COV ZAJ NYEEM NRUAB LIS PIAM XYOO A 2019-2020

TIM 26 LUB 2 HLIS 2020

Hnub Plaub Txais Tshauv - Pib Caij Plaub Caug Xyoo A

Zaj Nyeem Ib: YOS ES 2: 12-18

12 HUAB TAIS hais li no : "Lub sij hawm no, nej kav tsij muab tas nrho nej lub siab rov qab los cuag kuv; nej yoo mov, nej quaj, nej nyiav. 13 Nej dua nej lub siab kom ntuag, tsis txhob dua nej tej ris tsho; nej rov qab los cuag HUAB TAIS nej tus Tswv Ntuj, vim nws siab zoo thiab khuv leej neeg tas nrho, nws npau taws qeeb, nws lub siab puv nkaus kev ua zoo, nws tos tsis hnyoo yuav thim nws txoj kev rau txim. 14 Tej zaum nws yuav rov thim xav dua los kuj muaj, ces nws yuav foom ib lo lus zoo tseg rov tom qab, yuav muaj tsiaj txi ntuj thiab muaj cawv los cev rau HUAB TAIS nej tus Tswv Ntuj.
15 Nej tshuab puab nyob saum Xis Yoos ! Nej ua ib txog kev yoo ntshiab, nej teem ib lub caij tuaj sib txoos loj. 16 Nej hu tas tsoom pej xeem tuaj sib sau ua ke, nej ua kom lub txoos ntshiab dawb huv tuaj; nej hu cov neeg laus tuaj, nej sau coj cov me nyuam yaus thiab cov tseem noj mis tib si tuaj. Kom nraug vauv yuav tsum tso nws lub chaw pw tseg, nkauj nyab yuav tsum tso nws lub paim tseg. 17 Kom cov Leej Choj, uas yog HUAB TAIS cov tub txib, tuaj quaj nyob hauv lub tshav ntawm kis nruab nrab lub qhov rooj thiab lub thaj txi Ntuj, lawv yuav quaj hais tias : ‘HUAB TAIS, thov koj txuag koj haiv neeg ! Koj txhob tso koj lub cuab tam rau hauv txoj kev raug luag saib tsis taus, txhob cia cov kuj cuab hnyos lawv. Vim li cas koj thiaj yuav cia kom cov haiv neeg tau kev thuam tias : ‘Lawv tus Tswv Ntuj dua qhov twg lawd ?’”
18 Ces HUAB TAIS lub siab khib txog nws lub teb chaws, nws thiaj zam rau nws haiv neeg.

NPN 51: 3-4, 5-6AB, 12-13, 14+17

Txais: (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas huv si
thiab muab kuv qhov txhaum tshem mus kom kuv dawb huv tuaj.

Txais: (3a) HUAB TAIS, thov koj khuv leej peb vim peb tau ua txhaum lawm.

Kuv lees paub qhov phem kuv tau ua,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais: (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob ntiab kuv mus deb ntawm koj xub ntiag,
thiab txhob rho koj leej Tswv Yim Ntshiab tawm ntawm kuv mus.

Txais: (3a) HUAB TAIS, thov koj khuv leej peb vim peb tau ua txhaum lawm.

Thov koj pub kom kuv rov zoo siab nyob hauv koj txoj kev cawm
thiab ua kom kuv muaj ib lub tswv yim xav mloog koj.
HUAB TAIS, thov koj qhib kuv di ncauj,
ces kuv lub ncauj yuav tshaj koj lub koob meej.

Txais: (3a) HUAB TAIS, thov koj khuv leej peb vim peb tau ua txhaum lawm.

Zaj Nyeem Ob: 2 KOS LIS NTHOS 5: 20—6: 2

Cov kwv tij nkauj muad:
20 Peb yog Leej Pleev cov tiam lis, ces zoo li yog Tswv Ntuj siv peb los nqua hu sawv daws. Peb thiaj li sawv Leej Pleev cev thov nej tias, kom nej cia li tig los nrog Tswv Ntuj rov sib raug zoo. 21 Vim Tswv Ntuj hlub peb, nws ua kom tus uas tsis paub kev txhaum txia ua kev txhaum, kom nyob hauv nws, peb plhis tau ua Tswv Ntuj txoj kev ncaj.
6 1 Peb nrog Leej Pleev ua hauj lwm ua ke, ces peb thiaj thov qhuab ntuas nej kom nej txhob txais Tswv Ntuj lub txiaj ntsim dag xwb. 2 Vim nws hais tias: “Thaum lub sij hawm zoo, kuv tau teb rau koj raws li koj thov. Thaum txog hnub cawm neeg, kuv tau pab koj lawm.” Lub sij hawm zoo yog nyem no ntag; hnub cawm neeg yog nyem no kiag.

Zaj Cav lub Moo Zoo: NPN 95: 8

(Lub Caij 40 peb tsis hais As les lus yas lawm ces thiaj muab hloov hu li no lawm)

Txais: Huab Tais Yes Xus Pleev, Tswv Ntuj Lo Lus, peb cav txog koj.

Hnub no yog nej hnov nws lub suab,
nej tsis txhob ua nej lub siab tawv ncauj.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: MT 6: 1-6, 16-18

Yes Xus hais rau nws cov thwj tim tias:
1 “Nej ceev faj kom nej tsis txhob ua ncaj nyob ntawm neeg xub ntiag xwb, kom luag pom nej. Yog nej ua li ntawd, mas nej yuav tsis txais koob haum dab tsi ntawm nej Txiv nyob saum ntuj. 2 Thaum koj pub rau luag, koj txhob tshuab hom ua koj ntej, xws li cov neeg zoo sab nraud ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm. 3 Hos koj, mas thaum koj pub rau luag, koj txhob cia koj sab tes laug paub qhov koj sab tes xis ua. 4 Li ntawd, tsis muaj neeg paub tias koj tau pub rau luag. Ces koj Txiv uas nws pom hauv qhov chaw nraim yuav pauj rau koj.
5 Thaum nej teev Ntuj, nej txhob ua li cov neeg zoo sab nraud : lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm. 6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj rau ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag mluas mlob xws li cov neeg zoo sab nraud : lawv ua ntsej muag ntshaus, kom luag paub tias lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm. 17 Hos koj, mas thaum koj yoo mov, koj yuav pleev tshuaj tsw qab rau saum taub hau, koj yuav ntxuav muag, 18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv uas pom hauv qhov chaw nraim yuav pauj rau koj.”

TIM 27 LUB 2 HLIS 2020

Hnub Tsib tom qab Hnub Plaub Txais Tshauv Xyoo A Nruab Lis Piam Xyoo II

Zaj Nyeem Ib: Txoj Cai Ob 30: 15-20

Mais Xes hais rau tsoom pej xeem tias:
15 “Hnub no kuv muab kev muaj txoj sia thiab kev vam meej, kev tuag thiab kev puas ntsoog tso rau ntawm nej xub ntiag. 16 Yog nej mloog HUAB TAIS nej tus Tswv Ntuj cov lus qhia uas hnub no kuv muab rau nej no, yog nej nyiam nws, taug nws txoj kev, ua raws nws tej lus qhia, nws txoj cai thiab tej kev nws tau txiav, mas nej yuav muaj txoj sia thiab nej yuav huam vam ntws coob tuaj; HUAB TAIS nej tus Tswv Ntuj yuav foom hmoov zoo rau nej nyob hauv lub teb chaws uas nej tab tom yuav nkag mus nyob ua nej lub teb chaws. 17 Tab sis yog nej ntxeev siab, nej tsis mloog lus thiab nej cia luag ntxias tau nej mus nrog luag pe hawm thiab tsob hwb lwm cov dab, 18 mas hnub no kuv hais rau nej : nej yuav ploj mus xwb, nej yuav tsis tau nyob ntev xyoo hauv lub teb chaws uas nej yuav hla tus dej Yos Las Das mus txeeb los ua nej tug. 19 Hnub no, kuv hu lub ntuj lub teb nrog kuv ua tim khawv txog nej tias : kuv tau muab txoj sia thiab txoj kev tuag, lo lus zoo thiab lo lus phem tso rau nej xaiv. Nej xaiv txoj sia mog! Nej thiab nej cov xeeb leej xeeb ntxwv thiaj yuav muaj txoj sia, 20 vim nej nyiam HUAB TAIS, nej tus Tswv Ntuj, nej mloog nws lub suab, thiab npuab nws ruaj nreb; qhov ntawd yog qhov yuav ua kom nej muaj txoj sia thiab yuav ua kom nej tau ua neej ntev dhawv hauv lub teb chaws uas HUAB TAIS tau cog lus rau nej cov yawg koob Has Nplas Has, His Xas Has thiab Yas Kos tias yuav muab pub rau lawv.”

NPN 1: 1-2, 3, 4+6

Txais: (40:5a) Muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd .

Txais: (40:5a) Muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (40:5a) Muaj hmoov zoo yog cov uas tso siab rau Huab Tais.

Zaj Cav lub Moo Zoo: MT 4: 17

Huab Tais hais tias, nej yuav lees txhaum,
vim Ntuj lub Ceeb Tsheej tuaj txog ze lawm.

Ntawv Moo Zoo: LK 9: 22-25

22 Yes Xus hais rau nws cov thwj tim tias : “Neeg Leej Tub yuav tsum raug txom nyem loj thiab raug cov txwj laus, cov Thawj Leej Choj, thiab cov Kws Ntawv Ntshiab muab nws tshem tawm. Nws yuav raug luag tua, tab sis hnub peb nws yuav sawv rov los.” 23 Ces nws hais rau sawv daws tias : “Yog leej twg xav los raws kuv, mas nws yuav tsis txhob nco txog nws, nws yuav niaj hnub kwv nws tus ntoo cuam, thiab lawv kuv qab. 24 Vim tias tus xav cawm nws txoj sia, mas nws yuav ua nws txoj sia ploj. Hos tus twg ua nws txoj sia ploj vim kuv, mas tus ntawd yuav cawm nws txoj sia. 25 Yog ib tug neeg txeeb tau lub ntiaj teb tas huv si los ua nws tug, tab sis nws ua nws ploj, los ua nws tus kheej puas ntsoog tas, mas nws tau dab tsi zoo ?”

TIM 28 LUB 2 HLIS 2020

Hnub Rau tom qab Hnub Plaub Txais Tshauv Xyoo A Nruab Lis Piam Xyoo II

Zaj Nyeem Ib: HIS XAIS 58: 1-9A

HUAB TAIS Tswv Ntuj hais li no:
1 “Koj kav tsij qw tiag txhob tso tseg, tsa koj lub suab kom nrov li lub hom, koj tshaj rau kuv haiv neeg tias lawv ua phem, thiab rau Yas Kos tsev neeg tias lawv ua txhaum. 2 Lawv kuj nrhiav kuv ib hnub dhau ib hnub, lawv xav paub txog kuv tej kev xws li lawv yog ib lub kuj cuab uas coj kev ncaj thiab tsis tso nws tus Tswv Ntuj txoj cai pov tseg. Nyem no lawv thov kom kuv txiav txim ncaj rau lawv, lawv zoo siab kawg tias lawv tau nyob ze Tswv Ntuj.
3 (Lawv hais tias:) ‘Vim li cas peb thiaj yuav yoo mov, yog koj twb tsis pom? los ua kev them txim txhaum yog koj twb tsis quav ntsej txog?’ Yog vim li no : hnub nej yoo mov, nej tseem ua hauj lwm rau nej tus kheej xwb, thiab nej tseem yuam nej cov tub zog. 4 Thaum nej yoo mov nej tsuas nrhiav kev sib cav sib ceg, nej ua siab phem siv zog xuas nrig sib ntaus xwb. Nej yuav tseg tsis txhob yoo mov xws li niaj hnub no nej yoo ces thiaj yuav muaj tus mloog nej lub suab nyob saum txheej siab. 5 Txoj kev yoo zoo li ntawd puas yog txoj uas kuv nyiam, hu puas tau tias yog ib hnub them txim txhaum zoo? Ua taub hau qaij de xws li ib tug tauj deg, tso cev pw saum ntaub tsaj thiab plua tshauv, puas yog qhov koj hu ua kev yoo, puas yog ib hnub uas HUAB TAIS nyiam ?
6 Txoj kev yoo raws li kuv nyiam yog zoo li no: Tshem txoj kev phem tejv saw khi neeg, daws cov hlua quab yuam neeg, tso cov neeg raug hiam kom tau kev twj lij, muab txhua yam quab lov pov tseg, 7 muab koj mov los faib rau tus neeg tshaib noj, caw cov raug luag ntiab tawm thiab cov txom nyem tsis muaj chaw nyob los so hauv koj tsev, muab ris tsho rau cov neeg koj pom liab qab tau hnav, thiab tsis txhob tig nrob qaum rau tus uas yog koj roj koj ntshav. 8 Yog koj ua li no , mas koj qhov pom kev yuav ci tawm tuaj xws li thaum lub hnub tawm, koj lub qhov txhab yuav zoo sai, koj txoj kev ncaj ncees yuav mus ua koj ntej, HUAB TAIS lub hwj chim yuav lawv koj qab thaiv koj. 9 Yog koj hu mas HUAB TAIS yuav teb, yog koj qw kom pab, nws yuav hais tias : ‘Kuv nyob ntawm no.’”

NPN 51: 3-4, 5-6AB, 18-19

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj khuv leej kuv, vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab koj muab kub qhov txhaum tshem mus kom kuv dawb huv tuaj.

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Vim koj tsis zoo siab txais cov kev hlawv tsiaj txi ntuj;
yog kuv hlawv tsiaj txi rau koj, koj yuav tsis txais.
Kuv txoj kev txi ntuj, Tswv Ntuj, yog muaj
ib lub tswv yim xav lees txhaum;
tus muaj ib lub siab xav lees txhaum thiab ua neeg me,
Tswv ntuj, koj yuav tsis thuam.

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Zaj Cav lub Moo Zoo: AS MOS 5: 14

Nej nrhiav qhov zoo txhob nrhiav qhov phem
ces nej yuav muaj txoj sia nyob,
thiab Huab Tais yuav nrog nraim nej.

Ntawv Moo Zoo: MT 9: 14-15

14 Zam cov thwj tim tuaj cuag Yes Xus, lawv hais tias : "Peb yoo mov, cov Fas Lis Xais kuj yoo. Vim li cas koj cov thwj tim tsis yoo ?"
15 Yes Xus teb lawv tias : “Cov qhua tuaj noj tshoob puas yuav tsum ntoo xyom thaum nraug vauv tseem nrog lawv nyob? Muaj ib hnub thaum luag coj nraug vauv mus lawm, mas lawv mam li yuav yoo mov.”

TIM 29 LUB 2 HLIS 2020

Hnub Xya tom qab Hnub Plaub Txais Tshauv Xyoo A Nruab Lis Piam Xyoo II

Zaj Nyeem Ib: HIS XAIS 58: 9B-14

HUAB TAIS hais li no:
9b “Yog koj tshem txoj kev quab yuam neeg ntawm koj mus, yog koj tsis taw tes nki rau luag, koj tsis hais cov lus phem, 10 yog koj muab tas nrho koj lub siab los pub rau tus neeg tshaib noj, thiab los pab tus neeg txom nyem, mas koj qhov pom kev yuav sawv tuaj nyob hauv qhov tsaus ntuj, koj qhov tsaus ntuj yuav pom kev nrig li thaum tav su. 11 HUAB TAIS yuav coj koj kev mus li, nws yuav pub rau koj tus ntsuj plig tau noj tau haus kom zoo nqhis thaum muaj tej lub caij qhuav qhawv. Nws yuav ua kom koj cov pob txha rov muaj zog, koj yuav zoo li ib lub vaj muaj dej ywg, koj yuav zoo li ib lub hauv dej txhawv uas dej ntws tsis txawj nqhuab.
12 Koj cov qub vaj tse uas vau ntev los lawd yuav raug tsa dua tshiab, ces koj yuav txhim cov taw ntsa rau ntau txheej ntau tiam neeg; luag yuav hu koj ua “tus kho cov phab ntsa tawg,” “tus rov txhim tej kev puas,” kom tau kev mus nyob hauv. 13 Yog hnub xas npas tos, koj thim koj txhais ko taw, koj tsis mus ua raws koj siab nyiam nyob hauv kuv hnub ntshiab, yog koj hu hnub xas npas tos ua "Hnub zoo tshaj plaws", yog “HUAB TAIS hnub ntshiab tsim nyog hwm,” yog koj hwm Huab Tais, koj tsis mus raws koj tej kev ntshaw, koj tsis ua raws koj siab nyiam, koj tsis hais koj tej lus, 14 ces koj yuav muaj kev zoo siab puv npo nyob hauv HUAB TAIS, kuv yuav tsa koj nyob siab saum tej chaw siab nyob hauv lub teb chaws, kuv yuav muab koj txiv Yas Kos lub cuab tam los yug koj. Vim HUAB TAIS lub ncauj tau hais li ntawd.

NPN 86: 1-2, 3-4, 5-6

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug kev raws koj txoj kev tseeb.

Thov koj khoov cuab pob ntseg mloog kuv;
HUAB TAIS, thov koj teb kuv,
vim kuv txom nyem thiab kuv pluag.
Thov koj txuag kuv txoj sia, vim kuv npuab koj;
thov koj cawm koj tus tub txib uas tso siab rau koj;
Koj yog kuv tus Tswv Ntuj.

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug kev raws koj txoj kev tseeb.

Thov koj khuv leej kuv, Huab Tais,
vim kuv hu koj tas hnub.
Thov koj pub kev zoo siab rau koj tus tub txib tus ntsuj plig,
vim kuv tsa kuv tus ntsuj plig yuj plaws tuaj rau koj, Huab Tais.

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug taug kev raws koj txoj kev tseeb.

