COV ZAJ NYEEM NRUAB LIS PIAM XYOO B 2020-2021

Tim 17 lub 7 Hli 2021

Hnub Xya Lis Piam Kaum Tsib Nruab Xyoo B Nruab Lis Piam Xyoo I
Lectionary: 394

Zaj Nyeem Ib: KT 12: 37-42

37 Cov His Xas Lais sawv kev ntawm Las Maws Xes mus rau Xws Kos, lawv muaj ze ntawm rau pua txhiab leej txiv neej mus ko taw, tsis suav cov me nyuam yaus li.
38 Ib pab neeg coob coob muaj ntau hom neeg sib xyaws daws kuj nrog lawv mus thiab. Tseem muaj lawv cov tsiaj loj thiab tsiaj me coob coob nrog lawv thiab.
39 Lawv muab cov hmoov nplej uas tau do tsis xyaw poov xab uas lawv nqa Hais Nkws Tos teb los ci ua tej lub ncuav tsis su noj, vim luag ntiab kom lawv tawm hauv Hais Nkws Tos teb sai sai, ces lawv tsis muaj sij hawm tos ntxiv thiab ntim tsis tau txhiam xws rau lawv li.
40 Cov His Xas Lais nyob Hais Nkws Tos teb tau plaub puas peb caug xyoo nkaus.
41 Hnub uas puv plaub puas peb caug xyoo kiag ntawd, HUAB TAIS tsoom tub ki tawm hauv Hais Nkws Tos teb mus.
42 Hmo ntawd HUAB TAIS tau zov hmo saib xyuas tsoom His Xas Lais, nws ua kom lawv tawm ntawm Hais Nkws Tos teb los; yog ib hmos uas tas tsoom tub ki His Xas Lais yuav nyob zov hmo cav txog HUAB TAIS txheej dhau txheej tiam dhau tiam.

NPN 136: 1+23-24, 10-12, 13-15

Txais: (1b) Nws txoj kev khuv leej yuav nyob tas ib txhiab ib txhis.
los: As les lus yas.

Nej cav lus zoo ua HUAB TAIS tsaug, vim nws siab zoo,
Vim nws txoj kev khuv leej yuav nyob tas ib txhiab ib txhis
Thaum peb poob qis, nws nco txog peb,
vim nws txoj kev khuv leej yuav nyob tas ib txhiab ib txhis.
nws cawm peb dim ntawm oeb cov yeeb ncuab,
vim nws txoj kev khuv leej yuav nyob tas ib txhiab ib txhis.

Txais: Nws txoj kev khuv leej yuav nyob tas ib txhiab ib txhis.
los: As les lus yas.

Nws ntaus cov Hais Nkws Tos nyob hauv lawv cov tub hlob,
Vim nws txoj kev khuv leej yuav nyob tas ib txhiab ib txhis.
Nws coj cov His Xas Lais tawm hauv lawv mus,
Vim nws txoj kev khuv leej yuav nyob tas ib txhiab ib txhis.
Nws siv nws txhais tes muaj zog thiab nws xyab nws sab npab pab lawv,
Vim nws txoj kev khuv leej yuav nyob tas ib txhiab ib txhis.

Txais: Vim nws txoj kev khuv leej yuav nyob tas ib txhiab ib txhis
los: As les lus yas.

Nws phua dej ntuj Lisb ua ob sab,
Vim nws txoj kev khuv leej yuav nyob tas ib txhiab ib txhis.
Nws coj His Xas Lais hla hauv nruab nrab,
Vim nws txoj kev khuv leej yuav nyob tas ib txhiab ib txhis.
Nws ua kom Fas Las Oos thiab nws tsoom tub rog tog rau hauv dej,
Vim nws txoj kev khuv leej yuav nyob tas ib txhiab ib txhis.

Txais: Vim nws txoj kev khuv leej yuav nyob tas ib txhiab ib txhis.
los: As les lus yas.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib haum xeeb nyob hauv Leej Pleev
Thiab nws muab txoj kev tshaj lub moo zoo txog kev sib haum xeeb cob rau peb ua.

Txais: As les lus yas, as les lus yas.

Ntawv Moo Zoo: MT 12: 14-21

14 Cov Fas Lis Xais tawm mus sab laj nrhiav saib yuav muab Yes Xus tua zoo li cas.
15 Yes Xus paub qhov lawv xav ua, ces nws tawm ntawm qhov chaw ntawd mus. Muaj neeg coob coob raws nws, ces nws kho lawv sawv daws zoo tas huv si.
16 Tiam sis nws txwv tsis pub lawv qhia nws rau leej twg paub li.
17 Ua li mas muaj tuaj raws li Yaj Saub His Xais tau hais tseg tias :
18 “Nej ntsia, tus Tub Txib uas kuv tau xaiv. Nws yog tus kuv nyiam tus kuv zoo siab nyob hauv nws.
Kuv yuav tso kuv lub Tswv Yim rau saum nws. Nws yuav tshaj Txoj Kev Ncaj rau tsoom kuj cuab.
19 Nws yuav tsis cav, tsis nthe nrov, tsis muaj leej twg hnov nws lub suab tom tej tshav puam.
20 Tus tauj ntsws, nws tsis muab lov, tus teeb xeeb cig qauj les, nws tsis muab tshuab.
Nws yuav ua li ntawd mus txog hnub nws coj Txoj Kev Ncaj mus txais kev yeej.
21 Tsoom kuj cuab yuav tso siab lug nyo hauv nws lub npe.”

Tim     19     lub     7     Hli     2021

Hnub Ob Lis Piam Kaum Rau Nruab Xyoo B Nruab Lis Piam Xyoo I
Lectionary: 395

Zaj NYeem Ib:   KT 14: 5-18

5 Thaum lawv hais rau tus vaj Hais Nkws Tos tias cov His Xas Lais twb khiav tas lawm, mas Fas Las Oos thiab nws cov tub txib hloov siab, lawv hais tias: "Peb ua dab tsi li ntawd? Peb tso cov His Xas Lais mus ces yuav tsis muaj neeg ua hauj lwm rau peb lawm."
6 Ces Fas Las Oos npaj nws lub tsheb rog nees thiab sau nws cov tub rog tuaj ua ke.
7 Nws coj rau pua lub tsheb rog nees, uas yog cov zoo tshaj, thiab tas cov tsheb rog nees nyob Hais Nkws Tos teb; lub tsheb twg kuj muaj tub rog nyob hauv.
8 HUAB TAIS ua kom Fas Las Oos, tus vaj Hais Nkws Tos, lub siab tawv qhawv tuaj, ces nws sawv kev mus caum cov His Xas Lais uas lawv tau tab meeg tawm hauv lub teb chaws mus, nrog kev tau ntsej muag.
9 Cov Hais Nkws Tos mus caum tau cov His Xas Lais ntawm ntug dej hiav txwv, uas lawv tseem tsa tsev tsam phooj so nyob ntawd; Fas Las Oos cov nees, cov tsheb rog, cov tsav tsheb thiab cov tub rog tuaj txog, yog ze ntawm Pis Has His Los, nyob ncaj ntawm Npas Xes Foos.
10 Thaum Fas Las Oos tuaj txog ze lawm, cov His Xas Lais ntsia pom cov Hais Nkws Tos tuaj caum lawv, cov His Xas Lais ntshai kawg, lawv quaj hu HUAB TAIS.
11 Thiab lawv hais rau Mais Xes tias: "Puas yog vim nyob Hais Nkws Tos teb tsis muaj qhov ntxa rau peb, koj thiaj li coj peb los tuag rau hauv teb chaws suab puam no? Koj coj peb tawm Hais Nkws Tos teb los ua dab tsi?
12 Thaum nyob Hais Nkws Tos teb, peb tsis tau hais rau koj lod? tias: ‘Cia peb nyob peb, cia peb ua cov Hais Nkws Tos qhev twj ywm.’ Yog peb nyob ua lawv qhev twj ywm yuav zoo dua tuaj tuag nyob teb chaws suab puam no."
13 Mais Xes hais rau lawv tias: "Nej tsis txhob ntshai mas! Nej nyob ruaj nreb ces nej yuav pom HUAB TAIS cov hwj huam loj uas nws yuav ua pab nej hnub no, vim cov Hais Nkws Tos uas nej pom hnub no, nej yuav tsis pom ib zaug ntxiv lawm.
14 HUAB TAIS yuav ntaus rog thaiv nej, hos nej, mas nej tsuas nyob twj ywm xwb."
15 HUAB TAIS hais rau Mais Xes tias: "Vim li cas nej thiaj hu txog kuv? Koj hais rau cov His Xas Lais kom lawv rov sawv kev mus ntxiv.
16 Koj yuav tsa koj rab pas thiab xyab koj txhais tes rau saum dej hiav txwv, koj yuav faib dej ua ob sab, kom tsoom His Xas Lais tau taug kev qhuav qhawv hla mus.
17 Kuv yuav ua kom cov Hais Nkws Tos lub siab tawv qhawv, ces lawv yuav caum cov His Xas Lais qab mus thiab, ces kuv yuav nto koob meej vim Fas Las Oos thiab nws cov tub rog, nws cov tsheb rog thiab nws cov tsav tsheb.
18 Cov Hais Nkws Tos thiaj yuav paub tias kuv yog HUAB TAIS, thaum kuv tau koob meej vim Fas Las Oos thiab nws cov tsheb rog thiab nws cov tsav tsheb lawm."

NPN:    KT 15: 1bc-2, 3-4, 5-6

Txais: (1b) Peb cav txog Huab Tais vim nws tau ua kom nws nto koob meej lawm.

Kuv hu nkauj cav txog HUAB TAIS, vim nws muaj kev yeej nto koob meej loj,
nws tau muab tus nees thiab lub tsheb nees pov rau hauv hiav txwv.
HUAB TAIS yog kuv lub zog, thiab kuv lub peev xwm, nws tau cawm kuv dim.
Nws yog kuv tus Tswv Ntuj, kuv cav txog nws,
nws yog kuv txiv tus Tswv Ntuj, kuv qhuas txog nws

Txais: (1b) Peb cav txog Huab Tais vim nws tau ua kom nws nto koob meej lawm.

HUAB TAIS yog ib tug tseem tub rog, nws lub npe yog HUAB TAIS.
Nws muab Fas Las Oos cov tsheb rog thiab cov tub rog pov rau hauv hiav txwv.
Nws cov thawj tub rog tseem ceeb raug Dej Hiav Txwv Liab muab npog nkaus tas tib si.

Txais: (1b) Peb cav txog Huab Tais vim nws tau ua kom nws nto koob meej lawm.

Cov dej nphau los nyab lawv tas,
Lawv tog rau hauv qab thu xws li tej lub pob zeb.
Huab Tais, koj sab tes xis muaj hwj huam loj tas nrho,
Huab Tais, koj sab tes xis ua kom yeeb ncuab puas nstoog tas.

Txais: (1b) Peb cav txog Huab Tais vim nws tau ua kom nws nto koob meej lawm.

As Les Lus yas:    NPN 95: 8

Txais: As les lus yas, as les lus yas.

Hnub no, yog nej hnov nws lub suab,
Txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo:    MT 12: 38-42

38 Ib co Kws Ntawv Ntshiab thiab ib co Fas Lis Xais hais rau Yes Xus tias: "Xib Hwb, peb xav kom koj ua ib lub cim rau peb pom."
39 Yes Xus teb rau lawv hais tias: "Tiam neeg phem thiab fav xeeb lawv taij ib lub cim, tab sis yuav tsis muaj ib lub cim rau lawv pom, lub cim lawv yuav pom kawg yog Yaj Saub Yos Nas lub cim xwb.
40 Raws nkaus li Yos Nas tau nyob peb hnub peb hmos hauv tus vaj ntses lub plab, Neeg Leej Tub kuj yuav nyob hauv plawv av peb hnub peb hmos thiab.
41 Thaum txog Hnub Txiav Txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim thaum Yos Nas ntuas lawv, lawv hloov siab. Hos nyob ntawm no twb muaj loj dua Yos Nas!
42 Thaum txog Hnub Txiav Txim, tus poj vaj nyob Qab Teb kuj yuav nrog phaj neeg no sawv rov los, nws yuav muab txim rau lawv, vim nws tuaj tim npoo ntiaj teb kawg tuaj mloog Xas Los Moos cov lus thoob tsib. Hos nyob ntawm no, twb muaj loj dua Xas Los Moos!”

Tim 20 lub 7 Hli 2021

Hnub Peb Lis Piam Kaum Rau Nruab xyoo B Nruab lis piam Xyoo I
Lectionary: 396

XHLT: LN Apollinaris, Tswv Qhia tuag ua Tim Khawv

Zaj Nyeem Ib: Kev Tsiv 14: 21—15:1

21 Mais Xes tsa tes rau saum dej hiav txwv, ces HUAB TAIS ua cua hlob hlob ntsawj toob fab tuaj thawb cov dej ib hmos, ces qab thu dej tawm los, hos dej faib ua ob sab.
22 Cov His Xas Lais nkag mus hauv hiav txwv, lawv tsuj av qhuav mus, nyob ntawm lawv sab xis thiab sab laug muaj ob lub phab ntsa dej.
23 Cov Hais Nkws Tos caum lawv qab: Fas Las Oos cov nees, cov tsheb rog thiab cov tsav tsheb nkag mus hauv dej ntuj caum cov His Xas Lais.
24 Thaum yav yuav kaj ntug, HUAB TAIS nyob saum tus ncej huab hluav taws, nws ntsia mus rau cov Hais Nkws Tos, ces cov Hais Nkws Tos tau ntshai kawg.
25 Nws ua kom lawv cov log tsheb daig thiab ntog qeeb qeeb. Ces cov Hais Nkws Tos qw tias: "Peb khiav mus deb ntawm cov His Xas Lais vim HUAB TAIS pab lawv tawm tsam ntaus cov Hais Nkws Tos!"
26 HUAB TAIS hais rau Mais Xes tias: "Koj tsa tes rau saum dej hiav txwv, kom cov dej ntws rov los nyab cov Hais Nkws Tos thiab lawv cov tsheb rog thiab cov tsav tsheb tib si."
27 Mais Xes thiaj tsa tes rau saum dej hiav txwv, ces thaum pib kaj ntug, dej ntws rov los nyob li qub. Cov Hais Nkws Tos tig khiav rov qab rau hauv hiav txwv, ces HUAB TAIS ua kom lawv tog zom zaws rau hauv dej hiav txwv.
28 Cov dej nphau nphwv rov los nyob qhov qub, los npog tas cov tsheb thiab cov tsav tsheb hauv cov tub rog Hais Nkws Tos uas tau nkag mus hauv qab thu dej caum cov His Xas Lais, tsis dim ib tug li.
29 Hos cov His Xas Lais tau taug kev qhuav nyob hauv plawv dej hiav txwv, cov dej ua ob sab phab ntsa nyob ntawm lawv sab xis thiab sab laug.
30 Hnub ntawd, HUAB TAIS cawm cov His Xas Lais dim ntawm cov Hais Nkws Tos txhais tes. Cov His Xas Lais pom cov Hais Nkws Tos tuag pawg lug ntawm ntug dej hiav txwv.
31 Thiab lawv pom HUAB TAIS lub hwj huam loj uas nws siv los tiv yeej cov Hais Nkws Tos, ces tsoom pej xeem sawv daws hwm HUAB TAIS, thiab lawv ntseeg HUAB TAIS thiab ntseeg nws tus tub txib Mais Xes.
15: 1 Ces Mais Xes thiab tsoom His Xas Lais hu nkauj rau HUAB TAIS li no: "Kuv hu nkauj rau HUAB TAIS, vim nws muaj yeej thiab nws muaj koob meej, nws tau muab tus nees thiab lub tsheb nees pov rau hauv hiav txwv.”

NPN: KT 15: 8-9, 10+12, 17

Txais: (1b) Peb cia li hu nkauj cav txog HUAB TAIS; nws tau ua kom nws nto koob meej lug.

Koj tshuab ib pas ntawm koj qhov ntswg, dej cia li sawv tsees,
dej sawv ntseg ntsees zoo puav tam li ib lub roob.
Cov dej ntws lug cia li khov twj ywm nyob hauv qab thu tob hauv plawv hiav txwv.
Yeeb ncuab khav tias: "Kuv yuav caum lawv, kuv yeej caum cuag xwb,
kuv yuav faib lawv lub cuab tam, yuav tau txais raws li kuv lub siab ntshaw.
Kuv yuav rho hlo kuv rab ntaj, kuv txhais tes yuav ua kom lawv puas ntsoog.”

Txais: (1b) Peb cia li hu nkauj cav txog HUAB TAIS; nws tau ua kom nws nto koob meej lug.

Koj tshuab ib pas ntawm koj qhov ncauj, dej rov hlo los npog nkaus lawv,
lawv tog ntsuag qees xws li ib co qe hlau nyob hauv cov dej nphau nphwv.
Koj xyab koj txhais tes xis, av nrib pleb nqos lawv tas.

Txais: (1b) Peb cia li hu nkauj cav txog HUAB TAIS; nws tau ua kom nws nto koob meej lug.

HUAB TAIS, koj yuav coj koj haiv neeg mus,
koj yuav muab lawv cog rau saum lub roob uas yog koj li,
thaj chaw uas muaj koj lub rooj zaum,
qhov chaw mtshiab uas yog koj ob txhais tes npaj cia.

Txais: (1b) Peb cia li hu nkauj cav txog HUAB TAIS; nws tau ua kom nws nto koob meej lug.

As Les Lus Yas: Zam 14: 23

Txais: As Les Lus Yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav los nyob hauv nws.

Txais: As Les Lus Yas.

Ntawv Moo Zoo: MT 12: 46-50

46 Yes Xus tseem tab tom hais lus rau tej pab neeg,
ces Yes Xus niam thiab nws cov kwv tij tuaj sawv nraum zoov, lawv xav nrog nws tham.
47 Muaj ib tug neeg hais rau Yes Xus tias:
“Koj niam thiab koj cov kwv tij tuaj nyob nraud, lawv xav nrog koj tham.”
48 Yes Xus teb rau tus neeg tuaj qhia rau nws tias:
“Leej twg yog kuv niam? Thiab leej twg yog kuv cov kwv tij?"
49 Yes Xus taw tes rau nws cov thwj tim, nws hais tias:
"Kuv niam thiab kuv cov kwv tij yog cov ntawm no.
50 Vim tias tus twg ua raws kuv Txiv nyob saum ntuj lub siab,
Mas tus ntawd yog kuv kwv tij, kuv nkauj muam, thiab kuv niam."

Tim     21     lub     7     Hli     2021

Hnub Plaub Lis Piam Kaum Rau Nruab Xyoo B Nruab Lis Piam Xyoo I
Lectionary: 397

XHLT:  LN Lawrence nyob Brindisi, ua Leej Choj thiab Kws cov Txuj Ntshiab

Zaj Nyeem Ib:    KT 16: 1-5, 9-15

1 Tas soom His Xas Lais sawv kev ntawm Es Lis mus, lawv mus nkag rau lub hav suab puam Xees, nyob nruab nrab ntawm Es Lis thiab lub roob Xis Nais, yog hnub tim kaum tsib, lub hli ob txij hnub lawv tawm Hais Nkws Tos teb los lawm.
2 Tas tsoom His Xas Lais cem cem yws yws Mais Xes thiab As Loos nkawd nyob hauv teb chaws suab puam.
3 Cov His Xas Lais hais rau nkawd tias: "Kheev lam HUAB TAIS txhais tes tua kom peb tuag tas nyob Hais Nkws Tos teb, thaum peb zaum ncig tej lauj kaub nqaij thiab peb muaj mov noj tsau plab npo mas! Neb coj peb los nyob hauv lub hav suab puam no yog coj kom peb sawv daws los tuag tshaib tas xwb!"
4 Ces HUAB TAIS hais rau Mais Xes tias: "Kuv yuav ua kom mov poob saum ntuj los rau nej noj. Cov neeg yuav niaj tag kis tawm mus khaws kom txaus rau lawv noj hnub ntawd xwb. Kuv xav sim lawv li ntawd, kuv thiaj yuav paub tias lawv puas mloog kuv cov lus los tsis mloog.
5 Hnub rau, thaum lawv mus khaws cov mov lawv yuav npaj nqa los tsev, mas cov mov ntawd yuav tsum ntau npaum li cov lawv niaj hnub khaws ob npaug."
9 Mais Xes hais rau As Loos tias: "Koj hais rau tas tsoom His Xas Lais tias: ‘Nej cia li txav los ze ntawm HUAB TAIS xub ntiag, vim nws tau hnov nej cov lus yws lus cem lawm.’"
10 Thaum As Loos tab tom hais lus rau tas tsoom His Xas Lais, lawv tig mus ntsia tom sab hav suab puam, lawv pom HUAB TAIS lub hwj chim tawm los nyob saum cov huab.
11 HUAB TAIS hais lus rau Mais Xes tias:
12 "Kuv tau hnov cov His Xas Lais tej lus yws lus cem lawm. Koj hais li no rau lawv li no: ‘Thaum yav tsaus ntuj zuag, nej yuav tau nqaij noj, hos thaum kaj ntug, nej yuav tau mov noj kom tsau plab, ces nej yuav paub tias kuv HUAB TAIS yog nej tus Tswv Ntuj.'"
13 Ces thaum tsaus ntuj, muaj ib co yij ya tuaj tsaws puv thaj chaw lawv nyob, hos thaum sawv ntxov, muaj ib txheej lwg dawb paug puv ib ncig thaj tsam lawv nyob.
14 Thaum cov lwg ntawd qhuav tas, ces txawm pom ib co hmoov  ua tsig daws zoo li ib co te,nyob saum npoo av.
15 Thaum cov His Xas Lais pom li ntawd, lawv sib nug zom zaws tias: "Cov ntawd yog dab tsi ?" Vim lawv yeej tsis paub tias yog dab tsi tiag. Mais Xes hais rau lawv tias: "Cov ntawd, yog cov mov uas HUAB TAIS muab pub rau nej noj.”

