COV ZAJ NYEEM NRUAB LIS PIAM XYOO II 2017-2018

TIM 24 LUB 7 HLI 2018

Hnub Peb Lis Piam Kaum Rau Nruab Xyoo B Nruab Lis Piam Xyoo II

Hwm LN Sharbel Makhluf

Zaj Nyeem Ib: MIS KES 7: 14-15, 18-20

14 Koj ua tus tswv zov yaj muab koj rab pas los coj koj haiv neeg; yog pab yaj uas koj qee los ua koj cuab tam, nws nyob twj cuab hauv ib koog hav zoov, nyob hauv ib thaj av zoo ua noj. Thov koj cia lawv rov los nog zaub nyob Npas Sas thiab nyob Nkas Las As, xws li yav thaum ub ! 15 Xws li lub caij thaum nej tawm Hais Nkws Tos teb los, kuv yuav ua hwj huam loj rau nws pom .
18 Tus Tswv Ntuj twg thiaj yuav zam txhaum thiab tsis suav txim rau pab neeg seem uas yog nws tug zoo li koj, thiab thiaj yuav tsis npau taws mus li tiam sis nws zoo siab yeem ua zoo, 19 thiab nws yuav rov hlub peb dua, yuav muab peb tej kev txhaum tsuj ntiag rau ntawm taw? Koj yuav muab tas nrho peb tej kev txhaum pov lawm hauv qab tiv txwv. 20 Thov koj ua ncaj rau Yas Kos, koj pub koj lub txiaj ntsim rau Has Nplas Has, xws li koj twb tau cog lus rau peb cov yawg koob thaum ntxov ub lawm.

NPN 85: 2-4, 5-6, 7-8

Txais: (8a) Huab Tais, thov koj khuv leej peb thiab hlub pe.

HUAB TAIS, koj yeej nyiam koj lub teb chaws,
Koj tau coj Yas Kos cov neeg nyob txim pej kum teb rov los lawm.
Koj zam koj haiv neeg qhov yuam kev rau lawv,
Koj muab lawv cov txhaum npog tas tib si.
Koj thim koj lub siab npau taws, koj tshem koj lub siab ceev tawm.

Txais: (8a) Huab Tais, thov koj khuv leej peb thiab hlub pe.

Tswv Ntuj, tus cawm peb, thov koj tsa kom peb rov sawv dua!
Koj tso koj txoj kev chim rau peb pov tseg.
Koj puas yuav npau taws rau peb mus li,
puas yuav npau rau peb mus tiam dhau tiam?

Txais: (8a) Huab Tais, thov koj khuv leej peb thiab hlub pe.

Koj yuav tsis ua kom peb rov muaj sia muaj zog li los,
kom koj haiv neeg thiaj yuav zoo siab nyob hauv koj ?
HUAB TAIS, thov koj ua kom peb pom koj hlub peb,
thov koj pub koj txoj kev cawm rau peb !

Txais: (8a) Huab Tais, thov koj khuv leej peb thiab hlub pe.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws;
kuv Txiv wb yuav los nyob hauv nws.

Txais: As les lus yas, as les lus yas.

Ntawv Moo Zoo: MT 12: 46-50

46 Yes Xus tseem tab tom hais lus rau tej pab neeg coob coob, ces Yes Xus niam thiab nws cov kwv tij tuaj sawv nraum zoov, lawv xav nrog nws txuas lus. 47 Muaj ib tug neeg hais rau Yes Xus tias : “Koj niam thiab koj cov kwv tij tuaj sawv nraud, lawv xav nrog koj txuas lus.” 48 Yes Xus teb rau tus neeg qhia nws paub tias : "Leej twg yog kuv niam? Thiab leej twg yog kuv cov kwv tij ?" 49 Yes Xus taw tes rau nws cov thwj tim, nws hais tias : "Kuv niam thiab kuv kwv tij yog cov ntawd. 50 Vim tias tus twg ua raws kuv Txiv nyob saum ntuj lub siab, mas tus ntawd yog kuv ib tug kwv, ib tug muam, los ib leeg niam."

TIM      25      LUB      7      HLI      2018

Hnub Plaub Lis Piam Kaum rau Nruab Xyoo B Nruab Lis Piam Xyoo II

Hwm LN Yas Kos, tus Hauv Paus Xa Lus

Zaj Nyeem Ib:       2 KLN  4:   7-15

7 Peb khaws yam muaj nqis loj no cia rau hauv tej lub hub av, kom lub hwj huam loj ntawd yog tuaj ntawm Tswv Ntuj tuaj, tsis yog tawm ntawm peb los. 8 Peb raug luag tsim txom nyob hauv txhua yam, tab sis peb tsis raug luag tsuj; peb ntsib kev nyuaj siab, tiam sis peb tsis tas kev cia siab. 9 Peb raug luag hiam, tab sis Ntuj tsis tso peb pov tseg; peb raug luag thawb rau hauv av, tab sis peb tsis raug luag rhuav. 10 Peb mus txog qhov twg, peb ris rawv Yes Xus txoj kev tuag nyob hauv peb lub cev, kom xwv Yes Xus txoj sia tawm tuaj nyob hauv peb lub cev thiab. 11 Txawm peb tseem muaj txoj sia los peb niaj hnub yuav raug kev tuag vim Yes Xus, kom xwv Yes Xus txoj sia tawm tuaj nyob hauv peb lub cev uas txawj tuag. 12 Li ntawd txoj kev tuag lis rawv nws txoj hauj lwm nyob hauv peb, hos txoj sia lis rawv nws txoj hauj lwm nyob hauv nej. 13 Vim tias peb muaj tib lub tswv yim ntseeg xwb, raws li ntawv sau tseg tias: ‘Kuv ntseeg, kuv thiaj tau hais tawm.’ Peb kuj ib yam, peb ntseeg, ces peb thiaj hais tawm. 14 Peb paub tseeb tias, tus tau tsa Huab Tais Yes Xus sawv rov los, nws kuj yuav tsa peb nrog Yes Xus sawv los, thiab yuav coj peb thiab nej mus nyob ze nws. 15 Tas txhua yam yog peb ua los pab nej xwb, kom neeg coob ntxiv tuaj zuj zus tau txais txiaj ntsim, ces txoj kev ua Ntuj tsaug yuav muaj ntau tas mus li ua kom Tswv Ntuj nto koob meej.

NPN       126:   1BC-2AB, 2CD-3, 4-5, 6

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Thaum HUAB TAIS coj Xis Yoos cov neeg nyob txim rov los,
peb zoo li ib co neeg ua npau suav.
Peb lub ncauj muaj suab luag nqhua,
peb tus nplaig qw nkauj zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Tej pej kum cuab hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab kawg nkaus.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

HUAB TAIS, thov koj sau peb cov neeg rov qab los
xws li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev lom zem.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Thaum mus, lawv quaj kua muag poob,
vim lawv ris cov seev noob,
thaum rov los, lawv hu nkauj zoo siab,
vim lawv ris cov res nplej tshiab los.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

As Les Lus Yas:       ZAM  15:   16

Txais: As les lus yas, as les lus yas.

Huab Tais hais tias: kuv xaiv nej tawm ntawm ntiaj teb los
kom nej mus txi ib co txiv uas yuav tsis txawj phem.

Txais: As les lus yas, as les lus yas.

Ntawv Moo Zoo:       MT  20:   20-28

20 Ntxes Npes Dais ob tug tub leej niam nrog nws ob tug tub txav los ze Yes Xus, nws txhos caug ntua thov ib yam ntawm Yes Xus. 21 Yes Xus hais rau nws tias : “Koj xav tau dab tsi ?” Leej niam hais rau Yes Xus tias : “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.” 22 Yes Xus teb tias : “Nej tsis paub qhov nej thov. Neb puas haus taus lub ntim uas kuv yuav haus ?” Nkawd teb tias : “Wb haus taus.” 23 Yes Xus hais rau nkawd tias : “Kuv lub ntim, mas neb yuav haus, tab sis qhov yuav tau zaum ntawm kuv sab xis thiab sab laug, tsis yog kuv yuav muab rau neb. Kuv Txiv npaj qhov ntawd rau leej twg, mas yog leej twg tug."
24 Kaum leej thwj tim hnov cov lus thov ntawd, lawv npau taws rau nkawd ob kwv tij. 25 Ces Yes Xus hu lawv kom txav los ze nws, nws hais tias : “Nej paub tias cov thawj tswj tsoom kuj cuab kav pej xeem nruj, cov loj ua kom luag pom tias lawv muaj peev xwm tswj pej xeem. 26 Tab sis nyob hauv nej, mas yuav tsis txhob muaj li ntawd : leej twg xav ua tus loj nyob hauv nej, mas nws yuav ua nej tus tub txib. 27 Leej twg xav ua tus thawj nyob hauv nej, mas nws yuav ua nej tus qhev. 28 Yog vim li ntawd, Neeg Leej Tub tsis tuaj nyob ntiaj teb no kom luag tsob hwb nws. Nws tuaj tsob hwb sawv daws, thiab muab nws txoj sia los ua nqi txhiv coob leej.”

TIM 26 LUB 7 HLI 2018

Hnub Tsib Lis Piam Kaum Rau Nruab Xyoo B Nruab Lis Piam Xyoo II

Hwm LN Yuas Kis thiab As Nas, Niam Mab Liab niam thiab txiv

Zaj Nyeem Ib: YES LES MIAS 2: 1-3, 7-8, 12-13

1 HUAB TAIS hais nws lo lus rau kuv li no: 2 "Koj mus qw kom Yes Lus Xas Les hnov, koj hais tias: ‘Huab Tais hais li no: Kuv nco txog thaum koj hluas, koj npuab kuv nyiam kuv, koj hlub kuv li tus nkauj nyab tshiab; koj raws kuv mus hauv teb chaws suab puam, hauv lub teb chaws tsis tau cog qoob cog loo. 3 His Xas Lais yog qhov ntshiab rau HUAB TAIS, yog HUAB TAIS thawj phaum qoob uas siav. Leej twg noj cov qoob ntawd mas nws ua txhaum, nws yuav raug xwv txheej.” HUAB TAIS ceeb toom li ntawd.
7 “Kuv tau coj nej los nyob hauv ib lub teb chaws muaj vaj txiv ntoo, kom nej tau noj nws cov txiv thiab saj nws tej yam zoo. Nej tau nkag los nyob thiab nej ua kuv lub teb chaws puas tas phem tas, nej muab kuv lub cuab tam hloov ua ib yam tsiv saib. 8 Cov Leej Choj tsis nug txog tias: ‘HUAB TAIS nyob qhov twg?’ Cov ceev Txoj Cai twb tsis paub kuv li. Cov tswv zov yaj ntxeev siab rau kuv. Cov yaj saub tuav txog Npas Has lub npe ua saub, lawv mus raws tej yam twb tsis muaj nqes.
12 Cov txheej ntuj, nej yuav ceeb tas rau qhov no, nej yuav ntshai, thiab nej yuav poob siab loj !” Yog HUAB TAIS lo lus ceeb toom.
13 “Kuv haiv neeg tau ua ob yam phem: Lawv tso kuv pov tseg, kuv uas yog lub qhov dej txhawv muaj txoj sia, thiab lawv mus khawb dua tej lub qhov dej, uas yog cov qhov dej tawg ntim tsis tau dej."

NPN 36: 6-7AB, 8-9, 10-11

Txais: (10a) Huab Tais, koj yog lub qhov dej txhawv pub txoj sia.

HUAB TAIS, koj txoj kev khuv leej siab txij lub ntuj,
koj lub siab pheej xeeb sawv siab txij saum cov huab.
Koj txoj kev ncaj siab li Tswv Ntuj cov roob siab,
koj txoj kev txiav txim tob li qab thu hiav txwv tob

Txais: (10a) Huab Tais, koj yog lub qhov dej txhawv pub txoj sia.

Tswv Ntuj, koj txoj kev khuv leej muaj nuj nqis ua luaj !
Me nyuam neeg tuaj nkaum hauv koj qab tis qhov ntxoov.
Lawv tau noj txaus siab tej yam zoo tshaj hauv koj tsev,
koj ce koj tus dej qab ntshiab si rau lawv haus.

Txais: (10a) Huab Tais, koj yog lub qhov dej txhawv pub txoj sia.

Vim koj yog lub qhov dej txhawv pub txoj sia,
Nyob hauv koj qhov pom kev peb pom qhov pom kev.
Thov koj hlub tas mus li cov neeg uas lawv paub koj,
koj pub kev ncaj rau cov neeg muaj lub siab ncaj.

Txais: (10a) Huab Tais, koj yog lub qhov dej txhawv pub txoj sia.

As Les Lus Yas: MT 11: 25

Txais: As les lus yas, as les lus yas..

Kuv cav txog koj, Leej Txiv, Huab Tais kav lub ntuj lub teb,
vim koj tau qhia rau cov neeg me kom lawv paub txog lub Ceeb tsheej. .

Txais: As les lus yas, as les lus yas

Ntawv Moo Zoo: MT 13: 10-17

10 Cov thwj tim txav los ze Yes Xus, lawv hais rau nws tias : "Vim li cas koj thiaj ua paj lug hais lus rau cov neeg ?" 11 Yes Xus teb rau lawv tias : "Vim tias Ntuj pub kom nej paub txog tej yam tob hauv Ntuj lub Ceeb Tsheej, tab sis Ntuj tsis pub rau cov ntawd paub. 12 Tus uas twb muaj lawm, mas Ntuj yuav pub ntxiv rau nws kom nws nplua nuj. Hos tus tsis muaj, mas qhov me me nws muaj tseem yuav raug muab thau tawm mus. 13 Vim li ntawd, kuv thiaj ua paj lug hais rau lawv, vim tias lawv ntsia los lawv tsis pom, lawv hnov los lawv tsis mloog thiab tsis to taub. 14 Lawv thiaj ua raws li cov lus uas Yaj Saub His Xais xub hais tseg tias : ‘Nej pob ntseg hnov, los nej yuav tsis to taub ; nej ntsia, los nej yuav tsis pom.’ 15 Haiv neeg no lub siab qhwv dhau, lawv pob ntseg tsis hnov lus thiab lawv qi qhov muag, vim lawv ntshai tsam lawv qhov muag pom, thiab tsam lawv pob ntseg hnov lus, ces lawv lub siab yuav to taub ces lawv yuav tsum hloov siab, thiab kuv yuav kho tau lawv zoo. 16 Hos nej, mas nej qhov muag tau txoj hmoov zoo, vim nej qhov muag pom kev; nej pob ntseg tau txoj hmoov zoo, vim nej pob ntseg hnov lus. 17 Kuv hais tseeb rau nej, cov yaj saub thiab cov neeg siab ncaj thaud coob leej ntshaw pom yam uas nej pom, tab sis lawv tsis tau pom, ntshaw hnov yam uas nej hnov, tab sis lawv tsis tau hnov !”

TIM 27 LUB 7 HLI 2018

Hnub Rau Lis Piam Kaum Rau Nruab Xyoo B Nruab Lis Piam Xyoo II

Zaj Nyeem Ib: YLM 3: 14-17

14 HUAB TAIS hais tias: "Cov tub ki fav xeeb, nej cia li tig rov los cuag kuv vim kuv yog nej tus Tswv. Kuv yuav sau nej ib tug hauv ib lub nroog, ob tug hauv ib lub xeem, thiab coj nej los nyob pem Xis Yoos. 15 Kuv yuav tsa ib co tswv zov yaj uas kuv nyiam rau nej. Lawv yuav ua neeg txawj xav thiab xyuam xim los coj nej saib nej.” 16 Huab Tais kuj hais tias: “Thaum nej huam vam tuaj thiab tu tau tub ki nyob hauv lub teb chaws lawm, mas lub caij ntawd lawv yuav tsis hais txog HUAB TAIS lub Xab Cog Lus ntxiv; nws yuav tsis nyob ruj rawv hauv lawv lub siab, ces lawv yuav tsis tshua tsis nco txog nws lawm, lawv yuav tsis txua dua lwm lub ntxiv. 17 Thaum lub caij ntawd lawv yuav hu Yes Lus Xas Les ua : ‘HUAB TAIS lub theej kiab.’ Txhua haiv neeg yuav tuaj sib sau sib txoos ua ke nyob ntawd, kom tau hwm Huab Tais lub npe nyob Yes Lus Xas Les. Lawv yuav tsis taug txoj kev ua neeg twm xeeb mloog lawv lub siab phem ntxiv.

NPN YLM 31: 10, 11-12ABCD, 13

Txais: (10d) Huab Tais yuav saib peb xws li tus tswv zov yaj saib nws pab yaj.

Cov haiv neeg, nej mloog Huab Tais lo lus,
nej muab tshaj tawm rau cov pov txwv hnov, nej hais tias:
Tus uas tau cais kom His Xas Lais tawg ua ntau pab,
zaum no nws sau lawv rov los nyob ua ke,
Nws saib lawv xws li tus tswv zov yaj saib nws pab yaj.

Txais: (10d) Huab Tais yuav saib peb xws li tus tswv zov yaj saib nws pab yaj.

Huab Tais yuav rov txhiv Yas Kos,
nws yuav npo Yas Kos ntawm tus ntaus yeej lawv txhais tes.
Lawv yuav ke qw ke taug kev nce lub roob Xis Yoos,
lawv yuav tuaj sis dug tuaj mus txais Huab Tais txoj
koob hmoov zoo: uas yog nplej, cawv, roj, yaj thiab nyuj.

Txais: (10d) Huab Tais yuav saib peb xws li tus tswv zov yaj saib nws pab yaj.

Cov nkauj xwb yuav ua lom zem thiab yuav seev cev,
cov nraug xwb thiab cov neeg laus kuj yuav ua ib yam.
Kuv yuav hloov lawv txoj kev quaj kev nyiav ua kev zoo siab;
kuv yuav nplij lawv thiab yuav hloov lawv kev tu siab ua kev zoo siab.

Txais: (10d) Huab Tais yuav saib peb xws li tus tswv zov yaj saib nws pab yaj.

As Les Lus Yas: LK 8: 15

Txais: As Les Lus Yas, as les lus yas.

Lawv txoj hmoov zoo, cov uas muaj ib lub siab dav coj raws lo lus,
lawv txi taus txiv vim lawv mob siab coj nraim tsis tso tseg.

Txais: As Les Lus Yas, as les lus yas.

