COV ZAJ NYEEM NRUAB LIS PIAM XYOO A 2019-2020

TIM 24 LUB 4 HLIS 2020

Hnub Rau Lis Piam Ob Caij Hla Xyoo A Nruab Lis Piam Xyoo II

Hwm LN Fidelis nyob Sigmaringen, Leej Choj tuag ua Tim Khawv

Zaj Nyeem Ib: HAUJ LWM 5: 34-42

34 Ces ib tug Fas Lis Xais hu ua Nkas Mas Lias nyob hauv cov txwj laus Xas Nes Nrees, nws yog ib tug kws Txoj Cai uas tas tsoom pej xeem hwm, nws txawm sawv, nws hais kom coj cov Hauv Paus Xa Lus tawm mus ib pliag. 35 Ces nws hais rau cov txwj laus Xas Nes Nrees tias : "Cov kwv tij His Xas Lais, nej yuav xyuam xim rau tej yam nej ua rau cov neeg ntawd. 36 Tau tsis ntev los muaj ib tug hu ua Thaws Das. Nws hais tias nws yog ib tug loj. Nws sau tau kwv yees plaub puas leej neeg. Tab sis nws raug luag tua tuag, ces nws cov neeg tawg tas, tsis muaj dab tsi li lawm. 37 Tom qab nws, lub zim txwv txheeb tsoom mej hwm, mas Yus Das tus uas nyob Nkas Lis Lais kuj sawv los. Nws coj tau coob leej raws nws qab. Nws kuj tuag lawm thiab, ces cov neeg uas raws nws tawg tas xwb. 38 Ua li mas, nyem no, kuv hais rau nej tias nej tsis txhob quav ntsej txog cov neeg ntawd, nej tso plhuav kev rau lawv. Vim yog tias lawv cov dej num los txoj kab xwm tuaj ntawm neeg tuaj xwb, mas nws yuav rov rhuav nws ploj mus tas. 39 Hos yog tias lawv cov dej num los txoj kab xwm tuaj ntawm Tswv Ntuj tuaj tiag, mas nej yeej rhuav tsis tau lawv li. Nej tsis txhob tuam yim, tsam lam yog nej ua rog tiv Tswv Ntuj." Ces sawv daws yuav raws Nkas Mas Lias zaj tswv yim. 40 Lawv hu cov Hauv Paus Xa Lus kom rov los hauv tsev. Lawv kom luag muab cov Hauv Paus Xa Lus nplawm tas, lawv txwv tsis pub tuav txog Yes Xus lub npe los qhuab qhia ntxiv. Ces lawv tso cov Hauv Paus Xa Lus mus. 41 Cov Hauv Paus Xa Lus tawm ntawm lub rooj txwj laus Xas Nes Nrees los, lawv zoo siab vim Ntuj saib lawv tsim nyog raug luag hiam vim Lub Npe. 42 Niaj hnub lawv nyob hauv lub Tuam Tsev Teev Ntuj thiab nyob hauv lawv tej tsev qhia thiab tshaj txog Yes Xus Pleev lub Moo Zoo tsis tseg.

NPN 27: 1, 4, 13-14

Txais: (4abc) Ib yam uas kuv nrhiav: yog kom tau nyob hauv Huab Tais tsev.
los: As les lus yas.

Huab Tais yog kuv qhov pom kev thiab kuv txoj kev cawm;
Kuv yuav ntshai leej twg?
Huab Tais yog kuv qhov chaw nkaum hauv kuv lub neej,
Kuv yuav ntshai leej twg?

Txais: (4abc) Ib yam uas kuv nrhiav: yog kom tau nyob hauv Huab Tais tsev.
los: As les lus yas.

Kuv tsuas thov ib yam ntawm Huab Tais; qhov kuv nrhiav yog:
kom tau nyob hauv Huab Tais lub tsev niaj hnub hauv kuv lub neej,
kom kuv tau ntsia ntsoov Huab Tais txoj kev zoo
thiab tau pom nws lub tuam tsev.

Txais: (4abc) Ib yam uas kuv nrhiav: yog kom tau nyob hauv Huab Tais tsev.
los: As les lus yas.

Kuv ntseeg tias kuv yuav tau pom Huab Tais txoj kev nplua mias
nyob hauv cov neeg ciaj sia lub teb chaws.
Nej ua siab loj tos ntsoov Huab Tias,
ua siab tawv qhawv tos ntsoov Huab Tais.

Txais: (4abc) Ib yam uas kuv nrhiav: yog kom tau nyob hauv Huab Tais tsev.
los: As les lus yas.

As Les Lus yas: MT 4: 4B

Txais: As les lus yas, as les lus yas.

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo : ZAM 6: 1-15

1 Dhau tej no lawm, Yes Xus hla mus rau sab dej ntuj Nkas Lis Lais tim ub, yog tus ntug Dej Ntuj Tis Npes Lias. 2 Ib pab neeg coob raws nws mus, vim lawv tau pom cov cim nws ua kho tej neeg mob. 3 Yes Xus nce mus saum roob, nws nrog nws cov thwj tim zaum nyob saud. 4 Yuav txog lub Ntees Hla uas yog cov Yus Das lub ntees ua kev tsuj xeeb loj. 5 Yes Xus tsa muag ntsia pom ib pab neeg coob coob tuaj cuag nws, nws hais rau Fis Lis Pos tias : "Peb yuav mus muas ncuav mov qhov twg los rau cov neeg ntawd noj ?" 6 Yes Xus hais li ntawd sim Fis Lis Pos, tab sis Yes Xus yeej paub tias nws yuav ua dab tsi lawm. 7 Fis Lis Pos teb rau Yes Xus tias : "Txawm muab ob puas lub txiaj nyiag mus muas mov los los tseem yuav tsis txaus kom ib leeg tau ib qho me me li." 8 Yes Xus ib tug thwj tim hu ua As Nres, yog Xis Moos Pob Zeb tus kwv, hais rau Yes Xus tias : 9 "Ib tug me nyuam nyob ntawm no muaj tsib lub ncuav mov qib thiab ob tug ntses, tab sis qhov ntawd yuav ua cas txaus rau npaum no leej neeg noj ?" 10 Yes Xus hais tias : "Nej kom cov neeg zaum." Nyob ntawm qhov chaw ntawd muaj nroj ntau. Ces cov neeg zaum, kwv yees muaj tsib txhiab leej neeg. 11 Yes Xus tuav cov ncuav mov, nws ua ntuj tsaug tas, nws muab faib rau cov neeg uas zaum ntawd. Nws kuj ua ib yam li ntawd rau cov ntses thiab, kom txaus sawv daws noj txaus siab. 12 Thaum lawv noj tsau tas, Yes Xus hais rau nws cov thwj tim tias : "Nej khaws cov sab mov seem kom txhob nkim ib qho pov tseg li." 13 Ces lawv thiaj khaws cov mov seem noj tsis tag uas ntsu ntawm tsib lub ncuav mov qib los, lawv ntim puv kaum ob tawb. 14 Tsoom sid pom lub cim Yes Xus ua, ces lawv hais tias : "Tus no yog tus Yaj Saub uas yuav tuaj nyob hauv lub qab ntuj neeg tiag tiag." 15 Yes Xus paub tias lawv yuav tuaj ntes nws mus tsa ua vaj, ces nws mus nws tib leeg twj ywm rau saum roob lawm.

APRIL 25 LUB 4 HLIS 2020

Hnub Xya Lis Piam Ob Caij Hla Xyoo A Nruab Lis Piam Xyoo II

Hwm LN Mas Kos, tus sau Mas Kos Ntawv Moo Zoo.

Zaj Nyeem Ib: 1 POB ZEB 5: 5B-14

Cov hmov tshua:
5b Thaum nej ib leeg fim ib leeg, tas nej txhua tus yuav tsum npua rawv txoj kev ua neeg me, vim tias: “Tswv Ntuj tiv cov neeg muab hlob, hos nws pub nws cov txiaj ntsim rau cov neeg ua tus me.” 6 Li ntawd nej sawv daws yuav zoo siab ua neeg me nyob hauv Tswv Ntuj txhais tes muaj hwj huam, ces thaum txog lub sij hawm teem cia, nws yuav tsa nej rau qhov chaw siab. 7 Nej tso nej tej kev ntxhov siab tas huv tib si rau Tswv Ntuj, vim nws yog tus hlub nej.
8 Nej yuav noj me haus tsawg thiab ua neeg feeb meej, vim tus dab phem uas yog nej tus yeeb ncuab, nws zoo li ib tug tsov nyooj laws, nws koos ncig lees nyas ntshis nrhiav saib yuav tom leej twg. 9 Nej tiv nws mog ! Nej nyob ruaj nreb hauv txoj kev ntseeg; nej nco ntsoov tias nej cov kwv tij nkauj muam nyob tas ntiaj teb puav leej raug tib txog kev txom nyem li nej thiab. 10 Thaum nej raug kev nyuaj ib ntus tsis ntev tas, tus Tswv Ntuj pub txhua yam txiaj ntsim uas tau hu nej los txais lub koob meej nyob mus li hauv Leej Pleev, nws yuav rov tsa nej sawv, nws yuav ua kom nej nyob ruaj khov kho, nws yuav ntxiv zog rau nej. 11 Thov kom Tswv Ntuj lub hwj chim ua vaj nyob mus li tiam dhau tiam. Ua li.
12 Yog Xis Vas Nus, uas kuv saib nws yog ib tug kwv siab ncaj ncees, pab kuv sau cov lus luv luv no rau nej, los ntuas nej, thiab ua tim khawv qhia meej rau nej tias lub txiaj ntsim uas nej nyob ruaj nreb rau hauv yog Tswv Ntuj lub tseem txiaj ntsim tiag.
13 Lub Koom Txoos nyob Npas Npis Los, uas raug Ntuj xaiv ib yam li nej, xa lawv cov lus hmov tshua tuaj rau nej, thiab kuv tus tub Mas Kos xa thiab. 14 Nej ib leeg yuav hais lus hu ib leeg nyob hauv txoj kev sib qawg muaj kev sib nyiam sib hlub. Kom nej sawv daws cov nyob hauv Leej Pleev muaj kev kaj lug mog!

NPN 89: 2-3, 6-7, 16-17

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Kuv yuav hu nkauj mus li cav txog HUAB TAIS tej kev ua zoo,
kuv lub ncauj yuav tshaj txog koj txoj kev tsis fav xeeb mus tiam dhau tiam.
Vim koj tau hais tias: “Kuv lub siab zoo yuav nyob ruaj mus li;”
nyob saum ntuj koj tau cog koj txoj kev tsis fav xeeb kom nyob ruaj nreb.

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Huab Tais, cov txheej ntuj saud cav txog koj tej hauj lwm loj,
thiab tsoom neeg ntshiab lub txoos cav txog koj txoj kev tsis fav xeeb.
Nyob saum ntuj puas muaj leej twg yuav piv tau rau Huab Tais?
Puas muaj leej twg nyob hauv lwm cov tswv ntuj yuav zoo li Huab Tais?

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Cov neeg uas paub txoj kev qw zoo siab lawv txoj hmoov zoo;
Huab Tais, koj lub ntsej muag ci rau lawv pom kev taug kev.
Lawv zoo siab tas hnub vim koj lub npe,
koj txoj kev ncaj tsa lawv nyob rau qhov siab.

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

As Les Lus Yas: 1 KLN 1: 23A+24B

Txais: As les lus yas, as les lus yas.

Peb tshaj txog leej Pleev raug ntsia dai saum ntoo cuam;
nws yog Tswv Ntuj lub hwj huam thiab yog Tswv Ntuj txoj kev thoob tsib.

Txais: As les lus yas, as les lus yas.

Ntawv Moo Zoo: MK 16: 15-20

15 Yes Xus tshwm sim tuaj hais rau lawv pab kaum ib tias : "Nej mus thoob qab ntuj, nej tshaj lub Moo Zoo rau txhua leej txhua tus.
16 Tus twg ntseeg thiab txais lub cim ntxuav, mas nws yuav txais kev cawm, hos tus tsis ntseeg yuav mus raug txim.
17 Cov cim no yuav nrog nraim cov uas ntseeg: lawv tuav txog kuv lub npe, lawv yuav ntiab dab tau; lawv yuav txawj hais tej xeem lus tshiab;
18 lawv yuav tuav nab tau; yog lawv haus tshuaj lom neeg, tshuaj yuav tsis ua xwv txheej rau lawv; thaum lawv tsa tes rau saum cov neeg mob, mas cov mob yuav zoo."
19 Thaum Huab Tais Yes Xus hais cov lus no tas rau lawv, nws raug nqa mus rau saum ntuj, nws mus zaum ntawm Tswv Ntuj sab xis lawm.
20 Cov thwj tim thiaj tawm mus tshaj lub Moo Zoo rau tas qhov txhia chaw, Huab Tais nrog lawv lis hauj lwm nraim, nws ua ib co cim zeem tseeb txog Lo Lus.

TIM 27 LUB 4 HLIS 2020

Hnub Ob Lis Piam Peb Caij Hla Xyoo A Nruab Lis Piam Xyoo II

Zaj Nyeem Ib: Hauj Lwm 6: 8-15

8 Tes Fas Nos tau txais txiaj ntsim thiab hwj huam ntau, nws ua ib co hwj huam yees ntxwv thiab ib co cim loj kawg nyob hauv tsoom pej xeem. 9 Ces muaj ib co neeg tuaj ntawm lub tsev txoos hu ua Tsev Txoos Rau cov Qhev Dim Txim, cov Xis Les Nas, cov As Les Xas Nrias, cov Xis Lis Xias, thiab cov As Xias tuaj. Lawv tuaj nrog Tes Fas Nos sib cav. 10 Lawv tsis muaj peev xwm cav yeej txoj kev thoob tsib thiab Leej Ntuj Plig uas qhia nws hais lus. 11 Ces lawv txhob ib co neeg kom liam tias: "Peb hnov tus neeg ntawd hais ib co lus thuam Mais Xes thiab thuam Tswv Ntuj." 12 Lawv haub tsoom pej xeem, tsoom laus neeg, thiab tsoom kws ntawv ntshiab kom sawv daws npau taws, ces lawv tuaj tos kev ntes Tes Fas Nos thiab coj nws mus rau lub rooj txwj laus Xas Nes Nrees. 13 Lawv coj ib co tim khawv cuav tuaj liam tias: "Tus neeg ntawd hais lus phem tsis tseg txog lub Tsev Ntshiab ntawm no thiab txog Txoj Cai. 14 Peb tau hnov nws hais tias Yes Xus Nas Xas Les yuav rhuav lub Chaw no, thiab nws yuav hloov tej kab ke uas Mais Xes tau muab rau peb no." 15 Tas cov uas zaum hauv lub rooj txwj laus Xas Nes Nrees tig qhov muag mus ntsia nruj nreem rau Tes Fas Nos, lawv pom Tes Fas Nos lub ntsej muag zoo xws li ib tug Tshiab lub ntsej muag.

NPN 119: 23-24, 26-27, 29-30

Txais: (1ab) Cov tau txoj hmoov zoo yog cov neeg
ua raws nraim HUAB TAIS Txoj Cai!
los: Alleluia.

Txawm tias cov tub huab tais zaum sab laj nrhiav kev liam rau kuv,
los koj tus tub txib xav ntsoov txog koj tej cai lij choj.
Koj cov lus qhia ua rau kuv zoo siab,
Koj cov lus qhia tswv yim rau kuv.

Txais: (1ab) Cov tau txoj hmoov zoo yog cov neeg
ua raws nraim HUAB TAIS Txoj Cai!
los: Alleluia.

Kuv qhia kuv tej kev rau koj, ces koj teb kuv,
thov koj qhia koj txoj cai lij choj rau kuv paub.
Thov koj ua kom kuv to taub txog txoj kev coj koj cov lus qhia,
kuv yuav mob siab xav txog koj cov dej num uas txaus qhuas.

Txais: (1ab) Cov tau txoj hmoov zoo yog cov neeg ua
raws nraim HUAB TAIS Txoj Cai!
los: Alleluia.

Thov koj tshem txoj kev dag mus deb ntawm kuv,
koj muab koj Txoj Cai pub ua txiaj ntsim rau kuv.
Kuv xaiv txoj kev tseeb taug,
kuv ua raws nraim koj cov cai tswj siab ntsws.

Txais: (1ab) Cov tau txoj hmoov zoo yog cov neeg
ua raws nraim HUAB TAIS Txoj Cai!
los: Alleluia.

As Les Lus yas: MT 4: 4B

Txais: As les lus yas, as les lus yas.

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo: Zam 6: 22-29

(Hnub ua ntej yog hnub Yes Xus muab mov pub rau tsib txhiab leej noj tas ces hmo ntawd cov thwj tim pom Yes Xus mus kev saum nplaim dej.)
22 Tag kis sawv ntxov, tsoom neeg uas nyob sab dej ntuj tim no pom tias nag hmo tsuas muaj ib lub nkoj nyob ntawd xwb, thiab lawv paub tias Yes Xus tsis nrog nws cov thwj tim nce nkoj, cov thwj tim lawv mus lawv lawm xwb. 23 Muaj ib co nkoj tuaj Tis Npes Lias tuaj txog ntawm qhov chaw lawv noj cov mov uas Huab Tais tau ua Ntuj tsaug rau. 24 Tab sis tsoom neeg pom tias Yes Xus tsis nyob ntawd lawm, nws cov thwj tim kuj tsis nyob lawm thiab, ces lawv nce nkoj mus tim Kas Fas Naus mus nrhiav Yes Xus tid. 25 Thaum lawv tuaj nrhiav tau Yes Xus rau sab ntug dej tid, lawv hais rau nws tias : "Las Npis, thaum twg koj tuaj ntawm no lawm ?" 26 Yes Xus teb rau lawv tias : "Kuv hais qhov tseeb tiag rau nej : Nej nrhiav kuv, tsis yog vim nej tau pom ib co cim, hos yog vim nej tau noj cov ncuav mov tsau nej plab. 27 Nej tsis txhob ua hauj lwm nrhiav cov txhiam xws txawj ploj mas, nej yuav ua hauj lwm nrhiav cov txhiam xws pub txoj sia nyob mus li uas yog cov Neeg Leej Tub yuav pub rau nej, vim nws yog tus uas Leej Txiv Tswv Ntuj ntaus thwj rau." 28 Lawv hais rau Yes Xus tias : "Peb yuav ua dab tsi peb thiaj ua tau Tswv Ntuj cov hauj lwm ?" 29 Yes Xus teb rau lawv hais tias : "Tswv Ntuj txoj hauj lwm yog li no: kom nej ntseeg txog tus nws xa tuaj."

