Txiv Plig Cwj Vuam Chiv Yaj Nthuav Ntawv Ntshiab

Ib tsoom ntseeg thiab phooj ywg Hmoob txhua leej mloog Tswv Ntuj lus,

Rov txog hnub peb tuaj sib fim ua ke hauv lub Txoos Txi Ntuj, khaws Huab Tais Tswv Ntuj cov lus koob lus hmoov. Hnub no, lub Koom Txoos caw peb mloog saub His Xais cov lus. Yog ib co lus txhawb txhim yus tej siab ntsws kom muaj zog mus li, pab yus lub cev ntaj ntsug daws kab mob kev nkeeg pov tseg kom du lug, ntxuav vij sub vij npog auv yus tus ntsuj tus plig pov laim kom ntshiab si dawb paug kom ua neej nyob cus plaws. Vim li ntawd, peb xub caw nej mloog saub cov lus qhuab qhia ob peb los ua ntej.

Ib tsoom phooj ywg, peb yuav mloog tsis dhuav saub cov lus nplij peb txhua leej txhua tus lub siab lub ntsws. Ntshai yog peb tsis vam txog Tswv Ntuj pab. Yog leej twg vam thiab ntshaw Tswv Ntuj pab tiag, saub cov lus yuav kho tau tus ntawd nplooj siab ua ntsuag ciaj thiab tshem tas peb txhua leej txoj kev tu siab ntsawv nrees mus pov tseg. Tej ntawd ua peb mob, ua peb ntsaj. Huab Tais hlub peb ntiaj teb neeg, xav cawm peb tib neeg txhua tus. Vim peb Leej Txiv Tswv Ntuj pom peb kem txom nyem txaus. Huab Tais thiaj mloog ntsoov tus tib neeg muaj siab ntsws quaj ntsuag, raug mob raug ntsaj, raug luag ntxub raug luag hiam lo lus vam khom Huab Tais. Tib neeg tej suab quaj suab nyiav vim kev tu siab kev txom nyem laum tib neeg ua mob nyooj qas laws npaum Huab Tais Tswv Ntuj tus kheej kev tu siab rau tib neeg tej txim txhaum rov taw tuam thiab kev cam thawj qig lus. Tib neeg suab quaj, suab nroo tos ntsoov saib lub ntuj puas dauv muag los ntsia, puas cev tes tuaj hlub npaum nkaus Huab Tais Tswv Ntuj tos ntshi tib neeg ntiaj teb leej twg yuav mloog Tswv Ntuj lus, khiav khuav tuaj hais nws ib suab. Xyov peb puas paub, Tswv Ntuj hlub peb npaum li, Tswv Ntuj thiaj tshoj kom muaj saub, tus mloog Tswv Ntuj, los cev lus hais qhia Yes Lus Xas Les paub. Yes Lus Xas Les yog lub npe (Nroog thaj yeeb ; ville de paix) Tswv Ntuj tus kheej yog tus yuav nplij daws Yes Lus Xas Les kev quaj ntsuag, lub suab ntsaj, suab nroo los ua suab seev paj qeeg paj nruag kev dhia hom khaj. Kom lub “ Nroog thaj yeeb” nco ntsoov nws lub npe, yuav muaj tus nplij nws, nws yuav nyob thaj yeeb li nws lub zoo npe. Yes Lus Xas Les “Nroog thaj yeeb” tsis yog lam hu lub npe qhuav. Nws tau kev thaj yeeb vim cov neeg nyob hauv lub nroog. Tos lawv tau kev thaj yeeb, vim lawv txom nyem, muaj kev tu siab loj npaum twg, lawv tsis nrauj tsis thim txoj kev vam Huab Tais Tswv Ntuj. Lawv suab quaj suab hu Tswv Ntuj ua hnub ua hmo, lawv tej suab seev hauv lawv cov zaj thov ntuj, hauv tej tsev txoos, hauv lawv lub vaj lub tsev, ntawm lawv lub luag dej luag num…ua Tswv Ntuj mob siab tej niag zaj, nco lawv, hlub lawv. Tswv Ntuj yuav ua li cas nyob twj ywm tsis nti, tsis tig ntsej los mloog, tsis tig muag ntsia Tswv Ntuj cov me nyuam hauv lub “Nroog thaj yeeb” lub suab quaj suab pe ? Tswv Ntuj thiaj hais rau His Xais kom nplij Yes Lus Xas Les : “13 Kuv tus kheej yuav nplij nej xws li leej niam nplij nws tus me nyuam ; luag yuav nplij nej nyob Yes Lus Xas Les. 14 Nej yuav pom, nej yuav zoo siab hlo ; nej txha yuav hlav mos qas nyoos li nroj tsuag. Huab Tais yuav ua rau nws cov tub txib paub nws lub hwj huam.” Peb yuav mloog tsis dhuav saub cov lus nplij peb txhua leej txhua tus lub siab lub ntsws. Saub cov lus nplij peb, tsis yog cia peb zaum puag tes puag taw hauv vaj hauv tsev tsis ua zog tau zoo ywj siab ; los pw hauv ncoo siab siab saum txaj tsa ceg cwb co tav su tsis tau sawv. Saub cov lus nplij peb puas yuav thawb peb kom poob qab txag los txais Tswv Ntuj txiaj ntsim tsam plam ntxhiab nrhiav tsis pom Tswv Ntuj qab. Saub cov lus nplij peb puas thawb peb rau nraum zoov huas caij huas nyoog, txog sij hawm teev Tswv Ntuj pe Tswv Ntuj mus tseev kom ncav thiaj zoo yus siab. Peb txoj kev kub siab teev ntuj hauv peb lub neej, thov Tswv Ntuj ua hnub ua hmo, teev ntuj hauv yus vaj yus tsev, nqa tes ua Tswv Ntuj tsaug hauv yus hnub kaj hnub ntshiab, quaj pe Tswv Ntuj pab yus thaiv kev tsaus ntuj, pab tej neeg txom nyem, tshem lawv kev txhawj xeeb pov tseg…peb kev kub siab ua rau Tswv Ntuj nyob tsis taus twj ywm, ua rau Tswv Ntuj tig ntsej los mloog, cev tes plhws peb tib neeg tej txim txhaum pov tseg. Vim li ntawd, peb tej suab nkauj suab lus teev ntuj yuav tsis yog lam taus lam seev, ua kom lom zem laug caij laug nyoog li ntiaj teb tib neeg kev hluas lub suab nkauj suab seev. Peb cov suab nkauj suab lus, yuav hais muaj chaw txawb chaw dhos deev puas nyog Tswv Ntuj siab los mloog peb tib neeg kev vam khom khaub zig Huab Tais. Peb tib neeg tam zoj me nyuam mos tos ntshi Tswv Ntuj li leej niam txhais tes plhws thiab lub suab nqee. Leej Txiv Tswv Ntuj txoj kev nplij neeg, yog tshoj saub sawv los cev lus, tshem cov neeg nyob Yes Lus Xas Les kev txom nyem, cev tes plhws lawv taub hau, so lawv kua muag, pub kev thaj yeeb ntws nto li niam dej ntws hauv nws Leej Tub Yes Xus yug los nyob nruab nrab hauv lawv : “Kuv coj kev thaj yeeb li tus niam dej thiab cov teb chaws lub hwj chim phwj qas yaws li dej sab siv tuaj rau nws.” Cov neeg Yes Lus Xas Les qhov muag pom xyeem Tswv Ntuj lub hwj huam, tsis yog npau suav.

Zim txwv no, peb tig los ntseeg Tswv Ntuj raws li Huab Tais Yes Xus qhia. Yes Xus yog tus xaiv Pob Zeb thiab Paj Lug lawv los mus tshaj nws lub Moo Zoo thoob qab ntuj. Peb yuav mloog cov sawv los taj cov thwj tim tej lus qhuab qhia. Vim cov txiv plig, cov tswv qhia thiab vaj qhia yog cov sawv cov thwj tim lub chaw tshaj Yes Xus lub Moo Zoo nyob ntiaj teb no.
Thaum Yes Xus tseem nyob, muaj neeg coob caum Yes Xus qab ua npoj ntws. Yes Xus tau xaiv 12 leeg los ua nws pab tshaj xo ( Apôtres = Envoyés ; Hauv paus xa lus) thiab Yes Xus tau xa 72 leeg thwj tim mus ua nws ntej tam nws ntsej muag tshaj nws lub Moo Zoo. Nyob hauv Yes Xus cov thwj tim muaj pab 12 leeg thiab pab 72 leeg. Yog peb mloog kom zoo, Yes Xus cov thwj tim tsis kawg rau ob pab neeg ntawd. Twb muaj ib co poj niam tuaj caum Yes Xus thiab pab Yes Xus ntau yam. Twb muaj tus neeg poj niam thiab tus txiv neej tuaj ntsib Yes Xus, tuaj nug Yes Xus. Peb hnov Yes Xus caw lawv kom nrog Yes Xus mus tshaj Tswv Ntuj lo lus. Muaj tus neeg nplua nuj tuaj nug Yes Xus saib nws yuav ua li cas thiaj tau txais txoj sia nyob mus li. Yes Xus hais rau nws kom rov qab mus muab nws lub cuab tam muag los pub cov pluag. Kom nws los caum Yes Xus qab. Tiam sis nws ua ntsej muag ntshaus ntsho rov qab lawm. Vim nws khuv xim tseg tsis taus nws lub cuab tam. Peb pom tias Yes Xus cov thwj tim tsis kawg rau pab 12 npoj tshaj xo thiab pab 72 leeg ntawd. Vim li ntawd, tas ib tsoom ntseeg Tswv Ntuj mloog Yes Xus lus puav leej yog Yes Xus thwj tim huv si.
Hnub no, Yes Xus qhia rau peb txog kev ua Yes Xus thwj tim. Tswv Ntuj yog tus tswv qoob. Ntiaj teb neeg yog Tswv Ntuj cov qoob loo, Tswv Ntuj cog saum daim av. Txawm muaj tej suam qoob tsis qoos los kuj muaj ntau plas qoos siav daj vog. Tswv Ntuj khuv xim nws thaj qoob, xav sau kom tag los tso hauv txhab. Tiam sis, tub zog sau qoob muaj tsis txaus. Kev ua Yes Xus thwj tim yog ua tub zog sau Leej Txiv tej qoob. Peb Hmoob yog neeg ua teb, peb to taub Yes Xus cov paj lug no. Tej neeg ua qoob, tsis yog tsis khwv. Yuav tau tiv tshav tiv nag, nce toj nqes taug ris qoob loo cis fij cis tom. Tsis txog siav, sau tsis tau qoob los puv txhab. Kev tiv tshav tiv nag, nyiaj tshaib yoo nqhis, ris nra nce toj nqes taug, mus los txog siav, yog neeg ua teb txoj ke khwv. Cov tub zog sau qoob ris Yes Xus lub Moo Zoo kuj yuav khwv npaum li neeg liaj neeg teb. Kev tiv tshav tiv nag yuav tau nyiaj ntxeem yog neeg ntiaj teb kev thuam, kev twm txoj kev hwm Tswv Ntuj teev Tswv Ntuj. Peb txoj kev nkees tsis sib pab, tsis sib txhawb, kev cuaj khaum, siab dub, lim hiam, khav theeb, muab hlob, nrhiav koob meej…piv rau cov tub zog txoj kev yoo tshaib yoo nqhis li cov pluag. Yuav ua Yes Xus thwj tim, tsis kam ris Yes Xus lub Moo Zoo puas yuav mus tshaj tau Yes Xus cov lus kom thoob qab ntuj, coj tau tib neeg los mloog lub Moo Zoo ? Tus thwj tim tsis nyiam Yes Xus lub Moo Zoo, puas kam ris lub Moo Zoo mus kev deb kev nce toj, mus kom txog tib neeg tej zej zog tham qhia tib neeg paub. Tus thwj tim tsis muaj lub Moo Zoo ua nws lub nra xwb. Nws tseem yuav txuag lub Moo Zoo kom tag siab nrho tsis pub neeg thuam, tsis pub neeg hais. Tsis tas li ntawd, tus ris lub Moo Zoo tseem yuav tau plaub tau ntug. Vim lo lus ncaj nws hais yuav txiav lo lus nkaus, yuav faib kev nrau tus neeg ncaj ncees mus, kaw kev rau tus neeg lim hiav taug. Tus thwj tim cov lus yuav qhib tus lag pob ntseg kom to qhov thiab kaw tus hnov lus pob ntseg, yuav qhib tus dig kom pom kev ua neej, yuav ua tus muaj qhov muag dawm pob ntoos. Vim tej ntawd, Yes Xus thiaj ntxov qhia kom tus thwj tim ua siab loj : “Nej mus, kuv xa nej tam zoj cov yaj nruab nrab ib co hma…” Txawm muaj tus mloog tus thwj tim lus, kuj muaj tus ntxub nws, ua hma thiab tsov ncig luj luas tus thwj tim. Vim ib txwm, dab phem yeej tiv tas zog Tswv Ntuj thiab tsis nyiam cov neeg muab siab ntsws dai dhuam rau Tswv Ntuj tib leeg.
Niaj hnub no, nyob hauv cov teb chaws “koom tshaj” nom tswv txoj cai txwv nruj nreem pej xeem huab hwm tsis pub sib txoos sib sau ua npoj. Cov ntseeg twg, pawg ntseeg twg cam dhau txoj cai, nyiag kev teev hawm Tswv Ntuj nyob rau ib qho. Nom tswv tso neeg tuaj ntes, tuaj hu mus nug, mus qhia kev cai, raug lawv ntaus thiab nplawm, raug tsim txom. Muaj tej txhia raug luag muab kaw tsev loj faj. Rau nom tswv, sib sau ua ke coob, yog muag npe, lam yuav lub npe teev ntuj, yog npaj siab yuav tiv nom tswv, ntxeev nom tswv txoj cai ; txwv tsis pub neeg sib sau ua npoj, tsam muaj tus siab phem haub pej xeem huab hwm koom siab tsim kev kub ntxhov. Tus qhia kev ntseeg, yog ib tug thawj txw neeg. Yuav tsum tso neeg soj qab taug lw, mloog nws tej lus kom zoo. Vim li ntawd, luag kav cov tub tshaj ntuj lus. Luag kaw ke tsis pub yus mus ywj yus siab. Yus tsuas mus tau ncig tej zej zog thiab tej cheeb tsam luag tso kev xwb.
Nyob hauv cov teb chaws coj kev cai ywj pheej. Tib neeg tau kev to tog ua ywj nyias siab. Tau zoo nyob, nyob twj ywm yus vaj yus tsev, tsuav yus tsis mus thab plaub. Tsis muaj tug yuav hais yus ib los. Lub teb lub chaw, tej nom tswv tsuas siv siv zog sau se kom lub teb chaws nplua nuj, muaj tsev kho mob, tau kev tsheb khiav, muaj chaw kawm txuj kawm ci, muaj hauj lwm ua rau pej xeem. Sawv daws nrog nom tswv sib tw nrhiav nyiaj ib niag xyoos los tseem tsis kum yees. Sawv daws tsis yog tsis muaj nyiaj. Tej nyiaj txiaj yuav cia mus laij ncig ntuj ncig teb, mus loj leeb kom siab nqig, mus ua nab qa ziab tshav tej tug hiav nti. Leej twg yuav muaj cuab kav qhuab qhia tau tej tib neeg sib tw noj, sib tw nyob khoob. Vim nom tswv thiab lub teb chaws txw coj kam ua li ntawd. Tus yuav ua li cas, tus yuav tsis ntseeg ntuj tsis teev dab kav liam xij nyias. Txhua lub tsev teev ntuj nyob khoob vus. Tej pej xeem tau zoo noj, tau zoo nyob. Tsis nco tias muaj ntuj nyob saud. Mus teev ntuj yog nrhiav hauj lwm ua. Neeg sib tw nyob. Cov neeg ntseeg ib xyoos nkees teev ntuj dua qub, teev ntuj heev tsis zoo, yuav tau txo caij txo nyoog, teev ntuj kom tsawg thiaj haum neeg siab. Lub caij ntuj so tig los txog, yuav tsum caiv tsis txhob teev ntuj thiab…Yog muab xam los mus, ib nrab hauv cov yim neeg ntseeg Hmoob nyob Fab Kis teb, hauv ib lub xyoo 12 lub hlis, 54 lis piam, lawv puas mus teev hawm Huab Tais Leej Txiv Tswv Ntuj txog 10 zaus ? Yes Xus cov lus peb hnov hnub no tsis yog hais rau cov teb chaws coj kev cai “Koom Tshaj” los yog rau cov teb chaws ywj pheej. Yes Xus hais rau peb tus neeg ntseeg Tswv Ntuj txhua leej hnov, kom peb tig los npuab Leej Txiv zoo dua niaj hnub no.

Ib tsoom ntseeg sawv daws, txoj kev cai koom tshaj thiab txoj kev cai ywj pheej pauv tsis ntxiv. Ob txoj kev cai no, puav leej txw neeg kom ncaim mus deb ntawm txoj kev ua neeg hwm Tswv Ntuj thiab teev Tswv Ntuj. Tib neeg zoo li cov nroog tsis txais cov thwj tim tuaj tshaj lub Moo Zoo hauv tej zej zog. Peb siv zog nrhiav nyiaj dua nrhiav caij nyoog ntsib Huab Tais Tswv Ntuj. Peb yuav tau mloog lo lus no tib yam : "Tswv Ntuj lub ntuj tuaj ze nej lawm." Yog lo lus Yes Xus hais rau peb hnub no. Tsis tas li ntawd, peb kuj piv tau rau ob lub nroog txheej laus thaum ub : Xos Dos Mas thiab Nkos Mas Las, yog ob lub nroog raug Tswv Ntuj tso hluav taws hlawv cov tib neeg khov ua ncej zeb tas. Vim cov neeg hauv ob lub nroog plhom dhau kev dhau cai. Yes Xus hais tias Tswv Ntuj hnub tuaj txog thaum twg, peb yuav raug npluas pov khawv tshaj ob lub nroog ntawd : “12 Kuv hais rau nej, hnub ntawd, lub nroog Xos Dos Mas tseem yuav raug hnyav tsis npaum lub nroog ntawd.” Peb sim xav kom txaus saib, cov neeg hauv cov teb chaws koom tshaj tshaib thiab nqhis txog Tswv Ntuj, lawv raug hiam vim lawv nyiag kev los hwm Tswv Ntuj. Nyob hauv cov teb chaws ywj pheej dhuav Tswv Ntuj, nrauj Tswv Ntuj pov tseg li tej poj nrauj yawf nrauj rhuav lawv lub cuab lub yig. Peb tsoom ntseeg sim xav saib, peb ua neej rov qab, ua neej yuam kev los ua lub neej mus li cas lawm. Puas tsim nyog Tswv Ntuj npau taws rau peb ? Thov kom Huab Tais Yes Xus qhib peb siab ntsws txais nws cov lus hnub no.

