Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


XH. Yaj Zoov Ntxheb lub Tsev THOOB TSIB - Page 17 Empty

Suav neeg tuaj saib, txij hnub 17/09/2010 los mus.


    XH. Yaj Zoov Ntxheb lub Tsev THOOB TSIB

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 11th March 2020, 8:52 am


    Zaj 449- TEJ LO LUS ZOO NTUAS COV TXIJ NKAWM TSHIAB.

    Thaud tej laus mus xaiv nyob, luag xaiv li cas, thiab xav li cas nyob hauv luag nruab siab?
    Thaud tej laus lawv mus xaiv nyab lawv tsis nug tias:
    Nyob hauv nej lub zos no, puas muaj tej ntxhia zoo nkauj! Luag nug tias, nyob hauv nej lub zos no puas muaj tej ntxhais zoo ua nyab no xwb?
    Cov lus los ntawm, cov neeg tau teb los! Lawv hais tias:
    Muaj thiab mas, nws tsis zoo nkauj pes tsawg. Tab sis nws yog ib tug ntxhais tsim txiaj od! Nws nquag thiab txawj hais lus, haum tej laus siab kawg thiab mas!
    Cov tub thiab cov ntxhais, uas muaj lub ncauj lo lus zoo. Mas lawv zoo puav tam li lawv muaj ib phau ntawv passport, muaj nqis kawg. Nws yuav hla txoj kev twg, los mus rau lub teb chaws twg, mas luag qhib kev lug rau nws mus.
    Nws tsis ntshai cov neeg phem los cov tub sab yuav lwg nws. Nws cov lus tawm ntawm nws lub ncauj los, muaj nqes cuag li yog lus nyiaj lus kub, muas tau luag nplooj siab los ua phooj ywg sib raug zoo sai kawg.
    Nws nrog luag muaj kev sib tso siab lug, nws taug txoj kev twg thiab nrhiav yam twg. Mas lus qhia tseeb thiab muab txoj kev yog rau nws taug mus.
    Nyob hauv lub neej sib sau los nyob ua txij nkawm, neb yuav nco ntsoov yuav thiab xyaum coj li hais no, ua los pub rau yus tus txij nkawm.
    Txhob saib lub meej mom ntsej muag zoo nkauj zoo nraug, los mus ntshaw luag poj niam los ntshaw luag tus txiv los ua yus tud!
    Yog neb tsis muaj kev paub thiab ceev faj, mas tsam neb raug tau cov ntsuj plig dab phem qhia neb. Ces neb yuav siv, neb ob lub meej mom ntsej muag zoo nkauj zoo nraug ntawd.
    Los mus ua kev nkauj kev nraug nrog luaj poj niam los nrog luag tej txiv ua kev plees kev yi. Ces neb yuav ua ib lub neej lwj siab nyob mus li, tsis kav laus.
    Lub tswv yim uas cov dab ntsuj plig phem ntawd qhia, mas tua thiab rhuav yus yooj yim thiab tua yus sai kawg. Zoo li yus tawm rooj mus, yus tseem muaj lub siab nyob luag ntxhi.
    Tig loo rov los tsev xwb, dab cov ntsuj plig phem twb los nyob puv vaj puv tsev tos yus lawm. Nraum zoov los muaj tsov, hauv tsev los muaj dab tib si.
    Noj mov los tsis qab, pwv vov pam los tsis sov li, kho siab zim kwv tij los tsis nyiam. Neej tsa los tsis hlub, tsuas yog tshuav Mab Sua luag thiaj tsis paub, txog yus lub neej uas nqa qe qauj no xwb. Ces tas kev cia siab hlo mus ib sim neej.
    Vim yus tau qhuas txog yus, kev zoo nkauj zoo nraug, pub rau kev ua nkauj ua nraug rau teb caws saib nrog rau luag tej txiv, los luag tej poj niam lawm. Kom luag paub thiab cav tias, yus yog hom neeg zoo nkauj thiab zoo nraug tshaj nplaws cov.
    Lub tswv yim xav tau li hais no, puav leej yog txais los ntawm, cov ntsuj plig dab phem tau cob qhia rau yus los. Kom muaj kev lwj siab, ua kom lub cuab lub yig piam sij mus.
    Yuav ua rau tej tub ki tsis muaj lub neej, muaj zoo niam zoo txiv, nrog luag teb chaws ua neej. Tej me nyuab yuav tau ris lub npe tias:
    Lawv yog Nkauj Feb thiab txiv nraug Fav cov tub ki, lub npe no tseem nyob qis tshaj cov me nyuam ntsuag uas niam txiv tau dua toj mus lawd…
    Muaj ib txoj kev yeej xwb, Neb yuav vam txog Ntuj Niam Ntuj Txiv los pab pov puag neb lub neej. Ob leeg sib ua luag, ua luag kom tau sib hlub, sib ua luag mus pe hawm Tswv Ntuj thiab sib ua luag rau kwv tij neej tsa ob tog tau lub chaw ntoj chaw thuv khiav mus los sib cuag ua ke.
    Thaum muaj kev txhawj xeeb kev tus siab ob leeg rov los sib ua luag. koj qhia koj kev tu siab rau kuv, kuv qhia kuv kev txhov siab rau koj. Koj nyob ua kuv luag sib pab daws teeb meem.
    Kuv nyob ua koj luag kom muaj kev kaj siab rau koj, kom neb yeej tau cov ntsuj plig phem los haub ntxias neb mus. Ces neb yuav ua ib lub neej nyob kaj siab lug, nyob ua luag txwj zaum ua luag laus pov hwm cuab kwv tij los cuab neej tsa txhua tus.
    Neb zoo puav tam li tus choj tuam rau kwv tij neej tsa sawv daws tau taug mus los sib cuag kom tus choj tshoob los tsis pub lov, choj kos los tsis pub puas mu sib txhiab cuaj txhis li no mog.

    Sacramento tim 14/5/2019.
    Yaj Zoov Ntxheb Xib Hwb.




    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 31st March 2020, 9:14 pm


    Zaj 450- ROV HAIS KEV SIB HLUB.

    Kev sib hlub nyob nrog kev ua txij nkawm, hais rau cov npaj siab sib sau los nyob ua txij nkawm. Kev sib hlub, mas yog ib yam tseem ceej thiab loj tas nrho.
    Cov txiav siab los nyob ua txij nkawm, yuav nco ntoov tias, muaj kev phem kev zoo sib npaug zos nyob hauv. Hais kom sawv daws nco ntsoov txog, kev sib hlub uas thaum niam hluas nkauj, txiv hluas nraug.
    Ob leeg tau tham muaj li cas cia lawd, nco ntsoov txhob hloov lus thiab sib hwm raws li kev sib cog lus. Yus pom muaj dab tsi txawv, mas yuav eev faj heev txog.
    Feem ntau tsis kuj yuav muaj tseeb li yus xav thiab tej lus luag sab nraud hais txog yus. Yog yus lam ua xyem xyav thiab khaws tseg, ua chaw chim los pheej niaj hnub xav txog. Mas yuav ua tau, yus kev sib hlub, nyob tsis kav laus.
    Nyob hauv ob tug txij nkawm no. Yog pheej muaj tej lus xav nyob hauv nruab siab li hais no.
    1.Mas cov poj niam, mas lawv tsuas muaj kev tu siab loj nyob hauv lawv lub neej xwb. yog muaj kev sib ncaim, los lawv lub cev tsis hloov mus ntau.
    Hos yog muaj kev sib ncaim mus zoo li, sib nrauj sib tso mus lawm, mas lawv tau txais dua ib tug txiv neej tshiab, los kav lawv lub neej txuas ntxiv mus.
    Ces lawv tsis muaj mob, lwm yam ntau dua cov txiv neej los rau lawv. Lawv tsuas muaj kev khuv xim thiab kev nco ntau xwb.
    2. Hos ntawm cov txiv neej sab, mas muaj teeb meem loj thiab ntau dua poj niam sab. Vim tias, txiv neej lawv tuav lub meej mom siab dua poj niam.
    Nyob hauv txiv neej sab, mas tsis sib nrauj sib tso mus. Mas yuav muaj cov teeb meem li no:
    Tus txiv neej siab ncaj, nws tsuas yog hais lus kom txhob muaj chaw txaj luag, hais tej lo lus laug lub caij nyoog mus kom ntis tau nws lub meej mom txiv neej tias:
    Nws yog ib tug txiv neej, muaj peev xwm thiab muaj meej mom loj xwb. Nws tsis swb rau txoj kev luag hais saib tsis taus nws lub meej mom.
    Ces yog tej poj niam lam xav tias, nws siab tsis ncaj, nws taug kev plees ua kev phem kev qias nrog luag poj niam los hluas nkauj, ua nkauj ua nraug lawm.
    Poj niam pheej muab los hais ua hnub ua hmo tias, nws muaj siab nrog luag lwm tus mus ua nkauj ua nraug laum.
    Tsis muab kev hlub los hais txog, kev sib pab thiab sib hlub nyob hauv lub neej li. Nyob hauv tsev poj niam tau cais txaj chaw pw tsis vov pam ua ke.
    Los tsis muaj kev sib hlub, hais tej los lus tsis qhuas thiab ua kev ntxim ntxub rau tus txiv neej. Mas thaum tus txiv neej muaj lub hnub nyug ze xtog li 50 xyoo rov saud lawm.
    Mas nws yuav raug hom mob no:
    Tus txiv neej lub zog txiv neej yuav ntaug zuj sus mus, zoo li nws tsis muaj zog ua txiv neej lawm. Ces nws yuav pib nrhiav tshauaj txiv neej tawv nruj, nws pob ntseg yuav to qhov zoo. Rau cov neeg tham tias, lawv paub tshuaj txiv neej tawv nruj.
    Thaum ntawd ob tug, niam los laus, txiv los kuj laus tas lawm, luag hais tias laus cev los tsis laus siab. Ces ob leeg yuav pib nug tej kws tshuaj los nug cov neeg paub tshuaj tias:
    Koj cov tshuaj muaj zog rau txiv neej no, yog yuav no ne, yuav kim li cas? Thiab Leej twg paub, kuv xav tau nws npaws xov tooj no, nws yuav nug mus thoob qab teb dhau qaum teb, rau neeg paub.
    Vim los ntawm nkawd kev tsis ceev faj thiab tsis txawj hais lus, los tsis xawj coj lub neej sib hlub li thaum hluas tau sib hais los.
    3. Nyob hauv qee tus txiv neej, mas nws muaj kev txaj muag, tsis zoo hais tawm rau leej twg hnov. Ces nws tu siab twj ywm, heev zuj zus tsis qab sib ua neej nyob ntxiv.
    Nws kuj muaj kev txhawj xeeb tias, yus tsis ua txiv neej lawm. Ntshai poj niam ncaim kiag ntawm yus mus lawm, ces ntsib tsawg tus txiv neej, los ntshai poj niam yeej thov kom laug pab xyuas poj niam li lawm thiab.
    Ces haj yam ua rau tus txiv neej ntawd, txoj sia luv dua tuaj, vim nws muaj kev tu siab loj. Thiab nws xav tej zaj yuam kev mus deb dhau lawm. Yog nws tsis muaj mob los nws tsis qab los noj mov.
    Nws noj mov tsis tsheej pluas haus dej tsis cuag cua, ces nws yuav swb tus kab mob sab foob khaub thuas sai. Thiab nws tas kev cia siab rau kev ua neej lawm.
    Ces nws xav txog kev txo txoj sia, kom tsis tau ua neej nyob ntxiv mus lawm xwb. Nws zaj xav muaj nyob hauv nws nruab siab mas nws tsis zoo hais qhia rau leej twg li
    Tej tub ki los tsis muaj tus paub txog, phooj ywg los tsis paub li. Muaj tib tug thiaj paub xwb, tus ntawd, ces yog nws poj niam xwb, los poj niam tsis zoo qhia leej twg li thiab.
    Nws kuj ntshais qhia, tsam nws ho qhia los luag tej txiv neej saib tsis taus nws. Cuag li nws twb yog poj nrauj los poj ntsuam tsis muaj txiv los lawm ntau xyoo.
    Tsam luag ho thov yuav muab yus ua cuag list us tsis muaj txiv thiab. Yus tsis pub los niam cuag li yog lus hais tawm los li yus xav xav thab rau luag hnov, luag thiaj taij thiab thov ua.
    Niam tsis zoos hais li cas li, vim yus kev sib hlub tsis txawj coj thiab tsis txawj hais, leej txiv thiaj txais tau tus mob zoo li ntawd lawm.
    Tej neeg zoo li no, ces tej laus hais tias: Yus twb laus lawm yus mam ntse. ces yog ntse thaum yus laus lawd tsis zoo siv lawm.
    Yus yuav khuv xim tas yus sim neej, yus mam rov tig saib yus lub neej. Yus twb tsis tau ua ib yam tseem ceej li, txoj kev uas Qaum Ntuj tso yus los ua neeg ib zaug kom tsim nyoog li yus tej txuj ci.
    Tseem muaj qee lee, ua neeg tsab ntse, qhia tsis tau ib yam tseem ceeb rau tej tub ki coj los mus ua lawv lub neej.
    Xav los mas ib tiam neeg, yus tsuas muaj kev tsim teeb meem rau laug tej thiab khav tias, yus ntse tshaj li lawm.
    Mus txog saum ntuj mas yam uas yus tau coj mus ntawd, twb tsis tsim nuj dab tsi li. Yus tus txiaj nkawm los tseem ua tsis tau yus tus phooj ywg sib rau zoo thiab.
    Yog rov los mus thawj thiab tau, mas ntshai, yus yuav sau ntawv tib si tseg nyob saum ntuj kom tas tso. Yus mam rov los thawj thiab dua rov ua zoo los pauj rau yus tus txij nkawm uas yus tsis tau ua zoo nws ntawd lauj!
    Tab txawm txawj xav npaum twg, los yug tsuas yug los ua neeg ib zaug xwb. Lwm tiam ces kawg tshuav tus Ntsuj Plig ua lub neej nyob nrog Qaum ntuj xwb, yus ces tsuas muaj, qhov phem thiab qhov zoo txij li yus tau ua dhau los lawd xwb.
    Tsis muaj yuav npau sua ib zaug tias, yus yuav rov los mus thawj thiab tso. Mam rov ua pauj rau ntuj Niam Ntuj txi tau qhuas yus li lawm os!
    4.Txij nkawm kev sib hlub tseem tshuav ib qib lus hais tias: Yuav nco ntsoov tej lus uas thaum yus ua nkauj ua nraug, yus tau sib cog lus cia tias:
    Kuv nyiam koj, mas kuv yuav hlub thiab mloog koj hais. kom wb lub neej sib hlub raws li tej lus wb tau hais tseg nram ntej nram ntxov ntawd los.
    Yog ib yam tseem ceeb kawg nkaus thiab od! Nco ntsoov tias, tsam tej neej tsa, zoo li Niam Tais Yawm Txiv thiab cov dab laug, lawv tsis nyiam tus vauv.
    Tsam vauv ho ua lub neej txom nyem, dua cov neej tsa. Ces vauv twb muaj kev tso siab lug tias: Vauv muaj ib lub zoo tswv yim thiab muaj zoo peev xwm, yus yuav tau kev mus qiv Niam Tais Yawm Txiv.
    Los Dab Laug lawv nyiaj los mus chiv peev ua lag luam kom Vauv lub neej sawv siab sib xws, thiaj muaj kev sib pab mus rau yav tom ntej.
    Los tej neej tsa Niam Tais Yawm Txiv thiab Dab laug lawv ua neeg qia dub tsis kam qiv nyiaj rau Vaus txais los mus chiv peev.
    Ces Vauv muaj kev tus siab:
    kev tu siab muaj ob peb yam tu siab tuaj ua kom Vauv lub neej sawv tsis taus!
    a.Tu siab vim poj niam yoog raws li cov neej tsa, tsis pab hais kom lawv pab qiv los txais rau Vauv ua lag luam chiv peev kom Vauv lub neej sawv mus taus.
    Ces cov neej ta cia li hais tias, peb tsis muaj lawm. Peb qiv los pab tsis tau, kom Vauv txhob tus siab. Tab sis cov lus no yog lus lam hais raws li lub siab tsis xav pab xwb.
    b. Ces Vauv tu siab twj ywmj, ces vauv tsis hlub yus tus nkauj tus muam, Los los cia li tsis muaj kev tso siab thiab Vauv ua neeg vwm nrog kev tu siab.
    Vauv mus xyaum ua neeg quav yeeb quav tshuaj, mus tsis xav mus khwv noj khwv haus. Cia li ua neeg loj leeb nyob tsis tsheej cuab yim.
    Tso tej niam tub nyob ua ntsuag ciaj txom nyem tsis muaj noj muaj haus xws teb chaws. Yuav ua rau teb chaws ntxub yus tej nkauj muam nrog nws tej tub ki tias, lawv yog ib tsev niag hmoob tsis tsheej.
    c. Yog Vauv muaj peev xwm, ces Vauv tso yus tus nkauj muam pov tseg. Vuav mus ua dua ib lub neej tshiab, tej zaum nws ho muaj hmoov.
    Ces Vauv los Yawm Yij yuav los nrog yus sib twv, qee tsam yus ho tsis yeej Vauv. Ces ho tau poob tsim mus tias, vim yus ua neeg qia dub tsis hwm luag cov txom nyem.
    Nyob hauv yus nrub siab, mas yus xav ntsoov tias niag pluag tas npaud, yeej yuav tsis muaj ib zaug uas nws yuav ua neeg nplua nuj raws tau yus qab li.
    Thaum kawg yus ho tau txaj muag poob tsim mus los muaj od.
    d. Muaj qee tus mas yus ua li ntawd rau luag. ces luag tu siab tuaj, luag tsis muaj tswv yim ntau. Ces luag cia li mus txo luag txoj sia, luag xav tias, yus hmoov yuav phem ua luaj. Yuav mus yuav tau tsev Hmoob neej tsa qia dub tas npaud!
    Ces tuag mus kom lawv niag nkauj muam no tau raug kev txom nyem, ua ntsuag rau luag teb chaws ntsia vim tsev hmoob no ua neeg qia dub dhau lawm.
    Ces naws cia li mus zawm rau, voj hmab voj hlua tuag. Los mus dhia zeb dhia tsua tuag mus los muaj. Mam tseg ncauj xaiv ncauj lus rau lwm tiam mam sib hais plaub nyob rau dab teb.
    Hias txog tej plaub ntug no, tsuas yog muaj kev chim siab. Hais kom siab nqig xwb, yuav muaj tau thiab hais tau. Mas tsis muaj muaj neeg paub txog.
    E, Zaj lus no kuv sau los rau peb sawv daws ua kev kawm paub xwb. tej zawm muaj li hais no. Los yog ua npau suav pom mas tseem yuav tseeb dua thiab. Txhob muab ntaus nqi mus rau leej twg!
    Sawv daws lam kawm, kom yus ua neeg thoob tsib me ntsis tuaj. Yam yus tau ua tsi yog los kom xub paub thiab ho txawj ceev faj. Yog tsis tsim nyog ua los, ho txhob ua thiab tsam yus ho tau ua npau suav pom.
    Ces yus ho ua neej nyob tsis kaj siab mog ib tsoom phooj ywg sawv daws.