TIM 28 LUB 4 HLIS 2020

Hnub Peb Lis Piam Peb Caij Hla Xyoo A Nruab Lis Piam Xyoo II

Hwm LN Peter Chanel, Leej Choj tuag ua Tim Khawv;
Hwm LN Louis Marie Grignion de Montfort, ua Leej Choj

Zaj Nyeem Ib: HAUJ LWM 7: 51—8:1A

Tes Fas Nos hais rau cov neeg, cov txwj laus thiab cov kws Ntawv Ntshiab tias:
51 “Nej yog neeg xwb qwb txhav, uas lub siab thiab pob ntseg tsis txais lub cim txiav, nej thiaj tawv ncauj tsis mloog Leej Ntuj Plig Ntshiab; nej coj yog nkaus li nej cov yawg koob thiab. 52 Puas muaj ib tug yaj saub uas nej cov yawg koob tsis tau hiam ? Lawv tua cov yaj saub uas tau xub hais txog tus Siab Ncaj yuav tuaj, uas yog tus nej nyuam qhuav ntxeev siab rau nws thiab muab nws tua. 53 Nej tau txais Txoj Cai ntawm cov Tshiab los, tab sis nej tsis mloog Txoj Cai.”
54 Thaum lawv hnov cov lus no, mas lawv lub siab npau taws ceev kawg, lawv zim hniav zaig rau Tes Fas Nos. 55 Leej Ntuj Plig Ntshiab nyob puv hauv Tes Fas Nos lub siab, nws tsa muag ntsia ntsoov rau saum ntuj. Nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis. 56 Ces nws hais tias : "Kuv ntsia pom lub ntuj qhib lug, thiab pom Neeg Leej Tub sawv ntsug ntawm Tswv Ntuj sab xis." 57 Cov neeg nthe nrov nrov, lawv pos pob ntseg, sawv daws ua ib tsaug khiav mus rau ntawm Tes Fas Nos. 58 Lawv thawb nws mus rau sab nroog nraud, ces lawv txawb pob zeb tua nws. Cov ua tim khawv tso lawv tej khaub ncaws rau ntawm ib tug tub hluas hu ua Xauv ko taw. 59 Thaum lawv tab tom txawb pob zeb tua Tes Fas Nos mas nws thov ntuj, nws hais tias : "Huab Tais Yes Xus, thov koj txais kuv tus ntsuj plig." 60 Ces nws txhos caug, nws hais ib lo nrov nrov tias : "Huab Tais, koj txhob muab qhov txhaum ntawd rau lawv ris." Thaum nws hais lo lus ntawd tas, nws vau hlo pw tsaug zog lawm.
8 1 Hos Xauv, mas nws pom zoo kom lawv muab Tes Fas Nos tua.

NPN 31: 3CD-4, 6+7B+8A, 17+21AB

Txais: (6a) Huab Tais, kuv tso kuv tus ntsuj plig rau hauv koj txhais tes.
los: As les lus yas.

Thov koj ua lub tsua rau kuv ua chaw nkaum,
ua lub yeej ntsa zeb thaiv kuv ntawm tej xwv txheej.
Kuv lub tsua thiab kuv lub yeej ntsa zeb yog koj;
vim koj lub npe, thov koj tuav kuv tes coj kuv kev.

Txais: (6a) Huab Tais, kuv tso kuv tus ntsuj plig rau hauv koj txhais tes.
los: As les lus yas.

Kuv tso kuv tus ntsuj plig rau hauv koj txhais tes.
HUAB TAIS Tswv Ntuj tus tsis fav xeeb, koj yog tus txhiv kuv.
Kuv tso siab tas nrho rau Huab Tais,
Kuv zoo siab hom khaj vim koj khuv leej kuv.

Txais: (6a) Huab Tais, kuv tso kuv tus ntsuj plig rau hauv koj txhais tes.
los: As les lus yas.

Thov cia koj lub ntsej muag ci tuaj rau saum koj tus tub txib,
thov cawm kuv vim koj muaj lub siab zoo.
Koj coj cov neeg hwm koj mus zais rau hauv koj xub ntiag,
Deb ntawm cov neeg phem tej tswv yim nkhaus.

Txais: (6a) Huab Tais, kuv tso kuv tus ntsuj plig rau hauv koj txhais tes.
los: As les lus yas.

As Les Lus Yas: ZAM 6: 35AB

Txais: As les lus yas, as les lus yas.

Huab Tais hais tias: “Kuv yog cov mov pub txoj sia;
leej twg tuaj cuag kuv yuav tsis tshaib ib zaug ntxiv.”

Txais: As les lus yas, as les lus yas.

Ntawv Moo Zoo: ZAM 6: 30-35

30 Cov neeg hais rau Yes Xus tias : "Koj yuav ua lub cim dab tsi rau peb pom, kom peb ntseeg koj ? Koj ua tau dab tsi? 31 Peb cov yawg koob noj cov mov mas nas nyob teb chaws suab puam, raws li cov lus sau cia tias : "Nws pub cov mov tuaj saum ntuj tuaj rau lawv noj." 32 Yes Xus thiaj hais rau lawv tias : "Kuv hais qhov tseeb tiag rau nej : Mais Xes tsis yog tus pub cov mov tuaj saum ntuj tuaj rau nej, kuv Txiv yog tus pub cov tseem mov tuaj saum ntuj tuaj rau nej. 33 Tswv Ntuj cov mov yog cov uas nqes saum ntuj los pub txoj sia rau lub qab ntuj neeg."
34 Lawv thiaj hais rau Yes Xus tias : "Huab Tais, thov koj pub cov mov ntawd rau peb noj mus li." 35 Yes Xus hais rau lawv tias : "Kuv yog cov mov pub txoj sia. Tus tuaj cuag kuv nws yuav tsis tshaib li, tus ntseeg txog kuv nws yuav tsis nqhis ib zaug li.”

TIM     29     LUB     4     HLIS     2020

Hnub Plaub Lis Piam Peb Caij Hla Xyoo B Nruab Lis Piam Xyoo II

Hwm LN Catherine nyob Siena, Nkauj Xwb ua Kws cov Txuj Ntshiab

Zaj Nyeem Ib: HAUJ LWM 8: 1b-8

1b Hnub ntawd, lub Koom Txoos nyob Yes Lus Xas Les raug luag hiam loj kawg. Tas sawv daws tawg mus nyob nruab liaj nruab teb, hauv cov xeev Yus Das thiab Xas Mas Lias. Tsuas tshuav cov Hauv Paus Xa Lus thiaj tsis khiav xwb. 2 Muaj ib co neeg hwm Ntuj zoo tuaj muab Tes Fas Nos lub cev mus faus, thiab lawv quaj nyiav nws nrov nrov. 3 Hos Xauv, mas nws nrhiav kev kom tau hiam lub Koom Txoos. Nws mus ib lub tsev dhau ib lub tsev, nws cab cov txiv neej thiab cov poj niam huv si coj mus rau luag kaw.
4 Cov neeg uas tawg ncaim mus rau txhua qhov chaw, lawv mus txog twg lawv tshaj lub Moo Zoo rau sawv daws hnov. 5 Li ntawd Fis Lis Pos thiaj li mus rau nram ib lub nroog nyob Xas Mas Lias teb, nws tshaj txog Leej Pleev rau lawv. 6 Tsoom neeg coob koom ua ib lub siab mob siab mloog qhov uas Fis Lis Pos tshaj rau lawv, thaum lawv hnov cov lus nws hais thiab pom cov cim nws ua. 7 Vim tias muaj coob tus dab phem qw tej suab nrov nrov tawm ntawm cov neeg raug dab tsis huv mus, hos cov tuag ceg thiab cov ceg tawv coob leej kuj cia li zoo hlo. 8 Nyob hauv lub nroog ntawd, sawv daws zoo siab kawg nkaus.

NPN 66: 1-3A, 4-5, 6-7A

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

Tas ntiaj teb, nej cia li qw zoo siab rau Tswv Ntuj ;
Nej hu nkauj cav txog nws lub npe muaj hwj chim,
nej hais tej zaj lus cav txog nws lub koob meej.
Nej hais rau Tswv Ntuj tias : "Koj tej num muaj hwj xyeej ua luaj !”

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

"Kom tas lub ntiaj teb tuaj txhos caug pe hawm koj
thiab hu nkauj cav txog koj, hu nkauj qhuas koj lub npe!”
Nej tuaj xyuas Tswv Ntuj cov hauj lwm saib,
Nws ua hauj lwm muaj hwj xyeej nyob hauv As Das tsoom tub ki.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

Nws ua kom dej ntuj hloov ua av qhuav,
lawv taug kev hla dej, dej tsis ntub lawv ko taw ;
Li ntawd, peb yuav zoo siab nyob hauv nws.
Nws lub hwj huam yuav kav sawv daws tas mus li.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

As Les Lus Yas: ZAM 6: 40

Txais: As les lus yas, as les lus yas.

Huab Tais hais tias:
Txhua tus uas ntseeg txog Leej tub yuav muaj txoj sia nyob mus li,
thiab kuv yuav tsa nws sawv rov los thaum txog hnub kawg.

Txais: As les lus yas, as les lus yas.

Ntawv Moo Zoo: ZAM 6: 35-40

35 Yes Xus hais rau pab neeg coob tias : "Kuv yog cov mov muaj txoj sia. Tus tuaj cuag kuv nws yuav tsis tshaib li, tus ntseeg txog kuv nws yuav tsis nqhis ib zaug li. 36 Kuv hais rau nej lawm tias: txawm nej tau pom kuv, tsis kav nej tsis ntseeg li. 37 Txhua yam uas kuv Txiv muab rau kuv yuav los cuag kuv. Tus tuaj cuag kuv, kuv yuav tsis ntiab nws rau nraum zoov. 38 Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab. 39 Tus Xa kuv tuaj lub siab xav yog zoo li no : Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los. 40 Qhov uas kuv Txiv nyiam yog zoo li no : kom txhua tus uas pom Leej Tub thiab ntseeg txog Leej Tub muaj txoj sia nyob mus li, thiab Hnub Kawg, kuv yuav tsa nws sawv rov los."

TIM 30 LUB 4 HLIS 2020

Hnub Tsib Lis Piam Peb Caij Hla Xyoo A Nruab Lis Piam Xyoo II

Hwm LN Vaj Qhia Pius V

Zaj Nyeem Ib: HAUJ LWM 8: 26-40

26 Huab Tais tus Tshiab hais rau Fis Lis Pos tias : "Koj sawv kev mus lawm naj fab, koj taug txoj kev uas nqes ntawm Yes Lus Xas Les mus rau nram Nkas Xas, uas yog txoj kev suab puam." 27 Fis Lis Pos thiaj sawv kev mus. Muaj ib tug neeg Es Caus Pias, uas yog ib tug neeg sam, nws yog cov Es Caus Pias tus poj vaj hu ua Kas Des ib tug nom loj; nws yog tus saib tas nrho tus poj vaj cov txhab nyiaj. Nws tuaj mus pe hawm Ntuj pem Yes Lus Xas Les tas, 28 ces nws rov los, nws zaum hauv nws lub tsheb nyeem tus yaj saub His Xais phau ntawv. 29 Leej Ntuj Plig hais rau Fis Lis Pos tias : "Koj mus caum lub tsheb ntawd thiab koj nce mus rau saum tsheb." 30 Fis Lis Pos thiaj khiav mus caum, nws hnov tus nom ntawd nyeem His Xais phau ntawv, nws nug tias : "Koj puas to taub qhov koj nyeem?" 31 Tus nom teb tias : "Kuv yuav ua li cas to taub yog tsis muaj neeg qhia kuv?" Ces nws caw kom Fis Lis Pos nce los nrog nws zaum. 32 Cov lus uas tus nom tab tom nyeem yog cov no : “Nws zoo li ib tug yaj luag cab mus rau hauv tsev tua tsiaj thiab nws kuj zoo li ib tug me nyuam yaj nyob ntsiag to rau tus uas chais nws cov plaub, nws tsis qhib ncauj li. 33 Nws raug txoj kev poob hwj chim, luag tsis txiav txim ncaj rau nws li. Leej twg nyob hauv nws tiam neeg thiaj yuav piav txog tej no? Vim tias luag twb txo nws txoj sia kom ploj hauv ntiaj teb mus lawm.”
34 Tus nom sam hais rau Fis Lis Pos tias : "Kuv thov koj qhia kuv saib tus yaj saub hais txog leej twg zoo li ntawd ? Nws puas rov hais txog nws, los nws hais txog lwm tus thiab yog leej twg ?" 35 Fis Lis Pos thiaj qhib ncauj hais lus; nws siv cov lus sau tseg ntawd los qhia Yes Xus lub Moo Zoo rau tus nom sam. 36 Thaum nkawd taug kev, nkawd mus txog ib qho chaw muaj dej, tus nom sam hais tias : "Ntawm no twb muaj dej, puas muaj dab tsi ua kom kuv txais tsis tau lub cim ntxuav ?" [37 Fis Lis Pos hais tias: “Yog koj muab tas nrho koj lub siab ntseeg, ces koj txais tau.” Tus nom teb tias: “Kuv yeej ntseeg tias Yes Xus Plees yog Tswv Ntuj Leej Tub.”] 38 Ces nws kom lub tsheb nres. Fis Lis Pos thiab tus nom sam nkawd ob leeg nqes mus rau hauv dej, Fis Lis Pos thiaj ua lub cim ntxuav rau nws. 39 Thaum nkawd tawm hauv dej los, Huab Tais tus Ntsuj Plig nqa Fis Lis Pos lawm, ces tus nom sam tsis pom Fis Lis Pos ntxiv. Tab sis nws zoo siab hlo taug nws txoj kev mus ntxiv. 40 Hos Fis Lis Pos mas nws tshwm hauv lub zos As Ntxos; nws taug kev mus ntxiv, thiab tshaj lub Moo Zoo rau cov nroog uas nws hla tas huv si, mus txog ntua rau Xes Ntxas Les.

NPN 66: 8-9, 16-17, 20

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

Tsoom haiv neeg, nej cav txog peb tus Tswv Ntuj,
nej qw nrov nrov cav txog nws;
vim nws yog tus pub txoj sia rau peb tus ntsuj plig
thiab nws tsis cia kom peb npleem ko taw.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas

Tas nej cov uas hwm Tswv Ntuj, nej mloog kuv tshaj tawm
txog qhov uas nws tau ua rau kuv.
Thaum kuv qhib ncauj hais lus thov nws,
Lo lus qhuas twb nyob ntawm kuv ntsis nplaig lawm.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas

Thov kom Tswv Ntuj nto meej nto moo,
vim nws tsis xyeeb kuv zaj thov,
nws tsis tshem nws txoj kev hlub mus deb kuv!

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

As Les Lus Yas: ZAM 6: 51

Txais: As les lus yas, as les lus yas.

Huab Tais hais tias:
Kuv yog cov mov muaj txoj sia nqes saum ntuj los,
leej twg noj cov mov no yuav ciaj nyob mus li.

Txais: As les lus yas, as les lus yas.

Ntawv Moo Zoo: ZAM 6: 44-51

Yes Xus hais rau pab neeg coob tias:
44 “Tsis muaj leej twg tuaj cuag kuv tau, yog Leej Txiv tus xa kuv tuaj tsis rub nws los. Hos kuv, mas hnub kawg, kuv yuav tsa nws sawv rov qab los. 45 Muaj lus sau tseg nyob hauv cov Yaj Saub hais tias: ‘Tswv Ntuj yog tus yuav qhuab qhia sawv daws.’ Tus twg hnov Leej Txiv lub suab thiab txais nws lo lus qhia, mas tus ntawd tuaj cuag kuv. 46 Tsis muaj leej twg tau pom Leej Txiv, tsuas yog tus tuaj ntawm Tswv Ntuj tuaj xwb, nws thiaj tau pom Leej Txiv. 47 Kuv hais qhov muaj tseeb tiag rau nej : Tus ntseeg, mas nws muaj txoj sia nyob mus li. 48 Kuv yog qhov mov muaj txoj sia. 49 Nej cov yawg koob tau noj cov mov mas nas hauv teb chaws suab puam, tab sis lawv tuag tas lawm. 50 Qhov mov no yog qhov mov nqes saum ntuj los, kom tus twg noj qhov mov no, mas nws yuav tsis tuag. 51 Kuv yog qhov mov muaj txoj sia uas nqes saum ntuj los; yog leej twg noj qhov mov no, nws yuav ciaj nyob mus li; qhov mov uas kuv yuav muab pub rau yog kuv lub Cev, kom lub qab ntuj neeg muaj txoj sia."

Tim 1 lub 5 Hlis 2020

Hnub Rau Lis Piam Peb Caij Hla Xyoo B Nruab Lis Piam Xyoo II

Hwm LN Yos Xes, tus Ua Hauj Lwm (St Joseph the Worker)

Zaj Nyeem Ib: HAUJ LWM 9: 1-20

1 Xauv mas nws niaj hnub xav ntsoov txog qhov hiam thiab tua Huab Tais cov thwj tim, ces nws mus cuag tus thawj leej choj. 2 Nws thov kom tus thawj leej choj sau ntawv mus hais rau cov tsev txoos nyob Das Mas tias, yog nws mus nrhiav muaj cov neeg ntseeg Txoj Kev, tsis hais poj niam los txiv neej, mas nws yuav muab lawv khi cab los rau Yes Lus Xas Les.
3 Thaum nws tab tom taug kev mus yuav txog Das Mas, ces ib sij huam, muaj ib qho pom kev ci dawb vog tuaj saum ntuj tuaj ncig nws. 4 Nws ntog rau pem teb, nws hnov ib lub suab hais rau nws tias : "Xauv, Xauv, tim li cas koj hiam kuv ?" 5 Xauv teb hais tias : "Huab Tais, koj yog leej twg ?" Lub suab ntawd hais tias : "Kuv yog Yes Xus, tus uas koj hiam. 6 Tiam sis koj sawv, koj mus hauv lub nroog, yuav muaj neeg qhia koj tias koj yuav ua dab tsi." 7 Cov neeg nrog Xauv ua ke sawv daws nres, lawv ntshai tshee na tsis hais lus li, vim lawv hnov lub suab, tab sis lawv tsis pom neeg li. 8 Xauv sawv hauv av los, nws rua qhov muag plias, tab sis nws tsis pom kev li. Lawv thiaj tuav nws tes coj nws mus hauv lub nroog Das Mas. 9 Nws nyob peb hnub, tsis pom kev, tsis noj tsis haus dab tsi li.
10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias : "As Nas Nias." As Nas Nias teb tias : "Huab Tais, kuv nyob ntawm no." 11 Huab Tais hais ntxiv tias : "Koj sawv, koj mus lawm tom txoj kev hu ua Kev Ncaj, koj mus hauv Yus Das tsev, koj nug txog tus hu ua Xauv no nyob Tas Xis tuaj. Tam sis no nws tab tom teev Ntuj. 12 Nws yees pom ib tug txiv neej hu ua As Nas Nias chaws los hauv tsev los tsa tes rau saum nws kom nws rov pom kev tuaj." 13 As Nas Nias teb tias : "Huab Tais, kuv hnov coob leej hais tias tus neeg ntawd tau ua phem ntau kawg rau koj cov Ntshiab nyob Yes Lus Xas Les no, 14 thiab nyob ntawm no, nws tau cai ntawm cov thawj leej choj tuaj khi cov neeg uas hu txog koj lub npe tas huv tib si no." 15 Huab Tais hais rau As Nas Nias tias: "Koj cia li mus, vim tus neeg ntawd yog ib lub cuab yeej uas kuv xaiv los coj kuv lub Npe mus qhia rau cov neeg teev pej kum dab, rau cov ua vaj, thiab rau cov tub ki His Xas Lais. 16 Kuv yuav qhia nws tias nws yuav tsum raug tsim txom npaum li cas vim kuv lub Npe." 17 As Nas Nias thiaj mus. Nws chaws mus hauv lub tsev, nws tsa tes rau saum Xauv, nws hais tias: "Xauv, kuv tus kwv, yog Huab Tais xa kuv tuaj, yog tus Yes Xus uas tau tshwm sim rau koj tom txoj kev uas koj tuaj, kom koj rov qab pom kev, thiab kom koj tau txais Leej Ntuj Plig Ntshiab puv hauv koj.” 18 Tam sim ntawd muaj tej daim plhaws zoo li nplai ntses poob ntawm Xauv qhov muag los, ces nws rov qab pom kev. Nws sawv tsees los ces nws txais lub cim ntxuav kiag. 19 Nws noj mov ces nws rov qab muaj zog tuaj.
Xauv nrog cov thwj tim nyob ob peb hnub hauv Das Mas. 20 Ces nws cia li maj zoj zeeg mus nyob hauv cov tsev Txoos pib qhia tias Yes Xus yog Tswv Ntuj Leej Tub.

