COV ZAJ NYEEM NRUAB LIS PIAM XYOO A 2019-2020

TIM      26      LUB      3      HLIS      2020

Hnub Tsib Lis Piam Plaub Caij 40 Xyoo A Nruab Lis Piam Xyoo II

Zaj Nyeem Ib:       KEV TSIV  32:   7-14

7 HUAB TAIS hais rau Mais Xes tias : "Koj kav tsij nqes mus sai sai mus xyuas koj haiv neeg uas koj tau coj tawm ntawm Hais Nkws Tos teb los, vim lawv twb ua phem lawm. 8 Lawv twb maj maj ncaim ntawm txoj kev uas kuv tau qhia kom lawv taug. Lawv nchuav tau ib tug mlom nyuj rau lawv pe hawm, thiab lawv tua tsiaj txi rau, thiab lawv hais tias : ‘Cov His Xas Lais, nej ntsia, tus no yog nej tus Tswv Ntuj uas tau coj nej tawm ntawm Hais Nkws Tos teb los!’ " 9 HUAB TAIS hais ntxiv rau Mais Xes tias : "Kuv twb pom haiv neeg ntawd lawm, yog ib haiv neeg xwb qwb txhav kawg nkaus. 10 Zaum no, koj txhob cheem kuv, koj cia kuv npau taws kub lug rau lawv, kuv yuav muab lawv hlawv pov tseg kom tas, kuv mam li muab koj los tsim dua ib haiv neeg loj."
11 Tiam sis Mais Xes ua tib zoo thov nws tus HUAB TAIS Tswv Ntuj, nws hais tias : "HUAB TAIS, vim li cas koj thiaj li npau taws rau koj haiv neeg uas koj lub hwj huam loj thiab koj txhais tes muaj zog tau coj tawm ntawm Hais Nkws Tos teb los? 12 Vim li cas koj xav kom cov Hais Nkws Tos tau kev hais tias : ‘Nws yeej muaj lub siab phem xav coj lawv los kom nws tau muab lawv tua tuag kom tas nyob pem roob, thiab kom nws tau muab lawv hlawv pov tseg tsis tseg ib tug ua noob nyob ntiaj teb ntxiv ?' Thov koj cia koj lub siab npau taws kub lug ntaug mus, thiab koj tso qhov phem uas koj xav ua rau koj haiv neeg pov tseg mas. 13 Thov koj nco ntsoov txog koj cov tub txib Has Nplas Has, His Xas Has thiab His Xas Lais, uas koj tau cog lus ntawm koj tus kheej rau lawv tias : ‘Kuv yuav ua kom nej cov xeeb leej xeeb ntxwv huam vam coob npaum li cov hnub qub saum ntuj, thiab kuv yuav muab lub teb chaws uas kuv tau cog lus rau nej, pub rau nej cov xeeb leej xeeb ntxwv ua lawv tug mus ib txhis.’" 14 Ces HUAB TAIS thim xav, nws tsis ua phem rau nws haiv neeg raws li nws tau npaj xav ua lawm.

NPN       106:   19-20, 21-22, 23

Txais: (4a) Huab Tais, thov koj nco txog peb, thov koj ua zoo rau koj haiv neeg.

Peb cov yawg koob puab ib tug mlom nyuj nyob ntawm roob Hos Les;
lawv txhos caug pe hawm tus mlom uas lawv nchuav.
Lawv muab lawv lub koob meej
pauv ib tug duab nyuj uas yog tsiaj noj zaub.

Txais: (4a) Huab Tais, thov koj nco txog peb, thov koj ua zoo rau koj haiv neeg.

Lawv tsis nco qab tus Tswv Ntuj uas tau cawm lawv,
tus tau ua tej yam loj nyob Hais Nkws Tos teb,
tus tau ua tej yam hwj huam txaus qhuas nyob Has teb,
tus tau ua tej yam txaus ntshai nyob ntawm Dej Ntuj Liab.

Txais: (4a) Huab Tais, thov koj nco txog peb, thov koj ua zoo rau koj haiv neeg.

Nws tau hais tias nws yuav ua kom lawv tuag tu noob,
tab sis Mais Xes, tus nws xaiv,
tau cheem nws kom txhob ua raws nws xav,
kom nws thim nws lub siab npau taws xav txo lawv.

Txais: (4a) Huab Tais, thov koj nco txog peb, thov koj ua zoo rau koj haiv neeg.

Zaj Cav lub Moo Zoo:       ZAM  3:   16

Tswv Ntuj hlub lub ntiaj teb npaum no,
nws thiaj muab nws tib leeg tub rau,
Kom xwv txhua tus uas ntseeg nws muaj txoj sia nyob mus li.

Ntawv Moo Zoo:       ZAM  5:   31-47

Yes Xus hais rau cov Yus Das tias:
31 “Yog kuv rov ua tim khawv zeem txog kuv, mas kuv cov lus pov thawj tsis yog lus tseeb. 32 Yog lwm tus ua tim khawv zeem txog kuv, mas kuv paub tias nws cov lus pov thawj zeem txog kuv ntawd yog lus tseeb. 33 Nej xa ib co tub coj xo mus cuag Zam. Zam tau ua tim khawv txog qhov tseeb. 34 Kuv mas kuv tsis nrhiav lus zeem tseeb ntawm tib neeg, kuv hais tej no tsuas yog hais kom nej tau txais kev cawm xwb. 35 Zam yog ib lub teeb cig cig thiab ci ntsa iab, ces nej xyiv fab zoo siab ib lub sij hawm nyob hauv nws qhov pom kev. 36 Tiam sis kuv muaj ib qho tim khawv loj dua Zam qhov. Cov hauj lwm uas Leej Txiv muab rau kuv kom kuv ua, cov hauj lwm uas kuv ua no yeej ua tim khawv txog kuv tias yog Leej Txiv xa kuv tuaj. 37 Leej Txiv uas xa kuv tuaj, nws kuj tau ua tim khawv txog kuv thiab. Nej tsis tau hnov nws lub suab ib zaug, tsis tau pom dua nws lub ntsej muag li, 38 thiab nej kuj tsis muaj nws lo lus nyob hauv nej, vim nej twb tsis ntseeg tus uas nws xa tuaj. 39 Nej tshawb hauv tej ntaub ntawv, vim nej xav tias nej yuav tau txoj sia nyob mus li los ntawm cov ntawv ntawd los. Tab cov ntawv ntawd kiag twb ua tim khawv txog kuv thiab. 40 Tab sis nej tsis xav los cuag kuv kom nej tau txoj sia.
41 Kuv tsis nrhiav kom tau txais koob meej ntawm tib neeg, 42 tsis tas li xwb, kuv paub tias nej tsis muaj ib pluaj siab nyiam Tswv Ntuj nyob hauv nej li. 43 Kuv tuaj ntawm Leej Txiv lub npe tuaj, tab sis nej tsis txais kuv. Hos yog lwm tus nws tuaj ntawm nws tus kheej tuaj, mas nej ho txais nws. 44 Nej yuav ua cas ntseeg tau, yog tias nej tsuas nrhiav kom nej ib leeg rov qhuas ib leeg xwb, nej twb tsis nrhiav lub koob meej uas tuaj ntawm tib tug Tswv Ntuj xwb tuaj li? 45 Nej txhob xav tias kuv yog tus yuav kom nej rau ntawm Leej Txiv; tus yuav kom nej yog Mais Xes, tus uas nej tso siab rau. 46 Vim tias yog nej ntseeg Mais Xes tiag, mas nej kuj yuav ntseeg kuv thiab ; vim Mais Xes tau sau ntawv hais txog kuv. 47 Tiam sis yog nej tsis ntseeg tej lus Mais Xes sau cia, mas nej yuav ua cas ntseeg kuv tej lus?"

TIM 27 LUB 3 HLIS 2020

Hnub Rau Lis Piam Plaub Caij Plaub Caug Xyoo A Nruab Lis Piam Xyoo II

Zaj Nyeem Ib: THOOB TSIB 2: 1A, 12-22

1 Cov neeg siab phem tsis txawj xav raws qhov ncaj, lawv rov sib tham lawv tias :
12 “Peb kav tsij cuab ntxiab tos tus neeg ncaj, vim nws ua kom nyuaj peb, nws tsis nyiam peb tus yam ntxwv, nws cem peb tias peb ua txhaum rau Txoj Cai, thiab nws liam tias peb ua txhaum vim peb tsis ua raws li peb tau kawm. 13 Nws khav tias nws paub Tswv Ntuj, nws rov hu nws ua Huab Tais tus me nyuam. 14 Nws yog ib tug txiav txim rau peb zaj tswv yim, pom nws xwb twb ua rau peb nyuaj siab kawg lawm. 15 Nws lub neej tsis xws luag tej lub neej li, nws tej kev coj noj coj ua txawv luag tej tas nrho. 16 Nws saib peb yog tej yam qis qis, nws txav tawm ntawm peb txoj hau kev cuag li peb yog tej yam qias qias. Nws tshaj tias cov neeg ncaj yuav tau txoj hmoov zoo thaum kawg, nws khav tias Tswv Ntuj yog nws txiv. 17 Peb yuav ntsia saib qhov nws hais puas muaj tseeb; peb sim nws saib nws yuav xaus zoo li cas. 18 Yog tus siab ncaj yog Tswv Ntuj tus tub tiag, mas Tswv Ntuj yuav pab nws xwb, thiab yuav npo nws ntawm cov ntxub nws txhais tes. 19 Peb yuav sim nws, peb ua phem rau nws, peb hiam nws saib, ces peb yuav pom tias nws lub siab zoo npaum li cas, thiab saib nws puas ua siab ntev nyiaj kom dhau. 20 Peb kav tsij txiav txim rau nws kom nws tuag nyob hauv txoj kev poob koob meej ntsuav, vim raws li nws hais, Tswv Ntuj yuav tuaj pab txuag nws.”
21 Cov neeg phem xav tswv yim li ntawd, tab sis lawv yuam kev, lawv lub siab phem ua kom lawv dig muag. 22 Lawv tsis paub txog Tswv Ntuj cov hom phiaj zais ntshis, lawv tsis tso siab tias Ntuj yuav pub nqi zog rau txoj kev ua neeg ntshiab, lawv tsis to taub tias cov ntsuj plig dawb huv yuav tau txais paj tshab.

NPN 34: 17-18, 19-20, 21+23

Txais: (19a) Huab Tais nyob ze cov neeg mob siab lwj plawv.

HUAB TAIS tiv cov neeg ua phem,
nws ua kom ntiaj teb neeg txhob nco qab txog lawv ntxiv.
Thaum cov neeg siab ncaj quaj qw, HUAB TAIS mloog lawv,
nws npo lawv ntawm lawv tej kev ntxhov siab.

Txais: (19a) Huab Tais nyob ze cov neeg mob siab lwj plawv.

HUAB TAIS nyob ze cov neeg tu siab lwj plawv,
nws cawm cov neeg uas muaj lub tswv yim qaug zog.
Tus siab ncaj ntsib kev nyuaj tas kev nyuaj tuaj thiab,
tab sis HUAB TAIS npo nws ntawm txhua yam huv tib si.

Txais: (19a) Huab Tais nyob ze cov neeg mob siab lwj plawv.

Huab Tais zov tus siab ncaj cov pob txha,
nws tsis pub kom muaj ib tug lov li.
HUAB TAIS txhiv nws cov tub txib tus ntsuj plig;
cov tuaj nkaum hauv nws yuav tsis raug txim ib tug li.

Txais: (19a) Huab Tais nyob ze cov neeg mob siab lwj plawv.

Zaj Cav lub Moo Zoo: MT 4: 4b

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Ntawv Moo Zoo: ZAM 7: 1-2, 10, 25-30

1 Dhau qhov ntawd lawm, Yes Xus mus ncig hauv lub xeev Nkas Lis Lais, nws tsis xav mus hauv lub xeev Yus Das, vim cov Yus Das nrhiav kev muab nws tua. 2 Tab sis twb yuav txog cov Yus Das lub hnub nyoog nqaum paj nqaum nruas tsa tsev tsam phooj.
10 Ces thaum Yes Xus cov kwv tij nce mus nqaum paj nqaum nruas tas lawm, nws kuj nce mus thiab, tab sis nws tsis tab meeg mus nws nyiag mus xwb.
25 Muaj ib co neeg nyob Yes Lus Xas Les hais tias : "Tus ntawd tsis yog tus uas lawv nrhiav nws tua lod ? 26 Saib, zaum no nws tab meeg hais lus, luag tsis hais dab tsi rau nws li. Puas yog tias cov thawj coj lees tias nws yog Leej Pleev lawm ne? 27 Tab sis, peb twb paub tias tus neeg no nyob qhov twg tuaj. Hos Leej Pleev, mas thaum nws tuaj, tsis muaj neeg paub tias nws nyob qhov twg tuaj li." 28 Ces Yes Xus uas tab tom qhia nyob hauv lub Tuam Tsev Teev Ntuj thiaj hais nrov nrov tias : "Nej paub kuv thiab nej paub tias kuv nyob qhov twg tuaj; tiam sis tsis yog kuv tuaj kuv xwb, tus Xa kuv tuaj nws yog tus tseeb, nej tsis paub nws; 29 hos kuv paub nws, vim kuv tuaj ntawm nws tuaj, thiab nws yog tus xa kuv tuaj." 30 Lawv xav ntes Yes Xus tam sis ntawd, tab sis tsis muaj leej twg tsa tes tuav nws, vim nws lub sij hawm los tsis tau txog.

TIM      28      LUB      3     HLIS      2020

Hnub Xya Lis Piam Plaub Caij Plaub Caug Xyoo A Nruab Lis Piam Xyoo II

Zaj Nyeem Ib:       YES LES MIAS  11:   18-20

18 HUAB TAIS qhia rau kuv ces kuv thiaj paub; nws yog tus tau ua kom kuv paub txog lawv tej hauj lwm phem.
19 Kuv zoo li tus yaj seej seej uas luag cab mus rau hauv lub tsev tua tsiaj, tiam sis kuv tsis paub tias lawv npaj ua phem rau kuv li no: "Peb muab tus ntoo tshem pov tseg nrog nws lub txiv, peb muab nws txiav tawm ntawm lub teb chaws neeg muaj txoj sia mus, kom tsis muaj leej twg nco qab nws lub npe ntxiv."
20 Tiam sis koj, HUAB TAIS tus kav tsoom tshiab, tus txiav txim raws kev ncaj, tus pom hauv neeg lub tswv yim xav thiab hauv neeg nruab siab, thov koj cia kuv tau pom koj txoj kev ua pauj rau lawv, vim kuv tso siab rau koj tias koj yuav tsa kuv cai.

NPN       7:   2-3, 9BC-10, 11-12

Txais: (2a) HUAB TAIS, kuv tus Tswv Ntuj, kuv tuaj nkaum hauv koj.

HUAB TAIS kuv tus Tswv Ntuj, kuv tuaj nkaum hauv koj.
Thov koj cawm kuv ntawm cov nrhiav kuv tua, thov pab kom kuv dim;
yog koj tsis pab ces kuv yuav raug tsov tom,
tsov yuav muab kuv dua ua daim, yuav tsis muaj tus pab kuv dim li.

Txais: HUAB TAIS kuv tus Tswv Ntuj, kuv tuaj nkaum hauv koj.

Huab Tais, thov koj txiav txim ncaj rau kuv, vim kuv yog neeg ncaj,
thiab vim kuv tsis muaj txhaum nyob hauv kuv.
Thov koj ua kom tus neeg phem txoj kev phem ploj ntais mus,
tiam sis koj txhawb tus neeg ncaj kom nyob ruaj nreb;
Tswv Ntuj siab ncaj, koj yog tus tsom
tau hauv neeg lub siab lub tswv yim.

Txais: HUAB TAIS kuv tus Tswv Ntuj, kuv tuaj nkaum hauv koj.

Tswv Ntuj yog daim leem phiaj thaiv kuv,
nws yog tus cawm cov muaj lub siab ncaj kom dim.
Tswv Ntuj yog tus txiav txim ncaj,
tiam sis nws yuav rau txim hnub dhau hnub.

Txais: HUAB TAIS kuv tus Tswv Ntuj, kuv tuaj nkaum hauv koj.

Zaj Cav lub Moo Zoo:       LK  8:   15

Cov muaj hmoov zoo yog cov muaj ib lub siab loj siab dav khaws lo lus,
lawv txi txiv vim lawv ua siab tawv qhawv coj raws lo lus mus kom kawg.

Ntawv Moo Zoo:       ZAM  7:   40-53

40 Thaum pab neeg ntawd hnov Yes Xus cov lus, muaj ib txhia hais tias : "Tus no yog tus yaj saub tiag !" 41 Ib txhia hais tias : "Yog Leej Pleev!" Lwm cov hais tias : "Leej Pleev puas yuav tuaj Nkas Lis Lais tuaj mas? 42 Ntawv twb tau hais tseg tias Leej Pleev yog Das Vis xeeb ntxwv thiab nws yuav tawm hauv lub zos Npes Les Hes uas yog Das Vis lub zos tuaj no ne ?" 43 Li ntawd, tsoom sid muaj lus tsis sib haum vim Yes Xus. 44 Lawv ib txhia xav ntes Yes Xus kawg, tab sis tsis muaj leej twg tsa taus tes rau nws li.
45 Cov zov keeb rov los cuag cov thawj leej choj thiab cov Fas Lis Xais. Cov no hais rau lawv tias : "Vim li cas nej tsis coj nws los ?" 46 Cov zov keeb teb tias : "Tsis tau muaj dua leej twg txawj hais lus zoo npaum li tus neeg ntawd ib zaug li!" 47 Cov Fas Lis Xais hais rau cov zov keeb tias : "Puas yog nej raug nws haub tau nej lawm thiab ? 48 Nyob hauv cov thawj coj los nyob hauv cov Fas Lis Xais puas muaj ib tug ntseeg txog nws li? 49 Tsuas kawg yog tsoom pej xeem xwb uas yog cov tsis paub Txoj Cai, thiab yog cov tau hmoov phem.” 50 Nis Kos Des Mos, uas yog lawv cov Fas Lis Xais ib tug, yav dhau los nws tau tuaj cuag Yes Xus, nws hais rau lawv tias : 51 "Peb txoj cai puas kheev kom cia li lam muab txim rau ib tug neeg uas peb tsis tau xub hnov nws lus thiab paub tej yam nws ua tso mas?" 52 Lawv teb rau Nis Kos Des Mos tias : "Koj puas yog ib tug nyob Nkas Lis Lais tuaj thiab? Koj soj ntsuam zoo zoo saib mas, koj yuav pom tias tsis muaj ib tug yaj saub sawv hauv Nkas Lis Lais tuaj li os."
53 Ces lawv nyias rov mus nyias tsev tas.

TIM 30 LUB 3 HLIS 2020

Hnub Ob Lis Piam Tsib Caij Plaub Caug Xyoo A Nruab Lis Piam Xyoo II

Zaj Nyeem Ib: DAS NIAS 13: 1-9, 15-17, 19-30, 33-62

1 Nyob Npas Npis Los, muaj ib tug txiv neej hu ua Yuas Kis. 2 Nws yuav ib tug poj niam hu ua Xus Xas Nas, yog Hes Xias tus ntxhais. Nws yog ib tug poj niam zoo nkauj kawg thiab nws hwm Tswv Ntuj zoo, 3 vim nws niam nws txiv yog neeg ncaj, nkawd tu nkawd tus ntxhais hlob nyob hauv Mais Xes Txoj Cai. 4 Yuas Kis yog ib tug neeg nplua nuj heev. Nws muaj ib lub loog xov ncig nws lub tsev. Thiab cov Yus Das kheev tuaj tsham nws coob, vim sawv daws saib nws zoo tshaj tej.
5 Xyoo ntawd, tsoom pej xeem tau xaiv ob tug laus neeg los ua txwj laus txiav txim. Ntawv hais txog ob tug txwj laus ntawd tias: "Txoj kev phem tuaj nyob hauv Npas Npis Los. Yog tuaj ntawm cov txwj laus thiab ntawm cov coj tsoom pej xeem tuaj." 6 Ob tug txwj laus ntawd nquag tuaj nyob hauv Yuas Kis tsev, leej twg muaj plaub muaj ntug hais mas tuaj cuag nkawd nyob hauv.
7 Niaj hnub thaum tav su sawv daws mus tsev tas, mas Xws Xas Nas tawm tuaj yos ua si nyob hauv nws tus txiv lub loog. 8 Ob tug txwj laus ntawd niaj hnub pom Xus Xas Nas mus yos ua si li ntawd, mas nkawd pib muaj siab rau Xus Xas Nas, 9 ces ua kom nkawd lub tswv yim mooj tas, nkawd tsis kam tig ntsej muag mus saib lub Ntuj, tsis nco qab txog tias Ntuj yuav txiav txim rau nkawd li lawm.
15 Nkawd thiaj tos ntshis ub sij hawm zoo. Muaj ib hnub, Xus Xas Nas nrog nws ob tug ntxhais txib tuaj yos ua si hauv lub loog xws li txhia zaus. Sov sov, ces nws xav da dej nyob hauv lub loog. 16 Tsis muaj ib tug neeg li. Tsuas muaj ob tug txwj laus uas twb nkaum nyob ntawd lawm; nkawd nyas Xus Xas Nas. 17 Xus Xas Nas hais rau nws ob tug ntxhais txib tias : "Neb mus nqa cov roj tsw qab tuaj rau kuv. Neb mus mas neb kaw lub rooj loog zoo zoo, kuv xav da dej."
19 Ob tug ntxhais txib nyuam qhuav ploj ntais dua hauv tsev lawm, ob tug txwj laus cia li tawm plaws los tuav Xus Xas Nas thiab hais tias : 20 "Lub rooj loog kaw zoo zoo lawm, tsis muaj neeg yuav pom peb. 21 Wb nyiam nyiam koj, koj nrog wb pw ! Yog koj tsis kam mas wb yuav ntxo tias muaj ib tug hluas nrog koj nyob, vim li ntawd mas koj thiaj kom koj ob tug ntxhais txib rov mus tsev lawm."
22 Xus Xas Nas nroo tias : "Ua cas kuv kev tws tas li! Yog kuv mloog neb mas kuv yuav raug txim tuag. Yog kuv tsis mloog los kuv yuav tsis tau kev dim ntawm neb. 23 Tab sis kuv yeem raug neb liam dua nrog neb ua txhaum nyob ntawm kuv tus Huab Tais xub ntiag !"
24 Ces Xus Xas Nas thiaj quaj qw nrov nrov hu neeg. Ob tug txwj laus kuj qw nthe qw nthe rau Xus Xas Nas thiab. 25 Nkawd ib tug txawm khiav ntsuj mus qhib lub rooj loog. 26 Thaum cov neeg hnov qw li ntawd hauv lub loog tuaj, sawv daws khiav tuaj xyuas saib muaj tus xwm dab tsi. 27 Ces ob tug txwj laus piav nkawd zaj rau cov tub txib mloog. Cov tub txib thiaj tsis xav mloog thiab xu siab vim Xus Xas Nas tsis tau ua dua ib zaug dab tsi phem kom luag tej hais nws.
28 Tag kis los, sawv daws tuaj sib sau nyob hauv Yuas Kis tsev. Ob tug txwj laus kuj tuaj thiab. Nkawd lub siab nco ntsoov txog qhov phem xwb, nkawd xav kom Xus Xas Nas tuag. 29 Nkawd hais rau sawv daws tias : "Nej coj Xus Xas Nas uas yog Hes Xias tus ntxhais thiab yog Yuas Kis poj niam tuaj." Ces lawv mus hu Xus Xas Nas tuaj. 30 Xus Xas Nas nrog nws cov me nyuam, nws cov kwv tij neej tsa huv si tuaj.
33 Xus Xas Nas tsev neeg quaj tas tib si thiab cov neeg nyob ntawd sawv daws kuj quaj. 34 Ob tug txwj laus sawv thiab nkawd tsa tes rau saum Xus Xas Nas taub hau. 35 Xus Xas Nas kua muag poob, nws tsa muag ntsia txog ntuj, nws tso siab lug rau Tswv Ntuj. 36 Ob tug txwj laus thiaj piav tias : "Nag, wb taug taug kev ua si hauv lub loog, wb ob leeg xwb. Wb pom tus poj niam ntawd nrog ob tug ntxhais txib tuaj. Nws kaw rooj loog tas ces nws kom ob tug ntxhais txib rov qab mus tsev. 37 Ces ib tug hluas nraug nkaum nyob ntawd txawm tawm los. Nws thiaj mus nrog tus poj niam ntawd pw. 38 Wb nyob tom ib sab, wb pom nkawd ua phem li ntawd ces wb thiaj khiav mus ntes nkawd. 39 Wb tau pom nkawd ob leeg ua ke tiag, tab sis wb ntes tsis tau tus hluas nraug, vim nws muaj zog dua wb. Nws qhib plho qhov rooj ces nws cia li khiav lawm. 40 Wb ntes tau tus poj niam xwb. Wb nug nws tias tus hluas nraug yog leej twg. Tab sis nws tsis xav qhia wb. Wb tau pom zoo li ntawd."
41 Ob tug ntawd kam yog ob tug txwj laus txiav txim diam, mas sawv daws kuj ntseeg nkawd. Ces lawv txiav txim tias Xus Xas Nas yuav tsum tuag. 42 Xus Xas Nas thiaj hais nrov nrov tias : "Tswv Ntuj nyob mus li, koj paub tas ib puas tsav yam, tej yam zais ntshis los koj paub tas, ib qho tsis tau tshwm sim tuaj los koj twb xub paub lawm. 43 Koj paub tias ob tug ntawd liam ib qho tsis muaj tseeb rau kuv. Nyem no kuv yuav raug kev tuag, txawm tias kuv twb tsis tau ua txhaum xws li lawv lub siab phem xav muab liam rau kuv."
44 Huab Tais hnov Xus Xas Nas lub suab thov. 45 Thaum lawv coj Xus Xas Nas mus rau ntawm thaj chaw lawv yuav tua nws, mas Huab Tais tshoj ib tug tub hu ua Das Nias uas nws muaj ib lub tswv yim ntshiab. 46 Das Nias thiaj qw tias : "Kuv tsis xav koom nrog nej muab tus poj niam ntawd tua." 47 Sawv daws tig ntsia Das Nias, lawv nug nws tias: "Koj xav hais dab tsi li ntawd ?" 48 Ces tus tub hluas sawv, nws hais tias : "Tsoom tub ki His Xas Lais, ua cas nej yuav ruam ua luaj ! Nej muab txim rau ib tug ntxhais His Xas Lais, nej twb tsis tau tshawb kom meej, kom paub hais tias puas muaj tseeb tso li !
49 Nej sawv daws rov qab mus lawm tom tsev txiav txim tso, vim ob tug neeg ntawd liam ib qho tsis tseeb rau tus poj niam ntawd." 50 Sawv daws thiaj rov mus hauv tsev txiav txim. Ob tug txwj laus hais rau Das Nias tias : "Koj los nrog wb zaum ua ke, thiab koj qhia koj lub tswv yim rau wb, vim Ntuj twb pub ib lub hwj chim phim ua txwj laus rau koj lawm."
51 Das Nias hais rau lawv tias : "Nej tsis txhob cia ob tug ntawd nyob ua ke. Kuv yuav nug nkawd ib leeg zuj zus." 52 Ces lawv muab ob tug txwj laus sib cais. Das Nias thiaj hu ib tug los. Das Nias nug nws tias : "Koj yog ib tug niag neeg laus uas laus nyob hauv txoj kev txhaum. Mloog kuv hais koj cov txhaum koj ua kam. 53 Koj txiav txim tsis ncaj, koj muab txim rau cov neeg siab dawb, koj tso cov neeg txhaum mus, txawm tias Huab Tais twb qhia kom txhob muab tus neeg siab ncaj tsis txhaum tua. 54 Yog koj tau pom tseeb tiag no, koj qhia peb saib koj pom nkawd nyob ua ke hauv tsob qab ntoo twg ?" Tus txwj laus teb tias : "Nyob hauv ib tsob qab ntoo txab tsw qab." 55 Das Nias hais tias : "Kuv hais tseeb, koj lo lus dag yuav rov raug koj taub hau. Tswv Ntuj tus tshiab twb tau txais Tswv Ntuj lo lus txiav txim lawm, nws yuav txiav koj ua ob ya."
56 Das Nias tso tus ntawd tawm mus. Nws hu tus ob los, nws hais tias : "Niag neeg caj ces Kas Nas Has, tsis yog caj ces Yus Das ! Poj niam lub cev zoo nkauj ua kom koj tsaus muag, kev ntshaw sib dee ua kom koj lub siab phem tuaj. 57 Koj zes cov ntxhais His Xas Lais tau ntev los lawm. Lawv ntshai koj ces lawv thiaj nrog koj ua txhaum. Tab sis nyem no ib tug ntxhais Yus Das tsis yeem nrog koj ua txhaum ! 58 Koj sim hais rau kuv saib koj pom nkawd nyob hauv tsob qab ntoo twg ?" Nws teb tias : "Nyob hauv ib tsob qab ntoo qhib." 59 Das Nias hais tias : "Kuv hais tseeb, koj lo lus dag yuav rov raug koj taub hau thiab. Tswv Ntuj tus Tshiab tuav ib rab ntaj tos yuav txiav koj ua ob ya thiab, kom neb ob leeg txhob tau nyob ua neeg ntxiv."
60 Ces tas lub txoos qw nrov nrov cav txog Tswv Ntuj uas nws cawm cov neeg tso siab rau nws. 61 Sawv daws tig los cem ob tug txwj laus. Vim Das Nias tau ua kom nkawd lub ncauj rov lees tias nkawd tau dag liam rau lwm tus tiag. 62 Raws li Mais Xes Txoj Cai mas nkawd yuav tsum raug lub txim uas nkawd xav muab rau Xus Xas Nas. Ces lawv muab ob tug txwj laus ntawd tua. Hnub ntawd, Ntuj tau txuag ib tug neeg siab dawb roj ntsha.