    Sacramento tim 21/5/2019.
    Yaj Zoov Ntxheb Xib Hwb.








    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 8th April 2020, 9:21 am



    Zaj 451- QNIA KEV XAIV TXWJ NKAWM

    Nyob hauv kev xaiv txwj nkawm, maj 4 yam loj:
    1.Mas yog txoj hmoo raug los, Yam no, mas ntiaj teb neeg tsis muaj tus paub txog.  Ua li Hmoob hais nkawd yeej nqa ntawv txij nkwm pem ntuj los sib sau ua txij nkawm nyob ntiaj teb no.
    2.KEV XAIV NTAWM YUS TUS KHEEJ MUAJ 3 TXOJ KEV XAIV:
    1. XAIV TUS NTSE.
    Yog yus paub txoj kev xaiv zoo, mas yus xaiv tus ntse tshaj yus.  Thaum sib sau los ua txij nkawm lawd, Yus cia nws ua tus thawj, nyob hauv lub cuab lub yig.
    Yus tso plhuav txua yam rau nws tswj kav, yus tsuas ua tus pab nws.  Kom txhua yam mus zoo raws li lub siab xav, ua yam twg los kom ua tau txhob tos leej twg.
    Yus tsuas ua tus pab txhawb thiab nres.  kom sawv tsees mus tiav log.  Tsis muaj chaw daig khuam rau qhov twg xwb.
    Ces yus tau ib lub neej zoo, nyob yam kaj sib lug, tsis muaj kev txob kev txhawj tias, tsam ua tsis tiav no. Ces yus lub neej yuav nyob kaj siab lug mus kav laus.
    2. XAIV TUS RUAM.
    Yog yus xaiv tus ruam dua yus, kuj yog ib txij kev zoo thiab.  Vim nws tswv yim tsawg dua yus lawm, yus ho txib tau nws tsis tawv ncauj.  Nws nyiam mloog lus, Yus txib ua tsawg yam los, nws tsi cav kom yeej.
    Tsuav yog yus muab kev hlub kom txaus nws, nws txawj moog lus.   Nws tsis txawj xam khib, tsuav yog hlub raws lis kev sib txib sib hu, ces nws tuaj yeem tas nrho.
    Nyob hauv thawj ob yam uas yog yus txawj xaiv tau  no, ua rau yus lub neej nyob kaj siab luag. muaj siab ua neeg nyob luag ntxhi, ua neej nyob xws teb xws chaw mus kav laus ntag.
    3.YUS XAIV TSIS RAUG TXOJ KWV NTSHAW.
    Yus xaiV los ntawm lub cev ntaj ntsug, uas muaj lub meej mom zoo nkauj zoo nraug los xwb. Ces yus yuav xaiv tau tsis paub tias nruam, los ntse li.
    Xaiv tau cov nyob nruab nrab tsis ruam tsis ntse, tab tom xaiv tau.  Cov uas, luag hais tias:  Xaiv tau cov ua neeg thoj chim los thoj xeeb.
    Nws twb ruam los cav tsab ua neeg ntse, hais lus tsis paub tias, lus muaj ko thiab lus tsis muaj ko, los yog dab tsi li.
    Tsuav yog hais lus kom puv ncauj xwb, ces nws qhuas tias nws ntse tshaj sawv daws lawm. Tsis yuav thiab mloog leej twg hais li.
    Hnov tsis tau leej twg piav zaj twg los nws lees paub tas nrho. Ho tso nws ua thawj los ua tsis tau, kom nws mloog los tsis txawj mloog li thiab.
    Nws tsuas muaj cav kom yeej thiab ua neeg khav theeb tias, nws niam paub ub paub no thiab paub txhua yam.
    Qhia los tsis mloog, txib los txis txawj, nws pheej nyiam ua tus piav rau luag yuav. Piav los tsi muaj qab muaj hau, piav tsis tshab qhia tsis tau.
    Nws tsuas tsab kev zoo nkauj zoo nraug  muab nws ua kev cuab phiaj tos luag kev tham.  Saib luag puas seem rau nws sab.
    Nws tsab ua neeg muaj tsim txiaj, muaj nuj nqes heev, tab sis tsis muaj txuj li.  Yam nws txawj ces yog hais lus rau cua tshuab mus, kom  nrov raug neeg tej pob ntseg.
    Kom muaj neeg coob coob, tig los pom nws, nws kev zoo siab tsuas muaj nyob txij li ntawd xwb. Tus xaiv tau ib tug txij nkawm, zoo li hom hais no.  Mas nws ua lub neej nyob lwj sib tshaj lwm cov neeg.
    Thaum los pem ntuj los, yus twb tsis nqa ntawv los ua Nkaj feb thiab ua nraug Fav, los hmoov phem los raws tau lawm ces yuav tau ua Nkauj Feb los ua nraug Fav mus li.
    4.TSEEM TSHUA IB LO LUS.
    Yog lo lus kawg, thaum muaj zoo li no lawd, yus yuav tau vam txog tsoom niam tsoom txiv los tsoom txheeb ze pab qhia tej hauv tshuaj cawm siav rau yus kho yus lub neej.
    Saib yus puas muaj hmoo rov tau lub neej zoo ua mus:
    a-Yog yus tau ib tub neeg zoo li hais no lawm, yuav tau ua lub siab ntev. Yuav tau tsab ntse thiab tsab ua ruam ua ke, qee tsam yuav tau hais lus ruam. Qee tsam ho yuav tau hais lus ntse thiab:
    Yog dab tsi tiag!  Yam li:
    Yuav tau mus kawm cov lus uas tej neeg mus plob hav zoov ua lus ruam ntawd, los hais:  Yus yuav tau ua neeg ruam, piav tes rau ib kuag!  
    Yam uas yuav raug plaub ntug tsis xav pub raug rau nws, yog nws xav hnov tseeb. Mas yuav ua ruam piav tes, muab ib tug ntiv tes los pos qhov ncauj.
    Hais lus ntxhi li tus neeg yuav tua nas los tua noog tias:   Ua twj ywm tsam nas noog hnov ces lawv ya tas lawm.  Tsam nws hnov meej lawm ces nws ho mus cuab kom muaj ntau tshaj tsis muaj tseeb.
    b. Yog thaum nws ua hauj lwm, los ua tau ib yam zoo lawm.  Ho yuav hais lus ntse rau nws li nws yog ib tug neeg tsim txiaj,   Kom nws muaj siab thiab ntseeg tias, yus hlub thiab nws.
    Ces nws nyob tus tsis ua neeg siab ywj fab ywj fwj, thiab xav tias:  Sawv daws, mas niam ntxub nws ib leeg nkaus xwb.  Ua dab tsi los tsis muaj neeg nyiam thiab ntseeg, los qhuas txog nws li.
    Qhov ua no, yog txoj kev ua ib hauv tshuaj zoo, los pov hwm nws kom nyob tus, tsis muaj kev npau taws thiab hloov siab mus ua neeg dog dig.
    Yuav txawj pov hwm nws thiab zam ntau yam rau nws, ces nws yuav tsis peem mus kom dhau txoj cai uas nyob tsis taus ua ke.  Kev tu siab, kev chim los kev npau taws, yuav tsawg zuj zus mus.
    Yog tias, tus nrog nws nyob ua txij nkawm, tsis muaj kev pov hwm hom neeg zoo li hais no.  Ces txoj hmoov phem yuav raws tau sai,  Yus tsis muaj nqa ntawv phem ua txij nkawm phem ntuj los, los yus cia li tshaj rau teb chaws paub tias:
    Tshai yog yus coj daim ntawv phem los ua neej los ua li cas li lauj.  Yus cia li muaj kev tu siab tsis paub hais lus zoo rau ib leeg mus dhau leeg.
    Ces yog daim ntawv ua Nkauj Feb thiab ntawv ua Nraug Fav los raws cuag yus lawm. Tsis xav ua los yuav tau ua mus li od.
    Thaum yus ho tau ua Nkauj Feb thiab Nraug Fav mus lawd, qee leej mas yuav muaj kev khuv xim. Vim yus ua neeg thoob tsib tsis txaus.  Tsis yog yus yeej muaj ntawv phem los ua neej, hos yog yus txhob txwm mus nrhiav daim ntawv phem los ua neej.
    Tus neeg noj hnav tsis txhij tsis txhua, ces sib liam tias tim koj los tim kuv thiaj phem li no.  Yog tus tau noj txhij hnav txhua, ua neeg thoob tsib to nrog txaus.
    Ces yog tim ob leeg txoj kev ruam es kham mus ua neeg ntse, ces thiaj ua tau Suav cwj ntas ob tog plam mus zoo li no ntag!
    Lo lus kawg, kuv sau los kom muaj ib zaj lus hais, mus rau seem lus no, kom muaj chawm kawm paub rau cov poj niam los txiv neej ntshaw ua lub neej tshav ntuj nrig nyob mus kom kav laus.

    Sa cramento tim 24/5/2019.
    Yaj Zoov Ntxheb Xib Hwb.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 16th April 2020, 8:47 am



    Zaj 453- NTUJ LUB TXIAJ NTSIM TUAJ TXOG TSOOM HMOOB.

    Tswv Ntuj lub txiaj ntsim tuaj txog tsoom Hmoob nyob Los Tsaus teb: saum lub Roob Nyuj Qus, Kiukatiam, Xeev khuam thiab lub Nroog Luang Prabang.

    Ib lub sij hawm  ntawd, Txiv Plig Soob Leej Ranqeur mus rau sab Xeev Khuam.   Hos Txiv Plig Nyiaj Pov Yve Bertrais, tuaj rau sab luang Prabang, nws mus rau saum lub zos toj siab Roob Nyuj Qus (Kiukatiam).

    Tsis paub ob pab Hmoob nyob Npab Nas Pham Poom, xub txais kev ntseeg los yog pab nyob Rooj Nyuj Qus.   Xub txais kev ntseeg, txog Yes Xus lub Moo Zoo.

    1/.Hais txog dab neeg nyob Npab Nas Pham Poom, yog ob kwv tij Hmoob Lis.  Uas yog Lis Xyooj Pov thiab Lis Nchaiv  Ntxawg, ob yim no xub ntseeg Ntuj?

    Los yog Yaj Zam Nob  xub ntseeg Ntuj ua ntej?  
    Muaj dab neeg hais tias:
    Muaj ib hnub ces Lis Xyooj Pov muaj ib tug me nyuam mob, Ces nws poj niam mus hais rau Txiv Plig Soob Leej tias: nws tus me nyuam muaj mob lawm, yuav ua li cas rau?

    Txiv Plig Soob leej tsis tau paub lus Hmoob zoo, Hmoob los tsis paub lus Los Tsuas zoo thiab. Txiv Plig hais raws li Tswv Ntuj kev hlub, nws hais tias:

    Txhob txhawj, Huab Tais Ntuj yeej hlub.
    Ntuj yuav pab kom zoo xwb.
    Txawm yog muaj mob kho tsis tau los Ntuj yeej nyiam thiab hlub.
    Ntuj yuav coj tus Ntsuj plig mus rau txoj kev zoo xwb txhob txhawj!

