COV ZAJ NYEEM NRUAB LIS PIAM XYOO II 2017-2018

TIM 25 LUB 6 HLI 2018

Hnub Ob Lis Piam Kaum Ob Nruab Xyoo B Nruab Lis Piam Xyoo II

Zaj Nyeem Ib: 2 VAJ 17: 5-8, 13-15A, 18

5 Xas Mas Nas Xas, cov As Xis Lias tus vaj, tuaj vij lub teb chaws tas nrho, thiab nws tuaj ntaus Xas Mas Lias teb tau peb xyoos nkaus. 6 Thaum Os Xes ua vaj kav His Xas Lais tau cuaj xyoos lawm, tus vaj As Xis Lias ntaus yeej Xas Mas Lias, ces nws coj cov His Xas Lais mus nyob txim nyob As Xis Lias teb. Nws coj lawv mus nyob Has Las, thiab nyob ntawm tus ntug dej Has Npos hauv lub xeev Nkos Xas, thiab nyob hauv cov nroog Mes Dias.
7 Cov xwm tshwm sim zoo li ntawd yog vim cov His Xas Lais ua txhaum rau HUAB TAIS lawv tus Tswv Ntuj, uas yog tus tau coj lawv tawm ntawm Hais Nkws Tos teb los, thiab pab lawv dim ntawm Fas Las Oos tus vaj Hais Nkws Tos tes, thiab vim lawv mus teev lwm cov tswv ntuj. 8 Lawv mus coj lwm cov haiv neeg tej kev cai dab qhuas, cov haiv neeg uas HUAB TAIS tau ntiab khiav ntawm cov His Xas Lais thiab ntawm cov vaj His Xas Lais uas lawv tau tsa mus.
13 HUAB TAIS twb tau kom cov Yaj Saub xub ceeb toom rau His Xas Lais thiab rau Yus Das tias : "Nej tso nej tus yam ntxwv phem pov tseg, nej tig los coj kuv cov lus qhia raws nraim li txoj cai kuv tau ceeb toom rau nej cov yawg koob thiab raws li kuv tau kom kuv cov tub txib Yaj Saub qhia rau nej." 14 Tab sis lawv tsis mloog, lawv ua caj qwb txhav qhi xws li lawv cov poj yawm txwv koob uas tsis ntseeg HUAB TAIS lawv tus Tswv Ntuj. 15 Lawv tsis mloog nws cov kev cai lij choj thiab lo lus nws tau nrog lawv cov yawg koob cog; lawv tsis mloog HUAB TAIS cov lus ceeb toom rau lawv.
18 Ces HUAB TAIS npau taws heev rau cov His Xas Lais, nws muab lawv tshem deb ntawm nws ntsej muag. Tsuas tshuav tib lub xeem Yus Das lawm xwb.

NPN 60: 3, 4-5, 12-13

Txais: (7b) Thov koj muab koj txhais tes xis los pab peb,
Huab Tais, thov koj teb peb mas.

Tswv Ntuj, koj tso peb tseg, koj ua kom peb tawg tas,
koj tau npau taws rau peb, thov koj rov los coj peb mas !

Txais: (7b) Thov koj muab koj txhais tes xis los pab peb,
Huab Tais, thov koj teb peb mas.

Koj ua lub teb chaws qeeg tas, ua kom av tawg tej kab pleb :
thov koj kho cov kab pleb ntawd rau, vim teb chaws ua zog koog.
Koj tau cia koj haiv neeg raug kev nyuaj loj;
koj muab ib co cawv rau peb haus kom peb taub hau kiv pes lees.

Txais: (7b) Thov koj muab koj txhais tes xis los pab peb,
Huab Tais, thov koj teb peb mas.

Tswv Ntuj, puas yog koj tso peb tseg lawm
Koj thiaj tsis kam nrog peb cov tub rog
tawm mus ntaus tsam ntxiv?
Thov koj tuaj pab peb ntaus cov tawm tsam peb,
vim neeg txoj kev pab tsis zoo dab tsi rau peb.

Txais: (7b) Thov koj muab koj txhais tes xis los pab peb,
Huab Tais, thov koj teb peb mas.

As Les Lus Yas: HNpl 4: 12

Txais: As les lus yas, as les lus yas.

Tswv Ntuj lo lus muaj txoj sia thiab ua tau hauj lwm,
nws tsom tau neeg tej kev xav thiaj tej zaj tswv yim hauv nruab siab.

Txais: As les lus yas, as les lus yas.

Ntawv Moo Zoo: MT 7: 1-5

Yes Xus hais rau nws cov thwj tim tias:
1 "Nej txhob txiav txim, Ntuj thiaj yuav tsis txiav txim rau nej ; 2 vim tias, nej txiav txim li cas rau luag, Ntuj yuav txiav txim ib yam li ntawd rau nej; nej luj li cas rau luag, Ntuj kuj yuav luj li ntawd rau nej. 3 Ua cas koj pom tus quav nplej nyob hauv koj tus kwv tij qhov muag, tab sis tus nqaj ntoo nyob hauv koj qhov muag, koj ho tsis pom? 4 Koj ua cas hais tau rau koj tus kwv tij tias : ‘Cia kuv rho tus quav nplej hauv koj qhov muag pov tseg,’ tab sis ib tug nqaj twb nyob hauv koj qhov muag? 5 Neeg uas zoo sab nraud, koj xub rho tus nqaj hauv koj qhov muag pov tseg tso, koj thiaj li yuav pom kev tseeb rho tus quav nplej hauv koj tus kwv tij qhov muag.”

TIM 26 LUB 6 HLI 2018

Hnub Peb Lis Piam Kaum Ob Nruab Xyoo B Nruab Lis Piam Xyoo II

Zaj Nyeem Ib: 2 VAJ 19: 9B-11, 14-21, 31-35A, 36

9 Xes Nas Kes Lis, cov As Xis Lias tus vaj, rov qab tso dua ib co tiam lis tuaj cuag Es Xes Kais, nws hais cov lus no rau lawv: "Nej mus hais zoo li no rau Es Xes Kais cov Yus Das tus vaj: “Koj tsis txhob cia koj tus Tswv Ntuj uas koj tso tso siab rau dag koj, vim nws hais tias Yes Lus Xas Les yuav tsis poob rau hauv tus vaj As Xis Lias tes. 11 Tiam sis koj twb paub txog tej yam uas cov vaj As Xis Lias tau ua los rhuav tas txhua lub teb chaws lawm. Koj puas xav tias koj yuav dim ?”
14 Es Xes Kais txais tau tsab ntawv ntawm cov tiam lis, nws muab los nyeem. Ces nws mus pem HUAB TAIS lub Tuam Tsev, nws nthuav tsab ntawv tso rau ntawm HUAB TAIS xub ntiag, 15 nws thov ntuj zoo li no: "HUAB TAIS, His Xas Lais tus Tswv Ntuj, koj zaum saum koj lub theej kiab nyob saum cov Tshiab Kes Lus Npis, koj tib leeg yog tus Tswv Ntuj , koj tswj tas ib puas xyeem teb chaws muaj vaj nyob ntiaj teb no. Koj yog tus tau tsim lub ntuj lub teb. 16 HUAB TAIS, thov koj tig ntsej los mloog, thov koj qhib qhov muag los saib. Koj hnov Xes Nas Kes Lis cov lus lawm, nws tso neeg tuaj hais lus thuam tus Tswv Ntuj muaj txoj sia. 17 HUAB TAIS, yeej muaj tseeb tias cov vaj As Xis Lias tau rhuav kom cov haiv neeg ploj mus. 18 Lawv tau muab luag cov dab qhuas pov rau hauv hluav taws, vim cov dab ntawd tsis yog ib co tswv ntuj, lawv yog neeg txhais tes txua xwb, lawv yog ntoo, yog pob zeb xwb, cov vaj As Xis Lias thiaj tau muab rhuav tas tib si lawm. 19 Tab sis nyem no, HUAB TAIS, peb tus Tswv Ntuj, thov koj cawm peb dim ntawm Xes Nas Kes Lis tes. Kuv thov koj ! Ces txhua lub teb chaws muaj vaj ntxwv nyob ntiaj teb no yuav paub tias koj tib leeg yog Tswv Ntuj, HUAB TAIS !"
20 Ces His Xais, As Mos tub, tso neeg mus hais rau Es Xes Kais tias : " HUAB TAIS , His Xas Lais tus Tswv Ntuj hais li no : ‘Kuv hnov koj zaj thov ntuj uas koj hais txog tus vaj As Xis Lias, Xes Nas Kes Lis lawm.’ 21 HUAB TAIS cov lus tsawm Xes Nas Kes Lis yog li no:
Tus nkauj xwb tsim txiaj, leej ntxhais Xis Yoos ntxub koj thiab thuam koj. Tus ntxhais Yes Lus Xas Les co hau rau koj.
31 Vim tias yuav muaj ib pab seem tawm hauv Yes Lus Xas Les los, ib co neeg yuav dim ntawm lub roob Xis Yoos. HUAB TAIS Xas Npas Os txoj kev mob siab yuav ua tau qhov ntawd.
32 HUAB TAIS hais txog tus vaj As Xis Lias li no tias: ‘Nws yuav tsis tau chaws mus hauv lub nroog, nws yuav tsis tau tua xub mus rau hauv, nws yuav tsis tau tuav leem phiaj mus ntaus lub nroog, nws yuav tsis tau tsa ntsa vij lub nroog. 33 Nws yuav rov taug txoj kev coj nws tuaj rov qab mus, nws yuav tsis tau chaws mus hauv lub nroog. Yog HUAB TAIS hais li. 34 Kuv yuav txuag thiab yuav cawm Yes Lus Xas Les, vim kuv tus kheej thiab vim kuv tus tub txib Das Vis.'"
35 Hmo ntawd HUAB TAIS tus Tshiab tawm mus ntaus ib puas yim caum tsib txhiab tus neeg As Xis Lias tuag nyob hauv lawv lub yeej. 36 Ces Xes Nas Kes Lis, tus vaj As Xis Lias, tso lub yeej tseg, nws khiav rov mus tsev nyob Nis Nis Vas.

NPN 48: 2-3AB, 3CD-4, 10-11

Txais: (9d) Tswv Ntuj txuag nws lub tsheej mus li.

HUAB TAIS loj tas nrho, yeej tsim nyog peb cav txog nws
nyob hauv peb tus Tswv Ntuj lub tsheej.
Nws lub roob ntshiab, uas zoo tshaj txhua lub roob,
yog txoj kev zoo siab rau tas ntiaj teb neeg

Txais: (9d) Tswv Ntuj txuag nws lub tsheej mus li.

Roob Xis Yoos, thaj chaw dai siab nyob qaum teb,
yog tus tuam vaj lub tsheej,
Tswv Ntuj saib koj tej vaj tej tsev,
nws nto moo lug tias nws yog koj lub ntsa loog zeb.

Txais: (9d) Tswv Ntuj txuag nws lub tsheej mus li.

Tswv Ntuj, peb xav txog koj txoj kev hlub
nyob hauv koj lub tuam tsev.
Ib yam li koj lub npe, Tswv Ntuj, koj lub koob meej
kuj ncha mus txog npoo ntiaj teb kawg.
Txoj kev ncaj ncees nyob puv nkaus koj txhais tes xis.

Txais: (9d) Tswv Ntuj txuag nws lub tsheej mus li.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: Kuv yog qhov pom kev kaj lub ntiaj teb,
leej twg los raws kuv mas nws yuav tauj qhov pom kev kaj nws lub neej.

Txais: As les lus yas, as les lus yas.

Ntawv Moo Zoo: MT 7: 6, 12-14

Yes Xus hais rau nws cov thwj timn tias:
6 "Nej txhob muab tej yam ntshiab pub rau dev noj, txhob muab nej cov hlaws npliag deg pov rau ntawm npua xub ntiag, tsam npua tsuj ces npua tig rov los dua nej.
12 "Nej yuav ua rau luag tej tas ib puas tsav yam uas nej xav kom luag ua rau nej. Txoj Cai thiab cov Yaj Saub yog li ntawd.
13 “Nej chaws ntawm lub qhov rooj nqaim mus mog. Vim lub qhov rooj loj thiab txoj kev loj kev dav yog txoj coj neeg mus rau lub qhov tuag, muaj coob leej taug txoj kev ntawd. 14 Hos lub qhov rooj nqaim nqaim thiab txoj kev ti ti thiaj yog txoj coj neeg mus txog txoj sia. Muaj tsawg leej nrhiav tau txoj kev ntawd taug.”

TIM 27 LUB 6 HLI 2018

Hnub Plaub Lis Piam Kaum Ob Nruab Xyoo B Nruab Lis Piam II

Hwm LN Cyril nyob Alexandria

Zaj Nyeem Ib: 2 VAJ 22: 8-13; 23:1-3

8 Tus thawj Leej Choj His Kis Yas Hus hais rau tus tuav ntawv hu ua Xas Fas tias : "Kuv nrhiav tau phau ntawv Txoj Cai nyob hauv lub Tuam Tsev teev HUAB TAIS lawm." Ces His Kis Yas Hus muab phau ntawv rau Xas Fas nyeem. 9 Xas Fas mus cuag tus vaj thiab hais rau nws tias : "Koj cov tub txib muab cov nyiaj nyob hauv lub Tuam Tsev nchuav tas lawm thiab muab faib rau cov neeg saib hauj lwm kho HUAB TAIS lub Tuam Tsev Teev Ntuj lawm." 10 Xas Fas kuj hais rau tus vaj tias : "Tus Leej Choj His Kis Yas Hus muab tau ib phau ntawv rau kuv." Ces nws nyeem phau ntawv rau tus vaj mloog. 11 Tus vaj hnov cov lus nyob hauv phau ntawv Txoj Cai, mas nws dua rhe nws cov khaub ncaws. 12 Nws ceeb toom rau tus Leej Choj His Kis Yas Hus, rau As His Kas uas yog Xas Fas tub, rau As Npos uas yog Mis Kais Yas tub, rau Xas Fas tus tuav ntawv, thiab rau tus nom As Xais Yas tias : 13 "Nej mus sawv kuv thiab tsoom pej xeem chaw nug HUAB TAIS txog cov lus nyob hauv phau ntawv nyuam qhuav nrhiav tau no saib. Ntshai HUAB TAIS npau taws heev kawg rau peb lawm, vim peb cov yawg koob tsis tau mloog cov lus xws li hais nyob hauv phau ntawv, lawv tsis tau ua raws nraim li tau sau tseg nyob hauv."
23 1 Ces tus vaj hu tas tsoom txwj laus nyob Yus Das teb thiab nyob Yes Lus Xas Les tuaj. 2 Tus Vaj nce mus pem HUAB TAIS lub Tuam Tsev, tas tsoom neeg nyob Yus Das teb thiab nyob Yes Lus Xas Les, tas cov Leej Choj, cov Yaj Saub, tas tsoom pej xeem me hlob me yau kuj nrog tus vaj mus. Tus vaj nyeem tas nrho cov lus nyob phau ntawv cog lus uas nrhiav tau nyob hauv HUAB TAIS lub Tuam Tsev rau sawv daws mloog. 3 Tus vaj sawv nyob ntawm tus ncej, nws cog lus rau HUAB TAIS tias lawv yuav caum HUAB TAIS, yuav coj HUAB TAIS cov lus qhia, cov kev cai thiab lij choj, tas lawv siab ntsws tas lawv ntsuj plig; lawv rov cog lus dua raws li lo lus cog sau tseg nyob hauv phau ntawv ntawd. Tas tsoom pej xeem kuj pom zoo nrog tus vaj cog lus.

NPN 119: 33, 34, 35, 36, 37, 40

Txais: (33a) Huab Tais, thov koj qhia kom kuv taug raws koj txoj cai lij choj.

HUAB TAIS, thov koj qhia txoj kev coj raws koj cov cai lij choj rau kuv,
Kom kuv coj tau raws nraim li ntawd.

Txais: (33a) Huab Tais, thov koj qhia kom kuv taug raws koj txoj cai lij choj.

Thov koj ua kom kuv to taub, ces kuv yuav coj koj Txoj Cai,
kuv yuav muab tas kuv lub siab lub ntsws los khaws koj Txoj Cai.

Txais: (33a) Huab Tais, thov koj qhia kom kuv taug raws koj txoj cai lij choj.

Thov koj coj kuv kev kom kuv taug raws koj cov lus qhia,
vim kuv zoo siab nyob hauv koj cov lus qhia.

Txais: (33a) Huab Tais, thov koj qhia kom kuv taug raws koj txoj cai lij choj.

Thov koj tig kuv lub siab kom xib mus rau cov kev cai koj tau txiav,
txhob pub qaij mus rau kev nrhiav ua kom yus tsam peev.

Txais: (33a) Huab Tais, thov koj qhia kom kuv taug raws koj txoj cai lij choj.

Thov koj tig kuv qhov muag mus deb txoj kev tsis tseem ceeb,
koj pub txoj sia rau kuv nyob hauv koj txoj kev.

Txais: (33a) Huab Tais, thov koj qhia kom kuv taug raws koj txoj cai lij choj.

Koj ntsia saib, kuv ntshaw koj cov cai lij choj tiag,
thov koj muab txoj sia rau kuv vim koj txoj kev ua ncaj.

Txais: (33a) Huab Tais, thov koj qhia kom kuv taug raws koj txoj cai lij choj.

As Les Lus yas: ZAM 15: 4A, 5B

Txais: As les lus yas, as les lus yas.

Huab Tais hais tias, nej yuav nyob ruaj hauv kuv ib yam li kuv nyob hauv nej.
Tus uas nyob hauv kuv nws yuav txi txiv ncw.

Txais: As les lus yas, as les lus yas.

