Txiv Plig Cwj Vuam Chiv Yaj Nthuav Ntawv Ntshiab

Ib tsoom niam txiv kwv tij neej tsa thiab phooj ywg txhua leej txhua tus,

Peb zoo siab tuaj sib sau, tuaj vij tuaj pe peb Leej Niam Leej Txi, peb tus Huab Tais Tswv Ntuj, vim peb yog ib tse neeg ntseeg, yog nws tub nws ki. Tus tsim lub ntuj lub teb, tus pub peb muaj txoj sia nyob ntiaj teb no thiab tus yuav pub peb muaj txoj sia nyob txhiab niag tim puas xyoo, yog peb Leej Txiv Tswv Ntuj tib leeg. Nws hu peb tuaj sib txoos sib sau, cia peb qhib peb lub siab lub ntsws mloog nws lus, tuaj khaub zig nws dua.
Nej puas xam pom Huab Tais ua hnub kaj peb lub neej, ua tshav ziab ua nag ywg lub ntiaj teb daim av peb tej qoob loo thiab ua hmo qaim rau peb so los siav, daws peb zoo sab sawv ntxov tsees nquag plias tuav peb lub luag dej luag num ua. Peb puas muaj tus tsav tsi tsuam teev hnyav pauj tau peb tus Huab Tais lub txiaj ntsha, puas muaj tsav nqi qas tsi pauj txiaj ntsim peb tau txais dawb txais do ? Yog peb xam pom nuj pom nqi, tshuav ntau peb yuav them tsis tag rau peb Leej Txiv Tswv Ntuj. Vim li no, tsoom phooj ywg, peb txawm muab nyiaj muab kub, muab tsiaj txhu thiab qoob loo zoo npaum li cas ua txim los txi, nej xav, Huab Tais Tswv Ntuj puas ntshaw peb tej txim ntawd ? Lub ntiaj teb daim av, cov nyiaj cov kub, tej nroj tsuag, xyoob ntoo, qoob loo, kab ntsaum, tsiaj txhu…yog leej twg tug ? Puas yog peb tib neeg twg tsim muaj ? Vim li ntawd, tsoom kwv tij neej tsa, Tswv Ntuj ntshaw lwm yam peb muaj. Tsis yog khoom noj khoom siv, nws ntshaw, ua li, peb puas muab tau rau Tswv Ntuj yam peb muaj. Nws hu peb tuaj sib txoos vij nws lo lus, peb tsis yog tsis muaj num ua lam tuaj sib txoos laug caij kom dhau nyoog, los tuaj poob caij dawb nkim nyoog dag, lam teev ntuj dog dig kom tas, tos tsis hnyoo yuav mus kiab mus khws, mus pov qe hlau, ntaus phaij, twv txiaj yuam pov, haus dej haus cawv…Los puas, peb tuaj kom Xib Hwb thiab Txiv Plig zoo siab pom peb, vim lawv yuam peb tuaj teev ntuj. Peb tuaj teev ntuj, vim peb zoo siab hlo, txaus siab ua ntuj me nyuam ; peb tuaj, yog tuaj txaum yim ua peb tus Huab Tais Tswv Ntuj tsaug tej txiaj ntsha nws pub peb txais tsis tag, tej txiaj ntsig peb tau txais tas peb sim : “18 Koj tsis ntshaw tej txim, muab los txi koj tsis xav txais. 19 Tej txim txi Tswv Ntuj yog peb ntsuj plig ntsoog lis ntxaws, Tswv Ntuj tsis thuam tej siab ntsws mob ntsoog tas NPN50,18-19”Tej txim Tswv Ntuj ntshaw thiab tos peb muab rau Tswv Ntuj yog cob peb tej siab ntsws thiab ntsuj plig rau Huab Tais.
Twb yog lub lis piam 3 lub caij tos Huab Tais. Peb mloog saub Xos Fos Nias tsab ntawv hnub no. Tswv Ntuj hais dab tsi rau saub los qhuab qhia His Xais Lais hnov ? Hnub no, peb mloog saub Xos Fos Nias cov lus qhia, kuj yog mloog peb tus Tswv Ntuj cov lus hais tib yam. Peb khaws ib lub ntsiab lus coj los xav. Vim Tswv Ntuj pom nws haiv neeg lub neej txom nyem, muaj cov pluag, cov quaj ntsuag ; muaj cov tshaib plab, khaub hlab, loj leeb thov khawv, muaj txiab muaj nkeeg ; muaj cov dig muag, cov tuag ceg, cov mob ruas ; muaj cov me nyuam neeg dog dig raug tej nom raug cov loj, cov nplua nuj thuam thiab ntxub, raug hiam, quab yuam, tsim txom. Cov txwj laus, cov ua thawj, cov nom kuj tsis sib nyiam, tsis sib haum, faib ua caj ua ces, ib tog tshum lwm tog, ua plaub ua ntug, sib cav sib ceg, dub muag tsis xav sib pom…Muaj cov raug luag lom, raug tub sab tua tuag. His Xais Lais lub teb chaws tsis tiaj tus, raug tej pej kum neeg vam meej tuaj tsuj tuaj kav, quab yuam pej xeem huab hwm ntau tiam, ntau pua xyoo : zoo li cov Npas Npis Los Nias, Hais Nkws Tos, Hes Las, Los Mas...His Xais Lais cov siab ncaj, siab zoo, hwm ntuj thiab lawv cov saub nco ntsoov txhib sawv daws kom cia siab ruaj nreb rau Tswv Ntuj ; lawv nco ntsoov qhuab qhia Tswv Ntuj lus kom sawv daws ua siab loj, kom nco ntsoov khaws Tswv Ntuj lo lus twj ywm hauv siab. Muab nyias kev nyuaj siab, kev txhawj xeeb, kev tsaus ntuj lo ua lus hais, ua suab kwv txhiaj lus taum seev, ua nkauj hu Tswv Ntuj, thov Tswv Ntuj pab daws pab xyeeb ib puas kaum tsav kev iab kev daw pov tseg. Tswv Ntuj tshoj saub kom ntuas tas tsoom His Xais Lais tig ntsej los mloog, rua muag ntsia : “Huab Tais muab koj cov neeg lam liam koj ntiab khiav, ua thaub qab koj tus yeeb ncuab. Huab Tais, His Xais Lais tus vaj ntxwv nyob hauv koj. Tsis txog koj yuav muaj kev txhawj xeeb » Tswv Ntuj tsis nyob ib lub chaw xu das ib cag, los nyob ib lub teb chaws deb puag qab ntug kawg los ntxeev ntuj ntxeev teb twg, ntsej tsis hnov muag tsis pom tib neeg kev txom nyem, tsis paub plaub ntug thiab xwv txheej tuaj raug Tswv Ntuj cov me nyuam. Tsis yog peb tsis pom Tswv Ntuj ces ntshai Tswv Ntuj zoo li peb, nws yuav tsis pom peb thiab, tsis yog li ntawd. Tsis zoo li nyob hauv yus tsev neeg, yus cov me nyuam sib zeg, sib tsuab zom zaws, tes sib khawb sib dob plaub hau quaj qog qees yus tsis pom. Xyov tus twg xub thab tus twg. Peb leej tib neeg nyob hauv tsev phab ntsa thaiv peb qhov muag tsis pom sab nraum tsuag. Mus nkag hav fab, taug kev, peb tsis pom kab ntsaum nkaum tej qab nplooj qhua twg ; hnov kab saub kab xiv xi, xam tsis pom tej kab ntsuab, kab nqos vias quaj dai tej ntsis xyoob ntsis ntoo twg saum tej. Yog lub ntuj tsaus lawm, peb leej tib neeg zoo cuag dig tas tus, peb txhua tus yuav maub yuav xuas nyias txoj xub ke rov los nyias vaj nyias tsev. Huab Tais Tswv Ntuj tsis zoo li peb, txawm yog nruab hnub thiab hmo ntuj puav leej pom kev nrig tib yam nkaus rau Huab Tais. Txawm Huab Tais ntsia qaum nplooj tuaj yeej pom tshab qab ploog kab laug sab chaw nyob chaw ntaus zes ; txawm ntsia hauv pem teb pawv pleb ntswv saum npoo av yeej pom nas kos txaij pliag kaws hauv paus tauj puag nruab nrog av ; txawm ntsia pas dej nro yeej pom zaj laug pw chev cees zaj laug qho qab pag dej nro ; txawm ntsia peb tib neeg lub pliaj plhu xwb los Tswv Ntuj yeej pom peb lub siab dub los siab dawb, siab nkhaus los siab ncaj…Thaum peb tig los pom peb cov me nyuam sib thab quaj zig qees, peb txawm ntxais hniav zim ncaug zog rub me nyuam taub hau ntsoo qe qauj, los muab khauj tsiav rau ob leeg noj…Huab Tais Tswv Ntuj tsis zoo li peb, yuav xuas khauj, yuav siv ntaj siv riam thiab xuas phom los tua cov neeg txhaum, neeg phem, neeg thuam ntuj…Ntawm Tswv Ntuj, lo lus hais xwb, lub sim ceeb tshwm los, ntiaj teb daim av tawm tuaj ; muab av luaj puab tshuab pa ciaj taus neeg. « Huab Tais, His Xais Lais tus vaj ntxwv nyob hauv koj » Tswv Ntuj nyob nruab nrab hauv peb, yog peb qhov muag plooj lawm ntsia tsis pom Tswv Ntuj xwb. Tswv Ntuj hais ib los cheem nag xob nag cua ntsiag. Yog peb mloog lus, peb yuav Tswv Ntuj hais ces peb sib haum, sawv daws sib hwm thiab txawj sib hlub, ib tug ntev tau rau tug, tso lo lus ntxhib, lo chob neeg tseg…Peb suab cam suab nthe yuav ntsiag tas, Huab Tais lo lus yuav kho tau peb siab txias ntev tuaj, peb yuav zoo li peb tus Huab Tais, tsis yuav riam yuav phom ntsaws hnab ris hnab tshos tos kev tua peb tus yeeb ncuab. Phooj ywg, Tswv Ntuj lo lus zog loj tis ua loj tsis kawg, yuav kho tau peb lub siab mob kom zoo, lub siab luv kom ntev, lub siab dub kom dawb...Yuav pab kom peb thim txoj kev lim hiam. Peb yuav tso txoj kev yeeb ncuab tsis taug ntxiv. Peb yuav los ntaus kev phooj ywg nrog tas ib tsoom neeg txhua tus tib si. Yeej muaj tseeb tiag tsis yog tham pov tseg. Nej puas pom muaj ntau tus tua neeg hloov lawv lub siab phem los ua ib tug neeg tshiab, ua ib tug zoo nyiam tuaj. Muaj tau raws li saub qhia Tswv Ntuj lo lus tiag : “Huab Tais muab koj cov neeg lam liam koj ntiab khiav, ua thaub qab koj tus yeeb ncuab” Tswv Ntuj tsis zoo li peb muab tshuaj lom, muab riam hlais los xuas phom tua Tswv Ntuj tus yeeb ncuab pov tseg. Yog Tswv Ntuj ua li peb ua, peb tib neeg ob niam txiv hauv paus As Das thiab Es Vas nkawd tuag thaum ntej thaum ntxov ub, tsis muaj tib neeg nyob ntiaj teb no los txog lub zim txwv no. Tswv Ntuj hlub peb leej tib neeg txhua tus, tsis yog hais dag kom tas lus. Tswv Ntuj hlub peb, yog hlub tag siab nrho, tos ua hnub ua hmo hloov peb lub siab phem, kho peb lub siab dub siab nkhaus kom ncaj kom dawb cuag Tswv Ntuj.

Lus Kas tsab ntawv Moo Zoo peb hnov hnub no qhia tas zeej tsoom neeg tuaj mloog Zam, thov kom Zam pab lawv ua neeg tshiab : Hloov lub qub siab los coj dua lub siab tshiab, ua tib neeg nruab siab nruab ntsws, lub tswv yim thiab lub neej tshiab. Npoj neeg tuaj ntsauv Zam qhuab qhia yog npoj neeg zoo li cas ? Lawv nug Zam saib yuav ua dab tsi thiaj ua tau neeg tshiab neeg zoo ?
Npoj neeg tuaj ntsauv Zam qhuab qhia, lawv tsis txawv peb ntau. Muaj tej me nyuam neeg pej xeem, muaj cov neeg kawm txuj txawj ntse ua nom ua tswv, muaj cov tub rog kwv riam phom ua laj kab thaiv ciam dej ciam av…Hauv peb cov neeg ntseeg Tswv Ntuj Kav Tos Liv kuj zoo li npoj neeg tuaj mloog Zam qhuab qhia Tswv Ntuj lus. Peb cov ntseeg muaj ntau xeem neeg hais ntau xeem lus nyob thoob ntiaj teb. Muaj cov pluag, txom nyem, muaj cov tshaib plab thov khawv tsis muaj vag muaj tse nyob ; muaj cov txawj ntse ua nom ua tswv tswj zej tswj zos, kav teb kav chaw, ua txwj laus txiav plaub txiav ntug ; muaj cov tub ceev xwm khiav hauj lwm, tuav txhooj saib cai, tuav lub zej zog kom thaj yeeb ; muaj teb tub rog thaiv teb thaiv chaw kom sawv daws tau nyob tiaj tus, mus los tau luag tsis muaj tub sab tsov rog ua kub ua ntxhov. Tus hlob tus yau, tus laus tus hluas, tas sawv daws muaj qav muaj num ua. Zoo li peb los ntseeg Tswv Ntuj, peb los ua Tswv Ntuj cov tub cov ki. Peb los txais Tswv Ntuj lub luag dej luag num ua. Ua li, tsoom ntseeg sawv daws, Tswv Ntuj tej qav num, tshuav npau xi, ua tsis tag. Tswv Ntuj tej qav num tsis kawg rau thaum yus los ua neeg ntseeg hauv Koom Txoos Kav Tos Liv, yus kawm kev ntseeg 2 xyoos ntxuav plig tas ces plws tes nyob ntsia ntuj, tsis muaj num ua ntxiv. Tswv Ntuj tes qav num tsis kawg niaj lis piam hnub Chiv, mus teev ntuj nrog tsoom ntseeg tom tsev teev ntuj tas rov los zaum puag tes puag taw nyob. Tswv Ntuj tes qav num tsis kawg txoj kev qhia kev ntseeg, los ua Thaj Txi Ntuj, los mus thov ntuj pab tej neeg muaj mob muaj nkeeg…Ua Tswv Ntuj tej qav num, yuav ua dab tsi ? Hloov yus lub siab lub ntsws los coj Yes Xus lub siab, hloov yus lub neej kom zoo nyiam, yus txhob xav txog yus tus kheej. Siv zog hlub yus tsev neeg, hlub yus niam yus txiv, hlub kwv tij neej tsa. Yog cob, qhia, rub yus lub siab lub ntsws kom los npuab los yoog raws tau Huab Tais Yes Xus lub siab nyiam. Tsis yog lo lus hais ntawm lub ncauj, tsis yog zaj teev ntuj yus tsa ncauj seev rau Tswv Ntuj xwb. Ua Tswv Ntuj tes qav num, yus yuav loj npab ntsuas ua neeg nquag, qee yus lub caij lub nyoog taug kev mus qhia kev ntseeg rau cov ntseeg tshiab. Yus muaj 2 lub tsho, yus yuav faib rau tus tsis muaj. Piv txwv zoo li no : Yus tuaj nyob hauv cov teb chaws vam meej, muaj noj tsis tshaib haus tsis nqhis. Muaj cov neeg txom nyem, tiv no nkaum qab choj. Tsis txhob tos nom tswv ua tus hlub lawv xwb. Muab yus lub siab lub ntsws pab tej koom haum, txhawb yus lub zog rau tej koom haum kom lawv tuav lawv luag dej luag num. Yus pom tej teb chaws pluag tshaib plab, tsis muaj noj tsis muaj haus, yus yuav tau tawm hws, muab kom tau yus ntiag tug ib qho los pab kom tau luag. Tshuav yus tej kwv tij neej tsa Hmoob tseem txom nyem. Yus yuav tau faib yus ntiag tug ua txhiam xws, ua mov rau lawv noj. Yuav ua cas faib yus mov rau cov tshaib noj ? Yuav ua dab tsi ? Yus yuav tau yoo khob puav dej qab zib tsis haus ; yuav tau yoo tej pluas hmo, tsis noj ; yus ntshaw tej cuab yeej tuam txeem los siv hauv vaj hauv tsev. Yus tsuas yuav qhov loj thiab tseem ceeb. Tseg tej yam me tsis txhob yuav. Yus ua ib qho ntxiv ob qho tuaj, yog muab coj los sib ntxiv, cov dej qab zib yus tsis haus (tseem zoo rau yus lub cev), tej pluas hmo yus tau yoo, tej cuab yeej tuam txeem yus tsis tau phob nyiaj…muab sib xam los mus hauv ib lub xyoos kuj raug li 200 thiab 300 nyiaj. Qhov ntawd, yog yus lub nqe zog yus tau qee hauv yus lub neej nyob hauv ib lub xyoos. Tej qhov ntawd, yog yam yus muaj muab, yog tej txim ntxim Tswv Ntuj siab, yus coj mus txi rau Tswv Ntuj ib npaug, yus yuav pom Tswv Ntuj pauj pua npaug rov rau yus : « Zoo kuv siab npaum li cas tau muab cov txim no cev rau koj, kuv nco ntsoov koj lub npe ua koj tsaug, vim koj siab zoo NPN55,8 » Tsis tas li ntawd xwb, cov txiv neej thiab cov poj niam, niaj lub xyoo npaj tau nyiaj tawm rooj mus loj leeb kom siab nqig. Yog nyias qee tau 1 los 2 lub xyoo tsis kwv ceg mus lwj. Muab nyias cov nqi kev 2 lub xyoo ntawd los ua txim cev rau Tswv Ntuj. Nyias yuav pom Tswv Ntuj lub zog nyias yuav txais los txhawb nyias lub cuab lub yig kom txawj sib hlub. Nyias yuav pom nyias lub neej hloov dua tshiab. Tswv Ntuj lo lus yuav txhawb yuav tsa nyias lub neej. Nyias tseem yuav ua rau lub teb lub chaw ntshaw thiab qhuas. Tsis muaj leej twg yuav thuam tau cov neeg ntawd lub npe. Peb yuav tau xav kom zoo : Yus yuav tsis txob tsis txw luag tej txij nkawm nrog yus mob siab ; tsis rhuav tsis ntxias tej tub tej ntxhais lub neej kom puas nyob tej teb chaws txom nyem kom yim huab liam txwv mus. Yus thiaj yuav yog lub noob nplej qoos cua tshuab tsis ya tawm hauv lub tshav nplej. Yus thiaj tsis yog lub npluag poob hauv lub cub tawg cig tsis txawj kug tas yus sim neej : « Nws tuav nws rab ntxuam ntawm tes yuav ntxuaj kom pov khawv nws lub tshav nplej thiab nws yuav sau cov nplej rau hauv nws txhab. Dua li, lub npluag yuav kub nyiab suaj kaum hauv hluav taws tsis txawj kug »

Tus tsis txawj xav, lub ntuj lub teb rau nws cav tsis muaj tsw, tsis muaj tug. Yog nws tus kheej muaj hwj huam, kheev lam ua tau, nws tseem yuav ntxeev tag lub ntiaj teb thooj nyiaj thooj kub ua nws tug thiab keev hlo ntiaj teb tib neeg thiab daim av rau nws tus kheej tswj thiab kav twb tsis kum nws yees puas yog. Tiam sis peb yog Tswv Ntuj cov tub cov kiv, peb yuav xyaum ua neeg txawj xav thiab thoob tsib, tsis txhob lam khaws xyeem qhov yooj yim ua li yus siab nyiam siab xav, kav xyeem yus kev tub nkeeg. Peb tos Huab Tais yug los hauv peb lub neej, yog txais lub cim ntxuav hauv hluav taws, kub siab ua txoj hauj lwm Huab Tais Yes Xus tso tseg rau peb ua : Pub kom tus dig muag pom kev, pub kom tus tuag ceg sawv mus taus kev, hais tau yus tus yeeb ncuab thaub qab. Tsis txhob ntshai siv tas yus zog hnub thiab hmo los npuab kom tau Huab Tais Yes Xus lus qhuab, siv tas yus siab thiab tswv yim taug nws qab xuas kom tau nws lw mloog nws lus qhia.

Cwj Vuam Chiv 7.12.2009

Tsoom ntseeg tsob hwb Tswv Ntuj,

Hnub no yog ib hnub zoo sij hawm peb tuaj khaub zig peb tus Huab Tais Tswv Ntuj, yog peb niam peb txiv hlub peb tsis txawj tag. Peb nyuam qhuav mloog nws cov lus nws hais rau peb hnub no. Peb tsuas khaws tib lo lus tseg, yog lo lus coj peb ua neeg teev Tswv Ntuj mloog Tswv Ntuj lus ib yam li tej saub sawv Tswv Ntuj chaw cev Tswv Ntuj lus qhuab qhia Tswv Ntuj haiv neeg.

Ua neeg teev Tswv Ntuj mloog Tswv Ntuj lus. Kev teev ntuj, yuav teev li cas ? Ua cas yus tib neeg yus thiaj teev ntuj ?

