HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM NRUAB LIS PIAM XYOO II 2021-2022 - Page 2 Empty

Latest topics

» COV ZAJ NYEEM NRUAB LIS PIAM XYOO II 2021-2022
by Mim Today at 3:08 pm

» COV ZAJ NYEEM Hnub Chiv 2021-2022 Xyoo C
by Mim 11th August 2022, 6:37 pm

» Qhia Ntuj Kev Cai.
by Tub Kawm 11th July 2022, 3:08 am

» HMOOB NPAM NAJ XEES
by Maiv Tooj 1st July 2022, 8:52 am

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Mim 16th April 2022, 8:18 am

» MOO QAIJ QAUG
by Maiv Tooj 7th April 2022, 2:51 am

» Txiv Tswv QhiaTxwj Choo Thoj nyob los tsuas
by Maiv Tooj 16th March 2022, 6:54 am

» Zaj thov Ntuj rau cov neeg mob.
by Maiv Tooj 17th February 2022, 11:22 pm

» XH. Yaj Zoov Ntxheb lub Tsev THOOB TSIB
by Maiv Tooj 19th January 2022, 7:52 am

» Xib Hwb Thoj Xyooj lub neej
by Maiv Tooj 19th January 2022, 7:49 am

» COV ZAJ NYEEM RAU CAIJ YES XUS YUG LOS
by Mim 24th December 2021, 8:00 pm

» ZAJ THOV NTUJ RAU OB TUG TXWJ NKAWM.
by Maiv Tooj 10th December 2021, 6:10 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II 2021-2022

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 27th December 2021, 12:13 pm

    Tim      28     lub     12     Hlis     2021    

    Hmoov Hwm Cov Me Nyuam Tsis Txhaum, Tuag Ua Tim Khawv Pauv Yes Xus Chaw
     
    Lectionary: 698

    COV ZAJ NYEEM NRUAB LIS PIAM XYOO II 2021-2022 - Page 2 31219815

    Zaj Nyeem Ib:     1 Zam 1:  5—2:2

    Cov zoo nyiad:
    5 Lub moo uas peb tau hnov ntawm Yes Xus los, thiab peb tshaj rau nej paub yog li no Tswv Ntuj yog qhov pom kev, nyob hauv nws tsis muaj ib yam tsaus li.
    6 Yog peb hais tias: “Peb nrog nws koom siab,” tab sis peb tseem mus taug txoj kev tsaus ntuj, mas peb dag xwb, peb tsis ua neej raws txoj kev tseeb.
    7 Hos yog peb taug txoj kev pom kev, vim nws nyob hauv qhov pom kev, mas peb thiab nej sawv daws muaj kev sib koom siab ua ke, ces nws Leej Tub Yes Xus cov ntshav ntxuav peb ntawm txhua yam txhaum kom peb dawb huv tuaj.
    8 Yog peb hais tias: “Peb tsis muaj txhaum,” mas peb rov dag rau peb, qhov tseeb tsis nyob hauv peb li.
    9 Yog peb lees peb cov txhaum, mas Tswv Ntuj uas yog tus pheej xeeb thiab tus siab ncaj yuav zam peb cov txhaum rau peb, thiab yuav ntxuav tas puas tsav yam phem ntawm peb pov tseg kom peb dawb huv tuaj.
    10 Yog peb hais tias: “Peb tsis tau ua txhaum,” mas yog peb hais tias Tswv Ntuj dag xwb, ces nws lo lus tsis nyob hauv peb.
    2: 1 Kuv cov me nyuad, kuv sau tej no tuaj rau nej, kom nej tsis txhob ua txhaum. Tiam sis yog muaj ib tug twg tau ua txhaum lawm, los peb muaj ib tug pab peb cev lus thov Leej Txiv, yog Yes Xus Pleev,tus siab ncaj.
    2 Nws yog tus nqi txhiv peb ntawm peb cov txhaum; tsis yog txhiv peb xwb, nws tseem txhiv tas lub qab ntuj neeg ntawm lawv cov txhaum huv tib si thiab.

    NPN     124:  2-3, 4-5, 7cd-8

    Txais:   (7) Peb tus ntsuj plig tau txais kev dim xws li
    tus noog dim plaws ntawm tus cuab noog lub vas.  

    Yog HUAB TAIS tsis txhob tuaj pab peb
    thaum cov neeg sawv tuaj tua peb,
    mas ntshai lawv yeej muab peb nqos ciaj lawm,
    vim lawv npau taws heev rau peb cuag hluav taws kub.

    Txais:   (7) Peb tus ntsuj plig tau txais kev dim xws li
    tus noog dim plaws ntawm tus cuab noog lub vas.

    Ntshai dej twb los nyab peb tas,
    dej sab siv twb los tshoob peb tas ;
    cov dej hlob twb tshoob peb mus lawm.

    Txais:   (7) Peb tus ntsuj plig tau txais kev dim xws li
    tus noog dim plaws ntawm tus cuab noog lub vas.

    Lub vas ntuag rhe, peb dim plaws lawm.
    Peb qhov chaw vam khom yog nyob hauv HUAB TAIS lub npe;
    nws yog tus tswv tsim lub ntuj lub teb.

    Txais:   (7) Peb tus ntsuj plig tau txais kev dim xws li
    tus noog dim plaws ntawm tus cuab noog lub vas.

    As Les Lus Yas :   (zaj Te Deum)

    Txais:  As  les lus yas,as les lus yas.        

    Peb cav txog koj, Tswv Ntuj,    
    peb qw zeem koj ua peb tus Huab Tais;        
    tsoom tub rog hnav dawb uas tuag ua tim khawv cav txog koj.

    Txais:  As  les lus yas, as les lus yas.

    Ntawv Moo Zoo:      MT 2:   13-18

    13 Thaum cov kws hnub qub rov qab mus lawm, Huab Tais tus Tshiab tawm tuaj ua npau suav rau Yos Xes, nws hais tias:  "Koj sawv, koj coj tus me nyuam thiab nws niam khiav mus lawm Hais Nkws Tos teb, koj yuav nyob ntawd mus txog thaum kuv rov tuaj qhia koj, vim Hes Los yuav nrhiav tus me nyuam tua."
    14 Yos Xes sawv tsees los, nws coj tus me nyuam thiab leej niam, lawv khiav hmo ntuj mus Hais Nkws Tos teb.
    15 Nws nyob Hais Nkws Tos teb mus txog hnub Hes Los tuag, kom thiaj muaj raws li lo lus Huab Tais tus yaj saub xub hais tseg tias: “Kuv hu kuv leej tub tim Hais Nkws Tos teb los.”
    16 Thaum Hes Los pom tias cov kws hnub qub dag nws, ces nws npau taws ceev kawg.  Nws xa neeg mus tua cov me nyuam uas nyob Npes Les Hes thiab nyob ib ncig thaj tsam ntawd tas tib si, kom tua cov uas muaj ob xyoos rov hauv, raws li lub caij cov kws hnub qub qhia rau nws.
    17 Ces muaj raws li yaj saub Yes Les Mias tau hais tias:
    18 “Yuav hnov ib lub suab nrov nyob Las Mas, yog ib lub suab quaj suab nyiav; yog Las Nkes quaj nws cov me nyuam; tsis muaj neeg nplij tau nws, vim nws cov me nyuam tsis nyob tas lawm.”



    Last edited by Mim on 28th December 2021, 4:55 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 28th December 2021, 4:32 am

    Tim      29     lub     12     Hlis     2021

    Hnub Plaub Lis Piam Ib Caij Yes Xus Yug - Hnub Tsib Hauv Thawj Yim Hnub Yes Xus Yug Los

    Lectionary: 202

    XHLT:    LN Tos Mas Becket

    Zaj Nyeem Ib:   1 ZAM 2: 3-11


    Cov zoo nyiad,
    3 Qhov ua kom peb pom tias peb paub Yes Xus tiag, yog qhov tias peb coj nws cov lus qhia.
    4 Tus hais tias: “Kuv paub nws,” tab sis twb tsis coj nws cov lus qhia, mas tus ntawd yog ib tug neeg dag, qhov tseeb tsis nyob hauv nws.
    5 Hos tus coj Yes Xus lo lus, mas txoj kev nyiam Tswv Ntuj zoo tiav log nyob hauv nws lawm. Yog peb ua li ntawd, mas peb thiaj paub tias peb koom siab nrog nws.
    6 Tus uas nws hais tias nws nyob hauv Yes Xus, mas nws yuav tsum coj raws nraim li Yes Xus tau coj.
    7 Cov zoo nyiad, kuv tsis tau sau ib lo lus qhia tshiab tuaj rau nej li, tsuas sau ib lo lus qhia qub uas nej twb tau txais puag thaum lub hauv paus los lawm xwb. Lo lus qhia qub ntawd yog lo lus uas nej twb tau hnov lawm.
    8 Tsis kav, qhov kuv sau tuaj rau nej no, kuj yog ib lo lus qhia tshiab thiab, uas yog ib qho tseeb nyob hauv Yes Xus thiab nyob hauv nruab nrab nej. Vim qhov tsaus ntuj dua lawm, hos qhov uas yog tseem pom kev twb ci tuaj lawm.
    9 Tus hais tias nws nyob hauv qhov pom kev, tab sis nws ntxub nws tus kwv tij, mas nws tseem nyob hauv qhov tsaus ntuj.
    10 Tus nyiam nws tus kwv tij, mas nws thiaj nyob hauv qhov pom kev. Ces nyob hauv nws tsis muaj dab tsi yuav ua kom nws ntog taus.
    11 Hos tus ntxub nws tus kwv tij, mas nws nyob hauv qhov tsaus ntuj, thiab nws maub taug kev hauv qhov tsaus ntuj, ces nws tsis paub tias xyov nws mus qhov twg li, vim qhov tsaus ntuj npog rawv nws qhov muag tas lawm.

    NPN   96: 1-2a, 2b-3, 5b-6

    Txais: (11a) Kom lub ntuj zoo siab thiab kom lub ntiaj teb hom khaj!

    Nej hu ib zaj nkauj tshiab rau HUAB TAIS,
    tas cov teb chaws, nej hu nkauj rau HUAB TAIS,
    nej hu nkauj rau HUAB TAIS, nej cav txog nws lub npe.

    Txais…

    Hnub dhau hnub, nej tshaj txog nws txoj kev cawm seej.
    Nej piav txog nws lub hwj chim nyob hauv cov kuj cuab,
    piav txog nws tej hauj lwm txaus qhuas nyob hauv txhua haiv neeg.

    Txais…

    HUAB TAIS tau tsim lub ntuj.
    Lub hwj chim ci ntsa iab thiab lub meej mom ua nws ntej;
    txoj kev qhuas thiab kev ua tus loj nyob hauv nws lub tuam tsev.

    Txais…

    As Les Lus Yas:   LK 2: 32

    Txais: As les lus yas, As les lus yas

    Yog qhov pom kev tawm tuaj qhia rau cov pej kum neeg paub,
    thiab yog qhov ua kom koj haiv His Xas Lais tau koob meej.

    Txais: As les lus yas, As les lus yas

    Ntawv Moo Zoo:   LK 2: 22-35

    22 Thaum txog lub caij yuav ua kab ke ntxuav ob niam tub raws li Mais Xes Txoj Cai lawm, Mab Liab thiab Yos Xes nkawd coj Yes Xus mus pem Yes Lus Xas Les, kom tau fij tus me nyuam rau Huab Tais,
    23 raws li Huab Tais Txoj Cai sau tias: "Txhua tus me nyuam tub xub qhib niam lub plab yug los, yuav muab qee rau Huab Tais."
    24 thiab kom tau cev ib co txim uas yog: ib nkawg nquab lwb rwg, los puas ob tug me nyuam nquab dawb, raws li Huab Tais txoj cai teev cia.
    25 Thaum ntawd nyob Yes Lus Xas Les, muaj ib tug txiv neej npe hu ua Xis Mes Oos. Tus neeg ntawd yog neeg ncaj thiab nyiam teev Ntuj. Nws tos ntsoov tus yuav tuaj nplij His Xas Lais. Leej Ntuj Plig Ntshiab nyob saum nws.
    26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag.
    27 Leej Ntuj Plig coj nws tuaj nyob hauv lub Tuam Tsev Teev Ntuj. Ces thaum Mab Liab thiab Yos Xes nkawd coj tus me nyuam Yes Xus tuaj ua cov kab ke raws li Txoj Cai,
    28 Xis Mes Oos txais tus me nyuam los puag hauv nws ob txhais npab, nws cav lus zoo txog Tswv Ntuj tias:
    29 “Huab Tais, nyem no koj tso koj tus tub txib mus so kaj lug tau lawm, twb muaj raws li koj lo lus lawm,
    30 vim kuv qhov muag tau pom koj txoj kev cawm neeg lawm,
    31 uas koj tau npaj nyob ntawm ib tsoom haiv neeg xub ntiag rau lawv pom ntsoov;
    32 yog qhov pom kev uas tawm tuaj ua kev qhia rau cov pej kum haiv neeg paub, thiab yog qhov ua kom koj haiv His Xas Lais nto koob meej.”
    33 Yes Xus niam thiab txiv qhuas cov lus nkawd hnov hais txog tus me nyuam kawg.
    34 Ces Xis Mes Oos foom hmoov zoo rau lawv, nws hais rau Mab Liab, Yes Xus niam tias: "Koj saib mus, tus me nyuam no yuav ua chaw rau ntau leej His Xas Lais ntog thiab ntau leej sawv los; nws yog ib lub cim ua kom sawv daws muaj sib cav.
    35 Hos ntawm koj, mas ib rab ntaj yuav ntsia ntsees koj lub siab, kom xwv tej lus uas coob leej xav tuaj nruab siab tawm los rau sawv daws paub.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 29th December 2021, 7:50 am

    Tim 30 lub 12 Hlis 2021

    Hnub Rau Lis Piam Ib Caij Yes Xus Yug los -Hnub Rau hauv Thawj Yim Hnub Yes Xus Yug los

    Lectionary: 203

    Zaj Nyeem Ib: 1 ZAM 2: 12-17

    12 Cov me nyuad, kuv sau ntawv tuaj rau nej, vim nej cov txhaum daws tas lawm kom Yes Xus lub npe tau koob meej.
    13 Kuv sau ntawv tuaj rau nej cov ua txiv, vim nej yeej paub nws Tus ib txwm Nyob txij thaum lub hauv paus los lawm. Kuv sau ntawv tuaj rau nej cov hluas, vim nej tiv yeej tus Phem lawm.
    14 Kuv sau ntawv tuaj rau nej cov ua me nyuam, vim tias nej twb paub Leej Txiv lawm. Kuv sau ntawv tuaj rau nej cov ua txiv, vim nej yeej paub nws Tus ib txwm Nyob txij thaum lub hauv paus los lawm. Kuv sau ntawv tuaj rau nej cov hluas, vim nej muaj zog thiab Tswv Ntuj lo lus nyob ruaj khov hauv nej, ces nej ntaus yeej tus Phem lawm.
    15 Nej tsis txhob nyiam lub ntiaj teb, los tej yam uas nyob hauv lub ntiaj teb mog. Yog leej twg nyiam lub ntiaj teb, mas Leej Txiv txoj kev nyiam tsis nyob hauv nws.
    16 Vim txhua yam uas nyob hauv lub ntiaj teb, xws li lub cev txoj kev xav kev ntshaw sib daj sib dee, lub qhov muag txoj kev xav kev ntshaw pom, thiab lub neej txoj kev xav ua kom txaus lub siab ntshaw, txhua yam ntawd tsis yog tuaj ntawm Leej Txiv tuaj tiam sis yog tuaj ntawm lub ntiaj teb tuaj xwb.
    17 Lub ntiaj teb yuav dua mus, nrog lub ntiaj teb txoj kev ntxias neeg rub neeg; hos tus ua raws li Tswv Ntuj lub siab nyiam, mas nws yuav nyob mus li tas ib txhiab ib txhis.

    NPN 96: 7-8a, 8b-9, 10

    Txais: (11a) Kom lub ntuj zoo siab thiab lub ntiaj teb hom khaj!

    Cov cuab yim neeg nyob hauv cov haiv neeg, nej muab rau HUAB TAIS,
    nej muab lub koob meej thiab lo lus qhuas rau HUAB TAIS,
    nej muab lub koob meej uas phim HUAB TAIS lub npe rau nws.

    Txais…

    Nqa nej cov paj tshab nkag mus rau hauv nws cov tshav loog;
    nej hnav ib co tsoos ntshiab mus pe hawm HUAB TAIS.
    Tas lub ntiaj teb, nej yuav tshee na ntawm nws xub ntiag.

    Txais…

    Cov haiv neeg yuav sib hais zom zaws tias: HUAB TAIS yog tus vaj.
    Nws tau tsim lub ntiaj teb kom ruaj khov, yuav muab tshem tsis tau.
    Nws yuav tswj txhua haiv neeg raws kev ncaj ncees.

    Txais…

    As Les Lus Yas

    Txais: As les lus yas, As les lus yas

    Ib hnub nsthiab tawm tuaj ziab rau peb lawm.
    Txhua haiv neeg, nej cia li tuaj pe hawm HUAB TAIS.
    Hnub no muaj ib qho pom kev loj ci tuaj rau lub ntiaj teb lawm.

    Txais: As les lus yas, As les lus yas

    Ntawv Moo Zoo: LK 2: 36-40

    36 Tseem muaj ib tug poj saub hu ua As Nas, yog Fas Nus Es tus ntxhais, xeem As Sej. Nws muaj hnub nyoog nchav lawm. Thaum hluas, nws mus yuav txiv, nws nrog nws tus txiv nyob tau xya xyoo xwb.
    37 Ces nws ua poj ntsuam laus li ntawd txog thawm nws muaj yim caum plaub xyoos lawm. Nws tsis nrug ntawm lub Tuam Tsev Teev Ntuj mus li. Nws yoo mov thiab hais cov zaj teev Ntuj los pe hawm Tswv Ntuj nruab hnub hmo ntuj.
    38 Tib lub sij hawm ntawd, As Nas kuj los nyob ntawd thiab, nws cav lus zoo ua Tswv Ntuj tsaug, thiab nws hais txog tus me nyuam rau txhia leej txhia tus uas tos ntsoov tias yuav muaj tus tuaj cawm Yes Lus Xas Les.
    39 Thaum lawv ua txhua yam raws li Huab Tais Txoj Cai tas lawm, lawv rov mus Nkas Lis Lais teb, mus rau hauv lawv lub zos Nas Xas Les.
    40 Hos ntawm tus me nyuam, mas nws hlob thiab muaj zog zuj zus tuaj; nws muaj kev thoob tsib puv npo hauv nws, thiab Tswv Ntuj lub txiaj ntsim nyob saum nws.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 30th December 2021, 8:14 am

    Tim 31 lub 12 Hlis 2021

    Hnub Rau Lis Piam Ib Caij Yes Xus Yug los - Hnub Xya hauv Thawj Yim Hnub Yes Xus Yug Los
    Lectionary: 204

    XHLT: LN Sylvester I, ua Vaj Qhia

    Zaj Nyeem Ib: 1 ZAM 2: 18-21

    18 Cov me nyuad, twb txog lub zim txwv kawg lawm. Nej tau hnov hais tias tus tiv Leej Pleev yuav tuaj no, zaum no twb muaj ntau tus uas tiv Leej Pleev tau tshwm tuaj lawm; vim li ntawd peb thiaj paub tias txog lub zim txwv kawg lawm.
    19 Cov neeg ntawd tawm hauv peb mus, tab sis lawv tsis yog cov uas koom nrog peb ua ib pab tiag. Yog lawv nrog peb koom ua ib pab tiag, mas lawv yeej tseem yuav nrog peb ua ke. Lawv tawm mus kom sawv daws pom xyeem tias lawv tsis nrog peb koom ua ib pab neeg.
    20 Ntawm nej, mas nej tau txais cov roj ntawm tus Ntshiab los pleev nej, ces nej sawv daws muaj kev paub kev to taub lawm.
    21 Kuv sau ntawv tuaj rau nej, tsis yog vim nej tsis paub qhov tseeb; kuv sau tuaj, yog vim nej twb paub qhov tseeb lawm, thiab vim txhua yam lus dag yeej nyob tsis tau nrog qhov tseeb.

    NPN 96: 1-2, 11-12, 13

    Txais: (11a) Kom lub ntuj zoo siab thiab lub ntiaj teb hom khaj!

