Txiv Plig Cwj Vuam Chiv Yaj Nthuav Ntawv Ntshiab

Rau hnub tim 18 lub 11 hli 2012

Ib tsoom niam txiv kwv tij phooj ywg mloog Tswv Ntuj lus,

Twb rov txog hnub peb tuaj sib fim ua ke thiab teev hawm peb tus Huab Tais Tswv Ntuj, tus tsim lub ntuj thiab ntiaj teb, tus pub peb ciaj ua neeg saum daim av thiab yuav pub kom peb ciaj sia ib txhiab ib txhis saum qaum ntuj. Vim li ntawd, peb yuav los tham txog peb txoj kev cia siab rau Huab Tais Tswv Ntuj raws Koom Txoos Kav Tos Liv kev qhuab qhia.

Peb xav qhia qhov tseeb txog lub hauv paus kev ntseeg Tswv Ntuj rau ib tsoom niam txiv kwv tij neej tsa Hmoob sawv daws paub. Thaum chiv keeb, tsuas muaj tib lub hauv paus ntseeg teev hawm Tswv Ntuj xwb. Tiam sis, tib neeg ib tug tsis zoo xws tug, muaj cov mloog lus los kuj muaj cov cav ncauj cam thawj. Thaum Koom Txoos pib sawv, twb muaj ib co neeg ntseeg yuam kev thiab cam thawj (Hérétiques, Protestants) ua ntxhov lub hauv paus kev ntseeg. Vim li ntawd, cov thawj coj Koom Txoos tau ntiab cov neeg yuam kev (Hérétiques) khiav hauv Koom Txoos (excommunication : Marcion-144, Arius-325, Nestorius-430) thiab rub cov Tuam Rooj Ncauj Lus (Concile de Nicée-325, Concile d’Ephèse-430). Dhau ntawd los, kuj muaj cov neeg ntseeg cam thawj (Protestants) raug lub Koom Txoos Kav Tos Liv ntiab khiav (excommunication : Lus Thes-1520, Kas Vees-1530) thiab rub lub Tuam Rooj Ncauj Lus (Concile de Trente-1545-1563). Tiam sis, cov neeg raug ntiab tawm hauv Koom Txoos Kav Tos Liv, nyias mus tsim nyias pawg neeg teev Yes Xus raws li nyias zaj kev yuam cai thiab cam thawj. Nej thiaj pom muaj cov neeg teev Yes Xus loj cov kem tsuab txheej hla dhau txheej los txog niaj hnub no tsis txawj kawg. Tseem niaj hnub muaj tej tus xib hwb mus tsim nws pawg ua nws lub (church). Vim tej ntawd, peb xav qhia txoj tseem kev ntseeg Tswv Ntuj rau ib tsoom kwv tij neej tsa Hmoob kom ceev faj, yuav tsum txawj xaiv txoj tseem kev ntseeg tsis txhob poob rau txoj txuam tsoov thiab cuav. Peb xav pab nej txhua leej cov nyob hauv txoj tseem kev teev Tswv Ntuj kom muaj kev cia siab. Yog nej twb tsis paub txoj kev ntseeg twg txoj tseem thiab txoj twg txoj cuav, nej puas yuav tau Tswv Ntuj koob hmoov ? Yog li ntawd, thaum pib txoj kev ntseeg Yes Xus, yog nej cuab tau kab niag tsis yog thiab yuam kev ua ke nrog pawg niag yuam kev (hérétique), nej puas yuav muaj hmoo txais Yes Xus txiaj ntsim ? Nyob li tej qoob loo, noob txuam tsoov yeej tsis tseem noob, nej twb paub li ntawd. Hmoob twb niaj txhis piv lus : “Yuav ua neeg siab ncaj siab zoo thiaj tau ntuj ntoo.” Yog nej xuas tau kab tseem kev teev hawm Tswv Ntuj, nej thiaj yuav muaj hmoo txais Huab Tais Yes Xus tej txiaj ntsim txhawb nej kev cia siab. Peb tsis xav ntxias nej leej twg, tsis xav dag nej tus twg kom yuam kev. Peb tsuas qhia thiab pab kom nej tus neeg ntseeg Tswv Ntuj muaj kev zoo siab thiab kom nej txhua leej txhua tus txais kev kaj siab lug nrog cov neeg muaj hmoo muaj Huab Tais Yes Xus txiaj ntsim.

