XH. Yaj Zoov Ntxheb lub Tsev THOOB TSIB

Lo lus tseeb tsis pom xyeem no, nco tias twb sau ntau zaus lawm, yog ib co qub lus.  Uas neeg nyiam thiab siv los tau ntev lawm.
Nyob hauv lub qab ntuj khwb no, muaj ntau leej neeg thoob tsib, hais los lawm thiab:
Cov kws txuj, cov pog cov yawg ua neeg thoob tsib, los cov ua yaj saub.  Thiab tej tus Xib Hwb kawm txuj siab, cov Hauj Sam, tsis hais cov neeg muaj kev ntseeg los tsis muaj.  Yog cov uas muaj Ntuj txiaj ntsim me ntsis thiab siab zoo.
Yeej muaj leej puav hais dua los lawm. Yog ib co lus pab neeg tso siab rau txoj hmoo, kom muaj yeej txhua yam tsis zoo, thiab pov hwm lub vaj tse rau cov neeg kom tau ib lub neej zoo ua.
Yam li txhawb neeg txoj hmoo, los pov hwm neeg kom noj qab nyob zoo.  Ua neeg muaj hmoo, muaj nyiaj muaj kub, los yeej mob nkeeg. Txhawb kab looj mem txhua yam kom zoo raws li lub siab xav.
Cov tau hais dua los lawd, mas txhua tus lawv hais tias:
Koj yuav tsum muaj ib yam khoom uas koj ceev tseg ua puav pheej los pab koj!
Zoo li yog tooj los hlau, Los Tsuas hu ua Phab Lev Lai,los yog pob zeb, yog ib hom khoom uas ib tug neeg txua tau los.  Nws ua Khawv Koob rau kom muaj hwj huam, rub txhua yam zoo los pov hwm koj.
Tej no nyob ntawm koj kev ntseeg, puas yog ntseeg ib yam zoo,thiab tseeb rrau koj tiag?
Xav kom nrog zaj xav mam ntseeg! Qhov zoo, yog qhov koj ntseeg thiab koj tso siab. Tooj hlau, pob zeb, mlom, uas yog ib tug neeg txua tsim tau los. Tus neeg ntawd, twb tuag mus lawm.  Yuav muaj qhov tseeb rau koj pes tsawg feem pua?
Tshuav ib yam ua neeg sawv daws tsi tau paub txog!  Yeej muaj tej tus paub lawm, tsis tau nthuav tawm los. Cov ntseeg txog Yes Xus lub Moo Zoo, mas lawv nyob ze dua, vim lawv tau hnov Yes Xus hais tias:
Kuv yuav thov Leej Txiv kom nws xa dua ib leeg tuaj!  Yog Leej Nplij Neeg, tus qhia qhov tseeb.  Nws yuav tuaj tsa tsev nyob  hauv neeg nruab siab.
Tus no hu ua Leej Tswv Yim,tus Leej Tswv Yim no yog tus nrog Tswv Ntuj, tus hu ua Leej Txiv tsim lub ntuj lub teb, tsim tas txhuam nyob ntiaj teb no mus nto plaws txheej ntuj siab saud.
Yog Leej twg ntseeg thiab tso siab rau Leej Tswv Yim, ces nws tsis tas yuav muaj ib yam koom ceev tseg ua puav pheej li. Koj twb muaj Leej Tswv Yim yog tus nplua nuj, thiab muaj txij muaj txhua.  Nws qhia Koj ntseeg raws li Leej Tswv Yim coj, ces ntseeg tas nrho li koj tso siab.
Ces koj yuav muaj txhij muaj txhua, li koj lub siab xav tau. Koj ceev Leej Tswv Yim ntshiab tib leeg rau koj nruab siab, ces koj txiav siab mloog.
Leej Tswv yim Ntshiab coj koj mus ntsib,kev txawj kev ntse, ua neeg thoob tsib.  Mus ntsib koov nyiaj koov kub, ntsib mem toj mem av txhuam yam muaj nuj nqes zoo.
Uas yuav txhawb koj lub neej txhua yam uas Hmoob hu ua neeg muaj hmoov. Los rau koj ces koj yuav kaj siab lug li uas tus neeg muaj hmoo tiag.  Cuag li koj yeej muaj hmoo, nqa nrog koj ua kev los saum ntuj los, thaum koj xeeb los ua neeg.
Koj mloog Leej Tswv Yim qhia koj thiab koj ntseeg tias koj yuav tau li Leej Tswv Yim muab. mas yog lo lus tseeb.  Hnub uas txhua yam poob los ua koj tug lawm, mas tseeb li yog txoj hmoov ua Ntuj muab rau koj.
Yog lub ntiaj teb,peb sawv daws ntseeg li hais no, mas tas lub ntiaj teb neeg,kawg muaj tib tug yog Tswv Ntuj.  Yog tus muab txoj sia rau sawv daws, thiab lub ntiaj teb neeg sawv daws koom tib tug vaj los tib tug Nom Tswv, thiab sawv daws yog ib cuab los tib pab neeg xwb.
Thaum neeg tseem ntseeg tias,muaj tej tus Xib Hwb loj  thiab muaj ib co khawv koob zoo, ua rau pob zeb los ceg ntoo, thiab pov haum kaus npua foob pab ntau neeg txoj sia, mas tseem tshuav ntev neeg thiaj yuav paub thiab ntsib Leej Tswv Yim Ntshiab.
Uas yog tus nplua nuj muaj txhij txhua ntawd, Tus Leej Tswv Yim Ntshiab no, mas riam ntaj, los phom, hneev xub tshuaj  nws tsis siv.  Nws lub Tswv Yim tsis yog cov cuab yeej ua tsov ua rog uas neeg siv.
Kom muaj neeg ploj tuag mus ntau puas txhiab leej,  Leej Tswv Yim Ntsiab lub peev xwm, yog kev ncaj ncees, yam uas neeg ntseeg tsis tau tias muaj peev xwm.  Nws yog lo lus Tseeb.
Yam uas tawm ntawm neeg lub peev xwm los, mas txhua tus neeg txawj ntawd,yeej paub ntshais tias, Kuv puas tau ua dhau kev cai me ntsis lawm?
Ntiaj teb neeg tsis paub, ntshai tsam Qaum Ntuj paub lawm pob. Kuv yuav swb ib qho ntawd lawm lauj!....


Yaj Zoov Ntxheb Xib Hwb.

Ua ib tug leej tib neeg nco ntsoov tias koj yog neeg tsim txiaj, mas koj yeej txhua yam.
Thaum koj nco tias, koj yog neeg tsim txiaj lawm ces koj paub zam txoj kev tsis zoo. koj tawm tau tsis nrog cov neeg tsis thoob tsib nyob. Koj tsis nrog luag raus tes ua tej yam tsis muaj nuj nqes. Ces koj dim ntawm kev khaum kev txhaum, koj yog neeg tsis tsim txiaj.
Vim koj txuag tau koj nyob ua neeg dawb huv nrog cov neeg thoob tsib tsis kov tej kev qias kev vuab tsuab, los kev thoj chim.
Koj tsis ua neeg ruam, lam tau lam hais lus puv ncauj. Koj coj li cov neeg paub tab paub cai, paub qhov siab qhov qis. Koj paub txoj kev ua neeg muaj koob meej. Koj paub saib taus cov ceg ntoo qhuav nyob nyob saum koj taub hau. Thaum koj nco paub txog tej ntawd ces koj yog neeg muaj nuj nqes, tsis zoo li tej nroj tsuag uas lo av pes li nyob qis qis,tsis muaj neeg xav saib.
Thaum koj tsim txiaj lawm, mas tab yog tej mob nkeeg los kuj tsis raug koj thiab. Vim tej neeg muaj hmoo, muaj koob meej nyob ntiaj teb no nrog roos koj lawm ces koj lub siab lub cev muaj zog yeej tau mob nkees ntawd, thiab yeej xaiv lus tib si.
Thaum koj tsis paub tseeb tias koj tsim txiaj, mas txhua yam nyob ntawm koj tes, koj saib tsis muaj nuj nqes li:
a. Tab yog koj tus txij nkawm,nws twb zoo, muaj peev xwm, txawj ua ntau yam zoo los koj tsis qhuas txog nws li. Hos luag tej li mas xyov nws txawj thiab paub pes tsawg yam xwb los koj qhuas cuag li paub ib niag phab luaj ntuj. Hos tus ntawm koj xub ntiag mas koj saib li me nyuam neeg tsis paub tab. Luag sab nraud mas koj qhuas txog zoo cuag niam Nkauj zag, thiab paub cuag ntxhais Nkauj Sua.
Koj cuab kwv tij tej hlob los tej yau luag hwm koj ntshis xwb los koj tsis qhuas, tsis hlub tsis xyiv fab rau li. Luag qhua, no koj ho saib cuag li luag muaj txiaj ntsim pub rau koj ntau dua koj niam koj txiv los koj cuab kwv tij tau muaj rau koj. Koj muab luag qhuas loj tshaj cuag li luag tau pov hwm koj loj hlob.
b. Koj tej ntaub tawv pov thawj kev zeem tseeb koj ua neeg, ntawv kev txawj ntse, ntawv kev thoob tsib ua neeg tsim txiaj puas tsav yam los nws zoo tib yam li tej neeg tau hais los saum no thiab. Thaum tsis tau muaj mas koj ntshaw txog. Muaj lawm mas koj twb tsis saib tias tsim txiaj li. Yuav txuag thiab hwm tias pab tau koj tsim txiaj thiab, ces saib tus nraud los saib tus ntawm koj xub ntiag thiab, muab sawv daws tso muaj nuj nqis ib yam thiaj yog.
c. Koj Haiv neeg muaj suab npe, muaj kwv huam zoo, muaj txuj ci sib luag li lwm Haiv neeg Mab Suas. Koj tsis nco qhuas, tsis nco khuv xim. Mus qhua Mab Sua li mus xyaum los twb hais tsis zoo npaum luag,los koj rau siab yoog.
THaum Koj ua koj li poob mus los plam ntawm koj tes lawm, mas koj mam nco qhuas txog, mam paub li ces lig lawm:
a. Koj mam qhuas koj tus txij nkawm, qhuas rau cua tshuab mus paug luag pob ntseg tias,kuv me niam nquag niam hau zaub muag thiab me txiv zoo nraug txiv nraug Suav txiv txiav taws qhuav. Hmoob hais tias tshav ntuj puag nram qab ha xwb.
b.Saum tsiaj txhu kuj ib yam tus dim lawm mas yog tus loj koj mas khuv xim kawg hais kaum zaus rau neeg hnov los twb tsis txaj muag li. Nuv ntses tus dim lawd kuj yog tus loj thiab twb tsis tau pom tias luaj ntiv tes los luaj li dab teg li cia li hais tia loj tsis loj li lauj! Loj tshaj li yog txhob dim mas!
Sawv daws yuav ua neeg kom ib nyuag meej pem me ntsis, saib tias yam zoo thiab tsim txiaj. Nrog qhov tseeb uas yog qhov zoo mas koj maj mam muab tawm los tso rau tib neeg paub tias, kuv muaj yam no zoo txaus neeg tso siab ces thiaj yuav muaj neeg txhawb koj mus rau sab zoo. Txhob muab zais thaum pab tsis tau luag mam hais tias, yog txhob dim mas! lo lus no lam hais los khav cuam dawb tias, txhob dim mas kuv pab tau kiag xwb. Ua li no mas hais kom txaus rau dab ntseeg xwb. Txij nkawm los ncaim koj dua mus lawm. Tsiaj loj los dim tas lawm tsis tas yuav khav txog li. Khav los pab tsis tau, txhob hais los ntis ntsej muag mas zoo dua.
Hais tej no los cav tawg tsi taus paj,txi tsis tau txiv li. Yog koj xav qhuas, mas qhuas tus koj tau yog tus loj ntag. Tus txij nkawm nrog koj nyob yog tus zoo tiag. thiaj yog qhov tseeb.
Koj yog Hmoob koj yuav tsum qhuas Hmoob, thiab pab Hmoob. Koj txhob dag Hmoob.
Xav Kom zoo tso! Hmoob mas xav cem Hmoob xwb, yog tsis muaj Hmoob lawm, Hmoob nyob tsis taus, ua neeg twm zeej. Koj twb tsis nyiam Hmoob li, yog koj hnov tias muaj Hmoob tid,mas koj cia li tsiv los khiav mus nyob tid li thiab.
Sawv daws saib Hmoob hom hais lo lus no! MUAJ IB TUG NTXHAIS HMOOB,hais ib lo lus xa koj tias mus lwm hnub koj ho rov tuaj saib peb od! Koj nco tus ntxhais ntawd,mus li peb hnub ke. Hos ib tug ntxhais MAB SUA,muaj koj nuj nuj tso plhuav koj mus lawm xwb ib teev tom qab koj twb tsis nco seev txog nws lawm. Tus twg yog tus ua rau koj lub siab cno. Hmoob tej laus yeej hais tias, nplooj tsawb tsis yog ntaub npuag. Mab Sua, tsis yog kwv luag no.
Pab Hmoob ua plaub rau koj thiab cem koj yog pab coob luag tsiv lawm, koj yeej yuav tsiv mus raws luag thiaj tas. Koj tsis nrog luag nyob los koj yuav mus nyob kom ze koj siab thiaj zoo. Tus mus ua loj leeb, ua neeg twm zeej lam mus xwb yeej tsis kaj siab li.


Yaj Zoov Ntxheb Xib Hwb.

