Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


COV ZAJ NYEEM NRUAB LIS PIAM XYOO A 2019-2020 - Page 3 Empty

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO A 2019-2020

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 28th January 2020, 12:57 pm

    TIM 29 LUB 1 HLIS 2020

    Hnub Plaub Lis Piam Peb Nruab Xoo A Nruab Lis Piam II

    Zaj Nyeem Ib: 2 XM 7: 4-17


    4 Hmo ntawd, Huab Tais hais lus rau Nas Taas, nws hais tias: 5 "Koj mus hais rau kuv tus tub txib Das Vis tias: ‘HUAB TAIS hais li no : Koj puas yog tus yuav txhim ib lub tsev rau kuv nyob? 6 Txij hnub kuv tau coj tsoom tub ki His Xas Lais tawm Hais Nkws Tos teb los txog tav no, kuv tsis tau nyob hauv ib lub tsev li, kuv tsuas tau tshais chaw mus mus los los nyob hauv ib lub Tsev Tsam Phooj thiab hauv ib lub xab xwb. 7 Nyob tas qhov txhia chaw uas kuv tau nrog tsoom tub ki His Xas Lais tshais chaw mus mus los los, kuv puas tau hais rau ib tug txwj laus twg hauv ib lub xeem His Xas Lais uas kuv tau tsa los coj kuv haiv neeg tias: Ua cas nej tsis txhim ib lub tsev ntoo ciab rau kuv nyob?’
    8 Nyem no koj mus hais rau kuv tus tub txib Das Vis tias : ‘HUAB TAIS kav tsoom tshiab hais li no : Kuv yog tus tau rho koj hauv cov tshav zaub uas koj lawv pab yaj qab los tsa ua tus tswj kuv haiv His Xas Lais. 9 Kuv tau nrog koj nyob nraim txhua qhov txhia chaw koj tau mus txog. Kuv tau rhuav koj cov yeeb ncuab tib si nyob ntawm koj hauv ntej. Kuv tau pub kom koj lub npe nto moo loj cuag li cov neeg muaj koob muaj npe nyob hauv ntiaj teb no. 10 Kuv tseem yuav muab ib qho chaw rau kuv haiv neeg His Xas Lais nyob; kuv yuav muab lawv cog rau ntawd, kom lawv nyob ruaj tsis tau tsiv ntxiv lawm, thiab tsis muaj neeg phem yuav hiam lawv li yav tas los ntxiv, 11 xws li thaum lub caij kuv tau tsa ib co txwj laus txiav txim los coj kuv haiv His Xas Lais. Kuv yuav cia koj so tsis tau ntaus nej cov yeeb ncuab ntxiv.’ Thiab HUAB TAIS hais rau koj paub tias nws yuav txhim tsa ib lub tsev rau koj. 12 Thaum txog koj lub caij dua mus thiab koj mus nrog koj cov poj yawm txwv koob pw ntsiag to lawm, kuv yuav cia koj ib tug xeeb ntxwv tawm ntawm koj roj ntsha los hloov koj chaw; Kuv yuav nres nws txoj kev ua vaj kom nyob ruaj nreb. 13 Nws yog tus yuav tsa ib lub tsev rau kuv lub npe, ces kuv yuav ua kom nws lub rooj zaum ua vaj nyob ruaj mus li. 14 Kuv yuav ua nws txiv, nws yuav yog kuv leej tub. Yog nws ua qhov phem, kuv yuav siv tib neeg rab pas los rau txim rau nws thiab kuv yuav siv tib neeg rab nplawm los nplawm nws. 15 Tab sis kuv yuav tsis thau kuv lub txiaj ntsim ntawm nws los xws li kuv tau thau ntawm Xas Ws tus xub ua vaj dua koj los, uas kuv tau muab nws tshem tawm ntawm koj xub ntiag mus. 16 Koj tsev neeg thiab koj txoj kev ua vaj yuav nyob mus li nyob ntawm koj xub ntiag. Koj lub theej kiab yuav nyob ruaj nreb mus ib txhis.’"
    17 Nas Taas piav tas cov lus nws tau hnov thiab txhua yam nws tau pom tib si rau Das Vis mloog.

    NPN 89: 4-5, 27-28, 29-30

    Txais: (29a) Kuv yuav hlub kuv tus tub txib mus li.

    Kuv tau nrog tus kuv xaiv cog ib lo lus cia,
    kuv tau cog lus khov rau kuv tus tub txib Das Vis tias :
    Kuv yuav tsa koj caj ces kom nyob ruaj mus li,
    kuv yuav txhim koj lub theej kiab kom nyob tiam dhau tiam.

    Txais: (29a) Kuv yuav hlub kuv tus tub txib mus li.

    Nws yuav hu rau kuv tias : "Koj yog kuv txiv,
    kuv tus Tswv Ntuj, lub Tsua cawm kuv."
    Hos kuv yuav muab nws ua kuv tus tub hlob,
    ua tus loj tshaj tas cov vaj nyob ntiaj teb.

    Txais: (29a) Kuv yuav hlub kuv tus tub txib mus li.

    Kuv lub siab yuav khuv leej nws tas mus li,
    Kuv lo lus kuv nrog nws cog yuav nyob ruaj khov.
    Kuv yuav ua kom nws caj ces nyob mus ib txhis,
    yuav tsa nws lub theej kiab kom nyob ntev li lub ntuj.

    Txais: (29a) Kuv yuav hlub kuv tus tub txib mus li.

    As Les Lus Yas

    Txais: As les lus yas, as les lus yas.

    Lub noob nplej yog Tswv Ntuj lo lus, leej Pleev yog tus tseb cov noob nplej;
    txhua tus uas tuaj cuag nws yuav ciaj nyob mus li.

    Txais: As les lus yas, as les lus yas.

    Ntawv Moo Zoo: MK 4: 1-20

    1 Yes Xus rov pib qhuab qhia dua nyob ntawm ntug dej ntuj. Ib pab neeg coob kawg sis sau nyob ze nws, nws thiaj nce mus zaum hauv ib lub nkoj nyob saum nplaim dej ntuj, hos tas ib tsoom neeg nyob saum av, tim ntug nqhuab. 2 Yes Xus ua paj lug qhia ntau yam rau lawv. Thaum nws qhia lawv, nws hais tias :
    3 "Nej mloog saib ! Tus neeg tseb nplej tawm mus tseb nplej. 4 Thaum nws tseb, muaj ib co noob poob rau ntawm ntug kev, ces noog ya tuaj noj lawm. 5 Muaj ib co noob poob rau hauv thaj av pob zeb. Nyob ntawd tsis muaj av ntau, ces noob tuaj kaus sai, vim av tsis tob. 6 Thaum hnub tuaj ziab, cov yub ntsws tas; vim cov yub tsis muaj cag, ces cov yub cia li qhuav. 7 Tseem muaj ib co noob poob rau hauv cov pos. Pos hlob tuaj laum cov yub, ces cov yub ntawd txhawv tsis taus. 8 Hos muaj ib co noob poob rau hauv thaj av zoo. Cov yub nplej ntawd hlob thiab huam, txhawv ua hnab. Tej lub noob txi peb caug lub nplej, tej lub txi rau caum lub, tej lub txi ib puas lub." 9 Ces Yes Xus hais tias : "Leej twg muaj pob ntseg mloog, mas cia nws mloog."
    10 Thaum Yes Xus nyob ntawm ib qho xu kev lawm, cov neeg nrog nws ua ke thiab Pab Kaum Ob nug nws txog cov paj lug ntawd. 11 Yes Xus hais rau lawv tias : "Ntuj pub cov lus tob qhia txog Tswv Ntuj lub Ceeb Tsheej rau nej paub. Hos cov neeg uas nyob sab nraud, mas ib puas tsav yam yog paj lug rau lawv xwb. 12 Kom xwv ‘lawv ntsia ntsoov, los lawv tsis pom, lawv mloog ntsoov, los lawv tsis to taub li, vim ntshai tsam lawv yuav tsum hloov siab, ces Ntuj ho yuav zam rau lawv.’”
    13 Yes Xus hais rau lawv ntxiv tias : "Nej tsis to taub zaj paj lug no lod ? Yog li, nej yuav ua cas to taub cov paj lug tas huv si? 14 Tus tseb nplej nws tseb Lo Lus. 15 Cov uas poob ntawm ntug kev, qhov chaw uas lawv tseb Lo Lus, yog cov neeg uas tau hnov Lo Lus, tab sis, tam sis ntawd Xas Tas twb tuaj rho Lo Lus uas nyuam qhuav tseb rau hauv lawv nruab siab tawm lawm. 16 Cov uas poob rau hauv thaj av pob zeb, yog cov neeg uas thaum lawv hnov Lo Lus, lawv zoo siab hlo txais tam sis ntawd. 17 Tab sis lawv tsis muaj cag ruaj nyob hauv lawv, ces kav tsis ntev : thaum muaj kev txom nyem los kev raug luag hiam vim Lo Lus, mas lawv ntog tam sis ntawd. 18 Cov uas tseb poob rau hauv cov pos, yog cov neeg uas tau hnov Lo Lus, 19 tab sis lub caij nyoog tej kev txhawj xeeb, kev xav nplua nuj tej kev haub kev ntxias, thiab lub siab ntshaw ntau yam txeem mus laum Lo Lus, ces Lo Lus txi tsis taus txiv. 20 Hos cov uas tseb poob rau hauv thaj av zoo yog cov neeg uas hnov Lo Lus, lawv txais Lo Lus thiab lawv tawg paj txi txiv, ib tug txi peb caug lub, ib tug txi rau caum lub, ib tug txi ib puas lub."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 29th January 2020, 8:38 am

    TIM 30 LUB 1 HLIS 2020

    Hnub Tsib Lis Piam Peb Nruab Xyoo A Nruab Lis Piam Xyoo II

    Zaj Nyeem Ib: 2 XM 7: 18-19, 24-29


    Tus yaj saub Nas Taas nrog Das Vis tham tas,
    18 ces Das Vis nkag mus hauv tsev, nws mus zaum nyob ntawm HUAB TAIS xub ntiag, nws hais tias : "HUAB TAIS Tswv Ntuj, kuv yog leej twg, thiab kuv tsev neeg yog leej twg, koj thiaj coj kuv los txog txij no ? 19 Twb npaum li ntawd los koj tseem xav tias tsawg dhau, Huab Tais Tswv Ntuj, koj tseem hais txog koj tus tub txib tsev neeg mus deb lawm yav tom ntej ntxiv thiab. Qhov no yog txoj cai rau tib neeg coj los HUAB TAIS Tswv Ntuj?
    24 Koj tau tsa His Xas Lais ua koj haiv neeg, nws yuav yog koj haiv neeg mus li. Hos koj HUAB TAIS, koj yog lawv tus Tswv Ntuj. 25 Nyem no, HUAB TAIS Tswv Ntuj, thov koj muab koj lo lus koj tau hais rau koj tus tub txib thiab rau nws tsev neeg, zwm cia kom nyob mus li ib txhis, thiab thov koj ua raws nraim li koj tau hais. 26 Thov kom koj lub npe nto moo lug mus li. Kom luag hais tias: ‘Tus HUAB TAIS kav tsoom tshiab yog His Xas Lais tus Tswv Ntuj!’ Thiab thov kom koj tus tub txib Das Vis tsev neeg yuav nyob ruaj nreb nyob ntawm koj xub ntiag. 27 Vim koj, HUAB TAIS kav tsoom tshiab, His Xas Lais tus Tswv Ntuj, koj yog tus tau qhia koj tus tub txib tias: ‘Kuv yuav tsim ib lub tsev rau koj.’ Yog vim li ntawd koj tus tub txib thiaj muaj cuab kav thov ko li noj. 28 Nyem no, HUAB TAIS Tswv Ntuj, koj yog Tswv Ntuj tiag, koj cov lus yog qhov tseeb. Koj tau cog lo lus zoo ntawd rau koj tus tub txib lawm. 29 Yog li thov koj zoo siab tso koj lo lus foom hmoov zoo los rau saum koj tus tub txib tsev neeg, kom nws tsev neeg nyob ntawm koj xub ntiag mus li; vim koj, HUAB TAIS Tswv Ntuj, yog tus tau cog lus lawm; thov kom koj lo lus foom koob foom hmoov yuav ua kom koj tus tub txib tsev neeg muaj txoj hmoov zoo mus ib txhiab ib txhis."

    NPN 132: 1-2, 3-5, 11, 12, 13-14

    Txais: (Lk 1: 32b) Huab Tais Tswv Ntuj yuav muab
    nws txiv Das Vis lub theej kiab rau nws zaum.

    HUAB TAIS, thov koj nco ntsoov txog Das Vis,
    nco txog nws tej kev txom nyem kev khwv;
    nco txog lo lus nws tau cog rau HUAB TAIS,
    lub yeem nws tau fiv rau Yas Kos tus Huab Tais Muaj Hwj Huam:

    Txais: (Lk 1: 32b) Huab Tais Tswv Ntuj yuav muab
    nws txiv Das Vis lub theej kiab rau nws zaum.

    "Kuv yuav tsis chaws mus hauv kuv lub tsev tsam phooj,
    yuav tsis qhau cev pw saum kuv lub txaj,
    kuv yuav tsis pub kuv ob lub qhov muag qi,
    tsis kheev kuv ob daim tawv muag swb tus dab ntub,
    mus txog thaum kuv nrhiav tau ib qho chaw rau HUAB TAIS so,
    ib lub tsev rau Yas Kos tus Tswv Ntuj Muaj Hwj Huam nyob tso."

    Txais: (Lk 1: 32b) Huab Tais Tswv Ntuj yuav muab
    nws txiv Das Vis lub theej kiab rau nws zaum.

    HUAB TAIS tau cog lus tseeb rau Das Vis lawm,
    yog ib lo lus ruaj, nws yuav tsis thim nws lo lus no :
    " Ib tug tawm hauv koj roj ntsha los
    Yog tus kuv yuav tsa los zaum saum koj lub theej kiab.”

    Txais: (Lk 1: 32b) Huab Tais Tswv Ntuj yuav muab
    nws txiv Das Vis lub theej kiab rau nws zaum.

    “Yog koj cov tub ki khaws cov lus kuv nrog lawv cog,
    thiab ua raws li kuv cov lus kuv qhia kom lawv ua,
    mas lawv phaj tub kuj yuav tau zaum
    saum koj lub theej kiab tas mus li."

    Txais: (Lk 1: 32b) Huab Tais Tswv Ntuj yuav muab
    nws txiv Das Vis lub theej kiab rau nws zaum.

    Vim HUAB TAIS yeej tau xaiv Xis Yoos,
    nws ntshaw muab Xis Yoos ua nws qhov chaw nyob:
    "Xis Yoos yog kuv qhov chaw so mus li,
    kuv yuav nyob saum Xis Yoos, vim kuv ntshaw nws.”

    Txais: (Lk 1: 32b) Huab Tais Tswv Ntuj yuav muab
    nws txiv Das Vis lub theej kiab rau nws zaum.

    As Les Lus Yas: NPN 119: 105

    Txais: As les lus yas, as les lus yas.

    Koj lo lus yog lub teeb ci rau kuv ko taw,
    yog qhov pom kev kaj kuv txoj hau kev.

    Txais: As les lus yas, as les lus yas.

    Ntawv Moo Zoo: MK 4: 21-25

    21 Yes Xus hais rau lawv tias : "Thaum yus taws ib lub teeb nqa los, yus puas muab txawb hauv qab pob tawb los hauv qab txag? Puas yog yuav tsum muab txawb rau saum tus ncej teeb xwb los tsis yog?
    22 Vim tsis muaj ib yam zais ntshis cia, uas yuav tsis tshwm los rau luag pom, tsis muaj ib yam npog rawv uas yuav tsis tawm los rau luag paub.
    23 Leej twg muaj pob ntseg mloog, mas cia nws mloog !"
    24 Yes Xus hais ntxiv rau lawv tias : “Nej yuav ceev faj txog tej yam uas nej hnov ! Ntuj yuav xuas lub tais uas nej siv luj rov los luj rau nej, thiab Ntuj tseem yuav ntxiv rau nej.
    25 Vim tias tus uas twb muaj lawm, Ntuj yuav pub ntxiv rau nws, hos tus tsis muaj, mas Ntuj tseem yuav rho qhov me me nws muaj mus thiab.”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 30th January 2020, 11:30 am

    TIM 31 LUB 1 HLIS 2020

    Hnub Rau Lis Piam Peb Caij Nruab Xyoo A Nruab Lis Piam II

    Hwm LN John Bosco, Txiv Leej Choj

    Zaj Nyeem Ib: 2 XM 11: 1-4A, 5-10A, 13-17


    1 Thaum pib xyoo tshiab, yog lub caij cov vaj sawv npaj kev mus ntaus rog, Das Vis tso Yos As thiab nws cov tub txib nrog Yos As mus, thiab tas tsoom His Xas Lais huv tib si mus. Lawv mus tua yeej cov As Mos Nis thiab mus vij lub tsheej Las Npas. Tiam sis Das Vis tseem nyob ntawm Yes Lus Xas Les.
    2 Muaj ib hnub yav hnub qaij thaum twb lig lawm, Das Vis sawv ntawm nws lub txaj los, nws tawm mus ncig saum vaj ntxwv lub qaum ru tsev tiaj tiaj, nws txawm ntsia pom ib tug poj niam tab tom da dej. Tus poj niam ntawd zoo nkauj kawg. 3 Ces Das Vis tso neeg mus nug saib tus poj niam ntawd yog leej twg. Lawv hais rau nws tias : "Yog Npas Ses Npas, Es Lias tus ntxhais, uas yog Us Lis tus neeg His Tis poj niam." 4 Ces Das Vis tso neeg mus coj Npas Ses Npas tuaj. Npas Ses Npas tuaj, ces Das Vis txawm nrog nws pw… nws mam rov mus tsev lawm. 5 Thaum tus poj niam cev xeeb tub, nws xa lus tuaj rau Das Vis tias : "Kuv cev xeeb tub lawm !" 6 Ces Das Vis xa xov mus rau Yos As tias : "Koj xa tus neeg His Tis hu ua Us Lis los rau kuv." Yos As xa Us Lis rov los rau Das Vis. 7 Thaum Us Lis los txog, Das Vis nug tias Yos As nyob li cas thiab tsoom tub rog nyob li cas, thiab kev ntaus rog mus zoo li cas lawm. 8 Ces Das Vis hais rau Us Lis tias : "Koj mus nram koj tsev mog ! Mus ntxuav koj ko taw." Us Lis thiaj tawm hauv tus vaj lub tsev los, muaj neeg nqa tus vaj cov zaub mov ib qho lawv nws qab mus. 9 Tab sis Us Lis tsis mus nram nws tsev, nws pw ntawm tus vaj lub qhov rooj loog nrog nws tus tswv cov tub zov keeb xwb. 10 Muaj neeg mus qhia Das Vis tias : "Us Lis tsis tau mus nram nws tsev li."
    13 Hnub tom qab, Das Vis hu nws tuaj ntsib Das Vis, nws nrog Das Vis noj mov haus caws, ces Das Vis muab cawv rau nws haus kom qaug. Hmo ntawd Us Lis rov tawm mus pw nrog nws tus tswv cov tub zov keeb dua xwb, nws tsis nqes mus nram nws tsev li. 14 Hnub tom qab ntxiv, thaum sawv ntxov, Das Vis sau ib tsab ntawv mus rau Yos As, nws muab rau Us Lis nqa mus. 15 Nyob hauv tsab ntawv nws hais rau Yos As tias : "Nej muab Us Lis mus tso rau tom hauv ntej tom qhov chaw sib tua kub tshaj tej, ces nej sawv daws thaub rov qab, tseg nws nyob rau lawv tua kom tuag." 16 Li ntawd, thaum Yos As mus vij lub nroog, nws muab Us Lis mus tso rau ntawm qhov chaw uas nws paub tias muaj cov yeeb ncuab ntaus heev tshaj. 17 Ces thaum cov yeeb ncuab nyob hauv nroog tawm tuaj ntaus Yos As tog, Das Vis cov neeg muaj ob peb leeg tub rog tuag; Us Lis, tus neeg His Tis, kuj tuag thiab.

