COV ZAJ NYEEM NRUAB LIS PIAM XYOO B 2020-2021

Tim 28 lub 12 Hlis 2020

Hwm Cov Me Nyuam Tsis Txhaum Tuag Ua Tim Khawv Pauv Yes Xus Chaw
Lectionary: 698

Zaj Nyeem Ib: 1 Zam 1: 5—2:2

Cov zoo nyiad:
1: 5 Lub moo uas peb tau hnov ntawm Yes Xus los, thiab peb tshaj rau nej paub yog li no: Tswv Ntuj yog qhov pom kev, nyob hauv nws tsis muaj ib qho tsaus kiag li.
6 Yog peb hais tias: “Peb nrog nws ua phooj ywg koom siab,” tab sis peb tseem mus taug txoj kev tsaus ntuj, mas peb dag xwb, peb tsis ua neej raws txoj kev tseeb li.
7 Hos yog peb taug txoj kev pom kev, vim nws nyob hauv qhov pom kev, mas peb thiab nej muaj kev sib ntaus phooj ywg koom siab ua ke, ces nws Leej Tub Yes Xus cov ntshav ntxuav peb ntawm txhua yam txhaum kom peb dawb huv tuaj.
8 Yog peb hais tias: “Peb tsis muaj txhaum,” mas peb rov dag rau peb tus kheej, txoj kev tseeb tsis nyob hauv peb li.
9 Yog peb lees peb cov txhaum, mas Tswv Ntuj uas yog tus pheej xeeb thiab tus siab ncaj yuav zam peb cov txhaum rau peb, thiab yuav ntxuav tas puas tsav yam phem ntawm peb pov tseg kom peb dawb huv tuaj.
10 Yog peb hais tias: “Peb tsis tau ua txhaum,” mas yog peb hais tias Tswv Ntuj dag xwb, ces nws lo lus tsis nyob hauv peb.
2: 1 Kuv cov me nyuad, kuv sau tej no tuaj rau nej, yog xav kom nej tsis txhob ua txhaum xwb. Tiam sis yog muaj ib tug twg ho ua txhaum, los peb muaj ib tug pab peb cev lus thov Leej Txiv, yog Yes Xus Pleev, tus siab ncaj.
2 Nws yog tus them peb cov txhaum, tsis yog them peb cov xwb, nws tseem them tas lub qab ntuj neeg cov txhaum huv tib si thiab.

NPN 124: 2-3, 4-5, 7CD-8

Txais: (7) Peb tus ntsuj plig tau txais kev dim, xws li
tus noog dim plaws ntawm tus cuab noog rooj ntxiab.

Yog HUAB TAIS tsis tuaj pab peb
thaum cov neeg sawv tuaj tua peb,
mas ntshai lawv yeej muab peb nqos ciaj lawm
vim lawv npau taws heev rau peb cuag hluav taws kub.

Txais: (7) Peb tus ntsuj plig tau txais kev dim, xws li
tus noog dim plaws ntawm tus cuab noog rooj ntxiab.

Ntshai dej twb los nyab peb tas,
tej dej sab siv twb los kuav peb tas;
cov dej hlob twb los muab peb tshoob mus tas lawm.

Txais: (7) Peb tus ntsuj plig tau txais kev dim, xws li
tus noog dim plaws ntawm tus cuab noog rooj ntxiab.

Lub vas ntuag rhe, peb dim plaws lawm.
Peb qhov chaw vam khom yog nyob hauv HUAB TAIS lub npe;
nws yog tus tswv tsim lub ntuj lub teb.

Txais: (7) Peb tus ntsuj plig tau txais kev dim, xws li
tus noog dim plaws ntawm tus cuab noog rooj ntxiab.

As Les Lus Yas (zaj Te Deum)

Txais: As les lus yas,as les lus yas.

Peb cav txog koj, Tswv Ntuj,
peb qw zeem koj ua Huab Tais;
tsoom tim khawv ua ib pab tub rog
hnav dawb los cav txog koj.

Txais: As les lus yas,as les lus yas.

Ntawv Moo Zoo: MT 2: 13-18

13 Thaum cov kws hnub qub rov qab mus lawm, Huab Tais tus Tshiab tawm tuaj ua npau suav rau Yos Xes, nws hais tias: "Koj sawv, koj coj tus me nyuam thiab nws niam khiav mus lawm Hais Nkws Tos teb, koj yuav nyob ntawd mus txog thaum kuv tuaj hais koj, vim Hes Los yuav nrhiav tus me nyuam tua."
14 Yos Xes sawv tsees los, nws coj tus me nyuam thiab nws niam, lawv khiav hmo ntuj mus rau Hais Nkws Tos teb.
15 Nws nyob Hais Nkws Tos teb mus txog hnub Hes Los tuag, kom thiaj muaj raws li lo lus Huab Tais tus yaj saub xub hais tseg tias: “Kuv hu kuv leej tub tim Hais Nkws Tos teb rov los.”
16 Thaum Hes Los pom tias cov kws hnub qub dag nws, ces nws npau taws ceev kawg. Nws xa neeg mus tua cov me nyuam uas nyob Npes Les Hes thiab nyob ib ncig thaj tsam ntawd tas tib si, kom tua cov uas muaj ob xyoos rov hauv raws li lub caij cov kws hnub qub qhia rau nws.
17 Ces muaj raws li yaj saub Yes Les Mias tau hais tias :
18 “Yuav hnov ib lub suab nrov nyob Las Mas, yog ib lub suab quaj suab nyiav ntev loo; yog Las Ses quaj nws cov me nyuam; tsis muaj neeg nplij tau nws, vim nws cov me nyuam tsis nyob tas lawm.”

TIM 29 LUB 12 HLIS 2020

Hnub Peb Lis Piam Ib Caij Yes Xus Yug Los Xyoo B - Hnub Tsib Tom Qab Yes Xus Yug
Lectionary: 202

Hwm LN Tos Mas Becket

Zaj Nyeem Ib: 1 ZAM 2: 3-11

Cov zoo nyiad,
3 Qhov ua kom peb pom tias peb paub Yes Xus tiag, yog qhov tias peb coj nws cov lus qhia.
4 Tus hais tias : “Kuv paub nws,” tab sis twb tsis coj nws cov lus qhia, mas tus ntawd yog ib tug neeg dag, qhov tseeb tsis nyob hauv nws.
5 Hos tus coj Yes Xus lo lus, mas txoj kev nyiam Tswv Ntuj zoo tiav log nyob hauv nws lawm. Yog peb ua li ntawd, mas peb thiaj paub tias peb koom siab nrog nws.
6 Tus uas nws hais tias nws nyob hauv Yes Xus, mas nws yuav tsum coj raws nraim li Yes Xus tau coj.
7 Cov zoo nyiad, kuv tsis tau sau ib lo lus qhia tshiab tuaj rau nej li, tsuas sau ib lo lus qhia qub uas nej twb tau txais puag thaum lub hauv paus los lawm xwb. Lo lus qhia qub ntawd yog lo lus uas nej twb tau hnov lawm.
8 Tsis kav, qhov kuv sau tuaj rau nej no, kuj yog ib lo lus qhia tshiab thiab. Yog ib qho tseeb uas nyob hauv Yes Xus thiab nyob hauv nruab nrab nej. Vim qhov tsaus ntuj dua lawm, hos qhov uas yog qhov tseem pom kev twb ci tuaj lawm.
9 Tus hais tias nws nyob hauv qhov pom kev, tab sis nws ntxub nws tus kwv tij, mas nws tseem nyob hauv qhov tsaus ntuj.
10 Tus nyiam nws tus kwv tij, mas nws thiaj nyob hauv qhov pom kev. Ces nyob hauv nws tsis muaj dab tsi yuav ua kom nws ntog tau.
11 Hos tus ntxub nws tus kwv tij, mas nws nyob hauv qhov tsaus ntuj, thiab nws maub taug kev hauv qhov tsaus ntuj, ces nws tsis paub tias xyov nws mus qhov twg li, vim qhov tsaus ntuj npog rawv nws qhov muag tas lawm.

NPN 96: 1-2A, 2B-3, 5B-6

Txais: (11a) Kom lub ntuj zoo siab thiab kom lub ntiaj teb hom khaj!

Nej hu ib zaj nkauj tshiab rau HUAB TAIS,
tas cov teb chaws, nej hu nkauj rau HUAB TAIS,
nej hu nkauj rau HUAB TAIS, nej cav txog nws lub npe.

Txais…

Hnub dhau hnub, nej tshaj txog nws txoj kev cawm seej.
Nej piav txog nws lub hwj chim rau cov kuj cuab hnov,
piav txog nws tej hauj lwm txaus qhuas rau txhua haiv neeg paub.

Txais…

HUAB TAIS tau tsim lub ntuj.
Lub hwj chim ci ntsa iab thiab lub meej mom ua nws ntej;
txoj kev qhuas thiab kev ua tus loj nyob hauv nws lub tuam tsev.

Txais…

As Les Lus Yas: LK 2: 32

Txais: As les lus yas, As les lus yas

Yog qhov pom kev tawm tuaj qhia rau cov pej kum neeg paub,
thiab ua kom koj haiv His Xas Lais tau koob meej.

Txais: As les lus yas, As les lus ya

Ntawv Moo Zoo: LK 2: 22-35

22 Thaum txog lub caij yuav ua kab ke ntxuav ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau fij tus me nyuam rau Huab Tais.
23 Raws li Huab Tais Txoj Cai sau tias: "Txhua tus me nyuam tub xub qhib niam lub plab yug los, yuav muab qee rau Huab Tais."
24 Nkawd tseem yuav cev ib co txim uas yog: ib nkawg nquab lwb rwg, los puas ob tug me nyuam nquab dawb.
25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus neeg ntawd yog neeg ncaj thiab nyiam teev Ntuj. Nws tos tus yuav tuaj nplij His Xas Lais. Leej Ntuj Plig Ntshiab nyob saum nws.
26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag.
27 Leej Ntuj Plig coj nws tuaj nyob hauv lub Tuam Tsev Teev Ntuj. Ces thaum Mab Liab thiab Yos Xes nkawd coj tus me nyuamYes Xus tuaj ua cov kab ke raws li Txoj Cai,
28 Xis Mes Oos txais tus me nyuam los puag hauv nws ob txhais npab, nws cav lus zoo txog Tswv Ntuj tias:
29 “Tus Tswv, nyem no koj tso koj tus tub txib mus so kaj lug raws li koj lo lus tau lawm,
30 vim kuv qhov muag tau pom koj txoj kev cawm neeg lawm,
31 uas koj tau npaj nyob ntawm ib tsoom haiv neeg xub ntiag rau lawv pom ntsoov;
32 yog qhov pom kev uas tawm tuaj ua kev qhia rau cov pej kum haiv neeg paub, thiab ua kom koj haiv His Xas Lais nto koob meej.”
33 Yes Xus niam thiab txiv qhuas cov lus nkawd hnov hais txog tus me nyuam.
34 Ces Xis Mes Oos foom hmoov zoo rau lawv, nws hais rau Mab Liab, Yes Xus niam tias: "Koj saib mus, tus me nyuam no yuav ua chaw rau ntau leej His Xas Lais ntog thiab ntau leej rov sawv; nws yog ib lub cim ua kom sawv daws muaj sib cav.
35 Hos ntawm koj, mas ib rab ntaj yuav ntsia ntsees koj tus plig, kom xwv tej lus uas coob leej xav tuaj nruab siab tawm los rau sawv daws paub.”

TIM     30     LUB     12    HLIS    2020

Hnub Plaub Lis Piam Ib Caij Yes Xus Yug los Xyoo B

Hnub Rau hauv Thawj Yim Hnub lub Caij Yes Xus Yug los
Lectionary: 203

Zaj Nyeem Ib: 1 ZAM 2: 12-17

12 Cov me nyuad, kuv sau ntawv tuaj rau nej, vim nej cov txhaum daws tas lawm kom Yes Xus lub npe tau koob meej.
13 Kuv sau ntawv tuaj rau nej cov ua txiv, vim nej yeej paub nws Tus ib txwm Nyob txij thaum lub hauv paus los lawm. Kuv sau ntawv tuaj rau ne cov hluas, vim nej tiv yeej tus Phem lawm.
14 Kuv sau ntawv tuaj rau nej cov ua me nyuam, vim tias nej twb paub Leej Txiv lawm. Kuv sau ntawv tuaj rau nej cov ua txiv, vim nej yeej paub nws Tus ib txwm Nyob txij thaum lub hauv paus los lawm. Kuv sau ntawv tuaj rau nej cov hluas, vim nej muaj zog thiab Tswv Ntuj lo lus nyob ruaj khov hauv nej, ces nej ntaus yeej tus Phem lawm.
15 Nej tsis txhob nyiam lub ntiaj teb, los tej yam uas nyob hauv lub ntiaj teb mog. Yog leej twg nyiam lub ntiaj teb, mas Leej Txiv txoj kev nyiam tsis nyob hauv nws.
16 Vim txhua yam uas nyob hauv lub ntiaj, xws li lub cev nqaij txoj kev xav kev ntshaw, lub qhov muag txoj kev xav kev ntshaw pom, thiab lub neej txoj kev xav ua kom txaus lub siab ntshaw, txhua yam ntawd tsis yog tuaj ntawm Leej Txiv tuaj tiam sis yog tuaj ntawm lub lub ntiaj teb tuaj xwb.
17 Lub ntiaj teb yuav dua mus, nrog lub ntiaj teb txoj kev ntshaw; hos tus ua raws li Tswv Ntuj lub siab nyiam, mas nws yuav nyob mus li tas ib txhiab ib txhis.

NPN 96: 7-8A, 8B-9, 10

Txais: (11a) Kom lub ntuj zoo siab thiab lub ntiaj teb hom khaj!

Cov cuab yim neeg nyob hauv cov haiv neeg, nej muab rau HUAB TAIS,
nej muab lub koob meej thiab lo lus qhuas rau HUAB TAIS,
nej muab lub koob meej uas phim HUAB TAIS lub npe rau nws.

Txais…

Nqa nej cov paj tshab nkag mus rau hauv nws cov tshav loog;
nej hnav ib co tsoos ntshiab mus pe hawm HUAB TAIS.
Tas lub ntiaj teb, nej yuav tshee na ntawm nws xub ntiag.

Txais…

Cov haiv neeg yuav sib hais zom zaws tias: HUAB TAIS yog tus vaj.
Nws tau tsim lub ntiaj teb kom ruaj khov, yuav muab tshem tsis tau.
Nws yuav tswj txhua haiv neeg raws kev ncaj ncees.

Txais…

As Les Lus Yas

Txais: As les lus yas, As les lus yas

Ib hnub nsthiab tawm tuaj ziab rau peb lawm.
Txhua haiv neeg, nej tuaj pe hawm HUAB TAIS.
Hnub no muaj ib qho pom kev loj ci tuaj rau ntiaj teb lawm.

Txais: As les lus yas, As les lus yas

Ntawv Moo Zoo: LK 2: 36-40

36 Tseem muaj ib tug poj saub hu ua As Nas, yog Fas Nus Es tus ntxhais, xeem As Sej. Nws muaj hnub nyoog nchav lawm. Thaum hluas, nws nrog nws tus txiv nyob tau xya xyoo xwb,
37 ces nws ua poj ntsuam laus li ntawd txog thawm nws muaj yim caum plaub xyoos lawm. Nws tsis nrug ntawm lub Tuam Tsev Teev Ntuj mus li. Nws yoo mov thiab hais cov zaj teev Ntuj los pe hawm Tswv Ntuj nruab hnub hmo ntuj.
38 Tib lub sij hawm ntawd, As Nas kuj los nyob ntawd thiab, nws cav lus zoo ua Tswv Ntu tsaug, thiab nws hais txog tus me nyuam rau txhia leej txhia tus uas tos ntsoov tias yuav muaj tus txhiv cawm Yes Lus Xas Les.
39 Thaum lawv ua txhua yam raws li Huab Tais Txoj Cai tas lawm, lawv rov mus Nkas Lis Lais teb,mus rau hauv lawv lub nroog Nas Xas Les.
40 Hos ntawm tus me nyuam, mas nws hlob thiab muaj zog zuj zus tuaj; nws muaj kev thoob tsib puv npo hauv nws, thiab Tswv Ntuj lub txiaj ntsim nyob saum nws.

