KAB KE XA PLIG ntu Ib raws li XH.Yaj Zoov Ntxheb.

**Maiv Tooj** 17th December 2012, 9:24 am

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°1

KAB KE XA PLIG ntu Ib raws li XH.Yaj Zoov Ntxheb.

Post Maiv Tooj 17th December 2012, 9:24 am

ZAJ XA PLIG NTU IB.
Xib Hwb Yaj Zoov Ntxheb.

KAB KE XA PLIG ntu Ib raws li XH.Yaj Zoov Ntxheb. 45598010

1-Zoov liv ntuj ntsig teb hav cam sij vos, ( sij voos,) Yog hnub txheej tshoj taum ub. Tswv Ntuj tsim tau lub ntuj lub teb los nyob. (los txoos.) Li xeeb tau tub nraug laj, (niam nkauj lag,) cev los nyob. ( los txoos.)
2-Ua ciav tav no, tsaus ntuj, (kaj ntug ) lim zus, tub nraug laj, ( niam...) koj ntim tau lub cev txiaj zam lim zus, los pw li ko tuaj ntawm npoo hleb. Yog koj tuag daj los tuag tiag! Tuag tseeb los tuag cuav. Tuag daj nov ces sawv los ncig qav mum ncig num. Tuag tiag nov ces tig ntsej los mloog, tig muag los saib, kuv yuav qhia kev rau koj mus cuag tus Tswv Ntuj tsim koj lub cev, pub txoj sia rau koj nov nas.

NTUJ TSIM TEB RAUG.
3-Zoov liv, tub nraug Laj, (niam...) Koj yuav paub tias:
Thaum lub ntuj nyob tuaj tsis tau tawg paj. Lub teb nyob tsis tau tuaj nrog, Tswv Ntuj yeej nyob txawm tas. Tswv Ntuj thiaj yog thawj tug tsiaj ntawv As Fas.
=Koj yuav paub tias, thaum lub ntuj nyob tuaj tsis tau kaj Tswv Ntuj yeej nyob txawm tag. Ces Tswv Ntuj thiaj yog tus tsiaj ntawv kawg Os Mes Nkas.

4-Zoov liv hnub txheej tshoj taum ub lub ntuj nyob tsis tau muaj duab, ces Tswv Ntuj tso tus cua moj lwg kaw tuaj tshuab. Ces lub ntuj li kaj lis zus los ua ntuj ntsuab.
= Lub teb nyob tuaj tsaus lis nti, yees lis yi xws pas iav. Ces Tswv Ntuj li cog lub teb, kom muaj tus nroj tus tsuag tuaj ntsuab lis xiab.

5-Zoov liv Tswv Ntuj li tsim tau lub ntuj loj li tom cas, tsim tau lub teb dav li tom ci, ces Tswv Ntuj li tso noob xyoob noob ntoo, noob qoob noob loo, noob tsiaj, noob txhuv los nyob.
=Tswv Ntuj li rub nkauj hnub nraug hli tuaj ziab, kom noob xyoob noob ntoo, noob tsiaj noob txhuv tsiaj nqhuab tsij deg nyob muaj sia.

6- Tswv Ntuj li tso nkauj hnub nraug hli tuaj kav. Ces Ntuj li cais av nyob muaj av nras, cais dej nyob mus ua lawm dej pas.
Av li nyob mus ruaj cag, dej li sau nyob mus tsheej hav. Ces ntswj av nyob mus ciaj zeb, ntswj deg sau nyob mus ciaj ntsev nov nas.

TSWV NTUJ TSIM NEEG.
7-Zoov liv Tswv Ntuj tsim tau lub ntuj los tiav, tsim tau lub teb los txhua. Ces Tswv Ntuj tsim noob neej los kav, tsim noob tsav los xyuas.
-Hais liv nov rau koj mloog. Tswv Ntuj tsim noob neej, ces nws muab av luaj los puab. Ces noob neej lub cev ntaj ntsug li nyob tau phim tus ntsuj duab. Ces li mloog tau Ntuj li lus qhuab.

8-Tswv Ntuj muab av luaj los puab noob neej,los noob neej nyob tsis tsheej. Ces Tswv Ntuj li xuas noob neej txhav los los tsim niam nkauj lag. Ces noob neej saib niam nkauj Lag. Tus nqaij yog noob neej nqaij, txhav yog noob neej txha. Ces Noob neej saib niam nkauj Lag ntxim Noob neej siab. Ces Noob Neej li muab niam nkauj Lag, hu npe lis zus ua nkauj Iab.
Ces nkauj Ib saib Noob Neej raug tau meej mom zoo,ces nkauj Iab muab Noob Neej hu ua Txiv nraug lis Oo.

9- Zoov liv, hnub txheej tshoj thaum ub Nkauj Iab txiv nraug Oo tsis khwv los twb tau noj, tsis ua los twb paub nyob. Yeeb vimNtxwj Nyoog siab tuaj mus tsis zoo. Nws nyob tsheej npe tuaj hu ua dab. Ces nws txia lis ntshis ua niag zaj nab. Tuaj ntxias nkauj Iab, nraug Oo nkawd mus muab lub txiv toj txiv taug los saj, ces zaum no nkauj Iab Nrau Oo nkawd li txais tau, ntxwj sib nyoog zaj mob lub nkeeg nrog rau txoj kev ntsaj.
=Zoov liv ces Nkauj Iab, Nraug Oo nkawd li tau txoj kev txaj. Ces li de tau daim nplooj hmab nplooj ntoos los npua, los nplooj siab nyob qaug lias tsis nrog kaj. Thiaj tsim tau tus tsos seb los tib rau tus tsos maj. Kom tau daim tsoos ntuag tsoos maj los hnav. Nov

NTUJ NTXIAV TXIM.
10-Zoov liv yeeb vim niag zaj nab tuaj haub noob neej nyob mus lwj siab, Tswv Ntuj Leej Saub Yawm li qhub rau Noob Neej tias:
Neb tsis mloog Tswv Ntuj li lus qhub. Txij no mus neb yuav khwv nkag lim kaws los mus puv toj, ces neb yuav tau diav mov nplej mov kws los noj. Neb yuav khwv nkag lim kaws mus puv hav, ces mam li tau daim tsoos ntuag tsoos maj los hnav.

11-Zoov liv,Tswv Ntuj li qhub tias:
Neb tsis mloog Ntuj lus qhub, tuaj lus hais, neb yuav ris zaj mob lub nkeeg tuaj thaum yug tub tuaj rov yug ntxhais.
Zaum no yog vim niag zaj nab siab tuaj mus tsis ncaj, ces Saub yawm li hais tias, Zaj nab ces yuav xuas plab swb tuaj mus rau nruab a.
Neb tsis mloog Ntuj Saub li lus qhub, ces zaj mob lub tuag li tsoj tau neb cev mus zwm rau twv av mus luaj dub. tsuas tseg neb tus ntsuj plig siav rov mus rau pem ntuj huv , nov nas.

TSWV NTUJ ROV CAWM NEEG.
12-Zoov liv, chiv keeb chiv twg tuaj, chiv yuaj chiv twg los?
Chiv keeb,chiv ntawm nkauj Ntshiab Mab Liab tuaj. Chiv yuaj ces chiv ntawd Leej Ntshiab Nkas Nplias los.
Yog Nkauj xeeb zeejMab Liab, tus muaj txiaj ntsim puv siab. Leej Siab nrog koj nyob, ces koj yuav xeeb tub tuaj ntawm ntiag. Leej Siab tub nws yuav yog tus cawm seej, txhiv ntiaj teb leej tib neeg txoj sia.

13-Zoov liv Tswv Ntuj Leej Siab tso li plhuav 99 tus tshiab tuaj nqee suab nkauj, cav txog Leej siab ntshiab, nyob yaj ceeb mus nto nto lim plaws rau ntuj ceeb tsheej kiab.
-Tias yog Tswv Ntuj Leej tub xeeb los ua neeg, rau yaj ceeb lub tsev tuaj mus yug nyuj. Ces zaum no yaj ceeb leej tib neeg leej mus siab huv yuav nyob mus kaj lug.

14-Zoov liv cia ntuj hnub qub nyob mus yuj ntug. Yuav yuj lawm niaj mus ib lub, rau sab ntuj kaj. Nws lis mus fi tau lawm niaj peb tsav vaj tuaj txi tus paj tshab. Kom yaj ceeb leej tib neeg leej mus siab huv, tau nyob mus yeej dab.