    NPN 51: 3-4, 5-6AB, 6BCD-7, 10-11

    Txais: (3a) Thov koj khuv leej peb, Huab Tais,
    vim peb tau ua txhaum lawm.

    Tswv Ntuj, thov koj khuv leej kuv, vim koj lub siab zoo;
    thov koj so kuv qhov txhaum pov tseg,
    vim koj muaj kev hlub loj tas nrho.
    Thov koj ntxuav kuv lub txim pov tseg kom tas
    thiab koj muab kuv qhov txhaum tshem mus
    kom kuv dawb huv tuaj.

    Txais: (3a) Thov koj khuv leej peb, Huab Tais,
    vim peb tau ua txhaum lawm.

    Kuv lees paub kuv qhov txhaum,
    kuv qhov txhaum nyob rawv ntawm kuv xub ntiag.
    “Kuv tau ua txhaum rau koj ib leeg xwb,
    kuv tau ua qhov uas koj saib yog phem.”

    Txais: (3a) Thov koj khuv leej peb, Huab Tais,
    vim peb tau ua txhaum lawm.

    Vim kuv tau ua yam uas koj saib yog qhov phem,
    ces txawm koj txiav txim rau kuv los koj yeej ua qhov ncaj,
    txawm koj rau txim rau kuv los koj yeej ua qhov yog.
    Koj twb paub tias kuv yeej yug los muaj txhaum,
    kuv yog neeg txhaum txij thaum kuv niam xeeb kuv los.

    Txais: (3a) Thov koj khuv leej peb, Huab Tais,
    vim peb tau ua txhaum lawm.

    Thov koj cia kuv hnov cov suab lom zem thiab suab luag,
    ces cov pob txha uas koj tau muab tsoo tawg,
    yuav rov muaj kev zoo siab.
    Thov koj fee ntsej muag mus deb ntawm kuv cov txhaum,
    koj so kuv lub txim pov tseg kom tas huv tib si.

    Txais: (3a) Thov koj khuv leej peb, Huab Tais,
    vim peb tau ua txhaum lawm.

    As Les Lus Yas: MT 11: 25

    Txais: As les lus yas, as les lus yas.

    Kuv cav txog koj, Leej Txiv, tus Huab Tais kav lub ntuj lub teb,
    koj tau qhia tej yam tob txog Ntuj Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo: MK 4: 26-34

    26 Yes Xus hais tias : Tswv Ntuj lub Ceeb Tsheej zoo xws li ib tug neeg pov ib co noob rau nruab a : 27 Nws txawm pw los nws sawv, hmo ntuj los nruab hnub, lub noob tuaj kaus thiab hlob tuaj, nws tsis paub tias lub noob hlob zoo li cas li. 28 Av xwb tim txawj xeeb kom muaj tuaj : xub ua yub tas, ua plab nab, ces nplej txhawv puv hnab. 29 Thaum nplej siav, tus neeg ntawd xuas liag mus hlais tam sis ntawd, vim txog caij sau qoob lawm.
    30 Yes Xus tseem hais tias : "Peb yuav muab Tswv Ntuj lub Ceeb Tsheej los piv rau dab tsi ? Los peb yuav hais zaj paj lug twg los qhia txog Tswv Ntuj lub Ceeb Tsheej? 31 Tswv Ntuj lub Ceeb Tsheej yog zoo li ib lub noob zaub roj, uas thaum luag muab tseb rau hauv av, mas lub noob ntawd me tshaj lwm cov noob nyob ntiaj teb no. 32 Tab sis thaum tseb tas lawd, lub noob hlob tuaj, nws loj dua lwm cov zaub tas huv si; nws ncau ceg deb, ces tej noog ya saum ntuj tau kev los nkaum hauv nws qhov ntxoov."
    33 Yes Xus siv ntau yam paj lug zoo li no los qhia Lo Lus rau lawv, raws li lawv mloog tau. 34 Tsis muaj ib yam uas nws tsis ua paj lug hais. Tiam sis nws txhais txhua yam huv tib si rau nws cov thwj tim thaum tshuav lawv nrog nws nyob lawm xwb.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 31st January 2020, 5:03 pm

    TIM 1 LUB 2 HLIS 2020

    Thawj Hnub Xya Lis Piam Peb Nruab Xyoo A Nruab Lis Piam Xyoo II

    Zaj Nyeem Ib: 2 XM 12: 1-7A, 10-17


    1 HUAB TAIS xa tus yaj saub Nas Taas tuaj cuag Das Vis. Nws mus ntsib Das Vis, nws hais rau Das Vis tias : "Muaj ob tug txiv neej nyob hauv ib lub nroog, ib tug yog neeg nplua nuj, ib tug yog neeg pluag. 2 Tus nplua nuj muaj qaib muaj yaj coob kawg, 3 hos tus pluag tsis muaj dab tsi li, nws kawg muaj ib tug me nyuam maum yaj nkaus xwb uas nws muas los. Nws tu tus maum yaj ntawd zoo, cia tus maum yaj hlob nrog nws thiab nws cov me nyuam, cia nrog nws koom noj ib lub mov, nrog nws koom haus ib khob dej, cia nws puag pw tsaug zog hauv nws xub ntiag; nws saib tus maum yaj ntawd zoo li yog nws tus ntxhais. 4 Muaj ib tug qhua txawm tuaj hauv tus nplua nuj tsev. Tus nplua nuj tsis xav muab nws ib tug tsiaj me los tsiaj loj los tua rau tus qhua noj li, ces nws mus ntes tus pluag tus yaj los tua txais tus qhua ntawd." 5 Das Vis npau taws heev rau tus nplua nuj, nws hais rau Nas Taas tias : "Tseem ib yam li HUAB TAIS muaj txoj sia nyob, yeej tseeb tias tus neeg ua li ntawd mas nws tsim nyog tuag ! 6 Nws yuav tsum them plaub npaug tus yaj ntawd tus nqi, vim nws tau ua qhov phem ntawd, nws tsis hlub neeg li." 7 Ces Nas Taas hais rau Das Vis tias : "Tus neeg ntawd yog koj ntag! HUAB TAIS , His Xas Lais tus Tswv Ntuj hais li no :
    10 ‘Txij no mus, hniav ntaj yuav tsis zam koj tsev neeg ib zaug ntxiv li lawm, vim koj tau ua phem tsis saib kuv, koj tau coj Us Lis tus neeg His Tis tus poj niam los ua koj poj niam.” 11 HUAB TAIS tseem hais li no : “Kuv yuav ua kom muaj xwv txheej phem tawm hauv koj tsev neeg kiag tuaj raug koj. Kuv yuav tab meeg muab koj cov poj niam mus rau ib tug txiv neej nyob ze koj yuav; nws yuav tab meeg nrog lawv pw thaum nruab hnub nrig. 12 Koj mas koj nyiag zais ntshis ua txhaum, tab sis kuv yuav tab meeg ua tej ntawd kom tawm los rau tsoom His Xas Lais pom thaum nruab hnub nrig.’" 13 Ces Das Vis hais rau Nas Taas tias : "Kuv tau ua txhaum rau HUAB TAIS lawm !" Nas Taas hais rau Das Vis tias : "HUAB TAIS zam koj qhov txhaum rau koj, koj yuav tsis tuag. 14 Tab sis vim koj tau ua qhov ntawd kom HUAB TAIS cov yeeb ncuab tau kev hais lus thuam Ntuj, mas tus me nyuam uas xeeb los rau koj yuav tuag."
    15 Ces Nas Taas rov mus tsev lawm. HUAB TAIS thiaj ua kom tus me nyuam uas Us Lis tus poj niam yug los rau Das Vis muaj mob, ces nws pib mob heev tuaj. 16 Das Vis thov Ntuj rau tus me nyuam, nws yoo mov, nws mus tsev, hmo ntawd nws pw tshiav hauv av ib hmos. 17 Cov txwj laus nyob hauv nws tsev sawv daws sawv tuaj nyob ncig nws, lawv tsa kom nws sawv hauv av los; tab sis nws tsis kam sawv; nws kuj tsis nrog lawv noj mov li thiab.

    NPN 51: 12-13, 14-15 , 16-17

    Txais: (12a) Tswv Ntuj, thov koj tsim ib lub siab huv lis si rau kuv.

    Tswv Ntuj, thov koj tsim ib lub siab huv si rau kuv ;
    koj cog dua ib lub tswv yim nyob ruaj rau hauv kuv.
    Koj txhob ntiab kuv mus deb ntawm koj lub ntsej muag,
    txhob thau koj Leej Tswv Yim ntshiab ntawm kuv mus.

    Txais: (12a) Tswv Ntuj, thov koj tsim ib lub siab huv lis si rau kuv.

    Koj ua kom kuv rov zoo siab nyob hauv koj txoj kev cawm,
    koj pub ib lub tswv yim xav ua zoo kom nyob ruaj hauv kuv.
    Kuv yuav qhia koj txoj kev rau cov neeg yuam kev,
    cov neeg txhaum thiaj yuav rov los cuag koj.

    Txais: (12a) Tswv Ntuj, thov koj tsim ib lub siab huv lis si rau kuv.

    Thov koj cawm kuv ntawm txoj kev txhaum tua neeg,
    Tswv Ntuj, kuv tus Twv Ntuj tus cawm kuv;
    kuv tus nplaig yuav zoo siab hlo cav txog koj txoj kev ncaj !
    HUAB TAIS, thov koj qhib kuv di ncauj,
    ces kuv lub ncauj yuav tshaj lus zoo cav txog koj.

    Txais: (12a) Tswv Ntuj, thov koj tsim ib lub siab huv lis si rau kuv.

    As Les Lus Yas: ZAM 3: 16

    Txais: As les lus yas, as les lus yas.

    Tswv Ntuj hlub lub ntiaj teb npaum li no, nws thiaj tso nws tib leeg Tub los,
    kom leej twg ntseeg nws, tus ntawd yuav tau txoj siab nyob mus li.

    Txais: As les lus yas, as les lus yas.

    Ntawv Moo Zoo: MK 4: 35-41

    35 Hnub ntawd, thaum yav tsaus ntuj, Yes Xus hais rau nws cov thwj tim tias : "Peb hla mus lawm sab ntug dej tid." 36 Ces lawv tso tsoom sid tseg. Lawv coj Yes Xus mus, nws cia li mus zoo li ntawd rau hauv nkoj. Kuj muaj lwm cov nkoj nrog nws thiab. 37 Txawm muaj ib nthwv khaub zeeg cua loj kawg sawv tuaj. Dej sawv nphau nphwv los npog lub nkoj, ces lub nkoj twb pib puv dej lawm. 38 Yes Xus nyob tom tw nkoj, nws tsaug zog saum ib lub hauv ncoo. Lawv tsa Yes Xus, lawv hais rau nws tias : "Xib Hwb, koj tsis quav ntsej txog tias peb twb yuav tuag los ?" 39 Yes Xus tsim dheev los, nws txwv cua, thiab nws hais rau dej ntuj tias : "Tswm seeb ! Koj nyob twj ywm !" Ces cua tu nrho, dej ntuj rov tus yees tuaj. 40 Yes Xus hais rau lawv tias : "Ua cas nej ntshai ua luaj ? Nej tseem tsis tau ntseeg lod ?" 41 Lawv ntshai kawg, lawv sib tham hais tias : "Tus ntawd yog leej twg ? Ua cas cua thiab dej ntuj los yeej mloog nws lus tib si?"

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 3rd February 2020, 11:11 am

    TIM 3 LUB 2 HLIS 2020

    Hnub Ob Lis Piam Plaub Nruab Xyoo A Nruab Lis Piam Xyoo II

    Hwm LN Blase, Tswv Qhia tuag ua Tim Khawv; LN Ansgar, Tswv Qhia

    Zaj Nyeem Ib: 2 XM 15: 13-14, 30; 16: 5-13


    15 13 Muaj ib tug neeg tuaj xa xov rau Das Vis tias : "Cov His Xas Lais hloov siab mus npuab As Xas Los lawm." 14 Ces Das Vis hais rau nws cov tub txib uas nrog nws nyob Yes Lus Xas Les tias : "Nej sawv, peb cia li khiav ! Vim peb yuav tsis dim ntawm As Xas Los tes li. Nej maj nrawm nroos kom peb tau sawv kev, tsam ib sij huam As Xas Los tuaj caum tau peb, ces peb yuav raug xwv txheej loj thiab nws yuav xuas ntaj tua tas lub nroog huv tib si."
    30 Das Vis nce phab toj mus pem lub Roob Txiv Ntoo Roj, nws ke nce ke quaj, nws khwb taub hau thiab mus ko taw liab xwb. Tas cov neeg nrog nws sawv daws txhua leej kuj khwb taub hau huv si, thiab lawv kuj ke quaj ke taug kev nce toj thiab.
    16 5 Thaum Das Vis tuaj txog lub zos Npas Hus Lis, muaj ib tug txiv neej tawm hauv lub zos tuaj, nws tsev neeg txheeb rau Xas Ws tsev neeg, nws hu ua Xis Mes, yog Nkes Las tub, nws hais ib co lus phem kawg foom Davis thaum nws tawm tuaj. 6 Nws txawb pob zeb rau Das Vis thiab rau Das Vis cov tub txib huv tib si; tas cov pej xeem thiab cov neeg muaj zog sawv daws nyob ntawm Das Vis sab xis thiab sab laug. 7 Xis Mes cem Das Vis tias : "Khiav mus ! khiav mus, niag tua neeg, niag neeg siab phem! 8 Twb yog HUAB TAIS pab ua pauj rau Xas Ws tsev neeg cov roj ntsha uas koj tau hliv, koj thiaj txeeb tau nws tus vaj ua lawm. Nyem no HUAB TAIS yuav cia koj tus tub As Xas Los ua vaj. Koj yuav raug txov lau, vim koj yog tus tua neeg." 9 As Npis Sais, uas yog Xes Lus Yas tub, hais rau tus vaj tias : "Ua cas thiaj cia niag dev tuag aws no tsawm kuv tus huab tais vaj ntxwv li no ? Thov koj cia kuv mus txiav nws taub hau kiag saib!" 10 Tab sis tus vaj teb tias : "Xes Lus Yas cov tub, tsis yog kuv hauj lwm los nej hauj lwm yuav txwv nws, cia nws cem nws, vim ntshai twb yog HUAB TAIS hais rau nws kom nws tsawm Das Vis xwb. Yog li leej twg thiaj muaj cuab kav hais tau rau nws tias: 'Vim li cas koj ua li ntawd ?’" 11 Ces Das Vis hais rau As Npis Sais thiab tas nws cov tub txib tias : "Nej xav saib yog kuv tus tub kuv yug kiag twb xav muab kuv tua, mas tus Npes Yas Mis ntawd haj yam muaj cai ua li ntawd rau kuv. Nej cia nws tsawm nws, vim ntshai yog HUAB TAIS kom nws tsawm. 12 Ces nyaj tej zaud HUAB TAIS yuav pom kuv txoj kev txom nyem ces nws yuav muab ib yam zoo rau kuv los pauj cov lus tsawm uas raug kuv hnub no." 13 Ces Das Vis thiab nws cov neeg taug kev mus ntxiv, hos Xis Mes kuj taug kev ib sab raws roob caum Das Vis, nws ke mus kev ke foom lus phem, ke txaw pob zeb thiab txawb av tuaj rau Das Vis.

    NPN 3: 2-3, 4-5, 6-7

    Txais: (8a) Huab Tais, thov koj sawv tsees los cawm kuv.

    HUAB TAIS, kuv cov yeeb ncuab coob tas nrho !
    Cov sawv los ntxeev siab rau kuv muaj coob !
    Coob leej hais txog kuv tias :
    “Tsis muaj kev cawm rau nws nyob hauv Tswv Ntuj li.”

    Txais: (8a) Huab Tais, thov koj sawv tsees los cawm kuv.

    Tab sis, HUAB TAIS, koj yog daim leem phiaj thaiv kuv,
    koj yog kuv lub koob meej, yog tus tsa kuv taub hau kom siab.
    Thaum kuv tsa suab nrov hu HUAB TAIS,
    nws nyob saum nws lub roob ntshiab teb tuaj rau kuv.

    Txais: (8a) Huab Tais, thov koj sawv tsees los cawm kuv.

    Thaum kuv mus pw tsaug zog lawm,
    kuv tsim tau rov los vim HUAB TAIS nres kuv.
    Kuv tsis ntshai cov neeg coob coob
    uas sawv vij vog ib ncig kuv xav ntaus kuv.

    Txais: (8a) Huab Tais, thov koj sawv tsees los cawm kuv.

    As Les Lus Yas: LK 7: 16

    Txais: As les lus yas, as les lus yas.

    Ib tug yaj saub loj sawv los nyob hauv peb,
    Tswv Ntuj tau tuaj xyuas nws haiv neeg lawm.

    Txais: As les lus yas, as les lus yas.

    Ntawv Moo Zoo: MK 5: 1-20

    1 Yes Xus thiab nws cov thwj tim tuaj txog sab ntug dej ntuj tim ub, yog sab cov neeg Nkes Las Xis lub teb chaws. 2 Thaum Yes Xus nqes plhuav nkoj los, tam sis ntawd, muaj ib tug neeg raug ib tug dab tsis huv tawm ntawm cov toj ntxas tuaj cuag Yes Xus. 3 Nws yeej nyob rawv ntawm cov toj ntxas ntawd, tsis muaj leej twg khi tau nws cia li, tab yog xuas saw hlau los yeej tsis tau li. 4 Vim lawv twb xub nquag muab xauv taw thiab saw hlau khi nws tib si los nws yeej ua saw hlau tu tas, ua xauv taw lov tas, tsis muaj leej twg muaj zog txaus tuav tau nws cia li. 5 Niaj hnub niaj hmo nws nyob ntawm cov toj ntxas thiab nyob pem tej roob, nws qw tas mus li, thiab nws muab pob zeb los hlais nws kom mob. 6 Thaum nws pom Yes Xus tseem nyob deb, nws khiav tuaj, nws txhos caug ntua pe Yes Xus, 7 ces nws qw nrov nrov tias : “Koj xav ua dab tsi rau kuv, Yes Xus, Tswv Ntuj tus Nyob Siab Leej Tub ? Kuv hu txog Tswv Ntuj thov koj, koj txhob tsim txom kuv.” 8 Vim Yes Xus tau hais rau nws tias : "Dab tsis huv, koj tawm ntawm tus neeg no mus !" 9 Yes Xus nug nws tias : "Koj lub npe hu ua li cas ?" Nws teb tias : "Kuv lub npe hu ua Npoj, vim peb coob leej kawg." 10 Nws thov Yes Xus heev kawg kom txhob ntiab lawv tawm ntawm thaj chaw ntawd mus.
    11 Thaum ntawd, muaj ib pab npua coob coob tab tom noj zaub saum cov roob. 12 Cov dab tsis huv thov Yes Xus tias: "Thov koj xa peb mus lawm hauv cov npua ntawd, cia peb nkag mus nyob hauv." 13 Yes Xus tso lus rau lawv, ces cov dab tsis huv tawm mus, lawv nkag mus rau hauv cov npua. Ces tas pab npua khiav ntawm ib plas toj ntxhab ntxhab mus rau hauv dej ntuj, pab npua ntawd kwv yees muaj ob txhiab tus, cia li poob deg tuag tas rau hauv dej ntuj. 14 Cov zov npua tso tes khiav, lawv mus qhia lub moo ntawd rau hauv nroog thiab hauv cov zos. Ces neeg tuaj mus xyuas saib muaj xwm zeej dab tsi. 15 Thaum lawv tuaj txog ze ntawm Yes Xus, lawv pom tus neeg uas raug tus dab npoj zaum ntawd, hnav ris tsho tib si, thiab nws meej pem lawm, ces lawv ntshai. 16 Cov uas tau pom, lawv piav txog qhov uas tshwm sim rau tus neeg raug dab ntawd, thiab rau pab npua. 17 Ces lawv pib thov Yes Xus kom nws txav tawm ntawm lawv teb chaws mus. 18 Thaum Yes Xus nce mus rau hauv nkoj, tus neeg uas tau raug dab thov kom Yes Xus cia nws nrog Yes Xus mus. 19 Tab sis Yes Xus tsis kheev, nws hais rau tus raug dab tias : "Koj rov mus tsev, rov mus cuag koj cov txheeb ze, koj mus qhia rau lawv txog tas txhua yam uas Huab Tais tau ua rau koj thiab txog tias nws tau khuv leej koj li cas." 20 Ces tus raug dab rov mus, nws pib tshaj txhua yam uas Yes Xus tau ua rau nws, nyob hauv thaj tsam Des Kas Pos Lis. Cov uas tau hnov, lawv sawv daws qhuas kawg.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 4th February 2020, 5:37 am

