COV ZAJ NYEEM NRUAB LIS PIAM XYOO II 2017-2018

TIM 22 LUB 8 HLI 2018

Hnub Plaub Lis Piam Nes Nkaum Nruab Xyoo B Nruab Lis Piam Xyoo II

Hwm txog Niam Mab Liab txoj kev ua Poj Vaj

Zaj Nyeem Ib: ES XES KIAS 34: 1-11

1 HUAB TAIS lo lus nrov tuaj rau kuv li no : 2 “Neeg leej tub, koj ua yaj saub cem cov tswv zov yaj saib His Xas Lais, koj ua yaj saub tshaj rau lawv tias: ‘Cov tswv zov yaj, HUAB TAIS hais li no : cov tswv zov yaj saib His Xas Lais txoj hmoov yuav phem, vim lawv tsuas rov nrhiav zaub rau lawv noj xwb. Cov tswv zov yaj puas yog lawv yuav tsum coj pab yaj mus nog zaub lost sis yog ? 3 Nej tau haus yaj cov mis, hnav yaj cov plaub, muab cov yaj rog tua, tab sis nej tsis tau coj pab yaj mus nog zaub. 4 Nej tsis tau txhawb zog rau cov tsis muaj zog, tsis tau kho cov muaj mob kom zoo, tsis tau qhwv cov raug mob lub qhov txhab. Nej tsis tau mus coj tus mus yuam kev kom rov los, tsis tau mus nrhiav kom tau tus poob zoo. Nej tsuas yog ua siab heev tswj lawv, tsuj ntiag yuam ntiag lawv xwb. 5 Ces lawv thiaj tau tawg mus rau ub rau no vim tsis muaj tus tswv zov yaj saib lawv; lawv thiaj mus poob rau tsiaj qus ncauj tsiaj qus lo thaum lawv tawg ntawd. 6 Kuv pab yaj tau tawg mus rau ub rau no, lawv ncig mus nyob puv tej toj roob siab thiab tej toj roob qis qhov txhia chaw; kuv pab yaj tawg ua lwj ua liam mus nyob puv lub ntiaj daim av, tsis muaj leej twg yuav saib xyuas, tsis muaj leej twg yuav mus nrhiav lawv.”
7 Cov tswv zov yaj, nej tig ntsej los mloog HUAB TAIS lo lus. 8 HUAB TAIS Tswv Ntuj hais li no: “Ntawm kuv txoj sia, vim kuv pab yaj tau raug luag lwg, tau poob rau tsiaj qus lub ncauj lo, rau qhov tsis muaj tus tswv saib lawv; vim kuv cov tswv zov yaj tsis saib tsis xyuas kuv pab yaj, lawv mus nog lawv zaub, lawv tsis coj kuv pab yaj mus nog zaub.” 9 Vim li no, cov tswv zov yaj, nej tig ntsej los mloog HUAB TAIS lo lus. 10 HUAB TAIS Tswv Ntuj hais li no : “Kuv yuav tawm tsam cov tswv zov yaj, kuv yuav rov mus coj kuv pab yaj ntawm lawv tes los, kuv yuav txwv tsis pub lawv coj kuv pab yaj mus nog zaub ntxiv, ces lawv yuav tsis tau kev mus nog zaub rau lawv tus kheej ntxiv. Kuv yuav thau kuv cov yaj ntawm lawv qhov ncauj, kom kuv cov yaj tsis txhob yog ib co tsiaj rau lawv tau noj nqaij ntxiv.”
11 HUAB TAIS Tswv Ntuj hais li no : “Kuv tus kheej yuav tsob hwb kuv pab yaj, kuv yuav saib xyuas lawv mus.”

NPN 23: 1-3A, 3B-4, 5, 6

Txais: (1) Huab Tais yog tus tswv zov yaj saib kuv, kuv yuav tsis tshaib tsis nqhis.

HUAB TAIS yog kuv tus tswv zov yaj, kuv yuav tsis tshaib txog dab tsi.
Nws cia kuv so nyob hauv tej tshav zaub mos ntsuab xiab;
Nws coj kuv mus nyob ze cov dej tus yees;
nws ua kom kuv tus ntsuj plig rov muaj zog.

Txais…

Nws coj kuv mus taug txoj kev ncaj, vim nws lub npe.
Txawm kuv taug kev hauv ib lub hav tsaus nti,
kuv tsis ntshai dab tsi phem; vim koj nyob rawv ntawm kuv ib sab,
koj rab nplawm thiab rab pas nrig ua kuv luag.

Txais…

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov;
koj muab roj pleev kuv taub hau;
kuv lub ntim puv phwj yaws.

Txais…

Txiaj ntsim thiab kev khuv leej yuav raws kuv nraim
niaj hnub hauv kuv lub neej;
Kuv yuav nyob hauv HUAB TAIS tsev mus li
tsis muaj hnub yuav txawj kawg.

Txais…

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj txoj sia thiab ua tau hauj lwm,
Nws paub tau tej tswv yim thiab tej kev xav nyob hauv nruab siab.

Txais: As les lus yas, as les lus yas.

Ntawv Moo Zoo: MT 20: 1-16

Yes Xus hais rau nws cov thwj tim tias:
1 “Ntuj lub Ceeb Tsheej piv tau rau ib tug tswv teb uas thaum kaj ntug, nws tawm mus nrhiav tub zog tuaj ua nws daim teb txiv cawv. 2 Nws nrog cov tub zog hais haum ib hnub ib lub txiaj nyiag, ces nws xa lawv mus tom nws daim teb txiv cawv. 3 Ze cuaj teev, nws tawm mus ncig, nws pom ib co neeg nyob dag tom tshav puam. 4 Nws hais rau lawv tias : ‘Nej mus ua num tom kuv daim teb txiv cawv, kuv yuav muab nqi kom haum rau nej.’ 5 Ces lawv mus. Nws rov tawm mus ncig kwv yees thaum tav su thiab thaum hnub qaij peb teev, nws rov mus ua li qub dua. 6 Thaum ze li tsib teev, nws kuj rov tawm mus ncig dua, nws tseem pom ib co nyob nyob ntawd, nws hais rau lawv tias : ‘Vim li cas nej nyob dag tas hnub ntawm no, tsis ua num dab tsi li ?’ 7 Lawv hais rau nws tias : ‘Vim tsis muaj neeg ntiav peb.’ Tus tswv hais tias : ‘Nej mus ua num tom kuv daim teb txiv cawv thiab mas.’ 8 Thaum tsaus ntuj, tus tswv teb hais rau tus tswj nyiaj txiag tias : ‘Koj hu cov tub zog los, koj muab nyias tus nqe zog rau nyias. Koj xub hu cov tuaj tom qab zuj zus los xaus rau cov xub tuaj.’ 9 Cov tub zog uas tuaj thaum tsib teev hnub qaij los txog, lawv ib leeg tau ib lub txiaj nyiag. 10 Cov xub tuaj los txog, lawv xav tias lawv yuav tau txais nqi zog ntau dua, tab sis lawv ib leej kuj tau ib lub txiaj nyiag thiab xwb. 11 Thaum lawv txais lawv tus nqi, lawv yws yws rau tus tswv teb tias : 12 ‘Cov tuaj tom qab ua num ib teev xwb, koj muab rau lawv ib yam li muab rau peb, hos peb, mas peb siv zog khwv thiab tiv tshav ib hnub nkaus.’ 13 Ces tus tswv teb hais rau cov xub tuaj ib tug tias : ‘Phooj ywg, kuv tsis tau ua tsis ncaj rau koj. Wb tsis tau hais haum tias ib hnub ib lub txiaj nyiag no lod ? 14 Txais koj tus nqi zog, koj cia li mus. Kuv xav muab rau tus tuaj tom qab no ib yam li muab rau koj los yeej tau. 15 Kuv tsis muaj cai rho kuv tej nyiaj txiag raws kuv siab lod ? Los yog koj khib vim kuv siab zoo ?’ 16 Li ntawd, cov tuaj tom qab yuav tau ua ntej, hos cov ua ntej yuav tuaj tom qab zoo li no.”

TIM 23 LUB 8 HLI 2018

Hnub Tsib Lis Piam Nees Nkaum Nruab Xyoo B Nruab Lis Piam Xyoo II

Hwm LN Rose nyob Lima

Zaj Nyeem Ib: ES XES KIAS 36: 23-28

Huab Tais hais tias:
23 “Kuv yuav ua kom kuv lub npe loj ntshiab tuaj, vim cov kuj cuab tau thuam kuv lub npe, vim nej thuam kuv lub npe nyob hauv lawv. Ces cov kuj cuab yuav paub tias kuv yog HUAB TAIS, thaum kuv ua kom kuv txoj kev ntshiab ci tuaj rau lawv qhov muag pom vim nej,” Huab Tais hais li ntawd. 24 Vim kuv yuav thau nej hauv cov kuj cuab los, kuv yuav sau nej ntawm pej kum teb los ua ke, thiab kuv yuav coj nej rov los nyob hauv nej thaj av. 25 Kuv yuav pov dej ntshiab rau saum nej, kom ntxuav tej yam tsis huv nyob hauv nej mus kom tas; kuv yuav sau nej tej mlom dab pov tseg kom nej huv tuaj. 26 Kuv yuav muab ib lub siab tshiab rau nej thiab tso ib lub tswv yim tshiab rau hauv nej; kuv yuav dawj nej lub siab tawv li zeb tawm hauv nej lub cev mus, thiab yuav cog ib lub siab muag li nqaij rau nej. 27 Kuv yuav muab kuv lub tswv yim rau hauv nej, yuav ua kom nej coj raws kuv tej lij choj, thiab kom nej ua raws kuv tej kev cai kuv txiav. 28 Nej yuav tau nyob hauv lub teb chaws uas kuv muab rau nej cov yawg koob. Nej yuav yog kuv haiv neeg, kuv yuav yog nej tus Tswv Ntuj."

NPN 51: 12-13, 14-15, 18-19

Txais: (EXK 36:25) Kuv yuav ywg dej ntshiab rau nej thiab ntxuav nej cov txhaum tas tib si.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (EXK 36:25) Kuv yuav ywg dej ntshiab rau nej thiab ntxuav nej cov txhaum tas tib si.

Koj ua kom kuv rov zoo siab nyob hauv koj txoj kev cawm;
koj muab ib lub tswv yim txawj ua siab dav rau kuv.
Kuv yuav qhia koj txoj kev rau cov neeg yuam kev,
ces cov neeg txhaum yuav tig rov los cuag koj.

Txais: (EXK 36:25) Kuv yuav ywg dej ntshiab rau nej thiab ntxuav nej cov txhaum tas tib si.

Vim koj tsis zoo siab txais cov kev txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj,
yog muaj ib lub tswv yim xav lees txhaum;
muaj ib lub siab xav lees txhaum thiab ua neeg me,
Tswv Ntuj, koj yuav tsis thuam.

Txais: (EXK 36:25) Kuv yuav ywg dej ntshiab rau nej thiab ntxuav nej cov txhaum tas tib si.

As Les Lus Yas: NPN 95: 8

Txais: As les lus yas, as les lus yas.
.
Hnub no yog nej hnov nws lus suab,
nej yuav tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: MT 22: 1-14

1 Yes Xus tsa ncauj rov ua paj lug hais rau lawv ntxiv tias : 2 “Ntuj lub Ceeb Tsheej zoo li ib tug vaj uas nws ua tshoob rau nws tus tub. 3 Nws xa tub txib mus nqua hu neeg tuaj noj tshoob, tab sis lawv tsis xav tuaj. 4 Nws rov xa dua ib pab tub txib mus, nws hais li no : ‘Nej hais rau cov raug caw tias : Nej saib, kuv twb npaj kuv rooj qav tiav tas, kuv tej heev nyuj thiab cov tsiaj rog puav leej tua tas lawm. Txhua yam npaj txhij tas. Nej kav tsij tuaj nrog noj tshoob !’ 5 Tab sis cov neeg ntawd tsis quav ntsej, lawv nyias mus nyias tas, ib tug mus tom teb, ib tug mus ua luam. 6 Hos lwm cov tseem nthos nkaus cov tub txib ntes, hiam lawv, muab lawv tua pov tseg. 7 Tus vaj npau taws, nws xa nws cov tub rog mus tua cov neeg txo luag siav ntawd thiab hlawv lawv lub nroog. 8 Ces nws hais rau nws cov tub txib tias : ‘Rooj tshoob npaj tau txhij, tab sis cov neeg kuv caw tsis tsim nyog noj. 9 Nej mus tom tej ncauj ke, nej pom tsawg leej, nej nqua hu kom tuaj noj rooj tshoob.’ 10 Cov tub txib mus txhua txoj kev, lawv sau tas txhua leej txhua tus uas lawv ntsib, cov phem cov zoo tuaj huv tib si. Neeg tuaj puv nkaus lub tsev noj tshoob. 11 Tus vaj chaws los xyuas cov neeg tuaj koom lub ntees tshoob. Nyob ntawd, nws pom ib tug tsis hnav tsoos noj tshoob. 12 Tus vaj hais rau nws tias : ‘Npawg, ua cas koj los hauv no koj tsis hnav tsoos noj tshoob li ?’ Tus neeg ntawd nyob ntsiag to. 13 Ces tus vaj hais rau cov tub txib tias : ‘Nej muab nws pav tes pav taw, muab nws pov rau nraum zoov, hauv qhov tsaus ntuj : nyob ntawd, yuav muaj quaj laug laws thiab tom hniav nkawv.’ 14 Vim tias Ntuj hu ntau leej, tab sis tsawg leej thiaj raug xaiv.”

TIM 24 LUB 8 HLI 2018

Hnub Rau Lis Piam Nees Nkaum Nruab Xyoo B Nruab Lis Piam Xyoo II

Hwm LN Bartholomew (Npas Tos Los Mas Yos), ib tug Hauv Paus Xa Lus; Muaj coob leej hais tias Bartholomew thiab Nathanael (Nas Tas Nais) yog tib tug xwb.

Zaj Nyeem Ib: QYTN 21: 9B-14

Ib tug tshiab los hais rau kuv tias : “Koj los, kuv yuav coj koj mus saib tus Nkauj Nyab, uas yog Leej Yaj tus txij nkawm.” 10 Ces nws coj kuv hauv kuv lub tswv yim mus rau saum ib lub roob loj roob siab, nws muab lub tsheej ntshiab Yes Lus Xas Les rau kuv saib, uas nqes saum ntuj pem Tswv Ntuj los. 11 Lub tsheej muaj Tswv Ntuj lub hwj chim, nws ci ntsa iab xws li ib lub pob zeb pov haum muaj nqi kawg, xws li ib lub pob zeb jasper ci lam lug xws tsom iab. 12 Muaj ib lub ntsa zeb loj thiab siab xov lub tsheej. Lub ntsa zeb muaj kaum ob lub qhov rooj vag, muaj kaum ob tug Tshiab zov cov qhov rooj ntawd. Muaj ib co npe sau rau ntawm cov qhov rooj : yog cov npe ntawm kaum ob lub xeem tub ki His Xas Lais. 13 Sab Toob Fab muaj peb lub qhov rooj, Pej Fab muaj peb lub qhov rooj, Naj Fab muaj peb lub qhov rooj, Xib Fab muaj peb lub qhov rooj. 14 Lub ntsa zeb xov lub tsheej txawb rau saum kaum ob zaj taw ntsa. Muaj kaum ob lub npe sau rau saum cov taw ntsa, yog Leej Yaj kaum ob leeg Hauv Paus Xa Lus cov npe.

NPN 145: 10-11, 12-13, 17-18

Txais: (12) Huab Tais, koj cov phooj ywg tshaj txog
koj lub Ceeb Tsheej muaj hwj chim ci ntsa iab.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv tshaj txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (12) Huab Tais, koj cov phooj ywg tshaj txog
koj lub Ceeb Tsheej muaj hwj chim ci ntsa iab.

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej txais tas cov hlob nrog cov yau,
thiab koj txoj kev tswj kav yuav nyob mus txheej dhau txheej.

Txais: (12) Huab Tais, koj cov phooj ywg tshaj txog
koj lub Ceeb Tsheej muaj hwj chim ci ntsa iab.

Huab Tais tej kev yog kev ncaj
nws tej dej num yog num ntshiab.
Huab Tais nyob ze cov hu txog nws,
cov uas muaj lub siab hu txog nws tiag.

Txais: (12) Huab Tais, koj cov phooj ywg tshaj txog
koj lub Ceeb Tsheej muaj hwj chim ci ntsa iab.

As Les Lus Yas: ZAM 1: 49B

Txais: As les lus yas, as les lus yas.

Las Npis, koj yog Tswv Ntuj Leej Tub,
koj yog cov His Xas Lais tus vaj.

Txais: As les lus yas, as les lus yas.

Ntawv Moo Zoo: ZAM 1: 45-51

45 Fis Lis Pos ntsib Nas Tas Nais, nws hais rau Nas Tas Nais tias : "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib lawm, yog Yes Xus, Yos Xes nyob Nas Xas Les tus tub." 46 Ces Nas Tas Nais hais rau Fis Lis Pos tias : "Puas yuav muaj ib yam zoo tawm hauv Nas Xas Les tuaj tau ?" Fis Lis Pos hais rau Nas Tas Nais tias : "Koj tuaj, koj yuav pom." 47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis zais siab li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau nws tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub ! Koj yog His Xas Lais tus Vaj." 50 Yes Xus teb rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg, puas yog? Koj yuav pom tej yam loj dua no thiab." 51 Ces Yes Xus hais rau Nas Tas Nais tias : "Kuv hais qhov muaj tseeb tiag rau nej: Nej yuav pom ntuj qhib los, thiab pom Tswv Ntuj cov Tshiab nce mus thiab nqes los saum Neeg Leej Tub."

