HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM NRUAB LIS PIAM XYOO II 2021-2022 Empty

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II 2021-2022

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 29th November 2021, 5:09 am

    Tim     29     lub     11     Hlis     2021

    Hnub Ob Lis Piam Ib Caij Tos Huab Tais Xyoo BC Nruab Lis Piam Xyoo I & II

    Lectionary: 175

    Zaj Nyeem Ib:   HIS XAIS 2: 1-5

    1 Lo lus uas His Xais, As Mos tub, tau hnov hais txog Yus Das teb thiab Yes Lus Xas Les yog li no:
    2 Muaj ib hnub thaum lub caij kawg, lub roob uas HUAB TAIS lub tsev nyob rau saud yuav raug tsa ua lub roob siab dua cov, nws yuav sawv siab dua cov pov roob. Ces tas ib tsoom kuj cuab yuav khiav ua npoj ntws tuaj rau saum HUAB TAIS lub roob.
    3 Muaj neeg coob yuav tuaj, lawv yuav hais tias: "Nej tuaj ! Peb nce mus pem Huab Tais lub roob, pem Yas Kos tus Tswv Ntuj lub tsev, kom nws qhia nws tej kev rau peb, ces peb thiaj yuav taug tau nws tej kev." Vim tias Huab Tais txoj kev cai yuav tawm ntawm Xis Yoos tuaj, thiab nws lo lus yuav tawm ntawm Yes Lus Xas Les tuaj.
    4 Huab tais yuav txiav txim nyob hauv nruab nrab cov kuj cuab, nws yuav sau ib txog cai rau coob leej neeg. Ces lawv yuav muab lawv rab ntaj los ntaus ua voom laij teb, muab lawv rab hmuv ntaus ua liag. Ib lub kuj cuab yuav tsis tsa ntaj mus ntaus lwm lub kuj cuab ntxiv; lawv yuav tsis kawm kev ntaus rog ntxiv lawm.
    5 Yas Kos tsev neeg aw, nej tuaj, peb cia li taug kev nyob hauv Huab Tais qhov pom kev!

    NPN   122: 1-2, 3-4b, 4cd-5, 6-7, 8-9

    Txais: Nej tuaj peb zoo siab hlo mus pem Huab Tais tsev

    Kuv zoo siab vim lawv hais rau kuv tias:.
    "Peb yuav nce mus lawm pem Huab Tais tsev.”
    Yes Lus Xas Les, nim no, peb txhais taw
    twb tau tsuj sab hauv koj cov rooj loog lawm.

    Txais: Nej tuaj peb zoo siab hlo mus pem Huab Tais tsev

    Yes Lus Xas Les raug txhim los zoo li
    ib lub Nroog uas zoo tau xwm yeem.
    Cov xeem neeg nce mus pem nws,
    Yog Huab Tais cov xeem neeg

    Txais: Nej tuaj peb zoo siab hlo mus pem Huab Tais tsev

    Lawv nce mus raws li txoj cai qhia rau His Xas Lais,
    Kom tau mus ua tsaug cav txog Huab Tais lub Npe.
    Nyob ntawd muaj ib co rooj txiav txim teeb tau tseg,
    Yog cov rooj cia rau Das Vis tsev neeg zaum.

    Txais: Nej tuaj peb zoo siab hlo mus pem Huab Tais tsev

    Nej thov ntuj kom muaj kev thaj yeeb nyob Yes Lus Xas Les!
    Kom cov neeg uas nyiam koj tsuas muaj kev vam meej!
    Kom kev thaj yeeb nyob sab hauv koj cov ntsa loog,
    Kom kev vam meej nyob hauv koj cov vaj cov tsev.

    Txais: Nej tuaj peb zoo siab hlo mus pem Huab Tais tsev

    Vim kuv cov txheeb ze thiab kuv cov phooj ywg,
    kuv yuav foom rau koj tias: “Kom kev thaj yeeb nyob hauv koj!”
    Vim muaj Huab Tais peb tus Tswv Ntuj lub tsev,
    Kuv yuav thov ntuj rau koj kom koj tau qhov zoo.

    Txais: Nej tuaj peb zoo siab hlo mus pem Huab Tais tsev

    As Les Lus yas:   NPN 80: 4

    Txais: As les lus yas, as les lus yas.

    Thov koj tuaj cawm peb mas, Huab Tais, peb tus Tswv Ntuj;
    Cia koj lub ntsej muag ci tuaj rau saum peb, kom peb tau txais kev cawm.

    Txais: As les lus yas, as les lus yas.

    Ntawv Moo Zoo:   MT 8: 5-11

    5 Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias:
    6 "Huab Tais, kuv tus tub txib pw tom tsev, nws tes taw tuag tas, nws mob txom nyem kawg."
    7 Yes Xus hais rau nws tias: "Kuv yuav mus kho nws kom zoo."
    8 Tus xab txheeb teb tias: "Huab Tais, kuv tsis tsim nyog koj chaws los hauv kuv lub qab ru tsev, tsuav koj hais ib lo lus xwb ces kuv tus tub txib yuav zoo hlo.
    9 Vim tias kuv kuj yog ib tug neeg zwm rau tus loj dua kuv, kuv kuj muaj ib co tub rog zwm rau kuv thiab. Yog kuv hais rau ib tug tias: 'Koj mus !' nws cia li mus, kuv ho hais rau lwm tus tias: 'Koj los,' nws kuj cia li los. Kuv hais rau kuv tus tub txib tias: 'Koj ua qhov no !' nws cia li ua."
    10 Yes Xus hnov nws hais li ntawd, Yes Xus qhuas kawg. Nws hais rau cov neeg raws nws qab tias: "Kuv hais tseeb rau nej, kuv tsis tau pom ib tug neeg ntseeg npaum li no nyob hauv cov His Xas Lais li.
    11 Kuv hais rau nej tias, yuav muaj neeg coob tuaj Toob Fab thiab Xib Fab tuaj nrog Has Nplas Has, His Xas Has thiab Yas Kos lawv noj rooj qav hauv lub Ceeb Tsheej saum ntuj.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 29th November 2021, 5:18 am

    Tim    30    lub    11    Hlis    2021

    Hnub Peb Lis Piam Ib Caij Tos Huab Tais Xyoo C Nruab Lis Piam Xyoo II

    Hwm LN As Nres, tus Hauv Paus Xa Lus

    Lectionary: 684

    Zaj Nyeem Ib:  LOS MAS 10: 9-18

    Cov kwv tij nkauj muad:
    9 Yog nej lub ncauj lees paub tias Yes Xus yog Huab Tais, thiab nej lub siab ntseeg tias Tswv Ntuj tau tsa Yes Xus sawv hauv cov tuag rov los lawm, mas nej yuav txais kev cawm.
    10 Vim tus neeg lub siab uas ntseeg yuav coj nws mus rau txoj kev ncaj, thiab tus neeg lub ncauj uas lees paub yuav coj nws mus rau txoj kev cawm.
    11 Muaj ntawv sau tseg tias : ‘Txhua tus neeg uas ntseeg txog nws yuav tsis poob ntsej muag.’
    12 Li ntawd, cov Yus Das tsis txawv cov Hes Las li; sawv daws muaj ib tug Huab Tais xwb, nws ua siab dav tas nrho rau cov neeg hu txog nws.
    13 Vim tias txhua leej uas hu txog Huab Tais lub npe, mas nws yuav tau txais kev cawm.
    14 Li ntawd, cov neeg yuav ua cas hu txog tus uas lawv twb tsis tau ntseeg txog? Lawv yuav ua cas ntseeg txog tus uas lawv twb tsis tau hnov nws lub Moo Zoo? Lawv yuav ua cas hnov yog tsis muaj tus tshaj tawm li?
    15 Cov yuav tshaj lub Moo Zoo yuav ua cas mus tshaj yog tsis muaj tus xa lawv mus? Muaj ntawv sau cia li no: ‘Cov neeg xa lub Moo Zoo, mas lawv ko taw zoo nkauj tas nrho.’
    16 Tab sis tsis yog tas sawv daws tsis mloog lub Moo Zoo, vim His Xais hais tias : ‘Huab Tais, leej twg thiaj mloog cov lus lawv tau hnov ntawm peb?’
    17 Li ntawd, kev ntseeg txhawv ntawm qhov neeg hnov los; qhov neeg hnov yog txhawv ntawm Leej Pleev lo lus los. 18 Kuv thiaj nug tias: ‘Lawv puas tau hnov ne?’ Tab sis lawv yeej yuav tsum tau hnov lawm xwb, vim tias: ‘Cov tub tshaj lub Moo Zoo lub suab twb ntxhe mus thoob ntiaj teb, lawv cov lus twb nrov mus txog tim npoo ntia teb kawg lawm.’

    NPN   19: 8, 9, 10, 11

    Txais: (10) Huab Tais cov lus txiav txim yog qhov tseeb, txhua lo lus yog lus ncaj.
    los: (Zam 6:63) Huab Tais, koj cov lus yog ntsuj plig thiab yog txoj sia.

    HUAB TAIS txoj cai zoo txhij txhua,
    nws ntxiv siav rau tus ntsuj plig;
    HUAB TAIS tus txhooj tsim nyog tso siab rau,
    nws ua kom tus neeg ruam thoob tsib tuaj.

    Txais: …

    HUAB TAIS cov cai lij choj yog cai ncaj
    ua kom neeg zoo siab kaj lug.
    HUAB TAIS lo lus qhia ntshiab si,
    ua kom neeg pom kev.

    Txais: …

    Kev hwm HUAB TAIS yog kev dawb huv,
    kev hwm Huab Tais yuav nyob mus li.
    Cov cai HUAB TAIS txiav yog qhov tseeb,
    yog cai ncaj ncees tas huv si.

    Txais: …

    HUAB TAIS cov cai muaj nqes dua kub,
    muaj nqes dua ib txhab tseem kub,
    qab zib dua tej kua qab zib,
    los tej kua zib ntawm daim nas muv.

    Txais: …

    As Les Lus Yas:    MT 4: 19

    Txais: As les lus yas, as les lus yas.

    Huab Tais hais tias: “Nej raws kuv mus,
    Kuv yuav tsa nej ua cov tub puav neeg.”

    Txais: As les lus yas, as les lus yas.

    Ntawv Moo Zoo:   MT 4: 18-22

    18 Yes Xus mus ko taw taug tus ntug dej ntuj Nkas Lis Lais, nws pom ob kwv tij: Xis Moos uas hu ua Pob Zeb, thiab nws tus kwv As Nres. Nkawd tab tom pov vas ntses rau hauv dej ntuj, vim nkawd yog tub puav ntses.
    19 Yes Xus hais rau nkawd tias: "Neb los raws kuv mus, kuv yuav tsa neb ua tub puav neeg."
    20 Tam sis ntawd, kawd tso plhuav nkawd cov vas ntses tseg, nkawd raws Yes Xus mus.
    21 Yes Xus mus ntxiv, ces nws kuj pom ob kwv tij dua: Yas Kos, Ntxes Npes Dais tus tub, thiab Zam, Yas Kos tus kwv. Nkawd nyob hauv nkoj nrog nkawd txiv Ntxes Npes Dais, lawv tseem tab tom ntxiv lawv cov vas ntses; Yes Xus hu nkawd.
    22 Tam sis ntawd, nkawd tso plhuav nkawd lub nkoj thiab nkawd txiv tseg, nkawd raws Yes Xus mus.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 30th November 2021, 11:06 am

    Tim 1 lub 12 Hlis 2021

    Hnub Plaub Lis Piam Ib Caij Tos Huab Tais Xyoo C Nruab Lis Piam Xyoo II

    Lectionary: 177

    Zaj Nyeem Ib: HX 25: 6-10a

    6 Nyob saum lub roob no, tus HUAB TAIS kav tsoom tshiab yuav ua ib rooj nqaij rooj hno rau tas cov haiv neeg huv tib si, yog ib rooj qav muaj nqaij muaj dej caw qab, yog hom nqaij muaj roj muaj hlwb pob txha ntxuag, thiab yog hom cawv laus uas qab qab ntshiab huv si.
    7 Nyob saum lub roob no, HUAB TAIS yuav rhuav daim ntaub teem kiam uas npog tas ib tsoom neeg pov tseg, thiab lub vas uas cab mus vij tas ib tsoom kuj cuab.
    8 Nws yuav rhuav txoj kev tuag kom ploj mus tas ib txhiab ib txhis. Ces HUAB TAIS Tswv Ntuj yuav so cov kua muag ntws saum sawv daws lub ntsej muag, thiab nws yuav tshem nws haiv neeg nyob thoob ntiaj teb txoj kev poob ntsej muag tawm; vim HUAB TAIS tau hais li ntawd lawm.
    9 Hnub ntawd yuav muaj tus hais tias: "Nej ntsia peb tus Tswv Ntuj saib, tus uas peb tos ntsoov tias nws yuav cawm peb; nws yog peb tus HUAB TAIS uas peb tos ntsoov txog. Peb kav tsij dhia lom zem kav tsij zoo siab vim nws tau cawm peb lawm!”
    10a Vim HUAB TAIS txhais tes yuav so nyob saum lub roob no.

    NPN 23: 1-3a, 3b-4, 5, 6

    Txais: (6cd) Kuv yuav nyob hauv Huab lub Tais tsev niaj hnub tas kuv lub neej.

    HUAB TAIS yog tus tswv zov yaj saib kuv, kuv yuav tsis tshaib tsis nqhis li.
    Nws cia kuv so nyob hauv tej tshav zaub mos ntsuab xiab;
    Nws coj kuv mus nyob ze cov dej tus yees;
    nws ua kom kuv tus ntsuj plig rov muaj zog tuaj.

    Txais: (6cd) Kuv yuav nyob hauv Huab Tais lub tsev niaj hnub tas kuv lub neej.

    Nws coj kuv mus taug txoj kev ncaj, kom tau txuag nws lub npe.
    Txawm kuv taug kev hauv ib lub hav tsaus nti,
    kuv tsis ntshai ib yam phem, vim koj nyob rawv ntawm kuv ib sab,
    koj rab nplawm thiab rab pas nrig ua kuv luag.

    Txais: (6cd) Kuv yuav nyob hauv Huab Tais lub tsev niaj hnub tas kuv lub neej.

    Koj rau ib rooj mov rau ntawm kuv xub ntiag
    rau kuv cov yeeb ncuab ntsia ntsoov;
    koj muab roj pleev kuv taub hau;
    kuv lub ntim puv phwj yaws.

    Txais: (6cd) Kuv yuav nyob hauv Huab Tais lub tsev niaj hnub tas kuv lub neej.

    Kev ua siab zoo thiab kev khuv leej raws kuv nraim
    niaj hnub hauv kuv lub neej;
    Kuv yuav nyob hauv HUAB TAIS tsev
    mus txog txhiab niag tim puas xyoo.

    Txais: (6cd) Kuv yuav nyob hauv Huab Tais lub tsev niaj hnub tas kuv lub neej.

    As Les Lus Yas

    Txais: As les lus yas, as les lus yas.

    Nej ntsia, Huab Tais tuaj cawm nws haiv neeg;
    Cov uas npaj tiav log tos ntsib nws lawv txoj hmoov zoo.

    Txais: As les lus yas, as les lus yas.

    Ntawv Moo Zoo: MT 15: 29-37

    Thaum ntawd,
    29 Yes Xus tawm ntawm qhov chaw ntawd mus, nws mus txog ntawm tus ntug dej ntuj Nkas Lis Lais, nws nce mus saum roob, ces nws mus zaum nyob ntawd.
    30 Tej pab neeg coob kawg tuaj cuag nws; lawv coj tej tus ceg tawv, tej tus dig muag, tej tus tuag tes tuag taw, tej tus ruam tsis txawj hais lus, thiab lwm cov muaj mob coob kawg tuaj tso rau ntawm Yes Xus ko taw; Yes Xus kho sawv daws huv tib si kom zoo hlo.
    31 Ib zeej tsoom sawv daws qhuas kawg, thaum lawv pom cov ruam txawj hais tau lus tuaj, cov tuag tes tuag taw rov muaj zog tuaj, cov ceg tawv rov mus taus kev zoo, hos cov dig muag rov pom kev tuaj; ces lawv cav txog His Xas Lais tus Tswv Ntuj lub koob meej.
    32 Yes Xus hu nws cov thwj tim los, nws hais rau lawv tias: “Kuv lub siab hlub pab neeg no, vim lawv twb nrog kuv nyob tau peb hnub lawm, lawv tsis muaj dab tsi noj li. Kuv tsis xav cia lawv tshaib plab rov mus tsev, tsam lawv tsaus muag ntawm kev."
    33 Cov thwj tim hais rau nws tias: "Peb yuav nrhiav mov qhov twg hauv lub teb chaws suab puam no kom txaus ib pab neeg coob npaum no noj?"
    34 Yes Xus hais rau lawv tias: “Nej muaj pes tsawg lub ncuav mov?” Lawv teb tias: “Muaj xya lub thiab ob peb tug me nyuam ntses.”
    35 Yes Xus hais kom tsoom sid zaum hauv pem teb.
    36 Ces nws tuav xya lub ncuav mov thiab cov ntses, nws ua Ntuj tsaug; nws muab cov ncuav mov ntais, nws cev rau cov thwj tim, ces cov thwj tim coj mus faib rau tsoom sid noj.
    37 Tas sawv daws tau noj tsau npo.Thaum lawv noj tas lawm, lawv khaws tej sab mov seem tau puv xya pob tawb.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 2nd December 2021, 9:38 am

    Tim 2 lub 12 Hlis 2021

    Hnub Tsib Lis Piam Ib Caij Tos Huab Tais Xyoo C Nruab Lis Piam Xyoo II

    Lectionary: 178

    Zaj Nyeem Ib: HX 26: 1-6

    1 Hnub ntawd, nyob Yus Das teb lawv yuav hu zaj nkauj no:
    "Peb muaj ib lub tsheej ruaj khov; nws tsa phab ntsa thiab ntsa zeb los thaiv peb.
    2 Nej cia li qhib cov rooj loog mas! Kom haiv neeg siab ncaj nkag los, haiv neeg uas muaj kev ntseeg.
    3 Haiv neeg uas muaj ib lub hom phiaj ruaj khov koj txuag kom nws nyob thaj yeeb; nws nyob thaj yeeb vim nws tso siab rau koj.
    4 Nej tso siab rau HUAB TAIS mus li, vim HUAB TAIS yog lub tsua uas yuav nyob ib txhiab ib txhis.
    5 Nws txo kom cov nyob saum tej chaw siab poob rau qhov chaw qis; lub tsheej uas nyob saum qhov siab, nws ua kom poob rau hauv qhov qis, kom vau hlo rau hauv av, thiab mus xyaw av.
    6 Nws yuav raug cov neeg txom nyem muab ko taw tsuj rau hauv av thiab raug cov neeg pluag taug kev tsuj mus mus los los."