NPN 117: 1BC, 2

Txais: (MK 16:15) Nej mus thoob qab ntuj, nej tshaj
lub Moo Zoo rau txhua leej txhua tus.
los: As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais: (Mas Kos 16:15) Nej mus thoob qab ntuj, nej tshaj
lub Moo Zoo rau txhua leej txhua tus.
los: As les lus yas.

Vim nws lub siab ua zoo rau peb nyob ruaj nreb,
HUAB TAIS ua ncaj rau peb mus ib txhiab ib txhis.

Txais: (MK 16:15) Nej mus thoob qab ntuj, nej tshaj
lub Moo Zoo rau txhua leej txhua tus.
los: As les lus yas.

As Les Lus yas: ZAM 6: 56

Txais: As les lus yas, as les lus yas.

Huab Tais hais tias: “Tus twg noj kuv lub cev thiab haus kuv cov ntshav,
nws yuav nyob ruaj hauv kuv thiab kuv yuav nyob ruaj hauv nws.

Txais: As les lus yas, as les lus yas.

Ntawv Moo Zoo: Zam 6: 52-59

52 Ces cov Yus Das sib cav zom zaws tias : "Tus neeg ntawd yuav ua li cas muab tau nws cev nqaij los rau peb noj ?" 53 Yes Xus thiaj hais rau lawv tias : "Kuv hais qhov tseeb tiag rau nej : Yog nej tsis noj Neeg Leej Tub lub cev nqaij thiab tsis haus nws cov ntshav, mas nej yuav tsis muaj txoj sia nyob hauv nej.
54 Hos tus noj kuv lub cev nqaij thiab haus kuv cov ntshav, mas nws muaj txoj sia nyob mus li; hnub kawg, kuv yuav tsa nws sawv rov qab los.
55 Vim kuv lub cev nqaij yog tseem txhiam xws noj, thiab kuv cov ntshav yog tseem dej haus.
56 Tus noj kuv cev nqaij thiab haus kuv cov ntshav, nws nyob ruaj hauv kuv thiab kuv nyob ruaj hauv nws.
57 Ib yam li Leej Txiv uas muaj txoj sia xa kuv tuaj, ces kuv muaj txoj sia nyob hauv Leej Txiv, ib yam li ntawd, tus noj kuv, nws kuj yuav muaj txoj sia nyob hauv kuv thiab.
58 Qhov mov no yog qhov nqes saum ntuj los, tsis zoo li cov mov uas cov yawg koob tau noj, tab sis lawv tuag lawm. Hos tus noj qhov mov no, mas nws yuav ciaj nyob mus li."
59 Yes Xus hais cov lus ntawd thaum nws qhia nyob hauv lub tsev txoos nyob Kas Fas Naus.

TIM 2 LUB 5 HLIS 2020

Hnub Xya Lis Piam Peb Caij Hla Xyoo A Nruab Lis Piam Xyoo II

Hwm LN Athanasius, Tswv Qhia ua Kws cov Txuj Ntshiab

Zaj Nyeem Ib: HAUJ LWM 9: 31-42

31 Lub caij ntawd, lub Koom Txoos nyob hauv cov xeev Yus Das, Nkas Lis Lais, thiab Xas Mas Lias tau nyob thaj yeeb. Nws muaj kev txhawb txhim thiab taug txoj kev hwm Huab Tais. Leej Ntuj Plig Ntshiab nplij lub Koom Txoos, ces nws huam vam tuaj. 32 Pob Zeb ncig mus rau txhua qhov chaw, nws kuj nqes mus txog nram cov ntshiab nyob lub zos Lis Das thiab. 33 Nyob nrad nws ntsib ib tug neeg hu ua Es Nes As pw saum ib daim khaub lev tau yim xyoo lawm vim nws tuag ceg. 34 Pob Zeb hais rau nws tias : "Es Nes As, Yes Xus Pleev yuav kho kom koj zoo. Koj cia li sawv los tu koj lub txaj." Tam sim ntawd tus tuag ceg sawv tsees. 35 Tas cov neeg nyob hauv Lis Das thiab nyob Sas Loos pom nws, ces sawv daws tig los ntseeg txog Huab Tais.
36 Nyob Yos Pes, muaj ib tug thwj tim (poj niam) hu ua Tas Npis Thas. Nws lub npe txhais tias Me Nyuam Mos Lwj. Nws ua ntau yam hauj lwm zoo thiab nws pub ntau yam rau cov neeg txom nyem. 37 Muaj ib hnub, Tas Npis Thas cia li mob, ces nws tuag. Lawv muab nws ntxuav tas, lawv coj nws mus tso rau saum chav tsev siab. 38 Vim Lis Das kuj nyob ze Yos Pes, cov thwj tim hnov tias Pob Zeb tuaj txog Lis Das lawm, ces lawv tso ob tug neeg tuaj thov Pob Zeb tias : "Thov koj tuaj nram peb sai sai txhob ncua." 39 Pob Zeb sawv nrog ob tug neeg mus; thaum nws tuaj txog ntua, lawv coj nws nce mus saum chav tsev siab. Cov poj ntsuam sawv daws quaj zom zaws los ntsauv Pob Zeb. Lawv muab tej tsoos tsho uas Tas Npis Thas tau ua thaum nws tseem nrog lawv nyob rau Pob Zeb saib. 40 Pob Zeb kom lawv sawv daws tawm mus sab nraud, nws txhos caug thov Ntuj, ces nws tig los hais rau tus tuag tias : "Tas Npis Thas, koj sawv." Tus poj niam rua qhov muag tuaj, thaum nws pom Pob Zeb, nws sawv tsees los zaum. 41 Pob Zeb tuav nws txhais tes, rub kom nws sawv. Ces Pob Zeb hu cov Ntshiab thiab cov poj ntsuam los, nws muab ib tug neeg ciaj sia cob rau lawv. 42 Tas lub tsheej Yos Pes hnov txog lub moo ntawd, ces coob leej ntseeg txog Huab Tais.

NPN 116: 12-13, 14-15, 16-17

Txais: (12) Kuv yuav muab dab tsi rau Huab Tais los pauj
ib puas tsav yam zoo uas nws tau ua rau kuv ?
los: As les lus yas.

Kuv yuav muab dab tsi rau Huab Tais
los pauj ib puas tsav yam zoo uas nws tau ua rau kuv ?
Kuv yuav cev lub ntim cawm neeg,
Thiab kuv yuav hu txog HUAB TAIS lub npe.

Txais: (12) Kuv yuav muab dab tsi rau Huab Tais los pauj
ib puas tsav yam zoo uas nws tau ua rau kuv ?
los: As les lus yas.

Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag.
HUAB TAIS saib cov ntseeg nws
txoj kev tuag muaj nqes heev.

Txais: (12) Kuv yuav muab dab tsi rau Huab Tais los pauj
ib puas tsav yam zoo uas nws tau ua rau kuv ?
los: As les lus yas.

HUAB TAIS, kuv yog koj tus tub txib,
yog koj tus tub txib uas yog koj tus ntxhais txib tus tub.
Koj tau daws cov hlua khi kuv,
Kuv yuav cev ib co txim los ua koj tsaug,
Thiab kuv yuav tuav txog HUAB TAIS lub npe.

Txais: (12) Kuv yuav muab dab tsi rau Huab Tais los pauj
ib puas tsav yam zoo uas nws tau ua rau kuv ?
los: As les lus yas.

As Les Lus Yas: ZAM 6: 63C, 68C

Txais: As les lus yas, as les lus yas.

Koj cov lus, Huab Tais, yog ntsuj plig thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo: ZAM 6: 60-69

60 Yes Xus cov thwj tim coob tus hnov cov lus ntawd, lawv hais tias : "Cov lus no ntxhib dhau, leej twg yuav mloog tau ?" 61 Tab sis Yes Xus twb paub lawm tias nws cov thwj tim yws yws txog qhov ntawd, nws thiaj hais rau lawv tias: "Cov lus ntawd ua rau nej ceeb lod ? 62 Yog nej tseem pom Neeg Leej Tub nce mus saum qhov chaw uas nws xub nyob thiab mas nej yuav ua li cas? 63 Yog tus ntsuj plig ua kom muaj txoj sia, lub cev nqaij ua tsis tau dab tsi. Cov lus uas kuv tau hais rau nej yog ntsuj plig thiab yog txoj sia. 64 Tab sis nyob hauv nej, muaj ib co tsis ntseeg." Txij lub hauv paus los, Yes Xus yeej paub tias cov tsis ntseeg yog leej twg, thiab tus yuav muab nws muag yog leej twg. 65 Ces Yes Xus hais tias : "Vim li no kuv thiaj hais rau nej tias tsis muaj leej twg tuaj cuag kuv tau, yog Leej Txiv tsis pub kom nws tuaj." 66 Txij thaum ntawd los, Yes Xus ib co thwj tim coob thiaj li rov qab mus tsev tas, tsis nrog Yes Xus mus ntxiv lawm. 67 Yes Xus thiaj hais rau Pab Kaum Ob tias : "Nej ne, nej puas xav mus thiab ?" 68 Xis Moos Pob Zeb teb rau Yes Xus tias : "Huab Tais, peb yuav mus nrog leej twg ? Koj muaj cov lus pub txoj sia nyob mus li. 69 Ntawm peb mas peb ntseeg thiab peb paub tias koj yog Tswv Ntuj tus Ntshiab."

TIM 4 LUB 5 HLIS 2020

Hnub Ob Lis Piam Plaub Caij Hla Xyoo A Nruab Lis Piam Xyoo II

Zaj Nyeem Ib: Hauj Lwm 11: 1-18

1 Cov Hauv Paus Xa Lus thiab cov kwv tij nyob hauv xeev Yus Das tau hnov tias cov neeg teev pej kum dab los lawv kuj tau los txais Tswv Ntuj lo lus lawm thiab. 2 Ces thaum Pob Zeb mus pem Yes Lus Xas Les, mas cov txais lub cim txiav thiaj tuaj nrog Pob Zeb sib cav, lawv hais tias : 3 "Koj tseerm mus hauv cov neeg tsis txais lub cim txiav tsev, thiab nrog lawv noj mov huv si thiab!" 4 Pob Zeb thiaj li piav txij lub hauv paus txog lub ntsis rau lawv tias : 5 “Nyob hauv lub nroog Yos Pes, thaum kuv tseem tab tom teev ntuj, kuv ua yog toog yees pom ib yam nqes los, zoo li ib daig ntaub loj loj tuav ntawm plaub ces kaum tso dauv nqes saum ntuj los txog ntua ntawm kuv. 6 Kuv qhov muag ntsia ntsoov rau daim ntaub, ces kuv pom muaj cov tsiaj hauv ntiaj teb, cov tsiaj muaj plaub txhais tes taw, cov tsiaj qus, cov tsiaj txawj nkag, thiab cov noog ya saum nruab ntug huv tib si. 7 Kuv hnov ib lub suab hais rau kuv tias : 'Pob Zeb, koj sawv, koj mus muab tua thiab muab noj.' 8 Kuv teb tias : 'Huab Tais, kuv tsis noj; txog tav no tsis tau muaj dua ib yam qias los tsis huv nkag rau hauv kuv lub ncauj ib zaug li.' 9 Lub suab teb dua ib zaug ntxiv saum ntuj tuaj tias : 'Yam uas Tswv Ntuj tau ua kom huv, mas koj tsis txhob saib tias tsis huv.' 10 Muaj li ntawd peb zaug, ces txhia yam raug rub nce rau saum ntuj lawm. 11 Thaum ntawd kiag, txawm muaj peb tug neeg tuaj txog ntawm lub tsev uas peb nyob; luag xa lawv ntawm Xes Ntxas Les tuaj cuag kuv. 12 Leej Ntuj Plig hais rau kuv tias kom nrog lawv mus tsis txhob saib tias lawv yog neeg dab tsi li. Lawv rau leej kwv tij ntawm no kuj nrog kuv mus huv tib si, thiab lawv kuj chaws mus hauv tus neeg ntawd lub tsev thiab. 13 Nws thiaj piav rau peb tias nws pom ib tug tshiab tuaj sawv ntsug hauv nws tsev, tus tshiab hais rau nws tias : 'Koj tso neeg mus nram Yos Pes mus hais kom Xis Moos tus hu ua Pob Zeb tuaj ntawm no. 14 Nws yuav hais ib co lus rau koj ces yuav cawm tau koj thiab koj tsev neeg tas huv tib si.’ 15 Kuv nyuam qhuav pib hais lus xwb, Leej Ntuj Plig Ntshiab cia li nqes los rau saum lawv ib yam li nws nqes los rau saum peb thaum pib thiab. 16 Kuv thiaj nco txog Huab Tais lo lus uas nws hais tias : 'Zam ntxuav neeg nyob hauv dej, tiam sis nej mas nej yuav raug ntxuav nyob hauv Leej Ntuj Plig Ntshiab.' 17 Yog Tswv Ntuj twb pub tib lub txiaj ntsim rau cov neeg ntawd xws li nws pub rau peb vim peb ntseeg txog Huab Tais Yes Xus Pleev, mas kuv yog leej twg kuv thiaj yuav txwv tau Tswv Ntuj ?” 18 Lawv hnov cov lus no tas, lawv thiaj tsis muaj lus hais ntxiv, ces lawv cav txog Tswv Ntuj tias : "Ua li mas Tswv Ntuj kuj pub txoj kev thov txhaum kom tau txoj sia rau cov neeg teev pej kum dab thiab."

NPN 42: 2-3; 43: 3, 4

Txais: (3a) Kuv tus plig nqhis qhuav siab qhawv txog tus Tswv Ntuj muaj txoj sia.
los: As les lus yas.

Xws li tus kauv nqhis cov dej ntws lug,
ib yam li ntawd, kuv tus plig nqhis txog koj, Tswv Ntuj.
Kuv tus plig nqhis txog Tswv Ntuj, tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Txais: (3a) Kuv tus plig nqhis qhuav siab qhawv txog tus Tswv Ntuj muaj txoj sia.
los: As les lus yas.

Thov koj xa koj qhov pom kev thiab qhov tseeb tuaj
coj kuv kev mus txog saum lub roob koj txoj kev ntshiab,
mus txog ntua qhov chaw koj nyob.

Txais: (3a) Kuv tus plig nqhis qhuav siab qhawv txog tus Tswv Ntuj muaj txoj sia.
los: As les lus yas.

Ces kuv yuav mus kom txog ntawm Tswv Ntuj lub thaj,
ntawm tus Tswv Ntuj uas yog kuv txoj kev sov siab thiab zoo siab.
Ces kuv yuav ntaus nkauj nog ncas ua koj tsaug,
Tswv Ntuj, kuv tus Tswv Ntuj!

Txais: (3a) Kuv tus plig nqhis qhuav siab qhawv txog tus Tswv Ntuj muaj txoj sia.
los: As les lus yas.

As Les Lus Yas: ZAM 10: 14

Txais: As les lus yas, as les lus yas.

Huab Tais hais tias: Kuv yog tus zoo tswv zov yaj,
kuv paub kuv cov yaj, kuv cov yaj paub kuv.

Txais: As les lus yas, as les lus yas.

Ntawv Moo Zoo: ZAM 10: 1-10

Yes Xus hais tias:
1 "Kuv hais qhov muaj tseeb tiag rau nej : Tus tsis nkag ntawm qhov rooj mus rau hauv lub nkuaj yaj, hos nws nce lwm qhov chaw mus rau hauv, mas nws yog ib tug tub sab, ib tug nrhiav kev yuav nyiag luag xwb. 2 Tus uas nkag ntawm qhov rooj mus thiaj yog tus tswv zov pab yaj tiag. 3 Tus zov rooj vag qhib qhov rooj rau nws, hos cov yaj mloog nws lub suab. Nws hu nws cov yaj, nws tuav lawv ib tug zuj zus npe, nws coj lawv tawm mus. 4 Thaum nws coj cov yaj tawm tas lawm, nws mus ua ntej, cov yaj lawv nws qab, vim lawv paub nws lub suab. 5 Cov yaj yuav tsis mus raws lwm tus ua lawv tsis paub, lawv yuav khiav ntawm nws mus, vim lawv tsis paub nws lub suab." 6 Yes Xus hais zaj paj lug no rau lawv, tab sis lawv tsis paub tias nws hais txog dab tsi rau lawv.
7 Yes Xus thiaj rov qab hais rau lawv tias : "Kuv hais qhov muaj tseeb tiag rau nej tias, kuv yog cov yaj lub qhov rooj. 8 Tas cov uas tuaj ua kuv ntej yog ib co tub sab thiab ib co xav tuaj nyiag luag xwb, tab sis cov yaj kuj tsis mloog lawv li. 9 Kuv yog lub qhov rooj; tus twg nkag ntawm kuv mus, nws yuav txais kev cawm, nws yuav nkag tau rau hauv thiab tawm tau los, nws yuav nrhiav tau lub tshav zaub. 10 Tus tub sab tsuas yog tuaj nyiag, tuaj tua, thiab tuaj rhuav txoj kom puas xwb. Hos kuv, mas kuv tuaj ua kom lawv tau txoj sia, thiab kom lawv tau txoj sia ntawd puv npo.