15-Zoov liv Tswv Ntuj Leej Siab tub Yes Xus nqis nroos tuaj txwm lis zus tau peb caug peb xyoo. Tswv Ntuj yuav txhiv yaj ceeb neeg lub meej tsim kon rov zoo. Noob Neej yaj ceeb ces tau mloog, tus dab toj dab ntxaug lus haub tuaj lus npog. Ces li muab Tswv Ntuj Leej Siab tub tua dai lis ncuv tuaj rau tus khaub lig ntoo.
=Zoov liv txog lub caij zim txwv, Tswv Ntuj yuav txhiv neeg yaj ceeb neeg tus ntsuj. Ces Noob Neej tau mloog dab toj dab ntxaug lus haub, li qiv tau 30 lub txiaj los liam tias Ntuj Siab Leej tub ces yog tub thuam Ntuj.

16- Zoov liv Yes XusPleev, yog Leej Siab tub cawm seej tau tuag ua daj teg lis rawv rau tus ntoo mus ua daj npab. Ces yog tuag los mus txhiv, koj tub nraug Laj ( N ) koj tus ntsuj plig nrog ntsuj duab kom tau nce li hlo rau ntuj ceeb tsheej sab.
Yes Xus tau tuag mus ua lawm daj tes, ces yog tuag los mus cawm koj tub nraug Laj ( N ) Kom koj tau nrog Tswv Ntuj nyob ib tse tuaj mus ua ke. Nov na.

QHIA KEV MOB KEV TUAG.
17-Zoov liv, yeeb vim Noob neej tau mloog Ntxwj sib nyoog los lus haub tuaj lus ntxias, kom noj lub txiv toj txiv taug siav tuaj lub daj, ces zaum no koj ncig yeev 99 txog kab, los zaj mob lub tuag li raws tau koj qab.
=Tub nraug Laj (N ) Koj ncig lis yeev txog tej nrab plaj los cas zaj mob lub tuag nyob mus tsis nrog kaj. Cas koj ncig yeev txog tej nrab tsev txuas xwb los zaj mob lub tuag nyob tuaj tsis nrog nquag.

18-Zoov liv, tub txib los raug tsis muaj, tub khaiv los raug tsis tau. Tub tij ces yuav luj peev lis zias tuaj ntawm qaws tsho, yuav mus raws tau poj mab tuaj kho. Raws tau poj Mab tuaj txog, poj Mab muab yim hauv tshuaj los kho, los zaj mob lub tuag nyob tuaj mus tsis tso.
=Koj tub kwv yuav luj peev nyiaj lis zus tuaj ntawm duav, mus raws yawm Suav, Raws tau yawm Suav nqis tuaj poob, yawmSuav muab cuaj hauv tshuaj los txhaj, los zaj mob lub tuag nyob mus tsis nrog kaj.

19-Zoov liv zaum no koj vuag txoj pa,los txoj pa tu lis nrho,tuaj ntawm ncauj.
=Koj vuag txoj sia los txoj sia tu lis nrho tuaj ntawm cev. Nov nas.

HAIS TXOG TSOOS LAUS.
20-Zoov liv, Noob Neej tsis mloog Ntuj Saub yawm lo lus qhub tuaj lus qhia nyob nruab teb tuaj mus rau nruab vaj, ces noob neej li tau lawm txoj kev txaj. Ces Noob Neej li tsim tau tus tso seb los tib lawm tus tso maj. Kom tau daim tsoos ntuag tsoos maj los hnav.
=Yeeb vim Noob Neej tsis mloog Tswv Ntuj Saub yawm lus qhub tuaj lus qhia, nyob tuaj rau nruab teb. Zaum no Noob Neej li tsim tau tus tsos maj los tib lawm tus tsos seb, kom tau daim tsoos maj tsoos ntuag los ntxheb.

21-Tav nov, tus tsoos maj nyob twg muaj, tsoos ntuag nyob twg raug?
=Zoov liv, luag tsuas cav tau tus tsoos maj ces nyob ntawm poj mab, tsoos ntuag nyob ntawd yawm Suav.

22-Ua ciav leej tub tij yuav luj peev nyiaj lis zus,tuaj ntawm npab mus raws tus tsoos maj qab, txog rau poj mab.Ua ciav poj mab tus tsoos maj kim tuaj tis ua kim. Leej tub tij muas tau lawm niaj peb tib tsim.
= Leej tub kwv yuav luj peev lis zias tuaj ntawm dauv. Mus raws tsoos ntuag cev txog nram Suav. Ua cia yawm Suav tus tsoos ntuag iab tuaj tis ua iab. Leej tub kwv muas tau lawm niaj peb tib fab.

23-Zoov liv zaum no leej tub tij mus raws tau tus tsoos maj los txog. Muab nrom lim nroos rau me noog pej noog kos ncaws, Rheeb khuav tuaj ntawm taw,ncaws nco tuaj ntawm ncauj li tau tub nrug Laj ( N ) koj daim tsoos laus rau koj hnav.
=Leej tub kwv yuav mus raws tau tus tsoos ntuag cev los poob. Muab rau me noog pej noog kos ncaws. Yuav ncaws nco tuaj ntawm ncauj, rheeb khuav tuaj ntawm caug.Tub nraug Laj ( N) li tau koj daim tsoos ntuag rau koj npu, nov nas.

` QHIA DEJ NTXUAV MUAG.
24-Zoov liv yog Ntxwj nyoog siab tuaj mus tsis zao. Nws txia lim ntshis ua niag zaj nab tuaj peb hlis tshav, ziab ntiaj teb nrag caij tuaj tau xya niaj. Ces tus dej ntxheb dej cag li qhuav los mus tu caj.
=Yog Ntxwj Nyoog niag zaj nab tuaj peb hlis tshav, ziab ntiaj teb nrag cai tuaj lawm xya xyoo, ces tus dej ntxheb dej cag li qhuav tuaj mus tu moo.

25-Zoov liv Noob Neej li saub seev txog Ntuj Saub yawm tias, tus dej ntxheb tshuav nyob twg muaj? Dej cag tshuav nyob twg los?
=Zoov liv Tswv Ntuj Leej Saub yawm li qhub nws tub Mais Xes tias, koj muab tsav tshij rau li ntua rau caj zeb, ces caj zeb yuav tiv mus tsis taus. Caj zeb yuav tawg lis plho ua lawm niaj mus plaub txaug. Ces tus dej ntxheb dej cag yuav ntws nto nyob mus txij caug.
=Zoov li Tswv Ntuj Leej niam ntshiab, qhub lis zoj rau nws me ntxhais,Leej Ntshiab Npes nas dev tias, maiv ntxhais, koj muab tsav tshij rau li ntua rau caj tsua ces caj tsua mum tiv tsis taus, caj tsua tawg lis plho ua lawm niaj mus plaub fab. Ces tus dej ntxheb dej cag yuav txhawv yos nyob mus luaj npab.

26-Zoov liv Tswv Ntuj Leej tub Yes Xus nqis lim nroos rau dej Yos Las Das.Ces tus dej ntxheb dej cag li ntshiab huv, ntxuav tau Tub nraug Laj ( N) lub ntsej lub muag dawb mos lim nyoos, rov lawm pem ntuj kag.
=Yog Yes Xus Pleev nws nqis limnroos rau dej Yos Las Das ntub, ces tus dej ntxheb dej cag yuav ntshiab huv,ntxuav tau koj tub nraug Laj ( N) Koj kev txog mus kev txhaum dawb huv rov lawm pem ntuj, nov nas.
(pov dej zoo rau.)

COB NTOO CUAM.
Zoov liv nyob rau yeeb sim yaj no, tsis muaj leej mus siab huv, Tswv Ntuj li tso nws Leej Tub Yes Xus, tuaj tu ntug. Nws li tuaj tshwm sim rau ntiaj teb yaj ceeb neeg lub nkuaj tsiag mus tsev yug nyuj.
=Yaj ceeb li yeeb sim yaj no tsis muaj leej mus siab ncaj. Tswv Ntuj li tso nws Leej Tub tuaj tu plaub,Nws li tshwm sim tuaj rau yaj ceeb ntiaj teb leej tib neeg lub nkuaj tsiag mus dab zaub.

28-Zoov liv Yes Xus tshwm sim tau 33 niaj,Tswv Ntuj tso tus ncauj lus rau Yes Xus ua tus cawm seej, txhiv Noob Neej kom nyob mus yeej dab. Ces Noob neej nplooj siab xib nrog dab liam tias, Leej cawm cawm Seej xav ua ntiaj teb leej tib neeg tus txoov vaj los kav. Tim tseeb lub caij nyoog Pis Las tos ua Vaj txheeb. Ces neej dab sib cog sib hais, kom muab Leej cawm Seej tua lis nthi rau tus ntoo mus ua lawm daj npab.
=Zoov liv Tswv Ntuj Leej Tub nyob tuaj txwm 33 xyoo. Tswv Ntuj tso tus tuam moj cai rau Yes Xus coj. Kom yeej tau tus dab toj dab ntxaug. Kom Noob Neej tsis poob tuaj mus ua cev qhev. Ces Noob Neej nplooj siab xib nrog dab tias, Leej cawm Seej xav ua tus tuam Vaj ntse, li muab Leej caw Seej tua dai li ncuv rau tus ntoo mus ua daj tes. Muaj tseeb tim meej rau lub caij Xes Ntxas ua Txoov tuam Vaj, kav Los Mas teb. Nov nas.