Los: DAS NIAS 13: 41C-62

41C Ces tsoom neeg txiav txim tias Xus Xas Nas yuav tsum tuag. 42 Xus Xas Nas thiaj hais nrov nrov tias : "Tswv Ntuj nyob mus li, koj paub tas ib puas tsav yam, tej yam zais ntshis los koj paub tas, ib qho tsis tau tshwm sim tuaj los koj twb xub paub lawm. 43 Koj paub tias ob tug ntawd liam ib qho tsis muaj tseeb rau kuv. Nyem no kuv yuav raug kev tuag, txawm tias kuv twb tsis tau ua txhaum xws li lawv lub siab phem xav muab liam rau kuv."
44 Huab Tais hnov Xus Xas Nas lub suab thov. 45 Thaum lawv coj Xus Xas Nas mus rau ntawm thaj chaw lawv yuav tua nws, mas Huab Tais tshoj ib tug tub hu ua Das Nias uas nws muaj ib lub tswv yim ntshiab. 46 Das Nias thiaj qw tias : "Kuv tsis xav koom nrog nej muab tus poj niam ntawd tua." 47 Sawv daws tig ntsia Das Nias, lawv nug nws tias: "Koj xav hais dab tsi li ntawd ?" 48 Ces tus tub hluas sawv, nws hais tias : "Tsoom tub ki His Xas Lais, ua cas nej yuav ruam ua luaj ! Nej muab txim rau ib tug ntxhais His Xas Lais, nej twb tsis tau tshawb kom meej, kom paub hais tias puas muaj tseeb tso li !
49 Nej sawv daws rov qab mus lawm tom tsev txiav txim tso, vim ob tug neeg ntawd liam ib qho tsis tseeb rau tus poj niam ntawd." 50 Sawv daws thiaj rov mus hauv tsev txiav txim. Ob tug txwj laus hais rau Das Nias tias : "Koj los nrog wb zaum ua ke, thiab koj qhia koj lub tswv yim rau wb, vim Ntuj twb pub ib lub hwj chim phim ua txwj laus rau koj lawm."
51 Das Nias hais rau lawv tias : "Nej tsis txhob cia ob tug ntawd nyob ua ke. Kuv yuav nug nkawd ib leeg zuj zus." 52 Ces lawv muab ob tug txwj laus sib cais. Das Nias thiaj hu ib tug los. Das Nias nug nws tias : "Koj yog ib tug niag neeg laus uas laus nyob hauv txoj kev txhaum. Mloog kuv hais koj cov txhaum koj ua kam. 53 Koj txiav txim tsis ncaj, koj muab txim rau cov neeg siab dawb, koj tso cov neeg txhaum mus, txawm tias Huab Tais twb qhia kom txhob muab tus neeg siab ncaj tsis txhaum tua. 54 Yog koj tau pom tseeb tiag no, koj qhia peb saib koj pom nkawd nyob ua ke hauv tsob qab ntoo twg ?" Tus txwj laus teb tias : "Nyob hauv ib tsob qab ntoo txab tsw qab." 55 Das Nias hais tias : "Kuv hais tseeb, koj lo lus dag yuav rov raug koj taub hau. Tswv Ntuj tus tshiab twb tau txais Tswv Ntuj lo lus txiav txim lawm, nws yuav txiav koj ua ob ya."
56 Das Nias tso tus ntawd tawm mus. Nws hu tus ob los, nws hais tias : "Niag neeg caj ces Kas Nas Has, tsis yog caj ces Yus Das ! Poj niam lub cev zoo nkauj ua kom koj tsaus muag, kev ntshaw sib dee ua kom koj lub siab phem tuaj. 57 Koj zes cov ntxhais His Xas Lais tau ntev los lawm. Lawv ntshai koj ces lawv thiaj nrog koj ua txhaum. Tab sis nyem no ib tug ntxhais Yus Das tsis yeem nrog koj ua txhaum ! 58 Koj sim hais rau kuv saib koj pom nkawd nyob hauv tsob qab ntoo twg ?" Nws teb tias : "Nyob hauv ib tsob qab ntoo qhib." 59 Das Nias hais tias : "Kuv hais tseeb, koj lo lus dag yuav rov raug koj taub hau thiab. Tswv Ntuj tus Tshiab tuav ib rab ntaj tos yuav txiav koj ua ob ya thiab, kom neb ob leeg txhob tau nyob ua neeg ntxiv."
60 Ces tas lub txoos qw nrov nrov cav txog Tswv Ntuj uas nws cawm cov neeg tso siab rau nws. 61 Sawv daws tig los cem ob tug txwj laus. Vim Das Nias tau ua kom nkawd lub ncauj rov lees tias nkawd tau dag liam rau lwm tus tiag. 62 Raws li Mais Xes Txoj Cai mas nkawd yuav tsum raug lub txim uas nkawd xav muab rau Xus Xas Nas. Ces lawv muab ob tug txwj laus ntawd tua. Hnub ntawd, Ntuj tau txuag ib tug neeg siab dawb roj ntsha.

NPN 23: 1-3A, 3B-4, 5, 6

Txais: (4ab) Txawm kuv taug kev hauv ib lub hav tsaus ntuj nti,
kuv tsis ntshai dab tsi phem, vim koj nyob ntawm kuv ib sab.

HUAB TAIS yog tus tswv zov yaj saib kuv,
kuv tsis tshaib tsis nqhis dab tsi.
Nws tso kuv so nyob hauv tej tshav zaub mos;
nws coj kuv mus nyob ze tej tus dej tus yees,
nws ntxiv siav rau kuv tus ntsuj plig.

Txais: Txawm kuv taug kev hauv ib lub hav tsaus ntuj nti,
kuv tsis ntshai dab tsi phem, vim koj nyob ntawm kuv ib sab.

Nws coj kuv mus taug txoj kev ncaj vim nws lub npe
Tab yog kuv taug kev hauv lub hav tsaus ntuj nti,
kuv tsis ntshai dab tsi phem, vim koj nyob rawv ntawm kuv ib sab,
koj rab qws, thiab koj rab pas nrig pab kuv ua siab loj.

Txais: Txawm kuv taug kev hauv ib lub hav tsaus ntuj nti,
kuv tsis ntshai dab tsi phem, vim koj nyob ntawm kuv ib sab.

Koj npaj ib roog qav rau ntawm kuv xub ntiag,
rau cov neeg ntxub kuv qhov muag pom ntsoov,
koj muab roj tsw qab pleev kuv taub hau.
Kuv lub ntim puv cawv phwj yaws.

Txais: Txawm kuv taug kev hauv ib lub hav tsaus ntuj nti,
kuv tsis ntshai dab tsi phem, vim koj nyob ntawm kuv ib sab.

Kev tau qhov zoo thiab kev hlub caum rawv kuv
niaj hnub hauv kuv lub neej;
Kuv lub chaw nyob yog nyob hauv Huab Tais lub tsev
Mus tas lub caij tom ntej.

Txais: Txawm kuv taug kev hauv ib lub hav tsaus ntuj nti,
kuv tsis ntshai dab tsi phem, vim koj nyob ntawm kuv ib sab.

Zaj Cav lub Moo Zoo: ES XES KIAS 33: 11

Huab Tais hais tias: Kuv tsis zoo siab pom tus neeg phem tuag,
tiam sis kuv xav pom nws hloov siab tig los ua zoo, ces nws thiaj yuav tau txoj sis.

Ntawv moo Zoo: Zam 8: 1-11

1 Ntawm Yes Xus, mas nws mus rau pem lub Roob Txiv Ntoo Roj. 2 Tiam sis thaum kaj ntug txoog, Yes Xus rov mus hauv lub Tuam Tsev Teev Ntuj dua. Tas tsoom pej xeem tuaj cuag nws. Yes Xus zaum, nws thiaj pib qhia lawv. 3 Cov kws ntawv ntshiab thiab cov Fas Lis Xais coj ib tug poj niam tuaj rau Yes Xus : luag ntes nws thaum tab tom deev hluas nraug. Lawv coj tus poj niam tuaj sawv ntsug hauv nruab nrab. 4 Lawv hais rau Yes Xus tias : "Xib Hwb, tus poj niam no, luag pom nws tab tom deev hluas. 5 Nyob hauv Txoj Cai, mas Mais Xes kom peb xuas pob zeb txawb cov poj niam zoo li ntawd. Koj ne, koj hais li cas ?" 6 Lawv hais li ntawd vim lawv xav sim Yes Xus, lawv thiaj li tau kev mus kom nws. Tab sis Yes Xus khoov, nws xuas ntiv tes sau ntawv rau hauv pem teb. 7 Lawv pheej rov nug tsis tseg, ces Yes Xus sawv ntsug, nws hais rau lawv tias : "Nyob hauv nej, yog leej twg tsis muaj txhaum, mas kom nws xub txawb ib lub pob zeb rau tus poj niam ntawd." 8 Ces Yes Xus rov khoov, nws rov sau ntawv rau hauv pem teb. 9 Thaum lawv hnov hais li ntawd, lawv nyias rov mus nyias zuj zus. Cov xub mus yog cov laus dua cov. Tshuav Yes Xus tib leeg thiab tus poj niam uas sawv ntawm nws xub ntiag lawm xwb. 10 Yes Xus rov sawv ntsug, nws hais rau tus poj niam tias : "Tus poj niam, lawv dua twg tas lawm ? Tsis muaj leej twg muab txim rau koj lod ?" 11 Tus poj niam teb tias : "Huab Tais, tsis muaj leej twg li." Ces Yes Xus hais tias : "Kuv kuj tsis muab txim rau koj thiab. Koj rov mus, txij no mus koj txhob ua txhaum ntxiv lawm mog."

TIM 31 LUB 3 HLIS 2020

Hnub Peb Lis Piam Tsib Caij Plaub Caug Xyoo B Nruab Lis Piam Xyoo II

Zaj Nyeem Ib: XAM PHAJ 21: 4-9

4 Cov His Xas Lais sawv kev ntawm lub roob Hoj mus, lawv taug txoj kev mus rau lub hiav txwv Liab, lawv lug ncig Es Dos teb mus. Thaum lawv mus txog ib tog kev, tsoom pej xeem npau taws. 5 Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb los kom peb los tuag hauv teb chaws suab puam ? Tsis muaj mov noj, tsis muaj dej haus li, peb dhuav noj cov niag mov ntawd dhau lawm !" 6 Tswv Ntuj thiaj tso ib cov nab muaj taug hluav taws tuaj tom lawv. Cov nab ntawd tom cov His Xas Lais tuag coob leej. 7 Tsoom pej xeem mus hais rau Mais Xes tias : "Peb ua txhaum lawm vim peb tau cem HUAB TAIS thiab cem koj. Koj thov HUAB TAIS rau peb, kom nws tshem cov nab ntawd khiav mus deb peb." Ces Mais Xes thiaj thov Ntuj rau lawv. 8 HUAB TAIS hais rau Mais Xes tias : "Koj nchuav ib tug nab muaj taug hluav taws, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag." 9 Mais Xes thiaj muab tooj los nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.

NPN 102: 2-3, 16-18, 19-21

Txais: (2) HUAB TAIS, thov koj mloog kuv zaj thov ntuj
thiab cia kuv lub suab nrov tuaj txog koj !

HUAB TAIS, thov koj mloog kuv zaj thov ntuj
thiab cia kuv lub suab nrov tuaj txog koj !
Thov koj txhob thaiv ntsej muag rau kuv
thaum kuv raug kev nyuaj siab.
Thov koj tig pob ntseg mloog kuv,
hnub kuv hu txog koj, thov koj tsuag tsuag teb kuv.

Txais: HUAB TAIS, thov koj mloog kuv zaj thov ntuj
thiab cia kuv lub suab nrov tuaj txog koj !

Cov kuj cuab yuav hawm koj lub npe, HUAB TAIS
cov vaj nyob ntiaj teb yuav hawm koj lub koob meej,
Thaum HUAB TAIS rov txhim Xis Yoos,
nws yuav tawm tuaj nyob hauv nws lub hwj chim,
nws yuav tig los mloog cov neeg txom nyem tej lus thov,
nws yuav tsis ntxub lawv zaj thov ntuj.

Txais: HUAB TAIS, thov koj mloog kuv zaj thov ntuj
thiab cia kuv lub suab nrov tuaj txog koj !

Nej sau qhov no cia rau cov tub ki uas tseem yuav yug los,
ces cov phaj neeg nws tsim los tshiab yuav cav txog Huab Tais tias:
“HUAB TAIS nyob saum nws lub tsev ntshiab dauv muag los saib;
nws nyob saum txheej ntuj siab ntsia rau ntiaj teb,
Kom tau mloog cov neeg nyob txim lub suab ntsaj,
kom tau tso cov yuav raug kev tuag dim.

Txais: HUAB TAIS, thov koj mloog kuv zaj thov ntuj
thiab cia kuv lub suab nrov tuaj txog koj !

Zaj Cav lub Moo Zoo:

Lub noob nplej yog Tswv Ntuj lo lus, leej Pleev yog tus tseb nplej;
txhua leej uas mus cuag nws yuav muaj txoj sia nyob mus li.

Ntawv Moo Zoo: ZAM 8: 21-30

21 Yes Xus tseem rov hais rau cov Fas Lis Xais tias : "Kuv yuav ncaim mus, nej yuav nrhiav kuv, tab sis nej yuav tuag nyob hauv nej qhov txhaum. Qhov chaw kuv mus, mas nej tuaj tsis tau." 22 Ces cov Yus Das hais tias : "Puas yog nws yuav rov tua nws, nws thiaj hais tias : Qhov chaw kuv mus, mas nej tuaj tsis tau ?" 23 Yes Xus hais rau lawv tias : "Nej yog cov nyob hauv txheej qis no, kuv yog tus nyob saum txheej siab. Nej yog ntiaj teb no tug, kuv tsis yog ntiaj teb no tug. 24 Kuv thiaj hais rau nej tias nej yuav tuag nyob hauv nej cov txhaum, vim yog nej tsis ntseeg tias kuv yog tus uas Nyob, mas nej yuav tuag nyob hauv nej cov txhaum." 25 Lawv hais rau Yes Xus tias : "Koj yog leej twg ?" Yes Xus hais rau lawv tias : "Kuv yog tus kuv ib txwm hais rau nej los lawm. 26 Kuv muaj ntau yam hais txog nej thiab muaj chaw txiav txim ntau qhov rau nej. Tiam sis tus Xa kuv tuaj yog tus tseeb, qhov kuv hnov ntawm nws los kuv hais rau lub qab ntuj neeg paub." 27 Lawv tsis to taub tias Yes Xus hais txog Leej Txiv rau lawv. 28 Yes Xus thiaj hais tias : "Thaum nej muab Neeg Leej Tub tsa siab lawm, mas nej yuav pom tias kuv yog tus uas Nyob, thiab tsis muaj ib yam uas yog kuv ua kuv xwb, tiam sis yam uas Leej Txiv qhia rau kuv mas kuv hais yam ntawd. 29 Tus Xa kuv tuaj nws nrog nraim kuv, nws tsis cia kuv nyob kuv ib leeg, vim kuv ua ntxim nws siab tas mus li.” 30 Thaum Yes Xus hais cov lus ntawd, muaj coob leej ntseeg txog nws.

TIM 1 LUB 4 HLIS 2020

Hnub Plaub Lis Piam Tsib Caij Plaub Caug Xyoo A Nruab Lis Piam Xyoo II

Zaj Nyeem Ib: DAS NIAS 3: 14-20, 91-92, 95

14 Tus vaj Nas Npws Kos Dos Nos Xos nug tias : "Sas Nras, Mes Sas thiab As Npes Nes Nkos, puas muaj tseeb tias nej tsis kam tsob hwb kuv cov tswv ntuj, thiab nej tsis kam kim caug pe tus mlom kub uas kuv tau tsa? 15 Zaum no nej yuav tsum npaj zoo zoo, yog nej hnov raj kub twg nrov, hnov luag tshuab raj tshuab xyu, ntaus thaj cheej thiab hnov tas txhia lub suab paj nruag nrov, mas nej yuav txhos caug pe hawm tus mlom uas kuv tau ua, yog nej tsis pe mas tam sim ntawd muaj neeg yuav muab nej pov rau hauv lub qhov txos cig liab ploog. Ces saib tus Tswv Ntuj twg yuav tuaj cawm nej ntawm kuv txhais tes tau ?"
16 Sas Nras, Mes Sas, thiab As Npes Nes Nkos lawv teb rau tus vaj tias : "Tsis tas peb yuav nrog koj sib cav txog qhov koj nug no. 17 Aub ! Vaj ! Yog peb tus Tswv Ntuj, tus uas peb tsob hwb, nws pab tau peb dim ntawm lub qhov txos cig liab ploog thiab ntawm koj txhais tes, mas yeej xav thov kom nws pab peb dim xwb. 18 Tab yog nws tsis pab los, koj yuav tsum paub tias peb yeej tsis tsob hwb koj tus tswv ntuj thiab peb tsis kam pe tus mlom koj tau tsa li !" 19 Tus vaj Nas Npws Kos Dos Nos Xos npau taws heev heev ua ntsej muag hloov tas liab tag rau Sas Nras, Mes Sas thiab As Npes Nes Nkos lawv. Nws txib neeg kom mus rauv taws hauv lub qhov txos kom kub tshaj txhua zaus xya npaug ntxiv. 20 Thiab nws txib cov neeg muaj zog tshaj nyob hauv nws pab tub rog kom lawv muab Sas Nras, Mes Sas thiab As Npes Nes Nkos pav thiab muab pov rau hauv lub qhov txos cig liab ploog.
91 Tus vaj Nas Npws Kos Dos Nos Xos xav tsis thoob li, nws sawv tsees, nws hais rau nws cov tub tuav xam tias : "Ua cas, peb twb tau muab peb tug hluas pav thiab pov rau hauv hluav taws lawm sad, los tsis yog ?" Lawv teb tias : "Aub Vaj ! Yog kawg !" 92 Tus vaj hais tias : "Ua cas kuv pom plaub tug neeg tsis pav li, lawv mus mus los los hauv hluav taws, lawv tsis raug mob li. Tus plaub zoo li yog Tswv Ntuj ib tug tub."
95 Nas Npws Kos Dos Nos Xos thiaj tsa suab hlo hais tias : "Sas Nras, Mes Sas thiab As Npes Nes Nkos tus Huab Tais nto koob meej; nws tau xa nws tus tshiab tuaj cawm nws cov tub txib, uas lawv tso siab rau nws, lawv tsis kam mloog tus vaj lo lus ceeb toom, lawv tuaj yeem cia lawv lub cev raug puas dua mus tsob hwb thiab teev lwm tus tswv ntuj uas tsis yog lawv tus Tswv Ntuj.”

NPN: DN 3: 52, 53, 54, 55, 56

Txais: (52b) Thov kom Tswv Ntuj muaj hwj chim thiab nto koob meej mus li!

Kom koj nto koob meej, HUAB TAIS, peb phaj txiv tus Tswv Ntuj,
tus tsim nyog qhuas thiab muab saib siab tshaj tas txhua yam mus li;
kom koj lub npe ntshiab muaj hwj chim nto koob meej,
yog lub npe tsim nyog qhuas thiab muab saib siab tshaj
tas txhua yam tas mus li.

Txais: (52b) Thov kom Tswv Ntuj muaj hwj chim thiab nto koob meej mus li!

Kom koj nto koob meej nyob hauv lub tuam tsev muaj koj lub hwj chim ntshiab,
koj yog tus tsim nyog qhuas thiab muab saib siab tshaj tas txhua yam mus li.

Txais: (52b) Thov kom Tswv Ntuj muaj hwj chim thiab nto koob meej mus li!

Kom koj nto koob meej nyob saum lub theej kiab hauv koj lub ceeb tsheej,
koj yog tus tsim nyog qhuas thiab muab saib siab tshaj tas txhua yam mus li.

Txais: (52b) Thov kom Tswv Ntuj muaj hwj chim thiab nto koob meej mus li!

Kom koj nto koob meej, koj tus zaum saum cov kes lus npis,
koj ntsia mus tsom tau hauv cov qab thu tob,
koj yog tus tsim nyog qhuas thiab muab saib siab tshaj tas txhua yam mus li.

Txais: (52b) Thov kom Tswv Ntuj muaj hwj chim thiab nto koob meej mus li!

Kom koj nto koob meej nyob saum lub qab ntuj ntsuab saum ntuj
koj yog tus tsim nyog qhuas thiab muaj hwj chim tas mus li .

Txais: (52b) Thov kom Tswv Ntuj muaj hwj chim thiab nto koob meej mus li!

Zaj Cav lub Moo Zoo: LK 8: 15

Cov muaj hmoov zoo yog cov muaj ib lub siab loj siab dav khaws lo lus,
lawv txi taus txiv vim lawv ua siab tawv qhawv coj raws lo lus mus kom kawg.

Ntawv Moo Zoo: ZAM 8: 31-42

31 Yes Xus hais rau cov Yus Das uas ntseeg nws tias : "Yog nej nyob ruaj hauv kuv lo lus, mas nej thiaj yog kuv cov tseem thwj tim tiag. 32 Nej yuav paub qhov tseeb, ces txoj kev tseeb yuav ua kom nej ua neeg twj lij." 33 Lawv hais rau Yes Xus tias : "Peb yog Has Nplas Has cov xeeb ntxwv, peb tsis tau ua dua leej twg qhev ib zaug, ua cas koj thiaj hais tias : Nej yuav ua neeg twj lij ?" 34 Yes Xus teb rau lawv tias : "Kuv hais qhov muaj tseeb tiag rau nej tias : Leej twg ua txhaum, nws yog kev txhaum tus qhev. 35 Tus qhev tsis tau nyob hauv lub tsev neeg tas nws sid, hos tus tub thiaj tau nyob tas mus li. 36 Yog Leej Tub ua kom nej twj lij, mas nej thiaj ua tsheej neeg twj lij tiag. 37 Kuv yeej paub tias nej yog Has Nplas Has cov xeeb ntxwv, tab sis nej nrhiav kev muab kuv tua, vim kuv lo lus txeem tsis tau rau hauv nej. 38 Kuv hais yam uas kuv pom ntawm Leej Txiv, hos nej ua yam nej hnov ntawm nej txiv." 39 Lawv teb rau Yes Xus tias : "Peb txiv yog Has Nplas Has." Yes Xus hais rau lawv tias : "Yog tias nej yog Has Nplas Has cov me nyuam, mas nej yuav ua Has Nplas Has cov hauj lwm. 40 Tab sis nej nrhiav kev tua kuv, uas yog ib tug hais qhov tseeb uas kuv hnov ntawm Tswv Ntuj los. Has Nplas Has tsis tau ua li ntawd. 41 Nej ua nej txiv cov hauj lwm." Lawv hais rau Yes Xus tias : "Peb tsis yog me nyuam tsaub : Peb tsuas muaj ib leeg txiv xwb: Yog Tswv Ntuj." 42 Yes Xus hais rau lawv tias : “Yog tias Tswv Ntuj yog nej Txiv tiag, mas nej yuav nyiam kuv, vim kuv tawm ntawm Tswv Ntuj los thiab kuv tuaj ntawm Tswv Ntuj tuaj rau ntawm no; tsis yog kuv tuaj kuv, yog nws xa kuv tuaj.”

TIM 2 LUB 4 HLIS 2020

Hnub Tsib Lis Piam Tsib Caij Plaub Caug Xyoo A Nruab Lis Piam Xyoo II

Hwm LN Francis nyob Paola

Zaj Nyeem Ib: HAUV PAUS 17: 3-9

3 Ces Has Nplas txhos caug khoov ntsej muag ti av pe. Tswv Ntuj hais rau Has Nplas tias: 4 "Ntawm kuv mas kuv nrog koj cog lus li no : Koj yuav ua txiv rau ntau haiv neeg. 5 Luag yuav tsis hu koj ua Has Nplas ntxiv; koj yuav hu ua Has Nplas Has, vim kuv muab koj los ua txiv rau ntau haiv neeg. 6 Kuv yuav ua kom koj huam vam ntau, yuav ua kom koj ciaj ua ntau haiv neeg; thiab ntau tus vaj yuav sawv hauv koj los. 7 Kuv yuav tsa kom muaj ib txog kev cog lus nyob ntawm kuv thiab ntawm koj, kuv nrog koj cog lus thiab nrog haiv neeg uas los tom qab koj cog ib lo lus nyob mus li txheej dhau txheej tiam dhau tiam tias kuv yuav ua koj tus Tswv Ntuj thiab ua haiv neeg uas los tom qab koj tus Tswv Ntuj. 8 Kuv yuav muab lub teb chaws uas koj nyob ntawm no, yog tas nrho lub teb chaws Kas Nas Has, rau koj thiab rau haiv neeg uas los tom qab koj nyob mus tiam dhau tiam ua nej tug tas mus li ib txhis; thiab kuv yuav ua nej tus Tswv Ntuj."
9 Tswv Ntuj tseem hais rau Has Nplas Has tias : "Ntawm koj mas koj yuav ua raws li kuv lo lus uas kuv nrog koj cog, koj thiab haiv neeg uas los tom qab koj, nej yuav ua raws nraim li ntawd mus tiam dhau tiam.”

NPN 105: 4-5, 6-7, 8-9

Txais: (8a) Huab Tais nco ntsoov nws lo lus nws tau cog tas mus li.

Nej nrhiav Huab Tais nyob hauv nws lub zog,
nej nrhiav kom tau tsob hwb nws mus li.
Nej nco ntsoov txog cov hwj huam nws tau ua,
nco ntsoov nws cov hauj lwm muaj hwj chim,
thiab cov lus txiav txim nws lub ncauj tau hais.

Txais: Huab Tais nco ntsoov nws lo lus nws tau cog tas mus li.

Has Nplas Has tsoom xeeb ntxwv, Huab Tais cov tub txib,
Yas Kos cov tub, uas yog nws pab neeg nws tau xaiv!
Huab Tais yog peb tus Tswv Ntuj,
tas ntiaj teb yuav raws li nws tej lus txiav txim.

Txais: Huab Tais nco ntsoov nws lo lus nws tau cog tas mus li.

Nws nco ntsoov tas mus li nws lo lus nws tau cog,
yog nws lo lus cog ruaj nreb rau txhiab tiam neeg.
Yog lo lus nws xub nrog Has Nplas Has cog,
thiab nws rov zeem tseeb rau His Xas Has.

Txais: Huab Tais nco ntsoov nws lo lus nws tau cog tas mus li.

Zaj Cav lub Moo Zoo: NPN 95: 8

Yog hnub no nej hnov nws lub suab,
nej tsis txhob ua nej lub siab tawv ncauj.

Ntawv Moo Zoo: ZAM 8: 51-59

Yes Xus hais rau cov neeg Yus Das tias:
51 Kuv hais qhov muaj tseeb tiag rau nej : Leej twg khaws kuv lo lus, mas nws yuav tsis pom txoj kev tuag ib zaug li." 52 Ces cov Yus Das hais rau Yes Xus tias : "Zaum no peb paub tseeb tias koj yog neeg raug dab lawm. Has Nplas Has tuag lawm, cov yaj saub kuj tuag lawm, hos koj hais tias : 'Yog leej twg khaws kuv lo lus, mas nws yuav tsis saj txoj kev tuag ib zaug li.' 53 Ua li koj puas loj dua peb txiv Has Nplas Has uas nws tuag lawd ? Los loj dua cov yaj saub uas kuj tuag lawm thiab ? Koj khav tias koj yog leej twg tiag?" 54 Yes Xus teb tias : "Yog kuv rov cav txog kuv lub koob meej, mas kuv lub koob meej tsis muaj nqi dab tsi. Tab sis, tus cav txog kuv lub koob meej yog kuv Txiv, yog tus uas nej hais txog tias : 'Nws yog peb tus Tswv Ntuj.' 55 Tab sis nej tsis paub nws, hos kuv paub nws. Yog kuv hais tias kuv tsis paub nws, mas kuv yog ib tug neeg dag ib yam li nej. Tab sis kuv paub nws thiab kuv khaws nws lo lus. 56 Nej txiv Has Nplas Has zoo siab kawg vim nws tau pom kuv lub hnub nyoog lawm; nws tau pom, ces nws txaus siab lawm." 57 Cov Yus Das hais rau Yes Xus tias : "Koj twb tsis tau muaj tsib caug xyoo, koj txawm siv pom Has Nplas Has lawm lod?" 58 Yes Xus hais rau lawv tias : "Kuv hais qhov muaj tseeb tiag rau nej tias : Thaum Has Nplas Has tsis tau yug los, kuv twb Nyob lawm." 59 Ces lawv khaws pob zeb txawb rau Yes Xus, tab sis Yes Xus mus tsiv nraim, thiab nws tawm hauv lub Tuam Tsev Teev Ntuj mus lawm.

TIM 3 LUB 4 HLIS 2020

Thawj Hnub Rau Lis Piam Tsib lub Caij Plaub Caug Xyoo A Nruab Lis Piam Xyoo II

Zaj Nyeem Ib: YES LES MIAS 20: 10-13

10 Kuv tau hnov coob leej tej lus cem lus yws, thiab tau kev ntshai loj tas nrho nyob txhua qhov chaw: “Kom nws kiag! Peb mus kom nws!" Cov uas thaud yog kuv phooj ywg, lawv nyas ntshis saib kuv puas ua ib qho yuam kev. Lawv hais tias : "Nyaj tej zaud, nws yuav swb rau sawv daws tej lus haub lus ntxias, ces peb yuav yeej nws thiab peb yuav tau kev ua pauj." 11 Tab sis HUAB TAIS nrog nraim kuv zoo li ib tug peeb zeej zog nchav, ces kuv cov yeeb ncuab yuav ntog, lawv yuav swb loj; lawv yuav xav tsis thoob tias ua cas lawv swb; lawv yuav poob ntsej muag mus ib txhiab ib txhis tsis muaj hnub yuav tsis nco qab tau. 12 HUAB TAIS kav tsoom tshiab, koj tsom tau hauv tus neeg siab ncaj, koj pom tau hauv neeg nruab siab nruab plawv, thov cia kuv pom koj ua pauj rau lawv, vim kuv tau tso kuv txoj cai rau koj tes. 13 Nej hu nkauj rau HUAB TAIS, nej cav lus zoo txog HUAB TAIS, vim nws tau cawm tus neeg txom nyem txoj sia ntawm cov neeg phem txhais tes.

NPN 18: 2-3A, 3BC-4, 5-6, 7

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

HUAB TAIS, kuv nyiam koj, koj yog kuv lub zog.
HUAB TAIS yog kuv phab tsua, kuv lub yeej ntsa zeb,
nws yog tus cawm kuv dim.

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

Kuv tus Tswv Ntuj yog kuv lub tsua nkaum, kuv daim leem phiaj thaiv,
yog lub zog cawm kuv, yog kuv lub yeej ntsa zeb!
Kuv tau cav tias: Huab Tais nto koob meej!
ces kuv dim plaws ntawm kuv cov yeeb ncuab.

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

Cov nplaim dej coj kev tuag loj ntas tuaj ncig kuv,
cov dej sab siv huam loj tuaj nyab kuv,
cov hlua hauv tub tuag teb tuaj zoj kuv,
kev tuag cov vas tuaj puav kuv tas.

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

Kuv nyuaj siab, kuv hu txog Huab Tais tuaj pab,
kuv quaj qw hu txog kuv tus Tswv Ntuj;
Nws nyob hauv nws lub tuam tsev hnov kuv lub suab,
kuv lub suab quaj nrov txog nws pob ntseg.

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

Zaj Cav lub Moo Zoo: ZAM 6: 63C, 68C

Huab Tais, koj cov lus yog ntsuj plig thiab yog txoj sia;
koj muaj cov lus pub txoj sia nyob mus li.

Ntawv Moo Zoo: ZAM 10: 31-42

31 Cov Yus Das rov nqa dua ib co pob zeb los yuav txawb rau Yes Xus. 32 Yes Xus teb rau lawv tias : "Kuv tau ua ntau yam hauj lwm zoo tuaj ntawm kuv Txiv tuaj rau nej pom. Tim qhov twg, nej thiaj xav txawb pob zeb rau kuv ?" 33 Cov Yus Das teb rau Yes Xus tias : "Peb txawb pob zeb rau koj, tsis yog tim ib txog hauj lwm zoo, yog tim koj thuam Ntuj; koj tsuas yog ib tug neeg xwb, tsis kav, koj muab koj tsa ua Tswv Ntuj." 34 Yes Xus teb rau lawv tias : "Nyob hauv nej Txoj Cai, puas muaj lus sau cia tias : ‘Kuv hais tias : nej yog ib co tswv ntuj ?’ 35 Yog tias Ntawv twb hu cov neeg txais Tswv Ntuj lo lus ua tswv ntuj, thiab peb yuav rhuav tsis tau cov Ntawv, 36 ua cas tus uas Leej Txiv qee nws thiab xa nws tuaj rau lub qab ntuj neeg, nej ho hais tias : 'Koj thuam Ntuj' - vim kuv hais tias kuv yog Tswv Ntuj Leej Tub? 37 Yog tias kuv tsis ua kuv Txiv cov hauj lwm, mas nej txhob ntseeg kuv. 38 Tab sis yog kuv ua kuv Txiv cov hauj lwm, mas txawm tias nej tsis ntseeg kuv, los nej yuav tsum ntseeg cov hauj lwm, kom xwv nej thiaj paub thiab to taub tias Leej Txiv nyob hauv kuv, thiab kuv nyob hauv Leej Txiv." 39 Ces lawv rov qab xav ntes Yes Xus dua, tab sis nws khiav dim ntawm lawv tes mus lawm.
40 Yes Xus rov hla mus rau sab dej Yos Las Das tim ub, ntawm thaj chaw uas yav dhau los Zam ua kab ke ntxuav; ces Yes Xus nyob ntawd. 41 Muaj neeg coob tuaj cuag Yes Xus, lawv hais tias : "Zam tsis tau ua ib lub cim li, tab sis txhua yam uas Zam tau hais txog tus neeg no, mas muaj tseeb tas huv tib si." 42 Ces muaj coob leej ntseeg txog Yes Xus nyob ntawd.

