COV ZAJ NYEEM NRUAB LIS PIAM XYOO II 2017-2018

TIM       31      LUB      1      HLIS       2018

Hnub Plaub Lis Piam Plaub Nruab Xyoo B Nruab Lis Piam Xyoo II

Hwm LN John Bosco

Zaj Nyeem Ib:       2 XM  24:   2, 9-17

2 Vaj Das Vis hais rau Yos As thiab cov thawj hauv nws pab tub rog tias : "Nej mus ncig xyuas cov xeem His Xas Lais txij Das mus rau Npes Xas Npes, nej txheeb cov neeg tas tib si, kom kuv paub meej tias muaj pes tsawg leej neeg."
9 Yos As los hais qhia rau Das Vis tias cov neeg nws mus txheeb muaj npaum no leej:  Nyob hauv cov His Xas Lais muaj yim pua txhiab leej txiv neej muaj siab tawv uas lawv yeej tuav ntaj, nyob hauv cov Yus Das muaj tsib puas txhiab leej. 10 Tom qab Das Vis tau txheeb nws cov neeg tas lawm, nws lub siab nyob tsis tus, nws hais rau HUAB TAIS tias : "Kuv tau ua ib qho txhaum loj nyob hauv tej yam kuv tau ua! HUAB TAIS, thov koj zam txhaum rau koj tus tub txib, vim kuv tau ua yuam kev loj." 11 Tag kis sawv ntxov, thaum Das Vis sawv los, tus yaj saub Nkas, uas yog Das Vis tus saub, hnov HUAB TAIS lo lus hais rau nws tias: 12 "Koj mus hais rau Das Vis tias: HUAB TAIS hais li no : Kuv muab peb yam rau koj xaiv, koj xaiv ib yam ces kuv yuav tso yam ntawd los raug koj." 13 Ces tus yaj saub Nkas mus hais qhia rau Das Vis, nws nug tias : "Koj puas nyiam cia koj lub teb chaws tshaib plab peb xyoos ? Los koj puas yeem swb koj cov yeeb ncuab peb hlis, cia koj khiav lawv hos lawv caum koj tua? Los koj puas yeem cia koj lub teb chaws raug mob aws peb hnub ? Nyem no, koj xav tswv yim ces koj hais rau kuv saib kuv yuav teb dab tsi rau tus xa kuv tuaj." 14 Das Vis hais rau Nkas tias : "Kuv nyob rau ib qho kev nyuaj xaiv loj. Ntshai yeem cia Tswv Ntuj txhais tes ntaus peb, vim nws khuv leej neeg kawg nkaus, tsis yeem cia tib neeg txhais tes ntaus peb." 15 Ces Das Vis yeem xaiv tus mob aws. Thaum lub caij hlais cov nplej mov mog yog lub caij uas cov pej xeem pib mob aws . HUAB TAIS tso mob aws los raug cov His Xas Lais txij thaum sawv ntxov mus txog lub caij nws teem. Muaj txog xya caum txhiab leej neeg tuag nyob hauv lub teb chaws txij Das mus rau Npes Xas Npes. 16 Tab sis thaum tus Tshiab xyab tes yuav tso aws mus rau Yes Lus Xas Les, HUAB TAIS ho rov thim xav, nws hais rau tus tshiab rhuav neeg txoj sia tias : "Txaus lawm ! Nkaum koj txhais tes rov qab." Thaum ntawd Tswv Ntuj tus Tshiab nyob ze ntawm As Laus Nas uas yog ib tug neeg Yes Npws Xis lub tshav ntaus nplej. 17 Thaum Das Vis pom tus tshiab uas tso aws tuaj rau tsoom pej xeem, Das Vis hais rau HUAB TAIS tias : "Kuv yog tus tau ua txhaum, kuv, uas yog tus tswv zov pab yaj, yog tus tau ua tsis zoo xwb. Cov ntawd yog pab yaj, lawv tau ua dab tsi phem? Thov kom koj txhais tes ntaus kuv thiab kuv tsev neeg xwb mas !"

NPN       32: 1-2, 5, 6, 7

Txais: (5c) Huab Tais, kuv tau ua txhaum lawm thov koj zam rau kuv.

Hmoov zoo rau tus uas luag thim nws qhov txhaum lawm,
tus uas lawv npog nws qhov txhaum rau.
Hmoov zoo rau tus neeg uas HUAB TAIS tsis suav txim rau nws,
tus uas lub tswv yim tsis muaj ib qho kev siab phem.

Txais: (5c) Huab Tais, kuv tau ua txhaum lawm thov koj zam rau kuv.

Kuv lees kuv qhov txhaum rau koj,
kuv tsis muab kuv qhov txhaum npog cia.
Kuv hais tias: “Kuv lees kuv qhov txhaum rau HUAB TAIS,”
ces koj muab kuv lub txim ntawm kuv qhov txhaum tshem tas.

Txais: (5c) Huab Tais, kuv tau ua txhaum lawm thov koj zam rau kuv.

Vim li no txhua tus neeg muaj kev ntseeg ntuj yuav tsum
teev ntuj hu txog koj haum lub caij muaj kev nyuaj siab.
Txawm tias cov dej tob phwj yaws
los dej yuav tsis nce mus txog nws.

Txais: (5c) Huab Tais, kuv tau ua txhaum lawm thov koj zam rau kuv.

Koj yog kuv lub chaw nkaum,
koj yuav thaiv kuv ntawm txoj kev nyuaj;
nyob ib ncig kuv, koj yuav cia ib co
suab qw zoo siab txog kev twj lij.

Txais: (5c) Huab Tais, kuv tau ua txhaum lawm thov koj zam rau kuv.

As Les Lus Yas:       Zam  10:   27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab,
kuv paub lawv, thiab lawv caum kuv qab.

Txais: As les lus yas, as les lus yas.

Ntawv Moo Zoo:       MK  6:   1-6

1 Yes Xus tawm hauv qhov chaw ntawd mus, nws rov mus lub zos nws nyob hlob, cov thwj tim kuj nrog nws mus thiab. 2 Hnub Xas Npas Tos, Yes Xus pib qhuab qhia hauv lub tsev txoos. Muaj neeg coob tuaj mloog nws, lawv ceeb tas, lawv hais tias : "Nws tau tej ntawd qhov twg los ? Cas nws thiaj tau lub siab thoob tsib ntawd?  Thiab cov hwj huam yees ntxwv loj uas nws ob txhais tes ua, yog los qhov twg los? 3 Tus ntawd tsis yog tus kws ntoo, uas yog Mab Liab tus tub lod ? Nws tsis yog Yas Kos, Yos Xes, Yus Das thiab Xis Moos lawv kwv tij lod ? Hos nws cov muam, tsis yog cov nrog peb nyob ua ke ntawm no lod ?” Lawv tsis zoo siab rau Yes Xus. 4 Ces Yes Xus hais rau lawv tias : "Ib tug Yaj Saub yeej raug luag hwm nws, tsuas yog nyob hauv lub teb chaws, hauv nws cov txheeb ze thiab nws tsev neeg xwb, thiaj tsis muaj neeg xav hwm nws xwb." 5 Vim li ntawd, Yes Xus ua tsis tau ib yam hwj huam yees ntxwv nyob ntawd li, nws tsuas tsa tes rau tus puav tuag tes tuag taw kom zoo xwb. 6 Nws xav tsis thoob txog qhov lawv tsis ntseeg nws.

TIM       1      LUB      2      HLIS       2018

Hnub Tsib Lis Piam Plaub Nruab Xyoo B Nruab Lis Piam Xyoo II

Zaj Nyeem Ib:        1 VAJ  2:   1-4, 10-12

1 Thaum yuav txog Das Vis lub caij tuag, nws qhuab qhia nws tus tub Xas Los Moos tias : 2 "Kuv yuav mus taug txoj kev neeg sawv daws taug. Koj ua siab loj thiab coj kom phim ib tug txiv neej yawg. 3 Koj yuav tsum coj raws li HUAB TAIS koj tus Tswv Ntuj xav kom ua, koj yuav taug nws tej kev, mloog nws tej lus qhia lus ntuas, tej cai nws tau txiav, raws li tau sau tseg nyob hauv Mais Xes txoj cai, ces koj thiaj yuav ua dab tsi los ua tau raws li koj lub siab xav thiab raws li koj npaj, 4 thiab kom HUAB TAIS thiaj ua raws li lo lus nws tau cog rau kuv no : 'Yog koj cov tub ua lawv lub neej coj tus yam ntxwv zoo nyob ntawm kuv xub ntiag, yog lawv muab tas lawv lub siab thiab tus ntsuj plig los taug txoj kev zoo, mas koj yuav muaj neeg zaum saum cov His Xas Lais lub theej kiab tas mus li tsis tu ncua."
10 Ces Das Vis mus nrog nws cov yawg koob pw tsaug zog lawm, lawv muab nws mus los nyob hauv Das Vis lub tsheej. 11 Das Vis tau ua vaj kav His Xas Lais yog plaub caug xyoo: Nws ua vaj xya xyoo nyob Hes Nploos, thiab peb caug peb xyoos nyob Yes Lus Xas Les. 12 Xas Los Moos nce zaum nws txiv Das Vis lub theej kiab, nws txoj kev ua vaj nyob ruaj nreb.

NPN:        1 XWM  29:   10, 11AB, 11D-12A, 12BCD

Txais: (12b) HUAB TAIS, koj yog tus nyob siab dua txhua leej.

Thov kom koj nto koob meej lug, HUAB TAIS,
His Xas Lais tus Tswv Ntuj peb leej Txiv,
Kom koj nto koob meej mus li tsis txawj kawg.

Txais: (12b) HUAB TAIS, koj yog tus nyob siab dua txhua leej.

Huab Tais, kev muaj npe loj thiab kev muaj hwj huam yog koj li,
kev muaj hwj chim, kev ci ntsa iab, kev nto koob meej yog koj tug.

Txais: (12b) HUAB TAIS, koj yog tus nyob siab dua txhua leej.

HUAB TAIS, koj yog tus nyob siab dua txhua leej,
txoj kev ua vaj yog koj li, HUAB TAIS;
txhua tus tsa koj ua hau saib sawv daws;
kev nplua nuj thiab kev muaj meej mom yog koj pub.

Txais: (12b) HUAB TAIS, koj yog tus nyob siab dua txhua leej.

Koj txhais tes tuav lub hwj huam thiab hwj chim;
koj muaj cai pub lub meej mom loj thiab lub zog rau txhua leej.

Txais: (12b) HUAB TAIS, koj yog tus nyob siab dua txhua leej.

As Les Lus Yas:       MK  1:   15

Txais: As les lus yas, as les lus yas.

Tswv Ntuj lub Ceeb Tsheej nyob ze lawm;
nej cia li los lees txhaum thiab ntseeg txog lub Moo Zoo.

Txais: As les lus yas, as les lus yas.

Ntawv Moo Zoo:       MK  6:   7-13

7 Yes Xus hu Pab Kaum Ob los cuag nws, ces nws xa lawv ua tej pab ob leeg mus. Nws pub hwj huam ntiab dab tsis huv rau lawv. 8 Yes Xus qhia lawv kom txhob nqa dab tsi taug kev li, tsuas nqa tib rab pas nrig xwb. Txhob ntim mov, txhob nqa hnab ruas, txhob ntim xim nyiaj rau hauv duav siv. 9 Nws hais tias : "Nej rau khau khiab xwb, txhob hnav ob lub tsho." 10 Yes Xus tseem hais rau lawv tias : "Nej chaws mus hauv lub tsev twg, nej yuav nyob hauv lub tsev ntawd mus txog hnub nej rov qab. 11 Yog qhov chaw twg tsis txais nej, thiab luag tsis mloog nej, nej tso qhov chaw ntawd tseg, nej nchos cov plua av lo nej qab xib taws pov tseg, cia ua tim khawv txiav txim rau lawv." 12 Cov thwj tim tawm mus, lawv tshaj kom tsoom sid tig los hloov siab tshiab. 13 Lawv ntiab ntau tus dab phem, thiab lawv muab roj pleev ntau leej tuag tes tuag taw, thiab kho ntau tus neeg mob zoo.

TIM 2 LUB 2 HLIS 2018

Hnub Rau Lis Piam Plaub Nruab Xyoo B Nruab Lis Piam Xyoo II

Nco txog Niam Mab Liab thiab Yos Xes coj Yes Xus mus fij rau Ntuj

Zaj Nyeem Ib: MAS LAS KIS 3: 1-4

Huab Tais Tswv Ntuj hais tias:
1 “Kuv xa kuv tus tub tshaj xov mus npaj kev ua kuv ntej. Tos nco, tus Huab Tais uas nej nrhiav nws yuav chaws los hauv nws lub tuam tsev, yog tus tub tshaj xo txog lo lus tau cog, tus uas nej xav tau. Saib saib, nws tuaj txog ntawd lawm !” Tus HUAB TAIS kav tsoom hnub qub hais li ntawd.
2 Leej twg yuav tiv taus hnub nws tuaj txog? Thaum nws tawm tuaj, leej twg yuav sawv taus ntseg? Vim nws zoo li cov hluav taws nchuav hlau, thiab zoo li cov tshuaj ntxhua khaub ncaws dawb.
3 Nws yuav zaum ua tus nchuav nyiaj thiab tus ntxhua nyiaj kom huv, nws yuav ua kom Les Vis cov tub huv tuaj; nws yuav nchuav lawv ib yam li nchuav kub los nchuav nyiaj, kom lawv yog cov cev thaj txi Ntuj rau Huab Tias raws txoj kev ncaj.
4 Ces HUAB TAIS yuav zoo siab txais Yus Das thiab Yes Lus Xas Les thaj txi Ntuj, ib yam li txheej puag thaum ub, thiab yav dhau los.

NPN 24: 7, 8, 9, 10

Txais: Leej twg yog tus vaj nto koob meej? Yog HUAB TAIS!

Cov rooj vag, nej tsa nej daim txiag
puab saum qhov rooj kom siab,
cov qhov rooj laus, nej tshoom kom siab ntxiv,
kom tus vaj nto koob meej tau kev nkag los!

Txais: Leej twg yog tus vaj nto koob meej? Yog HUAB TAIS!

Leej twg yog tus vaj nto koob meej?
Yog HUAB TAIS, nws muaj zog, muaj hwj huam,
yog HUAB TAIS, nws muaj peev xwm yeej tsam rog.

Txais: Leej twg yog tus vaj nto koob meej? Yog HUAB TAIS!

Cov rooj vag, nej tsa nej daim txiag
puab saum qhov rooj kom siab,
cov qhov rooj laus, nej tshoom kom siab ntxiv,
kom tus vaj nto koob meej tau kev nkag los!

Txais: Leej twg yog tus vaj nto koob meej? Yog HUAB TAIS!

Tus vaj nto koob meej yog leej twg?
Tus HUAB TAIS kav tsoom hnub qub,
nws yog tus vaj nto koob meej.

Txais: Leej twg yog tus vaj nto koob meej? Yog HUAB TAIS!

Zaj Nyeem Ob: HEB 2: 14-18

14 Vim ib co me nyuam koom ib co roj ntsha ib lub cev nqaij, li ntawd Yes Xus kuj nrog lawv koom ib co roj ntsha thiab ib lub cev nqaij thiab, kom nws txoj kev tuag yeej tau tus tuav txoj kev tuag lub hwj huam; uas yog tus dab phem Xas Tas;
15 thiab kom nws cawm tau cov uas, vim lawv ntshai kev tuag, lawv raug yuam ua qhev tas lawv sid.
16 Yes Xus tsis tau pab cov Tshiab, tiam sis nws tau tuaj pab Has Nplas Has tsoom xeeb ntxwv.
17 Vim li no, nws thiaj yuav tsum ua kom nws zoo ib yam nkaus li nws tsoom kwv nyob hauv txhua yam, kom nws thiaj ua tau ib tug tuam Leej Choj uas khuv leej neeg thiab pheej xeeb nyob ntawm Tswv Ntuj xub ntiag, kom tau them tsoom pej xeem cov txim txhaum.
18 Vim nws tus kheej tau raug kev sim siab nyob hauv txoj kev raug txom nyem, mas nws thiaj txawj pab tau cov uas raug kev sim siab thiab.

As Les Lus Yas: LK 2: 32

Txais: As les lus yas, as les lus yas.

Ib qho pom kev tawm tuaj kaj cov pej kum haiv neeg,
hos lub koob meej yog koj haiv His Xas Lais tau txais.

Txais: As les lus yas, as les lus yas.