29-Zoov liv Yes Xus tuag lis nthi, pw lis ko rau yeeb tim teb. Tuaj lawm peb hnub, nws sawv tsees luag lawm tej sis ntxhub, nce hlo rov ceeb tsheej ntug.
= Yes Xus tuag lis nthi txwm lis zus tuaj lawm peb nyoog. Nws sawv tsees luag lawm tej sis nyav hla lim plaws rov lawm ntuj kag,tuaj mus teb zoo nov nas.

30-Zoov liv tub nraug Laj, ( Niam,) Koj yuav nco lis ntsoov tias, Leej cawm seej, nws tuag lis nthi los pw lis ko yeeb sim yaj no tej npoo hleb,ces yog tuag los mus txhiv koj tub nraug Laj, ( niam,) koj tus ntsuj plig feb mus rau Ntuj ceeb tsheej teb.
=Leej cawm seej tuag lis nthi, los pw lis ko ntswj av mus luaj dag, ces yog tuag los mus txhiv tub nraug Laj, (Niam) koj tus ntsuj plig rov lawm ntuj kag rau ceeb tsheej nras.

31- Zoov liv tub nraug Laj, ( Niam,) koj tau noj Yews Xus lus mloog Yes Xus qhuab. Zaum no koj sawv kev lim tsees los mus ces koj yuav tau nrog Yes Xus,thiab koj pog koj yawm nyob mum ua lawm ib cuab. Zaum no ces koj yuav coj Yes Xus ntoo cuam roos lawm koj duab. Nov nas.
(Muab ntoo cuam rau.)

QHIA TUS TSWM CIAB.
32-Zoov liv Tswv Ntuj Leej tub Yes Xus yog txoj kev tseem ceeb mus kev ncaj, tub nraug Laj, (Niam,) thaum koj ua neej nyob ntiaj teb, koj tso siab lim lug rauYes Xus lo lus ncaj, Zaum no koj sawv kev lim tsees los mus, koj txais Yes Xus tus paj tswm ciab no coj koj kev mus txog rau Tswv Ntuj lub nras.
= Yes Xus yog Leej cawm seej yog ntiaj teb nee txoj kev nyiam tuaj mus kev hlub,koj sawv kev lim tsees los mus, koj yuav txais Yes Xus tus paj tswm ciab coj koj mus txog Tswv Ntuj lub tsev ntshiab zoo tam li tus paj nyiag paj kub.

33-Zoov liv koj tub nraug Laj, ( Niam,) Yes Xus tus paj tswm ciab,ces yog lub hnub qub nyob mus yuj ntug. Nws yuav coj koj mus yuj txog koj pog koj yawm ib txwm nrog Tswv Ntuj nyob tuaj thaum ub. Koj mus txog ces koj yuav yog Tswv Ntuj ib leeg tub tuaj ib leej ntxhais nyob tsim nuj. Nov nas.
( Cob tswm ciab rau.)

QHIA LUB HLEB RAU.
33-Zoov liv, yeeb vim ntoo ciaj ceeb raug Noob Neej noj lub txiv toj txiv taug, txi tuaj lawm lub kheej. Ces ntoo ciaj ceeb li raug Noob Neej leej tub txawg muab txws los ua tau tub nraugLaj,( Niam,) lub tsev mus xw mleej.
=Yog ntoo ciaj ceeb lub txiv tau coj Noob Neej ncaim ntawm Tswv Ntuj. Ces ntoo ciaj ceeb li raug noob Neej tub txawg muab txws lis zus los ua lawm tub nraug Laj, (Niam,)lub tsev tsuj.

34- Zoov liv Leej tub txawg ntauj lis ntsaws,txog tej yas kab yog leej tub txawg li pom tau ntoo ciaj ceeb qab. Leej tub txawg yuav kwv tau rab niaj taus muaj peb plhu hniav ncig li yeev qab ntoo saib, tshuv lis zoj qaum ntoo nuam, yuav ntov li nrawv, Ntoo ciaj ceeb mus tiv tsis taus, ntoo ciaj ceeb qaug lias mus tav toj. Ces txhij lis zus tog paus cia yim li zoj tog ntsis tseg. Siv nplooj nqeeb hlais nruab nrab, ntoo ciaj ceeb faib li zoj ua lawm niaj mus plaub fab. Li coj los txws ua koj tub nraug Laj lub tsev tuaj mus xwm fab.
=Leej tub txawg siv tus nplooj nqeeb hlais ntoo ciaj ceeb tuaj nruab nrog. Ces ntoo ciaj ceeb pluam lis plhuav ua lawm niaj mus plaub nreej. Ces li coj los txws lim zus ua tau tub nrau Laj, ( Niam ) koj lub tsev tuaj mus xwm leej.

36- Zoov liv, tub nraug Laj, ( Niam,) koj ntim tau lub cev txij zam lim zus los pw lis ko tuaj ntawm cub, koj tub koj ki yuav hu tau tus qhua zej qhua zos tuaj nrog hlub. Zaum no, tus qhua zos tuaj txog, qhua zej tuaj txhua, muab cuaj txog kab los lis txhij, yim txoj kev los lis tas, ces yuav qhia kev rau koj mus rau lawm ntuj kag nov nas.
(Foom hmoov zoo rau lub hleb.)

UA TSAU TEB TSAUG CHAW.
(Nco ntsoov nug npe lub zos yug.)
37-Zoov liv, koj yuav nco li ntsoov tias, thaum koj ua neej nyob rau, Mis kuj teb, los Thaim kuj, Los kuj teb, koj tau noj tsuag luag ib ntsug zoov nuj, haus tas luag ib ncua dej. Rauv tas luag ib ntsug taws. Siv tas luag ib cim txuj. Zaum no koj yuav los mus, koj yuav ua luag tsaug dej tsawg taws, tsaug teb tuaj tsaug chaw, ces koj mas li mus txog lub zos( N...) koj niam koj txi xov xeeb koj.
Koj li mus muab koj tsho tsuj tsho npuag hnav. Koj yog leej tub ces tsho tsuj tsho npuag nyob ntawm ncej ntug. Koj yog leej ntxhais ces tsho tsuj tsho npuag nyob ntawm ncej paim. Lub haum koj ces koj li hnav.
Koj pog, koj yawg yuav nrog Tswv Ntuj tuaj tos koj taug txoj kev tuam choj kub choj nyiag. Koj pom Leej uas muaj mom teev nyiaj mom teev kub tawg paj lis paug tuaj ci hob, ces thiaj yog tus Tswv Ntuj yuav hlub koj.

38-Zoov liv kuv qhia koj nce nto lim plaws 99 qib ntaiv ntuj , Koj mus ces koj yuav pomYaj Koob thiab Yaj kuam. Yaj Koob tuav ntaj toog, Yaj Kuam tuav ntaj hlau. Nkawd yuav laug rooj vag thaiv koj kev, laug rooj lag thaiv koj kab. Ces koj hais tias, thaum koj ua neej nyob koj tau hnov Yes Xus zaj lus mloo tau nws zaj qhia. Koj yuav los mus cuag tus Tswv Ntuj tuav yaj Ceeb leej tib neeg txoj sia. Ces nkawd yuav qhib rooj vag rau koj hla. Qhib rooj ntug rau koj mus no.

(Kuv yuav hu nkauj rau koj hloog.)
39-Nplooj lus txiv li saub, Saub Txiv li lus, neej ces yuav qiv saub li lus lus hais.Zoo liv kuv xa koj los nto lis plaws Ntuj ceeb tsheej 99 qib mus ntaiv ntuj os, koj mus taus ces koj mus os. Kom Tswv Ntuj muab tus txiaj tus ntsim rau tub txawj lis nkiag rov mus qhia rau lawm koj tub nov yuas.
=Koj nce mus nto lis plaws ntuj ceeb tsheej 99 mus qib ntaiv os, koj mus taus ces koj mus os, kom Tswv Ntuj muab tus txiaj tus ntsim rau tub txawj lis nkiag coj rov mus qhia lawm koj ntxhais nov yuas.

40-Nplooj lus txiv li saub, Saub txiv li lus. Tswv Ntuj ces nrog nej (N...) tias, nej ua neejnyob rau ntiaj teb es, leej hlob yuav hlub lawmleej yau os, leej yau los yuav mloog lawm leej hlob os. Nej lub siab thiaj li yuav nyob tuaj mus nrog kaj no os.Nej me ntsuj plig li yuav nyob tuaj mus nrog chaw los mus nog txaj no yuas.
= Leej hlob ces yuav tuav lawm leej yau tes, leej yau los yuav hwm leej hlob tuaj mus lub npe nov yuas.