    Nej hu ib zaj nkauj tshiab rau HUAB TAIS,
    tas cov teb chaws, nej hu nkauj rau HUAB TAIS,
    nej hu nkauj rau HUAB TAIS, nej cav txog nws lub npe.
    Nej tshaj tawm txog nws txoj kev cawm seej hnub dhau hnub.

    Txais…

    Kom lub ntuj zoo siab thiab lub ntiaj teb hom khaj;
    kom lub hiav txwv thiab txhua yam nyob hauv qw nrov nroo ntws;
    kom cov tiaj nrag thiab txhua yam nyob hauv luag ntxhi!
    Ces tas txhua tsob ntoo nyob hauv hav zoov
    yuav dhia zoo siab ntawm HUAB TAIS xub ntiag.

    Txais…

    HUAB TAIS uaj lawm,
    nws tuaj tswj lub ntiaj teb.
    Nws yuav tswj ntiaj teb neeg raws kev ncaj
    thiab cov haiv neeg raws kev haum pheej.

    Txasi…

    As Les Lus Yas: ZAM 1: 14a 12a

    Txais: As les lus yas, as les lus yas

    Tswv Ntuj Lo Lus yug los muaj ib lub cev nqaij thiab nws tau nrog peb nyob.
    Cov uas txais nws, nws pub kom lawv
    muaj peev xwm ua tau Tswv Ntuj cov me nyuam.

    Txais: As les lus yas, as les lus yas

    Ntawv Moo Zoo: ZAM 1: 1-18

    1 Thaum lub hauv paus, Leej Lo Lus yeej nyob lawm.
    Leej Lo Lus nrog Tswv Ntuj nyob, Leej Lo Lus yog Tswv Ntuj.
    2 Thaum lub hauv paus, nws nrog Tswv Ntuj nyob.
    3 Tas ib puas tsav yam tshwm tawm los vim nws.
    Yog tsis muaj nws, yuav tsis muaj ib yam dab tsi tshwm tau los nyob.
    4 Yam uas nws ua kom tshwm tawm los yog txoj sia;
    txoj sia ntawd yog qhov pom kev kaj tib neeg.
    5 Qhov pom kev ci rau hauv qhov tsaus ntuj,
    qhov tsaus ntuj ua tsis tau kom qhov pom kev ploj li.
    6 Muaj ib tug neeg uas yog Tswv Ntuj xa nws tuaj, nws lub npe hu ua Zam.
    7 Nws tuaj yog tuaj ua tim khawv, kom tau hais lus pov thawj txog qhov pom kev,
    ces txhua leej txhua tus thiaj yuav ntseeg vim nws.
    8 Tus ntawd nws tsis yog qhov pom kev, tab sis nws tuaj ua pov thawj txog qhov pom kev.
    9 Qhov pom kev tseeb uas ci tuaj kaj txhua leej txhua tus neeg,
    nws tau tuaj nyob hauv lub sim ceeb.
    10 Nws tuaj nyob hauv lub sim ceeb uas yog nws ua kom tshwm tawm los,
    tiam sis lub sim ceeb tsis paub nws li.
    11 Nws los nyob hauv nws tsev neeg, tiam sis nws cov neeg tsis txais nws li.
    12 Tab sis cov uas txais nws, mas nws pub lub hwj huam rau lawv kom lawv ua tau
    Tswv Ntuj cov me nyuam; lawv yog cov uas ntseeg txog nws lub npe.
    13 Cov ntawd lawv tsis yug los raws ntiaj teb txoj kev xeeb tawm los, tsis yog neeg xav kom lawv yug los,
    thiab kuj tsis yog neeg txiav txim siab ua kom lawv yug los; tiam sis lawv yug ntawm Tswv Ntuj los.
    14 Leej Lo Lus tau tshwm los muaj ib lub cev nqaij, nws tau tsa tsev nrog peb nyob. Peb tau ntsia ntsoov nws lub hwj chim; yog ib lub hwj chim tsim nyog Leej Txiv ib Leeg Tub twm zeej yuav tsum muaj; nws muaj txiaj ntsim thiab qhov tseeb nyob puv hauv nws.
    15 Zam ua tim khawv txog nws, Zam tau qw tshaj tawm li no: "Tus no yog tus kuv tau hais txog nws tias: ‘Tus uas lawv kuv qab tuaj, nws loj dua kuv, vim nws yeej ib txwm nyob ua ntej kuv lawm.’"
    16 Peb sawv daws puav leej tau txais qhov uas nws muaj puv npo nyob bauv nws, yog tau txais txiaj ntsim tas txiaj ntsim dua,
    17 vim tias txoj Cai yog hla ntawm Mais Xes tuaj, hos lub txiaj ntsim thiab txoj kev tseeb yog tuaj ntawm Yes Xus Pleev tuaj.
    18 Tsis muaj leej twg tau pom dua Tswv Ntuj ib zaug li; yog Leej Tub Twm Zeej uas yog Tswv Ntuj, nyob rawv ntawm Leej Txivi ib sab, nws qhia kom peb paub Tswv Ntuj.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 31st December 2021, 8:59 am

    Tim 1 lub 1 Hlis 2022

    Hnub Yim hauv Thawj Yim Hnub Yes Xus Yug Los

    Hnub Pib Xyoo Tshiab Hwm Mab Liab ua Tswv Ntuj Niam

    Lectionary: 18

    Zaj Nyeem Ib: XAM PHAJ 6: 22-27

    22 HUAB TAIS hais rau Mais Xes tias:
    23 "Koj hais rau As Loos thiab nws cov tub tias :
    ‘Nej yuav foom hmoov zoo rau cov His Xas Lais li no, nej yuav hais rau lawv tias:
    24 Thov kom HUAB TAIS foom hmoov zoo rau nej thiab pov hwm nej!
    25 Thov kom HUAB TAIS ua nws lub ntsej muag ci ntsa iab
    rau saum nej thiab pub nws lub txiaj ntsim rau nej!
    26 Thov kom HUAB TAIS tsa qhov muag ntsia nej
    thiab pub kev thaj yeeb rau nej!'
    27 Lawv yuav tuav kuv lub npe rau saum cov His Xas Lais zoo li no,
    ces kuv yuav foom hmoov zoo rau lawv."

    NPN 67: 2-3, 5, 6+8.

    Txais: (2a) Thov kom Tswv Ntuj foom moov zoo
    rau peb vim nws khuv leej peb.

    Thov kom Tswv Ntuj khuv leej peb thiab foom hmoov zoo rau peb;
    kom nws ua nws lub ntsej muag ci tuaj rau saum peb.
    Ces lub ntiaj teb thiaj yuav paub txog koj txoj kev,
    tas txhua haiv neeg thiaj yuav paub txog koj txoj kev cawm.

    Txais: (2a) Thov kom Tswv Ntuj foom hmoov zoo
    rau peb vim nws khuv leej peb.

    Kom cov kuj cuab zoo siab thiab hom khaj
    vim koj tswj cov haiv neeg raws txoj kev ncaj;
    koj yog tus qhia kev rau cov kuj cuab nyob ntiaj teb taug

    Txais: (2a) Thov kom Tswv Ntuj foom hmoov zoo
    rau peb vim nws khuv leej peb.

    Kom cov haiv neeg cav txog koj, Tswv Ntuj,
    kom tas txhua xeem neeg cav txog koj !
    Thov kom Tswv Ntuj foom hmoov zoo rau peb,
    thiab kom tas cov npoo ntiaj teb kawg hwm nws !

    Txais: (2a) Thov kom Tswv Ntuj foom hmoov zoo
    rau peb vim nws khuv leej peb.

    Zaj Nyeem Ob: NKAS LAS TIAS 4: 4-7

    Cov kwv tij nkauj muad:
    4 Thaum txog lub caij teem lawm, Tswv Ntuj tso nws Leej Tub tuaj,
    yug ntawm ib tug poj niam los, yug los zwm rau Txoj Cai,
    5 kom tau txhiv cov uas zwm rau Txoj Cai,
    ces peb thiaj tau txais txoj kev los ua nws cov tub sau.
    6 Yog kom muaj kev zeem tseeb tias nej yog Tswv Ntuj cov tub,
    nws thiaj tau xa nws Leej Tub lub Tswv Yim tuaj nyob hauv peb lub siab,
    kom nws qw hauv peb tuaj tias: ‘As Npas, Txiv !’
    7 Ua li mas nej tsis yog tub qhe ntxiv lawm, nej yog ib co tub tiag;
    yog tias nej yog tub tiag ces nej kuj yog cov yuav tau txais
    lub cuab tam nyob hauv Tswv Ntuj thiab.

    As Les Lus Yas: Hes Nplaws 1: 1-2

    Txais: As les lus yas, as les lus yas

    Yav tas los, Tswv Ntuj hais lus
    rau peb cov yawg koob nyob hauv cov yaj saub;
    lub caij nyem no, nws hais lus rau peb nyob hauv nws leej Tub.

    Txais: As les lus yas, as les lus yas

    Ntawv Moo Zoo: LK 2: 16-21

    16 Cov tub zov yaj maj zeeg tuaj mus Npes Les Hes, lawv pom Mab Liab
    thiab Yos Xes, thiab pom tus me nyuam mos pw hauv lub dab nyuj.
    17 Thaum lawv pom li ntawd, lawv tshaj lo lus uas tus Tshiab
    tau qhia rau lawv txog tus me nyuam rau sawv daws paub.
    18 Tas txhua tus uas tau hnov kuj qhuas kawg
    txog tej lus uas cov zov yaj hais rau lawv.
    19 Hos Mab Liab, nws muab tej lus no khaws tas huv si cia
    thiab muab coj los xav rau nruab siab.
    20 Ces cov zov yaj rov mus tsev, lawv foom koob meej rau Tswv Ntuj
    thiab cav lus zoo txog nws, vim tas txhua yam lawv tau hnov
    thiab tau pom muaj raws li cov tshiab tau hais rau lawv.
    21 Thaum muaj yim hnub lawm, yog hnub ua lub cim txiav rau tus me nyuam,
    lawv tis npe rau nws hu ua Yes Xus, yog lub npe uas tus Tshiab tau qhia
    thaum nws tseem tsis tau xeeb los rau hauv plab.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 2nd January 2022, 3:01 pm

    Tim 3 lub 1 Hlis 2022

    Hnub Ob Lis Piam Yes Xus Tawm Tuaj (Epiphany) Nruab Lis Piam Xyoo II

    Lectionary: 212

    XHLT: Hwm Yes Xus lub Npe Ntshiab tas nrho

    Zaj Nyeem Ib: 1 ZAM 3: 22–4:6


    Cov Zoo Nyiad,
    22 Peb txais yam peb thov ntawm Tswv Ntuj, vim peb coj nws cov lus qhia, thiab peb ua yam uas xis nws siab.
    23 Tswv Ntuj Lo Lus qhia yog lo lus no: kom peb ntseeg txog nws Leej Tub Yes Xus Pleev lub npe, thiab kom peb sib nyiam sib hlub raws li lo lus qhia nws tau muab rau peb.
    24 Tus coj Tswv Ntuj cov lus qhia, nws nyob hauv Tswv Ntuj, thiab Tswv Ntuj nyob hauv nws. Peb paub tias Tswv Ntuj nyob hauv peb, vim muaj Leej Ntuj Plig uas nws tau pub rau peb qhia rau peb paub.
    4: 1 Cov zoo nyiad, nej txhob ntseeg txhua lub tswv yim mog. Nej yuav sim cov tswv yim ntawd saib puas yog tuaj ntawm Tswv Ntuj tuaj tso. Vim ntau tus yaj saub cuav tau tawm mus nyob hauv lub qab ntuj lawm.
    2 Nej yuav paub tias yog Tsuawv Ntuj lub tswv yim mas yauv tsum muaj li no: lub tswv yim twg zeem tseeb tias Yes Xus Pleev nqes los yuav ib lub cev nqaij, mas lub tswv yim ntawd tuaj ntawm Tswv Ntuj tuaj.
    3 Lub tswv yim twg tsis zeem tseeb txog Yes Xus, mas nws tsis tuaj ntawm Tswv Ntuj tuaj, yog tus tiv Leej Pleev lub tswv yim xwb. Nej twb tau hnov lawm tias tus tiv Leej Pleev yuav tuaj; nyem no, nws twb nyob hauv lub qab ntuj neeg lawm.
    4 Cov me nyuad, nej yog Tswv Ntuj tug, nej twb yeej cov tiv Leej Pleev lawm. Vim Tus nyob hauv nej, nws loj dua tus nyob hauv lub qab ntuj neeg.
    5 Lawv, mas lawv yog lub qab ntuj neeg tug. Lawv hais lus raws li lub qab ntuj neeg hais, ces lub qab ntuj neeg mloog lawv.
    6 Ntawm peb, mas peb yog Tswv Ntuj tug; leej twg paub Tswv Ntuj, mas nws mloog peb; hos tus tsis yog Tswv Ntuj tug, mas nws tsis mloog peb. Li ntawd, peb thiaj paub tias lub tswv yim twg yog qhov tseeb, thiab lub tswv yim twg yog qhov yuam kev.

    NPN 2: 7bc-8, 10-12a

    Txais: (8ab) Kuv yuav muab tas ib tsoom haiv neeg ua cuab tam pub rau koj.

    HUAB TAIS hais rau kuv tias: ‘Koj yog kuv leej tub,
    hnub no kuv tau yug koj los.
    Koj thov kuv ces kuv yuav muab tas
    ib tsoom haiv neeg ua cuab tam pub rau koj,
    thiab lub ntiaj teb mus txog tim npoo
    ntiaj teb kawg yuav yog koj teej tug.”

    Txais…

    Ib tsoom vaj, nej yuav tsum cuab pob ntseg mloog,
    cov tswj lub ntiaj teb, nej yuav tsum muaj kev ntshai.
    Nej yuav hwm HUAB TAIS, nej tsob hwb nws;
    Nej yuav dhia zoo siab nrog kev ntshai
    tshee na ntawm nws xub ntiag.

    Txais…

    As Les Lus Yas: MT 4: 23

    Txais: As les lus yas, as les lus yas.

    Yes Xus tshaj lub Moo Zoo txog lub Ceeb Tsheej
    thiab nws kho txhua yam mob hauv tsoom pej xeem zoo hlo.

    Txais: As les lus yas, as les lus yas.

    Ntawv Moo Zoo: MT 4: 12-17, 23-25

    12 Yes Xus hnov tias luag ntes Zam lawm, ces nws khiav mus rau Nkas Lis Lais teb.
    13 Nws tso Nas Xas Les tseg, nws mus nyob rau Kas Fas Naus, ntawm ntug dej ntuj, nyob ntawm Ntxas Npus Loos thiab Nes Tas Lis daim av.
    14 Li ntawd thiaj muaj raws li yaj saub His Xais xub hais tseg tias :
    15 “Ntxas Npus Loos daim av thiab Nes Tas Lis daim av, kev mus rau dej ntuj, cov nyob sab dej Yos Las Das tim ub, cov neeg teev pej kum dab daim av Nkas Lis Lais,
    16 haiv neeg uas zaum nyob hauv kev tsaus ntuj, lawv tau pom ib qho pom kev ci loj; nyob saum cov neeg uas zaum nyob hauv lub teb chaws muaj kev tuag roos lawv, muaj ib qho pom kev ci tawm tuaj kaj lawv lawm.”
    17 Txij thaum ntawd los, Yes Xus pib qhuab qhia tias: "Nej hloov siab mog, vim lub Ceeb Tsheej saum ntuj los txog ze lawm.”
    23 Yes Xus mus ncig thoob lub xeev Nkas Lis Lais, nws qhuab qhia nyob hauv lawv cov tsev txoos, nws tshaj lub Moo Zoo txog lub Ceeb Tsheej, nws kho tas puas tsav yam mob, puas tsav yam txiab nkeeg hauv tsoom pej xeem zoo tas.
    24 Nws lub moo nto mus thoob Xis Lias teb. Ces sawv daws coj cov neeg raug txhua hom mob, txhua hom txiab xeeb tuaj rau nws: cov raug dab, cov neeg vwm, cov tuag tes tuag taw huv si. Nws kho lawv sawv daws zoo tas.
    25 Muaj tej pab neeg coob coob tuaj ntawm Nkas Lis Lais, ntawm Des Kas Pos Lis, ntawm Yes Lus Xas Les, ntawm Yus Das teb, thiab sab dej Yos Las Das tim ub tuaj, lawv tuaj caum Yes Xus.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 3rd January 2022, 6:54 am

    Tim 4 lub 1 Hlis 2022

    Hnub Peb Lis Piam Yes Xus Tawm Tuaj (Epiphany) Nruab Lis Piam Xyoo II

    Lectionary: 213

    Yuav Hwm LN Elizabeth Ann Seton, ib tug Leej Phauj [Hwm nyob As Mes Lis Kas teb]

    Zaj Nyeem Ib: 1 ZAM 4: 7-10


    7 Cov zoo nyiad, peb yuav sib nyiam sib hlub mog , vim txoj kev nyiam tuaj ntawm Tswv Ntuj tuaj; ua li mas tus twg nyiam, tus ntawd yug ntawm Tswv Ntuj los, thiab nws paub Tswv Ntuj.
    8 Tus tsis muaj kev nyiam, mas nws tsis paub Tswv Ntuj, vim Tswv Ntuj yog txoj kev nyiam.
    9 Tswv Ntuj txoj kev nyiam peb tawm los rau qhov muag pom xyeem li no: Tswv Ntuj xa nws Leej Tub Twm Zeej tuaj nyob ntiaj teb no, kom peb muaj txoj sia nyob hauv nws Leej Tub.
    10 Txoj kev nyiam yog zoo li no: Tsis yog vim peb nyiam Tswv Ntuj, tiam sis yog vim Tswv Ntuj nyiam peb, ces nws thiaj xa nws Leej Tub tuaj ua nqi txhiv peb ntawm peb cov txhaum.

    NPN 72: 1-2, 3-4, 7-8

    Txais: (11) HUAB TAIS, txhua haiv neeg nyob hauv ntiaj teb no yuav pe hawm koj.

    Tswv Ntuj, thov koj pub txoj kev txawj txiav txim rau tus vaj,
    thiab txoj kev ncaj ncees rau vaj tus tub.
    Nws thiaj yuav tswj koj haiv neeg raws kev ncaj ncees
    thiab koj cov neeg me raws kev txawj txiav txim .

    Txais…

    Cov roob siab yuav pub kev thaj yeeb rau tsoom pej xeem,
    cov pov roob yuav pub txoj kev ncaj rau lawv.
    Nws yuav tuaj cov pluag hauv tsoom pej xeem tog,
    nws yuav cawm cov txom nyem tej me nyuam.

    Txais…

    Kev ncaj yuav tawg paj lub caij nws ua vaj,
    thiab yuav muaj kev thaj yeeb lug mus txog thaum tsis muaj lub hli ntxiv.
    Thov kom nws kav txij ib lub hiav txwv mus rau lwm lub,
    thiab txij tus Niam Dej mus txog tim npoo ntiaj teb kawg.

    Txais…

    As Les Lus Yas: LK 4: 18

    Txais: As les lus yas, as les lus yas

    Huab Tais tau xa kuv tuaj qhia ib lub moo zoo rau cov pluag
    thiab tshaj kev twj lij rau cov neeg raug txim.

