Txiv Plig Cwj Vuam Chiv Yaj Nthuav Ntawv Ntshiab

Rau hnub tim 15 lub 04 hli 2012


Ib zeej tsoom neeg ntseeg teev Huab Tais Yes Xus thiab phooj ywg,

Peb nyuam qhuav ua lub Hmoov Hla, nco txog peb tus Huab Tais Yes Xus qaij qaug mus zwm av sawv tsees ciaj Tswv Ntuj sia. Ntawm no mus, peb yuav piav ob peb los txog Huab Tais Yes Xus kev ciaj sia.

Ib tsoom phooj ywg, xav kom nej txhua leej txhua tus paub tseeb qhov no : Huab Tais Yes Xus yug los ciaj neeg nyob ntiaj teb no kom pab tau peb tib neeg lim hiam, neeg txhaum. Huab Tais thiaj raug txom nyem, raug ntxub, raug tua tuag, nrog peb noob neej ploj thiab tuag mus zwm av. Yog Huab Tais Yes Xus tsis sawv ciaj Tswv Ntuj sia, peb txoj kev ntseeg teev Yes Xus tsis txawv thiab tsis tsim nuj nqes dab tsi tshaj ntiaj teb neeg tej kev teev dab qhuas, kev teev mlom, kev teev Mas Hos Mes los lwm yam kev teev hawm. Vim Huab Tais Yes Xus hla dhau plaws kev ploj tuag, sawv tsees ciaj Tswv Ntuj sia nyob niaj txhiab ib txhis. Vim li ntawd, peb txoj kev ntseeg Yes Xus thiab teev Yes Xus muaj txiaj ntsim dua tej kev teev hawm tib si. Tag txhua txoj kev teev hawm hauv ntiaj teb puav leej zoo, tiam sis zoo tsis txaus. Tag cov thawj neeg rhawv tej kev cai teev hawm no puav leej yog neeg zoo neeg thoob tsib, txawj coj, txawj qhuab qhia, tiam sis, lawv dua toj tag tsis muaj ib tug yuav hla dhau kev ploj tuag. Tsuas yog Yes Xus tib tug xwb thiaj sawv tsees hauv kev ploj tuag ciaj sia.
Phus Thas, tus tsim kev cai hauj sam, nws yog ib tug neeg thoob tsib, siab dawb siab ncaj txawj hlub neeg. Tiam sis, nws tsuas muab tau nws cov lus thoob tsib qhia neeg, coj neeg kom siab dawb siab ncaj li nws. Phus Thas txhiv tsis tau lwm leej lwm tus neeg mob nkeeg thiab tsis nws muaj hwj huam cawm tau tib neeg tuag kom lub cev thiab ntsuj plig sawv ciaj sia. Phus Thas tus kheej tseem khuam ntiaj teb no li tej tib neeg.
Mas Hos Mes, tus tsim kev teev hawm Mawv Xim Lim, tsuas qhia kev thoob tsib kom tib neeg txawj sib hlub, sib haum xeeb. Nws kuj tsis muaj rab peev xwm muab tau hwj huam rau leej tib neeg twg kom ua tau hwj huam.
Peb tej poj yawm txwv txoob muaj koob hmoov pub rau peb tej ua xeeb leej xeeb ntxwv. Tiam sis, lawv kuj tsis muaj zog yuav tiv thaiv roos tau peb cov ua xeeb leej xeeb ntxwv. Vim li ntawd, peb tej poj yawm kuj tseem qhia kom peb fiv lub ntuj tuaj pov tuaj roos peb ntxiv poj yawm lub hwj xyeej thiab.
Peb thiaj hais tau tias, tag txhua txoj kev teev hawm nyob ntiaj teb no zoo los zoo tsis kawg thiab zoo tsis txaus. Tsuas kawg nkaus txoj kev teev Yes Xus thiaj txawv tag nrho lwm txoj kev teev hawm tib si. Txoj kev teev Yes Xus yog txoj zoo dua tej, zoo txij ntiaj teb no tshab plaws puag qaum ntuj. Yog txhais li cas ? Txhais tias kev teev Yes Xus zoo npaum no : tus tib neeg lim hiam, muaj txhaum, tiam sis, yos nws hloov tau siab ua neeg ncaj, ua neeg me, tsis txhob khav theeb, tsis txhob muab hlob, Tswv Ntuj pub tau kom tus neeg ntawd ntshiab huv tuaj, ciaj tau Tswv Ntuj tub ki thiab ua tau tej yam hwj huam neej thiab dab tsis muaj peev xwm ua tau. Tsuas kawg Tswv Ntuj thiaj pub tau tib neeg muaj Tswv Ntuj txiaj ntsim ua tej lub cim loj txaus ntshai txaus qhuas, txaus neeg hwm. Vim li ntawd, cov neeg ncaj neeg zoo muaj Tswv Ntuj hwj huam tiag tiag, yam li leej ntshiab Martin de Tours : “Muaj ib hnub, ze ntawm xyoo 389-391, Martin tseem rhuav ib lub thaj txi dab pov tseg, npoj neeg teev dab qhuas pom, ua rau lawv meem txom heev, sawv daws khiav nplawg ntia los muab nws mos. Muaj ib niag txawm rho loo tau nws rab ntaj hauv hnab los. Martin txawm muab nws lub tsho loj ua ntia pem teb, cev caj dab qoos qoos tos tus hniav ntaj. Tus yawm ntawd txawm tsa loo nws sab tes tuav ntaj, tiam sis nws cuab tau tes siab dhau ua rau nws ntxeev tiaj hlo rov qab ; nws cia li ntshai Tswv Ntuj tshee na, sawv tau los, nws thiaj los thov txhaum ntawm tswv qhia Martin.” Tej hwj huam Huab Tais Tswv Ntuj muab tuaj rau Martin no yog Tswv Ntuj kev hlub peb ntiaj teb neeg lim hiam, siab phem kom ntiaj teb muaj hwj huam npaum li saum qaum ntuj. Tus yawm ntawd ntxeev tiaj hlo rov qab ua nws siab nqig kiag ; Martin tau txais Tswv Ntuj txiaj ntsim tiv thaiv nws tsis raug hniav ntaj. Peb tib neeg ntiaj teb leej twg ntshaw, leej twg thov Tswv Ntuj txiaj ntsim ces tus ntawd yuav tau txais Huab Tais Yes Xus kev cawm. Cov neeg siab dawb siab ntshiab yog cov neeg me, neeg pluag tos rawv Huab Tais Yes Xus kev cawm. Huab Tais Yes Xus cawm tau Martin hnub ntawd. Huab Tais Yes Xus kuj yuav cawm tau peb tib yam. Txoj kev teev Yes Xus yog txoj zoo coj tau neeg ntiaj teb ciaj ua Tswv Ntuj neeg : “4 Vim tag cov yug ntawm Tswv Ntuj los yeej tuag nthi lub ntiaj teb : peb lub siab ntseeg ntawd yog kev yeej tuag nthi lub ntiaj teb.5 Leej twg yog tus yeej lub ntiaj teb, kawg tus ntseeg tias Yes Xus yog Tswv Ntuj Leej Tub.” Nej sim xav, puas muaj lwm txoj kev teev hawm dua ntawm txoj kev teev Yes Xus, yuav nqus peb neeg ntiaj teb lub cev thiab ntsuj plig mus tshwm qaum ntuj, nrog Tswv Ntuj nyob, ciaj Tswv Ntuj sia ? Dua ntawm txoj kev teev Yes Xus, tsis muaj lwm txoj kev yuav pab tau thiab cawm tau peb neeg ntiaj teb mus ciaj Tswv Ntuj sia nyob niaj txhiab ib txhis li Tswv Ntuj. Peb puas tso tau siab, puas ntseeg tau tias peb tib neeg yuav ciaj tau Tswv Ntuj sia ? Yog peb muab xav rau peb tib neeg ntiaj teb xwb, peb yuav ntseeg tsis tau. Peb leej tib neeg tsis muaj leej twg hla dhau txoj kev tuag. Tab txawm yog cov neeg ntseeg teev Yes Xus los kawg ploj tuag thiaj tag, tsis pom leej twg yuav sawv tsees ciaj sia. Tiam sis, tos peb hais tias peb tib neeg yuav sawv ciaj tau Tswv Ntuj sia, vim peb txoj kev teev Huab Tais Yes Xus qhia rau peb : “26 Yim hnub tom qab, nws cov thwj tim tseem nyob rawv sab hauv thiab Tos Mas nrog lawv ua ke. Cov qhov rooj puav leej kaw tas, Yes Xus tshwm plaws tuaj sawv hauv nruab nrab, nws hais : “Nyob thaj yeeb nej sawv daws !” 27 Thiab hais rau Tos Mas : “Cev koj ntiv tes ntawm no ntsia kuv cov tes thiab cev koj txhais tes ntawm kuv phab tav thiab txhob ua tus tsis ntseeg, tiam sis ua tus ntseeg.” 28 Tos Mas teb rau nws : “Kuv tus Huab Tais thiab kuv tus Tswv Ntuj.” Peb txoj kev teev Yes Xus qhia peb ntseeg tias, txawm peb lub cev qaij qaug ib hnub twg yuav ciab zib yaj ua plua av, plua tshauv, txhob poob siab. Huab Tais Yes Xus yuav pub peb lub cev thiab ntsuj plig sawv ciaj sia muaj hwj chim nrog Huab Tais Yes Xus hla dhau rooj ntxa. Cov neeg mloog Yes Xus lus muaj Yes Xus txiaj ntsim tiag tiag.
Peb sim xav rau ntawm peb Hmoob, peb twb ntseeg peb tej poj yawm tej lus qhuab qhia. Thaum ib tug laus qaij qaug txwm caij txwm nyoog, Hmoob twb ua kab ke tso plig kom ntsuj plig tau kev mus thawj thiab. Yog peb Hmoob ntseeg tias ntsuj plig yuav rov los thawj thiab ua kab ua ntsaum, ua nyuj ua nees rau luag thauj, ua mab ua sua, ua noob nom noob tsw…peb tej poj yawm yog nyuag tib neeg tsis muaj hwj huam, peb twb ntseeg lawv tej lus qhia. Huab Tais Yes Xus yog Tswv Ntuj Leej Tub, tus muaj hwj huam yeej tuag nthi kev ploj tuag cog lus pub peb yeej tuag nthi kev ploj tuag thiab pub peb nrog nws ciaj Tswv Ntuj sia nyob ib txhis, peb yim huab yuav ntseeg Huab Tais Yes Xus. Tsis tag li ntawd, tos peb ntseeg tias peb tib neeg yuav sawv tsees lawv Yes Xus qab ciaj Tswv Ntuj sia ua Tswv Ntuj neeg, vim peb leej niam Nkauj Xwb Mab Liab, yog peb ntiaj teb neeg thawj thawj tug lub cev thiab ntsuj plig mus dua qaum ntuj ua peb ntej tseeb tiag. Nkauj Xwb Mab Liab twb tshwm sim rau coob leej ntau tus neeg siab dawb siab ncaj pom : tshwm rau ib tug txiv neej Mev, Juan Diego, Mexico xyoo 1531, tshwm rau Catherine Labouré, Rue du Bac, Paris 1830, tshwm rau Bernardette Soubirous, Lourdes 1858…thiab tseem tshwm nyob ntau thaj chaw ntxiv. Peb txoj kev ntseeg Huab Tais Yes Xus sawv ciaj sia muaj txiag muaj ntsig rau peb tus neeg ntseeg. Niaj hnub no, Huab Tais Yes Xus sawv ciaj sia nyob nruab nrab hauv peb nrog peb ua ke, peb txhob txhawj.

