HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM NRUAB LIS PIAM XYOO II 2021-2022 - Page 13 Empty

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II 2021-2022

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 7th November 2022, 10:59 am

    Tim 8 lub 11 Hlis 2022

    Hnub Peb Lis Piam Peb Caug Ob Nruab Xyoo ABC Nruab Lis Piam Xyoo II

    Lectionary: 492

    Zaj Nyeem Ib: TIS TOS 2: 1-8, 11-14

    Tus zoo nyiam:
    1 “Ntawm koj, mas koj yuav hais cov lus kom haum raws txoj kev cai ntseeg tseem ceeb,
    2 kom cov txiv neej laus txhob quav dej quav cawv, kom ua neeg coj tau kom luag hwm yus, coj tau zoo haum txoj kev ntseeg, txoj kev nyiam, thiab txoj kev ua siab ntev nyiaj kom txog qhov kawg.
    3 Koj yuav qhia ib yam nkaus rau cov poj niam laus kom lawv coj ib tug yam ntxwv phim tej yam ntshiab, tsis txhob hais lus xaiv, txhob quav cawv, thiab qhia qhov zoo rau lwm tus.
    4 Li nyawd, lawv thiaj yuav cob qhia tau cov poj niam tseem hluas kom txawj hlub lawv tus txiv thiab lawv cov me nyuam,
    5 kom lawv tsis txhob ua kom luag qhuas yus, yuav ua neeg tsim txiaj, ua niam tsev tab cuab tab yig, ua neeg siab zoo, mloog tus txiv lus, ces luag thiaj tsis thuam Tswv Ntuj lo lus.
    6 Koj yuav txhob cov hluas kom lawv coj tus yam ntxwv ua neeg thoob tsib coj zoo.
    7 Koj kiag yuav ua ib tug piv txwv zoo txog txhua yam dej num zoo, nyob hauv txoj kev qhia tseem ceeb thiab muaj tsim,
    8 nyob hauv txoj kev hais lus meej pem kom luag thuam tsis tau, ces tus neeg xav tiv peb yuav poob ntsej muag vim nws hais tsis tau dab tsi phem txog peb.
    11 Vim tias Tswv Ntuj lub txiaj ntsim tau tshwm tawm los lawm, yog los cawm sawv daws,
    12 thiab los qhia kom peb xyaum tso tej kev tsis hwm Ntuj pov tseg, tso txoj kev ntshaw tej yam raws lub ntiaj teb no pov tseg, thiab kom peb ua neej raws txoj kev thoob tsib, txoj kev ncaj, thiab txoj kev hwm Ntuj nyob hauv tiam no.
    13 Peb tos ntsoov tias peb yuav tau raws li peb txoj kev zoo siab tso siab lug tos, thiab yuav tau pom peb tus Tswv Ntuj loj thiab peb tus cawm seej Yes Xus Pleev lub hwj chim tawm los rau qhov muag pom xyeem.
    14 Yes Xus Pleev tau muab nws rau luag kom tau cawm peb dim ntawm txhua txoj kev txhaum, thiab kom tau ntxuav ib haiv neeg uas nws tau xaiv kom dawb huv los ua nws tug, uas yog ib haiv neeg kub siab ua cov hauj lwm zoo.

    NPN 37: 3-4, 18+23, 27+29

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Nej tso siab rau HUAB TAIS thiab ua qhov zoo,
    ces nej yuav tau nyob hauv lub teb chaws thiab muaj noj nrog kev tso siab.
    Nej cia li zoo siab nyob hauv HUAB TAIS,
    ces nws yuav pub rau nej raws nej lub siab ntshaw.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    HUAB TAIS saib xyuas cov neeg coj ncaj ncees lawv lub neej;
    lawv lub cuab tam yuav nyob mus li.
    HUAB TAIS ua kom ib tug neeg tshais taus ruam mus kev khov kho,
    txoj kev nws taug xis Huab Tais siab.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Koj lug txoj kev ua phem, koj mus ua qhov zoo,
    koj thiaj yuav tau nyob mus li.
    Cov neeg ncaj yuav tau thaj av ua lawv tug,
    lawv yuav tau nyob hauv thaj av ntawd mus li.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    As Les Lus Yas: ZAM 14: 23

    Txais: As les lus yas, as les lus yas.

    Yog leej twg nyiam kuv, mas nws yuav coj rawv kuv lo lus,
    ces kuv Txiv yuav nyiam nws;
    kuv Txiv wb yuav los nyob hauv nws.

    Txais: As les lus yas, as les lus yas.

    Ntawv Moo Zoo: LK 17: 7-10

    Yes Xus hais rau nws cov Hauv Paus Xa Lus tias:
    7 "Nyob hauv nej, yog nej tus tub txib mus laij teb los mus zov tsiaj tom teb los txog ntua, nej puas muaj leej twg yuav hais rau nws tias: ‘Koj tsuag tsuag los ntawm no, los zaum noj mov?’
    8 Ntshai nws yuav hais li no xwb: ‘Koj los ua mov rau kuv noj tso. Ces koi yuav sia daim ntaub npua cev, koj nqa zaub nqa mov los rau kuv noj. Thaum kuv noj kuv haus tas lawm, koj mam noj mam haus tom qab.’
    9 Tus tub txib ua raws li nws tus tswv txib, tus tswv puas pom nws txiaj ntsim?
    10 Nej kuj zoo ib yam li ntawd thiab, thaum nej ua tas txhua yam raws li luag txib nej lawm, mas nej yuav hais tias: ‘Peb yog ib co tub txib tsis muaj nqis; peb tau ua qhov uas peb yuav tsum ua xwb.’"
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 8th November 2022, 3:42 am