Ntawv Moo Zoo: MT 13: 18-23

Yes Xus hais rau nws cov thwj tim tias:
18 “Nej yuav mloog zaj paj lug hais txog tus neeg tseb nplej lub ntsiab. 19 Ib tug neeg tau hnov Lo Lus qhia txog Ntuj lub Ceeb Tsheej, tiam sis nws tsis to taub; thaum tus Phem tuaj txog, nws nyiag tshem yam uas tau muab tseb rau hauv tus ntawd lub siab tawm: tus ntawd yog lub noob nplej uas poob rau ntawm ntug kev. 20 Lub noob uas poob rau hauv cov av pob zeb, yog tus neeg uas thaum nws hnov Lo Lus, nws zoo siab hlo txais tam sis ntawd. 21 Tab sis nws tsis muaj cag nyob hauv nws, ces kav tsis ntev: thaum muaj kev txom nyem los muaj kev raug luag hiam vim Lo Lus, mas nws thim tam sis ntawd. 22 Lub noob uas poob rau hauv cov pos, yog tus uas hnov Lo Lus, tab sis ntiaj teb kev txob xeeb, thiab nyiaj txiag tej kev haub kev ntxias laum Lo Lus, ces Lo Lus txi tsis taus txiv. 23 Lub noob uas poob rau hauv cov av zoo, yog tus uas hnov Lo Lus, nws to taub Lo Lus, ces nws txi txiv. Tej tug txi ib puas lub, tej tug txi rau caum lub, hos tej tug txi peb caug lub.”

TIM 28 LUB 7 HLI 2018

Hnub Xya Lis Piam Kaum Rau Nruab Xyoo B Nruab Lis Piam Xyoo II

Zaj Nyeem Ib: YES LES MIAS 7: 1-11

1 HUAB TAIS hais rau Yes Les Mias li no : 2 "Koj mus sawv nyob ntawm lub qhov rooj chaws mus hauv HUAB TAIS lub tuam tsev, koj tshaj lo lus no nyob ntawd : Cov Yus Das sawv daws uas nej chaws cov qhov rooj no mus pe hawm HUAB TAIS, nej mloog HUAB TAIS lo lus. 3 Tus HUAB TAIS Xas Npas Os, His Xas Lais tus Tswv Ntuj hais li no: Nej kho nej tus yeeb yam thiab nej tej hauj lwm kom zoo, kuv thiaj yuav ua kom nej tau nyob hauv thaj chaw no. 4 Nej tsis txhob cia siab rau lo lus dag tias : ‘Lub tsev no yog HUAB TAIS lub, yog HUAB TAIS lub tsev ! Yog Huab Tais lub tsev!’ 5 Yog nej kho nej tus yeeb yam thiab nej tej hauj lwm kom zoo, yog nej txhua tus muaj lub siab nrhiav txoj kev ncaj tiag, nyias ua ncaj rau cov neeg nyob ze nyias, 6 yog nej tsis yuam cov pej kum neeg, cov me nyuam ntsuag thiab cov poj ntsuam, yog nej tsis ua kom cov neeg tsis muaj txhaum ntshav nrog nyob thaj chaw no, yog nej tsis mus teev lwm cov tswv ntuj kom nej tau hmoov phem, 7 mas kuv yuav ua kom nej tau nyob hauv thaj chaw no, hauv lub teb chaws uas thaum ub los lawm kuv tau muab rau nej cov yawg koob nyob mus li. 8 Tab sis ntawm nej mas nej tso siab rau tej lus dag, tej lus tsis muaj nqes dab tsi rau nej. 9 Puas tsim nyog nej ua tub sab, nej tua neeg, nej zes luag txij luag nkawm, nej tsa tes rau ntuj cog lus cuav, nej hlawv xyab hlawv ntawv rau Npas Has, nej mus teev lwm cov tswv ntuj uas nej tsis paub, 10 thiab nej tseem ho tuaj nyob ntawm kuv xub ntiag hauv lub tsev no, uas ris kuv lub npe, nej hais tias : ‘Tsis muaj dab tsi yuav raug peb li,’ ces nej yeej tseem ua tas puas tsav yam phem ntawd ntxiv thiab? 11 Puas yog nej saib tias lub tsev uas ris kuv lub npe no ces tsuas yog tub sab lub chaw nkaum xwb? Tiam sis kuv pom ntsoov tej nej ua.” HUAB TAIS hais li ntawd.

NPN 84: 3, 4, 5-6A+8A, 11

Txais: (2) Huab Tais Tswv Ntuj muaj hwj huam,
koj lub tuam tsev zoo xis siab ua luaj!

Kuv tus plig ntshaw seev yees yuj plaws
rau HUAB TAIS cov tshav loog.
Kuv lub siab lub cev quaj qw hu
txog tus Tswv Ntuj muaj txoj sia.

Txais: (2) Huab Tais Tswv Ntuj muaj hwj huam,
koj lub tuam tsev zoo xis siab ua luaj!

Tab cov me noog ntxias nrhiav tau chaw nyob,
noog luv nrhiav tau zes puag nws cov me nyuam,
nyob ntawm koj cov thaj txi ntuj,
HUAB TAIS kav tsoom tshiab,
kuv tus vaj, kuv tus Tswv Ntuj!

Txais: (2) Huab Tais Tswv Ntuj muaj hwj huam,
koj lub tuam tsev zoo xis siab ua luaj!

Cov neeg nyob hauv koj tsev lawv txoj hmoov zoo :
lawv tau kev cav txog koj mus li tsis tseg.
Cov uas saib koj yog lawv lub zog, lawv txoj hmoov zoo.
Lawv yim mus kev lawv lub zog yim loj tuaj.

Txais: (2) Huab Tais Tswv Ntuj muaj hwj huam,
koj lub tuam tsev zoo xis siab ua luaj!

Kuv yeem nyob ib hnub hauv koj cov tshav puam
zoo dua nyob ib txhiab hnub lwm qhov chaw,
kuv yeem nyob ntawm kuv tus Tswv Ntuj taw rooj
zoo dua nyob hauv tus neeg phem lub tsev tsam phooj.

Txais: (2) Huab Tais Tswv Ntuj muaj hwj huam,
koj lub tuam tsev zoo xis siab ua luaj!

As Les Lus Yas: YAS KOS 1: 21BC

Txais: As les lus yas, as les lus yas.

Nej qhib ib lub siab me txais Lo Lus
uas Ntuj muab cog rau hauv nej lawm;
Lo Lus ntawd yuav cawm tau nej tus plig.

Txais: As les lus yas, as les lus yas.

Ntawv Moo Zoo: MT 13: 24-30

24 Yes Xus tseem hais dua ib zag paj lug tias : "Ntuj lub Ceeb Tsheej zoo li ib tug neeg tseb ib co noob zoo rau hauv nws daim teb. 25 Thaum sawv daws tsaug zog tas, nws tus yeeb ncuab tuaj tseb ib co noob nroj rau hauv cov nplej tas ces nws rov qab mus lawm. 26 Txij thaum nplej hlob txog nplej txhawv, nroj kuj tawm tuaj thiab. 27 Cov tub txib tuaj hais rau tus tswv qoob tias : "Huab Tais, koj tau tseb ib co noob qoob zoo rau hauv koj daim teb los tsis sub ? Ua cas thiaj muaj nroj, yog los qhov twg los ?" 28 Tus tswv qoob teb rau lawv tias : "Yog ib tug yeeb ncuab ua qhov ntawd." Cov tub txib hais rau tus tswv tias : "Koj puas xav kom peb mus dob cov nroj pov tseg ?" 29 Tus tswv teb tias : "Kuv tsis xav ! Tsam thaum nej dob nroj, nej rho tau nplej nrog thiab. 30 Nej cia nroj nrog nplej hlob ua ke mus txog lub caij sau nplej. Thaum txog caij sau qoob, kuv mam hais rau cov sau nplej tias : Nej xub sau cov nroj pav ua tej teg cia yuav hlawv, hos nej sau cov nplej mus rau hauv kuv lub txhab."

TIM 30 LUB 7 HLI 2018

Hnub Ob Lis Piam Kaum Xya Nruab Xyoo B Nruab Lis Piam Xyoo II

Hwm LN Peter Chrysologus

Zaj Nyeem Ib: YLM 13: 1-11

1 HUAB TAIS hais rau kuv li no : "Koj mus muas ib txog siv ntaub maj, koj muab sia duav, koj tsis txhob muab nws raus dej." 2 Ces kuv mus muas ib txog siv raws li HUAB TAIS lo lus, thiab kuv muab sia ntawm duav. 3 HUAB TAIS rov hais lus zaum ob rau kuv dua, nws hais li no : 4 "Koj nqa txoj siv uas koj muas los thiab koj muab sia duav, koj sawv, koj mus lawm nram Pas Las, koj muab txoj siv zais rau hauv ib qho kis zeb." 5 Ces kuv mus zais txoj siv nyob nram Pas Las raws li HUAB TAIS qhia kom ua. 6 Ib ntus ntev tom qab, HUAB TAIS hais rau kuv tias : "Koj sawv mas ! Koj mus nram Pas Las, koj mus nqa txoj siv uas kuv kom koj coj mus zais rau nrad rov los." 7 Kuv thiaj rov mus nram Pas Las, kuv mus nrhiav tau qhov chaw, ces kuv rub txoj siv hauv qhov chaw kuv zais nws los. Txoj siv twb lwj tas tsis zoo ua dab tsi lawm! 8 Ces HUAB TAIS hais ib lo lus rau kuv tias : 9 "HUAB TAIS hais li no: Kuv kuj yuav ua zoo li ntawd los rhuav Yus Das txoj kev muab hlob, thiab rhuav Yes Lus Xas Les txoj kev muab hlob loj. 10 Haiv neeg siab phem ntawd tsis xav mloog kuv cov lus, lawv mus ywj lawv lub siab twm xeeb xwb, lawv mus raws lwm cov tswv ntuj, mus tsob hwb thiab pe hawm cov ntawd. Lawv yuav zoo li txoj siv uas tsis zoo ua dab tsi ntxiv ntawd lawm. 11 Xws li txoj siv khi rawv ntawm tus neeg duav, kuv tau muab tas His Xas Lais tsev neeg thiab tas Yus Das tsev neeg los khi rau kuv,” HUAB TAIS hais li ntawd, “kom lawv ua kuv haiv neeg, kuv lub koob meej, kuv lub meej mom zoo nkauj. Tab sis lawv tsis mloog li !"

NPN TXOJ CAI OB 32: 18-19, 20, 21

Txais: (18a) Nej tsis nco qab Tswv Ntuj tus uas tau yug nej lawm.

Nej tsis quav ntsej txog lub Tsua uas tau xeeb nej,
Nej tsis nco qab Tswv Ntuj tus uas tau yug nej lawm.
Thaum HUAB TAIS pom li ntawd, nws ntxub kawg nkaus
thiab nws npau taws heev rau nws cov tub cov ntxhais.

Txais: (18a) Nej tsis nco qab Tswv Ntuj tus uas tau yug nej lawm.

Nws hais tias: “Kuv yuav zais kuv lub ntsej muag ntawm lawv,
ces kuv yuav pom saib lawv yuav mus xaus zoo li cas.
Lawv yog ib haiv neeg lub siab hloov sai sai,
yog ib co tub ki phem tsis muaj kev pheej xeeb nyob hauv lawv.”

Txais: (18a) Nej tsis nco qab Tswv Ntuj tus uas tau yug nej lawm.

“Vim lawv hais tias ‘tsis muaj Tswv Ntuj’ thiaj ua rau kuv khib,
thiab lawv mus teev dab teev mlom ua rau kuv npau taws,
Kuv kuj yuav ua kom lawv khib vim ib haiv neeg tsis tseem ceeb;
kuv yuav siv ib haiv neeg ruam los ua kom lawv npau taws.

Txais: (18a Nej tsis nco qab Tswv Ntuj tus uas tau yug nej lawm.

As Les Lus Yas: YK 1: 18

Txais: As les lus yas, as les lus yas.

Leej Txiv pom zoo yug peb ntawm lo lus tseeb los,
kom peb yog zoo li thawj cov txiv txi hauv tej yam nws tsim los.

Txais: As les lus yas, as les lus yas.

Ntawv Moo Zoo: MT 13: 31-35

31 Yes Xus tseem hais ib zag paj lug rau lawv li no : "Ntuj lub Ceeb Tsheej zoo li ib lub noob zaub roj uas ib tug neeg nqa mus tseb rau hauv nws daim teb. 32 Lub noob ntawd me tshaj txhua hom noob, tab sis thaum nws loj lawm, nws siab dua lwm cov zaub huv tib si. Nws loj luaj li ib tsob ntoo, ces tej noog ya saum ntuj los ua zes rau saum nws cov ceg."
33 Yes Xus tseem hais dua ib zag paj lug tias : "Ntuj lub Ceeb Tsheej zoo li ib co poov xab uas ib tug poj niam muab xyaw rau peb kawg hmoov nplej mus txog thaum uas tas cov hmoov ntawd su tuaj.”
34 Yes Xus qhia ib puas tsav yam ntawd rau zeej tsoom, mas nws ua paj lug hais, tsis muaj ib yam uas nws tsis ua paj lug hais li, 35 kom thiaj muaj raws li tus yaj saub tau hais tseg tias : “Kuv yuav qhib ncauj hais paj lug, kuv yuav tshaj tawm txog tej yam zais cia txij thaum ntuj tsim teb raug los lawm.”

TIM 31 LUB 7 HLI 2018

Hnub Peb Lis Piam Kaum Xya Nruab Xyoo B Nruab Lis Piam Xyoo II

Hwm LN Ignatius nyob Loyola

Zaj Nyeem Ib: YES LES MIAS 14: 17-22

17 Koj yuav hais lo lus no rau lawv : "Kuv kua muag poob nruab hnub hmo ntuj tsis muaj caij so li, vim kuv haiv neeg tus ntxhais nkauj xwb tsim txiaj raug puas loj lawm, nws muaj ib lub qhov txhab mob hnyav kawg nkaus. 18 Yog kuv tawm mus tom nruab liaj nruab teb, mas pom neeg raug ntaj tua. Yog kuv mus hauv nroog, mas pom neeg mob qaug luas vim tshaib plab. Tab yog tus Yaj Saub los tus Leej Choj, lawv mus ncig ib qho dhau ib qho, tsis paub yuav ua dab tsi ntxiv.
19 Puas yog koj muab Yus Das xyeeb hlo pov tseg lawm? Puas yog vim Xis Yoos dhuav koj dhau ? Ua cas koj thiaj cia peb raug puas loj li no? Tsis muaj kev yuav rov kho tau peb li. Peb tos txoj kev thaj yeeb, tab sis tos tsis tau dab tsi li. Peb tos lub caij peb tus mob yuav zoo, tab sis peb tsuas pom kev ntshai tuav plig rawv xwb. 20 HUAB TAIS, peb lees tias peb lub siab phem, peb lees paub peb cov yawg koob tej kev txhaum, peb tau ua txhaum rau koj lawm tiag. 21 Thov koj txuag koj lub npe, koj tsis txhob ntiab peb. Koj tsis txhob cia lub theej kiab txawb koj lub hwj chim poob koob meej. Thov koj nco ntsoov lo lus koj tau nrog peb cog, koj tsis txhob muab thim. 22 Nyob hauv tsoom haiv neeg tej mlom dab qhuas, puas muaj ib tug txawj ua kom los nag? Puas yog lub ntuj tso nag los nws tus kheej? HUAB TAIS peb tus Tswv Ntuj, koj ib leeg yog tus peb tso siab rau. Koj ib leeg yog tus ua tau tas puas tsav yam ntawd."

NPN 79: 8, 9, 11+13

Txais: (9) Huab Tais, thov koj cawm peb, kom koj lub npe nto koob meej.

Thov koj txhob nco txog peb txheej thaud tej txhaum ntxiv;
coj koj txoj kev khuv leej tuaj rau peb sai sai,
vim peb poob rau qhov qis kawg nkaus lawm.

Txais: (9) Huab Tais, thov koj cawm peb, kom koj lub npe nto koob meej.

Thov koj pab peb, Tswv Ntuj peb tus cawm seej,
vim koj lub npe muaj koob meej loj;
Thov cawm peb thiab zam peb cov txhaum rau peb
vim koj lub npe zoo..

Txais: (9) Huab Tais, thov koj cawm peb, kom koj lub npe nto koob meej.

Thov koj cia cov neeg nyob txim lub suab nroo nrov tuaj txog koj;
koj siv koj lub hwj huam loj los cawm cov neeg poob rau kev tuag.
Ces peb, uas yog koj haiv neeg thiab pab yaj nyob hauv koj lub nras zaub
yuav ua koj tsaug mus li tsis muaj caij kawg;
tiam dhau tiam peb yuav cav txog koj lub koob meej.

Txais: (9) Huab Tais, thov koj cawm peb, kom koj lub npe nto koob meej.

As Les Lus yas

Txais: As les lus yas, as les lus yas.

Lub noob nplej yog Tswv Ntuj lo lus, Leej Pleev yog tus tseb nplej;
Txhua leej uas tuaj cuag nws yuav ciaj nyob mus li.

Txais: As les lus yas, as les lus yas.

Ntawv Moo Zoo: MT 13: 36-43

36 Yes Xus tso tsoom sid tseg, nws rov mus hauv lub tsev. Nws cov thwj tim txav los hais rau nws tias : "Koj txhais zaj paj lug hais txog nroj tuaj hauv daim teb rau peb saib." 37 Yes Xus teb rau lawv tias : "Tus tseb cov noob zoo, yog Neeg Leej Tub. 38 Daim teb, yog lub qab ntuj neeg. Cov noob zoo, yog cov tub ki hauv lub Ceeb Tsheej. Cov nroj, yog tus Phem cov tub. 39 Tus yeeb ncuab uas tseb cov noob nroj, yog tus Dab Phem. Lub caij sau nplej, yog lub zim txwv kawg. Cov tub sau nplej, yog cov Tshiab. 40 Ib yam li cov nroj tsuas kawg yuav raug muab sau los hlawv hauv hluav taws, lub zim txwv kawg kuj yuav zoo ib yam li ntawd : 41 Neeg Leej Tub yuav xa nws cov Tshiab tuaj, lawv yuav sau tas txhua tus uas coj neeg mus ua txhaum thiab tas cov neeg ua phem huv tib si tawm hauv nws lub Ceeb Tsheej mus, 42 thiab yuav muab lawv pov rau hauv lub qhov hluav taws uas kub ntaiv; nyob hauv, sawv daws yuav quaj laug laws thiab yuav tom hniav nkawv. 43 Ces cov neeg siab ncaj yuav ci ntsa iab zoo li lub hnub nyob hauv lawv Txiv lub Ceeb Tsheej. Leej twg muaj pob ntseg, yeej meem mloog.”