Ntawv Moo Zoo: LK 2: 22-40

22 Thaum txog lub caij ua cov kab ke ntxuav kom huv rau ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau fij tus me nyuam rau Huab Tais, 23 raws li Huab Tais Txoj Cai sau tseg tias : "Txhua tus me nyuam tub uas yog tus xub qhib leej niam lub plab tawm los, yuav muab qee rau Huab Tais," 24 thiab tseem yuav cev ib co txim rau Ntuj raws li Huab Tais Txoj Cai uas sau cia tias : “muab ib nkawg nquab lwb rwg, los ob tug thav nquab dawb.”
25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus txiv neej ntawd yog neeg ncaj thiab nyiam teev Ntuj, nws tos nrhw tus yuav tuaj nplij His Xas Lais; Leej Ntuj Plig Ntshiab nyob hauv nws. 26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag. 27 Leej Ntuj Plig coj nws tuaj nyob hauv lub Tuam Tsev Teev Ntuj. Thaum leej niam thiab leej txiv coj tus me nyuam Yes Xus tuaj ua cov kab ke raws Txoj Cai, 28 Xis Mes Oos txais tus me nyuam los rau hauv nws xub ntiag, nws cav lus zoo txog Tswv Ntuj, nws hais tias : 29 “Tus Tswv, nyem no koj tso koj tus tub txib ncaim mus kaj lug raws li koj lo lus, 30 vim kuv qhov muag tau pom koj txoj kev cawm neeg lawm, 31 uas koj tau npaj nyob ntawm ib tsoom haiv neeg xub ntiag, 32 yog qhov pom kev tawm tuaj kaj cov pej kum haiv neeg, yog koj haiv neeg His Xas Lais lub koob meej. 33 Yes Xus niam thiab txiv qhuas cov lus nkawd hnov hais txog tus me nyuam. 34 Xis Mes Oos foom hmoov zoo rau nkawd, nws hais rau Mab Liab, Yes Xus niam tias : "Koj yuav pom , tus me nyuam no yuav ua chaw rau ntau leej nyob His Xas Lais ntog thiab ntau leej rov sawv. Nws yog ib lub cim ua kom sawv daws sib cav tsis sib haum. 35 Hos ntawm koj, mas ib rab ntaj yuav hno ntsees koj tus plig, kom xwv tej lus uas coob leej xav tuaj nruab siab tawm los rau sawv daws paub.”
36 Tseem muaj ib tug yaj saub poj niam, hu ua As Nas, yog Fas Nus Es tus ntxhais, xeem As Xej. Nws lub hnub nyoog laus lawm. Thaum dhau nws lub caij ua nkauj xwb lawm, mas nws nrog nws tus txiv nyob tau xya xyoo, 37 ces nws ua poj ntsuam los laus li ntawd txog thaum nws muaj yim caum plaub xyoos no lawm, nws tsis nrug ntawm lub Tuam Tsev Teev Ntuj li, nws yoo mov thiab teev Ntuj los tsob hwb Tswv Ntuj nruab hnub hmo ntuj. 38 Tib lub sij hawm ntawd, nws kuj tuaj nyob ntawd thiab, nws ua Tswv Ntuj tsaug, thiab nws hais txog tus me nyuam rau txhia leej txhia tus uas tos txog lub caij Yes Lus Xas Les yuav tau txais kev cawm.
39 Thaum lawv ua txhua yam raws li Huab Tais Txoj Cai tas lawm, lawv rov mus Nkas Lis Lais, hauv lawv lub nroog Nas Xas Les. 40 Tus me nyuam, nws hlob, nws muaj zog zuj zus, kev thoob tsib puv nws siab ntsws; Tswv Ntuj lub txiaj ntsim nyob hauv nws.

Los: LK 2: 22-32

22 Thaum txog lub caij ua cov kab ke ntxuav kom huv rau ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau fij tus me nyuam rau Huab Tais, 23 raws li Huab Tais Txoj Cai sau tseg tias : "Txhua tus me nyuam tub uas yog tus xub qhib leej niam lub plab tawm los, yuav muab qee rau Huab Tais," 24 thiab tseem yuav cev ib co txim rau Ntuj raws li Huab Tais Txoj Cai uas sau cia tias : “muab ib nkawg nquab lwb rwg, los ob tug thav nquab dawb.”
25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus txiv neej ntawd yog neeg ncaj thiab nyiam teev Ntuj, nws tos nrhw tus yuav tuaj nplij His Xas Lais; Leej Ntuj Plig Ntshiab nyob hauv nws. 26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag. 27 Leej Ntuj Plig coj nws tuaj nyob hauv lub Tuam Tsev Teev Ntuj. Thaum leej niam thiab leej txiv coj tus me nyuam Yes Xus tuaj ua cov kab ke raws Txoj Cai, 28 Xis Mes Oos txais tus me nyuam los rau hauv nws xub ntiag, nws cav lus zoo txog Tswv Ntuj, nws hais tias : 29 “Tus Tswv, nyem no koj tso koj tus tub txib ncaim mus kaj lug raws li koj lo lus, 30 vim kuv qhov muag tau pom koj txoj kev cawm neeg lawm, 31 uas koj tau npaj nyob ntawm ib tsoom haiv neeg xub ntiag, 32 yog qhov pom kev tawm tuaj kaj cov pej kum haiv neeg, yog koj haiv neeg His Xas Lais lub koob meej.

TIM 3 LUB 2 HLIS 2018

Hnub Xya Lis Piam Plaub Nruab Xyoo B Nruab Lis Piam Xyoo II

Hwm LN Blase; LN Ansgar

Zaj Nyeem Ib: 1 VAJ 3: 4-13

4 Tus vaj Xas Los Moos mus rau nram Nkas Npas Oos, mus txi Ntuj nyob ntawd, vim thaj chaw txi Ntuj loj tshaj yog nyob ntawd; Xas Los Moos hlawv txog txhiab tus tsiaj los txi Ntuj nyob saum lub thaj ntawd. 5 Thaum nyob Nkas Npas Oos, hmo ntuj HUAB TAIS tawm tuaj rau Xas Los Moos pom xyeem nyob hauv npau suav. Tswv Ntuj hais tias : "Koj thov qhov koj xav tau ces kuv yuav muab rau koj." 6 Xas Los Moos teb tias : "Koj tau hlub koj tus tub txib Das Vis uas yog kuv txiv, vim nws taug kev nyob ntawm koj xub ntiag, nws taug raws txoj kev pheej xeeb, txoj kev ncaj ncees thiab txoj kev ua neeg ncaj. Koj tau ua zoo rau nws los txog hnub no, koj tseem tau cia kom nws ib tug tub zaum nyob saum nws lub theej kiab thiab. 7 HUAB TAIS kuv tus Tswv Ntuj, nyem no koj tau tsa kuv, koj tus tub txib, ua vaj hloov kuv txiv Das Vis chaw. Kuv yog ib tug me nyuam tub hluas xwb, kuv tsis txawj ntaus thawj li. 8 Koj tus tub txib nyob nruab nrab haiv neeg uas koj tau xaiv, yog ib haiv neeg coob tas nrho suav tsis txheeb tshuaj tsis txhua. 9 Thov koj pub ib lub siab muaj kev to taub zoo rau koj tus tub txib kom nws txawj txiav txim rau koj haiv neeg, kom nws txawj pom tias qhov twg yog qhov zoo, qhov twg yog qhov phem. Vim tias leej twg thiaj yuav txawj tswj koj haiv neeg uas coob tas npaud ?" 10 HUAB TAIS zoo siab hnov tias Xas Los Moos tau thov li ntawd. 11 Ces Tswv Ntuj hais rau Xas Los Moos tias : "Koj tau thov qhov ntawd, tsis thov kom koj tau ua neej laus nkoos, tsis thov kom koj nplua nuj, tsis thov kom koj tau rhuav koj cov yeeb ncuab txoj sia, tiam sis koj thov txoj kev to taub txawj xav tom ntej tom qab kom paub tias qhov twg thiaj yog qhov zoo. 12 Li ntawd mas kuv yuav ua raws li koj thov, kuv pub ib lub siab thoob tsib thiab ntse rau koj, yav tas los lawd tsis tau muaj leej twg ntse zoo li ntawd, thiab yav tom ntej los kuj yuav tsis muaj leej twg ntse zoo li ntawd ntxiv. 13 Tab yog tej yam koj tsis tau thov los kuv tseem yuav muab rau koj tib si: kev nplua nuj thiab kev nto koob meej tshaj tas txhia tus vaj tib si.

NPN 119: 9, 10, 11, 12, 13, 14

Txais: (12b) Huab Tais, thov koj qhia koj txoj cai lij choj rau kuv.

Yuav ua cas ib tug tub hluas txoj kev thiaj yuav ntshiab huv ?
Yog yuav ua raws li koj cov lo lus.

Txais: (12b) Huab Tais, thov koj qhia koj txoj cai lij choj rau kuv.

Kuv nrhiav koj tas siab tas ntsws,
thov koj txhob cia kuv ncaim mus deb koj cov lus qhia.

Txais: (12b) Huab Tais, thov koj qhia koj txoj cai lij choj rau kuv.

Kuv khaws koj cov lus koj tau hais rau nruab siab
kom kuv tsis txhob ua txhaum rau koj.

Txais: (12b) Huab Tais, thov koj qhia koj txoj cai lij choj rau kuv.

HUAB TAIS, ua kom koj nto koob meej !
Thov koj qhia koj txoj cai lij choj rau kuv.

Txais: (12b) Huab Tais, thov koj qhia koj txoj cai lij choj rau kuv.

Kuv di ncauj tshaj tas nrho cov lus
cob qhia tawm ntawm koj lub ncauj los.

Txais: (12b) Huab Tais, thov koj qhia koj txoj cai lij choj rau kuv.

Kuv zoo siab hlo taug txoj kev ua raws li koj lo lus,
Zoo siab npaum li kuv yog neeg nplua nuj muaj txhij txhua.

Txais: (12b) Huab Tais, thov koj qhia koj txoj cai lij choj rau kuv.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub lawv, lawv raws nraim kuv qab.

Txais: As les lus yas, as les lus yas.

Ntawv Moo Zoo: MK 6: 30-34

30 Cov Hauv Paus Xa Lus los sib sau ncig Yes Xus, lawv piav tas puas tsav yam uas lawv tau ua thiab tau qhia. 31 Ces Yes Xus hais rau lawv tias : "Nej los rau ib qho chaw xu kev tsis muaj neeg, nej so me ntsis." Vim muajneeg tuaj thiab muaj neeg rov mus coob kawg, ces cov Hauv Paus Xa Lus tsis xyeej noj mov li. 32 Lawv thiaj caij nkoj mus rau ib qho chaw xu ke, tsis muaj neeg. 33 Tsoom sid pom cov Hauv Paus Xa Lus caij nkoj mus, coob leej twb mem tau lawm. Ces sawv daws khiav ko taw hauv tas cov nroog tuaj mus. Lawv xub mus txog chaw. 34 Thaum Yes Xus nqes nkoj, nws pom ib pab neeg coob coob, nws hlub lawv, vim lawv zoo li cov yaj uas tsis muaj tswv zov. Ces Yes Xus pib qhuab qhia lawv txog ntau yam.

TIM 5 LUB 2 HLIS 2018

Hnub Ob Lis Piam Tsib Nruab Xyoo B Nruab Lis Piam Xyoo II

Hwm LN Agatha, tuag ua Tim Khawv

Zaj Nyeem Ib: 1 VAJ 8: 1-7, 9-13

1 Cov txwj laus His Xas Lais, cov thawj nres xeem thiab cov tub nom tub tswv hauv haiv neeg His Xas Lais sawv daws tuaj sib sau nrog Xas Los Moos nyob Yes Lus Xas Les, vim yuav coj HUAB TAIS lub Xab Cog Lus ntawm Das Vis lub tsheej Xis Yoos los mus. 2 Tas tsoom neeg His Xas Lais tuaj sib sau nyob ncig vaj Xas Los Moos yog thaum nqaum paj nqaum nruas lub hlis Es Thas Nis (lub xya hli). 3 Thaum cov txwj laus His Xas Lais tuaj txhij lawm, cov Leej Choj kwv lub Xab Cog Lus thiab lub tsev tsam phooj sib ntsib nrog rau cov twj txi ntuj uas nyob hauv lub tsev tsam phooj huv si. Cov leej choj thiab cov Les Vis yog cov kwv. 5 Vaj Xas Los Moos thiab tas tsoom His Xas Lais sawv daws nrog nws sib sau nyob ntawm lub Xab Cog Lus, lawv tua yaj tua nyuj coob coob suav tsis txheeb los txi Ntuj nyob ntawd. 6 Cov Leej Choj coj HUAB TAIS lub Xab Cog Lus los txawb rau nws qhov chaw hauv Kem Ntshiab, hauv qab cov Tshiab Kes Lus Npis cov tis , nyob hauv lub Tuam Tsev Teev Ntuj. 7 Cov Tshiab Kes Lus Npis nthuav lawv cov tis puag saud los roos lub Xab Cog Lus thiab nws cov nqaj kwv.
9 Tsis muaj dab tsi nyob hauv lub Xab Cog Lus, kawg muaj ob daim txiag zeb uas Mais Xes muab rau hauv thaum nyob saum roob Hos Les uas HUAB TAIS tau nrog cov tub ki His Xas Lais cog lus thaum lawv tawm ntawm Hais Nkws Tos teb los xwb. 10 Thaum cov Leej Choj tawm hauv Kem Ntshiab los, muaj ib twv huab los nyob puv HUAB TAIS lub Tuam Tsev tas tib si. 11 Cov Leej Choj ua tsis tau cov kab ke ntxiv mus vim twv huab ntawd, vim HUAB TAIS lub hwj chim los nyob puv HUAB TAIS lub Tuam Tsev. 12 Ces Xas Los Moos hais tias : "HUAB TAIS yeej txaus siabj los nyob hauv tauv huab dub. 13 Kuv ua tau ib lub tsev phim tus vaj nyob rau koj lawm, yog lub tsev koj yuav nyob mus li."

NPN 132: 6-7, 8-10

Txais: (8a) HUAB TAIS, thov koj nce mus nyob hauv koj lub chaw so.

Peb tau hnov txog qhov ntawd nyob Es Fas Tas,
peb nrhiav tau nws tom cov nras teb Yas Aj.
Peb kav tsij nkag mus hauv Huab Tais lub tsev,
peb txhos caug pe ntawm nws lub rooj tiag taw.

Txais: (8a) HUAB TAIS, thov koj nce mus nyob hauv koj lub chaw so.

HUAB TAIS, thov koj nce mus nyob hauv koj lub chaw so,
koj thiab lub Xab Cog Lus uas muaj koj lub hwj chim.
Kom koj cov leej choj hnav txoj kev ncaj,
kom cov neeg ntseeg txog koj qw zoo siab.
Vim koj tus tub txib Das Vis,
thov koj txhob tsis kam mloog koj tus pleev lo lus thov

Txais: (8a) HUAB TAIS, thov koj nce mus nyob hauv koj lub chaw so.

As Les Lus Yas: MT 4: 23

Txais: As les lus yas, as les lus yas.

Yes Xus tshaj lub Moo Zoo txog lub Ceeb Tsheej
thiab nws kho txhua yam mob nyob hauv cov neeg.

Txais: As les lus yas, as les lus yas.

Ntawv Moo Zoo: MK 6: 53-56

53 Cov thwj tim hla dhau dej ntuj, lawv tuaj txog Nkes Nes Xas Les, lawv nqes nkoj. 54 Thaum lawv nqes plhuav nkoj, muaj neeg cim tau Yes Xus tam sis ntawd. 55 Cov neeg uas cim tau Yes Xus khiav thoob ib cheeb tsam ntawd, lawv mus kwv cov neeg muaj txiab nkeeg saum tej lub txaj lev tuaj rau Yes Xus. Lawv hnov luag hais tias Yes Xus nyob qhov twg, mas lawv kwv cov neeg mob tuaj rau ntawd. 56 Yes Xus mus txhua txhia qhov chaw, hauv cov zos, cov nroog, thiab pem yaj sab, lawv coj neeg mob tuaj tso rau ntawm tej tshav puam, lawv thov Yes Xus kom nws cia lawv kov nws, tab yog kov nws tw tsho xwb kuj tau. Cov neeg uas tau kov Yes Xus puav leej dim ntawm lawv tus mob

TIM 6 LUB 2 HLIS 2018

Hnub Peb Lis Piam Tsib Nruab Xyoo B Nruab Lis Piam Xyoo II

Hwm LN Paul Miki thiab pab nrog nws Tuag Ua Tim Khawv

Zaj Nyeem Ib: 1 VAJ 8: 22-23, 27-30

22 Xas Los Moos sawv nyob ntawm hauv ntej HUAB TAIS lub thaj txi Ntuj, nyob ntawm tas tsoom His Xas Lais xub ntiag, nws tsa tes rau saum Ntuj. 23 Nws hais tais : "HUAB TAIS, His Xas Lais tus Tswv Ntuj, tsis muaj lwm tus Tswv Ntuj zoo li koj nyob saum ntuj los nyob ntiaj teb no lawm. Koj ua raws nraim li lo lus hlub koj tau cog rau koj cov tub txib yog lawv mloog koj tas siab tas ntsws.
27 Tswv Ntuj puas yuav nrog neeg nyob ntiaj teb no tiag ? Vim tias lub ntuj saud thiab cov txheej ntuj siab twb ntim tsis tau koj, mas lub tsev kuv ua no haj yam yuav ntim tsis tau koj! 28 HUAB TAIS kuv tus Tswv Ntuj, thov koj saib txog koj tus tub txib cov lus thiab zaj thov koj thiab thov koj mloog koj tus tub txib no lub suab quaj hu thov koj hnub no. 29 Nruab hnub hmo ntuj thov koj dauv muag saib ntsoov lub tuam tsev no, yog lub tsev uas koj hais tias : 'Kuv lub npe yuav nyob ntawm no !' Thov koj mloog kuv koj tus tub txib cov lus thov koj nyob ntawm thaj chaw no. 30 Thov koj mloog koj tus tub txib thiab mloog koj haiv His Xas Lais cov lus thov koj nyob ntawm thaj chaw no. Thov koj nyob saum koj lub chaw saum ntuj mloog peb thiab zam txhaum rau peb."