41-Nplooj lus txiv li saub, Saub txiv li lus. Zoo liv tub txawj lis nkiag xa nej ( N...) mus nto lis plaws rau Ntuj Ceeb tsheej es, nws yuav nrog Ntuj niam Ntuj Txiv sib hais sib cog tias:
Tseem tshuav nws tub nws kiv ua neej nyob tuaj rov tom qab os. Kom Ntuj niam ntuj txiv foom tus ntsuj tub ntsuj ki rau nej kom huaj vam ntws xws xub ntab nov yuas.
=Nej (N...) nws laus tias:
Tshuav nws laus tub tuaj nws laus kiv tseem ua neej nyob tuaj rov tom tsev os. Kom Ntuj Niam Ntuj Txiv foom tus ntsuj tub mus ntsuj ki rau nej nyob huaj vam ntws xws li xub mes nov yuas.

42-Nplooj lus txiv li saub, Saub txiv li lus. Zoo liv tub txawj lis nkiag ces yuav ploj pliag rov qab los mus zaj ca yuav tawm lis plaws rov rau ntiaj nrag, toj roob mus zeb sib os. Txij no mus ces tus neej nrhiav los tsis tau, tus dab nrhiav los yuav tsis ntsib nov yuas.
=Zoo liv tub txawj lis nkiag, yuav ploj pliag rau qab mus zaj zeb os. Tawm lis plaws rov lawm ntiaj teb, toj mus roob zeb tshau. Txij no mus ces tus neej nrhiav los tsis ntsib, tus dab nrhiav tuaj los tsis tau. Nov yuas.

Xib Hwb Yaj Zoov Ntxheb.
Sacramento.12-13-2012.

KAB KE XA PLIG ntu Ib raws li XH.Yaj Zoov Ntxheb. 6dtr10

**Maiv Tooj** 7th February 2014, 8:20 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°2

Re: KAB KE XA PLIG ntu Ib raws li XH.Yaj Zoov Ntxheb.

Post Maiv Tooj 7th February 2014, 8:20 am

ZAJ NKAUJ SAWV KEV.

Zaj nkauj no hais thaum ua thaj txi ntuj tas. Uas tus txiv Leej Choj hlawv tshuaj tsw qab los foom hmoov zoo rau tus qauv lawd tas, ces hais thaum ntawd, mam coj tus qauv tawm hauv tes teev ntuj mus.

Xib Hwb hais los ib tug neeg ntseeg hais los tau.

1-Nplooj lus txiv li Saub, Saub Txiv li lus, neej ces yuav qiv Saub li lus los hais. Zoo liv raug tau ntuj ntsig cam sij vos, li raug neej dab teb sawv los nyob.
=Raug tau ntuj ntsig cam sij voos. Li raug, neej dab teb sawv los txoos.

2-Nplooj lus txiv li Saub, Saub txiv li lus, yog Ntxwj sib lis Nyoog siab tuaj mus tsis zoo. Tso lub mob lub tuag poob sis nroos rau lawm neej teb. Thiaj li kho nws laus siab tsis txawj tag, lub mob lub tuag li txeem zoj rau nws laus tej mus ntshua siab nov yuas.
=Nplooj lus... Saub Txiv li lus, Yog Ntxwj Sib lis Nyoog siab tuaj mus tsis zoo, tso lub mob lub tuag poob sis nroos rau lawm neej chaw, thiaj li yuav kho nws laus siab tsis txawj tag, lub mob lub tuag li txeem zoj rau nws laus tej mus ntshua plawv nov yuas.

3- Nploj lus txiv li Saub, Saub Txiv li lus, Ob xyoo nram ntej ces tsis kho nws laus siab. Nws laus yuav nrog nws poj li tub se koom ib plaj los mus qoob muab. Cas xyoo no yuav kho nws laus siab tsis txawj tag. Ces nws laus li yuav tau nrog nws ploj li tub se tuaj mus sis fab cuab nov yuas.
=Nplooj lus...Ob xyoo nram ntej ces tsis kho nws laus siab ces, nws laus yuav nro nws poj li tub se koom ib plaj los mus qoob ncig os. Xyoo no casyuav kho nws laus siab tsis txawj tag. Nws laus li yuav tau nrog nws poj li tub se tuaj mus sis faib yig nov yuas.

4-Nplooj lus ...Txhia niaj mus txhia xyoo. Nws laus yuav nrog nws poj li tuv se, koom sau plaj qoob los puv txhab tuaj lawm li nthub. Xyoo no nws laus qaij qaug li yeev los mus, nws tub nws kiv yuav muab tau tsav tsim nuj dab qas tsi rau nws hnav loj los mus ua Tswv Ntuj ib leeg tuaj mus zoo tub nov yuas.
=Nplooj lus...Txhia niaj mus txhia xyoo, nws laus yuav nrog nws poj tub li se koom sau plaj qoob lo puv txhab tuaj tsaus li nti, Xyoo no nws laus qaij qaug lis yeev los mus, nws tub nws kiv yuav muab tau tsav tsim nuj dab qas tsi rau nws laus hnav coj los mus ua Tswv Ntuj ib leeg tuaj mus zoo kiv nov yuas.

5-Nplooj lus...N...Thaum koj ua neej nyob os. Koj tsuas ua hnub coj ua hmo muab zaj peb txiv nyob saum ntuj los qhub. Hnub no ces yog lawm koj hnub,os koj ces yuav mus xeeb zuj lis zias ua Tswv Ntuj ib leeg tuaj mus zoo tub nov yuas,
=Nplooj lus...N...Thaum koj ua neej nyob, koj tsuas ua hnub coj ua hmo muab zaj koj nyob kaj lug Mab Liab coj los hais hnub no ces yog lawm koj hnub, koj ces yuav mus xeeb zuj lis zias ua Tswv Ntuj ib leeg tuaj mus zoo ntxhais nov yuas.

6-Nplooj lus, txiv li Saub, Saub txiv li lus. Zoo li tsev txoos los muas npoj xyom cuab, Nej txiv nws laus nce hlo Ntuj ceeb tsheej ces, nej so kua muag yuj lis ywm, nej tsis txhob quaj os, nej txiv nws laus mus ua neej ces nws yuav ua neej kaw qhov rooj li nti tsis rov tuaj nov yuas.
=Nplooj lus...Nej txiv nws laus nce li hlo rau ntuj ceeb tsheej ces, nej so kua muag yuj lis ywm tsis txhob tos, Nej txiv nw laus mus ua neej rau Ntuj Ceeb tsheej ces nws yuav ua neej kaw qhov rooj li nti tsis rov los nov yuas.
Tas.

Yaj Zoov Ntxheb Xib Hwb.

**Maiv Tooj** 7th February 2014, 8:23 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°3

Re: KAB KE XA PLIG ntu Ib raws li XH.Yaj Zoov Ntxheb.

Post Maiv Tooj 7th February 2014, 8:23 am

ZAJ XA PLIG NTU IB.
Yaj Zoov Ntxhwb Xib Hwb.

NTUJ TSIM TEB RAUG.
1- Zoov li, ntuj ntsig teb hav cam sij vos,( sij voos,) yog hnub txheej tshoj thaum ub. Tswv Ntuj tsim tau lub ntuj los nyob. ( los txoos.)
Li xeeb tau Tub Nraug Laj cev los nyob. ( los txoos.)

2- Zoov liv Tub Nraug Laj, ( Niam Nkauj Lag.) Koj yuav paub tias, Thaud lub ntuj ( teb ) ynob tuaj tsis tau tawg paj,( tuaj nrog.) Tswv Ntuj yeej nyob txawm tag. ( los ua ntej lub ntuj kaj) Tswv Ntuj yog zoo li thawj tug tsiaj ntawv As Fas. ( kawg Os Mes Nkas.)

3-Zoov liv, hnub txheej tshoj thaum ub,lub ntuj (teb) nyob tsis tau muaj duab, ces Tswv Ntuj li tso tus cua moj lwg kaws tuaj tshuab. Ces lub ntuj li kaj lis zus los ua ntuj ntsuab.
=Zoov liv hnub txheej tshoj thaum ub, lub teb tseem nyob tsaus li nti, yees lis yi xws pas iav. Ces Tswv Ntuj li cog lub teb kom muaj tus nroj tus tsuag xeeb tuaj ntsuab lis niab.