    Txais: As les lus yas, as les lus yas

    Ntawv Moo Zoo: MK 6: 34-44

    34 Thaum Yes Xus nqes nkoj, nws pom ib pab neeg coob coob, nws lub siab quaj dhi hlub lawv, vim lawv zoo li ib co yaj uas tsis muaj tswv zov. Ces Yes Xus pib qhia lawv txog ntau yam.
    35 Thaum lub sij hawm lig lawm, cov thwj tim los hais rau Yes Xus tias: “Qhov chaw no tsis muaj neeg nyob li, thiab tsam no lig lawm,
    36 koj tso lawv rov mus, kom lawv mus muas noj ntawm cov thaj tsam thiab cov zej zog nyob ib ncig ntawm no.”
    37 Tiam sis Yes Xus hais rau lawv tias: "Nej muab mov rau lawv noj mas." Cov thwj tim hais tias: "Peb puas yuav tsum siv nyiaj li ob puas hnub nqe zog mus muas mov coj los rau lawv noj?”
    38 Yes Xus hais rau lawv tias: "Nej muaj pes tsawg lub ncuav mov? Nej mus xyuas saib."
    Cov thwj tim mus nug, ces lawv hais tias: "Muaj tsib lub ncuav mov, thiab ob tug ntses."
    39 Yes Xus kom cov thwj tim coj sawv daws zaum ua tej pab tej pawg saum cov nroj ntsuab.
    40 Ces tas sawv daws zaum ua tej leej muaj ib puas leej, tej leej muaj tsib caug leej.
    41 Yes Xus tuav tsib lub ncuav mov thiab ob tug ntses, nws tsa muag ntsia saum ntuj, nws hais zaj foom hmoov zoo rau, nws muab cov ncuav mov ntais, nws cev rau cov thwj tim kom lawv nqa mus faib rau sawv daws. Yes Xus kuj muab ob tug ntses faib rau sawv daws thiab.
    42 Txhua leej txhua tus puav leej tau noj thiab sawv daws tau noj tsau npo.
    43 Lawv khaws tej sab mov seem tau puv kaum ob tawb nrog cov nqaij ntses seem.
    44 Cov neeg uas tau noj cov mov ntawd muaj tsib txhiab leej txiv neej.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 4th January 2022, 10:57 am

    Tim 5 lub 1 Hlis 2022

    Hnub Plaub Lis Piam Yes Xus Tawm Tuaj Nruab Lis Piam Xyoo II

    Lectionary: 214

    Yuav Hwm LN John Neumann, ua Tswv Qhia

    Zaj Nyeem Ib: 1 ZAM 4: 11-18

    11 Cov zoo nyiad, yog Tswv Ntuj nyiam peb npaum li ntawd, mas peb kuj yuav tsum sib nyiam sib hlub thiab.
    12 Tsis muaj leej twg tau pom dua Tswv Ntuj ib zaug li, tiam sis yog peb sib nyiam sib hlub, mas Tswv Ntuj nyob hauv peb, thiab nws txoj kev nyiam yuav zoo txhij txhua tiav log nyob hauv peb.
    13 Qhov ntawd yog qhov qhia rau peb paub tias peb nyob hauv Tswv Ntuj, thiab nws nyob hauv peb, vim nws tau pub nws Leej Tswv Yim rau peb lawm.
    14 Peb tau pom ntsoov thiab peb ua tim khawv zeem tseeb tias Leej Txiv tau xa nws Leej Tub tuaj ua tus cawm lub qab ntuj neeg tiag.
    15 Leej twg lees tias Yes Xus yog Tswv Ntuj Leej Tub, mas Tswv Ntuj nyob hauv nws, thiab nws nyob hauv Tswv Ntuj.
    16 Ntawm peb mas peb paub thiab ntseeg tias Tswv Ntuj nyiam peb hlub peb. Tswv Ntuj yog txoj kev nyiam; yog leej twg nyob hauv txoj kev nyiam, mas nws kuj nyob hauv Tswv Ntuj, thiab Tswv Ntuj nyob hauv nws.
    17 Yog peb coj li ntawd mas txoj kev nyiam yuav zoo tiav log nyob hauv peb, ces peb yuav muaj kev tso siab lug thaum txog hnub txiav txim, vim tias Tswv Ntuj zoo li cas, mas peb kuj zoo li ntawd nyob hauv ntiaj teb no thiab.
    18 Tsis muaj kev ntshai nyob hauv txoj kev nyiam li, txoj kev nyiam uas zoo tiav log muab txoj kev ntshai tshem tawm mus, vim tias nyob hauv txoj kev ntshai, mas muaj kev ntshai raug txim; vim li ntawd, leej twg ntshai, mas nws tseem tsis tau zoo tiav log nyob hauv txoj kev nyiam.

    NPN 72: 1-2, 10, 12-13

    Txais: (11) HUAB TAIS, txhua haiv neeg nyob hauv ntiaj teb no yuav pe hawm koj.

    Tswv Ntuj, thov koj pub txoj kev txawj txiav txim rau tus vaj,
    thiab txoj kev ncaj ncees rau vaj tus tub.
    Nws thiaj yuav tswj koj haiv neeg raws kev ncaj
    thiab koj cov neeg me rawj kev txawj txiav txim .

    Txais…

    Cov vaj nyob Tas Xis thiab nyob hauv cov pov txwv yuav nqa paj tshab tuaj;
    Cov vaj nyob Xes Npas thiab Xas Npas yuav nqa nyiaj nqa kub tuaj rau nws.

    Txais…

    Nws yuav cawm tus pluag uas hu txog nws,
    thiab yuav npo tus txom nyem uas tsis muaj neeg pab.
    Nws yuav hlub cov neeg me thiab cov txom nyem;
    nws yuav cawm cov pluag txoj sia.

    Txais…

    As Les Lus Yas: 1 TM 3: 16

    Txais: As les lus yas, as les lus yas

    Huab Tais Pleev, koj muaj koob meej,
    peb tshaj txog koj rau cov neeg teev pej kum dab paub.
    Huab Tais Pleev, koj muaj koob meej, tas ntiaj teb neeg ntseeg txog koj.

    Txais: As les lus yas, as les lus yas

    Ntawv Moo Zoo: MK 6: 45-52

    45 Thaum cov tsib txhiab leej neeg tau noj mov tsau plab tas, Yes Xus txhib nws cov thwj tim kom nce nkoj ua nws ntej mus lawm sab ntug dej tim ub, mus rau Npes Xais Das, hos Yes Xus tseem nyob tos tsoom sid rov qab mus tsev tas tso.
    46 Thaum lawv mus tas lawm, nws nce mus saum roob mus teev ntuj saud.
    47 Thaum tsaus ntuj lawm, lub nkoj twb mus deb txog tom plawv dej ntuj lawm, hos Yes Xus tib leeg tseem nyob tim ntug nqhuab.
    48 Yes Xus pom cov thwj tim nquam nkoj raug cua hlob ntsawj lawv loj kawg, vim cua tshuab tom hauv ntej tuaj. Thaum yuav kaj ntug kwv yees peb teev sawv ntxov, Yes Xus mus ko taw saum nplaim dej caum lawv qab, nws npaj yuav huas lawv ntej.
    49 Cov thwj tim pom Yes Xus mus kev saum nplaim dej, lawv xav tias yog dab, ces lawv qw zom zaws.
    50 Sawv daws puav leej pom tib si ces lawv ntshai kawg. Tab sis, Yes Xus hais lus tam sis ntawd rau lawv, nws hais tias: "Nej ua siab loj! Yog kuv xwb, nej tsis txhob ntshai."
    51 Ces Yes Yes Xus thiaj nce mus nrog lawv nyob hauv nkoj, cua cia li tu nrho. Cov thwj tim ceeb tas thiab poob siab loj kawg nkaus.
    52 Lawv tseem tsis tau to taub tias muaj dab tsi tshwm sim txog cov ncuav mov li, lawv lub siab tseem nyob tawv qhawv qhwv nrees xwb.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 5th January 2022, 4:50 am

    Tim 6 lub 1 Hlis 2022

    Hnub Tsib Lis Piam Yes Xus Tawm Tuaj Nruab Lis Piam Xyoo II

    Lectionary: 215

    XHLT: LN André Bessette, ua Leej Tij (hwm nyob USA)

    Zaj Nyeem Ib: 1 ZAM 4: 19–5:4


    Cov zoo nyiad,
    19 Peb nyiam Tswv Ntuj vim nws xub tau nyiam peb lawm.
    20 Yog leej twg hais tias: “Kuv nyiam Tswv Ntuj,” tab sis nws ntxub nws tus kwv tij, mas nws yog ib tug neeg dag; vim tus tsis nyiam nws tus kwv tij uas nws qhov muag pom tau, mas nws nyiam tsis tau Tswv Ntuj uas nws qhov muag tsis tau pom.
    21 Lo lus qhia uas peb tau txais ntawm nws los yog lo lus tias: Leej twg nyiam Tswv Ntuj mas nws kuj yuav tsum nyiam nws tus kwv tij thiab.
    5: 1 Txhua leej uas ntseeg tias Yes Xus yog Leej Pleev, mas nws yug ntawm Tswv Ntuj los. Vim leej twg nyiam leej Txiv mas nws kuj nyiam tus yug ntawm leej Txiv los thiab.
    2 Qhov ntawd ua kom peb paub tias peb nyiam Tswv Ntuj cov me nyuam, thaum peb nyiam Tswv Ntuj, thiab peb coj nws cov lus qhia.
    3 Vim txoj kev nyiam Tswv Ntuj yog li no: Yog coj nws cov lus qhia. Tswv Ntuj cov lus qhia tsis hnyav rau peb li.
    4 Vim leej twg yug ntawm Tswv Ntuj los mas tus ntawd yeej lub qab ntuj neeg; txoj kev uas yeej lub qab ntuj neeg yog peb txoj kev ntseeg.

    NPN 72: 1-2, 14+15bc, 17

    Txais: (11) HUAB TAIS, txhua haiv neeg nyob hauv ntiaj teb no yuav pe hawm koj.

    Tswv Ntuj, thov koj pub txoj kev txawj txiav txim rau tus vaj,
    thiab txoj kev ncaj ncees rau vaj tus tub.
    Nws thiaj yuav tswj koj haiv neeg raws kev ncaj,
    thiab koj cov neeg me raws kev txawj txiav txim .

    Txais…

    Nws yuav cawm lawv dim ntawm txoj kev
    raug luag dag thiab raug luag tsim txom,
    thiab nws yuav saib lawv cov ntshav muaj nuj nqes.
    Kom muaj tus thov ntuj rau lawv tas mus li;
    hnub dhau hnub lawv yuav cav txog nws.

    Txais…

    Thov kom nws lub npe nto moo mus li,
    kom nws lub npe nyob ntev npaum lub hnub.
    Tas txhua xeem neeg nyob ntiaj teb yuav
    txais txoj hmoov zoo nyob hauv nws,
    tas txhua haiv neeg yuav tshaj txog nws txoj kev zoo siab.

    Txais…

    As Les Lus Yas: LK 4: 18

    Txais: As les lus yas, as les lus yas

    HUAB TAIS tau xa kuv tuaj qhia ib lub moo zoo rau cov pluag
    thiab tshaj kev twj lij rau cov neeg raug txim.

    Txais: As les lus yas, as les lus yas.

    Ntawv Moo Zoo: LK 4: 14-22

    14 Yes Xus rov los rau Nkas Lis Lais nyob hauv Leej Ntuj Plig lub hwj huam. Nws lub moo nto lug mus puv ib cheeb tsam cov zej zog nyob ntawd.
    15 Nws qhia tsoom sid nyob hauv lawv cov tsev txoos, thiab tas sawv daws qhuas nws kawg.
    16 Ces Yes Xus los txog Nas Xas Les, lub zos uas nws nyob hlob; hnub Xas Npas Tos, nws mus hauv lub tsev txoos xws li nws ua kam, thiab nws sawv mus nyeem ntawv.
    17 Lawv cev tus Yaj Saub His Xais kauj ntawv rau nws. Nws nthuav kauj ntawv, nws nrhiav tau nqe lus uas sau tias:
    18 “Huab Tais lub Tswv Yim nyob saum kuv, vim nws tau pleev roj los qee kuv kom kuv mus tshaj lub Moo Zoo rau cov pluag; nws xa kuv mus tshaj kev twj lij rau cov neeg nyob txim, thiab kev rov pom kev rau cov dig muag, mus tso cov raug luag quab yuam kom rov tau nyob twj lij,
    19 thiab tshaj tias yog ib lub zoo xyoo rau Huab Tais pub nws cov txiaj ntsim.”
    20 Yes Xus rov kauv kauj ntawv rau, nws rov muab rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus.
    21 Ces Yes Xus hais rau lawv tias: “Hnub no, cov lus nyob hauv zaj ntawv no tsheej xeeb raws li nej tau hnov lawm."
    22a Tas cov neeg ntawd hais lus zoo kawg txog nws, lawv ceeb tas txog cov lus muaj txiaj ntsim tawm hauv nws lub ncauj los.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 6th January 2022, 12:11 pm

    Tim      7     lub     1     Hlis     2022

    Hnub Rau Lis Piam Yes Xus Tawm Tuaj Nruab Lis Piam Xyoo II

    Lectionary: 216

    XHLT:  LN Raymond Peñafort, ua Leej Choj

    Zaj Nyeem Ib:   1 ZAM 5: 5-13

    Cov zoo nyiad,
    5 Tus yeej lub ntiaj teb yog leej twg? Tsuas kawg yog tus uas ntseeg tias Yes Xus yog Tswv Ntuj Leej Tub xwb.
    6 Tus hla dhau hauv dej thiab hauv ntshav tuaj yog Yes Xus Pleev, tsis yog hauv dej xwb, tiam sis yog hauv dej thiab hauv ntshav tuaj. Leej Ntuj Plig yog tus ua tim khawv txog qhov ntawd; Leej Ntuj Plig yog qhov tseeb.
    7 Ua li mas muaj peb tug ua tim khawv zeem txog qhov ntawd:
    8 Muaj Leej Ntuj Plig, muaj dej thiab muaj ntshav; peb tug no puav leej hais ib lo lus xwb.
    9 Yog peb twb ntseeg tib neeg lo lus tim khawv, masTswv Ntuj lo lus tim khawv haj yam yuav tsum loj dua.
    Tswv Ntuj lo lus tim khawv yog li no: Yog lo tias nws tau ua tim khawv txog nws Leej Tub lawm.
    10 Leej twg ntseeg txog Tswv Ntuj Leej Tub, mas nws tau lo lus tim khawv ntawd los nyob hauv nws. Hos tus tsis ntseeg mas nws muab Tswv Ntuj ua ib tug neeg dag, vim nws tsis ntseeg lo lus tim khawv uas Tswv Ntuj hais txog nws Leej Tub.
    11 Tswv Ntuj lo lus tim khawv yog li no: Tswv Ntuj tau pub txoj sia nyob mus li rau peb, txoj sia ntawd nyob hauv nws Leej Tub.
    12 Leej twg muaj Leej Tub, ces nws tau txoj sia; leej twg tsis muaj Tswv Ntuj Leej Tub, ces nws kuj tsis tau txoj sia thiab.
    13 Kuv sau tej no tuaj rau nej, kom nej paub tias, nej cov uas ntseeg txog Tswv Ntuj Leej Tub lub npe, mas nej tau txoj sia nyob mus li.

    NPN   147: 12-13, 14-15, 19-20

    Txais: (12a) Yes Lus Xas Les, koj cia li cav txog Huab Tais.
    Los: As les lus yas

    Yes Lus Xas Les, koj cav txog koj tus Huab Tais mog,
    Xis Yoos, koj qhuas txog koj tus Tswv Ntuj mog.
    Vim nws tau ua kom koj cov tab ntoo ntawm rooj vag khov tuaj lawm.
    Nws tau foom hmoov zoo rau koj cov tub ki uas nyob hauv koj.

    Txais: (12a) Yes Lus Xas Les, koj cia li cav txog Huab Tais.
    Los: As les lus yas

    Nws tau ua kom muaj kev thaj yeeb nyob hauv koj tus ciam av
    Nws ua kom koj muaj cov mov qab noj tsau npo.
    Nws xa nws lo lus ceeb toom tuaj rau ntiaj teb,
    nws lo lus khiav ceev nrooj tuaj.

    Txais: (12a) Yes Lus Xas Les, koj cia li cav txog Huab Tais.
    Los: As les lus yas

    Nws tau tshaj nws tej lus rau Yas Kos
    thiab nws tej kev cai tej lij choj rau His Xas Lais.
    Nws tsis tau ua li no dua rau lwm haiv neeg,
    tsis tau qhia nws tej cai lij choj rau lawv paub li. As les lus yas.

    Txais: (12a) Yes Lus Xas Les, koj cia li cav txog Huab Tais.
    Los: As les lus yas

    As Les Lus Yas:   MT 4: 23

    Txais: As les lus yas, as les lus yas

    Yes Xus tshaj lub Moo Zoo txog lub Ceeb Tsheej
    thiab nws kho txhua yam mob hauv tsoom neeg kom zoo hlo.

    Txais: As les lus yas, as les lus yas

    Ntawv Moo Zoo:   LK 5: 12-16

    12 Muaj ib zaug, Yes Xus nyob hauv ib lub nroog, txawm muaj ib tug neeg uas nws ib ce mob ruas tas huv si. Thaum nws pom Yes Xus, nws khoov ntsej muag ti av pe, nws thov Yes Xus tias: "Huab Tais, yog koj xav mas koj ua tau kom kuv rov huv tuaj."
    13 Ces Yes Xus cev tes mus kov tus neeg mob ruas, nws hais tias: "Kuv xav. Koj cia li huv tuaj." Tam sis ntawd tus kab mob ruas tso tus neeg tseg.
    14 Yes Xus txwv tus neeg ntawd kom txhob hais dab tsi rau leej twg li, tab sis nws hais tias: “Koj yuav mus thws koj lub cev rau tus Leej Choj saib, thiab koj yuav cev tej yam ntxuav txhaum raws li Mais Xes qhia, los ua pov thawj rau lawv paub."
    15 Yes Xus lub moo tsuas muaj haj yam nrov zuj zus xwb. Tej pab neeg coob coob tuaj sib txoos mloog Yes Xus, thiab kom Yes Xus kho lawv cov mob kom zoo.
    16 Tab sis Yes Xus mus nraim nyob tom tej thaj chaw tsis muaj neeg, nws mus teev Ntuj nyob ntawd.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 7th January 2022, 5:50 am

    Tim 8 lub 1 Hlis 2022

    Hnub Xya Lis Piam Yes Xus Tawm Tuaj Nruab Lis Piam Xyoo II

    Lectionary: 217

    Zaj Nyeem Ib: 1 ZAM 5: 14-21

    Cov zoo nyiad:
    14 Peb muaj kev tso siab lug rau Tswv Ntuj tias yog peb thov ib yam raws li nws lub siab xav, mas nws yeej yuav mloog peb.
    15 Yog peb paub tias nws mloog peb thaum peb thov ib yam dab tsi, mas peb kuj paub tias peb twb tau yam uas peb thov lawm.
    16 Ces yog leej twg pom nws tus kwv tij ua ib qho txhaum, uas tsis yog ib qho txhaum coj mus rau kev tuag, mas nws yuav thov Tswv Ntuj rau nws tus kwv tij, ces Tswv Ntuj yuav pub txoj sia rau tus kwv tij ntawd; qhov no yog hais rau cov neeg ua txhaum tsis yog txhaum coj mus rau kev tuag xwb, vim muaj ib hom txhaum uas coj mus rau kev tuag; kuv tsis yog hais kom nej thov Ntuj rau tus neeg ua qhov txhaum uas coj mus rau kev tuag ntawd.
    17 Tas puas tsav yam tsis zoo yeej yog kev txhaum, tab sis muaj ib hom txhaum tsis yog txhaum coj mus rau kev tuag.
    18 Peb paub zoo tias tus yug ntawm Tswv Ntuj los, mas nws tsis ua txhaum, vim tias Tus Uas Yug ntawm Tswv Ntuj los txuag nws nraim, ces tus Phem kov tsis tau nws.
    19 Peb paub tias peb yog Tswv Ntuj neeg, hos tas lub qab ntuj neeg nyob rau hauv tus Phem lub hwj huam.
    20 Peb kuj paub tias Tswv Ntuj Leej Tub twb tuaj lawm, nws pub txoj kev txawj to taub rau peb, kom peb paub tus uas yog tus Tseeb. Peb twb nyob hauv tus uas yog tus Tseeb, hauv nws Leej Tub Yes Xus Pleev lawm. Tus ntawd thiaj yog tus Tseem Tswv Ntuj, thiab yog txoj sia nyob mus li.
    21 Cov me nyuad, nej ceev faj zoo txog cov tswv ntuj cuav mog!

    NPN 149: 1-2, 3-4, 5-6a+9b

    Txais: (4a) Huab Tais zoo siab nyob hauv nws haiv neeg.
    los: As les lus yas

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    Kom cov His Xas Lais zoo siab nyob hauv tus uas tsim lawv los,
    kom Xis Yoos cov me nyuam luag ntxhi nyob hauv lawv tus vaj.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Kom lawv ua kev lom zem yoj cev cav txog nws lub npe,
    kom lawv hu nkauj cav txog nws
    nrog suab nruas thiab suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej ua zam npua cov neeg me.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Kom cov muaj lub siab ntseeg hom khaj nyob lub koob meej;
    kom lawv hu nkauj zoo siab saum lawv tej chaw zaum;
    kom lawv lub qa tsuas muaj qw suab cav txog Tswv Ntuj.
    Cov uas ntseeg txog nws muaj koob meej zoo li ntawd. As les lus yas.