TIM      25      LUB      8      HLI      2018

Hnub Xya Lis Piam Nees Nkaum Nruab Xyoo B Nruab Lis Piam Xyoo II

Hwm LN Louis IX, Vaj Fab Kis; LN Joseph Calasanz

Zaj Nyeem Ib:       ES XES KIAS  43:   1-7AB

1 Tus txiv neej coj kuv mus rau ntawm lub qhov rooj vag uas tig rau sab hnub tuaj. 2 Nyob ntawd kuv pom cov His Xas Lais tus Tswv Ntuj lub hwj chim tawm tim phab hnub tuaj tuaj, nrog ib lub suab nrov nroo ntws xws li suab dej loj loj nrov, thiab nws lub hwj chim ua rau lub ntiaj teb ci ntsa iab. 3 Qhov kuv pom no zoo ib yam li qhov uas kuv tau pom thaum nws tuaj rhuav lub tsheej, thiab kuj zoo li qhov kuv tau pom nyob ntawm tus niam dej Kes Npas, uas kuv tau khoov pe ntsej muag ti av. 4 HUAB TAIS lub hwj chim hla ntawm lub qhov rooj vag uas tig rau sab hnub tuaj mus rau hauv lub Tuam Tsev Teev Ntuj. 5 Leej tswv yim nqa kuv coj kuv mus txog hauv lub plawv tsev, kuv pom HUAB TAIS lub hwj chim ci puv lub Tuam Tsev.
6 Ces kuv hnov ib lub suab hais lus rau kuv, tuaj hauv lub Tuam Tsev tuaj, hos tus txiv neej sawv ntawm kuv ib sab. 7 Lub suab hais rau kuv tias : "Neeg leej tub, qhov chaw no yog qhov kuv yuav txawb kuv lub theej kiab rau, qhov no yog qhov kuv yuav tiag kuv ob txhais xib taws rau; kuv yuav nyob ntawm no nrog tsoom tub ki His Xas Lais mus li txheej dhau txheej.”

NPN       85:   9AB+10, 11-12, 13-14

Txais:  10b) HUAB TAIS lub hwj chim yuav nyob txawm hauv peb lub teb chaws.

Kuv mloog saib HUAB TAIS Tswv Ntuj hais dab tsi:
Huab Tais nws tsuas foom kev thaj yeeb xwb.
Nws txoj kev cawm los txog ze cov hwm nws lawm,
Nws lub hwj chim yuav tsa tsev nyob hauv peb teb chaws.

Txais:  10b) HUAB TAIS lub hwj chim yuav nyob txawm hauv peb lub teb chaws.

Kev hlub thiab kev tseeb yuav los sib ntsib,
Kev ncaj ncees thiab kev thaj yeeb yuav los sib qawg.
Kev tseeb yuav txhawv tawm hauv ntiaj teb los,
kev ncaj ncees yuav dauv muag ntsia saum ntuj tuaj.

Txais:  10b) HUAB TAIS lub hwj chim yuav nyob txawm hauv peb lub teb chaws.

HUAB TAIS yuav pub kev vam meej,
peb cov av yuav ntsu qoob ntsu loo ntau,
Kev ncaj ncees yuav mus ua Huab Tais ntej,
txoj kev cawm yuav taug nws cov hneev taw.

Txais: 10b) HUAB TAIS lub hwj chim yuav nyob txawm hauv peb lub teb chaws.

As Les Lus Yas:       MT  23:   9B, 10B

Txais: As les lus yas, as les lus yas.

Nej tsuas muaj tib leeg Txiv xwb, yog tus nyob saum ntuj
nej tsuas muaj tib tug Coj xwb, yog Leej Pleev. .

Txais: As les lus yas, as les lus yas.

Ntawv Moo Zoo:       MT  23:   1-12

1 Yes Xus hais rau tsoom sid thiab rau nws cov thwj tim, nws hais tias : 2 “Cov Kws Ntawv Ntshiab thiab cov Fas Lis Xais zaum saum Mais Xes lub theej kiab. 3 Ua li mas nej ua thiab khaws tas txhua yam lawv qhia rau nej, tab sis nej txhob yoog raws li lawv. Vim lawv qhia, tab sis lawv tsis ua raws qhov lawv qhia. 4 Lawv nog tej lub nra hnyav ris tsis taus, muab yuam rau tsoom sid xwb pwg, tab sis lawv tsis kam cev ib tug ntiv tes los kov. 5 Lawv ua txhua tsav txhua yam kom luag qhuas. Lawv thiaj ntoo tej txws ntim Txoj Cai dav dav, thiab dai tej tw ntxhoo ntev ntev. 6 Lawv nyiam zaum thawj lub rooj thaum lawv mus noj mus haus; lawv nyiam zaum cov rooj pem hauv ntej nyob hauv cov tsev txoos. 7 Lawv nyiam kom luag hawm lawv tom tej tshav puam, nyiam hnov sawv daws hu lawv ua Xib Hwb. 8 Hos nej, mas nej txhob cia luag hu nej ua Xib Hwb, vim nej tsuas muaj tib tug Xib Hwb xwb, thiab nej sawv daws yog ib co kwv tij. 9 Nej txhob hu leej twg nyob ntiaj teb no ua Txiv, vim nej tsuas muaj tib leeg Txiv xwb, yog tus nyob saum ntuj.  10 Nej txhob cia luag hu nej ua Tus Coj, vim nej tsuas muaj tib tug Coj xwb, yog Leej Pleev. 11 Tus loj dua cov nyob hauv nej, yuav ua nej tus tub txib. 12 Tus twg tsa nws siab, yuav raug muab txo kom qis. Tus twg txo nws qis, yuav raug muab tsa kom siab.”

TIM      27      LUB      8      HLI      2018

Hnub Ob Lis Piam Nees Nkaum Ib Nruab Xyoo B Nruab Lis Piam Xyoo II

Hwm LN Monica (Mos Nis Kas),  uas yog LN Augustin Niam

Zaj Nyeem Ib:       2 TES XAS LOS NIS  1:   1-5, 11-12

1 Paj Lug, nrog Xis Vas Nus, thiab Tis Mos Tes sau ntawv tuaj rau lub Koom Txoos nyob Tes Xas Los Nis, nyob hauv Tswv Ntuj peb leej Txiv, thiab nyob hauv Huab Tais Yes Xus Pleev. 2 Thov kom  nej tau txais txiaj ntsim thiab kom Tswv Ntuj peb Leej Txiv thiab Huab Tais Yes Xus Pleev pub kev thaj yeeb rau nej.
3 Kwv tij, peb yuav tsum ua Tswv Ntuj tsaug tsis tseg vim nej ; tsim nyog peb yuav ua tsaug kawg, vim nej txoj kev ntseeg hlob mus zoo, thiab nej sawv daws txawj sib nyiam sib hlub zoo zuj zus. 4 Li ntawd mas nyob hauv Tswv Ntuj cov koom txoos peb muaj ntsej muag khav txog nej dua cov, vim tias, tab txawm nej raug luag hiam thiab raug txom nyem loj, los nej nyob ruaj nreb thiab nej ntseeg ruaj nreb. 5 Qhov zeem tseeb tau txog Tswv Ntuj txoj kev txiav txim ncaj yog qhov tias nej raug txom nyem vim Tswv Ntuj lub Ceeb Tsheej, mas nej tsim nyog mus hauv lub Ceeb Tsheej ntawd.
11 Peb thov Ntuj rau nej tsis tseg kom nws ua kom nej tsim nyog mloog nws hu nej, kom nws lub hwj huam pab nej ua qhov zoo, thiab pab nej kub siab ua cov hauj lwm phim kev ntseeg. 12 Ces peb tus Huab Tais Yes Xus lub npe yuav muaj koob meej nyob hauv nej, thiab nej yuav muaj koob meej nyob hauv nws, raws li peb tus Tswv Ntuj thiab Huab Tais Yes Xus Pleev lub txiaj ntsim.

NPN       96:   1-2A, 2B-3, 4-5

Txais: (3) Nej tshaj Tswv Ntuj cov hauj lwm loj rau txhua haiv neeg paub.

Nej hu ib zag nkauj tshiab rau HUAB TAIS,
tas txhua lub teb chaws, nej hu nkauj rau HUAB TAIS;
Nej hu nkauj rau HUAB TAIS, nej foom koob meej rau nws lub npe.

Txais: (3) Nej tshaj Tswv Ntuj cov hauj lwm loj rau txhua haiv neeg paub.

Hnub dhau hnub, nej tshaj nws txoj kev cawm.
Nej cav nws lub koob meej rau tsoom kuj cuab paub,
piav nws cov dej num nto moo rau tsoom haiv neeg hnov.

Txais: (3) Nej tshaj Tswv Ntuj cov hauj lwm loj rau txhua haiv neeg paub.

HUAB TAIS loj tas nrho, tsim nyog sawv daws cav txog nws,
nws zoo kawg nkaus, zoo tshaj ib tsoom tswv ntuj tas huv si .
Tas tsoom tswv ntuj uas lwm cov haiv neeg teev, tsis muaj nqi dab tsi.
Hos HUAB TAIS yog tus tsim yim txheej cuaj txheej ntuj.

Txais: (3) Nej tshaj Tswv Ntuj cov hauj lwm loj rau txhua haiv neeg paub.

As Les Lus Yas:       ZAM  10:   27

Txais: As les lus yas, as les lus yas.

Huab Tais hais tais: Kuv cov yaj mloog kuyv lub suab;
kuv paub kuv cov yaj, lawv tuaj raws kuv qab.

Txais: As les lus yas, as les lus yas.

Ntawv Moo Zoo:       MT  23:   13-22

Yes Xus hais rau tsoom sid thiab rau nws cov thwj tim tias:
13 “Tsoom Kws Ntawv Ntshiab thiab tsoom Fas Lis Xais, neeg zoo nraum daim tawv, nej txoj hmoov phem, vim nej muab Ntuj lub Ceeb Tsheej kaw kom neeg txhob mus tau ! Nej tsis chaws mus hauv, nej kuj tsis pub kom cov xav mus, tau kev chaws mus hauv. [14]
15 Tsoom Kws Ntawv Ntshiab thiab tsoom Fas Lis Xais, neeg zoo nraum daim tawv, nej txoj hmoov phem, vim nej hla hiav txwv, hla tej tuam teb mus nrhiav kom tau ib tug neeg los hwm ntuj. Thaum nej tau ib tug lawd, nej ua kom nws tsim nyog mus hauv dab phem cov hluav taws tshaj nej ob npaug.
16 Neeg dig muag coj kev, nej txoj hmoov phem, vim nej hais tias : ‘Yog tus twg tuav txog lub tuam tsev teev Ntuj los cog lus, mas tsis tseem ceeb dab tsi, tab sis tus twg tuav txog cov kub hauv lub tuam tsev teev Ntuj los cog lus, mas nws yuav tsum ua raws li lo lus nws tau cog.’ 17 Neeg vwm thiab dig muag, dab tsi muaj nqes dua ? Puas yog kub los yog lub tuam tsev teev Ntuj uas ua kom cov kub ntshiab tuaj ? 18 Nej tseem hais tias : ‘Yog tus twg tuav txog lub thaj txi Ntuj los cog lus, mas tsis tseem ceeb dab tsi, tab sis yog tus twg muab cov txim saum thaj txi Ntuj los cog lus, mas nws yuav tsum ua raws li lo lus nws tau cog.’ 19 Neeg dig muag, qhov twg yog qhov loj tshaj ? Puas yog cov txim los yog lub thaj txi Ntuj uas ua kom cov txim ntawd ntshiab ? 20 Tus tuav txog lub thaj txi Ntuj los cog lus, kuj yog tuav txog lub thaj thiab tas txhia yam uas nyob saum lub thaj huv si. 21 Tus tuav txog lub tuam tsev teev Ntuj los cog lus, kuj yog tuav txog lub tuam tsev thiab Tus nyob hauv lub tuam tsev ntawd tib si. 22 Tus tuav txog lub ntuj los cog lus, kuj yog tuav txog Tswv Ntuj lub theej kiab thiab Tus zaum saum lub theej kiab ntawd tib si.”

TIM 28 LUB 8 HLI 2018

Hnub Peb Lis Piam Nees Nkaum Ib Nruab Xyoo B Nruab Lis Piam Xyoo II

Hwm LN Augustin, ua Tswv Qhia thiab Kws Txuj Ntxhiab

Zaj Nyeem Ib: 2 TES XAS LOS NIS 2: 1-3A, 14-17

1 Cov kwv tij, peb thov hais rau nej tias, hais txog lub caij thaum peb tus Huab Tais Yes Xus Pleev yuav los, thiab peb yuav sib sau nyob ze nws, 2 mas thov kom nej txhob vwm sai sai txog; nej yuav tsis txhob ntxhov siab, yog tias muaj tej yam txawv txav uas yog tuaj ntawm ib lub tswv yim tuaj, los muaj tej cov lus los tej tsab ntawv uas luag hais tias yog tuaj ntawm peb tuaj hais tias twb txog Huab Tais lub Hnub Nyoog lawm. 3 Nej yuav ceev faj txhob cia leej twg ua kom nej yuam kev .
14 Tswv Ntuj tau hu nej nyob hauv peb lub Moo Zoo kom nej tau txais peb tus Huab Tais Yes Xus Pleev lub hwj chim. 15 Li ntawd mas, cov kwv tij, nej nyob ruaj nreb thiab nej coj raws nraim li tej kev cai nej tau ib txwm coj, uas yog peb tau qhia rau nej ntawm peb lub ncauj kiag, los ntawm peb cov tsab ntawv.
16 Thov kom peb tus Huab Tais Yes Xus Pleev thiab Tswv Ntuj peb leej Txiv uas yog tus hlub peb, pub lub txiaj ntsim rau peb kom peb muaj kev nplig siab mus li, thiab muaj kev zoo siab tso siab lug, 17 thov kom nws nplij nej lub siab thiab txhawb nej lub zog thaum nej ua tej hauj lwm zoo los hais cov lus zoo.

NPN 96: 10, 11-12, 13

Txais: (13b) Huab Tais tuaj txiav txim rau lub ntiaj teb.

Hais nyob hauv cov kuj cuab tias: HUAB TAIS yog vaj ntxwv ;
Nws tsim lub ntiaj teb kom nyob ruaj, tsis muaj leej twg muab tshem tau;
Nws tswj tsoom haiv neeg raws kev ncaj ncees.

Txais: (13b) Huab Tais tuaj txiav txim rau lub ntiaj teb.

Kom lub ntuj zoo siab, lub ntiaj teb hom khaj;
kom dej hiav txwv thiab txhua yam nyob hauv tsa suab nrov nroo ntws;
kom cov tiaj nras thiab txhua yam nyob hauv luag ntxhi!
Thiab kom txhua tus ntoo hauv hav zoov co zoo siab.

Txais: (13b) Huab Tais tuaj txiav txim rau lub ntiaj teb.

Lawv yuav dhia zoo siab ntawm HUAB TAIS xub ntiag,
vim nws tuaj txog lawm, nws tuaj kav lub ntiaj teb.
Nws yuav tswj lub ntiaj teb raws kev ncaj ncees
thiab cov haiv neeg raws kev xwm yeem.

Txais: (13b) Huab Tais tuaj txiav txim rau lub ntiaj teb.

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj txoj sia thiab ua tau hauj lwm,
Nws paub tau tej tswv yim thiab tej kev xav nyob hauv nruab siab.

Txais: As les lus yas, as les lus yas.

Ntawv Moo Zoo: MT 23: 23-26

Yes Xus hais tias:
23 “Tsoom Kws Ntawv Ntshiab thiab tsoom Fas Lis Xais, neeg zoo nraum daim tawv, nej txoj hmoov phem, vim nej them se ib feem kaum rau cov pum hub, zaub txhwb nyug thiab txheej txhaim, tab sis nej tso tej yam loj nyob hauv Txoj Cai pov tseg : yam li kev ncaj ncees, kev hlub luag, thiab kev ntseeg; yuav tsum xub muab siab rau coj tej no ua ntej, thiab kuj tsis tso tej tod tseg.
24 Neeg dig muag coj kev, nej lim tus yoov tshaj cum tawm, nej ho cia li nqos tus ntxhuav.
25 Tsoom Kws Ntawv Ntshiab thiab tsoom Fas Lis Xais, neeg zoo nraum daim tawv, nej txoj hmoov phem, vim nej ntxuav khob ntxuav phaj sab nraud, tab sis kev tub sab thiab kev hu dab nyob puv nkaus sab hauv.
26 Fas Lis Xais dig muag, koj xub ntxuav khob sab hauv tso, ces sab nraud thiaj yuav huv thiab.”

