Home
Yog koj tso siab rau Yesxus lub siab ntshiab, nws yuav ua koj siab kaj lug 
TOS HUAB TAIS CHIV 2 Xyoo B, tim 07-12-2014
*-Tus Yaj Saub His Xais hais tias: {40:1-5+9-11.}
Tswv Ntuj niaj hnub tuaj xyuas nws cov neeg xws li tus tswv zov Yaj tuaj saib nws pab Yaj.
Mloog Tswv Ntuj lo lus mas zoo li Nws niaj hnub hais rau cov thawj neeg tias:
Nej nplij kuv haiv neeg mas! Nej hais lus nrov rau lub ntiaj teb neeg mloog tias, nyiam no lub caij mus ua tub zog, ua qhev them txim txhaum dua lawm.
Txoj kev them txim txhaum cov paj tshab tuaj ntawm saum ntuj tuaj muaj nqes tshaj kev them txim txhaum li ob npaug lawm.
Tswv Ntuj lub ncauj hais tias:
Nej ntsia nej tus Tswv Ntuj tuaj xws li tus muaj tsim, muaj hwj chim hwj huam loj tas nrho. Txhua Haiv neeg tuaj zwm rau Nws, cov Haiv neeg uas Nws txeeb tau tuaj ua nws ntej xws li cov Yaj tuaj mus nog zaub.
Zaum no, txhua Haiv neeg yuav pon Tswv Ntuj lub hwj huam, hwj chim, raws li lub suab qw nyob teb chaws Suab Puam tias:
Nej npaj txoj kev rau Tswv Ntuj taug. Nej ncaus ib txoj kev ncaj rau Tswv Ntuj tuaj txog nej tej zos los nej lub tsev. Nej txhub cov kwj ha kom tiaj. Nej tshav cov hauv roob kom qis.
Cov qhov ntuj thiab tej toj ntxhab, nej txhub kom tiaj zoo ua tshav rag nyuj rag neeg, thiab zoo ua tshav zaub rau Cov Yaj mus nog zaub.
Ces Tswv Ntuj lub hwj chim yuav tawm tuaj rau sawv daws pom xyeem. Yog lub caij uas cov neeg muaj mob nkeeg thiab cov neeg ris nra hnyav yuav tau so los siav lawm.
**-Li ntawd Pob Zeb thiaj hais qhia peb tias: { 3:8-14.}
Huab Tais ua siab ntev tos kom peb tig los yuav lub siab tshiab. Mas peb txhob ncua ntev, vim peb tsis paub tias, Huab Tais yuav tuaj tos peb hnub twg!
Pob Zeb qhia rau peb tias:
Kwv tij, tshuav ib yam uas nej yuav tsum tau paub txog:
Nyob hauv Huab Tais Ntuj mas, 1000, xyoo yog ntev zoo li ib hnub. Ib hnub thiab 1000 xyoo yog ntev tib yam xwb. Thaum Huab Tais cog lus tias Nws yuav cia ib yam los Nws yuav rhuav ib yam mas Huab Tais tsis ncua ntev.
Muaj neeg hais tias Huab Tais yuav ua dab tsi mas Huab Tais ua qeeb qeeb. Qhov ntawd yog vim Huab Tais ua siab ntev rau neeg ntiaj teb xwb. Nws xav txuag sawv daws kom txhob ploj mus sai.
Huab Tais lub hnub nyoog yuav tuaj ntawd zoo li tus tub sab, nws tuaj thaum neeg tsis ceev faj. Thiab zoo li lub khauv zeeg cua, ib vuag xwb ces yaj ntshis tas lawm.
Ua li mas peb txhob ncua ntev, coj lub siab tshiab, teev Ntuj tas zog, Kom Tswv Ntuj lub hnub nyoog tuaj sai Ces lub ntuj lub teb tshiab thiaj yuav tuaj nyob raws li lo lus tau cog cia.
Ua li mas lub caij peb tos ntawd, thov kom peb txhob muaj lub siab tsis huv rau Huab Tais pom nyob rau qhov chaw kaj.
***-Ces Mas Kos ntawv Moo Zoo hais ntxiv tias:{1:1-8.}
Kom peb tig los yuav lub siab tshiab tos Yes Xus Pleev. Yog peb coj tus yam ntxwv ua neeg them txim txhaum, mas peb lub siab yuav kaj.