Ib tsoom phooj ywg sawv daws, peb twb muaj lub txiaj ntsim nrog Huab Tais Yes Xus sawv ciaj sia ua Tswv Ntuj tub ki, peb yuav tsis txhob ua neeg nkees, peb yuav nrauj peb txoj kev lim hiam pov tseg, tig los nrhiav Huab Tais Yes Xus tag peb lub siab, muab peb lub neej cog rau hauv Huab Tais Yes Xus xib teg.

11.4.2012 Cwj Vuam Chiv

Rau hnub tim 13 lub 5 hlis 2012


Ib tsoom ntseeg thiab phooj ywg txhua leej,

Peb nyob hauv lis piam 6, caij nyoog Hla, nco txog lub txiaj ntsim peb tus Huab Tais Yes Xus sawv hauv tsoom tub tuag los ciaj sia nyob ib txhis. Hnub no, peb yuav hais txog peb tus Huab Tais Tswv Ntuj lub siab zoo thiab kev hlub neeg. Peb tsuas hais me me txog Tswv Ntuj txoj kev hlub neeg raws li nram qab no, peb yuav piav tsis tag hais tsis kawg.

Peb sim xav txog peb tib neeg kev hlub neeg thiab Huab Tais Tswv Ntuj kev hlub neeg, peb yuav pom sib txawv deb npaum li cas.
Peb txoj kev hlub neeg. Yeej muaj kev sib hlub nyob hauv ib cuab ib yig neeg, peb lub cuab lub yig thiaj ciaj ua neej nyob. Tos peb tib neeg ho ciaj ib cuab koom ib yig, vim txoj kev sib hlub tuav peb, rub peb los ua ke. Thaum ib tug tub thiab ib tug ntxhais sib hlub sib ntshaw, ib tug yeej tseg tsis taus ib tug. Nkawd ob leeg thiaj zoo siab hlo sib qaws ua txij nkawm mus tag ib sim neej. Nkawd txoj kev sib ntshaw ua rau nkawd ob leeg tuaj zog ua neej mus khwv noj khwv haus tsheej hnub tsheej hli tsis nco sab, tsis nco nkees; hnub thiab hmo twb tsis ntev, twb yug tub yug ki huam vam puv vaj puv tsev. Lub neej twb tsis muaj pes tsawg niaj pes tsawg xyoo, nkawd twb ua pog ua yawg, ua poj koob yawm koob. Peb yeej xav tib yam, yus tseem hlub yus tej tub ki tsis taus txaus, lub neej laus twb los txog. Peb tib neeg txoj koob tsis sib luag txhua leej, txoj hmoo tsis sib xws txhua tus. Nyias muaj nyias koob nyias hmoov. Txhua leej muaj niam muaj txi yug, tiam sis, tsis muaj niam muaj txi hlub tas txhua tus. Hmoob hais tias : yog nplooj tsis zeeg zoov yuav tsis nqha, ntiaj teb tib neeg tsis ploj tsis tuag, daim av yuav tsis txaus nyob. Vim li ntawd, lub neej ntsuag yog lub neej poob kua muag. Txoj kev ntsuag, tub ntsoj ntxhais ntsuag, poj ntsuam yawg ntsuag, yeej tsis zoo ua neeg, lam ua neej dai siav rau ntiaj teb, vim tshuav siav tsis tu thiaj ntxeem nyob hnub dhau hnub ua npau suav toog leej niam txhais tes puag, leej txi txhais tes hlub.
Peb neeg ntiaj teb kev sib hlub tsis dawb do. Peb kev sib hlub mus raws txhooj raws cai. Vim peb muaj kev sib txib sib vam ua neej nyob, koj khiav kuv, kuv khiav koj. Thaum peb hais lus, peb nyiam hais lo tseeb, lo yog. Thaum peb ua dab tsi, peb xav kom ua raws kev raws cai, tsis lam taus lam hais, txhob lam taus lam ua. Peb txoj kev sib hlub, sib vam thiaj muaj txiaj muaj ntsig. Cov tub ki thoob tsib thiab tsim txiaj, yog cov tub ki txawj hlub, txawj nco niam txiv kev iab kev khwv tsa tub ki ua neej tsheej cuab tsheej yig. Peb txoj kev hlub tub ki, peb xav hlub kom tau txiaj ntsim. Vim li ntawd, luag tus ntxub yus tsis pom yus txiaj ntsim hlub luag, nkim yus txoj kev hlub dawb do. Hais tau tias peb tib neeg ntiaj teb pluag kev sib hlub, sib pab, sib zam. Peb kev hlub kev zam tsuas tam li pauv zog xwb. Peb tsuas hlub tau tus yuav hlub tau peb. Vim li ntawd, tus neeg ntxub peb, qig peb kev hlub dawb. Peb tsis muaj kev hlub txaus rau tus neeg ntxub peb, vim peb pluag kev hlub dhau. Tus khaub dab ntsoj ntsuag thiaj txom nyem tsis muaj neeg hlub.
Tswv Ntuj kev hlub neeg. Tswv Ntuj tsis pauv zog hlub tib neeg tos ntsoov kom tib neeg hlub Tswv Ntuj. Peb yuav pauj tsis tau Tswv Ntuj kev hlub peb tag npaum li. Tswv Ntuj hlub tag nrho lub ntuj thiab daim av, yaj ceeb no ntxee hlo yeeb ceeb sab. Hauv yaj ceeb no, tus nroj tsuag, tus kab ntsaum, tus tsiaj txhu, tus tib neeg Tswv Ntuj hlub txhij ; tus ntsuj duab ntsuj plig hauv yeeb ceeb Tswv Ntuj hlub tag nrho. Tswv Ntuj kev hlub tus nroj tsuag, yog ua nag ua lwg kom nroj tsuag ciaj sia rau kab ntsaum tau ua zes thiab tau noj. Yog Tswv Ntuj tsis hlub, tas txhua tsav puas yam yuav tsis ciaj sia nyob saum yaj ceeb no thiab ntsuj yuav tsis tsheej ntsuj hauv yeeb ceeb. Tswv Ntuj hlub tas txhua yam dawb do tsis tau them se, tsis them tus nqe dab tsi rov rau Tswv Ntuj : “9 Tswv Ntuj muab nws kev hlub rau peb zoo li no : Tswv Ntuj xa nws Leej Tub ib leeg kheej tuaj nyob ntiaj teb no, kom peb ciaj sia vim muaj nws.10 Kev hlub yog li no : tsis yog peb hlub Tswv Ntuj, yog nws hlub peb, nws thiaj xa nws Leej Tub tuaj ua txim dawb paug theej peb cov txhaum.” Yog Tswv Ntuj tsis hlub peb tib neeg, peb twb tsis yug los saum daim av. Zim txwv no, peb nyob saum daim av, peb txais daim av dawb paug rau peb ua neej, muaj nqaij qus nqaij nyeg, muaj zaub mov rau peb ua txhiam xws yug peb lub cev. Yog Tswv Ntuj tsis hlub peb, tsis pub nag los, tsis pub dej ntws, nroj tsuag yuav qhuav nkig nkuav, dej yuav tu, hiav txwv yuav nqhuab, av yuav kub hnyiab, kab ntsaum, tsiaj txhu, tib neeg yuav ploj tuag tu noob nrho, ntiaj teb yuav ciaj plua tshauv. Thaum zoo li ntawd, peb tib neeg yuav ua tau tus tsi los thov Tswv Ntuj hlub peb. Yog Tswv Ntuj zoo li peb, peb tsuas hlub peb pawg nyuag niaj hnub tuaj tso nyiaj hauv peb lub “church” xwb, yog Tswv Ntuj tsuas hlub cov neeg hlub Tswv Ntuj xwb, ntshai Tswv Ntuj twb nplua ntiaj teb no ciaj plua tshauv tav twg los lawm. Peb twb hlub tsis txaus peb lub cuab lub yig, peb twb pauj tsis tau yus niam yus txiv kev iab kev khwv, peb twb hlub tsis taus tej khaub dab ntsoj ntsuag. Peb pom ntsoov, peb cov neeg los teev hawm Tswv Ntuj, txoj nyuag kev mus pe, mus txaum yim ua Tswv Ntuj tsaug 7 hnub 1 nyuag zaus twb tseem tsis cuag ncua, twb dhuav twb nkees. Peb sim xav tshuav dab tsi peb muaj muab pauj Tswv Ntuj yog peb tsis teev Tswv Ntuj. Tseem muaj peb tib neeg thuam Huab Tais Tswv Ntuj, rov taw tuam ntuj. Yog Tswv Ntuj hlub peb dhau peb thiaj tseem muaj txoj sia nyob. Peb los ua neeg teev Tswv Ntuj, peb yuav thim xav, hloov siab ntsws, ua neeg mloog lus : “12 Kuv lo lus qhia yog lo lus no : nej sis nyiam sis hlub zoo npaum li kuv hlub nej. 13 Tsis muaj lwm txoj kev hlub loj dua yus muab yus txoj sia pub yus tej phooj ywg. 14 Nej yog kuv phooj ywg, yog nej ua raws li kuv lo lus qhia.” Peb ua neeg ntseeg Tswv Ntuj thiab teev Tswv Ntuj, xav kom peb txhua leej pom Tswv Ntuj hlub peb dawb paug npaum li hais saum no. Kev mloog Tswv Ntuj lus tsis yog kev ua ywj peb lub siab nyiam, ua li peb siab xav tam li tus neeg phem, neeg tub sab. Tus neeg tub sab lim hiam yeej tsis cheem nws lub siab phem, nws xav li cas yeej ua li ntawd. Tus neeg lim hiam tseem ua tau tej yam luag twb xav tsis tau. Peb los ua neeg ntseeg Tswv Ntuj, teev Tswv Ntuj, peb yuav hloov peb lub qub siab, hloov peb tus qub neeg ua tus neeg tshiab, taug txoj kev Yes Xus taug ua peb ntej. Peb tsis txhob lam yuav lub npe teev Tswv Ntuj, twb tsis nyiam, tsis paub teev Tswv Ntuj tam zoj tej neeg teev dab qhuas. Tsis txhob ua li tej neeg teev dab qhuas, tos sim neej luag tsis paub teev ntuj, vim luag twb tsis los teev Tswv Ntuj. Ntawm yus, yus twb kawm kev ntseeg, twb paub teev ntuj, tiam sis, yus xwb tim nkees, tsis mus fim, tsis mus teev hawm, tsis mus ua Tswv Ntuj tsaug. Puas tsim nyog Tswv Ntuj meem txom rau yus tshaj rau luag. Peb yuav kub siab thiab ua neeg khwv, ua neeg nquag mloog Huab Tais Yes Xus lus.