Huab Tais, koj lub siab zoo thiab txawj zam txhaum,
koj ua zoo tas nrho rau cov uas hu txog koj.
HUAB TAIS, thov koj mloog kuv zaj thov ntuj
thiab cuab pob ntseg rau kuv lub suab thov.

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug taug kev raws koj txoj kev tseeb.

Zaj Cav Lub Moo Zoo: ES XES KIAS 33: 11

Huab Tais hais tias, kuv tsis zoo siab pom tus neeg phem raug txoj kev tuag,
kuv xav pom kom nws tig los ua neeg zoo, ces nws thiaj yuav ciaj sia.

Ntawv Moo Zoo: LK 5: 27-32

27 Dhau qhov ntawd lawm, Yes Xus tawm mus. Nws pom ib tug sau se hu ua Les Vis zaum ntawm lub rooj sau se. Yes Xus hais rau nws tias : "Koj raws kuv mus." 28 Ces Les Vis sawv, nws tso tas ib puas tsav yam tseg, nws raws Yes Xus mus. 29 Les Vis ua ib rooj qav loj txais Yes Xus hauv nws tsev. Muaj ib pab neeg sau se coob thiab tseem muaj lwm cov neeg nrog lawv zaum ntawm rooj mov. 30 Cov Fas Lis Xais thiab lawv cov Kws Ntawv Ntshiab yws yws rau Yes Xus cov thwj tim hais tias : "Vim li cas nej nrog cov neeg sau se thiab cov neeg txhaum noj haus ua ke ?" 31 Yes Xus teb rau lawv tias : "Tsis yog cov neeg noj qab nyob zoo thiaj yuav vam txog kws kho mob, yog cov muaj txiab muaj nkeeg. 32 Kuv tsis tuaj hu cov neeg ncaj, kuv tuaj hu cov neeg txhaum kom tig los yuav lub siab tshiab."

TIM 2 LUB 3 HLIS 2020

Hnub Ob Lis Piam Ib Caij 40 Xyoo A Nruab Lis Piam Xyoo II

Zaj Nyeem Ib: LES VIS 19: 1-2, 11-18

1 HUAB TAIS hais rau Mais Xes tias :
2 "Koj yuav hais rau tas tsoom tub ki His Xas Lais tuaj sib sau ua ke tias :
Nej yuav ua neeg ntshiab, vim kuv, HUAB TAIS nej tus Tswv Ntuj, kuv Ntshiab.
11 Nej yuav tsis txhob ua tub sab, tsis txhob hais tej lus tsis muaj tseeb, los txhob dag ib leeg rau ib leeg.
12 Nej yuav tsis txhob lam tuav txog kuv lub npe los cog lus cuav,
vim nej ua li ntawd yog ua saib tsis taus nej tus Tswv Ntuj lub npe. Kuv yog HUAB TAIS.
13 Koj yuav tsis txhob nrhiav kev noj tus nyob ze koj los tsis txhob nyiag nws tug:
koj yuav tsis txhob khaws koj tus tub ntiav zog hnub no nws tus nqe zog cia rau ntawm koj kom txog tag kis.
14 Koj yuav tsis txhob tsawm foom lus phem rau tus neeg lag ntseg, thiab tsis txhob muab ib yam coj mus thaiv tus dig muag kev, tiam sis koj yuav ntshai koj tus Tswv Ntuj. Kuv yog HUAB TAIS.
15 Koj yuav tsis txhob ua tsis ncaj thaum koj txiav txim rau luag, txhob tuaj tus neeg pluag tog los txhob tsa tus ua nom ntsej muag, tiam sis koj yuav txiav txim rau tus nyob ze koj raws txoj kev ncaj xwb.
16 Koj yuav tsis txhob xyav koj cov neeg lub npe rau ub rau no; koj yuav tsis txhob ua kom tus nyob ze koj raug luag txov nws roj ntsha. Kuv yog HUAB TAIS.
17 Koj yuav tsis txhob ntxub koj tus kwv tij nyob hauv koj nruab siab; koj yuav cem yuav qhuab qhia tus nyob ze koj, koj thiaj yuav tsis tau ris nws qhov txhaum.
18 Koj yuav tsis txhob nrhiav kev ua pauj thiab yuav tsis txhob khaws kev chim rau cov tub nyob hauv koj haiv neeg. Tiam sis koj yuav nyiam tus nyob ze koj ib yam li koj nyiam koj. Kuv yog HUAB TAIS.

NPN 19: 8, 9, 10, 15

Txais: (Zam 6:63b) Huab Tais, koj cov lus yog tswv yim thiab yog txoj sia.

HUAB TAIS txoj cai zoo tas nrho,
nws ntxiv siav ntxiv zog rau ntsuj plig;
HUAB TAIS tus txhooj tsim nyog ntseeg,
nws ua kom tus neeg ruam thoob tsib tuaj.

Txais: Huab Tais, koj cov lus yog tswv yim thiab yog txoj sia.

HUAB TAIS cov lus qhuab qhia yog lus ncaj
ua kom neeg lub siab kaj.
HUAB TAIS lo lus qhia meej,
ua kom neeg qhov muag pom kev.

Txais: Huab Tais, koj cov lus yog tswv yim thiab yog txoj sia.

Txoj kev hwm HUAB TAIS dawb huv,
txoj kev ntawd yuav nyob mus li;
HUAB TAIS cov lus txiav txim yog lus tseeb,
tas nrho yog lus ncaj ncees.

Txais: Huab Tais, koj cov lus yog tswv yim thiab yog txoj sia.

Thov kom cov lus ntawm kuv lub ncauj
thiab txoj kev xav hauv kuv nruab siab zoo ntxim koj siab ,
HUAB TAIS, kuv lub tsua thiab kuv tus cawm seej.

Txais: Huab Tais, koj cov lus yog tswv yim thiab yog txoj sia.

Zaj Cav lub Moo Zoo: 2 KOS LIS NTHOS 6: 2B

Ntsia saib, lub sij hawm zoo, yog nyem no.
Hnub muaj kev cawm neeg, yog nyem no.

Ntawv Moo Zoo: MT 25: 31-46

Yes Xus hais rau nws cov thwj tim tias:
31 “Thaum Neeg Leej Tub yuav los muaj hwj chim ntxiag, thiab tas tsoom Tshiab yuav nrog nws los, mas nws yuav zaum saum nws lub theej kiab muaj hwj chim. 32 Tas ib tsoom haiv neeg yuav sib sau nyob ntawm nws xub ntiag. Ces nws yuav cais tsoom neeg xws li tus tswv zov yaj cais cov yaj ntawm cov tshis. 33 Nws yuav muab cov yaj tso rau ntawm nws sab xis, muab cov tshis tso rau ntawm nws sab laug. 34 Ces tus Vaj yuav hais rau cov nyob sab xis tias : “Nej cov uas kuv Txiv pub txoj hmoov zoo rau nej, nej los. Nej txais lub Ceeb Tsheej uas yeej npaj tseg rau nej txij puag thaum pib tsim lub sim ceeb los lawm ua nej tug. 35 Vim tias kuv tshaib plab, nej pub rau kuv noj ; kuv nqhis dej, nej pub rau kuv haus, kuv yog ib tug pej kum neeg, nej txais kuv ; 36 kuv liab qab, nej muab rau kuv hnav ; kuv mob, nej tuaj xyuas kuv ; kuv nyob hauv tsev loj faj, nej tuaj tsham kuv.” 37 Ces cov neeg ncaj yuav teb tias : “Huab Tais, thaum twg peb tau pom koj tshaib plab ces peb tau pub rau koj noj, los pom koj nqhis dej, ces peb tau muab rau koj haus? 38 Thaum twg peb tau pom koj yog ib tug pej kum neeg, ces peb tau txais koj, los pom koj liab qab ces tau muab rau koj hnav ? 39 Thaum twg peb tau pom koj mob los nyob hauv tsev loj faj, ces peb tau tuaj xyuas koj ?” 40 Tus Vaj yuav teb rau lawv tias : “Kuv hais tseeb rau nej, yog nej tau ua npaum li cas rau ib tug twg nyob hauv cov me tshaj hauv kuv tsoom kwv, mas yog nej tau ua rau kuv lawm.”
41 Ces tus vaj yuav hais rau cov nyob sab laug tias : “Nej khiav mus deb ntawm kuv, nej cov tau txoj hmoov phem, mus nyob hauv cov hluav taws kub tsis txawj tuag, uas yog npaj rau tus dab phem thiab nws cov dab nyob. 42 Vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus, 43 kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab kuv nyob hauv tsev loj faj nej tsis tuaj xyuas kuv.” 44 Ces cov ntawd kuj yuav teb rau tus Vaj tias : “Huab Tais, thaum twg peb tau pom koj tshaib plab los nqhis dej, pom koj yog ib tug pej kum neeg, pom koj liab qab, pom koj mob los nyob hauv tsev loj faj, ces peb tsis tau pab koj ?” 45 Ces tus Vaj yuav teb rau lawv tias : “Kuv hais tseeb rau nej, yog nej tsis tau ua rau ib tug twg hauv cov neeg me tshaj, npaum li cas, mas yog nej tsis tau ua rau kuv.”
46 Ces cov no yuav mus raug txim ib txhiab ib txhis, hos cov siab ncaj yuav mus txais txoj sia nyob mus li.

TIM 3 LUB 3 HLIS 2020

Hnub Peb Lis Piam Ib Caij 40 Xyoo A Nruab Lis Piam Xyoo II

Hwm LN Katharine Drexel

Zaj Nyeem Ib: HIS XAIS 55: 10-11

Huab Tais hais li no:
10 Xws li cov nag thiab cov daus uas poob saum ntuj los, lawv tsis rov mus saum ntuj ua ntej lawv yuav tsum xub ywg lub ntiaj teb tas tso, kom av zoo thiab tuaj taus kaus, thiaj yuav txi tau noob qoob noob loo rau tus tswv tseb thiab pub tau mov rau neeg noj, 11 lo lus tawm ntawm kuv lub ncauj los kuj zoo ib yam li ntawd, nws yuav tsis rov qab los cuag kuv qhuav nquas, nws yuav tsum xub tau ua qhov kuv xav kom ua, thiab ua tiav log txoj hauj lwm kuv xa nws mus ua tso."

NPN 34: 4-5, 6-7, 16-17, 18-19

Txais: (18b) Tswv Ntuj cawm tus neeg ncaj ntawm txhua yam kev nyuaj.

Nej nrog kuv cav txog HUAB TAIS lub koob meej,
peb sawv daws ua ke qhuas nws lub npe.
Kuv nrhiav HUAB TAIS, nws tau teb kuv,
thiab tau cawm kuv ntawm tas kuv tej kev ntshai.

Txais: (18b) Tswv Ntuj cawm tus neeg ncaj ntawm txhua yam kev nyuaj.

Nej vam txog nws ces nej yuav zoo siab luag ntxhi,
nej ntsej muag yuav tsis liab vim nej tau txaj muag.
Thaum tus neeg pluag hu, HUAB TAIS hnov,
thiab yuav cawm nws ntawm tas nws tej kev nyuaj.

Txais: (18b) Tswv Ntuj cawm tus neeg ncaj ntawm txhua yam kev nyuaj.

HUAB TAIS muaj qhov muag pom cov neeg ncaj,
muaj pob ntseg hnov lawv lub suab quaj.
HUAB TAIS tawm tsam cov neeg ua phem,
rhuav lawv kom lub ntiaj teb txhob nco txog lawv ntxiv.

Txais: (18b) Tswv Ntuj cawm tus neeg ncaj ntawm txhua yam kev nyuaj.

Thaum cov neeg ncaj hu, HUAB TAIS hnov lawv,
Nws cawm lawv ntawm tas lawv tej kev nyuaj.
HUAB TAIS nyob ze ze cov neeg siab lwj siab ntuag,
thiab nws cawm cov uas tas kev cia siab.

Txais: (18b) Tswv Ntuj cawm tus neeg ncaj ntawm txhua yam kev nyuaj.

Zaj Cav lub Moo Zoo: MT 4: 4B

Neeg tsis kawg muab mov los yug sia xwb,
neeg tseem yuav muab txhua lo lus tawm
ntawm Tswv ntuj lub ncauj los yug sia thiab.

Ntawv Moo Zoo: MT 6: 7-15

Yes Xus hais rau nws cov thwj tim tias:
7 Thaum nej teev Ntuj, nej txhob ntuas mus ntuas los zoo li cov neeg teev dab : lawv xav tias yog lawv hais lus ntau, mas dab yuav mloog lawv zoo dua.
8 Nej txhob ua zoo li lawv. Vim nej Txiv paub tias qhov twg yog qhov nej yuav tsum muaj, tab yog nej tseem tsis tau thov, nws twb xub paub lawm.
9 Nej yuav teev Ntuj zoo li no :
"Peb Txiv nyob saum ntuj, kom koj lub Npe ntshiab nto moo lug.
10 Koj lub Ceeb Tsheej kom los txog.
Kom muaj raws li koj nyiam nyob ntiaj teb no zoo li nyob saum ntuj.
11 Thov koj pub mov txaus peb noj hnub no.
12 Koj zam txhaum rau peb zoo li peb zam rau luag.
13 Koj txhob tso peb raug kev ntxias. Thov koj npo peb dim ntawm kev phem."
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab.
15 Hos yog nej tsis zam txhaum rau luag, mas nej Txiv kuj yuav tsis zam rau nej thiab.

TIM 4 LUB 3 HLIS 2020

Hnub Plaub Lis Piam Ib Caij 40 Xyoo A Nruab Lis Piam Xyoo II

Hwm LN Casimir

Zaj Nyeem Ib: YOS NAS 3: 1-10

1 HUAB TAIS lo lus nrov tuaj rau Yos Nas zaum ob tias : 2 "Koj sawv kev, koj yuav mus kom txog lub tuam tsheej loj Nis Nis Vas, koj yuav tshaj rau lawv raws li kuv qhia rau koj hais." 3 Yos Nas thiaj sawv kev, ces nws mus rau Nis Nis Vas raws li HUAB TAIS lo lus. Lub tsheej Nis Nis Vas yog ib lub tsheej loj kawg nkaus, yuav mus peb hnub ke thiaj hla dhau lub tsheej. 4 Yos Nas pib mus hla hauv lub nroog, nws mus kev deb li ib hnub ke, ces nws tshaj tawm rau sawv daws tias : "Tshuav plaub caug hnub ntxiv, ces lub tsheej Nis Nis Vas yuav raug rhuav tas." 5 Cov neeg nyob Nis Nis Vas cia li ntseeg Tswv Ntuj; lawv ceeb toom kom sawv daws yoo mov thiab npua ntaub tsaj, tsis hais tus laus dua cov los tus yau dua cov li.
6 Lub moo no kuj nrov tuaj txog tus vaj nyob Nis Nis Vas; nws sawv tsees ntawm nws lub theej kiab los, nws hle hlo nws lub tsho tshaj sab tseg, nws muab zoj ib lub hnab tsaj los npua, nws mus zaum hauv cov qhov tshauv. 7 Ces nws kom lawv mus qw thoob plaws hauv lub nroog Nis Nis Vas raws li tus vaj thiab nws cov tub nom tub tswv lo lus ceeb toom tias : "Tej neeg thiab tsiaj txhu, cov tsiaj loj thiab tsiaj me, sawv daws yuav tsis txhob noj dab tsi li, tsis noj mov noj zaub tsis haus dej li. 8 Txawm tus neeg txawm tus tsiaj los yuav tsum npua hnab tsaj huv tib si thiab yuav hu txog Tswv Ntuj tas zog; txhua tus neeg nyias yuav tso nyias txoj kev ua phem tseg, yuav cheem nyias ob txhais tes kom txhob ntaus luag tsim txom luag ntxiv. 9 Tsis muaj neeg paub, tiam sis tej zaud Tswv Ntuj siab yuav nqig, nws yuav thim xav, yuav thim nws txoj kev npau taws kub lug, ces peb sawv daws yuav tsis tuag ."
10 Tswv Ntuj pom lawv cov hauj lwm, thiab pom tias lawv tso lawv txoj kev ua phem tseg tiag, ces Tswv Ntuj hloov siab, nws thim qhov phem uas nws npaj yuav ua rau lawv, nws tsis ua raws li nws tau hais.

NPN 51: 3-4, 12-13, 18-19

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj txoj kev hlub loj tas nrho.
Thov koj ntxuav kuv lub txim pov tseg kom tas
thiab tshem kuv qhov txhaum mus kom kuv dawb huv tuaj.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Vim koj tsis zoo siab txais cov kev txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj, yog muaj
ib lub tswv yim xav lees txhaum;
tus muaj ib lub siab xav lees txhaum thiab
ua neeg me, Tswv ntuj, koj yuav tsis thuam nws.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Zaj Cav lub Moo Zoo: YOS ES 2: 12-13

HUAB TAIS hais tias, lub sij hawm no kiag,
nej muab tas nrho nej lub siab tig rov los cuag kuv,
vim kuv muaj lub siab hlub thiab khuv leej neeg.

Ntawv Moo Zoo: LK 11: 29-32

29 Thaum tej pab neeg coob coob tuaj sib sau nyob ua ke, Yes Xus pib hais lus rau lawv tias : "Tiam neeg no yog ib tiam neeg phem. Lawv taij ib lub cim, tab sis yuav tsis muaj ib lub cim rau lawv pom, tsuas kawg muaj tus yaj saub Yos Nas lub cim xwb. 30 Xws li Yos Nas yog ib lub cim rau cov neeg nyob Nis Nis Vas, Neeg Leej Tub kuj yog ib lub cim rau tiam neeg no thiab. 31 Thaum txog hnub txiav txim, tus poj vaj nyob Naj Fab yuav nrog tiam neeg no sawv los, nws yuav muab txim rau lawv, vim nws tuaj puag tim npoo ntiaj teb kawg tuaj mloog Xas Los Moos cov lus thoob tsib. Hos nyob ntawm no, twb muaj tus loj dua Xas Los Moos ! 32 Thaum txog hnub txiav txim, cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thim xav, hos nyob ntawm no twb muaj tus loj dua Yos Nas !”