Vim li ntawd, muaj ntau txoj kev teev Yes Xus, tiam sis muaj tib txog thiaj tseem xwb, xav kom nej paub meej li ntawd. Tus neeg twg cog nws lub siab ruaj nreb hauv lub Koom Txoos Kav Tos Liv kev qhuab qhia, tus neeg ntawd tsis nkim nws lub zog npuab Huab Tais Yes Xus. Vim li cas ? Vim Yes Xus yog tus tshoj Koom Txoos Kav Tos Liv tes dej num. Cov tub ntxhais txib hauv Koom Txoos Kav Tos Liv tshaj Yes Xus lub Moo Zoo, lawv yoog cov thwj tim Pob Zeb thiab Paj Lug tus roj hnee tshaj Yes Xus lub Moo Zoo : “1 Kwv tij, kuv qhia lub Moo Zoo rau nej paub, yog lub kuv tshaj rau nej thiab nej tau khaws tseg thiab nej yoog raws nraim khov kho 2 Vim li ntawd, nej yuav txais txoj kev cawm, kuv qhia nej li cas yog nej txuag zias tej lus li ntawd, yuav tsis nkim nej lub zog ntseeg 1KLN 15,1-2” Peb los txais kev ntseeg Tswv Ntuj raws li Koom Txoos Kav Tos Liv kev ntseeg Tswv Ntuj, yog txais Pob Zeb thiab Paj Lug kev ntseeg Tswv Ntuj. Tus tsis nyob hauv Koom Txoos Kav Tos Liv, kuj tsis nyob hauv Pob Zeb thiab Paj Lug kev ntseeg thiab tsis koom kev ntseeg Tswv Ntuj li Yes Xus qhia. Koom Txoos Kav Tos Liv kev ntseeg Tswv Ntuj yog cov thwj tim kev ntseeg Tswv Ntuj thiab yog Yes Xus kev ntseeg Leej Txiv Tswv Ntuj. Vim li ntawd, muaj tej lub cim qhia peb pom tias cov neeg ntseeg Kav Tos Liv txais tau Yes Xus txiaj ntsim. Tim li cas lwm cov neeg teev Yes Xus tsis muaj hmoo pom Yes Xus txiaj ntsim ? Puas yog Yes Xus hlub cov neeg ntseeg hauv Koom Txoos Kav Tos Liv dua lwm cov neeg teev Yes Xus ? Tsis yog li ntawd. Vim Yes Xus kev hlub neeg txawv peb kev hlub neeg. Peb tsuas hlub tau peb tsev neeg thiab hlub tus hlub tau peb xwb. Hos Yes Xus hlub tag ntiaj teb neeg, hlub tus muaj ib yam tus pluag, hlub tus teev Yes Xus ib yam tus teev pej kum dab. Tiam sis, nej yuav tsum to taub tias tus neeg tso siab rau Koom Txoos Kav Tos Liv kev qhuab qhia, yog tso siab rau Yes Xus. Tus tso siab rau Yes Xus, nws yog Yes Xus lub cev thiab tes taw. Muaj coob leej cov neeg ntseeg Tswv Ntuj Kav Tos Liv ua tau tej yam dej num tib neeg ntiaj teb tsis muaj lub peev xwm ua tau : “Peb kev cia siab rau Tswv Ntuj, yog ntseeg Tswv Ntuj ruaj thiab khov tias Tswv Ntuj pab tau peb. Leej Pleev yog tus qhia kom peb muaj txoj kev cia siab ntawd, thaum nws hais li no : tas txhua yam nej teev ntuj nej thov, nej ntseeg tias nej tau txais, ces kawg yuav muaj tuaj rau nej, nkauj xwb Teresa” Vim cov neeg mloog Koom Txoos kev qhuab qhia Yes Xus lub Moo Zoo tau txiaj ntsim li tsoom leej ntshiab, peb thiaj ntseeg tias Koom Txoos kev qhuab qhia tsis yuam kev. Tsoom leej ntshiab yog peb cov tij cov viv muaj Tswv Ntuj hwj chim saum qaum ntuj thiab muaj txiaj ntsim pab tau tib neeg nyob ntiaj teb no. Txiv vaj qhia Zam Paj Lug 2, yog tus sawv Pob Zeb lub chaw tswj tsoom neeg ntseeg Kav Tos Liv thoob ntiaj teb. Zam Paj Lug 2 muaj Tswv Ntuj txiaj ntsim rau peb tsoom neeg ntseeg pom. Xyoo 1996, nws qhuab qhia li no rau tsoom tub ntxhais tshaj Yes Xus lub Moo Zoo : “Kev xaiv npuab cov neeg pluag, yog txoj kab hlub neeg raws li Leej Pleev siab nyiam. Leej Pleev cov tub ntxhais txib yuav tsum taug txoj kab ntawd thiab cov txav los ti Leej Pleev tus roj hnee yuav tau yoog nws tus cwj pwm, tus tsis kam lees yuav tsis tau. Tus zoo siab rau Leej Pleev txoj kev hlub, nws yuav pom Leej Pleev txoj kev hlub coj nws khaws lub neej pluag ua thiab yog nws tsis lees yuav tsis tag vim cov neeg pluag… Vita Consecrata 82 JP II 1996” Peb pom tias Tswv Ntuj yeej tshoj kom muaj tej tus neeg siab dawb siab ncaj ua teeb cig pom kev coj tsoom neeg ntseeg txheej dhau txheej. Xyoo 1813, Eugène de Mazenod, tus tsim lub koom haum Oblats de Marie Immaculée, qhia cov txom nyem, cov pluag hauv tsev teev ntuj La Madeleine, Aix-en-Provence, Fab Kis teb : “Leej Pleev Yes Xus cov kwv tij pluag, txom nyem, raug mob raug ntsaj, zuav ces, khub hlwv…kuv cov kwv tij, nej cov nyob hauv kev txom nyem, cov zoo nyiam, cov ntxim hlub, nej cuab ntsej mloog kuv lus. Nej yog Tswv Ntuj me nyuam, Leej Pleev cov kwv cov muam, cov yuav txais qaum ntuj ua lawv cuab tam. Leej ntshiab Pob Zeb tau hais tseg li no : haiv neeg ntshiab, noob vaj ntxwv, noob leej choj, nej yog me nyuam tswv ntuj…saint Eugène de Mazenod ” Peb Hmoob yog ib me nyuam haiv neeg txom nyem, neeg pluag, tiam sis, Tswv Ntuj pom peb tsis muaj teb muaj chaw, raug neeg thuam. Tswv Ntuj hlub peb, xav pub qaum ntuj rau peb yuav ua peb cuab tam. Tswv Ntuj thiaj li tshoj leej ntshiab Eugène de Mazenod los hlub cov neeg txom nyem neeg pluag. Nws thiaj xa nws cov tub txib Oblats tuaj tshaj Yes Xus lub Moo Zoo coj peb los teev hawm Huab Tais Tswv Ntuj, tus peb cov yawg koob yeej ntxov hwm yog lawv tsis txawj teev xwb : “27 Nws yuav xa cov tshab xo mus sau tag cov raug hom tseg puag plaub ceg kaum ntuj txij npoo ntiaj teb mus txog tim npoo ntuj MK 13,27” Peb yuav nco ntsoov Tswv Ntuj lub txiaj ntsim hlub peb.

Ib tsoom neeg ntseeg, tas tsoom leej ntshiab yog Huab Tais Yes Xus cov txiaj ntsim txhawb peb txoj kev cia siab rau Huab Tais Tswv Ntuj. Peb yuav nco ntsoov Tswv Ntuj lub txiaj ntsim hlub peb mus ib txhis. Tsoom kwv tij neej tsa phooj ywg tsis tau paub Tswv Ntuj, nej tso siab los nrog peb txaum yim ua Tswv Ntuj tsaug, kawg Tswv Ntuj xwb thiab yuav cawm tau peb.

15.11.2012 Cwj Vuam Chiv

Rau hnub tim 25 lub 11 hli 2012

Zeej tsoom neeg ntseeg thiab phooj ywg sawv daws,

Hnub no yog ib hnub loj, tas lub Koom Txoos Kav Tos Liv thoob ntiaj teb ua “Peb Caug” quas lub xyoo laus. Lwm lub lis piam tuaj yog lis piam qhib lub xyoo tshiab. Tiam sis, Koom Txoos lub “Peb Caug” txawv ntiaj teb cov haiv neeg tej paj tsiab peb caug. Koom Txoos tsis tua tsiaj txhu ua ib pluag noj, tsis nqaum pab nqaum nruag. Tiam sis, Koom Txoos lub “Peb Caug” yog ib “Thaj Txi Ntuj” qhuas Huab Tais Yes Xus ua tag lub sim ceeb tus Vaj Ntxwv. Vim li ntawd, peb zoo siab caw tag ib tsoom kwv tij neej tsa Hmoob qab ntug txog hauv ntuj nrog peb koom lub Thaj Txi Ntuj qhuas peb tus Huab Tais Yes Xus Pleev ua Vaj Ntxwv kav tag qaum ntuj thiab yaj ceeb no ti plaws yeeb ceeb.