Ntawv Moo Zoo: MT 7: 15-20

Yes Xus hais rau nws cov thwj tim tias:
15 “Nej ceev faj txog cov yaj saub cuav, lawv txia ua ib co yaj tuaj cuag nej, tab sis nyob sab hauv, lawv yog ib co hma nrhiav ncauj. 16 Nej ntsia lawv lub txiv lawv txi nej yuav paub. Luag puas de txiv cawv saum ib tsob pos los de txiv ncuav pias saum ib tsob nrhab ? 17 Ib yam li ntawd, tus ntoo zoo yeej txi ib co txiv zoo, hos tus ntoo lwj yeej txi ib co txiv phem. 18 Tsob ntoo zoo txi tsis tau txiv phem, hos tsob ntoo lwj txi tsis tau txiv zoo. 19 Tsob ntoo twg tsis txi txiv zoo, luag yuav muab ntov mus pov hlawv. 20 Li ntawd, thaum nej pom lawv cov txiv, ces nej yuav paub lawv.”

TIM 28 LUB 6 HLI 2018

Hnub Tsib Lis Piam Kaum Ob Nruab Xyoo C Nruab Lis Piam II

Hwm LN Irenaeus

Zaj Nyeem Ib: 2 VAJ 24: 8-17

8 Yes Hos Yas Kis muaj kaum yim xyoo thaum nws sawv ua vaj, nws kav nyob Yes Lus Xas Les tau peb hlis. Nws niam hu ua Nes Hus Tas, yog Es Nas Thas nyob Yes Lus Xas Les tus ntxhais. 9 Yes Hos Yas Kis ua tsis ntxim HUAB TAIS siab ib yam li nws phaj txiv tau ua los lawm.
10 Thaum lub caij nws ua vaj, tus vaj Nas Npws Kos Dos Nos Xos nyob Npas Npis Los cov tub rog tuaj ntaus Yes Lus Xas Les. Lawv tuaj vij lub nroog tas. 11 Tus vaj Nas Npws Kos Dos Nos Xos nyob Npas Npis Los tuaj ntaus Yes Lus Xas Les hos nws cov tub rog yog cov vij Yes Lus Xas Les. 12 Ces tus vaj Yus Das, Yes Hos Yas Kis nrog nws niam, nws cov thawj tub rog, nws cov tub nom tub tswv thiab nws cov neeg sam sawv daws mus zwm rau tus vaj Npas Npis Los; tus vaj Npas Npis Los thiaj coj nws mus, yog xyoo yim uas nws ua vaj.
13 Nas Npws Kos Dos Nos Xos nqa tas cov nyiaj cov kub uas nyob hauv HUAB TAIS lub Tuam Tsev, thiab nyob hauv tus vaj Yus Das lub tuam tsev mus, thiab nws muab tej twj nyiaj twj kub uas His Xas Lais tus vaj Xas Los Moos tau nchuav los siv rau hauv HUAB TAIS lub Tuam Tsev txiav ua daim tas, thiaj muaj raws li HUAB TAIS lo lus ceeb toom tseg lawm. 14 Nws coj tas lub nroog Yes Lus Xas Lus tsoom nom tswv, cov thawj tub rog thiab cov tub rog mus nyob txim txog li kaum txhiab leej neeg, thiab nws coj tas cov kws ntaus nyiaj ntaus hlau tib si mus, tsuas tseg cov neeg pluag neeg txom nyem nyob hauv lub teb chaws xwb. 15 Nws coj tus vaj Yes Hos Yas Kis mus nyob txim nyob Npas Npis Los; nws kuj coj tus vaj niam, tus vaj cov poj niam, cov tub nom tub tswv leg dej num, cov neeg tseem ceeb huv si mus. 16 Kuj tseem muaj cov tub rog yog xya txhiab leej, cov kws ntaus nyiaj ntaus hlau yog ib txhiab leej, cov no yeej tau xyaum ua tub rog txawj tuav riam tuav phom huv tib si, tas sawv daws raug tus vaj Npas Npis Los coj lawv mus nyob txim nyob npas Npis Los tib si thiab.
17 Tus vaj Npas Npis Los tsa Yes Hos Yas Kis tus txiv ntxawm hu ua Mas Tas Nais Yas ua vaj hloov Yes Hos Yas Kis, thiab muab Mas Tas Nais Yas lub npe hloov hu ua Xes Des Kias.

NPN 79: 1B-2, 3-5, 8, 9

Txais: (9) Huab Tais, thov koj cawm peb kom koj lub npe nto koob meej.

Tswv Ntuj, cov kuj cuab tuaj txeeb koj lub cuab tam lawm,
lawv ua tsis zoo rau koj lub tuam tsev ntshiab,
lawv tsoo rhuav Yes Lus Xas Les pob tag.
Lawv muab koj cov tub txib lub cev
pub rau cov noog ya saum ntuj noj,
muab cov ntseeg koj lub cev pub rau ntiaj teb cov tsiaj qus dua.

Txais: (9) Huab Tais, thov koj cawm peb kom koj lub npe nto koob meej.

Lawv nchuav koj cov ntseeg tej ntshav zoo li dej
Uas ntws sis laub sis lug ncig Yes Lus Xas Les,
tsis muaj leej twg yuav faus lawv lub cev.
Cov neeg nyob ze peb ua tub qaug peb,
cov nyob ncig peb thuam peb luag peb.
HUAB TAIS, koj yuav npau taws hov ntev?
Koj puas yuav npau mus li?
Koj txoj kev khib puas yuav kub cuag hluav taws?

Txais: (9) Huab Tais, thov koj cawm peb kom koj lub npe nto koob meej.

Thov koj txhob nco txog peb cov yawg koob tej txhaum , txhob cia peb ris
muab koj lub siab khuv leej neeg tuaj pab peb sai sai,
vim peb poob rau qhov qis kawg nkaus lawm

Txais: (9) Huab Tais, thov koj cawm peb kom koj lub npe nto koob meej..

Tswv Ntuj peb tus cawm seej, thov koj pab peb,
vim koj lub npe nto koob meej lug;
Thov cawm peb thiab zam peb cov txhaum rau peb
vim koj lub npe zoo.

Txais: (9) Huab Tais, thov koj cawm peb kom koj lub npe nto koob meej.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As les lus yas, as les lus yas.

Ntawv Moo Zoo: MT 7: 21-29

Yes Xus hais rau nws cov thwj tim tias:
21 “Tsis yog cov uas hu kuv ua : ‘Huab Tais, Huab Tais,’ yuav tau mus hauv Ntuj lub Ceeb Tsheej tas tus, tsuas yog cov ua raws li kuv Txiv nyob saum ntuj lub siab nyiam xwb thiaj tau mus. 22 Hnub ntawd, yuav muaj coob leej hais rau kuv tias : ‘Huab Tais, Huab Tais, peb twb tau tuav koj lub npe ua yaj saub ne ? Peb twb tau tuav koj lub npe ntiab dab ne ? Peb twb tau tuav koj lub npe ua hwj huam yees ntxwv ne ?’ 23 Ces kuv yuav tab meeg teb rau lawv tias : ‘Kuv tsis tau paub nej dua! Nej txav mus deb ntawm kuv, cov niag neeg ua phem.’
24 Leej twg mloog kuv cov lus uas kuv hais no, thiab nws ua raws li ntawd, mas nws piv tau rau ib tug neeg xyuam xim uas txhim tsev rau saum tsua. 25 Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog ruaj khov rau saum tsua. 26 Hos leej twg hnov kuv cov lus kuv hais no, tab sis nws tsis ua raws li ntawd, mas nws piv tau rau ib tug neeg ruam txhim tsev rau saum tej av suab puam. 27 Thaum los nag hlob, dej sab siv huam, cua tshuab ntsawj lub tsev, ces lub tsev vau tas puas tas tib si.”
28 Thaum Yes Xus hais cov lus ntawd tas, tsoom sid qhuas nws cov lus qhia kawg, 29 vim nws qhia lawv zoo li ib tug neeg muaj hwj chim, tsis zoo li lawv cov Kws Ntawv Ntshiab.

TIM 29 LUB 6 HLI 2018

Hnub Rau Lis Piam Kaum Ob Nruab Xyoo B Nruab Lis Piam Xyoo II

Hwm ob tug Hauv Paus Xa Lus LN Pob Zeb thiab Paj Lug – Thaj Txi Ntuj hnub ntawd

Zaj Nyeem Ib: HAUJ LWM 12: 1-11

1 Kwv yees tib lub sij hawm ntawd, Hes Los ntes ib co neeg nyob hauv lub Koom Txoos thiab tsim txom lawv. 2 Nws kom lawv tua Zam tus tij laug Yas Kos, lawv xuas ntaj tua nws. 3 Thaum Hes Los pom tias cov Yus Das zoo siab rau qhov nws ua ntawd, ces nws tso neeg mus ntes Pob Zeb thiab. Thaum ntawd yog lub caij noj cov ncuav mov tsis rau poov xab. 4 Hes Los kom lawv coj Pob Zeb mus kaw hauv tsev loj faj, muaj plaub pab tub rog zov rawv nws, ib pab muaj plaub leeg. Hes Los npaj tias thaum ua lub Ntees Hla tas nrho, mas nws yuav coj Pob Zeb tawm los rau ntawm tsoom pej xeem xub ntiag. 5 Ces lawv muab Pob Zeb kaw hauv tsev loj faj tos, tiam sis lub Koom Txoos kub siab thov Tswv Ntuj rau Pob Zeb.
6 Txog hnub Hes Los yuav coj Pob Zeb tawm los, hmo ua ntej kiag Pob Zeb pw tsaug zog nyob nruab nrab ob tug tub rog, ob txog hlua khi rawv nws cia, hos tseem muaj ib co zov qhov rooj nyob sab nraud saib lub tsev loj faj thiab. 7 Ib sij huam, Huab Tais tus Tshiab cia li los sawv nyob ze ntawm Pob Zeb, thiab muaj ib qho ci ua kom kem tsev pom kev lug. Tus Tshiab kov Pob Zeb sab tav diaj nws thiab tsa nws sawv, hais rau nws tias : "Koj sawv tsees tam sis no !" Cov saw khi Pob Zeb ob lub caj dab teg cia li plam plaws tas. 8 Tus Tshiab hais ntxiv tias : "Muab koj txoj siv sia thiab rau koj nkawm khau !" Pob Zeb ua li ntawd tas, tus Tshiab hais tias : "Muab koj lub tsho ntev hnav ces koj lawv kuv qab !" 9 Ces Pob Zeb lawv tus Tshiab qab tawm mus. Pob Zeb tsis paub meej tias puas yog tiag, nws xav tias yog nws ua yog toog pom xwb. 10 Nkawd mus hla thawj pab zov keeb, thiab tseem mus dhau pab ob ntxiv thiab, nkawd thiaj txog lub qhov rooj hlau uas yuav tawm sab nraud mus rau hauv nroog. Lub qhov rooj hlau cia li qhib plho rau nkawd, nkawd tawm plaws mus taug ib txog kev, ces tus Tshiab cia li ploj ntais ncaim nws mus lawm. 11 Pob Zeb thiaj tsim dheev, nws hais tias : "Zaum no, kuv paub tseeb lawm tias Huab Tais tau xa nws tus Tshiab tuaj pab kuv kom kuv dim ntawm Hes Los tes thiab kom cov Yus Das txhob tau pom raws li lawv vam vam."

NPN 34: 2-3, 4-5, 6-7, 8-9

Txais: Huab Tais tus tshiab yuav tuaj cawm cov uas hwm nws.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig txoj kev khav yog nyob hauv HUAB TAIS;
tus neeg me yuav hnov kuv thiab yuav zoo siab.

Txais: Huab Tais tus tshiab yuav tuaj cawm cov uas hwm nws.

Nej nrog kuv cav txog HUAB TAIS,
peb sawv daws ua ke qhuas nws lub npe.
Kuv nrhiav HUAB TAIS; nws teb kuv,
Nws cawm kuv dim ntawm tas kuv tej kev ntshai.

Txais: Huab Tais tus tshiab yuav tuaj cawm cov uas hwm nws..

Nej vam txog HUAB TAIS, ces kev zoo siab yuav ua nej ci ntsa iab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog
thiab yuav cawm nws ntawm tas nws tej kev nyuaj ntxhov.

Txais: Huab Tais tus tshiab yuav tuaj cawm cov uas hwm nws.

HUAB TAIS tus tshiab tsa tsev tsam phooj
ncig cov neeg hwm HUAB TAIS, nws cawm lawv.
Nej saj ces nej yuav pom tias HUAB TAIS siab zoo npaum li cas.
Tus muab HUAB TAIS ua nws lub chaw nkaum tau txoj hmoov zoo.

Txais: Huab Tais tus tshiab yuav tuaj cawm cov uas hwm nws.

Zaj Nyeem Ob: 2 TMT 4: 6-8, 17-18

6 Ntawm kuv, Paj Lug, mas luag twb muab kuv hliv los txi Ntuj lawm, twb txog lub caij kuv yuav ncaim mus lawm. 7 Kuv tau sib tw txaus, kuv khiav mus txog chaw lawm; kuv tau ceev txoj kev ntseeg cia. 8 Nyem no mus, lub kaus mom muaj kev ncaj nyob tos kuv lawm xwb. Yog Huab Tais tus txiav txim ncaj yuav muab rau kuv thaum txog hnub ntawd, tsis yog muab rau kuv ib leeg xwb, nws tseem yuav muab rau tas ib tsoom neeg nyiam nws thiab tos ntsoov lub caij nws yuav los.
17 Huab Tais yog tus tau pab kuv thiab muab nws lub zog rau kuv kom kuv tshaj lo lus kom lo lus nrov mus txog cov neeg teev pej kum dab pob ntseg. Nws tau npo kuv dim ntawm tsov ntxhuav lub qhov ncauj. 18 Huab Tais yuav npo kuv dim ntawm txhua yam kev phem thiab yuav txuag kuv kom kuv mus txog nws lub Ceeb Tsheej nyob saum Ntuj. Thov kom Huab Tais nto koob meej mus ib txhiab ib txhis. Ua li.

As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, nyob saum lub pob zeb no,
kuv yuav txhim kuv lub Koom Txoos.
Dab phem teb cov rooj vag yuav tiv tsis yeej lub pob zeb no.

R. Alleluia, alleluia Txais: As les lus yas, as les lus yas.

Ntawv Moo Zoo: MT 16: 13-19

13 Thaum Yes Xus tuaj txog cheeb tsam ntawm Xes Ntxas Les Fis Lis Pos, nws nug cov thwj tim tias : "Luag tej hais tias Neeg Leej Tub yog leej twg ?" 14 Lawv teb tias : “Ib txhia hais tias yog Zam Ntxuav Plig, ib txhia hais tias yog Es Lias, tseem muaj lwm cov hais tias yog Yes Les Mias los yog ib tug hauv cov yaj saub.” Yes Xus hais tias : 15 "Nej ne, nej hais tias kuv yog leej twg ?" 16 Xis Moos Pob Zeb teb tias : "Koj yog Leej Pleev, yog tus Tswv Ntuj Muaj Txoj Sia Leej Tub." 17 Yes Xus teb rau Pob Zeb tias : "Xis Moos, Yos Nas tub, koj txoj hmoov zoo, vim tsis yog nqaij thiab ntshav qhia koj paub txog qhov no, yog kuv Txiv nyob saum ntuj qhia koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no, ces dab phem teb cov rooj vag yuav tiv tsis yeej nws. 19 Kuv yuav muab Ntuj lub Ceeb Tsheej cov yawm sij rau koj tuav. Koj khi yam twg nyob ntiaj teb no, yam ntawd yuav raug khi nyob saum ntuj. Koj daws yam twg nyob ntiaj teb no, yam ntawd yuav raug daws nyob saum ntuj."

TIM 30 LUB 6 HLI 2018

Hnub Xya Lis Piam Kaum Ob Nruab Xyoo B Nruab Lis Piam Xyoo II

Hwm Thawj cov LN Tuag Ua Tim Khawv hauv Koom Txoos Kas Tos Liv

Zaj Nyeem Ib: SEEV 2: 2, 10-14, 18-19

2 HUAB TAIS hlawv Yas Kos cov vaj tse tas huv si, nws tsis hlub lawv li; nws npau taws, nws tsoo cov yeej ntsa zeb thaiv tus ntxhais Yus Das tawg tas; nws muab lawv pov tseg rau hauv av; nws ua kom lub teb chaws thiab cov tswj teb chaws tau kev poob koob meej
10 Cov neeg laus hauv tus ntxhais Xis Yoos zaum ntsiag to hauv av, lawv nphoo plua tshauv rau lawv taub hau, lawv npua hnab tsaj. Cov ntxhais nyob Yes Lus Xas Les nyo hau rau hauv av.
11 Kuv quaj ua rau kuv qhov muag puas tas, kuv plab plaw ntsoog tas; kuv siab ntsws lwj mus ntxaum av vim tus ntxhais nyob hauv kuv haiv neeg puas ntsoog tas lawm, ua rau cov me nyuam yau thiab cov me nyuam mos tsaus muag ntog pawg lug hauv tej tshav puam hauv lub Tsheej.
12 Cov me nyuam nug lawv niam tsis tseg tias : "Mov nyob qhov twg ?” Lawv tsaus muag zoo li cov neeg raug mob hnyav nyob ntawm tej tshav puam hauv nroog, ces lawv tas txoj sia nyob hauv lawv niam xub ntiag.
13 Ntxhais Yes Lus Xas Les, kuv yuav piav li cas txog koj, yuav muab koj piv rau dab tsi? Ntxhais Xis Yoos, kuv yuav hais tias koj zoo dab tsi, thiaj yuav nplij tau koj ? Vim koj txoj kev puas kev ntsoog loj cuag li lub hiav txwv, leej twg thiaj yuav kho tau koj ?
14 Koj cov yaj saub tau pom tej yam cuav tsis muaj tseeb txog koj, ua kom fam koj qhov muag; lawv tsis hais koj cov txhaum meej rau koj thiaj yuav pab tau koj maim dhau txoj hmoov phem. Lawv tsuas pom tej yam cuav uas tau coj koj mus yuam kev xwb.
18 Ntxhais Xis Yoos lub ntsa loog zeb, koj quaj hu txog HUAB TAIS! Nruab hnub hmo ntuj, koj ua kua muag poob, cia kom ntws zoo li ib tug dej, tsis txhob pub koj tau so, tsis txhob cia koj qhov muag tau qi.
19 Hmo ntuj koj sawv, koj tsa suab quaj, raws txhua txhua lub caij pib zov hmo; qhib koj lub siab cia tawm ntws lug li dej nyob ntawm HUAB TAIS xub ntiag; tsa koj ob txhais tes rau nws, thov kom nws pab koj cov me nyuam txoj sia, vim lawv tshaib plab tsaus muag tas rau ntawm txhua txoj hau kev.