Muaj ntau txoj kev teev ntuj, peb yuav hais tsis txhij piav tsis txhua rau ntawm no. Vim peb yog neeg ntseeg Tswv Ntuj hwm Tswv Ntuj hauv lub Koom Txoos Kav Tos Liv. Peb tsuas paub qhia teev ntuj raws li peb Kav Tos Liv tej poj yawm txwv koob tau qhuab qhia rau peb. Lub ntsiab, yog qhia kom peb kawm tau thiab txawj yoog raws li tus neeg nyiam Tswv Ntuj zaj teev ntuj, ua raws li cov thwj tim qhia, raws li saub thiab raws li Yes Xus qhia rau peb.
Nyias yuav tau npaj caij npaj nyoog los teev ntuj ib hnub ob zaug los peb zaug txij hnub sawv txog hnub poob. Hnub chiv yog Tswv Ntuj hnub, pes tsawg, yus yuav tsum mus koom kom tau ib Thaj Txi Ntuj nrog ib pawg ntseeg hauv yus lub zos los nyob qhov twg kuj xij. Hauv kev teev ntuj, yus yuav tsum kawm kom paub seev thiab txawj hais zaj. Peb tib neeg thaum teev ntuj, peb ntshaw hu tej zaj nkauj kom lom zem, zoo mloog, kom tej suab nkauj deeg daws tau puag hauv yus tej hlab siab hlab ntsws deev tau yus siab kom kaj nrig ; yus nyiam tej zaj lus hais tau yog, muaj qab haus dhos yus nplooj siab nplooj plaw, zaj lus yim zoo, yim ua rau yus tuaj zog thiab zoo siab teev ntuj hnub ntawd...Kuj muaj tej suab nkauj ua rau yus xeeb txob thiab muaj tej zaj lus ntiav ntiav tws tws hais ntev hais ntau qhov qub, ua rau yus nkees tos ceeb laj hu xaus ib zaj nkauj. Kev teev ntuj tsis kawg rau tej nkauj paj nruag los cov zaj xwb, tus tib neeg thiab tas sawv daws…Piv txwv li yus mus teev ntuj, yus nqa tag yus lub siab lub ntsws thiab yus lub neej mus cev rau Tswv Ntuj. Tej txiaj ntsim yus tau txais yus mus ua Tswv Ntuj tsaug. Yus raug kev nyuaj siab, yus mus pe mus thov Tswv Ntuj pab yus daws yus kev tsaus ntuj pov tseg. Tsis yog yus npaj yus ntsej muag thiab lub ncauj mus yws Tswv Ntuj xwb. Vim yus liam Tswv Ntuj tsis pab yus, tsis hlub yus, yus thiaj li nyuaj siab li no, raug tus kab mob no, yus tus txheeb tus ze nim raug xwv txheej npaum li ntawd. Yus mus yuam Tswv Ntuj pab yus cuag Tswv Ntuj tshuav yus nqe. Dhau qhov ntawd lawm, tsheej hli, tsheej xyoo, cuag tu taw lawm, tsis tshwm ib taws tsev teev ntuj, mus txog thaum kev tws mam rov tuaj yws Tswv Ntuj mloog dua…
Kev teev ntuj yuav teev li cas ? Ntshai tsis muaj lwm txoj kev zoo tshaj qhib yus poj ntseg mloog saub lus qhua qhia, qhib yus tej siab ntsws tos txais Yes Xus lub Moo Zoo deev yus siab. Kev teev ntuj tsis yog nrhiav kev lom zem ua qhov ib. Yog tsis lom zem ces txawm nkees tsis teev ntuj, yog ua tau lom zem mam teev ntuj. Kev teev ntuj tsis yog mus yws yus tej kev txhawj xeeb kom Tswv Ntuj hlub yus xwb. Peb ho nrog xav saib, kev teev ntuj puas yog qhib yus lub siab los mloog saub lus, puas yog npaj yus tej siab ntsws tos txais Yes Xus lub Moo Zoo. Lub ntsiab yog kheev lam cia tau, cia yus lub siab thiab yus lub neej sawv ua npoj mus ua ntxaig caum saub qab lawv Yes Xus lw. Hmoob hais tias : soj tau qab xuas tau hneev. Peb sim xav saib saub teev ntuj saub teev li cas ? Hos ntawm peb, peb teev ntuj peb teev li cas ? Saub Yes Les Mias hais li no hauv nws zaj lus qhuab qhia : “Ua ntej xeeb koj hauv koj niam plab, kuv twb paub koj lawm ; ua ntej koj yug los kuv twb xaiv koj, kuv tsa koj ua ib tug saub rau cov haiv neeg” Yog saub tsis cuab pob ntseg, nej sim xav, saub puas hnov Tswv Ntuj tej lus txib saub ? Vim saub siab ntsws npuab rawv Tswv Ntuj tsis tseg, muaj tus xwm dab tsi, muaj lo lus tshiab li cas Tswv Ntuj xav hais saub puav leej paub, puav leej hnov. Tswv Ntuj lo lus txia ua saub lus pauj rov rau Tswv Ntuj. Saub pom tej txiaj ntsha txiaj ntsim Tswv Ntuj tau hlub saub npaum li cas, ua ntej saub tsis tau xeeb tsis tau yug, Tswv Ntuj twb xaiv saub ua Tswv Ntuj tug. Saub teev ntuj, saub hais tias vim Tswv Ntuj twb hom saub, Tswv Ntuj thiaj xeeb saub hauv saub niam plab. Yog peb tsis cuab pob ntseg mloog saub lus, peb kuj txais tsis tau saub zaj teev ntuj. Tiam sis, yog peb cuab pob tseg mloog saub, cov lus saub hais rau peb kuj yuav txia ua peb zaj teev ntuj pauj Tswv Ntuj txiaj ntsha txiaj ntsim peb tau txais ntawm Tswv Ntuj. Kev teev ntuj kuj yuav nthuav loj rau peb taug tsis kawg. Thaum ntawd, peb yuav to taub tias kev teev ntuj, tsis yog mus kom lom zem xwb, tsis yog mus thov Tswv Ntuj rau peb txoj kev tsaus ntuj ua neej nyob hauv ntiaj teb no…Peb mus teev ntuj vim Tswv Ntuj hlub peb tsis txawj tag, peb mus teev ntuj yog mus hais ib lo lus qhuas Tswv Ntuj siab ntshiab thiab siab zoo. Peb yuav pom tias peb tseg tsis taus, peb tseg tsis nyog kev teev ntuj. Ib yam saub hais : “Kav tsij sawv tsees, koj yuav tim lus los tiv lawv tas txhua yam kuv kom koj ua” Saub kev nyuaj siab tsis zoo li peb kev nyuaj siab. Ntawm peb, yog kev muaj mob muaj nkeeg ua rau peb nyuaj siab ; yog kev ploj kev tuag ua rau peb ntshai. Tsis yog kev muaj mob los kev ploj tuag ua saub nyuaj siab. Yog kev tseg tsis taus Tswv Ntuj txiaj ntsa, yog kev npuab Tswv Ntuj txiaj ntsim ua saub chaw ntxhov siab Tswv Ntuj tsa saub ua ncej hlau thiab ntsa tooj txheem Tswv Ntuj lus. Saub thiaj li sawv tsees los tiv tej nom tswv thiab vaj ntxwv thiab pej xeem kom sawv daws tsis txhob pob txhob vau, kom sawv daws ua neej nyob khov kho li tooj li hlau. Peb tsis yog yuav caum kom tau saub qab xwb. Peb tseem yuav raws kom tau Yes Xus lw.
Hnub no Lus Kas piav li no txog Yes Xus qhia rau peb hnov. Yes Xus rov los txog Nas Xas Les hauv Yes Xus qub zog. Cov neeg hnov lus moo cua piav txog Yes Xus cov hwj huam Yes Xus tau ua nyob Kas Fas Naus thiab lwm qhov chaw. Lawv yuam kom Yes Xus ua hwj huam rau lawv pom li nyob lwm lub zos. Tiam sis Yes Xus teb ob lo lus txheej laus thaum ub rau lawv xav :
1-Es Lis thiab cov poj ntsuam : Es Lis tsis raug xa mus rau cov poj ntsuam His Xais Lais, tiam sis, rau ib tug poj ntsuam neeg pej kum nyob lub zos Xas Les Tas, teb chaws Xis Doos. Lub ntuj tshav tau 3 xyoos thiab 6 hli ua rau ntiaj teb neeg puav leej tshaib plab. Tej poj ntsuam txhua leej puav leej tshaib plab. Tiam sis, Es Lis raug xa mus cawm tus poj ntsuam nyob Xas Les Tas. Thaum Yes Xus piav txog zaj ntawv no. Cov neeg nyob Nas Xas Les puav leej paub thiab to taub Yes Xus cov lus. Yes Xus zoo li Es Lis. Cov neeg nyob Nas Xas Les zoo li cov poj ntsuam His Xais Lais. Kas Fas Naus zoo li tus poj ntsuam nyob Xas Les Tas. Vim tus poj ntsuam nyob Xas Les Tas siab dawb siab dav, Tswv Ntuj tshua txog nws. Tswv Ntuj thiaj xa Es Lis mus nkaum hauv nws thiab mus cawm nws. Cov neeg nyob Kas Fas Naus, yog ib co neeg nyiam Tswv Ntuj mloog Tswv Ntuj lus. Yes Xus mus xyuas lawv yog mus cawm lawv. Cov neeg nyob Nas Xas Les tsis tshaib tsis nqhis Tswv Ntuj lus npaum cov nyob Kas Fas Naus thiab lwm qhov chaw.
2-Es Lis Xes thiab cov mob ruas : Nyob Hias Xais Lais kuj muaj mob ruas coob leej tiam sis tsis muaj tug yuav zoo thiab huv tuaj kawg yog Nas Maas ib niag neeg pej kum Xis Lias, vim nws yog tus mloog Tswv Ntuj lus tshaj cov mob ruas His Xais Lais.
Thaum lawv hnov Yes Xus piav ob zaj lus no tas, ua rau lawv meem txom rau Yes Xus. Vim lawv tsis ntseeg Tswv Ntuj zoo. Lawv puas yuav rua tau qhov muag pom Tswv Ntuj tej txiaj ntsim Tswv Ntuj tau pub rau lawv ? Yes Xus twb nrog lawv nyob tav li no, yog lub txiaj ntsim loj tshaj nyob lwm qhov chaw lawv twb tsis pom. Lawv tseem yuav kom Yes Xus ua hwj huam dab tsis ntxiv rau lawv saib ? Lwm qhov chaw, Yes Xus mus tib lwm xwb, lawv ntseeg tias Yes Xus yog Tswv Ntuj Leej Tub. Hauv zos, lawv hais tias Yes Xus yog Yos Xes tub.

Ib tsoom ntseeg sawv daws, peb to taub Huab Tais Yes Xus cov lus zoo li cas?
Peb yuav xyaum coj li cov neeg nyob Kas Fas Naus, ua neeg ntseeg Tswv Ntuj thiab mloog Tswv Ntuj lus. Qhib yus lub siab lub ntsws yam tus neeg tshaib thiab nqhis Tswv Ntuj lus. Yus coj yus lub neej kom haum li Tswv Ntuj nyiam, ua ncej hlau thiab ua ntsa tooj txheem Tswv Ntuj lus tiv tej nom tswv thiab vaj ntxwv thiab pej xeem yog tsis txhob yoog li luag, txhob ua li lub teb lub chaw. Yus yuav tiv tiag kom yeej lub teb lub chaw, yog ua li Yes Xus lus qhia, yog ua li Tswv Ntuj siab nyiam. Yog txoj kev sawv Tswv Ntuj ib tug saub.

Cwj Vuam Chiv 29.01.2010

Ib tsoom ntseeg mloog Huab Tais Tswv Ntuj lus qhuab qhia,


Yog zoo hnub zoo nyoog peb rov tuaj mloog Huab Tais Yes Xus lus koob lus hmoov qhib peb lub tswv yim kom nthuav, kho peb tej siab ntsws kom ncaj rau. Huab Tais Yes Xus niaj hnub tos peb tav li twg, peb thiaj muab peb tej siab ntsws cuaj khaum zawv thiab ntxhua pov tseg, tis daim nplooj siab tshiab zoo nyiam, lo dua daim nplooj plaw ntxim ntshaw ua koob hmoov.

Tsis muaj sij hawm txaus, peb tsuas piav me me hais ob peb los txog Yes Les Mias tsab ntawv. Peb lub neej tsob hwb Tswv Ntuj, vam khom thiab teev Tswv Ntuj zoo tam zoj tsob ntoo txawm rau ntawm ntug dej, nrhau cag muab tau dej los yug siav. Lub neej tsob hwb Tswv Ntuj, nyiam Tswv Ntuj yog koob yog hmoov. Peb zoo siab ua Tswv Ntuj tub ki, ciaj Tswv Ntuj haiv neeg. Peb yuav tsum to taub lub neej ciaj Tswv Ntuj me nyuam. Nws tsis zoo li lub neej teev pej kum dab, tsis zoo li lub neej ua dab ua qhua thiab tsis zoo li peb leej tib neeg lub siab thiab lub tswv yim xav tau. Lub neej ciaj Tswv Ntuj haiv neeg, yog hloov dua qhov muag tshiab los pom Tswv Ntuj tej txiaj ntsim peb tau txais txhawb peb lub neej. Muab tag peb lub siab thiab lub tswv yim los npuab Huab Tais Tswv Ntuj, mloog nws lus. Peb nyiam Tswv Ntuj kom tag peb lub zog noj mis. Peb yuav pom tej koob hmoov tuaj ntawm Tswv Ntuj tuaj txhawb tas ntiaj teb neeg txhua leej txhua tus, sawv daws thiaj muaj txoj sia nyob saum daim npoo av. Lub hnub tsis tawm tuaj ziab ib co neeg tseg lwm cov, tsis pom kev rau cov neeg ncaj tseg cov neeg nkhaus. Lub hnub pom kev thiab tshav rau tag ntiaj teb neeg lub neej. Muaj lub hnub, tib neeg thiaj li cia sia nyob. Lub hnub yog koob yog hmoov peb niaj hnub txais ntawm Tswv Ntuj kaj peb lub neej. Tus neeg tsis hwm Tswv Ntuj, qhia nws tsis ntseeg, hais nws tsis lees pom tsis lees paub Tswv Ntuj tej txiaj ntsim. Kawg yog tus neeg nyiam Tswv Ntuj thiaj lees pom lees paub. Nag thiab lwg tsis poob yug cov nquag tej qoob loo tseg cov tub nkeeg. Nag thiab lwg ua dej neeg haus, ua hiav txwv rau ntses nyob, ua pas rau zaj laug nkaum. Nag thiab lwg yog koob yog hmoov los yug tas ntiaj teb tej qoob loo thiab nroj tsuag pub tsiaj txhu noj…Lub neej ciaj Tswv Ntuj haiv neeg qhia peb tus mloog Tswv Ntuj lus kom yug los dua lub neej, siab ntsws thiab ntsuj plig tshiab tag nrho.

Lub neej tshiab yog tso yus tib neeg lub neej muab hlob thiab khav theeb pov tseg, xyaum coj lub neej raws li Huab Tais Yes Xus lo lus qhia, ua tus neeg me, rov yug dua yam tus me nyuam yaus, ntseeg nws niam nws txiv lus, mloog tus laus hais. Leej tib neeg ib txwm keeb, nws tsuas nco txog nws tus kheej. Vim li ntawd, tus tib neeg twg lub neej twb mus tib txog kab taug tib txoj lw : nws liaj nws lub rooj txag, tsis pub neeg txeem tau tsam muaj neeg tshawb nws nyiaj qab nas. Nws liaj nws lub rooj paim ntshai tub sab nkag mus tsev nqa nws tej cuab yeej. Nws xov laj kab koos nws lub vaj tsis pub leej twg tsuj nws taw rooj. Nws hom mos phua nws ciam dej ciam av txwv pej kum neeg hla dhau mus los…Peb yog Tswv Ntuj tub ki, peb yuav xyaum coj li Tswv Ntuj nyob tsis muaj vag muaj tse, nyob thoob ntiaj teb, thoob ntuj, txhua txheej ntuj. Saum daim npoo av tsuas yog peb lub chaw so xwb, peb lub chaw nyob mus li yog saum ntuj, nrog Tswv Ntuj ua ke. Ua Tswv Ntuj tub ki, yog mloog Tswv Ntuj lus, ua li Tswv Ntuj qhia.

Hloov siab hloov ntsws dua tshiab yog muab tag peb nplooj siab cog rau Huab Tais Yes Xus lo lus. Npaj peb lub siab tos txais tej yam hwj huam peb tsis tau pom dua. Yog peb txawj pom Tswv Ntuj lub siab dawb paug ua hnub tshav rau tus ncaj thiab tus nkhaus, ua nag poob rau tus nquag thiab tus tub nkeeg kom tau noj tau haus. Peb yuav tsis khib vim Tswv Ntuj hlub tus ncaj thiab tus nkhaus, tus nquag thiab tus nkees ob leeg sib npaug zos. Yog peb muaj khib vim Tswv Ntuj hlub tus tub sab los tus tua neeg hauv tsev loj faj ib yam peb. Hais tau tias, peb tseem zoo li cov neeg teev pej kum dab, peb tseem coj lub neej qub, coj lub qub siab. Peb tseem xav thiab coj li tej tib neeg tsis hwm, tsis paub Tswv Ntuj. Lawv lub siab thiab lub tswv yim tseem xam khib. Lawv yuav tsum pauj kom tau tus tub sab los tus tua neeg. Lawv pom zoo muab tus tua neeg tua pauj thiaj tag nws lub txim. Lawv tsuas pom tus tua neeg lub txim txhaum xwb, lawv tsis pom lawv tus kheej kuj yog neeg muaj txhaum. Txawm lawv tsis muaj lub txim tua neeg tiag. Tiam sis lawv muaj lwm lub txim txhaum neeg tsis paub los Huab Tais Tswv Ntuj paub. Peb yog Tswv Ntuj cov tub ki, peb yuav hloov peb tej siab ntsws dua tshiab, lawv Yes Xus qab mus txoj kev Yes Xus tho taug ua peb ntej. Peb tus kheej tsis muaj zog taug kev ib leeg, peb lawv Yes Xus qab thiaj tsis poob zoo. Peb yuav vam Leej Ntuj Plig Ntshiab pab peb, muab tag peb lub siab los npuab Tswv Ntuj tsis tseg, muab Tswv Ntuj ua peb lub chaw cia siab, mloog Tswv Ntuj lus. Vim Huab Tais Tswv Ntuj Ntshiab peb npaug Ntshiab : “Cov tshiab ib leeg qw rau ib leeg : “Ntshiab, Ntshiab, Ntshiab lub sim ceeb tus Huab Tais Tswv Ntuj. Nws lub hwj chim puv tas ntiaj teb HX6,3.” Peb li, peb muaj txhaum, yog neeg txhaum los Tswv Ntuj khuv leej peb, tso nws Leej Tub tuaj npo peb, zam tag peb tej txhaum rau peb. Vim li, peb tuaj pe Tswv Ntuj, ua Tswv Ntuj tsaug, vim Tswv Ntuj hlub tus ncaj thiab tus nkhaus sib npaug zos. Peb yuav xyaum hlub tus neeg muaj txhaum li Tswv Ntuj hlub peb.

Leej tib neeg kev txob kev txhawj loj yog dab tsi ? Peb txhawj peb lub cev thiab txoj sia. Tus tsis paub tsis hwm tsis ntseeg Tswv Ntuj, tsis muaj kev pab daws nws kev tsaus ntuj kev nyuaj siab. Vim li ntawd, cov neeg teev pej kum dab qhuas mus txob tej txoj cai ua nra hnyav ntxiv rau lawv leg. Ntawm peb Hmoob, peb cov poj yawm txwv koob thiaj muab tsiaj txhu ntsuj duab los thov los txhiv kom tau yus tus neeg mob tus ntsuj duab ntsuj plig rov qab los npuab cev. Muab tsiaj tus ntsuj los theej los roos yus tus neeg tus ntsuj duab ntsuj plig. Kom yus tus neeg dim ntawm lub mob zoo los muaj txoj sia nyob ntev. Hmoob txoj kev cai, Hmoob ua li ntawd. Peb los khaub zig Huab Tais Tswv Ntuj, ua Tswv Ntuj cov me nyuam. Peb tsis ua li Hmoob zaj qub kev cai no lawm. Peb ntseeg Yes Xus Tswv Ntuj Leej Tub peb ua raws li nws qhia rau peb ua. Peb twb pom Tswv Ntuj hlub tus pluag thiab tus nplua nuj, hlub tus teev dab thiab tus ntseeg Tswv Ntuj sib npaug zos. Peb yuav xyaum tso siab rau Yes Xus npaum Yes Xus tso siab rau Leej Txiv Tswv Ntuj. Yes Xus tsa suab thov Leej Txiv pab tshem lub ntim rau nws roj ntsha mus kom deb ntawm nws. Peb kuj thov Yes Xus roos peb lub cev ntaj ntsug, tshem lub mob lub ntsaj, kev qaij qaug kom mus deb ntawm peb. Leej Txiv Tswv Ntuj tuaj ruj nws Leej Tub Yes Xus tes, sawv tsees los muaj sia nyob txhiab niag tim puas xyoo. Leej Txiv tsis tso nws Leej Tub pov tseg rau txoj kev ploj kev tuag. Huab Tais Yes Xus kuj yuav rub peb cev nqaij ciab zib thiab txha plaub mag ib hnub twg sawv tsees nrog nws koom ib txoj sia nyob mus li. Yes Xus yuav tsis tso peb pov tseg tib yam. Vim li ntawd, saub His Xais thiaj hais tias : “7 Leej twg cia siab rau Huab Tais, nws tau hmoov : Huab Tais yog nws chaw tso siab. 8 Nws tam zoj tsob ntoo txawm ntawm ntug dej, nrhau cag ncav tau dej, lub ntuj qhuav nws tsis txhawj, nws tej nplooj nyob ntsuab li xiab ; lub xyoo nkig nws tsis ntshai, nws txiv txi tau tsis tseg” Tsob ntoo tsis txhawj, tsis ntshai lub ntuj qhuav ntuj nkig. Peb kuj tsis txhawj tsis ntshai peb lub cev ntaj xib ntsug raug mob raug ntsaj qaij qaug los mus ua twv av luaj dub luaj dag. Dej thiab tshuaj hauv yaj ceeb no cawm tsis tau peb lub cev ntaj xib ntsug. Tiam sis, Huab Tais Yes Xus tib leeg muaj hwj huam cawm tau peb cev ntaj ntsug ua twv av luaj dub luaj dag sawv tsees nrog nws muaj txoj sia nyob txhiab niag tim puas xyoo.

Hnub no, peb hnov Lus Kas qhia Huab Tais Yes Xus cov lus li no rau peb. Yes Xus nrog nws cov thwj tim nce mus saum roob mus teev ntuj. Yes Xus Xaiv 12 leeg los ua nws cov tshaj xo, cov Hauv Paus Xa Lus. Thaum xaiv tau lawv tas, lawv nqes saum roob los txog nram tiaj. Tas zeej tsoom neeg no muaj cov pluag, cov nplua nuj, muaj cov tshaib nqhis thiab cov ua neej ruaj ntseg tsis ntshaw tsis vam leej twg pab, muaj cov txhawj xeeb quaj ntsuag thiab cov nyob zoo tsis txob tsis txhawj, muaj cov raug luag ntxub luag thuam thiab cov muaj koob meej luag cav luag qhuas…Tas sawv daws tuaj nyob nram tiaj ua ib npoj neeg coob. Yes Xus thiab nws pab 12 leeg los poo sawv daws. Muaj ib txhia, lawv coj lawv cov mob tuaj thov Yes Xus kho. Muaj ib txhia yog cov tuaj ntsib Yes Xus thawj zaug, xav paub xav pom, xav hnov Yes Xus qhuab qhia. Kuj muaj cov lam tuaj nyob ntawd tsis muaj siab ntseeg dab tsi thiab muaj cov tuaj npaj hais lus xaiv lus ncua txog Yes Xus. Tom qab, lawv yog cov yuav tiv Yes Xus, txiav txim pom zoo muab Yes Xus tua.