TIM 31 LUB 12 HLIS 2020

Hnub Tsib Lis Piam Ib Caij Yes Xus Yug los Xyoo B

Hnub Xya hauv Thawj Yim Hnub Yes Xus Yug Los
Lectionary: 204

Hwm LN Vaj Qhia Sylvester I, tuag xyoo 335 AD

Zaj Nyeem Ib: 1 ZAM 2: 18-21

18 Cov me nyuad, twb txog lub zim txwv kawg lawm. Nej tau hnov hais tias tus tiv Leej Pleev yuav tuaj no, zaum no twb muaj ntau tus uas tiv Leej Pleev tau tshwm tuaj lawm; vim li ntawd peb thiaj paub tias txog lub zim txwv kawg lawm.
19 Cov neeg ntawd tawm hauv peb mus, tab sis lawv tsis yog cov uas koom nrog peb ua ib pab tiag. Yog lawv nrog peb koom ua ib pab tiag, mas lawv yeej tseem yuav nrog peb ua ke. Lawv tawm mus kom sawv daws pom xyeem tias lawv tsis nrog peb koom ua ib pab neeg.
20 Ntawm nej, mas nej tau txais cov roj ntawm tus Ntshiab los pleev nej, ces nej sawv daws muaj kev paub kev to taub lawm.
21 Kuv sau ntawv tuaj rau nej, tsis yog vim nej tsis paub qhov tseeb; kuv sau tuaj, yog vim nej twb paub qhov tseeb lawm, thiab vim txhua yam lus dag yeej nyob tsis tau nrog qhov tseeb.

NPN 96: 1-2, 11-12, 13

Txais: (11a) Kom lub ntuj zoo siab thiab lub ntiaj teb hom khaj!

Nej hu ib zaj nkauj tshiab rau HUAB TAIS,
tas cov teb chaws, nej hu nkauj rau HUAB TAIS,
nej hu nkauj rau HUAB TAIS, nej cav txog nws lub npe.
Nej tshaj tawm txog nws txoj kev cawm seej hnub dhau hnub.

Txais…

Kom lub ntuj zoo siab thiab lub ntiaj teb hom khaj;
kom lub hiav txwv thiab txhua yam nyob hauv qw nrov nroo ntws;
kom cov tiaj nrag thiab txhua yam nyob hauv luag ntxhi!
Ces txhua tsob ntoo nyob hauv hav zoov
yuav dhia zoo siab ntawm HUAB TAIS xub ntiag.

Txais…

HUAB TAIS uaj lawm,
nws tuaj kav lub ntiaj teb.
Nws yuav tswj ntiaj teb neeg raws kev ncaj
thiab cov haiv neeg raws kev haum pheej.

Txasi…

As Les Lus Yas: ZAM 1: 14A, 12A

Txais: As les lus yas, as les lus yas

Tswv Ntuj Lo Lus yug los ua neeg muaj nqaij tawv thiab nws tau nrog peb nyob.
Cov uas txais nws, nws pub kom lawv muaj peev xwm ua tau Tswv Ntuj cov me nyuam.

Txais: As les lus yas, as les lus yas

Ntawv Moo Zoo: ZAM 1: 1-18

1 Thaum lub hauv paus, Leej Lo Lus yeej nyob lawm. Leej Lo Lus nrog Tswv Ntuj nyob. Leej Lo Lus yog Tswv Ntuj.
2 Thaum lub hauv paus, nws nrog Tswv Ntuj nyob.
3 Tas ib puas tsav yam tshwm tawm los vim nws. Yog tsis muaj nws, yuav tsis muaj ib yam dab tsi tshwm tau los nyob.
4 Yam uas nws ua kom tshwm tawm los yog txoj sia; txoj sia ntawd yog qhov pom kev kaj tib neeg.
5 Qhov pom kev ci rau hauv qhov tsaus ntuj, qhov tsaus ntuj ua tsis tau kom qhov pom kev ploj li.
6 Muaj ib tug neeg uas yog Tswv Ntuj xa nws tuaj, nws lub npe hu ua Zam.
7 Nws tuaj yog tuaj ua tim khawv, kom tau hais lus pov thawj txog qhov pom kev, ces txhua leej txhua tus thiaj yuav ntseeg vim nws.
8 Tus ntawd nws tsis yog qhov pom kev, tab sis nws tuaj ua pov thawj txog qhov pom kev.
9 Qhov pom kev tseeb uas ci tuaj kaj txhua leej txhua tus neeg, nws tab tom tuaj nyob hauv lub sim ceeb.
10 Nws nyob hauv lub sim ceeb uas yog nws ua kom tshwm tawm los, tiam sis lub sim ceeb tsis paub nws li. 11 Nws los nyob hauv nws tsev neeg, tiam sis nws cov neeg tsis txais nws li.
12 Tab sis cov uas txais nws, mas nws pub lub hwj huam rau lawv kom lawv ua tau Tswv Ntuj cov me nyuam; lawv yog cov uas ntseeg txog nws lub npe.
13 Cov ntawd lawv tsis yug los raws ntiaj teb txoj kev xeeb tawm los, tsis yog neeg xav kom lawv yug los, thiab kuj tsis yog neeg txiav txim siab ua kom lawv yug los; tiam sis lawv yug ntawm Tswv Ntuj los.
14 Leej Lo Lus tau tshwm los muaj ib lub cev nqaij, nws tau tsa tsev nrog peb nyob. Peb tau ntsia ntsoov nws lub hwj chim; yog ib lub hwj chim tsim nyog Leej Txiv ib Leeg Tub twm zeej yuav tsum muaj, vim nws muaj txiaj ntsim thiab qhov tseeb nyob puv hauv nws.
15 Zam ua tim khawv txog nws, Zam tau qw tshaj tawm li no: "Tus no yog tus kuv tau hais txog tias: ‘Tus uas lawv kuv qab tuaj, nws xub ua kuv ntej lawm, vim nws yeej ib txwm nyob ua ntej kuv lawm.’"
16 Peb sawv daws puav leej tau txais qhov uas nws muaj puv npo nyob bauv nws, yog tau txais txiaj ntsim tas txiaj ntsim dua,
17 vim tias txoj Cai yog hla ntawm Mais Xes tuaj, hos lub txiaj ntsim thiab txoj kev tseeb yog tuaj ntawm Yes Xus Pleev tuaj.
18 Tsis muaj leej twg tau pom dua Tswv Ntuj ib zaug li; yog Leej Tub Twm Zeej uas yog Tswv Ntuj, nyob rawv ntawm Leej Txiv xub ntiag, nws qhia kom peb paub Tswv Ntuj.

Cov zaj nyeem rau tim 1 lub 1 Hlis 2021 nyob hauv cov zaj nyeem rau Hnub Chiv lawm nawb:

https://hmongcatholique.forumdediscussions.com/t1561-cov-zaj-nyeem-hnub-chiv-xyoo-b-2020-2021#16215

Tim 2 lub 1 Hlis 2021

Thawj Hnub Xya Lis Piam Ib Caij Yes Xus Yug los Xyoo B Nruab lis piam Xyoo I
Lectionary: 205

Hwm LN Basil tus Loj thiab LN Gregory Nazianzen, ob tug Tswv Qhia

Zaj Nyeem Ib: 1 ZAM 2: 22-28

Cov zoo nyiad:
22 Tus neeg dag yog leej twg? Yog tus uas tsis kam lees tias Yes Xus yog Leej Pleev; tus ntawd ntag yog tus tiv Leej Pleev, nws thiaj tsis kam lees paub Leej Txiv thiab Leej Tub.
23 Leej twg tsis lees Leej Tub, mas nws kuj tsis muaj Leej Txiv li thiab; tus lees Leej Tub, mas nws kuj mmuaj Leej Txiv thiab.
24 Nej yuav tsum khaws cov lus uas nej tau hnov txij thaum lub hauv paus los kom nyob ruaj rau hauv nej. Yog cov lus uas nej tau hnov txij thaum lub hauv paus los nyob ruaj hauv nej, mas nej kuj yuav nyob ruaj hauv Leej Tub thiab hauv Leej Txiv.
25 Qhov uas nws tau cog lus yuav pub rau peb yog txoj sia nyob mus li.
26 Kuv sau tej no rau nej yog xav hais txog cov neeg uas yuav coj tau nej mus yuam kev.
27 Ntawm nej mas cov roj pleev uas nej tau txais ntawm nws yeej nyob ruaj hauv nej lawm, ces nej tsis tas yuav muaj leej twg qhia rau nej lawm, yeeb vim tias cov roj uas nws tau pleev nej yuav qhia txhua yam rau nej paub,uas yog tseeb tsis yog dag; li ntawd, mas nej yuav tsum nyob ruaj nreb hauv nws, raws li nws twb tau qhia rau nej lawm.
28 Cov me nyuam, nyem no nej yuav tsum nyob hauv Leej Pleev mog, kom thaum twg nws tshwm sim los, peb thiaj yuav tso siab lug, thiab tsis tau txais kev txaj muag rau nws thaum lub zim txwv nws los ntawd.

NPN 98: 1, 2-3AB, 3CD-4

Txais: (3cd) Tas cov npoo ntiaj teb kawg tau pom
peb tus Tswv Ntuj lub hwj huam cawm neeg lawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais…

HUAB TAIS ua kom neeg paub txog nws txoj kev cawm seej,
nws muab nws txoj kev ncaj tawm los rau cov haiv neeg pom.
Nws rov nco txog nws txoj kev ua zoo rau thiab ua ncaj rau
tsev neeg His Xas Lais.

Txais…

Tas cov npoo ntiaj teb kawg tau pom peb
tus Tswv Ntuj txoj kev cawm seej lawm;
Tas txhua teb chaws, nej hu nkauj zoo siab rau HUAB TAIS,
nej cuab suab hu nkauj, nej cav txog nws.

Txais…

As Les Lus Yas: HES NPLAWS 1: 1-2

Txais: As les lus yas, as les lus yas

Yav tas los Tswv Ntuj hais lus rau peb cov yawg koob nyob hauv cov yaj saub;
niaj hnub no, nws hais lus rau peb nyob hauv nws Leej Tub.

Txais: As les lus yas, as les lus yas

Ntawv Moo Zoo: ZAM 1: 19-28

19 Ntawm no yog Zam cov lus pov thawj:
Thaum cov Yus Das nyob Yes Lus Xas Les xa ib co leej choj thiab ib co les vis tuaj mus nug Zam hais tias : "Koj yog leej twg ?"
20 Mas Zam lees, nws tsis zais, nws lees tias : "Kuv tsis yog Leej Pleev."
21 Lawv nug Zam tias: "Ua li koj yog leej twg ? Koj puas yog Es Lias?" Zam hais tias : "Kuv tsis yog."
"Koj puas yog tus Yaj Saub?" Zam teb tias: "Tsis yog."
22 Lawv thiaj hais rau nws tias: "Koj yog leej twg tiag? Peb yuav tsum coj ib lo lus teb rov mus rau cov xa peb tuaj. Koj hais dab tsi txog koj tus kheej?"
23 Zam hais tias: "Kuv yog lub suab ntawm tus neeg qw hauv teb chaws suab puam tias : ‘Nej kho kom Huab Tais txoj kev ncaj tuaj,’ raws li yaj saub His Xais tau hais tseg."
24 Luag kuj xa ib co Fas Lis Xais tuaj thiab.
25 Lawv nug Zam tias: "Koj tsis yog Leej Pleev, tsis yog Es Lias, thiab tsis yog tus Yaj Saub, vim li cas koj thiaj ua kab ke ntxuav?"
26 Zam teb rau lawv tias: "Kuv ua kab ke ntxuav nyob hauv dej. Tiam sis nyob hauv nej, muaj ib tug uas nej tsis paub,
27 tus ntawd yuav lawv kuv qab tuaj, kuv tsis tsim nyog yuav daws nws txoj hlua khau."
28 Tej no tshwm sim tuaj nyob Npes Tas Nias, nyob sab dej Yos Las Das tim ub, ntawm thaj chaw uas Zam ua cov kab ke ntxuav.

Tim 4 lub 1 Hlis 2021

Hnub Ob Lis Piam Yes Xus Tawm Tuaj (Epiphany) Xyoo B Nruab Lis Piam Xyoo I
Lectionary: 212

Hwm LN Elizabeth Ann Seton, ua Leej Phauj

Zaj Nyeem Ib: 1 ZAM 3: 22–4:6

Cov Zoo Nyiad,
22 Peb tau txais yam peb thov ntawm Tswv Ntuj, vim peb coj nws cov lus qhia, thiab peb ua yam uas xis nws siab.
23 Tswv Ntuj Lo Lus qhia yog lo lus no: kom peb ntseeg txog nws Leej Tub Yes Xus Pleev lub npe, thiab kom peb sib nyiam sib hlub raws li lo lus qhia nws tau muab rau peb.
24 Txhua tus uas coj Tswv Ntuj cov lus qhia, nyob ruaj hauv nws, thiab nws nyob hauv lawv. Peb paub tias Tswv Ntuj nyob hauv peb, vim muaj Leej Ntuj Plig uas nws tau pub rau peb qhia kom peb paub.
4: 1 Cov zoo nyiad, nej tsis txhob ntseeg txhua leej txhua tus lub tswv yim mog, nej yuav tsum sim tej tswv yim ntawd saib puas yog tuaj ntawm Tswv Ntuj tuaj tso. Vim muaj ntau tus yaj saub cuav tau tawm tuaj mus nyob puv lub qab ntuj lawm.
2 Yog muaj li no mas nej thiaj yuav paub tau tias yog Tswv Ntuj lub tswv yim: lub tswv yim twg zeem tseeb tias Yes Xus Pleev tau nqes los yuav ib lub cev nqaij, mas lub tswv yim ntawd thiaj yog tuaj ntawm Tswv Ntuj tuaj.
3 Txhua lub tswv yim uas tsis zeem tseeb txog Yes Xus, mas nws tsis tuaj ntawm Tswv Ntuj tuaj, yog tus xav tiv Leej Pleev lub tswv yim xwb. Nej twb tau hnov lawm tias tus tiv Leej Pleev yuav tuaj; nyem no, nws twb nyob hauv lub qab ntuj neeg lawm.
4 Cov me nyuad, nej tuaj ntawm Tswv Ntuj tuaj, nej twb yeej cov tiv Leej Pleev lawm. Vim Tus nyob hauv nej, nws loj dua tus nyob hauv lub qab ntuj neeg.
5 Lawv tuaj hauv lub qab ntuj neeg tuaj, lawv thiaj hais lus raws li lub qab ntuj neeg hais, ces lub qab ntuj neeg mloog lawv.
6 Ntawm peb mas peb tuaj ntawm Tswv Ntuj tuaj; leej twg paub Tswv Ntuj, mas nws mloog peb; tus tsis tuaj ntawm Tswv Ntuj tuaj, mas nws tsis mloog peb. Vim li no mas peb thiaj paub tias lub tswv yim twg yog qhov tseeb, thiab lub tswv yim twg yog qhov yuam kev.

NPN 2: 7BC-8, 10-12A

Txais: (8ab) Kuv yuav muab tas ib tsoom haiv neeg los pub rau koj ua koj cuab tam.

HUAB TAIS hais rau kuv tias: ‘Koj yog kuv leej tub,
hnub no kuv tau yug koj los.
Koj thov kuv ces kuv yuav muab tas
ib tsoom haiv neeg rau koj ua koj lub cuab tam,
thiab lub ntiaj teb mus txog tim npoo
ntiaj teb kawg yuav yog koj li teej tug.”

Txais…

Ib tsoom vaj, nej yuav tsum cuab pob ntseg mloog,
cov tswj lub ntiaj teb, nej yuav tsum muaj kev ntshai.
Nej yuav tsob hwb HUAB TAIS nyob hauv txoj mkev ntshai;
Nej yuav dhia zoo siab nyob ntawm nws xub ntiag,
Nej yuav zoo siab nrog kev ntshai tshee na.

Txais…

As Les Lus Yas: MT 4: 23

Txais: As les lus yas, as les lus yas.

Yes Xus tshaj lub Moo Zoo txog lub Ceeb Tsheej
thiab nws kho txhua yam mob hauv tsoom neeg kom zoo hlo.

Txais: As les lus yas, as les lus yas.