NPN 74: 1-2, 3-5, 6-7, 20-21

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

Tswv Ntuj, vim li cas koj muab peb tso pov tseg ntev ua luaj?
Vim li cas koj ua kev npau taws ncho pa lug rau koj pab yaj nyob hauv koj lub nras zaub?
Thov koj rov nco txog koj pab yaj uas koj tau tu txij thaum ub los lawm,
koj haiv neeg uas koj tau txhiv los ua koj lub cuab tam,
lub roob Xis Yoos uas koj xaiv los ua koj lub chaw nyob.

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

Tig koj ko taw tshais ruam mus ncig tej qub vaj tse uas vau tas.
Mus ncig koj lub tsev ntshiab uas yeeb ncuab tau ua phem npaum li cas rau.
Lawv tuaj qw ntshos tsuam tias lawv yeej lawm nyob hauv koj lub tuam tsev;
lawv tsa lawv tus chij rau ntawd ua cim ncoi tias lawv txoj kev yeej.
Lawv ua zoo li ib pab neeg nqa taus yuav tuaj ntov ib koog ntoo.

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

Lawv xuas txaug thiab xuas rauj tsoo cov phab ntsa kom tawg tas,
Lawv xuas taws hlawv koj lub tuam tsev kom kub hnyiab,
ua kom nws vau ti av; lawv tau thuam lub tsev teev koj lub npe.

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

Thov koj nco txog lo lus koj tau cog rau peb!
vim tej qhov tsua hauv lub teb chaws hloov ua chaw sib nkaug sib tua tas.
Thov kom tus uas raug luag quab yuam txhob poob ntsej muag ntxiv,
kom tus neeg me thiab tus txom nyem cav lus zoo txog koj lub npe !

Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

As Les lus Yas: MT 8: 17

Txais: As les lus yas, as les lus yas.

Leej Pleev tshem peb tej kev ceg tawv,
nws ris peb tej kev mob kev ntsaj.

Txais: As les lus yas, as les lus yas.

Ntawv Moo Zoo: MT 8: 5-17

5 Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias : 6 "Huab Tais, kuv tus tub txib pw tom tsev, nws tes taw tuag tas. Nws mob hnyav kawg." 7 Yes Xus teb tias : "Kuv yuav mus kho nws." 8 Tus xab txheeb hais ntxiv tias : "Huab Tais, kuv tsis tsim nyog koj chaws los hauv kuv tsev, tsuav yog koj hais ib los lus xwb ces kuv tus tub txib yuav zoo hlo. 9 Txawm tias kuv yog ib tug neeg zwm rau tus loj, kuv kuj muaj ib co tub rog zwm rau kuv thiab. Yog kuv hais rau ib tug tias : 'Koj mus !' nws cia li mus, kuv ho hais rau lwm tus tias : 'Koj los,' nws kuj cia li los. Kuv hais rau kuv tus tub txib tias : 'Koj ua qhov no !' nws cia li ua.’" 10 Yes Xus hnov nws hais li ntawd, Yes Xus qhuas. Yes Xus hais rau cov neeg raws nws tias : "Kuv hais tseeb rau nej, kuv tsis tau pom ib tug neeg ntseeg npaum li ntawd hauv cov His Xas Lais. 11 Kuv hais rau nej, yuav muaj neeg coob tuaj Toob Fab thiab Xib Fab tuaj nrog Has Nplas Has, nrog His Xas Has thiab Yas Kos noj rooj qav hauv Ntuj lub Ceeb Tsheej. 12 Hos Ntuj yuav muab cov tub hauv Ceeb Tsheej rho mus pov rau hauv qhov tsaus ntuj nraum zoov : nyob nraud, sawv daws yuav quaj tom hniav nkawv.” 13 Yes Xus hais rau tus xab txheeb tias : "Koj rov mus ! Koj yuav tau raws li koj lub siab ntseeg !" Ces tam sis ntawd, tus tub txib zoo hlo.
14 Yes Xus mus hauv Pob Zeb tsev. Nws pom Pob Zeb niam tais pw saum txaj, mob kub cev. 15 Yes Xus tuav nws txhais tes, tus mob kub cev thim hlo. Ces Pob Zeb niam tais sawv los, nws tsob hwb Yes Xus.
16 Yav tsaus ntuj, luag coj ib co neeg raug dab coob leej tuaj cuag Yes Xus. Nws hais ib lo lus los ntiab cov dab ntawd thiab nws kho cov neeg mob zoo tas huv si. 17 Ua li mas muaj raws li Yaj Saub His Xais lo lus tias : “ Nws tshem peb tej kev ceg tawv, nws ris peb tej kev mob kev ntsaj.”

TIM 2 LUB 7 HLI 2018

Hnub Ob Lis Piam Kaum Peb Nruab Xyoo B Nruab Lis PiamXyoo II

Zaj Nyeem Ib: AM 2: 6-10, 13-16

6 HUAB TAIS hais li no:
“Vim His Xas Lais peb qho txhaum thiab plaub qho,
Mas kuv tau txiav txim lawm kuv yuav tsis thim xav:
7 Yog vim lawv muab tus neeg ncaj muag yuav nyiaj
thiab muab tus neeg pluag pauv ib nkawm khau khiab;
Lawv muab tus neeg tsis muaj peev xwm taub hau tsuj ntiag rau hauv av
thiab ntiab tus neeg me tseev kom txav tawm txhob thaiv lawv kev;
leej tub thiab leej txiv ob leeg koom mus deev ib tug poj ntiav,
ces nkawd ua tsis hwm kuv lub npe ntshiab;
8 yog vim lawv hnav cov tsho uas luag coj tuaj yuam nqi cia
coj mus pw ze ntawm txhua lub thaj txi dab,
thiab lawv haus cov neeg tshuav lawv nqi tej cawv
nyob hauv cov tsev teev lawv cov dab.
9 Kuv yog tus tau ua kom cov As Mos Lis swb rau lawv
txawm cov As Mos Lis loj siab cuag cov ntoo ciab
txawm lawv khov npaum cov ntoo qhib;
kuv tau txiav lawv cov txiv uas nyob saud
thiab tau lawv cov cag uas nyob hauv.
10 Kuv yog tus tau coj nej tawm ntawm Hais Nkws Tos teb los,
Thiab coj nej ncig tau plaub caug xyoo nyob teb chaws suab puam
nej mam los txeeb tau cov As Mos Lis lub te chaws ua nej lub.
13 Hais rau nej paub, kuv yuav siv zog muab nej tsuj zom rau hauv av
xws li ib lub tsheb nog tau hnyav hnyav zom nyob ntawm chaw.
14 Tus neeg nrawm yuav khiav tsis taus,
hos tus neeg muaj zog yuav siv tsis tau nws lub zog,
tus neeg siab tawv yuav cawm tsis tau nws txoj sia;
15 tus tua hneev yuav nyob tiv tsis taus ntxiv,
tus neeg taw nrawm yuav khiav tsis dim,
tus caij nees yuav cawm tsis tau nws txoj sia,
16 hos tus neeg siab tawv tshaj nyob hauv tsoom neeg siab tawv
yuav khiav liab qab ploog thaum txog hnub ntawd;” HUAB TAIS hais li.

NPN 50: 16BC-17, 18-19, 20-21, 22-23

Txais: (22a) Nej cov uas tsis nco txog Tswv Ntuj li, nej nco ntsoov qhov no.

“Vim li cas nej qog kuv cov kev cai lij choj
thiab lees kuv txoj kev cog lus ntawm nej lub ncauj,
tiam sis nej ntxub txoj cai nruj
thiab muab kuv cov lus pov tseg nraum nej nrob qaum?”

Txais: (22a) Nej cov uas tsis nco txog Tswv Ntuj li, nej nco ntsoov qhov no.

Nej pom ib tug tub sab thaum twg, nej caum kom tau nws qab,
Nej txaus siab hlo nrog cov deev luag txij nkawm ua ke.
Nej qhib ncauj lug hais lus phem,
Nej tso plhuav nej tus nplaig hais qhov dag.

Txais: (22a) Nej cov uas tsis nco txog Tswv Ntuj li, nej nco ntsoov qhov no.

koj zaum tsaws hais lus phem txog koj tus kwv tij,
koj xyav lus moo cua txog koj niam tus tub.
Thaum koj ua zoo li no, kuv puas yuav tsum ua ntsej lag muag dig?
Los koj puas xav tias kuv zoo nkaus li koj?
Zaum no kuv yuav muab txim rau koj, yuav hais meej kom koj pom tseeb.”

Txais: (22a) Nej cov uas tsis nco txog Tswv Ntuj li, nej nco ntsoov qhov no.

Nej yuav tsum mloog, nej cov uas tsis quav ntsej txog Tswv Ntuj,
Tsis li ces kuv yuav muab nej rhuav, yuav tsis muaj neeg cawm tau nej.
Tus uas cev ib co lus zoo los txi Ntuj, tus ntawd ua kuv nto koob meej.
Tus neeg taug txoj kev ncaj, kuv yuav pub nws pom Tswv Ntuj txoj kev cawm.

Txais: (22a) Nej cov uas tsis nco txog Tswv Ntuj li, nej nco ntsoov qhov no.

As Les Lus Yas: NPN 95: 8

Txais: As les lus yas, as les lus yas.

Yog hnub no, nej hnov nws lub suab,
txhob cia nej lub siab tawv ncauj.

Txais: As les lus yas, as les lus yas.

Ntawv Moo Zoo: MT 8: 18-22

18 Yes Xus pom neeg coob tuaj ntsauv nws, nws kom lawv mus lawm sab ntug dej tim ub. 19 Ces muaj ib tug Kws Ntawv Ntshiab txav los hais rau nws tias : "Xib Hwb, txawm koj mus qhov twg, los kuv yuav raws koj mus." 20 Yes Xus teb rau nws tias : "Hma muaj hma lub qhov nkaum, cov noog saum ntuj, lawv kuj muaj lawv lub zes nyob, hos Neeg Leej Tub tsis muaj chaw rau ncoo li." 21 Nyob hauv cov thwj tim, muaj ib tug hais rau Yes Xus tias : "Huab Tais, thov koj cia kuv mus faus kuv txiv tso." 22 Tab sis Yes Xus hais rau nws tias : "Koj raws kuv mus, cia cov tuag mam li faus lawv cov tuag."

TIM      3      LUB      7      HLI      2018

Hnub Peb Lis Piam Kaum Peb Nruab Xyoo B Nruab Lis Piam Xyoo II



Hwm LN Tos Mas, tus Hauv Paus Xa Lus.

Zaj Nyeem Ib:        EFX  2:   19-22

Paj Lus sau ntawv tias:
19 Li ntawd, nej tsis yog ib co pej kum neeg, los ib co qhua ntxiv : nej nrog cov ntshiab ua pej xeem koom ib lub teb chaws, nej yog Tswv Ntuj tsev neeg,
20 yog ib lub tuam tsev txhim rau saum cov Hauv Paus Xa Lus thiab cov Yaj Saub, lawv ua taw ntsa, Yes Xus Pleev ua lub pob zeb txheem tas lub tsev.
21  Leej Pleev ua kom lub tuam tsev sib dhos zoo sib tuav ruaj thiab hlob ua ib lub Tuam Tsev Ntshiab nyob hauv Huab Tais.
22 Nyob hauv Leej Pleev, nej sawv daws ua ke kuj raug tsa ua ib lub tuam tsev cia rau Tswv Ntuj nyob, nyob  hauv Leej Ntuj Plig.

NPN        117:   1BC, 2

Txais:  (Mas Kos 16:15) Nej mus thoob qab ntuj, nej tshaj lub Moo Zoo.
los: As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais:  (Mas Kos 16:15) Nej mus thoob qab ntuj, nej tshaj lub Moo Zoo.
los: As les lus yas.

Huab Tais lub siab hlub peb nyob ruaj nreb,
nws lub siab pheej xeeb mus ib txhiab ib txhis.

Txais:  (Mas Kos 16:15) Nej mus thoob qab ntuj, nej tshaj lub Moo Zoo.
los: As les lus yas.

As Les Lus Yas:        ZAM  20:   29

Txais: As les lus yas, as les lus yas.

Huab Tais hais tias: "Tos Mas, koj ntseeg vim koj pom kuv.
Cov uas tsis tau pom tab sis lawv ntseeg, mas lawv txoj hmoov zoo!"

Txais: As les lus yas, as les lus yas.

Ntawv Moo Zoo:       ZAM  20:   24-29

24 Tos Mas yog ib tug hauv pab Kaum Ob, nws tseem hu ua Dis Dws Mos thiab. Thaum Yes Xus tawm los, nws tsis nrog cov thwj tim nyob. 25 Lwm cov thwj tim hais rau nws tias : "Peb pom Huab Tais lawm !" Ces Tos Mas hais rau lawv tias : "Yog kuv tsis pom lub qhov ntsia hlau nyob hauv nws ob txhais tes, yog kuv tsis tau muab kuv tus ntiv tes ntxig lub qhov ntsia hlau, thiab yog kuv tsis muab kuv txhais tes ntxig ntawm nws phab tav, mas kuv tsis ntseeg." 26 Yim hnub tom qab, cov thwj tim rov nyob hauv tsev dua. Tos Mas kuj nrog lawv nyob thiab. Cov qhov rooj puav leej kaw tas. Yes Xus tawm los sawv hauv nruab nrab, nws hais rau lawv tias : "Nej nyob kaj lug !" 27 Ces Yes Xus hais rau Tos Mas tias : "Cev koj ntiv tes rau ntawm no, koj ntsia kuv ob txhais tes. Cev koj txhais tes los, muab ntxig rau hauv kuv phab tav. Koj txhob ua neeg tsis ntseeg ntxiv, koj ntseeg mog." 28 Tos Mas teb rau Yes Xus tias : "Kuv tus Huab Tais, Kuv tus Tswv Ntuj." 29 Yes Xus hais rau Tos Mas tias : "Vim koj pom kuv, mas koj thiaj ntseeg. Cov uas tsis tau pom tab sis lawv ntseeg, mas lawv txoj hmoov zoo."

TIM 4 LUB 7 HLI 2018

Hnub Plaub Lis Piam Kaum Peb Nruab Xyoo B Nruab Lis Piam Xyoo II

Hnub lub teb chaws USA tau txais kev twj lij

Zaj Nyeem Ib: AM 5: 14-15, 21-24

14 Nej kav tsij nrhiav qhov zoo, tsis txhob nrhiav qhov phem, kom nej muaj txoj sia. Ces HUAB TAIS, tus Tswv Ntuj kav tsoom tshiab, thiaj yuav nrog nej nyob, zoo li nej hais. 15 Nej ntxub qhov phem nyiam qhov zoo thiab nej ua kom muaj kev ncaj ncees nyob ntawm lub rooj loog . Ces nyaj tej zaud HUAB TAIS, tus Tswv Ntuj kav tsoom tshiab, yuav khuv leej pab seem nyob hauv Yos Xes tsev neeg.
21 Kuv ntxub, kuv tsis txaus siab rau nej tej hnub nyoog ua ntees nqaum paj nqaum nruas, thiab kuv tsis xav hnia tej pa thaum nej tuaj ua kev sib txoos loj. 22 Thaum nej ua tej thaj hlawv tsiaj txi ntuj thiab cev qoob loo, kuv yuav tsis txais; kuv yuav tsis ntsia nej tej tsiaj rog rog uas nej muab txi rau kuv los nrhiav kev thaj yeeb. 23 Nej ua kom nej tej suab nkauj txav mus deb ntawm kuv, vim kuv tsis xav hnov nej tej twj nkauj paj nruag ! 24 Kom txoj kev ncaj ntws li dej , thiab kom txoj kev ua zoo ntws li ib tug dej txhawv tsis txawj tu.

NPN 50: 7, 8-9, 10-11, 12-13, 16BC-17

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Kuv haiv neeg, nej mloog mog, kuv yuav hais lus.
His Xas Lais, kuv yuav hais lus thuam nej :
Kuv yog Tswv Ntuj, yog nej tus Tswv Ntuj.

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Kuv cem nej tsis yog vim cov tsiaj nej txi rau kuv ;
cov tsiaj nej hlawv txi Ntuj nyob ntawm kuv xub ntiag tsis tseg.
Kuv tsis xav yuav ib tug heev nyuj hauv nej tsev,
tsis xav yuav ib tug tshis hauv nej nkuaj li.