Nej twb paub, ib txwm keeb Huab Tais Tswv Ntuj yeej ua Huab Tais nyob txawm. Hauv Tswv Ntuj tsuas yog kev hlub nkaus xwb : “8 ὁ θεὸς ἀγάπη ἐστίν Tswv Ntuj yog kev hlub 1 Z 4,8”. Peb twb tsis muaj ib lo zoo lus phim qhia Tswv Ntuj txoj kev hlub kom tshab rau peb : Leej Txiv hlub nws Leej Tub thiab Leej Tub hlub nws Leej Txiv thiaj li hu ua Leej Ntuj Plig. Huab Tais Leej Ntuj Plig yog Tswv Ntuj txoj kev hlub. Leej Ntuj Plig yog tus qhia kom peb sib hlub tib yam kev sib hlub hauv Tswv Ntuj. Tas cov neeg teev Tswv Ntuj sawv daws yog kwv yog tij, yog nkauj yog muam, yog tib tse neeg li Tswv Ntuj. Leej Tub nco Leej Txiv lub txiaj ntsim hlub Leej Tub. Vim li ntawd, Leej Tub kev hlub Leej Txiv yog nrog Leej Txiv cawm lub sim ceeb kom lub sim ceeb dim plaws nws kev ploj tuag thiab kev txhaum : “10 Kev hlub yog li no : tsis yog peb hlub Tswv Ntuj, yog nws hlub peb, nws thiaj xa nws Leej Tub tuaj ua txim dawb paug theej peb cov txhaum 1Z 4,10”. Vim muaj Leej Tub, Leej Txiv thiaj tsim lub sim ceeb, tsim muaj tib neeg. Tiam sis, dab xas tas ntxias tau tib neeg yuam kev, cam tawv tsis mloog Tswv Ntuj lus. Kev qaug xas tas ntxias ua rau peb muaj khib li xas tas khib rau Tswv Ntuj, ua rau peb lim hiam sib ntxub li xas tas lim hiam, rhuav lub sim ceeb puas tsuaj Tswv Ntuj tsim tau zoo nkauj rhib : “3 Tas puas tsav yam muaj tshwm vim nws, yog tsis muaj nws, ib yam dab tsi twb tsis muaj Z 1,3”. Tim kev txhaum ua lub sim ceeb lwj liam los Tswv Ntuj tsis nto, tsis hnyos peb neeg txhaum raug mob raug ntsaj, ploj thiab tuag. Peb yog nkawm niam txiv As Das thiab Es Vas xeeb ntxwv cam thawj li nkawd. Tsis kav, Tswv Ntuj xaiv tau His Xais Lais ua pov thawj teev Tswv Ntuj thiab tshoj saub qhuab qhia zeej tsoom His Xais Lais kom mloog Tswv Ntuj lus. Thaum txog caij nyoog, Tswv Ntuj yuav tuaj pauj peb kev raug txom nyem, kev ploj kev tuag : “Ua siab tawv, txhob txhawj, saib ov, nej tus Tswv Ntuj kev pauj, nws kev pab, Tswv Ntuj yuav tuaj cawm nej 5 Cov dig qhov muag yuav rua hlo, cov lag pob ntseg yuav qhib plho 6 Tus ceg pauv yuav dhia rhees li tus kauv, tus piav tes yuav qw tsheej suab EX 35,4-6” Tus yuav tuaj pauj peb kev iab kev daw, kev ploj tuag yog tus cawm lub qab ntuj neeg, yog lub sim ceeb tus Huab Tais Vaj Ntxwv, yog tus Vaj Ntxwv kav qaum ntuj, hauv qab ntuj no thiab puag yeeb ceeb. Nws yuav ua vaj kav mus ib txhiab ib txhis tsis txawj dua : “13 Kuv ua yog toog hmo ntuj pom dheev zoo li neeg leej tub nrog tej twv huab saum ntuj tuaj, lawv zam kev cia nws los ze ntawm ib tug laus neeg 14 Luag muab hwj huam, hwj chim thiab vaj ntxwv cob rau nws thiab tas txhia haiv neeg, txhia teb chaws, txhia xeem lus hawm nws, nws ua vaj kav ib txhis thiab nws kev kav yuav tsis txawj kawg DN 7,13-14” His Xais Lais hwm Mos Xes cai loj tag npaum li, muaj coob leej saub sawv los qhia His Xais Lais txheej dhau txheej tos tus cawm neeg yuav tuaj. Tiam sis, Yes Xus tuaj txog, His Xais Lais npaj tsis tiav. Yes Xus zam txhaum rau cov neeg muaj txhaum, His Xais Lais hais tias Yes Xus hla dhau Tswv Ntuj cai. Yes Xus txhais tes kho tau cov ruas zoo, ua tau cov dig pom kev, cov lag hnov lus thiab cov tuag tsim dheev sawv ciaj sia, tsis kav tsoom txwj laus liam Yes Xus rhuav Mos Xes cai. Lawv xav paub vim li cas Yes Xus lo lus muaj hwj huam thiab nws txhais tes muaj txiaj ntsim. Yes Xus qhia lawv tias Leej Txiv Tswv Ntuj yog Yes Xus Leej Txiv ces txhaum lawv lawm thiab. Yes Xus hais lo twg los tsis tau, ua dab tsi los txhaum tag.

Cov txwj laus His Xais Lais ntes tau Yes Xus, lawv xav tua Yes Xus los lawv nrhiav tsis tau ib lub txim tsim nyog tua Yes Xus. Lawv thiaj coj Yes Xus tuaj rau tus nom, Pis Las Tos txiav txim. Qhov tseeb qhov tiag tshwm plaws hauv Pis Las Tos lub rooj txiav txim :
-1 : Lub txim txhaum cov txwj laus liam Yes Xus, yog Yes Xus txhaum kev tsis hwm Mos Xes txoj cai thiab thuam Tswv Ntuj. Cov lim hiam ntxeev lus, tua neeg thiab ua neeg dag yog lawv, tsis yog Yes Xus. Yes Xus yog tus hwm Mos Xes txoj cai, cov txwj laus yog cov tsis hwm. Lawv lub ncauj hais tias ntseeg Tswv Ntuj, tiam sis, siab ntsws tsis npuab Tswv Ntuj. Lawv yog cov thuam Tswv Ntuj, tsis yog Yes Xus.
-2 : Pis Las Tos ua nom kav His Xais Lais teb. Yog nom txiav li cas, yog li ntawd hauv kev cai txiav txim : “37 Pis Las Tos teb nws tias : “Ua no, vaj ntxwv yog koj ?” Yes Xus teb tias : “Koj tus hais tias kuv yog vaj ntxwv, yog li ntawd kuv thiaj yug los thiab rau qhov ntawd kuv thiaj tuaj hauv qab ntuj no, xwv kuv ua tim khawv txog qhov tseeb tiag, leej twg tseeb tiag nws mloog kuv lub suab Z 18, 37” Tsab ntawv Moo Zoo ua tim khawv txog Pis Las Tos lo lus txiav tias Yes Xus yog cov Yus Das tus Vaj Ntxwv. Niaj hnub no kuj tib yam nkaus, tus yuav yeej los yuav swv plaub ntug yog lub rooj txiav txim.

Hnub no, tas lub Koom Txoos Kav Tos Liv ua Thaj Txi Ntuj quas niaj quas xyoo hawm Huab Tais Yes Xus Pleev ua Vaj Ntxwv. Peb caw cov neeg ntseeg sawv daws, nyias rov nug nyias tus kheej :
-Thaum nej tseem tsis tau paub Tswv Ntuj, nej txawm xav teev ntuj los nej tsis pom qab xyov yuav teev li cas.
-Txij nej txiav siab los ntseeg Tswv Ntuj, nej paub teev thiab paub hwm Tswv Ntuj. Ua li no, nej yeej tsis kub siab teev ntuj li thiab nej yeej tseem coj nej lub qub neej thiab lub qub siab li thaud, ntshai dab, ntseeg neeb, ntseeg tej nyuag poj saub yawm saub tsis muaj hwj huam tej lus dua Huab Tais Yes Xus tus muaj hwj huam lus nej ho tsis ntseeg. Tus neeg ntseeg coj li ntawd puas yog ib tug liam Yes Xus thuam ntuj li tus txwj laus His Xais Lais ?
-Yog tias cov los ntseeg Tswv Ntuj, los tag nrho siab ntsws thiab ntsuj plig, nej cog nej lub siab tus yees nruaj nreb, khov kho npuab Huab Tais Yes Xus yog lub sim ceeb tus Huab Tais Vaj Ntxwv muaj hwj huam. Nej yuav tsis pluag Huab Tais Yes Xus lub zog pov hwm nej. Txawm yuav muaj neeg hem, muaj tus ntxias nej npaum li cas, nej tus ntsuj duab ntsuj plig tsis txawj yuj tsis txawj poob. Tej vij sub vij sw txawm yuav hlob npaum li cas, yeej tsis cuag Huab Tais Yes Xus kev ua vaj kav tag nrho : “5 Yes Xus Pleev tus pov thawj tus tseem, tus xub yug hauv tsoom tub tuag los thiab ua ntiaj teb tsoom vaj ntxwv tus tub cag ; khwv saum tus hlub peb thiab vim nws cov ntshav tso peb dim plaws peb cov txhaum 6 Thiab yog nws tus ua peb ciaj vaj ntxwv QYTN 1,5.6” Yog peb tsis nrog Huab Tais Yes Xus ces peb yuav txhawj yuav txog siav. Tiam sis, yog peb lub siab npuab Huab Tais Yes Xus khov kho, peb yuav ciaj vaj ntxwv nrog Yes Xus kav tau tag xas tas thiab nws cov dab.