    Neeg tsis sib to taub lus hais kom mus rau sab lus tso siab,  Txiv Plig Soob Leej hais tias:
    Yog Yes Xus hlub hlub, Yes Xus yuav coj mus nrog Yes Xus nyob.

    Ces Hmoob to taub yuam kev tias:
     Yes Xus yuav coj mus , ces yuav yog yuav tuag mus xwb lauj!
     Ces pab Hmoob txais kev ntseeg nyob Npab Nas Pham Poom lawv cia li thim  kev ntseeg Ntuj tas tib si lawm.

    Lis Tub Yias ua Phub thene (député). Lis Nkaj Zeb Lis Txos,  lawv twb tau mus nrog Txiv Plig Soob Leej nyob kawm ntawv ib yam li Yaj Txoov Yeeb thiab Thoj Tshu Hwj lawv cov nyob rau  lub zos Roob Nyuj Qus.  Uas tau nrog Txiv Plig Ntiaj Pov nyob thiab tau kawm ntawv.

    2/. Nyob rau lub zos Roob Nyuj Qus no, Txiv Plig Nyiaj Pov tau tuaj nrog Hmoob nyob tau 4 xyoo kiag mam li muaj Yaj Zam Nob ib yim los ntseeg txog Yes Xus lub Moo Zoo.

    Thaum txiv Plig Nyiaj Pov tuaj txog  lub zos Roob Nyuj Qus, Txiv Plig cia li mus so nyob hauv Yaj Txawj Tswb tsev.   Nws nrog Yaj Txawj tswb thiab nws tus tub Yaj Zam Nob nyob, Zam Nob nyob zoo li yog phooj ywg sib raug zoo.

    Muaj qee lub caij Txiv Plig tsis xis neej, Yaj Zam Nob kuj tau ua neeb saib Txiv Plig.  Muaj ib xyoo Yaj Zam Nob mob ua npaws, yog hom mob daj uas  mob rau ntawm nws lub tsib.
    Yaj Zam Nob mob loj kawg, kev ciaj kev tuag sib npaug.  Txiv Plig mus nqa tshuaj tuaj kho nws. ib lub caij ntev loo. Yaj Zam Nob mam rov zoo los.
    Yaj Zam Nob yog ib tug txiv neeb, nws ua neeg dav kawg.  Nws ua neeb kho tas nrho ib nqaj tog Hmoob  nyob toj siab. saum cov zos Hmoob, lub zos Roob Nyuj, pham xab Neeb, Pham qhaum thiab Pam  Las Las Mus.
    Thaum Zam Nob zoo lawm, nws paub tseeb tias, kev ua neeb tsis yeej kev siv tshuaj.  Ces nws txiv siab txais kev ntseeg Ntuj.

    ‐Xyoo 1954 thawj pab neeg ntseeg
    Pib Xyoo 1954, mas Zam Nob xav kawm kev ntseeg thiab xav kawm ntawv Hmoob.  

    Txiv Plig thiaj xuas tes sau phau ntawv « A.E.T. »
    ­Lub 8 hli tim 15, yog lub hnub nyoog hawm Niam Mab Liab mus saum ntuj, Txiv Plig Nyiaj Pov ua lub cim ntxuav rau Yaj Zam Nob, Yaj  Txawj  Tswb,  Yaj  Yeeb  thiab Thoj Hwj.

    Thaum Txiv plig yuav tshaj Ntuj lus rau Hmoob, Txiv Plig Nyiaj Pov mus nug Phas Nyas Tub Npis Lis Foom nyob Xeev Khuam nws paub lus Fab Kis tias:  Hmoob tus dab loj tshaj Hmoob hu nws lub npe ua li cas?

    Tub Npis Lis Foom tau qhia Txiv Plig Nyiaj Pov tias, Hmoob hu ua Ntxwg Nyoog no. Txiv Plig tau Tub Npis Lis Foom lo lus ces Txiv Plig los hais rau Zam Nob thiab tsoom txwj laus neeg tias:
    Kuv tuaj nrog nej nyob, mas yog kuv tuaj qhia Ntxwg Nyoog kev cai. Tas nrho pab txwj laus Hmoob muaj: Hmoob Yaj, Hmoob Thoj, Hmoob Xyooj thiab Hmoob Tsab, Hmoob Vwj.
    Hmoob hais tias, Txiv Plig, Ntxwg nyoog yog tus dab loj.  Nws yog tus dab phem kawg laid!  Peb Hmoob mas peb ntshai Ntxwj Nyoog xwb, nws yog tus tso ntaub ploj ntawv tuag los rau Hmoob thiaj tau ploj tau tuag mus ua dab.
    Ntxwj Nyoog, mas Hmoob tsis nyiam li lauj!  

    Txiv Plig mam nug tias, tus dab zoo pab Hmoob no, Hmoob nej hu lia cas?

    Cov laus neeg hais tias:
    Tsis paub tus dab Zoo, Hmoob hais tias, yog Qaum  Ntuj yog tus zoo pab Hmoob no xwb.  Ces Txiv Plig thiaj tau muab tis npe hu ua Huab Tais Ntuj, kom Hmoob paub.  Vim Tej laus pes tsawg tiam los lawm, Hmoob Yeej ib txwm hu ua Qaum Ntuj siab zoo no xwb.
    Txij ntawd los, Txiv plig Nyiaj Pov tau qhia rau nws cov Xib Hwb thiab cov neeg ntseeg.  Nyob Roob Nyuj Qus hu ua Huab Tais Ntuj li peb hais los txog niaj hnub no.

    3/. Yog Leej Ntuj Plig tshoj kom Txiv Plig Nyiaj Pov, tsim ib cov ntawv.  Zoo hais lus lus Hmoob kom tau muab Hmoob tej txuj thiab Yes Xus lub Zoo Zoo sau ua lus Hmoob rau Hmoob nyeem thiab sau kom yog lus Hmoob.
    Txiv Plig tau muab ntawv Fuaj Kuj los sau ua lus Hmoob los nws txis tus ntawv tsis meej. nws kuj paub cov Christians (Protestants), tsim ib co ntawv Hmoob los ntawm cov tsiaj ntawv Aas kiv los thiab.
    Los zoo li tsis zoo siv li, Txiv Plig thiaj hais rau tus As Cas As (Pasteur) Mes lis Kas Berney nyob Xeev Kuam tias:
    Peb sib koom kom tsim tau ib co ntawv, zoo sau Hmoob lus.  Kom sau tau Tswv Ntuj cov Ntawv Ntshiab, ua lus Hmoob, rau tsoom Hmoob tau nyeem kom lawv paub txog Tswv Ntuj.

    Pasteur Berney no paub ib tug kws ntawv (Languistique), yog Dr. Smalley yog ib tug kws txawj tsim ntawv.   Nws thiaj pab Txiv Plig Nyiaj Pov nkawd tsim hom ntawv Hmoob Las Tees, Ntawv Hmoob Thoob Teb uas tsoom Hmoob siv niaj hnub no.
    Thaum lawv tsim tau cov ntawv no lawd, ob pab neeg cov Hmoob coj Ka Tau Liv thiab cov Hmoob coj Chistian, Protestants, sib cog lus kom txhob hloov siv zoo li no mus li.

    Tus zoo siab heev yog Txiv Plig Nyiaj Pov, Txiv Plig kom Zam Nob hais ob zaj kwv txhiaj thiab ob zaj dab neeg. Txiv plig luam tau ua ib phau me nyuam ntawv me me.

    Txiv plig txawm xa ob phau mus rau sab Sayaboury, ob phau mus rau sab Luang Nam Tha. ob phau mus rau sab Xeev khuam.
    Cov phau ntawv no, mus paug rau cov Xib Hwb Los Tsuas qhia ntawv cov pob ntseg thiab qhov muag.  Ces muaj ib txub plaub ntug sawv los loj kawg.  Tsis muaj neeg lees paub rau qhov zoo.  Txiv Plig yuav rau xa rov mus rau Fuaj Kuj teb, nws tu sia heev, nws thiaj li hais rau Zam Nob paub.
    Nws yuav tau rov mus rau nws lub teb chaw, nws khuv leej Zam Nob heev.
    Zam Nob tau hais ib lo lus li no:  "Lus yog kuv lus, hos ntawv yog koj ntawv."  

    Zam Nob twb kawm ntawv Hmoob paub nyeem paub sau tib si lawm.
    Txij hnub ntawd, los txog lub caij Zam Nob yuav ncaim ntawm lub ntiaj teb no mus.  Mas Zam Nob ua tus tsis txawj ntawv tsis paub nyeem ib los li lus nyob hauv ntawv li.

    Lub moo plaub ntug no, ncha mus txog Phas Nyas Tub Ntxawg Lis Foom.  Nws mus kawm tau ua kws Txiav Txim Lij Choj txheej siab, tiav nyob Fuaj Kuj teb rov los.
    Phas Nyas Tub Ntxawg Lis Foom lees tias yog nws lam sau los sim saib puas zoo siv xwb.  Vim Hmoob tsis paub ntawv, xav xa xov sib nug moo tsis tau. Tsis tau yog ib zaj tseeb. Ces lub plaub ntug no tuag mus lawm.

    4/.Xyoo 1962 Txiv Plig Nyiaj Pov tau los nyob Vees Cas,Phas Nyas Tub Npis Lis Foom tau nce mus ua Huab Tais Los Tsuas ib tug tub tuav xam sab laj nrog Huab Tais (Conseillé du Roi).
    Phas Nyas Tub Npis Lis Foom tuaj nyob Vees Cas, Txiv Plig Nyiaj pov thov kom Phas Nyas Tub Npis Lis Foom coj cov ntawv Hmoob  las tees no coj mus zwm nyob rau hauv  lub Kab Xua Mab Ham Thai (Ministère de l'Interieur) Los Tsuas kom Hmoob thiaj muaj cai siv cov Ntawv Hmoob las tees no nyob Los Tsuas teb. Lub caij nyoog ntawv Général Vaj Pov twb tau ua Nom tub rog loj saib pawg tub rog Phaj 2 nyob sab Xeev Khuam lawm.
    Tseem Hwv Los Tsuas tau tso lus kheev, ces peb xub mus sau ntawv xov xwm sib fi txuj nyob hauv Tub Npis Lis Foom tsev, peb niaj hnub mus.

    Txiv Plig Nyiaj Pov niaj hnub txhais ntawv Fab Kis hais txog Yes Xus lub Moo Zoo rau cov Xib Hwb kawm. Lawv yuav mus ua tub Tshaj Ntuj Lus nyob rau cov zo Hmoob.

    5/. Nyob lub zos Roob Nyuj Qus, Zam Nob yog thawj yim neeg ntseeg Huab Tais Ntuj Yaj Tsuj Xyooj tsis tau faib cuab tawm vaj tse ces nws ntseeg nrog Yaj Zam Nob.
    Thoj Tsav Ntxiaj yog yim 3 ntseeg, Yaj Nkias Keem, kuv toj laug, yog yim tim 3 xyoo 1952.  

    Xyoo 1954 Txiv Plig tau coj kuv, Yaj Zoov Ntxheb, thiab kuv tus kwv hu ua Yaj Faiv Ntxhos mus kawm ntawv nyob rau lub nroog Pahsane.  Nyob ntu nruab nrab teb Vees Cas thiab Savanakhet. Paksane yog lub chaw kawm ntawv siab thiab muaj cov Xib hwb thiab cov tub ntawv nyob ntawm chaw.
    Yog lub tsev kawm ntawv ua cov tub Los Tsuas kawm tas ces yuav muaj kawm txawv teb chaws. mus kawm ua Txiv Leej choj, los mus kawm kev ua kws kho mob los kawm kev ua nom ua tswv.

    Mus rau Thaib teb, Fuaj Kuj, Mes Kuj, los kas Nas Das.

    Xyoo 1957 Txiv Plig Nyiaj Pov hloov chaw mus nyob rau Sam Neua.  Nyov Sam Neua muaj cov teeb meem Hmoob Sawv Vaj, hais txog Huab Tais yuav nqes pem ntuj los.  Vim Hmoob toj siab hnov tej Nom Tswv co politiciens, hais txog tus Huab Tais Los Tsuas Tshiab yuav los (Huab Tais laus nyuam qhuav tuag ces yuav tsa tus Vaj Ntxwv Nplog  tshiab).  Hmoob ntaus nqe tias yog Huab Tais tshiab yuav nqes pem Ntuj los pab Hmoob. Ces Hmoob tos Hmoob tus  Huab Tais.
    Thaum lawv hnov cov xov uas cov neeg ntseeg Ntuj tuaj hais txog tus Huab Tais  nyob pem Ntuj yuav nqes los las lawv ntseeg sai sai.
    Txiv Plig Nyiaj Pov mus  tau peb hlis xwb twb muaj ntau yim Hmoob ntseeg Txog Yes Xus lub Moo Zoo. Puav leej yog cov thawj neeg xub ntseeg. cov tsis tau ntseeg los lawv puav leej ua phooj ywg nrog rau cov Txiv Plig zoo.

    6/. Xyoo 1959. Txiv Plig Nyiaj Pov hloov mus rau Sam Neua lawm. Sab Luang Prabang mus rau Sayaboury, Louang Nam Tha yog cov Txi Leej Choj Italie tuaj saib.

    Xyoo 1959 ntawd, Txiv Plig Vaj Pov lub npe Italia yog Yiji Sion thiab  Xib Hwb Thoj Xyooj mus saib lub zos Hmoob muaj lub npe hu ua zos  Na  vaas nyob rau Mab teb. ntawm xeev Luang Na Tha.
    Lub teb chaws no tsoom Hmoob tseem kub siab lug tos Niam Txiv Vaj Hmoob yuav nqes pem Ntuj los tib yam. lawv twb tos tau ob peb xyoos lawm. Lawv tus Niam txiv tos, Huab Tais Hmoob ntawd tau tas sim neej mus lawm.
    Los lawv lub siab tseem tsos mus li, muaj ib hnub tus thawj neeg hu ua Thoj Suav Lwm no, nws txawm  tshaj tias: Hnub no, yog hnub xiab 15.
    Hais rau sawv daws, peb yuav tau caiv, Niam Txiv Vaj Hmoob yuav nqes los.  Hmoob sawv daws, tas zej zog caiv tsis tawm rooj mus ua qoob loo lawv nyob hauv tsev.
    Tav su hnub qaij li peb teev Xib Hwb Thoj Xyooj thiab Txiv Plig vaj Pob yog neeg Italie, txawm mus txog lawv lub zos.  ncaj qha nug thiab mus so rau tus thawj neeg ntawd lub tsev.