Ntawv Moo Zoo: MT 4: 12-17, 23-25

12 Thaum Yes Xus hnov tias luag ntes Zam lawm, ces nws tshais chaw mus rau Nkas Lis Lais teb.
13 Nws tso Nas Xas Les tseg, nws mus nyob rau Kas Fas Naus, ntawm ntug dej ntuj, nyob ntawm cheeb tsam Ntxas Npus Loos thiab Nes Tas Lis.
14 Li ntawd thiaj muaj raws li tus yaj saub His Xais xub hais tseg tias :
15 “Ntxas Npus Loos daim av thiab Nes Tas Lis daim av, kev mus rau tom dej ntuj, uas nyob sab dej Yos Las Das tim ub, cov neeg teev pej kum dab lub xeev Nkas Lis Lais,
16 haiv neeg uas zaum nyob hauv kev tsaus ntuj, lawv tau pom ib qho pom kev ci loj; nyob saum cov neeg uas zaum nyob hauv lub teb chaws muaj kev tuag roos lawv, muaj ib qho pom kev ci tawm tuaj kaj lawv lawm.”
17 Txij thaum ntawd los, Yes Xus pib qhuab qhia tias: "Nej hloov siab mog, vim lub Ceeb Tsheej saum ntuj los txog ze lawm.”
23 Yes Xus mus ncig thoob lub xeev Nkas Lis Lais, nws qhuab qhia nyob hauv lawv cov tsev txoos, nws tshaj lub Moo Zoo txog lub Ceeb Tsheej, nws kho tas puas tsav yam mob, puas tsav yam txiab nkeeg hauv tsoom pej xeem zoo tas.
24 Nws lub moo nto mus thoob Xis Lias teb. Ces sawv daws coj cov neeg raug txhua hom mob nkeeg tuaj rau nws: cov raug mob raug ntsaj, cov raug dab, cov neeg vwm, cov tuag tes tuag taw, nws kho lawv sawv daws zoo tas tib si.
25 Muaj tej pab neeg coob coob tuaj caum nws, lawv tuaj Nkas Lis Lais tuaj, tuaj Des Kas Pos Lis tuaj, tuaj Yes Lus Xas Les tuaj, tuaj Yus Das teb tuaj, thiab tuaj sab dej Yos Las Das tim ub tuaj.

Tim 5 lub 1 Hlis 2021

Hnub Peb Lis Piam Yes Xus Tawm Tuaj (Epiphany) Xyoo B
Lectionary: 213

Hwm LN John Neumann, ua Tswv Qhia

Zaj Nyeem Ib: 1 ZAM 4: 7-10

7 Cov zoo nyiad, peb yuav sib nyiam sib hlub mog , vim txoj kev nyiam tuaj ntawm Tswv Ntuj tuaj; ua li mas tus twg nyiam, tus ntawd yug ntawm Tswv Ntuj los, thiab nws paub Tswv Ntuj.
8 Tus tsis muaj kev nyiam, mas nws tsis paub Tswv Ntuj, vim Tswv Ntuj yog txoj kev nyiam.
9 Tswv Ntuj txoj kev nyiam peb tawm los rau qhov muag pom xyeem li no: Tswv Ntuj xa nws Leej Tub Twm Zeej tuaj nyob ntiaj teb no, kom peb muaj txoj sia nyob hauv nws Leej Tub.
10 Txoj kev nyiam yog zoo li no: Tsis yog vim peb nyiam Tswv Ntuj, tiam sis yog vim Tswv Ntuj nyiam peb, ces nws thiaj xa nws Leej Tub tuaj ua nqi txhiv peb ntawm peb cov txhaum.

NPN 72: 1-2, 3-4, 7-8

Txais: (11) HUAB TAIS, txhua haiv neeg nyob hauv ntiaj teb no yuav pe hawm koj.

Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj tus tub.
Nws thiaj yuav tswj koj haiv neeg raws kev ncaj ncees
thiab koj cov neeg me raws kev txawj txiav txim .

Txais…

Cov roob siab yuav muab kev thaj yeeb rau tsoom pej xeem,
cov pov roob yuav muab txoj kev ncaj rau lawv.
Nws yuav tuaj cov pluag hauv tsoom pej xeem tog,
nws yuav cawm cov txom nyem tej me nyuam.

Txais…

Kev ncaj yuav tawg paj lub caij nws ua vaj,
thiab yuav muaj kev thaj yeeb lug mus txog thaum tsis muaj lub hli ntxiv.
Thov kom nws kav txij ib lub hiav txwv mus rau lwm lub,
txij tus Niam Dej mus txog tim npoo ntiaj teb kawg.

Txais…

As Les Lus Yas: LK 4: 18

Txais: As les lus yas, as les lus yas

Huab Tais tau xa kuv tuaj qhia ib lub moo zoo rau cov pluag
thiab tshaj kev twj lij rau cov neeg raug txim.

Txais: As les lus yas, as les lus yas

Ntawv Moo Zoo: MK 6: 34-44

34 Thaum Yes Xus nqes nkoj, nws pom ib pab neeg coob coob, nws lub siab quaj dhi hlub lawv, vim lawv zoo li ib co yaj uas tsis muaj tswv zov. Ces Yes Xus pib qhia lawv txog ntau yam.
35 Thaum lub sij hawm lig lawm, cov thwj tim los hais rau Yes Xus tias: “Qhov chaw no tsis muaj neeg nyob li, thiab tsam no lig lawm,
36 koj tso lawv rov mus, kom lawv mus muas noj ntawm cov thaj tsam thiab cov zej zog nyob ib ncig ntawm no.”
37 Tiam sis Yes Xus hais rau lawv tias: "Nej muab mov rau lawv noj mas." Cov thwj tim hais tias: "Peb puas yuav tsum siv nyiaj li ob puas hnub nqe zog mus muas mov coj los rau lawv noj ?”
38 Yes Xus hais rau lawv tias: "Nej muaj pes tsawg lub ncuav mov? Nej mus xyuas saib." Cov thwj tim mus nug, ces lawv hais tias: "Muaj tsib lub ncuav mov, thiab ob tug ntses."
39 Yes Xus kom cov thwj tim coj sawv daws zaum ua tej pab tej pawg saum cov nroj ntsuab.
40 Ces tas sawv daws zaum ua tej leej muaj ib puas leej, tej leej muaj tsib caug leej.
41 Yes Xus tuav tsib lub ncuav mov thiab ob tug ntses, nws tsa muag ntsia saum ntuj, nws hais zaj foom hmoov zoo rau, nws muab cov ncuav mov ntais, nws cev rau cov thwj tim kom lawv nqa mus faib rau sawv daws. Yes Xus kuj muab ob tug ntses faib rau sawv daws thiab.
42 Txhua leej txhua tus tau noj thiab sawv daws tau noj tsau npo.
43 Lawv khaws tej sab mov seem tau puv kaum ob tawb nrog cov nqaij ntses seem.
44 Cov neeg uas noj cov mov ntawd muaj tsib txhiab leej txiv neej.

Tim 6 lub 1 Hlis 2021

Hnub Plaub Lis Piam Yes Xus Tawm Tuaj Xyoo B
Lectionary: 214

Zaj Nyeem Ib: 1 ZAM 4: 11-18

11 Cov zoo nyiad, yog Tswv Ntuj nyiam peb npaum li ntawd, mas peb kuj yuav tsum sib nyiam sib hlub thiab.
12 Tsis muaj leej twg tau pom dua Tswv Ntuj ib zaug li, tiam sis yog peb sib nyiam sib hlub, mas Tswv Ntuj nyob hauv peb, thiab nws txoj kev nyiam yuav zoo txhij txhua tiav log nyob hauv peb.
13 Peb paub tias peb nyob hauv Tswv Ntuj, thiab nws nyob hauv peb vim qhov no: yog qhov tias nws pub nws Leej Tswv Yim rau peb.
14 Peb tau pom ntsoov thiab peb ua tim khawv zeem tias Leej Txiv tau xa nws Leej Tub tuaj cawm lub qab ntuj neeg.
15 Leej twg lees tias Yes Xus yog Tswv Ntuj Leej Tub, mas Tswv Ntuj nyob hauv nws, thiab nws nyob hauv Tswv Ntuj.
16 Ntawm peb mas peb paub thiab ntseeg tias Tswv Ntuj nyiam peb hlub peb, Tswv Ntuj yog txoj kev nyiam; thiab yog leej twg nyob hauv txoj kev nyiam, mas nws kuj nyob hauv Tswv Ntuj, thiab Tswv Ntuj nyob hauv nws.
17 Yog peb coj li ntawd mas txoj kev nyiam yuav zoo tiav log nyob hauv peb, ces peb yuav muaj kev tso siab lug thaum txog hnub txiav txim, vim tias Tswv Ntuj zoo li cas, mas peb kuj yuav zoo li ntawd nyob hauv ntiaj teb no thiab.
18 Tsis muaj kev ntshai nyob hauv txoj kev nyiam li, txoj kev nyiam uas zoo tiav log muab txoj kev ntshai tshem tawm mus, vim tias nyob hauv txoj kev ntshai, mas muaj kev ntshai raug txim; vim li ntawd, leej twg ntshai, mas nws tseem tsis tau zoo tiav log nyob hauv txoj kev nyiam.

NPN 72: 1-2, 10, 12-13

Txais: (11) HUAB TAIS, txhua haiv neeg nyob hauv ntiaj teb no yuav pe hawm koj.

Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj tus tub.
Nws thiaj yuav tswj koj haiv neeg raws kev ncaj
thiab koj cov neeg me rawj kev txawj txiav txim .

Txais…

Cov vaj nyob Tas Xis thiab nyob hauv cov pov txwv yuav nqa paj tshab tuaj;
Cov vaj nyob Xes Npas thiab Xas Npas yuav nqa nyiaj nqa kub tuaj rau nws.

Txais…

Nws yuav cawm tus pluag uas hu txog nws,
thiab yuav npo tus txom nyem uas tsis muaj neeg pab.
Nws yuav hlub cov neeg me thiab cov txom nyem;
nws yuav cawm cov pluag txoj sia.

Txais…

As Les Lus Yas: 1 TM 3: 16

Txais: As les lus yas, as les lus yas

Huab Tais Pleev, thov kom koj nto koob meej,
kom neeg tshaj txog koj rau cov neeg teev pej kim dab paub.
Huab Tais Pleev, thov kom koj nto koob meej,
kom tas ntiaj teb neeg ntseeg txog koj.

Txais: As les lus yas, as les lus yas

Ntawv Moo Zoo: MK 6: 45-52

45 Thaum cov tsib txhiab leej neeg tau noj mov tsau plab tas, Yes Xus txhib nws cov thwj tim kom nce nkoj ua nws ntej mus lawm sab ntug dej tim ub, mus rau Npes Xais Das, hos Yes Xus tseem nyob xa tsoom sid rov qab mus tsev.
46 Thaum nws xa lawv mus tas lawm, nws nce mus saum roob mus teev ntuj saud.
47 Thaum tsaus ntuj lawm, lub nkoj twb mus deb txog tom plawv dej ntuj lawm, hos Yes Xus tib leeg tseem nyob tim ntug nqhuab.
48 Yes Xus pom cov thwj tim nquam nkoj raug cua hlob ntsawj lawv sab kawg, vim cua tshuab tom hauv ntej tuaj. Thaum yuav kaj ntug kwv yees peb teev sawv ntxov, Yes Xus mus ko taw saum nplaim dej caum lawv qab, nws npaj yuav huas lawv ntej.
49 Cov thwj tim pom Yes Xus mus kev saum nplaim dej, lawv xav tias yog dab, ces lawv qw qw. 50 Sawv daws puav leej pom tib si ces lawv ntshai kawg. Tab sis, Yes Xus hais lus tam sis ntawd rau lawv, nws hais tias: "Nej ua siab loj ! Yog kuv xwb, nej tsis txhob ntshai."
51 Ces Yes Yes Xus thiaj nce mus nrog lawv nyob hauv nkoj, cua cia li tu nrho. Cov thwj tim ceeb tas thiab poob siab loj kawg nkaus,
52 vim lawv tseem tsis tau to taub tias muaj dab tsi tshwm sim txog cov ncuav mov li, lawv lub siab tseem nyob tawv qhawv qhwv nrees xwb.

Tim     7     lub     1     Hlis     2021

Hnub Tsib Lis Piam Yes Xus Tawm Tuaj Xyoo B
Lectionary: 215

Hwm LN Raymond Peñafort, ua Leej Choj

Zaj Nyeem Ib:   1 ZAM 4: 19–5:4

Cov zoo nyiad,
19 Peb nyiam Tswv Ntuj vim nws xub tau nyiam peb lawm.
20 Yog leej twg hais tias: “Kuv nyiam Tswv Ntuj,” tab sis nws ntxub nws tus kwv tij, mas nws yog ib tug neeg dag; vim tus tsis nyiam nws tus kwv tij uas nws qhov muag pom tau, mas nws nyiam tsis tau Tswv Ntuj uas nws qhov muag tsis pom.
21 Lo lus qhia uas peb tau txais ntawm nws los yog lo lus tias: Leej twg nyiam Tswv Ntuj mas nws kuj yuav tsum nyiam nws tus kwv tij thiab.
5: 1 Txhua leej uas ntseeg tias Yes Xus yog Leej Pleev, mas nws yug ntawm Tswv Ntuj los. Vim leej twg nyiam leej Txiv mas nws kuj nyiam tus yug ntawm leej Txiv los thiab.
2 Qhov no ua kom peb paub tias peb nyiam Tswv Ntuj cov me nyuam, thaum peb nyiam Tswv Ntuj, thiab peb coj nws cov lus qhia.
3 Vim txoj kev nyiam Tswv Ntuj yog li no: Yog coj nws cov lus qhia; Tswv Ntuj cov lus qhia tsis hnyav rau peb li.
4 Vim yam twg yug ntawm Tswv Ntuj los mas yam ntawd yeej lub qab ntuj neeg; txoj kev uas yeej lub qab ntuj neeg yog peb txoj kev ntseeg.

NPN   72: 1-2, 14+15BC, 17

Txais: (11) HUAB TAIS, txhua haiv neeg nyob hauv ntiaj teb no yuav pe hawm koj.

Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj tus tub.
Nws thiaj yuav tswj koj haiv neeg raws kev ncaj,
thiab koj cov neeg me raws kev txawj txiav txim .

Txais…

Nws yuav cawm lawv dim ntawm txoj kev
Raug luag dag thiab raug luag tsim txom,
thiab nws yuav saib lawv cov ntshav muaj nuj nqes.
Kom muaj tus thov ntuj rau lawv tas mus li;
hnub dhau hnub lawv yuav cav txog nws.

Txais…

Thov kom nws lub npe nto moo mus li,
kom nws lub npe nyob ntev npaum lub hnub.
Tas txhua xeem neeg nyob ntiaj teb yuav
txais txoj hmoov zoo nyob hauv nws,
tas txhua haiv neeg yuav tshaj txog nws txoj kev zoo siab.

Txais…

As Les Lus Yas:   LK 4: 18

Txais: As les lus yas, as les lus yas

HUAB TAIS tau xa kuv tuaj qhia ib lub moo zoo rau cov pluag
thiab tshaj kev twj lij rau cov neeg raug txim.

Txais: As les lus yas, as les lus yas.

Ntawv Moo Zoo:   LK 4: 14-22a

14 Yes Xus rov los rau Nkas Lis Lais, nws muaj Leej Ntuj Plig lub hwj huam puv hauv nws. Nws lub moo nto lug mus puv ib cheeb tsam cov zej zog nyob ntawd.
15 Nws qhia tsoom sid nyob hauv lawv cov tsev txoos, tas sawv daws qhuas nws kawg.
16 Ces Yes Xus los txog Nas Xas Les, lub zos uas nws nyob hlob; hnub Xas Npas Tos, nws mus hauv lub tsev txoos xws li nws ua kam, thiab nws sawv mus nyeem ntawv.
17 Lawv cev tus Yaj Saub His Xais kauj ntawv rau nws. Nws nthuav kauj ntawv, nws nrhiav tau nqe lus uas sau tias:
18 “Huab Tais lub Tswv Yim nyob saum kuv, vim nws tau pleev roj los qee kuv kom kuv mus tshaj lub Moo Zoo rau cov pluag; nws xa kuv mus tshaj kev twj lij rau cov neeg nyob txim, thiab kev pom kev rau cov dig muag, mus tso cov raug luag quab yuam kom rov tau nyob twj lij,
19 thiab tshaj tias yog ib lub zoo xyoo rau Huab Tais pub txiaj ntsim.”
20 Yes Xus rov kauv kauj ntawv rau, nws rov muab rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus.
21 Ces Yes Xus hais rau lawv tias: “Hnub no, cov lus nyob hauv zaj ntawv no tsheej xeeb raws li nej tau hnov lawm."
22a Tas cov neeg ntawd hais lus zoo kawg txog nws, lawv qhuas cov lus muaj txiaj ntsim tawm hauv nws lub ncauj los.