    TIM 4 LUB 2 HLIS 2020

    Hnub Peb Lis Piam Plaub Nruab Xyoo A Nruab Lis Piam Xyoo II

    Zaj Nyeem Ib: 2 XM 18: 9-10, 14B, 24-25A, 30–19:3


    9 As Xas Los txawm cia li mus ntsib Das Vis ib co tub rog; nws caij ib tug luj, tus luj cia li chaws mus hauv ib tsob qab ntoo qhib loj loj ntxhov ntxhov, ces nws cov plaub hau mus daig saum cov ceg ntoo. Nws dai viav vias nyob ib nta ntuj, hos tus luj nws caij dhia mus lawm. 10 Muaj ib tug neeg pom, nws mus hais qhia Yos As tias : "Kuv pom As Xas Los dai viav vias saum ib tsob ntoo qhib."
    14B Ces Yos As nqa peb rab xub ntawm tes mus, nws tua loo mus rau As Xas Los hauv siab thaum As Xas Los tseem ciaj dai saum tsob ntoo qhib.
    24 Das Vis zaum nyob ntawm kis nruab nrab ob lub qhov rooj vag. Tus peeb zov yeej nce mus saum ru tsev ncaj ntawm lub rooj vag, hla mus tuaj saum lub ntsa zeb thaiv lub nroog ntsia, nws pom ib tug neeg khiav khiav los ib leeg. 25 Tus peeb qw hais qhia rau tus vaj, ces tus vaj hais tias : "Yog nws ib leeg xwb mas yog nws coj ib lub moo zoo los xwb."
    30 Tus vaj hais rau As His Mas tias: “Koj txav mus sawv nyob ntawm no.” Ces nws txav mus sawv twj ywm nyob rau ntawd. 31 Ces Kus Sis los txog, nws hais tias : "Kuv tus vaj ntxwv huab tais, koj mloog lub moo zoo no. Hnub no HUAB TAIS ua pauj rau koj lawm, nws tau cawm koj ntawm cov neeg sawv ntxeev siab rau koj lawm." 32 Tus vaj nug Kus Sis tias : "Tus hluas As Xas Los puas nyob zoo ?" Kus Sis teb tias : "Xav kom kuv tus huab tais vaj ntxwv cov yeeb ncuab thiab cov neeg xav ntxeev siab ua phem rau koj tau txais xws li tus hluas ntawd !"
    19 1 Ces vaj Das Vis ib ce tshee tas. Nws nce mus saum kem tsev siab ncaj saum lub rooj vag, ces nws quaj. Nws quaj hu quaj hu tias : "Kuv me tub As Xas Los ! Kuv me tub ! Kuv me tub As Xas Los! Kheev lam Tswv Ntuj cia kuv tuag hloov koj mas ! As Xas Los ! Kuv tus me tub, kuv me tub aw!"
    2 Lawv mus hais qhia rau Yos As tias : "Tus vaj quaj quaj nyiav nyiav txog As Xas Los kawg li." 3 Ces hnub ntawd lawv yeej, tab sis tas tsoom pej xeem sawv daws tu siab, vim tsoom pej xeem hnov tias tus vaj quaj quaj txog nws tus tub kawg nkaus.

    NPN 86: 1-2, 3-4, 5-6

    Txais: (1a) Huab Tais, thov koj mloog kuv thiab teb kuv.

    HUAB TAIS, thov koj khoov tig pob ntseg los mloog kuv,
    Thov koj teb kuv, vim kuv txom nyem thiab kuv pluag.
    Thov koj txuag kuv tus ntsuj plig, vim kuv npuab koj;
    thov koj cawm koj tus tub txib uas tso siab rau koj,
    Koj yog kuv tus Tswv Ntuj.

    Txais: (1a) Huab Tais, thov koj mloog kuv thiab teb kuv.

    Thov koj khuv leej kuv, Huab Tais,
    vim kuv hu koj tas hnub.
    Thov koj ua kom koj tus tub txib tus ntsuj plig zoo siab,
    vim kuv tsa kuv tus ntsuj plig
    yuj plaws tuaj rau koj, Huab Tais.

    Txais: (1a) Huab Tais, thov koj mloog kuv thiab teb kuv.

    Huab Tais, koj muaj lub siab zoo thiab txawj zam txhaum,
    koj txoj kev ua siab zoo rau cov uas hu txog koj loj tas nrho.
    HUAB TAIS, thov koj mloog kuv zaj thov ntuj
    thiab cuab pob ntseg rau kuv lub suab thov koj.

    Txais: (1a) Huab Tais, thov koj mloog kuv thiab teb kuv.

    As Les Lus yas: MT 8:17

    Txais: As les lus yas, as les lus yas.

    Leej Pleev tshem peb tej kev tuag tes tuag taw mus
    thiab nws cug nrob qaum ris peb tej kev mob kev ntsaj.

    Txais: As les lus yas, as les lus yas.

    Ntawv Moo Zoo: MK 5: 21-43

    21 Thaum Yes Xus caij nkoj rov los txog sab ntug dej tim no, ib pab neeg coob coob tuaj sib sau ntsauv nws. Ces Yes Xus thiaj nyob ze ntawm ntug dej ntuj. 22 Muaj ib tug hauv cov tswj tsev txoos hu ua Yais Los tuaj. Thaum nws pom Yes Xus, nws txhos caug ntua ntawm Yes Xus ko taw. 23 Nws thov Yes Xus tas zog tias : "Kuv tus me ntxhais txoj sia tab tom yuav tu, thov koj mus tsa tes rau saum nws kom nws dim thiab rov ciaj los." 24 Yes Xus nrog Yais Los mus. Ib pab neeg coob coob raws Yes Xus mus thiab, lawv sawv daws txiv Yes Xus.
    25 Muaj ib tug poj niam tsob ntshav tau kaum ob xyoos los lawm. 26 Nws tau raug txom nyem loj vim nws tau siv tas nws lub cuab tam los kho nws ntawm ntau tus kws tshuaj, tiam sis tsis pab nws dab tsi li, nws tseem mob heev zuj zus ntxiv xwb. 27 Nws hnov luag hais txog Yes Xus, ces nws mus nrog tsoom sid sib txiv tom Yes Xus nraub qaum, thiab mus kov Yes Xus lub tsho. 28 Vim nws xav hais tias : "Tsuav yog kuv tau kov nws lub tsho xwb, mas kuv yeej yuav dim." 29 Ces tam sis ntawd, nws qhov tsob ntshav tu nrho, nws hnov tias nws lub cev zoo hlo tsis muaj mob lawm. 30 Tam sim ntawd, Yes Xus kuj hnov ib lub zog tawm hauv nws mus; ces Yes Xus tig los nug pab neeg ntawd tias : "Leej twg kov kuv lub tsho ?" 31 Cov thwj tim hais rau nws tias : "Koj ntsia saib, tas tsoom sid txiv koj txhua sab tuaj, koj tseem hais tias: ‘Leej twg kov kuv’ thiab?" 32 Yes Xus ntsia ib ncig kom pom tus neeg uas tau kov nws. 33 Ces tus poj niam ntshai, nws ib ce tshee tas, vim nws paub tias muaj dab tsi tshwm sim rau nws lawm. Nws thiaj los txhos caug ntawm Yes Xus ko taw thiab qhia qhov tseeb rau Yes Xus. 34 Yes Xus hais rau nws tias : “Me ntxhais, koj lub siab ntseeg cawm koj lawm. Koj rov mus kaj siab lug, thiab kom koj tus mob zoo hlo mus mog."
    35 Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias : “Koj tus ntxhais twb tuag lawm, koj tseem yuav txob Xib Hwb ua dab tsi ?” 36 Tab sis Yes Xus twb hnov lo lus lawv nyuam qhuav hais lawm, nws hais rau tus tswj tsev txoos tias : "Tsis txhob ntshai, tsuav koj ntseeg xwb mog." 37 Yes Xus tsis kheev leej twg nrog nws mus li, nws tsuas cia Pob Zeb, Yas Kos thiab Yas Kos tus kwv Zam nrog nws mus xwb. 38 Thaum Yes Xus tuaj txog tus tswj tsev txoos lub tsev, nws pom sawv daws ua nrov ntsuag qees ntxhov hnyo, ib txhia quaj, ib txhia nyiav nrov nrov. 39 Yes Xus los hauv tsev, nws hais rau lawv tias : "Ua cas nej sawv daws ua ntxhov hnyo thiab quaj cuag li no ? Tus me ntxhais tsis tuag, nws tsaug zog xwb." 40 Ces lawv luag Yes Xus. Yes Xus ntiab sawv daws kom tawm mus nraum zoov kom tas, nws tsuas tseg tus me nyuam niam thiab txiv, thiab cov nrog nws tuaj xwb. Nws chaws mus hauv kem uas tus me nyuam nyob. 41 Nws tuav nkaus tus me nyuam txhais tes, nws hais rau tus me nyuam tias : "Tas lis tas kus," txhais tias : "Me ntxhais, kuv hais rau koj, koj sawv los!" 42 Tus me ntxhais sawv tsees tam sis ntawd los, ces nws mus kev, vim nws twb muaj kaum ob xyoos lawm. Tam sim ntawd, sawv daws ntshai, lawv loj kawg nkaus. 43 Yes Xus txwv lawv heev kawg kom txhob qhia rau leej twg paub. Ces nws kom lawv muab mov rau tus me ntxhais noj.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 4th February 2020, 12:01 pm

    TIM 5 LUB 2 HLIS 2020

    Hnub Plaub Lis Piam Plaub Nruab Xyoo A Nruab Lis Piam Xyoo II

    Hwm LN Agatha, Nkauj Xwb ua Tim Khawv

    Zaj Nyeem Ib: 2 XM 24: 2, 9-17


    2 Vaj Das Vis hais rau Yos As, nws tus thawj tub rog uas nrog nws nyob ntawd tias : "Nej mus ncig xyuas cov xeem His Xas Lais txij Das mus rau Npes Ses Npas, nej txheeb cov neeg tas tib si, kom kuv paub meej tias muaj pes tsawg leej neeg."
    9 Yos As los hais qhia rau tus tias cov neeg nws mus txheeb muaj npaum no leej: Nyob hauv cov His Xas Lais muaj yim pua txhiab leej txiv neej muaj siab tawv uas yeej tuav ntaj tib si lawm, thiab nyob hauv cov Yus Das muaj tsib puas txhiab leej txiv neej. 10 Tom qab Das Vis tau txheeb nws cov pej xeem tas lawm, nws lub siab nyob tsis tus, nws hais rau HUAB TAIS tias : "Kuv ua txhaum loj nyob hauv qhov kuv tau ua! HUAB TAIS, thov koj zam txhaum rau koj tus tub txib, vim kuv tau ua yuam kev loj." 11 Tag kis sawv ntxov, thaum Das Vis sawv los, tus yaj saub Nkas, uas yog Das Vis tus saub, hnov HUAB TAIS lo lus hais rau nws tias: 12 "Koj mus hais rau Das Vis tias: ‘HUAB TAIS hais li no: Kuv muab peb yam rau koj xaiv, koj xaiv ib yam ces kuv yuav tso yam ntawd los raug koj." 13 Ces tus yaj saub Nkas mus hais qhia rau Das Vis, nws nug tias : "Koj puas nyiam cia koj lub teb chaws tshaib plab peb xyoos ? Los koj puas yeem swb koj cov yeeb ncuab peb hlis, cia koj khiav lawv hos lawv caum koj tua? Los koj puas yeem cia koj lub teb chaws raug mob aws peb hnub ? Nyem no, koj xav tswv yim ces koj hais rau kuv saib kuv yuav teb dab tsi rau tus xa kuv tuaj." 14 Das Vis hais rau Nkas tias : "Kuv nyob rau ib qho kev nyuaj siab loj. Ntshai yeem cia peb poob rau hauv Tswv Ntuj txhais tes, vim nws khuv leej neeg kawg nkaus, thov kom kuv txhob poob rau tib neeg txhais tes." 15 Ces Das Vis thiaj xaiv tus mob aws. Thaum ntawd yog lub caij hlais cov nplej mov mog. HUAB TAIS tso tus mob aws los raug cov His Xas Lais txij thaum sawv ntxov mus txog lub caij nws teem. Tsoom pej xeeem thiaj raug tus mob aws. Muaj txog xya caum txhiab leej neeg tuag nyob hauv lub teb chaws txij Das mus rau Npes Ses Npas. 16 Tab sis thaum tus Tshiab xyab tes yuav tso aws mus rau Yes Lus Xas Les, HUAB TAIS rov thim xav, nws hais rau tus tshiab rhuav tsoom pej xeem txoj sia tias : "Txaus lawm ! Nkaum koj txhais tes rov qab nyem no." Thaum ntawd Tswv Ntuj tus Tshiab nyob ze ntawm As Laus Nas uas yog ib tug neeg Yes Npws Xis lub tshav ntaus nplej. 17 Thaum Das Vis pom tus tshiab uas tso aws tuaj rau tsoom pej xeem, Das Vis hais rau HUAB TAIS tias : "Kuv yog tus tau ua txhaum, kuv yog tus tau ua tsis zoo. Cov ntawd yog pab yaj, lawv tau ua dab tsi phem? Kuv thov kom koj tsa koj txhais tes rau saum kuv thiab kuv txiv tsev neeg xwb mas!"

    NPN 32: 1-2, 5, 6, 7

    Txais: (5c) Huab Tais, kuv tau ua txhaum lawm thov koj zam rau kuv.

    Tus tau hmoov zoo yog tus uas Ntuj tshem nws qhov txhaum mus,
    yog tus uas Ntuj npog nws qhov txhaum rau.
    Tus tau hmoov zoo yog tus neeg uas HUAB TAIS tsis suav txim rau nws,
    tus uas lub tswv yim tsis muaj ib qho kev siab phem.

    Txais: (5c) Huab Tais, kuv tau ua txhaum lawm thov koj zam rau kuv.

    Kuv lees kuv qhov txhaum rau koj,
    kuv tsis muab kuv qhov txhaum npog cia.
    Kuv hais tias: “Kuv lees kuv qhov txhaum rau HUAB TAIS,”
    ces koj muab kuv lub txim ntawm kuv qhov txhaum tshem tas.

    Txais: (5c) Huab Tais, kuv tau ua txhaum lawm thov koj zam rau kuv.

    Vim li no txhua tus neeg muaj kev ntseeg yuav tsum
    teev ntuj hu txog koj thaum lub caij muaj kev nyuaj siab.
    Txawm tias cov dej tob phwj yaws
    los dej yuav tsis nce mus nyab txog nws.

    Txais: (5c) Huab Tais, kuv tau ua txhaum lawm thov koj zam rau kuv.

    Koj yog kuv lub chaw nkaum,
    koj yuav thaiv kuv ntawm txoj kev nyuaj;
    koj yuav cia ib co suab qw zoo siab
    txog kev twj lij nyob ib ncig kuv,

    Txais: (5c) Huab Tais, kuv tau ua txhaum lawm thov koj zam rau kuv.

    As Les Lus Yas: Zam 10: 27

    Txais: As les lus yas, as les lus yas.

    Huab Tais hais tias: Kuv cov yaj mloog kuv lub suab,
    kuv paub kuv cov yaj, kuv cov yaj caum kuv qab nraim.

    Txais: As les lus yas, as les lus yas.

    Ntawv Moo Zoo: MK 6: 1-6

    1 Yes Xus tawm ntawm qhov chaw ntawd mus, nws rov mus txog lub zos nws nyob hlob; nws cov thwj tim kuj nrog nws mus thiab. 2 Thaum txog hnub Xas Npas Tos, Yes Xus pib qhuab qhia nyob hauv lub tsev txoos. Muaj neeg coob hnov nws, lawv ceeb tas, lawv hais tias : "Nws tau tej ntawd qhov twg los ? Cas nws thiaj tau lub siab thoob tsib ntawd? Thiab cov hwj huam yees ntxwv loj uas nws ob txhais tes ua, yog los qhov twg los? 3 Tus ntawd tsis yog tus kws ntoo, uas yog Mab Liab tus tub lod ? Nws tsis yog Yas Kos, Yos Xes, Yus Das thiab Xis Moos lawv kwv tij lod ? Hos nws cov muam, tsis yog cov nrog peb nyob ua ke ntawm no lod ?” Lawv tsis zoo siab rau Yes Xus. 4 Ces Yes Xus hais rau lawv tias : "Ib tug Yaj Saub yeej raug luag hwm nws, tsuas yog nyob hauv nws lub teb chaws, hauv nws cov txheeb ze thiab nws tsev neeg xwb, thiaj tsis muaj neeg xav hwm nws xwb." 5 Vim li ntawd, Yes Xus ua tsis tau ib yam hwj huam yees ntxwv nyob ntawd li, nws tsuas tsa tes rau tus neeg mob kom zoo xwb.
    6 Nws xav tsis thoob txog qhov lawv tsis ntseeg nws li.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 5th February 2020, 7:23 am

    TIM 6 LUB 2 HLIS 2020

    Hnub Tsib Lis Piam Plaub Nruab Xyoo A Nruab Lis Piam Xyoo II

    Hwm LN Paul Miki thiab cov, tuag ua Tim Khawv

    Zaj Nyeem Ib: 1 VAJ 2: 1-4, 10-12


    1 Thaum yuav txog Das Vis lub caij tuag, nws qhuab qhia nws tus tub Xas Los Moos tias : 2 "Kuv yuav mus taug txoj kev uas tib neeg sawv daws taug; koj yusv tsum ua siab loj loj thiab coj kom phim ib tug txiv neej yawg. 3 Koj yuav tsum coj raws li HUAB TAIS koj tus Tswv Ntuj xav kom ua, koj yuav taug nws tej kev, mloog nws tej cai lij choj, nws tej lus qhia, tej kev uas nws tau txiav raws li tau sau tseg nyob hauv Mais Xes txoj cai, ces koj thiaj yuav ua dab tsi los tau raws li koj lub siab xav thiab koj yuav mus qhov twg los ntsib kev vam meej, 4 ces HUAB TAIS thiaj yuav ua raws li lo lus nws tau hais rau kuv tias : ‘Yog koj cov tub ua lawv lub neej coj tus yam ntxwv zoo, muab tas lawv lub siab thiab tus ntsuj plig los taug txoj kev ncaj nyob ntawm kuv xub ntiag, mas koj yuav muaj neeg zaum saum cov His Xas Lais lub theej kiab tas mus li tsis tu ncua."
    10 Ces Das Vis mus nrog nws cov yawg koob pw tsaug zog lawm, lawv muab nws mus los nyob rau hauv Das Vis lub tsheej. 11 Das Vis tau ua vaj kav His Xas Lais yog plaub caug xyoo: xya xyoo yog nyob Hes Nploos, thiab peb caug peb xyoos nyob Yes Lus Xas Les.
    12 Ces Xas Los Moos nce zaum nws txiv Das Vis lub theej kiab, nws txoj kev ua vaj nyob ruaj nreb.

    NPN: 1 XWM 29: 10, 11AB, 11D-12A, 12BCD

    Txais: (12b) HUAB TAIS, koj yog tus nyob siab dua txhua leej.

    Thov kom koj nto koob meej lug, HUAB TAIS,
    His Xas Lais tus Tswv Ntuj peb leej Txiv,
    Kom koj nto koob meej mus li tsis txawj kawg.

    Txais: (12b) HUAB TAIS, koj yog tus nyob siab dua txhua leej.

    Huab Tais, kev muaj lub npe loj thiab kev muaj hwj huam yog koj li,
    kev muaj hwj chim, kev ci ntsa iab, kev nto koob meej yog koj tug.

    Txais: (12b) HUAB TAIS, koj yog tus nyob siab dua txhua leej.