    Hmoob nug tias neb tuaj dab tsi ?  
    Xib Hwb Xyooj teb tias, peb tuaj qhia kev cai tshiab,  lawv thiaj nug tias, Nej cov kev cai tshiab yog qhia txog dab tsi?
    Nws teb tias, peb tuaj qhia Ntuj kev cai hais txog tus Huab Tias Ntuj nyob saum ntuj, Nws leej tub Yes Xus lwb yug los ua neeg tau ntau txhiab xyoo lawm.  Nws lub Moo Zoo nyuam qhuav tuaj txog Los Tsuas teb no tsis tau ntev.
    Tej Mab Sua nyob tiaj nrag nram tej nroog luag paub tas lawm.  Tshuav peb tsoom Hmoob nyob toj siab tsis tau paub txog xwb.  Wb tuaj qhia nws cov kev ntseeg.
    Ces nkawd nrog Hmoob tham tau peb hnub xwb, twb muaj 15 yim Hmoob npaj txais kev ntseeg muab npe rau kawd. Lawv cia li mus ua tsev rau nkawd nyob.
    Txiv Plig Vaj Pov xa xov rov los txog rau lub Zos Roob Nyuj Qus tias:   Muaj neeg ntseeg Hmoob xav kawm ntawv heev, peb tsis muaj Xib Hwb paub qhia ob yam ua ke xws li yuav qhia ntawv thiab kev ntseeg ua ke.
    7/.Txiv Plig Neej Vaj René Charrier nws cia li tuaj tos kuv, Yaj Zoov Ntxheb, nram lub tsev kawm txuj ua Leej Choj Pak Sane los mus ua Xib Hwb qhia Hmoob rau zos Npam Naj Xees, sab Luang Nam Tha Mab teb. Yog lu 7 hli 1959 kuv mus txog lawv lub zos. Mus txog los los nag thiab muaj av nkos nyam zaw xwb, vim cov Mab thiab Hmoob lawv muaj nyuj twm, npua thiab tshis coob. qhov twg los muaj av nkos vim cov tsiaj ntawd coob mus mus los los tuav qhov av ntau.
    Kuv mus txog lawv twb yeej ua lub tsev kawm ntawv tiav tas lawm. Kaj ntug xwb ces cov Hmoob paub tias kuv tuaj txog lawm, ces lawv twb tuaj nyob puv tse tas.
    Peb sib fim ib pliag ntawd xwb ces kuv cia li pib qhia ntawv rau cov Hmoob nyob lub zos Npam Naj Xees ntawd mus. Xyooj nrog kuv nyob peb lub hlis ces nws rov los rau sab Luang Prabang lawm.

    Kuv ua ob txoj hauj lwm ua ke tau peb lub xyoo, tsoom Hmoob lawv mus rhawv dua ib lub zos tshiab nyob ze txoj kev tsheb uas muaj chaw ua teb thiab yuav ua liaj los muaj tib si.
    Muaj ib tug dej ntws lis muaj tej che dej kuj muaj chaw tiaj zoo ua liaj, tej toj roob los muaj chaw zoo ua teb peg ua qoob lo zoo thiab.
    Hmoob nyuam qhuav los rhawv lub zos ntawd tau ib xyoos xwb. ces lub teb chaws kub tuaj, muaj tsov rog los ntawm cov Noob Huab Tais sib txeeb ua tus Tswv kav teb chaws Los Tsuas.
    Tsoom hmoob nyob thaj tsam ntawd thiaj li nyob tsis taus, lawv tsis nyiam tog los Tsuas Liab (communiste).  Yog tog txeeb teb chaws, ces tsoom hmoob lawv tau khiav ua neeg thoj nam tsiv mus sab Houei Say nyob ze Thaib sab qaum teb ntawd.
    Kuv rov los tsev rau sab Luang Prabang, los txog lub teb chaws kuj kub tuaj, lub zos Roob Nyuj Hmoob nyob tsis taus lawm. Muaj tub rog Los Tsuas tuaj nyob puv Hmoob tej zej zog.
    Tsoom kwv tij hmoob nyob Roob Nyuj Qus, lawv tau hloov chaw mus nyob rau sab Sayaboury.  Kuv los nrog Txiv Plig Nyiaj Povnyob Vees Cas yog xyoo 1962.

    8/. Txiv Plig Nyiaj Pov khiav pem Sam neua los, tsis muaj chaw nyob.  Txiv Plig los tsa tau ib lub tsev qhia cov Tub Ntxhais hluas Hmoob xyaum ua ib pab tub ntxhais mus tshaj Ntuj Lus, rau cov zos Hmoob.
    Tsoom Hmoob nyob toj siab lawv tej zej zog nyob ze rau tog Los Tsuas Liab ntxeev siab tuaj Nyab Laj Cob Tsib tog pab ntxeev teb chaws.
    Ces txov Txiv Plig mus nyob tsis tau Hmoob tej zej zog lawm. Tsoom tub ntxhais Hmoob kawm tiav ua tub tshaj Ntuj Lus lawv tis npe hu ua Xib hwb rau cov mus qhia Ntuj Kev Cai.
    Ces yog cov Xib Hwb ntawd mus tshaj Ntuj Lus thiab pab tsoom Hmoob xyuas lawv Hmoob tej kev mob nkeeg.  Kev cog qoob loo thiab kev qhia txuj rau Hmoob tej tub ki txhua yam.

    Mas cov Xib hwb lawv thiaj yuav tau kawm txuj kom muaj peb hom txuj pab tau txhua fab xws li:
    a.Lawv kawm ua ib tug Xib Hwb tshaj kev ntseeg Ntuj  nthuav Yes Xus lub Moo Zoo rau tsoom Hmoob nyob toj Siab kom Hmoob pau txog Tswv Ntuj.
    b. Cov Xib Hwb lawv yuav kawm txoj kev kho mob nkeeg kom pab tau cov Hmoob, muaj sab foob khaub thuas, mob plab dias hau. Faib tshuaj rau cov zej zog Hmoob ib ncig ntawm nws nyob txhua lub zos.
    c. Cov Xib Hwb lawv yuav tau kawm kev cog qoob loo,  kom pab tau cov laus ua qoob loo.  Yuav paub ntau yam noob qoog loo thiab paub tshuaj tua kab noj qoob, paub siv chiv rau qoob loo, kom qoob zoo.  Vim tias tsoom Hmoob tseem yog cov neeg ua qoob lo los yug ncauj yug los, yog feem ntau.
    d. cov Xib Hwb yuav tau kawm txuj kom ua tau ib tug xib hwb qhia ntawv rau cov me nyuam Hmoob txheej qes nyob hauv lub zos lawv nyob.
    Thaum cov me nyuam Hmoob loj hlob los lawv thiaj mus kawm tau txuj nrog tej neeg nyob rau cov nroog loj uas muaj zoo kws qhia txuj.

    Xyoo 1962 Kuv tuaj nyob rau Vees cas, kuv qhia ntawv rau cov tub ntxhais uas tuaj kwm nyob hauv lub tsev kawm txuj qhia ua tub tshaj Ntuj Lus.
    Yav sawv ntxo 8 teev tog 11 teev, kuv qhia pab tub.
    2 teev mus txog 5 teev kuv mus qhia pab ntxhais.

    Lub cai so ntawv kuv cov cov hluas peb mus tshaj kev ntseeg Ntuj nyob rau Roob Kub Twm thiab sab Phu Nyawj, muaj ntau lub zos hmoob.
    Xa cov Xib Hwb mus tshaj Ntuj Lus thiab qhia ntawv los mus faib tshuaj kho mob nkeeg rau Hmoob, peb mus txais Hmoob tej tub tuaj kawm ntawv ua tub Tshaj Ntuj lus.
    Cov Xib hwb lawv yog ib pab neeg coj zoo muaj kev sib tso siab.  Tus yau mloog tus hlob, cov Xib hwv yog ib pab neeg nto moo zoog muaj koob meej kawg.
    Cov Xib Hwb thiab tsoom niam zej txiv zos kuj sib raug zoo li yog ib pab kwv tij.  Noj sib hlub haus sib ce nyob tsis muaj xaiv muaj lus.

    9/. Xyoo 1966 Txiv Plig Tshaj Sawm tuaj thov Txiv Plig Nyiaj Pov thiab coj kuv tshaj Ntuj lus rau Thaib teb. Txiv Plig Tshaj Sawm nyob rau lub nroog  Oudonthani.  Nws tau coj kuv mus ncig lub Roob Hooj Kav, muaj muaj 4 lub zos Hmoob loj nyob:  Peb mus rau lub zos Thab Npawj, zos Paj Nyab, zos Khij Thaub, zos Roob Nploj thiab Khej Me.

    Kuv  tau mus nyob li peb lub hlis, kuv rov los rau Vee Cas. Nws rov tuaj tos kuv mus zaum ob dua thiab. Nws mas xaiv lub zos Khej Me ces nws mus tsa tsev nyob rau ntawd.
    Thawj tus me nyuam Hmoob uas kuv mus tos tuaj kawm ua tub tshaj Ntuj Lus yog Lis Nom Npis nws tuaj nyob rau Mes Kuj teb lawm.
    Vaj Kuam uas raug tub Sab tua lawd, nws kawm tau ua tub tshaj Ntuj Lus zoo kawg. Hmoob txuj ci kev pab zej zog txhua yam li tau piav los lawv nws tau kawm tiav tas.
    Nws muaj ib lub suab hais tau Zaj Tshoob txiv xaiv foom kom hu nkauj zoo kawg.
    Pab kawg uas kuv tau rov mus tos tuaj yog Yaj Toog, Lis Tsheej, Yaj Rwg.  Yog pab kawg nkaus qab no pab no lawv kawm txog qhov kawg uas lub teb chaws los tsuas muaj kev kub ntxhov yuav poob mus ua koom tshas.  Lawv mam rov los rau Thaib teb Ces cov Xib Hwb tau khiav ua neeg thoj nam rau Thaib teb tas.

    10/. Kuv yog Txiv Plig Nyiaj Pov tus Xib Hwb uas ua hauj lwm ntau rau tsoom Hmoob nyob Los Tsuas teb, Thaib teb  Fab Kis teb teb, Nkws Yas thiab Mes Kuj teb.
    Xyoo 1975 kuv ua neeg thoj Nam nyob hauv cov yeej tawg rog, kuv tshaj Ntuj Lus nyob hauv lub yeej ib yam  li Yes Xus cov Thwj Tim nyob hauv tej tsev loj faj.

    xyoo 1977 Kuv tau tsiv mus nyob Nkws Yas teb tau 28 xyoo txog xyoo 2004 kuv tsiv los nyob rau Mes Kuj teb ntawm lub nroog Sacramento.
    Lub Koom Txoos Kav Tos Liv nyob Sacramento txais kuv ua Xib Hwb.
    hnub kuv sau zaj lus no kuv lub hnub nyug muaj 79 xyoos thiab 5 lub hli lawm.
       
    Sau nyob Sacramento
    Tim22/7/2019.  
    Yaj Zoov Ntxheb.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 23rd April 2020, 8:24 am


    Zaj 454- NTHUAV KEV RAUG DAB.