    NPN 118: 1+8-9, 19-21, 25-27a

    Txais: (26a) Kom tus tuaj ntawm Huab Tais lub npe tuaj nto koob meej.

    Nej ua HUAB TAIS tsaug, vim nws siab zoo,
    nws txoj kev khuv leej yuav nyob mus li.
    Khiav los nkaum hauv HUAB TAIS zoo dua tso siab rau tib neeg,
    Khiav los nkaum hauv HUAB TAIS zoo dua tso siab rau tej nom tswv.

    Txais: (26a) Kom tus tuaj ntawm Huab Tais lub npe tuaj nto koob meej.

    Nej qhib cov rooj vag mus hauv txoj kev ncaj rau kuv,
    kuv yuav chaws mus, kuv yuav mus ua HUAB TAIS tsaug.
    Ntawm no yog HUAB TAIS lub rooj vag;
    tus neeg siab ncaj yuav tau nkag mus.
    Kuv yuav ua koj tsaug, vim koj tau teb kuv, koj yog tus cawm kuv.

    Txais: (26a) Kom tus tuaj ntawm Huab Tais lub npe tuaj nto koob meej.

    HUAB TAIS, thov koj pub kev cawm rau peb!
    HUAB TAIS, thov koj pub kev vam meej rau peb!
    Kom tus tuaj ntawm HUAB TAIS lub npe tuaj nto koob meej.
    Peb nyob hauv HUAB TAIS tsev foom hmoov zoo rau nej.
    HUAB TAIS yog Tswv Ntuj, nws pub qhov pom kev rau peb..

    Txais: (26a) Kom tus tuaj ntawm Huab Tais lub npe tuaj nto koob meej.

    As Les Lus Yas: His Xais 55: 6

    Txais: As les lus yas, As les lus yas

    Nej nrhiav HUAB TAIS thaum nej tseem nrhiav tau nws;
    nej hu nws thaum nws tseem nyob ze.

    Txais: As les lus yas, As les lus yas

    Zaj Ntawv Moo Zoo: Mas Tais 7: 21, 24-27

    Yes Xus hais rau nws cov thwj tim tias:
    21 “Tsis yog txhua tus uas hu kuv tias ‘Huab Tais, Huab Tais,’ thiaj yuav tau mus hauv lub Ceeb Tsheej saum ntuj, tiam sis yog tus uas ua raws li kuv Txiv nyob saum ntuj lub siab nyiam.
    24 Txhua tus uas mloog kuv cov lus no, thiab ua raws li ntawd, mas nws piv tau rau ib tug neeg xyuam xim uas txhim nws lub tsev rau saum tsua.
    25 Thaum los nag hlob, dej sab siv huam, cua tshuab ntsawj lub tsev ntawd, tab sis tsev tsis vau, vim lub tsev cog ruaj rau saum tsua.
    26 Hos txhua tus uas hnov kuv cov lus no, tab sis nws tsis ua raws li ntawd, mas nws piv tau rau ib tug neeg ruam uas txhim tsev rau saum av xuab zeb.
    27 Thaum los nag hlob, dej sab siv huam, cua tshuab ntsawj lub tsev, ces lub tsev vau tas thiab puas tas huv tib si.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 2nd December 2021, 12:48 pm

    Tim 3 lub 12 Hlis 2021

    Thawj Hnub Rau Lis Piam ib Caij Tos Huab Tais Xyoo C Nruab Lis Piam Xyoo II

    Lectionary: 179

    Yuav Hwm LN Francis Xavier, ua Leej Choj

    Zaj Nyeem Ib: HX 29: 17-24


    Huab Tais Tswv Ntuj hais li no:
    17 Tshuav caij luv luv lawm xwb, Les Npas Nos yuav hloov los ua ib lub vaj txiv ntoo, ces sawv daws yuav saib tias lub vaj txiv ntoo ntawd yog ib lub hav zoo.
    18 Hnub ntawd, cov neeg lag ntseg yuav hnov cov lus nyob hauv phau ntawv, hos cov dig muag qhov muag yuav dim plaws ntawm qhov tsaus ntuj muaj kev tu siab, lawv yuav pom kev tuaj.
    19 Cov neeg me yuav zoo siab hlo nyob hauv HUAB TAIS, cov pluag txom nyem yuav dhia hom khaj nyob hauv His Xas Lais tus Ntshiab.
    20 Vim tias yuav tsis muaj tus tsim txom lawv ntxiv, thiab tus khav tias nws loj dua lawv yuav ploj mus lawm; tas cov neeg uas nyas ntshis nrhiav ua qhov phem yuav raug muab tshem tawm tas,
    21 xws li cov neeg uas hais ib lo lus xwb ua tau kom ib tug neeg yog tus txhaum, lawv yog cov cuab ntxiab ntawm lub rooj loog tos tus tuaj pab nws, ces tus neeg siab ncaj ua tus swb hais tsis tau dab tsi.
    22 Vim li ntawd, HUAB TAIS, Yas Kos tsev neeg tus Tswv Ntuj, tus uas tau txhiv Has Nplas Has, nws hais li no: “Nyem no, Yas Kos yuav tsis txaj muag ntxiv, nws yuav tsis ua ntsej muag daj tseem ntxiv.
    23 Thaum Yas Kos cov me nyuam pom kuv cov hauj lwm kuv ob txhais tes ua nyob hauv nws, lawv yuav ua kom kuv lub npe ntshiab, lawv yuav cav hwm txog Yas Kos tus Ntshiab, thiab lawv yuav ntshai His Xas Lais tus Tswv Ntuj.
    24 Cov uas lub tswv yim xav yuam kev yuav kawm kom muaj kev to taub; cov uas pheej pom luag qhov tsis zoo yuav tau mloog cov lus qhuab ntuas.

    NPN 27: 1, 4, 13-14

    Txais: (1a) Huab Tais yog kuv qhov pom kev thiab kuv txoj kev cawm.

    Huab Tais yog kuv qhov pom kev thiab kuv txoj kev cawm;
    Kuv yuav ntshai leej twg?
    Huab Tais yog kuv lub chaw nkaum nyob hauv tas kuv lub neej,
    Kuv yuav tshee vim leej twg?

    Txais: (1a) Huab Tais yog kuv qhov pom kev thiab kuv txoj kev cawm.

    Kuv tsuas thov ib yam ntawm Huab Tais xwb; qhov kuv nrhiav yog:
    kom tau nyob hauv Huab Tais tsev niaj hnub hauv kuv lub neej,
    Kom kuv tau ntsia ntsoov Huab Tais txoj kev zoo
    thiab tau saib ntsoov nws lub tuam tsev.

    Txais: (1a) Huab Tais yog kuv qhov pom kev thiab yog kuv txoj kev cawm.

    Kuv ntseeg hais tias kuv yuav tau pom Huab Tais ua lub siab dav siab zoo
    nyob hauv cov neeg ciaj sia lub teb chaws.
    Nej ua siab loj tos ntsoov Huab Tias mog;
    nej ua siab tawv qhawv tos ntsoov Huab Tais.

    Txais: (1a) Huab Tais yog kuv qhov pom kev thiab yog kuv txoj kev cawm.

    As Les Lus Yas

    Txais: As les lus yas, As les lus yas.

    Nej ntsia, peb tus Huab Tais yuav tuaj muaj hwj huam loj;
    Nws yuav ua kom nws cov tub txib qhov muag pom kev.

    Txais: As les lus yas, As les lus yas.

    Gospel: MT 9: 27-31

    27 Thaum Yes Xus mus hla thaj tsam ntawd, muaj ob tug neeg dig muag raws nws qab; nkawd qw qw hais tias: "Das Vis Leej Tub, thov koj khuv leej wb mas!"
    28 Thaum Yes Xus nkag los rau hauv lub tsev lawm, ob tug dig muag los cuag Yes Xus, ces Yes Xus hais rau nkawd tias: "Neb puas ntseeg tias kuv ua tau qhov ntawd?" Nkawd teb tias: “Huab Tais, wb ntseeg.”
    29 Ces Yes Xus kov nkawd qhov muag, nws hais tias: "Kom muaj tuaj rau neb raws li neb kev ntseeg."
    30 Ces nkawd qhov muag qhib hlo. Yes Xus txwv nkawd nruj nruj tias: "Neb tsis txhob ua kom muaj neeg paub txog qhov no li!"
    31 Tab sis thaum nkawd tawm mus lawm, nkawd tshaj txog Yes Xus rau tas cheeb tsam ntawd paub tas huv tib si.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 3rd December 2021, 3:23 pm

    Tim    4    lub    12    Hlis    2021

    Thawj Hnub Xya Lis Piam Ib Caij Tos Huab Tais Xyoo C Nruab Lis Piam Xyoo II

    Lectionary: 180

    XHLT:  LN John  nyob Damascus, Leej Choj ua Kws cov Txuj Ntshiab

    Zaj Nyeem Ib:   His Xais 30: 19-21, 23-26


    Huab Tais, His Xas Lais tus Ntshiab hais li no:
    19 Tsoom neeg ntawm Xis Yoos uas nej nyob Yes Lus Xas Les, nej yuav tsis quaj ntxiv lawm. Huab Tais yuav ua zoo rau nej, thaum nej quaj hu; nws hnov dheev nej lub suab, ces nws yuav teb rau nej.
    20 Txawm Huab Tais yuav muab cov mov txhawj xeeb rau nej noj thiab cov dej txom nyem siab rau nej haus los nej tus Xib Hwb yuav tsis tsiv nraim ntawm nej ntxiv, nej qhov muag yuav tau pom nej tus Xib Hwb.
    21 Nej pob ntseg yuav hnov ib lub suab nrov ntawm nej nraub qaum tuaj tias: “Ntawm no yog txoj kev uas nej yuav tsum taug, txawm nej yuav mus rau sab xis los rau sab laug.
    23 Nws yuav ua kom nag los ywg cov noob qoob noob loo uas nej tseb rau hauv av. Ces cov nplej uas av yuav  txi rau nej yuav qab thiab yuav ntsu kawg nkaus. Hnub ntawd, nej cov tsiaj yuav muaj chaw noj zaub nyob hauv tej lub tiaj nrag dav fo.
    24 Cov heev nyuj thiab cov luj uas laij teb yuav noj cov zaub nyom uas yog xuas duav hlau thiab duav nkaug hais rau noj.
    25 Nyob saum txhua lub roob siab thiab txhua lub pov roob, yuav muaj tej tug dej txhawv muaj dej ntws lug; thaum ntawd yog lub caij muaj sib tua loj ua kom tej pej thuam vau tas.
    26 Ces lub hli yuav ci pom kev npaum lub hnub, hos lub hnub yuav ci pom kev tshaj xya npaug ntxiv, npaum li yog xya hnub ci ua ke. Hnub ntawd HUAB TAIS yuav qhwv nws haiv neeg cov qhov txhab thiab yuav kho lawv cov nqaij to uas raug nws nplawm ntuag kom zoo.

    NPN   147: 1-2, 3-4, 5-6

    Txais: (HX 30:18d) Txhua tus uas tos Huab Tais lawv txoj hmoov zoo.

    Nej cav txog Huab Tais, vim nws siab zoo;
    nej hu nkauj cav txog peb tus Tswv Ntuj, vim nws hlub neeg;
    tsim nyog kom peb cav txog nws.
    HUAB TAIS rov tsa Yes Lus Xas Les kom sawv;
    nws sau His Xas Lais cov neeg tawg tas rov los ua ke.

    Txais…

    Nws kho cov neeg lwj siab lwj ntsws kom zoo,
    thiab nws qhwv lawv tej qhov txhab rau.
    Nws suav cov hnub qub saib muaj pes tsawg lub;
    nws hu lawv cov npe ib lub zuj zus.

    Txais…

    Peb tus HUAB TAIS loj thiab muaj hwj huam tas nrho;
    nws txoj kev thoob tsib tsis muaj qhov txawj kawg.
    HUAB TAIS tsa cov neeg me cai;
    nws thawb kom cov siab phem ntog rau hauv av.

    Txais…

    As Les Lus Yas:   His Xais 33: 22

    Txais: As les lus yas, As les lus yas

    HUAB TAIS yog tus txiav txim rau peb, tus muab txoj cai rau peb;
    nws yog peb tus vaj, yog tus yuav cawm peb dim.
    .
    Txais: As les lus yas, As les lus yas

    Zaj Ntawv Moo Zoo:   Mas Tais 9:35-10:1,5A,6-8

    9: 35 Yes Xus mus ncig txhua cov nroog thiab cov zos huv si, nws qhuab qhia sawv daws nyob hauv lawv cov tsev txoos, nws tshaj lub Moo Zoo txog lub Ceeb Tsheej, thiab nws kho sawv daws tej txiab xeeb thiab tej mob nkeeg zoo tas huv si.
    36 Yes Xus pom tsoom pej xeem, nws muaj lub siab hlub lawv, vim lawv sawv daws sab thiab qaug zog zoo li ib co yaj tsis muaj tswv saib
    37 Yes Xus thiaj hais rau nws cov thwj tim tias: "Qoob loo ntau kawg, tab sis cov tub zog tsawg.
    38 Nej thov tus tswv qoob kom nws xa ib co tub zog tuaj sau nws cov qoob."
    10: 1 Yes Xus hu nws kaum ob leeg thwj tim kom los ntawm nws. Nws muab hwj huam rau lawv kom lawv ntiab tau dab tawm, thiab kho tau txhua yam txiab xeeb thiab txhua yam mob nkeeg kom zoo.
    5a Yes Xus xa kaum ob leeg no mus tshaj lub Moo Zoo, nws qhia lawv tias:
    6 “Nej mus nrhiav cov yaj ploj hauv tsev neeg His Xas Lais.
    7 Thaum nej taug kev, nej tshaj tias: ‘Lub Ceeb Tsheej saum ntujtuaj txog ze lawm.’
    8 Nej kho cov mob kom zoo, nej tsa cov tuag kom sawv rov los, nej kho cov mob ruas kom huv tuaj, nej ntiab dab phem kom khiav tawm mus. Nej tau txais dawb, nej kuj yuav pub dawb rau luag thiab.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 6th December 2021, 11:18 am

    Tim 6 lub 12 Hlis 2021

    Hnub Ob Lis Piam Ob Caij Tos Huab Tais Xyoo C Nruab Lis Piam Xyoo II

    Lectionary: 181

    XHLT: LN Nicholas, ua Tswv Qhia

    Zaj Nyeem Ib: HIS XAIS 35: 1-10


    1 Lub teb chaws suab puam thiab thaj av qhuav yuav dhia hom khaj; lub vos hav qhuav yuav zoo siab thiab yuav tawg paj
    2 Nws yuav tawg paj nra paug puv ntia thiab yuav zoo siab nrog suab nkauj lom zem; luag yuav muab Les Npas Nos lub koob meej rau nws, yog Roob Kas Mes thiab Sas Los lub hwj chim; lawv yuav tau pom HUAB TAIS lub hwj chim, yog peb tus Tswv Ntuj lub koob meej.
    3 Nej ua kom cov tuag tes rov muaj zog, kom cov hauv caug ntshaus rov khov tuaj.
    4 Nej hais rau cov siab me tias: "Nej ua siab loj! Nej txhob ntshai! Ntsia saib, nej tus Tswv Ntuj tuaj lawm! Nws tuaj ua kom nej tau ntsej muag; nws nqa paj tshab saum ntuj tuaj, nws tuaj cawm nej.
    5 Ces cov dig muag ob lub qhov muag yuav rua hlo, cov lag ntseg ob lub pob ntseg yuav qhib plho.
    6 Tus neeg ceg tawv yuav dhia nrawm xws tus muas lwj, tus nplaig txhav yuav hu tau nkauj. Dej yuav txhawv tawm hauv cov teb chaws suab puam los, tej tus dej loj yuav ntws tawm hauv cov teb chaws av qhuav los.
    7 Thaj av suab puam kub lug yuav hloov ua pas dej, lub teb chaws tshaib dej yuav txhawv dej ntws lug tawm los; thaj chaw uas hma nyob yuav hloov ua hav iav muaj tauj deg thiab muaj ncaug ua ntawv.
    8 Nyob ntawd, yuav muaj ib txog kev loj, tis npe hu ua "txoj Kev Ntshiab." Tus neeg tsis huv yuav mus tsis tau saum txoj kev ntawd; yog cia rau cov uas yuav taug txoj kev ntawd xwb; cov neeg vwm yuav tsis mus yuam kev tau rau saum txoj kev ntawd.
    9 Yuav tsis muaj tsov nyob saum txoj kev ntawd, tsis muaj tej tsiaj qus tsiaj tsiv nyob saud, yuav nrhiav tsis pom li, tsuas yog cov uas tau txais kev cawm xwb thiaj taug txoj kev ntawd.
    10 Ces cov neeg uas HUAB TAIS tau txhiv yuav rov qab los, lawv yuav nkag mus hauv Xis Yoos nrog suab hu nkauj; txoj kev zoo siab mus ib txhiab ib txhis yuav ua mom rau lawv ntoo saum taub hau. Lawv yuav txais kev zoo siab thiab kev luag ntxhi, hos kev tu siab thiab quaj ntsuag yuav ploj ntais tas mus.