TIM 5 LUB 5 HLIS 2020

Hnub Peb Lis Piam Plaub Caij Hla Xyoo A Nruab Lis Piam Xyoo II

Zaj Nyeem Ib: HAUJ LWM 11: 19-26

19 Cov ntseeg raug luag hiam vim Tes Fas Nos, ces lawv thiaj tawg khiav mus txog Fes Nis Xias teb, txog Kws Plos, thiab txog As Caus Kus. Lawv tsis tshaj Lo Lus rau leej twg li, l tsuas tshaj rau cov Yus Das nkaus xwb. 20 Tiam sis nyob hauv lawv, muaj tus puav yog cov neeg Kws Plos thiab Xis Les Nias tuaj txog As Caus Kus, lawv thiaj mus qhuab qhia cov Hes Las thiab tshaj Huab Tais Yes Xus lub Moo Zoo rau lawv. 21 Huab Tais txhais tes pab lawv, ces muaj neeg coob kawg los ntseeg thiab tig los cuag Huab Tais. 22 Lub Koom Txoos nyob Yes Lus Xas Les hnov lub moo ntawd, lawv thiaj xa Npas Nas Npes mus nyob As Caus Kus. 23 Thaum Npas Nas Npes tuaj txog, nws pom Tswv Ntuj lub txiaj ntsim, mas nws zoo siab heev, nws txhawb lawv kom ua siab loj siab tawv nyob ruaj nreb hauv txoj kev ntseeg txog Huab Tais, 24 vim nws yog ib tug neeg zoo muaj Leej Ntuj Plig Ntshiab thiab muaj kev ntseeg nyob puv hauv nws. Ces ib pab neeg coob kawg los ntseeg txog Huab Tais ntxiv. 25 Npas Nas Npes thiaj mus nrhiav Xauv nyob Tas Xis. 26 Thaum nws nrhiav tau Xauv lawm, nws coj Xauv los nyob As Caus Kus. Nkawd nyob ntawd tau ib xyoos nrog lub Koom Txoos sib sau ua lub txoos, thiab nkawd qhia ib pab neeg coob heev. Yog nyob As Caus Kus mas luag thiaj pib hu cov thwj tim ua cov ntseeg Leej Pleev.

NPN 87: 1B-3, 4-5, 6-7

Txais: (117:1a) Tas txhua haiv neeg, nej cav txog Huab Tais.
los: Alleluia.

Nws cov taw ntsa yog txhim rau saum cov roob ntshiab,
Huab Tais nyiam Xis Yoos cov rooj vag tshaj Yas Kos cov vaj tse.
Tswv Ntuj lub tsheej, neeg hais ntau yam qhuas txog koj!

Txais: (117:1a) Tas txhua haiv neeg, nej cav txog Huab Tais.
los: Alleluia.

Kuv suav Las Has thiab Npas Npis Los nrog cov uas paub Huab Tais.
Kuv hais txog Fis Lis Tis, Tws Los, Es Thias Pias tias:
“Tus neeg no yug nyob ntawd".
Tab sis luag yuav hais txog Xis Yoos tias:
“Txhua tus neeg yug nyob hauv nws;
tus tau txhim tsa nws yog tus HUAB TAIS nyob siab tshaj cov."

Txais: (117:1a) Tas txhua haiv neeg, nej cav txog Huab Tais.
los: Alleluia.

Luag yuav sau rau hauv phau ntawv txheeb npe tias :
"Tus neeg no yug los nyob rau ntawd !"
Tas txhua leej txhua tus yuav hu nkauj dhia lom zem tias:
“Kuv lub chaw nyob yog nyob hauv koj.”

Txais: (117:1a) Tas txhua haiv neeg, nej cav txog Huab Tais.
los: Alleluia.

As Les Lus yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab,
kuv paub kuv cov yaj, lawv raws nraim kuv qab mus.

Txais: As les lus yas, as les lus yas.

Ntawv Moo Zoo: ZAM 10: 22-30

22 Thaum ntawd txog lub hnub nyoog ua koob tsheej Fij lub Tuam Tsev Teev Ntuj nyob Yes Lus Xas Les. Yog lub caij ntuj no. 23 Yes Xus mus mus los los hauv lub Tuam Tsev Teev Ntuj nyob hauv lub qab ru tsev Xas Los Moos. 24 Cov Yus Das los ntsauv ncig nws, ces lawv hais rau nws tias : "Koj yuav cia peb lub siab ua xyem xyav txog thaum twg ? Saib koj yog Leej Pleev no, koj cia li hais rau peb kom meej?" 25 Yes Xus teb rau lawv tias : "Kuv twb hais rau nej tas lawm, tiam sis nej tsis ntseeg. Cov hauj lwm uas kuv ua nyob hauv kuv Txiv lub npe zeem tseeb txog kuv. 26 Tab sis nej tsis ntseeg vim nej tsis nyob hauv kuv cov yaj. 27 Kuv cov yaj mloog kuv lub suab, kuv paub lawv, lawv raws nraim kuv qab. 28 Kuv pub txoj sia nyob mus li rau lawv, lawv yuav tsis tuag ib zaug li; tsis muaj leej twg yuav chua tau lawv ntawm kuv txhais tes mus li. 29 Kuv Txiv tus muab lawv rau kuv, yog tus loj tshaj txhua leej txhua tus tas nrho, mas tsis muaj leej twg yuav txeeb tau lawv ntawm Leej Txiv txhais tes mus li. 30 Leej Txiv thiab kuv, wb yog ib tug xwb."

TIM 6 LUB 5 HLIS 2020

Hnub Plaub Lis Piam Plaub Caij Hla Xyoo A Nruab Lis Piam Xyoo II

Zaj Nyeem Ib: HAUJ LWM 12: 24—13: 1-5A

24 Tswv Ntuj lo lus huam vam thiab hlob mus tsis so. 25 Npas Nas Npes thiab Xauv nkawd ua nkawd txoj hauj lwm tiav, ces nkawd rov ntawm Yes Lus Xas Les los lawm; nkawd coj Zam, tus uas tseem hu ua Mas Kos, nrog nkawd los thiab.
13 1 Lub Koom Txoos nyob As Nthias Kias muaj ib co yaj saub thiab ib co kws qhia kev ntseeg : yog Npas Nas Npes, Xis Mes Oos uas luag hu nws ua Nis Zes, Lus Xyus tus nyob Xis Les Nas teb tuaj, Mas Nas Ees uas thaum yau nws tau nrog tus vaj Hes Los koom noj mis hlob ua ke, thiab Xauv. 2 Thaum lub caij lawv tab tom peb hawm Tswv Ntuj, thiab coj cov kab ke yoo mov, mas Leej Ntuj Plig Ntshiab hais rau lawv tias : "Nej qee Npas Nas Npes thiab Xauv nkawd, kom nkawd mus ua txoj hauj lwm uas kuv tau hu nkawd mus ua." 3 Ces thaum lawv yoo mov tas thiab teev Ntuj tas, lawv tsa tes rau saum nkawd, lawv tso nkawd mus. 4 Leej Ntuj Plig Ntshiab xa nkawd, ces nkawd nqes mus txog nram Xes Laws Xias, nyob nrad nkawd mam caij nkoj ntaub mus rau Kws Plos. 5 Thaum nkawd tuaj txog Xas Las Mis, nkawd pib tshaj Tswv Ntuj Lo Lus nyob hauv cov Tsev Txoos Yus Das.

NPN 67: 2-3, 5, 6 + 8

Txais: (4) Tswv Ntuj, koj cia kom tas txhua haiv neeg cav txog koj!
los: Alleluia.

Thov kom Tswv Ntuj hlub peb thiab foom hmoov zoo rau peb,
kom nws ua nws lub ntsej muag ci tuaj rau saum peb,
Ces lub ntiaj teb thiaj paub txog koj txoj kev,
cov kuj cuab thiaj paub txog koj txoj kev cawm neeg.

Txais: (4) Tswv Ntuj, koj cia kom tas txhua haiv neeg cav txog koj!
los: Alleluia.

Xav kom cov kuj cuab hom khaj thiab qw zoo siab,
vim koj tswj cov haiv neeg raws kev ncaj,
koj ua tus coj kev rau cov kuj cuab nyob ntiaj teb.

Txais: (4) Tswv Ntuj, koj cia kom tas txhua haiv neeg cav txog koj!
los: Alleluia.

Kom cov haiv neeg cav txog koj, Tswv Ntuj ,
kom tas txhua haiv neeg cav txog koj !
Thov kom Tswv Ntuj foom koob foom hmoov rau peb,
thiab kom tas cov npoo ntuj npoo ntiaj teb hwm Tswv Ntuj!

Txais: (4) Tswv Ntuj, koj cia kom tas txhua haiv neeg cav txog koj!
los: Alleluia.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: Kuv yog ntiaj teb neeg qhov pom kev,
leej twg los raws kuv yuav tau qhov pom kev uas pub txoj sia.

Txais: As les lus yas, as les lus yas.

Ntawv Moo Zoo: ZAM 12: 44-50

44 Yes Xus hais nrov nrov tias : "Leej twg ntseeg txog kuv, mas tsis yog nws ntseeg txog kuv xwb, yog ntseeg txog Tus Xa kuv tuaj thiab. 45 Leej twg pom kuv, mas nws pom Tus Xa kuv tuaj thiab. 46 Kuv yog qhov pom kev tuaj nyob hauv lub qab ntuj no kom xwv tus ntseeg txog kuv tsis txhob nyob hauv qhov tsaus ntuj. 47 Leej twg hnov kuv cov lus tab sis nws tsis coj raws, mas kuv tsis txiav txim rau nws ; vim kuv tsis yog tuaj txiav txim rau lub qab ntuj neeg, kuv tuaj yog kom tau cawm lub qab ntuj neeg. 48 Tus xyeeb kuv thiab tsis txais kuv cov lus, mas nws muaj nws ib tug txiav txim: Yog lo lus uas kuv tau hais, nws yuav txiav txim rau tus ntawd thaum txog hnub kawg. 49 Vim tias tsis yog kuv hais lus ntawm kuv tus kheej, tiam sis yog Leej Txiv tus uas xa kuv tuaj, txib kuv kom hais dab tsi thiab qhia dab tsi mas kuv thiaj hais. 50 Kuv paub tias Leej Txiv lo lus qhia yog txoj sia nyob mus li. Li ntawd, qhov kuv hais, mas kuv hais raws nraim li Leej Txiv tau qhia rau kuv."

TIM 7 LUB 5 HLIS 2020

Hnub Tsib Lis Piam Plaub Caij Hla Xyoo A Nruab Lis Piam Xyoo II

Zaj Nyeem Ib: HAUJ LWM 13: 13-25

13 Ob tug nrog Paj Lug lawv caij nkoj ntawm Pas Fos mus rau Pes Nkas nyob Pas Fis Lias teb. Tab sis Zam, uas tseem hu ua Mas Kos, tso nkawd tseg, nws rov mus Yes Lus Xas Les lawm. 14 Hos Paj Lug nkawd thiaj sawv kev ntawm Pes Nkas mus txog As Caus Kus nyob Pis Xis Dias teb. Thaum txog hnub xas npas tos, nkawd mus hauv lub Tsev Txoos, ces nkawd mus zaum. 15 Thaum lawv nyeem Txoj Cai thiab cov Yaj Saub tas, mas cov tswj lub Tsev Txoos tso neeg los hais rau nkawd tias : "Ob tug kwv tij, yog neb muaj lus dab tsi zoo txhawb tsoom pej xeem lub siab no, nej hais mas !" 16 Paj Lug thiaj li sawv tsees, nws tsa tes, thiab nws hais tias : "Cov kwv tij His Xas Lais, thiab nej cov uas hwm Tswv Ntuj, nej mloog mog ! 17 Haiv neeg His Xas Lais no tus Tswv Ntuj tau xaiv peb cov yawg koob, thiab nws tau ua kom haiv neeg huam vam tuaj lub caij uas lawv nyob Hais Nkws Tos teb, ces nws tau tsa nws txhais tes los pab kom lawv tawm ntawm lub teb chaws ntawd los. 18 Tau kwv yees plaub caug xyoo, nws tau ua siab ntev nyiaj lawv tus cwj pwm nyob hauv teb chaws suab puam. 19 Nws tau rhuav xya haiv neeg nyob hauv lub teb chaws Kas Nas Has, nws mam li muab lub teb chaws ntawd pub rau lawv ua lawv tug. 20 Lub caij ntawd ntev kwv yees plaub puas tsib caug xyoo. Dhau ntawd los, nws thiaj tsa ib co txwj laus txiav txim coj lawv los txog tus yaj saub Xas Muas. 21 Txij thaum ntawd los, lawv thov ib tug vaj. Ces Tswv Ntuj tsa Xas Ws, uas yog Kis tus tub, xeem Npes Yas Mis ua vaj rau lawv; ntu ntawd ntev li plaub caug xyoo. 22 Tswv Ntuj muab Xas Ws xyeeb pov tseg, nws thiaj tsa Das Vis ua lawv tus vaj. Tswv Ntuj ua pov thawj txog Das Vis tias : ‘Kuv nrhiav tau Das Vis, Yes Xes tus tub, nws yog tus neeg nyiam, nws yuav ua raws li kuv lub siab xav tas huv si.’ 23 Nyob hauv Das Vis caj ces, Tswv Ntuj ua raws li nws tau cog lus, nws tsa ib tug cawm seej rau haiv His Xas Lais, yog Yes Xus. 24 Zam xub tuaj ua ntej, npaj kev rau Yes Xus yuav tuaj; nws tshaj ib txog kab ke ntxuav los lees txhaum rau tas haiv His Xas Lais sawv daws. 25 Thaum Zam ua nws txoj hauj lwm yuav tiav, nws tau hais tias : "Nej xav tias kuv yog leej twg? Kuv tsis yog tus nej xav. Muaj ib tug tab tom tuaj lawv kuv qab; kuv tsis tsim nyog daws nws txoj hlua khau."

NPN 89: 2-3, 21-22, 25+27

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Kuv yuav hu nkauj mus li cav txog HUAB TAIS tej kev ua zoo,
kuv lub ncauj yuav tshaj txog koj txoj kev pheej xeeb mus tiam dhau tiam.
Vim koj tau hais tias: “Kuv lub siab zoo yuav nyob ruaj mus li;”
nyob saum ntuj koj tau cog koj txoj kev pheej xeeb kom ruaj nreb.

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Kuv nrhiav tau kuv tus tub txib Das Vis,
kuv tau muab kuv cov roj ntshiab los pleev nws.
Kuv txhais tes yuav nyob ze nws mus li,
Thiab kuv txhais npab yuav ua kom nws muaj zog.

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Kuv txoj kev ua ncaj thiab kev khuv leej nyob nrog nws nraim,
kuv lub npe yuav tsa nws hauv pliaj kom siab.
Nws yuav ais txog kuv li no : "Koj yog kuv txiv,
kuv tus Tswv Ntuj, kuv lub Tsua, kuv tus Cawm Seej!"

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

As Les Lus Yas: QYTN 1: 5AB

Txais: As les lus yas, as les lus yas.

Yes Xus Pleev, koj yog tus tim khawv pheej xeeb,
koj yog thawj tus tawm ntawm kev tuag los,
koj tau hlub peb thiab tau cawm peb dim
ntawm peb cov txhaum nyob hauv koj cov ntshav.

Txais: As les lus yas, as les lus yas.

Ntawv Moo Zoo: ZAM 13: 16-20

Thaum Yes Xus ntxuav nws cov thwj tim ko taw tas, nws hais rau lawv tias:
16 “Kuv hais qhov muaj tseeb tiag rau nej : Tus tub txib tsis loj dua nws tus tswv, tus xa xov kuj tsis loj dua tus uas xa nws tuaj. 17 Yog nej paub qhov no, mas nej txoj hmoov zoo yog nej ua raws li ntawd. 18 Kuv tsis hais txog nej txhua leej txhua tus. Kuv paub cov uas kuv tau xaiv. Tab sis vim yuav tsum tshwm sim raws li ntawv sau cia tias : ‘Tus noj kuv cov mov nws tig luj taws rau kuv.’ 19 Nyem no, kuv xub hais rau nej cheem tej ntawd tsis tau tshwm sim tuaj, kom xwv thaum tej ntawd tshwm tuaj, nej ntseeg tias kuv yog tus Nyob. 20 Kuv hais qhov muaj tseeb tiag rau nej : Leej twg txais tus uas kuv xa nws mus, mas yog nws txais kuv; leej twg txais kuv, mas yog nws txais tus xa kuv tuaj."

TIM 8 LUB 5 HLIS 2020

Hnub Rau Lis Piam Plaub Caij Hla Xyoo A Nruab Lis Piam Xyoo II

Zaj Nyeem Ib: HAUJ LWM 13: 26-33

Paj Lug hais nyob hauv lub tsev txoos nyob As Caus Kus tias:
26 Cov kwv tij uas nej yog Has Nplas Has cov tub, thiab nej cov uas hwm Tswv Ntuj nyob ntawm no, lo lus hais txog txoj kev cawm neeg no yeej yog xa tuaj rau peb ntag. 27 Cov neeg nyob Yes Lus Xas Les thiab lawv cov thawj coj tsis lees paub Yes Xus ces thaum lawv tau txiav txim muab nws tua, mas yog lawv tau ua raws li cov yaj saub cov lus uas peb niaj hnub nyeem hnub xas npas tos. 28 Lawv twb nrhiav tsis tau ib yam dab tsi nyob hauv Yes Xus kom txaus muab nws tua, tsis kav lawv tseem thov kom Pis Las Tos muab nws tua. 29 Thaum lawv ua tas puas tsav yam raws li Ntawv sau tseg txog nws lawm, mas lawv daws nws saum tus ntoo los thiab lawv muab nws mus zwm ntxa. 30 Tab sis Tswv Ntuj tau tsa nws sawv hauv cov tuag rov los lawm. 31 Tau ntau hnub Yes Xus yees tawm los xyuas cov neeg nrog nws tuaj ntawm Nkas Lis Lais tuaj mus rau Yes Lus Xas Les. Nyem no cov neeg ntawd ua tim khawv txog nws rau tsoom pej xeem sawv daws hnov. 32 Peb kuj tshaj lub Moo Zoo rau nej raws li lo lus Tswv Ntuj tau cog rau peb cov yawg koob; 33 nws tau ua rau peb uas yog lawv cov me nyuam raws nraim li lo lus cog ntawd thaum nws tsa Yes Xus sawv rov los; thiab nws tau ua raws li nyob hauv cov nkauj paj nruag zaj ob, muaj lo lus sau tseg tias : 'Koj yog kuv Leej Tub, hnub no kuv xeeb koj los.'

NPN 2: 6-7, 8-9, 10-11

Txais: (7bc) Koj yog kuv Leej Tub, hnub no kuv tau xeeb koj los.
los: As les lus yas.

“Kuv tau pleev roj rau kuv tus vaj
nyob saum Xis Yoos, lub roob kuv txoj kev ntshiab."
Kuv yuav tshaj HUAB TAIS txoj cai tawm.
HUAB TAIS hais rau kuv tias :
'Koj yog kuv leej tub, hnub no kuv tau xeeb koj los.