Thaum Mas Kos pib qhib Yes Xus lub Moo Zoo hais txog Yes Xus Pleev yog Tswv Ntuj Leej tub. Raws li Tus Yaj Saub His Xais hais tias, kuv xa kuv tus tiam li ua koj ntej kom tau npaj txoj kev rau koj taug.
Kwv tij hnub no yog ib hnub tseem ceeb rau peb cov neegt ntseeg tias:
Tswv Ntuj tau txib sawv daws ua Tswv Ntuj cov Yaj Saub, kom tau ua Leej Pleev cov tiam lis thoov kev rau Yes Xus Pleev taug.
Yes Xus Pleev tuaj nyob hauv lub sim ceeb no lawm. Tshuav qhov uas Leej Pleev yuav tuaj nyob txawm hauv peb sawv daws nrub siab nruab cev.
Peb yuav ncaus cov toj roob siab hauv peb kom qis, yuav txhub cov hav tob ntawm peb kom tiaj, cov qhov ntuj thiab cov toj ntxhab peb yuav meem av rau kom tiaj, zoo ua tshav zaub rau Nws pab Yaj nog, los tiaj kom zoo rag nyuj rag nees rau neeg saib.
Peb cov xub ntseeg lub Moo Zoo yog peb li hauj lwm. Peb yog lub suab qw nyob teb chaws suab puam tias, nej npaj Huab Tais txoj kev kom tiaj tus rau Huab Tais taug tuaj kom txog nej lub zos los nej lub tsev.
Peb yuav tshaj rau peb lub siab tias:
Nej txhob ncua ntev, txog lub caij lawm nej cia li tig los yuav lub siab tshiab. Rab taus nyob ze lub hauv paus ntoo lawm, Cov ntoo tsis txi txiv tus Tswv yuav muab ntov pov tseg. Cia chaws cog dua tsob ntoo tshiab, kom txi txiv ncw.
-ZAJ THOV NTUJ.
1. Peb thov Ntuj rau Tswv Ntuj lub Koom Txoos, Tswv Ntuj rov tuaj xyuas nws cov neeg, zoo li tus tswv zov Yaj nws tuaj xyuas nws paj Yaj mus li. Tswv Ntuj thov koj pov hwm thiab txuag koj lub Koom Txoos kom muaj zog tig los yuav lub siab. Peb thov koj.
2. Peb thov Ntuj rau cov Nom Tswv kav teb chaws, Huab Tais thov koj ua siab ntev tos kom neeg tig los yuav lub siab tshiab, kom cov nom Tswv txawj hlub tsoom pej xeem ces lub teb chaws yuav tau nyob kaj lug.
Peb thov koj...
3. Peb thov Ntuj rau cov neeg txom nyem. Cov nyob tsev loj faj, cov muaj mob nkeeg txhua tus, cov pw tsev tshuaj cov tom vaj tsev, thiab cov tuaj ntawm no tib si. Tswv Ntuj koj yog cov neeg txom nyem ntawd tus tswv Ntuj. Thaum lawv raug kev txom nyem no lawv tau them txim lawm thov koj khuv leej lawv. Peb thov koj...
4. Peb thov Ntuj rau cov neeg ntxhov siab, cov tu siab, cov tsis muaj kwv tij, cov niam txiv tsis sib hlub,cov tsis muaj vaj tse nyob, cov neeg thoj nam. Tswv Ntuj koj paub lawv teeb meem zoo dua, Koj khuv leej lawv mog.
5. Peb thov Ntuj rau cov tuaj teev Ntuj hnub no. Tswv Ntuj thov koj pub txiaj ntsim los ntawm lub thaj txi ntuj hub no rau peb kom muaj zoo dej tshuaj los kho peb tej mob nkeeg nyob hauv peb nruab siab. Peb Thov koj...
6.Peb cev peb zaj lus nyias muaj nyob nyias nruab siab rau Ntuj Kom nTuj ntxhuav txhua yam tsis huv los paug rau peb nruab siab tawm mus. Peb thov koj...
Yaj Zoov Ntxheb, Xib Hwb.
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