TIM 5 LUB 3 HLIS 2020

Hnub Tsib Lis Piam Ib Caij 40 Xyoo A Nruab Lis Piam Xyoo II

Zaj Nyeem Ib: Es Thes C: 12, 14-16, 23-25 (raws ‘New American Bible Rev. Ed.’)
Los: Es Thes 4: 17k-a+e, 17l-m, 17r-t (raws la Bible de Jerusalem)

12 (17k-a)Tus poj vaj Es Thes kuj txhawj xeeb loj kawg nkaus txog txoj kev tuag, ces nws tig mus vam khom HUAB TAIS pab. 14 (17k-e) Nws thiaj thov Huab Tais Tswv Ntuj li no: (17l) “Kuv tus Huab Tais kuv tus Tswv, koj ib leeg yog peb tus Vaj. Thov koj tuaj pab kuv, vim kuv ib leeg xwb, tsis muaj leej twg pab, tsuas muaj koj xwb. 15 Thiab kuv tab tom yuav pheej hmoo rau kuv txoj sia. 16 (17m) Txij thaum kuv yug los, kuv tau hnov hais nyob hauv kuv haiv neeg tias, Huab Tais, koj yog tus tau xaiv His Xas Lais hauv txhua haiv neeg los, thiab tau xaiv peb phaj txiv hauv lawv cov yawg koob los, kom tau ua koj tug tas mus li ib txhis, thiab koj tau ua zoo rau lawv raws li koj tau cog lus.
23 (17r) HUAB TAIS, thov koj nco ntsoov, thov koj tawm tuaj thaum peb ntsib kev txom nyem; thiab thov koj muab ib lub siab loj rau kuv, koj uas yog tus Vaj kav tas txhua tus tswv ntuj, tus Tswj kav tas txhua tus nom tswv. 24 (17s) Thov koj muab ib co lus rau kuv qhov ncauj kom txawj ntxias tsov kom seej tuaj thiab txawj tig tsov lub siab mus ntxub peb tus yeeb ncuab, thiaj yuav ua kom tus yeeb ncuab thiab nws cov neeg koom siab ploj mus kom tas. 25 (17t) HUAB TAIS, thov koj muab koj txhais tes los cawm peb (ntawm peb cov yeeb ncuab), thiab thov koj pab kuv, vim kuv ib leeg xwb, tsis muaj leej twg pab, tsuas muaj koj xwb. (Thov koj muab peb txoj kev quaj ntsuag hloov mus ua kev zoo siab, thiab muab peb txoj kev txom nyem hloov mus ua kev tau zoo.”

NPN 138: 1-2AB, 2CDE-3, 7C-8

Txais: (3a) Huab Tais, thaum kuv hu koj, koj tau teb kuv.

HUAB TAIS, kuv ua koj tsaug tas siab tas ntsws,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm cov tshiab xub ntiag;
kuv yuav khoov pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais: (3a) Huab Tais, thaum kuv hu koj, koj tau teb kuv.

Koj muaj lub siab zoo thiab lub siab pheej xeeb,
koj ua kom lub npe thiab koj txoj kev cog lus
loj tshaj tas txhua yam.
Thaum kuv hu txog koj, koj tau teb kuv lawm,
koj tau ntxiv zog rau kuv kom kuv lub zog loj tuaj.

Txais: (3a) Huab Tais, thaum kuv hu koj, koj tau teb kuv.

Koj txhais tes xis cawm kuv.
HUAB TAIS yuav ua kom tiav tej yam nws tau npaj ua rau kuv.
HUAB TAIS, koj lub siab zoo yuav nyob mus li;
thov koj txhob tso peb pov tseg, koj yog tus tsim peb los.

Txais: (3a) Huab Tais, thaum kuv hu koj, koj tau teb kuv.

Zaj Cav lub Moo Zoo: NPN 51: 12A, 14A

Tswv Ntuj, thov koj tsim ib lub siab huv lis si rau kuv,
thov koj pub kom kuv rov zoo siab nyob hauv koj txoj kev cawm

Ntawv Moo Zoo: MT 7: 7-12

Yes Xus hais rau nws cov thwj tim tias:
7 "Nej thov, ces nej yuav tau txais, nej nrhiav, ces nej yuav ntsib, nej khob qhov rooj, ces luag yuav qhib rau nej. 8 Vim tias leej twg thov, nws yuav tau txais ; leej twg nrhiav, nws yuav ntsib ; leej twg khob qhov rooj, mas yuav muaj tus qhib rau nws. 9 Nyog hauv nej, yog leej twg tus tub taij mov, nej puas yuav muab ib lub pob zeb rau nws noj ? 10 Los yog nej tus tub taij ib tug ntses, nej puas yuav muab ib tug nab rau nws ? 11 Txawm tias nej yog neeg phem, tsis kav nej twb txawj pub tej qhov zoo rau nej cov me nyuam. Li ntawd mas nej Txiv tus nyob saum ntuj haj yam yuav pub tej yam zoo rau cov neeg uas thov nws. 12 Tas ib puas tsav yam uas nej xav kom luag ua rau nej, mas nej kuj yuav tsum ua rau luag ib yam thiab: Txoj Cai thiab cov Yaj Saub yog li ntawd.”

TIM      6      LUB      3      HLIS      2020

Thawj Hnub Rau Lis Piam Ib Caij 40 Xyoo B Nruab Lis Piam Xyoo II

Zaj Nyeem Ib:       ES XES KIAS  18:   21-28

Huab Tais Tswv Ntuj hais li no:
21 “Yog tus muaj ib lub siab phem tseg tsis ua txhaum ntxiv, nws coj kuv cov lus qhia thiab nws ua raws nraim txoj kev ncaj kev zoo, mas nws yuav muaj txoj sia, nws yuav tsis tuag. 22 Kuv yuav tsis nco txog nws cov txhaum nws tau ua li, nws yuav ciaj vim nws ua qhov zoo. 23 Kuv puas yuav zoo siab yog kuv pom ib tug neeg txhaum tuag?” Huab Tais TSWV NTUJ hais li ntawd. “Ntshai kuv yuav zoo siab dua yog nws tso nws txoj kev ua phem tseg kom nws tau txoj sia.
24 Tab sis yog tus neeg siab ncaj nws ncaim ntawm txoj kev ncaj thiab nws mus ua txhaum xws li tus neeg tsis hwm Ntuj ua kam, mas tus neeg ntawd nws puas tsim nyog muaj txoj sia nyob ? Nws cov hauj lwm zoo uas thaum ub nws ua, kuv yuav tsis nco txog li. Vim nws tau tso kev ntseeg tseg thiab mus ua txhaum, vim li no nws yuav tsum tuag. 25 Tiam sis nej hais tias: ‘HUAB TAIS ua tsis ncaj ?’ Tsev neeg His Xas Lais, nej mloog zoo zoo, puas yog kuv ua tsis ncaj? Zoo li yog nej ua tsis ncaj los tsis sub? 26 Tus neeg siab ncaj nws ncaim ntawm txoj kev ncaj mus ua txhaum, ces nws tuag, yog vim nws tau ua txhaum nws thiaj yuav tsum tuag. 27 Hos tus neeg siab phem nws tso nws txoj kev ua phem pov tseg, nws los ua qhov ncaj qhov zoo, ces nws txoj sia yuav nyob. 28 Vim nws tso nws txoj kev phem pov tseg, mas nws yuav muaj txoj sia nws yuav tsis tuag.

NPN       130:   1-2, 3-4, 5-7a, 7bc-8

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab hu!
Thov koj cuab pob ntseg mloog kuv lub suab thov koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

HUAB TAIS, yog koj cim ntsoov peb cov txhaum
leej twg thiaj yuav nyob taus?
Tab sis nyob ntawm koj muaj kev zam txhaum,
thov kom sawv daws pe hawm koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Kuv tso siab rau HUAB TAIS,
kuv tus ntsuj plig tso siab rau nws lo lus.
Kuv tus ntsuj plig tos ntsoov HUAB TAIS
tos heev tshaj cov zov keeb tos lub caij kaj ntug.
His Xas Lais, koj yuav tsum tos ntsoov HUAB TAIS.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Vim HUAB TAIS muaj lub siab zoo,
thiab nws muaj txoj kev cawm nplua mias,
nws yuav cawm His Xas Lais
ntawm tas lawv tej kev txhaum.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Zaj Cav lub Moo Zoo:       ES XES KIAS  18:   31

HUAB TAIS hais tias: Nej cia li tso tas nej tej kev ua txhaum pov tseg,
thiab hloov dua ib lub siab tshiab thiab ib lub tswv yim tshiab.

Ntawv Moo Zoo:       MT  5:   20-26

Yes Xus hais rau nws cov thwj tim tias:
20 "Kuv hais rau nej : Yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv lub Ceeb Tsheej saum ntuj. 21 Nej hnov cov lus qhia rau tej laus thaud tias : ‘Koj tsis txhob tua neeg. Tus twg tua neeg, nws yuav raug luag txiav txim rau nws.’ 22 Hos kuv, mas kuv hais rau nej tias : Leej twg npau taws rau nws tus kwv tij, mas nws yuav raug luag txiav txim rau nws. Yog nws hais rau nws tus kwv tij tias "Niag ruam !" mas nws yuav raug txiav txim ntawm lub rooj txwj laus Xas Nes Nrees. Yog nws hais rau nws tus kwv tij tias: "Niag vwm", mas nws yuav mus raug txim nyob hauv dab phem cov hluav taws. 23 Li ntawd thaum koj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus rau koj lawm, 24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov los cev koj cov txim. 25 Thaum koj nrog tus neeg ntxub koj tseem ua ke taug kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj, koj yuav tawm tsis tau hauv tsev loj faj los, mus txog thaum koj rho nyiaj qab nas txog npib kawg nkaus los them tas tso.”

TIM 7 LUB 3 HLIS 2020

Thawj Hnub Xya Lis Piam Ib Caij 40 Xyoo A Nruab Lis Piam Xyoo II

Hwm LN Perpetua thiab Felicity, tuag ua Tim Khawv

Zaj Nyeem Ib: TXOJ CAI OB 26: 16-19

Mais Xes Hais rau nws cov neeg tias:
16 “Hnub no, HUAB TAIS, nej tus Tswv Ntuj ceeb toom rau nej tias kom nej yuav tsum coj nws tej kev cai tej lij choj. Nej yuav ua zoo coj tej kev cai tej lij choj ntawd, yuav muab tas nej lub siab nej tus nstuj plig los ua raws li ntawd. 17 Hnub no, nej nrog HUAB TAis cog lus tias: Nws yuav yog nej tus Tswv Ntuj, thiab nej yuav taug raws nws txoj kev, coj raws nws tej lij choj, tej lus qhia, tej kev cai, thiab nej yuav mloog nws lub suab. 18 Hnub no HUAB TAIS kuj nreog nej cog lus tias: nej yuav yog nws haiv neeg tshwj xeeb ntawm nws xub ntiag, xws li nws tau hais rau nej lawm; kom nej yuav tsum coj nws tej lus qhia tas huv tib si. 19 Ces HUAB TAIS yuav tsa nej siab, kom nej txoj kev nto koob meej, kev muaj meej mom, thiab muaj hwj chim nyob siab dua lwm cov haiv neeg uas nws tau tsim los huv tib si; nej yuav yog ib haiv neeg ntshiab rau HUAB TAIS nej tus Tswv Ntuj, raws li nws tau hais lawm.”

NPN 119: 1-2, 4-5, 7-8

Txais: (1b) Muaj hmoov zoo yog cov uas coj raws Huab Tais txoj cai!

Muaj hmoov zoo yog cov uas taug ib txoj kev tsis muaj chaw xyeej,
yog cov uas taug raws HUAB TAIS txoj cai.
Muaj hmoov zoo yog cov uas coj raws nws tej lus qhia,
yog cov uas nrhiav nws tas lawv siab lawv ntsws.

Txais: (1b) Muaj hmoov zoo yog cov uas coj raws Huab Tais txoj cai!

Koj tau ceeb toom kom sawv daws
mob siab mloog koj tej lus qhia.
Thov koj pab kuv kom kuv nyob ruaj nreb
hauv koj tej kev cai lij choj!

Txais: (1b) Muaj hmoov zoo yog cov uas coj raws Huab Tais txoj cai!

Kuv yuav muaj ib lub siab ncaj los ua koj tsaug,
thaum kuv paub txog koj txoj cai ncaj ncees lawm.
Kuv yuav coj nraim koj tej cai lij choj,
thov koj tsis txhob tso kuv pov tseg kiag li.

Txais: (1b) Muaj hmoov zoo yog cov uas coj raws Huab Tais txoj cai!

Zaj Cav lub Moo Zoo: 2 KLN 6: 2B

Nej ntsia saib, lub sij hawm zoo yog nyem no;
hnub muaj kev cawm neeg yog nyem no.

Ntawv Moo Zoo: MT 5: 43-48

Yes Xus hais rau nws cov thwj tim tias:
43 "Nej tau hnov tej lus qhia tias :’Koj yuav nyiam tus nyob ze koj, koj yuav ntxub koj tus yeeb ncuab.’
44 Tab sis, kuv hais rau nej tias : Nej yuav nyiam nej cov yeeb ncuab, nej yuav thov Ntuj rau cov tsim txom nej ;
45 nej thiaj yuav yog nej Txiv tus nyob saum ntuj cov tub ; vim tias nws ua kom lub hnub tuaj ziab cov neeg phem thiab cov neeg zoo huv tib si, thiab nws ua kom nag los rau cov siab ncaj thiab rau cov siab nkhaus huv tib si.
46 Yog nej nyiam cov neeg nyiam nej xwb, mas nej yuav tau koob haum dab tsi ? Cov sau se lawv tsis txawj ua ib yam li ntawd thiab lod?
47 Yog nej tsuas hu nej cov kwv tij xwb, mas nej tau ua dab tsi tshaj ? Tab yog cov neeg teev pej kum dab, lawv tsis txawj ua li ntawd lod?
48 Hos nej, mas nej yuav ua neeg zoo tshaj plaws, vim nej Txiv nyob saum ntuj yog tus zoo tshaj plaws.”

TIM 9 LUB 3 HLIS 2020

Hnub Ob Lis Piam Ob Caij 40 Xyoo A Nruab Lis Piam Xyoo II

Hwm LN Frances nyob Rome

Zaj Nyeem Ib: DN 9: 4B-10

4b Huab Tais, tus Tswv Ntuj loj thiab txaus ntshai tas nrho, koj ua raws li lo lus koj tau cog thiab koj khuv leej cov neeg uas nyiam koj thiab cov uas coj rawv koj cov lus qhia. 5 Peb tau ua txhaum lawm, peb tau ua qhov phem qhov tsis zoo; thiab peb tau ntxeev siab, tau tig nrob qaum rau koj cov lus qhia thiab koj cov cai lij choj lawm. 6 Peb tsis tau mloog cov yaj saub uas yog koj cov tub txib lus, thaum lawv tuav txog koj lub npe hais lus rau peb cov vaj, peb cov nom cov tswv, peb phaj txiv, thiab rau tas tsoom pej xeem nyob hauv lub teb chaws. 7 Huab Tais, koj yog tus nyob hauv txoj kev ncaj, peb yog cov tau kev txaj muag; niaj hnub no, peb poob ntsej muag, txawm yuav yog cov nyob Yus Das teb, cov nyob Yes Lus Xas Les, los tas nrho tsoom His Xas lais, cov nyob deb los nyob ze, nyob tas txhua lub teb chaws uas koj tau xa lawv mus nyob vim lawv tau ua txhaum rau koj. 8 Huab Tais, peb tau kev txaj muag nrog rau peb cov vaj, peb cov nom cov tswv, thiab peb phaj txiv, vim peb tau ua txhaum rau koj.
9 Huab Tais, peb tus Tswv Ntuj yog tus muaj lub siab hlub thiab muaj txoj kev zam txhaum, txawm tias peb ntxeev siab rau nws, 10 thiab peb tsis mloog Huab Tais peb tus Tswv Ntuj lub suab hais, tsis coj raws nws txoj cai uas nws kom cov yaj saub uas yog nws cov tub txib muab rau peb.

NPN 79: 8, 9, 11+13

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj txhob nco txog peb tej txhaum yav dhau los ntxiv;
coj koj txoj kev khuv leej tuaj rau peb sai sai,
vim peb poob rau qhov qis kawg nkaus lawm.

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj pab peb, Tswv Ntuj peb tus cawm seej,
vim koj lub npe muaj koob meej loj;
Thov cawm peb thiab zam peb cov txhaum rau peb
vim koj lub npe zoo.

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj cia cov neeg nyob txim lub suab ntsaj tuaj txog koj;
koj siv koj lub hwj huam loj los cawm cov neeg poob rau hauv kev tuag.
Ces peb, uas yog koj haiv neeg thiab pab yaj nyob hauv koj lub nras zaub
yuav ua koj tsaug mus li tsis muaj caij kawg;
tiam dhau tiam peb yuav cav txog koj lub koob meej.

Txais: (103:10a) Huab Tais, thov koj tsis txhob ua rau peb raws li peb cov txhaum.

Zaj Cav lub Moo Zoo: ZAM 6: 63C, 68C

Huab Tais, koj cov lus yog ntsuj plig thiab yog txoj sia;
koj muaj cov lus pub txoj sia nyob mus li.

