COV ZAJ NYEEM NRUAB LIS PIAM XYOO II 2017-2018

TIM 19 LUB 10 HLI 2018

Hnub Rau Lis Piam Nees Nkaum Yim Nruab Xyoo B Nruab Lis Piam Xyoo II

Hwm LN Jean de Brebeuf thiab LN Isaac Jogues, tuag ua Tim Khawv

Zaj Nyeem Ib: ES FES XOS 1: 11-14

Cov kwv tij,
11 Peb kuj tau raug xaiv nyob hauv Leej Pleev, tau raug qee raws li lub hom phiaj ntawm tus uas nws ua txhua tsav txhua yam kom haum nws lub siab xav, 12 kom peb tshwm sim los cav txog nws lub koob meej, vim peb yog cov xub tso siab rau Leej Pleev. 13 Nyob hauv Leej Pleev, nej cov uas tau hnov Lo Lus tseeb uas yog lub Moo Zoo muab txoj kev cawm rau nej, thiab nej tau ntseeg, mas nej kuj tau txais ib lub thwj muaj Leej Tswv Yim Ntshiab uas Ntuj tau cog lus yuav pub. 14 Leej Tswv Yim Ntshiab yog thawj yam nyob hauv lub cuab tam uas peb yuav tau txais ua peb tug; nws ua hauj lwm txhiv peb los ua Tswv Ntuj tug kom peb cav txog nws lub hwj chim.

NPN 33: 1-2, 4-5, 12-13

Txais: (12) Haiv neeg Huab Tais xaiv ua nws tug lawv txoj hmoov zoo.

Cov neeg siab ncaj, nej cia li zoo siab nyob hauv HUAB TAIS,
txoj kev qhuas Huab Tais phim tus neeg siab ncaj.
Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws.


Txais: (12) Haiv neeg Huab Tais xaiv ua nws tug lawv txoj hmoov zoo.

HUAB TAIS lo lus yog lus ncaj,
nws tej num yog num tsim nyog ntseeg.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (12) Haiv neeg Huab Tais xaiv ua nws tug lawv txoj hmoov zoo.

Haiv neeg uas lawv tus Tswv Ntuj yog HUAB TAIS, lawv txoj hmoov zoo!
Haiv neeg uas Huab Tais xaiv los ua nws lub cuab tam, lawv txoj hmoov zoo!
HUAB TAIS nyob txheej ntuj saud dauv muag los ntsia,
nws pom tas nrho ib tsoom neeg.

Txais: (12) Haiv neeg Huab Tais xaiv ua nws tug lawv txoj hmoov zoo.

As Les Lus Yas: NPN 33: 22

Txais: As les lus yas, as les lus yas.

HUAB TAIS, thov kom koj lub siab hlub roos peb,
vim koj yog peb qhov chaw tso siab.

Txais: As les lus yas, as les lus yas.

Ntawv Moo Zoo: LK 12: 1-7

1 Thaum ntawd, neeg coob coob, muaj txog ntau txhiab leej tuaj sib txoos ua tsheej pawg, sawv daws nyob sib tsub sib nias ib leeg tsuj ib leeg taw. Yes Xus pib hais lus, nws xub hais rau nws cov thwj tim tias : "Nej ceev faj txog cov poov xab– uas yog txoj kev lam ua zoo sab nraud – ntawm cov Fas Lis Xais. 2 Tsis muaj ib yam zais ntshis uas yuav tsis qhib tawm los, tsis muaj ib yam npog cia uas yuav tsis muaj neeg paub. 3 Yog vim li ntawd, tej yam uas nej hais nyob hauv qhov tsaus ntuj nti, yuav nrov rau luag hnov nruab hnub nrig; yam uas nej ntxhi rau hauv luag pob ntseg nyob hauv tej chav kaw nti, yuav muaj tus tuaj saum ru tsev muab tshaj tawm.
4 Kuv cov phooj ywg, kuv hais rau nej : Nej tsis txhob ntshai cov uas tua neeg lub cev, thaum lawv tua tas, lawv ua tsis tau dab tsi ntxiv rau lawm. 5 Kuv qhia rau nej tias nej yuav tsum ntshai leej twg : nej yuav ntshai tus uas tua lub cev tas, tseem muaj peev xwm yuav muab nej pov rau hauv dab phem teb thiab. Kuv hais rau nej tias, tus ntawd mas nej yuav tsum ntshai nws tiag tiag.
6 Tsib tug noog tsig txhuv tsuas muag tau ob lub txiaj toog xwb, puas yog ? Tsis kav, tsis muaj ib tug tsig txhuv uas Tswv Ntuj yuav tsis nco txog. 7 Tab yog nej cov plaub hau los Tswv Ntuj yeej suav tas huv si lawm. Nej tsis txhob txhawj mog : nej muaj nqis dua tej pab tsig txhuv coob coob.”