    Tim 9 lub 11 Hlis

    Tsuj Xeeb txog Hnub Foom Hmoov Zoo rau Tuam Tsev Teev Ntuj Lateran nyob Los Mas

    Lectionary: 671

    Zaj Nyeem Ib: EXK 47: 1-2, 8-9, 12

    1 Tus tshiab coj kuv rov los txog ntawm lub qhov rooj txuas nkag mus hauv lub Tuam Tsev Teev Ntuj, ua ciav kuv pom dej ntws hauv lub qab taw rooj los mus dua sab hnub tuaj lawm, vim lub Tuam Tsev tig sab qhov rooj txuas mus rau sab hnub tuaj. Dej txhawv ntawm lub qab tuam tsev sab xis uas yog nram sab naj lub thaj txi Ntuj los.
    2 Nws coj kuv tawm ntawm lub qhov rooj nyob sab pej los rau sab nraud, thiab coj kuv ncig sab Tuam Tsev nraud los txog ntawm lub rooj vag uas tig mus rau sab hnub tuaj. Nyob ntawd, kuv thiaj pom dej ntws tawm ntawm sab naj los.
    8 Nws hais rau kuv tias: "Cov dej no ntws mus rau thaj tsam sab toob fab, thiab nqes mus rau nram lub kwj ha As Las Npas, yuav mus tshwm rau hauv lub hiav txwv, mus ua kom cov dej hiav txwv qab ntshiab tuaj.
    9 Tus dej no ntws txog twg mas txhua tsav txhua yam muaj sia txawj huam vam yuav ciaj nyob hauv cov dej ntawd; yuav muaj ntses coob heev, vim thaum tus dej no tuaj txog, mas nws yuav ua kom cov dej hiav txwv qab ntshiab tuaj; ces txhua yam yuav ciaj sia tau hauv tej qhov chaw tus dej no ntws mus txog.
    12 Nyob ntawm ob sab ntug dej, yuav tuaj tas puas tsav yam ntoo zoo ua txhiam xws noj; lawv cov nplooj yuav tsis txawj ntsws li thiab lawv cov txiv yuav txi tsis muaj caij tsum. Niaj lub hli, lawv yuav txi ib phaum txiv tshiab, vim muaj cov dej uas ntws ntawm thaj chaw ntshiab los yug lawv. Lawv cov txiv yuav yog ib co txhiam xws, hos lawv cov nplooj yuav yog ib co tshuaj."

    NPN 46: 2-3, 5-6, 8-9

    Txais: (5) Cov dej hauv tus dej ntawd ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.

    Tswv Ntuj yog peb chaw nkaum, yog peb lub zog,
    yog tus pab peb mus li thaum peb ntsib kev nyuaj.
    Vim li no, peb tsis ntshai, txawm ntiaj teb yuav ua zog koog
    thiab toj roob hauv pes yuav nphau nphwv rau hauv qab thu dej.

    Txais: (5) Cov dej hauv tus dej ntawd ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.

    Muaj ib tug dej, nws ncau ceg mus ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.
    Tswv Ntuj nyob hauv lub tsheej, ces lub tsheej yuav tsis ntsib kev nyuaj ntxhov,
    Tswv Ntuj yuav tuaj pab nws thaum kaj ntug txoog.

    Txais: (5) Cov dej hauv tus dej ntawd ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.

    Tus Huab Tais kav tsoom tshiab nrog peb nyob;
    peb lub yeej ntsa zeb yog Yas Kos tus Tswv Ntuj.
    Nej tuaj xyuas HUAB TAIS cov hauj lwm saib,
    xyuas tej yam loj tas nrho uas nws tau ua nyob ntiaj teb.

    Txais: (5) Cov dej hauv tus dej ntawd ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.

    Zaj Nyeem Ob: 1 KLN 3: 9c-11, 16-17

    Cov kwv tij nkauj muad:
    9c “Nej yog Tswv Ntuj lub Tuam Tsev.
    10 Raws li lub txiaj ntsim uas Tswv Ntuj pub rau kuv, kuv zoo li ib tug neeg txhim tsev, kuv pib txhim tau lub taw ntsa, ces lwm tus tuaj txhim ntxiv rau saud. Tab sis nyias yuav muab siab rau saib xyuas nyias txoj kev txhim tsev saib yuav txhim li cas ntxiv rau saud.
    11 Vim tias tsis muaj leej twg yuav txhim tau ib tug taw ntsa txawv tus uas ib txwm nyob ntawd lawm: tus taw ntsa ntawd yog Yes Xus Pleev.
    16 Nej tsis paub tias nej yog Tswv Ntuj lub Tuam Tsev, thiab Tswv Ntuj Leej Tswv Yim nyob txawm hauv nej lod?
    17 Yog leej twg rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev, uas yog nej, yog ib yam ntshiab.

    As Les Lus Yas: 2 XWM 7: 16

    Txais: As les lus yas, as les lus yas.

    Huab Tais hais tias: “Kuv tau xaiv thiab tau tshwj lub tsev no
    cia rau kuv lub npe kom nyob ntawd tas mus li.”