Ntawv Moo Zoo: LK 6: 36-38

Yes Xus hais rau nws cov thwj tim tias:
36 “Nej yuav khuv leej neeg ib yam li nej Txiv khuv leej neeg.
37 Nej yuav tsis txhob txiav txim rau luag, thiaj yuav tsis muaj tus txiav txim rau nej. Nej yuav tsis txhob muab txim rau luag, thiaj yuav tsis muaj tus muab txim rau nej. Nej zam rau luag, thiaj yuav muaj tus zam rau nej.
38 Nej pub rau luag, ces yuav muaj tus pub rau nej; luag yuav luj kom puv puv, yuav muab tswm muab nchos kom cee ceev, yuav ua kom nco lug los hliv rau ntawm nej xub ntiag; vim tias nej luj li cas rau luag, mas kuj yuav muaj tus luj ib yam li ntawd rau nej thiab.”

TIM 10 LUB 3 HLIS 2020

Hnub Peb Lis Piam Ob Caij 40 Xyoo A Nruab Lis Piam Xyoo II

Zaj Nyeem Ib: HIS XAIS 1: 10, 16-20

10 Cov nom tswv kav Xos Dos Mas, nej cia li mloog Huab Tais cov lus ! Pej xeem nyob Nkos Mos Las, nej cia li cuab pob ntseg rau peb tus Tswv Ntuj txoj cai!
16 Nej ntxuav nej, nej ua kom nej dawb huv tuaj! Nej tshem nej tej kev ua phem mus kom kuv qhov muag txhob pom ntxiv; nej tso txoj kev ua phem tseg ! 17 Nej xyaum ua qhov zoo, nej nrhiav kev ncaj ncees, nej pab cuam tus neeg raug luag tsim txom, nej ua ncaj rau tus tub ntsuag, nej tuaj tus poj ntsuam tog. 18 HUAB TAIS hais tias : "Nej tuaj, peb sib tham kom haum! Txawm tias nej tej txhaum yuav liab ploog, los lawv yuav rov dawb li daus tau; tab yog nej tej txhaum yuav liab dub nciab, los lawv yuav rov dawb xws plaub yaj tau. 19 Yog nej mob siab tiag thiab nej mloog lus, mas nej yuav tau noj tej yam zoo nyob hauv lub teb chaws. 20 Tiam sis yog nej tsis kam mloog lus thiab nej ntxeev siab, mas hniav ntaj yuav txo nej." HUAB TAIS lub ncauj tau hais li ntawd.

NPN 50: 8-9, 16BC-17, 21+23

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis tshem ib tug heev nyuj hauv koj tsev mus,
los ib tug laug tshis hauv koj pab tsiaj mus.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom..

Tim li cas nej lub ncauj thiaj lam qog kuv cov kev cai lij choj,
thiab lam lees kuv cov lus kuv tau nrog nej cog,
tiam sis nej ntxub ua kom raws txoj cai
thiab nej muab kuv tej lus ua ntia pov tom nej qab xwb?

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Thaum nej ua tej yam zoo li no, kuv puas yuav tsum ua ntsej lag muag dig?“
Nej puas xav tias kuv zoo nkaus li nej thiab?
Kuv yuav qhuab qhia nej, yuav piav lub ntsiab kom nej pom tseeb.
Tus neeg twg tuaj cev lus zoorau kuv yog nws cav txog kuv lub koob meej;
tus twg xaiv txoj kev ncaj taug kuv yuav muab
Tswv Ntuj txoj kev cawm neeg rau nws pom.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Zaj Cav lub Moo Zoo: ES XES KIAS 18: 31

HUAB TAIS hais tias:
Nej cia li muab tas tej txhaum nej tau ua pov tseg deb ntawm nej,
thiab nej cia li yuav ib lub siab tshiab thiab ib lub tswv yim tshiab.

Ntawv Moo Zoo: MT 23: 1-12

1 Yes Xus qhia tsoom sid thiab nws cov thwj tim, nws hais tias : 2 “Cov Kws Ntawv Ntshiab thiab cov Fas Lis Xais zaum Mais Xes lub theej kiab. 3 Vim li no mas nej yuav ua thiab coj tas txhua yam lawv qhia rau nej, tab sis nej tsis txhob ua raws li lawv ua. Vim lawv qhia, tab sis lawv twb tsis ua raws qhov lawv qhia. 4 Lawv zoj tej lub nra hnyav hnyav ris tsis tso taus rau saum tsoom sid xwb pwg, tab sis lawv tsis kam tsa ib tug ntiv tes mus thawb kom ua zog li. 5 Lawv ua txhua tsav txhua yam kom neeg pom lawv xwb. Yog li ntawd, lawv thiaj coj tej txws ntim Txoj Cai dav dav, thiab dai tej tw ntxhoo ntev ntev. 6 Thaum lawv mus noj mus haus mas lawv nyiam zaum thawj cov rooj; nyob hauv cov tsev txoos, lawv nyiam zaum cov rooj pem hauv ntej. 7 Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”. 8 Hos nej, mas nej txhob cia luag hu nej ua “Xib Hwb”, vim nej tsuas muaj tib tug Xib Hwb xwb, thiab nej sawv daws yog ib co kwv tij. 9 Nej txhob hu leej twg nyob ntiaj teb no ua “Txiv”, vim nej tsuas muaj tib leeg Txiv xwb, yog tus nyob saum ntuj. 10 Nej txhob cia luag hu nej ua “Thawj Tswj”, vim nej tsuas muaj tib tug Tswj xwb, yog Leej Pleev. 11 Tus loj dua cov nyob hauv nej, yuav ua nej tus tub txib. 12 Tus twg tsa nws siab, yuav raug txo kom qis. Tus twg txo nws qis, yuav raug tsa kom siab.”

TIM 11 LUB 3 HLIS 2020

Hnub Plaub Lis Piam Ob Caij 40 Xyoo A Nruab Lis Piam Xyoo II

Zaj Nyeem Ib: YES LES MIAS 18: 18-20

18 Lawv hais tias : "Nej tuaj ! Peb yuav nrhiav ib txog kev los rhuav Yes Les Mias; txoj cai yeej yuav tsis ploj vim tseem yuav muaj cov Leej Choj, txoj kev tuav xav yeej yuav nyob vim tseem yuav muaj cov neeg thoob tsib, thiab cov lus saub los yeej yuav tsis ploj vim tseem yuav muaj cov ua yaj saub. Nej tuaj, peb kav tsij siv peb lub ncauj los rhuav nws, thiab peb tsis txhob quav ntsej nws tej lus ib qhov me me li."
19 HUAB TAIS, thov koj cuab pob ntseg rau kuv, thiab thov koj mloog cov lus uas kuv cov yeeb ncuab hais. 20 Puas yog lawv yuav ua tej yam phem los pauj tej yam zoo? Vim lawv khawb ib lub qhov taub cia txo kuv txoj sia. Thov koj nco txog tias kuv tau sawv nyob ntawm koj xub ntiag hais lus zoo txog lawv rau koj kom koj tshem koj txoj kev npau taws mus deb ntawm lawv.

NPN 31: 5-6, 14, 15-16

Txais: (17b) Huab Tais, thov koj cawm kuv, vim koj lub siab zoo.

Koj yeej yuav cawm kuv dim ntawm rooj ntxiab uas lawv caws tos kuv,
vim koj yog kuv qhov chaw vam khom.
Kuv muab kuv tus ntsuj plig tso rau hauv koj txhais tes;
koj yeej yuav txhiv kuv dim, Huab Tais, tus Tswv Ntuj tsis txawj fav xeeb.

Txais: (17b) Huab Tais, thov koj cawm kuv, vim koj lub siab zoo.

Kuv hnov tsoom neeg hais lus ntxhi nyob ib ncig kuv ua rau kuv ntshai,
lawv sib tuav tswv yim txog kuv, tias lawv yuav txo kuv txoj sia.

Txais: (17b) Huab Tais, thov koj cawm kuv, vim koj lub siab zoo.

Tiam sis Huab Tais, kuv tso siab lug rau koj,
kuv hais tias: “Koj yog kuv tus Tswv Ntuj.”
Kuv lub neej nyob hauv koj xib tes; thov koj tso kuv dim ntawm
kuv cov yeeb ncuab thiab cov neeg hiam kuv txhais tes.

Txais: (17b) Huab Tais, thov koj cawm kuv, vim koj lub siab zoo.

Zaj Cav lub Moo Zoo: ZAM 8: 12

Huab Tais hais tias: Kuv yog lub ntiaj teb qhov pom kev;
leej twg lawv kuv qab yuav muaj txoj kev kaj uas pub txoj sia.

Ntawv Moo Zoo: MT 20: 17-28

17 Thaum Yes Xus mus pem Yes Lus Xas Les, nws coj Pab Kaum Ob mus rau ib qho uas tsuas muaj lawv xwb; nws hais rau lawv thaum lawv tseem taug kev kev tias : 18 “Peb yuav mus pem Yes Lus Xas Les. Neeg Leej Tub yuav raug muag rau cov thawj leej choj thiab cov Kws Ntawv Ntshiab. Lawv yuav txiav lub txim tuag rau nws. 19 Lawv yuav muab nws rau cov neeg teev pej kum dab kom lawv thuam nws, nplawm nws thiab muab nws ntsia rau saum ntoo cuam. Ces hnub peb, nws yuav sawv rov los.”
20 Thaum ntawd, Ntxes Npes Dais ob tug tub leej niam nrog nws ob tug tub txav los ze Yes Xus, nws txhos caug hauv av vim nws xav thov ib yam ntawm Yes Xus. 21 Yes Xus hais rau nws tias : “Koj xav tau dab tsi ?” Leej niam hais rau Yes Xus tias : “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.” 22 Yes Xus teb tias : “Nej tsis paub qhov nej thov. Neb puas haus taus lub ntim uas kuv yuav haus ?” Nkawd teb tias : “Wb haus taus.” 23 Yes Xus hais rau nkawd tias : “Kuv lub ntim, mas neb yuav tau haus, tab sis qhov yuav tau zaum ntawm kuv sab xis thiab sab laug, mas kuv tsis yog tus yuav muab rau neb, tiam sis yog yuav cia rau cov uas kuv Txiv yeej npaj rau lawv lawm." 24 Thaum kaum leej hnov cov lus ntawd, lawv npau taws rau nkawd ob kwv tij. 25 Ces Yes Xus hu lawv kom txav los ze nws, nws hais tias : “Nej paub lawm tias cov ua nom ua tswv kav tsoom kuj cuab mas ua nruj ua tsiv rau lawv, hos cov ua hlob ua kom luag paub tias lawv muaj peev xwm tswj tsoom pej xeem. 26 Tab sis nyob hauv nej, mas yuav tsis txhob muaj ua li ntawd : leej twg xav ua tus loj nyob hauv nej, mas nws yuav ua nej tus tub txib. 27 Leej twg xav ua nej tus thawj, mas nws yuav ua nej tus qhev. 28 Ib yam li ntawd, Neeg Leej Tub tsis tuaj nyob ntiaj teb no kom luag tsob hwb nws, nws tuaj tsob hwb sawv daws, thiab muab nws txoj sia los ua nqi txhiv coob leej.”

TIM 12 LUB 3 HLIS 2020

Hnub Tsib Lis Piam Ob Caij Plaub Caug Xyoo A Nruab Lis Piam Xyoo II

Zaj Nyeem Ib: YES LES MIAS 17: 5-10

5 HUAB TAIS hais li no : "Tau hmoov phem yog tus neeg uas tso siab rau tib neeg, nws muab lub cev nqaij los ua nws lub zog, hos nws lub siab txav mus deb ntawm HUAB TAIS. 6 Nws zoo puav tam li ib tsob ntoo cob pob hlob tsis taus nyob hauv hav suab puam, nws tsis pom tias nws yuav tau txais tej yam zoo li, nws nyob hauv ib thaj chaw kub hnyiab dub nciab, uas yog av ntsev tsis muaj dab tsi yuav ciaj taus. 7 Tus tau hmoov zoo yog tus neeg tso siab rau HUAB TAIS thiab HUAB TAIS yog nws txoj kev tso siab. 8 Nws zoo puav tam li ib tsob ntoo cog nyob ze dej; nws nrhau cag mus txog cov dej ntws lug. Thaum txog lub caij ntuj sov nws tsis ntshai dab tsi, nws cov nplooj ntsuab mus li; thaum txog lub xyoo ntuj qhuav qhawv nws tsis txhawj, nws tseem txi taus txiv.
9 Neeg lub siab nkhaus tshaj lwm yam tas nrho, thiab phem kawg nkaus hloov tsis tau li, leej twg yuav to taub tau nws ? 10 Kuv, HUAB TAIS, kuv tsom hauv neeg lub tswv yim thiab sim neeg lub siab; ces kuv pub rau neeg kom phim tus yam ntxwv nws coj, kom haum raws li cov txiv txi ntawm nws tes hauj lwm."

NPN 1: 1-2, 3, 4+6

Txais: (40:5a) Cov muaj hmoov zoo yog cov uas tso siab rau Huab Tais.

Tus muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Cov mua hmoov zoo yog cov uas tso siab rau Huab Tais.

Nws zoo puav tam li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd. .

Txais: (40:5a) Cov mua hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (40:5a) Cov mua hmoov zoo yog cov uas tso siab rau Huab Tais.

Zaj Cav lub Moo Zoo: LK 8: 15

Cov muaj hmoov zoo yog cov muaj ib lub siab dav coj raws Lo Lus,
thiab mob siab rau coj mus txog qhov kawg ces lawv txi tau txiv zoo.

Ntawv Moo Zoo: LK 16: 19-31

Yes Xus hais rau cov Fas Lis Xais tias:
19 "Muaj ib tug neeg nplua nuj, nws hnav ntaub tsuj liab tsam xem thiab ntaub pag mos. Nws niaj hnub noj nqaij noj hno qab qab xwb. 20 Muaj ib tug pluag hu ua Las Ntxas Los pw nraum nws qhov rooj, ib ce mob kiav txhab tas. 21 Las Ntxas Los ntshaw noj tej tsig mov poob ntawm tus nplua nuj lub rooj mov los kom tsau nws plab... Dev tseem tuaj yaim nws tej qhov txhab thiab. 22 Muaj ib hnub, tus pluag tuag, ces cov Tshiab tuaj nqa nws mus rau hauv Has Nplas Has xub ntiag. Tus nplua nuj kuj tuag thiab, luag muab nws coj mus faus. 23 Tus nplua nuj nyob hauv ntuj txias teb tsaus, nws raug txom nyem loj kawg. Nws tsa muag ntsia pom Has Nplas Has nyob deb thiab pom Las Ntxas Los nyob hauv Has Nplas Has xub ntiag. 24 Nws hu nrov nrov tias : Txiv Has Nplas Has, thov koj khuv leej kuv, thov koj xa Las Ntxas Los tuaj muab nws tus ntsis ntiv tes tub dej rau kuv tus nplaig kom txias, vim kuv raug tsim txom nyob hauv cov hluav taws no. 25 Tab sis Has Nplas Has hais tias : Kuv tub aw, koj nco ntsoov tias thaum ua neej nyob koj tau txais tej yam zoo, hos Las Ntxas Los tau txais qhov phem. Zaum no Las Ntxas Los txais kev nplij siab nyob ntawm no, hos koj raug tsim txom. 26 Thiab tsis tag li ntawd : tseem muaj ib lub qhov ntuj tob kawg kem ntawm peb rau ntawm nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no. 27 Ces tus nplua nuj hais tias : "Txiv, kuv thov koj xa Las Ntxas Los mus hauv kuv txiv tsev neeg, 28 vim kuv muaj tsib tug kwv tij, kom Las Ntxas Los mus qhia rau lawv paub, kom lawv tsis txhob tuaj nyob hauv qhov chaw raug tsim txom no.” 29 Ces Has Nplas Has hais tias : “Lawv muaj Mais Xes thiab cov Yaj Saub. Cia lawv mloog Mais Xes thiab cov Yaj Saub qhia.” 30 Tus nplua nuj hais tias : “Txiv Has Nplas Has, yog tias ib tug hauv cov tuag mus cuag lawv, mas lawv thiaj yuav hloov siab.” 31 Tab sis Has Nplas Has hais rau nws tias : “Yog lawv twb tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv kiag los lawv yeej yuav tsis ntseeg nws li.”