TIM 4 LUB 4 HLIS 2020

Thawj Hnub Xya Lis Piam Tsib Caij Plaub Caug Xyoo A Nruab Lis Piam Xyoo II

Hwm LN Isidore, Tswv Qhia ua Kws cov Txuj Ntshiab

Zaj Nyeem Ib: EXK 37: 21-28

21 Koj yuav hais rau lawv tias : "HUAB TAIS Tswv Ntuj hais li no : ‘Kuv yuav mus coj cov His Xas Lais uas mus nyob xyaw lwm haiv neeg lawm rov los, kuv yuav sau lawv nyob tas qhov txhia chaw rov los rau hauv lawv thaj av. 22 Kuv yuav muab lawv ua ib haiv neeg xwb nyob hauv lub teb chaws, nyob saum cov roob His Xas Lais, ces ib tug vaj xwb yuav ua sawv daws tus vaj. Lawv yuav tsis sib faib ua ob haiv neeg ib zaig ntxiv thiab lawv yuav tsis nyob ob lub teb chaws ib zaug ntxiv lawm.
23 Lawv yuav tsis rov ua kom lawv qias ntxiv, lawv yuav tso lawv tej kev teev dab teev mlom thiab tej kev ua phem los ua txhaum tseg. Kuv yuav cawm lawv ntawm lawv txoj kev fav xeeb thiab kev txhaum, thiab kuv yuav ntxuav lawv kom lawv huv tuaj. Ces lawv yuav ua kuv haiv neeg, kuv yuav ua lawv tus Tswv Ntuj. 24 Kuv tus tub txib Das Vis yuav ua vaj kav lawv, ces yuav muaj ib tug tswv zov yaj saib sawv daws xwb. Lawv yuav mloog kuv tej kev cai lij choj, thiab yuav coj kuv Txoj Cai kom zoo. 25 Lawv yuav nyob txawm hauv lub teb chaws uas nej cov yawg koob tau nyob, uas yog kuv tau muab rau kuv tus tub txib Yas Kos. Lawv thiab lawv cov me nyuam thiab lawv cov me nyuam cov me nyuam yuav nyob ntawd mus li tsis muaj caij kawg. Kuv tus tub txib Das Vis yuav ua lawv tus vaj tas mus li tsis txawj kawg.
26 Kuv yuav nrog lawv cog lus nyob hauv txoj kev thaj yeeb, yuav yog ib txog kev cog lus nyob tas mus li. Kuv yuav foom hmoov zoo rau lawv, yuav ua kom lawv huam vam mus, thiab kuv yuav tsa kuv lub tsev ntshiab nyob nruab nrab hauv lawv mus li. 27 Kuv qhov chaw nyob yog nyob nrog lawv. Kuv yuav yog lawv tus Tswv Ntuj. Lawv yuav yog kuv haiv neeg. 28 Ces cov kuj cuab thiaj yuav paub tias kuv, HUAB TAIS, yog tus ua kom His Xas Lais ntshiab tuaj, vim kuv lub tsev ntshiab yuav nyob nruab nrab hauv lawv mus li."

NPN: YLM 31: 10, 11-12ABCD, 13

Txais: (10d) Huab Tais yuav saib ntsoov peb xws li tus tswv zov yaj saib nws pab yaj.

Cov haiv neeg, nej mloog Huab Tais lo lus,
nej muab tshaj tawm rau cov pov txwv nyob deb hnov, nej hais tias:
Tus uas tau cais kom His Xas Lais tawg ua ntau pab,
zaum no nws sau lawv rov los nyob ua ke,
Nws saib lawv nraim xws li tus tswv zov yaj saib nws pab yaj.

Txais: (10d) Huab Tais yuav saib ntsoov peb xws li tus tswv zov yaj saib nws pab yaj.

Huab Tais yuav rov txhiv Yas Kos,
nws yuav npo Yas Kos ntawm lawv tus yeeb ncuab txhais tes.
Lawv yuav ke qw ke taug kev nce lub roob Xis Yoos,
lawv yuav tuaj sis dug tuaj mus txais Huab Tais txoj
koob hmoov zoo: Yog nplej, cawv, roj, yaj thiab nyuj.

Txais: (10d) Huab Tais yuav saib ntsoov peb xws li tus tswv zov yaj saib nws pab yaj.

Cov nkauj xwb yuav ua lom zem thiab yuav seev cev,
cov nraug xwb thiab cov neeg laus kuj yuav seev cev.
Kuv yuav hloov lawv txoj kev quaj kev nyiav ua kev zoo siab;
kuv yuav nplij lawv thiab yuav hloov lawv kev tu siab ua kev puv siab.

Txais: (10d) Huab Tais yuav saib ntsoov peb xws li tus tswv zov yaj saib nws pab yaj.

Zaj Cav lub Moo Zoo: EXK 18: 31

Huab Tais hais tias: “Muab nej tej txhaum nej tau ua tso pov tseg kom tas,
nej yuav dua ib lub siab tshiab thiab ib lub tswv yim tshiab.”

Ntawv Moo Zoo: ZAM 11: 45-56

45 Coob tus Yus Das uas tuaj xyuas Mab Liab tau pom qhov uas Yes Xus ua ces lawv ntseeg txog Yes Xus. 46 Tab sis muaj ib co Yus Das mus cuag cov Fas Lis Xais, lawv mus qhia cov Fas Lis Xais txog qhov Yes Xus tau ua. 47 Cov thawj leej choj thiab cov Fas Lis Xais thiaj hu lub rooj xas nes nrees tuaj sab laj, lawv hais tias : "Peb yuav ua li cas, vim tus neeg ntawd ua ntau lub cim kawg li? 48 Yog peb cia nws ua li no ntxiv, mas sawv daws yuav ntseeg txog nws, ces cov Los Mas yuav tuaj rhuav peb thiab rhuav lub Chaw Ntshiab thiab peb haiv neeg." 49 Nyob hauv lawv, muaj ib tug hu ua Kais Fas, xyoo ntawd yog nws ua tuam thawj leej choj. Nws hais rau lawv tias : "Cas nej tsis paub dab tsi li ! 50 Nej tsis xav tswv yim tias qhov zoo tshaj rau nej, yog cia ib tug neeg xwb this tsoom pej xeem tuag, kom xwv tas haiv neeg tsis txhob tuag li." 51 Kais Fas hais li ntawd, tsis yog nws hais nws xwb, tab sis vim nws ua tuam thawj leej choj xyoo ntawd, ces nws thiaj ua saub qhia tias Yes Xus yuav tsum tuag rau nws haiv neeg, 52 thiab tsis yog tuag rau nws haiv neeg xwb, nws tseem tuag kom tau sau Tswv Ntuj cov me nyuam uas sib ncaim lawd rov los koom ua ib pab. 53 Ces txij hnub ntawd los, lawv txiav tias yuav tsum muab Yes Xus tua. 54 Ces Yes Xus thiaj tsis tab meeg mus mus los los nyob hauv tsoom Yus Das ntxiv. Nws mus nraim nyob rau ib thaj tsam tsis deb ntawm teb chaws suab puam, hauv ib lub nroog hu ua Es Fas Is. Nws nrog nws cov thwj tim nyob rau ntawd.
55 Thaum yuav txog cov Yus Das lub hnub nyoog Hla, cov neeg hauv tej zos nruab liaj nruab teb nce coob mus rau pem Yes Xus Xas Les, lawv xub mus ua cov kab ke ntxuav ua ntej lub ntees Hla kom lawv thiaj dawb huv. 56 Thaum lawv nyob hauv lub Tuam Tsev Teev Ntuj, lawv nrhiav Yes Xus, lawv ib leeg nug ib leeg tias : "Nej xav li cas ? Nej puas xav tias ntshai nws yuav tsis tuaj koom lub Ntees no?"

TIM 6 LUB 4 HLIS 2020

Hnub Ob Lis Piam Ntshiab Xyoo A Nruab Lis Piam Xyoo II

Zaj Nyeem Ib: HIS XAIS 42: 1-7

1 Nej ntsia kuv tus tub txib uas kuv nres, tus kuv xaiv uas ntxim kuv siab tiag; kuv muab kuv lub tswv yim rau saum nws, ces nws yuav coj kev tncaj los rau tsoom kuj cuab. 2 Nws yuav tsis qw nrov tsis nthe tsis ua suab ncha kom neeg hnov nyob ntawm tej kev. 3 Nws yuav tsis dam tus txhiav qaug kom lov ntho, nws yuav tsis tshuab tus nplaim teeb cig qauj les kom tuag, nws yuav tsa kom tau txoj kev txiav txim ncaj nyob hauv kev tseeb. 4 Nws yuav tsis ntaus siab me yuav tsis swb mus txog hnub nws tsa tau txoj kev txiav txim ncaj nyob hauv ntiaj teb lawm; cov pov txwv tos ntsoov nws txoj cai.
5 Tus Tswv Ntuj, tus HUAB TAIS uas yog tus tsim thiab nthuav cov txheej ntuj saud kom dav, tus ua kom lub ntiaj teb thiab tej yam tawm hauv los nyob ruaj khov, tus tshuab pa rau tsoom neeg nyob ntiaj teb, thiab muab tswv yim rau cov taug kev hauv lub ntiaj teb, nws hais li no: 6 “Kuv , HUAB TAIS, tau hu koj nyob hauv txoj kev ncaj, kuv tau tuav koj tes, tau puab koj, tau muab koj ua tsoom neeg txoj kev cog lus, muab koj ua lub teeb pom kev kaj cov kuj cuab, 7 kom koj ua tus qhib cov dig muag qhov muag, ua tus tso cov neeg kaw hauv tsev loj faj kom dim los, rho cov neeg kaw hauv qhov taub kom tawm hauv kev tsaus ntuj los.

NPN 27: 1, 2, 3, 13-14

Txais: (1a) HuabTais yog kuv qhov pom kev thiab kuv txoj kev cawm seej.

HUAB TAIS yog kuv qhov pom kev thiab kuv txoj kev cawm seej.
Kuv yuav ntshai leej twg?
HUAB TAIS yog lub yeej ntsa zeb thaiv kuv txoj sia,
Kuv yuav tshee vim leej twg?

Txais: (1a) HuabTais yog kuv qhov pom kev thiab kuv txoj kev cawm seej.

Thaum ib pab neeg phem txav los ze kuv,
yuav los dua kuv lub cev,
yog lawv, kuv cov yeeb ncuab thiab cov ntxub kuv,
yog lawv yuav dawm taw thiab yuav ntog.

Txais: (1a) HuabTais yog kuv qhov pom kev thiab kuv txoj kev cawm seej.

Txawm muaj ib pab tub rog tuaj tsa yeej npaj ntaus kuv,
Kuv lub siab tsis ntshai dab tsi li;
Tab yog lawv sawv ntaus rog tua kuv kiag,
los kuv tseem yuav tso siab lug.

Txais: (1a) HuabTais yog kuv qhov pom kev thiab kuv txoj kev cawm seej.

Kuv ntseeg tias kuv yuav tau pom HUAB TAIS lub siab zoo
nyob hauv tsoom neeg ciaj lub teb chaws.
Koj tos ntsoov HUAB TAIS, ua siab loj loj,
ua siab tawv qhawv, tos ntsoov HUAB TAIS!

Txais: (1a) HuabTais yog kuv qhov pom kev thiab kuv txoj kev cawm seej.

Zaj Cav lub Moo Zoo:

Peb hawm koj, peb tus Vaj,
koj ib leeg thiaj muaj lub siab zoo zam peb cov txhaum rau peb.

Ntawv Moo Zoo: ZAM 12: 1-11

1 Rau hnub ua ntej lub Ntees Hla, Yes Xus tuaj txog Npes Tas Nias, uas yog Las Ntxas Los lub zos; Las Ntxas Los yog tus uas Yes Xus tau tsa nws sawv hauv cov tuag rov los. 2 Nyob ntawd, lawv ua ib roog mov txais tos Yes Xus. Mas Tas rau mov, hos Las Ntxas Los yog ib tug nyob hauv cov uas nrog Yes Xus zaum ntawm rooj noj mov. 3 Mab Liab muab ib hwj tshuaj tsw qab, yog cov tseem tshuaj muaj nqis kim kawg los pleev Yes Xus ko taw, thiab nws muab nws cov plaub hau los so Yes Xus ko taw; cov tshuaj tsw thoob plaws lub tsev. 4 Ces Yus Das Kas Lis Yaus, uas yog Yes Xus ib tug thwj tim, nws yog tus yuav muab Yes Xus muag, nws hais tias : 5 "Ua cas tsis muab cov tshuaj tsw qab ntawd muag peb puas lub txiaj nyiag, ces muab pub rau cov pluag ?" 6 Yus Das hais li ntawd, tsis yog vim nws nco txog cov pluag, tab sis vim nws yog ib tug tub sab, nws yog tus saib lub hnab rau nyiaj, ces nws nyiag cov nyiaj uas lawv tso rau hauv. 7 Yes Xus thiaj hais tias : "Nej cia nws ua nws. Nws ua qhov no kom tau xub npaj hnub lawv yuav coj kuv mus zwm ntxa. 8 Nej muaj cov pluag nrog nej nyob mus li ; tab sis nej tsis muaj kuv nrog nej nyob mus li."
9 Cov Yus Das paub txog tias Yes Xus tuaj nyob ntawd, lawv tuaj tej pab coob coob tuaj, tsis yog vim lawv xav pom Yes Xus xwb, lawv kuj xav pom Las Ntxas Los uas Yes Xus tau tsa sawv hauv cov tuag rov los thiab. 10 Cov thawj leej choj txiav siab tias lawv yuav muab Las Ntxas Los tua thiab, 11 vim tias, tim Las Ntxas Los, ces cov Yus Das coob leej thiaj tso lawv tseg thiab los ntseeg Yes Xus.

TIM 7 LUB 4 HLIS 2020

Hnub Peb Lis Piam Ntshiab Xyoo A Nruab Lis Piam Xyoo II

Zaj Nyeem Ib: HIS XAIS 49: 1-6

1 Cov pov txwv, nej cuab pob ntseg rau kuv, cov haiv neeg nyob deb, nej mloog. HUAB TAIS twb hu kuv txij thaum kuv tseem tsis tau yug los lawm; thaum kuv tseem nyob hauv kuv niam plab, nws yeej tuav kuv npe lawm. 2 Nws muab kuv lub ncauj los ua ib rab ntaj ntse zuag plias, nws muab kuv zais rau hauv nws txhais tes qhov ntxoov. Nws muab kuv ua ib xib xub vos ntse ntse, muab kuv zais rau hauv nws lub raj xub. 3 HUAB TAIS hais rau kuv tias : "Koj yog kuv tus tub txib, His Xas Lais, kuv yuav ua kom kuv nto koob meej nyob hauv koj." 4 Tiam sis kuv hais tias : "Kuv tau khwv ciaj khwv tuag, tab sis tsis tau dab tsi li, kuv nkim kuv lub zog dag rau tej yam yaj ntshis xwb; txawm li ntawd los kuv qhov paj tshab yog nyob ntawm HUAB TAIS, kuv tus nqi zog yog nyob ntawm kuv tus Tswv Ntuj.”
5 Nyem no, HUAB TAIS hais tias, nws uas yog tus tau puab kuv nyob hauv kuv niam plab kom kuv ua nws tus tub txib, kom tau coj Yas Kos rov los cuag nws, thiab kom tau sau His Xas Lais rov qab los nrog nws koom ua ke; kuv yuav tau ntsej muag nyob ntawm HUAB TAIS xub ntiag; kuv tus Tswv Ntuj yog kuv lub zog. 6 Nws hais tias : “Tsis zoo txaus cia koj ua kuv tus tub txib, ua tus rov tsa cov xeem Yas Kos kom sawv thiab coj cov His Xas Lais seem kom rov qab los xwb; kuv tseem yuav muab koj ua lub teeb ci kaj cov kuj cuab kom kuv txoj kev cawm txeem mus txog tim npoo ntiaj teb kawg thiab.”

NPN 71: 1-2, 3-4A, 5AB-6AB, 15+17

Txais: (15ab) Kuv yuav hu nkauj cav txog koj txoj kev cawm seej.

Huab Tais, kuv tuaj nkaum nyob hauv koj,
thov koj tsis txhob cia kuv raug kev txaj muag ib zaug li.
Nyob hauv koj txoj kev ncaj, thov koj tuaj pab kuv, thov tso kuv dim;
cuab koj lub pob ntseg khoov los mloog kuv, thov cawm kuv.

Txais: (15ab) Kuv yuav hu nkauj cav txog koj txoj kev cawm seej.

Thov koj yog lub tsua rau kuv ua chaw nkaum,
yog lub yeej thaiv kuv ntawm tej xwv txheej,
vim koj yeej yog kuv lub tsua thiab kuv lub yeej ntsa zeb.
Kuv tus Tswv Ntuj, thov npo kuv ntawm cov neeg phem txhais tes.

Txais: (15ab) Kuv yuav hu nkauj cav txog koj txoj kev cawm seej.

Huab Tais, koj yog kuv txoj kev cia siab,
Tswv Ntuj koj yog tus kuv ntseeg siab txij thaum hluas los.
Kuv tso siab rau koj txij thaum kuv yug los,
txij thaum kuv nyob hauv kuv niam plab los, koj yeej yog kuv lub zog.

Txais: (15ab) Kuv yuav hu nkauj cav txog koj txoj kev cawm seej.

Kuv lub ncauj yuav tshaj koj txoj kev ncaj,
thiab koj txoj kev cawm neeg hnub dhau hnub.
Tswv Ntuj, koj tau qhuab qhia kuv txij thaum yau los,
txog niaj hnub no kuv tshaj tawm koj cov hauj lwm txaus qhuas.

Txais: (15ab) Kuv yuav hu nkauj cav txog koj txoj kev cawm seej.

Zaj Cav lub Moo Zoo:

Peb hawm koj, peb tus Vaj, vim koj tau mloog leej Txiv lus;
luag cab koj mus ntsia saum ntoo cuam xws li tus yaj seej seej lawv cab mus tua.

Ntawv Moo Zoo: ZAM 13: 21-33, 36-38


21 Yes Xus hais li ntawd tas, ces nws lub siab ntxhov hnyo, nws thiaj hais meej tias : "Kuv hais qhov muaj tseeb tiag rau nej tias nej ib tug yuav muab kuv muag." 22 Cov thwj tim sib ntsia zom zaws, lawv tsis paub tias Yes Xus hais txog leej twg. 23 Muaj ib tug thwj tim, yog tus uas Yes Xus nyiam, zaum qaij rau Yes Xus hauv siab. 24 Xis Moos Pob Zeb ncaws hau rau nws kom nug saib Yes Xus hais txog leej twg." 25 Tus thwj tim ntawd thiaj muab taub hau ntxeev tiaj mus pheeb kiag rau Yes Xus hauv siab, nws nug tias : "Huab Tais, yog leej twg?" 26 Yes Xus teb tias : "Yog tus uas kuv yuav muab qhov ncuav mov no ntsw kua cev rau nws." Ces Yes Xus muab qhov ncuav mov ntsw kua, nws muab cev rau Yus Das, Xis Moos Kas Lis Yaus tus tub. 27 Thaum Yus Das noj lo mov ntawd tas, ces Xas Tas nkag mus rau hauv Yus Das. Yes Xus hais rau Yus Das tias : "Qhov koj yuav ua, mas koj ua kom sai." 28 Cov zaum ntawm rooj mov, tsis muaj ib tug to taub tias yog vim li cas Yes Xus hais li ntawd rau Yus Das li. 29 Vim tias Yus Das saib lub hnab nyiaj, ces ib txhia xav tias Yes Xus hais rau nws tias : "Mus muas tej yam uas peb yuav siv rau rooj mov." los yog hais tias : "Pub tej yam rau cov pluag." 30 Yus Das txais nkaus lo mov, nws tawm mus tam sis ntawd; thaum ntawd tsaus ntuj lawm.
31 Thaum Yus Das tawm mus lawm, Yes Xus hais tias : "Nyem no Neeg Leej Tub twb txais koob meej lawm, thiab Tswv Ntuj kuj txais koob meej nyob hauv nws lawm. 32 Yog Tswv Ntuj txais koob meej nyob hauv Neeg Leej Tub, mas Tswv Ntuj kuj yuav ua kom Neeg Leej Tub muaj koob meej nyob hauv nws thiab. Tswv Ntuj yuav muab koob meej rau Neeg Leeg Tub sai sai no. 33 Cov me nyuad, kuv yuav nrog nej nyob me ntsis ntxiv lawm xwb. Nej yuav nrhiav kuv; tiam sis ib yam li kuv tau hais rau cov Yus Das, qhov chaw kuv mus, mas nej tuaj tsis tau, ces zaum no kuv hais rau nej thiab.”
36 Xis Moos Pob Zeb hais rau Yes Xus tias : "Huab Tais, koj yuav mus qhov twg?" Yes Xus teb tias : "Qhov chaw kuv mus, nyem no koj lawv kuv qab tsis tau. Tab sis yav tom ntej, mas koj yuav lawv kuv qab." 37 Pob Zeb hais rau Yes Xus tias : "Huab Tais, vim li cas nyem no kuv thiaj lawv koj qab mus tsis tau ? Kuv tuaj yeem siv kuv txoj sia rau koj." 38 Yes Xus teb tias : "Koj yuav siv koj txoj sia rau kuv no lod ? Kuv hais qhov tseeb tiag rau koj : Qaib tsis tau qua, koj twb tsis lees kuv peb zaug lawm."

TIM 8 LUB 4 HLIS 2020

Hnub Plaub Lis Piam Ntshiab Xyoo A Nruab Lis Piam Xyoo II

Zaj Nyeem Ib: HIS XAIS 50: 4-9A

4 HUAB TAIS Tswv Ntuj tau muab ib tug nplaig ua thwj tim rau kuv, kom kuv txawj hais tej lo lus txhawb tus neeg qaug zog. Ib tag kis dhau ib tag kis nws tsa kuv lub pob ntseg kom tsim dheev, nws tsa kuv lub pob ntseg kom kuv txawj mloog xws li ib tug thwj tim. 5 HUAB TAIS Tswv Ntuj qhib kuv pob ntseg, mas kuv tsis tawv ncauj, kuv tsis tig fee mus rau tom qab. 6 Kuv cuab nrob qaum rau cov neeg ntaus kuv, kuv tig kuv sab plhu rau cov neeg dob kuv hwj txwv; kuv tsis tau thaiv ntsej muag kom txhob raug lawv thuam thiab txhob raug lawv nto. 7 HUAB TAIS Tswv Ntuj yuav tuaj pab kuv, ces kuv yuav tsis poob ntsej muag; kuv ua ntsej muag tawv li zeb vim kuv paub tias kuv yuav tsis raug kev txaj muag. 8 Tus tsa kuv cai, nws nyob ze kuv, leej twg yuav muaj cuab kav nrog kuv hais yeej hais swb? Kom peb cia li ua ke tuaj mus sawv ntawm lub rooj txiav txim! Leej twg yog kuv tus yeeb ncuab? Kom nws kav tsij txav los ze kuv ! 9 Ntsia saib ! HUAB TAIS Tswv Ntuj yog tus tuaj pab kuv ! Leej twg yuav muab txim rau kuv tau ?

NPN 69: 8-10, 21-22, 31 + 33-34

Txais: (14c) Huab Tais, koj muaj lub siab hlub loj tas nrho, thov koj teb kuv.

Yog vim koj, kuv ua tiag nyiaj luag cov lus cem kuv,
kuv ua tiag ris kev txaj muag.
Kuv cov kwv tij tsis saib kuv yog lawv kwv tij ntxiv,
kuv niam cov tub saib kuv yog ib tug qhua xwb,
vim kuv muaj lub siab kub lug rau koj lub tsev,
ces cov neeg thuam koj tej lus phem poob rau saum kuv.

Txais: (14c) Huab Tais, koj muaj lub siab hlub loj tas nrho, thov koj teb kuv.

Lawv tej lus phem chob kuv lub siab, ua rau kuv zog tas,
kuv vam tias yuav muaj tus hlub kuv, tiam sis tsis muaj li;
vam tias yuav muaj tus nplij kuv, kuv nrhiav tsis tau li.
Lawv tseem muab kua tsib xyaw rau kuv cov mov xwb,
thaum kuv nqhis dej lawv muab kua qaub rau kuv haus.

Txais: (14c) Huab Tais, koj muaj lub siab hlub loj tas nrho, thov koj teb kuv.

Kuv yuav hu nkauj cav txog Tswv Ntuj lub npe,
kuv yuav ua nws tsaug kom nws tau koob meej loj:
Cov neeg me yuav pom, ces lawv yuav zoo siab.
Nej cov uas nrhiav Tswv Ntuj, kom nej lub siab muaj sia tuaj!
Vim Huab Tais mloog cov pluag hu,
nws tsis ntxub nws cov neeg uas raug nyob txim.

Txais: (14c) Huab Tais, koj muaj lub siab hlub loj tas nrho, thov koj teb kuv.

Zaj Cav lub Moo Zoo:

Peb hawm koj, peb tus Vaj,
koj ib leeg thiaj muaj lub siab zoo zam peb cov txhaum rau peb.

Los:

Peb hawm koj, peb tus Vaj, uas mloog leej Txiv lus;
luag cab koj mus ntsia saum ntoo cuam xws li tus yaj seej seej luag cab mus tua.

Ntawv Moo Zoo: MT 26: 14-25

14 Muaj ib tug nyob hauv pab kaum ob, hu ua Yus Das Kas Lis Yaus, nws mus cuag cov thawj leej choj, 15 nws hais rau lawv tias : “Nej yuav muab dab tsi rau kuv, yog kuv muab nws cob rau nej ntes?” Ces lawv them peb caug lub txiaj nyiag rau Yus Das. 16 Txij hnub ntawd los, Yus Das nrhiav ib lub sij hawm zoo cob Yes Xus rau hauv lawv txhais tes.
17 Thaum txog thawj hnub noj cov ncuav mov tsis xyaw poov xab, cov thwj tim txav los nug Yes Xus tias : “Koj xav kom peb npaj Pluas Hla rau koj noj nyob qhov twg ?” 18 Yes Xus hais tias : “Nej mus tom nroog, hauv ib tug neeg tsev, nej hais rau nws tias : ‘Xib Hwb hais tias : Kuv lub caij nyoog los txog ze lawm. Kuv yuav nrog kuv cov thwj tim noj Pluas Hla nyob hauv koj tsev.’” 19 Cov thwj tim ua raws li Yes Xus qhia. Ces lawv npaj Pluas Hla.
20 Thaum tsaus ntuj Yes Xus nrog pab Kaum Ob nyob ntawm rooj mov. 21 Thaum lawv tab tom noj mov, Yes Xus hais tias : “Kuv hais tseeb rau nej, nej ib tug yuav muab kuv muag.” 22 Lawv ntxhov siab tas nrho, lawv nyias pib nug nyias rau Yes Xus tias : “Huab Tais, puas yog kuv ?” 23 Yes Xus teb tias : “Tus yuav muab kuv muag, yog tus tau nrog kuv cev tes ntsw hauv lub phaj ! 24 Neeg Leej Tub mus raws li Ntawv xub sau tseg txog nws. Tab sis tus muab Neeg Leej Tub muag, mas nws txoj hmoov phem ! Txhiaj khoov tus ntawd tsis txhob yug los li!” 25 Yus Das, tus muab Yes Xus muag, kuj teb tias : “Xib Hwb, puas yog kuv ?” Yes Xus hais rau Yus Das tias : “Yog li koj hais.”

TIM 9 LUB 4 HLIS 2020

Hnub Tsib Ntshiab

THAJ TXI NTUJ TSIM COV ROJ NTSHIAB thaum Sawv Ntxov

Zaj Nyeem Ib: HIS XAIS 61: 1-3A, 6A, 8B-9

1 HUAB TAIS Tswv Ntuj lub tswv yim nyob saum kuv, vim HUAB TAIS tau pleev kuv. Nws tau tso kuv tuaj xa lub moo zoo rau cov neeg txom nyem, tuaj kho cov neeg tu siab lwj plawv kom lawv zoo hlo, tuaj tshaj kev twj lij rau cov neeg raug txim, thiab kev dim rau cov neeg nyob tsev loj faj, 2 tuaj tshaj txog ib xyoos uas HUAB TAIS yuav pub txiaj ntsim koob hmoov, ib hnub uas Tswv Ntuj yuav ua pauj, kom tau nplij cov neeg ntoo xyom quaj ntsuag; 3 kom kuv tuaj muab ib lub mom teev kub rau cov ntoo xyom quaj ntsuag nyob saum Xis Yoos hloov lawv cov tshauv, muab ib co roj zoo siab los pleev lawv hloov lawv kev tu siab, muab ib lub zam muaj hwj chim rau lawv hloov lawv txoj kev tas kev cia siab.
6 Ntawm nej, mas lawv yuav hu nej ua HUAB TAIS cov Leej Choj; lawv yuav tis npe rau nej ua : HUAB TAIS cov tim xyoob.
8 Kuv, HUAB TAIS, yuav muab nqi zog rau lawv kom haum pheej. Kuv yuav nrog lawv cog ib lo lus nyob mus li. 9 Lawv haiv neeg yuav nto moo nyob hauv cov kuj cuab, lawv cov xeeb ntxwv yuav nto meej nyob hauv cov haiv neeg; txhua leej uas pom lawv yuav zeem tias lawv yog ib tsav neeg uas HUAB TAIS foom hmoov zoo rau.

NPN 89: 21-22, 25+27

Txais: (2) Kuv yuav hu nkauj mus li cav txog HUAB TAIS lub siab zoo.

Kuv nrhiav tau Das Vis ua kuv tus tub txib,
kuv tau muab kuv cov roj ntshiab los pleev nws,
Kom kuv txhais tes nyob ze nws mus li,
Thiab kom kuv txhais npab ua kom nws muaj zog.

Txais: (2) Kuv yuav hu nkauj mus li cav txog HUAB TAIS lub siab zoo.

Kuv txoj kev pheej xeeb thiab kev khuv leej yuav nyob ze nws,
kuv lub npe yuav tsa nws hauv pliaj kom siab.
Nws yuav hu kuv tias : "Koj yog kuv txiv,
Kuv tus Tswv Ntuj, kuv lub Tsua, kuv tus Cawm Seej!"

Txais: (2) Kuv yuav hu nkauj mus li cav txog HUAB TAIS lub siab zoo.