NPN  78: 18-19, 23-24, 25-26, 27-28

Txais: (24b) Huab Tais muab cov mov poob saum ntuj los rau lawv noj.

Lawv sim Tswv Ntuj nyob hauv lawv nruab siab,
lawv taij kom nws muab mov rau lawv noj daws kev tshaib.
Lawv hais lus twv Tswv Ntuj tias:
"Tswv Ntuj puas muaj peev xwm rau tau
ib rooj mov nyob hauv teb chaws suab puad?”

Txais: (24b) Huab Tais muab cov mov poob saum ntuj los rau lawv noj.

Nws txib cov txheej ntuj saud,
thiab nws qhib cov qhov rooj ntug.
Nws ua kom mov mas nas poob li nag los rau lawv noj,
nws muab qaum ntuj cov mov rau lawv.

Txais: (24b) Huab Tais muab cov mov poob saum ntuj los rau lawv noj.

Tib neeg tau noj tsoom Tshiab cov mov,
nws xa txhiam laj txhiam xws rau lawv tau noj seem noj sos.
Nws ua kom nthwv cua toob fab tshuab tuaj nyob saum ntuj,
Nws lub hwj huam ua kom cua tuaj naj fab tuaj.

Txais: (24b) Huab Tais muab cov mov poob saum ntuj los rau lawv noj..

Nws ua kom nqaij poob los rau lawv, zoo li ib cov plua tshauv.
Nws ua kom noog poob los coob npaum cov suab puam ntawm ntug dej ntuj.
Cov noog los tsaws puv lawv tej chaw ua si, thiab ncig lawv tej tsev.

Txais: (24b) Huab Tais muab cov mov poob saum ntuj los rau lawv noj.

As Les Lus Yas

Txais: As les lus yas, as les lus yas.

Cov noob nplej yog Tswv Ntuj lo lus, Leej Pleev yog tus tseb nplej;
Txhua leej uas los cuag nws yuav ciaj nyob mus li.

Txais: As les lus yas, as les lus yas.

Ntawv Moo Zoo:  MT 13: 1-9

1 Hnub ntawd, Yes Xus tawm hauv tsev mus zaum ntawm ntug dej ntuj.
2 Tej pab neeg coob coob tuaj ntsauv nws, ces nws nce mus zaum hauv ib lub nkoj, hos tas tsoom neeg sawv nyob ntawm ntug dej.
3 Yes Xus ua paj lug qhia lawv ntev loo, nws hais li no: "Tus tseb nplej tawm mus tseb noob nplej.
4 Thaum nws tseb, muaj ib co noob poob ntawm ntug kev, noog ya tuaj khaws tas huv si lawm.
5 Ib co noob poob rau hauv cov av pob zeb, nyob ntawd tsis muaj av ntau, ces cov noob tuaj kaus sai, vim av tsis tob.
6 Thaum hnub tuaj, tshav ziab cov yub nkig tas, vim tsis muaj cag ces cov yub qhuav tas.
7 Tseem muaj ib co noob poob rau hauv cov pos. Pos hlob tuaj laum cov yub tas.
8 Hos muaj ib co noob poob rau hauv thaj av zoo, cov noob ntawd txhawv hnab, tej lub noob txi ib puas lub ntxiv, tej lub txi rau caum lub, tej lub txi peb caug lub.
9 Leej twg muaj pob ntseg, kom nws kav tsij mloog."

Tim 22 lub 7 Hli 2021

Hnub Tsib Lis Piam Kaum Rau Nruab Xyoo B Nruab Lis Piam Xyoo I

Koob Tsheej Hwm LN Mab Liab Mas Ntas Las
Lectionary: 603

Zaj Nyeem Ib: KWV TXHIAJ 3: 1-4b

Tus nkauj nyab hais tias:
1 Kuv nyob saum kuv lub lav, ntuj teb tag hmo,
kuv nrhiav tus uas kuv lub siab nyiam.
Kuv nrhiav nws, tab sis nrhiav tsis tau.
2 Kuv sawv mus ncig hauv lub nroog,
kuv nrhiav ntawm tej kev, ntawm tej tshav puam.
Kuv nrhiav tus uas kuv lub siab nyiam;
kuv nrhiav nws, tab sis nrhiav tsis tau.
3 Cov tub zov keeb saib lub nroog,
lawv ncig mus ncig los, lawv ntsib kuv:
"Nej puas pom tus kuv lub siab nyiam?"
4 Kuv nyuam qhuav mus dhau plaws ntawm lawv,
ces kuv nrhiav tau tus kuv lub siab nyiam.

Los: 2 KLN 5: 14-17

Cov kwv tij nkauj muad:
14 Leej Pleev txoj kev nyiam yuav txhib peb lub siab, yog peb ntseeg ruaj tias ib tug neeg tau tuag pub rau sawv daws, ces sawv daws kuj tau nrog nws tuag thiab.
15 Leej Pleev yog tus tau tuag pub rau sawv daws, kom cov neeg ciaj nyob txhob ua neej rau lawv tus kheej ntxiv lawm, tiam sis kom lawv ua neej rau tus uas tau tuag pub rau lawv, thiab nws tau sawv rov los lawm.
16 Li ntawd, txij nyem no mus, peb yuav tsis txhob saib ib tug neeg raws li lub cev sab nqaij tawv lawm; txawm peb tau pom Leej Pleev nyob hauv nws lub cev, los nyem no peb tsis pom nws zoo li ntawd lawm.
17 Li no, yog leej twg nyob hauv Leej Pleev, mas nws yog ib tug uas Ntuj tsim dua tshiab lawm: yam qub dua tas, yam tshiab los nyob lawm.

NPN 63: 2, 3-4, 5-6, 8-9

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

Tswv Ntuj, koj yog kuv tus Tswv Ntuj, yog tus kuv nrhiav;
kuv lub cev seev yees txog koj, kuv tus plig nqhis txog koj,
zoo puav tam li av qhuav qhawv, nkig nkuav, tsis tau dej.

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

Kuv tig mus saib koj nyob hauv lub tuam tsev ntshiab,
kuv pom koj lub hwj huam thiab koj lub hwj chim.
Vim koj txoj kev hlub kev ua zoo muaj nqis dua txoj sia,
kuv di ncauj yuav cav lus zoo txog koj.

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

Kuv yuav cav txog koj tas kuv sim neej,
kuv yuav tsa tes thov ntuj hu txog koj lub npe.
Kuv tus ntsuj plig yuav txaus siab hlo li tus tau noj nqaig noj hno,
kuv di ncauj yuav zoo siab, kuv lub ncauj yuav qhuas txog koj.

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

Koj yog tus pab kuv;
kuv qw zoo siab nyob hauv koj phab tis qhov ntxoov.
Kuv tus ntsuj plig dai dhuam rau ntawm koj,
koj txhais tes xis hwj kuv nraim.

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

As Les Lus Yas

Txais: As les lus yas, as les lus yas.

Mab Liab, koj qhia rau peb saib, koj pom dab tsi ntawm kev?
Kuv pom Leej Pleev sawv rov los lub hwj chim, kuv pom nws lub ntxa qhuav.

Txais: As les lus yas, as les lus yas.

Ntawv Moo Zoo: ZAM 20: 1-2, 11-18

1 Thawj hnub pib lub lis piam, thaum sawv ntxov, ntuj tsis tau kaj, Mab Liab Mas Ntas Las mus tom ntxa. Nws pom daim txiag zeb tshem ntawm lub ntxa lawm.
2 Mab Liab khiav mus cuag Xis Moos Pob Zeb thiab lwm tus thwj tim, uas yog tus Yes Xus nyiam. Nws hais rau nkawd tias: "Lawv nqa Huab Tais tawm hauv ntxa lawm, peb tsis paub xyov lawv coj nws mus tso rau qhov twg lawm."
11 Mab Liab sawv ze ntawm lub ntxa sab nraud, nws quaj. Thaum nws quaj, nws khoov rau hauv lub ntxa.
12 Ces nws pom ob tug Tshiab hnav dawb zaum hauv qhov chaw uas lawv tso Yes Xus lub cev, ib tug zaum pem taub hau, ib tug zaum nram ko taw.
13 Ob tug Tshiab hais rau Mab Liab tias: "Tus poj niam, ua cas koj quaj?" Mab Liab hais rau nkawd tias: "Vim lawv nqa kuv tus Huab Tais lawm, kuv tsis paub lawv muab nws tso rau qhov twg li."
14 Hais li ntawd tas, Mab Liab tig ntsia tom qab. Nws pom Yes Xus sawv ntsug nyob ntawd. Tab sis nws tsis paub tias yog Yes Xus.
15 Yes Xus hais rau Mab Liab tias: "Tus poj niam, ua cas koj quaj ? Koj nrhiav leej twg?" Mab Liab xav tias yog tus saib lub vaj, ces Mab Liab hais rau nws tias: "Yawg hlob, yog koj nqa nws lub cev lawm no, koj qhia kuv saib koj muab tso qhov twg lawm, kuv yuav mus nqa nws los."
16 Yes Xus hais rau Mab Liab tias: "Mab Liab !" Mab Liab tig hlo mus, nws ua lus Hes Nplaws hais tias: "Las Npus Nis!" Txhais tias: Xib Hwb.
17 Yes Xus hais rau Mab Liab tias: "Koj txhob tuav kuv, vim kuv tseem tsis tau nce mus cuag Leej Txiv. Koj mus cuag kuv cov kwv tij, koj hais rau lawv tias: ‘Kuv yuav nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj.’"
18 Mab Liab Mas Ntas Las thiaj los tshaj rau cov thwj tim hais tias: "Kuv pom Huab Tais lawm,” thiab nws hais cov lus Yes Xus tau hais rau nws rau lawv.

Tim 23 lub 7 Hli 2021

Hnub Rau Lis Piam Kaum Rau Nruab Xyoo B Nruab Lis Piam Xyoo I
Lectionary: 399

XHLT: LN Bridget nyob Sweden

Zaj Nyeem Ib: KT 20: 1-17

1 Tswv Ntuj hais tej lus no tas tib si tias:
2 "Kuv yog HUAB TAIS, koj tus Tswv Ntuj, kuv yog tus ua kom koj dim ntawm Hais Nkws Tos teb los, dim ntawm lub tsev yuam nej ua qhev los.
3 Koj yuav tsis txhob muaj dua lwm tus tswv ntuj dua ntawm kuv lawm.
4 Koj yuav tsis txhob txaug tej tug duab mlom los rau koj teev, uas zoo li tej yam nyob saum ntuj, los zoo li tej yam nyob hauv ntiaj teb no, los zoo li tej yam nyob hauv cov dej hauv qab lub ntiaj teb.
5 Koj yuav tsis txhob pe cov mlom ntawd, txhob tsob hwb lawv, vim kuv HUAB TAIS koj tus Tswv Ntuj yog ib tug Tswv Ntuj muaj khib; kuv muab phaj txiv lub txim txhaum rau lawv cov me nyuam ris, ces kuv rau txim rau cov uas ntxub kuv lawv phaj tub thiab phaj xeeb ntxwv mus txog tiam peb tiam plaub huv tib si.
6 Hos kuv yuav ua zoo mus li rau cov nyiam kuv thiab mloog kuv tej lus qhia lawv tej me tub me nyuam txog txhiab tiam neeg.
7 Koj yuav tsis txhob hu txog koj tus HUAB TAIS Tswv Ntuj lub npe mus ua dog dig, vim HUAB TAIS yuav tsis zam txim rau tus neeg uas tuav txog nws lub npe mus ua dog dig.
8 Koj yuav nco ntsoov caiv hnub xas npas tos, koj yuav muab saib ua ib hnub ntshiab.
9 Koj yuav khwv rau hnub thiab ua tas txhua yam hauj lwm nyob hauv rau hnub ntawd,
10 tab sis hnub xya yog hnub caiv xas npas tos rau koj tus HUAB TAIS Tswv Ntuj. Hnub ntawd koj yuav tsis txhob ua ib yam hauj lwm dab tsi li. Koj thiab koj tus tub, koj tus ntxhais, koj tus tub txib, koj tus ntxhais txib, koj cov tsiaj txhu, tus qhua uas tuaj nyob hauv koj tsev, nej sawv daws yuav caiv.
11 Vim tias HUAB TAIS tau ua hauj lwm rau hnub los tsim lub ntuj, lub ntiaj teb, lub hiav txwv, thiab tas puas tsav yam nyob hauv, tiam sis hnub xya nws so, vim li ntawd HUAB TAIS tau foom hmoov zoo rau hnub xya, nws muab hnub xya qee ua ib hnub ntshiab.
12 Koj yuav hwm koj niam thiab koj txiv, koj thiaj yuav tau nyob ntev niaj ntau xyoo hauv lub teb chaws uas koj tus HUAB TAIS Tswv Ntuj muab pub rau koj.
13 Koj yuav tsis txhob tua neeg.
14 Koj yuav tsis txhob zes luag txij luag nkawm.
15 Koj yuav tsis txhob ua tub sab tub nyiag.
16 Koj yuav tsis txhob lam ua tim khawv liam rau luag tej.
17 Koj yuav tsis txhob ntshaw txeeb luag vaj luag tsev. Koj yuav tsis txhob ntshaw txeeb luag tus poj niam, luag tus tub txib, luag tus ntxhais txib, luag tus nyuj los tus luj, los ib yam dab tsi uas yog luag tug."

NPN 19: 8, 9, 10, 11

Txais: (Zam 6:68c) Huab Tais, koj muaj cov lus pub txoj sia nyob mus li.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog yuav,
nws ua kom tus neeg ruam thoob tsib tuaj.

Txais: (Zam 6:68c) Huab Tais, koj muaj cov lus pub txoj sia nyob mus li.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus meej kawg nkaus,
ua kom qhov muag pom kev.

Txais: (Zam 6:68c) Huab Tais, koj muaj cov lus pub txoj sia nyob mus li.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
Txhua lo lus nws txiav yog qhov ncaj.

Txais: (Zam 6:68c) Huab Tais, koj muaj cov lus pub txoj sia nyob mus li.

Nws cov lus txiav txim, tsim nyog ntshaw dua kub,
Tsim nyog ntshaw dua ib txhab tseem kub,
qab zib dua cov kua zib ntawm cov paj,
los cov zib mu ntawm daim nas muv.

Txais: (Zam 6:68c) Huab Tais, koj muaj cov lus pub txoj sia nyob mus li.

As Les Lus Yas: LK 8: 15

Txais: As Les Lus Yas, as les lus yas.

Cov uas muaj ib lub siab dav coj raws lo lus, lawv tau hmoov zoo
thiab lawv txi taus txiv vim lawv ua siab ntev coj tsis tso tseg.

Txais: As Les Lus Yas, as les lus yas..

Ntawv Moo Zoo: MT 13: 18-23

Yes Xus hais rau nws cov thwj tim tias:
18 “Nej cia li mloog zaj paj lug hais txog tus tseb nplej.
19 Tus neeg uas tau hnov Lo Lus qhia txog lub Ceeb Tsheej, tiam sis nws tsis to taub, ces tus Phem tuaj txog, nws muab yam uas twb tseb rau hauv tus ntawd lub siab lawm rho kiag pov tseg: tus ntawd ces yog lub noob uas poob ntawm ntug kev.
20 Lub noob poob rau hauv cov av pob zeb, yog tus neeg uas thaum nws hnov Lo Lus, nws zoo siab hlo txais thaum ntawd.
21 Tab sis nws tsis muaj cag nyob hauv nws, ces tsuas kav ib nyuag ntu xwb: thaum muaj kev txom nyem, los muaj kev raug luag hiam vim Lo Lus, ces nws ntog tam sis ntawd.
22 Lub noob uas poob rau hauv cov pos, yog tus uas hnov Lo Lus, tab sis ntiaj teb tej kev txob xeeb, thiab nyiaj txiag tej kev ntxias laum Lo Lus, ces Lo Lus txi tsis taus txiv.
23 Lub noob uas poob rau hauv cov av zoo, yog tus uas hnov Lo Lus, nws to taub Lo Lus ntawd, ces nws txi txiv, ib tug txi ib puas lub, ib tug txi rau caum lub, hos lwm tus txi peb caug lub txiv.”

Tim 24 lub 7 Hli 2021

Hnuv Xya Lis Piam Kaum Rau Nruab Xyoo B Nruab Lis Piam Xyoo I
Lectionary: 400

XHLT: LN Sharbel Makhluf, ua Leej Choj

Zaj Nyeem Ib: KT 24: 3-8

3 Mais Xes rov los hais HUAB TAIS cov lus thiab cov cai qhia rau tsoom pej xeem, tas sawv daws koom ib lub suab teb tias: "Peb yuav ua tas txhua yam raws li Huab Tais tau hais."
4 Mais Xes muab HUAB TAIS cov lus sau cia tas tib si, ces tag kis nws sawv ntxov ntxov los, nws txhim ib lub thaj txi Ntuj rau ntawm taw roob thiab kaum ob tug ncej zeb rau kaum ob lub xeem His Xas Lais.
5 Ces nws xa ib co tub hluas His Xas Lais mus hlawv tsiaj txi Ntuj, lawv coj tej tus thav nyuj mus ua txim kev thaj yeeb txi rau HUAB TAIS.
6 Mais Xes cug cov ntshav, nws muab ib nrab hliv rau hauv phiab, hos ib nrab hliv ywg lub thaj txi Ntuj.
7 Ces nws muab phau ntawv cog lus los nyeem rau tsoom pej xeem mloog, lawv qw tias: "Txhua yam HUAB TAIS tau hais, peb yuav coj thiab peb yuav mloog."
8 Mais Xes txawm muab cov ntshav los nchos rau saum tsoom pej xeem sawv daws, nws hais tias: "Cov ntshav no yog ntshav cog lus, uas HUAB TAIS tau nrog nej cog, raws nraim li nws tau hais rau nej lawm."

NPN 50: 1b-2, 5-6, 14-15

Txais: (14a) Koj cev ib co lus qhuas ua txim txi rau Tswv Ntuj.

HUAB TAIS Tswv Ntuj nws qhib ncauj hais lus;
nws hu tas lub ntiaj teb tuaj koom, txij hnub tuaj txog hnub poob.
Tswv Ntuj nyob saum lub roob Xis Yoos,
nws zoo saib tas nrho, nws ci ntsa iab tuaj.

Txais: (14a) Koj cev ib co lus qhuas ua txim txi rau Tswv Ntuj.

Nej sau cov ntseeg txog kuv tuaj nyob ntawm kuv xub ntiag,
Nej sau cov uas tau tua tsiaj los nrog kuv cog lus.
Lub ntuj tshaj nws txoj kev ncaj :
Vim Tswv Ntuj yog tus txiav txim

Txais: (14a) Koj cev ib co lus qhuas ua txim txi rau Tswv Ntuj.

Koj muab lo lus qhuas los ua txim txi rau Tswv Ntuj,
koj pauj koj lub yeem rau tus Nyob Siab.
Thaum kev txhawj xeeb tuaj, koj hu txog kuv,
kuv yuav npo koj dim, ces koj yuav cav txog kuv lub koob meej.

Txais: (14a) Koj cev ib co lus qhuas ua txim txi rau Tswv Ntuj.

As Les Lus Yas: Yas Kos 1: 21bc

Txais: As les lus yas, as les lus yas.