4-Zoo liv, Tswv Ntuj tsim tau lub ntuj loj li tom cas. Ces Tswv Ntuj li tseb noob xyoob, noob ntoo, noob qoob noob loo los nyob. Tswv Ntuj tsim nkauj hnub nrau lhi tuaj ziab kom noob xyoob noob ntaoo, noob qoob noob los hlav hlob tuaj ntsuab lis xiab.
=Zoo liv, Tswv Ntuj tsim tau lub teb dav li tom ci. Ces Tswv Ntuj tsim noob tsiaj noob txhuv, noob neej los txhij, Ces Tswv Ntuj tsim nkauj hnub nraug hli hnub qub ci ntsa lis iab,kom tus noob tsiaj noob txhuv, tus tiaj nqhuab tsiaj deg nrog noob neej kom muaj sia.

5-Zoov liv Tswv Ntuj tso Nkauj hnub Nraug li tuaj kav. Ces Ntuj li cais av nyob muaj av nras. Av li nyob mus ruaj cag. Ces ntswj av li nyob mus ciaj zeb.
= Tswv Ntuj tso Nkauj Hnub Nraug hli tuaj nres. Ces Ntuj li cais dej nyob mus ua lawm dej pas. Tus dej li sau mus tsheej hav. Ces ntswj deg li nyob mus ciaj ntsev nov nas.

6- Ua ciav tav no, Kaj ntug ( Tsaus ntuj )lis zus, Tub Nraug Laj, ( Niam...) Koj ntim tau lub txiaj zam lis zus, los pw lis koj tuaj ntawm npoo hleb. Yog koj tuag daj los tuag tiag? Tuag daj no ces sawv los ncig qav mus ncig num. Tuag tiag nov ces tig ntsej los mloog, kuv yuav qhiav qhia kev rau koj mus cuag tus Tswv tsim koj lub cev.
=Ua ciav tav no, N...Koj ntim tau lub cev txiaj zam lis zus, los pw li ko tuaj nrog npoo ntoo. Yog koj tuag tseeb los tuag cuav? Tuag cuav nov ces sawv los txuas ncauj txuas lus. Tuag tseeb nov ces tig muas los saib kuv yuav qhia kev rau koj mus cuag tus Tswv tsim koj tus ntsuj plig, pub txoj pa rau koj nov nas.

NTUJ TSIM NEEG.

7-Zoov liv Tswv Ntuj tsim tau lub ntuj los tiav, ces Tswv Ntuj tsim noob neej los khiav. Tswv Ntuj tsim noob neej ces Tswv Ntuj muab av luaj los puab. Ces Noob Neej lub cev ntaj ntsug li nyob tau phim tus ntsuj duab. Kom mloog tau Tswv Ntuj li lus qhuab.
=Zoov liv, Tswv Ntuj tsim tau lub teb los txhua, ces Tswv Ntuj lis tsim Noob Tsav los xyuas. Tswv Ntuj tsim Noob Neej ces Nws muab av luaj los ncu. Kom Noob Neej lub cev ntaj ntsug nyob phim tus ntsuj plhu. Kom mloog tau lawm Ntuj li lus qhub...

8- Zoov liv, Tswv Ntuj muab av luaj los puab Noob Neej, los Noob Neej nyob tsis tsheej. Ces Tswv Ntuj li xuas Noob Neej txha tav los tsim Niam Nkauj Lag. Ces Noob Neej saib niam Nkauj Lag, tus nqaij yog Noob Neej nqaij, Txhav yog Noob Neej txhav, Noob Neej saib niam Nkauj lag zoo ntxim Noob Neej siab, ces Noob Neej muab niam Nkauj Lag hu npe lis zus ua Nkauj Iab.
= Tswv Ntuj muab av luaj los tsim Noob Neej, los Noob Neej, nyob tsis tus, ces Tswv Ntuj xuas Noob Neej cev los tsim Niam Nkauj lag. Ces Noob neej saib Nam Nkauj Lag, cev yog Noob Neej cev, duab yog Noob Neej duab, zoo li txooj xyoob nyob phim txooj ntoo. Nkauj Iab li seev suab muab Noob Neej hu ua Txiv Nraug Oo.

9-Zoov Liv, hnub txheej tshoj thaum ub, Nkauj Iab thiab txiv Nraug Oo nkawd tsis khwv los twb tau noj, yeeb vim Ntxwj Nyoog siab tuaj mus tsis zoo. Nws nyob tsheej npe tuaj hu ua dab, ces nws txia lis ntshis ua niag Zaj Nab. Tuaj ntxias, Nkauj Iab Nraug Oo nkawd muab lub txiv toj txiv taug los noj. Ces zaum no Nkauj Iab Nraug Oo nkawd li txais tau Ntxwj Sib Nyoog zaj mob lub tuag nrog txoj kev pl0j.
= Zoo liv, Hnub txheej tshoj taum ub, Nkauj Iab Nraug Oo nkawd tsis khwv los twb paub nyob. Yeeb vim Ntxwj Nyoog siab tuaj mus tsis zoo. Nws txia lis ntshis ua niag Zaj Nab, tuaj ntxias Nkauj Iab Nraug Oo nkawd, muab lub txiv toj txiv taug los saj. Ces zaum no Nkauj Iab Nraug Oo nkawd nplooj siab qaug lias nyob tuaj tsis nrog kaj. Li tsim tau tus tso seb tib lawm tus tsos maj, kom tau tus tsoos ntuag tsoos maj los hnav, nov nas.

NTUJ TXIAV TXIM.

10-Zoov liv Yog Ntxwj Nyoog tuaj haub Noob Neej nyob mus lwj siab, ces Noob neej taug li nraim txoj kev Noob Neej nyiam, Tswv Ntuj li qhub rau Noob Neej tias, neb tsis mloog Ntuj li lus qhia lus coj, txij no mus neb yuav Khawv nkag lis kaws mus puv toj, ces mam li tau diav mov nplej mov kws los noj.
=Zoov li,Yog Ntxwj Nyoog tuaj haub Noob Neej nyob mus lwj plawv, ces Noob Neej thiaj taug nraim li txoj kev Noob Neej ntshaw. Tswv Ntuj li qhub rau Noob Neej tias, neb Tsis mloog Tswv Ntuj li lus hais,txij no mus neb yuav khwv nkag lis kaws los mus puv hav, ces mas li tau daim tsoos ntuag tsoos masj los hnav no nas.

11-Zoov li , yog Ntuj Txiv li lus hais, neb tsis mloog Ntuj lus qhia tuaj lus qhub, ces neb yuav txais tau zaj mob lub nkeeg tuaj thaum yug ntxhais los rov yug tub.
=Zoov liv, yog Ntuj txiv li lus qhia, neb tsis mloog Ntuj lus qhia tuaj lus hais, ces neb yuav tau txais zaj mob lub nkaeg tuaj thaum xeeb tub los rov yug ntxhais.

12-Zoov liv Yeeb vim niag Zaj Nab siab tuaj mus tsis ncaj, Saub yawm li kom nws xuas plab swb tuaj nkag nrab a.
=Zoov li, Yog tau Zaj Nab siab tuaj mus tsis zoo, Saub Yawm li kom nws xuas plab swb tuaj mus nruab zoov. No nas.

13-Zoov liv Yeeb vim Noob Neej tsis mloog Ntuj Saub li lus qhub, ces zaj mob lub tuag lis tsoj tau Noob Neej cev rov mus zwm rau twv av mus luaj dub,
=Zoov liv Yeeb vim Noob Neej tsis mloog Ntuj Saub li lus qhia ces zaum no Zaj mob lub tuag li raws tau Noob Neej cev rov mus zwm rau twv av mus luaj liab nov nas.

TSWV NTUJ ROV CAWM NEEG.

14-Zoov liv chiv keeb chiv twg tuaj? Chiv yuaj chiv twg los?
Chiv keeb chiv ntawm Nkauj Ntshiab Mab Liaj tuaj. Yog Nkauj Ntshiab Mab Liab tus muaj txiaj ntsim puv siab, Leej Siab nrog koj nyob, ces koj yuav xeeb tub tuaj ntawm ntiag. Leej Siab tub ces yog Tub cawm seej.
=Zoo li Chiv yuaj chiv ntawm Nkas Nplias los, Nkauj xeeb zeej Mab Liab Lub txiv txi ntawm koj xub ntiag, Yog Leej Siab tub yog tub cawm seej, txhiv ntiaj teb leej tib neeg txoj sia. No nas.

15-Zoo li, Tswv Ntuj Leej Siab Ntshiab tso li plhuav, 99 tus tshiab nqis sis nrwb sis nroos tuaj nqee suab nkauj cav txoj Leej Siab Ntshiab nyob yaj ceeb mus nto plaws rau Ntuj Ceeb Tsheej kiab.
=Zoov li, Tswv Ntuj Leej Sisb Ntshiab tso plhuav 99 tus tshiab tuaj nqee suab nkauj ncav txog Leej Siab Ntshiab tub xeeb los ua neeg tuaj mus rau lub tsev los mus yug tsiaj. Ces zaum no Yaj ceeb leej tib neeg leej mus siab huv, yuav nyob kaj lug nrog txoj sia. Nov nas.