NPN 84: 3, 4, 5+10, 11

Txais: (2) Tswv Ntuj muaj hwj huam, koj lub chaw nyob zoo xis siab tiag!

Kuv tus plig ntshaw seev yees yuj plaws
rau HUAB TAIS cov tshav loog.
Kuv lub siab lub cev quaj
ntshaw txog tus Tswv Ntuj muaj txoj sia.

Txais: (2) Tswv Ntuj muaj hwj huam, koj lub chaw nyob zoo xis siab tiag !

Tej me noog liaj nrhiav tau chaw nyob,
tej noog luv nrhiav tau zes puag me nyuam,
nyob saum koj cov thaj txi ntuj nas HUAB TAIS muaj hwj huam,
kuv tus vaj, kuv tus Tswv Ntuj,

Txais: (2) Tswv Ntuj muaj hwj huam, koj lub chaw nyob zoo xis siab tiag !

Cov neeg nyob hauv koj tsev lawv hmoov zoo :
lawv tau kev cav txog koj tsis tseg.
Tswv Ntuj, thov koj saib daim leem phiaj thaiv peb,
thov koj ntsia tus koj tau pleev roj rau lub ntsej muag.

Txais: (2) Tswv Ntuj muaj hwj huam, koj lub chaw nyob zoo xis siab tiag!

Kuv yeem nyob ib hnub hauv koj cov tshav loog
zoo dua nyob ib txhiab hnub lwm qhov chaw,
kuv yeem sawv ntawm kuv tus Tswv Ntuj lub taw rooj
zoo dua nyob hauv cov tsis hwm ntuj tej tsev tsam phooj.

Txais: (2) Tswv Ntuj muaj hwj huam, koj lub chaw nyob zoo xis siab tiag !

As Les Lus yas : NPN 119: 36, 29B

Txais: As les lus yas, as les lus yas.

HUAB TAIS, ua kom kuv lub siab xib mus rau koj tej cai lij choj,
thiab pub lub txiaj ntsim rau kuv ua raws koj txoj cai.

Txais: As les lus yas, as les lus yas.

Ntawv Moo Zoo: MK 7: 1-13

1 Cov Fas Lis Xais thiab tus puav Kws Ntawv Ntshiab tuaj Yes Lus Xas Les tuaj, lawv sib sau ntsauv Yes Xus. 2 Lawv pom tus puav thwj tim xuas tes tsis huv noj mov, lawv tsis xub ntxuav tes tso, 3 vim tias cov Fas Lis Xais, thiab tas cov Yus Das huv tib si, mas lawv tsis noj mov yog lawv tsis xub ntxuav tes zoo zoo tso raws li tej laus ib txwm coj los. 4 Thaum lawv mus kav kiab kav khw rov los, yog lawv tsis tau xub pov dej rau lawv kom lawv huv tso, mas lawv tsis noj mov li. Tseem muaj ntau yam uas cov Yus Das ua raws li tej laus qhia kom ua : xws li ntxuav khob, ntxuav hub, thiab tej tais tooj dag, tej txaj chaw pw kom huv tso. 5 Vim li ntawd, cov Fas Lis Xais thiab cov kws Ntawv Ntshiab thiaj nug Yes Xus tias : "Ua cas koj cov thwj tim tsis ua raws li tej laus kev cai ib txwm qhia kom ua, lawv cia li xuas tes tsis huv noj mov ?" 6 Yes Xus teb rau lawv tias : "Neeg zoo sab nraud, His Xais tau hais raug kawg txog nej nyob hauv phab Ntawv Ntshiab no: ‘Haiv neeg no tsuas hwm kuv ntawm di ncauj xwb, lawv lub siab nyob deb kuv. 7 Lawv lam teev kuv dag, tej kev cai lawv qhia tsuas yog tib neeg tej kev cai xwb.’ 8 Nej tso Tswv Ntuj lo lus qhia tseg, nej muab nej khi rau neeg tej kev cai." 9 Thiab Yes Xus tseem hais rau lawv tias : "Nej muaj tswv yim kawg rhuav Tswv Ntuj txoj cai kom nej tau khaws nej txoj cai. 10 Xws li Mais Xes yeej tau qhia tias : ‘Koj yuav hwm koj niam koj txiv, tus tsawm niam tsawm txiv, yuav raug lub txim tuag !’ 11 Tab sis nej mas nej hais tias : ‘Yog ib tug twg hais rau nws niam nws txiv tias : cov nyiaj txiag uas kuv yuav cia los pab koj, mas yog kos npas lawm- txhais tias muab qee rau Ntuj lawm, 12 ces nej tsis hais kom nws ua dab tsi ntxiv rau nws niam nws txiv li. 13 Nej yeem rhuav Tswv Ntuj lo lus tsis yeem tso nej txoj cai uas yog nej tsim thiab nej coj tiam dhau tiam los mus. Nej tseem ua ntau yam ntxiv zoo li ntawd !"

TIM 7 LUB 2 HLIS 2018

Hnub Plaub Lis Piam Tsib Nruab Xyoo B Nruab Lis Piam Xyoo II

Zaj Nyeem Ib: 1 VAJ 10: 1-10

1 Tus poj vaj nyob Xas Npas hnov txog Xas Los Moos lub koob meej vim Huab Tais lub npe, nws xav tuaj nug tej zaj lus tob tob los sim Xas Los Moos. 2 Nws tuaj Yes Lus xas Les, nws coj ib npoj ntxhais txib tub txuas coob kawg tuaj. Nws xuas ntxhuav thauj tej nras tshuaj tsw qab, tej nras kub ntau heev, thiab tej nras pob zeb pov haum muaj nqes tuaj. Thaum nws tuaj txog ntawm Xas Los Moos lawm, nws nug Xas Los Moos txog tas puas tsav yam uas nws tau xav nyob hauv nws nruab siab. 3 Xas Los Moos thiaj piav meej pem txog tas txhia yam nws nug, tsis muaj ib yam uas Xas Los Moos yuav piav tsis tau kom meej li.
4 Thaum tus poj vaj nyob Xas Npas pom tias Xas Los Moos yog ib tug neeg thoob tsib kawg tiag, thiab pom Xas Los Moos lub tsev uas nws tau tsa rau nws nyob, 5 pom nws tej rooj zaub rooj hno, pom nws cov thawj tub rog zaum raws kev raws cai, pom nws cov tub txib txoj kev khiav dej num thiab lawv tej tsoos tsho, pom nws txoj kev noj kev haus nchuav lug, thiab pom nws ua tej thaj txi Ntuj nyob hauv Huab Tais lub tuam tsev teev Ntuj, mas nws yoob tas. 6 Nws hais rau Xas Los Moos tias : "Tej yam uas kuv tau hnov hais nyob hauv kuv lub teb chaws txog koj tej hauj lwm thiab txog koj lub tswv yim thoob tsib, mas muaj tiag tiag! 7 Thaum kuv qhov muag tsis tau tuaj pom kiag mas kuv tsis ntseeg. Tab sis kuv pom tias luag tsuas hais txog ib nrab xwb, koj tseem nplua nuj thiab thoob tsib tshaj qhov kuv tau hnov lawm. 8 Koj cov poj niam muaj txoj hmoov zoo, thiab koj cov tub txib muaj txoj hmoov zoo vim lawv tau nyob ze koj mus li, lawv tau mloog koj cov lus thoob tsib ! 9 Kom HUAB TAIS koj tus Tswv Ntuj nto koob meej ! Nws txaus siab tsa koj ua vaj zaum saum tsoom His Xas Lais lub theej kiab. Vim HUAB TAIS hlub His Xas Lais mus li, nws thiaj tsa koj ua vaj kom koj txiav txim thiab muab kev ncaj ncees rau lawv."
10 Ces tus poj vaj muab ib puas nees nkaum nras kub, muab tshuaj tsw qab ntau heev, thiab muab ib co pob zeb pov haum los pub rau tus vaj. Tus poj vaj nyob Xas Npas pub tshuaj tsw qab ntau ntau rau Xas los Moos, tsis muaj dua ib zaug ntxiv uas lwm tus yuav pub ntau npaum li ntawd lawm.

NPN 37: 5-6, 30-31, 39-40

Txais: (30a) Tus neeg ncaj lub ncauj hais lo lus thoob tsib.

Koj muab koj txoj hauv kev tso rau HUAB TAIS,
koj tso siab rau nws, nws yuav pab koj.
Nws yuav ua kom koj txoj kev ncaj ci li hauv ntuj ntsa,
ua kom koj txoj kev yeej cai ci cuag li lub hnub thaum tav su

Txais: (30a) Tus neeg ncaj lub ncauj hais lo lus thoob tsib.

Tus neeg ncaj lub ncauj hais lo lus thoob tsib,
nws tus nplaig tshaj txoj kev ncaj.
Nws tus Tswv Ntuj txoj cai nyob rawv hauv nws nruab siab,
nws mus kev, nws yuav tsis ntog.

Txais: (30a) Tus neeg ncaj lub ncauj hais lo lus thoob tsib.

Cov siab ncaj txoj kev cawm tuaj ntawm HUAB TAIS tuaj :
lub caij muaj kev txhawj xeeb, HUAB TAIS yog lawv lub chaw vam.
HUAB TAIS pab lawv thiab cawm lawv dim,
Nws npo lawv dim ntawm cov tsis hwm Ntuj,
nws cawm lawv, vim lawv tuaj nkaum hauv nws.

Txais: (30a) Tus neeg ncaj lub ncauj hais lo lus thoob tsib.

As Les Lus Yas: ZAM 17: 17B, 17A

Txais: As les lus yas, as les lus yas.

Huab Tais, koj lo lus yog qhov tseeb;
thov koj qee peb mus rau qhov tseeb.

Txais: As les lus yas, as les lus yas.

Ntawv Moo Zoo: MK 7: 14-23

14 Yes Xus rov hu tsoom sid los ntawm nws, ces nws hais rau lawv tias : "Tas nej sawv daws, nej mloog kuv kom nej to taub. 15 Tsis muaj dab tsi nyob sab nraum neeg lub cev, uas nkag rau hauv neeg, yuav ua kom neeg tsis huv. Tiam sis yam uas tawm hauv neeg los yog yam ua kom neeg tsis huv. [16]…” 17 Thaum Yes Xus rov los tsev thiab nyob nrug deb ntawm tsoom sid lawm, nws cov thwj tim nug nws txog zaj paj lug ntawd. 18 Ces Yes Xus hais rau lawv tias : "Nej kuj yog neeg tsis muaj tswv yim li thiab lod ? Nej tsis to taub tias tej yam nyob sab nraum no, nkag rau hauv neeg ua tsis tau kom neeg tsis huv no lod? 19 Vim tias tej yam ntawd tsis nkag mus hauv neeg lub siab, tsuas nkag rau hauv lub plab xwb, ces tawm mus rau nraum chaw tawm rooj xwb.” (Li no Yes Xus qhia tias txhua hom txhiam xws noj puav leej huv). 20 Nws hais ntxiv tias : "Yam uas tawm hauv neeg los yog yam ua kom neeg tsis huv. 21 Muaj tej yam tswv yim phem zoo li no txhawv hauv neeg nruab siab los : kev ua plees ua yi, kev ua tub sab, kev tua neeg, 22 kev deev luag txij luag nkawm, kev cuaj khaum, kev lim hiam, kev ua cuav, kev ua dev ua npua, kev khib, kev xyav luag moo, kev thuam ntuj, kev ua neeg vwm. 23 Txhua hom kev phem no tawm sab hauv los, mas thiaj ua kom neeg tsis huv."

TIM 8 LUB 2 HLIS 2018

Hnub Tsib Lis Piam Tsib Nruab Xyoo B Nruab Lis Piam Xyoo II

Hwm LN Jerome Emiliani; LN Josephine Bakhita

Zaj Nyeem Ib: 1 VAJ 11: 4-13

4 Thaum Xas Los Moos laus lawm, nws cov poj niam coj nws ntxeev siab mus teev lwm cov dab, nws lub siab tsis hwm HUAB TAIS nws tus Tswv Ntuj tib leeg xws li nws txiv Das Vis lub siab tau hwm. 5 Xas Los Moos mus teev cov neeg nyob Xis Doos tus poj dab As Tas Tes, thiab teev cov As Moos tus dab Mis Kos. 6 Xas Los Moos ua tej yam tsis ntxim HUAB TAIS siab, nws tsis mloog HUAB TAIS lus tas nrho xws li nws txiv Das Vis tau ua. 7 Ces Xas Los Moos txhim ib lub tsev teev tus dab Kes Mos uas yog cov Mos As tus dab, nyob saum lub roob nyob ncaj ntawm Yes Lus Xas Les sab tid; thiab nws kuj txhim ib lub tsev teev cov As Moos tus dab Mos Les thiab. 8 Nws ua li ntawd rau tas nrho nws cov poj niam uas nws yuav nyob pej kum teb los, uas lawv hlawv xyab rau thiab ua tej lub thaj txi lawv cov dab. 9 Ces HUAB TAIS npau taws rau Xas Los Moos, vim nws lub siab fee das rau HUAB TAIS, His Xas Lais tus Tswv Ntuj uas tau tuaj yees rau Xas Los Moos pom ob zaug lawm. 10 Tswv Ntuj twb tau qhia Xas Los Moos kom nws tsis txhob mus teev pej kum dab, tab sis Xas Los Moos tsis mloog Huab Tais lo lus qhia li. 11 Ces HUAB TAIS hais rau Xas Los Moos tias : "Koj tau ua li ntawd, koj tsis mloog kuv cov lus kuv tau cog, koj tsis mloog kuv tej cai lij choj uas kuv tau qhia rau rau koj li, kuv yuav thau koj lub teb chaws ntawm koj tes thiab kuv yuav muab rau koj ib tug tub txib kav. 12 Kuv yuav tsis ua li ntawd thaum koj tseem ua neej nyob, vim kuv saib koj txiv Das Vis. Tab sis kuv yuav thau koj lub teb chaws ntawm koj tus tub tes. 13 Kuv kuj yuav tsis thau tas nrho mus, kuv yuav cia ib xeem rau nws kav, vim kuv tus tub txib Das Vis thiab vim Yes Lus Xas Les uas kuv tau xaiv."

NPN 106: 3-4, 35-36, 37+40

Txais: (4a) Huab Tais, thov koj nco txog peb vim koj hlub koj haiv neeg.

Cov neeg tsom txoj kev ncaj taug, lawv txoj hmoov zoo,
Yog cov neeg uas ua raws kev haum pheej mus li.
HUAB TAIS, thov koj nco txog peb, vim koj hlub koj haiv neeg.
Thov koj tuaj xyuas peb tuaj pab cawm peb.

Txais: (4a) Huab Tais, thov koj nco txog peb vim koj hlub koj haiv neeg.

Tab sis lawv nrog cov neeg teev dab sib fim,
lawv xyaum luag tej kev teev dab pe mlom .
Lawv tsob hwb lwm haiv neeg cov mlom,
luag cov mlom thiaj ua rooj ntxiab cuab lawv.

Txais: (4a) Huab Tais, thov koj nco txog peb vim koj hlub koj haiv neeg.

Lawv muab lawv cov tub tua txi dab,
muab lawv cov ntxhais txi rau dab phem.
HUAB TAIS lub siab thiaj npau taws rau nws haiv neeg
ces nws ntxub nws lub cuab tam.