TIM 20 LUB 10 HLI 2018

Hnub Xya Lis Piam Nees Nkaum Yim Nruab Xyoo B Nruab Lis Piam Xyoo II

Hwm LN Paul of the Cross

Zaj Nyeem Ib: ES FES XOS 1: 15-23

Paj Lug sau ntawv tias:
15 Thaum kuv hnov luag tej hais lus zoo txog nej txoj kev ntseeg nyob hauv Huab Tais Yes Xus, thiab txog nej lub siab nyiam tas tsoom ntshiab, 16 mas kuv ua Ntuj tsaug tsis tseg vim nej, thiab kuv nco ntsoov txog nej thaum kuv teev Ntuj. 17 Kuv thov kom peb tus Huab Tais Yes Xus Pleev tus Tswv Ntuj, Leej Txiv tus muaj koob meej, pub ib lub tswv yim thoob tsib thiab txawj txawj paub yav tom ntej, kom nej paub Tswv Ntuj zoo. 18 Kuv thov kom nej lub siab cov qhov muag pom kev, kom nej paub tias txoj kev tso siab uas los ntawm txoj kev nws hu nej yog zoo li cas, thiab kom nej paub tias txoj kev nplua nuj muaj nws lub hwj chim nyob hauv nws lub cuab tam uas nej yuav txais nrog tsoom ntshiab yog dab tsi; 19 thiab nws lub hwj huam pab peb cov uas ntseeg loj npaum li, raws li nws txoj kev siv nws lub zog uas muaj peev xwm heev; 20 nws tau siv lub zog ntawd nyob hauv Leej Pleev : nws tsa Leej Pleev sawv hauv cov tub tuag rov los thiab nws tsa Leej Pleev zaum ntawm nws sab xis nyob saum cov txheej ntuj saud, 21 nyob siab dua cov Tuam Tshiab, siab dua cov Tshiab muaj hwj huam, siab dua cov Tshiab muaj zog, siab dua cov Tshiab tswj luag, siab dua txhua lub npe uas raug siv, tsis yog hauv lub zim txwv no xwb tiam sis tseem nyob rau tiam tom ntej huv tib si. 22 Tswv Ntuj tso tas puas tsav yam rau hauv Leej Pleev qab xib taws; nws tsa Leej Pleev ua tus Hau saib txhua yam nyob hauv lub Koom Txoos, 23 uas yog nws lub Cev thiab yog nws tus kheej tas nrho nyob puv qhov txhia chaw thiab puv txhua tsav yam.

NPN 8: 2-3AB, 4-5, 6-7

Txais: (7) Koj tsa koj leej Tub kav txhua yam koj txhais tes tau tsim los.

HUAB TAIS, peb tus HUAB TAIS, cas koj lub npe
muaj hwj xyeej ua luaj, nws ncha mus puv tas ntiaj teb!
Koj tau tsa koj lub koob meej nyob siab dua cov txheej ntuj saud.
Koj ua kom cov me nyuam yaus thiab cov me nyuam mos lub ncauj
Txawj cav lus zoo kawg nkaus txog koj vim koj cov yeeb ncuab.

Txais: (7) Koj tsa koj leej Tub kav txhua yam koj txhais tes tau tsim los.

Thaum kuv ntsia lub ntuj uas koj ntiv tes tau tsim los,
lub hli, cov hnub qub uas koj muab txawb rau nyias qhov chaw,
neeg yog dab tsi, koj thiaj nco txog nws?
Los leej tib neeg yog tus tsi, koj thiaj txhawj txog?

Txais: (7) Koj tsa koj leej Tub kav txhua yam koj txhais tes tau tsim los.

Koj tsim neeg los nyob siab yuav luag cuag cov tshiab
Koj muab koob meej thiab muab hwj chim rau neeg ntoo.
Koj tsa neeg kav txhua yam koj txhais tes tau tsim los,
koj tso tas puas tsav yam rau hauv neeg qab xib taws.

Txais: (7) Koj tsa koj leej Tub kav txhua yam koj txhais tes tau tsim los.

As Les Lus Yas: ZAM 15: 26B, 27A

Txais: As les lus yas, as les lus yas.

Huab Tais hais tias: “Leej Tswv Yim qhia qhov tseeb
yuav ua tim khawv txog kuv thiab nej kuj yuav ua tim khawv thiab.”

Txais: As les lus yas, as les lus yas.

Ntawv Moo Zoo: LK 12: 8-12

Yes Xus hais tias:
8 “Kuv hais rau nej : leej twg lees paub kuv rau ntawm tsoom neeg xub ntiag, mas Neeg Leej Tub kuj yuav lees paub tus ntawd nyob ntawm Tswv Ntuj cov Tshiab xub ntiag. 9 Tab sis leej twg tsis lees paub kuv nyob ntawm tsoom neeg ntiag, mas yuav tsis muaj tus lees paub nws nyob ntawm Tswv Ntuj tsoom Tshiab xub ntiag thiab. 10 Leej twg hais ib lo lus cem Neeg Leej Tub, mas Ntuj yuav zam rau nws. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws li.
11 Thaum luag coj nej mus sawv hauv cov tsev txoos, ntawm cov thawj tswj, thiab ntawm cov nom tswv xub ntiag, mas nej txhob txhawj tias nej yuav teb li cas los yuav hais dab tsi nej thiaj yeej ; 12 vim lub sij hawm ntawd, Leej Ntuj Plig Ntshiab yuav qhia nej kom hais dab tsi."