TIM 29 LUB 8 HLI 2018

Hnub Plaub Lis Piam Nees Nkaum Ib Nruab Xyoo B Nruab Lis Piam Xyoo II

Hwm txog LN Zam Ntxuab Plig txoj kev Txom NYem kev Tuag

Zaj Nyeem Ib: 2 TXLN 3: 6-10, 16-18

6 Cov kwv tij, peb tuav txog Huab Tais Yes Xus Pleev lub npe thov qhia nej kom nej txav mus deb ntawm tej tus kwv tij uas coj lub neej lwj liam, thiab lawv tsis mloog txoj kev cai ib txwm coj uas lawv tau txais ntawm peb los. 7 Vim nej paub zoo tias, nej yuav yoog peb li cas. Thaum peb nyob tim nej, peb tsis tau coj lub neej lwj liam. 8 Peb twb tsis tau kom leej twg pub mov rau peb noj dawb, peb tau ua hauj lwm nruab hnub hmo ntuj, peb tau khwv iab khwv daw, vim peb tsis xav ua ib lub nra hnyav rau nej leej twg ris. 9 Tsis yog vim peb tsis muaj cai noj, tab sis yog vim peb tus kheej xav ua ib tug piv txwv rau nej tau yoog raws li peb coj. 10 Thaum peb tseem nrog nej nyob, peb tau tsa ib txog cai li no rau nej tias, yog muaj ib tug neeg tsis kam ua hauj lwm, mas nws yuav tsis txhob noj mov thiab.
16 Thov kom tus Huab Tais muaj kev thaj yeeb pub txoj kev thaj yeeb rau nej txhua lub sij hawm thiab nyob hauv txhua txoj kev. Kom Huab Tais nrog nej sawv daws nyob nraim.
17 Lo lus foom hmoov zoo no, yog kuv txhais tes sau, yog Paj Lug txhais tes sau. Yog lub cim qhia kom paub kuv cov tsab ntawv; kuv sau ntawv zoo li ntawd. 18 Thov kom peb tus Huab Tais Yes Xus Pleev lub txiaj ntsim nrog nej sawv daws nyo nraim.

NPN 128: 1-2, 4-5

Txais: (1) Cov hwm Huab Tais lawv tau txoj hmoov zoo.

Cov hwm HUAB TAIS, nej txoj hmoov zoo,
vim nej taug raws nws tej kev!
Nej yuav tau noj lub txiv ntawm nej tej hauj lwm,
nej yuav tau hmoov zoo thiab yuav tau nws kev hlub.

Txais: (1) Cov hwm Huab Tais lawv tau txoj hmoov zoo.

Ntsia saib, tus neeg muaj txoj hmoov zoo
yog tus ntshai HUAB TAIS.
HUAB TAIS nyob saum Xis Yoos foom koob hmoov rau koj,
kom koj tau pom Yes Lus Xas Les vam meej
niaj hnub hauv koj lub neej.

Txais: (1) Cov hwm Huab Tais lawv tau txoj hmoov zoo.

As Les Lus Yas: MT 5: 10

Txais: As les lus ays, as les lus yas.

Cov tau txoj hmoov zoo, yog cov raug luag hiam vim txoj kev ncaj,
vim Ntuj lub Ceeb Tsheej yog lawv tug

Txais: As les lus ays, as les lus yas.

Ntawv Moo Zoo: MK 6: 17-29

17 Hes Los yog tus xa neeg mus ntes Zam thiab muab saw hlau khi Zam rau hauv tsev loj faj, vim tias nws tau yuav Hes Los Dias uas yog nws tij laug Fis Lis Pos tus poj niam los ua nws poj niam. 18 Zam hais rau Hes Los tias : "Koj tsis muaj cai yuav koj tij laug tus poj niam." 19 Ces Hes Los Dias ntxub Zam tas siab nrho, nws xav muab Zam tua, tab sis nws tua tsis tau, 20 vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas nws ntxhov siab kawg, tiam sis nws kuj nyiam mloog Zam thiab. 21 Muaj ib lub zoo sij hawm los txog, yog hnub tsuj xeeb Hes Los hnub yug. Hes Los ua ib roog qav caw cov nom tswv hauv nws tsev, cov thawj tub rog, thiab cov nom loj hauv xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev. Nws dhia tau ntxim Hes Los thiab cov qhua koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav yuav dab tsi, kuv yuav muab rau koj." 23 Ces tus vaj cog lus rau tus ntxhais tias : "Koj thov yam twg, mas kuv yuav muab rau koj, tab yog ib nrab ntawm lub teb chaws kuv kav los tau!" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sim ntawd, tus ntxhais rov ntsuj los ntawm tus vaj, nws hais tias : "Kuv xav kom koj muab Zam Ntxuav Plig lub taub hau tso rau hauv ib lub phaj cev rau kuv tam sim no." 26 Tus vaj ntsej muag ntshaus tu siab kawg, tab sis vim nws tau cog lus lawm thiab vim muaj cov qhua, nws thiaj tsis xav thim nws lo lus. 27 Ces tus vaj txib ib tug zov keeb tam sim ntawd, kom mus nqa Zam lub taub hau los. 28 Tus zov keeb mus txiav Zam caj dab hauv tsev loj faj, nws nqa Zam lub taub hau txawb hauv ib lub phaj los cev rau tus ntxhais. Tus ntxhais muab rau nws niam. 29 Zam cov thwj tim hnov li ntawd, ces lawv tuaj coj Zam lub cev mus tso rau hauv ib lub ntxa.

TIM      30      LUB      8      HLI      2018

Hnub Tsib Lis Piam Nees Nkaum Ib Nruab Xyoo B Nruab Lis Piam Xyoo II  

Zaj Nyeem Ib:      1 KLN  1:   1-9

1 Kuv, Paj Lug, tus raug hu los ua Yes Xus Pleev ib tug Hauv Paus Xa Lus vim Tswv Ntuj pom zoo, nrog tus kwv Xos Thes Nos,  2  sau ntawv tuaj rau Tswv Ntuj lub Koom Txoos nyob Kos Lis Nthos, rau nej cov uas tau hloov ua neeg dawb huv nyob hauv Yes Xus Pleev lawm, uas Ntuj hu nej los ua neeg ntshiab, nrog tas txhua leej nyob qhov txhia chaw uas tuav txog peb tus Huab Tais Yes Xus Pleev lub npe, uas nws yog lawv tus Huab Tais thiab yog peb tus Huab Tais. 3 Thov kom nej tau txais txiaj ntsim thiab kev thaj yeeb tuaj ntawm Tswv Ntuj peb Leej Txiv thiab ntawm Huab Tais Yes Xus Pleev tuaj.
4 Kuv ua kuv tus Tswv Ntuj tsaug tsis tseg vim nej, vim Tswv Ntuj lub txiaj ntsim uas nws tau pub rau nej nyob hauv Yes Xus Pleev,  5 ces nej tau ua neeg nplua nuj nyob hauv tas txhua yam : nej muaj kev txawj hais lus txog txhua yam, nej muaj kev paub txog txhua yam txuj ci, 6 ces nej yog ib qho tim khawv zeem tseeb txog Leej Pleev zoo;  7 thov kom tsis txhob muaj ib lub txiaj ntsim uas nej tsis tau txais, thaum nej tseem nyob tos peb tus Huab Tais Yes Xus Pleev yuav tawm los rau neeg pom xyeem. 8 Nws yuav pab kom nej nyob ruaj nreb mus txog qhov kawg, kom thaum txog peb tus Huab Tais Yes Xus Pleev hnub, mas tsis muaj ib qho xyeej nyob hauv nej. 9 Tswv Ntuj yog tus pheej xeeb, nws yog tus hu nej kom los nrog nws Leej Tub, peb tus Huab Tais Yes Xus Pleev muaj kev sib raug zoo.

NPN      145:   2-3, 4-5, 6-7

Txais:    (1)  Huab Tais, kuv yuav cav txog koj lub npe mus li.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws kawg nkaus;
nws loj tas nrho, neeg ntsuas tsis tau.

Txais:    (1)  Huab Tais, kuv yuav cav txog koj lub npe mus li.

Txheej dhau txheej sawv daws yuav qhuas txog koj tej hauj lwm,
Lawv yuav tshaj koj txoj kev muaj hwj xyeej rau neeg paub.
Lawv yuav qhia txog koj lub hwj huam hwj chim loj ci ntsa iab,
thab yuav hais tsis tseg txog koj cov dej num tsim nyog qhuas.

Txais:    (1)  Huab Tais, kuv yuav cav txog koj lub npe mus li.

Lawv yuav piav txog koj tej hauj lwm muaj hwj huam txaus ntshai,
thiab yuav tshaj koj lub hwj chim loj kawg nkaus.
Lawv yuav cav txog koj lub siab zoo siab dav tas nrho,
thiab yuav qw ntsuag qees cav txog koj txoj kev ncaj.

Txais:    (1)  Huab Tais, kuv yuav cav txog koj lub npe mus li.

As Les Lus Yas:       MT  24:   42A, 44

Txais:   As les lus yas, as les lus yas.

Nej zov hmo mas!
Vim nej tsis paub thaum twg Neeg Leej Tub yuav los.

Txais:   As les lus yas, as les lus yas.

Ntawv Moo Zoo:     MT  24:   42-51

Yes Xus hais rau nws cov thwj tim tias:
42 “Nej zov hmo! Vim nej tsis paub hnub twg nej tus Huab Tais yuav los. 43 Nej yeej paub tseeb tias : yog tus tswv tsev paub tias hmo ntuj, lub sij hawm twg tub sab yuav tuaj, mas nws yuav zov hmo, tsis cia tub sab tho qhov tsev. 44 Nej kuj ib yam, nej yuav npaj kom txhij tos, vim Neeg Leej Tub yuav los ib lub sij hawm uas nej tsis nco faj.
45 “Leej twg yog tus tub txib pheej xeeb thiab xyuam xim, uas tus tswv tsev tsa nws ua tus saib nws tsev neeg, kom thaum txog caij, nws faib txhiam xws rau sawv daws noj ? 46 Tus tub txib uas tus tswv tsev rov los pom tab tom lis dej num li ntawd, yuav tau txoj hmoov zoo. 47 Kuv hais tseeb rau nej, tus tswv yuav tsa nws ua tus saib tus tswv lub cuab tam tas huv si. 48 Tab sis yog tus tub txib ntawd siab phem nws xav tias : “Kuv tus tswv yuav los lig.” 49 Ces nws muab lwm cov tub txib nrog nws nyob ntaus, nws mus nrog cov quav dej quav cawv noj thiab haus,  50 mas nws tus tswv yuav rov los ib hnub uas nws tsis nco faj, thiab ib lub sij hawm uas nws tsis paub. 51 Tus tswv yuav rau txim loj rau nws, yuav ntiab nws mus nyob ib qho chaw nrog cov neeg uas zoo nraum daim tawv xwb. Nyob ntawd, yuav muaj kev quaj vwm leg thiab tom hniav nkawv.”

TIM 31 LUB 8 HLI 2018

Hnub Rau Lis Piam Nees Nkaum Ib Nruab Xyoo B Nruab Lis Piam Xyoo II

Zaj Nyeem Ib: 1 KLN 1: 17-25

Cov kwv tij:
17 Leej Pleev tsis xa kuv mus ua lub Cim Ntxuav, nws xa kuv mus tshaj lub Moo Zoo ; nws tsis ua kom kuv txawj hais lus thoob tsib, thiaj tsis ua kom Leej Pleev tus ntoo cuam yog ib qho tsis muaj nuj nqis. 18 Vim tus ntoo cuam cov lus yog lus vwm rau cov neeg taug txoj kev ploj. Tab sis rau peb cov neeg uas txais kev cawm, mas ntoo cuam cov lus yog Tswv Ntuj lub hwj huam. 19 Vim muaj lus sau tseg tias : ‘Kuv yuav rhuav cov neeg thoob tsib txoj kev thoob tsib, kuv yuav tshem cov neeg ntse txoj kev txawj ntse tawm.' 20 Tus neeg thoob tsib nyob qhov twg ? Tus neeg txawj sau ntawv dua qhov twg lawm ? Tus neeg txawj nrog luag sib cav hais tswv yim lub caij no nyob qhov twg? Tswv Ntuj tsis tau ua kom ntiaj teb txoj kev thoob tsib yog kev vwm lod ? 21 Vim nyob hauv Tswv Ntuj txoj kev thoob tsib mas ntiaj teb zeem tsis tau Tswv Ntuj vim kev thoob tsib, li ntawd Tswv Ntuj thiaj pom zoo muab txoj kev vwm hauv kev tshaj lub Moo Zoo los cawm cov neeg muaj kev ntseeg. 22 Vim tias cov Yus Das taij hwj huam yees ntxwv ; cov Hes Las nrhiav kev thoob tsib, 23 hos peb, mas peb tshaj Leej Pleev dai saum ntoo cuam; yog ib qho phem kawg nkaus rau cov Yus Das , yog ib zag vwm rau cov neeg teev dab qhuas. 24 Tab sis cov uas Ntuj hu lawv, tsis hais Yus Das los Hes Las, mas lawv saib Leej Pleev yog Tswv Ntuj lub hwj huam, yog Tswv Ntuj txoj kev Thoob Tsib. 25 Vim tias Tswv Ntuj txoj kev vwm mas tseem thoob tsib dua neeg kev thoob tsib, thiab Tswv Ntuj txoj kev qaug zog, mas tseem muaj zog dua neeg kev muaj zog

NPN 33: 1-2, 4-5, 10-11

Txais: (5) Lub ntiaj teb puv nkaus Huab Tais txoj kev hlub.

Cov neeg siab ncaj, nej cia li zoo siab nyob hauv HUAB TAIS;
txoj kev qhuas Huab Tais phim tus neeg siab ncaj.
Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws.

Txais: (5) Lub ntiaj teb puv nkaus Huab Tais txoj kev hlub.

HUAB TAIS lo lus yog lus ncaj,
nws tej num yog num tsim nyog tso siab rau.
Nws nyiam kev ncaj thiab kev haum pheej;
HUAB TAIS txoj kev hlub nyob puv lub ntiaj teb.

Txais: (5) Lub ntiaj teb puv nkaus Huab Tais txoj kev hlub

HUAB TAIS ua kom tej yam tsoom kuj cuab npaj mus tsis taus,
Nws rhuav cov haiv neeg zaj tswv yim kom tsheej xeeb tsis tau.
Cov hauj lwm HUAB TAIS npaj yuav nyob mus li,
Zaj tswv yim nws lub siab xav tau yuav nyob txheej dhau txheej.

Txais: (5) Lub ntiaj teb puv nkaus Huab Tais txoj kev hlub.

As Les Lus Yas: LK 21: 36

Txais: As les lus yas, as les lus yas.

Nej ua ib co neeg xyuam xim tas mus li, nej teev Ntuj tsis tseg,
nej thiaj yuav muaj zog sawv taus ntseg ntawm Neeg Leej Tub xub ntiag.

Txais: As les lus yas, as les lus yas.

Ntawv Moo Zoo: MT 25: 1-13

Yes Xus hais zaj paj lug no rau nws cov thwj tim:
1 “Ntuj lub Ceeb Tsheej yuav zoo xws li kaum leej ntxhais hluas taws teeb tawm mus tos nraug vauv. 2 Nyob hauv lawv, muaj tsib leeg ruam, hos tsib leeg xyuam xim. 3 Cov ruam nqa teeb, tab sis tsis nqa roj nrog. 4 Hos cov xyuam xim nqa teeb thiab ntim roj rau hauv hwj nrog. 5 Nraug vauv los lig lig, ces lawv qaug dab ntub. Sawv daws tsaug zog tas. 6 Thaum ib tag hmo, ib lub suab nthe tias : “Nraug vauv los txog lawm ! Nej tawm los txais nws !” 7 Ces tas cov ntxhais hluas sawv los npaj teeb. 8 Cov ruam hais rau cov xyuam xim tias : “Nej pub ib qho roj rau peb mas, peb cov teeb tuag lawm." 9 Tab sis cov xyuam xim teb rau cov ruam tias : “Ntshai roj yuav tsis txaus rau nej thiab rau peb. Nej mus muas roj tom cov tub luam rau nej.” 10 Thaum cov ntxhais ruam mus muas roj lawm, ces nraug vauv los txog. Cov uas tau npaj txhij tos, nrog nraug vauv chaws mus hauv chav tsev ua tshoob, ces luag kaw qhov rooj rau. 11 Tom qab ntawd, lwm cov ntxhais los txog thiab, lawv hais tias : “Huab Tais, Huab Tais, thov koj qhib qhov rooj rau peb.” 12 Tab sis nraug vauv teb tias : “Kuv hais tseeb rau nej, kuv tsis paub nej yog leej twg !” 13 Ua li mas nej zov hmo mog, vim nej tsis paub yuav yog hnub twg los lub sij hawm twg.”

TIM 1 LUB 9 HLIS 2018

Thawj Hnub Xya Lis Piam Nees Nkaum Ib Nruab Xyoo B Nruab Lis Piam Xyoo II

Zaj Nyeem Ib: 1 KLN 1: 26-31

26 Cov kwv tij, nej yuav rov xav txog tias Ntuj xaiv nej zoo li cas : Nyob hauv nej, yeej tsis muaj ntau leej uas neeg saib muaj kev thoob tsib, tsis muaj ntau leej muaj hwj chim, tsis muaj ntau leej yug los ua tub huab tais. 27 Tiam sis, Tswv Ntuj xaiv cov neeg uas lub ntiaj teb saib lawv ruam, kom cov neeg thoob tsib poob ntsej muag; thiab Tswv Ntuj xaiv cov neeg uas lub ntiaj teb saib lawv tsis muaj peev xwm, kom cov muaj peev xwm poob ntsej muag; 28 thiab Tswv Ntuj xaiv cov neeg uas lub ntiaj teb saib lawv qis qis thiab ntxub lawv, thiab saib lawv tsis tsim txiaj dab tsi, kom cov tsim tsim txiaj poob mus ua neeg tsis tsim txiaj dab tsi. 29 Ua li mas tsis muaj ib tug neeg twg yuav khav tau txog nws tus kheej nyob ntawm Tswv Ntuj xub ntiag. 30 Yog Tswv Ntuj tsa mas nej thiaj nyob hauv Yes Xus Pleev uas yog peb txoj kev thoob tsib tuaj ntawm Tswv Ntuj tuaj, yog peb txoj kev ncaj, peb txoj kev ntshiab, thiab peb txoj kev cawm seej, 31 kom thiaj muaj raws nraim li Ntawv hais tias : ‘Tus twg xav khav mas nws yuav tsum khav nyob hauv Huab Tais xwb.’