Ib tsoom phooj ywg, nej cov muaj kev iab kev daw, raug kev txhawj xeeb, nej los npaub peb tus Huab Tais Yes Xus thiab tso nej lub siab rau nws txhais xib teg. Kawg Huab Tais Yes Xus tib leeg thiaj yog tseem Vaj Nxwv, tsim nyog peb yuav teev hawm nws tag siab nrho.

22.11.2012 Cwj Vuam Chiv

Rau hnub tim 02 lub 12 hli 2012

Ib zeej tsoom neeg ntseeg thiab phooj ywg sawv daws,

Hnub no, Koom Txoos Kav Tos Liv thoob ntiaj teb qhib lub xyoo teev ntuj tshiab xyoo 3, yog hnub chiv 1 lub caij tos Huab Tais. Tas zeej tsoom neeg ntseeg Yes Xus, peb yuav npaj lub hmoov tsuj xeeb nco txog peb tus Huab Tais Yes Xus nqes los ciaj neeg. Vim li ntawd, peb thov caw nej txhua leej nrog peb mloog cov zaj nyeem no thiab khaws Huab Tais ob peb lo lus txhawb peb txoj kev ntseeg.

Txij lis piam no mus txog hnub tsuj xeeb, yog lub caij tos Huab Tais. Vim li cas thiaj hu ua lub caij tos Huab Tais ? Vim yog lub caij nyoog rau peb txhua tus neeg ntseeg npaj nyias lub siab thiab lub neej kom haum Huab Tais Tswv Ntuj siab nyiam. Leej Txiv siab nyiam yog xa nws Leej Tub Yes Xus tuaj cawm tag nrho ntiaj teb neeg. Peb tus neeg ntseeg Tswv Ntuj yuav zoo siab ua Leej Txiv Tswv Ntuj tsaug thiab tos txais nws Leej Tub tuaj cawm peb. Tiam sis, ntiaj teb neeg tsis teev Tswv Ntuj, tsis ntseeg Tswv Ntuj tas txhua leej, vim kev cam thawj, kev txhaum ua peb yuam kev. Peb xub ntseeg dab qhuas, teev dab niam dab txiv ua ntej teev hawm Tswv Ntuj. Tej txhia mus ntseeg lwm yam kev teev hawm, tej txhia tsuas ntseeg tib neeg, ntseeg lawv kus kheej xwb, tej txhia kuj twb tsis ntseeg tus tsav dab tsi li thiab, nyias sib txawv nyias. Hauv cov neeg ntseeg Tswv Ntuj, muaj tej txhia twb ntseeg tau ntev los, muaj tej txhia yog cov los ntseeg tshiab, hos tej txhia tseem pib hauv paus kev ntseeg. Peb pom tias zeej tsoom neeg ntseeg Tswv Ntuj sib txawv ntau, ib tug tsis zoo xws tug : muaj cov nquag thiab kub siab, kuj muaj cov tub nkeeg ; muaj cov ntseeg ruaj ntseeg khov, kuj muaj cov ntseeg duj de zuav zaws hle ntsuav ; muaj cov thoob tsib ntse cuag hau koob, kuj muaj cov npub cuag dauj cog.
Peb yuav xyuam xim txog tej teeb meem tshwm tuaj hauv peb lub Koom Txoos. Muaj tej txhia neeg twb ntseeg Tswv Ntuj ntev los lawm tsis kav, yeej tsis muaj kev ntseeg Tswv Ntuj li. Cov neeg no tej siab ntsws yeej tsis pom Tswv Ntuj lub hwj huam ib qho. Lawv lub ncauj hais tias ntseeg, sim neej ko taw yeej tsis tshwm tsev teev ntuj ib taws. Tseem muaj tej txhia muaj plhus twv lub ntuj hais tias tsis tas yuav teev Yes Xus, lawv no txawj txhab ntawv rau tib neeg. Xyov ua cas yuav tsis txawj ntshai tub qaug lub ntuj npaum li ntawd.
Cov los ntseeg tshiab, muaj tej txhia kuj ho ua neeg thoob tsib xyuam xim tshaj cov xub ntseeg. Tiam sis, tas zeej tsoom neeg ntseeg qub thiab tshiab thoob ntiaj teb, sawv daws yuav tsum nquag teev Tswv Ntuj, nrhiav caij nyoog fim Tswv Ntuj. Yog vim qhov ntawd, lub Koom Txoos Kav Tos Liv caw sawv daws sib puag npoo hauv lub caij tos Huab Tais ua lub ntsa tsev ruaj, ua tus ncej tse khov nrog Koom Txoos tiv nag xob nag cua ntsawj : “1 Dua li ntawd, peb hais rau nej thiab thov caw nej hauv peb tus Huab Tais Yes Xus, nej twb tau kawm ntawm peb yuav taug txoj kev twg thiaj ntxim Tswv Ntuj, xwv nej taug txoj kev ntawd nej thiaj yuav txawj dua ntawd 2 Vim nej twb paub Huab Tais Yes Xus tej lus peb tau hais kom nej ua 1TXLN 4,1-2” Yog peb tsis mloog Paj Lug cov lus qhia thiab tsis ua raws peb lub Koom Txoos kev coj, peb tsis muaj lwm txoj kev ua tau xis Yes Xus siab nyiam. Cov zaj nyeem hnub no tseem ceeb tas nrho rau peb txhua tus neeg ntseeg Tswv Ntuj.