    HUAB TAIS, koj yog tus nyob siab dua txhua leej,
    txoj kev ua vaj yog koj li, HUAB TAIS;
    txhua tus tsa koj ua hau saib sawv daws;
    kev nplua nuj thiab kev muaj meej mom yog koj pub.

    Txais: (12b) HUAB TAIS, koj yog tus nyob siab dua txhua leej.

    Koj txhais tes tuav lub hwj huam thiab lub peev xwm;
    koj yog tus pub lub meej mom loj thiab lub zog rau txhua leej.

    Txais: (12b) HUAB TAIS, koj yog tus nyob siab dua txhua leej.

    As Les Lus Yas: MK 1: 15

    Txais: As les lus yas, as les lus yas.

    Tswv Ntuj lub Ceeb Tsheej nyob ze lawm;
    nej cia li los lees txhaum thiab ntseeg txog lub Moo Zoo.

    Txais: As les lus yas, as les lus yas.

    Ntawv Moo Zoo: MK 6: 7-13

    7 Yes Xus hu Pab Kaum Ob los cuag nws, ces nws xa lawv ua tej pab ob leeg mus. Nws pub lub hwj huam ntiab dab tsis huv rau lawv. 8 Yes Xus qhia lawv kom txhob nqa dab tsi taug kev li, tsuas nqa tib rab pas nrig xwb; txhob ntim mov, txhob nqa hnab, txhob ntim nyiaj rau hauv duav siv, 9 tiam si kom rau khau khiab, txhob hnav ob lub tsho. 10 Yes Xus hais rau lawv tias : "Nej mus txog qhov twg, yog nej chaws mus hauv ib lub tsev, mas nej yuav nyob hauv lub tsev ntawd mus txog hnub nej tawm ntawd mus. 11 Yog qhov chaw twg tsis txais nej, thiab luag tsis mloog nej, mas nej tso qhov chaw ntawd tseg, nej nchos cov plua av lo nej qab xib taws cia, kom ua tim khawv txiav txim rau lawv." 12 Cov thwj tim tawm mus, lawv tshaj kom tsoom sid tig los hloov siab tshiab. 13 Lawv ntiab ntau tus dab phem tawm, thiab lawv muab roj pleev ntau leej muaj mob, thiab kho lawv zoo hlo.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 6th February 2020, 4:19 pm

    TIM 7 LUB 2 HLIS 2020

    Hnub Rau Lis Piam Plaub Nruab Xyoo A Nruab Lis Piam Xyoo II

    Zaj Nyeem Ib: NPES XIS LAS 47: 2-11


    2 Yam li thaum ua thaj txi Ntuj koom siab, luag muab cov nqaij rog tshem cia rau ib cag, Das Vis kuj zoo ib yam li ntawd, nws raug xaiv tawm ntawm tsoom tub His Xas Lais los. 3 Nws nrog cov tsov ua si zoo li yog ib co thav tshis, nws nrog cov dais ua si zoo li yog ib co yaj. 4 Thaum nws tseem tub hluas, tsis yog nws tua tau tus neeg loj loj lod? Nws daws nws haiv neeg chaw txaj muag. Nws tsa nws txhais tes muab hlua roj hmab txawb pob zeb mus raug tus neeg khav theeb Nkaus Lias ntog. 5 Das Vis hu txog HUAB TAIS tus Nyob Siab, ces HAB TAIS ua kom nws txhais tes xis muaj zog tua tau ib tug tub rog muaj peev xwm, thiab tsa tau His Xas Lais lub meej mom kom siab. 6 Vim li ntawd lawv thiaj cav nws lub koob meej tias nws tua yeej ib vam leej, lawv qhuas nws thiab cav txog Huab Tais lub txiaj ntsim, lawv muab ib lub mom teev kub muaj hwj chim rau nws ntoo. 7 Nws tua cov yeeb ncuab nyob ib ncig kom tu noob, nws ua kom cov yeeb ncuab Fis Lis Tis lub peev xwm ploj ntais mus los txog niaj hnub no. 8 Das Vis ua yam twg nws ua tus Ntshiab, tus Tsawv Ntuj Nyob Siab tsaug thiab hais lus cav txog nws lub koob meej; nws muab tas nws lub siab los hu nkauj qhuas txog tus nws nyiam, tus tsim nws. 9 Nws tsa tej pab tub hu nkauj nyob ze ntawm lub thaj txi Ntuj, kom muaj suab nkauj nrov zoo mloog. 10 Nws teem kom muaj ntau lub ntees nyob hauv ib lub xyoo, thiab nws npaj kom yog ib co ntees zoo saib; kom muaj neeg cav lus zoo txog Huab Tais lub npe ntshiab, thiab kom lawv cov suab nrov ncha ntws hauv thaj chaw ntshiab txij thaum kaj ntug mus. 11 Ces Huab Tais ntxuav Das Vis cov txhaum pov tseg, nws tsa kom Das Vis lub hwj chim nyob mus li. Huab Tais nrog Das Vis cog lus cia nws ua vaj thiab muab ib lub theej kiab nto koob meej rau Das Vis nyob hauv haiv His Xas Lais.

    NPN 18: 31, 47+50, 51

    Txais: (47b) Thov kom Tswv Ntuj tus Cawm kuv nto koob meej!

    Tswv Ntuj txoj kev zoo tas tsis muaj yuam kev,
    HUAB TAIS lo lus tsis muaj yam cuav txuam xyaw.
    Nws yog daim leem phiaj thaiv cov tuaj nkaum hauv nws.

    Txais: (47b) Thov kom Tswv Ntuj tus Cawm kuv nto koob meej!

    HUAB TAIS muaj txoj sia ! Kom lub tsua cawm kuv nto koob meej lug!
    Tus Tswv Ntuj uas cawm kuv, nws nto koob meej loj.
    Li ntawd, HUAB TAIS, kuv yuav cav txog koj rau tsoom kuj cuab paub.
    Kuv yuav hu nkauj cav lus zoo txog koj lub npe.

    Txais: (47b) Thov kom Tswv Ntuj tus Cawm kuv nto koob meej!

    Koj yog tus muab kev yeej loj kawg nkaus rau koj tus vaj,
    Thiab koj ua siab zoo rau tus koj tau pleev,
    Rau Das Vis thiab nws caj ces mus li ib txhis.

    Txais: (47b) Thov kom Tswv Ntuj tus Cawm kuv nto koob meej!

    As Les Lus Yas: LK 8: 15

    Txais: As Les Lus Yas, as les lus yas.

    Cov muaj hmoov zoo yog cov uas muaj ib lub siab dav coj raws lo lus
    thiab lawv txi txiv ntau vim lawv mob siab rau coj nraim.

    Txais: As Les Lus Yas, as les lus yas..

    Ntawv Moo Zoo: MK 6: 14-29

    14 Tus vaj Hes Los hnov hais txog Yes Xus, vim Yes Xus lub npe nto moo loj, ces luag tej hais tias : "Yog Zam Ntxuav Plig sawv hauv cov tuag rov qab los lawm, vim li ntawd, cov hwj huam yees ntxwv thiaj tawm hauv nws tuaj." 15 Hos ib txhia hais tias : “Nws yog Es Lias.” Lwm cov hais tias : “Yog ib tug yaj saub xws li tej yaj saub.” 16 Tab sis thaum Hes Los hnov hais txog Yes Xus, nws hais tias : "Yog tus Zam uas kuv tau txiav nws caj dab, nws sawv rov los lawm."
    17 Hes Los yog tus xa neeg mus ntes Zam thiab muab saw hlau khi Zam rau hauv tsev loj faj, vim Hes Los Dias uas yog Hes Los tij laug Fis Lis Pos tus poj niam, tab sis Hes Los yuav los ua nws poj niam. tab sis Hes Los yuav los ua nws poj niam. 18 Zam hais rau Hes Los tias : "Koj tsis muaj cai yuav koj tij laug tus poj niam." 19 Ces Hes Los Dias ntxub Zam tas siab tas ntsws. Nws xav muab Zam tua, tab sis nws tua tsis tau, 20 vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas ua rau nws ntxhov siab kawg. Hes Los kuj nyiam mloog Zam thiab.
    21 Muaj ib lub zoo sij hawm los txog, yog hnub tsuj xeeb Hes Los yug. Hes Los ua ib roog qav caw cov nom tswv hauv nws lub vaj loog, cov thawj tub rog, thiab cov nom loj hauv xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev. Nws dhia tau ntxim Hes Los thiab cov qhua koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav yuav dab tsi, kuv yuav muab rau koj." 23 Ces tus vaj cog lus rau tus ntxhais tias : "Koj thov yam twg, mas kuv yuav muab rau koj, tab yog ib nrab ntawm lub teb chaws kuv kav !" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sim ntawd, tus ntxhais rov ntsuj los ntawm tus vaj, nws hais tias : "Kuv xav kom koj muab Zam Ntxuav Plig lub taub hau tso saum ib lub phaj, los cev rau kuv tam sim no."
    26 Tus vaj tu siab kawg, tab sis vim nws tau cog lus lawm thiab vim muaj cov qhua nrog nws zaum noj mov, nws thiaj tsis xav ua kom tus ntxhais tu siab. 27 Ces tus vaj txib ib tug zov keeb tam sim ntawd, kom mus nqa Zam lub taub hau los. Tus zov keeb thiaj mus txiav Zam caj dab hauv tsev loj faj. 28 Nws nqa Zam lub taub hau txawb saum ib lub phaj los cev rau tus ntxhais. Tus ntxhais muab rau nws niam. 29 Thaum Zam cov thwj tim hnov li ntawd, lawv tuaj coj Zam lub cev mus tso rau hauv ib lub ntxa lawm.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 7th February 2020, 10:46 am

    TIM 8 LUB 2 HLIS 2020

    Hnub Xya Lis Piam Plaub Nruab Xyoo A Nruab Lis Piam Xyoo II

    Hwm LN Jerome Emiliani; LN Josephine Bakhita

    Zaj Nyeem Ib: 1 VAJ 3: 4-13


    4 Vaj Xas Los Moos mus rau nram Nkas Npoos, mus txi Ntuj nyob ntawd, vim thaj chaw txi Ntuj loj tshaj yog nyob rau ntawd. Xas Los Moos twb tau hlawv txog txhiab tus tsiaj txi Ntuj nyob saum lub thaj ntawd los lawm. 5 Thaum nyob Nkas Npoos, hmo ntuj HUAB TAIS tawm tuaj nyob hauv npau suav rau Xas Los Moos pom xyeem. Tswv Ntuj hais tias : "Koj thov saib koj xav kom kuv muab rau koj." 6 Xas Los Moos teb tias : "Koj tau hlub koj tus tub txib Das Vis uas yog kuv txiv, vim nws taug kev nyob ntawm koj xub ntiag, nws taug raws txoj kev pheej xeeb, txoj kev ncaj ncees thiab txoj kev ua neeg siab ncaj rau koj. Koj tau ua zoo kawg nkaus rau nws, thiab koj tseem tau cia kom nws ib tug tub zaum nyob saum nws lub theej kiab hnub no thiab. 7 HUAB TAIS kuv tus Tswv Ntuj, nyem no koj tau tsa kuv, koj tus tub txib, ua vaj hloov kuv txiv Das Vis chaw. Kuv yog ib tug me nyuam tub hluas xwb, kuv twb tsis paub yuav coj li cas li. 8 Koj tus tub txib nyob hauv nruab nrab koj haiv neeg uas koj tau xaiv, yog ib haiv neeg loj tas nrho suav tsis txheeb tshuaj tsis txhua li. 9 Thov koj pub ib lub siab muaj kev to taub zoo rau koj tus tub txib kom kuv thiaj txawj txiav txim rau koj haiv neeg, thiab kom kuv txawj pom tias qhov twg yog qhov zoo, qhov twg yog qhov phem. Vim tias leej twg thiaj yuav txawj tswj koj haiv neeg uas coob tas npaud ?"
    10 HUAB TAIS zoo siab hnov tias Xas Los Moos tau thov li ntawd. 11 Ces Tswv Ntuj hais rau nws tias : "Koj tau thov qhov ntawd, tsis thov kom koj ua neej laus nkoos, tsis thov kom koj nplua nuj, tsis thov kom koj tau txo koj cov yeeb ncuab txoj sia, tiam sis koj thov txoj kev txawj to taub kom mem tau tias qhov twg thiaj yog qhov zoo. 12 Ua li mas kuv ua raws li koj thov, kuv pub ib lub siab thoob tsib thiab txawj to taub rau koj; yav tas los lawd tsis tau muaj dua leej twg zoo li koj li, thiab yav tom ntej los kuj yuav tsis muaj leej twg zoo li koj ntxiv. 13 Kuv kuj tseem yuav muab tej yam koj tsis tau thov rau koj huv tib si: xws li kev nplua nuj thiab kev nto koob meej, kom tsis txhob muaj dua lwm tus vaj yuav piv tau rau koj nyob hauv tas koj lub neej li.”

    NPN 119: 9, 10, 11, 12, 13, 14

    Txais: (12b) Huab Tais, thov koj qhia koj cov cai lij choj rau kuv.

    Yuav ua cas ib tug tub hluas txoj kev coj
    thiaj yuav tsis muaj chaw xyeej ?
    Yog yuav ua raws li koj cov lo lus.

    Txais: (12b) Huab Tais, thov koj qhia koj cov cai lij choj rau kuv.

    Kuv nrhiav koj tas siab tas ntsws,
    thov koj txhob cia kuv ncaim mus deb koj cov lus qhia.

    Txais: (12b) Huab Tais, thov koj qhia koj cov cai lij choj rau kuv.

    Kuv khaws koj cov lus koj tau cog rau kuv nruab siab
    kom kuv tsis txhob ua txhaum rau koj.

    Txais: (12b) Huab Tais, thov koj qhia koj cov cai lij choj rau kuv.

    HUAB TAIS, thov koj ua kom koj nto koob meej !
    Thov koj qhia koj cov cai lij choj rau kuv.

    Txais: (12b) Huab Tais, thov koj qhia koj covj cai lij choj rau kuv.

    Kuv di ncauj tshaj tawm tas nrho cov lus
    cob qhia tawm ntawm koj lub ncauj los.

    Txais: (12b) Huab Tais, thov koj qhia koj cov cai lij choj rau kuv.

    Kuv zoo siab hlo taug txoj kev ua raws li koj lo lus,
    Zoo siab npaum li kuv yog neeg nplua nuj muaj txhij txhua.

    Txais: (12b) Huab Tais, thov koj qhia koj cov cai lij choj rau kuv.

    As Les Lus Yas: ZAM 10: 27

    Txais: As les lus yas, as les lus yas.

    Huab Tais hais tias: Kuv cov yaj mloog kuv lub suab;
    kuv paub kuv cov yaj, kuv cov raws nraim kuv qab mus.

    Txais: As les lus yas, as les lus yas.

    Ntawv Moo Zoo: MK 6: 30-34

    30 Cov Hauv Paus Xa Lus los sib sau ncig Yes Xus, lawv piav tas puas tsav yam uas lawv tau ua thiab tau qhia.
    31 Ces Yes Xus hais rau lawv tias : "Nej los rau ib qho chaw xu kev tsis muaj neeg, nej so me ntsis." Vim muaj neeg mus mus los los coob kawg, ces cov Hauv Paus Xa Lus tsis xyeej noj mov li.
    32 Lawv thiaj caij nkoj mus rau ib qho chaw xu ke, tsis muaj neeg.
    33 Tsoom sid pom cov Hauv Paus Xa Lus caij nkoj mus, coob leej twb to taub lawm. Ces sawv daws khiav ko taw hauv tas cov nroog tuaj mus rau ntawd. Lawv xub mus txog chaw.
    34 Thaum Yes Xus nqes nkoj, nws pom ib pab neeg coob coob, nws lub siab hlub lawv, vim lawv zoo li ib co yaj uas tsis muaj tswv saib. Ces Yes Xus pib qhuab qhia lawv txog ntau yam.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 10th February 2020, 8:42 am

    TIM 10 LUB 2 HLIS 2020

    Hnub Ob Lis Piam Tsib Nruab Xyoo A Nruab Lis Piam Xyoo II

    Hwm LN Scholastica, Nkauj Xwb Ntshiab

    Zaj Nyeem Ib: 1 VAJ 8: 1-7, 9-13


    1 Ces Xas Los Moos hu cov txwj laus His Xas Lais, cov thawj nres xeem thiab cov tub nom tub tswv hauv haiv neeg His Xas Lais sawv daws tuaj sib sau nrog Xas Los Moos nyob Yes Lus Xas Les, vim yuav coj HUAB TAIS lub Xab Cog Lus ntawm Das Vis lub tsheej Xis Yoos los mus. 2 Tas tsoom neeg His Xas Lais tuaj sib sau nyob ncig vaj Xas Los Moos thaum nqaum paj nqaum nruas lub hlis Es Thas Nis uas yog lub xya hli. 3 Thaum tas cov txwj laus His Xas Lais tuaj txhij lawm, cov Leej Choj kwv lub Xab Cog Lus mus. 4 Lawv kwv lub Xab Cog Lus thiab lub tsev tsam phooj sib ntsib nrog rau cov twj txi ntuj uas nyob hauv lub tsev tsam phooj huv si; cov leej choj thiab cov Les Vis yog cov kwv tej ntawd mus. 5 Vaj Xas Los Moos thiab tas tsoom His Xas Lais sawv daws tuaj nrog nws sib sau nyob ntawm lub Xab Cog Lus xub ntiag, lawv tua yaj tua nyuj coob coob suav tsis txheeb los txi Ntuj nyob ntawd. 6 Ces cov Leej Choj mam coj HUAB TAIS lub Xab Cog Lus los txawb rau nws qhov chaw hauv nruab nrog Kem Tsev Ntshiab, uas yog thaj chaw ntshiab tshaj plaws hauv lub tuam tsev teev ntuj, nyob hauv qab cov Tshiab Kes Lus Npis cov qab tis. 7 Cov Tshiab Kes Lus Npis nthuav lawv ob sab tis los vov thaj chaw lub Xab Cog Lus nyob thiab ua ib qhov chaw nkaum rau lub Xab Cog Lus thiab nws cov nqaj kwv.
    9 Tsis muaj dab tsi nyob hauv lub Xab Cog Lus, tsuas muaj ob daim txiag zeb uas Mais Xes muab rau hauv thaum nyob saum roob Hos Les uas HUAB TAIS tau nrog cov tub ki His Xas Lais cog lus thaum lawv tawm ntawm Hais Nkws Tos teb los xwb. 10 Thaum cov Leej Choj tawm hauv Kem Tsev Ntshiab los, muaj ib twv huab los nyob puv HUAB TAIS lub Tuam Tsev tas tib si. 11 Cov Leej Choj nyob tsis taus ua cov kab ke txi ntuj ntxiv mus vim twv huab ntawd, vim HUAB TAIS lub hwj chim los nyob puv HUAB TAIS lub Tuam Tsev lawm.
    12 Ces Xas Los Moos hais tias: "HUAB TAIS txaus siab nyob hauv tauv huab dub.
    13 Kuv tau tsa ib lub tsev tsim nyog rau koj lawm, yog lub tsev koj yuav nyob mus li."

    NPN 132: 6-7, 8-10

    Txais: (8a) HUAB TAIS, thov koj nce mus nyob hauv koj lub chaw so.

    Peb tau hnov txog qhov chaw ntawd nyob Es Fas Tas,
    peb nrhiav tau qhov chaw ntawd tom cov nras teb Yas Aj.
    Peb kav tsij mus lawm hauv Huab Tais lub tsev,
    peb mus txhos caug pe ntawm nws lub rooj tiag taw.

    Txais: (8a) HUAB TAIS, thov koj nce mus nyob hauv koj lub chaw so.

    HUAB TAIS, thov koj sawv mus nyob hauv koj lub chaw so,
    koj thiab lub Xab Cog Lus uas muaj koj lub hwj chim mus.
    Kom koj cov leej choj hnav txoj kev ncaj,
    kom koj cov neeg ntshiab qw zoo siab.
    Vim koj tus tub txib Das Vis,
    Thov koj tsis txhob tsis mloog tus koj tau pleev.

    Txais: (8a) HUAB TAIS, thov koj nce mus nyob hauv koj lub chaw so.