NPN 33: 12-13, 18-19, 20-21

Txais: (12) Haiv neeg Huab Tais xaiv ua nws tug lawv txoj hmoov zoo.

Haiv neeg uas lawv tus Tswv Ntuj yog HUAB TAIS, lawv txoj hmoov zoo!
Haiv neeg uas nws xaiv ua nws lub cuab tam, lawv txoj hmoov zoo!
Nyob txheej ntuj saud, HUAB TAIS dauv muag los ntsia,
nws pom tas nrho ib tsoom neeg.

Txais: (12) Haiv neeg Huab Tais xaiv ua nws tug lawv txoj hmoov zoo.

HUAB TAIS lub qhov muag saib ntsoov cov neeg hwm nws,
saib ntsoov cov tso siab rau nws txoj kev hlub;
nws yuav npo lawv dim ntawm kev tuag,
thiab yuav txuag lawv txoj sia thaum muaj kev tshaib plab.

Txais: (12) Haiv neeg Huab Tais xaiv ua nws tug lawv txoj hmoov zoo.

Peb tus ntsuj plig tos ntsoov HUAB TAIS:
nws yog tus pab peb, nws yog peb daim leem phiaj !
Vim nyob hauv Huab Tais peb muaj kev zoo siab,
nws lub npe ntshiab yog peb chaw tso siab.

Txais: (12) Haiv neeg Huab Tais xaiv ua nws tug lawv txoj hmoov zoo.

As Les Lus Yas: ZAM 13: 34

Txais: As les lus yas, as les lus yas.

Kuv muab ib lo lus qhia tshiab rau nej :
Nej yuav ib tug hlub ib tug ib yam li kuv tau hlub nej.

Txais: As les lus yas, as les lus yas.

Ntawv Moo Zoo: MT 25: 14-30

Yes Xus hais zaj paj lug no rau lawv tias:
14 “Yog zoo li ib tug neeg uas yuav tawm rooj mus ntev, nws hu nws cov tub txib tuaj, nws muab nws lub cuab tam rau lawv ceev. 15 Nws muab tsib nras nyiaj rau thawj tug, muab ob nras rau tus ob, hos muab ib nras rau tus peb; nws muab rau lawv raws li lawv lub peev xwm, ces nws tawm rooj mus lawm. Tam sis ntawd, 16 tus uas tau txais tsib nras nyiaj, nqa cov nyiaj ntawd mus ntxeev, nws tau paj tsib nras ntxiv. 17 Tus tau txais ob nras kuj ua li ntawd thiab, nws tau paj ob nras ntxiv. 18 Hos tus tau txais ib nras xwb mus khawb ib lub qhov rau hauv av, nws muab tus tswv nras nyiaj coj mus faus rau hauv. 19 Ib lub sij hawm ntev loo tom qab, cov tub txib tus tswv rov los txog. Nws nrog lawv txheeb nws cov nyiaj. 20 Tus uas tau txais tsib nras nyiaj tuaj txog, nws cev tsib nras ntxiv, nws hais tias : “Huab Tais, koj tau muab tsib nras nyiaj rau kuv, hos ntawm no yog tsib nras uas kuv coj mus ntxeev tau los ntxiv.” 21 Tus tswv hais rau nws tias : “Zoo kawg, tub txib siab zoo siab ncaj, thaum koj saib tej yam me, koj ua ncaj, mas kuv yuav tsa koj los saib tej yam loj. Koj los nyob hauv koj tus huab tais txoj kev zoo siab mog.” 22 Ces tus tau txais ob nras tuaj txog, nws hais tias : “Huab Tais, koj tau muab ob nras nyiaj rau kuv, hos ntawm no yog ob nras uas kuv coj mus ntxeev tau los ntxiv.” 23 Nws tus tswv hais rau nws tias : “Zoo kawg, tub txib siab zoo siab ncaj, thaum koj saib tej yam me, koj ua ncaj, mas kuv yuav tsa koj los saib tej yam loj. Koj los nyob hauv koj tus huab tais txoj kev zoo siab mog.” 24 Tus tub txib uas tau txais ib nras nyiaj tuaj txog, nws hais tias : “Huab Tais, kuv paub tias koj yog ib tug neeg siab heev. Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau. 25 Kuv ntshai, kuv thiaj coj koj nras nyiaj mus faus rau hauv av. Saib ntawm no, koj rov tau yam uas yog koj tug.” 26 Ces tus tswv teb rau nws tias : “Tub txib siab phem thiab tub nkeeg, koj twb paub tias kuv hlais nplej hauv tej teb uas kuv tsis tau tseb, thiab kuv sau qoob hauv tej chaw uas kuv tsis tau pov noob rau, 27 tsim nyog koj yuav nqa kuv cov nyiaj mus rau cov tub ceev nyiaj, thaum kuv rov los, kuv yuav tau kuv cov nyiaj nrog cov paj. 28 Nej rho nras nyiaj ntawm nws mus, nej muab rau tus uas muaj kaum nras lawm. 29 Vim tias Ntuj yuav pub rau tus uas twb muaj lawm, ces nws yuav tau ntau ntxiv. Hos tus uas tsis muaj, Ntuj tseem yuav thau qhov me me uas nws muaj mus thiab. 30 Nej muab tus tub txib tsis tsim txiaj ntawd pov rau nraum zoov rau hauv qhov tsaus ntuj nti: nyob ntawd yuav muaj kev quaj vwm leg thiab tom hniav nkawv.”

TIM 3 LUB 9 HLIS 2018

Hnub Ob Lis Piam Nees Nkaum Ob Nruab Xyoo B Nruab Lis Piam Xyoo II

Hwm LN Gregory tus Loj, ua Vaj Qhia thiab Kws Txuj Ntshiab

Zaj Nyeem Ib: 1 KLN 2: 1-5

1 Cov kwv tij, ntawm kuv mas thaum kuv tuaj tim nej, kuv tsis tau siv ib co lus muaj hwj chim thiab lus thoob tsib los tshaj lub ntsiab tob zais ntshis txog Tswv Ntuj rau nej. 2 Thaum kuv nrog nej nyob, kuv xyaum ua tus neeg tsis paub dab tsi li, tsuas paub txog Yes Xus Pleev ib leeg xwb, tus Yes Xus Pleev uas tuag nyob saum ntoo cuam xwb. 3 Kuv ua tus neeg tsis muaj peev xwm, tus neeg ntshai ntshai thiab txhawj tshee na rau nej pom xwb. 4 Kuv tej lus kuv tuaj hais thiab tuaj tshaj rau nej tsis yog hais los ntawm kev thoob tsib ntse ntsuav kom ntxias tau neeg, tiam sis yog hais los ntawm lub tswv yim thiab lub hwj huam los, 5 kom nej txoj kev ntseeg tsis txhob txawb rau saum neeg kev thoob tsib tiam sis txawb rau saum Tswv Ntuj lub hwj huam.

NPN 119: 97, 98, 99, 100, 101, 102

Txais: (97) Huab Tais, kuv nyiam koj cov lus qhia.

Huab Tais, kuv nyiam koj Txoj Cai tas nrho,
kuv muab coj los xav tuaj nruab siab tas hnub.

Txais: (97) Huab Tais, kuv nyiam koj cov lus qhia.

Koj lo lus qhia ua kom kuv thoob tsib dua kuv cov yeeb ncuab,
vim kuv muab khaws los coj nraim mus li.

Txais: (97) Huab Tais, kuv nyiam koj cov lus qhia.

Kuv to taub ntau dua kuv cov xib hwb tas huv si,
vim kuv muab koj cov lus qhia coj los xav los kawm.

Txais: (97) Huab Tais, kuv nyiam koj cov lus qhia.

Kuv txawj xav tom ntej tom qab dua cov txwj laus,
vim kuv coj koj cov lus qhia nraim.

Txais: (97) Huab Tais, kuv nyiam koj cov lus qhia.

Kuv maim txhua txoj kev phem,
kom kuv coj tau raws koj cov lus.

Txais: (97) Huab Tais, kuv nyiam koj cov lus qhia.

Kuv tsis ncaim ntawm txoj cai koj tau txiav,
vim koj yog tus cob qhia kuv.

Txais: (97) Huab Tais, kuv nyiam koj cov lus qhia.

As Les Lus yas: LK 4: 18

Txaiz: As les lus yas, as les lus yas.

Huab Tais lub Tswv Yim nyob saum kuv,
Nws xa kuv tuaj tshaj lub moo zoo rau cov pluag.

Txaiz: As les lus yas, as les lus yas.

Ntawv Moo Zoo: LK 4: 16-30

16 Yes Xus los txog Nas Xas Les, lub zos uas nws nyob hlob. Hnub Xas Npas Tos, nws mus hauv lub tsev txoos xws li nws ua kam, ces nws sawv mus nyeem ntawv. 17 Lawv cev tus Yaj Saub His Xais phau ntawv rau nws. Nws nthuav phau ntawv, nws nrhiav tau nqe lus uas sau tias : 18 “Huab Tais lub Tswv Yim nyob saum kuv, vim nws pleev roj los qee kuv. Nws xa kuv mus tshaj lub Moo Zoo rau cov pluag. Nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev; nws xa kuv mus tso cov raug luag yuam kom tau kev dim, 19 thiab kom kuv tshaj tias yog ib xyoo Huab Tais pom zoo pub txiaj ntsim.”
20 Yes Xus rov kauv phau ntawv rau, nws muab cev rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus. 21 Ces Yes Xus hais rau lawv tias : “Hnub no, cov lus nyob hauv zaj Ntawv no tsheej xeeb raws li nej tau hnov lawm." 22 Tas cov neeg ntawd zeem tseeb tias nws hais lus zoo kawg, lawv qhuas cov lus muaj txiaj ntsim tawm hauv nws lub ncauj los. Lawv hais tias : "Tus ntawd, tsis yog Yos Xes tus tub lod ?"
23 Ces Yes Xus hais rau lawv tias : "Paub ntsoov tias nej yuav hais lo lus piv txoj lus no rau kuv mloog: ‘Kws kho mob, koj rov kho koj mas !’ Tas txhua yam peb hnov luag piav tias tshwm sim nyob Kas Fas Naus, koj kuj ua nyob hauv koj lub zos koj hlob thiab !" 24 Yes Xus tseem hais tias : "Kuv hais tseeb rau nej, tsis muaj ib tug yaj saub uas luag yuav txais nws zoo nyob hauv lub zos nws hlob. 25 Kuv hais qhov muaj tseeb rau nej tias, lub caij Es Lias nyob, muaj coob tus poj ntsuam nyob His Xas Lais teb, thaum ntuj kaw nag tau peb xyoos thiab rau hli, tas teb chaws tshaib plab loj kawg. 26 Tab sis Ntuj tsis xa Es Lias mus pab lawv ib tug li, Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb xwb. 27 Lub caij tus yaj saub Es Lis Xais nyob, muaj coob tus mob ruas nyob His Xas Lais teb, tab sis lawv tsis muaj ib tug rov huv li, tsuas yog tus neeg Xis Lias hu ua Nas Maas thiaj rov huv xwb."
28 Tas cov neeg hauv lub tsev txoos hnov cov lus ntawd, mas lawv npau taws kawg. 29 Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib phab toj ntxhab saum lub roob uas lawv txhim lawv lub nroog, lawv yuav thawb Yes Xus kom nws ntog toj. 30 Tab sis Yes Xus hla plaws hauv nruab nrab lawv, nws taug nws kev mus lawm.

TIM 4 LUB 9 HLIS 2018

Hnub Peb Lis Piam Nees Nkaum Ob Nruab Xyoo B Nruab Lis Piam Xyoo II

Zaj Nyeem Ib: 1 KLN 2: 10B-16

10 Leej Ntuj Plig tsom tau tas puas tsav yam, nws tsom tau tej yam tob nyob hauv Tswv Ntuj tib si. 11 Nyob hauv ib tsoom neeg, leej twg thiaj paub tau yam nyob puag hauv ib tug neeg nruab siab ? Tsuas yog tus neeg ntawd lub tswv yim uas nyob hauv nws xwb thiaj paub. Nyob hauv Tswv Ntuj kuj ib yam, tsis muaj leej twg paub tej yam nyob hauv Tswv Ntuj, tsuas yog Tswv Ntuj Leej Tswv Yim xwb thiaj paub.
12 Ntawm peb, mas peb tsis tau txais ntiaj teb lub tswv yim ; tiam sis peb txais Leej Tswv Yim uas tuaj ntawm Tswv Ntuj tuaj, kom peb to taub cov txiaj ntsim uas Tswv Ntuj tau pub rau peb. 13 Thaum peb hais txog cov txiaj ntsim ntawd, mas peb tsis siv cov lus uas neeg kev thoob tsib qhia, peb siv cov lus uas Leej Tswv Yim qhia, peb thiaj paub siv ib co lus sab ntsuj plig los qhia txog tej yam nyob sab ntsuj plig.
14 Tib neeg nqaij tawv tsis xav txais tej yam tuaj ntawm Tswv Ntuj Leej Tswv Yim tuaj, nws xav tias yog ib zag vwm xwb; nws tsis to taub tej ntawd li, vim yuav tsum siv tswv yim los txiav txim txog tej ntawd. 15 Tus neeg siv tswv yim los xav, mas nws txiav txim tau rau tas txhua yam, tiam sis tsis muaj leej twg txiav txim tau rau nws. 16 Vim tias “leej twg thiaj yuav paub tau Huab Tais zaj tswv yim, kom nws pab tau tswv yim rau Huab Tais ?” Ntawm peb mas peb muaj Leej Pleev zaj tswv yim.

NPN 145: 8-9, 10-11, 12-13AB, 13CD-14

Txais: (17) Huab Tais tej kev yog kev ncaj tas tib si.

Huab Tais muaj lub siab hlub thiab khuv leej neeg,
nws npau taws qeeb, nws muaj lub siab zoo tas nrho.
Huab Tais ua zoo rau txhua leej txhua tus,
nws khuv leej txhua yam nws tau tsim los.

Txais: (17) Huab Tais tej kev yog kev ncaj tas tib si.

HUAB TAIS, cia koj txhua yam hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (17) Huab Tais tej kev yog kev ncaj tas tib si.

Cia lawv qhia rau neeg paub txog koj lub hwj huam loj
thiab txog koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej txais tas txhua tiam neeg,
thiab koj txoj kev tswj kav yuav nyob mus txheej dhau txheej.

Txais: (17) Huab Tais tej kev yog kev ncaj tas tib si.

Huab Tais tej lus yog lus tseeb,
nws tej dej num yog num ntshiab.
Huab Tais rub cov ntog kom sawv taus los,
nws tsa cov khoov nkoos kom sawv taus ntseg.

Txais: (17) Huab Tais tej kev yog kev ncaj tas tib si.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj tau sawv los nyob hauv peb,
Yog Tswv Ntuj tuaj xyuas nws haiv neeg.

Txais: As les lus yas, as les lus yas.

Ntawv Moo Zoo: LK 4: 31-37

31 Yes Xus nqes mus nram Kas Fas Naus uas yog ib lub nroog nyob hauv xeev Nkas Lis Lais. Hnub Xas Npas Tos, nws qhia lawv. 32 Sawv daws qhuas txog nws cov lus qhia, vim nws hais lus muaj hwj chim. 33 Nyob hauv lub tsev txoos ntawd, muaj ib tug neeg raug ib tug dab tsis huv, nws qw nrov nrov tias : 34 "Yes Xus Nas Xas Les, koj xav ua dab tsis rau peb ? Puas yog koj tuaj rhuav peb? Kuv paub koj yog leej twg : koj yog Tswv Ntuj tus Ntshiab." 35 Yes Xus cem nws tias : "Ua twj ywm ! Koj tawm ntawm nws mus!" Ces dab tsis huv muab tus neeg thawb ntiag rau hauv av rau sawv daws saib, nws tawm hauv tus neeg mus, tsis ua xwv txheej dab tsi rau tus neeg ntawd. 36 Tas lawv sawv daws yoob tag, lawv sib hais zom zaws tias : "Nws lo lus muaj dab tsi ? Nws siv hwj huam thiab hwj chim yuam dab tsis huv, ces dab cia li tawm mus lawm." 37 Ib lub moo qhuas txog Yes Xus thiaj li nrov mus rau tas txhua lub zos nyob ib ncig thaj tsam ntawd.