Ib tsoom ntseeg sawv daws, peb paub hais tias ua neej nyob, tus muaj thiab tus pluag, tus phem thiab tus zoo Tswv Ntuj yeej hlub ib yam. Peb txoj kev teev hawm Tswv Ntuj qhib txoj kev loj muaj txiaj ntsim tshaj plaws rau peb leej tib neeg txais. Zim txwv no, peb twb muaj txoj hmoo ciaj Tswv Ntuj phooj ywg, ciaj Tswv Ntuj neeg, peb yuav mloog Huab Tais Yes Xus lus qhia, peb yuav sib hlub thiab sib zam ib yam li Huab Tais Yes Xus hlub thiab zam rau peb.

10.05.2012 Cwj Vuam Chiv

Rau hnub hla tim 17 lub 5 hlis 2012


Ib zeej tsoom neeg ntseeg thiab phooj ywg txhua leej,

Hnub no, yog ib hnub ntshiab ib hnub huv, tag lub Koom Txoos Kav Tos Liv thoob ntiaj teb ua lub hmoov nco txog peb tus Huab Tais Yes Xus nce mus saum qaum ntuj, zaum ntawm Leej Txiv Tswv Ntuj sab xis ua Vaj Ntxwv kav qaum ntuj thiab ntiaj teb no. Peb yuav hais txog cov txiaj ntsim hauv lub hnub nyoog no.

Lub hmoov Huab Tais Yes Xus nce mus saum qaum ntuj muaj txiaj ntsim loj tas nrho rau peb ntiaj teb neeg thiab rau tus neeg teev Yes Xus. Txawm ntiaj teb neeg tsis teev Yes Xus tas txhua leej, los Yes Xus yog tag sawv daws tus Huab Tais. Thaum peb tseem teev dab qhuas, tsis tau paub teev Tswv Ntuj, peb ua lub neej tsaus ntuj nti hauv ntiaj teb no. Ib qho ob qho los peb hais tias muaj dab, yuav tau txi dab, ntxias dab tas lub neej kom dab txhob looj koov rau peb. Txoj me kev ntshai dab tom tsuam rawv peb caj qwb ruaj thiab khov npaum nkaus yej thiab cav tais nas tuag nthi nti tsis taus. Peb yuav tau tig ntsia peb Hmoob kev ua neej, peb thiaj yuav to taub peb Hmoob kev ntshai dab. Hmoob yog neeg ua liaj ua teb, nyob roob nyob hav, txawm zej zog rau tej hauv toj hauv pes, qab vag tsib taug yeej fab qas hnyo, tsis khoom tu tej zog kom du lug zoo nkauj rhib. Tej poj niam me nyuam yeej tsis tshua tau luag, tsaus ntuj zus yuav yoj hluav taws, yuav tsum cev tes fawb thiaj xuas tau kev taug. Tej nyuag kooj, nyuag kab xiv los peb hais tias ntshai yog ntsuj mam ntsuj plig txia los yuj los seev rau peb. Nruab hnub, nyuag nab raj nab rawm taug kev, khiav los ncaj qab vag tsib taug, peb twb poob siab nthav tsam lam pus vij mob thiab nplooj ntsws nphau lawm tsheej daig tsam tuaj xa vij ntsag. Pw tseem ua zaj dab ntub npau suav phem ntxiv ces peb yim huab poob plig loj. Yus txoj kev txhawj rov ua rau yus noj mov tsis poob plab haus dej tsis poob cev. Txawm xyeej huab cua hloov lub ntuj ntxoo, ntuj nag nqes ua rau tej txhia neeg lub cev thiab roj ntsha nyeej raws huab cua. Ua rau tej txhia neeg raug khaub thuas thiab kub cev li tej qaib tej npua raug ib phaum aws tig los txog. Sawv daws yuav tsum paub kom tseeb, yeej tsis tim dab los tshoj, tsis yog ntsuj tsis puab cev, tsis tim poob plig li. Tiam sis, vim peb txoj kev ntshai dab rov hem peb poob siab xwb ; yus tus plig nws puab nws cev los yus rov hem kom yus ntshai, ces plig cia li ntshaus thiab nyo ib hnub zuj zus raws lub cev tau khaub thuas qaug zog luj luas. Thaum zoo li ntawd, txhob vam tias txiv neeb txiv yaig yuav pab tau yus. Txiv neeb txiv yaig ncauj lus nug rov nug rais yim ua rau peb txhawj loj ntxiv xwb : teem caij teem nyoog kho li ub, yuav nrhiav lub taub hau tsiaj li no los txi, thiaj mus raws cuag, mus puav tau yus tus ntsuj duab ntsuj plig rov los puab cev, nws twb nim kho siab zim ntab sis yeev nrog zaj dab ntub npau suav phem, los twb nrog niag nab rab nab rawm sib pus ntoj rau tej yas toj, los nrog tej kab npauj kab xi seev lis yees rau tej yas ke lawm. Sawv daws yuav tsum paub kom tseeb, qaib npua zoo tsaws tshuaj noj thiab ua kom neeg lub cev muaj zog nkaus xwb ; qaib npua tsis yog tshuaj kho neeg lub mob lub ntsaj. Kev tua tsiaj kho mob kho ntsaj tsuas zoo them txiv neeb txiv yaig nqe nkaus xwb, tsis zoo dab tsi ntxiv, peb yuav tsum nkag siab, ris siab txij li no. Yuav kom yus tus neeg mob zoo, kawg nrhiav kom tau kuab tshuaj los noj thiab los txhaj lom tus kab mob, yus tus neeg mob thiaj yuav nquag nkaus xwb, zoo tam zoj yuav tsum txhaj tshuaj tiv aws rau qaib npua thiaj tsis tuag aws nkaus xwb. Yog leej twg tsis ntseeg, pes tsawg los nws tseem pheej khuv xim xav tiam dab qhuas, kawg dab qhuas yuav ntaim nws noj nws haus mus kom kawg.
Cov neeg ntseeg Tswv Ntuj thiab teev Tswv Ntuj los tsis txhob ua ywj fab ywj fwj. Peb yuav nco ntsoov, txij li peb nrauj dab qhuas, tsis ua neeb ua yaig, tsis tua tsiaj txhu txi dab, peb lub neej tshav ntuj nrig lawm pes tsaug npaug. Tsis yog peb tsis muaj mob muaj nkeeg, peb kev mob kev nkeeg yog huab yog cua ua, yog kab yog yoov tom, yog kev noj haus, tsis txawj caiv ncauj ua kab mob, kab peem ntxooj yus lub cev ua rau yus ntshav qab zib, muaj roj txhaws yus tej hlab ntsha, tej hlab siab hlab ntsws. Yog kws tshuaj peb yuav tsum thawj nkaus xwb, tsis yog peb raug dab li tej laus hais. Tsis tas li ntawd, peb txoj kev ntseeg Tswv Ntuj, teev Tswv Ntuj ua rau peb siab loj, tsis ntshai tus dab twg li, dab tom tsis tau peb. Tawm rooj plaws, dab tseem yog tus ntshai peb, khiav tsiv nraim peb txoj xub ke. Tsis yog lam hais, Huab Tais Tswv Ntuj yog peb Niam peb Txiv hlub peb, pab peb. Vim peb teev Tswv Ntuj, peb muaj Tswv Ntuj hwj huam. Peb txais Tswv Ntuj hwj huam yeej tag nrho ib tsoom dab ib tsoom ntsuj thiab yeej tag kev mob kev ntsaj, kev ploj kev tuag. Tsis yog peb tsis txawj ploj tsis txawj tuag, peb txais kev ploj tuag nrog Huab Tais Yes Xus kev tuag. Vim Huab Tais Yes Xus yeej hlo kev tuag, tsuj nthi kev tuag hauv nws qab xib taws. Ib hnub twg, peb nrog nws yeej hlo kev tuag, sawv tsees ciaj sia ib yam li nws. Peb cov neeg teev Tswv Ntuj, tsis ntshai tus dab tus ntsuj twg, nws yeej meem tuaj nrog peb sib ntsuas zog : “16 Tus ntseeg thiab ntxuav plig yuav tau kev cawm ; tus tsis ntseeg yuav raug txim.17 Cov ntseeg, tej cim no yuav nrog nraim lawv : hauv kuv npe lawv yuav ntiab dab phem rau sab nraud, lawv yuav hais tej cov lus tshiab, 18 Lawv yuav tuav tau nab hauv tes thiab txawm haus tau tshuaj lom neeg yuav tsis ua tau li cas rau lawv thiab lawv tsa tes saum cov neeg mob nkeeg yuav zoo tuaj.” Tswv Ntuj hlub peb npaum li ntawd, pub peb tib neeg txhaum no muaj Tswv Ntuj hwj huam ciaj tau ua Tswv Ntuj tub ki, yog lub txiaj ntsim loj tas nrho. Yog peb ntseeg thiab teev Tswv Ntuj raws li Huab Tais Yes Xus cov thwj tim qhia, mloog lub Koom Txoos Kav Tos Liv lus ces peb txoj hmoo zoo. Lub hnub nyoog Huab Tais Yes Xus nce pem ntuj no pub lub txiaj ntsim loj npaum li ntawd rau peb sawv nws lub luag dej luag num hauv ntiaj teb no. Yog vim li ntawd, peb thiaj muaj cuab kav hais tias tus neeg teev Yes Xus muaj koob hmoov. Nws txhais tes hlub, txhais tes plhws neeg txom nyem yog Yes Xus tus kheej cev tes hlub thiab plhws neeg txom nyem. Cov neeg teev Yes Xus raug luag ntxub, raug luag hiam tsis yog lawv tus kheej xwb, yog Yes Xus tus kheej raug ntxub raug hiam : “22 Tas puas tsav yam zwm rau nws qab xib taws, ntawm nws, pub nws ua tas lub koom txoos taub hau, 23 Koom Txoos yog nws lub cev, muaj tag nws txiaj ntsim puv npo.” Yog peb tsis nyob hauv Koom Txoos, txawm ua dab tsi peb tsis sawv Koom Txoos npe ua, tsis yog Huab Tais Yes Xus dej num peb ua. Yog peb ua peb tus kheej dej num, peb ua kom neeg cav thiab qhuas peb xwb. Tiam sis, tus mloog Koom Txoos thiab ua raws li cov thwj tim qhia, peb ua kom Huab Tais Yes Xus nto koob meej : “19 Thaum Huab Tais Yes Xus hais lus rau lawv tas, nws cia li mus dua saum ntuj zaum ntawm Tswv Ntuj sab xis. 20 Lawv cov ntawd cia li tawm mus tshaj lus qhov txhia chaw, Huab Tais nrog nraim lawv tes num thiab lus ciaj sia ua tau cim tshwm tuaj.” Niaj hnub no, txawm peb tsis pom Huab Tais Yes Xus pliaj plhu los tus neeg teev Yes Xus txoj dej num muaj Huab Tais Yes Xus hwj huam, piv li tej cim cov leej ntshiab ua tau pub rau tej txhia neeg.