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Vim tas cov tsiaj nyob hauv hav zoov,
thiab cov tsiaj nog zaub pem tej hauv sab, yog kuv li.
Kuv paub txhua tsav noog ya saum tej roob tib si.
Txhua tus tsiaj qus nyob hauv tej tiaj nras yog kuv tug.

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Yog kuv tshaib plab, tsis tas kuv yuav hais qhia nej.
Vim lub qab ntuj khwb thiab tas ib puas tsav yam nyob hauv, yog kuv tug.
Kuv puas noj tej heev nyuj muaj zog tej nqaij,
los puas muab tej ntshav tshis ua dej haus?

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

Nej qog kuv cov lus qhia ua dab tsi,
nej lub ncauj hais kuv cov lus cog ua dab tsi,
nej twb yog tus ntxub kuv tej kev qhuab qhia,
thiab muab kuv cov lus pov tseg rau tom nej nraub qaum ?

Txais: (23b) Kuv yuav muab Tswv Ntuj lub hwj huam
cawm neeg rau tus neeg siab ncaj pom.

As Les Lus Yas: YK 1: 18

Txais: As les lus yas, as les lus yas.

Leej Txiv pom zoo ua kom peb yug los nyob hauv lo lus qhia qhov tseeb,
kom peb yog thawj cov txiv txi hauv txhua yam uas nws tsim los.

Txais: As les lus yas, as les lus yas.

Ntawv Moo Zoo: MT 8: 28-34

28 Thaum Yes Xus tuaj txog sab ntug dej tim ub, txog rau Nkas Das Las teb chaws, muaj ob tug neeg raug dab tawm hauv cov ntxa tuaj cuag Yes Xus. Nkawd tsiv tsaim kawg, tsis muaj leeg twg muaj cuab kav taug txoj kev ntawd li. 29 Ob tug ntawd qw nrov nrov tias : "Tswv Ntuj Leej Tub, koj thiab peb muaj lus dab tsi? Tsis tau txog lub caij, koj txawm siv tuaj tsim txom peb ntawm no lod ?" 30 Nyob ib qho deb tsis heev ntawd, muaj ib pab npua coob tab tom noj zaub. 31 Cov dab thov Yes Xus tias : "Yog koj ntiab peb tawm, thov koj cia peb mus nyob hauv pab npua tod." 32 Yes Xus teb tias : "Kav tsij mus." Cov dab tawm plaws nkag mus nyob hauv cov npua, ces tas pab npua dhia puag saum tsag tob rau hauv dej ntuj, pab npua tuag tas rau hauv dej. 33 Cov tub zov npua tso tes khiav mus hauv nroog, lawv mus piav tas txhua yam txog tej xwm tshwm sim rau ob tug neeg raug dab ntawd. 34 Ces tas lub nroog tawm tuaj cuag Yes Xus. Thaum lawv pom nws, lawv thov kom nws tawm hauv lawv lub teb chaws mus.

TIM 5 LUB 7 HLI 2018

Hnub Tsib Lis Piam Kaum Peb Nruab Xyoo B Nruab Lis Piam Xyoo II

Hwm LN Anthony Zaccaria; LN Elizabeth nyob Portugal

Zaj Nyeem Ib: AM 7: 10-17

10 As Mas Xias, tus Leej Choj nyob Npes Thes, tso neeg mus hais rau Yes Los Npuag tus vaj His Xas Lais tias : "As Mos ntxias tsev neeg His Xas Lais kom lawv ntxeev siab rau koj. Lub teb chaws nyiaj tsis tau nws tej lus ntxiv lawm. 11 Vim As Mos hais zoo li no : ‘Yes Los Npuag yuav raug ntaj tua, thiab tsoom His Xas Lais yuav tawm ntawm lawv teb chaws mus nyob txim.’"
12 Ces As Mas Xias hais rau As Mos tias : "Niag txawj ua saub, koj cia li khiav, koj khiav mus nyob Yus Das teb! Koj mus ua Saub nyob ntawd nrhiav noj nrhiav haus. 13 Koj tsis txhob ua Saub nyob Npes Thes ib zaug ntxiv. Vim yog tus vaj qhov chaw ntshiab thiab nws lub tuam tsev teev Ntuj." 14 As Mos teb rau As Mas Xias tias : "Kuv ib txwm tsis tau ua saub, los yog ua thwj tim nrog ib pab saub. Kuv ib txwm yog neeg zov yaj thiab neeg tu cov ntoo xis kas mos xwb. 15 Tiam sis HUAB TAIS tau tuaj hu kuv ntawm kuv pab yaj, nws hais rau kuv tias: ‘Koj mus ua Yaj Saub rau kuv haiv His Xas Lais.’ 16 Nyem no koj yuav tsum mloog HUAB TAIS lo lus. Koj hais tias kom kuv txhob ua Yaj Saub cem His Xas Lais, kom kuv txhob hais lus qhuab qhia His Xas Has tsev neeg. 17 Mas zaum no HUAB TAIS hais li no : Koj tus poj niam yuav tab meeg mus ua poj ntiav nyob hauv nroog, thiab koj cov tub koj cov ntxhais yuav raug ntaj tua; koj tej liaj tej teb yuav raug luag muab kos ua tej kab sib faib yuav; koj tus kheej yuav mus tuag nyob hauv ib lub teb chaws tsis huv. His Xas Lais yuav raug mus nyob txim deb deb lawv teb lawv chaws."

NPN 19: 8, 9, 10, 11

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog yuav,
nws ua kom tus neeg ruam thoob tsib tuaj.

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus qhia meej kawg nkaus,
ua kom qhov muag pom kev.

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
Txhua lo lus nws txiav yog qhov ncaj.

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

Nws cov lus txiav txim, tsim nyog ntshaw dua kub,
Tsim nyog ntshaw dua ib txhab tseem kub,
qab zib dua cov kua zib,
los cov zib mu ntawm daim nas muv.

Txais: (10cd) Huab Tais cov lus txiav txim yog lus tseeb,
txhua lo lus nws txiav yog qhov ncaj.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb neeg nrog
nws rov sib haum xeeb nyob hauv Leej Pleev,
nws xav kom peb tshaj tawm txog lub
moo zoo ntawm txoj kev sib haum xeeb ntawd.

Txais: As les lus yas, as les lus yas.

Ntawv Moo Zoo: MT 9: 1-8

1 Yes Xus nce mus hauv nkoj, nws hla dej rov los txog nws lub nroog. 2 Thaum ntawd, luag nqa ib tug tuag ceg pw saum ib lub txaj tuaj rau Yes Xus. Yes Xus pom lawv ntseeg, nws hais rau tus tuag ceg tias : "Me tub, koj tso siab mog! Koj cov txhaum daws tas lawm." 3 Thaum ntawd, muaj ob peb tug Kws Ntawv Ntshiab xav twj ywm hauv nruab siab tias : ‘Tus neeg ntawd thuam Ntuj.’ 4 Tab sis Yes Xus paub qhov lawv xav, nws hais tias : "Vim li cas nej xav tej yam phem rau nruab siab ? 5 Lo lus twg hais yooj yim dua, puas yog lo tias : 'Koj cov txhaum daws tas lawm,' los yog lo tias 'Koj sawv mus kev.’ ? 6 Tiam sis kom nej paub tias Neeg Leej Tub muaj lub hwj huam daws txhaum tau nyob ntiaj teb no," cesYes Xus hais rau tus tuag ceg tias : "Koj sawv, nqa koj lub txaj, koj rov mus tsev". 7 Ces tus tuag ceg sawv, thiab nws rov mus nws lub tsev. 8 Tsoom sid pom li ntawd, sawv daws qhuas kawg. Lawv cav txog Tswv Ntuj vim nws pub lub hwj huam loj npaum li no rau tib neeg.

TIM 6 LUB 7 HLI 2018

Thawj Hnub Rau Lis Piam Kaum Peb Nruab Xyoo B Nruab Lis Piam Xyoo II

Thawj Hnub Rau hauv lub hlis yog ib hnub uas Yes Xus tau xav kom peb ua kev thov ntuj tshwj xeeb txog nws lub Plawv Ntshiab. Yog peb leej twg muaj caij mas peb yuav tsum tau mus koom thaj Txi Ntuj thiab txais Yes Xus lub Cev los ua kev them txim txhaum. Yes Xus tau hais cov lus no rau LN Marguerite Marie Alacoque: "Vim kuv lub Plawv muaj kev khuv leej ntau puv phwj yaws, kuv thiaj cog lus tias kuv txoj kev hlub muaj hwj huam loj tas nrho yuav pub rau cov neeg uas mus txais lub Cim Yug hauv Thawj Hnub Rau cuaj lub lub hlis sib law, lub txiaj ntsim kom tau txoj kev daws txhaum thaum kawg: lawv yuav tsis tuag nyob hauv kuv txoj kev npau taws, lawv yuav tau xub txais cov Cim thaum kawg tso; ces kuv lub Plawv yuav yog lawv qhov chaw vam khom tso siab lug thaum lawv lub caij kawg ntawd."

Los hwm LN Maria Goretti, tuag ua Tim Khawv

Zaj Nyeem Ib: AM 8: 4-6, 9-12

4 Nej cov uas tsuj ntiag cov txom nyem thiab rhuav cov pluag nyob hauv lub teb chaws, nej mloog kuv hais . 5 Nej hais tias : "Thaum twg hli xiab mam dhau kom peb tau muag peb cov qoob lau ? Thaum twg Xas Npas Tos mam dua, kom peb tau muag peb cov nplej mov mog? Peb yuav xuas cov kawm yau tsis txwm tawv los yeem, yuav siv thooj hlau kom hnyav tshaj, yuav kho kom peb rab teev tsis txwm choj thaum peb luj. 6 Peb yuav muab nyiaj los muas cov neeg pluag, yuav muab ib nkawm khau khiab los muas cov neeg txom nyem. Tab yog cov nplej muaj npluag ntau los peb tseem yuav sau nqe tib si."
9 HUAB TAIS Tswv Ntuj ceeb toom li no tias : “Hnub ntawd kuv yuav ua kom lub hnub poob qho thaum tav su, kuv yuav ua lub ntiaj teb tsaus ntuj nti thaum nruab hnub nrig. 10 Kuv yuav ua kom nej tej hnub nyoog lom zem hloov ua hnub nyoog tu siab, nej tej zaj kwv txhiaj yuav hloov ua tej zaj nyiav. Kuv yuav ua kom nej txhua tus npua ntaub tsaj thiab kom nej txhua tus taub hau do. Kuv yuav ua kom muaj kev quaj kev nyiav loj npaum nkaus li thaum muaj ib tug tub twm zeej ploj; ces hnub ntawd lawv yuav kawg rau kev txom nyem loj.” 11 Huab Tais Tswv Ntuj hais tias: Yeej yuav muaj ib lub caij uas kuv yuav xa kev tshaib kev nqhis tuaj rau lub teb chaws; tsis yog tshaib mov los nqhis dej, tiam sis yog tshaib nqhis kev mloog HUAB TAIS lo lus. 12 Lawv yuav taug kev ua loj leeb txij ib lub hiav txwv mus rau lwm lub, txij pej fab mus rau toob fab, lawv yuav nrhiav HUAB TAIS lo lus, tab sis lawv yuav nrhiav tsis tau !

NPN 119: 2, 10, 20, 30, 40, 131

Txais: (MT 4:4) Neeg tsis kawg muab mov xwb los yug siav,
neeg tseem muab txhua lo lus tawm ntawm
Tswv Ntuj lub ncauj los yug siav thiab."

Cov tau txoj hmoov zoo yog cov coj HUAB TAIS txoj cai,
yog cov nrhiav nws tas siab tas ntsws.

Txais: (MT 4:4) Neeg tsis kawg muab mov xwb los yug siav,
neeg tseem muab txhua lo lus tawm ntawm
Tswv Ntuj lub ncauj los yug siav thiab.".

Kuv nrhiav koj tas siab tas ntsws,
Thov koj txhob cia kuv yuam kev mus deb koj cov lus qhia.

Txais: (MT 4:4) Neeg tsis kawg muab mov xwb los yug siav,
neeg tseem muab txhua lo lus tawm ntawm
Tswv Ntuj lub ncauj los yug siav thiab."

Kuv tus plig yuj pluj plaws nqhis txog
koj cov cai lij choj txhua lub sij hawm.

Txais: (MT 4:4) Neeg tsis kawg muab mov xwb los yug siav,
neeg tseem muab txhua lo lus tawm ntawm
Tswv Ntuj lub ncauj los yug siav thiab."

Kuv tau xaiv txoj kev tseeb taug,
kuv lub siab ua raws nraim koj cov cai koj txiav.

Txais: (MT 4:4) Neeg tsis kawg muab mov xwb los yug siav,
neeg tseem muab txhua lo lus tawm ntawm
Tswv Ntuj lub ncauj los yug txoj sia thiab."

Koj ntsia saib, kuv nyiam koj cov cai lij choj tiag,
thov koj muab txoj sia rau kuv vim koj muaj kev ncaj ncees.

Txais: (MT 4:4) Neeg tsis kawg muab mov xwb los yug siav,
neeg tseem muab txhua lo lus tawm ntawm
Tswv Ntuj lub ncauj los yug siav thiab."

Kuv rua ncauj txog siav huas pa,
Vim kuv tshaib nqhis koj cov lus qhia.

Txais: (MT 4:4) Neeg tsis kawg muab mov xwb los yug siav,
neeg tseem muab txhua lo lus tawm ntawm
Tswv Ntuj lub ncauj los yug siav thiab."


As Les Lus yas: MT 11: 28

Txais: As les lus yas, as les lus yas.

Huab Tais hais tias: "Tas nej sawv daws uas nej khwv thiab
ris nra hnyav, nej tuaj cuag kuv, kuv yuav cia nej so los siav.

Txais: As les lus yas, as les lus yas.

Ntawv Moo Zoo: MT 9: 9-13

9 Thaum Yes Xus tab tom taug kev mus ntxiv dhau ntawd, nws pom ib tug neeg hu ua Mas Tais zaum ntawm lub rooj sau se. Yes Xus hais rau nws tias : "Koj raws kuv mus !" Ces tus neeg ntawd sawv tsees raws Yes Xus mus. 10 Thaum Yes Xus zaum noj mov hauv (Mas Tais) tsev, muaj ib co neeg sau se thiab ib co neeg txhaum coob tuaj nrog Yes Xus thiab cov thwj tim noj mov. 11 Cov Fas Lis Xais pom li ntawd, ces lawv hais rau cov thwj tim tias : "Vim li cas nej tus Xib Hwb nrog cov sau se thiab cov neeg txhaum noj mov ?" 12 Yes Xus hnov qhov lawv hais, nws teb tias : "Tsis yog cov neeg noj qab nyob zoo thiaj vam txog kws kho mob, tsuas yog cov neeg muaj mob thiaj vam txog xwb. 13 Nej yuav kawm lo lus no lub ntsiab cia: 'Qhov kuv xav tau yog txoj kev khuv leej, tsis yog thaj txi Ntuj.' Vim kuv tsis yog tuaj hu cov neeg ncaj, kuv tuaj hu cov neeg txhaum."

TIM 7 LUB 7 HLI 2018

Thawj Hnub Xya Lis Piam Kaum Peb Nruab Xyoo B Nruab Lis Piam II

Hwm Niam Mab Liab

Niam Mab Liab tau tuaj hais thiab thov nyob Fatima xyoo 1917 kom cov ntseeg sawv daws ua kev thov ntuj tshwj xeeb tsib lub hlis sib law thaum txog thawj Hnub Xya hauv lub hlis. Muaj 4 yam nyob hauv txoj kev teev ntuj tshwj xeeb ntawd uas yog peb yuav tsum ua los them txim txhaum pab lub ntiaj teb neeg vim ntiaj teb neeg tsis saib Tswv Ntuj, tsis nco nws txiaj ntsim li, thiab peb ua los thov kev thaj yeeb rau ntiaj teb neeg: Ib peb yuav tau mus daws txhaum, yim hnub ua ntej hnub ntawd los yim hnub tom qab hnub ntawd kuj tau, los yog mus tau hnub ntawd kiag haj yam zoo; Ob , peb yuav mus txais Yes Xus lub Cev rau hnub ntawd, txhais hais tias peb yuav mus koom Thaj Txi Ntuj; Peb, peb yuav hais txoj Saw Mab Liab kom thoob 5 yag hnub ntawd; Plaub, peb yuav tau nyob 15 nas this xav txog Yes Xus lub neej raws li cov txiaj ntsim hauv txoj Saw Mab Liab.

Zaj Nyeem Ib: AM 9: 11-15

Huab Tais hais tias:
11 “Lub caij ntawd kuv yuav rov tsa Das Vis lub khaub tsev, kuv yuav rov kho nws tej phab ntsa ntuag, kuv yuav rov tsa nws tej phab ntsa uas vau tas; kuv yuav rov txhim kom rov zoo li yav thaud dua. 12 Ces lawv yuav rov mus txeeb kom tau Es Dos thiab txeeb kom tau cov kuj cuab uas ris kuv lub npe. Kuv yog tus HUAB TAIS uas yuav ua qhov ntawd, kuv hais cov lus ceeb toom no.”
13 HUAB TAIS hais tias : “Lub caij ntawd cov laij teb yuav mus huas cov sau qoob ntej, cov tub txiav txiv cawv yuav huas cov tseb noob ntej. Kua txiv cawv yuav txhawv pem tej hauv roob los thiab yuav ntws lug nyob saum tej pov roob. 14 Kuv yuav rov tsa kuv haiv His Xas Lais kom sawv. Lawv yuav rov txhim tsa lawv cov tsheej uas vau tas, lawv yuav rov los nyob hauv. Lawv yuav cog cov vaj txiv cawv, lawv yuav tau cawv haus. Lawv yuav cog vaj txiv ntoo, lawv yuav tau txiv noj. 15 Kuv yuav cog kuv haiv neeg rau hauv lawv lub teb chaws, ces tsis muaj leej twg yuav tuaj rho tau lawv ntawm lub teb chaws kuv tau muab rau lawv. Kuv yog HUAB TAIS koj tus Tswv Ntuj, kuv hais li ntawd.”