TIM      5      LUB      9      HLIS      2018

Hnub Plaub Lis Piam Nees Nkaum Ob Nruab Xyoo B Nruab Lis Piam Xyoo II

Hwm LN Teresa nyob Calcutta

Zaj Nyeem Ib:       1 KLN  3:   1-9

1 Cov kwv tij, thaum pib mas kuv hais tsis tau ib co lus rau nej xws li yog hais rau ib co neeg uas yog tswv yim, kuv tsuas hais tau li yog hais rau ib co neeg muaj lub cev nqaij xwb, thiab xws li hais rau ib co me nyuam mos nyob hauv Leej Pleev xwb. 2 Kuv tau xub muab kua mis pub rau nej haus, tsis tau muab txhiam xws khov rau nej noj, vim nej tseem noj tsis tau taus. Tab nyem no los nej twb tseem noj tsis tau taus,  3 vim nej tseem zwm rau lub cev nqaij. Thaum nej muaj kev sib khib thiab kev sib tw kom yeej nyob hauv nej, mas kuj yog vim nej yog neeg nqaij tawv thiab nej coj tus yam ntxwv raws li neeg coj xwb puas yog ? 4 Thaum nej muaj ib tug hais tias : ‘Kuv yog Paj Lug tog,’ los tseem muaj lwm tus hais tias : ‘Kuv yog As Pos Los tog,’ mas tej lus ntawd yog tib neeg nqaij tawv tej lus xwb los tsis sub ? 5 As Pos Los yog leej twg ? Paj Lug ho yog leej twg ? Nkawd yog ob tug tub tshaj Ntuj lus rau nej kom nej tau los ua neeg ntseeg; nkawd nyias tshaj raws li Huab Tais pub rau nyias. 6 Kuv yog tus cog, As Pos Los ywg dej rau, tiam sis Tswv Ntuj yog tus ua kom hlob. 7 Li ntawd, tus cog tsis tseem ceeb dab tsi, tus ywg dej los kuj tsis tseem ceeb dab tsi ; Tswv Ntuj tus ua kom hlob, thiaj yog tus tseem ceeb xwb. 8 Tus cog thiab tus ywg dej, nkawd ob leeg yog ib tug xwb; tab sis nyias yuav txais nyias nqe zog raws li nyias kev khwv. 9 Vim tias peb yog cov nrog Tswv Ntuj ua hauj lwm ; nej yog Tswv Ntuj daim teb, nej yog Tswv Ntuj lub tsev.

NPN       33:   12-13, 14-15, 20-21

Txais: (12) Haiv neeg Huab Tais xaiv ua nws tug lawv txoj hmoov zoo.

Haiv neeg uas lawv tus Tswv Ntuj yog HUAB TAIS, lawv txoj hmoov zoo!
Haiv neeg uas nws xaiv ua nws lub cuab tam, lawv txoj hmoov zoo!
Nyob txheej ntuj saud, HUAB TAIS dauv muag los ntsia,
nws pom tas nrho ib tsoom neeg.

Txais: (12) Haiv neeg Huab Tais xaiv ua nws tug lawv txoj hmoov zoo.

Nws zaum saum nws lub roojtheej kiab tsis ua zog,
nws ntsia pom ib tsoom neeg nyob ntiaj teb.
Nws yog tus puab txhua leej txhua tus lub siab,
nws soj ntsuam txhua txoj hauj lwm lawv ua.

Txais: (12) Haiv neeg Huab Tais xaiv ua nws tug lawv txoj hmoov zoo.

Peb tus ntsuj plig tos ntsoov HUAB TAIS:
nws yog tus pab peb, nws yog daim leem phiaj thaiv peb !
Vim nyob hauv Huab Tais peb muaj kev zoo siab,
nws lub npe ntshiab yog peb chaw tso siab.

Txais: (12) Haiv neeg Huab Tais xaiv ua nws tug lawv txoj hmoov zoo.

As Les Lus Yas:       LK  4:   18

Txais: As les lus yas, as les lus yas.

Huab Tais xa kuv mus tshaj lub Moo Zoo rau cov pluag
Thiab mus ceeb toom rau cov nyob txim tias lawv yuav dim.

Txais: As les lus yas, as les lus yas.

Ntawv Moo Zoo:       LK  4:   38-44

38 Yes Xus tawm hauv lub tsev txoos mus, nws nkag mus hauv Xis Moos lub tsev. Xis Moos niam tais muaj mob kub cev heev, ces lawv thov kom Yes Xus mus saib Xis Moos niam tais. 39 Yes Xus thiaj mus khoov saib niam tais, nws tsawm tus mob kub cev, ces tus mob tso plhuav niam tais tseg. Niam tais sawv tsees tam sis ntawd, nws pib txais tos lawv.
40 Thaum lub hnub yuav poob qho, cov uas muaj neeg raug ntau hom mob, sawv daws coj lawv cov neeg mob tuaj rau Yes Xus. Ces Yes Xus tsa tes rau saum lawv ib leeg zuj zus, nws kho sawv daws zoo tas huv si. 41 Ib co dab phem kuj tawm hauv coob leej mus, dab phem qw qw tias : "Koj yog Tswv Ntuj Leej Tub." Tab sis Yes Xus cem lawv, nws txwv tsis pub lawv hais lus, vim lawv paub tias nws yog Leej Pleev.
42 Thaum kaj ntug, Yes Xus tawm mus rau ib qho chaw tsis muaj neeg. Tsoom sid nrhiav nws, lawv tuaj txog ntawm nws, lawv xav cheem Yes Xus kom txhob mus deb ntawm lawv. 43 Tab sis Yes Xus hais rau lawv tias : "Kuv yuav tsum tshaj lub Moo Zoo hais txog Tswv Ntuj lub Ceeb Tsheej rau lwm cov nroog thiab. Yog vim qhov ntawd, Ntuj thiaj xa kuv tuaj." 44 Ces Yes Xus mus qhuab qhia nyob hauv cov tsev txoos nyob Yus Das teb.

TIM 6 LUB 9 HLI 2018

Hnub Tsib Lis Piam Nees Nkaum Ob Nruab Xyoo B Nruab Lis Piam Xyoo II

Zaj Nyeem Ib: 1 KLN 3: 18-23

Cov kwv tij,
18 Nej tsis txhob rov dag nej tus kheej. Yog nyob hauv nej, leej twg xav tias tiam no nws yog neeg thoob tsib, mas nws yuav tsum ua neeg vwm, kom nws thoob tsib tuaj. 19 Vim Tswv Ntuj saib ntiaj teb txoj kev thoob tsib yog ib txog kev vwm. Muaj ib lo lus sau tseg tias : ‘Tswv Ntuj ua kom cov thoob tsib rov mag lawv txoj kev ntse rooj ntxiab.’ 20 Tseem muaj dua ib los sau tias : “Huab Tais paub cov neeg thoob tsib zaj tswv yim, nws paub tias tsis muaj nqes dab tsi.” 21 Li ntawd, nej tsis txhob muaj leej twg muab tib neeg los ua nej lub chaw khav, vim tas txhia yam yog nej tug, 22 tsis hais Paj Lug, los As Pos Los, los Kes Fas, los lub ntiaj teb, los txoj sia, los txoj kev tuag, los lub zim txwv no, los yav tom ntej, tas txhua yam ntawd yog nej tug, 23 hos nej yog Leej Pleev tug, Leej Pleev yog Tswv Ntuj tug.

NPN 24: 1BC-2, 3-4AB, 5-6

Txais: (1) Lub ntiaj teb thiab puas tsav yam nyob hauv yog HUAB TAIS li.

Lub ntiaj teb thiab puas tsav yam nyob hauv yog HUAB TAIS li,
lub sim ceeb thiab txhua yam nyob hauv yog nws tug.
Vim nws yog tus tsim lub ntiaj teb los txawb rau saum cov hiav txwv
thiab muab tsa rau saum cov dej ntws.

Txais: (1) Lub ntiaj teb thiab puas tsav yam nyob hauv yog HUAB TAIS li.

Leej twg thiaj yuav nce tau mus saum HUAB TAIS lub roob?
Los leej twg thiaj yuav mus sawv taus nyob hauv nws thaj chaw ntshiab?
Yog tus uas txhais tes tsis muaj txhaum, lub siab dawb huv,
tus uas tsis ntshaw tej yam tsis muaj qab hau.

Txais: (1) Lub ntiaj teb thiab puas tsav yam nyob hauv yog HUAB TAIS li.

HUAB TAIS yuav foom koob foom hmoov rau nws. ,
yog paj tshab tuaj ntawm Tswv Ntuj tus cawm nws tuaj.
Cov neeg uas nrhiav Tswv Ntuj yuav zoo li ntawd,
cov uas nrhiav Yas Kos tus Tswv Ntuj lub ntsej muag.

Txais: (1) Lub ntiaj teb thiab puas tsav yam nyob hauv yog HUAB TAIS li.

As Les Lus Yas: MT 4: 19

Txais: As les lus yas, as les lus yas.

Huab Tais hais tias: Nej raws kuv mus,
kuv yuav tsa nej ua cov tub puav neeg.

Txais: As les lus yas, as les lus yas.

Ntawv Moo Zoo: LK 5: 1-11

1 Muaj ib zaug, muaj ib pab neeg coob tuaj txiv Yes Xus kom tau mloog Tswv Ntuj Lo Lus, thaum ntawd Yes Xus sawv nyob ntawm ntug pas dej Nkes Nes Xas Les. 2 Yes Xus pom ob lub nkoj nres ntawm ntug dej. Cov tub puav ntses nqes nkoj tas lawm, lawv tseem mus ntxhua lawv cov vas lawm. 3 Yes Xus nce mus hauv ib lub nkoj, yog Xis Moos lub, nws kom Xis Moos nquam nkoj mus deb ntawm ntug dej me ntsis, ces nws zaum hauv nkoj qhia tsoom sid. 4 Thaum Yes Xus hais lus tas, nws hais rau Xis Moos tias : "Koj nquam nkoj mus lawm tom qhov dej tob, nej tso nej cov vas nqes mus puav ntses." 5 Xis Moos teb tias : "Xib Hwb, peb twb khwv ib hmos tsis tau dab tsi li. Tab sis yog vim koj hais, mas kuv yuav pov cov vas nqes mus." 6 Ces thaum lawv ua li ntawd, lawv puav tau ntses ntau kawg ua lawv cov vas txam kiag. 7 Lawv co tes rau lawv cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog. 8 Xis Moos Pob Zeb pom li ntawd, nws txhos caug ntua pe Yes Xus, nws hais tias "Huab Tais, koj txav mus deb kuv, vim kuv yog ib tug neeg txhaum." 9 Xis Moos ntshai kawg, cov nrog Xis Moos ua ke puav leej ntshai, vim lawv puav tau ntses ntau, 10 Yas Kos thiab Zam, uas yog Ntxes Npes Dais ob tug tub, thiab yog Xis Moos ob tug npawg, nkawd kuj ntshai ib yam thiab. Yes Xus hais rau Xis Moos tias : "Koj txhob ntshai, txij no mus, koj yuav puav tib neeg." 11 Ces lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus.

TIM 7 LUB 9 HLIS 2018

Thawj Hnub Rau Lis Piam Nees Nkaum Ob Nruab Xyoo B Nruab Lis Piam Xyoo II

Zaj Nyeem Ib: 1 KLN 4: 1-5

Cov kwv tij:
1 Xav kom sawv daws saib peb yog Yes Xus Pleev cov tub txib, thiab yog cov tuav txoj dej num cob qhia txog tej yam tob zais nyob hauv Tswv Ntuj. 2 Qhov uas sawv daws tos ntawm cov neeg tuav txoj dej num ntawd yog kom lawv ua ib co neeg sawv daws tso siab rau tau. 3 Ntawm kuv mas kuv tsis quav ntsej txog tias tsam nej yuav txiav txim rau kuv, los tsam ib pab txwj laus yuav txiav txim rau kuv; kuv los kuj tsis rov txiav txim rau kuv tus kheej li. 4 Kuv tsis pom tias kuv tau ua ib yam tsis zoo, tiam sis kuv hais tsis tau tias kuv tsis muaj txim li. Tus yuav txiav txim rau kuv kawg yog Huab Tais xwb. 5 Li ntawd mas nej tsis txhob maj txiav txim rau luag ua ntej lub caij teem tseg, mus txog lub caij Huab Tais yuav los. Ces nws yuav qhib tej yam zais nyob hauv qhov tsaus ntuj kom tawm los, nws yuav ua kom sawv daws pom yam npog cia nyob hauv tej nruab siab. Thaum ntawd nyias yuav txais Tswv Ntuj lo lus qhuas txog nyias.

NPN 37: 3-4, 5-6, 27-28, 39-40

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws thiab muaj noj nrog kev tso siab.
Nej zoo siab nyob hauv HUAB TAIS,
ces nws yuav pub rau nej raws nej lub siab ntshaw.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Muab nej txoj kev nej taug tso rau HUAB TAIS ua tus saib;
nej tso siab rau nws ces nws yuav pab. .
Nws yuav ua kom txoj kev ncaj sawv tuaj ziab nej li qhov pom kev;
ces nej txoj kev yeej yuav ci npaum thaum tav su nrig.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Koj tso txoj kev phem tseg mus ua qhov zoo,
koj yuav nyob ruaj nreb hauv qhov zoo mus li.
Vim HUAB TAIS nyiam txoj kev ncaj,
nws tsis tso cov neeg ntseeg nws pov tseg.
Cov neeg siab phem yuav raug muab txo kom ploj mus,
cov tsis hwm Ntuj tsoom tub ki yuav raug luag muab rho tawm.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Txoj kev cawm tus neeg ncaj tuaj ntawm HUAB TAIS tuaj,
nws yog lawv lub chaw vam thaum lawv ntsib kev nyuaj.
HUAB TAIS pab lawv thiab tso lawv dim,
nws tso lawv dim ntawm tus phem thiab cawm lawv,
vim lawv tuaj vam khom nws.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: "Kuv yog qhov pom kev kaj lub qab ntuj neeg.
Leej twg lawv kuv qab, nws yuav tau qhov pom kev uas pub txoj sia."

Txais: As les lus yas, as les lus yas.

Ntawv Moo Zoo: LK 5: 33-39

33 Copv thoob xwm ntawv thiab cov Fas Lis Xais hais rau Yes Xus tias : "Zam cov thwj tim nquag yoo mov thiab hais cov zaj teev Ntuj, cov Fas Lis Xas cov thwj tim kuj ua ib yam li ntawd thiab, hos koj cov thwj tim mas lawv noj thiab lawv haus tas li." 34 Yes Xus hais rau lawv tias : "Nej puas hais kom nraug vauv cov phooj ywg yoo mov thaum nraug vauv tseem nrog lawv nyob ? 35 Yuav muaj ib lub zim txwv uas luag coj nraug vauv mus lawm, thaum ntawd, lawv mam li yoo mov."
36 Yes Xus tseem hais ib zag paj lug rau lawv tias : "Tsis muaj leej twg yuav dua ib daig ntaub ntawm lub tsho tshiab los ntxiv rau lub khaub tshos. Vim ua li ntawd ces lub tshiab yuav ntuag, hos daim ntaub dua los kuj tsis phim lub khaub tshos thiab.
37 Thiab kuj tsis muaj leej twg yuav ntim cov cawv tshiab rau hauv tej qub hnab tawv. Vim tias cov cawv tshiab yuav ua kom cov hnab tawv tawg, ces cawv yuav txeej tas, hos cov hnab tawv los kuj yuav piam sij tas. 38 Ua li mas, yuav tsum muab cawv tshiab ntim rau hauv cov hnab tawv tshiab thiab. 39 Kuj tsis muaj ib tug neeg uas tau haus cawv laus tas, yuav xav haus cawv tshiab, vim nws hais tias : ‘cawv laus thiaj qab.’"

TIM 8 LUB 9 HLIS 2018

Hnub Xya Lis Piam Nees Nkaum Ob Nruab Xyoo B nruab Lis Piam Xyoo II

Hwm Hnub Niam Mab Liab Yug Los

Zaj Nyeem Ib: Mis Kes 5: 1-4a

Huab Tais hais tias:
1 Npes Les Hes Es Fas Tas, koj me dua cov tsis phim nyob hauv cov xeem Yus Das. Tus yuav kav His Xas Lais yuav tawm ntawm koj los. Nws lub keeb yeej nyob thaum ntxov ub los, yeej nyob puag txheej thaud los lawm. 2 Yog vim li ntawd mas Huab Tais yuav tso lawv pov tseg ib ntus, mus txog lub caij uas tus yuav yug me nyuam yug tau nws tus me nyuam lawm. Ces nws cov kwv tij seem yuav rov los koom nrog His Xas Lais cov me nyuam. 3 Nws yuav sawv ruaj nreb, nws yuav zov nws pab yaj nyob hauv HUAB TAIS lub hwj huam, nyob hauv Huab Tais nws tus Tswv Ntuj lub npe muaj hwj chim. Ces lawv yuav nyob ruaj vim zaum no nws yuav nto moo loj mus txog tim npoo ntiaj teb, 4 thiab nws yuav pub kev thaj yeeb.

Los: Los Mas 8: 28-30

Cov kwv tij,
28 Peb paub tias txhua yam pab kom cov uas nyiam Tswv Ntuj tau qhov zoo, raws li Tswv Ntuj hu lawv thiab raws qhov nws npaj rau lawv. 29 Cov neeg uas nws ib txwm paub ua ntej lawm, nws kuj pub txoj hmoov rau lawv kom lawv yoog tau raws li nws Leej Tub tus duab, ces nws Leej Tub thiaj ua tij, tus xub yug dua tas ib tsoom kwv coob coob. 30 Cov uas Tswv Ntuj ib txwm npaj hu, mas nws hu lawv; cov uas nws hu, mas nws ua kom lawv ncaj tuaj; cov uas nws ua kom ncaj tuaj, mas nws kuj muab hwj chim rau lawv thiab.

NPN 13: 6ab, 6c

Txais: (HX 61: 10) Kuv txaus siab thiab zoo siab nyob hauv Huab Tais.

Txawm tias kuv tso siab lug rau koj txoj kev khuv leej ,
Thov cia kuv lub siab luag ntxhi nyob hauv koj txoj kev cawm.

Txais: (HX 61: 10) Kuv txaus siab thiab zoo siab nyob hauv Huab Tais.

Cia kuv hu nkauj cav txog HUAB TAIS tias:
“Nws tau ua zoo kawg rau kuv.”