Ib tsoom phooj ywg, lub txiaj ntsim peb tus Huab Tais Yes Xus nce pem ntuj loj heev rau peb ntiaj teb neeg sawv dawv. Peb yuav pauj tsis tau Huab Tais Yes Xus lub txiaj ntsim no. Peb yuav nco ntsoov Huab Tais Yes Xus yog lub Koom Txoos taub hau coj lub Koom Txoos kev, nws nrog peb nyob nraim ntawm peb lub luag dej luag num.

12.05.2012 Cwj Vuam Chiv

Dua ntawm kev pab, peb kev hlub Yes Xus yog nrog Yes Xus cog Tswv Ntuj qaum ntuj kom hlob hauv ntiaj teb no. Peb puas pom Yes Xus hlub peb npaum li cas nrog peb tib neeg ris peb kev iab kev daw tuag nthi. Yes Xus hlub peb ua ntej peb hlub Yes Xus. Peb tsis txhob tos hnub peb nquag, peb mam mus nkag tsev teev ntuj, tsis txhob tos hnub peb noj seem noj so, peb mam faib peb mov seem rau tus tshaib thiab nqhis, los hnub peb pom Yes Xus hwj huam peb mam txiav siab pe Yes Xus. Vim kev hlub tsis muaj caij muaj nyoog thiab tsis txawj nqig. Yus hlub yus lub cuab lub yig, hlub yus niam yus txiv, hlub yus kwv tij neej tsa phooj ywg tag yus lub siab tsis txawj kawg. Peb kev hlub Yes Xus kuj tib yam nkaus, niaj hnub nrog Yes Xus leg leej Txiv Tswv Ntuj tes num ntawm peb nyob, hauv peb lub cuab lub yig, hauv peb lub zos, ntawm peb lub luag dej luag num. Peb kev txhawj kev pab tsoom neeg txom nyem, raug tshaib thiab nqhis yog koob hmoov Yes Xus muab rau peb tau nrog Yes Xus mus ib ncua kev lawv nws qab. Peb txoj kev hlub neeg yog txoj kev hlub Yes Xus thiab yog peb ntxub neeg, kuj yog Yes Xus peb ntxub. Leej twg mus xyuas ib tug neeg raug txim hauv nkuaj, tus ntawd nrog Yes Xus ris cov neeg raug txim ib qho kev iab kev daw, yam li Yes Xus nrog tsoom tub sab ris lawv lub txim tuag daim saum ntoo cuam ua ib pab : “28 Pob Zeb hais rau nws : “Peb tso ub no tseg thiab peb tuaj caum koj”29 Yes Xus hais tias : “Kuv hais tseeb rau nej, tus tso vaj tse, kwv tij, muam, niam thiab txiv, me nyuam, liaj teb tim kuv thiab tim lub Moo Zoo 30 Yuav txais zim txwv no ib puas npaug : vaj tse, kwv tij, muam, niam, me nyuam, liaj teb nrog kev txom nyem thiab lwm tiam txoj sia nyob ib txhis MK 10,28-30” Peb sawv Yes Xus npe hlub ib tug neeg pluag, peb ua rau Yes Xus nto koob meej thiab nrog Yes Xus muab qaum ntuj qhib tuaj hauv ntiaj teb no. Yog peb sawv Yes Xus npe raug txom nyem, peb kev txom nyem hmoov zoo vim peb txais Huab Tais Yes Xus txiaj ntsim ib puas npaug. Cov leej ntshiab txais Huab Tais Yes Xus txiaj ntsim txhua tus. Leej ntshiab Bernadette ua tau tej yam nws tsis muaj peev xwm ua : nws txhais tes hus av ua dej ntws nto txog nia hnub no nram Lourdes.

Ib tsoom phooj ywg sawv daws, peb txoj kev teev hawm Tswv Ntuj muaj txiaj muaj ntsig cawm tau peb zim txwv no thiab cawm tau peb fab lwm tiam ciaj Tswv Ntuj sia. Tsis muaj lwm txoj kev teev hawm yuav loj thiab muaj hwj huam cuag li peb txoj kev teev Yes Xus. Peb nco ntsoov, yog leej twg tsis nrog Yes Xus raug txom nyem, nws kev raug mob raug ntsaj tuag los puas raug xwv txheej ua nws tuag mus lawm ncaj qha tsi muaj txiaj ntsim. Tiam sis, tus neeg mloog Yes Xus lus raug hiam raug tua tuag, nws kev raug txom nyem muaj hmoo nrog Yes Xus txom nyem tuag, nws yuav txais lub cuab tam nrog Yes Xus ciaj Tswv Ntuj sia ib txhis saum qaum ntuj.


10.10.2012 Cwj Vuam Chiv

Rau hnub tim 21 lub 10 hli 2012

Ib tsoom neeg ntseeg thiab phooj ywg sawv daws,

Twb rov txog lub caij nyoog peb tuaj sib fim moog Tswv Ntuj lus ua ke. Peb yuav tsis muaj sij hawm hais kom txhij piav kom txhua cov zaj nyeem lub Koom Txoos Kav Tos Liv muab los qhia rau peb hnub no. Tiam sis, ua neej nyob, peb nyias muaj nyias kev txob kev txhawj. Vim peb yog neeg teev Yes Xus, peb yeej vam ntsoov Huab Tais Yes Xus lub hwj huam roos peb. Vim li ntawd, peb yuav los nthuav ob peb los txog peb kev tsa ncauj thov Yes Xus lub txiaj ntsim pab peb yam li Yas Kos Npos thiab Zam nkawd thov Yes Xus lub hwj chim rau nkawd.

