COV ZAJ NYEEM NRUAB LIS PIAM XYOO B 2020-2021

Tim 20 lub 5 Hlis 2021

Hnub Tsib Lis Piam Xya Caij Hla Xyoo ABC Nruab Lis Piam Xyoo I & II
Lectionary: 300

Zaj Nyeem Ib: HAUJ LWM 22: 30; 23: 6-11

30 Hnub tom qab, tus xab txheeb xav paub tseeb tias cov Yus Das liam dab tsi rau Paj Lug tiag, ces nws daws Paj Lug thiab nws ceeb toom kom cov thawj leej choj thiab tas tsoom txwj laus Xas Nes Nrees tuaj sib sau. Nws coj Paj Lug nqes los, thiab kom Paj Lug mus sawv ntawm lawv xub ntiag.
23: 6 Paj Lug paub tias cov neeg nyob ntawd muaj ib co yog tog Xas Dus Kais, hos ib co yog tog Fas Lis Xais, ces nws tsa suab hais nrov nrov rau tsoom Xas Nes Nrees tias: "Cov kwv tij, kuv yog ib tug Fas Lis Xais, kuv yog Fas Lis Xais tub. Yog vim txoj kev cia siab rau qhov hais tias cov neeg tuag yuav ciaj rov qab los mas kuv thiaj raug lus li no."
7 Paj Lug hais li no ces cov Fas Lis Xais thiab cov Xas Dus Kais pib sib ceg, ces pab neeg ntawd faib kiag ua ob tog.
8 Vim cov Xas Dus Kais hais tias tsis muaj kev sawv rov los, tsis muaj cov Tshiab thiab tsis muaj dab li, hos cov Fas Lis Xais ntseeg txog peb yam ntawd tib si.
9 Sawv daws thiaj sib cav ntsuag qees. Muaj ob peb tug kws ntawv, uas yog tog Fas Lis Xais sawv, lawv hais tias: "Peb tsis pom tus neeg ntawd ua ib qho txhaum dab tsi. Tej zaum tsam yog ib tug dab los yog ib tug Tshiab hais lus rau nws xwb?"
10 Lawv haj yam sib cav muaj ceem zuj zus tuaj, ces tus xab txheeb ntshai tsam lawv muab Paj Lug dua ua daim, nws thiaj kom nws pab tub rog nqes mus chua Paj Lug ntawm lawv los thiab coj nws rov los nyob hauv lub yeej.
11 Hmo tom qab, Huab Tais tuaj xyuas Paj Lug, thiab hais rau nws tias: "Ua siab loj loj mog! Ib yam li koj tau ua tim khawv txog kuv nyob Yes Lus Xas Les lawm, ib yam li ntawd, koj tseem yuav ua tim khawv txog kuv nyob Los Mas thiab."

NPN 16: 1-2a+5, 7-8, 9-10, 11

Txais: (1) Tswv Ntuj, thov koj txuag kuv, koj yog kuv chaw tso siab.
Los: As les lus yas.

Tswv Ntuj, thov koj txuag kuv, vim kuv tuaj khaub zig koj.
Kuv hais rau HUAB TAIS tias: "Koj yog kuv tus HUAB TAIS!”
Huab Tais, kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (1) Tswv Ntuj, thov koj txuag kuv, koj yog kuv chaw tso siab.
Los: As les lus yas.

Kuv cav lus zoo txog HUAB TAIS tus qhia kuv xav tswv yim,
Tab yog hmo ntuj, kuv siab ntsws tseem qhia kuv.
Kuv cia HUAB TAIS nyob ntawm kuv xub ntiag tsis tseg;
muaj nws nyob ntawm kuv sab xis, kuv yuav tsis ntshai.

Txais: (1) Tswv Ntuj, thov koj txuag kuv, koj yog kuv chaw tso siab.
Los: As les lus yas.

Kuv lub siab luag ntxhi, kuv tus plig hom khaj,
kuv lub cev kuj tau nyob nyab xeeb,
Vim koj yuav tsis tso kuv tus ntsuj plig
pov tseg rau ntuj txias teb tsaus,
Koj yuav tsis kheev kom tus ntseeg koj paub kev puas kev lwj.

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Koj yuav qhia kom kuv paub txoj kev taug mus txog txoj sia,
txog txoj kev zoo siab puv npo nyob ntawm koj xub ntiag,
txog txoj kev nplig siab nyob ntawm koj sab xis tas mus li.

Txais: (1) Tswv Ntuj, thov koj txuag kuv, koj yog kuv chaw tso siab.
Los: As les lus yas.

As Les Lus Yas: ZAM 17: 21

Txais: As les lus yas, as les lus yas.

Huab Tais hais tias:
“Leej Txiv, thov kom lawv sawv daws koom ua ib leeg,
ib yam li koj nyob hauv kuv thiab kuv nyob hauv koj,
kom ntiaj teb neeg thiaj ntseeg tias yog koj xa kuv tuaj.”

Txais: As les lus yas, as les lus yas.

Ntawv Moo Zoo: ZAM 17: 20-26

Yes Xus tsa muag ntsia saum ntuj, nws thov ntuj li no:
20 "Kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus thiab,
21 kom lawv sawv daws koom ua ib leeg xwb, ib yam li koj, Leej Txiv, nyob hauv kuv thiab kuv nyob hauv koj, kom lawv nyob hauv wb, ces ntiaj teb neeg thiaj ntseeg tias yog koj xa kuv tuaj.
22 Lub koob meej uas koj muab rau kuv, mas kuv muab rau lawv lawm, kom xwv lawv ua ib leeg xwb xws li wb ua ib leeg,
23 kuv nyob hauv lawv thiab koj nyob hauv kuv, kom lawv thiaj li ua tsheej ib leeg tiav log, ces lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv.
24 Txiv, lawv yog cov uas koj muab pub rau kuv; kuv nyob qhov twg, mas kuv xav kom lawv tau nrog kuv nyob qhov ntawd thiab, kom lawv pom kuv lub koob meej uas koj muab rau kuv, vim koj tau nyiam kuv txij thaum tsis tau tsim lub sim ceeb los lawm.
25 Kuv Txiv siab ncaj, lub qab ntuj neeg tsis paub koj, tab sis kuv paub koj, thiab cov no kuj paub tias yog koj xa kuv tuaj.
26 Kuv twb qhia koj lub npe rau lawv paub lawm, kuv tseem yuav qhia kom neeg paub ntxiv, kom txoj kev nyiam uas koj muab los nyiam kuv nyob hauv lawv, thiab kom kuv nyob hauv lawv."

Tim 21 lub 5 Hlis 2021

Hnub Rau Lis Piam Xya Caij Hla Xyoo ABC Nruab Lis Piam Xyoo I & II
Lectionary: 301

XHLT: LN Christopher Magallanes, ua Leej Choj & cov tuag ua Tim Khawv

Zaj Nyeem Ib: HAUJ LWM 25: 13b-21

13 Tus vaj As Nqis Pas thiab Npes Les Nis nkawd tuaj txog Xes Ntxas Les, nkawd xav tuaj xyuas Fes Tus.
14 Vim tias nkawd yuav nyob ntau hnub, ces Fes Tus thiaj piav txog Paj Lug rau tus vaj hais tias: "Nyob ntawm no, muaj ib tug neeg uas Fes Liv tau muab nws kaw cia.
15 Thaum kuv mus Yes Lus Xas Les, cov thawj leej choj thiab cov txwj laus Yus Das tuaj liam nws rau kuv, lawv hais kom kuv muab txim rau nws.
16 Kuv teb lawv tias cov Los Mas tsis muaj cai yuav cia li muab ib tus neeg tso rau hauv cov neeg liam nws txhais tes, yuav tsum xub cia nws nrog lawv sib hais tim ntsej tim muag tso, thiab yuav cia nws tau kev hais lus daws lub txim uas luag liam rau nws tso.
17 Ces thaum cov Yus Das tuaj sib sau nyob ntawm no, kuv tsis ncua sij hawm li, tag kis tom qab kiag xwb, kuv mus zaum hauv lub tsev txiav txim, kuv kom lawv coj tus neeg los.
18 Cov neeg liam rau nws tuaj sawv ncig nws; tiam sis lawv liam tsis tau ib qho phem raws li kuv xav li.
19 Lawv tsuas nrog nws muaj lus sib cav tsis sib haum hais txog lawv txoj kev teev hawm, thiab hais txog ib tug Yes Xus uas tuag lawm, tab sis Paj Lug hais tias nws tseem muaj txoj sia nyob xwb.
20 Kuv tsis pom qab ua dab tsi rau ib zag sib cav zoo li ntawd, kuv thiaj nug Paj Lug saib nws puas yeem mus pem Yes Lus Xas Les, ces mam txiav txim txog tej ntawd rau nws nyob ped.
21 Tiam sis Paj Lug tau thov kom kuv muab nws kaw tos txog thaum nws mus rau tus Tuam Vaj txiav txim rau nws xwb. Kuv thiaj li ceeb toom cia Paj Lug nyob ntawm no mus txog hnub kuv xa nws mus rau Xes Ntxas.”

NPN 103: 1-2, 11-12, 19-20ab

Txais: (19a) Huab Tais tau tsa nws lus theej kiab nyob saum ntuj.
los: As les lus yas.

Kuv tus ntsuj plig, koj cav txog HUAB TAIS;
tas nrho kuv tus kheej, koj cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej txiaj ntsim ib qho li.

Txais: (19a) Huab Tais tau tsa nws lus theej kiab nyob saum ntuj.
los: As les lus yas.

Siab npaum li lub ntuj nyob siab rau saum ntiaj teb,
nws kuj hlub cov neeg uas hwm nws tshaj npaum li ntawd.
Deb npaum li sab hnub tuaj nyob deb ntawm sab hnub poob,
nws kuj tau muab peb tej txhaum pov tseg
deb npaum li ntawd ntawm peb.

Txais: (19a) Huab Tais tau tsa nws lus theej kiab nyob saum ntuj.
los: As les lus yas.

HUAB TAIS tau tsa nws lub theej kiab nyob saum ntuj,
nws txoj kev ua vaj tswj tas txhua tsav txhua yam.
Nej uas yog nws cov Tshiab, nej cav lus zoo txog HUAB TAIS,
nej yog cov muaj zog loj ua raws li nws lo lus.

Txais: (19a) Huab Tais tau tsa nws lus theej kiab nyob saum ntuj.
los: As les lus yas.

As Les Lus Yas: ZAM 14: 26

Txais: As les lus yas, as les lus yas.

Leej Tswv Yim Ntshiab yuav qhia tas ib puas tsav yam rau nej,
thiab yuav pab nej rov nco txog tas txhua yam kuv tau hais rau nej.

Txais: As les lus yas, as les lus yas.

Ntawv Moo Zoo: ZAM 21: 15-19

15 Thaum Yes Xus tawm tuaj rau nws cov thwj tim pom thiab lawv noj tshais tas, Yes Xus hais rau Xis Moos Pob Zeb tias: "Xis Moos, Zam tus tub, koj puas nyiam kuv dua lawv cov ntawd?" Pob Zeb hais rau Yes Xus tias: "Huab Tais, koj yeej paub tias kuv nyiam koj." Yes Xus hais rau Pob Zeb tias: "Koj coj kuv cov yaj mus nog zaub."
16 Yes Xus rov hais zaum ob tias: "Xis Moos, Zam tus tub, koj puas nyiam kuv?" Pob Zeb hais rau Yes Xus tias: "Huab Tais, koj yeej paub tias kuv nyiam koj." Yes Xus hais rau nws tias: "Koj saib kuv cov yaj mog."
17 Yes Xus tseem rov hais dua zaum peb rau Pob Zeb tias: "Xis Moos, Zam tus tub, koj puas nyiam kuv?” Pob Zeb tu siab rau qhov Yes Xus hais rau nws zaum peb tias: "Koj puas nyiam kuv?" Pob Zeb hais rau Yes Xus tias: "Huab Tais, koj paub tas ib puas tsav yam, koj yeej paub tias kuv nyiam koj." Yes Xus hais rau Pob Zeb tias: "Koj coj kuv cov yaj mus nog zaub mog.
18 Kuv hais qhov muaj tseeb tiag rau koj; thaum koj tseem hluas, koj muab koj siv koj sia koj, koj xav mus qhov twg los koj mus koj. Tiam sis thaum koj laus lawm, koj yuav tsa tes cia lwm tus kho siv rau koj sia thiab coj koj mus qhov uas koj tsis xav mus."
19 Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej. Yes Xus hais li tas, nws hais rau Pob Zeb tias: "Koj raws kuv mus.

Tim 22 lub 5 Hlis 2021

Hnub Xya Lis Piam Xya Caij Hla Xyoo ABC Nruab Lis Piam Xyoo I & II
Lectionary: 302

ZHLT: LN Rita nyob Cascia, leej phauj

Zaj Nyeem Ib: HAUJ LWM 28: 16-20, 30-31

16 Thaum peb tuaj txog hauv Los Mas lawm, mas lawv cia Paj Lug nws nyob nws ib leeg nrog tus tub rog uas zov nws xwb.
17 Peb hnub tom qab, Paj Lug hu cov thawj coj Yus Das kom tuaj. Thaum lawv tuaj txog tas, Paj Lug hais rau lawv tias: "Cov kwv tij, kuv tsis tau ua dab tsi txhaum peb haiv neeg, los txhaum peb cov yawg koob tej kev cai, tsis kav lawv ntes kuv thiab muab kuv rau cov Los Mas kaw nyob Yes Lus Xas Les.
18 Thaum cov Los Mas tshuaj lus tas, lawv xav tso kuv mus, vim lawv tsis pom kuv tau ua dab tsi txaus ris lub txim tuag.
19 Tab sis cov Yus Das tsis kam tso kuv, ces kuv thiaj yuav tsum tau thov kom cia Xes Ntxas uas tus txiav txim, txawm tias kuv tsis muaj lus dab tsi phem yuav hais txog kuv haiv neeg.
20 Yog vim li no, mas kuv thiaj xav ntsib nej thiab hais rau nej paub tias, yog vim His Xas Lais txoj kev tso siab, mas kuv thiaj li coj cov saw khi kuv li no."
30 Paj Lug nyob tau ob xyoos nkaus hauv lub tsev nws nyob no. Nws tos txais cov neeg uas tuaj xyuas nws tas huv tib si.
31 Nws tshaj txog Tswv Ntuj lub Ceeb Tsheej, thiab qhia txog Huab Tais Yes Xus Pleev, nyob hauv txoj kev tso siab lug thiab tsis muaj leej twg txwv nws li.

NPN 11: 4, 5+7

Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
los: As les lus yas.

HUAB TAIS nyob hauv nws lub tuam tsev ntshiab;
HUAB TAIS lub theej kiab nyob saum ntuj.
Nws qhov muag saib ntsoov,
nws ntsia tsom ntsoov rau tsoom tib neeg.

Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
los: As les lus yas.

HUAB TAIS nrhiav tus neeg ncaj thiab tus neeg nkhaus,
nws ntxub tus nyiam kev sib ntaus sib tua.
Vim HUAB TAIS siab ncaj, nws nyiam cov hauj lwm ncaj ncees;
cov neeg siab ncaj yuav tau ntsia ntsoov HUAB TAIS lub ntsej muag

Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
los: As les lus yas.

As Les Lus Yas: ZAM 16: 7, 13

Txais: As les lus yas, as les lus yas.

Huab Tais hais tias:
Kuv yuav xa Leej Tswv Yim muaj qhov tseeb tuaj rau nej;
Nws yuav coj nej mus txog txhua yam tseeb.

Txais: As les lus yas, as les lus yas.

Ntawv Moo Zoo: ZAM 21: 20-25

20 Pob Zeb tig ntsia tom qab, nws pom tus thwj tim uas Yes Xus nyiam tuaj lawv qab, yog tus uas thaum lawv noj hmo, nws tig mus pheeb rau ntawm Yes Xus hauv siab, thiab nug tias: “Huab Tais, tus yuav muab koj rau luag yog leej twg?”
21 Pob Zeb pom tus thwj tim ntawd, Pob Zeb hais rau Yes Xus tias: "Huab Tais, tus ntawd ned?"
22 Yes Xus hais rau Pob Zeb tias: "Yog kuv xav kom nws nyob mus txog hnub kuv rov los no, koj ho quav ntsej dab tsi txog? Ntawm koj, mas koj raws kuv mus."
23 Lo lus no thiaj ncha rau hauv cov kwv tij tias: “Tus thwj tim ntawd yuav tsis tuag.” Tab sis Yes Xus tsis tau hais rau Pob Zeb tias: “Nws yuav tsis tuag”, Yes Xus tsuas tau hais tias: “Yog kuv xav kom nws nyob txog hnub kuv rov no koj ho quav ntsej dab tsi txog?” xwb.
24 Yog tus thwj tim ntawd ua tim khawv txog tej no thiab yog nws muab sau cia. Peb paub tias nws cov lus ua pov thawj muaj tseeb.
25 Tseem tshuav ntau yam kawg uas Yes Xus tau ua, yog yuav sau ib yam zuj zus tas huv tib si, mas kuv xav tias lub ntiaj teb yuav ntim tsis tas cov phau ntawv sau ntawd li.

Tim     24     lub     5     Hlis     2021

Hnub Ob Tom Qab Hnub Chiv Leej Ntuj Plig Nqes Los

Hwm tus Nkauj Xwb Tsim Txiaj Mab Liab ua lub Koom Txoos Leej Niam .
Lectionary: 572a

Zaj Nyeem Ib:   HP 3: 9-15, 20

Thaum As Das noj lub txiv tas lawm,
9 HUAB TAIS Tswv Ntuj hu nws tias: "Koj nyob qhov twg?"
10 Tus txiv neej teb tias: "Kuv tau hnov koj nyob hauv lub vaj, tiam sis kuv ntshai vim kuv liab qab, ces kuv thiaj khiav tsiv nraim lawm."
11 Tswv Ntuj hais tias: "Leej twg qhia koj tias koj liab qab? Yog koj noj lub txiv uas kuv txwv tsis pub koj noj lawm puas yog ?"
12 Tus txiv neej teb tias: "Yog tus poj niam uas koj tso nrog kuv nyob, nws muab lub txiv ntawm tsob ntoo rau kuv, ces kuv thiaj noj."
13 HUAB TAIS Tswv Ntuj hais rau tus poj niam tias: "Koj ua dab tsi li ntawd ?" Tus poj niam teb tias: "Yog niag nab ntxias kuv, kuv thiaj noj."
14 Ces HUAB TAIS Tswv Ntuj hais rau tus nab hais tias: "Vim koj tau ua li no mas koj txoj hmoov yuav phem tshaj tas ib tsoom tsiaj nyeg thiab tas ib tsoom tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej.
15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.

Los:      HL 1: 12-14

Thaum Yes Xus nce mus saum ntuj lawm,
12 cov Hauv Paus Xa Lus nqes pem lub roob uas hu ua "Roob Txiv Ntoo Roj" rov los rau Yes Lus Xas Les. Lub roob ntawd nyob ze ze ntawm Yes Lus Xas Les, tsuas deb li hnub Xas Npas Tos ib ncua kev xwb.
13 Thaum lawv los txog hauv nroog, lawv nce mus saum chav tsev siab uas yog qhov chaw lawv nyob; muaj Pob Zeb thiab Yas Kos thiab Zam thiab As Nres, Fis Lis Pos thiab Tos Mas, Npas Tos Los Mas Yos thiab Mas Tais, Yas Kos uas yog As Fas Yos tub thiab Xis Moos Xis Los thiab Yus Das uas yog Yas Kos tub.
14 Tas lawv cov no sawv daws koom ib lub siab kub siab teev ntuj, nrog rau ib co poj niam, thiab Mab Liab uas yog Yes Xus niam, thiab nrog Yes Xus cov kwv tij thiab.

NPN   87: 1-2, 3+5, 6-7

Txais: (3) Tswv Ntuj lub tsheej, lawv hais tej yam nto koob meej qhuas txog koj!