Txais: (HX 61: 10) Kuv txaus siab thiab zoo siab nyob hauv Huab Tais.

As Les Lus yas

Txais: As les lus yas, as les lus yas.

Koj tau txoj hmoov zoo, Nkauj Dawb Huv Mab Liab,
Tsim nyog sawv daws qhuas koj;
Lub hnub uas pub txoj kev ncaj tawm hauv koj tuaj,
yog Leej Pleev peb tus Tswv Ntuj.

Txais: As les lus yas, as les lus yas.

Ntawv Moo Zoo: Mt 1: 1-16, 18-23

1 Phau ntawv qhia txog Yes Xus Pleev lub keeb, nws yog Das Vis leej tub thiab yog Has Nplas Has leej tub : 2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij. 3 Yus Das yug Fas Les thiab Ntxas Las, nkawd niam yog Thas Mas; Fas Les yug Es Xas Los; Es Xas Los yug As Las; 4 As Las yug As Mis Nas Das; As Mis Nas Das yug Nas As Xoos; Nas As Xoos yug Xas Moos, 5 Xas Moos yug Npuag Oos, nws niam yog Las Has; Npuag Oos yug Os Npes, nws niam yog Luv; Os Npes yug Yes Xes; 6 Yes Xes yug tus vaj Das Vis.
Das Vis yug Xas Los Moos, uas yog Us Lis tus poj niam yug; 7 Xas Los Moos yug Los Npuag; Los Npuag yug As Npias; As Npias yug As Xas; 8 As Xas yug Yos Xas Fas; Yos Xas Fas yug Yos Las; Yos Las yug Os Xias; 9 Os Xias yug Yos Thas; Yos Thas yug As Kas; As Kas yug Es Xes Kias; 10 Es Xes Kias yug Mas Nas Xes; Mas Nas Xes yug As Moos; As Moos yug Yos Xias; 11 Yos Xias yug Yes Kos Nias thiab nws cov kwv tij, thaum lub caij lawv mus raug txim nyob Npas Npis Los.
12 Dhau lub caij raug txim nyob Npas Npis Los lawm, Yes Kos Nias yug Xas Las Thias; Xas Las Thias yug Ntxos Los Npas Npes; 13 Ntxos Los Npas Npes yug As Npis Yus; As Npis Yus yug Es Lias Kis; Es Lias Kis yug As Ntxos, 14 As Ntxos yug Xas Dos; Xas Dos yug As Khis; As Khis yug Es Lis Us; 15 Es Lis Us yug Es Les As Ntxas; Es Les As Ntxas yug Mas Thas; Mas Thas yug Yas Kos; 16 Yas Kos yug Yos Xes uas yog Mab Liab tus txiv. Mab Liab yug Yes Xus, uas hu nws ua Leej Pleev.
18 Yes Xus Pleev lub keeb chiv zoo li no : Mab Liab uas yog nws niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub hauv plab. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab yuav nrauj Mab Liab twj ywm. 20 Thaum nws xav tau li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : "Tswv Ntuj nrog peb nyob".

Los: MT 1: 18-23

18 Yes Xus Pleev lub keeb chiv zoo li no : Mab Liab uas yog nws niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub hauv plab. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab yuav nrauj Mab Liab twj ywm. 20 Thaum nws xav tau li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : "Tswv Ntuj nrog peb nyob".’

TIM 10 LUB 9 HLIS 2018

Hnub Ob Lis Piam Nees Nkaum Peb Nruab Xyoo B Nruab Lis Piam Xyoo II

Zaj Nyeem Ib: 1 KLN 5: 1-8

Cov kwv tij,
1 Hnov luag hais nroos ntws tias, nyob tim nej, mas muaj kev ua dev ua npua qias kawg, tab yog cov neeg teev pej kum dab, lawv twb tsis ua qias npaum li ntawd, xws li ib tug neeg cia li mus nrog nws txiv tus poj niam nyob ! 2 Tsis kav nej tseem khav theeb muab hlob kawg nkaus! Twb phim nej yuav tu siab loj los tsis sub? Kom tus ua phem li no raug tshem tawm hauv nej mus.
3 Ntawm kuv, mas txawm kuv lub cev tsis nrog nej nyob los kuv lub tswv yim nrog nej nyob; kuv twb txiav txim nyob hauv Huab Tais Yes Xus lub npe rau tus ua qhov phem ntawd lawm, cuag li kuv nrog nej nyob ntag. 4 Thaum nej tuaj sib txoos ua ke nyob hauv peb tus Huab Tais Yes Xus lub npe thiab kuv lub tswv yim koom nrog nej nyob hauv Huab Tais Yes Xus lub hwj huam, 5 mas nej yuav muab tus neeg ntawd tso rau Xas Tas kom nws lub cev nqaij raug puas tsuaj tas mus, tiam sis kom thaum txog Huab Tais Hnub, nws tus ntsuj plig thiaj yuav tau kev dim.
6 Nej cov lus khav theeb tsis zoo mloog kiag li! Nej puas paub tias, ib qho poov xab me me ua kom tas cov hmoov nplej su tuaj ? 7 Nej ntxuav cov qub poov xab pov tseg, kom nej txia ua ib co hmoov nplej nyuam qhuav do tshiab tshiab, raws li nej yog cov hmoov tsis xyaw poov xab. Vim Leej Pleev, peb tus Yaj Hla twb tuag txi rau Ntuj lawm. 8 Li ntawd peb ua lub Ntees Hla, peb tsis txhob siv cov qub poov xab, uas ua kom kev lim hiam thiab kev phem sawv tuaj, tiam sis peb yuav siv cov mov tsis xyaw poov xab, uas ua kom muaj kev dawb huv thiab kev tseeb.

NPN 5: 5-6, 7, 12

Txais: (9) Huab Tais, thov koj coj kuv raws koj txoj kev ncaj.

Tswv Ntuj, koj tsis zoo siab pom txoj kev phem.
Tus neeg phem yuav nyob tsis taus nrog koj.
Tus neeg saib tsis taus luag yuav sawv tsis taus rau koj pom.
Koj ntxub tas tsoom neeg nrhiav kev ua phem.

Txais: (9) Huab Tais, thov koj coj kuv raws koj txoj kev ncaj.

Koj txo kom cov neeg hais lus cuav ploj mus tag.
Cov neeg txo luag roj ntsha thiab cov neeg dag,
HUAB TAIS ntxub lawv tas siab nrho.

Txais: (9) Huab Tais, thov koj coj kuv raws koj txoj kev ncaj.

Kom cov tuaj nkaum hauv koj
zoo siab thiab hom khaj mus li;
thov koj txuag lawv, kom cov neeg nyiam
koj lub npe muaj koj ua lawv kev zoo siab.

Txais: (9) Huab Tais, thov koj coj kuv raws koj txoj kev ncaj.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub lawv, lawv raws nraim kuv qab mus.

Txais: As les lus yas, as les lus yas.

Ntawv Moo Zoo: LK 6: 6-11

6 Tseem muaj dua ib hnub Xas Npas Tos, Yes Xus mus hauv lub tsev txoos, nws qhia sawv daws. Nyob ntawd, muaj ib tug neeg uas sab tes xis qhuav. 7 Cov Kws Ntawv Ntshiab thiab cov Fas Lis Xais nyas ntsia twj ywm saib Yes Xus puas kho neeg mob rau hnub Xas Npas Tos, xwv lawv thiaj tau kev nrhiav lus rau Yes Xus. 8 Tiam sis Yes Xus twb paub qhov lawv xav lawm, ces nws hais rau tus neeg qhuav tes tias : "Koj mus sawv ntsug nyob hauv nruab nrab." Ces tus qhuav tes sawv ntsug rau ntawd. 9 Yes Xus hais rau lawv tias : « Kuv nug nej: Hnub Xas Npas Tos, puas yog txoj cai kheev kom ua zoo tsis kheev ua phem los tsis yog? Puas yog kheev kom cawm ib txog sia tsis kheev cia ib txog sia ploj los tsis yog? » 10 Ces Yes Xus ntsia ib ncig lawv sawv daws tas, nws hais rau tus qhuav tes tias : "Koj xyab tes." Tus neeg ntawd xyab tes, nws txhais tes cia li zoo hlo. 11 Tab sis lawv npau taws heev kawg, ces lawv sib tham saib lawv yuav ua li cas tau rau Yes Xus.

TIM 11 LUB 9 HLIS 2018

Hnub Peb Lis Piam Nees Nkaum Peb Nruab Xyoo B Nruab Lis Piam Xyoo II

Zaj Nyeem Ib: 1 KLN 6: 1-11

1 Thaum nej ib tug nrog lwm tus muaj lus, cas nws muaj cuab kav mus hais plaub tim cov neeg tsis ncaj, ua cas tsis mus cuag cov ntshiab ? 2 Nej tsis paub tias cov ntshiab yog cov yuav txiav txim rau lub ntiaj teb no lod? Yog nej twb yuav txiav txim rau lub ntiaj teb, ua cas nej ho tsis tsim nyog txiav txim rau tej yam me me? 3 Nej tsis paub tias peb yuav txiav txim rau Ntuj cov Tshiab no lod ? Yog li phim peb haj yam yuav txiav txim tau rau tej lus hauv lub neej tam sis no los tsis yog? 4 Ua cas, thaum nej muaj lus, nej yuav mus cuag tej tus neeg uas lub Koom Txoos tsis pom zoo kom lawv txiav txim rau nej? 5 Kuv hais tej no rau nej kom saib nej puas txaj muag. Nyob hauv nej txawm tsis muaj ib tug neeg thoob tsib uas yuav txiav txim tau rau cov kwv tij li lod ? 6 Nej yeem cia tus kwv mus kom tus tij rau tom tsoom neeg tsis ntseeg puas yog?
7 Li cas los thaum nej sib ua plaub ua ntug ib leeg rau ib leeg, yog nej swb rau kev ua tsis yog lawm ! Ua cas nej tsis ua tiag nyiaj cia luag ua tsis ncaj rau nej? Ua cas nej tsis ua tiag nyiaj cia luag dag noj nej ? 8 Tab sis nej twb yog cov ua tsis ncaj thiab yog cov dag noj, tseem yog ua rau nej cov kwv tij thiab xwb. 9 Nej tsis paub tias cov neeg tsis ncaj yuav tsis txais Tswv Ntuj lub Ceeb Tsheej ua lawv tug no lod ? Nej ceev faj txhob coj yuam kev, vim cov neeg nyiam sib dee, cov teev dab teev mlom, cov zes luag txij luag nkawm, cov ua txiv ntiav niam ntiav, cov txiv neej nrog txiv neej ua dev ua npua, 10 cov ua tub sab tub nyiag, cov ntshaw tau ntau, cov quav dej quav cawv, cov xyav luag moo phem, cov hem kom tau noj luag, lawv puav leej yuav tsis tau txais Tswv Ntuj lub Ceeb Tsheej los ua lawv tug. 11 Yav tas los, nej qee leej tau ua li tau hais ntawd thiab. Tab sis, nyem no, nej ntxuav nej tas lawm, mas nej ntshiab tuaj lawm; nej ncaj ncees tuaj nyob hauv Huab Tais Yes Xus Pleev lub npe thiab hauv peb tus Tswv Ntuj Leej Tswv Yim lawm.

NPN 149: 1B-2, 3-4, 5-6A+9B

Txais: (4a) Huab Tais zoo siab nyob hauv nws haiv neeg.

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav zoo siab nyob hauv tus uas tsim lawv,
Xis Yoos cov me nyuam yuav luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej ua zam npua cov neeg me.

Txais: (4a) Huab Tais zoo siab nyob hauv nws haiv neeg.

Cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Cov uas ntseeg nws lawv lub koob meej yog li no. As les lus yas.

Txais: (4a) Huab Tais zoo siab nyob hauv nws haiv neeg.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: kuv xaiv nej hauv lub ntiaj teb los,
kom nej mus txi ib co txiv uas yuav nyob ruaj,

Txais: As les lus yas, as les lus yas.

Ntawv Moo Zoo: LK 6: 12-19

12 Yes Xus nce mus pem roob mus teev Ntuj, nws nyob ib hmos ped teev Tswv Tswv Ntuj. 13 Thaum kaj ntug, nws hu nws cov thwj tim los, nws xaiv kaum ob leeg, nws hu lawv ua Hauv Paus Xa Lus. 14 Yog Xis Moos, uas nws tis npe hu ua Pob Zeb, thiab As Nres, Pob Zeb tus kwv, Yas Kos, Zam, Fis Lis Pos, Npas Tos Los Mas Yos, 15 Mas Tais, Tos Mas, Yas Kos uas yog As Fas Yos tus tub, Xis Moos Siab Kub, 16 Yus Das, Yas Kos tus tub, thiab Yus Das Kas Lis Yaus, uas yog tus ntxeev siab.
17 Yes Xus nrog cov Hauv Paus Xa Lus nqes los, nws sawv saum ib qho chaw tiaj. Muaj Yes Xus ib tsoom thwj tim thiab ib pab neeg coob kawg tuaj ntawm xeev Yus Das, ntawm Yes Lus Xas Les, thiab ntawm ntug dej ntuj Tws Los thiab Xis Doos tuaj. 18 Lawv tuaj mloog Yes Xus thiab tuaj thov nws kho lawv cov mob kom zoo; tab cov uas raug tej tus dab tsis huv tsim lawv, puav leej rov zoo tas. 19 Ces tas tsoom sid nrhiav kom tau kev chwv Yes Xus, vim muaj ib lub zog tawm hauv nws los kho sawv daws zoo tas huv si.

TIM 12 LUB 9 HLIS 2018

Hnub Plaub Lis Piam Nees Nkaum Peb Xyoo B Nruab Lis Piam Xyoo II

Hwm Niam Mab Liab lub Npe Ntshiab

Zaj Nyeem Ib: 1 KLN 7: 25-31

25 Hais txog cov neeg xav nyob ua neeg tab seeb mas kuv tsis muaj Huab Tais ib lo lus qhia txog, tab sis kuv yuav hais ib lo lus raws li kuv xav vim kuv yog ib tug Huab Tais tau khuv leej uas nej ntseeg tau. 26 Kuv xav tias, vim lub zim txwv no muaj kev nyuaj kev ntxhov, mas qhov zoo yog nyias yuav tsum coj raws li nyias tau xaiv lawm. 27 Yog koj muaj poj niam lawm, mas koj txhob nrhiav kev ncaim ntawm koj tus poj niam. Hos yog koj tsis tau muaj poj niam, mas koj txhob nrhiav yuav poj niam. 28 Tab sis yog koj ho yuav poj niam los koj tsis ua txhaum, thiab yog ib tus ntxhais hluas nkauj yuav txiv, los nws kuj tsis txhaum; tab sis vim cov yuav poj niam yuav txiv li ntawd yuav paub kev txom nyem nyob hauv lawv lub neej nqaij tawv, mas kuv xav pab lawv kom txhob raug txoj kev ntawd xwb.
29 Cov kwv tij, kuv hais rau nej tias, tsis tshuav zim txwv ntev lawm. Li ntawd mas cov muaj poj niam yuav coj lub neej xws li lawv tsis muaj poj niam, 30 Cov neeg quaj ntsuag yuav coj xws li lawv tsis muaj chaw quaj, cov muaj kev lom zem, yuav ua xws li lawv tsis lom zem, cov muas cuab yeej cuab tam yuav ua zoo li lawv tsis muaj dab tsi li, 31 cov uas siv lub ntiaj teb yuav ua zoo li lawv tsis siv. Vim lub ntiaj teb uas zoo xws li qhov peb paub no yuav dua mus sai sai.

NPN 45: 11-12, 14-15, 16-17

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Me ntxhais, koj mloog mog ! Koj ntsia, koj tig ntsej los mloog :
Koj txhob nco koj haiv neeg, koj niam koj txiv lub tsev ntxiv.
Tus vaj qaug siab hlo nyiam koj txoj kev zoo nkauj !
Nws yog koj tus huab tais, koj yuav txhos caug pe hawm nws.

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Vaj ntxwv tus ntxhais nkag los nws muaj hwj chim kawg,
Nws hnav ib ce zam yog paj ntaub ntos xov kub.
Nws hnav zam paj ntaub ces lawv coj nws mus cob rau tus vaj;
ib pab nkauj xwb lawv nws qab kuj raug coj mus rau tus vaj thiab.

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Lawv ua ib pab muaj kev zoo siab sib law sib liag,
lawv chaws mus hauv tus vaj lub tuam tsev.
Koj cov tub yuav los sawv phaj txiv chaw,
koj yuav tsa lawv ua vaj txheeb kav ntiaj teb

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

As Les Lus Yas: LK 6: 23AB

Txais: As les lus yas, as les lus yas.

Nej yuav zoo siab, nej yuav dhia hom khaj,
vim nej yuav tau txais koob haum loj nyob saum ntuj.

Txais: As les lus yas, as les lus yas.