TIM 1 LUB 8 HLI 2018

Hnub Plaub Lis Piam Kaum Xya Nruab Xyoo B Nruab Lis Piam Xyoo II
Hwm LN Alphonsus Liguouri, ua Tswv Qhia thiab Kws Txuj Ntshiab

Zaj Nyeem Ib: YES LES MIAS 15: 10, 16-21

10 “Kuv niad, kuv txoj hmoov phem, vim koj yug kuv los yog ib tug neeg ua kom tas lub teb chaws tsis sib haum, sib cav sib ceg. Kuv tsis tau qiv tsis tau txais dab tsi, tsis kav sawv daws foom kuv phem.
16 HUAB TAIS, thaum kuv nrhiav tau koj cov lus, kuv muab nqos tas. Koj cov lus ua rau kuv puv siab, ua rau kuv zoo siab nyob puag hauv nruab plaw, vim luag hu kuv raws koj lub npe, HUAB TAIS tus Tswv Ntuj kav tsoom tshiab. 17 Kuv tsis tau zaum luag nrog cov neeg nyiam hais lus thuam neeg, kuv cia koj txhais tes tuav kuv, kuv zaum kuv ib cag, vim koj ua kom kuv lub siab npau taws. 18 Vim li cas kuv lub mob thiaj tsis muaj caij xaus, kuv lub qhov txhab thiaj kho tsis tau kom zoo, los yog tsis kam zoo li? Koj zoo li yog ib tug dej ntxias kuv dag kuv xwb, tso siab tsis tau rau !”
19 Ces HUAB TAIS teb li no : “Yog koj tig rov los, mas kuv yuav rov tsa koj dua, koj yuav los sawv nyob ntawm kuv xub ntiag. Yog koj txawj muab tau qhov zoo tawm ntawm qhov phem los , mas koj yuav yog kuv lub qhov ncauj. Lawv yuav rov los cuag koj, hos koj yuav tsis txhob mus cuag lawv ! 20 Kuv yuav tsa koj ua ib lub ntsa loog tooj ruaj khov rau haiv neeg ntawd. Lawv yuav tsa rog ntaus koj, tab sis lawv yuav tsis yeej koj, vim kuv nrog koj nyob, kuv cawm koj thiab npo koj dim.” Yog HUAB TAIS lo lus ceeb toom. 21 “Kuv yuav npo koj ntawm cov neeg siab phem txhais tes thiab kuv yuav txhiv koj tawm ntawm cov neeg siab heev lub xib teg los."

NPN 59: 2-3, 4, 10-11, 17, 18

Txais: (17d) Hnub muaj kev nyuaj siab, Tswv Ntuj yog kuv qhov chaw nkaum.

Kuv tus Tswv Ntuj, thov koj npo kuv dim ntawm kuv cov yeeb ncuab ;
thov koj txuag kuv ntawm cov neeg tuaj tua kuv.
Thov npo kuv ntawm cov neeg ua phem rau kuv,
cawm kuv ntawm cov neeg siab nyoos.

Txais: (17d) Hnub muaj kev nyuaj siab, Tswv Ntuj yog kuv qhov chaw nkaum.

Ntsia saib, lawv tuaj nyas txov kuv txoj sia;
cov neeg muaj hwj chim loj tuaj ntaus kuv.
HUAB TAIS, tsis yog vim kuv tau ua yuam kev, los ua txhaum li.

Txais: (17d) Hnub muaj kev nyuaj siab, Tswv Ntuj yog kuv qhov chaw nkaum..

Tswv Ntuj, koj yog kuv lub zog, kuv ntsia ntsoov koj.
Vim koj Tswv Ntuj, yog kuv lub yeej ntsa zeb ;
Thov kom kuv tusTswv Ntuj txoj kev hlub mus ua kuv ntej,
kom nws cia kuv pom kuv cov yeeb ncuab swb.

Txais: (17d) Hnub muaj kev nyuaj siab, Tswv Ntuj yog kuv qhov chaw nkaum.

Ntawm kuv, kuv yuav hu nkauj cav txog koj lub zog,
sawv ntxov tsees, kuv zoo siab hlo nyob hauv koj txoj kev hlub,
vim koj yog kuv lub yeej ntsa zeb khov,
yog kuv qhov chaw nkaum hnub kuv muaj kev txom nyem,.

Txais: (17d) Hnub muaj kev nyuaj siab, Tswv Ntuj yog kuv qhov chaw nkaum.

Kuv lub zog! Kuv yuav hu nkauj cav txog koj.
Tswv Ntuj, koj yog kuv lub yeej ntsa zeb khov,
yog kuv tus Tswv Ntuj muaj kev khuv leej neeg!

Txais: (17d) Hnub muaj kev nyuaj siab, Tswv Ntuj yog kuv qhov chaw nkaum.

As Les Lus Yas: ZAM 15: 15B

Txais: As les lus yas, as les lus yas.

Huab Tais hais tias: “Kuv hu nej ua phooj ywg,
vim kuv tau qhia rau nej paub tas ib puas tsav yam uas Leej Txiv hais rau kuv.”

Txais: As les lus yas, as les lus yas.

Ntawv Moo Zoo: MT 13: 44-46

Yes Xus hais rau nws cov thwj tim tias:
44 “Ntuj lub Ceeb Tsheej zoo li ib hub nyiaj faus rau hauv ib daim teb. Muaj ib tug neeg mus nrhiav tau, nws rov muab zais; nws zoo siab ces nws mus muag nws lub cuab tam tas huv si , thiab mus muas daim teb ntawd.
45 Ntuj lub Ceeb Tsheej tseem zoo li ib tug tub luam nrhiav cov hlaws npliag deg zoo nkauj.
46 Thaum nws nrhiav tau ib lub hlaws nphiag deg muaj nqi loj, nws mus muag nws lub cuab tam tas huv si, ces nws mus muas lub hlaws npliag deg ntawd.”

TIM 2 LUB 8 HLI 2018

Hnub Tsib Lis Piam Kaum Xya Nruab Xyoo B Nruab Lis Piam Xyoo II

Hwm LN Eusebius nyob Vercelli; los LN Peter Julian Eymard

Zaj Nyeem Ib: YES LES MIAS 18: 1-6

1 HUAB TAIS lo lus nrov tuaj txog Yes Les Mias li no : 2 "Koj sawv tsees ! Koj mus nram tus puab lauj kaub av tsev. Nyob nrad, kuv yuav hais kuv cov lus rau koj.” 3 Ces kuv mus nram tus puab lauj kaub av tsev, nws tab tom ua hauj lwm kiv lub kauj puab lauj kaub. 4 Thaum muaj ib lub lauj kaub tus puab lauj kaub txhais tes puab tsis tau kom zoo, mas nws rov muab cov av ntawd puab dua lwm lub xws li nws pom zoo. 5 Ces HUAB TAIS lo lus nrov tuaj rau kuv li no : 6 "His Xas Lais tsev neeg, yog kuv xav ua rau nej xws li tus puab lauj kaub ntawd ua tsis tau lod? Ntawm no yog Huab Tais hais lus. Xws li cov av nyob hauv tus puab lauj kaub txhais tes, nej kuj nyob hauv kuv txhais tes ib yam thiab os, His Xas Lais tsev neeg."

NPN 146: 1B-2, 3-4, 5-6AB

Txais: (5a) Tus muaj Yas Kos tus Tswv Ntuj pab nws mas nws txoj hmoov zoo.
los: As les lus yas.

Kuv tus plig, koj cav lus zoo txog HUAB TAIS !
Kuv yuav cav txog HUAB TAIS tas kuv sim neej,
kuv yuav hu nkauj cav txog kuv tus Tswv Ntuj
thaum kuv tseem muaj sia nyob.

Txais: (5a) Tus muaj Yas Kos tus Tswv Ntuj pab nws mas nws txoj hmoov zoo.
los: As les lus yas.

Nej txhob tso siab rau cov ua nom ua tswv,
Los rau tib neeg uas tsis muaj hwj huam cawm tau nej :
Nws txoj pa tu nrho, nws kawg rov mus ua av luaj,
thaum ntawd, tas puas tsav yam nws xav ua kuj ploj mus tas.

Txais: (5a) Tus muaj Yas Kos tus Tswv Ntuj pab nws mas nws txoj hmoov zoo.
los: As les lus yas.

Tus muaj Yas Kos tus Tswv Ntuj pab nws mas nws txoj hmoov zoo,
nws tso siab rau HUAB TAIS nws tus Tswv Ntuj,
uas yog tus tsim lub ntuj tsim lub ntiaj teb,
tsim dej ntuj thiab ib puas tsav yam nyob hauv dej.

Txais: (5a) Tus muaj Yas Kos tus Tswv Ntuj pab nws mas nws txoj hmoov zoo.
los: As les lus yas.

As Les Lus Yas: HAUJ LWM 16: 14B

Txais: As les lus yas, as les lus yas.

Huab Tais, thov koj qhib peb lub siab
Kom peb mloog koj Leej Tub cov lus.

Txais: As les lus yas, as les lus yas.

Ntawv Moo Zoo: MT 13: 47-53

Yes Xus hais rau nws cov thwj tim tias:
47 "Ntuj lub Ceeb Tsheej tseem zoo li ib lub vas uas luag pov rau hauv dej ntuj. Lub vas puav tau ntau tsav ntau hom ntses. 48 Thaum lub vas puv lawd, lawv rub lub vas los tim ntug nqhuab, ces lawv zaum xaiv cov zoo rau hauv tawb, hos muab cov tsis zoo pov tseg. 49 Thaum lub zim txwv kawg, kuj yuav zoo ib yam li ntawd thiab: cov tshiab yuav tawm tuaj, lawv yuav cais cov neeg phem ntawm cov neeg ncaj. 50 Lawv yuav muab cov neeg phem pov tseg rau hauv lub qhov hluav taws : nyob hauv, yuav quaj laug laws thiab tom hniav nkawv. 51 Nej puas to taub tas ib puas tsav yam ntawd ?" Lawv teb rau nws tias : "Peb to taub." 52 Yes Xus hais rau lawv tias : “Li ntawd, thaum ib tug Kws Ntawv Ntshiab los ua thwj tim hauv Ntuj lub Ceeb Tsheej, mas nws zoo li ib tug tswv tsev uas rho tau tej yam qub thiab tej yam tshiab hauv nws lub cuab tam los.”
53 Thaum Yes Xus hais cov paj lug no tas, nws tso qhov chaw ntawd tseg.

TIM      3      LUB      8      HLI      2018

Thawj Hnub Rau Lis Piam Kaum Xya Nruab Xyoo B Nruab lis Piam Xyoo II

Zaj Nyeem Ib:       YLM  26:   1-9

1 Thaum Zos Yas Kis, Yos Xias tub, pib ua vaj nyob Yus Das teb, HUAB TAIS ceeb toom ib lo lus li no tuaj rau Yes Les Mias : 2 "HUAB TAIS hais li no : koj mus sawv ntsug ntawm lub tshav puam nyob hauv HUAB TAIS lub tuam tsev, koj hais kuv cov lus rau tas tsoom sid uas tuaj ntawm txhua lub tsheej Yus Das tuaj pe HUAB TAIS nyob hauv HUAB TAIS tuam lub tsev. Koj yuav hais cov lus kuv qhia rau koj tas huv si, txhob tso ib los tseg. 3 Nyaj tej zaud lawv yuav mloog thiab tig rov los, nyias yuav tso nyias txoj kev phem pov tseg, ces kuv yuav thim tsis xa cov xwv txheej uas kuv npaj xa tuaj rau lawv vim lawv txoj kev ua phem. 4 Koj yuav hais rau lawv tias: HUAB TAIS hais li no : Yog nej tsis mloog kuv, tsis coj raws txoj kev cai kuv tsa nyob ntawm nej xub ntiag, 5 yog nej tsis mloog kuv cov tub txib Yaj Saub tej lus uas kuv xa tuaj rau nej tsis tseg, vim nej yeej tsis mloog lawv li, 6 mas kuv yuav ua rau lub tsev no ib yam li kuv tau ua rau Xis Laus, thiab kuv yuav ua kom lub tsheej no yog ib qho chaw uas txhua lub kuj cuab tuav txog los sib foom hmoov phem."
7 Cov Leej Choj, cov Yaj Saub thiab tas tsoom sid tau hnov Yes Les Mias hais cov lus ceeb toom ntawd nyob hauv HUAB TAIS lub tsev. 8 Thaum Yes Les Mias hais cov lus uas HUAB TAIS kom nws hais rau tsoom sid tas lawm, mas cov Leej Choj thiab cov Yaj Saub ntes Yes Lis Mias. Lawv qw rau nws tias : 9 "Koj yuav tsum tuag! Vim li cas koj tuav txog HUAB TAIS lub npe los ceeb toom tias lub tsev no yuav zoo li Xis Laus thiab lub tsheej no yuav puas tas, yuav tsis tshuav neeg nyob hauv ntxiv?" Ces tas tsoom pej xeem txav los ntsauv vij vog Yes Les Mias nyob hauv HUAB TAIS lub tuam tsev.

NPN      69:   5, 8-10, 14

Txais: (14c) Huab tais, thov koj teb kuv vim koj muaj kev hlub loj tas nrho.

Cov neeg ntxub kuv ntau tshaj kuv cov plaub hau saum taub hau,
lawv ntxub kuv tsis muaj hauv paus hauv ntsis.
Cov neeg uas xav muab kuv tua muaj coob;
Kuv cov yeeb ncuab liam tej yam cuav rau kuv.
Yam kuv tsis tau nyiag, kuv puas yuav tsum xa rov qab?

Txais: (14c) Huab tais, thov koj teb kuv vim koj muaj kev hlub loj tas nrho.

Yog vim koj kuv thiaj raug luag tsawm,
yog vim koj, kuv thiaj tau txaj muag.
Kuv cov kwv tij saib kuv yog ib tug qhua,
kuv niam cov tub saib kuv yog pej kum neeg.
Vim kuv kub siab rau koj lub tsev,
Yog lawv thuam koj, lawv tej lus thuam poob los rau saum kuv.

Txais: (14c) Huab tais, thov koj teb kuv vim koj muaj kev hlub loj tas nrho..

Ntawm kuv, HUAB TAIS, kuv teev ntuj thov txog koj
Thaum lub caij zoo sij hawm rau koj.
Tswv Ntuj, koj lub siab hlub loj tas nrho, thov koj teb kuv,
vim koj yog txoj kev cawm tsis muaj qhov dag.

Txais: (14c) Huab tais, thov koj teb kuv vim koj muaj kev hlub loj tas nrho.

As Les Lus Yas:       1 PZ  1:   25

Txais: As les lus yas, as les lus yas.

Huab Tais Lo Lus nyob mus li ib txhiab ib txhis,
Yog lo lus uas twb muab tshaj tawm rau nej lawm.

Txais: As les lus yas, as les lus yas.

Ntawv Moo Zoo:       MT  13:   54-58

54 Yes Xus rov mus txog lub zos nws hlob, nws qhia tsoom sid nyob hauv lawv lub tsev txoos. Lawv qhuas, ces sawv daws hais tias : "Lub tswv yim thoob tsib, thiab cov hwj huam yees ntxwv ntawd, nws tau qhov twg los ? 55 Tus ntawd, tsis yog tus kws ntoo tus tub lod ? Nws niam tsis yog tus hu ua Mab Liab no lod ? Thiab nws cov kwv tij tsis yog Yas Kos, Yos Xes, Xis Moos thiab Yus Das lawv lod ? 56 Hos tas nws cov muam tib si, tsis yog cov nrog peb nyob ua ke ntawm no lod ? Tas ib puas tsav yam nws ua tau ntawd, los qhov twg los ?" 57 Yes Xus ua lawv poob siab. Nws hais rau lawv tias : "Ib tug yaj saub, tsuas yog nyob hauv lub zos nws hlob thiab nyob hauv nws tsev neeg, luag thiaj saib nws tsis muaj nqis." 58 Yes Xus tsis ua hwj huam yees ntxwv ntau nyob ntawd, vim lawv tsis ntseeg.

TIM 4 LUB 8 HLI 2018

Hnub Xya Lis Piam Kaum Xya Nruab Xyoo B Nruab Lis Liam Xyoo II

Hwm LN John Vianney, ua Leej Choj

Zaj Nyeem Ib: YLM 26: 11-16, 24

11 Cov Leej Choj thiab cov Yaj Saub hais rau cov ntaus thawj thiab rau tas tsoom pej xeem tias : "Tus neeg ntawd tsim nyog raug lub txim tuag, vim nws ua yaj saub hais tej lo lus phem txog lub tsheej no. Nej pob ntseg twb tau hnov tas lawm." 12 Yes Les Mias hais rau tsoom pej xeem thiab rau cov ntaus thawj tias : "Yog HUAB TAIS xa kuv tuaj ceeb toom cov lus txog lub tsev no thiab txog lub nroog no xws li nej tau hnov. 13 Nyiam no nej yuav tsum kho nej tus yeeb yam thiab nej tej hauj lwm kom zoo tuaj ! Nej mloog nej tus HUAB TAIS Tswv Ntuj lub suab mog ! Ces HUAB TAIS yuav tso tseg tsis ua yam phem uas nws xav ua rau nej lawm. 14 Ntawm kuv, mas kuv nyob hauv nej xib tes, nej ua rau kuv raws li nej pom tias zoo thiab yog qhov ncaj. 15 Tab sis, kom nej paub meej tias yog nej muab kuv tua mas nej lob ib co ntshav tsis muaj txhaum rau saum nej, rau saum lub nroog no thiab rau cov pej xeem nyob hauv lub nroog no. Vim tias yeej yog HUAB TAIS xa kuv tuaj cuag nej tiag, kom xwv kuv tau hais tej lus ntawd tas huv si rau nej tau hnov." 16 Ces cov ntaus thawj thiab tas tsoom pej xeem hais rau cov Leej Choj thiab cov Yaj Saub tias : "Tus neeg ntawd tsis tsim nyog raug lub txim tuag, vim nws tuav txog HUAB TAIS peb tus Tswv Ntuj lub npe los hais lus rau peb."
24 Ces As His Kas, uas yog Xas Fas tub, thiaj pab Yes Les Mias, ces lawv tsis muab Yes Les Mias rau hauv cov neeg uas xav muab nws tua txhais tes.

NPN 69: 15-16, 30-31, 33-34

Txais: (14c) Huab Tais, koj muaj kev hlub loj kawg nkaus, thov koj teb kuv.

Thov koj rub kuv tawm ntawm cov av nyam, kom kuv txhob zom av.
Thov koj rub kuv dim ntawm cov ntxub kuv,
thiab dim ntawm cov dej tob;
Kom cov dej ceev txhob ntsawj kuv mus,
kom kuv txhob poob rau hauv lub qhov ntuj uas yuav nqos kuv,
kom lub qhov ntuj txhob qos ncauj kaw nkaus kuv rau hauv.

Txais: (14c) Huab Tais, koj muaj kev hlub loj kawg nkaus, thov koj teb kuv.

Kuv poob rau kev txom nyem thiab kev tu siab lawm,
Tswv Ntuj,thov kom koj txoj kev cawm txuag kuv cia.
Kuv yuav hu ib zag nkauj cav txog Tswv Ntuj lub npe,
kuv yuav ua nws tsaug kom nws nto koob meej loj.

Txais: (14c) Huab Tais, koj muaj kev hlub loj kawg nkaus, thov koj teb kuv.