+-> Kuv yov Yaj Zoov Ntxheb Xib Hwb,hais rau peb tsoom ntseeg sawv daws. Ka Tau Liv txoj kev ntseeg, yog Tswv Ntuj txoj kev thoob tsib muaj txoj sia nyob mus li.
{ N... Ka Tau Liv Kev ntseeg,}
Nws kev coj qhia tsis txawv Peb tsoom Hmoob tej pog tej yawg, cov kab lis kev cai coj peb Haiv Hmoob, ua neej nyob rau hauv lub qab ntuj khwb no.
Peb sawv daws tej pog tej yawg yeej qhia tias, nyias muaj nyias dab qhua,mas yuav tsum hwm thiab coj,raws li txheej laus thaud. Thiaj noj qab nyob zoo,kom mus nce toj los nqes hav, thiaj tsis muaj kev ntshaus hlaub ntshaus raws.
Cov txiv tsev yuav mloog tus txiv muam, thiaj tsis puas dab puas qhua. Dab thiaj pov hwm pov yawm kom ib tse, 120 leej noj hno paug cev, haus dej los paug siab.
Tej Dab qhuas no,yog tej yam me me no xwb,tej me nyuam twb mloog cov niam txiv lus qhia hais, cov niam txiv twb mloog cov txiv muam lus qhia coj. ib xyoos ntuj zeeg,kom tsis muaj hmab dawm tes hlua dawm taw.
Peb Ka Tau Liv txoj kev ntseeg, muaj Qaum Ntuj kev thoob tsib, muaj txoj sia nyob hauv,yog yam tseem ceeb tshaj lawm, vim li cas niam txiv ntseeg thiab coj, tej tub ki ho saib zoo li yog ib txoj kev cai laus xwb. Nej yuav tos kom nej laus nej mam los ntseeg thiab coj,yuav muaj dab tsi zoo rau nej?
Muab ua piv txwv tias, Kuv tuav nej txoj sia cia rau ntawd, yuav muab rau nej. Nej hais tias,tos kom nej laus tso nej mam los nqa txoj sia.
Nej twb laus yuav muaj 50-60 xyoo lawm, yuav mus kav nej tsawg xyoo. Ib yam li thaum nej hluas ntxhias,muaj lub zog nej tsis txais yuav. Nej tos kom nej laus tso, nej mam txais txoj sia, nws puas yuav pab tau nej?
Tswv Ntuj xav muab pub rau nej thaum nej muaj zog, Nej hais tias, kuv tos me ntsis tso. Thaum nej tsis muaj zog lawm,nej mam thov kom muab txoj sia rau nej, kom nej rov muaj zog ib ncua ntxiv.
Yuav pab tau dab tsi?
Tswv Ntuj xav kom peb muaj kev sib pauv, los sib pauj ua ke. Nej txhob muab lub caij nej tsis muaj zog, los pub rau Tswv Ntuj xwb. Zoo li nej muab lub caij seem uas neeg twb tsis siv lawd, los pab Tswv Ntuj xwb.
Qaum Ntuj puas xav siv nej lub peev xwm thiab! Yog muab txoj sia rau ib tug neeg,mas Ntuj kuj xav muab rau thaum koj muaj zog. Kom txoj sia ntawd,ua hauj lwm pab tau koj,thiaj yog qhov zoo.
Peb ua dab tsi mas peb yuav muaj qhov,sib pauv los sib pauj. Thaum peb hluas, Ntuj pab kom peb muaj zog, muaj tswv yim, muaj koob meej, peb yuav qee tej lub caij, pub rau Tswv Ntuj txib.
Yam liTswv Ntuj xav qiv, peb lub cev muaj zog, los hais Tswv Ntuj cov lus thoob tsib. Hais nws tej kev txawj ntse, muaj nuj nqes los pub rau ntiaj teb neeg, hnov thiab paub.
Peb yuav txhob yig, peb yuav zoo siab txais, Ib tug neeg muaj lub hnub nyoog, tshaj 10 xyoo lawm, mas Tswv Ntuj yeej txaus siab txib nws los hais lus lawm.
Peb yuav xyaum raws tej niam tej txi mus tshawj, kom peb tau hnov,Tswv Ntuj lo lus lub suab hu peb. pab ua Tswv Ntuj tej hauj lwm, cawm lub ntiaj teb neeg.
Tswv Ntuj tsis txib koj tas hnub, Ntuj tsuas txib, tej lub caij thaum muaj ib txog hauj lwm, yuav ua li ob peb fiab, li ob peb {secon}, los hais ob peb lo lus zoo, pab rau ib tug neeg kom zoo siab xwb.
Kav Tau Liv txoj kev ntseeg, muaj Tswv Ntuj 10 lo lus qhia nyob hauv. Peb coj tsis tau 10 lo lus ntawd tas, los tsuav yog peb coj tau peb lo ces twb zoo lawm.
Yam li:
a.Hwm Huab Tais Ntuj.
b.txhob mus ua kev plees kev yi,los txhob ntshaw ua.
c.koj txhob rov dag koj tus kheej, los dag rau luag tej.
Yog peb coj tau peb lo lus no lawm xwb, ces lub ntiaj teb no twb tshiab tuaj lawm ntau heev. Vim tias lub ntiaj teb no muaj kev sib haum xeeb, ces ntiaj teb neeg muaj kev kaj siab, sawv daws xav ua neej nyob.
Tsis muaj neeg ua dej txiag los paug siab, tsis muaj kev tu siab, ces kuj tsis muaj mob muaj nkeeg, ua neeg yeej tas txhua yam kev phem kev tsis zoo, uas coj xwv txheej los rau neeg.
Lo lus dag, yog ib lo lus loj tiag, tus neeg dag mas nws dag yam tsis txaj muag li. Nws loj xov dag rau lub ntuj lub teb, dag rau lub hnub lub hli,qhov kawg ces nws dag rau nws tus kheej kiag li lawm.
Ces koj hla tas nrho txhua yam tib si mus, txhais tau tias koj tsis muaj nuj nqes ib qho li.
Kwv tij peb cov ntseeg nyob Sacramento no muaj 104 yim neeg. Ib yim neeg no xwb,yeej muaj peb leeg txawj txawj los thov Tswv Ntuj.
kom Ntuj hlub thiab zam rau neeg, pov hwm kom neeg, kom txhob muaj mob muaj nkeeg, thiab txhob ua tsov rog, los mus sib tua.
Peb puas tawm leej no ib leeg thov kom Ntuj pov hwm li ib hnub xwb. Twb txaus Ntuj pov hwm tas ib lub xyoo lawm. Kom tas sawv daws cov peb paub lawv,los cov peb tsis paub tib si,kom txhob muaj mob nkeeg,los raug xwv txheej.
Tas peb cov Hmoob nyob Mis Kuj teb no, sawv daws koom siab thov li hais no. Mas Tswv Ntuj yuav pov hwm, lub ntiaj teb no mus ntau xyoo, tsis pub muaj xwv thxeej los yeej tau.
Kev Thov Ntuj thiab teev Ntuj tsis zoo li kev teev Dab, uas yuav tsum yog tus txiv muam paub paub dab hais xwb, Dab thiaj yuav mloog, thiab muab qaib npua los txhiv.
Kev thov Ntuj peb tsuas siv, Ntuj kev thoob tsib los hlub thiab nyiam neeg xwb ces Ntuj cia li mloog peb lus lawm.
Tus hlob tus yau, tus laus los tus hluas, los Ntuj zoo siab mloog sawv daws, tej lus thov tib si. Peb yuav xyaum ua thiab ntseeg, tso siab lug rau,Tswv Ntuj lub txiaj ntsim no. Nws yeej muaj hwj Huam pab tau tiag.
Qhov Tseeb yog Tswv Ntuj lo lus:
Tswv Ntuj lo lus yog qhov tseeb, Tswv Ntuj dag tsis tau. Nws hais nyob hauv ntawv Hes Nplaws 6: 18
Leej Ntuj Plig Ntshiab kuj tshoj, neeg lub Tswv Yim kom tshaj Tswb Ntuj lo lus tseeb, raws li Tswv Ntuj nyiam.
Mas thiaj muaj ntau pab neeg,txais Tswv Ntuj lo lus kom tau muaj txoj sia nyob mus li. Leej Ntuj Plig Ntshiab,yeej tshoj kom neeg hais qhov tseeb xwb.
Raws li lo lus tseeb uas Yes Xus tau hais tseg tias:
Kuv yog txoj kev, yog qhov tseeb,thiab yog txoj sia. Nyob hauv Zam 14:6. Tus ntseeg tias, Yes Xus yog Leej Pleev, yog Tswv Ntuj Leej tub. Mas nws muaj Leej Pleev cov txuj ci, ntim tas txhua yam, kev tseem ceeb nyob hauv nws.
mas thaum koj ua tej hauj lwm thov Ntuj, koj ntseeg thiab tso siab, ces yuav tshwm tuaj tau xwb. Yog muaj ib pab neeg,nyiam thov Ntuj li no, mas peb cov tub ki yuav tsim txiaj, mus ntau tiam neeg yav tom ntej mus ntxiv.
Nej ntsia saib peb tej tub ki lawv ua neeg twb tsis tsim txiaj li. Lawv pe thov tej niam tej txiv xwb, tej niam tej txiv zam tas nrho rau, yuav them nyiaj daws plaub ntug.
Los them nqe tshoob nqe kos ntau npaum li cas,los lawv tsis tsis khuv xim li.
Tswv Ntuj siab zoo tshaj peb tej niam tej txi no ntau npaug saud lawm, mas Ntuj yeej kam mloog peb xwb. Ua li mas,koob hmoov nyob ntawm koj tus kheej yeej muaj.
Koj txhob mus nrhiav nyob lwm qhov chaw:
-> Txhua yam yuav zoo, yuav tseeb los nyob ntawm koj.
-> Kev ntseeg thiab muaj koob hmoov,los nyob ntawm koj.
-> Kev vam meej nrog lub ntiaj teb, los nyob ntawm koj.
-> Kev yuav ua phem ua zoo los nyob ntawm koj.{ Tas}
Lo lus kawg, kuv thov kom lub xyoo tshiab tuaj no, kom Tswv Ntuj lo lus tseeb nrog rau peb tsoom pog tsoom yawg,foom hmoov zoo rau peb txhua tus tuaj ntawm no, thiab pov hwm,kom peb sawv daws muaj yeej rau sab ntseeg tias, muaj txoj sia nyob mus li, thiab yeej kev mob kev nkeeg.
Nrog lub xyoo tshiab no mus,nyob ntsej liab muag tshiab,kom sawv daws ua neej nyob muaj koob nto npe. mus puv lub niaj lub xyoo.
Kom txhua yim neeg, nrog luag muaj vaj muaj tsev nyob, tsis ntshaw leej twg. Ua dab tsi los kom tau li lub siab xa,tus nyiam kev lag luam los kom muaj nyiaj muaj txiaj.
Tus nyiam ua Nom ua Tswv los kom muaj hwj chim, mus kav tau luag. Kev tu tub tu kiv kom muaj tub txawj nrog ntxhais ntse, kawm tau ua neeg thoob tsib to nrog.
Los coj peb haiv Hmoob nyob ua pab ua pawg ua ke, noj haus mus raws kev sib hlub sib hwm, ib leeg mloog leeg hais. Tig los sib pab sib nres.
Hnub no peb muab yam tsis zoo tso nrog huab cua ya mus rau hnub coog hli kawg...

Yaj Zoov Ntxb Xib Hwb.

Txoj kev pauj zog no, yog ib txoj kev tseem ceeb rau ib tug neeg, uas nws haum nrog lub ntuj lub teb, thiab haum nrog, leej tib neeg sawv daws tib si.
Kev pauj zog, yog koj paub txog lub ntsiab ntawm kev pauj zog,mas koj tau ua ib tug neeg muaj nuj nqes zoo txaus lawm.
Kev mus pauj zog mas ua rau Ntuj thiab neeg zoo siab rau koj tshaj lwm yam tib si lawm. Peb tuaj ua ib tug neeg nyob rau lub ntiaj teb no mas peb tshuav luag zog, yuav tau mus pauj!
Tus nuj nqes ntawd,mas Ntuj los tos, hos neeg los kuj tos tib yam thiab!
Koj ua neej nyob muaj ib tse neeg, los ib pab neeg los ib haiv neeg sib xws li no, koj tshuav luag nqes zog yuav tau mus pauj.
Vim li cas ho hais tau li ntawd?
Luag tos saib koj, koj puas yuav tuaj txhawb luag zog,luag tos saib koj puas tuaj nrog luag noj luag haus. Luag twb tau suav koj rau hauv lawm, luag thiaj caw los hu txog koj.
Yog koj tsis mus ces koj tsis tau pauj luaj lub txiaj ntsim zoo uas suav koj ua luag ib tug neeg tseem ceeb nyob hauv lawm.  Qhov koj tshuav nuj nqes yog qhov luag tau suav koj rau hauv, koj tsis tau mus pauj tus nuj nqes ntawd, cuag li koj nrauj luag tus nqi ntawd ntag.
Luag suav koj ua luag tus phooj ywg zoo, los ua luag li txheeb ze, los tus neeg tsim txiaj nyob hauv luag kev tso siab thiab muaj koob meej. Koj tsis lees ua luag tus zoo neeg, cuag li koj tau nrauj luag tseg lawm.
Nyob hauv Tswv Ntuj sab mas tseem muaj nqes dua neeg sab me ntsis thiab!
Vim Ntuj saib saib, koj puas ua neeg siab dawb thiab muaj kev sib hlub, ua qhov tseem ceeb dua.
Neeg lub tswv yim me me thiab swb rau kev ua txhaum sai.  Yog koj txo hwj chim nrog cov neeg me nyob sib txig.  Mas Qaum Ntuj saib koj tsis yog neeg muab hlob. Ces Qaum Ntuj nyiam koj dua, Nws tsis suav koj nyob hauv cov neeg khav theeb npaj rawv kev ua txhaum los twv rau Ntuj.  Ces zoo li koj twb npaj txiav siab los pauj tej yam koj ua tsis zoo rau Ntuj, kom koj tsis tshuav nuj nqis, ntau tseg rau Ntuj saib.
Txhua yam kev sib haum xeeb kev sib pab kev sib hlub  uas koj tau ua rau tej kwv tij los tsoom txheeb ze ntawd Ntuj kuj muab suav rau koj tej kev sib pauj zog txhua yam.
Yog muaj neeg txom nyem neeg pluag thov koj nyiaj, koj tsis muaj nyiaj pub lawv los koj txawj muab lo lus zoo los pauj  qhov nyiaj uas koj tsis muaj ntawd.  Ces cov lus koj muab rau luag kuj txawj tshawb kom luag tiv taus kev tshaib nqhis mus thawm hnub ces kuj yog ib yam zoo uas koj tau pub rau luag lawm thiab.  Ces kuj cuag li Ntuj tau pub kev kaj siab los daws nej sawv daws kev tshaib kev nqhis mus ib ncuas.
Muaj ib yam uas peb yuav tsum ua:
Yog cov neeg siab ncaj, cov neeg me, los cov neeg txom nyem sib koom ua ib yam mas koj yuav tau mus koom nrog lawv.  Vim muaj ntau leej siab ncaj nyob hauv, thiab muaj Tswv Ntuj nrog.
Cov lus phem thiab neeg phem yeej muaj, tsuas yog cov uas hmoob hu ua neeg tsis paub tab no xwb, lawv lam tau lam hais los tsis tseem ceeb.
Hu ua kev sib koom dag zog,sib txhawb sib nres, nyob rau Tswv Ntuj sab mas yog kev sib koom los pauj zog tas nrho xwb.  Koj pauj koj los koj mus koom nrog lawv nej dawv daws puaj ua ke.
Kev teev Ntuj, koj teev koj los, koj mus koom nrog luag los haj yam zoo. Ntuj saib tias yog ib txoj kev uas nej sawv daws tuaj pauj zog. Vim peb yuav pauj tej kev zoo uas Ntuj twb tau pub rau peb lawd, los tej yam Ntuj tseem yuav pub, mas peb los yuav ntaus nqi tias peb yuav nrog Ntuj sib pauj sib pauv ntau yam, kom peb lub neej txhob muaj teeb meem nrog kev ua txhaum, kev tu siab, los kev thoj chim xyaw kev txom nyem, kev iab kev khwv puas tsav yam huv si.

Yaj Zoov Ntxheb Xib Hwb.

Neeg Yaj Ceeb txoj kev pib thiab xaus. Yuav muab plaub tsib txoj kev tseem ceeb los piav.
Nyob ntiaj teb no muaj ntau pab neeg ib co lawv xaiv txoj kev kaj hos ib co xaiv txoj kev tsaus.
1. Thawj pab neeg, yog cov thawj neeg no mas nyob tas nrho hauv cov tuav hauj lwm txhua pab,qib qis mus txog qib siab, ti nkaus tus txoov Tswv Tim thiab Huab Tais {Txoov Tswv Tim= President}. Nyob hauv txhua lub rooj ua hauj lwm yeej muaj 50, 50% phem thiab zoo nyob ua ke.
a. Saum txoj Cai neeg tsim los kom tau tswj thiab tiv thaiv tus neeg xav ua Phem xwb. Tab tom zoo rau cov neeg phem thiab cov neeg muab hlob txawj xam khib kom lawv tau kev liam txim rau cov neeg zoo tias, tsim tau saib tsis taus tej cai no nrhiav kev iab liam kom tau muab tus neeg zoo, tsim kom tau kev los txais kev txom nyem tau thiab, los poob nyiaj txiag los ua plaub ntug rau kom tau.
b. Cov Neeg tsis ncaj ncees nrhiav kev dag tej Nom Tswv kom tau kev muab nyiaj txiag phob mus ua lwm yam kom tau qee nyiaj ntawm tej neeg npua nuj, pob nyiaj mus siv.
Liam txim tau rau cov neeg siab dawb cuag li txhob txwm muab tshuaj kob dub los zas neeg tej nplooj siab kom lub ntiaj teb neeg tsis muaj kev tso siab. Kom saib tias neeg ntiaj teb no sawv daws puav leej dub tas. Tsis dub los kom tau raug ceb muag mus tas txhua tus li. Hais txog tej teeb meem no yog nrhiav mas suav tsis paub tag teeb meem li.
c. Ua li mas tab yog cov thawj neeg tsim tau tej txoj cai los tswj kav kom zoo. Nws tsuas kav tau tus neeg uas ua tau los pom xyeem qhov muag xwb. Tus uas nws xwb tim ua puag nruab siab tuaj mas zoo li nws tau zoo ua kawg nkaus li.
d. Cov thawj neeg no 50% uas hais tias tsis zoo, ces yog cov, uas muab txoj cai los tsim txom cov neeg siab dawb los hiam cov neeg siab ncaj thiab muab kev lwj siab tseb puv lub qab ntuj no kom neeg tsis tau nyob tiaj tus.
Nyiam no mas neeg paub tias txhua lub tswv yim tawm ntawm cov thawj neeg los ib hom ntoo xwb txi tau ob hom txiv, zoo sib xws tab sis muaj cov qab zib thiab cov qaub ua ke lawm.

2.Pab ob no yog tas nrho cov Thawj Neeg nyob hauv txhua hom kev ntseeg. Hauv 120 txoj kev ntseeg. puav leej zoo. Yuav ua twb zoo saib,zoo sab nraud ntau dua, sab hauv.
a. Nyob hauv 120 txoj kev ntseeg mas kawg yog tib txoj thiaj yog thiab tseem ceeb xwb. Lwm cov tsis yog tias tsis zoo. Zoo thiab los tsuas zoo txog 50% li xwb, tos hais tias zoo txog 50%. Vim tias cov lus teev hawm zoo. Hos txog kev coj thiab ntseeg tsis zoo li kev teev hawm hauv lub siab tawm los.
b. Muab hais los mas ntseeg tus Tswv thiab kev ncaj ncees tsawg dua ntseeg hwj huam ntau dua lawm. Yuav hais tseeb kiag: Ntseeg tus mlom pob zeb los tus mlom ntoo ua neeg txhais tes txua tau muaj peev xwm dua li ntseeg txog tus Tswv. Ntseeg txog tus Tswv mas tsis muaj qab hau, hos tsuav yog koj muaj tus mlom xwb mas pab thaiv tau mem toj mem av kom zoo thaib xwv thxeej, pab tau ua neeg nplua nuj tib sis. Yog hnov li no yuav xyuam xim me ntsis txog.
c. Ntawm txoj kev ntseeg uas ntiaj teb neeg feem coob ntseeg hais tias ntseeg txog Ntuj no xwb twb muaj tshaj puas tawm txoj los pua tawm yam.
Qhov hais no yog Cov Xib Hwb lawv li kev zoo thiab kev phem nyob nrog sib npaug zos:
Tas nrho saum cov Thawj neeg txhua pab li. Cov lus thiab txoj cai cov uas Xib Hwb hais, muaj ib co lus tsis yog qaum Ntuj li lus.
b. Qhov hais tias tsis yog qaum Ntuj lus, vim Tus Xib Hwb nws txua ib co lus los tsis xws li Qaum Ntuj cov rau. Los sis nws txhais tsis yog lawm lawm, ces ua rau neeg ntseeg tias tseeb lawm.
Cov ntseeg muaj Yes Xus Pleev lub npe nyob hauv yog lawv hais sib txawv tsis xws li cov ntawv ntshiab, lawv niaj hnub tuav txog Leej Ntuj Plig uas Yes Xus hu ua Leej Tswv Yim ntshiab tus tuaj nrog neeg nyob no, mas hais tau tias lawv twb ncaim ntawm nws mus lawm.
c. Cov ncaim ntawm Leej Tswv Yim mas Leej Tswv Yim kuj tsis ntxub lawv. Tab sis Leej Tswv Yim tsis pab pov kom lawb nyiam los nyob ua kev. Nws tsis yog lub tswv Yim zoo. Lub Tswv yim pab tawm tsam tas kho tas nyob ua ke yog lub tswv yim zoo. Hos lub tswv Yim sib tawm tsam tas sib ncaim mus no tsis yog Lub Leej Twv Yim lo lus Leej Ntuj Plig qhia. Lo lus uas Tswv Ntuj hais tseeb Tshaj nyob hauv Nws los lus yog:
->Leej Txiv, Leej Tub, Leej ntuj Plig, lawv ua peb leeg Huab Tais,thiab Peb leeg yog ib tug Huab Tais xwb.
d. Cov hu ua tub tshaj Ntuj lus zoo li cov Xib Hwb. Lawv yuav muaj kev ceev faj, yog koj txua ib co lus thiab cai uas nws tsis yog Ntswv Ntuj li cai koj muab rau cov pej xeem ris mas yuav dawm lawv kev. Cov cai thiab cov lus ntawd Tswv Ntuj yuav tsis leeg yuav.
Thaum koj pab neeg ris mus txog pem rooj ntug. Qaum Ntuj yuav nug cov ntseeg tias. Me Tub koj ris dab Tsi ua cas hnyav ua luaj. Luag yuav qhia Qauj Ntuj tias:
Puav Leej yog Xib Hwb muab los xwb. Qaum Ntuj yuav tias Yog Xib Hwb Li ces tso rau ntawm no. Peb Qaum Ntuj muaj ntau, peb siv tsis txog cov no. Luag coob leej tso ces thaum kawg yuav muaj li peb roob peb ha. Hnub Xib Hwb mus txog ces Qaum Ntuj yuav hais tias:
Xib Hwb tej lus thiab cai los nyiaj ntawd yog koj li koj nyiam koj txua koj huas ua koj tug tau lawm, Qaum Ntuj tsis yuav muab tas nrho rau koj, yog ko li
Koj cov lus,cov cai thiab nyiaj kub no yuav muaj tus saib nyob rau lwm qhov chaw. Mus tsis tau rau Saum ntuj.
Tus yuav rau zov yog, leej twg?...