    As Les Lus Yas: MT 4: 23

    Txais: As les lus yas, as les lus yas.

    Yes Xus tshaj lub Moo Zoo txog lub Ceeb Tsheej
    thiab nws kho txhua yam mob nyob hauv cov neeg zoo hlo.

    Txais: As les lus yas, as les lus yas.

    Ntawv Moo Zoo: MK 6: 53-56

    53 Cov thwj tim hla dhau dej ntuj, lawv tuaj txog lub teb chaws Nkes Nes Xas Les, ces lawv nqes nkoj.
    54 Thaum lawv nqes plhuav nkoj los, muaj neeg cim tau Yes Xus tam sis ntawd.
    55 Cov neeg ntawd khiav thoob ib cheeb tsam ntawd, lawv mus kwv cov neeg muaj txiab nkeeg saum tej lub txaj lev tuaj; lawv hnov luag hais tias Yes Xus nyob qhov twg, mas lawv kwv cov neeg mob tuaj rau qhov ntawd.
    56 Txhua txhia qhov chaw, hauv cov zos, cov nroog, thiab pem yaj sab, uas Yes Xus mus, mas lawv coj cov neeg mob tuaj tso rau ntawm tej tshav puam, lawv thov Yes Xus kom nws cia lawv kov nws, txawm yog kov nws cov tw ntxhoo ntawm nws lub tsho xwb los xij. Ces cov neeg uas tau kov Yes Xus puav leej dim ntawm lawv tus mob huv si.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 10th February 2020, 10:58 am

    TIM 11 LUB 2 HLIS 2020

    Hnub Peb Lis Piam Tsib Nruab Xyoo A Nruab Lis Piam Xyoo II

    Hwm Leej Niam tuaj tim Lourdes (Our Lady of Lourdes/Notre Dame de Lourdes)

    Zaj Nyeem Ib: 1 VAJ 8: 22-23, 27-30


    22 Xas Los Moos mus sawv nyob ntawm hauv ntej HUAB TAIS lub thaj txi Ntuj, nyob ntawm tas tsoom His Xas Lais xub ntiag, nws tsa tes rau saum Ntuj. 23 Nws hais tais : "HUAB TAIS, His Xas Lais tus Tswv Ntuj, tsis muaj lwm tus Tswv Ntuj zoo li koj nyob saum ntuj los nyob ntiaj teb no lawm; koj ua raws nraim li koj tau cog lus thiab koj khuv leej koj cov tub txib uas lawv mloog raws li koj nyiam tas lawv siab lawv ntsws.
    27 Tswv Ntuj puas yuav nyob tau hauv ntiaj teb no tiag ? Vim tias lub ntuj saud thiab cov txheej ntuj siab saud twb ntim tsis tau koj, mas lub tsev kuv tau tsa no haj yam yuav ntim tsis tau koj li! 28 Txawm li ntawd los, HUAB TAIS kuv tus Tswv Ntuj, thov koj saib txog koj tus tub txib cov lus thiab zaj thov koj, thiab thov koj mloog koj tus tub txib lub suab quaj hu thiab nws zaj thov uas nws hais nyob ntawm koj xub ntiag hnub no. 29 Thov kom nruab hnub hmo ntuj koj dauv muag saib ntsoov lub tuam tsev no, yog lub tsev uas koj tau hais txog tias : 'Kuv lub npe yuav nyob ntawd!' Thov koj mloog kuv koj tus tub txib cov lus thov koj nyob ntawm thaj chaw no. 30 Thov koj mloog koj tus tub txib thiab mloog koj haiv His Xas Lais cov lus thov koj nyob ntawm thaj chaw no. Thov koj nyob saum koj lub chaw saum ntuj mloog peb thiab zam txhaum rau peb."

    NPN 84: 3, 4, 5+10, 11

    Txais: (2) Tswv Ntuj muaj hwj huam, koj lub chaw nyob zoo xis siab ua luaj li!

    Kuv tus plig ntshaw seev yees yuj plaws
    rau HUAB TAIS cov tshav loog.
    Kuv lub siab lub cev quaj ntshaw
    txog tus Tswv Ntuj muaj txoj sia.

    Txais: (2) Tswv Ntuj muaj hwj huam, koj lub chaw nyob zoo xis siab ua luaj li!

    Tej me noog liaj nrhiav tau chaw nyob,
    tej noog luv nrhiav tau zes puag me nyuam,
    rau saum koj cov thaj txi ntuj nas HUAB TAIS muaj hwj huam,
    kuv tus vaj, kuv tus Tswv Ntuj,

    Txais: (2) Tswv Ntuj muaj hwj huam, koj lub chaw nyob zoo xis siab ua luaj li!

    Cov neeg nyob hauv koj tsev lawv hmoov zoo :
    lawv tau kev cav txog koj tas mus li tsis tseg.
    Tswv Ntuj, thov koj saib daim leem phiaj thaiv peb,
    thov koj ntsia tus koj tau pleev roj rau lub ntsej muag.

    Txais: (2) Tswv Ntuj muaj hwj huam, koj lub chaw nyob zoo xis siab ua luaj li!

    Kuv yeem nyob ib hnub hauv koj cov tshav loog
    zoo dua nyob ib txhiab hnub lwm qhov chaw;
    kuv yeem pw ntawm kuv tus Tswv Ntuj lub taw rooj
    zoo dua nyob hauv cov tsis hwm ntuj tej tsev tsam phooj.

    Txais: (2) Tswv Ntuj muaj hwj huam, koj lub chaw nyob zoo xis siab ua luaj li!

    As Les Lus yas : NPN 119: 36, 29b

    Txais: As les lus yas, as les lus yas.

    HUAB TAIS, thov ua kom kuv lub siab xib mus rau koj tej cai lij choj,
    thiab pub lub txiaj ntsim rau kuv ua raws koj txoj cai.

    Txais: As les lus yas, as les lus yas.

    Ntawv Moo Zoo: MK 7: 1-13

    1 Cov Fas Lis Xais thiab tus puav Kws Ntawv Ntshiab tuaj Yes Lus Xas Les tuaj, lawv sib sau ntsauv Yes Xus. 2 Lawv pom tus puav thwj tim xuas tes tsis huv noj mov, lawv tsis xub ntxuav tes tso, 3 vim tias cov Fas Lis Xais, thiab tas cov Yus Das huv tib si yeej tsis noj mov yog lawv tsis xub ntxuav tes zoo zoo tso raws li tej laus ib txwm coj los. 4 Thaum lawv mus kav kiab kav khw rov los, yog lawv tsis tau xub pov dej rau lawv kom lawv huv tso, mas lawv tsis noj mov li. Tseem muaj ntau yam uas cov Yus Das ua raws li tej laus qhia kom ua : xws li ntxuav khob, ntxuav hub, thiab tej tais tooj dub, tej txaj chaw pw kom huv. 5 Vim li ntawd, cov Fas Lis Xais thiab cov kws Ntawv Ntshiab thiaj nug Yes Xus tias : "Ua cas koj cov thwj tim tsis ua raws li tej laus kev cai ib txwm qhia kom ua, lawv cia li xuas tes tsis huv noj mov ?" 6 Yes Xus teb rau lawv tias : "Neeg zoo sab nraud, His Xais tau hais raug kawg txog nej raws li muaj lus sau tseg li no: ‘Haiv neeg no tsuas hwm kuv ntawm di ncauj xwb, lawv lub siab nyob deb kuv. 7 Lawv lam teev kuv dag, tej kev cai lawv qhia tsuas yog tib neeg tej kev cai xwb.’ 8 Nej tso Tswv Ntuj lo lus qhia tseg, nej khaws tib neeg tej kev cai xwb." 9 Thiab Yes Xus tseem hais rau lawv tias : "Nej muaj tswv yim kawg rhuav Tswv Ntuj txoj cai kom nej tau khaws nej txoj cai. 10 Xws li Mais Xes yeej tau qhia tias : ‘Koj yuav hwm koj niam koj txiv, tus tsawm niam tsawm txiv, yuav tsum tuag !’ 11 Tab sis nej mas nej hais tias : ‘Yog ib tug twg hais rau nws niam los nws txiv tias : cov nyiaj txiag uas kuv yuav cia los pab koj, mas yog kos npas lawm- txhais tias muab qee rau Ntuj lawm, 12 ces nej tsis hais kom nws ua dab tsi ntxiv rau nws niam nws txiv li. 13 Nej yeem rhuav Tswv Ntuj lo lus qhia tsis yeem tso nej txoj cai uas yog nej tsim thiab nej coj tiam dhau tiam los mus. Nej tseem ua ntau yam ntxiv zoo li ntawd thiab!"

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 12th February 2020, 6:14 pm

    TIM 12 LUB 2 HLIS 2020

    Hnub Plaub Lis Piam Tsib Nruab Xyoo A Nruab Lis Piam Xyoo II

    Zaj Nyeem Ib: 1 VAJ 10: 1-10


    1 Tus poj vaj nyob Xas Npas hnov txog Xas Los Moos lub koob meej nrov hais txog Huab Tais lub npe, nws thiaj tuaj nug tej zaj lus tob tob los sim Xas Los Moos. 2 Nws tuaj txog Yes Lus xas Les, nrog ib npoj neeg coob kawg tuaj; muaj ib co ntxhuav thauj tej nras tshuaj tsw qab, tej nras kub ntau heev, thiab tej nras pob zeb pov haum muaj nqes nrog nws tuaj; thaum nws tuaj txog ntawm Xas Los Moos lawm, nws nug Xas Los Moos txog tas puas tsav yam uas nws tau xav nyob hauv nws nruab siab. 3 Xas Los Moos thiaj piav meej pem txog tas txhia yam nws nug, tsis muaj ib yam uas Xas Los Moos yuav piav tsis tau kom meej li.
    4 Thaum tus poj vaj nyob Xas Npas pom tas nrho Xas Los Moos txoj kev thoob tsib, pom nws lub tsev uas nws tau txhim tsa, 5 pom nws tej rooj nqaij rooj hno, pom nws cov tub txib zaum muaj kev muaj cai, pom nws cov tub ua dej num tuaj nyob rau ntawd, nrog lawv tej tsoos tsho, pom nws cov tub ce dej ce cawv, thiab pom tus vaj nce mus ua tej thaj txi Ntuj nyob hauv Huab Tais lub tuam tsev, mas tus poj vaj tsis pom qab xav tas nrho. 6 Nws hais rau tus vaj tias : "Tej yam uas kuv tau hnov hais nyob hauv kuv lub teb chaws txog koj tej hauj lwm thiab txog koj txoj kev thoob tsib, mas muaj tiag tiag! 7 Thaum kuv qhov muag tsis tau tuaj pom kiag mas kuv tsis ntseeg. Tab sis kuv pom tias luag tsuas hais txog ib nrab xwb, koj tseem thoob tsib thiab nplua nuj tshaj qhov kuv tau hnov lawm. 8 Koj cov neeg muaj txoj hmoov zoo, thiab koj cov tub txib muaj txoj hmoov zoo vim lawv tau nyob ze koj tas mus li, lawv tau mloog koj cov lus thoob tsib ! 9 Kom HUAB TAIS koj tus Tswv Ntuj nto koob meej ! Nws txaus siab tsa koj ua vaj zaum saum tsoom His Xas Lais lub theej kiab; vim HUAB TAIS hlub His Xas Lais mus li, nws thiaj tsa koj ua vaj kom koj txiav txim thiab muab kev ncaj ncees rau lawv."
    10 Ces tus poj vaj muab ib puas nees nkaum nras kub, muab tshuaj tsw qab ntau heev, thiab muab ib co pob zeb pov haum los pub rau tus vaj. Tus poj vaj nyob Xas Npas pub tshuaj tsw qab ntau kawg nkaus rau vaj Xas los Moos, tsis muaj dua ib zaug ntxiv uas luag yuav pub ntau npaum li ntawd lawm.

    NPN 37: 5-6, 30-31, 39-40

    Txais: (30a) Tus neeg ncaj lub ncauj hais cov lus thoob tsib.

    Koj muab koj txoj hauv kev tso rau HUAB TAIS saib,
    koj tso siab rau nws, ces nws yuav pab koj.
    Nws yuav ua kom koj txoj kev ncaj ci li lub hauv ntuj ntsa,
    thiab ua kom koj txoj kev txiav txim ci li lub hnub thaum tav su

    Txais: (30a) Tus neeg ncaj lub ncauj hais cov lus thoob tsib.

    Tus neeg ncaj lub ncauj hais cov lus thoob tsib,
    nws tus nplaig tshaj txoj kev ncaj.
    Nws tus Tswv Ntuj txoj cai nyob rawv hauv nws nruab siab,
    thaum nws mus kev, nws yuav tsis dawm ntog.

    Txais: (30a) Tus neeg ncaj lub ncauj hais cov lus thoob tsib.

    Cov neeg siab ncaj txoj kev cawm tuaj ntawm HUAB TAIS tuaj :
    lub caij muaj kev txhawj xeeb, HUAB TAIS yog lawv lub chaw nkaum.
    HUAB TAIS tuaj pab lawv thiab cawm lawv dim,
    Nws npo lawv dim ntawm cov neeg tsis hwm Ntuj;
    nws cawm lawv vim lawv tuaj nkaum hauv nws.

    Txais: (30a) Tus neeg ncaj lub ncauj hais cov lus thoob tsib.

    As Les Lus Yas: ZAM 17: 17B, 17A

    Txais: As les lus yas, as les lus yas.

    Huab Tais, koj lo lus yog qhov tseeb;
    thov koj tshwj peb mus nyob hauv qhov tseeb.

    Txais: As les lus yas, as les lus yas.

    Ntawv Moo Zoo: MK 7: 14-23

    14 Yes Xus rov hu tsoom sid los ntawm nws, ces nws hais rau lawv tias : "Tas nej sawv daws, nej mloog kuv hais kom nej to taub. 15 Tsis muaj dab tsi nyob sab nraum neeg lub cev, uas nkag rau hauv neeg, yuav ua kom neeg tsis huv. Tiam sis yam uas tawm hauv neeg los yog yam ua kom neeg tsis huv. 16 Yog leej twg muaj pob ntseg mloog kom to taub, mnas cia nws tro taub.”
    17 Thaum Yes Xus rov los tsev thiab nyob nrug deb ntawm tsoom sid lawm, nws cov thwj tim nug nws txog zaj paj lug ntawd. 18 Ces Yes Xus hais rau lawv tias : "Nej kuj yog ib co neeg tsis muaj tswv yim li thiab lod ? Nej tsis to taub tias tas puas tsav yam nyob sab nraud, nkag rau hauv neeg ua tsis tau kom neeg tsis huv no lod? 19 Vim tias tej yam ntawd tsis nkag mus hauv neeg lub siab, tsuas nkag rau hauv lub plab xwb, thiab tawm mus rau nraum chaw tawm rooj xwb, ces thiaj li ua kom txhua hom txhiam xws noj puav leej yog yam huv.” 20 Nws hais ntxiv tias : "Yam uas tawm hauv neeg los yog yam ua kom neeg tsis huv. 21 Vim tias cov tswv yim phem yog txhawv hauv nruab nrog hauv neeg nruab siab los, xws li kev coj tus yam ntxwv tsis zoo, kev ua tub sab, kev tua neeg, 22 kev deev luag txij luag nkawm, kev cuaj khaum, kev lim hiam, kev dag ntxiasv luag, kev ua dev ua npua, kev khib, kev xyav luag moo, kev thuam ntuj, kev muab hlob, kev ua neeg vwm. 23 Txhua yam kev phem no yog tawm sab hauv los, mas thiaj ua kom neeg tsis huv."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 12th February 2020, 8:01 pm

    TIM 13 LUB 2 HLIS 2020

    Hnub Tsib Lis Piam Tsib Nruab Xyoo A Nruab Lis Piam Xyoo II

    Zaj Nyeem Ib: 1 VAJ 11: 4-13


    4 Thaum Xas Los Moos laus lawm, nws cov poj niam coj nws ntxeev siab mus teev lwm cov dab, nws lub siab tsis hwm HUAB TAIS nws tus Tswv Ntuj tib leeg xwb xws li nws txiv Das Vis lub siab tau hwm. 5 Xas Los Moos mus teev As Tas Tes uas yog cov neeg nyob Xis Doos tus poj dab, thiab teev tus dab Mis Kos uas yog cov neeg As Moos tus daB. 6 Li ntawd, Xas Los Moos ua tej yam tsis ntxim HUAB TAIS siab, nws tsis ua raws li HUAB TAIS nyiam kom tas nrho xws li nws txiv Das Vis tau ua. 7 Ces Xas Los Moos mus txhim ib lub tsev teev tus dab Kes Mov uas yog cov neeg Mos As tus dab, nyob saum lub roob uas nyob ntawm Yes Lus Xas Les sab hnub tuaj, thiab txhim ib lub rau tus dab Mis Kos, uas yog cov As Moos tus dab. 8 Nws ua li ntawd rau tas nrho nws cov poj niam uas nws yuav nyob pej kum teb los huv si, vim lawv hlawv xyab rau thiab nyias ua nyias tej thaj txi ntuj rau nyias cov dab.
    9 Ces HUAB TAIS npau taws rau Xas Los Moos, vim nws lub siab fee das rau HUAB TAIS, His Xas Lais tus Tswv Ntuj uas tau tuaj yees rau Xas Los Moos pom ob zaug lawm. 10 Thaum ntawd, HUAB TAIS twb tau qhia rau nws kom tsis txhob mus teev pej kum cov dab, tab sis Xas Los Moos tsis mloog Huab Tais lo lus qhia li. 11 Ces HUAB TAIS hais rau Xas Los Moos tias : "Koj tau ua li ntawd, koj tsis mloog kuv cov lus kuv tau cog, koj tsis mloog kuv tej cai lij choj uas kuv tau qhia rau koj li, kuv yuav thau koj lub teb chaws ntawm koj tes thiab kuv yuav muab rau koj ib tug tub txib kav. 12 Kuv yuav tsis ua li ntawd thaum koj tseem ua neej nyob, vim kuv saib taus koj txiv Das Vis. Tab sis kuv yuav thau koj lub teb chaws ntawm koj tus tub tes. 13 Kuv kuj yuav tsis thau tas nrho mus, kuv yuav cia ib lub xeem rau nws kav, vim muaj kuv tus tub txib Das Vis thiab vim muaj Yes Lus Xas Les uas kuv tau xaiv."

    NPN 106: 3-4, 35-36, 37+40

    Txais: (4a) Huab Tais, thov koj nco txog peb vim koj hlub koj haiv neeg.

    Cov neeg tsom txoj kev zoo taug, lawv txoj hmoov zoo,
    Yog cov neeg uas ua raws kev ncaj tas mus li.
    HUAB TAIS, thov koj nco txog peb, vim koj hlub koj haiv neeg.
    Thov koj tuaj xyuas peb tuaj pab cawm peb.

    Txais: (4a) Huab Tais, thov koj nco txog peb vim koj hlub koj haiv neeg.

    Tab sis lawv nrog cov pej kum haiv neeg sib fim,
    ces lawv xyaum luag tej kev teev dab kev pe mlom .
    Lawv mus tsob hwb lwm haiv neeg tej mlom,
    ces cov mlom ntawd thiaj ua rooj ntxiab cuab lawv.

    Txais: (4a) Huab Tais, thov koj nco txog peb vim koj hlub koj haiv neeg.

    Lawv muab lawv cov tub tua txi dab,
    muab lawv cov ntxhais txi rau dab phem.
    HUAB TAIS lub siab thiaj npau taws rau nws haiv neeg,
    nws thiaj ntxub nws lub cuab tam.

    Txais: (4a) Huab Tais, thov koj nco txog peb vim koj hlub koj haiv neeg.

    As Les Lus Yas: YK 1: 21BC

    Txais: As les lus yas, as les lus yas.

    Nej yuav ua neeg me txais lo lus
    uas twb muab cog rau hauv nej lawm,
    nws yog qhov yuav cawm tau nej tus ntsuj plig.

    Txais: As les lus yas, as les lus yas.