01.07.2010 Cwj Vuam Chiv

Tsoom phooj ywg mloog lus thiab nyiam Tswv Ntuj,


Zoo caij zoo nyoog peb rov tuaj sib fim hauv lub txoos pe hawm peb tus Huab Tais Tswv Ntuj hnub no. Vim peb nyiam Huab Tais, peb ntshaw nws kev hlub, tos nws kev pab peb, pub peb nyob thaj yeeb nyab xeeb hauv ntiaj teb no. Peb vam ntsoov Huab Tais tseem yuav txais peb nrog nws nyob ua ke saum qaum ntuj ntawm nws xub ntiag mus ib txhiab ib txhis. Vim li ntawd, peb zoo siab ua Huab Tais tsaug, khaws Huab Tais cov lus ua txiaj ua ntsig txhawb peb lub neej kom nyob kaj siab lug tsis muaj caij kawg.
Thaum ub, peb tej poj yawm txwv koob yeej hwm ntuj, tiam sis lawv hu ntuj tsis muaj npe, vim tsis muaj tus qhia ntuj npe rau lawv paub. Zim txwv no, muaj tus qhia, cov ntseeg, cov xib hwb, cov txiv plig tau qhuab qhia Tswv Ntuj npe hu li cas. Peb thiaj paub hu Huab Tais Tswv Ntuj ua : Leej Txiv, Leej Tub thiab Leej Ntsuj Plig Ntshiab. Txij li peb txiav siab, nrauj dab qhuas tu taw tseg tig los ntseeg Huab Tais Tswv Ntuj lawm. Peb tau kawm kev ntseeg ntau, txais lub cim ntxuav tag, paub kab ke teev ntuj, twb niaj hnub nyeem thiab mloog Huab Tais Tswv Ntuj tej lus hauv tej Txoos Txi Ntuj, hauv tej caij nyoog, tej sij hawm teev ntuj. Peb hnov Tswv Ntuj lus ntau zaus. Peb kuj tseem nco tau Huab Tais tej lo lus, zaj puav lus hauv peb nruab siab.
Vim Tswv Ntuj hlub lub sim ceeb, hlub ntiaj teb neeg, hlub peb yog Tswv Ntuj haiv neeg. Huab Tais paub ntsoov tus yeeb ncuab kev lim hiam, hawv kev haub ntxias tib neeg kom sawv ua yeeb ncuab. Leej tib neeg yuav tsis muaj zog ib leeg sawv tiv tau tus yeeb ncuab. Txawm Tswv Ntuj haiv neeg yuav maim tsis dhau tus yeeb ncuab kev lim hiam. Tswv Ntuj haiv neeg yuav tsum npuab Tswv Ntuj tiv qawv kom yeej tus yeeb ncuab ua qauv tseg rau txhua haiv neeg pom. Tswv Ntuj tshoj Mai Xes, tus mloog lus, kom sawv qhuab qhia Tswv Ntuj txoj cai, rau tswv yim, ua chaw cuab zog pab His Xais Lais Tswv Ntuj haiv neeg. Mai Xes yog tus muab Tswv Ntuj lus sau tseg ua txhooj rau His Xias Lais tuav, ua cai qhia His Xais Lais teev, kav His Xais Lais tej siab ntsws. Txoj cai Mai Xes muab rau His Xais Lais teev tuaj ntawm Tswv Ntuj tuaj, yog Tswv Ntuj cai muab pab cawm His Xais Lais. Tus mloog lus, hwm txoj cai, ua li Mai Xes qhia, teev txoj cai, nws teev Tswv Ntuj. Tus yuam cai, cam thawj, hla dhau Mai Xes txoj cai, nws npuab yeeb ncuab qab tshob, tsa yeeb ncuab cai thuam Tswv Ntuj. Tus teev Tswv Ntuj, npuab Tswv Ntuj, tus ntawd muaj koob hmoo, nws muaj zog hla dhau txhua txoj kev txhawj xeeb, kev tsaus ntuj hauv nws lub neej : “11 Txoj Cai kuv kom koj mloog hnub no tsis nyob dhau koj lub zog thiab lub peev xwm. 12 Tsis nyob puag qaum ntuj…Tsis nyob puag hiav txwv sab nraum ub kom koj hais tau tias : "Leej twg yuav mus…muab los qhia peb kom peb hnov thiab coj tau li hais ? "14 Vim lo lus nyob ze ntawm koj, nyob hauv koj lub ncauj, hauv koj nruab siab kom koj coj tau li hais” Peb twb los ntseeg Tswv Ntuj, los teev hawm Tswv Ntuj, peb yog Tswv Ntuj haiv neeg rau cov haiv neeg tsis hwm Tswv Ntuj ib ncig ntawm peb ib yam His Xais Lais rau cov haiv neeg teev dab qhuas txheej laus thaum ub. Cov lus Mai Xes hais thaum ub rau His Xais Lais tseem haum rau peb tiam no thiab lwm tiam kom txog hnub kawg. Cov lus Mai Xes hais rau His Xais Lais yog Tswv Ntuj lus. Cov lus tuaj ntawm Tswv Ntuj tuaj muaj sia muaj zog. Tswv Ntuj lus hais ib tiam kav niaj txhiab ib txhis. Vim Tswv Ntuj lus ciaj sia nyob mus li ib yam Tswv Ntuj. Yav tas los, Tswv Ntuj lus qhuab qhia pab tau His Xais Lais ua siab loj siab tawv. Zim txwv no, Tswv Ntuj lus, peb yuav qhib ntsej mloog muaj txiaj ntsim nphoo ntxuas yuav pab txhawb tau peb lub neej tib yam. Tib neeg yog plua av plua tshauv, tib neeg lus tsis muaj hwj huam dab tsi. Tswv Ntuj lus muaj sia muaj zog. Tswv Ntuj tshuab pa plua av plua tshauv ciaj sia ua tib neeg. Vim li ntawd, tus tib neeg npuab Tswv Ntuj, mloog Tswv Ntuj lus txais Tswv Ntuj kev cawm, muaj sia muaj zog li Tswv Ntuj. Peb puas pom, peb tib neeg muaj hmoo loj npaum li cas. Txawm peb yog plua av plua tshauv, tsis kav Tswv Ntuj txuag peb zias, tsa peb muaj hwj chim ciaj nyog Tswv Ntuj me nyuam. Tswv Ntuj twb tsis taij dab tsi kom peb peev xwm txog. Tsuav peb nplooj siab tig los teev Tswv Ntuj, ntseeg Tswv Ntuj, peb twb ciaj nyog Tswv Ntuj neeg. Mloog Tswv Ntuj lus, tsuav yus zoo siab hlo qhib yus lub ncauj hais Tswv Ntuj lus thiab qhib yus lub siab tos txais Tswv Ntuj xwb. Tswv Ntuj tshoj Mai Xes kom qhuab qhia li ntawd rau His Xais Lais. Peb twb los ntseeg Yes Xus, peb ho qhib peb lub siab mloog Yes Xus thiab.

Thaum lub sij hawm Yes Xus tseem nyob ntiaj teb no. His Xais Lais teb kuj muaj nom tswv kav teb chaws, muaj cov neeg kawm txuj paub ntaub paub ntawv, muaj tej pej xeem txom nyem, pluag tsis txawj ntawv…Tus thoob xwm tuaj ntsib Yes Xus, yog ib tug tau kawm txuj paub ntaub ntawv, paub Mai Xes txoj cai, yog ib tug neeg ntseeg Tswv Ntuj. Lub caij ntawd, lub teb chaws His Xais Lais muaj ob pab neeg, cov nyob qab teb npe hu ua cov Yus Das. Lawv yog pab siv zog teev hawm Mai Xes txoj Cai, lawv muab siab rau teev ntuj, coj tej kab ke caiv nruj raws li txoj cai, tso nyiaj 10% ntawm lawv lub nyiaj hli rau lub Tuam Tsev Teev Ntuj. Pab nyob qaum teb hu ua cov Xas Mas Lias. Lawv tsis tshua muab siab rau ceev Mai Xes txoj Cai, tsis tshua quav ntsej, tsis caiv, tsis tso nyiaj rau lub tuam tsev teev ntuj raws li tus txhooj tus cai Mais Xes sau tseg. Hais ncaj, lawv tub nkeeg teev ntuj dua cov qab teb. Lawv tseem nyob xyaw tej pej kum neeg teev dab qhuas neeg Los Mas, neeg Hes Las, neeg Kas Nas Nias, Xis Lias…His Xais Lais ib txwm saib tej pej kum neeg qis qis, yog neeg txhaum, neeg tsis huv. Vim li ntawd, cov yawg koob Has Nplas Has, His Xas Has…lawv tsis pub lawv cov tub yuav cov nyab teev dab qhuas. Cov Xas Mas Lias ua neej nyob xyaw pej kum neeg, coj raws li neeg pej kum, tsis teev tsis hwm ntuj, txog hnub caiv tsis caiv…lawv kuj tsis ntshiab tsis huv li pej kum neeg lawm. Vim tej ntawd, cov Yus Das tsis nyiam thiab saib tsis taus cov Xas Mas Lias. Sawv daws sib thuam sib ntxub. Lawv tsis xav sib pom, tsis xav hais lus ua ke. Vim li ntawd, thaum cov thwj tim mus hla cov Xas Mas Lias zej zog tshaj Yes Xus lub Moo Zoo. Lawv tsis kam txais cov thwj tim. Peb kuj nco, thaum Yes Xus nrog ib tug poj Xas Mas Lias tham ntawm yawg koob Yas Kos lub qhov dej, ua rau tus poj niam ceeb tas. Vim Yes Xus, ib tug txiv neej Yus Das, muaj ntsej muag tsa ncauj nrog ib tug poj niam Xas Mas Lias hais lus…tsis tau pom dua !!!
Tus thoob xwm tuaj ntsib Yes Xus, tos ntsoov Yes Xus ib lo lus. Vim, lub teb chaws cav Yes Xus lub moo ncha ntws, yog yaj saub loj. Nws txhob txwm tuaj sim Yes Xus txog ntawm Mai Xes txoj cai : "Xib Hwb, yuav ua li cas kuv thiaj yuav muaj txoj sia nyob mus li ua kuv tug ?" Yes Xus xub teb nws txog ntawm txoj cai. Nws yog ib tug txawj ntawv, niaj hnub sau ntaub sau ntawv, nquag nyeem Mai Xes txoj cai. Nws yuav tsum pom, paub lub ntsiab lus loj, paub qhov tseem ceeb hauv txoj cai hais dab tsi : “Koj yuav hlub Huab Tais, koj tus Tswv Ntuj, tas koj siab ntsws, tas koj ntsuj plig, tas koj lub zog, tas koj lub tswv yim thiab hlub koj tus txheeb ze ib yam li koj tus kheej.” Yes Xus qhuas nws txawj teb raug lub ntsiab lus hauv txoj cai teev ntuj hwm ntuj. Tiam sis nws kuj xav kom Yes Xus paub nws nruab siab nruab ntsws. Nws yog ib tug neeg teev ntuj hwm ntuj. Nws siv zog hwm txoj cai thiab ua raws li txoj cai qhia kom ua. Tsuas tshuav tib qho ntxiv, nws xav paub, thaum txoj cai hais txog yus yuav hlub yus tus txheeb ze, puas yog hais yus tsev neeg xwb, los yus kwv tij xwb, los yus tej neej tsa xwb ? Txoj Cai hais tsis txog tus tsis txheeb ze yus. Yog li ntawd, thaum txoj Cai hais tus txheeb ze yus, txoj Cai hais txog leej twg ? Nws tos Yes Xus ib los meej : “Nws thiaj hais rau Yes Xus : Kuv tus txheeb ze yog leej twg ?”

Hais ntawm Hmoob ua ntej. Hmoob hais tias kwv tij txheeb txheeb : “koom roj koom ntshav, koom noj ib lub mis hlob, koom ib tug niam tug txiv, koom pog koom yawg” Yog koom niam tsis koom txiv los koom txiv tsis koom niam, twb kem zog lawm. Ib lub xeem, tsis koom pog yawg, lam ua kwv tij xwb. Twb deb zog lawm. Dua li lwm xeem, ces yog qhua lawm. Dua li qhua zej qhua zos ces yog mab sua, haj yam deb lawm. Ntawm peb Hmoob kev cai, tus txheeb ze yus, yog yus niam yus txiv, yus poj niam tub se, yus tsev neeg.

Hais txog lwm haiv neeg. Luag kuj xav tsis txawv peb Hmoob ntau. Tsuav yog ib tse neeg, koom ib cuab ib yig ces yog txheeb ze lawm. Tib neeg xav tib yam ntau txog ntawm kev txheeb ze.

Hais raws li kev ntseeg ntuj. Yus tus txheeb tus ze raws li kev cai ntseeg Tswv Ntuj, raws Yes Xus qhia rau tus thoob xwm, nws tsis zoo li peb leej tib neeg lub siab xav. Vim li no, peb tig los ntseeg Tswv Ntuj, peb yuav tau siv zog kawm kev cai ntseeg ntuj tiag tiag. Kev Cai ntseeg ntuj peb kawm tsis tag thiab tsis tiav hnub peb txais lub cim ntxuav. Luag tsuas thws lub hauv paus kev cai ntseeg ntuj rau peb kawm xwb, muab peb ntxuav plig lawm. Tus teev ntuj, yuav nrhiav kawm kev cai ntseeg Tswv Ntuj kom tag sim neej twb tsis thoob. Piv li yus tus txheeb ze raws li Yes Xus qhia, tsis yog yus tsev neeg nkaus xwb, tsis yog yus pab nyuag phooj ywg niaj hnub sib pom xwb. Yus tus txheeb ze, raws li Yes Xus qhia, yuav tau xam tus yus xav tsis txog, tus yus pom thawj zaug, ntsib thawj nplua ; tus yus ntshai pom thiab ntshai ntsib, kuj yog yus tus txheeb tus ze. Yes Xus qhia tus thoob xwm kom nthuav nws lub siab loj dua qub los mloog Yes Xus lus. Nyob hauv cov Yus Das, lawv tsuas pom lawv thiaj yog neeg zoo, qhuas lawv tsim txiaj, tsis muaj txhaum, hwm Mai Xes txoj cai nruj nreem, tso nyiaj rau lub Tuam Tsev Teev Ntuj tsis sav li. Lawv yog cov niaj lis piam yoo mov, caiv tsis ua num hnub xas npas tos, teev ntuj tsis tseg. Cov zoo, yog cov thawj coj, cov Fas Lis Xais, cov leej choj, cov Les Vis, cov Yus Das. Yes Xus paub lawv zaj tswv yim ; tus thoob xwm yog ib tug hauv pab Les Vis. Yes Xus paub tus thoob xwm xav li cas hauv nws siab. Cov muaj txhaum, cov tsis ntshiab tsis huv yog cov coj li cov Xas Mas Lias. Yes Xus thiaj muab zaj txhais no los piav qhia tus thoob xwm kom coj mus xav.
Muaj ob tug neeg Yus Das : tus leej choj thiab tus Les Vis, neeg txwj laus, neeg paub cai, hwm Mai Xes txoj cai nruj kawg. Tiam sis nkawd tuaj ntsib tus tib neeg raug txom nyem pw ntawm kev, nkawd tsis qhib qhov muag ntsia, tsis xav pom tus neeg txom nyem, ntshai nws thov nkawd nyiaj, thov nkawd zog pab nws. Nkawd lug kev, huas kev khiav kom dim txhob tau cev tes pab tus raug txom nyem. Nkawd yog neeg hwm ntuj, niaj hnub qhia Mai Xes txoj cai rau pej xeem. Nkawd coj tus yam ntxwv nruj npaum nkawd yuam pej xeem, tsis muaj siab ntsws.
Tus Xas Mas Lias, peb tsuas pom sab nraud xwb, zoo li nws tsis paub kev cai, tsis hwm Mai Xes txoj cai, tsis rau siab teev ntuj. Tiam sis, nws muaj ib pluaj siab zoo nkauj thiab muaj nqes tshaj pov haum tsis muaj twg paub. Peb tsuas pom nws pluaj siab ib pliag twb tsis pov khawv. Nws tsis ua tus neeg siab me, siab nqaim. Nws pom deev tus neeg raug txom nyem ua nruj nriaj pw pem teb. Mob nws siab npaum li yog nws tsev neeg. Nws tso sas ntws los puag lias, plhws zoj, muab cawv muab roj los qhwv tus neeg mob tej qhov txhab npaum li yog nws kwv tij. Muab nees thauj mus nkaum tshav, mus kho cawm kom ciaj rov los nrog nws poj niam tub se ua neej. Peb tsis paub tus Xas Mas Lias npe, cim tsis tau nws ntsej muag, nws twb mus dua toj lawm, nws tseem yuav rov los. Tiam sis xyov tav twg, laj tos txog lub caij nws rov los, maj ntsib nws dhau…xav ua nws tsaug ib los.

Ib tsoom phooj ywg sawv daws, Yes Xus tsis qhia tus Xas Mas Lias no lub npe rau peb paub. Tiam sis yog peb khaws Yes Xus cov lus qhia txog kev txheeb ze : “36 Lawv peb leeg no, koj xav ne, leej twg ua tus txheeb ze rau tus poob hauv cov tub sab tes ?"37 Tus no teb tias : "Yog tus tau khuv leej luag." Yes Xus hais rau nws : “Koj mus, koj ua tib yam li ntawd thiab.” Yog peg ua luag tus txheeb ze, ces peb yuav paub tus Xas Mas Lias no lub npe. Yog peb tsis mloog Yes Xus lus. Zaj txhais no, tsuas yog ib zag dab neeg zoo zoo mloog, hais laug caij laug nyoog xwb. Xav kom zaj txhais no coj tau peb txhua leej mus ntsib tus tseem Xas Mas Lias, Huab Tais Yes Xus.


07.07.2010 Cwj Vuam Chiv

Tsoom ntseeg thiab phooj ywg sawv daws,


Peb zoo siab rov tuaj sib fim mloog Tswv Ntuj cov lus ua ke. Xav kom Tswv Ntuj cov lus peb hnov hnub no, muaj nuj nqes rau peb txhua tus.