TIM 13 LUB 3 HLIS 2020

Hnub Rau Lis Piam Ob Caij PLaub Caug Nruab Xyoo A Nruab Lis Piam Xyoo II

Zaj Nyeem Ib: HP 37: 3-4, 12-13A, 17B-28A

3 His Xas Lais hlub Yos Xes tshaj nws cov tub huv si, vim Yos Xes yug thaum nws twb laus laus lawm. Ces nws kom lawv xaws ib lub tsho ntev txaij ntau yam tsos rau Yos Xes hnav. 4 Nws cov tij laug pom tias laav txiv hlub nws tshaj nws cov tij laug txhua tus, mas lawv sawv daws ntxub nws, lawv tsis xav hais lus zoo rau nws li.
12 Thaum ntawd, Yos Xes cov tij laug mus zov lawv txiv pab yaj noj zaub nyob Xis Kes lawm. 13a His Xas Lais hais rau Yos Xes tias : "Koj cov tij laug mus zov tsiaj dua tom lub tshav zaub Xis Kes lawm puas yog ? Los, kuv xa koj mus xyuas lawv."
17b Ces Yos Xes mus nrhiav nws cov tij laug, nws nrhiav tau lawv nyob Dos Tas. 18 Lawv pom nws thaum nws tseem tuaj txog deb. Thaum nws tuaj tsis tau txog ntawd, lawv sib tuav tswv yim tias yuav ua kom nws tuag. 19 Lawv sib tham tias : "Nej saib ! Niag neeg txawj ua npau suav tuaj lawm ! 20 Zaum no, peb muab nws tua kiag thiab muab nws pov rau hauv ib lub qub qhov tim thaj, ces peb mus hais tias yog ib tug tsiaj qus tom nws lawm. Peb yuav pom tias nws cov npau suav leej tas nrho !" 21 Tiam sis Lus Npees hnov lawv tham, nws xav pab kom Yos Xes dim ntawm lawv tes, nws hais tias : "Peb tsis txhob txo nws txoj sia." 22 Lus Npees hais ntxiv rau lawv tias : "Nej tsis txhob ua ntshav ntws, nej cia li muab nws pov rau hauv lub qhov tim thaj ntawm suab puam no xwb, nej tsis txhob tsa nej txhais tes rau saum nws." Lus Npees hais li no, vim nws xav cawm Yos Xes ntawm lawv tes, nws thiaj li yuav coj tau Yos Xes rov mus rau nws txiv. 23 Ces thaum Yos Xes tuaj txog ntawm nws cov tij laug lawm, lawv muab nws lub tsho ntev txaij uas nws hnav hle. 24 Lawv txhom nws thiab muab nws pov rau hauv lub qhov tim thaj uas yog ib lub qhuav tsis muaj dej.
25 Ua li tas ces lawv mus zaum noj mov. Lawv tsa muag ntsia pom ib pab neeg Is Mas Es tuaj Nkas Las As tuaj. Lawv cov ntxhuav thauj ib co txab ntoo, ib co tshuaj pleev thiab ib co tshuaj tsw qab uas lawv yuav coj mus rau Hais Nkws Tos teb. 26 Ces Yus Das hais rau nws cov kwv tij tias : "Yog peb muab peb tus kwv tua thiab muab nws cov ntshav zais, peb yuav tau dab tsi ? 27 Nej los, peb muab nws muag rau cov neeg Is Mas Es ntawd xwb, peb txhob tsa peb txhais tes rau saum nws : vim nws twb yog peb tus kwv, yog tib co nqaij tawv ib yam li peb thiab." Ces nws cov kwv tij mloog nws hais. 28 Thaum ntawd cov tub luam Mis Dias tuaj hla ntawd, ces lawv rub Yos Xes tawm hauv lub qhov tim thaj los, lawv muab nws muag nees nkaum lub txiaj nyiag, rau cov neeg Is Mas Es ntawd.

NPN 105: 16-17, 18-19, 20-21

Txais: (5a) Nej yuav cim ntsoov Huab Tais cov hwj huam nws tau ua cia.

Thaum HUAB TAIS hu kom kev tshaib plab
poob los rau saum lub teb chaws,
thiab ua kom tej qoob loo uas yuav yug lawv lwj tas,
nws tso ib tug neeg mus ua lawv ntej,
yog Yos Xes, tus raug muag mus ua qhev.

Txais: (5a) Nej yuav cim ntsoov Huab Tais cov hwj huam nws tau ua cia.

Lawv muab khawb hlau pav nws ko taw
thiab muab kauj hlau khi nws caj dab.
Thaum txog caij, kuj muaj tuaj raws li nws tau hais tseg,
HUAB TAIS lo lus ua pov thawj tias nws yog tus tseeb.

Txais: (5a) Nej yuav cim ntsoov Huab Tais cov hwj huam nws tau ua cia.

Tus vaj hu nws mus thiab tso nws tawm nkuaj,
tus tswj cov haiv neeg muab kev twj lij rau nws.
Tus vaj muab nws ua tus kav tus vaj lub vaj lub tsev
thiab tus tswj tas txhua yam uas yog tus vaj tug.

Txais: (5a) Nej yuav cim ntsoov Huab Tais cov hwj huam nws tau ua cia.

Zaj Cav lub Moo Zoo: ZAM 3: 16

Txais: Huab Tais Yes Xus Pleev, Tswv Ntuj Lo Lus, peb cav txog koj.

Tswv Ntuj hlub lub ntiaj teb npaum li ntawd
nws thiaj tso nws tib leeg tub los
kom xwv txhua leej uas ntseeg nws
yuav muaj txoj sia nyob mus li.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: MT 21: 33-43, 45-46

Yes Xus hais rau cov thawj leej choj thiab cov txwj laus tias:
33 “Nej mloog dua ib zag paj lug li no. Muaj ib tug tswv teb, nws cog tau ib thaj txiv cawv. Nws xov laj kab ncig nws thaj teb, nws khawb qhov ntim ib lub zeb zom txiv cawv, thiab tseem txhim tau ib lub lawj siab siab rau hauv. Nws ntiav ib co neeg zov, ces nws tawm rooj mus kev deb lawm. 34 Thaum yuav txog caij de txiv, nws xa nws cov tub txib mus nqa txiv cawv ntawm cov zov teb. 35 Cov neeg zov teb ntes cov tub txib, muab ib tug ntaus, muab ib tug tua, muab pob zeb los txawb lwm tus kom tuag. 36 Tus tswv rov xa ib co tub txib coob dua thawj cov mus, cov zov teb kuj ua ib yam li lawv ua rau thawj cov. 37 Qhov kawg, nws xa nws tus tub mus cuag lawv, nws xav tias : ‘Lawv yuav hwm kuv tus tub.’ 38 Tab sis cov zov teb pom dheev tus tub, lawv sib tham tias : ‘Tus ntawd yog tus yuav txais lub cuab tam. Tsuag tsuag ! Peb muab nws tua, lub cuab tam thiaj yuav yog peb tug.’ 39 Ces lawv ntes ntho tus tub, coj nws mus rau tom ntug teb thiab muab nws tua. 40 Thaum tus tswv teb txiv cawv los txog, nws yuav ua dab tsi rau cov zov teb ntawd?” 41 Lawv teb rau Yes Xus tias : “Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb. Thaum txog caij txiv cawv siav, cov ntawd yuav xa cov txiv rau tus tswv.” 42 Yes Xus hais rau lawv tias : “Nej puas tau nyeem ib zaug li txog cov lus hauv Ntawv tias :
‘Lub pob zeb uas cov tub txhim tsev muab pov tseg, txia ua lub pob zeb txheem tsev; yog Huab Tais ua kom muaj tau li ntawd; yog ib yam zoo kawg nkaus rau ntawm peb qhov muag.’
43 Vim li ntawd, kuv hais rau nej tias: Ntuj lub Ceeb Tsheej yuav raug muab thau ntawm nej los pub rau ib haiv neeg uas yuav tu kom txi txiv zoo.”
45 Cov thawj leej choj thiab cov Fas Lis Xais hnov Yes Xus cov zaj paj lug, lawv to taub tias Yes Xus hais txog lawv.
46 Lawv nrhiav kev ntes Yes Xus, tab sis lawv ho ntshai tsoom sid, vim sawv daws saib Yes Xus yog ib tug yaj saub.

TIM 14 LUB 3 HLIS 2020

Hnub Xya Lis Piam Ob Caij Plaub Caug Xyoo A Nruab Lis Piam Xyoo II

Zaj Nyeem Ib: MIS KES 7: 14-15, 18-20

14 Thov koj siv koj rab pas ua tswv zov yaj los coj los qhuab qhia koj haiv neeg, lawv yog koj pab yaj koj lub cuab tam; lawv nyob ncaim npoj hauv ib lub hav zoov nyob hauv Kas Mes. Kheev lam lawv tau mus nog zaub nyob Npas Sas thiab nyob Nkas Las As xws li yav thaum ub mas!
15 “Xws li thaum lub caij thaum nej tawm Hais Nkws Tos teb los, kuv yuav cia nej pom tej yam hwj huam loj.”
18 Tus Tswv Ntuj twg thiaj zoo li koj? Thiaj zam txhaum thiab tsis suav cov neeg seem hauv nws lub cuab tam tej kev ua phem; thiaj yuav tsis npau taws tas mus li, tiam sis nws nyiam ua lub siab zoo khuv leej neeg?
19 Thiaj tseem yuav hlub peb ib zaug ntxiv, thiab yuav muab peb tej kev phem tsuj ntiag rau hauv av ? Koj yuav muab peb tej txhaum pov rhees kom tas lawm hauv qab tiv txwv !
20 Koj yuav ua raws qhov tseeb rau Yas Kos, thiab yuav pub koj txoj kev khuv leej rau Has Nplas Has, xws li koj tau cog lus rau peb cov yawg koob thaum ntxov ub lawm.

NPN 103: 1-2, 3-4, 9-10, 11-12

Txais: (8a) Huab Tais siab zoo thiab khuv leej neeg.

Kuv tus ntsuj plig, koj cia li cav txog HUAB TAIS;
kuv tej siab ntsws, nej cia li cav txog nws lub npe ntshiab.
Kuv tus ntsuj plig, koj cia li cav txog HUAB TAIS,
koj tsis txhob hnov qab nws tej kev ua zoo ib qho li.

Txais: (8a) Huab Tais siab zoo thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob nkeeg zoo hlo.
Nws tau cawm koj txoj sia ntawm kev puas nstoog,
nws tau muab nws txoj kev ua siab zoo
thiab kev khuv leej ua mom rau koj ntoo.

Txais: (8a) Huab Tais siab zoo thiab khuv leej neeg.

Nws tsis cem tsis yws tas mus li,
nws kuj tsis chim tas mus ib txhis.
Nws tsis nplua peb raws li peb tau ua txhaum,
nws tsis ua pauj rau peb raws li peb tau ua phem.

Txais: (8a) Huab Tais siab zoo thiab khuv leej neeg.

Lub ntuj nyob siab tshaj saum lub ntiaj teb npaum li cas,
nws kuj hlub cov neeg uas hwm nws tshaj npaum li ntawd.
Sab hnub tuaj nyob deb sab hnub poob npaum li cas,
nws kuj tau muab peb tej txhaum pov tseg
deb ntawm peb npaum li ntawd .

Txais: (8a) Huab Tais siab zoo thiab khuv leej neeg.

Zaj Cav lub Moo Zoo: LK 15: 18

Txais: Huab Tais Yes Xus Pleev, Tswv Ntuj Lo Lus, peb cav txog koj.

Kuv yuav sawvkev, kuv yuav mus cuag kuv txiv thiab hais rau nws tias:
Txiv, kuv tau ua txhaum rau Ntuj thiab rau koj lawm.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: LK 15: 1-3, 11-32

1 Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais lus. 2 Ces cov fas lis xais thiab cov thoob xwm ntawv cem zom zaws tias : "Tus neeg ntawd txais cov neeg txhaum, nws tseem nrog lawv noj mov thiab !" 3 Yes Xus thiaj hais zaj paj lug no rau lawv :
11 “Ib tug neeg muaj ob tug tub. 12 Tus tub ntxawg hais rau nws txiv tias : ‘Txiv, koj muab koj lub cuab tam feem uas yog kuv tug faib rau kuv.’ Ces leej txiv thiaj muab nws lub cuab tam faib rau nws ob tug tub. 13 Ob peb hnub tom qab, tus tub ntxawg sau feem uas yog nws tug tas huv si, nws khiav mus rau ib lub teb chaws nyob deb. Nyob ntawd nws muab nws lub cuab tam phob tas vim nws coj ib lub neej tsis tsim txiaj. 14 Thaum nws muab nws lub cuab tam phob tas huv si lawm, ces lub teb chaws tshaib plab loj. Nws pib paub txoj kev yoo tshaib yoo nqhis. 15 Nws thiaj mus ua zog hauv ib tug neeg nyob txawm lub teb chaws ntawd. Luag kom nws mus zov npua tom teb. 16 Tus tub ntxawg ntshaw noj cov qos uas npua noj kom tsau nws plab, tab sis tsis muaj neeg pub rau nws noj li. 17 Nws lub siab mam li ras dheev tias : Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no. 18 Kuv yuav sawv kev, kuv yuav mus cuag kuv txiv, kuv yuav hais rau nws tias : Txiv, kuv tau ua txhaum rau Ntuj thiab rau koj lawm. 19 Kuv tsis tsim nyog koj hu kuv ua koj tus tub ntxiv. Thov koj saib kuv ib yam li yog koj ib tug tub zog. 20 Ces tus tub ntxawg thiaj sawv kev, nws rov los cuag nws txiv. Thaum tus tub tseem los txog deb, nws txiv twb pom nws lawm; nws txiv hlub nws tas siab nrho. Leej txiv thiaj tso sas khiav mus puag nkaus tus tub caj dab, thiab nwj nws tub tub. 21 Tus tub hais rau leej txiv tias : 'Txiv, kuv tau ua txhaum rau Ntuj thiab rau koj lawm. Kuv tsis tsim nyog koj hu kuv ua koj tus tub ntxiv.'
22 Tab sis leej txiv hais rau cov tub txib tias : 'Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib ntiv nplhaib los ntxig nws ntiv tes, thiab ib nkawg khau los ntxig nws ko taw. 23 Nej cab tus xyuas nyuj rog los tua. Peb noj nqaij, peb ua lom zem. 24 Vim tias kuv tus tub no tuag lawm, nyem no nws ciaj rov los dua. Nws ploj lawm, nyem no rov nrhiav tau nws dua lawm.' Ces lawv sawv daws noj haus lom zem. 25 Thaum ntawd, tus tub hlob tseem nyob tom teb. Thaum nws rov los yuav txog tsev, nws hnov suab paj nruag thiab suab dhia seev cev nrov ntsuag qees. 26 Nws hu ib tug tub txib kom tawm tuaj, nws nug saib lub suab ntawd yog dab tsi. 27 Tus tub txib hais rau nws tias : 'Yog koj tus kwv rov qab los tsev lawm, koj txiv tua tus xyuas nyuj rog, vim nws tau pom koj tus kwv rov los noj qab nyob zoo.' 28 Ces tus tub hlob npau taws, nws tsis kam nkag los hauv tsev. Leej txiv tawm tuaj hais kom nws los tsev. 29 Tab sis tus tub hlob teb rau nws txiv tias : Kuv tau ua hauj lwm tsob hwb koj tau npaum no xyoo, kuv tsis tau hla koj ib lo lus li, koj twb tsis tau muab ib tug me nyuam tshis pub kuv ib zaug, kom tau nrog kuv cov phooj ywg noj ib pluag lom zem li. 30 Hos koj niag tub ntawd, twb muab koj lub cuab tam mus siv luaj thuam rau cov niam ntiav tas, thaum nws rov los txog, koj tseem tua tus nyuj rog rau nws thiab!' 31 Ces leej txiv hais rau tus tub hlob tias : 'Me tub, koj ib txwm nrog kuv nyob, ib puas tsav yam uas yog kuv tug, mas kuj yog koj tug tib si. 32 Zaum no peb yuav tsum noj ib pluag loj thiab ua lom zem zoo siab, vim koj tus kwv no twb tuag lawm, zaum no nws rov ciaj dua, nws twb ploj lawm, nyem no rov nrhiav tau nws dua lawm.’”

TIM 16 LUB 3 HLIS 2020

Hnub Ob Lis Piam Peb Caij Plaub Caug Xyoo A Nruab Lis Piam Xyoo II

Zaj Nyeem Ib: 2 VAJ 5: 1-15AB

1 Nas Maas, tus thawj tub rog rau tus vaj As Las Mais, yog ib tug neeg uas tus vaj hwm thiab nyiam vim yog muaj nws mas HUAB TAIS thiaj pab cov As Las Mais yeej rog. Tab sis tus neeg muaj peev xwm ntawd mob ruas. 2 Muaj ib zaug cov As Las Mais tuaj lwg His Xas Lais teb, lawv coj tau ib tug me nyuam ntxhais mus lawm. Tus ntxhais ntawd mus ua ntxhais txib rau Nas Maas tus poj niam. 3 Nws hais rau Nas Maas tus poj niam tias : "Yog kuv tus tswv mus cuag tus Yaj Saub nyob Xas Mas Lias teb mas tus Yaj Saub yuav cawm tau nws dim ntawm nws tus mob ruas xwb !" 4 Nas Maas mus qhia rau nws tus huab tais txog cov lus uas tus ntxhais tuaj teb chaws His Xas Lais tuaj tau hais.
5 Tus vaj As Las Mais teb tias : "Yog li ces koj mus, kuv yuav xa ib tsab ntawv mus rau tus vaj His Xas Lais." Ces Nas Maas mus, nws nqa kaum choj nyiag, rau txhiab lub txiaj kub thiab kaum cev tsoos tsho ua zam. 6 Nws mus txog, nws cev tus vaj tsab ntawv rau tus vaj His Xas Lais nyeem. Nyob hauv tsab ntawv muaj cov lus hais li no : "Kuv xa kuv tus tub txib Nas Maas nrog tsab ntawv no tuaj. Thov koj kho nws tus mob kom zoo." 7 Thaum tus vaj His Xas Lais nyeem tsab ntawv tas, nws dua rhe nws lub tsho, nws hais tias : "Kuv puas yog ib tug tswv ntuj txawj ua kom neeg ciaj los neeg tuag? Ua cas tus ntawd thiaj yuav kom kuv kho ib tug neeg mob ruas ? Qhov tseeb yog nws xav nrhiav lus rau kuv xwb."
8 Tab sis thaum Es Lis Xais hnov tias tus vaj dua nws cov ris tsho, mas nws tso neeg mus hais rau tus vaj tias : "Vim li cas koj dua koj cov ris tsho ? Kom nws tuaj cuag kuv saib ! Nws thiaj yuav paub tias muaj ib tug Yaj Saub nyob His Xas Lais teb." 9 Nas Maas caij tsheb nees nrog nws pab neeg tuaj txog, nws theem ntawm Es Lis Xais qhov rooj. 10 Es Lis Xais tso neeg mus hais rau nws tias : "Koj mus da dej xya zaus nyob hauv tus dej Yos Las Das ces koj cev nqaij yuav rov zoo thiab huv tuaj." 11 Nas Maas npau taws, nws hais tias : "Kuv vam tias ntshai nws yuav tawm tuaj, nws yuav hu txog HUAB TAIS nws tus Tswv Ntuj lub npe thiab nws yuav plhws kuv qhov nqaij mob, ces kuv yuav zoo hlo no. 12 Tus dej As Npas Nas thiab tus dej Fas Pas nyob Das Mas teb tsis zoo dua cov dej nyob His Xas Lais teb lod ? Yog kuv mus da cov dej nyob Das Mas teb kuv yuav tsis zoo tuaj sai dua lod ?" Ces Nas Maas lem loo nees rov qab, nws npau taws heev. 13 Tab sis nws cov tub txib txav los hais rau nws tias : "Txiv, yog tus Yaj Saub kom koj ua ib yam nyuaj dua ntawd mas koj twb yuav ua xwb puas yog ? Txawm yog nws hais tias kom koj mus da dej xwb ces koj yuav zoo mas koj haj yam yuav zoo siab ua xwb" 14 Nas Maas thiaj nqes mus hauv tus dej Yos Las Das, nws mus ntxuav cev xya zaus xws li Tswv Ntuj tus yaj saub hais, ces nws cov nqaij rov zoo tuaj xws li tus me nyuam mos tej nqaij. Nws huv si tuaj lawm. 15 Nas Maas nrog nws cov tub txib rov los tom Tswv Ntuj tus neeg xub ntiag, nws hais tias : "Nyem no, kuv paub lawm tias tsis muaj dua lwm tus Tswv Ntuj nyob tas ntiaj teb, tsuas kawg muaj ib tug xwb nyob His Xas Lais teb !”