    Txais: As les lus yas, as les lus yas.

    Ntawv Moo Zoo: ZAM 2: 13-22

    13 Yuav txog cov Yus Das lub Ntees Hla, ces Yes Xus nce mus pem Yes Lus Xas Les.
    14 Nyob hauv lub Tuam Tsev Teev Ntuj, nws pom cov tub luam muag nyuj, muag tshis, thiab muag nquab, thiab pom cov neeg pauv nyiaj zaum nyob ntawd.
    15 Nws muab ib co hlua los ua ib rab nplawm, nws ntiab sawv daws huv tib si tawm hauv lub Tuam Tsev Teev Ntuj, nrog cov yaj thiab cov nyuj mus; nws nchuav cov pauv nyiaj tej nyiaj me, thiab nws muab lawv tej rooj ntxeev.
    16 Nws hais rau cov muag nquab tias: "Nej tshem tej no tawm hauv no mus. Nej tsis txhob muab kuv Txiv lub Tsev los ua ib lub tsev lag tsev luam ntxiv."
    17 Yes Xus cov thwj tim nco txog lo lus uas Ntawv sau tseg tias: “Kev mob siab rau koj lub Tsev ua kom kuv lub siab kub lug.”
    18 Cov Yus Das thiaj teb hais rau nws tias: "Koj yuav ua ib lub cim dab tsi qhia rau peb txog qhov koj ua no?”
    19 Yes Xus teb rau lawv tias: "Nej rhuav lub tuam tsev no, ces peb hnub tom qab, mas kuv yuav rov txhim tau tas.”
    20 Cov Yus Das thiaj hais tias: "Lawv ua hauj lwm plaub caug rau xyoo diam thiaj txhim tau lub tuam tsev no, hos koj li, koj ua peb hnub xwb, koj yuav rov txhim tau no lod?"
    21 Tab sis Yes Xus hais txog lub tuam tsev uas yog nws lub cev.
    22 Ces thaum Yes Xus sawv hauv cov tuag rov los lawm, nws cov thwj tim thiaj rov nco txog tias nws twb tau hais li ntawd lawm, ces lawv ntseeg txog Phau Ntawv thiab ntseeg txog lo lus uas Yes Xus tau hais.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 10th November 2022, 1:57 am

    Tim 10 lub 11 Hlis 2022

    Hnub Tsib Lis Piam Peb Caug Ob Nruab Xyoo ABC Nruab Lis Piam Xyoo II

    Lectionary: 494

    Yuav Hwm LN Leo the Great, ua Vaj Qhia thiab Kws cov Txuj Ntshiab

    Zaj Nyeem Ib: FIS LES MOOS 7-20


    Tus zoo nyiad:
    7 Kuv muaj kev zoo siab loj thiab muaj kev nplig siab ntau los ntawm koj txoj kev hlub los, vim tias koj tau txhawb cov ntshiab lub siab os, me kwv.
    8 Li ntawd, txawm tias kuv yeej muaj cai yuam koj nyob hauv Leej Pleev, kom koj yuav tsum coj raws qhov yog,
    9 los kuv tsis yuam, kuv thov koj raws txoj kev nyiam xwb, vim kuv Paj Lug, yog ib tug laus lawm, thiab nyem no kuv kuj yog ib tug neeg raug txim pub rau Yes Xus Pleev,
    10 mas kuv thov koj rau kuv tus tub Os Nes Xis Mus, uas kuv tau ua nws txiv txij thaum kuv raug saw hlau khi kuv nyob hauv nkuaj lawm.
    11 Yav dhau los, nws yog ib tug neeg tsis muaj nqis rau koj, tab sis, nyem no, nws yuav muaj nqis rau koj, ib yam li nws muaj nqis loj rau kuv.
    12 Kuv xa nws rov qab los rau koj; nws yog kuv nplooj siab ntag.
    13 Kuv twb xav cia nws nrog kuv nyob, kom nws sawv koj chaw pab kuv nyob hauv kuv txoj kev raug cov saw hlau khi vim lub Moo Zoo.
    14 Tab sis, kuv tsis xav ua ib yam uas kuv tsis tau lus pom zoo ntawm koj tso, kom xwv yam zoo uas koj ua, tsis yog vim koj raug yuam tiam sis yog koj yeej txaus siab ua koj.
    15 Tej zaum twb yog vim li no, Os Nes Xis Mus thiaj tau ncaim ntawm koj mus ib ntus lawm, kom koj rov tau nws los nrog koj nyob mus li.
    16 Tsis yog nws yuav rov los ua koj ib tug qhev ntxiv, tiam sis nws yuav zoo tshaj ib tug qhev, nws yuav yog koj ib tug kwv tij; nws twb yog kuv ib tug kwv uas kuv hlub kawg nkaus, tiam sis nws haj yam yuav yog koj ib tug kwv tij uas koj hlub raws li kev cai neeg ntiaj teb thiab raws li nyob hauv Huab Tais.
    17 Li ntawd, yog koj saib tias wb yog ob tug neeg muaj kev sib pab, mas koj yuav txais nws ib yam li txais kuv.
    18 Yog nws tau ua tub qaug koj li cas lawm, los yog nws tshuav koj nqi dab tsi, mas koj cia kuv ua tus ris.
    19 Kuv, Paj Lug, muab kuv ob txhais tes sau ntawv cog lus tias: kuv yog tus yuav them. Kuv tsis xav hais txog qhov tias, koj tshuav kuv nqi, uas yog koj tus kheej kiag.
    20 Me kwv, kuv tso siab tias koj yuav ua qhov ntawd pub rau kuv nyob hauv Huab Tais; koj ua kom kuv lub siab kaj nyob hauv Leej Pleev mog.