16-Zoov Li, cia ntuj hnub qub nyob yuj ntug, yuav yuj lawm niaj ib lub rau sab Ntuj kaj, nws yuav mus fi tau lawm niaj peb tsav Vaj, tuaj txi tus paj tshab. Kom Yaj Ceeb Leej tib neeb neeg Leej mus siab huv, tau nyob mus yeej dab.
=Zoov li, cia ntuj hnub qub nyob yuj ntug, yuav yuj lawm niaj ib lub rau sab kaj ntug lim txoog. Ces nws yuav mus fi tau lawm niaj peb tsav Vaj tuaj txi tus paj tshab, kom neeg yaj ceeb leej mus siab dawb tua nyob mus yeej dab Ntxwj Nyoog. Nov nas.

17-Zoov liv, Tswv Ntuj Leej Siab tub Yes Xus nqis nroos tuaj txwm lis zus tau peb caug peb xyoo, Ces Nws yuav txhiv Yaj ceeb leej tib neeg lub meej yim kom rov zoo. Ces yaj ceeb Leej Tib neeg tau mloog niag dab toj taug lo lus hauj tuaj lus npog, ces li muab Leej Siab Ntshiab tub Yes Xus tua ua daj teg li ncuv tuaj saum khaub lig ntoo.
= Zoov liv, Tswv Ntuj Leej tub Yes Xus nqis lis nroos tuaj txwm peb caug peb niaj, Ces nws yuav txhiv yaj ceeb neeg tus Ntsuj duab nrog Ntuj Plig rov qab. Ces Yaj ceeb Leej tib neeg tau mloog niag dab toj taug lus haub tuaj lus npog. Li mus qiv tau 30 lub txiaj nyiag los liam tias, Leej Siab tub ces yog tub Thuam Ntuj. Ces muab tua lis nti rau tus ntoo los mus ua lawm daj npab.

18-Zoov li Yes Xus Pleev yog Leej Siab tub cawm Seej tau tuag ua daj teg li ruav rau tus ntoo mus ua daj npab, ces yog tuag los mus txhiv koj tub naug Laj
( niam nkauj Lag) koj tus Ntsuj Plig nrog Ntsuj Duab kom tau nce li hlo rau Ntuj ceeb tsheej sab.
=Zoov li, Yes Xus Pleev yog Leej Siab tub cawm Seej tau tuag dai li ncuv rau tus ntoo mus ua daj teg, ces yog tuag los mus txhiv Tub Nraug Laj ( Niam...) koj tus Ntsuj Plig Ntsuj cev rov rau Ntuj ceeb tsheej teb,Nov nas.

QHIA KEV MOB KEV TUAG.

19-Zoov li,yeeb vim Noob Neej tau mloog Ntxwj Sib lis Nyoog lus haub tuaj lus ntxias, kom noj lub txiv toj txiv taug siav tuaj lub daj, ces zaum no koj ncig yeev 99 txog kab, los zaj mob lub tuag li raws tau koj qab. Koj ncig yeev tej nrab plaj xwb los zaj mob lub tuag nyob mus tsis nrog kaj.
=Zoov li, Yeeb Vim Noob Neej tau mloog Ntxwj Sib lis Nyoog lus hauj tuaj lus ntxias, kom noj lub txiv toj txiv taug siav tuaj lub ntev, ces zaum no koj ncig yeev 99 txog kev los zaj mob lub tuag tuav tau koj tes. Koj ncig yeev tej nrab txuas xwb los zaj mob lub tuag nyob tuaj tsis nrog nquag.

20-Zoov li, tub txib los raug tsis muaj. Tub Khaiv los raug tsis tau. Tub tij ces yuav luj peev li zias tuaj ntawm nqaws tsho, yuav mus raws poj Mab tuaj kho, raws tau poj Mab tuaj txog, poj Mab muab yim hauv tshuaj los kho. Los zaj mob lub tuag nyob tuaj mus tsis tso. Tub Nraug Laj (Niam...) Zaum no koj vuag txoj pa los txoj pa tu li nrho tua ntawm lo.
=Zoov Liv, Tub kwv yuav luj peev nyiaj lis zus tuaj ntawm duav, yuav mus raws yawm Suav, Raws tau yawm Suav nqis tuaj poob. Yawm Suav muab cuaj hauv kuab los txhaj, los zaj mob lub tuag nyob mus tsis nrog kev. Tub...( Niam...) Zaum no Koj vuag txoj sia los txoj sia tu li nrho tuaj ntawm cev. Nov nas.

HAIS TXOG TSOOS LAUS.

21-Zoov liv, Yog vim Noob Neej tsis mloog Ntuj Saub yawm li lus qhuab tuaj Nruab vaj, ces Noob Neej li tau txais txoj niag kev txaj, Ces Noob Neej li tsim tau tus tso seb los tib rau tus tso maj, kom tau daim tsoo ntuag tsoos maj los hnav.
=Zoov liv,yog Noob Neej tsis mloog Ntuj Saub yawm li lus qhia tuaj nruab tsev, ces Noob Neej li ntshaw txoj kev ntxheb. Ces Noob Neej li tsim tau tus tsos maj tib lawm tus tsos seb, kom tau daim tsoos maj tsoos ntuag los ntxheb. Nov nas.

22- Zoovliv, tav no tus tsoos maj nyob twg muaj, tsoos ntuag nyob twg raug?
Luag tsuas cav tau tus tsoos maj ces nyob ntawm poj Mab. Tsoos ntuag ces nyob ntawm yawm Suav.

23- Zoov liv Ua ciav Leej Tub Tij yuav luj peev nyiaj lis zus tuaj ntawm npab, mus raws tus tsoos maj qab. Mus txog poj Mab ua ciav poj Mab tus tsoos maj kim tuaj tis ua kim. Leej tub tij mus tau lawm niaj mus peb tib tshim.
=Zoov liv, Leej tub kwv yuav luj peev lis zias tuaj ntawm tes, yuav mus raws tsoos ntuag cev. Mus txog rau yawm Suav ua ciav yawm Suav tus tsoos ntuag iab tiaj tis ua iab, leej tub kwv mus tau lawm niaj peb tib fab.

24-Zoov liv, Leej tub tij mus raws tau tsoos maj qab los txog. Muab nrom lim nroos rau me noog pej noog kos ncaws, rheeb khuav tuaj ntawm taw,ncaws nco tuaj ntawm ncauj, li tau Tub Nraug Laj ( N...) koj daim tsoos laus rau koj hnav no nas.
=Zoov liv, Leej Tub kwv yuav mus raws tau tus tsoos ntuag cev los poob, yuav muab rau me noog pej noog kos ncaws, yuav ncaws nco tuaj ntawm ncauj, rheeb khuav tuaj ntawm tes li tau Tub... ( Niam...) koj daim tsoos laus rau koj ntsheb, nov nas.

QHIA DEJ NTXUAV MUAG.

25-Zoov liv,yog Ntxwj Nyoog siab tuaj mus tsis ncaj. Nws txia lim ntshis ua niag Zaj Nab tuaj peb hlis tshav,ziab ntiaj teb nrag cai tuaj tau xya niaj. Ces tus dej ntxheb dej cag, li qhuav los mus ntsiag txiaj.
=Zoov liv,Yog Ntxwj Nyoog siab tuaj mus tsis zoo, nws txia lim ntshis ua niag Zaj Nab tuaj peb hlis tshav, ziab ntiaj teb tuaj lawm xya xyoo. Tus dej Ntxheb dej cag thiaj qhuav los mus tu moo. Nov nas.

26-Zoov liv, Noob Neej li saub seev txog txog Ntuj Saub yawm tias, tus dej ntxheb tshuav nyob twg muaj? Zoov li, Ntuj Saub Yawm li qhub rau nws tub Mais Xes tias,koj muab tsav tshij rau lis ntua rau caj zeb, ces caj zeb mum tiv tsis taus, caj zeb yuav tawg lis plho ua lawm niaj ob txaug. Ces tus dej ntxheb dej cag yuav ntws nto nyob mus txij caug.
=Zoov liv, tus dej ntxheb dej cag tshuav nyob twg los? Zoov li Tswv Ntuj Leej Niam Ntshiab, qhub li zoj rau nws me ntxhais Npes Nas Dette tias, Maiv Ntxhais, Koj muab tsav tshij rau li ntua rau caj tsua, ces caj tsua yuav tiv tsis taus. Ces caj tsua yuav tawg li plho ua lawm niaj mus plaub fab,tus dej Ntxheb dej cag yuav txhawv yos nyob mus luaj npab. Nov nas.