Zaj Nyeem Ob: QYTN 1: 5-8

5 Thov kom nej tau txais txiaj ntsim thiab kev thaj yeeb tuaj ntawm Yes Xus Pleev tuaj, uas yog tus Tim Khawv pheej xeeb, tus xub yug hauv cov tub tuag los, tus thawj kav tsoom vaj nyob ntiaj teb no. Nws yog tus nyiam peb, nws tau muab nws cov ntshav los ntxuav peb cov txhaum.
6 Nws tsa peb ua ib haiv neeg ua vaj, ua ib co Leej Choj teev nws Leej Txiv thiab nws tus Tswv Ntuj. Vim li ntawd, mas lub koob meej thiab lub hwj chim yog nws tug mus tas ib txhiab ib txhis. Ua li.
7 Ntsia saib ! Nws nrog cov huab tuaj; txhua leej txhua tus yuav pom nws; cov tau nkaug nws kuj yuav pom nws. Tas txhua haiv neeg nyob ntiaj teb yuav quaj yuav nyiav vim nws. Yuav muaj tseeb li ntawd. Ua li.
8 Huab Tais Tswv Ntuj hais tias: “Kuv yog As Fas thiab Os Mes Nkas,”, vim nws yog tus tab tom nyob, tus nyob dhau los lawd, thiab tus tab tom yuav tuaj, nws yog tus Muaj Hwj Huam tas nrho.

Zaj Cav lub Moo Zoo: HIS XAIS 61: 1 (LK 4: 18)

HUAB TAIS lub tswv yim nyob saum kuv,
nws tau tso kuv tuaj xa lub moo zoo rau cov neeg txom nyem.

Ntawv Moo Zoo: LK 4: 16-21

16 Yes Xus los txog Nas Xas Les, lub zos uas nws nyob hlob. Hnub Xas Npas Tos, nws mus hauv lub tsev txoos xws li nws ua kam, ces nws sawv mus nyeem ntawv.
17 Lawv cev tus Yaj Saub His Xais kauj ntawv rau nws. Nws nthuav kauj ntawv, nws nrhiav tau nqe lus uas sau tias : 18 “Huab Tais lub Tswv Yim nyob saum kuv, vim nws pleev roj los qee kuv kom kuv mus tshaj lub Moo Zoo rau cov pluag; nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev, rau cov raug luag yuam tias lawv yuav rov tau ua neeg twj lij;
19 nws xa kuv mus tshaj tias yog xyoo Huab Tais yuav pub txiaj ntsim.”
20 Yes Xus rov kauv kauj ntawv rau, nws rov muab rau tus tub txib, ces nws mus zaum. Tas tsoom neeg uas nyob hauv lub tsev txoos ntsia ntsoov Yes Xus.
21 Ces Yes Xus hais rau lawv tias : “Hnub no, cov lus nyob hauv zaj ntawv no tsheej xeeb raws li nej tau hnov lawm."

+++++++++++++++++++++++++++++++++++++++++

Hnub Tsib Ntshiab

THAJ TXI NTUJ NCO TXOG YES XUS NOJ PLUAS HMO KAWG yav tsaus ntuj

Zaj Nyeem Ib: KEV TSIV 12: 1-8, 11-14

1 HUAB TAIS hais rau Mais Xes thiab As Loos nyob Hais Nkws Tos teb tias: 2 "Lub hlis no nej yuav muab suav ua thawj lub hlis ua ntej cov, nej yuav muab ua lub ib hlis qhib lub xyoo tshiab. 3 Neb hais rau ib tsoom pej xeem His Xas Lais tias: ‘Lub hlis no xiab kaum, mas nej txhua yim neeg nyias yuav tsum npaj nyias ib tug tsiaj me, txhua lub tsev yuav tsum npaj ib tug tsiaj me. 4 Yog tsev neeg twg tsawg dhau noj tsis tas ib tug tsiaj me, mas nej yuav mus koom nrog lwm tsev neeg uas nyob ze nej dua cov kom muaj neeg coob txaus. Nej yuav xaiv ib tug tsiaj kom txaus nkaus sawv daws noj tsis seem. 5 Nej yuav xaiv ib tug tsiaj zoo nkauj tsis muaj chaw xyeej, muaj hnub nyoog ib xyoos; nej yuav xaiv ib tug thav tshis los tau ib tug thav yaj los tau.
6 Nej yuav ceev tus tsiaj no cia mus txog lub hlis no hnub xiab kaum plaub; hmo ntawd, tas tsoom His Xas Lais nyias yuav tua nyias tus tsiaj thaum hnub poob qho kiag. 7 Nej yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag mus hauv lub tsev uas nej noj tus tsiaj ntawd. 8 Hmo ntawd, nej yuav muab cov nqaij txhiab hauv hluav taws noj, nej yuav noj ntxuag ib co ncuav mov tsis xyaw poov xab, thiab ib cov zaub iab.
11 Nej yuav noj mov zoo li no : Nej sia siv khov kho ntawm duav, nej rau khau tib si, thiab tuav rawv nej rab pas nrig ntawm tes. Nej yuav tsuag tsuag noj nrawm nroos, vim yog HUAB TAIS hmo hla. 12 Hmo ntawd, kuv yuav hla mus thoob Hais Nkws Tos teb, kuv yuav ntaus cov ua tub hlob nyob hauv Hais Nkws Tos teb tib si kom tuag, tsis hais tib neeg los tsiaj txhu li, thiab kuv yuav txiav txim rau cov dab Hais Nkws Tos, kuv yog HUAB TAIS!
13 Cov ntshav yuav yog ib lub cim txuag nej hauv cov tsev uas nej nyob. Kuv pom lub cim ntawd, kuv yuav hla dhau plaws mus, ces nej yuav tsis raug qhov xwv txheej loj ntawd, hmo uas kuv ntaus Hais Nkws Tos teb.
14 Nej yuav cim ntsoov hnub ntawd cia ua ib hnub tshwj xeeb rau nej, nej yuav muab ua ib hnub cav txog HUAB TAIS, yuav yog ib hnub nej ua koob tsheej tiam dhau tiam, yog ib txog cai nej yuav coj mus li.

NPN 116: 12-13, 15-16BC, 17-18

Txais: (1 KLN 10:16) Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
thiab kuv yuav tuav txog HUAB TAIS lub npe.

Txais: Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

HUAB TAIS saib cov ntseeg txog nws
txoj kev tuag muaj nqes loj.
Kuv yog koj tus tub txib, yog koj tus ntxhais txib tus tub;
Koj tau daws cov hlua khi kuv.

Txais: Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Kuv yuav cev ib co txim los ua koj tsaug,
kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm nws haiv neeg xub ntiag,

Txais: Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Zaj Nyeem Ob: 1 KLN 11: 23-26

Cov kwv tij nkauj muad:
23 Cov lus kuv qhia rau nej no, yog cov lus kuv tau txais ntawm Huab Tais los: Hmo Huab Tais Yes Xus raug muag, nws tuav ib lub ncuav mov,
24 nws ua Ntuj tsaug, nws muab lub ncuav mov ntais, nws hais tias : “Qhov no yog kuv lub cev uas cia rau nej; Nej ua qhov no kom nej nco txog kuv.”
25 Thaum noj hmo tas kuj ib yam, nws tuav lub ntim cawv, nws hais tias : “Lub ntim cawv no yog zaj cog lus tshiab nyob hauv kuv cov ntshav ; nej haus lub ntim no thaum twg, mas nej haus kom nej nco txog kuv.”
26 Vim li no, niaj zaus thaum nej noj lub ncuav mov no thiab nej haus cov cawv no, mas yog nej tshaj Huab Tais txoj kev tuag mus txog hnub Huab Tais rov los.

Zaj Cav lub Moo Zoo: ZAM 13: 34

Huab Tais hais tias: Kuv muab ib lo lus qhia tshiab rau nej:
nej yuav sib nyiam sib hlub ib yam li kuv tau nyiam thiab hlub nej.

Ntawv Moo Zoo: ZAM 13: 1-15

1 Thaum yuav txog lub Ntees Hla, Yes Xus paub tias txog nws lub caij hla lub ntiaj teb no rov mus cuag Leej Txiv lawm. Nws hlub nws cov neeg uas nyob hauv lub qab ntuj no, mas nws hlub lawv mus txog thaum kawg. 2 Thaum lawv tab tom noj hmo, dab phem twb xub nkag ua ntej mus tshoj Yus Das Kas Lis Yaus, Xis Moos tus tub, lub siab lawm kom muab Yes Xus rau luag ntes. 3 Yes Xus paub tias Leej Txiv tso tas ib puas tsav yam rau hauv nws txhais tes, nws paub tias nws tuaj ntawm Tswv Ntuj tuaj, thiab nws yuav rov mus cuag Tswv Ntuj,
4 Ces nws sawv ntawm lub rooj mov mus, nws hle tsho, nws muab ib daig ntaub khi rau ntawm nws duav. 5 Nws hliv dej rau hauv ib lub phiab, ces nws pib ntxuav cov thwj tim ko taw. Nws muab daim ntaub khi ntawm duav los so lawv ko taw. 6 Yes Xus los txog ntawm Xis Moos Pob Zeb, Pob Zeb hais rau Yes Xus tias : "Huab Tais, koj yuav ntxuav kuv ko taw lod ?" 7 Yes Xus teb rau Pob Zeb tias : "Qhov uas kuv ua, mas tam sis no koj tsis to taub, tiam sis yav tom ntej koj yuav to taub." 8 Pob Zeb hais rau Yes Xus tias : "Koj txhob ntxuav kuv ko taw, kuv tsis kam ib zaug li." Yes Xus teb rau Pob Zeb tias : "Yog kuv tsis ntxuav koj, mas koj yuav tsis muaj cuab tam nrog kuv li."
9 Xis Moos Pob Zeb hais rau Yes Xus tias : "Huab Tais, yog li mas tsis yog ntxuav taw xwb, koj ntxuav kuv tes thiab kuv taub hau huv tib si." 10 Yes Xus hais rau Pob Zeb tias : "Tus uas nws da dej lawm mas tsis tas yuav ntxuav ntxiv, tsuas ntxuav ko taw xwb, vim nws ib ce huv tas tib si lawm; nej kuj huv lawm thiab, tab sis huv tsis tas txhua leej." 11 Yes Xus yeej paub tus twg yog tus yuav muab nws rau luag, vim li ntawd nws thiaj hais tias : "Nej huv tsis tas txhua leej."
12 Thaum Yes Xus ntxuav lawv ko taw tas, nws rov hnav nws lub tsho, nws rov los zaum ntawm rooj mov, nws thiaj hais rau lawv tias : "Nej puas to taub qhov uas kuv ua rau nej ? 13 Nej hu kuv ua : Xib Hwb thiab Huab Tais. Nej hu raug lawm, vim kuv yeej yog tiag. 14 Yog tias kuv uas yog Xib Hwb thiab yog Huab Tais, kuv twb ntxuav nej ko taw, mas nej ib tug kuj yuav tsum rov ntxuav ib tug ko taw thiab. 15 Qhov kuv tau ua yog ib tug piv txwv rau nej, kom nej ua raws li kuv tau ua rau nej.”

TIM      10      LUB      4      HLIS      2020

Hnub Rau Ntshiab Xyoo A - Yes Xus Tuag - Kev Hawm Ntoo Cuam

COV ZAJ NYEEM

Tsis muaj thaj txi ntuj. Thaum pib lub Txoos, leej choj los khoov pw khwb rwg ntawm hauv ntej thov ntuj twj ywm ib pliag, nws sawv thiab hais ob peb lo lus thov ntuj tas ces cia li pib cov zaj nyeem mus.

Zaj Nyeem Ib:       HIS XAIS  52:   13—53: 12

52 13 Ntsia saib, kuv tus tub txib yuav ua tiav nws txoj hauj lwm, nws yuav raug luag saib hlob, thiab nws yuav raug muab tsa rau qhov siab dua cov. 14 Ib yam li coob leej pom nws lawv ceeb loj, vim nws txawv tas tsis zoo li tib neeg lawm, thiab nws lub cev hloov tas tsis zoo li tib neeg lub lawm, 15 ib yam li ntawd, ntau lub kuj cuab kuj yuav ceeb nkaus, thiab cov vaj yuav sawv ntsug rua ncauj u nyob ntawm nws xub ntiag, vim lawv pom tej yam uas tsis tau muaj leej twg piav rau lawv dua, lawv paub txog tej yam uas lawv tsis tau hnov dua.
53 1 Leej twg thiaj ntseeg qhov uas peb tau hnov? Leej twg thiaj paub txog tias yog Huab Tais txhais npab ua tej ntawd? 2 Nws tau loj hlob nyob ntawm HUAB TAIS xub ntiag xws li ib tug ntsuag ntoo, xws li ib tug cag hlav tawm hauv thaj av qhuav qhawv los; nws tsis muaj qhov zoo saib los zoo nyiam ua kom peb xav ntsia, tsis muaj ib yam yuav rub kom peb nyiam nws li. 3 Nws raug luag ntxub, raug luag muab xyeeb tawm; nws yog ib tug neeg raug mob loj, swm kev txom nyem ntau; yog ib tug neeg uas luag tig ntsej muag kom txhob pom; sawv daws ntxub nws; peb tsis muab nws saib rau nqe li.
4 Tab sis, twb yog nws ris peb tej kev tu siab, twb yog nws nyiaj peb tej kev txom nyem, los peb tseem xav tias yog Tswv Ntuj nplua nws, thiab ua kom nws raug txom nyem, thiab poob hwj chim. 5 Tos nws raug luag nkaug, los yog vim peb tej kev ua phem, nws raug luag tsuj, los yog vim peb tej kev txhaum. Lub txim uas nws ris yog qhov ua kom peb tau nyob kaj siab, nws tej nqaij ntuag kho peb kom zoo hlo. 6 Peb sawv daws zoo li ib co yaj poob zoo, peb nyias taug nyias txoj kev, HUAB TAIS muab peb lub txim txhaum huv si nog rau nws ris.
7 Nws raug luag hiam loj, tab sis nws yeem ua tus me, nws tsis qhib ncauj; nws ua zoo li tus yaj uas luag cab mus rau hauv lub tsev tua tsiaj, nws nyob ntsiag to xws li tus yaj uas luag txiav nws cov plaub, nws tsis qhib ncauj li. 8 Lawv tsim txom nws thiab txiav txim rau nws, ces lawv cab nws mus. Leej twg nyob hauv nws tiam neeg thiaj yuav mob siab txog tias luag muab nws txiav tawm hauv tsoom neeg ciaj lub teb chaws mus lawm? Nws raug tua twb yog vim nws haiv neeg txoj kev txhaum. 9 Lawv muab nws zwm av nrog cov neeg phem, nws lub ntxa yog nrog cov neeg nplua nuj, txawm tias nws tsis tau ua ib qho phem, tsis tau hais ib lo lus dag. 10 HUAB TAIS tau pom zoo cia nws raug txom nyem, Huab Tais muab nws tso rau txoj kev nyuaj siab. Yog vim nws muab nws txoj sia los txi Ntuj them txim txhaum, mas nws yuav muaj ib co xeeb leej xeeb ntxwv, thiab yuav ua lub neej nyob ntev dhawv; nws yog tus ua kom muaj raws li HUAB TAIS lub siab xav.
11 Thaum nws tus plig nyiaj yeej kev sim siab tas lawm, nws yuav pom txoj kev pom kev thiab yuav muaj kev puv siab npo. Vim nws muaj kev paub, kuv tus tub txib tus siab ncaj yuav ua kom coob leej ntau tus ncaj tuaj, vim nws yuav ris lawv cov txhaum. 12 Yog vim li ntawd, kuv yuav muab ib feem rau nws nyob hauv cov ua thawj, thiab nws yuav nrog cov muaj peev xwm faib yeeb ncuab lub cuab tam, kom phim qhov nws tau yeem cia nws tus plig swb rau kev tuag thiab cia luag suav nws nrog cov neeg phem, thiab nws tau ris coob leej cov txhaum thiab thov ntuj kom muab kev zam rau cov ua phem.

NPN      31:   2-6, 12-13, 15-16, 17, 25

Txais: (Lk 23:46) Txiv, kuv muab kuv tus ntsuj plig tso rau hauv koj txhais tes.

HUAB TAIS, kuv los nkaum hauv koj,
thov koj txhob pub kuv poob ntsej muag ib zaug li.
Nyob hauv koj txoj kev ncaj, thov cawm kom kuv dim.
Kuv tso kuv tus ntsuj plig rau hauv koj txhais tes,
HUAB TAIS, Tswv Ntuj tus pheej xeeb, koj yog tus txhiv kuv.

Txais: Txiv, kuv muab kuv tus ntsuj plig tso rau hauv koj txhais tes.

Rau kuv cov yeeb ncuab, kuv yog neeg phem,
rau cov nyob ze kuv, kuv yog neeg ntxim luag thuam,
kuv cov phooj ywg ceeb laj pom kuv,
thaum neeg pom kuv ntawm kev, lawv khiav mus deb kuv.
Kuv zoo li tus neeg tuag uas ploj ntais hauv neeg lub siab mus lawm;
kuv zoo li ib lub twj taig tawg tas tsis zoo yuav ntxiv.

Txais: Txiv, kuv muab kuv tus ntsuj plig tso rau hauv koj txhais tes.

Tiam sis, Huab Tais, kuv tso siab rau koj;
Kuv hais tias, “Koj yog kuv tus Tswv Ntuj!
Kuv lub neej nyob hauv koj txhais tes; thov koj cawm kuv
ntawm kuv cov yeeb ncuab thiab ntawm cov neeg hiam kuv xib teg.”

Txais: Txiv, kuv muab kuv tus ntsuj plig tso rau hauv koj txhais tes.

Cia koj lub ntsej muag ci tuaj rau saum koj tus tub txib,
thov cawm kuv vim koj ua siab zoo rau kuv.
Nej kav tsij ua siab loj ua siab tawv qhawv,
tas nej cov uas tso siab rau Huab Tais.

Txais: Txiv, kuv muab kuv tus ntsuj plig tso rau hauv koj txhais tes.

Zaj Nyeem Ob:       HES NPLAWS  4:   14-16; 5:7-9

Cov kwv tij,
4 14 Vim peb muaj ib tug Tuam Leej Choj uas tau hla dhau yim txheej cuaj txheej ntuj, uas yog Yes Xus, Tswv Ntuj leej Tub, mas peb yuav nyob ruaj nreb hauv peb txoj kev lees ntseeg nws. 15 Peb tsis muaj ib tug Tuam Leej Choj uas yuav tsis txawj hlub peb cov neeg zog me, rau qhov nws tau raug txoj kev sim siab txhij txhua ib yam li peb, tsuas tshuav txoj kev txhaum xwb, nws thiaj tsis raug. 16 Peb kav tsij tso siab lug mus ze ntawm lub theej kiab muaj txiaj ntsim, kom peb tau txais kev khuv leej, thiab txais txiaj ntsim los pab peb thaum peb xav tau kev pab.
5  7 Thaum Leej pleev tseem ua neej nyob hauv cev nqaij, nws tau tsa suab quaj thov tus muaj peev xwm cawm tau nws ntawm txoj kev tuag; Tswv Ntuj tau mloog nws tej lus thov, vim nws hwm Tswv Ntuj zoo. 8 Txawm tias nws yog tus Tub cag, tsis kav nws yuav tsum tau kawm kev mloog lus nyob hauv txoj kev raug txom nyem.
9 Thaum nws ua tau txhua yam zoo txhij zoo txhua lawm, nws kuj yog lub hauv paus uas muab kev cawm mus li rau txhua tus mloog nws lus.

Zaj Cav lub Moo Zoo:       FLP  2:   8-9

Leej Pleev tuaj yeem mloog Tswv Ntuj lus mus txog qhov tuag,
tab txawm yog kev tuag saum ntoo cuam.
Vim li ntawd, mas Tswv Ntuj thiaj tsa nws ua tus loj dua cov
thiab muab lub npe uas nyob siab dua lwm lub npe rau nws.

Ntawv Moo Zoo:       ZAM  18:   1—19: 42

Vim zaj Ntawv Moo Zoo no ntev heev, mas yuav muab cais ua plaub tug neeg sib pab nyeem: ib tug ua tus piav (TP), ib tug ua Pis Las Tos los lwm tus neeg hais lus (ITN, ib tug neeg), ib tug ua Yes Xus hais lus (YX), thiab sawv daws (SD) nyeem thaum yog cov Yus Das coob coob hais lus.

TP: 18  1 Yes Xus hais li ntawd tas, ces nws nrog nws cov thwj tim hla tus dej Kis Loos mus rau sab tim ub. Muaj ib lub vaj nyob ntawd. Yes Xus thiab nws cov thwj tim mus rau hauv lub vaj. 2 Yus Das, tus uas muab Yes Xus rau luag ntes, kuj paub qhov chaw ntawd thiab, vim Yes Xus thiab nws cov thwj tim sib sau ntau zaus nyob ntawd. 3 Yus Das coj ib pab peeb zeej thiab ib co zov keeb tuaj, uas yog cov thawj leej choj thiab cov Fas Lis Xais muab rau nws. Lawv taws teeb, taws tsau thiab nqa ntaj nqa riam phom tuaj. 4 Yes Xus paub ib puas tsav yam uas yuav tshwm sim tuaj raug nws, ces nws tawm los hais rau lawv tias :
YX: "Nej nrhiav leej twg ?"
TP: 5 Lawv teb rau nws tias :
SD: " Yes Xus Nas Xas Les."
TP: Yes Xus hais rau lawv tias :
YX: "Yog kuv."
TP: Yus Das, tus muab Yes Xus rau luag nrog lawv sawv ua ke.
6 Thaum Yes Xus hais rau lawv tias : "Yog kuv", mas lawv thaub qab thiab lawv ntog tas rau hauv av. 7 Yes Xus rov nug lawv dua tias :
YX: "Nej nrhiav leej twg ?"
TP: Lawv hais tias :
SD: "Yes Xus Nas Xas Les."
TP: 8 Yes Xus teb tias :
YX: "Kuv twb hais rau nej tias yog kuv. Yog nej nrhiav kuv, mas nej tso cov no mus."
TP: 9 Qhov no tshwm sim raws li lo lus uas nws xub hais tseg tias : "Cov uas koj muab rau kuv, mas kuv tsis ua ib tug ploj li." 10 Xis Moos Pob Zeb muaj ib rab ntaj. Nws rho hlo nws rab ntaj tib ntag rau tus thawj leej choj tus qhev, txiav raug nws sab pob ntseg xis tu nrho. Tus qhev no hu ua Mas Kws. 11 Yes Xus hais rau Pob Zeb tias :
YX: "Koj ntxig ntaj rau hauv hnab. Lub ntim uas Leej Txiv muab rau kuv, kuv puas yuav tsis haus ?"
TP: 12 Ces pab peeb zeej nrog tus lwm txheeb, thiab cov zov keeb Yus Das ntes Yes Xus. Lawv muab nws khi.
13 Lawv xub coj nws mus tim As Nas tsev. As Nas yog Kais Fas yawm txiv. Xyoo ntawd yog Kais Fas ua tuam leej choj. 14 Kais Fas yog tus tau tawm tswv yim rau cov Yus Das hais tias : "Cia ib tug neeg xwb tuag pauv tsoom pej xeem mas zoo dua."
15 Xis Moos Pob Zeb thiab lwm tus thwj tim raws Yes Xus qab. Tus thwj tim ntawd yog tus tuam leej choj ib tug swm neeg, ces nws tau nrog Yes Xus chaws mus hauv tus tuam leej choj lub tshav loog. 16 Hos Pob Zeb nyob sab nraud, nws sawv ze ntawm qhov rooj. Lwm tus thwj tim uas yog tus tuam leej choj ib tug swm neeg thiaj tawm los, nws hais lus rau tus ntxhais txib zov qhov rooj, ces tus txhais txib kom Pob Zeb chaws mus hauv. 17 Tus ntxhais txib zov qhov rooj thiaj hais rau Pob Zeb tias :
ITN: "Koj tsis yog tus neeg ntawd ib tug thwj tim thiab lod ?"
TP: Pob Zeb hais tias :
ITN: "Kuv tsis yog."
TP: 18 Cov tub qhev thiab cov zov keeb rauv ib cub tawg thee, vim lub caij ntawd no no; lawv nyob ntawd nte taws.
Pob Zeb kuj nrog lawv nyob ntawd nte taws thiab.
19 Tus tuam leej choj nug Yes Xus txog nws cov thwj tim thiab nws cov lus qhia. 20 Yes Xus teb rau tus tuam leej choj tias :
YX: "Kuv tab meeg hais lus rau lub qab ntuj neeg kom sawv daws hnov. Kuv niaj hnub qhuab qhia nyob hauv cov tsev txoos thiab hauv lub Tuam Tsev Teev Ntuj uas tas tsoom Yus Das tuaj sib txoos. Kuv tsis tau nyiag hais ib yam dab tsi. 21 Tim li cas koj nug kuv ? Koj nug cov uas tau hnov kuv tej lus qhuab qhia masv; cov ntawd paub tias kuv tau hais dab tsi."
TP: 22 Thaum Yes Xus hais li ntawd, mas cov zov keeb uas sawv ntsug nyob ntawd, muaj ib tug ib tawg ncuav rau Yes Xus, nws hais rau Yes Xus tias :
ITN: "Koj teb li ntawd rau tus tuam leej choj lod ?"
TP: 23 Yes Xus teb rau tus zov keeb tias :
YX: "Yog kuv hais lus phem, koj ua pov thawj qhia saib qhov twg phem. Hos yog kuv hais raug lawm, vim li cas koj thiaj ntaus kuv ?”
TP: 24 Ces As Nas xa Yes Xus, uas raug muab khi rawv, mus rau tus tuam leej choj Kais Fas.
25 Thaum ntawd Xis Moos Pob Zeb nyob ntawd nte taws. Lawv hais rau nws tias :
SD: "Koj tsis yog nws ib tug thwj tim lod ?"
TP: Pob Zeb tsis lees, nws hais tias :
ITN: “Kuv tsis yog.”
TP: 26 Tus tuam leej choj ib tug qhev, yog ib tug txheeb ze tus qhev uas raug Pob Zeb txiav ib sab pob ntseg, nws hais tias :
ITN: "Kuv twb pom koj nrog nws nyob hauv lub vaj los tsis yog ?"
TP: 27 Pob Zeb rov qab tsis lees, ces tam sis ntawd ib tug qaib qua.
28 Lawv coj Yes Xus tim Kais Fas tsev mus rau hauv lub tsev txiav txim Los Mas. Thaum ntawd kaj ntug lawm. Tab sis cov Yus Das tsis mus hauv lub tsev txiav txim, kom lawv txhob tsuas yam tsis huv, lawv thiaj yuav noj tau pluas Hla. 29 Pis Las Tos thiaj li tawm tuaj cuag lawv, nws hais tias :
ITN: "Nej muaj lus dab tsi tuaj kom tus neeg ntawd ?"
TP: 30 Lawv teb rau Pis Las Tos hais tias :
SD: "Yog tus neeg no tsis yog neeg phem, mas peb yuav tsis coj nws tuaj rau koj."
TP: 31 Pis Las Tos hais rau lawv tias :
ITN: "Nej coj nws mus, nej txiav txim rau nws raws li nej txoj cai."
TP: Cov Yus Das hais rau Pis Las Tos tias :
SD: "Txoj cai tsis pub peb muab ib tug neeg tua."
TP: 32 Qhov no tshwm sim raws li lo lus Yes Xus tau xub hais qhia tias nws yuav tsum tuag zoo li cas. 33 Ces Pis Las Tos thiaj rov chaws mus hauv lub tsev txiav txim, nws hu Yes Xus los, nws hais tias :
ITN: "Koj puas yog cov Yus Das tus vaj ?"
TP: 34 Yes Xus teb tias :
YX: "Puas yog koj hais koj, los yog luag tej hais txog kuv li ntawd rau koj ?"
TP: 35 Pis Las Tos teb tias :
ITN: "Kuv puas yog ib tug Yus Das ? Koj haiv neeg thiab cov thawj leej choj coj koj tuaj rau kuv. Koj tau ua dab tsi?"
TP: 36 Yes Xus teb tias :
YX: "Kuv lub Ceeb Tsheej tsis nyob hauv lub qab ntuj no. Yog kuv lub Ceeb Tsheej nyob hauv lub qab ntuj no, mas kuv cov neeg yuav sawv ntaus rog thaiv kom kuv txhob poob rau hauv cov Yus Das txhais tes. Tab sis, kuv lub Ceeb Tsheej tsis nyob hauv lub qab ntuj no."
TP: 37 Pis Las Tos hais rau Yes Xus tias :
ITN: "Ua li koj yog vaj lod ?"
TP: Yes Xus teb hais tias :
YX: "Koj yog tus hais tias kuv yog vaj. Kuv yug los, thiab kuv tuaj nyob hauv lub qab ntuj no tsuas yog tuaj ua tim khawv txog qhov tseeb xwb. Leej twg yog txoj kev tseeb tug, mas nws mloog kuv lub suab."
TP: 8 Pis Las Tos hais rau Yes Xus tias :
ITN: "Qhov tseeb yog dab tsi ?"
TP: Thaum Pis Las Tos hais li no tas, nws tawm plaws rov mus cuag cov Yus Das, nws hais rau lawv tias :
ITN: "Kuv tsis pom ib yam tsim nyog raug txim nyob hauv tus neeg ntawd. 39 Tab sis raws li nej kev cai, mas txog lub Ntees Hla kuv tso ib tug neeg mus. Nej puas xav kom kuv tso cov Yus Das tus vaj ?"
TP: 40 Lawv rov qab qw nrov nrov tias :
SD: "Txhob tso nws, tso Npas Las Npas!"
TP: Npas Las Npas yog ib tug tub sab.
19 1 Ces Pis Las Tos coj Yes Xus mus, nws kom lawv nplawm Yes Xus. 2 Cov tub rog xuas ib co pos ntxias ua ib lub kauj, lawv muab tso saum Yes Xus taub hau. Lawv muab ib lub tsho ntev liab tsam xem rau Yes Xus hnav. 3 Lawv txav los ze nws, lawv hais tias :
SD: "Nyob kaj lug, cov Yus Das tus vaj,"
TP: ces lawv ntaus nws tej niag teg.
4 Pis Las Tos rov tawm mus nraum zoov, nws hais rau lawv tias :
ITN: "Nej saib, kuv coj tus neeg no tawm los rau nej, kom nej paub tias kuv tsis pom ib yam tsim nyog raug txim nyob hauv nws."
TP: 5 Yes Xus tawm los sab nraud, nws ntoo lub kauj pos thiab hnav ib lub tsho ntev liab tsam xem, ces Pis Las Tos
hais rau lawv tias :
ITN: "Nej ntsia tus neeg no."
TP: 6 Thaum cov thawj leej choj thiab cov zov keeb pom Yes Xus, lawv
nthe nrov nrov tias :
SD: "Muab dai saum ntoo cuam ! Muab dai saum ntoo cuam !"
TP: Pis Las Tos hais rau lawv tias :
ITN: "Nej coj nws mus, nej muab nws dai saum ntoo cuam. Vim tias kuv tsis pom ib yam tsim nyog raug txim nyob hauv nws."
TP: 7 Cov Yus Das teb rau Pis Las Tos tias :
SD: "Peb muaj ib Txoj Cai, raws li Txoj Cai ntawd, mas nws yuav tsum tuag, vim nws tsa nws ua Tswv Ntuj Leej Tub."
TP: 8 Thaum Pis Las Tos hnov lo lus ntawd, mas nws haj yam ntshai. 9 Ces nws rov chaws mus hauv lub tsev txiav txim. Nws hais rau Yes Xus tias :
ITN: "Koj nyob qhov twg tuaj ?"
TP: Tab sis Yes Xus tsis teb ib lo lus rau nws li. 10 Pis Las Tos thiaj hais rau Yes Xus tias :
ITN: "Koj tsis hais lus rau kuv. Koj puas paub hais tias kuv muaj hwj huam tso tau koj mus, thiab muaj hwj huam muab koj dai saum ntoo cuam ?"
TP: 11 Yes Xus teb hais tias :
YX: "Yog koj tsis tau txais hwj huam saum ntuj los, mas koj yuav ua tsis tau dab tsi rau kuv li. Vim li ntawd, tus muab kuv rau koj, nws muaj ib qho txhaum loj dua."
TP: 12 Txij ntawd los, Pis Las Tos nrhiav kev tso Yes Xus. Tab sis cov Yus Das nthe nrov nrov hais tias :
SD: "Yog koj tso tus neeg ntawd mus, mas koj tsis yog Xes Ntxas phooj ywg. Leej twg tsa nws ua vaj, mas nws sawv tiv Xes Ntxas."
TP: 13 Thaum Pis Las Tos hnov cov lus no, nws kom lawv coj Yes Xus tawm los. Ces Pis Las Tos mus zaum saum lub theej kiab txiav txim, ntawm qhov chaw hu ua Tshav Pua Zeb, lus Hes Nplaws hais tias Nkas Npas Thas.
14 Hnub ntawd, yog hnub npaj ua lub Ntees Hla. Thaum ntawd kwv yees ze kaum ob teev tav su. Pis Las Tos hais rau cov Yus Das tias :
ITN: "Nej ntsia nej tus vaj."
TP: 15 Cov Yus Das nthe nrov nrov tias :
SD: "Muab nws tua ! Muab nws tua ! Muab dai saum ntoo cuam !"
TP: Pis Las Tos hais rau lawv tias :
ITN: "Kuv puas yuav tsum muab nej tus vaj dai saum ntoo cuam?"
TP: Cov thawj leej choj teb hais tias :
SD: "Peb tsuas muaj Xes Ntxas ua peb tus vaj xwb."
TP: 16 Ces Pis Las Tos muab Yes Xus rau lawv, kom lawv coj nws mus dai saum ntoo cuam. Lawv thiaj li coj Yes Xus mus. 17 Yes Xus kwv nws tus ntoo cuam, nws mus txog qhov chaw hu ua "Khauj Khaum Taub Hau", uas lus Hes Nplaws hu ua "Nkos Nkos Thas." 18 Lawv muab nws ntsia dai rau saum ntoo cuam nyob ntawd. Lawv kuj muab ob tug neeg dai saum ntoo cuam thiab, ib tug nyob ib sab, Yes Xus nyob nruab nrab. 19 Pis Las Tos sau ib co ntawv rau saum ib daim ntoo ; nws kom muab tso rau saum tus ntoo cuam. Cov npe ntawv sau hais tias : “Yes Xus Nas Xas Les, cov Yus Das tus vaj.” 20 Coob leej Yus Das nyeem cov lus saum daim ntoo, vim qhov chaw uas lawv muab Yes Xus dai saum ntoo cuam nyob ze lub nroog, thiab lawv sau ua lus Hes Nplaws, lus Las Tis Nas, thiab lus Hes Las. 21 Cov thawj leej choj Yus Das hais rau Pis Las Tos tias :
SD: "Koj tsis txhob sau tias : Cov Yus Das tus vaj, yuav tsum sau tias "Tus ntawd hais tias : Kuv yog cov Yus Das tus vaj."
TP: 22 Pis Las Tos teb hais tias :
ITN: "Qhov kuv sau, mas kuv twb sau lawm."
TP: 23 Thaum cov tub rog muab Yes Xus dai saum ntoo cuam tas, lawv muab Yes Xus cov ris tsho faib ua plaub tsw, rau plaub tug tub rog, ib leeg tuaj ib qho. Lawv muab lub tsho ntev faib, tab sis lub tsho ntev tsis
muaj leej leeg li, yog tsho ntos ua ib daig xwb ntos pem caj dab mus rau nram taw. 24 Cov tub rog sib tham tias :
SD: "Peb txhob muab lub tsho ntev dua, peb twv saib leej twg yuav tau lub tsho ntawd."
TP: Ua li mas tshwm sim raws li Ntawv sau cia tias : “Lawv sib faib kuv cov khaub ncaws, lawv twv saib leej twg yuav tau kuv lub tsho.” Cov tub rog tau ua li ntawd.
25 Yes Xus niam thiab nws niam tus viv ncaus, hu ua Mab Liab uas yog Dlos Pas poj niam, thiab Mab Liab Mas Ntas Las, lawv sawv ze ntawm tus ntoo cuam. 26 Thaum Yes Xus pom nws niam, thiab pom tus thwj tim uas nws nyiam sawv ze ntawd, ces nws hais rau nws niam tias :
YX: "Niad, tus ntawd yog koj tus tub."
TP: 27 Thiab Yes Xus hais rau tus thwj tim tias :
YX: "Tus ntawd yog koj niam."
TP: Txij lub sij hawm ntawd los, tus thwj tim coj Mab Liab mus nyob hauv nws tsev.
28 Ua li ntawd tas, Yes Xus paub tias zaum no ib puas tsav yam tiav tas lawm, kom xwv muaj tshwm sim raws nraim li ntawv sau tseg, nws hais tias :
YX: "Kuv nqhis dej",
TP: 29 Muaj ib hub cawv qaub puv nkaus nyob ntawd. Lawv muab ib thooj rwb tub cov cawv qaub chob rau ib tug ntsis pas nroj his xos cev mus rau Yes Xus qhov ncauj. 30 Thaum Yes Xus haus qhov cawv qaub tas, nws hais tias :
YX: "Tiav tas lawm."
TP: Ces Yes Xus nyo taub hau, nws tso nws tus ntsuj plig tawm mus.