    NPN 146: 7, 8-9a, 9bc-10

    Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

    HUAB TAIS muav kev ncaj rau cov raug luag quab yuam.
    nws pub mov rau cov neeg tshaib noj.
    HUAB TAIS tso cov neeg raug txim kom lawv dim.

    Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

    HUAB TAIS ua kom cov dig muag pom kev tuaj,
    HUAB TAIS tsa cov khoov nkoos kom sawv ntseg,
    HUAB TAIS nyiam cov neeg siab ncaj.
    HUAB TAIS pov hwm cov pej kum neeg.

    Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

    Nws pab txhawb tus ntsuag nos thiab tus poj ntsuam,
    nws ua kom tus siab phem plam qhov nws nyiam.
    HUAB TAIS yuav ua vaj nyob mus li;
    Xis Yoos, koj tus Tswv Ntuj yuav ua vaj mus tas txhua tiam! As les lus yas!

    Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

    As Les Lus Yas: ZAM 15: 5

    Txais: As les lus yas, as les lus yas.

    Huab Tais hais tias: “Kuv yog tsob hmab txiv cawv, nej yog cov ceg;
    tus twg nyob hauv kuv thiab kuv nyob hauv nws, mas nws yuav txi txiv ntau.

    Txais: As les lus yas, as les lus yas.

    Ntawv Moo Zoo: LK 17: 20-25

    20 Cov Fas Lis Xais nug Yes Xus tias thaum twg Tswv Ntuj lub Ceeb Tsheej thiaj li los txog, Yes Xus teb rau lawv tias: "Tswv Ntuj lub Ceeb Tsheej yog ib yam uas neeg qhov muag pom tsis tau.
    21 Tsis muaj leej twg yuav hais tau tias 'Ntuj lub Ceeb Tsheej nyob ntawm no', los ‘nyob tod', vim tias Tswv Ntuj lub Ceeb Tsheej yog nyob nruab nrab hauv nej.”
    22 Yes Xus hais rau cov thwj tim tias: "Yuav muaj tej lub sij hawm uas nej ntshaw pom ib hnub hauv lub caij uas Neeg Leej Tub tseem nyob, tab sis nej yuav tsis pom.
    23 Luag yuav hais rau nej tias: ‘Nws nyob tod', los 'Nws nyob ntawm no'; mas nej tsis txhob mus, tsis txhob tso sas ntws khiav mus caum.
    24 Vim tias ib yam li tej kab xob laim ci dawb vog ib ceg kaum ntuj mus rau lwm ces, Neeg Leej Tub kuj yuav zoo li ntawd thiab thaum txog nws hnub.
    25 Tab sis nws yuav tsum xub raug txom nyem loj kawg nkaus thiab raug tiam neeg no muab xyeeb pov tseg tso.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 10th November 2022, 1:58 am

    Tim     11     lub     11     Hlis     2022

    Hnub Rau Lis Piam Peb Caug Ob Nruab Xyoo ABC Nruab Lis Piam Xyoo II
    Lectionary: 495

    Yuav Hwm LN Martin nyob Tours, ua Tswv Qhia

    Zaj NYeem Ib:    2 ZAM 1: 4-9

    Zam sau ntawv rau ib tug niam tsev tias:
    4 Kuv zoo siab heev tau ntsib koj cov me nyuam uas mus taug txoj kev tseeb, raws li Leej Txiv lo lus qhia rau peb.
    5 Zaum no, kuv hais rau koj tus ua niam tias, kuv tsis yog sau ib lo lus qhia tshiab tuaj rau koj, kuv tsuas sau lo lus qhia uas peb yeej muaj txij puag thaum lub hauv paus los lawm xwb, yog kom peb yuav tsum sib nyiam sib hlub.
    6 Txoj kev sib nyiam sib hlub yog li no: yog kom peb coj raws li Leej Txiv tej lus qhia. Lo lus qhia yog li ntawd, raws li nej yeej tau hnov txij thaum lub hauv paus los lawm, ces nej yuav tsum coj raws nraim li ntawd.
    7 Muaj coob tus neeg dag tau mus nyob thoob qab ntuj lawm. Lawv tsis ntseeg tias Yes Xus Pleev yug los ua tib neeg muaj ib lub cev nqaij. Tus neeg dag thiab tiv Leej Pleev yog tus zoo li ntawd.
    8 Nej yuav ceev faj kom nej tsis txhob plam yam uas peb tau khwv ua pub rau nej, tiam sis kom nej tau txais cov paj tshab tuaj ntawm qhov ntawd tuaj tas huv tib si.
    9 Tus twg qhia ib txog kev tshiab mas nws tsis nyob hauv Leej Pleev txoj kev qhia, nws tsis muaj Tswv Ntuj nyob hauv nws. Tus uas nyob hauv Leej Pleev txoj kev qhia, mas nws muaj Leej Txiv thiab Leej Tub nyob hauv nws.

    NPN    119: 1, 2, 10, 11, 17, 18

    Txais: (1b) Cov tau txoj hmoov zoo yog cov ua raws nraim HUAB TAIS Txoj Cai.

