Hnub Txais Tshauv thiab Caij 40

Lub lis piam no Hnub Plaub yog hnub peb txais tshauv (Ash Wednesday/Mercredi des Cendres) pib lub caij Plaub Caug (Lent/le Carême), uas peb tseem hu ua lub Caij Yoo no thiab. Ob lo lus ntawd yog piav txog thaum ub HT Yes Xus tau mus yoo mov tau plaub caug hnub plaub caug hmo nyob teb chaws suab puam npaj lub caij nws yuav mus pib tshaj lub Moo Zoo. Lub caij niam no, peb ua kev cai yoo plaub caug hnub yog npaj rau lub caij uas Yes Xus yuav raug txom nyem tsim txom dai saum ntoo cuam, tuag thiab sawv rov qab los peb hnub tom qab.  Hnub Chiv no yog hnub Chiv Ib hauv lub Caij Plaub Caug. Peb nyeem ob zaj piav txog dab phem kev ntxias neeg. Thawj zaj yog thaum ub dab phem txia ua tus nab tuaj ntxias pog Es Vas nyob hauv lub vaj Es Dees. Pog Es Vas swb tus nab, nws noj lub txiv raws li tus nab hais, thiaj coj neeg mus poob kev txhaum uas muaj kev phem kev qias, kev ntxub ntxaug, kev nyuaj siab nyuaj ntsws, kev txom nyem, kev mob kev nkeeg, kev ploj kev tuag, thiab qhov loj tshaj yog kev ncaim ntawm Tswv Ntuj, tsis tau Tswv Ntuj lub txiaj ntsim nyob hauv peb lawm.  Zaj ob yog piav txog thaum Yes Xus mus yoo mov tau 40 hnub 40 hmo nyob teb chaws qhuav teb chaws suab puam, nws kuj raug dab phem tuaj ntxias nws thiab. Hmoov zoo rau peb tib neeg, Yes Xus kov yeej dab phem txoj kev ntxias, ces nws thiaj tau ua nws txoj hauj lwm cawm ntiaj teb neeg kom tiav. Nws xub mus ncig teb ncig chaw, tshaj txog Tswv Ntuj lub Moo Zoo tau 3 lub xyoo, ces nws raug ntes, raug tsim txom, thiab tuag los cawm ntiaj teb neeg. Tsis tas li xwb, nws yeej txoj kev tuag, nws tau sawv rov qab los muaj txoj sia. Nws lub cev sawv rov los yog ib lub cev uas tseem zoo li neeg, tiam sis kuj ho txawv neeg thiab, vim yog ib lub cev dawb huv, muaj hwj chim ci ntsa iab, txawj ploj txawj tshwm, hla tau phab ntsa. Yes Xus tau raug txom nyem li ntawd yog nws zoo siab raug los them peb tib neeg lub txim txhaum.

Nyob hauv txoj kev cai Kas Tos Liv, thaum txog lub Caij Plaub Caug no, yog ib lub caij uas peb yuav tau rov tig los xav txog peb lub neej, saib peb yuav tau hloov qhov twg fab twg kom zoo dua, haum Tswv Ntuj lub siab dua, haum peb txoj kev ntseeg dua.  Peb yuav tsum tau xyaum kiag hloov peb lub neej, kho peb lub siab.  Thaum hais mas hais tau yooj yim, tiam sis thaum yuav ua kiag mas yog ib qho nyuaj. Peb yog ib tug neeg ntseeg, yog peb paub tias peb tsis coj lub neej kom phim kev ntseeg, mas peb yuav tau kho peb, kom peb xyaum coj kom phim ib tug neeg ntseeg. Tej zaum yuav tau nquag mus tshwm ntsej muag tom tsev teev ntuj ntau dua qub. Yog li peb yuav tau yeej peb txoj kev nkees. Yuav muab siab tiag thiaj yeej.  Tej zaum yuav tsum tau xyaum nquag niaj hnub nco txog Tswv Ntuj, teev ntuj hauv vaj hauv tsev ntau dua qub, coj yus tsev neeg xyaum teev ntuj ua ke. Yog peb ua tsis kam mas yeej xyaum nyuaj tsawv. Txoj cai kuj qhia kom yoo mov caiv nqaij. Peb yuav tau los xyaum ua kom raws txoj cai, peb thiaj yog ib tug ntseeg Kas Tos Liv.