    Ntawv Moo Zoo: MK 7: 24-30

    24 Yes Xus sawv kev ntawd mus, nws ncaim mus rau lub xeev Tws Los. Nws mus hauv ib lub tsev, nws tsis xav kom muaj neeg paub li, tab sis nws tsiv nraim tsis tau. 25 Tsis ntev xwb, muaj ib tug poj niam uas nws tus ntxhais raug ib tug dab tsis huv, txawm hnov hais txog Yes Xus. Thaum nws tuaj txog, nws txhos caug ntua ntawm Yes Xus ko taw. 26 Tus poj niam ntawd yog ib tug neeg Hes Las, yug los nyob Xis Lias Fes Nis Xias xeev ntuj; nws thov kom Yes Xus ntiab tus dab tawm hauv nws tus ntxhais mus. 27 Yes Xus hais rau nws tias : "Yuav tsum cia cov me nyuam noj kom tsau tso, vim tsis yog kev ncaj ncees kom muab cov me nyuam tej mov los pub rau me nyuam dev noj." 28 Tab sis tus poj niam teb rau Yes Xus tias : “Huab Tais, tab sis cov me nyuam dev nyob hauv qab rooj, lawv twb noj tej tsig mov uas poob ntawm cov me nyuam los thiab.” 29 Ces Yes Xus hais rau tus poj niam tias : "Vim koj tau hais lo lus no, koj rov mus mog, tus dab phem twb tawm hauv koj tus ntxhais mus lawm." 30 Thaum tus poj niam rov mus txog tsev, nws pom tus me nyuam pw nyob saum txaj, hos tus dab phem twb tawm mus lawm.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 13th February 2020, 5:14 am

    TIM 14 LUB 2 HLIS 2020

    Hnub Rau Lis Piam Tsib Nruab Xyoo A Nruab Lis Piam Xyoo II

    Hwm LN Cyril, Txiv Twj Cuab, thiab LN Methodius, Tswv Qhia

    Zaj Nyeem Ib: 1 VAJ 11: 29-32; 12:19


    Yes Los Npuag yog vaj Xas Los Moos ib tug tub txib.
    29 Lub caij ntawd, thaum Yes Los Npuag tawm hauv lub tsheej Yes Lus Xas Les mus, tus yaj saub As His Yas uas nyob Xis Laus txawm tuaj ntsib nws ntawm kev; tus Yaj Saub hnav ib lub tsho tshaj sab tshiab tshiab; tsuas muaj nkawd ob leeg xwb nyob ntawm thaj tsam av ua liaj ua teb ntawd. 30 As His Yas hle hlo lub tsho tshaj sab tshiab tshiab uas nws hnav thiab muab dua rhe ua kaum ob daig. 31 Ces nws hais rau Yes Los Npuag tias : "Koj khaws kaum daim rau koj. Vim HUAB TAIS His Xas Lais tus tswv Ntuj hais li no : ‘Kuv yuav thau lub teb chaws ntawm Xas Los Moos tes mus, kuv yuav muab kaum lub xeem His Xas Lais rau koj kav. 32 Tiam sis kuv yuav tseg ib lub xeem rau nws, vim muaj kuv tus tub txib Das Vis thiab muaj lub tsheej Yes Lus Xas Les uas kuv tau xaiv nyob hauv tas cov xeem His Xas Lais huv tib si.’"
    12 19 Yog vim li no ces cov His Xas Lais thiaj sawv tiv Das Vis tsev neeg los txog niaj hnub no.

    NPN 81: 10-11AB, 12-13, 14-15

    Txais: (11a+9a) Kuv yog Huab Tais koj tus Tswv Ntuj, koj mloog kuv hais.

    Koj yuav tsis txhob muaj lwm tswv ntuj nyob hauv koj,
    koj yuav tsis txhob txhos caug pe pej kum neeg ib tug dab qhuas li.
    Kuv, HUAB TAIS yog koj tus Tswv Ntuj,
    tus tau coj koj tawm ntawm Hais Nkws Tos teb los.

    Txais: (11a+9a) Kuv yog Huab Tais koj tus Tswv Ntuj, koj mloog kuv hais.

    Kuv haiv neeg tsis hnov kuv lub suab li,
    His Xas Lais tsis xav mloog kuv lus li.
    Kuv thiaj tso lawv ua raws lawv lub siab cam thawj,
    cia lawv mus raws li lawv lub siab ntshaw !

    Txais: (11a+9a) Kuv yog Huab Tais koj tus Tswv Ntuj, koj mloog kuv hais.

    Kheev lam kuv haiv neeg mloog kuv hais mas,
    kheev lam His Xas Lais mus raws kuv tej kev mas !
    Tam sis ntawd kuv yuav qhau kom lawv cov yeeb ncuab swb tas,
    kuv yuav tig kuv txhais tes mus ntaus cov neeg ntxub lawv.

    Txais: (11a+9a) Kuv yog Huab Tais koj tus Tswv Ntuj, koj mloog kuv hais.

    As Les Lus Yas: HL 16: 14b

    Txais: As les lus yas, as les lus yas.

    Huab Tais, thov koj qhib peb lub siab
    kom peb mloog koj Leej Tub cov lus.

    Txais: As les lus yas, as les lus yas.

    Ntawv Moo Zoo: MK 7: 31-37

    31 Yes Xus tso thaj tsam Tws Los tseg, nws taug txoj kev hla Xis Doos mus rau lub hiav txwv Nkas Lis Lais, mus rau hauv thaj tsam Des Kas Pos Lis. 32 Lawv coj ib tug neeg lag ntseg, hais lus txhav qhi, tuaj rau Yes Xus, lawv thov kom Yes Xus tsa tes rau saum nws. 33 Yes Xus coj nws tawm ntawm tsoom sid mus rau ib cag kom txhob muaj neeg, Yes Xus muab nws tus ntiv tes ntxig rau tus lag ntseg ob lub qhov ntsej, nws nti aub ncaug los pleev tus neeg ntawd tus nplaig. 34 Yes Xus tsa muag ntsia saum ntuj, nws xyu ib suab, nws hais rau tus lag ntseg tias : "Es fas tas," txhais tias : "Koj qhib los." 35 Tam sis ntawd tus lag ntseg ob lub qhov ntsej qhib plho, hos cov hlua khi nws tus nplaig kuj plam plaws, ces nws hais tau lus meej meej. 36 Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tshaj tawm tas zog. 37 Qhov ntawd ua rau lawv qhuas kawg nkaus, lawv hais tias : "Nws ua tau ib puas tsav yam zoo kawg: nws ua tau kom cov lag ntseg hnov lus, thiab kom cov nplaig txhav hais tau lus."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 14th February 2020, 9:43 am

    TIM 15 LUB 2 HLIS 2020

    Hnub Xya Lis Piam Tsib Nruab Xyoo A Nruab Lis Piam Xyoo II

    Zaj Nyeem Ib: 1 VAJ 12: 26-32; 13:33-34


    26 Yes Los Npuag xav nyob hauv nruab siab tias : "Ntshai lub teb chaws yuav rov mus zwm rau Das Vis tsev neeg xwb lau. 27 Yog cia tsoom pej xeem mus txi Ntuj pem HUAB TAIS lub Tuam Tsev Teev Ntuj nyob Yes Lus Xas Les ntxiv, mas lawv lub siab yeej yuav tig rov mus zwm rau lawv tus tswv Les Hos Npuag, uas yog tus vaj Yus Das xwb, ces lawv yuav muab kuv tua." 28 Tus vaj thiaj mus nrog nws cov tub tuav xam tham tas, nws txawm los muab kub nchuav tau ob tug mlom nyuj, thiab nws hais rau tsoom pej xeem tias : "Nej nce mus pem Yes Lus Xas Les ntev txaus lawm. Tsoom His Xas Lais, nej ntsia ntawm no, yog nej tus Tswv Ntuj uas tau coj nej tawm ntawm Hais Nkws Tos teb los." 29 Ces nws tsa ib tug mlom nyuj nyob Npes Thes thiab ib tug nyob Daas. 30 Ces qhov ntawd yog ib qho kev ua txhaum vim tsoom pej xeem mus pe hawm cov mlom nyuj ntawd txog Daas huv tib si. 31 Yes Los Npuag tseem tsa ib lub tsev teev mlom nyob tej thaj chaw siab, thiab nws muab ib co neeg nyob txheej qis tshaj uas tsis yog cov Les Vis los tsa ua leej choj. 32 Hnub tim kaum tsib lub yim hli, Yes Los Npuag tsa ib lub hnub nyoog rau hnub ntawd kom lawv nqaum paj nqaum nruas li nyob Yus Das teb thiab; nws kuj mus txi ntuj rau saum lub thaj txi ntuj nyob Npes Thes rau cov mlom nyuj nws tau nchuav, thiab nws tso ib co leej choj uas nws tau tsa, nyob rau Npes Thes.
    13 33 Dhau tej no lawm, Yes Los Npuag kuj tsis tso nws txoj kev phem tseg li. Nws tseem xaiv tej tus neeg pej xeem hauv txheej qis tshaj xwb los tsa ua Leej Choj nyob saum cov chaw siab. Tus twg xav ua leej choj nws cia li tsa ua leej choj nyob saum cov chaw siab. 34 Tej no ua kom Yes Los Npuag tsev neeg poob rau hauv kev txhaum. Vim li ntawd lawv thiaj raug muab txiav tawm, lawv thiaj puas ntsoog ploj mus tas tsis nyob saum ntiaj teb no ntxiv lawm.

    NPN 106: 6-7AB, 19-20, 21-22

    Txais: (4a) Huab Tais, thov koj nco txog peb, vim koj hlub koj haiv neeg.

    Peb tau ua txhaum ib yam li peb cov yawg koob,
    peb tau ncaim ntawm koj txoj kev, peb tau ua qhov phem.
    Nyob Hais Nkws Tos teb, peb phaj yawg
    tsis saib koj cov hwj huam yees ntxwv muaj nqes li.

    Txais: (4a) Huab Tais, thov koj nco txog peb, vim koj hlub koj haiv neeg.

    Peb cov yawg koob tau puab ib tug nyuj nyob ntawm roob Hos Les;
    lawv txhos caug pe tus mlom uas lawv nchuav.
    Lawv muab lawv lub koob meej los
    pauv ib tug duab mlom uas yog ib tug nyuj noj zaub.

    Txais: (4a) Huab Tais, thov koj nco txog peb, vim koj hlub koj haiv neeg.

    Lawv tsis nco qab tus Tswv Ntuj uas tau cawm lawv lawm,
    tus tau ua tej yam loj nyob Hais Nkws Tos teb ,
    tus tau ua tej yam hwj huam txaus qhuas nyob Haas teb,
    tus tau ua tej yam txaus ntshai nyob ntawm Dej Ntuj Liab

    Txais: (4a) Huab Tais, thov koj nco txog peb, vim koj hlub koj haiv neeg.

    As Les Lus Yas: MT 4: 4B

    Txais: As les lus yas, as les lus yas.

    Neeg tsis kawg muab mov los yug siav xwb,
    neeg tseem yuav yuav txhua lo lus tawm ntawm
    Tswv Ntuj lub ncauj los yug siav thiab.

    Txais: As les lus yas, as les lus yas.

    Ntawv Moo ZOO: MK 8: 1-10

    1 Lub sij hawm ntawd, rov qab muaj dua ib pab neeg coob coob, lawv tsis muaj dab tsi noj. Yes Xus hu cov thwj tim los, nws hais rau lawv tias : 2 "Kuv hlub cov neeg no, vim lawv nrog kuv nyob tau peb hnub lawm, lawv tsis muaj dab tsi noj li. 3 Yog kuv cia lawv yoo tshaib rov mus tsev, mas lawv yuav tsaus muag tom tog kev, vim lawv ib txhia tuaj deb tuaj." 4 Cov thwj tim teb rau Yes Xus tias : "Yuav muab mov qhov twg los txaus rau cov neeg ntawd noj kom tsau, vim ntawm no yog ib qho niag chaw twj cuab xwb?” 5 Ces Yes Xus nug lawv tias : "Nej muaj pes tsawg lub ncuav mov?" Lawv teb tias : "Xya lub." 6 Yes Xus kom tsoom sid zaum pem teb. Nws tuav xya lub ncuav mov, nws ua Ntuj tsaug, nws muab cov ncuav mov ntais, nws cev rau cov thwj tim kom nqa mus faib rau sawv daws. Ces cov thwj tim muab faib rau pab neeg ntawd noj. 7 Lawv kuj muaj ob peb tug me nyuam ntses thiab. Yes Xus foom hmoov zoo rau cov ntses tas, nws kom lawv nqa mus faib rau sawv daws noj thiab. 8 Sawv daws tau noj tsau npo; lawv tseem khaws tej sab mov seem tau xya tawb thiab! 9 Cov neeg ntawd kwv yees muaj li plaub txhiab leej. Yes Xus kom lawv rov mus tsev. 10 Ces Yes Xus nrog nws cov thwj tim nce nkoj tam sis ntawd, lawv mus rau thaj tsam Das Mas Nus Thas.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 17th February 2020, 8:07 am

    TIM 17 LUB 7 HLI 2020

    Hnub Ob Lis Piam Rau Nruab Xyoo A Nruab Lis Piam Xyoo II

    Hwm Xya Leej Tub Tsim lub Koom Haum cov Servites los Koom Haum Mab Liab cov Tub Txib

    Zaj Nyeem Ib: YK 1: 1-11


    1 Kuv, Yas Kos, uas yog Tswv Ntuj thiab Huab Tais Yes Xus Pleev ib tug tub txib, hais rau kaum ob lub xeem sib ncaim mus nyob qhov txhia chaw tias: Nej nyob kaj lug.
    2 Kuv cov kwv tij, thaum nej raug txom nyem ntau yam, mas nej yuav saib tias txhua yam ntawd yog ib txog kev zoo siab. 3 Vim nej twb paub tias yog Ntuj sim nej txoj kev ntseeg kom nej ua siab tawv qhawv ntseeg ruaj nreb xwb. 4 Nej txoj kev ua siab tawv qhawv ntseeg ruaj yuav tsum tawv kom kawg, thiaj yog qhov zoo tshaj plaws, nej thiaj yuav zoo txhij zoo txhua tsis muaj chaw xyeej, tsis tshuav dab tsi uas luag thuam tau. 5 Yog nej ib tug twg tsis thoob tsib, mas nws yuav thov kev thoob tsib ntawm Tswv Ntuj, uas pub dawb paug rau txhua leej txhua tus tsis cem tsis yws, ces Tswv Ntuj yuav pub rau nws. 6 Tiam sis nws yuav tsum muaj lub siab ntseeg tiag, tsis txhob ua xyem xyav. Vim tus ua xyeem xyav, nws zoo li ib twv dej nphau nyob hauv hiav txwv uas cua muab nplawm thiab muab ntsawj rau ub rau no. 7 Tus ua xyem xyav, nws txhob xav tias nws yuav tau txais ib yam dab tsi ntawm Huab Tais, 8 vim nws yog ib tug neeg muaj ntau lub siab, nws ua yam twg ua tsis tsheej li.
    9 Tus kwv tij uas yog neeg txheej qis, nws yuav tsum muaj ntsej muag tias Ntuj tsa nws siab. 10 Hos tus kwv tij nplua nuj yuav muaj ntsej muag txo kom nws qis, vim nws yuav dua mus xws li ib lub paj nroj. 11 Thaum hnub tuaj, cov cua sov tuaj ziab tsob nroj qhuav tas, lub paj zeeg, nws qhov zoo nkauj kuj ploj ntais mus. Ib yam li ntawd tus nplua nuj kuj yuav nrog nws tej hauj lwm ploj mus tas.

    NPN 119: 67, 68, 71, 72, 75, 76

    Txais: (77a) Huab Tais, thov koj ua siab zoo rau kuv ces kus yuav muaj txoj sia.

    Thaum kuv tsis tau raug txom nyem, kuv tau mus yuam kev ;
    nyiam no, kuv mloog nraim koj tej lus qhuab lus qhia.

    Txais: Huab Tais, thov koj ua siab zoo rau kuv ces kuv yuav muaj txoj sia.

    Koj yog tus muaj lub siab zoo lub siab dav,
    thov koj qhia koj cov cai lij choj rau kuv kawm.

    Txais: Huab Tais, thov koj ua siab zoo rau kuv ces kuv yuav muaj txoj sia.

    Yog ib qho zoo uas kuv tau raug txom nyem,
    vim qhov ntawd kuv thiaj tau kawm koj cov cai lij choj.

    Txais: Huab Tais, thov koj ua siab zoo rau kuv ces kuv yuav muaj txoj sia.

    Txoj cai uas tawm hauv koj lub ncauj los muaj nqe rau kuv
    dua ntau txhiab daim kub thiab ntau txhiab daim nyiaj.

    Txais: Huab Tais, thov koj ua siab zoo rau kuv ces kuv yuav muaj txoj sia.

    HUAB TAIS, kuv paub tias koj txiav cai raws kev haum pheej,
    Thiab koj cia kuv tau raug txom nyem raws kev ncaj ncees.

    Txais: Huab Tais, thov koj ua siab zoo rau kuv ces kuv yuav muaj txoj sia.

    Thov muab koj lub siab zoo los nplij kuv
    raws li koj tau cog lus rau koj cov tub txib.

    Txais: Huab Tais, thov koj ua siab zoo rau kuv ces kuv yuav muaj txoj sia.

    As Les Lus Yas: ZAM 14: 6

    Txais: As les lus yas, as les lus yas.

    Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
    Tsis muaj leej twg mus cuag Leej Txiv tau, yog nws tsis mus ntawm kuv mus.

    Txais: As les lus yas, as les lus yas.

    Ntawv Moo Zoo: MK 8: 11-13

    11 Cov Fas Lis Xais tawm los, lawv pib nrog Yes Xus sib cav, lawv xav kom Yes Xus ua ib lub cim tawm saum ntuj tuaj, kom lawv tau kev sim nws.
    12 Yes Xus xyu ib suab nyob puag hauv nws nruab siab, ces nws hais tias : "Vim li cas tiam neeg no thiaj taij ib lub cim? Kuv hais tseeb rau nej, yuav tsis muaj ib lub cim rau tiam neeg no pom."
    13 Ces Yes Xus tso lawv tseg, nws rov nce nkoj thiab mus rau sab ntug dej tim ub lawm.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 17th February 2020, 9:59 am

    TIM 18 LUB 2 HLIS 2020

    Hnub Peb Lis Piam Rau Nruab Xyoo A Nruab Lis Piam Xyoo II

    Zaj Nyeem Ib: YK 1: 12-18


    12 Tus twg ua siab tawv qhawv hla dhau txoj kev ntxias, mas nws txoj hmoov zoo, vim tus neeg uas yeej kev ntxias, mas nws yuav txais lub mom teev kub muaj txoj sia uas Huab Tais tau cog lus yuav pub rau cov neeg nyiam nws.
    13 Tus twg raug kev ntxias yuav tsis txhob hais tias : “Yog Tswv Ntuj ntxias kuv.” Vim tias, Tswv Ntuj tsis txawj raug kev ntxias mus ua phem, thiab nws tsis ntxias leej twg. 14 Yog nyias lub siab ntshaw rov rub thiab coj nyias mus raug txoj kev ntxias. 15 Kev ntshaw ua kom kev txhaum xeeb tuaj thiab yug tawm los. Thaum kev txhaum loj tiav log, mas nws daug tau txoj kev tuag.
    16 Kuv cov kwv tij zoo nyiam, nej tsis txhob yuam kev mog: 17 Tas txhua yam zoo thiab tas tej paj tshab tsis muaj chaw xyeej puav leej yog tuaj saum ntuj tuaj, tuaj saum Leej Txiv uas yog qhov pom kev tuaj; nyob hauv nws, tsis muaj ib yam txawj hloov, los tsis muaj kev tsaus vim txawj hloov. 18 Leej Txiv tau pom zoo hais lo lus tseeb yug peb tawm los, kom peb yog thawj cov txiv txi hauv txhua yam uas nws tsim los.

    NPN 94: 12-13A, 14-15, 18-19

    Txais: (12a) HUAB TAIS, tus uas koj qhuab qhia nws tau txoj hmoov zoo.

    HUAB TAIS, tus uas koj qhuab qhia nws tau txoj hmoov zoo,
    tus uas koj cob qhia nws taug koj txoj cai nws tau txoj hmoov zoo.
    Nws tau kev dim ntawm cov hnub nyoog phem.