Nej yuav ua neeg me txais lo lus uas twb muab cog rau hauv nej lawm,
nws yog qhov yuav cawm tau nej tus ntsuj plig.

Txais: As les lus yas, as les lus yas.

Ntawv Moo Zoo: Mas Tais 13: 24-30

24 Yes Xus tseem hais dua ib zag paj lug rau cov neeg tias: "Lub Ceeb Tsheej saum ntuj zoo li ib tug neeg tseb ib co noob zoo rau hauv nws daim teb.
25 Thaum sawv daws tsaug zog tas lawm, nws tus yeeb ncuab tuaj, thiab tseb ib co nroj xyaw rau hauv cov nplej tas ces nws rov mus lawm.
26 Thaum cov nplej hlob tuaj thiab txhawv, nroj kuj tawm tuaj thiab.
27 Cov tub txib tuaj hais rau tus tswv qoob tias: "Huab Tais, koj tau tseb ib co noob zoo zoo rau hauv koj daim teb los tsis sub? Vim li cas thiaj muaj nroj?"
28 Tus tswv qoob teb rau lawv tias: "Yog ib tug yeeb ncuab tuaj ua qhov ntawd." Cov tub txib hais rau tus tswv tias: "Koj puas xav kom peb mus sau cov nroj pov tseg?" Tus tswv teb tias:
29 "Kuv tsis xav! Tsam thaum nej sau nroj, nej rho tau nplej nrog thiab.
30 Nej cia nroj nrog nplej hlob ua ke mus txog lub caij sau nplej. Thaum txog caij sau nplej lawm, kuv mam hais rau cov sau nplej tias: Nej xub sau cov nroj ua ntej tso, nej muab pav ua tej teg cia yuav muab pov hlawv, hos nej sau cov nplej rau hauv kuv lub txhab.”

Tim 26 lub 7 Hli 2021

Hnub Ob Lis Pias Kaum Xya Nruab Xyoo B Nruab Lis Piam Xyoo I
Lectionary: 401

Yuav Hwm LN Yuas Kis thiab LN As Nas, Mab Liab niam thiab txiv

Zaj Nyeem Ib: KT 32: 15-24, 30-34

15 Mais Xes tig rov qab nqes saum roob los, nws nqa ob daig txiag zeb sau cov Lus Qhia ntawm tes; ob daig txiag ntawd sau ob sab, sab saud thiab sab hauv huv si.
16 Ob daig txiag ntawd yog Tswv Ntuj txua, cov npe ntawv yog Tswv Ntuj sau, nws muab txaug rau saum ob daig txiag zeb.
17 Yos Suas hnov tsoom pej xeem qw tsheej tsaug, nws hais rau Mais Xes tias: “Muaj suab nrov cuag li yog sib tua hauv lub yeej lawm!"
18 Mais Xes teb tias: "Tsis yog lub suab qw yeej ib nthwv rog, kuj tsis yog lub suab qw swb ib nthwv rog thiab. Kuv hnov zoo li yog suab hu nkauj ua kev lom zem."
19 Thaum nws los txog ze lub yeej lawm, Mais Xes pom tus mlom nyuj thiab tej pab dhia daj dhia luag lom zem. Ces Mais Xes npau taws heev, nws muab ob daig txiag zeb ntawm nws tes cuam pov tseg, ob daig txiag zeb tawg tas ntawm lub taw roob.
20 Nws muab tus mlom nyuj uas lawv nchuav pov rau hauv hluav taws kom yaj tas, nws muab coj los tuav ua hmoov mos mos, muab coj mus nphoo rau hauv dej, ces nws yuam cov His Xas Lais haus cov dej ntawd.
21 Mais Xes hais rau As Loos tias: "Haiv neeg ntawd tau ua dab tsi rau koj, vim li cas koj thiaj coj lawv ua ib qho txhaum loj tas npaud ?"
22 As Loos teb tias "Thov koj tus loj tsis txhob npau taws, koj twb paub tias haiv neeg ntawd zoo li cas lawm, koj paub tias lawv yeej nyiam ua qhov phem.
23 Lawv hais rau kuv tias: 'Koj ua ib tug tswv ntuj rau peb teev, kom nws mus ua peb ntej, vim tus Mais Xes uas nws coj peb tawm ntawm Hais Nkws Tos teb los, mas peb tsis paub xyov nws dua twg lawm.'
24 Kuv hais rau lawv tias : 'Leej twg coj kub ntawm nws, muab hle tawm los.' Lawv muab los rau kuv, kuv coj mus pov rau hauv hluav taws, ces tus nyuj no cia li tawm los."
30 Hnub tom qab, Mais Xes hais rau tsoom pej xeem tias: "Nej tau ua ib qho txhaum loj kawg. Kuv yuav nce mus cuag HUAB TAIS, kuv yuav thov HUAB TAIS, tej zaum nws yuav zam rau nej."
31 Mais Xes thiaj rov nce mus cuag HUAB TAIS, nws hais tias: “Haiv neeg ntawd tau ua ib qho txhaum loj kawg. Lawv tau puab ib tug tswv ntuj kub rau lawv teev.
32 Tab sis nyem no thov koj zam rau lawv qhov txhaum. Yog koj tsis kam zam no ces thov koj rho kuv tawm hauv phau ntawv uas koj tau sau cia lawm!"
33 HUAB TAIS hais rau Mais Xes tias: "Tus tau ua txhaum rau kuv, mas kuv yuav rho nws tawm hauv kuv phau ntawv mus.
34 Tab sis zaum no koj rov mus, koj coj haiv neeg ntawd mus rau qhov chaw uas kuv tau hais rau koj lawm. Kuv tus Tshiab yuav mus ua koj ntej. Txog hnub uas kuv tuaj xyuas lawv, kuv mam li muab txim rau lawv vim lawv qhov txhaum."

NPN 106: 19-20, 21-22, 23

Txais: (1a) Nej ua Huab Tais tsaug vim nws siab zoo.

Peb cov yawg koob puab ib tug mlom nyuj nyob ntawm roob Hos Les;
lawv txhos caug pe tus mlom uas lawv nchuav.
Lawv muab lawv lub koob meej
pauv ib tug duab mlom uas yog ib tug nyuj noj zaub.

Txais: (1a) Nej ua Huab Tais tsaug vim nws siab zoo.

Lawv tsis nco qab tus Tswv Ntuj uas tau cawm lawv lawm,
tus tau ua tej yam loj nyob Hais Nkws Tos teb ,
tus tau ua tej yam hwj huam txaus qhuas nyob Haas teb,
tus tau ua tej yam txaus ntshai nyob ntawm lub Hiav Txwv Liab.

Txais: (1a) Nej ua Huab Tais tsaug vim nws siab zoo.

Nws tau hais tias nws yuav ua kom lawv tuag tu noob
tab sis Mais Xes, tus uas nws xaiv,
tau sawv lawv chaw thov nws nrog nws hais,
kom nws txo nws lub siab npau taws uas tsis xav txuag lawv.

Txais: (1a) Nej ua Huab Tais tsaug vim nws siab zoo.

As Les Lus Yas: YK 1: 18

Txais: As les lus yas, as les lus yas.

Leej Txiv pom zoo ua kom lo lus tseeb yug peb los,
kom peb yog thawj phau txiv nyob hauv txhua yam uas nws tsim.

Txais: As les lus yas, as les lus yas.

Ntawv Moo Zoo: Mt 13:31-35

31 Yes Xus hais ib zag paj lug rau tej pab neeg coob tias: "Lub Ceeb Tsheej saum ntuj zoo li ib lub noob zaub roj uas ib tug neeg nqa mus tseb rau hauv nws daim teb.
32 Lub noob ntawd me tshaj txhua hom noob, tab sis thaum nws hlob tuaj, nws loj dua lwm cov zaub huv tib si. Nws loj luaj li ib tsob ntoo me Ces tej noog ya saum ntuj los nkaum hauv nws cov ceg."
33 Yes Xus tseem hais dua ib zag paj lug rau lawv tias: "Lub Ceeb Tsheej saum ntuj zoo li ib co poov xab uas ib tug poj niam muab tso rau hauv ib co hmoov nplej ntau li peb kawg mus txog thaum uas tas cov hmoov ntawd su tuaj.’
34 Yes Xus ua paj lug hais ib puas tsav yam ntawd rau zeej tsoom, tsis muaj ib yam uas nws tsis ua paj lug hais.
35 Li ntawd kom muaj raws li tus yaj saub tau hais tseg tias: “Kuv yuav qhib ncauj hais ib co paj lug. Tej yam zais txij thaum ntuj tsim teb raug los lawm, kuv yuav muab haisj tawm.”

Tim 27 lub 7 Hli 2021

Hnub Peb Lis Piam Kaum Xya Nruab Xyoo B Nruab Lis Piam Xyoo I
Lectionary: 402

Zaj Nyeem Ib: KT 33: 7-11; 34:5B-9, 28

7 Mais Xes nqa lub tsev tsam phooj, nws coj mus tsa rau sab yeej nraud tas mus li, nyob nrug deb ntawm lub yeej. Nws tis npe rau tias Tsev Tsam Phooj Sib Ntsib. Yog leej twg xav vam txog HUAB TAIS, mas nws yuav tawm mus tom lub Tsev Tsam Phooj Sib Ntsib, nyob sab yeej nraud.
8 Niaj zaus thaum Mais Xes tawm mus nraum lub Tsev Tsam Phooj, mas tas tsoom neeg sawv daws sawv ntsug, nyias sawv ntawm nyias lub qhov rooj tsev tsam phooj, lawv ntsia ntsoov Mais Xes mus nkag kiag hauv lub Tsev Tsam Phooj lawm.
9 Thaum Mais Xes nkag mus rau hauv lub Tsev Tsam Phooj, mas twv huab nqes los nyob ntawm lub qhov rooj, ces HUAB TAIS nrog Mais Xes tham.
10 Tas tsoom neeg sawv daws pom twv huab nyob ntawm lub qhov rooj Tsev Tsam Phooj, ces sawv daws sawv, thiab nyias nyob ntawm nyias lub qhov rooj pe hawm Huab Tais.
11 HUAB TAIS hais lus rau Mais Xes, tim ntsej tim muag, ib yam li ib tug tib neeg nrog nws tus phooj ywg tham, tham tas ces Mais Xes mam rov los hauv lub yeej. Tab sis Mais Xes tus tub txib Yos Suas uas yog Nus tus tub, nyob rawv hauv lub Tsev Tsam Phooj tsis nrug li.
34: 5b Mais Xes nrog HUAB TAIS sawv nyob ntawd thiab nws hu txog HUAB TAIS lub npe tias “HUAB TAIS.”.
6 Ces HUAB TAIS hla ntawm Mais Xes xub ntiag, thiab qw nrov nrov tias: "HUAB TAIS, HUAB TAIS, tus Tswv Ntuj uas lub siab khuv leej neeg thiab pub txiaj ntsim ntau, tus npau taws qeeb, tus muaj lub siab zoo puv ntoob thiab tsis fav xeeb,
7 tus ua zoo mus li rau neeg mus txog txhiab tiam, tus ua siab ntev zam neeg qhov phem, qhov yuam kev thiab qhov txhaum rau neeg, tiam sis nws tsis cia leej twg dim nws lub txim. Nws muab phaj txiv lub txim txhaum rau phaj tub thiab phaj xeeb ntxwv ris mus txog tiam peb tiam plaub huv si."
8 Tam sis ntawd, Mais Xes txhos caug ntua khoov hauv av pe.
9 Ces nws hais tias: "Huab Tais, yog koj saib kuv tsim nyog, thov koj nrog nraim peb mus, txawm tias peb yog ib haiv neeg xwb qwb txhav, los thov koj zam peb qhov phem thiab peb cov txhaum rau peb, koj muab peb los ua koj tug."
28 Mais Xes nrog Huab Tais nyob tau plaub caug hnub plaub caug hmo, nws tsis noj mov tsis haus dej li, nws sau cov nqe cog lus rau hauv phau ntawv, uas yog kaum lo lus qhia.

NPN 103: 6-7, 8-9, 10-11, 12-13

Txais: (8a) Huab Tais siab zoo thiab khuv leej neeg.

HUAB TAIS nrhiav muab kev ncaj
thiab muab cai rau tas cov raug luag tsuj.
Nws qhia nws tej kev rau Mais Xes paub,
nws qhia nws cov hauj lwm rau tsoom His Xas Lais.

Txais: (8a) Huab Tais siab zoo thiab khuv leej neeg.

HUAB TAIS khuv leej neeg, nws pub txiaj ntsim ntau
nws npau taws qeeb, nws siab zoo tas nrho.
Nws tsis niaj hnub yws, nws kun tsis npau taws mus li.

Txais: (8a) Huab Tais siab zoo thiab khuv leej neeg.

Nws tsis nplua peb raws li peb tau ua txhaum,
nws tsis pauj rau peb raws li peb tej kev ua phem.
Xws li lub ntuj nyob siab tshaj saum lub ntiaj teb npaum li cas,
Nws kuj ua zoo tshaj npaum li ntawd rau cov neeg hwm nws thiab.

Txais: (8a) Huab Tais siab zoo thiab khuv leej neeg.

Deb npaum li sab hnub tuaj nyob deb sab hnub poob.
Nws xyeeb peb cov txhaum mus deb peb npaum li ntawd,
Zoo li ib leeg txiv hlub nws cov me nyuam,
HUAB TAIS kuj hlub cov hwm nws zoo ib yam li ntawd,

Txais: (8a) Huab Tais siab zoo thiab khuv leej neeg.

As Les Lus Yas

Txais: As les lus yas, as les lus yas.

Lub noob nplej yog Tswv Ntuj lo lus, Leej Pleev yog tus tseb nplej;
Txhua tus uas tuaj cuag nws yuav ciaj nyob mus li.

Txais: As les lus yas, as les lus yas.

Ntawv Moo Zoo: MT 13: 36-43

36 Yes Xus tso tsoom neeg mus tsev, ces nws los hauv lub tsev. Cov thwj tim txav los hais rau nws tias: "Koj txhais zaj paj lug hais txog cov nroj tuaj hauv daim teb rau peb saib."
37 Yes Xus teb rau lawv tias: "Tus tseb cov noob zoo, yog Neeg Leej Tub.
38 Daim teb, yog lub qab ntuj neeg. Cov noob zoo, yog cov tub hauv lub Ceeb Tsheej. Cov nroj, yog tus Phem cov tub.
39 Tus yeeb ncuab uas tseb cov noob nroj, yog Dab Phem. Lub caij sau nplej, yog lub zim txwv kawg. Cov tub sau nplej, yog cov Tshiab.
40 Ib yam li luag sau cov nroj mus pov hlawv hauv hluav taws, lub zim txwv kawg kuj yuav zoo ib yam li ntawd :
41 Neeg Leej Tub yuav xa nws cov Tshiab tuaj, lawv yuav sau txhua yam kev ntxias neeg ua txhaum thiab cov neeg ua phem tawm hauv nws lub Ceeb Tsheej mus.
42 Lawv yuav coj cov ntawd mus pov rau hauv lub qhov hluav taws; nyob hauv, yuav muaj kev quaj laug laws thiab tom hniav nkawv.
43 Ces cov neeg siab ncaj yuav ci ntsa iab zoo li lub hnub nyob hauv lawv Txiv lub Ceeb Tsheej. Leej twg muaj pob ntseg, kom nws yeej meem mloog.”

Tim 28 lub 7 Hli 2021

Hnub Plaub Lis Piam Kaum Xya Nruab Xyoo B Nruab Lis Piam Xyoo I
Lectionary: 403

Zaj Nyeem Ib: KT 34: 29-35

29 Thaum Mais Xes nqes saum roob Xis Nais rov los, nws tuav ob daig txiag zeb sau cov Lus Qhia ntawm nws tes. Nws tsis paub hais tias nws lub ntsej muag daim tawv ci ntsa iab vim nws tau nrog HUAB TAIS tham.
30 Thaum As Loos thiab cov His Xas Lais pom Mais Xes, lawv saib nws lub ntsej muag daim tawv ci ntsa iab, lawv ntshai txav los ze nws.
31 Mais Xes hu lawv, ces As Loos thiab tas cov txwj laus thiaj txav los ze nws; Mais Xes nrog lawv tham.
32 Cov pej xeem His Xas Lais sawv daws mam txav los tom qab, ces Mais Xes qhia tas puas tsav yam uas HUAB TAIS tau hais rau nws nyob saum roob Xis Nais.
33 Thaum Mais Xes hais lus tas lawm, nws muab ib daig ntaub los npog nws ntsej muag.
34 Txhua zaus thaum Mais Xes yuav nkag mus nrog HUAB TAIS tham, mas nws tshem daim ntaub npog nws ntsej muag mus txog thaum nws yuav ncaim Huab Tais rov tawm los. Nws tawm los lawm, mas nws tshaj rau cov His Xas Lais paub txog HUAB TAIS cov lus ceeb toom.
35 Cov His Xas Lais pom Mais Xes lub ntsej muag daim tawv ci ntsa iab, ces Mais Xes rov muab ntaub los npog nws ntsej muag mus txog thaum nws yuav rov chaws mus nrog HUAB TAIS tham dua.

NPN 99: 5, 6, 7, 9

Txais: (9c) Huab Tais, peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj,
nej pe hawm nws ntawm nws lub rooj tiag taw!
Nws ntshiab tiag!

Txais: (9c) Huab Tais, peb tus Tswv Ntuj yog tus ntshiab.

Mais Xes thiab As Loos nkawd yog ob tug hauv nws tsoom leej choj,
Xas Muas yog ib tug hauv cov uas vam txog nws lub npe;
lawv hu txog HUAB TAIS mas nws teb lawv.

Txais: (9c) Huab Tais, peb tus Tswv Ntuj yog tus ntshiab.

HUAB TAIS nyob hauv tus ncej huab nrog lawv tham;
Lawv tau hnov nws tej lij choj thiab txoj cai nws muab rau lawv.

Txais: (9c) Huab Tais, peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj;
nej pe hawm nws nyob saum lub roob nws txoj kev ntsiab,
vim HUAB TAIS peb tus Tswv Ntuj ntshiab tiag!

Txais: (9c) Huab Tais, peb tus Tswv Ntuj yog tus ntshiab.

As Les Lus Yas: ZAM 15: 15b

Txais: As les lus yas, as les lus yas.

Huab Tais hais tias: Kuv hu nej ua kuv cov phooj ywg,
vim kuv tau qhia rau nej paub tas puas tsav yam uas leej Txiv hais rau kuv lawm.

Txais: As les lus yas, as les lus yas.

Ntawv Moo Zoo: MT 13: 44-46

Yes Xus hais rau nws cov thwj tim tias:
44 “Lub Ceeb Tsheej saum ntuj zoo li ib hub nyiaj faus rau hauv ib daim teb. Muaj ib tug neeg mus nrhiav tau, nws rov muab zais dua; nws zoo siab kawg, nws mus muag nws lub cuab tam tas huv si, ces nws muas daim teb ntawd.
45 "Lub Ceeb Tsheej saum ntuj kuj tseem zoo li ib tug tub luam nrhiav cov hlaws npliag deg zoo nkauj.
46 Thaum nws nrhiav tau ib lub muaj nqi loj, nws mus muag nws lub cuab tam tas huv si, ces nws muas lub hlaws npliag deg ntawd.”