Txais: (7bc) Koj yog kuv Leej Tub, hnub no kuv tau xeeb koj los.
los: As les lus yas.

Koj thov kuv, ces kuv yuav muab
tsoom kuj cuab los ua koj lub cuab tam,
kuv yuav muab lub ntiaj teb
mus txog tim npoo ntuj los ua koj tug.
Koj yuav tuav ib tug cwj hlau los tswj lawv,
Koj yuav tsoo lawv ntsoog tas xws li lub lauj kaub av."

Txais: (7bc) Koj yog kuv Leej Tub, hnub no kuv tau xeeb koj los.
los: As les lus yas.

Ib tsoom vaj, nej yuav mob siab rau mloog,
cov tswj lub ntiaj teb, nej yuav tsum nrhiav kom paub.
Nej yuav tsob hwb HUAB TAIS thiab ntshai nws.
Nej yuav zoo siab nyob ntawm nws xub ntiag,
Nej yuav zoo siab thiab ntshai nws.


Txais: (7bc) Koj yog kuv Leej Tub, hnub no kuv tau xeeb koj los.
los: As les lus yas.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis mus ntawm kuv mus.

Txais: As les lus yas, as les lus yas.

Ntawv Moo Zoo: ZAM 14: 1-6

Yes Xus hais rau nws cov thwj tim tias:
1 Nej tsis txhob ntxhov siab mog. Nej twb ntseeg txog Tswv Ntuj, nej ntseeg txog kuv thiab. 2 Nyob hauv kuv Txiv tsev, muaj ntau chav. Yog tsis muaj, mas kuv puas yuav hais rau nej tias kuv mus npaj ib qho chaw rau nej? 3 Thaum kuv mus lawm thiab npaj tau ib qho chaw rau nej lawm, kuv yuav rov los coj nej mus nrog kuv nyob, kom xwv kuv nyob qhov twg, nej nrog kuv nyob qhov ntawd. 4 Nej yeej paub txoj kev mus txog qhov chaw kuv yuav mus lawm. 5 Tos Mas hais rau Yes Xus tias : "Huab Tais, peb tsis paub koj yuav mus qhov twg, peb yuav ua cas paub txoj kev ?" 6 Yes Xus hais rau Tos Mas tias : "Kuv yog Txoj Kev, yog Qhov Tseeb, thiab yog Txoj Sia. Tsis muaj leej twg mus cuag Leej Txiv tau, yog nws tsis mus ntawm kuv mus."

TIM 9 LUB 5 HLIS 2020

Hnub Xya Lis Piam Plaub Caij Hla Xyoo A Nruab Lis Piam Xyoo II

Zaj Nyeem Ib: HAUJ LWM 13: 44-52

44 Txog hnub Xas Npas Tos tom qab, yuav luag tas lub tsheej tuaj sib sau mloog Tswv Ntuj Lo Lus. 45 Cov Yus Das pom neeg tuaj coob coob, mas lawv khib, ces lawv hais lus thuam Paj Lug cov lus thiab thuam Ntuj. 46 Paj Lug thiab Npas Nas Npes nkawd ob leeg hais lus ncaj qha tsis zais lus tias : "Peb yeej yuav tsum xub tshaj Tswv Ntuj lo lus rau nej ua ntej dua cov, tab sis yog nej tsis kam txais lo lus thiab nej rov txiav txim rau nej tias nej tsis tsim nyog txais txoj sia nyob mus li, ces peb yuav tig mus qhia cov neeg teev pej kum dab. 47 Vim Huab Tais twb tau hais rau peb tias : ‘Kuv tsa koj ua qhov pom kev kaj txhua haiv neeg, kom koj coj kuv txoj kev cawm neeg mus txog tim npoo ntiaj teb kawg.’" 48 Cov neeg teev pej kum dab hnov cov lus no mas lawv zoo siab kawg, lawv cav txog Huab Tais lo lus, thiab tas cov uas lawv txoj hmoo yog tau txais txoj sia nyob mus li mas lawv tig los ntseeg. 49 Ces Huab Tais lo lus ri mus puv tas thaj tsam teb chaws ntawd. 50 Tab sis cov Yus Das mus cob cov poj niam nom uas hwm Tswv Ntuj, thiab cov ua thawj nyob hauv lub tsheej, ces lawv pib hiam Paj Lug thiab Npas Nas Npes nkawd, thiab lawv ntiab nkawd kom tawm hauv lawv nrim teb chaws mus. 51 Nkawd thiaj nchos cov plua av lo nkawd ko taw rau lawv, ces nkawd mus rau Is Kos Nias. 52 Hos cov thwj tim, mas lawv muaj kev zoo siab thiab muaj Leej Ntuj Plig Ntshiab nyob puv hauv lawv.

NPN 98: 1, 2-3AB, 3CD-4

Txais: (3cd) Tas npoo ntuj npoo ntiaj teb tau pom peb tus Tswv Ntuj lub hwj huam cawm neeg.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws muaj yeej,
nws sab npab ntshiab tau ua.

Txais…

HUAB TAIS tau ua kom sawv daws paub txog nws txoj kev cawm,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo rau thiab
hlub tsev neeg His Xas Lais.

Txais…

Tas cov npoo ntiaj teb kawg tau pom
peb tus Tswv Ntuj txoj kev cawm neeg.
Tas txhua teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais…

As Les Lus Yas: ZAM 8: 31B-32

Txais: As les lus yas, as les lus yas.

Huab Tais hais tias: Yog nej nyob ruaj hauv kuv lo lus,
mas nej yog kuv cov tseem thwj tim thiab nej yuav paub qhov tseeb.

Txais: As les lus yas, as les lus yas.

Ntawv Moo Zoo: ZAM 14: 7-14

Yes Xus hais rau nws cov thwj tim tias:
7 “Yog tias nej paub kuv, mas nej kuj yuav paub kuv Txiv thiab. Txij nyem no mus, nej twb paub nws thiab twb pom nws lawm." 8 Fis Lis Pos hais rau Yes Xus tias : "Huab Tais, koj pub kom peb pom Leej Txiv, ces peb txaus siab lawm." 9 Yes Xus hais rau Fis Lis Pos tias : "Fis Lis Pos, kuv nrog nej nyob ntev npaum no, koj tseem tsis tau paub kuv thiab lod ? Tus twg pom kuv, mas nws kuj pom Leej Txiv lawd. Ua cas koj thiaj hais tau tias : 'Koj pub kom peb pom Leej Txiv'? 10 Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod ? Cov lus uas kuv hais rau nej, tsis yog kuv hais kuv , yog Leej Txiv uas nyob txawm hauv kuv nws ua nws cov hauj lwm xwb. 11 Nej ntseeg kuv mas, tias kuv nyob hauv Leej Txiv, thiab Leej Txiv nyob hauv kuv. Txawm nej tsis ntseeg kuv los nej yuav tsum ntseeg vim cov hauj lwm. 12 Kuv hais qhov muaj tseeb tiag rau nej : Tus ntseeg kuv, nws kuj yuav ua cov hauj lwm uas kuv ua, thiab nws tseem yuav ua tej yam loj dua cov kuv ua no thiab, vim tias kuv yuav mus cuag Leej Txiv. 13 Yog nej thov dab tsi nyob hauv kuv lub npe, mas kuv yuav ua rau nej, kom xwv Leej Txiv muaj koob meej nyob hauv Leej Tub. 14 Yog nej tuav txog kuv lub npe thov ib yam dab tsi, mas kuv yuav ua yam ntawd."

TIM 11 LUB 5 HLIS 2020

Hnub Ob Lis Piam Tsib Caij Hla Xyoo A Nruab Lis Piam Xyoo II

Zaj Nyeem Ib: HL 14: 5-18

5 Thaum ntawd cov neeg teev pej kum dab thiab cov Yus Das nrog lawv cov thawj coj xav ua phem rau ob tug Hauv Paus Xa Lus thiab xav txawb pob zeb tua nkawd. 6 Nkawd paub txog li ntawd, ces nkawd khiav mus rau hauv cov nroog Lis Ros thiab Des Npes nyob Lis Kos Nias teb, thiab rau thaj tsam ib ncig ntawd. 7 Nkawd tshaj lub Moo Zoo nyob ntawd.
8 Nyob Lis Ros, muaj ib tug txiv neej zaum nyob ntawd uas nws ko taw tsis muaj zog, nws tuag taw txij hnub nws yug los lawm, nws tsis tau mus kev ib zaug li. 9 Nws mloog rawv Paj Lug qhuab qhia, Paj Lug kuj ntsia ntsoov nws, ces Paj Lug pom tias nws muaj kev ntseeg txaus kho kom nws zoo. 10 Paj Lug thiaj hais ib suab nrov nrov tias : "Koj cia li sawv los nyob ntseg ntsees saum koj ob txhais taw saib!" Tus tuag taw tib plhaw sawv tsees thiab nws mus kev. 11 Cov neeg pom Paj Lug ua li ntawd, lawv ua lus Lis Kos Nias qw zom zaws tias : "Dab txia ua tib neeg nqes los rau hauv peb lawm lau!" 12 Lawv hu Npas Nas Npes ua ‘Zeus,’ hos hu Paj Lug ua ‘Hermes,’ vim Paj Lug yog tus hais lus ntau dua. 13 Tus leej choj teev Zeus uas nyob ze ze ntawm lub qhov rooj loog nkag los rau hauv nroog coj ib co heev nyuj nrog tej txoj hlua chob nplooj ntxuag paj tuaj txog ntawm lub qhov rooj loog, vim tus leej choj nrog tsoom pej xeem npaj yuav txi nyuj rau nkawd. 14 Thaum ob tug hauv paus xa lus Npas Nas Npes thiab Paj Lug hnov txog li ntawd, nkawd dua rhe nkawd cov ris tsho, thiab nkawd khiav loo tawm mus qw rau tsoom neeg tias : 15 "Cov kwv tij, nej ua dab tsi li no ? Wb kuj zoo li nej thiab xwb, wb yog tib neeg ib yam nkaus li nej xwb; wb tuaj qhia lub moo zoo rau nej kom nej tso tej dab tej mlom tsis muaj sia no pov tseg, tig los hwm tus Tswv Ntuj muaj txoj sia uas yog tus tsim lub ntuj lub teb, lub hiav txwv thiab tas txhua yam nyob hauv hiav txwv. 16 Nyob hauv cov tiam neeg dhau los, Tswv Ntuj cia cov haiv neeg nyias mus raws nyias txoj kev. 17 Tsis kav Tswv Ntuj yeej muaj pov thawj txog tej yam zoo nws ua rau sawv daws: nws tso nag poob saum ntuj los rau nej, nws ua kom muaj caij nyoog zoo ua qoob ua loo rau nej, kom nej muaj noj muaj haus thiab kom nej muaj kev zoo siab puv npo." 18 Nkawd cov lus no txwv yuav luag tsis tau kom tsoom sid tsis txhob tua nyuj txi rau nkawd.

NPN 115: 1-2, 3-4, 15-16

Txais: (1ab HUAB TAIS, koj tsis txhob muab koob meej
rau peb, tab sis muab rau koj lub npe.
los: As les lus yas.

HUAB TAIS, txhob muab koob meej rau peb,
txhob muab rau peb, tab sis muab rau koj lub npe
vim koj khuv leej neeg thiab koj yog kev tseeb.
Vim li cas cov teev pej kum dab thiaj yuav tau kev hais tias :
"Lawv tus Tswv Ntuj nyob qhov twg ?"

Txais: (1ab HUAB TAIS, koj tsis txhob muab koob meej
rau peb, tab sis muab rau koj lub npe.
los: As les lus yas.

Peb tus Tswv Ntuj nyob txheej ntuj saud ;
ib puas tsav yam nws xav ua, nws ua tau tas.
Lawv cov mlom dab yog nyiaj yog kub,
yog neeg ob txhais tes ua tawm los xwb.

Txais: ((1ab HUAB TAIS, koj tsis txhob muab koob meej
rau peb, tab sis muab rau koj lub npe.
los: As les lus yas.

Thov kom HUAB TAIS foom koob foom hmoov rau nej,
nws yog tus xeeb ntuj xeeb teb.
Lub ntuj yog HUAB TAIS lub ntuj,
hos lub ntiaj teb, nws muab pub rau tib neeg.

Txais: (1ab HUAB TAIS, koj tsis txhob muab koob meej
rau peb, tab sis muab rau koj lub npe.
los: As les lus yas.

As Les Lus Yas: Zam 14: 26

Txais: As les lus yas, as les lus yas.

Leej Ntuj Plig Ntshiab yuav qhia tas ib puas tsav yam rau nej
thiab yuav pab kom nej rov nco txog txhua yam kuv tau hais rau nej.

Txais: As les lus yas, as les lus yas.

Ntawv Moo Zoo: Zam 14: 21-26

Yes Xus hais rau nws cov thwj tim tias:
21 Tus twg muaj kuv cov lus qhia, thiab coj raws li ntawd, nws thiaj yog tus nyiam kuv. Tus nyiam kuv mas kuv Txiv yuav nyiam nws, kuv kuj yuav nyiam nws, thiab kuv yuav muab kuv rau nws pom." 22 Yus Das - tsis yog tus Kas Lis Yaus - hais rau Yes Xus tias : "Huab Tais, ua cas koj thiaj yuav muab koj rau peb pom xwb, tsis cia lub qab ntuj neeg pom?" 23 Yes Xus teb rau Yus Das tias : "Yog leej twg nyiam kuv, nws yuav coj rawv kuv lo lus, ces kuv Txiv yuav nyiam nws, kuv Txiv wb yuav los nyob hauv nws, wb yuav tsa tsev nyob hauv nws. 24 Tus tsis nyiam kuv, nws tsis coj raws kuv lo lus. Lo lus uas nej hnov, tsis yog kuv lo lus, yog Leej Txiv uas xa kuv tuaj lo lus.
25 Kuv hais tej no rau nej thaum kuv tseem nrog nej nyob. 26 Tus Pab nej, Leej Ntuj Plig Ntshiab, uas Leej Txiv yuav xa nws tuaj nyob hauv kuv lub npe, nws yog tus yuav qhia tas ib puas tsav yam rau nej, thiab nws yuav pab kom nej rov nco txog tas txhua yam uas kuv tau hais rau nej.”

TIM 12 LUB 5 HLIS 2020

Hnub Peb Lis Piam Tsib Caij Hla Xyoo A Nruab Lis PIam Xyoo II

Hwm LN Nereus thiab LN Achillus, ua Tim Khawv; hwm LN Pancras, ua Tim Khawv

Zaj Nyeem Ib: HAUJ LWM 14: 19-28

19 Muaj ib co Yus Das tuaj As Caus Kus thiab Is Kos Nias tuaj; lawv haub ntxias tsoom pej xeem, ces lawv xuas pob zeb txawb rau Paj Lug thiab muab nws cab mus pov rau sab tsheej nraud, lawv xav tias nws tuag lawm. 20 Tab sis cov thwj tim tuaj sawv ncig Paj Lug, ces nws rov sawv los thiab nws rov mus hauv lub tsheej. Hnub tom qab, nws nrog Npas Nas Npes nkawd sawv kev mus rau Des Npes.
21 Thaum nkawd tshaj Ntuj lus tas nyob hauv lub tsheej Des Npes, thiab nkawd qhia tau ib pab thwj tim coob lawm, nkawd rov mus rau Lis Ros, thiab rau Is Kos Nias thiab rau As Caus Kus. 22 Nkawd txhawb cov thwj tim kom muaj ib lub siab ruaj nreb thiab txhawb kom lawv nyob tawv qhawv hauv txoj kev ntseeg. Nkawd qhia tias : "Peb yuav tsum raug ntau yam kev txom nyem, peb thiaj yuav tau mus hauv Tswv Ntuj lub Ceeb Tsheej." 23 Nkawd xaiv ib co txwj laus coj lawv nyob hauv txhua lub koom txoos. Lawv ua cov kab ke teev ntuj thiab yoo mov tas, ces nkawd muab cov txwj laus fij rau tus Huab Tais uas lawv tau los ntseeg txog.
24 Ces nkawd hla Pis Xis Dias teb mus txog Paas Fis Lias teb. 25 Thaum nkawd tshaj lo lus nyob Pes Nkas tas lawm, nkawd thiaj li nqes mus rau nram Aas Tas Lias. 26 Ces nkawd caij nkoj ntawm Aas Tas Lias mus rau As Caus Kus, uas yog lub tsheej Tswv Ntuj lub txiaj ntsim tau xaiv nkawd los mus ua txoj hauj lwm uas nkawd tau ua tiav log no. 27 Thaum nkawd los txog, nkawd hu lub Koom Txoos tas huv si tuaj, ces nkawd piav txog tas txhua yam uas Tswv Ntuj tau pab nkawd ua rau sawv daws mloog, thiab nkawd piav tias Tswv Ntuj tau qhib qhov rooj rau cov neeg teev dab los ua neeg ntseeg lawm. 28 Ces nkawd nrog cov thwj tim nyob ib ntus ntev hauj sim.

NPN 145: 10-11, 12-13AB, 21

Txais: (12) Huab Tais, koj cov phooj ywg tshaj rau neeg paub
txog koj lub ceeb tsheej muaj hwj chim ci ntsa iab.
los: As les lus yas.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (12) Huab Tais, koj cov phooj ywg tshaj rau neeg paub
txog koj lub ceeb tsheej muaj hwj chim ci ntsa iab.
los: As les lus yas..

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej rau tas txhua tiam neeg,
thiab koj txoj kev tswj kav yuav nyob mus txheej dhau txheej.

Txais: (12) Huab Tais, koj cov phooj ywg tshaj rau neeg paub
txog koj lub ceeb tsheej muaj hwj chim ci ntsa iab.
los: As les lus yas.

Kom kuv lub ncauj cia li cav txog HUAB TAIS,
kom txhua leej muaj lub cev nqaij cia li foom lus zoo
rau nws lub npe ntshiab mus ib txhiab ib txhis !

Txais: (12) Huab Tais, koj cov phooj ywg tshaj rau neeg paub
txog koj lub ceeb tsheej muaj hwj chim ci ntsa iab.
los: As les lus yas.

As Les Lus Yas: LK 24: 46, 26

Txais: As les lus yas, as les lus yas.

Leej Pleev yuav tsum raug txom nyem
thiab sawv hauv cov tub tuag rov los,
ces nws thiaj tau mus rau hauv nws lub hwj chim.

Txais: As les lus yas, as les lus yas.