Sawv daws to taub tias peb lub neej ua neeg ntseeg Tswv Ntuj thiab teev Tswv Ntuj yog ib lub neej tshiab. Peb yuav tsum nrauj txoj qub kev cai, lub qub siab, zaj tswv yim qub, peb thiaj nkag tau rau lub neej tshiab. Kev tig los ua neeg mloog Tswv Ntuj lus, teev Tswv Ntuj, yog txoj kev taug mus txais lub neej tshiab. Lub neej ua neeg ntseeg Tswv Ntuj no tsis yooj yim. Yog peb nyob nyias vaj nyias tsev puag tes taw twj ywm, peb yuav ua cas txawj ua neeg ntseeg Tswv Ntuj ? Yuav kom peb txawj ua neeg ntseeg Tswv Ntuj raws kev raws cai, peb yuav tsum loj npab nqes tes kawm, peb thiaj yuav txawj ua li Tswv Ntuj nyiam. Kev nrauj peb lub qub siab, nrauj zaj tswv yim qub thiab lub neej qub, tsis nrauj tau yooj yim kiag. Vim peb lub siab, lub tswv yim thiab lub neej tsis yog pluaj ntaub pluaj xo, txiav ib txiab yuav cais tau pluaj zoo thiab pluaj khaub hlab pov tseg. Kev hloov siab tshiab yog hloov peb lub siab ntseeg dab pov tseg los yuav lub siab ntseeg Tswv Ntuj, nrauj zaj tswv yim lim hiam nkhaus los ua neeg ncaj. Ib tug neeg xeeb txawm siab nkhaus, yuav kom tag kis nws cia li ncaj tsis tau. Yuav tsum siv caij siv nyoog thiaj yuav tau : “36 Nej yuav xyuam xim, teev ntuj txhua sij hawm, nej thiaj muaj zog maim dhau thaum tej ntawd tshwm sim tuaj thiab sawv ntsug tsheej ntawm neeg Leej Tub xub ntiag LK 21,36” Tsis tas li ntawd, yog peb tsis vam Huab Tais Yes Xus pab peb, tsis vam cov leej ntshiab tej koob hmoov, tsis vam cov neeg ncaj ncees tej lus qhuab qhia, peb yuav ua tsis tau tus neeg zoo nyiam raws li Paj Lug thiab raws li Yes Xus kev qhuab qhia. Peb cov neeg lam los ntseeg Tswv Ntuj, siab ntsws thiab tswv yid tseem nyob li qub npuab rawv qub kev cai, ntseeg dab, ntseeg neeb peb yuav tsis tau Huab Tais Yes Xus tej koob hmoov cawm peb.

Ib tsoom phooj ywg sawv daws, lub caij tos Huab Tais lub ntsiab lus yog kom peb muaj kev cia siab rau peb tus Huab Tais Yes Xus yuav tuaj cawm peb. Txawm yuav muaj xwv txheej, muaj mob muaj nkeeg, kev iab kev daw tuaj raug peb los tsis txhob txhawj, ua siab loj. Peb txoj kev teev Yes Xus, peb lub siab ntseeg Yes Xus yuav pub tau ib lub neej tshiab nyab xeeb thiab thaj yeeb lug li saum qaum ntuj rau peb.

29.11.2012 Cwj Vuam Chiv

Rau hnub tim 09 lub 12 hli 2012


Ib zeej tsoom neeg ntseeg thiab phooj ywg sawv daws,


Hnub no yog lis piam hnub chiv ob, lub caij tos peb tus Huab Tais Yes Xus tuaj hlub peb neeg txom nyem hauv qab ntuj no. Thov kom peb tus Huab Tais pub nws txoj kev thaj yeeb rau txhua leej txhua tus lub cev thiab ntsuj plig raug kev txhawj xeeb. Cov zaj nyeem peb hnov hnub no caw peb los khaub zig peb tus Huab Tais Yes Xus nws thiaj yog tus cawm tau peb.

Lub caij tos Huab Tais yog ib lub zoo sij hawm rau peb tus neeg ntseeg pib dua lub neej tshiab, ua tus neeg ntseeg tshiab, mloog lus thiab txawj hlub neeg dua yav tag los. Peb yuav thov Tswv Ntuj pab peb txoj kev pluag, pluag kev hlub neeg thiab pluag kev npuab Tswv Ntuj. Yuav kom peb txais Huab Tais tej koob hmoov, peb yuav tsum txhob ua tus neeg ntseeg qig lus luaj thuam. Ib tug neeg luaj thuam yog ib tug neeg zoo li cas ? Tus neeg luaj thuam yog ib tug neeg pluag tsis txuag nyiaj txiag, tsis nco txiaj ntsim, tsis txawj xav. Hmoob thiaj pheej hais tias : “Neeg luaj thuam yog neeg xyob txhiaj.” Lub caij tos Huab Tais qhia rau peb tus neeg ntseeg tsis txhob ua tus neeg ntseeg luaj thuam Huab Tais Tswv Ntuj kev hlub peb. Vim li cas ? Vim peb yuav tsum txawj xam pom Tswv Ntuj kev hlub peb ua leej tib neeg nyob. Peb tej vaj tse, tej liaj teb, tej dej num, kev noj kev haus, yus lub cuab lub yig, yus tej tub ki, kev noj qab nyob zoo…tas txhua yam yog Tswv Ntuj pub rau peb. Tus tshaib plab thiab tus noj seem noj so, tus neeg mob nkeeg thiab tus zoo neej Tswv Ntuj yeej hlub tib yam nkaus. Vim li ntawd, yus yuav txawj ua Tswv Ntuj tsaug thiab hlub neeg li Tswv Ntuj hlub yus : “1 Yes Lus Xas Les, hle koj daim tsoos chim siab thiab txom nyem cia, hnav Tswv Ntuj daim tsoos hwj chim mus ib txhis 2 Muab Tswv Ntuj lub tsho loj ncaj ncees rau koj hnav, ntoo Huab Tais hauv phuam hwj chim saum koj taub hau 3 Tswv Ntuj yuav muab koj lub meej mom ua nto moo lug hauv qab ntuj NL 5,2-3” Tab peb txawm txom nyem loj npaum twg, tsis cuag Tswv Ntuj kev txom nyem hlub peb ntiaj teb neeg. Tus neeg txom nyem yuav nco ntsoov, Tswv Ntuj raug txom nyem tshaj nws. Tus nplua nuj yuav nco ntsoov, Tswv Ntuj nplua nuj tshaj nws. Tsis phim peb tus neeg ntseeg twb tsis txawj hais ib los ua Tswv Ntuj tsaug, tsis nco tej txiaj ntsim Tswv Ntuj tau pab peb. Tsis tsim nyog rau peb tus neeg ntseeg hais tej lus no : “Mus teev ntuj nkim caij nkim nyoog, sem yus dab ntub pw tsis los siav, ua rau yus koom tsis tau kwv tij neej tsa pluas noj pluas haus…” Puas phim Tswv Ntuj meem txom rau peb tus neeg ntseeg luaj thuam ? Tiam sis, Tswv Ntuj ua hnub tshav li qub thiab ua nag xwm yeem mus li ywg yus tej liaj teb twj ywm.

