COV ZAJ NYEEM NRUAB LIS PIAM XYOO B 2020-2021

Tim 18 lub 6 Hli 2021

Hnub Rau Lis Piam Kaum Ib Nruab Xyoo B Nruab Lis Piam Xyoo I
Lectionary: 369

Zaj Nyeem Ib: 2 KLN 11: 18, 21-30

Cov kwv tij nkauj muad:
18 Vim muaj coob leej khav txog lawv nyob hauv sab nqaij tawv , mas kuv kuj xav khav txog kuv thiab.
21 Kuv hais nrog kev txaj muag, vim peb yog ib co neeg tsis muaj zog . Yog ib tug twg muaj peev xwm ua tau ib yam dab tsi los xij, mas kuv yuav hais raws li ib tug neeg vwm hais, kuj kuj muaj peev xwm ib yam nkaus thiab.
22 Lawv khav tias lawv yog neeg Hes Nplaws, kuv kuj yog ib tug Hes Nplaws thiab! Lawv khav tias lawv yog ib co His Xas Lais, kuv kuj yog ib tug His Xas Lais thiab! Lawv khav tias lawv yog Has Nplas Has xeeb ntxwv, kuv kuj yog Has Nplas Has xeeb ntxwv thiab.
23 Lawv khav tias lawv yog Leej Pleev cov tub txib, kuv kuj yuav hais raws li ib tug neeg vwm hais tias kuv tseem yog Leej Pleev ib tug tub txib zoo tshaj lawv thiab; vim kuv khwv ua hauj lwm ntau tshaj, kuv raug txim hauv tsev loj faj ntau tshaj, kuv raug luag nplawm ntau tshaj, kuv yuav luag raug tua ntau zaus kawg nkaus.
24 Kuv tau raug cov Yus Das nplawm kuv plaub caug nplawm luv ib yog tsib zaug.
25 Kuv tau raug lawv xuas pas ntaus kuv peb zaug, raug lawv xuas pob zeb txawb kuv ib zau; caij nkoj, lub nkoj puas tog peb zaug; tau poob dej nyob ib hnub ib hmos saum cov nplaim dej hiav txwv.
26 Kuv nquag tawm rooj musk o taw kev deb, ntsib xwm txheej ntawm cov niam dej loj, ntawm cov tub sab, ntawm kuv haiv neeg, ntawm cov neeg teev pej kum dab, nyob hauv cov tsheej, hauv teb chaws suab puam, hauv dej hiav txwv; thiab tseem raug xwv txheej los ntawm cov kwv tij cuav los thiab .
27 Kuv ntsib kev khwv kev sab kev nkees, kev yoo dab ntub ntau zaus, kev yoo tshaib yoo nqhis, ntau zaus tsis muaj mov noj, nquag tiv no tsis muaj ris tsho npua cev.
28 Ntxiv rau tej yam no, tseem tshuav kuv txoj kev niaj hnub ntxhov siab txog cov Koom Txoos tas huv si thiab.
29 Leej twg tsis muaj zog, kuv ho muaj zog? Leej twg ntog, kuv ho tsis mob siab?
30 Yog kuv yuav tsum khav, mas kuv kawg yuav khav txog tej yam ua kom pom kuv txoj kev tsis muaj zog xwb.

NPN 34: 2-3, 4-5, 6-7

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig lub koob meej yog nyob hauv HUAB TAIS;
tus neeg me yuav hnov kuv thiab yuav zoo siab.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Nej nrog kuv cav txog HUAB TAIS,
peb sawv daws ua ke qhuas nws lub npe.
Kuv nrhiav HUAB TAIS; nws tau teb kuv,
Nws cawm kuv dim ntawm tas kuv tej kev ntshai.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Nej vam txog HUAB TAIS, ces kev zoo siab yuav ua nej ci ntsa iab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog,
thiab yuav npo nws dim ntawm tas nws tej kev nyuaj ntxhov.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

As Les Lus Yas: MT 5: 3

Txais: As les lus yas, as les lus yas.

Cov tau txoj hmoov zoo yog cov pluag hauv nruab siab,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv Moo Zoo: MT 6: 19-23

Yes Xus hais rau nws cov thwj tim tias:
19 "Nej tsis txhob sau tej txhab nyiaj txhaj kub cia nyob ntiaj teb no, vim muaj kab rws kab lia txo, thiab muaj tub sab tho qhov tsev tuaj nyiag.
20 Tiam sis nej yuav sau tej txhab nyiaj txhab kub cia nyob saum ntuj: nyob saud, tsis muaj kab rws kab lia txo, tsis muaj tub sab tho qhov tsev tuaj nyiag.
21 Vim tias, koj txhab nyiaj txhab kub nyob qhov twg, mas koj lub siab kuj yuav nyob qhov ntawd.
22 Lub teeb ua kom lub cev pom kev yog lub qhov muag. Yog koj lub qhov muag zoo, mas tas koj lub cev yuav pom kev nrig.
23 Tab sis yog koj lub qhov muag phem, mas tas koj lub cev yuav nyob tsaus ntuj nti. Yog qhov pom kev uas nyob hauv koj twb tsaus nti, mas yuav ua cas tsaus ntuj npaum li cas.”

Tim 19 lub 6 Hli 2021

Hnub Xya Lis Piam Kaum Ib Nruab Xyoo B Nruab Lis Piam Xyoo I
Lectionary: 370

XHLT: LN John Romuald, Txiv Twj Cuab

Zaj Nyeem Ib: 2 KLN 12: 1-10

Cov kwv tij nkauj muad:
1 Tej lus uas kuv khav txog kuv mas tsis pab rau kuv dab tsi li. Tiam sis kuv yuav hais txog Huab Tais tej kev yees tawm tuaj thiab tej yam nws tau qhia rau kuv paub.
2 Kuv paub ib tug neeg nyob hauv Leej Pleev, uas tau kaum plaub xyoos los lawm, nws raug nqa hlo mus txog saum txheej ntuj peb; xyov nws mus nrog nws lub cev los kuv tsis paub, tsis mus nrog los kuv tsis paub, Tswv Ntuj thiaj paub xwb.
3 Kuv paub tias tus neeg ntawd, xyov yog nrog nws lub cev los kuv tsis paub, tsis nrog los kuv tsis paub, Tswv Ntuj thiaj paub xwb,
4 kuv paub tias nws yeej raug coj mus txog saum lub Nras Lom Zem kiag, thiab nws tau hnov ib co lus zoo tas nrho uas neeg tsis muaj cai yuav muab hais tawm.
5 Kuv yuav khav tau txog tus neeg ntawd, tab sis ntawm kuv mas kuv tsuas khav tau txog kuv tej kev tsis muaj zog xwb.
6 Yog tias kuv xav khav tiag, mas kuv yuav tsis yog ib tug neeg vwm, kuv tsuas kawg hais qhov muaj tseeb xwb. Tab sis kuv tsis khav, vim ntshai tsam luag tej xav tias kuv zoo dua qhov sawv daws pom thiab qhov sawv daws hnov ntawm kuv.
7 Vim Ntuj tau qhia ntau yam tas nrho rau kuv paub, tiam sis nws tsis xav kom kuv muab hlob, ces nws tso ib tug saus los chob kuv cov nqaij; qhov ntawd yog Xas Tas ib tug dab tuaj nplawm kuv tej nplawg kom kuv tsis txhob muab hlob.
8 Kuv tau thov Huab Tais peb zaug kom qhov ntawd txav mus deb ntawm kuv.
9 Tiam sis Huab Tais teb rau kuv tias: “Kuv lub txiaj ntsim txaus pab koj lawm, vim lub hwj huam yuav zoo tiav txhij txhua yog nyob hauv tus tsis muaj zog.” Yog li mas kuv thiaj khav txog kuv txoj kev tsis muaj zog xwb, kom Leej Pleev lub hwj huam los nyob hauv kuv.
10 Tim li ntawd mas kuv thiaj zoo siab nyob hauv kuv txoj kev tsis muaj zog, nyob hauv txoj kev raug luag thuam raug luag cem, kev ntsib kev yuam kev ti, kev raug luag hiam, thiab tej kev nyuaj siab, vim Leej Pleev. Vim tias yog thaum kuv tsis muaj zog, mas kuv thiaj muaj zog.

NPN 34: 8-9, 10-11, 12-13

Txais: (9a) Nej saj ces nej yuav paub tias Huab Tais lub siab zoo npaum cas.

HUAB TAIS tus tshiab tuaj tsa tsev nyob
ncig cov neeg hwm HUAB TAIS, nws yuav cawm lawv dim.
Nej saj nej thiaj paub tias HUAB TAIS siab zoo npaum cas.
Tus muaj hmoov zoo yog tus mus nkaum hauv HUAB TAIS.

Txais: (9a) Nej saj ces nej yuav paub tias Huab Tais lub siab zoo npaum cas.

Nej, uas yog nws cov ntshiab, nej cia li hwm HUAB TAIS,
vim cov neeg hwm HUAB TAIS yuav muaj txhij muaj txhua
Cov neeg muaj hwj chim yuav txawj pluag txawj tshaib plab;
Tiam sis cov nrhiav HUAB TAIS yuav tsis ntshaw txog dab tsi li.

Txais: (9a) Nej saj ces nej yuav paub tias Huab Tais lub siab zoo npaum cas.

Kuv cov me nyuad, nej los mloog kuv hais!
Kuv yuav qhia txoj kev hwm HUAB TAIS rau nej.
Nej leej twg yog tus xav tau txoj sia,
Leej twg yog tus zoo siab pom lub neej vam meej?

Txais: (9a) Nej saj ces nej yuav paub tias Huab Tais lub siab zoo npaum cas.

As Les Lus Yas: 2 KLN 8: 9

Txais: As les lus yas, as les lus yas.

Yes Xus Pleev yog tus nplua nuj, tab sis nws ua kom nws pluag,
kom xwv nws txoj kev pluag ua kom nej nplua nuj tuaj.

Txais: As les lus yas, as les lus yas.

Ntawv Moo Zoo: MT 6: 24-34

Yes Xus hais rau nws cov thwj tim tias:
24 "Tsis muaj leej twg yuav tsob hwb ob tug tswv tau: nws yuav ntxub ib tug nyiam lwm tus; los nws yuav npuab ib tug thuam lwm tus. Nej yuav ib txhij tsob hwb Tswv Ntuj thiab nyiaj txiag tsis tau.
25 Yog vim li ntawd, kuv thiaj hais rau nej tias: Nej tsis txhob txhawj txog nej txoj sia tias yuav muab dab tsi los noj los yuav muab dab tsi los haus, txhob txhawj txog nej lub cev tias yuav muab dab tsi los hnav. Txoj sia tsis muaj nqis dua txhiam xws noj lod? Lub cev tsis muaj nqis dua tej tsoos hnav lod ?
26 Nej ntsia cov noog saum ntuj saib: lawv tsis tseb nplej, tsis hlais nplej, tsis sau qoob rau hauv txhab li, tsis kav nej Txiv nyob saum ntuj pub rau lawv noj. Nej tsis muaj nqis dua cov noog ntawd lod?
27 Nej leej twg txhawj txhawj, nws puas rub tau txoj sia kom ntev li ib tshim ntxiv?
28 Hais txog tej tsoos tsho, nej yuav txhawj dab tsi? Nej kawm ntawm cov paj ntoos nyob tom tej nras saib, lawv cia li hlob, lawv tsis khwv, tsis ua maj saws ntuag li.
29 Kuv hais rau nej tias, tab yog Xas Los Moos kiag, txawm nws muaj koob meej nto moo lug los, nws tsis tau hnav zoo npaum li ib lub paj ntawd li.
30 Tej nroj nruab nrag, hnub no ciaj, tag kis luag twb yuav muab pov hlawv hauv qhov txos, tsis kav Tswv Ntuj tseem muab zam zoo npaum ntawd rau lawv hnav. Tswv Ntuj tseem yuav tsis ua zoo tshaj rau nej lod, neeg ntseeg tsis ti txha aw?
31 Li ntawd, nej tsis txhob ua siab fab tias: 'Peb yuav muab dab tsi los noj? Yuav muab dab tsi los haus? Yuav muab dab tsi los hnav?’
32 Tej ntawd yog tas puas tsav yam uas cov neeg teev pej kum dab nrhiav. Hos nej Txiv nyob saum ntuj yeej paub tias nej yuav tsum muaj tej ntawd tas huv si.
33 Tiam sis nej yuav xub nrhiav nej Txiv lub Ceeb Tsheej thiab nws txoj kev ncaj tso, ces nws yuav pub tas puav tsav yam ntawd tib si ntxiv rau nej.
34 Nej tsis txhob ua siab fab txog tag kis, cia tag kis mam li txhawj rau tag kis, vim hnub no twb muaj kev nyuaj txaus rau hnub no lawm.”

Tim 21 lub 6 Hli 2021

Hnub Ob Lis Piam Kaum Ob Nruab Xyoo B Nruab Lis Piam Xyoo I
Lectionary: 371

Yuav tsum hwm LN Aloysius Gonzaga, txiv tab seeb

Zaj Nyeem Ib: HAUV PAUS 12: 1-9

1 HUAB TAIS hais rau Has Nplas tias: "Tso koj lub teb chaws, koj tej txheeb ze thiab koj txiv lub vaj tse tseg, koj mus nyob lub teb chaws uas kuv yuav qhia rau koj.
2 Kuv yuav tsa koj ua ib haiv neeg loj, kuv yuav foom hmoov zoo rau koj, thiab yuav ua kom koj lub npe nto moo loj, kom koj nqa txoj hmoov zoo rau txhua tus.
3 Kuv yuav foom hmoov zoo rau cov neeg uas foom hmoov zoo rau koj, kuv yuav foom phem rau cov uas foom phem rau koj. Tas txhua yim neeg nyob ntiaj teb yuav tau hmoov zoo nyob hauv koj.”
4 Ces Has Nplas sawv kev mus raws li HUAB TAIS kom nws mus. Los kuj nrog nws mus thiab. Thaum Has Nplas tsiv hauv Has Laas teb mus, nws muaj xya caum tsib xyoos.
5 Has Nplas coj nws poj niam Xas Lais, thiab nws tus tij laug tus tub hu ua Los, thiab nws sau tas nkawd lub cuab tam uas nkawd tau tsim, thiab tas nkaw cov tub txib tub txuas uas nkawd muaj nyob Has Laas nrog nws mus. Lawv sawv kev mus rau Kas Nas Has, ces lawv kuj mus txog Kas Nas Has teb.
6 Has Nplas mus hla lub teb chaws, nws thiaj mus txog thaj chaw hu ua Xis Kes, txog ntua ntawm tus ntoo ntseej Mos Les; thaum ntawd, cov neeg Kas Nas Has nyob hauv lub teb chaws.
7 HUAB TAIS tawm los rau Has Nplas pom, thiab hais rau nws tias: "Kuv yuav muab lub teb chaws no pub rau koj tsoom xeeb leej xeeb ntxwv." Ces Has Nplas txhim ib lub thaj txi ntuj rau HUAB TAIS, vim HUAB TAIS tawm los rau nws pom nyob ntawd.
8 Has Nplas thiaj txav ntawd mus rau pem roob, nyob ntawm sab hnub tuaj ntawm Npes Thes. Nws tsa nws lub tsev tsam phooj rau ntawd, Npes Thes nyob rov sab hnub poob, hos Ais nyob rov sab hnub tuaj. Nyob ntawd nws kuj tsa ib lub thaj txi ntuj rau HUAB TAIS thiab nws teev HUAB TAIS lub npe.
9 Ces Has Nplas maj mam tsiv ua ntu zus ib thaj chaw dhau ib thaj, mus txog lub teb chaws Nes Zes.

NPN 33: 12-13, 18-19, 20+22

Txais: (12) Haiv neeg Huab Tais xaiv ua nws tug lawv txoj hmoov zoo.

Haiv neeg uas lawv tus Tswv Ntuj yog HUAB TAIS, lawv txoj hmoov zoo!
lawv yog haiv neeg uas Huab Tais xaiv los ua nws lub cuab tam.
HUAB TAIS nyob txheej ntuj saud dauv muag los ntsia,
nws pom tas nrho ib tsoom neeg.

Txais: (12) Haiv neeg Huab Tais xaiv ua nws tug lawv txoj hmoov zoo.

Ntsias saib, HUAB TAIS lub qhov muag saib ntsoov cov neeg hwm nws,
ntsia ntsoov cov tso siab rau nws txoj kev hlub,
nws yuav npo lawv dim ntawm txoj kev tuag,
thiab yuav txuag lawv txoj sia thaum muaj kev tshaib plab.

Txais: (12) Haiv neeg Huab Tais xaiv ua nws tug lawv txoj hmoov zoo.

Peb tus ntsuj plig tos ntsoov HUAB TAIS:
nws yog tus pab peb, nws yog peb daim leem phiaj!
HUAB TAIS, thov kom koj lub siab zoo roos peb,
vim peb tso siab lug rau koj!

Txais: (12) Haiv neeg Huab Tais xaiv ua nws tug lawv txoj hmoov zoo.

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj tsom tau tej tswv yim thiab tej kev xav hauv neeg nruab siab.

Txais: As les lus yas, as les lus yas.

Ntawv Moo Zoo: MT 7: 1-5

Yes Xus hais rau nws cov thwj tim tias:
1 “Nej tsis txhob txiav txim rau luag, Ntuj thiaj yuav tsis txiav txim rau nej ;
2 vim tias, nej txiav txim li cas rau luag, mas Ntuj kuj yuav txiav txim ib yam li ntawd rau nej. Nej luj li cas rau luag, mas Ntuj kuj yuav luj li ntawd rau nej.
3 Ua cas koj pom tus quav nplej nyob hauv koj tus kwv qhov muag, tab sis koj ho tsis pom tus nqaj ntoo nyob hauv koj qhov muag?
4 Koj tseem hais rau koj tus kwv tias: ‘Cia kuv rho tus quav nplej hauv koj qhov muag pov tseg,’ tab sis ib tug nqaj ntoo twb nyob hauv koj qhov muag!
5 Neeg zoo sab nraud, koj xub rho tus nqaj hauv koj qhov muag tso, koj thiaj li pom kev rho tus quav nplej hauv koj tus kwv qhov muag.”

Tim 22 lub 6 Hli 2021

Hnub Peb Lis Piam Kaum Ob Nruab Xyoo B Nruab Lis Piam Xyoo I
Lectionary: 372

XHLT: LN Paulinus nyob Nola, tswv qhia; los LN John Fisher thiab Thomas More, tuag ua Tim Khawv

Zaj Nyeem Ib: HAUV PAUS 13: 2, 5-18

2 Has Nplas nplua nuj kawg, nws muaj tsiaj txhu, muaj nyiaj thiab muaj kub ntau.
5 Los, uas nrog Has Nplas mus, nws kuj muaj yaj muaj nyuj thiab muaj tsev tsam phooj ntau.
6 Lub teb chaws tsis txaus sawv daws tsa tsev nyob ua ke; vim nkawd muaj cuab yeej cuab tam ntau ces thiaj tsis tau kev rau sawv daws nyob ua ke.
7 Has Nplas cov tub zov tsiaj thiab Los cov tub zov tsiaj kuj muaj lus sib cav sib ceg thiab. Lub caij ntawd yog cov neeg Kas Nas Has thiab cov neeg Pes Lis Xis nyob hauv lub teb chaws.
8 Vim li ntawd Has Nplas thiaj hais rau Los tias: "Tsis xav kom koj thiab kuv wb muaj kev tsis sib haum xeeb, los puas kom kuv cov tub zov tsiaj thiab koj cov tub zov tsiaj muaj kev tsis sib haum xeeb, vim wb yog ob txiv tub.
9 Tas nrho lub teb chaws twb qhib lug rau koj los tsis sub? Yog li kuv thov kom koj ncaim kuv mus mog. Yog koj mus sab laug ces kuv yuav mus sab xis; yog koj mus sab xis, ces kuv yuav mus sab laug."
10 Los tsa muag ntsia, nws pom tas nrho lub tiaj Yos Las Das yog ib lub tiaj muaj dej nyob qhov txhia chaw mus txog ntua rau Xos As, zoo li HUAB TAIS lub vaj, thiab zoo li teb chaws Hais Nkws Tos; thaum ntawd HUAB TAIS tseem tsis tau rhuav Xos Dos Mas thiab Nkos Mos Las.
11 Los thiaj xaiv lub tiaj Yos Las Das huv si rau nws. Ces nws muab xub ke mus rau sab hnub tuaj. Nkawd thiaj tau sib ncaim li ntawd.
12 Has Nplas thiaj nyob hauv lub teb chaws Kas Nas Has, hos Los mus nyob hauv cov nroog hauv lub tiaj. Los mus tsa nws cov tsev tsam phooj nyob txog thaj tsam ze ntawm Xos Dos Mas.
13 Cov neeg Xos Dos Mas yog ib co neeg phem tas nrho, thiab ua txhaum loj kawg nkaus rau HUAB TAIS.
14 Thaum Los ncaim mus lawm, HUAB TAIS hais rau Has Nplas tias: "Koj tsa qhov muag ntsia, txij ntawm qhov koj nyob ko mus rau sab pej thiab sab naj, mus rau toob fab thiab xib fab.
15 tas nrho lub teb chaws uas koj pom ntawd, kuv yuav muab rau koj thiab rau koj tsoom xeeb leej xeeb ntxwv nyob mus li.
16 Kuv yuav ua kom koj cov xeeb leej xeeb ntxwv coob npaum li cov plua av nyob ntiaj teb. Yog neeg suav txheeb cov plua av hauv ntiaj teb mas lawv thiaj yuav suav txheeb koj cov xeeb leej xeeb ntxwv.
17 Koj sawv, koj cia li mus ncig kom txhua thaj av qhov ntev thiab qhov dav, vim kuv yuav muab pub rau koj." 18 Ces Has Nplas tshais nws cov tsev tsam phooj, nws tsiv mus nyob ze cov ntoo Ntseej ntawm Mas Nples, uas nyob Hes Nploos. Nyob ntawd nws txhim ib lub thaj txi ntuj rau HUAB TAIS.