3. Cov txiv muam coj ib hom kev ntseeg thiab cov txiv neeb txiv yaig. Txoj kev ntseeg no lub sim xeeb cov lus tshaj tawm thiab lus coj leej tib neeg lub siab yog ib co lus ncaj ncees. Txoj hauj lwm ua ntawm tes tsis pom kev tseeb. Puav leej yog kev teev dab. Tab sis muaj qhov yuam kev ntawm cov dab ntau me ntsis lawm.
a. Thawj cov Dab muab hais los mas yog cov dab zoo. Suav tau Tswv Ntuj nyob hauv nrog:
Thawj tug dab ces yeej yuav tsum yog Tswv Ntuj li lawm. Nws yog tus dab xeeb teb Xeeb chaw. Tsuas Yog Tswv Ntuj tib leeg thiaj xeeb tau. Lwm hom dab mas yees tau ua tab sis yeej xeeb tsis tau. Xeeb tau mas yog muaj tuaj lawm ces nyob mus li.
b.Qhov yuam kev yog tej no:
Cov dab hnub tes hnub taw, tus dab zaj. Dab xob. Dab qhov dej saus, dab qhov dej npau. Dab qhov cub dab qhov txos...
Cov no puas muaj los tsis muaj?
Cov dab no yog cov dab tsiv tsaim thiab ua xwv txheej rau neeg uas yog xwv txheej loj xwb. Leej twg ua txhaum los tub qaug lawm kawg tuag. Cov txiv muam txiv neeb thiaj yuav tau muab nyiaj txiag xyab ntawv mus kho los pauj, tseem yuav tau siv tsiaj txhu mus hloov ntsuj lig nyob tub tuag teb kom tau rov los thiab.
c. Ib qho yuam kev ntxiv, cov txiv muam no ua rau neeg tsis to taub. Luag tau ntseeg tias: tus txiv neeb no, nws nce tau mus saum ntuj. Los nqes tau nruab yeeb tau mus nrog dab tham tau los lawm yeej tseeb li 100% li ntag. Twb tau siv tsiaj txhu xyab ntawv mus daws teeb meem txhiv ntsuj plig tas tus neeg tseem tuag mus lawm thiab.
d. Zoo li cov txiv neeb, niam neeb no lawv ua neej nyob peem tsheej nrab neej nrab dab lawm, yam tsis muaj tseeb los hais tias tseeb, thiab yog tiag. Hais tej lus no mas ua rau Leej Tib neeg ntshai, thiab poob siab. Lo lus raug neej ces yog tej lus hais no ntag.
Hais los mas Hmoob tej kev mob nkeeg ua hais tias raug dab mob mas yog xub raug neej ua ntej mam li mob. Muab liam rau dab tas nrho lawm.
e. Yog Dab hais yooj yim li neej mas ntshais neej thiab dab ua plaub tsis txawj tas li. Cov plaub no yog zoo li neej sab, mas ua plaub neej tsis paub yeej dab li. Vim lub keeb dag poob los nyob rau neej nruab siab lawm. Ces neej thiaj tau dag mus li, dag yeej xwb.
f. Cov txiv muam lawv muaj ib lub nra xws li cov thawj neeg coj ib hom kev ntseeg:
Tus Txiv Muam nws taus hais cov lus tseeb lus cuav sib npaug zos. Tau ua kom luag tau them nyiaj rau nws tau siv yooj yim. Muaj ntau pua tus ntsuj Plig tsiaj los pauv Ntsuj Plig neeg hloov lawv txoj sia los. Cab thiab ris mus tso pawg lug rau pem rooj ntug. Yog cov nyiaj txiag, thiab cov tsiaj uas tus txiv neeb kom cov npoj neeg them tuaj rau tus txiv neeb no. Qhov kawg tus txiv neeb yuav tau ua neeg nplua nuj hnub nws mus txog pem lub rooj ntug, uas nws yuav tau txais cov nyiaj txiag thiab cov tsiaj txhu neeg ntiaj teb tau them rau nws thaum ua neej nyob ntiaj teb.
Tej no puav leej yog nyiaj kub quav tooj quav hlau thiab pob txha xwb tsis paub yaj li, yuav nyob mus li, ces tus tswv yuav tau saib xyuas thiab zov. Txhais tau tias yus raug txim...

4. Muaj ib co ntseeg tshiab sawv los, cov Hmoob hu ua Saub no sawv.
Yog Saub tiag, mas ib Haiv neeg los ib tiam Ntuj tsuas tshoj qhia kom muaj ib tug xwb. Phaum Saub no. ib tse neeg. Los ib lub zos sawv ob peb leeg li no.
Lawv yog Niam Toj Txiv Toj, Qaum Ntuj pub los kheev lawv siv cov Yaj Saub lub meej mom thiab lub hwj chim.
a. Vim li cas cov Niam Toj Txiv Toj no thiaj sawv qab zej hauv zos nplawg ntia li no?
Muaj lawv sawv los, vim tias, Muaj txhua pab pawg neeg cov thawj neeg ncaj tsis tas. Qaum Ntuj tshoj kom lawv sawv los hais txog neeg Yaj ceeb no tej kev khaum kev txhaum. Uas kuv tau ua rau koj, es koj ho tau ua rau lawv lawm, lawv kuj tau ua rau luag lwm pab thiab.
b. Cov Niam Toj Txiv Toj no lawv txoj hauj lwm yog Qaum Ntuj txib lawv los qhia ntiaj teb neeg. Lawv tau ua raws li lawv tau kawm los:
Tus kawm tau hauv tev los mas lawv tsuas muaj cai tshaj hauv tsev xwb. Tus kawm tau tom kev tshuam los tom tshav puav puam puam los mas lawv tshaj rau ib tug neeg los ib pab me nyuam neeg. Los sis ob peb leeg, lawv tsis mus txeeb lus tshaj hauv tej npoj neeg coob li cov luag muaj tsev teev hawm.
c. Pab neeg no kuj muaj kev phem kev zoo sib npaug zos:
Suav tas nrho lub hauv paus uas muaj kev ntseeg coj pab coj pawg los thoob plaws mus rau txhua npoj neeg. Tus ua thawj neeg nws raug Qaum Ntuj hu los ua nws txoj hauj lawm mas yeej yog tus neeg zoo tas nrho xwb.
d. Cov tsis zoo nyob hauv cov ua npoj ntawm pab thawj neeg no, dhau lub caij Qaum Ntuj xaiv thiab hu lawv lawd, mas kuj muaj tus phem mus tos lawv tom kev thsuam, ces tus phem kuj tau cob kom lawv siv Qaum Ntuj zaj lus zaj txuj ci los coj cob qhia. Tab si lawv lub tswv yim ncaim ntawm lub niam tswv yim uas tus Leej Tswv yim zoo uas Qaum Ntuj tso los coj neeg Yaj Ceeb no kom muaj kev ncaj ncees rau Qaum Ntuj thiab txhua tus leej neeg.
e. Cov Niam Toj Txiv Toj no, tas sawv daws kuj tsis zoo li yog ib pab xwb. Muaj ntau pab thiab. Cuag li muaj ntau leej nyob saum qaum ntuj xaiv lawv li nyias muaj nyias tus tswv. Qhov tseeb muaj ib pab yeej yog Qaum Ntuj xaiv. Hos ib pab mas lawv hais tias lawv li yog cov pog Koob yawg Koob xais lawv. Lo lus tseeb tsis tau muaj neeg paub tau li.
f. Qib lus no yuav hais rau sawm txhua pab uas yog thawj neeg. Saum cov thawj neeg muaj 50% yog neeg dawb huv. Hos 50% kuj tsis paub nws feemxyuam. Thaum mus txog ntawm txoj kev kaj thiab kev tsaus sib txuas yuav muaj kev sib ncaim. Txhua tus neeg paub cov thawj neeg no mas yeej xav tias, cov thawj neeg yeej yuav tau mus nyob ntuj kag. Cov mus rau Ntuj tsaus tus yog sawv daws cov tau hla kev ua ncaj ncees lawm xwb.Txhua tus leej neeg tau sib paub nyob ntiaj teb no, yeej ntseeg thiab xav tias cov ua thawj neeg yeej yuav tau mus nyob ntuj kag xwb.
g. Thaum tsoom pej xeem me nyuam neeg ntau vam leej mus txog ntuj kag, lawv xav tias yuav pom cov thawj neeg nyob ntuj kag yuav tuaj tos lawv. Tab sis pom cov thawj neeg ntawd tsawg leej kawg.
Tig mus ntsia sab ntuj tsaus pom feem coob yog cov thawj neeg ntau xwb. Cov thawj neeg nyob ntuj tsaus, cov thawj neeg ntawd, muaj tas nrho txhua hom los txhua pab thawj neeg nyob rau Ntuj tsaus.

5. Pab kawg yog pab tsis muaj thawj neeg. Tsis muaj Xib Hwb coj thiab cov qhia los lawv yeej tsis lees txais yuav leej twg li. Cov no lawv tsis ntseeg li cov tau xub sau los lawd. Lawv tsis muaj Tswv Ntuj los Huab Tais. Lawv ua lawv lub plab qhev nkaus xwb. Thaum lawv tsau plab lawm lawv nyob zoo li yog neeg dawb huv. Tab sis thaum lawv tshaib plab tuaj lawm, mas lawv siv zog ua hauj lwm kawg.
Lawv tuaj yeem maub hmo ntuj tiv nag, tiv kub tiv no mus kom txog chaw. Lawv muaj peev xwm tho kom tau luag tej qhov vaj qhov tsev mus. Tej tus kuj muaj peev xwm muab nws niam nws txiv tua kom tuag. Lawv ua kom lawv lub plab tsau xwb, ces txaus lawv siab lawm. Tej tsam mas cov neeg no lawv kuj muaj hwj chim cuag li cov thawj neeg thiab.

Yaj Zoov Ntxheb Xib Hwb.

Tus neeg txawj hais lus, tuaj saum kev thoob tsib tuaj, mas thaum nws hais nws zaj lus nrov tuaj. Mas nws piav tau nws zaj lus tseeb cuag li zaj cinemas, los Hmoob ib zaj dab neeg ua rau neeg to taub lub ntsiab lus uas nws xav hais rau luag tej hnov. Tus neeg txawj hais lus, thaum nws tham txog ib zaj lus, mas nyob hauv zaj lus ntawd zoo li yog ib daim duab, uas nws muab nthuav hlo rau sawv daws saib. Thaum nws hais lus tas ces sawv daws nkag siab los to taub tag, nyob hauv nws zaj lus piav ntawd.
Nyob hauv Hmoob cov lus tus piv txwv lus hais tau meej thiab ua kom neeg to taub zaj lus thiab cim tau mas, yog Hmoob cov dab neeg. Luag hais dab neeg mas,hais ib lwm xwb sawv daws cim tau thiab to taub zaj lus tas nrho.n Nkag siab tia, zaj dab neeg ntawd lub ntshiab xav qhia dab tsis. Ib tug neeg yuav mus ua tus thoob xo, los xa xov, txhais lus,thiab ntuav lus, thaum nws hais cov ntsiab lus ntawd tas, ua rau neeg paub thiab to taub nws zaj lus tseeb li hmoob hais dab neeg, mas tus ntawd yog neeg txawj hais lus lawm.
Hos tus uas nws hais lus tas neeg tsis paub nws cov lus , yog hais txog dab tsi, nws tuaj tshab xo, los ceeb toom, muaj xwm los yog tuaj cog paj los cog pos,mas nws tseem tsis tau txawj hais lus. Nws muab tsis tau tus ko lus los lub ntsiab lus los hais, kom neeg to taub tias cov lus nws hais tawm los ntawd yog lus tu siab los lus zoo siab.
Yog lus ceeb toom kom paub los lus qhia los lus lam tshaj tawm rau hnov xwb.
Cov neeg xav nce mus ua luag tus thawj neeg mas yuav tau xyaum hais lus kom luag to taub ces yuav tau xyaum kom hais tau cov lus thoob tsib uas neeg nkag siab sai li ib tug Hmoob hais zaj dab neeg rau luag mloog, mas yus thiaj txawj hais lus zoo..
Yaj Zoov Ntxheb Xib Hwb.

Zaj Hmoob tau zoo Looj Mem no, sau thiab hais raws li Hmoob lub tswv yim thiab Hmoob zaj xav uas Hmoob coj los txog niaj hnub no.
Cov niam txiv Hmoob thoob tsib mus taug ib txoj kev haum pheej los tsis haum soj qab taug lw mus saib.
Yuav xub txhais lo lus Looj Mem no tso mam piav mus ntxiv:
Looj Mem= txhais tias tus Cwj zag. Looj= yog Zaj. Mem yog tus Cwj qhia kev los taw kev los yog tus mem sau ntawv.
Yog koj paub Looj Me zoo mas koj yuav txais ob sab, mas koj tau tiag. Koj tsis paub Koj mus txais ib sab xwb ces koj tsuas tau ib sab xwb.
1. Cov tub lawv sab Looj mem zoo li no.
Haiv Hmoob txhua xeem tej niam txiv yeej xav foom kom cov tub tau zoo Looj Mem xwb. Lawv paub tsis txog txheej siab saud. Lawv xav tias foom ces yeej yuav tsum tau zoo Looj Mem xwb li.
2. Cov tub yeej tau tiag li tej niam txiv xav lawm ntag:
Cov tub sawv daws yeej tau zoo Looj mem tas txhua tus li. Vim li cas ho tau!
a->Saib, cov tub lawv tau txais niam txiv lub cuab tam los ua lawv tug.
b->Cov tub yuav poj yuav sev, niam txiv them nqi tshoob tas nrho rau.
c->Txob tau plaub ntug los niam txiv then tib si rau thiab.
d->Tau ua nom ua tswv ua luag tus thawj los niam txiv txhawb tib si kom zoo rau.
e->Muaj noj haus tsis txaus los niam txiv pab tib si rau.
f->Tus tsis ua hauj lwm los niam txiv yug rau kom hlob tas, niam txiv tseem tau yug kom lkaus thiab.
Tas nrho tej hais los no, ces cov tub tau txais ntawm niam thiab txiv los tib sis lawm, ua cas yuav tsis tau zoo looj mem. Tau zoo Looj Mem tas nrho, li tus txiv xaiv foom los li lawm tiag.
3. Tau cov Looj Mem hais los saum no, mas yog tus Looj Mem raug tau pem ntuj poob los xwb. Nws tsis yog tus ua Tus txiv xaiv foom los!
Tus Looj Mem uas tseem tus Looj Tim txawm nyob hauv tus Looj Tswv Lauj, mas muaj ob sab:
a. Tus Looj Mem Tswv Luaj los Tim Looj Tswv av.
b.Tus Looj Mem kab teg thiab Cwj kos kab ntaw thiab mas thiaj tau tas nrho, tus zoo Looj Mem.
Yog Koj ntseeg lawm ces koj pw tos kom nws cia li los xwb los nws yeej los ntag. Los , los koj tsis paub siv nws, koj duav tsis khov zog tsis loj, txawm los lawm los koj ua tsis tau.
Koj txais tus Looj mem kab teg no nrog mas hnub nws los txog koj tsis xav yuav tsis xav ua los luag yuav tuaj pe kom koj ua li. Luag yeej hu koj ua thawj neeg, kom koj mus zaum luag hauv rooj hais luag hauv lus. Noj luag hau qav li, ces koj yuav tau ua xwb.
Cov Ntxhais sab.
Cov Ntxhais, mas niam txiv yeej ib txwm tsis faib rau. Tig fee zog los saib ntxhais sab xwb mas luag tsis kam li, tsam cov ntxhais ho tau zoo lawm mas tsis kam tig li od.
Cov ntxhais mas lawv tu siab nrho txog tus Looj Mem Tswv Luaj los Tim Looj Tswv av no.
Cov ntxhais lawv rau siab ntso mus tos Looj Mem kab teg no xwb. Tus no yog Zaj Laug tus Cwj kos ntawv. Yam li:
1. Nyob Los Kuj teb thaum ub cov Ntxhais tsis tau kawm txuj lawv kuj mus tsis txog twg li thib.
Nyiam no ntuj dav tuaj lawm neeg hloov tas ntau niam txiv tsis foom rau cov ntxhais los lawv txawj mus txais sab Looj Mem kab teg ces lawv tuav tau zaj laug tus cwj kos ntawv lawm, ces cov ntxhais muaj peev xwm dua cov tub tuaj lawm thiab.
2. Nyob Mis kuj los Fuaj Kuj teb chaws Cov tub 100 leej mus rag txuj tsuas muaj 30 leej rag nto.
Hos cov ntxhais lawv mus rag txuj 100 leej lawv rag nto 49 leeg li lawm.
3. Hmoob cov ntxhais lawv rag txuj tau zoo kawg tshuav ib yam uas lawv tsis nco qab txog, lawv muab txoj kev zoo nkauj los hnav, ces lawv tsis ceev faj lawm. Hmoob cov ntxhais yog neeg muaj nqes heev. Lawv cia muab lawv txo ua ib tug nqe pheej yig rau cov txiv neej. Ces cov nraug Mab lawv xub nyeem tau cov ntxhais no zaj xav thiab lub txwv yim. Ces muaj 50 % tus ntxhais rag txuj tas ua neeg thoob tsib lawm. Mas yog cov nraug Mab xub pom thiab xub paub ua ntej cov nraug Hmoob lawm, thaum Cov nrug Hmoob paub txog mas twb yog tsov xubcoj Ntxaum ua ntej lawm xwb.
Txawm tsis tau foom rau los tus txawj mus txais yeej yuav tau txais xwb. Tus Looj Mem no tsis yog ntiaj teb li txiv neej tug. Uas poj niam tsis muaj cai txais. Cov uas poj niam tsis muaj cais txais niam txiv yeej hwm rau cov tub lawd, yog thawj tshooj lus xub hais los lawd saum co tsiaj ntawv a.b.c...f, ntawd ntag.


Yaj zoov Ntxheb Xib Hwb.