Txoj cai yoo mov caiv nqaij yog zoo li no:
Niaj Hnub Rau hauv lub lis piam yog ib hnub peb ua kev them txim txhaum thawm niaj thawm xyoo, xws li caiv nqaij, tiam sis noj tau nqaij ntses. Ib tug neeg muaj 14 xyoos mus rau 60 xyoo yuav tsum caiv nqaij niaj Hnub Rau (every Friday/chaque Vendredi) mus tas yus lub neej ua kev them txim txhaum. Tiam sis nyob Mes Lis Kas teb, cov Tswv Qhia tau tso cai pub rau peb cov ntseeg, yog leej twg ho xav tias caiv nqaij tsis yog ib txog kev them txim txhaum rau nws, nws xav ua lwm yam nyuaj dua los them txim txhaum los tau.  Tiam sis yog peb tsis muaj lwm yam, ces peb yuav tsum caiv nqaij. Hos lub Caij Plaub Caug, mas txoj cai yuav tseev (obligatory/obligatoire) kom sawv daws caiv nqaij niaj Hnub Rau. Hnub Plaub Txais Tshauv thiab Hnub Rau Ntshiab, yog ob hnub yoo mov thiab caiv nqaij tib si. Ib tug neeg muaj 18 xyoos mus rau 60 xyoo yuav tsum caiv nqaij thiab yoo mov (obligatory) rau ob hnub ntawd. Yuav yoo mov yog yoo li no: tsuas noj ib pluag mov loj hnub ntawd thiab noj ob pluag txom ncauj me ntsis xwb, nco ntsoov tsis noj nqaij li.  Yog nej noj txom ncauj ntau tshaj ntawd, ces tsis yog kev yoo lawm.

Txoj kev yoo no yog ib txog kev xyaum tswj yus lub cev kom txhob coj yus mus ua qhov phem, thiab yus kuj xyaum tswj yus lub siab lub tswv yim thiab.  Yog peb xyaum tsis tau ntau yam los xyaum ib ob yam uas yuav ua kom peb yog ib tug neeg ntseeg zoo. Txoj kev yoo no kuj zoo li yog ib txog kev peb muab peb tus kheej rau txim me ntsis kom peb to taub txog Yes Xus txoj kev raug txom nyem tsim txom pub rau peb.

Tub ntsuag wrote:nyob zoo mim ua tsaus koj twb tuaj qhia txog hnub txais tshauv lawm ntawm txhua leej los kujnco ntsoov tias hnub /o yog hnub yoo mov tiam ntawm peb thaj tsam lawv cov coj ho tsi yoo li mas ua rau kuv poob siab tas li lawm xyov xyoo no lawv kuj coj tau tej yam txawv mawg li tiam si ntawm kuv tug kheej mas kuv  yeej nco ntsoov mas ku v yeej yoo li txhua txhua xyoo .lawv hais mas yuav txog hmoob hli xab cuaj lawv mam yoo no mas kuv saib
mas tej yam txawv kawg ua rau kuv poob siab tas li os.nyob zoo

Mim wrote:Nyob zoo Tub Ntsuag,

Kuv xub teb koj tas saud lawm ces kuv mam mus pom lawv hais xov xwm txog tias xyoo no vim Suav lub xyoo tshiab poob ncaj rau Hnub Plaub Txais Tshauv ces muaj coob tus tswv qhia nyob sab As Xias teb tau tshaj tawm tias, cov uas xav yoo mov hnub ntawd los lawv yoo tau, tiam sis yog lawv tsis yoo no los lub Koom Txoos yuav zam rau lawv hnub ntawd no os. Tiam sis lawv kuj tau hais tias yog lawv tsis yoo hnub ntawd no ces lawv mam xaiv ib hnub uas lawv ua kab ke yoo no. Tiam sis lawv tsis hais txog xiab cuaj li koj hais, lawv tsuas hais txog Hnub Plaub Txais Tshauv xwb. Thaum koj hais tias koj poob siab vim cov coj ua txawv txawv no kuv kuj xav tsis thoob li thiab, tiam sis kuv mus pom lawv cov xov xwm no ces kuv kuj to taub lawm os. Yog thaum Tswv Qhia tso cai lawm ces txawm yus tsis yoo los yus tsis muaj kev txhaum thiab tsis tau hla txoj cai os. Es koj ho ua siab loj thiab os.