    Txais: (4a) Huab Tais zoo siab nyob hauv nws haiv neeg.
    los: As les lus yas

    As Les Lus Yas: MT 4: 16

    Txais: As les lus yas, as les lus yas

    Haiv neeg zaum hauv kev tsaus ntuj tau pom ib qhov pom kev ci loj;
    qhov pom kev tau tawm tuaj kaj cov uas
    nyob hauv lub teb chaws muaj kev tuag roos lawm.

    Txais: As les lus yas, as les lus yas

    Ntawv Moo Zoo: ZAM 3: 22-30

    22 Yes Xus thiab nws cov thwj tim mus rau thaj av Yus Das, nws nrog lawv nyob ntawd thiab nws ua cov kab ke ntxuav.
    23 Zam kuj ua kab ke ntxuav nyob Es Noos ze ntawm Xas Lis thiab, vim nyob ntawd muaj dej ntau, ces tsoom neeg tuaj cuag nws thiab txais cov kab ke ntxuav.
    24 Thaum ntawd, Zam tseem tsis tau raug luag muab kaw hauv tsev loj faj.
    25 Muaj ib zaug, Zam cov thwj tim txawm nrog ib tug Yus Das sib cav txog txoj kev ntxuav txhaum.
    26 Lawv los cuag Zam, lawv hais rau nws tias: "Las Npis, tus uas tau nrog koj ua ke nyob sab dej Yos Las Das tim ub, tus uas koj tau ua tim khawv hais txog nws, mas zaum no nws ua kab ke ntxuav thiab; ces tas ib tsoom neeg tuaj cuag nws."
    27 Zam teb tias: "Neeg muab tsis tau ib yam dab tsi los rau nws li, yog lub ntuj tsis pub rau nws.
    28 Nej yog cov tim khawv hnov kuv hais tias: Kuv tsis yog Leej Pleev, tiam sis kuv yog tus tuaj ua nws ntej.
    29 Tus tau nkauj nyab, yog nraug vauv; nraug vauv tus phooj ywg sawv nyob ntawd, nws mloog, mas nws zoo siab kawg vim nws tau hnov nraug vauv lub suab. Li ntawd kuv muaj txoj kev zoo siab puv npo lawm.
    30 Tus ntawd mas nws yuav tsum loj tuaj, hos kuv mas kuv yuav tsum me tuaj.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 9th January 2022, 11:36 am

    Tim 10 lub 1 Hlis 2022

    Hnub Ob Lis Piam Ib Nruab Xyoo C Nruab Lis Piam Xyoo II

    Lectionary: 305

    Zaj Nyeem Ib: 1 XM 1: 1-8

    1 Muaj ib tug txiv neej nyob Las Mas Thas Yis, nws yog ib tug neeg Xus Fais tuaj ntawm lub roob Es Fas Yis tuaj; nws hu ua Es Kas Nas. Nws yog Yes Los Has tub, uas yog Es Lis hus tub, uas yog Tos Hus tub, uas yog Xus tub, uas yog ib tug neeg Es Fas Yis.
    2 Nws muaj ob tug poj niam, ib tug hu ua As Nas, ib tug hu ua Pes Nis Nas. Pes Nis Nas muaj me nyuam, tab sis As Nas tsis muaj li.
    3 Niaj xyoo tus txiv neej ntawd mus ntawm nws lub zos mus pe hawm HUAB TAIS tus kav tsoom tshiab thiab txi HUAB TAIS rau pem Xis Laus. Nyob ped, yog Es Lis ob tug tub hu ua Hos Nis thiab Pis Nes Has nkawd ua Huab Tais cov Leej Choj .
    4 Thaum txog hnub Es Kas Nas mus txi Ntuj, nws faib kam nws cov txim ua tej phuv, ib phuv rau nws poj niam Pes Nis Nas, thiab ib leeg ib phuv rau Pes Nis Nas cov tub thiab cov ntxhais;
    5 thiab nws muab ib phuv loj li ob npaug rau As Nas vim nws hlub As Nas, uas yog tus HUAB TAIS tsis pub kom nws xeeb tau tub li.
    6 Pes Nis Nas los nquag ua tej yam kom As Nas tu siab, kom nws npau taws txog qhov tias HUAB TAIS ua kom nws tsis muaj me nyuam.
    7 Niaj xyoo thaum lawv mus pem HUAB TAIS lub tuam tsev mas Pes Nis Nas ua zoo li ntawd kom tu As Nas siab. Ces As Nas quaj quaj, nws tsis noj mov.
    8 Ces nws tus txiv Es Kas Nas hais rau nws tias : "As Nas, vim li cas koj quaj quaj thiab koj tsis noj mov ? Vim li cas koj tu siab ? Koj muaj kuv, tsis zoo dua koj muaj kaum leej tub lod ?"

    NPN 116: 12-13, 14-17a, 18-19

    Txais: (17a) Huab Tais, kuv yuav cev ib co txim los cav txog koj.
    los: As les lus yas.

    Kuv yuav muab dab tsi los pauj
    ib puas tsav yam zoo uas HUAB TAIS ua rau kuv ?
    Kuv yuav cev lub ntim cawm neeg,
    kuv yuav hu txog HUAB TAIS, yuav tuav txog nws lub npe

    Txais: (17a) Huab Tais, kuv yuav cev ib co txim los cav txog koj.
    los: As les lus yas.

    Kuv yuav pauj kuv lub yeem rau HUAB TAIS
    nyob ntawm nws haiv neeg xub ntiag.
    HUAB TAIS saib tias cov ntseeg txog nws
    txoj kev tuag muaj nuj nqes.
    HUAB TAIS, kuv yog koj tus tub txib,
    kuv yog koj tus tub txib tiag,
    yog koj tus ntxhais txib tus tub.
    Koj tau daws cov hlua khi kuv.

    Txais: (17a) Huab Tais, kuv yuav cev ib co txim los cav txog koj.
    los: As les lus yas.

    Kuv yuav pauj kuv lub yeem rau HUAB TAIS
    nyob ntawm nws haiv neeg xub ntiag,
    nyob ntawm cov tshav loog hauv HUAB TAIS tsev,
    nyob hauv nruab nrab koj Yes Lus Xas Les.
    .
    Txais: (17a) Huab Tais, kuv yuav cev ib co txim los cav txog koj.
    los: As les lus yas.

    As Les Lus Yas: MK 1: 15

    Txais: As les lus yas, as les lus yas.

    Tswv Ntuj lub Ceeb Tsheej nyob ze ze lawm,
    nej cia li lees txhaum thiab ntseeg txog lub Moo Zoo.

    Txais: As les lus yas, as les lus yas.

    Ntawv Noo Zoo: MK 1: 14-20

    14 Thaum luag ntes Zam lawm, ces Yes Xus mus Nkas Lis Lais teb, nws tshaj lub Moo Zoo qhia txog Tswv Ntuj, nws hais tias :
    15 "Txog lub caij teem lawm, Tswv Ntuj lub Ceeb Tsheej los txog ze lawm : nej lees txhaum, thiab nej ntseeg txog lub Moo Zoo mog."
    16 Thaum Yes Xus taug tus ntug dej ntuj Nkas Lis Lais, nws pom Xis Moos, thiab Xis Moos tus kwv As Nres. Nkawd tab tom pov vas rau hauv dej ntuj, vim nkawd yog tub puav ntses.
    17 Yes Xus hais rau nkawd tias : "Neb raws kuv mus, kuv yuav muab neb tsa ua tub puav neeg."
    18 Nkawd tso plhuav nkawd cov vas puav ntses tseg tam sis ntawd, nkawd raws Yes Xus mus.
    19 Yes Xus mus ntxiv me ntsis tom ntej, nws pom Yas Kos, uas yog Ntxes Npes Dais tus tub, thiab Yas Kos tus kwv Zam. Nkawd kuj nyob hauv nkoj thiab, nkawd tseem tab tom ntxiv nkawd cov vas ntses.
    20 Yes Xus hu nkawd. Ces nkawd tso plhuav nkawd txiv Ntxes Npes Dais tam sis ntawd thiab cov tub zog rau hauv nkoj, nkawd raws Yes Xus mus.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 10th January 2022, 2:17 pm

    Tim 11 lub 1 Hlis 2022

    Hnub Peb Lis Piam Ib Nruab Xyoo C Nruab Lis Piam Xyoo II

    Lectionary: 306

    Zaj Nyeem Ib: 1 XM 1: 9-20

    9 Thaum lawv noj mov haus cawv nyob Xis Los tas lawm, As Nas sawv, nws mus nyob ntawm HUAB TAIS xub ntiag; thaum ntawd tus Leej Choj Es Lis zaum ntawm nws lub rooj zaum uas nyob ze ntawm lub qhov rooj tuam tsev teev HUAB TAIS.
    10 As Nas tu siab tas nrho, nws thov HUAB TAIS thiab nws quaj heev kawg nkaus.
    11 As Nas fiv ib lub yeem zoo li no tias: "HUAB TAIS Xas Npas Os aw! Thov koj saib koj tus ntxhais txib txoj kev txom nyem mas, yog koj nco txog kuv, tsis txhob hnov qab koj tus ntxhais txib, yog koj muab ib tug tub rau koj tus ntxhais txib, mas kuv yuav muab nws fij rau HUAB TAIS tas nws sid, rab chais yuav tsis chwv nws taub hau li."
    12 As Nas teev Ntuj li ntawd ntev loo nyob ntawm HUAB TAIS xub ntiag; Es Lis ntsia ntsoov As Nas qhov ncauj.
    13 As Nas hais lus hauv nws nruab siab xwb, tsuas pom nws di ncauj ua zog xwb, tab sis tsis hnov nws lub suab, ces Es Lis xav tias yog As Nas vwm cawv.
    14 Es Lis hais rau As Nas tias : "Koj yuav vwm cawv li ko mus txog thaum twg ? Koj cia li tseg tsis txhob vwm cawv ntxiv."
    15 Tab sis As Nas teb tias : "Tus tswv, tsis yog li ntawd, kuv kawg yog ib tug poj niam ua neej lwj siab ntsuav xwb. Kuv tsis tau haus cawv txiv ntoo los cawv txhuv li. Kuv hais kuv txoj kev lwj siab rau HUAB TAIS xwb.
    16 Thov koj tsis txhob xav tias koj tus ntxhais txib yog neeg tsis tsim txiaj. Yog vim tu kuv siab dhau thiab mob kuv siab dhau mas kuv thiaj hais lus txog tav no."
    17 Ces Es Lis teb tias : "Koj mus, koj ua siab kaj lug. Thov kom His Xas Lais tus Tswv Ntuj pub rau koj raws li koj tau thov."
    18 As Nas hais tias : "Thov kom koj tus ntxhais txib tau ua xis koj siab." Ces As Nas mus lawm. Nws noj mov, ces nws lub ntsej muag tsis zoo li lub qub lawm.
    19 Tag kid, lawv sawv ntxov ntxov, lawv mus pe hawm HUAB TAIS tas, ces lawv rov qab mus lawv lub tsev nyob Las Mas lawm. Thaum Es Kas Nas nrog nws poj niam As Nas koom cev, HUAB TAIS nco txog As Nas.
    20 Ces nyob hauv cov hnub nyoog ntawd, As Nas cev xeeb tub, nws yug tau ib tug tub, nws muab tis npe hu ua Xas Muas, nws hais tias: "Vim kuv tau thov nws ntawm HUAB TAIS los."

    NPN: 1 XM 2: 1, 4-5, 6-7, 8abcd

    Txais: (1) Kuv lub siab dhia hom khaj nyob hauv HUAB TAIS, tus cawm kuv.

    Kuv lub siab dhia hom khaj nyob hauv HUAB TAIS,
    kuv tsa ntsej muag siab nyob hauv kuv tus Tswv Ntuj.
    Kuv lub ncauj hais lus tsis txuag kuv cov yeeb ncuab;
    kuv zoo siab vim koj tau cawm kuv.

    Txais: (1) Kuv lub siab dhia hom khaj nyob hauv HUAB TAIS, tus cawm kuv.

    Cov neeg muaj zog rab hneev dam dhuav,
    hos cov zog sib lub zog loj tuaj.
    Cov uas thaud tau noj tsau npo mus ua zog kom tau mov noj,
    hos cov uas thaud tshaib plab tso txoj kev khwv tseg.
    Tus pog khab seeb yug tauj xya leej tub,
    hos tus muaj tub coob nyob txom nyem ntsuav.

    Txais: (1) Kuv lub siab dhia hom khaj nyob hauv HUAB TAIS, tus cawm kuv.

    HUAB TAIS ua kom tuag thiab ua kom ciaj sia;
    nws muab thawb lawm hauv ntuj txias teb tsaus,
    thiab nws muab tsa kom muaj sia sawv rov los.
    HUAB TAIS ua kom pluag thiab ua kom muaj;
    nws muab txo kom qis thiab nws tsa kom siab.

    Txais: (1) Kuv lub siab dhia hom khaj nyob hauv HUAB TAIS, tus cawm kuv.

    Nws tsa cov txom nyem nyob hauv cov plua av los mus rau qhov siab;
    nws tshem cov pluag tawm hauv qhov chaw qias los,
    nws coj lawv mus zaum nrog cov tub nom tub tswv
    thiab muab ib qho chaw muaj meej mom rau lawv ua lawv tug.

    Txais: (1) Kuv lub siab dhia hom khaj nyob hauv HUAB TAIS, tus cawm kuv.

    As Les Lus Yas: 1 TES XAS LOS NIS 2:13

    Txais: As les lus yas, as les lus yas.

    Nej yuav txais Tswv Ntuj lo lus, txhob txais raws li yog neeg lo lus,
    tiam sis raws li nws yeej yog Tswv Ntuj lo lus tseeb tiag.

    Txais: As les lus yas, as les lus yas.

    Ntawv Moo Zoo: MK 1: 21-28

    21 Yes Xus thiab nws cov thwj tim lawv mus hauv Kas Fas Naus. Hnub Xas Npas Tos, Yes Xus nkag tam sis ntawd mus hauv lub tsev txoos, thiab nws qhuab qhia sawv daws.
    22 Zeej tsoom qhuas nws cov lus qhia, vim nws qhia lawv xws li ib tug neeg muaj hwj chim, tsis zoo li cov kws Ntawv Ntshiab.
    23 Nyob hauv lawv lub tsev txoos, muaj ib tug neeg raug ib tug dab tsis huv, nws nthe nrov nrov,
    24 nws hais tias: "Yes Xus Nas Xas Les, peb thiab koj muaj lus dab tsi? Koj tuaj rhuav peb xwb. Kuv paub koj yog leej twg : koj yog Tswv Ntuj tus Ntshiab."
    25 Yes Xus cem nws tias : "Ua twj ywm, koj cia li tawm hauv tus neeg no mus."
    26 Dab tsis huv muab tus neeg ntawd nchos ua ntxeev ua nphau, nws nthe ib suab nrov nrov ces nws tawm hauv tus neeg mus.
    27 Tas sawv daws ntshai, lawv sib nug zom zaws tias : “Qhov ntawd yog dab tsi ? Yog ib txog kev qhuab qhia tshiab muaj peev xwm kawg. Tab yog cov dab tsis huv los nws muaj peev xwm tswj lawv, ces lawv mloog nws lus.”
    28 Ces ib sij huam, Yes Xus lub moo nto lug rau txhua qhov, mus thoob ib cheeb tsam hauv lub xeev Nkas Lis Lais.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 11th January 2022, 4:15 am

    Tim     12     lub     1     Hlis     2022


    Hnub Plaub Lis Piam Ib Nruab Xyoo ABC  Nruab Lis Piam Xyoo II
    Lectionary: 307

    Zaj Nyeem Ib:      1 XM 3:  1-10, 19-20

    1 Tus me nyuam hluas Xas Muas tsob hwb HUAB TAIS nyob ntawm Es Lis xub ntiag. Lub zim txwv ntawd, HUAB TAIS tuaj hais lus tsawg tsawg zaus kawg; nws tsis tawm tuaj rau neeg pom xyeem ntau li. 2 Muaj ib hnub, Es Lis pw hauv nws chav pw; thaum ntawd, nws qhov muag tsis zoo lawm ces ua rau nws tsis pom kev. 3 Tswv Ntuj lub teeb tseem tsis tau tuag. Xas Muas pw hauv HUAB TAIS Kem Ntshiab uas muaj Tswv Ntuj lub Xab Cog Lus. 4 HUAB TAIS hu Xas Muas tias : "Xas Muas ! Xas Muas !" Tus me nyuam hluas teb tias : "Kuv nyob ntawm no !" 5 Ces nws khiav mus hais rau Es Lis tias : "Koj hu kuv, kuv thiaj los." Es Lis hais tias : "Tub, kuv tsis tau hu koj. Koj rov mus pw." Xas Muas rov mus pw. 6 HUAB TAIS rov hu dua tias : "Xas Muas ! Xas Muas !" Ces Xas Muas mus txog ntawm Es Lis, nws hais rau Es Lis tias : "Koj hu kuv, kuv thiaj los ntawm no." Es Lis hais tias : "Tub, kuv tsis tau hu koj. Koj rov mus pw." 7 Xas Muas tseem tsis tau paub HUAB TAIS, thiab nws tsis tau hnov dua HUAB TAIS lo lus. 8 HUAB TAIS rov hu Xas Muas zaum peb. Xas Muas sawv mus txog ntawm Es Lis, nws hais tias : "Koj hu kuv, kuv thiaj los ntawm no." 9 Ces Es Lis thiaj mam to taub tias yog HUAB TAIS hu tus me nyuam hluas ntawd. Es Lis hais rau Xas Muas tias : "Koj mus pw. Yog muaj tus hu koj mas koj yuav hais tias : ‘HUAB TAIS, koj hais lus mas. Koj tus tub txib mloog koj !’" Ces Xas Muas rov mus pw nws qhov chaw. 10 HUAB TAIS tuaj nyob ntawd. HUAB TAIS hu nws xws li thawj peb zaug ua ntej tias : "Xas Muas ! Xas Muas !" Xas Muas teb tias : "Koj hais lus mas ! Koj tus tub txib mloog koj hais!"
    19 Xas Muas hlob tuaj, HUAB TAIS nrog nws nyob nraim thiab tsi pub kom nws tej lus nws hais rau Xas Muas tsis poob ib los li.  20 Txij Daas mus txog Npes Xas Npes, tas tsoom His Xas Lais sawv daws puav leej paub tias Xas Muas yog HUAB TAIS tus Yaj Saub tiag.

    NPN     40:  2+5, 7-8a, 8b-9, 10

    Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Kuv tau tso siab thiab tos ntsoov HUAB TAIS,
    nws tau khoov qis qis los saib kuv thiab mloog kuv.
    Muaj hmoov zoo yog tus neeg uas tso siab rau HUAB TAIS,
    Tsis ntxeev siab mus tuaj cov tsis hwm ntuj tog,
    Los tsis mus caum cov neeg ntseeg cov tswv ntuj cuav.

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    Koj tsis ntshaw tej tsiaj thiab tej qoob loo txi rau koj,
    tiam sis koj muab pob ntseg rau kuv kom kuv cuab ntsej mloog.
    Koj tsis xav tau tsiaj hlawv txi ntuj los tsiaj hlawv them txim txhaum,  
    kuv thiaj hais tias:  “Kuv nyob ntawm no, cia kuv tuaj.”      

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    Nyob hauv phau ntawv muaj lus sau tseg rau kuv tias:
    “Kuv xav ua ywj koj lub siab, kuv tus Tswv Ntuj,
    koj txoj cai nyob rawv hauv kuv nruab plaw!”  

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    Kuv tau tshaj lub moo zoo txog txoj kev ncaj
    rau tsoom neeg coob tuaj sib txoos,
    kuv tsis tau kaw kuv lub qhov ncauj, HUAB TAIS, koj yeej paub.      

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    As Les Lus Yas:       ZAM  10:   27

    Txais:  As les lus yas, as les lus yas

    Huab Tais hais tias, kuv cov yaj mloog kuv lub suab,
    kuv paub kuv cov yaj, cov yaj kuv lawv kuv qab nraim.  