Peb hnov Huab Tais Yes Xus cov lus no, peb yuav ceev faj tsis txhob to taub yuam kev. Txhob yuam kev tias Yes Xus hlub ib co tseg ib co. Thaum peb hnov Yes Xus hais txog cov pluag, cov tshaib cov muaj kev tu siab quaj, cov raug luag ntxub raug luag thuam, raug luag nto, peb tsis txhob xav hauv siab tias ntshai Yes Xus hais lwm leej lwm tus, tsis yog hais peb. Kuj tsis txhob to taub yuam kev tias, puas yog Yes Xus tsis pab tsis hlub cov nplua nuj, cov muaj noj haus tsau npo, muaj kev noj qab nyob zoo tsis txob txhawj nyob luag ntxhi, los yog cov muaj suab muaj npe nto koob meej. Muaj ntau yam yuav piav, yuav hais tsis tas, tiam sis peb tsuas khaws 3 yam coj los xav hnub no :

-1 Npoj neeg tuaj ntsauv Yes Xus nram tiaj no, yog ntiaj teb tib neeg sawv daws txhua nrho. Hauv qab ntuj khwb, muaj cov teb chaw pluag, txom nyem, cov teb chaws nplua nuj, muaj cov teb chaws tshaib plab thiab cov teb chaws vam meej muaj noj seem noj so, muaj cov teb chaws sim neej luag tsis hais txog thiab cov teb chaws luag niaj hnub qhuas niaj hnub cav txog…Tsis yog lub ntiaj teb xwb, lub teb chaws twg puav leej muaj cov neeg zoo li no. Tab hauv yus lub zos los hauv yus lub tsev teev ntuj, kuj muaj cov pluag, cov nplua nuj, muaj cov poj ntsuam tub ntsuag muaj kev tu siab, los kua muag, quaj thiab muaj cov tau zoo neej tsis txob tsis txhawj…

-2 Cov pluag thiab cov nplua nuj Yes Xus hais, tsis yog pluag nyiaj kub, los pluag noj haus, los pluag daim tsoos hnav tsoos npua xwb. Tiam sis, pluag lwm yam loj dua qhov yus xav. Yes Xus kuj tsis yog hais cov nplua nuj fab nyiaj txiag, muaj noj muaj hnav, muaj vag muaj tse. Tiam sis, cov nplua nuj lwm fab. Yog li ntawd, thaum Yes Xus hais cov pluag thiab cov nplua nuj yog cov zoo li cas ? Yes Xus cov lus qhuab qhia no yog ib co lus qhuab qhia tag tsoom sid, tas pab 12 leeg hauv Paus Xa Lus, tas lwm cov thwj tim, tas cov neeg tuaj ntawm Yus Das, Yes Lus Xas Les, Tws Los, Xis Doos…Yog peb nyeem Lus Kas Ntawv Moo Zoo mus lawm tom ntej. Peb yuav pom cov neeg no npe thiab lub pliaj plhu tshwm zuj zus los. Peb yuav hais tsis tas lawv cov npe rau ntawm no. Yog hais txog cov pluag thiab nplua nuj, muaj coob muaj ntau. Muaj ntau tus pluag Yes Xus tsis qhuas. Tus pluag Yes Xus qhuas, yog tus zoo li Las Ntxas Los. “Nws ib ce mob kev txhab, chev ntawm tus nplua nuj lub taw rooj; yam twg poob ntawm tus nplua nuj lub rooj mov los puav leej ua rau nws ntshaw kom tsau nws plab; tiam sis, kawg cov dev thiaj yaim nws tej kev txhab LK16,20” Tus Las Ntxas Los pluag no, yog tus pluag kawg kiag. Pluag noj pluag haus, qias neeg, ntsu kauv, tsw phem, mob kev txhab ib ce lwj dhi, tsis zoo hlub, tsis zoo nyiam. Las Ntxas pluag, yog pluag kawg kiag, ua neej nyob tsis muaj pluag tshaj nws. Mob chev pem teb sawv tsis taus, mus tsis taus, liam txwv, poob tsim tsis zoo ua neeg, nrog dev ua ib pag. Tsis muaj tib neeg tug thuv laj hlub taus. Dev thiaj yaim nws cov kev txhab.
Tus nplua nuj, nyob tsev zeb tsev tsua, hnav nyiaj hnav kub, noj qab noj zoo rog kheej lam, ntxub Las Ntxas Los, tsw phem thiab qias neeg, chev ntawm nws taw rooj paim, laj ntsia, tshaib los puam chawj, cia yoo kom tuag mus, dhuav siab laj pom laj mloog nws suab ntsaj ua hnub ua hmo ntawm taw rooj. Las Ntxas Los, tus pluag liam txwv tuag tshaib. Tus nplua nuj siv zog noj haus ua plab nrha ris, ua mob, tuag mob. Las Ntxas mus nrog yawg koob Has Nplas Has nyob. Tus nplua nuj mus khooj hauv qhov ntuj puag dab teb. Peb to taub Yes Xus cov lus no : “cov pluag, nej hmoov zoo, lub ntuj yog nej tug…Cov nplua nuj, mob nej siab, twb tas kev nplij nej” Tus nplua nuj, tsis yog nplua nuj nyiaj txiag thiab noj haus, tsoos hnav tsoos npua xwb. Tus nplua nuj, nws siab ntsws kuj nplua nuj, tswv yim kuj nplua nuj. Lub siab ntsws nplua nuj, yog lub siab twm xeeb, plab plaw tsis nthuav. Nws tsis ntshaw, tsis vam leej twg, tawv tim tawv. Ciaj los nyob tuag los tseg. Tus nplua nuj lub tswv yim txawj dag tau noj, txawj liam tau yuav. Lo tas lo tuaj, zaj tag zaj tuaj, tsis pluag lus hais. Tus nplua nuj neej nws tsis vam, Tswv Ntuj tsis ntshaw tsis ntxiv dab tsi rau nws. Mus teev ntuj tseem tab kaum nws, tseem txaj muag mus tshwm ntsej muag hauv tsev teev ntuj. Tsis yog Tswv Ntuj thawb nws hauv qhov ntuj, nrog dab phem nyob. Yog nws tus kheej xwb tim dhia qhov ntuj. Tuag mus, tus nplua nuj thiaj mus khooj dab teb, ciaj dab phem. Thaum ua neej nyob, Las Ntxas pluag, vam txog neej pab, quaj tu siab pe thov Tswv Ntuj cawm. Tuag tas, Las Ntxas nce mus saum ntuj, nrog cov pluag nyob.
-3 Yuav kom peb tsis txhob yuam kev, peb twb los ua Tswv Ntuj cov me nyuam ua Tswv Ntuj haiv neeg. Peb twb yog Huab Tais Yes Xus thwj tim. Peb yuav tau mloog Yes Xus qhuab qhia peb ib yam pab 12 leeg ua Yes Xus thwj tim. Yog peb mloog Yes Xus lus, peb ua li Yes Xus qhia rau peb. Peb yog tus pluag ntxim Yes Xus qhuas. Peb tsis yog tso siab rau peb lub zog, tsis yog tso siab rau tus tib neeg tsis muaj peev xwm, tsis muaj hwj huam dab tsi. Peb tsis yog tso siab rau tej qaib npua, nyuag tsiaj nyuag txhu tsis muaj nuj nqes yuav thaiv tau peb tej txhaum. Peb tsis tso siab rau dej thiab tshuaj cawm tsis tau peb txoj sia. Tus peb yuav vam khom, tus peb tos, tus peb hwm, peb teev, yog Tswv Ntuj, tus muaj hwj huam muaj hwj chim nyob mus li. Yog Huab Tais Yes Xus, tus muaj, tus nplua nuj, muaj hwj chim, muaj hwj huam, txia ua tus pluag li peb tib neeg sawv txij peb, ua peb ib leeg tij, rub peb tes ua nws kwv nws muam nrog nws tuav Huab Tais Ntuj npe ua : Leej Txiv. Yog lub koob lub hmoov Yes Xus muab pub rau peb.

Ib tsoom phooj ywg sawv daws, peb nco ntsoov muab peb lub siab lub ntsws npuab Huab Tais Yes Xus tsis tseg. Yog peb txoj kev ua Yes Xus thwj tim.

Cwj Vuam Chiv 11.02.2010

Ib tsoom ntseeg mloog Tswv Ntuj lus,


Peb nyob hauv lub caij 40, yog 40 hnub ua ntej lub Hmoov Hla (Pâque du Seigneur Jésus, Lord's Passover), Huab Tais Yes Xus Hla lub lav tuag sawv tsees rov muaj sia, Hla lub ntiaj teb no mus saum ntuj. Lub Koom Txoos Kav Tos Liv caw tas tsoom ntseeg, siv zog muab 40 hnub los hloov yus lub siab neeg pov tseg los coj Tswv Ntuj siab, ua li Tswv Ntuj nyiam.

Peb muab 3 lub caij coj los piav Tswv Ntuj cov lus peb hnov hnub no :
-Txheej laus thaum ub.
-Lub sij hawm thaum Yes Xus tseem ua neej nyob.
-Zim txwv peb nyob no.

Txheej laus thaum ub:

Has Nplas Has, yog neeg As Las Mias (Araméen), cov teb chaws niaj hnub no (Irak thiab Syrie) lawv cov poj yawm txwv txoob thaum ub neeg. Has Nplas Has ua loj leeb tuaj txog His Xais Lais teb thiab tuaj mus nyob ua neeg pej kum rau Hais Nkws Tos teb (Egypte). Niaj xyoo, Mai Xes Txoj Cai Ob, kom Has Nplas Has tsoom tub ki nco ntsoov txog lawv lub keeb kwm thiab koob hmoov Huab Tais Tswv Ntuj tau pub rau lawv txais : “5 Koj los hais cov lus no ntawm koj tus Huab Tais Tswv Ntuj : "Kuv txiv yog ib tug neeg As Las Mias loj leeb, nws nqes mus Hais Nkws Tos teb ua pej kum neeg, nrog nws pab nyuam txiv tub. Yog nyob nrad, lawv huam vam coob ua ib haiv neeg loj thiab muaj zog.” Has Nplas Has ua loj leej, tsis yog loj leeb li peb Hmoob lo lus hais, loj leeb tub nkoj tub nkeeg tsis xav ua noj, mus ncig toj ncig pes kom txhua nrho, tsis loj leej li tus tub sab los neeg quav dej quav cawv, nyob tsis muaj chaw…Has Nplas Has loj leej xws li fab Hmoob hais kev nkauj nraug. Nkauj yog nkauj tso tshav, nraug yog nraug tso nras. Tos nkauj nraug los sib tau, vim nkauj nraug nyias nqa nyias daim ntawv nyiaj keeb puaj txwm lug toj lug pes los sib sau. Nraug vauv tsuas pom kauj nyab zoo nkauj tuam sis iab, nraug vauv tau nkauj nyab thiaj ntxim nraug vauv siab. Nkauj nyab tsuas pom nraug vauv zoo nraug tuaj sis awv, nkauj nyab tau nraug vauv thiaj ntxim nkauj nyab plawv. Has Nplas Has loj leej hla 9 lub toj ntiab dab tshoj dab ntxhiab 8 lub dawm xa qhua raws ntoj thuv Faj Tim Huab Tais Tswv Ntuj li ntxim Has Nplas Has me nplooj plaw. Hla 9 lub dawm xa qhua raws 8 lub toj xa dab ntxhiab ntoj thuv Huab Tais Tswv Ntuj thiaj ntxim Has Nplas Has nplooj siab. Tej koob hmoov Has Nplas Has tsev nyuam txiv tub tau txais vim Has Nplas Has ua neeg mloog Huab Tais Tswv Ntuj lus txib lus ntuas. Mus ua pej kum neeg nyob puag Hais Nkws Tos teb, dai luag toj qiv luag tais ua noj, yoog luag txuj kawm luag ci. Muaj Tswv Ntuj koob hmoov ua kaus roos Has Nplas Has tsoom tub ki. Lawv huam vam coob, txawj ntse ua rau vaj ntxwv Fas Las Oos txhawj thiab ntshai. Vaj ntxwv thiaj ua zaj ua ntxeev txo, ua zaj ua ntxeev hiam tsoom tub ki His Xais Lais ciaj khaub poob cev qhev. Nyiaj tshaib nyiaj nqhis, tiv tshav tiv nag. Lawv tsa suab hlo quaj pe thov Huab Tais Tswv Ntuj. Yawg koob Has Nplas Has tus Tswv Ntuj thiaj cev tes tuaj npo lawv khiav tawm Hais Nkws Tos teb, muab npab thaiv lawv lw, Fas Las Oos cov tub rog caij nees nrhiav tsis tau lawv tua pov tseg. Lawv nco ntsoov Tswv Ntuj lub hwj huam cawm lawv dim ntawm Hais Nkws Tos teb los hla hav suab puam 40 xyoo. Tsoom tub ki His Xais Lais hla hav suab puam 40 xyoo, ib tiam neej. Lawv tau ntsib ntau yam kev nyuaj siab, kev txob txhawj, raug kev haub kev ntxias. Lawv raug ntxias qhov noj qhov haus, lawv cem Mai Xes yog tus coj lawv los tuag tshaib tuag nqhis hauv hav suab puam. Lawv khuv xim lawv tej lauj kaub nqaij cub nqaij hau noj seem noj so nyob Hais Nkws Tos teb. Lawv khuv xim qhov noj ua cas tsis nyob ua siab nyoo, ua Fas Las Oos qhev tsuav plab tsau. Hla hav suab puam tsis muaj chaw nkaum tshav nkaum nag, yuav tau yoo tshaib yoo nqhis, tso siab rau lub ntuj coj yus kev. Luag pub yus muaj txoj sia, zoo siab ciaj sia nyob tag kis. Luag pom zoo yus tuag, yus zoo siab hlo muab tag yus txoj sia tso hauv luag xib teg. Muaj coob leej, rov lawv taw tuam ntuj. Lawv sau lawv tej nyiaj tej kub los nchuav ua nyuj rau lawv teev, lawv hawm, cuag tsis muaj Tswv Ntuj. Lawv tsis nco Huab Tais Tswv Ntuj tej txiaj ntsim cawm lawv, tso lawv dim Fas Las Oos tus quab thiab rab nplawm. Muab tus mlom nyuj lawv nchuav ua lawv tus huab tais. Tsis tas li ntawd, tsoom His Xais Lais tseem yws Tswv Ntuj thiab yws Mai Xes. Lawv lub ncauj thiab siab ntsws tsawm Huab Tais Tswv Ntuj qaug dab phem ntxias, qaug yeeb ncuab quav. Tus yeeb ncuab yog dab Xas Tas txia ua nab. Thaum lub hauv paus ntxias niam Nkauj Iab Es Vas qaug nws quav. Tsoom tub ki His Xais Lais kuj qaug dab Xas Tas ntxias, raug nab tom tuag coob. Lawv quaj thov pe Tswv Ntuj zam lawv cov txhaum. Leej twg raug nab tom, yuav kom nws dim, nws yuav mloog Tswv Ntuj tus tub txib Mai Xes lus. Leej twg tsa muag ntsia tus nab tooj Mai Xes muab dai saum nkhib ntoo, nws yuav ciaj sia nyob. Tus nab tooj tsis yog nab, tiam sis yog siav tooj siav hlau qaum ntuj tso tuaj khuam saum nkhib ntoo. Leej twg ntshaw, tus tsa muag ntsia, nws yuav tau txais thiab muaj txoj sia. Zaj yog toog ua txiv saub lus hais, lus qhuab lus qhia txog tus yuav nqes saum ntuj los ib hnub twg. Huab Tais Yes Xus tus nqes saum ntuj los, raug dai saum Ntoo Cuam, tuag, sawv tsees muab txoj sia rau tsoom ciaj tsoom tuag ib yam tus nab tooj cawm cov raug nab tom thaum ub.

Thaum Yes Xus tseem ua neej nyob:

Yes Xus nqes saum ntuj los. Zam Ntxuav Plig ua lub Cim Ntxuav rau Yes Xus hauv dej Yos Las Das. Leej Ntuj Plig tuaj nyob saum Yes Xus thiab coj Yes Xus mus 40 hnub hauv hav suab puam. Dab Xas Tas kuj tuaj ntxias Yes Xus ib yam thaum ub Xas Tas tuaj ntxias tsoom tub ki His Xais Lais 40 xyoo hauv hav suab puam :
1- Yes Xus mus teev ntuj 40 hnub nyob hav suab puam, ua ntej yuav mus tshaj lub Moo Zoo qhia Huab Tais Tswv Ntuj lub siab hlub neeg rau ntiaj teb. Lub sij hawm teev ntuj, yog lub caij yus tsis khoom noj mov thiab haus dej. Yus muab tag yus lub siab lub ntsws, lub tswv yim thiab lub cev los npuab los mloog Tswv Ntuj. Yes Xus yoo tau ntev hnub. Yes Xus tshaib plab thiab nqhis dej ib yam His Xais Lais, ib yam sawv daws hla hav suab puam. Xas Tas pom Yes Xus tshaib, yuav ntxias tau yooj yim. Xas Tas paub, Yes Xus yog Tswv Ntuj Leej Tub muaj hwj huam loj. Tus quav yeeb, muab yeeb ntxias tau yooj yim. Tus ntshaw nyiaj, muaj nyiaj ntxias tau yooj yim. Tus tshaib plab muab dab tsi ntxias tau tag. Yes Xus tshaib plab thiaj muaj hwj huam loj, muab hwj huam los ntxias Yes Xus kom Yes Xus ua hwj huam : “3 Dab phem hais nws tias : "Saib ! Koj yog Tswv Ntuj Leej Tub, hais kom lub pob zeb no txia ua mov." Dab phem zaj yog zaj yooj yim : Haub, ntxias thiab dag yeej. Hem kom neeg ntshai, muab yam neeg ntshaw los haub, los ntxias neeg. Muaj hwj huam loj, muaj hwj chim lug cuag Yes Xus. Tsis txog yuav nyiaj tshaib, yoo nqhis npaum li tus tib neeg pluag, txom nyem, tsis muaj peev xwm dab tsi, yuav tsum nyob ze dej kom tau dej haus ; siv zog khwv ciaj khwv tuag thiaj muaj diav mov noj txuas pluas, muaj daim hnav lo npua. Kom Yes Xus cia li siv nws lub hwj huam Leej Txiv tso rau nws. Tsis txog yuav cev tes mus khwv mus ua npaum li neeg. Hais tib lo xwb pob zeb txia kiag ua mov noj tsis tag, nroj tsuag txia ua daim tsuj daim npuag hnav zoo nkauj nyob zoo nraug, dej ntws paim yaws ntawm ko taw. Tiam sis Yes Xus tsis muaj plhus thiab tsis khav theeb li ntsej muag dab phem : “4 Thiab Yes Xus teb rau nws : "Tau sau muaj tseg : Tsis yog mov nkaus xwb ua neeg ciaj sia." Muaj mov noj, tsis yog neeg txhais tes nkaus khwv tawm lo noj xwb. Mov, kuj yog koob yog hmoov Tswv Ntuj pub, tib neeg thiaj tau noj tau haus. Tsis muaj daim liaj daim teb ua, tsis muaj noob qoob noob tsa, tsis muaj lub ntuj tshav ntuj nag, tib neeg txhais tes khwv dawb yuav tsis muaj noj muaj haus. Vim li ntawd, tsis yog zaub mov nkaus ua kom tib neeg muaj txoj sia nyob. Koob hmoov, txiaj ntsim thiab Huab Tais Tswv Ntuj lo lus txib lus ntuas tib neeg sib hlub, sib faib mov noj ua tau sawv daws thiaj muaj txoj sia nyob.
2-Dab phem rov ntxias Yes Xus dua zaum ob. Saum neej no, dab phem kav tag nrho. Dab phem yog tus muaj hwj chim loj saum yaj ceeb no. Nws muaj peev xwm muab nws lub hwj chim hle nog leej tib neeg twg tau tag, tus neeg ntawd muaj hwj chim cuag dab phem. Muaj tseeb, tej vaj ntxwv thiab nom tswv muaj hwj chim loj cuag dab phem hais. Lawv muaj cai tua neeg thiab cawm tau neeg. Vim li ntawd, lawv ntsia lawv muaj hwj chim txaus tsis vam txog tus neeg me, tus pluag. Tib neeg thiaj muaj khib, tej vaj ntxwv, tej nom tswv, cov ua thawj ua hau thiaj sib txeeb ua tus loj dua cov. Thaum ub, cov His Xais Lais muab lawv cov nyiaj cov kub nchuav ua nyuj rau lawv teev, ua lawv tus huab tais. Yog lawv kev tso siab rau lawv lub zog, lawv cia siab rau lawv thooj nyiaj thooj kub loj tshaj cia siab rau Huab Tais Tswv Ntuj. Yes Xus twb pom xeeb yog Tswv Ntuj Leej Tub muaj hwj chim lug npaum li ntawd. Dab phem kom Yes Xus pe dab phem tib pe xwb txaus lawm. Kom Yes Xus tuaj dab phem zaj, siv Yes Xus lub hwj chim, hloov pob zeb los ua mov thiaj tsis tau cev tes mus khwv cuag tus tib neeg pluag, tsis muaj peev xwm ua dab tsi : “8 Thiab Yes Xus hais teb rau nws : "Tau sau muaj tseg : Huab Tais koj tus Tswv Ntuj, koj yuav pe thiab koj yuav teev nws ib leeg” Dab phem haub tsis tau Yes Xus kom ua li His Xais Lais siab xav thiab ua li tej vaj ntxwv thiab tej nom tswv zaj. Yes Xus tsis zoo li dab phem xav, thuam Tswv Ntuj thiaj thuam neeg li dab phem.
3-Dab phem nrhiav dua tswv yim ntxias Yes Xus zaum peb. Yes Xus twb yog Tswv Ntuj Leej Tub diam, muaj hwj huam loj cuag li, muaj hwj chim lug thiab muaj lub cev nqaij thiab txha. Ntiaj teb tib neeg cev nqaij cev txha yug los hauv yaj ceeb no, tshwm sim ua lub neej qas yeev nyob, yuav raws lub sim ceeb yas kab yas ncua, lawv nws qab taug nws lw. Tib neeg cev nqaij cev txha muaj noj qab nyob zoo phim lub sim ceeb zoo nkauj thiab zoo saib ; lub cev ntaj ntsug muaj mob dia hau phim ntuj nrhoo teb qeeg, kuav toj hauv pes nphau. Yes Xus tshwm sim muaj lub cev ntaj ntsug tsis yog zaj dab ntub npau suav, tsis yog cuav ; Yes Xus tsheej xeeb ua lub neej qas yeev nyob yaj ceeb no ciaj neeg, muaj tseeb muaj tiag. Dab Xas Tas rov ntxias kom Yes Xus ua Yes Xus lub cev ntaj ntsug txawm mob tsis txog txhawj, txawm txhoj tsis txog ntshai. Kom Yes Xus mus tsaw tsua, tshiab yuav thaiv yuav npo tsis pub Yes Xus ceg lov npab dam. Tiam sis Yes Xus paub Xas Tas siab nyoog, haus ntshav nyoos. Kom tseg, dab Xas Tas yuav tsum hwm Tswv Ntuj, tsis yeem ntxias Huab Tais Tswv Ntuj.