Hmoob ob zaj txuj ci, los ob lo lus Hmoob hais no:
Lo lus Zaj tshoob thiab txiv Xaiv foom kom ntawd, vim li cas ho muab hu zoo li ntawd?
1. Zaj tshoob yog hais tias Zaj ua tus qhia rau Hmoob hais. Hmoob thiaj paub hais los mus lawm.
2. Txiv Xaiv, yog Leej txiv tau xaiv ib tug yawg laus nyob tid tuaj qhuab qhia, los ntuas nws cov tub, ces thiaj tis lub npe hu ua txiv xaiv no.
Zaum no yuav nthuav ob lo lus no:
1. Zaj Tshoob, yog hais tias,Yog Zaj lus Zaj ua tus qhia los. Hmoob kawm ntawm Zaj laug los Puj Zag los, ces thiaj hu ua zaj tshoob no xwb. Kuj yog ib zaj lus ua txuj ci hais rau saum kev muab nyab los qua ntxhais ces thiaj hais hom lus ntawd.
Hmoob ua tshoob kos thiab cov lus txhoob kos cov zaj cov haiv no muaj tshwm sim los tom qab dej nyab ntiaj teb tas mam li muaj. Neeg tau tsim thiab siv los mus.
Yog ib co lus ua paj lug hais. Dej nyab ntiaj teb ces Zaj kuav hmoob ntawv txiaj tshoob thiab ntawv ntsis kos mus rau Zaj teb tas lawm. Coj neeg mus tag rau hauv dej lawm. Nyob hauv dej ces muaj zaj thiab hais tias yog Zaj teb ces yog hauv qhov dej tob thiab dej loj. Zoo li poj niam txiv neej mas tsis tshuav leej twg nyob li lawm. Zaum no ces tsuas tshuav Nkauj Muam thiab Nraug Nus nkawd lawm xwb. Vim nkawd siab ncaj ces Ntuj qhia kom Nkawd zoj nruas Daj, ces nruas daj thiaj ntab yees rau saum yaj, Nkawd siab zoo, Ntuj qhia nkawd mus zoj nruas ntoo, nruas ntoo, thiaj ntab yees rau saum npoo. Nkawd yuav rov sib yuav, Los nkawd tseem txaj muag thiab. Ces teem caij tseg, tso Nkauj Muam mus nrhiav rau hauv ntuj, hos Nraug Nus mus nrhiav rau qab ntug. Nkawd ib leeg mus nrhiav tau cuaj xyoos puag lis zus, los noob neej noob tsav nyob tuag mus lawm tiag. Tshuav Nkauj Muam thiab Nraus Nus nkawd niaj ob tib tug xwb. Nkawd tseem txaj muag dua thiab, thiaj ris zeb tuaj nruab roob dov zeb tuaj nruab tiag. Zeb ntog zeb los sis puab ces Nkauj Muam thiab Nraug Nus nkawd mam los mus vij cuab. Yog thawj tiam tib neeg sib yuav tom qab dej nyab ntiaj teb tas.
Mam yug tau Liaj Lwg thiab Rhwv Yis Mws nkawd, Liaj Lwg yog tus tub, los tus Nus. Rhwv Yis Mws yog tus Ntxhais, los tus Muam. Nkawd tsis txaus siab sib yuav ces nkad mam mus taug ntawv txiaj tshoob qab dua thiab. Nkawd mus taug ntawv txiaj tshoob thiab ntawv ntsis kos lw, Mam mus nug Puj Zag. Nkawd nug puj Zag tias, Puj Zag, koj mus kov hauv dej li ntua, koj puas pom Liaj Lwg Rhwv Yis Mws ntawv txiaj tshoob ntab los txhua?Koj mus kov hauv dej li zus koj puas pom wb Liaj Lwg thiab Rhwv Yis Mws me ntawv txiaj tshoob ntsis kos ntab los mus?
Puj Zag hais tias, kuv puj Zag ces mus kov hauv dej li zus ces kuv pom Liaj Lwg thiab Rhwv Yis Mws neb ntswv txiaj tshoob ntsis koj ntab los mus. { hais tias dej nyab tuag tas lawm tiag.} Neb yuav mus phwb tshoob ces neb mus saib puj qaib tus txhav xub puab. Yog to ntshua plaub txub plaub sis mos, ces yog to ntshua, Liaj Lwg thiab Rhwv Yis Mws Neb daim ntawv ntsis kos no. Neb mus saib puj qaib tus txhav xub tis, to ntshua plaub txub plaub sis thoob, ces yog to ntshua Liaj Lwg thiab Rhwv Yis Mws neb daim ntawv tshoob no. Nkawd mas rov los nyob ua txij ua nkawm. Thaum Hmoob ua tshoob ua kos Hmoob taug ntawv txiaj tshoob qab ces Hmoob hais tej no xwb.
Hmoob Kheev muab Huab Tais thiab tej Nom Tswv loj hu ua Zaj laug no, Hmoob cov tshoob kos yog tshoob huab Tais thiab tshoob nom tshoob tswv xwb. Cov lus tshoob kuj yog lus nom lus tswv xwb ces thiaj hais tias tub ntsuag mus yuav Zaj Laug ntxhais ntxawm, Tub Ntsuag yog tub ntse, kawg puj Zag thiaj paub tau, hos Zaj Laug mas twb tau ua Vauv lawm mas paub tias,yog vauv zoo mam paub tom qab xwb, twb yuav luag mus li tias paub li mas, ces twb yuav luag yog lo lus lig lawm.Cov tub ntsuag tau Zaj Laug ntxhais ntxawm mas puav leej yog Puj Zag pom zoo muab rau tub ntsuag ntau xwb. Hais txog sab sib pub tub ntxhais no, poj niam paub zoo dua cov txiv neej. Cov txiv neej lawv muaj ntsis tsis nco qab txog lawv lub siab ntshaw thaum lawv tseem hluas es lawv mus yuav nyab. Nws yeej tsis nyiam lo lus uas muaj neeg los cuam tshuam tsis pub sib yuav. Tab sis tiam twg los tus tsis pom zoo ntau zaus yog cov txiv neej ntau xwb.
Cov Zaj tshoob tos hais zaj tshoob pheej hais lub suab tias, Hais Zoo Liv Kus. Yog Cuaj Khaum lub npe, Puj Zag muab Puj Zag Vauv hloov npe tis hu ua LIV KUS no.
Zaj Kwv huam yog mus li no:
Muaj ob tug niam txiv Hmoob yug tau cuaj leeg tub. Tus tub ntxawg nkawd muab hu ua Cuaj no. Cov hlob cais vaj cais tsev tas lawm, nyias mus nyob nyias tas. Thiab Hmoob kev cais mas tej laus hmoob cia Niam txiv lub cuab tam, liaj teb los tsiaj txhu rau tus tub ntxawg, los sis cia rau tus yau.
Hnub uas Leej Txiv tas txoj yawg lawm cov ua tij xav txeeb lub cuab tam los yuav muab faib rau sawv daws sib npaug, Ces Cuaj tsis kam.
Cov ua tij thiaj muab Cuaj pav kwv mus khaum pem roob saum ib tug ntoo kom yawg Cuaj ntawd tuag mus. Hmoob los lus CUAJ KHAUM= yog qia dub, ces yob tawm ntawm yawg Cuaj no los, thiaj siav npe hu ua neeg CUAJ KHAUM no. Yog lus foom kom tuag mus li yawg Cuaj ntawd ntag. Thaum cov tij rov mus tsev lawm Cuaj nti nti, ces Cuaj poob los rau hauv av, Cuaj ho tsis tuag. Nws tsis tau luag taug kev , ces nws taug dej nqes hav rov los tsev. Ces Cuaj los ntsib Zaj laug ntxhais Ntxawm.{ Ntsib Huab Tais tus ntxhais Ntxawm.}
Zaj Laug ntxhais ntxawm txawm nyiam Cuaj lawm. Zaj laug yuav muab Cuaj tua pov tseg, Hmoob hais tias Zaj laug yuav muabNtsuag, los Cuaj ua ntxuag cawv. Puj Zag paub zoo ces puj Zag hais rau Zaj Laug tias, cia Puj Zag mam saib xyuas rau. Ces Puj Zag thiaj muab lub kaus roos Zaj Laug ntxhais Ntxawm ces Puj Zaj muab xa Cuaj thiab Ntxhais Ntawm nkawd mus nrauj zoo, ces puj Zag hais tias nws twb saib xyuas tiav lawm.
Puj Zag muab nws ntxhais Ntxawm ntim los qhwv rau hauv lub kaus xa mus txog chaw mam nthuav, ces Nkauj Zag poob nthav hauv lub kaus los.
Twb yog Puj Zag muab lub Kaus ntawd roos Ntxhais ntxawm kom tsis muaj neeg pom nws tawm rooj mus.
Hmoob muab Zaj kwv huam no los mus ua tshoob hais tias, lub kaus ntawd ces yog roos Nkauj nyab sab ntsuj plig kom dab lwj hlaws nees raws tsis tau. Cov dab tuag txhob raws tau no xwb.
Puj Zag thiaj muab Cuaj hloov npe tis hu ua LIV KUS no, kom nws cov tij nrhiav tsis tau thiab yog ib lub npe muaj koob meej lawm.
Cov zaj tshoob thiaj siv lub suab hais tias, HAIS ZOO LIV KUS, kuv niam kuv txiv cuaj hnub yuav mus phwb tshoob, yim hmo yuav mus phwb kos, lag yau wb li ntauj nog tuaj txog....
Ua ntej Liv Kus tseem mus taus kev mas, cov mus ua tshoob yeej thov kom Liv Kus nqa nws lub kaus mus roos nnyab xwb. Tom qab Liv Kus laus lawm Nws tso cai rau neeg nqa lub kaus mus roos nyab lawm mas thiaj yog tus txiv tuam mej koob ua tus nqa lub kaus ntawd mus ua tshoob.
Hmoob tus txiv tuam mej koob tsim txiaj npaum li As Mes Lis Kas tus Lov yawj hais plaub ntug. Los ib yam li Fab Kis As Vaus Kas mus txheem plaub thiab ntag. Tus tsis ntse ua tsis tau txiv tuam meej koob hais tshoob tsis tau. Yog nws tsis txawj ua Txiv tuam mej koob ces niam txiv ob tog yeej plam tsis tau tshoob tau kos li od, thiab tseem tau xaiv tau lus nrog thiab....
2. Cov txiv Xaiv. Tsis yog Zaj qhia los. Yog ib leej txiv nws muaj tub coob nws tsis tau qhia nws cov tub thiab lawv tsis mloog lus Leej Txiv xaiv ib tug neeg cia tseg thaum txog lub cawv xeeb cawv lav tus leej txiv xaiv ntawd nws mam tuaj hais cov lus qhuab qhia raws li leej txiv xaiv nws cia. Ces thiaj hu ua Zaj txiv xaiv. { Zaj,yog lo lus los zaj lus ntawm tus leej txiv xaiv tau ntawd cov zaj lus, thiaj hu ua zaj txiv xaiv no, Hais tias. Yog ib tshooj lus no xwb. Tsis yog zaj cov lus. Xws li kwv txhiaj, yog ib tshooj lus los ib txwm lus no xwb.
Cov lus nyob hauv lub ntees pam tuag, mas kuj muaj kwv huam los li no thiab:
Muaj ib tug yawg nws muaj tub ki coob nws cov tub hlob tuaj tas. Nyias mus nyias tus nyob deb los nyob ze kuj muaj. Tsis muaj leej twg xav tsob hwb leej txiv tus laus ntawd li. Thaum Leej Txiv tuag tsis muaj leej twg tuaj tsob zeem nta lub ntees ntawd ces Tub ceev xwm thiaj mus ntses cov tub los cuab, khi. Qhov ntoo xyom thiab thiaj hu lawv ua tub xyom cuab ces hu tias cov mag cuab khi no ntag od, thiab yuav tau los pe hawm. Ces thiaj muab lawv hu ua xyom cuab, yog cov raug cuab los pe hawm.
[ Kav xwm= yog Police].
Thaum hais xim thiaj muaj cov txheeb ze. Cuab tsav yog tus thawj neeg ntawm lub xeem ntag. Muam Phauj, los txiv dab laug yog ob tug nus muag kev neej kev tsav sib ze dua cov. Ib tug ze rau Leej niam sab, hos ib tug ze rau Leej txiv sab. Mam muaj xeev txwj laug Yog tus nkov ves nawm {Yog tus tsawb Kav los Txoov Kav, hauv lub nroog ntawd ntag.} Dua li cov thiaj yog tub txib, ces hu ua tub qav tub num vim thov tuaj ua num nta kev noj kev haus hauv lub ntees ntawd , Kav xwm ua tus coj pab neeg ntawd..
Ob tug kav xwm sawv qab nteeg thiaj hu ua ob tug tub hais xaiv los tub coj xai. Nkawd hais cov xaiv lus xyom cuab tsis mloog lus ntawd. Thiab hais txog kev ua neeg tsim txiaj, txhob mus deev luag poj luag sev, Ua tub sab tub nyiag. Ua neeg xyom seej xyom hauv sib hlub. Cuab tsav tuaj lees cov lus ntawd.
Ob tug muam phauj los txiv dab laug tuaj hais cov lus ua neej nyob noj tsis sib hlub haus tsis sib ce ib leej saib tsis tau leeg. Tuaj noj nkawd pluas mov kawg tu moo tias choj lov lawm ces kev tu zaum no lauj!
Tus Xeev txwj ces tus laus los ua neej dai nws qab vag tsib taug muaj nws sis hlub sis pab, zaum no tus laus no tso tes plhuav nws mus lawm ces yuav plam nws nws ib txhais npab no lauj. Dua li cov ces yuav ua lawv tsaug rau lawv kev iab kev khwb kom lawv huaj vam mus zoo thiab foom pub kom lawv muaj tub muaj ntxhais zoo nkauj zoo nraug nyob tom qab. Hais rau xyoom cuab los kom zoo rau lawv thiab ua neej ib leeg hlub leeg kom ua neej tshav ntuj nrig,sib luag mus. qhia rau Ntuj kom Ntuj pom Ntuj hlub neeg pom los kom neeg nyiam thiab ntshaw no.
Hmoob ob txoj cai thiab cov txuj no yog kev sib pab ua neej kom zoo zuj zus tuaj tiam zoo dua tiam mus lawm tom ntej xwb. Tsis txuam kev teev dab rau hauv li. Tsuas yog cov lus hais muaj dab rau xwb. Nws tsis yog ib tug dab zoo li cas li! Dab ces yog pom tus qauv neeg phem lawm ces cia hu ua dab tuag no xwb. Yog tus dab tseeb tiag nws kuj tsis zoo li ntawd thiab.


Yaj Zoov NtxhebX.H.

Nyob zoo txoom phooj ywg sawv saws txhua tus,lub xyoo no nej txhxua tus, cov sau ntawv tuaj kuv puav leej tau txais tib si lawm.
Ua tsaug rau nej txhua tus, Kuv Yog Leej Tsob Hwb Jacques Ya Jong Nse,thiab tsev neeg peb nyob zoo.
Xyoo 2016 no kuv thov Ntuj, kom Ntuj tus Tshiab thiab tus Leej Ntshiab, nrog nej nyob pov hwm nej. Kom nej txhua tus, txawj ua tej yam zoo ntxim Tswv Ntuj siab.
Yam uas kuv ntshaw,lub xyoo 2016 yuav yuaj no. Xav kom muaj neeg sib hlub ntau ntau leej, Kon Tswv Ntuj pom, ces Ntuj yuav pub txiaj ntsim rau lub ntiaj teb neeg.
Kom tej nom tswv kav teb chaws sib haum xeeb,tso kev ua tsov rog tseg. Niaj hnub no xwb twb muaj cov neeg siab ntshiab uas tsis tau ua txhaum lawv txais txoj kev tuag.
Tej no ua rau Tswv Ntuj lub siab nyob tsis zoo,peb yuav sib hlub, peb muaj ob peb leeg nyob ua kev xwb los peb sib hlub.
Peb Koom nrog peb niam Mab Liab peb sib koom hais txoj saw Mab Liab, thiab Vam txog Ntuj cov tshiab tsoom Leej Ntshiab pab peb thov Ntuj hloov tej nom tswv lub siab.
Kom lawv hais lus sib haum, muab kev ua rog tso tseg kom lub ntiaj teb tau nyob thaj yeeb. Yog neeg ntiaj teb tsis txawj sib hlub lawm, ces yuav muaj ntuj qhuav tsis los nag.
Los tej thaj chaws yuav tsis los daus, los yuav muaj cua daj cua dub los, thiab muaj ntiaj teb qeeg yam loj. Ua rau muaj roob hluav taws tawg Vim neeg tib co kev sib ntxub no xwb.
Tej yam no tsis yog Ntuj txhob txwm tso los vim neeg xav xav sim kev ua rog, neeg niaj hnub sib tua,pov hoob poob kom av qeeg.
Ces thiaj muaj cua daj cua dub tshuab thiab ntiaj teb qeeg nplawm neeg tej xwv txheej loj no nrog cua mus. Xav kom neeg sib haum xeeb,neeg txhob xav muab lub ntiaj teb rhuav kom ntsoog txom nyem mus.
Txij thaum ntuj tsim teb raug los txog lub caij Yes Xus tuaj them neeg ntiaj teb cov txhaum twb hnyav kawg lawm.
Yes Xus twb ntog ntau zaus vim neeg tej txhaum. Yog ntiaj neeg tseem ua kev txhaum ntxiv mas, kawg Ntuj yuav tso rau neeg xaiv kev txom nyem thoob lub qab ntuj khwb li neeg nyiam.
Thaum neeg xaiv txoj kev txom nyem no coob lawm mas tab yog Yes Xus tuaj txog ntawm peb lub qhov rooj los Nws yuav tsis kam los xyuas peb lub vaj tse.
vim tsis muaj neeg kam txais Yes Xus los tsev. Neeg tej tsev lub twg los twb sw tsis huv txaus Txais Yes Xus los tsev.
Peb lub los tib yam, vim peb tsis nco sib hlub thiab.


sau npe : Yaj Zoov Ntxheb Xib Hwb.

Hmoob kev teev hawm, nws tsis xws li kev teev hawm Huab Tais Tswv Ntuj, los zoo li kev teev hawm Phus Thas.
Kuj tsis zoo li hawm ib tug Nom, los ib tug neeg muaj koob meej thiab.
Tsis paub yuav tis lub npe, los hu li cas thiaj li haum, rau qhov kev teev hawm Hmoob ua ntawd.
Tas kuv sim neej nyob laus nkoos li no twb yuav muaj 80 xyoo. Kuv tsis tau pom dua ib tug Hmoob mus teev Dab los teev Poj Yawm, xws li teev Ntuj, los mus teev mlom li thiab!
Hmoob tsis mus muab ntoo los av puab ua ib tug dab tuaj muaj kub los muaj kaus coj los mus tso rau ib qho chaw siab, ces mam mus tuaj sab nrad pe hawm los hais ib zaj lus los mus teev. Kom muaj lub npe tias, kuv tuaj pe hawm koj.
Hmoob kev teev tiam Poj Yawm thiab Dab xeeb teb xeeb chaw. Mas Hmoob ua li no:
Thaum Hmoob muaj noj mov nplej tshiab, muaj ib tug tsiaj loj los tua noj, Tua noj quas lub niaj lub xyoo los Hmoob mus muab nyab los txog tsev, thiab muaj ntxhais qua mus ua luag nyab lawm.
Mas Hmoob hais tias laig dab,{hu} yog hu txog tej niam txiv dua nras lawd, thiab hu tus xeeb teb xeeb chaw uas tsim lub ntuj lub teb no,tuaj nrog Hmoob noj, Hmoob haus.
Tuaj noj pov hwm haus pov yawm, tsom kav tsom kwm lub caij Hmoob ua qoob ua loo, ncig toj ncig pes, kom txhob muaj hmab los dawm taw, thiab hlua los dawm tes, tsis pub kom muaj xaiv muaj lus, kom hmoob tau nyob kaj nyob huv.
Zoo li ib zaj cog lus thov Ntuj luv luv thov Ntuj thiab niam txiv tuaj pov hwm Hmoob xwb. Yog hu txog cov neeg laus dua nras thiab Ntuj xwb.{ Tus Dab xeeb teb xeeb chaw, yog Huab Tais Ntuj. Ntuj thiaj xeeb tau, Ntuj twb xeeb muaj lub ntuj lub teb tas lawm,Dab mam tuaj nyob. Dab xeeb tsis tau lub ntuj lub teb no ib zaug li.