Yes Xus yog Huab Tais Tswv Ntuj nqes saum ntuj los ua neeg kom coj tau peb tib neeg nrog nws mus saum qaum ntuj ciaj Huab Tais Tswv Ntuj tub ki. Yog li, peb los teev hawm Yes Xus, xav kom peb paub Yes Xus kom zoo zoo, yog peb twb tsis paub xyov Yes Xus yog leej twg, peb puas yuav muaj kev cia siab rau Yes Xus ? Peb mloog Yes Xus cov lus hais rau tsoom txwj laus His Xais Lais, vim lawv tsis ntseeg tias Yes Xus yog Tswv Ntuj Leej Tub : “34 Yes Xus teb rau lawv : Puas yog sau tseg hauv nej txoj cai : kuv hais tias nej yog tswv ntuj 35 Yog txoj cai pom xeeb hu ua tswv ntuj cov Tswv Nuj lo lus hais lawv, tsis muaj leej twg muaj peev xwm rhuav tau tej ntawv sau tseg no 36 Tus uas Leej Txiv txi ntshiab si thiab xa tuaj hauv ntiaj teb, nej li nej hais tias : koj thuam ntuj, vim kuv hais tias Tswv Ntuj Leej Tub yog kuv ? Z 10,34-36” Yes Xus qhia peb tias tus mloog Tswv Ntuj lus ciaj tau Tswv Ntuj. Vim li ntawd, peb los teev hawm Yes Xus, peb hmoov zoo, peb teev hawm tus tseem Huab Tais Tswv Ntuj. Peb yeej paub qas ntsoov, ib tug qhev tsis yog ib tug thawj neeg los ib tug nom. Li ntawd, tej nyuag huab tais cuav thiab saub cuav tsis yog Huab Tais Tswv Ntuj. Thaum peb muaj chaw thov kev pab, kev cawm siav, peb twb tsis mus pe tus qhev pab tsis tau peb, peb mus thawj mus pe tus neeg tseem ceeb muaj peev xwm pab tau peb. Ntawm tej kev teev hawm kuj tib yam li, kawg txoj kev teev Yes Xus thiaj yog txoj teev hawm Huab Tais Tswv Ntuj thiab muaj hwj chim xwb.

Peb yuav tsum paub Yes Xus yog tus muaj hwj chim, peb tsis txhob yuam kev cia siab rau tej huab tais cuav ntsej lag muag dig tsis muaj hwj huam los lwm yam kev teev hawm los tej kev teev dab qhuas. Yes Xus hu tau pab kaum ob los ua (ἀπόστολοι, Les Envoyés) npoj Xa Moo, ua nws thwj tim nrog nws leg Leej Txiv tes dej num nyob ntiaj teb no : “1 Nws hu nws kaum ob tug thwj tim los, nws pub hwj huam rau lawv kav cov dab qias ntiab tau lawv tawm khiav thiab kho cov neeg mob nkeeg thiab qaug zog kom zoo hlo 2 Kaum ob tug xa moo ntawd npe yog : tus thawj hu ua Pob Zeb…MT 10,1-2” Yes Xus coj npoj Xa Moo nrog nws mus tshaj lub Moo Zoo taug kev tuaj mus pem lub tuam ceeb Yes Lus Xas Les, pem lub tuam tsev teev ntuj. Lawv hla ntau lub xeev teb, mus txog ntau lub nroog thiab ntsib zeej tsoom His Xais Lais thiab tej pej kum neeg pluag txom nyem, zuav ces, dig muag, mob ruas, raug dab thiab mus fim coob leej cov zoo neej, nplua nuj, tej tub rog, tej nom tswv…Yes Xus pab sawv daws, kho tej neeg mob zoo hlo, tsa tej neeg tuag sawv, ua ntau yam hwj huam. Cov thwj tim niaj hnub nrog Yes Xus ua ke, lawv zeem tau Yes Xus tseeb zuj zus, Yes Xus yog (מָשִׁ֖יחַ ; χριστὸς) Leej Pleev, tus uas cov yaj saub hais quj qees tiam dhau tiam thiab sau tseg rau hauv ntawv tias nws yuav tshwm sim tuaj : “7 Ziag no, kuv paub tias Huab Tais cawm nws Leej Pleev, nws teb ntua nws kev ntshiab si saum qaum ntuj cev nws txhais xis vuag lias cawm NPN 20,7”Npoj Xa Moo ntseeg tias Yes Xus yog Tswv Ntuj Leej Pleev, muaj hwj huam loj npaum li Yes Xus, ntiab tau dab phem khiav ntsaj qaws, cheem cua daj cua dos tu lis nrho, tsa neeg tuag sawv tsees tawm plaws ntawm rooj ntxas. Yes Xus yuav tsis txawj tshaib tsis txawj nqhis, yuav tsis raug mob raug ntsaj, yuav tsis txawj ploj tsis txawj tuag. Tiam sis tsis yog li lawv xav, lawv kev to taub Yes Xus lub Moo Zoo tsis ti ntsiab. Tseem tshuav deb heev Yes Xus yuav tsum qhia lawv kom lawv to taub : “33 Peb nce mus pem Yes Lus Xas Les, neeg Leej Tub yuav raug muag rau cov thawj leej choj thiab cov thoob xwm, lawv yuav txiav txim cia nws tuag, muab nws muag rau cov pej kum neeg 34 lawv yuav thuam yuav nto nws, muab nws nplawm thiab tua nws, peb hnub tom qab nws yuav xeev sawv tsees rov los MK 10,33-34” Cov lus Yes Xus hais lawv no yog zaum peb los tsis nkag npoj Xa Moo pob ntseg. Vim thaum lub caij ntawd, lawv tseem tsis tau nkag siab txog lub Moo Zoo. Lawv tseem nyob thaj chaw qub, nce tsis tau txog theem paub Yes Xus kom meej meej, lawv siab tseem tsis tau qhib tsis tau ras : “Xib hwb, wb xav kom koj mloog wb thov koj” 36 Nws hais nkawd tias : “Neb xav kom kuv ua dab tsi rau neb ?”37 Nkawd hais rau nws : “Kom wb tau zaum ib tug ntawm koj sab xis, ib tug ntawm koj sab laug hauv koj lub hwj chim MT 10,35-37” Yas Kos Npos thiab Zam nkawd ob kwv tij los ntxhi thov Yes Xus lub hwj chim rau nkawd. Tiam sis, lwm cov thwj tim kuj xav muaj Yes Xus hwj chim tib yam li nkawd. Txoj kev ntshaw muaj Yes Xus hwj chim ua rau cov thwj tim sib khib, lawv pib muaj lus sib cav sib ceg liab muag tsuas. Hu ua neeg, leej twg los kuj ntshaw muaj hwj chim, ntshaw muaj koob meej, ntshaw kev nplua nuj, ntshaw ua nom ua tswv, ua huab tais kav pej xeem, kav teb kav chaw. Tab peb cov neeg ntseeg teev Tswv Ntuj, twb yog tib pab neeg ntseeg xwb, hais tib xeem lus, nyob koom zej koom zos, koom tib lub tsev teev ntuj twb muaj khib, muaj lus sib cav sib ceg ntxhov quav niab, faib ua pab ua pawg, tsis xav sib pom, tsis xav teev ntuj ua ke. Teeb meem, tsis yog txoj kev ntshaw muaj hwj chim los muaj kooj meej phem tsis zoo li ub li no. Yes Xus tsis txwv cov thwj tim kom txhob ntshaw Yes Xus hwj chim. Qhov ua teeb meem Yes Xus qhia yog qhov lawv tsis to taub Yes Xus hwj chim. Yog Yas Kos Npos thiab Zam nkawd ntxov to taub Yes Xus lub hwj chim, nkawd yuav tsis muaj ntsej muag thov li nkawd thov ntawd : “Neb tsis paub yam neb thov ; neb puas haus taus lub ntim kuv yuav haus…Nkawd hais rau nws : “Wb muaj cuab kav.” Lwm cov thwj tim kuj tib yam, yog lawv ntxov to taub Yes Xus lub hwj chim, lawv yuav tsis sib khib liab muag tsuas li ntawd. Peb cov neeg ntseeg muaj khib, siab nkhaus nrhiav teeb meem, ua teeb meem niaj hnub no kuj yog vim peb tsis to taub Yes Xus lub Moo Zoo. Tej txhia thawj coj txawm xav tias tau kawm me ntsis txuj ces paub Yes Xus lub Moo Zoo thoob tag, twb tsis tshua xav mloog vaj qhia, tswv qhia thiab tej txiv plig lus lawm. Vim li ntawd, twb yog tib tse neeg ntseeg Kav Tos Liv xwb los cam thawj cuag li lwm pab neeg ntseeg hauv tej me nyuam koom txoos cam thawj thiab : “42 Yes Xus hu lawv los hais rau lawv tias : “Nej twb paub, cov ua thawj kav tej haiv neeg yuam lawv qhi thiab cov ua hlob siv lawv hwj chim rau luag 43 Hauv nej, txhob ua li, leej twg xav ua tus loj yuav ua nej tus tub txib 44 Leej twg hauv nej xav ua tus thawj ua sawv daws tus qhev 45 Thiab neeg Leej Tub tsis tuaj kom luag tiam, hos kom tau tiam thiab pub nws ntsuj plig txhiv kom tau coob leej MK 10,42-45” Yes Xus cov lus no qhia kom peb txawj txaj muag, ua ib tse neeg ntseeg teev Tswv Ntuj zoo nyiam tsim nyog sawv Yes Xus lub npe, tseg lub siab nkhaus, nrauj dab xas tas zaj tswv yim lim hiam tawm hauv peb mus. Peb cov neeg teev Yes Xus yuav tsum ua ib co neeg paub cai. Vim li cas ? Tus neeg ntseeg paub cai, yog tus paub Yes Xus lub hwj chim. Tus muaj Yes Xus lub hwj chim tsis yog tus loj ua nom ua tswv los ua huab tais li peb tib neeg xav. Tus muaj hwj chim raws li Yes Xus qhia yog tus tub txib, tus qhev, tus nquag siab loj siab dav pub tau nws txoj sia ua nyiaj ua kub cev txi rau Huab Tais Yes Xus thiab pub nws ntsuj plig ua pov haum roos coob tus neeg tsis zoo nyiam kom zoo hlub zoo nyiam : “40 Qhov zaum ntawm kuv sab xis los sab laug, tsis yog kuv tus yuav pub, tiam sis yeej npaj cia rau tej txhia MK 10,40” Yes Xus kev muaj hwj chim tsis yog tsa tau neeg tuag tawm plaws hauv qhov ntxa xwb. Yes Xus lub hwj chim kuj yog ua tau phooj ywg nrog ob tug tub sab dai ua nqag saum ntoo cuam tug sab xis, tug sab laug. Yog peb ua neeg ntseeg paub cai, peb yuav pom tias muaj tej zaum tos Yes Xus tsis ua rau peb li peb siab xav los ntshai peb zoo li Zam nkawd ob kwv tij thiab. Yog Yes Xus muab Yes Xus lub hwj chim rau peb no xyov peb puas kam txais thiab.