Lub zim txwv no :

Ib tsoom phooj ywg mloog Tswv Ntuj lus txib lus ntuas. Ua ntej Huab Tais Yes Xus, His Xais Lais raug dab phem ntxias tau tag. Thaum lub hauv paus, As Das thiab Es Vas nkawd kuj raug dab phem haub thiab ntxias tau nkawd. Peb leej tib neeg tsis muaj zog tiv Xas Tas kev haub kev ntxias. Kawg yog Huab Tais Yes Xus tib leeg thiaj tiv yeej Xas Tas kev haub kev ntxias.
Peb tsoom ntseeg yuav vam Huab Tais Yes Xus lub zog pab peb txhua txhia txoj xub ke, txhua txhia lub sij hawm hauv peb lub neej. Vim li ntawd, lub caij 40, peb yuav siv zog teev ntuj dua qub thov Yes Xus lub txiaj ntsim roos peb kom peb muaj zog. Peb muab caij nyoog los teev saw Mab Liab pab ib tsoom neeg txom nyem. Peb ua tiag sawv kom tau mus teev ntuj…Lub caij 40, peb yuav caiv peb lub cev ntaj ntsug tsis txhob ua zaj qub raws li peb ua kam. Kuv yog neeg nyiam haus yeeb thiab haus cawv. Kuv yuav caiv yeeb thiab cawv. Kuv yog neeg nyiam twv nees rag. Kuv yuav caiv tsis mus nrog luag twv nees. Kuv nyiam tau zoo caij tsheb. Kuv caiv tsheb txhob caij, mus taw ib ntus…Cov nyiaj kuv sau tau vim kuv caiv tsis haus yeeb haus cawv, tsis mus twv nees rag, tsis yuav roj rau tsheb, tsis mus noj pluas qab, tsis mus cinéma...Lub caij 40, kuv faib lub txiaj ntsim Tswv Ntuj tau muab rau kuv txais los ua txim cev rau Tswv Ntuj. Kuv muab cov nyiaj kuv sau tau vim kuv caiv thiab kuv yoo, pub rau ib lub Koom Haum txhawb neeg pluag, pub ib lub Association kho tib neeg muaj mob, pab tej lub teb chaws txom nyem txhawb me nyuam kawm ntawv, los puas pab yus lub Koom Txoos txoj hauj lwm. Cov nyiaj peb tseg tau no, muaj nuj nqes kawg nkaus nyob ntawm Tswv Ntuj xub ntiag. Yog leej twg tsis ntseeg, kom nws sim puv 3 xyoos. Lub txiaj Tswv Ntuj muab rau nws txais, nws yuav pom loj thiab zoo nkauj heev, tej zaum nws tseem yuav xav txog lig.

Peb sawv daws ua Huab Tais Yes Xus tsaug, nws hlub peb tsis txawj tag.

Cwj Vuam Chiv 16.02.2010

Tsoom ntseeg nquag mloog Tswv Ntuj lus,


Hnub no yog hnub Chiv ob hauv lub Caij 40. Yog lub caij nyoog rau peb tsoom ntseeg rub nyias lub siab lub ntsws kom ncaj thiab ua lub neej tshiab ntawm peb tus Huab Tais Tswv Ntuj xub ntiag. Peb yuav rau siab ntso mus cuag peb tus Huab Tais Yes Xus, nrog nws ua ke ib yam li cov thwj tim hauv zaj nyeem peb hnov hnub no. Peb xub piav ob peb los txog Tswv Ntuj kev cog lus nrog Has Nplas Has, peb mam los hais txog Huab Tais Yes Xus muab nws lub hwj chim rau cov thwj tim pom xyeem ib vuag dua saum roob ntawm thaj chaw lawv mus teev ntuj.

Yog ze ntawm 2000 xyoo ua Yes Xus ntej, Has Nplas Has loj leej tuaj txog Cas Nas Has teb. Nkawd ob niam txiv kuj ua neej xws luag muaj nyiaj muaj txiaj ntau, muaj tsiaj txhu coob, muaj tub mab tub qhe nrog ncig. Yawg Has Nplas Has tsis yog ib tug neeg dog dig, nws yog neeg nplua nuj, neeg ntseeg Tswv Ntuj. Tiam sis nkawd lub siab ntsws nyob tsis qab, ua lub neej ntxhov qas hnyo : Ntshaw tub ki dhau yug tsis muaj ib tug. Nws poj niam Xas Lais kuj laus heev lawm. Nkawd yug tsis muaj tub ki xws li luag tej, ua nkawd txhawj tsis muaj tug los tuav nkawd lub cuab lub yig, tuav nkawd lub cuab tam. Xav zaj twg los kev puav leej tws, yus ua tsis tau dab tsi, cuag li tsis muaj hmoo, txawm yuav poob noob tiag tiag. Tsis kav, Has Nplas Has coj lub siab ntev siab tus, ua siab loj ntseev dav fo, tsis fav xeeb rau Huab Tais Tswv Ntuj. Nws tsis yog neeg siab nkhaus, siab nqaim siab luv li tej tib neeg. Nws ntseeg Tswv Ntuj, nws tso siab lug ruaj nreb rau Tswv Ntuj thiab teev Tswv Ntuj tsis tseg. Nws txawm pom nkawd ib xyoos laus zuj zus, nkawd kev txhawj xeeb ua mob qas ntsuav auv nkawd lub neej, tsis kav nws thov Huab Tais Tswv Ntuj kho nws qhov mob hauv nws nruab siab tsis tseg. Ib hnub, yog zoo hnub, ib hmo zoo hmo. Tswv Ntuj pom Has Nplas Has kev nyuaj siab kev txhawj xeeb loj heev. Tswv Ntuj tuaj tshoj tuaj hais rau nws tias : “Tsa muag ntsia saum ntuj, suav cov hnub qub yog koj suav txheeb." Thiab hais tias : "Koj yuav muaj xeeb leej xeeb ntxwv npaum li ntawd." 6 Has Nplas Has ntseeg Huab Tais thiab Huab Tais pom nws ncaj ncees.” Has Nplas Has nkawd laus lawm tiag, twb yug tsis muaj ib tug nyob qhov twg, yuav ua li cas muaj tub ki npaum tsoom hnub qub nyob saum ntuj ? Puas yooj yim tso siab thiab ntseeg Tswv Ntuj lus npaum li ntawd ? Tiam sis Has Nplas Has tseem npuab qees Tswv Ntuj, ntseeg Tswv Ntuj lo lus khov kho. Has Nplas Has kev tso siab thiab ntseeg Tswv Ntuj lo lus no ua koob ua hmoov nyob mus li tsis ploj. Muaj koob hmoov zoo li cas ? Muaj koob hmoov loj rau nws tus kheej thiab muaj koob hmoov tseg tiam dhau tiam. Peb Hmoob twb hais txog tsim koob tsim hmoov tseg. Yam koob hmoov loj rau nws tus kheej pom xyeem yog Tswv Ntuj ua nws yug tau tub raws li nws lub siab ntshaw. Has Nplas Has tsuas xav tau ntiav ntiav li tej tib neeg tej siab ntsws, tsuas pom ze ze ntawm qhov muag tub ki yus yug ntawm yus roj yus ntshav. Nws tsis pom tej koob hmoov loj tis ua loj, Huab Tais Tswv Ntuj yuav pub rau nws. Yog tej koob hmoov ntxoov tuaj mus tiam dhau tiam. Tswv Ntuj pom, Tswv Ntuj qhuas Has Nplas Has yog ib tug ncaj ncees. Has Nplas Has siab tsis nqaim, tsis nkhaus, siab tsis me tsis muag yuav cib nyeej rau Tswv Ntuj, yws Tswv Ntuj. Has Nplas Has tsis zoo li dab phem yuav sim yuav twv Huab Tais Tswv Ntuj. Nws tos ntsoov Tswv Ntuj tej koob hmoov ua hnub ua hmo, thawm niaj thawm xyoo.
Peb yuav tau tig ntsia peb tus yawg Koob Has Nplas Has, rua muag los saib nws kev hwm Tswv Ntuj teev Tswv Ntuj. Tsis yog nws tsis muaj kev txob txhawj ; tsis yog nws tsis muaj kev nyuaj siab. Peb yuav tau xav ntawm peb lub neej mus cob rau ntawm nws lub neej. Peb muaj kev nyuaj siab ntxhov plawv, peb ntsib kev tsaus ntuj hauv peb lub neej. Peb yuav xav txog nws kev nyuaj siab kev tsaus ntuj. Nkawd ob niam txiv yug tsis muaj tub ki, ib xyoos laus zuj zus, nkawd txhawj xeeb nkawd lub neej ib hmos tsis txawj kaj ntug, ib hnub tsis txawj tsaus ntuj. Tsis kav, nkawd thov Tswv Ntuj, tsis nkees teev Tswv Ntuj li. Ua li ntawm peb, peb twb thov Tswv Ntuj tsis muaj 3 zaug sib law, thov dawb thov do Tswv Ntuj ib lo qhuav xwb, peb haj tseem dhuav, npau, chim, thiab muaj cuab kav yws npaum Huab Tais tshuav peb nqe. Thaum zoo li no lawd, yus ho xav tau ib zag txawv txawv yuam kev rhuav, nyiag kev rov mus fiv dab. Tshuav dab nqe, siv zog ntsos them, zoo siab hlo muas tsiaj muas txhuv ntiav dab pov yus. Tus phem, tus looj koov rau yus, tus ntaim yus noj haus, tus qis tus me, tsis muaj tsim hlo, yus ho mus zwm mus nyoo nws. Puas yog yus ua neej thaub qab, ua kub ua npau, ua ceev npaum li ntawd; dab puas muaj peev xwm npaum Tswv Ntuj ? Sim neej, peb Hmoob tsis hais ib los tias dab tsim tau ib yam nyob qhov twg. Tiam sis Hmoob hais tias : “Thaum Ntuj tsim teb raug…” Peb yuav rua muag ntsia kom deb puag qab ntug kawg. Yog qiv saub qhov muag los coj yus txoj kev teev Tswv Ntuj, ntseeg Tswv Ntuj; qiv saub lub ncauj hais Tswv Ntuj lus tshem yus kev txob txhawj kev tsaus ntuj pov tseg; ua nphoov tes cug yawg koob Has Nplas Has tej koob hmoov ntxoov tuaj txog ncua peb zim txwv no mus txog fab lwm txheej, sawv daws yog nws tub nws ki npaum hnub qub saum ntuj thiab suab puam ntawm hiav txwv. Tej koob hmoov yawg koob tau txais, Tswv Ntuj tau pub nws txais, peb kuj yuav txais, Tswv Ntuj kuj yuav pub peb txais.
Tiam sis muaj ib yam khi yawg koob ruaj nreb ntawm Tswv Ntuj xub ntiag. Yam ntawd yuav khi peb kom ruaj nreb ntawm Tswv Ntuj xub ntiag tib yam nkaus. Yawg koob li, yawg koob tau txais Tswv Ntuj tej koob hmoov lawm tshuav peb tug peb tseem yuav txais. Yog peb tsis siv zog npuab Tswv Ntuj kom ruaj nreb, peb ua nphoov tes to qhov cug tsis tau Tswv Ntuj tej koob hmoov. Tswv Ntuj qhia li no rau yawg koob : “Koj muab rau kuv ib tug xyuas nyuj maum peb xyoos, ib tug thav tshis maum peb xyoos, ib tug thav yaj txiv peb xyoos, ib tug poj nquab thiab ib tug me nyuam nquab."10 Has Nplas Has coj cov tsiaj li hais los, muab faib nruab nrab, tso sib tib nyias sab nyob nyias pawv; tiam sis nws tsis muab cov noog faib.” Has Nplas Has ua nphoov tes cug tsis tag Tswv Ntuj tej koob hmoov ntws si lug tuaj txog rau peb yog li no: Has Nplas Has tes txawj tes nquag, muaj tsiaj muaj txhu coob. Nws muab nws tej tsiaj los ua txim txi Tswv Ntuj ntxim Tswv Ntuj siab. Thaum tsaus ntuj nti, thiaj muaj ib teg tsau cig tuaj lwm cov sab nqaij nws muab los txi Tswv Ntuj. Yog tej koob hmoov Tswv Ntuj nchuav tuaj rau nws nphoov tes cug tsis tag kom tuaj txog rau peb, nws tej tub ki, mloog nws lus, ntseeg Tswv Ntuj li nws. Ntawm peb, peb tsis muaj tsiaj txhu los cev txi rau Tswv Ntuj. Tiam sis, peb kuj mus khwv tau qhov noj qhov haus, yug peb poj niam tub se. Peb muab ib qho qee ua txim txi Tswv Ntuj li yawg koob Has Nplas Has. Peb kuj yuav ua nphoov tes cug tsis tag Tswv Ntuj tej koob hmoov.

Vim li ntawd, Tswv Ntuj tej koob hmoov nws loj thiab dav npaum li cas peb tsuas pom tsuas paub me me tej yam Tswv Ntuj tau muab rau peb pom xwb. Rau peb, twb loj kawg, peb twb qhuas kawg. Tiam sis, tseem tshuav loj, tshuav dav thiab tshuav ntau yam zoo ntxiv, peb paub tsis tag. Muab piv li cov thwj tim tau raws Yes Xus mus teev ntuj saum roob. Lawv tau txais cov txiaj ntsim qhib lawv qhov muag pom xyeem Huab Tais Yes Xus lub hwj chim. Peb muab ob lub ntsiab lus los piav txog Huab Tais Yes Xus lub hwj chim rau ntawm no :

1-Vim cov thwj tim raws Yes Xus qab, lawv thiaj pom Yes Xus lub hwj chim. Muaj 3 yam ua rau lawv zoo siab tsis paub tag : Cov thwj tim twb raws Yes Xus ntev los lawm. Lawv twb nrog nws mus tshaj lub Moo Zoo txog ntau qhov chaw. Lawv pom Yes Xus ua hwj huam ntau zaus, ua neeg dig muag rov pom kev, ua neeg tuag ceg mus taus kev, tsa neeg tuag sawv rov ciaj sia. Yog thawj zaug lawv pom Huab Tais Yes Xus hloov tshiab tsis zoo li qub thiab ris tsho dawb paug cuag xob laim. Tsis tas li ntawd, lawv zoo siab, vim lawv tau pom xyeem nyob ntawm Yes Xus txheej laus thaum ub thiab zim txwv no nyob ua ib ke, sawv ib nqag, ua rau lawv tsis paub nruab hnub thiab hmo ntuj, tsis paub lub caij lub nyoog, ua rau lawv mloog zoo li nyob hauv zaj npau suav, tiam sis yog tiag tiag. Lawv pom xyeem lawv cov yawg koob tsuas paub lawv npe xwb, zim txwv no pom dheev tus tib neeg. Mai Xes thiab Es Lis nkawd nrog Yes Xus sib txuas lus ntawm lawv xub ntiag. Lawv tseem nco tau tej lus lawv tau sib tham : Mai Xes, Es Lis thiab Yes Xus lawv hais txog txoj hauj lwm Yes Xus yuav mus ua thiab yuav tshwm tuaj nyob lub tuam ceeb Yes Lus Xas Les. Pob Zeb tsis pom qab hais li cas, nws cia li lam taus lam hais tej lo lus txawv txawv : “Tsa 3 lub tsev tsam phooj, ib lub rau Mai Xes, ib lub rau Es Lis, ib lub rau koj” kom lawv tau nyob ntev saum roob tsis xav rov los tsev. Yog txia tau, lawv twb xav txia saum roob tsis ua neeg. Thiab yam 3 ua rau lawv zoo siab, muaj ib lub suab txhib lawv puav leej hnov : “Tus no yog kuv Leej Tub, tus raug xaiv tau, kav tsij mloog nws.” Lub suab ua tau lawv lub siab lub ntsws muaj zog, ua rau lawv kev tso siab rau Yes Xus yim huab loj ntxiv.

2-Lub ntsiab lus 2 yuav pab kom peb khaws Lus Kas zaj nyeem no txhawb peb txoj kev ntseeg. Peb yuav ntsia lub cim cov thwj tim tau pom thiab tau ntsib saum lub roob nrog Yes Xus, yog ib lub ntxiaj ntsim thiab koob hmoov txhawb cov thwj tim kev tso siab rau Yes Xus. Peb tug thwj tim, yog peb leeg caum Yes Xus tas zog. Lawv caum Yes Xus txog twg, vim lawv nyiam Yes Xus, xav nrog Yes Xus ua ke. Lub txiaj ntsim peb leeg thwj tim tau pom, kuj yog tej koob hmoov Yes Xus xav pub rau peb leej twg kub siab mloog Yes Xus, kub siab raws Yes Xus kom muaj cov koob hmoov no hauv peb lub neej. Lawv peb leeg thwj tim no cov yawg koob : Mai Xes, 1200 xyoo thiab Es Lis, 870 xyoo ua Yes Xus ntej lawv twb dua nra tas tau pes tsawg tiam los. Peb tug thwj tim tseem tau ntsib lawv cov yawg koob nrog Yes Xus sib tham sib txuas lus. Yog ib lub cim qhia rau peb txog peb lub cev thiab txoj sia. Txawm leej twg dua nras tas txij puag txheej thaud los mus txog fab lwm tiam hnub ntiaj teb kawg, lawv thiab tsoom neeg ciaj sawv daws tseem yuav rov sib pom ntawm Huab Tais Yes Xus lub hwj chim. Twb yog ib lub cim qhia ua ntej rau cov thwj tim thiab qhia rau peb paub meej hais txog Yes Xus yuav raug hiam, tuag nyob Yes Lus Xas Les thiab sawv tsees ciaj sia nyob mus li ntawm Tswv Ntuj. Mai Xes thiab Es Lis ua pov thawj txog txoj sia nyob mus li. Cov thwj tim tseem tsis tau to taub. Thaum lawv pom Yes Xus tuag thiab sawv rov qab los, lawv thiaj mam to taub thiab ntseeg vim li cas lawv pom Mai Xes thiab Es Lis. Nkawd muaj Tswv Ntuj txoj sia nyob mus li ntawm Tswv Ntuj xub ntiag ib yam Yes Xus sawv tsees rov los muaj txoj sia nyob mus li. Ntawm peb, kuj tsis yog thawj zaug peb hnov hais txog Yes Xus sawv tsees hauv tsoom tub tuag thiab rov muaj txoj sia. Tiam sis peb kuj yuav to taub ib hnub twg. Peb yuav thov kom Yes Xus pub lub txiaj ntsim ntawd rau peb.

Ib tsoom phooj ywg Hmoob, peb los ntseeg Huab Tais Tswv Ntuj tus tsim lub ntuj lub teb, tus muaj hwj huam. Peb tsis yog yawg koob Has Nplas Has cov tub ki koom roj koom ntshav. Tiam sis yog nws cov tub ki muaj koob meeb thiab loj tshaj koom roj koom ntshav. Vim peb txais nws cov koob hmoov Tswv Ntuj laub rau nws nphoov tes cug tuaj roos txog rau peb. Peb ntseeg tus Huab Tais tsim lub ntuj lub teb ib yam nws yog peb leej txiv tus xub ntseeg. Tsis tas li ntawd, peb ntseeg Huab Tais Yes Xus, tsis yog peb ntseeg raws li peb tus kheej siab nyiam thiab xav tau. Peb ntseeg Yes Xus, peb raws Yes Xus qab raws li cov thwj tim qhia rau peb. Peb mloog raws li lub Koom Txoos Kav Tos Liv sawv cov thwj tim npe qhia rau peb ntseeg. Peb mloog Yes Xus cov lus raws li lub suab txhib cov thwj tim kom tso siab rau Yes Xus. Vim li ntawd, lub caij 40 no, yog lub caij nyoog rau peb tsoom ntseeg rub nyias lub siab lub ntsws kom ncaj thiab ua lub neej tshiab ntawm peb tus Huab Tais Tswv Ntuj xub ntiag.