Lub caij no sawv daws nyob ntsiag to txhos caug hawm Yes Xus lub caij uas nws txoj sia tu.

TP: 31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog tseem ceeb, ces cov Yus Das thiaj thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los.
32 Cov tub rog thiaj tuaj muab thawj tug uas nrog Yes Xus dai saum ntoo cuam ob sab ceg lov, thiab muab lwm tus ob sab ceg lov.
33 Thaum lawv los txog ntawm Yes Xus, lawv pom nws twb tuag lawm, lawv tsis muab nws ob sab ceg lov,
34 tab sis ib tug tub rog xuas nws rab hmuv nkaug Yes Xus phab tav; tam sis ntawd ib co ntshav thiab ib co dej tawm plaws los.
35 Tus uas tau pom qhov ntawd ua pov thawj hais txog. Nws cov lus pov thawj muaj tseeb, nws paub tias qhov nws hais muaj tiag, nws hais kom nej ntseeg.
36 Tej xwm no tshwm sim kom muaj raws li Ntawv sau cia tias : ‘Nws cov pob txha tsis lov ib tug li.’ 37 Tseem muaj lwm lo lus hauv Ntawv hais tias : ‘Lawv yuav saib tus uas lawv nkaug.’
38 Thaum tej xwm ntawd tshwm tuaj tas, Yos Xes nyob As Lis Mas Tias, uas yog Yes Xus ib tug thwj tim tiam sis nws tsis pub luag tej paub vim nws ntshai cov Yus Das, nws tuaj thov Pis Las Tos kom kheev nws mus txo Yes Xus lub cev los. Pis Las Tos tso lus. Ces nws mus txo Yes Xus lub cev. 39 Nis Kos Des Mos kuj tuaj thiab, yog tus uas thaum chiv thawj, nws tuaj cuag Yes Xus hmo ntuj, nws nqa ib cov tshuaj qhwv tuag tuaj, yog txab txiv yoov xyaw txab xyab phij, kwv yees hnyav li ib puas choj. 40 Lawv txo Yes Xus lub cev los, lawv xuas tej pluaj hlab ntaub los qhwv nws lub cev nrog cov tshuaj qhwv tuag, raws li cov Yus Das kev cai tu zam.
41 Nyob ntawm thaj chaw uas luag muab Yes Xus dai saum ntoo cuam, muaj ib lub vaj. Nyob hauv lub vaj ntawd muaj ib lub ntxa tshiab tshiab uas tseem tsis tau tso dua ib tug tuag rau hauv li. 42 Ces lawv muab Yes Xus zwm rau hauv lub ntxa ntawd, vim tias hnub ntawd yog cov Yus Das Hnub Npaj lawm, thiab lub ntxa ntawd kuj nyob ze ze.

Niaj xyoo muaj kev thov Ntuj, kev hawm Ntoo Cuam thiab kev txais lub Cim Yug, tiam sis xyoo no peb sd tsis mus teev ntuj tom tsev teev ntuj vim tus kab mob coronavirus. Yog nej leej twg muaj internet, nej nrhiav mus koom tau hauv internet.

KEV THOV NTUJ

Thaum nyeeem Ntawv Moo Zoo tas lawm, muaj kev thov ntuj rau ntau yam:

1. Thov ntuj rau lub Koom Txoos.
2. Thov ntuj rau Vaj Qhia.
3. Thov ntuj rau cov Tswv QHia, cov leej choj, cov leej tsob hwb, leej tij leej phauj thiab ta sib tsoom ntseeg.
4. Thov ntuj rau cov neeg kawm npaj txais lub Cim Ntxuav, yuav los ua neeg ntseeg tshiab thaum Hmo Hla.
5. Thov ntuj rau ib tsoom neeg ntseeg Yes Xus kom rov los muaj kev sib haum.
6. Thov ntuj rau haiv neeg His Xas Lais kom lawv los ntseeg Yes Xus.
7. Thov ntuj rau cov neeg uas tsis kam ntseeg Yes Xus.
8. Thov ntuj rau cov neeg uas tsis kam ntseeg Tswv Ntuj.
9. Thov ntuj rau cov ua nom ua tswv kabv teb kav chaw.
10. Thov ntuj rau tas ib tsoom neeg uas ntsib ntau yam kev nyuaj, xws li cov muaj mob muaj nkeeg,
cov tab tom tas sim neej, cov neeg taug kev yuav mus hauj lwm los lwm yam kom txhob ntsib
teeb meem, cov raug quab yuam tsis muaj kev twj lij, thiab rau lub ntiaj teb kom puas tsav yam
kev phem, kev cuav, kev tshaib kev nqhis, kev mob kev nkeeg yaj mus ploj mus kom tas.

KEV HAWM NTOO CUAM

Ua cov kab ke hawm ntoo cuam: Leej choj mus coj tus ntoo cuam los txawb rau ntawm hauv ntej ntawm lub thaj txi ntuj, ces sawv daws los mus hawm tus ntoo cuam.

KEV TXAIS LUB CIM YUG

Xub hais zaj “Peb Txiv nyob saum ntuj…” ces sawv daws mus txais lub Cim Yug; leej choj hais ib zaj thov ntuj kawg, ces tas li ntawd.

TIM 11 LUB 4 HLIS 2020

Hnub Xya Ntshiab Xyoo A - Thaj Txi Ntuj Thaum tsaus Ntuj Hmo Hla

Cov zaj nyeem nram no muaj ntau zaj, tiam sis yog tus TP tsis xav kom nyeem txhua txhua zaj, ces nws muaj cai xaiv saib yuav nyeem zaj twg xwb, thiab cov zaj nyeem mas zoo ib yam txhua txhua xyoo, tiam sis zoo li zaj Ntawv Moo Zoo yuav txawv.

Zaj Nyeem Ib: HAUV PAUS 1: 1—2:2

1 1 Thaum chiv lub keeb, Tswv Ntuj tsim lub ntuj thiab lub ntiaj teb, 2 mas lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum nplaim dej. 3 Tswv Ntuj hais tias : "Kom muaj qhov pom kev." Ces txawm muaj qhov pom kev tuaj. 4 Tswv Ntuj pom tias qhov pom kev ntawd zoo. Tswv Ntuj cais qhov pom kev ntawm qhov tsaus ntuj. 5 Tswv Ntuj hu qhov pom kev ua "nruab hnub" thiab hu qhov tsaus ntuj ua "hmo ntuj." Txawm muaj tsaus ntuj thiab muaj kaj ntug : yog thawj hnub.
6 Tswv Ntuj hais tias : "Kom muaj ib lub ntuj ntsuab nyob hauv nruab nrab cov dej thiab kom nws quas cov dej ntawm cov dej". Ces txawm muaj li ntawd tuaj. 7 Tswv Ntuj ua lub ntuj ntsuab los quas cov dej nyob hauv qab ntuj ntsuab ntawm cov dej nyob saum qaum ntuj ntsuab. 8 Tswv Ntuj hu lub ntuj ntsuab ua "ntuj." Txawm muaj tsaus ntuj thiab muaj kaj ntug : yog hnub ob.
9 Tswv Ntuj hais tias : "Kom cov dej uas nyob hauv qab lub ntuj ntsuab sib sau los ua ib pawg xwb, thiab kom av qhuav tshwm los." Ces txawm muaj li ntawd tuaj. 10 Tswv Ntuj hu cov av qhuav ua "ntiaj teb" thiab hu cov dej ua "hiav txwv." Tswv Ntuj pom tias qhov ntawd zoo. 11 Tswv Ntuj hais tias : "Kom lub ntiaj teb tuaj nroj tsuag ntsuab xiab : kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv, nyias muaj nyias hom noob." Ces txawm muaj li ntawd tuaj. 12 Ntiaj teb tuaj nroj tsuag ntsuab xiab : tej nroj tsuag nyias txawj txi nyias hom noob thiab tej ntoo nyias txawj txi nyias hom txiv, nyias muaj nyias hom noob. Tswv Ntuj pom hais tias qhov ntawd zoo. 13 Txawm muaj tsaus ntuj thiab muaj kaj ntug : yog hnub peb.
14 Tswv Ntuj hais tias : "Kom muaj tej lub ci ci nyob saum lub ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo, 15 kom tej lub ci ci nyob saum lub ntuj ntsuab ua kom ntiaj teb pom kev." Ces txawm muaj li ntawd tuaj. 16 Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub. 17 Tswv Ntuj muab lawv txawb rau saum lub ntuj ntsuab saud kom ntiaj teb pom kev, 18 cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo. 19 Txawm muaj tsaus ntuj thiab muaj kaj ntug : yog hnub plaub.
20 Tswv Ntuj hais tias : "Kom muaj tej tsiaj muaj sia npau xi nyob hauv cov dej, thiab kom muaj noog ya saum npoo ntiaj teb, saum ib nta ntuj ntsuab." Ces txawm muaj li ntawd tuaj. 21 Tswv Ntuj tsim cov nab hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyias muaj raws nyias hom, thiab tsim cov noog muaj tis, nyias muaj raws nyias hom. Tswv Ntuj pom tias qhov ntawd zoo. 22 Tswv Ntuj foom lus zoo rau lawv tias : "Nej yeej meem tsim noob, yeej meem huam vam mus nyob puv cov dej hauv hiav txwv, kom cov noog yeej meem huam vam mus puv ntiaj teb." 23 Txawm muaj tsaus ntuj thiab muaj kaj ntug : yog hnub tsib.
24 Tswv Ntuj hais tias : "Kom lub ntiaj teb txawj muaj tej yam tsiaj muaj sia, nyias muaj raws nyias hom : tsiaj nyeg, kab ntsaum, tsiaj qus, nyias muaj raws nyias hom." Ces txawm muaj li ntawd tuaj. 25 Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo. 26 Tswv Ntuj hais tias : "Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. 27 Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg. Nws tsim nkawd ua txiv neej thiab ua poj niam. 28 Tswv Ntuj foom lus zoo rau nkawd thiab hais rau nkawd tias : "Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av." 29 Tswv Ntuj hais tias : "Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. 30 Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj." Ces txawm muaj li ntawd tuaj. 31 Tswv Ntuj ntsia tas txhua yam nws tau ua : txhua yam ntawd zoo kawg. Txawm muaj tsaus ntuj thiab muaj kaj ntug : yog hnub rau.
2 1 Lub ntuj thiab lub ntiaj teb yog tsim los zoo li no, thiab tas txhua yam nyob rau hauv. 2 Tswv Ntuj ua nws txoj num tiav tas rau hnub xya. Ces hnub xya nws thiaj so, vim nws ua nws txoj num tiav tas lawm.

Los: HP 1: 1, 26-31A

1 Thaum chiv lub keeb, Tswv Ntuj tsim lub ntuj thiab lub ntiaj teb.
26 Tswv Ntuj hais tias : "Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. 27 Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg. Nws tsim nkawd ua txiv neej thiab ua poj niam. 28 Tswv Ntuj foom lus zoo rau nkawd thiab hais rau nkawd tias : "Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av." 29 Tswv Ntuj hais tias : "Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. 30 Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj." Ces txawm muaj li ntawd tuaj. 31 Tswv Ntuj ntsia tas txhua yam nws tau ua : txhua yam ntawd zoo kawg nkaus.

NPN 104: 1-2, 5-6, 10+12, 13-14, 24+35c

Txais: (30) Huab Tais, thov koj xa koj lub Tswv Yim
tuaj ua kom lub ntiaj teb rov tshiab tuaj.

Kuv tus plig, koj cav lus zoo txog HUAB TAIS !
HUAB TAIS, kuv tus Tswv Ntuj, koj loj tas nrho !
Koj hnav hwj chim ci ntsa iab thiab hnav koob meej,
koj hnav qhov pom kev ua tsoos tsho.

Txais: (30) Huab Tais, thov koj xa koj lub Tswv Yim
tuaj ua kom lub ntiaj teb rov tshiab tuaj.

Koj tsim lub ntiaj teb txawb rau chaw ruaj,
ntiaj teb nyob ib sid tsis txav chaw.
Koj muab dej hiav txwv los vov ntiaj teb xws li daim tsoos tsho,
dej nyob tus yees saum cov ncov roob.

Txais: (30) Huab Tais, thov koj xa koj lub Tswv Yim
tuaj ua kom lub ntiaj teb rov tshiab tuaj.

Koj tso cov dej txhawv ntws ua tej tus dej
uas chev ncig tej kis roob.
Cov noog ya saum ntuj khiav los nkaum ze ntawm cov dej,
noog quaj saum cov ceg ntoo tuaj.

Txais: (30) Huab Tais, thov koj xa koj lub Tswv Yim
tuaj ua kom lub ntiaj teb rov tshiab tuaj.

Koj nyob saum koj lub tsev vaj loog tso dej los ywg cov roob,
ntiaj teb puv nkaus koj cov hauj lwm koj ua.
Koj ua kom nroj tsuag hlob los yug tsiaj,
ua kom tej qoob loo hlob rau neeg siv,
kom neeg tau mov tawm nruab av los noj.

Txais: (30) Huab Tais, thov koj xa koj lub Tswv Yim
tuaj ua kom lub ntiaj teb rov tshiab tuaj.

HUAB TAIS, koj cov hauj lwm ntau ua luaj !
Koj tsim tas txhua yam raws kev thoob tsib,
cov tsiaj koj tsim los nyob puv tas ntiaj teb.
Kuv tus plig, koj cav lus zoo txog HUAB TAIS ! As Les Lus Yas !

Txais: (30) Huab Tais, thov koj xa koj lub Tswv Yim
tuaj ua kom lub ntiaj teb rov tshiab tuaj.

Los: NPN 33: 4-5, 6-7, 12-13, 20+22

Txais: (5b) Huab Tais txoj kev zoo nyob puv nkaus lub ntiaj teb.

HUAB TAIS lo lus yog lus ncaj,
nws tej num yog num ruaj txaus ntseeg.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (5b) Huab Tais txoj kev zoo nyob puv nkaus lub ntiaj teb.

HUAB TAIS lo lus los tsim muaj yim txheej cuaj txheej ntuj,
nws txoj pa tsim muaj ib tsoom hnub qub nyob saud.
Nws sau cov dej rau hauv hiav txwv xws li rau ib lub taub dej,
nws tauv cov dej tob cia rau hauv tej lub rhawv dej.

Txais: (5b) Huab Tais txoj kev zoo nyob puv nkaus lub ntiaj teb.

Haiv neeg uas tau HUAB TAIS los uaTswv Ntuj, nws txoj hmoov zoo!
Yog Haiv neeg Tswv Ntuj xaiv los ua HUAB TAIS lub cuab tam!
Nyob txheej ntuj saud, HUAB TAIS dauv muag los ntsia,
nws pom tas nrho ib tsoom neeg.

Txais: (5b) Huab Tais txoj kev zoo nyob puv nkaus lub ntiaj teb.

Peb tus plig tos ntsoov HUAB TAIS:
nws yog tus pab peb, nws yog peb daim leem phiaj.
HUAB TAIS, thov kom koj lub siab zoo roos peb,
vim peb tso siab lug rau koj !

Txais: (5b) Huab Tais txoj kev zoo nyob puv nkaus lub ntiaj teb.

Zaj NYeem Ob: HP 22: 1-18

1 Thaum tej xwm no dhau tas lawm, Tswv Ntuj sim Has Nplas Has siab. Nws hu tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 2 Tswv Ntuj hais tias : "Coj koj leej tub twm zeej His Xas Has uas koj hlub kawg, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj." 3 Tag kis, Has Nplas Has sawv ntxov los, nws nog nra rau nws tus luj, nws coj ob tug tub txib thiab nws tus tub His Xas Has nrog nws mus. Nws phua ib co taws npaj mus ua thaj txi ntuj, ces nws sawv kev mus rau thaj chaw uas Tswv Ntuj qhia rau nws.
4 Hnub peb, Has Nplas Has tsa muag ntsia pom thaj chaw ntawd tseem nyob deb. 5 Has Nplas Has hais rau nws ob tug tub txib tias : "Neb nrog tus luj nyob ntawm no. Kuv tus me nyuam wb mus kom txog tid, wb yuav pe hawm Ntuj tas wb mam rov los ntawm neb." 6 Has Nplas Has muab cov taws txi Ntuj nog rau nws tus tub His Xas Has ris, hos nws nqa cov hluav taws thiab rab riam, ces nkawd ob leeg ua ke mus. 7 His Xas Has nug nws txiv Has Nplas Has tias : "Kuv txiv !" Has Nplas Has teb tias : "Me tub, koj hais dab tsi !" His Xas Has hais ntxiv tias : "Ua cas pom hluav taws thiab cov taws xwb, ua li tus yaj yuav coj los hlawv txi Ntuj nyob qhov twg ?" 8 Has Nplas Has teb tias : "Me tub, Tswv Ntuj mam li muab tus yaj uas yuav txi Ntuj rau wb." Ces nkawd ob leeg taug kev mus ntxiv.
9 Thaum nkawd tuaj txog thaj chaw uas Tswv Ntuj tau qhia nws, Has Nplas Has tsa ib lub thaj rau ntawd thiab nws muab cov taws mus teeb rau saud. Nws muab nws tus tub His Xas Has pav, ces nws muab tso rau saum cov taws saum lub thaj txi Ntuj. 10 Has Nplas Has tsa tes mus nthos rab riam yuav coj los tua nws tus tub. 11 Tiam sis HUAB TAIS tus Tshiab hu saum ntuj tuaj rau nws tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 12 Tus Tshiab hais tias : "Txhob tsa koj txhais tes rau saum tus me nyuad ! Txhob ua dab tsi phem rau nws ! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv." 13 Has Nplas Has tsa muag ntsia pom ib tug laug tshis uas ob tug kub daig hauv ib koog khaub. Ces nws mus muab tus laug tshis los hlawv txi Ntuj hloov nws tus tub chaw. 14 Has Nplas Has tis npe rau thaj chaw ntawd hu ua "HUAB TAIS yuav pub.” Ces zaum no thiaj muaj lo lus hais kam tias "Saum lub roob HUAB TAIS yuav pub."
15 HUAB TAIS tus Tshiab rov hu zaum ob saum ntuj tuaj rau Has Nplas Has, 16 nws hais tias : "HUAB TAIS hais tias : Kuv tuav txog kuv lub npe cog lus rau koj tias : vim koj tau ua li ntawd, koj tsis yig, koj tuaj yeem muab koj leej tub twm zeej los txi rau kuv, 17 mas kuv yuav foom hmoov zoo ntau rau koj, kuv yuav ua kom koj tsoom xeeb zeej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb zeej xeeb ntxwv yuav ua tswv kav lawv cov yeeb ncuab tej qhov rooj loog. 18 Tas txhua haiv neeg nyob ntiaj teb yuav tuav txog koj tsoom xeeb ntxwv lub npe los sib foom hmoov zoo, vim koj tau mloog kuv lus."

Los: HP 22: 1-2, 9A, 10-13, 15-18

1 Thaum tej xwm no dhau tas lawm, Tswv Ntuj sim Has Nplas Has siab. Nws hu tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 2 Tswv Ntuj hais tias : "Coj koj leej tub twm zeej His Xas Has uas koj hlub kawg, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj."
9 Thaum nkawd tuaj txog thaj chaw uas Tswv Ntuj tau qhia nws, Has Nplas Has tsa ib lub thaj rau ntawd thiab nws muab cov taws mus teeb rau saud.
10 Has Nplas Has tsa tes mus nthos rab riam yuav coj los tua nws tus tub. 11 Tiam sis HUAB TAIS tus Tshiab hu saum ntuj tuaj rau nws tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 12 Tus Tshiab hais tias : "Txhob tsa koj txhais tes rau saum tus me nyuad ! Txhob ua dab tsi phem rau nws ! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv." 13 Has Nplas Has tsa muag ntsia pom ib tug laug tshis uas ob tug kub daig hauv ib koog pos. Ces nws mus muab tus laug tshis los hlawv txi Ntuj hloov nws tus tub chaw.
15 HUAB TAIS tus Tshiab rov hu zaum ob saum ntuj tuaj rau Has Nplas Has, 16 nws hais tias : "HUAB TAIS hais tias : Kuv tuav txog kuv lub npe cog lus rau koj tias : vim koj tau ua li ntawd, koj tsis yig, koj tuaj yeem muab koj leej tub twm zeej los txi rau kuv, 17 mas kuv yuav foom hmoov zoo ntau rau koj, kuv yuav ua kom koj tsoom xeeb zeej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb zeej xeeb ntxwv yuav ua tswv kav lawv cov yeeb ncuab tej qhov rooj loog. 18 Tas txhua haiv neeg nyob ntiaj teb yuav tuav txog koj tsoom xeeb ntxwv lub npe los sib foom hmoov zoo, vim koj tau mloog kuv lus."

NPN 16: 5+8, 9-10, 11

Txais: (1) Huab Tais, koj yog kuv lub cuab tam.

HUAB TAIS, koj yog lub cuab tam kuv tau txais los,
Koj yog kuv lub ntim, koj yog tus tuav kuv txoj hmoo.
Kuv cia HUAB TAIS nyob ntawm kuv xub ntiag tsis tseg,
Vim nws nyob rawv ntawm kuv sab xis, kuv yuav tsis qaij qaug.

Txais: (1) Huab Tais, koj yog kuv lub cuab tam.

Vim li ntawd, kuv lub siab luag ntxhi, kuv tus plig hom khaj,
kuv lub cev los kuj nyob nyab xeeb.
Vim koj yuav tsis tso kuv pov tseg rau ntuj txias teb tsaus.
Koj tsis kheev kom tus ntseeg txog koj paub txoj kev lwj kev puas.

Txais: (1) Huab Tais, koj yog kuv lub cuab tam.

Koj yuav qhia txoj kev taug mus muaj txoj sia rau kuv paub,
Yuav muaj kev zoo siab tsis tu nyob ntawm koj xub ntiag,
Yuav muaj kev nplig siab nyob ntawm koj sab xis mus ib txhis.
Txais: (1) Huab Tais, koj yog kuv lub cuab tam.

Zaj Nyeem Peb: KEV TSIV 14: 15—15:1

14 15 HUAB TAIS hais rau Mais Xes tias : "Vim li cas koj thiaj hu kuv cuag li ntawd ? Koj hais rau cov His Xas Lais kom lawv rov sawv kev mus ntxiv. 16 Koj yuav tsa koj rab pas thiab xyab koj txhais tes rau saum dej ntuj, koj yuav faib dej ua ob sab, kom cov His Xas Lais tau taug kev qhuav qhawv hauv qab thu dej mus. 17 Kuv yuav ua kom cov Hais Nkws Tos lub siab tawv qhawv tuaj, lawv yuav caum cov His Xas Lais qab hla hauv qab thu dej mus thiab, ces kuv yuav siv Fas Las Oos thiab nws cov tub rog, nws cov tsheb rog thiab cov tsav tsheb los ua kom kuv nto koob meej. 18 Thaum kuv siv Fas Las Oos thiab nws cov tsheb rog thiab cov tsav tsheb ua kom kuv nto koob meej lawm, cov Hais Nkws Tos mam yuav paub tias kuv yog HUAB TAIS tiag."
19 Tswv Ntuj tus Tshiab uas mus ua tsoom His Xas Lais ntej, hloov chaw mus thaiv tom lawv qab : ces tus ncej huab nyob ntawm lawv hauv ntej txav chaw mus nyob tom lawv qub qab. 20 Nws mus nyob nruab nrab kem tog Hais Nkws Tos ntawm tog His Xas Lais. Twv huab dub nciab tsaus nti ib hmos thaiv lawv, ces hmo ntawd ib hmos, ib tog txav tsis ti ib tog li. 21 Mais Xes tsa tes rau saum dej ntuj, ces HUAB TAIS ua cua hlob hlob ntsawj toob fab tuaj thawb cov dej ib hmos, qab thu dej tawm qhuav qhawv los, hos cov dej faib nyob ob sab. 22 Cov His Xas Lais nkag hauv hiav txwv, lawv tsuj av qhuav qhawv mus, nyob ntawm lawv sab xis thiab sab laug muaj ob lub phab ntsa dej. 23 Cov Hais Nkws Tos caum lawv qab : Fas Las Oos cov nees, cov tsheb rog thiab cov tsav tsheb nkag mus hauv dej ntuj caum cov cov His Xas Lais. 24 Thaum yuav kaj ntug, HUAB TAIS nyob saum tus ncej huab hluav taws, ntsia pom cov Hais Nkws Tos. Nws ua kom cov Hais Nkws Tos tau ntshai kawg. 25 Nws ua kom lawv cov log tsheb daig thiab ntog qeeb qeeb. Cov Hais Nkws Tos hais tias : "Peb khiav mus deb ntawm cov His Xas Lais vim HUAB TAIS pab lawv tawm tsam ntaus cov Hais Nkws Tos !" 26 HUAB TAIS hais rau Mais Xes tias : "Koj tsa tes rau saum dej ntuj, kom dej ntws rov los nyab cov Hais Nkws Tos thiab lawv cov tsheb rog thiab cov tsav tsheb tib si." 27 Mais Xes tsa tes rau saum dej ntuj, ces thaum pib kaj ntug, dej ntws rov los nyob qhov qub chaw. Cov Hais Nkws Tos tig khiav rov qab, tiam sis dej nphau nphwv los npog lawv, HUAB TAIS ua kom lawv ntxeev zom zaws rau hauv dej ntuj. 28 Cov dej nphau rov los nyob qhov qub, los npog cov tsheb thiab cov tsav tsheb Hais Nkws Tos uas tau nkag mus hauv qab thu dej caum cov His Xas Lais, tsis dim ib tug li. 29 Hos cov His Xas Lais tau taug kev qhuav nyob hauv plawv dej ntuj, cov dej ua ob sab phab ntsa nyob ntawm lawv sab xis thiab sab laug. 30 Hnub ntawd, HUAB TAIS cawm cov His Xas Lais dim ntawm cov Hais Nkws Tos txhais tes. Cov His Xas Lais pom cov Hais Nkws Tos tuag pawg lug ntawm ntug dej ntuj. 31 Cov His Xas Lais pom HUAB TAIS lub peev xwm uas nws siv los tiv yeej cov Hais Nkws Tos. Tsoom pej xeem sawv daws hwm HUAB TAIS. Lawv tso siab rau HUAB TAIS thiab rau nws tus tub txib Mais Xes.
15 1 Ces Mais Xes thiab tsoom tub ki His Xas Lais hu nkauj cav txog HUAB TAIS li no : “Kuv hu nkauj cav txog HUAB TAIS, vim nws yeej thiab nws muaj hwj chim loj, nws tau muab tus nees thiab tus caij nees pov rau hauv hiav txwv.”