Nws raug txhim nyob rau saum cov ncov roob txoj kev ntshiab;
Huab Tais nyiam Xis Yoos cov rooj vag
tshaj Yas Kos lwm cov tsev tas huv si.

Txais: (3) Tswv Ntuj lub tsheej, lawv hais tej yam nto koob meej qhuas txog koj!

Luag hais tej yam zoo kawg qhuas txog koj, Tswv Ntuj lub tsheej!
Lawv yuav hais txog Xis Yoos tias:
“Tus no thiab txhua tus neeg yug nyob hauv nws.
Tus uas txhim tsa Xis Yoos yog tus Huab Tais nyob siab.”

Txais: (3) Tswv Ntuj lub tsheej, lawv hais tej yam nto koob meej qhuas txog koj!

Lawv yuav sau rau hauv phau ntawv txheeb npe txog
cov haiv neeg tias: "Tus neeg no yug los nyob ntawd."
Tas sawv daws yuav zoo siab yoj cev hu nkauj tias:
"Kuv lub tsev yog nyob hauv koj."

Txais: (3) Tswv Ntuj lub tsheej, lawv hais tej yam nto koob meej qhuas txog koj!

As Les Lus Yas

Txais: As les lus yas, as les lus yas.

Nkauj Tsim Txiaj, koj yuav zoo siab, koj yug peb tus Huab Tais;
Lub Koom Txoos Leej Niam tus tau txoj hmoov zoo,
koj ua kom peb sov siab nyob hauv
koj leej Tub Yes Xus Pleev leej Tswv Yim.

Txais: As les lus yas, as les lus yas.

Ntawv Moo Zoo:   ZAM 19: 25-34

25 Cov sawv nyob ze ntawm Yes Xus tus ntoo cuam yog nws niam thiab nws niam tus niam hluas Mab Liab uas yog Dlos Pas poj niam, thiab Mab Liab Mas Ntas Las.
26 Yes Xus pom nws niam, thiab pom tus thwj tim uas nws nyiam sawv nyob ze, ces nws hais rau nws niam tias: "Niad, tus ntawd yog koj tus tub."
27 Thiab Yes Xus hais rau tus thwj tim tias: "Tus ntawd yog koj niam." Ces txij lub sij hawm ntawd los, tus thwj tim coj Mab Liab mus nyob hauv nws tsev.
28 Ua li ntawd tas, Yes Xus paub tias zaum no ib puas tsav yam tiav tas lawm; kom xwv muaj raws li ntawv sau tseg, nws hais tias: "Kuv nqhis dej."
29 Muaj ib hub kua qaub puv nkaus nyob ntawd. Lawv muab ib thooj rwb tub kua qaub chob rau ib tug ceg ntoo his xos cev mus rau Yes Xus qhov ncauj.
30 Thaum Yes Xus haus qhov kua qaub tas, nws hais tias: " Tiav tas lawm." Ces Yes Xus nyo taub hau, nws txoj pa tas thaum ntawd.
31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam rau hnub Xas Npas Tos, vim tias hnub Xas Npas Tos ntawd yog ib lub hnub nyoog tseem ceeb. Cov Yus Das thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los.
32 Cov tub rog thiaj tuaj muab thawj tug neeg thiab muab lwm tus neeg uas nrog Yes Xus raug dai saum ntoo cuam ob sab ceg lov.
33 Thaum lawv los txog ntawm Yes Xus, lawv pom nws twb tuag lawm, lawv tsis muab nws ob sab ceg lov,
34 tab sis ib tug tub rog xuas nws rab hmuv nkaug Yes Xus phab tav; tam sis ntawd ib co ntshav thiab ib co dej tawm los.

Tim 25 lub 5 Hlis 2021

Hnub Peb Lis Piam Yim Nruab Xyoo B Nruab Lis Piam Xyoo I
Lectionary: 348

XHLT: LN Bede tus Tsim Nyog Hwm, Leej Choj ua Kws cov Tsuj Ntshiab; LN Gregory VII, ua Vaj Qhia; LN Mary Magdalene de Pazzi

Zaj Nyeem Ib: Npes Xis Las 35: 1-12

1 Ua raws Txoj Cai yog cev ntau thaj txi ntuj; tus muab siab rau coj cov lus qhia yog nws cev cov thaj txi Ntuj muaj kev koom siab.
2 Tus ua tej yam hauj lwm hlub luag yog nws cev ib co hmoov nplej los txi Ntuj; pub nyiaj rau tus pluag yog ib thaj cav txog Tswv Ntuj.
3 Cheem kom yus tsis txhob ua phem yog qhov ntxim Tswv Ntuj siab, thiab tso txoj kev tsis ncaj tseg yog kev them txim txhaum.
4 Koj tsis txhob mus tes dawb tes npliag ntawm Huab Tais xub ntiag, vim koj yuav tsum cev txhua yam rau nws raws li lo lus qhia kom ua.
5 Tus neeg ncaj cov txim ua kom lub thaj txi Ntuj zoo nkauj muaj nqes tuaj, nws ncho ib co pa tsw qab ntxiag nyob ntawm Tus Nyob Siab xub ntiag.
6 Tus neeg ncaj thaj txi ntuj ntxim Huab Tais siab kawg nkaus, Huab Tais yuav nco ntsoov tas mus li.
7 Nej ua lub siab dav cav txog Huab Tais lub koob meej thiab tsis txhob qia dub thaum nej cev paj tshab.
8 Niaj zaus koj pub paj tshab mas koj yuav ua ntsej muag luag ntxhi, thiab koj yuav zoo siab hlo thaum koj pub nyiaj txiag
9 Koj yuav pub rau tus Nyob Siab ib yam li nws tau pub rau koj, nrog ib lub siab loj siab dav, raws li koj pub tau.
10 Vim Huab Tais yeej rov ua pauj tas mus li, nws yuav pauj xya npaug rov rau koj.
11 Koj tsis txhob cev ib co txim los xiab Huab Tais, nws yuav tsis txais cov ntawd; koj tsis txhob tso siab rau ib thaj txi ntuj tsis ncaj ncees.
12 Vim nws yog ib tug Tswv Ntuj muaj kev ncaj ncees, nws tsis kws leej twg cai.

NPN 50: 5-6, 7-8, 14+23

Txais: (23b) Kuv yuav qhia Tswv Ntuj lub hwj huam cawm neeg rau tus neeg ncaj pom.

"Nej sau cov neeg ntseeg kuv tuaj nyob ntawm kuv xub ntiag,
cov uas tau ua thaj txi ntuj nrog kuv cog lus.”
Lub ntuj tshaj nws txoj kev ncaj,
vim tias Tswv Ntuj yog tus txiav txim.

Txais: (23b) Kuv yuav qhia Tswv Ntuj lub hwj huam cawm neeg rau tus neeg nca pomj.

“Kuv haiv neeg, nej mloog, kuv yuav hais lus;
His Xas Lais, kuv yuav hais tej yam phem txog koj,
Kuv, Tswv Ntuj, yog koj tus Tswv Ntuj.
Kuv yuav hais tej yam phem tsis yog vim koj cov thaj txi Ntuj ;
koj cov tsiaj hlawv txi Ntuj yeej nyob ntawm kuv xub ntiag mus li.

Txais: (23b) Kuv yuav qhia Tswv Ntuj lub hwj huam cawm neeg rau tus neeg ncaj pom.

Koj yuav tsum muab lo lus qhuas lus cav los txi rau Ntuj,
koj yuav tsum pauj koj cov yeem rau tus Nyob Siab.
Leej twg muab lo lus qhuas lus cav los txi Ntuj, mas nws ua kom kuv nto koob meej.
kuv yuav qhia Tswv Ntuj txoj kev cawm neeg rau tus taug txoj kev ncaj pom.

Txais: (23b) Kuv yuav qhia Tswv Ntuj lub hwj huam cawm neeg rau tus neeg ncaj pom.

As Les Lus Yas: Mt 11: 25

Txais: As les lus yas, as les lus yas.

Peb cav txog koj, Leej Txiv, tus Huab Tais kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: Mk 10: 28-31

28 Pob Zeb pib hais rau Yes Xus tias: “Peb tau tso ib puas tsav yam tseg, thiab peb los raws koj.”
29 Yes Xus hais tias: "Kuv hais tseeb rau nej, tsis muaj ib tug neeg uas tau tso vaj tse, los kwv tij nkauj muam, los niam thiab txiv, me tub me nyuam, los liaj teb tseg vim kuv thiab vim lub Moo Zoo,
30 uas yuav tsis tau txais nyob hauv tiam no, ib puas npaug nyem no ntawm tej vaj tse, thiab kwv tij nkauj muam, niam thiab txiv, me tub me nyuam, thiab liaj teb, ntxiv rau kev raug luag hiam, thiab lwm tiam, nws yuav txais txoj sia nyob mus li.
31 Coob leej tuaj ua ntej, yuav nyob tom qab, hos coob leej tuaj tom qab, yuav nyob pem hauv ntej.”

Tim 26 lub 5 Hlis 2021

Hnub Plaub Lis Piam Yim Nruab Xyoo B Nruab Lis Piam Xyoo I
Lectionary: 349

Yuav Hwm LN Philip Neri, ua Leej Choj

Zaj Nyeem Ib: NXL 36: 1, 4-5a, 10-17

1 Tswv Ntuj kav lub sim ceeb, thov koj khuv leej peb mas. thov koj ntsia peb, koj ua kom tas txhia haiv neeg ntshai koj hwm koj.
4 Kom cov pej kum haiv neeg zeem paub koj, ib yam li peb zeem tias dua ntawm koj Huab Tais lawm, tsis muaj lwm tus Tswv Ntuj ntxiv.
5 Thov koj rov ua koj cov cim dua, thiab rov ua ib co hwj huam tshiab.
10 Koj sau tas cov xeem Yas Kos kom rov los ua ke, kom lawv rov tau txais lub cuab tam xws li txheej thaum ntxov ub.
11 HUAB TAIS, thov koj khuv leej haiv neeg uas ris koj lub npe, uas yog His Xas Lais, koj tus tub hlob mas.
12 Thov koj hlub koj lub tsheej ntshiab Yes Lus Xas Les, uas yog koj lub chaw so.
13 Koj tso koj lub hwj chim los nyob puv hauv Xis Yoos, koj lub koob meej los nyob puv hauv koj lub tuam tsev.
14 Koj ua tim khawv txog thawj cov neeg koj tau tsim los thaum lub hauv paus, thiab koj ua kom muaj raws li cov lus uas cov Yaj Saub ceeb toom nyob hauv koj lub npe.
15 Koj pub txiaj ntsim paj tshab rau cov neeg uas tso siab lug tos koj, neeg thiaj yuav pom tias koj cov Yaj Saub tau hais lus tseeb tiag.
16 Huab Tais, thov koj mloog koj cov tub txib zaj thov koj, vim koj ua siab zoo tas li rau koj haiv neeg thiab koj coj peb mus nyob hauv txoj kev ncaj.
17 Ces tas tsoom neeg nyob ntiaj teb thiaj yuav paub tseeb tias koj yog Huab Tais, tus Tswv Ntuj uas nyob mus li.

NPN 79: 8, 9, 11+13

Txais: (NXL 36:1b) Huab Tais, thov koj muab koj lub siab zoo qhov kaj rau peb pom.

Thov koj txhob nco txog peb tej txhaum yav dhau los ntxiv;
muab koj txoj kev khuv leej tuaj rau peb sai sai,
vim peb poob rau qhov qis kawg nkaus lawm.

Txais: (NXL 36:1b) Huab Tais, thov koj muab koj lub siab zoo qhov kaj rau peb pom.

Thov koj pab peb, Tswv Ntuj peb tus cawm seej,
vim koj lub npe muaj koob meej;
Thov koj cawm peb thiab zam txhaum rau peb vim koj lub npe

Txais: (NXL 36:1b) Huab Tais, thov koj muab koj lub siab zoo qhov kaj rau peb pom.

Thov koj cia cov neeg nyob txim lub suab ntsaj nrov tuaj txog koj;
koj siv koj lub hwj huam loj los cawm cov neeg poob rau hauv kev tuag.
Ces peb, uas yog koj haiv neeg thiab pab yaj nyob hauv koj lub nras zaub
yuav ua koj tsaug mus li tsis muaj caij kawg,
Thiab yuav cav txog koj lub koob meej tiam dhau tiam.

Txais: (NXL 36:1b) Huab Tais, thov koj muab koj lub siab zoo qhov kaj rau peb pom..

As Les Lus Yas: Mk 10: 45

Txais: As les lus yas, as les lus yas.

Neeg Leej Tub tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: Mk 10: 32-45

32 Cov thwj tim taug kev nce mus pem Yes Lus Xas Les, Yes Xus mus ua lawv ntej. Lawv lub siab ntshai rwg, hos cov neeg raws lawv mus kuj ntshai kawg. Yes Xus rov hu Pab Kaum Ob los ze nws nyob rau ib cag, ces nws pib hais txog tej yam uas yuav tuaj raug nws li no:
33 "Zaum no, peb nce mus pem Yes Lus Xas Les, mas Neeg Leej Tub yuav raug ntes mus rau cov thawj leej choj thiab cov kws Ntawv Ntshiab, ces lawv yuav txiav lub txim tuag rau nws, thiab yuav muab nws cob rau cov neeg teev pej kum dab.
34 Lawv yuav hais lus thuam nws, nto aub ncaug rau nws, muab nws nplawm thiab muab nws tua. Peb hnub tom qab, nws yuav sawv rov los."
35 Yas Kos thiab Zam, uas yog Ntxes Npes Dais ob tug tub, txav los ntawm Yes Xus, nkawd hais rau nws tias: "Xib Hwb, qhov wb yuav thov ntawm koj, mas wb xav kom koj ua rau wb."
36 Yes Xus hais rau nkawd tias: "Neb xav kom kuv ua dab tsi rau neb ?"
37 Nkawd hais tias: "Thov koj pub wb ib tug zaum ntawm koj sab xis, ib tug zaum ntawm koj sab laug nyob hauv koj lub hwj chim."
38 Yes Xus hais rau nkawd tias: "Neb tsis paub neb thov dab tsi. Neb puas haus taus lub ntim uas kuv yuav haus? Thiab txais puas taus lub cim ntxuav uas kuv yuav txais?”
39 Nkawd teb tias: “Wb ua tau.” Yes Xus hais rau nkawd tias: “Lub ntim uas kuv yuav haus, neb kuj yuav haus, thiab lub cim ntxuav uas kuv yuav txais, neb kuj yuav txais.
40 Hos qhov yuav zaum ntawm kuv sab xis los sab laug, mas kuv tsis yog tus yuav muab rau neb. Ntuj npaj qhov ntawd rau leej twg, mas yog leej twg tug.”
41 Thaum cov kaum leej hnov li ntawd, lawv tsis txaus siab rau Yas Kos thiab Zam nkawd.
42 Yes Xus hu cov thwj tim los, nws hais rau lawv tias: "Nej paub lawm tias cov uas luag saib lawv yog thawj coj nyob hauv cov kuj cuab, mas lawv kav sawv daws xws li ib co tswv, thiab cov hlob yuam sawv daws nruj.
43 Nyob hauv nej, mas yuav tsis zoo li ntawd: leej twg xav ua tus loj nyob hauv nej, nws yuav ua nej tus tub txib.
44 Hos leej twg xav ua tus ntaus thawj nyob hauv nej, mas nws yuav ua sawv daws tus qhev.
45 Vim tias, Neeg Leej Tub tsis tuaj kom luag tsob hwb nws, hos nws tuaj kom tau tsob hwb sawv daws thiab muab nws txoj sia los ua nqi txhiv coob leej."

Tim 27 lub 5 Hlis 2021

Hnub Tsib Lis Piam Yim Nruab Xyoo B Nruab Lis Piam Xyoo I
Lectionary: 350

XHLT: LN Augustine nyob Canterbury, ua Tswv Qhia

Zaj Nyeem Ib: NXL 42: 15-25

15 Nyem no kuv yuav rov nco txog Huab Tais cov hauj lwm,
thiab tej yam kuv tau pom mas kuv yuav piav txog.
Huab Tais hais nws cov lus, ces nws tej hauj lwm cia li tsheej xeeb tuaj;
Yam nws tsim los mloog nws lus ua raws li nws nyiam.
16 Lub hnub qhov pom kev ci dauv los kaj tas puas tsav yam,
ces Huab Tais lub hwj chim nyob puv nkaus nws tej hauj lwm.
17 Huab Tais tsis tau muab lub peev xwm rau nws cov Ntshiab
kom lawv cav txog nws tej hauj lwm tsim nyog qhuas tas huv si.
Tsis kav tus Huab Tais muaj hwj huam tas nrho tau tsa nws tej hauj lwm kom nyob ruaj nreb,
kom tas lub sim ceeb nyob khov kho hauv Huab Tais lub hwj chim.
18 Huab Tais tsom tau hauv tej qab thu tob thiab nkag tau rau hauv neeg nruab siab;
nws txeem mus tau hauv lawv cov tswv yim phem nyob nruab nrog.
Tus Nyob Siab paub tas txhua yam kev paub txuj txhij txhua,
nws pom ntsoov cov cim yuav muaj raws cov caij nyoog.
19 Nws qhia kom neeg paub txog yav dhau los lawm thiab yav tom ntej.
Nws qhia tawm txog tej yam zais ntshis uas nyob tob tob.
20 Tsis muaj ib zag tswv yim neeg xav tau uas nws yuav paub tsis txog,
tsis muaj ib lo lus uas yuav muab zais tau ntawm nws.
21 Nws ua kom tej yam zoo kawg uas nws lub tswv yim thoob tsib tau tsim los khiav zoo.
Nws ib txwm nyob tsis muaj caij pib los thiab yuav nyob must sis muaj caij kawg.
Tsis muaj ib yam dab tsi uas yuav ntxiv tau rau nws los yuav thau tau tawm ntawm nws mus.
Nws tsis tas yuav vam txog lwm tus pab nws xav tswv yim.
22 Nws cov hauj lwm tas huv tib si zoo nkauj tas nrho,
ci ntsa iab rau yus qhov muag pom!.
23 Tas puas tsav yam ntawd muaj txoj sia, thiab nyob mus li,
txhua yam nyob cia tau siv, txhua yam mloog lus.
24 Txhua yam muaj ob sab, ib sab txawv ib sab,
Huab Tais tsis tau ua ib yam uas yuav tsis zoo txaus.
25 Txhua yam zoo nkauj txaus qhia txog lwm yam qhov zoo tshaj.
Leej twg thiaj yuav nkees saib nws lub hwj chim ci ntsa iab?

NPN 33: 2-3, 4-5, 6-7, 8-9

Txais: (6a) Huab Tais lo lus ua kom lub ntuj tsim tawm los.

Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws.
Nej hu ib zaj nkauj tshiab rau nws;
Nej qoj cov hlua kom zoo mloog nrog nej cov suab qw zoo siab.

Txais: (6a) Huab Tais lo lus ua kom lub ntuj tsim tawm los..

HUAB TAIS lo lus yog lus ncaj,
nws tej hauj lwm yog hauj lwm txaus ntseeg.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (6a) Huab Tais lo lus ua kom lub ntuj tsim tawm los..

Huab Tais lo lus ua kom lub ntuj tsim tawm los;
nws txoj pa ua kom cov hnub qub tshwm tawm tuaj.
Nws sau cov dej hiav txwv los rau ib lub zoo li plhuaj taub;
nws muab cov dej ntuj ntim rau tej lub txhab tob tob.

Txais: (6a) Huab Tais lo lus ua kom lub ntuj tsim tawm los.

Thov kom tas lub ntiaj teb ntshai HUAB TAIS,
kom tas txhua leej nyob hauv lub qab ntuj hwm nws.
Vim nws hais lus, ces txhua yam tsheej xeeb tuaj;
nws txib, ces txhua yam tshwm tawm tau los.

Txais: (6a) Huab Tais hais nws lo lus ces lub ntuj tsim tawm los.