Yog peb tsa muag ntsia lub ntuj, peb yuav pom tias peb tsis muaj dab tsi pauj tau Tswv Ntuj lub txiaj ntsim. Vim li ntawd, yog peb tseem tsis ua peb txoj num teev Tswv Ntuj, peb puas zoo yuav lawm ? Peb yuav khawv khuav tsis sav ib lub sij hawm mus pe mus thov Tswv Ntuj saib peb puas muaj txoj hmoo txais Tswv Ntuj tej txiaj ntsim, tsis yog ua kom peb ntsej muag loj, hos yog ua kom Tswv Ntuj nto koob meej. Peb tus neeg ntseeg Tswv Ntuj tiam neej no los yav thaud, los tus leej ntshiab twg, sawv daws ntseeg tib tug Huab Tais Yes Xus raws li cov thwj tim Pob Zeb thiab Paj Lug kev qhuab qhia. Cov neeg muaj Huab Tais Yes Xus txiaj ntsim yog cov mloog Yes Xus lus li cov leej ntshiab thiab cov thwj tim. Yog peb tus neeg ntseeg mloog cov leej ntshiab thiab cov thwj tim lus, peb txoj kev teev hawm thiaj muaj Huab Tais Yes Xus txiaj tsim li lawv. Tus leej ntshiab tau txiaj ntsim tsis ua rau tus leej ntshiab muaj plhus, tiam sis tus leej ntshiab zoo siab vim Tswv Ntuj nto koob meej : “Kuv thov ntuj kom xwv nej kev hlub muaj zog tuaj hauv kev thoob tsib thiab txawj xav 10 Nej thiaj pom tau qhov muaj nqes ua cov neeg huv si tsis muaj qhov xyeej txog Leej Pleev hnub 11 Muaj kev ncaj ncees puv npo ua rau Leej Pleev qhuas thiab ua rau Tswv Ntuj nto koob meej FLP 1,9-11” Yog peb tus neeg ntseeg Tswv Ntuj txawj xav, peb yuav pom tias peb tsis muaj peev xwm dab tsi. Peb lub siab me me, nqaim nqaim, tsis muaj zog hlub neeg, tsis muaj peev xwm zam tus neeg ua tub qaug peb, tsis muaj cuab kav hlub peb tus yeeb ncuab. Peb lub tswv yim lam khav dag, lim hiam thiab nkhaus heev. Yog tias peb tseem ib nyuag txawj ntse, ib nyuag tau nom ua los ib nyuag nplua nuj dua, ces peb yeej saib tsis tshua taus cov pluag thiab cov ruam li lawm. Peb tib neeg txoj kev khav theeb, kev muab hlob, kev lim hiam, kev plees kev yis…yeej xeeb tau puag nruab thiab los. Vim li ntawd, Hmoob thiaj piv txoj lug tias : “Yug tau cev yug tsis tau siab.” Cov ua niam ua txiv, nej cov me nyuam nej yug tau qee leej qig lus tsis yoog nej siab hlo, nej twb paub li ntawd. Peb tib neeg kev khav theeb, muab hlob, lim hiam, neeg plhom neeg plees zoo tam zoj lub toj roob hauv pes xeeb tau txawm com kawb, ua tsag kwj ha tob kwj ha tais : “Nej npaj Huab Tais txoj kev, nej ua kom nws txoj kev tiaj tus 5 Yuav meem txhua lub kwj ha, yuav tshav kom txhua lub tsua txhua lub roob kom qis ; qhov com kawb yuav kho kom ncaj, tej kev qawj yuav meem kom tiaj tus 6 Tas txhua lub cev ntaj ntsug yuav pom Tswv Ntuj kev cawm neeg LK 3,4-6” Tus neeg teev Yes Xus muaj Yes Xus txiaj ntsim yog tus nws ncaws nws lub siab khav theeb ploj thiab tu taw mus ; yog tus txo nws txoj kev muab hlob los ua tus me ntxawg me aiv ; yog tus zam txoj kev lim hiam tam zoj txiav tej roob com kawb kom qis, kho txoj kev nkhaus kom ncaj ncees ; yog tus cheem nws lub siab plhom siab plees li meem kev qawj, kev to qhov, tej kwj ha kom tiaj tus zoo mus los tsis ntshaus hlaub ntshaus ceg. Peb yuav vam cov leej ntshiab tej lus koob lus hmoov qhia peb li Zam cov lus qhia tsoom His Xais Lais.

Ib tsoom phooj ywg txhua leej, yog peb tus neeg ntseeg tsis tshaib tsis nqhis Tswv Ntuj lub txiaj ntsim hlub neeg ces peb zoo li tus neeg luaj thuam tsis nco Huab Tais Yes Xus kev yug los ciaj neeg muaj nuj nqes. Vim li ntawd, txij no mus, peb yuav tsum siv zog npaj Huab Tais txoj kev kom tiaj tus, nqes tes hlub neeg thiab hwm Tswv Ntuj tag siab nrho.

04.12.2012 Cwj Vuam Chiv

NTHUAV NTAWV NTSHIAB.

Rau hnub chiv tim 23 lub 12 hlis 2012


Ib zeej tsoom neeg ntseeg thiab tsoom phooj ywg,

Hnub no yog lis piam 4 hauv lub caij tos Huab Tais, yog ib lub zoo sij hawm rau peb txhua leej tig los txais peb tus Huab Tais Tswv Ntuj yug los ciaj neeg kom hlub tau cawm tag lub qab ntuj neeg.

Tos peb ciaj ua neeg, vim peb muaj niam muaj txi yug, muaj niam muaj txi hlub, tsa cuab tsa yim rau peb, peb thiaj li ciaj neeg. Yus yuav tsis nrauj yus niam yus txiv lub txiaj lub ntsig, yuav nco ntsoov yus tej poj yawm txwv txoob tej koob hmoov, vim muaj lawv thiaj muaj yus niam yus txiv. Tej laus thiaj qhia tej me nyuam kom hlub niam hlub txiv, kom hwm poj yawm txwv txoob. Hmoob thiaj li muaj pe tsiab. Hauv kev cai pe tsiab, tej xeeb leej xeeb ntxwv thiab tub ki ua npoj ntws tuaj pe lawv tus pog koob yawg koob thov koob hmoov. Vim lawv pog koob yawg koob muaj hmoo tau daim ntawv nyob ua neej laus qas nkoos, muaj tub ki vam ntws xws xub ntab, xeeb ntxwv nroo ntws xws xub mu. Vim li ntawd, kev hlub niam hlub txiv, kev hwm poj yawm txwv txoob tsis khib tsis txhaum Tswv Ntuj, tseem yim ua ntxim Tswv Ntuj siab xwb. Hmoob tej laus txawm tsis teev ntuj los lawv kev hlub niam hlub txiv twb dhos daws Tswv Ntuj lo lus qhia : “Koj yuav hwm koj niam koj txiv.” Hmoob tseem paub hwm lub ntuj ua tus loj, lo lus kawg mus cob thiab mus xaus rau lub ntuj xwb. Hmoob kev pauj lub “yeem ntuj” twb yog tua tsiaj txhu ua lub ntuj tsaug raws kev cai hmoob. Txawm Hmoob tsis paub Tswv Ntuj npe, twb yog Tswv Ntuj cev tes npo pab cawm tau Hmoob.