Tim     29     lub     7     Hli     2021

Hnub Tsib Lis Piam Kaum Xya Nruab Xyoo B Nruab Lis Piam Xyoo I
Lectionary: 404

Yuav Hwm LN Mas Tas, Mab Liab thiab Las Ntxas Los (saib ob zaj nyeem nram qab)

Zaj Nyeem Ib:    KT 40: 16-21, 34-38

16 Mais Xes ua tas puas tsav yam raws nraim li HUAB TAIS qhia kom ua.
17 Lub ib hlis xiab ib xyoo ob, nws tsa lub Tsev Nyob.
18 Mais Xes yog tus tsa lub Tsev Nyob; nws teeb cov taw, nws tsa lub cuam khoov, nws tso cov nqaj tav rau thiab tsa cov ncej rau.
19 Ces nws muab lub tsev tsam phooj nthuav rau saum lub Tsev Nyob, nws muab daim ntaub tsev tsam phooj los vov rau saum toj lub Tsev Nyob, raws li HUAB TAIS tau hais rau nws.
20 Mais Xes muab ob daig txiag zeb txaug cov lus qhia kaw rau hauv lub Phij Xab Cog Lus. Nws muab cov nqaj laug rau ntawm lub Phij Xab os sab, thiab muab lub rooj thov zam txim los tso tshooj rau saum lub Phij Xab Cog Lus.
21 Nws nqa lub Phij Xab Cog Lus mus tso rau hauv lub Tsev Nyob; nws tsa daim ntaub kem rau kom los thaiv lub Phij Xab Cog Lus Raws li Huab Tais tau hais rau Mais Xes.
34 Ces twv huab los ntsauv lub Tsev Tsam Phooj Sib Ntsib, thiab HUAB TAIS lub hwj chim ci puv nkaus hauv lub Tsev Nyob.
35 Mais Xes nkag tsis tau mus rau hauv lub Tsev Tsam Phooj Sib Ntsib, vim twv huab los ntsauv rawv saum lub tsev tsam phooj sib ntsib thiab HUAB TAIS lub hwj chim ci ntsa iab puv lub Tsev Nyob.
36 Txhua zaus thaum twg yog twv huab nce mus nyob siab saum toj lub Tsev Nyob lawm mas cov His Xas Lais mam sawv kev mus dua ntxiv.
37 Yog twv huab tsis nce siab, mas lawv tsis sawv kev li mus txog hnub uas twv huab nce siab rau saud lawm.
38 Vim tias,  nruab hnub HUAB TAIS twv huab nyob saum lub Tsev Nyob, hos hmo ntuj muaj ib co hluav taws rau tas tsoom His Xas Lais pom; yeej puav leej zoo li ntawd nyob qhov txhia chaw uas lawv tau mus tib si.

NPN    84: 3, 4, 5-6a+8a, 11

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv tus plig ntshaw seev yees yuj plaws
rau HUAB TAIS cov tshav loog.
Kuv lub siab lub cev quaj qw hu
txog tus Tswv Ntuj muaj txoj sia.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Tab yog cov noog ntxias los yeej nrhiav tau chaw nyob,
cov noog luv los nrhiav tau zes puag lawv cov me nyuam
nyob ntawm koj cov thaj txi ntuj, HUAB TAIS kav tsoom tshiab,
kuv tus vaj, kuv tus Tswv Ntuj!

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Cov neeg nyob hauv koj tsev lawv txoj hmoov zoo:
lawv tau kev cav txog koj mus li tsis tseg.
Cov uas saib koj yog lawv lub zog, lawv txoj hmoov zoo.
Lawv yim mus kev lawv lub zog yim loj tuaj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv yeem nyob ib hnub hauv koj cov tshav loog
zoo dua nyob ib txhiab hnub lwm qhov chaw,
kuv yeem nyob ntawm kuv tus Tswv Ntuj taw rooj
zoo dua nyob hauv cov neeg phem lub tsev tsam phooj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

(Mus saib nram qab:)

As Les Lus Yas:    HL 16: 14b

Txais: As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo:    MT 13: 47-53

Yes Xus hais rau nws cov thwj tim tias:
47 "Lub Ceeb Tsheej saum ntuj tseem zoo li ib lub vas uas luag pov rau hauv dej ntuj; lub vas puav tau txhua tsav txhua yam ntses.
48 Thaum lub vas puv lawm, lawv rub lub vas los tim ntug nqhuab, lawv zaum, ces lawv xaiv cov zoo rau hauv tawb, hos muab cov phem pov tseg.
49 Thaum lub zim txwv kawg, kuj yuav zoo ib yam li ntawd thiab: cov tshiab yuav tawm tuaj mus, lawv yuav cais cov neeg phem ntawm cov neeg ncaj.
50 Lawv yuav muab cov neeg phem pov tseg rau hauv lub qhov hluav taws; nyob hauv, yuav muaj quaj laug laws thiab tom hniav nkawv.
51 Nej puas to taub tas ib puas tsav yam no?" Lawv teb rau Yes Xus tias: "Peb to taub."
52 Yes Xus hais rau lawv tias: “Vim li no, txhua tus Kws Ntawv Ntshiab uas los ua thwj tim nyob hauv lub Ceeb Tsheej saum ntuj, mas nws zoo li ib tug tswv tsev uas rho tau tej yam tshiab thiab tej yam qub hauv nws lub cuab tam los.”
53 Thaum Yes Xus hais cov paj lug no tas lawm, ces nws tawm ntawm qhov chaw ntawd mus.

+++++++++++++++++++++

Hnub no yuav tsum ua kev nco txog LN Mas Tas, Mab Liab thiab Las Ntxas Los, ces yuav tsum tau siv zaj As Les Lus Yas thiab xaiv ib zaj Ntawv Moo Zoo nram no los pauv zaj As Les Lus Yas thiab zaj Ntawv Moo Zoo saud:
Lectionary: 607

As Les Lus Yas:    Zam 8: 12

Txais: As les lus yas, as les lus yas.

Huab Tais hais tias: “Kuv yog ntiaj teb neeg qhov pom kev,
leej twg los raws kuv yuav tau qhov pom kev pu txoj sia.”

Txais: As les lus yas, as les lus yas.

Ntawv Moo Zoo:    Zam 11: 19-27

19 Muaj coob leej Yus Das tuaj xyuas Mas Tas thiab Mab Liab nkawd, lawv tuaj nplij nkawd vim nkawd tus nus Las Ntxas Los tuag lawm.
20 Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev.
21 Mas Tas hais rau Yes Xus tias: "Huab Tais, yog koj ntxov tuaj txog ntawm no, mas kuv tus nus yuav tsis tuag.
22 Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj."
23 Yes Xus hais rau Mas Tas tias: "Koj tus nus yuav sawv rov los."
24 Mas Tas hais rau Yes Xus tias: "Kuv paub tias thaum txog Hnub Kawg, lub caij leej tib neeg lub cev ciaj rov los, mas nws yuav sawv rov los."
25 Yes Xus hais rau Mas Tas tias: "Kuv yog Txoj Kev Sawv Rov Los thiab yog Txoj Sia; tus ntseeg txog kuv, tab yog nws tuag lawm, nws tseem yuav muaj txoj sia nyob.
26 Hos leej twg ua neej nyob nws ntseeg txog kuv, mas nws yuav tsis tuag ib zaug. Koj puas ntseeg qhov ntawd?"
27 Mas Tas hais rau Yes Xus tias: "Huab Tais, kuv ntseeg. Kuv yeej ntseeg hais tias koj yog Leej Pleev, yog Tswv Ntuj Leej Tub, tus yuav tuaj nyob hauv lub qab ntuj no."

Los:    Lk 10: 38-42

38 Thaum Yes Xus lawv taug kev, lawv mus txog hauv ib lub zos. Ib tug poj niam hu ua Mas Tas txais Yes Xus los hauv nws tsev.
39 Tus poj niam ntawd muaj ib tug niam hluas hu ua Mab Liab. Mab Liab zaum ntawm Huab Tais ko taw, nws mloog rawv Huab Tais hais lus.
40 Hos Mas Tas rau siab ntso lis ntau yam qav num. Ces Mas Tas los hais rau Yes Xus tias: "Huab Tais, koj tsis quav ntsej tias kuv tus niam hluas cia kuv tib leeg lis qav lis num xwb lod? Koj hais kom nws pab kuv thiab mas!"
41 Tab sis Huab Tais teb rau Mas Tas tias: "Mas Tas yuas Mas Tas, koj txhawj thiab ua siab fab txog ntau yam,
42 tab sis tsuas muaj ib yam xwb uas yuav tsum ua. Mab Liab xaiv ua qhov zoo tshaj lawm, yuav tsis txhob muab tshem ntawm nws mus."

Tim 30 lub 7 Hli 2021

Hnub Rau Lis Piam Kaum Xya Nruab Xyoo B Nruab Lis Piam Xyoo I
Lectionary: 405

XHLT: LN Peter Chrysologus, ua Tswv Qhia thiab Kws Cov Txuj Ntshiab

Zaj Nyeem Ib: LV 23: 1, 4-11, 15-16, 27, 34b-37

1 HUAB TAIS hais rau Mais Xes tias :
4 Cov no yog HUAB TAIS cov hnub nyoog tsuj xeeb, uas thaum txog caij txog nyoog, nej yuav tsum ua tej lub txoos ntshiab los ua kev zoo siab nco txog.
5 Lub ib hlis xiab kaum plaub thaum tsaus ntuj, yog Huab Tais Hmo Hla.
6 Hnub xiab kaum tsib, yog hnub tsuj xeeb txog cov mov tsis xyaw poov xab rau HUAB TAIS; mas nej yuav noj mov tsis xyaw poov xab xya hnub sib law.
7 Thawj hnub, nej yuav sib sau ua lub txoos ntshiab, nej yuav tsis txhob ua ib yam hauj lwm hnyav li.
8 Xya hnub sib law, nej yuav niaj hnub hlawv ib co txim hauv hluav taws rau HUAB TAIS. Hnub xya, yog hnub sib sau ua lub txoos ntshiab, nej yuav tsis txhob ua ib yam hauj lwm hnyav li.
9 HUAB TAIS tseem hais rau Mais Xes tias:
10 "Koj hais rau Tsoom His Xas Lais tias: ‘Thaum nej mus txog lub teb chaws uas kuv muab rau nej nyob lawm, nej cog tau qoob loo mas nej yuav nqa thawj tes nplej ntawm nej cov qoob loo tuaj rau tus leej choj.
11 Leej choj yuav muab tes nplej los cev rau HUAB TAIS kom nws saib nej xis nws siab. Yog hnub tom qab hnub Xas Npas Tos, mas leej choj yuav ua cov kab ke cev cov qoob tshiab ntawd.
15 Txij hnub tom qab hnub xas npas tos uas nej tuaj cev thawj tes nplej tshiab rau Ntuj, txij hnub ntawd mus nej yuav suav xya lub lis piam txwm nkaus.
16 Nej yuav suav tsib caug hnub, ces rov txog hnub tom qab hnub xas npas tos tim xya dua, ces nej rov qab nqa tej yam qoob tshiab tuaj cev rau HUAB TAIS dua.
27 Lub xya hli xiab kaum, yog hnub them txim txhaum. Nej yuav sib sau ua lub txoos ntshiab. Nej yuav ua kev them txim txhaum thiab nej yuav hlawv ib co txim rau HUAB TAIS.
34b Lub xya hli xiab kaum tsib, nej yuav pib ua HUAB TAIS lub koob tsheej nco txog cov Tsev Tsam Phooj, nej yuav ua xya hnub nkaus.
35 Thawj hnub, nej ua lub txoos ntshiab, nej yuav tsis txhob ua ib yam hauj lwm hnyav li.
36 Nej yuav niaj hnub hlawv ib co txim rau HUAB TAIS kom puv xya hnub sib law. Hnub yim, nej yuav sib sau ua lub txoos ntshiab thiab nej yuav hlawv ib co txim rau HUAB TAIS. Hnub nej sib sau xaus ntawd yog ib hnub caiv, nej yuav tsis txhob ua ib yam hauj lwm hnyav li.
37 Cov hnub nyoog no yog HUAB TAIS cov hnub nyoog tsuj xeeb, mas nej yuav tshaj tawm tias yog tej lub hnub nyoog rau sawv daws tuaj sib sau ua lub txoos ntshiab, tuaj cev tej cov txim rau HUAB TAIS, hlawv tsiaj txi Ntuj, cev qoob loo txi Ntuj, ua thaj txi Ntuj noj cov txim, hliv dej hliv cawv txi Ntuj, raws li nyias tej kab ke kav nyias lub hnub nyoog.”

NPN 81: 3-4, 5-6, 10-11ab

Txais: (2a) Nej cia li hu nkauj zoo siab rau Tswv Ntuj, nws yog tus pab peb.

Nej pib suab paj nruag, nej ntaus nruas npuaj,
Ntaus nkauj nog ncas thiab ntaus thaj cheej.
Nej tshuab hom thaum hli xiab,
thaum hli nra, thaum peb ua kev tsuj xeeb loj.

Txais: (2a) Nej cia li hu nkauj zoo siab rau Tswv Ntuj, nws yog tus pab peb.

Yog His Xas Lais txoj cai lij choj,
yog txoj cai Yas Kos tus Tswv Ntuj tau txiav.
Yog txoj cai Tswv Ntuj muab rau Yos Xes coj
Thaum nws tawm hauv Hais Nkws Tos teb los.

Txais: (2a) Nej cia li hu nkauj zoo siab rau Tswv Ntuj, nws yog tus pab peb.

Koj yuav tsis txhob muaj dua lwm tus tswv ntuj nyob hauv koj,
koj yuav tsis txhob txhos caug pe pej kum neeg cov dab qhuas.
Kuv, HUAB TAIS yog koj tus Tswv Ntuj,
tus tau coj koj tawm ntawm Hais Nkws Tos teb los.

Txais: (2a) Nej cia li hu nkauj zoo siab rau Tswv Ntuj, nws yog tus pab peb.

As Les Lus Yas: 1 PZ 1: 25

Txais: As les lus yas, as les lus yas.

Huab Tais Lo Lus yuav nyob tas ib txhiab ib txhis,
Yog lo lus uas tau muab tshaj tawm rau nej lawm.

Txais: As les lus yas, as les lus yas.

Ntawv Moo Zoo: MT 13: 54-58

54 Yes Xus rov los txog lub teb chaws uas nws nyob hlob, nws qhia tsoom sid nyob hauv lawv tej tsev txoos. Lawv ceeb nws, lawv hais tias: "Lub tswv yim thoob tsib, thiab cov hwj huam yees ntxwv ntawd, nws tau qhov twg los?
55 Tus ntawd tsis yog tus kws ntoo tus tub lod? Nws niam tsis yog tus hu ua Mab Liab no lod? Thiab nws cov kwv tij twb yog Yas Kos, Yos Xes, Xis Moos thiab Yus Das lawv los tsis yog?
56 Hos tas nws cov muam tib si, tsis yog nrog peb nyob ua ke ntawm no lod? Tas ib puas tsav yam ntawd, nws muab qhov twg los?"
57 Lawv poob siab tas rau nws. Ces Yes Xus hais rau lawv tias: "Ib tug yaj saub yeej raug luag hwm, tsuas yog cov neeg nyob hauv nws teb chaws thiab cov nyob hauv nws tsev neeg xwb thiaj saib nws tsis rau nqi."
58 Yes Xus tsis ua hwj huam yees ntxwv ntau nyob ntawd, vim lawv tsis ntseeg.

Tim 31 lub 7 Hli 2021

Thawj Hnub Xya Lis Piam Kaum Xya Nruab Xyoo B Nruab Lis Piam Xyoo I
Lectionary: 406

Yuav Hwm LN Ignatius nyob Loyola

Zaj Nyeem Ib: LV 25: 1, 8-17

1 HUAB TAIS hais rau Mais Xes saum lub roob Xis Nais tias :
8 “Koj yuav suav xya lis piam xyoo, uas yog xya zaus xya xyoo, ces lub caij ntawd yuav yog plaub caug cuaj xyoos rau nej.
9 Thaum ntawd, thaum txog lub xya hli hnub xiab kaum, nej yuav tshuab hom nrov nrov. Hnub ntawd yog hnub them txim txhaum, mas tas lub teb chaws yuav tshuab hom nrov nrov nyob qhov txhia chaw.
10 Nej yuav muab xyoo tsib caug ntawd ua ib xyoos Ntshiab; nej yuav tshaj rau cov neeg nyob hauv lub teb chaws tias sawv daws nyob muaj kev twj lij. Yog ib xyoos rau nej sawv daws muaj kev zoo siab; nej nyias yuav rov mus nyob hauv nyias vaj nyias tsev, nyias yuav rov mus nyob hauv nyias tsev neeg.
11 Nyob hauv xyoo tsi caug no uas yog ib xyoos rau nej zoo siab, mas nej yuav tsis txhob tseb noob qoob noob loo, thiab nej yuav tsis txhob sau cov nplej uas nws tuaj nws, nej yuav tsis txhob de cov txiv cawv uas txi saum cov hmab tsis tau muab txo ceg.
12 Vim yog ib xyoos zoo siab, uas nej yuav muab saib ua ib Xyoos Ntshiab, mas nej tsuas noj tau tej txhiam xws uas tuaj rau hauv tej nruab teb xwb.
13 Xyoo zoo siab no, mas nej txhua tus nyias yuav rov mus nyob hauv nyias thaj av.
14 Yog koj muag ib yam dab tsi rau ib tug neeg nyob ze koj, los koj muas dab tsi ntawm nws los, mas yuav tsis txhob pub kom muaj kev ib tug noj tau ib tug.
15 Koj yuav suav saib lub xyoo zoo siab dhau los tau pes tsawg xyoo lawm, ces koj yuav them tus nqi muas av ntawm tus nyob ze koj rau nws raws li cov xyoo ntawd. Tus muag av rau koj kuj yuav suav nqe rau koj them raws li cov cim qoob nws tau sau lawm thiab.
16 Yog tseem tshuav ntau xyoo, mas tus nqe yuav kim, yog tshuav tsawg xyoo, mas tus nqe yuav pheej yig, vim tias nws yuav xam saib nws muag tus nqe raws li tshuav pes tsawg cim qoob rau koj them.
17 Nej yuav tsis txhob ib leeg dag ib leeg noj. Nej yuav ntshai nej tus Tswv Ntuj. kuv HUAB TAIS yog nej tus Tswv Ntuj.”

NPN 67: 2-3, 5, 7-8

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Thov kom Tswv Ntuj hlub peb thiab foom hmoov zoo rau peb,
kom nws ua nws lub ntsej muag ci tuaj rau saum peb,
Kom lub ntiaj teb thiaj yuav paub txog koj tej kev,
cov kuj cuab thiaj yuav paub txog koj txoj kev cawm neeg.

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Kom cov kuj cuab hom khaj thiab qw zoo siab,
vim koj kav cov haiv neeg raws kev ncaj,
koj yog tus coj cov kuj cuab nyob ntiaj teb.

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Lub ntiaj teb twb txi nws cov txiv lawm:
Tswv Ntuj, peb tus Tswv Ntuj tau foom koob hmoov rau peb.
Thov kom Tswv Ntuj foom lus zoo rau peb,
kom tas npoo ntuj npoo ntiaj teb kawg hwm nws ntshai nws!

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

As Les Lus Yas: MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
vim lub Ceeb Tsheej saum ntuj yog lawv tug.

Txais: As les lus yas, as les lus yas.

Ntawv Moo Zoo: MT 14: 1-12

1 Lub caij ntawd, Yes Xus lub moo nrov ncha mus txog vaj txheeb Hes Los pob ntseg.
2 Ces Hes Los hais rau nws cov tub txib tias: "Tus ntawd yog Zam Ntxuav Plig! Nws sawv hauv cov tuag rov los lawm; vim li ntawd cov hwj huam yees ntxwv thiaj ua hauj lwm nyob hauv nws. “
3 Vim tias Hes Los tau ntes Zam thiab muab Zam khi coj mus kaw rau hauv tsev loj faj, los ntawm qhov tias Hes Los Dias yog Hes Los tij laug Fis Lis Pos tus poj niam.
4 Ces Zam hais rau Hes Los tias: "Koj tsis muaj cai yuav tus poj niam ntawd."
5 Hes Los twb xav muab Zam tua, tab sis nws ho ntshai tsoom pej xeem, vim sawv daws saib Zam yog ib tug yaj saub.
6 Ua li mas, thaum txog hnub tsuj xeeb Hes Los hnub yug, Hes Los Dias tus ntxhais tuaj dhia seev cev rau sawv daws saib, nws dhia tau ntxim Hes Los siab kawg.
7 Hes Los thiaj cog lus tias nws yuav pub yam tus ntxhais thov rau nws.
8 Leej niam cob tus ntxhais, ces tus ntxhais hais tias: "Thov koj muab Zam Ntxuav Plig lub taub hau txawb hauv ib lub phaj nqa los rau kuv ntawm no."
9 Tus vaj tu siab thiab mluas kiag, tab sis vim nws tau cog lus lawm, thiab vim cov qhua tuaj koom rooj qav, mas tus vaj thiaj txib kom lawv ua raws li tus ntxhais tau thov.
10 Tus vaj xa neeg mus txiav Zam caj dab hauv tsev loj faj.
11 Lawv muab Zam lub taub hau txawb hauv ib lub phaj nqa los cev rau tus ntxhais; tus ntxhais nqa mus cev rau nws niam.
12 Zam cov thwj tim tuaj nqa Zam lub cev mus faus. Ces lawv mus hais qhia rau Yes Xus paub.