As Les Lus Yas: Zam 8: 12

Txais: As les lus yas, as les lus yas.

Huab Tais hais tias: Kuv yog lub ntiaj teb qhov pom kev;
leej twg lawv kuv qab yuav muaj txoj kev kaj uas pub txoj sia.

Txais: As les lus yas, as les lus yas.

Ntawv Moo Zoo: Mk 10: 46-52

46 Thaum Yes Xus nrog nws cov thwj tim thiab ib pab neeg coob coob tawm ntawm Yes Lis Kos mus, Npas Tis Mes uas yog Tis Mes tus tub, yog ib tug neeg dig muag, nws zaum thov khawv ntawm ntug kev.
47 Thaum nws hnov tias yog Yes Xus Nas Xas Les tuaj, nws pib qw hu tias: "Yes Xus, Das Vis Leej Tub, thov koj khuv leej kuv mas!"
48 Muaj ntau leej cem nws kom ua twj ywm, tab sis tus dig muag haj yam qw nrov hu tias : "Das Vis Leej Tub, thov koj khuv leej kuv mas."
49 Yes Xus nres, nws hais tias: "Nej hu nws los." Lawv hu tus dig muag tias: "Koj tso siab! Koj sawv mus. Yes Xus hu koj."
50 Ces tus dig muag muab nws lub tsho ntev pov rhees cia, nws sawv tsees thiab mus cuag Yes Xus.
51 Yes Xus hais rau nws tias: "Koj xav kom kuv ua dab tsi rau koj?" Tus dig muag teb rau Yes Xus tias: " Xib Hwb, kuv xav kom kuv rov pom kev!"
52 Yes Xus hais rau nws tias: "Koj mus, koj lub siab ntseeg cawm koj lawm." Tam sis ntawd, tus dig muag rov pom kev tuaj, ces nws taug kev lawv Yes Xus qab mus.

Tim 28 lub 5 Hlis 2021

Hnub Rau Lis Piam Yim Nruab Xyoo B Nruab Lis Piam Xyoo I
Lectionary: 351

Zaj Nyeem ib: NXL 44: 1, 9-13

1 Peb yuav cav txog cov neeg nto moo loj,
uas yog peb cov yawg koob, thaum lub caij lawv ua neej nyob.
9 Muaj ib txhia mas tsis muaj leej twg nco txog lawv ntxiv.
Thaum lawv dua mus lawm, mas zoo cuag li
lawv tsis tau yug los ua neeg ib zaug li;
lawv tej me nyuam los kuj ib yam.
10 Tab sis lawv kuj yog ib co neeg siab zoo txawj hlub neeg,
Uas tau ua tej yam hauj lwm hwm Tswv Tswv Ntuj zoo.
11 Lawv txoj kev nplua nuj yuav nyob hauv lawv tsoom xeeb ntxwv,
Thiab lawv lub cuab tam yuav mus rau lawv caj lawv ces.
12 Lawv tsoom xeeb ntxwv coj raws nraim lawv txoj kev cog lus,
lawv tej tub ki los coj ib yam, kom tau hwm lawv.
13 Lawv tsoom xeeb ntxwv yuav nyob mus li ib txhis,
lawv lub koob meej yuav tsis ploj ib zaug li.

NPN 149:1b-2, 3-4, 5-6a+9b

Txais: (4a) Huab Tais zoo siab nyob hauv nws haiv neeg.
los: As les lus yas.

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
Kom His Xas Lais cia li zoo siab nyob hauv tus tau tsim lawv,
kom Xis Yoos cov me nyuam luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas.

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej los ua zam npua cov neeg me.

Txais: (4a) Huab Tais zoo siab nyob hauv nws haiv neeg.
los: As les lus yas.

Kom cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab nyob hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Txhua tus ntseeg txog nws yeej muaj lub koob meej zoo li no. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas.

As Les Lus Yas: Zam 15:16

Txais: As les lus yas, as les lus yas.

Huab Tais hais tias: Kuv tau xaiv nej hauv lub ntiaj teb los,
kom nej mus thiab nej txi ib co txiv uas yuav nyob ruaj.

Txais: As les lus yas, as les lus yas.

Ntawv Moo Zoo: Mk 11:11-26

11 Yes Xus mus hauv Yes Lus Xas Les, nws chaws mus hauv lub Tuam Tsev Teev Ntuj, nws ntsia txhua yam nyob ncig nws. Thaum ntawd twb lig lawm, nws tawm mus. Nws nrog Pab Kaum Ob leeg mus rau Npes Tas Nias.
12 Hnub tom qab, thaum lawv tawm hauv Npes Tas Nias mus, Yes Xus tshaib plab.
13 Nws tuaj deb ntsia pom ib tsob txiv ncuav pias muaj nplooj, nws mus xyuas saib puas muaj dab tsi. Tab sis thaum nws mus txog ntawm tsob ncuav pias, tsuas muaj nplooj xwb, vim tsis yog lub caij txi txiv.
14 Yes Xus hais rau tsob txiv ncuav pias tias: "Kom txhob muaj neeg tau noj koj tej txiv ib zaug ntxiv mus li lawm!" Cov thwj tim hnov Yes Xus hais li ntawd.
15 Lawv tuaj txog Yes Lus Xas Les, Yes Xus chaws mus hauv lub Tuam Tsev Teev Ntuj, nws pib ntiab cov tub luam tuaj muag thiab cov tuaj yuav toob xib hauv lub Tuam Tsev Teev Ntuj. Nws ntxeev cov tub pauv nyiaj tej rooj, thiab cov muag nquab tej tog zaum.
16 Nws tsis kheev leej twg nqa toob xib hla hauv lub Tuam Tsev li.
17 Ces Yes Xus qhuab qhia lawv, nws hais rau lawv tias: "Ntawv tsis tau sau tseg tias: ‘Kuv lub tsev yuav hu ua tsev teev Ntuj, cia rau ib tsoom haiv neeg’ lod? Tab sis, nej muab kuv lub tsev ua ib qho chaw rau tub sab tuaj nkaum!"
18 Cov thawj leej choj thiab cov kws Ntawv Ntshiab hnov, ces lawv nrhiav saib yuav ua cas muab Yes Xus tua. Tab sis lawv kuj ntshai Yes Xus thiab, vim tas tsoom pej xeem zoo siab rau Yes Xus cov lus qhia.
19 Thaum tsaus ntuj, Yes Xus lawv tawm mus rau sab nroog nraud.
20 Tag kis thaum sawv ntxov ntxov, lawv mus hla ntawd, lawv pom tsob txiv ncuav pias qhuav ti nkaus cag.
21 Pob Zeb nco dheev txog, nws hais rau Yes Xus tias: "Xib Hwb, koj saib, tsob txiv ncuav pias uas koj tsawm qhuav tas lawm."
22 Yes Xus teb rau lawv tias: "Nej ntseeg Tswv Ntuj mog.
23 Kuv hais qhov tseeb rau nej, yog leej twg hais rau lub roob no tias: ‘Koj nqa koj tawm, koj dhia lawm hauv hiav txwv,’ yog tias tus ntawd tsis ua xyem xyav hauv siab li, thiab nws ntseeg tias qhov nws hais yuav tshwm sim tiag, mas qhov ntawd yuav tshwm sim rau nws tau.
24 Vim li ntawd, kuv thiaj hais rau nej tias, tas puas tsav yam uas thaum nej teev Ntuj nej thov, yog nej ntseeg tias nej twb tau txais lawm, ces nej yeej yuav tau txais xwb.
25 Hos thaum nej tab tom sawv ntsug teev Ntuj, yog nej muaj lus tsis txaus siab rau ib tug twg, mas nej yuav zam rau nws, kom xwv nej Txiv nyob saum ntuj zam nej cov txhaum rau nej thiab.
26 Yog nej tsis zam mas nej Txiv nyob saum ntuj kuj yuav tsis zam nej cov txhaum rau nej li thiab.

Tim 29 lub 5 Hlis 2021

Hnub Xya Lis Piam Yim Nruab Xyoo B Nruab Lis Piam Xyoo I
Lectionary: 352

XHLT: LN Vaj Qhia Paj Lug VI

Zaj Nyeem Ib: NXL 51: 12cd-20

12 Kuv ua Huab Tais tsaug thiab cav txog nws,
kuv foom lus zoo rau HUAB TAIS lub npe
13 Thaum kuv tseem hluas, kuv tsis tau mus ncig teb ncig chaw,
kuv yeej tab meeg nrhiav kev thoob tsib nyob hauv txoj kev teev ntuj lawm.
14 Nyob ntawm lub tuam tsev teev ntuj, kuv tau thov kom tau kev thoob tsib;
kuv yuav nrhiav kev thoob tsib mus kom txog kuv hnub kawg.
15 Kev thoob tsib tawg paj ces ua ib re txiv cawv uas siav sai,
ua kom kuv zoo siab nyob hauv nws.
Kuv txhais taw mus tsuj saum txoj kev ncaj taug;
txij kuv yav hluas los, kuv raws nws tus hneev taw.
16 Kuv tig pob ntseg mloog ib lub caij luv luv xwb,
ces kuv tau txais kev thoob tsib, thiab kuv nrhiav tau kev qhuab qhia ntau.
17 Nyob hauv kev thoob tsib mas kuv txawj ua zoo tuaj;
Ces kuv yuav cav txog tus pub kev thoob tsib lub koob meej.
18 Kuv txiav siab tias kuv yuav coj raws kev thoob tsib.
Kuv kub siab nrhiav qhov zoo,
kuv yuav tsis raug kev txaj muag ib zaug li.
19 Kuv tus plig tau ntsib kev tawm tsam kom tau kev thoob tsib.
Kuv tau mob siab coj kom raws Txoj Cai,
kuv tau tsa tes siab rau saum ntuj,
thiab kuv tu siab vim tshuav ntau yam kuv tsis paub.
20 kuv tig kuv tus plig rau kev thoob tsib,
ces kuv nrhiav tau nws nyob hauv txoj kev dawb huv.

NPN 19: 8, 9, 10, 11

Txais: (9ab) Huab Tais txoj cai ua kom yus muaj kev zoo siab.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog tso siab rau,
nws ua kom tus neeg ruam thoob tsib tuaj.

Txais: (9ab) Huab Tais txoj cai ua kom neeg zoo siab.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus qhia meej kawg nkaus,
ua kom qhov muag pom kev.

Txais: (9ab) Huab Tais txoj cai ua kom neeg zoo siab..
Txoj kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov cai nws txiav yog lus tseeb,
Txhua lo lus nws txiav yog qhov ncaj.

Txais: (9ab) Huab Tais txoj cai ua kom neeg zoo siab.

Nws cov cai nws txiav muaj nqes dua kub,
muaj nqes dua ib txhab tseem kub,
qab zib dua cov kua zib,
los cov zib mu ntawm daim nas muv.

Txais: (9ab) Huab Tais txoj cai ua kom neeg zoo siab.

As Les Lus Yas: KLX 3: 16a, 17c

Txais: As les lus yas, as les lus yas.

Nej cia Leej Pleev lo lus nyob puv nplua mias hauv nej;
Nej ua Leej Txiv Tswv Ntuj tsaug nyob hauv nws.

Txais: As les lus yas, as les lus yas.

Ntawv Moo Zoo: Mk 11: 27-33

27 Yes Xus thiab nws cov thwj tim rov qab los hauv Yes Lus Xas Les dua. Yes Xus mus mus los los hauv lub Tuam Tsev Teev Ntuj, ces cov thawj leej choj, cov kws Ntawv Ntshiab thiab cov txwj laus tuaj cuag nws.
28 Lawv hais rau nws tias: "Koj tau cai qhov twg los, koj thiaj ua tej ntawd? Los leej twg muab cai rau koj kom ua tej ntawd?"
29 Yes Xus teb rau lawv tias: "Kuv kuj yuav nug nej ib los thiab. Nej teb kuv, kuv mam li qhia nej tias kuv tau cai ntawm leej twg los ua tej ntawd.
30 Zam lub cim ntxuav puas tuaj saum ntuj tuaj los tuaj ntawm neeg tuaj ? Nej teb kuv saib."
31 Ces lawv sib tham tias: "Yog peb hais tias: 'Tuaj saum ntuj tuaj,' nws yuav hais tias: 'Ua cas nej tsis ntseeg nws?'
32 Yog peb teb tias: ‘Tuaj ntawm neeg tuaj’ ne?” Lawv kuj ntshai tsoom sid, vim tas sawv daws saib Zam yog ib tug yaj saub tiag.
33 Ces lawv teb rau Yes Xus tias: "Peb tsis paub." Yes Xus thiaj hais rau lawv tias: "Kuv kuj yuav tsis qhia nej tias kuv tau cai ntawm leej twg los ua tej ntawd thiab."

Tim 31 lub 5 Hlis 2021

Hnub Ob Lis Piam Cuaj Nruab Xyoo B Nruab Lis Piam Xyoo I

Ua Hmoov Hwm Niam Mab Liab mus saib Es Lis Xas Npes
Lectionary: 572

Zaj Nyeem Ib: XFN 3: 14-18A

14 Leej me ntxhais Xis Yoos, koj cia li nqua suab qw zoo siab! Tsoom His Xas Lais, nej cia li hu nkauj luag ntxhi! Me ntxhais Yes Lus Xas Les, koj lub siab cia li dhia hom khaj zoo siab hlo!
15 HUAB TAIS tau thim nws lo lus txiav txim rau koj lawm. Nws tau caum koj cov yeeb ncuab khiav mus tas. HUAB TAIS , His Xas Lais tus vaj, nws nyob nruab nrab hauv koj, koj yuav tsis ntshai kev phem dab tsi ntxiv.
16 Hnub ntawd, Yes Lus Xas Les yuav hnov cov lus no tias: “Xis Yoos, koj txhob ntshai, txhob ntaus siab me!
17 HUAB TAIS koj tus Tswv Ntuj nyob nruab nrab hauv koj, yog tus cawm seej muaj hwj huam. Nws zoo siab vimj koj; nws kev hlub ua kom koj rov tshiab tuaj. Nws hu nkauj dhia zoo siab yog vim koj,
18 zoo xws li thaum neeg hu nkauj ua koob tsheej lom zem.”

Los: LOS MAS 12: 9-16

Cov kwv tij nkauj muad:
9 Nej yuav tsum muaj txoj kev nyiam tseeb tiag. Nej yuav tuav plig rawv khiav mus deb ntawm qhov phem, yuav tuav rawv qhov zoo kom ruaj nreb.
10 Nej yuav muaj lub siab muag sib nyiam sib hlub xws li ib co kwv tij; nej yuav xyaum sib tw kom ib leeg txawj xub saib ib leeg muaj nqes.
11 Nej yuav ua lub siab kub lug tsis txhob ua tus neeg nkees nkees; nej mob siab muab tas nej lub tswv yim los tsob hwb Huab Tais.
12 Nej yuav zoo siab nyob hauv txoj kev tso siab lug, nej yuav ua siab ntev nyiaj txoj kev txom nyem, nej yuav tsis txhob nkees teev Ntuj tsis tseg.
13 Nej yuav tso nyiaj pab rau cov ntshiab raws li lawv tej kev siv; nej yuav xyiv fab txais cov qhua tuaj hauv nej.
14 Nej yuav foom lus zoo rau cov neeg hiam nej, nej foom lus zoo xwb txhob foom lus phem rau lawv.
15 Nej yuav zoo siab nrog cov neeg muaj kev zoo siab, nej yuav quaj nrog cov neeg tau kev quaj ntsuag.
16 Nej yuav ua siab zoo ib yam nkaus ib leeg rau ib leeg; nej tsis txhob ua neeg muab hlob, tiam sis yuav saib taus cov neeg me nrog lawv ua phooj ywg; nej tsis txhob rov saib nej zoo dua luag tej.

NPN: HX 12: 2-3, 4BCD, 5-6

Txais: (6) His Xas Lais tus loj thiab tus Ntshiab tuaj nyob hauv nej lawm.

Tswv Ntuj yog kuv tus cawm seej,
Kuv tso siab rau nws, kuv tsis txhawj.
Kuv lub zog thiab kuv lub peev xwm yog HUAB TAIS,
Nws yog tus tau cawm kuv.
Nej yuav zoo siab luag ntxhi mus ce dej
Hauv lub qhov dej muaj kev cawm neeg.

Txais: (6) His Xas Lais tus loj thiab tus Ntshiab tuaj nyob hauv nej lawm.

Nej ua HUAB TAIS tsaug, nej cav txog nws lub npe;
Nej tshaj nws tej hauj lwm loj rau cov haiv neeg paub,
Nej qhia rau lawv tias nws lub npe zoo tas nrho.

Txais: (6) His Xas Lais tus loj thiab tus Ntshiab tuaj nyob hauv nej lawm.

Nej hu nkauj qhuas HUAB TAIS txog nws tej hauj lwm muaj hwj chim,
Coj mus qhia rau tas ntiaj teb paub kom thoob .
Nroog Xis Yoos, koj tsa suab qw zoo siab,
vim His Xas Lais tus loj thiab tus Ntshiab tuaj nyob hauv koj lawm!

Txais: (6) His Xas Lais tus loj thiab tus Ntshiab tuaj nyob hauv nej lawm.

As Les Lus Yas: LK 1: 45

Txais: As les lus yas, as l;es lus yas.

Koj tau hmoov zoo, nkauj xwb tsim txiaj Mab Liab, vim koj ntseeg
tias yuav muaj tuaj raws li Huab Tais tau hais rau koj.

Txais: As les lus yas, as les lus yas.

Ntawv Moo Zoo: LK 1: 39-56

39 Mab Liab sawv kev mus, nws rau siab ntso maj nroos mus pem toj siab, mus rau ib lub nroog nyob xeev Yus Das.
40 Nws chaws mus hauv Ntxas Kas Lias tsev, nws tsa suab hu Es Lis Xas Npes.
41 Thaum Es Lis Xas Npes hnov Mab Liab lub suab hu, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes.
42 Ces Es Lis Xas Npes tsa suab hlo hais nrov nrov tias: "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov.
43 Ua cas kuv tau txoj hmoov no qhov twg los, kuv tus Huab Tais leej niam thiaj tuaj xyuas kuv?
44 Koj saib, thaum kuv hnov dheev koj lub suab hu nrov txog kuv pob ntseg, tus me nyuam hauv kuv plab dhia zoo siab.
45 Koj tus tau ntseeg tias cov lus Huab Tais hais rau koj yuav tsheej xeeb tuaj, mas koj txoj hmoov zoo !"
46 Ces Mab Liab hais tias: "Kuv tus plig cav txog Huab Tais lub hwj chim,
47 kuv lub tswv yim hom khaj nyob hauv Tswv Ntuj, tus Cawm kuv,
48 vim nws tau dauv muag los ntsia nws tus ntxhais txib tsis muaj tsim. Vim li ntawd, txij no mus, txhua tiam neeg yuav hais tias kuv txoj hmoov zoo;
49 vim tus Muaj Hwj Huam tau ua tej yam loj rau kuv, nws lub npe Ntshiab.
50 Nws lub siab hlub cov neeg hwm nws tiam dhau tiam.
51 Nws tau xyab nws txhais npab muaj zog, nws tau ua kom cov neeg uas lub siab muab hlob tawg tas.
52 Huab Tais txo cov muaj hwj chim kom poob ntawm lawv lub rooj zaum, hos nws tsa cov neeg hauv txheej qis kom siab.
53 Nws pub tej yam zoo rau cov neeg tshaib tau noj seem noj so, hos nws ntiab cov neeg muaj rov qab mus tes qhuav qhawv.
54 Huab Tais tuaj pab nws tus tub txib His Xas Lais, vim nws nco ntsoov tias nws tau cog lus yuav khuv leej lawv,
55 yog lo lus nws tau cog rau peb cov yawg koob, rau Has Nplas Has thiab Has Nplas Has tsoom xeeb leej xeeb ntxwv mus ib txhiab ib txhis."
56 Mab Liab nrog Es Lis Xas Npes nyob li peb lub hlis tej, ces nws rov mus tsev.