Ziag no, Tswv Ntuj tshoj peb los teev hawm Tswv Ntuj, peb yuav nco ntsoov hlub peb niam peb txiv, hlub peb tej pog koob yawg koob thiab hlub Tswv Ntuj vim Tswv Ntuj yog ntiaj teb neeg Leej Niam Leej Txi : “Koj yuav hlub Huab Tais, koj tus Tswv Ntuj, tas koj siab ntsws, tas koj ntsuj plig, tas koj lub zog, tas koj lub tswv yim thiab hlub tus nyob ze koj ib yam li koj tus kheej LK 10,27” Yog peb mloog peb niam peb txiv lus ces peb ua neeg tsim txiaj. Tos peb tsim txiaj vim peb hlub peb niam peb txiv, nco peb niam peb txiv tej txiaj ntsim. Kev nco niam txiv txiaj ntsig yog koob hmoov. Peb sim xav saib, tej laus Hmoob kev hlub niam hlub txiv thiab hlub tej poj yawm, pub lawv tau koob hmoov. Txawm lawv hu txog niam txiv poj yawm lub koob lub npe tsis duav pab tsis tau lawv los Tswv Ntuj zoo siab hlo cawm lawv. Peb twb los teev hawm Tswv Ntuj, peb yuav tsum paub, txoj kev teev hawm Tswv Ntuj tau koob hmoov loj npaum li cas npaug rau peb. Tiam sis, tsis yog ua li qub thiab hais zaj qub.
Hmoob hais kam tias peb los ua neeg, peb nyias nqa nyias daim ntaub ntawv los ua neej. Tos tib neeg tso ntiaj teb tseg yog vim nws daim ntaub ntawv ua neej tag lawm. Hmoob tej lus tsuas yam kob dej kob tshuaj kho peb kev tu siab. Tiam sis, peb to taub tej laus cov lus qhia thiab Tswv Ntuj cov lus qhia sib txawv ntau. Tej laus cov lus muaj kuab ua tau peb siab kaj, daws peb kev chawj kev chim kom ploj mus, hos Tswv Ntuj cov lus muaj peev xwm pab thiab cawm tau neeg. Vim Tswv Ntuj lus muaj hwj huam hos peb niam peb txiv zaj lus mos lus muag nqee peb kev tu siab thiab teev peb lub kua muag. Huab Tais Yes Xus yug los ua neeg, tsis nqa ntaub ntawv los ua neej li Hmoob hais kam. Huab Tais Yes Xus yug los ua neeg li tej lus muaj tseg sau rau hauv ntaub hauv ntawv thaum ntej thaum ntxov. Peb mloog saub Mis Kas Es cov lus sau tseg li no txog tus yuav yug los cawm tag lub qab ntuj neeg : “1 Npes Les Hes Es Fas Tas, tus me tshaj hauv Yus Das cov xeem, kuv yuav ua kom tus tswj His Xais Lais tawm hauv koj los MKE 3,1” Npes Les Hes, lus Hes Nplaws (לחם בית) txhais tias : “Tsev Mov.” Npes Les Hes yog ib lub me nyuam zos nyob ze lub tuam ceeb Yes Lus Xas Les, hauv xeem Yus Das nrim teb. Yus Das yog Yas Kos ib tug hauv nws 12 leeg tub. Tom qab no thiaj muaj 12 lub xeem His Xais Lais. Yawg koob Yas Kos tau foom koob hmoov rau nws tus tub Yus Das tias nws cov kwv tij yuav tsa ncauj qhuas nws, lawv yuav tuaj pe tuaj hawm nws thiab nws txhais tes yuav nyob saum nws cov yeeb ncuab caj qwb, kav lawv hauv nws xib teg (HP 49,8 ). Vim li ntawd, peb yuav to taub tias Yas Kos cov lus foom koob hmoov rau Yus Das yog Tswv Ntuj lus foom koob hmoov rau Tswv Ntuj Leej Tub. Yes Xus Tswv Ntuj Leej Tub yug nyob lub zos Npes Les Hes, zos “Tsev Mov.” Yes Xus yog mov ciaj sia cawm tag lub qab ntuj neeg ; Yes Xus ua Vaj Ntxwv kav qaum ntuj, ntiaj teb thiab Tswv Ntuj tus yeeb ncuab Xas Tas mus ib txhiab ib txhis. Peb kev mloog Yes Xus lus yog lub txim peb muaj muab tau ntxim Leej Txiv Tswv Ntuj siab dua tej : “Kuv tuaj ua kom tau li koj siab nyiam” Nws yog tus rhuav thawj tus txhooj kom tsa dua tus ob sawv 10 Hauv tus ob no ua tau peb ntshiab huv li nws nyiam vim Yes Xus Pleev lub cev ua txim ib zaug kav ib txhis HN 10,9-10” Peb los teev hawm Tswv Ntuj nrog lub Koom Txoos nyob thoob ntiaj teb, peb yuav xyiv fab rau lub Thaj Txi Ntuj. Niaj hnub peb mus koom Thaj Txi Ntuj, yog peb koom nrog Yes Xus muab nws lub cev thiab roj ntsha los txi rau Leej Txiv. Vim li ntawd, Thaj Txi Ntuj (la messe) yog lub txim loj tshaj plaws ntxim Leej Txiv Tswv Ntuj siab tshaj dua tej. Mab Liab thiab Es Lis Xas Npes nkawd yog ob tug ntseeg Tswv Ntuj thiab mloog Tswv Ntuj lus zoo tshaj tej. Tswv Ntuj ua rau nkawd pom xyeem Tswv Ntuj txoj kev cawm neeg : “45 Hmoov zoo tus ntseeg yam Huab Tais hais rau nws yeej kawg tsheej xeeb LK 1,45” Peb txoj kev teev hawm Tswv Ntuj tsis yog ib txoj kab lis kev cai li lwm tej kev cai teev hawm, tus paub thiaj tau koob hmoov, tus tsis paub tsis tau. Vim kev teev hawm Tswv Ntuj loj tshaj txoj kev cai : nws yog koob hmoov thiab txiaj ntsim. Vim li ntawd, tus neeg ncaj ncees hwm Tswv Ntuj, txawm paub thiab txawm tsis paub Tswv Ntuj los puav leej muaj Tswv Ntuj koob hmoov.

Ib tsoom phooj ywg, hauv lub caij tos Huab Tais no, peb yuav tig mus ntsia Mab Liab thiab Es Lis Xas Npes nkawd ob viv ncaus ua piv txwv qhia peb tos Tswv Ntuj kev cawm lub qab ntuj neeg. Peb pom nkawd kev mloog Tswv Ntuj lus thiab npuab Tswv Ntuj tau koob tau hmoov. Tswv Ntuj pub nkawd ib leeg ib lub txiaj ntsim loj tshaj yam nkawd tos rau nkawd pom. Peb txoj kev teev hawm Tswv Ntuj kuj yuav pub tau ib lub txiaj ntsim rau peb txhua leej, kom peb txhob poob siab.

19.12.2012 Cwj Vuam Chiv

Rau hnub chiv tim 30 lub 12 hlis 2012


Ib zeej tsoom neeg ntseeg, tsoom niam txiv thiab phooj ywg txhua leej,

Hnub no, tag lub Koom Txoos Kav Tos Liv thoob ntiaj teb sawv daws hwm Mab Liab thiab Yos Xes nkawd lub cuab lub yig nrog Tswv Ntuj Leej Tub Yes Xus yug los hauv nkawd. Peb hais tias lub cuab lub yig “Neeg Ntshiab” lub hmoov.

Lub cuab “Yim Neeg Ntshiab” lub hmoov no muaj txiaj ntsim rau tag ntiaj teb tej txij nkawm thiab rau tag nrho lub sim ceeb. Vim li ntawd, yog nej cov ua niam ua txiv, ua txij ua nkawm lub hmoov. Tos lub sim ceeb huam vam ciaj taus sia, tos tej noob qoob noob loo, tej tsiaj txhu thiab tib neeg ciaj taus noob los yeeb vim muaj poj niam thiab muaj txiv neej, muaj maum thiab muaj txiv. Peb twb paub qas ntsoov, thaum Tswv Ntuj tsim tau nraug Oo As Das tsis tau muaj nkauj Iab Es Vas txawm tau los nyob, As Das twb ceeb laj ua neej ib hnub txog tsaus ntuj. Hnub Es Vas tshwm sim ua neej Es Vas xwb thiaj daws tau As Das kev kho siab, pom qab ua neej nyob. Vim li ntawd, txawm tus txiv neej los tus poj niam nyob ib leeg yuav tsis ciaj taus ua neeg.