    NPN 85: 9ab+10, 11-12, 13-14

    Txais: (H X 35:4f) Peb tus Tswv Ntuj yuav tuaj cawm peb!

    Kuv yuav hnov tias Tswv Ntuj hais dab tsi.
    Huab Tais nws tshaj txog kev thaj yeeb rau nws haiv neeg,
    Nws txoj kev cawm los txog ze ze cov hwm nws lawm tiag,
    lub hwj chim nyob txawm hauv peb lub teb chaws.

    Txais: (H X 35:4f) Peb tus Tswv Ntuj yuav tuaj cawm peb!

    Kev ua zoo thiab kev tseeb yuav sib ntsib,
    kev ncaj thiaj kev thaj Yeeb yuav los sib puag.
    Kev Tseeb yuav txhawv tawm hauv ntiaj teb los,
    kev ncaj yuav dauv muag ntsia saum ntuj tuaj.

    Txais: (H X 35:4f) Peb tus Tswv Ntuj yuav tuaj cawm peb!

    HUAB TAIS yuav pub nws cov txiaj ntsim,
    peb cov av yuav ntsu qoob loo ntau tshaj qub.
    Kev ncaj yuav taug kev mus ua nws ntej,
    Kev cawm yuav taug raws txoj kev nws hneev taw rhawv.

    Txais: (H X 35:4f) Peb tus Tswv Ntuj yuav tuaj cawm peb!

    As Les Lus Yas

    Txais: As les lus yas, as les lus yas.

    Nej ntsia tus vaj yuav tuaj, yog tus Huab Tais kav ntiaj teb,
    nws yuav daws lub nra uas tsuam peb kom peb nti tsis taus.

    Txais: As les lus yas, as les lus yas.

    Ntawv Moo Zoo: LK 5: 17-26

    17 Muaj ib hnub, thaum Yes Xus tab tom qhia sawv daws, muaj ib cov Fas Lis Xais thiab ib co Kws Txoj Cai tuaj ntawm txhua lub zos hauv xeev Nkas Lis Lais, xeev Yus Das, thiab tuaj Yes Lus Xas Les tuaj, lawv sawv daws zaum nyob ntawd. Huab Tais lub hwj huam ua kom Yes Xus kho tau cov neeg mob zoo kuj nyob hauv nws thiab.
    18 Muaj ib pab neeg kwv ib tug tuag ceg saum ib lub txaj tuaj. Lawv nrhiav kev yuav nqa tus tuag ceg mus rau hauv tsev, coj nws mus tso rau ntawm Yes Xus xub ntiag.
    19 Tab sis lawv tsis tau kev nqa tus tuag ceg mus rau sab hauv, vim neeg coob dhau. Ces lawv nce mus saum ru tsev, lawv dauv tus tuag ceg pw saum nws lub txaj, nqes ntawm cov kis thwj cib mus rau hauv nruab nrab ntawm Yes Xus xub ntiag.
    20 Yes Xus pom tias lawv muaj kev ntseeg, nws hais tias: "Ntawm koj, mas koj cov txhaum daws tas lawm."
    21 Ces cov Kws Ntawv Ntshiab thiab cov Fas Lis Xais xav twj ywm hais tias: "Tus neeg ntawd yog leej twg, cas nws thiaj hais ib co lus thuam Ntuj? Leej twg yuav daws txhaum tau? Kawg yog Tswv Ntuj tib leeg xwb."
    22 Yes Xus twb paub qhov lawv xav hauv nruab siab lawm, nws hais rau lawv tias: "Vim li cas nej thiaj xav tej zaj tswv yim li ntawd hauv nej siab ?
    23 Lo lus twg yog lo hais yooj yim dua, lo lus tias: 'Koj cov txhaum daws tas lawm,' los yog lo lus tias : 'Koj sawv, koj mus kev ?'
    24 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb no,” ces Yes Xus hais rau tus tuag ceg tias: “Kuv hais rau koj: koj sawv, koj nqa koj lub txaj, koj rov mus tsev."
    25 Tam sis ntawd, tus tuag ceg sawv tsees los nyob ntawm sawv daws xub ntiag, nws nqa lub txaj uas thaum tuaj nws pw, nws rov mus tsev, nws cav txog Tswv Ntuj.
    26 Sawv daws yoob tas, lawv cav txog Tswv Ntuj. Lawv ntshai kawg, lawv hais tias: "Hnub no, peb tau pom tej yam tsis txaus ntseeg li!"

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 6th December 2021, 1:25 pm

    Tim 7 lub 12 Hlis 2021

    Hnub Peb Lis Piam Ob Caij Tos Huab Tais Xyoo C Nruab Lis Piam Xyoo II

    Lectionary: 182

    Yuav Hwm LN Ambrose, ua Tswv Qhia thiab Kws cov Txuj Ntshiab

    Zaj Nyeem Ib: HIS XAIS 40: 1-11


    1 Nej tus Tswv Ntuj hais tias: "Nej nplij kuv haiv neeg, nej nplij lawv mas !
    2 Nej hais lus mos lus zoo nplig siab rau Yes Lus Xas Les.
    Nej tshaj rau nws tias nws lub caij tawm tsam tiav tas lawm,
    nws them nws tej txhaum tas lawm,
    vim nws tau txais kev txom nyem ntawm HUAB TAIS txhais tes los
    yog ob npaug ntawm nws cov txhaum lawm."
    3 Muaj ib lub suab qw nyob hauv teb chaws suab puam tias :
    "Nej npaj kev rau HUAB TAIS; nej ua kom muaj ib txog kev ncaj
    nyob hauv cov teb chaws suab puam rau peb tus Tswv Ntuj.
    4 Nej txhub cov hav tob kom siab tuaj, nej ua kom cov roob siab
    thiab cov pov roob cia li qis tuaj, kom cov av siab av qis
    hloov ua av tiaj tus yees, kom tej qhov ntxhab hloov ua hav tiaj.
    5 Ces HUAB TAIS lub hwj chim yuav tawm los rau sawv daws pom xyeem;
    txhua tus neeg puav leej yuav tau pom ua ke,
    vim HUAB TAIS lub ncauj tau hais lli ntawd.
    6 Muaj iIb lub suab hais tias: "Koj qw mas!" Kuv teb tias: "Kuv yuav qw txog dab tsi ?"
    -"Txhua tus muaj lub cev nqaij yog nroj tsuag,
    lawv qhov zoo nkauj ces zoo li lub paj nyob nruab nrag.
    7 Tsob nroj yuav qhuav, lub paj yuav ntsws thaum Huab Tais tshuab pa tuaj rau;
    li ntawd tib neeg ces yeej yog nroj tsuag.
    8 Tsob nroj yuav qhuav, lub paj yuav ntsws,
    tab sis peb tus Tswv Ntuj lo lus yuav nyob mus li.”
    9 Koj nce mus lawm saum lub roob siab mas,
    Xis Yoos, koj yog tus tub xa tsab xov zoo siab;
    koj tsa suab qw kom nrov li nrov tau mog,
    Yes Lus Xas Les, koj yog tus tub xa lub moo zoo.
    Koj qw suab kom nrov, tsis txhob ntshai hais rau cov nroog nyob Yus Das tias:
    ‘Ntawm no yog nej tus Tswv Ntuj!
    10 Ntawm no yog HUAB TAIS Tswv Ntuj.
    Nws tuaj muaj hwj huam, nws txhais npab muaj zog yog tus tswj.
    Nws nqa nws cov paj tshab nrog nws, nws tus nqe zog ua nws ntej.
    11 Nws zoo li ib tug tswv zov yaj coj nws pab yaj mus noj zaub;
    nws sau cov me nyuam yaj rau ntawm nws ob txhais npab,
    nws nqa lawv nyob hauv nws xub ntiag;
    nws ua twb zoo coj cov maum yaj uas tseem pub mis rau me nyuam.

    NPN 96: 1-2, 3+10ac, 11-12, 13

    Txais: (HX 40:10ab) Huab Tais peb tus Tswv Ntuj tuaj muaj hwj huam loj.

    Nej hu ib zaj nkauj tshiab rau HUAB TAIS;
    txhua lub teb chaws, nej hu nkauj rau HUAB TAIS.
    Nej hu nkauj rau HUAB TAIS, nej foom lus zoo cav txog nws lub npe;
    nej tshaj txog nws txoj kev cawm, hnub dhau hnub.

    Txais…

    Nej piav txog nws lub hwj chim rau cov haiv neeg,
    nej piav txog nws tej hauj lwm txaus qhuas rau txhua xeem neeg.
    Nej hais rau txhua haiv neeg tias: HUAB TAIS yog vaj ntxwv;
    Nws tswj tsoom neeg raws kev ncaj ncees.

    Txais…

    Kom lub ntuj zoo siab, lub ntiaj teb hom khaj;
    kom dej hiav txwv thiab txhua yam nyob hauv tsa suab nrov nroo ntws;
    kom cov tiaj nras thiab txhua yam nyob hauv zoo siab luag ntxhi!
    Thiab kom txhua tus ntoo hauv tej hav zoov zoo siab.

    Txais…

    Lawv yuav dhia zoo siab ntawm HUAB TAIS xub ntiag,
    vim nws tuaj txog lawm, nws tuaj kav lub ntiaj teb.
    Nws yuav tswj lub ntiaj teb raws kev ncaj ncees,
    thiab cov haiv neeg raws kev pheej xeeb.

    Txais…

    As Les Lus Yas

    Txais: As les lus yas, As les lus yas.

    Huab Tais lub hnub nyoog tuaj txog ze lawm.
    Ntsias saib, nws yuav tuaj cawm peb.

    Txais: As les lus yas, As les lus yas

    Ntawv Moo Zoo: MT 18: 12-14

    Yes Xus hais rau nws cov thwj tim tias:
    12 “Raws li nej xav ne, yog ib tug neeg muaj ib puas tus yaj, ib tug mus poob zoo lawm, nws puas yuav tsis tso cuaj caum cuaj tug ntawd cia saum roob, mus nrhiav tus uas poob zoo lawd ?
    13 Kuv hais tseeb rau nej tias, thaum nws nrhiav tau tus yaj poob zoo, mas nws yuav zoo siab rau tus ntawd tshaj rau cuaj caum cuaj tug uas tsis tau poob zoo.
    14 Nej Txiv nyob saum ntuj kuj zoo ib yam li ntawd thiab: nws tsis xav kom ib tug me nyuam me li no ploj li.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 7th December 2021, 11:59 am

    Tim 8 lub 12 Hlis 2021

    Hnub Peb Lis Piam Ob Caij Tos Huab Tais Xyoo C Nruab Lis Piam Xyoo II

    Ua Hmoov Hwm Niam Mab Liab xeeb los tsis lo neeg lub keeb txhaum

    Lectionary: 689

    Zaj Nyeem Ib: HAUV PAUS 3: 9-15, 20

    Thaum tus txiv neej tau noj lub txiv lawm,
    9 HUAB TAIS Tswv Ntuj hu tus txiv neej hais tias: "Koj nyob qhov twg?"
    10 Tus txiv neej teb tias: "Kuv hnov koj nyob hauv lub vaj, kuv ntshai vim kuv liab qab, kuv thiaj khiav tsiv nraim."
    11 Tswv Ntuj rov hais ntxiv tias: "Leej twg qhia koj tias koj liab qab? Yog koj noj lub txiv uas kuv txwv tsis pub noj lawm puas yog?"
    12 Tus txiv neej teb tias: "Yog tus poj niam uas koj tso nyob ze kuv muab lub txiv rau kuv, ces kuv thiaj noj!"
    13 HUAB TAIS Tswv Ntuj hais rau tus poj niam tias: "Koj ua dab tsi li ntawd?" Tus poj niam teb tias: "Yog niag nab ntxias kuv, kuv thiaj noj."
    14 Ces HUAB TAIS Tswv Ntuj hais rau tus nab hais tias: "Vim koj tau ua li ntawd, koj txoj hmoov yuav phem nyob hauv tas ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej.
    15 Kuv yuav ua kom muaj kev ciaj caub nyob ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
    20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.

    NPN 98: 1, 2-3ab, 3cd-4

    Txais: (1) Nej hu ib zaj nkauj tshiab rau Huab Tais, vim nws tau ua tej yam txaus qhuas kawg nkaus.

    Nej hu ib zaj nkauj tshiab rau Huab Tais,
    vim nws tau ua tej yam txaus qhuas kawg nkaus;
    Nws txhais tes xis tau ua kom nws muaj yeej,
    nws txhais npab dawb huv tau ua.

    Txais…

    HUAB TAIS tau qhia nws txoj kev cawm rau sawv daws paub;
    nws tau muab nws txoj kev ncaj rau cov haiv neeg pom.
    Nws tau nco qab txog nws lub siab zoo thiab nws lub siab
    pheej xeeb rau His Xas Lais tsev neeg.

    Txais...

    Txhua qhov chaw tim cov npoo ntiaj teb kawg tau pom
    peb tus Tswv Ntuj txoj kev cawm seej lawm.
    Tas cov teb chaws, nej hu nkauj luag ntxhi rau HUAB TAIS;
    Nej cia li seev suab hu nkauj, cia li hu nkauj qhuas nws.

    Txais…

    Zaj Nyeem Ob: ES FES XOS 1: 3-6, 11-12

    Cov kwv tij nkauj muad:
    3 Kuv cav lus zoo txog peb tus Huab Tais Yes Xus Pleev tus Tswv Ntuj thiab Leej Txiv; nws tau foom txhua yam koob hmoov zoo nyob saum ntuj pub rau peb nyob hauv Leej pleev.
    4 Nws tau xaiv peb nyob hauv Leej Pleev thaum tseem tsis tau tsim lub ntuj lub teb lawm, kom peb ntshiab huv, tsis muaj chaw xyeej rau ntawm nws xub ntiag, nyob hauv txoj kev nyiam.
    5 Nws yeej xub npaj peb los ua nws cov tub sau ntxhais sau nyob hauv Yes Xus Pleev thaum ntxov, raws li nws lub siab nyiam lawm,
    6 kom tau cav txog nws lub txiaj ntsim muaj hwj chim, uas nws pub rau peb nyob hauv leej Zoo Nyiam.
    11 Kuj yog nyob hauv nws, peb tau raug xaiv, tau txais txoj hmoo raws li tus uas ua kom tas txhua yam muaj tuaj haum li nws lub siab nyiam lub hom phiaj,
    12 kom peb yug los yog los ua cov cav txog nws lub koob meej, vim peb yog cov uas xub tau tso siab rau Leej Pleev .

    As Les Lus Yas: LK 1: 28

    Txais: As les lus yas, As les lus yas.

    Koj nyob kaj lug, Mab Liab, koj tau txiaj ntsim puv siab, Huab Tais Ntuj nrog koj nyob;
    koj tau koob tau hmoov tshaj ib tsoom poj niam tib si.

    Txais: As les lus yas, As les lus yas.