    Txais:  As les lus yas, as les lus yas

    Ntawv Moo Zoo:       MK  1:   29-39

    29 Tam sim ntawd, Yes Xus tawm hauv lub tsev txoos los, nws nrog Yas Kos thiab Zam nkawd mus hauv Xis Moos thiab As Nres nkawd tsev.  30 Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub. 31 Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces nws tsob hwb lawv.  32 Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus. 33 Tas lub nroog sau nthwv tuaj nyob ua ke ntawm nws qhov rooj. 34 Yes Xus kho coob leej neeg, uas muaj ntau hom mob kom zoo hlo, thiab nws ntiab ntau tus dab tawm. Nws tsis pub cov dab hais lus li, vim lawv paub nws yog leej twg.  35 Thaum sawv ntxov, tseem tsis tau kaj ntug, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd. 36 Xis Moos thiab cov nrog nws caum Yes Xus qab mus. 37 Thaum lawv nrhiav tau Yes Xus, lawv hais rau nws tias : "Sawv daws nrhiav koj." 38 Yes Xus hais rau lawv tias : "Peb mus lwm qhov chaw ntxiv, mus lawm hauv cov zej zog nyob tsis deb ntawm no, kom kuv tau kev tshaj lus nyob ntawd thiab; yog vim li ntawd, kuv thiaj tawm tuaj".  39 Ces Yes Xus mus qhuab qhia nyob hauv lawv cov tsev txoos nyob thoob lub xeev Nkas Lis Lais, thiab nws ntiab dab phem kom tawm khiav.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 12th January 2022, 10:53 am

    Tim     13     lub     1     Hlis     2022
     
    Hnub Tsib Lis Piam Ib Caij Nruab Xyoo ABC Nruab Lis Piam Xyoo II
    Lectionary: 308
     
    XHLT:   LN Hilary, Tswv Qhia ua Kws cov Txuj NTshiab

    Zaj Nyeem Ib:   1 XM 4: 1-11

    1 Xas Muas xa lus tuaj ray tas tsoom His Xas Lais. Ces cov His Xas Lais thiaj sawv kev mus ntaus rog rau cov Fis Lis Tis; cov His Xas Lais tuaj tsa yeej nyob ze ntawm Es Npes Nis Xes, hos cov Fis Lis Tis tsa yeej nyob As Fev.

    2 Cov Fis Lis Tis txav ua pab nias tsam qees tuaj ntaus cov His Xas Lais; thaum kev sib tua hnyav lawm, cov His Xas Lais swb cov Fis Lis Tis, uas tua lawv tuag kwv yees li plaub txhiab leej nyob ntawm tshav rog.
    3 Tsoom pej xeem thiaj tuaj rau hauv yeej, ces tsoom kev txwj laus His Xas Lais hais tias : "Ua cas hnub no HUAB TAIS cia peb swb cov Fis Lis Tis ? Peb yuav mus tim Xis Laus mus kwv Huab Tais lub Xab Cog Lus tuaj, kom nws tuaj nyob hauv nruab nrab peb, thiab kom nws cawm peb ntawm peb cov yeeb ncuab txhais tes."
     4 Ces lawv xa neeg mus tim Xis Laus, lawv mus muab HUAB TAIS Xas Npas Os uas zaum saum cov Tshiab Kes Lus Npis lub Xab Cog Lus kwv tuaj. Es Lis ob tug tub uas hu ua Hos Nis thiab Pis Nes Has, nkawd nrog lub Xab Cog Lus tuaj.
    5 Thaum HUAB TAIS lub Xab Cog Lus tuaj txog lub yeej, tas tsoom His Xas Lais qw ib lub suab nrov loj loj ncha ntws, ua rau ntiaj teb qeeg nkaws.
    6 Cov Fis Lis Tis hnov lub suab nrov ncha ntws lawv hais tias : "Cas yuav hnov suab nrov loj npaum no hauv cov His Xas Lais lub yeej tuaj, yog txhais li cas tiag?" Ces lawv hnov moo tias HUAB TAIS lub Xab Cog Lus tuaj txog hauv cov His Xas Lais lub yeej lawm.
    7 Cov Fis Lis Tis thiaj ntshai, lawv hais tias : "Tswv Ntuj tuaj nyob hauv lawv lub yeej lawm. Peb hmoov phem kawg nkaus! Yav tas tsis tau muaj dua li no li.
    8 Peb hmoov phem kawg nkaus ! Leej twg yuav pab peb dim ntawm cov tswv ntuj muaj hwj huam ntawd txhais tes ? Cov tswv ntuj ntawd yog cov tau xa tas puas tsav yam xwv txheej tuaj rau Hais Nkws Tos teb.
    9 Tiam sis tsoom Fis Lis Tis aw, nej sawv daws ua siab loj ua siab tawv qhawv li tseem txiv neej yawg, kom nej tsis txhob poob ua cov His Xas Lais qhev xws li lawv tau ua nej qhev los lawm. Nej cia li ua siab tawv qhawv tseem txiv neej yawg mus ntaus tsam!”
    10 Ces cov Fis Lis Tis nam qees tuaj nias tsam; cov His Xas Lais thiaj swb, lawv tso tes khiav nyias rov mus nkaum tom nyias lub tsev tsam phooj. Lawv raug kev puas tsuaj loj kawg nkaus. Tog His Xas Lais tuag txog peb caug txhiab leej tub rog.
    11 Cov Fis Lis Tis txeeb tau Tswv Ntuj lub Xab Cog Lus, thiab Es Lis ob tug tub Hos Nis thiab Pis Nes Has nkawd kuj tuag tas.

    NPN   44: 10-11, 14-15, 24-25

    Txais: (27b) HUAB TAIS, thov koj cawm peb, vim koj khuv leej neeg.

    Nyem no, koj tau tso peb pov tseg, rhuav peb ntsej muag.
    Koj tsis nrog peb cov tub rog mus ntaus tsam ntxiv,
    Koj cia peb thaub qab swb rau peb cov yeeb ncuab,
    Cov ntxub peb txeeb peb tej cuab yeej cuab tam nqa ywj siab.

    Txais: (27b) HUAB TAIS, thov koj cawm peb, vim koj khuv leej neeg.

    Koj cia peb rau cov nyob ze peb ntxub,
    rau cov nyob ib ncig peb cem thiab thuam.
    Koj cia tsoom kuj cuab muab peb ua dab neeg hais,
    Cia lwm haiv neeg luag peb.

    Txais: (27b) Thov koj cawm peb, HUAB TAIS, vim koj khuv leej neeg.

    HUAB TAIS, ua cas koj zais koj lub ntseg muag,
    koj tsis nco qab tias peb txom nyem thiab raug luag tsim txom li ?
    Peb tus ntsuj plig twb khoov mus ti nkaus cov plua tshauv lawm,
    Peb lub cev twb raug luag muab tsuj mus plia av lawm.

    Txais: (27b) Thov koj cawm peb, HUAB TAIS, vim koj khuv leej neeg.

    As Les Lus Yas:   MT 4: 23

    Txais: As les lus yas, as les lus yas.

    Yes Xus tshaj lub Moo Zoo txog Ntuj Ceeb Tsheej
    thiab nws kho txhua yam mob nkeeg nyob hauv cov neeg.

    Txais: As les lus yas, as les lus yas.

    Ntawv Moo Zoo:   MK 1: 40-45

    40 Muaj ib tug neeg mob ruas tuaj cuag Yes Xus, nws thov Yes Xus, nws txhos caug ntua taij tias : "Yog koj xav mas koj yeej ua tau kom kuv rov huv tuaj."

    41 Yes Xus hlub tus neeg ntawd, Yes Xus cev tes mus chwv nws thiab hais rau nws tias : "Kuv xav. Koj rov huv mas."
    42 Tam sim ntawd, tus kab mob ruas tso tus neeg ntawd tseg, nws cia li huv hlo tuaj.
    43 Yes Xus hais lus nchav tsawv rau nws thiab kom nws rov mus tam sis ntawd.
    44 Yes Xus hais rau nws tias : "Koj ua twj ywm, txhob qhia dab tsi rau leej twg li. Koj mus thws koj lub cev rau tus leej choj saib, thiab mus cev paj tshab ntxuav koj raws li Mais Xes qhia, ua puav pheej rau awv pom."
    45 Tab sis tus neeg ntawd tawm plaws mus xwb, nws twb pib tshaj tej ntawd thiab mus hais rau qhov txhia qhov chaw paub lawm . Ces Yes Xus tsis tau kev tab meeg mus hauv ib lub nroog twg li. Nws tsuas nyob sab nroog nraud, ntawm tej qhov chaw tsis muaj neeg xwb. Los neeg tseem tuaj tas qhov txhia chaw tuaj cuag nws qees thiab.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 13th January 2022, 11:25 am

    Tim     14     lub    1     Hlis     2022


    Hnub Rau Lis Piam Ib Nruab Xyoo ABC Nruab Lis Piam Xyoo II
    Lectionary 309

    Zaj Nyeem Ib:       1 XM  8:   4-7, 10-22a

    4 Tas tsoom txwj laus His Xas Lais sib sau koom ua ib pab tuaj cuag Xas Muas nyob Las Mas.

    5 Lawv hais rau Xas Muas tias: "Koj twb laus lawm, koj cov tub tsis coj raws koj tus lwj lwm li, nyem no thov koj tsa ib tug vaj rau peb, kom nws txiav txim rau peb xws li tas luag lwm haiv neeg ua."
    6 Xas Muas pom tias qhov uas lawv hais tias: 'Koj muab ib tug vaj rau peb kom nws txiav txim rau peb' yog ib qho phem, ces Xas Muas mus teev ntuj hu txog HUAB TAIS.
    7 HUAB TAIS hais rau Xas Muas tias: "Koj mloog tsoom pej xeem hais, koj mloog tas puas tsav yam uas lawv hais rau koj. Tsis yog lawv xav muab koj tshem tawm, yog lawv xav muab kuv tshem tawm kom kuv txhob ua vaj kav lawv ntxiv. "
    10 Xas Muas hais tas nrho HUAB TAIS cov lus huv si rau cov pej xeem uas thov ib tug vaj ntawm nws.   

    11 Nws hais tias: "Ntawm tus vaj uas yuav kav nej mas nws yuav muaj cai ua zoo li no: Nws yuav sau nej tej tub mus, yuav cia lawv ua nws cov tub tsav tsheb ntaus rog thiab cov tub caij nees, lawv yuav khiav ua tus vaj lub tsheb ntej.  
    12 Nws yuav tsa lawv los tswj tej pab tub rog muaj txhiab leej thiab tej pab muaj tsib caug leej. Nws yuav kom nej cov tub laij nws cov teb, thiab sau nws cov qoob; kom lawv ntaus nws tej ntaj tej hmuv ua rog thiab ntaus tej cuab yeej rau nws cov tsheb rog.
    13 Nws kuj yuav coj nej cov ntxhais mus, muab lawv ua cov tsim tshuaj tsw qab, cov ua zaub ua mov, cov ci mov ci rau nws.
    14 Nws yuav muab nej tej liaj teb, tej vaj txiv cawv thiab vaj txiv ntoo roj uas zoo tshaj los pub rau nws cov tub tuav dej num.
    15 Nws yuav sau se ib feem kaum ntawm nej tej qoob loo thiab ntawm nej cov txiv cawv los pub rau nws cov neeg sam thiab nws cov tub qhe.
    16 Nws yuav coj nej tej tub txib tej ntxhais txib, nej tej tub hluas uas zoo dua cov, nej tej nyuj thiab tej luj, mus ua hauj lwm rau nws.
    17 Nws yuav sau se ib feem kaum ntawm nej tej tsiaj txhu, thiab nej tseem yuav ua nws cov tub txib thiab.
    18 Ces thaum ntawd nej yuav quaj yws txog tus vaj uas nej tau xaiv rau nej, tab sis hnub ntawd HUAB TAIS yuav tsis teb nej!"
    19 Tiam sis tsoom pej xeem tsis mloog Xas Muas cov lus li. Lawv hais tias: "Yeej tsis muaj li ntawd! Peb yuav tsum muaj ib tug vaj kav peb xwb,  

    20 kom xwv peb thooj li luag lwm haiv neeg. Peb tus vaj yuav txiav txim rau peb, nws yuav ua peb tus ntaus thawj thiab yuav coj peb mus ntaus peb cov tsam rog."
    21 Xas Muas hnov cov lus uas tsoom pej xeem hais tas tib si, nws coj mus hais qhia rau HUAB TAIS mloog.
    22 Ces HUAB TAIS hais rau Xas Muas tias: "Koj ua raws li lawv thov, koj tsa ib tug vaj kav lawv."

    NPN       89:   16-17, 18-19

    Txais: (2) Kuv yuav hu nkauj mus li cav txog HUAB TAIS lub siab zoo.

    Muaj hmoov zoo yog cov neeg uas paub txog txoj kev qw zoo siab;
    Huab Tais, koj lub ntsej muag ci rau lawv pom kev taug kev.
    Lawv zoo siab tas hnub nyob hauv koj lub npe,
    koj txoj kev ncaj tsa lawv nyob qhov chaw siab.

    Txais: (2) Kuv yuav hu nkauj mus li cav txog HUAB TAIS lub siab zoo.

    Koj yog lawv lub zog txoj kev ci ntsa iab,
    koj lub txiaj ntsim tsa peb hauv pliaj kom ntseg.
    Vim peb daim leem phiaj yog HUAB TAIS li,
    peb tus vaj yog His Xas Lais tus Ntshiab tug.

    Txais: (2) Kuv yuav hu nkauj mus li cav txog HUAB TAIS lub siab zoo.

    As Les Lus Yas:       LK  7:   16

    Txais: As les lus yas, as les lus yas

    Ib tug yaj saub loj sawv los nyob hauv peb,
    Tswv Ntuj tau tuaj xyuas nws haiv neeg lawm.

    Txais: As les lus yas, as les lus yas

    Ntawv Moo Zoo:       MK  2:   1-12

    1 Ob peb hnub tom qab, Yes Xus rov los rau hauv Kas Fas Naus, sawv daws paub tias Yes Xus los nyob hauv tsev lawm.

    2 Ces neeg tuaj sib sau coob coob ua ke, tsis tshuav chaw seem li lawm, tab ntawm qhov rooj los tsis tshuav chaw li. Yes Xus tshaj Lo Lus rau sawv daws.
    3 Ces lawv coj ib tug tuag ceg tuaj rau Yes Xus, muaj plaub leeg nqa nws tuaj.
    4 Lawv tsis tau kev nqa tus tuag ceg hla cov neeg coob coob los rau Yes Xus, ces lawv yaws lub ru tsev ncaj qhov chaw Yes Xus nyob, lawv tho ib lub qhov, lawv dauv lub txaj uas tus tuag ceg pw nqes los.
    5 Yes Xus pom tias lawv muaj siab ntseeg tiag, nws hais rau tus tuag ceg tias: "Me tub, koj cov txhaum daws tas lawm."
    6 Muaj ib co kws Ntawv Ntshiab zaum nyob ntawd, lawv xav hauv nruab siab tias :
    7 "Tus neeg ntawd hais dab tsi li ntawd? Yog nws thuam Ntuj lawm! Leej twg thiaj daws txhaum tau? Tsuas kawg Tswv Ntuj tib leeg xwb."
    8 Tab sis Yes Xus lub tswv yim twb paub tam sis ntawd tias lawv xav dab tsi hauv lawv nruab siab lawm, nws thiaj hais tias : "Yog vim li cas nej xav tej zaj zoo li ntawd nyob hauv nej nruab siab?
    9 Lo lus twg yog lo hais yooj yim dua rau tus tuag ceg: Lo tias 'Koj cov txhaum daws tas lawm', los lo tias: ‘Koj sawv, nqa koj lub txaj, koj mus kev’?
    10 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb no," ces Yes Xus hais rau tus tuag ceg tias:
    11 "Kuv hais rau koj, koj sawv, nqa koj lub txaj, koj rov mus tsev."
    12 Tus tuag ceg sawv tsees, tam sis ntawd nws nqa hlo nws lub txaj, nws tawm ntawm sawv daws xub ntiag mus lawm. Cov neeg nyob ntawd ceeb tas, lawv cav txog Tswv Ntuj, thiab lawv hais tias: "Peb tsis tau pom dua ib yam zoo li ntawd ib zaug li."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 14th January 2022, 9:46 am

    Tim    15    lub    1    Hlis    2022


    Hnub Xya Lis Piam Ib Nruab Xyoo C Nruab Lis Piam Xyoo II
    Lectionary: 310

    Zaj Nyeem Ib:   1 XM 9: 1-4, 17-19; 10: 1

    9:  1 Muaj ib tug txiv neej nyob hauv lub xeem Npes Yas Mis hu ua Kis Saws; nws yog As Npis Es tub, uas yog Ntxes Los tub, uas yog Npes Kos Las tub, uas yog As Fias tub, uas yog ib tug neeg Npes Yas Mis, muaj peev xwm thiab siab tawv.

    2 Nws muaj ib tug tub hu ua Xas Ws , tiav hluas zoo nraug ntxiag thiab yog neeg zoo. Tsis muaj ib tug tub hauv cov His Xas Lais yuav zoo npaum nws lawm; nws sawv taub hau thiab xub pwg siab dua sawv daws tas tib si.
    3 Muaj ib zaug Xas Ws txiv Kis Saws cov maum luj ploj lawm. Ces nws hais rau nws tus tub Xas Ws tias: "Koj coj ib tug tub txib nrog koj, neb sawv kev mus nrhiav kuv cov maum luj."

    4 Ces nkawd thiaj mus, nkawd mus hla lub roob Es Fais thiab lub teb chaws Sas Lis Sas, nkawd nrhiav tsis tau; nkawd mus hla lub teb chaws Sas As Lis los tsis pom; nkawd kuj mus hla lub teb chaws Npes Yas Mis tib si los tsis pom cov luj li.
    17 Thaum Xas Muas pom Xas Ws, HUAB TAIS qhia Xas Muas tias: "Tus ntawd, yog tus kuv hais rau koj; nws yog tus yuav tswj kuv haiv neeg."

    18 Xas Ws txawm los ntsib Xas Muas ntawm lub rooj vag, nws hais rau Xas Muas tias: "Kuv thov koj qhia tus yaj saub lub tsev rau kuv saib."
    19 Xas Muas teb Xas Ws tias: "Kuv yog tus yaj saub. Koj nce ua kuv ntej mus saum qhov chaw siab; hnub no, koj yuav nrog kuv noj mov. Tag kis sawv ntxov kuv mam tso koj mus thiab kuv yuav qhia koj txog tas puas tsav yam koj ntshaw nyob hauv koj lub siab.”
    10:  1 Ces Xas Muas muab lub hwj roj los tuav ntawm tes, nws hliv roj rau saum Xas Ws taub hau thiab nws puag nkaus Xas Ws, nws hais tias:  “HUAB TAIS tau pleev koj los ua tus tswj nws lub cuab tam. Koj yog tus yuav kav HUAB TAIS haiv His Xas Lais, thiab yuav cawm lawv ntawm cov yeeb ncuab uas nyob ncig lawv tes. Ntawm no yog lub cim qhia rau koj paub tias HUAB TAIS tau pleev koj ua tus tswj nws lub cuab tam.”

    NPN   21: 2-3, 4-5, 6-7

    Txais: (2a) Huab Tais, tus vaj zoo siab nyob hauv koj lub zog.

    HUAB TAIS, tus vaj zoo siab nyob hauv koj lub zog :
    koj kev yeej ua rau nws zoo siab tas nrho.
    Koj tau pub rau nws raws nraim li nws lub siab ntshaw.
    Koj tau mloog lo lus thov uas tawm ntawm nws di ncauj los.

    Txais: (2a) Huab Tais, tus vaj zoo siab nyob hauv koj lub zog.

    Koj tau foom koob hmoov zoo kawg nkaus txais tos nws;
    koj muab ib lub mom tseem tseem kub rau nws ntoo.
    Nws thov txoj sia ntawm koj, koj pub rau nws
    kom nws nyob ntev niaj ntau xyoo tsis muaj caij kawg.

    Txais: (2a) Huab Tais, tus vaj zoo siab nyob hauv koj lub zog.

    Nws lub koob meej nto moo loj nyob hauv koj txoj kev yeej;
    koj muab hwj chim ci ntsa iab rau nws.
    Koj muab nws ua ib txoj hmoov zoo rau txheej dhau txheej;
    Koj lub ntsej muag luag ntxhi ua kom nws zoo siab.