NPN 85: 9AB + 10, 11-12, 13-14

Txais: (9b) Huab Tais hais txog kev thaj yeeb rau nws haiv neeg.

Kuv mloog saib HUAB TAIS Tswv Ntuj hais dab tsi:
Yog nws foom kev thaj y-15eeb rau nws haiv neeg thiab cov ntseeg nws.
Nws txoj kev cawm los txog ze cov hwm nws lawm,
Kom nws lub koob meej tsa tsev nyob hauv peb teb chaws.
.

Txais: (9b) Huab Tais hais txog kev thaj yeeb rau nws haiv neeg.

Kev hlub thiab kev tseeb yuav los sib ntsib,
Kev ncaj ncees thiab kev thaj yeeb yuav los sib qawg.
Kev tseeb yuav txhawv tawm hauv ntiaj teb los,
kev ncaj ncees yuav dauv muag ntsia saum ntuj tuaj.

Txais: (9b) Huab Tais hais txog kev thaj yeeb rau nws haiv neeg.

HUAB TAIS yuav pub kev vam meej,
hos peb cov av yuav ntsu qoob ntsu loo,
Kev ncaj ncees yuav mus ua Huab Tais ntej,
nws cov hneev taw yuav rhawv ib txoj kev taug.

Txais: (9b) Huab Tais hais txog kev thaj yeeb rau nws haiv neeg.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab,
Kuv paub lawv, lawv caum kuv qab.

Txais: As les lus yas, as les lus yas.

Ntawv Moo Zoo: MT 9: 14-17

14 Zam cov thwj tim tuaj cuag Yes Xus, lawv hais tias : "Peb yoo mov, cov Fas Lis Xais kuj yoo. Vim li cas koj cov thwj tim tsis yoo ?" 15 Yes Xus teb tias : “Cov qhua tuaj noj tshoob puas yuav ntoo xyom thaum nraug vauv tseem nrog lawv nyob? Muaj ib hnub, thaum luag coj nraug vauv mus lawm, mas lawv mam li yuav yoo mov. 16 Tsis muaj leej twg ntxiv ib daim ntaub tshiab rau ib lub qub tsho,vim daim ntaub ntxiv ntawd yuav caws rub lub qub tsho, ces haj yam ntuag loj. 17 Luag kuj tsis xuas hnab tawv qub los ntim cawv tshiab ; vim cov hnab tawv qub yuav tawg, ces cawv yuav nchuav tas, cov hnab kuj yuav puas tas. Luag thiaj muab cawv tshiab ntim hauv hnab tshiab, cov hnab thiab cov cawv thiaj yuav kav ntev.”

TIM 9 LUB 7 HLI 2018

Hnub Ob Lis Piam Kaum Plaub Nruab Xyoo B Nruab Lis Piam Xyoo II

Hwm LN Augustine Zhao Rong thiab Cov, Tuag ua Tim Khawv

Zaj Nyeem Ib: OS XES 2: 16, 17C-18, 21-22

Huab Tais hais tias:
16 "Kuv yuav ntxias kom nws rov nyiam kuv, kuv yuav coj nws mus hauv teb chaws suab puam, kuv yuav hais lus rau nws lub siab mloog. 17 Nyob ntawd, nws yuav teb kuv zoo li thaum nws tseem hluas, zoo li thaum nws tawm hauv Hais Nkws Tos teb los." 18 HUAB TAIS hais zoo li no : "Hnub ntawd, koj yuav hu kuv tias : 'Kuv tus txiv.' Koj yuav tsis hu kuv ntxiv tias : 'Kuv tus Npas Has.' 21 Kuv yuav qhaib koj rau kuv tas ib sid. Kuv yuav qhaib koj nyob hauv txoj kev ncaj thiab txoj cai, txoj kev sib nyiam sib hlub thiab txoj kev khuv leej. 22 Kuv yuav qhaib koj nyob hauv txoj kev ua siab ncaj, ces koj yuav paub HUAB TAIS."

NPN 145: 2-3, 4-5, 6-7, 8-9

Txais: (8a) HUAB TAIS muaj kev hlub mos thiab kev khuv leej neeg.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws ;
nws loj tas nrho, neeg ntsuas tsis tau.

Txais: (8a) HUAB TAIS yog kev hlub mos thiab kev khuv leej neeg.

Sawv daws yuav qhuas txog koj tej hauj lwm txheej dhau txheej,
Lawv yuav tshaj koj lub hwj huaj hwj xyeej.
Lawv yuav piav txog koj lub hwj huam hwj chim loj ci ntsa iab,
thiab yuav hais txog koj cov dej num tsim nyog qhuas.

Txais: (8a) HUAB TAIS yog kev hlub mos thiab kev khuv leej neeg.

Neeg yuav hais txog koj lub hwj huam txaus ntshai,
lawv yuav tshaj koj lub hwj huam loj kawg nkaus.
Neeg yuav cav txog koj lub siab zoo siab dav tas nrho,
thiab yuav qw ntsuag qees cav txog koj lub siab ncaj.

Txais: (8a) HUAB TAIS yog kev hlub mos thiab kev khuv leej neeg.

HUAB TAIS lub siab hlub mos thiab khuv leej neeg,
nws npau taws qeeb, nws lub siab hlub neeg tas nrho.
HUAB TAIS ua siab zoo rau txhua leej txhua tus,
nws lub siab khuv leej tas puas tsav yam nws tau tsim.

Txais: (8a) HUAB TAIS yog kev hlub mos thiab kev khuv leej neeg.

As Les Lus Yas: 2 TM 1: 10

Txais: As les lus yas, as les lus yas.

Peb tus Huab Tais Yes Xus Pleev tau rhuav txoj kev tuag lawm,
thiab nws lub Moo Zoo ua kom txoj sia ci tawm tuaj.

Txais: As les lus yas, as les lus yas.

Ntawv Moo Zoo: MT 9: 18-26

18 Yes Xus tseem tab tom hais lus rau lawv, muaj ib tug nom tuaj txog, nws txhos caug ntua ntawm Yes Xus, nws thov tias : "Kuv tus ntxhais txoj sia nyuam qhuav tu. Thov koj tuaj tsa tes rau saum nws, ces nws yuav rov muaj txoj sia." 19 Yes Xus sawv los, nws lawv tus nom qab mus, nws cov thwj tim kuj mus thiab. 20 Muaj ib tug poj niam tsob ntshav tau kaum ob xyoos lawm, nws txav los ze ntawm Yes Xus nraub qaum, nws kov Yes Xus lub tw tsho. 21 Vim nws xav hauv siab tias : ‘Tsuav yog kuv kov tau nws lub tsho xwb, mas kuv yuav dim.’ 22 Yes Xus tig loo ntsia, nws pom tus poj niam, ces nws hais rau tus poj niam tias : "Tus ntxhais, koj tso siab, koj lub siab ntseeg cawm koj lawm." Tus poj niam cia li dim plaws ntawm tus mob txij ntawd los.
23 Yes Xus tuaj txog tus nom lub tsev, nws pom cov txiv tshuab raj thiab pom neeg coob coob ua ntxhov hnyo. Yes Xus hais tias : "Nej tawm mus. Tus me ntxhais tsis tuag, nws tsaug zog xwb." Sawv daws luag Yes Xus zom zaws. 25 Thaum cov neeg tawm nraum zoov tas, Yes Xus chaws mus hauv, nws tuav tus ntxhais txhais tes, ces tus ntxhais sawv los. 26 Ces lub moo ntawd nto mus thoob lub teb chaws ntawd.

TIM 10 LUB 7 HLI 2018

Hnub Peb Lis Piam Kaum Plaub Nruab Xyoo B Nruab Lis Piam Xyoo II

Hwm LN Veronica Giuliani

Zaj NYeem Ib: OS XES 8: 4-7, 11-13

HuabTais hais tias:
4 Lawv tau tsa lawv cov vaj kav His Xas Lais, tab sis kuv tsis tau tso cai, lawv tau tsa lawv cov tswj, tab sis kuv tsis tau pom zoo. Lawv muab lawv tej nyiaj tej kub los nchuav ua mlom rau lawv teev; cov mlom ntawd yuav raug muab rhuav. 5 Xas Mas Lias, kuv ntxub koj tus mlom xyuas nyuj. Kuv lub siab npau taws heev rau lawv. Yuav hov ntev His Xas Lais thiaj mam ua tau qhov zoo? 6 Yog los ntawm His Xais Lais los, tsuas yog kws txawj puab puab tawm los xwb, tsis yog ib tug tswv ntuj . Qhov tseeb, tus xyuas nyuj Xas Mas Lias yuav tawg ua tshauv tas. 7 Lawv tseb cua, lawv yuav sau cua daj cua dub. Lawv cov nplej yuav tsis txhawv hnab nplej; cov hnab nplej yuav tsis qoos tsis muaj hmoov nplej. Yog qoos, cov pej kum neeg yuav tuaj noj tas.
11 Cov Es Fais tau tsa ntau lub thaj txi Ntuj los daws kev txhaum. Tab sis lawv tsuas siv cov thaj ntawd los ua txhaum xwb. 12 Kuv sau ntau lo lus qhia rau lawv coj, tab sis lawv saib zoo li yog ib tug pej kum neeg tej lus xwb. 13 Lawv nyiam tua tsiaj txi Ntuj, lawv yeej txi, lawv noj tej nqaij, tab sis HUAB TAIS tsis txaus siab txais tej ntawd. Txij no mus, HUAB TAIS yuav nco ntsoov lawv cov txhaum, nws yuav rau txim rau lawv, lawv yuav rov qab mus nyob Hais Nkws Tos teb dua.

NPN 115: 3-4, 5-6, 7AB-8, 9-10

Txais: (9a) His Xas Lais tsev neeg tso siab rau Huab tais.

Peb tus Tswv Ntuj nyob txheej ntuj saud ;
Nws xav ua dab tsi, nws ua tau tas.
Lawv cov dab yog mlom nyiaj mlom kub,
Yog neeg ob txhais tes puab tawm los.

Txais: (9a) His Xas Lais tsev neeg tso siab rau Huab tais..

Lawv muaj qhov ncauj, tab sis tsis txawj hais lus ;
Lawv muaj qhov muag, tab sis tsis pom kev.
Lawv muaj pob ntseg, tab sis lawv tsis hnov lus ;
Lawv muaj qhov ntswg, tab sis tsis hnov ntxhiab ;

Txais: (9a) His Xas Lais tsev neeg tso siab rau Huab tais.

Lawv muaj ob txhais tes, tab sis tsis txawj kov dab tsi ;
Lawv muaj ob txhais taw, tab sis tsis txawj mus kev ;
Cov neeg puab lawv los yuav zoo ib yam li lawv,
Cov tso siab rau lawv kuj yuav zoo ib yam li ntawd.

Txais: (9a) His Xas Lais tsev neeg tso siab rau Huab tais.

His Xas Lais tsev neeg, nej tso siab rau Huab Tais,
Nws yog tus tuaj pab peb tus tuaj thaiv peb.
As loos tsev neeg, nej tso siab rau Huab Tais,
Nws yog tus tuaj pab peb tus tuaj thaiv peb.

Txais: (9a) His Xas Lais tsev neeg tso siab rau Huab tais.

As Les Lus Yas: Zam 10: 14A

Txais: As les lus yas, as les lus yas.

Huab Tais hais tias: Kuv yog tus zoo tswv zov yaj;
kuv paub kuv cov yaj, kuv cov yaj paub kuv.

Txais: As les lus yas, as les lus yas.

Ntawv Moo Zoo: MT 9: 32-38

32 Lawv nyuam qhuav tawm mus xwb, luag twb coj ib tug neeg tsis txawj hais lus tuaj cuag Yes Xus, vim nws raug ib tug dab phem. 33 Yes Xus ntiab tus dab, ces tus neeg cia li hais lus tau. Tas tsoom sid qhuas kawg, lawv hais tias : "Tsis tau pom dua tej yam zoo li ntawd nyob hauv haiv His Xas Lais ib zaug li." 34 Tab sis cov Fas Lis Xais hais tias : "Nws hu tus Tuam Thawj dab tuaj ntiab dab."
35 Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si. 36 Yes Xus pom tej pab neeg coob coob, nws hlub lawv, vim sawv daws muaj kev nyuaj thiab tsis muaj tus pab, lawv zoo li ib co yaj tsis muaj tsw zov. 37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg. 38 Nej thov tus Tswv qoob kom nws xa ib co tub zog tuaj sau nws cov qoob."

TIM 11 LUB 7 HLI 2018

Hnub Plaub Lis Piam Kaum Plaub Nruab Xyoo B Nruab Lis Piam Xyoo II

Hwm LN Benedict

Zaj Nyeem Ib: OS XES 10: 1-3, 7-8, 12

1 His Xas Lais yog ib tsob hmab txiv cawv txi txiv ncw ncw. Lawv yim txi txiv ntau, lawv yim txhim thaj txi dab ntau tuaj. Lawv lub teb chaws yim npluaj nuj tuaj, lawv yim tsa ncej teev dab ntau ntxiv. 2 Lawv muaj ob lub siab, li ntawd masnyem no lawv yuav tsum them txim txhaum. Huab Tais yuav muab lawv tej thaj txi dab ntxeev, yuav rho lawv tej ncej teev dab pov tseg. 3 Ces lawv yuav hais tias: "Peb tsis muaj vaj lawm, vim peb tsis tau hwm HUAB TAIS. Tiam sis txawm tus vaj kiag los nws yuav ua tau dab tsi pab peb?"
7 Xas Mas Lias teb raug muab txiav tawm lawm. Nws tus vaj yuav ploj mus xws cov npuas ntab saum nplaim dej. 8 Cov chaw teev mlom saum tej ncov roob yog His Xas Lais chaw ua txhaum. Luag yuav tuaj muab rhuav pov tseg. Pos thiab nrhab yuav hlob tuaj laum lawv cov thaj txi dab. Lawv yuav hais rau cov hauv toj tias: "Nej vau los vov peb mas !" thiab hais rau cov hauv pes tias: "Nej vau los tsuam peb mas !"
12 Nej kav tsij tseb noob kev ncaj ncees, thiab kav tsij sau cov qoob kev hwm Ntuj; nej cia li mus luaj dua teb tshiab vim txog caij nej nrhiav HUAB TAIS lawm, mus txog hnub nws los ywg txoj kev ncaj rau saum nej.

NPN 105: 2-3, 4-5, 6-7

Txais: (4b) Nej yuav nrhiav Huab Tais lub ntsej muag mus li.

Nej hu nkauj rau nws, nej ntaus suab paj nruag cav txog nws,
nej tshaj tawm txog tej yam loj nws tau ua.
Nej txais koob meej nyob hauv nws lub npe,
nej cia li zoo siab, nej cov uas muaj lub siab nrhiav HUAB TAIS!

Txais: (4b) Nej yuav nrhiav Huab Tais lub ntsej muag mus li.

Nej nrhiav Huab Tais thiab nws lub zog,
nej nrhiav nws lub ntsej muag mus li.
Nej nco ntsoov txog cov hwj huam txaus qhuas nws tau ua,
nws cov hauj lwm loj, thiab cov lus txiav txim nws lub ncauj tau hais.

Txais: (4b) Nej yuav nrhiav Huab Tais lub ntsej muag mus li.

Nej yog Has Nplas Has tsoom xeeb ntxwv, nws cov tub txib,
yog Yas Kos cov tub, nws pab neeg nws tau xaiv!
Huab Tais nws yog peb tus Tswv Ntuj,
tas ntiaj teb yuav raws li nws txiav.

Txais: (4b) Nej yuav nrhiav Huab Tais lub ntsej muag mus li.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej nyob ze lawm:
Nej cia li thov txhaum thiab ntseeg lub Moo Zoo.

Txais: As les lus yas, as les lus yas.

Ntawv Moo Zoo: MT 10: 1-7

1 Yes Xus hu nws kaum ob leeg thwj tim los ntawm nws, nws muab lub hwj huam ntiab tau cov dab tsis huv tawm thiab kho tau txhua yam kev mob nkeeg kev txiab xeeb kom zoo hlo rau lawv. 2 Kaum ob leeg Hauv Paus Xa Lus muaj npe li no : 3 Tus ib, Xis Moos uas tseem hu ua Pob Zeb, ces As Nres, Xis Moos tus kwv, Yas Kos, Ntxes Npes Dais tub, Zam, Yas Kos tus kwv, Fis Lis Pos thiab Npas Tos Los Mas Yos, Tos Mas thiab Mas Tais, tus sau se, Yas Kos, uas yog As Fas Yos tub, tiab Thas Dais Yos, 4 Xis Moos tus Ntxes Los, thiab Yus Das Kas Lis Yaus tus muab Yes Xus muag rau luag. 5 Yes Xus xa kaum ob leeg no mus tshaj lub Moo Zoo, nws qhia lawv tias :
"Nej tsis txhob mus cuag cov neeg teev dab, txhob mus hauv ib lub nroog Xas Mas Lias li. 6 Nej mus cuag cov yaj ploj hauv haiv His Xas Lais tso. 7 Thaum nej taug kev, nej ceeb toom tias: ‘Ntuj lub Ceeb Tsheej tuaj txog ze lawm.’”