    Zaj Ntawv Moo Zoo: LUS KAS 1: 26-38

    26 Tswv Ntuj xa tus Tshiab Nkas Nplias mus rau hauv ib lub zos
    nyob Nkas Lis Lais teb, hu ua Nas Xas Les,
    27 mus cuag ib tug nkauj xwb, uas lawv muab qhaib rau ib tug txiv neej
    hu ua Yos Xes, caj ces Das Vis lawm. Tus ntxhais lub npe hu ua Mab Liab.
    28 Tus Tshiab chaws mus hauv Mab Liab tsev, nws hais rau Mab Liab tias:
    "Koj nyob kaj lug, tus tau txiaj ntsim puv siab! Huab Tais nrog koj nyob."
    29 Mab Liab ua lub siab nphau npog rau lo lus ntawd;
    nws xav hauv nruab siab tias lo lus hawm ntawd yog xav hais dab tsi.
    30 Tus Tshiab hais rau Mab Liab tias:
    "Mab Liab, koj tsis txhob ntshai. Tswv Ntuj saib koj ntxim nws siab.
    31 Zaum no, koj yuav xeeb tub, koj yuav yug ib tug tub,
    koj yuav tis nws npe hu ua Yes Xus.
    32 Nws yuav yog ib tug loj, luag yuav hu nws ua tus Nyob Siab leej Tub.
    Huab Tais Tswv Ntuj yuav muab nws txiv
    Das Vis lub theej kiab rau nws zaum.
    33 Nws yuav ua vaj kav Yas Kos tsev neeg tiam dhau tiam.
    Nws txoj kev ua vaj yuav tsis muaj caij kawg."
    34 Mab Liab hais rau tus Tshiab tias:
    "Qhov ntawd yuav muaj tau zoo li cas? vim kuv tsis paub ib tug txiv neej."
    35 Tus Tshiab teb rau Mab Liab tias: "Leej Ntuj Plig Ntshiab
    yuav los nyob saum koj, tus Nyob Siab lub hwj huam yuav los roos koj.
    Li ntawd, tus ntshiab yug los yuav hu ua Tswv Ntuj Leej Tub.
    36 Saib! Es Lis Xas Npes, tus uas txheeb koj, luag hu nws ua pog khab seeb,
    nws hnub nyoog laus lawm, tab sis nws kuj xeeb tub lawm thiab;
    lub hlis no, yog lub rau hli rau nws lawm.
    Vim tias, tsis muaj ib yam uas Tswv Ntuj yuav ua tsis tau."
    38 Ces Mab Liab hais tias: "Kuv yog Huab Tais tus ntxhais txib.
    Kuv xav kom muaj rau kuv aws li koj hais."
    Ces tus Tshiab thiaj tso Mab Liab tseg.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 8th December 2021, 12:42 pm

    Tim 9 lub 12 Hlis 2021

    Hnub Tsib Lis Piam Ob Caij Tos Huab Tais Xyoo C Nraub Lis Piam Xyoo II

    Lectionary: 184

    Zaj Nyeem Ib: His Xais 41: 13-20

    13 Kuv yog HUAB TAIS koj tus Tswv Ntuj; kuv tuav rawv koj txhais tes xis, kuv yog tus hais rau koj tias: “Koj txhob ntshai, kuv yuav pab koj.”
    14 Koj txhob txhawj os, me cab Yas Kos; me kas His Xas Lais, kuv yuav pab koj; Huab Tais hais li ntawd. Tus cawm koj yog His Xas Lais tus Ntshiab.
    15 Ntsia saib, kuv yuav muab koj los ua ib daig txiag ntaus nplej ntse ntse, tshiab tshiab muaj hniav li hniav kaw. Koj yuav ntaus cov roob, koj yuav muab tsoo kom tawg ua hmoov, thiab koj yuav muab cov pov roob ua kom zoo li cov npluag nplej.
    16 Thaum koj yaj nplej, cua yuav pus cov npluag tawm mus; cua daj cua dub yuav muab ntsawj mus rau ntau qhov chaw. Ntawm koj mas koj yuav zoo siab nyob hauv HUAB TAIS, koj yuav muaj koob meej nyob hauv His Xas Lais tus Ntshiab.
    17 Thgaum cov neeg txom nyem thiab cov neeg pluag nrhiav dej haus, tab sis nrhiav tsis tau, lawv nqhis nqhis dej nplaig qhuav qhawv, kuv, HUAB TAIS yuav teb lawv cov lus thov; kuv, His Xas Lais tus Tswv Ntuj yuav tsis tso lawv pov tseg.
    18 Kuv yuav qhib kom muaj tej tus dej ntws lug nyob saum cov hauv roob do, thiab kom muaj dej txhawv ntws sis nyob hauv cov hav tiaj dav; kuv yuav ua kom lub hav suab puam txia ua pas hav iav, thiab cov av qhuav muaj dej txhawv.
    19 Nyob hauv tej thaj chaw tsis muaj neeg nyob, kuv yuav cog cov ntoo thwj suab, cov ntoo as kas xias, cov ntoo tawg paj li paj huab poob, thiab cov ntoo txiv roj; nyob hauv cov av suab puam, kuv yuav cog ntoo ciab, thiab tej hom ntoo loj siab thiab ntoo thuv ua ke
    20 Kom tib neeg pom thiab paub, kom lawv saib thiab to taub tias yog HUAB TAIS txhais tes tau ua tej yam ntawd, yog His Xas Lais tus Ntshiab tau tsim tej ntawd.

    NPN 145: 1+9, 10-11, 12-13ab

    Txais: (Cool Huab Tais hlub thiab khuv leej neeg; nws npau taws qeeb, thiab nws siab zoo tas nrho.

    Kuv yuav qhuas txog koj, kuv tus Tswv Ntuj thiab kuv tus Vaj,
    thiab kuv yuav cav txog koj lub npe mus li ib txhiab ib txhis.
    HUAB TAIS ua siab zoo rau txhua leej txhua tus,
    thiab nws hlub txhua yam nws tau tsim los.

    Txais…

    HUAB TAIS, koj cia tas koj cov hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    thiab piav txog koj lub hwj huam loj.

    Txais…

    Cia lawv qhia rau neeg paub txog koj lub hwj huam loj
    thiab txog koj lub Ceeb Tsheej muaj hwj chim ci ntsa iab.
    Koj lub Ceeb Tsheej yog ib lub Ceeb Tsheej txais tas cov hlob nrog cov yau,
    thiab koj txoj kev tswj kav yuav nyob mus txheej dhau txheej.

    Txais…

    As Les Lus Yas: HIS XAIS 45: 8

    Txais: As les lus yas, As les lus yas

    Thov kom cov huab tso tus Neeg Ncaj poob los zoo li nag,
    thiab kom ntiaj teb yug tus Cawm Seej tawm los.

    Txais: As les lus yas, As les lus yas

    Zaj Ntawv Moo Zoo: Mas Tais 11: 11-15

    Yes Xus hais rau tsoom sid tias:
    11 Kuv hais tseeb rau nej, tas cov tub uas yug ntawm tsoom poj niam los tsis muaj ib tug yuav loj dua Zam Ntxuav Plig lawm. Tsis kav tus me tshaj hauv lub Ceeb Tsheej saum ntuj kuj tseem loj dua nws.
    12 Txij thaum lub caij Zam Ntxuav Plig tuaj los txog nyem no, mas lub Ceeb Tsheej saum ntuj tau raug kev tsim txom loj; cov neeg phem yuam qhi muab kom tau nws.
    13 Tas cov yaj saub thiab Txoj Cai puav leej tau ua saub ceeb toom txog qhov no los txog lub caij Zam tuaj.
    14 Yog nej ntseeg kuv hais, mas Zam yog tus Es Lias uas yuav rov los ntag.
    15 Leej twg muaj pob ntseg, mas kom nws yeej meem mloog."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 9th December 2021, 3:49 am

    Tim 10 lub 12 Hlis 2021

    Hnub Rau Lis Piam Ob Caij Tos Huab Tais Xyoo C Nruab Lis Piam Xyoo II

    Lectionary: 185

    XHLT: Leej Niam tim Loreto

    Zaj Nyeeem Ib: HIS XAIS 48: 17-19


    17 HUAB TAIS tus txhiv koj, His Xas Lais tus Ntshiab, nws hais li no :
    "Kuv HUAB TAIS, koj tus Tswv Ntuj, kuv qhia rau koj paub txog yam yuav zoo rau koj,
    thiab kuv coj koj mus taug txoj kev uas koj yuav tsum taug.
    18 Yog koj muab siab rau mloog kuv cov lus qhia,
    mas koj txoj kev thaj yeeb yuav ntws lug xws li ib tug dej ntws,
    thiab koj txoj kev ncaj yuav ntas ntua zoo li cov nplaim dej nyob hauv hiav txwv;
    19 koj caj ces yuav coob npaum li cov suab zeb, cov tawm hauv koj los yuav ntau npaum li cov tsig zeb.
    Lawv lub npe yuav tsis raug muab txiav tawm los tshem tawm ntawm kuv mus li ib txhis.

    NPN 1: 1-2, 3, 4+6

    Txais: (Zam 8:12) Cov uas raws koj qab, Huab Tais, lawv yuav muaj kev kaj lub neej.

    Muaj hmoov zoo yog tus uas tsis coj raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov txog HUAB TAIS txoj cai nruab hnub hmo ntuj.

    Txais: (Zam 8:12) Cov uas raws koj qab, Huab Tais, lawv yuav muaj kev kaj lub neej.

    Nws zoo puav tam li ib tsob ntoo cog nyob ze cov dej ntws,
    nws txi txiv raws caij raws nyoog, thiab nws tej nplooj tsis txawj zeeg li.
    Nws ua yam twg tau yam ntawd.

    Txais: (Zam 8:12) Cov uas raws koj qab, Huab Tais, lawv yuav muaj kev kaj lub neej.

    Cov neeg phem tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais: (Zam 8:12) Cov uas raws koj qab, Huab Tais, lawv yuav muaj kev kaj lub neej.

    As Les Lus Yas

    Txais: As les lus yas, as les lus yas.

    Huab Tais yuav tuaj, kav tsij tawm mus ntsib nws mas!
    Nws yog tus vaj pub kev thaj yeeb.

    Txais: As les lus yas, as les lus yas.

    Ntawv Moo Zoo: MT 11: 16-19

    Yes Xus hais rau tsoom sid tias:
    16 "Kuv yuav muab tiam neeg no piv rau dab tsi? Tiam neeg no zoo li ib pab me nyuam yaus zaum tom tshav puam; lawv rov sib hu lawv tias :
    17 ‘Peb twb tshuab raj rau nej, nej tsis dhia li! Peb cuab suab nqua nkauj tuag, los nej tsis nyiav li!’
    18 Zam tuaj, nws tsis noj mov, tsis haus cawv, lawv hais tias: ‘Nws raug ib tug dab lawm!’
    19 Neeg Leej Tub tuaj, nws noj mov haus cawv, lawv hais tias: ‘Saib tus ntawd mas! Nws hu dab thiab quav cawv, nws nrog cov sau se thiab cov neeg txhaum ua phooj ywg!’ Tab sis, kev Thoob Tsib cov hauj lwm ua kom kev thoob tsib tau txais kev ncaj ncees lawm.“

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 10th December 2021, 2:07 pm

    Tim 11 lub 12 Hlis 2021

    Hnub Xya Lis Piam Ob Caij Tos Huab Tais Xyoo C Nruab Lis Piam Xyoo II

    Lectionary: 186

    XHLT: LN Damasus I, ua Vaj Qhia

    Zaj Nyeem Ib: Npes Xis Las 48: 1-4, 9-11a


    1 Lub caij ntawd, tus Yaj Saub Es Lias sawv tawm tuaj zoo xws li ib co hluav taws, nws lo lus cig cuag li ib teg tsau.
    2 Nws ua kom kev tshaib plab tuaj raug lawv, nws lub siab kub ua kom lawv tuag tas tshuav tsawg tsawg leej lawm xwb.
    3 Nws hais Huab Tais lo lus los muab cov dej nag saum ntuj kaw cia. Nws kuj ua kom hluav taws poob los peb zaug thiab.
    4 Es Lias, koj muaj hwj chim kawg nkaus nyob hauv koj cov hwj huam yees ntxwv!
    Leej twg yuav khav tau tias nws loj ib yam li koj?
    9 Ib lub khaub zeeg cua hluav taws nqa hlo koj mus lawm, koj caij ib lub tsheb nees hluav taws mus.
    10 Muaj ntawv sau tseg tias koj raug xaiv ua tus yuav rov los yav tom ntej; koj yuav los cheem Tswv Ntuj txoj kev npau taws kom tsis txhob mus txog qhov npau heev dhau; koj yog tus yuav tig phaj txiv lub siab kom rov los npuab phaj tub ki; thiab koj yuav rov tuaj tsa cov xeem Yas Kos kom sawv.
    11 Tau txoj hmoov zoo yog cov neeg uas tau pom koj, thiab tau txais koj txoj kev hlub lawv.

    NPN 80: 2ac+3b, 15-16, 18-19

    Txais: (4) HUAB TAIS, thov koj tig peb lub siab kom los npuab koj;
    koj pub koj lub ntsej muag rau peb pom, ces peb thiaj yuav txais kev cawm.

    Tus tswv zov yaj saib His Xas Lais, thov koj cuab pob ntseg mloog mas.
    thov koj zaum saum theej kiab saum cov kes lus npis ci ntsa iab tuaj.
    Koj cia li tsa koj lub hwj huam kom tsim dheev los.

    Txais…

    HUAB TAIS kav ib tsoom tshiab, thov koj
    rov dauv muag saum ntuj los saib dua ib zaug ntxiv.
    Thov koj los tu tsob txiv cawv no,
    los txuag yam uas koj txhais tes xis tau cog cia,
    neeg leej tub uas koj tau ua kom muaj zog.

    Txais…

    Thov koj tuaj pab tus neeg uas yog koj sab tes xis,
    tus neeg leej tub uas koj tau ua kom muaj zog.
    Ces peb thiaj yuav tsis ncaim deb ntawm koj ntxiv lawm.
    Thov koj muab txoj sia tshiab rau peb, ces peb yuav hu txog koj lub npe.

    Txais…

    As Les Lus Yas: LUS KAS 3: 4, 6

    Txais: As les lus yas, As les lus yas

    Nej npaj txoj kev rau Huab Tais, nej ua kom nws txoj kev ncaj.
    ces txhua leej neeg yuav pom Tswv Ntuj txoj kev cawm.

    Txais: As les lus yas, As les lus yas

    Ntawv Moo Zoo: Mas Tais 17: 9a, 10-13

    9a Thaum lawv nqes saum roob los,
    10 cov thwj tim nug Yes Xus tias: "Ua cas cov Kws Ntawv Ntshiab hais tias Es Lias yuav xub los ua ntej tso no?"
    11 Yes Xus teb tias: "Yeej yog tiag. Es Lias yuav tsum los tso, nws yuav los kho ib puas tsav yam kom zoo tso.
    12 Tiam sis kuv hais rau nej tias: Es Lias twb los lawm, tab sis lawv zeem tsis tau nws, lawv ua lwj ua liam rau nws raws lawv siab. Neeg Leej Tub kuj yuav raug lawv tsim ib yam nkaus."
    13 Ces cov thwj tim thiaj to taub tias yog Yes Xus hais txog Zam Ntxuav Plig rau lawv.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 12th December 2021, 1:45 pm

    Tim 13 lub 12 Hlis 2021

    Hnub Ob Lis Piam Peb Caij Tos Huab Tais Xyoo C Nruab Lis Piam Xyoo II

    Lectionary: 187

    Yuav Hwm LN Lucy, nkauj tsim txiaj tuag ua Tim Khawv

    Zaj Nyeem Ib: XP 24: 2-7, 15-17a


    2 Npas Las tsa muag ntsia, nws pom cov His Xas Lais tsa lawv cov tsev nyob raws lawv cov xeem. Ces Tswv Ntuj lub tswv yim los nyob saum nws.
    3 Nws thiaj hais ib co lus saub tias: "Npas Las, Npes Os tub, hais nws cov lus saub;
    tus neeg uas qhov muag tsis dag hais nws cov lus saub;
    4 tus uas hnov Tswv Ntuj cov lus, hais nws cov lus saub;
    nws yog tus pom raws li tus Muaj Hwj Huam tas nrho pom;
    nws ua yog toog, tiam sis nws qhov muag pom ntsoov.
    5 Yas Kos, cas koj cov tsev tsam phooj yuav zoo nkauj ua luaj!
    His Xas Lais, cas koj tej chaw nyob yuav zoo saib tas npaud!
    6 Lawv zoo puav tam li tej lub vaj txiv ntoo nyob ntawm ntug dej;
    puav tam li cov ntoo ciab uas txawm nyob ze dej.
    7 Dej yuav ntws lug ntawm nws cov qhov dej los,
    nws yuav nyob ze lub hiav txwv;
    nws tus vaj yuav nyob rau saum qhov chaw siab,
    nws txoj kev ua vaj yuav nto koob meej.
    15 Npas Las hais nws cov lus saub, nws hais tias: “Npas Las, Npes Os tub, hais nws cov lus saub;
    tus neeg uas qhov muag tsis dag, hais nws cov lus saub,
    16 tus uas hnov Tswv Ntuj cov lus hais nws cov lus saub,
    tus uas paub txog tej yam tus Nyob Siab paub,
    tus uas pom tej yam tus Muaj Hwj Huam tas nrho pom,
    nws ua yog toog, tiam sis nws qhov muag pom ntsoov.
    17a Kuv pom nws, tab sis tsis yog lub caij tam sis no,
    kuv ntsia ntsoov nws, tab sis tsis yog sai sai no.
    Ib lub hnub qub yuav tawm hauv Yas Kos tuaj,
    ib tug cwj kav neeg yuav sawv hauv His Xas Lais los.