Tim 1 lub 6 Hli 2021

Hnub Peb Lis Piam Cuaj Nruab Xyoo B Nruab Lis Piam Xyoo I
Lectionary: 354

Yuav Hwm LN Justin, ua Tim Khawv

Zaj Nyeem Ib: TOS NPIS 2: 9-14

9 Hmo ua hmoov tsib caug hnub ntawd, kuv mus faus tuag los, vim kuv tsis huv lawm ces kuv mus nraum kuv lub tshav loog, kuv mus pw ze ntawm lub phab ntsa loog; kuv tsis npog ntsej muag li.
10 Kuv tsis paub tias nyob ncaj saum qhov kuv pw, muaj ib co noog ua zes rau saum phab ntsa. Txawm muaj ib co quav noog poob nthav sov so los rau hauv kuv ob lub qhov muag. Kuv qhov muag thiaj hlav tej daim dawb dawb los plooj rau tas. Kuv coj mus rau cov kws tshuaj kho; tab sis lawv yim muab lawv cov tshuaj rau mas yim haj yam mob loj tuaj xwb, ces thaum kawg kuv cia li tsis pom kev lawm. Kuv tsis pom kev li ntawd tau plaub xyoos, kuv cov kwv tij nrog kuv tu siab kawg. As His Kas tu kuv tau ob xyoos ces nws mus dua Es Lis Mais teb lawm.
11 Thaum ntawd kuv poj niam As Nas thiaj mus nrhiav zog ua, nws nrhiav tau txoj hauj lwm ntos ntaub uas yog hauj lwm poj niam.
12 Thaum ntos tau lawm nws xa mua rau cov tswv ces lawv them nyiaj rau nws. Lub caij ntuj no, hnub tim 7 lub peb hlis, kuv poj niam ua tiav ib tug ntaub thiab xa mus rau cov tswv. Lawv them nyiaj rau nws tib si thiab lawv tseem pub tau ib tug tshis rau nws coj los tua noj.
13 Thaum nws nkag los tsev, tus tshis txawm quaj. Kuv hu kuv poj niam tias: "Tus tshis ntawd los qhov twg los? Tej zaum ntshai yog nyiag los xwb mas coj rov mus rau nws tus tswv. Peb tsis muaj cai noj tej yam nyiag los."
14 Kuv poj niam hais tias: "Yog lawv pub rau kuv, ntxiv kuv tus nqi zog xwb!" Kuv tsis ntseeg, kuv kom kuv poj niam cab rov mus rau cov tswv, vim tias kuv pab kuv poj niam txaj muag heev. Ces kuv poj niam teb tias: "Koj tej kev niaj hnub pub rau luag dua twg lawd? Koj tej kev niaj hnub ua zoo zoo xwb dua twg tas lawd? Sawv daws paub ntsoov tias koj tau dab tsi vim koj tej kev ua zoo ntag los mas."

NPN 112: 1-2, 7-8, 9

Txais: (7c) Tus neeg ncaj lub siab nyob ruaj nreb, tso siab lug rau Huab Tais.
los: As les lus yas.

Nws muaj hmoov zoo yog tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj peev xwm nyob ntiaj teb;
caj ces neeg siab nca yuav tau txoj hmoov zooj.

Txais: (7bc) Tus neeg ncaj lub siab nyob ruaj nreb, tso siab lug rau Huab Tais.
los: As les lus yas.

Nws tsis ntshai hnov ib tsab xov phem;
nws lub siab nyob ruaj nreb, tso siab lug rau HUAB TAIS.
Nws lub siab nyob khob kho, nws tsis txhawj,
nws yuav tsa hau siab tig los saib nws cov yeeb ncuab.

Txais: (7bc) Tus neeg ncaj lub siab nyob ruaj nreb, tso siab lug rau Huab Tais.
los: As les lus yas.

Nws muaj siab dav, pub ntau rau cov pluag :
nws txoj kev ua siab loj siab dav yuav nyob mus li,
nws yuav tau ntsej muag thiab nto koob meej.

Txais: (7bc) Tus neeg ncaj lub siab nyob ruaj nreb, tso siab lug rau Huab Tais.
los: As les lus yas.

As Les Lus Yas: EFX 1: 17-18

Txais: As les lus yas, as les lus yas.

Thov kom peb tus Huab Tais Yes Xus Pleev leej Txiv
tso qhov pom kev ci tuaj kaj peb


cov qhov muag hauv nruab siab,
kom peb paub txog tias txoj kev tso siab uas
nws hu peb los txais yog dab tsi.

Txais: As les lus yas, as les lus yas.

Ntawv Moo Zoo: MK 12: 13-17

13 Ob peb tug Fas Lis Xais thiab Hes Los Dias raug luag xa tuaj lem Yes Xus kom nws hais lus yuam kev.
14 Lawv tuaj txog, lawv hais rau Yes Xus tias: "Xib Hwb, peb paub tias koj yog ib tug neeg hais qhov tseeb, thiab koj tsis txhawj txog leej twg cov lus uas lawv hais txog koj. Koj tsis saib tib neeg lub ntsej muag qhia, tiam sis koj qhia Tswv Ntuj txoj kev raws qhov tseeb xwb. Txoj cai puas kom them se rau Xes Ntxas los tsis kom? Peb puas yuav tsum them se los tsis them?"
15 Yes Xus twb paub tias lawv lub siab nkhaus, ces nws hais rau lawv tias: "Ua cas nej xav sim kuv? Muab ib lub txiaj nyiag los rau kuv xyuas saib."
16 Lawv muab ib lub txiaj nyiag los, Yes Xus thiaj hais rau lawv tias: "Tus duab no thiab cov npe ntawv hauv no yog leej twg li?" Lawv hais rau Yes Xus tias: "Yog Xes Ntxas li."
17 Ces Yes Xus hais rau lawv tias: "Yam twg yog Xes Ntxas tug, ces nej muab rov rau Xes Ntxas, yam twg yog Tswv Ntuj tug, mas nej muab rov rau Tswv Ntuj." Ces lawv ceeb tas, lawv nyob hab nuv cia.

Tim 2 lub 6 Hli 2021

Hnub Plaub Lis Piam Cuaj Nruab Xyoo B Nruab Lis Piam Xyoo I
Lectionary: 355

XHLT: LN Marcellinus thiab LN Peter, ua Tim Khawv

Zaj Nyeem Ib: TOS NPIS 3: 1-11, 16-17a

1 Ces tu kuv siab loj tas nrho, kuv nroo thiab kuv quaj, kuv thiaj pib hais zaj teev Ntuj no ntxuag lub kua muag tias:
2 "HUAB TAIS, koj yog tus siab ncaj, koj ua qhov twg yog qhov ncaj. Koj tej kev tsuas yog kev khuv leej thiab qhov tseeb xwb; koj yog tus txiav txim ncaj ncees tas mus li.
3 Vim li no, thov koj nco txog kuv, Huab Tais, thov koj tig koj lub ntsej muag hlub neeg los saib kuv. Koj tsis txhob rau txim rau kuv vim kuv tej kev txhaum los tej kev yuam kev, los vim kuv cov yawg koob tej kev txhaum lawv tau ua rau koj.
4 Vim lawv tau hla koj cov lus qhia, ces koj tau tso peb raug luag tuaj lwg peb, raug luag tuaj cab peb mus ua qhev, thiab raug luag tua; koj muab peb los ua ib tug piv txwv luag tau siv los cem piv zias rau nyob hauv cov haiv neeg uas koj cais peb mus nyob xyaw.
5 Zaum no, koj tej kev txiav txim rau kuv yeej yog lawm, thaum koj tsub txim rau kuv ris vim kuv tej kev txhaum thiab kuv cov yawg koob tej kev txhaum, vim peb tsis tau coj koj cov lus qhia, peb tsis tau ua raws qhov tseeb nyob ntawm koj xub ntiag.
6 Ces zaum no, thov koj ua rau kuv raws li koj nyiam. Thov koj hais kom kuv tus ntsuj plig nce mus cuag koj, kom kuv tau ncaim mus, thiab rov mus ua av. Yog kuv tuag mas zoo dua kuv ciaj nyob, vim kuv tau hnov lawv lam tau lam cem kuv, ces tu kuv siab loj tas nrho. Huab Tais, thov koj hais kom kuv cia li tawm plaws ntawm txoj kev txom nyem no mus nyob lub teb chaws kuv yuav so mus li. Thov koj tsis txhob fee koj lub ntsej muag rau kuv, vim kuv tuag zoo dua cia kuv ua neej raug txom nyem npaum no thiab cia kuv hnov luag cem kuv.”
7 Tib hnub ntawd, nyob Es Npas Tas Nas, Mes Dias teb, Xas Las, uas yog Las Nkus Es tus ntxhais, kuj raug nws txiv ib tug ntxhais txib cem nws thiab.
8 Vim tias lawv twb muab nws pub tshoob rau xya tus txiv lawm, tab sis tus dab phem As Mos Des uas yog tus phem tshaj plaws hauv cov dab phem, muab nws cov txiv tua tuag tas tib si, tsis pub lawv tau nrog Xas Las pw ua niam txiv raws tus kev cai li. Ces tus ntxhais txib tseem hais tias: "Twb yog koj muab koj cov txiv tua tas xwb puas yog? Koj yuav xya tus txiv lawm, koj tsis tau muaj kev zoo siab nrog ib tug li.
9 Ua cas koj ntaus peb? Yog koj cov txiv tuag tas lawm, koj kuj caum lawv mus! Kom peb tsis txhob tau pom koj ib tug tub los ib tug ntxhais li!"
10 Hnub ntawd, Xas Las hnov cov lus no, nws tu siab loj kawg li, nws quaj. Nws nce mus saum nws txiv chav pw, nws npaj tias nws yuav mus dai tuag nyob saud. Tab sis nws ho xav tau tias: "Tsam luag tej yuav cem kuv txiv thiab lawv yuav hais tias: 'Koj muaj ib tug nyuag ntxhais rau koj hlub xwb, nws tseem dai tuag lawm thiab, vim nws txoj hmoov phem!' Kuv tsis xav ua kom kuv txiv tu tu siab thaum nws yav laus no mus txog hnub nws tuag kiag. Ntshai zoo dua kom kuv txhob dai tuag, tiam sis kuv yuav thov HUAB TAIS ua kom kuv tuag, kom kuv thiaj tsis hnov luag tej thuam kuv ntxiv."
11 Tam sis ntawd, Xas Las tsa tes tig mus rau ntawm qhov rais, nws thov Ntuj tias: "HUAB TAIS, kuv tus Tswv Ntuj tus khuv leej neeg, thov kom koj nto koob meej, kom koj lub npe ntshiab tsim nyob hwm nto koob meej. Thov kom koj nto koob meej nyob hauv koj tej dej num mus ib txhiab ib txhis!”
16 Thaum ntawd, Tos Npis thiab Xas Las nkawd ob zag thov ntuj ua ib txhij nrov mus txog ntawm Tswv Ntuj muaj hwj chim lub xub ntiag.
17a Ces Las Fais thiaj raug xa tuaj kho nkawd ob leeg: Nws yuav tuaj laws tej yam dawb dawb nyob hauv Tos Npis qhov muag kom nws rov pom Tswv Ntuj lub hnub ci pom kev dua; thiab nws yuav tuaj muab Las Nkus Es tus ntxhais Xas Las txis rau Tos Npis tus tub Tos Npias ua poj niam; thiab nws tuaj ntiab tus dab As Mos Des uas phem tshaj tawm ntawm Xas Las mus.

NPN 25: 2-3, 4-5ab, 6+7bc, 8-9

Txais: (1) Huab Tais, kuv tsa kuv tus ntsuj plig tuaj rau koj.

Kuv tso siab rau koj, thov koj tsis txhob cia kuv poob ntsej muag,
txhob pub kom kuv cov yeeb ncuab muaj kev zoo siab vim kuv.
Cov neeg tso siab rau koj, tsis muaj ib tug yuav poob ntsej muag,
hos cov neeg ntxeev siab rau kev ntseeg yuav poob ntsej muag.

Txais: (1) Huab Tais, kuv tsa kuv tus ntsuj plig tuaj rau koj.

Huab Tais, thov ua kom kuv paub koj tej kev,
thov qhia koj tej kev rau kuv taug,
coj kuv mus raws koj txoj kev tseeb thiab qhia rau kuv kawm,
vim koj yog Tswv Ntuj, tus cawm kuv.

Txais: (1) Huab Tais, kuv tsa kuv tus ntsuj plig tuaj rau koj.

Huab Tais, thov koj nco ntsoov tias koj yeej ib txwm
muaj lub siab hlub, thiab lub siab zoo txij puag thaum ub los lawm.
Vim koj lub siab zoo, thov koj nco txog kuv
nyob hauv koj txoj kev ua zoo, Huab Tais.

Txais: (1) Huab Tais, kuv tsa kuv tus ntsuj plig tuaj rau koj.

Huab Tais yog tus zoo tus siab ncaj,
nws qhia txoj kev zoo rau tus neeg txhaum taug
Nws coj tus neeg me mus raws txoj kev ncaj,
nws qhia nws txoj kev rau tus neeg me taug.

Txais: (1) Huab Tais, kuv tsa kuv tus ntsuj plig tuaj rau koj.

As Les Lus Yas: ZAM 11: 25a, 26

Txais: As les lus yas, as les lus yas.

Huab Tais hais tias: Kuv yog txoj kev sawv rov los thiab txoj sia,
leej twg ntseeg txog kuv yuav tsis tuag ib zaug li.

Txais: As les lus yas, as les lus yas.

Ntawv Moo Zoo: MK 12: 18-27

18 Ib co xas dus kais tuaj cuag Yes Xus. Lawv yog cov uas hais tias neeg tuag yuav tsis sawv rov los li. Lawv nug Yes Xus tias:
19 "Xib Hwb, Mais Xes sau cia rau peb tias: ‘Yog leej twg ib tug kwv tij tuag tseg poj niam cia, tsis tau muaj me nyuam, mas tus kwv yuav tsum qaws tus niam tij kom tsa tau tus kwv tij ntawd lub keeb sawv.’
20 Zaum no, muaj xya leej kwv tij. Thawj tug yuav poj niam, nws tuag, tsis tau muaj tub ki.
21 Tus ob qaws tus niam tij ntawd, nws kuj tuag tsis tau muaj tub ki li thiab; tus peb kuj ua ib yam li ntawd.
22 Ces lawv xya leej kwv tij ntawd puav leej ua ib yam tsis muaj tub ki cia li. Thaum lawv tuag tas lawm, tus poj niam kuj tuag thiab.
23 Thaum txog caij neeg lub cev sawv rov los, lawv yuav sawv rov los, ua li mas tus poj niam ntawd yuav yog leej twg tus? Vim lawv xya tus kwv tij puav leej tau yuav nws ua poj niam."
24 Yes Xus hais rau lawv tias: "Puas yog vim nej tsis paub Ntawv Ntshiab thiab tsis paub Tswv Ntuj lub hwj huam, nej thiaj yuam kev?
25 Vim tias, thaum neeg lub cev sawv hauv cov tuag los, mas sawv daws yuav tsis yuav poj niam tsis yuav txiv, sawv daws yuav zoo li cov Tshiab nyob saum ntuj.
26 Hais txog ntawm cov tuag yuav sawv rov los, mas nej puas tau nyeem nyob hauv Mais Xes phau Ntawv, zaj piav txog tsob pos, uas Tswv Ntuj hais rau Mais Xes tias: ‘Kuv yog Has Nplas Has tus Tswv Ntuj, His Xas Has tus Tswv Ntuj, thiab Yas Kos tus Tswv Ntuj’?
27 Nws tsis yog cov tuag tus Tswv Ntuj, nws yog cov neeg ciaj tus Tswv Ntuj. Nej yuam kev lawm deb."

Tim 3 lub 6 Hli 2021

Hnub Tsib Lis Piam Cuaj Nruab Xyoo B Nruab Lis Piam Xyoo I
Lectionary: 356

Yuav Hwm LN Charles Lwanga thc… ua Tim Khawv

Zaj Nyeem Ib: TOS NPIS 6:10-11; 7:1BCDE, 9-17; 8:4-9A

6: 10 Thaum tus tshiab Las Fais thiab Tos Npias mus txog Mes Dias teb lawm thiab mus yuav txog Es Npas Tas Nas,
11 tus tshiab hais rau tus hluas tias: “Tus kwv Tos Npias.” Nws teb tias: “Dab tsi?” Tus tshiab hais tias: “Hmo no wb yuav mus pw hauv Las Nkes tsev; nws yog koj ib tug txheeb ze. Nws muaj ib tug ntxhais hu ua Xas Las.”
7: 1bcde Ces nws coj tus hluas mus tom Las Nkes tsev; nkawd pom Las Nkes zaum ntawm lub rooj vag ntawm nws lub ntsa vaj. Nkawd xub hu nws. Nws teb nkawd tias: “Nyob zoo ray neb thiab os ob tug kwv tij! Thov kom neb tsuas ntsib kev noj qab haus huv os, los tsev mas!” Ces nws coj nkawd los hauv nws tsev.
9 Las Nkes ntes ib tug laug yaj hauv nws pab yaj los tua, nws ua ib pluag mov txais nkawd zoo. Thaum nkawd da dej ntxuav cev tas, nkawd los noj mov, Tos Npias hais rau Las Fais tias: "Tij laug As Ntxas Lias, thov koj pab kuv mus thov Las Nkes kom nws muab kuv tus muam Xas Las rau kuv yuav yuad?'
10 Las Nkes hnov tus hluas cov lus no, Las Nkes hais rau nws tias: "Hmo no koj noj mov haus dej kom txaus txaus thiab ua kev lom zem tso mog, vim cav tsis muaj leej twg muaj cai yuav yuav kuv tus ntxhais Xas Las npaum li koj li os, tus kwv. Txawm li cas los kuv yeej muab tsis tau nws rau lwm tus li, vim koj twb yog tus txheeb ze kuv tshaj lawm. Tiam sis, me tub, kuv yuav hais qhov tseeb rau koj.
11 Kuv twb nrhiav nyob hauv peb cov kwv tij txheeb ze xya tus txiv rau nws lawm. Tab sis cov txiv ntawd puav leej tuag tas tib si thawj hmo thaum lawv nyuam qhuav nkag kiag mus rau nws chav pw xwb. Ua li mas nyem no koj rau siab noj thiab haus tso mog. HUAB TAIS yeej yuav pub nws lub txiaj ntsim thiab nws txoj kev kaj lug rau koj xwb." Tos Npias txawm teb tias: "Kuv yuav tsis kam noj tsis kam haus dab tsi li, yog koj tsis xub cog lus tias koj yuav muab nws rau kuv tso." Las Nkes thiaj teb tias: “Cia ua li koj nyiam, vim raws Mais Xes txoj Cai ces nws yeej yog koj tug, yog lub ntuj txiav kom muab nws rau koj. Ces kuv muab koj tus muam cob rau koj. Txij no mus koj yog nws tus nus thiab nws yog koj tus muam. Nws yog koj tug txij hnub no mus li lawm. Tus Tswv saum lub ntuj yeej yuav muab kev vam meej rau neb hmo no, thiab yuav muab nws txoj koob hmoov thiab kev kaj siab lug rau neb xwb os.”
12 Las Nkes hu nws tus ntxhais Xas Las los, nws muab tus ntxhais txhais tes cob rau Tos Npias, nws hais tias: "Kuv muab kuv tus ntxhais rau koj; Mais Xes Txoj Cai thiab tus txhooj yeej qhaib nws los ua koj poj niam lawm. Koj yuav nws, koj coj nws mus nrog koj nyob hauv koj txiv tsev mog. Thov kom tus Tswv saum lub ntuj pub neb rov mus txog tsev, mus dawb mus huv mog!"
13 Las Nkes hu nws poj niam kom muab ib kauj ntawv los rau nws sau. Nws poj nuiam nqa ntawv los, ces Las Nkes sau ntawv cog lus sib yuav cia tias: nws muab nws tus ntxhais Xas Las rau Tos Npias yuav ua poj niam raws li Mais Xes kev cai; nws ntaus thwj rau daim ntawv tib si.
14 Ua li ntawd tas sawv daws thiaj mam noj mov haus dej haus cawv.
15 Ces Las Nkes hu nws poj niam Es Nas los thiab hais tias: "Koj niad, koj npaj chav tsev tod, koj coj wb tus ntxhais mus pw hauv."
16 Es Nas mus kho tau chaw raws li nws tus txiv hais kom kho, nws los coj nws tus ntxhais mus pw. Nws quaj quaj rau tus ntxhais tas, nws so kua muag thiab nws hais tias:
17 "Kuv me ntxhais, koj tso siab mog! Tswv Ntuj yeej yuav hloov koj txoj kev tu siab los ua kev zoo siab xwb mog! Ua siab loj loj!" Ces leej niam tawm los.
8: 4 Thaum tus ntxhais niam thiab txiv tawm hauv chav pw los thiab kaw qhov rooj rau lawm, Tos Npias sawv tsees saum txaj los, nws hais rau Xas Las tias: "Leej muad, koj sawv os! Wb ob leeg yuav tsum teev Ntuj tso, wb yuav thov kom HUAB TAIS pub nws lub txiaj ntsim pab wb thiab kom nws pov hwm wb."
5 Ces Xas Las sawv thiab nkawd ob leeg teev Ntuj thov kom Tswv Ntuj pov hwm nkawd. Tos Npias thiaj pib hais tias: "Peb cov yawg koob tus Tswv Ntuj, thov kom koj nto koob meej, thiab kom koj lub npe ntoo koob meej mus txheej dhau txheej! Kom cov txheej ntuj saud thiab tas txhua tsav yam koj tau tsim los cav txog koj lub koob meej mus txheej dhau txheej.
6 Koj yog tus tsim As Das, koj yog tus tsim Es Vas nws poj niam kom ua tus pab nws tus txhawb nws, ces caj ces tib neeg thiaj yug ntawm nkawd ob leeg los. Koj yog tus hais tias: 'Yuav tsis txhob cia txiv neej nws nyob nws ib leeg, peb yuav tsim ib tug los pab nws kom zoo li nws.'
7 Nyem no kuv yuav kuv tus muam no, tsis yog kuv yuav los ua si. Kuv yuav vim kuv muaj lub siab dawb paug hlub nws tiag. Thov koj hlub nws thiab hlub kuv, thiab thov koj pub wb ua wb lub neej laus nkoos ua ke!"
8 Nkawd ob leeg ua ke teb tias: "Ua li! Ua li!"
9 Ces nkawd mam mus pw hmo ntawd ib hmos.