Tim 2 lub 8 Hli 2021

Hnub Ob Lis Piam Kaum Yim Nruab Xyoo B Nruab Lis Piam Xyoo I
Lectionary: 407

XHLT: LN Eusebius nyob Vercelli, ua Tswv Qhia; los LN Peter Julian Eymard, ua Leej Choj

Zaj Nyeem Ib: XP 11: 4b-15

4b Cov His Xas Lais rov quaj quaj tias: "Kheev lam peb muaj nqaij noj mas!
5 Ua cas peb yuav nco tej nqaij ntses uas peb tau noj dawb nyob Hais Nkws Tos teb ua luaj! Nco tej dib ntsuab, tej dib pag, tej zaub, tej dos tej qij tib si!
6 Nyem no ces peb lub zog ntaug zuj zus, peb ntsia qhov twg los tsis muaj dab tsi tsuas pom mov Mas Nas xwb!"
7 Cov Mas Nas ntawd ua tej lub zoo li noob zaub txhwb qaib, daw lam lam li ib co txab ntoo.
8 Thaum tsoom pej xeem mus ncig khaws Mas Nas los txog, lawv xuas zeb zom los muab tuav hauv tshuaj khib, ces lawv muab hau rau hauv lauj kaub, lawv mam muab puab ua ncuav noj. Cov ncuav Mas Nas qab li ncuav xyaw roj.
9 Hmo ntuj, thaum lwg poob los, cov Mas Nas kuj nrog lwg poob los thiab.
10 Mais Xes hnov tsoom pej xeem quaj quaj, nyias quaj ntawm nyias lub qhov rooj tsev tsam phooj; lawv ua rau HUAB TAIS npau taws heev, hos Mais Xes tu siab kawg nkaus.
11 Mais Xes nug HUAB TAIS tias: "Vim li cas koj ua nyuaj li no rau koj tus tub txib? Vim koj saib kuv tsis xis koj siab los ua cas koj thiaj muab lub nra saib tas koj haiv neeg huv si rau kuv ris?
12 Puas yog kuv tau xeeb haiv neeg no, los tau yug lawv los? Ua cas koj thiaj hais rau kuv tias: 'Koj puag haiv neeg no rau ntawm koj xub ntiag xws li leej niam pub mis puag tus me nyuam noj mis,’ mus kom txog lub teb chaws uas koj tau cog lus muab rau lawv cov yawg koob?
13 Kuv yuav muab nqaij qhov twg los rau tas cov neeg no noj? vim lawv quaj tsis tseg rau kuv tias: ‘Koj muab nqaij rau peb noj!’
14 Kuv ib leeg ris tsis taus haiv neeg no li, lawv hnyav dhau rau kuv lawm.
15 Yog koj ua nyuaj kuv li no, thov koj ua siab zoo muab kuv tua kom tuag zoo dua, kom kuv thiaj tsis tau ntsib txoj kev ntxhov siab no ntxiv lawm!"

NPN 81: 12-13, 14-15, 16-17

Txais: (2a) Nej qw zoo siab rau Tswv Ntuj, tus uas pab peb.

Kuv haiv neeg tsis mloog kuv lub suab,
His Xas Lais tsis xav mloog kuv lus.
Kuv thiaj tso lawv ua raws lawv lub siab cam thawj;
ces lawv thiaj mus raws li lawv lub siab ntshaw.

Txais: (2a) Nej qw zoo siab rau Tswv Ntuj, tus uas pab peb.

Kheev lam kuv haiv neeg mloog kuv lus mas,
thiab His Xas Lais mus raws kuv txoj kev mas,
Tam sis ntawd kuv yuav txo lawv cov yeeb ncuab kom swb tas,
kuv yuav tig kuv txhais tes mus ntaus cov neeg ntxub lawv.

Txais: (2a) Nej qw zoo siab rau Tswv Ntuj, tus uas pab peb.

Cov uas ntxub HUAB TAIS lam ua txuj qhuas kuv,
Tiam sis lawv txoj hmoov phem yuav nyob mus li .
Kuv yuav muab cov hmoov nplej qab tshaj los yug His Xas Lais,
Yuav muab zib ntab zib mu saum tsua los rau lawv noj kom txaus siab.

Txais: (2a) Nej qw zoo siab rau Tswv Ntuj, tus uas pab peb.

As Les Lus Yas: MT 4: 4

Txais: As les lus yas, as les lus yas.

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo: MT 14: 13-21

13 Thaum Yes Xus hnov tias Zam Ntxuav Plig tuag lawm, nws caij nkoj mus rau ib qhov chaw xu kev, kom tau nyob ib leeg. Zeej tsoom hnov, lawv tawm hauv tej nroog mus ko taw raws nws qab.
14 Thaum Yes Xus nqes nkoj, nws pom ib pab neeg coob coob, ces nws hlub lawv ; nws kho lawv cov neeg uas muaj mob muaj nkeeg kom zoo hlo.
15 Yav yuav tsaus ntuj, cov thwj tim txav los hais rau nws tias: "Thaj tsam no, tsis muaj neeg nyob, thiab lig lawm; koj tso tsoom neeg mus tsev kom lawv tau kev mus muas mov noj hauv tej zos."
16 Yes Xus teb rau lawv tias: "Tsis tas lawv yuav mus qhov twg li, nej yog cov yuav muab mov rau lawv noj."
17 Cov thwj tim hais rau Yes Xus tias: “Ntawm no, peb tsuas muaj tsib lub ncuav mov thiab ob tug ntses xwb.”
18 Yes Xus hais tias: "Nej nqa los rau kuv."
19 Ces Yes Xus hais kom sawv daws xyab zaum saum tej nroj tsuag, nws tuav tsib lub ncuav mov thiab ob tug ntses, nws tsa muag ntsia saum ntuj, nws hais zaj foom hmoov zoo, nws muab cov ncuav mov ntais, nws cev rau cov thwj tim, kom lawv muab rau sawv daws.
20 Tas sawv daws tau noj tsau txaus siab npo, lawv tseem khaws tej mov seem tau puv kaum ob tawb!
21 Cov neeg tau noj mov ntawd muaj ze ntawm tsib txhiab leej txiv neej, tsis xam poj niam me nyuam li.

Tim 3 lub 8 Hli 2021

Hnub Peb Lis Piam Kaum Yim Nruab Xyoo B Nruab Lis Piam Xyoo I
Lectionary: 408

Zaj Nyeem Ib: XP 12: 1-13

1 Mis Lias thiab As Loos nkawd yws yws txog Mais Xes, vim Mais Xes poj niam yog ib tug neeg Kus Sis uas nws tau yuav.
2 Nkawd yws tias: "HUAB TAIS puas hais lus rau Mais Xes ib leeg xwb? Nws tsis hais lus rau wb thiab lod?" Ces HUAB TAIS hnov.
3 Mais Xes yog ib tug neeg uas nyiam ua neeg me tshaj txhua leej hauv lub ntiaj teb no.
4 Ib sij huam, HUAB TAIS hais rau Mais Xes, As Loos thiab Mis Lias lawv tias: "Nej peb leeg tuaj tom lub Tsev Tsam Phooj Sib Ntsib." Ces lawv peb leeg mus.
5 HUAB TAIS nrog twv huab nqes los nyob ze ntawm lub qhov rooj Tsev Tsam Phooj. Nws hu As Loos thiab Mis Lias nkawd, ces nkawd ob leeg txav mus.
6 HUAB TAIS hais tias: "Neb mloog kuv cov lus no: Yog muaj ib tug yaj saub nyob hauv nej, mas kuv cia nws ua yog toog pom kuv, kuv hais lus rau nws nyob hauv npau suav xwb.
7 Tiam sis kuv tsis ua li ntawd rau kuv tus tub txib Mais Xes; nyob hauv kuv tas kuv lub tsev, nws yog tus kuv tso siab rau.
8 Kuv nrog nws hais lus tim ntsej tim muag kiag, kuv hais lus tseeb, tsis ua paj lug hais rau nws, nws tau pom kiag HUAB TAIS tus ntsuj. Vim li cas neb thiaj muaj cuab kav hais lus thuam kuv tus tub txib Mais Xes?"
9 HUAB TAIS npau taws rau nkawd heev, ces nws rov mus lawm.
10 Thaum twv huab ploj ntawm lub Tsev Tsam Phooj lawm, Mis Lias cia li mob ruas, nws ib ce dawb paug cuag daus. As Loos tig mus ntsia nws, As Loos pom nws twb mob ruas lawm.
11 As Loos hais rau Mais Xes tias: "Kuv tus tswv, thov koj txhob muab txim rau wb qhov txhaum uas wb tsis tau ua zoo xav, wb cia li ua lawm.
12 Thov koj tsis txhob cia nws zoo li ntawd, xws li tus me nyuam tuag hauv nws niam plab, uas thaum nws nchuav tawm los nws tej nqaij twb lwj tas ib nrab lawm."
13 Ces Mais Xes thiaj thov HUAB TAIS tias: "Tswv Ntuj aw, Kuv thov koj, thov koj kho nws kom nws zoo mas!"

NPN 51: 3-4, 5-6ab, 6cd-7, 12-13

Txais: (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab muab kuv qhov txhaum tshem mus kom kuv dawb huv tuaj.

Txais: (3a) HUAB TAIS, thov koj khuv leej peb vim peb tau ua txhaum lawm.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
Kuv tau ua txhaum rau koj ib leeg xwb,
kuv tau ua qhov uas koj saib yog qhov phem.”

Txais: (3a) HUAB TAIS, thov koj khuv leej peb vim peb tau ua txhaum lawm.

Kom neeg pom koj txoj kev ncaj thaum koj hais lus,
thaum koj txiav txim, neeg thuam tsis tau.
Koj ntsia, thaum kuv yug los kuv yeej muaj txim,
thaum kuv niam xeeb kuv, kuv yeej muaj txhaum.

Txais: (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (3a) HUAB TAIS, thov koj khuv leej peb vim peb tau ua txhaum lawm.

As Les Lus yas: ZAM 1: 49b

Txais: As les lus yas, as les lus yas.

Las Npis, koj yog Tswv Ntuj Leej Tub,
Koj yog His Xas Lais tus Vaj.

Txais: As les lus yas, as les lus yas.

Ntawv Moo Zoo: MT 14: 22-36

22 Yes Xus txhib cov thwj tim kom nce nkoj ua nws ntej mus lawm sab ntug dej tim ub, hos nws nyob xa tsoom sid rov qab.
23 Thaum Yes Xus xa zeej tsoom rov qab mus tas lawm, nws nce mus saum roob rau ib qho xu kev, ces nws teev Ntuj. Thaum tsaus ntuj, tshuav nws tib leeg xwb.
24 Lub nkoj twb mus deb ntawm ntug nqhuab lawm ntau ntsua muag. Dej nphau nphwv tuaj nplawm lub nkoj, vim cua tshuab tom hauv ntej tuaj.
25 Thaum lub caij ntu plaub yav yuav kaj ntug, Yes Xus mus caum cov thwj tim, nws mus ko taw saum nplaim dej.
26 Lawv pom Yes Xus mus ko taw saum dej ntuj, lawv ib ce xob tas, lawv hais tias: "Yog poj ntxoog". Lawv ntshai kawg, ces lawv qw qw.
27 Tam sis ntawd Yes Xus hais rau lawv tias: "Nej tso siab mas! Yog kuv, nej xhob ntshai."
28 Pob Zeb teb rau Yes Xus tias: "Huab Tais, yog koj tiag no, koj hais kom kuv tsuj nplaim dej tuaj cuag koj."
29 Yes Xus teb tias: "Tuaj mas!" Ces Pob Zeb nqes nkoj tso ko taw tsuj saum nplaim dej mus cuag Yes Xus.
30 Tab sis nws pom cua hlob, nws ntshai, ces nws pib tog hauv dej, nws qw tias: "Huab Tais, cawm kuv mas!"
31 Yes Xus cev tes tam sis ntawd tuav Pob Zeb, nws hais rau Pob Zeb tias: "Neeg ntseeg tsawg, ua cas koj ua xyem xyav?"
32 Thaum Yes Xus nkawd nce hlo rau hauv nkoj, ces cua tu nrho.
33 Cov nyob hauv nkoj txhos caug zom zaws pe Yes Xus, lawv hais tias: "Koj yog Tswv Ntuj Leej Tub tiag!"
34 Thaum lawv hla dhau de lawm, lawv mus nqes nkoj rau ntawm Nkes Nes Xas Les.
35 Cov neeg nyob txawm ntawd cim tau Yes Xus, ces lawv mus qhia rau ib thaj tsam ntawd paub. Sawv daws coj lawv cov neeg mob tuaj rau Yes Xus.
36 Lawv thov Yes Xus kom nws cia cov neeg mob chwv nws tus tw tsho xwb; ces txhua tus uas tau chwv, puav leej dim ntawm lawv tus mob.

Los: MT 15: 1-2, 10-14

Yog tej xyoo uas zaj saum toj no twb raug nyeem hnub ua ntej lawm, ces yuav xaiv nyeem zaj nram no:

1 Ib co Fas Lis Xais thiab ib co Kws Ntawv Ntshiab nyob Yes Lus Xas Les tuaj cuag Yes Xus, lawv hais rau nws tias:
2 "Vim li cas koj cov thwj tim hla cov yawg koob tej kab kev lis kev cai? Vim thaum lawv noj mov, lawv tsis xub ntxuav tes tso."
10 Yes Xus hu tsoom sid kom txav los ze nws. Nws hais rau lawv tias: "Nej mloog kom nej to taub.
11 Tsis yog tej yam nkag hauv lub ncauj mus ua kom tus neeg tsis huv, tiam sis yog tej yam uas tawm hauv lub ncauj los ua kom tus neeg tsis huv."
12 Cov thwj tim txav los ze Yes Xus, lawv hais tias: "Koj puas paub tias cov Fas Lis Xais hnov koj hais li ntawd, mas lawv tsis txaus siab?"
13 Yes Xus teb tias: "Tus yub nroj twg tsis yog kuv Txiv nyob saum ntuj cog, mas yuav muab dob pov tseg.
14 Cia lawv chim lawv: lawv yog ib co neeg dig muag coj ib pab dig muag kev. Yog ib tug dig muag coj lwm tus dig muag kev, mas nkawd ob leeg yuav ua ke mus poob qho xwb."

Tim 4 lub 8 Hli 2021

Hnub Plaub Lis Piam Kaum Yim Nruab Xyoo B Nruab Lis Piam Xyoo I
Lectionary: 409

Yuav Hwm LN John Vianney, ua Leej Choj

Zaj Nyeem Ib: XP 13: 1-2, 25–14:1, 26-29a, 34-35

1 HUAB TAIS hais rau Mais Xes [nyob hauv lub suab puam Pas Las] tias:
2 "Koj xa ib co neeg mus soj ntsuam Kas Nas Has teb, lub teb chaws uas kuv muab rau His Xas Lais cov tub ki mus nyob. Koj xa cov thawj coj, ib lub xeem ib tug mus."
25 Lawv mus soj ntsuam lub teb chaws tau plaub caug hnub, ces lawv rov qab los txog.
26 Lawv mus cuag Mais Xes, As Loos, thiab tsoom His Xas Lais nyob hauv lub hav suab puam Pas Las, nyob ntawm Kas Des. Lawv coj ib co lus los piav qhia rau Mais Xes lawv thiab rau tas tsoom pej xeem mloog, lawv muab tej txiv hmab txiv ntoo uas lawv nqa tau los rau sawv daws saib.
27 Lawv hais rau Mais Xes tias: "Peb mus txog lub teb chaws uas koj xa peb mus xyuas. Yog ib lub teb chaws uas mis nyuj thiab zib ntab zib mu ntws lug; ntawm no yog lub teb chaws tej txiv hmab txiv ntoo.
28 Tab sis haiv neeg nyob hauv lub teb chaws ntawd tsiv kawg nkaus; lawv tej nroog xov ntsa zeb ntsa tsua, thiab khov kawg li. Peb tseem tau pom As Nas Kis cov xeeb ntxwv huv si thiab.
29 Cov neeg As Mas Les Kis nyob hauv lub xeev Nes Zes; cov neeg His Tis, cov Yes Npus Xis , thiab cov As Mos Lis lawv nyob pem cov toj roob, hos cov neeg Kas Nas Has nyob raws ntug hiav txwv thiab raws tus ntug dej Yos Las Das."
30 Kas Les thiaj hais lus rau tsoom pej xeem uas yws yws rau Mais Xes, nws hais tias: "Peb yuav tsum sawv kev mus, peb mus ntaus kom tau lub teb chaws, peb muaj peev xwm ua tau xwb."
31 Tiam sis cov txiv neej uas tau nrog nws mus, teb tias: "Peb yuav ntaus tsis yeej haiv neeg ntawd li, vim lawv muaj zog tshaj peb."
32 Ces lawv hais ib co lus hem txog lub teb chaws uas lawv tau mus soj ntsuam rau cov His Xas Lais, lawv hem tias: "Lub teb chaws uas peb mus soj ntsuam mas yog ib lub teb chaws noj neeg. Cov neeg peb tau pom mas txhua tus yog neeg loj loj siab siab xwb.
33 Peb tau pom kiag As Nas Kis cov tub, uas yog caj ces neeg loj loj cov xeeb ntxwv. Peb muab peb piv rau lawv mas peb zoo nkaus li ib co kooj xwb, lawv los ntshai lawv yeej saib peb zoo li ntawd thiab xwb."
14: 1 Ces tas tsoom pej xeem tsa suab yws, lawv nthe zom zaws nrov nrov. Hmo ntawd tas haiv neeg quaj ib hmos.
26 Huab Tais hais rau Mais Xes thiab As Loos tias:
27 “Tsav neeg phem no yuav yws yuav cem kuv mus txog thaum twg? Kuv hnov cov His Xas Lais tej lus yws lus cem kuv lawm.
28 Koj hais rau lawv tias: ‘Huab Tais hais li no: Ntawm kuv txoj sia, kuv yuav ua rau nej raws nraim li nej cov lus uas nej tau hais rau kuv pob ntseg hnov lawm.
29a Nej cov pob txha yuav raug tso tseg nyob hauv lub teb chaws suab puam no.
34 Nej tau mus soj ntsuam lub teb chaws tau plaub caug hnub, nej yuav tau raus txom nyem vim nej lub txim txhaum kom puv plaub caug xyoo, ib hnub muab suav ua ib xyoos, nej thiaj yuav paub hais tias yog nej tsis yuav li kuv hais ces nej yuav zoo li cas.
35 Kuv Huab Tais tau hais lawm, kuv yuav ua raws li ntawd rau tas tsoom neeg phem uas tuaj sib sau yws txog kuv no. Nyob hauv thaj suab puam no, lawv yuav tsum xaus lawv lub neej, lawv yuav tsum tuag kom tas mus.”

NPN 106: 6-7ab, 13-14, 21-22, 23

Txais: (4a) Huab Tais, thov koj nco txog peb, vim koj hlub koj haiv neeg.

Peb tau ua txhaum ib yam li peb phaj txiv,
Peb ncaim ntawm koj txoj kev, peb tau ua qhov phem.
Nyob Hais Nkws Tos teb, peb phaj txiv tsis
saib koj cov hwj huam yees ntxwv muaj nqes.

Txais: (4a) Huab Tais, thov koj nco txog peb, vim koj hlub koj haiv neeg.

Tau tsis ntev, lawv twb tsis nco qab nws tej hwj huam lawm,
lawv tsis tos mloog nws zaj tswv yim nws tej lus li.
Nyob teb chaws suab puam, lawv ntshaw noj ntshaw haus,
lawv sim Tswv Ntuj nyob ntawm thaj chaw av nkig teb do.

Txais: (4a) Huab Tais, thov koj nco txog peb, vim koj hlub koj haiv neeg.

Lawv tsis nco qab tus Tswv Ntuj uas tau cawm lawv,
tus tau ua tej yam loj nyob Hais Nkws Tos teb ,
tus tau ua tej yam hwj huam txaus qhuas nyob Haas teb,
tus tau ua tej yam txaus ntshai nyob ntawm Dej Ntuj Liab.

Txais: (4a) Huab Tais, thov koj nco txog peb, vim koj hlub koj haiv neeg..

Nws tau hais tias nws yuav ua kom lawv tuag tu noob
tab sis Mais Xes, tus uas nws xaiv,
tau sawv lawv chaw thov nws nrog nws hais,
kom nws tso nws lub siab npau taws uas xav txo lawv tseg.