Ntawv Moo Zoo: ZAM 14: 27-31A

Yes Xus hais rau nws cov thwj tim tias:
27 “Kuv tso txoj kev thaj yeeb rau nej, kuv muab kuv txoj kev thaj yeeb rau nej. Kuv tsis muab rau nej xws li lub qab ntuj neeg muab. Nej tsis txhob ntxhov siab, tsis txhob ntshai. 28 Nej tau hnov kuv hais rau nej tias : Kuv yuav mus, ces kuv yuav rov los cuag nej.’ Yog nej nyiam kuv, mas nej yuav zoo siab tias kuv mus cuag Leej Txiv, vim Leej Txiv loj dua kuv. 2 Zaum no kuv tau xub hais rau nej lawm, cheem tseem tsis tau tshwm sim tuaj, kom thaum tej ntawd tshwm sim tuaj, nej thiaj ntseeg. 30 Kuv yuav tsis tau nrog nej tham ntau ntxiv, vim tus tswj lub qab ntuj neeg tuaj lawm. Nws tsis muaj hwj huam ua tau dab tsi rau kuv. 31 Tab sis lub qab ntuj neeg yuav tsum paub hais tias kuv nyiam Leej Txiv thiab kuv ua raws li Leej Txiv txib kom kuv ua.”

TIM     13     LUB     5     HLIS 2020

Hnub Plaub Lis Piam Tsib Caij Hla Xyoo A Nruab Lis Piam Xyoo II

Hwm Niam Mab Liab tuaj tim Fatima

Zaj Nyeem Ib: HAUJ LWM 15: 1-6

1 Muaj ib co neeg tuaj Yus Das teb tuaj, lawv qhia cov kwv tij tias : "Yog nej tsis ua lub cim txiav raws li Mais Xes txoj cai, mas nej yuav txais kev cawm tsis tau." 2 Paj Lug thiab Npas Nas Npes nkawd nrog lawv sib hais sib cav muaj ceem hauj sim txog qhov ntawd, ces lawv thiaj txiav txim tias cia tso Paj Lug thiab Npas Nas Npes thiab lawv ob peb leeg mus pem Yes Lus Xas Les, mus cuag cov Hauv Paus Xa Lus thiab cov txwj laus, mus nrog lawv tham txog cov lus sib cav ntawd. 3 Lub Koom Txoos thiaj xa lawv cov ntawd mus; thaum lawv hla Fes Nis Xias thiab Xas Mas Lias teb, lawv piav txog cov ua dab tig los txais kev ntseeg rau cov kwv tij mloog, mas sawv daws zoo siab kawg. 4 Thaum lawv tuaj txog Yes Lus Xas Les, lub Koom Txoos nrog cov Hauv Paus Xa Lus thiab cov txwj laus txais tos lawv zoo. Paj Lug thiab Npas Nas Npes nkawd piav rau sawv daws txog tej yam Tswv Ntuj tau nrog nkawd ua. 5 Tab sis, muaj ib co neeg uas yog tog Fas Lis Xais los txais kev ntseeg, lawv sawv los tawm suab hais tias yuav tsum kom cov neeg teev pej kum dab txais lub cim txiav thiab coj Mais Xes txoj cai thiab. 6 Cov Hauv Paus Xa Lus thiab cov txwj laus thiaj sib sau sab laj txog cov lus no.

NPN 122: 1-2, 3-4AB, 4CD-5

Txais: (1) Nej tuaj peb zoo siab hlo mus pem Huab Tais tsev.
los: As les lus yas.

Kuv zoo siab vim lawv hais rau kuv tias:.
"Peb yuav nce mus lawm pem Huab Tais tsev.”
Yes Lus Xas Les, nyem no
peb txhais taw tau tsuj koj cov rooj loog lawm.

Txais…

Yes Lus Xas Les, yog ib lub nroog
uas luag txhim tau zoo xwm yeem.
Muaj ib co xeem neeg nce mus pem Yes Lus Xas Les,
Yog Huab Tais cov xeem neeg.

Txais…

Lawv mus raws li txoj cai qhia rau His Xas Lais,
Kom tau ua tsaug cav txog Huab Tais lub Npe.
Nyob ntawd muaj ib co rooj txiav txim teeb tau tseg,
Yog cov rooj cia rau Das Vis tsev neeg.

Txais…

As Les Lus Yas: ZAM 15: 4A, 5B

Txais: As les lus yas, as les lus yas.

Huab Tais hais tias:
Nej yuav nyob ruaj hauv kuv ib yam li kuv nyob hauv nej;
leej twg nyob ruaj hauv kuv nws yuav txi txiv ntau.

Txais: As les lus yas, as les lus yas.

Ntawv Moo Zoo: ZAM 15: 1-8

Yes Xus hais rau nws cov thwj tim tias:
1 "Kuv yog tsob tseem hmab txiv cawv, kuv Txiv yog tus tswv cog txiv cawv. 2 Nyob hauv kuv, txoj hmab twg tsis txi txiv, kuv Txiv muab txiav pov tseg, txoj hmab twg txi txiv, kuv Txiv tav nws ntsis kom nws txi txiv ncw dua tuaj. 3 Nej lub ntsis twb raug tav lawm, vim lo lus kuv tau hais rau nej. 4 Nej yuav nyob ruaj hauv kuv, ib yam li kuv nyob hauv nej. Tus ceg twg tsis txuas rau txoj hmab, mas nws txi tsis taus txiv nws tus kheej; nej kuj ib yam, nej yuav txi tsis taus txiv yog nej tsis nyob ruaj hauv kuv. 5 Kuv yog txoj hmab txiv cawv, nej yog cov ceg. Tus uas nyob ruaj hauv kuv thiab kuv nyob hauv nws, mas nws yuav txi txiv ncw; vim tias yog tsis muaj kuv mas nej ua tsis tau dab tsi li. 6 Yog leej twg tsis nyob hauv kuv, luag yuav muab nws pov tseg rau sab nraud xws li tus ceg ntoo, ces nws yuav qhuav. Luag yuav sau cov ceg qhuav mus pov rau hauv hluav taws kom kub hnyiab tas. 7 Yog nej nyob ruaj hauv kuv, thiab kuv cov lus nyob ruaj hauv nej, mas yog nej xav tau dab tsi nej thov, ces nej yuav tau raws li nej thov. 8 Qhov yuav ua kom kuv Txiv tau koob meej, mas yog kom nej txi txiv ntau thiab nej ua kuv thwj tim.”

TIM     14     LUB     5     HLIS     2020

Hnub Tsib Lis Piam Tsib Caij Hla Xyoo A Nruab Lis Piam Xyoo II

Hwm Hauv Paus Xa Lus Leej Ntshiab Mas Thias

Zaj Nyeem Ib: HAUJ LWM 1: 15-17, 20-26

15 Lub caij ntawd, Pob Zeb sawv ntsug hauv nruab nrab cov kwv tij, - muaj ze ntawm ib puas nees nkaum leej tuaj sib txoos ua ke nyob ib qho, - nws hais tias : 16 "Kwv tij sawv daws, cov lus uas sau rau hauv Phau Ntawv yuav tsum tshwm sim tuaj, raws li Leej Ntuj Plig tau siv Das Vis lub ncauj los xub hais txog Yus Das, uas yog tus coj luag kev tuaj ntes Yes Xus. 17 Yus Das yog ib tug nyob hauv peb thiab nws kuj tau txais ib txog hauj lwm xws li peb txoj thiab.
20 Vim Ntawv Nkauj Paj Nruag sau tseg tias : ‘Cia kom nws lub vaj tse nyob nphob xuav, tsis txhob muaj neeg nyob hauv li,’ thiab hais tias : ‘Cia lwm tus ua nws txoj dej num.’ 21 Vim li ntawd, cov neeg uas tau nrog peb ua ke tas lub caij Huab Tais Yes Xus nrog peb mus mus los los, 22 txij hnub Zam ua kab ke ntxuav los txog hnub uas nws raug nqa hauv peb mus lawd, mas yuav tsum muaj ib tug los nrog peb ua tim khawv txog nws txoj kev sawv rov los." 23 Ces lawv muab tau ob leeg npe los, yog Yos Xes tseem hu ua Npas Xas Npas, uas sawv daws kuj tseem hu nws ua Yus Tus thiab, thiab Mas Thias. 24 Lawv thov Ntuj li no : "Huab Tais, koj paub tas txhua leej neeg lub siab, thov koj qhia saib ob tug no tus twg yog tus koj xaiv  25 kom los leg txoj dej num ua Hauv Paus Xa Lus uas Yus Das muab tso pov tseg thiab khiav mus nyob nws qhov chaw lawm." 26 Ces lawv tso nkawd npe cia rho ntawv saib tau leej twg; lawv rho tau Mas Thias npe, lawv thiaj suav nws los ntxiv rau pab Kaum Ib leeg Hauv Paus Xa Lus.

NPN 113: 1-2, 3-4, 5-6, 7-8

Txais: Huab Tais yuav coj nws mus zaum nrog cov thawj coj hauv nws haiv neeg.
los: As les lus yas.

HUAB TAIS cov tub txib, nej cav txog nws,
nej cav txog HUAB TAIS lub npe.
Kom HUAB TAIS lub npe nto moo lug,
txij no mus tas txheej dhau txheej !

Txais: Huab Tais yuav coj nws mus zaum nrog cov thawj coj hauv nws haiv neeg.
los: As les lus yas.

Txij thaum hnub tawm tuaj txog hnub poob qho,
kom HUAB TAIS lub npe nto koob meej.
HUAB TAIS nyob siab tshaj ib tsoom kuj cuab,
nws lub hwj chim nyob siab dua txheej ntuj saud.

Txais: Huab Tais yuav coj nws mus zaum nrog cov thawj coj hauv nws haiv neeg.
los: As les lus yas.

Leej twg thiaj zoo li HUAB TAIS peb tus Tswv Ntuj?
Nws zaum saum nws lub theej kiab nyob siab saud
Thiab nws dauv muag khoov los ntsia lub ntuj
thiab lub ntiaj teb nyob txheej qis hauv.

Txais: Huab Tais yuav coj nws mus zaum nrog cov thawj coj hauv nws haiv neeg.
los: As les lus yas.

Nws tsa tus pluag hauv plua tshauv los,
nws rub tus txom nyem hauv qhov qias los
kom los zaum nrog cov tub huab tais,
cov tub huab tais hauv nws haiv neeg.

Txais: Huab Tais yuav coj nws mus zaum nrog cov thawj coj hauv nws haiv neeg.
los: As les lus yas.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: Kuv tau xaiv nej hauv lub ntiaj teb los,
kom nej mus thiab nej txi ib co txiv uas yuav nyob ruaj.

Txais: As les lus yas, as les lus yas.

Ntawv Moo Zoo: ZAM 15: 9-17

Yes Xus hais rau nws cov thwj tim tias:
9 “Ib yam li Leej Txiv nyiam kuv, kuv kuj nyiam nej ib yam li ntawd. Nej nyob ruaj hauv kuv txoj kev nyiam mog. 10 Yog nej coj kuv cov lus qhia, mas nej yuav nyob ruaj hauv kuv txoj kev nyiam, ib yam li kuv tau coj kuv Txiv cov lus qhia thiab kuv nyob ruaj hauv nws txoj kev nyiam.
11 Kuv hais tej no rau nej kom kuv txoj kev zoo siab nyob hauv nej ces nej thiaj muaj kev zoo siab puv npo. 12 Kuv lo lus qhia yog lo lus no : nej yuav sis nyiam sis hlub ib yam li kuv tau nyiam thiab hlub nej. 13 Tsis muaj leej twg yuav muaj txoj kev hlub loj dua tus uas siv nws txoj sia rau nws cov phooj ywg. 14 Nej yog kuv cov phooj ywg yog nej ua qhov kuv kom nej ua. 15 Kuv tsis hu nej ua tub txib ntxiv, vim tus tub txib tsis paub qhov uas tus tswv ua. Tab sis kuv hu nej ua phooj ywg, vim kuv tau qhia nej paub txog tas ib puas tsav yam kuv tau hnov ntawm kuv Txiv los lawm. 16 Tsis yog nej xaiv kuv, yog kuv xaiv nej, thiab yog kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. 17 Lo lus qhia uas kuv muab rau nej yog kom nej sis nyiam sis hlub."

TIM 15 LUB 5 HLIS 2020

Hnub Rau Lis Piam Tsib Caij Hla Xyoo A Nruab Lis Piam Xyoo II

Hwm LN Isidore

Zaj Nyeem Ib: HAUJ LWM 15: 22-31

22 Cov Hauv Paus Xa Lus thiab cov txwj laus nrog lub Koom Txoos tas nrho pom zoo cia lawv xaiv ib co sawv cev ntawm lawv xa nrog Paj Lug thiab Npas Nas Npes nkawd mus As Caus Kus. Lawv xaiv Yus Das uas tseem hu ua Npas Xas Npas thiab Xis Las nkawd uas yog ob tug ua thawj coj nyob hauv cov kwv tij. 23 Lawv sau ib tsab ntawv li no: "Cov Hauv Paus Xa Lus thiab cov txwj laus, nej cov kwv tij, xa lus tuaj rau cov kwv tij nyob As Caus Kus, nyob Xis Lias teb, thiab nyob Xis Lis Xias teb, uas nej yog cov teev pej kum dab tig los ntseeg. Noj qab nyob zoo rau nej sawv daws. 24 Peb tau hnov tias muaj ib co neeg nyob hauv peb tau tuaj , tiam sis tsis yog peb xa lawv tuaj. Lawv tuaj hais ib co lus ua kom nej ntxhov siab thiab ua kom nej lub tswv yim nyob tsis tus. 25 Peb thiaj ua ke pom zoo txiav tias cia peb xaiv ib co sawv peb chaw tuaj cuag nej nrog ob tug kwv tij Npas Nas Npes thiab Paj Lug nkawd, 26 uas yog ob tug neeg mob siab siv nkawd txoj sia los tsob hwb peb tus Huab Tais Yes Xus Pleev lub Npe. 27 Peb tso Yus Das thiab Xis Las nkawd tuaj, kom nkawd tuaj hais kiag tib co lus li hauv daim ntawv no rau nej tias: 28 ‘Leej Ntuj Plig Ntshiab thiab peb tau txiav txim pom zoo tias yuav tsis yuam ib lub nra ntxiv rau nej ris, tsuas kom nej coj tej yam tseem ceeb raws li no xwb : 29 caiv cov nqaij txi dab, caiv ntshav, caiv cov nqaij tsiaj nyem caj dab tuag, caiv txoj kev sib dee tsis tau sib yuav ua txij ua nkawm. Yog nej caiv tsis ua tej no ces yog nej ua qhov zoo lawm. Peb tuaj ntsib nej li no xwb." 30 Nkawd ob leeg thiaj tau sawv kev nrog lawv mus; thaum mus txog As Caus Kus, lawv hu sawv daws tuaj, ces nkawd muab tsab ntawv rau pawg ntseeg. 31 Thaum lawv muab tsab ntawv los nyeem mas lawv zoo siab kawg tias cov lus nyob hauv txhawb lawv ntau.

NPN 57: 8-9, 10-12

Txais: (10a) Huab Tais, kuv yuav nrog tsoom haiv neeg cav txog koj.
los: As les lus yas.

Kuv lub siab nyob ruaj nreb, Tswv Ntuj, kuv lub siab nyob ruaj nreb.
Kuv yuav hu nkauj, kuv yuav hu ib zaj cav txog koj.
Kuv tus plig, koj cia li tsim dheev los;
nkauj nog ncas thiab thaj cheej, nej cia li tsim dheev!
Kuv yuav tsa kom lub hnub sawv tawm tuaj.

Txais: (10a) Huab Tais, kuv yuav nrog tsoom haiv neeg cav txog koj.
los: As les lus yas.

Kuv yuav nrog tsoom haiv neeg ua tsaug cav txog koj, Huab Tais,
kuv yuav nrog tsoom kuj cuab hu nkauj qhuas txog koj.
Vim koj txoj kev khuv leej loj siab npaum lub ntuj,
thiab koj txoj kev ua ncaj siab npaum cov txheej ntuj.
Tswv Ntuj, thov kom koj nto koob meej nyob txheej ntuj saud,
thiab kom koj lub hwj chim nyob siab saum tas lub ntiaj teb!

Txais: (10a) Huab Tais, kuv yuav nrog tsoom haiv neeg cav txog koj.
los: As les lus yas.

As Les Lus Yas: ZAM 15: 15

Txais: As les lus yas, as les lus yas.

Huab Tais hais tias: Kuv hu nej ua kuv cov phooj ywg,
vim kuv tau qhia rau nej paub tas puas tsav yam uas leej Txiv hais rau kuv lawm.

Txais: As les lus yas, as les lus yas.

Ntawv Moo Zoo: ZAM 15: 12-17

Yes Xus hais rau nws cov thwj tim tias:
12 “Kuv lo lus qhia yog lo lus no : nej yuav sis nyiam sis hlub ib yam li kuv tau nyiam thiab hlub nej. 13 Tsis muaj leej twg yuav muaj txoj kev hlub loj dua tus uas siv nws txoj sia rau nws cov phooj ywg. 14 Nej yog kuv cov phooj ywg yog nej ua qhov kuv kom nej ua. 15 Kuv tsis hu nej ua tub txib ntxiv, vim tus tub txib tsis paub qhov uas tus tswv ua. Tab sis kuv hu nej ua phooj ywg, vim kuv tau qhia nej paub txog tas ib puas tsav yam kuv tau hnov ntawm kuv Txiv los lawm. 16 Tsis yog nej xaiv kuv, yog kuv xaiv nej, thiab yog kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. 17 Lo lus qhia uas kuv muab rau nej yog kom nej sis nyiam sis hlub."

TIM 16 LUB 5 HLIS 2020

Hnub Xya Lis Piam Tsib Caij Hla Xyoo A Nruab Lis Piam Xyoo II

Zaj Nyeem Ib: HAUJ LWM 16: 1-10

1 Paj Lug mus txog Des Npes thiab Lis Ros. Nyob ntawd muaj ib tug thwj tim hu ua Tis Mos Tes. Nws niam yog ib tug poj niam Yus Das los txais kev ntseeg, tiam sis nws txiv yog ib tug Hes Las. 2 Cov kwv tij nyob Lis Ros thiab nyob Is Kos Nias hais lus pov thawj zoo txog nws. 3 Paj Lug xav coj Tis Mos Tes nrog nws mus tshaj Ntuj lus, ces nws muab Tis Mos Tes ua lub cim txiav, vim muaj ib co Yus Das coob nyob thaj tsam ntawd, thiab sawv daws paub tias nws txiv yog neeg Hes Las. 4 Thaum Paj Lug lawv mus hla ib lub nroog twg, mas lawv tshaj txoj cai uas cov Hauv Paus Xa Lus thiab cov txwj laus nyob Yes Lus Xas Les tau txiav, rau cov Ntseeg kom lawv coj txoj cai ntawd. 5 Ua li mas cov Koom Txoos khov zuj zus tuaj nyob hauv txoj kev ntseeg, thiab niaj hnub huam vam coob ntxiv tuaj.
6 Paj Lug lawv hla lub teb chaws Fis Zias thiab xeev ntuj Nkas Las Tias mus, tiam sis Leej Ntuj Plig tsis kheev lawv tshaj Ntuj Lo Lus nyob As Xias teb. 7 Thaum lawv tuaj txog ntawm Mis Xias teb, lawv xav mus rau Npis Tis Nias teb, tab sis Yes Xus Leej Tswv Yim tsis kheev. 8 Ces lawv hla Mis Xias teb nqes mus rau nram lub tsheej Thuas. 9 Thaum hmo ntuj, Paj Lug yees pom ib tug neeg Mas Xes Dos Nias sawv ntsug thiab thov nws tias : "Thov koj hla tuaj rau Mas Xes Dos Nias teb, tuaj pab peb !" 10 Paj Lug pom li ntawd tas, ces peb nrhiav kev mus Mas Xes Dos Nias teb tam sim ntawd, vim peb pom tias yog Tswv Ntuj hu peb mus tshaj Ntuj lus rau lawv cov neeg ntawd.