Ua ib sim neej nyob saum daim npoo av, peb yuav tsum muaj ib txoj num. Yog peb tsis ua ib txoj num dab tsi li, nej ntsia puas zoo ua neeg. Dej num muaj ntau txoj, peb ua txoj twg xav kom peb siv zog ntsos ua kom zoo, ua kom tiav. Ntseeg Tswv Ntuj, kuj yog ib txoj num loj. Tus txais kev ntseeg Tswv Ntuj, yog txais txoj hauj lwm muaj nqes tshaj. Txij peb los ua haiv neeg ntseeg Tswv Ntuj, peb nyias yuav siv zog ntsos tuav nyias txoj hauj lwm ntseeg Tswv Ntuj, hwm Tswv Ntuj thiab teev Tswv Ntuj. Ua li, peb puas pom peb txoj kev khaub zig Tswv Ntuj muaj nqes hauv peb lub neej ? Yog peb tsis nco qab pom, peb yuav tau cuab ntsej mloog peb tus yawg koob Has Nplas Has cov lus nws hais rau peb hnub no.

Hauv Has Nplas Has thiab Xas Las nkawd lub neej, muaj ib qho kev txhawj xeeb tsaus nti. Nkawd ntshaw tub ki los sov siab, los tuav nkawd lub cuab tam. Kawg Tswv Ntuj tib leeg thiaj pab daws tau nkawd kev txhawj xeeb. Nkawd niaj hnub tos Tswv Ntuj, tiam sis nkawd tsis yog yuav nyob dawb. Txog caij txog nyoog teev hawm, nkawd rau siab ntso teev hawm Tswv Ntuj ; txog caij khwv, nkawd siv zog ntsos tu tsiaj txhu : Muaj tsiaj loj, tsiaj me khiav log laig. Nkawd muag nyuj muag yaj muaj nyiaj txhawb nkawd lub neej. Nkawd ntiav tub mab tub qhe nrog nkawd tu nkawd tej tsiaj txhu. Nkawd muaj noj muaj haus tsis tshaib tsis nqhis. Tsuas tshuav tub ki, nkawd ua tsis tau kom nkawd muaj. Tswv Ntuj thiaj yog tus pab tau nkawd. Nkawd tos Tswv Ntuj uas tshais ua hmo, tos ib xyoos tas ib xyoos tuaj, kawd laus heev tsis muaj tub ki li. Muaj ib hnub, Has Nplas Has tseem zaum ntawm qhov rooj tsev tsam phooj nkaum tshav. Ua cas nws pom peb tug txiv neej nyob ntawm nws ib sab. Nws thiaj sawv tsees mus txais lawv thiab pe lawv coj lawv los so hauv tsev. Has Nplas Has txais lawv zoo kawg, muab dej rau lawv ntxuav tes ntxuav taw, tua tus tsiaj mos thiab qab nqaij tshaj rau qhua noj, tiam qhua. Yuav kom peb kub siab tsob hwb Tswv Ntuj, peb yuav tig mus ntsia Has Nplas Has.
Yog muab Has Nplas Has los piv rau peb tus neeg ntseeg Tswv Ntuj. Peb yuav pom muaj tej yam hauv peb lub neej zoo li Has Nplas Has lub neej. Qhov sib xws ntawm Has Nplas Has thiab ntawm peb, hauv txoj kev tos Tswv Ntuj, vam Tswv Ntuj pab peb. Nyob hauv peb lub neej, hauv peb nruab siab, peb kuj tos ntshis ua cas Tswv Ntuj tsis maj zeeg ua rau peb, teb rau peb tej lus vam khom thiab lus thov Tswv Ntuj. Kuj ua rau peb poob siab, ua rau peb npau taws tag rau Tswv Ntuj.
Tiam sis muaj qhov txawv ntawm Has Nplas Has thiab peb. Has Nplas Has muaj kev tso siab rau Tswv Ntuj loj tshaj peb. Has Nplas Has txawj poob siab rau Tswv Ntuj, tiam sis nws tsis cem, tsis chim rau Tswv Ntuj. Peb poob siab rau Tswv Ntuj, peb cem thiab chim rau Tswv Ntuj, nrog Tswv Ntuj ua plaub, tsib nqe ntawm Tswv Ntuj. Peb coj Tswv Ntuj nce txwj laus. Peb hais rau ib leeg, ob leeg, kaum leej tias Tswv Ntuj tsis hlub, tsis pab peb. Peb chim, tsis tuaj teev ntuj lawm. Peb tseem khiav tav zas mus nug txiv neeb txiv muam. Peb tso Tswv Ntuj pov tseg, tuaj yeem mus khaub zig tib neeg tus tsis muaj hwj huam dab tsi, npuab tus ntaim peb noj peb haus qab tshob, yuav nws zaj. Yog peb muaj txawm peem, peb rho hnya zog txiaj nyiag, yog tsis txawm peem, peb mus luab nuj luab nqe tseev kom muas tau nyuj tau npua rau txiv neeb kho peb. Tiam sis, peb tsa ncauj dawb thov Tswv Ntuj, tsis kam poob ib nplib ua koob hmoov thov pe Tswv Ntuj, txi rau Tswv Ntuj. Peb thiab Has Nplas Has ntseeg tib tug Tswv Ntuj, peb Leej Txiv tus tsim lub ntuj lub teb. Thaum Has Nplas Has txais Tswv Ntuj, nws pe Tswv Ntuj ntsej muag ti av thov kom Tswv Ntuj tuaj so hauv nws tsev. Thaum peb mus thov Tswv Ntuj hauv tsev teev ntuj, peb mus sawv tej tug ntseg ntsees muaj ntsej muag dav fo cev lus rau Tswv Ntuj. Peb sim muab xav saib, Tswv Ntuj pom Has Nplas Has thiab pom peb tas, nej hais Tswv Ntuj xav li cas txog peb ? Peb tsis txawj zoo nyiam, Tswv Ntuj puas xav pab peb ? Peb puas txawj txaj muag rau Tswv Ntuj ? Yog peb txawj saib Huab Tais Tswv Ntuj rau nqe npaum li Has Nplas Has, Tswv Ntuj yeej tuaj ntsib peb tib yam Tswv Ntuj tuaj ntsib nws : "Kuv yuav tuaj, rov tuaj cuag koj sim neej no kom ib tug tub rau koj poj niam Xas Las" Yog ib lo lus tseem ceeb, peb leej twg tos ntshis thiab khaub zig peb Leej Txiv Tswv Ntuj, nws yuav pub rau peb yam peb tos ntshis ntawm Leej Txiv npaum li Has Nplas Has. Tsis tas li ntawd xwb, Has Nplas Has tsis paub tias peb tug txiv neej ntawd yog leej twg. Ib xyoos tom qab, thaum Has Nplas Has yug tau nws tus tub. Nws thiaj to taub tias Huab Tais Tswv Ntuj ua qhua tuaj, yog muab nws tus tub tuaj rau nws. Ntawm peb kuj tib yam, peb niaj hnub tos ntshis Tswv Ntuj tuaj cawm peb. Tswv Ntuj yuav ua qhua tuaj ntsib peb xwb, peb kuj yuav tsis paub tuaj lub caij nyoog twg. Vim li ntawd, peb txoj kev mloog Tswv Ntuj lus yog ib yam tseem ceeb yuav pub peb ntsib tau Tswv Ntuj. Vim peb tus Huab Tais Tswv Ntuj nws tuaj saib peb, nws tsis kom tub mab tub qhe caij tsheb quaj lib leb ua nws ntej li tib neeg tej nom tswv thiab vaj ntxwv. Tswv Ntuj ua nchias taw tuaj ntsib tus muaj koob muaj hmoo mloog lus tos ntshis Tswv Ntuj ua tshais thiab ua hmo tsis muaj tug paub.

Hauv tsab ntawv Moo Zoo Yes Xus kuj qhia tib yam li ntawd rau peb tsoom ntseeg sawv daws. Hauv tas tsoom ntseeg Tswv Ntuj nyob thoob ntiaj teb, yog muab sawv daws lub neej los sib piv kuj sib txawv deb, tsis zoo sib xws. Cov ntseeg nyob hauv cov teb chaws koom tshaj thiab nyob hauv cov teb chaws ywj pheej lub neej sib txawv deb kawg nkaus. Hauv cov teb chaws ywj pheej, xyov hmoov dab tsi, cov ntseeg muaj kev to tog sib sau pe hawm peb tus Huab Tais raws li peb lub siab nyiam. Cov nyob teb chaws koom tshaj, hmoov tsis zoo, raug txwv, raug quab yuam tsis pub muaj kev pe hawm Tswv Ntuj raws li nyias siab nyiam. Hauv tsoom ntseeg, ib co muaj hmoo tau kev ua ywj siab ; lwm cov tsis muaj hmoo, txoj kev kaw nti tsis pom qab ua zaj twg. Ntawm peb, peb yog cov muaj chaw thiab tau kev mloog Tswv Ntuj lus ywj peb siab. Tshuav lwm cov, lawv yuav tsum nyiag kev ua neeg ntseeg Tswv Ntuj txhob qhia nom tswv paub. Hauv tas tsoom ntseeg, ib txhia muaj kev ywj siab, pom qab ua neej. Lwm cov, raug kev quab yuam, ua tsis tau lub neej ywj siab.
Ib tsoom ntseeg thiab phooj ywg sawv daws, xav kom Huab Tais cov lus muaj nuj nqes rau peb lub neej. Peb cov tau kev ywj siab, ua cas peb yuav nkim peb lub caij nyoog, tsis muab los nrhiav Tswv Ntuj, txais Tswv Ntuj. Yog peb saib Tswv Ntuj lus muaj nuj nqes rau peb tiag, peb yuav tsis kam ncua lub caij nyoog teev hawm Tswv Ntuj niaj lub lis piam. Tsis tas li ntawd xwb, peb yuav nyob tsis taus peb tus kheej twj ywm tsis co taw, tsis nti hauv vaj hauv tsev. Peb yuav nrhiav kev tawm npaum tus tsiaj kaw hauv nkuaj, tus noog kaw hauv tawb, kom mus cuag tau cov raug hiam, mus saib lawv, nrog lawv sab laj, cev tes pab lawv. Peb yuav nrog lawv koom siab cev lus thov Tswv Ntuj tas zog : “Leej Txiv Tswv Ntuj, tus tsim lub sim ceeb, tus hlub peb leej tib neeg tsis txawj tag. Peb tsis muaj yam koj ntshaw, tsis muaj dab tsi pauj tau koj lub txiaj ntsim. Lub sim ceeb koj tsim muab pub peb kav, txoj sia koj pub peb muaj. Koj ua tshav ua nag ywg peb tej qoob loo, muab tsiaj nyeg tsiaj qus ua nqaij rau peb noj. Koj tsis kheev muaj ib tug me neeg tseev kom tshaib, tuag taus nqhis. Muab av peb nyob dawb. Muab dej peb haus do. Peb twb tsis pom koj txiaj ntsha txiaj ntsim ua peb Leej Txi hlub peb tag npaum li no.
Leej Txiv Tswv Ntuj, koj tib leeg tus hlub peb dhau niaj dhau tiam. Txawm peb luaj thuam, thov koj tig muag los ntsia, dauv ntsej los mloog peb lub suab nkauj suab seev qhuas koj lub siab dawb siab zoo. Koj tsis hlub, leej twg yuav hlub peb npaum koj hlub. Koj tsis plhws, leej twg yuav ces tes plhws peb lub mob pov tseg. Koj lub suab lus, suab nqee thiaj yuav nplij tau peb lub siab chim kom zoo hlo, daws tau peb kev tu siab, pub kom peb rov qab siab ua neej, muaj lub ntsej muag rov luag ntxi. Koj txhais tes tsis roos peb, Leej Txiv Tswv Ntuj, peb neeg txhaum yuav ceeb laj ua neej saum daim npoo av. Vim koj lub hwj huam txuag nraim peb tsis tseg. Txawm peb lub cev thiab ntsuj plig tiv tsis taus ntiaj teb kev ploj kev tuag. Koj twb muab ntiaj teb kev ploj kev tuag rhuav ntsoog tas, ua tau koj Leej Tub Yes Xus sawv tsees ciaj sia nyob mus li. Yog koj tib leeg, tus yuav pab peb rhuav kev ploj tuag kom ntsoog tas, pub peb sawv tsees rov muaj sia nyob mus li ib yam koj Leej Tub. Ploj tuag peb tsis txhawj tsis ntshai lawm vim koj Leej Tub ua tus txheem tus nres mus ib txhiab ib txhis.” Peb los ntseeg Tswv Ntuj tiag, tiam sis peb tseem phob fab ntau yam li Mas Tas. Peb tuaj mloog Yes Xus lub Moo Zoo hauv tsev teev ntuj, tiam sis peb siab ntsws tseem dai dhuam rau peb kev txhawj xeeb, kev nyuaj siab. Vim li ntawd, peb yuav tau kawm Mab Liab, coj li nws xaiv kev mloog yes Xus.

Ib tsoom phooj ywg, peb yuav ntsia Yes Xus lub Moo Zoo muaj nqes hauv peb txoj kev ntseeg. Tsis yog peb mus teev ntuj rau peb xwb. Peb mus teev ntuj, vim peb nrog ib tsoom ntseeg nyob thoob ntiaj teb koom tib luj cev ua tib lub siab, teev tib tug Tswv Ntuj, nrog tib neeg koom lub ntiaj teb. Tseem muaj cov neeg ntseeg tsis tau kev sib sau teev ntuj ywj lawv siab. Peb tau kev teev ntuj ywj siab, peb mus teev ntuj, muaj txiaj ntsim pab rau cov tsis muaj kev ywj siab. Yog peb tsis saib kev teev ntuj muaj nqes, peb tso kev teev hawm Tswv Ntuj pov tseg. Ntxov lig, peb yuav ntsib kev ntxhov siab loj npaum li cov ntseeg raug luag hiam. Tsis muaj yeeb ncuab nyob qhov twg yuav tuaj hiam peb. Tiam sis yog nyias lub txhaum ntxeev ua yeeb ncuab hiam nyias. Vim li ntawd, kev teev hawm Tswv Ntuj muaj txiaj ntsim rau tsoom ntseeg thiab rau tas lub ntiaj teb neeg. Tus neeg ntseeg yuav ntsia txoj kev teev hawm Tswv Ntuj muaj nuj nqes hauv nws lub neej.

15. 07. 2010 Cwj Vuam Chiv

Rau hnub chiv tim 03-10-2010

Ib tsoom kwv tij neej tsa thiab phooj ywg,


Zoo siab rov tuaj sib fim ua ke qhib ntsej mloog Tswv Ntuj lus ntxiv. Peb tsis muaj caij nthuav kom ntxaws ntxaws. Peb tsuas piav ob peb los yam txoj kev tho me ntsis ncauj xub ke ua ntej rau sawv daws taug. Nyias mam hov riam hov txuas kom ntse mus raws Leej Ntuj Plig Ntshiab lw. Xav kom peb cim ntsoov tseg Tswv Ntuj lub suab hauv tas cov suab sab nrhoo peb pob ntseg. Peb thiaj paub lub suab twg yog Tswv Ntuj lub thiab lub suab twg tsis yog Tswv Ntuj lub hauv cov suab ncha peb pob ntseg. Yog peb npuab Tswv Ntuj ruaj thiab khov tiag, txawm peb ntsib kev txob txhawj loj npaum twg peb tau kev dai Tswv Ntuj. Yog peb mloog tsis tau thiab tsis cim ntsoov Tswv Ntuj lub suab, thaum peb ntsib kev txhawj xeeb, peb thiaj pheej mus tso siab rau tej yam nyuag tsis muaj qab hau, tsis muaj hwj huam pab tau peb li kuam thiab li yaig…tej ntawd yog tej nyuag suab nrhoo pob ntseg xwb.

Peb mloog saub Has Npas Kws piav rau peb hnub no. Nws hu Tswv Ntuj npaum li cas zaus los zoo li lub ntuj ntsiag qas to. Muaj pes tsawg zaus hauv peb lub neej, peb tau hu Tswv Ntuj thiab vam khom Tswv Ntuj daws peb tej kev txhawj xeeb pov tseg. Peb tos npaum twg los tsis pom Tswv Ntuj daws peb kev txhawj xeeb kom ploj mus. Kev nyuaj siab yim loj ntxiv tuaj rau peb. Ua cas, zoo li Tswv Ntuj nyob twj ywm ntsia peb tej siab ntsws puas ntsoog tas, ntsia peb lub neej liam txwv, ntsia lub zej zog sib cav sib ceg, ntsia lub teb chaws txhov quav niab pej xeem huab hwm txom nyem ntsuav. Zoo li Tswv Ntuj tsis quav ntsej peb dab tsi. Peb lub neej ntseeg Tswv Ntuj tsis txawv saub Has Npas Kws tej lus nws tau hais saum no. Txawm peb tsis pom Tswv Ntuj npo peb los peb tsis txhob maj poob siab, txhob ua tus neeg siab ceev siab me, chim rau Tswv Ntuj. Saub hais tias: muaj ib hnub, Tswv Ntuj teb rau saub. Tswv Ntuj kom saub muab Tswv Ntuj cov lus kos tseg rau hauv phiaj los qhuab qhia tsoom ntseeg. Saub ua li Tswv Ntuj hais. Vim Tswv Ntuj pom ua ntej tias yuav muaj neeg coob leej tuaj tsa suab hu Tswv Ntuj pab lawv yam nkaus li saub. Saub thiaj qhia tias : yam peb tsa ncauj thov Tswv Ntuj yuav pub tuaj rau peb. Kom peb tus tso siab rau Tswv Ntuj ua siab ntev tos. Ib hnub twg, peb yuav pom tshwm sim ntawm peb txhais tes : “3 Zaj yog toog kos tseg mam tshwm sim hnub kawg, yuav tsis yuam kev. Txawm nws tsis hnyoo tshwm, ua tiag tos, nws yuav tuaj tsis ntev saum no…” Txoj kev mloog Tswv Ntuj lus tsis qhia kom peb txawj ua siab ntev xwb, yog txoj kev yuav cawm tau peb. Txhob coj li tej txhia neeg, tuaj thov Tswv Ntuj pab tag, tsis pov khawv, ho mus khaub zig leej tib neeg twg ntxiv kom pab lawv ; ua li tas los tsis txaus, tseem ho yuav mus muas tsiaj txhu nrhiav thoob teb chaws kom tau tus txiv heev nyuj qhov muag yeej yeem, los tus thav npua txaij pliag, los puas tus rhaws qaib tseev plaub ntawv ntawv, vim muaj tus hais li nrhiav tseem kom tau, npaum nkaus tej tsiaj ntawd niam loj dua Tswv Ntuj, yuav thaiv tau lawv kev txhawj xeeb. Tej suab lus no, tsis yog Tswv Ntuj lub suab, yog niag tib neeg hais xwb. Peb tus tso siab rau Huab Tais, peb yuav tsum paub kom meej. Loj yog Tswv Ntuj loj, siab yog Tswv Ntuj siab. Kawg nkaus rau Huab Tais Tswv Ntuj peb yuav cia siab ntsoov. Vim li ntawd, peb yuav nco ntsoov Huab Tais Yes Xus. Tus yuav txhawb peb txoj kev ntseeg Tswv Ntuj kom khov kho, yog tus ua vaj ntxwv kav qaum ntuj thiab ntiaj teb, tus kav lub cev ntaj ntsug saum neej no thiab ntsuj plig. Tus kav puag ncov ntuj ka txog puag dab teb tsaus tag tib si : yog peb tus Huab Tais Yes Xus, tus Huab Tais cawm seej. Yes Xus nqes saum qaum ntuj los ciaj neeg thiab rov mus saum qaum ntuj tos peb mus nrog nws nyob ua ke. Tus kawg nkaus muaj hwj huam npo tau peb yog Huab Tais Yes Xus. Peb mloog nws lus.