Cov neeg me pom, lawv yuav zoo siab :
Nej cov uas nrhiav Tswv Ntuj, thov kom nej lub siab rov tuaj zog.
Vim HUAB TAIS pub rau cov pluag raws li lawv thov;
thaum nws cov neeg raug luag ntes nws tsis tso lawv pov tseg.

Txais: (14c) Huab Tais, koj muaj kev hlub loj kawg nkaus, thov koj teb kuv.

As Les Lus Yas: MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo: MT 14: 1-12

1 Yes Xus lub moo nto ncha mus txog vaj txheeb Hes Los pob ntseg, 2 ces Hes Los hais rau nws cov tub txib tias : "Tus ntawd yog Zam Ntxuav Plig ! Nws sawv hauv cov tuag rov los lawm : vim li ntawd cov hwj huam yees ntxwv thiaj tawm hauv nws los. 3 Ua ntej ntawd, Hes Los tau kom lawv ntes Zam, thiab xuas saw hlau khi Zam mus kaw hauv tsev loj faj, vim Hes Los Dias uas yog Hes Los tij laug Fis Lis Pos tus poj niam pom zoo. 4 Vim Zam tau hais rau Hes Los tias : "Koj tsis muaj cai yuav tus poj niam ntawd." 5 Hes Los twb xav muab Zam tua, tab sis nws ntshai tsoom pej xeem, vim sawv daws saib Zam yog ib tug yaj saub. 6 Tiam sis thaum txog Hes Los hnub tsuj xeeb, Hes Los Dias tus ntxhais tuaj dhia seev cev rau sawv daws saib, nws dhia tau ntxim Hes Los siab kawg, 7 Hes Los thiaj cog lus tias yuav pub yam nws thov rau nws. 8 Leej niam cob tus ntxhais, ces tus ntxhais hais tias : "Thov koj muab Zam Ntxuav Plig lub taub hau txawb hauv ib lub phaj nqa los rau kuv ntawm no." 9 Tus vaj tu siab, tab sis vim nws tau cog lus lawm, thiab cov qhua tuaj koom rooj qav kuj tau hnov, ces tus vaj thiaj txib kom lawv muab rau tus ntxhais raws li nws thov. 10 Ces tus vaj xa neeg mus txiav Zam caj dab hauv tsev loj faj. 11 Lawv muab Zam lub taub hau txawb hauv ib lub phaj cev rau tus ntxhais, tus ntxhais nqa mus cev rau nws niam. 12 Zam cov thwj tim tuaj nqa Zam lub cev mus faus. Ces lawv mus hais qhia rau Yes Xus paub.

TIM 6 LUB 8 HLI 2018

Hnub Ob Lis Piam Kaum Yim Nruab Xyoo B Nruab Lis Piam Xyoo II

Nco txog Yes Xus lub Hwj Chim tawm los rau nws cov Thwj Tim Pom.

Zaj Nyeem Ib: DN 7: 9-10, 13-14

9 Kuv ntsia, kuv txawm pom luag muaj ib co theej kiab los txawb rau ntawd, ces tus neeg laus los zaum saum nws lub theej kiab. Nws cov ris tsho dawb paug ci cuag daus, nws cov plaub hau dawb cuag plaub yaj. Nws lub theej kiab yog nplaim taws, muaj ib co log hluav taws. 10 Muaj ib tug dej hluav taws txhawv ntws lug ntawm qhov chaw nws zaum los. Txhiab vam leej tsob hwb nws, pua txhiab vam leej tiam nws. Lawv qhib lub rooj txiav txim, tej ntaub ntawv twb nthuav tas rau ntawd lawm.
13 Hmo ntuj kuv tseem yees pom ntxiv zoo li no: Muaj ib tug zoo xws li tib neeg ib leeg Tub, nws tuaj saum cov huab saum ntuj tuaj; nws txav los rau ntawm tus Laus, ces lawv coj nws qhia rau tus Laus. 14 Ces tus uas zoo xws li tib neeg ib leeg Tub txais lub hwj huam, lub koob meej thiab kev ua vaj. Tas txhia haiv neeg, txhia lub kuj cuab, txhia xeem lus tsob hwb nws. Nws lub hwj huam yog ib lub hwj huam nyob mus li tsis txawj kawg; yuav tsis muaj leej twg txeeb ntawm nws mus tau. Nws txoj kev ua vaj yuav tsis raug leej twg muab rhuav.

NPN 97: 1-2, 5-6, 9

Txais: (1a +9a) Huab Tais ua vaj, nws yog tus loj tshaj kav tas lub ntiaj teb.

HUAB TAIS yog vaj ntxwv, lub ntiaj teb zoo siab;
ntau lub pov txwv luag ntxhi.
Cov huab thiab qhov tsaus nyob ncig nws,
kev ncaj ncess thiab kev txiav txim yog lub taw ncej txheem nws lub theej kiab.

Txais: (1a +9a) Huab Tais ua vaj, nws yog tus loj tshaj kav tas lub ntiaj teb.

Cov roob yaj tas xws li ciab ntab yaj nyob Huab Tais xub ntiag,
ntawm tus HUAB TAIS kav tas lub ntiaj teb xub ntiag.
Lub ntuj cav txog nws txoj kev ncaj ncees,
tas txhua haiv neeg pom nws lub hwj chim.

Txais: (1a +9a) Huab Tais ua vaj, nws yog tus loj tshaj kav tas lub ntiaj teb.

HUAB TAIS, vim koj yog tus nyob siab dua cov saib tas lub ntiaj teb.
koj loj tshaj tas ib tsoom tswv ntuj.

Txais: (1a +9a) Huab Tais ua vaj, nws yog tus loj tshaj kav tas lub ntiaj teb.

Zaj Nyeem Ob: 2 PZ 1: 16-19

16 Peb tsis tau ntseeg raws li tej zaj dab neeg uas cov neeg ncauj npliag tau xev; pebtuaj qhia nej tsuas tau qhia kom nej paub txog peb tus Huab Tais Yes Xus Pleev lub hwj huam, thiab paub tias nws yuav rov los. Peb yog ib co tim khawv tau pom xyeem nws lub hwj chim ntawm peb qhov muag. 17 Leej Pleev tau txais koob meej thiab txais hwj chim ntawm Leej Txiv Tswv Ntuj, yog hnub uas Leej Txiv lub suab muaj hwj xyeej nrov tuaj hais tias : ‘Tus no yog kuv Leej Tub, tus kuv nyiam, nws ua ntxim kuv lub siab tas nrho.’ 18 Lub suab ntawd, peb tau hnov nrov saum ntuj tuaj, hnub uas peb nrog Yes Xus nyob saum lub roob ntshiab. 19 Peb kuj tseem muaj cov Yaj Saub tej lus uas yog ib co lus tsim nyog peb ntseeg. Nej yuav tsum mob siab ntseeg tej lus ntawd thiab, uas yog ib co lus zoo li ib lub teeb ci hauv qhov tsaus ntuj rau nej mus txog lub caij uas lub hnub tawm tuaj thiab lub hnub qub kaj ntug ci tuaj rau hauv nej nruab siab.

As Les Lus Yas: MT 17: 5C

Txais: As les lus yas, as les lus yas.

"Tus no yog kuv leej tub uas kuv nyiam, nws yog kuv qhov chaw zoo siab,
nej cia li mloog nws hais.

Txais: As les lus yas, as les lus yas.

Ntawv Moo Zoo: MK 9: 2-10

2 Tau rau hnub tom qab, Yes Xus coj Pob Zeb, Yas Kos, thiab Zam lawv rau ib qho, nws coj lawv mus saum ib lub roob siab. Nws ib ce hloov tas rau ntawm lawv xub ntiag. 3 Nws cov ris tsho ci dawb paug, yog yam dawb ci uas nyob ntiaj teb no tsis muaj tshuaj yuav ua tau kom dawb Mas Kos, Zaj 9 9 585 li ntawd. 4 Es Lias thiab Mais Xes nkawd tawm los rau lawv pom, nkawd nrog Yes Xus tham. 5 Ces Pob Zeb hais rau Yes Xus tias : "Xib Hwb, peb nyob ntawm no mas hmoov zoo kawg. Cia peb ua peb lub tsev tsam phooj : ib lub rau koj, ib lub rau Mais Xes, ib lub rau Es Lias." 6 Pob Zeb tsis paub hais dab tsi, vim lawv ntshai kawg. 7 Ces ib twv huab los ntxoov roos lawv, thiab ib lub suab nrov hauv twv huab tuaj tias : "Tus no yog kuv Leej Tub uas kuv nyiam ; nej mloog nws mog." 8 Ib sij huam, lawv ntsia ib ncig tsis pom leej twg li, tsuas pom Yes Xus tib leeg nrog lawv nyob xwb. 9 Thaum lawv tab tom nqes pem roob los, Yes Xus txwv lawv kom txhob piav txog qhov lawv pom ntawd rau leej twg li, yuav tsum tos kom Neeg Leej Tub sawv hauv cov tuag rov los tso. 10 Peb leeg thwj tim khaws lo lus txwv ntawd tseg, tab sis lawv sib nug tias "sawv hauv cov tuag rov los" yog dab tsi.

TIM 7 LUB 8 HLI 2018

Hnub Peb Lis Piam Kaum Yim Nruab Xyoo B Nruab Lis Piam Xyoo II

Hwm LN Sixtus II, ua Tim Khawv, thiab cov; los LN Cajetan

Zaj Nyeem Ib: YES LES MIAS 30: 1-2, 12-15, 18-22

1 HUAB TAIS lo lus nrov tuaj rau Yes Les Mias zoo li no : 2 " HUAB TAIS His Xas Lais tus Tswv Ntuj hais li no : Cov lus kuv tau hais rau koj, koj muab sau rau hauv ib phau ntawv."
12 “HUAB TAIS hais li no tiag : Koj qhov mob yuav zoo tsis taus, koj lub qhov txhab yuav tsis txawj zoo li. 13 Tsis muaj leej twg tuaj koj tog, tsis muaj tshuaj yuav kho tau koj lub qhov txhab, koj yuav tsis zoo. 14 Koj cov phooj ywg hlub tsis nco txog koj lawm, lawv tsis nrhiav koj li ! Kuv ntaus koj zoo li kuv yog koj tus yeeb ncuab, kuv rau txim hnyav rau koj vim koj cov txhaum muaj ntau, koj txoj kev ua phem loj kawg nkaus. 15 Vim li cas koj thiaj qw ntsaj txog koj qhov mob? Koj yeej yuav tsis txawj zoo li. Tos kuv tau ua li ntawd rau koj yog vim koj qhov txhaum hnyav kawg nkaus thiab koj ua txhaum ntau kawg li.
18 HUAB TAIS hais li no : "Kuv yuav rov tsa Yas Kos cov tsev tsam phooj. Kuv yuav khuv leej lawv tej vaj tse; lawv yuav rov qab txhim lub tsheej nyob saum pov roob, yuav rov kho lawv cov tsev loj kom zoo li qub. 19 Lawv yuav rov hu tej zaj nkauj cav txog Ntuj, lawv yuav rov luag lom zem. Kuv yuav ua kom lawv huam vam tuaj, lawv yuav tsis tsawg. Kuv yuav ua kom lawv muaj koob meej, lawv yuav tsis raug thuam ntxiv. 20 Lawv cov xeeb zeej xeeb ntxwv yuav rov zoo li txheej thaud, lawv tsoom neeg yuav nyob ruaj nreb ntawm kuv xub ntiag. Kuv yuav muab txim rau cov haiv neeg hiam lawv. 21 Tus ua tswv saib lawv yog ib tug tawm hauv lawv los, lawv tus vaj tawm ntawm lawv haiv neeg los. Kuv yuav hu nws tuaj ntsib kuv ces nws yuav tuaj cuag kuv. Yog kuv tsis hu, leej twg thiaj yuav muaj peev xwm tuaj cuag kuv tau? Huab Tais lus ceeb toom.
22 Nej yuav ua kuv haiv neeg, kuv yuav yog nej tus Tswv Ntuj."

NPN 102: 16-18, 19-21, 29+22-23

Txais: (17) Huab Tais yuav rov tsa Xis Yoos kom sawv, nws yuav tawm tuaj muaj hwj chim loj.

HUAB TAIS, cov kuj cuab yuav hawm koj lub npe,
tas cov vaj nyob ntiaj teb yuav hawm koj lub hwj chim,
Thaum HUAB TAIS rov txhim Xis Yoos,
sawv daws yuav pom nws nyob hauv nws lub hwj chim;
nws yuav tig los mloog cov neeg txom nyem tej lus thov,
nws yuav tsis thuam lawv zaj teev ntuj.

Txais: (17) Huab Tais yuav rov tsa Xis Yoos kom sawv, nws yuav tawm tuaj muaj hwj chim loj.

Nej sau qhov no cia rau phaj tub ki uas yuav los yav tom ntej,
ces ib haiv neeg tshiab yuav cav txog HUAB TAIS :
Nws nyob saum nws lub tsev ntshiab dauv muag los saib;
HUAB TAIS nyob saum txheej ntuj siab ntsia ntiaj teb,
Kom tau mloog cov neeg nyob txim lub suab ntsaj,
kom tau tso cov yuav raug tua dim kev tuag.

Txais: (17) Huab Tais yuav rov tsa Xis Yoos kom sawv, nws yuav tawm tuaj muaj hwj chim loj.

Koj cov tub txib tej me nyuam yuav nyob ruaj,
lawv cov xeeb ntxwv yuav nyob ntawm koj xub ntiag mus li.
Sawv daws yuav tshaj HUAB TAIS lub npe nyob Xis Yoos,
Thiab yuav cav lus zoo txog nws nyob Yes Lus Xas Les.
Cov haiv neeg yuav sib sau los nyob ua ke,
cov ceeb tsheej yuav sib txoos los tsob hwb HUAB TAIS.

Txais: (17) Huab Tais yuav rov tsa Xis Yoos kom sawv, nws yuav tawm tuaj muaj hwj chim loj.

As Les Lus Yas: ZAM 1: 49B

Txais: As les lus yas, as les lus yas.

Las Npis, koj yog Tswv Ntuj Leej Tub,
koj yog His Xas Lais tus Vaj.

Txais: As les lus yas, as les lus yas.

Ntawv Moo Zoo: MT 14: 22-36

22 Tam sis ntawd, Yes Xus txhib cov thwj tim kom nce nkoj ua nws ntej mus lawm sab ntug dej tim ub, hos nws nyob xa tsoom sid rov qab. 23 Thaum Yes Xus xa zeej tsoom rov qab mus tas lawd, nws nce mus saum roob, rau ib qho chaw xu kev, ces nws teev Ntuj. Thaum tsaus ntuj, tshuav nws tib leeg xwb. 24 Lub nkoj twb mus deb ntawm ntug nqhuab lawm ntau ntsua muag. Dej nphau nphwv tuaj nplawm lub nkoj, vim cua tshuab tom hauv ntej tuaj. 25 Thaum yuav kaj ntug, Yes Xus mus ko taw saum nplaim dej, nws tuaj caum cov thwj tim. 26 Lawv pom Yes Xus mus ko taw saum dej ntuj, lawv ib ce xob : lawv hais tias : "Yog poj ntxoog". Lawv ntshai kawg, ces lawv qw qw. 27 Tam sis ntawd Yes Xus hais rau lawv tias : "Nej tso siab mas ! Yog kuv ! Txhob ntshai." 28 Pob Zeb teb rau Yes Xus tias : "Huab Tais, yog koj tiag no, koj kheev kom kuv tsuj nplaim dej tuaj cuag koj." 29 Yes Xus teb tias : "Tuaj mas !" Ces Pob Zeb nqes nkoj tso ko taw tsuj saum nplaim dej mus cuag Yes Xus. 30 Tab sis nws pom cua hlob, nws ntshai, ces nws pib tog hauv dej, nws qw tias : "Huab Tais, cawm kuv mas !" 31 Yes Xus cev tes tam sis ntawd tuav Pob Zeb, nws hais rau Pob Zeb tias : "Neeg ntseeg tsawg, ua cas koj ua xyem Mas Tais, Zaj 14 thiab 15 537 xyav ?" 32 Thaum Yes Xus nkawd nce hlo rau hauv nkoj, ces cua tu nrho. 33 Cov nyob hauv nkoj pe Yes Xus, lawv hais tias : "Koj yog Tswv Ntuj Leej Tub tiag !" Yes Xus kho neeg mob nyob Zes Nes Xas Les. 14 : 34 - 36. 34 Yes Xus lawv hla dhau dej, lawv mus nqes rau Zes Nes Xas Les. 35 Cov neeg nyob txawm ntawd cim tau Yes Xus, ces lawv mus qhia ib thaj tsam ntawd paub. Sawv daws coj lawv cov neeg mob tuaj rau Yes Xus. 36 Lawv thov Yes Xus kom nws cia cov neeg mob kov Yes Xus tw tsho. Txhua tus uas tau kov, puav leej dim ntawm lawv tus mob.


Los: MT 15:1-2, 10-14

1 Ib co Fas Lis Xais thiab ib co Kws Ntawv Ntshiab nyob Yes Lus Xas Les tuaj cuag Yes Xus, lawv hais rau Yes Xus tias : 2 "Vim li cas koj cov thwj tim hla cov yawg koob tej kab ke ? Vim thaum lawv noj mov, lawv tsis xub ntxuav tes tso?"
10 Yes Xus hu tsoom sid kom txav los ze, nws hais rau lawv tias : "Nej mloog kom nej to taub ! 11 Tsis yog tej yam nkag hauv neeg lub ncauj mus ua kom neeg tsis huv ; yog tej yam uas tawm hauv lub ncauj los ua kom neeg tsis huv." 12 Cov thwj tim txav los ze Yes Xus, lawv hais tias : "Koj puas paub tias cov Fas Lis Xais hnov koj hais li ntawd, mas lawv tsis txaus siab ?" 13 Yes Xus teb tias : "Tus yub twg tsis yog kuv Txiv nyob saum ntuj cog, mas yuav muab dob pov tseg. 14 Cia lawv chim lawv : lawv yog ib co neeg dig muag coj ib pab dig muag kev ! Vim tias yog ib tug dig muag coj lwm tus dig muag kev, mas nkawd ob leeg yuav ua ke mus poob qhov xwb."