Txais: (4a) Huab Tais, thov koj nco txog peb, vim koj hlub koj haiv neeg.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo: MT 15: 21-28

21 Yes Xus tawm ntawm qhov chaw ntawd mus, nws mus rau thaj tsam Tws Los thiab Xis Doos teb.
22 Muaj ib tug poj niam Kas Nas Has nyob hauv teb chaws ntawd tuaj. Nws hu nrov nrov tias: "Huab Tais, Das Vis Leej Tub, thov koj khuv leej kuv! Kuv tus ntxhais raug ib tug dab phem uas tsim txom nws heev kawg."
23 Yes Xus tsis teb ib los li. Cov thwj tim txav los hais tias: "Koj muab nws ntiab khiav mus, vim nws pheej hu nrov nrov tsis tseg lawv peb qab."
24 Yes Xus teb rau lawv tias: "Kuv raug xa tuaj cawm cov yaj ploj hauv His Xas Lais tsev neeg xwb."
25 Tab sis tus poj niam twb tuaj txog lawm, nws txhos caug ntua pe Yes Xus, nws thov tias: "Huab Tais, thov koj pab kuv!"
26 Yes Xus teb rau nws tias: "Tsis phim muab me nyuam tej mov pov rau cov me nyuam dev noj."
27 Tus poj niam teb tias: "Huab Tais, li ntawd los cov me nyuam dev tseem tau noj tej tsig mov txeej ntawm lawv tus tswv lub rooj los thiab."
28 Ces Yes Xus teb rau nws tias "Tus poj niam, koj txoj kev ntseeg loj kawg! Kom koj tau raws li koj lub siab xav." Ces nws tus ntxhais zoo hlo txij lub caij ntawd mus lawm.

Tim 5 lub 8 Hli 2021

Hnub Tsib Lis Piam Kaum Yim Nruab Xyoo B Nruab Lis Piam Xyoo I
Lectionary: 410

XHLT: Nco txog Hnub Thov Ntuj Qhib lub Tuam Tsev Teev Ntuj St Mary Major nyob Los Mas

Zaj Nyeem Ib: XP 20: 1-13

1 Lub ib hlis, tas His Xas Lais tsoom tub ki sawv daws los txog lub teb chaws suab puam Xees. Lawv los tsa tsev nyob Kas Des. Thaum lawv los txog ntawd, ces Mis Lias tuag, lawv muab nws faus rau ntawd.
2 Tsoom neeg sawv daws tsis tau dej haus, ces lawv koom siab tuaj ib tog cem Mais Xes thiab As Loos nkawd.
3 Lawv tuaj nrog Mais Xes si cav tias: "Kheev peb lam tau nrog peb cov kwv tij tuag thaum lawv tuag nyob ntawm HUAB TAIS xub ntiag mas!
4 Vim li cas koj thiaj coj HUAB TAIS pab neeg los nyob hauv lub suab puam no kom peb thiab peb cov tsiaj tuag tad?
5 Vim li cas koj thiaj coj peb tawm hauv Hais Nkws Tos teb los nyob thaj chaw phem no? Tsis zoo cog qoob, cog txiv cev, cog hmab txiv cawv, los cog txiv ntsiav kw li, twb tsis muaj dej haus li thiab!"
6 Mais Xes thiab As Loos nkawd ncaim ntawm cov neeg mus nyob ntawm lub qhov rooj Tsev Tsam Phooj Sib Ntsib. Nkawd txhos caug ntua khoov ntsej muag pe ti av, ces HUAB TAIS lub hwj chim tawm tuaj rau nkawd pom.
7 HUAB TAIS hais rau Mais Xes tias:
8 "Koj nqa koj rab pas nrig, ces koj thiab As Loos koj tij laug neb yuav nqua hu tsoom pej xeem kom tuaj sib sau ua ke, ces koj yuav hais lus rau phab tsua no rau lawv ntsia ntsoov, kom phab tsua cia li txhawv dej los. Ces koj yuav ua tau kom dej tawm hauv phab tsua los rau lawv haus. Koj yuav muab rau tsoom pej xeem thiab rau lawv cov tsiaj haus."
9 Mais Xes thiaj muab nws tus pas nrig tawm ntawm nws qhov chaw ntawm HUAB TAIS xub ntiag los raws li HUAB TAIS kom ua.
10 Mais Xes thiab As Loos nkawd hu tas tsoom pej xeem tuaj sawv nyob ntawm hauv ntej ntawm phab tsua, ces Mais Xes hais rau lawv tias: "Cov neeg ntxeev siab, nej mloog mog. Peb puas yuav ua tau kom dej txhawv hauv phab tsua no los rau nej haus?"
11 Ces Mais Xes tsa nws txhais tes, nws muab nws rab pab nplawm phab tsua ob nplawg: Dej txhawv ntws lug tawm los, txaus rau tas tsoom pej xeem thiab lawv cov tsiaj haus.
12 HUAB TAIS hais rau Mais Xes thiab As Loos tias: "Vim neb tsis ntseeg kuv, tsis ua kom His Xas Lais tsoom tub ki pom tias kuv ntshiab tiag, mas neb yuav tsis tau coj tsoom neeg ntawd mus tsuj lub teb chaws uas kuv muab rau lawv nyob."
13 Cov dej ntawd yog cov dej nyob Mes Lis Npas, vim nyob ntawd cov His Xas Lais ntxeev siab rau HUAB TAIS, ces HUAB TAIS muab nws txoj kev ntshiab rau lawv pom.

NPN 95: 1-2, 6-7, 8-9

Txais: ( 8 ) Hnub no yog nej hnov nws lub suab, nej tsis txhob ua nej lub siab tawv ncauj.

Nej tuaj peb hu nkauj luag ntxhi rau HUAB TAIS,
peb qw suab cav txog lub Tsua Cawm peb.
Peb tuaj nyob ntawm nws xub ntiag ua nws tsaug,
peb hu nkauj paj nruag luag ntxhi rau nws.

Txais: ( 8 ) Hnub no yog nej hnov nws lub suab, nej tsis txhob ua nej lub siab tawv ncauj.

Tuaj peb mus khoov pe hawm nws,
peb mus txhos caug ntawm tus HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws saib xyuas, pab yaj nws coj.

Txais: ( 8 ) Hnub no yog nej hnov nws lub suab, nej tsis txhob ua nej lub siab tawv ncauj.

Xav kom hnub no nej mloog nws lus suab hais:
“Nej tsis txhob ua lub siab tawv ncauj li nyob Mes Lis Npas,
thaum lub caij uas nyob Mas Xas hauv teb chaws suab puam,
qhov chaw uas nej phaj txiv tau sim kuv;
lawv twb tau pom kuv tej hauj lwm los lawv tseem sim kuv thiab.”

Txais: ( 8 ) Hnub no yog nej hnov nws lub suab, nej tsis txhob ua nej lub siab tawv ncauj.

As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, kuv yuav txhim kuv lub Koom Txoos rau saum lub pob zeb no.
Dab phem teb cov qhov rooj yuav tiv tsis taus lub pob zeb no.

Txais: As les lus yas, as les lus yas.

Ntawv Moo Zoo: MT 16: 13-23

13 Yes Xus tuaj txog cheeb tsam ntawm Xes Ntxas Les Fis Lis Pos, ces nws nug cov thwj tim li no: "Luag tej hais tias Neeg Leej Tub yog leej twg?"
14 Lawv teb tias: “Ib txhia hais tias yog Zam Ntxuav Plig. Ib txhia hais tias yog Es Lias. Tseem muaj lwm cov hais tias yog Yes Les Mias los yog ib tug hauv cov yaj saub.” Yes Xus hais rau lawv tias:
15 "Nej ne, nej hais tias kuv yog leej twg?"
16 Xis Moos Pob Zeb teb tias: "Koj yog Leej Pleev, yog tus Tswv Ntuj Muaj Txoj Sia Leej Tub."
17 Yes Xus teb rau Pob Zeb tias: "Xis Moos, Yos Nas tub, koj txoj hmoov zoo, vim tsis yog nqaij thiab ntshav qhia rau koj paub. Yog kuv Txiv nyob saum ntuj qhia rau koj.
18 Ua li mas kuv hais rau koj: Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb cov qhov rooj yuav tiv tsis taus lub pob zeb no.
19 Kuv yuav muab lub Ceeb Tsheej saum ntuj cov yawm sij rau koj tuav. Koj khi yam twg nyob ntiaj teb no, mas yam ntawd kuj yuav raug khi nyob saum ntuj. Koj daws yam twg nyob ntiaj teb no mas yam ntawd kuj yuav raug daws nyob saum ntuj."
20 Ces Yes Xus txwv cov thwj tim nruj tsis pub qhia leej twg paub tias nws yog Leej Pleev.
21 Txij hnub ntawd los, Yes Xus pib qhia rau nws cov thwj tim tias nws yuav tsum mus pem Yes Lus Xas Les, nws yuav raug kev txom nyem loj los ntawm cov txwj laus, cov thawj leej choj thiab cov Kws Ntawv Ntshiab. Nws yuav raug luag muab tua; hnub peb, nws yuav sawv rov los.
22 Pob Zeb rub Yes Xus mus rau ib qho, nws hais rau Yes Xus tias: "Huab Tais, kom Tswv Ntuj txuag koj! Tsis pub kom tej yam ntawd tuaj raug koj!"
23 Tab sis, Yes Xus tig los hais rau Pob Zeb tias: "Xas Tas, koj lawv kuv qab. Koj thaiv kuv kev. Koj tsis xav li Tswv Ntuj xav, koj xav li neeg xav xwb.”

Tim      6      lub      8      Hli      2021

Hnub Rau Lis Piam Kaum Yim Nruab Xyoo B Nruab Lis Piam Xyoo I

Nco txog Yes Xus lub Hwj Chim tawm los rau nws cov Thwj Tim Pom
Lectionary: 614

Zaj Nyeem Ib:        DN  7:   9-10, 13-14

9 Kuv ntsia ntsoov pom luag muab ib co theej kiab los txawb rau ntawd,
ces tus Laus Hnub Nyoog Nchav los zaum saum nws lub theej kiab.
Nws cov ris tsho dawb paug cuag daus, nws cov plaub hau saum taub hau dawb paug cuag plaub yaj.
Nws lub theej kiab yog nplaim taws, muaj ib co log yog hluav taws.
10 Muaj ib tug dej hluav taws txhawv ntws lug ntawm qhov chaw nws zaum ntawm nws xub ntiag los.
Txhiab txhiab leej tsob hwb nws tiam nws, vam vam leej sawv nyob ntawm nws xub ntiag.
Ces lawv qhib lub rooj txiav txim, tej ntaub ntawv twb nthuav tas lawm.
13 Hmo ntuj kuv tseem yees pom ntxiv zoo li no:
Muaj ib tug tuaj saum cov huab saum ntuj tuaj, nws zoo xws li neeg leej tub;
nws los rau ntawm tus Laus Hnub Nyoog Nchav, ces lawv coj nws los qhia rau tus Laus.
14 Ces nws txais lub hwj huam kav, lub koob meej thiab kev ua vaj.
Tas txhia haiv neeg, txhia lub kuj cuab, txhia xeem lus yuav tsob hwb nws.
Nws lub hwj huam kav yog ib lub hwj huam nyob mus li, yuav tsis txawj dua mus
Nws txoj kev ua vaj yuav tsis raug leej twg muab rhuav.

NPN        97:   1-2, 5-6, 9

Txais: (1a+9a) Huab Tais ua vaj, nws yog tus loj tshaj kav tas lub ntiaj teb.

HUAB TAIS yog vaj ntxwv, lub ntiaj teb yuav zoo siab;
ntau lub pov txwv yuav luag ntxhi.
Cov huab thiab qhov tsaus nyob puag ncig nws,
kev ncaj ncees thiab kev txiav txim
yog lub taw ntsa txheem nws lub theej kiab.

Txais: (1a+9a) Huab Tais ua vaj, nws yog tus loj tshaj kav tas lub ntiaj teb.

Cov roob yaj tas xws li ciab ntab yaj nyob ntawm Huab Tais xub ntiag,
ntawm tus HUAB TAIS kav tas lub ntiaj teb xub ntiag.
Cov txheej ntuj cav txog nws txoj kev ncaj ncees,
tas txhua haiv neeg pom nws lub hwj chim.

Txais: (1a+9a) Huab Tais ua vaj, nws yog tus loj tshaj kav tas lub ntiaj teb.

Vim koj HUAB TAIS yog tus nyob siab tshaj saib tas lub ntiaj teb.
koj loj tshaj tas ib tsoom tswv ntuj.

Txais: (1a+9a) Huab Tais ua vaj, nws yog tus loj tshaj kav tas lub ntiaj teb.

Zaj Nyeem Ob:        2 PZ  1:   16-19

Cov zoo nyiad:
16 Peb tsis tau qhia raws li tej zaj dab neeg uas neeg lub tswv yim ntse tau xev, thaum peb tuaj qhia nej kom nej paub txog peb tus Huab Tais Yes Xus Pleev lub hwj huam thiab nws txoj kev tuaj nrog peb nyob, vim peb yog ib co tim khawv tau pom xyeem nws lub hwj chim ntawm peb qhov muag.
17 Leej Pleev tau txais koob meej thiab hwj chim ntawm Leej Txiv Tswv Ntuj los; muaj kev qhia meej txog qhov ntawd yog hnub uas lub suab muaj hwj xyeej nrov tuaj txog nws tias: “Tus no yog kuv Leej Tub, tus kuv nyiam, nws ua ntxim kuv lub siab tas nrho.”
18 Lub suab ntawd, peb tau hnov nrov saum ntuj tuaj, hnub uas peb nrog Yes Xus nyob saum lub roob ntshiab.
19 Peb kuj tseem muaj cov Yaj Saub tej lus uas yog ib co lus tsim nyog ntseeg. Nej yuav tsum mob siab txog tej lus ntawd thiab, uas yog ib co lus zoo li ib lub teeb ci hauv qhov tsaus ntuj rau nej, mus txog thaum lub hnub tawm tuaj thiab lub hnub qub kaj ntug ci tuaj rau hauv nej nruab siab lawm.

As Les Lus Yas:        MT  17:   5c

Txais: As les lus yas, as les lus yas.

"Tus no yog kuv Leej Tub uas kuv nyiam, nws yog kuv qhov chaw zoo siab,
nej cia li mloog nws hais.

Txais: As les lus yas, as les lus yas.

Ntawv Moo Zoo:         LK  9:   28b-36

28b Yes Xus coj Pob Zeb, Zam, thiab Yas Kos nrog nws, ces nws nce mus teev Ntuj saum roob.
29 Thaum Yes Xus teev Ntuj, nws lub ntsej muagcia li hloov, nws cev ris tsho dawb paug ci ntsa iab tuaj.
30 Txawm muaj ob tug neeg nrog Yes Xus tham, yog Mais Xes thiab Es Lias nkawd.
31 Nkawd tawm los muaj hwj chim, nrog Yes Xus tham txog nws txoj kev yuav ncaim mus uas yuav tshwm sim nyob Yes Lus Xas Les.
32 Pob Zeb thiab cov nrog nws qaug dab ntub kawg nkaus, tab sis thaum lawv tsim meej lawm, lawv pom Yes Xus lub hwj chim thiab pom ob tug neeg uas sawv nrog Yes Xus ua ke.
33 Thaum ob tug ntawd yuav ncaim ntawm Yes Xus mus, Pob Zeb hais rau Yes Xus tias: "Xib Hwb, peb nyob ntawm no mas zoo kawg li! Cia peb tsa peb lub tsev tsam phooj, ib lub rau koj, ib lub rau Mais Xes, thiab ib lub rau Es Lias." Pob Zeb tsis paub tias nws hais dab tsi li.
34 Thaum Pob Zeb tab tom hais li ntawd, txawm muaj ib twv huab tuaj ua ntxoov ntxoo vov nkaus lawv. Thaum lawv nkag mus rau hauv twv huab, lawv ntshai kawg.
35 Muaj ib lub suab nrov hauv twv huab tuaj tias: "Tus no yog kuv Leej Tub, yog tus kuv hlub, nej mloog nws lus mog."
36 Thaum lub suab hais li ntawd tas, tshuav Yes Xus tib leeg lawm xwb. Lub caij ntawd, cov thwj tim ua twj ywm tsis qhia dab tsi rau leej twg txog qhov uas lawv tau pom li.

Tim     7     lub     8     Hli     2021

Hnub Xya Lis Piam Kaum Yim Nruab Xyoo B Nruab Lis Piam Xyoo I
Lectionary: 412

XHLT:   LN Sixtus II, Vaj Qhia tuag ua Tim KHawv, thc...; LN Cajetan, ua Leej Choj

Zaj Nyeem Ib:    TCO 6: 4-13

Mais Xes hais rau tsoom pej xeem tias:
4 His Xas Lais, nej mloog mas: HUAB TAIS yog peb tus Tswv Ntuj, nws ib leeg xwb.
5 Li ntawd, nej yuav nyiam HUAB TAIS, nej tus Tswv Ntuj, kom tas nej siab ntsws, nej tus ntsuj plig thiab nej lub zog.
6 Nej yuav khaws cov lus uas kuv hais rau nej hnub no rau hauv nej nruab siab.
7 Nej yuav muab qhia tas zog rau nej cov tub ki; nej yuav muab hais tas zog thaum nej nyob hauv vaj hauv tsev thiab thaum nej mus tawm rooj, thaum nej pw thiab thaum nej sawv.
8 Nej yuav muab khi rau nej txhais tes coj kom ua ib lub cim rau nej; nej yuav muab ntoo rawv xws li ib lub txiaj rau saum nej hauv pliaj.
9 Nej yuav muab sau rau ntawm nej tej ncej qhov rooj tsev thiab nej tej ncej rooj vag.
10 Thaum HUAB TAIS nej tus tswv Ntuj coj nej mus txog lub teb chaws uas nws tau cog lus rau nej cov yawg koob, Has Nplas Has, His Xas Has thiab Yas Kos, tias yuav muab rau nej, yog ib lub teb chaws muaj tej lub nroog loj thiab zoo nkauj uas nej tsis tau txhim,
11 muaj tej tsev puv toob xib txhij txhua uas nej tsis tau muab tso rau hauv, muaj tej qhov dej uas nej tsis tau khawb, tej vaj hmab txiv cawv thiab tej txiv ntoo roj uas nej tsis tau cog; thaum nej tau noj tsau haus txaus lawm,
12 mas nej yuav ceev faj, tsis txhob hnov qab HUAB TAIS tus tau coj nej tawm Hais Nkws Tos teb, ntawm lub teb chaws nej ua qhev los.
13 Nej yuav hwm HUAB TAIS nej tus Tswv Ntuj; nej yuav tsob hwb nws, nej yuav tuav txog nws lub npe los cog lus.”

NPN    18: 2-3a, 3bc-4, 47+51

Txais: (2) Kuv nyiam koj, Huab Tais, koj yog kuv lub zog.

Kuv nyiam koj, HUAB TAIS, koj yog kuv lub zog,
HUAB TAIS, koj yog kuv phab tsua, kuv lub yeej ntsa zeb, tus cawm kuv dim.

Txais: (2)Huab Tais kuv nyiam koj, koj yog kuv lub zog.

Kuv tus Tswv Ntuj, kuv lub tsua rau kuv ua chaw nkaum,
kuv daim leem phiaj, lub zog cawm kuv, lub yeej thaiv kuv!
Kuv tau cav txog Huab Tais, kuv tau thov nws,
ces nws pab kuv dim ntawm kuv cov yeeb ncuab.

Txais: (2)Huab Tais kuv nyiam koj, koj yog kuv lub zog.

Kom HUAB TAIS nyob mus! Kom kuv lub Tsua nto koob meej !
Kom Tswv Ntuj tus cawm kuv, nto koob meej lug !
Koj yog tus muab kev yeej loj kawg nkaus rau koj tus vaj,
koj ua zoo rau tus koj tau muab roj pleev,  
yog rau Das Vis thiab Das Vis caj ces mus li.

Txais: (2)Huab Tais kuv nyiam koj, koj yog kuv lub zog.

As Les Lus Yas:    2 TM 1: 10

Txais: As les lus yas, as les lus yas.

Pet us Cawm Seej Yes Xus Pleev tau rhuav txoj kev tuag pov tseg
thiab ua kom txoj sia nyob mus li tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo:    MT 17: 14-20

14 Thaum lawv rov los txog ntawm cov neeg coob lawm, muaj ib tug neeg tuaj txog, nws txhos caug ntua ntawm Yes Xus xub ntiag, nws hais tias:
15 "Huab Tais, thov koj hlub kuv tus tub, nws mob vwm txom nyem kawg li. Nws ntog rau hauv hluav taws thiab rau hauv dej ntau zaus lawm.
16 Kuv twb coj nws tuaj rau koj cov thwj tim lawm, tab sis lawv kho tsis tau."
17 Yes Xus teb tias: "Tiam neeg tsis ntseeg thiab neeg phem, kuv yuav nrog nej nyob txog thaum twg? Kuv yuav nyiaj nej txog thaum twg? Nej coj tus tub los rau kuv ntawm no saib."
18 Yes Xus cem tus dab phem, ces tus dab phem tawm hauv tus me nyuam mus. Tus me nyuam zoo hlo txij thaum ntawd los.
19 Thaum tshuav cov thwj tim thiab Yes Xus nyob ib qho lawm xwb, cov thwj tim txav los ze Yes Xus, lawv nug nws tias: "Vim li cas peb ntiab tsis tau tus dab ntawd?”
20 Yes Xus hais rau lawv tias: "Vim nej ntseeg tsawg dhau. Kuv hais tseeb rau nej, yog nej ntseeg luaj lub noob zaub roj xwb, mas nej hais rau lub roob ntawd tias: 'Koj txav ntawm no mus lawm tod saib,' lub roob kuj yuav txav mus. Ces yuav tsis muaj ib yam uas nej ua tsis tau li.”