    Txais: (12a) HUAB TAIS, tus uas koj qhuab qhia nws tau txoj hmoov zoo.

    Vim HUAB TAIS tsis nrauj nws haiv neeg,
    nws tsis muab nws lub cuab tam laim pov tseg.
    Txoj kev txiav txim yuav rov txiav raws txoj kev ncaj,
    tas tsoom neeg siab ncaj yuav taug raws txoj kev ncaj.

    Txais: (12a) HUAB TAIS, tus uas koj qhuab qhia nws tau txoj hmoov zoo.

    Thaum kuv hais tias : "Kuv yuav ntog !"
    HUAB TAIS, koj txoj kev khuv leej txheem kuv.
    Thaum kev txhawj xeeb nyob puv hauv kuv tas,
    koj tej lus nplig ua kom kuv tus plig zoo siab.

    Txais: (12a) HUAB TAIS, tus uas koj qhuab qhia nws tau txoj hmoov zoo.

    As Les Lus Yas: ZAM 14: 23

    Txais: As les lus yas, as les lus yas.

    Huab Tais hais tias: Yog leej twg nyiam kuv,
    nws yuav coj rawv kuv lo lus, ces kuv Txiv yuav nyiam nws.
    Kuv Txiv wb yuav tuaj nyob hauv nws.

    Ntawv Moo Zoo: MK 8: 14-21

    14 Cov thwj tim tsis nco qab ntim mov, lawv tsuas muaj ib lub mov nyob hauv nkoj xwb. 15 Yes Xus txawm qhia lawv zoo li no : "Nej xyuam xim mog, nej ceev faj txog cov poov xab Fas Lis Xais thiab cov poov xab Hes Los." 16 Ces cov thwj tim txawm sib tham tias ntshai yog vim lawv tsis ntim mov. 17 Yes Xus paub qhov lawv xav, ces Yes Xus hais rau lawv tias : "Ua cas nej sib tham tias yog vim nej tsis ntim mov ? Nej tseem tsis tau to taub thiab nej mem tsis tau li lod ? Nej lub siab tawv dhau lawm lod ? 18 Nej puas lam muaj qhov muag xwb, tsis pom kev, lam muaj pob ntseg xwb, tsis hnov lus li? Nej tsis nco qab lawm lod? 19 Thaum kuv ntais tsib lub ncuav mov rau tsib txhiab leej noj, nej khaws tau pes tsawg tawb mov seem?" Lawv teb tias : "Kaum ob tawb." 20 Thiab zaum uas kuv ntais xya lub ncuav mov rau plaub txhiab leej noj, nej khaws tau pes tsawg tawb mov seem?" Lawv teb tias : "Xya tawb." 21 Ces Yes Xus hais rau lawv tias : "Nej tseem tsis tau to taub thiab lod ?"

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 18th February 2020, 10:14 am

    TIM 19 LUB 2 HLIS 2020

    Hnub Plaub Lis Piam Rau Nruab Xyoo A Nruab Lis Piam Xyoo II

    Zaj Nyeem Ib: YK 1: 19-27


    19 Kuv cov kwv tij zoo nyiam, nej yuav tsum paub tias : Txhua leej txhua tus yuav xyaum ua neeg mloog lus sai, hais lus tsawg, npau taws qeeb. 20 Vim tus neeg npau taws leg tsis tau Tswv Ntuj txoj kev ncaj. 21 Li ntawd nej yuav tshem txhua yam tsis huv thiab tshem txoj kev siab phem uas muaj ntau nyob hauv nej pov tseg. Nej qhib ib lub siab txo hwj chim los txais Tswv Ntuj Lo Lus uas nws muab cog rau hauv nej. Lo Lus ntawd thiaj yuav cawm tau nej tus ntsuj plig.
    22 Nej yuav tsum ua kiag kom raws li Lo Lus, tsis txhob lam xuas pob ntseg mloog dag xwb, nej thiaj tsis rov dag nej. 23 Tus neeg uas hnov Lo Lus tab sis tsis ua raws, mas nws zoo li ib tug neeg uas rov ntsia nws tus kheej lub ntsej muag hauv daim tsom iav; 24 nws ntsia ib muag tas, nws cia li mus, ces tam sis ntawd nws twb tsis nco qab tias nws lub ntsej muag zoo li cas lawm. 25 Tiam sis tus neeg uas muab siab rau kawm kom tob txog txoj cai zoo pub kev twj lij, thiab nws nyob ruaj hauv txoj cai ntawd, mas nws tsis yog ib tug neeg uas mloog tas nrho xwb twb hnov qab lawm, nws yog ib tug neeg uas coj raws nraim li txoj cai, mas nws yuav tau txoj hmoov zoo nyob hauv txhua yam nws ua.
    26 Yog ib tug twg xav tias nws hwm Ntuj, tiam sis nws tsis cheem nws lub ncauj, mas nws rov dag rau nws xwb , nws txoj kev hwm Ntuj tsis muaj qab hau dab tsi li. 27 Txoj kev hwm Ntuj dawb huv tsis lo ib yam qias nyob ntawm Leej Txiv Tswv Ntuj xub ntiag yog txoj no : yog mus xyuas cov me nyuam ntsuag thiab cov poj ntsuam uas raug kev txom nyem, thiab yog txuag yus tus kheej kom lub ntiaj teb tej kev qias txhob lo yus.

    NPN 15: 2-3A, 3BC-4AB, 5

    Txais: (1) Huab Tais, leej twg yuav tau nyob saum koj lub roob ntshiab?

    Yog tus uas coj tus yeeb yam tsis muaj chaw xyeej thiab ua ncaj,
    yog tus uas xav qhov tseeb nyob hauv nruab siab,
    thiab nws tsis cia nws tus nplaig hais lus dag txog lwm tus.

    Txais: (1) Huab Tais, leej twg yuav tau nyob saum koj lub roob ntshiab?

    Yog tus tsis ua phem rau luag,
    los tsis nrhiav lus rau tus nyob ze nws.
    Yog tus tsis hwm tus ua kev phem kev txhaum,
    tiam sis nws hwm cov neeg hwm HUAB TAIS.

    Txais: (1) Huab Tais, leej twg yuav tau nyob saum koj lub roob ntshiab?

    Yog tus qiv nyiaj txiag nws tsis tsuam paj.
    yog tus tsis txais luag cov nyiaj xiab
    kom muab txim rau tus tsis txhaum.
    Tus ua li no, mas nws yuav nyob nyab xeeb mus li.

    Txais: (1) Huab Tais, leej twg yuav tau nyob saum koj lub roob ntshiab?

    As Les Lus Yas: EFX 1: 17-18

    Txais: As les lus yas, as les lus yas.

    Thov kom peb tus Huab Tais Yes Xus Pleev leej Txiv
    qhib peb lub qhov muag hauv peb lub siab kom pom kev,
    kom peb thiaj paub txog tias peb txoj kev tso siab yog dab tsi
    thaum Tswv Ntuj hu peb.

    Txais: As les lus yas, as les lus yas.

    Ntawv Moo Zoo: MK 8: 22-26

    22 Lawv mus txog Npes Xais Das, ces luag coj ib tug neeg dig muag tuaj rau Yes Xus,
    lawv thov kom Yes Xus kov tus dig muag.
    23 Yes Xus tuav tus dig muag tes, thiab coj nws tawm hauv zos mus rau sab nraud.
    Yes Xus muab aub ncaug los pleev tus dig muag ob lub qhov muag, nws tsa tes rau saum tus dig muag,
    ces nws nug tus dig muag tias : "Koj puas pom ib qho dab tsi?"
    24 Tus dig muag rua muag ntsia, nws teb tias : "Kuv pom ib co neeg, zoo li ib co ntoo, txawj mus kev."
    25 Yes Xus rov qab tsa tes rau saum tus dig muag ob lub qhov muag dua,
    ces tus dig muag pom kev tseeb tuaj, nws zoo lawm, nws pom ib puas tsav yam meej thiab tseeb lawm.
    26 Yes Xus thiaj kom nws rov mus tsev, thiab hais rau nws tias : "Koj tsis txhob nkag mus hauv lub zos no li."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 19th February 2020, 5:27 pm

    TIM 20 LUB 2 HLIS 2020

    Hnub Tsib Lis Piam Rau Nruab Xyoo A Nruab Lis Piam Xyoo II

    Zaj Nyeem Ib: YK 2: 1-9


    1 Kuv cov kwv tij, nej yuav tsis txhob saib taus ib co neeg saib tsis taus lwm cov nyob hauv nej txoj kev ntseeg txog peb tus Huab Tais Yes Xus Pleev, tus Huab Tais muaj hwj chim. 2 Yog thaum nej tuaj sib sau ua ke, muaj ib tug neeg coj nplhaib nyiaj nplhaib kub, hnav tsoos tsho zoo zoo nkag los nrog nej koom, thiab kuj muaj dua lwm tus yog neeg pluag pluag hnav tsoos tsho khaub khaub hlab nkag los, 3 nej ua zoo tos txais tus hnav tsoos tsho zoo, nej hais rau nws tias : “Koj los zaum ntawm no os !” Hos nej hais rau tus neeg pluag tias : “Koj sawv ntsug ntawd!” los hais tias : “Koj zaum saum lub tog tiag taw hauv av no!” 4 Yog nej ua li ntawd, mas puas yog nej saib tias neeg tsis muaj nqis ib yam, thiab nej yog ib co neeg txiav txim muaj lub tswv yim nkhaus los tsis yog?
    5 Kuv cov kwv tij zoo nyiad, nej mloog mog ! Tswv Ntuj tsis tau xaiv cov neeg uas lub ntiaj teb saib lawv pluag, kom los ua ib co neeg nplua nuj nyob hauv txoj kev ntseeg, thiab kom lawv los ua cov yuav tau xais lub Ceeb Tsheej ua lawv lub cuab tam, raws li nws tau cog lus rau cov neeg nyiam nws lod ? 6 Tab sis nej tseem ua saib tsis taus tus pluag thiab. Cov neeg nplua nuj tsis yog cov hiam nej, tsis yog cov coj nej mus kom rau hauv lub tsev txiav txim lod ? 7 Lawv tsis yog cov thuam nej lub npe zoo uas luag tis rau nej lod ?
    8 Yog nej ua raws li peb tus Vaj txoj cai uas sau cia hauv Ntawv hais tias : “Koj yuav nyiam tus nyob ze koj ib yam li koj nyiam koj.,” mas nej ua zoo lawm. 9 Tab sis, yog nej hwm cov nplua nuj tsis hwm cov pluag, mas yog nej ua txhaum. Txoj Cai txiav txim rau nej tias nej yog neeg hla Txoj Cai lawm.

    NPN 34: 2-3, 4-5, 6-7

    Txais: (7a) Huab Tais mloog tus pluag lub suab quaj.

    Kuv yuav cav lus zoo txog HUAB TAIS txhua lub sij hawm,
    lo lus cav txog nws yuav nyob rawv hauv kuv lub ncauj.
    kuv tus ntsuj plig yuav muaj koob meej yog nyob hauv HUAB TAIS,
    Ces cov neeg me yuav hnov kuv, lawv yuav zoo siab.

    Txais: (7a) Huab Tais mloog tus pluag lub suab quaj.

    Nej nrog kuv cav txog HUAB TAIS,
    peb sawv daws ua ke qhuas nws lub npe.
    Kuv tau thov HUAB TAIS; nws tau teb kuv,
    Nws daws kuv dim ntawm tas txhua yam kev ntshai.

    Txais: (7a) Huab Tais mloog tus pluag lub suab quaj.

    Nej ntsia ntsoov HUAB TAIS ces nej lub
    ntsej muag yuav ci tshiab luag ntxhi,
    Nej lub phlu yuav tsis liab vim kev txaj muag.
    Thaum tus txom nyem quaj qw, HUAB TAIS mloog nws,
    HUAB TAIS cawm nws ntawm tas nws tej kev txhawj xeeb.

    Txais: (7a) Huab Tais mloog tus pluag lub suab quaj.

    As Les Lus Yas: ZAM 6: 63C, 68C

    Txais: As les lus yas, as les lus yas.

    Huab Tais, koj cov lus yog ntsuj plig thiab yog txoj sia;
    koj muaj cov lus pub txoj sia nyob mus li.

    Txais: As les lus yas, as les lus yas.

    Ntawv Moo Zoo: MK 8: 27-33

    27 Yes Xus nrog nws cov thwj tim mus rau cov zej zos nyob cheeb tsam ntawm Xes Ntxas Les Fis Lis Pos. Thaum lawv taug kev, Yes Xus nug nws cov thwj tim tias: "Luag tej hais tias kuv yog leej twg ?"
    28 Cov thwj tim teb tias : "Ib txhia hais tias koj yog Zam Ntxuav Plig, ib txhia hais tias koj yog Es Lias, hos ib txhia tseem hais tias koj yog ib tug hauv cov yaj saub no."
    29 Yes Xus nug lawv tias : "Nej ne, nej hais tias kuv yog leej twg ?" Pob Zeb teb rau Yes Xus tias : "Koj yog Leej Pleev."
    30 Ces Yes Xus txwv lawv nruj kom txhob hais txog nws rau leej twg li.
    31 Yes Xus pib qhia cov thwj tim hais tias : "Neeg Leej Tub yuav tsum raug txom nyem loj. Cov txwj laus, cov thawj leej choj thiab cov thoob xwm yuav tsis kam lees nws; lawv yuav muab nws tua. Peb hnub tom qab, nws yuav sawv rov los. 32 Yes Xus tab meeg qhia tej ntawd tsis zais li. Pob Zeb rub Yes Xus mus rau ib qho, ces Pob Zeb yws rau Yes Xus.
    33 Tab sis Yes Xus tig ntsia nws cov thwj tim, nws cem Pob Zeb hnyav ncawv tias : "Xas Tas, koj khiav mus lawv kuv qab ! Vim koj tsis xav li Tswv Ntuj xav, koj xav li tib neeg xav xwb !"

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 20th February 2020, 6:29 am

    TIM 21 LUB 2 HLIS 2020

    Hnub Rau Lis Piam Rau Nruab Xyoo A Nruab Lis Piam Xyoo II

    Hwm LN Peter Damian

    Zaj Nyeem Ib: YK 2: 14-24, 26


    14 Kuv cov kwv tij, yuav muaj qab hauy dab tsis rau ib tug neeg, yog nws hais tias nws ntseeg, tiam sis nws twb tsis ua cov hauj lwm zoo li? Txoj kev ntseeg ntawd puas cawm tau nws? 15 Thaum ib tug kwv los ib tug muam tsis muaj dab tsi hnav, thiab tsis muaj mov txaus noj txwm hnub, 16 yog nej ib tug twg hais rau lawv tias: “Nej mus kaj siab lug, kom nej tau nyob sov so, kom nej tau noj tsau npo mog,” tab sis nej twb tsis pub dab tsi pab rau lawv lub cev li, mas nej lo lus muaj qab hau dab tsi ? 17 Ntawm txoj kev ntseeg los kuj zoo ib yam, yog nej tsis ua cov hauj lwm zoo, ces nej txoj kev ntseeg tsis muaj sia li.
    18 Qee tus yuav hais tias : “Koj muaj lub siab ntseeg, hos kuv muaj cov hauj lwm zoo. Koj muab koj lub siab ntseeg tsis ua cov hauj lwm zoo rau kuv pom, kuv yuav muab kuv cov hauj lwm zoo qhia txog txoj kev ntseeg rau koj pom. 19 Yog koj ntseeg tias tsuas muaj ib tug Tswv Ntuj xwb, mas koj yeej ua zoo lawm. Tab sis cov dab phem kuj ntseeg li ntawd thiab, thiab lawv ntshai tshee na xwb. 20 Neeg tsis txawj xav tswv yim aw, koj puas paub tias txoj kev ntseeg uas tsis muaj cov hauj lwm zoo nrog, mas yog ib qho tsis muaj qab hau dab tsi li?”
    21 Peb Txiv Has Nplas Has muaj lub siab ntshiab dawb huv tuaj, tsis yog vim nws cov hauj lwm zoo, uas nws cev nws tus tub Is Xas Has rau saum lub thaj txi Ntuj lod?. 22 Koj thiaj pom tias, txoj kev ntseeg ua kom nws ua tau cov hauj lwm zoo, ces cov hauj lwm zoo ntawd ua kom nws txoj kev ntseeg loj tiav txhij. 23 Li ntawd muaj raws nraim li Ntawv sau hais tias: “Has Nplas Has ntseeg Tswv Ntuj, ces yog qhov ua kom nws yog ib tug neeg ncaj,” luag thiaj hu nws ua Tswv Ntuj tus phooj ywg. 24 Li ntawd, nej pom tias Ntuj saib ib tug yog neeg ncaj, yog vim nws ov hauj lw zoo, tsis yog vim txoj kev ntseeg nkaus xwb.
    26 Ib yam nkaus li lub cev tsis muaj sia yog ib lub cev tuag, txoj kev ntseeg tsis muaj cov hauj lwm zoo kuj yog ib txog kev ntseeg tuag thiab.

    NPN 112: 1-2, 3-4, 5-6

    Txais: (1b) Tus nyiam Huab Tais cov lus qhia tas siab nrho, nws txoj hmoov zoo.

    Tus muaj hmoov zoo yog tus hwm HUAB TAIS
    thiab nyiam Huab Tais cov lus qhia tas sdiab nrho.
    Nws caj ce yuav muaj zog nyob ntiaj teb;
    tiam neeg siab ncaj yuav tau txoj hmoov zoo.

    Txais: (1b) Tus nyiam Huab Tais cov lus qhia tas siab nrho, nws txoj hmoov zoo.

    Nyob hauv nws vaj tse yuav muaj kev vam meej kev nplua nuj,
    nws txoj kev ua siab dav yuav nyob tas mus li.
    Tus neeg ncaj ci hauv qhov tsaus ntuj ua lub teeb kaj cov neeg ncaj,
    nws ua siab zoo, nws khuv leej luag, nws ua haum pheej.

    Txais: (1b) Tus nyiam Huab Tais cov lus qhia tas siab nrho, nws txoj hmoov zoo.

    Tus tau txoj hmoov zoo yog tus txawj hlub luag, thiab qiv rau luag,
    Nws tswj nws tej dej num raws kev nca ncees.
    Tus neeg ncaj yuav nyob ruaj nreb tshem tsis tau,
    sawv daws yuav nco ntsoov txog nws mus li.

    Txais: (1b) Tus nyiam Huab Tais cov lus qhia tas siab nrho, nws txoj hmoov zoo.

    As Les Lus Yas: ZAM 15: 15B

    Txais: As les lus yas, as les lus yas.

    Huab Tais hais tias: “Kuv hu nej ua phooj ywg,
    vim kuv tau qhia rau nej paub tas ib puas
    tsav yam uas Leej Txiv tau hais rau kuv lawm.”

    Txais: As les lus yas, as les lus yas.