    Cov tau txoj hmoov zoo yog cov taug lawv txoj kev kom zoo,
    lawv ua raws nraim li HUAB TAIS Txoj Cai.

    Txais: (1b) Cov tau txoj hmoov zoo yog cov ua raws nraim HUAB TAIS Txoj Cai.

    Cov tau txoj hmoov zoo yog cov ua raws li HUAB TAIS txoj cai,
    Lawv nrhiav nws tas lawv siab lawv ntsws.

    Txais: (1b) Cov tau txoj hmoov zoo yog cov ua raws nraim HUAB TAIS Txoj Cai.

    Kuv nrhiav koj tas kuv siab kuv ntsws,
    Thov koj txhob cia kuv ncaim mus deb koj cov lus qhia.

    Txais: (1b) Cov tau txoj hmoov zoo yog cov ua raws nraim HUAB TAIS Txoj Cai.

    Kuv khaws koj cov lus koj tau cog rau nruab siab
    kom kuv thiaj tsis txhob ua txhaum rau koj.

    Txais: (1b) Cov tau txoj hmoov zoo yog cov ua raws nraim HUAB TAIS Txoj Cai.

    Thov koj ua zoo rau koj tus tub txib,
    kuv thiaj yuav muaj txoj sia, thiab yuav khaws koj cov lus.

    Txais: (1b) Cov tau txoj hmoov zoo yog cov ua raws nraim HUAB TAIS Txoj Cai.

    Thov koj qhib kuv qhov muag, kuv thiaj yuav pom
    tias koj Txoj Cai zoo tas nrho.

    Txais: (1b) Cov tau hmoov zoo yog cov ua raws nraim HUAB TAIS Txoj Cai.

    As Les Lus Yas:    LK 21: 28

    Txais: As les lus yas, as les lus yas.

    Nej yuav sawv kom ntseg, nej yuav tsa taub hau,
    vim txoj kev txhiv nej los txog ze lawm.

    Txais: As les lus yas, as les lus yas.

    Ntawv Moo Zoo:    LK 17: 26-37

    Yes Xus hais rau nws cov thwj tim tias:
    26 “Lub caij Nos Hes nyob zoo li cas, mas kuj yuav zoo ib yam li ntawd thaum txog Neeg Leej Tub lub caij thiab.
    27 Thaum ub sawv daws noj sawv daws haus, sawv daws yuav poj niam thiab muab tshoob muab kos, mus txog ntua hnub uas Nos Hes chaws mus rau hauv lub nkoj lawm, ces dej los nyab kom sawv daws tuag tas.
    28 Thiab kuj yuav zoo li lub zim txwv uas Los nyob thiab: Sawv daws noj sawv daws haus, sawv daws muas sawv daws muag, sawv daws cog, sawv daws txhim.
    29 Hnub uas Los tawm plaws khiav ntawm Xos Dos Mas mus, hluav taws thiab leej faj poob saum ntuj los kub sawv daws tuag tas huv si.
    30 Hnub uas Neeg Leej Tub yuav tawm los rau qhov muag pom kuj yuav zoo ib yam li ntawd thiab.
    31 Hnub ntawd, tus uas nyob saum ru tsev, tab sis nws cov cuab yeej cuab tam nyob hauv tsev lawm, mas nws yuav tsis txhob nqes mus nqa. Tus nyob tom teb kuj ib yam, nws yuav tsis txhob tig rov mus nqa yam nyob tom qab.
    32 Nej nco ntsoov txog Los poj niam.
    33 Leej twg nrhiav kev txuag nws txoj sia, mas nws yuav plam nws txoj sia, hos leej twg plam nws txoj sia, mas nws yuav cawm tau txoj sia nyob.
    34 Kuv hais rau nej tias, hmo ntawd, muaj ob leeg pw ib txag, luag yuav coj ib tug mus, tseg ib tug.
    35 Muaj ob tug poj niam ua ke zom zeb, luag yuav coj ib tug mus, tseg ib tug nyob." [36...]
    37 Ces cov thwj tim hais rau Yes Xus tias: “Coj mus qhov twg, Huab Tais?" Yes Xus hais rau lawv tias: "Lub cev nyob qhov twg, cov dav kuj yuav sib sau ntsauv nyob qhov ntawd thiab."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 14th November 2022, 3:10 am

    Tim 12 lub 11 Hlis 2022

    Hnub Xya Lis Piam Peb Caug Ob Nruab Xyoo ABC Nruab Lis Piam Xyoo II

    Lectionary: 496

    Yuav Hwm LN Josaphat, ua Tswv Qhia thiab Tim Khawv

    Zaj Nyeem Ib: 3 Zam 1: 5-8


    5 Tus zoo nyiad, koj tau ua raws qhov tseeb nyob hauv txhua yam koj ua pab rau cov kwv tij lawm, txawm tias lawv yog ib co neeg koj tsis paub.
    6 Lawv tau ua tim khawv txog koj txoj kev nyiam nyob ntawm lub Koom Txoos xub ntiag. Li ntawd, mas thov koj kav tsij pab lawv kom phim rau Tswv Ntuj, lawv thiaj tau kev mus ncig ntxiv.
    7 Lawv tau sawv kev tawm mus ncig yog vim lub Npe, lawv tsis kam txais dab tsi ntawm cov neeg teev dab qhuas li.
    8 Ua li mas peb yuav tsum txhawb cov neeg zoo li ntawd, peb thiaj tau nrog lawv koom tes ua txoj hauj lwm tshaj txoj kev tseeb.