Huab Tais Yes Xus nqes saum qaum ntuj los kom cawm tag lub qab ntuj neeg txhua leej, tus txawm paub ntuj los tsis paub, txawm teev ntuj, teev dab thiab teev mlom huv si. Huab Tais Yes Xus vam kom muaj ib pab neeg nrog nws leg nws txoj hauj lwm cawm neeg. Nws thiaj tsa muaj ib pab thwj tim. Lawv yog cov mus tshaj Yes Xus kev cawm neeg thoob qhov txhia chaw, mus tshaj “Yes Xus lub Moo Zoo”. Yes Xus pub kom lawv ua tau tej yam lawv xav tsis txog : pub lawv muaj hwj huam ntiab dab phem khiav. Lawv pom Yes Xus ua hwj huam kho tej tus mob ruas cev nqaij nqawm du dais, muaj peev xwm cheem tau cua daj cua dos ntsawj dej hiav txwv nphau tej twv nyob tau tus yees…Hmoob hais tias pom dua, tsis cuag ua dua. Cov thwj tim tsuas pom tej cim Huab Tais ua tau muaj muaj ceem xwb. Pom tas los cov thwj tim khaws tsis tau ib yam dab tsi tseg. Lawv tej siab ntsws tsis tsim los pom lub ntsiab Yes Xus xav qhia lawv. Zoo li cov thwj tim txoj kev ntseeg Tswv Ntuj tsis muaj zog, ntseeg tsis ti txha. Hnub no, peb hnov cov thwj taij Huab Tais kom Huab Tais txhab kev ntseeg ntxiv rau lawv : “Yog nej kev ntseeg lam luaj lub noob zaub, nej hais rau tsob txiv pos nphuab : nkoj cag mus thiab mus ruaj cag rau nruab deg hiav txwv ; nws yuav mloog nej lus…” Peb kuj tseem zoo li cov thwj tim los tseem twb tsis cuag lawv : ntseeg tsis ti txha. Txhais tau tias puas yog kev ntseeg Tswv Ntuj tseem ceeb dua tej tib si ? Puas yog kev cia siab rau Tswv Ntuj loj tshaj yam peb lub siab ntshaw, loj dua qhov peb tsa ncauj thov Tswv Ntuj pab peb ? Tsis yog tsis pub peb thov Tswv Ntuj pab peb. Yog peb kev ntseeg Tswv Ntuj lam piv tau luaj lub noob zaub, peb yuav tuav tau Tswv Ntuj tes dej num. Tswv Ntuj yuav pub peb ua tau tej yam peb xav tsis txog.
Tus nroj tsuag tsuas muaj kev cai nrhau cag ciaj sia saum daim npoo av. Tiam sis, vim peb kev ntseeg Tswv Ntuj, peb hais tau tus nroj tsuag tshais mus ciaj sia tau saum nplaim dej. Tej ntawd, kawg Tswv Ntuj thiaj muaj peev xwm ua tau. Tsis tas li ntawd, peb tsis yog lub ntiaj teb tus tswv. Tej plua av plua tshauv, dej nag, nroj tsuag, tsiaj txhu, huab cua, caij nyoog, lub ntiaj teb thiab lub sim ceeb muaj tswv tsim, muaj tswv kav, yog Huab Tais Tswv Ntuj. Loj yog Tswv Ntuj loj. Tswv Ntuj loj dua tus txhooj tus cai thiab lub caij lub nyoog. Tswv Ntuj xav hloov tus txhooj tus cai, Tswv Ntuj ua tau. Yog Tswv Ntuj pom zoo thiab txaus siab rau leej tib neeg twg. Tus ntawd yuav ua tau tej yam tib neeg tsis muaj peev xwm ua tau. Tus mloog Tswv Ntuj lus thiab ua Tswv Ntuj tes qav num yog Yes Xus. Huab Tais Yes Xus, Tswv Ntuj Leej Tub, tus mloog Leej Txiv lus, nqes saum ntuj los nqus ntiaj teb tib neeg npab mus saum qaum ntuj ua qaum ntuj nyab. Yes Xus ua tau Tswv Ntuj tes qav num, tsa tau neeg tuag sawv rov los. Peb tus kheej ua tsis tau li Yes Xus. Vim li ntawd, Yes Xus muaj Leej Txiv Tswv Ntuj lub hwj huam tag nrho : “Kuv hais tseeb tseeb rau nej, leej twg ntseeg kuv, nws yuav ua cov num kuv ua thiab ; nws tseem yuav ua loj tshaj ntxiv vim kuv mus cuag Leej Txiv z 14, 12” Yog peb kev ntseeg Tswv Ntuj loj li noob zaub, peb kuj yuav muaj Tswv Ntuj lub hwj huam li Yes Xus hais. Peb kuj yuav hloov tau tus txhooj tus cai kom tsob txiv pos nphuab mus ciaj sia lawm hauv hiav txwv. Txoj kev mloog Yes Xus lus coj peb ua Yes Xus thwj tim. Ua li, leej twg thiaj ua tau Yes Xus thwj tim ? Tag tsoom neeg ntseeg sawv daws puav leej yog Yes Xus thwj tim. Txij hnub peb txais lub cim ntxuav, peb nrog Yes Xus muaj Tswv Ntuj lub hwj huam nyob ntiaj teb no. Peb nrog Yes Xus tuav num tes qav num cawm ntiaj teb neeg. Tus mloog Yes Xus lus, nws tshaj Yes Xus lub Moo Zoo. Nws ua Yes Xus thwj tim, ua Yes Xus tub ntxhais txib. Peb twb ntseeg Yes Xus, tag peb sawv daws puav leej yog Yes Xus cob tub txib ntxhais txib.
Hnub no, Yes Xus qhia ib los txog kev ua tub txib. Yog peb pom txoj kev ua tub txib, ua qhev nyob ntiaj teb no. Peb thiaj yuav to taub Yes Xus. Yog peb to taub Yes Xus, peb thiaj yuav ntshaw thiab zoo siab ua Yes Xus cov tub qhe. Nyob ntiaj teb no, leej twg muaj ib tug qhev. Tus tswv yuav tsis caw nws tus qhev mus zaum ntawm rooj mov ua nws ntej. Tus qhev yuav sia nws daim ntaub xub tiam tus tswv, rau mov rau tus tswv noj ua ntej thiaj yog kev cai. Vim txoj kev txoj cai mus ua luag tub txib, ua luag qhev, yeej yuav tsum leg qav leg num kom tiav tag tib si rau luag. Twb siv zog ntso ua kom zoo tshaj, maj nroos ua kom tiav haum caij haum nyoog rau luag raws li luag kom ua. Tsis kav, luag tsis lam cev tes los txaum yim ua tus qhev tsaug. Vim tus neeg ua qhev tsuas yog ib tug me nyuam neeg dog dig.
Hais txog ua Yes Xus tub txib, ua Yes Xus qhev. Yes Xus txib peb kom ua dab tsi ? Kom peb ua Yes Xus tes qav tes num : hlub tus neeg pluag thiab tus neeg txhaum, cev tes plhws, cev tes puag tus qias neeg rau hauv xub ntiag, zam rau tus tshuav peb nuj nqes, zam tus yeeb ncuab lim hiam…Yog peb mloog Yes Xus, peb kuj zoo li tus qhev mloog nws tus tswv lus. Txawm peb mloog Yes Xus lus, peb tsuas zoo li Yes Xus tus qhev dog dig xwb. Yog hais dab tsis li ntawd ? Tus tswv ntawd yog nyuag tib neeg xwb. Tus qhev twb ua txhij ua txhua zoo tag rau nws tus tswv nyuag tib neeg xwb. Ntawm peb ne ? Tswv Ntuj yog Huab Tais Yes Xus. Loj yog Yes Xus loj, hwj huam yog Yes Xus muaj. Peb txhua leej txhua tus ntxhuav plig, peb puas leg tej qav num Yes Xus kom peb ua tiav tag rau Yes Xus ? Peb puas siv zog leg tej qav num tiav tag zoo tag rau Yes Xus npaum tus tub txib ua rau nws tus tswv nyuag tib neeg xwb ? Peb sim xav saib peb puas sawm zoo ?

Ib tsoom phooj ywg sawv daws, txawm peb tsis tsim nyog thiab tsis phim ua Yes Xus cov tub qhe. Tsis kav Yes Xus twb xaiv tau peb tuav nws tes dej num. Peb twb ntxuav plig tas, txais Yes Xus lub hwj huam ua Yes Xus tes qav num rau Yes Xus. Peb zoo siab hlo mloog Yes Xus lus : “10 Ntawm nej tib yam nkaus, thaum nej ua tas txhua yam kom nej ua, nej yuav hais : Peb yog nyuag qhev dog dig, ua tiav tas yam peb yuav tsum ua.” Thaum Yes Xus hais tias peb yog nyuag qhev dog dig. Tsis yog Yes Xus thuam peb los saib tsis taus peb. Yog ib lo lus qhuab qhia qhib peb lub siab tias Yes Xus hlub peb txhua leej tag siab nrho. Peb leej twg hlub nws tus yeeb ncuab li Yes Xus qhia, ntawm ib zeej tsoom neeg xub ntiag, peb tsuas yog Yes Xus ib niag qhev dog dig. Peb ua tiav txoj num peb yuav tsum ua rau Yes Xus xwb. Tiam sis, nyob saum qaum ntuj, peb yog tus zaum ntawm Leej Yaj tsum mov tiam mej zeeg. Leej Yaj yuav hnav nws lub zam los tiam peb: “Kuv hais tseeb rau nej, nws yuav muab siv los sia, kom lawv zaum ntawm rooj qav, nws yuav rau rau ib leeg zuj zus noj Lk12,37” Peb yog Yes Xus tus qhev dog dig nyob ntiaj teb no. Tiam sis, saum qaum ntuj, Yes Xus saib peb loj kawg. Hnub ntawd, yog hnub ntshiab hnub huv, Leej Yaj yuav muab nws lub hwj chim tsa peb rau lub chaw siab. Peb yuav pom dheev, peb tsis tsim nyog txais Leej Yaj lub txiaj ntsim loj cuag li. Ntshai twb tsis muaj ib lo lus peb yuav teev tau rau peb tus Huab Tais Yes Xus : “Huab Tais, kuv twb tsis muaj yam dab tsi pauj tau koj lub txiaj ntsim hlub kuv npaum li ntawd.”

01.10.2010 Cwj Vuam Chiv

Rau hnub chiv tim 10-10-2010

Ib tsoom ntseeg thiab phooj ywg,

Yog zoo caij zoo nyoog, peb tau rov tuaj mloog peb tus Huab Tais Tswv Ntuj tej lus koob lus hmoov tshav peb ntuj. Vim peb tib neeg lub neej, nyias twb ntsib dua thiab pom dua los lawm. Ua cas muaj hnub ntuj kaj nrig rau luag, ho pos huab nti thiab teb tsaus ntais tsis pom qab ua neej rau yus. Yog peb txawj mloog, Tswv Ntuj cov lus hnub no yuav tshav peb ntuj yam tsis muaj dab tsis pauj tau.