    NPN 25: 4-5ab, 6+7bc, 8-9

    Txais: (4) Huab Tais, thov koj qhia koj txoj kev rau kuv taug.

    Huab Tais, thov koj ua kom kuv paub koj tej kev,
    thov qhia koj tej lw rau kuv taug,
    thov coj kuv mus raws koj txoj kev tseeb thiab qhia rau kuv paub,
    vim koj yog Tswv Ntuj tus cawm kuv.

    Txais: (4) Huab Tais, thov koj qhia koj txoj kev rau kuv taug.

    Huab Tais, thov koj nco ntsoov tias koj yeej ib txwm muaj
    lub siab hlub neeg, thiab muaj lub siab zoo txij puag thaum ub los.
    Huab Tais, thov koj nco txog kuv
    vim koj lub siab zoo, thiab lub siab hlub neeg.

    Txais: (4) Huab Tais, thov koj qhia koj txoj kev rau kuv taug.

    Huab Tais yog tus zoo tus ncaj,
    nws thiaj qhia txoj kev zoo rau tus neeg txhaum.
    Nws coj tus neeg me mus raws txoj kev ncaj,
    nws qhia nws txoj kev rau tus neeg me taug.

    Txais: (4) Huab Tais, thov koj qhia koj txoj kev rau kuv taug.

    As Les Lus Yas: NPN 85: 8

    Txais: As les lus yas, as les lus yas.

    Huab Tais, thov koj muab koj txoj kev hlub rau peb pom
    thiab koj pub koj txoj kev cawm rau peb.

    Txais: As les lus yas, as les lus yas

    Ntawv Moo Zoo: MT 21: 23-27

    23 Yes Xus mus rau hauv lub Tuam Tsev Teev Ntuj. Thaum nws qhia sawv daws, cov thawj leej choj thiab cov laus neeg nyob hauv tsoom pej xeem txav los ze Yes Xus, lawv hais rau nws tias: “Koj tau cai qhov twg los ua tej ntawd? Leej twg muab cai rau koj?”
    24 Yes Xus teb lawv tias: “Kuv kuj yuav nug nej ib lo lus thiab. Yog nej teb kuv, ces kuv mam li yuav qhia nej tias leej twg muab cai rau kuv ua tej ntawd.
    25 Zam lub cim ntxuav tuaj qhov twg tuaj? Puas yog tuaj saum ntuj tuaj los tuaj ntawm neeg tuaj?”
    Cov thawj leej choj thiab cov laus neeg rov sib tham lawv tias :
    26 “Yog peb hais tias 'Tuaj saum ntuj tuaj,' nws yuav hais rau peb tias: ‘Yog li, uas cas nej tsis ntseeg nws?’ Hos yog peb hais tias 'Tuaj ntawm neeg tuaj,' peb kuj ntshai tsoom pej xeem, vim sawv daws saib Zam yog ib tug yaj saub.”
    27 Ces lawv teb rau Yes Xus tias: “Peb tsis paub.” Yes Xus thiaj hais rau lawv tias: “Ntawm kuv los, kuv kuj yuav tsis qhia nej tias kuv tau cai ntawm leej twg los ua tej ntawd thiab.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 13th December 2021, 10:23 am

    Tim 14 lub 12 Hlis 2021

    Hnub Peb Lis Piam Peb Caij Tos Huab Tais Xyoo C Nruab Lis Piam Xyoo II

    Lectionary: 188

    Yuav Hwm LN John Ntoo Cuam

    Zaj Nyeem Ib: XFN 3: 1-2, 9-13


    Huab Tais hais li no tias:
    1 “Aub! Hmoov phem rau lub nroog ntxeev siab, nroog tsis huv, thiab quab yuam neeg!
    2 Nws tsis kam mloog lus, tsis txais lo lus qhuab qhia li; nws tsis tso siab rau HUAB TAIS, tsis kam txav los ze nws tus Tswv Ntuj li.
    9 Ua li mas kuv yuav hloov kom tsoom neeg tej di ncauj dawb huv tuaj, kom lawv txhua tus tuav txog HUAB TAIS lub npe, thiab sib koom siab tsob hwb nws.
    10 Cov neeg teev hawm kuv, nyob sab ntug cov dej nyob Es Caus Pias teb tim ub yuav tuaj, lawv yuav nqa kuv cov paj tshab tuaj rau kuv.
    11 Hnub ntawd, nej yuav tsis tau kev txaj muag ntxiv txog tej yam nej tau ua lawm, txawm tias nej tau ua ntau yam txhaum rau kuv, vim kuv yuav ntiab cov neeg muab hlob kom tawm hauv nej mus, ces nej yuav tsis ua neeg muab hlob nyob saum lub roob kuv txoj kev ntshiab ntxiv.
    12 Kuv yuav cia kom nej muaj ib pab neeg seem nyob, yuav yog ib co neeg txo hwj chim ua neeg me, uas yuav nrhiav chaw vam khom nyob hauv HUAB TAIS lub npe: yog pab His Xas Lais seem.
    13 Lawv yuav tsis ua phem, tsis hais lus dag; yuav tsis pom muaj ib tug nplaig nkhaus nyob hauv lawv lub ncauj li; lawv yuav tau kev coj lawv pab yaj mus nog zaub thiab mus so, tsis muaj leej twg ua kom lawv ntshai.”

    NPN 34: 2-3, 6-7, 17-18, 19+23

    Txais: (7a) HUAB TAIS mloog tus txom nyem lub suab quaj.

    Kuv yuav cav lus zoo txog HUAB TAIS txhua lub sij hawm,
    lo lus cav txog nws yuav nyob rawv hauv kuv lub ncauj.
    Kuv tus plig qhov chaw khav yog nyob hauv HUAB TAIS,
    cov neeg me hnov kuv , lawv yuav zoo siab.

    Txais: (7a) HUAB TAIS mloog tus txom nyem lub suab quaj.

    Nej ntsia ntsoov HUAB TAIS ces nej yuav zoo siab luag ntxhi,
    Nej lub ntsej muag yuav tsis liab ploog vim kev txaj muag.
    Thaum tus txom nyem quaj hu, HUAB TAIS yuav mloog nws,
    Huab Tais yuav cawm nws dim ntawm tas nws tej kev txhawj xeeb.

    Txais: (7a) HUAB TAIS mloog tus txom nyem lub suab quaj.

    HUAB TAIS tawm tsam cov neeg ua phem,
    nws ua kom ntiaj teb neeg txhob nco qab txog lawv ntxiv.
    Thaum cov neeg siab ncaj quaj hu, HUAB TAIS mloog lawv lub suab,
    nws npo lawv dim ntawm tas lawv tej kev ntxhov siab.

    Txais: (7a) HUAB TAIS mloog tus txom nyem lub suab quaj.

    HUAB TAIS nyob ze ze cov neeg nyuaj siab lwj plawv,
    nws cawm cov uas tus ntsuj plig qaug zog zuj zis.
    HUAB TAIS txhiv nws cov tub txib txoj sia;
    cov tuaj nkaum hauv HUAB TAIS tsis raug nplua ib tug li.

    Txais: (7a) HUAB TAIS mloog tus txom nyem lub suab quaj.

    As Les Lus Yas

    Txais: As les lus yas, as les lus yas.

    Huab Tais, tsuag tsuag tuaj mas, tsis txhob ncua ntev.
    Thov koj zam koj haiv neeg tej txhaum rau lawv.

    Txais: As les lus yas, as les lus yas.

    Ntawv Moo Zoo: MT 21:28-32

    Yes Xus hais rau cov thawj leej choj thiab cov txwj laus saib tsoom pej xeem tias:
    28 “Nej hais saib, nej xav li cas? Ib tug neeg muaj ob tug tub. Nws mus hais rau thawj tug tias: ‘Me tub, hnub no koj mus ua teb tom lub vaj txiv cawv ov.’
    29 Tus tub ntawd teb tias: ‘Kuv tsis xav mus.’ Tab sis, ib me ntsis, nws thim xav, ces nws cia li mus ua teb lawm.
    30 Leej txiv kuj mus hais rau lwm tus tub ib yam li ntawd thiab. Tus tub ntawd teb tias: ‘Txiv, kuv mam li mus.’ Tab sis nws ho tsis mus li.
    31 Ob tug tub no, tus twg tau ua raws li leej txiv xav kom ua?” Lawv teb tias: “Yog thawj tug.” Yes Xus hais rau lawv tias: “Kuv hais tseeb rau nej, cov sau se thiab cov niam ntiav yuav xub tau mus hauv Tswv Ntuj lub Ceeb Tsheej dua nej.
    32 Vim tias, Zam tuaj qhia txog txoj kev ncaj rau nej, tab sis nej tsis ntseeg nws. Hos cov sau se, thiab cov niam ntiav ntseeg. Tom qab no nej twb pom lawv ntseeg, los nej kuj tsis hloov siab thiab tsis ntseeg nws li.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 14th December 2021, 9:45 am

    Tim 15 lub 12 Hlis 2021

    Hnub Plaub Lis Piam Peb Caij Tos Huab Tais Xyoo C Nruab Lis Piam Xyoo II

    Lectionary: 189

    Zaj Nyeem Ib: HIS XAIS 45:6b-8, 18, 21b-25

    HUAB TAIS hais li no tias:
    6c “Kuv yog HUAB TAIS, tsis muaj dua lwm tus ntxiv.
    7 Kuv puab qhov pom kev, kuv tsim qhov tsaus ntuj, kuv ua kom muaj kev noj qab nyob zoo, thiab kuv tsim kev txom nyem. Kuv, HUAB TAIS, tsim tag txhua yam ntawd.
    8 Yim txheej cuaj txheej ntuj, nej cia kev ncaj poob saud los zoo li lwg, kom lub ntuj ntsuab tso nws poob los xws li nag; kom lub ntiaj teb av tawg pleb, ces txoj kev cawm neeg yuav hlav tawm tuaj, thiab kev ncaj yuav nthaw kaus tuaj; kuv HUAB TAIS, tau tsim kom muaj li no.
    18 HUAB TAIS, tus tsim cov txheej ntuj saud, nws yog Tswv Ntuj, tus puab thiab tsim lub ntiaj teb, tus txawb lub ntiaj teb kom ruaj khov, tsis tsim kom yog ib qho chaw siv tsis tau, tiam sis yog ib qho chaw neeg nyob tau, nws hais li no: “Kuv yog HUAB TAIS, tsis muaj dua lwm tus ntxiv.
    21b Leej twg yog tus tau tshaj txog tej no thaum ntxov lawm, thiab tau xub hais txog tej no yav puag thaum ub los lawm? Tsis yog kuv, HUAB TAIS lod? Vim yeej tsis muaj dua lwm tus Tswv Ntuj dua ntawm kuv lawm, uas yog ib tug Tswv Ntuj ncaj ncees thiab pub kev cawm; tsis muaj dua lwm tus ntxiv dua ntawm kuv lawm.
    22 Nej cia li tig los cuag kuv mog, cov npoo ntiaj teb kawg, nej thiaj yuav txais kev cawm. Vim kuv yog Tswv Ntuj, tsis muaj dua lwm tus ntxiv lawm.
    23 Kuv tau cog lus rau kuv tus kheej, yog ib lo lus coj kev ncaj ncees uas tau tawm ntawm kuv lub ncauj mus lawm, nws yuav tsis rov los ntxiv, yog lo tias: ‘Txhua lub hauv caug yuav tsum kim rau kuv, txhua lub ncauj yuav tsum cog lus nyob hauv kuv.’
    24 Lawv yuav hais tias: ‘Tsuas yog nyob hauv HUAB TAIS xwb thiaj muaj kev ncaj thiab lub hwj huam. Tas cov uas yav tas los lawv tau npau taws rau Hua Tais, lawv puav leej yuav tuaj cuag nws, nrog txaj muag tas nrho.
    25 Nyob hauv HUAB TAIS, tas His Xas Lais tsoom xeeb ntxwv yuav tau ntsej muag thiab yuav nto koob meej.’”

    NPN 85: 9ab+10, 11-12, 13-14

    Txais: HX 45:8 Kom cov huab tso tus Siab Ncaj poob los li nag,
    thiab kom lub ntiaj teb daim av yug tus Cawm Seej tawm los.

    Kuv yuav tau hnov qhov Tswv Ntuj tshaj tawm txog;
    HUAB TAIS, nws tshaj tawm txog kev thaj yeeb rau nws haiv neeg.
    HUAB TAIS txoj kev cawm nyob ze ze cov uas hwm nws lawm,
    lub hwj chim yuav los nyob txawm hauv peb lub teb chaws.

    Txais: HX 45:8 Kom cov huab tso tus Siab Ncaj poob los li nag,
    thiab kom lub ntiaj teb daim av yug tus Cawm Seej tawm los.

    Kev ua siab zoo thiab kev tseeb yuav tuaj sib ntsib,
    kev ncaj thiab kev thaj yeeb yuav los sib qawg.
    Kev tseeb yuav tawm hauv lub ntiaj teb los,
    thiab kev ncaj yuav dauv muag ntsia saum ntuj tuaj

    Txais: HX 45:8 Kom cov huab tso tus Siab Ncaj poob los li nag,
    thiab kom lub ntiaj teb daim av yug tus Cawm Seej tawm los.

    HUAB TAIS yuav pub nws tej txiaj ntsim koob hmoov,
    ces peb lub teb chaws yuav ntsu qoob loo.
    Kev ncaj yuav taug kev ua nws ntej,
    kev cawm yuav taug raws nws txoj lw.

    Txais: HX 45:8 Kom cov huab tso tus Siab Ncaj ua nag poob los,
    thiab kom lub ntiaj teb daim av yug tus Cawm Seej tawm los.

    As Les Lus Yas: HX 40: 9-10

    Txais: As les lus yas, as les lus yas.

    Nej kav tsij qw suab nrov nrov tshaj lub Moo Zoo tias:
    Ntsia saib, peb tus HUAB TAIS Tswv Ntuj tuaj muaj hwj huam loj.

    Txais: As les lus yas, as les lus yas.

    Ntawv Moo Zoo: LK 7: 18b-23

    18b Thaum ntawd Zam hu nws ob leeg thwj tim los,
    19 nws xa nkawd kom mus nug Huab Tais tias: "Koj puas yog tus yuav tuaj, los peb tseem yuav tos dua lwm tus?"
    20 Thaum ob tug thwj tim tuaj txog ntawm Yes Xus lawm, nkawd hais tias: "Zam Ntxuav Plig xa wb tuaj nug koj tias: "Koj puas yog tus yuav tuaj, los peb tseem yuav tos dua lwm tus?"
    21 Lub sij hawm ntawd, Yes Xus tab tom kho coob leej neeg raug txiab nkeeg, raug mob txom nyem, raug dab phem, thiab nws kuj tau ua kom ntau tus dig muag rov pom kev tuaj.
    22 Ces Yes Xus teb rau ob tug ntawd tias: "Neb rov mus hais qhia rau Zam txog qhov neb tau pom thiab tau hnov tias: Cov dig muag rov pom kev tuaj, cov tuag ceg mus taus kev tuaj, cov mob ruas rov huv tuaj lawm, cov lag ntseg hnov lus tuaj, cov tuag sawv tsees rov los tau, muaj tus xa lub Moo Zoo tuaj txog cov neeg pluag lawm.
    23 Tus uas nws tsis muaj kev tsis txaus siab rau kuv, mas nws txoj hmoov zoo."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 15th December 2021, 12:28 pm

    Tim 16 lub 12 Hlis 2021

    Hnub Tsib Lis Piam Peb Caij Tos Huab Tais Xyoo C Nruab Lis Piam Xyoo II

    Lectionary: 190

    Zaj Nyeem Ib: HIS XAIS 54: 1-10

    1 Tus tsis muaj tub ki tsis yug me nyuam, koj cia li nqua suab zoo siab,
    cia li qw nrov nrov, koj tus uas tsis tau mob plab!
    Vim tus niam uas tsis muaj txiv muaj tub coob dua tus muaj txiv.
    HUAB TAIS hais li ntawd.
    2 Koj ua kom koj thaj av tsa tsev tsam phooj dav tuaj mas!
    Koj nthuav koj cov ntaub vov tsev kom ntau txhob khuv xim,
    koj txuas koj cov hlua kom ntev, koj npuj koj cov tswg kom khov kho.
    3 vim koj yuav coob nchuav ntws mus rau sab xis thiab sab laug;
    koj caj ces yuav mus txeeb ib tsoom kuj cuab los ua lawv tug,
    lawv yuav mus nyob puv hauv tej nroog uas luag tau muab tso tseg lawm.
    4 Koj tsis txhob ntshai, koj yuav tsis ntsib kev txaj muag,
    koj tsis txhob ntaus siab me, koj yuav tsis poob ntsej muag.
    Koj yuav tsis nco qab txog txoj kev txaj muag thaum koj yav hluas ntxiv,
    koj yuav tsis nco txog txoj kev poob tsim thaum koj ua poj ntsuam ntxiv.
    5 Vim koj tus txiv yog tus tsim koj. Nws lub npe yog tus HUAB TAIS Nyob Siab.
    Tus txhiv koj yog His Xas Lais tus Ntshiab, nws hu ua tus Tswv Ntuj kav tas lub ntiaj teb.
    6 HUAB TAIS tau hu koj rov los, zoo li tus poj niam uas luag muab tso pov tseg,
    uas muaj kev tu siab loj hauv nruab siab, zoo li tus poj niam uas nws yuav thaum hluas
    thiab tau muab ntiab khiav mus lawm; koj tus Tswv Ntuj hais li ntawd.
    7 Kuv tau tso koj tseg ib nyuag pliag, tab sis kuv lub siab hlub koj heev, kuv rov sau koj los.
    8 Kuv tau npau taws heev rau koj, kuv thiaj nraim kuv lub ntsej muag ib nyuag chim,
    tab sis kuv lub siab hlub koj mus tas ib txhis, kuv khuv leej koj;
    tus HUAB TAIS txhiv koj, nws hais li ntawd.
    9 Yuav zoo ib yam li thaum lub caij Nos Hes nyob,
    kuv tau cog lus tias dej yuav tsis nyab ntiaj teb ib zaug ntxiv;
    nyem no, kuv cog lus tias kuv yuav tsis npau taws rau koj ntxiv,
    los yuav tsis tso hem thawj rau koj lawm.
    10 Txawm tias cov toj roob txawj txav mus, cov hauv pes txawj ua zog koog,
    los kuv lub siab hlub koj yuav tsis nrug deb ntawm koj,
    kuv txoj kev cog lus pub kev thaj yeeb yuav tsis hloov.
    Tus HUAB TAIS uas khuv leej koj nws hais li ntawd.