Cwj Vuam Chiv 23.02.2010

Tsoom phooj ywg Hmoob mloog Tswv Ntuj lus,


Peb txoj kev ua neej hauv lub ntiaj teb tsis niaj hnub yooj yim li lub siab ntshaw lub siab xav. Vim sawv daws yuav tsum mob siab siv zog ntsos mus khwv thiaj muaj noj muaj haus yug yus tej poj niam tub se, pab txhawb tsa yus lub cuab lub yig kom xws lub teb lub chaw, ua lub neej xws li luag. Thiaj hais tias ua neej nyob saum daim npoo av tsis yog tau zoo. Yuav tau siv zog, tawm hws, nyiaj dab ntub, yoo tshaib yoo nqhis, tiv tshav tis nag, tiv no tiv daus, raug luag tsawm, raug luag yuam ua txoj hnyav…

Peb hnov zaj nyeem hauv phau Ntawv Kev Tsiv hnub no, hais txog Mai Xes txoj kev khwv noj khwv haus. Peb tsis muaj sij hawm los piav txog Mai Xes lub neej rau ntawm no. Nej mam mus ntshawb nyeem hauv phau Ntawv Kev Tsiv. Mai Xes ua lub neej laus nkoos txwm 120 xyoo li peb Hmoob niaj txhis piv lus, nws mam tso lub ntiaj teb no tseg. Hauv nws lub neej muaj peb toom yuav piav. Hnub no, peb tsuas hais me me txog nws lub neej xwb : yav thaum tseem yau mus txog 40 xyoo, yav hluas mus txog rau 80 xyoo thiab yav ua luag txwj luag laus coj tsoom His Xais Lais hla hav suab puam 40 xyoo, xam tas nrho puv 120 xyoo. Thaum yau, Mai Xes tau kawm txuj nrog vaj ntxwv Fas Las Oos cov tub. Fas Las Oos tau xa nws mus saib tsoom tub mab tub qhe, ua dag ua zog txhim zej kho zos tsa vaj ntxwv Fas Las Oos lub teb chaw. Muaj ib hnub, nws pom cov kwv tij His Xais Lais raug ib tug thawj peeb Hais Nkws Tos tsim txom ntawm luag hauj lwm. Nws pab lawv muab tus peeb tua tuag faus tom hav suab puam. Nws paub nws plaub mob thiab paub ntsoov Fas Las Oos yuav tsis zam. Nws thiaj xuas kev khiav mus tsiv nraim dua Mas Dias teb lawm. Nws mus nkaum hauv Zes Raus tsev. Zes Rau ua txiv leej choj nyob Mas Dias. Zes Raus muaj 7 leej ntxhais. Nws yuav Xis Pos Las, Zes Rau sib tug ntxhais ua poj niam. Mai Xes niaj hnub mus zov nws yawm txiv cov tsiaj nog zaub ib hnub rau ib qho, ib lub tshav zaub mus rau lwm lub tshav ua li ntawd ntev niaj ntau xyoo mus txwm li 40 xyoo. Muaj ib hnub, nws coj cov tsiaj mus txog lub roob Hos Les. Nws thiaj li mus pom ib tauv khaub cig nplaim ua ntsaj phov tsis txawj kug. Nws tsis paub xyov yog tus tsi, nws tau nyas mus xauj kom ze tsis tau pom dua tej yam yuav txawv tag npaud. Nws thiaj mam hnov ib lub suab hu nws npe. Nws thiaj paub lub suab hu nws ntawd yog nws cov yawg koob tus Tswv Ntuj.

Hmoob twb hais kam : tsis txhob twv ntuj twv teb, twv dej twv taws. Hmoob yeej ib txwm ntseeg muaj Ntuj nyob saud, Ntuj pom tiag. Leej twg nkhaus lam liam tib neeg, tus neeg dag, yuav dag yeej luag lwm tus tib neeg, tiam sis dag tsis yeej Tswv Ntuj. Tej niam tej txi thiaj cob qhia tej tub ki kom ua neeg nquag thiaj muaj noj muaj haus. Tsis txhob ua neeg nkees, thiaj tsis tshaib thiab tsis nqhis, tsis mus thov khawv noj, tsis mus ua tub sab tub nyiag luag teej luag tug. Yus ob txhais tes, yus lub dag lub zog khwv tau li cas, zoo siab noj li ntawd. Tsis txhob ua neeg dag, tsis ua siab dub siab nkhaus mus huab noj huab haus, txhav luag li, tua neeg. Yuav xyaum coj nyias lub siab kom ncaj ncees, ua leej tib neeg tus hlob tus yau, tus mab tus sua sawv daws kwv tij kwv npawg. Xyaum coj lub neej xws li Mai Xes, hlub leej tib neeg, tus poj niam, tus txiv neej nws cev tes pab tag nrho. Peb pom Mai Xes muaj lub siab hlub nws cov neeg His Xais Lais. Nws pab lawv kom lawv dim ntawm cov thawj rab nplawm thiab tus quab muab lawv tsim txom ua qhev nyiaj tshaib yoo nqhis. Nws kuj tau yuam kev tua neeg. Nws thiaj ntshai khiav tsiv nraim kom Fas Las Oos nrhiav tsis tau nws tua pov tseg. Tiam sis Tswv Ntuj pom tag. Tswv Ntuj pom Fas Las Oos lub siab lim hiam, tsim neeg, pom nws lub siab nyoos. Tswv Ntuj pom cov thawj Hais Nkws Tos quab yuam tsoom His Xais Lais. Tswv Ntuj thiaj cev tes tuaj tso tsoom tub ki His Xais Lais kom dim ntawd Fas Las Oos kev quab yuam. Tiam sis, Tswv Ntuj tsis coj tsis ua li tib neeg zaj lim hiam ib yam Fas Las Oos, tsis quab yuam neeg li cov thawj Hais Nkws Tos thiab tsis cib nyeej tua neeg li Mai Xes. Peb thiaj yuav tsum mloog Tswv Ntuj cov lus, Tswv Ntuj hais rau Mai Xes : “8 Kuv nqes los tso lawv dim ntawm cov Hais Nkws Tos xib teg kom coj lawv tawm thaj av ntawd los mus rau thaj av dav thiab av zoo qoob, mus rau thaj av muaj mis thiab zij ntws nto, mus Kas Nas Has teb. 10 Koj mus tam sis no ! Kuv xa koj mus cuag Fas Las Oos : koj coj kuv haiv neeg, His Xais Lais cov tub ki, tawm Hais Nkws Tos teb.” Tswv Ntuj yog tus nqes los tso tsoom tub ki His Xais Lais. Tiam sis, ua cas Tswv Ntuj tsis mus ua kiag txoj hauj lwm Tswv Ntuj tus kheej kom tiav kiag ? Tswv Ntuj ho yuav xa Mai Xes nrog Fas Las Oos ciaj caub rov mus cuag Fas Las Oos, mus ua tus coj His Xais Lais tawm khiav los ? Peb twb paub tias Tswv Ntuj muaj hwj huam loj, ua cas Tswv Ntuj ho yuav vam txog Mai Xes, ib tug tib neeg tsis muaj peev xwm dab tsi ? Mai Xes twb ntshai tuag thiaj khiav nkaum kom Fas Las Oos tua tsis tau nws. Puas yog Tswv Ntuj coj Mai Xes mus txhob rau Fas Las Oos tua ? Tsis yog li ntawd. Yog peb xav li ntawd, peb xav tau yuam kev, peb tsuas xav li neeg xav. Peb ntshai, peb ua raws li peb lub siab nqaim siab me xwb. Peb yuav cuab pob ntseg mloog Tswv Ntuj lus. Tswv Ntuj zaj, yog zaj ncaj, leej tib neeg twg twb haum twb yuav tau, siv tau. Tswv Ntuj zaj, yog zaj loj thiab dav, leej twg twb qhuas twb hwm thiab twb ntshai. Mai Xes yog thawj tug hwm Tswv Ntuj, qhuas Tswv Ntuj thiab ntshai Tswv Ntuj. Mai Xes thiaj tau thaiv nws ntsej muag kom txhob pom Tswv Ntuj, vim Mai Xes hwm Tswv Ntuj loj, nws tsis tsim nyog pom Tswv Ntuj. Fas Las Oos tsuas ntshai Tswv Ntuj ib leeg kheej thiab nyoo Tswv Ntuj ib leeg. Thaum kawg, Fas Las Oos yuam Mai Xes kom coj tsoom His Xais Lais tawm khiav Fas Las Oos thiaj tsis raug Tswv Ntuj npau taws, tsis raug nplua. Tswv Ntuj lo lus yog lo zoo yuav, lo ncaj muaj raws li Tswv Ntuj tau xub hais tseg : “8 Kuv nqes los tso lawv dim ntawm cov Hais Nkws Tos xib teg…Kuv xa koj mus cuag Fas Las Oos : koj coj kuv haiv neeg, His Xais Lais cov tub ki, tawm Hais Nkws Tos teb.” Tswv Ntuj zaj kho tau Mai Xes thiab Fas Las Oos kom rov sib haum xeeb, rov sib txuas lus ; kho tau Mai Xes muaj kev cia siab tuag nthi rau Tswv Ntuj. Tsis tas li ntawd, los txog tav no, Mai Xes tsis paub thiab tsis to taub Tswv Ntuj yog leej twg ; ziag no, Mai Xes paub Tswv Ntuj muaj npe : “Yog kuv tus yuav yog”. Mai Xes yuav txawj piav hais qhia rau tsoom tub ki His Xais Lais. Tswv Ntuj zaj tseem kho tau Fas Las Oos thim xav pom tias nws tsis yog tus loj, tseem muaj Tswv Ntuj muaj hwj chim loj tshaj nws ; kho tau Fas Las Oos zoo siab yuav li Tswv Ntuj siab nyiam, tso kev cia tsoom tub ki His Xais Lais mus nyob twj lij rau lawv teb chaws thiab tseem muab nyiaj txiag ntiav lawv, pua lawv taw mus. Hauv lub Caij 40 no, peb yuav mloog Tswv Ntuj lus kom zoo ib yam Mai Xes thiab Fas Las Oos, sib haum xeeb ntawv peb lub cuab lub yig, hauv peb tsoom kwv tij neej tsa, hwm Tswv Ntuj thiab ua li Tswv Ntuj siab nyiam npaum li Fas Las Oos twb tawv tsis dhau Tswv Ntuj. Peb yuav xyaum mloog Tswv Ntuj lus ib yam Mai Xes.

Kev mloog Tswv Ntuj lus, tsis yog mloog ib zaug yuav txaus. Tus mloog Tswv Ntuj lus, nws yuav tau mloog Mai Xes lus, mloog cov yaj saub lus thiab qhov kawg mloog Yes Xus lus thiab ua li Yes Xus hais kom ua. Yus hnov Tswv Ntuj lus tag, yus paub Tswv Ntuj qhia li cas. Xav kom yus ua tau raws li Tswv Ntuj siab nyiam, coj tau lub neej muaj txiag muaj ntsig. Tus mloog Tswv Ntuj lus, nws yuav vam txog Tswv Ntuj lub zog pab nws. Tus vam txog Tswv Ntuj pab, nws yuav khiav khuav khaub zig Tswv Ntuj tas zaj tas zog ; tsis yog ib zaug los kaum zaus, tiam sis txhiab pua zaus tag nws sim neej. Vim li no, peb mloog Huab Tais Yes Xus tej lus qhuab qhia ib zaug, ob zaug los kaum zaus kuj tsis txaus peb. Peb yuav vam, yuav thov Huab Tais Yes Xus tej txiaj ntsim txhiab pua zaus pab peb kom tag peb sim neej.
Hnub no peb hnov Huab Tais Yes Xus qhuab qhia li no rau cov neeg tuaj ntsauv nws. Muaj ib pab neeg Nkas Lis Lais tseem tab tom sib sau ua lub txoos txi ntuj. Lawv npaj tau ib co txim yuav coj los txi rau Huab Tais. Tiam sis pab neeg Nkas Lis Lais no, yog ib pab sawv tiv thiab tua cov tub rog neeg Los Mas. Vim lawv tsis nyiam cov Los Mas tuaj kav Nkas Lis Lais teb. Thaum lawv tuaj sib sau teev ntuj, lawv raug Pis Las Tos txhij tub rog Los Mas muab lawv puav tua tuag tas. Muaj neeg tuaj hais qhia Yes Xus hnov. Yes Xus teb rau lawv : “Nej xav tias cov Nkas Lis Lais no muaj txhaum dua lwm cov Nkas Lis Lais, vim li ntawd lawv thiaj raug tsim txom ? 3 Kuv hais rau nej, tsis yog li ntawd…Los puas cov kaum yim leej raug lub phawv Xis Laus Es pob tsuam tuag, nej xav tias lawv muaj txim loj dua cov tib neeg nyob Yes Lus Xas Les ? 5 Kuv hais rau nej, tsis yog li ntawd…” Peb hnov Yes Xus cov lus no, yog ib co lus qhuab qhia peb lub tswv yim kom xav tau qhov ncaj ncees qhov yog. Tsis txhob xav yuam kev, txhob xav ib zag tswv yim nkhaus cees xu das puag tom tej. Muaj ntau zaus, peb leej tib neeg lub tswv yim thiab tej siab ntsws xav tau tej zaj niag nkhaus cees thiab xu das tsis yog kev yog cai, tsis zoo yuav. Tej zaj tswv yim thiab tej siab ntsws nkhaus no ua rau peb tib neeg yuam kem loj. Yus rov ua rau yus txhawj, yus rov ua rau yus txom nyem thiab yus tseem rov txo yus txoj sia kuj muaj. Yog peb mloog Huab Tais Yes Xus lus qhuab qhia, peb yuav muaj Huab Tais Yes Xus lub txiaj ntsim pab daws peb kev txhawj, pab peb tiv kev txom nyem thiab ua tau peb txoj sia loj tuaj tiag tiag. Huab Tais Yes Xus lub txiaj ntsim pab peb yog pab kom peb lub tswv yim tsis yuam kev, kom peb xav tau qhov ncaj qhov yog ; pab kom peb lub siab loj tiv taus kev txob kev txhawj, tsis ntshai zaj dab ntub npau suav phem ; pab kom peb ua lub neej tsim txiaj, sib haum xeeb, sib hlub, muaj zog hla dhau kev sib cav sib ceg, ua kawm to qab, tsis cib nyeej, ib leeg txawj zam rau ib leeg. Huab Tais Yes Xus qhia tias kom peb tsis txhob yuam kev muab txim txhaum nog ntxiv rau pab Nkas Lis Lais raug Pis Las Tos tua tuag. Lawv tsis muaj txhaum loj dua lwm leej Nkas Lis Lais. Vim tseem muaj lwm cov Nkas Lis Lais tsis nyiam cov neeg Los Mas. Tiam sis lawv tuaj tsis ncaj hnub ntawd, lawv thiaj tseem ciaj sia nyob rau lwm thaj chaw. Lawv tseem yuav npaj, yuav nyas quav txias tua Pis Las Tos kom pauj tau lawv cov neeg. Ntawm Pis Las Tos kuj tib yam, nws yeej paub ntsoov tias tseem tshuav yeeb ncuab coob leej nrhiav tua kom tag. Yes Xus thiaj qhia hais tias : “Yog nej sawv daws tsis hloov siab, nej yuav raug puas ntsoog tib yam nkaus.” Pab neeg ntawd, cov Nkas Lis Lais thiab Pis Las Tos kuj tib yam, yuav tau hloov siab tshiab. Ntawm peb kuj tib yam. Yog peb tsis nrauj peb lub tswv yim phem, tsis hloov peb lub siab neeg nkhaus no, peb yuav tsis muaj kev nyob tiaj tus thaj yeeb. Yog peb tsis vam Huab Tais Yes Xus lub txiaj ntsim pab peb, ua pes tsawg tiam neej, peb zoo tib yam mus tib txoj kab : tus nkees, yuav tuag nws txoj kev tub nkeeg, tus tub sab, yuav this nws kev tub sab tuag, tus siv ntaj siv riam yuav tuag hniav ntaj hniav riam…Tus neeg tsis mloog lus, tsis tso lub qub siab pov tseg, tsis tig los yuav lub siab tshiab, nws zoo li tsob txiv ncuav pias tsis txi txiv nkim av dag. Huab Tais twb xav muab txiav pov tseg los Huab Tais ua siab ntev tos rov lwm xyoo saib puas txi tau txiv. Vim tus tub zog tseem khuv xim xav tu tsob txiv kom kawg siab ncaws av ncig hauv paus thiab nphoo chiv rau tos rov lwm xyoo fim nws yuav txi tau txiv.

Ib tsoom phooj ywg, peb pom Tswv Ntuj muaj hwj huam tiam sis Tswv Ntuj vam txog Mai Xes, tib neeg tsis muaj hwj huam los cev tes mus tso His Xais Lais tawm ntawm chaw raug txim. Huab Tais txiav tau siab yuav muab tsob txiv ncuav pias nkim av tsis txi txiv txiav pov tseg los Huab Tais ua siab ntev yuav tus tub txib lus, tos tus tub txib ua txhij ua txhua tu kom kawg siab tsob txiv ncuav pias…Cov lus peb mloog no, yog Tswv Ntuj cov lus qhib peb lub tswv yim thiab peb lub siab. Peb yuav tsis txhob muab peb lub neej los mus xyaw zaj dab ntub npau suav phem. Peb tsis txhob muab peb lub cev noj qab nyob zoo los muaj mob muaj nkeeg los piv kev txhoj kev txhaum, los piv rau kev tau koob tau hmoov los puas raug foom raug khaum, raug dab li ub li no. Nyias muaj nyias kab nyias ke taug. Peb lub neej thiab zaj dab ntub yog ob yam sib txawv. Neeg lub cev ntaj ntsug tau zoo nyob los raug mob raug ntsaj tsis yog koob hmoov ua, tsis yog muaj txim muaj txhaum los puas khaum li Hmoob hais thiaj muaj mob. Yog peb tseem ntseeg li ntawd, muab lob tau los sib xyaws, qhov ntawd yog txoj qub kab qub ke. Peb lag ntseg, tsis hnov Huab Tais Yes Xus lo lus qhia. Peb pom Tswv Ntuj muaj hwj huam loj, Tswv Ntuj tseem vam txog tus tsis muaj hwj huam dab tsi los ua Tswv Ntuj txoj hauj lwm. Peb twb pom thiab to taub tias peb yog tus tsis muaj hwj huam dab tsi. Yog peb vam Tswv Ntuj tus muaj hwj huam pab peb. Lub tswv yim peb xav, lo lus peb hais, txoj dej num peb txhais tes ua yuav muaj Tswv Ntuj lub hwj huam loj. Mai Xes to taub Tswv Ntuj lub npe mus li ntawd : “ Yog kuv tus yuav yog”. Mai Xes lo lus hais thiab Mai Xes txhais tes ua “Yog kuv tus yuav yog” lo lus hais thiab txhais tes ua. Yog peb mloog lus, peb yuav tso siab rau Yes Xus lo lus qhia. Yog peb tso siab rau Yes Xus, peb yuav mloog Huab Tais cov tub txib lus. Lawv yuav pab kom peb tawg paj thiab txi txiv tau rov lwm xyoo Huab Tais yuav rov tuaj de txiv.

Cwj Vuam Chiv 03.03.2010

Ib tsoom ntseeg thiab phooj ywg Hmoob,


Peb nyob hauv lub lis piam 5 lub caij 40. Hnub no peb tsuas hais ob peb los txog tsab ntawv Moo Zoo, Zam tau sau tseg. Yes Xus nrog nws cov thwj tim nce mus pem Yes Lus Xas Les, mus ua lub hmoov “Tsev tsam phooj, fête des Tentes, the Tabernacles feast ” nco txog thaum ub lawv cov yawg koob tsa cov tsev tsam phooj hla hav suab puam 40 xyoo. Lub hmoov “Tsev tsam phooj” ua thaum lub caij sau qoob tas, lub 9 hlis ntuj. Yuav tsum paub tias, tau ntev los, cov txwj laus Fas Lis Xais, cov thoob xwm thiab cov xib hwb qhia Ntawv Ntshiab nrhiav ib lub zoo sij hawm kom tau kev ntes Yes Xus. Vim lawv pom Yes Xus tsis caiv hnub Xas Npas Tos raws li Mai Xes txoj cai. Yes Xus pheej kho neeg mob, kho neeg dig muag hnub caiv pheej tsis caiv. Yes Xus tseem muaj cuab kav hu Tswv Ntuj ua nws Leej Txiv. Tsis tau pom dua ib tug neeg muaj ntsej muag npaum Yes Xus. Ntawm tsoom pej xeem, lawv ho xav txawv cov txwj laus. Tsoom pej xeem pom Yes Xus ua hwj huam, ua tau tej yam tib neeg tsis muaj peev xwm ua, lawv qhuas Yes Xus. Lawv pom Yes Xus ua tau hwj huam muaj mov muaj nqaij noj tsis tag. Lawv xav tsa Yes Xus ua vaj ntxwv kav His Xais Lais. Lawv yuav tsis tau cev tes niaj hnub mus khwv tiv tshav tiv nag, lawv yuav tau zoo nyob pw xwb los tau noj lawm. Muaj neeg coob caum Yes Xus nrhiav Yes Xus, ua rau cov txwj laus txhawj thiab khib rau Yes Xus. Lawv kuj tsis txaus siab vim Yes Xus yuam kev ob peb zaug lawm. Yes Xus twb tsis hwm Mai Xes txoj cai raws li cov thoob xwm thiab cov xib hwb qhuab qhia. Ua rau lawv sib cav tau tawg ua ob peb pab. Yes Xus nrog nws cov thwj tim nyob hauv lub tuam tsev teev ntuj ua lub hmoov tsev tsam phooj tsis tau tag.