Tim 9 lub 8 Hli 2021

Hnub Ob Lis Piam Kaum Cuaj Nraub Xyoo B Nruab Lis Piam Xyoo I
Lectionary: 413

XHLT: LN Teresa Benedicta of the Cross, Nkauj Tsim Txiaj tuag ua Tim Khawv

Zaj Nyeem Ib: TCO 10: 12-22

Mais Xes hais rau tsoom pej xeem tias:
12 His Xas Lais, HUAB TAIS nej tus Tswv Ntuj xav kom nej ua dab tsi? Nws tsuas xav kom nej hwm HUAB TAIS nej tus Tswv Ntuj, kom nej taug raws nws tej kev tas huv si, kom nej nyiam nws, kom nej muab tas nej lub siab nej tus ntsuj plig los tsob hwb HUAB TAIS nej tus Tswv Ntuj,
13 kom nej khaws HUAB TAIS tej lus qhia thiab nws cov kev cai lij choj uas hnub no kuv qhia rau nej, ces nej yuav tau qhov zoo.
14 Nej xav saib, lub ntuj, thiab cov txheej ntuj saud, puav leej yog HUAB TAIS nej tus Tswv Ntuj tug, lub ntiaj teb thiab tas puas tsav yam nyob hauv ntiaj teb los kuj ib yam.
15 Tsis kav Huab Tais tau tso nws lub siab npuab nej cov yawg koob xwb, vim nws hlub lawv, ces nws thiaj tau xaiv lawv caj ces los tom qab lawv uas yog nej, nyob hauv tas txhua haiv neeg, xws li niaj hnub no.
16 Nej yuav ua lub cim txiav rau nej lub siab thiab nej lub xwb qwb, kom nej tsis txhob txhav qhi ntxiv lawm.
17 Vim HUAB TAIS nej tus Tswv Ntuj yog tus Tswv Ntuj kav tsoom tswv ntuj, tus Huab Tais kav tsoom huab tais. Nws yog tus Tswv Ntuj loj, muaj hwj huam, thiab txaus ntshai tas nrho. Nws tsis tsa leej twg cai, nws tsis txais leej twg cov nyiaj xiab.
18 Nws txiav txim ncaj rau tus me nyuam ntsuag thiab tus poj ntsuam; nws hlub tus pej kum neeg, nws pub mov rau tus pej kum neeg noj thiab pub ris tsho rau nws hnav.
19 Nej kuj yuav tsum hlub cov pej kum neeg thiab, vim thaud nyob Hais Nkws Tos teb nej twb yog ib co pej kum neeg.
20 HUAB TAIS nej tus Tswv Ntuj yog tus nej yuav hwm thiab yuav tsob hwb; nej yuav npuab nws ruaj nreb, nej yuav tuav txog nws lub npe los cog lus.
21 Nws yog nej lub koob meej, nws yog nej tus Tswv Ntuj, nws tau ua tej yam loj tas nrho thiab txaus ntshai kawg nkaus rau nej qhov muag pom xyeem.
22 Thaum nej cov yawg koob tsiv mus nyob Hais Nkws Tos teb, lawv tsuas muaj xya caum leej xwb; nyem no, HUAB TAIS nej tus Tswv Ntuj twb ua kom nej coob npaum li cov hnub qub nyob saum ntuj lawm.”

NPN 147: 12-13, 14-15, 19-20

Txais: (12a) Yes Lus Xas Les, koj cia li cav txog Huab Tais.

Yes Lus Xas Les, cia li cav txog Huab Tais lub koob meej,
Xis Yoos, cia li cav txog koj tus Tswv Ntuj.
Vim nws tau ua kom cov tab ntawm koj cov rooj vag khov tuaj lawm,
nws tau foom hmoov zoo rau koj cov me nyuam nyob hauv koj.

Txais: (12a) Yes Lus Xas Les, koj cia li cav txog Huab Tais.

Nws ua kom muaj kev thaj yeeb nyob hauv koj cov ciam av;
Nws pub cov hmoov nplej qab tshaj rau koj noj kom tsau npo.
Nws xa nws lo lus qhuab qhia tuaj rau ntiaj teb;
nws lo lus khiav nrawm nroos.

Txais: (12a) Yes Lus Xas Les, koj cia li cav txog Huab Tais.

Nws tau tshaj nws lo lus rau Yas Kos,
nws cov kev cai thiab lij choj rau His Xas Lais.
Nws tsis tau ua zoo li ntawd rau lwm haiv neeg twg,
nws tsis tau qhia nws cov lij choj rau lawv paub li. As Les Lus Yas.

Txais: (12a) Yes Lus Xas Les, koj cia li cav txog Huab Tais.

As Les Lus yas: 2 TXLN 2: 14

Txais: As les lus yas, as les lus yas.

Tswv Ntuj siv lub Moo Zoo hu nej los kom nej tau txais
peb tus Huab Tais Yes Xus Pleev lub koob meej ua nej tug.

Txais: As les lus yas, as les lus yas.

Ntawv Moo Zoo: MT 17: 22-27

22 Thaum Yes Xus thiab nws cov thwj tim mus sib sau nyob Nkas Lis Lais teb, nws hais rau lawv tias : "Neeg Leej Tub yuav raug luag muab muag rau tsoom neeg tes.
23 Lawv yuav muab nws tua, hnub peb nws yuav sawv rov los." Ces cov thwj tim ntxhov siab kawg nkaus.
24 Thaum lawv los txog Kas Fas Naus, cov sau se rau lub Tuam Tsev Teev Ntuj tuaj cuag Pob Zeb, lawv hais rau nws tias: "Nej tus xib hwb puas them se rau lub Tuam Tsev Teev Ntuj?"
25 Pob Zeb teb tias: "Nws them." Thaum Pob Zeb los txog hauv tsev, Yes Xus xub nug nws tias: "Xis Moos, koj xav li cas? Cov vaj kav ntiaj teb sau se ntawm leej twg? Ntawm lawv cov tub los ntawm luag tej qhua?"
26 Pob Zeb teb tias: "Ntawm luag tej qhua." Yes Xus hais rau Pob Zeb tias: "Yog li mas cov tub tsis tas them se li.
27 Tab sis, wb yuav tsis txhob ua kom luag tsis zoo siab. Koj mus lawm nram dej ntuj, koj pov nuv rau hauv dej; thawj tug ntses tawm tuaj, koj muab rub los, koj rua nws lub qhov ncauj, koj yuav pom ib lub txiaj nyiag, koj muab lub txiaj nyiag ntawd rau lawv kom tau them se rau kuv thiab rau koj."

Tim 10 lub 8 Hli 2021

Hnub Peb Lis Piam Kaum Cuaj Nruab Xyoo B Nruab Lis Piam Xyoo I

Koob Tsheej Hwm LN Lawrence, leej Tsob Hwb tuag ua Tim Khawv
Lectionary: 618

Zaj Nyeem Ib: 2 KLN 9: 6-10

Cov kwv tij nkauj muad:
6 Tus tseb nplej tsawg, nws kuj yuav sau tau tsawg, tus tseb nplej ntau nws kuj yuav sau tau ntau.
7 Nej nyias yuav pub raws li nyias tau txiav txim nyob hauv nyias siab lawm, nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab hlo pub rau luag.
8 Tswv Ntuj muaj peev xwm yuav pub tau tas ib puas tsav yam txiaj ntsim nchuav lug rau nej, kom nej muaj txhua yam tas mus li txhua sij hawm, thiab tseem yuav seem ib co txaus pab nej ua txhua yam hauj lwm zoo.
9 Raws li Ntawv sau tseg tias: ‘Nws muab faib txhua nrho, nws pub rau cov pluag ; nws txoj kev ua neeg ncaj yuav nyob mus li.’
10 Tus uas muab noob qoob rau tus tswv teb, thiab muab mov ua txhiam xws, nws haj yam yuav muab noob rau nej thiab ua kom cov noob ntawd ntau tuaj, thiab nws yuav ua kom nej txoj kev ncaj ntsu qoob ntau ntws lug.

NPN 112: 1-2, 5-6, 7-8, 9

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

Tus hwm HUAB TAIS, nws txoj hmoov zoo :
Nws nyiam Huab Tais cov lus qhia tas siab nrho,
Nws caj ce yuav muaj zog nyob ntiaj teb;
tiam neeg siab ncaj yuav tau txoj hmoov zoo.

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

Tus neeg txawj hlub luag thiab qiv rau luag, nws txoj hmoov zoo.
Nws ua nws tej hauj lwm raws kev ncaj.
Nws yuav nyob ruaj nreb mus li;
sawv daws yuav nco ntsoov txog tus neeg ncaj mus ib txhis.

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

Nws yuav tsis ntshai cov lus cuav hais phem txog nws ;
nws lub siab nyob ruaj nreb, nws tso siab lug rau HUAB TAIS.
Nws ua siab tawv qhawv, nws yuav tsis ntshai,
nws yuav ua pliaj siab dauv muag mus saib nws cov yeeb ncuab.

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

Nws pub tsis txuag rau cov pluag :
nws txoj kev ua siab dav yuav nyob mus li,
nws yuav muaj meej mom siab thiab yuav nto koob meej,

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

As Les Lus Yas: ZAM 8: 12bc

Txais: As les lus yas, as les lus yas.

Huab Tais hais tias: "Leej twg lawv kuv qab,
nws yuav tsis maub tsaus ntuj taug kev.
Nws yuav tau qhov pom kev muaj txoj sia."

Txais: As les lus yas, as les lus yas.

Ntawv Moo Zoo: ZAM 12: 24-26

Yes Xus hais rau nws cov thwj tim tias:
24 “Kuv hais qhov muaj tseeb tiag rau nej: Yog ib lub noob nplej tsis poob rau hauv av thiab tsis tuag, mas nws tsuas yog ib lub noob nplej xwb, hos yog nws tuag, mas nws txi txiv ntau.
25 Tus twg nyiam nws txoj sia, mas nws ua nws txoj sia ploj. Hos tus twg tsis khuv xim nws txoj sia nyob hauv lub ntiaj teb no, mas nws yuav ceev tau nws txoj sia kom tau ciaj nyob mus li.
26 Tus twg xav tsob hwb kuv, mas nws yuav tsum los raws kuv. Kuv nyob qhov twg, kuv tus tub txib kuj yuav nyob qhov ntawd thiab. Leej Txiv yuav hwm tus uas tsob hw kuv.”

Tim 11 lub 8 Hli 2021

Hnub Plaub Lis Piam Kaum Cuaj Nruab Xyoo B Nruab Lis Piam Xyoo I
Lectionary: 415

Yuav Hwm LN Clare, Nkauj tsim txiaj

Zaj Nyeem Ib: TCO 34: 1-12

1 Mais Xes sawv kev ntawm cov tiaj Mos As, nws nce mus saum lub roob Nes Npos, mus txog lub ncov roob Pis Nkas uas nyob ncaj Yes Lis Kos sab tid. HUAB TAIS muab lub teb chaws huv tib si rau Mais Xes pom: txij Nkas Las As teb mus txog ntua rau Daas teb,
2 tas Nes Tas Lis teb huv si, uas yog Es Fais thiab Mas Nas Xes nkawd lub teb chaws; tas Yus Das teb mus txog lub hiav txwv xib fab,
3 lub teb chaws Nes Zes, lub nras tiaj uas yog lub hav Yes Lis Kos lub tsheej muaj txoob ntau, mus txog ntua rau thaj tsam ntawm Xos As.
4 HUAB TAIS hais rau Mais Xes tias: "Koj ntsia lub teb chaws no yog lub uas kuv tau cog lus rau Has Nplas Has, His Xas Has thiab Yas Kos tias: ‘Kuv yuav muab rau koj tsoom xeeb ntxwv nyob.’ Kuv muab rau koj qhov muag pom, tiam sis koj yuav hla tsis tau mus txog cov teb chaws ntawd."
5 Ces Mais Xes, HUAB TAIS tus tub txib, tuag nyob ntawd, nyob hauv thaj av Mos As, raws li HUAB TAIS tau txiav.
6 Lawv muab nws faus rau hauv lub kwj ha ncaj ntawm Npes Pes Os sab tid, nyo hauv lub teb chaws Mos As. Los txog niaj hnub no, yeej tsis muaj leej twg paub tseeb tias Mais Xes lub ntxa yog nyob qhov twg kiag li.
7 Thaum Mais Xes tuag, nws muaj ib puas nees nkaum xyoo, nws qhov muag tseem tsis tau puas, thiab nws lub zog tseem tsis tau ntaug li.
8 Tsoom His Xas Lais quaj Mais Xes tau peb caug hnub nyob hauv lub tiaj Mos As, ces lawv thiaj ua lub caij ntoo xyom thia lub ntees rau Mais Xes tiav.
9 Yos Suas uas yog Nus tus tub muaj lub tswv yim thoob tsib, vim Mais Xes tau tsa tes rau saum nws lawm. Cov His Xas Lais mloog Yos Suas lus, lawv ua raws li HUAB TAIS tau ceeb toom rau Mais Xes.
10 Txij thaum ntawd los txog tav no, tsis tau muaj dua ib tug Yaj Saub zoo li Mais Xes sawv hauv cov His Xas Lais los ntxiv lawm; Mais Xes yog tus HUAB TAIS paub tim ntsej tim muag.
11 Tsis muaj leej twg ntxiv yuav ua tau cov cim thiab cov hwj huam loj cuag li Mais Xes ua lawm, uas yog HUAB TAIS tau txib kom nws mus ua nyob Hais Nkws Tos teb, tiv tus vaj Fas Las Oos thiab Fas Las Oos cov tub txib, thiab tas nws lub teb chaws tas huv tib si.
12 Thiab tsis muaj dua lwm tus yuav muab tau nws lub hwj huam loj thiab nws lub hwj xyeej txaus ntshai rau
tas tsoom His Xas Lais pom li Mais Xes ntxiv lawm.

NPN 66: 1-3a, 5+8, 16-17

Txais: (20a+10b) Kuv cav txog Tswv Ntuj lub koob meej,
vim nws ua kom kuv tug ntsuj plig kub cuag hluav taws.

Tas ntiaj teb, nej qw zoo siab cav txog Tswv Ntuj ;
Nej hu nkauj cav txog nws lub npe nto koob meej,
nej tshaj tej zaj lus cav txog nws lu hwj chim.
Nej hais rau Tswv Ntuj tias :
"Koj tej hauj lwm muaj hwj xyeej ua luaj!”

Txais: (20a+10b) Kuv cav txog Tswv Ntuj lub koob meej,
vim nws ua kom kuv tug ntsuj plig kub cuag hluav taws.

Nej tuaj, nej yuav pom Tswv Ntuj cov hauj lwm,
nws cov hwj huam loj nws ua rau As Das cov tub pom:
Tsoom haiv neeg, nej cav lus zoo txog peb tus Tswv Ntuj,
Nej qw ua suab ncha ntws cav txog nws.

Txais: (20a+10b) Kuv cav txog Tswv Ntuj lub koob meej,
vim nws ua kom kuv tug ntsuj plig kub cuag hluav taws.

Tas nej cov uas hwm Tswv Ntuj, nej tuaj mloog kuv hais,
kuv yuav piav txog qhov uas nws tau ua rau kuv.
Thaum kuv qhib ncauj hais lus thov nws,
Lo lus qhuas twb nyob ntawm kuv ntsis nplaig lawm.

Txais: (20a+10b) Kuv cav txog Tswv Ntuj lub koob meej,
vim nws ua kom kuv tug ntsuj plig kub cuag hluav taws.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib raug zoo nyob hauv Leej Pleev,
nws tso cov lus pab kom neeg nrog nws rov sib raug zoo rau peb muab tshaj tawm.

Txais: As les lus yas, as les lus yas.

Ntawv Moo Zoo: MT 18: 15-20

Yes Xus hais rau nws cov thwj tim tias:
15 “Yog koj ib tug kwv tij ua txhaum rau koj, koj yuav mus cuag nws mus nrog nws tham ib leeg txog nws qhov txhaum. Yog nws mloog koj, mas koj rov tau kwv tau tij dua lawm.
16 Yog nws tsis mloog koj, koj yuav coj ib leeg los ob leeg nrog koj mus dua, kom ob tug los peb tug tim khawv nrog hnov tej lus ntawd.
17 Yog nws tsis mloog cov nrog koj mus thiab, koj yuav qhia rau lub Koom Txoos paub. Yog nws tseem tsis mloog lub Koom Txoos hais thiab, ces koj yuav saib nws zoo li ib tug neeg teev pej kum dab los ib tug tub sau se xwb.
18 Kuv hais tseeb rau nej tias, yog nej khi yam twg nyob ntiaj teb no, mas yam ntawd kuj yuav raug khi nyob saum ntuj; yog nej daws yam twg nyob ntiaj teb no, mas yam ntawd kuj yuav raug daws nyob saum ntuj.
19 Kuv rov hais tseeb rau nej dua tias: yog muaj ob leeg hauv nej hais sib haum koom siab thov dab tsi nyob ntiaj teb no, mas kuv Txiv nyob saum ntuj yuav pub yam ntawd rau nkawd.
20 Vim thaum ob leeg los peb leeg sib sau ua ke nyob hauv kuv lub npe, mas kuv nyob nruab nrab hauv lawv.”

Tim     12     lub     8     Hli     2021

Hnub Tsib Lis Piam Kaum Cuaj Nruab Xyoo B Nruab Lis Piam Xyoo I
Lectionary: 416

XHLT:  LN Jane de Chantal. Ua Leej Phauj

Zaj Nyeem Ib:    YX 3: 7-10a, 11, 13-17

7 HUAB TAIS hais rau Yos Xuas tias: "Hnub no, kuv yuav muab koj tsa rau qhov siab rau tas tsoom His Xas Lais pom, kom lawv paub tias kuv yuav nrog nraim koj ib yam li kuv tau nrog Mais Xes.
8 Koj yuav ceeb toom rau cov Leej Choj kwv lub Phij Xab Cog Lus li no: ‘Thaum nej mus txog ntawm ntug dej Yos Las Das lawm, nej yuav mus sawv twj ywm nyob hauv tus dej."
9 Ces Yos Xuas hais rau cov His Xas Lais tias: "Nej txav los ntawm no, los mloog HUAB TAIS nej tus Tswv Ntuj cov lus!"
10 Yos Xuas hais ntxiv tias: "Nej yuav pom ib yam ua rau nej paub tias tus Tswv Ntuj muaj txoj sia nws nyob nruab nrab hauv nej, thiab nws yuav rhuav tshem cov Kas Nas Has ntawm nej hauv ntej mus.
11 HUAB TAIS, tus Tswv kav tas lub ntiaj teb, lub Phij Xab Cog Lus yuav ua nej ntej hla mus rau hauv tus dej Yos Las Das.
13 Thaum cov Leej Choj kwv HUAB TAIS, tus Tswv kav tas lub ntiaj teb, lub Phij Xab Cog Lus, lawv cov ko taw mus tsuj hauv tus dej Yos Las Das, mas dej yuav tsis ntws ntxiv; cov dej ntws sab pem hauv los yuav nres ua ib pawg.”
14 Thaum tsoom pej xeem tso lub yeej thiab lawv cov tsev tsam phooj tseg, thiab pib sawv kev mus hla tus dej Yos Las Das, mas cov Leej Choj kwv lub Phij Xab Cog Lus mus ua sawv daws ntej.
15 Thaum cov kwv lub Phij Xab Cog Lus tuaj txog ntua ntawm tus ntug dej Yos Las, mas cov Leej Choj kwv lub Phij Xab Cog Lus muab lawv ko taw nqes plhuav tam sis ntawd mus tsuj cov dej ntawm tus ntug dej, uas kev cai huam loj puv ob sab ntug tas lub caij sau qoob loo.
16 Ces cov dej ntws pem hauv los cia li nres kiag tam sid, thiab teev ua ib pawg loj loj mus deb deb, txij ntawm As Das mus, uas yog ib lub nroog nyob ze rau Xas Lev Thas. Hos cov dej nram qab deg uas ntws mus txog lub hiav txwv daw ntsev hu ua hiav txwv As Las Npas cia li cais tu nrho ntawm cov pem hauv lawm. Ces tsoom pej xeem hla mus rau sab ntug tid ncaj ntawm lub tsheej Yes Lis Kos.
17 Cov Leej Choj uas kwv lub Phij Xab Cog Lus sawv nres twj ywm hauv thaj chaw dej nqhuab tas hauv tus dej Yos Las Das, hos tas tsoom His Xas Lais hla ntawm qhov chaw dej nqhuab tas mus rau sab ntug tid mus txog thaum tas haiv His Xas Lais hla dhau tas huv si lawm.