TIM 12 LUB 7 HLI 2018

Hnub Tsib Lis Piam Kaum Plaub Nruab Xyoo B Nruab Lis Piam Xyoo II

Zaj Nyeem Ib: OS XES 11: 1-4, 8E-9

Huab Tais hais tias:
1 Thaum His Xas Lais tseem yog ib tug me nyuam kuv twb nyiam nws lawm, kuv tau hu kuv tus tub khuam nyob Hais Nkws Tos teb kom los.
2 Tab sis kuv yim hu lawv mas lawv yim txav mus deb kuv. Lawv txi cov dab Npas Has, lawv hlawv xyab rau cov mlom dab.
3 Kuv twb yog tus uas tau hwj Es Fais xyaum mus kev, kuv tuav rawv lawv txhais npab; lawv tsis to taub tias kuv saib xyuas lawv.
4 Kuv xuas ib co hlua tib neeg cab lawv mus, yog ib co hlua muaj kev hlub. Kuv tu lawv zoo li ib leeg niam nqa hlo nws tus me nyuam los npuab nws sab plhu. Kuv khoov cev mus rau lawv pub mov rau lawv noj.

8e Kuv lub siab lub plawv ntxeev tas nphau tas, kuv tej plab plaw tshee tas.
9 Kuv yuav tsis tso kuv lub siab npau taws, kuv yuav tsis rhuav Es Fais dua ntxiv; vim kuv yog Tswv Ntuj, kuv tsis yog tib neeg; kuv yog tus Ntshiab nyob nruab nrab hauv nej, kuv yuav tsis cia cov nplaim taws tuaj rhuav nej pov tseg.

NPN 80: 2AC+3B, 15-16

Txais: (4b) Huab Tais, cia peb pom koj lub ntsej muag ces peb yuav tau txais kev cawm.

His Xas Lais tus tswv zov yaj e, thov cuab pob ntseg mloog.
Koj zaum saum cov tshiab kes lus npis, thov koj ci ntsa tuaj.
Koj tsa koj lub hwj huam kom tsim dheev.

Txais: (4b) Huab Tais, cia peb pom koj lub ntsej muag ces peb yuav tau txais kev cawm.

HUAB TAIS kav ib tsoom tshiab,
thov koj rov dauv muag saum ntuj los ntsia.
Thov koj los tu tsob txiv cawv no,
thov koj txuag yam uas koj txhais tes xis tau cog,
neeg tus tub uas koj tau ua kom muaj zog.

Txais: (4b) Huab Tais, cia peb pom koj lub ntsej muag ces peb yuav tau txais kev cawm.

As Les Lus yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej nyob ze lawm,
Nej cia li lees txhaum thiab ntseeg lub Moo Zoo.

Txais: As les lus yas, as les lus yas.

Ntawv Moo Zoo: MT 10: 7-15

Yes Xus hais rau nws cov thwj tim tias:
7 “Thaum nej taug kev, nej ceeb toom tias: ‘Ntuj lub Ceeb Tsheej tuaj txog ze lawm.’ 8 Nej kho cov muaj mob kom zoo, nej tsa cov tuag kom ciaj rov los, nej kho cov mob ruas kom huv tuaj, nej ntiab dab kom khiav tawm. Nej tau txais dawb, nej rov pub dawb.
9 Nej txhob muab kub, muab nyiaj, los xim nyiaj qhwv rau hauv duav siv.
10 Txhob ris hnab taug kev, txhob nqa ob lub tsho, txhob nqa khau los nrig pas; tus tub zog yeej tsim nyog txais nws pluas mov los noj.
11 Nej mus hauv lub nroog los lub zos twg, nej nug kom tau ib tug neeg muaj meej mom, nej nyob hauv nws tsev mus txog hnub nej rov qab.
12 Thaum nej chaws mus hauv ib lub tsev, nej foom key kaj lug rau lub tsev ntawd.
13 Yog lub tsev ntawd tsim nyog txais, mas nej txoj key kaj lug yuav nqes los nyob hauv lawv. Yog lub tsev ntawd tsis tsim nyog txais, ces nej txoj key kaj lug yuav rov los roos nej.
14 Yog leej twg tsis txais nej, thiab tsis mloog nej cov lus, nej cia li tawm hauv lub tsev ntawd los lub nroog ntawd mus. Nej yuav nchos cov plus av lo nej ko taw pov tseg.
15 Kuv hais tseeb rau nej : Txog Hnub Txiav Txim, teb chaws Xos Dos Mas thiab Nkos Mos Las yuav raug txim hnyav tsis cuag li lub nroog ntawd.”

TIM 13 LUB 7 HLI 2018

Hnub Rau Lis Piam Kaum Plaub Bruab Xyoo B Nruab Lis Piam Xyoo II

Hwm LN Henry

Zaj Nyeem Ib: OS XES 14: 2-10

Huab Tais hais tias:
2 Cov His Xas Lais, nej rov qab los cuag HUAB TAIS nej tus Tswv Ntuj mas ! Nej tau ua txhaum, nej thiaj ntog.
3 Nej npaj ib co lus ces nej yuav rov mus cuag HUAB TAIS; nej yuav hais rau nws tias : "Thov koj tshem peb cov txhaum pov tseg, koj tsuas saib qhov zoo nyob hauv peb xwb. Peb yuav tsis muab heev nyuj txi rau koj, peb yuav muab peb di ncauj txi rau koj.
4 As Xws yuav cawm tsis tau peb. Peb yuav tsis caij nees ntxiv, peb yuav tsis hais rau cov mlom uas yog peb txhais tes ua tias : ‘Peb tus Tswv Ntuj !’ Vim tsuas yog nyob ze ntawm koj xwb tus me nyuam ntsuag thiaj tau txais kev hlub."
5 Ces HUAB TAIS hais tias : "Kuv yuav kho lawv txoj kev ntxeev siab kom lawv zoo hlo. Kuv yuav hlub lawv tas siab tas ntsws, vim kuv tsis npau taws rau lawv ntxiv.
6 Kuv yuav zoo li ib co dej lwg los ywg His Xas Lais, lawv yuav tawg paj zoo li lub paj lis, lawv yuav nrhau cag tob xws li cov ntoo ciab nyob Lis Npaas.
7 Lawv yuav hlav kaus ncau mus deb, lawv yuav zoo saib xws li ib co txiv ntoo roj, yuav tsw qab xws li cov ntoo ciab Lis Npaas.
8 Lawv yuav rov los zaum hauv kuv qhov ntxoov ntxoo. Lawv yuav ua kom rov muaj hmoov nplej; lawv yuav ua kom cov hmab txiv cawv rov tawg paj thiab nto moo xws li cov cawv nyob Lis Npaas.
9 Es Fais puas tseem muaj kev yuav mus teev mlom ntxiv? Kuv yog tus mloog lawv tej lus thov, kuv saib xyuas lawv. Lawv hais tias: “Kuv zoo puav tam li ib tug ntoo thuv ntsuab mus li.” Yog vim muaj kuv nej thiaj txi txiv tau.
10 Tus neeg thoob tsib yuav txawj to taub txog tej yam no, tus neeg ntse yuav paub zoo txog. HUAB TAIS txoj kev yog kev ncaj, cov neeg siab ncaj taug nws txoj kev, hos cov neeg txhaum ntog hauv txoj kev ntawd.

NPN 51: 3-4, 8-9, 12-13, 14+17

Txais: (17b) Kuv lub ncauj yuav tshaj txog koj lub koob meej.

Tswv Ntuj, thov koj khuv leej kuv, vim koj lub siab zoo;
thov koj so kuv qhov txhaum pov tseg, vim koj kev hlub loj tas nrho.
Thov koj ntxuav kuv lub txim pov tseg,
thiab koj muab kuv qhov txhaum tshem mus.

Txais: (17b) Kuv lub ncauj yuav tshaj txog koj lub koob meej.

Koj nyiam ib lub siab tsis muaj kev dag,
koj qhia kev thoob tsib rau kuv puag hauv kuv nruab siab
Koj muab his xos ntxuav kuv qhov txhaum ces kuv yuav huv tuaj;
Koj ntxuav kuv mas kuv yuav dawb dua daus.

Txais: (17b) Kuv lub ncauj yuav tshaj txog koj lub koob meej.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (17b) Kuv lub ncauj yuav tshaj txog koj lub koob meej.

Thov koj pub kom kuv rov zoo siab nyob hauv koj txoj kev cawm
thiab ua kom kuv muaj ib lub tswv yim xav mloog koj.
HUAB TAIS, thov qhib kuv di ncauj,
ces kuv lub ncauj yuav tshaj koj lub koob meej.

Txais: (17b) Kuv lub ncauj yuav tshaj txog koj lub koob meej.

As Les Lus Yas: ZAM 16: 13A; 14: 26D

Txais: As les lus yas, as les lus yas.

Thaum Leej Tswv Yim qhia qhov tseeb tuaj txog,
Nws yuav coj nej mus rau qhov tseeb tas huv si
Thiab yuav pab kom nej rov nco txog txhua yam kuv hais rau nej.

Ntawv Moo Zoo: MT 10: 16-23

Yes Xus hais rau nws cov thwj tim tias:
16 Kuv xa nej mus xws li ib co yaj mus nyob hauv nruab nrab ib co hma. Mas nej ua neeg xyuam xim xws li nab, ua siab dawb xws li nquab." 17 Nej ceev faj txog neeg : lawv yuav mus kom nej rau cov rooj txwj laus txiav txim, lawv yuav nplawm nej hauv cov tsev txoos. 18 Luag yuav coj nej mus rau cov nom thiab cov vaj vim kuv, kom nej tau ua tim khawv txog kuv nyob ntawm cov nom tswv thiab cov teev pej kum dab xub ntiag. 19 Thaum luag ntes nej, mas nej tsis txhob txhawj tias yuav hais li cas thiab yuav teb dab tsi. Thaum txog sij hawm teb, Ntuj yuav muab cov lus teb rau nej. 20 Li ntawd, yuav tsis yog nej hais lus, yog nej Txiv tus Ntsuj Plig yuav hais tawm hauv nej los.
21 "Tus tij yuav muab tus kwv rau luag tua, leej txiv yuav muab nws tus me nyuam rau luag. Tej me nyuam yuav sawv tiv niam thiab txiv, thiab yuav muab rau luag tua. 22 Sawv daws yuav ntxub nej vim kuv lub npe. Tab sis, tus twg ua siab ntev nyiaj mus txog qhov kawg, mas nws yuav txais kev cawm.
23 "Yog luag caum nej hauv lub nroog no, mas nej khiav mus rau lwm lub. Kuv hais tseeb rau nej, nej tseem khiav tsis tau ncig txhua cov nroog hauv His Xas Lais teb, thaum Neeg Leej Tub los txog.”

TIM 14 LUB 7 HLI 2018

Hnub Xya Is Piam Kaum Plaub Nruab Xyoo B Nruab lis Piam Xyoo II

Hwm LN Kateri Tekakwitha

Zaj Nyeem Ib: HIS XAIS 6: 1-8

1 Xyoo tus vaj Os Xias tuag, kuv pom Huab Tais zaum saum ib lub theej kiab siab siab muaj hwj chim. Nws lub tw tsho dauv mus puv nkaus lub Tuam Tsev tas huv tib si. 2 Nyob ntawm nws txheej saud, muaj ib co Tshiab Xes Las Fis sawv ntsug saud. Lawv ib leeg muaj rau txhais tis, ob txhais thaiv ntsej muag, ob txhais vov ko taw, ob txhais cia yam us mus los los. 3 Lawv ib leeg hu qw nrov nrov rau ib leeg tias : "Tsoom tshiab tus HUAB TAIS ntshiab, ntshiab, ntshiab. Nws lub koob meej nyob puv lub ntiaj teb." 4 Lub suab ntawd nrov ua cov ncej qhov rooj ua zog koog, pa taws ncho puv lub tsev. 5 Kuv hais tias : "Kuv hmoov phem ! Kuv yuav tuag lau! Vim kuv yog ib tug neeg di ncauj tsis huv, kuv nyob nruab nrab ib haiv neeg di ncauj tsis huv. Txawm li ntawd los kuv qhov muag tau pom tus Vaj, tus HUAB TAIS kav tsoom tshiab lawm tiag !" 6 Ces ib tug tshiab Xes Las Fis ya ntxiag los txog ntawm kuv, nws txhais tes tuav ib lub ncaig kub lug uas nws xuas ib rab ciaj tais ntawm lub thaj txi Ntuj los. 7 Nws coj lub ncaig ntawd los so kuv di ncauj, nws hais tias : "Saib ! Qhov no twb chwv koj di ncauj lawm, nws tshem koj qhov phem mus lawm, thiab koj cov txhaum muab ntxuav tas lawm." 8 Ces kuv hnov Huab Tais lub suab hais tias : "Kuv yuav xa leej twg mus ? Leej twg yuav sawv peb cev mus ?" Kuv teb tias : "Kuv nyob ntawm no. Koj xa kuv mus."

NPN 93: 1AB, 1CD-2, 5

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Huab Tais ua vaj, nws hnav hwj chim ci ntsa iab,
Nws hnav lub tsho muaj zog thiab sia siv khov kho.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Nws tsim Lub ntiaj teb nyob ruaj nreb, txav tsis tau chaw.
Koj lub theej kiab yeej teem tau ruaj khov kho txij puag thaum ub los.
Huab Tais, koj yeej ib txwm nyob txhiab niag tim puas xyoo mus li.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Koj cov cai lij choj tsim nyog ntseeg tas nrho;
Huab Tais, txoj kev ntshiab tsab koj lub tsev
kom zoo nkauj mus li lawm yav tom ntej.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

As Les Lus yas: 1 POB ZEB 4: 14

Txais: As les lus yas, as les lus yas.

Yog nej raug luag tsawm vim Leej Pleev lub npe,
mas nej txoj hmoov zoo,
vim Tswv Ntuj Leej Tswv Yim tuaj roos nej

Txais: As les lus yas, as les lus yas.

Ntawv Moo Zoo: MT 10: 24-33

Yes Xus hais rau nws cov thwj tim tias:
24 "Tus thwj tim tsis loj dua nws tus xib hwb, tus tub txib tsis loj dua nws tus tswv. 25 Tus thwj tim txaus siab heev thaum nws zoo li nws tus xib hwb lawm. Tus tub txib txaus siab heev thaum nws zoo li nws tus tswv kawm. Yog lawv twb hu tus tswv tsev ua Npes Ntxes Npus mas lawv haj yam yuav hu cov neeg hauv nws tsev li ntawd!
26 Nej txhob ntshai cov neeg ntawd ! Vim tsis muaj ib yam npog rawv uas yuav tsis muab qhib tawm, tsis muaj ib yam zais ntshis uas yuav tsis muab thws rau sawv daws paub. 27 Tej yam uas kuv hais rau nej hauv qhov tsaus ntuj, nej yuav muab hais tawm thaum nruab hnub nrig. Hos yam nej hnov ntxhi rau hauv nej pob ntseg, mas nej yuav nce mus tshaj rau saum tej ru tsev.
28 Nej txhob ntshai cov neeg tua tau lub cev, tab sis lawv tua tsis tau tus ntsuj plig. Nej yuav ntshai tus muaj peev xwm tua tau lub cev thiab tus ntsuj plig huv si nyob hauv lub pas hluav taws.
29 Ob tug noog tsig txhuv, luag tsuas muag tau ib npib xwb. Tsis kav, tsis muaj ib tug poob hauv av tau, yog nej Txiv tsis tso lus. 30 Ntawm nej, tab yog nej cov plaub hau saum taub hau yeej raug suav tas huv si lawm. 31 Li ntawd, nej tsis txhob ntshai dab tsi vim nej muaj nqis tshaj tej pab tsig txhuv coob coob ua ke.
32 Leej twg lees rau sawv daws tias nws paub kuv, mas kuv kuj yuav lees rau kuv Txiv nyob saum Ntuj tias kuv paub nws. 33 Hos tus tsis lees rau sawv daws tias nws paub kuv, kuv kuj yuav tsis lees rau kuv Txiv nyob saum ntuj tias kuv paub nws.”

TIM 16 LUB 7 HLI 2018

Hnub Ob Lis Piam Kaum Tsib Nruab Xyoo B Nruab Lis Piam Xyoo II

Hwm Leej Niam nyob Kas Mes/Our Lady of Carmel

Zaj Nyeem Ib: HIS XAIS 1: 10-17

10 Cov nom tswv tswj Xos Dos Mas, nej mloog Huab Tais cov lus mas ! Pej xeem nyob Nkos Mos Las, nej mloog peb tus Tswv Ntuj cov lus cob qhia! 11 HUAB TAIS hais tias : "Nej cov txim txi Ntuj txawm yuav ntau npaum twg tsis muaj nqes dab tsi rau kuv. Kuv dhuav nej cov laug tshis uas nej muab los hlawv kheej rau kuv, thiab dhuav cov roj ntawm nej cov tsiaj rog; kuv tsis zoo siab pom cov thav nyuj, thav yaj thiab thav tshis tej roj ntsha.
12 Thaum nej tuaj nyob ntawm kuv xub ntiag, yog leej twg kom nej coj tej ntawd tuaj tsuj kuv lub tsev ? 13 Tsis txhob nqa tej txim tsis muaj nqes tuaj hlawv rau kuv ! Nej cov pa xyab yog ib qho phem kawg li rau kuv. Nej tej hli xiab tshiab, nej cov hnub xas npas tos, nej cov kev tuaj sib txoos, mas kuv nyiaj tsis taus tej kev ua phem thiab tej kev ua txoos loj lawm. 14 Nej tej hli xiab tshiab thiab nej tej hnub nyoog teem ua koob tsheej mas kuv ntxub tas siab nrho, hnyav kuv ua luaj, kuv ceeb laj ris kawg nkaus. 15 Thaum nej tsa tes hu txog kuv, kuv qi qhov muag tsis ntsia nej. Txawm nej hais nej tej zaj teev Ntuj ntau npaum li cas los kuv tsis mloog. Nej txhais tes lo ntshav tas! 16 Nej rov ntxuav nej kom nej huv tuaj mas ! Nej tshem nej tej hauj lwm phem mus kom kuv qhov muag txhob pom; tso txoj kev ua phem tseg ! 17 Nej xyaum ua qhov zoo, nej nrhiav kev ncaj ncees, nej ntuas tus muaj siab kub, nej muab kev ncaj rau tus tub ntsuag, nej tuaj tus poj ntsuam tog."