Nyob hauv zaj nyeem ib, Ntawv Ntshiab vaj ntxwv phau ob, piav txog yawg Nas As Maas lub neej. Nws yog neeg Xis Lias, tsis paub teev Huab Tais Tswv Ntuj li Mais Xes txoj cai qhia tsoom tub kis His Xais Lais teev Tswv Ntuj. Nas As Maas yog ib tug thawj tub rog, muaj koob muaj npe ncha ntws. Tiam sis nws raug kev nyuaj siab, ua lub neej tsaus ntuj nti, tsis muaj tus pab tau nws. Nws tau ib tug mob phem : mob ruas.
Tsis hais txheej thaud thiab tiam no. Leej tib neeg ces tiam twg los zoo tib yam pauv tsis ntxiv. Thaum tib neeg ceeb thiab tau ntshai tuaj lawm ces cuag li poob plig tas. Thaum neej tau ntshai tuaj lawm, dab, neej twb tsis ntshai npaum neej rov ntshai neej. Ruas yog yam mob neej txhawj thiab ntshai kawg kiag. Ruas yog yam tsiv mob neej kho tsis tau. Ruas ua tib neeg ntsej muag khis, tes taw nqws, ua tib neeg liam txwv ciaj khaub yuav ntoog mus txog hnub txoj sia tu. Kawg tsis pom qab ua dab tsis rau tus ruas. Luag thiaj li coj ruas mus nrauj zoo, kom ntsej tsis hnov muag tsis pom. Hmoob txheej laus thiaj qhia txheej hluas kom nyob hauv tsev liaj qhov rooj khov kho tsam ruas tuaj ruas los tsev. Txheej no txawm muaj tshuaj kho tau ruas los neeg yeej ntshai qees. Luag thiaj pheej hais tej tub mus yuav nyab, tsa tej ntxhais ua neej, kom mus yuav tej caj hmoob keeb los huv ces los zoo : “Yuav noj nceb yuav tau taug cav, yuav poj yuav sev yuav xaiv neej xaiv tsav” Lub ncauj tsis hais los vim siab ntsws nshai ruj rwg tsam nkawg tau ruas paug caj hlav ces ncau.
Yawg Nas As Maas ua luag tus thawj tub rog los nws tau niag tsiv mob ruas thoob ib ce ua neej tsis qab siab. Nws tus ntxhais qhev thiaj kom nws tuaj cuag saub Es Lis Xais pab nws. Tau tus mob phem dhau lawm ces tsuas tos ntsoov puas muaj tus pab tau yus nyob rooj teb twg. Hnov tsis tseeb nws tus ntxhais qhev lus, nws sawv tsees taug kev tuaj mus. Tuaj txog saub, nws vam tias saub yuav yoj teg yim taw muaj muaj ceem rau nws qhov muag pom tsim nyog qhuas. Tiam sis, saub kom nws nqes mus raus tus nyuag dej Yos Las Das xyas zaus, tsis txaus ntseeg hlo thiab cuag li muab nws thuam. Ua rau nws meem txom, tuaj puag Das Mas, Xis Lias teb tuaj txog. Tshuaj los tsis muab, dab tsi los tsis ua, kom yus mus raus nyuag dej qhuav qhuav xwb. Nkim caij nkim nyoog tuaj ib zaug deb tag npaum li, npau taws thiab yws : “Tej dej ntws nto nyob Das Mas pauv tsis tau los ua cas, khiav rov qab.” Tiam sis, cov tub txib sawv daws cheem thiab hais zom zaws kom ua siab ntev, mloog saub lus. Peb pom tau tias Nas As Maas tsis muab hlob li luag tej nom, nws mloog nws tej tub mab tub qhe lus. Yog Nas As Maas saib nws lub hwj chim ua nom loj, ntshai nws yuav tsis mloog tus twg hais. Nas As Maas thiaj ua tiag mus raus dej los. Ua ciav, ruas ploj lawm du lug, nws cev nqaij mos qas nyoos tuaj tiag.
Yawg Nas As Maas tuaj cuag saub, tsis tuaj tes dawb tes npliag tuaj. Nws qhwv nyiaj qhwv txiaj nqa tsoos maj tsoos ntuag. Muab ib nkawm luj thauj ob nras nyiaj nras kub nrog khaub ncaws hnav tuaj ua txiaj ntsim thov saub pab daws nws kev tsaus ntuj. Ziag no, dim plaws ruas zoo huv si, muab ob nras nyiaj nras kub rau saub ua Tswv Ntuj tsaug thiab ua saub tsaug. Los saub Es Lis Xais yig yig tsis kam yuav li. Thaum kawg, nws thiaj thov kom saub tso lus pub nws xuas ob tug luj thauj ob nras av mus tsev : “17 Nas As Maas hais tias : Dab tsi los yig tsis kom pub li, ua li thov pub rau koj tus tub txib ib nras av rau nkawm luj thauj vim koj tus tub txib yuav tsis ua txim txi lwm cov tswv ntuj ntxiv, tsuas kawg rau Huab Tais.” Nas As Maas pom His Xais Lais tus Tswv Ntuj thiaj yog tus tseem thiab txawj hlub neeg. Nws cov nyiaj cov kub ob tug luj thauj quj qees twb pauj tsis tau Tswv Ntuj lub txiaj ntsim, twb pauv tsis tau saub lo lus koob lus hmoov. Tsis tas li ntawd, cov av nyob His Xais Lais teb muaj nqes tshaj nws ob nras nyiaj thiab kub. Cia thov saub thauj ib qho av mus ua tshuaj, mus ua qhov txos, ua zaub ua mov noj, mus puab thaj txi ntuj, hlawv yaj hlawv tshis txi Huab Tais Tswv Ntuj…Los txog tav no, tej dab, tej huab tais nws nrog luag ua txij tog txij peg tsis muaj nuj nqes dab tsi, tsis yog Tswv Ntuj. Cia muab tas tej dab qhuas ntawd thim, muab nrauj pov tseg lam ua yus leg dag tsis muaj hwj huam pab tau yus. Tsuas muaj tib tug thiaj tseem Tswv Ntuj xwb, tus nyob His Xais Lais teb : “Saib, kuv paub tias tsis muaj dua lwm tus Tswv Ntuj nyob ntiaj teb no, tsuas kawg nyob His Xas Lais teb !” Peb yuav nco ntsoov Nas As Maas tej lus no. Peb cov neeg ntseeg Tswv Ntuj yuav tau coj peb lub siab kom loj kom dav cuag li peb tus Huab Tais Tswv Ntuj peb teev thiab peb ntseeg. Saub sawv Tswv Ntuj npe qhuab qhia Tswv Ntuj lus rau cov neeg teev Tswv Ntuj, haiv neeg His Xais Lais. Saub kuj cev Tswv Ntuj lus rau tej neeg teev dab qhuas li Nas As Maas. Tswv Ntuj tau cawm His Xais Lais dim kev quab yuam ua vaj ntxwv Fas Las Oos qhev los nyob twj lij teev Tswv Ntuj. Tswv Ntuj cawm Nas As Maas dim ruas los nyob siab kaj lug zoo siab hlo teev Tswv Ntuj tsis thaub qab mus zwm dab ntxiv. Saub ua Tswv Ntuj tus tub txib tshaj Tswv Ntuj lus rau ntiaj teb neeg. Peb puas pom Huab Tais Tswv Ntuj loj li ntuj loj, dav li teb dav. Huab Tais Tswv Ntuj hlub ntiaj teb neeg txhua leej txhua tus. Peb leej twg ncaj mloog saub lus. Huab Tais Tswv Ntuj kuj yuav cawm tus ntawd kom dim kev txhawj xeeb tib yam nkaus Tswv Ntuj cawm His Xais Lais thiab cawm yawg Nas As Maas. Peb tsis yog lam xav lam hais, niaj hnub no, yog peb thov, Tswv Ntuj yeej pab tau peb txhua leej.
Ze xyoo 1930, muaj ib co Txiv Plig Fab Kis mus tshaj Yes Xus lub Moo Zoo, nyob Canada qaum teb, rau cov neeg nyob ncov ntiaj teb tau ntev xyoo. Cov neeg tsis muaj leej twg tig los ntxuav plig, los ua neeg ntseeg Yes Xus. Muaj ib hnub, Txiv Plig Gérard, tau txais ob tsab ntawv tuaj Fab Kis teb tuaj. Hauv ob lub hnab ntawv, ib lub ntim ib tsab ntawv. Lwm lub, ntim ib co hmoov av nqa los ntawm leej ntshiab Thérèse Me Nyuam Yes Xus lub qua ntxa, nyob Lisieux, Fab Kis teb. Txiv Plig Gérard muab cov hmoov av nphoo rau cov neeg nws mus nrog nyob. Txij tag kis rov yav, cov neeg txawm tuaj taij thov thim dab qhuas tig los ua neeg ntseeg Yes Xus. Tej lub cim me me no qhia peb pom Tswv Ntuj tej koob hmoov loj npaum li cas. Huab Tais Tswv Ntuj tsis pluag txiaj ntsim. Tim li cas Huab Tais Tswv Ntuj tsis pluag txiaj ntsim ? Tsis hais txheej laus thaud, txheej no, los tiam neeg twg kuj tib yam. Txawm yog tus neeg ntseeg teev Tswv Ntuj, tus neeg teev dab qhuas, tus twg ua neeg ncaj ncees, hwm luag tej, saib taus luag, ua siab dawb paug pe thov Tswv Ntuj pab. Huab Tais Tswv Ntuj mloog tag nrho txhua leej. Vim li ntawd, peb hmoob lub yeem ntuj puas yog lub loj tshaj plaws, peb hmoob tsa ncauj hu Tswv Ntuj pab ? Tswv Ntuj kuj cawm Hmoob pab Hmoob. Vim Tswv Ntuj hlub Hmoob, Tswv Ntuj thiaj cawm Hmoob dim kev ua dab qhev los ua neej ywj siab teev Tswv Ntuj. Thaum peb hais tias Tswv Ntuj tsis pluag txiaj ntsim, saub, tus mloog Tswv Ntuj lus muaj cuab kav txais Tswv Ntuj cov txiaj ntsim khuv leej neeg faib tau rau lwm tus neeg txais, yim ua Tswv Ntuj cov txiaj ntsim khuv leej neeg huam vam. Tswv Ntuj cov txiaj ntsim tsis paub nqig, neeg yim txais yim huam vam xwb.
Peb hnov Huab Tais Yes Xus qhuab qhia Tswv Ntuj lub txiaj ntsim khuv leej neeg hauv zaj ntawv Moo Zoo hnub no. Tsis paub yog tim li cas Yes Xus taug kev tuaj poob ncaj lub zos ntawd. Puas yog lub zos ntawd muaj teeb meem loj, Yes Xus taug kev tuaj xyuas ? Muaj ib pab mob ruas, lub zos muab lawv xyeeb rau ib cag, vim sawv daws ntshai lawv kis mob rau sawv daws. Pab kaum leej mob ruas ua neej nyob tsaus ntuj nti, tsis muaj tug tau luag pab lawv : “Xib Hwb Yes Xus, khuv leej peb yuas.” Yog peb mloog lawv lub suab hu Yes Xus, peb paub ntsoov tias tsis muaj neeg hlub lawv. Kom Yes Xus hla los ze ntawd, thov Yes Xus hlub lawv. Tiam sis, Yes Xus tsis ua dab tsi txawv kom txaus lawv qhuas. Yes Xus tsuas hais lawv tib los raws li Mai Xes txoj cai qhia kom ua. Lawv twb niaj hnub mus teev ntuj. Lawv mloog Mai Xes txoj cai cis fij cis tom dhuav tas. Tus leej choj, yog tus muaj cai xyeeb ib tug neeg mob ruas mus nrauj zoo thiab txais tos rov los hauv zos yog nws zoo tu qab lawm : “Tau mus, nej mus thws nej tus kheej rau cov leej choj saib.” Yes Xus tes qav num zoo li tus tswv zov yaj, tso nws pab yaj rau tom hav suab puam mus nrhiav kom tau tus yaj ploj. Hnub no, Yes Xus hla tuaj ncaj lub zos ntsib pab mob ruas. Peb yuav tau tig mus ntsia Yes Xus tuaj nrog lub zos sib kho kom sawv daws tsis txhob sib ncaim : cov zoo neej thiab cov mob ruas rov los nyob ua ke. Ruas twb yog ib tug mob phem, txaus ntshai, muab cov mob cais mus nrauj zoo ib cag, tsis txhob nyob xyaw cov zoo neej, tsam ruas kis sawv daws. Mai Xes tso cai ua li ntawd. Thaum sawv daws pom zoo thiab xav li ntawd, puas yuav zoo ua neeg lawm ? Vim sawv daws ntshai, kev ntshai ua rau neeg yuam kev. Cov zoo neej xyeej cov muaj mob. Tsis yog ntshai ruas, ntxub ruas ces txawm ntxub tus neeg nrog. Qhov ntshai thiab qhov xyeej cov mob ruas tam zoj tsuj nthi cov mob ruas kom yim huab txom nyem ntxiv. Yes Xus hais kom cov mob ruas thiab cov zoo neej sib koom tiv ruas ua ke. Vim ruas yog cov zoo neej thiab cov muaj mob tus yeeb ncuab. Phim sawv daws yuav sib hlub, sib koom tiv kom yeej ruas. Yes Xus xa cov mob ruas los hauv zos, los thws lawv tus mob rau leej choj saib. Lawv mloog Yes Xus hais, ces lawv dim lawv tus mob.
Peb txoj kev ntseeg Tswv Ntuj txawv deb thiab txawv ntau tej kev cai tswj pej xeem huab hwm thiab kev ua nom ua tswv. Tsis yog feem coob xav li cas ces ua raws feem coob zaj. Muab feem tsawg yuam mus raws feem coob. Vim kev ntseeg Tswv Ntuj, yog npuab Tswv Ntuj tus Huab Tais Vaj Ntxwv loj dua tej thiab ciaj sia nyob mus li. Tsis muaj yam dab tsi los piv tau. Tas nrho tej kev cai muab sau los ua ib thooj tsis muaj hwj huam thiab pauv tsis tau kev cia siab thiab ntseeg Tswv Ntuj. Vim li ntawd, peb txoj kev ntseeg Tswv Ntuj puas yuav coj tau peb txhua tus tib neeg lub siab thiab lub tswv yim los ua tib npoj, tib tse neeg muaj Tswv Ntuj lub txiaj ntsim cuag Tswv Ntuj.

Tsoom ntseeg thiab phooj ywg sawv daws, ruas yog ib tug mob tib neeg ntshai thiab xyeej tshaj plaws. Tiam sis dua li mob ruas ntawm lub cev nqaij daim tawv, ruas kuj yog peb tib neeg tus mob kev sib ntxub. Txoj kev sib ntxub zoo li ruas ua rau peb ib tug xyeej tug hauv lub cuab lub yig, ntawm kev ua txij nkawm, ntawm kev kwv kev tij, kev neej kev tsav los ntawm yus thiab luag tus qhua tej mab sua…txoj kev sib ntxub zoo li ruas ua rau peb tib neeg nyob tsis taus ua ke, tsis xav sib ntsib sib pom cais nyias mus nyias. Tsis tas li ntawd, txoj kev sib khib, sib cav sib ceg, hauv tej vaj tse, hauv lub zej zog los hauv ib pab neeg ntseeg kuj yog zoo li mob ruas tib yam nkaus. Thaum tib neeg ciaj caub zoo li ntawd, peb zoo tam zoj tus mob ruas. Ces peb lub neej yuav tsaus ntuj nti li Nas As Maas mob ruas. Peb nyias yuav nyob nyias zoo li kaum leej mob ruas, twb txom nyem txaus hu ntuj hu teb pab. Tsuas muaj tib txoj kev yuav pab, yuav cawm tau peb. Peb tuaj tham hais qhia Yes Xus paub. Yog peb mloog Yes Xus qhia, tsa ncauj pe Yes Xus thov Yes Xus pab. Peb yuav tau txais Yes Xus lub txiaj ntsim khuv leej neeg tuaj nyab peb tej siab ntsws. Peb ntseeg tias Huab Tais Yes Xus thiaj yog tus hlub peb. Huab Tais Yes Xus yuav pab peb rhuav peb txoj kev sib ntxub pov tseg, tam lub mob hauv peb tej siab ntsws thiab hauv tswv yim peb yuav vam Yes Xus nrog peb kho. Peb yuav zoo siab hlo los npuab Yes Xus tam li tus mob ruas txawj xav taug kev rov los qhuas Tswv Ntuj, los ua Yes Xus tsaug.


08.10.2010 Cwj Vuam Chiv

Rau hnub chiv tim 17-10-2010

Tsoom ntseeg thiab phooj ywg txhua leej,

Peb rov tuaj sib sau mloog Huab Tais Tswv Ntuj lus. Thov kom cov lus hauv ob tsab ntawv no rub tau peb me nplooj siab nplooj ntsws dai dhuam rau Huab Tais Tswv Ntuj.

Peb yuav piav ob peb los ua ntej txog tsab ntawv kev tsiv, hais txog His Xais Lais lub neej tsiv teb tsaws chaw thiab ntawm peb Hmoob lub neej. Peb yog Hmoob, tsis kav Huab Tais Tswv Ntuj saib peb muaj nuj nqes npaum li tej xeem neeg tsawg nce luag toj tsuj luag teb nqes luag chaw tsuj luag nras los npaum tib yam cov pej xeem neeg coob koom teb muaj chaw nyob. Cav tsis yog Hmoob xwb thiaj yog neeg tsiv teb tsaws chaw, muaj coob muaj ntau xeem neeg. Nyob saum daim npoo av, kwv los puaj tiam, neeg yeej tsiv teb tsaws chaw. Tus tsiv teb tsaws chaw thiaj paub txog kev nyuaj siab, kev txob txhawj mus qiv luag toj ua noj, luag tais rau ntxhai. Zoo tam zoj haiv neeg His Xais Lais tsiv Hais Nkws Tos hla hav suab puam los nyob Kas Nas Has teb, lub teb chaws Tswv Ntuj cog lus muab pub ua lawv tug. Lub neej qiv luag toj khaws luag tais yuav tsum tiv poj mab yawm sua txoj qab mus voj hluas, ua tiag maim luag meej nom meej tsw thiab tej vaj ntxw tus hniav ntaj hniav riam hlais. Zoo li Mai Xes hais rau Yos Xuas : "Xaiv ib co txiv neej hauv peb tawm mus tiv As Mas Les tag kis, kuv yuav sawv saum lub ncov roob, tuav rawv Tswv Ntuj rab pas ntawm tes." Zoo tam ntua His Xais Lais raug tshav raug nag nyiaj tshaib yoo nqhis ntawm tog kev. Tsis tas li ntawd, tseem yuav tau tiv yeeb ncuab tus ntsis ntaj ntsis hmuv yim nphawv mus yim npho. Hmoob lub neej tsiv teb tsaws chaw txom nyem tsis txawv His Xais Lais. Vim li ntawd, zaj ntawv kev tsiv piav txog His Xais Lais lub neej, yog piav tas zeej tsoom neeg sawv daws tib si lub neej raug luag nto, luag tsuj. Leej tib neeg yug los hauv lub qab ntuj khwb, tam zoj tus neeg tsiv teb tsaws chaw, qiv daim av ua noj so ib ntus, mam mus txog lub teb chaw ciaj sia nyob mus li. Lub zim txwv peb nyob saum ntiaj teb no, peb tseem raug tshav raug nag, muaj mob dias hau, peb nyias muab tag nyias lub neej kev txhawj xeeb tso lis plhuav rau tus muaj rab peev xwm npo thiab cawm peb dim ntawm peb tus yeeb ncuab tes. Peb tos ntshi tus cawm peb txhais tes puag peb hauv nws xub ntiag.

Cov As Mas Les pom His Xais Lais tsuj teb hla nras. Tus vaj ntxwv As Mas Les tsis txaus siab, txhij tub rog sawv caum tua His Xais Lais pov tseg. Lawv yuav tsum sis koom tiv cov As Mas Les. His Xais Lais kev sib koom, tsis yog koom lub ncauj lo lus qhuav. Lawv sis koom siab ua ib lub, koom zog ua ib nqag. Lawv sis koom tes, cov txiv neej caj npab puv tes tsho, ncej puab puv ceg ris loj npab ntshuas sawv ua nqaj koom ua ntsa thaiv poj niam tub se. Lawv koom siab koom ntsws mloog Mai Xes, lawv tus thawj, tus coj lawv kev. Vim lawv koom tes thiab koom siab, ua npoj muaj tes muaj taw fab fo laim txias ntsim hniav ntaj hniav riam nphawv npho thiab siab ntsws tib thooj nrog Mai Xes tos ntsoov Tswv Ntuj lub zog mus thawm hnub. Txoj kev sib koom, yog His Xais Lais lub zog thiab txoj sia ua tau lawv dim plhuav kev txom nyem thiab kev tuag. His Xais Lais npab ntug thiab Tswv Ntuj rab pas nrig nplawm As Mas Les thiab nws cov tub rog qaug pes lees tag. His Xais Lais nco ntsoov, yog tsis muaj Tswv Ntuj lub zog ntxiv lawv ncej puab ntug, His Xais Lais yuav tsis dim plhuav lub lav tuag ntawm thaj chaw Les Fis Dis.
Muaj ntau lub ntsiab lus hauv zaj ntawv no peb yuav tsis muaj caij los mus piav tag. Tiam sis hnub no, peb tsuas piav ob lub ntsiab ua peb tus pas nrig txheem peb lub neej. Thawj lub ntsiab, peb muab peb lub neej los xav rau His Xais Lais. Peb zoo li His Xais Lais, tsiv Hais Nkws Tos teb, khiav ntawm vaj ntxwv Fas Las Oos xub ntiag tsis kam ua nws qhev teev nws dab, los mus teev Tswv Ntuj nyob lub teb chaws Kas Nas Has muaj mis nyuj, zib ntab zib mu teev pes yees. Peb thim khiav tsis teev Hmoob dab ntxiv, tsis ua dab qhev los mus teev Huab Tais Yes Xus vam ntsoov ib hnub twg peb yuav mus tshwm qaum ntuj noj qaum ntuj txhiam laj txhiam xws mus ib thxiab ib txhis. Peb zoo li tus tsiv teb tsaws chaw, tsiv dab los khaub zig Tswv Ntuj, zim txwv no tseem txog ib tog kev. Peb yuav mus txog qaum ntuj hnub xaus hmo kawg. Zim txwv no, peb tseem nyob nrab ke. Peb cov yeeb ncuab tseem coob tuaj puav peb kev, txhom peb mus ntsim hniav ntaj hniav riam : dab As Mas Les, dab Hmoob, dab nyiaj dab kub, dab tub sab, dab lim hiam tua neeg, dab plees dab yis, dab nom, dab tub nkeeg…tseem raug puas tsav hom yeeb ncuab hawv thiab haub tas zaj tas zog ntawm kev. Peb yuav loj npab ntshuas npuab lub Koom Txoos tiv tiag kom yeej cov yeeb ncuab no.
Lo lus ob, Mai Xes, tus tuav Tswv Ntuj rab pas nrig tsa nws ob sab npab saum roob tsis pub tes dauv ib hnub mus txog thaum hnub poob qho, pab tau Yos Xuas thiab cov txiv neej His Xais Lais thav ntaj tiv yeej kiag cov As Mas Les nram tiaj. Yog ib lub cim loj, muaj ib lub ntsiab qhia rau peb cov neeg teev Tswv Ntuj ua Tswv Ntuj haiv neeg. Huab Tais Tswv Ntuj pub nws lub hwj huam cawm neeg thiab hlub neeg qhia peb pom zem zuag ntawm nws tus tub txib Mai Xes. Npaum li cas tus cawm tag lub qab ntuj neeg yuav sawm khwv. Peb cov neeg ntseeg pom thaum Yes Xus sawm cia luag hiam nws saum ncov roob, luag tsa nws rau saum tus ntiv ncej ua daj npab cug tas lub qab ntuj neeg mus lawm qaum ntuj. Peb yog Tswv Ntuj haiv neeg sawm zoo, peb puas hais tau rau peb tus Huab Tais Yes Xus : “Huab Tais, thov txhob tso koj tus tub txib pov tseg, nws zoo siab hlo lawv koj qab taug koj hnee.”