NPN 128: 1-2, 3, 4-5

Txais: (1a) Cov uas hwm Huab Tais tau txoj hmoov zoo.

Nej cov hwm HUAB TAIS, nej txoj hmoov zoo,
thiab nej cov taug raws nws txoj kev!
Vim nej yuav tau noj lub txiv ntawm nej tes hauj lwm,
nej yuav tau hmoov zoo thiab nws yuav ua zoo rau nej.

Txais: (1a) Cov uas hwm Huab Tais tau txoj hmoov zoo.

Kuj tus poj niam yuav zoo li ib txoj hmab txi txiv ncw
nyob rau hauv koj tej kaum vaj kaum tsev,
koj cov me nyuam zoo li ib co ntoo txiv roj
nyob ncig lees koj lub phaj tsum.

Txais: (1a) Cov uas hwm Huab Tais tau txoj hmoov zoo.

Nej saib, tus neeg muaj txoj hmoov zoo
uas yog tus hwm HUAB TAIS.
HUAB TAIS nyob saum roob Xis Yoos foom koob hmoov rau nej,
kom nej tau pom Yes Lus Xas Les vam meej niaj hnub hauv nej lub neej.

Txais: (1a) Cov uas hwm Huab Tais tau txoj hmoov zoo.

As Les Lus Yas: 2 TMT 1: 10

Txais: As les lus yas, as les lus yas.

Yes Xus Pleev peb tus Cawm seej tau rhuav txoj kev tuag pov tseg
thiab ua kom txoj sia tshwm tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo: MK 12: 28-34

28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias: "Nyob hauv cov lus qhia tas huv tib si, lo lus qhia twg yog thawj lo lus qhia?"
29 Yes Xus teb rau nws tias: "Thawj lo lus qhia yog lo lus no: ‘His Xas Lais, koj mloog mog! Peb tus Huab Tais Tswv Ntuj tib leeg xwb yog Huab Tais.
30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.’
31 Lo lus qhia ob yog lo lus no: ‘Koj yuav nyiam tus nyob ze koj ib yam li koj nyiam koj.’ Tsis muaj lwm lo lus qhia loj dua ob lo lus no lawm."
32 Tus kws Ntawv Ntshiab hais rau Yes Xus tias: "Koj hais raug kawg, Xib Hwb, koj tau hais qhov tseeb tias: muaj ib tug Tswv Ntuj xwb, tsis muaj dua lwm tus dhau ntawm nws lawm;
33 thiab kom nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab kom nyiam tus nyob ze yus ib yam li yus nyiam yus, qhov ntawd zoo tshaj tej tsiaj hlawv thiab tej thaj txi Ntuj huv tib si."
34 Yes Xus pom tias tus kws Ntawv Ntshiab cov lus teb muaj kev to taub zoo, ces nws hais rau tus kws Ntawv Ntshiab tias: "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus ntxiv.

Tim 4 lub 6 Hli 2021

Hnub Rau Lis Piam Cuaj Xyoo B Nruab Lis Piam Xyoo I
Lectionary: 357

Zaj Nyeem Ib: TOS NPIS 11: 5-17

5 As Nas zaum ntsia ntsoov txoj xub ke uas nws tus tub yuav rov los.
6 Nws pom dheev yog nws tus tub, nws hais rau leej txiv tias: "Koj tus tub nrog tus ua nws luag los txog lawm!"
7 Thaum nkawd los tsis tau txog ntawm nws txiv, Las Fais hais rau Tos Npias tias: "Kuv cog lus rau koj tias koj txiv qhov muag yuav rov pom kev tuaj.
8 Koj yuav muab lub tsib ntses los pleev nws qhov muag. Cov tshuaj yuav tom thiab yuav ua kom txheej dawb dawb qhuav thiab nti tawm ntawm nws lub qhov muag los. Ces koj txiv yuav tsis dig muag ntxiv, nws yuav rov qab pom kev tuaj."
9 Tos Npias niam khiav khiav tuaj puag lias nws tus tub caj dab, nws hais tias: "Nyem no, kuv rov tau pom koj lawm kuv tuag kuj tau lawm !" Ces nws niam quaj!
10 Tos Npis sawv tuaj, nws maub dawm ub dawm no, tab sis nws kuj xuas xuas hla dhau lub qhov rooj loog tuaj thiab. Tos Npias khiav los ntsib nws txiv,
11 Nws nqa lub tsib ntses ntawm tes; nws tshuab pa rau nws txiv qhov muag thiab nws tuav nws txiv ruaj ruaj, nws hais tias: "Txiv, koj txhob ntshai!" Ces nws muab lub tsib ntses pleev nws txiv qhov muag; nws tos ib me ntsis,
12 Thaum nws txiv hnov tshuaj tom tom nws ob lub qhov muag, nws muab mos mos rau.
13 Ces Tos Npias xuas nws ob txhais tes mus nti daim tawv dawb dawb ntawm nws txiv ob lub kaum muag los. Tos Npis thiaj pom nws tus tub thiab cev tes mus puag lias nws tus tub caj dab.
14 Tos Npis quaj thiab nws hais tias: "Me tub, tus uas yog kuv qhov pom kev, kuv pom koj lawm!" Tos Npis hais ntxiv tias:
"Thov kom Tswv Ntuj nto meej nto moo! Kom nws lub npe loj tas nrho nto meej nto moo! Kom nws cov tshiab nto meej nto moo! Kom nws lub npe loj tas nrho nto meej nto moo mus tiam dhau tiam!
15 Vim yog nws tau muab kev txom nyem rau kuv, thiab nws kuj tau khuv leej kuv. Nyiam no, kuv thiaj tau pom kuv tus tub Tos Npias lawm tiag!"
Tos Npias nkag mus rau hauv tsev, nws tsa suab hlo nrov nrov cav txog Tswv Ntuj vim nws zoo siab. Thiab nws tham qhia nws txiv tias nws tau mus zoo thiab nws nqa tau cov nyiaj los lawm. Nws twb yuav tau poj niam lawm thiab, nws yuav Las Nkes tus ntxhais hu ua Xas Las. Tus nyab lawv nws qab los txog tsis deb cov rooj loog Nis Nis Vas lawm.
16 Ces Tos Npis sawv tsees mus tos nws tus nyab nyob ntawm cov rooj loog Nis Nis Vas. Nws mus, nws cav txog Tswv Ntuj vim nws zoo siab. Thaum cov neeg nyob Nis Nis Vas pom tsis muaj neeg tuav nws tes mus kev thiab pom nws rov muaj zog zoo li thaum ub lawm, mas lawv poob siab.
17 Tos Npis tshaj rau lawv tias yog Tswv Ntuj tau hlub nws thiab rov qhib nws qhov muag lawm. Ces Tos Npis mus txog ntawm Xas Las, uas yog nws tus tub Tos Npias poj niam, nws foom lus zoo rau Xas Las tias: "Me ntxhais, kuv zoo siab tos txais koj! Kom koj tus Tswv Ntuj nto koob meej, vim nws tau tso koj los nrog peb nyob! Thov kom koj niam thiab koj txiv tau txoj hmoov zoo thiab kom kuv tus tub Tos Npias thiab koj, neb tau txoj hmoov zoo mog, Me ntxhais! Koj los nyob hauv koj tsev, thov kom koj tau txoj hmoov zoo thiab kev zoo siab mog! Los tsev, me ntxhais!"
Hnub ntawd, tas cov neeg Yus Das nyob Nis Nis Vas zoo siab.

NPN 146: 1b-2, 6c-7, 8-9a, 9bc-10

Txais: (1b) Kuv tus plig, koj cav lus zoo txog HUAB TAIS !
los: As les lus yas.

Kuv tus plig, koj cav lus zoo txog HUAB TAIS !
Kuv yuav cav txog HUAB TAIS tas kuv sim neej,
kuv yuav hu nkauj cav txog kuv tus Tswv Ntuj
thaum kuv tseem muaj sia nyob.

Txais: (1b) Kuv tus plig, koj cav lus zoo txog HUAB TAIS !
los: As les lus yas.

Huab Tais pheej xeeb mus ib txhiab ib txhis :
cov raug luag quab yuam, nws tsa lawv cai.
nws pub mov rau cov neeg tshaib noj.
HUAB TAIS tso cov neeg raug txim dim

Txais: (1b) Kuv tus plig, koj cav lus zoo txog HUAB TAIS !
los: As les lus yas.

HUAB TAIS qhib cov dig muag qhov muag,
HUAB TAIS tsa cov khoov nkoos kom sawv ntseg,
HUAB TAIS nyiam cov neeg ncaj.
HUAB TAIS pov hwm cov pej kum neeg .

Txais: (1b) Kuv tus plig, koj cav lus zoo txog HUAB TAIS !
los: As les lus yas.

Nws txhawb tus ntsuag nos thiab tus poj ntsuam,
nws thaiv tus siab phem txoj kev phem kom txhob tshwm tuaj tau.
HUAB TAIS yuav ua vaj mus li; Xis Yoos,koj tus Tswv Ntuj
yuav ua vaj mus txheej dhau txheej ! As les lus yas!

Txais: (1b) Kuv tus plig, koj cav lus zoo txog HUAB TAIS !
los: As les lus yas.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As les lus yas, as les lus yas.

Ntawv Moo Zoo: MK 12: 35-37

35 Thaum Yes Xus qhia nyob hauv lub Tuam Tsev Teev Ntuj, nws hais tias: "Vim li cas cov kws Ntawv Ntshiab thiaj hais tias Leej Pleev yog Das Vis tub ?
36 Hos Das Vis tau Leej Ntuj Plig tshoj nws kom nws hais cov lus no tias: ‘Huab Tais hais rau kuv tus Huab Tais tias: Koj zaum ntawm kuv sab xis, mus txog hnub kuv muab koj cov yeeb ncuab rau hauv koj qab xib taws.’
37 Das Vis twb hu Leej Pleev ua ‘Huab Tais’, ua cas Leej Pleev ho yog Das Vis tub thiab." Ces tsoom neeg coob zoo siab mloog Yes Xus cov lus.

Tim 5 lub 6 Hli 2021

Hnub Xya Lis Piam Cuaj Nruab Xyoo B Nruuab Lis Piam Xyoo I
Lectionary: 358

Yuav Hwm LN Boniface, Tswv Qhia ua Tim KHawv

Zaj Nyeem Ib: TOS NPIS 12: 1, 5-15, 20

1 Thaum lawv los ua pluas noj hauv tsev tas lawm, Tos Npis hu nws tus tub Tos Npias los, thiab hais rau nws tias: "Me tub, koj yuav nco ntsoov them nyiaj rau tus ua koj luag mus, koj yuav muab tshaj tus nqi uas peb tau hais tseg."
5 Tos Npias hu tus ua nws luag los, Tos Npias hais rau nws tias: "Koj yuav ib nrab ntawm tej yam uas koj tau thauj los ua koj tus nqi zog, thiab koj rov mus siab kaj lug mog!"
6 Ces Las Fais coj nkawd ob txiv tub mus rau ntawm ib qho chaw xu me ntsis, nws hais rau nkawd tias: "Neb cav txog Tswv Ntuj mog, neb ua nws tsaug nyob ntawm tsoom neeg ciaj xub ntiag rau tej yam zoo nws tau ua rau neb; neb qhuas txog nws thiab hu nkauj cav txog nws lub npe. Neb hwm Tswv ntuj thiab tshaj rau txhua leej neeg paub txog nws tej hauj lwm; neb tsis txhob nkees ua nws tsaug mog.
7 Yeej phim yuav tsum nrog tus vaj zais nws tej lus npog cia, tiam sis Tswv Ntuj tej hauj lwm mas yuav tsum muab qhia thiab tshaj tawm kom sawv daws paub; neb ua nws tsaug kom tsim nyog; thiab neb ua qhov zoo ces yuav tsis muaj qhov phem tuaj raug neb.
8 Txoj kev teev ntuj nrog kev yoo mov yog ib qho zoo; txoj kev pub rau luag nrog kev ncaj ncees muaj nqes dua txoj kev nplua nuj nyob hauv kev ua txhaum. Xyaum pub rau luag muaj nqes dua khaws ib niag pob kub cia.
9 Txoj kev pub rau luag cawm yus ntawm txoj kev tuag thiab ntxuav yus tej txhaum tas huv si pov tseg. Cov neeg pub rau luag yuav ua neej nyob ntev laus nkoos.
10 Cov neeg ua txhaum thiab ua phem rov ua yeeb ncuab rau lawv tus kheej txoj sia.
11 Kuv yuav qhia qhov tseeb rau neb, yuav tsis zais ib yam dab tsi. Kuv twb hais rau neb lawm hais tias tsim nyog yuav nrog tus vaj khaws nws tej lus npog cia, tiam sis kuj yog ib qho nto koob meej kom yus yuav tsum tshaj Tswv Ntuj cov hauj lwm tawm thiab.
12 Nyem no, thaum koj Tos Npis thiab koj tus nyab Xas Las neb tau thov Ntuj, mas kuv yog tus tau cev neb zaj thov nyob ntawm Huab Tais muaj hwj chim xub ntiag; thaum twg koj mus faus cov neeg tuag los kuj yog kuv cev koj cov hauj lwm rau Ntuj.
13 Thaum koj tsis ua xyem xyav, koj cia li tso diav plhuav sawv tsees mus faus ib tug neeg tuag, los kuv kuj raug xa tuaj sim koj siab.
14 Thiab nyem no los yog Tswv Ntuj xa kuv tuaj kho koj kom zoo hlo thiab pab koj tus nyab Xas Las.
15 Kuv yog Las Fais, yog ib tug ntawm xya leej Tshiab uas chaws mus tsob hwb Tswv Ntuj nyob ntawm nws lub hwj chim.
20 Yog li, nej cav txog Huab Tais nyob ntiaj teb no thiab ua Tswv Ntuj tsaug. Kuv yuav nce rov mus cuag tus uas tau xa kuv tuaj. Nej yuav tsum muab tas puas tsav yam uas tshwm sim rau nej sau cia.”

NPN: Tos Npis 13: 2, 6efgh, 7, 8

Txais: (1b) Peb cav txog Tswv Ntuj tus uas nyob mus li.

Nws nplua neeg thiab nws kuj khuv leej neeg;
nws ua kom neeg poob lawm puag dab nriag teb,
thiab nws kuj npo neeg puag hauv lub qhov ntuj tob tawm los.
Tsis muaj leej twg yuav khiav dim tau ntawm nws txhais tes.

Txais: (1b) Peb cav txog Tswv Ntuj tus uas nyob mus li.

Nej yuav saib tas puas tsav yam nws tau ua rau nej,
ces nej tsa suab nrov nrov cav txog nws.
Nej cav lus zoo txog tus Huab Tais muaj kev ncaj ncees,
thiab nej qhuas txog tus Vaj kav cov caij nyoog.

Txais: (1b) Peb cav txog Tswv Ntuj tus uas nyob mus li.

Kuv nyob hauv lub teb chaws kuv raug mus nyob txim
los kuv yeej cav txog Huab Tais,
thiab kuv qhia txog nws lub hwj huam thiab hwj chim
Rau ib haiv neeg txhaum paub.

Txais: (1b) Peb cav txog Tswv Ntuj tus uas nyob mus li.

Tas nej cov uas nws tau xaiv, nej cav txog Huab tais,
tas nej sawv daws cia li cav txog nws lub hwj chim.
Nej qee tej hnub los ua kev zoo siab thiab cav txog nws.

Txais: (1b) Peb cav txog Tswv Ntuj tus uas nyob mus li.

As Les Lus yas: MT 5: 3

Txais: As les lus yas, as les lus yas.

Cov pluag hauv nruab siab lawv txoj hmoov zoo,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv moo Zoo: MK 12: 38-44

38 Thaum Yes Xus qhia sawv daws, nws hais tias: "Nej ceev faj rau cov kws Ntawv Ntshiab. Lawv nyiam hnav tej lub tsho ntev ua zam mus kev piav yeev rau ub rau no, kom luag hawm lawv tom tej tshav puam.
39 Lawv nyiam zaum cov rooj kim txwv pem hauv ntej hauv cov tsev txoos, thiab thawj cov rooj zaum thaum muaj noj muaj haus.
40 Lawv muab cov poj ntsuam tej vaj tse nqos tas, ces lawv ua txuj hais tej zaj teev ntuj ntev ntev los npog tej ntawd. Lawv yuav raug txiav txim hnyav kawg nkaus."
41 Yes Xus mus zaum ncaj rau lub txhab ceev nyiaj, thiab nws ntsia zeej tsoom tso lawv cov txiaj toog rau hauv lub txhab. Cov nplua nuj coob leej tso nyiaj ntau rau hauv.
42 Muaj ib tug poj ntsuam pluag pluag tuaj tso ob lub nyuag txiaj toog me me, tsis muaj nqis ntau li.
43 Ces Yes Xus hu cov thwj tim los ze nws, nws hais rau lawv tias: "Kuv hais tseeb rau nej, tus poj ntsuam pluag pluag no, tau tso nyiaj ntau dua cov uas tuaj tso nyiaj rau hauv lub txhab ceev nyiaj huv tib si.
44 Vim tas cov neeg tso nyiaj ntawd, rho lawv tej nyiaj seem mus tso, hos tus poj ntsuam no rho nyiaj hauv nws txoj kev pluag los tso, nws rho tas nrho qhov nws muaj, qhov uas nws yuav siv los yug nws txoj sia los tso rau hauv."