NPN 50: 8-9, 16BC-17, 21+23

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis muab ib tug heev nyuj tawm hauv koj tsev mus,
los ib tug laug tshis tawm hauv koj pab tsiaj mus.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom..

Tim li cas nej lub ncauj thiaj qog kuv cov kev cai lij choj,
thiab hais kuv cov lus kuv tau nrog nej cog ntawm di ncauj,
tiam sis nej ntxub txoj kev coj nruj
thiab muab kuv tej lus ua ntia pov tom nej qab xwb?

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Thaum nej ua tej yam zoo li no, kuv puas yuav tsum ua ntsej lag muag dig?
Nej puas xav tias kuv zoo nkaus li nej thiab?
Kuv yuav qhuab qhia nej, yuav qhia lub ntsiab tawm plaws rau nej.
Tus neeg twg tuaj ua kuv tsaug yog nws cav txog kuv lub koob meej;
kuv yuav muab Tswv Ntuj txoj kev cawm neeg rau tus neeg ncaj pom.

As Les Lus Yas: MT 5: 10

Txais: As les lus ays, as les lus yas.

Cov tau txoj hmoov zoo, yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus ays, as les lus yas.

Ntawv Moo Zoo: MT 10: 34-11: 1

Yes Xus hais rau nws cov thwj tim tias:
34 "Nej txhob xav tias kuv coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj. 35 Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj. 36 Ua li mas yus cov yeeb ncuab yog cov neeg nyob hauv yus tsev. 37 Tus nyiam nws niam nws txiv dua kuv, mas nws tsis tsim nyog nrog kuv; tus nyiam nws tej tub tej ntxhais dua kuv, mas nws tsis tsim nyog nrog kuv. 38 Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv. 39 Tus nrhiav tau nws txoj sia, nws ua nws txoj sia ploj, hos tus ua nws txoj sia ploj vim kuv, mas nws yuav nrhiav tau nws txoj sia. 40 Tus txais nej, mas yog nws txais kuv. Tus txais kuv, mas yog nws txais Tus xa kuv tuaj. 41 Tus txais ib tug yaj saub, vim tus ntawd yog yaj saub, nws yuav txais koob haum phim tus yaj saub. Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj. 42 Kuv hais tseeb rau nej, leej twg pub ib khob dej txias rau ib tug neeg me li no haus, vim nws yog ib tug thwj tim, mas nws yeej yuav tsis poob nws qhov koob haum li."
11 1 Thaum Yes Xus qhia nws kaum ob leeg thwj tim li no tas lawd, nws tso qhov chaw ntawd tseg, nws mus qhia thiab nthuav lub Moo Zoo rau hauv lawv cov nroog.

TIM 17 LUB 7 HLI 2018

Hnub Peb Lis Piam Kaum Tsib Nruab Xyoo B Nruab Lis Piam Xyoo II

Zaj Nyeem Ib: HIS XAIS 7: 1-9

1 Lub caij As Kas, uas yog Yos Tas tub, uas yog Os Xias tub, ua vaj kav Yus Das teb, mas Las Xoos tus vaj kav As Las teb nrog Pes Kas tus vaj kav His Xas Lais teb, uas yog Les Mas Lias tub, nkawd mus ntaus Yes Lus Xas Les, tab sis nkawd ntaus tsis tau. 2 Luag tuaj qhia Das Vis tsev neeg paub tias tus vaj As Las tuaj tsa yeej nyob hauv lub xeev Es Fais lawm. Ces tus vaj thiab tsoom pej xeem lub siab ntshai tshee cuag li cov nplooj ntoos hauv hav zoov co thaum raug cua tshuab. 3 HUAB TAIS hais rau His Xais tias : "Koj tawm mus cuag As Kas, koj thiab koj tus tub Ses Yas Sus neb mus, neb mus lawm pem tus kwj deg uas ntws mus rau lub pas dej nyob pem toj ntawm qhov kawg, ntawm txoj kev mus rau hauv daim teb ntxhua seb. 4 Koj hais rau As Kas tias : ‘Koj yuav ceev faj, yuav ua siab tus tus. Koj tsis txhob ntshai, txhob ntaus siab me nyob ntawm ob ya tog taws tseem ncho pa ntawd, yog vim Las Xoos thiab cov As Las thiab Les Mas Lias tus tub txoj kev npau taws heev. 5 Vim tias As Las, Es Fais, thiab Les Mas Lias tus tub lawv npaj siab ua phem rau koj, lawv tau hais tias : 6 ‘Peb mus lawm ped, peb ntaus kom yeej Yus Das, thiab muab nws yuam los zwm rau peb. Ces peb tsa Tas Npes Ees tus tub los ua vaj kav lawv.’
7 HUAB TAIS hais li no : ‘Yuav tsis muaj li ntawd. Yuav tsis ua tau li ntawd. 8 Lub tuam nroog nyob As Las teb yog Das Mas, hos tus ua thawj nyob Das Mas yog Las Xoos. Tshuav 65 xyoos tom ntej no ces Es Fais yuav tsis yog ib haiv neeg ntxiv lawm. 9 Lub xeev loj nyob Es Fais yog Xas Mas Lias, hos tus ua thawj nyob Xas Mas Lias yog Les Mas Lias tus tub. Yog nej tsis ntseeg khov mas nej yuav nyob tsis taus ruaj ntxiv.

NPN 48: 2-3A, 3B-4, 5-6, 7-8

Txais: (9d) Tswv Ntuj ua kom nws lub tsheej ruaj khov mus li.

HUAB TAIS yog tus loj, thiab tsim nyog qhuas
Nyob hauv peb tus Tswv Ntuj lub tsheej.
Nws lub roob ntshiab, zoo nkauj tshaj lwm lub,
Yog ntiaj teb lub chaw zoo siab.

Txais: (9d) Tswv Ntuj ua kom nws lub tsheej ruaj khov mus li.

Roob Xis Yoos, nyob zaj pem qaum teb,
yog tus Vaj loj lub tsheej.
Tswv Ntuj nyob hauv nws cov tsev vaj loog,
Neeg cav txog nws yog lub yeej ntsa zeb txeem tsis tau.

Txais: (9d) Tswv Ntuj ua kom nws lub tsheej ruaj khov mus li.

Ntsia saib, cov vaj tuaj sib sau ;
lawv tib txhij sawv kev tuaj mus.
Lawv pom dheev, tam sis ntawd lawv ceeb tas.
lawv ntshai kawg, lawv tso tes khiav.

Txais: (9d) Tswv Ntuj ua kom nws lub tsheej ruaj khov mus li.

Av qeeg ua rau lawv ceeb nkaus rau ntawm chaw,
lawv mob npaum li tus poj niam yuav daws cev,
Yog zoo li cov cua toob fab ntsawj tuaj
ua kom cov nkoj nyob Tas Sis ntsoog ntxaws tas.

Txais: (9d) Tswv Ntuj ua kom nws lub tsheej ruaj khov mus li.

As Les Lus Yas: NPN 95: 8

Txais: As les lus ays, as les lus yas.

Yog hnub no nej hnov nws lub suab,
nej tsis txhob ua nej lub siab tawv ncauj.
Txais: As les lus ays, as les lus yas.

Ntawv Moo Zoo: MT 11: 20-24

20 Yes Xus pib tsawm cov nroog uas tau pom nws ua hwj huam yees ntxwv ntau tshaj, tab sis lawv tsis hloov siab: 21 “Kos Las Ntxis, koj txoj hmoov phem ! Npes Xais Das, koj txoj hmoov phem ! Vim tias, cov hwj huam yees ntxwv uas kuv tau ua hauv neb, kheev lam yog ua nyob Tws Los thiab nyob Xis Doos, mas lawv twb hloov siab lawm ntxov thiab twb hnav ntaub tsaj thiab muab plua tshauv los nphoo lawv lawm. 22 Kuv hais meej rau neb, hnub txiav txim, Tws Los thiab Xis Doos yuav raug txim sib dua neb. 23 Thiab koj, Kas Fas Naus, koj xav tias koj yuav raug tsa siab txij ntuj no puas yog? Koj yuav nqes mus lawm hauv tub tuag teb. Vim tias cov hwj huam yees ntxwv kuv tau ua nyob hauv koj, kheev lam yog ua nyob Xos Dos Mas, mas lub nroog ntawd tseem yuav nyob txog tav no. 24 Kuv hais meej rau koj, hnub txiav txim, Xos Dos Mas yuav raug txim sib dua koj."

TIM 18 LUB 7 HLI 2018

Hnub Plaub Lis Piam Kaum Tsib Nruab Xyoo B Nruab Lis Piam Xyoo II

Hwm LN Camillus de Lellis

Zaj Nyeem Ib: HIS XAIS 10: 5-7, 13B-16

Huab Tais hais li no:
5 “As Xws txoj hmoov phem ! Nws yog rab pas thaum kuv npau taws, yog rab qws thaum kuv tsis txaus siab. 6 Kuv xa nws mus ntaus ib lub kuj cuab tsis hwm Ntuj. Kuv kom nws mus ntaus haiv neeg kuv npau taws rau, mus lwg lawv cov toob xib, mus txeeb lawv lub cuab tam los, kom nws mus tsuj haiv neeg ntawd xws li cov av nkos nyob ntawm tej kev. 7 Tab sis As Xws tsis npaj ua li ntawd, nws lub siab tsis xav mus raws li ntawd. Nws tsuas rau siab tua neeg kom tu noob, nws xav rhuav kom tas ntau lub kuj cuab.
13 As Xws hais tias : ‘Yog kuv txhais tes muaj peev xwm, yog kuv lub tswv yim thoob tsib coj kuv ua tau tej ntawd, vim kuv ntse ! Kuv tau nam cov haiv neeg ciam teb, kuv tau lwg lawv tej cuab yeej cuab tam. Kuv ua tus loj muaj zog, kuv thawb cov zaum saum theej kiab kom poob qis. 14 Kuv txhais tes nrhiav tau cov haiv neeg tej nyiaj txiag xws li nrhiav tau ib lub zes qe, thiab kuv tau khaws tas ntiaj teb los ua kuv tug, xws li khaws ib co qe luag muab tso tseg, tsis muaj leej twg co ib tis, tsis muaj leej twg rua ncauj los quaj ib suab.’
15 Rab taus puas khav yeej tus txhib taws ? Rab kaw puas khav yeej tus tuav nws los siv nws ? Cuag li yog rab pas ua kom tus tsa nws ua zog tau; cuag li yog rab qws ua kom tus neeg tsis yog ntoo ua zog tau! 16 Yog vim li ntawd Huab Tais, tus HUAB TAIS kav tsoom tshiab, yuav ua kom nws cov neeg rog cia li yuag tuaj, thiab nws lub hwj chim yuav ua kom muaj ib qho cig tuaj, xws li hluav taws cig.

NPN 94: 5-6, 7-8, 9-10, 14-15

Txais: (14a) Huab Tais yuav tsis tso nws haiv neeg pov tseg..

HUAB TAIS, lawv tsuj koj haiv neeg !
Lawv ua kom koj lub cuab tam raug txom nyem.
Lawv tua tus poj ntsuam thiab tus pej kum neeg,
lawv txo cov ntsuag nos siav.

Txais: (14a) Huab Tais yuav tsis tso nws haiv neeg pov tseg..

Lawv hais tias : "HUAB TAIS tsis txawj pom,
Yas Kos tus Tswv Ntuj tsis txawj paub dab tsi li.”
Cov neeg ruam hauv tsoom pej xeem, nej yuav tsum paub !
Cov neeg vwm, hnub twg nej mam yuav thoob tsib ?

Txais: (14a) Huab Tais yuav tsis tso nws haiv neeg pov tseg..

Tus cog pob ntseg rau neeg, nws tsis txawj hnov lus lod ?
Tus puab qhov muag rau neeg, nws tsis txawj pom lod ?
Tus cob ib tsoom kuj cuab, nws tsis txawj nplua txim lod ?
Twb yog nws pub kev txawj ntse rau neeg.

Txais: (14a) Huab Tais yuav tsis tso nws haiv neeg pov tseg..

Vim HUAB TAIS tsis nrauj nws haiv neeg,
nws tsis muab nws lub cuab tam laim pov tseg.
Kev txiav txim thiaj yuav rov muaj kev haum pheej,
tas tsoom neeg siab ncaj yuav coj raws kev haum pheej.

Txais: (14a) Huab Tais yuav tsis tso nws haiv neeg pov tseg..

As Les Lus Yas: MT 11: 25

Txais: As les lus yas, as les lus yas..

Peb cav txog koj, Leej Txiv, Huab Tais kav lub ntuj lub teb,
Koj tau qhia kom cov neeg me paub txog lub Ceeb Tsheej. .

Txais: As les lus yas, as les lus yas.

Ntawv Moo Zoo: MT 11: 25-27

25 Lub caij ntawd, Yes Xus tsa suab hais tias : "Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov neeg coj li me nyuam yaus.
26 Yog li tiag, Txiv, koj lub siab yeej nyiam li ntawd.
27 Kuv Txiv muab tas ib puas tsav yam cob rau kuv. Tsis muaj leej twg paub Leej Tub, tsuas kawg Leej Txiv thiaj paub. Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom nws paub.”

TIM 19 LUB 7 HLI 2018

Hnub Tsib Lis Piam Kaum Tsib Nruav Xyoo B Nruab Lis Piam Xyoo II

Zaj Nyeem Ib: HIS XAIS 26: 7-9, 12, 16-19

7 Tus neeg siab ncaj txoj kev yog txoj kev ncaj; koj leem kom kev tiaj rau tus neeg siab ncaj taug. 8 Muaj tiag, Huab Tais , nyob hauv txoj kev coj raws li koj tau txiav, peb tos ntsoov koj; peb tus plig ntshaw txog koj lub npe thiab ntshaw nco ntsoov txog koj. 9 Hmo ntuj, kuv tus plig nqhis txog koj, kuv lub tswv yim nrhiav koj nyob hauv qhov tob tob hauv kuv nruab siab. Thaum koj txiav txim rau lub ntiaj teb, mas cov neeg nyob hauv lub qab ntuj yuav paub txog txoj kev ncaj.
12 Huab Tais, koj muab kev thaj yeeb rau peb; peb tej hauj lwm los yog koj ua pub rau peb tib si.
16 HUAB TAIS, peb raug txom nyem, peb tuaj cuag koj; peb tuaj thov koj vim yog koj rau txim rau peb. 17 Zoo li tus poj niam cev xeeb tub, thaum txog caij nws tab tom yuav daws cev, nws mob plab, nws ntsaj thiab quaj qw vim nws zaj mob; peb kuj zoo li ntawd nyob ntawm koj xub ntiag, Huab Tais. 18 Peb tau xeeb tub, peb ntsaj mob daws cev, peb tsuas yug tau cua xwb, peb tsis tau coj kev cawm rau lub ntiaj teb li, cov neeg nyob hauv lub qab ntuj ua tsis tau kom kev cawm tshwm sim los. 19 Tiam sis koj cov neeg tuag yuav ciaj rov los, lawv lub cev yuav sawv rov los. Nej cov uas pw nyob hauv av, nej kav tsij tsim dheev los, nej cia li seev suab hu nkauj. Vim koj cov lwg yog lwg pom kev kaj lug, hos lub teb chaws tsaus ntuj txawj daws cev yug me nyuam.

NPN 102: 13-14AB+15, 16-18, 19-21

Txais: (20b) Huab Tais nyob saum ntuj dauv muag los saib lub ntiaj teb.

Koj, HUAB TAIS, yuav nyob tas mus li ib txhis,
txhua tiam neeg yuav nco txog koj tiam dhau tiam.
Koj yuav sawv, koj yuav hlub Xis Yoos,
vim txog caij koj yuav khuv leej nws lawm.
Koj cov tub txib hlub txog nws cov pob zeb,
lawv lub siab khuv leej nws cov plua tshauv.

Txais: (20b) Huab Tais nyob saum ntuj dauv muag los saib lub ntiaj teb.

Cov kuj cuab yuav hwm koj lub npe, HUAB TAIS,
tas cov vaj nyob ntiaj teb yuav hwm koj lub hwj chim.
Thaum HUAB TAIS rov txhim Xis Yoos,
sawv daws yuav pom nws nyob hauv nws lub hwj chim;
nws yuav tig los mloog cov neeg txom nyem tej lus thov,
nws yuav tsis thuam lawv zaj thov ntuj.

Txais: (20b) Huab Tais nyob saum ntuj dauv muag los saib lub ntiaj teb.

Nej sau qhov no cia rau tiam neeg uas yuav los tom ntej,
ces cov neeg raug tsim los yuav cav txog Tswv Ntuj :
Nws nyob saum nws lub tsev ntshiab dauv muag los saib;
HUAB TAIS nyob saum txheej ntuj siab ntsia rau ntiaj teb,
Kom tau mloog cov neeg nyob txim lub suab nroo,
kom tau tso cov cov neeg zwm rau kev tuag dim.