Peb tsoom neeg ntseeg teev hawm Tswv Ntuj, peb yog Yes Xus cov tub ntxhais txib tshaj Yes Xus lub Moo Zoo niaj hnub no ib ncig ntawm peb nyob. Tej zaum peb kuj yuav pom thiab mem tau Yes Xus yog leej twg rau peb tus kheej. Tiam sis, tshuav ntau yam peb tseem yuav vam Yes Xus cov thwj tim qhia thiab mloog Yes Xus lus. Tswv Ntuj kev muaj hwj chim tsis zoo li tib neeg tej hwj chim, tus hlob quab yuam tus yau, tus muaj thuam tus pluag los nom tswv khoo pej xeem. Tswv Ntuj lub hwj chim yog kev hlub neeg.

19.10.2012 Cwj Vuam Chiv

Rau hnub tim 28 lub 10 hli 2012


Ib tsoom ntseeg nyiam mloog Tswv Ntuj lus,

Hnub no zoo hnub, peb yuav los piav txog Huab Tais Tswv Ntuj lub siab khuv leej raws li cov tsab ntawv peb nyuam qhuav mloog tas saum no.

Peb txoj kev ntseeg Tswv Ntuj thiab teev hawm Tswv Ntuj yog dab tsi ? Nyias yuav tau nug nyias tus kheej, tim li cas kuv ho los ntseeg thiab teev Tswv Ntuj ? Yog peb nug peb tus kheej tiag, peb yuav pom tias kev ntseeg thiab kev teev hawm Tswv Ntuj muaj nuj nqes thiab tau txiaj ntsim, ua rau peb zoo siab tshaj plaws. Tej nuj nqes thiab tej txiaj ntsim Huab Tais Tswv Ntuj pub tuaj rau peb pom dheev ntawm qhov muag, tsis yog dag, tsis yog npau suav. Peb yuav muab tsis tau ib thooj txiaj ntsim txaij nraug zees li cas rau neeg pom. Vim tej txiaj ntsim los ntawm yus kev ntseeg thiab teev hawm Huab Tais Tswv Ntuj los. Kawg tus muaj koob hmoov, tau txais Huab Tais Tswv Ntuj kev hlub nws, nws thiaj li paub, nws thiaj li pom. Lub txiaj ntsim Tswv Ntuj pub rau yus pom ntawd, yus qhia tsis tau rau leej twg. Yus tus neeg npuab Tswv Ntuj thiaj paub, npaum li cas Tswv Ntuj hlub yus thiab pab yus. Tus tsis ntseeg thiab tsis teev Tswv Ntuj, tseem yuav hais tias ntshai yus vwm lawm no. Tej nuj nqes thiab tej txiaj ntsim Tswv Ntuj pub rau cov neeg ntseeg Tswv Ntuj no, tsis tus tsis txawj tag ib sim neej : “9 Lawv coj tau tej niag uas lus thov tuaj kua muag si laim, kuv yuav coj yuav pus lawv rau tus dej ntws nto taug txoj kev ncaj tsis dawm lawv kev, vim kuv yog His Xais Lais leej txiv thiab Es Fais yog kuv thawj tug tub YLM 31,9” Haiv neeg ntseeg Tswv Ntuj pom Tswv Ntuj kev hlub kev pab thiab kev cawm lawv. Tas txhua tiam neej, Tswv Ntuj cov tub ntxhais txib, txhua tus saub puav leej muaj Tswv Ntuj lub zog nres lawv, muaj Tswv Ntuj hwj huam ua lawv luag. Saub Yes Les Mias nco ntsoov Tswv Ntuj tej txiaj ntsim tau cawm His Xais Lais hla dhau lawv tej xwv txheej txhua yam. Kom His Xais Lais nco ntsoov teev hawm thiab los npuab Tswv Ntuj kho kho, yog txoj kev ncaj tsis dawm lawv taw. Yog lawv mus yoog tej pej kum neeg, teev lawv dab qhuas, lawv taug txoj kev nkhaus hmab thiab cag ntoos yuav dawm lawv taw. Mus pe, mus txi tej pej kum neeg tej dab qhuas tsis muaj hwj huam, nkim lawv lub zog dag. Huab Tais Tswv Ntuj yog peb Leej Txiv tsim tau peb, hlub peb npaum li ntawd. Peb txawm raug kev iab kev daw, muaj kev tu siab, chim siab kua muag si, tsis txhob ntshai thov Tswv Ntuj, nws yuav tuav peb tes coj peb kev li tus neeg tshaib dej tau dej cawm nws siav.

Tos peb hais txheej thaud kwv huam lawv tau txais Tswv Ntuj kev hlub lawv los yog xav kom peb nco ntsoov Tswv Ntuj txiaj ntsim rau peb tiam neej no. Peb twb hnov thiab ntseeg tias Tswv Ntuj tau hlub His Xais Lais npaum li cas, Tswv Ntuj yuav hlub txhua tus neeg mloog Tswv Ntuj lus tiam no ib yam li yav thaud. Thaum Yes Xus tseem ua neej nyob, txhua tus neeg vam khom Yes Xus pab, lawv puav leej tau txais Yes Xus txiaj ntsim. Hu ua tib neeg, tsis muaj leej twg tsis raug kev nyuaj siab. Peb nyias muaj nyias kev txom yem nyob hauv nyias. Txawm peb tshaib, tseem muaj tus tshaib tshaj peb, txawm peb txom nyem los tseem muaj tus txom nyem loj tshaj peb, piv li tus dig muag Npas Tis Mais, niaj hnub zaum ntawm ntug kev thov khawv, thov saib leej twg puas hlub tau nws. Neeg kuj hlub nws thiab los hlub tsis tag, hlub tsis pov khawv. Muaj ib hnub zoo hnub, Yes Xus taug kev tuaj ncaj ntawm nws lub chaw zaum. Nws tsa suab hlo thov Yes Xus pab nws : “Yes Xus, Das Vis Leej Tub, khuv leej kuv yuas…Koj xav kom kuv ua dab tsi rau koj ?” Tus dig muag hais rau nws : “Las Npus Nis, kom kuv pom kev” 52 Yes Xus hais nws tias : “Rov mus, koj lub siab ntseeg cawm koj lawm os MK 10,47.51-52” Cov poj niam los cov txiv neej, laus los hluas, cov txiav txim siab zoo siab hlo, tsa ncauj thov Tswv Ntuj hlub lawv, pab lawv, daws lawv kev txom nyem, lawv kawg tau txais Tswv Ntuj lub txiaj ntsim. Peb hnov Yes Xus hais rau Npas Tis Mais kom rov qab mus siab kaj nrig, vim nws kev ntseeg Tswv Ntuj cawm nws. Yog peb ntseeg Tswv Ntuj npaum Npas Tis Mais, peb lub siab kuj yuav thaj yeeb thiab kaj lug kaj nrig ib yam nws.

Kom peb nco ntsoov cov neeg txom nyem nyob Is Dias teb, hauv lub nroog Calcutta, lawv yog cov txom nyem tshaj plaws, yoo tshaib yoo nqhis txog txhiab thiab vam leej. Neeg pom lawv coob muaj mob qias dhau, tsis muaj tug xav cev tes kov, cev tes hlub lawv. Tiam sis, muaj ib hnub zoo caij, ib hnub zoo nyoog, tsis muaj neeg paub, tos nco Tswv Ntuj tuaj hlub, tuaj ua tsev rau lawv nkaum tshav nkaum nag, muab txaj chaw rau lawv pw, ua mov rau lawv noj, muab dej rau lawv da, cev tes plhws lawv, muab tshuaj kho lawv tej kev txhab. Tus tuaj tu cov neeg txom nyem no, kuj yog ib tug me nyuam neeg xwb, nws tsis muaj ib txhab nyiaj, tsis muaj ib txhab qoob txaus yug txhiab vam leej neeg txom nyem. Tiam sis, nws tsis poob siab, nws tsa suab hlos niaj tag kis, niaj hnub, niaj hmo thov Yes Xus pab nws ib yam li Npas Tis Mais tus dig muag. Nws ua neej raws Yes Xus lo lus qhia : “3 Yes Xus hais rau lawv : “Txhob nqa pas nrig, lub nas, txiaj nyiag, mov thiab tsoos hloov dab tsis taug kev LK 9,3” Tus me nyuam neeg siab dawb siab loj no cawm tau cov neeg txom nyem hauv lub nroog Calcutta ua txhiab vam leej tej siab ntsws nyob kaj lug: “Kuv lub neej zoo li tej tsiaj txhu nyob nraum kev, tiam sis, kuv tuag li Tswv Ntuj tus tub xa moo, muaj tus hlub thiab saib taus kuv” Tib neeg hais li rau nkauj xwb Teresa hnov.