    Txais: (2a) Huab Tais, tus vaj zoo siab nyob hauv koj lub zog.

    As Les Lus Yas:   LK 4: 18

    Txais: As les lus yas, as les lus yas.

    Huab Tais xa kuv tuaj kom coj lub moo zoo tuaj rau cov pluag
    thiab tshaj kev twj lij rau cov nyob hauv tsev loj faj.

    Txais: As les lus yas, as les lus yas.

    Ntawv Moo Zoo:   MK 2: 13-17

    13 Yes Xus rov tawm mus rau ntawm ntug dej ntuj dua; tas tsoom sid tuaj ntsauv nws, ces nws qhia lawv.

    14 Thaum nws taug kev, nws pom Les Vis, uas yog As Fas Yos tus tub, zaum ntawm rooj sau se. Yes Xus hais rau Les Vis tias: "Koj los raws kuv." Les Vis cia li sawv thiab raws Yes Xus mus.
    15 Thaum Yes Xus noj mov hauv Les Vis tsev, mas muaj ib co sau se thiab ib co neeg txhaum coob coob nrog Yes Xus thiab nws cov thwj tim noj mov: vim lawv muaj coob leej raws Yes Xus.
    16 Cov kws Ntawv Ntshiab uas yog ib co Fas Lis Xais pom Yes Xus nrog cov neeg txhaum thiab cov sau se noj mov, lawv hais rau nws cov thwj tim tias: "Vim li cas nws nrog cov sau se thiab cov neeg txhaum noj mov?"
    17 Yes Xus hnov, nws hais rau lawv tias: "Tsis yog cov neeg noj qab nyob zoo yuav vam txog kws kho mob, hos yog cov neeg muaj mob. Kuv tsis yog tuaj hu cov neeg ncaj, kuv tuaj hu cov neeg txhaum."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 15th January 2022, 5:23 am

    Tim    17    lub    1    Hlis    2022


    Hnub Ob Lis piam Ob Caij Nruab Xyoo ABC Nruab Lis Piam Xyoo II
    Lectionary: 311


    Yuav Hwm LN Anthony tus Loj, Thawj tug Txiv Twj Cuab


    Zaj Nyeem Ib:   1 XM 15: 16-23

    16 Xas Muas hais rau Xas Ws tias: "Koj nres! Cia kuv qhia koj txog qhov HUAB TAIS tau hais rau kuv nag hmo thaum hmo ntuj tso." Xas Ws teb tias: "Koj hais mas."
    17 Ces Xas Muas hais tias: "Txawm tias koj rov saib koj yog ib tug neeg me los, koj kuj tau ua tus tswj cov xeem His Xas Lais lawm los tsis yog? Thiab HUAB TAIS tau pleev koj ua vaj kav tsoom His Xas Lais.
    18 Nws tau xa koj mus ua ib txog hauj lwm, nws tau hais rau koj tias: ‘Mus, koj mus muab cov neeg txhaum As Mas Les tua kom tu noob nrho, koj yuav mus ua rog ntaus lawv kom lawv tsis muaj ib tug seem li.’
    19 Vim li cas koj tsis mloog HUAB TAIS lus? Koj tau mus huab lwg lawv tej cuab yeej cuab tam, mas yog ib qho tsis ntxim HUAB TAIS siab li."
    20 Xas Ws teb rau Xas Muas tias: "Kuv twb tau mloog HUAB TAIS! Kuv tau mus ntaus rog raws li HUAB TAIS xa kuv mus, kuv coj tau As Mas Les tus vaj As Nkav los lawm, thiab kuv tau ua kom cov As Mas Les tuag tas lawm.
    21 Hos tej yam peb tau lwg los, mas tsoom pej xeem tau khaws cov yaj thiab cov nyuj uas zoo tshaj, yuav coj los txi rau HUAB TAIS koj tus Tswv Ntuj nyob Zis Nkas xwb."
    22 Ces Xas Muas teb tias:
    “HUAB TAIS puas zoo siab dua rau cov thaj hlawv tsiaj txi Ntuj thiab thaj cev txim rau Ntuj,
    los puas zoo siab dua rau txoj kev mloog lus?
    Tseeb tiag, txoj kev mloog lus zoo tshaj ib thaj txi Ntuj;
    ua li nws hais yog qhov zoo tshaj cov roj tshis!
    23 Vim tias txoj kev ntxeev siab yog ib qho txhaum zoo cuag li kev mus saib saub,
    txoj kev tawv ncauj zoo cuag li yog kev mus teev dab teev mlom.
    Yog vim koj tau tso HUAB TAIS lo lus tseg,
    ces HUAB TAIS yuav tso koj tseg, tsis cia koj ua vaj ntxiv!"

    NPN   50: 8-9, 16bc-17, 21+23

    Txais: (23b) Kuv yuav muab Tswv Ntuj lub hwj huam

                cawm neeg rau tus neeg ncaj pom.

    Kuv tsis yog cem nej vim nej cov thaj txi ntuj,
    nej tej tsiaj hlawv txi ntuj yeej nyob ntawm kuv xub ntiag mus li.
    Kuv tsis muab ib tug heev nyuj tawm hauv koj tsev mus,
    los ib tug laug tshis tawm hauv koj pab tsiaj mus.

    Txais: (23b) Kuv yuav muab Tswv Ntuj lub hwj huam

                cawm neeg rau tus neeg ncaj pom.

    Tim li cas nej lub ncauj thiaj qog kuv cov kev cai lij choj,
    thiab lees kuv cov lus kuv tau nrog nej cog,
    tiam sis nej ntxub kuv tej lus qhia
    thiab muab kuv tej lus ua ntia pov tom qab?

    Txais: (23b) Kuv yuav muab Tswv Ntuj lub hwj huam

                cawm neeg rau tus neeg ncaj pom.

    Thaum nej ua zoo li ntawd, kuv puas yuav tsum ua ntsej lag muag dig?“
    Nej puas xav tias kuv zoo nkaus li nej thiab?
    Kuv yuav qhuab qhia nej, yuav qhia lub ntsiab tawm plaws rau nej pom.
    Tus twg muab lo lus qhuas cev ua txim rau kuv
    yog nws cav txog kuv lub koob meej.
    Tus twg mus taug txoj kev ncaj,
    kuv yuav muab Tswv Ntuj txoj kev cawm rau nws pom.

    Txais: (23b) Kuv yuav muab Tswv Ntuj lub hwj huam

                cawm neeg rau tus neeg ncaj pom.

    As Les Lus Yas:   HES NPLAWS 4: 12

    Txais: As les lus yas, as les lus yas.

    Tswv Ntuj lo lus muaj sia thiab ua tau hauj lwm,
    nws paub tau tej tswv yim thiab
    tej kev xav uas nyob hauv neeg nruab siab.

    Txais: As les lus yas, as les lus yas.

    Ntawv Moo Zoo:   MK 2: 18-22

    18 Zam cov thwj tim thiab cov Fas Lis Xais nquag ua kev yoo mov. Ces muaj neeg tuaj hais rau Yes Xus tias: "Vim li cas Zam cov thwj tim thiab cov Fas Lis Xais cov thwj tim yoo mov, hos koj cov thwj tim tsis yoo?"

    19 Yes Xus hais rau lawv tias: "Thaum nraug vauv tseem nrog lawv nyob, cov neeg tuaj noj tshoob puas yoo mov tau? Tas lub caij uas nraug vauv nrog lawv nyob, mas lawv yoo tsis tau mov.
    20 Tab sis, muaj ib hnub luag yuav coj nraug vauv ntawm lawv mus, ces hnub ntawd lawv mam yuav yoo mov.
    21 Tsis muaj leej twg ntxiv ib daim ntaub tshiab rau lub khaub tsho, vim daim ntaub ntxiv tshiab yuav caws yuav rub lub tsho qub, ces haj yam yuav ntuag loj.

    22 Kuj tsis muaj leej twg ntim cawv tshiab rau hauv ib co hnab tawv qub; vim cov cawv yuav ua cov hnab tawv qub tawg, ces cawv yuav txeej tas, hos cov hnab tawv los kuj yuav puas tas. Vim li ntawd luag thiaj muab cawv tshiab ntim rau hauv cov hnab tawv tshiab.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 17th January 2022, 5:52 am

    Tim    18    lub    1    Hlis    2022


    Hnub Peb Lis Piam Ob Nruab Xyoo A Nruab Lis Piam Xyoo II
    Lectionary: 312

    Zaj Nyeem Ib:   1 XM 16: 1-13


    1 HUAB TAIS hais rau Xas Muas tias: "Koj tseem yuav quaj Xas Ws hov ntev ntxiv? Kuv twb tso nws tseg, tsis xav yuav nws ua vaj kav His Xas Lais ntxiv lawm. Koj ntim roj puv koj lub raj kub twg, koj sawv kev mus. Kuv xa koj mus rau Yes Xes tsev neeg nyob Npes Les Hes, vim nyob hauv nws cov tub kuv tau xaiv ib tug los ua kuv tus vaj."

    2 Xas Muas hais tias: "Kuv yuav ua zoo li cas mus? Yog Xas Ws hnov, mas nws yuav muab kuv tua." HUAB TAIS teb tias: "Koj yuav cab ib tug thav nyuj nrog koj, koj yuav hais tias: ‘kuv tuaj txi ntuj rau HUAB TAIS.’
    3 Koj yuav caw Yes Xes tuaj txi Ntuj thiab, ces kuv yuav qhia koj tias koj yuav ua zoo li cas. Koj yuav sawv kuv chaw pleev roj rau tus kuv yuav taw rau koj."
    4 Xas Muas ua raws li HUAB TAIS qhia, nws mus rau Npes Les Hes. Cov txwj laus nyob hauv tsheej sawv daws ntshai tshee na, lawv tuaj ntsib Xas Muas, lawv nug nws tias: "Yaj Saub, koj tuaj li no, puas yog koj coj kev thaj yeeb tuaj?"

    5 Xas Muas teb tias: "Yog, kuv coj kev thaj yeeb tuaj, kuv tuaj cev ib thaj txi ntuj rau HUAB TAIS xwb. Nej yuav tsum mus ntxuav nej kom dawb huv ces nej tuaj nrog kuv koom kuv pluas mov txi ntuj thiab.” Ces Xas Muas kom Yes Xes thiab nws cov tub mus ntxuav lawv kom dawb huv, thiab nws caw lawv sawv daws huv si tuaj koom lub thaj txi ntuj.
    6 Thaum Yes Xes thiab nws cov tub tuaj txog, Xas Muas pom Es Lias, nws xav tias: "Tus no yog HUAB TAIS tus pleev ntag, nws tuaj nyob ntawm Huab tais xub ntiag lawm."

    7 Tab sis HUAB TAIS hais rau Xas Muas tias: "Koj txhob saib nws tus yam ntxwv sab nraud los nws lub cev ntaj ntsug siab ntshuas xwb, vim kuv tsis xaiv nws. Huab Tais tsis pom raws li neeg pom. Neeg saib tus yam ntxwv sab nraud, hos HUAB TAIS saib hauv lub siab lub plawv."
    8 Ces Yes Xes hu As Npis Nas Das los nyob ntawm Xas Muas xub ntiag. Tab sis Xas Muas hais tias: "Tsis yog tus uas HUAB TAIS xaiv."
    9 Yes Xes coj Sas Mas los, Xas Muas hais tias: "Tsis yog tus HUAB TAIS xaiv thiab."
    10 Yes Xes coj nws xya leej tub ib tug zuj zus los nyob ntawm Xas Muas xub ntiag, tab sis Xas Muas hais rau Yes Xes tias: "HUAB TAIS tsis xaiv cov no ib tug li."
    11 Ces Xas Muas nug Yes Xes tias: "Koj cov tub tas li no xwb lod?" Yes Xes teb tias: "Tshuav tus tub ntxawg thiab, nws mus zov cov tsiaj noj zaub lawm." Xas Muas hais rau Yes Xes tias: "Koj tso neeg mus hu nws los. Peb yuav tsis noj tsum mov txi ntuj no mus txog thaum nws los txog tso."
    12 Ces Yes Xes thiaj tso neeg mus hu tus hluas los. Tus tub ntawd cov plaub hau daj liab, nws lub ntsej muag zoo nraug. Nws sawm txhiaj kawg! HUAB TAIS hais rau Xas Muas tias: "Koj pleev roj rau nws, nws yog tus kuv xaiv."
    13 Ces Xas Muas nthos nkaus tus kub ntim roj, nws pleev tus tub ntxawg nyob hauv nruab nrab nws cov tij laug. Txij hnub ntawd los mus, HUAB TAIS Leej Tswv Yim lub hwj huam los nyob puv hauv Das Vis. Ces Xas Muas mam sawv kev rov mus tsev rau Las Mas lawm.

    NPN   89: 20, 21-22, 27-28

    Txais: (21a) Kuv nrhiav tau Das Vis, kuv tus tub txib lawm.

    Yav thaud, koj yees tawm tuaj hais lus rau neeg,
    koj hais rau cov neeg ntseeg koj li no:
    "Kuv tau muab lub mom kub rau ib tug neeg tshaj lij ntoo,
    kuv tau tsa ib tug hluas kav kuv haiv neeg.”

    Txais: (21a) Kuv nrhiav tau Das Vis, kuv tus tub txib lawm.

    Kuv nrhiav tau Das Vis kuv tus tub txib lawm,
    kuv muab kuv cov roj ntshiab los pleev nws.
    kom kuv txhais tes nyob nrog nraim nws mus li,
    thiab kom kuv sab npab ua kom nws lub zog nchav.

    Txais: (21a) Kuv nrhiav tau Das Vis, kuv tus tub txib lawm.

    Nws yuav hu kuv tias: "Koj yog kuv txiv,
    kuv tus Tswv Ntuj, kuv lub Tsua, tus cawm kuv."
    Hos kuv yuav tsa nws ua tus tub hlob,
    ua tus vaj loj tshaj tsoom vaj hauv ntiaj teb.

    Txais: (21a) Kuv nrhiav tau Das Vis, kuv tus tub txib lawm.

    As Les Lus Yas:   EFX 1: 17-18

    Txais: As les lus yas, as les lus yas.

    Thov kom peb tus Huab Tais Yes Xus Pleev leej Txiv
    qhib peb lub qhov muag hauv peb lub siab kom pom kev,
    kom peb thiaj paub txog tias peb txoj kev cia siab yog dab tsi
    thaum Tswv Ntuj hu peb.

    Txais: As les lus yas, as les lus yas.

    Ntawv Moo Zoo:   MK 2: 23-28

    23 Muaj ib zaug, yog hnub Xas Npas Tos, Yes Xus hla ib co teb, nws cov thwj tim taug kev, lawv pib de tej hnab nplej.

    24 Cov Fas Lis Xais hais rau Yes Xus tias: "Saib! Vim li cas lawv ua tej yam txwv tsis pub ua hnub Xas Npas Tos?"
    25 Yes Xus hais rau lawv tias: "Nej tsis tau nyeem dua txog qhov tias muaj ib zaug Das Vis tau ua li cas thaum nws tsis muaj dab tsi noj, ces nws thiab nws cov kwv luag tshaib plab lod?
    26 Nws mus hauv Tswv Ntuj lub tsev thaum lub caij As Npias Thas ua tuam leej choj, nws noj cov ncuav mov txi Ntuj uas kawg yog cov leej choj thiaj muaj cai noj tau xwb, nws tseem muab rau nws cov kwv luag noj thiab."
    27 Ces Yes Xus hais ntxiv rau lawv tias: "Ntuj tsim hnub Xas Npas Tos los rau neeg, tsis yog tsim neeg los rau hnub Xas Npas Tos,
    28 Vim li ntawd Neeg Leej Tub kuj yog tus tswv kav hnub Xas Npas Tos thiab."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 18th January 2022, 1:02 pm

    Tim    19    lub    1    Hlis    2022

    Hnub Plaub Lis Piam Ob Nruab Xyoo C Nruab Lis Piam Xyoo II
    Lectionary: 313

    Zaj Nyeeem Ib:    1 XM  17: 32-33, 37, 40-51

    32 Das Vis hais rau Xas Ws tias: "Kom tus vaj tsis txhob ntaus siab me kiag li. Kuv yog  koj tus tub txib, cia kuv mam mus ntaus tus Fis Lis Tis ntawd."
    33 Xas Ws teb Das Vis tia: "Koj mus ntaus tsis tau tus Fis Lis Tis ntawd, koj yog ib tug me nyuam tub xwb, hos tus neeg ntawd yeej ua tub rog txij nws yav hluas los lawm."
    37 Das Vis hais ntxiv tias: "HUAB TAIS uas tau npo kuv ntawm tsov thiab dais tej rau tes rau taw los lawm, yeej yuav npo kuv ntawm tus Fis Lis Tis ntawd txhais tes thiab." Xas Ws teb tias: “Yog li koj cia li mus, thov kom HUAB TAIS nrog nraim koj.”
    40 Das Vis nthos nkaus nws rab pas tuav ntawm tes. Nws xaiv tsib lub qe zeb du du hauv hav dej los ntim rau hauv nws lub hnab zov yaj uas nws ris rawv, nws nqa nws txoj hlua hneev roj hmab ntawm tes, ces nws txav zog mus kom ze tus Fis Lis Tis.
    41 Tus Fis Lis Tis txav los ze Das Vis zuj zus, muaj ib tug nqa lub vab hlau thaiv nws ua nws ntej.
    42 Tus Fis Lis Tis ntsia pom tias Das Vis yog ib tug me nyuam tub xwb, muaj plaub hau daj liab ploog, zoo nraug ntxiag, ces nws pib hais lus saib tsis taus Das Vis.
    43 Nws hais rau Das Vis tias: "Kuv puas yog ib tug dev xwb, ua cas koj nqa ib rab qws tuaj tiv kuv?" Ces tus Fis Lis Tis tuav txog nws cov dab lub npe los foom lus phem rau Das Vis.
    44 Nws hais rau Das Vis tia: "Kav tsij txav kiag los kom ze! Kuv yuav muab koj tej nqaij rau cov noog saum ntuj thiab cov tsiaj nruab nrag dua."
    45 Das Vis teb rau tus Fis Lis Tis tias: "Koj tuav ntaj tuav hmuv tuav xub nkaug tuaj tiv kuv, hos kuv tuav txog tus HUAB TAIS kav tsoom tshiab lub npe tuaj tiv koj, nws yog tsoom tub rog His Xas Lais tus Tswv Ntuj uas koj tau hais lus thuam.
    46 Hnub no kiag, HUAB TAIS yuav muab koj rau hauv kuv txhais tes; kuv yuav muab koj tua kom vau hlo, kuv yuav txiav koj taub hau. Hnub no, kuv yuav muab koj lub cev thiab tsoom tub rog Fis Lis Tis lub cev rau cov noog saum ntuj thiab cov tsiaj nruab nrag dua. Ces tas lub qab ntuj neeg yuav paub tias haiv His Xas Lais muaj ib tug Tswv Ntuj.
    47 Tas ib zeej tsoom nyob ntawm no yuav pom tias tsis tas HUAB TAIS yuav siv ntaj siv hmuv los pub txoj kev yeej, vim HUAB TAIS yog tus tswv coj tsam rog no; nws yuav muab nej rau hauv peb xib teg."
    48 Tus Fis Lis Tis pib txav los kom ze rau Das Vis, ces Das Vis thiaj khiav kiag mus ntsib tus Fis Lis Tis rau ntawm qhov chaw sib ntaus.
    49 Nws cev tes loo rau hauv nws lub hnab, thau kiag tau ib lub qe zeb los, nws xuas hlua hneev roj hmab txawb qe zeb mus ntawb nkaus tus Fis Lis Tis hauv pliaj. Lub pob zeb nkag rau hauv nws hauv pliaj kiag lawm, ces nws cia li vau hlo khwb rwg ntxis rau hauv av.
    50 Li no Das Vis xuas hlua hneev roj hmab thiab pob zeb xwb, nws ntaus yeej tus Fis Lis Tis; nws txawb raug tus Fs Lis Tis vau hlo thiab muab nws tua tuag, tsis tau tuav ntaj ntawm tes li.
    51 Ces Das Vis khiav loo mus sawv ntsia tus Fis Lis Tis; nws cev tes rho hlo tus Fis Lis Tis rab ntaj hauv hnab los loos ntxiv rau thiab txiav kiag nws taub hau tu nrho. Cov Fis Lis Tis pom tias lawv tus neeg muaj zog tuag lawm, ces lawv tso tes khiav.