    NPN 30: 2+4, 5-6, 11-12a+13b

    Txais: (2a) Kuv yuav cav txog koj, Huab Tais, vim koj tau cawm kuv.

    HUAB TAIS kuv yuav cav lus zoo txog koj, vim koj rub kuv sawv rov los,
    koj tsis cia kuv ua yeeb ncuab lub chaw zoo siab.
    HUAB TAIS koj rub kuv tus plig tawm hauv ntuj txias teb tsaus los,
    kuv tau nrog lawv nqes hauv qhov av, koj ua kom kuv rov muaj sia tuaj.

    Txais: (2a) Kuv yuav cav txog koj, Huab Tais, vim koj tau cawm kuv.

    Cov ntseeg HUAB TAIS, nej hu nkauj cav txog nws,
    nej ua nws tsaug cav txog nws lub npe ntshiab :
    Nws npau taws tsuas npau ib pliag, nws hlub neeg, nws hlub tas ib sid.
    Hmo ntuj kua muag poob tsis tu, tab sis kaj ntug tuaj, rov muaj kev zoo siab.

    Txais: (2a) Kuv yuav cav txog koj, Huab Tais, vim koj tau cawm kuv.

    Thov koj mloog kuv, HUAB TAIS, thov khuv leej kuv;
    HUAB TAIS, thov koj ua tus pab kuv.
    Koj tau muab kuv txoj kev quaj nyiav hloov ua kev dhia lom zem,
    HUAB TAIS, kuv tus Tswv Ntuj, kuv yuav ua koj tsaug mus li ib txhis.

    Txais: (2a) Kuv yuav cav txog koj, Huab Tais, vim koj tau cawm kuv.

    As Les Lus Yas: LK 3: 4, 6

    Txais: As les lus yas, as les lus yas.

    Nej npaj kev rau Huab Tais, nej ua kom nws txoj lw ncaj tuaj:
    Ces tas ib tsoom muaj lub cev nqaij yuav pom Tswv Ntuj txoj kev cawm.

    Txais: As les lus yas, as les lus yas.

    Ntawv Moo Zoo: LK 7: 24-30

    24 Thaum ob tug thwj tim Zam xa tuaj rov mus lawm, Yes Xus thiaj pib hais txog Zam rau tsoom sid tias: "Nej tawm mus saib dab tsi hauv teb chaws suab puam? Puas yog nej mus nuam ib tsob tauj raug cua tshuab co ntuj nto?
    25 Nej mus xyuas dab tsi tiag? Puas yog mus xyuas ib tug neeg hnav tsoos tsuj tsoos npuag laim txias? Tab sis cov neeg hnav zoo thiab noj qab, mas lawv nyob hauv cov tsev vaj loog rau vaj ntxwv nyob xwb.
    26 Ua li nej mus xyuas dab tsi tiag? Puas yog ib tug yaj saub? Muaj tseeb. Kuv hais rau nej, nws tseem loj dua ib tug yaj saub.
    27 Nws yog tus uas Ntawv sau tseg tias: ‘Ntsia saib, kuv xa kuv tus tub tshaj xo mus ua koj ntej, nws yuav npaj koj txoj kev rau koj.’
    28 Kuv hais rau nej tias: tas cov me nyuam uas yug ntawm tsoom poj niam los, mas tsis muaj ib tug loj dua Zam. Tsis kav tus me tshaj hauv Tswv Ntuj lub Ceeb Tsheej tseem loj dua Zam thiab.”
    29 Tas tsoom neeg uas tuaj mloog, tab yog cov neeg sau se uas tau txais kab ke ntxuav ntawm Zam, sawv daws lees tias Tswv Ntuj yog tus ncaj.
    30 Tiam sis cov Fas Lis Xais thiab cov Kws Lij Choj uas lawv tsis kam txais Zam cov kab ke ntxuav, lawv muab Tswv Ntuj lub hom phiaj uas nws npaj rau lawv xyeeb pov tseg.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 16th December 2021, 2:21 pm

    Tim 17 lub 12 Hlis 2021

    Hnub Rau Lis Piam Peb Caij Tos Huab Tais Xyoo C Nruab Lis Piam Xyoo II


    Lectionary: 193

    Zaj Nyeem Ib: HAUV PAUS 49: 1a, 2, 8-10

    1a Yas Kos hu nws cov tub los, nws hais rau lawv tias :
    2 “Nej tuaj sib sau ua ke thiab nej mloog mog, Yas Kos cov tub aw, ces nej thiaj yuav ua tau raws nej txiv His Xas Lais cov lus.
    8 Yus Das, koj cov kwv tij yuav cav txog koj; koj txhais tes yuav ntsiab rawv koj cov yeeb ncuab lub xwb qwb, hos koj txiv cov tub yuav khoov cev hawm koj.
    9 Yus Das yog ib tug me nyuam tsov; me tub, koj loj hlob nyob hauv txoj kev caum nqaij.
    Nws khooj rau hauv av, nws pw zoo li ib tug tsov, zoo li ib tug maum tsov; leej twg thiaj yuav muaj cuab kav tsa kom nws sawv los?
    10 Tus cwj ua vaj yuav tsis ncaim ntawm Yus Das mus ib zaug li, rab pas tswj neeg yuav tsis txav tawm ntawm nws ob txhais taw mus, mus txog thaum lawv nqa paj tshab tuaj rau nws, thiab cov haiv neeg los hawm nws lawm.

    NPN 72: 1-2, 3-4ab, 7-8, 17

    Txais: (7) Txoj kev ncaj yuav tawg paj lub caij nws ua vaj,
    thiab yuav muaj kev thaj yeeb lug tas mus li ib txhis.

    Aub! Tswv Ntuj, thov koj pub txoj kev txawj txiav txim rau tus vaj,
    thiab txoj kev ncaj ncees rau vaj ntxwv tus tub.
    Nws thiaj yuav tswj koj haiv neeg raws kev ncaj
    thiab yuav txiav txim haum pheej rau koj cov neeg me.

    Txais…

    Cov roob siab yuav muab kev thaj yeeb rau tsoom pej xeem,
    thiab cov pov roob yuav muab kev ncaj rau lawv.
    Nws yuav txiav txim rau cov txom nyem hauv tsoom pej xeem yeej
    nws yuav cawm cov pluag tej me nyuam.

    Txais…

    Kev ncaj yuav tawg paj lub caij nws ua vaj,
    thiab yuav muaj kev thaj yeeb lug mus txog
    thaum tsis muaj lub hli ntxiv.
    Kom nws ua tus kav txij ntawm ib lub hiav txwv mus rau lwm lub,
    thiab txij ntawm tus niam dej mus txog tim npoo ntiaj teb kawg.

    Txais…

    Kom nws lub npe nto koob meej lug mus li,
    kom nws lub npe nyob ntev npaum lub hnub.
    Nyob hauv nws, txhua xeem neeg nyob ntiaj teb
    yuav tau txoj hmoov zoo, txhua haiv neeg
    yuav tshaj txog nws txoj kev zoo siab.

    Txais..

    As Les Lus Yas

    Txais: As les lus yas, as les lus yas

    Aub! peb tus Tswv Ntuj tus Nyob Siab muaj kev Thoob Tsib,
    koj siv lub hwj huam thiab kev hlub los coj txhua yam koj tsim los,
    thov koj tuaj qhia txoj kev paub txuj paub ci rau peb!

    Txais: As les lus yas, as les lus yas

    Ntawv Moo Zoo: MAS TAIS 1: 1-17

    1 Phau ntawv qhia txog Yes Xus Pleev lub keeb; nws yog Das Vis leej tub, yog Has Nplas Has leej tub:
    2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij.
    3 Yus Das yug Fas Les thiab Zas Las nkawd ntawm Thas Mas los. Fas Les yug Es Xas Los, Es Xas Los yug As Las,
    4 As Las yug As Mis Nas Das, As Mis Nas Das yug Nas Soos, Nas Soos yug Xas Moos,
    5 Xas Moos yug Npuag Oos , uas nws niam yog Las Has. Npuag Oos yug Os Npes , uas nws niam yog Luv. Os Npes yug Yes Xes.
    6 Yes Xes yug tus vaj Das Vis. Vaj Das Vis yug Xas Los Moos, uas nws niam uas yog Us Lis poj niam.
    7 Xas Los Moos yug Los Npuag, Los Npuag yug As Npias, As Npias yug As Xas,
    8 As Xas yug Yos Xas Fas, Yos Xas Fas yug Yos Las, Yos Las yug Os Xias,
    9 Os Xias yug Yos Thas, Yos Thas yug As Kas, As Kas yug Es Xes Kias,
    10 Es Xes Kias yug Mas Nas Xes, Mas Nas Xes yug As Moos, As Moos yug Yos Xias,
    11 Yos Xias yug Yes Kos Nias thiab Yes Kos Nias cov kwv tij, thaum lub caij lawv mus raug txim nyob Npas Npis Los.
    12 Dhau lub caij raug txim nyob Npas Npis Los lawm, Yes Kos Nias yug Xas Las Thias; Xas Las Thias yug Zos Los Npas Npes.
    13 Zos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos.
    14 As Ntxos yug Xas Dos, Xas Dos yug As Kis, As Kis yug Es Lis Us,
    15 Es Lis Us yug Es Les As Ntxas, Es Les As Ntxas yug Mas Thas, Mas Thas yug Yas Kos,
    16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
    17 Tas cov tiam neeg huv tib si txij Has Nplas Has los txog Das Vis, muaj kaum plaub tiam; txij Das Vis los txog lub caij raug txim nyob Npas Npis Los, muaj kaum plaub tiam; txij lub caij raug txim nyob Npas Npis Los los txog lub caij Leej Pleev tuaj, muaj kaum plaub tiam.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 17th December 2021, 4:16 pm

    Tim     18     lub     12     Hlis     2021

    Hnub Xya Lis Piam Peb Caij Tos Huab tais Xyoo C Nruab Lis Piam Xyoo II

    Lectionary: 194

    Zaj Nyeem Ib:   YES LES MIAS 23: 5-8

    5 HUAB TAIS hais tias: "Nej ntsia saib! Twb txog lub caij lawm uas kuv yuav tsa ib tug ceg siab ncaj rau Das Vis. Nws yuav ua vaj; nws yuav tswj raws kev xyuam xim; nws yuav coj raws qhov ncaj thiab qhov yog nyob hauv lub teb chaws.
    6 Lub caij nws ua vaj mas Yus Das yuav txais kev cawm, thiab His Xas Lais yuav tau nyob nyab xeeb. Lub npe uas luag yuav tis rau nws yog: "HUAB TAIS peb txoj kev ncaj."
    7 HUAB TAIS thiaj hais li no tias: "Ntsia saib! Nyem no txog lub caij yuav tsis hais ntxiv lawm tias: 'Xws li tus HUAB TAIS muaj txoj sia nyob, uas tau coj tsoom tub ki His Xas Lais tawm ntawm Hais Nkws Tos teb los.'
    8 Tab sis sawv daws yuav hais tias: 'Xws li tus HUAB TAIS muaj txoj sia nyob, uas sau His Xas Lais cov xeeb leej xeeb ntxwv nyob cov teb chaws qaum teb rov los,’ thiab nyob txhua lub teb chaws uas kuv tau cia lawv tawg mus nyob rov los. Ces lawv yuav los nyob hauv lawv thaj av dua."

    NPN   72: 1-2, 12-13, 18-19

    Txais: (7) Txoj kev ncaj yuav tawg paj lub caij nws ua vaj
    thiab yuav muaj kev thaj yeeb puv npo nyob mus li.

    Tswv Ntuj, thov koj muab koj txoj kev txiav txim rau tus vaj,
    thiab koj txoj kev ncaj rau vaj ntxwv tus tub.
    Nws thiaj yuav tswj koj haiv neeg raws kev ncaj
    thiab koj cov neeg txom nyem raws kev haum pheej.

    Txais…

    Nws yuav pab tus pluag thaum nws quaj hu,
    thiab tus txom nyem uas tsis muaj leej twg pab.
    Nws yuav hlub cov neeg me thiab cov pluag.
    Nws yuav cawm cov pluag txoj sia.

    Txais…

    Kom His Xas Lais tus HUAB TAIS Tswv Ntuj nto koob meej,
    nws tib leeg xwb ua tej yam txaus qhuas.
    Kom nws lub npe nto moo lug mus li;
    kom nws lub hwj chim nyob puv tas lub ntiaj teb.

    Txais…

    As Les Lus Yas

    Txais: As les lus yas, As les lus yas

    Tus thawj coj His Xas Lais tsev neeg,
    tus muab txoj cai rau Mais Xes nyob saum roob Xis Nais,
    thov koj muab koj lub hwj huam loj tuaj cawm pe mas!.

    Txais: As les lus yas, As les lus yas

    Ntawv Moo Zoo:   MAS TAIS 1: 18-25

    18 Yes Xus Pleev lub keeb yug los yog  li no: Mab Liab uas yog Yes Xus niam, raug muab qhaib rau Yos Xes lawm; thaum nkawd tseem tsis tau los nyob ua ke, Mab Liab cev xeeb tub lawm, yog Leej Ntuj Plig Ntshiab ua kom muaj li ntawd.
    19 Yos Xes , nws tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab ntsiag to xwb.
    20 Thaum nws tab tom xav tswv yim txog li ntawd, Huab Tais tus Tshiab tawm los ua npau suav rau nws, thiab hais rau nws tias: "Yos Xes, Das Vis leej tub, koj txhob ntshai mus coj Mab Liab, koj tus poj niam los. Vim tus xeeb los nyob hauv nws yog los ntawm Leej Ntuj Plig Ntshiab los xwb.
    21 Nws yuav yug ib tug tub, koj yuav tis nws npe hu ua Yes Xus, vim nws yuav cawm nws haiv neeg ntawm lawv cov txhaum."
    22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias:
    23 “Tus ntxhais nkauj xwb yuav xeeb tub hauv nws lub cev, yuav yug ib tug tub. Luag yuav tis nws npe hu ua Es Mas Nus Es,” txhais tias : "Tswv Ntuj nrog peb nyob".
    24 Thaum Yos Xes tsim los, nws ua raws li Huab Tais tus Tshiab qhia rau nws: nws mus coj nws poj niam los nyob hauv nws tsev.
    25 Nws tsis paub nws poj niam li, mus txog hnub nws poj niam yug tau ib tug tub. Nws tis tus tub ntawd npe hu ua Yes Xus.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 19th December 2021, 12:44 pm

    Tim 20 lub 12 Hlis 2021

    Hnub Ob Lis Piam Plaub Caij Tos Huab Tais Xyoo C Nruab Lis Piam Xyoo II

    Lectionary: 196

    Zaj Nyeem Ib: HX 7: 10-14

    10 HUAB TAIS hais ntxiv rau As Kas tias:
    11 "Koj thov koj tus HUAB TAIS Tswv Ntuj kom nws muab ib lub cim rau koj; Koj xav kom tawm nyob puag hauv qab ntuj txias teb tsaus, los puas nyob siab puag saum ntuj los tau."
    12 As Kas hais tias: "Kuv yuav tsis thov. Kuv yuav tsis sim HUAB TAIS."
    13 Ces His Xais hais tias: "Das Vis tsev neeg, nej mloog mas! Nej ua kom tej tib neeg ceeb laj tas nrho, los tsis txaus nej siab! Nej tseem yuav ua kom Tswv Ntuj ceeb laj thiab.
    14 Vim li ntawd, Huab Tais yuav pub ib lub cim rau nej. Ntsia saib! Tus hluas nkauj yuav xeeb tub. Nws yuav yug ib tug tub. Nws yuav tis npe rau nws tus tub hu ua Es Mas Nus Es.