Tim 8 lub 1 Hlis 2021

Hnub Rau Lis Piam Yes Xus Tawm Tuaj Xyoo A
Lectionary: 216

Zaj Nyeem Ib: 1 ZAM 5: 5-13

Cov zoo nyiad,
5 Tus yeej lub ntiaj teb yog leej twg? Tsuas kawg yog tus uas ntseeg tias Yes Xus yog Tswv Ntuj Leej Tub xwb.
6 Tus tuaj hauv dej thiab hauv ntshav tuaj yog Yes Xus Pleev; nws tsis tuaj hauv dej tuaj xwb, nws tuaj hauv dej thiab hauv ntshav tuaj. Leej Ntuj Plig yog tus ua tim khawv txog qhov ntawd; Leej Ntuj Plig yog qhov tseeb.
7 Ua li mas muaj peb tug ua tim khawv zeem txog qhov ntawd:
8 Muaj Leej Ntuj Plig, muaj dej thiab muaj ntshav; peb tug no puav leej hais ib lo lus xwb.
9 Yog peb twb ntseeg tib neeg lo lus tim khawv, masTswv Ntuj lo lus tim khawv haj yam yuav tsum loj dua.
Tswv Ntuj lo lus tim khawv yog li no: Yog lo tias nws tau ua tim khawv txog nws Leej Tub lawm.
10 Leej twg ntseeg txog Tswv Ntuj Leej Tub, mas nws tau lo lus tim khawv ntawd los nyob hauv nws. Hos tus tsis ntseeg mas nws muab Tswv Ntuj ua ib tug neeg dag, vim nws tsis ntseeg lo lus tim khawv uas Tswv Ntuj hais txog nws Leej Tub.
11 Tswv Ntuj lo lus tim khawv yog li no : Tswv Ntuj pub txoj sia nyob mus li rau peb, txoj sia ntawd nyob hauv nws Leej Tub.
12 Leej twg muaj Leej Tub, ces nws tau txoj sia; leej twg tsis muaj Tswv Ntuj Leej Tub, ces nws kuj tsis tau txoj sia thiab.
13 Kuv sau tej no tuaj rau nej, kom nej paub tseeb tias, nej cov uas ntseeg txog Tswv Ntuj Leej Tub lub npe, mas nej tau txoj sia nyob mus li.

NPN 147: 12-13, 14-15, 19-20

Txais: (12a) Yes Lus Xas Les, koj cia li cav txog Huab Tais.
Los: As les lus yas

Yes Lus Xas Les, koj cav txog koj tus Huab Tais mog,
Xis Yoos, koj qhuas txog koj tus Tswv Ntuj mog.
Vim nws tau ua kom koj cov tab ntoo ntawm rooj vag khov tuaj lawm.
Nws tau foom hmoov zoo rau koj cov me nyuam uas nyob hauv koj.

Txais: (12a) Yes Lus Xas Les, koj cia li cav txog Huab Tais.
Los: As les lus yas

Nws ua kom muaj kev thaj yeeb nyob hauv koj tus ciam av
Nws ua kom koj muaj cov mov qab noj tsau npo.
Nws xa nws lo lus ceeb toom tuaj rau ntiaj teb,
nws lo lus khiav ceev nrooj tuaj.

Txais: (12a) Yes Lus Xas Les, koj cia li cav txog Huab Tais.
Los: As les lus yas

Nws tshaj nws tej lus rau Yas Kos
thiab nws tej kev cai tej lij choj rau His Xas Lais.
Nws tsis tau ua li no dua rau lwm haiv neeg,
tsis tau qhia nws tej cai lij choj rau lawv paub li. As les lus yas.

Txais: (12a) Yes Lus Xas Les, koj cia li cav txog Huab Tais.
Los: As les lus yas

As Les Lus Yas: MT 4: 23

Txais: As les lus yas, as les lus yas

Yes Xus tshaj lub Moo Zoo txog lub Ceeb Tsheej
thiab nws kho txhua yam mob hauv tsoom neeg kom zoo hlo.

Txais: As les lus yas, as les lus yas

Ntawv Moo Zoo: LK 5: 12-16

12 Muaj ib zaug, Yes Xus nyob hauv ib lub nroog, txawm muaj ib tug neeg uas nws ib ce mob ruas tas huv si. Thaum nws pom Yes Xus, nws khoov ntsej muag ti av pe, nws thov Yes Xus tias : "Huab Tais, yog koj xav mas koj ua tau kom kuv rov huv tuaj."
13 Ces Yes Xus cev tes mus kov tus neeg mob ruas, nws hais tias : "Kuv xav. Koj cia li huv tuaj." Tam sis ntawd tus kab mob ruas tso tus neeg tseg.
14 Yes Xus txwv tus neeg ntawd kom txhob hais dab tsi rau leej twg li, tab sis nws hais tias: “Koj yuav mus thws koj lub cev rau tus Leej Choj saib, thiab koj yuav cev tej yam ntxuav txhaum raws li Mais Xes qhia, los ua pov thawj rau lawv paub."
15 Yes Xus lub moo tsuas muaj haj yam nrov zuj zus xwb. Tej pab neeg coob coob tuaj sib txoos mloog Yes Xus, thiab kom Yes Xus kho lawv cov mob kom zoo.
16 Tab sis Yes Xus mus nraim nyob tom tej thaj chaw tsis muaj neeg, nws mus teev Ntuj nyob ntawd.

Tim 9 lub 1 Hlis 2021

Hnub Xya Lis Piam Yes Xus Tawm Tuaj Xyoo B
Lectionary: 217

Zaj Nyeem Ib: 1 ZAM 5: 14-21

Cov zoo nyiad:
14 Peb muaj kev tso siab lug rau Tswv Ntuj tias yog peb thov ib yam raws li nws lub siab xav, mas nws yeej yuav mloog peb.
15 Yog peb paub tias nws mloog peb thaum peb thov ib yam dab tsi, mas peb kuj paub tias peb twb tau yam uas peb thov lawm.
16 Ces yog leej twg pom nws tus kwv tij ua ib qho txhaum, uas tsis yog ib qho txhaum coj mus rau kev tuag, mas nws yuav thov Tswv Ntuj rau nws tus kwv tij, ces Tswv Ntuj yuav pub txoj sia rau tus kwv tij ntawd; qhov no yog hais rau cov neeg ua txhaum tsis yog txhaum coj mus rau kev tuag xwb, vim muaj ib hom txhaum uas coj mus rau kev tuag; kuv tsis hais kom nej thov Ntuj rau tus neeg ua qhov txhaum uas coj mus rau kev tuag ntawd.
17 Tas puas tsav yam tsis zoo yeej yog kev txhaum, tab sis muaj ib hom txhaum tsis yog txhaum coj mus rau kev tuag.
18 Peb paub zoo tias tus yug ntawm Tswv Ntuj los, mas nws tsis ua txhaum, vim tias tus uas yug ntawm Tswv Ntuj los mas Tswv Ntuj pov hwm nws, ces tus Phem kov tsis tau nws.
19 Peb paub tias peb yog Tswv Ntuj neeg, hos tas lub qab ntuj neeg nyob rau hauv tus Phem lub hwj huam.
20 Peb kuj paub tias Tswv Ntuj Leej Tub twb tuaj lawm, nws pub txoj kev txawj to taub rau peb, kom peb paub tus uas yog tus Tseeb. Peb twb nyob hauv tus uas yog tus Tseeb, hauv nws Leej Tub Yes Xus Pleev lawm. Nws thiaj yog tus Tseem Tswv Ntuj, thiab yog txoj sia nyob mus li.
21 Cov me nyuad, nej ceev faj zoo txog cov tswv ntuj cuav mog !

NPN 149: 1-2, 3-4, 5-6A+9B

Txais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
Kom cov His Xas Lais zoo siab nyob hauv tus uas tsim lawv los,
kom Xis Yoos cov me nyuam luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
kom lawv hu nkauj cav txog nws nrog
suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej ua zam npua cov neeg me.

Txais: (4a) Huab Tais zoo siab nyob hauv nws haiv neeg.
los: As les lus yas

Kom cov muaj lub siab ntseeg hom khaj
nyob hauv txoj kev nto koob meej;
kom lawv hu nkauj zoo siab saum lawv tej chaw zaum;
kom lawv lub qa tsuas muaj qw suab cav txog Tswv Ntuj.
Cov uas ntseeg txog nws muaj koob meej zoo li ntawd. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas: MT 4: 16

Txais: As les lus yas, as les lus yas

Haiv neeg zaum hauv kev tsaus ntuj tau pom ib qhov pom kev ci loj;
qhov pom kev tau tawm tuaj kaj cov uas
nyob hauv lub teb chaws muaj kev tuag roos.

Txais: As les lus yas, as les lus yas

Ntawv Moo Zoo: ZAM 3: 22-30

22 Yes Xus thiab nws cov thwj tim mus rau thaj av Yus Das, nws nrog lawv nyob ntawd thiab nws ua cov kab ke ntxuav.
23 Zam kuj ua kab ke ntxuav nyob Es Noos ze ntawm Xas Lis thiab, vim nyob ntawd muaj dej ntau, ces tsoom neeg tuaj cuag nws thiab txais cov kab ke ntxuav.
24 Thaum ntawd, Zam tseem tsis tau raug luag muab kaw hauv tsev loj faj.
25 Muaj ib zaug, Zam cov thwj tim nrog ib tug Yus Das sib cav txog txoj kev ntxuav txhaum.
26 Lawv los cuag Zam, lawv hais rau nws tias: "Las Npis, tus uas tau nrog koj ua ke nyob sab dej Yos Las Das tim ub, tus uas koj tau ua tim khawv hais txog nws, mas zaum no nws ua kab ke ntxuav thiab; ces tas ib tsoom neeg tuaj cuag nws."
27 Zam teb tias: "Neeg muab tsis tau ib yam dab tsi los rau nws li, yog lub ntuj tsis pub rau nws.
28 Nej yog cov tim khawv hnov kuv hais tias: ‘Kuv tsis yog Leej Pleev,’ tiam sis kuv yog tus tuaj ua nws ntej.
29 Tus tau nkauj nyab, yog nraug vauv; nraug vauv tus phooj ywg sawv nyob ntawd, nws mloog, mas nws zoo siab kawg vim nws tau hnov nraug vauv lub suab. Li ntawd kuv muaj txoj kev zoo siab puv npo lawm.
30 Tus ntawd mas nws yuav tsum loj tuaj, hos kuv mas kuv yuav tsum me tuaj.”

Tim 11 lub 1 Hlis 2021

Hnub Ob Lis Piam Ib Nruab Xyoo B Nruab Lis Piam Xyoo I
Lectionary: 305

Zaj Nyeem Ib: HES NPLAWS 1: 1-6

Cov kwv tij nkauj muad:
1 Yav thaum ub, Tswv Ntuj kom cov Yaj Saub siv ntau zaus thiab ntau txoj kev los cev nws cov lus rau peb cov yawg koob.
2 Lub zim txwv kawg niaj hnub no, nws hais nws cov lus rau peb nyob hauv nws Leej Tub, tus uas nws tau tsa los txais lub cuab tam tas huv tib si, thiab tus tau nrog nws tsim tas lub sim ceeb.
3 Leej Tub yog Tswv Ntuj lub hwj chim ci ntsa iab, yog Tswv Ntuj tus duab; nws siv nws lo lus muaj hwj huam los nres tas lub sim ceeb huv tib si. Thaum nws ntxuav txoj kev txhaum pov tseg tas lawm, nws los zaum ntawm tus Muaj Hwj Huam nyob txheej ntuj saud sab xis.
4 Nws loj dua ib tsoom Tshiab, nws thiaj tau txais ib lub npe muaj hwj chim loj dua tas cov Tshiab tej npe huv tib si.
5 Vim tias, puas muaj ib tug Tshiab twg uas Tswv Ntuj tau hais rau nws tias: “Koj yog kuv Leej Tub, hnub no kuv xeeb koj los?” Los tseem hais tias:“Kuv yog nws Txiv, nws yog kuv Leej Tub?”
6 Tseem muaj ib lo lus ntxiv: thaum Tswv Ntuj coj tus uas Xub Yug los tuaj nyob hauv lub sim ceeb no, nws hais tias: “Kom tas Tswv Ntuj ib tsoom Tshiab pe hawm nws.”

NPN 97: 1+2B, 6+7C, 9

Txais: (7c) Kom tas Huab Tais cov tshiab pe hawm nws.

HUAB TAIS ua vaj, kom lub ntiaj teb cia li hom khaj,
kom cov pov txwv uas muaj ntau lub cia li zoo siab.
Kev ncaj ncees thiab kev txiav txim yog tus
taw txheem nws lub theej kiab.

Txais: (7c) Kom tas Huab Tais cov tshiab pe hawm nws.

Lub ntuj tshaj nws txoj kev ncaj ncees,
tas txhua haiv neeg pom nws lub hwj chim.
Kom tas nws tsoom tshiab cia li pe hawm nws.

Txais: (7c) Kom tas Huab Tais cov tshiab pe hawm nws.

HUAB TAIS, vim koj yog tus Nyob Siab Tshaj kav tas lub ntiaj teb.
koj loj tshaj tas ib tsoom tswv ntuj.

Txais: (7c) Kom tas Huab Tais cov tshiab pe hawm nws.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej nyob ze ze lawm,
nej cia li lees txhaum thiab ntseeg txog lub Moo Zoo.

Txais: As les lus yas, as les lus yas.

Ntawv Noo Zoo: MK 1: 14-20

14 Thaum luag ntes Zam lawm, Yes Xus mus Nkas Lis Lais teb; nws tshaj Tswv Ntuj lub Moo Zoo tias:
15 "Txog lub caij teem lawm, Tswv Ntuj lub Ceeb Tsheej los txog ze lawm, nej kav tsij lees txhaum thiab ntseeg lub Moo Zoo."
16 Thaum Yes Xus taug tus ntug dej ntuj Nkas Lis Lais, nws pom Xis Moos, thiab Xis Moos tus kwv As Nres, nkawd tab tom pov vas rau hauv dej ntuj, vim nkawd yog tub puav ntses.
17 Yes Xus hais rau nkawd tias: "Neb raws kuv mus, kuv yuav muab neb tsa ua tub puav neeg."
18 Tam sis ntawd nkawd tso plhuav nkawd cov vas puav ntses tseg, nkawd cia li raws Yes Xus mus.
19 Yes Xus mus ntxiv me ntsis tom ntej, nws pom Yas Kos, uas yog Ntxes Npes Dais tus tub, thiab nws tus kwv Zam; nkawd tseem nyob hauv nkoj, tab tom ntxiv nkawd cov vas puav ntses.
20 Yes Xus hu nkawd, ces tam sis ntawd nkawd tso plhuav nkawd txiv Ntxes Npes Dais rau hauv nkoj nrog cov tub zog, nkawd cia li lawv Yes Xus qab mus lawm.