    NPN 112: 1-2, 3-4, 5-6

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Tus muaj hmoov zoo yog tus uas hwm HUAB TAIS,
    thiab nyiam coj Huab Tais cov lus qhia tas siab tas ntsws.
    Nws caj ces yuav muaj hwj chim nyob ntiaj teb;
    tiam neeg siab ncaj yuav tau txais txiaj ntsim koob hmoov.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Kev nplua nuj kev muaj nyiaj muaj txiaj yuav nyob hauv nws tsev;
    Nws txoj kev ua siab dav yuav nyob ruaj nreb mus li.
    Qhov pom kev ci hauv qhov tsaus ntuj tuaj kaj tus siab ncaj;
    nws muaj lub siab zoo, khuv leej luag, thiab ua ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Tus neeg txawj hlub luag thiab qiv rau luag nws tau hmoov zoo.
    Nws tswj nws tej nyiaj txiag raws kev ncaj.
    Tus neeg ncaj yuav nyob ruaj nreb,
    sawv daws yuav nco ntsoov txog nws mus li.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    As Les Lus Yas: 2 TXLN 2: 14

    Txais: As les lus yas, as les lus yas.

    Tswv Ntuj hu peb nyob hauv lub Moo Zoo,
    kom peb tau txais peb tus Huab Tais Yes Xus Pleev lub koob meej.


    Txais: As les lus yas, as les lus yas.

    Ntawv Moo Zoo: LK 18: 1-8

    1 Yes Xus hais ib zag paj lug rau nws cov thwj tim, qhia lawv tias yuav tsum teev Ntuj txhua lub sij hawm, txhob ntaus siab yau.
    2 Nws hais tias: “Nyob hauv ib lub nroog, muaj ib tug kws txiav txim, nws tsis ntshai Tswv Ntuj thiab tsis hwm leej twg li.
    3 Muaj ib tug poj ntsuam nyob hauv lub nroog ntawd tuaj cuag tus kws txiav txim, nws hais tias: "Thov koj pab txiav txim tsa kuv cai, tiv tus neeg ntxub kuv."
    4 Tus kws txiav txim tsis kam ua qhov ntawd tau ntev loo. Tab sis thaum kawg nws xav tias: "Tab yog kuv tsis ntshai Tswv Ntuj thiab tsis hwm ib tug neeg twg li los,
    5 vim tus poj ntsuam ntawd tuaj txob kuv dhau, ces kuv yuav txiav txim ncaj rau nws, vim ntshai tsam thaum kawg nws tuaj ua kom kuv nyuaj siab loj."
    6 Ces Huab Tais hais tias: "Nej mloog saib tus kws txiav txim siab tsis ncaj ntawd hais li cas.
    7 Yog cov uas Tswv Ntuj xaiv ua hnub ua hmo hu txog nws, nws puas yuav tsis tsa lawv cai li? Nws puas yuav tos ntev ntev tsis teb lawv?
    8 Kuv hais rau nej tias, Tswv Ntuj yeej yuav tsa lawv cai sai sai. Tab sis thaum Neeg Leej Tub rov los, nws puas yuav nrhiav tau kev ntseeg nyob ntiaj teb?"
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 14th November 2022, 3:12 am

    Tim 14 lub 11 Hlis 2022

    Hnub Ob Lis Piam Peb Caug Peb Nruab Xyoo ABC Nruab Lis Piam Xyoo II

    Lectionary: 497

    Zaj Nyeem Ib: QYTN 1: 1-4; 2:1-5

    1: 1 Yes Xus Pleev txoj kev qhia txog yav tom ntej uas yog Tswv Ntuj muab rau nws, kom nws qhia rau nws cov tub txib txog tej yam uas yuav tsum tshwm sim tuaj sai sai no. Nws xa nws tus Tshiab tuaj qhia cov lus ntawd rau nws tus tub txib Zam.
    2 Zam ua pov thawj zeem tseeb txog Tswv Ntuj Lo Lus thiab txog Yes Xus Pleev cov lus tim khawv, uas yog tas puas tsav yam nws tau yees pom.
    3 Tus nyeem cov lus saub no thiab cov uas mloog cov lus saub no thiab coj raws li tau sau rau hauv no, lawv txoj hmoov zoo, vim lub caij los txog ze ze lawm!
    4 Kuv Zam sau ntawv rau xya lub Koom Txoos nyob As Xias: Thov kom nej tau txais lub txiaj ntsim thiab txoj kev thaj yeeb tuaj ntawm tus uas yog Tus Nyob, tus Nyob los lawm, thiab tus Tab Tom yuav tuaj, thiab tuaj ntawm xya leej tswv yim uas nyob ntawm hauv ntej ntawm nws lub theej kiab tuaj.
    (Lub suab hais rau kuv tias):
    2: 1 “Koj sau ntawv rau tus Tshiab hauv lub Koom Txoos nyob Es Fes Xos tias:
    Tus uas nws tuav xya lub hnub qub nyob hauv nws txhais tes xis, thiab nws mus kev hauv nruab nrab xya tus ncej kub txawb teeb hais li no:
    2 Kuv paub koj cov hauj lwm, paub koj txoj kev khwv, thiab koj lub siab ruaj siab tawv, thiab kuv paub tias koj tsis nyiam cov neeg ua phem. Koj tau sim cov uas lawv hais tias lawv yog hauv paus xa lus, tab sis lawv twb tsis yog, ces koj pom tias lawv yog ib co hauv paus xa lus cuav xwb.
    3 Tsis tas li ntawd xwb, koj yog ib tug muaj lub siab loj siab tawv qhawv, koj tau raug txom nyem vim kuv lub npe, los koj tsis ntaus siab me li.
    4 Tsis kav, kuv muaj ib qho tsis zoo siab rau koj li no, yog qhov tias koj tau tso koj txoj kev nyiam yav thaum nyuam qhuav pib pov tseg lawm.
    5 Koj yuav xav saib koj poob qis npaum li cas lawm; koj yuav thov txhaum, thiab koj rov ua cov hauj lwm yav thaud koj ua mog. Yog koj tsis ua li ntawd, yog koj tsis thov txhaum, mas kuv yuav tuaj xyuas koj, yuav rho koj tus ncej txawb teeb ntawm nws qhov chaw mus.”