    NPN 24: 1-2, 3-4ab, 5-6

    Txais: (7c+10b) Nej cia Huab Tais chaws los; nws yog tus Vaj nto koob meej.

    Lub ntiaj teb thiab txhua yam uas nyob hauv yog HUAB TAIS li,
    Lub qab ntuj khwb thiab tas tsoom neeg nyob hauv yog HUAB TAIS tug.
    Vim HUAB TAIS yog tus txawb lub ntiaj teb rau saum dej hiav txwv,
    thiab teeb lub ntiaj teb kom ruaj rau saum cov niam dej.

    Txais: (7c+10b) Nej cia Huab Tais chaws los; nws yog tus Vaj nto koob meej.

    Leej twg yuav nce tau mus rau saum HUAB TAIS lub roob?
    Leej twg yuav sawv taus nyob hauv nws thaj chaw ntshiab?
    Yog tus neeg siab dawb huv, uas txhais tes tsis lo txhaum,
    tus uas tsis ntshaw txog tej yam tsis muaj nqes,

    Txais: (7c+10b) Nej cia Huab Tais chaws los; nws yog tus Vaj nto koob meej.

    Nws yuav tau HUAB TAIS lo lus foom hmoov zoo,
    yog paj ntshab ntawm nws tus Tswv Ntuj cawm neeg los
    Haiv neeg nrhiav Tswv Ntuj, lawv zoo li ntawd,
    Lawv nrhiav Yas Kos tus Tswv Ntuj lub ntsej muag.

    Txais: (7c+10b) Nej cia Huab Tais chaws los; nws yog tus Vaj nto koob meej.

    As Les Lus Yas

    Txais: As les lus yas, as les lus yas.

    Aub! Das Vis tus yawm sij, uas qhib cov rooj vag
    mus lawm hauv Tswv Ntuj lub Ceeb Tsheej nyob mus li,
    thov koj tuaj tso cov neeg raug kaw nyob hauv kev tsaus ntuj

    Txais: As les lus yas, as les lus yas.

    Ntawv Moo Zoo: LK 1: 26-38

    26 Thaum muaj rau hli lawm, Tswv Ntuj xa tus Tshiab Nkas Nplias mus rau hauv ib lub zos nyob Nkas Lis Lais teb hu ua Naj Xas Les,
    27 mus cuag ib tug ntxhais nkauj xwb uas lawv tau muab qhaib rau ib tug txiv neej hu ua Yos Xes, yog caj ces Das Vis lawm; tus nkauj xwb ntawd lub npe hu ua Mab Liab.
    28 Tus Tshiab chaws mus hauv Mab Liab tsev, nws hais rau Mab Liab tias: "Koj nyob kaj lug, tus tau txiaj ntsim puv siab! Huab Tais nrog koj nyob."
    29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus ntawd yog xav hais dab tsi.
    Tus Tshiab hais rau nws tias: "Mab Liab, koj tsis txhob ntshai, vim Tswv Ntuj saib koj ntxim nws lub siab.
    31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus.
    32 Nws yuav yog ib tug loj, luag yuav hu nws ua tus Nyob Siab leej Tub; Huab Tais Tswv Ntuj yuav muab nws txiv Das Vis lub theej kiab rau nws zaum.
    33 Nws yuav ua vaj kav Yas Kos tsev neeg tiam dhau tiam; nws txoj kev ua vaj yuav tsis muaj caij kawg."
    34 Mab Liab hais rau tus Tshiab tias: "Qhov ntawd yuav muaj tuaj zoo li cas, vim kuv tsis paub ib tug txiv neej li."
    35 Tus Tshiab teb rau Mab Liab tias: "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub.
    36 Saib ! Es Lis Xas Npes, tus uas txheeb koj, luag hu nws ua pog khab seeb no, nws hnub nyoog laus lawm, tab sis nws kuj xeeb tub lawm thiab; lub hlis no, yog lub rau hli rau nws lawm.
    37 Vim tias, tsis muaj ib yam uas Tswv Ntuj ua tsis tau."
    38 Ces Mab Liab hais tias: "Kuv yog Huab Tais tus ntxhais txib. Kuv xav kom muaj tuaj rau kuv raws li koj hais." Ces tus Tshiab tso Mab Liab tseg.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 21st December 2021, 7:52 am

    Tim 21 lub 12 Hlis 2021

    Hnub Peb Lis Piam Plaub Caij Tos Huab Tais Xyoo C Nruab Lis Piam Xyoo II

    Lectionary: 197

    XHLT: LN Peter Canisius, Leej Choj ua Kws cov Txuj Ntshiab

    Zaj Nyeem Ib: Kwv Txhiaj 2: 8-14


    8 Kuv tus hlub lub suab! Ntsia saib, nws tuaj lawm!
    Nws dhia hla toj roob hauv pes tuaj, dhia plhaw hla tej pov roob khiav tuaj.
    9 Kuv tus hlub zoo puav tam li tus kauv, puav tam li tus thav muas lwj.
    Ntsia saib! Nws tuaj sawv nraum peb lub ntsa loog.
    Nws ntsia nraum qhov rai tuaj, nws xauj nraum cov ntxaij ntsia ntsoov tuaj.
    10 Kuv tus hlub tsa suab hais rau kuv tias: "Koj sawv tsees mas,
    kuv tus me ntxim hlub, kuv tus neeg zoo, tawm tuaj mas!
    11 Koj saib, lub caij ntuj no twb dhau lawm,
    nag twb tu thiab dua tas lawm.
    12 Paj twb tawg puv tas teb chaws; yog lub caij mus txo tej ceg hmab txiv cawv lawm.
    Twb hnov tus nquab tsug pib quaj hauv peb lub teb chaws lawm.
    13 Cov txiv cev pib ua cos ntsuab vog, cov hmab txiv cawv tawg paj tsw qab ntxiag.
    Sawv tsees los mas, kuv tus me ntxim hlub, kuv tus neeg zoo, tawm tuaj mas!
    14 Kuv me nkauj nquab, koj nkaum hauv tej kis zeb saum tsua,
    hauv cov qhov nraim hauv tej phab zeb phab tsua.
    Tawm tuaj rau kuv pom yuad! Pub kuv hnov koj lub suab mas!
    Vim koj lub suab zoo mloog, thiab koj lub ntsej muag zoo ntxim nyiam kawg li.”

    Los: XFN 3: 14-18a

    14 Leej me ntxhais Xis Yoos aw, koj cia li qw zoo siab mog!
    Tsoom His Xas Lais, nej kav tsij hu nkauj luag ntxhi mas!
    Me ntxhais Yes Lus Xas Les, koj cia li muab tas
    koj lub siab los dhia zoo siab hom khaj mog!
    15 HUAB TAIS tau tshem koj lub txim mus lawm,
    nws tau ntiab koj cov yeeb ncuab kom rov qab tas.
    Huab Tais, His Xas Lais tus Vaj tuaj nyob nruab nrab hauv koj lawm,
    koj yuav tsis ntshai kev raug xwv txheej ntxiv.
    16 Hnub ntawd, luag yuav hais rau Yes Lus Xas Les tias:
    “Xis Yoos, koj txhob ntshai mog, koj txhob ntaus siab me kiag li.
    17 HUAB TAIS koj tus Tswv Ntuj nyob nruab nrab hauv koj;
    nws yog tus muaj hwj huam cawm tau koj.
    Nws zoo siab heev rau koj, nws kev hlub yuav ua kom koj rov tshiab tuaj.
    Nws yuav hu nkauj zoo siab luag ntxhi yog vim koj,
    18a xws li ib tug neeg hu nkauj hauv cov ntees lom zem.”

    NPN 33: 2-3, 11-12, 20-21

    Txais: (1a,3a) Cov neeg ncaj, nej cia li zoo siab nyob hauv Huab Tais!
    Nej hu ib zaj nkauj tshiab rau nws.

    Nej ntaus nkauj nog ncas ua HUAB TAIS tsaug.
    Nej ntaus nkauj nog ncas kaum txoj hlua cav txog nws!
    Nej hu ib zag nkauj tshiab rau nws,
    nej muab siab rau qoj cov hlua ncas nrog suab qw zoo siab.

    Txais: (1a,3a) Cov neeg ncaj, nej cia li zoo siab nyob hauv Huab Tais!
    Nej hu ib zaj nkauj tshiab rau nws.

    Tej yam HUAB TAIS npaj yuav nyob mus li,
    Yam nws lub siab xav ua yuav nyob txheej dhau txheej.
    Haiv neeg uas muaj HUAB TAIS uaTswv Ntuj, lawv txoj hmoov zoo,
    lawv yog cov neeg Huab Tais tau xaiv los ua nws lub cuab tam.

    Txais: (1a,3a) Cov neeg ncaj, nej cia li zoo siab nyob hauv Huab Tais!
    Nej hu ib zaj nkauj tshiab rau nws.

    Peb tus ntsuj plig tos ntsoov HUAB TAIS:
    nws yog tus pab peb, nws yog peb daim leem phiaj.
    Vim peb muaj kev zoo siab yog nyob hauv nws,
    peb chaw tso siab yog nyob hauv nws lub npe ntshiab.

    Txais: (1a,3a) Cov neeg ncaj, nej cia li zoo siab nyob hauv Huab Tais!
    Nej hu ib zaj nkauj tshiab rau nws.

    As Les Lus yas

    Txais: As les lus yas, as les lus yas.

    Aub! Es Mas Nus Es, koj yog peb tus Vaj, tus muab Txoj Cai rau peb,
    thov koj tuaj cawm peb, Huab Tais peb tus Tswv Ntuj!

    Txais: As kles lus yas, as les lus yas.

    Ntawv Moo Zoo: LK 1: 39-45

    39 Tau ob peb hnub tom qab, ces Mab Liab sawv kev mus; nws rau siab ntso mus pem toj siab, mus rau ib lub nroog nyob xeev Yus Das.
    40 Nws chaws mus hauv Ntxas Kas Lias tsev, nws tsa suab hu Es Lis Xas Npes.
    41 Thaum Es Lis Xas Npes hnov Mab Liab lub suab hu, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes,
    42 ces Es Lis Xas Npes tsa suab hlo hais nrov nrov tias: "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov.
    43 Yog ua cas thiaj muaj li no rau kuv, cas kuv tus Huab Tais leej niam thiaj tuaj xyuas kuv?
    44 Koj saib, thaum kuv hnov dheev koj lub suab hu nrov txog kuv pob ntseg, mas tus me nyuam hauv kuv plab dhia zoo siab.
    45 Tus uas tau ntseeg tias cov lus Huab Tais hais rau nws yuav tsheej xeeb tau, mas nws txoj hmoov zoo."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 21st December 2021, 7:55 am

    Tim 22 lub 12 Hlis 2021

    Hnub Plaub Caij Tos Huab Tais Xyoo C Nruab Lis Piam Xyoo II

    Lectionary: 198

    Zaj Nyeem Ib: 1 XAS MUAS 1:24-28

    24 Thaum tus me nyuam Xas Muas cais mis lawm, As Nas coj tus me nyuam nrog ib tug heev nyuj muaj peb xyoos, ib tawb hmoov nplej thiab ib hnab tawv cawv, mus fij rau Ntuj hauv HUAB TAIS lub tuam tsev uas nyob Xis Laus; tus me nyuam tseem me me.
    25 Nws txiv muab tus heev nyuj tua txi ntuj tas ces nws niam As Nas coj nws mus rau Es Lis.
    26 As Nas hais tias: "Yawg Hlob, kuv thov txim ntawm koj! Tseeb ib yam li koj muaj txoj sia, kuv yog tus poj niam uas tau txhos caug nyob ze koj ntawm no thov HUAB TAIS.
    27 Tus me nyuam no yog tus uas kuv tau teev ntuj thov, ces HUAB TAIS tau muab nws rau kuv raws li kuv tau thov.
    28 Mas nyem no kuv xav muab nws fij rau HUAB TAIS, kom tas nws sim neej, nws yog tus raug muab qee rau HUAB TAIS."
    Ces nws niam muab nws tso tseg rau Huab Tais nyob ntawd.

    NPN: 1 XAS MUAS 2: 1, 4-5, 6-7, 8abcd

    Txais: (1a) Kuv lub siab hom khaj nyob hauv Huab Tais, tus Cawm kuv

    Kuv lub siab hom khaj nyob hauv HUAB TAIS,
    kuv lub zog loj tuaj nyob hauv kuv tus Tswv Ntuj.
    Kuv qhib ncauj hais lus tsis txuag kuv cov yeeb ncuab,
    kuv zoo siab vim kuv muaj kev yeej lawm.

    Txais…

    Cov neeg muaj hwj chim rab hneev dam tas,
    hos tus tsis muaj zog txais lub zog los sia ntawm duav.
    Cov neeg thaud tau noj tsau plab yuav tsum mus ua zog thiaj muaj noj,
    hos cov uas thaud tshaib plab tau noj seem noj so.
    Tus poj khab seeb yug tau xya leej tub,
    hos tus muaj tub coob ua neeg qaug zog zuj zis.

    Txais…

    HUAB TAIS ua kom txawj tuag thiab ua kom txawj muaj sia tuaj;
    nws muab pov rau ntuj txias teb tsaus,
    nws rub kom sawv tau rov los.
    HUAB TAIS ua kom pluag thiab ua kom muaj,
    Nws txo kom qis, thiab nws muab tsa rau qhov siab.

    Txais…

    Nws tsa cov neeg pluag hauv plua tshauv los,
    nws rub cov txom nyem tawm hauv qhov chaw qias
    los nrog cov nom tswv zaum,
    nws muab ib lub rooj zaum nto koob meej rau lawv ua lawv tug.

    Txais…

    As Les Lus Yas

    Txais: As les lus yas, as les lus yas

    Aub! Tus Vaj kav tas txhia haiv neeg thiab lub pob zeb txheem lub Koom Txoos,
    thov koj tuaj cawm tib neeg uas koj tau muab av los puab mas!

    Txais: As les lus yas, as les lus yas

    Ntawv Moo Zoo: LUS KAS 1: 46-56

    46 Mab Liab hais tias : "Kuv tus plig cav txog Huab Tais lub hwj chim loj,
    47 kuv lub tswv yim hom khaj nyob hauv Tswv Ntuj, tus Cawm kuv,
    48 vim nws tau dauv muag los ntsia nws tus ntxhais txib tsis muaj tsim.
    Vim li ntawd, txij no mus, txhua tiam neeg yuav hais tias kuv txoj hmoov zoo;
    49 vim tus Muaj Hwj Huam tau ua tej yam loj rau kuv, nws lub npe Ntshiab.
    50 Nws lub siab khuv keej cov neeg uas hwm nws tiam dhau tiam.
    51 Nws sab npab nthuav nws lub zog rau sawv daws pom.
    Cov neeg uas lub siab muab hlob, HuabTais ua kom lawv tawg tas.
    52 Huab Tais nchuav cov muaj hwj chim kom poob ntawm lawv lub theej kiab,
    nws tsa cov neeg me kom siab.
    53 Nws pub tej yam zoo rau cov neeg tshaib noj seem noj so,
    hos nws ntiab cov neeg muaj rov qab mus tes qhuav.
    54 HuabTais tuaj pab nws tus tub txib His Xas Lais,
    vim nws nco ntsoov tias nws tau cog lus yuav khuv leej neeg,
    55 yog lo lus nws tau cog rau peb cov yawg koob,
    rau Has Nplas Has thiab nws cov xeeb ntxwv mus tas ib txhiab ib txhis."
    56 Mab Liab nrog Es Lis Xas Npes nyob peb lub hlis tej,
    ces nws mam rov mus tsev lawm.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 22nd December 2021, 10:34 am

    Tim 23 lub 12 Hlis 2021

    Hnub Tsib Lis Piam Plaub Caij Tos Huab Tais Xyoo C Nruab Lis Piam Xyoo II

    Lectionary: 199

    XHLT: LN John nyob Kanty, ua Leej Choj

    Zaj Nyeem Ib: MLK 3: 1-4, 23-24


    Huab Tais Tswv Ntuj hais li no:
    1 “Kuv yuav xa kuv tus tub tshaj xov mus kho kev ua kuv ntej.
    Ces ib sij huam, tus Huab Tais uas nej nrhiav yuav chaws los hauv nws lub tuam tsev,
    tus tub tshaj txog txoj kev cog lus uas nej ntshaw. Saib, nws tuaj txog ntawd lawm!"
    Tus HUAB TAIS kav tsoom tshiab hais li ntawd.
    2 “Leej twg thiaj yuav tiv taus hnub nws tuaj txog?
    Leej twg thiaj yuav sawv taus ntseg thaum nws tawm plaws los?
    Vim nws yuav zoo li cov hluav taws nchuav nyiaj nchuav kub,
    thiab zoo li cov tshuaj ntxhua xov kom dawb.
    3 Nws yuav zaum ua tus nchuav nyiaj thiab ua kom nyiaj dawb tuaj.
    Nws yuav ua kom Les Vis cov tub huv tuaj, thiab yuav muab lawv nchuav
    xws li nchuav nyiaj thiab nchuav kub, kom lawv ua tau cov tub
    cev thaj txi ntuj rau HUAB TAIS raws txoj kev tseem ceeb.
    4 Ces HUAB TAIS yuav pom zoo txais Yus Das thiab Yes Lus Xas Les cov thaj txi Ntuj
    ib yam li txheej thaum ub, ib yam li thaum lub caij dhau los lawd.
    23 Ntsia saib, kuv yuav xa tus yaj saub Es Lias tuaj rau nej ua ntej hnub
    HUAB TAIS yuav tuaj, uas yog ib hnub loj thiab txaus ntshai kawg nkaus.
    24 Nws yuav rub tau cov ua niam ua txiv lub siab rov mus hlub lawv cov tub cov ntxhais
    thiab cov tub cov ntxhais lub siab rov mus hlub lawv niam lawv txiv,
    tsis li ntawd ces kuv yuav tsum tau tso kev puas tsuaj puas ntsoog tuaj raug lub ntiaj teb.”