Txais: (20b) Huab Tais nyob saum ntuj dauv muag los saib lub ntiaj teb.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Tas nej sawv daws uas nej khwv thiab ris nra hnyav,
nej tuaj cuag kuv mas kuv yuav cia nej so los siav.”

Txais: As les lus yas, as les lus yas.

Ntawv Moo Zoo: MT 11: 28-30

Yes Xus hais tias:
28 "Tas nej sawv daws uas nej khwv, thiab ris nra hnyav, nej tuaj cuag kuv mas kuv yuav cia nej so los siav. 29 Nej txais kuv tus quab mus kwv, nej kawm ntawm kuv, vim kuv muaj lub siab mos siab muag, kuv tsis muab hlob, nej tus plig yuav nrhiav tau chaw so los siav.
30 Vim kuv tus quab kwv yooj yim, thiab kuv lub nra sib.”

TIM 20 LUB 7 HLI 2018

Hnub Rau Lis Piam Kaum Tsib Nruab Xyoo B Nruab lis piam Xyoo II

Hwm LN Apollinaris, Tswv Qhia tuag ua Tim Khawv

Zaj Nyeem Ib: HIS XAIS 38: 1-6, 21-22, 7-8

1 Muaj ib hnub, tus vaj Es Xes Kias tau ib tug mob hnyav, Yaj Saub His Xais uas yog As Mos tub tuaj xyuas nws, His Xais hais rau nws tias : “HUAB TAIS hais li no : Koj tu koj lub tsev kom zoo, vim koj yuav tuag, koj yuav tsis zoo rov los ntxiv.” 2 Ces Es Xes Kias tig hlo rau tim phab ntsa, nws thov HUAB TAIS tias : 3 "HUAB TAIS aw, thov koj nco ntsoov tias kuv tau taug kev nyob ntawm koj xub ntiag, kuv npuab koj, tsis ua ntau lub siab, kuv tau ua yam uas koj pom zoo." Es Xes Kias quaj tu siab nrho. 4 HUAB TAIS lo lus nrov tuaj rau His Xais tias : 5 "Koj mus hais rau Es Xes Kias tias : HUAB TAIS koj txiv Das Vis tus Tswv Ntuj hais li no : Kuv tau hnov koj zaj thov ntuj, kuv tau pom koj cov kua muag lawm. Kuv yuav kho koj kom zoo; peb hnub saum no koj yuav nce mus pem HAB TAIS lub tuam tsev. Kuv yuav ntxiv kaum tsib xyoos rau koj lub hnub nyoog. 6 Kuv yuav npo koj thiab npo lub tsheej no kom dim ntawm tus vaj As Xws txhais tes. Kuv yuav pov hwm lub tsheej no."
21 His Xais thiaj hais tias : "Nej muab ib pob tshuaj txiv ncuav pias los npuab lub qhov txhab, ces nws yuav zoo." 22 Es Xes Kias hais tias : "Yuav muaj lub cim twg ua kom kuv paub tias kuv yuav mus pem HUAB TAIS lub tsev ?"
7 His Xais teb tias : "HUAB TAIS yuav ua lub cim no qhia rau koj paub tias nws yuav ua raws li lo lus nws tau hais: 8 Koj yuav pom, kuv yuav ua kom lub hnub tus duab ntxoov ntxoo nyob ntawm cov theem ntaiv nce mus saum As Kas chav tsev rov thaub qab kaum theem ntaiv uas nws tau nqes los ntxoov.” Ces lub hnub cia li thaub qab kaum theem ntaiv ntawm tus ntaiv uas nws tau nqes los ntxoov.

NPN: HIS XAIS 38: 10, 11, 12ABCD, 16

Txais: (17b) Huab Tais, koj tau cawm kuv txoj sia lawm, kuv yuav tsis tuag.

Thaum tav su nrig hauv kuv lub neej, kuv yuav tsum ncaim mus.
Kuv raug mus hla hauv cov qhov rooj hauv ntuj txias teb tsaus,
kuv yuav tsis tau ua kuv lub neej mus ntxiv kom tas.

Txais: (17b) Huab Tais, koj tau cawm kuv txoj sia lawm, kuv yuav tsis tuag.

Kuv hais tias: “Kuv yuav tsis pom HUAB TAIS ntxiv
nyob hauv cov neeg ciaj lub teb chaws.
Kuv yuav tsis pom kuv cov phooj ywg ntxiv
nyob hauv cov neeg uas nyob ntiaj teb.

Txais: (17b) Huab Tais, koj tau cawm kuv txoj sia lawm, kuv yuav tsis tuag.

Kuv lub tsev raug muab rhuav coj mus tso deb ntawm kuv
Zoo xws li cov yug yaj lub tsev tsam phooj.
Xws li tus ntos ntaub, kuv muab kuv txoj sia kauv ua ib thooj,
Ces nws muab kuv cov tw xov txiav tawm ntawm lub ntos mus.

Txais: (17b) Huab Tais, koj tau cawm kuv txoj sia lawm, kuv yuav tsis tuag.

Cov uas Huab Tais txuag, lawv muaj txoj sia nyob;
koj yog kuv tus ntsuj plig txoj sia,
Koj yuav muab kev noj qab nyob zoo thiab txoj sia rau kuv.

Txais: (17b) Huab Tais, koj tau cawm kuv txoj sia lawm, kuv yuav tsis tuag.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab,
Kuv paub lawv, lawv raws nraim kuv qab.

Txais: As les lus yas, as les lus yas.

Ntawv Moo Zoo: MT 12: 1-8

1 Muaj ib hnub Xas Npas Tos, Yes Xus hla ib co teb npleg. Cov thwj tim tshaib plab, ces lawv pib de tej hnab nplej los noj. 2 Cov Fas Lis Xais pom li ntawd, lawv hais rau Yes Xus tias : "Saib, koj cov thwj tim ua tej yam txwv tsis pub ua hnub Xas Npas Tos !" 3 Tab sis, Yes Xus hais rau lawv tias : "Nej tsis tau nyeem qhov Das Vis ua thaum Das Vis thiab nws cov neeg tshaib plab lod ? 4 tias nws tau chaws mus hauv Tswv Ntuj lub tsev li cas, thiab nws thiab nws cov neeg tau noj cov ncuav mov txi Ntuj, uas kev cai lawv noj tsis tau, kawg yog cov leej choj xwb thiaj noj tau. 5 Los nej puas tau nyeem hauv Txoj Cai tias, hnub Xas Npas Tos, cov leej choj ua hauj lwm nyob hauv lub Tuam Tsev teev Ntuj, lawv tsis caiv raws txoj cai l0s lawv tsis txhaum? 6 Kuv qhia meej rau nej tias, nyob ntawm no muaj ib tug loj dua lub Tuam Tsev Teev Ntuj. 7 Yog nej to taub lo Lus hais tias : ‘Qhov kuv xav yuav, yog txoj kev khuv leej, tsis yog thaj txi Ntuj,’ mas nej yuav tsis muab txim rau cov neeg tsis txhaum. 8 Vim tias, Neeg Leej Tub yog tus tswv ntawm hnub Xas Npas Tos."

TIM 21 LUB 7 HLI 2018

Hnub Xya Lis Piam Kaum tsin Nruab Xyoo B Nruab Lis Piam Xyoo II

Hwm LN Lawrence nyob Brindisi

Zaj NYeem Ib: MIS KES 2: 1-5

1 Cov neeg nrhiav kev ua phem thiab npaj tswv yim tias yuav ua li cas thaum lawv tseem pw saum txaj, mas lawv txoj hmoov phem. Ntuj nyuam qhuav kaj, lawv twb mus ua qhov lawv npaj lawm, vim lawv txhais tes ua tau. 2 Yog lawv ntshaw luag tej liaj teb mas lawv cia li mus txeeb, yog lawv ntshaw luag tej vaj tse mas lawv cia li mus huab yuav, lawv ntes tus tswv tsev nrog nws lub tsev, ntes tus neeg nrog nws tej cuab yeej cuab tam tib si. 3 Vim li ntawd HUAB TAIS thiaj hais li no : "Kuv npaj tso ib txoj kev txom nyem los raug tsav neeg no, yog ib txog kev txom nyem uas nej yuav tsis tau kev thau nej lub caj dab kom dim. Nej yuav mus kev tsa taub hau siab tsis tau, vim yog lub caij raug txom nyem lawm. 4 Hnub ntawd, luag yuav hais tej zaj lus paj huam thuam nej, luag yuav hu tej zaj nkauj seev tu siab hais tias : “Peb tsis tshuav dab tsi li lawm. Lawv ntsuas peb tej liaj teb faib rau cov tswv uas tuaj ntes peb tas lawm. Peb haiv neeg cov liaj teb raug muab faib tas lawm tsis muaj leej twg yuav mus muab tau rov los li.” 5 Li ntawd nej yuav tsis muaj leej twg mus ntsuas av kom muaj ciaj nyob hauv HUAB TAIS pawg neeg lawm."

NPN 10: 1-2, 3-4, 7-8, 14

Txais: (12b) Huab Tais, thov koj tsis txhob hnov qab cov neeg pluag.

HUAB TAIS, ua cas koj nyob nrug deb deb?
Lub caij peb ntsib kev txhawj xeeb, ua cas koj tsiv nraim, ?
Tus tsis hwm ntuj lub siab muab hlob tsim tus neeg txom nyem;
tus txom nyem mag rooj ntxiab uas tus tod cuab.

Txais: (12b) Huab Tais, thov koj tsis txhob hnov qab cov neeg pluag.

Tus tsis hwm Ntuj rov qhuas nws txog nws tej kev ntshaw.
Tus siab hlob thuam thiab tsis saib Huab Tais rau nqes.
Tus tsis hwm Ntuj lub siab muab hlob tsis kam nrhiav Huab Tais,
nws tsuas xav hais tias : "Tsis muaj Tswv Ntuj !"

Txais: (12b) Huab Tais, thov koj tsis txhob hnov qab cov neeg pluag.

Nws lub ncauj puv tej lus foom phem, lus dag, lus cuav.
Nws tus nplaig tsuas hais kev lim hiam, kev ua phem.
Nws nyas nraim nkoos ntawm tej ntug zos,
nyiag muab tus tsis txhaum tua ntawm nws qhov chaw nkaum;
nws qhov muag soj ntshis tus txom nyem.

Txais: (12b) Huab Tais, thov koj tsis txhob hnov qab cov neeg pluag.

Koj yeej pom tej kev txom nyem kev tu siab,
Koj txhais tes tuav tas txhia yam ntawd.
Tus txom nyem tso siab rau koj,
Tus ntsuag nos vam koj pab nws.

Txais: (12b) Huab Tais, thov koj tsis txhob hnov qab cov neeg pluag.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib haum xeeb nyob hauv Leej Pleev
Thiab nws muab kev tshaj lub moo zoo txog kev sib haum xeeb cob rau peb.

Txais: As les lus yas, as les lus yas.


Ntawv Moo Zoo: MT 12: 14-21

14 Cov Fas Lis Xais tawm mus sab laj nrhiav saib yuav muab Yes Xus tua zoo li cas. 15 Yes Xus paub li ntawd, ces nws tawm ntawm qhov chaw ntawd mus. Muaj neeg coob raws nws, Yes Xus kho lawv sawv daws zoo tas. 16 Nws txwv tsis pub lawv qhia nws rau neeg paub. 17 ces thiaj muaj raws li Yaj Saub His Xais tau hais tseg tias :
18 “Nej ntsia, kuv tus Tub Txib uas kuv xaiv, nws yog tus kuv nyiam, kuv tus plig zoo siab nyob hauv nws. Kuv yuav tso kuv lub Tswv Yim rau saum nws. Nws yuav tshaj Txoj Kev Ncaj rau tsoom kuj cuab. 19 Nws yuav tsis cav, tsis nthe nrov, tsis muaj leej twg hnov nws lub suab tom tej tshav puam. 20 Tus tauj qaug, nws tsis muab lov, tus teeb xeeb tseem ncho pa liab pliv, nws tsis muab tua. Nws yuav ua li ntawd mus txog hnub nws coj Txoj Kev Ncaj mus txais kev yeej. 21 Ces tsoom kuj cuab yuav tso siab lug rau nws lub npe.”

TIM 23 LUB 7 HLI 2018

Hnub Ob Lis Piam Kaum Rau Nruab Xyoo B Nruab Lis Piam Xyoo II

Hwm LN Bridget

Zaj Nyeem Ib: MIS KES 6: 1-4, 6-8

1 Nej mloog saib HUAB TAIS hais dab tsi:
“Nej cia li sawv, nej tuaj hais nej cov lus rau ntawm cov toj roob siab, kom cov toj roob qis hnov nej lub suab. 2 Cov toj roob, nej mloog HUAB TAIS cov lus, ntiaj teb cov taw ntsa, nej cuab pob ntseg mloog ! Vim HUAB TAIS muaj lus tsis zoo siab rau nws haiv neeg, nws yuav nrog His Xas Lais sib hais.
3 Kuv haiv neeg, kuv tau ua dab tsi rau nej ? Kuv tau ua dab tsi kom nej ceeb laj? Nej teb kuv mas ! 4 Kuv tau coj nej tawm hauv Hais Nkws Tos teb los, kuv tau txhiv nej kom dim ntawm lub tsev nej ua qhev los. Kuv tau xa Mais Xes, As Loos thiab Mis Lias tuaj pab nej.”
6 “Kuv yuav nqa dab tsi mus cev rau HUAB TAIS, tus Tswv Ntuj nyob siab, thaum kuv mus pe hawm nws ? Kuv puas yuav coj ib co txim mus hlawv, coj ib co thav nyuj muaj ib xyoos mus? 7 Tab yog kuv txi ntau txhiab tus laug yaj los hliv roj ntws cuag li kaum txhiab tus dej ntws nws puas yuav zoo siab ? Kuv puas yuav tsum muab kuv tus tub hlob los them kuv lub txim txhaum ? Kuv puas yuav tsum muab tus tawm ntawm kuv cev nqaij los mus them kuv tus ntsuj plig qhov txhaum ?”
8 “Leej tib neeg, Ntuj twb qhia qhov zoo rau koj paub lawm thiab qhia qhov uas HUAB TAIS xav kom koj ua: tsuas yog yuav tsum ua raws txoj kev ncaj, thiab yuav tsum nyiam txoj kev ua siab zoo rau luag, thiab muaj lub siab ua neeg me nrog koj tus Tswv Ntuj taug kev xwb.”

NPN 50: 5-6, 8-9, 16BC-17, 21+23

Txais: (23b) Kuv yuav ua kom tus neeg ncaj paub Tswv Ntuj txoj kev cawm neeg.

"Nej hu cov ntseeg kuv tuaj sib sau nyob ntawm kuv,
cov uas tau tua tsiaj txi ntuj nrog kuv cog lus.”
Lub ntuj tshaj txog nws txoj kev ncaj,
vim Tswv Ntuj yog tus txiav txim.

Txais: (23b) Kuv yuav ua kom tus neeg ncaj paub Tswv Ntuj txoj kev cawm neeg.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis kam yuav ib tug heev nyuj tawm hauv koj tsev los,
los ib tug laug tshis tawm hauv koj pab tsiaj los.

Txais: Kuv yuav ua kom tus neeg ncaj paub Tswv Ntuj txoj kev cawm neeg.

Tim li cas nej thiaj qog kuv cov kev cai lij choj,
thiab nej hais kuv cov lus kuv tau nrog nej cog ntawm di ncauj,
tiam sis nej ntxub txoj kev coj kom haum,
thiab muab kuv tej lus cuam pov tom nej qab xwb?

Txais: Kuv yuav ua kom tus neeg ncaj paub Tswv Ntuj txoj kev cawm neeg.

Thaum nej ua tej yam zoo li no, kuv nyob ntsiag to.
Nej xav tias kuv zoo li nej thiab xwb.
Tiam sis kuv yuav qhuab qhia nej, yuav muaj ib lub txim rau nej ris.
Tus twg tuaj cev nws kev ua tsaug ua txim pub rau kuv yog nws cav txog kuv;
kuv yuav muab Tswv Ntuj txoj kev cawm rau tus neeg ncaj pom.

Txais: Kuv yuav ua kom tus neeg ncaj paub Tswv Ntuj txoj kev cawm neeg.

As Les Lus Yas: NPN 95: 8

Txais: As les lus ays, as les lus yas.

Yog hnub no koj hnov nws lub suab,
tsis txhob ua koj lub siab tawv ncauj.

Txais: As les lus ays, as les lus yas.

Ntawv Moo Zoo: MT 12: 38-42

38 Ib co kws Ntawv Ntshiab thiab ib co Fas Lis Xais hais rau Yes Xus tias : "Xib Hwb, peb xav kom koj ua ib lub cim rau peb pom." 39 Yes Xus teb rau lawv hais tias : "Tiam neeg phem thiab fav xeeb no taij ib lub cim, tab sis yuav tsis muaj ib lub cim rau lawv, tsuas kawg muaj yaj saub Yos Nas lub cim xwb. 40 Raws nkaus li Yos Nas tau nyob peb hnub peb hmos hauv tus vaj ntses lub plab, Neeg Leej Tub kuj yuav nyob hauv plawv av peb hnub peb hmos thiab. 41 Hnub Txiav Txim, cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim thaum Yos Nas ntuas lawv, lawv hloov siab. Hos nyob ntawm no twb muaj ib tug loj dua Yos Nas ! 42 Tus poj vaj nyob Qab Teb kuj yuav nrog tiam neeg no sawv los thiab, nws yuav muab txim rau lawv, vim nws tuaj puag tim npoo ntiaj teb kawg tuaj mloog Xas Los Moos cov lus thoob tsib. Hos nyob ntawm no, twb muaj ib tug loj dua Xas Los Moos.”