NPN 15: 2-3a, 3bc-4ab, 5

Txais: (1b) Tus neeg ncaj yuav tau nyob ntawm Huab Tais xub ntiag.

Tus uas taug kev tsis muaj chaw xyeej thiab ua ncaj,
Tus uas xav qhov tseeb nyob hauv nws nruab siab,
Thiab nws tsis cia nws tus nplaig hais lus dag.

Txais: (1) Tus neeg ncaj yuav tau nyob ntawm Huab Tais xub ntiag.

Nws tsis ua phem rau luag,
Nws tsis nrhiav lus rau tus nyob ze nws.
Nws tsis saib cov neeg phem muaj nqes.
Nws hwm cov neeg hwm HUAB TAIS.

Txais: (1) Tus neeg ncaj yuav tau nyob ntawm Huab Tais xub ntiag.

Nws qiv nyiaj txiag, nws tsis tsuam paj.
Nws tsis txais luag cov nyiaj xiab kom muab txim rau tus tsis txhaum.
Leej twg ua li hais los no, mas nws yuav tsis ntsib kev nyuaj.

Txais: (1) Tus neeg ncaj yuav tau nyob ntawm Huab Tais xub ntiag.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: “Kuv yog ntiaj teb neeg qhov pom kev,
leej twg los raws kuv yuav tau qhov pom kev kaj nws lub neej.”

Txais: As les lus yas, as les lus yas.

Ntawv Moo Zoo: MT 7: 6, 12-14

Yes Xus hais rau nws cov thwj tim tias:
6 "Nej tsis txhob muab tej yam ntshiab pub rau dev noj, los txhob muab nej cov hlaws npliag deg pov rau ntawm npua xub ntiag, tsam npua muab tsuj ntiag rau hauv av thiab tig rov los dua nej ua daim tas.
12 "Txhua yam nej xav kom luag ua rau nej mas nej yuav xub ua rau luag tso. Txoj Cai thiab cov Yaj Saub yog li no.
13 “Nej chaws ntawm lub qhov rooj nqaim mus lawm hauv. Vim lub qhov rooj dav thiab txoj kev dav yog txoj yuav coj mus rau lub qhov tuag; muaj coob leej taug txoj kev ntawd.
14 Hos lub qhov rooj nqaim thiab txoj kev ti thiaj yog txoj coj mus rau txoj sia; muaj tsawg leej nrhiav tau txoj kev ntawd taug.”

Tim 23 lub 6 Hli 2021

Hnub Plaub Lis Piam kaum Ob Nruab Xyoo B Nruab Lis Piam Xyoo I
Lectionary: 373

Zaj Nyeem Ib: HP 15: 1-12, 17-18

1 Thaum tej no dhau tas lawm, Has Nplas yees hnov HUAB TAIS lo lus hais rau nws tias: "Koj txhob ntshai mog, Has Nplas! Kuv yog daim leem phiaj thaiv koj, koj yuav tau txais koob haum loj kawg nkaus."
2 Has Nplas teb tias: "HUAB TAIS Tswv Ntuj, koj yuav muab paj tshab dab tsi pub rau kuv? Kuv niaj hnub nyob tsis muaj tub ki li; tus yuav txais kuv lub cuab tam ntshai yog kuv tus tub txib tus tub Es Lis Xes nyob Das Mas xwb?"
3 Has Nplas hais ntxiv tias: "Koj tsis pub kom kuv muaj ib tsob noob li ces ib tug tub txib uas yug hauv kuv tsev yuav los txais kuv lub cuab tam xwb lau."
4 HUAB TAIS lo lus nrov tam sid tuaj rau Has Nplas tias: "Tus ntawd yuav tsis yog tus los txais koj lub cuab tam, tus yuav txais koj lub cuab tam yog koj tus tub uas yug tawm ntawm koj los."
5 HUAB TAIS coj Has Nplas mus nraum zoov thiab hais rau nws tias: "Koj tsa muag ntsia saum ntuj thiab koj suav cov hnub qub saib koj suav puas txheeb." Ces nws hais tias: "Koj cov xeeb ntxwv yuav coob npaum li ntawd."
6 Has Nplas ntseeg HUAB TAIS, ces HUAB TAIS muab qhov ntawd suav ua kev ncaj ncees rau Has Nplas.
7 HUAB TAIS hais rau nws tias: "Kuv yog tus HUAB TAIS uas tau coj koj tawm hauv cov neeg Kas Dias lub teb chaws Uj los mus nyob lub teb chaws no, uas kuv yuav muab rau koj ua koj tug."
8 Has Nplas teb tias: "HUAB TAIS Tswv Ntuj, dab tsi yuav ua kom kuv paub tias kuv yuav tau lub teb chaws no los ua kuv tug ?"
9 HUAB TAIS hais rau nws tias: "Koj mus coj ib tug xyuas nyuj muaj peb xyoos, ib tug nkauj tshis muaj peb xyoos, ib tug thav yaj muaj peb xyoos, ib tug nkauj nquab thiab ib tug me nyuam lau nquab tuaj rau kuv."
10 Has Nplas coj cov tsiaj raws li hais tuaj. Nws muab cov tsiaj phua nruab nrab, nws muab ob sab teeb nyias nyob nyias sab; tiam sis nws tsis phua cov noog.
11 Dav yuj plaws ya ntxiag los noj cov tsiaj, tab sis Has Nplas nplawm kom dav khiav.
12 Thaum lub hnub tab tom poob qho, Has Nplas cia li tuaj ib tug dab ntub hlob hlob ua kom nws looj hlias mus, ces muaj ib qho txaus ntshai thiab tsaus nti los tsuam Has Nplas.
17 Thaum lub hnub poob qho kiag thiab tsaus ntuj lawm, txawm pom ib lub qhov cub ncho pa lug thiab ib teg tsau cig cig los hla ntawm cov sab nqaij kis nruab nrab.
18 Hnub ntawd, HUAB TAIS nrog Has Nplas cog lus li no: "Kuv muab lub teb chaws no rau koj tsoom xeeb ntxwv ua lawv tug, txij li ntawm tus niam dej nyob Hais Nkws Tos teb mus txog ntua tus niam dej loj Aws Fas Tes.”

NPN 105: 1-2, 3-4, 6-7, 8-9

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej ua HUAB TAIS tsaug, nej hu txog nws lub npe,
nej qhia nws cov hauj lwm loj rau cov haiv neeg paub.
Nej seev nkauj rau HUAB TAIS, nej hu nkauj cav txog nws ;
nej piav txog nws cov hwj huam yees ntxwv tas tib si.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej nrhiav koob meej rau nej nyob hauv nws lub npe,
cov uas muaj lub siab nrhiav Huab Tais, nej cia li zoo siab!
Nej nrhiav HUAB TAIS nyob hauv nws lub zog,
nej nrhiav kev tsob hwb nws tsis tseg.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej, Has Nplas Has tsoom xeeb ntxwv, nej yog Huab Tais cov tub txib,
Nej, Yas Kos cov tub, nej yog cov Huab Tais tau xaiv,
Nws, HUAB TAIS yog peb tus Tswv Ntuj,
Nws tej cai tswj tas qhov txhia chaw hauv lub ntiaj teb.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nws nco ntsoov mus li txog cov lus nws cog,
yog ib co lus cog ruaj khov rau txhiab tiam tub ki.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

As Les Lus Yas: ZAM 15: 4a, 5b

Txais: As les lus yas, as les lus yas.

Huab Tais hais tias:
“Nej yuav nyob ruaj hauv kuv ib yam li kuv nyob hauv nej;
leej twg nyob ruaj nreb hauv kuv nws yuav txi txiv ncw.”

Txais: As les lus yas, as les lus yas.

Ntawv Moo Zoo: MT 7: 15-20

Yes Xus hais rau nws cov thwj tim tias:
15 “Nej ceev faj txog cov yaj saub cuav, lawv txia ua ib co yaj tuaj cuag nej, tab sis nyob sab hauv, lawv yog ib co hma nrhiav ncauj.
16 Nej ntsia lub txiv lawv txi, ces nej yuav paub lawv. Luag puas de txiv cawv saum ib tsob pos, los de txiv ncuav pias saum ib tsob nrhab?
17 Li ntawd, tus ntoo zoo txi ib co txiv zoo, hos tus ntoo phem kuj txi ib co txiv phem.
18 Tsob ntoo zoo txi tsis tau txiv phem, hos tsob ntoo phem kuj txi tsis tau txiv zoo.
19 Tsob ntoo twg tsis txi txiv zoo, luag yuav muab ntov mus pov hlawv.
20 Li ntawd, thaum nej pom lawv cov txiv, nej yuav paub tias lawv zoo li cas.”

Tim 24 lub 6 Hli 2021

Koob Tsheej Hwm LN Zam Ntxuav Plig Hnub Yug
Lectionary: 587

Zaj Nyeem Ib: HIS XAIS 49: 1-6

1 Cov pov txwv, nej mloog kuv hais!
Cov haiv neeg nyob deb, nej cuab pob ntseg mloog kuv!
HUAB TAIS yeej hu kuv txij thaum kuv tseem nyob hauv kuv niam plab lawm,
nws yeej hu kuv npe txij thaum kuv tseem nyob hauv kuv niam cev lawm.
2 Nws muab kuv lub ncauj ua ib rab ntaj ntse zuag plias;
nws muab kuv zais rau hauv nws txhais tes qhov ntxoov.
Nws muab kuv ua ib xib xub vos ntse ntse,
muab kuv zais rau hauv nws lub raj xub.
3 HUAB TAIS hais rau kuv tias: "koj yog kuv tus tub txib;
His Xas Lais, kuv yuav nto koob meej nyob hauv koj."
4 Hos kuv hais tias: "Kuv tau siv zog khwv, tab sis tsis tau dab tsi li,
kuv nkim kuv lub zog tas dawb dawb xwb.
Tsis kav kuv muaj cai nyob ntawm HUAB TAIS,
kuv tus nqi zog yog nyob ntawm kuv tus Tswv Ntuj.”
5 Nyem no, HUAB TAIS, tus tau puab kuv nyob hauv kuv niam nrog cev
kom kuv ua nws tus tub txib,
kom tau coj Yas Kos rov los cuag nws,
kom tau sau His Xas Lais rov los nrog nws ua ke,
vim Huab Tais saib kuv tsim nyog;
ces kuv tus Tswv Ntuj thiaj yog kuv lub zog.
6 Nws hais tias: "Tsis tsim nyog kom koj yog kuv tus tub txib xwb,
tus rov tsa cov xeem Yas Kos kom sawv,
thiab coj cov His Xas Lais seem kom rov los,
kuv tseem xaiv koj kom koj yog lub teeb ci kaj cov kuj cuab,
ces kuv txoj kev cawm thiaj yuav ri mus txog cov npoo ntiaj teb kawg tib si.”

NPN 139: 1b-3, 13-14ab, 14c-15

Txais: (14) Kuv cav txog koj vim koj puab kuv tau zoo tas nrho.

HUAB TAIS, koj tsom tshab kuv, koj paub kuv :
koj paub thaum kuv sawv thiab thaum kuv zaum ;
koj nyob deb paub tas tej kuv xav.
Koj saib nraim kuv thaum kuv taug kev los thaum kuv so,
koj paub txhua yam kuv ua.

Txais: (14) Kuv cav txog koj vim koj puab kuv tau zoo tas nrho.

Koj yog tus tsim kuv sab nruab nrog tas huv si;
koj xaws kuv ntxiv kuv hauv kuv niam plab.
Kuv ua koj tsaug, vim koj tsim kuv tau txaus ntshai txaus qhuas tas nrho:
koj tsim kuv zoo ua luaj, koj cov dej num zoo tas nrho

Txais: (14) Kuv cav txog koj vim koj puab kuv tau zoo tas nrho.

Koj paub kuv tus ntsuj plig txhij txhua thoob plaws.
koj pom thaum kuv cov pob txha pib tsheej xeeb los,
thaum koj puab kuv nyob hauv qhov chaw nraim,
thaum koj xaws kuv tsheej zuj zus puag hauv tej nruab a.

Txais: (14) Kuv cav txog koj vim koj puab kuv tau zoo tas nrho.

Zaj Nyeem Ob: HAUJ LWM 13: 22-26

Paj Lug hais lus, nws hais tias:
22 Tswv Ntuj muab Xas Ws xyeeb pov tseg, nws tsa Das Vis ua lawv tus vaj. Tswv Ntuj ua pov thawj txog Das Vis li no: ‘Kuv nrhiav tau Das Vis, Yes Xes tus tub; nws yog tus neeg ntxim kuv siab, nws yuav ua raws li kuv lub siab xav tas huv si.’
23 Nyob hauv Das Vis cov xeeb ntxwv, Tswv Ntuj tau tsa ib tug cawm seej tuaj pab tsoom His Xas Lais, yog Yes Xus.
24 Zam xub tuaj npaj kev rau nws ua ntej, nws tuaj tshaj rau haiv His Xas Lais kom tas sawv daws txais cov kab ke ntxuav los thov txhaum.
25 Thaum Zam ua nws txoj hauj lwm yuav tiav, nws nug tias: ‘Nej xav hais tias kuv yog leej twg? Kuv tsis yog tus uas nej xav. Ntsias saib, tus lawv kuv qab, nws twb tuaj lawm; tus ntawd mas kuv tsis tsim nyog daws nws txoj hlua khau.’
26 Cov kwv tij, nej cov uas yog Has Nplas Has tsev neeg cov tub, thiab nej cov uas hwm Tswv Ntuj nyob ntawm no, lo lus tshaj txog txoj kev cawm seej twb tuaj txog peb lawm.”

As Les Lus Yas: LK 1: 76

Txais: As les lus yas, as les lus yas.

Me tub, luag yuav hu koj ua Leej Nyob Siab tus yaj saub,
vim koj yuav mus ua Huab Tais ntej, koj yuav npaj nws txoj kev.

Txais: As les lus yas, as les lus yas.

Ntawv Moo Zoo: LK 1: 57-66, 80

57 Thaum txog Es Lis Xas Npes lub caij daws cev, mas nws yug tau ib tug tub.
58 Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes kawg nkaus, mas lawv nrog nws zoo siab.
59 Thaum txog hnub yim, lawv tuaj ua lub cim txiav tawv rau tus me nyuam, lawv xav tis nws npe hu ua Ntxas Kas Lias raws li nws txiv.
60 Tab sis nws niam hais tias: "Tsis tau, tus me nyuam yuav hu ua Zam."
61 Lawv hais rau leej niam tias: "Tsis muaj ib tug hauv koj cov txheeb ze hu li ntawd."
62 Ces lawv piav tes rau leej txiv saib nws xav kom lawv tis tus me nyuam npe hu li cas.
63 Leej txiv kom lawv muab ib daim txiag los, nws sau ntawv rau saud tias: " Zam yog nws lub npe." Sawv daws ceeb tas.
64 Tam sis ntawd, leej txiv lub ncauj qhib plho, tus nplaig muag nthas, nws hais tau lus, nws cav txog Tswv Ntuj.
65 Tsoom neeg nyob ze ntawd sawv daws tau ntshai kawg. Hos nyob pem toj siab hauv xeev Yus Das, sawv daws tham txog tej xwm ntawd.
66 Cov uas tau hnov luag tham txog tej xwm no, muab khaws cia rau nruab siab, lawv hais tias: "Tus me nyuam ntawd yuav yog ib tug zoo li cas?" Vim Huab Tais txhais tes yeej nrog nraim tus me nyuam ntawd.
80 Tus me nyuam hlob tuaj, nws lub tswv yim muaj zog zuj zus. Nws nyob hauv teb chaws suab puam mus txog hnub nws tawm los rau cov His Xas Lais pom.

Tim 25 lub 6 Hli 2021

Hnub Rau Lis Kaum Ob Nruab Xyoo B Nruab Lis Piam Xyoo I
Lectionary: 375

Zaj NYeem Ib: HP 17: 1, 9-10, 15-22

1 Thaum Has Nplas muaj cuaj caum cuaj xyoos, HUAB TAIS yees tawm los hais rau nws tias: "Kuv yog Es Sas Dais, tus Tswv Ntuj muaj hwj huam loj tas nrho. Koj yuav taug kev ntawm kuv xub ntiag thiab yuav ua neeg zoo tsis muaj ib qho xyeej.”
9 Tswv Ntuj hais ntxiv rau Has Nplas Has tias: "Ntawm koj mas koj yuav ua raws li kuv lo lus uas kuv nrog koj cog, koj thiab koj caj ces uas los ntom qab koj, mus tiam dhau tiam.
10 Kuv lo lus uas kuv nrog koj cog, thiab nrog koj caj ces cog, thiab nej yuav tsum ua raws nraim, mas yog li no: Tas nrho nej cov tub huv si yuav tsum ua lub cim txiav tawv.”
15 Tswv Ntuj kuj tseem hais rau Has Nplas Has tias: "Koj poj niam Xas Lais, koj yuav tsis hu nws ua Xas Lais ntxiv, nws yuav hu ua Xas Las lawm.
16 Kuv yuav foom hmoov zoo rau nws thiab kuv yuav muab ib tug tub yug ntawm nws los rau koj. Kuv yuav foom hmoov zoo rau tus tub ntawd thiab; ntau haiv neeg yuav sawv hauv nws los, ntau tus vaj kav tej haiv neeg yuav tawm ntawm nws los."
17 Ces Has Nplas Has khoov pw nthi hauv av, nws tuaj dab ros, vim nws xav hauv nruab siab tias : "Ib tug tub puas yuav yug tau ntawm ib tug txiv neej muaj ib puas xyoo lod? Thiab Xas Las twb muaj cuaj caum xyoo lawm, nws puas tseem yuav yug me nyuad tau?"
18 Has Nplas Has hais rau Tswv Ntuj tias: "Thov kom Is Mas Es ua lub neej raws li koj nyiam."
19 Tiam sis Tswv Ntuj teb tias: "Koj poj niam Xas Las yuav yug ib tug tub rau koj, koj yuav tis nws npe hu ua His Xas Has, kuv yuav nrog nws cog lus, yog ib txog kev cog lus nyob mus li. Kuv yuav ua nws tus Tswv Ntuj thiab ua nws caj ces tom qab nws tus Tswv Ntuj.
20 Hais txog Is Mas Es los kuv tau hnov koj lo lus thov lawm. Kuv yuav foom hmoov zoo rau nws, kuv yuav ua kom nws tsim noob ntau, yuav ua kom nws huam vam. Nws yuav yug tau kaum ob tug thawj coj, thiab kuv yuav ua kom nws yog ib haiv neeg loj.
21 Tiam sis tus kuv yuav nrog nws cog lus yog His Xas Has uas lwm xyoo rov txog lub zim txwv no, Xas Las yuav yug rau koj."
22 Thaum Tswv Ntuj nrog Has Nplas Has tham li no tas, mas Tswv Ntuj ncaim nws mus lawm.