NPN: KT 15: 1-2, 3-4, 5-6, 17-18

Txais: (1b) Peb yuav cav txog Huab Tais vim nws tau ua kom nws nto koob meej.

Kuv hu nkauj cav txog HUAB TAIS, vim nws yeej thiab nws muaj hwj chim loj,
nws tau muab tus nees thiab tus caij nees pov rau hauv hiav txwv.
HUAB TAIS yog kuv lub zog, nws yog kuv lub peev xwm, nws tau cawm kuv dim.
Nws yog kuv tus Tswv Ntuj, kuv cav txog nws,
nws yog kuv txiv tus Tswv Ntuj, kuv qhuas txog nws.

Txais: (1b) Peb yuav cav txog Huab Tais vim nws tau ua kom nws nto koob meej.

HUAB TAIS yog ib tug tseem tub rog, nws lub npe yog HUAB TAIS.
Nws muab Fas Las Oos cov tsheb rog thiab cov tub rog pov rau hauv dej ntuj tas.
Dej Ntuj Liab nqos nws cov thawj tub rog tas tib si

Txais: (1b) Peb yuav cav txog Huab Tais vim nws tau ua kom nws nto koob meej.

Cov dej nphau nphwv los nyab lawv tas,
Lawv tog rau hauv qab thu xws li tej lub pob zeb.
Huab Tais, koj sab tes xis muaj hwj huam loj tas nrho,
Huab Tais, koj sab tes xis ua kom yeeb ncuab puas nstoog tas.

Txais: (1b) Peb yuav cav txog Huab Tais vim nws tau ua kom nws nto koob meej.

HUAB TAIS, koj coj koj haiv neeg uas koj tau cawm los,
koj muab lawv cog rau saum lub roob uas yog koj li cuab tam,
qhov chaw uas koj muaj koj lub rooj zaum,
thaj chaw ntshiab uas yog koj ob txhais tes tau npaj cia.
HUAB TAIS yuav ua vaj nyob mus li tas ib txhiab ib txhis.

Txais: (1b) Peb yuav cav txog Huab Tais vim nws tau ua kom nws nto koob meej.

Zaj Nyeem Plaub: HX 54: 5-14

5 Tus tsim koj los yog koj tus txiv; nws lub npe hu ua tus HUAB TAIS Kav Tsoom Tshiab. His Xas Lais tus Ntshiab yog koj tus Cawm Seej; nws hu ua tus Tswv Ntuj kav tas lub ntiaj teb. 6 HUAB TAIS rov hu koj los, xws li tus poj niam uas raug muab tso pov tseg thiab muaj kev tu siab loj, xws li tus poj niam uas yuav thaum hluas, tiam sis muab tso tseg lawm. Koj tus Tswv Ntuj hais li ntawd. 7 Kuv muab koj tso tseg ib nyuag ntu luv luv, tab sis kuv lub siab hlub koj heev, kuv rov sau koj los dua. 8 Kuv tau npau taws heev rau koj, kuv thiaj nraim kuv lub ntsej muag ib nyuag chim, tab sis kuv lub siab hlub koj tas mus ib txhis, kuv yuav khuv leej koj. HUAB TAIS koj tus Cawm Seej hais li ntawd.
9 Yuav zoo ib yam li lub caij thaum Nos Hes nyob rau kuv; thaum ntawd kuv tau cog lus tias Nos Hes cov dej yuav tsis nyab ntiaj teb ntxiv. Nyem no, kuv cog lus tias kuv yuav tsis npau taws rau koj ntxiv, thiab kuv yuav tsis ua phem rau koj ntxiv. 10 Txawm cov roob txawj txav mus, cov hauv toj txawj vau, los kuv lub siab hlub koj yuav tsis nrug deb koj li, kuv txoj kev cog lus pub kev thaj yeeb yuav tsis raug thim. Tus HUAB TAIS khuv leej koj hais li ntawd.
11 Tus neeg raug txom nyem aw, koj tau raug cua daj cua dub tuaj ntsawj koj, tsis muaj leej twg nplij koj; koj ntsia saib, kuv yuav rov tsa koj cov pob zeb yog pov haum daj liab, yuav muab pov haum xiav los ua koj cov taw ntsa; 12 kuv yuav muab pov haum txaij ntau yam los ua koj cov taub hau phab ntsa, yuav muab pov haum liab los ua koj cov rooj vag thiab muab pob zeb pov haum los ua tas nrho koj tej phab ntsa tib si.
13 Koj cov tub ki sawv daws yuav ua HUAB TAIS thwj tim, ces lawv yuav muaj kev kaj siab loj. 14 Koj yuav nyob ruaj khov kho nyob hauv txoj kev ncaj; koj yuav tsis ntsib txoj kev nyuaj siab loj, vim koj tsis ntshai dab tsi; koj yuav tsis muaj kev txhawj ntshai rwg, vim kev txhawj ntshai yuav tsis txav los ze ntawm koj.

NPN 30: 2+4, 5-6, 11+12B+13B

Txais: (2a) Kuv yuav cav txog koj, Huab Tais, vim koj tau cawm kuv.

HUAB TAIS, kuv cav lus zoo txog koj, vim koj tau cawm kuv dim,
koj tsis cia kuv ua yeeb ncuab lub chaw zoo siab.
HUAB TAIS, koj rub kuv tus plig tawm hauv ntuj txias teb tsaus los,
kuv nrog lawv nqes hauv qhov av, tiam sis koj tau txuag kuv txoj sia.

Txais: (2a) Kuv yuav cav txog koj, Huab Tais, vim koj tau cawm kuv.

Cov ntseeg HUAB TAIS, nej hu nkauj cav txog nws,
nej ua tsaug rau nws lub npe ntshiab.
Nws npau taws, tsuas npau ib pliag, nws hlub neeg hlub ib sid.
Hmo ntuj txoj kev kua muag poob nkag los,
tab sis, qhov kaj ntug coj kev zoo siab tuaj.

Txais: (2a) Kuv yuav cav txog koj, Huab Tais, vim koj tau cawm kuv.

HUAB TAIS, koj mloog mas ! thov koj hlub kuv!
HUAB TAIS, thov koj pab kuv!
Koj muab kuv txoj kev quaj nyiav hloov los ua kev dhia lom zem,
HUAB TAIS, kuv tus Tswv Ntuj, kuv yuav ua koj tsaug mus li.

Txais: (2a) Kuv yuav cav txog koj, Huab Tais, vim koj tau cawm kuv.

Zaj Nyeem Tsib: HX 55: 1-11

HUAB TAIS hais tias:
1 Nej sawv daws uas nej nqhis dej, cia li tuaj cuag tus dej. Nej cov uas tsis muaj nyiaj txiag, nej tuaj mas ! Nej muas, nej noj, tsis tas yuav them nyiaj. Nej tuaj muas cawv txiv ntoo muas mis nyuj, tsis tas siv nyiaj, tsis tas them ib tug nqi. 2 Ua cas nej yuav siv nyiaj los muas tej yam tsis yog mov noj ? Ua cas nej siv nej cov nyiaj nqe zog los muas tej yam tsis ua kom nej zoo siab ? Nej mloog kuv mas ! Ces nej yuav tau noj tej yam zoo, nej yuav tau tej yam txhiam xws qab xis nej lub ncauj. 3a Nej tig ntsej los mloog kuv mog, thiab nej tuaj cuag kuv ! Nej mloog kuv, ces nej tus plig yuav muaj txoj sia nyob. 3b Kuv yuav nrog nej cog ib lo lus nyob mus ib txhiab ib txhis, raws li kuv txoj kev hlub Das Vis uas yog kev hlub ruaj khov thiab tseeb. 4 Kuv tau tsa Das Vis los ua ib tug tim khawv rau cov haiv neeg, ua ib tug ntaus thawj thiab ib tug tswj cov haiv neeg. 5 Koj yuav hu ib co kuj cuab uas koj tsis paub, ces cov kuj cuab uas tsis paub koj yuav khiav tuaj cuag koj, yog vim HUAB TAIS koj tus Tswv Ntuj thiab yog vim His Xas Lais tus Ntshiab tau ua kom koj nto koob meej.
6 Nej cia li nrhiav HUAB TAIS thaum nej tseem nrhiav tau nws, nej hu txog nws thaum nws tseem nyob ze. 7 Tus siab phem, nws yuav tsum tso nws txoj kev phem tseg; tus siab nkhaus yuav tsum tso nws lub tswv yim lim hiam tseg. Nws yuav tig rov los cuag HUAB TAIS, ces HUAB TAIS yuav khuv leej nws. Nws cia li tig los cuag peb tus Tswv Ntuj, vim Tswv Ntuj muaj lub siab dav kawg nkaus zam rau nws.
8 Vim tias nej zaj tswv yim tsis zoo li kuv zaj, nej txoj kev tsis zoo li kuv txoj. Yog HUAB TAIS lus ceeb toom. 9 Lub ntuj nyob siab dua lub ntiaj teb npaum li cas, kuv txoj kev nyob siab dua nej txoj kev npaum li ntawd, thiab kuv zaj tswv yim kuj nyob siab dua nej zaj tswv yim ib yam li ntawd. 10 Cov nag thiab cov daus uas poob saum ntuj los, lawv yuav tsis rov mus saum ntuj tiam sis lawv yuav mus ywg lub ntiaj, ua kom ntiaj teb pub tau txoj sia, kom nws nthaw taus kaus, txi taus txiv rau tus tseb cov noob, thiab pub tau mov rau tus yuav noj. 11 Lo lus tawm ntawm kuv lub ncauj los kuj zoo ib yam li ntawd. Nws tsis rov los cuag kuv tes dawb tes npliag, nws yuav tsum ua qhov kuv xav kom nws ua, thiab yuav tsum ua txoj hauj lwm kuv xa nws mus ua kom tiav log tas tso.

NPN: HX 12: 2-3, 4, 5-6

Txais: (3) Nej yuav zoo siab hlo mus ce cov dej txhawv uas pub kev cawm seej.

Tswv Ntuj yog kuv tus cawm seej tiag.
Kuv tso siab rau nws, kuv tsis txhawj.
Kuv lub zog thiab kuv peev xwm yog HUAB TAIS.
Nws yog tus tau cawm kuv.
Nej yuav zoo siab luag ntxhi mus
ce dej hauv lub qhov dej cawm neeg.

Txais: (3) Nej yuav zoo siab hlo mus ce cov dej txhawv uas pub kev cawm seej.

Nej ua HUAB TAIS tsaug, nej cav txog nws lub npe !
Nej tshaj nws tej hauj lwm loj nyob hauv cov haiv neeg,
nej tshaj rau lawv kom lawv paub tias nws lub npe zoo tas nrho.

Txais: (3) Nej yuav zoo siab hlo mus ce cov dej txhawv uas pub kev cawm seej.

Nej hu nkauj cav txog HUAB TAIS vim nws
tau ua tej yam muaj hwj chim loj tas nrho,
kom tas ntiaj paub txog tej ntawd.
Tsoom neeg nyob Xis Yoos, nej qw suab zoo siab,
vim His Xas Lais tus Ntshiab loj tas nrho nyob hauv nej.

Txais: (3) Nej yuav zoo siab hlo mus ce cov dej txhawv uas pub kev cawm seej.

Zaj Nyeem Rau: NPAS LWS 3: 9-15, 32-4:4

His Xas Lais, koj yuav tsum mloog cov lus qhia uas pub txoj sia: Koj cuab pob ntseg mloog ces koj yuav paub kev xyuam xim! 10 Vim li cas, His Xas Lais aw, vim li cas koj thiaj nyob hauv koj cov yeeb ncuab lub teb chaws, koj thiaj ua neej laus nyob hauv pej kum av, 11 koj thiaj ua kom koj tsis huv nrog cov neeg tuag, luag thiaj suav koj xyaw cov mus rau ntuj txias teb tsaus lawm xwb? 12 Yog vim koj tau tso lub hauv paus txhawv kev thoob tsib pov tseg lawm. 13 Yog tias koj tau taug raws Tswv Ntuj txoj kev mas koj yuav tau nyob thaj yeeb lug mus li. 14 Koj yuav tsum kawm kom koj paub tias kev thoob tsib yog nyob qhov twg, lub zog yog nyob qhov twg, kev txawj ntse yog nyob qhov twg, ces koj thiaj yuav paub txog tias lub neej ntev thiab txoj sia yog nyob qhov twg, qhov pom kev rau yus lub qhov muag thiab kev thaj yeeb yog nyob qhov twg. 15 Leej twg thiaj nrhiav tau kev thoob tsib qhov chaw nyob? Leej twg thiaj nkag tau rau hauv nws tej txhab nplua nuj?
32 Tsuas yog tus uas paub tas ib puas tsav yam xwb thiaj paub kev thoob tsib; nws txoj kev to taub ua kom nws soj ntsuam tau kev thoob tsib; nws yog tus uas tau npaj lub ntiaj teb kom nyob ib txhis, thiab tau tso tsiaj muaj plaub txhais tes taw los nyob puv rau hauv. 33 Nws yog tus uas xa qhov pom kev mus, ces qhov pom kev mus, yog nws hu qhov pom kev los, ces qhov pom kev tshee na mloog nws lus rov los. 34 Cov hnub qub ci thaum txog lawv lub caij nyoog mas ua rau lawv zoo siab; 35 nws hu lawv, ces lawv teb tias: “Peb nyob ntawm no.” Lawv zoo siab ci ntsa rau tus uas tsim lawv los pom. 36 Tus ntawd yog peb tus Tswv Ntuj, tsis muaj lwm tus ntxiv zoo li nws lawm. 37 Nws tau tsa kom muaj txoj kev paub txuj tas huv si, thiab tau muab rau Yas Kos, nws tus tub txib, muab rau His Xas Lais, tus tub uas nws hlub. 38 Txoj kev paub txuj ntawd tau tshwm los rau ntiaj teb thiab tau los nrog tib neeg nyob.
4 1 Yog phau ntawv ntim Tswv Ntuj cov lus qhia, yog txoj cai uas nyob mus li; leej twg khaws txoj cai ntawd yuav muaj txoj sia, leej twg tso txoj cai ntawd tseg yuav ntsib kev tuag. 2 Yas Kos, koj cia li tig rov los, cia li khaws nkaus txoj cai los coj, cia li taug kev raws nws qhov pom kev thiaj li yuav mus txog qhov ci ntsa loj. 3 Koj tsis txhob cia lwm tus tau koj lub koob meej, tsis txhob cia lwm pej kum haiv neeg tau cov koob hmoov uas yog koj li. 4 His Xas Lais, peb tau txoj hmoov zoo, vim peb paub txog tias yam twg yog yam Tswv Ntuj nyiam.

NPN 19: 8, 9, 10, 11

Txais: (Zam 6:68c) Huab Tais, koj muaj cov lus pub txoj sia nyob mus li.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog ntseeg,
nws ua kom tus neeg ruam thoob tsib tuaj.

Txais: (Zam 6:68c) Huab Tais, koj muaj cov lus pub txoj sia nyob mus li.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus meej kawg nkaus,
ua kom qhov muag pom kev.

Txais: (Zam 6:68c) Huab Tais, koj muaj cov lus pub txoj sia nyob mus li.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov cai nws txiav yog lus tseeb,
Txhua lo lus nws txiav yog qhov ncaj.

Txais: (Zam 6:68c) Huab Tais, koj muaj cov lus pub txoj sia nyob mus li.

Nws cov cai nws txiav tsim nyog ntshaw dua kub,
Tsim nyog ntshaw dua ib txhab tseem kub,
qab zib dua cov kua zib,
los cov zib mu ntawm daim nas muv.

Txais: (Zam 6:68c) Huab Tais, koj muaj cov lus pub txoj sia nyob mus li.

Zaj Nyeem Xya: EXK 36: 16-17A, 18-28

16 HUAB TAIS lo lus nrov tuaj rau kuv li no: 17 “Neeg leej tub, thaum tsoom neeg His Xas Lais nyob hauv lawv thaj av, lawv tus yam ntxwv thiab lawv tej hauj lwm ua kom lawv thaj av tsis huv tas.
18 Kuv thiaj tau tso kuv lub siab npau taws rau lawv, vim lawv ua luag roj ntsha ntws nyob hauv lub teb chaws, lawv muab tej tus mlom dab los ua kom lawv teb chaws phem. 19 Kuv tau ua kom cov His Xas Lais sib tawg mus nyob hauv nruab nrab cov kuj cuab, kuv tau muab lawv sib faib mus rau pej kum teb. Kuv tau txiav txim rau lawv raws lawv tus yam ntxwv thiab lawv tes dej num. 20 Thaum lawv mus nyob pej kum teb, txawm yuav nyob qhov twg los xij, lawv ua tsis zoo dau kuv lub npe ntshiab, lawv ua kom pej kum haiv neeg tau kev hais tias: ‘Lawv yog HUAB TAIS haiv neeg, tsis kav lawv tau tawm hauv nws lub teb chaws tuaj.’ 21 Tab sis kuv txuag kuv lub npe ntshiab, uas His Xas Lais ua kom puas nyob hauv cov kuj cuab uas lawv mus nyob.
22 Koj mus hais rau tsoom His Xas Lais tias : ‘Huab Tais Tswv Ntuj hais li no : His Xas Lais tsev neeg, tsis yog vim nej ces kuv thiaj ua zoo li no, yog vim kuv lub npe ntshiab uas nej tau ua puas nyob hauv cov kuj cuab uas nej mus nyob. 23 Kuv yuav ua kom neeg pom tias kuv lub npe loj yeej ntshiab tiag, vim nej tau ua kom kuv lub npe puas nyob hauv cov kuj cuab uas nej mus nyob. Cov kuj cuab thiaj yuav paub tias kuv yog HUAB TAIS.’ HUAB TAIS Tswv Ntuj hais li ntawd. ‘Kuv yuav ua kom kuv txoj kev ntshiab tawm hauv nej tuaj rau lawv qhov muag pom. 24 Vim kuv yuav thau nej hauv cov kuj cuab los, kuv yuav sau nej ntawm tas cov pej kum teb los ua ke, thiab kuv yuav coj nej rov los nyob hauv nej thaj av. 25 Kuv yuav nchos dej ntshiab rau saum nej, ces nej yuav huv tuaj tsis muaj qhov qias ntxiv. Kuv yuav ua kom nej tso nej tej mlom dab pov tseg kom nej huv tuaj. 26 Kuv yuav pub ib lub siab tshiab rau nej, thiab kuv yuav tso ib lub tswv yim tshiab rau hauv nej; kuv yuav dawj lub siab tawv li zeb tawm hauv nej mus thiab yuav cog ib lub siab muag li nqaij rau hauv nej lub cev. 27 Kuv yuav muab kuv lub tswv yim rau hauv nej. Kuv yuav ua kom nej mus raws kuv tej lij choj, thiab kom nej coj kuv tej kev cai. 28 Nej yuav tau nyob hauv lub teb chaws uas kuv muab rau nej phaj txiv phaj yawg. Nej yuav yog kuv haiv neeg, kuv yuav yog nej tus Tswv Ntuj.

NPN * 42: 3, 5; 43:3, 4

Yog muaj cov txais lub Cim Ntxuav hu zaj no.

Txais: (42:2) Xws li tus kauv nqhis cov dej ntws lug,
kuv tus ntsuj plig nqhis txog koj, Tswv Ntuj.

Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Txais: (42:2) Xws li tus kauv nqhis cov dej ntws lug,
kuv tus ntsuj plig nqhis txog koj, Tswv Ntuj.

Kuv nrog npoj neeg coob taug kev,
coj lawv taug kev mus kom txog Tswv Ntuj lub tsev,
sawv daws qw zoo siab thiab ua Ntuj tsaug,
sawv daws ua koob tsheej muaj kev lom zem.

Txais: (42:2) Xws li tus kauv nqhis cov dej ntws lug,
kuv tus ntsuj plig nqhis txog koj, Tswv Ntuj.

Thov koj xa koj qhov pom kev thiab qhov tseeb tuaj rau kuv,
kom coj kuv kev mus txog saum lub roob koj txoj kev ntshiab,
mus txog ntua qhov chaw koj nyob.

Txais: (42:2) Xws li tus kauv nqhis cov dej ntws lug,
kuv tus ntsuj plig nqhis txog koj, Tswv Ntuj.

Kuv yuav nkag mus rau hauv Tswv Ntuj lub thaj,
mus txog tus Tswv Ntuj uas ua kom kuv zoo siab.
Ces kuv yuav ntaus nkauj nog ncas ua koj tsaug,
Tswv Ntuj, kuv tus Tswv Ntuj!

Txais: (42:2) Xws li tus kauv nqhis cov dej ntws lug,
kuv tus ntsuj plig nqhis txog koj, Tswv Ntuj.

Yog tsis muaj neeg txais lub Cim Ntxuav hu zaj nram no.

NPN: * HX 12: 2-3, 4BCD, 5-6

Txais: (3) Nej yuav zoo siab hlo mus ce cov dej txhawv uas pub kev cawm seej.

Tswv Ntuj yog kuv tus cawm seej tiag.
Kuv tso siab lug, kuv tsis txhawj li.
Kuv lub zog thiab kuv lub peev xwm yog HUAB TAIS.
Nws yog kuv tus cawm seej.
Nej yuav zoo siab luag ntxhi mus
ce dej hauv lub qhov dej cawm neeg.

Txais: (3) Nej yuav zoo siab hlo mus ce cov dej txhawv uas pub kev cawm seej.

Nej ua HUAB TAIS tsaug, nej cav txog nws lub npe !
Nej tshaj nws tej hauj lwm loj kom cov haiv neeg paub txog,
nej tshaj kom lawv paub tias nws lub npe zoo tas nrho.

Txais: (3) Nej yuav zoo siab hlo mus ce cov dej txhawv uas pub kev cawm seej.

Nej hu nkauj cav txog HUAB TAIS
vim nws tau ua ua tej yam muaj hwj chim loj tas nrho,
kom tas ntiaj paub txog tej ntawd.
Nroog Xis Yoos, koj qw suab zoo siab mog,
vim His Xas Lais tus Ntshiab loj tas nrho nyob hauv nej.

Txais: (3) Nej yuav zoo siab hlo mus ce cov dej txhawv uas pub kev cawm seej.

Los: * NPN 51: 12-13, 14-15, 18-19

Txais: (12a) Tswv Ntuj, thov koj tsim ib lub siab huv lis si rau kuv.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (12a) Tswv Ntuj, thov koj tsim ib lub siab huv lis si rau kuv.

Koj ua kom kuv rov zoo siab nyob hauv koj txoj kev cawm;
thov koj muab ib lub tswv yim nyiam mloog lus rau kuv.
Kuv yuav qhia koj txoj kev rau cov neeg yuam kev,
ces cov neeg txhaum yuav tig rov los cuag koj.

Txais: (12a) Tswv Ntuj, thov koj tsim ib lub siab huv lis si rau kuv.

Vim koj tsis zoo siab txais cov kev txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj, yog muaj ib lub siab xav lees txhaum;
muaj ib lub siab xav lees txhaum thiab ua neeg me,
Tswv ntuj, koj yuav tsis thuam.

Txais: (12a) Tswv Ntuj, thov koj tsim ib lub siab huv lis si rau kuv.

Zaj Nyeem Tsab Ntawv: * LM 6: 3-11

Cov kwv tij:
3 Nej puas paub tias peb cov uas tau txais lub Cim Ntxuav nyob hauv Yes Xus Pleev, mas yog peb txais lub Cim Ntxuav nyob hauv Yes Xus txoj kev tuag? 4 Lub Cim Ntxuav ua kom peb nrog Yes Xus mus zwm ntxa nyob hauv txoj kev tuag, kom ib yam li Leej Pleev ciaj sawv hauv cov tub tuag rov los vim Leej Txiv lub hwj chim, peb kuj tau txais ib lub neej tshiab ua thiab. 5 Yog tias peb nrog Yes Xus koom ua ib tug xwb vim peb nrog nws tuag ua ke, mas peb kuj yuav nrog nws koom ua ib tug nyob hauv txoj kev sawv rov los thiab. 6 Peb yuav tsum to taub tias yog peb muab peb tus qub neeg ntsia nrog Yes Xus rau saum ntoo cuam, mas peb lub cev uas xib rau kev txhaum yuav tsis muaj zog ntxiv, ces peb thiaj tsis ua kev txhaum cov qhev ntxiv. 7 Vim tias tus neeg tuag lawm, tsis zwm rau txoj kev txhaum ntxiv. 8 Yog peb nrog Leej Pleev tuag mas peb ntseeg tias peb kuj yuav nrog nws muaj txoj sia thiab. 9 Peb paub tias Leej Pleev sawv hauv qhov tuag los lawm, nws yuav tsis rov tuag dua lawm, txoj kev tuag tsis muaj cuab kav tuaj raug nws ib zaug ntxiv. 10 Nws tuag yog yuav ua kom txoj kev txhaum tuag, nws tsuas tuag ib zaug xwb. Hos nws ciaj rov los yog ciaj kom muaj txoj sia nyob hauv Tswv Ntuj. 11 Ntawm nej, kuj zoo ib yam li ntawd thiab : nej yuav tsum saib tias nej tuag nyob sab kev txhaum lawm, tiam sis nej nrog Tswv Ntuj muaj txoj sia nyob hauv Yes Xus Pleev.

NPN * 118 : 1-2, 16-17, 22-23

Txais: As les lus yas, as les lus yas, as les lus yas.

Nej ua HUAB TAIS tsaug, vim nws siab zoo,
nws hlub peb tas ib txhiab ib txhis.
Kom tsev neeg His Xas Lais hais tias :
“Nws khuv leej peb tas ib txhiab ib txhis.”

Txais: As les lus yas, as les lus yas, as les lus yas.

HUAB TAIS txhais tes xis ua hauj lwm muaj zog loj!
HUAB TAIS txhais tes xis nto koob meej!
Kuv yuav tsis tuag, kuv yuav muaj txoj sia nyob,
kuv yuav tshaj txog HUAB TAIS cov hauj lwm.

Txais: As les lus yas, as les lus yas, as les lus yas.

Lub pob zeb uas cov txhim tsev muab pov tseg,
yog lub pob zeb txheem kaum tsev.
Qhov ntawd yog HUAB TAIS ua kom muaj tau,
yog yam txaus qhuas kawg rau peb qhov muag pom.

Txais: As les lus yas, as les lus yas, as les lus yas.

Ntawv Moo Zoo: * MT 28: 1-10

1 Tom qab Xas Npas Tos, yog thawj hnub hauv lub lis piam thaum sawv ntxov ntxov, Mab Liab Mas Ntas Las thiab lwm tus Mab Liab nkawd mus xyuas lub ntxa. 2 Ib sij huam, muaj av qeeg loj kawg; Huab Tais tus Tshiab nqes saum ntuj los, nws los txog ze, ces nws dov daim txiag zeb, thiab zaum saud. 3 Nws ib ce ci li xob laim, nws cev tsoos tsho dawb li daus. 4 Cov zov keeb ntshai nws, lawv tshee na, lawv zoo li tuag lawm. 5 Tus Tshiab hais rau ob tug poj niam tias : "Neb txhob ntshai mog : kuv paub tias neb nrhiav Yes Xus, tus raug dai saum ntoo cuam. 6 Nws tsis nyob ntawm no, nws tau sawv rov los raws li nws tau hais lawm. Neb los xyuas qhov chaw lawv tso nws lub cev mas ! 7 Neb maj zeeg mus hais rau nws cov thwj tim tias : 'Nws sawv hauv cov tuag los lawm, nws ua nej ntej mus Nkas Lis Lais lawm; nej yuav pom nws nyob ped.' Kuv qhia li no rau neb." 8 Ob tug poj niam tso plhuav lub ntxa tseg. Nkawd ntshai thiab zoo siab tas nrho. Nkawd khiav mus xa lub moo ntawd rau cov thwj tim.
9 Yes Xus tuaj tos ob tug poj niam kev, nws hais tias : "Neb nyob kaj lug". Ces nkawd txav los ze Yes Xus, nkawd kov Yes Xus ko taw, thiab khoov pe nws. 10 Yes Xus hais rau nkawd tias : "Neb txhob ntshai mog, neb mus qhia kuv cov kwv tij tias kom lawv mus lawm Nkas Lis Lais teb, lawv yuav pom kuv nyob ped."

TIM 13 LUB 4 HLIS 2020

Hnub Ob Lis Piam Hla Xyoo A Nruab Lis Piam Xyoo II

Zaj Nyeem Ib: HAUJ LWM 2: 14, 22-33

14 Pob Zeb nrog Pab Kaum Ib sawv ntsug, nws hais cov lus no nrov nrov rau lawv tias : "Cov Yus Das, thiab tas nej cov uas nyob hauv Yes Lus Xas Les, nej yuav tsum paub qhov no, thiab nej yuav tig ntsej los mloog kuv cov lus.
22 Nej cov uas yog neeg His Xas Lais, nej mloog cov lus no : Yes Xus Nas Xas Les, uas Tswv Ntuj tau ua tim khawv txog nws rau nej, nyob hauv cov hwj huam yees ntxwv, cov dej num nto moo, thiab cov cim uas nws tau ua nyob nruab nrab hauv nej, raws li nej twb paub lawm, 23 tus Yes Xus ntawd raug muab muag raws nraim li Tswv Ntuj tau teem tseg thiab raws li nws txoj kev paub txog yav tom ntej lawm; nej tau siv cov neeg tsis hwm txoj cai muab lawv txhais tes ntsia nws rau saum ntoo cuam thiab muab nws tua. 24 Tiam sis Tswv Ntuj tau tsa nws sawv rov los, thiab daws nws dim ntawm txoj kev zwm rau kev tuag lawm, vim tias kev tuag tsis muaj hwj huam yuav tuav tau nws cia.
25 Das Vis twb tau hais txog nws tias : ‘Kuv pom Huab Tais nyob ntawm kuv xub ntiag tsis tseg, nws nyob rawv ntawm kuv sab xis, kom kuv txhob qaij txhob qaug. 26 Yog vim li ntawd kuv lub siab thiaj xyiv fab hlo, kuv tus nplaig hom khaj, thiab kuv lub cev nqaij yuav so nyob hauv txoj kev tso siab. 27 Vim koj yuav tsis tso kuv tus plig pov tseg rau hauv ntuj txias teb tsaus, thiab koj yuav tsis cia koj tus Ntshiab paub kev puas kev lwj. 28 Koj tau qhia kom kuv paub txog cov kev taug mus rau hauv txoj sia, koj yuav pub kom kuv muaj kev zoo siab ntau nyob ntawm koj xub ntiag.’
29 Kwv tij sawv daws, kuv hais tau tseeb rau nej txog tus yawg koob Das Vis tias, nws tuag lawm thiab nws mus zwm av lawm. Nws lub ntxa tseem nyob rau peb pom txog niaj hnub no. 30 Tiam sis Das Vis yog ib tug yaj saub thiab nws paub tias Tswv Ntuj twb tau cog lus rau nws lawm tias yuav cia nws ib tug xeeb ntxwv uas yog nws roj ntsha los zaum nws lub theej kiab. 31 Nws twb xub pom tej no ua ntej, ces nws twb hais txog tias Leej Pleev yuav sawv rov los, nws yuav tsis raug tso pov tseg rau hauv tub tuag teb, thiab nws lub cev nqaij yuav tsis paub kev puas kev lwj. 32 Tus Yes Xus ntawd, Tswv Ntuj tau tsa nws sawv rov los lawm. Peb txhua tus ua tim khawv tau pom nws. 33 Nyem no nws tau nyob siab ntawm Tswv Ntuj sab xis lawm, nws tau txais Leej Ntuj Plig Ntshiab ntawm Leej Txiv los raws li nws tau cog lus, ces nws thiaj tso Leej Ntuj Plig los rau sawv daws; yog qhov uas nej pom thiab nej hnov no.”