Nyob hauv Lus Kas tsab ntawv hnub no, peb yuav nco ntsoov Huab Tais Yes Xus lo lus khov kho rau nruab siab. Zaj paj lug Yes Xus hais thiaj yuav muaj kuab ntxiv zog rau peb lub neej txhua txhia sij hawm. Peb thiaj yuav pab tau rau lwm leej lwm tus siab ntsws tiv nyog kev nyuaj siab ntawm nws lub neej. Peb lub neej ua neeg ntseeg Tswv Ntuj, teev Tswv Ntuj tsis yog zaj dab ntub los npau suav. Nyob hauv zaj npau suav, yus ya taus nrog huab nrog cua tam zoj noog liaj noog luv yuj ntab sis yeev tej nta ntuj. Cas yuav pom tej toj roob hauv pes txawm tau laug los sib tib tshav ntuj nrig puag qab ntug ntsuab sab tim i kho siab zim. Tsim dheev nruab dab ntub, ua ciav niag npau suav xwb. Xav txog, haj khuv xim yus zaj npau suav tsis tau kawg. Txoj kev cia siab thiab ntseeg Tswv Ntuj, yog ib txoj kev coj peb lub neej kom tsim meej peb kev npau suav : “Ua cas, yus txhawj xeeb tag npaum li no rau yus tus txheeb ze. Hnov hais tias ntxuav plig zoo. Ntshai yuav muab yus tus txheeb ze ntxuav plig kom dim nws tus mob tus ntsaj…” Yog ntseeg Tswv Ntuj lam ua tau yooj yim cuag li yus xav, ntshai tiaj nrag ntseeg txhij qaum pes ntseeg txhua, tsis txog yuav tiv tshav tiv nag khwv ciaj khwv tuag nthua nroj tom teb, muab kiag kev ntseeg pauv noj pauv haus xwb tsis tshaib tsis nqhis lawm. Yog yooj yim npaum li ntawd, peb los ntseeg Tswv Ntuj, muaj nuj nqes dab tsi ? Peb kam tsij ntseeg peb tus kheej, peb nyob peb tus kheej tau zoo tshaj. Thaum peb xav kom peb dim peb tus mob, peb xav kom peb tej txheeb ze dim kev nyuaj siab, peb xav kom peb tus yeeb ncuab yaj thiab ploj mus…Peb cia li yuam kom Tswv Ntuj ua rau peb li peb siab xav. Peb leej twg muab kev ntseeg Tswv Ntuj xav yooj yim npaum li ntawd, tus ntawd xav luaj nyug xu luaj ntug li tej laus hais. Thaum yus muab txoj kev ntseeg Tswv Ntuj coj los xav li yus nyiam, yus pom xwb, puas yog yus ntseeg Huab Tais Tswv Ntuj tiag ? Tswv Ntuj puas zoo li yus xav ? Vim li ntawd, kev ntseeg Tswv Ntuj tsis mus li peb lub tswv yim thiab tej siab ntsws xav tau. Xav kom peb txhua leej nco ntsoov Huab Tais Yes Xus Pleev cov lus hauv nyias nruab siab tsis pub poob. Txoj kev ntseeg Tswv Ntuj, yog ib txoj kev kaj lub sim ceeb rau tas txhua tus tib neeg : “Kuv yog ntiaj teb qhov pom kev…Z 8,12” Tus zoo siab txais kev ntseeg thiab nyiam Tswv Ntuj, yuav tsum thov nkag los txais los kawm kom paub Tswv Ntuj, paub nyiam, paub teev, paub hwm Tswv Ntuj. Tiam sis yog peb mloog Yes Xus kom zoo zoo, Yes Xus hais tias, tos peb los xaiv Tswv Ntuj ua peb Leej Txiv, vim Tswv Ntuj twb xub xaiv peb : “Tsis yog nej xaiv kuv, yog kuv xaiv nej Z15,16” Tos peb ntshaw Tswv Ntuj, nyiam Tswv Ntuj, vim Tswv Ntuj xub nyiam peb. Tos peb paub tias Tswv Ntuj nyiam peb, npaum li cas zaus, Tswv Ntuj npo peb dim kev tsaus ntuj txij hnub peb tig los mloog Tswv Ntuj, los tsob hwb Tswv Ntuj. Peb lub neej txawv npaum li cas yav thaum peb tseem tiam dab qhuas. Pes tsawg tus tsiaj peb tsis tua lawm. Yog muab xam nuj xam nqi raug pes tsawg nyiaj, peb dim plaws tsis tau them ; xam tas los raug npaum li cas txiaj, peb puav leej khaws tau cia hauv nas. Peb puas ntsia lub txiaj ntsim Tswv Ntuj tau pab peb loj thiab tseem ceeb rau peb npaum li cas txij li peb los teev Tswv Ntuj ? Peb tseem yuav taij kom Tswv Ntuj pab peb loj tshaj li cas ntxiv ? Leej ntshiab Paj Lug, tus tshaj Yes Xus lub Moo Zoo thoob ntiaj teb hais li no rau cov ntseeg Yes Xus nyob Es Fes Xos, Hes Las teb, thaum lub Koom Txoos pib sawv cia sia los. Paj Lug yog peb ib tug yawg koob hauv kev ntseeg Yes Xus, nws hais li no rau lawv : “ Kwv tij, Tswv Ntuj twb ntxov xaiv peb los ua nws haiv neeg…Nej tau hnov lo lus tseem ceeb hauv Leej Pleev, lub moo zoo cawm tau nej ; nej ntseeg nyob hauv nws, nej muaj lub cim Leej Ntuj Plig muab nej maim…EFX 1,11.” Paj Lug kuj hais tib yam, vim Tswv Ntuj xub nyiam xub xaiv peb, hnub no peb thiaj los ua haiv neeg ntseeg Tswv Ntuj, muab Leej Ntuj Plig maim peb ua Tswv Ntuj me nyuam. Dab ntshai rwg tsis kav tuaj vij peb. Tiam sis, peb tseem pom tshuav tej kwv tij neej tsa, tej ntsuab tej ze, tseem rau siab ntso niaj hnub ua zaj qub, ua lub neej xeeb txob tsaus ntuj nti. Xam los hlub lawv, xav pab xav qhia lawv los tsis pom qab hais lo twg rau lawv. Peb twb los ua neeg ntseeg Yes Xus, peb yuav ua ib siab coj tag peb lub siab lub ntsws, lub tswv yim thiab lub neej kom tag du lug los thawj Yes Xus, npuab Yes Xus. Peb tsis txhob tos, tsis muaj leej neeg los leej dab hlub peb tshaj Yes Xus nyob qhov twg ntxiv.
Lub ntsiab lus twg peb yuav khaws tseg hauv Lus Kas zaj ntawv peb mloog hnub no thiab nws yuav pab peb zoo li cas ? Tej zaum pab kom peb txoj kev teev ntuj tsis txhob mus raws li peb zaj thiab peb siab nyiam xwb, kom mus raws li tus neeg tso siab rau Tswv Ntuj thiab nyiam Tswv Ntuj zaj. Tus neeg ntseeg Tswv Ntuj, tso siab rau Tswv Ntuj zaj, nws tsis paub ua ntej xyov Tswv Ntuj yuav pab tuaj los tsis pab rau nws cov lus thov lus vam khom. Tiam sis nws taij tas zog Tswv Ntuj yam tus me nyuam taij tas zog leej niam thiab leej txiv ua rau nws noj. Niam thiab txiv mloog ces tau noj, niam thiab txiv tawg ncuav ces khaws quaj. Peb ntseeg Tswv Ntuj, peb puas kam ua li tus me nyuam ntawd tiag ? Vim Tswv Ntuj nyiam tus tib neeg ntseeg Tswv Ntuj coj li tus me nyuam niam txiv ua noj tag luag ntxhi, los puas niam txiv ntaus tag rov los khawm niam txiv xub ntiag. Txawm niam txiv tau ncuav pias los niam txiv yeej hlub tas zog tus me nyuam, tsis yog niam txiv tsis hlub. Tus me nyuam mob dias hau, niam txiv yeej txhawj tsis tag yuav nrhiav tshuaj kho kom me nyuam zoo. Tswv Ntuj hlub peb tshaj peb tsa ncauj thov Tswv Ntuj pab. Yes Xus caw kom peb mloog tus tswj txiav txim muab hlob tsis hwm Tswv Ntuj thiab tsis hlub neeg. Hauv nws lub siab phem twj muaj me me npliag tib neeg tsis nqhuab. Ua cas peb tseem ntaus siab yau rau Tswv Ntuj, tus hlub peb leej tib neeg loj npaum li ? Txawm tsis pom Tswv Ntuj ua dab tsi teb peb lo lus taij Tswv Ntuj los txhob poob siab, txhob txhawj tus tsi : “6 Huab Tais hais : Nej mloog tus kws txiav txim tsis quav ntsej neeg no ; 7 Tswv Ntuj, tus ntev npaum li nws rau luag, yuav tsis ua dab tsi pauj rau cov nws xaiv tau tuaj ua hnub ua hmo taij nws lod ?” Tos Yes Xus hais tau li ntawd, Tswv Ntuj twb pab tuaj rau peb tas txhua yam hauv peb lub neej, nruab hnub rau peb khwv ua noj, hmo ntuj rau peb so los siav. Tshuav peb txoj kev txhawj xeeb, Tswv Ntuj twb qhia tag hais tag kom peb ua li cas rau li cas. Tiam sis peb zoo li tus me nyuam qig lus rov qab mus taij, mus nug kev pab ntawm Tswv Ntuj dua. Peb sim xav saib peb puas sawm zoo ? Peb kuj yuav nco ntsoov Yes Xus cov lus nws tau hais li no ntxiv: “Vim li ntawd, kuv thiaj hais rau nej, tas puas tsav yam nej tsa ncauj thov, nej yuav tsum ntseeg tias nej twb tau txais lawm, ces nej yuav pom dheev pub rau nej lawm tiag Mc11,24.”

Ib tsoom ntseeg thiab phooj ywg, peb yuav cia siab ntsoov rau Tswv Ntuj tag siab nrho. Vim yog peb ntseeg Tswv Ntuj, cia siab tag rau Tswv Ntuj, peb yuav pom tej txiaj ntsim peb tau txais ntawm Tswv Ntuj muaj ntau tsav ntau yam tiag. Tsis txog peb tseem yuav thov ntxiv kom tab kaum Tswv Ntuj. Peb sim xav, Tswv Ntuj hlub peb txog txij muab nws Leej Tub ua peb tus ntsuab tus ze, tus txhiv peb. Yog peb mloog Yes Xus, peb thiaj tsim nyog Yes Xus txoj ke sawm hlub tag ntiaj teb neeg ua daj npab cug sawv daws hauv xub ntiag thiab ris ntiaj teb neeg kev txom nyem saum ntiv ncej Ntoo Cuam, dai qas ncuv ntiaj teb tus ntoo maj ntoo tov.

13.10.2010 Cwj Vuam Chiv

Rau hnub chiv tim 24-10-2010

Tsoom niam txiv kwv tij neej tsa thiab phooj ywg,

Twb rov txog hnub peb tuaj teev Tswv Ntuj pe hawm peb tus Huab Tais ciaj sia nyob mus li. Peb yuav ua nws tsaug tsis txawj tag rau nws cov lus qhuab qhia peb hnov hnub no. Lub ntsiab lus yog kom peb tsis txhob ua tus neeg muab hlob khav theeb ntxim ntxub rau cov tib neeg nyob ib ncig ntawm peb thiab ntawm Tswv Ntuj xub ntiag.

Tus neeg muab hlob thiab khav theeb tsis yog ntawm neeg luag thiaj dhuav thiab ntxub xwb. Kuj dhuav Huab Tais Tswv Ntuj thiab tseem yuav raug ntiab tawm ntawm Tswv Ntuj xub ntiag. Thawj tus khav theeb thiab muab hlob, yog tus dab phem xas tas, tus sawv tiv Tswv Ntuj, ua kom ib yam pluam thiab tawg mus ua ob peb yam, lus Hes Las hais tias : “διάβολος, diable, diviseur (celui qui divise)” Dab phem xas tas, tus tsim kev kub ntxhov, nws tsim li cas ? Dab phem yog ib tug khav theeb muab hlob, nws khav nws loj thiab ntse ib yam Tswv Ntuj nws tus Huab Tais tsim nws. Huab Tais Tswv Ntuj hais ib lo lus zoo, dab phem muab Tswv Ntuj lo lus ntxeev kom neeg lub siab thiab lub tswv yim ua xyem xyav, kom neeg yuam kev. Dab phem pom Tswv Ntuj tsim tau tsoom dab cov ntsuj, tsim tau lub sim ceeb, txheej huab saud thiab lub ntiaj teb, huab cua, tsiaj txhu, xyoob ntoo thiab leej tib neeg muaj lub cev thiab ntsuj plig. Thaum Tswv Ntuj tsim tau tib neeg, Tswv Ntuj zoo siab luag ntxhi. Tswv Ntuj hlub leej tib neeg tsis txawj tag, txuag zias leej tib neeg hauv Tswv Ntuj lub vaj hloog Es Dees. Peb tseem nco, Tswv Ntuj hais li no rau tib neeg lub qhov ntsej : « Koj noj tau tas txhua yam ntoo hauv vaj, tshwj zias tsis noj tsob ntoo qhia qhov phem qhov zoo, vim hnub twg koj muab noj, yuav ua koj raug kev ploj tuag HP 2,16.17 » Tswv Ntuj hlub hlub neeg, qhuab qhia ceeb toom lo lus zoo kom maim dhau kev txhawj xeeb. Tswv Ntuj lo lus hwj xwm tij neeg nyob ntawm Tswv Ntuj xub ntiag. Tswv Ntuj txuag zias tib neeg hauv Tswv Ntuj lub vaj loog, tsi muaj mob, tsis txob tsis txhawj dab tsi. Tus yeeb ncuab dab phem, tus muab hlob paub Tswv Ntuj thiab tib neeg, tshwm sim tuaj nrog tib neeg hais lus. Nws tsis yog tuaj dawb tuaj huv tham pem. Hauv nruab siab, nws khav nws loj thiab ntse cuag Tswv Ntuj. Nws muab Tswv Ntuj lo lus zoo, lus qhuab qhia ntxeev hais dua ib zag txawv txawv. Nws hais rau tib neeg : « Tswv Ntuj hais tias neb noj tsis tau txhua yam ntoo hauv lub vaj…HP 3,1 » Dab phem muab Tswv Ntuj lo lus ntxeev ua dab phem lus. Cov lus dab phem hais tsis yog cov lus Tswv Ntuj hais. Dab phem yog ib tug ntxeev lus, tsim kev kub ntxhov, qhov zoo muab ua kom phem, liam txwv ; qhov yog, muab hawv kom luag ua xyem xyav hauv luag lub siab thiab lub tswv yim, ua kom luag yuam kev, ua kom neeg sib ncaim, sib cav sib ceg, tawg paim quav ua pab ua pawg. Tib neeg mloog lus ces ciaj sia, cam thawj muab tsob ntoo caiv los saj ces tuag tseeb. Peb ntiaj teb neeg cov muab hlob thiab khav theeb, muaj tswv yim txawj nkhaus lem neeg kawg. Cov neeg khav theeb yeej tsis haum luag ob cag, nyiam plaub ntug, ua rau luag dhuav thiab ntxub npaum nkaus tib neeg dhuav thiab ntxub dab phem. Tus tshaj xo Paj Lug mus qhuab qhia Huab Tais Yes Xus lub Moo Zoo rau cov neeg teev pej kum dab txog ntau lub teb chaws. Paj Lug ntsib tej tug neeg muab hlob thiab khav theeb. Paj Lug muab cem txaus nkaus thiab cem mob kawg : “Nws hais rau Es Lis Mas, tus ua hwj huam hem thiab ntxias luag, noob dab phem, yeeb ncuab kev ncaj ncees, koj puas yuav tseg tsis xyav Huab Tais txoj xub ke ncaj ncees HL 13,10” Vim thaum chiv lub keeb, dab phem yeej ntxias tau tib neeg yooj yim ua dab phem tub ki tiag : nkhaus thiab muab hlob. Peb tus neeg ntseeg Tswv Ntuj, ua Tswv Ntuj me nyuam yuav tsum xyaum tso txoj keb khav theeb thiab muab hlob pov tseg. Vim txoj kev khav theeb thiab muab hlob coj tsis tau peb los npuab Tswv Ntuj : “Txawm Huab Tais nyob siab npaum twg, nws twb pom tus neeg me ; txawm nyob deb npaum cas nws paub tus neeg muab hlob NPN 137,6” Peb xyaum ua tus neeg me thaum twg, peb sawv tiv dab phem thaum ntawd. Vim kev ua tus neeg me, tsis tshua yooj yim. Yus yuav tsum ua neeg xyuam xim rau tej lus yus yuav hais, xyuam xim hauv yus lub neej, nrog ib zeej tsoom neeg. Peb hnov Npes Xis Las qhuas tus neeg me hais lus saib taus neeg. Tus neeg me ib txwm ua ntxim Tswv Ntuj siab, hais lus Tswv Ntuj mloog tsis dhuav, ua rau Tswv Ntuj tshua cov neeg me tsis txawj tag saum yaj ceeb no thiab ntawm Tswv Ntuj xub ntiag mus ib txhiab ib txhis : “17 Tus neeg me zaj thov ntuj mus tshab txheej huab saud, yog mus tsis txog nws siab yuav tsis nqig.” Peb xyaum ua tus neeg me saum neej no thaum twg, txawm peb tsis paub, yog Tswv Ntuj tuav peb tes coj peb ua neej. Tsis tas li xwb, tus neeg me tshaj Tswv Ntuj lub npe rau ntiaj teb neeg, tuav Tswv Ntuj txoj qa num. Qhov peb txuag thiab ntshaw coj tus yam ntxwv ua tus neeg me hauv peb lub neej, yog txuag Tswv Ntuj lub npe tsis cia neeg thuam Tswv Ntuj. Qhov peb txuag Tswv Ntuj lub npe, yog peb hwm Tswv Ntuj, peb nrog Tswv Ntuj hlub tag lub sim ceeb Tswv Ntuj cia rau peb saib xyuas. Peb los ua lub Koom Txoos me nyuam, ua Tswv Ntuj haiv neeg hauv ntiaj teb no rau cov neeg teev dab qhuas, tsis paub Tswv Ntuj, tsis hwm Tswv Ntuj kom lawv los zuj zus los npuab Tswv Ntuj thiab. Vim muaj tus neeg me sawv nruab nrab ntiaj teb neeg cov muab hlob thiab khav theeb, Tswv Ntuj lub txiaj ntsim nyab tus neeg me thiab nyab mus txog cov muab hlob. Peb ntseeg tias cov neeg muab hlob thiab khav theeb tau txais Tswv Ntuj lub txiaj ntsim hlub lawv vim Tswv Ntuj hlub cov neeg me nyob nruab nrab hauv lawv.
Peb hnov Huab Tais Yes Xus cem cov muab hlob pov khawv nkaus. Hnub no, peb yuav nco ntsoov rau nruab siab zaj txhais hais txog tus neeg muab hlob thiab tus neeg txhaum. Tus muab hlob khav hauv nws nruab siab, nws yog tus zoo, tus ntse, tus txawj thiab paub tshaj luag tej tib neeg huv si, tsis muaj qhov xyeej nyob rau hauv nws. Hauv tsev teev ntuj, tus Fas Lis Xais muab hlob mus qhuas nws rau Tswv Ntuj yam muaj plhus ntxiag. Nws mus khav tag nrho yam nws txawj ua, yam nws ua tau, yam nws paub rau Tswv Ntuj mloog. Tiam sis peb hnov, Yes Xus tsis qhuas tus neeg zoo li ntawd. Thab raug Yes Xus cem. Ntawm peb los tib yam, peb yuav tau ceev faj kom zoo. Thaum peb raug cov neeg ib ncig ntawm peb muab peb thuam thiab muab peb tsawm. Yog ib lub cim qhia peb paub tias peb kuj yuav raug Huab Tais Yes Xus cem thiab qhuab qhia peb nyhav ib yam. Peb yuav nco ntsoov zaj txhais no coj mus xav rau nyias. Peb yuav tsis txhob xav hais tias Yes Xus zaj lus qhuab qhia hnub no, yog hais luag ob cag xwb. Cov lus Yes Xus hais hnub no puav leej hais rau tus poj niam, tus txiv neej, tus laus tus hluas huv si. Yes Xus tsis hais rau luag hnov xwb, Yes Xus hais rau peb txhua tus hnov yog hais rau peb txhua tus tib si kom siv zog ua neeg me.
Tshuav ib lo lus ntxiv, tej zaum ib txhia yuav nug tias vim li cas Yes Xus cem tus neeg khav theeb ho qhuas tus neeg txhaum ? Tus neeg txhaum yog tus deev hluas, tus tua neeg, tus ua tub sab, tus neeg cuaj khaum, tsis teev tsis hwm Tswv Ntuj, tsis hlub neeg…Ua cas Yes Xus tseem qhuas tus neeg txhaum ? Peb yuav tsum paub qhov Yes Xus qhuas yog qhuas dab tsi. Yes Xus tsis qhuas qhov phem tus neeg txhaum tau ua. Vim kev txhaum yog ib qho phem kawg. Yes Xus kuj tsis qhuas tus neeg khav theeb lub siab muab hlob vim yog ib qho phem kawg. Peb yuav tsum thoob tsib to nrog. Qhov Yes Xus qhuas, yog qhuas tus neeg txhaum nws txawj ua neeg me, thov Tswv Ntuj zam rau nws. Tus neeg txhaum pom nws tej txhaum loj thiab ntau heev. Nws tej txhaum yog nuj nqes nws tshuav ntawm luag tej thiab tshuav ntawm Tswv Ntuj. Nws yuav them tsis tag nws tej nuj nqes, nws tej txhaum. Nws tuaj khaub zig pe thov Tswv Ntuj pab thim nws tej nuj nqes, thov Tswv Ntuj hlub nws. Tus khav theeb, nws tuaj qhuas nws rau Tswv Ntuj mloog, tsis pom nws tej txhaum ib qho luaj plaub hau. Neeg khav theeb, yog neeg dag. Vim tus khav theeb yog neeg txhaum, txawm tsis tua neeg, nws twb thuam luag, saib tsis taus luag, twb yog txhaum. Nws txawm caiv mov, yoo tshaib los nws tsis hlub cov pluag, tsis plhws cov muaj mob, cov tshaib plab thov mov noj nws tseem npau taws, txhaum tsis loj twb txhaum li tej tib neeg. Nws tseem muaj cuab kav hais rau Tswv Ntuj mloog : nws yog tus zoo tshaj luag tej. Tus neeg muab hlob, khav theeb yeej tsis txawj txaj muag, hais lus loj loj, saib nws muaj muaj nqis : “Vim leej twg saib nws tus kheej siab yuav poob qis, leej twg saib nws qis yuav raug tsa nyob siab.”