Tim 12 lub 1 Hlis 2021

Hnub Peb Lis Piam Ib Nruab Xyoo B Nruab Lis Piam Xyoo I
Lectionary: 306

Zaj Nyeem Ib: HES NPLAWS 2: 5-12

5 Tswv Ntuj tsis tau muab lub sim ceeb fab lwm tiam uas peb hais txog zwm rau ib co Tshiab.
6 Muaj ib tug tau sau lo lus zeem tseeb no tias: “Neeg yog dab tsi koj thiaj nco txog nws?” los “Leej tib neeg tus tub yog dab tsi, koj thiaj muab nws saib rau qhov siab?
7 Koj tau muab nws tso qis dua cov Tshiab ib me ntu. Koj muab hwj chim thiab koob meej ua mom teev kub rau nws ntoo.
8 Koj tso puas tsav puas yam rau hauv nws qab xib taws.” Tswv Ntuj tso txhua yam zwm rau tib neeg, nws tsis cia ib yam dab tsi uas yuav tsis zwm rau tib neeg. Lub zim txwv no, peb tseem tsis tau pom tias txhua yam zwm rau tib neeg.
9 Tiam sis Yes Xus tus uas tau nyob qis dua cov Tshiab ib me ntu, mas peb pom tias nws tau lub hwj chim thiab lub koob meej ua mom teev kub ntoo lawm, vim nws tau raug txom nyem nyiaj txoj kev tuag. Tswv Ntuj lub txiaj ntsim ua kom nws yuav tsum saj txoj kev tuag, nws thiaj pab tau txhua tus neeg.
10 Vim tias, tus uas tas puas tsav yam yog nws tug thiab nws yog tus tsim tas puas tsav yam, mas tsim nyog kom thaum nws coj coob leej tub ki mus txais koob meej, nws yuav tsum cia tus tuam thawj coj txoj kev cawm los rau lawv raug txom nyem loj ua kom nws yog tus neeg zoo tas nrho tiav log.
11 Vim tus ua tau kom luag ntshiab tuaj, thiab cov tau txais kev ntshiab, lawv sawv daws puav leej tawm ntawm ib tug los xwb. Vim li ntawd, nws thiaj tsis txaj muag hu lawv ua nws cov kwv.
12 Nws thiaj hais tias: “Kuv yuav tshaj koj lub npe rau kuv cov kwv, kuv yuav cav txog koj nyob hauv lawv lub txoos.”

NPN 8: 2AB+5, 6-7, 8-9

Txais: (7) Koj tau muab koj Leej Tub ua tus tswj tej yam koj txhais tes tau tsim los.

HUAB TAIS, peb tus Huab Tais, ua cas koj lub npe
yuav muaj hwj chim loj ua luaj nyob saum tas lub ntiaj teb!
Tib neeg yog dab tsi, koj thiaj li quav ntsej txog nws?
Tib neeg tus tub yog dab tsi, koj thiaj li khuv xim nws?

Txais: (7) Koj tau muab koj Leej Tub ua tus tswj tej yam koj txhais tes tau tsim.

Koj tau tsim nws qis me ntsis cov tshiab,
koj tau muab koob meej thiab hwj chim rau nws ntoo.
Koj tau tsa nws ua tus kav tej yam koj txhais tes tau tsim,
koj tso txhua tsav txhua yam rau hauv nws qab xib taws.

Txais: (7) Koj tau muab koj Leej Tub ua tus tswj tej yam koj txhais tes tau tsim.

Xws li tas cov yaj thiab cov nyuj,
tas cov tsiaj nyob hauv tej nras liaj nras teb,
cov noog ya saum ntuj, cov ntses hauv hiav txwv,
thiab txhua yam tsiaj ua luam dej hauv hiav txwv.

Txais: (7) Koj tau muab koj Leej Tub ua tus tswj tej yam koj txhais tes tau tsim.

As Les Lus Yas: 1 TES XAS LOS NIS 2: 13

Txais: As les lus yas, as les lus yas.

Nej yuav txais Tswv Ntuj lo lus, tsis txais li yog neeg lo lus,
tiam sis raws li qhov tseeb tiag, uas yog Tswv ntuj lo lus.

Txais: As les lus yas, as les lus yas.

Ntawv Moo Zoo: MK 1: 21-28

21 Yes Xus thiab nws cov thwj tim mus hauv Kas Fas Naus. Hnub Xas Npas Tos, Yes Xus mus hauv lub tsev txoos, tam sis ntawd, thiab nws qhia sawv daws.
22 Zeej tsoom qhuas nws cov lus qhia, vim nws qhia lawv xws li neeg muaj peev xwm, tsis zoo li cov kws Ntawv Ntshiab.
23 Tam sis ntawd, nyob hauv lawv lub tsev txoos, muaj ib tug neeg raug ib tug dab tsis huv nthe nthe,
24 nws hais tias: "Yes Xus Nas Xas Les, koj xav ua dab tsi rau peb? Puas yog koj tuaj rhuav peb? Kuv paub koj yog leej twg: koj yog Tswv Ntuj tus Ntshiab."
25 Yes Xus cem nws tias : "Ua twj ywm, koj cia li tawm hauv nws mus."
26 Dab tsis huv siv zog kawg muab tus neeg ntawd nchos, nws nthe ib suab nrov nrov ces nws tawm hauv tus neeg mus.
27 Tas sawv daws ntshai, lawv sib nug zom zaws tias: “Qhov ntawd yog dab tsi? Yog ib txog kev qhuab qhia tshiab muaj peev xwm kawg; tab yog dab tsis huv los nws tswj tau lawv, ces lawv mloog nws lus.”
28 Ces ib sij huam, Yes Xus lub moo nto lug rau txhua qhov, mus thoob ib cheeb tsam hauv xeev Nkas Lis Lais.

Tim 13 lub 1 Hlis 2021

Hnub Plaub Lis Piam Ib Nruab Xyoo B Nruab Lis Piam Xyoo I
Lectionary: 307

Hwm LN Hilary, ua nTswv Qhia thiab Kws cov Txuj Ntshiab

Zaj Nyeem Ib: HES NPLAWS 2: 14-18

14 Vim ib co me nyuam koom ib co roj ntsha ib ce nqaij, mas Yes Xus kuj nrog lawv koom thiab, kom nyob hauv txoj kev tuag nws yeej tus muaj txoj kev tuag lub hwj huam, uas yog tus dab phem.
15 Thiab nws muab kev twj lij rau cov uas ntshai ntshai kev tuag ces lawv raug ua qhev tas lawv sim neej.
16 Nws tsis yog tuaj cawm ib co tshiab, nws tuaj cawm Has Nplas Has tsoom xeeb ntxwv.
17 Vim li no, nws thiaj yuav tsum yug los zoo ib yam li nws cov kwv cov muam, kom nws ua tau ib tug Tuam Leej Choj khuv leej neeg thiab pheej xeeb nyob ntawm Tswv Ntu xub ntiag, nws thiaj theej tau tsoom pej xeem lub txhoj.
18 Vim nws tus kheej tau raug txom nyem nyob hauv txoj kev sim siab, mas nws thiaj muaj peev xwm pab tau cov uas raug kev sim siab.

NPN 105: 1-2, 3-4, 6-7, 8-9

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

Nej ua HUAB TAIS tsaug, nej tuav txog nws lub npe,
nej tshaj tej yam nws tau ua rau cov haiv neeg paub.
Nej hu nkauj rau nws, nej hu nkauj cav txog nws,
nej tshaj txog tej yam loj tsim nyog qhuas nws tau ua.

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

Nej txais koob meej nyob hauv nws lub npe,
nej cia li zoo siab, nej cov uas muaj lub siab nrhiav HUAB TAIS!
Nej vam txog HUAB TAIS, nej nrhiav nws lub zog,
nej yuav nrhiav kom tau tsob hwb nws tsis tseg.

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

Has Nplas Has tsoom xeeb ntxwv, Tswv Ntuj cov tub txib,
Yas Kos cov tub, cov nws tau xaiv aw!
HUAB TAIS yog peb tus Tswv Ntuj!
Nyob thoob ntiaj teb nws txoj kev txiav txim muaj yeej.

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

Nws nco ntsoov tas mus li txog nws lo lus cog tseg
uas nws tau hais ruaj khov kom kav ib txhiab tiam neeg,
raws li nws tau hais rau Has Nplas Has
thiab tau nrog His Xas Has cog lus.

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

As Les Lus Yas: ZAM 10: 27

Txais: As les lus yas, as les lus yas

Huab Tais hais tias: Kuv cov yaj mloog kuv lub suab,
kuv paub kuv cov yaj, kuv cov yaj taug kev raws kuv qab.

Txais: As les lus yas, as les lus yas

Ntawv Moo Zoo: MK 1: 29-39

29 Yes Xus tawm hauv tsev txoos los, nws nrog Yas Kos thiab Zam nkawd mus hauv Xis Moos thiab As Nres nkawd tsev.
30 Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub.
31 Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces niam tais mus tsob hwb lawv.
32 Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus.
33 Tas lub nroog sau nthwv tuaj nyob ua ke ntawm qhov rooj.
34 Yes Xus kho neeg coob zoo, uas lawv nyias raug nyias hom mob, thiab nws tseem ntiab ntau tus dab tawm; nws tsis pub cov dab hais lus li, vim lawv paub nws.
35 Thaum sawv ntxov tseem tsaus ntuj nti, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd.
36 Xis Moos thiab cov neeg nrog nws raws Yes Xus qab mus nrhiav nws.
37 Thaum lawv nrhiav tau Yes Xus, lawv hais rau nws tias : "Sawv daws nrhiav koj."
38 Yes Xus hais rau lawv tias : "Peb mus rau lwm qhov chaw hauv cov zej zog nyob tsis deb ntawm no, kom kuv tau kev qhuab qhia nyob ntawd thiab; yog vim qhov ntawd, kuv thiaj tawm tuaj."
39 Ces Yes Xus mus thoob lub xeev Nkas Lis Lais, nws qhuab qhia nyob hauv lawv cov tsev txoos, thiab nws ntiab dab phem tawm.

Tim 14 lub 1 Hlis 2021

Hnub Tsib Lis Piam Ib Nruab Xyoo B Nruab Lis Piam Xyoo I
Lectionary: 308

Zaj Nyeem Ib: HES NPLAWS 3: 7-14

7 Leej Ntuj Plig Ntshiab hais tias :
“Hnub no, yog nej hnov nws lub suab,
8 mas nej tsis txhob ua nej lub siab cam thawj xws li thaum ub
muaj kev ntxeev siab thaum lub caij raug sim siab nyob teb chaws suab puam.
9 Nyob ntawd, nej cov yawg koob tau sim kuv thiab tau tawm tsam kuv,
txawm lawv twb tau pom kuv cov hauj lwm tau plaub caug xyoo.
10 Kuv thiaj npau taws rau tiam neeg ntawd, kuv tau hais tias :
‘Lawv niaj hnub ua yuam kev nyob hauv lawv lub siab, lawv tsis paub kuv tej kev li.’
11 Kuv npau taws, kuv tau cog lus tias: ‘Lawv yuav tsis tau mus nyob hauv kuv lub chaw so.’”
12 Cov kwv tij, nej yuav ceev faj, tsam nyob hauv nej muaj ib tug twg muaj lub siab phem
tsis xav ntseeg, ces nws tso tus Tswv Ntuj muaj txoj sia pov tseg.
13 Nej yuav tsum niaj hnub sib txhawb zog thaum tseem yog “hnub no,” kom xwv nej tsis
txhob muaj ib tug twg cia kev txhaum txoj kev dag ntxias nej kom nej ua lub siab cam thawj.
14 Vim tias peb yuav tau ua Leej Pleev cov phooj ywg mas yuav tsum yog
peb nyob ruaj nreb hauv peb txoj kev ntseeg txij thaum pib mus txog thaum xaus.

NPN 95: 6-7C, 8-9, 10-11

Txais: ( 8 ) Hnub no yog nej hnov nws lub suab, nej tsis txhob ua lub siab cam thawj.

Tuaj peb mus khoov pe hawm nws, peb mus txhos caug
ntawm tus HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws saib, pab yaj nws coj.

Txais: ( 8 ) Hnub no yog nej hnov nws lub suab, nej tsis txhob ua lub siab cam thawj.

Kheev lam hnub no nej mloog nws lub suab hais:
“Nej tsis txhob ua lub siab cam thawj li nyob Me Lis Npas,
li lub caij uas nyob Mas Xas hauv teb chaws suab puam,
ntawm qhov chaw uas nej phaj txiv tau ua kom kuv npau taws;
lawv twb tau pom kuv tej hauj lwm los lawv tseem sim kuv thiab.”

Txais: ( 8 ) Hnub no yog nej hnov nws lub suab, nej tsis txhob ua lub siab cam thawj.

Tau plaub caug xyoo kuv ceeb laj nyiaj lawv phaj neeg ntawd kawg;
kuv tau hais tias: “Haiv neeg no lub siab mus yuam kev,
lawv tsis paub kuv tej kev li.”
Vim li no kuv npau taws, kuv thiaj tau cog lus tias:
“Lawv yuav tsis tau nkag los nyob hauv kuv lub chaw so ib zaug li.”

Txais: ( 8 ) Hnub no yog nej hnov nws lub suab, nej tsis txhob ua lub siab cam thawj.

As Les Lus Yas: MT 4: 23

Txais: As les lus yas, as les lus yas.

Yes Xus tshaj lub Moo Zoo txog Ntuj Ceeb Tsheej
thiab nws kho txhua yam mob nyob hauv cov neeg zoo hlo.

Txais: As les lus yas, as les lus yas.

Ntawv Moo Zoo: MK 1: 40-45

40 Muaj ib tug neeg mob ruas tuaj cuag Yes Xus, nws txhos caug thov Yes Xus tias: "Yog koj xav, mas koj yeej ua tau kom kuv rov huv tuaj."
41 Yes Xus hlub tus neeg ntawd, Yes Xus cev tes tuav nws thiab hais rau nws tias: "Kuv xav. Koj rov huv tuaj."
42 Tam sim ntawd, tus mob ruas tso tus neeg ntawd tseg, nws cia li huv hlo.
43 Yes Xus txwv nruj nruj rau nws thiab kom nws rov mus tam sis ntawd.
44 Yes Xus hais rau nws tias: "Koj ua twj ywm, txhob qhia dab tsi rau leej twg li. Tiam sis koj yuav mus thws koj lub cev rau tus leej choj saib, thiab mus cev paj tshab ntxuav txhaum rau koj raws li Mais Xes qhia, los ua puav pheej rau lawv pom."
45 Tab sis tus neeg ntawd tawm plaws xwb, nws cia li pib tshaj tas tej ntawd tawm thiab mus hais rau qhov txhia chaw paub. Ces Yes Xus tsis tau kev tab meeg mus rau hauv ib lub nroog li, nws nyob sab nroog nraud ntawm tej qhov chaw tsis muaj neeg xwb, los neeg tseem tuaj tas qhov txhia chaw tuaj cuag nws thiab.

Tim 15 lub 1 Hlis 2021

Hnub Rau Lis Piam Ib Nruab Xyoo B Nruab Lis Piam Xyoo I
Lectionary: 309

Zaj Nyeem Ib: HES NPLAWS 4: 1-5, 11

1 Peb yuav tsum ntshai rwg tias txawm txoj kev cog lus yeej qhib lug rau peb mus hauv Tswv Ntuj lub chaw so, los tsam nej ib tug twg ho raug saib tsis tsim nyog mus.
2 Vim peb yeej tau hnov lub Moo Zoo ib yam li peb cov yawg koob thaud. Tab sis lo lus lawv tau hnov tsis pab lawv dab tsi, vim tsis muaj kev ntseeg txog lo lus ntawd nyob hauv cov uas hnov lo lus.
3 Peb cov uas ntseeg, mas peb yuav tau mus hauv lub chaw so, raws li Tswv Ntuj tau hais tias:
“Kuv npau taws, kuv thiaj cog lus tias lawv yuav tsis tau mus nyob hauv kuv lub chaw so ib zaug li.”
Tswv Ntuj tej hauj lwm twb yeej tiav tas puag thaum ntuj tsim teb raug lawm,
4 rau qhov muaj ntawv sau hais txog hnub xya li no tias: “Hnub xya, Tswv Ntuj so, nws tso hauj lwm tseg tas tib si.”
5 Thiab tseem muaj qhov chaw hais saud tias: “Lawv yuav tsis tau mus nyob hauv kuv lub chaw so.”
11 Ua li mas peb kav tsij peem tiag kom tau mus nyob hauv lub chaw so ntawd, kom tsis txhob muaj ib tug twg poob vim nws yoog lawv tus piv txwv tawv ncauj thaum ub.

NPN 78: 3+4BC, 6C-7, 8

Txais: (7b) Nej yuav tsis txhob hnov qab Huab Tais cov hauj lwm!

Tej yam uas peb tau hnov thiab peb paub,
tej yam uas peb cov yawg koob tau hais qhia rau peb,
peb yuav muab hais qhia rau cov tiam neeg tom ntej,
yog tej yam txaus qhuas HUAB TAIS tau ua thiab yog nws lub zog.

Txais: (7b) Nej yuav tsis txhob hnov qab Huab Tais cov hauj lwm!

Lawv kuj yuav tsum tau qhia rau lawv tej tub ki tias
kom lawv yuav tsum tso siab rau Tswv ntuj,
thiab tsis txhob hnov qab Tswv ntuj cov hwj huam
thiab yuav coj raws nws tej lus qhia.