1. Ib xyoos ntuj zeeg, Hmoob tsis muaj noj muaj haus, Hmoob kuj tsis hu txog lawv li. Hnub twg Hmoob muaj ib qho loj noj haus txaus hu mas Hmoob nco ntsoov hu txhua lub caij.
2. Thaum Hmoob mus rau nruab zoov nruab tsuag lawm, Hmoob noj mov, Hmoob liag {hu] txog tis:
Tus hu hais tias,Niam thiab Txiv, Dab xeeb teb xeeb chaw, peb, los kuv nyob nruab zoov nruab tsuag, kuv noj mov hu txoj nej los nrog kuv noj kuv haus. Pov hwm kuv kom tau nyob kaj nyob huv aud!
3. Tsis hais tus laus los hluas, txiv neej los poj niam li, sawv daws coj li no:
Thaum nws ntshai los pom ib yam xwv txheej txav los, los cia li ncaj qha los. Thiab nws ntog, los poob ib qho chaw siab los. Sawv daws hu, los hais tias, Niam aw! Txiv aw! Los Ntuj aw! Pab laujd...
4. Kev hu plig, thaum Hmoob tau ceeb tau ntshai, los ntog raug sab lawm, los mus ib leeg raug neeg hem los ntshai dab hem thiab ntshai tsov tom. Hmoob hu plig. Tsam tus ntsuj plig ntshai ces ntsuj plig tsis nyob nrog lub cev lawm. Hmoob hu kom hnov hais tseeb tias muaj niam muaj txiv pom lub cev tseem muaj txoj sia nyob, kom tus ntsuj plig txhob ncaim lub cev mus. Ntsuj plig ho tau ceeb tau ntshai pw nruab av los nraim nruab zoov nruab tsuag lawm no cia li los nyob nrog tus ntsuj ce kom ntsuj duab ntsuj ce nyob sis puab. Hmoob ntshai tsam ntsuj plig ntshai tias ntsuj ce raug sab ces ho tau tuag mus lawm. Ces Hmoob hu thiab xav li ntawd xwb.
Qhov tseeb ces yog hnov ib los lus meej tias tsis muaj xwm dab tsi ces siab loj thiab zoo xwb.
5. Kev ua Neeb tsis yog kev teev Dab! Ua Neeb, Tus Txiv Neeb ntawd yog ib tug Txiv Txheem plaub ntug.
Hmoob tus Txiv Neeb zoo li As Mes Lis Kas tus Lov Yawm, sawv cev mus tiv plaub ntug,thiab xws li Fab Kis tus As Vaus Kas mus txheem plaub ntug xwb. Tus Txiv Neeb zoo li yog tus thawj tub rog mus ntaus Dab.
Txiv Neeb yog Tuam Thawj Peeb, nws muaj ob pab tub rog. Cov caij nees uas hu ua peeb muas no yog pab, caij nees mus. Tus Txiv Neeb Nws caij thawj tug nees ua ntej hlo mus ntag. Pab tub rog mus taw,yog cov peeb Zeej, lawv lawv qab tuaj. Yog pab ris zaub mov nqaij hno txhij vog ntag.
Ua neeb mus nruab yeeb, yog mus nrog Dab tawm tsam ncauj lus. Hmoob ntseeg cov dab qus ntawd nyob zoo li tom tej ntug kev, ces Hmoob mus ze ntawd tsam ho tau dawm raug dab los hla tau dab taub hau ces tub qaug dab lawm, Dab thiaj tom kom Hmoob mob plab los dias taub hau. Ces thiaj hu tus txawj ua neeb tuaj mus nrog Dab sib tawm tsam.
Yog tau ua txhaum lawm, no ces them nyiaj txiag thiab xyab los ntawv rau dab. Yog Dab ntes tau tus ntsuj cev lawm no ces mam li muab qaib npua mus hloov rov los. Ua li uas Dab yuav muab tua noj, ces muab tsiaj mus pauv kom dab muab tsiaj mus tua noj. Kom tso neeg tus ntsuj ce rov los nrog tus ntsuj duab nyob ua ke. Kom Ntsuj Plig txhob tawm mus.
Them tas lawm, muab tus tsiaj tua, los Dab haus pa xwb, vim Dab tsis muaj lub cev,cia neeg noj nqaij.
Kev tso siab los ntawm tus txiv neeb los. Hmoob ntseeg tias thaum tus txiv neeb nws ua neeb mas nws tus Ntsuj plig nce tau mus saum ntuj los nws nqes tau mus rau nruab yeeb, mus nrog Ntuj los Dab tham tau, li koj coj tus yawg As Vaus Kas, thiab tus Lov yawm, mus hais plaub. Nws paub tias yus yeej los yus swb lawm no laid.
6. Thaum koj saib tej lus hais no tas mas, koj saib Hmoob kev teev hawm txawv li Txoj kev teev hawm Tswv Ntuj thiab teev hawm mlom.
a. Mab Sua zoo li Los Tsuas kev teev dab, mas lawv ua ib lub phaj tsum mov me me muaj nqaij muaj mov, los txiv xyoob txiv ntoo rau hauv, nqa mus tso rau tom tej pob ntoos, los saum pob zeb, hais rau Dab tias, dab nej tshaib nej nqhis no los noj, nqaij mov nyob ntawm no aud!
b. Hmoob ho tsis ua txog li tej no. Hmoob ua nyob saum rooj mov, hais lus tas ces sawv daws noj xwb. Noj ua ke li nyob saum yaj no sawv daws nyob ua ib cuab ib yim. Yog hais tas nrho los mas Haiv Hmoob tsis muaj kev teev hawm Dab li lo lus hais tias Hmoob teev dab qhuas. Hmoob saib li tej laus xub pom, thiab xub paub tias, xwv txheej yuav muaj tuaj zoo li cas. Kom noj pov hwm pov yawm tej tub ki, ua neej kom nyob dawb nyob huv, thiab nyob kaj siab xwb. Tej zaum mas yog tsis paub lo lus ces txhais tsis tau kom meej xwb. Lo lus teev dab no ntshai yog tej Mab sua nug saib Hmoob puas muaj kab lis kev cai teev hawm. Ces Hmoob txhais tau li no rau Mab Sua lawm xwb. Hmoob tsis muaj kev teev dab, Hmoob thiaj tsis paub, ces Hmoob hloov kev ntseeg, Hmoob lam hais tias yog kev teev Dab no, tab sis tsis yog ib qho li.


Yaj Zoov Ntxheb Xib Hwb.

Hmoob kev ntseeg txij thaum ntuj tsim teb raug los txog niaj hnub no, los nws tseem nqes los tsis txawj tas li.
Kuv tsis hais tias Hmoob txoj kev ntseeg. Hos kuv hais tias Hmoob cov kev ntseeg.
Vim tias, Hmoob cov kev ntseeg twb yog ib txoj xwb los Hmoob hais tias sib Txawv no thiab. Dab qhuas yog ib hom xwb los Hmoob kuj hais tias txawv:
Ib cov muaj dab ntau, hos ib cov ho muaj dab tsawg. Cov dab qub los cov dab txia. Cov nco ntsoov ua li qub los cov ho ntxiv rau lawm.
Hmoob cov Dab thiab Hmoob cov Vaj los ua ke, yog muab sib cais, kuj tsis paub,nyuaj me ntsis:
Tus nqes ntawm Vaj Tswv Ntuj los qhia Hmoob teev hawm, thiab tus Vaj nqes los kav Hmoob ua neej rau lub qab ntuj no, kom Hmoob muaj teb muaj chaw nyob xws li zeej tsoom Mab Sua. Mas kuj tsis sib txawv, tej pab mas cia li muab, nws los ua Huab Tais teev hawm. Hos tej pab ho muab nws ua Huab Tais Vaj kav ntiaj teb xwb thiab.
Mloog mas zoo li Hmoob Cov Huab Tais qhia kev teev Hawm thiab cov Vaj yuav los kav thiab coj hmoob nyob ntiaj teb no, mas nyob pem ntuj muaj ntau tus kawg li. Lawv los tsis paub tas rau ntiaj teb no li.
Lawv nyob ua phiaj zias tos, txog leej twg sij hawm mas tus ntawd mam li los. Tus Huab Tais coj sab Ntsuj Plig thiab tus los ua Hmoob tus Vaj muaj ntsis los thooj txhij.
Tus tshiab los txog mas nws hloov dab qhuas kev teev hawm nrog kev coj kav tib neeg dua tshiab mus, raws li nws nyiam.
Hmoob cov kev ntseeg tuaj, los nqes los nrog ib tug neeg muaj hwj chim. Los nrog ib zaj dab neeg,xws li ib tug qub neeg muaj hwj chim yav ntuj thaum ub los
Hmoob kev ntseeg puav leej ncau los ntawm txhua yam. Los txhua tus. Thiab txhua zaj dab neeg los:
1. Tawm ntawm cov dab neeg, zoo li Nkauj Ntsuab Thiab Nraug Nab,Vaj Yaj Yuam, Yaj Txiv Yawg, Vwj Paj Yig,Tuam Nqaj Kab, Txoov Vam Khib,Vaj Yim Leej, Vaj Xeem Xais.... Cov no yog txheej laus thaud tsis tau khiav Suav teb los.
Lawv tseem yog lub caij siv ntaj siv hmuv los sib tua.
Txij thaum Hmoob thiab Suav muaj kev ciaj Caub los. Ces Hmoob pib sawv los zuj zus rau Xov Tshoj teb cov phiaj nom tshiab no:
Tus yuav lug pib, yog Tswv Xyas, Nws sawv tsis taus ces, nws tig mus ua Tsov, los tos neeg mus ua rog,rau av luaj thaws. Tswv Xyas ua ib tug Vaj kav cov neeg tuag thiab tom tsiaj noj nkaus xwb. Ces thiaj ua rau neej los ntxub, hos dab los ntxub thiab.
Dhau yawg Tswv Xyas lawm mas yog, Paj Cai sawv, Lauj Kiab Toom, Lis Foom. Vaj Pov sawv los pab Huab Tais Los Tsuas. Cov no tas huv siv los kav Hnoob tau ob tiam neeg xam thaum yug los thiab hlob mus txog laus.
Cov npe tawm ua zem zuag,yuav nto los ua Huab Tais los ua Vaj,yog Yaj Soob Lwj, Zoov Zuag Hawj, Paj Kaub Hawj,... Cov hais Keeb kwm, thiab Pab niam toj txiv toj, Hmoob yog cov hais tias, sawv ua Saub... Txawj ua neeb tso ntsuj plig mus thawj thiab... ntuas Haiv Hmoob kom txhob ua kev khaum kev txhaum, mus ntxiv lawm tom ntej.
Hmoob kev ntseeg sawv tshiab,thiab cov nqes pem ntuj los muaj ntau txoj kawg li thiab:
1. Ib txwm Hmoob coj cov kev ntseeg muaj Xwm Kab, nyuj dab, npua tai, dab roog. Laig poj yawm thiab xeeb teb xeeb chaw.
2. Xyoo 1950 Kev Ntsee Tswv Ntuj muaj Yes Xus lub Moo Zoo nyob hauv tuaj txog cov Hmoob nyob Los Tsuas teb:
-Cov Ka Tau Liv. Cov Protestant hu ua,C I M. thiab cov Batisme.
Hmoob tuaj Txog USA teb no mas Hmoob ntsib ntau pab cov Protestants. Suav tsis tshua tau tias muaj pes tsawg pab li lawm.
3. Xyoo 1960 Yaj Soob Lwj kev qhuab qhia tuaj txog Hmoob lub caij Vaj Pov tsim lub nroog Looj Ceeb.
Yaj Soob Lwj kev qhuab qhia thiab txuj ci maj mam hlob tuaj pib xyoo 1975 Hmoob ua neeg thoj nam los rau xyoo 2015 no.
Yaj Soob Lwj kev qhuab qhia txuam nrog Vaj Tswv Ntuj, thiab Phab Phu Thas Caub muaj sib xyaws me ntsis, zoo li Yaj Soob Lwj tuaj nyob ze Pha phu Thas Caub, thiab Vaj Leej txiv cov txuj cime ntsis thiab. Kuv mas khuv xim ua cas tsis tuaj lub caij uas Suav muaj caub chim rau Hmoob suav muab Hmoob txuj ci rhuav tas ces Hmoov ho tau muab los siv. Zaum no ntshai Hmoob twb sib haum xeeb tas lawm. Vim tias ib Haiv neeg thoob tsib li Haiv Hmoob mas tsis phim cia kom Hmoob ua neeg txom nyem poob qab muab los ntau tiam. Uas Hmoob tau muab tej txuj ci mus zais rau Hmoob tej paj ntaub tw siv,poj niam thiaj txawj nrhia, txiv neej tsis paub, Txiv neej tsuas paub zaj paub haiv, poj niam ho tsis paub thiab.
Xyoo 2013, muaj ib tug, Niam Toj, Nws ua neeb mus tsa tau Niam Nkauj Ntsuab nyob qhov tsua Thaib teb sawv los ua Hmoob Leej Niam rau Hmoob tau teev hawm lawm. Nws tsa tau Nruag Nab sawv los ua Hmoob tus mem toj pov hwm Hmoob lawm thiab.
Hos ua ntej xyoo 2000 ntawd Yes Xus tus muam cia li poob los nyob nram qhov tsua,Nyob Thaib teb thiab, ces Vaj Siv Yis mus yuav tau los ua nws poj niam. Nws coj mus txog USA teb, nyob tsis taus, tau mus nyob rau av Xab Xeeb kaum Siv Yis yuav kom muaj txog li 13 tug txiv neeb mus ua ib thaj neeb tso meej mom los txawb Hmoob kom muaj teb chaws nrog Mab Sua nyob. Ces tau peb tug txiv neeb xwb.Thaum lawv tab tom ua neeb txog tog tus txiv neeb nyob Los Kuj teb vau hlo tuag kiag lawm. Tus nyob Thaim Kuj teb ntog teeg vau hlo tsis tau tuag. Ces Siv Yis rov loo rau USA teb lawm. Nws los tsa lub Koom hawm teev hawm poj koob yawm Ntxwg... Txhais tau tias lawv kuj muaj peb leeg Huab Tais loj thiab:
Yawm Ntxwg yog tus 1, Yawm Xob yog tus 2, Hos Yawm Zaj Laug yog tus 3.
Hos nyiam no nyob Mis Kuj teb chaws. Maiv Ntxawm twb sawv lawm. Yes Xus twb yug ntawm Maiv Ntxawm los twb yuav muaj 12 xyoos. Cov mus teev Maiv Ntxawm tam sim no mas yog cov muaj hmoo. leej twg tsis maj nroos mas yuav raws tsis cuag luag li, hais li no mas kuj tsis paub yuav mus ncua kev deb li cas thiab.
Kuv ib tug phooj ywg Hmoob xeem Lauj nws nyuam qhuav ua neeb mus tso cov neeg raug txim nyob teb chaws raug txim los. Nws hais tias,nws ua neeb mus tso tau Lauj Kiab Toom, thiab Yawg Lwj Txheeb Vaj Pov tas los lawm. Lwm xyoo nws yuav mus ua neeb tso Yes Xus tawm los thiab, Kuv hnov li no mas kuv kuj cia siab kawg thiab,thaum kuv paub nws ua neeb mus tso tau Yes Xus rov los mas kuv yuav kom nws coj kuv mus xyuas saib Yes Xus, Nws puas zoo li tus duab nyob hauv ntawv,hauv cov ntseeg daid, los txawv me ntsis.
Kuv twb xav tau hauv kuv nruab siab tias Yes Xus yeej yuav txawv me ntsis xwb. Thaum kuv pom lawm mas kuv mam hais qhia nej.
Ntawm kuv tus kheej mas kuv twb xav li no lawm:
Yes Xus zoo kiag li tus neeg uas koj tau tig mus ntsia ntawd lawm ntag. Koj tig mus ntsia ib tug txiv neej ces Nws YOG tus ntawd lawm, koj ho pom ib tug poj niam, Yes Xus kuj zoo kiag li tus koj NTSIA ntawd lawm. Los Yes Xus Nws zoo nkaus li KOJ thiab. Kuv lub hlwb twb pom zoo li no ua ntej lawm. Yes Xus zoo li KOJ los zoo li NWS los zoo li KUV thiab zoo li LAWV. Vim Yes Xus qhia peb hu Tswv Ntuj ua peb Leej Txiv, thiab peb yog Yes Xus cov kwv thiab muam, Yes Xus tau hais lo lus no nyob KasFas Naus los tsis sub ned! Qhov kawg mas Leej Tswv Yim Ntshiab kuj tuaj tsa tsev nyob hauv peb nrub siab. Ua li mas yuav tsis txawv li lo lus kuv hais no.
Yaj Zoov Ntxheb X.H.