NPN 128: 1-2, 3, 4-5

Txais: (4) Huab Tais foom koob hmoov rau cov uas hwm nws.

Nej cov hwm HUAB TAIS, nej txoj hmoov zoo,
thiab nej cov taug raws nws txoj kev!
Vim nej yuav tau noj lub txiv ntawm nej tej hauj lwm,
nej yuav tau hmoov zoo thiab yuav tau txais txiaj ntsim.

Txais: (4) Huab Tais foom koob hmoov rau cov uas hwm nws.

Kuj poj niam yuav zoo li ib txoj hmab txiv cawv txi txiv ncw
nyob rau hauv koj tej kaum vaj kaum tsev,
koj cov me nyuam zoo li ib co ntoo txiv roj
nyob ncig lees koj lub phaj tsum.

Txais: (4) Huab Tais foom koob hmoov rau cov uas hwm nws.

Ntsia saib, tus neeg muaj txoj hmoov zoo
yog tus ntshai HUAB TAIS.
HUAB TAIS nyob saum roob Xis Yoos foom koob hmoov rau nej;
thov kom nej tau pom Yes Lus Xas Les vam meej niaj hnub hauv nej lub neej.

Txais: (4) Huab Tais foom koob hmoov rau cov uas hwm nws.

As Les Lus Yas: MT 8: 17

Txais: As les lus yas, as les lus yas.

Leej Pleev tshem peb tej kev ceg tawv mus,
thiab nws ris peb tej kev mob kev ntsaj.

Txais: As les lus yas, as les lus yas.

Ntawv Moo Zoo: MT 8: 1-4

1 Thaum Yes Xus nqes saum roob los, tej pab neeg coob coob raws nws.
2 Ces ib tug neeg mob ruas txav los, nws txhos caug ntua pe Yes Xus, nws hais tias: “Huab Tais, yog koj xav, mas koj yeej ua tau kom kuv rov huv tuaj.”
3 Yes Xus cev tes mus plhws tus mob ruas, nws hais tias: "Kuv xav, koj cia li rov huv tuaj." Ces tam sis ntawd tus mob ruas cia li zoo hlo.
4 Yes Xus hais rau nws tias: “Koj tsis txhob qhia qhov ntawd rau leeg twg. Tiam sis koj mus thws koj lub cev rau cov leej choj saib, thiab koj mus cev paj tshab raws li Mais Xes qhia, ua puav pheej rau lawv pom.”

Tim 26 lub 6 Hli 2021

Hnub Xya Lis Piam Kaum Ob Nruab Xyoo B Nruab Lis Piam Xyoo I
Lectionary: 376

Zaj Nyeem Ib: HP 18: 1-15

1 HUAB TAIS yees tawm los rau Has Nplas Has pom nyob hauv tsob qab ntoo qhib ntawm Maas Les, Has Nplas Has tab tom zaum ntawm nws lub qhov rooj tsev tsam phooj, yog lub sij hawm uas pib sov tuaj thaum yav nruab hnub.
2 Nws tsa muag ntsia, nws pom peb tug txiv neej tuaj sawv ze ntawm nws. Nws pom dheev lawv, nws cia li sawv tsees ntawm nws lub qhov rooj tsev tsam phooj mus tos txais lawv; nws khoov hauv av pe,
3 thiab nws hais tias: "Huab Tais, yog koj saib kuv tsim nyog no thov koj tsis txhob tuaj hla ntawm koj tus tub txib tsis nres xyuas kuv li.
4 Kuv mam li kom lawv nqa me ntsis dej los rau nej ntxuav ko taw, ces nej thiaj zoo so nyob hauv tsob qab ntoos no.
5 Thiab kuv yuav nrhiav ib qho mov rau nej noj kom nej muaj zog ces nej mam li mus ntxiv, vim twb yog li no, nej thiaj tuaj hla ntawm kuv." Ces lawv teb nws tias: "Ua li koj hais."
6 Has Nplas Has thiaj maj nrawm nroos mus hauv nws lub tsev tsam phooj mus hais rau Xas Las tias: "Koj tsuag tsuag mus luj peb taig hmoov nplej, cov hmoov nplej uas qab qab, koj muab do, muab puab ua ib co ncuav mov ci."
7 Has Nplas Has tso sas ntws mus xyuas nws pab tsiaj, nws ntes kiag ib tug thav nyuj mos tab tom qab, nws muab cob kiag rau nws tus tub txib coj mus ua kom siav sai sai.
8 Ces Has Nplas Has nqa mis nyuj khov thiab mis nyuj haus thiab tus nyuj mos uas twb ua siav lawm coj los rau rau ntawm lawv xub ntiag. Ces nws mus sawv ntsug ze lawv nyob ntawm tsob qab ntoos, saib lawv noj mov.
9 Lawv nug nws tias: "Koj poj niam Xas Las mus qhov twg lawm?" Has Nplas Has teb tias: "Nws nyob hauv tsev tsam phooj."
10 Ib tug thiaj hais tias: "Lwm xyoo tav lub zim txwv no, mas kuv yuav rov tuaj xyuas koj dua, thaum ntawd koj poj niam Xas Las yuav yug tau ib tug tub lawm." Xas Las hnov, vim nws nyob ntawm qhov rooj tsev tsam phooj sab hauv mloog, nyob ntawm tus txiv neej nrob qaum.
11 Has Nplas Has thiab Xas Las nkawd twb laus laus thiab muaj hnub nyoog nchav heev lawm. Xas Las twb tsis ua li tej poj niam ntxiv lawm.
12 Ces Xas Las luag twj ywm hauv nruab siab tias : "Zaum no kuv twb laus lawm thiab kuv tus txiv los twb laus lawm, kuv tseem yuav rov paub txoj kev zoo siab thiab lod ?"
13 Tab sis HUAB TAIS hais rau Has Nplas Has tias: "Ua cas Xas Las thiaj luag hais tias : 'Niag laus li kuv, tseem yuav yug tau me nyuam thiab lod?'
14 Puas muaj ib yam uas HUAB TAIS ua tsis tau? Lwm xyoo kuv yuav rov tuaj ntsib koj dua tib lub caij no raws li kuv tau teem lawm, thaum ntawd Xas Las yuav muaj ib tug tub."
15 Xas Las tsis kam lees, vim nws ntshai, nws hais tias : "Kuv tsis tau luag." Tiam sis HUAB TAIS hais tias: "Koj twb luag lawm."

NPN LK 1: 46-47, 48-49, 50+53, 54-55

Txais: (54b) Huab Tais rov nco txog nws txoj kev khuv leej neeg.

Kuv tus plig cav txog Huab Tais lub hwj chim loj,
kuv lub tswv yim hom khaj nyob hauv Tswv Ntuj, tus Cawm kuv.

Txais: (54b) Huab Tais rov nco txog nws txoj kev khuv leej neeg.

Vim nws dauv muag los saib nws tus ntxhais txib tsis muaj tsim.
Txij no mus, txhua tiam neeg yuav hais tias kuv txoj hmoov zoo;
vim tus Muaj Hwj Huam ua tej yam loj rau kuv, nws lub npe ntshiab.

Txais: (54b) Huab Tais rov nco txog nws txoj kev khuv leej neeg.

Nws lub siab khuv leej cov neeg hwm nws tiam dhau tiam.
Nws pub tej yam zoo rau cov neeg tshaib tau noj seem noj so,
nws ntiab cov neeg muaj rov qab mus tes qhuav nquas.

Txais: (54b) Huab Tais rov nco txog nws txoj kev khuv leej neeg.

Nws tuaj pab nws tus tub txib His Xas Lais,
vim nws nco ntsoov tias nws tau cog lus yuav khuyv leej neeg,
nws tau cog lus rau peb cov yawg koob, rau Has Nplas Has
thiab Has Nplas Has cov xeeb ntxwv mus ib txhiab ib txhis."

Txais: (54b) Huab Tais rov nco txog nws txoj kev khuv leej neeg.

As Les Lus Yas: MT 8: 17

Txais: As les lus yas, as les lus yas.

Leej Pleev tshem peb tej kev ceg tawv mus
thiab nws ris peb tej kev mob kev ntsaj.

Txais: As les lus yas, as les lus yas.

Ntawv Moo Zoo: MT 8: 5-17

5 Thaum Yes Xus mus hauv Kas Fas Naus, muaj ib tug xab txheeb txav los ze Yes Xus, nws thov tias:
6 "Huab Tais, kuv tus tub txib pw tom tsev, nws tes taw tuag tas, nws mob hnyav kawg."
7 Yes Xus teb tias: "Kuv yuav mus kho nws."
8 Tus xab txheeb hais ntxiv tias: "Huab Tais, kuv tsis tsim nyog koj chaws los hauv kuv tsev, tsuav yog koj hais ib lo lus xwb ces kuv tus tub txib yuav zoo hlo.
9 Vim tias kuv kuj yog ib tug neeg zwm rau lwm tus, thiab kuv kuj muaj ib co tub rog zwm rau kuv thiab. Yog kuv hais rau ib tug tias : 'Koj mus!' nws cia li mus; kuv ho hais rau lwm tus tias: 'Koj los,' nws kuj cia li los; kuv hais rau kuv tus tub txib tias: 'Koj ua qhov no!' nws cia li ua."
10 Yes Xus hnov nws hais li ntawd, Yes Xus qhuas kawg; nws hais rau cov neeg raws nws tias: "Kuv hais tseeb rau nej, kuv tsis tau pom dua ib tug neeg ntseeg npaum li ntawd nyob hauv cov His Xas Lais.
11 Kuv hais rau nej: yuav muaj neeg coob tuaj Toob Fab thiab Xib Fab tuaj zaum nrog Has Nplas Has, nrog His Xas Has thiab nrog Yas Kos noj rooj qav hauv Ntuj lub Ceeb Tsheej.
12 Hos cov tub hauv Ceeb Tsheej yuav raug muab rho mus pov rau hauv qhov tsaus ntuj nraum zoov; nyob nraud, sawv daws yuav quaj tom hniav nkawv.”
13 Yes Xus hais rau tus xab txheeb tias: "Koj rov mus ! Koj yuav tau raws li koj lub siab ntseeg!" Ces tib lub sij hawm ntawd, nws tus tub txib zoo hlo.
14 Ces Yes Xus chaws mus hauv Pob Zeb tsev. Nws pom Pob Zeb niam tais pw saum txaj, mob kub cev.
15 Yes Xus tuav nws txhais tes, tus mob kub cev thim hl.. Ces Pob Zeb niam tais sawv, nws tsob hwb Yes Xus.
16 Yav tsaus ntuj, lawv coj ib co neeg raug dab coob leej tuaj cuag Yes Xus. Yes Xus hais ib lo lus los ntiab cov dab ntawd, thiab nws kho cov neeg mob zoo tas huv si.
17 Ua li mas muaj raws li Yaj Saub His Xais lo lus tias: “Nws tshem peb tej kev ceg tawv mus, nws ris peb tej kev mob kev ntsaj.”

Tim     28     lub     6     Hli     2021

Hnub Ob Lis Piam Kaum Peb Nruab Xyoo B Nruab Lis Piam Xyoo I
Lectionary: 377

Yuav Hwm LN Irenaeus, tswv qhia ua Tim Khawv

Zaj Nyeem Ib:   HP 18: 16-33

16 Thaum peb tug txiv neej uas tuaj xyuas Has Nplas Has tab tom sawv kev mus, lawv ntsia pom Xos Dos Mas. Has Nplas Has kuj nrog lawv mus thiab, nws xa lawv mus.
17 HUAB TAIS hais hauv nruab siab tias: "Kuv puas yuav zais tsis qhia Has Nplas Has paub txog qhov uas kuv npaj yuav ua?
18 Vim hais tias nws yuav yog ib haiv neeg loj thiab muaj peev xwm, thiab tas txhua haiv neeg nyob hauv ntiaj teb yuav tau hmoov zoo yog vim nws.
19 Kuv twb tau xaiv nws lawm, kom nws qhuab qhia nws cov tub cov ntxhais thiab nws tsev neeg uas yuav los tom qab nws, kom sawv daws coj raws nraim li HUAB TAIS txoj kev, uas yog yuav tsum ua raws qhov yog thiab qhov ncaj ncees; yog lawv coj li ntawd mas HUAB TAIS thiaj yuav pub rau Has Nplas Has raws li qhov nws tau cog lus rau Has Nplas Has lawm."
20 Ces HUAB TAIS hais tias: "Muaj ib lub suab nrv loj kawg yws yws txog Xos Dos Mas thiab Nkos Mos Las, vim lawv txoj kev txhaum hnyav kawg nkaus.
21 Yog li kuv yuav nqes mus xyuas saib lawv puas tau ua phem npaum li lub suab nrov tuaj hais los tsis tau, kom kuv thiaj paub."
22 Ob tug txiv neej sawv kev mus rau Xos Dos Mas lawm, tshuav HUAB TAIS tseem nrog Has Nplas Has sawv nyob ntawd.
23 Ces Has Nplas Has txav zog los ze, nws nug tias: "Koj puas yuav rhuav cov neeg ncaj nrog cov neeg txhaum tib si?
24 Tej zaud tsam muaj txog li tsib caug leej neeg ncaj nyob hauv lub nroog ne, koj puas yuav muab lub nroog rhuav, tsis zam rau lub nroog tab yog muaj lawv nyob hauv?
25 Thov kom koj tsis txhob ua ib yam zoo li ntawd, tsis txhob rhuav tus neeg ncaj nrog tus neeg txhaum. Ua li ces tus neeg ncaj nrog tus neeg txhaum tuag zoo ib yam xwb tsis muaj qhov txawv li. Thov kom lub tswv yim ntawd nyob deb ntawm koj. Tus txiav txim rau lub ntiaj teb, nws yuav tsis txiav txim kom ncaj lod?"
26 HUAB TAIS teb tias : "Yog kuv nrhiav tau tsib caug leej neeg ncaj nyob hauv lub nroog Xos Dos Mas, mas kuv yuav zam rau lub nroog tas huv si vim muaj lawv."
27 Has Nplas Has teb tias: "Kuv yog plua av plua tshauv xwb, tsis kav kuv tseem muaj cuab kav nrog kuv tus Huab Tais hais.
28 Vim tias, tej zaum tsam tsis muaj txog tsib caug leej neeg ncaj, es yog tsawg tsib leeg ne, koj puas yuav rhuav lub nroog tas huv si vim tsawg tsib leeg ntawd?" HUAB TAIS teb tias: "Kuv yuav tsis rhuav, yog tias kuv nrhiav tau plaub caug tsib leej neeg ncaj."
29 Has Nplas Has rov hais ntxiv tias: "Tej zaum tsam muaj plaub caug leej xwb ne?" HUAB TAIS teb tias : "Kuv yuav tsis rhuav lub nroog, vim plaub caug leej ntawd."
30 Has Nplas Has hais tias: "Thov kom kuv tus Huab Tais txhob npau taws thiab cia kuv hais lus dua. Tej zaum tsam muaj peb caug leej xwb ne?" HUAB TAIS teb tias: "Kuv yuav tsis rhuav lub nroog, yog kuv nrhiav tau peb caug leej."
31 Has Nplas Has hais tias: "Kuv ua neeg muaj cuab kav tas zog, kuv thiaj nrog kuv tus Huab Tais hais ntxiv: Tej zaum tsam nrhiav tau nees nkaum leej xwb ne ?" HUAB TAIS teb tias: "Kuv yuav tsis rhuav lub nroog, vim nees nkaum leej ntawd."
32 Has Nplas Has hais tias: "Thov kom kuv tus Huab Tais tsis txhob npau taws, kuv tseem yuav hais ib zaug ntxiv yog zaum kawg: Tej zaum tsam nrhiav tau kaum leej xwb ne?" HUAB TAIS teb tias: "Kuv yuav tsis rhuav lub nroog, vim kaum leej ntawd."
33 HUAB TAIS nrog Has Nplas Has tham tas, nws mus lawm. Ces Has Nplas Has rov qab mus tsev.

NPN   103: 1b-2, 3-4, 8-9, 10-11

Txais: (8a) Huab Tais siab zoo thiab khuv leej neeg.

Kuv tus plig, koj cia li cav txog HUAB TAIS;
tas nrho kuv tus kheej, koj cia li cav txog nws lub npe ntshiab.
Kuv tus plig, koj cia li cav txog HUAB TAISs,
thiab tsis txhob hnov qab nws tej txiaj ntsim koob hmoov.

Txais: (8a) Huab Tais siab zoo thiab khuv leej neeg.

Nws zam tas nrho koj cov txhaum rau koj,
nws kho tas koj tej mob nkeeg kom zoo.
Nws txhiv koj txoj sia ntawm kev puas tsuaj puas ntsoog,
nws muab nws lub siab zoo thiab nws kev hlub los roos koj.

Txais: (8a) Huab Tais siab zoo thiab khuv leej neeg.

HUAB TAIS khuv leej thiab hlub neeg,
nws npau taws qeeb, nws muaj txoj kev  ua zoo puv ntoob
Nws tsis cem tsis yws tas mus li,
nws kuj tsis npau taws tas mus ib txhis.

Txais: (8a) Huab Tais siab zoo thiab khuv leej neeg.

Nws tsis nplua peb raws li peb tau ua txhaum,
nws tsis pauj rau peb raws li peb tau ua phem.
Npaum li lub ntuj nyob siab tshaj saum ntiaj teb,
nws kuj hlub cov neeg uas hwm nws tshaj npaum li ntawd.

Txais: (8a) Huab Tais siab zoo thiab khuv leej neeg.

As Les Lus Yas:   NPN 95: 8

Txais: As les lus yas, as les lus yas.

Yog hnub no nej hnov nws lub suab,
Nej tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo:   MT 8: 18-22

18 Yes Xus pom tias muaj neeg coob coob tuaj ntsauv nws, ces nws kom lawv mus lawm sab ntug dej tim ub.
19 Txawm muaj ib tug kws ntawv ntshiab txav los hais rau nws tias: “ Xib Hwb, txawm koj yuav mus qhov twg los kuv yuav raws koj mus.”
20 Yes Xus hais rau nws tias: “Hma muaj hma lub qhov nkaum, cov noog saum ntuj kuj muaj lawv lub zes, hos Neeg Leej Tub twb tsis muaj chaw rau ncoo li.”
21 Muaj ib tug nyob hauv nws cov thwj tim hais rau nws tias: “Huab Tais, thov koj cia kuv mus faus kuv txiv tso.”
22 Tab sis Yes Xus hais rau nws tias: “Koj raws kuv mus, koj cia cov tuag mam li faus cov tuag.”