27-Zoov li , Ua ciav Tswv Ntuj Leej tub Yes Xus nqis lim nroos rau dej Yos Las Das ntub. Ces tus dej Ntxheb dej cag li ntshiab huv ntxuav tau Tub Nraug Laj, (N...) lub ntsej lub muag dawb mos lim nyoos, rov lawm pem ntuj huv.
=Zoov liv, Tswv Ntuj Leej tub Yes Xus nqis lim nroos rau dej Yos Las Das. Ces tus dej ntxheb dej cag yuav ntshiab huv, ntxuav tau Tub Nraug Laj
( N...) lub ntsej lub muag dawb mos lim nyoos rov lawm pem ntuj kag nov nas.
( pov dej zoo rau.)

COBNTOO CUAM.

28-Zoov liv, yeeb sim yaj no, tsis muaj leej mus siab huv. Tswv Ntuj li tso Nws Leej Tub Yes Xus tuaj tu ntug. Nws li tuaj tshwm sim rau Yaj Ceeb leej tib neeg lub tsev mus yug nyuj.
=Zoov liv, Yaj Ceeb, Yeeb sim yaj no, tsis muaj leej mus siab ncaj. Tswv Ntuj li tso nws Leej Tub tuaj tu plaub. Nws li tshwm sim rau Yaj Ceeb leej tib neeg lub nkuaj tsiag mus dab zaub, Nov nas.

29- Zoo,liv, Yes Xus tuaj tshwm sim rau Yaj Ceeb tau 33 niaj, Tswv Ntuj tso lus rau Yes Xus ua tus cawm Seej, txhiv noob Neej nyob mus yeej dab. Ces Noob Neej nplooj siab xib nrog dab liam tias, Leej Cawm Seej xav ua ntiaj teb leej tib neeg tus Tuam Txoov Vaj kav. Tim meej tseeb lub caij nyoog Pis Las Tos ua Vaj Txheeb.
CesNeej Dab sib cog sib hais kom muab leej cawm Seej tua li nti rau tus ntoo mus ua lawm daj npab.
=Zoov liv Tswv Ntuj Leej tub nyob txwm lis zus 33 xyoo, Tswv Ntuj tso tus Tuam Moj Cai rau Yes Xus coj. Kom yeej tau tus dab toj dab ntxaug. Kom Noob Neej tsis poob ua cev qhev. Ces Noob Neej nplooj siab xib nrog Dab tias, Leej cawm Seej xav ua tus Tuam Txoov Vaj ntse, li muab Leej Cawm Seej tua dai li ncuv rau tus ntoo mus ua lawm daj tes. Zoo liv, muaj tseeb tim meej rau lub caij Xes Ntxas yog Tuam Txoov Vaj kav LosMas teb, Nov nas.
30- Zoov liv, Yes Xus tuag li nthi pw li ko rau yeeb sim yaj no tuaj lawm peb hnub. Ces Nws sawv tseem luag lawm tej sis ntxhub, Nce hlo Ntuj Ceeb Tsheej ntug.
=Zoov liv, Yes Xus tuag li lis nthi txwm lis zus tuaj mus peb nyoog, Nws sawv tsees luag lawm tej sis nyav hla lim plaws rov rau lawm ntuj kag. Nov nas.
31- Zoov liv, Tub Nraug Laj, ( N...) Koj yuav nco li ntsoov tias, Leej Cawm Seej. Nws tuag lis nthi pw li ko yeeb sim yaj no tej npoo hleb, ces yog tuag los mus txhiv Tub Nraug Laj. ( N...) koj tus ntsuj duab ntsuj plig feb mus rau Ntuj Ceeb Tsheej teb.
=Zoov liv, Leej cawm Seej, tuag li nthi los pw li ko yeeb sim yaj no twv av mus luaj dag. Ces yog tuag los mus txhiv tub Nraug Laj, (N...) Koj tus ntsuj plig ntsuj duab rov rau lawm pem ntuj kag. Nov nas.
32-Zoov liv, Tub Nraug Laj, koj tau mloog Yes Xus hais, txais Yes Xus cev, ces zaum no koj yuav coj Yes Xus Ntoo Cuam qhia koj kev. Ces koj yuav sawv kev lim tsees los mus nrog Yes Xus thiab koj pog koj yawm ua lawm niaj mus ib tse.
=Zoov liv, Tub Nraug Laj, ( N...) Koj tau mloog Yes Xus qhuab, txais Yes Xus yuav, Ces zaum no koj coj Yes Xus ntoo cuam roos lawm koj duab, Ces koj yuav sawv kev lim tsees los mus nrog Yes Xus thiab koj pog koj yawm ua lawm niaj mus ib cuab. Nov nas.
( Muab ntoo cuam cob rau.)
QHIA TUS TSWM CIAB.
33- Zoov li Tub Nraug Laj, ( N...) Yes Xus tus paj Tswm Ciab, ces yog koj lub hnub qub nyob mus yuj ntug. Nws yuav coj koj mus yuj txog koj pog koj yawm ib txwm nrog Tswv Ntuj nyob tuaj mus thaum ub. Koj mus txog ces koj yuav yog Tswv Ntuj ib leeg tub nyob tuaj mus tsim nuj.
=Zoov liv, Tub Nraug Laj, ( N...) Yes Xus tus paj tswm ciab, ces yog koj lub hnub qub nyob mus yuj ntug. Nws yuav coj koj mus yuj txog koj pog koj yawm ib txwm nrog Tswv Ntuj nyob tuaj mus thaum i, Koj mus txog ces koj yuav yog Tswv Ntuj ib leeg tuaj mus zoo kiv nyob tuaj mus tsim nqi. Nov nas.
( Cob twm ciab rau.)