Tus Vaj Hmoob yuav nqes los no,raws li cov saub hais niaj hnub no. Mas txij li thaum kuv twb xeev xwm los lawd, uas kuv paub, nyob ze ntawm cov xyoo 1947-48 ntawd los ua ntu zus los txog niaj hnub no, xyoo 2016.
Peb tus yawg Liaj Ntxawm, thiab yawg Tsuas Vws nkawd twb sawv, pib ua vaj Hmoob tos niam txiv niag neeg yuav nqes pem ntuj los.
Nkawd ua tau ib xyoos ces muaj ib lub plaub ntug tuaj, yog ib co tub rog Los Tsuas tuaj ntes nkawd. Ces nkawd ntshai, nkawd tso pov tseg.
Thaum Fab Kis tuaj kav Is Dus Cis, zoo li kav Cob Tsib teb, Khas Npaus Dias, thiab Los Tsuas teb. Yawg Paj Cai sawv ua rog lub hauv paus kuj yog zoo li ntawd me ntsis.
Xyoo 1957 -59 ntawd, nyob sab Sam Neu, thiab sab Luag Nam Tha Hmoob kuj sawv ua Huab Tais tos niam txiv Vaj Hmoob nqes pem ntuj nqes los.
Nyob ob lub xeev no, thaum lawv tab tom sawv ntawd, Yes Xus lub Moo zoo tuaj txog lawv cov zej zog. Ces ob lub xeev no yog cov tib neeg txais kev ntseeg nyob hauv Yes Xus lub Moo Zoo coob dua cov.
Hais txog thawj lub zos nyob sab Luag Prabang, lub zos Roob nyuj ntawd. Txiv Plig Nyiaj Pov tuaj nyob tau 9 xyoo. Mam muaj ib yim neeg txais Yes Xus luv Moo Zoo.
Txog xyoo1954 muaj tsib yim Hmoob txais kev ntseeg xwb. Thawj yim, yog Yaj Zam Nob. yaj Tsuj Xyooj uas yog Txiv Leej Choj Cwj Vuam Txiv. Thoj tsav Ntxaij, Yaj Nkias Keem uas yog Yaj Zoov Ntxheb Xib Hwb tus tij laug hlob,thiab yog Leej Tsob Hwb Yaj Xov Tsheej txiv. Yim tsib Yog Thoj Vam Khwv uas yog Txiv Tswv Qhia Txwj Choo txiv.
Sab Sam Neu mas kuv tsis paub kuv xav tias txiv Plig Nyiaj Pov mus nyob tsis tau muaj ib xyoo mas ntshai twb muaj tshaj li 10 yim neeg txais kev ntseeg nyob hauv Yes Xus lub Moo zoo lawm.
Hos sab pem Luag Nam Tha mas kuv pau zoo,tus Xib Hwb Xyooj thoj thiab txiv plig Vaj Pov mus tog lawv Hmoob lub zos sib tham tau peb hnub xwb ces muaj 15 yim Hmoob txais kev ntseeg nyob hauv Yes Xus lub Moo Zoo lawm.
Lub Koom Txoos thiaj tuaj tos Kuv hauv tseb kawm ntawv ncaj qha mus ua Xib Hwb qhia ntawv thiab qhia kev ntseeg rau pab Hmoob 15 yim no.
Tos muaj txoj kev ntseeg sawv sai li no, vim lub caij ntawd yog lub caij tsoom Hmoob tab tom tos Niam Txiv Vaj Hmoob pem ntuj yuav nqes lo.
Xyoo 1960-62 ntawd nyob Vees Cam teb lub Roob Kub Twm kuj muaj Hmoob tab tom tos Huab Tais Hmoob los nyob pem Roob Kub Twm Vaj Loog Tsua. Muaj ntau pab Hmoob tsiv mus nyob pem Roob Kub Twm.
Lub Moo ntawd los tau peb lub xyoo, ces muaj ib yam xwm tawm tuaj. Tsis tau muaj neegua tus pom xyeem ntawm qhov muag,tab sis hmo ntuaj mas dev tom heev.
Nyob tom tej ntug zos mas, muaj ntau lub chaw pw zoo li yog tsiaj tuaj pos { tsov} los pw. Tej lav pw, plaub zeeg ntau txoj ntev thiab npws loos xws li plaub tsov, ces ob lub zos tsis tau luag.
Lawv tuaj hais qhia peb nyob Vees Cas, peb Tso Yaj Nom Rwg mus nrog lawv nyob. Ces ob lub zos Hmoob Tsab thiab Hmoob Vwj ntawd txias kev ntseeg nyob hauv Yes Xus lub Moo Zoo ze li 15 yim Hmoob.
Peb pab neeg txais kev ntseeg coob, xws li Sam Neu, Luag Nam Tha, thiab Vees Cas pem roob Kub Twm yog cov thawj neeg ua thawj tos niam txiv Vaj Hmoob pem ntuj yuav nqes los.
Lawv tos Niam Txiv Vaj Hmoob ces mus txais tau lwm txoj kev tseem ceeb tshaj uas yog nqes pem ntuj los tiag.
Txij li thaum Vaj Pov coj Hmoob ua neeg thoj nam tawm Los Tsuas teb los lawd, Kuj Muaj Hmoob tos Huab Tais tuab ntaws los txog li ntiaj hnub no ntawm cov xyoo 2015-16 no tas zog li thiab.
Nyob Mis Kuj teb muaj ntau tus Saub Sawv. Ib cov lawv tsuas tuaj hais kev txhaum kev khaum xwb. Kom Hmoob muaj kev sib hlub txhob ua kev khaum kev txhaum ntxiv lawm.
Cov ua Yaj Saub tuaj hais kev txhaum kev khaum yog cov coob. Muaj ib fem sawv los ua Huab Tais yuav npaj mus ua tsov rog, los muaj thiab.
Zoo li Hmoob coob Leej tseem niaj hnub ua npau suav tos Huab Tais Hmoob yuav los coj Hmoob mus ua tsov rog kom muaj teb chaws nyob li tej Mab Sua.
Hos kuv li mas kuv kuj muaj ib zaj npau suav thiab, Kuv zaj npau suav mas kuv xav li no:
Kuv Xav tias, Haiv Hmoob suav tau nrog lub ntiaj teb tsoom Haiv neeg mas Hmoob tsis phem tshaj luag lwm cov thiab. Qaum Ntuj kuj kws Hmoob cai coj Hmoob mus nyob thoob qab ntuj.
Kom Haiv Hmoob paub kev paub cai ua neej thoob tsib, kom sib kho tej kev cai sib hwm kom zoo. Hmoob hwm thiab saib Mab Sua mas Hmoob txwj kawg lawm.
Tab sis Hmoob tsis tau txawj hwm Hmoob thiab Saib Hmoob mus rau lub sam xeeb tias txhua tus Hmoob muaj nuj nqes sib xws, ces sib hwm thiab sib coj kom sib raug zoo.
Thaum Hmoob rov sib raug zoo rau Hmoob lawm,mas Hmoob yog ib haiv neeg ntse, thiab nyiam ua nom heev. Mas sawv daws yuav tau mus kawm txuj kom sab twg, los muaj hmoob nyob hauv thiab tuav pab lub teb chaws.
Hmoob nyiam, thiab xib rau sab ua nom ua tswv heev, tsis hais lub teb chaws twg li. Suav puag pem Suav teb, uas hu ua Tsoob Kuj, Nyab Laj, Los Kuj. Thaim Kuj Australie Fuaj Kuj thiab Mis Kuj.
Cov teb chaws no muaj ntau tus City,Merre. Frefet, Govener thiaj tus Presidet yog Hmoob ces thiaj yog qhov Tseeb tias Vaj Hmoob los niam Txiv pem ntuj nqes los rau Hmoob txhij txhua tiag.
Thaum no cov President Hmoob no yuav tswj kom Ntau lub teb chaws txhob tsim kev ua tsov ua rog kom neeg tau nyob thaj yeeb los muaj peev xwm tswj tau cov teb chaws phooj ywg kom nyob tiaj tus tau lawm.
Thaum no thiaj yog tseeb tiag tias, Vaj Hmoob nqes los nyob ntiaj teb no. Muaj kev nyiam los ua huab Tais los ua Vaj mas txoj no thiaj yog ib zaj tseeb tias, yog zaj npau suav zoo dua cov.
tej lus no yog tej lus sau los kawm kom tau ua neeg thoob tsib mas thiaj npau suav tseeb xwb. tsis yog lus hais leej twg li dab plig. Txhob muab mus ntaus nqi yuam kev txog leej twg.


Yaj Zoov Ntxheb Xib Hwb.

Lub tswv yim uas Ntuj tau tsim kom muaj ib tug txiv neej, thiab ib tug poj niam, yog lub tswv yim uas muaj txiaj ntsim loj thiab muaj zog heev tiag.
Neeg ntiaj teb no, cov txiv neej thiab cov poj, niam tsis nco qab hwm lub txiaj ntsim no kom zoo.  Raws li Ntuj tau tsim los rau ob tug leej tib neeg, nyob ntiaj teb no.
Qhov uas Ntuj tau tsim ib tug txiv neej thiab ib tug poj niam no, mas Ntuj yeej xav tau zoo lawm. Ntuj mam tsim los kom tau sib pab, raws li ntawv Faj Lem tau hais los tias:
Yog cia tus txiv neej nyob ib leeg zoo li no mas tsis zoo.  Ntuj yuav tsim ib tug poj niam los kom phim tus txiv neej thiab pab tau nws.
Yog neeg ntiaj teb nyob hauv lub qab ntuj no, tsis hwm lo lus thiab Ntuj zaj txuj ci no, mas Cov txiv neej thiab cov poj niam yuav raug kev txom nyem siab li uas yuav piav muaj nram no.
a. Cov poj niam niam sab mas zoo li no:
Thaum poj niam tsis hwm nws tus txiv lawm, saib tsis taus los muab nws ces yam tsis yog kev cai. Nws xav tias nws ntse txaus lawm, hais lus saib tsis taus los ua tej yam tsuj los hla kiag tus txiv lawm.
Tsis hwm tus txiv lub hwj chim los lub meej mom, hais lus tsis zoo rau los thuam tus txiv lub hwj chim yam saib tsis taus mus li.
Qhov kawg nws tso nws tus txiv pov tseg, tsis tas li ntawd xwb Nws yuav mus qhia nws lub cev rau lwm tus txiv neej paub.  Tus nws tau xaiv tom qab ntawd mas tseem phem, los heev tshaj tus nws tso pov tseg ntawd ib npaug ntxiv.
Cov poj niam ua li ntawd mas, lawv yuav nco thiab nyiam txiv neej heev, vim lawv yeej ncaim tsis tau mus li tsis nyob ti txiv neej. Tab lawv ua zoo npaum li cas los tus txiv neej uas nws ntsib yeej xav tias yog nws zoo tiag mas nws yuav tsis ncaim ntawm tus nws xub tau paub los lawd.
Thiab tas nws sim neej nws tsis puv siab ib zaug li tias kuv tau ua ib txoj hauj lwm zoo raws li kuv yog niam rau txiv neej. Vim kuv ua poj niam pub rau ntau tus txiv neej, kuv nplooj siab yog leej twg  li tiag.
Kuv tawm ntawm txiv neej los, kuv tso plhuav rau txiv neej siv saib yuav yog leej twg tug. Koj yog tus ncaim ces yuav tau ncaim mus li.
Qhov kawg yog koj tau ua neeg lwj siab, kho siab thiab txom nyem siab. zoo li koj xaiv tsis tau  tus txha thiab daim nqaij uas  Ntuj tau thau tawm los ntawm tus txiv neej raws li txoj koob txoj hmoov.
Feem coob tus  xaiv tom qab yeej zoo tsis caug li tus uas xub tau. yog txawj sib hwn mas yeej zoo thiab ua neej tshav ntuj nrig mus li.
Tus tom qab ces koj mus khaws tau li khaws tus dab seem uas luag xa mus nrauj zoo lawd.  Los zoo li lub cuab yeej luag twb siv tsis zoo lawm ces luag muab pov tseg lawm yus thiaj pom.
Tsiv kav yus tseem qhuas tias zoo kawg,  qhov koj tau qhuas ntawd, yog qhov hais tias koj tau poob tus txiv neej koj nyiam lawm ces koj pom koj thiaj hais tias yog zoo no xwb.
Cov uas tau ua lub neej tsis nto ntsis ib tug tso ib tug tseg mas lawv tsis yog tus dab tsis zoo uas luag xa mus nrauj zoo. lawv yog cov uas tau txais ib txoj hmoov tsis nto ntsis, cov no kuj tsis liam tau ua neeg phem.
b.Hos nyem no hais txog txiv neej sab,  mas txiv neej sab muaj kev txom nyem loj dua poj niam sab uas tau piav dhau los lawd thiab:
Vim txiv neej yog thawj tug neeg uas Ntuj tau xub tsim nws los kom tau faib nws ib tug txha rau tus poj niam.
Cov txiv neej uas tsis txawj hwm lawv cov poj niam, mas poj niam ua tuaj ces lawv raug sab dua.  Vim yog poj niam ua tuaj ces  txiv neej muaj kev poob tsim rau lawv cov poj niam.
Thiab lawv tu siab tuaj mas cov txiv neej mus deb dua, lawv mus txog qhov uas tsis muaj vaj tse nyob, cia li ua neeg mus thov khawv noj mus li lawm.
Tsis hais sab twg li,nco ntsoov tias koj tau ua ib yam rau ib tug neeg raug txom nyem los ua rau nws tu siab,mas koj yuav tau faib ib feem ntawm tus neeg ntawd los rau koj thiab.
koj txhob xav tias koj ua rau luag lwj siab txaus ces koj yuav tau zoo mus li.  Qhov kev nyuaj siab ntawd, tus nyob siab nws yeej txawj cais, cia nyias yuav nyias feem.
Peb ua neeg peb yuav tsum paub tias koj ua rau ib tug neeg raug txom nyem thiab tu siab mus, nco ntsoov tias nws ris nws qhov.  Hos koj yuav ris koj qhov, vim thaum pib koom nrog nws tsis muaj neeg yuam koj.  Koj txaus siab nrog nws koom kev zoo siab thiab kev nyob ua ke nrog nws neb zoo neb siab cog lus nyob ua ke.
Zaum no neb tsis sib hwm ib leeg ua rau ib leeg thiaj muaj kev txom nyem los kev lwj siab ces nyias yeej muaj nyias li, tsuas yog tias muaj ib tog muaj lwm tus neeg los nrog nws qee lawm ces nws txom nyem thiab lwj siab tsis npaum tus tod xwb.
Saum cov txiv neej mas yuav ceev faj kawg nkaus li yuav tau thov kom Ntuj pab koj nrhiav ib tug poj niam los txhawb koj lub neej kom tsim nyog.
Koj tsis muaj ib tug poj niam los txhawb koj tab yog koj kawm txuj siab los koj tsis qab siab ua lub neej nrog kev muaj txuj ci. Cov neeg ua ib siab mus nyob qab choj, yog cov neeg muaj txuj siab.
Lawv tsis muaj poj niam txhawb lawv lub neej, ua hauj lwm tau nyiaj ntau tsis muaj neeg nrog nws siv nws them se ntau rau tej nom tswv. Ces nws tsis xav ua hauj lawm.
Nws yeem mus ua neeg thov khawv tsuav ib hnub tau ib lub ncuav mov ci noj xwb mas nws tseem zoo siab dua ua hauj lwm txwm hli ces tau them se rau no Tswv.  Nws twb tsis muaj neeg nrog nws siv nyiaj.
Muaj qee tus kawm txuj siab dhau, paub ntau yam yuav luag txawj hlub neeg npaum li Ntuj hlub neeg. Nws pom ntiaj teb tej teeb meem neeg tsis txawj sib hlub li no ces nws cia li ua neeg vwm tau thiab.
yog nws tswj tau nws tus kheej, mas twb yog nws txawj tswj nws kawg li lawm.  Qee tus nws pom tej teeb meem li no xwb ces nws tsis xav ua neeg nyob ntxiv.
Vim nws niaj hnub pom neeg kev sib hlub nyob tsis sib luag ces nws lub sib tsis kheev ces cia muab nws hloov kiag los ua ib tug neeg muaj mob rau nws tus ntsuj plig.
Ces nws ntsia lub ntiaj teb no tsis muaj ib yam zoo li, nws tsis tso siab rau leej twg tau li lawm. Ua li mas zaj Tswv Yim Ntuj tsim kom muaj ib tug txiv neej thiab ib tug poj niam no yog ib zaj zoo thiab Ntuj yeej xav tau zoo txaus lawm tiag.
Peb leej tib neeg tsis hais leej twg, tus txiv neej los poj niam yuav tau hwm los lus Ntuj tsim kom muaj txiv neej los poj niam no.
Nyob hauv Hmoob cov dab neeg yeej muaj keeb kwm hais txog  poj niam thiab txiv neej ua ntu zus los mus. Zaj dab neeg uas poj niam muab cov txiv neej txiav caj dab, nqa tau hau mus rau Huab Tais.
Kom Huab Tais muab poj niam tsa ua Nom loj ntawd yog ib zaj los tau ntau tiam lawm. Muaj qee lo lus uas txiv neej thiab poj niam sib cem ua txiv dev los maum dev yog vim los ntawm zaj lus tsis sib hwm no los ntag.
Tab txawm ua li cas los tsis muaj txiv neej poj niam nyob tsis ua neeg tau. Hos tsis muaj poj niam lawm los txiv neej yeej nyob ua neeg tsis tau thiab.
Thiaj muab zaj lus no sau piav ua lus kawm rau peb neeg sawv daws kom tau ua kev kawm los ua neej nyob nrog txoj kev sib  hlub ntawm txiv neej thiab poj niam.
Kom nyob tsheej xeeb zoo li lub keeb uas Ntuj tsis tau los ntawd, hwm raws li txoj kab txoj kev uas yog qhov tseeb.
Yaj Zoov Ntxheb Xib Hwb.

Nyob hauv peb cov neeg ntseeg, mas peb tsis paub txoj kev teev Ntuj zoo, cia muab plaub tug qauv los yog plaub daim duab no rau peb saib kom peb txawj xaiv txoj kev teev Ntuj zoo los rau peb.
1. Thawj tus neeg nkag mus hauv lub tsev teev Ntuj mas nws coj li no:
Nws nkag los ces nws hawm lub rooj txi Ntuj thiab tus ntoo cuam tas, ces nws los zaum. Nws tig ntsia saib hnub no neeg tuaj coob li cas, thaum nws tuaj mas nws yeej ris ib tug dab ntub tuaj nrog nws.
Ces nws nrhiav chaw zaum, nws cia li nrog nws tus dab ntub sib tham ua npau suav mus tas lub caij teev Ntuj. Thaum teev Ntuj tas luag rov mus tsev nws mam li tsim dheev los ces cia li mus tsev lawm.
Tas lub caij nyob hauv tsev teev Ntuj nws tsis tau nrog Tswv Ntuj los Yes Xus tham ib lo lus li.
2. Tus ob no, nws tuaj nws kuj ua tib yam li thawj tug! Nws hwm lub thaj txi Ntuj tas ces nws mus zaum. Nws ris ib co lus xaiv thiab lus thuam tib neeg, puv nkaus nws lub cev tuaj.
Ces nws pib hais cov lus xaiv uas nws ris tuaj ntawd, tham rau tus nyob ntawm nws ib sab hnov tias, Koj saib lawv mas niam hais li no tiag, kuv mas tsis xav hnov kiag li. Hos tus neeg nyob ped naj. nws twb yog neeg ntseeg tsis kav nws mas cem neeg kawg.
kuv xav mas nws twb tsis tsim nyog tuaj teev ntuj li, tsis kav nws ntsej muag tuab kawg li thiab, nws tseem tuaj txog nov thiab.
3. Tus peb tuaj nws kuj ua tib yam, pe hawm ntoo cuam tas ces nws mus zaum lawm thiab.Nws kuj teev ntuj zoo kawg thiab. nws cov lus teev ntuj hais li no:
Huab Tais cov neeg ntseeg no, tus no thiab tus no mas, nws lam ua neeg ntseeg xwb, ntshais nws tsis yog neeg ntseeg zoo. kuv pom nws mus ua tej yam tsis raug li kev ntseeg.
Nws mus saib yaig, los tseem mus ua neeb tej, thiab nws hais lus dog dig xwb, hais tiag mas phim Ntuj yuav txiav txim rau nws kom nws paub.
Ua cas Ntuj pheej cia nws ua li no thiab, yog kuv mas kuv twb xa nws mus nyob rau dab teb ntev lwm lauj!
4. Tus plaub no nws tuaj, nws hawm ntoo cuam tas ces nws mus zaum nws ntsia sawv daws saib leej twg thiab Leej twg tuaj.
Ces nws pom sawv daws tuaj coob, nws hais tias ua cas tej neeg khav teeb no tseem tuaj thiab lauj! Nws mas coj li uas luag yog neeg ruam ruam li, nws xav tias nws ib leeg thiaj li paub ua ub ua no xwb los ua cas lauj!
Nws tsis xav tias tshuav lwm tus thiab ,nws huas tas txhua yam,ntshai nws xav tias, nws thiaj txawj xwb los ua cas!
Tus no kuj tsis tau nrog Tswv Ntuj los Yes Xus tham dab tsi li thiab.
Txij thawj tug los txog tus plaub no, thaum lawv rov mus tsev, los lawv tsis tau coj los caw Yes Xus mus xyuas lawv vaj tse. Thiab pov hwm lawv mus rau lub lis piam yuav tuaj no li.
5. Tus tsib no, Nws tuaj txog nws kuj hawm lub thaj txi ntuj thiab tus ntoo cuam li sawv daws. Nws mam li mus zaum.
Nws mloog cov zaj teev Ntuj los cov nkauj hu hauv lub txoos, mloog cov tsab ntawv, cov lus nthuav, nws txais Ntuj cov lus xws li ib co txhiam xws los yug nws, lub siab thiab tus ntsuj plig.
Nws raws nraim lub txoos teev Ntuj, Thaum Leej Choj rub Yes Xus nqes los nyob hauv mov thiab cawv. Nws tau ntsib Tswv Ntuj lib hwj chim uas yog Tswv Ntuj kev nyiam thiab hlub neeg nyob hauv Yes Xus.
Thaum lub Txoos teev Ntuj tas Leej choj foom Hmoov Zoo, Xib Hwb cev Yes Xus rau sawv daws. Nws txais thiab caw Yes Xus coj Yes Xus mus xyuas nws Vaj tse, thov Kom Yes Xus pov hwm nws tsev neeg mus tas ib lis piam, rov txog lub lis piam tom ntej yuav tuaj mam li sib ntsib Tswv Ntuj lub hwj chim hauv lub Cim Yug dua.
Kev teev Ntuj hauv lub tsev teev Ntuj mas yog coj li no.
6. Tab yog cov Leej Choj, los cov Xib Hwb hauv cov neeg ntseeg, mas muaj 10 leej. 5 leeg mas lawv mus qhov twg los lawv thiaj caw Yes Xus nrog lawv mus.
Hos muaj 5 leeg, mas lawv mus qhov twg los lawv yeej tsis caw Yes Xus nrog lawv mus li thiab. Lawv kuj ntshai tsam lawv coj Yes Xus nrog lawv mus ces lawv hais tej yam ho rhiab los qaub Yes Xus pob ntseg.
Ces lawv mus lawv tus kheej thiab xwb, lawv kuj txaj muag tsam nws ho hais tau tej yam tsiv mloog, uas nws hais kam los lawd thiab.
Cov neeg ntseeg mas leej puav kuj xav tias thaum mus txog saum ntuj ces Xib hwb yuav nyob saud tos lawv. Thaum lawv mus txog saud, ces lawv nrhiav xib Hwb ua cas tsis pom Xib Hwb nyob saud.
Lawv ntsia rau ntuj tawg, ua cas Pom Xib Hwb nyob hauv, tej tus mus hauv pom Xib Hwb nyob hauv, nws nug tias, Xib Hwb koj los nov thiab?
Ces Xib Xwb teb tias He!!! Los nov thiab tiag.