Tim 29 lub 6 Hli 2021

Hnub Peb Lis Piam Kaum Peb Nruab Xyoo B Nruab Lis Piam Xyoo I

Hwm ob tug Hauv Paus Xa Lus LN Pob Zeb thiab Paj Lug – Thaj Txi Ntuj hnub ntawd
Lectionary: 591

Zaj Nyeem Ib: HAUJ LWM 12: 1-11

1 Lub caij ntawd, tus vaj Hes Los ntes ib co neeg nyob hauv lub Koom Txoos thiab tsim txom lawv.
2 Nws xuas ntaj tua Yas Kos uas yog Zam tus tij laug.
3 Thaum nws pom tias cov Yus Das zoo siab rau qhov nws ua ntawd, nws kuj tso neeg mus ntes Pob Zeb thiab. Thaum ntawd yog lub caij noj cov ncuav mov tsis rau poov xab.
4 Thaum Hes Los ntes tau Pob Zeb lawm, nws coj Pob Zeb mus kaw hauv tsev loj faj. Nws kom plaub pab tub rog zov rawv, ib pab muaj plaub leeg. Hes Los npaj tias thaum ua lub Ntees Hla tas nrho, mas nws yuav coj Pob Zeb tawm los rau ntawm tsoom pej xeem xub ntiag.
5 Ces Pob Zeb thiaj raug kaw hauv tsev loj faj; tiam sis lub Koom Txoos thov Tswv Ntuj tsis tseg rau Pob Zeb.
6 Hmo ua ntej kiag hnub Hes Los yuav coj Pob Zeb tawm los, Pob Zeb pw tsaug zog nyob nruab nrab ob tug tub rog, muaj ob txog saw khi rawv nws cia, hos tseem muaj ib co tub rog zov qhov rooj nyob sab nraud saib lub tsev loj faj thiab.
7 Ib sij huam, Huab Tais tus Tshiab cia li los sawv nyob ze ntawm Pob Zeb, thiab muaj ib qho ci ua kom pom kev rau hauv kem tsev. Tus Tshiab diaj Pob Zeb ntawm ib sab, tsa kom nws sawv, thiab hais rau nws tias: "Koj sawv tsees tam sis no!" Cov saw khi Pob Zeb ob txhais tes cia li plam plaws tas.
8 Tus Tshiab hais tias: "Sia koj txoj siv thiab rau koj nkawm khau!" Pob Zeb ua li ntawd tas, tus Tshiab hais tias: "Hnav koj lub tsho loj ces lawv kuv qab!"
9 Ces Pob Zeb lawv tus Tshiab qab tawm mus. Pob Zeb tsis paub tias qhov tus tshiab ua ntawd yog tiag, nws xav tias yog nws ua yog toog pom xwb.
10 Nkawd mus hla thawj pab zov keeb, thiab tseem mus dhau pab ob ntxiv thiab, nkawd thiaj los txog lub qhov rooj hlau uas yuav tawm sab nraud mus rau hauv nroog. Lub qhov rooj hlau cia li qhib plho nws tus kheej rau nkawd, nkawd tawm plaws mus taug ib txog kev, ces tus Tshiab cia li ploj ntais ncaim mus lawm.
11 Pob Zeb thiaj tsim dheev feeb meej tuaj, nws hais tias: "Zaum no, kuv paub tseeb lawm tias Huab Tais tau xa nws tus Tshiab tuaj pab kuv kom kuv dim ntawm Hes Los txhais tes thiab ntawm qhov uas cov Yus Das vam vam yuav tau pom."

NPN 34: 2-3, 4-5, 6-7, 8-9

Txais: Huab Tais tus tshiab yuav tuaj cawm cov uas hwm nws.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig lub koob meej yog nyob hauv HUAB TAIS;
tus neeg me yuav hnov txog kuv thiab yuav zoo siab.

Txais: Huab Tais tus tshiab yuav tuaj cawm cov uas hwm nws.

Nej nrog kuv cav txog HUAB TAIS,
peb sawv daws ua ke qhuas nws lub npe.
Kuv tau nrhiav HUAB TAIS, ces nws teb kuv,
Nws cawm kuv dim ntawm tas kuv tej kev ntshai.

Txais: Huab Tais tus tshiab yuav tuaj cawm cov uas hwm nws..

Nej vam txog HUAB TAIS, ces kev zoo siab yuav ua nej ci ntsa iab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog
thiab yuav cawm nws ntawm tas nws tej kev nyuaj siab.

Txais: Huab Tais tus tshiab yuav tuaj cawm cov uas hwm nws.

HUAB TAIS tus tshiab tsa tsev tsam phooj nyob
ncig cov neeg hwm HUAB TAIS, nws cawm lawv.
Nej saj ces nej yuav pom tias HUAB TAIS siab zoo npaum li cas.
Tus tau txoj hmoov zoo yog tus vam khom HUAB TAIS.

Txais: Huab Tais tus tshiab yuav tuaj cawm cov uas hwm nws.

Zaj Nyeem Ob: 2 TMT 4: 6-8, 17-18

6 Ntawm kuv, Paj Lug, mas kuv twb raug muab hliv los txi Ntuj lawm, ces twb txog lub caij kuv yuav mus lawm. 7 Kuv tau sib tw khiav txaus, kuv khiav mus txog chaw lawm; kuv tau ceev txoj kev ntseeg cia.
8 Txij nyem no mus, lub mom teeb kub muaj kev ncaj nyob tos kuv lawm xwb. Huab Tais tus txiav txim ncaj yuav muab ua paj tshab rau kuv thaum txog hnub ntawd, tsis yog muab rau kuv ib leeg xwb, nws tseem yuav muab rau tas ib tsoom neeg nyiam nws thiab tos ntsoov lub caij nws yuav los.
17 Huab Tais yog tus tau pab kuv thiab ntxiv zog rau kuv, kom vim kuv, mas txoj kev tshaj Lo Lus thiaj yuav tiav log, ces tas cov neeg teev pej kum dab thiaj tau hnov txog. Nws tau npo kuv dim ntawm tsov ntxhuav lub ncauj lo.
18 Huab Tais yeej yuav npo kuv dim ntawm txhua yam kev phem thiab yuav txuag kuv kom kuv mus txog nws lub Ceeb Tsheej nyob saum ntuj. Thov kom Huab Tais nto koob meej mus ib txhiab ib txhis. Ua li.


As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, kuv yuav txhim kuv lub Koom Txoos rau saum lub pob zeb no.
Dab phem teb cov qhov rooj yuav tiv tsis yeej nws.

Txais: As les lus yas, as les lus yas.

Ntawv Moo Zoo: MT 16: 13-19

13 Thaum Yes Xus tuaj txog cheeb tsam ntawm Xes Ntxas Les Fis Lis Pos, nws nug cov thwj tim tias: "Luag tej hais tias Neeg Leej Tub yog leej twg?"
14 Lawv teb tias : “Ib txhia hais tias yog Zam Ntxuav Plig, ib txhia hais tias yog Es Lias, tseem muaj lwm cov hais tias yog Yes Les Mias los yog ib tug hauv cov yaj saub.”
15 Yes Xus hais rau lawv tias: "Nej ne, nej hais tias kuv yog leej twg ?"
16 Xis Moos Pob Zeb teb tias: "Koj yog Leej Pleev, yog tus Tswv Ntuj Muaj Txoj Sia Leej Tub."
17 Yes Xus teb rau Pob Zeb tias: "Xis Moos, Yos Nas tub, koj txoj hmoov zoo, vim tsis yog nqaij thiab ntshav qhia koj paub txog qhov no, yog kuv Txiv nyob saum ntuj qhia koj.
18 Ua li mas kuv hais rau koj: Koj yog Pob Zeb, kuv yuav txhim kuv lub Koom Txoos rau saum lub pob zeb no, ces dab phem teb cov qhov rooj yuav tiv tsis yeej nws.
19 Kuv yuav muab lub Ceeb Tsheej saum ntuj cov yawm sij rau koj tuav. Koj khi yam twg nyob ntiaj teb no, yam ntawd kuj yuav raug khi nyob saum ntuj; koj daws yam twg nyob ntiaj teb no, yam ntawd kuj yuav raug
daws nyob saum ntuj."

Tim 30 lub 6 Hli 2021

Hnub Plaub Lis Piam Kaum Peb Nruab Xyoo B Nruab Lis Piam Xyoo I
Lectionary: 379

Yuav Hwm Thawj cov Tuag Ua Tim Khawv nyob hauv Koom Txoos Kas Tos Liv

Zaj Nyeeem Ib: HP 21: 5, 8-20a

5 Has Nplas Has muaj ib puas xyoo nkaus thaum nws tus tub His Xas Has yug los.
8 Tus me nyuam loj tuaj, thaum txog caij muab nws cais mis, Has Nplas Has ua ib pluag mov loj loj rau His Xas Has hnub cais nws mis ntawd.
9 Xas Las xauj pom Has Nplas Has tus tub uas yug ntawm As Nkas, tus poj Hais Nkws Tos los, nrog nws tus tub His Xas Has ua si.
10 Xas Las hais rau Has Nplas Has tias: "Ntiab tus ntxhais qhev ntawd thiab nws tus tub khiav mus. Tsis pub kom tus ntxhais qhev ntawd tus tub los nrog kuv tus tub His Xas Has sib txeeb lub cuab tam."
11 Cov lus no ua rau Has Nplas Has tsis zoo siab thiab ntxhov siab rau nws tus tub Is Mas E.
12 Tiam sis Tswv Ntuj hais rau nws tias : "Koj tsis txhob nyuaj siab txog tus me nyuam thiab koj tus ntxhais txib. Xas Las xav kom koj ua dab tsi mas koj ua raws li ntawd, vim His Xas Has thiaj yog koj caj ces tus yuav ris koj lub npe nyob mus li.
13 Hos tus tub ntawm tus ntxhais qhev los kuv kuj yuav muab nws ua ib haiv neeg loj vim nws yog koj roj ntsha."
14 Ces tag kis, Has Nplas Has sawv ntxov ntxov los ntim mov thiab ib hnab tawv dej rau As Nkas, nws muab khuam rau saum As Nkas xub pwg thiab muab tus me nytuam cob rau nws, ces Has Nplas Has kom nkawd tawm mus. As Nkas thiaj mus, nws mus ncig mus ncig los hauv lub hav suab puam Npes Xas Npes.
15 Thaum nws lub hnab tawv dej tas lawm, nws muab tus me nyuam tso tseg rau hauv ib tsob qab ntoos,
16 ces nws txav mus zaum deb ntawm tus me nyuam li ib ncua hneev. Nws xav hais tias: "Kuv tsis xav pom kuv tus tub txoj sia tu." As Nkas mus zaum deb ntawd, ces tus me nyuam tsa suab quaj.
17 Tswv Ntuj hnov tus me tub quaj, ces Tswv Ntuj tus Tshiab hu saum ntuj tuaj rau As Nkas tias: "As Nkas, muaj teeb meem dab tsi? Koj tsis txhob txhawj vim Tswv Ntuj tau hnov tus me tub lub suab quaj hauv nws qhov chaw tuaj lawm.
18 Koj cia li sawv tsees mus tsaws nws los puag kom ruaj ruaj, vim kuv yuav muab nws tsa ua ib haiv neeg loj."
19 Tswv Ntuj qhib As Nkas qhov muag ces As Nkas pom ib lub qhov dej. Nws thiaj nqa lub hnab mus ntim dej coj los rau tus me tub haus.
20 Ces tus me tub hlob zuj zus tuaj, Tswv Ntuj nrog nraim nws.

NPN 34: 7-8, 10-11, 12-13

Txais: (7a) Huab Tais mloog tus txom nyem lub suab quaj.

Thaum tus txom nyem quaj qw, HUAB TAIS mloog nws,
Huab Tais cawm nws ntawm tas nws tej kev txhawj xeeb.
HUAB TAIS tus tshiab tsa tsev tsam phooj
ncig cov neeg hwm HUAB TAIS, nws cawm lawv.

Txais: (7a) Huab Tais mloog tus txom nyem lub suab quaj.

Nej uas yog nws tsoom neeg ntshiab, nej cia li hwm HUAB TAIS,
vim cov neeg hwm HUAB TAIS tsis tshaib tsis nqhis li.
Cov muaj koob muaj npe yuav txom nyem tshaib plab;
hos cov nrhiav HUAB TAIS yuav tsis tshaib tsis nqhis dab tsi li.

Txais: (7a) Huab Tais mloog tus txom nyem lub suab quaj.

Cov me nyuad, los ntawm no, los mloog kuv hais;
Kuv yuav qhia txoj kev hwm HUAB TAIS rau nej.
Nej leej twg xav tau txoj sia,
thiab zoo siab nyob hauv lub neej vam meej?

Txais: (7a) Huab Tais mloog tus txom nyem lub suab quaj.

As Les Lus Yas: YAS KOS 1: 18

Txais: As les lus yas, as les lus yas.

Leej Txiv pom zoo kom peb yug los nyob hauv lo lus tseeb,
kom peb yog thawj cov txiv nyob hauv txhua yam uas nws tsim los.

Txais: As les lus yas, as les lus yas.

Ntawv Moo Zoo: MT 8: 28-34

28 Thaum Yes Xus tuaj txog sab ntug dej tim ub, txog rau ntawm Nkas Das Las teb chaws, mas muaj ob tug neeg raug dab tawm hauv cov toj ntxas tuaj cuag Yes Xus. Nkawd tsiv tsaim kawg nkaus, tsis muaj leeg twg muaj cuab kav taug txoj kev ntawd li.
29 Ob tug ntawd qw nrov nrov tias: "Tswv Ntuj Leej Tub, koj xav ua dab tsi rau wb ? Tsis tau txog lub caij teem, koj txawm siv tuaj tsim txom wb lawm lod ?"
30 Nyob tsis deb ntawd, muaj ib pab npua coob tab tom noj zaub.
31 Cov dab thov Yes Xus tias : "Yog koj ntiab peb tawm, thov koj cia peb mus nyob hauv pab npua tod."
32 Yes Xus teb tias: "Nej kav tsij mus mas." Cov dab tawm plaws nkag mus nyob hauv cov npua, ces tas pab npua dhia puag saum tsag siab rau hauv dej ntuj; pab npua poob dej tuag tas tib si.
33 Cov tub zov npua tso tes khiav mus hauv nroog, lawv mus piav tas txhua yam tib si thiab piav txog tej xwm tshwm sim rau ob tug neeg raug dab ntawd.
34 Ces tas lub nroog tawm tuaj cuag Yes Xus. Thaum lawv pom nws, lawv thov kom nws tawm hauv lawv thaj chaw mus.

Tim 1 lub 7 Hli 2021

Hnub Tsib Lis Piam Kaum Peb Nruab Xyoo B Nruab Lis Piam Xyoo I
Lectionary: 380

Zaj Nyeem Ib: HAUV PAUS 22: 1b-19

1 Tswv Ntuj xav sim Has Nplas Has siab, nws hu tias: "Has Nplas Has!" Has Nplas Has teb tias: "Kuv nyob ntawm no!"
2 Tswv Ntuj hais tias: "Coj koj leej tub twm zeej His Xas Has uas koj hlub kawg nkaus, koj mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj."
3 Tag kid, Has Nplas Has sawv ntxov ntxov los, nws nog nra rau nws tus luj, nws coj ob tug tub txib thiab nws tus tub His Xas Has nrog nws mus. Nws phua ib co taws npaj mus ua thaj txi ntuj, ces nws sawv kev mus, nws mus rau thaj chaw uas Tswv Ntuj qhia rau nws.
4 Hnub peb, Has Nplas Has tsa muag ntsia, nws pom thaj chaw ntawd tseem nyob deb.
5 Has Nplas Has hais rau nws ob tug tub txib tias: "Neb nyob ntawm no nrog tus luj, hos kuv thiab kuv tus tub wb yuav mus ntxiv, wb yuav mus pe hawm Tswv Ntuj, ces wb mam rov los ntawm neb."
6 Has Nplas Has muab cov taws txi Ntuj nog rau nws tus tub His Xas Has ris, hos nws nqa cov hluav taws thiab rab riam, ces nkawd ob leeg ua ke mus.
7 His Xas Has nug nws txiv Has Nplas Has tias: "Kuv txiv !" Has Nplas Has teb tias: "Kuv nyob ntawm no os, me tub!" His Xas Has hais ntxiv tias: "Ua cas pom hluav taws thiab cov taws xwb, ua li tus yaj yuav coj los hlawv txi Ntuj ne nyob qhov twg?"
8 Has Nplas Has teb tias: "Me tub, Tswv Ntuj mam li muab tus yaj uas yuav txi Ntuj rau wb os." Ces nkawd ob leeg taug kev mus ntxiv.
9 Thaum nkawd tuaj txog thaj chaw uas Tswv Ntuj tau qhia rau nws lawm, Has Nplas Has tsa ib lub thaj txi ntuj rau ntawd thiab nws muab cov taws mus teeb rau saud. Nws muab nws tus tub His Xas Has pav, ces nws muab tso rau saum lub thaj txi Ntuj saum cov taws .
10 Has Nplas Has tsa tes mus nthos rab riam yuav coj los tua nws tus tub.
11 Tiam sis HUAB TAIS tus Tshiab hu saum ntuj tuaj rau nws tias: "Has Nplas Has! Has Nplas Has!" Has Nplas Has teb tias: "Kuv nyob ntawm no!"
12 Tus Tshiab hais tias: "Koj txhob tsa txhais tes rau saum tus me nyuad! Txhob ua dab tsi rau nws! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv."
13 Has Nplas Has tsa muag ntsia pom ib tug laug tshis uas ob tug kub daig hauv ib koog khaub nyob tom nws qub qab. Ces nws mus muab tus laug tshis los hlawv txi Ntuj hloov nws tus tub chaw.
14 Has Nplas Has tis npe rau thaj chaw ntawd hu ua qhov chaw "HUAB TAIS mam muab.” Ces zaum no neeg thiaj hais kam tias "Saum lub roob HUAB TAIS mam muab."
15 HUAB TAIS tus Tshiab rov hu zaum ob saum ntuj tuaj rau Has Nplas Has,
16 nws hais tias: "HUAB TAIS hais li no: Kuv tuav txog kuv lub npe cog lus rau koj, vim koj tau ua li ntawd, koj tsis yig, koj tuaj yeem muab koj leej tub, uas yog koj tib leeg tub los txi rau kuv,
17 mas kuv yuav foom hmoov zoo rau koj, kuv yuav ua kom koj tsoom xeeb leej xeeb ntxwv coob npaum cov hnub qub saum ntuj thiab ntau npaum cov xuab zeb ntawm ntug hiav txwv. Koj tsoom xeeb leej xeeb ntxwv yuav ua tswv kav lawv cov yeeb ncuab tej qhov rooj loog.
18 Tas txhua haiv neeg nyob ntiaj teb yuav tau txais txoj koob hmoov zoo nyob hauv koj tsoom xeeb leej xeeb ntxwv, vim koj tau mloog kuv lus."
19 Has Nplas Has rov qab los txog ntawm nws ob tug tub txib, ces lawv sawv kev ua ke rov los rau Npes Xas Npes uas yog qhov chaw Has Nplas Has tsa nws lub tsev nyob.

NPN 115: 1-2, 3-4, 5-6, 8-9

Txais: (116:9) Kuv yuav taug kev nyob ntawm Huab Tais xub ntiag,
hauv cov neeg ciaj lub teb chaws.

HUAB TAIS, koj txhob ua kom peb nto koob meej,
tab sis thov koj ua kom koj lub npe nto koob meej,
vim koj siab zoo, vim koj yog qhov tseeb.
Vim li cas cov kuj cuab thiaj tau kev hais tias :
"Lawv tus Tswv Ntuj nyob qhov twg ?"

Txais: (116:9) Kuv yuav taug kev nyob ntawm Huab Tais xub ntiag,
hauv cov neeg ciaj lub teb chaws.

Peb tus Tswv Ntuj nyob txheej ntuj saud ;
nws ua tau tas ib puas tsav yam nws xav ua.
Lawv cov mlom dab yog nyiaj yog kub,
yog neeg ob txhais tes puab xwb.

Txais: (116:9) Kuv yuav taug kev nyob ntawm Huab Tais xub ntiag
hauv cov neeg ciaj lub teb chaws.

Lawv cov mlom muaj qhov ncauj, tab sis tsis txawj hais lus ;
lawv muaj qhov muag, tab sis tsis pom kev.
Lawv muaj pob ntseg, tab sis tsis hnov lus ;
lawv muaj qhov ntswg, tab sis tsis hnov ntxhiab ;

Txais: (116:9) Kuv yuav taug kev nyob ntawm Huab Tais xub ntiag
hauv cov neeg ciaj lub teb chaws.

Cov puab mlom yuav zoo ib yam li lawv cov mlom,
Txhua tus tso siab rau cov mlom yuav zoo ib yam li cov mlom.
His Xas Lais cov tub tso siab rau HUAB TAIS,
Nws yog tus pab lawv, yog daim leem phiaj thaiv lawv.

Txais: (116:9) Kuv yuav taug kev nyob ntawm Huab Tais xub ntiag
hauv cov neeg ciaj lub teb chaws.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib raug zoo nyob hauv Leej Pleev,
nws tso cov lus pab kom neeg nrog nws rov sib raug zoo rau peb ua cov tshaj tawm.

Txais: As les lus yas, as les lus yas.