Txais: (7b) Nej yuav tsis txhob hnov qab Huab Tais cov hauj lwm!

Kom lawv tsis txhob ua zoo li lawv cov yawg koob,
uas yog ib tiam neeg phem thiab ntxeev siab,
ib tiam neeg tsis muaj lub siab ruaj nreb,
los lub tswv yim npuab khov kho rau Tswv ntuj.

Txais: (7b) Nej yuav tsis txhob hnov qab Huab Tais cov hauj lwm!

As Les Lus Yas: LK 7: 16

Txais: As les lus yas, as les lus yas

Ib tug yaj saub loj sawv los nyob hauv peb,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas

Ntawv Moo Zoo: MK 2: 1-12

1 Ob peb hnub tom qab, Yes Xus rov los hauv Kas Fas Naus, sawv daws paub txog tias nws nyob hauv tsev.
2 Ces neeg tuaj sib sau coob coob ua ke, tsis tshuav chaw seem rau lawv li lawm, tab ntawm qhov rooj los tsis seem li. Yes Xus tshaj Lo Lus rau sawv daws.
3 Ces muaj plaub leeg kwv ib tug tuag ceg tuaj rau Yes Xus.
4 Lawv tsis tau kev coj tus tuag ceg los rau Yes Xus vim neeg coob dhau, ces lawv mus yaws lub ru tsev ncaj ntawm qhov chaw Yes Xus nyob; lawv tho qhov saum ruv tsev, lawv dauv lub txaj uas tus tuag ceg pw nqes los.
5 Yes Xus pom lawv lub siab ntseeg, nws hais rau tus tuag ceg tias: "Me nyuad, koj cov txhaum daws tas lawm."
6 Muaj ib co kws Ntawv Ntshiab zaum nyob ntawd, lawv xav hauv nruab siab tias:
7 "Tus neeg ntawd hais dab tsi li ntawd ? Nws thuam Ntuj lawm! Leej twg thiaj daws txhaum tau? Tsuas kawg Tswv Ntuj tib leeg xwb."
8 Tab sis Yes Xus lub tswv yim twb paub tam sis ntawd tias lawv xav dab tsi hauv lawv siab lawm, nws thiaj hais rau lawv tias: "Ua cas nej xav tej zaj zoo li nonyob hauv nej nruab siab?
9 Lo lus twg yog lo hais yooj yim dua rau tus tuag ceg: Yog lo tias 'Koj cov txhaum daws tas', los yog lo tias : ‘Koj sawv, nqa koj lub txaj, koj mus’?
10 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb no," ces Yes Xus hais rau tus tuag ceg tias:
11 "Kuv hais rau koj, koj sawv, nqa koj lub txaj, koj rov mus tsev."
12 Tus tuag ceg sawv tsees, nws nqa hlo nws lub txaj tam sim ntawd, nws tawm mus rau sawv daws pom. Cov neeg nyob ntawd yoob tas, lawv cav txog Tswv Ntuj, thiab lawv hais tias: "Peb tsis tau pom dua ib yam zoo li no ib zaug li."

Tim 16 lub 1 Hlis 2021

Hnub Xya Lis Piam Ib Nruab Xyoo B Nruab Lis Piam Xyoo I
Lectionary: 310

Zaj Nyeem Ib: HES NPLAWS 4: 12-16

12 Tswv Ntuj lo lus muaj sia, nws ua tau hauj lwm, nws ntse dua ib rab ntaj ob sab ntse, nws txeem mus tau rau hauv kis uas cais tus ntsuj plig ntawm lub tswv yim, thiab kis uas cais cov pob qij txha ntawm cov hlwb txha; thiab nws nyeem tau tej zaj tswv yim thiab tej txoj kev xav nyob hauv neeg nruab siab.
13 Tsis muaj ib yam tsim tawm los uas Tswv Ntuj lo lus pom tsis tau, txhua yam liab qab thiab qhib lug rau nws qhov muag pom;nws yog tus uas peb yuav tsum teb rau nws txog txhua yam.
14 Vim peb muaj ib tug Tuam Leej Choj uas yog tus loj, nws tau hla dhau yim txheej cuaj txheej ntuj tuaj, yog Yes Xus, Tswv Ntuj leej Tub, mas peb yuav tsum tuav rawv peb txoj kev ntseeg kom ruaj nreb khov kho.
15 Peb tsis muaj ib tug Tuam Leej Choj uas tsis txawj hlub peb cov neeg zog me, tiam sis peb muaj ib tug Tuam Leej Choj uas tau raug txoj kev sim siab txhij txhua ib yam nkaus li peb, tsuas tshuav kiag txoj kev txhaum xwb.
16 Li ntawd peb kav tsij tso siab lug mus kom txog lub theej kiab muaj txiaj ntsim, kom peb tau txais kev khuv leej, thiab txais txiaj ntsim los pab peb thaum peb xav tau kev pab

NPN 19: 8, 9, 10, 15

Txais: (Zam 6:63c) Huab Tais, koj cov lus yog ntsuj plig thiab yog txoj sia.

HUAB TAIS txoj cai zoo tas nrho,
ua tau kom tus ntsuj plig muaj zog tuaj;
HUAB TAIS cov cai lij choj tsim nyog ntseeg,
ua tau kom tus neeg tsis ntse thoob tsib tuaj.

Txais: (Zam 6:63c) Huab Tais, koj cov lus yog ntsuj plig thiab yog txoj sia.

HUAB TAIS cov cai lij choj ncaj ncees,
ua tau kom lub siab zoo hlo ;
HUAB TAIS lo lus qhia meej kawg,
ua tau kom qhov muag pom kev.

Txais: (Zam 6:63c) Huab Tais, koj cov lus yog ntsuj plig thiab yog txoj sia.

Txoj kev hwm HUAB TAIS yog kev ntshiab,
yog txoj yuav nyob mus li;
HUAB TAIS cov txhooj yog qhov tseeb,
tas nrho nws cov txhooj yeej ncaj ncees.

Txais: (Zam 6:63c) Huab Tais, koj cov lus yog ntsuj plig thiab yog txoj sia.

Thov kom cov lus kuv lub ncauj hais thiab tej yam
kuv lub siab xav tau zoo raws li koj nyiam,
HUAB TAIS, kuv lub tsua thiab tus cawm kuv.

Txais: (Zam 6:63c) Huab Tais, koj cov lus yog ntsuj plig thiab yog txoj sia.

As Les Lus Yas: LK 4: 18

Txais: As les lus yas, as les lus yas.

Huab Tais xa kuv tuaj kom coj lub moo zoo tuaj rau cov pluag
thiab tshaj kev twj lij rau cov raug kaw nyob hauv tsev loj faj.

Txais: As les lus yas, as les lus yas.

Ntawv Moo Zoo: MK 2: 13-17

13 Yes Xus tawm mus ncig taug ntug dej ntuj; tas tsoom sid tuaj ntsauv nws, ces nws qhuab qhia lawv.
14 Thaum Yes Xus taug kev, nws pom Les Vis, uas yog As Fas Yos tub, zaum ntawm rooj sau se, ces Yes Xus hais rau Les Vis tias: "Koj los raws kuv." Les Vis sawv tsees, nws raws Yes Xus mus.
15 Thaum Yes Xus zaum noj mov hauv Les Vis tsev, mas muaj ib co sau se thiab ib co neeg txhaum coob coob nrog Yes Xus thiab cov thwj tim zaum noj mov, vim lawv yeej muaj coob leej raws Yes Xus.
16 Cov kws Ntawv Ntshiab uas yog ib co Fas Lis Xais pom Yes Xus nrog cov neeg txhaum thiab cov sau se noj mov, lawv hais rau nws cov thwj tim tias: "Vim li cas nws nrog cov sau se thiab cov neeg txhaum noj mov ?"
17 Yes Xus hnov, nws hais rau lawv tias: "Tsis yog cov neeg noj qab nyob zoo thiaj yuav vam txog kws kho mob, tiam sis yog cov neeg muaj mob. Kuv tsis yog tuaj hu cov neeg ncaj, kuv tuaj hu cov neeg txhaum."

Tim 18 lub 1 Hlis 2021

Hnub Ob Lis Piam Ob Nruab Xyoo B Nruab Lis Piam Xyoo I
Lectionary: 311

Zaj Nyeem Ib: HES NPLAWS 5: 1-10

Cov kwv tij nkauj muad:
1 Txhua tus Tuam Leej Choj yog muab hauv zeej tsoom los tsa ua tus sawv sawv daws chaw nyob ntawm Tswv Ntuj xub ntiag, kom nws ua tus cev paj tshab thiab cev cov txim them txim txhaum rau Tswv Ntuj.
2 Nws yog tus txawj to taub cov neeg tsis paub dab tsi thiab cov neeg yuam kev, vim tias nws kuj txawj ua txhaum ib yam nkaus li lawv thiab.
3 Vim nws txawj ua txhaum, mas nws yuav tsum ua thaj txi Ntuj them nws cov txhaum, ib yam li nws txi Ntuj them tsoom sid cov txhaum.
4 Tsis muaj leej twg yuav rov muab nws tsa ua leej choj tau, yog Tswv Ntuj hu nws mas nws thiaj ua leej choj tau, ib yam li Tswv Ntuj tau hu As Loos.
5 Leej Pleev kiag los kuj ib yam, nws tsis tau rov muab hwj chim rau nws tus kheej kom nws raug tsa ua Tuam Leej Choj, tiam sis nws txais lub hwj chim ntawd ntawm tus hais rau nws tias: “Koj yog kuv Leej Tub, hnub no, kuv tau xeeb koj los.”
6 Tswv Ntuj tseem hais nyob lwm qhov tias: “Koj ua leej choj mus ib txhiab ib txhis, raws li Mes Kis Xes Des txoj cai.”
7 Thaum Yes Xus tseem nyob hauv nws lub cev nqaij, nws tau quaj qw los kua muag teev ntuj thov tus muaj peev xwm cawm tau nws ntawm txoj kev tuag, ces Tswv Ntuj mloog nws tej lus thov vim nws ua raws li Tswv Ntuj nyiam.
8 Ces txawm tias nws yog tus tub cag, los nws yuav tsum tau kawm txoj kev mloog lus nyob hauv txoj kev raug txom nyem.
9 Thaum nws ua tas txhua yam zoo tiav log lawm, nws yog lub hauv paus uas pub txoj kev cawm nyob mus li rau cov neeg mloog nws lus.
10 Vim tias Tswv Ntuj tsa nws ua Tuam Leej Choj raws li Mes Kis Xes Des txoj cai.

NPN 110: 1, 2, 3, 4

Txais: (4b) Koj yuav ua leej choj mus ib txhis raws li Mes Kis Xes Des txoj cai.

HUAB TAIS hais rau kuv tus Huab Tais tias: “Koj zaum ntawm kuv sab xis
mus txog thaum kuv muab koj cov yeeb ncuab ua rooj rau koj tiag taw.”

Txais: (4b) Koj yuav ua leej choj mus ib txhis raws li Mes Kis Xes Des txoj cai. .

HUAB TAIS yuav ua kom koj tus cwj ua vaj muaj hwj huam
nthuav kom deb txij ntawm Xis Yoos mus:
“Koj yuav ua vaj nyob nruab nrab hauv koj cov yeeb ncuab.”

Txais: (4b) Koj yuav ua leej choj mus ib txhis raws li Mes Kis Xes Des txoj cai.

“Koj yeej tau txais lub hwj huam ua vaj ua koj tug hnub koj yug los
nyob hauv lub hwj chim ntshiab ci ntsa iab lawm.
Ua ntej lub hnub qub sawv ntxov, zoo li cov lwg, kuv tau xeeb koj los.”

Txais: (4b) Koj yuav ua leej choj mus ib txhis raws li Mes Kis Xes Des txoj cai.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

Txais: (4b) Koj yuav ua leej choj mus ib txhis raws li Mes Kis Xes Des txoj cai.

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj mem tau tej zaj tswv yim thiab tej zaj kev xav nyob hauv neeg nruab siab.

Txais: As les lus yas, as les lus yas.

Ntawv Moo Zoo: MK 2: 18-22

18 Zam cov thwj tim thiab cov Fas Lis Xais cov thwj tim ua kam cov kev cai yoo mov, ces muaj neeg tuaj hais rau Yes Xus tias: "Vim li cas Zam cov thwj tim thiab cov Fas Lis Xais cov thwj tim yoo mov, hos koj cov thwj tim tsis yoo li?"
19 Yes Xus hais rau lawv tias: “Thaum nraug vauv tseem nrog nws cov kwv luag nyob, lawv puas yoo mov tau? Thaum lub caij lawv tseem muaj nraug vauv nrog lawv, mas lawv yoo tsis tau.
20 Tab sis, muaj ib hnub luag yuav coj nraug vauv ntawm lawv mus, ces hnub ntawd lawv yuav yoo mov.
21 Tsis muaj leej twg yuav ntxiv ib daig ntaub tshiab uas tsis tau nqws rau lub khaub tsho, vim daim ntaub tshiab yuav rub daim qub, ces haj yam yuav ntuag loj.
22 Kuj tsis muaj leej twg ntim cawv tshiab rau hauv ib co hnab tawv qub ; vim cov cawv yuav ua cov hnab tawv qub tawg, ces cawv yuav txeej tas, hos cov hnab tawv los kuj yuav puas tas. Vim li ntawd mas cawv tshiab yuav muab ntim rau cov hnab tawv tshiab.”

Tim 19 lub 1 Hlis 2021

Hnub Peb Lis Piam Ob Nruab oo B Nruab Lis Piam Xyoo I
Lectionary: 312

Zaj Nyeem Ib: HES NPLAWS 6: 10-20

Cov kwv tij:
10 Tswv Ntuj tsis yog ib tug siab tsis ncaj ncees, uas yuav cia li tsis nco qab nej tej hauj lwm thiab nej txoj kev nyiam luag vim nws lub npe, thaum nej tau pab thiab nej tseem niaj hnub pab cov ntshiab.
11 Peb xav kom nej txhua leej muaj lub siab kub lug ua kom txoj kev tso siab tsuas muaj tawg paj txi txiv mus txog hnub kawg xwb,
12 kom nej tsis txhob ua ib co neeg nkees qaug zog, tiam sis kom nej yoog raws cov uas lawv ntseeg thiab ua lub siab ntev tsis tso tseg, ces lawv tau txais lub cuab tam raws li txoj kev cog lus.
13 Thaum Tswv Ntuj cog lus rau Has Nplas Has, nws tuav tsis tau ib tug loj dua nws lub npe, ces nws rov tuav nws lub npe los cog lus,
14 nws hais tias: “Kuv yuav foom hmoov zoo rau koj, thiab kuv yuav ua kom koj huam vam coob tas nrho.”
15 Vim Has Nplas Has tau ua lub siab ntev tsis tso tseg, mas nws thiaj tau txais raws li Tswv Ntuj cog lus.
16 Tej tib neeg cog lus, mas lawv tuav txog ib tug loj dua lawv lub npe los cog lus, thiab lawv muaj pov thawj cia, kom txhob muaj chaw sib cav sib hais.
17 Yog li ntawd, Tswv Ntuj xav kom cov yuav txais lub cuab tam paub tias nws lo lus yeej tsis hloov li, mas nws thiaj tau siv txoj kev twv ntuj los cog lus.
18 Kom nyob hauv ob qho ruaj uas hloov tsis tau no, uas Tswv Ntuj dag tsis tau, peb cov uas tau tso puas tsav yam tseg muaj kev tso siab lug, kom peb tuav ruaj ruaj txoj kev tso siab uas Ntuj cev los rau peb.
19 Txoj kev tso siab ntawd yog zoo li ib tug nqe lauj nkoj ruaj thiab khov peb muaj los tuav peb tus plig kom nyob tus, nws txeem tau mus dhau daim ntaub thaiv kem ntshiab mus rau sab hauv.
20 Yes Xus yog thawj tug ua peb ntej nkag mus nyob rau hauv lawm, vim nws ua Tuam Leej Choj mus li, raws nraim Mes Kis Xes Des txoj cai.

NPN 111: 1-2, 4-5, 9+10C

Txais: (5) Huab Tais yuav nco ntsoov nws lo lus nws tau cog mus tas ib txhis.
los: As les lus yas.

Kuv yuav ua HUAB TAIS tsaug tas kuv lub siab lub ntsws
thaum kuv nrog tsoom neeg siab ncaj ua ib pab thiab ua lub txoos.
HUAB TAIS cov hauj lwm loj tas nrho,
zoo ntxim siab kawg nkaus.