    Ntawv Moo Zoo: MK 8: 34–9:1

    34 Yes Xus hu tsoom sid nrog nws cov thwj tim los, nws hais rau lawv tias : "Yog leej twg xav los raws kuv, nws yuav tsum txhob nco txog nws tus kheej, nws yuav kwv nws tus ntoo cuam, thiab yuav lawv kuv qab. 35 Vim leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv thiab vim lub Moo Zoo, mas nws cawm nws txoj sia. 36 Yog ib tug neeg txeeb tau lub qab ntuj no tas huv tib si los ua nws tug, tab sis nws ua nws txoj sia ploj, mas nws tau dab tsi ? 37 Leej tib neeg yuav muab dab tsi los pauv tau nws txoj sia ? 38 Tus txaj muag lees kuv thiab kuv cov lus rau tiam neeg fav xeeb thiab muaj txhaum no, mas Neeg Leej Tub kuj yuav txaj muag lees nws thaum Neeg Leej Tub yuav nrog cov Tshiab ntshiab tuaj muaj nws Txiv lub hwj chim thiab.
    9 1 Yes Xus tseem hais rau lawv tias : "Kuv hais tseeb rau nej : cov neeg nyob ntawm no, muaj ib txhia yuav tsis xub tau saj txoj kev tuag mus txog thaum lawv tau pom Tswv Ntuj lub Ceeb Tsheej lub hwj huam los txog tso.”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 21st February 2020, 12:03 pm

    TIM 22 LUB 2 HLIS 2020

    Hnub XyaLis Piam Rau Nruab Xyoo A Nruab Lis Piam Xyoo II

    Hwm txog Pob Zeb lub Rooj Zaum

    Zaj Nyeem Ib: 1 POB ZEB 5: 1-4


    Cov hmov tshua:
    1 Kuv xav ntuas cov ua leej choj nyob hauv nej, vim kuv kuj yog ib tug leej choj thiab kuv yog ib tug ua tim khawv txog Leej Pleev txoj kev txom nyem, thiab kuv kuj yog ib tug yuav nrog sawv daws txais lub hwj chim uas lwm hnub yuav tawm tuaj. 2 Nej yuav coj Tswv Ntuj pab yaj uas nrog nej nyob. Nej yuav saib lawv tsis yog vim muaj tus yuam nej, tiam sis yog vim nej yeej zoo siab hlo ua qhov ntawd raws li Tswv Ntuj nyiam, thiab tsis yog vim nej yuav tau ib pob nyiaj noj, tiam sis yog vim nej yeej kub siab lug ua qhov ntawd xwb. 3 Nej tsis txhob ua ib co huab tais tswj cov neeg Ntuj muab rau nej saib, tiam sis nej yuav ua ib tug qauv zoo rau pab yaj xyaum. 4 Ces thaum tus tuam thawj Tswv Zov Yaj tawm los, nej yuav tau txais lub kaus mom muaj koob meej tsis txawj qub.

    NPN 23: 1-3A, 4, 5, 6

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    HUAB TAIS yog tus tswv zov yaj saib kuv, kuv yuav tsis ntshaw dab tsi.
    Nws coj kuv mus so nyob hauv tej tshav zaub mos ntsuab xiab.
    Nws coj kuv mus tso nyob ze tej tus dej tus yees;
    nws ua kom kuv tus ntsuj plig los siav.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Txawm kuv taug kev nyob hauv lub hav tsaus nti los,
    kuv tsis ntshai dab tsi phem, vim koj nyob rawv ntawm kuv ib sab
    nrog koj rab pas nplawm thiab rab pas nrig,
    ua rau kuv muaj siab loj.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Koj rau ib rooj mov rau ntawm kuv xub ntiag
    rau kuv cov yeeb ncuab ntsia ntsoov.
    Koj muab roj pleev kuv taub hau;
    kuv lub khob puv phwj yaws.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Tsuas muaj kev ua siab zoo thiab ua siab dawb thiaj
    caum cuag kuv txhua txhia hnub hauv kuv lub neej xwb.
    Kuv yuav tau nyob hauv HUAB TAIS tsev
    ntev niaj ntau xyoo lawm tom ntej.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    As :Les Lus Yas: MT 16: 18

    Txais: As les lus yas, as les lus yas.

    Koj yog Pob Zeb, nyob saum lub pob zeb no,
    kuv yuav txhim kuv lub Koom Txoos;
    Dab phem teb cov rooj vag yuav tsis yeej nws li.

    Txais: As les lus yas, as les lus yas.

    Ntawv Moo Zoo: MT 16: 13-19

    13 Yes Xus tuaj txog cheeb tsam ntawm Xes Ntxas Les Fis Lis Pos, ces nws nug cov thwj tim li no : "Luag tej hais tias Neeg Leej Tub yog leej twg ?" 14 Lawv teb tias : “Ib txhia hais tias yog Zam Ntxuav Plig. Ib txhia hais tias yog Es Lias. Tseem muaj lwm cov hais tias yog Yes Les Mias los yog ib tug hauv cov yaj saub.” Yes Xus hais tias : 15 "Nej ne, nej hais tias kuv yog leej twg ?" 16 Xis Moos Pob Zeb teb tias : "Koj yog Leej Pleev, yog tus Tswv Ntuj muaj txoj sia Leej Tub." 17 Yes Xus teb rau Pob Zeb tias : "Xis Moos, Yos Nas tub, koj txoj hmoov zoo; vim qhov koj paub no, tsis yog nqaij thiab ntshav qhia rau koj, yog kuv Txiv nyob saum ntuj qhia rau koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no, dab phem teb cov qhov rooj vag yuav tsis yeej nws li. 19 Kuv yuav muab Ntuj lub Ceeb Tsheej cov yawm sij rau koj tuav. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 23rd February 2020, 6:21 pm

    TIM 24 LUB 2 HLIS 2020

    Hnub Ob Lis Piam Xya Nruab Xyoo A Nruab Lis Piam Xyoo II

    Zaj Nyeem Ib: YK 3: 13-18


    Cov zoo nyiad:
    13 Nyob hauv nej, puas muaj ib tug neeg thoob tsib thiab txawj ntse? Yog muaj mas nws yuav coj ib tug yam ntxwv zoo los ua nws cov hauj lwm nyob hauv txoj kev thoob tsib ua neeg me. 14 Tab sis yog nej muaj kev khib siab iab qhi, thiab nej nyiam sib cav sib ceg, mas nej tsis txhob khav theeb, tsis txhob dag hais qhov tsis tseeb. 15 Ib txog kev thoob tsib zoo li ntawd tsis yog nqes saum ntuj los, yog los ntawm ntiaj teb los, los ntawm nqaij tawv, thiab ntawm dab phem los. 16 Vim tias, qhov twg muaj kev sib khib thiab sib cav sib ceg, mas muaj kev ntxhov, thiab tsuas muaj hauj lwm phem xwb. 17 Hos txoj kev thoob tsib nqes saum ntuj los, mas nws dawb huv, nws tseb kev thaj yeeb, kev coj tus, nws nrhiav kev sib haum xeeb, nws muaj kev khuv leej, nws txi ntau yam txiv zoo, nws tsis dag, tsis ua txuj yog neeg zoo sab nraud. 18 Lub txiv ntawm txoj kev ncaj yog cov neeg nrhiav kev thaj yeeb muab tseb nyob hauv kev thaj yeeb thiaj txi tawm los tau.

    NPN 19: 8, 9, 10, 15

    Txais: (9a) Huab Tais cov cai lij choj ua kom lub siab zoo siab.

    HUAB TAIS txoj cai zoo tas nrho,
    nws ntxiv siav rau tus ntsuj plig;
    HUAB TAIS tus txhooj tsim nyog ntseeg,
    nws ua kom tus neeg ruam thoob tsib tuaj.

    Txais: (9a) Huab Tais cov cai lij choj ua kom lub siab zoo siab.

    HUAB TAIS cov lus qhuab qhia yog lus ncaj
    ua kom neeg zoo siab kaj siab.
    HUAB TAIS lo lus qhia meej kawg,
    ua kom neeg qhov muag pom kev.

    Txais: (9a) Huab Tais cov cai lij choj ua kom lub siab zoo siab.

    Txoj kev hwm HUAB TAIS dawb huv,
    thiab yuav nyob mus li;
    HUAB TAIS cov lus txiav txim yog lus tseeb,
    txhua lo lus yog lus ncaj.

    Txais: (9a) Huab Tais cov cai lij choj ua kom lub siab zoo siab.

    Thov kom cov lus ntawm kuv lub ncauj zoo ntxim koj siab
    thiab txoj kev xav hauv kuv nruab siab yog qhov koj nyiam,
    HUAB TAIS, kuv lub tsua thiab kuv tus cawm seej.

    Txais: (9a) Huab Tais cov cai lij choj ua kom lub siab zoo siab.

    As Les Lus Yas: 2 TM 1: 10

    Txais: As les lus yas, as les lus yas.

    Peb tus Cawm Seej Yes Xus Pleev twb rhuav txoj kev tuag lawm,
    thiab nws ua kom txoj sia ci tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo: MK 9: 14-29

    14 Thaum Yes Xus nrog Pob Zeb, Yas Kos thiab Zam lawv rov los txog ntawm lwm cov thwj tim lawm, lawv pom ib pab neeg coob coob nyob ncig cov thwj tim, thiab ib co kws Ntawv Ntshiab nrog cov thwj tim sib cav. 15 Tam sim ntawd, tas tsoom sid pom Yes Xus, lawv ceeb tas, lawv khiav tuaj tos Yes Xus, thiab foom kev kaj lug rau nws. 16 Ces Yes Xus nug lawv tias : "Nej nrog lawv sib cav txog dab tsi ?" 17 Muaj ib tug hauv pab neeg ntawd hais rau Yes Xus tias : "Xib Hwb, kuv coj kuv tus tub tuaj rau koj, nws raug ib tug dab tsis txawj hais lus. 18 Thaum tus dab nkag rau hauv nws, mas dab muab nws thawb rau pem teb, ces tus tub ua npuas ncauj, nws zom hniav, ib ce txhav tas. Kuv thov koj cov thwj tim kom lawv ntiab tus dab ntawd tawm, tab sis lawv tsis muaj peev xwm yuav ntiab tau." 19 Yes Xus teb rau lawv tias : "Tiam neeg tsis muaj kev ntseeg, kuv yuav nrog nej nyob txog thaum twg ? Kuv yuav nyiaj nej txog thaum twg ? Nej coj tus tub los rau kuv saib." 20 Ces lawv coj tus tub los rau Yes Xus. Thaum tus dab pom dheev Yes Xus, dab muab tus tub diaj kom nti ua lwj ua liam, ces tus tub ntog rau hauv pem teb, nws nti dov mus dov los, thiab ua npuas ncauj tawm plaws. 21 Yes Xus nug leej txiv tias : "Nws raug qhov ntawd tau hov ntev los lawm ?" Leej txiv teb tias : "Txij thaum yau los lawm. 22 Muaj ntau zaus dab muab nws thawb rau hauv hluav taws thiab rau hauv dej kom tuag. Yog koj pab tau li cas los, thov koj pab peb, thov koj khuv leej peb thiab.”
    23 Yes Xus teb tias : "Yog koj pab tau ! …Tus neeg ntseeg, mas yeej ua tau txhua yam rau nws." 24 Tam sis ntawd, tus tub leej txiv hais nrov nrov tias : "Kuv ntseeg ! Thov koj tuaj pab kuv txoj kev tsis ntseeg!" 25 Yes Xus pom muaj neeg coob coob tuaj ntsauv, nws cem tus dab tsis huv tias : "Dab nplaig txhav, dab lag ntseg, kuv yuam koj, koj tawm hauv tus me nyuam no mus, txhob rov los nkag hauv nws ib zaug ntxiv lawm." 26 Tus dab nthe nrov nrov, nws muab tus me nyuam nchos heev heev, ces nws tawm mus. Tus me nyuam zoo li tuag lawm. Coob leej hais tias : ‘nws tuag lawm.’ 27 Tab sis Yes Xus tuav nws tes, tsa nws sawv, ces tus me nyuam sawv tsees los sawv ntsug. 28 Thaum Yes Xus nkag los rau hauv tsev lawm, nws cov thwj tim nug nws twj ywm tias : "Vim li cas peb ntiab tsis tau tus dab ntawd tawm li?" 29 Yes Xus hais rau lawv tias : "Hom dab ntawd tsuas yog txoj kev teev Ntuj xwb thiaj ntiab tau tawm."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 24th February 2020, 2:21 pm

    TIM 25 LUB 2 HLIS 2020

    Hnub Peb Lis Piam Xya Nruab Xyoo A Nruab Lis Piam Xyoo II

    Zaj Nyeem Ib: YK 4: 1-10


    Cov zoo nyiad:
    1 Tej kev sib ntaus rog thiab tej lus sib ceg hnyav nyob hauv nej yog txhawv qhov twg los ? Puas yog los ntawm nej tej kev xav ua kom nej zoo siab ces nej thiaj muaj kev sib ntaus sib tuas los tsis yog? 2 Nej ntshaw, tab sis nej tsis muaj. Nej tua neeg thiab nej khib, tiam sis nej tsis tau raws li lub siab ntshaw, nej thiaj sib ceg, thiab sis ntaus sib tua. Tos nej tsis muaj los vim nej tsis thov. 3 Nej thov, tab sis nej tsis tau txais, vim nej tsis txawj thov, nej tsuas thov kom tau ua raws li nej lub cev ntshaw xwb.
    4 Cov niag neeg ntxeev siab mus deev hluas, nej tsis paub hais tias kev nyiam lub ntiaj teb, mas yog kev ntxub Tswv Ntuj no lod? Li ntawd leej twg nyiam lub ntiaj teb, mas nws rov tsa nws ua Tswv Ntuj tus yeeb ncuab. 5 Los nej puas xav tias Ntawv lam hais lo lus no xwb tsis muaj ntsiab tseem ceeb dab tsi: “Lub tswv yim uas nyob hauv peb nws xib mus rau txoj kev khib siab.’
    6 Tiam sis Tswv Ntuj tseem pub ib lub txiaj ntsim loj dua qhov ntawd. Vim li ntawd Ntawv thiaj hais tias : ‘Tswv Ntuj tiv cov neeg muab hlob, nws pub txiaj ntsim rau cov nyiam ua neeg me.’ 7 Ua li mas nej kav tsij zwm rau Tswv Ntuj. Nej tiv dab phem, ces nws yuav khiav mus deb ntawm nej. 8 Nej txav los ze Tswv Ntuj mog, ces Tswv Ntuj yuav txav los ze nej. Cov neeg txhaud, nej kav tsij ntxuav nej tes mog. Cov neeg muaj ob lub siab, nej kav tsij ua kom nej lub siab ntshiab dawb huv tuaj. 9 Nej cia li tu siab, cia li quaj, cia li nyiav. Nej ua kom nej tej suab luag hloov ua suab quaj tu siab, kom nej tej kev zoo siab hloov ua kev mluas mlob. 10 Nej txo nej qis nyob ntawm Huab Tais xub ntiag, ces nws yuav tsa nej siab.

    NPN 55: 7-8, 9-10A, 10B-11A, 23

    Txais: (23a) Muab koj kev nyuaj pov rau HUAB TAIS, ces nws yuav pab koj.

    Kuv thiaj hais tias : “Kheev lam kuv muaj tis li nquab,
    Kuv yuav ya plho khiav mus, kuv yuav tau nyob kaj siab.
    Kuv yuav khiav mus kom deb deb,
    yuav mus nyob hauv teb chaws suab puam.”

    Txais: (23a) Muab koj kev nyuaj pov rau HUAB TAIS, ces nws yuav pab koj.

    “Kuv yuav tos ntsoov tus tuaj cawm kuv,
    kom txhob raug nag xob nag cua nplawm.”
    HUAB TAIS, koj muab lawv nchuav,
    koj ua kom lawv hais lus tsis sib haum.

    Txais: (23a) Muab koj kev nyuaj pov rau HUAB TAIS, ces nws yuav pab koj.

    Kuv pom muaj kev ua nruj ua tsiv
    thiab kev tsis sib haum nyob hauv lub tsheej.
    Nruab hnub hmo ntuj, lawv sib tos
    sib nyas ncig tej ntsa tsheej:

    Txais: (23a) Muab koj kev nyuaj pov rau HUAB TAIS, ces nws yuav pab koj.

    Muab koj kev nyuaj pov rau HUAB TAIS,
    Ces nws yuav nres koj pab koj;
    nws yuav tsis cia tus neeg ncaj ntxhov siab ib zaug li.

    Txais: (23a) Muab koj kev nyuaj pov rau HUAB TAIS, ces nws yuav pab koj.

    As Les Lus Yas: NLT 6: 14

    R. Alleluia, alleluia.
    Yog kuv xav khav, mas tsuas kawg khav nyob hauv
    peb tus Huab Tais Yes Xus Pleev tus ntoo cuam xwb.
    Nws muab lub ntiaj teb dai saum ntoo cuam rau kuv,
    thiab muab kuv dai saum ntoo cuam rau lub ntiaj teb.

    Ntawv Moo Zoo: MK 9: 30-37

    30 Yes Xus thiab nws cov thwj tim tawm ntawm qhov chaw ntawd mus, lawv hla xeev Nkas Lis Lais; Yes Xus tsis xav kom muaj neeg paub txog li. 31 Vim Yes Xus xav qhia nws cov thwj tim, nws hais rau lawv tias : "Neeg Leej Tub yuav raug muab muag rau hauv tsoom neeg txhais tes, ces lawv yuav muab nws tua. Peb hnub tom qab nws tuag tas lawm, nws yuav sawv rov los." 32 Cov thwj tim tsis to taub lo lus ntawd li, tab sis lawv ntshai nug Yes Xus.
    33 Ces lawv tuaj txog Kas Fas Naus, thaum lawv mus hauv tsev lawm, Yes Xus nug lawv tias : "Nej sib cav txog dab tsi nyob tom kev ?" 34 Lawv nyob ntsiag to, vim nyob tom kev, lawv sib cav tias leej twg yog tus loj dua cov. 35 Yes Xus zaum, nws hu Pab Kaum Ob los, nws hais rau lawv tias : "Yog leej twg xav ua tus thawj, mas nws yuav ua tus tuaj tom sawv daws qab, thiab yuav ua sawv daws tus tub txib." 36 Ces Yes Xus coj ib tug me nyuam los sawv hauv nruab nrab hauv lawv, nws puag tus me nyuam, ces nws hais rau lawv tias : 37 "Leej twg txais ib tug me nyuam yaus zoo li tus no vim kuv lub npe, mas yog nws txais kuv. Thiab leej twg txais kuv, mas tsis yog nws txais kuv, yog nws txais Tus xa kuv tuaj."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2810
    Date d'inscription : 2009-10-16

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Mim on 25th February 2020, 7:06 am

    Nyob zoo txhua leej txhua tus,
    Tag kis Hnub Plaub yog Hnub Plaub Txais Tshauv lawm. Yog hnub peb pib lub aij 40 los tseem hu ua lub Caij Yoo thiab.

    Peb yuav nco ntsoov tias yog ib hnub yoo mov loj ib yam li Hnub Rau Ntshiab (Goog Friday) thiab. Ob hnub no mas peb yuav tau caiv zoo tiag, tsis txhob noj nqaij li, peb noj tau nqaij ntses xwb. Yuav kom zoo tiag mas ob hnub ntawd yuav tsum noj mov zaub tsuag los mov ntse dej xwb thiaj yuav zoo tshaj. Thiab ob hnub ntawd mas tus kev cai yoo qhia tias kom peb noj ib pluag mov loj xwb, dhau ntawd ces noj li ob pluag me tuav plab tshaib xwb.

    Dua li ntawd mas niaj hnub Rau (every Friday) nyob hauv lub Caij 40, peb sd kuj yuav tsum caiv nqaij, noj tau nqaij ntses xwb.

    Cov neeg muaj mob thiab cov me nyuam yau dua 14 xyoos thiab cov laus li 60 xyoo rov saud mas txoj cai kuj tsis khoo nruj kom lawv yuav tsum yoo. Tiam sis yog leej twg yoo taus los haj yam zoo xwb. Dua li lwm cov uas nyob ntawm ntu nruab nrab 14 mus txog 60 xyoo mas sd yuav tsum tau caiv nqaij thiab yoo mov thiaj phim peb yog ib tug neeg ntseeg Kas Tos Liv.

    Dhau ntawm txoj kev caiv nqaij yoo mov lawm, peb tseem muaj yoo TV, yoo internet, yoo dej caw, yoo luam yeeb.... yoo txhos hais lus phem, txhob npau taws sai, txhob ua neeg qia dub neeg nplaum dhau, txhos hais lus xaiv, txhob ua kev plees kev yi,,,,txhais hais tias yog ib lub caij rau peb xyaum hloov yus tus kheej kom txawj ua neeg zoo thiab neeg ntshiab dawb huv.

    Yog vim li cas peb thiaj ua txoj kev yoo nqaij yoo mov, los yoo lwm yam tsis zoo? Nws yog ib txog kev peb ua los them txim txhaum rau peb tus kheej thiab rau peb tej txheeb ze thiab rau lwm tus.



    Last edited by Mim on 25th February 2020, 7:22 am; edited 1 time in total

    Sponsored content

    COV ZAJ NYEEM NRUAB LIS PIAM XYOO A 2019-2020 - Page 3 Empty Re: COV ZAJ NYEEM NRUAB LIS PIAM XYOO A 2019-2020

    Post  Sponsored content


      Current date/time is 1st June 2020, 7:02 pm