Ntawv Moo Zoo: MT 9: 1-8

1 Yes Xus nce mus hauv nkoj, nws hla dej ces nws rov los txog lub nroog nws nyob.
2 Thaum ntawd, neeg nqa ib tug tuag ceg pw saum ib lub txaj tuaj rau Yes Xus. Yes Xus pom lawv ntseeg, nws hais rau tus tuag ceg tias: "Me tub, koj tso siab mog! Koj cov txhaum daws tas lawm."
3 Thaum ntawd, muaj ob peb tug Kws Ntawv Ntshiab xav twj ywm hauv nruab siab tias: ‘Tus neeg ntawd thuam Ntuj.’
4 Tab sis Yes Xus paub qhov lawv xav, nws hais tias: "Vim li cas nej xav tej yam phem rau nruab siab?
5 Lo lus twg hais yooj yim dua, puas yog lo tias: 'Koj cov txhaum daws tas lawm,' los yog lo tias: 'Koj sawv tsees mus kev?'
6 Kom nej paub tias Neeg Leej Tub muaj lub hwj huam daws txhaum tau nyob ntiaj teb no," ces Yes Xus hais rau tus tuag ceg tias : "Koj sawv, koj nqa koj lub txaj, koj rov mus tsev".
7 Ces tus tuag ceg sawv tsees los thiab nws rov mus tsev lawm.
8 Tsoom sid pom li ntawd, sawv daws qhuas kawg. Lawv cav txog Tswv Ntuj vim nws pub lub hwj huam loj npaum li no rau tib neeg.

Tim 2 lub 7 Hli 2021

Thawj Hnub Rau Lis Piam Kaum Peb Nruab Xyoo B Nruab Lis Piam Xyoo I
Lectionary: 381

Zaj Nyeem Ib: HP 23: 1-4, 19; 24: 1-8, 62-67

23: 1 Xas Las ua neej ntev txog ib puas nees nkaum xya xyoo.
2 Ces nws tuag nyob Kis Lis Yas Tas Npas uas yog Hes Nploos, nyob teb chaws Kas Nas Has. Has Nplas Has ua nws lub ntees thiab quaj nyiav nws nyob ntawd.
3 Ces Has Nplas Has tso nws tus tuag tseg, nws mus hais rau Hes cov tub tias:
4 "Kuv yog ib tug pej kum neeg ua qhua tuaj poob rau hauv nej. Kuv thov nej muag ib thaj av rau kuv ua toj ntxas kom kuv tau coj kuv tus tuag mus zais."
19 Ces Has Nplas Has thiaj yuav thaj av thiab coj Xas Las nws poj niam mus los rau hauv lub qhov tsua hauv daim teb Mas Pes Las, nyob sab hnub tuaj ntawm Mas Nples, uas yog Hes Nploos, hauv teb chaws Kas Nas Has.
24: 1 Thaum ntawd Has Nplas Has laus laus muaj hnub nyoog nchav lawm thiab HUAB TAIS tau foom hmoov zoo rau Has Nplas Has nyob hauv txhua yam tib si lawm.
2 Ces Has Nplas Has hais rau nws tus tub txib uas laus dua cov nyob hauv nws tsev, thiab yog tus saib tas nws lub cuab tam huv si tias: "Koj cev tes mus npuab kuv sab qab ncej puab,
3 kuv yuav kom koj tuav txog HUAB TAIS tus Tswv Ntuj kav lub ntuj thiab lub ntiaj teb los cog lus tias koj yuav tsis nrhiav ib tug poj niam nyob hauv cov neeg Kas Nas Has uas kuv nrog lawv nyob los rau kuv tus tub yuav.
4 Tiam sis koj yuav mus pem kuv lub teb chaws, mus xaiv ib tug poj niam nyob hauv kuv tsev neeg coj los rau kuv tus tub His Xas Has yuav ua poj niam."
5 Tus tub txib hais tias: "Ntshai tsam tus poj niam ntawd tsis kam nrog kuv los nyob teb chaws no ne? Kuv puas yuav tsum coj koj tus tub rov mus lawm pem lub teb chaws uas koj tawm los lawd?"
6 Has Nplas Has teb tias: "Koj yuav ceev faj tsis txhob coj kuv tus tub rov mus nyob rau ped.
7 HUAB TAIS, tus Tswv lub ntuj, nws tau coj kuv tawm ntawm kuv txiv lub tsev thiab ntawm kuv tsev neeg lub teb chaws los, thiab nws tau cog lus rau kuv tias: “Kuv yuav muab lub teb chaws no rau koj cov xeeb leej xeeb ntxwv nyob,” tus HUAB TAIS ntawd yuav xa nws tus Tshiab mus ua koj ntej, ces koj yuav coj tau ib tug poj niam nyob ped los rau kuv tus tub.
8 Yog tus poj niam tsis kam nrog koj los, mas koj yuav tsis ua txhaum rau lo lus koj cog rau kuv no li, tab sis koj tsis txhob coj kuv tus tub rov mus nyob ped kiag li."
62 Lub caij ntawd His Xas Has rov tom lub qhov dej Las Hais Luas rov los, thiab nws nyob hauv lub teb chaws Nes Zes.
63 Muaj ib zaug thaum yav tsaus ntuj, nws tawm mus teev ntuj nraum cov nras teb, nws tsa muag ntsia pom ib co ntxhuav tab tom tuaj.
64 Les Npes Kas kuj tsa muag ntsia pom His Xas Has thiab. Nws nqes plhuav saum tus ntxhuav los rau hauv av.
65 Nws nug tus tub txib hais tias: "Tus txiv neej uas taug kev hauv cov nras teb tuaj tos peb ntawd yog leej twg?" Tus tub txib teb tias: "Yog kuv tus tswv." Ces Les Npes Kas muab nws txoj phuam los kauv zoj nws ntsej muag
66 Tus tub txib piav tas puas tsav yam txog txoj hauj lwm nws tau mus ua rau His Xas Has mloog.
67 Ces His Xas Has coj Les Npes Kas los nyob hauv nws lub tsev tsam phooj. Nws yuav Les Npes Kas ua nws poj niam. Nws nyiam Les Npes Kas thiab nws muaj kev nplig siab, ces nws tsis nco nws niam heev lawm.

NPN 106: 1b-2, 3-4a, 4b-5

Txais: (1b) Nej cav lus zoo ua Huab Tais tsaug vim nws siab zoo.

Nej cav lus zoo ua HUAB TAIS tsaug, vim nws siab zoo,
nws khuv leej neeg mus li ib txhiab ib txhis.
Leej twg yuav piav tau HUAB TAIS tej hauj lwm muaj hwj huam loj,
Los hais tau tas puas tsav yam lus cav txog nws?

Txais: (1b) Nej cav lus zoo ua Huab Tais tsaug vim nws siab zoo.

Cov tau hmoov zoo yog cov neeg tsom txoj kev ncaj taug,
Yog cov ua raws txoj kev haum pheej tas mus li.
HUAB TAIS, thov koj nco txog peb raws li koj hlub koj haiv neeg.

Txais: (1b) Nej cav lus zoo ua Huab Tais tsaug vim nws siab zoo.

Thov koj tuaj xyuas kuv tuaj pab cawm kuv,
Kom kuv tau pom koj cov xaiv txoj kev vam meej,
Kom kuv zoo siab nyob hauv koj haiv neeg txoj kev zoo siab,
Kom kuv tau koob meej nyob hauv koj lub cuab tam.

Txais: (1b) Nej cav lus zoo ua Huab Tais tsaug vim nws siab zoo.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: Tas nej sawv daws uas nej khwv
thiab ris nra hnyav, nej tuaj cuag kuv, mas kuv yuav cia nej so los siav.

Txais: As les lus yas, as les lus yas.

Ntawv Moo Zoo: MT 9: 9-13

9 Yes Xus tawm mus, thaum nws tab tom taug kev, nws pom ib tug neeg ua Mas Tais zaum ntawm lub rooj sau se. Yes Xus hais rau nws tias: "Koj raws kuv mus!" Ces tus neeg ntawd sawv tsees raws Yes Xus mus.
10 Thaum Yes Xus zaum noj mov hauv Mas Tais tsev, muaj ib co neeg sau se thiab ib co neeg txhaum coob coob tuaj nrog Yes Xus thiab nws cov thwj tim noj mov.
11 Cov Fas Lis Xais pom li ntawd, lawv hais rau cov thwj tim tias: "Vim li cas nej tus Xib Hwb nrog cov sau se thiab cov neeg txhaum noj mov?"
12 Yes Xus twb hnov lawm, nws thiaj hais tias: "Cov neeg noj qab nyob zoo tsis yog cov yuav vam txog kws kho mob, tiam sis cov neeg mob yog cov yuav vam txog.
13 Nej yuav kawm lo lus no lub ntsiab cia: 'Qhov kuv xav yuav yog txoj kev khuv leej, tsis yog thaj txi Ntuj.' Kuv tsis yog tuaj hu cov neeg ncaj, kuv tuaj hu cov neeg txhaum."

Tim     3     lub     7     Hli     2021

Thawj Hnub Xya Lis Piam Kaum Peb Nruab Xyoo B Nruab Lis Piam Xyoo I

Hmoov Hwm LN Tos Mas, tus Hauv Paus Xa Lus.
Lectionary: 593

Zaj Nyeem Ib:        EFX  2:   19-22

Cov kwv tij nkauj muad:
19 Nej tsis yog ib co pej kum neeg, los ib co qhua ntxiv lawm, nej nrog cov ntshiab ua pej xeem koom ib lub teb chaws thiab nej yog Tswv Ntuj tsev neeg,
20 uas yog ib lub tuam tsev txhim rau saum cov Hauv Paus Xa Lus thiab cov Yaj Saub ua lub taw ntsa, Yes Xus Pleev ua lub pob zeb txheem tas lub tsev.
21  Nyob hauv Leej Pleev tas lub tuam tsev sib tuav ruaj thiab hlob ua ib lub Tuam Tsev Ntshiab nyob hauv Huab Tais.
22 Nyob hauv Leej Pleev, nej sawv daws kuj puav leej ua ke raug muab tsa ua ib lub  tsev cia rau Tswv Ntuj nyob, nyob  hauv Leej Ntuj Plig.

NPN        117:   1BC, 2

Txais: (MK 16:15) Nej mus kom thoob qab ntuj, nej tshaj lub Moo Zoo rau lawv.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais: (MK 16:15) Nej mus kom thoob qab ntuj, nej tshaj lub Moo Zoo rau lawv.

HUAB TAIS txoj kev ua zoo rau peb nyob ruaj nreb,
nws ua ncaj rau peb mus ib txhiab ib txhis.

Txais: (MK 16:15) Nej mus kom thoob qab ntuj, nej tshaj lub Moo Zoo rau lawv.

As Les Lus Yas:        ZAM  20:   29

Txais: As les lus yas, as les lus yas.

Huab Tais hais tias: "Tos Mas, koj ntseeg vim koj tau pom kuv.
Cov uas tsis tau pom tab sis lawv ntseeg, mas lawv txoj hmoov zoo!"

Txais: As les lus yas, as les lus yas.

Ntawv Moo Zoo:       ZAM  20:   24-29

24 Tos Mas, tseem hu ua Dis Dws Mos thiab, yog ib tug hauv pab Kaum Ob; thaum Yes Xus yees tawm los, nws tsis nrog lawv nyob.
25 Ces lawv hais rau nws tias: "Peb pom Huab Tais lawm!" Tab sis Tos Mas hais rau lawv tias: "Yog kuv tsis pom cov qhov ntsia hlau nyob ntawm nws ob txhais tes, yog kuv tsis tau muab kuv tus ntiv tes ntxig rau cov qhov ntsia hlau ntawd, thiab yog kuv tsis tau muab kuv txhais tes ntxig ntawm nws phab tav, mas kuv tsis ntseeg li."
26 Yim hnub tom qab, cov thwj tim rov nyob ua ke hauv tsev dua, Tos Mas kuj nrog lawv nyob thiab. Cov qhov rooj puav leej xauv tas, Yes Xus cia li tshwm plaws los sawv hauv nruab nrab lawv, nws hais rau lawv tias: "Nej nyob kaj lug!"
27 Ces Yes Xus hais rau Tos Mas tias: "Cev koj ntiv tes rau ntawm no, koj ntsia kuv ob txhais tes saib; cev koj txhais tes los, muab ntxig rau hauv kuv phab tav. Koj txhob ua neeg tsis ntseeg ntxiv, koj ntseeg mog."
28 Tos Mas teb rau Yes Xus tias: "Kuv tus Huab Tais, kuv tus Tswv Ntuj."
29 Yes Xus hais rau Tos Mas tias: "Koj ntseeg vim koj tau pom kuv puas yog? Cov uas tsis tau pom tab sis lawv ntseeg, mas lawv txoj hmoov zoo."

Tim     5     lub     7     Hli     2021

Hnub Ob Lis Piam Kaum Plaub Nruab Xyoo B Nruab Lis Piam Xyoo I
Lectionary: 383

XHLT:  LN Elizabeth nyob Portugal; los LN Anthony Mary Zaccaria, ua Leej Choj

Zaj Nyeem Ib:   HP 28: 10-22a

10 Yas Kos sawv kev ntawm Npes Xas Npes mus, nws mus rau Has Laas teb.
11 Thaum nws mus txog ib qho chaw, hnub twb poob qho lawm, nws thiaj nrhiav chaw pw. Nws khaws ib lub pob zeb nyob ntawd los rau ncoo, ces nws pw tsaug zog nyob qhov chaw ntawd.
12 Nws ua ib zag npau suav: Nws pom ib tug ntaiv, tus taw txhos rau hauv ntiaj teb, lub ntsis mus nto saum ntuj, hos Tswv Ntuj ib co Tshiab nce thiab nqes mus mus los los ntawm tus ntaiv.
13 Ces Yas Kos pom HUAB TAIS sawv saum tus ntaiv thiab hais tias: "Kuv yog HUAB TAIS, kuv yog koj txiv Has Nplas Has tus Tswv Ntuj, thiab yog His Xas Has tus Tswv Ntuj. Thaj av uas koj tau los pw no, kuv yuav muab rau koj thiab rau koj tsoom xeeb leej xeeb ntxwv.
14 Koj tsoom xeeb leej xeeb ntxwv yuav coob npaum li cov hmoov av nyob saum npoo ntiaj teb. Nyob hauv lawv, koj yuav nyob puv ntia mus rau sab hnub tuaj sab hnub poob, mus rau sab qaum teb sab qab teb huv tib si. Tas txhua haiv neeg hauv ntiaj teb yuav tau txais txoj hmoov zoo vim koj thiab koj tsoom xeeb leej xeeb ntxwv.
15 Kuv yuav nrog koj nraim, thiab yuav saib xyuas koj nyob qhov txhia chaw uas koj yuav mus, thiab kuv yuav coj koj rov los nyob hauv lub teb chaws no. Kuv yuav tsis tso koj pov tseg mus txog thaum kuv tau ua raws li kuv tau cog lus rau koj tiav tas lawm."
16 Yas Kos tsim dheev nruab dab ntub los, nws hais tias: "HUAB TAIS nyob ntawm thaj chaw no tiag tiag, tiam sis kuv tsis paub li!"
17 Yas Kos ntshai, ces nws hais tias: "Thaj chaw no muaj hwj xyeej kawg nkaus! Yeej yog Tswv Ntuj lub tsev nyob thiab yog lub rooj ntug ntag!"
18 Tag kis, Yas Kos sawv ntxov ntxov los, nws muab lub pob zeb uas nws tau siv rau ncoo los teeb ua pej thuam, nws hliv roj ywg saum lub ntsis.
19 Nws tis npe rau thaj chaw ntawd hu ua Npes Thes. Hos yav tas los, mas lub nroog hu ua Lus Xaws no.
20 Yas Kos fiv yeem zoo li no: "Yog Tswv Ntuj nrog nraim kuv thiab saib xyuas kuv ntawm txoj kev uas kuv taug no, yog nws pub mov rau kuv noj, pub ris tsho rau kuv hnav,
21 yog kuv rov los txog kuv txiv tsev tsis raug xwv txheej dab tsi, mas HUAB TAIS yuav ua kuv tus Tswv Ntuj,
22 hos daim pob zeb uas kuv muab teeb ua pej thuam no yuav yog Tswv Ntuj qhov chaw nyob."

NPN   91: 1-2, 3-4a, 14-15ab

Txais: (2b) Kuv tus Tswv Ntuj, kuv tso siab lug rau koj.

Koj tus uas tsa tsev rau hauv tus Nyob Siab lub chaw nkaum,
Tus uas nraim hauv tus Muaj Hwj Huam tus duab ntxoov ntxoo,
Koj hais rau HUAB TAIS tias: "Koj yog kuv lub chaw nkaum,
thiab kuv lub yeej ntsa zeb, koj yog kuv tus Tswv Ntuj, tus kuv tso siab rau.”

Txais: (2b) Kuv tus Tswv Ntuj, kuv tso siab lug rau koj.

Nws yog tus npo koj dim ntawm cuab noog lub vas,
tus cawm koj ntawm tus mob aws tsis txuag siav.
Nws muab nws ob phab tis los vov koj.
Koj cia li khiav los nkaum hauv nws lub qab tis.

(2b) Kuv tus Tswv Ntuj, kuv tso siab lug rau koj.

Vim nws dai ruaj nreb rau kuv, mas kuv yuav cawm nws,
Kuv yuav muab nws txawb rau qhov chaw siab vim nws lees paub kuv lub npe.
Nws yuav hu txog kuv ces kuv yuav teb nws;
kuv yuav nrog nws nyob thaum nws raug txom nyem.

(2b) Kuv tus Tswv Ntuj, kuv tso siab lug rau koj.

As Les Lus Yas:   2 TMT 1: 10

Txais: As les lus yas, as les lus yas.

Yes Xus Pleev tus Cawm Peb tau rhuav txoj kev tuag pov tseg
thiab ua kom txoj sia tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo:   MT 9: 18-26

18 Thaum Yes Xus tseem tab tom hais lus rau lawv, muaj ib tug nom tuaj txog, nws txhos caug ntua ntawm Yes Xus, nws thov tias : "Kuv tus ntxhais txoj sia nyuam qhuav tu nrho. Thov koj tuaj tsa tes rau saum nws, ces nws yuav rov muaj txoj sia."
19 Yes Xus sawv, nws lawv tus nom qab mus; nws cov thwj tim kuj mus thiab.
20 Muaj ib tug poj niam tsob ntshav tau kaum ob xyoos lawm, nws txav los ze ntawm Yes Xus nraub qaum, nws kov Yes Xus lub tw tsho.
21 Vim nws xav hauv siab tias: ‘Tsuav yog kuv tau kov nws lub tsho xwb, mas kuv yuav zoo.’
22 Yes Xus tig ntsia, nws pom tus poj niam, ces nws hais rau tus poj niam tias: "Me ntxhais, koj tso siab mog ! Koj lub siab ntseeg cawm koj lawm." Txij ntawd los, tus poj niam cia li dim plaws ntawm tus mob lawm.
23 Thaum Yes Xus tuaj txog tus nom lub tsev, nws pom cov txiv tshuab raj thiab pom neeg coob coob ua ntxhov hnyo, Yes Xus hais tias:
24 "Nej tawm mus. Tus me ntxhais tsis tuag, nws tsaug zog xwb." Sawv daws luag Yes Xus.
25 Thaum lawv ntiab cov neeg tawm mus tas lawm, Yes Xus chaws mus hauv, nws tuav tus me ntxhais txhais tes, ces tus me ntxhais sawv tsees los.
26 Lub moo ntawd nrov mus thoob lub teb chaws ntawd.