NPN 100: 1B-2, 3, 5

Txais: Kom tas lub ntiaj teb qw zoo siab rau Tswv Ntuj.
los: As les lus yas.

Tas txhua daim av, nej hu nkauj rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag !


Txais: Kom tas lub ntiaj teb qw zoo siab rau Tswv Ntuj.
los: As les lus yas.

Nej cia li lees tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog pab yaj nws saib.

Txais: Kom tas lub ntiaj teb qw zoo siab rau Tswv Ntuj.
los: As les lus yas.

HUAB TAIS muaj lub siab zoo :
nws ua zoo rau peb mus li,
nws ua ncaj rau peb txheej dhau txheej.

Txais: Kom tas lub ntiaj teb qw zoo siab rau Tswv Ntuj.
los: As les lus yas.

As Les Lus Yas: KLX 3: 1

Txais: As les lus yas, as les lus yas.

Yog nej twb tau nrog Leej Pleev sawv rov los lawm,
mas nej cia li nrhiav tej yam nyob txheej saud,
uas yog qhov chaw Leej Pleev zaum rawv
ntawm Tswv Ntuj phab xis.

Txais: As les lus yas, as les lus yas.

Ntawv moo Zoo: Zam 15: 18-21

Yes Xus hais rau nws cov thwj tim tias:
18 "Yog lub qab ntuj neeg ntxub nej, mas nej yuav nco tias lawv twb xub ntxub kuv ua ntej lawm. 19 Yog nej yog lub qab ntuj neeg tug, mas qab ntuj neeg yuav nyiam yam uas yog nws tug. Tab sis vim nej tsis yog qab ntuj neeg tug, rau qhov kuv tau xaiv nej thau nej hauv lub qab ntuj neeg los lawm mas lub qab ntuj neeg ntxub nej. 20 Nej nco ntsoov lo lus uas kuv tau hais rau nej tias : ‘Tus tub txib tsis loj dua nws tus tswv.’ Yog lawv twb hiam kuv, mas lawv kuj yuav hiam nej thiab. Yog lawv khaws kuv lo lus, mas lawv kuj yuav khaws nej lo lus thiab. 21 Lawv yuav ua tas puas tsav yam ntawd rau nej vim kuv lub npe, rau qhov lawv tsis paub Tus xa kuv tuaj.”

TIM 18 LUB 5 HLIS 2020

Hnub Ob Lis Piam Rau Caij Hla Xyoo A Nruab Lis Piam Xyoo II

Hwm LN John I, ua Vaj Qhia

Zaj Nyeem Ib: HAUJ LWM 16: 11-15

11 Peb caij nkoj nyob Thuas ncaj qha mus rau Xas Mos Thas; hnub tom qab peb mus rau Nias Pos Lis. 12 Txog ntawd, peb mus ntxiv rau Fis Lis Pos uas yog thawj lub tsheej nyob hauv lub cheeb Mas Xes Dos Nias, uas yog ib lub xeev cov Los Mas kav. Peb nyob ob peb hnub hauv lub nroog ntawd. 13 Txog hnub xav npas tos, peb tawm mus rau sab rooj vag nraud, mus rau ntawm ib tug ntug dej, uas peb xav tias yog ib qho chaw rau neeg tuaj teev ntuj. Peb zaum, thiab peb hais lus rau cov poj niam tuaj sib sau nyob ntawd. 14 Muaj ib tug poj niam hu ua Lis Dias, nws yog ib tug neeg muag tshuaj zas ntaub liab tsam xem nyob Thias Tis Las tuaj, nws thiaj mloog peb. Nws yog neeg teev Tswv Ntuj, ces Huab Tais qhib nws lub siab kom nyiam txais tej yam uas Paj Lug hais. 15 Thaum Lis Dias thiab nws tsev neeg txais lub cim ntxuav tas, nws thov peb li no: "Yog nej saib kuv yog ib tug neeg ntseeg txog Huab Tais zoo, mas thov nej los so hauv kuv tsev thiab nrog peb nyob." Ces peb thiaj tau ua raws li nws hais.

NPN 149: 1-2, 3-4, 5-6A+9B

Txais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
Kom His Xas Lais zoo siab nyob hauv tus uas tsim lawv,
kom Xis Yoos cov me nyuam luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej ua zam npua cov neeg me.

Txais: (4a) Huab Tais zoo siab nyob hauv nws haiv neeg.
los: As les lus yas

Cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Txhua tus uas ntseeg muaj lub hwj chim zoo li no. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas: ZAM 15: 26B, 27A

Txais: As les lus yas, as les lus yas.

Huab Tais hais tias:
Leej Tswv Yim muaj qhov tseeb yuav ua tim khawv txog kuv,
thiab nej kuj yuav ua tim khawv txog kuv ib yam.

Txais: As les lus yas, as les lus yas.

Ntawv Moo Zoo: ZAM 15: 26—16:4A

Yes Xus hais rau nws cov thwj tim tias:
26 “Thaum tus Pab Nej tuaj txog, uas yog tus kuv yuav xa ntawm Leej Txiv tuaj rau nej, yog Leej Ntuj Plig qhia qhov tseeb uas tawm hauv Leej Txiv los, nws yuav ua tim khawv txog kuv. 27 Nej kuj yuav ua tim khawv thiab, vim nej tau nrog kuv txij thaum lub hauv paus los lawm.
16 1 "Kuv xub hais tej no rau nej kom nej txhob ntog. 2 Luag yuav ntiab nej tawm hauv cov tsev txoos mus. Yuav muaj ib lub caij uas txhua tus muab nej tua yuav xav tias nws ua ib qho los hawm Tswv Ntuj. 3 Lawv ua li ntawd vim lawv tsis paub Leej Txiv thiab tsis paub kuv. 4 Kuv hais tej no rau nej, kom thaum txog lub sij hawm ntawd, nej nco txog tias kuv twb xub hais qhia rau nej lawm.”

TIM 19 LUB 5 HLIS 2020

Hnub Peb Lis Piam Rau Caij Hla Xyoo A Nruab Lis Piam Xyoo II

Zaj Nyeem Ib: HL 16: 22-34

22 Tas tsoom sid nyob Fis Lis Pos koom ua phem rau Paj Lug thiab Xis Las nkawd. Cov nom tswv kom lawv muab nkawd tej khaub ncaws hle, thiab muab pas nplawm nkawd. 23 Lawv muab nkawd nplawm ntau nplawg sab kawg, ces lawv muab nkawd pov rau hauv tsev loj faj. Lawv ceeb toom rau tus zov tsev loj faj kom yuav tsum zov nkawd zoo zoo. 24 Tus zov tsev loj faj hnov lawv hais li ntawd, mas nws coj nkawd mus kaw hauv lub qhov taub uas nyob hauv nruab nrog tsev loj faj, thiab tseem xuas saw khi nkawd ko taw tib si rau ntawm ib tug ncej.
25 Thaum ib tag hmo, Paj Lug thiab Xis Las nkawd teev ntuj hu nkauj cav txog Tswv Ntuj, cov neeg nyob txim mloog nkawd. 26 Ib sij huam txawm muaj ib qho av qeeg loj loj, ua rau lub tsev loj faj tej phab ntsa ua zog koog, tas cov qhov rooj cia li qhib plho tam sim ntawd, hos cov saw khi cov neeg raug txim plam tas huv tib si. 27 Tus zov tsev loj faj tsim dheev los, nws pom cov qhov rooj qhib lug, ces nws rho hlo nws rab ntaj, nws yuav rov tua nws, vim nws xav tias cov neeg raug txim twb khiav dim tas lawm. 28 Tab sis Paj Lug qw ib suab nrov nrov tias : "Koj txhob ua dab tsi rau koj tus kheej, peb sawv daws tseem nyob ntawm no tas huv tib si." 29 Tus zov tsev loj faj thiaj kom lawv taws teeb, ces nws maj nroos nkag los, nws los txhos caug tshee na ntawm Paj Lug thiab Xis Las nkawd ko taw, 30 nws coj nkawd tawm sab nraud, nws hais rau nkawd tias : "Ob tug hlob, kuv yuav ua dab tsi kuv thiaj yuav txais kev cawm?" 31 Nkawd teb tias : "Koj ntseeg txog Huab Tais Yes Xus, ces koj thiab koj tsev neeg yuav txais kev cawm." 32 Ces nkawd qhia Huab Tais Lo Lus rau nws, thiab rau cov neeg hauv nws tsev tas huv tib si. 33 Thaum ib tag hmo ntawd, tus zov tsev loj faj coj nkawd los thiab ntxuav nkawd cov qhov txhab, ces nws thiab tas nws tsev neeg huv si txais lub cim ntxuav tam sim ntawd. 34 Nws coj nkawd nce mus saum nws tsev, nws rau mov rau sawv daws noj. Nws thiab tas nws tsev neeg huv si zoo siab, vim lawv tau ntseeg txog Tswv Ntuj lawm.

NPN 138: 1-2AB, 2CDE-3, 7C-8

Txais: (7c) Huab Tais, koj sab tes xis cawm kuv.
Los: As les lus yas.

Kuv yuav ua koj tsaug, HUAB TAIS, tas kuv lub siab ntsws,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm cov tshiab xub ntiag;
kuv yuav tuaj pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais: (7c) Huab Tais, koj sab tes xis cawm kuv.
Los: As les lus yas.

Vim koj lub siab zoo thiab koj txoj kev tseeb,
koj tau muab koj lub npe thiab koj txoj kev cog lus
ua qhov loj tshaj tas txhua yam.
Thaum kuv hu, koj tau teb kuv,
koj ntxiv zog rau kuv kom kuv lub zog loj tuaj.

Txais: (7c) Huab Tais, koj sab tes xis cawm kuv.
Los: As les lus yas.

Koj txhais tes xis cawm kuv.
HUAB TAIS yuav ua kom tiav tej yam nws npaj ua rau kuv. ;
HUAB TAIS, koj lub siab zoo yuav nyob mus li;
thov txhob muab yam koj txhais tes tau tsim los tso tseg.

Txais: (7c) Huab Tais, koj sab tes xis cawm kuv.
Los: As les lus yas.

As Les Lus yas: ZAM 16: 7, 13

Txais: As les lus yas, as les lus yas.

Huab Tais hais tias:
Kuv yuav xa Leej Tswv yim qhia qhov tseeb tuaj rau nej,
nws yuav coj nej mus txog txhua yam tseeb.

Txais: As les lus yas, as les lus yas.

Ntawv Moo Zoo: ZAM 16: 5-11

Yes Xus hais rau nws cov thwj tim tias:
5 “Nyem no kuv yuav mus cuag Tus Xa kuv tuaj. Nej tsis muaj leej twg nug kuv tias: ‘Koj yuav mus qhov twg?’ 6 Tiam sis vim kuv hais tej no rau nej, ces nej muaj kev tu siab nyob puv nej siab ntsws. 7 Tab sis kuv hais qhov tseeb rau nej tias: Cia kuv mus mas yuav zoo dua rau nej. Yog kuv tsis mus, mas Leej Nplij Neeg yuav tsis tuaj nyob hauv nej. Hos yog kuv mus, mas kuv yuav xa Leej Nplij Neeg tuaj rau nej. 8 Thaum Leej Nplij Neeg tuaj txog, nws yuav txiav txim rau qab ntuj neeg txog kev txhaum, txog kev ncaj, thiab txog kev raug txim. 9 Kev txhaum, vim lawv tsis ntseeg txog kuv, 10 kev ncaj, vim kuv mus cuag Leej Txiv, ces nej yuav tsis pom kuv ntxiv, 11 kev raug txim, vim tus tswj lub qab ntuj neeg twb raug txim lawm.”

TIM 20 LUB 5 HLIS 2020

Hnub Plaub Lis Piam Rau Caij Hla Xyoo A Nruab Lis Piam Xyoo II

Hwm LN Bernardine nyob Siena, ua Leej Choj

Zaj Nyeem Ib: HAUJ LWM 17: 15, 22—18:1

15 Cov neeg uas xa Paj Lug, xa nws mus txog ntua As Thes Nas, ces lawv rov qab. Lawv coj Paj Lug cov lus rov los rau Xis Las thiab Tis Mos Tes kom nkawd mus caum Paj Lug sai sai.
22 Ces Paj Lug mus sawv ntsug ntawm lub rooj txwj laus As Les Os Pas Nkus, nws hais tias : "Cov neeg As Thes Nas aw, raws li kuv pom mas nej yog ib co neeg muaj kev teev hawm zoo kawg nkaus. 23 Kuv tau mus yos ncig thiab mus xyuas nej cov tsev teev hawm, mas kuv pom muaj ib lub thaj uas sau ib co lus tias : ‘Rau tus Tswv Ntuj peb tsis paub.’ Tus uas nej hawm, tab sis nej tsis paub ntawd mas kuv tuaj tshaj txog nws rau nej paub. 24 Tus Tswv Ntuj tsim lub sim ceeb thiab tsim tas ib puas tsav yam nyob hauv lub sim ceeb, tus Huab Tais kav lub ntuj lub teb, nws tsis nyob hauv cov tsev teev hawm uas yog neeg ob txhais tes txhim. 25 Nws kuj tsis tas yuav siv neeg los ua nws tub txib, xws li ib tug uas xav tau yam ub yam no, vim nws yog tus uas pub txoj sia txoj pa thiab txhua yam rau sawv daws. 26 Nws tau tsim tas tsoom tib neeg tawm ntawm ib tug xwb los nyob puv ntiaj teb, thiab nws teem cov caij nyoog thiab cais cov ciam dej ciam av rau tib neeg nyob , 27 kom lawv nrhiav Tswv Ntuj, tej zaud lawv yuav tsum tau maj mam maub xuas nrhiav thiaj ntsib nws, txawm tias nws yeej nyob tsis deb ntawm peb ib tug twg li.
28 Peb muaj txoj sia, peb txawj ua zog, thiab ciaj taus ua tib neeg yog nyob hauv nws. Nej twb muaj ib co neeg txawj sau lus paj huam tseg tias : ‘Peb kuj yog nws caj ces thiab.’ 29 Li ntawd, peb yog Tswv Ntuj caj ces, mas peb yuav tsis txhob xav tias Tswv Ntuj yog zoo li ib tug mlom kub, mlom nyiaj, los mlom pob zeb uas neeg lub tswv yim xav tau thiab txhais tes txua tau. 30 Tswv Ntuj tau ua siab ntev nyiaj lub caij uas tib neeg tsis paub txog nws yav tas los lawd, tiam sis nyem no, nws xav kom tas ib zeej tsoom nyob tas qhov txhia chaw sawv daws yuav tsum los thov txhaum. 31 Vim Tswv Ntuj twb tau teem ib hnub cia txiav txim rau lub qab ntuj neeg raws li txoj kev ncaj lawm, thiab nws twb xaiv tau tus yuav txiav txim ntawd lawm; nws tau tsa tus ntawd sawv hauv cov tub tuag rov los, kom sawv daws paub tias yuav muaj tseeb li ntawd tiag."
32 Thaum Paj Lug hais txog kev sawv hauv cov tub tuag rov los, mas ib txhia pib thuam Paj Lug, hos ib txhia hais rau Paj Lug tias : "Lwm zaus tso, peb mam rov mloog koj hais txog qhov ntawd dua." 33 Ces Paj Lug tso lawv tseg li ntawd. 34 Tsis kav, kuj muaj tus puav los raws Paj Lug thiab txais kev ntseeg. Cov txais kev ntseeg muaj ib tug yog Dis Yos Nis Xus, uas nws yog ib tug kev txwj laus As Les Os Pas Nkus; kuj muaj ib tug poj niam hu ua Das Mas Lis thiab ob peb leeg ntxiv .
18 1 Ua li ntawd tas, Paj Lug tawm hauv As Thes Nas mus, ces nws mus txog rau Kos Lis Nthos.

NPN 148: 1-2, 11-12, 13, 14

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Nej cov nyob saum ntuj cav txog Huab Tais,
nej cov nyob saum tej chaw siab cav txog nws.
Nws cov tshiab, nej cav txog nws,
nws cov peeb zeej, nej cav txog nws.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Kom tas cov vaj nyob ntiaj teb thiab tas txhua haiv neeg,
tas cov tub nom tub tsw thiab cov nom txiav txim nyob ntiaj teb,
cov tub nraug hluas thiab ntxhais nkauj xwb,
cov neeg laus thiab cov me nyuam yaus,

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Kom lawv cia li cav txog Huab Tais lub npe ,
vim nws tib lub npe thiaj loj siab dua cov;
nws lub hwj xyeej nyob siab tshaj lub ntiaj teb thiab lub ntuj.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Nws tsa nws haiv neeg lub ntsej muag kom siab :
Vim li no kom sawv daws yuav tsum cav txog nws,
Tsis hais cov ntseeg txog nws los cov tub ki His Xas Lais
uas yog haiv neeg nyob ze nws,.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

As Les Lus Yas: ZAM 14: 16

Txais: As les lus yas, as les lus yas.

Kuv yuav thov Leej Txiv,
ces nws yuav xa dua ib tug Nplij Neeg
los nrog nej nyob mus li.

Txais: As les lus yas, as les lus yas.

Ntawv Moo Zoo: ZAM 16: 12-15

Yes Xus hais rau nws cov thwj tim tias:
“12 Kuv tseem tshuav ntau yam yuav hais rau nej, tab sis nyem no nej ris tsis taus. 13 Thaum Leej Tswv Yim qhia qhov tseeb tuaj txog, nws yuav coj nej mus rau qhov tseeb tas huv si. Vim nws yuav tsis hais nws cov lus, nws yuav hais qhov nws hnov, thiab nws yuav qhia nej txog tej xwm uas yuav tshwm sim tuaj. 14 Nws yuav ua kom kuv muaj koob meej, vim nws yuav coj yam uas yog kuv tug tuaj qhia rau nej. 15 Tas ib puas tsav yam uas yog Leej Txiv tug, mas kuj yog kuv tug huv tib si. Vim li ntawd kuv thiaj hais rau nej tias : Leej Tswv Yim yuav coj yam uas yog kuv tug tuaj qhia rau nej.”