NPN 42: 2, 3; 43: 3, 4

Txais: (42:3) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Xws li tus kauv nqhis cov dej ntws lug,
ib yam li ntawd, kuv tus ntsuj plig nqhis txog koj, Tswv Ntuj.

Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Thov xa koj qhov pom kev thiab koj txoj kev pheej xeeb tuaj rau kuv,
thiaj yuav coj kuv taug kev mus ntxiv, thiab coj kom kuv tuaj
txog lub roob koj txoj kev ntshiab, tuaj txog koj lub chaw nyob.

Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Ces kuv yuav chaws mus hauv lub thaj txi Tswv Ntuj, yog
tus Tswv Ntuj ua kom kuv muaj kev zoo siab thiab kaj siab.
Ces kuv yuav ntaus nkauj nog ncas ua koj tsaug,
Tswv Ntuj, kuv tus Tswv Ntuj!

Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Zaj Cav lub Moo Zoo: NPN 130: 5, 7

Kuv tso siab rau Huab Tais, kuv cia siab rau nws lo lus,
nws muaj lub siab zoo tas nrho thiab muaj kev cawm seej ntws lug.

Ntawv Moo Zoo: LK 4: 24-30

24 Yes Xus hais rau cov neeg nyob hauv lub tuam tsev teev ntuj nyob Naj Xas Les tias : "Kuv hais tseeb rau nej tias, tsis muaj ib tug yaj saub uas luag yuav txais nws zoo hauv lub zos nws nyob hlob. 25 Kuv hais tseeb rau nej : lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg. 26 Tab sis Ntuj tsis xa Es Lias mus pab cov poj ntsuam His Xas Lais ib tug li. Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb xwb. 27 Lub caij tus yaj saub Es Lis Xais nyob, kuj muaj coob tus mob ruas nyob His Xas Lais teb, tab sis tsis muaj ib tug mob ruas His Xas Lais rov huv, tsuas yog tus mob ruas Xis Lias hu ua Nas Maas thiaj rov huv xwb."
28 Tas cov neeg hauv lub tsev txoos hnov cov lus ntawd, mas lawv npau taws kawg. 29 Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib qho ua tw roob saum lub roob uas lawv txhim lub nroog, lawv yuav thawb Yes Xus kom poob lawm hauv lub qab tw roob. 30 Tab sis Yes Xus hla plaws hauv nruab nrab lawv, nws taug nws kev mus lawm.

TIM 17 LUB 3 HLIS 2020

Hnub Peb Lis Piam Peb Caij Plaub Caug Xyoo A Nruab Lis Piam Xyoo II

Hwm LN Patrick

Zaj Nyeem Ib: DAS NIAS 3: 25, 34-43

25 As Xas Lias sawv hauv cov nplaim taws, nws thov ntuj nrov nrov tias :
34 "Huab Tais, thov koj saib koj lub npe, es koj tsis txhob tso peb rau luag tes mus li, los tsis txhob thim lo lus koj tau cog. 35 Koj tsis txhob thau koj lub txiaj ntsim ntawm peb rov qab, vim koj saib Has Nplas Has koj tus phooj ywg, His Xas Has koj tus tub txib, thiab His Xas Lais koj tus Ntshiab. 36 Koj tau cog lus rau lawv tias lawv yuav muaj tub ki coob cuag li cov hnub qub nyob saum ntuj, los cuag li cov suab zeb nyob ntawm ntug hiav txwv. 37 Huab Tais, peb yog ib haiv neeg me tshaj lwm haiv neeg; hnub no nyob tas ntiaj teb qhov txhia chaw peb txaj muag vim peb cov txhaum. 38 Nyem no, peb tsis muaj vaj, tsis muaj yaj saub, tsis muaj tus thawj, peb tsis muaj tsiaj hlawv txi ntuj, tsis muaj cov txim yuav cev rau Ntuj, tsis muaj xyab, tsis muaj qhov chaw yuav cev thawj cov txiv, 39 thiab yuav ua raws koj nyiam li, tab sis thov koj txais peb vim peb muaj ib lub siab lees txhaum thiab ib lub tswv yim txo hwj chim, 40 zoo puav tam li yog ib co laug tshis thiab ib co heev nyuj los yog ib txhiab tus yaj rog hlawv txi rau koj. Thov kom hnub no peb thaj txi Ntuj yog zoo li ntawd rau koj, vim peb los raws koj tas peb lub siab lub ntsws, thiab vim cov tso siab rau koj yuav tsis raug kev poob ntsej muag. 41 Nyem no peb muab tas peb lub siab los raws koj, los hwm koj thiab rov nrhiav koj lub ntsej muag dua. 42 Thov koj tsis txhob cia peb poob rau kev txaj muag, tiam sis koj mloog koj lub siab zoo thiab khuv leej neeg, koj ua zoo rau peb. 43 Thov koj ua hwj huam loj los cawm peb, Huab Tais, koj ua kom sawv daws cav txog koj lub npe."

NPN 25: 4-5AB, 6+7BC, 8-9

Txais: (6a) Huab Tais, thov koj nco ntsoov koj txoj kev khuv leej.

Huab Tais, thov koj ua kom kuv paub koj tej kev,
thov qhia koj tej kev rau kuv taug,
thov coj kuv mus raws koj txoj kev tseeb thiab qhia rau kuv paub,
vim koj yog Tswv Ntuj, yog tus cawm kuv.

Txais: (6a) Huab Tais, thov koj nco ntsoov koj txoj kev khuv leej.

Huab Tais, thov koj nco ntsoov tias koj yeej ib txwm muaj
lub siab hlub neeg, thiab muaj siab zoo txij puag thaum ub los.
Huab Tais, vim koj lub siab zoo, thiab lub siab hlub neeg
thov koj nco txog kuv.


Txais: (6a) Huab Tais, thov koj nco ntsoov koj txoj kev khuv leej.

Huab Tais yog tus ncaj tus zoo,
nws thiaj qhia txoj kev zoo rau tus neeg txhaum.
Nws coj tus neeg me mus raws txoj kev ncaj,
nws qhia nws txoj kev rau tus neeg me taug.

Txais: (6a) Huab Tais, thov koj nco ntsoov koj txoj kev khuv leej.

Zaj Cav lub Moo Zoo: Yos Es 2: 12-13

HUAB TAIS hais tias: Nyem no
nej cia li muab tas nej lub siab tig rov los cuag kuv,
vim kuv muaj lub siab zoo thiab khuv leej neeg.

Ntawv Moo Zoo: MT 18: 21-35

21 Thaum ntawd, Pob Zeb txav los hais rau Yes Xus tias : “Huab Tais, yog kuv tus kwv ua txhaum rau kuv, kuv yuav zam pes tsawg zaus rau nws? Kuv puas yuav zam txog xya zaus ?” 22 Yes Xus hais rau Pob Zeb tias : “Kuv tsis hais kom koj zam txog xya zaus, tiam sis kuv hais kom koj zam txog xya caum xya zaus. 23 Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. 24 Thaum lawv pib txheeb, luag coj ib tug tub txib uas tshuav nuj nqis txog ib vam nras nyiaj tuaj rau tus vaj. 25 Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. 26 Tus tub txib txhos caug ntua ntawm tus vaj ko taw, nws pe tus vaj, nws hais tias : ‘Huab Tais, thov koj ua siab ntev rau kuv, kuv yuav them kom tas rau koj.’ 27 Tus Huab Tais ntawd hlub nws tus tub txib, ces nws tso tus tub txib mus thiab tseem zam cov nuj nqis huv tib si rau nws. 28 Thaum tus tub txib tawm rov qab mus, nws ntsib nws ib tug phooj ywg ua tub txib li nws thiab, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus phooj ywg caj dab, zawm tus phooj ywg caj pas, thiab hais tias : ‘Koj tshuav kuv nqi koj cia li them kom tas rau kuv.’ 29 Tus phooj ywg txhos caug ntua ntawm nws ko taw thov tias : ‘Thov koj ua siab ntev rau kuv, kuv yuav them rau koj.’ 30 Tab sis tus tub txib ntawd tsis kam li, nws kom luag muab nws tus phooj ywg mus kaw hauv tsev loj faj mus txog hnub tus phooj ywg them nuj nqis tas huv tib si rau nws. 31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus Huab Tais. 32 Ces tus Huab Tais hu tus tub txib tuaj, nws hais rau tus tub txib ntawd tias : ‘Tub txib siab phem dab tsi ! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. 33 Ua cas koj tsis hlub koj tus phooj ywg zoo li kuv tau hlub koj ?’ 34 Ces tus Huab Tais npau taws heev, nws muab tus tub txib ntawd tso rau cov tub hiam neeg tsim txom mus txog hnub nws them nws cov nuj nqis tas huv tib si. 35 Kuv Txiv nyob saum ntuj los kuj yuav ua ib yam li ntawd rau nej thiab, yog tias nej txhua tus tsis zam hauv nruab siab rau nej ib tug kwv tij twg.”

TIM 18 LUB 3 HLIS 2020

Hnub Plaub Lis Piam Peb Caij Plaub Caug Xyoo A Nruab Lis Piam Xyoo II

Hwm LN Cyril nyob Yes Lus Xas Les

Zaj Nyeem Ib: TXOJ CAI OB 4: 1, 5-9

Mais Xes hais rau tsoom pej xeem tias:
1 "Cov His Xas Lais, zaum no nej mloog cov cai thiab cov lij choj uas kuv qhia rau nej coj, nej thiaj yuav muaj txoj sia thiab yuav tau nkag mus txeeb tau lub teb chaws uas HUAB TAIS nej cov yawg koob tus Tswv Ntuj muab pub rau nej los ua nej tug.
5 Li ntawd, kuv qhia rau nej ib co cai thiab lij choj raws li Huab Tais kuv tus Tswv Ntuj kom kuv qhia, kom nej yuav tau coj nyob hauv lub teb chaws nej yuav mus txeeb los ua nej tug. 6 Nej yuav mloog yuav coj raws nraim cov cai lij choj ntawd, ces lwm haiv neeg thiaj yuav pom tias nej yog neeg thoob tsib neeg ntse. Thaum lawv hnov txog tas cov cai lij choj no, lawv yuav hais tias : ‘Haiv neeg loj ntawd yog ib haiv neeg thoob tsib thiab ntse tiag tiag !’ 7 Vim tias, haiv neeg loj twg thiaj muaj ib co tswv ntuj nyob ze ze lawv li HUAB TAIS peb tus Tswv Ntuj nyob ze ze peb niaj zaus thaum peb hu txog nws ? 8 Haiv neeg loj twg thiaj muaj ib co cai thiab lij choj ncaj npaum li Txoj Cai uas kuv muab tso rau nej hnub no ?
9 Tiam sis nej yuav tau ceev faj zoo, nej yuav tau tsis txhob hnov qab tej yam nej qhov muag tau pom kiag, yuav tsis txhob muab tej ntawd tshem ntawm nej lub tswv yim mus li, txog thaum nej txoj sia tu; tiam sis nej yuav tsum tau muab qhia rau nej cov me nyuam, thiab rau nej cov me nyuam cov me nyuam huv tib si.

NPN 147: 12-13, 15-16, 19-20

Txais: (12a) Yes Lus Xas Les, koj cia li cav txog Huab Tais.

Yes Lus Xas Les, koj cia li cav txog Huab Tais lub koob meej,
Xis Yoos, koj cia li cav txog koj tus Tswv Ntuj,
Vim nws tau ua kom cov tab ntawm koj cov rooj vag khov tuaj lawm,
nws tau foom hmoov zoo rau koj cov me nyuam nyob hauv koj.

Txais: (12a) Yes Lus Xas Les, koj cia li cav txog Huab Tais.

Nws xa nws lo lus qhuab qhia tuaj rau ntiaj,
nws lo lus khiav nrawm nroos!
Nws tseb daus los zoo li plaub yaj,
nws pov cov te los zoo li tshauv.

Txais: (12a) Yes Lus Xas Les, koj cia li cav txog Huab Tais.

Nws tau tshaj nws lo lus rau Yas Kos,
nws cov kev cai thiab lij choj rau His Xas Lais.
Nws tsis tau ua zoo li ntawd rau lwm haiv neeg twg li,
nws tsis tau qhia nws cov lij choj rau lawv paub li.

Txais: (12a) Yes Lus Xas Les, koj cia li cav txog Huab Tais.

Zaj Cav lub Moo Zoo: ZAM 6: 63C, 68C

HUAB TAIS, koj cov lus yog tswv yim thiab txoj sia,
koj muaj cov lus pub txoj sia nyob mus li.

Ntawv Moo Zoo: MT 5: 17-19

Yes Xus hais rau nws cov thwj tim tias:
17 Nej txhob xav tias kuv tuaj rhuav Txoj Cai los cov Yaj Saub : kuv tsis yog tuaj rhuav, kuv tuaj qhia ntxiv kom thoob xwb. 18 Kuv hais tseeb rau nej tias: Lub ntuj lub teb yuav dua mus, tab sis yuav tsis muaj ib tug txwm ntawv me me, los ib teev ntawv me me hauv Txoj Cai yuav ploj li, mus txog thaum tas ib puas tsav yam yuav tsum tshwm sim tuaj tas tso.
19 Vim li no yog leej twg hla ib txog cai me me, thiab nws qhia kom luag tej ua xws li nws, mas luag yuav hu tus ntawd ua tus me tshaj cov nyob hauv Ntuj lub Ceeb Tsheej; hos tus uas ua raws Txoj Cai tas huv si, thiab qhia kom luag tej ua li nws, mas luag yuav hu nws ua tus loj tshaj nyob hauv Ntuj lub Ceeb Tsheej.”

TIM 19 LUB 3 HLIS 2020

Hnub Tsib Lis Piam Peb Caij Plaub Caug Xyoo A Nruab Lis Piam Xyoo II

Hwm leej Ntshiab Yos Xes, Niam Mab Liab tus txij nkawm

Zaj Nyeem Ib: 2 XAS MUAS 7: 4-5A, 12-14A, 16

4 Tib hmos ntawd, HUAB TAIS lo lus nrov tuaj rau Nas Taas tias :
5 "Koj mus hais rau kuv tus tub txib Das Vis li no:
12 ‘Thaum txog koj lub caij mus nrog koj cov poj yawm txwv koob pw lawm, kuv yuav tsa koj ib tug tub kom sawv los tom qab koj, yog ib tug tawm ntawm koj roj ntsha los, kuv yuav tsa nws txoj kev ua vaj kom nyob ruaj nreb.
13 Nws yog tus yuav txhim ib lub tsev rau kuv lub npe, ces kuv yuav tsa nws txoj kev ua vaj kom nyob ruaj nreb mus li.
14a Kuv yuav ua nws txiv, nws yuav ua kuv tus tub.
16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag. Koj lub theej kiab yuav nyob ruaj nreb mus ib txhis.’”

NPN 89: 2-3, 4-5, 27+29

Txais: (37) Das Vis leej tub yuav nyob tas mus li ib txhis.

Kuv yuav hu nkauj mus li cav txog HUAB TAIS txoj kev hlub;
tiam dhau tiam kuv lub ncauj yuav tshaj txog koj txoj kev pheej xeeb.
Vim koj tau hais tias: “Kuv txoj kev hlub yuav nyob mus li,”
koj tau tsa koj txoj kev pheej xeeb kom nyob ruaj nreb nyob saum ntuj.

Txais: (37) Das Vis leej tub yuav nyob tas mus li ib txhis.

Kuv tau hais haum nrog tus kuv xaiv,
kuv tau cog lus ruaj rau Das Vis kuv tus tub txib tias:
“Kuv yuav tsa koj caj ces kom nyob mus li,
kuv yuav txhim koj lub theej kiab kom nyob tiam dhau tiam.”

Txais: (37) Das Vis leej tub yuav nyob tas mus li ib txhis.

“Nws yuav hais txog kuv tias: ‘Koj yog kuv txiv,
koj yog kuv tus Tswv Ntuj, kuv lub tsua, tus cawm kuv.’
Kuv yuav muab kuv txoj kev hlub rau nws tas mus li,
thiab kuv txoj kev nrog nws cog lus yuav nyob ruaj nreb.”

Txais: (37) Das Vis leej tub yuav nyob tas mus li ib txhis.