Tim 7 lub 6 Hli 2021

Hnub Ob Lis Piam Kaum Nruab Xyoo B Nruab Lis Piam Xyoo I
Lectionary: 359

Zaj Nyeem Ib: 2 KLN 1: 1-7

1 Kuv, Paj Lug, Yes Xus Pleev ib tug Hauv Paus Xa Lus vim Tswv ntuj pom zoo, nrog tus kwv Tis Mos Tes, sau ntawv rau Tswv Ntuj lub Koom Txoos nyob Kos Lis Nthos thiab cov ntshiab nyob As Kas Yas teb tib si.
2 Thov kom Tswv Ntuj peb Leej Txiv thiab Huab Tais Yes Xus Pleev pub txiaj ntsim thiab kev thaj yeeb rau nej.
3 Peb cav lus zoo txog Tswv Ntuj peb tus Huab Tais Yes Xus Pleev leej Txiv, uas yog Leej Txiv khuv leej neeg thiab yog tus Tswv Ntuj nplij sawv daws lub siab.
4 Nws nplij peb nyob hauv peb txhua txoj kev txom nyem, kom peb nplij luag tej nyob hauv lawv txoj kev txom nyem thiab, vim peb teb tau txais Tswv Ntuj lo lus nplig siab lawm.
5 Vim Leej Pleev txoj kev txom nyem tuaj raug peb ntau kawg nkaus, vim li ntawd nyob hauv Leej Pleev, peb kuj tau txais kev nplij siab ntau kawg nkaus thiab.
6 Yog peb raug txom nyem mas yog raug kom nej tau txais kev nplig siab thiab kev cawm. Yog peb tau txais kev nplig siab, mas kuj yog txais kom nej tau txais kev nplig siab thiab, ces nej thiaj yuav ua siab ntev ris tej kev txom nyem uas peb ris thiab.
7 Peb muaj kev tso siab lug ruaj nreb hais txog nej, vim peb paub tias nej twb nrog peb ris kev txom nyem, mas nej kuj yuav nrog peb txais kev nplig siab thiab.

NPN 34: 2-3, 4-5, 6-7, 8-9

Txais: (9a) Nej saj ces nej yuav pom tias Huab Tais lub siab zoo.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Thov kom kuv tus plig tau koob meej nyob hauv HUAB TAIS;
tus neeg me yuav hnov txog thiab yuav zoo siab.

Txais: (9a) Nej saj ces nej yuav pom Huab Tais lub siab zoo.

Nej nrog kuv cav txog HUAB TAIS lub koob meej,
peb sawv daws ua ke qhuas nws lub npe.
Thaum kuv nrhiav HUAB TAIS, nws tau teb kuv,
thiab tau cawm kuv dim ntawm kuv tej kev ntshai.

Txais: (9a) Nej saj ces nej yuav pom tias Huab Tais lub siab zoo.

Nej vam txog nws ces nej yuav zoo siab luag ntxhi,
nej ntsej muag yuav tsis liab vim nej tau txaj muag.
Thaum tug neeg pluag hu, HUAB TAIS hnov,
thiab yuav cawm nws ntawm tas nws tej kev nyuaj.

Txais: (9a) Nej saj ces nej yuav pom tias Huab Tais lub siab zoo.

HUAB TAIS tus tshiab tsa tsev tsam phooj nyob ncig
cov neeg hwm HUAB TAIS, nws cawm lawv dim.
Nej saj ces nej yuav pom tias HUAB TAIS lub siab zoo npaum li cas.
Hmoov zoo rau tus muab HUAB TAIS ua nws lub chaw vam khom!

Txais: (9a) Nej saj ces nej yuav pom tias Huab Tais lub siab zoo.

As Les Lus Yas: MT 5: 12A

Txais: As les lus yas, as les lus yas.

Nej yuav zoo siab thiab hom khaj,
vim nej yuav tau txais koob haum loj nyob saum ntuj.

Txais: As les lus yas, as les lus yas.

Ntawv Moo Zoo: MT 5: 1-12

1 Yes Xus pom neeg coob coob tuaj, nws nce mus saum lub roob, nws zaum ces cov thwj tim txav los ze nws.
2 Yes Xus thiaj tsa ncauj qhia lawv hais tias :
3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li.
4 Cov tau txoj hmoov zoo, yog cov quaj ntsuag, vim yuav muaj tus nplij lawv.
5 Cov tau txoj hmoov zoo, yog cov ua neeg me, vim lawv yuav txais lub ntiaj teb los ua lawv tug.
6 Cov tau txoj hmoov zoo, yog cov tshaib thiab nqhis txog txoj kev ncaj, vim yuav muaj tus daws lawv qhov nqhis.
7 Cov tau txoj hmoov zoo, yog cov khuv leej luag, vim yuav muaj tus khuv leej lawv.
8 Cov tau txoj hmoov zoo, yog cov muaj lub siab dawb siab huv, vim lawv yuav pom Tswv Ntuj.
9 Cov tau txoj hmoov zoo, yog cov tsim kev thaj yeeb, vim luag yuav hu lawv ua Tswv Ntuj cov me nyuam.
10 Cov tau txoj hmoov zoo, yog cov raug luag hiam vim txoj kev ncaj, vim lub Ceeb Tsheej saum ntuj yog lawv tug.
11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo.
12 Nej zoo siab thiab nej hom khaj mog, vim nej yuav tau txais koob haum loj nyob saum ntuj.
Cov yaj saub tuaj ua nej ntej, kuj raug luag hiam zoo li ntawd thiab.”

Tim 8 lub 6 Hlis 2021

Hnub Peb Lis Piam Kaum Nruab Xyoo B Nruab Lis Piam Xyoo I
Lectionary: 360

Zaj NYeem Ib: 2 KLN 1: 18-22

Cov kwv tij nkauj muad:
18 Ib yam li Tswv Ntuj yog tus pheej xeeb, peb cov lus peb hais rau nej kuj tsis ib txhij muaj lo lus ‘tau’ thiab ‘tsis tau.’
19 Vim Tswv Ntuj Leej Tub Yes Xus Pleev, uas Xis Vas Nus thiab Tis Mos Tes thiab kuv peb tau tshaj rau nej paub, mas nws tsis muaj ‘tau’ thiab ‘tsis tau’ nyob hauv nws, tsuas muaj qhov ‘tau’ xwb.
20 Tas nrho Tswv Ntuj cov lus nws tau cog txhua lo muaj qhov “tau” huv tib si nyob hauv nws; thiab kuj yog nrog Yes Xus, peb thiaj hais lo lus tias ‘Ua li’ rau Tswv Ntuj los cav txog nws lub koob meej.
21 Tus ua kom peb nrog nej nyob ruaj nreb hauv Leej Pleev, thiab tus tau pleev roj rau peb, yog Tswv Ntuj.
22 Nws tau muab nws lub thwj los ntaus cim rau peb, thiab nws tau tso Leej Ntuj Plig los nyob hauv peb, yog thawj yam ntawm txhua yam nws cog lus yuav muab rau peb .

NPN 119: 129, 130, 131, 132, 133, 135

Txais: (135a) Huab Tais, cia koj lub ntsej muag ci tuaj rau kuv mas.

Koj tej txhooj koj tau txiav zoo tas nrho,
vim li no kuv thiaj coj raws li ntawd.

Txais: (135a) Huab Tais, cia koj lub ntsej muag ci tuaj rau kuv mas.

Koj cov lus tawm tuaj ci kom pom kev,
ua kom cov neeg me txawj to taub.

Txais: (135a) Huab Tais, cia koj lub ntsej muag ci tuaj rau kuv mas.

Kuv huas pa rua ncauj hlo,
Vim kuv tshaib koj cov lus qhia.

Txais: (135a) Huab Tais, cia koj lub ntsej muag ci tuaj rau kuv mas.

Thov koj tig los saib kuv thiab khuv leej kuv,
ib yam li koj tig los rau cov neeg nyiam koj lub npe.

Txais: (135a) Huab Tais, cia koj lub ntsej muag ci tuaj rau kuv mas.

Thov koj hwj kuv txhais taw kom taug raws nraim li koj cov lus cog,
txhob kheev kom kev phem tuaj tswj tau kuv.

Txais: (135a) Huab Tais, cia koj lub ntsej muag ci tuaj rau kuv mas.

Thov cia koj lub ntsej muag ci tuaj rau koj tus tub txib
thiab qhia koj cov kev cai lij choj rau kuv.

Txais: (135a) Huab Tais, cia koj lub ntsej muag ci tuaj rau kuv mas.

As Les Lus Yas: MT 5: 16

Txais: As les lus yas, as les lus yas.

Cia nej qhov pom kev ci nyob ntawm zeej tsoom xub ntiag,
kom lawv pom nej cov dej num zoo, ces lawv yuav cav txog nej Txiv nyob saum ntuj.

Txais: As les lus yas, as les lus yas.

Ntawv Moo Zoo: MT 5: 13-16

Yes Xus haisrau nws cov thwj tim tias:
13 "Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab daw tuaj? Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb.
14 "Nej yog qhov pom kev ci rau lub ntiaj teb. Ib lub nroog txhim rau saum ncov roob, yuav muab zais tsis tau.
15 Hos, luag kuj tsis taws teeb coj mus zais rau hauv qab txees, luag muab txawb rau saum tus ncej teeb, lub teeb thiaj ci rau tas cov neeg nyob hauv tsev pom kev.
16 Li ntawd, nej qhov pom kev yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj.

Tim 9 lub 6 Hli 2021

Hnub Plaub Lis Piam Kaum Nruab Xyoo B Nruab Lis Piam Xyoo I
Lectionary: 361

XHLT: LN Ephrem, ua Tsob Hwb thiab Kws cov Txuj Ntshiab

Zaj Nyeem Ib: 2 KLN 3: 4-11

Cov kwv tij nkauj muad:
4 Peb muaj kev tso siab loj tas nrho rau Tswv Ntuj nyob hauv Leej Pleev.
5 Tsis yog vim tias peb tus kheej muaj peev xwm ua tau tej yam uas peb yuav khav tau tias yog peb ua tawm los, tiam sis peb lub peev xwm yog tuaj ntawm Tswv Ntuj tuaj.
6 Nws yog tus pub kom peb muaj peev xwm ua tau txoj kab xwm tshaj txoj kev cog lus tshiab, uas tsis yog ib txog kev cog lus nyob hauv ntaub ntawv, tiam sis yog ib txog kev cog lus nyob hauv Leej Ntuj Plig, vim tias lo lus hauv ntaub ntawv ua kom tuag, hos Leej Ntuj Plig ua kom ciaj sia.
7 Yog tias txoj kab xwm hais txog kev tuag hauv ntaub ntawv uas muab txaug rau saum cov txiag zeb twb muaj hwj chim loj, ua tau kom cov tub ki His Xas Lais ntsia tsis taus Mais Xes lub ntsej muag vim nws lub ntsej muag muaj hwj chim, txawm tias yog ib lub hwj chim kav tsis ntev,
8 mas txoj kab xwm hais txog Leej Ntuj Plig haj yam yuav tsum muaj hwj chim loj tshaj ntawd.
9 Yog tias txoj kab xwm muab txim rau neeg twb muaj hwj chim, mas txoj kab xwm muab kev ncaj ncees haj yam yuav muaj hwj chim loj dua.
10 Li ntawd txoj kab xwm uas thaud muaj hwj chim, nyem no tsis muaj hwj chim dab tsi, vim txoj kab xwm tshiab lub hwj chim loj tshaj lawm.
11 Vim tias yog yam uas yuav dua sai twb muaj hwj chim, mas yam uas yuav nyob mus li, haj yam yuav tsum muaj hwj chim loj dua.

NPN 99: 5, 6, 7, 8, 9

Txais: (9c) Huab Tais peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj;
nej pe hawm nws ntawm nws lub rooj tiag taw!
Nws yeej ntshiab tiag!

Txais: (9c) Huab Tais peb tus Tswv Ntuj yog tus ntshiab.

Mais Xes thiab As Loos yog ob tug nyob hauv nws tsoom leej choj,
Xas Muas yog ib tug nyob hauv cov uas hu txog nws lub npe;
thaum lawv hu txog HUAB TAIS, nws teb lawv.

Txais: (9c) Huab Tais peb tus Tswv Ntuj yog tus ntshiab.

HUAB TAIS nyob hauv tus ncej huab nrog lawv tham;
Lawv hnov nws tej lij choj thiab txoj cai nws muab rau lawv.

Txais: (9c) Huab Tais peb tus Tswv Ntuj yog tus ntshiab.

HUAB TAIS, peb tus Tswv Ntuj, koj teb lawv,
koj yog ib tug Tswv Ntuj ua siab ntev zam rau lawv,
tab sis koj rau txim rau lawv vim lawv cov txhaum.

Txais: (9c) Huab Tais peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj ;
nej pe hawm nws nyob saum lub roob nws txoj kev ntshiab,
vim HUAB TAIS peb tus Tswv Ntuj ntshiab tiag !

Txais: (9c) Huab Tais peb tus Tswv Ntuj yog tus ntshiab.

As Les Lus Yas: NPN 25: 4b, 5a

Txais: As les lus yas, as les lus yas.

Kuv tus Tswv Ntuj, thov qhia koj txoj kev rau kuv taug,
thiab coj kuv mus nyob hauv koj txoj kev tseeb.

Txais: As les lus yas, as les lus yas.

Ntawv Moo Zoo: MT 5: 17-19

Yes Xus hais rau nws cov thwj tim tias:
17 “Nej txhob xav tias kuv tuaj rhuav Txoj Cai thiab cov Yaj Saub; kuv tsis yog tuaj rhuav, kuv tuaj qhia ntxiv kom thoob xwb.
18 Kuv hais qhov muaj tseeb rau nej tias: mus txog thaum lub ntuj lub teb dua, yuav tsis muaj ib tug txwm ntawv, los ib lub cim ntawv me me hauv Txoj Cai yuav ploj, tas ib puas tsav yam nyob hauv yuav tsum tshwm sim tuaj tso.
19 Li ntawd yog leej twg hla ib txog cai me me nyob hauv cov lus qhia, thiab qhia kom luag tej coj xws li nws, mas nws yuav yog tus qis tshaj cov nyob hauv lub Ceeb Tsheej saum ntuj. Hos tus ua raws Txoj Cai tas huv si, thiab nws qhia kom luag coj li ntawd, mas nws yuav yog tus loj tshaj nyob hauv lub Ceeb Tsheej saum ntuj.”

Tim 10 lub 6 Hli 2021

Hnub Tsib Lis Piam Kaum Nruab Xyoo B Nruab Lis Piam Xyoo I
Lectionary: 362

Zaj Nyeem Ib: 2 KLN 3: 15—4: 1, 3-6

Cov kwv tij nkauj muad:
15 Los txog niaj hnub no, thaum lawv nyeem Mais Xes cov ntawv, mas muaj ib daig ntaub pheej npog rawv cov His Xas Lais lub siab.
16 Tiam sis thaum twg ib tug neeg tig los hwm Huab Tais, mas daim ntaub ntawd yuav raug muab tshem mus.
17 Vim Huab Tais yog Leej Tswv Yim, cess yog Huab Tais leej Tswv Yim nyob qhov twg, mas kev twj lij kuj nyob qhov ntawd thiab.
18 Peb sawv daws cov uas ntsej muag tsis npog ntaub lawm, peb ntsia pom Huab Tais lub hwj chim zoo li nyob hauv daim iav; ces peb plhis ua zoo li daim duab ntawd, uas txais hwj chim loj zuj zus ntawm Huab Tais uas yog Leej Tswv Yim tuaj.
4: 1 Li ntawd tos peb tau txais txoj kab xwm no los ua los yog vim Tswv Ntuj khuv leej peb, mas peb tsis ntaus siab me.
3 Txawm tias peb lub Moo Zoo muaj zoo li dab tsi npog, mas tsuas yog npog rau cov neeg uas mus taug txoj kev ploj xwb.
4 Lawv yog cov neeg tsis ntseeg uas tus tswv ntuj kav tiam neeg no ua kom lawv lub tswv yim tsis pom kev, ces lawv thiaj tsis pom txoj kev pom kev uas ci ntawm lub Moo Zoo qhia txog Leej Pleev lub hwj chim tuaj,tus uas yog Tswv Ntuj tus duab.
5 Peb tsis yog rov tshaj txog peb tus kheej, hos peb tshaj txog tias Yes Xus Pleev yog Huab Tais. Ntawm peb, peb tsuas ua nej tub txib xwb, kom tau nyiam Yes Xus.
6 Vim tus Tswv Ntuj uas tau hais tias: ‘Kom qhov pom kev ci hauv qhov tsaus ntuj tuaj,’ nws yog tus ci nyob hauv peb nruab siab, ua kom txoj kev pom kev ntawm kev paub txog Tswv Ntuj lub hwj chim nyob saum Leej Pleev lub ntsej muag ci hob tawm tuaj.

NPN 85: 9ab+10, 11-12, 13-14

Txais: (10b) HUAB TAIS lub hwj chim yuav nyob txawm hauv peb lub teb chaws.

Kuv yuav hnov yam Tswv Ntuj tshaj tawm;
Huab Tais, nws tshaj tawm txog kev thaj yeeb rau nws haiv neeg.
Nws txoj kev cawm nyob ze ze cov neeg hwm nws lawm,
nws lub hwj chim yuav nyob txawm hauv peb lub teb chaws.

Txais: (10b) HUAB TAIS lub hwj chim yuav nyob txawm hauv peb lub teb chaws.

Kev ua siab zoo thiab kev tseeb yuav los sib ntsib,
kev ncaj ncees thiab kev thaj yeeb yuav los sib qawg.
Kev tseeb yuav txhawv tawm hauv ntiaj teb daim av los,
kev ncaj ncees yuav dauv muag ntsia saum ntuj tuaj

Txais: (10b) HUAB TAIS lub hwj chim yuav nyob txawm hauv peb lub teb chaws.

HUAB TAIS yuav pub nws tej koob hmoov,
ces peb cov av yuav ntsu qoob ntsu loo tuaj.
Kev ncaj ncees yuav taug kev ua nws ntej,
kev cawm yuav taug kev raws nws cov hneev taw.

Txais: (10b) HUAB TAIS lub hwj chim yuav nyob txawm hauv peb lub teb chaws.

As Les Lus Yas: Zam 13: 34

Txais: As les lus yas, as les lus yas.

Kuv muab ib lo lus qhia tshiab rau nej:
Nej yuav ib leeg hlub ib leeg raws li kuv tau hlub nej.

Txais: As les lus yas, as les lus yas.

Ntawv Moo Zoo: MT 5: 20-26

Yes Xus hais rau nws cov thwj tim tias:
20 "Kuv hais rau nej tias: Yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv lub Ceeb Tsheej saum ntuj.
21 "Nej tau hnov cov lus qhia rau nej cov laus thaud tias: ‘Koj tsis txhob tua neeg; tus twg tua neeg, nws yuav raug luag txiav txim rau nws.’
22 Hos kuv mas kuv hais rau nej tias: Leej twg npau taws rau nws tus kwv tij, mas nws yuav raug txiav txim ntawm tsev hais plaub. Yog nws hais rau nws tus kwv tij tias: ‘Niag ruam !’ mas nws yuav raug txiav txim ntawm lub rooj txwj laus Xas Nes Nrees. Yog nws hais rau nws tus kwv tij tias: "Niag vwm’, mas nws yuav raug txiav txim mus nyob hauv dab phem cov hluav taws.
23 Li ntawd, thaum koj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus tsis zoo rau koj lawm,
24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov los cev koj cov txim.
25 Koj kav tsij nrog koj tus yeeb ncuab hais kom haum sai sai, thaum koj tseem nrog nws ua ke taug kev mus lawm tom tsev txiav txim, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj.
26 Kuv hais tseeb rau koj tias, koj yuav tawm tsis tau hauv tsev loj faj los, mus txog thaum koj rho nyiaj qab nas txog npib kawg mus them tas rau tso.”