Ib tsoom phooj ywg Hmoob sawv daws, yuav kom peb paub peb zoo. Peb yuav tsum cuab ntsej mloog luag tej hais peb. Piv txwv li hais txog peb Hmoob. Hmoob yog ib haiv neeg zoo li cas ? Peb yuav tau mloog cov neeg hlub Hmoob, nrog Hmoob nyob ciaj ua Hmoob lawm. Saib lawv hais li cas txog peb Hmoob. Thaum yus mloog luag tas, yus thiaj paub tseeb hais tias yus haiv Hmoob zoo qhov twg phem qhov twg. Peb haiv Hmoob, muaj ntau qhov zoo. Tej yam zoo hauv Hmoob xws li txoj kev txais qhua tiam qhua. Hmoob ua zoo kawg. Qhov zoo hauv Hmoob tsis ua teeb meem ces tsis piav ntau. Qhov phem hauv Hmoob ua teeb meem loj, ces yuav tau piav ob peb los. Muaj ib tug txiv plig nrog Hmoob nyob ntev los, hlub Hmoob, muab nws lub neej los pab Hmoob mus txog hnub kawg. Muaj ib hnub, tus txiv plig ntawd nrog nws pab phooj ywg tham. Lawv txawm tham los txog rau ntawm Hmoob. Lawv tsis paub tias kuv hla los ncaj ntawm lawv ib sab. Kuv hnov lawv hais txog Hmoob, ces kuv txawm nres zog mloog saib lawv hais dab tsi. Muaj ib sab phab ntsa thaiv tas, lawv los tsis pom kuv thiab kuv kuj tsis pom lawv : “Hmoob lub neej nyob roob nyob hav xwb, Hmoob ua neej txom nyem ntau…Hmoob tsis nyiag khoom, tiam sis Hmoob qiv tau yus ib yam khoom lawm mas cia li tsis xa rov qab li lawm…Qhov teeb meem nyob hauv Hmoob, Hmoob yog ib haiv neeg muab hlob thiab khav theeb…” Tej lus no, luag tsis tab meeg hais rau yus paub. Tiam sis, thaum luag sib tham luag ua rau yus hnov xwb. Tej lus no, kuj yog tej lub cim qhia rau yus paub meej txog yus haiv neeg. Vim peb muaj kwv tij neej tsa Hmoob los ntseeg Tswv Ntuj. Peb twb hnov Huab Tais Yes Xus cov lus qhuab qhia cov Fas Lis Xais, yog ib co neeg muab hlob. Ntau zaus Yes Xus cem lawv hnyav kawg. Peb nyias yuav tsum tso txoj kev khav theeb hauv nyias pov tseg. Tig los xyaum ua tus neeg zoo nyiam, tus neeg me raws li Yes Xus qhia.


20.10.2010 Cwj Vuam Chiv

Rau hnub chiv tim 21 lub 11 hlis 2010

Ib tsoom ntseeg thiab phooj ywg sawv daws,


Hnub no, yog hnub xaus lub xyoo teev hawm Tswv Ntuj xyoo 3. Lub lis piam tom ntej, peb pib dua lub xyoo teev hawm Tswv Ntuj xyoo tshiab. Niaj lub xyoo, thaum txog lub lis piam xaus xyoo teev hawm Tswv Ntuj, lub Koom Txoos Kav Tos Liv txhib tag ib zeej tsoom neeg ntseeg ua hmoov nco txog peb tus Huab Tais Yes Xus ua Vaj Ntxwv kav lub ntuj lub teb.

Hnub no, peb yuav nthuav ob lub ntsiab lus hais txog Huab Tais Yes Xus ua Vaj Ntxwv kav lub sim ceeb. Tiam sis peb xub nrog sawv daws tham ua ntej, xub nug sawv daws : Nws muaj nuj nqes dab tsi rau peb cov neeg ntseeg Tswv Ntuj ua hmoov nco txog Huab Tais Yes Xus yog lub sim ceeb tus Vaj Ntxwv ? Yog peb tsis hwm Huab Tais Yes Xus ua lub sim ceeb tus Vaj Ntxwv puas txhaum dab tsi ? Peb sim muab xav saib, peb yog me nyuam. Peb muaj niam muaj txi yug tau peb, tu peb da quav da zis hlob, tsa peb ua neej tsheej cuab ntseg yim. Yus nco txog yus niam yus txiv lub txiaj ntsim kev iab kev daw tus yus hlob, ces yus khiav khuav saib xyuas lawv. Los puas, yus ua neeg mom txheej, puam chawj, tsis quav ntsej, tsis nco yus niam yus txiv tej txiaj ntsim, tsis saib tsis xauj yus niam yus txiv. Yeej muaj ib txhia me nyuam, ib txhia neeg zoo li ntawd, puas yog ? Kuj tsis dua ntawm peb xav. Saib yus yog neeg mom luag txheej los neeg nco txiaj ntsim xwb. Nej ho mus yug tau ib co me nyuam, nej tu lawv hlob tiav neeg tas. Ib co ncawg nej, khiav khuav saib xyuas nej. Muaj leej puav khiav lawm ploj qab ntais cuag tsis yog nej yug lawv, ua li puas txhaum, puas txawv li cas ? Peb yuav hwm peb niam peb txiv los peb tsis hwm ? Tsis muaj leej twg yuav teb tau rau peb, kawg peb tus kheej. Tsis yog vim tus khiav khuav saib xyuas nws niam nws txiv yuav nplua nuj npaum ub npaum no ; tus ho khiav ploj qab ntais lawm tsis quav ntsej nws niam nws txiv kuj tsis pluag txom nyem qas ntsuav. Qhov peb xav tham txog hnub no, tsis yog qhov nplua nuj li ub li no, los qhov txom nyem. Lub ntsiab, yog hais txog tus siab zoo, thoob tsib, tus nco txiaj nco ntsim. Peb tus neeg ntseeg hwm thiab tus tsis hwm Huab Tais Yes Xus ua lub sim ceeb tus Vaj Ntxwv kuj piv tau rau tus me nyuam txawj hlub niam hlub txiv thiab tus tsis quav ntsej niam thiab txiv.

Txij li peb thim dab qhuas los ua Tswv Ntuj me nyuam teev Tswv Ntuj. Peb yuav tau siv zog kawm phau Ntawv Ntshiab, nquag nyeem Tswv Ntuj cov lus, thiab mob siab mloog Huab Tais Yes Xus cov lus qhuab qhia raws yus lub Koom Txoos cob qhia rau yus. Yog peb tsis paub Yes Xus, peb nrhiav kawm kom paub. Kev nrhiav paub Yes Xus muaj ntau ntau txoj kev, yus yuav tsum xaiv txoj ncaj txoj yog. Yus rhiav kom muaj kws qhia Yes Xus rau yus kom yus cim tau Yes Xus lub ntsej muag, mloog tau Yes Xus lub suab, paub Yes Xus lub siab. Leej twg yuav qhia tau kom yus paub Yes Xus ? Ib yam li ib tug me nyuam mos yug tau los, leej twg tu, leej twg qhub leej twg qhia ? Yog nws leej niam qhub thiab qhia nws hais lus, tu nws hlob. Peb thim dab los ntseeg Tswv Ntuj kuj tam zoj peb yug dua tshiab li tus me nyuam mos : “Yes Xus hais rau nws : kuv hais tseeb tseeb rau koj, tsis muaj leej twg yuav pom tau Tswv Ntuj lub ntuj, yog tsis yug los nyob txheej siab saud, Nis Kos Des Mos hais nws tias : ib tug neeg laus yuav ua cas yug dua tau Z3,1 ?” Yus lub Koom Txoos yog yus leej niam qhub thiab qhia kom yus ciaj ua Tswv Ntuj me nyuam. Yus mloog yus tus xib hwb qhia yus kawm kev ntseeg. Yus mloog cov txiv plig, cov tswv qhia, vaj qhia tej lus. Yus yoog ib tsoom leej ntshiab tus piv txwv coj lub neej teev Yes Xus nyob ntiaj teb no rau yus pom. Yus yuav siv tag yus lub neej los nrhiav kom yus ntsib dheev Yes Xus, raws tau Yes Xus qab lawv Yes Xus lw. Txij hnub peb hnov Yes Xus tshoj peb, hu peb los teev nws, hwm nws. Peb thim dab qhuas los ua neeg ntseeg Tswv Ntuj teev Tswv Ntuj, peb los ua Tswv Ntuj haiv neeg. Peb tsis zoo li tus qub neeg lawm. Peb lub siab lub ntsws hloov dua tshiab. Peb lub neej nyob ntiaj teb kuj yuav tsum hloov dua tshiab tag nrho. Muaj mob dias hau, ua dab ntub npau suav phem yuav tsum cheem yus lub siab txhob ntshaw rov mus thawj tej txiv neeb. Yes Xus tib leeg thiaj yog tus peb vam nkaus xwb. Yes Xus thiaj yog tus yus mus thawj, mus khaub zig, mus teev hawm. Yog peb tsis siv zog, tsis kub siab nrhiav kev tuaj cuag Yes Xus, fim Yes Xus. Hnub peb raug dab phem ntxias, peb yuav tsis muaj zog tiv dab phem. Thaum ntawd, peb yuav rov mus thawj txiv neeb. Hais tau tias peb pauv tsis ntxiv lwm cov tib neeg teev lwm cov dab qhuas. Vim lawv tsis teev tsis hwm Huab Tais Yes Xus yog lub sim ceeb tus Vaj Ntxwv hlub thiab khuv leej lub sim ceeb. Cov neeg tsis teev, tsis hwm Yes Xus yuav ua cas pom Yes Xus yog Vaj Ntxwv thiab Huab Tais ? Lawv tsuas saib Yes Xus yog ib tug tib neeg zoo, tib neeg thoob tsib xwb tsis tshaj ntawd. Hos rau peb tus neeg teev Yes Xus hwm Yes Xus kom ti txha. Peb pom, peb paub ntsoov ntiaj teb tib neeg tus zoo tshaj thiab thoob tsib tshaj twb piv tsis nyog rau Huab Tais Yes Xus.

1-Thawj lub ntsiab lus qhia rau peb paub Huab Tais Yes Xus yog peb tib neeg tus Huab Tais hlub peb, yog tag lub sim ceeb tus Huab Tais Vaj Ntxwv kav tag lub sim ceeb qaum ntuj thiab ntiaj teb. Peb Hmoob txawm tsis paub teev ntuj los ib txwv Hmoob yeej hais txog ntuj. Hmoob yeej ib txwm hwm ntuj loj rau nruab siab. Tsis txhob lam ua neeg lim hiam, tsis txhob lam twv ntuj twv teb, twv dej twv taws. Nyob saud, muaj ntuj, ntuj pom. Hmoob paub li ntawd. Qhov peb tsis paub, Yes Xus ua Vaj Ntxwv kav qaum ntuj thiab ntiaj teb, Yes Xus kav zoo li cas ? Peb yuav tham ob peb los txog qhov no. Yes Xus puas kav li tej huab tais vaj ntxwv kav teb chaws nyob ntiaj teb no ? Vim li ntawd, hnub no, peb yuav cuab ntsej mloog Lus Kas cov lus no. Yog Yes Xus tuaj nyob ntiaj teb no, hais tau tias Yes Xus lub chaw nyob tsis nyob ntiaj teb no, tiam sis nyob rau ib qho qhov twg tuaj. Txog txij Yes Xus tuaj ib qho tuaj, peb to taub tias Yes Xus muaj nws lub chaw nyob. Ua li, Yes Xus puas hais dab tsi ? Peb mloog Zam ntawv Moo Zoo : “Tsis yog kuv tuaj kuv tus kheej, tiam sis yog nws tus xa kuv tuaj, tus xa kuv tuaj nej tsis paub nws. Kuv li, kuv paub nws, vim kuv tuaj ntawm nws tuaj, yog nws tus xa kuv tuaj Z 7,28-29.” Yog peb hnov Yes Xus lo lus hais tias vim muaj tus xa nws yug los ua neeg, nws thiaj yug los li tib neeg muaj nqaij muaj txha, muaj mob dias hau raug tshaib raug nqhis ib yam leej tib neeg txhua leej saum daim npoo av. Leej Txiv Tswv Ntuj yog tus xa nws tuaj. Vim ntau zaus Yes Xus hais tias nws tuaj ntawm Leej Txiv Tswv Ntuj tuaj : “Ib yam Leej Txiv xa kuv, kuv thiab kuv xa nej Z 20,21.” Tiam sis, yog Yes Xus lo lus hais xwb tsis muaj cim tshwm sim, ib txhia yuav tsis tso siab kom tag rau Yes Xus. Muaj dab tsi ua rau peb tso siab tau tias Yes Xus yog Huab Tais Vaj Ntxwv ? Muaj ntau yam, muaj ntau lub cim ua rau neeg pom : “Ib txhia Fas Lis Xais hais tias : tus neeg ntawd tsis lam tuaj ntawm Tswv Ntuj, vim nws tsis caiv hnub xas npas tos ; ib txhia hais tias : ib tug neeg txhaum puas ua tau tej lub cim npaum li ntawd Z 9,16?” Tej yam hwj huam neej thiab dab tsis muaj peev xwm ua, Yes Xus ua tau rau neeg pom. Neej thiab dab ua tsis tau cov hwj huam Yes Xus ua. Cov hwj huam Yes Xus muaj yog Tswv Ntuj hwj huam. Yes Xus muaj tag Leej Txiv Tswv Ntuj hwj huam hauv Yes Xus xib teg. Yes Xus yug los ciaj neeg, yog los ua txoj num dab tsi ? Yes Xus yug los ua neeg kom qhia tau rau ntiaj teb paub, Tswv Ntuj hwj huam tshwm sim tuaj, ciaj tau nyob ntiaj teb no : “Kuv hais tseeb tseeb rau nej, tus ntseeg kuv yuav ua cov num kuv ua tib yam thiab nws tseem yuav ua loj dua ntxiv Z 14,12” Yes Xus ua Vaj Ntxwv kav ntiaj teb, Yes Xus tsis ntaim pej xeem neeg nuj nqes li dab qhuas, tsis sau teb sau chaw dag zog kom tsam rau Yes Xus ntiag tug li ntiaj teb neeg tej vaj ntxwv. Yes Xus ua Vaj Ntxwv kav ntiaj teb, yog coj Leej Txiv Tswv Ntuj tes hwj huam tuaj tseb tuaj cog rau leej tib neeg kom sawv muaj Leej Txiv Tswv Ntuj hwj huam npaum li Yes Xus. Vim li ntawd, txawm peb leej tib neeg muaj txhaum, tej txhia Huab Tais Yes Xus pub lawv ua tau tej yam hwj huam txaus qhuas taj Yes Xus nyob ntiaj teb no. Peb hu lawv ua cov neeg ntshiab huv. Lawv nrog Huab Tais Yes Xus ua tim khawv nyob ntiaj teb no qhuas Leej Txiv Tswv Ntuj. Huab Tais Yes Xus ua Vaj Ntxwv kav ntiaj teb tsi yog yav tag los xwb, Yes Xus hwj huam tseem tsheej xeeb tau zwj ceeb no thiab mus txog hnub kawg.
2-Lub ntsiab lus tim ob hais txog Huab Tais Yes Xus ua Vaj Ntxwv kav qaum ntuj thiab ntiaj teb, yog ib txoj kev kav txawv deb sim neej peb ntiaj teb tib neeg siab ntsws pom tsis tshab thiab neeg tswv yim tsis muaj yuav feeb txog. Huab Tais Yes Xus kev ua Vaj Ntxwv yuav ua rau peb ceeb loj, yog peb cam thawj thiab yuav ua rau peb txhawj, yog peb muab hlob. Tim li cas ? Yog peb cam thawj, tsis mloog lus tsis quav ntsej Yes Xus lub Moo Zoo, yog peb khav tias peb paub tag Yes Xus tej lus qhuab qhia, peb tsis ntshaw, tsis vam leej tib neeg twg qhia Yes Xus lub Moo Zoo rau peb lawm. Peb yuav ceeb loj li cov thawj coj thiab cov tub rog los tus tub sab Lus Kas hais hnub no. Cov thawj coj tsoom pej xeem paub tias Yes Xus muaj hwj huam, ua tau tus dig muag rov pom kev, kho tau tus tuag rov cia los. Lawv tsis pom tias lawv tsuas yog neeg txhaum, neeg tub roj tub ruag, tsis thoob tsib to nrog yuav tig los npuab Yes Xus, los mloog Yes Xus. Lawv haj tseem muaj ntsej muag sawv tiv Yes Xus, tsis hwm Yes Xus, saib tsis taus Yes Xus. Lawv hnov Yes Xus hais dab tsi, lawv cam, tsis mloog Yes Xus lus qhia. Thaum lawv ntes tau Yes Xus hauv lawv xib teg, coj mus nug thiab liam Yes Xus tsis hwm lawv txoj cai, muab lawv txoj cai rhuav, txw pej xeem kom yuam kev. Lawv khav tias lawv paub Tswv Ntuj, hwm Tswv Ntuj zoo tshaj Yes Xus. Lawv ntxub Yes Xus vim Yes Xus tej lus qhia thiab tej hwj huam Yes Xus ua : “Tus thawj leej choj nug nws thiab hais rau nws : yog koj Leej Pleev, tus Zoo nws Leej Tub ? Yes Xus teb : yog kuv, nej yuav pom neeg Leej Tub zaum ntawm tus muaj hwj huam sab xis thiab nrog qaum ntuj twv huab tuaj. Tus thawj leej choj dua rhe nws lub tsho hais tias : peb tseem yuav ntshaw leej twg ua pov thawj ntxiv ? Nej twb hnov ntsoov nws lo lus thuam, nej pom zoo li cas ? Lawv sawv daws txiav txim cia nws tuag MK 14,62-64” Yes Xus kev ua Vaj Ntxwv yog hle tag Leej Txiv tes hwj huam hauv nws xib teg los pub rau cov neeg me raug luag ntxub, raug luag hiam thiab tsim txom nyob ntiaj teb. Vim Yes Xus pub tag Leej Txiv tes hwj huam rau tus neeg ncaj ncees raug luag ntxub, Yes Xus raug hiam tam zoj tus neeg raug txim tsis muaj leej twg txhiv, tsis muaj tug pab. Tam zoj tus tub sab poob tsim, raug thuam, Yes Xus nrog cov tub sab ua ib nqag luag tsawm luag hnyos : “Cov thawj coj hnyos nws tias : "Nws cawm tau luag tej, kom nws rov cawm nws tus kheej, nws pom xeeb yog Tswv Ntuj Leej Pleev yog tus xaiv diam !" 36 Cov tub rog kuj thuam nws, cob cawv qaub rau nws, 37 Thiab hais tias : "Yog koj, cov Yus Das tus vaj ntxwv, sim rov cawm koj tus kheej sob ! ” Yes Xus kev ua Vaj Ntxwv yog nrog cov tub sab ua ib nqag pab cov tub sab ; nrog cov neeg ncaj ncees raug hiam ua ib nqag pab cov ncaj ncees ; nrog cov mob ruas luag ntxub luag ntshai ua ib nqag ; nrog cov dig muag ua ib nqag…Thaum kawg, luag hiam Yes Xus tuag nthi li tej tib neeg, tuag mus zwm av li sawv daws. Vim Yes Xus raug luag hiam tuag li tej neeg raug luag hiam tuag. Tiam sis, peb tib neeg tuag lawm, peb ua tsis tau dab tsi ntxiv. Yes Xus tuag nrog tib neeg tuag kom rhuav txoj kev tuag pov tseg. Yam li Yes Xus tuag nrog tsoom tub tuag, Yes Xus ciaj rov los kom txuas tau txoj sia tshiab rau tsoom tub tuag ciaj rov los muaj txoj sia nyob mus li. Yes Xus yeej kev tuag, rhuav tau txoj kev tuag pov tseg. Yes Xus yog Huab Tais Vaj Ntxwv ntawm tib neeg txoj sia. Vim Yes Xus twb sawv hauv tsoom tub tuag rov muaj txoj sia tshiab nyob mus li. Muaj ib hnub, ntiaj teb tsoom tub tuag kuj yuav sawv muaj txoj sia tshiab nyob mus li nrog Yes Xus.