    Thaum muaj ib tug neeg, muaj mob los raug rau neeg lub cev, tsheej ua tus mob nkaeeg lawm. Hmoob muaj ob paub lo lus hais li no:
    1.Yam uas ua rau neeg lam qaug zog, tau ceeb los tau ntshai. Hmoob hais tias, yog poob plig lawm…
    2.Yam mob sib hnub puav, mas Hmoob hais tias, raug sab foob khaub thuas!
    3. Yam uas raug mob loj, uas tau qaug txaj lawd, Hmoob hais tias, yog raug dab lawm, thiaj muaj mob.
    4. Tseem muaj qee yam uas Hmoob hais tias, vim ntsuj plig tsiv tsawv lawm!
    Nyob hauv plaub yam no, yuav tau saib kom yog lo lus tseeb tiag! Yog yam loj tshaj uas, nws nyob ze lo lus Hmoob hais tias yog raug dab no!
    Yog yuav hais los kom haum li lo lus tseeb, mas yuav haIs tias raug Neej mob. Mas yog lo lus tseeb
    NQE 1. Hais los tas nrho, saum txhua tus neeg muaj mob. Mas tsis yog raug dab mob li, nws yog raug neej mob ntau xwb, yam li:
    Yog raug neej ua ntej, thiaj mam raug muaj mob los, Muab piv li ob tug neeg! Tus loj muaj zog thiab muaj peev xwm, nws xub muab tus me tsi muaj zog, cem los ntaus thiab thuam ua ntej lawm.
    Nws mam raug kev tu siab chim siab, los ntawm tus loj muaj zog thiab muaj peev xwm tau cem nws los lawm. Nws muaj kev tu siab ntau yam, nws lub siab tsis kaj, noj mov, tsis poob plab.
    Nws mam swb tus sab foob khaub thuas, los ntawm cov cua kub thiab cua txias los. Ces nws mam ua mob los raug rau nws lub cev, los tej roj ntsha thiab tej leeg.
    Ces nws mam muaj mob tuaj, yog hais raws li kev ncaj thiab tseeb tiag. Mas yeej yog raug neej mob, tsis yog raug dab ua rau neeg mob.
    NQE 2. Kev raug neej mas txoj kev tuag, los nyob ze txoj xub ke ntawm kev tuag dua. kev raug dab mob, yog nws xub raug neeg hem ua ntej lawm. Txhob xav tias tsis loj no. Raug Neeg hem, mas nws kiav mus dawm pob ntoos, los cia li tuag mus lawm los muaj!
    Raug neeg hem khiav mus poob zeb, poob tsua tuag los muaj! nws ntshai nws khiav mus poob qhov ntuj tuag lawm los kuj yog. Tej no mas piav tsis paub tas li…
    NQE 3. Hais txog cov poj niam xeeb tub nyob nruab cev, Mus hla tsis tau toj pob. Los hla tej hauv dej thiab tej pas iav pas dej, uas tej laus hais tias, ntxim li yuav muaj Zaj nyob ntawd.
    mus tsis tau tsam tau ua tub qaug rau dab zaj, ces nchuav me nyuam mus. Tej hais no, kuj yog tawm ntawm neeg tej ncauj loj nplaig nkhaus lam hais tawm los. Ces mam ua rau cov poj niam xeeb tub, poob siab tau ntshai.
    lawv cia li muaj kev ntshai nrog kev ceeb, mus ti nkaus rau lawv lub hlwb tej hlab ntsha nrog tej leeg. Ces ua kom cov poj niam no txhua yam hauv nrog cev khiav tsis zoo.
    Ces mam muaj teeb meem txog nws kev mob kev nkeeg tuaj. Ces cia li hais tias raug dab zaj lawm no xwb, qhov tseeb tiag, yog nws ntshai nws ces nws cia li ceeb nws tus kheej xwb, tsis muaj teeb.
    NQE 4. Kev raug dab poj ntxoog los hem. Tus dab poj ntxoog no, yog tus dab nyob ze neeg lub tswv yim ntawm txhua tus neeg tshaj. Nws nyob nrog neeg tus nplaig thiab neeg lub tswv yim ntau heev!
    Neeg feem coob lawv tsis zeem thiab saib kom meej pem zoo. Nws ntsib cov neeg poob zoo los neeg nyob tsis muaj chaw. los thov kev pab ntawm lawv.
    Ces lawv muaj kev ceeb ntshai, nrog tej laus tej qub ncauj qub lus hem los ntawm kev tsis muaj tseeb. Ua teeb meem yam tsis tseeb. Ces nws cia zeem tias, yog poj ntxoog tau ua rau nws ceeb ntshai los. Ces cia peem tsheej ua poj ntxoog los lawm xwb.
    Yam tseeb tsis yog poj ntxoog hem, yog neeg los lus rov hem neeg. Ces ua rau qhov muag fam mus pom. Mas neeg cia li ceeb loj ntshaj li yog dab hem.
    NQE 5. Hais txog txoj kev khaum, nws kuj yog tuaj ntawm leej tib neeg, tej ncauj lus uas neeg tus nplaig nkhaus thiab ncauj loj tuaj ntau xwb.
    Zoo li, nws raug rau tus neeg muaj zog, los muaj peev xwm loj, hais lus tsis zoo saib tsis taus thiab cem nws. Los foom lus phem rau nws ua ntej lawm.
    Ces nws muaj kev tu siab tsis xav khwv los ua noj ua haus. zoo li, nws lub tswv yim ruam mus los qeeb lawm. Ces nws cia li hloov nws tus kheej mus, xws li tus neeg raug khaum mus lawm!
    Ntawm kev khaum no, txhob xav tias yus foom nws ces nws yuav xub raug khaum mus! Tus foom rau luag, mas nws xub raug khaum ua ntej!
    Zooj koj foom rau tej Tub Ki, ces luag tu siab los luag chim siab mus lawm. Ces ua rau luag lub siab mam tsis dav tuaj. Nws npau taws ces nws tsis ncov qab txog koj tus laus.
    Nws ua txaus nws noj lawm xwb, nws tsis muaj seem pub rau koj noj, nws tsis nco tias, muaj koj li lawm. Ces koj yog tus laus xub raug khaum ua ntej.
    Tus yus tau foom ntawd, mas lawv yuav laus npaum li koj, ces lawv mam li raug khaum mus, vim lawv raug koj cem muaj kev tu siab, ces lawv ua neeg ruam mus lawm!
    NQE 6. Kev raug Neej, mas tawm muaj los nyob hauv cov txij nkawm ntau heev: Ob tug nyob ua txij nkawm no, lub siab loj tsis txaus. Nkawd tsis muaj kev sib hlub thiab sib hwm tsis tsis txaus.
    Nkawd tsis muaj kev sib ntseeg, kev sib tso siab. Tsis muaj kev sib zam kom muaj kev sib raug zoo. Ib tug pheej ua xyem xyav txog tug tais:
    Ntshai tseem muaj siab rau tej qub Nkauj qub Nraug, nws tseem nco ntsoov nyob rau nws nruab siab. Nthai nws tos ntsoov thiab nco nraim txog.
    Muaj zoo caij zoo nyoog, nws yuav tos ntshis kev sib teem caij teem nyoog mus sib ntsib. Ua kev nkauj kev nraug kom zoo siab, ces nkawd ob lub siab pib sib ncaim mus deb zuj zus lawm.
    Tej no yog kev raug neej li hais ntag, kev raug neej, mob loj tshaj kev raug dab mus lawm ntau npaug. Kev raug neej nyob ze txoj kev tuag dua li kev raug dab!
    Kev raug neej tsis paub lub caij twg yuav tuag mus li! Ib sij huam xwb twb sib tua tuag kiag lawm. los tsis nco qab li twb mus dai voj hmab voj hlua tuag kiag mus.
    Los mus noj yeeb noj tshuaj tuag mus, ua neej nyob nrog kev tu siab mus li tsis txawj ploj. Yog tsis paub muab qhia rau tej niam tej txiv, los cov neeg paub tab. Pab yus. mas cheem tsis tau kom rov muaj txoj sia nyob ua neej ntxiv txuas mus!
    NQE 7. Hmoob thiaj muaj tej lus hais tias: Neej dab nyob ua ke, dab neeg nyob sis nce. Neej dab nyob ua pawg, dab neeg nyob sis xyaws.
    Cov nyob ua txij nkawm no, raug neej raug dab sib npaug zos! Cov txiv neej, ib hnub lawv raug tsov tom peb zaug los tseem tsis tau tsau ntuj! Hos cov poj niam, ib hnub raug dab hem peb zaug los hnub tsis tau poob li thiab!
    Hmo ntuj pw kuj vov pam ua ke, Tas nrho txhua yam uas Hmoob hais tias, raug neej thiab raug dab no.
    Puav leej yog cov dab uas Leej Tib Neeg yug nyob rau hauv Neeg tej nruab siab nruab plawv los xwb.
    NQE 8. Txoj kev raug dab yeej muaj tiag! Tab sis kev raug dab, nws nyob tob dua li kev rau Neej! Kev rau dab muaj caij nyoog mus nrhiav neeb nrhiav tshuaj los kho! Hos kev raug Neej mas tsis ceev faj tiag, mas tsis muaj caij kho tau kom zoo rov los!
    Kev kho cov neeg raug dab, mas tsis yooj yim kho. Tej txiv neeb txiv yaig thiab tej Saub los tej niam tej txi lawv tsuas kho tau kom zoo yog feem tsawg xwb!
    Tus yuav kho tau kom zoo hlo, mas yog nws tus kheej rov kho nws thiab Vam Txog Tswv Ntuj thiab Leej Tswv Yim Ntshiab tuaj pab kho, mas thiaj li yuav kho tau kom zoo!
    Cov Dab no, lawv loj thiab muaj peev xwm dua neeg thiab muaj zog dua Leej Tib Neeg lawm ntau npaug! Thiab Dab muaj hwj huam loj dua neeg ntiaj teb no!
    Dab tsom tau Neeg nruab tswv Yim thiab neeg tej nruab siab tas nrho. Dab paub tias, tus neeg no thiab tus neeg tod nyiam coj lis cas! Dab qhia thiab coj nws ua raws nraim li nws nyiam.
    Dab rau siab txhawb cov neeg phem lub zog thiab pub tswv yim rau lawv, kom nws haj yam txawj thiab paub ua kom loj thiab tob dua ntxiv!
    NQE 9. Cov neeg hom raug dab ntau tshaj, mas yog cov neeg txawj ua siab phem tshaj plaws rau luag lwm tus neeg!
    Cov raug dab zoo li hais no, muaj ntau heev, yog cov neeg ua Nom thiab cov ua thawj neeg muaj peev xwm tsim txom neeg, muaj coob leej ntau tus neeg nyob ntiaj teb no:
    Yog cov neeg ntshaw luag cuab tam thiab ua tub sab, lawv yog cov neeg raug dab loj lawm. Lawv tsis ntshai Ntuj los tsis ntshai neeg, lawv tua tau neeg pov tseg los tua neeg npog nroj ntsuab tau!
    Cov ua kev phem kev qias yuam luag tub luag ntxhais thiab yuam luag poj luag sev ua Nkauj ua Nraug. kuj yog cov neeg raug dab ntag! Cov uas Hmoob hais tias lawv ncauj loj nplaig nkhaus nyiam hais lus xaiv thiab sib cav sib ceg, tsawm taus ntawd, thiab cov tsis hwm leej twg li ua kom nws yeej tas nrhos mus.
    Cov ntawd kuj yog cov neeg raug dab tib si, lawv thiaj nyiam coj tej tus yam ntxwv txawv. Ua kom neeg swb nws mus, Saib tsis taus Ntuj los saib tsis taus neeg. Kev raug dab mas txawv mus deb ntawm kev raug Neej.
    Cov neeg raug dab no, mas lawv txoj sia nyob ntev. Thiab lawv tsis vam txog neeb txiv yaig thiab txiv tshuaj los kho lawv lub cev thiab kho Ntuj Plig.
    Lawv muaj dab hwj huam txaus txaus nyob rau lawv nruab siab lawm. Nyob rau lawv nruav siab lawv tseem qhuas tias lawv tau ua zoo tshaj los pub rau Tswv Ntuj lawm thiab!
    Lawv tseem ntshaw tej lub hwj chim loj kom tau nce los nyob rau Tswv Ntuj chaw. Kom lawv hais ib los lus rau leej twg, muaj neeg tuag kiag mus, nyob ntawm lawv xub ntiag. Rau neeg saib los rau neeg qhuas tias lawv muaj peev xwm loj tshaj Tswv Ntuj thiab tshaj cov dab nyob ntiaj teb no lawm tib si!
    Kwv tij zaj no yog, qhia nej tias, kev raug neej thiab kev raug dab, ob yam no taug tib txoj lw, mus sib law sib liag ua ke ntag!
    Lo lus hais tias raug Neej, mas txoj kev tuag nyob ze dua. Kev raug dab, txoj sia nyob kav ntev dua. Vim kev raug dab, mas muaj kev zoo siab loj. Hos kev raug Neej, mas tsuas muaj kev tu siab mus li xwb.
    Ob txoj kev no, yog zoo li, ib txoj kev ntxhaib. Mus sib law sib liag ua ke. Yog hais los, mas yog kev raug dab pib los, mam xeeb muaj kev raug Neej raws neeg qab.

    Sacramento tim 24/6/2019.
    Yaj Zoov Ntxhev Xib Hwb.




    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 29th April 2020, 8:00 pm



    Zaj 456 - NRHIAV TAUG HMOOB TUS YEEB NCUAB.