Tim 11 lub 6 Hli 2021

Hnub Rau Lis Piam Kaum Nruab Xyoo B Nruab Lis Piam Xyoo I

Ib hnub tseem ceeb: Hnub Hwm HT Yes Xus lub Plawv Ntshiab
Lectionary: 171


Zaj Nyeem Ib: OX 11: 1, 3-4, 8c-9

Huab Tais hais tias:
1 Thaum haiv His Xas Lais tseem yog me nyuam yaus kuv twb nyiam nws lawm,
kuv tau hu kuv tus tub kom tawm hauv Hais Nkws Tos teb los.
3 Kuv yog tus tau qhia kom Es Fais txawj mus kev,
kuv puag rawv lawv hauv kuv ob txhais npab,
tiam sis lawv tsis to taub tias kuv yog tus pab lawv.
4 Kuv tau siv ib co hlua tib neeg cab lawv coj lawv kev,
ib co hlua muaj kev hlub.
Kuv tu lawv zoo npaum li ib tug neeg nqa nws tus me nyuam mos los npuab nws sab plhu,
kuv tseem khoov mus pub mov rau lawv noj tib si.
8c Kuv lub siab lub plawv ntxeev tas hauv kuv,
kuv tej siab ntsws tshee hnyo quaj dhi.
9 Kuv yuav tsis cia kuv lub siab npau taws yeej;
Kuv yuav tsis rhuav Es Fais dua ntxiv,
vim kuv yog Tswv Ntuj, kuv tsis yog tib neeg;
nyob nruab nrab hauv nej, kuv yog tus Ntshiab,
kuv yuav tsis cia nplaim taws tuaj hlawv nej pov tseg.

NPN HX 12: 2-3, 4, 5-6.

Txais: (3) Nej yuav ce dej luag ntxhwb ntxhi
hauv tus dej txhawv muaj kev cawm neeg.

Tswv Ntuj yog tus cawm kuv,
Kuv tso siab lug, kuv tsis txhawj.
Kuv lub zog thiab kuv lub peev xwm yog HUAB TAIS,
Nws yog tus cawm kuv.
Nej yuav zoo siab luag ntxhi mus ce dej
Hauv lub qhov dej muaj kev cawm neeg.

Txais: (3) Nej yuav ce dej luag ntxhwb ntxhi
hauv tus dej txhawv muaj kev cawm neeg.

Nej ua HUAB TAIS tsaug, nej cav txog nws lub npe;
Nej tshaj nws tej hauj lwm zoo rau cov haiv neeg paub,
Nej qhia rau lawv tias nws lub npe loj tas nrho.

Txais: (3) Nej yuav ce dej luag ntxhwb ntxhi
hauv tus dej txhawv muaj kev cawm neeg.

Nej hu nkauj qhuas HUAB TAIS txog nws tej hauj lwm muaj hwj chim,
Coj mus qhia rau tas ntiaj teb paub kom thoob .
Nroog Xis Yoos, koj cia li tsa suab qw zoo siab,
vim His Xas Lais tus Ntshiab yog tus loj nyob hauv nej!

Txais: (3) Nej yuav ce dej luag ntxhwb ntxhi
hauv tus dej txhawv muaj kev cawm neeg.

Zaj Nyeem Ob: EFX 3: 8-12, 14-19

Cov kwv tij nkauj muad:
8 Kuv, tus me dua cov nyob hauv tsoom ntshiab, tau txais lub txiaj ntsim no: kom tshaj Leej Pleev txoj kev nplua nuj uas neeg ntsuas tsis tau rau cov neeg teev pej kum dab,
9 kom kuv qhia sawv daws paub txog tias, lub hom phiaj ntawm yam uas nyob zais ntshis hauv Tswv Ntuj tus tsim tas txhua yam tau ntau tiam ua ntej los lawm yog dab tsi,
10 kom nyem no, vim muaj lub Koom Txoos mas cov Tshiab ua vaj txheeb thiab cov Tshiab muaj hwj huam nyob saum cov txheej ntuj siab thiaj paub txog Tswv Ntuj txoj kev thoob tsib uas muaj ntau fab.
11 Qhov no yog raws nraim li lub hom phiaj uas Tswv Ntuj yeej ib txwm tau npaj los lawm thiab nws tau ua kom tshwm sim tuaj nyob hauv peb tus Huab Tais Yes Xus Pleev lawm.
12 Nyob hauv Leej Pleev, peb muaj cuab kav hais lus tsis ntshai leej twg thiab peb tso siab lug txav los ze nws nyob hauv txoj kev ntseeg txog Leej Pleev.
14 Vim li no, mas kuv txhos caug nyob ntawm Leej Txiv xub ntiag,
15 nws yog tus uas tas txhua yim neeg nyob saum ntuj, thiab nyob ntiaj teb no txais lub npe txiv ntawm nws los.
16 Thov kom Leej Txiv pub rau nej raws li nws txoj kev nplua nuj muaj koob meej, kom nej tau txais Leej Ntuj Plig txoj kev txhawb zog nyob hauv nej nruab siab.
17 Thiab thov kom Leej Pleev los nyob txawm hauv nej lub siab, vim nej ntseeg, ces nej yuav nrhau cag ruaj thiab nej yuav cog nej lub siab rau hauv txoj kev nyiam,
18 kom nej txais ib lub zog pab nej kom nej nrog tsoom ntshiab to taub tias Leej Pleev txoj kev nyiam dav npaum li cas, ntev npaum li cas, siab npaum li cas, thiab tob npaum li cas,
19 thiab kom nej paub Leej Pleev txoj kev nyiam uas tob tshaj txoj kev paub txuj, ces nej yuav tau txais Tswv Ntuj txoj kev puv npo los nyob puv hauv nej.

As Les Lus Yas: MT 11: 29ab

Txais: As les lus yas, as les lus yas.

Huab Tais hais tias: Nej txais kuv tus quab mus nej kwv,
Nej kawm ntawm kuv, vim kuv muaj lub siab mos siab muag txo hwj chim.

Txais: As les lus yas, as les lus yas.

los: 1 ZAM 4: 10b

Txais: As les lus yas, as les lus yas.

Tswv Ntuj xub nyiam peb, nws thiaj xa nws Leej Tub
tuaj ua nqi txhiv peb ntawm peb cov txhaum.

Txais: As les lus yas, as les lus yas.

Ntawv Moo Zoo: ZAM 19: 31-37

31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog loj, ces lawv thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los.
32 Cov tub rog thiaj tuaj muab thawj tug uas nrog nws dai saum ntoo cuam ob sab ceg lov, thiab muab lwm tus ob sab ceg lov.
33 Thaum lawv los txog ntawm Yes Xus, lawv pom nws twb tuag lawm, ces lawv tsis muab nws ob sab ceg lov,
34 tab sis ib tug tub rog xuas nws rab hmuv nkaug Yes Xus phab tav, tam sis ntawd ib co ntshav thiab ib co dej tawm los.
35 Tus uas tau pom qhov ntawd ua pov thawj hais, nws lo lus pov thawj yog qhov tseeb, nws paub tias qhov nws hais muaj tiag. Nws hais tej ntawd kom nej ntseeg.
36 Tej xwm no tshwm sim kom muaj raws li Ntawv sau cia tias: ‘Nws cov pob txha tsis lov ib tug li.’
37 Thiab tseem muaj lwm lo lus hauv Ntawv hais tias: ‘Lawv yuav ntsia ntsoov tus uas lawv muab nkaug.’

Tim     12     lub     6     Hli     2021

Hnub Xya Lis Piam Kaum Nruab Xyoo B Nruab Lis Piam Xyoo I
Lectionary: 364/573

Kuj yog hnub yuav hwm Niam Mab Liab lub Plawv Tsis Lo Txhaum
(Cov zaj nyeem rau Niam Mab Liab nkaus xwb nyob nram qab)

Zaj Nyeem Ib:   2 KLN 5: 14-21

Cov kwj tim nkauj muad:
14 Leej Pleev txoj kev nyiam txhib peb tas zog, vim peb ntseeg tias nws ib leeg tuag rau sawv daws; vim li ntawd kuj yog zoo li sawv daws tuag tib si thiab.
15 Nws tuag pub rau sawv daws, yog kom cov neeg ciaj tsis txhob ua neej rau lawv tus kheej xwb, tiam sis kom lawv ua neej rau tus uas tau tuag thiab sawv rov los pub rau lawv lawm.
16 Li ntawd, txij nyem no mus, peb yuav tsis txhob saib ib tug neeg raws li lub cev nqaij xwb. Tab yog peb tau pom Leej Pleev raws li lub cev nqaij yav tas los lawd, los nyem no, peb tsis pom nws zoo li ntawd lawm.
17 Vim li ntawd, yog leej twg nyob hauv Leej Pleev, mas nws yog ib tug uas raug tsim dua tshiab lawm: yam qub dua mus tas, hos yam tshiab sawv los nyob rau ntawd lawm .
18 Tas txhua yam no puav leej yog tuaj ntawm Tswv Ntuj tuaj, nws ua kom peb rov nrog nws sib haum xeeb nyob hauv Leej Pleev, thiab nws muab txoj hauj lwm coj sawv daws los sib haum xeeb rau peb leg.
19 Tswv Ntuj yog tus ua kom lub ntiaj teb neeg nrog nws rov sib haum xeeb dua nyob hauv Leej Pleev, nws tsis saib txog neeg cov txhaum ntxiv, thiab nws muab cov lus muaj kev sib haum xeeb tso rau peb ua cov qhia.
20 Ces peb yog Leej Pleev cov tiam lis, zoo cuag li yog Tswv Ntuj siv peb mus qhuab qhia neeg. Peb sawv Leej Pleev chaw thov nej tas zog, kom nej cia li nrog Tswv Ntuj rov sib haum xeeb.
21 Tswv Ntuj ua kom tus uas tsis muaj txhaum, txia ua kev txhaum los pab peb, kom xwv nyob hauv Leej Pleev peb hloov tau mus ua Tswv Ntuj txoj kev ncaj.

NPN   103: 1-2, 3-4, 9-10, 11-12

Txais: (8a) Huab Tais muaj lub siab zoo thiab khuv leej neeg.

Kuv tus ntsuj plig, koj cav txog HUAB TAIS;
tas kuv tus kheej, koj cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej kev zoo ib qho li.

Txais: (8a) Huab Tais muaj lub siab zoo thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob nkeeg kom zoo.
Nws tau cawm koj txoj sia ntawm kev puas nstoog,
nws tau muab nws txoj kev ua zoo thiab kev khuv leej rau koj ntoo.

Txais: (8a) Huab Tais muaj lub siab zoo thiab khuv leej neeg.

Nws tsis yws tas mus li,
nws kuj tsis chim tas mus ib txhis.
Nws tsis nplua peb raws li peb tau ua txhaum,
nws tsis ua pauj rau peb raws li peb tau ua phem.

Txais: (8a) Huab Tais muaj lub siab zoo thiab khuv leej neeg.

Npaum li lub ntuj nyob siab saum ntiaj teb,
nws hlub cov neeg uas hwm nws tshaj npaum li ntawd.
Npaum li sab hnub tuaj nyob deb ntawm sab hnub poob,
nws muab peb tej txhaum pov tseg deb ntawm peb npaum li ntawd.

Txais: (8a) Huab Tais muaj lub siab zoo thiab khuv leej neeg.

As Les Lus Yas:    Lk 2: 19

xais: As les lus yas, as les lus yas.

Tus nkauj tsim txiaj Mab Liab tau txoj hmoov zoo vim nws
khaws Tswv Ntuj lo lus cia thiab muab coj los xav hauv nruab siab.

Txais: As les lus yas, as les lus yas.

Ntawv Moo Zoo:   LK 2:  41-51

41 Yes Xus niam thiab txiv nkawd niaj xyoo mus ua lub Ntees Hla pem Yes LusXas Les.
42 Thaum Yes Xus muaj kaum ob xyoos, lawv kuj mus ua lub Ntees Hla rau ped raws li kev cai thiab.
43 Thaum cov hnub ua ntees ntawd tas lawm, Yos Xes thiab Mab Liab nkawd sawv kev rov los, hos tus me tub Yes Xus tseem nyob Yes Lus Xas Les, nws niam thiab nws txiv tsis paub li.
44 Nkawd xav tias nws nyob hauv pab neeg coob nrog sawv daws rov qab los lawm. Ces nkawd mus ib hnub ke, nkawd mam li pib nrhiav nws hauv cov txheeb ze thiab cov swm neeg.
45 Tiam sis nkawd nrhiav tsis tau, ces nkawd thiaj rov mus nrhiav nws pem Yes Lus Xas Les.
46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj, nws zaum hauv nruab nrab cov kws Txoj Cai, nws mloog lawv thiab nug lawv.
47 Cov neeg uas tau hnov nws hais lus puav leej yoob tas rau nws txoj kev to taub thiab nws cov lus teb.
48 Thaum nkawd pom Yes Xus, nkawd xav tsis thoob, ces nws niam hais rau nws tias: "Me tub, vim li cas koj ua li ntawd rau wb? Saib koj txiv wb nrhiav koj, wb ntxhov siab tas nrho."
49 Yes Xus hais rau nkawd tias: "Vim li cas neb nrhiav kuv? Neb tsis paub tias kuv yuav tsum leg kuv Txiv cov hauj lwm no lod?”
50 Tiam sis nkawd tsis to taub nws lo lus nws hais rau nkawd li.
51 Yes Xus nrog nkawd rov mus nyob Nas Xas Les, nws mloog nkawd lus. Nws niam khaws tej lus ntawd huv tib si cia rau nruab siab.


++++++++++++++++++++++++

Hnub Xya hauv Lis Piam Hnub Chiv Ob tom qab Leej Ntuj Plig Nqes Los

Hwm Niam Mab Liab lub PLawv Tsis Lo Txhaum
Lectionary: 573
 
Zaj Nyeem Ib:    HX 61:  9-11

HUAB TAIS hais tias:
9 Kuv haiv neeg tsoom xeeb leej yuav nto moo nyob hauv cov kuj cuab, lawv cov xeeb ntxwv yuav muaj koob meej nyob hauv cov haiv neeg. Tas tsoom neeg uas pom lawv yuav zeem tias lawv yog ib haiv neeg uas HUAB TAIS foom hmoov zoo rau.
10 Kuv zoo siab tag nrho nyob hauv HUAB TAIS, kuv tus plig dhia hom khaj nyob hauv kuv tus Tswv Ntuj; vim nws muab kev cawm ua tsoos rau kuv hnav, nws muab kev ncaj ua tsho tshaj sab rau kuv npua, xws li nraug vauv tau ib lub mom teev kub los ntoo, xws li nkauj nyab tau npauj kub npauj nyiag los coj.
11 Ib yam li daim av ua tau kom tej nroj tsuag nthaw kaus tuaj, los ib lub vaj ua tau kom tej noob tseb rau hauv txawj hlav tuaj, ib yam li ntawd, HUAB TAIS Tswv Ntuj kuj yuav ua kom txoj kev ncaj thiab kev cav kev qhuas tshwm tawm tuaj nyob ntawm txhua haiv neeg xub ntiag.

NPN:   1 XM 2:  1, 4-5, 6-7, 8abcd

Txais: (1) Kuv lub siab dhia hom khaj nyob hauv HUAB TAIS tus cawm kuv.

Kuv lub siab dhia hom khaj nyob hauv HUAB TAIS,
kuv muaj kooj meej loj nyob hauv kuv tus Tswv Ntuj.
Kuv lub ncauj hais lus tsis ntshai kuv cov yeeb ncuab,
vim kuv zoo siab nyob hauv koj txoj kev cawm.

Txais: (1) Kuv lub siab dhia hom khaj nyob hauv HUAB TAIS tus cawm kuv.

Cov neeg muaj zog rab hneev dam daws,
hos cov zog sib lub zog loj tuaj.
Cov uas tau noj tsau npo yuav tsum mus ua zog kom tau mov noj,
hos cov tshaib plab tso txoj kev khwv tseg.
Tus pog khab seeb yug tauj xya leej tub,
hos tus muaj tub coob tsis muaj kev sov siab li.

Txais: (1) Kuv lub siab dhia hom khaj nyob hauv HUAB TAIS tus cawm kuv.

HUAB TAIS ua kom tuag thiab ua kom ciaj sia.
Nws muab thawb lawm hauv ntuj txias teb tsaus,
thiab nws tsa kom muaj sia sawv rov los.
HUAB TAIS ua kom pluag thiab ua kom muaj;
nws muab txo kom qis thiab nws tsa kom siab.

Txais: (1) Kuv lub siab dhia hom khaj nyob hauv HUAB TAIS tus cawm kuv.

Nws tsa cov txom nyem hauv cov plua av los rau qhov siab;
nws tshem cov pluag tawm hauv qhov chaw qias los,
nws coj lawv mus zaum nrog cov tub nom tub tswv
thiab muab ib lub rooj zaum muaj meej mom rau lawv ua lawv tug.

Txais: (1) Kuv lub siab dhia hom khaj nyob hauv HUAB TAIS, tus cawm kuv.

As Les Lus Yas:    Lk 2: 19

xais: As les lus yas, as les lus yas.

Tus nkauj tsim txiaj Mab Liab tau txoj hmoov zoo vim nws
khaws Tswv Ntuj lo lus cia thiab muab coj los xav hauv nruab siab.

Txais: As les lus yas, as les lus yas.

Ntawv Moo Zoo:   LK 2:  41-51

41 Yes Xus niam thiab txiv nkawd niaj xyoo mus ua lub Ntees Hla pem Yes LusXas Les.
42 Thaum Yes Xus muaj kaum ob xyoos, lawv kuj mus ua lub Ntees Hla rau ped raws li kev cai thiab.
43 Thaum cov hnub ua ntees ntawd tas lawm, Yos Xes thiab Mab Liab nkawd sawv kev rov los, hos tus me tub Yes Xus tseem nyob Yes Lus Xas Les, nws niam thiab nws txiv tsis paub li.
44 Nkawd xav tias nws nyob hauv pab neeg coob nrog sawv daws rov qab los lawm. Ces nkawd mus ib hnub ke, nkawd mam li pib nrhiav nws hauv cov txheeb ze thiab cov swm neeg.
45 Tiam sis nkawd nrhiav tsis tau, ces nkawd thiaj rov mus nrhiav nws pem Yes Lus Xas Les.
46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj, nws zaum hauv nruab nrab cov kws Txoj Cai, nws mloog lawv thiab nug lawv.
47 Cov neeg uas tau hnov nws hais lus puav leej yoob tas rau nws txoj kev to taub thiab nws cov lus teb.
48 Thaum nkawd pom Yes Xus, nkawd xav tsis thoob, ces nws niam hais rau nws tias: "Me tub, vim li cas koj ua li ntawd rau wb? Saib koj txiv wb nrhiav koj, wb ntxhov siab tas nrho."
49 Yes Xus hais rau nkawd tias: "Vim li cas neb nrhiav kuv? Neb tsis paub tias kuv yuav tsum leg kuv Txiv cov hauj lwm no lod?”
50 Tiam sis nkawd tsis to taub nws lo lus nws hais rau nkawd li.
51 Yes Xus nrog nkawd rov mus nyob Nas Xas Les, nws mloog nkawd lus. Nws niam khaws tej lus ntawd huv tib si cia rau nruab siab.