TIM 21 LUB 5 HLIS 2020

HNUB TSIB LIS PIAM RAU CAIJ HLA XYOO A Nruab Lis Piam Xyoo II

Hnub Tsib no kev cai yog ua hmoov nco txog HT Yes Xus nce mus saum ntuj, tiam sis nyob ntau qhov chaw lub Koom Txoos muab Hnub Yes Xus nce mus saum ntuj pauv mus rau Hnub Chiv tom ntej lawm. Vim li ntawd thiaj muab ob co zaj nyeem tib si los tso rau ntawm no.
Yog nej lub teb chaws los nej lub tsev teev ntuj ua hmoov nco txog Yes Xus mus saum ntuj rau hnub no, ces nej mus xaiv cov zaj nyeem hais txog Yes Xus mus saum ntuj, yog nej teb chaws los lub tsev teev ntuj tsis ua hmoov Yes Xus mus saum ntuj hnub no, ces nej mus xaiv cov zaj nyeem rau Hnub Tsib Lis Piam Rau Caij Hla hauv qab no.


COV ZAJ NYEEM RAU HNUB TSIB LIS PIAM RAU CAIJ HLA

Hwm LN Christopher Magallanes, ua Leej Choj thiab Cov, tuag ua Tim Khawv

Zaj Nyeem Ib: HAUJ LWM 18: 1-8

1 Dhau ntawd lawm, Paj Lug tawm hauv As Thes Nas mus, nws mus txog Kos Lis Nthos. 2 Nyob Kos Lis Nthos, Paj Lug ntsib ib tug neeg Yus Das hu ua As Kis Las, uas yug los nyob Poos Tus teb. Nws nyuam qhuav tsiv tim Is Tas Lis teb, nrog nws poj niam hu ua Phis Xis Las los txog, 3 vim tus Vaj Klaus Dis Yus ceeb toom kom tas cov Yus Das sawv daws yuav tsum tawm hauv Los Mas mus. Paj Lug mus xyuas nkawd; 3 vim tias Paj Lug kuj ua txoj hauj lwm uas nkawd ua thiab, ces nws mus nrog nkawd nyob, thiab ua hauj lwm. Lawv txoj hauj lwm yog xaws tsev tsam phooj. 4 Niaj hnub xas npas tos, Paj Lug mus nrog lawv tham nyob hauv lub tsev txoos. Nws txawj hais kom cov Yus Das thiab cov Hes Las ntseeg.
5 Thaum Xis Las thiab Tis Mos Tes nkawd nqes pem Mas Xes Dos Nias teb los txog lawm, mas Paj Lug siv nws lub sij hawm tas nrho los tshaj Lo Lus lawm xwb. Nws zeem tseeb rau cov Yus Das tias Yes Xus yog Leej Pleev. 6 Tab sis lawv hais lus tiv Paj Lug thiab thuam Ntuj, ces Paj Lug nchos nws cov ris tsho rau lawv thiab nws hais tias : "Cia nej cov ntshav rov poob los rau saum nej taub hau. Kuv tsis tau ua txhaum dab tsi. Txij no mus kuv yuav mus tsham cov neeg teev pej kum dab lawm xwb." 7 Ces Paj Lug tawm ntawd mus, nws mus hauv ib tug hu ua Tis Tos Yus Tus lub tsev. Yus Tus yog ib tug neeg hwm Tswv Ntuj ; nws lub tsev nyob puab kiag ntawm lub tsev Txoos. 8 Khis Pus uas yog tus saib lub tsev Txoos nrog nws tsev neeg sawv daws kuj ntseeg txog Huab Tais, thiab muaj ntau leej neeg Kos Lis Nthos hnov Paj Lug, lawv kuj los ntseeg thiab txais lub cim ntxuav.

NPN 98: 1, 2-3ab,3cd-4

Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
los: As les lus yas.

Nej hu ib zag nkauj tshiab rau HUAB TAIS,
vim nws ua dej num loj muaj tsim txaus qhuas.
Nws sab xis ua kom nws yeej,
nws sab npab ntshiab ua.

Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
los: As les lus yas.

HUAB TAIS ua kom sawv daws paub nws txoj kev cawm ;
nws muab nws txoj kev ncaj rau cov kuj cuab pom.
Nws rov nco txog nws txoj kev ua zoo
thiab kev pheej xeeb rau His Xas Lais tsev neeg.

Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
los: As les lus yas.

Tas cov npoo ntiaj teb kawg tau pom
peb tus Tswv Ntuj txoj kev cawm seej.
Tas txhua teb chaws, nej qw zoo siab cav txog HUAB TAIS !
Nej qcuab suab hu nkauj, nej cav txog nws!

Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
los: As les lus yas.

As Les Lus Yas: ZAM 14: 18

Txais: As les lus yas, as les lus yas.

Huab Tais hais tias: Kuv yuav tsis cia nej ua ntsuag,
kuv yuav rov los cuag nej ces nej yuav zoo siab hlo.

Txais: As les lus yas, as les lus yas.

Ntawv Moo Zoo: ZAM 16: 16-20

Yes Xus hais rau nws cov thwj tim tias:
16 "Tshuav me ntsis ntxiv lawm xwb, ces nej yuav tsis pom kuv. Tab sis ib me ntsis ntxiv, ces nej yuav rov pom kuv dua." 17 Muaj ob peb tug thwj tim sib tham tias : "Nws hais dab tsi li ntawd rau peb tias : ‘Tshuav me ntsis ntxiv lawm xwb, ces nej yuav tsis pom kuv, tab sis ib me ntsis ntxiv , nej yuav rov pom kuv dua,’ thiab lo lus tias : ‘Kuv mus cuag Leej Txiv,’ yog txhais li cas? " 18 Lawv hais tias : "Qhov ‘ib me ntsis’ uas nws hais ntawd yog li cas ? Peb tsis paub nws xav hais dab tsi li." 19 Yes Xus paub tias lawv xav nug nws, ces nws hais rau lawv tias : "Puas yog nej rov sib nug nej txog lo lus kuv hais tias : Tshuav me ntsis lawm xwb, nej yuav tsis pom kuv, tab sis ib me ntsis ntxiv, nej yuav rov pom kuv dua? 20 Kuv hais qhov muaj tseeb tiag rau nej tias nej yuav quaj thiab nej yuav nyiav, hos lub qab ntuj neeg yuav zoo siab. Nej yuav tu siab loj, tab sis nej txoj kev tu siab yuav hloov mus ua kev zoo siab.”

++++++++++++++++++++++++++++++++++++++++++

NCO TXOG YES XUS NCE MUS SAUM NTUJ

Zaj Nyeem Ib: HAUJ LWM 1: 1-11

1 Tes Os Fis Los aw, nyob hauv kuv thawj phau ntawv, kuv tau sau txog tas ib puas tsav yam uas Yes Xus tau ua thiab tau qhia txij thaum lub hauv paus los,
2 mus txog hnub uas Leej Ntuj Plig Ntshiab tau kom nws hais nws cov lus kawg rau cov Hauv Paus Xa Lus uas yog cov nws tau xaiv, ces nws nce mus saum ntuj lawm.
3 Lawv kuj yog cov uas nws tau tawm los muaj txoj sia rau lawv pom, tom qab lub caij nws tau raug txom nyem; muaj ntau yam zeem tseeb tias nws yees tawm los rau lawv pom tau plaub caug hnub, thiab nws tham txog Tswv Ntuj lub Ceeb Tsheej rau lawv.
4 Muaj ib zaug thaum lawv noj mov, nws hais rau lawv kom tsis txhob tawm hauv Yes Lus Xas Les mus, “Nej nyob tos qhov uas Leej Txiv tau cog lus yuav xa tuaj tso, uas yog qhov nej tau hnov kuv hais txog tias:
5 Zam ua kab ke ntxuav nyob hauv dej, hos nej, mas tshuav hnub puav ntxiv xwb, nej yuav txais kab ke ntxuav nyob hauv Leej Ntuj Plig Ntshiab.”
6 Thaum cov Hauv Paus Xa Lus nyob ua ke, lawv nug Yes Xus tias : "Huab Tais, nyem no puas yog lub sij hawm koj yuav rov tsa kev ua vaj rau His Xas Lais ?"
7 Yes Xus hais rau lawv tias : "Tsis yog nej hauj lwm yuav paub txog cov caij nyoog los lub sij hawm uas Leej Txiv tau teem cia raws nws tus kheej tau txiav lawm.
8 Tab sis nej, mas nej yuav txais ib lub peev xwm los ntawm Leej Tswv Yim Ntshiab los rau saum nej, ces nej yuav ua kuv cov tim khawv nyob Yes Lus Xas Les, nyob thoob lub xeev Yus Das thiab Xas Mas Lias, mus txog puag tim npoo ntiaj teb kawg."
9 Nws hais cov lus no tas, ces nws nce siab zuj zus ntawm lawv qhov muag ntsia ntsoov mus lawm; muaj ib tw huab los thaiv ces lawv tsis pom nws ntxiv.
10 Thaum Yes Xus nce mus lawd, lawv tseem nyob hab nuv ntawd ntsia ntsoov saum ntuj, ces cia li muaj ob tug neeg hnav dawb los sawv ze ntawm lawv.
11 Nkawd hais tias : "Cov neeg Nkas Lis Lais, vim li cas nej sawv ntsug ntsia ntsoov saum ntuj zoo li no ? Tus Yes Xus uas raug nqa ntawm nej mus rau saum ntuj lawm, nws yuav rov los zoo nkaus li nej pom nws nce mus saum ntuj thiab."

NPN 47: 2-3, 6-7, 8-9

Txais: (6) Tswv Ntuj nce saum nws lub theej kiab,
muaj suab qw zoo siab, muaj suab hom nrov rau Huab Tais.
Los: As les lus yas.

Txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS tus nyob siab, tus zoo tshaj,
yog tus vaj loj kav tas nrho lub ntiaj teb.

Txais: (6) Tswv Ntuj nce saum nws lub theej kiab,
muaj suab qw zoo siab, muaj suab hom nrov rau Huab Tais.
Los: As les lus yas.

Tswv Ntuj nce saum nws lub theej kiab, muaj suab zoo sia
HUAB TAIS nce, muaj suab hom nrov.
nej hu nkauj cav txog Tswv Ntuj, nej cav txog nws,
nej hu nkauj cav txog peb tus vaj, nej cav txog nws.

Txais: (6) Tswv Ntuj nce saum nws lub theej kiab,
muaj suab qw zoo siab, muaj suab hom nrov rau Huab Tais.
Los: As les lus yas.

Tus vaj kav tas lub ntiaj teb yog Tswv Ntuj,
nej hu nkauj cav txog nws.
Tswv Ntuj tswj cov haiv neeg,
Tswv Ntuj zaum saum nws lub theej kiab ntshiab.

Txais: (6) Tswv Ntuj nce saum nws lub theej kiab,
muaj suab qw zoo siab, muaj suab hom nrov rau Huab Tais.
Los: As les lus yas.

Zaj Nyeem Ob: ES FES XOS 1: 17-23

Cov kwv tij nkauj muam,
17 Thov kom peb tus Huab Tais Yes Xus Pleev tus Tswv Ntuj, uas yog Leej Txiv tus muaj koob meej, pub ib lub tswv yim thoob tsib thiab txawj mem tau tej yam zais ntshis rau nej, kom nej paub nws tseeb.
18 Thov kom muaj qhov pom kev kaj nej cov qhov muag hauv nej nruab siab, ces nej thiaj yuav paub tias muaj kev vam kev cia siab npaum li cas nyob hauv txoj kev uas Tswv Ntuj hu nej, nej yuav paub tias muaj kev nto koob meej loj npaum li cas nyob hauv txoj kev nrog cov leej ntshiab koom txais nws lub cuab tam,
19 thiab nej yuav paub tias nws lub hwj huam loj tshaj npaum li cas pub rau peb cov ntseeg, raws li lub peev xwm ntawm lub zog ntawm nws lub hwj huam,
20 uas nws tau siv ua hauj lwm nyob hauv Leej Pleev thaum nws tsa Leej Pleev sawv hauv cov tub tuag rov los thiab tsa Leej Pleev zaum ntawm nws phab xis nyob saum cov txheej ntuj saud,
21 nyob siab dua cov tshiab ua vaj, siab dua cov tshiab muaj hwj chim, siab dua cov tshiab muaj hwj huam, siab dua cov tshiab ua huab tais, thiab siab dua txhua lub npe uas hu tau, hauv lub zim txwv tiam no mus rau tiam yuav tuaj huv tib si.
22 Tswv Ntuj tso tas ib puas tsav yam rau hauv Leej Pleev qab xib taws thiab tsa nws ua lub taub hau kav tas nrho lub Koom Txoos,
23 uas yog Leej Pleev lub Cev, yog qhov puv npo tus uas nyob puv txhua yam txhua tsav.

As Les Lus Yas: MT 28: 19A, 20B

Txais: As les lus yas, as les lus yas.

Huab Tais hais tias: Nej mus qhuab qhia rau tas txhua haiv neeg,
kuv yuav nrog nej nyob nraim mus txog thaum ntiaj teb kawg.

Txais: As les lus yas, as les lus yas.

Ntawv Moo Zoo: MT 28: 16-20

16 Pab Kaum Ib leeg mus txog Nkas Lis Lais teb, lawv mus saum lub roob uas Yes Xus teem rau lawv.
17 Lawv pom Yes Xus, lawv pe nws, tab sis lawv tseem ua xyem xyav.
18 Yes Xus txav los ze lawv, nws hais lus rau lawv li no : "Ntuj pub ib puas tsav yam hwj huam rau kuv nyob saum ntuj thiab nyob ntiaj teb no.
19 Nej mus, nej ua kom tas ib tsoom haiv neeg los ua kuv thwj tim. Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv.
20 Nej qhia kom lawv coj tas puas tsav yam uas kuv qhia rau nej. Hos kuv, mas kuv niaj hnub nrog nej nyob mus txog thaum lub zim txwv no kawg.”

TIM 22 LUB 5 HLIS 2020

Hnub Rau Lis Piam Rau Caij Hla Xyoo A Nruab Lis Piam Xyoo II

Hwm LN Rita nyob Cassia, ua Leej Phauj

Zaj Nyeem Ib: HAUJ LWM 18: 9-18

9 Muaj ib hmos, nyob Kos Lis Nthos, Paj Lug ua yees pom Huab Tais hais rau nws tias : "Koj tsis txhob ntshai, koj kav tsij hais lus tsis txhob nyob twj ywm, 10 vim kuv nrog nraim koj, tsis muaj leej twg yuav tsa tes ua phem rau koj tau, vim tias muaj ib haiv neeg coob uas yog kuv cov neeg nyob hauv lub tsheej no." 11 Ces Paj Lug thiaj nyob hauv lub tsheej ntawd ib xyoos thiab rau hli. Nws qhia Tswv Ntuj lo lus rau lawv.
12 Thaum ntawd, Nkas Lis Os ua pwm tsav kav lub xeev As Kais. Cov Yus Das koom sawv ntxeev siab rau Paj Lug, lawv coj Paj Lug tuaj kom rau lub tsev txiav txim. 13 Lawv hais tias : "Tus neeg no haub zeej tsoom kom sawv daws teev Tswv Ntuj tsis haum raws li txoj cai." 14 Paj Lug tseem yuav qhib ncauj hais lus, tab sis Nkas Lis Os twb teb ntua rau cov Yus Das tias : "Cov Yus Das, yog nej hais txog kev tsis ncaj ncees los kev ua phem li cas, mas kuv yuav pab nej raws txoj cai. 15 Tab sis yog nej sib cav txog ib txog kev ntxeeg, los tej lub npe, los ib txoj cai uas yog nej li, mas cia nej txiav nej, kuv tsis kam txiav txim rau tej yam ntawd." 16 Ces Nkas Lis Os ntiab sawv daws tawm hauv tsev txiav txim mus. 17 Sawv daws thiaj ntes tus saib lub tsev txoos hu ua Xos Thes Nes. Lawv muab nws ntaus nyob ze lub tsev txiav txim. Tiam sis Nkas Lis Os tsis quav ntsej txog tej ntawd li.
18 Paj Lug tseem nyob Kos Lis Nthos ib ntus ntev loo ntxiv, nws mam li hais rau cov kwv tij tias nws yuav ncaim mus, ces nws nce nkoj mus rau Xis Lias teb. Phis Xis Las thiab As Kis Las nkawd kuj nrog nws mus thiab. Nyob Xees Qhes, Paj Lug chais plaub hau, raws li nws tau cog lus lawm.

NPN 47: 2-3, 4-5, 6-7

Txais: (8a) Tswv Ntuj ua vaj kav tas lub ntiaj teb.
los: Alleluia.

Txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS tus nyob siab, tus zoo tshaj,
yos tus vaj loj kav tas nrho lub ntiaj teb.

Txais: (8a) Tswv Ntuj ua vaj kav tas lub ntiaj teb.
los: Alleluia.

Nws coj cov haiv neeg los zwm rau peb,
nws tso cov kuj cuab rau hauv peb qab xib taws.
Nws xaiv peb lub cuab tam rau peb,
Yog Yas Kos tus nws nyiam lub koob meej.

Txais: (8a) Tswv Ntuj ua vaj kav tas lub ntiaj teb.
los: Alleluia.

Tswv Ntuj nce saum nws lub theej kiab, muaj suab zoo siab
HUAB TAIS nce mus, muaj suab hom nrov.
nej hu nkauj cav txog Tswv Ntuj, nej cav txog nws,
nej hu nkauj cav txog peb tus vaj, nej cav txog nws.

Txais: (8a) Tswv Ntuj ua vaj kav tas lub ntiaj teb.
los: Alleluia.

As Les Lus yas: LK 24: 46, 26

Txais: As les lus yas, as les lus yas.

Leej Pleev yuav tsum raug txom nyem
thiab sawv hauv cov tub tuag rov los,
ces nws mam mus rau hauv nws lub hwj chim.

Txais: As les lus yas, as les lus yas.

Ntawv moo Zoo: ZAM 16: 20-23

Yes Xus hais rau nws cov thwj tim tias:
20 “Kuv hais qhov muaj tseeb tiag rau nej:
Nej yuav quaj thiab nej yuav nyiav, hos lub qab ntuj neeg yuav zoo siab.
Nej yuav tu siab loj, tab sis nej txoj kev tu siab yuav hloov ua kev zoo siab.
21 Thaum ib tug poj niam daws cev, mas nws nyuaj siab, vim txog nws caij lawm.
Tab sis thaum nws yug tau tus me nyuam lawm, nws tsis nco nyuaj siab ntxiv,
vim nws zoo siab tias ib tug me nyuam tau yug los nyob hauv ntiaj teb no lawm.
22 Nej kuj ib yam : Nyem no nej nyuaj siab, tab sis kuv yuav rov pom nej dua, ces nej lub siab yuav kaj.
Yuav tsis muaj leej twg tshem tau nej txoj kev zoo siab ntawm nej mus.
23 Hnub ntawd, nej yuav tsis nug kuv txog dab tsi ntxiv lawm.
Kuv hais qhov muaj tseeb tiag rau nej :
Nej tuav txog kuv lub npe thov dab tsi ntawm Leej Txiv, mas nws yuav pub rau nej.”