    NPN 1: 1-2, 3, 4+6

    Txais: (QYTN 2:17) Cov uas ntaus rog yeej, kuv yuav muab tsob ntoo muaj txoj sia los yug lawv.

    Tus muaj hmoov zoo yog tus uas tsis coj raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS txoj cai nruab hnub hmo ntuj.

    Txais: (QYTN 2:17) Cov uas ntaus rog yeej, kuv yuav muab tsob ntoo muaj txoj sia los yug lawv.

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj zeeg li.
    Nws ua yam twg tau yam ntawd.

    Txais: (QYTN 2:17) Cov uas ntaus rog yeej, kuv yuav muab tsob ntoo muaj txoj sia los yug lawv.

    Cov neeg phem tsis zoo li ntawd, lawv tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais: (QYTN 2:17) Cov uas ntaus rog yeej, kuv yuav muab tsob ntoo muaj txoj sia los yug lawv.

    As Les Lus Yas: ZAM 8: 12

    Txais: As les lus yas, as les lus yas.

    Huab Tais hais tias: "Kuv yog qhov pom kev kaj lub qab ntuj neeg.
    Leej twg lawv kuv qab, nws yuav tau qhov pom kev uas pub txoj sia.

    Txais: As les lus yas, as les lus yas.

    Ntawv Moo Zoo: LK 18: 35-43

    35 Thaum Yes Xus tuaj yuav txog Yes Lis Kos, muaj ib tug dig muag zaum thov khawv ntawm ntug kev.
    36 Nws hnov ib pab neeg taug kev, nws nug saib yog muaj dab tsi.
    37 Lawv qhia nws tias: “Yog Yes Xus Nas Xas Les hla tuaj mus.”
    38 Ces nws tsa suab hu nrov nrov tias: "Yes Xus, Das Vis Leej Tub, thov koj khuv leej kuv!"
    39 Cov uas mus kev tom hauv ntej cem nws kom ua twj ywm, tab sis nws haj yam hu nrov tias: "Das Vis Leej Tub, thov koj khuv leej kuv!”
    40 Ces Yes Xus nres, nws kom lawv coj tus dig muag los rau nws. Thaum tus dig muag los txog ze lawm, Yes Xus nug nws tias:
    41 "Koj xav kom kuv ua dab tsi rau koj?" Tus dig muag teb tias: "Huab Tais, thov ua kom kuv pom kev."
    42 Ces Yes Xus hais rau nws tias: "Koj rov pom kev mas! Koj lub siab ntseeg cawm koj lawm."
    43 Tam sis ntawd, tus dig muag rov pom kev, ces nws raws Yes Xus qab mus, nws cav txog Tswv Ntuj lub hwj chim. Tas tsoom neeg pom qhov ntawd, lawv cav lus zoo txog Tswv Ntuj.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 15th November 2022, 2:56 am