Tim 6 lub 7 Hli 2021

Hnub Peb Lis Piam Kaum Plaub Nruab Xyoo B Nruab Lis Piam Xyoo I
Lectionary: 384

XHLT: LN Maria Goretti, ntxhais nkauj xwb tuag ua Tim Khawv

Zaj Nyeem Ib: HP 32: 23-33

23 Thaum hmo ntuj, Yas Kos sawv, nws coj nws ob tug poj niam, nws ob tug ntxhais txib, thiab nws kaum ib tug me nyuam, lawv hla tus dej Yas Npos ntawm qhov chaw ntiav zoo hla.
24 Nws coj lawv hla tus dej, thiab coj tas puas tsav yam uas nws muaj nrog lawv hla dej mus rau sab tid tas tib si.
25 Tshuav Yas Kos tib leeg nyob xwb; hmo ntawd, muaj ib tug txiv neej nrog Yas Kos sib ntsuas zog ib hmos kaj ntug plaws.
26 Nws pom tias nws kov tsis yeej Yas Kos, ces nws ntaus Yas Kos lub qij txha ntawm ntsag thaum nkawd tab tom sib ntsuas zog, ua rau lub qij txha ntawd qis kiag.
27 Nws hais rau Yas Kos tias: "Koj tso kuv, twb kaj ntug lawm." Tiam sis Yas Kos teb tias: "Yog koj tsis foom hmoov zoo rau kuv mas kuv tsis tso koj li."
28 Tus txiv neej ntawd nug tias: "Koj hu li cas?" Yas Kos teb tias: " Yas Kos."
29 Nws hais ntxiv tias: "Luag yuav tsis hu koj ua Yas Kos ntxiv lawm, luag yuav hu koj ua His Xas Lais, vim koj muaj zog tiv tau Tswv Ntuj thiab tiv tau neeg, thiab koj yeej lawm."
30 Yas Kos thov tias: "Thov koj qhia koj lub npe rau kuv." Tiam sis tus ntawd teb tias: "Vim li cas koj thiaj nug txog kuv lub npe?" Thaum ntawd kiag, nws foom hmoov zoo rau Yas Kos.
31 Yas Kos tis npe rau thaj chaw ntawd hu ua Pes Nus Es, nws hais tias: "Vim kuv tau pom Tswv Ntuj tim ntsej tim muag, tsis kav kuv txoj sia tseem nyob."
32 Thaum hnub tuaj, Yas Kos ncaim ntawm Pes Nws Es mus. Nws deeg pauv mus kev, vim nws lub ntsag qis lawm.
33 Yog vim li no, cov His Xas Lais thiaj caiv tsis noj cov leeg nqaij ntawm ntsag uas tuav lub pob qij txha ntawm ncej puab los txog niaj hnub no, vim Huab Tais ntaus Yas Kos lub qij txha ntawm cov leeg nqaij ntawm ntsag.

NPN 17: 1bcd, 2-3, 6-7ab, 8b+15

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

HUAB TAIS, thov koj mloog ib zag lus kom plaub ncaj ncees;
Koj cuab pob ntseg rau kuv lub suab quaj,
Koj tig ntsej los rau kuv lo lus thov vim kuv di ncauj tsis hais lus dag.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Thov cia koj ua tus txiav txim rau kuv,
Vim koj qhov muag thiaj pom qhov ncaj.
Txawm koj sim kuv siab, koj tuaj xyuas kuv thaum hmo ntuj;
koj sim kuv nyob hauv hluav taws,
tiam sis koj yuav tsis pom dab tsi phem nyob hauv kuv.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Tswv Ntuj, kuv hu txog koj, vim koj yeej yuav teb kuv;
thov koj tig pob ntseg los rau kuv, thiab mloog kuv lo lus.
Thov qhib koj txoj kev khuv leej txaus qhuas rau peb pom,
koj yog tus cawm cov uas khiav mus deb ntawm lawv cov yeeb ncuab.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Thov koj txuag kuv nyob hauv koj phab tis qhov ntxoov,
Kuv yeej yuav tau pom koj lub ntsej muag nyob hauv txoj kev ncaj.
Thaum kuv tsim dheev los, kuv yuav zoo siab hlo tau nyob ze ntawm koj.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

As Les Lus Yas: ZAM 10: 14

Txais: As les lus yas, as les lus yas.

Huab Tais hais tias: Kuv yog tus zoo tswv zov yaj,
kuv paub kuv cov yaj, kuv cov yaj paub kuv.

Txais: As les lus yas, as les lus yas.

Ntawv Moo Zoo: MT 9: 32-38

32 Luag coj ib tug neeg uas raug dab nplaig txhav tsis txawj hais lus tuaj cuag Yes Xus.
33 Yes Xus ntiab tus dab tawm, ces tus neeg nplaig txhav cia li hais tau lus. Tas tsoom sid qhuas kawg, lawv hais tias: "Tsis tau muaj dua tej yam zoo li no tshwm sim hauv haiv His Xas Lais ib zaug li."
34 Tab sis cov Fas Lis Xais hais tias: "Nws hu txog tus Tuam Thawj dab tuaj ntiab cov dab."
35 Yes Xus mus ncig txhua cov nroog thiab txhua cov zos huv si, nws qhia sawv daws nyob hauv lawv cov tsev txoos, nws tshaj lub Moo Zoo txog lub Ceeb Tsheej, thiab nws kho sawv daws tej txiab xeeb thiab tej mob nkeeg zoo tas huv si.
36 Yes Xus pom tsoom pej xeem, nws lub siab hlub lawv, vim lawv tsis muaj tus coj thiab lawv qaug zog zoo li ib co yaj tsis muaj tswv zov.
37 Yes Xus thiaj hais rau nws cov thwj tim tias: "Qoob loo ntau kawg, tab sis cov tub zog tsawg.
38 Nej thov tus Tswv qoob kom nws xa ib co tub zog tuaj sau nws cov qoob."

Tim 7 lub 7 Hli 2021

Hnub Plaub Lis Piam Kaum Plaub Nruab Xyoo B Nruab Lis Piam Xyoo I
Lectionary: 385

Zaj Nyeem Ib: HP 41: 55-57; 42: 5-7a, 17-24a

55 Thaum ntawd muaj kev tshaib plab nyob thoob Hais Nkws Tos teb, ces cov pej xeem tuaj quaj thov mov noj ntawm Fas Las Oos. Fas Las Oos hais rau cov neeg Hais Nkws Tos tias: "Nej mus cuag Yos Xes, nws hais dab tsi rau nej, mas nej ua li ntawd."
56 Vim tas teb chaws tshaib plab, ces Yos Xes qhib cov txhab nplej nyob qhov txhia chaw, thiab muag mov rau cov Hais Nkws Tos sawv daws, vim muaj kev tshaib plab loj nyob teb chaws Hais Nkws Tos.
57 Tas ntiaj teb sawv daws kuj tuaj Hais Nkws Tos teb tuaj muas nplej ntawm Yos Xes, vim tas ntiaj teb kuj tshaib plab loj thiab.
42: 5 Ces His Xas Lais cov tub thiaj tuaj mus muas nplej, lawv nrog sawv daws tuaj, vim nyob Kas Nas Has teb, muaj kev tshaib plab thiab.
6 Yos Xes yog tus tuav lub teb chaws, nws yog tus muag nplej rau sawv daws. Yos Xes cov tij laug tuaj txog, lawv khoov ti av pe Yos Xes.
7a Thaum Yos Xes pom nws cov tij laug, nws rov paub lawv, tab sis nws ua txuj coj li ib tug pej kum neeg thiab nws hais lus nchav nchav rau lawv.
17 Yos Xes muab lawv sawv daws kaw tau peb hnub hauv ib qho chaw.
18 Hnub peb, nws hais rau lawv tias: "Nej yuav ua li no, ces nej thiaj yuav cawm nej txoj sia, vim tias kuv yogi b tug neeg hwm Tswv Ntuj:
19 Yog nej tau hais qhov tseeb tiag, mas nej yuav tso nej ib tug kaw nyob hauv qhov chaw no, hos cov mas nej rov qab mus, nej yuav ris nplej mus rau nej tsev neeg noj.
20 Tiam sis nej yuav rov tuaj, nej coj nej tus kwv ntxawg tuaj rau kuv pom, thaum ntawd kuv paub tias nej hais tseeb lawm ces nej yuav tsis tuag." Ces lawv pom zoo ua raws li ntawd.
21 Tiam sis lawv rov sib hais lawv tias: "Muaj tseeb lawm tiag, yog peb them lub txim txhaum uas thaud peb ua rau peb tus kwv xwb. Peb twb pom nws txoj kev txom nyem siab, nws thov thov peb, los peb tsis mloog nws li. Vim li ntawd peb thiaj raug kev nyuaj siab li no."
22 Lus Npees thiaj teb lawv tias: "Kuv puas tau hais rau nej tias kom nej txhob ua phem rau tus me nyuam no? Los nej tsis xav mloog kuv hais, ces zaum no luag thiaj nug peb txog nws cov ntshav."
23 Lawv sib tham, lawv tsis paub tias Yos Xes to taub lawv xeem lus, vim muaj ib tug neeg nyob ntawd txhais lus rau Yos Xes.
24a Ces Yos Xes txav mus nraim lawv, nws quaj twj ywm.

NPN 33: 2-3, 10-11, 18-19

Txais: (22) Huab Tais, thov koj khuv leej peb vim peb tso siab rau koj.

Nej ntaus nkauj nog ncas ua HUAB TAIS tsaug.
Nej ntaus nkauj nog ncas kaum txoj hlua cav txog nws!
Nej hu ib zag nkauj tshiab rau nws,
nej ua tib zoo qoj cov hlua ncas nrog suab qw zoo siab.

Txais: (22) Huab Tais, thov koj khuv leej peb vim peb tso siab rau koj.

HUAB TAIS ua kom cov hauj lwm tsoom kuj cuab npaj mus tsis taus,
Nws ua kom cov haiv neeg zaj tswv yim tsheej xeeb tsis tau.
Tiam sis cov hauj lwm HUAB TAIS npaj yuav nyob mus li,
Zaj tswv yim nws lub siab xav tau yuav nyob txheej dhau txheej.

Txais: (22) Huab Tais, thov koj khuv leej peb vim peb tso siab rau koj.

Ntsia saib, HUAB TAIS lub qhov muag saib ntsoov cov neeg hwm nws,
saib ntsoov cov uas tso siab rau nws lub siab zoo;
tias nws yuav npo lawv dim ntawm kev tuag,
thiab yuav txuag lawv thaum muaj kev tshaib plab.

Txais: (22) Huab Tais, thov koj khuv leej peb vim peb tso siab rau koj.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej hloov siab, nej cia li ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: MT 10: 1-7

1 Yes Xus hu nws kaum ob leeg thwj tim los ntawm nws. Nws muab hwj huam kom lawv ntiab tau dab tawm, thiab kho tau txhua yam txiab xeeb thiab txhua yam mob nkeeg kom thim.
2 Kaum ob leeg Hauv Paus Xa Lus muaj npe li no :
3 thawj tug, yog Xis Moos uas sawv daws hu nws ua Pob Zeb, As Nres, Xis Moos tus kwv, Yas Kos, uas yog Ntxes Npes Dais tub, Zam, Yas Kos tus kwv, Fis Lis Pos, thiab Npas Tos Los Mas Yos, Tos Mas, thiab Mas Tais, tus sau se; Yas Kos, uas yog As Fas Yos tub, Thas Dais Yos ,
4 Xis Moos tus neeg Kas Nas Nias, thiab Yus Das Kas Lis Yaus, tus muab Yes Xus rau luag ntes.
5 Yes Xus xa kaum ob leeg no mus tshaj lub Moo Zoo, nws qhia lawv tias: “Nej tsis txhob mus cuag cov neeg teev dab, txhob mus hauv ib lub nroog Xas Mas Lias li.
6 Nej xub mus cuag cov yaj poob zoo hauv tsev neeg His Xas Lais tso.
7 Thaum nej taug kev, nej ceeb toom tias: “Lub Ceeb Tsheej saum ntuj tuaj txog ze ze lawm.”

Tim 8 lub 7 Hli 2021

Hnub Tsib Lis Piam Kaum Plaub Nruab Xyoo B Nruab Lis Piam Xyoo I
Lectionary: 386

Zaj Nyeem Ib: HP 44: 18-21, 23b-29; 45:1-5

18 Yus Das txav los ntawm Yos Xes, nws hais rau Yos Xes tias: "Yawg Hlob, koj tus tub txib thov koj pub nws hais ib lo lus tseeb thiab thov koj tsis txhob npau taws rau koj tus tub txib, vim koj yeej zoo cuag li yog Fas Las Oos lawm!
19 Yawg Hlob tau nug koj cov tub txib hais tias: 'Nej txiv puas tseem nyob thiab nej puas tseem muaj ib tug kwv?'
20 Peb tau teb Yawg Hlob hais tias: 'Peb tseem muaj peb txiv uas nws laus laus lawm thiab peb tshuav ib tug kwv ntxawg uas yug thaum peb txiv twb laus lawm. Nws tus tij laug tuag lawm, cov tub uas nws niam yug mas tshuav nws tib leeg xwb, mas peb txiv hlub nws kawg!'
21 Ces koj tau hais rau koj cov tub txib tias: 'Nej mus coj nws tuaj rau kuv, kom kuv pom nws.'
23b 'Yog nej tus kwv ntxawg tsis nrog nej tuaj mas kuv yuav tsis txais nej tuaj ntsib kuv ntxiv lawm.'
24 Ces thaum peb rov qab mus txog ntawm koj tus tub txib uas yog peb txiv, peb tau hais Yawg Hlob cov lus rau nws.
25 Thaum peb txiv rov hais rau peb tias: 'Nej rov qab mus muas me ntsis nplej dua.'
26 Peb tau teb nws tias : 'Peb mus tsis tau, yog peb tus kwv ntxawg nrog peb thiab mas peb thiaj mus tau, vim tus txiv neej ntawd tsuas txais peb, yog peb nrog peb tus kwv ntxawg xwb.'
27 Ces koj tus tub txib uas yog peb txiv tau hais rau peb tias: 'Nej twb paub lawm tias kuv poj niam tsuas yug ob tug me nyuam rau kuv xwb.
28 Ib tug ncaim kuv lawm, kuv tau hais tias: Ntshai nws raug muab dua ua daim tas lawm! ces kuv yeej tsis rov pom nws ib zaug ntxiv los txog tav no li.
29 Yog nej tseem coj tus no mus deb ntawm kuv, yog nws raug dab tsi phem, mas nej yuav ua kom kuv tu siab tuag, thiab ua kom kuv cov plaub hau dawb no mus nkag hauv qhov ntxa xwb.'”
45: 1 Ces Yos Xes nyiaj tsis taus ntxiv, nws nthe rau nws cov neeg tias: "Nej kom sawv daws tawm mus." Sawv daws tawm tas tib si, ces Yos Xes thiaj qhia nws rau nws cov kwv tij.
2 Tab sis nws quaj nrov nrov ces tas cov neeg Hais Nkws Tos hnov, ces lub moo ntawd thiaj nrov mus txog hauv Fas Las Oos tsev.
3 Yos Xes hais rau nws cov kwv tij tias: "Kuv yog Yos Xes! Kuv txiv puas tseem nyob?" Nws cov kwv tij teb tsis taus nws ib los li, vim lawv poob siab tag rau nws.
4 Nws hais rau nws cov kwv tij tias: "Nej txav los ze ze kuv mas!" Ces lawv txav los. Nws hais tias: "Kuv yog Yos Xes, nej tus kwv uas thaud nej muab muag rau Hais Nkws Tos teb lawm.
5 Tiam sis zaum no nej tsis txhob tu siab, nej tsis txhob khuv xim tias cas nej tau muag kuv rau ntawm no lawm. Twb yog Tswv Ntuj xa kuv ua nej ntej tuaj kom tau cawm neeg txoj sia xwb.”

NPN 105: 16-17, 18-19, 20-21

Txais: (5a) Nej cim ntsoov Huab Tais cov hwj huam nws tau ua tseg.

Thaum HUAB TAIS hu kom kev tshaib plab poob los rau saum lub teb chaws,
thiab ua kom tej qoob loo uas yug lawv txoj sia piam tas,
nws tso ib tug neeg mus ua lawv ntej,
yog Yos Xes, tus raug muag mus ua qhev.

Txais: (5a) Nej cim ntsoov Huab Tais cov hwj huam nws tau ua tseg.

Lawv muab khawb hlau khi nws ko taw
thiab muab saw hlau pav nws,
mus txog thaum muaj tuaj raws li nws tau ua saub hais tseg.
HUAB TAIS lo lus ua pov thawj tias nws yog tus hais lus tseeb. .

Txais: (5a) Nej cim ntsoov Huab Tais cov hwj huam nws tau ua tseg.

Tus vaj hu nws mus thiab tso nws tawm nkuaj,
tus tswj cov haiv neeg muab kev twj lij rau nws.
Tus vaj muab nws ua tus kav tus vaj lub vaj lub tsev
thiab tus tswj tas txhua yam uas yog tus vaj tug.

Txais: (5a) Nej cim ntsoov Huab Tais cov hwj huam nws tau ua tseg

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej hloov siab mog, thiab nej cia li ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: MT 10: 7-15

Yes Xus hais rau nws cov thwj tim tias:
7 “Thaum nej mus kev, nej ceeb toom tias lub Ceeb Tsheej saum ntuj tuaj txog ze lawm.
8 Nej kho cov mob kom zoo, nej tsa cov tuag kom sawv rov los, nej kho cov mob ruas kom huv tuaj, nej ntiab dab kom khiav mus. Nej tau txais dawb, nej yuav pub dawb rau luag.
9 Nej txhob muab kub, muab nyiaj, los muab txiaj toog qhwv rau hauv duav siv.
10 Txhob ris hnab taug kev, txhob nqa ob lub tsho, txhob nqa khau los nqa pas nrig li, vim tias tus tub zog tsim nyog txais nws pluas mov noj.”
11 “Nej mus hauv lub nroog los lub zos twg, nej nug kom tau ib tug neeg tsim nyog, nej nyob hauv nws tsev mus txog hnub nej rov qab.
12 Thaum nej chaws mus hauv luag tsev, nej foom kev thaj yeeb rau lub tsev ntawd.
13 Yog lub tsev ntawd tsim nyog txais, mas nej txoj kev thaj yee yuav nqes los nyob hauv lawv. Yog lub tsev ntawd tsis tsim nyog txais, ces nej txoj kev thaj yeeb yuav rov los roos nej.
14 Yog leej twg tsis txais nej, thiab tsis mloog nej cov lus, mas nej cia li tawm ntawm lub tsev ntawd los lub nroog ntawd mus thiab nej yuav nchos cov plua av lo nej ko taw pov tseg.
15 Kuv hais tseeb rau nej tias, txog Hnub Txiav Txim, teb chaws Xos Dos Mas thiab Nkos Mos Las yuav raug txim hnyav tsis cuag li lub nroog uas tsis txais nej ntawd.”

Tim 9 lub 7 Hli 2021

Hnub Rau Lis Piam Kaum Plaub Nruab Xyoo B Nruab Lis Piam Xyoo I
Lectionary: 387

XHLT: LN Augustine Zhao Rong, Leej Choj, thc. tuag ua Tim Khawv

Zaj Nyeem Ib: HP 46: 1-7, 28-30

1 His Xas Lais sau tas nrho nws lub cuab tam, nws sawv kev mus. Thaum nws mus txog Npes Xas Npes, nws muab ib co txim txi rau nws txiv His Xas Has tus Tswv Ntuj.
2 Nyob ntawd thaum hmo ntuj, Tswv Ntuj yees tawm los hu His Xas Lais tias: "Yas Kos! Yas Kos!" His Xas Lais teb tias: "Kuv nyob ntawm no!"
3 Tswv Ntuj rov hais tias: "Kuv yog Tswv Ntuj, yog koj txiv tus Tswv Ntuj. Koj tsis txhob ntshai mus nyob Hais Nkws Tos teb, vim nyob nrad, kuv yuav tsa koj ua ib haiv neeg loj.
4 Kuv yuav nrog koj mus nyob Hais Nkws Tos teb, thiab kuv yuav coj koj rov los nyob ntawm no, thaum Yos Xes kaw koj ob lub qhov muag lawm."
5 Ces Yas Kos sawv kev ntawm Npes Xas Npes mus. His Xas Lais cov tub muab lawv txiv Yas Kos thiab muab lawv cov poj niam me nyuam nce rau saum cov tsheb uas Fas Las Oos xa tuaj tos lawv txiv.
6 Lawv coj lawv cov tsiaj thiab lawv lub cuab tam uas lawv tsim tau nyob teb chaws Kas Nas Has huv tib si, ces lawv mus nyob Hais Nkws Tos teb; Yas Kos thiab tas nrho nws cov tub ki xeeb leej xeeb ntxwv nrog nws mus.
7 Nws cov tub, thiab nws cov tub cov tub, nws cov ntxhais thiab nws cov tub cov ntxhais, thiab tas nrho nws cov xeeb leej xeeb ntxwv huv tib si, nws coj nrog nws mus nyob Hais Nkws Tos teb.
28 His Xas Lais xa Yus Das ua ntej mus hais rau Yos Xes kom Yos Xes tuaj tos nws nyob xeev Nkaus Ses. Ces lawv tuaj txog Nkaus Ses teb.
29 Yos Xes kom lawv npaj nws lub tsheb, ces nws caij tsheb tuaj tos nws txiv His Xas Lais nyob Nkaus Ses. Thaum nws pom nws txiv, nws puag nkaus nws txiv caj dab, ces nws quaj ntev loo puag rawv nws txiv.
30 His Xas Lais hais rau Yos Xes tias: "Zaum no, kuv tuag los tau lawm, vim kuv tau pom koj lub ntsej muag lawm, thiab kuv paub tias koj tseem muaj txoj sia nyob.”