TIM 8 LUB 8 HLI 2018

Hnub Plaub Lis Piam Kaum Yim Nruab Xyoo B Nruab Lis Piam Xyoo II

Hwm LN Dos Mis Niv (Dominic), ua Leej Choj

Zaj Nyeem Ib: YLM 31: 1-7

1 Huab Tais hais tias: Lub caij ntawd kuv yuav yog tas txhua xeem His Xas Lais tus Tswv Ntuj, lawv yuav yog kuv haiv neeg. 2 Huab Tais kuj hais li no tias: Haiv neeg uas maim dhau rab ntaj, lawv mus nrhiav tau ib lub txiaj ntsim zoo nyob teb chaws suab puam. His xas Lais taug kev mus rau lub chaw nws yuav tau so.
3 Huab Tais nyob deb tshwm sim rau nws pom: Kuv tau hlub koj, kuv txoj kev hlub yeej nyob puag taum ntxov los lawm; kuv tau khaws rawv kuv txoj kev khuv leej koj cia. 4 Tus nkauj xwb tsim txiaj His Xas Lais e, kuv yuav rov kho koj dua, ces koj yuav raug txhim dua tshiab. Koj yuav rov hnav zam ntaus paj nruag dhia taug kev ua kev lom zem dua. 5 Nej yuav rov cog hmab txiv cawv nyob saum cov roob Xas Mas Lias dua. Cov khwv cog yuav tau txiv noj. 6 Ces hnub ntawd, cov zov keeb yuav qw nyob saum lub roob Es Fais tias: “Nej kav tsij sawv tsees los, peb mus lawm pem Xis Yoos, pem Huab Tais peb tus Tswv Ntuj.”
7 Vim Huab Tais hais li no: Nej qw zoo siab rau Yas Kos, nej cav txog haiv neeg loj dua cov. Nej yeej meem hais kom luag hnov, yeej meem cav txog, yeej meem tshaj tawm tias: Huab Tais cawm nws haiv neeg lawm, yog cov His Xas Lais seem.

NPN: YLM 31: 10, 11-12AB, 13

Txais: (10d) Huab Tais yuav zov peb li tus tswv zov nws pab yaj.

Cov haiv neeg, nej mloog Huab Tais lo lus,
nej muab tshaj tawm rau cov pov txwv nyob deb paub, nej hais tias:
Tus uas tau ua kom His Xas Lais tawg mus rau ntau qhov, rov sau lawv los ua ke,
nws zov lawv li tus tswv zov nws pab yaj.

Txais: (10d) Huab Tais yuav zov peb li tus tswv zov nws pab yaj.

HUAB TAIS yuav txhiv Yas Kos rov los,
nws yuav tso Yas Kos kom dim ntawm tus muaj zog txhais tes.
Lawv yuav ke qw zoo siab ke nce mus pem lub roob Xis Yoos,
lawv yuav tuaj laub lug mus txais HUAB TAIS lo lus zoo.

Txais: (10d) Huab Tais yuav zov peb li tus tswv zov nws pab yaj.

Cov nkauj xwb dhia lom zem zoo siab,
cov tub hluas thiab cov neeg laus kuj yuav dia.
Kuv yuav muab lawv txoj kev tu siab siab ntxeev ua kev zoo siab
Kuv yuav nplij lawv kom lawv zoo siab, txhob nyuaj siab ntxiv.

Txais: (10d) Huab Tais yuav zov peb li tus tswv zov nws pab yaj.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo: MT 15: 21-28

21 Yes Xus tawm ntawm qhov chawd ntawd mus, nws mus rau Tws Los thiab Xis Doos teb. 2 Muaj ib tug poj niam Kas Nas Has nyob hauv teb chaws ntawd tuaj, nws hu nrov nrov tias: “Huab Tais, Das Vis leej Tub, thov koj khuv leej kuv! Kuv tus ntxhais raug ib tug dab phem tsim txom nws. 23 Tiam sis Yes Xus tsis teb ib los li. Cov thwj tim txav los hais rau nws tias: “Koj kuj pab nws saib, vim nws pheej hu nrov nrov caum peb qab.” 24 Yes Xus teb rau lawv tias: “Kuv raug xa tuaj pab cov yaj ploj hauv His Xas Lais tsev neeg xwb.” 25 Tab sis tus poj niam twb tuaj txog lawm, nws txhos caug thov Yes Xus tias: “Huab Tais, thov koj pab kuv.” 26 Yes Xus teb rau nws tias: Tsis phim yuav muab me nyuam tej mov pov rau me nyuam dev noj.” 27 Tus poj niam hais tias: “Thov koj, Huab Tais, vim tias cov me nyuam dev twb noj cov tsig mov uas poob saum lawv tus tswv lub rooj los xwb. 28 Ces Yes Xus hais rau nws tias: “Tus poj niam, koj muaj lub siab ntseeg loj kawg nkaus! Kom koj tau raws li koj lub siab xav.” Ces nws tus ntxhais zoo hlo txij lub caij ntawd los lawm.

TIM 9 LUB 8 HLI 2018

Hnub Tsib Lis Piam Kaum Yim Nruab Xyoo B Nruab Lis Piam Xyoo II

Hwm LN Teresa Benedicta of the Cross

Zaj Nyeem Ib: YES LES MIAS 31: 31-34

31 Huab Tais ceeb toom hais tias: Lub hnub nyoog tuaj yuav txog, uas kuv yuav nrog His Xas Lais tsev neeg thiab thiab Yus Das tsev neeg cog lus dua tshiab. 32 Yuav tsis yog cog lus zoo li kuv tau nrog lawv cov yawg koob cog lus thaum lub caij kuv tau tuav lawv tes coj lawv tawm ntawm Hais Nkws Tos teb los lawm, vim lawv tau rhuav kuv lo lus cog txawm tias kuv yog lawv tus Huab Tais. Yog Huab Tais lus ceeb toom. 33 Tab sis kuv yuav rov nrog His Xas Lais tsev neeg cog lus dua zoo li no, thaum dua lub caij ntawd lawm. Yog Huab Tais lus ceeb toom. Kuv yuav muab kuv txoj cai cog kiag rau hauv lawv, yuav muab sau kiag rau hauv lawv nruab siab; ces kuv yuav yog lawv tus Tswv Ntuj thiab lawv yuav yog kuv haiv neeg. 34 Lawv yuav tsis tas qhia rau tus nyob ze lawv los rau lawv tus kwv tij tias: “Koj yuav tsum paub Huab Tais mas.” Tas sawv daws, tsis hais tus hlob tus yau, yuav paub kuv, yog Huab Tais lo lus, vim kuv yuav zam lawv tej kev ua phem rau lawv thiab kuv yuav tsis nco qab lawv cov txhaum ntxiv lawm.

NPN 51: 12-13, 14-15, 18-19

Txais: (12a) Tswv Ntuj, thov koj tsim ib lub siab huv lis si rau kuv.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (12a) Tswv Ntuj, thov koj tsim ib lub siab huv lis si rau kuv.

Koj ua kom kuv rov zoo siab nyob hauv koj txoj kev cawm;
koj muab ib lub tswv yim txawj xav dav rau kuv.
Kuv yuav qhia koj txoj kev rau cov neeg yuam kev,
ces cov neeg txhaum yuav tig rov los cuag koj.

Txais: (12a) Tswv Ntuj, thov koj tsim ib lub siab huv lis si rau kuv.

Vim koj tsis zoo siab txais cov kev txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj, yog muaj ib lub siab xav lees txhaum;
muaj ib lub siab xav lees txhaum thiab ua neeg me, Tswv ntuj, koj yuav tsis thuam.

Txais: (12a) Tswv Ntuj, thov koj tsim ib lub siab huv lis si rau kuv.

As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, nyob saum lub pob zeb no kuv yuav txhim kuv lub Koom Txoos,
dab phem teb cov qhov rooj yuav tiv tsis yeej lub pob zeb no.

Txais: As les lus yas, as les lus yas.

Ntawv Moo Zoo: MT 16: 13-23

13 Yes Xus tuaj txog cheeb tsam ntawm Xes Ntxas Les Fis Lis Pos, ces nws nug coy thwj tim li no : "Luag tej hais tias Neeg Leej Tub yog leej twg ?" 14 Lawv teb tias : “lb txhia hais tias : Yog Zam Ntxuav Plig. lb txhia hais tias, yog Es Lias. Tseem muaj lwm coy hais tias yog Yes Les Mias los yog ib tug hauv coy yaj saub.” Yes Xus hais tias : 15 "Nej ne, nej hais tias kuv yog leej twg ?"
16 Xis Moos Pob Zeb teb tias : "Koj yog Leej Pleev, yog tus Tswv Ntuj Muaj Txoj Sia Leej Tub." 17 Yes Xus teb rau Pob Zeb tias : "Xis Moos, Yos Nas tus tub, koj txoj hmoov zoo, vim qhov koj paub no, tsis yog nqaij thiab ntshav qhia koj. Yog kuv Txiv nyob saum ntuj qhia koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb coy qhov rooj yuav tiv tsis taus lub pob zeb no. 19 Kuv yuav muab Ntuj lub Ceeb Tsheej cov yawm sij rau koj. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj."
20 Ces Yes Xus txwv cov thwj tim tsis pub qhia leej twg tias nws yog Leej Pleev. 21 Txij hnub ntawd los, Yes Xus pib qhia nws cov thwj tim tias nws yuav tsum mus Yes Lus Xas Les. Nyob ped, nws yuav raug cov txwj laus, cov thawj leej choj thiab cov Kws Ntawv Ntshiab tsim nws. Lawv yuav muab nws tua. Hnub peb, nws yuav sawv rov los. 22 Pob Zeb rub Yes Xus los ntawm nws, nws nroo rau Yes Xus tias : "Huab Tais, thov kom Tswv Ntuj txuag koj ! Tsis pub kom tej yam ntawd tuaj raug koj !"
23 Tab sis, Yes Xus fee hlo, nws hais rau Pob Zeb tias : "Xas Tas, koj lawv kuv qab. Koj thaiv kuv kev. Vim qhov koj xav, tsis yog qhov Tswv Ntuj xav, yog tej yam neeg xav xwb."

TIM 10 LUB 8 HLI 2018

Hnub Rau Lis Piam Kaum Yim Nruab Xyoo B Nruab Lis Piam Xyoo II

Hwm LN Lawrence, leej Tsob Hwb, tuag ua Tim Khawv

Zaj Nyeem Ib: 2 KOS LIS NTHOS 9: 6-10

Cov kwv tij nkauj muam aw:
6 Nej yuav nco ntsoov tias, tus tseb nplej tsawg, nws kuj yuav sau tau tsawg, tus tseb nplej ntau nws yuav sau tau ntau.
7 Nej nyias yuav pub raws li nyias tau txiav nyob hauv siab lawm. Nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab hlo pub. 8 Tswv Ntuj muaj hwj huam, nws yuav pub tas ib puas tsav yam txiaj ntsim rau nej, kom nej muaj txhua yam tas mus li thiab txhua sij hawj, thiab tseem yuav seem ib co txaus nej ua cov hauj lwm zoo pab luag. 9 Raws li Ntawv sau tseg tias : ‘Nws tau ua siab dav, nws pub rau cov pluag ; nws txoj kev ua neeg ncaj yuav nyob mus li. 10 Tus uas muab noob nplej rau tus tswv teb tau cog, thiab muab mov los yug nws, nws haj yam yuav muab noob qoob noob loo ntau rau nej, nws yuav ua kom nej txoj kev ncaj loj tuaj thiab txi txiv ntau.

NPN 112: 1-2, 5-6, 7-8, 9

Txais: (5) Tus neeg txawj hlub luag, thiab qiv rau luag, nws txoj hmoov zoo.

Tus hwm HUAB TAIS, nws txoj hmoov zoo :
Nws nyiam Huab Tais cov lus qhia tas siab nrho,
Nws caj ce yuav muaj zog nyob ntiaj teb,
ntuj yuav foom hmoov zoo rau tiam neeg siab ncaj.

Txais: (5) Tus neeg txawj hlub luag, thiab qiv rau luag, nws txoj hmoov zoo.

Tus neeg txawj hlub luagthiab qiv rau luag, nws txoj hmoov zoo.
Nws ua nws tej hauj lwm raws kev ncaj.
Nws yuav tsis qaug ib zaug, yuav nyob rua mus lij;
sawv daws yuav nco ntsoov mus li txog tus neeg ncaj.

Txais: (5) Tus neeg txawj hlub luag, thiab qiv rau luag, nws txoj hmoov zoo.

Nws yuav tsis ntshai cov lus cuav hais phem txog nws ;
nws lub siab nyob ruaj nreb, nws tso siab lug rau HUAB TAIS.
Nws ua siab tawv qhawv, nws yuav tsis txhawj,
nws yuav tsa hauv pliaj siab ntsia rau saum nws cov yeeb ncuab.

Txais: (5) Tus neeg txawj hlub luag, thiab qiv rau luag, nws txoj hmoov zoo.

Nws pub ntau rau cov pluag :
nws txoj kev ua siab dav yuav nyob mus li,
nws yuav tau ntsej muag, yuav nto koob meej lug,

Txais: (5) Tus neeg txawj hlub luag, thiab qiv rau luag, nws txoj hmoov zoo.

As Les Lus Yas: ZAM 8: 12BC

Txais: As les lus yas, as les lus yas.

Huab Tais hais tias:
Leej twg lawv kuv qab, nws yuav tsis mus kev hauv qhov tsaus ntuj.
Nws yuav tau qhov pom kev uas coj mus rau txoj sia."

Txais: As les lus yas, as les lus yas.

Ntawv Moo Zoo: ZAM 12: 24-26

Yes Xus hais rau nws cov thwj tim tias:
24 “Kuv hais qhov muaj tseeb tiag rau nej : Yog ib lub noob nplej tsis poob rau hauv av thiab tsis tuag, mas nws nyob nws xwb. Hos yog nws tuag, mas nws txi txiv ntau.
25 Tus twg nyiam nws txoj sia, mas nws plam nws txoj sia. Hos tus twg tsis khuv xim nws txoj sia nyob hauv lub ntiaj teb no, mas nws yuav ceev tau nws txoj sia kom ciaj nyob mus li.
26 Tus twg tsob hwb kuv, mas nws yuav tsum los raws kuv. Kuv nyob qhov twg, kuv tus tub txib kuj yuav nyob qhov ntawd thiab. Tus twg tsob hwb kuv, mas Leej Txiv kuj yuav hwm nws.”

TIM 11 LUB 8 HLI 2018

Hnub Xya Lis Piam Kaum Yim Nruab Xyoo B Nruab Lis Piam Xyoo II

Hwm LN Clare, ua Leej Phauj

Zaj Nyeem Ib: HAS NPAS KWS 1: 12—2:4

12 HUAB TAIS puas yog koj yeej nyob puag thaum ntxov ub los lawm, kuv tus Tswv Ntuj, kuv tus Ntshiab, tus tsis txawj tuag ? HUAB TAIS, koj tau xaiv nws los raug txiav txim; kuv lub Tsua, koj yog tus npaj nws los nyob txim. 13 Koj lub qhov muag ntshiab huv, koj tsis xav pom qhov phem, koj ntsia tsis taus txoj kev lim hiam. Vim li cas koj ntsia cov neeg siab phem, thiab thaum tus neeg nkhaus noj tus siab ncaj dua nws mas koj ua twj ywm ? 14 Koj tau tsim tib neeg los zoo li cov ntses nyob hauv hiav txwv, zoo li ib co tsiaj txawj ua zog tiam sis tsis muaj tus tswv kav. 15 Nws xuas nuv los nqe sawv daws, xuas vas los ntaus rub lawm tim ntug , xuas lub yawm los yawm, ces nws zoo siab nws dhia hom khaj ! 16 Nws txi dab rau nws lub vas, nws hlawv xyab hlawv ntawv rau nws lub yawm ntses. Vim lub vas thiab lub yawm ntses pub nqaij ntau rau nws, nws tau coj mus ua tej pluag qab qab noj. 17 Nws puas yuav pov nws lub vas tas mus li mus tua cov haiv neeg, es tsis paub hlub leej twg li?
2 1 Kuv yuav mus nyob ntawm kuv qhov chaw zov keeb, kuv yuav mus sawv saum lub ntsa zeb, kuv yuav zov tos saib nws yuav hais dab tsi rau kuv, nws yuav teb dab tsi rau kuv cov lus tsis zoo siab. 2 Ces HUAB TAIS teb kuv tias : "Koj sau zaj koj pom cia, koj muab txaug raU saum daim txiag kom meej, luag thiaj tau kev nyeem yooj yim. 3 Vim tias qhov koj yees pom ntawd nws muaj lub caij teem yuav tshwm sim tuaj. Nws yuav qhia txog lub caij kawg, yuav tsis dag. Yog tsis txawj tshwm sim mas koj yuav tos, yeej yuav muaj tuaj xwb, nws yuav tsis tuaj txog lig li! 4 Tus neeg muab hlob lub tswv yim xav tsis tau qhov yog, hos tus neeg siab ncaj yuav muaj txoj sia vim nws lub siab ntseeg.

NPN 9: 8-9, 10-11, 12-13

Txais: (11b) Huab Tais, koj tsis tso tus nrhiav koj pov tseg.

HUAB TAIS zaum ua vaj mus ib txhiab ib txhis,
nws txawb nws lub theej kiab ruaj nreb tos lub caij txiav txim.
Nws txiav txim rau lub sim ceeb raws txoj kev ncaj,
Nws tswj kav tsoom haiv neeg raws kev haum pheej.

Txais: (11b) Huab Tais, koj tsis tso tus nrhiav koj pov tseg.

HUAB TAIS yog lub yeej ntsa zeb thaiv tus raug luag tsim,
Lub caij raug xwv txheej, Huab Tais yog lub yeej khov !
Cov neeg nyiam koj lub npe, lawv tso siab rau koj,
vim koj tsis tso cov neeg nrhiav koj pov tseg, HUAB TAIS.

Txais: (11b) Huab Tais, koj tsis tso tus nrhiav koj pov tseg.

Nej hu nkauj cav txog tus HUAB TAIS zaum nyob pem Xis Yoos.
Nej tshaj nws cov hauj lwm loj rau txhia haiv neeg paub !
Vim tus ua pauj neeg cov ntshav nco ntsoov txog lawv,
nws tsis hnov qab cov txom nyem lub suab hu.

Txais: (11b) Huab Tais, koj tsis tso tus nrhiav koj pov tseg.

As Les Lus Yas: 2 TM 1: 10

Txais: As les lus yas, as les lus yas.