Ntawv Moo Zoo: LK 6: 20-26

20 Yes Xus tsa muag ntsia nws cov thwj tim, nws hais tias : "Nej cov uas yog neeg pluag, nej txoj hmoov zoo, vim Tswv Ntuj lub Ceeb Tsheej yog nej tug. 21 Nej cov uas nyem no nej tshaib, nej txoj hmoov zoo, vim nej yuav tau noj txaus siab. Nej cov uas nyem no nej quaj, nej txoj hmoov zoo, vim nej yuav luag. 22 Thaum muaj neeg ntxub nej, thaum luag ntiab nej, los luag cem nej, los xyav lus phem txog nej lub npe vim Neeg Leej Tub, mas nej txoj hmoov zoo. 23 Hnub ntawd, nej yuav zoo siab, nej yuav dhia hom khaj, vim nej yuav tau txais koob haum loj nyob saum ntuj. Txheej thaud, lawv cov yawg koob kuj tau ua li ntawd rau cov Yaj Saub tiab.
24 Hos nej cov uas yog neeg nplua nuj, mas nej txoj hmoov phem, vim nej twb txais kev nplij nej lawm. 25 Nej cov uas nyem no tau noj tsau, nej txoj hmoov phem, vim nej yuav tshaib. Nej cov uas nyem no nej luag, nej txoj hmoov phem, vim nej yuav quaj thiab yuav nyiav. 26 Thaum zeej tsoom cav lus zoo txog nej, mas nej txoj hmoov phem. Vim txheej thaud, lawv cov yawg koob kuj ua li ntawd rau cov yaj saub cuav thiab.”

TIM      13      LUB      9      HLIS      2018

Hnub Tsib Lis Piam Nees Nkaum Peb Nruab Xyoo B Nruab Lis Piam Xyoo II  

Hwm LN John Chrysostom

Zaj Nyeem Ib:       1 KLN  8:  1B-7, 11-13

Cov kwv tij:  
1 Hais txog cov nqaij txi rau cov mlom mas peb paub tias peb sawv daws yeej paub zoo txog. Tab sis kev paub ua kom yus muab hlob, hos txoj kev nyiam thiaj tsim tsa tau yus. 2 Yog ib tug twg xav tias nws muaj kev paub txog dab tsi mas nws tseem tsis tau paub txaus. 3 Tab sis yog ib tug nyiam Tswv Ntuj, mas Tswv Ntuj paub nws. 4 Li ntawd, mas hais txog qhov yuav noj cov nqaij txi mlom, mas peb paub tias ib tug mlom tsis muaj qab hau dab tsi nyob ntiaj teb no, thiab tsis muaj dua lwm tus tsuas muaj tib tug tseem Tswv Ntuj xwb. 5 Txawm tias muaj ntau tus tswv ntuj cuav nyob saum ntuj, thiab nyob hauv ntiaj teb no, vim tias yeej muaj ntau tus tswv ntuj ntau tus huab tais tiag, 6 tab sis ntawm peb, mas tsuas muaj ib tug Tswv Ntuj xwb, yog Leej Txiv, tus uas tas puas tsav yam tawm ntawm nws los, thiab tus peb yuav mus cuag nws; thiab tsuas muaj ib tug Huab Tais Yes Xus Pleev xwb, tus ua kom txhua tsav txhua yam muaj tuaj tau thiab tus ua kom muaj peb. 7 Tab sis, tsis yog tas sawv daws paub txog qhov no. Muaj ib txhia, vim lawv ib txwm teev mlom los txog nyem no, ces yog lawv noj tej nqaij txi mlom, mas lawv lub tswv yim tseem saib tias cov nqaij ntawd yog txi rau mlom lawm tiag, ces lawv lub siab muag ua rau lawv xav tias lawv tsis huv lawm.  
11 Li ntawd ces nej txoj kev paub yuav ua kom tus neeg siab muag ntsib kev ploj , nws twb yog ib tug kwv tij uas Leej Pleev tau tuag cawm nws thiab. 12 Yog nej ua txhaum rau nej cov kwv tij zoo li ntawd, nej ua xwv txheej rau lawv lub siab muag, mas kuj yog nej ua txhaum rau Leej Pleev. 13 Vim li ntawd, yog yam txhiam xws twg yuav ua kuv tus kwv tij chaw ntog, mas kuv yuav yoo tsis noj yam txhiam xws ntawd mus li, kom kuv tus kwv tij txhob muaj chaw ntog.

NPN       139:  1B-3, 13-14AB, 23-24

Txais:   (24b)  Huab Tais, thov koj coj kuv mus taug txoj kev yuav nyob mus li.  

HUAB TAIS, koj tsom kuv, koj paub kuv :
koj paub thaum kuv sawv thiab thaum kuv zaum ;
koj nyob deb to taub tas tej kuv xav.
Koj saib nraim kuv thaum kuv mus kev los thaum kuv zaum,
koj paub txhua txoj kev kuv taug.  

Txais:   (24b)  Huab Tais, thov koj coj kuv mus taug txoj kev yuav nyob mus li.

Koj yog tus tsim kuv lub tswv yim tej plab plaw ;
koj ntos kuv ntxiv kuv hauv kuv niam plab.
Kuv ua koj tsaug, vim koj tes dej num txaus ntshai,
koj tsim kuv zoo ua luaj, koj cov dej num txaus qhuas tas nrho.  

Txais:   (24b)  Huab Tais, thov koj coj kuv mus taug txoj kev yuav nyob mus li.

Tswv Ntuj, Xav kom koj tsom kuv, thiab paub kuv lub siab,
Xav kom koj sim kuv,thiab paub kuv tej kev ntxhov siab.
Koj saib kuv puas mus taug txoj kev phem,
thov koj coj kuv mus taug txoj kev yuav nyob mus li.

Txais:   (24b)  Huab Tais, thov koj coj kuv mus taug txoj kev yuav nyob mus li.

As Les Lus Yas:       1 JN  4:   12

Txais: As les lus yas, as les lus yas.

Yog peb sib nyiam sib hlub, mas Tswv Ntuj nyob hauv peb,
thiab nws txoj kev nyiam yuav zoo tiav log nyob hauv peb.

Txais: As les lus yas, as les lus yas.

Ntawv Moo Zoo:       LK  6:   27-38

Yes Xus hais rau nws cov thwj tim tias:
27 "Kuv hais rau nej cov uas mloog kuv tias : Nej yuav nyiam nej cov yeeb ncuab, nej yuav ua zoo rau cov neeg ntxub nej. 28 Nej foom lus zoo rau cov foom phem rau nej, nej thov Ntuj rau cov neeg xyav nej lub moo. 29 Leej twg ib ncuav pias rau koj sab plhu, koj tig sab tod rau nws thiab. Leej twg chua koj lub tsho tshaj sab, mas koj tso koj lub tsho hnav rau nws thiab. 30 Leej twg thov koj, mas koj pub rau nws. Leej twg nqa tej yam uas yog koj li lawm, mas koj tsis txhob kom nws xa rov qab. 31 Nej xav kom luag tej ua li cas rau nej, mas nej kuj yuav ua ib yam li ntawd rau luag thiab. 32 Yog nej nyiam cov neeg nyiam nej, mas nej tau txiaj ntsim dab tsi ? Tab yog cov neeg txhaum kuj txawj nyiam cov uas nyiam lawv thiab. 33 Yog nej ua zoo rau cov neeg ua zoo rau nej, mas nej tau txiaj ntsim dab tsi ? Tab yog cov neeg txhaum kuj txawj ua ib yam li ntawd thiab. 34 Yog nej txais nyiaj rau cov neeg uas nej paub tias nej yuav tau rov qab, mas nej tau txiaj ntsim dab tsi ? Cov neeg txhaum kuj txawj txais nyiaj rau cov neeg txhaum kom lawv rov tau li qub los. 35 Hos nej, mas nej yuav nyiam nej cov yeeb ncuab, nej yuav ua qhov zoo thiab nej yuav txais nyiaj tsis tos luag them dab tsi rov rau nej li, ces nej qhov koob haum yuav loj kawg, thiab nej yuav yog Tus Nyob Siab cov tub, vim nws ua siab zoo rau cov neeg mom nws txiaj ntsim thiab rau cov neeg lim hiam. 36 Nej yuav muaj lub siab khuv leej neeg ib yam li nej Txiv khuv leej neeg.
37 Nej tsis txhob txiav txim, nej thiaj yuav tsis raug txiav txim. Nej tsis txhob muab leej twg mus nyob txim, nej thiaj yuav tsis raug mus nyob txim. Nej zam txhaum rau luag ces Ntuj thiaj yuav zam rau nej. 38 Nej pub rau luag, ces Ntuj thiaj yuav pub rau nej. Ntuj yuav xuas ib lub tawb loj los luj, yuav muab tswm muab co kom ceev thiab ntim nco lug, yuav muab nchuav rau hauv nej lub nqaws tsho. Vim tias nej luj li cas rau luag, mas Ntuj kuj yuav luj li ntawd  rov rau nej.”

TIM 14 LUB 9 HLIS 2018

Hnub Rau Lis Piam Nees Nkaum Peb Nruab Xyoo B Nruab Lis Piam Xyoo II

Hawm Yes Xus tus Ntoo Cuam

Zaj Nyeem Ib: XAM PHAJ 21: 4B-9

4 Cov His Xas Lais mus txog ib tog kev, lawv npau taws. 5 Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb los kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau hwv lawm !" 6 Tswv Ntuj thiaj rau txim rau lawv, nws tso ib cov nab muaj taug hluav taws tuaj tom lawv. Cov nab ntawd tom cov His Xas Lais tuag coob leej. 7 Tsoom pej xeem thiaj mus hais rau Mais Xes tias : "Peb ua txhaum lawm vim peb tau cem HUAB TAIS thiab cem koj. Koj thov kom HUAB TAIS zam rau peb, kom nws ntiab cov nab ntawd khiav mus deb peb." Ces Mais Xes thiaj thov kom Ntuj zam rau lawv. 8 HUAB TAIS hais rau Mais Xes tias : "Koj xuas tooj nchuav ib tug nab muaj taug hluav taws, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag." 9 Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.

NPN 78: 1BC-2, 34-35, 36-37, 38

Txais: (7b) Nej yuav nco ntsoov Huab Tais cov hauj lwm loj.

Kuv haiv neeg, nej mloog kuv tej lus qhuab qhia;
Nej tig ntsej los mloog cov lus tawm ntawm kuv lub ncauj los.
Kuv yuav qhib ncauj hais ib zag paj lug,
Kuv yuav hais tej zaj lus tob uas yeej muaj txheej thaud los lawm.

Txais: (7b) Nej yuav nco ntsoov Huab Tais cov hauj lwm loj.

Thaum Tswv Ntuj rhuav lawv, ces lawv nrhiav nws ;
lawv hloov siab thiab tig rov los nrhiav nws.
Lawv rov nco tias Tswv Ntuj yog lawv lub tsua,
yog tus Tswv Ntuj Nyob Siab tus txhiv lawv.

Txais: (7b) Nej yuav nco ntsoov Huab Tais cov hauj lwm loj.

Tab sis lawv lam ntxias nws ntawm ncauj,
lawv tus nplaig hais lus dag nws.
Lawv lub siab tsis npuab nws ruaj,
lawv tsis coj raws cov lus nws tau cog rau lawv.

Txais: (7b) Nej yuav nco ntsoov Huab Tais cov hauj lwm loj.

Tab sis, Tswv Ntuj lub siab hlub neeg zam rau lawv qhov txhaum,
nws tsis rhuav lawv pov tseg,
Nws cheem nws lub siab npau tsis tseg,
nws tsis pub kom nws lub siab ceev tsim dheev los.

Txais: (7b) Nej yuav nco ntsoov Huab Tais cov hauj lwm loj.

Zaj Nyeem Ob: FIS LIS POS 2: 6-11

Cov kwv tij nkauj muam,
6 Yes Xus Pleev yog Tswv Ntuj, tiam sis nws tsis tau txeeb tseev kom nws loj ib yam li Tswv Ntuj. 7 Nws muab nws lub hwj chim hle, nws yeem ua ib tug qhev, nws yug los xws li tib neeg, luag pom nws tus yam ntxwv yog yam ntxwv tib neeg. 8 Nws txo nws qis, nws tuaj yeem mloog lus mus txog qhov tuag, thiab tseem yog kev tuag saum ntoo cuam. 9 Vim li ntawd, mas Tswv Ntuj thiaj tsa Yes Xus ua tus loj nyob qhov chaw siab dua cov, thiab muab lub npe uas nyob siab dua txhua lub npe rau nws. 10 Kom thaum twg hnov tuav txog Yes Xus lub npe, mas txhua leej txhua tus yuav tsum kim caug hawm, tsis hais nyob saum cov txheej ntuj saud, los nyob ntiaj teb no, los nyob nruab yeeb tib si. 11 Thiab kom txhua xeem lus yuav tsum zeem tseeb tias Yes Xus Pleev yog Huab Tais, ces Leej Txiv Tswv Ntuj thiaj muaj koob meej nto moo lug.

As Les Lus Yas

Txais: As les lus yas, as les lus yas.

Leej Pleev, peb pe hawm koj, thiab peb cav txog txog,
vim koj tau cawm qab ntuj neeg nyob saum koj tus Ntoo Cuam.

Txais: As les lus yas, as les lus yas.

Ntawv Moo Zoo: ZAM 3: 13-17

Yes Xus hais rau Nis Kos Des Mos tias:
13 “Tsis muaj leej twg tau nce mus saum ntuj dua li, tsuas muaj tus tau nqes saum ntuj los xwb, uas yog Neeg Leej Tub. 14 Ib yam li Mais Xes tsa tus nab nyob teb chaws suab puam, Neeg Leej Tub kuj yuav tsum raug luag tsa nws siab, 15 kom xwv tus ntseeg txog nws, muaj txoj sia nyob mus li.”
16 Vim Tswv Ntuj nyiam lub qab ntuj neeg npaum no, nws thiaj muab nws Leej Tub twm zeej rau lawv, kom xwv tus ntseeg txog nws txhob tuag, tab sis kom nws muaj txoj sia nyob mus li. 17 Tswv Ntuj tsis tau xa nws Leej Tub tuaj hauv lub qab ntuj kom nws muab txim rau lub qab ntuj neeg, tiam sis kom qab ntuj neeg tau txais kev cawm nyob hauv nws.

TIM 15 LUB 9 HLIS 2018

Hnub Xya Lis Piam Nees Nkaum Peb Xyoo B Nruab Lis Piam Xyoo II

Hwm Leej Niam tus muaj kev Tu Siab (Our Lady of Sorrows)

Zaj Nyeem Ib: 1 KLN 10: 14-22

14 Kuv cov zoo nyiad, nej txav deb ntawm txoj kev teev dab teev mlom mog. 15 Kuv hais lus rau nej yog hais rau ib co neeg paub tab. Nej yuav tsum txiav txinm rau kuv cov lus saib puas yog los tsis yog. 16 Lub ntim foom hmoov zoo uas peb foom hmoov rau, puas ua kom peb koom siab nyob hauv Leej Pleev cov ntshav los tsis ua ? Cov mov uas peb muab ntais, puas ua kom peb koom siab nyob hauv Leej Pleev lub cev los tsis ua ? 17 Ib yam li tsuas muaj tib lub ncuav mov xwb, peb sawv daws, txawm peb muaj coob leej, kuj koom ua ib lub cev thiab xwb, vim peb sawv daws koom noj tib lub ncuav mov. 18 Nej ntsia tsoom His Xas Lais raws li nyob sab nqaij tawv saib : cov uas noj cov txim, lawv puas koom nrog lub thaj uas yog lub rooj txi Ntuj los tsis koom ? 19 Qhov kuv hais no yog xav hais dab tsi ? Puas yog xav hais tias cov nqaij txi dab yog ib yam uas muaj nqes ? Los puas yog xav hais tias cov dab ntawd muaj nqes? 20 Tsis yog li ntawd, qhov kuv xav hais yog qhov tias tej yam uas lawv muab los txi, mas yog txi rau ib co dab phem, tsis yog txi rau Tswv Ntuj. Ces kuv tsis xav kom nej nrog cov dab phem sib koom siab. 21 Nej ib txhij haus Huab Tais lub ntim thiab dab phem lub ntim tsis tau. Nej ib txhij noj Huab Tais rooj qav thiab dab phem rooj qav tsis tau. 22 Los puas yog peb xav txhob txwm ua kom Huab Tais khib ? Peb puas muaj zog dua Huab Tais ?

NPN 116: 12-13, 17-18

Txais: (17) Huab Tais, kuv yuav cev ib co txim los cav txog koj.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
kuv yuav hu txog HUAB TAIS, yuav tuav txog nws lub npe.

Txais: (17a) Huab Tais, kuv yuav cev ib co txim los cav txog koj.

Kuv yuav cev ib co txim los ua koj tsaug,
kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag,

Txais: (17) Huab Tais, kuv yuav cev ib co txim los cav txog koj.

As Les Lus Yas:

Txais: As les lus yas, as les lus yas.

Nkauj xwb tsim txiaj Mab Liab, koj tau txoj hmoov zoo,
txawm koj tsis tau muab koj txoj sia pauv,
los koj tau txais lub mom teev kub tuag ua Tim Khawv,
thaum koj sawv ntawm HUab Tais tus ntoom Cuam.

Txais: As les lus yas, as les lus yas.

Ntawv Moo Zoo: ZAM 19: 25-27

25 Sawv ze ntawm Yes Xus tus Ntoo Cuam yog nws niam thiab nws niam tus niam hluas, nrog Mab Liab uas yog Khos Pas poj niam, thiab Mab Liab Mas Ntas Las.
26 Yes Xus pom nws niam, thiab pom tus thwj tim uas nws nyiam sawv ze ntawd, ces nws hais rau nws niam tias : "Niad, tus ntawd yog koj tus tub."
27 Thiab Yes Xus hais rau tus thwj tim tias : "Tus ntawd yog koj niam." Ces txij lub sij hawm ntawd los, tus thwj tim coj Mab Liab mus nyob hauv nws tsev.