NPN 37: 3-4, 18-19, 27-28, 39-40

Txais: (39a) Txoj kev cawm tus neeg ncaj tuaj ntawm Huab Tais tuaj.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws
thiab yuav tau noj tau haus tsis muaj kev txhawj.
Nej zoo siab nyob hauv HUAB TAIS mog,
ces nws yuav pub rau nej raws nej lub siab ntshaw.

Txais: (39a) Txoj kev cawm tus neeg ncaj tuaj ntawm Huab Tais tuaj.

HUAB TAIS saib ntsoov cov neeg siab ncaj lub neej,
lawv lub cuab tam yuav nyob mus li.
Lub caij txom nyem, lawv yuav tsis poob ntsej muag,
lub caij muaj kev tshaib plab, lawv yuav tau noj tsau.

Txais: (39a) Txoj kev cawm tus neeg ncaj tuaj ntawm Huab Tais tuaj.

Nej tso txoj kev phem tseg mus ua qhov zoo mog,
nej yuav nyob ruaj nreb hauv qhov zoo mus li.
Vim HUAB TAIS nyiam txoj kev ncaj,
nws tsis tso cov neeg ntseeg nws pov tseg.

Txais: (39a) Txoj kev cawm tus neeg ncaj tuaj ntawm Huab Tais tuaj.

Txoj kev cawm tus neeg ncaj tuaj ntawm HUAB TAIS tuaj,
nws yog lawv lub chaw vam khom thaum lawv ntsib kev nyuaj.
HUAB TAIS pab lawv thiab cawm lawv dim,
nws tso lawv dim ntawm tus phem thiab cawm lawv,
vim lawv tuaj vam khom txog nws.

Txais: (39a) Txoj kev cawm tus neeg ncaj tuaj ntawm Huab Tais tuaj.

As Les Lus Yas: ZAM 16: 13a, 14:26d

Txais: As les lus yas, as les lus yas.

Thaum Leej Tswv Yim muaj qhov tseeb tuaj,
nws yuav coj nej kom mus txog txhua yam tseeb
thiab yuav ua kom nej rov nco txog txhua yam kuv hais rau nej lawm.

Txais: As les lus yas, as les lus yas.

Ntawv Moo Zoo: MT 10: 16-23

Yes Xus hais rau nws cov thwj tim tias:
16 “Kuv xa nej xws li ib co yaj mus nyob hauv nruab nrab ib co hma. Mas nej yuav ua neeg ntse xws li nab, thiab ua neeg siab ncaj xws li nquab.
17 Tiam sis nej yuav ceev faj txog tej tib neeg , vim lawv yuav mus kom nej rau cov rooj txwj laus txiav txim, lawv yuav muab nej nplawm hauv lawv cov tsev txoos.
18 Lawv yuav cab nej mus rau cov nom tswv thiab cov vaj ntxwv vim kuv, kom nej tau ua tim khawv txog kuv nyob ntawm cov nom tswv thiab cov teev pej kum dab xub ntiag.
19 Thaum luag ntes nej mus rau lawv, mas nej tsis txhob txhawj tias yuav hais li cas thiab yuav teb dab tsi. Lub sij hawm ntawd, yuav muaj tus muab cov lus teb rau nej hais.
20 Li ntawd, tsis yog nej yuav hais lus, yog nej Txiv Leej Tswv Yim yuav hais lus nyob hauv nej.
21 Kwv tij yuav muab nws tus kwv tij rau luag tua, leej txiv yuav muab nws tus me nyuam rau luag. Tej me nyuam yuav sawv tiv niam thiab txiv, thiab yuav muab nkawd rau luag tua.
22 Sawv daws yuav ntxub nej vim kuv lub npe. Tab sis, tus twg ua siab ntev nyiaj kom txog qhov kawg, mas nws yuav txais kev cawm.
23 Yog luag caum nej ntes hauv lub nroog no, mas nej kav tsij khiav mus rau lwm lub. Kuv hais tseeb rau nej tias, thaum Neeg Leej Tub los txog, mas nej tseem khiav tsis tau txhua cov nroog hauv His Xas Lais teb.”

Tim 10 lub 7 Hli 2021

Hnub Xya Lis Piam Kaum Plaub Nruab Xyoo B Nruab Lis Piam Xyoo I
Lectionary: 388

Zaj Nyeem Ib: HP 49: 29-32; 50: 15-26a

29 Yas Kos ceeb toom rau nws cov tub tias: "Txog caij kuv yuav rov mus cuag kuv cov yawg koob lawm. Nej yuav muab kuv coj mus los nrog kuv cov phaj txiv nyob hauv lub qhov tsua hauv Es Plhoos tus neeg His Tis daim teb.
30 Yog lub qhov tsua nyob hauv daim teb Mas Pes Las, nyob ntsia ntsoov mus rau Mas Nples, hauv teb chaws Kas Nas Has, uas Has Nplas Has tau muas ntawm tus His Tis hu ua Es Plhoos los ua toj ntxas.
31 Has Nplas Has thiab nws poj niam Xas Las nkawd ob lub ntxa nyob ntawd, His Xas Has thiab Les Npes Kas nkawd kuj nyob ntawd. Kuv kuj muab Les As faus rau ntawd lawm thiab.
32 Yog daim teb nrog lub qhov tsua nyob hauv uas thaud lawv muas ntawm Hes Thes cov tub los."
50: 15 Thaum Yos Xes cov tij laug pom tias lawv txiv tuag lawm, ces lawv hais tias: "Tsam Yos Xes tseem muaj kev chim rau peb, ces nws yuav ua phem rau peb pauj qhov peb tau ua rau nws ne?"
16 Ua li mas, lawv xa lus mus rau Yos Xes tias: “Ua ntej koj txiv yuav tuag nws tau hais li no cia:
17 'Nej yuav hais rau Yos Xes tias: Kuv thov koj zam txhaum rau koj cov tij laug, koj zam lawv qhov ua phem thiab lawv qhov txhaum rau lawv vim lawv tau ua tsis zoo rau koj lawm.’ Zaum no peb kuj thov koj zam txhaum rau koj txiv tus Tswv Ntuj cov tub txib thiab." Yos Xes kua muag poob nthav thaum lawv hais cov lus no rau nws.
18 Nws cov tij laug kuj tuaj ntsib nws kiag, lawv txhos caug ntawm nws ko taw pe nws tias: "Thov koj yuav peb ua koj cov tub txib."
19 Tiam sis Yos Xes teb rau lawv tias: "Nej tsis txhob ntshai! Kuv puas yuav txeeb Tswv Ntuj qhov chaw?
20 Qhov phem nej tau ua rau kuv, mas Tswv Ntuj muab hloov ua ib qho zoo lawm, ces thiaj muaj tuaj raws li niaj hnub no, vim nws xav cawm ntau haiv neeg txoj sia.
21 Nyem no nej tsis txhob ntshai kiag li, kuv yog tus yuav yug nej kev noj kev haus thiab yug nej tej me tub me nyuam." Yos Xes nplij lawv thiab hais lus mos lus zoo rau lawv.
22 Ces Yos Xes thiab nws txiv tsev neeg thiaj nyob ruaj rau Hais Nkws Tos teb. Yos Xes nyob tau ib puas kaum xyoo.
23 Nws tau pom nws cov xeeb ntxwv, uas yog Es Fais cov tub mus txog peb tiam. Nws kuj tau pom Mas Kis uas yog Mas Nas Xes tus tub cov tub yug los rau Yos Xes puag tib si.
24 Thaum kawg, Yos Xes hais rau nws cov kwv tij tias: "Txog kuv lub caij tuag lawm, Tswv Ntuj yuav tuaj xyuas nej thiab yuav coj nej nce rov qab mus nyob hauv lub teb chaws uas nws tau cog lus muab rau Has Nplas Has, His Xas Has thiab Yas Kos."
25 Ces Yos Xes kom His Xas Lais cov tub cog lus li no: "Thaum Tswv Ntuj tuaj coj nej mus, mas nej yuav tsum thauj kuv cov pob txha ntawm no nrog nej mus."
26a Thaum Yos Xes tuag, nws muaj ib puas kaum xyoo.

NPN 105: 1-2, 3-4, 6-7

Txais: (NPN 69:33) Cov neeg me, nej cia li zoo siab mas, thov kom nej lub siab zoo hlo!

Nej ua HUAB TAIS tsaug, nej hu txog nws lub npe,
nej qhia nws cov hauj lwm loj rau cov haiv neeg paub.
Nej seev nkauj rau HUAB TAIS, nej hu nkauj cav txog nws ;
nej tshaj txog nws cov hwj huam loj tas huv si.

Txais: (NPN 69:33) Cov neeg me, nej cia li zoo sia mas, thov kom nej lub siab zoo hlo!

Nej nrhiav koob meej rau nej nyob hauv nws lub npe,
cov uas muaj lub siab nrhiav Huab Tais, nej cia li zoo siab!
Nej nrhiav HUAB TAIS nyob hauv nws lub zog,
nej nrhiav tsob hwb nws tsis tseg.

Txais: (NPN 69:33) Cov neeg me, nej cia li zoo siab mas, thov kom nej lub siab zoo hlo!

Has Nplas Has tsoom xeeb ntxwv, nej yog Huab Tais cov tub txib,
Yas Kos cov tub, nej yog cov Huab Tais tau xaiv.
HUAB TAIS nws yog peb tus Tswv Ntuj,
Nws tej cai tswj tas qhov txhia chaw hauv lub ntiaj teb.

Txais: (NPN 69:33) Cov neeg me, nej cia li zoo siab mas, thov kom nej lub siab zoo hlo!

As Les Lus Yas: 1 PZ 4: 14

Txais: As les lus yas, as les lus yas.

Yog nej raug luag cem vim Leej Pleev lub npe, mas nej txoj hmoov zoo,
vim Tswv Ntuj Leej Tswv Yim tuaj so nyob saum nej.

Txais: As les lus yas, as les lus yas.

Ntawv Moo Zoo: MT 10: 24-33

Yes Xus hais rau nws cov thwj tim tias:
24 "Tus thwj tim tsis loj dua nws tus xib hwb, tus tub txib kuj tsis loj dua nws tus tswv.
25 Tus thwj tim yuav txaus siab heev yog nws yoog tau raws li nws tus xib hwb lawm. Tus tub txib kuj yuav txaus siab heev yog nws zoo caum tau nws tus tswv lawm. Yog lawv twb hu tus tswv tsev ua Npes Ntxes Npus, mas lawv haj yam yuav hu cov neeg hauv nws tsev neeg li ntawd!
26 Li ntawd nej txhob ntshai lawv! Vim tsis muaj ib yam npog rawv uas yuav tsis qhib tawm, tsis muaj ib yam zais ntshis uas yuav tsis tawm los rau sawv daws paub.
27 Tej yam uas kuv hais rau nej hauv qhov tsaus ntuj, nej yuav hais tawm thaum nruab hnub nrig. Hos yam nej hnov ntxhi rau hauv nej pob ntseg, mas nej yuav nce mus nyob saum tej ru tsev tshaj tawm.
28 Nej txhob ntshai cov neeg tua tau nej lub cev, tab sis lawv tua tsis tau nej tus plig. Nej yuav tsum ntshai tus muaj peev xwm rhuav tau nej tus plig thiab nej lub cev huv si nyob hauv lub pas hluav taws.
29 Ob tug noog tsig txhuv tsuas muab muag tau ib npib xwb los tsis yog? Tsis kav, tsis muaj ib tug poob hauv av tau, yog nej Txiv tsis tso lus.
30 Nej kuj ib yam, tab yog nej cov plaub hau, nej Txiv yeej suav tas huv si lawm.
31 Li ntawd, nej tsis txhob ntshai dab tsi, nej muaj nqis tshaj tej pab tsig txhuv coob coob ua ke.
32 Leej twg lees paub kuv rau sawv daws, mas kuv kuj yuav lees paub nws rau kuv Txiv nyob saum Ntuj.
33 Hos tus tsis lees paub kuv rau sawv daws, mas kuv kuj yuav tsis lees paub nws rau kuv Txiv nyob saum ntuj thiab.”

Tim 12 lub 7 Hli 2021

Hnub Ob Lis Piam Kaum Tsib Nruab Xyoo B Nruab Lis Piam Xyoo I
Lectionary: 389

Zaj NYeem Ib: KT 1: 8-14, 22

8 Muaj ib tug vaj tshiab sawv los kav Hais Nkws Tos teb, nws tsis paub dab tsi txog Yos Xes li.
9 Nws hais rau nws cov neeg tias: "Cov neeg His Xas Lais coob dhau thiab muaj zog tshaj peb lawm.
10 Peb yuav tsum nrhiav ib zag tswv yim los yuam kom lawv tsis txhob huam vam ntxiv. Yog tsis ua li ntawd mas ntshai tsam thaum muaj tsov rog tuaj, lawv mus nrog cov yeeb ncuab koom siab tig ua rog rau peb, ces lawv yuav tawm hauv lub teb chaws no mus."
11 Ces lawv tsa ib cov thawj saib hauj lwm yuam cov His Xas Lais kom ua hauj lwm hnyav hnyav raws li lawv txib; cov His xas Lais thiaj yuav tsum txhim tsa ob lub nroog muaj tej txhab ntim qoob loo rau Fas Las Oos, yog ob lub nroog Pis Toos thiab Las Mas Xes.
12 Tab sis cov His Xas Lais yim raug txom nyem, lawv yim huam vam coob ntxiv xwb, lawv mus nyob puv qhov txhia chaw. Ces cov Hais Nkws Tos ntshai cov His Xas Lais.
13 Lawv muab cov His Xas Lais yuam ua qhev nruj nruj,
14 mas lawv lub neej txom nyem kawg, vim lawv ua hauj lwm hnyav hnyav xwb: lawv do av, puab thwv cib, thiab lawv ua ntau yam hauj lwm hnyav nyob nruab liaj nruab teb. Luag yuam lawv nruj nruj kom lawv ua txhua tsav txhua yam.
22 Ces Fas Las Oos ceeb toom li no rau nws cov neeg tias: "Cov His Xas Lais yug tau pes tsawg leej tub, mas nej muab pov rau hauv tus niam dej kom tas, hos cov ntxhais mas, nej mam cia nyob."

NPN 124: 1b-3, 4-6, 7-8

Txais: (8a) Peb txoj kev pab yog nyob hauv Huab Tais lub npe.

Yog HUAB TAIS tsis txhob tuaj peb tog ,
Kom His Xais Lais yuav tsum hais tias:
yog HUAB TAIS tsis txhob tuaj peb tog,
thaum cov neeg sawv tuaj ntaus peb,
mas lawv yeej yuav muab peb nqos ciaj lawm,
vim lawv npau taws rau peb cuag hluav taws kub.

Txais: (8a) Peb txoj kev pab yog nyob hauv Huab Tais lub npe.

Ntshai dej twb los nyab peb tas, tus dej twb phwj tuaj ntsawj peb mus tas;
Dej sab siv twb huam tuaj vov peb tas.
Peb kav tsij cav lus zoo txog HUAB TAIS,
Vim nws tsis tau pub kom peb raug lawv xuas hniav xo peb !

Txais: (8a) Peb txoj kev pab yog nyob hauv Huab Tais lub npe.

Peb zoo puav tam li noog dim ntawm tus cuab ntxiab lub vas ;
lub vas ntuag rhe, peb dim plaws lawm.
Peb qhov chaw vam khom yog nyob hauv HUAB TAIS lub npe,
Nws uas yog tus tsim lub ntuj lub teb.

Txais: (8a) Peb txoj kev pab yog nyob hauv Huab Tais lub npe.

As Les Lus Yas: MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo: MT 10: 34—11:1

Yes Xus hais rau nws cov thwj tim tias:
34 "Nej txhob xav tias kuv tuaj yog coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj.
35 Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj.
36 Ua li mas yus cov yeeb ncuab yog cov neeg nyob hauv yus tsev.
37 "Tus nyiam nws niam nws txiv dua kuv, mas nws tsis tsim nyog nrog kuv. Tus nyiam nws tej tub tej ntxhais dua kuv, mas nws tsis tsim nyog nrog kuv.
38 Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv.
39 Tus nrhiav nws txoj sia, nws yuav ua nws txoj sia ploj, hos tus ua nws txoj sia ploj vim kuv, mas nws yuav nrhiav tau nws txoj sia.
40 "Tus txais nej, mas yog nws txais kuv. Tus txais kuv, mas yog nws txais Tus xa kuv tuaj.
41 Tus txais ib tug yaj saub, vim tus ntawd yog yaj saub, mas nws yuav txais koob haum phim tus yaj saub. Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj.
42 Yog leej twg pub txawm ib khob dej txiag xwb los xij rau ib tug neeg me li cov no haus, vim tus ntawd yog ib tug thwj tim, mas kuv hais tseeb rau nej tias, nws yeej yuav tsum tau txais nws qhov koob haum."
11: 1 Thaum Yes Xus qhia nws kaum ob leeg thwj tim tas lawm, nws tso qhov chaw ntawd tseg, nws mus qhuab qhia thiab tshaj lub Moo Zoo rau hauv lawv cov nroog.

Tim 13 lub 7 Hli 2021

Hnub Peb Lis Piam Kaum Tsib Nruab Xyoo B Nruab Lis Piam Xyoo I
Lectionary: 390

XHLT: LN Henry

Zaj Nyeem Ib: KT 2: 1-15a

1 Muaj ib tug txiv neej yog Les Vis xeeb ntxwv mus yuav ib tug ntxhais kuj yog Les Vis xeeb ntxwv thiab, los ua txij nkawm.
2 Tus poj niam yug tau ib tug tub. Nws pom tias nws tus tub zoo nraug kawg, nws muab tus tub zais tau peb lub hlis.
3 Thaum nws zais tsis tau ntxiv lawm, nws npaj ib lub tawb xuas ncaug fiab, nws muab roj hmab dub thiab muab ciab ntoo leem zoo zoo rau. Nws tso tus me nyuam rau hauv lub tawb, nws coj mus tso rau hauv ib koog tauj deg ntawm tus ntug niam dej.
4 Tus me nyuam tus muam hlob nyob tsis deb ntawd saib saib yuav muaj dab tsi tshwm sim rau tus me nyuam.
5 Thaum ntawd Fas Las Oos tus ntxhais nqes tuaj da dej hauv tus niam dej, nws cov ntxhais txib ncig ua si ntawm ntug dej. Tus ntxhais pom lub tawb ntab ntab hauv cov tauj deg, nws kom ib tug ntxhais txib mus muab los.
6 Nws muab qhib xyuas ces nws pom tus me nyuam, yog ib tug tub quaj quaj nyob hauv. Nws hlub tus me nyuam, nws hais tias: "Yog ib tug me nyuam tub Hes Nplaws."
7 Tus me nyuam tus muam tawm los hais rau Fas Las Oos tus ntxhais tias: "Koj puas xav kom kuv mus nrhiav ib tug poj niam Hes Nplaws tuaj pab koj pub mis rau tus me nyuam noj?"
8 Fas Las Oos tus ntxhais teb tias: "Koj mus nrhiav tuaj." Tus me ntxhais thiaj mus nrhiav tus me nyuam leej niam tuaj.
9 Fas Las Oos tus ntxhais hais tias: "Koj coj tus me nyuam no mus tu rau kuv, kuv yuav muab nqi zog rau koj." Ces tus poj niam coj tus me nyuam mus tu lawm.
10 Thaum tus me nyuam loj lawm, nws coj tus me nyuam rov tuaj rau Fas Las Oos tus ntxhais. Fas Las Oos tus ntxhais muab tus me nyuam los ua nws tus tub. Nws tis npe rau hu ua Mais Xes, nws hais tias: "Vim kuv tau npo nws hauv dej los."
11 Thaum Mais Xes loj tiav txiv lawm, muaj ib zaug, nws mus xyuas nws haiv neeg. Nws pom tej hauj lwm hnyav hnyav uas luag yuam lawv ua. Nws kuj pom ib tug Hais Nkws Tos tab tom muab nws ib tug kwv tij Hes Nplaws ntaus.
12 Nws ntsia ib ncig tsis pom muaj leej twg, nws txawm muab tus Hais Nkws Tos tua, thiab muab zais rau hauv cov suab puam.
13 Hnub tom qab, nws rov mus dua, nws pom ob tug neeg Hes Nplaws tab tom sib ntaus. Nws hais rau tus xub thab tias: "Tim li cas koj ntaus koj tus npawg?"
14 Tus ntawd teb tias: "Leej twg tsa koj ua txwj laus txiav txim rau wb? Koj puas xav muab kuv tua xws li koj tua tus Hais Nkws Tos thiab?" Ces Mais Xes ntshai, nws xav tau tias: "Ntshai sawv daws paub tas lawm."
15 Ces Fas Las Oos kuj hnov hais txog qhov ntawd, nws nrhiav Mais Xes tua. Mais Xes thiaj khiav mus deb ntawm Fas Las Oos, nws khiav mus nyob Mas Dias teb.