NPN 16: 1-2A+5, 7-8, 9-10, 11

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Tswv Ntuj, thov koj txuag kuv, vim kuv tuaj khaub zig koj.
Kuv hais rau HUAB TAIS tias: " Koj yog kuv tus HUAB TAIS !”
Huab Tais, kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Kuv cav lus zoo txog tus HUAB TAIS uas pab kuv xav tswv yim,
Tab yog hmo ntuj kuv siab ntsws tseem txhib kuv.
Kuv cia HUAB TAIS nyob ntawm kuv xub ntiag tsis tseg,
Vim nws nyob rawv ntawm kuv sab xis, kuv yuav tsis qaij tsis qaug

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Vim li ntawd, kuv lub siab luag ntxhi, kuv tus plig dhia hom khaj,
kuv lub cev kuj tau nyob nyab xeeb,
Vim koj yuav tsis tso kuv tus plig pov tseg rau hauv ntuj txias teb tsaus.
Koj tsis kheev kom tus ntseeg koj mus ntsib kev puas kev lwj.

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Koj yuav qhia rau kuv txog txoj kev mus rau txoj sia,
txog kev zoo siab nyob ntawm koj xub ntiag,
txog kev nplig siab mus ib sid nyob ntawm koj sab xis.

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

As Les Lus Yas: NPN 118: 24

Txais: As les lus yas, as les lus yas.

Hnub no yog hnub Huab Tais tau tsim,
peb yuav zoo siab thiab yuav luag ntxhi hauv hnub no.

Txais: As les lus yas, as les lus yas.

Ntawv Moo Zoo: MT 28: 8-15

8 Mab Liab Mas Ntas Las thiab lwm tus Mab Liab tso plhuav lub ntxa tseg. Nkawd ntshai thiab kuj zoo siab tas nrho, nkawd khiav mus xa lub moo zoo ntawd rau cov thwj tim. 9 Yes Xus tuaj tos ob tug poj niam kev, nws hais tias : "Neb nyob kaj lug". Ces nkawd txav los ze Yes Xus, nkawd puag Yes Xus ko taw, nkawd pe nws. 10 Yes Xus hais rau nkawd tias : "Neb txhob ntshai mog, neb mus qhia kuv cov kwv tij kom lawv mus lawm Nkas Lis Lais teb, lawv yuav pom kuv nyob ped."
11 Lub sij hawm ob tug poj niam tab tom rov mus, cov zov keeb ob peb leeg kuj rov mus hauv nroog. Lawv mus qhia tej xwm uas lawv tau pom rau cov thawj leej choj. 12 Cov thawj leej choj nrog cov txwj laus sib sau tuav xam. Lawv sau tau nyiaj ntau txaus ces lawv muab rau cov zov keeb, 13 lawv hais tias : "Nej hais li no : Hmo ntuj, thaum peb tsaug zog lawm, Yes Xus cov thwj tim tuaj nyiag nws lub cev mus lawm.' 14 Yog tias tej lus no nrov txog tus nom tswj teb chaws pob ntseg, peb yuav npliag kom nej tsis txhob raug dab tsi nyuaj." 15 Cov zov keeb khaws cov nyiaj mus, lawv ua raws li cov hlob qhia lawv. Cov lus no thiaj nrov mus rau hauv cov Yus Das los txog niaj hnub no.

TIM 14 LUB 4 HLIS 2020

Hnub Peb Lis Piam Hla Xyoo A Nruab Lis Piam Xyoo II

Zaj Nyeem Ib: HAUJ LWM 2: 36-41

Hnub Leej Ntuj Plig nqes los ntawd, Pob Zeb hais rau tsoom neeg His Xas Lais tias:
36 "Tas tsev neeg His Xas Lais, nej yuav tsum paub meej tias : Tswv Ntuj tau tsa tus Yes Xus uas nej tau muab ntsia dai saum ntoo cuam, ua Huab Tais thiab ua Leej Pleev tib si."
37 Thaum lawv hnov cov lus ntawd ua rau lawv lub siab mob chob nkuav, ces lawv hais rau Pob Zeb thiab rau cov Hauv Paus Xa Lus tias : "Cov kwv tij, peb yuav ua li cas ?" 38 Pob Zeb teb rau lawv tias : “Nej yuav thov txhaum, thiab nej txhua leej txhua tus yuav txais lub cim ntxuav nyob hauv Yes Xus Pleev lub npe kom nej tau txais kev zam txhaum rau nej cov txhaum, ces nej yuav txais Leej Ntuj Plig Ntshiab lub txiaj ntsim; 39 vim nyob hauv txoj kev cog lus mas yeej yog cog lus yuav muab rau nej, thiab rau nej cov me nyuam, thiab rau cov neeg nyob deb, rau tas tsoom neeg coob uas Huab Tais peb tus Tswv Ntuj yuav hu lawv los." 40 Pob Zeb tseem hais ntau lo lus ua tim khawv ntxiv thiab nws ntuas lawv tias : "Nej kav tsij ua kom nej dim ntawm tiam neeg nkhaus no." 41 Cov neeg uas mloog Pob Zeb cov lus, tau txais lub cim ntxuav; ces hnub ntawd, muaj ze ntawm peb txhiab leej los ntseeg ntxiv.

NPN 33: 4-5, 18-19, 20+22

Txais: (5b) Huab Tais txoj kev hlub nyob puv lub ntiaj teb.
Los: As les lus yas.

HUAB TAIS lo lus yog lus ncaj,
nws tej num yog num txaus ntseeg.
Nws nyiam kev ncaj thiab kev haum pheej;
HUAB TAIS txoj kev hlub nyob puv lub ntiaj teb.

Txais: (5b) Huab Tais txoj kev hlub nyob puv lub ntiaj teb.
Los: As les lus yas.

Ntsias saib HUAB TAIS lub qhov muag saib ntsoov cov neeg hwm nws,
saib ntsoov cov tso siab rau nws txoj kev hlub
tias nws yuav npo lawv dim ntawm kev tuag,
thiab yuav txuag lawv txoj sia thaum muaj kev tshaib plab.

Txais: (5b) Huab Tais txoj kev hlub nyob puv lub ntiaj teb.
Los: As les lus yas.

Peb tus ntsuj plig tos ntsoov HUAB TAIS:
nws yog tus pab peb, nws yog peb daim leem phiaj !
HUAB TAIS, thov kom koj lub siab hlub roos peb
cov uas tso siab lug rau koj !

Txais: (5b) Huab Tais txoj kev hlub nyob puv lub ntiaj teb.
Los: As les lus yas.

As Les Lus Yas: NPN 118: 24

Txais: As les lus yas, as les lus yas.

Hnub no yog hnub Huab Tais tau tsim,
peb yuav zoo siab thiab yuav luag ntxhi hauv hnub no.

Txais: As les lus yas, as les lus yas.

Ntawv Moo Zoo: ZAM 20: 11-18

11 Mab Liab Mas Ntas Las sawv ze lub ntxa sab nraud, nws quaj. Thaum nws quaj, nws khoov xauj hauv lub ntxa. 12 Ces nws pom ob tug Tshiab hnav dawb zaum, ib tug pem yav taub hau ib tug nram yav ko taw hauv qhov chaw uas lawv tso Yes Xus lub cev. 13 Nkawd hais rau Mab Liab tias: "Tus poj niam, ua cas koj quaj ?" Mab Liab hais rau nkawd tias : "Vim lawv nqa kuv tus Huab Tais lawm, kuv tsis paub lawv muab nws tso qhov twg." 14 Hais li ntawd tas, Mab Liab tig ntsia rov tom qab, nws pom Yes Xus sawv ntsug nyob ntawd, tab sis nws tsis paub tias yog Yes Xus. 15 Yes Xus hais rau Mab Liab tias : "Tus poj niam, ua cas koj quaj ? Koj nrhiav leej twg ?" Mab Liab xav tias yog tus neeg saib lub vaj, ces Mab Liab hais rau nws tias : "Txiv Hlob, yog koj nqa nws lub cev lawm no, koj qhia kuv saib koj muab tso qhov twg lawm, kuv yuav mus nqa nws los." 16 Yes Xus hais rau Mab Liab tias : "Mab Liab !" Mab Liab tig hlo mus, nws ua lus Hes Nplaws hais tias : "Las Npus Nis !" Txhais tias : “Xib Hwb.” 17 Yes Xus hais rau Mab Liab tias : "Koj txhob chwv kuv, vim kuv tseem tsis tau nce mus cuag Leej Txiv. Tiam sis koj mus cuag kuv cov kwv tij, koj hais rau lawv tias : ‘Kuv nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj.’" 18 Mab Liab Mas Ntas Las thiaj los tshaj rau cov thwj tim hais tias : "Kuv tau pom Huab Tais lawm,” thiab nws hais Yes Xus cov lus uas Yes Xus tau hais rau nws rau lawv.

TIM 15 LUB 4 HLIS 2020

Hnub Plaub Lis Piam Hla Xyoo A Nruab Lis Piam Xyoo II

Zaj Nyeem Ib: HAUJ LWM 3: 1-10

1 Pob Zeb thiab Zam nkawd nce mus pem lub Tuam Tsev Teev Ntuj, mus ua zaj teev ntuj thaum teev cuaj (thaum peb teev yav hnub qaij). 2 Thaum ntawd, lawv coj ib tug neeg tuag ceg nruab thiab tuaj. Lawv niaj hnub muab nws tso rau ntawm lub qhov rooj mus hauv lub Tuam Tsev Teev Ntuj, uas hu ua Qhov Rooj Zoo Nkauj, kom tus tuag ceg tau kev thov khawv ntawm cov neeg uas chaws mus hauv. 3 Thaum nws pom Pob Zeb thiab Zam nkawd tab tom yuav chaws mus hauv lub tuam tsev gteev ntuj, ces nws thov khawv ntawm nkawd. 4 Pob Zeb ntsia nruj nreem rau nws, Zam kuj ntsia nws thiab. Pob Zeb hais tias : "Koj ntsia wb." 5 Tus tuag ceg ntsia ntsoov nkawd, nws xav tias nws yuav tau txais ib yam dab tsi. 6 Tab sis Pob Zeb hais tias : "Nyiaj thiab kub mas kuv tsis muaj muab, qhov kuv muaj, mas kuv muab pub rau koj : Kuv tuav txog Yes Xus Pleev, tus neeg Nas Xas Les lub npe, koj sawv koj mus kev !" 7 Ces Pob Zeb tuav nkaus tus tuag ceg sab tes xis, rub nws sawv. Tam sis ntawd, nws ob txhais taw thiab nws ob lub pob qij taws ruaj nrees tuaj. 8 Nws tib plhaw, sawv tsees, ces nws mus taus kev ib ncig ntawd. Thiab nws nrog nkawd chaws mus hauv lub Tuam Tsev, nws rhais ruam mus kev, nws dhia tej paj paws thiab nws cav txog Tswv Ntuj. 9 Tas tsoom pej xeem pom nws rhais ruam mus kev thiab cav txog Tswv Ntuj, 10 sawv daws zeem tau tias nws yog tus zaum thov khawv ntawm lub Qhov Rooj Zoo Nkauj tiag, lawv poob siab thiab qhuas kawg nkaus txog qhov uas nyuam qhuav tshwm sim tuaj rau tus tuag ceg ntawd.

NPN 105: 1-2, 3-4, 6-7, 8-9

Txais: (3b) Cov uas muaj lub siab nrhiav Huab Tais, nej cia li zoo siab.
los : As les lus yas.

Nej ua HUAB TAIS tsaug, nej hu txog nws lub npe,
nej qhia nws cov hauj lwm nto koob meej rau cov haiv neeg paub.
Nej seev nkauj rau HUAB TAIS, nej hu nkauj cav txog nws ;
nej piav txog nws cov hwj huam yees ntxwv tas tib si.

Txais: (3b) Cov uas muaj lub siab nrhiav Huab Tais, nej cia li zoo siab.
los : As les lus yas.

Nej nrhiav koob meej rau nej nyob hauv nws lub npe;
nej cia li zoo siab, nej cov uas muaj lub siab nrhiav Huab Tais!
Nej nrhiav HUAB TAIS thiab nws lub zog,
nej nrhiav kom tau tsob hwb nws tsis tseg.

Txais: (3b) Cov uas muaj lub siab nrhiav Huab Tais, nej cia li zoo siab.
los : As les lus yas.

Nej, uas yog Has Nplas Has tsoom xeeb ntxwv, yog nws cov tub txib,
nej uas yog Yas Kos cov tub, cov uas nws tau xaiv,
Nws HUAB TAIS yog peb tus Tswv Ntuj,
Nws tej cai tswj tas lub ntiaj teb.

Txais: (3b) Cov uas muaj lub siab nrhiav Huab Tais, nej cia li zoo siab.
los : As les lus yas.

Nws nco ntsoov mus li cov lus nws cog cia,
yog ib co lus cog ruaj rau txhiab tiam tub ki.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (3b) Cov uas muaj lub siab nrhiav Huab Tais, nej cia li zoo siab.
los : As les lus yas.

As Les Lus Yas: NPN 118: 24

Txais: As les lus yas, as les lus yas.

Hnub no yog hnub Huab Tais tau Tsim,
peb yuav zoo siab thiab yuav luag ntxhi hauv hnub no.

Txais: As les lus yas, as les lus yas.

Ntawv Moo Zoo: LK 24: 13-35

13 Tib hnub ntawd, ob leeg hauv cov thwj tim taug kev mus rau ib lub zos, deb li rau caum ncuas kev ntawm Yes Lus Xas Les; lub zos hu ua Es Mas Ws. 14 Nkawd sib tham txog tas txhua tsav yam xwm uas tau tshwm sim tuaj. 15 Thaum nkawd sib tham thiab sib hais txog tej ntawd, Yes Xus txawm los caum tau nkawd, ces nws nrog nkawd taug kev. 16 Tab sis nkawd qhov muag plooj lawm zeem tsis tau Yes Xus. 17 Ces Yes Xus hais rau nkawd tias : "Neb sib tham txog ib co lus dab tsi taug kev ?" Ces nkawd nres, nkawd ua ntsej muag ntshaus ntsho. 18 Tus hu ua Dles Os Pas thiaj qhib ncauj teb tias : "Tas cov neeg nyob Yes Lus Xas Les, ntshai koj tib leeg xwb thiaj tsis paub txog tej xwm uas tau tshwm sim ob peb hnub no lawm pob?" 19 Yes Xus hais rau nkawd tias : "Muaj xwm dab tsi ?" Nkawd hais rau Yes Xus tias : "Tej xwm hais txog Yes Xus Nas Xas Les, uas yog ib tug tib neeg ua yaj saub, nws ua tau tej hauj lwm thiab hais tau tej lus muaj hwj huam nyob ntawm Tswv Ntuj thiab ntawm tsoom sid xub ntiag. 20 Peb cov Thawj Leej Choj thiab peb cov thawj coj tau ntes nws mus kom luag txiav lub txim tuag rau nws thiab muab nws ntsia dai saum ntoo cuam lawm. 21 Ntawm peb mas peb twb vam tias nws yog tus yuav txhiv His Xas Lais no, tiam sis tej xwm no twb tshwm sim tas tau peb hnub rau hnub no lawm. 22 Tsis tas li xwb, tseem muaj ob peb tug poj niam uas yog peb cov neeg, lawv tau ua rau peb poob siab tas; tag kis no lawv sawv ntxov ntxov mus tom ntxa, 23 lawv nrhiav tsis tau nws lub cev, lawv rov los hais rau peb tias ib cov Tshiab tawm los rau lawv pom, hais rau lawv tias nws muaj txoj sia nyob no. 24 Cov nrog peb ob peb leeg kuj tau mus txog tom lub ntxa, lawv pom txhua yam raws li cov poj niam hais, tab sis lawv kuj tsis pom nws thiab."
25 Ces Yes Xus hais rau nkawd tias : "Ua cas nej lub siab yuav ruam ua luaj, thiab yuav ntseeg qeeb ua luaj txog tas txhua yam uas cov Yaj Saub tau tshaj los lawm! 26 Tej ntawd tsis yog tej kev tsim txom uas Leej Pleev yuav tsum raug tso nws mam li mus rau hauv nws lub koob meej lod ?" 27 Ces Yes Xus pib piav txij Mais Xes los rau cov Yaj Saub tas huv tib si, nws txhais tas nrho cov ntawv ntshiab uas hais txog nws tus kheej rau nkawd.
28 Thaum lawv tuaj txog ze lub zos uas ob tug thwj tim mus lawm, Yes Xus ua txuj yuav mus ntxiv. 29 Tab sis nkawd cheem Yes Xus tias : "Nrog wb nyob mas ! Twb yuav tsaus ntuj, lub hnub twb poob qho lawm." Yes Xus thiaj chaws mus hauv tsev mus nrog nkawd nyob. 30 Thaum nws nrog nkawd zaum ntawm rooj mov, nws tuav lub ncuav mov, nws hais zaj foom hmoov zoo, nws muab lub ncuav mov ntais, nws cev rau nkawd. 31 Ces nkawd qhov muag qhib plho, nkawd zeem tau Yes Xus... Tab sis Yes Xus ploj ntais ntawm nkawd qhov muag lawm. 32 Ces nkawd rov sib tham nkawd tias : "Wb lub siab kub lug nyob hauv wb puas yog, thaum uas nws hais lus rau wb tom kev, thiab nws txhais Ntawv rau wb nas?"
33 Ces nkawd sawv tsees lub sij hawm ntawd, nkawd rov mus Yes Lus Xas Les. Nkawd los pom Pab Kaum Ib sib sau nyob ua ke, nrog cov uas koom nrog lawv thiab. 34 Lawv hais tias : "Huab Tais sawv rov los lawm tiag, nws twb tawm tuaj rau Xis Moos pom lawm!" 35 Ces nkawd thiaj piav qhov uas tshwm tuaj nyob tom kev, thiab nkawd piav tias nkawd zeem tau nws yog thaum nws ntais lub ncuav mov.

TIM 16 LUB 4 HLIS 2020

Hnub Tsib Lis Piam Hla Xyoo A Nruab Lis Piam Xyoo II

Zaj Nyeem Ib: HAUJ LWM 3: 11-26

11 Tus tuag ceg tsis tso Pob Zeb thiab Zam nkawd tseg li, tas tsoom pej xeem poob siab tas, lawv khiav tuaj vij nkawd nyob hauv lub qab ruv tsev uas hu ua Xas Los Moos lub qab ru tsev. 12 Pob Zeb pom li ntawd, nws hais rau tsoom pej xeem hais tias : "Cov His Xas Lais, vim li cas nej poob siab rau qhov ntawd ? Vim li cas nej qhov muag ntsia ntsoov wb, cuag li yog wb ua kom tus neeg ntawd mus taus kev vim wb muaj hwj huam los txawj thov Ntuj? 13 Has Nplas Has, His Xas Has, thiab Yas Kos tus Tswv Ntuj, uas yog peb cov yawg koob tus Tswv Ntuj tau muab koob meej rau nws tus tub txib Yes Xus, uas nej tau muab nws rau luag ntes thiab nej tsis kam lees nws nyob ntawm Pis Las Tos xub ntiag thaum Pis Las Tos xav tso nws mus. 14 Nej tsis lees tus siab Ntshiab thiab siab Ncaj, nej thov kom luag tso ib tug neeg tua neeg dim los rau nej. 15 Nej tau muab tus tswv txoj sia tua, tiam sis Tswv Ntuj tsa nws sawv hauv cov tub tuag rov los lawm. Peb ua tim khawv pom. 16 Yog vim txoj kev ntseeg txog Yes Xus lub npe, mas nws lub npe tau ua kom tus neeg uas nej pom thiab nej paub no muaj zog tuaj, ces yog txoj kev ntseeg uas tuaj ntawm nws tuaj ua kom tus neeg no lub cev zoo hlo tas huv si rau tas nej sawv daws pom.
17 Kwv tij sawv daws, kuv paub hais tias thaum nej ua li ntawd, nej yeej tsis paub dab tsi li, nej cov thawj coj los kuj tsis paub li thiab. 18 Li ntawd, Tswv Ntuj uas tau siv nws cov Yaj Saub lub ncauj xub hais ntxov txog tias Leej Pleev yuav raug txom nyem loj, nws thiaj tau ua kom muaj raws li ntawd. 19 Ua li mas, nej yuav thov txhaum thiab nej yuav tig los hloov dua siab, kom Ntuj so nej cov txhaum pov tseg, 20 ces thiaj yuav muaj tej lub caij muaj kev txhawb zog rau nej tuaj ntawm Huab Tais tuaj, thiab nws thiaj yuav xa tus nws ib txwm npaj cia ua Leej Pleev tuaj rau nej, uas yog Yes Xus, 21 tus uas lub ntuj yuav tsum muab ceev cia mus txog thaum lub zim txwv tas txhia yam yuav rov plhis dua tshiab, raws li Tswv Ntuj tau siv nws cov yaj saub ntshiab lub ncauj xub tau hais tseg txij puag thaum ntxov ub los lawm.
22 Mais Xes tau hais tias : ‘Huab Tais, nej tus Tswv Ntuj yuav muab nej ib tug kwv tij tsa ua Yaj Saub xws li kuv. Nej yuav mloog tas puas tsav yam tus ntawd qhia rau nej. 23 Leej twg tsis mloog tus Yaj Saub ntawd hais, mas nws yuav raug muab tshem tawm ntawm nws haiv neeg mus.’ 24 Tas nrho cov yaj saub, txij Xas Muas los rau cov hloov nws tom qab no, sawv daws puav leej tau hais txog thiab tshaj txog tej yam uas tshwm sim niaj hnub no. 25 Nej yog cov yaj saub cov tub, thiab nej yog cov tub nyob hauv txoj kev cog lus uas Tswv Ntuj tau nrog peb cov yawg koob cog thaum nws hais rau Has Nplas Has tias : ‘Tas txhua haiv neeg nyob ntiaj teb no yuav tau txais ib txog hmoov zoo nyob hauv koj cov xeeb leej xeeb ntxwv.’ 26 Li ntawd Tswv Ntuj tsa nws leej Tub Yes Xus sawv rov los, yog tsa los pab nej ua ntej dua cov, kom nws tuaj foom hmoov zoo rau nej kom nej txhua tus hloov dua siab tshiab txhob mus taug nej txoj kev ua phem ntxiv."

NPN 8: 2AB+5, 6-7, 8-9

Txais: (2ab) HUAB TAIS, peb tus Tswv Ntuj,
koj lub npe muaj hwj xyeej nyob puv tas ntiaj teb!
los: As les lus yas.

HUAB TAIS, peb tus Tswv Ntuj,
koj lub npe muaj hwj xyeej nyob puv tas ntiaj teb.
Neeg yog dab tsi, koj thiaj quav ntsej txog nws?
Neeg tus tub yog dab tsi, koj thiaj li txhawj txog nws?

Txais: (2ab) HUAB TAIS, peb tus Tswv Ntuj,
koj lub npe muaj hwj xyeej nyob puv tas ntiaj teb!
los: As les lus yas.

Koj tsim neeg los nyob qis dua cov tshiab me ntsis.
Koj muab hwj chim thiab meej mom zoo rau neeg ntoo.
Koj tsa neeg kav tas txhua yam koj txhais tes tau tsim los,
koj tso tas puas tsav yam rau hauv neeg qab xib taws :

Txais: (2ab) HUAB TAIS, peb tus Tswv Ntuj,
koj lub npe muaj hwj xyeej nyob puv tas ntiaj teb!
los: As les lus yas.

tas tej me yaj, me nyuj huv tib si,
thiab tas tsoom tsiaj nyob nruab nrag,
tej me noog ya saum ntuj, me ntses nyob hauv hiav txwv,
thiab tas txhua hom tsiaj khiav hauv dej hiav txwv.

Txais: (2ab) HUAB TAIS, peb tus Tswv Ntuj,
koj lub npe muaj hwj xyeej nyob puv tas ntiaj teb!
los: As les lus yas.

As Les Lus Yas: NPN 118: 24

Txais: As les lus yas, as les lus yas.

Hnub no yog hnub Huab Tais tau Tsim,
peb yuav zoo siab thiab yuav luag ntxhi hauv hnub no.

Txais: As les lus yas, as les lus yas.

Ntawv Moo Zoo: LK 24: 35-48

35 Ces ob tug thwj tim piav qhov uas tshwm tuaj nyob ntawm kev, thiab piav tias nkawd zeem tau Yes Xus thaum nws ntais lub ncuav mov. 36 Thaum lawv tab tom sib tham txog tej xwm ntawd, Yes Xus sawv ntsug kiag hauv nruab nrab lawv, nws hais rau lawv tias : "Nej nyob kaj lug." 37 Cov thwj tim ceeb nkaus, lawv ntshai kawg, lawv xav tias lawv pom ib tug dab. 38 Ces Yes Xus hais rau lawv tias : "Vim li cas nej poob siab ? Vim li cas tej zaj ua xyem xyav li ntawd sawv los nyob hauv nej lub siab ? 39 Nej ntsia kuv ob txhais tes thiab ob txhais taw, yog kuv tiag tiag! Nej xuas kuv saib ! Nej ntsia mas : dab tsis muaj nqaij tsis muaj pob txha, xws li nej pom kuv muaj." 40 Thaum Yes Xus hais li ntawd, nws muab nws ob txhais tes ob txhais taw rau lawv saib. 41 Lawv zoo siab dhau, lawv tseem tsis tau xav ntseeg, lawv yoob tas. Yes Xus hais rau lawv tias : "Nyob ntawm no, nej puas muaj dab tsi noj ?" 42 Lawv muab ib ya ntses txhiab cev rau Yes Xus. 43 Yes Xus txais los tuav, nws noj yav ntses ntawd nyob ntawm lawv xub ntiag.
44 Yes Xus hais rau lawv tias : "Thaum kuv tseem nrog nej nyob, kuv tau hais cov lus no rau nej tias: Tas ib puas tsav yam uas Mais Xes Txoj Cai, cov Yaj Saub, thiab cov Nkauj Paj Nruag sau txog kuv, mas yuav tsum tshwm sim kom tiav." 45 Ces Yes Xus qhib lawv lub tswv yim kom lawv to taub cov Ntawv Ntshiab. 46 Nws hais rau lawv tias : "Ntawv yeej sau hais tias: Leej Pleev yuav raug luag tsim txom thiab hnub peb, nws yuav sawv hauv cov tuag rov los, 47 thiab yuav muaj kev qhuab qhia nyob hauv Leej Pleev lub npe, rau tas ib tsoom haiv neeg, txog txoj kev hloov dua siab kom Ntuj zam txhaum rau sawv daws. Yuav xub qhuab qhia pib ntawm Yes Lus Xas Les tuaj mus. 48 Nej yog cov tim khawv txog tej no.”

TIM 17 LUB 4 HLIS 2020

Hnub Rau Lis Piam Hla Xyoo A Nruab Lis Piam Xyoo II

Zaj Nyeem Ib: HAUJ LWM 4: 1-12

Thaum tus tuag ceg zoo lawm,
1 Pob Zeb thiab Zam nkawd tseem tab tom hais lus rau tsoom pej xeem, ces cov leej choj, tus tswj cov zov keeb saib lub Tsev Txoos, thiab cov Xas Dus Kais tuaj txog. 2 Lawv tsis zoo siab rau qhov tias nkawd qhia tsoom sid thiab nkawd tshaj tias neeg tuag yuav sawv rov los xws li Yes Xus. 3 Lawv ntes nkawd thiab coj nkawd mus kaw txog thaum kaj ntug, vim thaum ntawd twb tsaus ntuj lawm. 4 Tiam sis muaj ntau leej uas tau hnov nkawd lo lus kuj txais kev ntseeg; suav cov txiv neej xwb, cov ntseeg muaj nto tsib txhiab leej tej lawm.
5 Tag kis los txog, cov nom tswv Yus Das, cov laus neeg, thiab cov kws ntawv, sawv daws tuaj sib sau nyob Yes Lus Xas Les. 6 Tus thawj leej choj As Nas kuj tuaj, Kais Fas, Zam, As Les Xas Nrias thiab cov uas yog caj ces ua leej choj puav leej tuaj nyob ntawd tas huv tib si. 7 Lawv kom luag coj ob tug Hauv Paus Xa Lus los sawv hauv nruab nrab, ces lawv nug nkawd tias : "Leej twg muab cai rau neb, thiab neb tuav txog leej twg lub npe los ua tej ntawd" ? 8 Ces Pob Zeb muaj Leej Ntuj Plig nyob puv hauv nws, nws hais rau lawv tias : "Cov thawj coj tsoom pej xeem, thiab tsoom laus neeg sawv daws , 9 yog hnub no nej nug wb txog qhov hauj lwm zoo uas ua kom ib tug neeg mob lub cev dim ntawm tus mob lawm, 10 mas nej sawv daws thiab tas tsoom His Xas Lais huv tib si nej yuav tsum paub tias yog vim Yes Xus Pleev lub npe, tus Yes Xus Nas Xas Les uas nej muab ntsia dai saum ntoo cuam, tab sis Tswv Ntuj tsa nws sawv hauv cov tub tuag rov los lawm; yog nyob hauv nws lub npe, tus neeg no thiaj sawv ntsug zoo hlo li no rau nej pom. 11 Nws yog lub pob zeb uas nej cov txhim tsev muab pov tseg, zaum no nws yog thawj lub pob zeb txheem lub tsev. 12 Kev cawm neeg tsis muaj nyob hauv lwm tus ntxiv, thiab tsis muaj dua lwm lub npe nyob hauv tas lub qab ntuj khwb tis rau tib neeg uas yuav cawm tau peb lawm."

NPN 118: 1-2+4, 22-24, 25-27A

Txais: (22) Lub pob zeb uas cov txhim tsev muab pov tseg
txia ua lub pob zeb txheem tsev.
los: As les lus yas.

Nej ua HUAB TAIS tsaug, vim nws siab zoo,
Nws khuv leej peb tas ib txhiab ib txhis!
Kom His Xas Lais tsev neeg hais tias :
Nws khuv leej peb tas ib txhiab ib txhis!
Kom cov neeg hwm HUAB TAIS hais tias :
Nws khuv leej peb tas ib txhiab ib txhis!

Txais: (22) Lub pob zeb uas cov txhim tsev muab pov tseg
txia ua lub pob zeb txheem tsev.
los: As les lus yas.

Lub pob zeb uas cov txhim tsev muab pov tseg
txia ntshis ua lub pob zeb txheem tsev.
Qhov ntawd yog tuaj ntawm HUAB TAIS tuaj,
yog ib yam txaus qhuas rau peb qhov muag pom !
Hnub no yog hnub HUAB TAIS tau tsim,
peb yuav zoo siab thiab luag ntxhi hauv hnub no.

Txais: (22) Lub pob zeb uas cov txhim tsev muab pov tseg
txia ua lub pob zeb txheem tsev.
los: As les lus yas.