Tim 14 lub 6 Hli 2021

Hnub Ob Lis Piam Kaum Ib Nruab Xyoo B Nruab Lis Piam Xyoo I
Lectionary: 365

Zaj Nyeem Ib: 2 KLN 6: 1-10

Cov kwv tij nkauj muad:
1 Vim peb ua hauj lwm nrog Tswv Ntuj, mas peb thov nej kom nej tsis txhob lam txais Tswv Ntuj lub txiaj ntsim dag xwb.
2 Vim nws hais tias: ‘Thaum zoo sij hawm, kuv tau teb koj, thaum txog hnub cawm neeg, kuv tau cev tes pab koj.’ Lub sij hawm zoo, ces yog nyem no, hnub cawm neeg, ces yog nyem no.
3 Peb tsis ua ib yam kom ua rau ib tug twg poob rau ib qho phem dab tsi, kom peb txoj kev tshaj lub Moo Zoo thiaj tsis muaj ib qho chaw xyeej nyob hauv li.
4 Tiam sis nyob hauv txhua yam, peb saib peb yog Tswv Ntuj cov tub txib uas nyob rawv hauv txoj kev ua siab ntev nyiaj ntau yam, hauv txoj kev ntsib kev txhawj xeeb, kev nyuaj, kev ntxhov siab,
5 kev raug luag ntaus, raug luag kaw, raug luag ntxeev, kev siv zog khwv, kev yoo dab ntub, kev yoo tshaib yoo nqhis;
6 nyob hauv txoj kev xyaum ua neeg dawb huv, xyaum ua neeg muaj kev txawj kev ntse, ua neeg siab ntev, ua neeg siab zoo; nyob hauv Leej Tswv Yim Ntshiab, nyob hauv txoj kev nyiam tseeb,
7 nyob hauv lo lus tseeb, nyob hauv Tswv Ntuj lub hwj huam; nyob hauv txoj kev siv txoj kev ncaj tej cuab yeej nyob sab xis thiab nyob sab laug;
8 nyob hauv txoj kev muaj koob meej thiab kev poob ntsej muag, txoj kev raug luag tsawm thiab raug luag qhuas; peb raug luag saib tias yog neeg dag, txawm tias peb hais qhov tseeb xwb.
9 Luag hais tias tsis paub peb, tsis kav muaj neeg lees paub peb; luag hais tias peb yuav tuag, tab sis peb kuj tseem muaj txoj sia nyob; luag saib peb yog neeg raug txim, tab sis peb kuj tsis tau raug muab tua;
10 luag xav tias peb tu siab, tab sis peb zoo siab mus li; luag saib peb pluag kawg nkaus, tab sis peb ua kom coob leej nplua nuj tuaj; luag saib peb yog cov neeg tsis muaj dab tsi li, tab sis peb muaj tas ib puas tsav yam ua peb tug.

NPN 98: 1, 2b-3ab, 3cd-4

Txais: (2a) Huab Tais ua kom neeg paub txog nws txoj kev cawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais: (2a) Huab Tais ua kom neeg paub txog nws txoj kev cawm.

HUAB TAIS tau ua kom cov haiv neeg pom nws txoj kev ncaj
Nws rov nco txog nws txoj kev ua zoo
thiab kev pheej xeeb rau tsev neeg His Xas Lais.

Txais: (2a) Huab Tais ua kom neeg paub txog nws txoj kev cawm.

Tas cov npoo ntiaj teb kawg tau pom
peb tus Tswv Ntuj txoj kev cawm neeg.
Tas txhua teb chaws, nej hu nkauj zoo siab rau HUAB TAIS mas,
nej qw suab nkauj, nej cav txog nws.

Txais: (2a) Huab Tais ua kom neeg paub txog nws txoj kev cawm.

As Les Lus Yas: NPN 119: 105

Txais: As les lus yas, as les lus yas.

Koj lo lus yog ib lub teeb tsom hauv kuv ko taw,
yog ib qho pom kev kaj kuv txoj kev.

Txais: As les lus yas, as les lus yas.

Ntawv Moo Zoo: MT 5: 38-42

Yes Xus hais rau nws cov thwj tim tias:
38 “Nej tau hnov tej lus qhia tias: ‘Qhov muag pauj qhov muag, kaus hniav pauj kaus hniav.’
39 Hos kuv hais rau nej tias: nej tsis txhob nrog tus neeg phem sib cav. Yog leej twg ib ncuav pias rau koj sab plhu xis, tig sab plhu laug rau nws thiab.
40 Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab.
41 Leej twg thov koj xa nws mus ib ncua kev, mas koj nrog nws mus ob ncuas.
42 Leej twg thov dab tsi ntawm koj, mas koj pub rau nws. Leej twg xav txais koj nyiaj, mas koj txhob tig nraub qaum rau nws.”

Tim 15 lub 6 Hli 2021

Hnub Peb Lis Piam Kaum Ib Nruab Xyoo B Nruab Lis Piam Xyoo I
Lectionary: 366

Zaj Nyeem Ib: 2 KLN 8: 1-9

1 Cov kwv tij nkauj muad, peb xav kom nej paub txog lub txiaj ntsim uas Tswv Ntuj tau pub rau cov Koom Txoos nyob Mas Xes Dos Nias teb.
2 Lawv tau raug kev sim siab loj nyob hauv kev txom nyem, tsis kav lawv txoj kev zoo siab puv npo thiab lawv txoj kev pluag ti txha tseem ua kom txoj kev ua siab dav fo pub paj tshab ntau txhawv phwj yaws tawm hauv lawv tuaj.
3 Lawv pub raws li lawv muaj, kuv yeej ua tau pov thawj txog, thiab lawv tseem pub tshaj qhov lawv muaj thiab, lawv zoo siab hlo pub tsis muaj tus yuam.
4 Lawv tau taij peb tsis tseg kom peb kheev lawv tau nrog sawv daws koom txoj kev tsob hwb cov ntshiab.
5 Lawv tau ua zoo tshaj qhov peb tos ntawm lawv; lawv xub muab lawv fij rau Huab Tais ua ntej, ces lawv mam li pab peb raws li Tswv Ntuj nyiam.
6 Vim li ntawd, peb thiaj tau thov Tis Tos tias raws li nws twb tau pib ua los lawm, kom nws nrog nej ua qhov hauj lwm muaj txiaj ntsim zoo no kom tiav.
7 Zaum no nej ua tau zoo heev nyob hauv txhua yam lawm, tsis hais kev ntseeg, los kev txawj hais lus, los kev paub txuj, los kev kub siab lug rau txhua yam, los nyob hauv txoj kev peb nyiam nej, ua li mas thov kom nej kuj yuav tsum ua zoo tshaj nyob hauv txoj kev pub paj tshab muaj txiaj ntsim no thiab.
8 Kuv hais li no tsis yog xav yuam nej, tsuas yog xav sim saib nej puas muaj txoj kev nyiam kev hlub tseeb tiag thaum nej nco txog luag tej xwb.
9 Nej twb paub lawm tias peb tus Huab Tais Yes Xus Pleev tau ua ib yam muaj txiaj ntsim loj: Nws yog tus nplua nuj, tab sis vim nej mas nws ua komn nws pluag, kom xwv nws txoj kev pluag ua kom nej nplua nuj tuaj.

NPN 146: 1B-2, 5-6AB, 6C-7, 8-9A

Txais: (1b) Kuv tus plig, koj cav lus zoo txog HUAB TAIS!
los: As les lus yas.

Kuv tus plig, koj cia li cav lus zoo txog HUAB TAIS!
Kuv yuav cav txog HUAB TAIS tas kuv sim neej,
kuv yuav hu nkauj cav txog kuv tus Tswv Ntuj
thaum kuv tseem muaj sia nyob.

Txais: (1b) Kuv tus plig, koj cav lus zoo txog HUAB TAIS!
los: As les lus yas.

Muaj hmoov zoo yog tus tau Yas Kos tus Tswv Ntuj nres nws,
Yog tus tso siab rau HUAB TAIS nws tus Tswv Ntuj,
uas yog tus tswv tsim lub ntuj lub teb,
tsim dej ntuj thiab ib puas tsav yam nyob hauv dej.

Txais: (1b) Kuv tus plig, koj cav lus zoo txog HUAB TAIS!
los: As les lus yas.

Nws yog tus pheej xeeb mus ib txhiab ib txhis;
cov raug luag quab yuam, nws tsa lawv cai,
nws pub mov rau cov neeg tshaib noj;
HUAB TAIS tso cov neeg raug txim kom lawv dim.

Txais: (1b) Kuv tus plig, koj cav lus zoo txog HUAB TAIS!
los: As les lus yas.

HUAB TAIS qhib cov dig muag qhov muag,
HUAB TAIS tsa cov khoov nkoos kom sawv ntseg,
HUAB TAIS nyiam cov neeg ncaj,
HUAB TAIS pov hwm cov pej kum neeg.

Txais: (1b) Kuv tus plig, koj cav lus zoo txog HUAB TAIS!
los: As les lus yas.

As Les Lus yas: ZAM 13: 34

Txais: As Les Lus Yas.

Kuv muab ib lo lus qhia tshiab rau nej:
Nej yuav sib nyiam sib hlub li kuv nyiam thiab hlub nej.

Txais: As Les Lus Yas.

Ntawv Moo Zoo: MT 5: 43-48

Yes Xus haisrau nws cov thwj tim tias:
43 "Nej tau hnov tej lus qhia tias: ‘Koj yuav nyiam tus nyob ze koj, koj yuav ntxub koj tus yeeb ncuab.’
44 Tab sis, kuv hais rau nej tias: nej yuav nyiam nej cov yeeb ncuab, nej yuav thov Ntuj rau cov tsim txom nej,
45 nej thiaj yuav yog nej Txiv nyob saum ntuj cov tub; vim tias nej Txiv ua kom lub hnub tawm tuaj ziab cov neeg phem thiab cov neeg zoo, thiab nws ua kom nag los rau cov neeg siab ncaj thiab cov neeg siab nkhaus huv tib si.
46 Yog nej nyiam cov neeg nyiam nej xwb, mas nej yuav tau koob haum dab tsi? Tab yog cov sau se, lawv kuj txawj nyiam li ntawd.
47 Yog nej tsuas hais lus hu nej cov kwv tij xwb, mas nej tau ua dab tsi txawv? Tab yog cov neeg teev pej kum dab los lawv kuj txawj ua li ntawd thiab.
48 Hos nej, mas nej yuav tsum ua neeg zoo tshaj plaws, vim nej Txiv nyob saum ntuj yog tus zoo tshaj plaws.”

Tim 16 lub 6 Hli 2021

Hnub Plaub Lis Piam Kaum Nruab Xyoo B Nruab Lis Piam Xyoo I
Lectionary: 367

Zaj Nyeem Ib: 2 KLN 9: 6-11

Cov kwv tij nkauj muad:
6 Nej yuav nco tias, tus tseb nplej tsawg, nws kuj yuav sau tau tsawg, tus tseb nplej ntau nws kuj yuav sau tau nplej ntau thiab.
7 Nej nyias yuav ua raws li nyias tau txiav nyob hauv nyias siab; nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab luag ntxhi pub.
8 Tswv Ntuj muaj peev xwm yuav pub tau tas ib puas tsav yam txiaj ntsim nplua mias los rau nej, kom nej muaj tas txhua yam siv tas mus li, thiab tseem muaj seem txaus pab rau tej yam hauj lwm zoo thiab.
9 Raws li Ntawv sau tseg tias: ‘Nws pub paj tshab puv ntia, nws pub rau cov pluag; nws txoj kev ua neeg ncaj yuav nyob mus li.’
10 Tus muab noob rau tus tswv teb cog, thiab muab mov los ua txhiam xws, nws yuav muab noob rau nej thiab ua kom nej cov noob ntsu tuaj, thiab yuav ua kom cov qoob txi ntawm nej txoj kev ncaj huam vam ntau tuaj.
11 Ces nej yuav nplua nuj nyob hauv txhua yam vim nej txoj kev ua siab dav, uas yuav ua kom muaj kev ua Tswv Ntuj tsaug nyob hauv peb.

NPN 112: 1bc-2, 3-4, 9

Txais: (1b) Tus neeg hwm Huab Tais nws txoj hmoov zoo.
los: As les lus yas.

Tus muaj hmoov zoo yog tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj peev xwm nyob ntiaj teb,
caj ces neeg siab ncaj yuav tau txoj hmoov zoo.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Yuav muaj kev nplua nuj kev nto moo nyob hauv nws vaj tse
nws txoj kev ua siab dav yuav nyob mus li.
Qhov pom kev ci hauv qhov tsaus tuaj kaj cov neeg ncaj,
Nws khuv leej neeg, nws zam rau luag, thiab nws ua ncaj.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Nws tau faib rauy luag, nws tau pub rau cov pluag :
nws txoj kev ua siab dav yuav nyob mus li,
nws yuav lub koob meej yuaj muaj hwj chim loj.

Txais: (1b) Tus neeg hwm Huab Tais nws txoj hmoov zoo.
los: As les lus yas.

As Les Lus Yas: ZAM 14: 23

Txais: As Les Lus Yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As Les Lus Yas.

Ntawv Moo Zoo: MT 6: 1-6, 16-18

Yes Xus hais rau nws cov thwj tim tias:
1 “Nej ceev faj, tsis txhob ua ncaj nyob ntawm neeg xub ntiag, kom luag pom nej xwb. Yog nej ua li ntawd, mas nej yuav tsis txais koob haum ntawm nej Txiv nyob saum ntuj.
2 Thaum koj pub rau luag, koj txhob tshuab hom ua koj ntej xws li cov neeg zoo sab nraud lawv ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm.
3 Hos koj, mas thaum koj pub rau luag, koj txhob cia koj sab tes laug paub qhov uas sab tes xis ua.
4 Li ntawd, tsis muaj neeg paub tias koj tau pub rau luag. Ces koj Txiv uas nws pom hauv qhov chaw nraim yuav pauj rau koj.
5 "Thaum nej teev Ntuj, nej txhob ua li cov neeg zoo sab nraud: lawv nyiam mus sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm.
6 Hos koj, mas thaum koj teev Ntuj, koj mus nyob twj ywm hauv koj chav pw, kaw koj qhov rooj ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag ntshaus xws li cov neeg zoo sab nraud: lawv ua ntsej muag mluas mlob, kom luag pom tias yog lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm.
17 Hos koj, mas thaum koj yoo mov, koj yuav pleev tshuaj tsw qab rau saum taub hau, thiab yuav ntxuav muag,
18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv pom hauv qhov chaw nraim yuav pauj rau koj.”

Tim 17 lub 6 Hli 2021

Hnub Tsib Lis Piam Kaum Ib Nruab Xyoo B Nruab Lis Piam Xyoo I
Lectionary: 368

Zaj Nyeem Ib: 2 KLN 11: 1-11

Cov kwv tij nkauj muad:
1 “Xav kom nej ua siab ntev rau kuv, txawm kuv yuav hais tau tej yam vwm me ntsis. Kuv thov kom nej ua siab ntev xwb mog!
2 Vim tias kuv lub siab khib nej ib yam li yog Tswv Ntuj khib thiab, vim kuv tau qhaib nej rau ib tug txiv xwb, nej yog zoo li ib tug nkauj xwb dawb huv uas kuv muab rau Leej Pleev yuav.
3 Tab sis, kuv ntshai tsam, ib yam li Es Vas raug tus nab ntse siab nkhaus ntxias tau nws, mas tsam nej kuj yuav cia nej lub tswv yim hloov, ces nej tsis tuag siab nthi thiab tsis ua siab dawb paug rau Leej Pleev ntxiv.
4 Yog muaj tej tus tuaj tshaj ib tug Yes Xus txawv tus peb tau tshaj, los yog nej txais dua lwm tus Leej Ntuj Plig txawv tus nej tau txais lawm, los yog nej hnov dua ib lub Moo Zoo txawv lub Moo Zoo nej ib txwm tau ntseeg los, mas ntshai tsam nej cia li yuav qaug rau tej ntawd yooj yooj yim xwb.
5 Kuv xav tias kuv yeej tsis qis dua cov hauv paus xa lus muaj peev xwm ntawd li.
6 Tej zaum kuv yuav tsis txawj hais lus zoo, tab sis hais txog kev paub txuj, mas kuv yeej tsis swb li. Nyob hauv txhua yam, peb yeej tau ua rau sawv daws pom tias peb paub txuj.
7 Kuv puas tau ua ib qho yuam kev, vim kuv ua hauj lwm dawb tshaj Tswv Ntuj lub Moo Zoo rau nej, kuv tau txo kom kuv qis, thiab tsa nej rau qhov siab?
8 Kuv tau noj nyiaj hli ntawm lwm cov Koom Txoos, kom kuv tau kev tsob hwb nej.
9 Thaum kuv tuaj nrog nej nyob lawm, txawm kuv tsis muaj txaus noj txaus haus, los kuv tsis tau tsuam ib lub nra rau nej ris, vim muaj ib co kwv tij tuaj Mas Xes Dos Nias teb tuaj tau pab kuv kev noj kev haus. Li ntawd, kuv tau ceev faj kom txhob ua ib lub nra hnyav rau nej, thiab kuv tseem yuav ua li ntawd ntxiv mus.
10 Vim Leej Pleev txoj kev tseeb uas nyob hauv kuv, mas yuav tsis muaj leej twg txwv tau kuv cov lus uas kuv khav txog kuv me me no nyob As Kas Yas teb li.
11 Yog vim li cas? Puas yog vim kuv tsis nyiam nej? Tswv Ntuj yog tus paub tias kuv yeej nyiam nej!

NPN 111: 1b-2, 3-4, 7-8

Txais: (7a) Huab Tais, koj cov hauj lwm yog kev ncaj thiab kev tseeb.
los: As les lus yas.

Kuv yuav ua HUAB TAIS tsaug tas kuv lub siab lub ntsws
nyob ntawm tsoom neeg siab ncaj xub tiag thiab hauv lawv lub txoos.
HUAB TAIS cov hauj lwm loj tas nrho,
zoo ntxim siab kawg nkaus.

Txais: (7a) Huab Tais, koj cov hauj lwm yog kev ncaj thiab kev tseeb.
los: As les lus yas.

HUAB TAIS cov hauj lwm muaj hwj chim thiab nto koob meej,
nws txoj kev ncaj yuav nyob ib txhiab ib txhis.
Nws nto koob meej lug vim nws cov hwj huam yees ntxwv ;
HUAB TAIS muaj lub siab zoo thiab khuv leej neeg

Txais: (7a) Huab Tais, koj cov hauj lwm yog kev ncaj thiab kev tseeb.
los: As les lus yas.

Cov hauj lwm nws txhais tes tsim yog hauj lwm tseeb thiab ncaj nces.
Nws cov lus qhuab qhia yog cov lus tsim nyog tso siab rau,
Yog cov lus yuav nyob ruaj mus li ib txhis,
xeeb tawm los nyob hauv kev tseeb thiab kev ncaj ncees.

Txais: (7a) Huab Tais, koj cov hauj lwm yog kev ncaj thiab kev tseeb.
los: As les lus yas.

As Les Lus Yas: LOS MAS 8: 15bc

Txais: As les lus yas, as les lus yas.

Nej tau txais ib lub tswv yim ua tub ki tshiab,
lub tswv yim ntawd qhia peb hu Tswv Ntuj tias : ‘As Npas! Txiv!’

Txais: As les lus yas, as les lus yas.

Ntawv Moo Zoo: MT 6: 7-15

Yes Xus hais rau nws cov thwj tim tias:
7 “Thaum nej teev Ntuj, nej txhob ntuas mus ntuas los zoo li cov neeg teev dab; lawv xav tias yog lawv hais lus ntau, mas dab yuav mloog lawv zoo dua.
8 Nej txhob ua zoo li lawv. Vim nej Txiv yeej paub tias qhov twg yog qhov nej yuav tsum muaj; tab yog nej tseem tsis tau thov, nws twb xub paub lawm.
9 Nej yuav teev Ntuj zoo li no :
‘Peb Txiv nyob saum ntuj, koj lub Npe ntshiab nto moo lug.
10 Koj lub Ceeb Tsheej kom los txog. Kom muaj raws koj nyiam nyob ntiaj teb no li nyob saum ntuj.
11 Thov koj pub mov txaus peb noj hnub no.
12 Koj zam peb cov txhaum rau peb zoo li peb zam rau cov tau ua txhaum rau peb.
13 Koj txhob tso peb raug kev ntxias, thov koj npo peb dim ntawm kev phem.’
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab.
15 Hos yog nej tsis zam txhaum rau luag, mas nej Txiv kuj yuav tsis zam nej cov txhaum rau nej li thiab.”