Yaj Zoov Ntxheb Xib Hwb.

Tas nrho cov ua thawj neeg nyob ntiaj teb no,tsis hais leej twg li. Tus ntseeg tswv Ntuj, mas nws zaj xav thiab nws tes hauj lwm nyob ze Ntuj dua.
Kev ntseeg txog Ntuj, tsis yog yuav tsum coj ib txoj kev ntseeg los ntawm, ib tug neeg qhia coj. Los,los ntawm ib lub Koom Haum qhia txog Tswv Ntuj lub npe los coj.
Tas txhua yam kev ntseeg, tsuav yog ntseeg tias muaj ib tug yog tus tseeb thiab loj nyob saud. Mas tus neeg ntawd nyob ze Ntuj, thiab nws zaj xav los nws tes hauj lwm, feem loj yog tuaj saum ntuj tuaj.
Tab yog nws tsis paub Tswv Ntuj lub npe, thiab ib co lus coj siab. Mas nws yeej ua raws li tus tsim ntuj tsim teb zaj tswv yim thiab kev xav lawm.
Nyob hauv cov kev ntseeg uas ib tug neeg qhia,los cov Koom Haum uas lawv muaj ntawv Faj Lem qhia, mas kuj yog ib co kab ke muaj qab hau.
Pab lawv coj thiab ua neeg ncaj ncees raws li Qaum Ntuj zaj tswv yim nplua nuj, muaj txhiam xws noj los yug lub cev thiab tus ntsuj plig.
Kom muaj noj muaj haus,ua neeg muaj koob meej, muaj lub npe nrog npoj neeg siab ntshiab. Lawv muaj cai nrog cov neeg ntshiab huv, uas muaj txoj kev ntseeg tuaj ntawm cov ntawv Faj Lem hais txog kev paub Tswv Ntuj lub npe.
Thiab ua neeg txawj yoog raws li Tswv Ntuj kev nplua nuj. Ces kuj zoo li lawv tau ntseeg txog tus tseem ceeb haum nrog txoj kev uas cov neeg ntshiab huv lawv tau sib txoos los ua Ntuj cov tub ki.
Kuj muaj ntau leej ntseeg yuam kev, Vim neeg lub tswv yim me dhau lawm. Lawv tsis ntseeg txog Tus Tswv Ntuj uas muaj lub Tswv Yim zoo, thiab nplua nuj uas yog tus tseeb tau tsim lub ntuj lub teb tiag ntawd.
Muaj coob leej ntseeg yuam kev, lawv tau ntseeg ib leeg tswv yim phem nyob tom kev tshuam los tom tej tog kev tos neeg. Tus ntawd yog tus qhia kom cov ua thawj neeg ntxiv yam ub yam no rau.
Yam ntxiv ntawd, yog tus Phem qhia kom neeg ntxiv rau kom neeg ua tus muaj hwj chim los muaj koob meej loj, thiab qhia kom neeg ntshaw ua neeg nplua nuj, muaj ntiaj teb lub cuab tam ntau.
Thaum neeg lub siab xib rau ob yam no lawm, ces ob yam no, yuav coj cov ua thawj neeg mus poob rau txoj kev nyiam ua plees ua yi. Ces sau tau los ua peb yaj loj.
Thaum ib tug neeg rau tas peb yam no lawm ces peb yam no yuav coj tau neeg mus zwm rau txoj kev tuag sai. Yuav zwm tau li cas?
Ces nws yuav muaj xaiv muaj lus txog ib tug thawj neeg ntawd, ces nws yuav nyob hauv txoj kev npau taws, nws yuav ua neeg muaj lub siab lub thiab muaj kev khib heev.
Nws tsis raug plaub ntug los nws poob hwj chim mus lawm, ces nws yuav muaj mob nkeeg, ua neeg qaug zog, los nws yuav muaj kev tu siab ces nws rov txo nws txoj sia, nws tuag mus nyob hauv kev ua txaum.
Nws muaj kev tu siab loj yam uas tsis muaj neeg pab tau. Vim nws ntseeg yuam kev, nws kev tso siab tsis yog tuaj saum tus nyob siab uas npoj neeg ntshiab huv ntseeg tias yog tus tseem ceeb.
Nws zaj xav thiab lub tswv yim ncaim ntawm tus tseem ceeb nyob tsheej siab saud mus, vim nws tso siab rau tus tos nws nyob tom tog kev los tom kev tshuam ntawd qhia xwb.
Cov uas ntseeg tau tus nyob saud, mas lawv zaj xav thiab lawv tes hauj lwm lawv ua raws li Qaum Ntuj tus uas Muaj Leej zoo Tswv yim coj saum ntuj nqes los.
Lawv ua yam twg los lawv maj mam ua raws li Lub Tswv Yim Thoob tsib cob qhia kom ua, ces lawv ua tau tsis yuam kev.
Peb neeg ntiaj teb mas muaj ib co lawv ntseeg tau tus Tswv Ntuj uas yog tus tsim lub ntuj lub teb. Tab sis lawv lo lus lub ncauj los tes hauj lwm ua txwv me ntsis. Vim tias lawv tsis tuav Tus Tsim ntuj tsim teb lo lus thiab ua kom haum li txoj kev txoj cai, uas yog Ntuj lus qhia.
Yog hais saum qhov tseeb, mas cov tau ua tus thawj neeg ntawd, mas lawv yeej xav ua qhov zoo xwb. lawv tsis paub, thiab xav tsis txog tias, muaj ib tug tswv yim nyob tom kev tshuam tos lawv kev qhia kom neeg ntxiv tej yam rau.
Thaum neeg tau ntxiv tej yam li ntawd rau lawm, mas feem coob lawv kuj xav tias ntshai yog Ntuj qhia lawv. Kom lawv txua rau kom muaj kuab zog tuaj.
Nyob hauv cov tau ua luag thawj neeg, mas lub tswv yim phem kheev qhia ob yam no ua ntej tshaj:
a. Tus tswv yim phem ntawd nyiam qhia kom cov tau ua luag tus thawj neeg no nyiam lub meej mom hwj chim ua neeg muab hlob thiab khav theeb.
Ces lawv sib txeeb ua tus loj nyob ze Qaum Ntuj los yog tus tsim ntuj tsim teb. Ces lawv sib txua ntau lo lus hais tias, Yog Ntuj qhia lawv kom ua yam ub yam no, los hais rau neeg ntiaj teb sawv daws.
b. Thiab tus Phem qhia kom lawv ntshaw ntiaj teb lub cuab tam los ua lawv tug. Ces lawv hais tias lawv tej hauj lwm, mas muaj nuj nqes siab heev, yog ib tug neeg thov kom pab ua ib yam los daws teeb meem mas yuav tau siv nyiaj txiag ntau,txog li 500 - 800 los 1,200 li mas thiaj tsim nyog hu Ntuj tuaj pab ib zaug.
Los thiaj tsim nyog hu tej poj koob yawm txwv nyob txheej thaud tuaj pab daws teeb meem. Cov laus ntawd mas yuav kom them ua nyiaj txiag npaum ub npaum no rau lawv mas kom mus daws teeb meem thiaj zoo.
Neeg yog thaum ib tug poob rau ob theem no lawm, ces nws kuj yuav poob mus txog theem coj tib neeg ua plees ua yi mus....
Thaum ib tug neeg mag tas peb them no, mas txoj kev tuag txav los nyob ze lawm. Cov tsis txawj ceev faj ces lawv tuag nyob hauv ua txhaum.
Lawv yuav muaj xaiv muaj lus,los kev poob tsim raws cuag. Muaj kev txaj muag,los kev tus siab, mob nkeeg los txog, los kev tu siab raws tau, ces kuj lam mus dai caj dab tuag, los nws rov tua nws tus kheej.
Zaj lus no yog los ntawm, tus phem nyob tom kev tshuam qhia los, Tus phem ntawd txhais hais tias, yus txua tej yam tsis yog los ntxiv rau.
Zaj no mas nws kheev caum raws cov tau ua thawj neeg no kawg. Tus phem no saib ntsoov saib cov thawj neeg no, nws ntsia saib yuav txog caij mus los yuav txog caij rov, nws tos ntsis kom caum tau nyob tom kev tshuam txhua lub caij.
Txhua tus saum cov tau ua thawj neeg,cov ua nom ua tswv,cov ua thawj coj kev ntseeg, zoo li co leej choj, cov Xib Hwb, thiab zoo li peb Hmoob cov txiv muam paub dab qhuas.
Thiab cov neeg sawv coob coob los ua niam toj txiv toj no. Hmoob hu lawv tias sawv ua Saub Tshiab. los ua neeb saub.
Tus yuav yeej lub tswv yim phem no, yog cov uas lawv muaj ib txoj kev ntseeg zwm rau tus tsim ntuj tsim teb. uas yog lub Moo zoo tuaj ntawm Yes Xus tuaj.
Lawv ntseeg thiab thov kom Yes Xus kev txom nyem npo lawv kom txhob mag tus phem zaj kev ntxias. Thiab lawv txawj vam txog ntau tus neeg siab dawb los pab lawv tiv thaiv kom yeej kev haub kev ntxias:
Xws Yes Xus Pleev tej koob hmoov, thiab Niam Mab Liab uas txawj nyiam Tswv Ntuj nrog rau ntau tus Leej Ntshiab cov koob hmoov los pov hwm kom txawj zam kev haub ntxia ntawm tus phem.
Ntxiv rau tus uas Yes Xus hais rau cov Thwj Tim tias:
Kuv yuav thov kom Leej Txiv xa dua ib tug tuaj nrog nej nyob. Tus ntawd yog Leej Tswv Yim Ntshiab, Nws yuav qhia qhov tseem ceeb rau nej.
Tus Leej Tswv Yim Ntshiab no, mas lub sim ceeb no tsis kam zeem nws, vim lub sim ceeb tseem tsis tau paub nws.
Cov uas paub tus Leej Tswv Yim Ntshiab no,yog cov uas lawv txais txoj kev ntseeg tuaj ntawm Yes Xus lub Moo Zoo tuaj,mas lawv thiaj paub tias Leej Tswv Yim Ntshiab yog leej twg.
Nyob hauv lub Koom Txoos Ka Tau Liv mas txij li thaum Yes Xus nce mus saum cov huab lawm mas yog Tus Leej Tswv Yim Ntshiab no ua hauj lwm nrog luab Koom Txoos Ka Tau Liv no,los txog rau xyoo 2016 no lawm.


Yaj Zoov Ntxheb Xib Hwb.

Tas sawv daws tuaj ua neeg nyob ntiaj teb no, neeg yuav rov hwm neeg,thiab qhuas.  Kom txhob muaj kev tu siab, cov yuav muab siab rau hwm, thiab saib lawv, yog cov nyob ze koj.
Cov nyob ze koj, mas yog koj tus txij nkawm, koj cuab kwv tij, los rau koj pab neej tsa, thiab tsoom txheeb ze uas koj paub lawv zoo.
Koj thiab pab neeg hais no, yuav tau nyob kaj siab lug, mas yuav tau ceev faj thiab sib hwm rau txoj kev ua neeg sib saib taus tias,lawv yog neeg tsim txiaj thiab muaj nuj nqes.
Txoj kev ua rau neeg tu siab ntawd yog tej yam no:
1->Txoj kev ntsia neeg tsis ncaj lub ntsiab muag ces yog tus cag los lub noob pib xa kev tu siab rau luag.
2->Koj tsis ceev faj, koj hais lus ntau, qhia ntau tshaj qhov luag xav yuam kev rau koj lawd, ces cuag li koj cog kev tu siab rau luag xws li luag yog neeg ruam dhau lawm.
3->Koj txhob txwm qhuas yam tsis yog kev cai, qhuas zoo li yog ua kev thuam, ces koj xa txoj kev tu siab mus cuab ntxiab rau luag,ua rau luag xav tias koj tsis nyiam luag lawm.
4->Koj hais lus siab luag, zoo li saib luag tsis muaj nuj nqes los luag tsis tsim txiaj ces koj twb taw txoj kev tu siab kom txav mus nyob ze luag lawm.
5.->Koj ntsia luag vaj tsab xeem lis xws li luag yog neeg ruam, koj xav tias koj mas ntse tshaj ib zeej toom, ces koj twb muab txoj kev tu siab xyeeb mus nyob rau luag sab lawm.
6-> yog yuav tsom ib yam zuj zus los hais, mas suav tsis paub tas li. Qhov kawg koj mam rov pom tau tias koj tseem yog tus ruam tshaj sawv daws. Ces koj yuav rov tu siab rauj koj, mas yog lig lawm, thim tsis tau rov.
Thaum ntawd koj mam paub thiab pom tias luag mus siab dua koj. luag twb nyob nrog txheej huab sib txig lawm. Koj tseem nrog cov nroj thiab tej nyom nyob sis xyaws xwb.
Neeg tsis muaj yeeb yaj tsom los tsom mas neeg tsis pom txog koj zaj txuj ci, uas koj niaj hnub siv rau cov leej tib neeg ntawd,kawg yog Ntuj thiaj pom thiab paub tau nkaus xwb.
Txoj kev tu siab no yog koj tsis ceev faj,mas koj ua poob los raug neeg sai kawg, yam li:
a. Thaum koj tsis ceev faj koj hais lus nrov tshaj sawv daws xwb, koj twb sua tau kev tu siab mus poob ze luag tej lawm.
b. Koj pheej xav tias tsam luag tsis paub, koj qhia tshaj dhau lawm, zoo li koj zam kev rau cua tshuab kev tu siab mus poob ze rau luag lawm.
c. Koj tsis xav pab los tsis nyiam tsis qhuas luag, ces cuag li, koj txhob txwm tso kev tu siab txav mus nyob ti rau luag lawm.
d. Koj hnov lus xaiv, koj tsis tau mloog ob tog, koj cia li ntseeg thiab pab luag hais tias, yog li koj tau hnov ntawd lawm. Ces koj twb xyeeb kev tu siab kom poob raug tus luag xyav moo ntawd lawm.
e. Thaum koj twb yog neeg lag ntseg lawm, koj tsis kam qhia tias koj lag ntseg, luag hais koj tsis hnov los koj tsis teb ces, koj twb cog kev tu siab rau luag lawm.
f. Koj nrog ib pab neeg nyob ua ke, koj coj li ib tug neeg tsis nrog luag koom siab, ces zoo li koj xav kom kev tu siab caum raws luag qab sai.
Qhov kawg tshuav ntau yam yog yuav maj mam suav mus, hais los mas ntau heev, cov uas yuav tau ceev faj zoo mas yog cov neeg nyob ze koj dua cov.
Cov ntawd yog cov muaj kev tu siab thiab xa nej lub moo tsis sib raug zoo mus puv ib tog ntuj. Tos koj paub xwb neeg twb tu siab rau koj tas lawm, tus pib ua lus dim lus dua ntawd yog koj tus neeg nyob ze koj tshaj.
Mam txawj sib kis mus deb deb txog qhov txhia chaw. Tej no kuj yog peb kev sib kawm tas huv si, kom txawj ua neeg thoob tsib hno xaiv li tej laus cov lus piv sab sij huam ib txwm uas lawv txawj hais los lawd.

Yaj Zoov Ntxheb Xib Hwb.