    NPN     144: 1b, 2, 9-10

    Txais: (1) Thov kom HUAB TAIS nto koob meej, nws yog kuv lub tsua!

    Thov kom HUAB TAIS nto koob meej, nws yog kuv lub tsua,
    nws qhia kom kuv ob txhais tes txawj ntaus rog,
    kuv ntiv tes txawj ntaus tsam.

    Txais: (1) Thov kom HUAB TAIS nto koob meej, nws yog kuv lub tsua!

    Nws yog kuv qhov chaw nkaum, yog kuv lub yeej ntsa zeb,
    Yog kuv lub loog ruaj nreb, yog tus cawm kuv dim;
    nws yog kuv daim leem phiaj, kuv tso siab rau nws ;
    nws qhau kuv cov neeg kom los zwm rau kuv.

    Txais: (1) Thov kom HUAB TAIS nto koob meej, nws yog kuv lub tsua!

    Tswv Ntuj, kuv yuav hu ib zag nkauj tshiab rau koj,
    Kuv yuav ntaus lub thaj cheej kaum txoj hlua cav txog koj.
    Koj yog tus pub kev yeej rau cov vaj,
    Yog tus cawm koj tus tub txib Das Vis ntawm rab ntaj tua neeg.

    Txais: (1) Thov kom HUAB TAIS nto koob meej, nws yog kuv lub tsua!

    As Les Lus Yas:     MT  4: 23

    Txais: As les lus yas, as les lus yas.

    Yes Xus tshaj lub moo zoo txog lub Ceeb Tsheej
    thiab kho txhua yam mob nkeeg nyob hauv tsoom neeg.

    Txais: As les lus yas, as les lus yas.

    Ntawv Moo Zoo:     MK  3:  1-6

    1 Yes Xus rov mus hauv ib lub tsev txoos dua. Nyob ntawd, muaj ib tug neeg uas ib sab tes qhuav.
    2 Ces lawv nyas ntshis ntsia saib Yes Xus puas yuav kho tus neeg qhuav tes ntawd hnub Xas Npas Tos, kom lawv tau kev liam rau Yes Xus.
    3 Yes Xus hais rau tus neeg qhuav tes tias: "Koj los sawv hauv nruab nrab ntawm no."
    4 Thiab Yes Xus hais rau cov Fas Lis Xais tias: "Hnub Xas Npas Tos, txoj cai puas kheev kom ua qhov zoo los yuav cia ua qhov phem, puas kheev cawm ib txog sia los yuav cia txo ib txog sia?" Sawv daws nyob ntsiag to.
    5 Yes Xus ntsia lawv ib muag npau taws vog, nws tu siab vim lawv lub siab txhav dhau, ces nws hais rau tus neeg qhuav tes tias: "Koj xyab tes." Ces nws xyab loo tes, nws txhais tes rov zoo hlo lawm.
    6 Cov Fas Lis Xais tawm mus, lawv nrog cov Hes Los Dias sab laj tam sis ntawd saib yuav ua li cas thiaj tau kev muab Yes Xus tua.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 19th January 2022, 2:36 pm

    Tim    20    lub    1    Hlis    2022

    Hnub Tsib Lis Piam Ob Nruab Xyoo C Nruab Lis Piam Xyoo II
    Lectionary: 314

    Zaj Nyeem Ib:    1 XM  18: 6-9; 19:1-7

    18:  6 Thaum Das Vis mus tua tus Fis Lis Tis tas, lawv rov qab los tsev, mas cov poj niam tuaj txhua lub nroog His Xas Lais tuaj, lawv hu nkauj tshuab raj yoj cev tuaj tos tus vaj Xas Ws, nrog suab nruas, suab zoo siab lom zem, thiab suab paj nruag, suab nkauj nog ncas peb txoj hlua.

    7 Cov poj niam dhia daj dhia luag hu nkauj tias: "Xas Ws tau tua ntau txhiab leej, hos Das Vis tua ntau vam leej."
    8 Ces Xas Ws txawm npau taws heev, nws tsis txaus siab rau tej nkauj ntawd li; nws xav tias: "Lawv muab ntau vam leej rau Das Vis, muab txhiab leej rau kuv xwb; Das Vis ces tsuas tshuav kiag qhov ua vaj lawm xwb!"
    9 Ces txij hnub ntawd los, Xas Ws khib thiab pib soj ntshis Das Vis.
    19:  1 Xas Ws hais rau nws tus tub Yos Nas Thas thiab rau nws cov tub txib tias nws xav muab Das Vis tua. Tab sis Xas Ws tus tub Yos Nas Thas nrog Das Vis ua phooj ywg zoo heev.

    2 Nws qhia rau Das Vis tias: "Kuv txiv Xas Ws nrhiav kev tua koj, koj yuav ceev faj zoo rau tag kis sawv ntxov; koj tsis txhob tawm li, koj khiav mus tsiv nraim.
    3 Kuv yuav nrog kuv txiv tawm mus rau pem toj siab thaj tsam uas koj nyob. Kuv yuav tham txog koj rau nws, ces saib yog muaj dab tsi kuv mam hais qhia koj paub."
    4 Yos Nas Thas hais lus zoo txog Das Vis rau nws txiv Xas Ws. Nws hais tias: "Tus vaj yuav tsis txhob ua phem rau nws tus tub txib Das Vis, vim Das Vis tsis tau ua phem dab tsi rau koj, qhov nws tau ua yog ua tej yam pab koj ntau kawg xwb.

    5 Nws tau muab nws txoj sia mus tiv thiab tua tus Fis Lis Tis, ces HUAB TAIS pub kom His Xas Lais muaj yeej loj kawg. Koj pom li ntawd koj twb zoo siab kawg. Vim li cas koj thiaj xav ua txhaum, thiaj yuav ua kom ib tug neeg tsis muaj txhaum tej ntshav ntws, thiaj lam muab Das Vis tua tsis muaj ib lub txim li?"
    6 Xas Ws mloog Yos Nas Thas hais, nws cog lus tias: "Ib yam li HUAB TAIS muaj txoj sia nyob, Das Vis yuav tsis raug tua."
    7 Ces Yos Nas Thas hu Das Vis tuaj, nws hais tej ntawd qhia Das Vis tib si. Ces Yos Nas Thas coj Das Vis mus cuag Xas Ws. Das Vis rov tau ua nws txoj hauj lwm rau tus vaj li qub.

    NPN    56: 2-3, 9-10a, 10b-12, 13-14

    Txais: (5b) Kuv tso siab rau Tswv Ntuj, kuv yuav tsis ntshai.

    Tswv Ntuj, thov koj khuv leej kuv, vim muaj neeg xav tsuj kuv;
    lawv ua rog tsim txom kuv tas hnub,.
    Kuv cov yeeb ncuab muab kuv tsuj ntiag tas hnub.
    Muaj neeg coob kawg tuaj tawm tsam kuv.

    Txais: (5b) Kuv tso siab rau Tswv Ntuj, kuv yuav tsis ntshai.

    Koj tau suav kuv tej ruam kev uas mus yuam kev;
    koj tau cug kuv cov kua muag rau hauv koj lub taub ntim dej.
    Koj tau muab sau tseg rau hauv koj phau ntawv lawm los tsis yog?
    Kuv cov yeeb ncuab yuav thim rov qab thaum kuv tsa suab hu txog koj.

    Txais: (5b) Kuv tso siab rau Tswv Ntuj, kuv yuav tsis ntshai.

    Nyem no kuv paub lawm tias Tswv Ntuj tuaj kuv tog.

    Nyob hauv Tswv Ntuj lo lus nws tau cog kuv thiaj tau ntsej muag,
    Nyob hauv Tswv Ntuj, kuv tso siab lug, kuv tsis ntshai;
    Leej twg yuav ua tau dab tsi rau kuv?

    Txais: (5b) Kuv tso siab rau Tswv Ntuj, kuv yuav tsis ntshai.

    Tswv Ntuj, kuv yuav nco ntsoov pauj kuv cov yeem rau koj,
    Kuv yuav cev cov thaj cav lus zoo txog koj.
    Vim koj tau cawm kuv dim ntawm lub qhov tuag los,
    koj tau hwj kuv ko taw kom txhob ntog,
    kom kuv tau taug kev ntawm Tswv Ntuj xub ntiag,
    nyob hauv tsoom neeg ciaj txoj kev kaj.

    Txais: (5b) Kuv tso siab rau Tswv Ntuj, kuv yuav tsis ntshai.

    As Les Lus Yas:    2 TM  1: 10

    Txais: As les lus yas, as les lus yas.

    Peb tus Cawm Seej Yes Xus Pleev twb rhuav txoj kev tuag lawm,
    thiab nws ua kom txoj sia ci tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo:     MK  3: 7-12

    7 Yes Xus nrog nws cov thwj tim mus rau nram ntug dej ntuj. Muaj tej pab neeg coob kawg nyob xeev Nkas Lis Lais tuaj raws nws, kuj muaj cov nyob Yus Das teb tuaj,  

    8 nyob Yes Lus Xas Les, thiab nyob Is Dws Mias, thiab nyob sab dej Yos Las Das tim ub, nyob ib ncig Tws Los thiab Xis Doos tuaj cuag Yes Xus, vim lawv tau hnov txog tas ib puas tsav yam nws ua.
    9 Yes Xus hais kom nws cov thwj tim muab ib lub nkoj rau nws nyob, vim muaj neeg coob coob, kom lawv txhob txiv nws.
    10 Yog vim nws kho ntau leej zoo, ces tas cov neeg uas muaj txiab muaj nkeeg sawv daws phoom tas zog kom tau kov Yes Xus.
    11 Thaum twg cov dab tsis huv pom Yes Xus, mas lawv khoov ti av nyob ntawm nws xub ntiag, lawv qw tias: "Koj yog Tswv Ntuj Leej Tub!"
    12 Yes Xus txwv lawv nruj tsis pub lawv ua kom neeg paub txog nws.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 20th January 2022, 12:16 pm

    Tim    21    lub    1    Hlis    2022


    Hnub Rau Lis Piam Ob Nruab Xyoo C Nruab Lis Piam Xyoo II
    Lectionary: 315

    Yuav Hwem LN Agnes, nkauj ntshiab tuag ua Tim Khawv



    Zaj Nyeem Ib:   1 XM 24: 3-21

    3 Xas Ws xaiv tau peb txhiab leej neeg nyob hauv tsoom His Xas Lais, nws coj lawv mus nrhiav Das Vis thiab Das Vis pab neeg ntawm cov pob tsuas tshis qus.

    4 Thaum Xas Ws tuaj txog ntawm ib co nkuaj yaj nyob ntawm txoj kev, muaj ib lub qhov tsua nyob ntawd, nws txawm mus tawm rooj rau hauv lub qhov tsua. Das Vis thiab nws pab tub rog twb nkaum nyob tim qhov kawg hauv lub qhov tsua ntawd lawm thiab.
    5 Cov tub rog hais rau Das Vis tias: "Hnub no yog hnub HUAB TAIS qhia koj tias: 'Kuv tso koj tus yeeb ncuab rau hauv koj xib tes lawm. Koj ua rau nws ywj koj siab mas.’" Das Vis sawv, nws nyiag mus txiav Xas Ws ib qho tw tsho tshaj sab.

    6 Nws ua li ntawd tas, nws lub plawv dhia pig poog, vim nws tau txiav Xas Ws ib qho tw tsho lawm.
    7 Nws hais rau nws pab tub rog tias: "Thov kom HUAB TAIS txhob cia kuv ua phem rau kuv tus tswv, txhob cia kuv tsa kuv txhais tes rau saum nws, uas yog HUAB TAIS tus pleev."
    8 Das Vis hais cov lus no los txwv nws pab tub rog tsis pub kom lawv dhia mus tua Xas Ws. Ces Xas Ws sawv, nws tawm hauv qhov tsua los, nws taug kev mus ntxiv.
    9 Das Vis kuj sawv, nws tawm hauv qhov tsua los, nws hu Xas Ws nrov nrov tias: "Kuv tus huab tais vaj ntxwv aw!" Xas Ws tig ntsia rov tom qab. Das Vis khoov ti av thiab pe Xas Ws.

    10 Das Vis hais rau Xas Ws tias: "Ua cas koj ntseeg cov neeg uas lawv hais rau koj tias: ‘Das Vis nrhiav ua phem rau koj’?
    11 Hnub no, koj qhov muag pom lawm tias HUAB TAIS tau muab koj rau hauv kuv xib tes nyob hauv lub qhov tsua; yog kuv xav tua koj ces twb tua lawm, tiam sis kuv tau txuag koj, kuv tau hais tias: Kuv yuav tsis tsa tes rau saum kuv tus vaj, vim nws yog HUAB TAIS tus pleev.
    12 Txiv, koj ntsia saib, koj ib daig tw tsho nyob hauv kuv txhais tes no. Kuv tau txiav koj ib qho tw tsho lawm, tab sis kuv tsis tau muab koj tua. Yog li koj yuav tsum paub thiab pom tias, kuv tsis muaj lub siab xav ua phem los xav ntxeev siab li, thiab kuv tsis tau ua txhaum koj dab tsi li, hos koj mas koj nrhiav kev ntes kuv thiab txo kuv txoj sia.
    13 Thov kom HUAB TAIS ua tus txiav txim rau kuv thiab rau koj, kom HUAB TAIS yog tus ua pauj pub rau kuv, tab sis kuv txhais tes yuav tsis ua phem rau koj li.
    14 Xws li tej laus ib txwm piv txoj lus tias: ‘Txoj kev phem txhawv ntawm cov neeg phem los,’ yog li kuv yuav tsis tsa tes ua phem rau koj.
    15 His Xas Lais tus vaj, koj sawv tsam rog tua leej twg? Koj caum leej twg tiag? Koj caum ib nyuag dev tuag, ib nyuag dev mub xwb!
    16 Cia HUAB TAIS ua tus txiav txim, nws mam li txiav txim rau kuv thiab rau koj; kuv thov kom nws pom, kom nws ntsuas kuv cai, muab kev ncaj ncees rau kuv thiab npo kuv ntawm koj txhais tes."
    17 Thaum Das Vis hais li ntawd tas rau Xas Ws, Xas Ws hais tias: "Kuv me tub Das Vis, puas yog koj lub suab tiag?" Ces Xas Ws tsa suab hlo quaj nrov nrov.
    18 Nws hais rau Das Vis tias: "Koj siab ncaj dua kuv, vim koj ua zoo rau kuv, hos kuv tau ua phem rau koj xwb.
    19 Hnub no koj tseem tau ua zoo tshaj rau kuv, vim HUAB TAIS twb muab kuv rau hauv koj xib tes, tab sis koj tsis muab kuv tua.
    20 Thaum ib tug neeg ntsib nws tus yeeb ncuab, nws puas yuav cia nws tus yeeb ncuab dim mus taug nws txoj kev ntxiv? Li ntawd HUAB TAIS yuav pub paj tshab rau koj pauj qhov zoo uas hnub no koj tau ua rau kuv.
    21 Nyem no kuv paub tseeb lawm tias koj yuav tau ua vaj tiag, thiab txoj kev ua vaj tswj His Xas Lais yuav poob los ua koj tug."

    NPN   57: 2, 3-4, 6+11

    Txais: (2a) Thov koj hlub kuv, Tswv Ntuj, thov koj khuv leej kuv mas.

    Thov koj hlub kuv, Tswv Ntuj, thov koj hlubkhuv leej kuv mas,
    vim kuv tuaj vam khom koj ;
    kuv los nkaum nyob hauv koj qab tis qhov ntxoov,
    mus txog thaum xwv txheej dhau mus tas.

    Txais: (2a) Thov koj hlub kuv, Tswv Ntuj, thov koj khuv leej kuv mas.

    Kuv hu txog tus Tswv Ntuj uas Nyob Siab,
    tus Tswv Ntuj uas yuav pab kuv txhua yam.
    Thov kom nws xa kev pab saum ntuj tuaj cawm kuv,
    Kom nws rau txim rau cov uas tsuj kuv.
    Thov kom Tswv Ntuj xa nws kev hlub thiab kev ua siab ncaj tuaj.

    Txais: (2a) Thov koj hlub kuv, Tswv Ntuj, thov koj khuv leej kuv mas.

    Tswv Ntuj, thov kom neeg muab koj saib siab dua lub ntuj,
    kom koj lub hwj chim sawv roos tas lub ntiaj teb.
    Vim koj txoj kev khuv leej loj siab txij li lub ntuj,
    koj txoj kev ua siab ncaj loj siab txij txheej ntuj saud.

    Txais: (2a) Thov koj hlub kuv, Tswv Ntuj, thov koj khuv leej kuv mas.

    As Les Lus Yas:   2 KLN 5: 19

    Txais: As les lus yas, as les lus yas.

    Tswv Ntuj nrog lub ntiaj teb rov sib haum xeeb nyob hauv leej Pleev,
    nws tso txoj hauj lwm xa tsab xov nrhiav kev sib haum xeeb rau peb ua.

    Txais: As les lus yas, as les lus yas.

    Ntawv Moo Zoo:   MK 3: 13-19

    13 Yes Xus nce mus saum lub roob, nws hu cov uas nws nyiam kom los ntawm nws, ces lawv los nyob ze nws.
    14 Nws tsa kaum ob leeg uas nws tis npe rau hu ua cov Hauv Paus Xa Lus, kom lawv nrog nraim nws thiab kom nws tau xa lawv mus qhuab qhia,
    15 thiab kom lawv tau lub hwj huam ntiab dab phem tawm.
    16 Nws thiaj tsa Pab Kaum Ob: muaj Xis Moos uas Yes Xus tis nws npe hu ua Pob Zeb;
    17 muaj Yas Kos, Ntxes Npes Dais tus tub, muaj Zam, Yas Kos tus kwv, Yes Xus tis nkawd npe hu ua Npuas Nes Nkes, txhais tias Yawm Xob cov tub;
    18 muaj As Nres, Fis Lis Pos, Npas Tos Los Mas Yos, Mas Tais, Tos Mas, Yas Kos uas yog As Fas Yos tub, Thas Daws, Xis Moos tus Kas Nas Nias,
    19 thiab Yus Das Kas Lis Yaus, tus muab Yes Xus muag.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 21st January 2022, 8:21 am

    Tim     22     lub      1     Hlis     2022


    Hnub Xya Lis Piam Ob Nruab Xyoo C Nruab Lis Piam Xyoo II
    Lectionary: 316


    XThLT:    Hnub Thov Ntuj kom Muaj Txoj Cai Txwv Tsis Pub Rho Me Nyuam


    Zaj Nyeem IB:   2 XM 1: 1-4, 11-12, 19, 23-27

    1 Thaum ntawd tshwm sim tuaj zoo li no: lub caij Xas Ws tuag, Das Vis mus tua yeej cov As Mas Les rov los, nws los nyob Xis Las ob hnub.
    2 Hnub peb, ib tug neeg khiav ntawm Xas Ws lub yeej los. Nws cov khaub ncaws ntuag tas, nws taub hau paug hmoov av tas. Thaum nws los txog ntawm Das Vis, nws txhos caug ntua hauv av pe Das Vis.
    3 Das Vis hais rau nws tias: "Koj tuaj qhov twg tuaj?" Nws teb tias: "Kuv khiav dim ntawm lub yeej His Xas Lais tuaj."
    4 Das Vis nug tias: "Ua cas lawm? Koj qhia rau kuv saib!" Tus khiav los teb tias: "Tsoom tub rog khiav tas tso tsam rog tseg. Muaj coob leej kawg tau ntog thiab tuag tas lawm. Xas Ws thiab nws tus tub Yos Nas Thas kuj tuag huv tib si lawm."
    11 Ces Das Vis dua rhe nws lub tsho. Cov neeg nrog nws lawv kuj dua lawv tej tsho.