Vim li ntawd, ib tsoom phooj ywg mloog Tswv Ntuj lus, peb tsis txhob ua siab me, Huab Tais Tswv Ntuj yog peb Leej Txiv hlub peb tsis txawj kawg. Txawm peb muaj kev txom nyom loj npaum twg, peb yim huab yuab tso siab rau Tswv Ntuj, yeej meem tsa peb lub suab thov Huab Tais Yes Xus. Peb yuav pom nws kev hlub peb ntawm qhov muag.

25.10.2012 Cwj Vuam Chiv

Rau hnub tim 04 lub 11 hli 2012



Hnub no, yog ib hnub zoo caij zoo nyoog rau peb tus neeg ntseeg Tswv Ntuj thiab rau ib zeej tsoom txhua leej tuaj sib fim. Peb xav los nthuav ob peb los txog lub ntsiab lus Huab Tais Yes Xus qhia rau peb hauv txoj kev ntseeg Tswv Ntuj.

Huab Tais Tswv Ntuj yog tag lub ntuj thiab ntiaj teb, saum yaj ceeb no thiab hauv yeeb ceeb tus Huab Tais Tswv Ntuj. Phim leej tib neeg yuav xaiv Tswv Ntuj ua sawv daws tus Huab Tais thiab teev Tswv Ntuj tib leeg xwb. Tiam sis, nej pom tias txhua tus tib neeg tsis teev thiab tsis hwm Tswv Ntuj. Nyias mus thawj nyias tej niag huab tais cuav li nyias siab nyiam thiab siab xav. Zoo tib yam li nej yug tau nej pab me nyuam huam vam xeeb leej xeeb ntxwv nphoo ntxuas, nej pom tej txhia lawv txawj hlub nej thiab txawj hwm nej dua tej txhia. Tej kev cai teev hawm saum daim npoo av kuj zoo li ntawd, tej txhia kev teev hawm ua tau xis Tswv Ntuj siab nyiam dua tej txhia. Tiam sis, txawm muaj tej txhia neeg tsis teev tsis hwm Tswv Ntuj los Tswv Ntuj tsis khib rau cov neeg ntawd. Nej thiab, nej kuj tsis pom qab khib rau nej tej xeeb ntxwv tsis txawj hlub nej. Txawm tias tej kev cai teev hawm tsis hwm Tswv Ntuj los lawv kev qhuab qhia kom neeg thoob tsib thiab nyiam zoo, muaj nuj nqes pab Tswv Ntuj ib qho hauj lwm. Muab piv li txoj kev cai teev dab qhuas Hmoob, los teev Mos Has Mes kev cai thiab Phus Thas kev cai qhia kom neeg txhob ua tub sab tub nyiag, txhob quav yeeb quav tshuaj, twb muaj nuj nqes qhia kom neeg tsim txiaj. Tiam sis, tej kev cai teev hawm no pab tsis tau tib neeg rau tej qhov tseem ceeb tshaj kev qhuab qhia : yam li kev cawm neeg. Tsuas kawg txoj kev teev hawm Tswv Ntuj thiaj cawm tau tib neeg. Vim Huab Tais Tswv Ntuj tib leeg thiaj muaj hwj huam, peb tib neeg tsis muaj hwj huam ib qho li. Vim li ntawd, tej kev cai teev hawm tib neeg ua tus tsim txawm zoo npaum twg, yeej tsis cuag peb txoj kev teev hawm tus tseem Huab Tais Tswv Ntuj : “2 Kom koj hwm Huab Tais koj tus Tswv Ntuj nco ntsoov khaws tag nws tej kab xwm thiab tej lus uas kuv kom rau koj thiab koj tej tub ki thiab xeeb ntxwv mus tag sim neej koj thiaj yuav nyob laus nkoos 3 Thiab His Xais Lais, koj yuav tsum mloog thiab yuav tsum ua kom tau vim nws zoo rau koj xwv nej thiaj yuav huam vam hauv lub teb chaws mis thiab zib meem mias li Huab Tais nej cov yawg koob tus Tswv Ntuj hais rau koj TC2 6,2-3” Hauv txoj kev teev hawm Tswv Ntuj muaj tej yam loj tas nrho uas tsis muaj hauv tib neeg tej kev cai teev hawm : yam li lub txiaj ntsim thiab tej hwj huam. Vim hwj huam yog Huab Tais Tswv Ntuj lub hwj chim. Peb cov neeg mloog Tswv Ntuj lus teev hawm Tswv Ntuj, txais tau Huab Tais Tswv Ntuj lub hwj chim. Hos cov neeg teev hawm hauv lwm tej kev cai teev hawm pluag hwj chim txhua leej, vim lwm yam kev teev hawm tsis muaj hwj huam dab tsi.

Peb tus Huab Tais Yes Xus yog Tswv Ntuj Leej Tub nqes saum ntuj los ciaj neeg. Huab Tais Yes Xus muab tau Tswv Ntuj lub hwj chim rau cov neeg mloog Tswv Ntuj lus thiab teev Tswv Ntuj raws li Yes Xus qhia. Peb yuav tsum nkag siab tias kev muaj Tswv Ntuj hwj chim tsis yog ua li peb tib neeg kev cai teev hawm. Peb yuav tsum paub, txoj kev teev hawm Tswv Ntuj tsis cia peb tshaj leej twg. Lub nra sib nra hnyav, peb yuav ris tag nrho. Txoj kev teev hawm Tswv Ntuj tsis yog yuav qee peb txhob cia peb txog siav los txhob cia peb txom nyem, tsis yog li ntawd. Hnub no, peb yuav mloog kom zoo Huab Tais Yes Xus qhia lub ntsiab lus loj hauv peb txoj kev teev hawm Tswv Ntuj rau peb : “29 Yes Xus teb tias lo loj tshaj : “Tig ntsej mloog, His Xais Lais, peb tus Huab Tais Tswv Ntuj tib leeg kheej yog tseem Huab Tais 30 Koj hlub Huab Tais koj tus Tswv Ntuj tag nrho koj lub siab, tag koj ntsuj plig tag koj tswv yim thiab tag koj lub zog 31 Lo ob lo no : Koj hlub luag tus ze ntawm koj li koj tus kheej, tsis muaj lwm lo lus qhia loj tshaj cov no MK 12,29-31” Yes Xus lo lus qhia no tsis txwv txiav cov neeg teev lwm txoj kev cai teev hawm thiab tsis thuam txoj kev cai teev hawm twg phem. Yog lo lus qhuas thiab caw tag ntiaj teb neeg txhua leej txawm teev lwm txoj kev teev hawm thiab txawm teev Tswv Ntuj cuab tag sawv daws zog kom loj. Cov neeg teev lwm txoj kev teev hawm tus twg siab zoo thiab txawj hlub neeg, Huab Tais Tswv Ntuj pom thiab paub, Tswv Ntuj yuav pauj koob haum tuaj rau nws. Cov neeg ntseeg thiab teev hawm Tswv Ntuj tus siab zoo thiab hlub neeg, nws yog neeg hwm Tswv Ntuj tseeb tiag, Tswv Ntuj yuav pauj koob haum tuaj rau nws tib yam nkaus. Cov neeg muaj Tswv Ntuj koob haum hmoov zoo, lawv yuav txais Huab Tais Yes Xus lub hwj chim. Yes Xus lo lus qhia no yog qhia rau peb txog Yes Xus tus kheej thiab cov neeg muaj koob haum mloog Yes Xus lus. Peb to taub tias tus hlub Leej Txiv Tswv Ntuj tag siab nrho, yog Yes Xus : “38 Vim kuv nqes saum ntuj los tsis los ua li kuv nyiam, hos ua li tus xa kuv tuaj siab nyiam Z 6,38.”, Yes Xus hlub Leej Txiv tag Yes Xus Ntsuj Plig : “46 Yes Xus hais : Txiv, kuv tso kuv ntsuj plig hauv koj txhais tes LK 23,46” thiab hlub Leej Txiv tag Yes Xus lub zog : “13 Tsis muaj lwm txoj kev hlub loj dua yus muab yus txoj sia pub yus tej phooj ywg Z 15,13” Txoj kev hlub neeg yog qaum ntuj txoj kev Yes Xus taug tuaj cuag peb. Cov neeg muaj koob haum yog cov hlub neeg thiab mloog Yes Xus lus taug tau Yes Xus lw mus tshwm qaum ntuj.

Ib zeej tsoom neeg ntseeg thiab phooj ywg, peb tus Huab Tais Tswv Ntuj siab loj siab dav hlub neeg tiag tiag. Peb leej twg hlub neeg, txawm yuav yog tus teev dab qhuas los tus teev Tswv Ntuj, nws yuav txais Tswv Ntuj koob haum mus ciaj Tswv Ntuj sia nrog Huab Tais Yes Xus muaj Tswv Ntuj hwj chim, yog peb txoj kev teev Tswv Ntuj lub ntsiab.