Txais: (5) Huab Tais yuav nco ntsoov nws lo lus nws tau cog mus tas ib txhis.
los: As les lus yas.

Nws cov hauj lwm txaus qhuas ua kom nws nto moo lug;
HUAB TAIS muaj lub siab zoo thiab khuv leej neeg.
Nws muab txhiam xws rau cov hwm nws tau noj,
nws yuav nco ntsoov mus li txog tias nws tau cog lus.

Txais: (5) Huab Tais yuav nco ntsoov nws lo lus nws tau cog mus tas ib txhis.
los: As les lus yas.

Nws tau xa kev cawm tuaj rau nws haiv neeg,
nws yuav tsis hloov nws lo lus tas mus li ib txhis;
nws lub npe ntshiab thiab loj tas nrho.
Nws lub koob meej yuav nyob mus li ib txhis. .

Txais: (5) Huab Tais yuav nco ntsoov nws lo lus nws tau cog mus tas ib txhis.
los: As les lus yas.

As Les Lus Yas: ES FES XOS 1: 17-18

Txais: As les lus yas, as les lus yas.

Thov kom peb tus Huab Tais Yes Xus Pleev leej Txiv
qhib peb lub qhov muag hauv peb nruab siab kom pom kev,
kom peb thiaj paub txog tias thaum peb muaj kev tso siab
yuav tau dab tsi yog peb mloog Tswv Ntuj hu peb.

Txais: As les lus yas, as les lus yas.

Ntawv Moo Zoo: MK 2: 23-28

23 Muaj ib zaug, yog hnub Xas Npas Tos, Yes Xus hla ib thaj teb, nws cov thwj tim txawm fawb ib txoj kev taug, thiab lawv pib de tej hnab nplej.
24 Cov Fas Lis Xais hais rau Yes Xus tias : "Saib ! Vim li cas lawv ua tej yam txwv tsis pub ua hnub Xas Npas Tod?"
25 Yes Xus hais rau lawv tias : "Nej tsis tau nyeem ib zaug txog qhov Das Vis tau ua thaum nws tsis muaj dab tsi noj, es nws thiab nws cov kwv luag tshaib plab lod ?
26 Tias nws nkag mus hauv Tswv Ntuj lub tsev li cas, yog thaum lub caij As Npias Thas ua tuam leej choj, thiab nws noj cov ncuav mov txi Ntuj uas kawg yog cov leej choj thiaj noj tau xwb, thiab nws tseem muab rau nws cov kwv luag noj thiab lod?"
27 Ces Yes Xus hais rau lawv tias : "Ntuj tsim hnub Xas Npas Tos rau tib neeg, tsis yog tsim tib neeg rau hnub Xas Npas Tos.
28 Li ntawd neeg Leej Tub kuj yog tswv kav hnub Xas Npas Tos thiab."

Tim 20 lub 1 Hlis 2021

Hnub Plaub Lis Piam Ob Nruab Xyoo B Nruab Lis Piam Xyoo I
Lectionary: 313

Hwm LN Sebastian, tuag ua Tim Khawv; los LN Fabian, Tswv Qhia tuag ua Tim Khawv

Zaj Nyeem Ib: HES NPLAWS 7: 1-3, 15-17

1 Mes Kis Xes Des, tus vaj kav Xas Les uas yog Tswv Ntuj nyob siab tus leej choj, nws tuaj ntsib Has Nplas Has thaum Has Nplas Has mus tua yeej cov vaj lawm thiab nws rov los tsev; ces nws foom hmoov zoo rau Has Nplas Has. 2 Has Nplas Has qee ib feem kaum ntawm puas tsav yam nws muaj pub rau Mes Kis Xes Des. Lub npe Mes Kis Xes Des txhais tias ‘Vaj muaj txoj kev ncaj,’ thiab nws kuj ua vaj kav Xas Les, txhais tias tus Vaj muaj kev thaj yeeb!
3 Nws tsis muaj niam tsis muaj txiv, tsis muaj keeb kwm, nws lub neej tsis muaj hnub pib tsis muaj hnub xaus li, yog zoo li Tswv Ntuj Leej Tub; nws ua leej choj mus ib txhiab ib txhis.
15 Tseem muaj ib qho qhia tseeb kawg, li no tias : Yog muaj lwm tus sawv ua leej choj tshiab raws li Mes Kis Xes Des,
16 mas nws tau ua leej choj tsis yog vim muaj lus qhia tseg tias nyob saum nqaij tawv nws caj ces keeb kwm yeej ua leej choj, tiam sis yog los ntawm lub hwj huam muaj txoj sia uas rhuav tsis tau.
17 Vim muaj ib lo lus zeem tseeb txog tus ntawd hais tias : “Koj ua leej choj mus li raws nraim Mes Kis Xes Des txoj cai.”

NPN 110: 1, 2, 3, 4

Txais: (4b) Koj yuav ua leej choj mus ib txhis raws li Mes Kis Xes Des txoj kab ke.
HUAB TAIS hais rau kuv tus Huab Tais tias:
“Koj zaum ntawm kuv sab xis
mus txog thaum kuv muab koj cov
yeeb ncuab ua rooj rau koj tiag taw.”

Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

HUAB TAIS yuav ua kom koj tus cwj ua vaj muaj hwj chim
nthuav mus deb txij ntawm Xis Yoos mus:
Koj yuav ua vaj nyob nruab nrab hauv koj cov yeeb ncuab.

Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

Koj tau lub hwj chim ua vaj ua koj tug txij hnub koj yug los,
yog lub hwj chim ntshiab ci ntsa iab,
Ua ntej lub hnub qub sawv ntxov,
zoo li cov lwg, kuv tau yug koj los.
Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

As Les Lus Yas: MT 4: 23

Txais: As les lus yas, as les lus yas.

Yes Xus tshaj lub Moo Zoo txog Ntuj lub Ceeb Tsheej
thiab nws kho txhua yam mob nyob hauv cov neeg zoo hlo.

Txais: As les lus yas, as les lus yas.

Ntawv Moo Zoo: MK 3: 1-6

1 Yes Xus rov mus hauv ib lub tsev txoos dua. Nyob ntawd, muaj ib tug neeg uas ib sab tes qhuav.
2 Ces lawv nyas ntshis ntsia saib Yes Xus puas yuav kho tus neeg qhuav tes ntawd hnub Xas Npas Tos, kom lawv tau kev liam rau Yes Xus.
3 Yes Xus hais rau tus neeg qhuav tes tias : "Koj los sawv hauv nruab nrab."
4 Thiab Yes Xus hais rau lawv tias : "Hnub Xas Npas Tos, txoj cai puas kheev kom ua qhov zoo los kom ua qhov phem, puas kom cawm ib txog sia los txo ib txog sia ?" Sawv daws nyob ntsiag to.
5 Yes Xus ntsia ib ncig npau taws vog, nws tu siab vim lawv lub siab txhav qhi, ces nws hais rau tus neeg qhuav tes tias : "Koj xyab tes." Ces nws xyab kiag tes, nws txhais tes rov zoo hlo.
6 Thaum cov Fas Lis Xais tawm mus, lawv mus nrog cov Hes Los Dias sab laj tam sis ntawd saib yuav ua li cas lawv thiaj ua tau kom Yes Xus ploj mus.

Tim 21 lub 1 Hlis 2021

Hnub Tsib Lis Piam Ob Nruab Xyoo B Nruab Lis Piam Xyoo I
Lectionary: 314

Hwm LN Agnes, Nkauj xweb tuag ua Tim Khawv

Zaj Nyeem Ib: HES NPLAWS 7: 25—8:6

7 25 Leej Pleev muaj peev xwm cawm tau cov neeg uas vam txog nws kom mus cuag tau Tswv Ntuj, vim nws muaj txoj sia mus li kom nws tau thov Ntuj pab lawv tsis tseg.
26 Yeej tsim nyog kom peb yuav tsum muaj ib tug Thawj Leej Choj zoo li ntawd, ib tug ntshiab huv, tsis muaj chaw xyeej, tsis muaj ib yam phem nyob hauv nws, nws tsis nyob xyaw cov neeg txhaum, nws nyob siab dua cov txheej ntuj saud.
27 Nws tsis tas yuav niaj hnub tua tsiaj txi Ntuj li lwm cov leej choj, kom tau them nws cov txhaum, thiab them tsoom pej xeem cov txhaum. Nws tsuas txi Ntuj ib zaug xwb, yog thaum nws rov muab nws tus kheej txi rau Ntuj.
28 Txoj Cai tsa ib co neeg muaj txaug muaj txhaum los ua thawj leej choj, tiam sis lo lus nyob hauv txoj kev cog lus uas los tom qab Txoj Cai, tau tsa Leej Tub ua tus thawj leej choj mus ib txhiab ib txhis, vim nws tau ua tas txhua yam zoo tiav log.
8: 1 Lub ntsiab tseem ceeb uas peb tau hais txog yog qhov no: Peb muaj ib tug Thawj Leej Choj zoo tas nro uas mus zaum ntawm tus muaj hwj huam lub theej kiab phab xis nyob saum cov txheej ntuj saud lawm.
2 Nws tuav txoj kab xwm saib Kem Tsev Ntshiab, thiab saib lub tsev tsam phooj, lub tseem, uas yog Huab Tais tsa, tsis yog tib neeg tsa.
3 Txhua tus thawj leej choj raug tsa los ua tus cev paj tshab thiab txi Ntuj; ua li mas nws yuav tsum muaj tej yam mus txi Ntuj.
4 Yog tias Yes Xus tseem nyob ntiaj teb no, mas nws tsis tau ua leej choj, vim twb muaj cov leej choj txi Ntuj raws Txoj Cai lawm.
5 Cov leej choj no lis txoj kab xwm teev hawm uas yog ib tug piv txwv thiab ib tug qauv duab teev hawm xws li tus nyob saum ntuj xwb, vim thaum Mais Xes yuav tsa lub tsev tsam phooj, Tswv Ntuj tau qhia nws paub thiab hais rau nws tias: “Koj ntsia, koj yuav ua txhua yam kom raws li tus piv txwv kuv muab rau koj saib nyob saum lub roob.”
6 Qhov tseeb, Leej Pleev tau txais ib txog kab xwm siab dua txoj qub, vim nws ua tus cev lus rau ib txog kev cog lus zoo dua, uas txawb rau saum ib co lus khov dua.

NPN 40: 7-8A, 8B-9, 10, 17

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

Koj tsis ntshaw tsiaj los txhiam xws txi rau koj,
tiam sis koj muab ob lub pob ntseg txawj mloog lus rau kuv.
Koj tsis xav tau tsiaj hlawv txi ntuj los tsiaj hlawv them txim txhaum,
kuv thiaj hais tias: “Kuv nyob ntawm no, cia kuv tuaj.”

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

Nyob hauv kauj ntawv muaj lus hais tseg rau kuv tias:
“Ua ywj koj siab, kuv tus Tswv Ntuj, yog yam ntxim kuv siab,
koj txoj cai nyob rawv hauv kuv nruab plaw!”

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

Kuv tau tshaj koj txoj kev ncaj rau tsoom neeg coob tuaj sib txoos paub,
kuv tsis tau kaw kuv lub ncauj, HUAB TAIS, koj yeej paub.

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

Thov kom txhua leej uas nrhiav koj zoo siab hom khaj nyob hauv koj,
thiab kom cov uas nyiam koj txoj kev cawm seej
cav tsis tseg tias: “Kom HUAB TAIS nto koob meej.”

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

As Les Lus Yas: 2 TMT 1: 10

Txais: As les lus yas, as les lus yas.

Peb tus Cawm Seej Yes Xus Pleev twb rhuav txoj kev tuag lawm,
thiab nws ua kom txoj sia ci tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo: MK 3: 7-12

7 Yes Xus nrog nws cov thwj tim mus so nyob nram ntug dej ntuj. Muaj ib pab neeg coob kawg nyob Nkas Lis Lais thiab nyob Yus Das teb raws nws qab tuaj,
8 Cov neeg nyob Yes Lus Xas Les, nyob Is Dus Mias, nyob sab dej Yos Las Das tim ub, thiab nyob ib ncig Tws Los thiab Xis Doos los tuaj coob kawg tuaj cuag Yes Xus, vim lawv hnov txog tas ib puas tsav yam uas nws ua.
9 Yes Xus hais kom cov thwj tim npaj ib lub nkoj me rau nws mus nyob hauv vim muaj neeg coob dhau, kom lawv txhob tuaj txiv nws.
10 Yes Xus kho ntau leej zoo, ces tas cov neeg uas muaj mob muaj nkeeg sawv daws phoom tas zog kom tau chwv nws.
11 Thaum cov dab tsis huv pom Yes Xus, mas lawv khoov hauv av nyob ntawm nws xub ntiag, lawv qw tias : "Koj yog Tswv Ntuj Leej Tub!"
12 Yes Xus txwv lawv nruj tsis pub lawv hais lus kom muaj neeg paub txog nws.

Tim 22 lub 1 Hlis 2021

Hnub Rau hauv Lis Piam Ob Nruab Xyoo B Nruab Lis Piam Xyoo I
Lectionary: 315

Hnub Thov Ntuj Ua Kom cov Nom Tswv Txiav Txoj Cai Tsis Pub Rho Me Nyuam

Zaj Nyeem Ib; HES NPLAWS 8: 6-13

Cov kwv tij nkauj muad:
6 Qhov tseeb, Leej Pleev tau txais ib txog kab xwm siab dua zoo dua, vim nws ua tus cev lus rau ib txog kev cog lus zoo dua qub, uas txawb rau saum ib co lus zoo dua qub lawm.
7 Vim tias yog txoj kev cog lus thawj zaug zoo tas tsis muaj chaw xyeej law li, mas tsis tas yuav rov cog lus dua zaum ob.
8 Tiam sis Tswv Ntuj tau tsawm tseg rau lawv tias: “Yuav muaj ib hnub yav tom ntej, kuv yuav nrog His Xas Lais tsev neeg thiab Yus Das tsev neeg cog dua ib lo lus tshiab,
9 yuav tsis cog lus xws li kuv tau nrog lawv cov yawg koob cog lus, hnub uas kuv tuav lawv tes, coj lawv tawm hauv Hais Nkws Tos teb los lawm. Vim thaum ntawd lawv tsis nyob ruaj hauv kuv lo lus cog, ces kuv kuj tsis quav ntsej lawv thiab,” Huab Tais hais li ntawd.
10 “Kuv yuav nrog His Xas Lais tsev neeg rov cog lus li no thaum dhau lub sij hawm ntawd lawm,” Huab Tais hais li ntawd. “Kuv yuav muab kuv cov kev cai lij choj cog rau hauv lawv lub tswv yim, kuv yuav muab txaug rau hauv lawv nruab siab, ces kuv yuav ua lawv tus Tswv Ntuj, lawv yuav ua kuv haiv neeg.
11 “Tsis tas yuav muaj leej twg qhia lwm tus, tsis tas nyias yuav hais rau nyias tus kwj tij tias :‘Koj yuav tsum paub Huab Tais,’ vim tus hlob tus yau sawv daws yuav tsum paub kuv tas huv tib si.
12 “Kuv yuav zam rau lawv tej kev txaug kev txhaum, kuv yuav tsis nco txog lawv cov txhaum ntxiv.”
13 Thaum Tswv Ntuj hais txog kev cog lus tshiab, mas yog nws saib thawj txoj kev cog lus qub lawm. Tej yam uas pib qub thiab pib puas, mas tshuav tsis ntev yuav ploj mus.

NPN 85: 8+10, 11-12, 13-14

Txais: (11a) Kev siab zoo thiab kev tseeb yuav tuaj sib ntsib.

HUAB TAIS, thov muab koj txoj kev khuv leej rau peb pom,
Thiab muab koj txoj kev cawm pub rau peb.
Txoj kev cawm yeej nyob ze ze cov uas hwm nws lawm tiag;
nws lub hwj chim yuav nyob txawm hauv peb lub teb chaws.

Txais: (11a) Kev siab zoo thiab kev tseeb yuav tuaj sib ntsib.

Kev siab zoo thiab thiab kev tseeb yuav tuaj sib ntsib,
kev ncaj thiab kev thaj yeeb yuav los sib puag.
Kev tseeb yuav tawm hauv ntiaj teb los,
thiab kev ncaj yuav dauv muag ntsia saum ntuj tuaj.