NPN 69: 3, 14, 30-31, 33-34

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

Kuv mus zom rau hauv lub hav iav muaj av nkos tob tob,
tsis muaj dab tsi ruaj rau kuv tsuj tiag taw.
Kuv tog rau hauv cov dej tob,
dej ceev ntsawj tuaj kuv kov tsis yeej.

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

Ntawm kuv mas, HUAB TAIS, kuv teev ntuj thov txog koj
kom koj ua siab zoo rau kuv, Tswv Ntuj.
Koj muaj lub siab hlub loj tas nrho, thov koj teb kuv,
thov koj tuaj pab kuv tas mus li.

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

Kuv poob rau txoj kev txom nyem thiab kev tu siab lawm,
Tswv Ntuj, thov kom koj txoj kev cawm txuag kuv cia.
Kuv yuav hu ib zag nkauj cav txog Tswv Ntuj lub npe,
thiab kuv yuav cav txog nws lub koob meej los ua nws tsaug.

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

Cov neeg me, nej yuav pom thiab yuav zoo siab;
Nej cov uas nrhiav Tswv Ntuj, thov kom nej lub siab rov ciaj sia.
Vim HUAB TAIS mloog cov pluag lub suab thov;
nws tsis ntxub nws cov neeg uas raug luag yuam.

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

As Les Lus yas: NPN 95: 8

Txais: As les lus yas, as les lus yas.

Yog hnub no nej hnov nws lub suab,
Tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: MT 11: 20-24

20 Yes Xus pib cem cov nroog uas tau pom nws ua hwj huam yees ntxwv ntau tshaj, tab sis lawv tsis hloov siab li.
21 “Kos Las Xis, koj txoj hmoov phem! Npes Xais Das, koj txoj hmoov phem! Vim tias, cov hwj huam yees ntxwv uas kuv tau ua nyob hauv neb, kheev lam yog ua nyob Tws Los thiab nyob Xis Doos, mas ob lub nroog ntawd twb npua ntaub tsaj thiab muab hmoov tshauv nphoo nkawd puag ntxov lawm, thiab nkawd twb hloov siab tas lawm.
22 Kuv hais meej rau neb tias, txog hnub txiav txim mas Tws Los thiab Xis Doos yuav raug txim sib dua neb.
23 Thiab koj, Kas Fas Naus, koj xav tias koj yuav sawv siab txij ntuj no puas yog? Koj yuav nqes lawm puag hauv tub tuag teb mog. Vim tias cov hwj huam yees ntxwv kuv tau ua nyob hauv koj, kheev lam yog ua nyob Xos Dos Mas, mas lub nroog ntawd twb tseem yuav nyob txog tav no.
24 Kuv hais meej rau koj, txog hnub txiav txim mas thaj av Xos Dos Mas yuav raug txim sib dua koj."

Tim 14 lub 7 Hli 2021

Hnub Plaub Lis Piam Kaum Tsib Nruab Xyoo B Nruab Lis Piam Xyoo I
Lectionary: 391

Yuav Tsum Hwm LN Kateri Tekakwitha

Zaj Nyeem Ib: KT 3: 1-6, 9-12

1 Mais Xes niaj hnub mus zov nws yawm txiv Zes Raus pab yaj; Zes Raus yog ib tug leej choj Mas Dias. Mais Xes coj cov yaj mus noj zaub dhau lub hav suab puam, ces nws mus txog Hos Les, uas yog Tswv Ntuj lub roob.
2 Nyob ntawd HUAB TAIS tus Tshiab yees tawm los rau Mais Xes pom nyob hauv ib co nplaim taws cig cig hauv ib tsob me nyuam ntoo. Mais Xes ntsia ntsoov pom tsob me nyuam ntoo ntawd yeej cig ntsa iab tab sis ua cas tsis txawj kub hnyiab li.
3 Ces Mais Xes hais tias: "Kuv yuav tsum lug kev mus xyuas yam loj uas pom tau ntawd saib yog vim dab tsi, ua cas tsob me nyuam ntoo tsis txawj kuh hnyiab li."
4 HUAB TAIS pom nws lug kev tuaj xyuas, ces Tswv Ntuj hu nws hauv tsob me nyuam ntoo tuaj tias: "Mais Xes, Mais Xes." Mais Xes teb tias: "Kuv nyob ntawm no."
5 Tswv Ntuj hais tias: "Koj txhob txav los ze ntawm no, hle koj nkawm khau ntawm koj ko taw, vim thaj chaw uas koj tsuj no yog ib thaj chaw ntshiab."
6 Tswv Ntuj hais ntxiv tias: "Kuv yog koj cov yawg koob tus Tswv Ntuj, yog Has Nplas Has tus Tswv Ntuj, yog His Xas Has tus Tswv Ntuj, thiab yog Yas Kos tus Tswv Ntuj." Ces Mais Xes thaiv nws lub ntsej muag, vim nws ntshai ntsia Tswv Ntuj.
9 “Nyem no, cov His Xas Lais lub suab quaj nrov tuaj txog kuv lawm; thiab kuv kuj pom txoj kev quab yuam uas cov Hais Nkws Tos siv los quab yuam lawv.
10 Li ntawd, nyem no koj mus mog, kuv xa koj mus cuag Fas Las Oos thiab mus coj kuv haiv neeg uas yog His Xas Lais cov tub tawm hauv Hais Nkws Tos teb los."
11 Mais Xes hais rau Tswv Ntuj tias: "Kuv yog leej twg, kuv thiaj yuav mus cuag tau Fas Las Oos, thiab coj tau His Xas Lais cov tub tawm hauv Hais Nkws Tos teb los?"
12 Tswv Ntuj hais tias: "Kuv yuav nrog nraim koj; lub cim ntawm no yuav qhia rau koj kom koj paub tseeb tias yog kuv xa koj mus: Thaum koj coj haiv His Xas Lais tawm hauv Hais Nkws Tos teb los lawm, mas nej yuav tsob hwb Tswv Ntuj nyob saum lub roob no "

NPN 103: 1B-2, 3-4, 6-7

Txais: (8a) Huab Tais lub siab zoo thiab khuv leej neeg.

Kuv tus ntsuj plig, koj cav txog HUAB TAIS;
kuv tej siab ntsws, nej cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej kev zoo ib qho li.

Txais: (8a) Huab Tais lub siab zoo thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob nkeeg kom zoo hlo.
Nws tau cawm koj txoj sia ntawm kev puas ntsoog,
nws tau muab nws txoj kev ua siab zoo thiab kev khuv leej rau koj ntoo.

Txais: (8a) Huab Tais lub siab zoo thiab khuv leej neeg.

HUAB TAIS muab kev ncaj rau cov raug luag tsuj, nws tsa lawv cai.
Nws qhia nws tej kev rau Mais Xes paub,
thiabqhia nws cov hauj lwm rau tsoom His Xas Lais paub.

Txais: (8a) Huab Tais lub siab zoo thiab khuv leej neeg.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MT 11: 25-27

25 Lub caij ntawd, Yes Xus hais tias: "Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov neeg me paub.
26 Muaj tseeb, Txiv, koj lub siab yeej nyiam li ntawd.
27 Kuv Txiv muab tas ib puas tsav yam rau kuv. Tsis muaj leej twg paub Leej Tub, tsuas kawg Leej Txiv thiaj paub xwb. Kuj tsis muaj leej twg paub Leej Txiv, tsuas kawg Leej Tub thiaj paub xwb, thiab tus uas Leej Tub pom zoo qhia rau kom paub xwb.”

Tim 15 lub 7 Hli 2021

Hnub Tsib Lis Piam Kaum Tsib Nruab Xyoo B Nruab Lis Piam Xyoo I
Lectionary: 392

Yuav tsum hwm LN Bonaventure, Tswv Qhia thiab Kws cov Txuj Ntshiab

Zaj Nyeem Ib: KT 3: 13-20

13 Mais Xes hnov HUAB TAIS lub suab hais lus hauv tsob me nyuam ntoo tuaj, nws hais rau Tswv Ntuj tias: "Thaum kuv mus cuag cov His Xas Lais, thiab kuv hais rau lawv tias: 'Nej cov yawg koob tus Tswv Ntuj xa kuv tuaj pab nej,' yog lawv nug kuv tias: 'Nws lub npe hu li cas?' kuv yuav hais li cas rau lawv?”
14 Tswv Ntuj hais rau Mais Xes tias: "Kuv yog tus Kuv Yog." Tswv Ntuj hais ntxiv tias: "Koj yuav hais rau cov His Xas Lais li no: ‘Tus Kuv Yog xa kuv tuaj pab nej."
15 Tswv Ntuj tseem hais ntxiv rau Mais Xes tias: "Koj yuav hais li no rau cov His Xas Lais: ‘HUAB TAIS, uas yog nej cov yawg koob tus Tswv Ntuj, yog Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj xa kuv tuaj pab nej.’ Lub npe no yog kuv lub npe mus li ib txhis, thiab yog lub npe ua kom neeg nco txog kuv mus txheej dhau txheej.
16 Koj mus, koj hu cov txwj laus His Xas Lais tuaj sib sau ua ke, koj hais rau lawv tias: 'HUAB TAIS uas yog nej cov yawg koob tus Tswv Ntuj, yog Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj, tau yees tawm los rau kuv pom xyeem, nws hais rau kuv tias: ‘Kuv tau tuaj xyuas nej, thiab tau pom txhua yam uas luag ua rau nej nyob Hais Nkws Tos teb lawm.
17 Ces kuv tau hais tias kuv yuav coj nej tawm hauv txoj kev txom nyem nyob Hais Nkws Tos teb los mus nyob hauv cov neeg Kas Nas Has, thiab cov His Tis, thiab cov As Mos Lis, thiab cov Pes Lis Xis, thiab cov His Vis thiab cov Yes Npus Xis daim av, yog ib daig av uas muaj mis nyuj thiab zib mu ntws lug.’
18 Lawv yuav mloog koj cov lus. Ces koj thiab cov txwj laus His Xas Lais nej yuav mus cuag tus vaj Hais Nkws Tos, nej yuav hais rau nws tias: 'HUAB TAIS uas yog cov Hes Nplaws tus Tswv Ntuj tuaj xyuas peb lawm. Thov koj tso lus rau peb mus deb li peb hnub ke lawm hauv teb chaws suab puam, peb yuav mus txi peb tus HUAB TAIS Tswv Ntuj.'
19 Kuv paub zoo tias tus vaj Hais Nkws Tos yuav tsis tso nej mus yooj yim, yuav tsum muaj ib txhais tes muaj hwj huam yuam nws xwb, nws thiaj tso.
20 Vim li ntawd, kuv yuav tsa kuv txhais tes thiab yuav ua ntau yam hwj huam nyob Hais Nkws Tos teb los tiv lub teb chaws, ces thaum kawg, tus vaj yuav tso nej mus.”

NPN 105: 1+5, 8-9, 24-25, 26-27

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

Nej cav lus zoo ua HUAB TAIS tsaug, nej hu txog nws lub npe,
nej qhia nws cov hauj lwm rau txhua haiv neeg paub.
Nej nco ntsoov txog cov hwj huam loj nws tau ua,
Nco ntsoov nws cov hauj lwm txaus qhuas,
thiab cov lus txiav txim tawm ntawm nws lub ncauj los.

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

Nws nco ntsoov mus li txog cov lus nws cog cia,
yog ib co lus nws cog ruaj rau txhiab tiam neeg.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

Nws ua kom nws haiv neeg huam vam coob tuaj ntau,
Thiab muaj zog dua haiv neeg uas ntxub lawv.
Nws ntxeev cov ntawd lub siab kom lawv ntxub nws haiv neeg,
thiab ua siab phem lim hiam rau nws cov tub txib.

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

HUAB TAIS xa nws tus tub txib Mais Xes
thiab As Loos uas nws tau xaiv mus.
Nkawd ua Huab Tais cov cim muaj hwj xyeej nyob hauv lawv,
thiab ua hwj huam yees ntxwv nyob hauv Has lub teb chaws

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: Tas nej sawv daws uas nej khwv
thiab ris nra hnyav, nej tuaj cuag kuv, kuv yuav cia nej so los siav.

Txais: As les lus yas, as les lus yas.

Ntawv Moo Zoo: MT 11: 28-30

Yes Xus hais tias:
28 "Tas nej sawv daws uas nej khwv thiab ris nra hnyav, nej tuaj cuag kuv mog! Kuv yuav cia nej so los siav.
29 Nej txais kuv tus quab mus kwv. Nej kawm ntawm kuv, vim kuv ua neeg me thiab tsis muab hlob; nej tus plig yuav nrhiav tau chaw so los siav.
30 Vim kuv tus quab kwv yooj yim, thiab kuv lub nra sib kha.”

Tim     16     lub     7     Hli     2021

Hnub Rau Liam Kaum Tsib Nruab Xyoo B Nruab Lis Piam Xyoo I
Lectionary: 393

XHLT: Niam Mab Liab saum Roob Kas Mes

Zaj Nyeem Ib:    KT 11: 10—12: 14

11: 10 Mais Xes thiab As Loos nkawd ua ib cov hwj huam yees ntxwv loj nyob ntawm Fas Las Oos xub ntiag, tiam sis Huab Tais ua kom Fas Las Oos lub siab tawv qhawv, ces Fas Las Oos tsis kam tso cov His Xas Lais tawm ntawm nws lub teb chaws mus.
12: 1 HUAB TAIS hais rau Mais Xes thiab As Loos nyob Hais Nkws Tos teb tias:
2 "Lub hlis no nej yuav muab suav ua thawj lub hlis hauv nej txoj kev xam nyoog, yuav yog lub ib hlis pib lub xyoo rau nej.
3 Neb hais rau ib tsoom His Xas Lais tias: Lub hlis no xiab kaum, mas cov txiv tsev nyias yuav tsum npaj nyias ib tug tsiaj me rau nyias tsev neeg, thiab txhua lub tsev nyias yuav tsum npaj nyias ib tug.
4 Yog yim neeg twg tsawg dhau rau ib tug tsiaj me, mas lawv yuav mus nrog lwm yim neeg uas nyob ze lawv thiab yuav suav cov neeg kom coob txaus koom noj ib tug tsiaj me.
5 Yuav tsum yog ib tug txiv tsis muaj chaw xyeej, hnub nyoog ib xyoos; Nej xaiv ib tug thav yaj los tau ib tug thav tshis los tau.
6 Nej yuav muab tso rau ib qho tos txog hnub xiab kaum plaub lub hlis no; hmo ntawd, tas tsoom His Xas Lais tuaj sib txoos ua ke, ces lawv yuav tua lawv cov tsiaj thaum tsaus ntuj
7 Lawv yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag hauv lub tsev uas lawv noj tus tsiaj ntawd.
8 Hmo ntawd, lawv yuav noj tus tsiaj cov nqaij txhiab hauv hluav taws, lawv  yuav noj ntxuag ib co ncuav mov tsis xyaw poov xab, thiab ib cov txuj lom iab.
9 Lawv yuav tsis txhob noj nyoos los hau li, tiam sis yuav  muab ci kheej nrog lub taub hau, cov tes taw thiab plab hnyuv huv si.
10 Nej tsis txhob tseg ib qho seem rau tag kis li; yog tag kis seem dab tsi, mas nej muab pov hlawv hauv hluav taws kom tas.
11 Nej yuav noj tus tsiaj ntawd zoo li no: Nej sia siv khov kho, nej rau khau thiab tuav nej rab pas nrig ntawm tes huv si, nej yuav noj tsuag tsuag noj nrawm nroos, vim yog HUAB TAIS hmo hla.
12 Hmo ntawd, kuv yuav hla mus thoob Hais Nkws Tos teb, kuv yuav ntaus cov tub hlob nyob Hais Nkws Tos teb huv si kom ntog tas, tsis hais neeg los tsiaj li. Thiab kuv yuav txiav txim rau cov dab Hais Nkws Tos; kuv yog HUAB TAIS.
13 Cov ntshav yuav yog ib lub cim qhia tias nej nyob hauv cov tsev ntawd. Kuv pom cov ntshav, kuv yuav hla dhau plaws mus, ces nej yuav tsis raug qhov xwv txheej loj thaum kuv tuaj ntaus Hais Nkws Tos teb.
14 Hnub ntawd yuav yog ib hnub hmoov tsuj xeeb rau nej, nej yuav muab qee ua ib hnub cav txog HUAB TAIS mus txheej dhau txheej tiam dhau tiam; yuav yog ib txog cai nyob mus li rau nej coj kom tau cav txog HUAB Tais.

NPN    116: 12-13, 15+16bc, 17-18

Txais: (13) Kuv yuav cev lub ntim cawm neeg,thiab yuav hu txog HUAB TAIS lub npe.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
thiab yuav hu txog HUAB TAIS lub npe.

Txais: (13) Kuv yuav cev lub ntim cawm neeg,thiab yuav hu txog HUAB TAIS lub npe.

HUAB TAIS saib cov ntseeg txog nws
Lawv txoj kev tuag muaj nqes loj.
Kuv yog koj tus tub txib, yog koj tus ntxhais txib tus tub;
Koj tau daws cov hlua khi kuv lawm.

Txais: (13) Kuv yuav cev lub ntim cawm neeg,thiab yuav hu txog HUAB TAIS lub npe.

Kuv yuav cev ib co txim los ua koj tsaug,
thiab kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag,

Txais: (13) Kuv yuav cev lub ntim cawm neeg,thiav yuav hu txog HUAB TAIS lub npe.

As Les Lus Yas:    ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub kuv cov yaj, lawv raws li nraim kuv mus.

Txais: As les lus yas, as les lus yas.

Ntawv Moo Zoo:    MT 12: 1-8

1 Muaj ib hnub Xas Npas Tos, Yes Xus mus hla hauv ib co teb npleg. Cov thwj tim tshaib plab, ces lawv pib de tej hnab nplej los noj.
2 Cov Fas Lis Xais pom li ntawd, lawv hais rau Yes Xus tias: "Saib, koj cov thwj tim ua tej yam txwv tsis pub ua hnub Xas Npas Tos!"
3 Yes Xus hais rau lawv tias: "Nej tsis tau nyeem txog qhov Das Vis ua thaum Das Vis thiab nws cov neeg tshaib plab lod,
4 tias lawv tau chaws mus hauv Tswv Ntuj lub tsev, thiab lawv tau noj cov ncuav mov txi Ntuj, uas Das Vis thiab nws cov neeg noj tsis nyog, kawg yog cov leej choj xwb thiaj noj tau lod?
5 Los nej puas tau nyeem hauv Txoj Cai tias, hnub Xas Npas Tos, cov leej choj uas nyob hauv lub Tuam Tsev Teev Ntuj tsis caiv hnub Xas Npas Tos, los lawv tsis txhaum?
6 Kuv hais rau nej tias: Nyob ntawm no, muaj ib yam loj dua lub Tuam Tsev Teev Ntuj.
7 Lo Lus hais tias : ‘Qhov kuv xav tau yog txoj kev khuv leej tsis yog thaj txi Ntuj,’ yog nej paub lo lus no lub ntsiab, mas nej yuav tsis muab txim rau cov neeg tsis txhaum ntawd.
8 Vim tias, Neeg Leej Tub yog tus tswv kav hnub Xas Npas Tos."