02.11.2012 Cwj Vuam Chiv

Rau hnub tim 11 lub 11 hli 2012
Ib zeej tsoom neeg ntseeg thiab phooj ywg nyiam mloog Tswv Ntuj lus,

Peb zoo siab rov tuaj sib fim ua ke teev hawm peb tus Huab Tais Tswv Ntuj. Hnub no, peb xav los nthuav ob peb los txog lub txiaj ntsim peb tau txais ntawm Tswv Ntuj raws li cov zaj nyeem peb hnov hnub no. Peb xav caw nej sawv daws muab cov tsab ntawv no nyeem ob peb lwm ces nej yuav pom Tswv Ntuj lub txiaj ntsim ntsu npaum li cas rau nej.

Tsoom phooj ywg sawv daws, peb yuav nco ntsoov tias Huab Tais Tswv Ntuj yog tas ntiaj teb neeg thiab tej ntsuj plig tus Huab Tais. Tswv Ntuj tsis yog cov neeg teev Tswv Ntuj tus Huab Tais Tswv Ntuj xwb, yog tas yaj ceeb no thiab yeeb ceeb tus Tswv Ntuj. Vim tas txhua tus tib neeg thiab txhua tus ntsuj yog Tswv Ntuj tib leeg tsim muaj. Saum yaj ceeb no muaj coob npaum li ntawd haiv neeg, ua cas tsuas muaj haiv neeg His Xais Lais thiaj teev hawm Tswv Ntuj xwb, lwm haiv neeg nyias mus teev nyias kev cai dab qhuas, nej xav li cas ? Vim ntiaj teb neeg yog As Das thiab Es Vas xeeb ntxwv, sawv daws lo nkawd keeb txhaum yuam cai cam thawj, nyias cam nyias mus ua ywj nyias siab. Tswv Ntuj thiaj xaiv His Xais Lais los teev hawm Tswv Ntuj ua qauv dib lwm haiv neeg. Yog li ntawd, lub txiaj ntsim Tswv Ntuj pub rau His Xais Lais ua Tswv Ntuj haiv neeg, Tswv Ntuj xav pub rau tas ntiaj teb neeg. Nej thiaj pom muaj ntau haiv neeg tig los teev hawm Tswv Ntuj thiab lawv tseem huas kev ua His Xais Lais ntej : “29 Yuav muaj cov sab hnub tuaj thiab hnub poob, cov qaum teb thiab qab teb yuav tuaj zaum ntawm rooj qav hauv Tswv Ntuj qaum ntuj 30 Ua ciav, cov ua qab yuav ua thawj thiab cov ua thawj yuav ua qab LK 13,29-30” Tswv Ntuj siab nyiam thiab siab xav yog coj tag ntiaj teb neeg los ua Tswv Ntuj haiv neeg. Tswv Ntuj thiaj xaiv His Xais Lais los teev hawm Tswv Ntuj ua qauv nyob ntawd rau lwm haiv neeg yoog, tsis yog Tswv Ntuj hlub His Xais Lais tshaj lwm haiv neeg. Kuj tib yam thiab, tos peb los teev hawm Tswv Ntuj, vim Tswv Ntuj yeej hlub peb thaum peb tseem teev dab qhuas tsis tau paub teev Tswv Ntuj : “10 Es Lis Yas Hu sawv kev mus rau Txhas Pas Tas, nws tuaj txog ntawm rooj loog, ciav ib tug poj ntsuam khaws khaub tawg, nws txawm hu thiab nug tias : “Thov koj nqa dej hauv tshob rau kuv haus yuad” 11 Tus poj niam tig ntiag zoj mus, nws thiaj hais dua : “Thov koj nqa ib thooj mov hauv koj tes thiab 1V 17,10-11” Tus poj ntsuam no, yog neeg pej kum teev cov Fes Nis Xias dab qhuas (Baal, Melqart, Astarté) tsis kav Tswv Ntuj kuj hlub nws puav tam ib tug poj ntsuam His Xais Lais teev Tswv Ntuj. Vim ntuj yuav tshav teb yuav nkig puv peb niaj, tib neeg yuav raug txom nyem. Tswv Ntuj hlub tus poj ntsuam thiab nws tus tub, Tswv Ntuj thiaj xa saub Es Lis Yas Hu tuaj cawm ob niam tub ntsuag. Saub Es Lis Yas Hu tuaj tom thawj khee hlo tus poj ntsuam tes hmoov nplej thiab dia roj kawg noj ua ntej nkawd yuav tuag tshaib. Tiam sis, tus poj ntsuam zoo siab hlo muab nws tes hmoov nplej khee ua rau saub noj. Ua ciav, nws tais hmoov nplej tsis txawj nqig, dia roj tsis txawj nqhuab raws nraim li saub tau hais rau nws txaus lawv noj puv peb niaj.

Peb yuav to taub txoj kev teev hawm Tswv Ntuj raws li Yes Xus qhia muaj txiaj ntsim cawm tau peb zoo li tus poj ntsuam tais hmoov nplej tsis nqig thiab dia roj tsis nqhuab. Tus neeg ntseeg Yes Xus yuav to taub cov lus no li cas ? Peb yuav muab tus poj ntsuam no lub neeg txom nyem los xav rau nyias tus kheej. Thaum ua ntej, peb tej poj yawm twb tsis txawj teev hawm Tswv Ntuj los Tswv Ntuj yeej ntxov hlub peb tej poj yawm. Txoj kev cai teev dab qhuas Hmoob, poj yawm ib txwm teev dab niam dab txiv, dab caj dab ces, txawm tsis teev Tswv Ntuj los tsis khib Tswv Ntuj qhov twg. Vim Tswv Ntuj lo lus twb qhia kom nyias hwm nyias niam nyias txiv, hwm nyias poj yawm txwv txoob. Hmoob kev hwm niam hwm txiv, teev dab caj dab ces poob rau kab ntawd. Tiam sis, Hmoob kev teev dab qhuas txawm pab tau Hmoob lub siab kaj ib zaug, los ntau zaus ua rau Hmoob txhawj xeeb, ntshai thiab raug txom nyem. Vim Hmoob hais tias neej tuag thaum twg ces neej txia ua dab. Hmoob kev cai teev dab, yog tiam dab, ntxias dab tas yus lub neej, yus thiaj noj qab nyob zoo. Yog neej ua puas dab qhov twg ces dab yuav ua kom neej ploj mus thiab tuag tu noob. Txoj kev cai teev dab ua rau Hmoob txom nyem tshaj, yog qhov ntshai rwg dab tom Hmoob tuag tu noob. Vim li ntawd, Huab Tais Tswv Ntuj hlub poj yawm Hmoob thiab xav cawm kom peb dim txoj kev ntshai dab tom thiab raug txom nyem ua dab qhev. Tswv Ntuj thiaj li xa Tswv Ntuj cov tub txib tuaj txog Hmoob tej zej zog, nrog Hmoob nyob, hais Hmoob lus, ciaj Hmoob, loj npab ntshuas daws Hmoob kev ntshai dab pov tseg. Tswv Ntuj cov tub txib xub tuaj nrog Hmoob nyob tshaj yog nyob Tuam Tshoj teb : TP. François Jean-Marie GOUBAULT, mep (1882-1941) nws tuaj tshaj Yes Xus lub Moo Zoo qhia Tswv Ntuj txoj kev hlub neeg nrog Hmoob nyob txog hnub nws tso ntiaj teb tseg. Cov Hmoob nyob Cob Tsib, lub zos Pheej Huj, xeev Yen Bai twb los teev hawm Tswv Ntuj xyoo 1921. Nyob sab Los Tsuas teb, TP Yves BERTRAIS Nyiaj Pov yog tus coj Yes Xus lub Moo Zoo tuaj tshaj qhia Hmoob nyob Roob Nyuj Qus xyoo 1950. Yog tsis muaj neeg tuaj qhia Yes Xus lub Moo Zoo rau peb, peb yuav tsis pom qab ntseeg Yes Xus. Yos tsis muaj neeg qhia txoj kev teev hawm Tswv Ntuj, peb yuav tsis txawj teev hawm Tswv Ntuj. Hmoob poj yawm yeej ntxov hwm lub ntuj, tiam sis poj yawm tsis txawj teev Tswv Ntuj. Vim li ntawd, Tswv Ntuj thiaj li xa Tswv Ntuj cov tub txib tuaj nrog Hmoob nyob cawm Hmoob tam li Es Lis Yas Hu mus nrog ob niam tub ntsuag nyob cawm nkawd.

Ib tsoom phooj ywg sawv daws, Tswv Ntuj tso peb dim txoj kev ntshai dab tom thiab txi dab ua dab qhev. Tsis phim peb tus neeg ntseeg Yes Xus nyiag kev rov mus thawj tej niag saub cuav, mus saib tes thiab saib yaig, mus ua khawv koob pov thiab mus ua neeb kho yus txoj kev txhawj xeeb. Peb tus neeg teev Tswv Ntuj yuav ntsia peb txoj kev txhawj xeeb li tus poj ntsuam pluag. Tus poj ntsuam no muab tag nws kev txom nyem mus txi Tswv Ntuj : “42 Ib tug poj ntsuam pluag nam zoj mus tso ob lub nyuam txiaj 43 Yes Xus hais rau nws cov thwj tim : “Kuv hais tseeb rau nej, tus poj ntsuam pluag no tso rau hauv hub ntau tshaj tag nrho sawv daws MK 12,42-43” Yog peb muab tag peb txoj kev txhawj xeeb ua txim txi Tswv Ntuj, txhob ua siab me zais siab, nyiag kev rov mus thawj dab cia siab rau dab ces Tswv Ntuj yeej txaus siab cawm tau peb.

09.11.2012 Cwj Vuam Chiv