    Yuav ua li cas thiaj nrhiav tau Hmoob tus yeeb ncuab! Zaj lus no, yog ib zaj lus, kawm kom paub txog Hmoob tus yeeb ncuab!
    Tsis yog Hmoob xwb thiaj muaj tus yeeb ncuab li hais no. Tas txhua Haiv neeg, puav leej muaj tib hom yeeb ncuab. Tab sis nyog Hmoob yog cov muaj yeeb ncuab ntau dua lwm Haib neeg:
    1.Hmoob cov yeeb ncuab, nws nyob txawm rau hauv peb nruab siab thiab peb lub tswv yim. Nrog rau peb tej lo lus hais tawm ntawm peb lub ncauj los!
    Zoo nkaus li peb lo hniav ntag, vim li cas yus thiaj rov tom raug yus di ncauj, los tom raug yus tus nplaig. Sab saud nws ncaj, sab hauv qab tsis ncaj pes tsawg, thaum peb noj mov.
    Nws thiaj txhais lo, los tom raug di ncauj, los tom raug peb tus nplaig.
    2. Peb Hmoob tus yeeb ncuab kuj piv tau, xws nkaus li ob tug txij nkawm nyob ua ke. Nkawd yeej muaj kev sib hlub loj, qee tsam ib xav tso dag rau ib tug.
    Yus tsis txawj xaiv lus los hais, yus hais tau tej lus tsis sib hwm. Hais tau tej los lus tsis ncaj txoj kev yuav hais kom haum siab. ua rau tus mloog to taub tsis ncaj txoj kev nws hais, ces nws npau taws thiab teb tsis ncaj li kev nug hais tuaj.
    Ces nkawd ob leeg sib npau taws, ces cia li yog pib kev sib ceg tuaj lawm. Kuj ua tau kom muaj lus sib ceg loj thiab muaj kev tu siab nyob hauv nkawd kev sib hlub.
    3. Peb Hmoob tus yeeb ncuab, yog yus pab kwv tij, Nkauj Muam Nraug Nus. Yug los koom ib la, noj ib tsus,Los tej Niam tej Txi.
    Muaj qee zaus yus yws taus ntau dhau lawm, los hais tau tej lo lus tsis sib haum. Hais tau tej lo lus rhiab pob ntseg los txaj qhov muag ces muaj kev tu siab thiaj muaj kev sib ncaim mus.
    Ib tug thiaj mus nyob rau ib sab ntuj, thiaj tsis sib nug moo. Nyias nyob nyias, cuag li lawv tsis yog kwv tij. Sib txheeb nyob ua ke los.
    4. Peb Hmoob tus yeeb ncuab yog yus pab neej tsa, sib hlub dhau qhov sib lub lawm. Muaj qee tsam yus hlub lawv tsis sib luag, ces muaj ib tug tus siab tuaj.
    Nws tau seev rau lwm cov hnov, lawv kuj cia li khaws tu siab tias tsis hlub tus ntawd. Ntshais yus los yuav tsis hlub ib yam thiab, cia li khaws lwm tus kev tu siab los ris nrog yus mus lawm thiab.
    Ces sawv daws cia li muaj kev tu siab ua tas phab tas pheev tuaj, mus sib tshuam tas nrho. Yam tsis paub paus los paub ntsis xyov yog hlav twg tuaj!
    Ces sawv daws cia li muaj lus xaiv lus ncua, ua kom lawv tsis sib raug zoo thiab sib ncaim mus yam tsis muaj qab hau. Ces khaws kev cib nyeej tseg ua pob khawv chim cia.
    5. Hmoob tus yeeb ncuab yog Hmoob lub xeem, cov paub tab los muaj, cov tsis paub tab los coob. yus tsis paub qhov tseeb.
    Hnov luag muaj nqaij noj xwb, tsis paub tias, puas yog tua ntxhuav los tu ntxhw noj. Cia li khaws tu siab tias, yog yus neej yus tsav lawm. ua cas yuav noj tsis sib hlub, haus tsis sib cev li, ces khaws kev tu siab los coj.
    Tos txog hub plaj tshoob ntsis kos hlav los sib cob, mam muab los hais. Kom tau npluaj nyiaj los yuav thiab kom zoo nws lub siab.
    Los ua li tej laus hais ntov ntoo tsis saib ceg qhuav. los cia li khaws ceg ntoo qhuav los tsoo luag taub hau rau luag paub tib si, mas thiaj zoo siab!
    6. Peb Hmoob tus yeeb ncuab kuj yog, Hmoob cov dab qhuas. Los ntawm kev qia dub los, ntshai tsam tsis txaus noj. Ces nyias thiaj ua kom txhua nyias cov tub, txawm yog ib lub lub xeem thiab ib tse neeg.
    Los dab qhuas thiaj sib txawv lawm, muaj kev txom nyem muaj ib siab ob qig los. Los pab tsis tau txhob tu siab, tsam txhaum dab qhuas no.
    Txawm yog kwv tij los yuav tau sib ncaim mus, nyias muaj nyias dab qhuas tsis sib thooj lawm. Cov peb taig los dab qhuas kuj txawv, los ntawm cov dab siab nqaim los. Tej txiv hlob txiv ntawm, lub siab tsis nthuav ntxeev.
    Hlub tsis tau tej tub ntsoj tub ntsuag, noj cais npho, tsis tsob zeem txog tias, yog yus kwv yus tij li. Cov dab tu siab thiaj qhia kom nws ncaim nws mus ua peb taig, kom dab qhuas sib txawv tau li ntawd.
    7. Hmoob tus yeeb ncuab kuj yog lub xeem Hmoob, cov laus lawv tsuas hlub lawv lub xeem ntau xwb. Lub Xeem Hmoob muab hais los tias, yog cov hluas tsis muaj cuab yim lub xeem.
    Lawv thiaj hwm, zoo li ib tug tub los ib tug ntxhais hlob tiav nkauj los tiav nrau lawm. Mas lawv thiaj zeem txog hlub lub xeem Hmoob. Kom muaj kev ua nkauj ua nraug thiab tau muaj tshoob muaj kos ua.
    Li Hmoob hais kam los tias: Koj qaib pw kuv cooj, hos kuv os pw koj nkuaj. Kom plaj tshoob ntsis kos hlav rov los sib cuag dua mus rau yav tom ntej!
    Tej hluas mus ua neej, tsis xyom hauj xyom seem. Muaj xaiv muaj lus tuaj, los khaws kev cib nyeej tseg. Tos txog lub caij tshoob kos thiab kev ploj tuag raws tau, mam rov muab hais los nplua nyiaj yuav.
    8. Hmoob tus yeeb ncuaj kuj yog cov thawj neeg, uas zej zog tsa tau los saib lub zej zog. Nws tsav hwj chim, tsab ua tus loj cuag li yob tus Huab Tais kev ib ntsug teb.
    Pab tus nws nyiam thiab saib tsis taus luag poj luag sev, los luag tub luag ntxhais. Nws xav yuam leej twg los kom cia li mloog nws hais, muaj pub rau nws cuag li nws muab yus los ua ib tug tsiaj tua txi rau dab, los tua txi rau ntuj.
    Kom zoo nws siab tsis txawj tas, tsis paub tias luag muaj kev tu siab loj, los yau li. Tsuav yog nws tau siv yus lub cev los txi rau nws xwb, tsis muaj kev hlub thiab txuag luag tias, yog Qaum Ntuj ib tug me nyuam li.
    Tsis zeem tias, yog me tub me nyuam txheeb ze yus, ces yuav pov hwm lawv nyob ua kwv ua tij sib txheeb ze li.
    9. Hmoob tus yeeb ncuab, kuj yog tas txhua tus neeg tsis hwm tus hlob ua thawj neeg tseem ceeb. Yus ntshaw ib lub hwj chim khav theeb nyiam ua luag tus thawj neeg.
    Yus twb ruam kawg los tseem tsab ua neeg ntse mus sawv tom hauv ntej rau luag hwm los pe yus loj li yog ib tug nom loj heev.
    Leej twg ua thawj neeg lawm, yus nrhiav lus rau thiab mus taug xaiv qhia Mab Sua tias, nws siab tsis ncaj. Nws tsis nyiam Mab Sua, nws xav ntxeev siab ua rau Mas Sua nws xav ua tus thawj kav Mab Sua.
    Ces Mab Sua nrhiav kev muab nws txo nom, los muab nws tua kom tsis muaj txoj yawg ua neej nyob. Thaum tus thawj neeg tau poob tsam mus lawm, cov tim xyoob no kuj raug Mab Sua txo mus tas txhua tus.
    Tsawg tiam los thiaj tsis muaj ib tug Nom Hmoob nyob ua nom kom mus kav laus li.
    Hmoob cov yeeb ncuab, puav leej tawm ntawm Hmoob txoj kev khib los. Ntshai tsam luag ho loj tuaj lawm ces nce mus txog theem ua Huab Tais kav Hmoob.
    Hmoob cov yeeb ncuab tawm hauv Hmoob kev khib thiab kev cib nyeej no loj tas nrho. Los nyob hauv Hmoob lub tswv yim kom txhawb tsis tau ib tug Hmoob sawv ua nom los ua Huab Tais loj li tej Mab Sua mus!
    10. Hmoob tus yeeb ncuab yog ntshai tsam luag muaj txuj cia siab dua yus thiab muaj nyiaj txiag ntau tshaj yus lawm.
    Luag muaj noj muaj haus, tshaj yus ces yus, ces cia li lam khib thiab saib tsis taus. Los tsis hwm nws mus ntxiv lawm. Nrhiav kev nrhiav lus cob qhia luag cov tsis paub tab kom luag nrog yus ua ib nqag,
    Kom tsis muaj leej twg mem tau tias, yus yog ntxub nws lawm no. Yus cia li ntshaw. Nws teej nws tug, xav huab kom tau tas nrho. Los ua yus tug, nrog yus lub meej mom khav theeb tsab ua tus loj.
    11. Hmoob tus yeeb ncuab tsis yog Mab Sua tsis nyiam Hmoob, Yeej yog Hmoob rov tsis nyiam los tsis kam hwm Hmoob tus nom ua ntej.
    Hmoob tsis muaj kev taug lawm, Hmoob lam liam tias: Mab Sua tsis nyiam Hmoob no. Qhov tseeb yog Hmoob tsis nyiam Hmoob nkaus xwb.
    Txij thaum Hmoob ua rog, swb rau Suav los lawd, Cov Nom Hmoob tseem ceeb tsis yog Hmoob tsa los ua nom. Puav leej yog Mab Sua pom zoo tsa los ua nom tas nrho txhua tus.
    12. Hmoob cov nom thiab Hmoob cov Huab Tais, Txij thaum muaj keeb kwm hais txog Txiv Yawg thiab Vwj Paj Yig los txog Yawg Hlob Vaj Pov no. Los lus hais tias Mab Sua tsis nyiam Hmoob, Mas Sua muab Hmoob txov kom Hmoob raug kev txom nyem loj.
    Chiv lub hauv paus los tsis yog Mab Sua ua Hmoob tus Yeeb ncuab. Yog peb Hmoob sawv daws ua yeeb ncuab rau Hmoob lub Keeb Cag chiv kom tau puas tsuaj mus.
    Koj ua ib tug, kuv ua ib tug, lawv ua ib pab, ces paug Mab Sua pob ntseg puv nkaus lawm. Mab Sua tsis muaj peev xwm ua. Mab Sua tsa Hmoob ua tus thawj kom Hmoob rov mus rhuav Hmoob.
    Koj rhuav ib zaug kuv rhuav ib zaug, lawv ho rhuav ib zaug thiab. Peb cov lus tsis zoo, uas kuv rhuav los koj qhia, koj rhuav los lawv qhia. Ces thiaj mus xaus rau Mab Suav lub pob ntseg.
    Ces sawv daws rov muab liam rau Mab Sua tas tib si, Peb Hmoob yeej muaj lub lub txim ntawd lawm. Ces yog li Hmoob cov lus haistias, yus lub txim nphau los tsuam yuslawm ntag.
    Ces yus tsis txom nyem los raug rau yus txheeb yus ze thiab yus neej yus tsav tau txom nyem mus.
    Peb yuav lees txim peb yuav thov kom cov Hmoob tau txais kev txom nyem no, lawv cov ntsuj Plig zam kev ua txhaum rau peb.
    Peb thiaj yuav cais tau peb cov yeeb ncuab nyob hauv peb lub plab lub plawv tawm mus. Kom peb Hmoob rov txawj sib hlub li peb yog ib tse neeg ua yeej ib txwm yog Qaum Ntuj me nyuam los puag thaum Ntuj tsim teb raug los lawd.

    Sacramento, USA.
    Tim 10/6/2019.
    Yaj Zoov Ntxheb X.H.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 29th April 2020, 8:22 pm



    Zaj 445- XYOO 2020.

    Lub xyoo 2020 no mas yog xyoo uas lub ntiaj teb ua zog koog, deeg daws,  loj tas nrho.   Loj tshaj plaws li yam tsis tau muaj dua hauv lub ntiaj teb no, muaj ib kob tsov rog loj hla thoob plaws lub ntiaj teb  sab xib fab (hnub tuaj) mus rau sab toob fab (hnub poob) mus lawm ib ncua thoob plaws lub ntiaj teb.
    Muaj tseeb tiag, nws yog tus kab mob aws hu ua Corona virus (Covid 19) uas tas ntiaj teb hais tias yog "tus kab mob Suav tuag aws" no. Qhov tseeb yog Suav xub raug tus kab mob sib kis no xwb tsis yog Suav tus kab mob tuag aws, nws yog tas nrho lub ntiaj teb tus kab mob tuag aws. Tsuas yog thaum xub pib tuag yog Suav xub tuag ua ntej ces thiaj kis pla mus kis rau lub ntiaj teb no tas nrho, ntawm sab hnub tuaj mus ti nkaus rau sab hnub poob lawm.  Nws tau pla mus puv nkaus rau lub ntiaj teb no tib si.
    Nyiam no tus kab mob ntiaj teb tuag aws no pla mus tsis xaiv leej twg li tsis hais tus nom muaj txiag nplua nuj los tus pej xeem txom nyem li, nws ncaj leej twg ces nws  zeem tus ntawd los ua nws tus phooj ywg sib puag mus sau laus ua ke xwb. Tus kab mob Covid 19 nov tsis xaiv tus txiv neej los poj niam, tub plog tub plug los tub muaj txiag nplua nuj, tus ruam tus ntse los tus loj tus me li. Nws tsis xaiv neeg ua phooj ywg. Nws nyiam nyob rau thaj chaw uas neeg nyiam nyob sib txoos ua ke ntau, cov nyob ua ke txog ntawm ob tug rau peb tug sib nrug deb uas koj hnov kuv tus ntxhiab thiab kuv hnov koj tus pa tsw. Zoo li thaum muaj peb leeg nyob ua ke lawm ces koj tus pa nrog nws tus pa thiab rau kuv tus pa, yog muaj ib tug kis tau tus kab mob nov rau nws lub cev lawm ces nws ua pa tawm yuav muaj tus kab Covid 19 nov tawm nrog nws cov pa ua ua tej lub dej me me li plua tshauv ya tawm ntawm tus kis tau qhov pa mus rau ib tug nqus tau ces thiaj li nkag mus nyob hauv tus nqus tau lub ntsws, mus huam ua ib cov ntxiv kom tau pla mus ntxiv rau lwm tus uas nws muaj fwv tsam yuav txeem mus tau...

    Tus kab mob tuag aws Covid 19 no yuav muab liam rau ib tug los ib Haiv neeg mas ntshe yuav tsis muaj tseeb. Yuav muab hais ces yog tim ntiaj teb neeg sawv daws tsis txuag lub ntiaj teb, txov tej xyoob ntoo nroj tsuag uas rau tej tsiaj qus tsis muaj chaws nyob chaw nkaum raws li ntuj tsim tej raug. Thaum lawv tsis tau chaw nyob, tsis muaj noj ces lawv lub cev yuav hloov thiab yuav tsim tej yam tshiab los tiv thaiv lawv kom nyob tau thiab tswj txoj sia raws lub ntiaj teb hloov. Thaum cov tsiaj txhu hloov thiab plhis mus ntau thiaj li mus xeeb tau tej kab mob phem phem los kis rau tib neeg. Xav kom neeg nco ntsoov tias: "yog peb tsis txuag lub ntiaj teb, thaum lub ntiaj teb mob, peb cov nyob saum lub ntiaj teb yuav nrog Peb Daim Niam Av Yug, Koob peb Mob tib yam."

    Thaum cov kab mob nov kis mus ntau, mus deb ces nws txawj hloov cev plhis ua ib cov kab mob thev thiab muaj zog dua thaum pib lawm. Nws zoo nkaus li cov tib neeg uas muaj noj muaj haus zoo ces txawj vam meej zuj zus, txawj ntse thiab siav ntev dua vim tau zoo lawm...
    Muaj ntau tus ntxhiab pa neeg, kuj zoo li lub teb chaws, muaj kev noj hus ntau.  Thaum ib tug neeg noj ntau yam qav lawm kuj ua rau nws ntse tuaj los yog nws muaj txuj txawv ces zoo lo nws yuav vam meej tshaj luag lwm pab  mus lawm thiab...
    Nyiam no, tas nrho lub ntiaj teb tham txog tus kab mob Covid 19 sib kis no muaj zog thiab heev tshaj ib kob tsov rog ntiaj teb, ua rau tas lub ntiaj teb tsis muaj kev sib haum xeeb, ua rau laj mej pej xeem poob kev ploj plug, kev txom nyem tsis tau khwv noj khwv haus li.
    Kob Tsov rog kab mob sib kis no mas yog zoo li pib kiag hauv yus cuab yim neeg mus. Cuag li yus cuab yim neeg niam txiv, los tub ki tsis muaj kev sib haum xeeb li lawm.
    Ib leeg tsis tso siab thiab ntseeg tsis tau ib leeg lawm, kuv ntshai koj npaum li koj ntshai kuv thiab. koj thiab kuv wb yog yeeb ncuab.
    Yog wb nyob ua ke ces koj yuav kis rau kuv los kuv yuav kis rau koj.   Li ntawd txawm wb ob leeg xwb los nyias ntshai tsam nyias tau tuag ua ntej... Li ntawd thiaj ua rau neeg cov ncauj nplaig txhais txhua tus cuag li twb yog kws txuj tau kawm tiav los tib si, tus yuav txawj tshaj li cas los muaj yam tseem tsab ntse tshaj cov Kawm tawm los thiab... Cov tsis tau yog kws kawm txuj los lawv cuag li yog Yaj saub paub tshaj li Tswv Ntuj lawm thiab...
    Muaj neeg coob leej ntau tus sawv mus nyob Qaum Ntuj chaw, lawv paub kev ua txhaum los kev khaum ntau dua li Tswv Ntuj paub lawm thiab.  Muaj ntau leej twb tau ua neeg txiav txim tias, yog Qaum Ntuj tsis txawj ua, los twb yog Qaum Ntuj txhob txwm ua rau neeg ntiaj teb no ntag...
    Nyem no, lub ntiaj teb ua zog koog loj tshaj li ib kob tsov rog. Tuaj muab lub ntiaj teb no rhuav kom puas tsuaj mus.
    Nws nrov tshaj cov lus uas Mes Kuj, Suav thiab Lav Xias yuav teem kev ua tsov rog rau lub ntiaj teb tau saib ntawd.
    Yuav tau muab txhais, zoo li tus kab mos Aws sib kis no.  Nws yog ib tug dab noj nyoos haus txias, nws muaj peev xwm noj neeg ib tog zus tuaj li yog ib tug dab tsiv tsaim tshaj plaws li lawm.
    Tus kab mob aws sib kis neeg no, nws nyiam raug rau cov laus, ntau dua cov hluas.  Kuj tsis txaus yuav poob siab loj, muaj ntau yam txhais mus saib! Cov laus, lawv kuj yog cov paub kev ua txhaum ntau yam dua li cov hluas thiab.  Yam phem uas saib tau  tias, hais lus rhiab pob ntseg los hais tej lus uas tsis paub txaj muag ntawd.
    Kuj yog cov laus, xub tau hais los qhia rau tej hluas.  Kev ua zoo los lawv tau ua ntau dua, kev ua phem los kuj yog lawv xub tau ua ntau dua ua ntej lawm thiab. Ib yam ntxiv lawv li kuj yog txog lub caij ze ze lawv yuav mus cuag poj cuag yawm lawm thiab.  Ces yam twg los thiaj poob los ncaj lawv kuj tsis txaus yuav ntshai thiab tu siab txog ntshai loj dhau tus kev cai.