    NPN 25: 4-5ab, 8-9, 10+14

    Txais: (LK 21:28) Tsa nej taub hau ntsia mas,
    ces nej yuav pom tias nej txoj kev dim nyob ze ze lawm.

    HUAB TAIS, thov koj ua kom kuv paub koj tej kev,
    thov qhia koj tej kev rau kuv kawm.
    Coj kuv mus taug koj txoj kev tseeb, thiab thov qhia rau kuv paub,
    vim koj yog Tswv Ntuj tus cawm kuv.

    Txais…

    HUAB TAIS yog tus siab zoo thiab siab ncaj,
    nws qhia cov neeg txhaum rov los taug txoj kev zoo.
    nws coj cov neeg me mus rau txoj kev ncaj,
    nws qhia nws txoj kev rau cov neeg me kawm.

    Txais…

    Tas HUAB TAIS tej kev yog kev ua siab zoo thiab ua siab ncaj
    rau cov neeg coj raws nraim li nws tau cog lus thiab nws txoj cai.
    Cov neeg hwm HUAB TAIS thiaj yog nws cov phooj ywg,
    thiab nws txoj kev cog lus yog txoj kev qhuab qhia lawv.

    Txais…

    As Les Lus Yas

    Txais: As les lus yas, as les lus yas

    Aub! Tus ua vaj kav tas txhua haiv neeg thiab lub pob zeb txheem lub Koom Txoos,
    thov koj tuaj cawm tib neeg uas koj tau muab av los puab mas!

    Txais: As les lus yas, as les lus yas

    Ntawv Moo Zoo: LK 1: 57-66

    57 Thaum ntawd txog lub caij Es Lis Xas Npes daws cev lawm, ces nws yug tau ib tug tub.
    58 Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes kawg nkaus, lawv nrog nws zoo siab.
    59 Thaum txog hnub yim, lawv tuaj ua lub cim txiav tawv rau tus me nyuam, lawv xav tis nws npe raws li nws txiv Ntxas Kas Lias lub npe.
    60 Tiam sis nws niam hais tias: "Tsis yog. Tus me nyuam yuav hu ua Zam."
    61 Lawv hais rau leej niam tias: "Tsis muaj ib tug hauv neb cov txheeb ze hu li ntawd li."
    62 Ces lawv piav tes rau leej txiv saib nws xav kom lawv tis tus me nyuam npe li cas.
    63 Leej txiv kom lawv muab ib daim txiag sau ntswv los, nws sau ntawv tias: "Nws lub npe hu ua Zam." Sawv daws ceeb tas.
    64 Tam sis ntawd, leej txiv lub ncauj qhib plho, tus nplaig muag nthas, ces nws hais tau lus, thiab cav txog Tswv Ntuj.
    65 Tsoom neeg nyob ze nkawd sawv daws tau ntshai kawg. Hos nyob pem toj siab hauv xeev Yus Das, sawv daws tham zom zaws txog tej xwm ntawd.
    66 Cov uas tau hnov luag tham txog tej xwm no, muab khaws cia rau nruab siab, lawv hais tias: "Tus me nyuam ntawd yuav yog ib tug zoo li cas? Vim Huab Tais txhais tes yeej nrog nraim tus me nyuam ntawd tiag.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 23rd December 2021, 2:04 pm

    Tim 24 lub 12 Hlis 2021

    Hnub Rau Lis Piam Plaub Caij Tos Huab Tais Xyoo C Nruab Lis PIam Xyoo II


    Mis Xas sawv ntxov rau Caij Tos Huab Tais.
    Lectionary: 200

    Zaj Nyeem Ib: 2 XM 7: 1-5, 8b-12, 14a, 16

    1 Thaum vaj Das Vis tshais los nyob hauv nws lub tsev lawm thiab HUAB TAIS pub kom nws tau so tsis muaj kev tawm tsam nrog nws cov yeeb ncuab nyob ib ncig ntawm nws lawm,
    2 mas nws hais rau tus yaj saub Nas Taas tias: "Koj ntsia saib! kuv nyob hauv ib lub tsev ntoo thwj suab, hos Tswv Ntuj lub Xab Cog Lus nyob hauv ib lub Tsev Tsam Phooj xwb!"
    3 Nas Taas teb rau tus vaj tias: "Koj mus ua raws li koj lub siab xav los mas, vim HUAB TAIS yeej nrog nraim koj."
    4 Tiam sis hmo ntawd, HUAB TAIS hais lus tuaj rau Nas Taas tias:
    5 "Koj mus hais rau kuv tus tub txib Das Vis li no: ‘HUAB TAIS hais tias: Koj puas yog tus yuav txhim ib lub tsev rau kuv nyob?
    8b Kuv yog tus tau rho koj tawm hauv cov tshav zaub thiab hauv txoj kev tu tsiaj los tsa ua tus tswj kuv haiv neeg His Xas Lais.
    9 Koj mus txog twg kuv tau nrog koj nraim, thiab tau rhuav tshem koj cov yeeb ncuab ntawm koj hauv ntej tas tib si. Kuv yuav ua kom koj muaj koob nto npe ib yam li cov neeg tseem ceeb nyob hauv ntiaj teb.
    10 Kuv yuav qee ib thaj av rau kuv haiv His Xas Lais nyob; kuv yuav coj lawv mus cog rau ntawd kom lawv nyob muaj chaw, ces lawv yuav tsis ntsib kev nyuaj siab ntxiv; cov neeg phem yuav tsis tsuj lawv ntxiv xws li yav dhau los lawm,
    11 xws li lub caij txij thaum kuv xub tau tsa ib co txwj laus txiav txim los tswj kuv haiv His Xas Lais lawm.
    Ces kuv yuav cia koj tau so, tsis raug koj cov yeeb ncuab ua phem rau koj ntxiv. HUAB TAIS tseem qhia ntxiv rau koj tias, nws yuav tsa ib tsev neeg rau koj.
    12 Thaum koj lub neej dua lawm, thiab koj mus so nrog koj cov poj yawm txwv koob lawm, kuv yuav tsa koj ib tug xeeb ntxwv sawv lawv koj qab los; nws yuav tawm ntawm koj roj koj ntshav los, thiab kuv yuav tsa nws ua vaj kom nyob ruaj nreb.
    14a Kuv yuav yog nws txiv, nws yuav yog kuv ib leeg tub.
    16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag; koj lub theej kiab yuav nyob ruaj nreb mus ib txhis."

    NPN 89: 2-3, 4-5, 27+29

    Txais: (2) Kuv yuav hu nkauj mus li cav txog HUAB TAIS lub siab zoo.

    Kuv yuav hu nkauj mus li cav txog HUAB TAIS tej kev ua zoo,
    kuv lub ncauj yuav tshaj txog koj txoj kev ua siab ncaj rau txhua tiam neeg paub.
    Vim koj tau hais tias: “Kuv txoj kev ua siab zoo yuav nyob ruaj mus li;”
    nyob saum ntuj koj tau cog koj txoj kev ua siab ncaj kom nyob ruaj nreb.

    Txais…

    “Kuv tau cog lus nrog tus kuv tau xaiv,
    kuv tau cog lus ruaj rau Das Vis kuv tus tub txib tias:
    kuv yuav nres koj caj ces kom nyob ruaj nreb mus li,
    thiab yuav tsa koj lub theej kiab kom nyob tiam dhau tiam,”

    Txais…

    “Nws yuav hais rau kuv tias, ‘Koj yog kuv txiv,
    kuv tus Tswv Ntuj, kuv lub tsua, kuv tus cawm seej.’
    Kuv yuav ua siab zoo rau nws mus tas ib txhis,
    thiab kuv txoj kev nrog nws cog lus yuav nyob ruaj nreb.”

    Txais…

    As Les Lus Yas

    Txais: As les lus yas, as les lus yas

    Aub! Qhov Kaj Ntug ci ntsa iab,
    Qhov pom kev ci ntsa paug mus li, lub hnub muaj kev ncaj ncees,
    thov koj tuaj ci kaj cov neeg nyob hauv kev tsaus ntuj
    thiab hauv txoj kev tuag tus duab ntxoov ntxoo.

    Txais: As les lus yas, as les lus yas

    Ntawv Moo Zoo: LK 1: 67-79

    67 Ces Ntxas Kas Lias, tus me nyuam leej txiv, muaj Leej Ntuj Plig Ntshiab nyob puv hauv nws, nws ua yaj saub hais tias:
    68 "Kom Huab Tais, His Xas Lais tus Tswv Ntuj nto koob meej, vim nws tau tuaj xyuas nws haiv neeg thiab tuaj txhiv lawv lawm.
    69 Nws tau tsa ib tug Cawm Seej muaj zog rau peb lawm, uas yug los nyob hauv nws tus tub txib Das Vis tsev neeg,
    70 raws li nws tau kom nws cov yaj saub ntshiab ib txwm hais txheej thaud los tias:
    71 Nws cog lus yuav cawm peb ntawm peb cov yeeb ncuab, thiab ntawm cov neeg ntxub peb txhais tes.
    72 Nws cog lus yuav khuv leej peb cov yawg koob, thiab yuav nco ntsoov txog nws txoj kev cog lus ntshiab,
    73 uas yog lo lus nws tau cog rau peb txiv Has Nplas Has tias :
    74 Nws yuav cawm peb dim ntawm peb cov yeeb ncuab txhais tes, kom peb tau kev twj lij tsis ntshai pe hawm nws,
    75 tau ua neeg ntshiab thiab neeg ncaj nyob ntawm nws xub ntiag tas peb sid.
    76 Hos koj, me tub, luag yuav hu koj ua Leej Nyob Siab tus yaj saub; vim koj yuav mus ua Huab Tais ntej, koj yuav npaj nws txoj kev.
    77 Koj yuav qhia nws haiv neeg kom lawv paub txog txoj kev cawm, uas yog los ntawm txoj kev lawv tau txais kev zam txhaum los.
    78 Vim peb tus Tswv Ntuj muaj lub siab mos siab muag khuv leej peb, ces kev kaj ntug saum txheej siab yuav tawm tuaj rau peb,
    79 yuav ci tuaj kaj cov neeg zaum nyob hauv qhov tsaus ntuj thiab nyob hauv kev tuag tus duab ntxoov ntxoo; nws yuav hwj peb txhais taw kom mus taug txoj kev thaj yeeb."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 25th December 2021, 2:38 am

    Yog leej twg xav nrhiav cov zaj nyeem rau lub caij HT Yes Xus yug los no ces nej mus rau hauv no:

    https://hmongcatholique.forumdediscussions.com/t1580-cov-zaj-nyeem-rau-caij-yes-xus-yug-los#16713
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 26th December 2021, 10:42 am

    Tim    27     lub     12     Hlis      2021    

    Hmoov Hwm LN Zam, Hauv Paus Xa Lus thiab Kws Sau Zam Ntawv Moo Zoo

    Lectionary: 697

    COV ZAJ NYEEM NRUAB LIS PIAM XYOO II 2021-2022 V_opt-104

    Zaj Nyeem Ib:      1 ZAM  1:   1-4

    Cov zoo nyiad:
    1 Tej yam uas tau muaj thaum lub hauv paus los lawm,
    tej yam uas peb tau hnov, tej yam peb tau pom xyeem ntawm qhov muag,
    tej yam peb tau ntsia ntsoov, thiab tej yam peb txhais tes tau kov,
    puav  leej yog hais txog Leej Lo Lus pub txoj sia;
    2 vim Txoj Sia tau tawm los rau qhov muag pom,
    ces peb tau pom thiab peb ua tim khawv hais txog nws,
    thiab peb tuaj tshaj kom nej paub txog Txoj Sia nyob mus li,
    uas yeej nyob nrog Leej Txiv thiab kuj tau tawm los rau peb pom thiab.
    3 Yam uas peb tau pom thiab tau hnov, mas nyem no peb muab tshaj rau nej paub,
    kom nej nrog peb koom ua ib lub siab; peb txoj kev sib koom siab ntawd yog koom nrog Leej Txiv thiab nws Leej Tub Yes Xus Pleev.
    4 Peb sau hais txog qhov no, kom peb tsuas muaj txoj kev zoo siab puv meem mias.

    NPN        97:   1-2, 5-6, 11-12

    Txais:  (12) Cov neeg ncaj,  nej cia li zoo siab nyob hauv Huab Tais!

    HUAB TAIS yog vaj ntxwv, kom lub ntiaj teb zoo siab;
    kom cov pov txwv uas muaj ntau lub luag ntxhi.
    Cov huab thiab qhov tsaus ntuj nyob ncig nws,
    kev ncaj thiab kev txiav txim yog lub taw ntsa txheem nws lub theej kiab.

    Txais…

    Cov roob yaj tas xws li ciab ntab yaj nyob ntawm Huab Tais xub ntiag,
    ntawm tus HUAB TAIS  kav tas lub ntiaj teb xub ntiag.
    Lub ntuj tshaj txog nws txoj kev ncaj ncees,
    tas txhua haiv neeg pom nws lub hwj chim.

    Txais…

    Qhov pom kev ci thaum kaj ntug tuaj kaj cov neeg ncaj,
    kev zoo siab ci tuaj rau cov neeg muaj siab zoo.
    Cov neeg ncaj, nej cia li  siab nyob hauv HUAB TAIS,
    nej yuav ua tsaug rau nws lub npe ntshiab mog.

    Txais…

    As Les Lus Yas:   Te Deum

    Txais:  As les lus yas, As les lus yas

    Tswv Ntuj peb cav txog koj,
    peb qw zeem koj ua peb tus Huab Tais;
    npoj Hauv Paus Xa Lus muaj hwj chim cav txog koj.

    Txais:  As les lus yas, As les lus yas

    Ntawv Moo Zoo:     ZAM  20:   1a+2-8

    1 Thawj hnub pib lub lis piam, thaum tseem ntxov ntxov,
    2 Mab Liab Mas Ntas Las khiav mus cuag Xis Moos Pob Zeb thiab lwm tus thwj tim uas yog tus Yes Xus nyiam. Nws hais rau nkawd tias: "Lawv tshem Huab Tais tawm hauv ntxa mus lawm, peb tsis paub xyov lawv coj nws mus tso qhov twg lawm."
    3 Pob Zeb tawm plaws mus, lwm tus thwj tim kuj tawm plaws thiab, nkawd mus tom ntxa.
    4 Nkawd ob leeg ua ke khiav mus, tab sis lwm tus thwj tim khiav nrawm dua Pob Zeb, nws xub mus txog tom ntxa.
    5 Nws khoov mus xauj, nws pom cov pluaj ntaub nyob ntawd, tab sis nws tsis chaws mus hauv.
    6 Ces Xis Moos Pob Zeb kuj lawv nws qab tuaj txog, Pob Zeb chaws mus hauv lub ntxa, nws pom cov pluaj ntaub nyob ntawd,
    7 hos daim ntaub npog ntsej muag uas nyob saum nws taub hau, nws nyob nws, kauv zoo zoo rau ib qho, tsis xyaw cov pluaj ntaub.
    8 Ces lwm tus thwj tim uas xub tuaj txog ntawm lub ntxa mam li chaws mus hauv. Nws pom ces nws ntseeg.


    Sponsored content


    COV ZAJ NYEEM NRUAB LIS PIAM XYOO II 2021-2022 Empty Re: COV ZAJ NYEEM NRUAB LIS PIAM XYOO II 2021-2022

    Post  Sponsored content


      Current date/time is 28th November 2022, 10:40 am