Los: LK 2: 33-35

33 Yes Xus niam thiab txiv qhuas cov lus nkawd hnov hais txog tus me nyuam.
34 Xis Mes Oos foom hmoov zoo rau lawv, nws hais rau Mab Liab, Yes Xus niam tias : "Koj ntsia ! Tus me nyuam no yuav ua chaw rau ntau leej His Xas Lais ntog thiab ntau leej rov sawv. Nws yog ib lub cim yuav ua kom sawv daws sib cav.
35 Hos ntawm koj, mas ib rab ntaj yuav chob koj tus plig, kom xwv tej lus uas coob leej xav tuaj nruab siab tawm los rau sawv daws paub.”

TIM 17 LUB 9 HLIS 2018

Hnub Ob Lis Piam Nees Nkaum Plaub Nruab Xyoo B Nruab Lis Piam Xyoo II

Hwm LN Robert Bellarmine

Zaj Nyeem Ib: 1 KLN 11: 17-26, 33

Cov kwv tij,
17 Nyob hauv kuv cov lus ntuas nej no, mas kuv tsis qhuas nej, vim thaum nej tuaj ua lub txoos, mas nej tsis ua qhov zoo rau sawv daws hos nej ua qhov phem xwb. 18 Thawj yam kuv hnov mas yog qhov hais tias, thaum nej sib sau ua lub Txoos, mas nej muaj kev sib cais tsis sib koom; kuv ntseeg tau tej lus ntawd ib nrab. 19 Yeej kawg yuav tsum muaj chaw sib cais nyob hauv nej ces sawv daws thiaj yuav paub tias nyob hauv nej leej twg yog tus zoo. 20 Thaum nej tuaj sib sau ua lub txoos, mas zoo li tsis yog nej tuaj noj Huab Tais Rooj Qav li, 21 vim thaum txog caij noj, mas nej nyias taus nyias huas nyias noj nyias pluas mov, ces tus tseem tshaib plab kuj muaj, tus twb qaug cawv lawm los muaj. 22 Nej tsis muaj tej tsev rau nej noj mov haus cawv li lod ? Los yog nej xav thuam Tswv Ntuj lub Koom Txoos thiab xav ua kom cov neeg tsis muaj dab tsi txaj muag ? Kuv yuav hais dab tsi rau nej ? Kuv puas yuav qhuas nej ? Hais txog qhov no, mas kuv yuav tsis qhuas nej kiag li.
23 Vim cov lus kuv tau txais ntawm Huab Tais los mas kuv kuj tau muab qhia rau nej; yog qhov tias, hmo lawv muab Huab Tais Yes Xus rau luag ntes, nws tuav ib lub ncuav mov, 24 nws ua Ntuj tsaug, nws muab lub ncuav mov ntais, nws hais tias : ‘Qhov no yog kuv lub cev uas muab pub rau nej; nej ua qhov no kom tau nco txog kuv.’ 25 Ib yam li ntawd, thaum noj hmo tas nws tuav lub ntim cawv, nws hais tias : ‘Lub ntim cawv no yog kev cog lus tshiab nyob hauv kuv cov ntshav ; niaj zaus thaum nej haus lub ntim no, mas nej haus kom tau nco txog kuv.’ 26 Vim li ntawd, thaum twg nej noj lub ncuav mov thiab nej haus lub ntim cawv, mas nej tshaj Huab Tais txoj kev tuag, nej yuav ua li no kom mus txog hnub Huab Tais rov los.
33 Li no mas, kuv cov kwv tij, thaum nej sib sau los noj Rooj Qav, nej yuav tsum sib tos, ib leeg tos ib leeg.

NPN 40: 7-8A, 8B-9, 10, 17

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

Koj tsis ntshaw tsiaj los txhiam xws txi rau koj,
tiam sis koj muab pob ntseg rau kuv kom kuv cuab ntsej mloog lus.
Koj tsis xav tau tsiaj hlawv txi ntuj los tsiaj hlawv them txim txhaum,
kuv thiaj hais tias: “Kuv nyob ntawm no, cia kuv tuaj.”

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

Nyob hauv kauj ntawv muaj lus hais tseg rau kuv tias:
“Ua ywj koj lub siab, kuv tus Tswv Ntuj, yog yam ntxim kuv siab,
koj txoj cai nyob rawv hauv kuv nruab plaw!”

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

Kuv tau tshaj koj txoj kev ncaj rau hauv tsoom neeg coob tuaj sib txoos,
kuv tsis tau kaw kuv lub qhov ncauj, HUAB TAIS, koj yeej paub.

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

Thov kom txhua leej uas nrhiav koj
zoo siab hom khaj nyob hauv koj,
thiab kom cov uas nyiam koj txoj kev cawm
cav tsis tseg tias: “HUAB TAIS nto koob meej.”

Txais: (1 KLN 11:26b) Nej tshaj Huab Tais txoj kev tuag mus txog thaum nws rov los dua.

As Les Lus Yas: ZAM 3: 16

Txais: As les lus yas, as les lus yas.

Vim Tswv Ntuj nyiam lub qab ntuj neeg npaum no :
nws thiaj muab nws Leej Tub twm zeej rau lawv,
kom xwv txhua tus ntseeg txog nws muaj txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 1-10

1 Thaum Yes Xus hais nws cov lus rau tsoom sid mloog tas, nws mus hauv Kas Fas Naus. 2 Ib tug xab txheeb muaj ib tug tub txib uas nws nyiam tab tom mob hnyav, yuav tuag. 3 Thaum tus xab txheeb hnov hais txog Yes Xus, nws xa ib co txwj laus Yus Das tuaj thov Yes Xus kom mus cawm nws tus tub txib. 4 Thaum cov txwj laus tuaj txog ntawm Yes Xus, lawv thov Yes Xus tas zog rau tus xab txheeb tias : "Tsim nyog koj yuav ua qhov ntawd rau nws, 5 nws nyiam peb haiv neeg, thiab nws yog tus tau txhim lub tsev txoos rau peb." 6 Yes Xus nrog lawv taug kev mus. Thaum lawv tuaj yuav txog lub tsev, tus xab txheeb xa ib pab phooj ywg tuaj hais rau Yes Xus tias : "Huab Tais, txhob ua nyuaj koj, vim kuv tsis tsim nyog kom koj chaws los hauv kuv lub qab ru tsev, 7 thiab kuv tus kheej tsis tsim nyog tuaj cuag koj. Tab sis thov koj hais ib lo lus xwb kom kuv tus tub txib zoo hlo. 8 Vim tias, txawm kuv yog ib tug neeg zwm rau ib tug loj, los kuv kuj muaj ib co tub rog uas kuv tswj lawv, yog kuv hais rau ib tug tias 'Mus !' ces nws cia li mus ; hos kuv hais rau lwm tus tias : 'Los !', mas nws cia li los. Kuv hais rau kuv tus tub txib tias 'Ua qhov no !' ces nws cia li ua". 9 Yes Xus hnov cov lus no, nws qhuas tus xab txheeb ntawd, nws tig ntsia tom qab, nws hais rau cov neeg lawv nws qab hais tias : "Kuv hais rau nej, nyob hauv tsoom His Xas Lais, kuv tsis tau pom dua ib lub siab ntseeg npaum no li." 10 Thaum cov neeg uas tuaj tos Yes Xus rov mus txog tsev, lawv pom tus tub txib twb zoo neej lawm.

TIM      18      LUB      9      HLIS      2018

Hnub Peb Lis Piam Nees Nkaum Plaub Nruab Xyoo B Nruab Lis Piam Xyoo II

Zaj Nyeem Ib:       1 KLN  12:   12-14, 27-31A

Cov kwv tij,
12 Ib yam li neeg tsuas muaj tib lub cev xwb, tab sis lub cev ntawd muaj ntau yam ntau ces; txhua yam txhua ces ntawd, txawm tias muaj ntau, tsuas yog tib lub cev xwb.  Nyob hauv Leej Pleev kuj zoo ib yam  li ntawd. 13 Vim tias peb sawv daws tau txais lub Cim Ntxuav nyob hauv Leej Ntuj Plig tib leeg, peb koom ua lub Cev xwb. Tsis hais cov Yus Das los cov Hes Las, cov ua qhev los cov twj lij, peb sawv daws puav leej tau haus ib tug Leej Ntuj Plig xwb. 14 Lub cev tsis yog ib yam xwb, lub cev muaj ntau yam.
27 Ntawm nej, mas nej yog Leej Pleev lub cev, nej nyias muaj nyias ib yam nyob rau hauv. 28 Muaj tej tus neeg, Tswv Ntuj tsa lawv, ib ua Hauv Paus Xa Lus nyob hauv lub Koom Txoos, ob ua Yaj Saub, peb ua Xib Hwb;  kuj tseem muaj cov ua tau hwj huam yees ntxwv, cov tau lub txiaj ntsim kho neeg mob, cov txawj tsob hwb luag, cov txawj tuav kev tswj fwm, thiab cov paub ntau xeem lus. 29 Sawv daws puas yog Hauv Paus Xa Lus ? Sawv daws puas yog Yaj Saub? Sawv daws puas yog Xib Hwb ? Sawv daws puas ua tau hwj huam yees ntxwv ? 30 Sawv daws puas tau lub txiaj ntsim txawj kho mob? Sawv daws puas paub ntau xeem lus ? Sawv daws puas txhais tau ntau xeem lus ?
31 Xav kom nej yuav tsum mob siab nrhiav cov txiaj ntsim nyob sab ntsuj plig uas muaj nqis dua cov.

NPN       100:   1B-2, 3, 4, 5

Txais: (3) Peb yog nws haiv neeg, peb yog nws pab yaj.

Tas lub ntiaj teb, nej zoo siab hu nkauj rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag

Txais: (3) Peb yog nws haiv neeg, peb yog nws pab yaj.

Nej yuav tsum paub tias HUAB TAIS yog Tswv Ntuj.
Nws tau tsim peb los, peb yog nws tug,
peb yog nws haiv neeg, yog pab yaj nws saib.

Txais: (3) Peb yog nws haiv neeg, peb yog nws pab yaj.

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais: (3) Peb yog nws haiv neeg, peb yog nws pab yaj.

Vim HUAB TAIS muaj lub siab zoo,
nws txoj kev ua zoo yuav nyob mus li,
nws ua ncaj rau peb txheej dhau txheej.

Txais: (3) Peb yog nws haiv neeg, peb yog nws pab yaj.

As Les Lus Yas:       LK  7:   16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo:       LK  7:   11-17

11 Yes Xus mus hauv ib lub nroog hu ua Nas Ees. Yes Xus cov thwj tim thiab ib pab neeg coob nrog Yes Xus ua ke mus. 12 Thaum Yes Xus tuaj yuav txog lub qhov rooj loog nkag hauv lub nroog, luag tab tom kwv ib tug tuag tawm tuaj txog ntawd. Yog ib leeg tub twm zeej, hos leej niam yog ib tug poj ntsuam. Ib pab neeg coob hauv nroog nrog leej niam tawm tuaj. 13 Huab Tais pom tus poj ntsuam, Huab Tais khuv leej nws. Huab Tais hais rau nws tias : "Koj txhob quaj." 14 Yes Xus txav los pem hauv ntej los tuav lub hleb, ces cov kwv hleb nres. Ces Yes Xus hais tias : "Tus hluas, kuv hais koj : Koj cia li sawv !" 15 Ces tus tuag sawv los zaum, thiab nws pib hais lus. Yes Xus muab tus tub hluas ntawd cob rau nws niam. 16 Tas sawv daws ntshai kawg. Lawv cav txog Tswv Ntuj tias : "Ib tug yaj saub loj sawv los nyob hauv peb,” thiab lqwv tseem hais tias: “ Tswv Ntuj tuaj xyuas nws haiv neeg lawm." 17 Cov lus no ncha mus thoob tas xeev Yus Das thiab ib ncig lub teb chaws ntawd.

TIM 19 LUB 9 HLIS 2018

Hnub Plaub Lis Piam Nees Nkaum Plaub Nruab Xyoo B Nruab Lis Piam Xyoo II

Hwm LN Januarius

Zaj Nyeem Ib: 1 KLN 12: 31-13: 13

Cov kwv tij:
12 31 Nej yuav tsum mob siab nrhiav cov txiaj ntsim nyob sab ntsuj plig uas muaj nqis dua cov. Tiam sis kuv tseem yuav qhia dua ib txog kev zoo tshaj cov tib si rau nej thiab.
13 1 Txawm kuv txawj hais ntau haiv neeg cov xeem lus, thiab txawj hais Ntuj cov Tshiab cov xeem lus huv tib si, los yog kuv tsis muaj txoj kev nyiam, mas kuv tsuas yog ib lub nruas tooj nrov nrov, los ib lub nruas npuaj ncha ncha xwb. 2 Txawm kuv txawj ua Yaj Saub, los kuv paub tas ib puas tsav yam lus tob thiab ib puas tsav yam txuj ci, txawm kuv muaj kev ntseeg loj kawg nkaus, kuv tshem tau tej lub roob rau lwm qhov, los yog kuv tsis muaj txoj kev nyiam, mas kuv tsis muaj nqis dab tsi li. 3 Txawm kuv muab kuv lub cuab tam tas huv tib si los faib rau cov neeg pluag, txawm kuv muab kuv lub cev tso rau hluav taws hlawv, los yog kuv tsis muaj txoj kev nyiam, mas txhua yam ntawd tsis nqa ib qho dab tsi zoo los rau kuv.
4 Txoj kev nyiam txawj ua siab ntev, txawj ua siab zoo; txoj kev nyiam tsis txawj khib, tsis khav theeb, tsis muab hlob. 5 Txoj kev nyiam tsis ua tub qaug luag, tsis nrhiav qhov zoo rau nws tus kheej, tsis npau taws sai, tsis cib nyeej. 6 Txoj kev nyiam tsis zoo siab pom txoj kev ua tsis ncaj, nws zoo siab pom qhov tseeb. 7 Nws zam rau sawv daws, nws ntseeg sawv daws, nws tso siab rau sawv daws, nws ua siab ntev ris tas puas tsav yam nyuaj. 8 Txoj kev nyiam tsis txawj tas ib zaug li. Txoj kev ua Yaj Saub yuav ploj mus. Txoj kev txawj hais ntau xeem lus yuav nyob ntsiag to. Txoj kev txawj kev ntse kuj yuav dua mus.
9 Vim tias, kev txuj ci, peb tsuas paub ib feem xwb.; kev ua yaj saub los peb tsuas txawj ib txhia xwb. 10 Thaum qhov zoo txhij zoo txhua los txog, mas tej yam uas zoo tsis tas yuav ploj mus. 11 Thaum kuv tseem yau, kuv hais lus me nyuam yaus, kuv xav li me nyuam yaus, kuv ntaus tswv yim li ib tug me nyuam yaus. Thaum kuv hlob tiav lawm, kuv tso tej kev ua me nyuam yaus pov tseg. 12 Zaum no, peb pom tsis tseeb, peb tsuas pom zoo li nyob hauv ib daim tsom iav xwb. Thaum ntawd, peb yuav pom xyeem ntawm qhov muag. Nyem no, kuv paub ib feem me me xwb. Thaum ntawd, kuv yuav paub txhua yam, ib yam li Ntuj paub kuv txhij txhua. 13 Li ntawd nyem no, txoj kev ntseeg, txoj kev tso siab, thiab txoj kev nyiam , peb yam no yuav nyob, tiam sis qhov loj tshaj yog txoj kev nyiam.

NPN 33: 2-3, 4-5, 12+22

Txais: (12) Haiv neeg uas Huab Tais xaiv lawv ua nws tug, lawv txoj hmoov zoo.

Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws.
Nej hu ib zaj nkauj tshiab rau nws;
Nej qoj cov hlua kom zoo mloog nrog nej cov suab qw zoo siab.

Txais: (12) Haiv neeg uas Huab Tais xaiv lawv ua nws tug, lawv txoj hmoov zoo.

HUAB TAIS lo lus yog lus ncaj,
tas nws tej dej num yog qhov tseeb.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (12) Haiv neeg uas Huab Tais xaiv lawv ua nws tug, lawv txoj hmoov zoo.

Haiv neeg uas tau HUAB TAIS los uaTswv Ntuj, lawv txoj hmoov zoo,
Haiv neeg Huab Tais xaiv los ua nws lub cuab tam, lawv txoj hmoov zoo!
HUAB TAIS, thov kom koj txoj kev hlub roos peb,
vim koj yog peb qhov chaw tso siab.

Txais: (12) Haiv neeg uas Huab Tais xaiv lawv ua nws tug, lawv txoj hmoov zoo.

As Les Lus Yas: ZAM 6: 63C, 68C

Txais: As les lus yas, as les lus yas.

Huab Tais, koj cov lus yog ntsuj plig thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 31-35

Yes Xus hais rau tsoom sid tias:
31 “Kuv yuav muab tiam neeg no piv rau leej twg ? Lawv zoo li leej twg ?
32 Lawv zoo li ib pab me nyuam yaus zaum tom tshav puam, lawv sib hu tias : 'Peb twb tshuab raj rau nej, nej tsis seev cev dhia li! Peb twb cuab suab nyiav, nej tsis quaj li!'
33 Zam Ntxuav Plig tuaj, nws tsis noj mov, tsis haus cawv, nej hais tias : 'Nws raug dab !'
34 Neeg Leej Tub tuaj, nws noj mov thiab haus cawv, nej hais tias : 'Saib, tus neeg ntawd hu dab thiab quav cawv, nws nrog cov sau se thiab cov neeg txhaum ua phooj ywg !'
35 Tiam sis kev Thoob Tsib cov me nyuam huv tib si puav leej ua rau nws tau ntsej muag lawm.”