Neeg ntiaj teb kev sib hlub muaj ob txoj sib txawv li neej kev sib hlub, los puas dab kev sib hlub.
1. Txoj kev sib hlub li neej sab kev sib hlub, txoj kev sib hlub no, mas hlub tawm hauv nruab siab tuaj. Muaj kev hlub tseeb raws li nws xav hlub tus tib neeg ntawd tiag.
Nws hlub haum li Qaum Ntuj kev hlub thiab neeg tej kev sib hlub uas nws yeej hlub nyob hauv nruab siab raws li nws kev khuv leej neeg thiab nyiam hlub.
Nws hlub raws li neeg muaj cov roj ntsha sib hlub ntawm ib tug neeg mus dhau ib tug. Tsis yog lam hlub ua plhu los ua ntsej muag rau neeg pom xwb.
Nws hlub raws li kev ncaj ncees uas tas ib tsoom neeg nyob ntiaj teb no txoj kev hlub tawm hauv nruab siab los.
2. Txoj kev sib hlub raws li Dab kev hlub, mas yog ib txoj kev hlub txawv li Ntuj hlub,los neeg hlub. Txoj kev hlub no, nws lam hlub kom tas lub chaw tias,nws ua ib tug neeg es lam hlub kom luag qhuas tias, nws txawj hlub neeg thiab.
Nws hlub tshawv tshawv, thiab hlub ntxhib ntxhib. Ntawm lub ncauj, mas hlub mos nyoos li tus neeg muaj lub siab zoo heev.
Tab sib lub siab mas ntxub cuag li twb xav muab tua kiag pov tseg ntawd ntag. Nws ua tsis tau li cas rau ces lam ua lub ncauj hlub mos nyoog rau luag hnov xwb, lub siab mas ntxub tas kev nrho li.
Cov neeg coj lub siab zoo li no mas kuv xav tias nyob hauv cov haiv neeg nyob hauv qab kev mam meej ntshai yog 70% yog cov xav li ntawd.
Vim tias cov neeg ntawd hla tsis dhau txoj cai hais tias yog Nom Tswv neeg, es yus xav muab tua los tua tsis tau, yus xav ntaus los tsis muaj cai ntaus thiab.
Ces yus yuav tsum tau hlub, ces thiaj muab hlub tshawv, tshawv thiab hlub ntxhib ntxhib li ntawd. Hmoob hais tias ib sab tes hlub hos ib sab tes de.
Yus ua twb zoo mloog neeg cov lus mas, yus hnov tej tus neeg hais lus rau lawv tej txij nkawm, los tej tub ntxhais ntsuag mas yus hnov cov lus no ntawm yus pob ntseg los.
Muaj tseeb, ib co txij nkawm mas yus hnov luag hais tej lus no tias, kuv me nplooj siab kuv hhub koj kawg li os. Tab sib nws nplooj siab mas nws muab khuam rau tej tus neeg nyob deb deb uas nws nyiag nyiam los nyig hlub xwb.
Tas nws lub neej mas ua li Hmoob hais xav xav ces plag ntshav, xia, xia ces plag cia. Tus pab nws mas nws lam hlub dog dig li ntawd lam hlub kom ua dab chaw ntseeg thiab tso siab xwb.
Nyob hauv nws tsis muaj ib yam dab tsi yuav cog lus tau tias kuv hlub koj tiag tiag los tseeb lawm. Lam hlub los ua phu xwb.
Ib tuig neeg coj li no, mas tas nws sim neej nws tsis muaj dab tsi li, nyob hauv nws lub neej mas nws pluag tas kev nrho li.
Lwm tiam nws yuav muaj dab tsi coj mus ua puav pheej tias, nws tau hlub nws tus txij nkawm npaum li cas. Los nws muaj kev hlub tej tub ntxhais ntsuag uas tsis muaj niam muaj txij lawv tau ua lub neej txom nyem los ua kev cog lus tias muaj kev hlub luag.
Nws cov paj tsab yuav coj mus qhia Ntuj los qhia tej pog tej yawg, nws hais tias nws twb hlub hlub luag tej thiab,tsis kav ntsia mas nws twb coj mus khuam rau lwm tus uas nws nyiag nyiam thiab nyiag hlub uas luag tsis pom thiab tsis paub nws li.
Ces ib sim neej los ua neeg rau ntiaj teb no nws tsis tau tsim ib yam zoo li pub rau leej twg. Ntshai yuav khuv xim kawg li lauj!


Yaj Zoov Ntxheb Xib Hwb.

Peb ua neeg nyob ntiaj teb no,peb yuav tau ceev faj txhua yam los ntawm txoj kev yuam kev. Koj ua neeg yuam kev lawm, mas tsis yog ib yam yooj yim li.
Dub lawm ceeb laj ntxuav kom dawb,ntuag lawm kuj ceeb laj ntxiv kom zoo nkauj. koj ua yuam kev lawm, mas lam hais tias yog raug xwv txheej no xwb. Yuav tsum hais li ntawd los daws kev txaj muag.
Ua riam raug tes lawm txawm zoo lawm, los yeej caws pliav lawm tawv tsis zoo nkauj li qub lawm.
Zaj lus no, cov yuav tau ceev faj,yog cov neeg paub tab, thiab cov ua thawj neeg txhua tus.
Hais saum kev yuam kev no, muaj ntau yam yuam kev:
Yog ib txoj hauj lwm tsis paub los tsis txawj, ua yuam kev lawm, los ua raug neeg, mas hais tau tias yog raug xwv txheej.
Hos yam xav hauv nruab siab hais tawm ntawm lub ncauj, nrog rau kev ua siab tsis ncaj plawv tsis ncees. Ua yuam kev lawm, mas tsis zoo li raug xwv txheej.
Yam uas koj tau ua rau ib tug neeg tsis muaj zog li koj. Los nws tsis muaj peev xwm, koj ua saib tsis taus nws, los koj ua li koj tsis nyiam nws ntawd.
Thiab koj xwb tim ua nrog kev cib nyeej, los kev npau taws. los ua nrog kev caub chim. Tej no kuj muaj ib feem kev yuam kev me me nyob hauv, los raws li koj kev ruam los xwb.
Suav nrog kev tsis hwm tib neeg,tsis ris luag tej txiaj ntsim,koob hmoov uas luag tau ua zoo rau koj yav dhau los lawd.
Koj muaj zog, koj kawm tau, koj ua neeg khav theeb, ua neeg muab hlob. Koj muaj peev xwm, koj xav tias koj ntse lawm, ces koj thuam luag cov tau ua thawj neeg ua ntej koj.
Tej no yog koj yuam kev mus raws li koj kev ua neeg ruam, tsab ntse li hmoob tej laus hais lawm. Txoj kev ua neeg ruam,xyav luag moo, cem luag, hais luag dab plig li no, xav txog mas koj rov txaj muag rau ko tas nrho li.
Cov qub thawj neeg, tus ua yog lawm yuav tau hwm tseg rau ntawd. tau muab los ua tus qauv zoo qhia rau tej tub ki mus tiam dhau tiam.
Xaiv qhov tseeb los hais, qhov cuav ua tus tsis paub txog mas thiaj yog. Txhob muab nws qhov phem los xyav puas rau qhov zoo.
Leej tib neeg nyob ntiaj teb no tsis muaj leej twg zoo tas 100% li. Muaj 120 txoj kev zoo, tsuav yog nws coj tau ib txoj mus rau peb txoj ces nws twb yog neeg paub tab lawm.
Vim muaj li hais no mas thiaj li muaj ntau pab neeg mus nyob tom hauv ntej ua luag cov thawj neeg. Sawv daws muaj koob meej hwj chim ib yam xwb.
Tsis yog tus mus ua Nom tswj teb kav chaw, txiav plaub ntug saum kev ciaj thiab kev tuag thiaj yog cov tseem thawj neeg.
Thaum Ntuj tsim teb raug los txog niaj hnub no, tsis tau muaj dua ib tug neeg yuav thoob tsib, uas paub tas nrho 120 txoj kab lis kev cai txhua li.
Ib tug neeg paub tab lawm,nws yeej ntshais ib ruam mus rau saum kev ua thawj neeg lawm. Tsis yog tus thawj los yeej ua thawj neeg sawv tus tuam thawj chaws los hais lus.
Saum cov thawj neeg lub siab lub plawv, mas leej twg los yeej xav hais cov lus, kom pub tau kev ncaj ncees rau leej tib neeg.
Yog nws kev thoob tsib to nrog tsis txaus, ces nws muab hais tau tshaj li qhov tseeb uas muaj. Nws xav txua ntxiv kom yog thoob tsib dua, nws kev thoob tsib mus tsis ncav, ces kev ruam los nias rau ces ua rau nws yuam kev mus deb lawm.
Peb yuav ceev faj kawg nkaus,Txhob xav tias koj ua thawj neeg ces koj yog tus uas Ntuj nyiam tshaj plaws lawm. Nyob ntawm Qaum Ntuj sab, mas Ntuj nyiam sawv daws ib yam nkaus.
Tus neeg uas nws nyiam txua ntau yam rau kom neeg qhuas tias Ntuj nyiam nws kawg. Tej tus zoo li ntawd, mas Ntuj zaum nyob ntawm nws xub ntiag los, nws hais lus nws yeej tsis saib tias ntshais Ntuj nyob ntawd yuav hnov nws tej lus thiab pab qhuas nws li.
Peb leej tib neeg cov yuam kev yog feem coob, Yes Xus twb hais ua ntej ntej lawm. Yog pab 10 leej hluas nkauj, uas 5 tug ruam thiab 5 tug xyuam xim ntawd.
Muab 10 leej Xib Hwb los ua piv txwv:
Nyob hauv 10 leej Xib Hwb no, 5 tug lawv ua Xib hwb mas, lawv mus txoj kev twg los lawv tos thiab coj Yes Xus nrog lawv mus.
Hos muaj 5 tug mas, lawv muab Yes Xus xauv yawj sij cia hauv tsev teev ntuj ua ntej tso. Lawv mus txoj kev twg mas, lawv tsis yaum kom Yes Xus nrog lawv mus li.
Lawv mus lawv tus kheej, los lawv mus yaum ib pab poj niam txiv neej, xis lawv hom qav nrog lawv mus. Kom lawv muaj luag, ua yam twg los kom yooj yim, thiab hais hom lus ua tsis xis rau Yes Xus mloog, kom lawv muaj zog ua txhua yam zais ntshis.
Sab yuav qhia rau neeg pom thiab paub mas lawv nyiam hnav tsho dawb dawb, ntsej muag los zas tshuaj dawb tib si zoo li cov neeg dawb huv.
Lawv hais lus xwb cov pa tawm ntawm lawv lub ncauj los twb ncho pa dub li cov kua tsuaj raus lub siab dub tas tib si lawm los lawv tseem qhuas tias ncho pa dawb dua pa huab lawm thiab.
Peb tsis ceev faj, muaj tej lub zos, mas cov neeg nyob haus lub zos ntawd, Yes Xus tuaj nyob li yog ib tug neeg raug txim.
sawv daws muab Yes Xus xauv thiab kaw rau hauv lub tsev Teev Ntuj,mus tsev los tsis coj Yes Xus mus saib vaj saib tsev li.
Tuaj teev Ntuj los tuaj hais rau Yes Xus tias, Kuv mas khwv khwv li los luag tsis nyiam thiab luag cem kuv mus li xwb. Yog koj tsis muab txim rau lawv mas kuv yuav ua tus txiv txim kiag rau ntag.
Lawv hais lus mas hais saib tsis tau koj, vim kuv yog koj tus tub txib niaj hnub pab lawv. los lawv tsis hwm kuv li. Thaum twg koj mam yuav muab txim rau lawv.
Kuv dhuav lawv dhau lawm, kuv tuaj ntawm no yog kuv tuaj hais qhia rau koj paub ntag Yes Xus.
Peb yuav to tau tias peb txoj kev yuam kev loj ces yog tej zoo li hais no ntag. Yog muaj ib hnub peb to taub txog ntshai peb yuav txaj muag heev lauj!
Ua cas peb yuav ruam npaum li no ne! ntshais tsis zoo ua neeg nyob muaj kwv muaj tig los mus phooj muaj pwg lawm pob!
Zaj lus no kuv sau los rau peb ua kev kawm kom ua neeg paub tab xwb.

Yaj Zoov Ntxheb Xib Hwb.

Ntiaj teb neeg hu txoj kev tua neeg ua txoj kev tsis ncaj ncees. koj tus kheej yeej xav ua neeg nyob laus nkoos, kom txhob muaj dab tsis ua xwv txheej los raug.
Kom koj tau pom lub ntuj lub teb, tej kev zoo nkauj zoo saib kom txhua. thiab ua lub neej nyob kaj siab lug, ua lub neej nyob tsis xav ncaim lub ntiaj teb no mus li.
Lub ntiaj teb no muaj kev noj kev haus zoo, xav noj kom txhij hnav kom txhua,thiab saib kom tas.
Koj tseem muaj kev ntseeg kev tso siab tias, lwm tiam koj tseem yuav zoo tshaj,tej tub ki xeeb ntxwv tso siab rau, tej mem toj mem av, yuav zoo rau tej tub ki lub neej tom ntej.
Cov kev tua neeg no muaj ntau txoj:
1. Cov neeg sib ntxub, lawv sib tua kom tuag mus.
2.Cov uas lawv muaj kev khib, lam tua tej neeg nplua nuj kom tau yuav luag cuab tam nyiaj txiag.
3. Cov uas lawv tsis hwm neeg, saib tsis taus tej neeg ruam, lam muab luag tua pov tseg, ntshais puas koj lub koob lub npe.
4. Cov tsis xav tias yuav muaj kev khaum kev txaum, muab tshuaj ntaus me nyuam kom poob los ntiav neeg rho me nyuam tawm hauv cev mus.
Plaub yam hais no puav leej muaj kev txhaum nyob hauv tas nrho txhua yam tib si.
Cov ntsiab lus yuav teev los muaj:
1. Cov sib ntxub,sib tua kom tuag mus no. Ob tog puav leej muaj kev txhaum, muaj sib los hnyav raws li kev tus xub pib. Yog tus xub pib, yuav tau txais kev txiav txim raws li muaj.
Thiab tseem sib kis mus rau cov uas pom thiab paub, txhaub dev sib tog los txheem tw ntxiab, kom muaj yeej muaj swb nrog thiab.
Cov no lawv cov plaub ntug xaus tsis tau rau yaj ceeb, yuav xaus mus nyob nruab yeeb. Zoo li yog Ntuj thiab Dab yuav ua cov txiav txim mam li tas mus.
2. Tus lawm ntxub cov neeg nplua nuj, muab luag tua yuav cuab tam nyiaj txiag no. yog kev ua txhaum loj, lam ntshaw luag teej tug.
Muab luag tua kom tau yuav dawb, cov no nws tsis hwm Ntuj. Nws kev txhaum ua tub qaug rau Ntuj thiab neeg tib sis. Cov no lub hwj chim los ua neeg lawv pauj tsis tau rov qab.
Kom tsim nyog tias nws xeeb tau los ua neeg ib zaug rau lub sim ceeb no. Nws lub paub ntug no mus tsis txawj kawg li. Yuav kis los rau nws cov roj ntsha, uas Hmoob hais tias,tej tub ki muaj niam txiv tus ntsuj roj ntsuj ntsha nrog lawv ua neej.
Tej kev txhaum kev khaum no yuav nyob nrog tej tub ki mus ntau tiam. Luag lwm xeem Vaj Tsab xeem lis sawv daws yuav sib tw sib foom los rau,ces tej tub ki poob tsim mus, ua neej tsis muaj peev xwm ua luag thawj neeg.
Yuav raug cov neeg tsis paub tab thuam ua neeg ruam. Ces tej xeeb ntxwv tsis muaj kev xaiv lub neej mus ua txij nkawm. Lwm lub xeem lam txais mus ua neej so taw, los tiv kev iab kev khwv ntau xwb.
Lawv rooj plaub xo ncej ntug kuj yuav xaus mus nyob rau Dab teb, Tseeb thiab cuav muaj sib npaug. Yuav muaj tim khawv pov thauj ntau leej ntau tus mus tshab xo. Vim qhov tseeb thiab cuav sib npaug.
3. Cov ua saib tsis taus cov neeg ruam no kev txhaum kev khaum tseem loj dua ob yam xub hais los saum no. Vim yog kev tsis hwm ntuj. Nws saib tsis tau tej neeg ruam los neeg uas Ntuj tsim lawv los.
Cov neeg xeeb los li hai no, yog lawv raug xwv txheej los ntawm tej laus tsis hwm cov neeg me los neeg ruam, uas tej niam txiv, muaj tus ntsuj roj ntsuj ntsha ua ntej los tiam pem suab.
Tus ua phem los tua cov neeg ruam li hais no, lawv yuav muaj ib tug nywj ua neej nyob nrog lawv mus ntau tiam neeg.
Thaum lawv ua cov kev txhaum kev khaum rau tus neeg ruam no tas, ces lawv ntshai,ces lawv kev txhawj xeeb thiab roj ntsha tig los txais tus nywj ruam no rau lawv cov ntsuj roj ntsha, ces cia li xeeb tau muaj los ua lawv kev khaum.Tsis paub tias puas yog tseeb.
Tab sis cov ua li no yeej tshwm los muaj lawm ntau tus nywj li hais no. Tej laus yeej ntshai rwg, thiab qhia ua ntu zus los mus.
Muaj neeg ua Yaj Saub hais txog tias, cov neeg Ruam no lawv tsis tau lub neej zoo. Lawv yuav rov los tshwm sim los ua neeg txog li ib ob tiam.
Lawv rov tshwm sim los ua neeg dua, kom tau ua lub neej zoo kom tsim nyog ib zaug. Los sis rov tshwm sim los ua neeg kom tau pauj khawv chim. Los xyov yog los pauj yam twg, kuj twv tsis tau.
4. Cov ntuj Plig xeeb tau los ua neeg tsis tau pom lub sim ceeb no, lawv xub raug xwv txheej lawm. Lawv yeej yuav tau rov xeeb ua neeg zaum ob, kom tau pom lub sim ceeb tej kev zoo nkauj zoo saib no.
Lawv yeej yog ib tug ntsuj plig tseeb lawm, lawv tau raug xev txheej. Ces zoo li lawv txoj kev los deb heev, los tsis txawj txog lub ntiaj teb, kom tau pom lub sim ceeb saib zoo li cas.
Lawv muaj cai nrhiav dua niam dua txiv tshiab, kom paub neeg ntiaj teb kev sib hlub loj li cas. Qaum Ntuj sab mas lawv paub lawm, tshuav neeg ntiaj teb sab lawv tsis tau paub txog.
Twb muaj neeg tham txog lawv tej kev ua npau suav dua los lawm tias, lawv xeeb ntau zaus,los ua ntau xeem hmoob,
Cov nqa ntawv ua txiv ua tub,ua kwv ua tij los muaj, cov coj ntawv txij ntawv nkawm los coob. mloog zoo li yog ua npau suav tas tib si.
Cov kev tua neeg zoo li no puav leej muaj nywj, los xyw los ua neej nrog lawv nyob:
Leej puav los ua nywj mob nkeeg rau lawv,ua npau suav pom. Hos tej leeg los ua nywj muaj kev txom nyem siab ntsws noj tsis qab pw tsis taug zog, mus saib saub saib yaig pom txog.
Ua li mas kev tua tib neeg tsis zoo tua, yog muaj tus nywj li hais no. Cov muaj kev sib ntxub los ntxub lawm txhob tua neeg, sib zam kev cia nyias nyob nyias.
Cov tsis xav xeeb tub ki kawg caiv, cais txaj chaw pw, thiaj tsis tau ua kev txhaum. Koj caiv tsis tau xeeb tub lawm ua ib siab ntev los hlub kom nws tau kev pom lub sim ceeb no, thiaj yog haum li txoj cai Ntuj tsim neeg los. Vim lawv yog niam txiv tus ntsuj roj ntsuj ntsha,luag xav ua neej li koj thiab.

Y.Z.N.X.H.