Tom thawj, lawv nrhiav tau ib zaj plaub tsa lawv tw ntxiab, cuab lawv zog. Cov txwj laus ntes tau ib tug poj niam deev hluas nraug cab tuaj sawv nruab nrab ntawm Yes Xus thiab ib tsoom neeg : “Xib Hwb, tus poj niam no, ntes tau thaum tseem deev hluas. 5 Nyob hauv peb txoj cai, Mai Xes hais tseg yog muaj li tiag, kom xuas zeb tua. Ntawm koj ne yuav hais li cas ?” Lawv tos ntshis saib Yes Xus yuav teb lawv cov lus nug mus zaj twg. Yog Yes Xus tseem rov hais ib los txawv rau lawv hnov, piv li rhuav Mai Xes txoj cai, ces lawv tau cai muab Yes Xus zoj kiag. Saib Yes Xus yuav npuab lawv zaj, ib tug poj niam deev hluas nraug, txhaum txoj cai. Kawg muab cab tom tshav puam rau sawv daws xuas zeb lawg kom tuag. Yog Yes Xus yuav li lawv zaj, nyaj Yes Xus tseem yuav dim zaum no. Yog Yes Xus rhuav Mai Xes txoj cai li cas, lawv yuav liam cuag Yes Xus saib tsis taus lawv muab lawv rhuav tib yam. Lawv sib hais haum tas muab Yes Xus puav kom ti ntsa hnub ntawd tsis pub dim. Tiam sis Yes Xus tsis nrog lawv sib cav. Yes Xus twb tsis tsa muag ntsia lawv, nyo taub hau twj ywm mloog lawv tsawm kom siab nqig, lawv ua cuag lawv muaj ntsej muag loj kawg, cav thiab nthe li ub li no, ua heev diam. Yes Xus thiaj tsa hau los caw lawv xav tswv yim kom thoob kom txaus ua ntej lawv yuav tua ib tug neeg muaj txhuam : “Tus tsis muaj txhaum hlo hauv nej kom nws xub cuam zeb rau tus ntawd.” Xam los txog, lawv kuj yog neeg ntse, ua neeg xav tswv yim ; lawv tsis ua qhov lim hiam, ua ruam tua tsov, ciaj los nyob tuag los tseg. Lawv pom tus poj niam no lub txim txhaum deev hluas. Tiam sis Yes Xus lo lus qhib lawv lub siab thiab lub tswv yim kom pom kev deb thiab xav tau tob dua qhov lawv xav tau los txog txij no. Txawm lawv tsis mus deev luag poj luag sev tiag, lawv puas muaj ntsej muag lees rau Tswv Ntuj tias lawv dawb thiab huv tsis muaj txhaum hlo. Lawv pom tus poj niam deev hluas txhaum Mai Xes txoj cai. Ua li Mai Xes kuj tau qhia ntau yam, hais ntau lo lus tseg hauv nws txoj cai. Lawv yog cov qhuab qhia Mai Xes txoj cai rau ib zeej tsoom neeg, lawv paub Mai Xes txoj cai zoo kawg : “Niaj xyoo, koj sau koj cov teb qoob tas, koj nco ntsoov muab ib qho los ntaus tus se…Yog koj nyob txoj ke deb…koj muab pauv ua nyiaj, nqa nyiaj hauv koj tes mus txog thaj chaw koj tus Huab Tais Tswv Ntuj xaiv tau…koj coj mus pauv tsiaj loj los tsiaj me, yuav dej caw, yam koj ntshaw. Koj muab noj ua kev zoo siab nrog koj tsev neeg nyob ntawd nrog koj tus Huab Tais Tswv Ntuj…Peb xyoos twg sib law, koj sau koj cov qoob xyoo ntawd, koj qee tus nqe se txawb ntawm qhov rooj. Tus les vis, nws tsis nrog koj muaj tug tsis muaj cuab tam, tus pej kum neeg, tus nyuam ntsuag, tus poj ntsuam hauv koj lub nroog, lawv yuav tuaj noj kom tsau npo…TC2 14,22-29” Tas cov txwj laus neeg ua kub ua npau cuag li tuaj ntawd, lawv puas ua tag li Mai Xes tau hais nyob hauv txoj cai ? Lawv pom tias lawv kuj yog neeg dawb huv tsis tag. Lawv tsis muaj txhaum qhov no los lwm qhov lawv kuj lav tsis tau rau Tswv Ntuj. Tus poj niam no muaj txhaum qhov no los tej zaum lwm qhov nws kuj tsis muaj txhaum. Lawv ntsia lawv tsis muaj lus los teb Yes Xus lawm. Lawv cia li tsis muaj plhus nyob ntawd ntxiv. Cov laus tshaj xub xuas kev khiav ua ntej, nyob nyob ploj ib leeg tag. Thaum kawg, tshuav Yes Xus thiab tus poj niam lawm xwb.

Ib tsoom ntseeg thiab phooj ywg Hmoob sawv daws. Ua leej tib neeg nyob ua ke koom zej koom zos, nyob muaj vag muaj tse, muaj cuab muaj yig, tsis hais luag mab sua thiab peb Hmoob. Nyob qhov twg thiab tus leej tib neeg twg twb puav leej muaj lus, ntsib dua kev sib cov nyom tsis sib haum, ib tug ua tub qaug ib tug. Hnub no, peb yuav khaws Yes Xus cov lus hauv Zam tsab ntawv Moo Zoo no coj los xav hauv nyias lub cuab lub yig, ntawm nyias lub neej. Muaj ntau lub ntsiab yuav hais tsis txhua rau ntawm no. Peb tsuas khaws peb lub ntsiab xwb :
1-Hais txog ntawm peb tib neeg txoj kev yuam kev, ua txhaum ua tub qaug neeg. Teeb meem tsis yog lub txhaum me. Qhov ua teeb meem, yog lub txhaum loj, tsis muaj leej twg muaj peev xwm kho tau. Cov neeg tub sab, cov tua neeg yog lub txhaum loj. Vim li ntawd, nyob hauv ntau lub teb chaws, hais tias vam meej. Lawv tseem muaj txoj cai tua tus neeg txhaum nyob rau ntawd. Tiam sis nyob tas ntiaj teb, sawv daws tsis coj thiab tsis pom mus ib yam. Peb pom, muaj ntau lub teb chaws nyob sab Aws Los Pas, txawm tus tib neeg muaj lub txim txhaum loj npaum twg, tsis muaj cai tua tus neeg txhaum lawm. Ntau lub teb chaws nyob sab Aws Los Pas tau rhuav tus txhooj tua neeg pov tseg. Tus neeg ua txhaum loj npaum twg, luag tsuas muab kaw mus tas sim neej, muab tus neeg txhaum loj faj mus txog hnub tuag xwb. Hais txog tus poj niam deev hluas no yeej txhaum tuag nthi. Yog lawv tsis coj tuaj rau Yes Xus ces nws twb tuag rau lawv tes lawm. Rau peb tus neeg ntseeg Tswv Ntuj, peb yuav mloog Yes Xus cov lus hais txog txoj kev tua neeg. Peb los ua tus neeg teev Tswv Ntuj hwm Tswv Ntuj. Peb puas yuav coj thiab yuav ua li tej neeg thiab tej teb chaws ua, los peb yuav vam Yes Xus lo lus coj peb ua neej. Yog ib lo lus muab rau peb xav.
2-Peb pom Yes Xus tsis muab tus poj niam no rau txim, nws twb ua txhaum, tsim nyog yuav muab nplawm ob peb nplawg. Peb ua neeg ntseeg Yes Xus peb yuav xav li cas ? Tsis yog Yes Xus pab tus poj niam, tsa nws cai. Hu ua txiv neej, leej twg tus poj niam deev hluas twb yuav tsum khib tas tus. Yog vim li ntawd, peb yuav tig ntsej mloog Yes Xus. Tsis yog vim Yes Xus tsis rau txim rau tus poj niam, Yes Xus yuav tso kev plhuav rau nws mus ua plees ua yis zoo nws siab ywj nws. Yes Xus tau hais ib los rau tus poj niam coj mus xav tsis tag : “Kuv kuj tsis muab koj rau txim. Kav tsij mus, txij zaum no txhob ua txhaum ntxiv” Yes Xus vam ntsoov tias tus poj niam yuav ris siab. Txij no mus nws yuav ua neeg tsim txiaj, hloov siab tshiab, tig los ua ib tug neeg tshiab. Neeg lub siab peb paub tsis tau. Qhov peb hais kam : qub neeg ces yuav coj lub qub siab. Peb kuj tsis paub, nws yuav ris siab hlo los ua lub neej puab cuab, peb hais tsis tau. Peb hnov Yes Xus cov lus no tsis txaus peb ntseeg, vim peb tos Yes Xus muab nws rau txim ib yam cov txwj laus tos. Tej zaum lub ntsiab, Yes Xus muab tus poj niam deev hluas no coj los ua ib zaj qhuab qhia peb leej tib neeg kom nrhiav lwm txoj kev sib zam txhaum, muaj ntau txoj kev taug. Tsis txhob ua qhov lim hiam, ua qhov yooj yim raws li tib neeg ua kam. Tiam sis rhawv ib txoj kev tshiab, rhawv txoj ncaj, txoj zoo taug kom sib haum. Vim li ntawd, Yes Xus tsis hais nws cov lus rau tus poj niam xwb. Yog Yes Xus hais rau tas peb cov neeg muaj pob ntseg hnov lub Moo Zoo. Tsis yog tus poj niam txawj ua txhaum, cov txwj laus txawj ua txhaum, peb txawj ua txhaum tas tus. Yes Xus tsis muab tus poj niam rau txim, Yes Xus tsis muab cov txwj laus rau txim, Yes Xus tsis muab peb rau txim thiab. Tiam sis Yes Xus kom tus poj niam hloov siab txhob ua txhaum ntxiv. Ntawm peb ne, peb puas hloov siab tshiab tsis txhob ua tub qaug luag, txhob ua txhaum rau Tswv Ntuj ? Tsis yog vim peb paub Yes Xus tsis muab peb rau txim, tab peb txawm tsis mus teev ntuj, tab peb txawm ua neeg cuaj khaum tsis hlub leej twg, Yes Xus hais rau peb nruab siab tias : txij no mus, peb yuav ua neeg nquag hwm Tswv Ntuj, teev Tswv Ntuj, ua neeg siab dawb txhawb lub Koom Txoos, hlub tej neeg txom nyem…Txhob ua txhaum ntxiv.
3-Yes Xus cov lus yog ib co lus ncaj qhia peb lub siab nkhaus kom ncaj ncees tuaj. Kom peb tsis txhob ua li cov txwj laus rhiav lus kom tau liam Yes Xus, lam mus lob ub lob no kom liam yeej luag. Qhov Yes Xus ua puav leej yog, lo Yes Xus hais yog lo ncaj yuav taus. Tiam sis cov txwj laus xwb tim lem, nrhiav lus rau Yes Xus. Lawv rov rhuav lawv ntsej muag. Peb yuav tsis txhob muaj plhus ua tus ntse, tsam peb rov muab peb rhuav poob ntsej muag rau tus neeg ncaj.

Thov kom lub caij 40 no coj peb los npuab peb tus Huab Tais Yes Xus kom tag peb tej siab ntsws thiab ua peb lub neej muaj Huab Tais Yes Xus lub hwj chim.

Cwj Vuam Chiv 18.03.2010

Ib tsoom ntseeg sawv daws,


Hmo ua Hmoov Hla yog ib hmos loj tseem ceeb, yog lub Koom Txoos Kav Tos Liv txoj kev ntseeg lub ntsiab. Lub Koom Txoos xav pab kom peb tus kheej ua lub neej thiab coj lub siab phim Yes Xus thwj tim lawv Yes Xus qab. Lub Koom Txoos thiaj siv zog tas mus li qhuab qhia kom peb nco ntsoov peb txoj kev teev hawm, kev ntseeg Tswv Ntuj lub ntsiab. Nej paub lub ntsiab loj thiab tseem ceeb ntawm peb txoj kev ntseeg, kev teev hawm Tswv Ntuj thiab ntawm peb tus kheej nyias kev tso siab rau Yes Xus, Tswv Ntuj Leej Tub. Peb txoj kev ntseeg Tswv Ntuj lub ntsiab yog dab tsi ? Peb kev tso siab rau Yes Xus yog dab tsi ? Nws yog zoo li no :

-Peb txoj kev teev hawm thiab ntseeg Tswv Ntuj txhawv hauv lub Koom Txoos Kav Tos Liv tuaj ; lub Koom Txoos tau txais lub ntsiab kev ntseeg Tswv Ntuj ntawm cov tim khawv, Yes Xus cov thwj tim los, txheej qhia dhau txheej los txog rau peb thiab peb yuav qhuab qhia mus rau peb tej me nyuam, xeeb leej xeeb ntxwv…Cov thwj tim tau pom xyeem Yes Xus, ua rau lawv muaj lub siab los ntseeg Yes Xus khov thiab ruaj, ua rau cov tim khawv tuaj zog mus qhia Yes Xus lub Moo Zoo thoob qab ntuj. Cov neeg ntseeg Yes Xus raws li cov thwj tim qhia yog cov mloog lus, tsis tawv ncauj tsis cam thawj (Tsis ua cov protestants) yog peb, yog cov txiv plig, cov Tswv Qhia thiab Vaj Qhia, yog lub Koom Txoos Kav Tos Liv. Peb ntseeg Tswv Ntuj raws li lub Koom Txoos Kav Tos Liv qhia. Peb tsis yog lwm pab lwm pawg neeg coj kev ntseeg los kev teev hawm. Peb txoj kev ntseeg Tswv Ntuj lub ntsiab yog ua Yes Xus thwj tim lawv Yes Xus qab. Peb puas ua tau Yes Xus thwj tim, lawv tau Yes Xus qab, yog peb tsis ntseeg Yes Xus ? Yog peb ntseeg Yes Xus, peb mloog Yes Xus lus qhia, peb txais Yes Xus lub neej. Yog peb txais Yes Xus lub neej, peb zoo siab hlo coj peb lub neej kom thooj li Yes Xus lub neej. Peb yuav tsis tawv tsis cam. Yes Xus txib dab tsis peb ua dab tsi. Yes Xus txib cov thwj tim kom ua dab tsi ? Yes Xus txib cov thwj tim kom mus tshaj Yes Xus lub Moo Zoo thoob qab ntuj. Leej twg ntseeg, muab tus ntawd ntxuav plig hauv Leej Txiv thiab Leej Tub thiab Leej Ntuj plig lub npe. Yes Xus qhia cov thwj tim kom tsis txhob ua cov neeg muab hlob, khav theeb : “Tus loj hauv nej, ua nej tus tub txib…Nej hlub tus pluag…Nej zam rau tus phem…Nej hlub nej tus yeeb ncuab, nej thov ntuj rau tus hiam nej…” Yes Xus tsis yog tsa lub ncauj qhuav los qhia rau cov thwj tim kom lawv ua li nws qhia xwb. Yes Xus yog tus raus tes ua ntej. Yes Xus yog Tswv Ntuj tus tub txib sia daim ntaub tiag duav leg qav leg num, muab ntaub los sia ntawm duav ntxuav cov thwj tim ko taw, ua tus qhev, ua tus tub txib txoj hauj lwm. Muaj ntau zaus Yes Xus kho cov mob ruas zoo hlo, kho cov dig muag kom pom ke tseeb, kho cov tuag ceg mus tsis taus, niaj hnub nyob qhov qub chaw, zaum thaj chaw qub, kom sawv taus los ciaj neeg sas lam nrog Yes Xus mus kev, taug txoj kev tshiab, ua lub neej tshiab. Lawv yog cov pluag Yes Xus hlub tshaj. Peb pom Yes Xus ua tau tej yam ua rau yus meem txom, ua rau yus kev tws. Cov neeg siab phem, yuam kev tsim nyog xuas pas xuas nplem qhia, Yes Xus zam tag lawv tej txhaum rau lawv, yam li tus poj niam deev hluas nraug, Yes Xus tsis muab rau txim ; los tus tub yau khiav mus loj leeb txaus, muab cuab tam phob tag rov tes dawb tes npliag los txog, leej txi ua ib pluag qav qab tos txais ua kwv tij li qub. Yes Xus qhia kom peb ua li leej txi ua, txhob ua li peb nyiam ua. Qhov kawg, qhov ua rau peb xav tsis thoob, yog qhov yus tseem yuav hlub yus tus yeeb ncuab. Thaum cov yeeb ncuab muab Yes Xus dai saum nkhib ntoo tas, Yes Xus thov Tswv Ntuj, kom nws Leej Txiv zam rau nws cov yeeb ncuab : “Txiv thov koj zam lawv cov txhaum, vim lawv tsis paub yam lawv tau ua.” Yog tej lo lus qhia muaj nuj nqes rau peb tib neeg mus ib txhis. Nyob hauv tas txhua txoj kev cai teev hawm, tsis muaj zaj lus qhia mus deb npaum li kawg siab ntsws. Tas txhia yam hauv Yes Xus lub neej Yes Xus tau ua ua ntej. Yes Xus qhia kom cov neeg ntseeg Tswv Ntuj mloog Yes Xus lus coj lub neej lawv Yes Xus qab. Peb txais Yes Xus lub neej, peb tsis xaiv qhov yooj yim ua, khaws qhov sib, muab qhov hnyav tso pov tseg. Peb zoo siab hlo ua tus neeg ntseeg Yes Xus, mloog nws lus. Peb pom Yes Xus tsis xaiv hauj lwm. Yes Xus khaws nkaus qhov sib, qhov hnyav ua tag nrho. Yes Xus txoj num yog hlub nws Leej Txiv thiab hlub peb leej tib neeg, ciaj los nyob tuag los zoo siab. Thaum Yes Xus tseem muaj txoj sia, peb twb nyuam qhuav piav tas los saum no, Yes Xus qhia dab tsi, Yes Xus kom peb ua dab tsi. Peb yuav tsis rov qab piav cov qub lus. Peb hais txog Yes Xus tuag thiab sawv tsees rov muaj sia. Yes Xus zoo siab tuag kom mus pab tau cov tuag. Thaum tseem ua neej ciaj sia, Yes Xus zam tau cov neeg phem lawv tej txhaum rau lawv. Yes Xus tuag kom zam tau cov tuag tej txhaum rau lawv. Cov tuag lub txhaum yog ploj mus ciaj dab ciaj tso raws li Hmoob hais. Raws li txoj kev ntseeg Tswv Ntuj, cov tuag lub txhaum yog mus ciaj dab phem tub ki. Neeg lub txhaum loj, yog ploj tuag mus lawm ncaj. Lawv mus daig, mus nyam lub lav tuag mus ib txhiab ib txhis. Yes Xus zoo siab tuag vim Yes Xus hlub Leej Txiv, tso siab rau Leej Txiv thiab hlub cov tuag kom mus ntsib tas cov tuag. Leej Txiv nco nws Leej Tub siab dawb mloog lus, tsis tso nws Leej Tub Yes Xus pov tseg. Leej Txiv tis txoj sia nyob mus li rau Leej Tub ua Leej Tub sawv tsees muaj txoj sia nyob mus li, pus tag tsoom tub tuag sawv tsees nrog nws muaj txoj sia. Vim li ntawd, Yes Xus yog Leej Yaj muab nws txoj sia los txi cawm tsoom ciaj thiab tsoom tuag, pab tib neeg saum yaj thiab cawm tau tsoom tuag puag nruab yeeb mus saum qaum ntuj. Yes Xus sawv tsees rov muaj sia, coj tsoom tuag Hla lub lav tuag, pub txoj sia nyob mus li rau tsoom tub tuag. Leej ntshiab Paj Lug thiaj sau nws tsab ntawv li no : “ Yes Xus yog lub cev lub taub hau, lub koom Txoos lub taub hau, yog tus thawj, thawj tug yug hauv tsoom tuag los KLX1,18” Tsuas kawg Yes Xus tib leeg, tus sawv nqaij thiab txha rov los muaj txoj sia tshiab. Peb ua lub Hmoov Hla, yog nrog Yes Xus hla lub lav tuag muaj txoj sia tshiab mus saum qaum ntuj. Peb hla ntuj txias teb tsaus mus saum lub ntuj tshiab ntuj ka nrog Tswv Ntuj koom ib cuab ib yig ciaj Tswv Ntuj tub ki. Peb hu Yes Xus ua Huab Tais, vim Huab Tais Yes Xus sawv rov muaj sia ua Huab Tais, ua Vaj Ntxwv nyob txhiab niag tim puas xyoo, muab dab phem tsuj nthi rau ntawm taw ; txoj sia nyob mus li rhuav yeej kev tuag mus ib txhiab ib txhis. Yog Yes Xus tsis sawv hauv tsoom tub tuag rov los. Peb txoj kev cai teev hawm Yes Xus tsuas zoo li lwm txoj kab ke teev hawm xwb. Mos Has Mes, Npus Das thiab Confucius…lawv cov tsim kev cai teev hawm, los puas qhuab qhia tib neeg coj siab ntsws ntseeg raws li lawv qhia. Lawv lub cev ntaj ntsug tseem tos nrhw kev sawv rov los ib yam peb tej poj yawm txwv koob. Tiam sis, vim Huab Tais Yes Xus sawv hauv tsoom tuag rov muaj sia, peb txoj kev teev hawm Huab Tais Yes Xus txawv deb lwm txoj kev ntseeg thiab kev teev hawm. Yes Xus, yog tus tseem Huab Tais tiag. Huab Tais Yes Xus thiaj yog lub sim ceeb tus Huab Tais, yog tsoom ciaj thiab tsoom tuag tus Huab Tais Vaj Ntxwv. Peb niaj hnub hais zaj ntseeg : “Yes Xus raug dai saum Ntoo Cuam, tuag mus zwm av, mus txog ntuj txias teb tsaus, hnub peb, sawv tsees hauv cov tub tuag rov los, nce mus lawm saum ntuj, zaum ntawm Leej Txiv Tswv Ntuj, tus muaj hwj huam phab xis, yuav rov los txiav lub txim rau tsoom ciaj thiab tsoom tuag…” Peb muaj Huab Tais Yes Xus lub hwj chim sawv rov los txuag peb lawm. Tsis txog peb yuav txhawj li yav tas los thaum peb tsis paub, tsis ntseeg Huab Tais Yes Xus. Vim li ntawd, peb tus kheej yuav muaj kev tso siab rau Yes Xus ib yam Yes Xus muaj kev tso siab rau nws Leej Txiv Tswv Ntuj.
-Peb kev tso siab rau Huab Tais Yes Xus ua lub chaw cuab zog rau peb txoj kev teev hawm Tswv Ntuj. Tsis yog vim peb siv zog kawm kev ntseeg ob xyoos thiab txais lub cim ntxuav tas ces peb lub siab loj. Kuj tsis yog vim peb niaj hnub mus teev ntuj ces nyaj peb txawj ua zoo, tsis muaj qhov xyeej hauv peb lub neej. Los puas, vim peb paub txoj kev ntseeg lub ntsiab, paub tias Yes Xus tuag sawv rov los ces yuav cia li tshem peb txoj kev ua neeg phem pov tseg, tshem peb lub siab nkhaus, tshem peb txoj kev tub nkeeg, tshem peb kev cib nyeej…Peb xav yooj yim dhau, peb xav li tib neeg xav, peb tsis hnov Huab Tais Yes Xus cov lus qhuab qhia.