HUAB TAIS, peb thov koj pub kev cawm rau peb !
HUAB TAIS, peb thov koj pub kev vam meej rau peb!
Kom tus tuaj ntawm HUAB TAIS lub npe tuaj nto koob meej!
Peb nyob hauv HUAB TAIS lub tsev foom koob hmoov rau nej.
HUAB TAIS yog Tswv Ntuj, nws tau ua kom peb pom kev :

Txais: (22) Lub pob zeb uas cov txhim tsev muab pov tseg
txia ua lub pob zeb txheem tsev.
los: As les lus yas.

As Les Lus Yas: NPN 118: 24

Txais: As les lus yas, as les lus yas.

Hnub no yog hnub Huab Tais tau tsim,
peb yuav zoo siab thiab yuav luag ntxhi hauv hnub no.

Txais: As les lus yas, as les lus yas.

Ntawv Moo Zoo: ZAM 21: 1-14

1 Dua li ntawd, Yes Xus rov tawm los rau nws cov thwj tim pom nyob ntawm ntug dej ntuj Tis Npes Lias. Nws tawm los zoo li no: 2 Cov nyob ua ke ntawd muaj Xis Moos Pob Zeb, Tos Mas uas hu ua Dis Dws Mos, Nas Tas Nais uas nyob Kas Nas hauv xeev Nkas Lis Lais, Ntxes Npes Dais ob tug tub, thiab ob tug thwj tim ntxiv. 3 Xis Moos Pob Zeb hais rau lawv tias : "Kuv yuav mus puav ntses." Lawv hais rau nws tias : "Peb nrog koj mus thiab." Ces lawv tawm mus nce rau hauv lub nkoj. Hmo ntawd lawv puav tsis tau dab tsi li.
4 Thaum kaj ntug txoog lawm, Yes Xus sawv nyob tim ntug dej; tab sis cov thwj tim tsis paub tias yog Yes Xus. 5 Yes Xus thiaj hais rau lawv tias : "Cov me nyuad, nej puas muaj nqaij dab tsi noj ?" Lawv teb rau Yes Xus tias : "Tsis muaj li." 6 Nws hais rau lawv tias : "Nej pov vas rau ntawm lub nkoj sab xis, ces nej yuav nrhiav tau." Lawv thiaj pov vas mus, ces lawv rub tsis tau lub vas rov los, vim mag tau ntses ntau kawg. 7 Tus thwj tim uas Yes Xus nyiam thiaj hais rau Pob Zeb tias : "Yog Huab Tais !" Xis Moos Pob Zeb hnov dheev tias yog Huab Tais, nws muab zoj ib daim khaub ncaws khi ntawm duav, vim nws liab qab, ces nws dhia loo rau hauv dej. 8 Lwm cov thwj tim mam li caij nkoj los, vim lawv nyob tsis deb ntawm ntug nqhuab lawm, tsuas deb li ob puas tshim xwb, thiab lawv cab lub vas puav ntses los. 9 Thaum lawv nqes los txog saum av, lawv pom ib cub tawg thee nyob ntawd, hos muaj ib co ntses tso rau saud, thiab ib co ncuav mov. 10 Yes Xus hais rau lawv tias : "Nej coj ib cov ntses uas nej nyuam qhuav puav tau los saib." 11 Xis Moos Pob Zeb thiaj nce mus hauv nkoj, nws rub lub vas mag cov ntses loj puv nkaus los rau saum av : tau ib puas tsib caug peb tus ntses ! Txawm tias puav tau ntses ntau npaum ntawd, tsis kav lub vas tsis ntuag. 12 Yes Xus hais rau lawv tias : "Nej los noj tshais." Tsis muaj ib tug thwj tim muaj cuab kav nug Yes Xus tias : "Koj yog leej twg ?" Vim lawv yeej paub tseeb lawm tias yog Huab Tais. 13 Yes Xus txav los muab cov ncuav mov cev rau lawv, nws kuj muab cov ntses cev rau lawv thiab. 14 Zaum no yog zaum peb uas Yes Xus tawm los rau nws cov thwj tim pom, txij thaum nws sawv hauv cov tuag rov los lawm.

TIM      18      4      HLIS      2020

Hnub Xya Lis Piam Hla Xyoo A Nruab Lis Piam Xyoo II

Zaj Nyeem Ib:       HAUJ LWM  4:   13-21

13 Cov thawj coj, cov txwj laus thiab cov thoob xwm ntawv pom tias Pob Zeb hais lus dawb paug muaj zog tsis ua xyem xyav li thiab Zam los kuj ib yam, thiab lawv kuj pom tau tias nkawd yog neeg tsis tau kawm ntawv thiab tsis muaj kev txawj ntse li, ces lawv ua siab poob nthav; lawv kuj rov zeem tau tias nkawd yog cov uas tau nrog Yes Xus ua ke thiab. 14 Ces thaum lawv pom tus neeg uas nkawd kho zoo sawv ntsug nyob ze nkawd, lawv tsis pom qab teb dab tsi li. 15 Lawv kom nkawd tawm ntawm lub tsev txiav txim mus, ces lawv mam sab laj ua ke. 16 Lawv hais tias: "Peb yuav ua dab tsi rau ob tug neeg ntawd ? Qhov tias nkawd tau ua ib yam hwj huam, mas tas cov neeg nyob Yes Lus Xas Les paub tas lawm, peb dag tsis tau tias nkawd tsis tau ua. 17 Tiam sis yuav kom cov pej xeem tsis txhob ntseeg coob zuj zus ntxiv, mas peb yuav tsum muab kev hem los txwv nkawd, tsis pub nkawd hais txog lub Npe ntawd ntxiv rau leej twg li." 18 Ces lawv hu Pob Zeb thiab Zam nkawd rov los, lawv txwv tsis kheev nkawd hais dab tsi txog los qhuab qhia txog Yes Xus lub npe ntxiv li. 19 Tiam sis Pob Zeb thiab Zam nkawd teb hais tias : "Saib Tswv Ntuj puas pom zoo dua kom wb mloog nej los kom wb mloog Tswv Ntuj, nej yog cov yuav txiav txim li cas tsis dua ntawm nej. 20 Ntawm wb mas wb kawg yuav tsum tshaj tej yam wb tau pom thiab tau hnov xwb." 21 Lawv thiaj hem nkawd ntau yam ntxiv, ces lawv cia li tso nkawd mus; lawv tsis pom qab muab txim dab tsi rau nkawd vim lawv ntshai tsoom pej xeem, vim tias sawv daws cav txog Tswv Ntuj rau tej yam tau tshwm sim tuaj ntawd.

NPN       118:   1+14-15AB, 16-18, 19-21

Txais: (21a) Kuv yuav ua koj tsaug, vim koj tau teb kuv.
los: As les lus yas.

Nej ua HUAB TAIS tsaug, vim nws siab zoo,
Nws hlub peb tas ib txhiab ib txhis.
Kuv lub zog, kuv lub peev xwm yog HUAB TAIS !
Nws yog tus tau cawm kuv.
Muaj suab zoo siab suab yeej rog qw ntsuag qees
hauv tsoom neeg siab ncaj cov tsev tsam phooj:

Txais: (21a) Kuv yuav ua koj tsaug, vim koj tau teb kuv.
los: As les lus yas.

HUAB TAIS txhais xis nto koob meej !
HUAB TAIS txhais xis ntaus muaj zog loj!
Kuv yuav tsis tuag, kuv yuav muaj txoj sia,
thiab yuav tshaj txog HUAB TAIS cov dej num :
HUAB TAIS tau rau txim hnyav rau kuv tiag,
tiam sis nws tsis tau tso kuv raug txoj kev tuag.

Txais: (21a) Kuv yuav ua koj tsaug, vim koj tau teb kuv.
los: As les lus yas.

Nej qhib lub rooj vag mus rau hauv txoj kev ncaj rau kuv,
kuv yuav chaws mus ua HUAB TAIS tsaug.
Ntawm no yog HUAB TAIS lub rooj vag ,
Cov muaj siab ncaj yuav tau chaws mus hauv.
Kuv yuav ua koj tsaug, vim koj tau teb kuv lawm,
koj yog tus tau cawm kuv.

Txais: (21a) Kuv yuav ua koj tsaug, vim koj tau teb kuv.
los: As les lus yas.

As Les Lus Yas:       NPN  118:   24

Txais: As les lus yas, as les lus yas.

Hnub no yog hnub Huab Tais tau tsim,
peb yuav zoo siab thiab yuav luag ntxhi hauv hnub no.

Txais: As les lus yas, as les lus yas.

Ntawv Moo Zoo:       MK  16:   9-15

9 Thaum Yes Xus sawv rov los, yog hnub chiv lub lis piam thaum sawv ntxov ntxov, nws xub tawm los rau Mab Liab Mas Ntas Las pom dua cov; Mab Liab yog tus uas Yes Xus tau ntiab xya tus dab phem tawm hauv nws mus. 10 Mab Liab mus qhia lub moo ntawd rau cov tau nrog Yes Xus ua ke, uas lawv muaj kev tu siab thiab quaj ntsuag. 11 Thaum lawv hnov hais tias Yes Xus muaj txoj sia nyob, thiab Mab Liab Mas Ntas Las twb tau pom nws lawm, mas lawv tsis ntseeg li.
12 Dhau ntawd lawm, Yes Xus ua ib tug txawv me ntsis tawm tuaj rau ob leeg hauv lawv pom thaum nkawd tab tom taug kev mus tom cov zos ua liaj ua teb. 13 Ob tug ntawd rov los qhia rau lwm cov, tab sis lawv kuj tsis ntseeg nkawd thiab.
14 Thaum kawg, thaum lawv tab tom noj mov, Yes Xus tawm tuaj rau pab kaum ib pom, thiab nws yws lawv lub siab tsis ntseeg thiab lub siab tawv, vim lawv tsis ntseeg cov uas tau pom nws thaum nws sawv rov los lawm. 15 Yes Xus hais rau lawv tias : "Nej mus kom thoob plaws lub qab ntuj, thiab nej tshaj lub Moo Zoo rau txhua leej txhua tus paub.”

TIM 20 LUB 4 HLIS 2020

Hnub Ob Lis Piam Ob Caij Hla Xyoo A Nruab Lis Piam Xyoo II

Zaj Nyeem Ib: HAUJ LWM 4: 23-31

23 Thaum lawv tso Pob Zeb thiab Zam nkawd tawm, mas nkawd rov los nrog nkawd cov neeg nyob thiab nkawd piav tas tej yam uas cov leej choj thiab cov txwj laus tau hais rau nkawd. 24 Sawv daws hnov li ntawd mas sawv daws koom ua ib lub siab tsa suab thov Tswv Ntuj tias : "Huab Tais loj tas nrho, koj yog tus tsim lub ntuj lub teb, lub hiav txwv thiab tas ib puas tsav yam nyob rau hauv. 25 Koj yog tus tau siv peb txiv Das Vis koj tus tub txib lub ncauj los hais cov lus no nyob hauv Leej Ntuj Plig Ntshiab tias : ‘Vim li cas tsoom kuj cuab thiaj npau taws, thiab vim li cas cov haiv neeg thiaj xav tau tej yam vwm ua luaj ? 26 Cov vaj nyob ntiaj teb tau sawv los tiv, cov thawj coj ua tej pab sib koom nrhiav kev tawm tsam Huab Tais thiab nws Leej Pleev.’
27 Muaj tseeb li ntawd tiag, vim lawv tuaj sib sau nyob hauv lub nroog no koom tiv koj Leej Tub Txib Ntshiab Yes Xus uas koj tau pleev roj rau nws; yog Hes Los thiab Poos Xyus Pis Las Tos nrog cov pej kum haiv neeg thiab nrog cov xeem His Xas Lais tuaj sib koom, 28 kom tau ua raws li koj txhais tes thiab koj lub tswv yim yeej tau teem cia puag ntxov los lawm. 29 Huab Tais, nyem no koj ntsia saib lawv hem peb; thov koj pub lub peev xwm rau koj cov tub txib kom muaj lub siab tawv qhawv tshaj koj lo lus; 30 thov koj xyab koj txhais tes los kho cov neeg mob kom zoo hlo, thiab los ua tej lub cim thiab tej yam txaus qhuas nyob hauv koj tus Tub Txib Ntshiab Yes Xus lub npe."
31 Thaum lawv teev ntuj li ntawd tas nrho, mas qhov chaw uas lawv tuaj sis sau qeeg nkaws ua zog koog; ces Leej Ntuj Plig Ntshiab los nyob puv hauv lawv txhua tus, ua kom lawv muaj siab tawv qhawv tshaj Tswv Ntuj lo lus ntxiv mus.

NPN 2: 1-3, 4-7A, 7B-9

Txais: (11d) Tas cov uas vam khom Huab Tais lawv txoj hmoov zoo.
los: Alleluia.

Vim li cas cov kuj cuab yuav npau taws,
Cov haiv neeg yuav ntxhi xyib xyaub tsis muaj qab hau?
Cov vaj nyob ntiaj teb sawv ntxeev siab,
Hos cov nom tswv sib tuav tswv yim nrhiav kev
tawm tsam HUAB TAIS thiab nws leej pleev tias :
"Peb nriaj kom nkawd cov saw khi peb tu,
"peb muab nkawd tej saw hlau hle pov tseg !"

Txais: (11d) Tas cov uas vam khom Huab Tais lawv txoj hmoov zoo.
los: Alleluia.

Tus zaum saum txheej ntuj siab tuaj dab ros.
HUAB TAIS thuam lawv.
Nws hais lus npau taws rau lawv,
Nws lub siab ceev ua rau lawv ntshai:
"Kuv tau pleev roj tsa kuv tus vaj nyob
saum Xis Yoos, lub roob kuv txoj kev ntshiab."
Kuv yuav tshaj HUAB TAIS txoj cai tawm.

Txais: (11d) Tas cov uas vam khom Huab Tais lawv txoj hmoov zoo.
los: Alleluia.

HUAB TAIS hais rau kuv tias : 'Koj yog kuv leej Tub.
Hnub no kuv tau xeeb koj los.
Koj thov kuv, mas kuv yuav muab
tsoom kuj cuab los ua cuab tam pub rau koj,
kuv yuav muab lub ntiaj teb mus txog tim npoo ntuj los ua koj tug.
Koj yuav tuav ib tug cwj hlau los tswj lawv.
Koj yuav tsoo lawv ntsoog tas xws li lub lauj kaub av."

Txais: (11d) Tas cov uas vam khom Huab Tais lawv txoj hmoov zoo.
los: Alleluia.

As Les Lus Yas: KOS LOS XAIS 3: 1

Txais: As les lus yas, as les lus yas.

Nej twb tau nrog Leej Pleev sawv rov los lawm,
mas nej yuav nrhiav tej yam nyob txheej siab saud,
uas yog qhov chaw Leej Pleev zaum ntawm Tswv Ntuj phab xis.

Txais: As les lus yas, as les lus yas.

Ntawv Moo Zoo: ZAM 3: 1-8

1 Nyob hauv cov Fas Lis Xais, muaj ib tug hu ua Nis Kos Des Mos, nws yog cov Yus Das ib tug thawj coj. 2 Nws tuaj cuag Yes Xus hmo ntuj, nws hais rau Yes Xus tias : "Las Npis, peb paub tias koj yog ib tug xib hwb tuaj ntawm Tswv Ntuj tuaj, vim yeej tsis muaj leej twg ua tau cov cim koj ua, yog Tswv Ntuj tsis nrog nws nyob." 3 Yes Xus teb rau Nis Kos Des Mos tias : “Kuv hais qhov muaj tseeb tiag rau koj : Ib tug neeg yog nws tsis yug saum txheej siab los, mas nws pom tsis tau Tswv Ntuj lub Ceeb Tsheej.” 4 Nis Kos Des Mos hais rau Yes Xus tias : "Ib tug neeg laus lawm, nws yuav ua li cas rov yug los tau ? Nws puas rov mus tau rau hauv nws niam plab ib zaug ntxiv, mam rov yug los dua ?” 5 Yes Xus teb tias : “Kuv hais qhov muaj tseeb tiag rau koj: Tus twg tsis yug ntawm dej thiab ntawm Leej Ntuj Plig los, mas nws yuav mus tsis tau hauv Tswv Ntuj lub Ceeb Tsheej. 6 Tus uas yug ntawm lub cev nqaij los, mas nws yog neeg nqaij tawv; tus uas yug ntawm Leej Ntuj Plig los, mas nws yog ntsuj plig. 7 Koj txhob poob siab vim kuv hais rau koj tias : Nej yuav tsum yug saum txheej siab los. 8 Cua xav tshuab lawm seem twg kuj tau, koj hnov cua nrov, tab sis koj tsis paub tias cua tuaj qhov twg tuaj los cua mus lawm qhov twg li. Tus uas yug ntawm Leej Ntuj Plig los kuj zoo ib yam li ntawd thiab.”

TIM 21 LUB 4 HLIS 2020

Hnub Peb Lis Piam Ob Caij Hla Xyoo A Nruab Lis Piam Xyoo II

Hwm LN Anselm, ua Tswv Qhia thiab Kws cov Txuj Ntshiab

Zaj Nyeem Ib: HAUJ LWM 4: 32-37

32 Tas cov ntseeg sawv daws muaj ib lub siab ib lub tswv yim xwb. Tej yam uas yog nws li, tsis kav tsis muaj leej twg yuav hais tias yog nws tug xwb. Nyias muab nyias tug los ua sawv daws tug. 33 Cov Hauv Paus Xa Lus muaj hwj huam loj nyob hauv lawv txoj kev ua tim khawv txog Huab Tais Yes Xus sawv rov los, ces tas sawv daws tau txais txiaj ntsim ntau kawg. 34 Nyob hauv lawv, tsis muaj ib tug yuav txom nyem txog dab tsi : vim tias cov uas muaj liaj teb los muaj vaj tse, muab muag, ces lawv nqa tus nqe tuaj, 35 lawv muab tso rau ntawm cov Hauv Paus Xa Lus ko taw; lawv mam muab faib rau sawv daws kom nyias tau txaus nyias siv.
36 Muaj ib tug hu ua Yos Xes, uas cov Hauv Paus Xa Lus muab nws hu ua Npas Nas Npes - txhais tias: ‘tus txawj nplij neeg,’ nws yog xeem Les Vis, yug los nyob Kws Plos, 37 nws muaj ib daim teb, nws muab muag, nws coj cov nyiaj tuaj tso rau ntawm cov Hauv Paus Xa Lus ko taw.

NPN 93: 1AB, 1CD-2, 5

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

HUAB TAIS ua vaj, nws hnav hwj chim muaj tsim.
HUAB TAIS hnav zam, nws muab lub zog los sia duav.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Nws tsim lub ntiaj teb nyob ruaj nreb, tsis pub txav chaw.
Koj lub theej kiab nyob ruaj khov kho txij puag thaum ub los,
Huab Tais, koj yeej ib txwm nyob txhiab niag tim puas xyoo los lawm.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Koj cov cai koj tau txiav tseeb tas nrho,
Huab Tais, txoj kev ntshiab phim koj lub tsev
mus li tsis muaj lub caij kawg.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

As Les Lus Yas: ZAM 3: 14-15

Txais: As les lus yas, as les lus yas.

Neeg Leej Tub yuav tsum raug muab tsa siab,
kom xwv txhua tus uas ntseeg txog nws,
muaj txoj sia nyob mus li.

Txais: As les lus yas, as les lus yas.

Ntawv Moo Zoo: ZAM 3: 7B-15

Yes Xus hais rau Nis Kos Des Mos tias:
7b “Nej yuav tsum yug saum txheej siab los. 8 Cua xav tshuab lawm seem twg kuj tau, koj hnov cua nrov, tab sis koj tsis paub cua tuaj qhov twg tuaj, thiab tsis paub cua mus lawm qhov twg li. Tus uas yug ntawm Leej Ntuj Plig los kuj zoo ib yam li ntawd thiab.” 9 Nis Kos Des Mos teb rau Yes Xus tias : “Yuav ua li ntawd tau li cas ?” 10 Yes Xus hais rau Nis Kos Des Mos tias : “Koj yog ib tug xib hwb nyob hauv cov His Xas Lais, koj tseem tsis to taub tej no thiab lod? 11 Kuv hais qhov muaj tseeb tiag rau koj, peb hais yam peb paub, peb ua tim khawv txog tej uas peb tau pom, tab sis nej tsis txais peb cov lus ua tim khawv. 12 Thaum kuv hais txog tej yam nyob ntiaj teb no rau nej, nej twb tsis ntseeg; yog kuv hais txog tej yam nyob saum ntuj rau nej, mas nej yuav ua cas ntseeg tau ? 13 Tsis muaj leej twg tau nce mus txog saum ntuj, tsuas yog tus nqes saum ntuj los, uas yog Neeg Leej Tub thiaj tau mus txog xwb. 14 Xws li Mais Xes tau tsa tus nab nyob teb chaws suab puam, Neeg Leej Tub kuj yuav tsum raug muab tsa siab, 15 kom xwv txhua tus uas ntseeg txog nws, muaj txoj sia nyob mus li.”

TIM 22 LUB 4 HLIS 2020

Hnub Plaub Lis Piam Ob Caij Hla Xyoo A Nruab Lis Piam Xyoo II

Zaj Nyeem Ib: HAUJ LWM 5: 17-26

17 Tus thawj leej choj thiab nws cov tub ncig uas yog tog Xas Dus Kais, sawv tuaj cuam tshuam, vim lawv khib, 18 lawv ntes cov Hauv Paus Xa Lus coj mus pov rau hauv lub tsev loj faj rau cov pej xeem. 19 Tab sis hmo ntuj, Huab Tais tus Tshiab qhib cov qhov rooj hauv tsev loj faj, nws coj lawv tawm sab nraud, ces nws hais rau lawv tias : 20 "Nej mus sawv nyob hauv lub tuam tsev teev ntuj, nej yuav tshaj cov lus hais txog Txoj Sia no rau tsoom pej xeem." 21 Cov Hauv Paus Xa Lus hnov cov lus ntawd, thaum kaj ntug, lawv sawv ntxov ntxov chaws mus hauv lub Tuam Tsev Teev Ntuj, ces lawv pib qhuab qhia. Thaum tus thawj leej choj nrog nws cov tub ncig tuaj txog, lawv hu cov txwj laus Xas Nes Nrees thiab lub rooj sab laj ntawm cov laus neeg hauv tsoom His Xas Lais tas huv si tuaj, ces lawv tso neeg mus coj cov Hauv Paus Xa Lus tom tsev loj faj los. 22 Tab sis thaum cov neeg ntawd mus txog tom chaw, lawv tsis pom cov Hauv Paus Xa Lus nyob hauv tsev loj faj lawm, lawv thiaj rov los ceeb toom tias : 23 "Peb pom lub tsev loj faj kaw zoo zoo, hos cov zov keeb nyob rawv ntawm cov rooj loog. Tab sis thaum peb qhib qhov rooj, peb tsis pom leej twg nyob sab hauv li." 24 Tus tswj zov lub Tuam Tsev Teev Ntuj thiab cov thawj leej choj hnov cov lus ntawd, lawv nyob hab nuv tsis to taub tias qhov ntawd yog txhais li cas. 25 Ces txawm muaj ib tug neeg tuaj ceeb toom rau lawv tias : "Cov neeg uas nej muab kaw hauv tsev loj faj, mas nyem no lawv nyob hauv lub Tuam Tsev Teev Ntuj qhia tsoom pej xeem." 26 Tus tswj zov lub Tuam Tsev thiaj nrog nws cov tub ceev xwm mus coj cov Hauv Paus Xa Lus zoo zoo rov los, lawv tsis ua phem, vim lawv ntshai tsam tsoom pej xeem txawb pob zeb tua lawv.

NPN 34: 2-3, 4-5, 6-7, 8-9

Txais: (7a) Huab Tais mloog tus pluag lub suab quaj.
los : As les lus yas.

Kuv yuav qhuas txog HUAB TAIS txhua lub sij hawm;
lo lus cav txog nws yuav nyob rawv ntawm kuv lub ncauj.
Kuv tus plig tau koob meej yog nyob hauv HUAB TAIS;
tus neeg me yuav hnov kuv thiab yuav zoo siab.

Txais: (7a) Huab Tais mloog tus pluag lub suab quaj.
los : As les lus yas.

Nej nrog kuv cav txog HUAB TAIS lub koob meej,
peb sawv daws ua ke qhuas nws lub npe.
Kuv nrhiav HUAB TAIS, nws tau teb kuv,
thiab tau cawm kuv ntawm tas kuv tej kev ntshai.

Txais: (7a) Huab Tais mloog tus pluag lub suab quaj.
los : As les lus yas.

Nej vam txog HUAB TAIS, ces nej ntsej muag yuav kaj lug luag ntxhi,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS yuav mloog
thiab yuav cawm nws dim ntawm nws tej kev nyuaj ntxhov.

Txais: (7a) Huab Tais mloog tus pluag lub suab quaj.
los : As les lus yas.

HUAB TAIS tus tshiab tsa yeej ncig
cov neeg hwm nws, thiab nws cawm lawv dim.
Nej saj ces nej yuav pom tias HUAB TAIS siab zoo npaum li cas.
Tus muaj hmoov zoo yog tus mus nkaum nyob hauv HUAB TAIS.

Txais: (7a) Huab Tais mloog tus pluag lub suab quaj.
los : As les lus yas.

As Les Lus yas ZAM 3: 16

Txais: As les lus yas, as les lus yas.

Tswv Ntuj hlub lub qab ntuj neeg npaum no,
nws thiaj muab nws Leej Tub twm zeej rau,
kom xwv tus ntseeg txog nws muaj txoj sia nyob mus li.

Txais: As les lus yas, as les lus yas.

Ntawv moo Zoo ZAM 3: 16-21

16 Tswv Ntuj nyiam lub qab ntuj neeg npaum no, nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li. 17 Tswv Ntuj tsis tau xa nws Leej Tub tuaj hauv lub qab ntuj kom nws muab txim rau lub qab ntuj neeg, nws xa Leej Tub tuaj cawm lub qab ntuj neeg. 18 Tus ntseeg txog Leej Tub yuav tsis raug txiav txim, hos tus tsis ntseeg, nws twb raug txiav txim lawm, vim nws tsis ntseeg txog Tswv Ntuj Leej Tub twm zeej lub npe. 19 Kev txiav txim yog zoo li no : Qhov pom kev tuaj nyob hauv lub qab ntuj neeg, tab sis tsoom neeg nyiam qhov tsaus ntuj dua qhov pom kev, vim lawv ua cov hauj lwm phem. 20 Vim tus twg ua qhov phem, mas nws ntxub qhov pom kev, ces nws tsis los nyob hauv qhov pom kev, kom nws cov hauj lwm phem txhob tshwm tawm los. 21 Hos tus ua qhov tseeb, mas nws los nyob hauv qhov pom kev, kom luag pom tias nws ua nws cov hauj lwm nyob hauv Tswv Ntuj."

TIM 23 LUB 4 HLIS 2020

Hnub Tsib Lis Piam Ob Caij Hla Xyoo A Nruab Lis Piam Xyoo II

Hwm LN George, ua Tim Khawv;
LN Adalbert, ua Tswv Qhia tuag ua Tim Khawv

Zaj Nyeem Ib: HAUJ LWM 5: 27-33

27 Thaum cov tub ceev xwm coj cov Hauv Paus Xa Lus los txog, lawv kom mus sawv ntawm cov txwj laus Xas Nes Nrees xub ntiag. Tus Thawj leej choj nug cov Hauv Paus Xa Lus tias : 28 "Peb twb txwv nej, tsis kheev nej siv lub npe ntawd los qhuab qhia lawm ne, tab sis nej tseem qhia nej zaj ntawd mus thoob Yes Lus Xas Les thiab, yog nej xav kom tus neeg ntawd cov ntshav rov qab poob los rau saum peb xwb." 29 Ces Pob Zeb nrog cov Hauv Paus Xa Lus teb tias : "Peb yuav tsum mloog Tswv Ntuj lus zoo dua mloog neeg lus. 30 Peb cov yawg koob tus Tswv Ntuj tau tsa Yes Xus sawv rov los lawm, tus Yes Xus uas nej muab nws dai rau saum ib tug ncej kom tuag. 31 Nws yog tus uas Tswv Ntuj tau tsa nyob siab ntawm Tswv Ntuj sab xis kom nws ua tus Tswj thiab tus Cawm Seej, nws thiaj yuav pub txoj kev thov txhaum thiab kev zam txhaum rau His Xas Lais. 32 Peb yog cov ua tim khawv txog tej no, thiab Leej Ntuj Plig Ntshiab uas Tswv Ntuj pub rau cov neeg mloog nws lus kuj ua tim khawv txog thiab."
33 Lawv hnov li ntawd mas lawv npau taws kawg, lawv xav muab cov Hauv Paus Xa Lus tua kiag xwb.

NPN 34: 2+9, 17-18, 19-20

Txais: (7a) Huab Tais mloog tus pluag lub suab quaj.
los : As les lus yas.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Nej saj ces nej yuav pom tias HUAB TAIS siab zoo npaum li cas.
Tus muaj hmoov zoo yog tus mus nkaum nyob hauv HUAB TAIS.

Txais: (7a) Huab Tais mloog tus pluag lub suab quaj.
los : As les lus yas.

HUAB TAIS tig ntsej muag mus tiv cov neeg phem,
rhuav kom txhob muaj chaw nco txog lawv nyob ntiaj teb ntxiv.
Thaum cov neeg ncaj hu, HUAB TAIS mloog lawv,
thiab npo lawv dim ntawm tas lawv txoj kev nyuaj siab.

Txais: (7a) Huab Tais mloog tus pluag lub suab quaj.
los : As les lus yas.

HUAB TAIS nyob ze ze tus neeg muaj kev lwj siab;
nws pab cawm cov neeg tag kev cia siab.
Tus siab ncaj raug ntau yam kev nyuaj kev ntxhov,
Tiam sis HUAB TAIS npo nws dim ntawm txhua yam.

Txais: (7a) Huab Tais mloog tus pluag lub suab quaj.
los : As les lus yas.

As Les Lus Yas: ZAM 20: 29

Txais: As les lus yas, as les lus yas.

Huab Tais hais tias: "Tos Mas, koj ntseeg vim koj pom kuv.
Cov uas tsis tau pom tab sis lawv ntseeg, mas lawv txoj hmoov zoo!"

Txais: As les lus yas, as les lus yas.

Ntawv Moo Zoo: ZAM 3: 31-36

31 “Tus tuaj saum txheej siab tuaj, nws nyob siab dua sawv daws. Tus tuaj hauv ntiaj teb tuaj, nws yog ntiaj teb tug, nws hais txog tej yam nyob ntiaj teb. Tus tuaj saum ntuj tuaj nws nyob siab dua sawv daws, 32 nws ua tim khawv txog qhov nws tau pom thiab tau hnov, tab sis tsis muaj leej twg txais nws cov lus tim khawv. 33 Tus uas txais nws cov lus tim khawv, nws lees meej tias Tswv Ntuj yog tus tseeb. 34 Tus uas Tswv Ntuj xa tuaj, nws hais Tswv Ntuj cov lus, vim Tswv Ntuj pub Leej Ntuj Plig nplua mias tsis xuas dab tsi luj. 35 Leej Txiv nyiam Leej Tub, nws tso tas ib puas tsav yam rau hauv Leej Tub txhais tes. 36 Tus ntseeg txog Leej Tub, mas nws muaj txoj sia nyob mus li. Hos tus tsis kam ntseeg txog Leej Tub, nws yuav tsis pom txoj sia; Tswv Ntuj lub siab npau taws yuav nyob rawv saum nws.”