Txais: (4a) Huab Tais, thov koj nco txog peb vim koj hlub koj haiv neeg.

As Les Lus Yas: YK 1: 21BC

Txais: As les lus yas, as les lus yas.

Nej yuav ua neeg me txais lo lus
uas twb muab cog rau hauv nej lawm,
nws thiaj yuav cawm tau nej tus ntsuj plig.

Txais: As les lus yas, as les lus yas.

Ntawv Moo Zoo: MK 7: 24-30

24 Yes Xus sawv kev ntawd mus rau lub xeev Tws Los . Nws mus hauv ib lub tsev, nws tsis xav kom muaj neeg paub li, tab sis nws tsiv nraim tsis tau. 25 Tsis ntev xwb, muaj ib tug poj niam uas nws tus ntxhais raug ib tug dab tsis huv, txawm hnov hais txog Yes Xus. Nws tuaj txog, nws txhos caug ntua ntawm Yes Xus ko taw. 26 Tus poj niam ntawd yog ib tug neeg Hes Las, yug los nyob Xis Lias Fes Nis Xias xeev ntuj, nws thov kom Yes Xus ntiab tus dab tawm hauv nws tus ntxhais mus. 27 Yes Xus hais rau nws tias : "Yuav tsum cia cov me nyuam noj kom tsau tso, vim tsis yog kev ncaj ncees kom muab cov me nyuam tej mov los pub rau me nyuam dev noj." 28 Tab sis tus poj niam teb rau Yes Xus tias : “Huab Tais, yog li tiag! Tab sis, cov me nyuam dev nyob hauv qab rooj, lawv twb noj tej tsig mov uas poob ntawm cov me nyuam los tiab.” 29 Ces Yes Xus hais rau tus poj niam tias : "Vim koj hais lo lus no, koj rov mus mog, tus dab phem twb tawm hauv koj tus ntxhais lawm." 30 Thaum tus poj niam rov mus txog tsev, nws pom tus me nyuam pw saum txaj, tus dab phem teb tawm mus lawm.

TIM 9 LUB 2 HLIS 2018

Hnub Rau Lis Piam Tsib Nruab Xyoo B Nruab Lis Piam Xyoo II

Zaj Nyeem Ib: 1 VAJ 11: 29-32; 12:19

29 Lub caij ntawd, Yes Los Npuag tawm hauv lub tsheej Yes Lus Xas Les mus, tus yaj saub As His Yas uas nyob Xis Laus ntsib nws ntawm kev. Tus Yaj Saub hnav ib lub tsho tshaj sab tshiab tshiab. Thaum ntawd muaj nkawd ob leeg nyob ntawm thaj chaw ntawd xwb. 30 As His Yas hle hlo nws lub tsho tshaj sab tshiab tshiab thiab nws muab dua rhe ua kaum ob daig. 31 Ces nws hais rau Yes Los Npuag tias : "Koj khaws kaum daim rau koj. Vim HUAB TAIS His Xas Lais tus tswv Ntuj hais li no : Kuv yuav thau lub teb chaws ntawm Xas Los Moos tes mus, kuv yuav muab kaum lub xeem His Xas Lais rau koj kav. 32 Kuv yuav tseg ib lub xeem rau Xas Los Moos xwb, vim kuv saib kuv tus tub txib Das Vis thiab lub tsheej Yes Lus Xas Les uas kuv tau xaiv hauv tas cov xeem His Xas Lais tib si."
12 19 Ces cov His Xas Lais sawv tiv Das Vis tsev neeg los txog niaj hnub no.

NPN 81: 10-11AB, 12-13, 14-15

Txais: (11a and 9a) Kuv yog Huab Tais koj tus Tswv Ntuj, koj cia li mloog kuv hais.

Koj yuav tsis txhob muaj lwm tswv ntuj nyob hauv koj,
koj yuav tsis txhob txhos caug pe pej kum neeg ib tug dab qhuas li.
Kuv, HUAB TAIS yog koj tus Tswv Ntuj,
tus tau coj koj tawm ntawm Hais Nkws Tos teb los.

Txais: (11a and 9a) Kuv yog Huab Tais koj tus Tswv Ntuj, koj cia li mloog kuv hais.

Kuv haiv neeg tsis hnov kuv lub suab li,
His Xas Lais tsis xav mloog kuv lus li.
Kuv thiaj tso lawv ua raws lawv lub siab cam thawj,
cia lawv mus raws li lawv lub siab ntshaw !

Txais: (11a and 9a) Kuv yog Huab Tais koj tus Tswv Ntuj, koj cia li mloog kuv hais.

Kheev lam kuv haiv neeg mloog kuv hais,
kheev lam His Xas Lais mus raws kuv txoj kev mas !
Tam sis ntawd kuv yuav txo lawv cov yeeb ncuab kom swb tas,
kuv yuav tig kuv txhais tes mus ntaus cov neeg ntxub lawv.

Txais: (11a and 9a) Kuv yog Huab Tais koj tus Tswv Ntuj, koj cia li mloog kuv hais.

As Les Lus Yas: HL 16: 14B

Txais: As les lus yas, as les lus yas.

Huab Tais, thov koj qhib peb lub siab
kom peb mloog koj Leej Tub cov lus.

Txais: As les lus yas, as les lus yas.

Ntawv Moo Zoo: MK 7: 31-37

31 Yes Xus tso lub xeev Tws Los tseg, nws taug txoj kev hla Xis Doos mus rau lub dej ntuj Nkas Lis Lais, mus rau hauv lub xeev Des Kas Pos Lis. 32 Lawv coj ib tug neeg lag ntseg, hais lus txhav qhi, tuaj rau Yes Xus, lawv thov kom Yes Xus tsa tes rau saum nws. 33 Yes Xus coj nws tawm ntawm tsoom sid mus rau ib cag kom txhob muaj neeg, Yes Xus muab nws tus ntiv tes ntxig rau tus lag ntseg ob lub qhov ntsej, nws nti aub ncaug los pleev tus neeg ntawd tus nplaig. 34 Yes Xus tsa muag ntsia saum ntuj, nws nroo ib suab, nws hais rau tus lag ntseg tias : "Es fas tas," txhais tias : "Koj qhib los." 35 Tus lag ntseg ob lub qhov ntsej qhib hlo, hos cov hlua khi nws tus nplaig kuj plam plaws tam sim ntawd, ces nws hais tau lus meej meej. 36 Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tshaj tawm tas zog. 37 Qhov ntawd ua rau lawv qhuas kawg nkaus, lawv hais tias : "Nws ua tau ib puas tsav yam zoo kawg: nws ua tau kom cov lag ntseg hnov lus, thiab kom cov nplaig txhav hais lus tau."

TIM 10 LUB 2 HLIS 2018

Hnub Xya Lis Piam Tsib Nruab Xyoo B Nruab Lis Piam Xyoo II

Hwm LN Scholastica, Nkauj Dawb Huv

Zaj Nyeem Ib: 1 VAJ 12: 26-32; 13:33-34

26 Yes Los Npuag xav nyob hauv nruab siab tias : "Ntshai lub teb chaws yuav rov mus zwm rau Das Vis tsev neeg xwb. 27 Yog cia tsoom pej xeem mus txi Ntuj pem HUAB TAIS lub Tuam Tsev Teev Ntuj nyob Yes Lus Xas Les, mas lawv lub siab yeej yuav tig rov mus zwm rau lawv tus tswv Les Hos Npuag, uas yog tus vaj Yus Das xwb, ces lawv yuav muab kuv tua." 28 Tus vaj thiaj mus nrog nws cov tub tuav xam tham tas, nws txawm los muab kub nchuav tau ob tug mlom nyuj, thiab nws hais rau tsoom pej xeem tias : "Nej nce mus pem Yes Lus Xas Les ntev txaus lawm. Tsoom His Xas Lais, nej ntsia ntawm no, yog nej tus Tswv Ntuj uas tau coj nej tawm ntawm Hais Nkws Tos teb los." 29 Ces nws tsa ib tug mlom nyuj nyob Npes Thes thiab ib tug nyob Daas. 30 Ces qhov ntawd yog ib qho kev txhaum vim tsoom pej xeem mus pe hawm tus mlom nyuj txog Daas huv tib si. 31 Yes Los Npuag tseem tsa tej lub tsev teev mlom nyob tej thaj chaw siab, thiab nws muab ib co neeg uas tsis yog cov Les Vis los tsa ualLeej choj. 32 Hnub tim kaum tsib lub yim hli, Yes Los Npuag tsa ib lub hnub nyoog kom lawv nqaum paj nqaum nruas nyob Npes Thes yoog xws li cov Yus Das ua thiab; Yes Los Npuag mus txi ntuj rau ob tug mlom nyuj nws tau nchuav, thiab nws tsa ib co leej choj nyob rau Npes Thes.
13 33 Dhau tej no lawm, Yes Los Npuag kuj tsis tso nws txoj kev phem tseg li. Nws tseem xaiv tej tus neeg pej xeem xwb los tsa ua Leej Choj nyob saum cov chaw siab. Tus twg xav ua leej choj nws cia li tsa ua leej choj nyob saum cov chaw siab. 34 Tej no ua kom Yes Los Npuag tsev neeg poob rau hauv kev txhaum. Vim li ntawd lawv thiaj raug muab txiav tawm, lawv thiaj ploj mus tsis nyob ntiaj teb no ntxiv lawm.

NPN 106: 6-7AB, 19-20, 21-22

Txais: (4a) Huab Tais, thov koj nco txog peb, vim koj hlub koj haiv neeg.

Peb tau ua txhaum ib yam li peb cov yawg koob,
peb ncaim ntawm koj txoj kev, peb tau ua qhov phem.
Nyob Hais Nkws Tos teb, peb phaj yawg
tsis saib koj cov hwj huam yees ntxwv muaj nqes li.

Txais: (4a) Huab Tais, thov koj nco txog peb, vim koj hlub koj haiv neeg.

Peb cov yawg koob puab ib tug nyuj nyob ntawm roob Hos Les;
lawv txhos caug pe tus mlom uas lawv nchuav.
Lawv muab lawv lub koob meej
pauv ib tug duab mlom uas yog ib tug nyuj noj zaub.

Txais: (4a) Huab Tais, thov koj nco txog peb, vim koj hlub koj haiv neeg.

Lawv tsis nco qab tus Tswv Ntuj uas tau cawm lawv lawm,
tus tau ua tej yam loj nyob Hais Nkws Tos teb ,
tus tau ua tej yam hwj huam txaus qhuas nyob Haas teb,
tus tau ua tej yam txaus ntshai nyob ntawm Dej Ntuj Liab

Txais: (4a) Huab Tais, thov koj nco txog peb, vim koj hlub koj haiv neeg.

As Les Lus Yas: MT 4: 4B

Txais: As les lus yas, as les lus yas.

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo ZOO: MK 8: 1-10

1 Lub sij hawm ntawd, rov qab muaj dua ib pab neeg coob coob, lawv tsis muaj dab tsi noj. Yes Xus hu cov thwj tim los, nws hais rau lawv tias : 2 "Kuv hlub cov neeg no, vim lawv nrog kuv nyob tau peb hnub lawm, lawv tsis muaj dab tsi noj li. 3 Yog kuv cia lawv yoo tshaib rov mus tsev, mas lawv yuav tsaus muag tom tog kev, vim lawv ib txhia tuaj deb tuaj." 4 Cov thwj tim teb rau Yes Xus tias : "Yuav muab mov qhov twg los txaus rau cov neeg ntawd noj kom tsau, vim ntawm no yog ib qho niag chaw twj cuab xwb?” 5 Ces Yes Xus nug lawv tias : "Nej muaj pes tsawg lub ncuav mov?" Lawv teb tias : "Xya lub." 6 Yes Xus kom tsoom sid zaum pem teb. Nws tuav xya lub ncuav mov, nws ua Ntuj tsaug, nws muab cov ncuav mov ntais, nws cev rau cov thwj tim kom nqa mus faib rau sawv daws. Ces cov thwj tim muab faib rau pab neeg ntawd noj. 7 Lawv muaj ob peb tug me nyuam ntses thiab. Yes Xus foom hmoov zoo rau cov ntses tas, nws kom lawv nqa mus rau sawv daws noj thiab. 8 Sawv daws tau noj tsau npo; lawv tseem khaws tej sab mov seem tau xya tawb thiab! 9 Cov neeg ntawd kwv yees muaj li plaub txhiab leej. Ces Yes Xus kom lawv rov mus tsev. 10 Yes Xus nrog nws cov thwj tim nce mus hauv nkoj tam sis ntawd, nws mus rau thaj tsam Das Mas Nus Thas.

TIM 12 LUB 2 HLIS 2018

Hnub Ob Lis Piam Rau Nruab Xyoo B Nruab Lis Piam Xyoo II

Zaj Nyeem Ib: YK 1: 1-11

1 Kuv, Yas Kos, yog Tswv Ntuj thiab Huab Tais Yes Xus Pleev ib tug tub txib, kuv sau ntawv tuaj rau kaum ob lub xeem sib ncaim mus nyob thoob ntiaj teb. Nej nyob kaj lug.
2 Kuv cov kwv tij, thaum nej raug txom nyem ntau yam, mas nej yuav saib tias yog ib txog kev zoo siab. 3 Vim nej paub tias yog Ntuj sim nej txoj kev ntseeg kom nej ua siab tawv qhawv ntseeg ruaj xwb. 4 Nej txoj kev ua siab tawv qhawv ntseeg ruaj yuav tsum tawv kom kawg, nej thiaj yog tus neeg zoo txhij zoo txhua, tsis muaj chaw xyeej, tsis tshuav dab tsi uas luag thuam tau. 5 Yog nej ib tug twg tsis thoob tsib, mas nws yuav thov kev thoob tsib ntawm Tswv Ntuj, uas pub dawb paug rau txhua leej txhua tus tsis cem tsis yws, ces Tswv Ntuj yuav pub rau nws. 6 Tiam sis tus thov Tswv Ntuj yuav tsum muaj lub siab ntseeg tiag, tsis txhob ua xyem xyav. Vim tus ua xyeem xyav, nws zoo li ib twv dej nphau nyob hauv hiav txwv uas cua muab nplawm thiab muab ntsawj rau ub rau no. 7 Tus ua xyem xyav, nws txhob xav tias nws yuav tau txais ib yam dab tsi ntawm Huab Tais, 8 vim nws yog ib tug neeg muaj ntau lub siab, nws ua yam twg ua tsis tsheej li.
9 Tus kwv tij uas yog neeg txheej qis, nws yuav tsum muaj ntsej muag tias Ntuj tsa nws siab. 10 Hos tus kwv tij nplua nuj yuav muaj ntsej muag tias Ntuj ua kom nws qis, vim nws yuav dua mus xws li ib lub paj nroj. 11 Thaum hnub tuaj, cov cua sov tuaj ziab tsob nroj qhuav tas, lub paj zeeg, nws qhov zoo nkauj kuj ploj ntais mus. Ib yam li ntawd tus nplua nuj kuj yuav nrog nws tej hauj lwm ploj mus tas.

NPN 119: 67, 68, 71, 72, 75, 76

Txais: (77a) Huab Tais, thov koj ua siab zoo rau ces kus yuav muaj txoj sia.

Thaum kuv tsis tau poob ntsej muag, kuv mus yuam kev ;
nyiam no, kuv mloog nraim koj tej lus qhuab lus qhia.

Txais: Huab Tais, thov koj ua siab zoo rau kuv ces kuv yuav muaj txoj sia.

Koj yog tus siab zoo, koj yog tus ua zoo,
thov koj qhia koj cov lij choj rau kuv.

Txais: Huab Tais, thov koj ua siab zoo rau kuv ces kuv yuav muaj txoj sia.

Yog ib qho zoo uas kuv tau poob ntsej muag,
vim qhov ntawd kuv thiaj tau kawm koj cov lij choj.

Txais: Huab Tais, thov koj ua siab zoo rau kuv ces kuv yuav muaj txoj sia.

Txoj cai uas tawm hauv koj lub ncauj los muaj nqe rau kuv
dua ntau txhiab daim kub thiab ntau txhiab daim nyiaj.

Txais: Huab Tais, thov koj ua siab zoo rau kuv ces kuv yuav muaj txoj sia.

HUAB TAIS, kuv paub tias koj txiav cai raws kev haum pheej,
Thiab koj cia kuv tau poob ntsej muag raws kev pheej xeeb.

Txais: Huab Tais, thov koj ua siab zoo rau kuv ces kuv yuav muaj txoj sia.

Thov muab koj lub siab zoo los nplij kuv
raws li koj tau cog lus rau koj tus tub txib.

Txais: Huab Tais, thov koj ua siab zoo rau kuv ces kuv yuav muaj txoj sia.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis los ntawm kuv mus.

