv HUAB TAIS xub ntiag.

Txais: (2a) HUAB TAIS ua kom sawv daws paub txog nws txoj kev cawm.

As Les Lus Yas: ZAM 14: 16

Txais: As les lus yas, as les lus yas.

Huab Tais hais tias: "Kuv yog Txoj Kev, yog Qhov Tseeb, thiab yog Txoj Sia;
tsis muaj leej twg mus cuag Leej Txiv tau, yog nws tsis mus ntawm kuv mus.

Txais: As les lus yas, as les lus yas.

Ntawv Moo Zoo: LK 11: 47-54

Yes Xus hais tias:
47 Nej hmoov phem, nej cov uas txhim cov yaj saub uas yog nej phaj txiv tau muab tua, tej ntxa. 48 Li ntawd, nej ua tim khawv thiab nej pom zoo tias nej phaj txiv ua yog lawm, vim lawv yog cov muab tua, hos nej yog cov txhim ntxa. 49 Yog vim li ntawd Tswv Ntuj txoj kev Thoob Tsib thiaj hais tias: ‘Kuv yuav xa ib co yaj saub thiab ib co tub xa lus mus cuag lawv, lawv yuav muab ib co tua thiab hiam lawv.’ 50 Kom xwv luag yuav nug txog cov yaj saub tej roj ntsha uas tau nchuav txij thaum ntuj tsim teb raug los lawm, ntawm tiam neeg no 51 txij As Npes cov ntshav los txog Ntxas Kas Lias cov ntshav, tus uas raug tua ntawm lub thaj txi Ntuj thiab lub tuam tsev kis nruab nrab. Kuv hais rau nej tias : tiam neeg no yuav raug them lub txim ntawm cov ntshav ntawd.
52 Nej tsoom Kws Lij Choj nej txoj hmoov phem! Vim nej tau rho tus yuam sij qhib kev txawj ntse tawm mus lawm; nej tsis kam nkag mus hauv thiab cov xav nkag mus hauv los nej tsis pub lawv mus."
53 Thaum Yes Xus tawm mus lawm, cov Kws Ntawv Ntshiab thiab cov Fas Lis Xais pib ntxub Yes Xus tas siab nrho, thiab lawv pib nug Yes Xus txog ntau yam, 54 vim lawv npaj tswv yim tos rawv thaum twg nws hais ib lo lus yuam kev ces lawv thiaj tau kev liam nws.