Zaj Nyeem Ob: LOS MAS 4: 13, 16-18, 22

Cov kwv tij nkauj muad:
13 Has Nplas Has los nws tsoom xeeb ntxwv tau txais txoj kev cog lus tias lawv yuav tau txais lub ntiaj teb los ua lawv tug, tsis yog vim Has Nplas Has mloog txoj cai, tiam sis yog vim nws muaj txoj kev ncaj ncees uas los ntawm txoj kev ntseeg los.
16 Vim li no txoj kev cog lus ntawd yog txawb rau saum txoj kev ntseeg, ces nws thiaj yog ib qho txiaj ntsim koob hmoov thiab thiaj li nyob ruaj nreb rau tas Has Nplas Has tsoom xeeb leej xeeb ntxwv, tsis yog rau cov uas coj raws txoj cai xwb, tiam sis rau txhua tus uas coj txoj kev ntseeg raws li Has Nplas Has uas yog peb sawv daws txiv, 17 raws li muaj ntawv sau tseg tias: “Kuv tsa koj ua txiv rau ntau haiv neeg.” Tswv Ntuj yeej saib Has Nplas Has yog peb txiv, vim Has Nplas Has ntseeg Tswv Ntuj tus uas muab tau txoj sia rau cov neeg tuag thiab cia li hu xwb ces txhua yam tsis muaj txawj xeeb muaj tuaj. 18 Thaum tsis muaj kev cia siab li lawm, Has Nplas Has tseem cia siab tuag nthi thiab ntseeg tuag nthi tias nws yuav ua txiv rau ntau haiv neeg raws li cov lus hais rau nws tias: “Koj tsoom xeeb ntxwv yuav coob npaum li no.”
22 Vim li no thiaj muab qhov kev ntseeg ntawd ntaus nqe ua nws txoj kev ncaj ncees.

Zaj Cav lub Moo Zoo: NPN 84: 5

Cov muaj hmoov zoo yog cov nyob hauv koj lub tsev, HUAB TAIS,
lawv yuav cav txog koj mus li tsis muaj caij kawg.

Ntawv Moo Zoo: MT 1: 16, 18-21, 24A

16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
18 Yes Xus Pleev lub keeb chiv zoo li no : Mab Liab uas yog Yes Xus niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm xwb. 20 Thaum nws txiav siab li ntawd lawm, Huab Tais tus Tshiab txawm tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab koj tus poj niam los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus, vim nws yuav cawm nws haiv neeg ntawm lawv cov txhaum."
24 Thaum Yos Xes tsim los, nws ua raws li Huab Tais tus Tshiab qhia rau nws : nws mus coj nws poj niam los nyob hauv nws tsev.

Los: LK 2: 41-51A

41 Yes Xus niam thiab txiv nkawd niaj xyoo mus ua lub Ntees Hla pem Yes Lus Xas Les. 42 Thaum Yes Xus muaj kaum ob xyoos, lawv kuj mus ua lub Ntees Hla pem Yes Lus Xas Les raws li kev cai thiab. 43 Thaum cov hnub ua ntees tas lawm, Yos Xes thiab Mab Liab nkawd sawv kev rov mus tsev, hos tus me tub Yes Xus tseem nyob Yes Lus Xas Les, nws niam thiab nws txiv tsis paub. 44 Nkawd xav tias nkawd tus tub nrog pab neeg tuaj ua ke rov qab lawm. Ces nkawd mus ib hnub ke, nkawd mam li pib nrhiav nkawd tus tub hauv cov txheeb ze thiab cov swm neeg. 45 Nkawd nrhiav tsis tau, ces nkawd rov mus nrhiav nws pem Yes Lus Xas Les. 46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj. Nws zaum hauv nruab nrab cov kws qhia Txoj Cai, nws mloog lawv thiab ho nug lawv. 47 Cov neeg uas tau hnov Yes Xus hais lus, puav leej yoob tas rau nws txoj kev to taub thiab rau nws cov lus teb. 48 Thaum nkawd pom Yes Xus, nkawd xav tsis thoob, ces Yes Xus niam hais rau Yes Xus tias : "Me tub, vim li cas koj ua li ntawd rau wb ? Saib ! Koj txiv wb nrhiav koj, wb ntxhov siab tas nrho." 49 Yes Xus hais rau nkawd tias : "Vim li cas neb nrhiav kuv ? Neb tsis paub tias kuv yuav tsum ua kuv Txiv cov hauj lwm no lod ?” 50 Mab Liab thiab Yos Xes nkawd tsis to taub lo lus uas Yes Xus hais rau nkawd li. 51 Yes Xus nrog nkawd rov mus Nas Xas Les. Nws mloog nkawd lus.

TIM 20 LUB 3 HLIS 2020

Hnub Rau Lis Piam Peb Caij Plaub Caug Xyoo A Nruab Xyoo II

Zaj Nyeem Ib: OS XES 14: 2-10

Huab Tais hais li no:
2 “Cov His Xas Lais, nej cia li rov qab los cuag HUAB TAIS nej tus Tswv Ntuj; nej poob tsag vim nej tau ua txhaum.
3 Nej yuav npaj ib co lus, ces nej yuav rov los cuag HUAB TAIS, nej yuav hais rau nws tias : Thov koj zam peb cov txhaum tas huv sir au peb, koj tsuas yuav qhov zoo xwb. Ces peb yuav muab peb di ncauj los hloov cov thav nyuj tua txi koj. 4 As Xws yuav cawm tsis tau peb, peb yuav tsis muaj nees caij ntxiv; peb yuav tsis hais ntxiv rau tej yam peb txhais tes tsim tawm tias : ‘Peb tus Tswv Ntuj !’ Vim yog nyob hauv koj, tus me nyuam ntsuag thiaj tau txais kev khuv leej.’"
5 Ces HUAB TAIS hais tias: “Kuv yuav kho lawv kev ntxeev siab kom lawv zoo hlo, kuv yuav txaus siab hlo hlub lawv. Kuv yuav tsis npau taws rau lawv ntxiv lawm. 6 Kuv yuav zoo li ib co lwg poob los yug His Xas Lais. Nws yuav tawg taus paj zoo li lub paj ‘lis lis’, nws yuav nrhau cag xws li cov ntoo ciab nyob Lis Npaas. 7 Nws cov ceg yuav hlav tuaj, yuav zoo saib xws li tsob txiv ntoo roj, yuav tsw qab xws li cov ntoo ciab nyob Lis Npaas. 8 Lawv yuav rov qab los nkaum hauv nws qhov ntxoov ntxoo thiab lawv yuav ua kom tej noob nplej rov ciaj tuaj. Lawv yuav tawg paj xws li cov hmab txiv cawv. Ces nws yuav nto moo xws li cov cawv nyob Lis Npaas.
9 Es Fais! ua cas nws thiaj tseem yuav vam txog tej pej kum dab ntxiv ua dab tsi? Kuv yog tus hnov nws cov lus thov, kuv saib ntsoov nws. Kuv zoo puav tam li ib tsob ntoo thuv tawg paj ncw hna. Kuv yog tus ua kom koj txi taus txiv. “
10 Tus neeg twg thoob tsib, nws thiaj yuav to taub txog tej no. Tus neeg twg ntse, nws thiaj yuav mem tau lub ntsiab. Vim HUAB TAIS tej kev yog kev ncaj, cov neeg siab ncaj thiaj yuav taug tau, hos cov neeg txhaum yuav ntog.

NPN 81: 6C-8A, 8BC-9, 10-11AB, 14+17

Txais: (11+9a) Kuv yog HUAB TAIS koj tus Tswv Ntuj, cia li mloog kuv hais.

Kuv hnov ib co lus tshiab tias:
“Kuv txo nws lub nra ntawm nws xub pwg,
nws ob txhais tes dim tsis tau tuav lub pob tawb ntxiv.
Thaum koj muaj kev nyuaj siab,
koj tau hu, ces kuv tau tuaj pab koj.”

Txais: Kuv yog HUAB TAIS koj tus Tswv Ntuj, cia li mloog kuv hais.

Koj tsis pom kuv, kuv tau teb koj nyob hauv xob quaj.
Kuv tau sim koj nyob ntawm cov dej Mes Lis Npas.
Kuv haiv neeg, nej mloog kuv, kuv yuav ntuas nej,
His Xas Lais, koj puas yuav hnov kuv?

Txais: Kuv yog HUAB TAIS koj tus Tswv Ntuj, cia li mloog kuv hais.

Nej yuav tsis txhob muaj dua lwm tus tswv ntuj,
tsis txhob teev hawm lwm tus pej kum dab.
Kuv, HUAB TAIS, yog nej tus Tswv Ntuj
tus tau coj nej tawm Hais Nkws Tos teb los.

Txais: Kuv yog HUAB TAIS koj tus Tswv Ntuj, cia li mloog kuv hais.

Kheev lam kuv haiv neeg cuab pob ntseg mloog kuv,
kheev lam His Xas Lais taug kuv tej kev,
mas kuv yuav muab cov nplej mov mog qab tshaj rau lawv noj,
thiab kuv yuav tho cov zib muv saum tsua los daws lawv nqhis.

Txais: Kuv yog HUAB TAIS koj tus Tswv Ntuj, cia li mloog kuv hais.

Zaj Cav lub Moo Zoo: MT 4: 17

Huab Tais hais tias, nej cia li hloov siab,
Ntuj lub Ceeb Tsheej nyob ze ze lawm.

Ntawv Moo Zoo: MK 12: 28-34

28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias : "Nyob hauv cov lus qhia tas huv tib si, lo lus qhia twg yog lo loj tshaj?" 29 Yes Xus teb rau nws tias : "Thawj lo lus qhia yog lo lus no : ‘His Xas Lais, koj mloog mog ! Peb tus Huab Tais Tswv Ntuj tib leeg xwb yog Huab Tais. 30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.’ 31 Lo lus qhia ob yog lo lus no : ‘Koj yuav nyiam tus nyob ze koj ib yam li koj nyiam koj.’ Tsis muaj lwm lo lus qhia loj dua ob lo lus no lawm." 32 Tus kws Ntawv Ntshiab hais rau Yes Xus tias : "Koj hais raug kawg, Xib Hwb, koj hais qhov tseeb : muaj ib tug Huab Tais Tswv Ntuj xwb, tsis muaj dua lwm tus Tswv Ntuj dhau ntawm nws lawm. 33 Kev nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab nyiam tus nyob ze yus ib yam li yus nyiam yus, yog zoo tshaj tej tsiaj hlawv thiab tej thaj txi Ntuj huv tib si." 34 Yes Xus pom tus kws Ntawv Ntshiab txhab ib lo lus thoob tsib, ces nws hais rau tus kws Ntawv Ntshiab tias : "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus dab tsi ntxiv.

TIM 21 LUB 3 HLIS 2020

Hnub Xya Lis Piam Peb Caij Plaub Caug Xyoo A Nruab Lis Piam Xyoo II

Zaj Nyeem Ib: OS XES 6: 1-6

1 Nej tuaj, peb rov qab los cuag HUAB TAIS. Nws tau dua peb ntuag, tab sis nws yuav rov kho peb kom zoo; nws tau nplawm peb, tab sis nws yuav qhwv peb cov qhov txhab. 2 Nws tos dhau ob hnub ces nws yuav rov muab txoj sia rau peb; hnub peb, nws yuav tsa peb sawv rov los, peb yuav tau nyob ntawm nws xub ntiag. 3 Peb yuav tsum paub, peb kav tsij nrhiav kom paub HUAB TAIS. Tseeb ib yam li lub hnub tuaj thaum sawv ntxov, nws yeej yuav tuaj tiag. Nws yuav tuaj xws li thawj phaum nag thiab phaum nag kawg uas poob los ywg lub ntiaj teb.
4 Kuv yuav ua dab tsi rau koj, Es Fais ? Kuv yuav ua dab tsi rau koj, Yus Das ? Nej txoj kev nyiam kuv yog zoo li cov huab thaum sawv ntxov, thiab zoo li cov lwg uas yaj sai sai. 5 Yog vim li ntawd kuv thiaj siv cov Yaj Saub muab lawv txiav ua ntau daim, kuv lub ncauj thiaj hais cov lus muab lawv tua, ces kuv txoj kev txiav txim yuav ci tawm plaws tuaj xws li qhov pom kev. 6 Vim tias kuv ntshaw kev nyiam kev hlub dua cov thaj txi Ntuj, kuv ntshaw kev paub Tswv Ntuj dua cov thaj hlawv tsiaj.

NPN 51: 3-4, 18-19, 20-21AB

Txais: (OX 6:6) Kuv xav pom nej txoj kev hlub neeg dua nej tej kev txi ntuj.

Thov koj khuv leej kuv, Tswv Ntuj, vim koj lub siab zoo,
thov so kuv qhov txhaum pov tseg,
vim koj txoj kev hlub loj kawg nkaus.
thov ntxuav kuv lub txim kom tas nrho pov tseg
thiab tshem kuv qhov txhaum mus kom kuv dawb huv tuaj.

Txais: Kuv xav pom nej txoj kev hlub neeg dua nej tej kev txi ntuj.

Vim koj tsis zoo siab txais peb tej kev txi ntuj,
yog kuv yuav hlawv tsiaj txi ntuj, koj yuav tsis kam txais.
Kuv txoj kev txi ntuj, Tswv Ntuj,
yog muaj ib lub tswv yim xav lees txhaum;
ib lub siab xav lees txhaum thiab ua neeg me,
Tswv Ntuj, koj yuav tsis thuam.

Txais: Kuv xav pom nej txoj kev hlub neeg dua nej tej kev txi ntuj.

HUAB TAIS, thov koj ua siab dav rau Xis Yoos,
vim koj lub siab zoo, koj rov tsa Yes Lus Xas Les cov ntsa loog.
Ces thaum ntawd koj yuav zoo siab txais peb cov thaj txi ntuj,
peb cov kev tua tsiaj hlawv tsiaj txi ntuj.

Txais: Kuv xav pom nej txoj kev hlub neeg dua nej tej kev txi ntuj

Zaj Cav lub Moo Zoo: NPN 95: 8

Yog hnub no nej hnov nws lub suab,
nej tsis txhob ua nej lub siab tawv ncauj.

Ntawv Moo Zoo: LK 18: 9-14

9 Yes Xus tseem hais zaj paj lug no ntxiv, nws hais rau ib txhia neeg uas lawv khav tias lawv yog neeg ncaj, ces lawv thuam luag tej. 10 "Muaj ob tug neeg nce mus teev Ntuj pem lub Tuam Tsev Teev Ntuj. Ib tug yog Fas Lis Xais, ib tug yog tub sau se. 11 Tus Fas Lis Xais sawv ntsug, nws teev Ntuj li no nyob hauv siab : 'Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws. Lawv mas lawv ua tub sab, ua tsis ncaj, deev luag txij luag nkawm, los tseem ua zoo li tus sau se ntawd. 12 Kuv mas ib lis piam twg, kuv yoo mov ob zaug, kuv pub ib feem kaum ntawm tas txhia yam uas kuv khwv tau.' 13 Tus sau se nyob nrug deb, tsis muaj cuab kav tsa muag ntsia saum ntuj. Nws ntaus nws hauv siab, nws hais tias : 'Aub ! Tswv Ntuj, thov koj khuv leej kuv, vim kuv yog neeg txhaum !' 14 Kuv hais rau nej tias: Tus sau se nqes rov mus tsev, nws dawb huv tuaj lawm, hos tus Fas Lis Xais tsis dawb huv. Vim tias leej twg tsa nws siab, Ntuj yuav txo nws qis, hos leej twg txo nws qis, Ntuj yuav tsa nws siab."

TIM 23 LUB 3 HLIS 2020

Hnub Ob Lis Piam Plaub Caij Plaub Caug Xyoo A Nruab Lis Piam Xyoo II

Hwm LN Toribio (Turibius) nyob Mogrovejo, ua Tswv Qhia

Zaj Nyeem Ib: HIS XAIS 65: 17-21

Huab Tais hais tias:
17 Saib ntawm no, kuv tsim cov txheej ntuj tshiab thiab ib lub ntiaj teb tshiab. Yuav tsis nco txog yav tas los lawd ntxiv, yuav tsis muaj nyob hauv lub tswv yim ntxiv. 18 Tiam sis yuav muaj kev hom khaj thiab kev zoo siab mus li nyob hauv qhov kuv tsim. Vim kuv tsim Yes Lus Xas Les los ua ib qho kev zoo siab, kuv tsim nws haiv neeg los ua ua ib qho kev kaj siab. 19 Kuv yuav zoo siab nyob hauv Yes Lus Xas Les thiab yuav dhia hom khaj nyob hauv kuv haiv neeg. Yuav tsis hnov suab quaj los suab ncia nyob hauv lawv ntxiv. 20 Nyob hauv lawv, yuav tsis muaj ntxiv cov me nyuam mos uas yug los nyob ob peb hnub xwb, yuav tsis muaj ib tug neeg laus uas nyob tsis puv nws lub hnub nyoog. Tus neeg tuag thaum hnub nyoog ib puas xyoo, mas yog nws tuag hluas kawg; hos tus tuag tsis muaj ib puas xyoo mas luag yuav saib nws yog ib tug neeg tau hmoov phem. 21 Lawv yuav tau nyob hauv cov tsev uas lawv txhim tsa, thiab lawv yuav tau noj cov txiv cawv uas lawv tau cog rau hauv vaj.

NPN 30: 2+4, 5-6, 11-12A+13B

Txais: (2a) Kuv yuav cav txog koj, Huab Tais, vim koj tau cawm kuv.

Kuv yuav cav txog koj, Huab Tais, vim koj tau npo kuv dim,
tsis pub kom kuv cov yeeb ncuab muaj kev zoo siab yeej kuv.
HUAB TAIS, koj tau thau kuv tus ntsuj plig
tawm ntawm ntuj txias teb tsaus los;
nyob hauv cov uas poob mus rau lub qhov tob,
koj tau rov muab txoj sia rau kuv.

Txais: (2a) Kuv yuav cxav txog koj, Huab Tais, vim koj tau pab kuv.