Txais: As les lus yas, as les lus yas.

Ntawv Moo Zoo: MK 8: 11-13

11 Cov Fas Lis Xais tawm los, lawv pib nrog Yes Xus sib cav. Lawv xav kom Yes Xus ua ib lub cim tawm saum ntuj tuaj, ces lawv thiaj tau sim nws.
12 Yes Xus xyu ib suab nyob hauv nws lub tswv yim, nws hais tias : "Vim li cas tiam neeg no thiaj taij ib lub cim? Kuv hais tseeb rau nej, yuav tsis muaj ib lub cim rau tiam neeg no pom."
13 Ces Yes Xus tso lawv tseg, nws rov nce nkoj ces nws mus rau sab ntug dej tim ub lawm.

TIM 13 LUB 2 HLIS 2018

Hnub Peb Lis Piam Rau Nruab Xyoo B Nruab Lis Piam Xyoo II

Zaj Nyeem Ib: YK 1: 12-18

12 Tus twg ua siab tawv qhawv hla dhau txoj kev ntxias, mas nws txoj hmoov zoo, vim tus neeg raug kev sim siab tas, mas nws yuav txais lub teev kub muaj txoj sia uas Huab Tais tau cog lus yuav pub rau cov neeg nyiam nws.
13 Tus twg raug kev sim siab yuav tsis txhob hais tias : “Yog Tswv Ntuj tso kev ntxias tuaj raug kuv.” Vim tias, Tswv Ntuj tsis txawj raug kev ntxias mus ua phem, thiab nws tsis ntxias leej twg. 14 Yog nyias lub siab ntshaw rov rub thiab coj nyias mus raug txoj kev ntxias. 15 Kev ntshaw ua kom kev txhaum xeeb tuaj thiab yug tawm los. Thaum kev txhaum loj tiav log, mas nws daug tau txoj kev tuag.
16 Kuv cov kwv tij zoo nyiam, nej tsis txhob yuam kev : 17 Tas txhua yam zoo thiab tas tej paj tshab tsis muaj chaw xyeej uas tuaj saum ntuj tuaj puav leej yog Leej Txiv uas nws muaj qhov pom kev, tso nqes los tas huv tib si; nyob hauv nws, tsis muaj ib yam txawj hloov, los tsis muaj kev tsaus vim txawj hloov. 18 Leej Txiv tau pom zoo hais ib lo lus tseeb yug peb tawm los, kom peb ua thawj cov txiv txi hauv txhua yam uas nws tsim los.

NPN 94: 12-13A, 14-15, 18-19

Txais: (12a) HUAB TAIS, tus uas koj qhuab qhia nws tau txoj hmoov zoo.

HUAB TAIS, tus uas koj qhuab qhia nws tau txoj hmoov zoo,
tus uas koj cob qhia nws txog koj txoj cai tau txoj hmoov zoo.
Nws tau kev dim ntawm cov hnub nyoog phem.

Txais: (12a) HUAB TAIS, tus uas koj qhuab qhia nws tau txoj hmoov zoo.

Vim HUAB TAIS tsis nrauj nws haiv neeg,
nws tsis muab nws lub cuab tam laim pov tseg.
Txoj kev txiav txim yuav rov txiav raws kev ncaj,
tas tsoom neeg siab ncaj yuav taug raws kev ncaj.

Txais: (12a) HUAB TAIS, tus uas koj qhuab qhia nws tau txoj hmoov zoo.

Thaum kuv hais tias : "Kuv yuav ntog !"
HUAB TAIS, koj txoj kev khuv leej txheem kuv.
Thaum kev txhawj xeeb laum kuv tas,
koj tej lus nplij ua kom kuv tus plig zoo siab.

Txais: (12a) HUAB TAIS, tus uas koj qhuab qhia nws tau txoj hmoov zoo.

As Les Lus Yas: ZAM 14: 23

Txais: As les lus yas, as les lus yas.

Huab Tais hais tias, yog leej twg nyiam kuv,
nws yuav coj rawv kuv lo lus, ces kuv Txiv yuav nyiam nws.
Kuv Txiv wb yuav tuaj nyob hauv nws.

Ntawv Moo Zoo: MK 8: 14-21

14 Cov thwj tim tsis nco qab ntim mov, lawv tsuas muaj ib lub mov nyob hauv nkoj xwb. 15 Thaum ntawd, Yes Xus qhia lawv zoo li no : "Nej xyuam xim mog, nej ceev faj txog cov poov xab Fas Lis Xais thiab cov poov xab Hes Los." 16 Ces cov thwj tim txawm sib tham tias ntshai yog vim lawv tsis ntim mov. 17 Yes Xus paub qhov lawv xav, ces Yes Xus hais rau lawv tias : "Ua cas nej sib tham tias yog vim nej tsis ntim mov ? Nej tseem tsis tau to taub thiab nej mem tsis tau li lod ? Nej lub siab tawv dhau lawm lod ? 18 Nej puas lam muaj qhov muag xwb, tsis pom kev, lam muaj pob ntseg xwb, tsis hnov lus li? 19 Nej tsis nco qab lawm lod, thaum kuv ntais tsib lub ncuav mov rau tsib txhiab leej noj, nej khaws tau pes tsawg tawb mov seem?" Lawv teb tias : "Kaum ob tawb." 20 Thiab zaum uas kuv ntais xya lub ncuav mov rau plaub txhiab leej noj, nej khaws tau pes tsawg tawb mov seem?" Lawv teb tias : "Xya tawb." 21 Ces Yes Xus hais rau lawv tias : "Nej tseem tsis tau to taub thiab lod ?"

TIM 14 LUB 2 HLIS 2018

Hnub Plaub Txais Tshauv - Pib Caij Plaub Caug Xyoo B

Zaj Nyeem Ib: YOS ES 2: 12-18

12 HUAB TAIS hais li no : "Lub sij hawm no, nej kav tsij muab tas nrho nej lub siab rov qab los cuag kuv; nej yoo mov, nej quaj, nej nyiav. 13 Nej dua nej lub siab kom ntuag, nej tsis txhob dua nej tej tsoos tsho; nej rov qab los cuag HUAB TAIS nej tus Tswv Ntuj, vim nws siab zoo thiab khuv leej neeg tas nrho, nws npau taws qeeb, nws lub siab puv nkaus kev ua zoo, nws tos tsis hnyoo yuav thim nws txoj kev rau txim. 14 Tej zaum nws twb thim xav tsis rau txim los kuj muaj, ces nws yuav foom hmoov zoo tseg, thiab yuav muaj qoob loo thiab muaj cawv los txi rau HUAB TAIS nej tus Tswv Ntuj.
15 Nej tshuab puab nyob saum Xis Yoos ! Nej tshaj tawm ib txog kev yoo ntshiab, nej teem ib lub caij tuaj sib txoos ua ke. 16 Nej hu tas tsoom pej xeem tuaj, nej sib sau ua ib lub txoos ntshiab; nej hu cov laus tuaj, nej sau coj cov me nyuam yaus thiab cov tseem noj mis tib si tuaj. Tus vauv yuav tso nws lub chaw pw tseg, tus nyab yuav tso nws lub paim tseg. 17 Cov Leej Choj, uas yog HUAB TAIS cov tub txib, yuav tuaj quaj nyob hauv lub tshav ntawm kis nruab nrab lub qhov rooj thiab lub thaj txi Ntuj, lawv yuav quaj hais tias : ‘HUAB TAIS, thov koj txuag koj haiv neeg ! Koj txhob tso koj lub cuab tam rau hauv txoj kev raug luag saib tsis taus, txhob cia cov kuj cuab hnyos lawv. Vim li cas koj thiaj yuav cia kom cov haiv neeg tau kev thuam tias : ‘Lawv tus Tswv Ntuj dua qhov twg lawd ?’” 18 Ces HUAB TAIS lub siab khib txog nws lub teb chaws, nws thiaj zam rau nws haiv neeg.

NPN 51: 3-4, 5-6AB, 12-13, 14+17

Txais: (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab muab kuv qhov txhaum tshem mus kom kuv dawb huv tuaj.

Txais: (3a) HUAB TAIS, thov koj khuv leej peb vim peb tau ua txhaum lawm.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais: (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (3a) HUAB TAIS, thov koj khuv leej peb vim peb tau ua txhaum lawm.

Thov koj pub kom kuv rov muaj kev zoo siab nyob hauv koj txoj kev cawm
thiab ua kom kuv muaj ib lub tswv yim xav mloog koj.
HUAB TAIS, thov qhib kuv di ncauj,
ces kuv lub ncauj yuav tshaj koj lub koob meej.

Txais: (3a) HUAB TAIS, thov koj khuv leej peb vim peb tau ua txhaum lawm.

Zaj Nyeem Ob: 2 KOS LIS NTHOS 5: 20—6: 2

Paj Lug sau ntawv rau cov Ntseeg nyob Kos Lis Nthos tias:
20 Peb yog Leej Pleev cov tiam lis, ces zoo li yog Tswv Ntuj siv peb los qhuab qhia neeg. Peb thiaj li thov nej tias vim Leej Pleev, mas kom nej cia li nrog Tswv Ntuj rov sib raug zoo. 21 Vim tus uas tsis paub kev ua txhaum, nws muab nws txia ua kev txhaum vim peb, kom nyob hauv nws, peb plhis tau ua Tswv Ntuj txoj kev ncaj.
6 1 Peb nrog Leej Pleev ua hauj lwm ua ke, mas peb thov qhuab ntuas nej kom nej txhob txais Ntuj lub txiaj ntsim dag xwb. 2 Vim nws hais tias: “Thaum lub sij hawm zoo, kuv tau teb rau koj raws li koj thov. Thaum txog hnub cawm neeg, kuv tau pab koj.” Lub sij hawm zoo, yog nyem no ntag; hnub cawm neeg, yog nyem no kiag.

Zaj Cav lub Moo Zoo: NPN 95: 8

(Lub Caij 40 peb tsis hais As les lus yas lawm ces thiaj muab hloov hu li no lawm)

Txais: Huab Tais Yes Xus Pleev, Tswv Ntuj Lo Lus, peb cav txog koj.

Hnub no yog nej hnov nws lub suab,
nej tsis txhob ua nej lub siab tawv ncauj.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: MT 6: 1-6, 16-18

Yes Xus hais rau nws cov thwj tim tias:
1 “Nej ceev faj, nej txhob ua ncaj nyob ntawm neeg xub ntiag xwb, kom luag pom nej. Yog nej ua li ntawd, mas nej yuav tsis txais koob haum dab tsi ntawm nej Txiv nyob saum ntuj. 2 Thaum koj pub rau luag, koj txhob tshuab hom ua koj ntej, xws li cov neeg zoo sab nraud ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm. 3 Hos koj, mas thaum koj pub rau luag, koj txhob cia koj sab tes laug paub qhov koj sab tes xis ua. 4 Li ntawd, tsis muaj neeg paub tias koj tau pub rau luag. Ces koj Txiv uas nws pom hauv qhov chaw nraim yuav pauj rau koj.
5 Thaum nej teev Ntuj, nej txhob ua li cov neeg zoo sab nraud : lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm. 6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj rau ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag ntshaus xws li cov neeg zoo sab nraud : lawv ua ntsej muag mluas mluas, kom luag paub tias lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm. 17 Hos koj, mas thaum koj yoo mov, koj yuav pleev tshuaj tsw qab saum taub hau, koj ntxuav muag rau, 18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv pom hauv qhov chaw nraim yuav pauj rau koj.”

TIM 15 LUB 2 HLIS 2018

Hnub Tsib tom qab Hnub Plaub Txais Tshauv Xyoo B Nruab Lis Piam Xyoo II

Zaj Nyeem Ib: Txoj Cai Ob 30: 15-20

Mais Xes hais rau tsoom pej xeem tias:
15 Hnub no kuv muab kev muaj txoj sia thiab kev vam meej, kev tuag thiab kev puas tsuaj tso rau ntawm nej xub ntiag. 16 Yog nej mloog HUAB TAIS, nej tus Tswv Ntuj cov lus qhia uas hnub no kuv muab rau nej no, yog nej nyiam nws, taug nws txoj kev, ua raws nws tej lus qhia, nws txoj cai thiab tej yam nws tau txiav, mas nej yuav muaj txoj sia thiab nej yuav huam vam tuaj; HUAB TAIS nej tus Tswv Ntuj yuav foom hmoov zoo rau nej nyob hauv lub teb chaws uas nej tab tom yuav nkag mus nyob ua nej lub teb chaws. 17 Tab sis yog nej ntxeev siab, nej tsis mloog lus thiab nej cia luag ntxias tau nej mus nrog luag pe thiab tsob hwb lwm cov dab, 18 mas hnub no kuv hais rau nej : nej yuav tuag xwb, nej yuav tsis tau nyob ntev xyoo hauv lub teb chaws uas nej yuav hla tus dej Yos Las Das mus txeeb los ua nej tug. 19 Hnub no, kuv hu lub ntuj lub teb nrog kuv ua tim khawv txog nej tias : kuv tau muab txoj sia thiab txoj kev tuag, lo lus zoo thiab lo lus phem tso rau nej xaiv. Nej xaiv txoj sia mog! Nej thiab nej cov xeeb leej xeeb ntxwv thiaj yuav muaj txoj sia, 20 vim nej nyiam HUAB TAIS, nej tus Tswv Ntuj, nej mloog nws lub suab, thiab npuab nws ruaj nreb; qhov ntawd yog qhov yuav ua kom nej muaj txoj sia thiab yuav ua kom nej tau ua neej ntev dhawv hauv lub teb chaws uas HUAB TAIS tau cog lus rau nej cov yawg koob Has Nplas Has, His Xas Has thiab Yas Kos tias yuav muab pub rau lawv.

NPN 1: 1-2, 3, 4 + 6

Txais: (40:5a) Muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd .

Txais: (40:5a) Muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (40:5a) Muaj hmoov zoo yog cov uas tso siab rau Huab Tais.

Zaj Cav lub Moo Zoo: MT 4: 17

Huab Tais hais tias, nej yuav lees txhaum,
vim Ntuj lub Ceeb Tsheej tuaj txog ze lawm.

Ntawv Moo Zoo: LK 9: 22-25

22 Yes Xus hais rau nws cov thwj tim tias : “Neeg Leej Tub yuav tsum raug txom nyem loj thiab raug cov txwj laus, cov Thawj Leej Choj, thiab cov Kws Ntawv Ntshiab muab nws tshem tawm. Nws yuav raug luag tua, tab sis hnub peb nws yuav sawv rov los.” 23 Ces nws hais rau sawv daws tias : “Leej twg xav los raws kuv, nws yuav tsis txhob nco txog nws, nws yuav niaj hnub kwv nws tus ntoo cuam, thiab lawv kuv qab. 24 Vim tias tus xav cawm nws txoj sia, mas nws yuav ua nws txoj sia ploj. Hos tus twg ua nws txoj sia ploj vim kuv, mas tus ntawd yuav cawm nws txoj sia. 25 Yog ib tug neeg txeeb tau lub ntiaj teb tas huv si los ua nws tug, tab sis nws ua nws ploj, los ua nws tus kheej puas tsuaj tas, mas nws tau dab tsi zoo ?”