Peb tus Cawm Seej Yes Xus Pleev tau tshem txoj kev tuag mus lawm,
thiab nws tau ua kom txoj sia ci tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo: MT 17: 14-20

14 Thaum lawv rov los nrog tsoom sid, muaj ib tug neeg tuaj txog ntawm Yes Xus, nws txhos caug ntua hais rau Yes Xus tias : 15 "Huab Tais, thov koj hlub kuv tus tub, nws qaug dab peg heev kawg. Nws ntog rau hauv hluav taws thiab rau hauv dej ntau zaus. 16 Kuv twb coj nws tuaj rau koj cov thwj tim, tab sis lawv kho tsis tau." 17 Yes Xus teb tias : "Caj ces neeg tsis ntseeg thiab siab phem, kuv yuav nrog nej nyob txog tav twg ? Kuv yuav nyiaj nej txog thaum twg ? Nej coj nws los rau kuv ntawm no." 18 Yes Xus cem tus dab, ces tus dab phem tawm hauv tus me nyuam mus. Tus me nyuam zoo hlo tam sis ntawd. 19 Thaum cov thwj tim thiab Yes Xus lawv nyob ib cag, cov thwj tim txav los ze Yes Xus, lawv nug twj ywm tias : "Vim li cas peb ntiab tsis tau tus dab ntawd ?” 20 Yes Xus hais rau lawv tias : "Vim nej ntseeg tsawg. Li ntawd, kuv hais tseeb rau nej, yog nej ntseeg luaj li lub noob zaub roj, mas nej hais rau lub roob ntawd tias : 'koj txav ntawm no mus lawm tod saib,' lub roob kuj yuav txav mus. Yuav tsis muaj ib yam uas nej ua tsis tau...” [21]

TIM 13 LUB 8 HLI 2018

Hnub Ob Lis Piam Kaum Cuaj Nruab Xyoo B Nruab Lis Piam Xyoo II

Hwm LN Pontian thiab LN Hippolytus

Zaj Nyeem Ib: ES XES KIAS 1: 2-5, 24-28C

2 Hnub xiab tsib hauv lub plaub hlis ntawm xyoo tsib uas tus vaj Yuas Kees mus nyob txim rau pej kum teb, 3 HUAB TAIS hais lus rau tus Leej Choj Es Xes Kias uas yog Npus Xis tub, nyob hauv cov Kas Des lub teb chaws, nyob ze tus dej Kes Npas. Nyob ntawd, HUAB TAIS txhais tes los nyob saum kuv. 4 Kuv ntsia ntsoov: muaj ib nthwv cua hlob tshuab sab pej fab tuaj, pom ib twv huab loj loj uas muaj ib qho pom kev ci hob ncig, hauv twv huab muaj ib lub cub tawg txawj cig plaws tuag ntais cig plaws tuag ntais, lub plawv cub tawg muaj ib qho ci ntsa daj rhuv. 5 Nyob hauv plawv, kuv pom ib yam yog zoo li plaub tug ciaj sia. Cov ciaj sia ntawd zoo li no: lawv muaj ib lub cev xws li tib neeg.
24 Ces kuv hnov lawv cov tis nrov, hnov nroo ntws cuag dej hlob nphau, cuag li yog Tus Muaj Hwj Huam Loj lub suab nroo. Thaum lawv mus kev, hnov nrov deeg daws cuag li yog ib pab tub rog taug kev. Thaum lawv nres, lawv nkaum lawv cov tis. 25 Kuj hnov ib lub suab nrov saum txheej saum lub qaum ru tsev tuaj thiab. 26 Nyob saum lub ru tsev ncaj saum lawv taub hau muaj ib yam zoo li ib lub pob zeb pov haum xiav uas yog ib lub theej kiab, nyob saum lub theej kiab, saum qhov siab saud, muaj ib tug zoo li tib neeg. 27 Txij ntawm qhov zoo li yog nws lub duav rov saud kuv pom ib qho ci cuag li nyiaj thiab kub, zoo li yog ib qho hluav taws nyob ib ncig tas nrho; txij ntawm qhov zoo li yog nws lub duav rov hauv, kuv pom ib yam zoo li hluav taws, thiab muaj ib qho ci ntsa iab pom kev nyob ib ncig tas nrho. 28 Qhov pom kev ci ntsa iab ntawd zoo xws li zaj sawv saum ntuj thaum los nag tas. Qhov kuv pom uas yog HUAB TAIS lub hwj chim yog zoo li no.

NPN 148: 1-2, 11-12, 13, 14

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Nej nyob saum ntuj cav txog Huab Tais,
nej nyob saum tej chaw siab cav txog nws.
Nws cov tshiab, nej cav txog nws,
nws cov peeb zeej, nej cav txog nws.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Kom tas cov vaj ntxwv nyob ntiaj teb thiab tas txhua haiv neeg,
tas cov tub nom tub tsw thiab cov nom txiav txim nyob ntiaj teb,
cov tub nraug hluas thiab ntxhais nkauj xwb,
cov laus thiab cov me nyuam yaus,

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Kom lawv cia li cav txog Huab Tais lub npe ,
vim nws tib lub npe thiaj loj siab dua cov;
nws lub hwj xyeej nyob siab tshaj lub ntiaj teb thiab lub ntuj.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Nws tsa nws haiv neeg lub peev xwm kom siab :
Vim li no kom cov ntseeg nws, uas yog cov tub ki His Xas Lais
uas yog haiv neeg nyob ze nws, sawv daws yuav tsum cav txog nws.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

As Les Lus Yas: 2 TXLN 2: 14

Txais: As les lus yas, as les lus yas.

Tswv Ntuj hu nej nyob hauv lub Moo Zoo,
kom nej tau txais peb tus Huab Tais Yes Xus Pleev lub koob meej.

Txais: As les lus yas, as les lus yas.

Ntawv Moo Zoo: MT 17: 22-27

22 Muaj ib zaug Yes Xus thiab nws cov thwj tim lawv mus rau Nkas Lis Lais, nws hais rau lawv tias : "Neeg Leej Tub yuav raug muab muag rau hauv tib neeg txhais tes. 23 Lawv yuav muab nws tua, hnub peb nws yuav sawv rov los." Tas cov thwj tim sawv daws ntxhov siab.
24 Thaum Yes Xus lawv rov qab los rau Kas Fas Naus, cov sau se rau lub Tuam Tsev Teev Ntuj tuaj cuag Pob Zeb, lawv hais rau nws tias : "Nej tus xib hwb puas them se pab lub Tuam Tsev Teev Ntuj ?" 25 Pob Zeb teb tias : "Nws them." Thaum Pob Zeb los txog hauv tsev, mas Yes Xus xub ua ntej nug Pob Zeb tias : "Xis Moos, koj xav li cas ? Cov vaj kav ntiaj teb sau se ntawm leej twg ? Ntawm lawv cov tub los ntawm luag tej qhua ?" 26 Pob Zeb teb tias : "Lawv sau se ntawm luag tej qhua." Yes Xus hais rau Pob Zeb tias : "Yog li, mas cov tub tsis them se. 27 Tab sis, wb yuav tsis txhob ua kom luag to taub yuam kev. Ua li mas, koj mus nram dej ntuj, koj pov nuv mus rub thawj tug ntses tawm tuaj. Koj nthos nkaus nws. Koj rua nws lub qhov ncauj : Koj yuav pom ib lub txiaj nyiag uas raug ob tug nqe se, koj muab lub txiaj ntawd rau lawv kom tau them se rau kuv thiab rau koj."

TIM 14 LUB 8 HLI 2018

Hnub Peb Lis Piam Kaum Cuaj Nruab Xyoo B Nruab Lis Piam Xyoo II

Hwm LN Maximilian Kolbe, Leej Choj tuag ua Tim Khawv

Zaj Nyeem Ib: ES XES KIAS 2: 8—3:4

Huab Tais TSWV NTUJ hais rau kuv tias:
8 “Neeg leej tub, koj mloog kuv hais, koj tsis txhob tawv ncauj li cov neeg ntxeev siab hauv lub tsev no, koj rua ncauj noj qhov kuv yuav muab rau koj noj.” 9 Ces kuv ntsia pom ib txhais tes cev los rau kuv, muaj ib kauj ntawv nyob hauv txhais tes ntawd. 10 Nws muab phau ntawv nthuav rau kuv saib, phau ntawv ntawd sau sab saud thiab sab nraud huv si. Cov lus sau rau hauv yog : "Suab quaj, suab nyiav, suab ntsaj."
3 1 Nws hais rau kuv tias : "Neeg leej tub, koj noj qhov kuv cev rau koj no, koj noj kauj ntawv no thiab koj mus hais lus rau cov His Xas Lais." 2 Kuv rua qhov ncauj ces nws muab kauj ntawv rau kuv noj. 3 Nws hais rau kuv tias : "Neeg leej tub, koj noj kauj ntawv no, noj kom tsau koj plab." Ces kuv noj kauj ntawv, nws qab cuag zib ntab nyob hauv kuv qhov ncauj. 4 Nws hais rau kuv tias : "Neeg leej tub, koj mus cuag His Xas Lais tsev neeg. Koj mus hais kuv cov lus rau lawv."

NPN 119: 14, 24, 72, 103, 111, 131

Txais: (103a) Cov lus koj tau cog tseg qab zib ua luaj rau kuv qhov ncauj!

Kuv zoo siab taug txoj kev ua raws li koj lo lus,
Zoo siab tshaj ua neeg nplua nuj muaj txhij txhua.

Txais: (103a) Cov lus koj tau cog tseg qab zib ua luaj rau kuv qhov ncauj!

Koj cov lus qhia ua rau kuv zoo siab,
Koj cov lus pab tswv yim rau kuv.

Txais: (103a) Cov lus koj tau cog tseg qab zib ua luaj rau kuv qhov ncauj!

Txoj Cai uas tawm hauv koj lub ncauj los,
muaj nqe rau kuv dua ib txhab nyiaj ib txhab kub.

Txais: (103a) Cov lus koj tau cog tseg qab zib ua luaj rau kuv qhov ncauj!

Cov lus koj tau cog tseg qab zib ua luaj rau kuv tus nplaig,
qab dua zib ntab zib mu nyob hauv kuv qhov ncauj !

Txais: (103a) Cov lus koj tau cog tseg qab zib ua luaj rau kuv qhov ncauj!

Koj cov lus qhia yog kuv lub cuab tam mus li,
yog kuv txoj kev sov siab.

Txais: (103a) Cov lus koj tau cog tseg qab zib ua luaj rau kuv qhov ncauj!

Kuv huas pa laws rua ncauj txog siav,
Vim kuv tshaib nqhis koj cov lus qhia.

Txais: (103a) Cov lus koj tau cog tseg qab zib ua luaj rau kuv qhov ncauj!

As Les Lus Yas: MT 11: 29AB

Txais: As les lus yas, as les lus yas.

Nej txais kuv tus quab kwv, nej kawm ntawm kuv mog,
vim kuv ua neeg me, kuv siab tsis muab hlob

Txais: As les lus yas, as les lus yas.

Ntawv Moo Zoo: MT 18: 1-5, 10, 12-14

1 Lub caij ntawd cov thwj tim los cuag Yes Xus, lawv hais rau nws tias : “Leej twg yog tus loj dua nyob hauv Ntuj lub Ceeb Tsheej ?” 2 Yes Xus hu ib tug me nyuam los ntawm nws, nws coj tus me nyuam los nyob hauv nruab nrab lawv, 3 nws hais tias : “Kuv hais tseeb rau nej, yog nej tsis hloov rov los ua xws li ib co me nyuam, mas nej yuav mus tsis tau hauv Ntuj lub Ceeb Tsheej. 4 Leej twg rov saib nws me xws li tus me nyuam no, tus ntawd yog tus loj dua nyob hauv Ntuj lub Ceeb Tsheej. 5 Leej twg txais ib tug me nyuam zoo li tus no, vim kuv lub npe, mas yog nws txais kuv.”
10 Nej ceev faj, tsis txhob thuam ib tug me nyuam yaus li : kuv hais rau nej li ntawd, vim nyob saum ntuj, cov Tshiab zov lawv ntsia ntsoov kuv Txiv nyob saum ntuj lub ntsej muag mus li.”
12 “Raws li nej xav, yog ib tug neeg muaj ib puas tus yaj, ib tug mus poob zoo lawm. Nws puas yuav tsis tso cuaj caum cuaj tug ntawd cia saum roob, mus nrhiav tus uas poob zoo lawd ? 13 Kuv hais tseeb rau nej, thaum nws nrhiav tau tus yaj poob zoo, mas nws zoo siab rau tus ntawd tshaj rau cuaj caum cuaj tug uas tsis tau poob zoo. 14 Nej Txiv nyob saum ntuj, kuj zoo ib yam li ntawd thiab: nws tsis xav kom ib tug me nyuam yaus no ploj li.”

TIM       15      LUB      8      HLI      2018

Hnub Plaub Lis Piam Kaum Cuaj Nruab Xyoo B Nruab Lis Piam Xyoo II

Hwm Niam Mab Liab Nce Mus Saum Ntuj Nrog Nws lub Cev – Thaj Txi Ntuj Hmo Ua Ntej

Zaj Nyeem Ib:       1 XWM  15:   3-4, 15-16; 16:1-2

3 Das Vis hu tas tsoom His Xas Lais tuaj sib sau nyob Yes Lus Xas Les; lawv yuav kwv HUAB TAIS lub Xab Cog Lus mus rau hauv qhov chaw uas nws tau npaj tseg. 4 Das Vis kuj hu As Loos cov tub thiab hu cov Les Vis tuaj.
15 Cov Les Vis muab ib co nqaj kwv Tswv Ntuj lub Xab Cog Lus nyob saum lawv xub pwg, xws li Mais Xes tau ceeb toom tseg raws li HUAB TAIS lo lus. 16 Ces Das Vis hais rau cov ua thawj nyob hauv cov Les Vis kom xaiv ib co kws hu nkauj nyob hauv lawv cov kwv tij, thiab kom lawv ntaus lawv cov twj ua paj nruag, nkauj nog ncas thiab nruas npuaj, kom nrov nrov ua ib lub ntees zoo siab lom zem loj.
16   1 Lawv coj Tswv Ntuj lub Xab Cog Lus los rau sawv daws pom thiab coj mus tso rau hauv nruab nrab lub Tsev Tsam Phooj uas Das Vis txhob txwm tsa cia txais lub Xab. Lawv hlawv tsiaj txi rauTswv Ntuj thiab lawv ua tej thaj txi Ntuj noj cov txim.  2 Thaum Das Vis hlawv tsiaj txi Ntuj thiab ua cov thaj txi Ntuj noj cov txim tas nws tuav txog HUAB TAIS lub npe, thiab nws foom hmoov zoo rau tsoom sid.

NPN      132:   6-7, 9-10, 13-14

Txais:    HUAB TAIS, koj sawv mus nyob pem koj lub chaw so, koj thiab lub Xab uas muaj koj txoj kev ntshiab.

Peb hnov txog qhov ntawd nyob Es Fas Tas,
peb nrhiav tau nws tom cov nras teb Yas As.
Peb kav tsij nkag mus hauv nws lub tsev,
peb txhos caug pe ntawm nws lub rooj tiag taw.

Txais:    HUAB TAIS, koj sawv mus nyob pem koj lub chaw so, koj thiab lub Xab uas muaj koj txoj kev ntshiab.

Thov kom koj cov leej choj hnav txoj kev ncaj,
kom cov hwm koj qw zoo siab lom zem.
Vim koj tus tub txib Das Vis,
Thov koj mloog tus koj tau pleev cov lus thov.

Txais:    HUAB TAIS, koj sawv mus nyob pem koj lub chaw so, koj thiab lub Xab uas muaj koj txoj kev ntshiab.

HUAB TAIS tau xaiv Xis Yoos,
nws yeem yuav Xis Yoos los ua nws chaw nyob.
Xis Yoos yog kuv qhov chaw so mus ib txhiab ib txhis,
kuv yuav nyob txawm saum Xis Yoos, vim kuv xaiv nws.

Txais:    HUAB TAIS, koj sawv mus nyob pem koj lub chaw so, koj thiab lub Xab uas muaj koj txoj kev ntshiab.

Zaj Nyeem Ob:    1 KLN  15:   54B-57

54 Thaum yam uas txawj lwj hnav tau txoj kev tsis txawj lwj lawm thiab thaum yam uas txawj tuag hnav tau txoj kev tsis txawj tuag lawm, mas yuav muaj raws li lo lus nyob hauv Ntawv hais tias : “Txoj kev tuag tog tas rau hauv txoj kev yeej lawm. 55 Kev tuag, koj txoj kev yeej nyob qhov twg ? Kev tuag, koj tus ple muaj taug nyob qhov twg ?”
56 Kev tuag tus ple muaj taug yog kev txhaum. Kev txhaum lub zog yog txoj cai. 57 Tiam sis peb ua Tswv Ntuj tsaug, vim nws pub kev yeej rau peb nyob hauv peb tus Huab Tais Yes Xus Pleev.

As Les Lus Yas:      LK  11: 28

Txais:   As les lus yas, as les lus yas.

Cov muaj hmoov zoo yog cov uas mloog Tswv Ntuj lo lus
thiab coj raws nraim li ntawd.      

Txais:   As les lus yas, as les lus yas.

Ntawv Moo Zoo:      LK  11:   27-28

27 Thaum Yes Xus tseem hais tej lus ntawd, muaj ib tug poj niam nyob hauv nruab nrab tsoom sid tsa suab hais nrov nrov rau Yes Xus tias : "Lub plab uas tau nqa koj thiab lub xub ntiag uas pub mis rau koj tau txoj hmoov zoo !"
28 Yes Xus teb tias : "Cov uas mloog Tswv Ntuj Lo Lus thiab ua raws li Tswv Ntuj Lo Lus, mas lawv thiaj yog cov tau txoj hmoov zoo."


*********************************

TIM     15    LUB    8    HLI     2018




Hwm Niam Mab Liab Nce Mus Saum Ntuj Nrog Nws lub Cev – Thaj Txi Ntuj Thaum Nruab Hnub

Zaj Nyeem Ib:     QYTN  11:   19A; 12:1-6A, 10AB

19 Ces Tswv Ntuj lub Tuam Tsev nyob saum ntuj qhib los, yus pom tau nws Lub Xab Cog Lus nyob hauv lub tuam tsev.
12   1 Muaj ib lub cim loj tas nrho tshwm nyob saum ntuj : ib tug Poj Niam hnav lub hnub, lub hli nyob hauv nws qab xib taws, Kaum ob lub hnub qub ua ib lub mom teev kub nyob saum nws taub hau. 2 Tus Poj Niam ntawd xeeb tub lawm. Nws ntsaj mob, vim nws tab tom daws cev. 3 Tseem muaj dua ib lub cim tshwm tuaj nyob saum ntuj : ib tug niag Zaj loj kawg, liab ploog cuag hluav taws. Nws muaj xya lub taub hau thiab kaum tus kub. Xya lub taub hau ntoo xya lub kaus mom kub. 4 Nws tus ko tw cheb cov hnub qub saum ntuj poob tas lawm ib feem peb; nws muab cuam pov los rau hauv ntiaj teb. Ces tus Zaj mus sawv ntawm tus poj niam uas tab tom daws cev xub ntiag, npaj nqos tus me nyuam uas tus poj niam yuav yug. 5 Tus Poj Niam yug tau tus me nyuam, yog ib tug me tub : yog tus yuav tuav ib rab cwj hlau coj tas txhua haiv neeg. Luag nqa hlo tus me nyuam mus rau ntawm Tswv Ntuj thiab ntawm nws lub theej kiab lawm. 6 Hos tus Poj Niam khiav mus nyob hauv teb chaws suab puam : nws mus nyob hauv qhov chaw uas Tswv Ntuj npaj rau nws.
10 Ces kuv hnov ib lub suab nrov loj loj saum ntuj tuaj tias : “Zaum no, kev yeej, kev muaj hwj huam, peb tus Tswv Ntuj txoj kev ua Vaj, thiab nws Leej Pleev lub hwj huam los txog lawm.