NPN    114: 1-2, 3-4, 5-6

Txais: As les lus yas.

Thaum His Xas Lais tawm ntawm Hais Nkws Tos teb los,
thaum Yas Kos lub cuab yim tso ib haiv neeg qus tseg,
Yus Das ciaj ua chaw ntshiab rau HUAB TAIS so,
His Xas Lais ciaj ua tsev rau HUAB TAIS nyob.

Txais: As les lus yas.

Dej ntuj pom, dej ntuj zam kev khiav,
Dej Yos Las Das ntws loo rov qab,
Cov roob dhia tej plhaw xws li cov txiv laug tshis,
cov pov roob dhia paj paws xws li cov me nyuam yaj.

Txais: As les lus yas!

Cov dej ntuj, vim li cas nej khiav?
Dej Yos Las Das, vim li cas koj ntws rov qab?
Cov roob siab, vim li cas nej dhia tej plhaw xws li cov txiv laug tshis?
Cov pov roob, vim li cas nej dhia paj paws xws cov me nyuam yaj?

Txais: As les lus yas!

As Les Lus Yas:    NPN 119: 135

Txais: As les lus yas, as les lus yas.

Thov cia koj lub ntsej muag ci tuaj rau koj tus tub txib
Thiab thov qhia koj cov cai lij choj rau kuv kawm.

Txais: As les lus yas, as les lus yas.

Ntawv Moo Zoo:    MT 18: 21–19:1

21 Thaum ntawd, Pob Zeb txav los nug Yes Xus tias: “Huab Tais, yog kuv tus kwv tij ua txhaum rau kuv, kuv yuav zam rau nws pes tsawg zaus? Kuv puas yuav zam txog xya zaus?”
22 Yes Xus hais rau Pob Zeb tias: “Kuv tsis hais rau koj tias 'xya zaus', kuv hais rau koj tias, 'xya caum xya zaus'.
23 Vim li ntawd, lub Ceeb Tsheej saum ntuj yog zoo li ib tug vaj uas xav nrog nws cov tub txib txheeb nws tej nyiaj txiag.
24 Thaum nws pib txheeb, lawv coj ib tug tub txib uas tshuav nws nuj nqis ib vam nras nyiaj tuaj rau nws.
25 Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd.
26 Tus tub txib txhos caug ntua ntawm tus tswv ko taw, nws pe tus tswv, nws hais tias: “Thov koj ua siab ntev rau kuv, kuv yuav them kom tas rau koj.”
27 Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws.
28 Thaum tus tub txib tawm rov qab mus, nws ntsib nws ib tug phooj ywg tub txib, uas tshuav nws nqi ib puas lub txiaj nyiag. Tus tub txib ntawd nthos nkaus nws tus phooj ywg, zawm tus phooj ywg caj pas, thiab hais tias: “Them qhov nqi koj tshuav los rau kuv.”
29 Nws tus phooj ywg txhos caug ntua ntawm nws ko taw thov tias: “Thov koj ua siab ntev rau kuv, kuv yuav them kom tas rau koj.”
30 Tab sis tus tub txib ntawd tsis kam li, nws coj nws tus phooj ywg mus kaw hauv tsev loj faj mus txog hnub tus phooj ywg them nuj nqis tas huv tib si rau nws.
31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv.
32 Ces tus vaj hu tus tub txib tuaj, nws hais rau tus tub txib ntawd tias: “Tub txib siab phem dab tsi! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv.
33 Ua cas koj tsis hlub koj tus phooj ywg zoo li kuv tau hlub koj?"
34 Ces tus vaj npau taws heev, nws muab tus tub txib tso rau luag tsim txom mus txog hnub nws them nws cov nuj nqis tas huv tib si.
35 Kuv Txiv nyob saum Ntuj kuj yuav ua ib yam li ntawd rau nej thiab, yog tias nej tsis nyias muab tas nyias lub siab zam rau nej tus kwv tij.
19: 1 Thaum Yes Xus hais cov lus no tas, nws tso Nkas Lis Lais teb tseg, nws mus rau Yus Das teb, sab dej Yos Las Das tim ub.

Tim 13 lub 8 Hli 2021

Hnub Rau Lis Piam Kaum Cuaj Nruab Xyoo B Nruab Lis Piam Xyoo I
Lectionary: 417

XHLT: LN Pontian, ua Vaj Qhia thia LN Hippolytus, ua Leej Choj, ob tug Tim Khawv

Zaj Nyeem Ib: YOS XUAS 24: 1-13

1 Yos Xuas hu tas nrho cov xeem His Xas Lais tuaj sib sau nyob Xis Kes, nws hu lawv cov txwj laus, cov thawj coj, cov nom txiav txim thiab cov tub tuav hauj lwm tuaj; ces lawv tuaj sawv nyob ntawm Tswv Ntuj xub ntiag.
2 Yos Xuas hais rau tsoom sid sawv daws tias : "HUAB TAIS tsoom His Xas Lais tus Tswv Ntuj hais li no: ‘Thaum ub, nej cov yawg koob los txog rau Tes Las, uas yog Has Nplas Has thiab Nas Hos nkawd txiv, yeej nyob sab ntug dej tim ub tau ntev los lawm; lawv teev hawm lwm cov dab qhuas.
3 Tiam sis kuv tau hu nej txiv Has Nplas Has tawm sab ntug dej tid los thiab tau coj nws mus hla tas nrho lub teb chaws Kas Nas Has. Kuv tau ua kom nws tsob noob huam vam coob tuaj, kuv tau pub His Xas Has rau nws.
4 Kuv muab Yas Kos thiab Es Xas Ws nkawd rau His Xas Has. Kuv pub lub roob Xes Is rau Es Xas Ws nyob ua nws tug. Hos Yas Kos thiab nws cov tub tsiv mus nyob Hais Nkws Tos teb lawm.
5 Ces kuv thiaj tau xa Mais Xes thiab As Loos nkawd mus, thiab tau tso xwv txheej loj los raug Hais Nkws Tos teb, raws li cov hwj huam kuv tau ua nyob hauv lawv. Tom qab ntawd kuv thiaj tau coj nej tawm los.
6 Thaum kuv coj nej phaj txiv tawm Hais Nkws Tos teb los, thiab nej los txog ntawm lub hiav txwv, mas cov Hais Nkws Tos caij tsheb caij nees tuaj caum nej txog ntawm lub Hiav Txwv Liab.
7 Ces nej phaj txiv quaj hu txog HUAB TAIS, nws thiaj tso kev tsaus ntuj tuaj kem nej ntawm cov Hais Nkws Tos, thiab nws tso dej hiav txwv nphau los tsuam lawv thiab nyab lawv. Nej qhov muag pom ntsoov tej yam kuv tau ua rau Hais Nkws Tos teb, thiab nej kuj tau los nyob ntev xyoo nyob hauv teb chaws suab puam.
8 Ces kuv tau coj nej los txog hauv cov As Mos Lis lub teb chaws uas nyob sab dej Yos Las Das tim ub. Lawv sawv ua rog ntaus nej, tab sis kuv muab lawv rau hauv nej tes, kom nej tau lawv lub teb chaws los ua nej tug, thiab kuv tau ua kom lawv tawg tas nyob ntawm nej xub ntiag.
9 Ces Npas Lav uas yog tus vaj Mos As Lis thiab yog Xis Pos tub, kuj tau ua rog rau His Xas Lais. Nws tso neeg mus hu Npas Laas uas yog Npes Os tub, kom tuaj foom lus phem rau nej.
10 Tab sis kuv tsis kam mloog Npas Laas, ces Npas Laas yuav tsum tau foom lus zoo rau nej xwb, thiab kuv tau cawm nej dim ntawm nws txhais tes.
11 Thaum nej hla dhau tus dej Yos Las Das thiab los txog Yes Lis Kos lawm, cov neeg nyob Yes Lis Kos ua rog rau nej, thiab tseem muaj cov As Mos Lis, cov Pes Lis Xis, cov Kas Nas Has, cov His Tis, cov Zis Nkas Sis, cov His Vis thiab cov Yes Npws Xis thiab, tab sis kuv tau muab lawv tso rau hauv nej xib tes tib si.
12 Kuv tau tso ib co nkawj ua nej ntej mus caum kom ob tug vaj As Mos Lis khiav tawm ntawm nej xub ntiag mus, ces nej tsis tau siv ntaj los siv hneev li.
13 Kuv tau muab ib lub teb chaws uas nej tsis tau khwv tsim thiab ib co tsheej uas nej tsis tau txhim tsa rau nej nyob; Ib co vaj txiv cawv thiab ib co vaj txiv ntoo roj uas nej tsis yog tau khwv cog rau nej tau noj."

NPN 136: 1-3, 16-18, 21-22+24

Txais: Huab Tais txoj kev khuv leej nyob ruaj mus li.

Nej ua HUAB TAIS tsaug, vim nws siab zoo,
vim nws txoj kev hlub nyob tas ib txhiab ib txhis.
Nej ua tus Tswv Ntuj kav tas tsoom tswv ntuj tsaug,
vim nws txoj kev hlub nyob tas ib txhiab ib txhis.
Nej ua tus HUAB TAIS kav tas tsoom huab tais tsaug,
vim nws txoj kev hlub nyob tas ib txhiab ib txhis.

Txais: Huab Tais txoj kev khuv leej nyob ruaj mus li.

Nws coj nws haiv neeg hla dhau teb chaws suab puam,
vim nws txoj kev hlub nyob tas ib txhiab ib txhis.
Nws ntaus cov vaj loj kom lawv qaug,
vim nws txoj kev hlub nyob tas ib txhiab ib txhis.
Nws tua tej vaj muaj hwj xyeej kom lawv tuag,
vim nws txoj kev hlub nyob tas ib txhiab ib txhis,

Txais: Huab Tais txoj kev khuv leej nyob ruaj mus li.

Nws muab lawv lub teb chaws los pub ua cuab tam,
vim nws txoj kev hlub nyob tas ib txhiab ib txhis,
yog ua cuab tam rau nws tus tub txib His Xas Lais,
vim nws txoj kev hlub nyob tas ib txhiab ib txhis.
nws cawm peb dim ntawm peb cov yeeb ncuab,
vim nws txoj kev hlub nyob tas ib txhiab ib txhis.

Txais: Huab Tais txoj kev khuv leej nyob ruaj mus li.

As Les Lus Yas: 1 TXLN 2: 13

Txais: As les lus yas, as les lus yas.

Nej khaws Tswv Ntuj lo lus txhob khaws li yog neeg lo lus xwb;
nej yuav khaws kom raws li yeej yog Tswv Ntuj lo lus tiag.

Txais: As les lus yas, as les lus yas.

Ntawv Moo Zoo: MT 19: 3-12

3 Ib co Fas Lis Xais los cuag Yes Xus, lawv xav sim nws, lawv hais rau nws tias: “Ib tug txiv neej puas muaj cai nrauj nws poj niam txawm yuav tim li cas los tau?”
4 Yes Xus teb tias: “Nej tsis tau nyeem tias, thaum chiv lub keeb, tus Tsim neeg, nws tau tsim kom muaj txiv neej thiab poj niam,
5 thiab nws hais tias: ‘Vim qhov ntawd, mas txiv neej yuav tso nws niam nws txiv tseg mus npuab nws poj niam, ces ob tug ntawd yuav ua ib lub cev nqaij xwb’ no lod?
6 Vim li ntawd, nkawd tsis yog ob leeg lawm, nkawd yog ib leeg lawm xwb. Qhov uas Tswv Ntuj sau los ua ke, mas neeg yuav tsis txhob muab sib txhem.”
7 Lawv teb rau Yes Xus tias: “Vim li cas Mais Xes ho qhia kom ua ib daig ntawv nrauj rau yus poj niam ces yus muab nws nrauj tau?"
8 Yes Xus hais rau lawv tias: “Yog vim nej lub siab twm xeeb dhau, ces Mais Xes thiaj tso lus kom nej nrauj tau poj niam. Tab sis txij thaum chiv lub keeb los, mas tsis yog li ntawd.
Kuv hais rau nej tias: leej twg nrauj nws poj niam, yog tsis yog vim kev sib yuav txhaum cai, thiab nws ho rov mus yuav dua lwm tus, mas nws yog ib tug muaj txij nkawm mus deev hluas. Hos tus uas mus yuav tus luag muab nrauj lawm kuj yog ib tug mus deev luag txij nkawm thiab.”
10 Cov thwj tim hais rau Yes Xus tias: “Yog muaj li koj hais txog ntawm tus txiv neej thiab nws poj niam tiag, mas txhob yuav poj niam zoo dua."
11 Yes Xus hais rau lawv tias: “Tsis yog sawv daws yuav to taub cov lus no, tsuas yog cov uas Ntuj pub rau mas lawv thiaj to taub:
12 Muaj ib co neeg yuav tsis tau txij nkawm, vim lawv yeej yug los zoo li ntawd. Muaj ib co, vim neeg muab lawv sam lawm. Hos muaj ib co, yog lawv txhob txwm tsis yuav txij nkawm vim lub Ceeb Tsheej saum ntuj. Leej twg txawj to taub qhov no, mas yeej meem cia nws to taub.”

Tim     14     lub     8     Hli    2021

Hnub Xya Lias Piam Kaum Cuaj Nruab Xyoo B Nruab Lis Piam Xyoo I
Lectionary: 418

Yuav Hwm LN Maximilian Mary Kolbe, Leej Choj tuag ua Tim Khawv

Zaj Nyeem Ib:    YOG XUAS 24: 14-29

Yos Xuas hais rau cov His Xas Lais nyob Xis Kes tias:
14 "Tsoom His Xas Lais, nyem no, nej yuav hwm HUAB TAIS thiab ua siab dawb paug tsob hwb nws raws qhov tseeb tiag tiag. Nej muab cov dab uas nej phaj txiv teev nyob sab dej tim ub thiab nyob Hais Nkws Tos teb tso pov tseg, nej cia li tsob hwb HUAB TAIS.
15 Tab sis yog nej tsis zoo siab tsob hwb HUAB TAIS, mas nej cia li xaiv ib co dab uas nej xav tsob hwb hnub no, saib nej yuav xaiv nej phaj txiv lawv cov dab uas lawv teev nyob sab dej tim ub, los nej yuav xaiv cov As Mos Lis cov dab, uas nyem no nej nyob hauv lawv teb chaws. Ntawm kuv thiab kuv tsev neeg mas peb yuav tsob hwb HUAB TAIS."
16 Ces tsoom sid teb tias: "Peb yuav tsis tso HUAB TAIS pov tseg mus teev lwm cov dab li!
17 Vim HUAB TAIS peb tus Tswv Ntuj yog tus tau coj peb thiab peb phaj txiv tawm hauv Hais Nkws Tos teb los , tawm ntawm lub tsev muab peb yuam ua lawv qhev los. Nws tau ua hwj huam loj rau peb qhov muag pom xyeem. Nws tau pov hwm peb ntawm txhua txoj kev uas peb tau taug, thiab txuag peb ntawm txhua haiv neeg uas peb tau hla hauv lawv los.
18 HUAB TAIS tseem tau caum tas cov haiv neeg thiab cov As Mos Lis uas nyob hauv lub teb chaws no kom lawv khiav tawm ntawm peb hauv ntej mus. Peb kuj yuav tsob hwb HUAB TAIS thiab vim nws yog peb tus Tswv Ntuj."
19 Ces Yos Xuas hais rau tsoom sid tias: "Ntshai tsam nej yuav tsob hwb HUAB TAIS tsis tau, vim nws yog ib tug Tswv Ntuj ntshiab, nws yog ib tug Tswv Ntuj muaj khib, nws yuav tsis zam nej tej kev ua tsis zoo thiab nej tej txhaum rau nej.
20 Yog tias nej tso HUAB TAIS pov tseg mus tsob hwb cov pej kum dab, mas thaum ntawd HUAB TAIS yuav tso nej tseg thiab yuav xa xwv txheej tuaj raug nej, nws yuav ua kom nej ploj tas txawm tias nws xub tau ua zoo rau nej lawm."
21 Tsoom sid teb rau Yos Xuas tias: "Li cas los peb yuav tsob hwb HUAB TAIS xwb."
22 Ces Yos Xuas hais rau tsoom sid tias: "Nej rov ua tim khawv txog nej tus kheej tias nej tau xaiv txoj kev tsob hwb HUAB TAIS." Lawv teb tias : "Peb ua tim khawv!"
23 Yos Xuas hais tias: "Ua li mas nej muab pej kum neeg cov dab uas nyob hauv nej tshem tawm mus, thiab nej tig nej lub siab los rau HUAB TAIS, His Xas Lais tus Tswv Ntuj."
24 Tsoom sid cog lus rau Yos Xuas tias: " Peb yuav tsob hwb HUAB TAIS peb tus Tswv Ntuj, peb yuav mloog nws hais!"
25 Hnub ntawd Yos Xuas nrog tsoom sid cog lus. Nws tsa ib co txhooj thiab ib txog cai rau lawv coj nyob Xis Kes.
26 Yos Xuas sau cov lus ntawd tseg rau hauv phau ntawv hais txog Tswv Ntuj Txoj Cai; thiab nws muab ib lub pob zeb loj loj los teeb rau hauv tsob qab ntoo qhib uas yog HUAB TAIS lub tsev ntshiab.
27 Yos Xuas hais rau tas tsoom sid tias: "Nej ntsia, lub pob zeb no yuav ua tim khawv txiav txim rau peb, vim nws tau hnov cov lus uas HUAB TAIS tau hais rau peb tas tib si lawm, thiab nws yuav ua tim khawv txiav txim rau nej, yog tias nej ua tsis ncaj rau nej tus Tswv Ntuj."
28 Ces Yos Xuas tso sawv daws nyias rov mus nyias vaj nyias tsev.
29 Thaum tej no tshwm sim tuaj tas lawm, mas Yos Xuas, Nuv tus tub thiab Huab Tais tus tub txib, thiaj mam tuag, nws muaj ib puas kaum xyoo.

NPN    16: 1-2a+5, 7-8, 11

Txais: (5a) Huab Tais, koj yog kuv lub cuab tam.

Tswv Ntuj, thov koj txuag kuv, vim kuv tuaj nkaum hauv koj.
Kuv hais rau HUAB TAIS tias: "Koj yog kuv tus HUAB TAIS!”
Huab Tais, kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (5a) Huab Tais, koj yog kuv lub cuab tam.

Kuv cav lus zoo txog tus HUAB TAIS, tus qhia kuv xav tswv yim,
Tab yog hmo ntuj kuv lub siab ntsws tseem txhib kuv.
Kuv cia HUAB TAIS nyob rawv ntawm kuv xub ntiag tsis tseg;
Vim nws nyob ntawm kuv sab xis, kuv yuav tsis qaij tsis qaug

Txais: (5a) Huab Tais, koj yog kuv lub cuab tam.

Koj yuav qhia kuv taug txoj kev mus rau txoj sia,
qhia kuv paub txog txoj kev zoo siab
puv npo nyob ntawm koj xub ntiag,
txog txoj kev nplij siab tsis txawj kawg nyob ntawm koj sab xis.

Txais: (5a) Huab Tais, koj yog kuv lub cuab tam.

As Les Lus Yas:    MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo:    MT 19: 13-15

13 Muaj neeg coj ib co me nyuam yaus tuaj rau Yes Xus kom Yes Xus tsa tes rau saum lawv thiab thov Ntuj rau lawv, tab sis cov thwj tim cem cov neeg ntawd.
14 Yes Xus thiaj hais tias: “Nej cia cov me nyuam yaus ntawd tuaj cuag kuv, nej txhob txwv lawv ; vim lub Ceeb Tsheej saum ntuj yog cov neeg zoo li cov me nyuam no tug.”
15 Ces Yes Xus tsa tes rau saum cov me nyuam ntawd tas, nws mam ncaim mus lawm.