TIM 16 LUB 2 HLIS 2018

Hnub Rau tom qab Hnub Plaub Txais Tshauv Xyoo B Nruab Lis Piam Xyoo II

Zaj Nyeem Ib: HIS XAIS 58: 1-9A

HUAB TAIS Tswv Ntuj hais li no:
1 “Koj kav tsij qw tiag txhob tso tseg, tsa koj lub suab kom nrov li lub hom, koj tshaj rau kuv haiv neeg tias lawv ua phem, thiab rau Yas Kos tsev neeg tias lawv ua txhaum. 2 Lawv nrhiav kuv ib hnub dhau hnub, lawv xav paub kuv tej kev xws li ib lub kuj cuab uas xav coj kev ncaj thiab tsis tso nws tus Tswv Ntuj txoj cai pov tseg. Nyem no lawv thov kom kuv txiav txim ncaj rau lawv, lawv zoo siab kawg tias lawv tau nyob ze Tswv Ntuj.
3 (Lawv hais tias:) ‘Vim li cas peb thiaj yuav yoo mov, yog koj twb tsis pom? los ua kev them txim txhaum yog koj twb tsis quav ntsej txog ?’ Yog vim li no : hnub nej yoo mov, nej tseem ua hauj lwm rau nej tus kheej xwb, thiab nej tseem yuam nej cov tub zog. 4 Thaum nej yoo mov nej tsuas nrhiav kev sib cav sib ceg, nej ua siab phem siv zog xuas nrig sib ntaus xwb. Nej yuav tseg tsis txhob yoo mov xws li niaj hnub no nej yoo ces thiaj yuav muaj tus mloog nej lub suab nyob saum txheej siab. 5 Txoj kev yoo zoo li ntawd puas yog txoj uas kuv nyiam, hu puas tau tias yog ib hnub them txim txhaum zoo? Ua taub hau qaij de xws li ib tug tauj deg, tso cev pw saum ntaub tsaj thiab plua tshauv, puas yog qhov koj hu ua kev yoo, puas yog ib hnub uas HUAB TAIS nyiam ? 6 Txoj kev yoo raws li kuv nyiam yog zoo li no: Tshem cov saw khi tsis ncaj ncees, daws cov hlua quab yuam neeg, tso cov neeg raug hiam kom tau kev twj lij, muab txhua yam quab lov pov tseg, 7 muab koj mov los faib rau tus neeg tshaib noj, caw cov raug luag ntiab tawm thiab cov txom nyem tsis muaj chaw nyob los so hauv koj tsev, muab ris tsho rau cov neeg liab qab koj pom tau hnav, thiab tsis txhob tig nrob qaum rau tus txheeb ze koj. 8 Yog koj ua li no , mas koj qhov pom kev yuav ci tawm tuaj xws li thaum lub hnub tawm tuaj, koj lub qhov txhab yuav zoo sai, koj txoj kev ncaj ncees yuav mus ua koj ntej, HUAB TAIS lub hwj chim yuav lawv koj qab. 9 Yog koj hu mas HUAB TAIS yuav teb, yog koj qw kom pab, nws yuav hais tias : ‘Kuv nyob ntawm no.’”

NPN 51: 3-4, 5-6AB, 18-19

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj khuv leej kuv, vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab koj muab kub qhov txhaum tshem mus kom kuv dawb huv tuaj.

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Vim koj tsis zoo siab txais cov kev hlawv tsiaj txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj, yog muaj ib lub tswv yim xav lees txhaum;
muaj ib lub siab xav lees txhaum thiab ua neeg me, Tswv ntuj, koj yuav tsis thuam.

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Zaj Cav lub Moo Zoo: AS MOS 5: 14

Nej nrhiav qhov zoo txhob nrhiav qhov phem
ces nej yuav muaj txoj sia nyob,
thiab Huab Tais yuav nrog nraim nej.

Ntawv Moo Zoo: MT 9: 14-15

14 Zam cov thwj tim tuaj cuag Yes Xus, lawv hais tias : "Peb yoo mov, cov Fas Lis Xais kuj yoo. Vim li cas koj cov thwj tim tsis yoo ?"
15 Yes Xus teb lawv tias : “Cov qhua tuaj noj tshoob puas yuav tsum ntoo xyom thaum nraug vauv tseem nrog lawv nyob? Muaj ib hnub thaum luag coj nraug vauv lawm, mas lawv mam li yuav yoo mov.”

TIM 17 LUB 2 HLIS 2018

Hnub Xya tom qab Hnub Plaub Txais Tshauv Xyoo B Nruab Lis Piam Xyoo II

Hwm Xya tus Leej Ntshiaj uas Tau Tsim Tsa lub Koom Haum cov Servites

Zaj Nyeem Ib: HIS XAIS 58: 9B-14

HUAB TAIS hais li no:
9b Yog koj tshem txoj kev quab yuam neeg ntawm koj mus, yog koj tsis taw tes nki rau luag, yog koj tsis hais cov lus phem, 10 yog koj faib mov rau tus neeg tshaib noj, yog koj pab tus neeg txom nyem, mas koj qhov pom kev yuav sawv tuaj nyob hauv qhov tsaus ntuj, koj qhov tsaus ntuj yuav pom kev nrig li thaum tav su. 11 HUAB TAIS yuav coj koj kev mus li, nws yuav pub rau koj haus kom zoo nqhis nyob hauv tej chaw qhuav qhawv. Nws yuav ua kom koj cov pob txha rov muaj zog, koj yuav zoo li ib lub vaj muaj dej ywg, koj yuav zoo li lub hauv dej txhawv uas dej ntws tsis txawj nqhuab. 12 Luag yuav rov tsa koj cov qub vaj tse uas vau ntev los lawd, koj yuav tsa cov taw ntsa rau ntau txheej ntau tiam kom siab, luag yuav hu koj ua “tus kho phab ntsa tawg,” “tus rov txhim tej kev puas,” kom tau kev mus nyob. 13 Yog hnub xas npas tos, koj thim koj txhais ko taw, koj tsis mus ua raws koj siab nyiam nyob hauv kuv hnub ntshiab, yog koj hu hnub xas npas tos ua "Hnub zoo tshaj plaws", yog “HUAB TAIS hnub ntshiab tsim nyog hwm,” yog koj hwm Huab Tais, koj tsis mus raws koj tej kev, koj tsis ua raws koj siab nyiam, koj tsis hais koj tej lus, 14 ces koj yuav muaj kev zoo siab puv npo nyob hauv HUAB TAIS, kuv yuav tsa koj nyob siab saum tej chaw siab nyob hauv lub teb chaws, kuv yuav muab koj txiv Yas Kos lub cuab tam los yug koj. Vim HUAB TAIS lub ncauj tau hais li ntawd.

NPN 86: 1-2, 3-4, 5-6

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug kev raws koj txoj kev tseeb.

Thov koj khoov cuab pob ntseg mloog kuv, HUAB TAIS, thov teb kuv,
vim kuv txom nyem thiab kuv pluag.
Thov koj txuag kuv txoj sia, vim kuv npuab koj;
thov koj cawm koj tus tub txib uas tso siab rau koj,
Koj yog kuv tus Tswv Ntuj.

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug kev raws koj txoj kev tseeb.

Thov koj khuv leej kuv, Huab Tais,
vim kuv hu koj tas hnub.
Thov koj pub kev zoo siab rau koj tus tub txib tus ntsuj plig,
vim kuv tsa kuv tus ntsuj plig yuj plaws tuaj rau koj, Huab Tais.

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug taug kev raws koj txoj kev tseeb.

Huab Tais, koj muaj lub siab zoo thiab txawj zam txhaum,
koj txoj kev ua siab zoo loj tas nrho rau cov uas hu txog koj.
HUAB TAIS, thov koj mloog kuv zaj thov ntuj
thiab cuab pob ntseg rau kuv lub suab thov.

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug taug kev raws koj txoj kev tseeb.


Zaj Cav Lub Moo Zoo: ES XES KIAS 33: 11

Huab Tais hais tias, kuv tsis zoo siab pom tus neeg phem raug txoj kev tuag,
kuv xav pom kom nws tig los ua neeg zoo, ces nws thiaj yuav ciaj.

Ntawv Moo Zoo: LK 5: 27-32

27 Dhau qhov ntawd lawm, Yes Xus tawm mus. Nws pom ib tug sau se hu ua Les Vis zaum ntawm lub rooj sau se. Yes Xus hais rau nws tias : "Koj raws kuv mus." 28 Ces Les Vis sawv, nws tso tas ib puas tsav yam tseg, nws raws Yes Xus mus. 29 Les Vis ua ib rooj qav loj txais Yes Xus hauv nws tsev. Muaj ib pab neeg sau se coob thiab tseem muaj lwm cov neeg nrog lawv zaum ntawm rooj mov. 30 Cov Fas Lis Xais thiab lawv cov Kws Ntawv Ntshiab yws yws rau Yes Xus cov thwj tim hais tias : "Vim li cas nej nrog cov neeg sau se thiab cov neeg txhaum noj haus ua ke ?" 31 Yes Xus teb rau lawv tias : "Tsis yog cov neeg noj qab nyob zoo thiaj yuav vam txog kws kho mob, yog cov muaj txiab muaj nkeeg. 32 Kuv tsis tuaj hu cov neeg ncaj, kuv tuaj hu cov neeg txhaum kom tig los yuav lub siab tshiab."

TIM 19 LUB 2 HLIS 2018

Hnub Ob Lis Piam Ib Caij 40 Xyoo B Nruab Lis Piam Xyoo II

Zaj Nyeem Ib: LES VIS 19: 1-2, 11-18

1 HUAB TAIS hais rau Mais Xes tias : 2 "Koj yuav hais rau tas tsoom tub ki His Xas Lais tuaj sib sau ua ke tias : Koj yuav ua neeg ntshiab, vim kuv, koj tus HUAB TAIS Tswv Ntuj, kuv Ntshiab.
11 Koj yuav tsis txhob ua tub sab, tsis txhob hais lus dag, los hais tej yam cuav tsis muaj tseeb rau lwm tus.
12 Koj yuav tsis txhob lam tuav txog kuv lub npe los cog lus cuav, vim koj ua li ntawd yog ua saib tsis taus koj tus Tswv Ntuj lub npe. Kuv yog HUAB TAIS.
13 Koj yuav tsis txhob nrhiav kev noj luag los nyiag luag tug, tsis txhob khaws koj tus tub ntiav zog hnub no nws tus nqe zog cia rau ntawm koj kom txog tag kis.
14 Koj yuav tsis txhob tsawm foom lus phem rau tus neeg ruam tsis txawj hais lus, thiab tsis txhob muab ib yam coj mus thaiv tus dig muag kev, tiam sis koj yuav ntshai koj tus Tswv Ntuj. Kuv yog HUAB TAIS.
15 Koj yuav tsis txhob ua tsis ncaj thaum koj txiav txim rau luag, txhob saib neeg txiav txim, txhob tuaj tus neeg pluag tog los txhob tsa tus ua nom ntsej muag, tiam sis koj yuav txiav txim rau txhua tus raws kev ncaj xwb.
16 Koj yuav tsis txhob xyav koj cov neeg lub npe rau ub rau no, tsis txhob ua kom tus nyob ze ntawm koj raug luag txov nws roj ntsha. Kuv yog HUAB TAIS.
17 Koj yuav tsis txhob ntxub koj tus kwv tij nyob hauv koj nruab siab. Koj yuav cem yuav qhuab qhia tus nyob ze ntawm koj, koj thiaj yuav tsis tau ris nws qhov txhaum.
18 Koj yuav tsis txhob nrhiav kev ua pauj thiab yuav tsis txhob chim ntev ntev rau cov me nyuam nyob hauv koj haiv neeg. Koj yuav nyiam tus nyob ze koj ib yam li koj nyiam koj. Kuv yog HUAB TAIS.

NPN 19: 8, 9, 10, 15

Txais: (Zam 6:63b) Huab Tais, koj cov lus yog tswv yim thiab yog txoj sia.

HUAB TAIS txoj cai zoo tas nrho,
nws ntxiv siav rau ntsuj plig;
HUAB TAIS tus txhooj tsim nyog ntseeg,
nws ua kom tus neeg ruam thoob tsib tuaj.

Txais: Huab Tais, koj cov lus yog tswv yim thiab yog txoj sia.

HUAB TAIS cov lus qhuab qhia yog lus ncaj
ua kom neeg lub siab kaj.
HUAB TAIS lo lus qhia ntshiab si,
ua kom neeg qhov muag pom kev.

Txais: Huab Tais, koj cov lus yog tswv yim thiab yog txoj sia.

Txoj kev hwm HUAB TAIS dawb huv,
txoj kev ntawd yuav nyob mus li;
HUAB TAIS cov lus txiav txim yog lus tseeb,
tas nrho yog lus txiav txim ncaj.

Txais: Huab Tais, koj cov lus yog tswv yim thiab yog txoj sia.

Thov kom cov lus ntawm kuv lub ncauj
thiab txoj kev xav hauv kuv nruab siab zoo ntxim koj siab ,
HUAB TAIS, kuv lub tsua thiab kuv tus cawm seej.

Txais: Huab Tais, koj cov lus yog tswv yim thiab yog txoj sia.

Zaj Cav lub Moo Zoo: 2 KOS LIS NTHOS 6: 2B

Ntsia saib, lub sij hawm zoo, yog nyem no.
Hnub muaj kev cawm neeg, yog nyem no.

Ntawv Moo Zoo: MT 25: 31-46

Yes Xus hais rau nws cov thwj tim tias:
31 “Thaum Neeg Leej Tub yuav rov los muaj hwj chim ntxiag, thiab tas tsoom Tshiab yuav nrog nws los, mas nws yuav zaum saum nws lub theej kiab muaj hwj chim. 32 Tas ib tsoom haiv neeg yuav sib sau nyob ntawm nws xub ntiag. Ces nws yuav cais tsoom neeg xws li tus zov yaj cais cov yaj ntawm cov tshis. 33 Nws yuav muab cov yaj tso rau ntawm nws sab xis, muab cov tshis tso rau ntawm nws sab laug. 34 Ces tus Vaj yuav hais rau cov nyob sab xis tias : “Nej cov uas kuv Txiv pub txoj hmoov zoo rau nej, nej los. Nej txais lub Ceeb Tsheej uas yeej npaj tseg rau nej txij puag thaum pib tsim lub sim ceeb los lawm ua nej tug. 35 Vim tias kuv tshaib plab, nej pub rau kuv noj ; kuv nqhis dej, nej pub rau kuv haus, kuv yog ib tug pej kum neeg, nej txais kuv ; 36 kuv liab qab, nej muab rau kuv hnav ; kuv mob, nej tuaj xyuas kuv ; kuv nyob hauv tsev loj faj, nej tuaj tsham kuv.” 37 Ces cov neeg ncaj yuav teb tias : “Huab Tais, thaum twg peb tau pom koj tshaib plab ces peb tau pub rau koj noj, pom koj nqhis dej, ces peb tau muab rau koj haus? 38 Thaum twg peb tau pom koj yog ib tug pej kum neeg, ces peb tau txais koj, pom koj liab qab ces tau muab rau koj hnav ? 39 Thaum twg peb tau pom koj mob los nyob hauv tsev loj faj, ces peb tau tuaj xyuas koj ?” 40 Tus Vaj yuav teb rau lawv tias : “Kuv hais tseeb rau nej. Nej tau ua npaum li cas rau cov me tshaj hauv kuv tsoom kwv, mas yog nej tau ua rau kuv.” 41 Ces tus vaj yuav hais rau cov nyob sab laug tias : “Nej khiav mus deb ntawm kuv, nej cov tau txoj hmoov phem, mus nyob hauv cov hluav taws kub tsis txawj tuag, uas yog npaj rau tus dab phem thiab nws cov dab nyob. 42 Vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus, 43 kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab kuv nyob hauv tsev loj faj nej tsis tuaj xyuas kuv.” 44 Ces cov ntawd kuj yuav teb rau tus Vaj tias : “Huab Tais, thaum twg peb tau pom koj tshaib plab los nqhis dej, pom koj yog ib tug pej kum neeg, pom koj liab qab, pom koj mob los nyob hauv tsev loj faj, ces peb tsis tau pab koj ?” 45 Ces tus Vaj yuav teb rau lawv tias : “Kuv hais tseeb rau nej, nej tsis tau ua rau cov me tshaj hauv kuv tsoom kwv npaum li cas, mas yog nej tsis tau ua rau kuv.” 46 Ces cov no yuav mus raug txim ib txhiab ib txhis, hos cov siab ncaj yuav mus txais txoj sia nyob mus li.

TIM 20 LUB 2 HLIS 2018

Hnub Peb Lis Piam Ib Caij 40 Xyoo B Nruab Lis Piam Xyoo II

Zaj Nyeem Ib: HIS XAIS 55: 10-11

Huab Tais hais li no:
10 Xws li cov nag thiab cov daus uas poob saum ntuj los, lawv tsis rov mus saum ntuj ua ntej lawv yuav tsum xub ywg lub ntiaj teb tas tso, kom av zoo thiab muaj chiv, thiaj yuav txi tau noob qoob noob loo rau tus tswv teb thiab pub tau mov rau neeg noj, 11 lo lus tawm ntawm kuv lub ncauj los kuj zoo ib yam li ntawd, nws yuav tsis rov los cuag kuv qhua nquas, nws yuav tsum tau ua qhov kuv xav kom ua, thiab ua kom tiav txoj hauj lwm kuv xa nws mus ua tso."

NPN 34: 4-5, 6-7, 16-17, 18-19

Txais: (18b) Tswv Ntuj cawm tus neeg ncaj ntawm txhua yam kev nyuaj.

Nej nrog kuv cav txog HUAB TAIS lub koob meej,
peb sawv daws ua ke qhuas nws lub npe.
Kuv nrhiav HUAB TAIS, nws tau teb kuv,
thiab tau cawm kuv ntawm kuv tej kev ntshai.

Txais: (18b) Tswv Ntuj cawm tus neeg ncaj ntawm txhua yam kev nyuaj.