NPN     45:   10, 11, 12, 16

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.  

Muaj ib co ntxhais vaj ntxwv nyob hauv koj pab niam nkauj ntsuab,
tus poj vaj hnav kub Os Fis sawv ntawm koj sab xis.

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

Me ntxhais, koj mloog mog ! Koj ntsia, koj tig ntsej los mloog :
Koj txhob nco koj haiv neeg, koj niam koj txiv lub tsev ntxiv.

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

Tus vaj qaug siab hlo nyiam koj txoj kev zoo nkauj !
Nws yog koj tus huab tais, koj mus txhos caug pe ntawm nws xub ntiag.

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

Lawv ua ib pab muaj kev zoo siab sib law sib liag,
chaws mus hauv tus vaj lub tuam tsev.

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

Zaj Nyeem Ob:      1  KLN  15:   20-27

20 Leej Pleev sawv hauv cov tuag rov los lawm; nws yog thawj tug sawv rov los nyob hauv ib tsoom neeg uas mus pw tsaug zog lawm.  21 Tim ib tug neeg, ces txoj kev tuag thiaj muaj tau, kuj yog tim ib tug neeg ces txoj kev sawv hauv cov tuag rov los thiaj muaj tau thiab. 22 Ib yam li sawv daws tuag nyob hauv As Das, sawv daws kuj yuav ciaj rov los nyob hauv Leej Pleev thiab. 23 Tiam sis nyias muaj nyias lub sij hawm: Ua ntej dua cov yog Leej Pleev, tus xub sawv rov los, ces thaum txog lub hnub nyoog Leej Pleev rov tawm tuaj, mas Leej Pleev cov neeg yuav sawv rov los. 24 Ces mam yog lub caij kawg: Thaum ntawd Leej Pleev yuav muab nws txoj kev ua vaj cob rau Leej Txiv Tswv Ntuj, tiam sis yuav yog tom qab uas nws rhuav txhua txoj kev ua vaj, txhua txoj kev ua tus tswj, thiab txhua tus muaj hwj huam tas lawm tso. 25 Vim Leej Pleev yuav tsum ua vaj mus txog lub caij Leej Txiv tso tsoom yeeb ncuab tas tib si rau hauv nws qab xib taws. 26 Tus yeeb ncuab kawg, uas nws yuav rhuav, yog txoj kev tuag. 27 Vim nws tau muab tas puas tsav yam rau hauv nws qab xib taws lawm.

As Les Lus Yas:  

Txais:   As les lus yas, as les lus yas.

Mab Liab nce mus saum ntuj,
ib pab tshiab hu nkauj zoo siab.

Txais:   As les lus yas, as les lus yas.

Ntawv Moo Zoo:       LK  1:   39-56

39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !"
46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub roos cov neeg hwm nws tiam dhau tiam. 51 Nws sab npab nthuav nws lub zog rau sawv daws pom. Cov neeg uas lub siab muab hlob, Huab Tais ua kom lawv tawg. 52 Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab. 53 Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav. 54 Huab Tais pab nws tus tub txib His Xas Lais, vim nws nco ntsoov tias nws lub siab hlub neeg, 55 nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis."
56 Mab Liab nrog Es Lis Xas Npes nyob peb lub hlis tej, ces nws rov mus tsev.

TIM 16 LUB 8 HLI 2018

Hnub Tsib Lis Piam Kaum Cuaj Nruab Xyoo B Nruab Lis Piam Xyoo II

Hwm LN Stephen nyob Hungary

Zaj Nyeem Ib: EXK 12: 1-12

1 HUAB TAIS lo lus nrov tuaj rau kuv li no: 2 "Neeg leej tub, koj nyob hauv nruab nrab ib tsav neeg ntxeev siab; lawv muaj qhov muag, tab sis lawv tsis pom li, lawv muaj pob ntseg, tab sis lawv tsis hnov li, vim lawv yog ib tsav neeg ntxeev siab. 3 Neeg leej tub, koj npaj ib nras khoom rau koj ris zoo li ib tug neeg raug mus nyob txim lawm pej kum teb, ces koj sawv kev mus rau lawv pom. Koj tsiv ntawm qhov chaw koj nyob mus rau lwm qhov chaw, rau lawv qhov muag pom. Ces tej zaud lawv yuav to taub tias lawv yog ib tsav neeg ntxeev siab. 4 Nruab hnub, koj yuav thau nra tawm xws li ib tug neeg yuav raug mus nyob txim rau lawv pom; thaum tsaus ntuj, koj yuav tawm mus xws li ib tug neeg raug mus nyob txim rau lawv pom. 5 Koj tho ib lub qhov nyob ntawm phab ntsa rau lawv pom, ces koj nqa nra tawm ntawm lub qhov ntawd mus. 6 Koj kwv koj lub nra saum xub pwg rau lawv ntsia ntsoov, thiab koj maub tawm mus. Koj yuav npog ntsej muag kom tsis txhob pom lub teb chaws, vim kuv muab koj los ua ib lub cim qhia rau tsoom His Xas Lais paub."
7 Ces kuv ua raws li cov lus ceeb toom ntawd. Nruab hnub kuv npaj kuv lub nra xws li ib tug neeg yuav raug mus nyob txim lawm pej kum teb. Thaum tsaus Ntuj, kuv xuas tes tho ib lub qhov nyob ntawm phab ntsa. Kuv maub nqa nra tawm los, kuv muab kwv saum xub pwg mus rau lawv pom.
8 Ces thaum sawv ntxov, HUAB TAIS hais rau kuv li no : 9 “Neeg leej tub, His Xas Lais tsev neeg, tsav neeg ntxeev siab ntawd, puas tau hais rau koj tias : ‘Koj ua dab tsi li ntawd ?’ 10 Koj hais rau lawv tias : HUAB TAIS Tswv Ntuj hais li no : Cov lus ceeb toom no yog hais rau Yes Lus Xas Les thiab rau tas His Xas Lais tsev neeg uas nyob hauv. 11 Koj hais tias : Kuv yog ib lub cim qhia rau nej paub. Kuv tau ua li cas mas lawv yuav raug li cas. Lawv yuav tau mus nyob txim lawm pej kum teb. 12 Tus ua nom nyob hauv lawv yuav kwv nws pob khoom saum xub pwg, nws yuav maub tsaus ntuj nti tawm mus, nws yuav tawm ntawm lub qhov lawv tho ntawm phab ntsa rau nws, nws yuav npog ntsej muag kom tsis txhob pom lub teb chaws."

NPN 78: 56-57, 58-59, 61-62

Txais: (7b) Nej yuav nco ntsoov Huab Tais cov hauj lwm cia.

Lawv ntxeev siab, lawv sim tus Tswv Ntuj Nyob Siab,
lawv tsis hwm Tswv Ntuj cov cai lij choj.
Lawv ncaim mus, lawv ntxeev siab xws li lawv phaj txiv,
lawv lem cees xws ib rab hneev nkhaus.

Txais: (7b) Nej yuav nco ntsoov Huab Tais cov hauj lwm cia.

Lawv ua tub qaug nws vim lawv tej chaw siab,
Lawv ua khib nws vim lawv cov mlom.
Tswv Ntuj hnov lawv, nws npau taws ceev,
nws muab His Xas Lais xyeeb hlo pov tseg.

Txais: (7b) Nej yuav nco ntsoov Huab Tais cov hauj lwm cia.

Nws cia His Xas Lais lub zog swb rau luag,
tso His Xas Lais lub hwj chim rau yeeb ncuab txhais tes.
Nws tso nws haiv neeg rau hniav ntaj hlais,
nws npau taws heev rau nws lub cuab tam.

Txais: (7b) Nej yuav nco ntsoov Huab Tais cov hauj lwm cia.

As Les Lus Yas: NPN 119: 135

Txais: As les lus yas, as les lus yas.

Thov cia koj lub ntsej muag ci tuaj rau koj tus tub txib :
koj qhia koj cov lij choj rau kuv kawm.

Txais: As les lus yas, as les lus yas.

Ntawv Moo Zoo: MT 18: 21–19:1

21 Pob Zeb txav los hais rau Yes Xus tias : “Huab Tais, yog kuv tus kwv tij ua txhaum rau kuv, kuv yuav zam pes tsawg zaus rau nws ? Kuv puas yuav zam txog xya zaus ?” 22 Yes Xus hais rau Pob Zeb tias : “Kuv tsis hais rau koj tias 'xya zaus'. Kuv hais rau koj tias, 'xya caum xya zaus'.
23 Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. 24 Thaum lawv pib txheeb, ces luag coj ib tug tub txib uas tshuav nuj nqis ib vam nras nyiaj, tuaj rau tus vaj. 25 Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. 26 Tus tub txib txhos caug ntua ntawm tus tswv ko taw, nws pe tus tswv, nws hais tias : ‘Thov koj ua siab ntev rau kuv, kuv yuav them kom tas rau koj.’ 27 Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. 28 Thaum tus tub txib tawm rov qab mus, nws ntsib nws ib tug npawg, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab, zawm tus npawg caj pas, thiab hais tias : ‘Them koj cov nqi.’ 29 Nws tus npawg txhos caug ntua ntawm nws ko taw thov tias : ‘Thov koj ua siab ntev rau kuv, kuv yuav them rau koj.’ 30 Tab sis tus tub txib ntawd tsis kam li, nws kom luag muab nws tus npawg kaw hauv tsev loj faj mus txog hnub tus npawg them nuj nqis tas huv tib si rau nws.
31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv. 32 Ces tus vaj hu tus tub txib tuaj, nws hais rau tus tub txib ntawd tias : ‘Tub txib siab phem dab tsi ! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. 33 Ua cas koj tsis hlub koj tus npawg zoo li kuv tau hlub koj ?’ 34 Ces tus vaj npau taws heev, nws muab tus tub txib rau cov tub hiam neeg tsim txom mus txog hnub nws them nws cov nuj nqis tas huv tib si. 35 Kuv Txiv nyob saum ntuj kuj yuav ua ib yam li ntawd rau nej thiab, yog tias nej tsis nyias zam hauv nyias nruab siab tas nrho rau nyias tus kwv tij.”
9 1 Thaum Yes Xus hais cov lus ntawd tas, nws tso Nkas Lis Lais teb tseg, nws mus rau Yus Das teb nyob sab dej Yos Las Das tim ub.

TIM      17      LUB      8      HLI      2018

Hnub Rau Lis Piam Kaum Cuaj Nruab Xyoo B Nruab Lis Piam Xyoo II

Zaj Nyeem Ib:       EXK  16:   1-15, 60, 63

1 HUAB TAIS lo lus nrov tuaj rau kuv hais li no : 2 "Neeg leej tub, koj qhia rau Yes Lus Xas Les kom nws paub txog nws tej kev phem kev qias. 3 Koj hais tias: HUAB TAIS Tswv Ntuj hais li no rau Yes Lus Xas Les: Koj lub keeb thiab koj yug los yog nyob hauv lub teb chaws Kas Nas Has. Koj txiv yog ib tug neeg As Mos Lis, koj niam yog ib tug neeg His Tis. 4 Hnub koj yug los, tsis muaj neeg txiav koj hlab ntaws, tsis muaj tus muab dej ntxuav koj kom dawb huv, tsis muaj tus muab ntsev txhuam koj, tsis muaj tus muab ntaub qhwv koj li. 5 Tsis muaj ib tug neeg yuav tig ntsej muag ntsia koj thiab hlub koj tu koj raws li hais ntawd li. Hnub koj yug los, lawv muab koj pov tseg rau nraum tshav puam nraum zoov vim koj yog ib yam qias lawv.
6 Kuv hla ze ntawd, kuv pom koj nti luj luam hauv koj cov ntshav. Ces kuv hais rau koj tias : 'Koj ciaj nyob hauv koj cov ntshav mog !  7 Thiab koj kav tsij hlob tuaj xws li ib tsob nroj nyob nruab liaj nruab teb.’ Ces koj txawm hlob tuaj siab tuaj, koj hlob mus tiav nkauj, koj ob lub mis pib o, koj plaub hau ntau tuaj. Tab sis koj nyob liab qab ploog xwb.
8 Kuv rov hla tuaj ze ntawm koj dua, kuv saib koj; yog lub caij koj txawj muaj kev hlub lawm. Kuv nthuav kuv lub tsho tshaj sab los npog koj qhov liab qab. Kuv muab kuv tus kheej qhaib rau koj, kuv nrog koj sib cog lus, ces koj ua kuv tug lawm.” Yog HUAB TAIS Tswv Ntuj lo lus. 9 “Ces kuv muab koj da dej, kuv ntxuav cov ntshav lo koj pov tseg, thiab muab roj los pleev koj. 10 Kuv muab ris tsho paj ntaub rau koj hnav, muab khau tawv zoo nkauj rau koj rau, muab siv ntaub maj los pav koj duav thiab muab tsho tsuj tsho npuag rau koj npua. 11 Kuv muab npauj nyiag npauj kub rau koj coj, muab kauj npab rau koj coj ntawm tes, muab saw rau koj coj ntawm caj dab. 12 Kuv ntxig ib lub kauj rau ntawm koj qhov ntswg, ib co npauj rau koj pob ntseg, kuv txawb ib lub mom teev kub ci ntsais plias rau saum koj taub hau. 13 Koj ua zam coj nyiaj coj kub, koj tej tsoos tsho yog ntaub tsuj ntaub npuag zoo nkauj thiab yog paj ntaub xwb. Koj muaj hmoov nplej mos noj, muaj zib ntab zib mu haus thiab muaj roj siv. Koj loj tau zoo nkauj rhib, phim sawv ciaj ib tug poj vaj. 14 Koj lub koob meej ncha mus txog cov haiv neeg, sawv daws cav txog koj qhov zoo nkauj, uas yeej zoo tiag tiag, vim kuv muab kuv lub hwj chim rau koj hnav.” Yog HUAB TAIS Tswv Ntuj lo lus.
15 “Tab sis koj khav koj lub meej mom zoo nkauj, koj coj koj lub koob meej mus taug txoj kev lwj liam, koj muab koj lub cev mus ua poj ntiav muag rau txhua leej txhua tus neeg taug kev.
60 Txawm li ntawd los kuv yuav nco ntsoov lo lus kuv tau nrog koj cog thaum koj tseem hluas, thiab kuv yuav nrog koj cog ib lo lus uas yuav nyob mus li.
63 Kom koj rov nco txog thiab yuav xav tsis thoob, thiab kom koj nyob ntsiag to vim koj txaj muag dhau thaum kuv zam koj cov txhaum tas nrho rau koj.." Yog HUAB TAIS Tswv Ntuj lo lus.

Los:       EXK  16:   59-63

59 HUAB TAIS hais li no: Kuv yuav ua rau koj raws li koj tau ua; koj tau ntxub lo lus koj tau cog thiab rhuav koj lo lus cog. 60 Txawm li ntawd los kuv yuav nco ntsoov kuv lo lus kuv tau nrog koj cog thaum koj tseem hluas, thiab kuv yuav nrog koj cog ib lo lus uas yuav nyob mus li. 61 Ces koj yuav rov nco txog koj txoj kev ua phem thiab yuav txaj muag, thaum kuv muab koj ob tug viv ncaus, tus hlob koj thiab tus yau koj, los rau koj ua koj ob tug ntxhais, txawm tias kuv tsis tas yuav tsum ua raws kuv lo lus kuv tau nrog koj cog. 62 Vim kuv yuav rov qab nrog koj cog lus dua, kom koj paub tias kuv yog HUAB TAIS, 63 kom koj rov nco txog thiab yuav xav tsis thoob, thiab kom koj nyob ntsiag to vim koj txaj muag dhau thaum kuv zam koj cov txhaum tas nrho rau koj.” Yog Huab Tais TSWV NTUJ lo lus.

NPN:      His Xais  12:   2-3, 4bcd, 5-6

Txais: (1c) Koj tau thim koj txoj kev npau taws.

Tswv Ntuj yog tus cawm kuv tiag,
Kuv tso siab rau nws, kuv tsis txhawj.
Kuv lub zog thiab kuv lub peev xwm yog HUAB TAIS,
Nws yog tus tau cawm kuv.
Nej yuav zoo siab luag ntxhi mus
ce dej hauv lub qhov dej cawm neeg.

Txais: (1c) Koj tau thim koj txoj kev npau taws..

Nej ua HUAB TAIS tsaug, nej cav txog nws lub npe !
Nej tshaj nws tej hauj lwm loj rau cov haiv neeg paub,
nej hais rau lawv paub tias nws lub npe zoo tas nrho.

Txais: (1c) Koj tau thim koj txoj kev npau taws.

Nej hu nkauj cav txog HUAB TAIS cov hauj lwm loj,
kom tej ntawd nrov ncha ntws puv ntiaj teb.
Nroog Xis Yoos, koj nqua suab zoo siab,
vim His Xas Lais tus Ntshiab yog tus loj nyob hauv koj.

Txais: (1c) Koj tau thim koj txoj kev npau taws.

As Les Lus Yas:       1 TXLN  2:  13

Txais: As les lus yas, as les lus yas.

Nej yuav txais Tswv Ntuj Lo Lus, txhob txais xws li yog neeg lo lus ;
Tiam sis nej txais raws li yeej yog tseem Tswv Ntuj Lo Lus tiag.

Txais: As les lus yas, as les lus yas.

Ntawv Moo Zoo:       MT  19:   3-12

3 Ib co Fas Lis Xais txav los ntawm Yes Xus, lawv xav sim nws, lawv hais rau nws tias : “ Ib tug txiv neej puas muaj cai nrauj nws poj niam vim li ub li no ? ” 4 Yes Xus teb tias : “Nej tsis tau nyeem lod tias thaum chiv lub keeb, tus Tswv Tsim, ‘nws tsim kom muaj txiv neej thiab poj niam, 5 thiab nws hais tias : Vim qhov ntawd, mas txiv neej yuav tso nws niam nws txiv tseg mus koom nrog nws poj niam, ces nkawd ob leeg yuav ua ib lub cev nqaij xwb ?’ 6 Yog li nkawd tsis yog ob leeg lawm, nkawd yog ib lub cev nqaij lawm xwb. Qhov uas Tswv Ntuj sau los ua ke, mas neeg tsis txhob muab sib cais.”  7 Lawv teb rau Yes Xus tias : “Vim li cas Mais Xes ho hais kom ua ntawv nrauj rau yus poj niam ces muab nws tso mus?" 8 Yes Xus hais rau lawv tias : “Yog vim nej lub siab twm xeeb, ces Mais Xes thiaj kheev kom nej nrauj poj niam. Tab sis thaum chiv lub keeb, mas tsis yog li ntawd.  9 Kuv hais rau nej : tus twg nrauj nws poj niam, ntawm no tsis hais txog kev sib yuav tsis raug kev raug cai, nws ho rov yuav dua ib tug, mas nws yog ib tug muaj txij nkawm mus deev hluas.” 10 Cov thwj tim hais rau Yes Xus tias: “Yog zoo li ntawd rau tus txiv neej hais txog ntawm nws poj niam, mas txhob yuav poj niam zoo dua." 11 Yes Xus hais rau lawv tias : “Tsis yog sawv daws yuav to taub lo lus no, tsuas yog cov uas Ntuj pub rau, mas lawv thiaj to taub xwb. 12 Muaj ib co ua neeg sam, vim lawv yeej yug los zoo li ntawd; muaj ib co ua neeg sam, vim luag muab lawv sam; hos muaj ib co txhob txwm ua neeg sam nyob tab seeb vim Ntuj lub Ceeb Tsheej. Leej twg txawj to taub qhov no, mas cia nws to taub.”