Phooj ywg sawv daws, peb tus Huab Tais Yes Xus yog tag qaum ntuj thiab ntiaj teb tus Vaj Ntxwv, yog tag lub sim ceeb tus Huab Tais Vaj Ntxwv. Yog peb ntseeg li ntawd, peb hmoov zoo. Peb muaj kev txhawj xeeb loj npaum twg, hnyav npaum li cas tsis txhob poob siab, phooj ywg sawv daws ! Huab Tais Yes Xus nws nyob nruab nrab ntawm peb kev txom nyem, nres peb. Peb pom tias, ntawm ob tug tub sab Yes Xus tuaj pab, muaj ib tug tau nrog Yes Xus ua ke. Vim li cas ? Vim lwm tus tsis hwm Yes Xus, tsis ua neeg txawj xav. Tus txawj xav tau nrog Yes Xus ua ke : “39 Ib tug neeg phem dai saum ntiv ncej tsawm nws tias : "Leej Pleev tsis yog koj los cas ? Rov cawm koj tus kheej thiab peb nrog."40 Lwm tus tsa ncauj teb yws nws tias : "Koj tsis ntshai Tswv Ntuj, koj twb muaj txim npaud ! 41 Rau wb tsuas haum, tsim nyog wb raug vim tej wb tau ua ; hos nws li tsis tau ua dab tsi phem.” Hauv peb lub neej, hauv peb tes dej num, hauv peb txoj kev teev hawm, hauv peb txoj kev raug txom nyem…Hauv txhua txoj xub kev, peb vam txog Huab Tais Yes Xus pab, nws yuav tuaj nres peb. Tiam sis, peb yuav nco ntsoov hwm peb tus Huab Tais Yes Xus. Peb tus Huab Tais yuav tsis tso peb pov tseg.

17.11.2010
Cwj Vuam Chiv

Rau hnub tim 27 lub 2 hlis 2011

Ib tsoom niam txiv kwv tij neej tsa thiab phooj ywg,



Cov zaj nyeem hnub no caw peb los xav txog noob neej ntiaj teb kev txhawj xeeb thiab txoj kev yuav pab tau peb daws peb tej teeb meem kev txhawj xeeb. Yug los ua leej tib neeg, peb muaj ntau yam kev txhawj xeeb nyob ntiaj teb no. Yam kev txhawj xeeb ua teeb meem rau peb ntiaj teb tib neeg txhua tus, yog yam peb ntshaw hauv ntiaj teb no. Yam peb ntshaw ntawd ua rau peb pom npaum li cas peb xav kom tau ua peb tug thiaj ua rau peb npau taws, ua rau peb khib ciaj khib tuag los ua rau peb txhawj tsis tag sim neej.

Qhov ua rau peb npau taws. Muaj ntau yam ua rau yus npau taws, peb yuav hais tsis tag piav tsis txhua, tsuas piav ob peb los xwb. Nyob li ib tug me nyuam mos, ntshaw leej niam lub xub ntiag, vim nws noj leej niam mis. Thaum tshaib tsis tau leej niam mis noj, nws yeej npau taws quaj ntxias tsis tau tus me nyuam ntsiag. Hais txog peb Hmoob kev ua noj ua haus los kuj tib yam nkaus. Peb twb pom dua hauv tej zej zog muaj lus sib cav sib ceg vim tej liaj teb : “Kuv twb hom mos phua tas rau thaj teb no lawm, koj cia li luaj cuag tsis muaj qhov muag ntsia. Koj qhov muag dig tas lawm los ua cas…yeej yog koj saib tsis taus kuv ntag…” Qhov noj qhov hnav yog loj tshaj plaws. Twb muaj noj tsis tag los yus tseem ntshai rwg tus neeg tshaib. Daim hnav twb seem los yus faib tsis tau rau tus khaub hlab thov khawv. Vim tib neeg yeej xav tau twj ywm hauv nyias nruab siab : Nyias lub plab yeej txawj txawj qhia nyias, yuav tsum khwv thiaj tau noj. Ntaus zaus tib neeg tsuas xav qhov ncaj : Tshaib yog vim tub nkeeg, ua dab tsi tsis xav siv zog, cia kom tshaib. Khaub hlab cia kom khaub, twb muaj tes muaj taw, tsis cob tsis xyaum tes taw kom txawj kom nquag thiaj khaub hlab, nyuam qhuav ntxim…Tej txhia neeg yeej tsis leem cai tiag. Thaum tshaib tuaj lawm, luag yeej tab meeg huab noj huab haus, ua tub sab tub nyiag, tua neeg ntag. Ciaj los nyob tuag los tseg. Tib neeg, yog tsis muaj noj ces kawg tuag, tsis muaj hnav ces kawg txaj muag ua neej. Tiam sis sawv daws tsis muaj noj tsis muaj hnav raws li sawv daws ntshaw, ua rau sawv daws txhawj xeeb tsam tuag tshaib. Ntiaj teb kev ua tsov ua rog kuj los ntawd kev sib txeeb ciam dej ciam av, huab qhov nyiaj qhov kub, qhov roj qhov ntsev kom muaj ua yus teej yus tug…Vim tib neeg txoj kev ntshaw noj ntshaw hnav ua teeb meem txheej dhau txheej, tiam dhau tiam npaum li ntawd tsis txawj suaj kaum.

Qhov ua rau peb khib ciaj khib tuag. Txawm yog hauv yus vaj yus tsev, hauv yus lub cuab lub yig, hauv yus tej kwv tij neej tsa, tej mab sua los lub teb chaws twg kuj tib yam. Tib neeg lub siab muaj yees ua rau tib neeg khib ciaj khib tuag. Neeg lub siab yees hlob hlob dab tsi twb tsis txhaws tau, tsis kum tau tib neeg lub yees. Neeg lub yees, tsis zoo li kev tshaib thiab nqhis noj ib thooj txawj tsau, haus ib pas yuav pov khawv. Tsis muaj yam dab tsi yuav kum tau neeg lub yees. Yus poj yus sev, yus leej tub leej roog twb hlub yus tag npaum li ntawd los yeej tsis kum yees. Vim li ntawd, yus txwj nkawm qhov muag ua tav zas rau lwm leej lwm tus poj niam los txiv neej, twb mob yus siab nthav deeg qas daws, khib yus lawm tsheej zag. Yus lub ncauj tsis hais, siab ntsws twb xav ntau ntau lawm. Yog haj tseem hais tau lo puav lus luag ntxhi rau luag lawm ces los txog tsev, koj niam thiab koj txiv yeej kawg muaj plaub dob xwb xwb. Hmoob thiaj hais tias : “Yuav poj yuav sev, nce toj yuav tau soj, nqes hav yuav tau kav.” Tib neeg lub siab khib tseem muaj ntau txoj kev : Ntawm kev kawm txuj ci, kev nrhiav nyiaj txiag…kev ntshaw ua nom ua tswv tseem yog ib txoj kev khib ua teeb meem loj, txheej dhau txheej tiam dhau tiam. Tib neeg yeej ib txwm khib xav kom muaj suab muaj npe, muaj phooj muaj ywg, ntxias thiab hau pej xeem huab hwm sawv los poog yus, tsa yus sawv ua nom ua tswv thiab ua huab tais vaj ntxwv. Vim li ntawd, tas txhua tiam neeg los, cov xav ua nom ua tswv tsis muaj yuav tsis khib. Yuav ua taus nom, yeej yuav tsum sawv sib tiv, sib rhuav ua yeeb ncuab quj qees. Tsuas yog txheej tshiab no thiaj mam tsim muaj pov ntawv xaiv npe. Leej twg muab suab ntau cia tus ntawd ua sawv daws tus nom, thiaj tseg tsis tshua pom sib tua. Tsis kav, tseem muaj ntau tus nom nyob ntiaj teb zaum rawv lawv lub rooj nom khov kho nto 30 los 40 xyoo, dhuav luag dhau los rau nws tus kheej yeej tsis kum yees. Ua nom ntev, ua rau pej xeem dhuav dhau tsis xav pom ntxiv, pej xeem sawv tiv, caum qw ntiab los yeej tsis kam khiav li. Tib neeg ces tau ua nom lawm yeej tuav ruaj ruaj tsis tso lub rooj nom. Khuv xim dhau : Ua nom muaj hwj chim, muaj cai quab yuam neeg, tuav nyiaj txiag, nto koob meej…tso tsis tau lub rooj nom tseg rau lwm tus, khib siab dhau. Cov xav ua nom los muaj coob muaj ntau ncig yuj yeev nraum zoov tos, yuav tav twg thiaj tau ua nom kav pej xeem, kav teb kav chaw. Vim li ntawd, lub sij hawm xaiv nom nyob ntau lub teb chaws yog ib lub caij nyoog ntxhov quav niab, muaj teeb meem yuav tau ceeb faj.

Qhov ua rau peb txhawj tsis tag. Peb leej tib neeg txhua tus txhawj tsam tsis muaj noj, tsis muaj hnav, tsis muaj nyiaj siv, tsis muaj tus hlub yus, tsis muaj neeg qhuas yus…Peb tsuas pom tej ntawd xwb thiaj tseem ceeb tshaj hauv peb lub neej. Peb thiaj muab tag peb lub neej los nrhiav kom tau tej ntawd txhim peb lub cuab lub yig. Rau peb tib neeg, yog peb muaj tej ntawd ua peb teej peb tug, peb thiaj yuav ciaj sia taus saum daim av. Ces peb txhawj tsis txawj tag ib hnub txog tsaus ntuj, ib hmo laj tos kaj ntug. Peb muab tas peb sim neej los peem nrhiav kom muaj tej ntawd. Tiam sis yog peb mloog Huab Tais Yes Xus lus qhia. Yes Xus hais tias : Muaj lwm yam tseem ceeb tshaj peb tsis pom yuav pab, yuav txhim tau peb lub neej nyob ua kwv ua tij, noj sib hlub haus sib ce, tsis txob tsis txhawj tag npaum li ntawd : “26 Nej sim ntsia tej me noog saib : lawv tsis nrom qoob, tsis muab, tsis sau qoob hauv txhab, nej Txiv tus nyob saum qaum ntuj pub lawv noj. Nej tsis tshaj lawv los cas ? 27 Nej leej twg kev txhawj puas rub tau nws txoj sia kom ntev ib tshim ntxiv” Tus nas tus noog, tus kab tus ntsaum yog tsav ntuj tsim muaj sia yuj ntav ntuj los nkag pem teb. Yuav kom peb yug tus nas tus noog, peb yuav yug tsis taus. Nas noog nyob nas noog zes. Nas noog cav tsis nrom noob qoob los muaj noj, tsis sau noob tsa los muaj haus. Tus nroj tus tsuag yog tsav ntuj tsim los plooj hauv toj thiab qab ha. Tus nroj tus tsuag, tsis yog nyiaj yog kub, peb ntsia tsis tsim nuj tsim nqi. Tiam sis muaj nuj muaj nqi rau tus tswv tsim tsob zoo xws tsob, lub paj tshiab tsw qab phim lub txiv ntsais tsias toj roob hauv pes, nruab tiaj nruab nrag ua ntxooj nyes. Lub paj tawg tshiab dib mos nkawj ya kaj niab, dee mos muv tsaws ntsauv zeeg tshaws. Peb thuam tsis tau txhua yam peb tus Huab Tais Tswv Ntuj tsim muaj nyob saum daim av, muaj nuj nqis peb yuav tsum hwm yuav tsum txuag. Yog tsis muaj tus nroj tsuag, qab roob qab ha yuav tsis tawg lub paj txi lub txiv. Yog paj tsis tawg, txiv tsis txi, yuav kho me tsoom mos nkawj mos muv siab tsis xav ua neej. Yog tsis muaj me txiv hmab txiv ntoo, suab kab yuav tsis xiv, suab noog yuav tsis kau hauv toj hauv pes yuav txias qas to…Vim Huab Tais Tswv Ntuj twb nyiam tag puas tsav puas yam nws txhais tes tsim, thiaj muaj tsav me nroj tsuag, me paj hmab paj ntoos. Huab Tais hlub tas ib tsoom kab ntsaum, mos nkawj mos muv, nas noog npaum li ntawd. Txhua tus kab ntsoom, nas noog thiaj nrhiav tau noj tsau haus txaus tsis txob tsis txhawj. Tswv Ntuj tseem hlub peb leej tib neeg txhua tus pes tsawg npaug tshaj tej nroj tsuag, tej kab ntsaum thiab nas noog huv si. Peb tib neeg twb pom nas noog, yuav tau xyaum nas noog ua neej, tsis txob tsis txhawj peb lub cev thiab txoj sia yuav noj yuav hnav dab tsi. Peb twb pom ib tsoom pab hmab paj ntoos tawg tshiab thiab zoo nkauj yuav tau kawm. Peb yuav ua lub neej kom zoo nkauj tam zoj lub paj tawg tshiab dib tau deev tau mos nkawj mos muv siab nqig. Peb yuav hais lus sib hwm, cev tes sib pab, sib vam khom thiab sib yoog, tug txawj zam tug tam zoj pab hmab dib mos nkawj mos muv, txiv ntoo ua txhiam xws yug nas noog, suab kab xiv, suab noog kau sov zej sov zoov, hauv toj hauv pes nyob sov so.

Ib tsoom phooj ywg sawv daws, peb kev npau taws, kev khib thiab kev txhawj tsam tsis muaj noj muaj hnav, tsis muaj nyiaj muaj txiaj, ntshaw ua nom ua tswv tsis pab peb leej tib neeg noj sib hlub haus sib cev. Tiam sis, peb kev hwm thiab txuag lub sim ceeb, tseg txhob hlawv toj roob hauv pes, txhob tua me nas me noog ua tu noob, txhob thuam, txhob khib, txhob lim hiam huab noj huab haus, tua neeg, ua plees ua yis…Peb nrog Huab Tais Tswv Ntuj txuag lub ntiaj teb, pab kom tas txhua tsav puas yam muaj txoj sia nyob txhij thiab nyob txhua saum daim av : “1 Luag leej tib neeg saib peb li Leej Pleev cov tiam lis coj Tswv Ntuj kab xwm” Peb cov neeg teev hawm Huab Tais Tswv Ntuj tus tsim lub ntuj lub teb, peb yuav coj lub neej kom ncaj ncees, tsis ua puas Tswv Ntuj lub npe. Yuav kom peb ua tau neeg ncaj ncees, peb yuav vam Huab Tais Yes Xus lub zog pab peb, Leej Ntuj Plig Ntshiab tshoj peb ua neej. Tas ib tsoom ntseeg, peb yuav niaj hnub thov Leej Ntuj Plig Ntshiab kom nyob nraim hauv peb lub neej.


23.02.2011 Cwj Vuam Chiv