Nej cav txog HUAB TAIS, nej cov uas nyiam nws,
nej ua nws tsaug, nej cav txog nws lub npe ntshiab.
Vim nws kev npau taws tsuas nyob ib pliag,
hos nws txoj kev ua zoo nyob mus ib tiam.
Thaum tsaus ntuj kev quaj nkag los,
tiam sis thaum sawv ntxov muaj kev zoo siab.

Txais: (2a) Kuv yuav cxav txog koj, Huab Tais, vim koj tau pab kuv.

HUAB TAIS, thov koj mloog kuv thiab khuv leej kuv,
HUAB TAIS, thov koj ua tus pab kuv.
Koj tau hloov kuv txoj kev quaj ntsuag ua kev dhia zoo siab.
HUAB TAIS, kuv tus Tswv Ntuj,
kuv yuav ua koj tsaug mus li ib txhiab ib txhis.

Txais: (2a) Kuv yuav cxav txog koj, Huab Tais, vim koj tau pab kuv.

Zaj Cav lub Moo Zoo: AS MOS 5: 14

Nej nrhiav qhov zoo txhob nrhiav qhov phem, nej thiaj yuav muaj txoj sia,
thiab HUAB TAIS thiaj yuav nrog nej nyob.

Ntawv Moo Zoo: ZAM 4: 43-54

43 Dhau ob hnub ntawd lawm, Yes Xus sawv kev ntawm qhov chaw ntawd mus rau Nkas Lis Lais teb. 44 Vim Yes Xus tau hais meej tias ib tug yaj saub tsis raug luag saib muaj nqis nyob hauv lub zos nws nyob hlob. 45 Thaum Yes Xus tuaj txog Nkas Lis Lais, cov neeg Nkas Lis Lais txais nws zoo, vim lawv tau pom tej yam nws ua nyob Yes Lus Xas Les thaum lub caij ua koob tsheej, yog vim lawv kuj tau mus ua koob tshej nyob ped thiab. 46 Yes Xus thiaj rov mus txog Kas Nas, xeev Nkas Lis Lais, lub zos uas nws muab dej los txia ua cawv. Muaj ib tug nom ua hauj lwm rau tus vaj nyob Kas Fas Naus nws tus tub muaj mob. 47 Nws hnov tias Yes Xus los Yus Das teb los txog Nkas Lis Lais lawm, ces nws mus cuag Yes Xus, nws thov Yes Xus kom nqes mus kho nws tus tub ; vim tus tub twb yuav tuag. 48 Yes Xus hais rau nws tias : "Yog nej tsis pom ib co cim thiab tej yam hwj huam, mas nej yeej tsis ntseeg li." 49 Tus nom hais rau Yes Xus tias : "Huab Tais, thov koj nqes mus, cheem kuv tus me nyuam tsis tau tuag." 50 Yes Xus hais rau nws tias : "Koj rov mus, koj tus tub ciaj sia nyob." Tus neeg ntawd ntseeg lo lus Yes Xus hais rau nws, ces nws sawv kev rov mus. 51 Thaum nws tab tom nqes mus, nws cov tub txib tuaj tos nws, lawv hais tias nws tus tub zoo neej lawm. 52 Nws nug lawv saib yog lub sij hawm twg tus tub thiaj rov zoo. Lawv hais rau nws tias : "Nag hmo, thaum ib teev hnub qaij, ces tus mob kub cev thim hlo lawm." 53 Leej txiv thiaj pom tias yog lub sij hawm uas Yes Xus hais rau nws tias : 'Koj tus tub ciaj sia nyob.' Ces nws ntseeg, nws thiab tas nws tsev neeg huv tib si ntseeg.
54 Thaum Yes Xus los ntawm xeev Yus Das mus rau xeev Nkas Lis Lais, mas nws ua lub cim ob yog zoo li ntawd.

TIM 24 LUB 3 HLIS 2020

Hnub Peb Lis Piam Plaub Caij Plaub Caug Xyoo A Nruab Lis Piam Xyoo II

Zaj Nyeem Ib: ES XES KIAS 47: 1-9, 12

1 Tus tshiab coj kuv, Es Xes Kias, rov los txog ntawm lub qhov rooj mus hauv lub Tuam Tsev Teev Ntuj. Ua ciav kuv pom muaj ib tug dej ntws hauv lub qab taw rooj los dua sab hnub tuaj lawm, vim lub Tuam Tsev tig mus rau sab hnub tuaj. Dej ntws tawm hauv qab sab xis ntawm lub Tuam Tsev Teev Ntuj los, nyob sab naj lub thaj txi ntuj. 2 Nws coj kuv tawm ntawm lub rooj vag nyob sab pej los rau sab nraum zoov, thiab coj kuv ncig sab Tuam Tsev nraud los txog ntawm lub rooj vag nyob sab hnub tuaj, uas kuv pom dej ntws tawm ntawm sab xis los. 3 Ces Tus tshiab mus rov rau sab hnub tuaj, nws nqa ib txoj hlua ntsuas ntawm tes, nws ntsuas ntev li ib txhiab tshim, ces nws kom kuv mus kwm dej; dej txij li kuv lub qij taw. 4 Nws rov ntsuas ib txhiab tshim ntxiv thiab kom kuv rov mus kwm dej dua, dej nce txij kuv hauv caug lawm. Nws rov ntsuas dua ib txhiab tshim ntxiv, nws rov kom kuv mus kwm dej, dej txij kuv duav lawm. 5 Nws tseem rov qab ntsuas dua ib txhiab tshim ntxiv, thaum ntawd cia li yog ib tug dej loj kuv kwm tsis tau lawm, vim cov dej puv tuaj ua ib tug dej loj hla tsis dhau lawm, yuav tsum yog ua luam dej xwb mas thiaj hla dhau. 6 Ces tus ntawd hais rau kuv tias : " Neeg leej tub, koj puas pom?" Nws thiaj coj kuv los rau ntawm tus ntug dej. 7 Thaum kuv los txog, mas nyob ntawm sab ntug dej tim no thiab nyob sab tim ub, kuv pom muaj ib co ntoo ntau ntau. 8 Tus ntawd hais rau kuv tias : "Cov dej no ntws mus rau sab toob fab thiab mus rau nram lub hav As Las Npas, yuav mus tshuam rau hauv hiav txwv, uas muaj cov dej teeg teeg nro npli qias neeg ntsuav, yuav mus ua kom lub hiav txwv cov dej ntshiab si tuaj. 9 Tus dej no ntws txog qhov twg mas tas puas tsav yam muaj sia uas txawj huam vam yuav ciaj sia; ces yuav muaj ntses ntau tuaj. Tus dej no ntws mus rau hauv lub hiav txwv, yog xav ua kom cov dej hiav txwv ntawd ntshiab huv tuaj; ces tus dej no mus txog twg mas tas txhua tsav yam yuav muaj cia sia nyob qhov ntawd.
12 Nyob ntawm tus dej ob sab ntug yuav tuaj tas ib puas tsav yam ntoo txi txiv cia ua txhiam laj txhiam xws; lawv cov nplooj yuav tsis zeeg thiab lawv cov txiv yuav muaj tsis tu ncua li; niaj lub hlis lawv yuav txi ib phaum txiv tshiab, vim cov dej ywg cov ntoo ntawd ntws ntawm thaj chaw ntshiab los. Lawv cov txiv yuav yog txhiam xws noj, lawv cov nplooj yuav yog tshuaj kho mob nkeeg."

NPN 46: 2-3, 5-6, 8-9

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Tswv Ntuj yog peb lub chaw nkaum yog peb lub zog,
yog tus pab peb mus li thaum peb ntsib kev nyuaj.
Vim li no peb tsis ntshai, txawm ntiaj teb yuav ua zog koog
thiab toj roob hauv pes yuav nphau nphwv rau hauv qab tiv txwv.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Muaj ib tug dej, nws ncau ceg mus ua kom Tswv Ntuj lub tsheej zoo siab,
lub tsheej uas yog tus Nyob Siab lub vaj tse dawb huv.
Tswv Ntuj nyob hauv lub tsheej, nws yuav tsis muaj kev swb,
Tswv Ntuj yuav tuaj pab nws thaum kaj ntug txoog.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Tus Huab Tais kav tsoom tshiab nrog peb nyob,
peb lub yeej ntsa zeb yog Yas Kos tus Tswv Ntuj.
Nej tuaj xyuas HUAB TAIS cov hauj lwm saib!
Tuaj xyuas tej yam txaus ntshai nws tau ua nyob ntiaj teb no.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Zaj Cav lub Moo Zoo: NPN 51: 12A, 14A

Tswv Ntuj, thov koj tsim ib lub siab huv lis si rau kuv,
koj pub kom kuv rov muaj kev zoo siab nyob hauv koj txoj kev cawm.

Ntawv Moo Zoo: ZAM 5: 1-16

1 Dhau tej ntawd lawm, txog cov Yus Das ib lub hnub nyoog ua koob tsheej, ces Yes Xus nce mus pem Yes Lus Xas Les. 2 Nyob Yes Lus Xas Les, muaj ib lub pas dej nyob ze lub rooj vag hu ua Qhov Rooj Yaj, uas lus Hes Nplaws hu ua Npes Xais Das. Lub pas dej no muaj tsib lub ru tsev nyob rau ntawd. 3 Ib pab neeg coob kawg pw hauv cov qab ru tsev no : ib co muaj mob, ib co dig muag, ib co ceg tawv, thiab ib co tuag tes tuag taw; (lawv pw ntawd tos kom cov dej ntas. 4 Vim muaj tej lub caij, Huab Tais tus Tshiab nqes los hauv lub pas dej, ces ua rau dej ntas. Thaum ntawd, yog leej twg xub nqes mus rau hauv dej, mas nws tus mob zoo hlo, txawm raug tus mob dab tsi los zoo tas huv tib si.) 5 Muaj ib tug txiv neej nyob ntawd, nws mob tau peb caug yim xyoo lawm. 6 Yes Xus pom nws pw, Yes Xus paub tias nws pw tos li ntawd tau ntev los lawm, nws hais rau tus neeg mob tias : "Koj puas xav kom koj tus mob zoo ?" 7 Tus neeg mob teb rau Yes Xus tias : "Huab Tais, thaum dej ntas kiag, kuv tsis muaj leej twg pab muab kuv tso rau hauv dej li. Thaum kuv tab tom mus, twb muaj lwm tus xub nqes ua kuv ntej lawm." 8 Yes Xus hais rau nws tias : "Koj sawv ! Nqa koj daim lev pua chaw, thiab koj mus kev mas." 9 Tam sis ntawd tus neeg mob zoo hlo. Nws nqa nws daim lev, ces nws sawv mus kev. Hnub ntawd yog hnub Xas Npas Tos.
10 Cov Yus Das hais rau tus neeg uas zoo lawd tias : "Hnub no yog Xas Npas Tos, txwv tsis pub koj nqa koj daim lev pua chaw." 11 Tab sis nws hais rau lawv tias : "Tus uas kho kuv zoo, nws hais rau kuv tias : Nqa koj daim lev pua chaw, thiab koj mus kev mas." 12 Lawv nug nws tias : "Leej twg yog tus hais rau koj tias : Nqa koj daim lev pua chaw, thiab koj mus kev?" 13 Tab sis tus neeg uas zoo ntawd tsis paub tias yog leej twg, vim Yes Xus twb ploj lawm, thiab muaj neeg coob coob nyob rau ntawd. 14 Ib tsam, Yes Xus pom nws hauv lub Tuam Tsev Teev Ntuj, Yes Xus hais rau nws tias : "Nyem no, koj tus mob twb zoo lawm, koj txhob ua txhaum ntxiv, tsam ib yam phem tshaj ho rov raug koj dua." 15 Tus neeg mus hais rau cov Yus Das tias tus kho nws zoo yog Yes Xus. 16 Vim li ntawd, cov Yus Das thiaj pib hiam Yes Xus, vim nws ua tej ntawd hnub Xas Npas Tos.

TIM 25 LUB 3 HLIS 2020

Hnub Plaub Lis Piam Plaub Caij Plaub Caug Xyoo A Nruab Lis Piam Xyoo II

Hwm txog lub Caij tus Tshiab Tuaj Xa Lus rau Mab Liab

Zaj Nyeem Ib: HIS XAIS 7: 10-14; 8: 10c

10 HUAB TAIS rov hais lus rau As Kas tias:
11 "Koj thov HUAB TAIS koj tus Tswv Ntuj kom nws ua ib lub cim rau koj pom, kom yog ib lub cim nyob tob npaum puag hauv qab ntuj txias teb tsaus, los puas kom nyob siab npaum puag saum cov chaw siab puag saum ntuj."
12 As Kas hais tias : "Kuv yuav tsis thov. Kuv yuav tsis sim HUAB TAIS."
13 Ces His Xais hais tias: "Das Vis tsev neeg, nej mloog ! Nej ua kom tej tib neeg ceeb laj tas nrho, los tsis txaus nej siab! Nej tseem yuav ua kom kuv tus Tswv Ntuj ceeb laj thiab lod?
14 Vim li ntawd, Huab Tais yuav pub ib lub cim rau nej. Nej ntsia saib ! Tus nkauj tsim txiaj xeeb tub lawm. Nws yuav yug ib tug tub. Nws yuav tis npe rau nws tus tub hu ua Es Mas Nus Es,
8 10c txhais tias: “Tswv Ntuj nrog peb nyob!”

NPN 40: 7-8A, 8B-9, 10, 11

Txais: (8a+9a) Kuv nyob ntawm no, Huab tais, kuv tuaj ua ywj koj lub siab.

Koj tsis xav yuav tsiaj los txhiam xws los txi rau koj,
koj muab ib lub pob ntseg xav mloog lus rau kuv;
koj tsis xav tau cov tsiaj hlawv txi ntuj los cov tsiaj them txim txhaum.
Ces kuv hais tias: “Cia kuv tuaj.”

Txais: Kuv nyob ntawm no, Huab tais, kuv tuaj ua ywj koj lub siab.

“Nyob hauv phau ntawv, muaj lus sau tseg rau kuv,
kom kuv ua ywj koj siab nyiam; yog qhov kuv zoo siab hlo ua.
Tswv Ntuj, koj txoj cai nyob rawv hauv kuv nruab siab!”

Txais: Kuv nyob ntawm no, Huab tais, kuv tuaj ua ywj koj lub siab.

Kuv tau tshaj koj txoj kev ncaj nyob hauv lub txoos loj muaj neeg coob;
kuv tsis tau kaw kuv qhov ncauj, Huab tais, koj yeej paub.

Txais: Kuv nyob ntawm no, Huab tais, kuv tuaj ua ywj koj lub siab.

Kuv tsis tau muab koj txoj kev ncaj zais cia rau nruab siab;
kuv tau tshaj txog koj txoj kev pheej xeeb thiab koj txoj kev cawm neeg;
kuv tsis tau zais tsis qhia koj txoj kev hlub
thiab kev tseeb rau lub txoos muaj neeg coob.

Txais: Kuv nyob ntawm no, Huab tais, kuv tuaj ua ywj koj lub siab.

Zaj Nyeem Ob: HES NPLAWS 10: 4-10

Cov kwv tij,
4 Ntshav nyuj ntshav tshis daws txhaum tsis tau.
5 Vim li ntawd, thaum Leej Pleev tuaj nyob ntiaj teb no, nws thiaj hais tias : “Tswv Ntuj, cov thaj txi Ntuj thiab cov paj tshab, mas koj tsis xav yuav, koj thiaj puab ib lub cev rau kuv.
6 Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais.
7 Kuv thiaj hais tias : ‘Tswv Ntuj, cia kuv tuaj ua ywj koj siab nyiam, raws li phau ntawv sau hais txog kuv.’”
8 Leej Pleev xub hais li no : “Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis zoo siab txais;” vim tej ntawd yog tej yam uas Txoj Cai qhia kom ua.
9 Ces Leej Pleev hais ntxiv tias : “Cia kuv tuaj ua ywj koj siab nyiam.” Li ntawd, Leej Pleev rhuav thawj txoj cai, nws tsa ib txog tshiab los hloov.
10 Qhov Tswv Ntuj nyiam ntawd yog ua kom peb ntshiab tuaj nyob hauv Yes Xus Pleev txoj kev txi nws lub cev rau Ntuj, nws tsuas txi ib zaug xwb pub rau txhua leej txhua tus.

Zaj Cav lub Moo Zoo: ZAM 1: 14AB

Txais: Huab Tais Yes Xus Pleev, koj yog tus pub kev cawm seej,
tus muaj koob meej thiab muaj hwj huam.

Tswv Ntuj Lo Lus yuav ib lub cev nqaij thiab tuaj nrog peb nyob,
peb tau pom nws lub hwj chim.

Txais: Huab Tais Yes Xus Pleev, koj yog tus pub kev cawm seej,
tus muaj koob meej thiab muaj hwj huam.

Ntawv Moo Zoo: LK 1: 26-38

26 Tswv Ntuj xa tus Tshiab Nkas Nplias mus rau hauv ib lub zos nyob Nkas Lis Lais teb, hu ua zos Nas Xas Les. 27 Tswv Ntuj xa nws mus cuag ib tug nkauj xwb raug muab qhaib rau ib tug txiv neej hu ua Yos Xes, xeem Das Vis lawm; tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus ntawd lub ntsiab yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws zaum. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tau zoo li cas, vim kuv tsis paub ib tug txiv neej?" 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb ze koj, nws kuj xeeb ib tug tub lawm thiab, txawm tias nws twb laus lawm. Lub hlis no yog lub rau hli rau nws, tus uas luag hu nws tias pog khab seeb. Vim tias, tsis muaj ib yam uas Tswv Ntuj yuav ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj rau kuv raws li koj hais." Tus Tshiab thiaj tso Mab Liab tseg.