TIM      18      LUB      8      HLI      2018

Hnub Xya Lis Piam Kaum Cuaj Nruab Xyoo B Nruab Lis Pia, Xyoo II

Zaj Nyeem Ib:       ES XES KIAS  18:   1-10, 13B, 30-32

1 HUAB TAIS lo lus nrov tuaj rau kuv li no: 2 “Neeg leej tub, nej niaj hnub hais zaj paj lug no nyob His Xas Lais teb, ‘Vim phaj txiv noj cov txiv cawv ntsuab, ces phaj tub thiaj rhiab hniav tas,’ nws lub ntsiab yog dab tsi?” 3 HUAB TAIS Tswv Ntuj hais tias: “Kuv yog tus muaj txoj sia nyob, kuv cog lus tias nej yuav tsis hais zaj paj lug no ntxiv nyob His Xas Lais teb lawm. 4 Vim txhua tus txoj sia puav leej yog kuv tug tib si, leej txiv txoj sia kuj yog kuv tug, leej tub txoj sia kuj yog kuv tug. Tus twg ua txhaum mas tus ntawd xwb thiaj yuav tuag.
5 Ib tug neeg siab ncaj, mas nws coj raws txoj kev ncaj kev ncees. 6 Nws tsis noj tej txhiam xws saum cov roob, nws tsis tsa muag ntsia cov mlom uas His Xas Lais tsev neeg teev, nws tsis zes tsis deev luag poj luag sev. Nws caiv txaj tas lub caij tus poj niam cev tsis huv. 7 Nws tsis hiam leej twg; luag muab yam twg tuaj yuam nuj nqe cia mas nws xa rov qab tib si. Nws tsis ua tub sab tub nyiag. Nws pub nws cov mov rau cov neeg tshaib noj, pub ris tsho rau tus neeg liab qab hnav. 8 Nws txais nyiaj rau luag, nws tsis noj paj, nws tsis tsuam paj hnyav hnyav. Nws nkaum tes kom txhob tau ua phem. Nws txiav txim ncaj kom haum ob tog. 9 Nws ua lub neej raws kuv txoj cai lij choj, nws mloog kuv cov lub qhia, nws coj rawv kom haum li ntawd. Ib tug neeg ua li no mas nws yog ib tug neeg ncaj tiag, nws yeej yuav tau txoj sia xwb.” Yog HUAB TAIS Tswv Ntuj lo lus.
10 “Tab sis yog tus neeg zoo ntawd nws muaj ib tug tub uas yog neeg tub sab, neeg tua neeg, los yog qiv nyiaj tsuam paj hnyav hnyav,
13b mas tus tub ntawd yuav tsis tau txoj sia, vim nws ua tej yam phem, mas nws yuav tsum tuag; nws tau txoj kev tuag yog nws rov ua rau nws ris xwb.”
30 HUAB TAIS Tswv Ntuj hais li no : “Tsev neeg His Xas Lais, kuv kuj yuav muab txim rau nej, muab rau nyias raws li nyias txoj kev. Nej cia li tig los yuav ib lub siab tshiab thiab tso nej tej kev ua phem pov tseg tas huv si, kom nej thiaj tsis muaj txim txhaum ntxiv. 31 Nej muab nej cov kev ua phem uas nej tau ua tso pov tseg kom tas, nej rov yuav dua ib lub siab tshiab thiab ib lub tswv yim tshiab! Tsev neeg His Xas Lais, vim li cas nej thiaj li yuav xaiv txoj kev tuag ? 32 Kuv yeej tsis zoo siab pom ib tug neeg twg tuag li! Nej kav tsij tig rov los kom nej tau txoj sia!" Yog HUAB TAIS Tswv Ntuj lo lus.

NPN       51:   12-13, 14-15, 18-19

Txais: (12a) Tswv Ntuj, thov koj tsim ib lub siab huv lis si rau kuv.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (12a) Tswv Ntuj, thov koj tsim ib lub siab huv lis si rau kuv.

Koj ua kom kuv rov zoo siab nyob hauv koj txoj kev cawm;
koj muab ib lub tswv yim txawj ua siab dav rau kuv.
Kuv yuav qhia koj txoj kev rau cov neeg yuam kev,
ces cov neeg txhaum yuav tig rov los cuag koj.

Txais: (12a) Tswv Ntuj, thov koj tsim ib lub siab huv lis si rau kuv.

Vim koj tsis zoo siab txais cov kev txi ntuj,
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj,
yog muaj ib lub tswv yim xav lees txhaum;
muaj ib lub siab xav lees txhaum thiab ua neeg me,
Tswv Ntuj, koj yuav tsis thuam.

Txais: (12a) Tswv Ntuj, thov koj tsim ib lub siab huv lis si rau kuv.

As Les Lus Yas:       MT  11:   25

Txais: As les lus yas, as les lus yas.

Kuv cav txog koj, Leej Txiv, tus Huab Tais kav lub ntuj lub teb,
vim koj qhib cov txuj txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo:       MT  19:   13-15

13 Thaum ntawd, muaj neeg coj ib co me nyuam yaus tuaj rau Yes Xus kom Yes Xus tsa tes thov Ntuj rau lawv.  Ces cov thwj tim cem cov neeg ntawd.
14 Yes Xus thiaj hais tias : “Nej cia cov me nyuam no tuaj cuag kuv, nej tsis txhob txwv lawv ; vim Ntuj lub Ceeb Tsheej yuav yog cov neeg zoo li cov me nyuam no li.”
15 Ces Yes Xus tsa tes rau saum cov me nyuam ntawd tas, nws mam mus ntxiv.

TIM      20      LUB      8      HLI      2018

Hnub Ob Lis Piam Nees Nkaum Nruab Xyoo B Nruab Lis Piam Xyoo II
 
Hwm LN Bernard nyob Clairvaux, ua Kws Txuj Ntshiab (Doctor of the Church)

Zaj Nyeem Ib:       EXK  24:   15-23

15 HUAB TAIS lo lus nrov tuaj rau kuv li no : 16 "Neeg leej tub, ib sij huam xwb ces kuv yuav thau tus uas koj qhov muag xav pom ntawm koj mus. Tab sis koj yuav tsis txhob quaj tsis txhob nyiav, tsis txhob ua kua muag poob li. 17 Koj yuav nroo twj ywm ntsiag to xwb, txhob ua kev cai ntoo xyom li;  koj yuav ntoo phuam saum taub hau, rau khau ntawm ko taw;  koj tsis txhob npog hwj txwv. txhob noj cov mov pam tuag." 18 Thaum sawv ntxov kuv tseem hais lus rau tsoom sid, thaum tsaus ntuj kuv poj niam tuag. Tag kis sawv ntxov kuv ua raws li HUAB TAIS xub qhia rau kuv lawm. 19 Ces tsoom sid nug kuv tias : "Koj ua li ntawd, koj puas yuav piav tias lub ntsiab koj xav qhia rau peb yog dab tsi ?" 20 Kuv teb lawv tias : “HUAB TAIS lo lus nrov tuaj rau kuv hais li no : 21 Koj hais rau His Xas Lais tsev neeg tias : HUAB TAIS Tswv Ntuj hais li no: Kuv yuav rhuav kuv lub tsev ntshiab, uas yog nej qhov chaw khav txog nej lub zog, yog qhov chaw nej qhov muag xav pom thiab yog qhov chaw nej lub siab ntshaw txog. Nej cov tub cov ntxhais uas nej muab lawv tso tseg, lawv yuav raug ntaj tua. 22 Thaum ntawd nej yuav ua zoo li kuv ua no : Nej yuav tsis npog hwj txwv, tsis noj cov mov pam tuag li, 23 Nej yuav ntoo phuam saum taub hau, nej yuav rau khau, nej yuav tsis quaj, tsis nyiav li, tiam sis nej yuav lwj zuj zus mus vim nej cov txhaum. Ces nej yuav ib leeg nroo rau ib leeg."

NPN:       TXOJ CAI OB  32:   18-19, 20, 21

Txais: (18a) Nej tsis nco qab Tswv Ntuj tus uas tau yug nej lawm.

Nej tsis quav ntsej txog lub Tsua uas tau xeeb nej,
Nej tsis nco qab Tswv Ntuj tus uas tau yug nej lawm.
Thaum HUAB TAIS pom li ntawd, nws ntxub kawg nkaus
thiab nws npau taws heev rau nws cov tub cov ntxhais.

Txais: (18a) Nej tsis nco qab Tswv Ntuj tus uas tau yug nej lawm.

Nws hais tias: “Kuv yuav zais kuv lub ntsej muag ntawm lawv,
ces kuv yuav pom saib lawv yuav mus xaus zoo li cas.
Lawv yog ib haiv neeg lub siab hloov sai sai,
yog ib co tub ki phem tsis muaj kev npuab kuv ruaj nyob hauv lawv.”

Txais: (18a) Nej tsis nco qab Tswv Ntuj tus uas tau yug nej lawm.

“Vim lawv hais tias ‘tsis muaj Tswv Ntuj’ thiaj ua rau kuv khib,
thiab lawv mus teev dab teev mlom ua rau kuv npau taws;
Kuv kuj yuav siv ib haiv neeg tsis tseem ceeb los ua kom lawv khib;
kuv yuav siv ib haiv neeg ruam los ua kom lawv npau taws.”

Txais: (18a Nej tsis nco qab Tswv Ntuj tus uas tau yug nej lawm.

As Les Lus Yas:       MT  5: 3

Txais: As les lus yas, as les lus yas.

Cov muaj txoj hmoov zoo yog cov pluag hauv nruab siab,    
vim Ntuj lub Ceeb Tsheej yog lawv li.      

Txais: As les lus yas, as les lus yas.

Ntawv Moo Zoo:       MT  19:   16-22

16 Muaj ib tug neeg tuaj cuag Yes Xus, nws hais rau Yes Xus tias : “Xib Hwb, kuv yuav ua dab tsi zoo, kuv thiaj tau txoj sia nyob mus li ?” 17 Yes Xus teb rau nws tias : “Vim li cas koj nug kuv txog qhov zoo ? Tsuas muaj tib leeg xwb thiaj Zoo. Yog koj xav muaj txoj sia, koj yuav ua raws li cov lus qhia.” 18 Nws hais tias : “Cov lus qhia twg ?” Yes Xus hais rau nws tias : “Koj txhob tua neeg, koj txhob zes luag txij luag nkawm, koj txhob ua tub sab, koj txhob ua tim khawv cuav, 19 koj hwm koj niam koj txiv, koj yuav nyiam tus nyob ze koj ib yam li koj nyiam koj.” 20 Tus hluas hais rau Yes Xus tias : “Kuv yeej ua raws li tej ntawd tas huv tib si lawm. Tshuav dab tsi kuv tsis tau ua ?” 21 Yes Xus hais rau nws tias : “Yog koj xav kom koj zoo tshaj, mas koj rov mus, koj muab txhua yam uas yog koj tug muag, muab pub rau cov pluag, ces koj yuav muaj ib lub cuab tam muaj nqis loj nyob saum ntuj. Ua li ntawd tas, mas koj los raws kuv." 22 Thaum tus hluas hnov cov lus no, nws rov mus, nws tu siab kawg, vim nws muaj cuab yeej cuab tam ntau.

TIM 21 TIM LUB 8 HLI 2018

Hnub Peb Lis Piam Nees Nkaum Nruab Xyoo B Nruab Lis Piam Xyoo II

Hwm LN Pis Yus X, ua Vaj Qhia

Zaj NYeem Ib: ES XES KIAS 28: 1-10

1 HUAB TAIS lo lus nrov tuaj rau kuv li no : 2 "Neeg leej tub, koj hais rau tus nom tswj Tws Los tias : HUAB TAIS Tswv Ntuj hais li no : Vim koj lub siab muab hlob, koj hais tias: ‘Kuv yog tswv ntuj, kuv zaum saum tswv ntuj lub theej kiab, nyob hauv plawv hiav txwv.' Tab sis koj tsuas yog ib tug neeg xwb, koj tsis yog tswv ntuj, tsuas yog koj lub siab xav tias koj yog tswv ntuj xwb. 3 Koj xav tias koj thoob tsib dua Das Nias lawm, tsis muaj ib yam zais ntshis uas koj yuav paub tsis tau. 4 Koj kev thoob tsib thiab kev ntse ua kom koj yog ib tug neeg nplua nuj. Koj khaws nyiaj khaws kub cia puv koj tej txhab. 5 Koj tau cuab yeej cuab tam ntau nplua mias, vim koj kev thoob tsib qhia kom koj txawj ua lag ua luam loj; ces koj lub siab muab hlob vim koj kev nplua nuj. 6 Vim li ntawd, HUAB TAIS Tswv Ntuj hais li no : Vim koj xav tias koj lub tswv yim ntse li Tswv Ntuj lub, 7 vim li ntawd mas kuv yuav xa ib co pej kum neeg tuaj ntaus koj, yog ib haiv neeg muaj lub siab nyoos tshaj tej. Lawv yuav rho ntaj tuaj tawm tsam koj txoj kev thoob tsib, thiab yuav tsuj ntiag koj lub hwj chim. 8 Lawv yuav muab koj thawb rau hauv qhov; ces koj yuav tuag txom nyem ntsuav li tus neeg raug phom nyob hauv qab tiv txwv. 9 Thaum ntawd koj puas tseem yuav hais rau cov tua koj tias : ‘Kuv yog tswv ntuj ?’ Vim koj tsuas yog ib tug tib neeg xwb koj tsis yog tswv ntuj, nyob hauv cov neeg tua koj lub xib teg. 10 Koj yuav tuag zoo li cov neeg tsis tau txais lub cim txiav, yog cov pej kum neeg yuav muab koj tua. Kuv tau hais li no lawm.” Yog Huab Tais TSWV NTUJ lo lus.

NPN TXOJ CAI OB 32: 26-27AB, 27CD-28, 30, 35CD-36AB

Txais: (39c) Kuv yog tus ua kom tuag thiab ua kom ciaj sia tau.

Kuv twb xav hais li no: Kuv yuav ua kom lawv tu noob,
kuv yuav ua kom neeg txhob nco txog lawv lub npe ntxiv.
Tiam sis kuv ntshai tsam lawv cov yeeb ncuab tau kev thuam,
tsam cov yeeb ncuab ntawd tau kev khav qhuas ntxhias.

Txais: (39c) Kuv yog tus ua kom tuag thiab ua kom ciaj sia tau.

Yog peb txhais tes mus ntaus yeej lawv,
HUAB TAIS tsis tau pab peb dab tsi.
Vim lawv yog ib haiv neeg tsis txawj xav,
tsis muaj ib lub tswv yim txawj to taub.

Txais: (39c) Kuv yog tus ua kom tuag thiab ua kom ciaj sia tau.

Vim li cas ib tug neeg ua tau kom ib txhiab leej swb,
vim li cas ob tug neeg caum tau ib vam leej khiav?
Yuav tsum yog vim lawv lub Tsua muab lawv muag,
lawv tus HUAB TAIS muab lawv tso rau luag teb xwb.

Txais: (39c) Kuv yog tus ua kom tuag thiab ua kom ciaj sia tau.

Hnub uas lawv yuav raug rhuav los txog ze lawm,
txoj kev puas ntsoog khiav nrawm nroos los rau saum lawv!
Tiam sis nyaj HUAB TAIS yuav muab kev ncaj rau nws haiv neeg;
nws yuav muab kev khuv leej rau nws cov tub txib.

Txais: (39c) Kuv yog tus ua kom tuag thiab ua kom ciaj sia tau.

As Les Lus Yas: 2 KLN 8: 9

Txais: As les lus yas, as les lus yas.

Yes Xus Pleev yog tus nplua nuj, tab sis nws ua kom nws pluag,
kom xwv nws lub neej pluag ua nej nplua nuj tuaj.

Txais: As les lus yas, as les lus yas.

Ntawv Moo Zoo: MT 19: 23-30

23 Yes Xus hais rau nws cov thwj tim tias : “Kuv hais tseeb rau nej : ib tug neeg nplua nuj yuav ceeb laj nkag mus hauv Ntuj lub Ceeb Tsheej. 24 Kuv rov hais dua rau nej tias, ib tug ntxhuav yuav nkag hauv ib lub qhov koob, mas tseem yooj yim dua ib tug neeg nplua nuj mus hauv Ntuj lub Ceeb Tsheej.” 25 Cov thwj tim hnov cov lus ntawd, lawv poob siab tas, lawv hais tias : “Yog li leej twg thiaj yuav tau txais kev cawm ?” 26 Yes Xus ntsia lawv tseeb tseeb, nws hais rau lawv tias : “Yog neeg ua xwb mas yeej tsis tau li. Tab sis, ntawm Tswv Ntuj, mas nws ua tau tas ib puas tsav yam.” 27 Ces Pob Zeb teb rau Yes Xus tias : “Peb ne, peb tau tso ib puas tsav yam tseg, peb los raws koj, peb yuav tau dab tsi ?” 28 Yes Xus hais rau lawv tias : “Kuv hais tseeb rau nej cov uas los raws kuv : Lub zim txwv sawv daws yuav rov plhis tshiab, mas Neeg Leej Tub yuav zaum saum nws lub theej kiab muaj hwj chim, ces nej kuj yuav zaum saum kaum ob lub theej kiab, txiav txim rau kaum ob lub xeem His Xas Lais thiab. 29 Tus uas tau tso vaj tse, kwv tij, nkauj muam, niam txiv, me tub me nyuam thiab tso liaj teb tseg, vim kuv lub npe, mas tus ntawd yuav tau txais ib puas npaug tshaj qhov nws tau tso tseg, thiab nws tseem yuav tau txoj sia nyob mus li los ua nws tug. 30 Muaj coob leej cov ua ntej yuav tuaj tom qab, hos coob leej cov tuaj tom qab yuav tau ua ntej.”