Ua li, peb yuav nrhiav li cas, peb yuav ua dab tsi peb thiaj muaj kev tso siab rau Huab Tais Yes Xus ? Puas yog peb yuav tau hloov ntau yam hauv peb lub siab lub ntsws thiab hauv peb lub neej ua ntej ? Peb sim mloog ob tug txiv neej cov lus hais rau cov poj niam : “Tim li cas nej nrhiav tus ciaj hauv cov tuag ?6 Nws tsis nyob ntawm no, nws twb sawv los lawm. Nej puas nco thaum nws tseem nyob Nkas Lis Lais, nws tau hais li cas rau nej ? 7 Hais li no : neeg Leej Tub yuav tau raug ntes hauv cov tib neeg txhaum txhais tes thiab muab dai saum nkhib ntoo, hnub peb yuav sawv tsees los” Raws li ob tug txiv neej hais rau cov poj niam, lawv twb hnov Yes Xus hais ntau zaus tias nws yuav raug cov neeg txhaum muab nws tua daim saum nkhib ntoo, hnub peb nws yuav sawv rov los. Tiam sis, zoo li lawv yog ib co neeg lag ntseg tsis hnov Yes Xus cov lus. Lawv pom Yes Xus lub ntxa qhuav qhawv, tsis pom Yes Xus lub cev ces lawv tsis to taub. Lawv tseem tsis tau muaj kev tso siab rau Yes Xus. Peb niaj hnub mus mloog txiv plig qhia kev ntseeg, peb hnov ntau yam txog Yes Xus. Peb twb paub Yes Xus ua hwj huam npaum ub npaum no. Yog peb tsis hloov peb lub neej, tsis npaj peb lub siab kom peb kev tso siab rau Huab Tais Yes Xus loj hlob. Peb kuj yuav zoo li cov poj niam tsis xeev, tsis ras txog Yes Xus yuav sawv taus rov los. Muaj ntau txoj kev yuav pab tau peb kom peb muaj kev cia siab rau Huab Tais Yes Xus. Thawj txoj kev yog hloov yus lub siab ua ntej. Txoj kev hloov siab, tsis yog hloov ib zaug yuav txaus. Hnub no ua zoo, cas tag kis ua phem lawm. Yus tsis xav kom phem los twb phem lawm. Yog vim li ntawd, kev hloov siab tshiab, yog txoj hauj lwm tus neeg ntseeg Yes Xus niaj hnub ua kom tag nws sim neej. Yog yus ua yus txoj hauj lwm ntseeg Yes Xus, yog yus kev teev ntuj tsis pub tu ncua. Yog yus nquag teev ntuj, yus yuav pom tias yus yog neeg tsis muaj zog, yuav khaub zig Yes Xus mus li. Tej hnub yus nquag, tej hnub yus nkees, tej hnub yus zoo siab, tej hnub yus nyuaj siab, tej lub sij hawm yus zoo neej, lwm lub caij yus muaj mob muaj nkeeg…Yus txoj kev tsos siab rau Tswv Ntuj tsis poob nthav saum qaum ntuj ib niag uas rau yus li ib kob nag nrov zuag hauv ntiaj teb. Lub txiaj ntsim pab kom yus txoj kev tso siab rau Yes Xus muaj zog, khov thiab ruaj, ua teeb kaj pom kev rau lwm leej lwm tus txhawv li dej ntawm yus lub luag hauj lwm ua tus neeg ntseeg vam khom Leej Ntuj Plig lub zog tuaj pab tuaj nres yus ua hnub ua hmo.
Piv txwv zoo li no : yog peb yim teev ntuj, yim ua peb dhuav Tswv Ntuj. Hais tau tias peb txoj kev ntseeg muaj mob, yuav tau nrhiav tshuaj kho kom peb txoj kev ntseeg zoo. Yog peb yim teev ntuj, peb yim pom peb pluag, yim kub siab lug nrhiav kev khaub zig Yes Xus. Hais tau tias peb muaj hmoo raws li Yes Xus cov lus : “Cov pluag yog cov muaj hmoo.” Yog peb pom peb tsis muaj zog, peb pluag, peb yog neeg muaj txhaum…peb thiaj vam Yes Xus lub txiaj ntsim. Yog peb vam Yes Xus pab peb, peb thiaj li yuav mus qhuab qhia Yes Xus lub Moo Zoo rau tej tib neeg kom tig los mus npuab peb tus Huab Tais Tswv Ntuj, ua Yes Xus lub luag hauj lwm, ua nws thwj tim.

Ib tsoom phooj ywg Hmoob, lub Hmoov Hla, yog peb tus Huab Tais Yes Xus lub txiaj ntsim yeej txoj kev tuag. Lub Hmoov Hla, yog peb tib neeg ntiaj teb kev yeej txoj kev tuag, Huab Tais Yes Xus ua peb ntej, peb lawv nws qab. Vim li ntawd, dua ntawm peb tus Huab Tais Yes Xus, tsis muaj leej tib neeg twg yuav pab tau peb. Kawg Huab Tais Yes Xus tib leeg, tus cawm tau ntiaj teb tib neeg. Peb tso siab rau nws, tig los hloov siab tshiab thiab coj peb lub neej kom hlub tau ntiaj teb neeg li nws hlub thiab haum nws siab nyiam. Nyob zoo tas txhua leej hauv lub Hmoov Hla, Alléluia ! hallelujah !

Cwj Vuam Chiv 01.04.2010

Ib tsoom ntseeg mloog nraim Yes Xus lub Moo Zoo,

Hnub no yog zoo hnub zoo nyoog, tsoom ntseeg sawv daws npaj siab tuaj mloog peb tus Huab Tais Yes Xus cov lus qhuab qhia. Tiam sis ua ntej, peb yuav xub khaws ib lub ntsiab hauv saub Xas Muas tsab ntawv. Peb mam los nthuav ob peb los txog tsab ntawv Moo Zoo peb hnov hnub no.

Peb nyob hauv hnub Chiv 11 lub caij nyob nruab xyoos. Hnub no, lub Koom Txoos caw tas tsoom ntseeg Kav Tos Liv mloog Huab Tais Tswv Ntuj cov lus qhuab qhia txog txoj kev sib zam txhaum. Tim li cas, peb tib neeg thiaj li yuav tau ua siab ntev, yuav tau sib zam ? Txawm tias peb ib leeg tau ua tub qaug ib leeg, peb nyias yuav tau rub nyias lub siab kom loj kom ntev, peb tsis txhob nplua, txhob pauj rau luag, ua li tib neeg ua kam, tiam sis tug yauv tau zam rau tug, vim Tswv Ntuj tau ua siab loj siab ntev zam rau peb leej tib neeg txhua leej txhua tus ua tub qaug nws. Tsis hais tus ntseeg Tswv Ntuj thiab tus tsis ntseeg, tus hwm Tswv Ntuj los tus thuam Tswv Ntuj, tus paub tswv Ntuj los tus tsis paub, Huab Tais Tswv Ntuj tsis nplua peb vim peb tau thuam nws, los tau ua tub qaug nws ; Huab Tais zam rau peb leej tib neeg mus li vim nws hlub peb ntiaj teb tib neeg txhua leej txhua tus.

Yuav kom peb ntiaj teb tib neeg ua ke thooj txhij los ntseeg Tswv Ntuj, mloog Tswv Ntuj lus, coj li Tswv Ntuj qhuab qhia tsis tau. Tswv Ntuj siab loj siab dav, Tswv Ntuj ua siab ntev ntev maj mam tshoj xaiv kom muaj ib haiv neeg nyob ntiaj teb sawv los mloog Tswv Ntuj lus, los tsob hwb thiab ntseeg Tswv Ntuj ua tim khawv coj Tswv Ntuj cov lus qhuab qhia ua teeb ntsa pom kev rau lwm cov haiv neeg teev dab qhuas, teev mlom thiab tsis muaj ntseeg, tsis muaj kev teev hawm ib tug tswv dab tsi kom ib hnub twg lawv hloov siab tig los npuab, los teev hawm tus tseem Tswv Ntuj thiab. Yog haiv neeg ntseeg Tswv Ntuj txoj qa num, yog peb txoj dej num, yog tus neeg ntseeg txoj hauj lwm peb nyias yuav tau raus tes ua tim khawv tuav kom ruaj Tswv Ntuj cov lus qhuab qhia no, txuag Tswv Ntuj lub npe. Peb sim xav saib, thaum ub, peb tsis paub tsis teev Tswv Ntuj. Vim muaj tus neeg ntseeg Tswv Ntuj coj Tswv Ntuj cov lus tuaj qhia rau peb paub. Peb mloog Tswv Ntuj lus, ces peb hnov nws lub suab lus hu peb. Tswv Ntuj hlub peb npaum li cas, ua tau peb dim plaws txoj kev ntshai dab phem dab qus. Peb zoo siab hlo tig los teev Tswv Ntuj hawm Tswv Ntuj yog peb Leej Niam Leej Txi hlub peb tsis paub kawg. Nyiam no, peb thiaj li muaj suab muaj npe hu ua Tswv Ntuj cov tub ki ; peb thiaj li muaj lub pliaj plhu, muaj ntsej muag sawv los ua haiv neeg ntseeg Tswv Ntuj. Vim li ntawd, peb yog Tswv Ntuj haiv neeg, peb yuav tau coj thiab yuav tau ua raws li Tswv Ntuj cov lus qhuab qhia rau peb. Tsis txhob ua li peb tus qub neeg lub qub siab, xav zaj tswv yim qub, rov qab mus vam khom khaub zig tej txiv neeb txiv muam, muab tsiaj txhu qaib npua los ua txim pauj dab phem dab qus kev looj koov, kev ntaim noj ntaim haus ntawm peb tib neeg li yav thaum ub lawm. Kuj tsis txhob ua li tus nom twg, tus huab tais vaj ntxwv twg siab nyiam, los ua li tus kws thiab tus xib hwb twg, los leej tib neeg twg zaj tswv yim peb pom ib ncig ntawm peb. Yus yuav ua li cas ? Tus neeg ntseeg Tswv Ntuj, tus mloog Tswv Ntuj lus, yuav ua li peb Leej Txiv Tswv Ntuj cov lus qhuab qhia. Peb thiaj li yog nws cov me nyuam, yog nws haiv neeg mloog lus nyob ntiaj teb no, txuag nws lub npe, ua tim khawv qhia qhov tseeb, qhov ncaj tag nrho peb Leej Txiv Tswv Ntuj lub siab nyiam rau ntiaj teb neeg paub. Vim li ntawd, niaj xyoo, peb pom muaj ib cov kwv tij neej tsa tshiab nkag los thov txais txoj kev ntseeg, kev teev hawm Tswv Ntuj. Huab Tais Tswv Ntuj yog tus tshoj, tus xaiv peb los ntseeg nws. Kuj yog Tswv Ntuj ua tus tshoj, tus xaiv lawv nkag los ntseeg nws. Peb txoj hauj lwm yog zoo siab pab lawv, qhuab qhia peb Leej Txiv Tswv Ntuj lub npe rau lawv paub. Yog hais lus zoo thiab coj yus lub neej kom mus raws li Tswv Ntuj cov lus qhia. Yus yuav nquag teev ntuj, tsob hwb Tswv Ntuj niaj hnub, niaj hli, niaj xyoo…Peb yuav kub siab thiab siv zog khwv kom peb ciaj ua tus neeg tso siab thiab nyiam Tswv Ntuj tshaj puas tsav yam. Peb tsis txhob xav li coob leej tus neeg ntseeg xav : muaj ntau tus ntseeg xav tias hauj lwm tiav txij hnub peb txais lub Cim Ntxuav, tsis muaj qav num ua ntxiv. Tus neeg ntseeg txoj dej num pib txij hnub nws txais lub Cim Ntxuav nkag ua Tswv Ntuj haiv neeg. Txoj hauj lwm ua Tswv Ntuj me nyuam, ua Tswv Ntuj ib tug tim khawv muaj ntau, tshuav ntau yam yuav tau rau tes ua mus li kom txog hnub ntiaj teb kawg.

Kev yug ua Tswv Ntuj ib tug me nyuam mloog lus yog mloog Tswv Ntuj cov lus qhuab qhia, yog mloog nws cov tub txib tej lus. Tswv Ntuj cov tub txib yog cov poj niam thiab cov txiv neej mloog Tswv Ntuj lus sawv Tswv Ntuj lub npe tshaj nws tej lus. Tswv Ntuj tshoj Xas Muas, tshoj Nas Taas, Yes Les Mias, His Xais…tshoj peb tus ntseeg nws sawv ua nws tus tub txib kom tshaj nws tej lus qhuab qhia. Hnub no, peb mloog saub Nas Taas cov lus hais rau vaj ntxwv Das Vis. Tswv Ntuj pom Das Vis tau rhuav Tswv Ntuj lub npe, ua puas Tswv Ntuj loj kawg. Das Vis tau thuam Tswv Ntuj zoo li cas ? Das Vis yog tsoom His Xais Lais tus vaj ntxwv kav tsoom pej xeem. Tus vaj ntxwv, yog tsoom pej xeem leej txiv, tiv thaiv plaub ntug, txhawb txhim thiab hlub tsoom pej xeem tsis pub leej twg raug txom nyem. Das Vis muaj ib tug tub rog tsis yog neeg His Xais Lais li lwm cov tub rog. Nws npe hu ua Us Lis, yog neeg pej kum His Tis. Das Vis yog vaj ntxwv, muaj hwj chim loj. Us Lis yog tub rog dog dig xwb. Tiam sis, Us Lis poj niam zoo nkauj heev. Das Vis xa Us Lis mus ntau rog lawm ces nws tso neeg mus hu Us Lis poj niam tuaj rau nws deev. Ziag no, Us Lis poj niam cev xeeb tub lawm, neeg yuav pom, Das Vis yuav poob ntsej muag. Das Vis xav tau ib zaj tswv yim lim hiam. Nws hais kom cov nom loj muab Us Lis thawb mus rau tom plawv rog. Us Lis raug tua tuag. Das Vis mus yuav Us Lis poj niam ua niam yau. Das Vis vam tias nws npog tau nws kev txhaum plaub tsis muaj tus paub. Tiam sis, npog tsis tau lub ntuj, Tswv Ntuj pom Das Vis nplooj siab lim hiam. Tswv Ntuj xa saub Nas Taas tuaj hais rau Das Vis mloog : “Kuv muab roj pleev koj ua His Xas Lais tus vaj ntxwv, kuv cawm koj dim ntawm Xas Ws tes…9 Tim li cas koj tseem tsis txuag Huab Tais thiab ua tub qaug nws ? Koj rho ntaj tua Us Lis, koj txeeb nws poj niam los ua koj poj niam, koj xwb tim cia nws tuag rau cov As Mos tus hniav ntaj” Thaum Das Vis pom li ntawd, nws lees nws tej txhaum ntawm Tswv Ntuj. Lub ntsiab lus peb yuav khaws : Das Vis txawj yuam kev li peb tib neeg sawv daws. Das Vis yog His Xais Lais tus vaj ntxwv yuav tsum pab, yuav tsum hlub tsoom pej xeem. Tiam sis, nws tseem mus txeeb tus me tshaj nws, tus me nyuam neeg txom nyem dua nws teej tug los rau nws tus kheej. Yog peb ntiaj teb neeg, yog peb tsoom ntseeg, yog tus neeg ntseeg kev tawv ncauj cam thawj, kev tsis hwm tsis teev Tswv Ntuj, kev ua plaub ua ntug, ua tub sab, sib ntxub ntawm peb ua rau Tswv Ntuj mob siab. Vim Tswv Ntuj yog ntiaj teb neeg tus Vaj Ntxwv thiab tus Huab Tais. Tswv Ntuj hlub Us Lis, tus neeg txom nyem tam li hlub Das Vis ua His Xais Lais tus vaj ntxwv. Tswv Ntuj khuv xim Us Lis tam zoj Das Vis, ua cas Das Vis tsis ntshai tub qaug Tswv Ntuj, saib tsis taus Tswv Ntuj.

Peb leej tib neeg muaj lub cuab lub yig, ua kwv ua tij, ua neej ua tsav, nyob koom zej zog thiab nyob nrog mab sua, koom teb koom chaw. Peb pom tias qees lub sij hawm peb raug luag thuam, raug luag ntxub, raug luag muab peb lem, tsim txom…Peb zoo li Us Lis, raug Das Vis txhaub mus rau nruab nrab tsov rog. Vim muaj neeg ntshaw yus tej liaj teb, ntshaw yus lub vaj lub tsev, khib rau yus tus txheeb tus ze, khib rau yus tej neej tej tsa…Yus cia li raug luag ntxub yus dawb dawb do do. Los puas yus tsis yog luag neeg hais luag xeem lus ces yus raug luag tsawm, raug luag yuam yus ua txoj hauj lwm hnyav, raug luag txo yus lub nyiaj hli, raug luag tsuj rho yus poob hauj lwm. Tsis muaj leej twg pab yus, tsis muaj leej twg hlub yus, zoo li Us Lis, luag tseem txeeb tau yus poj niam thiab muab yus txhob rau qhov tuag.
Kuj muaj qee zaum, peb zoo li Das Vis. Peb yog tus neeg lim hiam, tus phem txeeb luag teej luag tug. Yus mus fim tus nom, los mus ntaus phooj ywg li ub li no kom pab yus ua ntaub ntawv, nrog yus koom ib nqag. Ces yus mus txeeb luag tej liaj teb, txhav luag vaj tse, ua kom luag poob nyiaj, coj luag mus nce txwj laus, yuam luag them, muab luag nplua kom poob nyiaj los kho yus. Thaum kawg, ua rau luag nyuaj siab, yus los tsis tsam peev dab tsi, tseem poob hauv txoj kev ua yeeb ncuab nrog sawv daws sib ntxub tag…Los puas nyob hauv yus lub neej, yus ua tus neeg nkees, tsis mus nrhiav hauj lwm ua, yug me nyuam coob coob rau nom tswv tu. Yus ua tus neeg hle zuav hlub tsis taus tej me nyuam, pab tsis tau lawv. Thaum kawg, tej me nyuam txom nyem, lawv loj tuaj lawv ua neeg tawv ncauj tsis mloog leej twg qhuab qhia, sawv ua tub sab tub nyiag…Peb yuav tsum paub tias peb tib neeg qee lub caij, peb zoo li Us Lis, qee lub caij peb zoo li Das Vis. Tiam sis, peb txawm zoo li ntawd los peb Leej Txiv Tswv Ntuj hlub peb tsis txawj tag. Peb mloog zoo li Us Lis tuag dawb dawb txaus khib, xav pab nws muab Das Vis rau txim hnyav ncawv. Tiam sis, Us Lis tsis tuag dawb dawb, ua rau Tswv Ntuj mob siab heev. Tswv Ntuj kev mob siab txawv tib neeg kev mob siab yuav ua kub ua npau, yuav nrhiav pauj kom siab nqig. Tswv Ntuj kev mob siab yog kev khuv leej tus raug hiam dawb do ; Tswv Ntuj kev khuv leej hloov tau Us Lis kev tuag dawb dawb ua txiaj ua ntsig tseg cia rau cov neeg raug hiam ib yam Us Lis yav tas los, zim txwv no thiab mus txog hnub ntiaj teb kawg. Tswv Ntuj tsis tso cov neeg no ploj tas dawb, Tswv Ntuj yuav txhiv kom tau lawv. Yog Tswv Ntuj txoj kev cawm neeg. Tswv Ntuj yuav ua zoo li cas cawm ? Us Lis tuag dawb, poj niam los poob rau Das Vis tes. Kuj yog Das Vis tua Tswv Ntuj dawb dawb pov tseg vim Tswv Ntuj puav leej nrog Us Lis thiab nrog Das Vis tib si. Tsis yog Das Vis ua Us Lis tuag xwb, Das Vis kuj ua puas Tswv Ntuj. Tswv Ntuj cawm Us Lis, yog pub Us Lis sawv muaj sia ntawm Tswv Ntuj. Vim li no, Das Vis nyiam siv tus hniav ntaj, tus hniav ntaj kuj yuav tuaj rau Das Vis pom : “tus hniav ntaj yuav tsis maim koj tsev neeg, vim koj tsis txuag kuv” Tiam sis, Tswv Ntuj yuav pab kom Das Vis hla dhau Das Vis lub neej txom nyem. Yog Tswv Ntuj txoj kev zam Das Vis cov txim txhaum : « Huab Tais zam koj qhov txhaum rau koj, koj yuav tsis tuag. » Tus yuav coj kom peb tsis txhob yuam kev, yog peb tus Huab Tais Yes Xus.

Vim li no, peb thiaj yuav tig ntsej los mloog Huab Tais Yes Xus lub Moo Zoo. Yes Xus yog peb tus Huab Tais cawm peb, coj peb kom mus txog Leej Txiv Tswv Ntuj. Peb yuav tsum khaws kom tag nws cov lus nyiaj lus kub hauv peb nruab siab kav peb lub neej. Hais txog txoj kev sib zam ntawm peb kev ua neej nyob ntiaj teb no. Yog peb xwb, peb tsis muaj zog yuav zam tau rau cov neeg thab plaub, neeg lim hiam, cov neeg ua tub qaug peb. Tiam sis, yog peb mloog lus, peb tso siab rau peb tus Huab Tais Yes Xus Pleev, peb yuav ua tau tej yam Huab Tais pub kom peb ua.