    Kwv tij kuv sau zaj lus no, tsis yog sau los ua kev qhuab qhia los ua kev khaum rau leej twg.  Kuv sau raws li ib lub tswv yim uas ua kom neeg txhob muaj kev tu siab tias: "Vim Leej Tib Neeg tsis hwm Ntuj los tsis hwm neeg es thiaj raug khaum mus." Tsis yog li ntawd, tsuas yog ib zaj lus kom to taub tias:  Kev phem kev zoo nyob ua ke tus yuav raug sab zoo los muaj coob hos tus yuav raug sab phem los muaj ntau.
    Yog yus tsis txiav txim rau yus mas yus tsis txhob txiav txim rau luag thiab.   Koj thiab kuv wb tau ua kev phem kev zoo muaj sib npaug txhob hais tias kuv zoo dua koj lawm ntau npaug los koj zoo dua kuv mus lawm ib nrab.  Tej yam zoo thiab phem tsuas yog Qaum Ntuj tib leeg thiaj yog tus paub xwb.

    Sau nyob Sacramento, USA.
    Tim 24/3/2020.
    Yaj Zoov Ntxheb X.H.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 6th May 2020, 7:53 pm


    Zaj 457 - NTHUAV HMOOB TUS YEEB NCUAB.

    Nyob hauv Hmoob lub ncauj hais tawm los, mas Hmoob ntxub lo lus thiab tus ua yeeb ncuab ua raug rau Hmoob tshaj plaws!
    Tab sis zoo li nyob hauv Hmoob nruab siab, mas Hmoob yug tthiab yeeb ncuab, zais tus Hmoob tus yeeb ncuab. Uas Hmoob ntxub ntawd, zoo tshaj laws rau Hmoob nruab siab!
    =>.Cov yeeb ncuab uas Hmoob ntxub tshaj, mas hloov tas nrho los ua tus Hmoob nyiam tshaj plaws li:
    Nyem no, mas yuav yog cov tub ntxhais hluas, tiam neeg no mus. Yuav tau muab kho hloov dua tshiab, kom tus yeeb ncuab uas Hmoob ntxub hloov mus ua tus nyob deb rau sab nraud.
    Kom txhob yog, tus nyob rau hauv Hmoob nruab siab. Uas Hmoob nyiam thiab yug cia, nyob nrog Hmoob puag thaum ub los txog lub zim txwv no mus ntxiv lawm:
    1->.Kev tsis sib hwm, kev muab hlob, ua neeg khav theeb. Kev xam khib thiab kev cib nyeej, Kev thuam neeg, hais lus tsis saib tsis taus neeg.
    Li Hmoob hais kam los tias,ntov ntoo tsis saib ceg qhuav. Tej lus no dhau los ua Hmoob cov yeeb ncuab tib si nyob nrog Hmoob.
    2->.Kev ua neeg siab luv, npau taws, uas Hmoob ua neeg tsis thoob tsib to nrog. Hais lus tsis zoo mloog, yus tsis nco saib neeg hais lus, los tsis tej lus siab neeg tsis zoo mloog.
    Ua rau neeg tsis to taub lub ntshiab lus yus hais ntawd. Kuj yog kev ua yeeb ncuab rau Hmoob.
    3->.Kev tsis hwm neeg, kev ua tub sab tub nyiag, nrog kev nyiam ua plees ua yi. Nyiam mus thab lug tub, thiab deev luag poj, muaj xaiv lus ua plaub ntug. Los yog Hmoob tus yeeb ncuab uas Hmoob nyiam xyaum thiab raws qab ntag.
    4->. Kev dag ua tim khawv cuav, hais lus tsis tseeb, qog tej qub lus uas twb dhau los lawm ntxov ntxov. Zoo li Hmoob hais tias, nyiam rhaub qub zaub noj. Los yog tus yeeb ncuab rau li Hmoob nyiam.
    5->.Tsis muaj kev hwm thiab saib taus neeg, pom luag muaj tshaj yus, los luag ua neeg thoob tsib to nrog dua yus. lam khib thiab thuam luag raws kev khib lam xav txo luag ua neeg poob tsag mus.
    Ua li Hmoob los lus hais tias: ntxias luag nce nthab, lauj luag taw ntaiv, kom luag poob nthab mus. Kuj yog cog yeeb ncuab cia nyob nrog yus!
    6->.Hmoob nyiam yug yeeb ncuab kom tau tso los sib tawm tsam, li tso nyuj twm los tshis sib nraus. Thaum muaj tub muab nyob, thiab muaj ntxhais qua.
    Hmoob nyiam muab qub kev cib nyeej, los hais cis fij cis tom, rau saum lub rooj tshoob rooj kos. Los rau saum lub ntees ploj ntees tuag. Kuj yog tso yeeb ncuab tawm tuaj!
    7->.Hmoob muaj ntau lub xeem, txhua lub xeem, mas nyias saib nyias lub xeem, muaj nqes tshaj cov. Lwm cov xeem, mas muaj nqes li ntawm yus lub xeem, ib nrab mus xwb. Tsuas muab khaws cia ua ib lub xeem tau tis tshoob tis kos rau tub ntxhais xwb.
    8->Tsoom Hmoob cov Xeev Txwj qab zej, Xeev Laus hau zos, nyiam tso khav thawj sib twv hais paj lug. Los kwm lawv ncauj lus khav ua txiv thais, tsis kws txoj cai ua neeg paub tab sib hwm nyob ua phooj ywg.
    Cog kev sib hlub, sib pab sib txhawb, sib sab laj ntaus tswv yim. kho tub ntxhais, kho kev neej kev tsav los sib hlub. Nyob koom ua ib npoj, noj sib hlub haus sib cev li yog kwv tij txheeb ze.
    Tej kev noj no, kuj yog cog yeeb ncuab cia kom mus caub chim ua caj hlav ces ncau mus tsis txawj kawg li thiab!
    9->.Hmoob txhua tus, nyiam kom muaj ib tug Huab Tais, Hmoob sawv los ua tus coj Hmoob. Kom Hmoob txhob tau ua ntsuag niam ntsuag txiv mus.
    Thiab Hmoob nyiam ntseeg ib tug yaj Saub, nqes pem ntuj los cob qhia Hmoob. kom Hmoob txawj ntse cuag li tej Mab Sua mus, thiab paub txuj mus nto ntuj,paub ci mus nto ntsis.
    Tab sis thaum muaj tub tug tub Hmoob, pib tau nce ib qib yuav tau mus ua Xeev Txwj Xeev Laus. mas txhua tus tsis hwm li, nrhiav lus rau kom nws ua neej kho siab poob tsim poob nthab mus.
    Thaum twg yog tas nws txoj sia txoj yawg tas mus lawm, mam li muaj ib feem los tsa thiab cav tias: Nws yog tus Niam Txiv tus Vaj Hmoob zoo.
    Suav txij li Huab Tais Txiv Yawg, ua Hmoob tus Huab Tais. Los txog lub zwj Ceeb no, txhua tus Huab Tais Hmoob yog dhau nws lub cawv xeeb cawv lav mus lawm.
    Hmoob mam hais lo lus qhuav los tsa, ua Niam Txiv, los tsa ua Vaj Hmoob mus thiab cav rau tej xeeb ntxwv hnov tias, yog Vaj Hmoob no mus!
    Cov Xeeb Ntxwv lawv twb tsis paub zoo tias: Thaum nws nyob nws ua Huab Tais Hmoob muaj dab tsi zoo rau Hmoob.
    Nws lub Meej Mom hwj chim, loj siab npaum li cas tiag! Thiaj tau ua Hmoob tus Niam Txiv, Thiab yog Vaj Hmoob, muaj lub npe nto moo lug mus thoob qab ntuj khwb!
    Uas Mab Sua tau nrog hnov thiab paub txog, Hmoob tus Vaj Hmoob no. Ua Huab Tais Hmoob thiab nyob thaj chaw twg los ua Huab Tais.
    Nws pej xeem me tub me nyuam muaj pes tsawg roob, nws lub hwj chim kav pes tsawg ntswg av thiab pes tsawg ncua dej los lawm.

    Sacramento USA
    Tim 2/8/2019.
    Yaj Zoov Ntxheb X.H.




    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 13th May 2020, 8:15 am

    Zaj 458 - NTHUAV HMOOB LUB XEEM LUB NTSIAB.
    Hais txog Hmoob lub Xeem muaj kev tseem ceeb npaum li cas?
    Lub Xeem Hmoob no yog tas nrho txhua tus Hmoob lub neej. Yog ib tug Hmoob tsis muaj lub xeem mas nws tsis tsis tsim txiaj ib qho li.
    Lub Xeem no tawm ntawm Nkauj Muam Nraug Nus nkawd los. Yog tus Tswv Ntuj tau tsim lub ntuj lub teb feeb los rau Hmoob.
    Yog ib tug Hmoob nws tsis muaj lub Xeem hlav los ntawm nws caj hlav ces ncau los mas nws tsis muaj kev sib hlub li tej laus hais kam los tias:
    Koj qaib pw kuv cooj los kuv os pw koj nkuaj no los tau ntau txheej ntau tiam lawm. Hmoob lub Xeem yog tej poj niam me nyuam lawv li los yog lawv lub Xeem.
    Txij thaum Ntuj tsim teb raug los txog lub zwj ceeb no tsis tau muaj ib lub Xeem uas yog lub Xeem tsis zoo.
    Yam uas Hmoob hais tias yog tsis zoo mas tsuas yog tej tus neeg tau ua tsis zoo mas yog hos yog yuav hais tias lub Xeem tsis zoo mas yog tus neeg hais ntawd tsis txawj hais lus xwb.
    Ces nws tau muab hais los mus hla rau saum lub Xeem lawm xwb. Nyob hauv txhua lub Xeem, tsis tau muaj ib lub Xeem, uas Ntuj tau hais tias lub Xeem no yog lub Xeem phem li.
    Thiab tas nrho lwm cov Xeem kuj tsis tau hais tias, nws yog lub Xeem phem. Tsuas yog koj ib leeg thiaj hais tias lawv yog lub Xeem phem no xwb. Tab yog koj tub los koj ntxhais yeej tsis tau hais tias lawv lub Xeem Phem. Tej tub ntxhais hluas lawv tseem ua lawv nkauj lawv nraug tsis tsis tu ncua li. Txij thaum ntuj xeeb muaj los, teb xeeb raug tau los, txhua lub xeem tseem zoo los txog niaj hnub no.
    - Peb tig rov mus saib Ntshiab thiab Ntshaus nkawd lub Xeem seb tsim txiaj npaum li cas thiab?
    Dab neeg hais tias:
    Tso Ntshiab mus taug dej ntshiab kom Ntshiab mus yuav poj liab. Hos Ntshaus mus taug dej nrho kom Ntshaus mus yuav poj tsov.
    Poj tsov raug Ntshaus muab sim ntaj pov tseg tas hos Ntshiab tus poj liab raug Ntshaus hais kom Ntshiab coj mus cuab taub rau Ntshaus sim hneev lawm.
    Ntshiab thiab Nthaus nkawd mam los yuav lub Xeem ntawm ob tug ntxhais Hmoob uas lawv muab lub yias thawj tsheb khwb tseg kom poj dab nrhiav tsis tau ntawd los tsom kav tsom kwm ntawd lub neej.
    Lub xeem tsiaj xeem txhuv tsis muaj qab hau rau Hmoob li. Peb thiaj hnov Ntshiab thiab Ntshaus nkawd zaj dab neeg no. Tej laus txeev hais tias: “Ntshiab los liab, Ntshaus los txaus” no.
    - Nyob hauv lub Xeem twg los yeej muaj tus zoo los tus phem, tus tsheej los tus tsis tsheej, tsuas yog qee leej neeg phem thiab tsis tsheej xwb. Tsis yog Noob tsis tsheej los lub xeem tsis tsheej.
    Peb yuav cem lawv lub xeem mas tsis yog lawm thiab cem tsis tau li ntawd ntxiv lawm. Vim tas nrho hauv txhua lub Xeem los sib koom thiaj li mam los ua tau Haiv Hmoob.
    Yog koj ib leeg xwb yeej ua tsis tau Haiv Hmoob ib zaug li. Txawm muaj raws li lo lus tej laus hais tias:
    “Suav tau cem tias tus txiv neej Hmoob mas noob qes luaj taum daj los tua kom tuag tas nrho mus.” Los luag Mab Sua twb hwm cov poj niam los cia ua noob kom muaj keeb kwm txuas mus rau yav tom ntej.
    Tsis hais Hmoob los Mab Sua yeej hwm noob cia nyob. Yog tag nrho Tsoom poj niam no sawv daws ntag.
    Tas nrho peb tsoom Hmoob tsis hais tiam twg li thaum lawv yuav qua ntxhais muab nyab. Tej laus thiaj tseem muaj tuam choj tshoob mus txog niam txiv tom ub lub qab plaj xab los qab plaj txuas. Vim Noob Neej yog tsoom poj niam coj; Noob Hmoob thiaj muaj nyob puv ntuj.
    Txij no mus mas tsim nyog yuav muab cov coj Noob no los saib muaj nqes ib yam li cov txiv neej. Poj niam txawm tsis coj ntug los poj niam yeej ntse dua tsoom txiv neej!
    Tsuas yog lawv yog cov coj Noob ces lawv muaj lub zog tab dua tsoom txiv neej xwb lawv ntse thiab muaj peev xwm tshaj zog txiv neej!
    Muab ib qho me me los piv:
    Yam li ib tug txiv neej hem ib tug poj niam, mas thawj zaug mas poj niam nws ntshais tus txiv neej ntawd. Thaum tus poj niam raug hem ib zaug lawm mas yog Poj Niam tig rov hem txiv neej.
    Mas txiv neej yuav ntshai tshaj qhov ntshai lawm. Nws yuav khiav yam tsis nco qab saib pob ntoos li. Yog dawm pob ntoo ces nws kawg tuag mus.
    Poj niam tau hem txiv neej los lawm mas txiv neej kawg ruam mus tsis txawj ua dab tsi li lawm. Ib tug txiv neej yuav ntse mus li mas yog poj niam txhawb mas nws thiaj ntse mus kav laus.
    Kuv twb tau pom dua thiab hnov dua los lawm: ib tug txiv neej Hmoob ntse heev hais lus pub rau tuam tsoom Hmoob sawv daws yuav thiab mloog nws lus tas nrho. Muaj ib zaug muaj neeg pub ib qho paj tshab rau nws, yog lawv muaj ib thooj nqaij rau nws nqa los tsev. Thaum nws mus ua kav xwm, nws zaum tsis ncaj nws lub rooj, nws mus hais nws ib zaj foom kom nyob tim tsev pam tuag, nws tau mus zaum rau lub rooj ua nkauj ua nraug ua ntej lawm. Nws tau hlub tus poj nrauj ntawd ntau zog xwb. Nws qee nws ib qho nqai pub ua tshav ntuj rau tus poj nrauj ntawd kuj tsis loj tsis yau. Muaj neeg pom thiab paub, hais qhia nws tus niam tsev lawm. Thaum tus txiv neej los txog tsev nws nqa ib qho nqaij los cev rau nws tus niam tsev kom muab khaws tseg li txhua zaus. Ces nws tus niam niam tsev txais nkaus pov rhees rau dev ces dev kuj xav tias yog muab rau dev noj. Ces dev khaws nkaus kwv kiag coj mus noj lawm. Nkawd muaj ob peb los lus sib hais thaum ntawd xwb ces tus txiv neej ntse thoob tsib muaj txuj ci no. Cia li ruam li tus tsis tau kawm dua txuj ci los li lawm.
    Tas nrho zej zog Tuam Cuab txhua lub Xeem Hmoob rov tuaj thov nws mus hais lus qhuab ntuas los nws tsis txawj hais li lawm. Tus neeg ruam luag tso dag los tseem txawj luag. Hos tus neeg ntse tau ruam tuaj lawm mas tseem txom nyeem dua tus ruam nruab thiab los.
    Peb Hmoob yeej hais kam lo lus tias ib sab ntuj muaj ib yam txuj, ib rab tej muaj ib yam ci. Lo lus no yeej muaj tseeb tiag. Yam li peb teb chaws peb nyiam li cas peb txiav yuav li ntawd, nej teb chaws nej nyiam txawv nej kuj txiav coj txaw hais li nej sab. Niam txiv nyiam kom tub txhais lub cev loj hlob muaj 14-15 xyoo tub luaj txiv, ntxhais luaj niam ces hais tias hlob tiav nkauj tiav nraug lawm.
    Lawv muaj cai ua nkauj ua nraug tau. Txawv teb chaws lawv tub lawv ntxhais yuav tsum muaj 18 xyoo mam ua nkauj ua nraug tau.
    Ob pab Hmoob nyob ob sab ntuj ntawd lawv tsuas saib neeg lub cev xwb lawv tsis tau saib txoj cai kom tas! Ob tog puav leej tsis saib qhov hais tias kev ua nkauj ua nraug lawm mas yog kev yuav sib yuav mus mam ua nkauj ua nraug tau. Ces ob tog thiaj muaj xaiv muaj lus. Thaum hais xaiv hais lus tas tsis txawj pom qhov koj twb ua tsis ncaj kuv thiaj li hais cia li muab nkawd tej xaiv tej lus no hais nrov rau cua tshuab ces cua tshuab mus paug lwm tus Hmoob pob ntseg. Ces cov lus txawv tas tib si lawm tsis muaj qhov nkawd sib cog lus tias yog ntuj vau los yuav txheem, tsua pob los yuav thaiv tsis pub raug nkawd.
    Cua xa ib co lus nrov tuaj tias:
    Hmoob Los Tsuas mas phem kawg lam tau lam muab Hmoob Mekas nplua nyiaj yuav. Hmoob Los Tsuas kuj hais tias Hmoob Meskas mas phem kawg mus dag luag tub luag ntxhais coj mus ua si tas tsis yuav.
    Ob sab lus no puav leej nug tsis tshab li. Hmoob tsuas ntshaw ua nkauj ua nraug xwb Hmoob tsis tshaw qhov yuav yuav. Yog ntsib tau niam nkauj Ntsuab los txiv Nraug Nab mas leej twg los yeej yuav tsum yuav kom tau xwb. Yog mus ntsib tau nkauj Nrhee thiab niam nkauj kub Kaws ces leej twg los tso tes plau. Qhov no yog qhov tsis ncaj ncees nyob rau Hmoob tej xaiv lus ntag.
    Xav tias yus mus deb lawm ces “dab tsis quaj” lawm no xwb txhua tus Hmoob mus Los Tsuas teb ntshai puav leej xav li hais no lawm.
    Txhob ua li ntawd ntxiv lawm nco ntsoov tias lub Xeem Hmoob thiaj yog yus lub Xeem thiab yog yus tsev neeg. Paub yus hom lus yus yuav tsum yus hwm yus tus kheej ua neeg tsim txiaj ua ntej tshaj plaws.
    Yus yuav hwm luag lub xeem nyob hauv yus lub tib yam thiaj li yuav vam meej mus rau yav tom ntej. Mas Haiv Hmoob thiaj li yog Haiv Hmoob ntse.
    Tab sis Hmoob tsis siv sab kev hwm kev hlub ua ntej. Hmoob muab kev khav theeb kev muab hlob kev tsab ntse los khav ua ntej ntau xwb.
    Ces Hmoob thiaj raug Mab Sua muab Hmoob rhuav ib tog zus tuaj. Luag yeej paub tias Hmoob xa xav rhuav Hmoob li ces luag muab me ntsis hwj chim nrog nyiaj txiag ntxias Hmoob ces Hmoob rov rhuav Hmoob rau luag saib xwb.
    Kwv tij zaj lus kuv sau no yog sau los sib zeem ua kwv ua tij kom peb txhua tus muaj phooj ywg coob xwb. txawm muaj qee lo lus siab leej twg lawm los tsis yog hais rau koj li mog.
    Yog xav ua kom muaj ib zaj rau tus xav kawm paub kom nws tau kawm tias muaj ib zaj tau xub hais tawm lawm. kom cov xav tau muaj kev cia siab thiab muaj kev taug mus rau yav tom ntej xwb.