Nej vam txog nws ces nej yuav zoo siab luag ntxhi,
nej ntsej muag yuav tsis liab vim nej tau txaj muag.
Thaum tug neeg pluag hu, HUAB TAIS hnov,
thiab yuav cawm nws ntawm tas nws tej kev nyuaj.

Txais: (18b) Tswv Ntuj cawm tus neeg ncaj ntawm txhua yam kev nyuaj.

HUAB TAIS muaj qhov muag pom cov neeg ncaj,
muaj pob ntseg hnov lawv lub suab quaj.
HUAB TAIS tawm tsam cov neeg ua phem,
rhuav lawv kom lub ntiaj teb txhob nco txog lawv ntxiv.

Txais: (18b) Tswv Ntuj cawm tus neeg ncaj ntawm txhua yam kev nyuaj.

Thaum cov neeg ncaj hu, HUAB TAIS hnov lawv,
Nws cawm lawv ntawm tas lawv tej kev nyuaj.
HUAB TAIS nyob ze ze cov neeg siab lwj siab ntuag,
thiab nws cawm cov uas tas kev cia siab.

Txais: (18b) Tswv Ntuj cawm tus neeg ncaj ntawm txhua yam kev nyuaj.

Zaj Cav lub Moo Zoo: MT 4: 4B

Neeg tsis kawg muab mov los yug sia xwb,
neeg tseem yuav muab txhua lo lus tawm
ntawm Tswv ntuj lub ncauj los yug sia thiab.

Ntawv Moo Zoo: MT 6: 7-15

Yes Xus hais rau nws cov thwj tim tias:
7 Thaum nej teev Ntuj, nej txhob ntuas mus ntuas los zoo li cov neeg teev dab : lawv xav tias yog lawv hais lus ntau, mas dab yuav mloog lawv zoo dua. 8 Nej txhob ua zoo li lawv. Vim nej Txiv paub tias qhov twg yog qhov nej yuav tsum muaj, tab yog nej tseem tsis tau thov, nws twb xub paub lawm. 9 Nej yuav teev Ntuj zoo li no :
"Peb Txiv nyob saum ntuj, koj lub Npe ntshiab nto moo lug.
10 Koj lub Ceeb Tsheej los txog.
Kom muaj raws li koj nyiam nyob ntiaj teb no li nyob saum ntuj.
11 Thov koj pub mov txaus peb noj hnub no.
12 Koj zam txhaum rau peb zoo li peb zam rau luag.
13 Koj txhob tso peb raug kev ntxias. Thov koj npo peb dim ntawm kev phem."
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab. 15 Hos yog nej tsis zam txhaum rau luag, mas nej Txiv kuj yuav tsis zam rau nej.

TIM 21 LUB 2 HLIS 2018

Hnub Plaub Lis Piam Ib Caij 40 Xyoo B Nruab Lis Piam Xyoo II

Hwm LN Peter Damian

Zaj Nyeem Ib: YOS NAS 3: 1-10

1 HUAB TAIS lo lus nrov tuaj rau Yos Nas zaum ob tias : 2 "Koj sawv kev, koj yuav mus kom txog lub tuam tsheej Nis Nis Vas, koj yuav tshaj rau lawv raws li kuv qhia rau koj hais." 3 Yos Nas thiaj npaj, ces nws sawv kev mus lawm Nis Nis Vas raws li HUAB TAIS lo lus. Lub tsheej Nis Nis Vas yog ib lub tsheej loj kawg nkaus, yuav mus peb hnub ke thiaj hla dhau lub tsheej. 4 Yos Nas pib hla hauv lub nroog, nws nyuam qhuav mus kev ib hnub xwb, nws tshaj tawm rau sawv daws tias : "Tshuav plaub caug hnub ntxiv, ces lub tsheej Nis Nis Vas yuav raug rhuav tas." 5 Cov neeg nyob Nis Nis Vas cia li ntseeg Tswv Ntuj; ces lawv ceeb toom kom sawv daws yoo mov thiab lawv kuj hnav ntaub tsaj, tsis hais tus hlob los tus yau.
6 Lub moo no kuj nrov tuaj txog tus vaj nyob Nis Nis Vas; nws sawv tsees ntawm nws lub theej kiab mus hle nws lub tsho loj tseg, nws muab zoj ib lub hnab tsaj los npua, nws mus zaum hauv cov tshauv. 7 Ces nws kom lawv mus qw thoob plaws lub nroog Nis Nis Vas raws li tus vaj thiab nws cov tub nom tub tswv lo lus ceeb toom tias : "Tej neeg thiab tsiaj txhu, cov tsiaj loj thiab tsiaj me, sawv daws yuav tsis txhob noj dab tsi li, tsis noj mov noj zaub tsis haus dej li. 8 Txawm tus neeg txawm tus tsiaj los yuav tsum npua hnab tsaj huv si thiab yuav hu txog Tswv Ntuj tas zog; txhua tus neeg nyias yuav tso nyias txoj kev ua phem tseg, yuav cheem nyias ob txhais tes kom txhob ua txhaum ntxiv. 9 Tsis muaj neeg paub, tiam sis tej zaum Tswv Ntuj siab yuav nqig, nws yuav thim xav, yuav thim nws txoj kev npau taws kub lug, ces peb sawv daws yuav tsis tuag ."
10 Tswv Ntuj pom lawv cov hauj lwm, thiab pom tias lawv tso lawv txoj kev ua phem tseg tiag, ces Tswv Ntuj hloov siab, nws thim qhov phem uas nws npaj yuav ua rau lawv, nws tsis ua raws li nws tau hais.

NPN 51: 3-4, 12-13, 18-19

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab tshem kuv qhov txhaum mus kom kuv dawb huv tuaj.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Vim koj tsis zoo siab txais cov kev txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj, yog muaj
ib lub tswv yim xav lees txhaum;
tus muaj ib lub siab xav lees txhaum thiab
ua neeg me, Tswv ntuj, koj yuav tsis thuam.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Zaj Cav lub Moo Zoo: YOS ES 2: 12-13

HUAB TAIS hais tias, lub sij hawm no kiag,
nej muab tas nrho nej lub siab tig rov los cuag kuv,
vim kuv muaj lub siab hlub thiab khuv leej neeg.

Ntawv Moo Zoo: LK 11: 29-32

29 Thaum tej pab neeg coob coob tuaj sib sau nyob ua ke, Yes Xus pib hais lus tias : "Tiam neeg no yog ib tiam neeg phem. Lawv taij ib lub cim, tab sis yuav tsis muaj ib lub cim rau lawv pom, tsuas kawg muaj tus yaj saub Yos Nas lub cim xwb. 30 Xws li Yos Nas yog ib lub cim rau cov neeg nyob Nis Nis Vas, Neeg Leej Tub kuj yog ib lub cim rau tiam neeg no thiab. 31 Hnub txiav txim, tus poj vaj nyob Naj Fab yuav nrog tiam neeg no sawv los, nws yuav muab txim rau lawv, vim nws tuaj puag tim npoo ntiaj teb tuaj mloog Xas Los Moos cov lus thoob tsib. Hos nyob ntawm no, twb muaj tus loj dua Xas Los Moos ! 32 Hnub txiav txim, cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thim xav, hos nyob ntawm no twb muaj tus loj dua Yos Nas !”

TIM        22      LUB      2     HLIS       2018

Hnub Tsib Lis Piam Ib Caij 40  Xyoo B Nruab Lis Piam Xyoo II

Hwm txog Pob Zeb lub Rooj Zaum

Zaj Nyeem Ib:   1 POB ZEB 5:  1-4

Cov hmov tshua:
1 Kuv xav ntuas cov ua leej choj nyob hauv nej, vim kuv kuj yog ib tug leej choj thiab kuv yog ib tug ua tim khawv txog Leej Pleev txoj kev txom nyem, thiab kuv kuj yog ib tug yuav nrog sawv daws txais lub hwj chim uas lwm hnub yuav tawm tuaj. 2 Nej yuav coj Tswv Ntuj pab yaj uas nrog nej nyob. Nej yuav saib lawv tsis yog vim muaj tus yuam nej, tiam sis yog vim nej yeej zoo siab hlo ua qhov ntawd raws li Tswv Ntuj nyiam xwb, thiab tsis yog vim nej yuav tau ib pob nyiaj noj, nej tsuas yog kub siab lug coj lawv xwb. 3 Nej tsis txhob ua ib co huab tais tswj cov neeg Ntuj muab rau nej saib,  tiam sis nej yuav ua ib tug qauv zoo rau pab yaj xyaum. 4 Ces thaum tus tuam thawj Tswv Zov Yaj tawm los, nej yuav tau txais lub kaus mom ua vaj muaj koob meej tsis txawj qub.

NPN 23:   1-3A, 4, 5, 6

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

HUAB TAIS yog tus tswv zov yaj saib kuv, kuv yuav tsis ntshaw dab tsi.
Nws coj kuv mus so nyob hauv tej tshav zaub mos ntsuab xiab.
Nws coj kuv mus tso nyob ze tej tus dej tus yees;
nws ua kom kuv tus ntsuj plig los siav.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Txawm kuv taug kev nyob hauv lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab
nrog koj rab pas nplawm thiab rab pas nrig,
ua rau kuv muaj siab loj.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov.
Koj muab roj pleev kuv taub hau;
kuv lub khob puv phwj yaws.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Tsuas muaj kev ua siab zoo thiab ua siab dawb thiaj
caum cuag kuv txhua txhia hnub hauv kuv lub neej xwb.
Kuv yuav tau nyob hauv HUAB TAIS tsev
ntev niaj ntau xyoo lawm tom ntej.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Za j Cav lub Moo Zoo:   MT 16:   18

Koj yog Pob Zeb, nyob saum lub pob zeb no,
kuv yuav txhim kuv lub Koom Txoos;
Dab phem teb cov qhov rooj yuav tsis yeej nws li.

Ntawv Moo Zoo:   MT 16:   13-19

13 Yes Xus tuaj txog cheeb tsam ntawm Xes Ntxas Les Fis Lis Pos, ces nws nug cov thwj tim li no : "Luag tej hais tias Neeg Leej Tub yog leej twg ?" 14 Lawv teb tias : “Ib txhia hais tias : Yog Zam Ntxuav Plig. Ib txhia hais tias, yog Es Lias. Tseem muaj lwm cov hais tias yog Yes Les Mias los yog ib tug hauv cov yaj saub.” Yes Xus hais tias : 15 "Nej ne, nej hais tias kuv yog leej twg ?" 16 Xis Moos Pob Zeb teb tias : "Koj yog Leej Pleev, yog tus Tswv Ntuj muaj txoj sia Leej Tub." 17 Yes Xus teb rau Pob Zeb tias : "Xis Moos, Yos Nas tub, koj txoj hmoov zoo; vim qhov koj paub no, tsis yog nqaij thiab ntshav qhia koj, yog kuv Txiv nyob saum ntuj qhia koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no, dab phem teb cov qhov rooj yuav tsis yeej nws li. 19 Kuv yuav muab Ntuj lub Ceeb Tsheej cov yawm sij rau koj. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj."

TIM 23 LUB 2 HLIS 2018

Hnub Rau Lis Piam Ib Caij 40 Xyoo B Nruab Lis Piam Xyoo II

Hwm LN Polycarp

Zaj Nyeem Ib: ES XES KIAS 18: 21-28

Huab Tais Tswv Ntuj hais li no:
21 “Yog tus muaj ib lub siab phem tseg tsis ua txhaum ntxiv, nws coj kuv cov lus qhia thiab nws ua raws nraim txoj kev ncaj kev zoo, mas nws yuav muaj txoj sia, nws yuav tsis tuag. 22 Kuv yuav tsis nco txog nws cov txhaum ib qho li, nws yuav ciaj vim nws ua qhov zoo. 23 Kuv puas yuav zoo siab yog kuv pom ib tug neeg txhaum tuag?” Yog Huab Tais TSWV NTUJ hais lus. “Ntshai kuv yuav zoo siab dua yog nws tso nws txoj kev ua phem tseg kom nws tau txoj sia. 24 Tab sis yog tus neeg siab ncaj nws ncaim ntawm txoj kev ncaj thiab nws mus ua txhaum xws li tus neeg tsis hwm Ntuj ua kam, mas tus neeg ntawd nws puas tsim nyog muaj txoj sia nyob ? Nws cov hauj lwm zoo uas thaum ub nws ua, kuv yuav tsis nco txog li. Vim nws tau tso kev ntseeg tseg thiab mus ua txhaum, vim li no nws yuav tsum tuag. 25 Tiam sis nej hais tias: ‘HUAB TAIS ua tsis ncaj ?’ Tsev neeg His Xas Lais, nej mloog zoo zoo, puas yog kuv ua tsis ncaj? Zoo li yog nej ua tsis ncaj los tsis sub? 26 Tus neeg siab ncaj nws ncaim ntawm txoj kev ncaj mus ua txhaum, ces nws tuag, yog vim nws tau ua txhaum nws thiaj yuav tsum tuag. 27 Hos tus neeg siab phem nws tso nws txoj kev ua phem pov tseg, nws los ua qhov ncaj qhov zoo, ces nws txoj sia yuav nyob. 28 Vim nws tso nws txoj kev phem pov tseg, mas nws yuav muaj txoj sia nws yuav tsis tuag.

NPN 130: 1-2, 3-4, 5-7a, 7bc-8

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab!
Thov koj cuab pob ntseg mloog kuv lub suab thov koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

HUAB TAIS, yog koj cim ntsoov peb cov txhaum
leej twg thiaj yuav nyob taus?
Tab sis nyob ntawm koj muaj kev zam txhaum,
thov kom sawv daws hawm koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Kuv tso siab rau HUAB TAIS,
kuv tus ntsuj plig tso siab rau nws lo lus.
Kuv tus ntsuj plig tos ntsoov HUAB TAIS
heev tshaj cov zov keeb tos lub caij kaj ntug.
His Xas Lais, koj yuav tos ntsoov HUAB TAIS.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Vim HUAB TAIS muaj lub siab zoo,
thiab nws muaj txoj kev cawm nplua mias,
nws yuav cawm His Xas Lais
ntawm tas lawv tej kev txhaum.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Zaj Cav lub Moo Zoo: ES XES KIAS 18: 31

HUAB TAIS hais tias, nej cia li tso tas nej tej kev ua txhaum pov tseg,
thiab hloov dua ib lub siab tshiab thiab ib lub tswv yim tshiab.

Ntawv Moo Zoo: MT 5: 20-26

Yes Xus hais rau nws cov thwj tim tias:
20 "Kuv hais rau nej : yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej. 21 "Nej hnov cov lus qhia rau tej laus thaud tias : "Koj tsis txhob tua neeg. Tus twg tua neeg, nws yuav raug luag txiav txim rau nws. 22 Hos kuv, mas kuv hais rau nej tias : Leej twg npau taws rau nws tus kwv tij, mas nws yuav raug txiav txim ntawm tsev hais plaub. Yog nws hais rau nws tus kwv tij tias "Niag ruam !" mas nws yuav raug txiav txim ntawm lub rooj txwj laus Xas Nes Nrees. Yog nws hais rau nws tus kwv tij tias : "Niag vwm", mas nws yuav mus raug txim nyob hauv dab phem cov hluav taws. 23 Thaum koj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus rau koj lawm. 24 Mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov los cev koj cov txim. 25 Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj, koj yuav tawm tsis tau hauv tsev loj faj, mus txog thaum koj rho nyiaj qab nas txog npib kawg nkaus los them.

TIM       24      LUB      2       HLIS       2018

Hnub Xya Lis Piam Ib Caij 40 Xyoo B Nruab Lis Piam Xyoo II

Zaj Nyeem Ib:       TXOJ CAI OB  26:   16-19

Mais Xes Hais rau nws cov neeg tias:
16 “Hnub no, HUAB TAIS, nej tus Tswv Ntuj ceeb toom rau nej tias kom nej yuav tsum coj nws tej kev cai tej lij choj. Nej yuav ua zoo coj tej kev cai ntawd, yuav muab tas nej lub siab nej tus nstuj plig los ua raws li ntawd. 17 Hnub no, nej nrog HUAB TAIS cog lus tias: Nws yuav yog nej tus Tswv Ntuj, thiab nej yuav taug nws txoj kev, coj raws nws tej lij choj, nws cov lus qhia, nws tej kev cai, thiab mloog nws lub suab. 18 Hnub no HUAB TAIS kuj nrog nej cog lus tias: nej yuav yog nws haiv neeg tshwj xeeb ntawm nws xub ntiag, xws li nws tau hais rau nej lawm; thiab nej yuav coj nws tej lus qhia tas huv tib si. 19 Ces HUAB TAIS yuav ua kom nej muaj ntsej muag, nto koob meej, thiab muaj hwj chim loj tshaj lwm cov haiv neeg uas nws tsim los; nej yuav yog ib haiv neeg ntshiab rau HUAB TAIS nej tus Tswv Ntuj, xws li nws tau hais lawm.