    12 Sawv daws nyiav, sawv daws quaj thiab yoo mov mus txog tsaus ntuj. Lawv quaj Xas Ws thiab nws tus tub Yos Nas Thas. Lawv quaj li no txog HUAB TAIS cov xeem neeg His Xas Lais cov tub rog vim lawv tau raug hniav ntaj tua tuag tas lawm:

    19 "Tus uas yog His Xas Lais lub hwj chim,
    cas nws yuav raug tua saum koj cov roob?!
    Cov tub rog muaj peev xwm, cas thiaj vau tas lawm?!
    23 Xas Ws thiab Yos Nas Thas, ob tug peb hlub peb tshua,
    nkawd ua neej tsis muaj sib cais, nkawd tuag los tuag ua ke nraim.
    Nkawd nrawm dua dav ya, muaj zog dua tsov.
    24 Cov poj niam His Xas Lais, nej yuav tsum quaj Xas Ws,
    nws yog tus muab ntaub tsuj ntaub npuag rau nej hnav,
    tus dai lias nyiaj lias kub rau nej tej tsoos tsho.
    25 Ua cas cov tub rog thiaj tuag thaum tsam rog tab tom kub tshaj?
    Yos Nas Thas raug mob nyob saum koj cov nco roob!
    26 Kuv mob siab vim koj, kuv tus me kwv Yos Nas Thas!
    Koj yog tus zoo tshaj plaws rau kuv; koj txoj kev hlub txaus qhuas kawg li,
    tseem zoo tshaj ib tug poj niam kev hlub.
    27 Vim li cas cov tub rog muaj peev xwm thiaj ntog tas ,
    cov ntaj cov hmuv ua rog thiaj puas tas?!"

    NPN   80: 2-3, 5-7
     
    Txais: (4b) Huab Tais, cia peb pom koj lub ntsej muag,
                ces peb yuav tau txais kev cawm.

    Tus tswv zov yaj saib His Xas Lais, thov koj mloog,
    Koj yog tus coj Yos Xes xws li coj ib pab yaj,
    Koj tus zaum saum cov Tshiab Kes Lus Npis, cia li ci ntsa iab

    Tuaj kaj Es Fais, Npes Yas Mis thiab Mas Nas Xes hauv ntej.
    Tsa koj lub hwj huam kom tsim dheev, koj cia li tuaj cawm peb.

    Txais: (4b) Huab Tais, cia peb pom koj lub ntsej muag,
                ces peb yuav tau txais kev cawm.

    HUAB TAIS kav tsoom tshiab, koj yuav npau taws
    hov ntev rau koj haiv neeg uas thov koj?
    Koj tau muab mov rau lawv noj ntxuag kua muag,
    Thiab koj muab kua muag puv ntim rau lawv haus.
    Koj cia cov neeg nyob ze peb sib ceg txog peb,
    Thiab cia peb cov yeeb ncuab tau kev luag peb.

    Txais: (4b) Huab Tais, cia peb pom koj lub ntsej muag,
                ces peb yuav tau txais kev cawm.

    As Les Lus Yas:   HAUJ LWM 16: 14b

    Txais: As les lus yas, as les lus yas.

    Huab Tais, thov koj qhib peb lub siab
    kom peb mloog koj leej Tub cov lus.

    Txais: As les lus yas, as les lus yas.

    Ntawv Moo Zoo:   MK 3: 20-21

    20 Yes Xus nrog nws cov thwj tim nkag los hauv tsev,

    ces rov muaj neeg coob coob tuaj sib sau ua ke dua,
    ua rau lawv tsis xyeej noj mov li.
    21 Yes Xus cov txheeb ze hnov li ntawd, 

    lawv tawm tuaj coj nws mus,
    vim lawv hais tias: "Nws tsis meej pem lawm."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 24th January 2022, 4:41 am

    Tim    24    lub    1    Hlis    2022


    Hnub Ob Lis Piam Peb Nruab Xyoo C Nruab Lis Piam Xyoo II
    Lectionary: 317

    Yuav Hwm LN Francis de De Sales, Tswv Qhia ua Kws cov Txuj Ntshiab



    Zaj Nyeem Ib:   2 XM 5: 1-7, 10

    1 Cov xeem His Xas Lais huv tib si tuaj cuag Das Vis nyob Hes Nploos. Lawv hais rau nws tias: "Koj saib ntawm no, peb yog koj txha peb yog koj nqaij.

    2 Yav thaud, Xas Ws ua peb tus vaj, tiam sis koj yog tus coj cov His Xas Lais mus tawm rooj thiab coj lawv rov los. HUAB TAIS tau hais rau koj tias: ‘Koj yuav ua tswv zov yaj saib kuv tsoom pej xeem His Xas Lais, koj yuav ua His Xas Lais tus tswj.’”
    3 Ces thaum tas tsoom txwj laus His Xas Lais tuaj cuag tus vaj Das Vis nyob Hes Nploos ntawd, tus vaj nrog lawv cog lus nyob  ntawm HUAB TAIS xub ntiag, thiab Lawv pleev roj tsa Das Vis ua vaj kav His Xas Lais.
    4 Das Vis muaj peb caug xyoo thaum nws pib ua vaj. Nws ua vaj tau li plaub caug xyoo:
    5 Xya xyoo thiab rau hli nyob Hes Nploos kav Yus Das Teb, thiab peb caug peb xyoos nyob Yes Lus Xas Les, kav tas nrho His Xas Lais thiab Yus Das teb huv tib si.
    6 Das Vis nrog nws cov neeg sawv kev mus pem Yes Lus Xas Les, lawv mus ntaus cov Yes Npws Xis uas ib txwm nyob txawm teb chaws ntawd. Lawv hais rau Das Vis tias: "Koj tuaj tsis tau ntawm no! Cov dig muag thiab cov ceg tawv yeej yuav ntiab kom koj tawm mus." Lawv hais li ntawd yog txhais tias: “Das Vis yuav tuaj nkag tsis tau rau hauv no.”

    7 Tab sis Das Vis kuj mus txeeb tau lub yeej Xis Yoos, uas tam sis no yog Das Vis lub tsheej.
    10 Ces Das Vis muaj hwj chim loj zuj zus xwb, vim tus HUAB TAIS kav tsoom tshiab nyob nrog nraim nws.

    NPN   89: 20, 21-22, 25-26

    Txais: (25a) Kuv txoj kev ua siab ncaj thiab kev khuv leej yuav nyob nrog nws nraim.

    Thaud, koj tau yees tawm tuaj hais ib co lus,
    koj tau hais rau cov neeg ntseeg koj tias :
    "Kuv tau muab lub mom teev kub rau ib tug neeg tshaj lij ntoo,
    kuv tau tsa ib tug hluas kav kuv haiv neeg.”

    Txais: (25a) Kuv txoj kev ua siab ncaj thiab kev khuv leej yuav nyob nrog nws nraim.

    “Kuv nrhiav tau Das Vis kuv tus tub txib lawm,
    kuv tau muab kuv cov roj ntshiab los pleev nws;
    Kuv txhais tes yuav nyob ze nws mus li,
    kuv sab npab yuav ua kom nws lub zog nchav.”

    Txais: (25a) Kuv txoj kev ua siab ncaj thiab kev khuv leej yuav nyob nrog nws nraim.

    “Kuv txoj kev ua siab ncaj thiab kev khuv leej yuav nyob nrog nws,
    kuv lub npe yuav tsa nws hauv pliaj kom siab.
    Kuv yuav tsa nws txhais tes rau saum cov hiav txwv,
    Tsa nws phab tes xis rau saum cov niam dej.”

    Txais: (25a) Kuv txoj kev ua siab ncaj thiab kev khuv leej yuav nyob nrog nws nraim.

    As Les Lus Yas:   2 TM 1: 10

    Txais: As les lus yas, as les lus yas.

    Peb tus Cawm Seej Yes Xus Pleev twb rhuav txoj kev tuag lawm,
    thiab nws ua kom txoj sia ci tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo:   MK 3: 22-30

    22 Cov thoob xwm ntawv tuaj pem Yes Lus Xas Les tuaj hais txog Yes Xus tias: "Nws raug dab Npes Ntxes Npus lawm," thiab lawv tseem hais tias: "Nws hu txog tus tuam dab los ntiab dab xwb."
    23 Yes Xus hu lawv los ntawm nws, ces nws ua paj lug hais rau lawv tias: "Xas Tas yuav ua cas rov ntiab tau Xas Tas tawm?

    24 Yog ib lub teb chaws rov ua kom nws sib tawg, mas lub teb chaws ntawd nyob tsis tau kom ruaj.
    25 Yog ib tse neeg rov ua kom nws sib tawg, mas tsev neeg ntawd yuav nyob tsis tau kom ruaj.
    26 Ua li mas yog Xas Tas rov sawv tiv Xas Tas, ua kom nws tawg tas, mas nws yuav nyob ruaj tsis tau, nws kawg yuav ploj mus tas.
    27 Tsis muaj leej twg nkag tau mus hauv tus neeg muaj zog tsev, mus lwg nws lub cuab tam, yog tsis xub muab tus muaj zog khi cia tso, cess nws mam mus lwg tau tus muaj zog lub tsev.
    28 Kuv hais tseeb rau nej, Ntuj yuav zam txhua yam kev ua txhaum rau cov tib neeg, thiab txhua yam lus thuam Ntuj lawv tau hais.
    29 Tab sis tus twg hais lus thuam Leej Ntuj Plig Ntshiab, mas Ntuj yuav tsis zam rau nws ib zaug li, vim nws tau ua ib qho txhaum nyob mus li."
    30 Yes Xus hais li ntawd vim lawv hais tias: "Nws raug ib tug dab tsis huv."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3451
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 24th January 2022, 6:48 am

    Tim     25     lub     1     Hlis     2022
     
    Hnub Peb Lis Piam Peb Nruab Xyoo C Nruab Lis Piam Xyoo II

    Hmoov Nco txog Hnub LN Paj Lug Tig Los Ntseeg

    Lectionary: 519
    COV ZAJ NYEEM NRUAB LIS PIAM XYOO II 2021-2022 - Page 2 Paul-damascus-road-e1548802939473


    Zaj Nyeem Ib:   HAUJ LWM 22: 3-16

    3 Paj Lug hais rau cov neeg li no:
    "Kuv yog ib tug Yus Das, kuv yug los nyob Tas Xis, Xis Lis Xias teb. Tab sis kuv tuaj hlob nyob hauv lub tsheej no. Nkas Mas Lias yog kuv tus xib hwb, nws qhia kuv kom ua raws nraim peb cov yawg koob Txoj Cai. Mas kuv yeej kub siab lug rau Tswv Ntuj ib yam li nej nyem no.

    4 Kuv tau hiam Txoj Kev no kom nws ploj mus, kuv tau muab saw hlau los khi poj niam txiv neej huv tib si, thiab coj lawv mus pov rau hauv tsev loj faj.
    5 Tus thawj leej choj thiab pab txwj laus tib si puav leej ua tau tim khawv pom kuv ua li ntawd tiag. Kuv tau txais lawv ib co ntawv sau mus rau cov kwv tij nyob Das Mas, ces kuv thiaj sawv kev mus lawm tid, kuv npaj siab mus khi cov nyob Das Mas coj los rau txim nyob Yes Lus Xas Les.
    6 Kuv tseem tab tom mus kev, tshuav tsis deb yuav txog Das Mas, thaum ntawd kwv yees tav su lawm, cia li muaj ib qho pom kev ci dawb paug loj loj tuaj saum ntuj tuaj vij kuv.

    7 Kuv poob nthav rau hauv av, kuv hnov ib lub suab hais rau kuv tias: 'Xauv, Xauv, vim li cas koj hiam kuv?'
    8 Kuv teb tias: Huab Tais, koj yog leej twg?' Ces nws teb kuv tias: 'Kuv yog tus Yes Xus Nas Xas Les uas koj hiam.'
    9 Cov neeg nrog kuv kuj pom qhov pom kev ci dawb loj loj thiab, tab sis lawv tsis hnov lub suab hais lus rau kuv.
    10 Kuv nug tias: 'Huab Tais, kuv yuav tsum ua dab tsi?' Huab Tais thiaj hais rau kuv tias: 'Koj sawv, koj mus rau Das Mas. Mus txog tod, mas lawv mam qhia rau koj txog tas puas tsav yam Ntuj yeej npaj rau koj lawm kom koj yuav tsum ua.'
    11 Thaum ntawd kuv tsis pom kev li, vim qhov pom kev ci loj ntawd fam kuv qhov muag lawm. Kuv cov neeg thiaj tuav kuv tes, coj kuv mus txog Das Mas.
    12 Muaj ib tug txiv neej hu ua As Nas Nias, nws yog ib tug neeg hwm Ntuj zoo raws li Txoj Cai; cov Yus Das nyob hauv lub tsheej sawv daws hais lus zoo txog nws.

    13 Nws tuaj xyuas kuv, nws tuaj nyob ze ntawm kuv, ces nws hais tias: 'Xauv, kuv tus kwv, koj rov pom kev mog.' Kuv cia li pom nws tam sim ntawd.
    14 Nws hais ntxiv tias: 'Peb cov yawg koob tus Tswv Ntuj yeej tau xaiv koj los lawm, kom koj paub tias qhov nws lub siab nyiam yog dab tsi, kom koj tau pom tus Siab Ncaj, thiab kom koj tau hnov nws lub suab.
    15 Vim tias koj yuav tsum ua nws tim khawv nyob ntawm tas zeej tsoom xub ntiag txog tej yam koj tau pom thiab tau hnov.
    16 Ua li mas koj tseem yuav tos dab tsi ntxiv? Koj cia li sawv, koj mus txais lub cim ntxuav kom ntxuav koj cov txhaum pov tseg thaum koj hu txog nws lub npe.' ”

    Los:     HAUJ LWM 9: 1-22

    1 Ntawm Xauv, mas nws tsuas xav ntsoov txog qhov hiam thiab tua Huab Tais cov thwj tim nkaus xwb, ces nws mus cuag tus thawj leej choj.

    2 Nws thov kom tus thawj leej choj muab ntawv rau nws nqa mus Das Mas, mus rau cov tsev txoos kom yog nws nrhiav tau cov neeg uas npuab Txoj Kev, tsis hais poj niam lost xiv neej li, nws yuav muab lawv khi cab mus lawm pem Yes Lus Xas Les.
    3 Thaum nws tab tom taug kev, yuav txog Das Mas, ces ib sij huam, muaj ib qho pom kev ci dawb vog tuaj saum ntuj tuaj ncig nws.
    4 Nws ntog rau hauv av, nws hnov ib lub suab hais rau nws tias: "Xauv, Xauv, tim li cas koj hiam kuv?"
    5 Xauv teb hais tias: "Huab Tais, koj yog leej twg?" Lub suab hais tias: "Kuv yog Yes Xus, tus uas koj hiam.
    6 Koj sawv, koj mus hauv lub nroog. Yuav muaj neeg qhia koj tias koj yuav tsum ua dab tsi."
    7 Cov neeg nrog Xauv taug kev, sawv daws nres tas, lawv ntshai kawg hais tsis taus lus li, lawv kuj hnov lub suab thiab, tab sis tsis pom leej twg li.
    8 Xauv sawv hauv av los, nws qhov muag rua pliav, tab sis nws tsis pom kev li. Lawv tuav nws tes coj nws mus hauv lub nroog Das Mas.
    9 Nws nyob tau peb hnub, tsis pom kev, tsis noj tsis haus dab tsi li.
    10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias: "As Nas Nias." As Nas Nias teb tias: "Huab Tais, kuv nyob ntawm no."

    11 Huab Tais hais rau nws tias: "Koj sawv mus, koj mus lawm tom txoj kev hu ua Kev Ncaj, koj mus hauv Yus Das tsev, koj nrhiav ib tug neeg hu ua Xauv nyob Tas Xis tuaj. Tam sim no nws tab tom teev Ntuj.
    12 Nws pom ib tug txiv neej hu ua As Nas Nias chaws los tsa tes rau saum nws kom nws rov pom kev tuaj."
    13 As Nas Nias teb tias: "Huab Tais, kuv tau hnov ntau leej hais tias tus neeg ntawd ua phem kawg rau koj cov Ntshiab nyob Yes Lus Xas Les no.
    14 Nws tuaj ntawm no, vim nws tau cai ntawm cov thawj leej choj tuaj khi cov neeg uas hu txog koj lub npe tas huv tib si."
    15 Tab sis Huab Tais hais rau As Nas Nias hais tias: "Koj mus, vim tus neeg ntawd yog ib lub cuab yeej uas kuv xaiv los coj kuv lub Npe mus rau cov neeg teev pej kum dab, rau cov vaj, thiab rau cov tub ki His Xas Lais.
    16 Kuv yuav qhia nws tias nws yuav tsum raug tsim txom npaum li cas vim kuv lub Npe."
    17 As Nas Nias thiaj mus. Nws chaws mus hauv lub tsev ntawd. Nws tsa tes rau saum Xauv, nws hais tias: "Xauv, kuv tus kwv, yog Huab Tais xa kuv tuaj, yog tus Yes Xus uas tau tawm los rau koj pom tom txoj kev uas koj tuaj. Nws xa kuv tuaj kom koj rov qab pom kev, thiab kom koj tau txais Leej Ntuj Plig Ntshiab puv hauv koj.”

    18 Tam sim ntawd muaj tej daim zoo li nplai ntses poob ntawm Xauv qhov muag los, ces nws rov qab pom kev. Lawv ua lub cim ntxuav rau nws tam sis ntawd.
    19 Nws noj mov, ces nws rov qab muaj zog tuaj. Nws nrog cov thwj tim nyob ob peb hnub hauv Das Mas.
    20 Ces tam sis ntawd nws cia li mus nyob hauv cov tsev Txoos, thiab pib qhuab qhia txog Jesus, nws tshaj tawm tias Yes Xus yog Tswv Ntuj Leej Tub.
    21 Tas tsoom neeg uas hnov nws, mas lawv poob siab, lawv hais zom zaws tias: "Tus no tsis yog tus nyob Yes Lus Xas Les, uas tau hiam cov neeg hu txog lub npe ntawd lod? Tsis yog nws twb txhob txwm tuaj ntawm no kom tau ntes lawv, muab lawv khi, thiab cab lawv mus rau cov thawj leej choj xwb lod?"
    22 Hos Xauv, mas nws muaj zog zuj zus tuaj. Nws ua rau cov Yus Das nyob Das Mas xav tsis thoob li, vim nws hais lus tim khawv qhia tseeb hais tias Yes Xus yog Leej Pleev tiag.

    NPN   117: 1BC, 2

    Txais: (MK 16:15) Nej mus kom thoob qab ntuj, nej tshaj lub Moo Zoo rau txhua leej txhua tus.
     los:     As les lus yas.

    Tas ib tsoom kuj cuab, nej cav lus zoo txog HUAB TAIS.
    Tas ib tsoom haiv neeg, nej cav txog nws lub hwj chim.

    Txais: (MK 16:15) Nej mus kom thoob qab ntuj, nej tshaj lub Moo Zoo rau txhua leej txhua tus
    los:       As les lus yas.

    Vim nws lub siab xav ua zoo rau peb nyob ruaj nreb,
    HUAB TAIS lub siab pheej xeeb nyob mus ib txhiab ib txhis.

    Txais: (MK 16:15) Nej mus kom thoob qab ntuj, nej tshaj lub Moo Zoo rau txhua leej txhua tus.
    los:        As les lus yas.

    As Les Lus Yas:   ZAM 15: 16

    Txais: As les lus yas, as les lus yas.

    Huab Tais hais tias: Kuv yog tus xaiv nej hauv lub ntiaj teb los
    thiab xa nej mus kom nej txi ib co txiv uas nyob ruaj nreb.

    Txais: As les lus yas, as les lus yas.

    Ntawv Moo Zoo:   MK 16: 15-18

    15 Yes Xus yees tawm tuaj hais rau nws kaum ib leeg thwj tim tias:

    "Nej mus kom thoob lub qab ntuj, nej tshaj lub Moo Zoo rau txhua leej txhua tus.
    16 Tus twg ntseeg thiab txais lub cim ntxuav, mas nws yuav txais kev cawm,
    hos tus twg tsis ntseeg yuav raug txim.
    17 Cov cim no yuav nrog nraim cov uas ntseeg:
    lawv hu txog kuv lub npe ntiab dab ces dab yuav tawm khiav;
    lawv yuav hais tej hom lus tshiab.
    18 Lawv yuav tuav tau nab  hauv lawv txhais tes,  thiab
    yog lawv haus tshuaj lom neeg, tshuaj yuav tsis ua xwv txheej rau lawv li;  
    thaum lawv tsa tes rau saum cov neeg mob, mas cov mob yuav rov zoo hlo."

    Sponsored content


    COV ZAJ NYEEM NRUAB LIS PIAM XYOO II 2021-2022 - Page 2 Empty Re: COV ZAJ NYEEM NRUAB LIS PIAM XYOO II 2021-2022

    Post  Sponsored content


      Current date/time is 15th August 2022, 7:51 pm