    Kuv sau zaj lus no yog hnub uas kuv muaj 79 xyoo txwm nkaus los rau hnub no kiag.
    Tim 3/5/2019.


    Sau nyob Sacramento. USA.
    Yaj Zoov Ntxheb Xib Hwb.




    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5877
    Date d'inscription : 2009-08-18

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Maiv Tooj on 19th May 2020, 7:54 am



    Zaj 459 - NTHUAV DAIM NTAWV NYIAJ KEEB PUAJ TXWM

    Nyob hauv lo lus Hmoob hais ntawv nyiaj keeb puaj txwm yog lub ntsiab lus uas los ntawm Tswv Ntuj tsim ib tug txiv neej thiab ib tug poj niam kom nkawd tau los nyob ua ke thiab muaj kev sib hlub.
    Nyob hauv Phau Ntawv Ntshiab, Tswv Ntuj xub tsim tus txiv neej tas, Tswv Ntuj pom tias tus txiv neej tsis tau luag nws thiaj tso ib tug dab ntub los laum tus txiv neej.
    Ces Tswv Ntuj rho tus txiv neej ib tug txha tav los tsim kom muaj tus poj niam. Kom nkawd tau nyob ua ke sib pab sib ua luag.
    1.Hnub uas tus txiv neej thiab tus poj niam nkawd hlob los tiav nkauj tiav nraug. Yog hnub uas Qaum Ntuj tsim neeg tiav los nyob ntiaj teb no.
    Hnub nkawd txiav sib yuav los sib sau nyob ua txwj nkawm, Qaum Ntuj foom lus pub kom nkawd daim ntawv nyiaj keeb puaj txwm raug nyob pem ntuj nqes los.
    Hnub uas nkawd muaj daim ntawv nyiaj keeb puaj txwm yog daim ntawv uas nkawd sib cog lus tias: Ib leeg yuav ua ncaj rau leeg mus rau lub neej nyob ua ke.
    Cov neeg ntseeg txog Yes Xus lub npe Tswv Ntuj foom pub los nyob hauv lub Cim Cog Lus. Peb hais tias nkawd mus txais lub Cim Cog Lus. Lub Koom Txoos thiaj ua thaj Txi Ntuj los thov Ntuj foom hmoov zoo rau nkawd.
    Hos nyob hauv Haiv Hmoob txoj kab lis kev cai yog hnub niam txiv ob tog nkawd ua tshoob ua kos rau tus tub los tus nyab…
    Ua rau Ntuj thiab niam txiv tau paub tias Qaib tau los ntshav ntsej npua tau los ntshav ntswg lawm. Muaj niam txiv ob tog nrog rau plaub tug txiv tuam meej koob thiab lwm mej zeeg tau ua tim khawv pom paub txog.
    Niam txiv tom ub tau siv nyiaj ua tshoob ua kos Hmoob hais tias: Niam txiv tom ub nws tuam tau ib tug choj tshoob choj kos ntug yees luaj cav cos rau txiv nyuj txiv nees rag lis ntws nyob tsis ploj cob nkaus rau niam txiv tom no qab mus plaj xab los qab mus plaj txuas.
    Kom Nkauj nyab nraug vauv hwm tus choj no niaj txhiab me txhis tsis pub ntab thiab tsis pub puas no. Yog nkawd kev cog lus ncaj ncee ib leeg txhob ntxeev siab rau ib leeg.
    2. Daim ntawv nyiaj keeb no yog daim ntawv cog lus tias: Ib leeg yuav muab kev ncaj ncees pub rau leeg. Ntuj twb pom zoo neeg twb paub tas lawm.
    Lub caij nkawd tseem nyob ua Nkauj ua Nraug uas yus tab tom xaiv ntawv txwj ntawv nkawm ntawd yus tau ua neeg siab hlob, tsav hwj chim rau sab ua neeg khav zoo nkauj los zoo nraug. Yus tau raug xwv txheej los ntawm kev ua nkauj ua nraug nrog lwm tus uas yus nyiam tsis tas los yus raug xwv txheej los ntawm ntawv nyiaj keeb puaj txwm tsis sib raug zoo. Raug luag txeeb nws mus lawm los yog raug nws hloov siab lawm. Qhov no yuav saib hais tias yog yus raug xwv txheej ib zaug lawm xwb.
    Txhob muab los ua kev khuv xim thiab nco mus li nyob hauv yus nruab siab yog yus pheej khaws cia nyob hauv yus nruab siab mas tus twg los yus yuav tau mas ntshe yeej yog ntshaw tau nws daim ntawd ntuag xwb.
    Ces yus tsis nco qab qhuas txog yus twb muaj ib daim ntawv nyiaj keeb puaj txwm zoo lawm. Cov xav li no mas tsawg tus los puav leej yog mus khaws tau luag tej ntawv txwj nkawm ntuag los ua neej ces nws yuav ua neej tsis kaj siab thiab yuav ua neej tsis puv siab li.
    Nyob hauv peb tsoom Hmoob yeej muaj coob leej ntau tus pheej xav li kuv hais no. Lawv muaj tsawg tus poj tus niam lawm los zoo li yus pheej tsis muaj hmoo li. Cuag li yus pheej mus khaws luag tej poj niam muaj ntawv ntuag los ua yus tug. Tab yog yus laus lawm yus mus yuav ib tug ntxhais hluas hluas los kuj zoo li yus muab ib daim ntawv ntuag rau nws ua neej. Nws yuav ua lub neej tsaus ntuj nti tsis kaj siab xws luag.
    3. Yog koj ua neeg paub tab, koj txawm khaws tau ntawv ntuag los ua neej xwb los koj muab los qhia rau Ntuj Niam Ntuj Txi thov kom Ntuj foom koob hmoov rau koj ces koj yuav ua ib lub neej tshav ntuj nrig li tus tsis tau muaj dua daim ntawv ntuag thiab. Vim koj rov muab txoj kev ncaj ncees los qhia rau Ntuj, koj thov kom Ntuj rov foom hmoov zoo pub rau koj. Txawm yog koj khaws luag li ntawv ntuag los Qaum Ntuj yuav hloov dua ib daim ntawv tshiab ces yog ib daim ntawv nyiaj keeb puaj txwm tshiab lawm.
    4. Cov neeg tsis paub ua kom muaj txoj kev ncaj ncee no mas lawv ua ib lub neej kho siab heev. Ua li Hmoob tej laus hais los tias lawv lam ua lub neej nrog cav lwj sis ib nyob. Lawv nyiam coj ib lub neej qub qub li thaud txheej laus, lawv coj cov kev cai tias txiv neej muaj cai mus tham hluas nkauj…Tsuas yog poj niam thiaj tsis muaj cai mus tham hluas nraug xwb. Zaj tswv yim no qub dhau lawm, poj niam muaj hlwb zoo dua cov txiv neej lawm ntau kawg. Ib tug txiv neej mas tseem yuav tau kawm ntau yam kom yus txawj hais lus thiab yus muaj nyiaj qhwv rau ntawm cev kom luag paub thiab qhuas txog yus tus yam ntxwv tso. Poj niam ntse dua txiv neej mus lawm ib npaug. Poj niam taug ke nws ua txoj dawm txiv neej taw ntog rau hauv av xwb, poj niam twb tham tau txiv neej lawm. Tej laus thiaj hais rau tej ntxhais tias txhob mus pw rau ntawm tej ntug kev tsam txiv neej hla tau ces muaj me nyuam lawm no!
    5. Lo lus kawg, mas cov nyob ua txwj nkawm yuav nco ntsoov tias yus tsis txawj sib hlub ua neej thiaj muaj muaj lus sib cav sib ceg. Vim yus tsis nco qab txog qhov uas niam txiv tau ua tshoob ua kos rau yus. Kom ntiaj teb neeg paub tias yus muaj ntawv nyiaj keeb poob puaj txwm poob pem Ntuj nqes los ua txwj ua nkawm lawm. Yog yus tseem nco txog tej niag ntawv ntuag uas luag tso yus pov tseg los tau sib plam mus lawm los muaj lwm tus txeeb tau mus lawm tej no yuav tsum saib tias raug xwv txheej ib zaug dhau los lawm xwb tsis yog ntawv nkauj ntawv nraug lawm yog koj rov mus khaws ces puav leej yog rov mus khaws ntawv ntuag xwb. Vim nws twb kawm los tau nyeem tas lawm, sab phem sab zoo, los nws paub tas nrho. Koj khaws tau los yuav yog nws nyeem tau sab zoo xwb kuj tsis muaj dab tsi hos muaj ib hnub nws nyeem mus txog sab phem, ces nws yuav ntxub yus daim ntawv ntuag heev.
    6. Zaj no kuv hais raws nraim li ib lub neej Hmoob xwb. Ob leeg twb ua lub neej laus nkoos lawm los koj yuav hnov kuv tsw ntxhiab hos kuv los yuav hnov koj tsw kauv. Koj niaj hnub muab kuv cem ua neeg tsis da dej, kuv los kuj niaj hnub hais tias cas koj tsis ntxuav cev.
    Ua rau koj tsis pom qab nyob kuv los tsis paub zaum ze leej twg li. Ncig ua yaj yaum yeev nyob tsis muaj chaw muaj lus los tsis paub tham. Tham lus los tsis muaj ko lus zoo ua lub neej nyob nrog kev ruam kev ntse sib npaug zos! Chim siab tshaj xav nrog yeeb nrog tshuaj sib puag ua phooj ywg mus kom tau nyob kaj siab lug xwb.
    Ces yuav mus nrhiav dua ntawv nyiaj keeb puaj txwm tshiab los lub meej mom ua nkauj laug nraug laus tas. Xu xu tej tub ki siab xav txog mas tseem haj yam kho siab thiab tu siab tuaj.
    Tsis zoo muab los hais qhia leej twg li tus ho tau ua raws nraim li hais lawm los nco ntsoov muab qhia rau Ntuj kom Ntuj hloov dua yus daim ntawv tshiab seb yus lub siab puas yuav nyob kaj kom mus kav txog hnub laus mog.

    Sacramento, USA.
    Tim 18/6/2019.
    Yaj Zoov Ntxheb X.H.




    Sponsored content

    XH. Yaj Zoov Ntxheb lub Tsev THOOB TSIB - Page 17 Empty Re: XH. Yaj Zoov Ntxheb lub Tsev THOOB TSIB

    Post  Sponsored content


      Current date/time is 26th May 2020, 9:29 pm