Hnub no, peb ntsoom neeg ntseeg Kav Tos Liv ua lub hmoov hwm “Cuab yim neeg ntshiab”. Peb noob neej ntiaj teb yuav tau tig los thov Mab Liab thiab Yos Xes nkawd tej koob hmoov txhawb peb lub cuab lub yig kom peb txawj sib hlub, sib nres, sib haum xeeb li yim neeg ntshiab. Peb yuav tau qhib ntsej mloog Mab Liab thiab Yos Xes nkawd lub neej. Nkawd nyias yeej npaj nyias lub siab sib qaws los ua txij ua nkawm tam ntua ib tsoom tub ntxhais sawv daws. Tiam sis, muaj tej yam hauv nkawd lub neej ntxim Tswv Ntuj siab. Nkawd yog neeg hwm niam hwm txiv, hwm poj yawm txwv txoob. Nkawd ntseeg lawv cov saub tej lus qhia txog Tswv Ntuj Leej Cawm Seej yuav yug los cawm tag lub qab ntuj neeg kev txhoj kev txhaum, kev ploj kev tuag, coj kom tag lub qab ntuj neeg mus lawm qaum ntuj. Mab Liab thiab Yos Xes yeej tos ntsoov Tswv Ntuj lo lus hauv nkawd nruab siab nruab ntsws thiab hauv nkawd kev npaj sib qaws ua neej. Ua ciav, ib sij huam, Tswv Ntuj tus tshab xo cuam tshuam nkawd lub hom phiaj. Tswv Ntuj tus tub xo caw Mab Liab txais Tswv Ntuj txoj dej num thiab caw Yos Xes kom txhawb txhim Mab Liab leg Tswv Ntuj tes num.

Peb sim muab xav kom zoo, yeej tsis yooj yim rau nkawd. Tiam sis, peb pom nkawd siab loj, nkawd txawj hlub Tswv Ntuj tshaj peb lub siab xav tau ; txawm tsis yooj yim los Mab Liab zoo siab hlo ua Tswv Ntuj ib tug ntxhais txib, tsuav yug tau tus Siab Tshaj Leej Tub. Hos rau Yos Xes los tib yam nkaus, tim li cas nws tus hluas nkauj Mab Liab cev ho xeeb tub ? Puas yooj yim ntseeg Mab Liab lus thiab rov los hlub Mab Liab ? Puas yooj yim rau Yos Xes nrog Mab Liab tu ib tug me nyuam tsis yog nkawd roj nkawv ntshav ?

Mab Liab thiab Yos Xes nkawd kev mloog Tswv Ntuj lus hloov nkawd lub hom phiaj sib qaws ua neej nkawd tau sib tham ua ntej. Nkawd pom Tswv Ntuj lus xeeb nyob hauv nkawd lub neej. Tswv Ntuj pom nkawd yog ob niam txiv ncaj ncees siab loj siab dav, siab ntev, nquag, mloog lus yuav hlub thiab tu taus Tswv Ntuj Leej Tub kom loj hlob. Tsis tas li ntawd, nkawd tseem yuav sib hlub mus kom kawg, kom nto ntsis. Yog tias Mab Liab tsis hlub Yos Xes, Mab Liab yuav muab Yos Xes tso pov tseg, tsis yuav Yos Xes ua taub hau txiv. Hos yog Yos Xes tsis hlub Mab Liab, Yos Xes yuav cem Mab Liab phem thiab nrauj pov tseg. Tiam sis, Mab Liab thiab Yos Xes nkawd yog neeg ncaj ncees, siab loj siab dav, nkawd tsis yug tub ki rau nkawd yuav. Nkawd zoo siab faib tau nkawd lub neej tos txais Tswv Ntuj. Nkawd paub tias Tswv Ntuj pluag tshaj thiab txom nyem tshaj nkawd. Tswv Ntuj tsis pom qab yug los ua neeg. Tswv Ntuj ntshaw peb txoj kev hlub Tswv Ntuj, cev tes plhws Tswv Ntuj kev tshaib kev nqhis. Nkawd hlub thiab txhawj xeeb Yes Xus npaum li ntawd. Mab Liab thiab Yos Xes thiab Yes Xus lawv niaj xyoo tuaj teev ntuj nyob Yes Xus Xas Les hauv lub tuam Tsev Teev Ntuj. Thaum lawv twb rov qab mus txog ib tog kev nrhiav tsis pom Yes Xus. Nkawd thiaj los nrhiav tau Yes Xus nrog cov kws txuj thiab cov thawj leej choj sib tham hauv tuam Tsev Teev Ntuj : “Me tub, tim li cas koj ua li ntawd rau wb ? Saib ! Koj txiv thiab kuv, wb txhawj koj npaum li.” 49 Tiam sis nws hais nkawd tias : “Vim li cas neb ho nrhiav kuv ? Neb tsis paub tias qhov twg kuv txiv teej tug, kuv yuav tsum nyob ntawd lod ? LK 2,48-49” Mab Liab thiab Yos Xes nkawd yeej tsis xub paub Yes Xus lub neej tom ntej li. Mab Liab nco ntsoov tej lus Yes Xus hais rau nkawd hauv nws siab.

Peb yuav tau coj lub neej ua neeg ntseeg Tswv Ntuj thiab peb lub neej ua txij nkawm yam li Mab Liab thiab Yos Xes thiab Yes Xus “Yim Neeg Ntshiab” no lub neej. Mab Liab yog peb leej niam siab zoo txawj ua haum Tswv Ntuj siab nyiam. Yos Yes yog ib leej txiv nrog Mab Liab hlub thiab tu Yes Xus. Vim li ntawd, peb pom “Yim Neeg Ntshiab” lub neej kuj tsis yog ib zaj npau suav. Mab Liab thiab Yos Xes thiab Yes Xus lawv ua tau lub neej ntxim Tswv Ntuj siab, lawv nquag teev ntuj, txawj sib hlub, sib zam thiab sib yoog. Peb twb tsis yog neeg ntshiab huv, peb yim huab yuav vam txog “Yim Neeg Ntshiab” tej txiaj ntsim pab peb, tsis txhob ua li tej txhia neeg tsis paub cai cav muaj ntsej muag thuam “Yim Neeg Ntshiab” no.

Tseem muaj ntau txoj kev hauv peb lub neej, peb yuav ceev faj tsis txhob yuam kev coj li tej tib neeg tsis txawj sib hlub, tsis xav sib zam. Nyias khav khav nyias, ib tug tsis vam txog ib tug, koj ua koj lub neej fee das nyob ib cag, kuv ua kuv neej fee de rau ib sab teb. Peb sim rua muag ntsia tiam neeg no cov cuab yig tawg tas ntau lub cuab yig niam mus niam lwj liam, txiv mus txiv lwj dhi, me tub me nyuam tsis pom qab ua neej nyob txom nyem ntsuav tam ntua tub ntsoj ntxhais ntsuag tos leej niam txhais tes hlub leej txi txhais tes puag. Tseem muaj tej yam xwm txaus txhawj ua npog dub thiab ua npog daj txiv neej rov qaws txiv neej ua ib cuab, poj niam qaws poj niam ua ib yig ; xyov lub neej yuav mus xaus qhov twg.

Ib zeej tsoom phooj ywg sawv daws, tab tib neeg txawm yuav paub txuj paub ci loj npaum twg, nplua nuj loj npaum li cas, tib neeg kawg yuav npuab Huab Tais Tswv Ntuj thiaj tsis liam txwv. Peb kev npuab Tswv Ntuj yog nrauj peb lub siab ua neeg cam thawj thiab cav ncauj, sib hlub sib zam, mloog peb lub Koom Txoos Kav Tos Liv lus qhuab qhia. Mab Liab thiab Yos Xes thiab Yes Xus lawv “Yim Neeg Ntshiab” lub neej muaj txiaj ntsim. Peb yuav vam txog lawv lub txiaj ntsim txhawb peb lub neej thiab kev ntseeg Tswv Ntuj.

26.12.2012 Cwj Vuam Chiv [/color]