NPN       119:  1-2, 4-5, 7-8

Txais: (1b) Muaj hmoov zoo yog cov uas coj raws Huab Tais txoj cai!

Muaj hmoov zoo yog cov uas taug ib txoj kev tsis muaj qhov xyeej,
yog cov uas taug raws HUAB TAIS txoj cai.
Muaj hmoov zoo yog cov uas coj raws nws tej lus qhia,
yog cov uas nrhiav nws tas lawv siab lawv ntsws.

Txais: (1b) Muaj hmoov zoo yog cov uas coj raws Huab Tais txoj cai!

Koj tau ceeb toom kom sawv daws
mob siab mloog koj tej lus qhia.
Thov koj pab kuv kom kuv nyob ruaj nreb
hauv koj tej kev cai lij choj!

Txais: (1b) Muaj hmoov zoo yog cov uas coj raws Huab Tais txoj cai!

Kuv yuav muaj ib lub siab ncaj ua koj tsaug,
thaum kuv paub txog koj txoj cai ncaj ncees lawm.
Kuv yuav coj nraim koj tej cai lij choj,
thov koj tsis txhob tso kuv pov tseg li.

Txais: (1b) Muaj hmoov zoo yog cov uas coj raws Huab Tais txoj cai!

Zaj Cav lub Moo Zoo:       2 KLN  6:   2B

Ntsia saib lub sij hawm zoo yog nyem no;
Hnub muaj kev cawm neeg yog nyem no.

Ntawv Moo Zoo:       MT  5:   43-48

Yes Xus hais rau nws cov thwj tim tias:
43 "Nej tau hnov tej lus qhia tias : Koj yuav nyiam tus nyob ze koj, koj yuav ntxub koj tus yeeb ncuab. 44 Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej ; 45 nej thiaj yog nej Txiv nyob saum ntuj cov tub ; vim nej Txiv ua kom lub hnub tuaj ziab cov neeg phem thiab cov neeg zoo tib si, nws ua kom nag los rau cov siab ncaj thiab cov siab nkhaus tib si. 46 Yog nej nyiam cov neeg nyiam nej xwb, mas nej yuav tau koob haum dab tsi ? Cov sau se lawv tsis txawj ua ib yam li ntawd thiab lod? 47 Yog nej tsua hu nej cov kwv tij xwb, mas nej tau ua dab tsi tshaj ? Tab yog cov neeg teev pej kum dab, lawv tsis txawj ua li ntawd lod? 48 Hos nej, mas nej yuav ua neeg zoo tshaj plaws, vim nej Txiv nyob saum ntuj yog tus zoo tshaj plaws.

TIM 26 LUB 2 HLIS 2018

Hnub Ob Lis Piam Ob Caij 40 Xyoo B Nruab Lis Piam Xyoo II

Zaj Nyeem Ib: DN 9: 4B-10

4b Huab Tais, Tswv Ntuj loj thiab muaj hwv xyeej tas nrho, koj yog tus ua raws li lo lus koj tau cog rau cov neeg uas nyiam koj thiab coj rawv koj cov lus qhia. 5 Peb tau ua txhaum, tau ua qhov tsis zoo, tau ua qhov phem; peb tau ntxeev siab, tau tig nrob qaum rau koj cov lus qhia thiab koj cov cai lij choj lawm. 6 Peb tsis tau mloog koj cov yaj saub lus thaum lawv tuav koj npe hais lus rau peb cov vaj, peb cov nom cov tswv, peb phaj txiv, thiab rau tas tsoom pej xeem nyob hauv lub teb chaws. 7 Huab Tais, koj yog tus nyob hauv txoj kev ncaj, peb yog cov tau kev txaj muag ua peb lub ntsej muag poob tas, xws li niaj hnub no tsis hais peb cov nyob Yus Das, nyob Yes Lus Xas Les, los nyob tas His Xas lais teb, cov nyob deb los cov nyob ze, los cov nyob tas txhua lub teb chaws uas koj tau caum peb mus nyob vim peb tau ua tsis ncaj rau koj lawm. 8
Huab Tais, peb tau kev txaj muag nrog peb cov vaj, peb cov nom cov tswv, thiab peb phaj txiv vim peb tau ua txhaum rau koj. 9 Tiam sis Huab Tais, peb tus Tswv Ntuj, koj muaj lub siab hlub thiab muaj txoj kev zam txhaum! Li ntawd los peb tseem ntxeev siab rau koj, Huab Tais peb tus Tswv Ntuj, peb tsis mloog koj cov lus qhia, tsis coj raws koj txoj cai uas koj muab rau peb nyob hauv cov yaj saub li.”

NPN 79: 8, 9, 11+13

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj txhob nco txog peb tej txhaum yav dhau los ntxiv;
coj koj txoj kev khuv leej tuaj rau peb sai sai,
vim peb poob rau qhov qis kawg nkaus lawm.

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj pab peb, Tswv Ntuj peb tus cawm seej,
vim koj lub npe muaj koob meej loj;
Thov cawm peb thiab zam peb cov txhaum rau peb
vim koj lub npe zoo..

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj cia cov neeg nyob txim lub suab ntsaj tuaj txog koj;
koj siv koj lub hwj huam loj los cawm cov neeg poob rau hauv kev tuag.
Ces peb, uas yog koj haiv neeg thiab pab yaj nyob hauv koj lub nras zaub
yuav ua koj tsaug mus li tsis muaj caij kawg;
tiam dhau tiam peb yuav cav txog koj lub koob meej.

Txais: (103:10a) Huab Tais, thov koj tsis txhob ua rau peb raws li peb cov txhaum.

Zaj Cav lub Moo Zoo: ZAM 6: 63C, 68C

Huab Tais, koj cov lus yog ntsuj plig thiab yog txoj sia;
koj muaj cov lus pub txoj sia nyob mus li.

Ntawv Moo Zoo: LK 6: 36-38

Yes Xus hais rau nws cov thwj tim tias:
36 “Nej yuav khuv leej neeg ib yam li nej Txiv khuv leej neeg. 37 Nej yuav tsis txhob txiav txim rau luag, thiaj yuav tsis muaj tus txiav txim rau nej. Nej yuav tsis txhob muab txim rau luag, thiaj yuav tsis muaj tus muab txim rau nej. Nej zam rau luag, thiaj yuav muaj tus zam rau nej. 38 Nej pub rau luag, ces yuav muaj tus pub rau nej; luag yuav luj kom puv puv, yuav muab tswm rau muab co kom cee ceev, yuav ua kom nco lug los hliv rau ntawm nej xub ntiag; vim tias nej luj li cas rau luag, mas kuj yuav muaj tus luj ib yam li ntawd rau nej thiab.”

TIM 27 LUB 2 HLIS 2018

Hnub Peb Lis Piam Ob Caij 40 Xyoo B Nruab Lis Piam Xyoo II

Zaj Nyeem Ib: HIS XAIS 1: 10, 16-20

10 Cov nom kav Xos Dos Mas, nej cia li mloog Huab Tais cov lus ! Pej xeem nyob Nkos Mos Las, cia li cuab pob ntseg rau peb tus Tswv Ntuj cov lus qhuab lus qhia!
16 Nej ntxuav nej kom nej huv tuaj! Nej tshem nej tej kev phem mus kom kuv qhov muag txhob pom ntxiv. Nej tso txoj kev ua phem tseg ! 17 Nej xyaum ua qhov zoo, nej nrhiav kev ncaj ncees, nej ntuas tus neeg siab heev, nej ua ncaj rau tus tub ntsuag, nej tuaj tus poj ntsuam tog. 18 HUAB TAIS hais tias : "Nej tuaj ! Peb sib tham kom haum! Txawm tias nej tej txhaum yuav liab ploog, los lawv yuav rov dawb li daus tau; tab yog nej tej txhaum yuav liab dub nciab, los lawv yuav rov dawb xws plaub yaj tau. 19 Yog nej mob siab tiag thiab mloog lus, mas nej yuav tau noj lub teb chaws cov qoob. 20 Tiam sis yog nej tsis kam mloog lus thiab nej ntxeev siab, mas hniav ntaj yuav txo nej." HUAB TAIS lub ncauj tau hais li ntawd.

NPN 50: 8-9, 16BC-17, 21+23

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis tshem ib tug heev nyuj hauv koj tsev mus,
los ib tug laug tshis hauv koj pab tsiaj mus.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom..

Tim li cas nej lub ncauj thiaj lam qog kuv cov kev cai lij choj,
thiab lam lees kuv cov lus kuv tau nrog nej cog,
tiam sis nej ntxub kuv tej kev cai
thiab muab kuv tej lus ua ntia pov tom nej qab xwb?

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Thaum nej ua tej yam zoo li no, kuv puas yuav tsum ua ntsej lag muag dig?“
Nej puas xav tias kuv zoo nkaus li nej thiab?
Kuv yuav qhuab qhia nej thiab yuav piav lub ntsiab rau nej.
Tus neeg twg tuaj ua kuv tsaug yog nws cav txog kuv lub koob meej;
tus twg xaiv txoj kev ncaj taug kuv yuav muab
Tswv Ntuj txoj kev cawm neeg rau nws pom.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Zaj Cav lub Moo Zoo: ES XES KIAS 18: 31

HUAB TAIS hais tias, nej cia li muab tas tej txhaum nej tau ua pov tseg deb ntawm nej
thiab nej cia li yuav ib lub siab tshiab thiab ib lub tswv yim tshiab.

Ntawv Moo Zoo: MT 23: 1-12

1 Yes Xus qhia tsoom sid thiab nws cov thwj tim. Nws hais tias : 2 “Cov Kws Ntawv Ntshiab thiab cov Fas Lis Xais zaum Mais Xes lub theej kiab. 3 Vim li no nej ua thiab nej coj tas txhua yam lawv qhia rau nej, tab sis nej txhob ua raws li lawv ua. Vim lawv qhia, tab sis lawv tsis ua raws. 4 Lawv nog tej lub nra hnyav yuam rau saum tsoom sid xwb pwg, tab sis lawv tsis kam cev ib tug ntiv tes los txheem li. 5 Lawv ua txhua tsav txhua yam kom neeg pom lawv xwb. Yog li ntawd, lawv thiaj coj tej txws ntim Txoj Cai dav dav, thiab dai tej tw ntxhoo ntev ntev. 6 Thaum lawv mus noj mus haus mas lawv nyiam zaum thawj cov rooj; nyob hauv cov tsev txoos, lawv nyiam zaum cov rooj pem hauv ntej. 7 Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”. 8 Hos nej, mas nej txhob cia luag hu nej ua “Xib Hwb”, vim nej tsuas muaj tib tug Xib Hwb xwb, thiab nej sawv daws yog ib co kwv tij. 9 Nej txhob hu leej twg nyob ntiaj teb no ua “Txiv”, vim nej tsuas muaj tib leeg Txiv xwb, yog tus nyob saum ntuj. 10 Nej txhob cia luag hu nej ua “Thawj Tswj”, vim nej tsuas muaj tib tug Tswj xwb, yog Leej Pleev. 11 Tus loj dua cov nyob hauv nej, yuav ua nej tus tub txib. 12 Tus twg tsa nws siab, yuav raug txo kom qis. Tus twg txo nws qis, yuav raug tsa kom siab.

TIM 28 LUB 2 HLIS 2018

Hnub Plaub Lis Piam Ob Caij 40 Xyoo B Nruab Lis Piam Xyoo II

Zaj Nyeem Ib: YES LES MIAS 18: 18-20

18 Cov neeg Yus Das thiab cov pej xeem nyob Yes Lus Xas Les hais tias : "Nej tuaj ! Peb yuav nrhiav ib txog kev los rhuav Yes Les Mias, kom txoj cai los tseem yuav muaj Leej Choj los qhuab qhia txog, txoj kev tuav xam los tseem yuav muaj tus neeg thoob tsib los ua, thiab cov lus saub los tseem yuav muaj tus txawj los hais. Nej tuaj, peb kav tsij siv peb lub ncauj los rhuav nws kom ti txha, thiab peb tsis txhob quav ntsej nws tej lus ib qhov me me li."
19 HUAB TAIS, thov koj mloog kuv, thov koj cuab pob ntseg mloog cov lus kuv cov yeeb ncuab hais. 20 Puas tsim nyog ua tej yam phem los pauj tej yam zoo? Lawv khawb ib lub qhov taub tos kuv. HUAB TAIS, thov koj nco txog tias kuv tau sawv nyob ntawm koj xub ntiag hais lus zoo txog lawv rau koj kom koj tshem koj txoj kev npau taws mus deb ntawm lawv.

NPN 31: 5-6, 14, 15-16

Txais: (17b) Huab Tais, thov koj cawm kuv, vim koj lub siab zoo.

Koj yuav cawm kuv dim ntawm cov rooj ntxiab uas lawv caws tos kuv,
vim koj yog kuv qhov chaw nkaum.
Kuv muab kuv tus ntsuj plig tso rau hauv koj txhais tes;
koj yeej yuav txhiv kuv dim, Huab Tais, tus Tswv Ntuj tsis txawj ntxeev siab.

Txais: (17b) Huab Tais, thov koj cawm kuv, vim koj lub siab zoo.

Kuv hnov tsoom neeg hais lus ntxhi nyob ib ncig kuv ua rau kuv ntshai,
lawv sib tuav tswv yim txog kuv, tias lawv yuav txo kuv txoj sia.

Txais: (17b) Huab Tais, thov koj cawm kuv, vim koj lub siab zoo.

Tiam sis Huab Tais, kuv tso siab lug rau koj,
kuv hais tias: “Koj yog kuv tus Tswv Ntuj.”
Kuv lub neej nyob hauv koj txhais tes; thov koj tso kuv dim ntawm
kuv cov yeeb ncuab thiab cov neeg hiam kuv lub xib teg.

Txais: (17b) Huab Tais, thov koj cawm kuv, vim koj lub siab zoo.

Zaj Tshaj lub Moo Zoo: ZAM 8: 12

Huab Tais hais tias, kuv yog lub ntiaj teb qhov pom kev;
leej twg lawv kuv qab yuav muaj txoj kev kaj lub neej.

Ntawv Moo Zoo: MT 20: 17-28

17 Thaum Yes Xus mus pem Yes Lus Xas Les, nws coj Pab Kaum Ob mus rau ib cag; lawv tab tom mus kev, Yes Xus hais rau lawv tias : 18 “Peb yuav mus pem Yes Lus Xas Les. Neeg Leej Tub yuav raug muag rau cov thawj leej choj thiab cov Kws Ntawv Ntshiab. Lawv yuav txiav lub txim tuag rau nws. 19 Lawv yuav muab nws rau cov neeg teev pej kum dab kom lawv thuam nws, nplawm nws thiab muab nws ntsia saum ntoo cuam. Hnub peb, nws yuav sawv rov los.” 20 Thaum ntawd, Ntxes Npes Dais ob tug tub leej niam nrog nws ob tug tub txav los ze Yes Xus, nws txhos caug hauv av vim nws xav thov ib yam ntawm Yes Xus. 21 Yes Xus hais rau nws tias : “Koj xav tau dab tsi ?” Leej niam hais rau Yes Xus tias : “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.” 22 Yes Xus teb tias : “Nej tsis paub qhov nej thov. Neb puas haus taus lub ntim uas kuv yuav haus ?” Nkawd teb tias : “Wb haus taus.” 23 Yes Xus hais rau nkawd tias : “Kuv lub ntim, mas neb yuav tau haus, tab sis qhov yuav tau zaum ntawm kuv sab xis thiab sab laug, tsis yog kuv yuav muab rau neb. Kuv Txiv npaj qhov ntawd rau leej twg, mas yog leej twg tug." 24 Kaum leej thwj tim hnov cov lus thov ntawd, lawv npau taws rau nkawd ob kwv tij. 25 Ces Yes Xus hu lawv kom txav los ze nws, nws hais tias : “Nej paub lawm tias cov ua tswv kav cov kuj cuab mas lawv ua nruj ua tsiv rau tsoom pej xeem, cov loj ua kom luag paub tias lawv muaj peev xwm tswj tsoom pej xeem. 26 Tab sis nyob hauv nej, mas yuav tsis txhob muaj li ntawd : leej twg xav ua tus loj nyob hauv nej, mas nws yuav ua nej tus tub txib. 27 Leej twg xav ua nej tus thawj, mas nws yuav ua nej tus qhev. 28 Yog vim li ntawd, Neeg Leej Tub tsis tuaj nyob ntiaj teb no kom luag tsob hwb nws. Nws tuaj tsob hwb sawv daws, thiab muab nws txoj sia los ua nqi txhiv coob leej.”