Txais: (11a) Kev siab zoo thiab kev tseeb yuav tuaj sib ntsib.

HUAB TAIS yuav tso nws tej koom hmoov los,
hos peb lub teb chaws yuav ntsu qoob.
Kev ncaj yuav taug kev ua nws ntej,
kev cawm yuav taug raws nws tus hneev taw.

Txais: (11a) Kev siab zoo thiab kev tseeb yuav tuaj sib ntsib. .

As Les Lus Yas

Txais: As les lus yas, as les lus yas.

Tswv Ntuj nrog lub ntiaj teb rov sib haum nyob hauv leej Pleev,
nws muab lo lus nrhiav kev siv haum xeeb tso rau peb tshaj.

R. Alleluia, alleluia.

Ntawv Moo Zoo: MK 3: 13-19

13 Yes Xus nce mus saum lub roob, nws hais cov uas nws xav hu kom los ntawm nws. Ces lawv los nyob ze nws.
14 Nws tsa kaum ob leeg uas nws tis npe rau lawv hu ua cov Hauv Paus Xa Lus , kom lawv nrog nraim nws, thiab kom nws tau xa lawv mus tshaj Lo Lus,
15 thiab kom lawv tau txais lub hwj huam ntiab tau dab phem tawm mus.
16 Nws tsa Pab Kaum Ob, muaj: Xis Moos uas nws tis npe hu ua Pob Zeb,
17 Yas Kos, Ntxes Npes Dais tub thiab Zam, Yas Kos tus kwv; Yes Xus tis nkawd npe hu ua Npuas Nes Nkes, txhais tias Yawm Xob cov tub;
18 thiab As Nres, Fis Lis Pos, Npas Tos Los Mas Yos, Mas Tais, Tos Mas, Yas Kos uas yog As Fes Yos tub, Thas Das Yos, Xis Moos tus Kas Nas Nias,
19 thiab Yus Das Kas Lis Yaus, tus muab Yes Xus muag.

Tim 23 lub 1 Hlis 2021

Hnub Xya Lis Piam Ob Nruab Xyoo B Nruab Lis Piam Xyoo I
Lectionary: 316

Hwm LN Vincent Tsob Hwb tuag ua Tim Khawv; Hwm LN Marianne Cope, nkauj xwb

Zaj Nyeem Ib: HES NPLAWS 9: 2-3, 11-14

2 Lawv tsa ib lub tsev tsam phooj uas yog thawj lub; nyob hauv muaj tus ncej txawb tswm ciab, lub rooj, thiab cov ncuav mov txi ntuj, hu ua lub Tsev Ntshiab.
3 Ces nyob dhau tom daim ntaub thaiv ob, yog lub tsev tsam phooj hu ua chav Ntshiab rau cov khoom Ntshiab.
11 Thaum Leej Pleev tuaj, nws yog tus Thawj Leej Choj kav lub cuab uas tab tom tuaj, nws hla ib lub tsev tsam phooj loj dua thiab zoo dua, uas tsis yog xuas tes ua, tsis yog tsim los nyob hauv ntiaj teb no,
12 nws mus hauv chav Ntshiab ib zaug xwb, nws tsis muab ntshav tshis los ntshav nyuj, nws siv kiag nws cov roj ntsha los ua txoj kev cawm neeg uas nyob mus li.
13 Yog tias ntshav laug tshis thiab ntshav heev nyuj thiab cov hmoov tshauv xyuas nyuj, uas luag muab tsuag rau saum cov neeg tsis huv, twb ua tau kom cov tsis huv ntawd lub cev huv tuaj,
14 mas Leej Pleev cov ntshav haj yam ua tau kom peb lub siab huv tuaj thiab kom peb dim tau ntawm peb cov hauj lwm txhaum los teev tus Tswv Ntuj muaj txoj sia, vim Leej Tswv Yim tus nyob mus li ua kom Leej Pleev uas tsis muaj ib qho xyeej, rov muab nws txi rau Tswv Ntuj.

NPN 47: 2-3, 6-7, 8-9

Txais: (6) Tswv Ntuj nce saum nws lub theej kiab, muaj suab qw zoo siab,
muaj suab hom nrov nroo ntws hwm Huab Tais.

Txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS tus nyob siab, tus zoo tshaj,
yos tus vaj loj kav tas nrho lub ntiaj teb.

Txais: (6) Tswv Ntuj nce saum nws lub theej kiab, muaj suab qw zoo siab,
muaj suab hom nrov nroo ntws hwm Huab Tais.

Tswv Ntuj nce saum nws lub theej kiab, muaj suab zoo sia
HUAB TAIS nce, muaj suab hom nrov nroo ntws.
Nej hu nkauj cav txog Tswv Ntuj, nej cav txog nws,
nej hu nkauj cav txog peb tus vaj, nej cav txog nws.

Txais: (6) Tswv Ntuj nce saum nws lub theej kiab, muaj suab qw zoo siab,
muaj suab hom nrov nroo ntws hwm Huab Tais.

Tus vaj kav tas lub ntiaj teb yog Tswv Ntuj,
nej hu tej zaj nkauj paj nruag cav txog nws.
Tswv Ntuj tswj cov haiv neeg,
Tswv Ntuj zaum saum nws lub theej kiab ntshiab.

Txais: (6) Tswv Ntuj nce saum nws lub theej kiab, muaj suab qw zoo siab,
muaj suab hom nrov nroo ntws hwm Huab Tais.

As Les Lus Yas: Hauj Lwm 16: 14B

Txais: As les lus yas, as les lus yas.

Huab Tais, thov koj qhib peb lub siab
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo: MK 3: 20-21

20 Yes Xus nrog nws cov thwj tim nkag los rau hauv ib lub tsev,
ces rov muaj neeg coob coob tuaj ntsauv lawv dua,
Yes Xus thiab nws cov thwj tim tsis xyeej noj mov li.
21 Yes Xus tsev neeg hnov li ntawd, lawv tawm mus coj nws,
vim lawv hais tias: "Nws tsis meej pem lawm."

Tim 25 lub 1 Hlis 2021

Hnub Ob Lis Piam Peb Nruab Xyoo B Nruab Lis Piam Xyoo I

Nco txog Hnub LN Paj Lug Tig Los Ntseeg
Lectionary: 519

Zaj Nyeem Ib: HAUJ LWM 22: 3-16

3 Paj Lug hais rau cov neeg li no:
"Kuv yog ib tug Yus Das, kuv yug los nyob Tas Xis, Xis Lis Xias teb. Tab sis kuv tuaj hlob nyob hauv lub tsheej no. Nkas Mas Lias yog kuv tus xib hwb, nws qhia kuv kom ua raws nraim peb cov yawg koob Txoj Cai. Mas kuv yeej kub siab lug rau Tswv Ntuj ib yam li nej nyem no.
4 Kuv tau hiam Txoj Kev no kom nws ploj mus, kuv tau muab saw hlau los khi poj niam txiv neej huv tib si, thiab coj lawv mus pov rau hauv tsev loj faj.
5 Tus thawj leej choj thiab pab txwj laus tib si puav leej ua tau tim khawv pom kuv ua li ntawd tiag. Kuv tau txais lawv ib co ntawv sau mus rau cov kwv tij nyob Das Mas, ces kuv thiaj sawv kev mus lawm tid, kuv npaj siab mus khi cov nyob Das Mas coj los rau txim nyob Yes Lus Xas Les.
6 Kuv tseem tab tom mus kev, tshuav tsis deb yuav txog Das Mas, thaum ntawd kwv yees tav su lawm, cia li muaj ib qho pom kev ci dawb paug loj loj tuaj saum ntuj tuaj vij kuv.
7 Kuv poob nthav rau hauv av, kuv hnov ib lub suab hais rau kuv tias: 'Xauv, Xauv, vim li cas koj hiam kuv ?'
8 Kuv teb tias: 'Huab Tais, koj yog leej twg ?' Ces nws teb kuv tias: 'Kuv yog tus Yes Xus Nas Xas Les uas koj hiam.'
9 Cov neeg nrog kuv kuj pom qhov pom kev ci dawb loj loj thiab, tab sis lawv tsis hnov lub suab hais lus rau kuv.
10 Kuv nug tias: 'Huab Tais, kuv yuav tsum ua dab tsi ?' Huab Tais thiaj hais rau kuv tias: 'Koj sawv, koj mus rau Das Mas. Mus txog tod, mas lawv mam qhia rau koj txog tas puas tsav yam Ntuj yeej npaj rau koj lawm kom koj yuav tsum ua.'
11 Thaum ntawd kuv tsis pom kev li, vim qhov pom kev ci loj ntawd fam kuv qhov muag lawm. Kuv cov neeg thiaj tuav kuv tes, coj kuv mus txog Das Mas.
12 Muaj ib tug txiv neej hu ua As Nas Nias, nws yog ib tug neeg hwm Ntuj zoo raws li Txoj Cai; cov Yus Das nyob hauv lub tsheej sawv daws hais lus zoo txog nws.
13 Nws tuaj xyuas kuv, nws tuaj nyob ze ntawm kuv, ces nws hais tias : 'Xauv, kuv tus kwv, koj rov pom kev mog.' Kuv cia li pom nws tam sim ntawd.
14 Nws hais ntxiv tias : 'Peb cov yawg koob tus Tswv Ntuj yeej tau xaiv koj los lawm, kom koj paub tias qhov nws lub siab nyiam yog dab tsi, kom koj tau pom tus Siab Ncaj, thiab kom koj tau hnov nws lub suab.
15 Vim tias koj yuav tsum ua nws tim khawv nyob ntawm tas zeej tsoom xub ntiag txog tej yam koj tau pom thiab tau hnov.
16 Ua li mas koj tseem yuav tos dab tsi ntxiv? Koj cia li sawv, koj mus txais lub cim ntxuav kom ntxuav koj cov txhaum pov tseg thaum koj hu txog nws lub npe.' ”

Los: HAUJ LWM 9: 1-22

1 Ntawm Xauv, mas nws tsuas xav ntsoov txog qhov hiam thiab tua Huab Tais cov thwj tim nkaus xwb, ces nws mus cuag tus thawj leej choj.
2 Nws thov kom tus thawj leej choj muab ntawv rau nws nqa mus Das Mas, mus rau cov tsev txoos kom yog nws nrhiav tau cov neeg uas npuab Txoj Kev, tsis hais poj niam lost xiv neej li, nws yuav muab lawv khi cab mus lawm pem Yes Lus Xas Les.
3 Thaum nws tab tom taug kev, yuav txog Das Mas, ces ib sij huam, muaj ib qho pom kev ci dawb vog tuaj saum ntuj tuaj ncig nws.
4 Nws ntog rau hauv av, nws hnov ib lub suab hais rau nws tias: "Xauv, Xauv, tim li cas koj hiam kuv?"
5 Xauv teb hais tias: "Huab Tais, koj yog leej twg?" Lub suab hais tias : "Kuv yog Yes Xus, tus uas koj hiam.
6 Koj sawv, koj mus hauv lub nroog. Yuav muaj neeg qhia koj tias koj yuav tsum ua dab tsi."
7 Cov neeg nrog Xauv taug kev, sawv daws nres tas, lawv ntshai kawg hais tsis taus lus li, lawv kuj hnov lub suab thiab, tab sis tsis pom leej twg li.
8 Xauv sawv hauv av los, nws qhov muag rua pliav, tab sis nws tsis pom kev li. Lawv tuav nws tes coj nws mus hauv lub nroog Das Mas.
9 Nws nyob tau peb hnub, tsis pom kev, tsis noj tsis haus dab tsi li.
10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias: "As Nas Nias." As Nas Nias teb tias: "Huab Tais, kuv nyob ntawm no."
11 Huab Tais hais rau nws tias: "Koj sawv mus, koj mus tom txoj kev uas hu ua Kev Ncaj, koj mus hauv Yus Das tsev, koj nrhiav ib tug neeg hu ua Xauv nyob Tas Xis tuaj. Tam sim no nws tab tom teev Ntuj.
12 Nws pom ib tug txiv neej hu ua As Nas Nias chaws los tsa tes rau saum nws kom nws rov pom kev tuaj."
13 As Nas Nias teb tias: "Huab Tais, kuv tau hnov ntau leej hais tias tus neeg ntawd ua phem kawg rau koj cov Ntshiab nyob Yes Lus Xas Les no.
14 Nws tuaj ntawm no, vim nws tau cai ntawm cov thawj leej choj tuaj khi cov neeg uas hu txog koj lub npe tas huv tib si."
15 Tab sis Huab Tais hais rau As Nas Nias hais tias: "Koj mus, vim tus neeg ntawd yog ib lub twj uas kuv xaiv los coj kuv lub Npe mus rau cov neeg teev pej kum dab, rau cov vaj, thiab rau cov tub ki His Xas Lais.
16 Kuv yuav qhia nws tias nws yuav tsum raug tsim txom npaum li cas vim kuv lub Npe."
17 As Nas Nias thiaj mus. Nws chaws mus hauv lub tsev ntawd. Nws tsa tes rau saum Xauv, nws hais tias : "Xauv, kuv tus kwv, yog Huab Tais xa kuv tuaj, yog tus Yes Xus uas tau tawm los rau koj pom tom txoj kev uas koj tuaj. Nws xa kuv tuaj kom koj rov qab pom kev, thiab kom koj tau txais Leej Ntuj Plig Ntshiab puv hauv koj.” 18 Tam sim ntawd muaj tej daim zoo li nplai ntses poob ntawm Xauv qhov muag los, ces nws rov qab pom kev. Lawv ua lub cim ntxuav rau nws tam sis ntawd.
19 Nws noj mov, ces nws rov qab muaj zog tuaj. Nws nrog cov thwj tim nyob ob peb hnub hauv Das Mas.
20 Ces tam sis ntawd nws cia li mus nyob hauv cov tsev Txoos, thiab pib qhuab qhia txog Jesus, nws tshaj tawm tias Yes Xus yog Tswv Ntuj Leej Tub.
21 Tas tsoom neeg uas hnov nws, mas lawv poob siab, lawv hais zom zaws tias: "Tus no tsis yog tus uas nyob Yes Lus Xas Les, uas tau hiam cov neeg hu txog lub npe ntawd lod? Tsis yog nws twb txhob txwm tuaj ntawm no kom tau ntes lawv, muab lawv khi, thiab cab lawv mus rau cov thawj leej choj xwb lod?"
22 Hos Xauv, mas nws muaj zog zuj zus tuaj. Nws ua rau cov Yus Das nyob Das Mas xav tsis thoob li, vim nws qhia tseeb hais tias Yes Xus yog Leej Pleev tiag.

NPN 117: 1BC, 2

Txais: (MK 16:15) Nej mus kom thoob qab ntuj, nej tshaj lub Moo Zoo rau txhua leej txhua tus.
los: As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais: (MK 16:15) Nej mus kom thoob qab ntuj, nej tshaj lub Moo Zoo rau txhua leej txhua tus
los: As les lus yas.

Vim nws lub siab ua zoo rau peb nyob ruaj nreb,
HUAB TAIS lub siab pheej xeeb mus ib txhiab ib txhis.

Txais: (MK 16:15) Nej mus kom thoob qab ntuj, nej tshaj lub Moo Zoo rau txhua leej txhua tus.
los: As les lus yas.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: Kuv yog tus xaiv nej hauv lub ntiaj teb los
thiab xa nej mus kom nej txi ib co txiv uas yuav nyob ruaj nreb.

Txais: As les lus yas, as les lus yas.

Ntawv Moo Zoo: MK 16: 15-18

15 Yes Xus tawm tuaj hais rau nws cov thwj tim tias: "Nej mus kom thoob lub qab ntuj, nej tshaj lub Moo Zoo rau txhua leej txhua tus.
16 Tus twg ntseeg thiab txais lub cim ntxuav, mas nws yuav txais kev cawm, hos tus tsis ntseeg yuav raug txim. 17 Cov cim no yuav nrog nraim cov uas ntseeg: lawv hu txog kuv lub npe ntiab dab ces dab yuav tawm khiav; lawv yuav hais tej hom lus tshiab;
18 lawv yuav tuav nab tau hauv lawv txhais tes thiab yog lawv haus tshuaj lom neeg, tshuaj yuav tsis ua xwv txheej rau lawv li; thaum lawv tsa tes rau saum cov neeg mob, mas cov mob yuav rov zoo."