QHIA LUB HLEB RAU.
34- Zoo li, yeeb vim ntoo ciaj ceeb raug Noob Neej noj ntoo lub txiv toj txiv taug txi tuaj lub kheej. Ces ntoo ciaj ceeb li raug Noob Neej tub txawg, muab txws lim zus los ua tau Tub Nraug Laj ( N...) lub tsev mus xwm leej.
=Zoov liv, yog ntoo ciaj ceeb lub txiv toj txiv taug tau coj Noob Neej ncaim ntawm Tswv Ntuj. Ces ntoo ciaj ceeb li raug Noob Neej tub txawg, muab txws lim zus los mus ua lawm Tub Nraug Laj ( N...) lub mus tsev tsuj. Nov nas.
35- Zoov liv, Leej tub txawg ntauj lis ntsaws txog tej yas kab,ces yog leej tub txawg li pom ntoo ciaj ceeb qab. Leej tub txawg yuav kwv rab niaj taus muaj peb plhu hniav, ncig li yeev qab ntoo saib tshuav li zoj qaum ntoo nuam yuav ntov li nrawv, ntoo ciaj ceeb mus tiv tsis taus, ntoo ciaj ceeb qaug lias mus tav toj ces txhij li zus tog paus cia, yim li zog tog ntsis tseg. Xuab nplooj nqeeb hlais nruab nrab, ntoo ciaj ceeb faib li zoj lawm niaj mus plaub fab, li coj los txws ua lawm koj tub Nraug laj lub tsev tuaj mus xwm fab.
= Zoov liv, Leej tub txawg siv nplooj nqeeb hlais ntoo ciaj ceeb tuaj mus nruab nrog, ces ntoo ciaj ceeb plam lis plhuav ua lawm niaj mus plaub nreej. Ces li coj los txws lis zus ua tau tub Nraug Laj ( N...) lub tsev los mus xwm leej. Nov nas.
36- Zoov liv, tub Nraug Laj (N...) koj ntim tau lub cev txiaj zam lim zus, los pw li ko tuaj ntawm cub. Koj tub koj ki yuav hu tau tus qhua zej qhua zos tuaj hlub. Zaum no, tus qhua zos tuaj txog qhua zej tuaj txhua muab cuaj txog kab los lis txhij yim txoj kev los lis du, ces yuav qhia kev rau koj mus pem ntuj huv.
=Zoov liv, tub Naug Laj ( N...)Koj ntim tau lub cev txiaj zam los pw li ko tuaj ntawm plag, ces koj tub koj ki yuav mus hu tau tus qhua zej qhua zos tuaj nta. Zaum no tus qhua zos tuaj txog qhua zej tuaj tag, ces muab cuaj txog kab los li txhij yim txoj kev los lis tag, ces yuav qhia kev rau koj mus pem ntuj kag. Nov nas.
( Foom hmoov zoo rau lub hleb.)
UA TSAUG TEB TSAUG CHAW.
(Tsuas hais cov npe teb chaws xwb. Tsis hais cov npe zos.)
37- Zoov liv, Koj yuav nco li ntsoov tias, thaum koj ua neej nyob rau Los Kuj teb, Thaim Kuj Teb, Mis Kuj teb los Fuaj Kuj teb. Koj tau noj tsuag luag ib ntsug zoov nuj, haus tas luag ib ntu dej, rauv tas luag ib tsuag taws, siv tas luag ib cim txuj. Zaum no koj yuav los mus, koj yuav nco lis ntsoov ua luag tsaug teb tsaug chaw, tus tsaug qoob tsaug loo, tsaug dej mus tsaug taws, koj mam li los mus cuag koj pog koj yawm nyob rau Ntuj Ceeb Tsheej nov na.
HU NKAUJ FOOM LUS ZOO THIAB NCAIM ROV.
38-Nplooj lus Txiv li Saub. Saub Txiv li lus, neej ces yuav qiv Saub li lus los hais:
Zoo li , zaum nov nej txiv nws laus sawv kev lis tsees nce li hlo 99 mus qib ntaiv tuag os, nej ua neej nyob tuaj rov tom qab os, nej pom luag ua tus liaj dab tuaj mus sib tsuab. Nej tsis tim mus yoog luag. Nej thiaj li txais tau nej txiv los lus qhuab, nej ua lub neej huaj vam ntws los nej thiaj tseem yog Xeem N... ib cuab nov yuas.
=Nplooj...Zoo liv zaum no nej txiv nws laus sawv kev lis tsees los mus nce li hlo 99 mus qib ntaiv ploj os. Nej ua neej nyob tom qab, nej pom luag ua tus liaj da tuaj mus sib ntaus. Nej tsis tim mus yoog luag, ces nej thiaj li txais nej txiv lo lus tau. Nej ua lub neej vam meej ntws los nej thiaj tseem yog ib xeem raug no...
39- Nplooj lus txiv li Saub, Saub txiv li lus. Zoo liv, nej txiv nws laus tias Nws yug tau nej yog kwv mus yog tij os, yawm yij yawm dab, nkauj muam mos nyab, ntshai tsam tub kwv tsis mloog tub tij lus the tsam nej nyob koom tsis tau ua ib tse nov yuas.
=Nplooj...Zoo liv nej txiv yug tau nej yog kwv yog tij es, yawm yij yawm dab, nkauj muam mos Nyab, tshai tsam tub tij tsis mloog tub kwv lus qhuab, tsam nej nyob koom tsis tau tuaj mus ua ib cuab nov yuas.
40-Nplooj... Nej txiv nws laus tshai tsam Tub tij ces siv siab yuj lis ywm mus qee tub kwv nyiaj tuaj rau nruab hub. Ces nej ua xaiv coj mus ua lus. Nej sib sib ntxub, tsis muaj lawm kev sis hlub nov yuas.
=Nplooj...Nej txiv nws lus ntshai tsam tub kwv siv siab yuj lis ywm mus qee tub tij nyiaj tuaj rau nruab xab, nej ua xaiv coj ua lus, ces nej sib sib ntxub nej koom tsis tau tuaj ua ib pab nov yuas.
( Tig rov pem tus qauv.)
41-Nplooj lus txiv li Saub ...Koj laus, koj nce li hlo 99 qib mus ntaiv tuag, koj mus taus ces koj mus, Tub txawj lis Nkiag ces yog Yaj Ceeb leej mus tib neeg, nws yuav ploj pliag rau qab mus zaj zeb tawm lim plaws ntiaj teb toj mus roob zeb tshau. Txij no mus ces tus neej nrhiav los tsis ntsib, tus dab nrhiav los tsis tau nov yuas.
=Nploojlus... Koj laus ces koj nce li hlo 99 qib mus ntaiv ploj os, koj mus taus ces koj mus, Tub txawj li Nkiag ces yuav ploj pliag rau qab mus zaj ca, tawm lim plaws rau ntiaj nrag toj mus roob zeb sib, txij no mus ces tus neej nrhiav los tsis tau, dab nrhiav los tsis ntsib nov yuas.

Yaj Zoov Ntxheb Xib Hwb.
Tas.

:

**Maiv Tooj** 24th January 2019, 7:01 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°4

Re: KAB KE XA PLIG ntu Ib raws li XH.Yaj Zoov Ntxheb.

Post Maiv Tooj 24th January 2019, 7:01 am

Zaj 361- TXOJ KEV TUAG NWS YOG TXOJ KEV THAJ YEEB.

( Cov lus no siv tau nyob hauv lub ntees pam tuag.)

Txoj kev tuag yog ib txoj kev mus ua lub neej nyob thaj yeeb mus ib txhiab ib txhis. Thaum peb muaj ib tug neeg tuag, mas peb txhob tu siab heev.
Leej tib neeg txoj kev tuag, muaj ob sab. Yam li:
1.Ib sab nws yuav tau mus nyob thaj yeeb, nyob kaj siab lug mus li.
2. Ib sab, thaum nws ua neej nyob, nws npaj siab tsis tau txaus. Mas nws yuav tau mus ntxuav nws tus ntsuj plig tas, ces nws yuav mus ua lub neej nyob kaj nyob huv nrog tsoom Poj Yawm Txwv Koob uas lawv tau nyob thaj yeeb lawm.
Txoj kev tuag, mas peb noob neej tsis paub tau tias, nws yuav tau mus rau sab twg li. Kawg Yog Qaum Ntuj thiaj paub tau xwb.
Txawm yog zoo li cas, los peb tsis txhob ntseeg tias: Nws tus Laus ntawd, muaj kev txhaum los kev khaum.
Nws yuav tau ncaj qha mus nyob kaj lug, los nws yuav tau mus ntxuav Ntsuj Plig kom dawb huv mam mus!
Lub ntees pam tuag, yog cov neeg ciaj thiab cov neeg tuag sib pub koob hmoov, lub zim txwv ua lub ntees pam tuag no.
Nyob hauv peb txoj kev ntseeg Txog Yes Xus peb muaj qhov hais tias: Cov neeg dua ras zoo li peb N… no,nws tos cov tub ki thiab cov txheeb ze ib co koob hmoov mus pab ntxuav Ntsuj Plig kom dawb huv nyob teb chaws them txim, ib ntus.
Cov neeg ciaj thiab cov neeg tuag lawv sib pab sib pauv txiaj ntsim koob hmoov tau nyob rau lub caij mus them txim no.
Yog tsoom neeg ciaj lawv nyob rau qhov muaj cai thov kom Tswv Ntuj zam txim txhaum rau tus dua ras kom tau mus nyob dawb nyob huv.
Thiaj ua lub ntees muaj kab kev thov Ntuj los daws kev ua neeg zoo kom tiav nyob ntiaj teb no. Cov neeg ciaj yuav pab thov kom txhob muaj dab tsis khuam tes khuam taw, muaj los kom ho sib me ntsis rau tus mus lawd.
Thaum tus mus lawd tau mus nyob thaj yeeb lawm, Nws ho nchuav koob hmoov los pab rau tej tub ki los tej txheeb ze, kom txhob poob ua neej nyob nrog kev ua txhaum.
Tsam lawv tiam ho yuav tau mus rau teb chaws ntxuv Ntuj plig nyobntev caij nyoog dua xwb. Muaj raws li peb Haiv Hmoob ntseeg uas lawv vam txog tej ua niam ua txiv tej koob hmoov los pov hwm.
Hmoob ntseeg tias lawv yuav pov hwm lub caij ua neej nyob, hos peb txoj kev ntseeg txog Yes Xus, mas peb thov kom pov hwm lub caij sawv kev mus cuag Tswv Ntuj kom lub caij ntawd, tau mus dawb mus huv mas muaj koob Hmoov ntau dua.
Vim cov nyob saum ntuj lawm, mas lawv nyob ze Tswv Ntuj thiab nrog sib txuas lus zoo dua. Lawv twb yog Ntuj me nyuam lawm, ces Lawv nchuav koob hmoob los pab cov nyob ntiaj teb no zoo dua.
Thaum muaj ib tug tas sim neej lawm, mas peb ua lub ntsees peb thiab yuav ua kom muaj cov zaj thov Ntuj pab tus sawv kev mus ntawd, ua yam loj.
Dhau li cov kab lis kev cai thov Ntuj tas, peb tseem siv raws li Hmoob tej kev sib hlub sib tshua, nrog tej txheeb ze nyob ntawm ob tog uas lawv yog kev neej kev tsav.
Kom kev sib hlub tsis txhob tu ncua mus. Muaj kev sib pab rau cov tseem nyob ua lub neej rau yav txuas mus ntxiv.
Peb saib Hmoob tej kev cai tsis yog yam ua dab, mas peb siv raws li leej tib neeg tej kev cai ua neej nyob lub caij ua neeg los nplij tsev xyom cuab

Yaj Zoov Ntxhev X.H..