Nyob hauv Lus Kas tsab ntawv hnub no : Muaj ib tug Fas Lis Xais, Xis Moos caw Yes Xus mus nrog nws noj ib pluag mov. Tsis hais tus Fas Lis Xais, Xis Moos, los peb tus kheej sawv daws xav tib yam. Peb pom muaj tus neeg phem thiab muaj tus neeg zoo, muaj cov tsis tsim txiaj thiab muaj cov neeg tsim txiaj. Leej twg los kuj tsuas nyiam zoo xwb. Vim li no, cov neeg nyiam zoo tsis tshua xav nrog cov neeg phem ua ke. Tej no, yog tib neeg kev coj kam, ua kam. Thaum tus Fas Lis Xais pom tus poj niam tsis tsim txiaj tuaj sawv ntawm rooj mov quaj kua muag kua ntswg hlauv leg, ua tej yam txawv txawv rau Yes Xus. Tus Fas Lis Xais lub ncauj tsis hais los siab ntsws xav tau ntau thiab yws twj ywm rau tus pog. Yes Xus paub tus Fas Lis Xais xav lis cas hauv nws siab. Ntawm peb lub neej kuj tib yam nkaus. Yes Xus paub peb nruab siab nruab ntsws, paub peb zaj nkhaus, zaj lim hiam, paub peb lub siab dawb siab huv tib si. Vim li ntawd, zaj lus peb hnov hnub no, yog Yes Xus zaj lus nws hais rau peb, hais rau tus neeg ntseeg Tswv Ntuj kom peb hloov peb lub siab qub, coj dua lub siab tshiab zoo phim Tswv Ntuj cov tub ki, tsis txhob coj li tib neeg ntiaj teb zaj, los coj li tus Fas Lis Xais zaj. Ua li Hmoob hais, peb tsis txhob saib ntsej ua plhu saib dej ua ntu, ntsia tib neeg sab nraum daim tawv. Tus poj niam no lub pliaj plhu thiab coj lub neej tsis tsim txiaj. Pes tsawg tus txiv neej los tej zaum nws puav leej tham. Tus Fas Lis Xais ua neeg paub kev cai, ua neeg nquag teev ntuj tiag. Tiam sis nws saib tsis tshua taus cov tib neeg tsis tsim txiaj, tsis nyiam cov poj niam coj tus yam ntxwv zoo li no. Yes Xus hais rau tus Fas Lis Xais, kuj yog hais rau peb tib yam. Kom nws tsis txhob muab nws piv rau tus poj niam no. Ntawm peb los tib yam. Kom peb tsis txhob ua li tib neeg muab peb los sib piv tug rau tug : tus no muaj, tus no pluag ; tus no tsab, tus no phem ; tus no me, tus no loj ; tus no yuag, tus no rog…Tus neeg ntseeg yuav tsum tso zaj tswv yim thiab lub qub siab no pov tseg. Nws tig los mloog Yes Xus lus, yog coj thiab ua li Yes Xus siab nyiam. Yuav ntsia tus tib neeg tsis yog ntiaj teb li tib neeg xwb, yog qaum ntuj li tug thiab. Tus tib neeg, tsis yog tsiaj txhu zoo noj nqaij. Tsis yog xyooj ntoo zoo muab siv ua toob xib. Tsis yog riam txuas zoo hlawv, ntaus, ceem hauv cub tawg cub tshau…Tib neeg muaj siab muaj ntsws, muaj ntsuj mam huaj xyw. Lub cev ntaj xib ntsug tuag li nthi saum yaj, los tshuav ntsuj duab ntsuj plig muaj sia nyob ncig luj luas sawv ua nqag ntawm Tswv Ntuj xub ntiag vim tib neeg yog qaum ntuj li tib neeg thiab. Yog peb mloog Yes Xus lus, peb yuav pom kev deb cuag li Yes Xus, rua muag ntsia saum ntuj, tsa ncauj nrog Leej Txiv Tswv Ntuj txuas tau lus. Yog peb nrog tau Leej Txiv txuas lus, peb yog Leej Txiv tub ki thiab xeeb leej xeeb ntxwv. Peb kuj yog Yes Xus kwv tij thiab nkauj muam saum yaj no thiab koom tib txoj sia ua ke nrog nws saum qaum ntuj. Tsis phim peb yuav muab peb los sib piv thiab sib thuam vim peb sib txawv saum yaj no los saum qaum ntuj peb twb tsis muaj qhov txawv, yog tib tse, nkauj muam thiab nraug nus koom tib txoj sia nyob mus li ntawm Tswv Ntuj.

Vim li no, Tswv Ntuj twb zam peb tej txhaum rau peb saum yaj no. Peb yuav tau sib zam rau peb li peb Leej Txiv hlub peb, zam peb tej txhaum rau peb niaj hnub no thiab. Yog peb hloov siab hloov ntsws dua tshiab, Yes Xus cov lus yuav coj peb taug ib txoj kev tshiab. Txoj kev tshiab yuav ua rau peb pom peb tus yeeb ncuab kuj tsis phem tag nrho. Kuj muaj qhov zoo nyob hauv peb tus yeeb ncuab thiab. Yog peb pom muaj qhov zoo, peb kuj yuav hwm tau nws. Yog peb muaj qhov hwm luag hauv peb siab, peb twb yog tus neeg mloog Yes Xus lus lawm. Peb kuj yuav nrog taus peb tus yeeb ncuab txuas tau lus. Yog peb txoj kev sib zam, tug zam rau tug.

Thov kom peb tus Huab Tais Yes Xus cov lus hnub no pub ib lub zog tshiab rau peb pom peb tus yeeb ncuab yog peb ib tug phooj ywg.

10.06.2010 Cwj Vuam Chiv

Ib tsoom ntseeg sawv daws,


Rov txog hnub peb tuaj teev hawm peb tus Huab Tais Tswv Ntuj. Peb tsis muaj yam dab tsi muaj nuj nqes pauj tau peb tus Huab Tais Tswv Ntuj lub txiaj ntsim nws tau pub rau peb. Vim li no, peb tsuas nqa peb lub siab lub ntsws thiab lub txiaj ntsim tuaj cev rau peb tus Huab Tais thiab ua nws tsaug hauv lub Thaj Txi Ntuj (La Messe) hnub chiv.

Hnub no, peb zoo siab rov qab mloog peb tus Huab Tais cov lus nyiaj lus kub pab txhawb peb lub siab lub ntsws kom muaj zog. Kom peb ntseeg khov ntseeg ruaj tso siab lug rau Huab Tais Tswv Ntuj, yog peb Leej Niam Leej Txi hlub peb tsis muaj caij kawg. Nws cov lus thiaj yog dej yog tshuaj kho peb lub cev nqaij daim tawv muaj mob muaj nkeeg kom zoo hlo, txhim kho peb lub siab lub ntsws txhawj xeeb no kom rov nyob tiaj tus tau thiab pub dag zog rau peb tus ntsuj tus plig kom nquag plias, ua lub neej nyob cus plaws ntawm nws xub ntiag. Yuav kom peb txais tau nws cov txiaj ntsim nyab peb lub neej thiab tej siab ntsws, peb yuav nco ntsoov khaws nws cov lus no ua txiaj ua ntsig pab peb.

Nyob hauv saub Ntxas Kas Lias tsab ntawv, saub caw Das Vis thiab tus nyob lub nroog Yes Lus Xas Les kom qhib ntsej mloog Tswv Ntuj lo lus : “Lawv yuav tsa muag ntsia kuv, tus lawv muab nkaug. Lawv yuav nyiav nws ib yam nyiav ib leeg tub kheej. Lawv yuav quaj nyiav nws npaum quaj thawj tug me nyuam…” Tswv Ntuj lo lus ua txiaj ua ntsig pab tau peb leej twg tso siab tas nrho rau Tswv Ntuj. Peb sim mloog saib, peb puas tso siab tag rau Huab Tais Tswv Ntuj. Niaj hnub no, peb twb zoo siab hlo nrauj dab qhuas tseg tig los npuab, los tsob hwb Huab Tais Tswv Ntuj. Yog peb tso siab tsis tag rau Tswv Ntuj, peb yuav nug saib tim li cas peb thiaj tsis los npuab peb Leej Txiv Tswv Ntuj kom tag siab nrho. Tseem tshuav dab tsi khuam peb lub siab nyob deb ntawm Tswv Ntuj ? Muaj dab tsi txwv peb, tiv thaiv tsis pub peb los ze peb tus Huab Tais ? Puas yog dab phem dab qus cais peb ? Puas yog peb tej txhaum ? Yog peb nco Tswv Ntuj cov lus, peb paub tias Tswv Ntuj lub peev xwm loj tshaj dab phem lub peev xwm. Tswv Ntuj qhib ncauj hais ib los, dab phem khiav ti nqug nkaus tag qhov tsaus ntuj tsis muaj ntsej muag tshwm rau Tswv Ntuj pom. Yog li ntawd, dab phem dab qus cais tsis tau peb tus neeg teev ntuj kom txhob los npuab Tswv Ntuj. Peb kuj tseem nco, Tswv Ntuj nws lub siab loj siab dav, nws zam tau peb cov txhaum peb ua tub qaug nws. Tswv Ntuj zam tau rau leej tib neeg txhua tus tej txhaum lawv ua yuam kev los txhob txwm ua rau nws. Yog li ntawd, peb tej txhaum yuav thaiv tsis tau peb Leej Txiv Tswv Ntuj kev hlub peb. Peb yuav tsum paub tseeb tseeb qhov no. Tiam sis, peb tej txhaum yog yam cais peb mus rau ib qho. Peb tej txhaum nrug peb deb ntawm Tswv Ntuj, khuam peb tej siab ntsws dai dhuam rau ib cag, ua kom peb nplooj siab nplooj ntsws muag luav, noj mov tsis qab, ncia mov, haus dej khuam siab…Peb lub cev ib hnub zog ntaug zuj zus. Peb ntsuj plig ib hmos ntsoos puj pob tsis pom nquag. Tsis yog tsiaj txhu thiab qaib npua tua yim cuaj kaum tus yuav daws tau peb qhov ntsoos puj pob kom nquag. Tua pes tsawg tus tsiaj txhu los mus lawm ncaj daws tsis tau peb cov txhaum kom sib kha. Qaib npua yog nqaij, yam noj yam haus yug tib neeg lub cev kom muaj sia muaj zog. Qaib npua tsuas pab qhov me. Lub cev qab los ces yuav noj taus nqaij haus taus kua kom tsau npo, lub cev yuav muaj zog tuaj. Yog lub cev qaug zog luj luas, noj tsis taus nqaij haus tsis tau kua. Tua tsawg tus tsiaj txhu los mus lawm ncaj qha. Vim li ntawd, qhov kev pab loj tuaj ntawm Huab Tais Tswv Ntuj tuaj, ntawm kev npuab, kev tso siab rau Tswv Ntuj lo lus. Vim Tswv Ntuj lo lus ua hwj huam, ua tau puas tsav yam. Tus neeg teev Tswv Ntuj, mloog Tswv Ntuj lus, nws hais dab tsi, Tswv Ntuj mloog nws hais. Vim Tswv Ntuj mloog yus tus neeg tej lus hais, lo lus tus neeg hais yog hais Tswv Ntuj lus. Tus hais Tswv Ntuj lus, yog ua Tswv Ntuj tus tub txib, tus tseem saub. Muaj coob leej ntau tus sawv saub, cov saub cuav lawv hais lawv lus, lawv tsis txawj hais Tswv Ntuj lus. Tswv Ntuj tus tub txib hais Tswv Ntuj lus. Vim li no, saub Ntxas Kas Lias cov lus yog Tswv Ntuj lus. Tswv Ntuj cov lus txawm hais tau ntev niaj ntau tiam lawm los zoo li yog ib co lus tseem tshiab khiv nyob tshiab khiv tsis txawj qub, tsis nphob, tsis dua caij dua nyoog ; cov lus Tswv Ntuj hais tawm txheej laus thaud tseem raug rau peb tiam neeg no lub neej thiab tseem yuav kav lub neej lawm yav tom ntej. Vim li no, Tswv Ntuj lus kav tag nrho lub sim ceeb. Peb paub Tswv Ntuj lus tsis txawj tag, peb mloog Tswv Ntuj lus tsis txawj dhuav. Peb yim mloog Tswv Ntuj lus, peb tej siab ntsws yim huab to nrog mus tob. Thaum ntawd, peb yuav pom tias peb tsuas yog plua av, plua tshauv ; peb yim xav paub Tswv Ntuj kom zoo, peb yim pom npaum li cas peb pluag, npaum li cas peb ntshaw Tswv Ntuj, ntshaw nrog Tswv Ntuj ua ib ke. Tsis muaj dab tsi hauv peb lub neej peb ntshaw thiab vam tshaj ntshaw Huab Tais Tswv Ntuj. Yog peb muaj Tswv Ntuj thiaj yuav zoo peb siab. Lub txiaj ntsim thiab dag zog tuaj ntawm Tswv Ntuj lo lus tuaj rau tus neeg ntseeg thiab teev Tswv Ntuj. Tus muab Tswv Ntuj ua nws lub pov haum, tus no thiaj muaj zog : “Lawv yuav tsa muag ntsia kuv, tus lawv muab nkaug” Tus tib neeg ncaj luag xuas ntaj xuas hmuv nkaug, tus tib neeg ncaj raug luag tsa ncauj tsawm…lawv tsis yog tuag dawb thiab poob ntsej muag dawb. Tswv Ntuj tus kheej tuag dawb thiab poob ntsej muag dawb vim Tswv Ntuj npo lawv. Saub cov lus tseem tshwm sim niaj hnub no. Peb tseem pom muaj cov neeg tuag dawb thiab raug luag tsawm dawb niaj hnub no saum daim npoo av. Vim li ntawd, saub cov lus tsis yog ib zag dab neeg hais tso tseg. Saub hais Tswv Ntuj lus. Peb Leej Txiv Tswv Ntuj hlub cov neeg raug hiam zoo li no, kom lawv tso siab tias Tswv Ntuj yuav tsis tso lawv pov tseg. Tswv Ntuj lo lus kuj qhia peb tus mloog nws lus : tus neeg lim hiam muab luag nkaug, muab luag tua, muab luag tsawm. Nws xav tias nws rhuav leej tib neeg, tiam sis yog nws rhuav Tswv Ntuj ua ke tus tib neeg. Tswv Ntuj lo lus tseem qhia peb ntxiv : tus neeg ncaj, yog Tswv Ntuj li neeg. Yog Tswv Ntuj mloog tus neeg ncaj tej lus. Tus neeg ncaj raug hiam npaum li cas, Tswv Ntuj raug hiam npaum li ntawd. Tswv Ntuj muaj hwj huam tiag tiag, pab tau tus neeg tso siab rau Tswv Ntuj thiab pub nws ua tau tej yam tib neeg thiab dab phem ua tsis tau. Hmoob hais tias Tswv Ntuj muaj hwj huam.

Nyob hauv tsab ntawv Moo Zoo hnub no : muaj ob pab neeg. Ib pab, yog Huab Tais Yes Xus cov thwj tim thiab lwm pab, yog cov neeg caum Yes Xus qab ua npoj ntws. Cov npoj neeg no pom Yes Xus ua hwj huam ntau yam. Lawv tsis paub tseeb Yes Xus yog leej twg. Lawv tsuas caum Yes Xus vim lawv pom Yes Xus yog ib tug saub (Zam Ntxuav Plig, Es Lias los lwm tus saub). Tiam sis rau cov thwj tim niaj hnub nrog Yes Xus ua ke nyob, ua ke noj, ua ke mus tshaj Leej Txiv Tswv Ntuj thoob qhov txhia chaw. Lawv paub tseeb Yes Xus yog leej twg :"Koj yog Tswv Ntuj Leej Pleev." Peb tus neeg ntseeg Tswv Ntuj, teev Tswv Ntuj, peb yuav nco ntsoov tsab ntawv Moo Zoo peb hnov no. Peb yuav tsum paub Yes Xus kom zoo npaum li cov thwj tim.

Peb yuav coj peb txoj kev ntseeg Tswv Ntuj zoo li cas thiaj haum Tswv Ntuj siab nyiam ? Yuav coj li cas thiaj mus raws li Yes Xus cov lus qhia ? Yog peb coj peb txoj kev ntseeg Tswv Ntuj, teev Tswv Ntuj li peb hwm thiab coj kev cai dab qhuas Hmoob, los coj hauj sam Phus Thas kev cai los coj nom tswv txoj kev txoj cai. Peb txoj kev ntseeg Tswv Ntuj tsuas zoo li lwm txoj kev teev hawm xwb. Piv li peb ua neeg nquag, txog caij txog nyoog teev ntuj peb mus teev ntuj ; txog caij ua hmoov, peb ua hmoov ; tsuav peb tus kheej txhob lim hiam rau leej twg, txhob mus nyiag luag tug, txhob tua neeg, txhob thab luag txij nkawm…ces peb tsis txhaum nom tswv txoj cai, tsis txhaum Phus Thas kev cai, tsis txhaum tej dab qhuas Hmoob, tsis txhaum Tswv Ntuj…Peb leej twg coj tau li no yeej zoo tiag, yeej yog lawm tsis txhaum tsis tub qaug tus txhooj tus cai twg tiag. Tiam sis, hais qhov tseeb, peb tsuas zoo li npoj neeg caum Yes Xus qab xwb. Lawv tsis paub Yes Xus yog leej twg tiag. Lawv hnov Yes Xus cov lus qhia los lawv tsis to taub thiab lawv tsis yoog tau li Yes Xus siab nyiam. Ntawm peb, yog peb tsis siv zog rau txoj kev hwm Tswv Ntuj teev Tswv Ntuj, peb zoo li npoj neeg, sawv nyob ib cag ntsia Yes Xus ua hwj huam muaj muaj ceem ib lub zos dhau lwm lub zos xwb. Peb txawm raws Yes Xus qab thoob qhov txhia chaw, ntau hli, ntev xyoo los peb tsis nkag siab tim li cas Yes Xus ua tej hwj huam kho tej neeg txom nyem dig muag, lag ntseg, tuag ceg, mob ruas thiab tsa tej tuag sawv rov los. Tus neeg ntseeg yuav tsum pom txoj kev teev Tswv Ntuj hwm Tswv Ntuj tsis yog ib txoj kev teev hawm li lwm txoj kev cai.
Peb Txoj kev ntseeg Tswv Ntuj, teev Tswv Ntuj txawv deb lwm txoj kev teev hawm tag tib si. Txoj kev ntseeg Tswv Ntuj yuav tsum hloov tau peb lub siab lub ntsws, hloov tau peb lub tswv yim thiab hloov tau peb lub neej kom peb plhis ua ib tug neeg tshiab tiag tiag. Peb yuav tsis plhis tawv li tsiaj plhis plaub nab plhis tawv. Peb lub siab, lub tswv yim thiab peb lub neej yuav tsum hloov dua tshiab li Tswv Ntuj siab nyiam. Yog peb txoj kev plhis ua ib tug neeg tshiab, mloog Tswv Ntuj lus ib yam tus me nyuam mloog niam mloog txiv lus. Thaum peb mloog Tswv Ntuj lus, tsis yog txiv plig los tswv qhia yuav khoo peb kom peb ua dab tsi peb mam ua, kom peb niaj hnub teev ntuj peb mam teev…Peb tus kheej yuav kub siab lug rau Tswv Ntuj. Txoj kev tso siab rau Tswv Ntuj ua kom peb mob siab siv zog los caum Yes Xus qab. Peb txawm pom muaj coob leej ntau tus ntseeg ua tej tug tuag luav ntseeg tsis ti txha, ntseeg tsis ruaj tsis khov los peb tus kheej cia siab ntsoov kom tuag nthi ruaj nreb rau Yes Xus lub Moo Zoo. Xav kom peb txoj kev ntseeg Tswv Ntuj pab peb sib txig zos li cov thwj tim, pab kom peb pom Yes Xus “Yog Tswv Ntuj Leej Pleev” Peb thiaj li nkag siab, txawj ua haum Tswv Ntuj siab nyiam, coj raws li Yes Xus cov lus qhia.
Cov thwj tim raws Yes Xus qab tau ntev hli. Lawv pom Yes Xus tes qav num. Lawv mam pib to taub zuj zus txog Yes Xus. Vim li ntawd, lawv mem tau Yes Xus yog tus cov yaj saub cav txog thiab taus hais tseg rau hauv ntawv. Tiam sis, txawm cov thwj tim mem tau Yes Xus yog Leej Pleev tus tuaj ntawm Tswv Ntuj tuaj. Tsis kav, Yes Xus txwv tsis pub lawv qhia leej twg paub. Ua cas Yes Xus thiaj txwv nruj kom txhob hais qhia leej twg paub ? Vim Leej Pleev, tsis yog tus muaj peev xwm ua tau hwj huam loj rau lawv pom lawv qhuas xwb : « Yog leej twg xav lawv kuv qab tuaj, nws yuav txhob xam nws thiab nws yuav niaj hnub kwv nws tus ntoo cuam thiab kom nws caum kuv. » Cov thwj tim yuav tsum hloov siab ntsws dua tshiab, hloov tswv yim thiab los mloog Yes Xus cov lus qhia. Lawv txoj kev ntseeg Tswv Ntuj yuav tsum laus txaus thiab qoos tau noob tiag tiag. Tswv Ntuj Leej Pleev tsis zoo li lawv lub siab xav. Lawv yuav tsum siv zog nrhiav ntxiv thiaj paub tau Tswv Ntuj Leej Pleev. Ua li Tswv Ntuj Leej Pleev yog zoo li cas tiag ? Leej Pleev, kuj yog Tswv Ntuj Leej Yaj, yuav raug hiam, yuav raug tua tuag los ua txim daws tas lub qab ntuj neeg cov txhaum. Leej Pleev yog tus muaj hwj huam thiab yog tus tub txib tiam ntiaj teb tib neeg. Leej Pleev yog Huab Tais ciaj sia nyob mus li thiab yog tus yuav raug tua tuag li tus tub sab thiab tus neeg khaum raug dai saum nkhib ntoo. Thaum ua ntej, cov thwj tim xav tsis txog tias Tswv Ntuj Leej Pleev yuav zoo li ntawd. Lawv ntseeg tsis tau tias Yes Xus yog Leej Pleev thiab yog tub txib. Cov thwj tim tsuas lees paub Leej Pleev kev muaj hwj huam, tsis kam lees Leej Pleev kev raug tua tuag li tus neeg khaum raug luag dai saum nkhib ntoo. Qhov Yes Xus txwv lawv tsis pub lawv qhia Leej Pleev rau leej twg paub, vim lawv tus kheej tseem to taub Leej Pleev tsis tau thoob. Yuav yog tom qab, thaum Yes Xus Pleev raug hiam tuag thiab sawv tsees rov muaj sia hauv lub lav tuag. Cov thwj tim thiaj mam xeev los nkag siab, mam paub Leej Pleev. Txij ntawd mus, lawv thiaj sawv kev ua Huab Tais Yes Xus Pleev cov thwj tim, pom qab mus tshaj nws lub Moo Zoo rau ntiaj teb neeg paub.
Ib tsoom ntseeg txhua leej txhua tus. Peb yog neeg ntseeg Yes Xus Pleev, yog peb tsis pom Leej Pleev txoj kev raug hiam tuag muaj nuj nqes daws peb cov txhaum. Peb yuav tsis to taub Leej Pleev lub txiaj ntsim cawm peb ntiaj teb neeg. Peb nyias yuav tau nug nyias tus kheej, yog peb tsis kwv peb tus ntoo cuam lawv Yes Xus qab, peb yuav lawv leej twg qab ? Vim li no, peb yuav kub siab lug txais Huab Tais Yes Xus cov lus qhuab qhia hnub no thiab rov nyeem dua tsab Ntawv Moo Zoo hnub no. Peb thov kom Leej Ntuj Plig Ntshiab pab peb kom peb plhis tau ua tus neeg mloog lus thiab txawj ua neeg zoo nyiam haum Tswv Ntuj siab.

18.06.2010 Cwj Vuam Chiv