    Tim 15 lub 11 Hlis 2022

    Hnub Peb Lis Piam Peb Caug Peb Xyoo ABC Nruab Lis Piam Xyoo II

    Lectionary: 498

    XHLT: LN Albert tus Loj, ua Tswv Qhia thiab Kws cov Txuj Ntshiab

    Zaj Nyeem Ib: QYTN 3: 1-6, 14-22


    Kuv, Zam, hnov Huab Tais hais tias:
    1 “Koj sau ntawv rau tus Tshiab hauv lub Koom Txoos nyob Xas Dis tias: ‘Tus uas muaj Tswv Ntuj xya leej tswv yim thiab xya lub hnub qub nws hais li no: Kuv paub koj cov hauj lwm koj ua; koj muaj lub koob lub npe tias koj ciaj sia, tiam sis koj twb tuag lawm.
    2 Kav tsij ceev faj zoo; koj cia li ua kom koj qhov seem uas tseem tshuav txoj sia thiab twb yuav tu siav rov muaj zog tuaj. Vim kuv tsis pom tias koj tau ua koj cov hauj lwm tiav log rau kuv tus Tswv Ntuj qhov muag pom li.
    3 Koj nco ntsoov txog tias koj tau muaj siab txais thiab hnov Lo Lus; cia li muab khaws cia, thiab los lees txhaum mas! Yog koj tsis ceev faj zoo, mas kuv yuav los xws li ib tug tub sab, koj yuav tsis paub lub sij hawm twg kuv los txog ntawm koj li.
    4 Tab sis, nyob Xas Dis, koj tseem muaj ob peb leeg uas lawv tsis tau ua lawv cov tsoos tsho dub. Lawv yuav hnav dawb nrog kuv taug kev, vim lawv tsim nyog nrog kuv.’
    5 Leej twg ntaus tsam yeej, mas nws yuav hnav dawb, tsis muaj kev txhawj txog tias kuv yuav tshem nws lub npe tawm hauv phau ntawv muaj txoj sia mus li; kuv yuav lees paub nws lub npe nyob ntawm kuv Txiv thiab ntawm nws cov Tshiab xub ntiag.
    6 Leej twg muaj pob ntseg, kom nws kav tsij mloog cov lus uas Leej Ntuj Plig hais rau cov Koom Txoos.
    14 Koj sau ntawv rau tus tshiab hauv lub Koom Txoos nyob Laus Dis Xes tias: Tus As Mees, tus Tim Khawv pheej xeeb thiab tseeb, tus ua hauv paus chiv Tswv Ntuj tej hauj lwm tsim lub sim ceeb, nws hais li no :
    15 ‘Kuv paub koj cov hauj lwm koj ua, koj tsis txias, tsis kub li. Kheev lam koj yuav txias txawm txias kiag, koj yuav kub txawm kub kiag mas!
    16 Vim koj sov ntem ntauv, koj tsis kub tsis txias, mas kuv yuav ntuav koj tawm hauv kuv lub ncauj mus.
    17 Koj hais tias: “Kuv nplua nuj, kuv muaj koob nto npe, kuv tsis ntshaw dab tsi li,” tab sis koj twb tsis pom tias koj txom nyem, koj kob huam, koj pluag, koj dig muag, koj liab qab li!
    18 Kuv pab tswv yim rau koj tias, kom koj muas kub ntawm kuv uas yog cov kub nchuav tawm hauv hluav taws los, koj thiaj yuav nplua nuj tuaj; koj muas cov tsoos tsho dawb ntawm kuv los hnav npog koj qhov liab qab txaj muag; koj muas tshuaj ntawm kuv mus pleev koj qhov muag kom koj thiaj pom kev tuaj.
    19 Kuv qhuab ntuas thiab rau txim rau cov neeg uas kuv nyiam. Kav tsij kub siab tig los lees txhaum mog!
    20 Ntsia saib, kuv sawv ntawm qhov rooj lawm, thiab khob qhov rooj. Leej twg hnov kuv lub suab thiab qhib qhov rooj, mas kuv yuav chaws mus hauv nws tsev, kuv yuav nrog nws noj mov, thiab nws yuav nrog kuv noj mov.
    21 Leej twg ntaus tsam yeej, mas kuv yuav pub kom nws tau nrog kuv zaum saum kuv lub theej kiab, ib yam li thaum kuv tau ntaus tsam yeej thiab tau nrog kuv Txiv zaum saum nws lub Theej Kiab.
    22 Leej twg muaj pob ntseg, kom nws kav tsij mloog cov lus uas Leej Ntuj Plig hais rau cov Koom Txoos.”

    NPN 15: 2-3a, 3bc-4ab, 5

    Txais: (QYTN 3:21) Kuv yuav cia tus uas ntaus tsam yeej zaum ntawm kuv ib sab saum kuv lub theej kiab.

    Yog tus uas coj tus yeeb yam tsis muaj chaw xyeej thiab ua ncaj,
    Tus uas xav qhov tseeb nyob hauv nws nruab siab,
    Thiab nws tsis cia nws tus nplaig hais lus dag.

    Txais: (QYTN 3:21) Kuv yuav cia tus uas ntaus tsam yeej zaum ntawm kuv ib sab saum kuv lub theej kiab.

    Nws tsis ua phem rau lwm tus neeg
    Nws tsis nrhiav lus rau tus nyob ze nws.
    Nws ntxub tus neeg ua phem.
    Nws hwm cov neeg hwm HUAB TAIS.

    Txais: (QYTN 3:21) Kuv yuav cia tus uas ntaus tsam yeej zaum ntawm kuv ib sab saum kuv lub theej kiab.

    Nws qiv nyiaj txiag, nws tsis tsuam paj.
    Nws tsis txais luag cov nyiaj xiab
    kom muab txim rau tus tsis txhaum.
    Leej twg ua li hais no, mas nws yuav nyob ruaj nreb mus li.

    Txais: (QYTN 3:21) Kuv yuav cia tus uas ntaus tsam yeej zaum ntawm kuv ib sab saum kuv lub theej kiab.

    As Les Lus Yas: 1 ZAM 4: 10b

    Txais: As les lus yas, as les lus yas.

    Tswv Ntuj hlub peb, nws xa nws Leej Tub tuaj
    them peb cov txhaum rau peb.

    Txais: As les lus yas, as les lus yas.

    Ntawv Moo Zoo: LK 19: 1-10

    1 Thaum ntawd, Yes Xus mus hauv Yes Lis Kos, nws taug kev hla lub tsheej.
    2 Muaj ib tug neeg lub npe hu ua Ntxas Kais, nws yog ib tug thawj nom sau se, nws yog neeg nplua nuj.
    3 Nws nrhiav kom tau kev pom saib Yes Xus yog leej twg, tab sis nws tsis tau kev pom, vim neeg coob dhau, thiab nws yog neeg qig taub.
    4 Ces nws khiav mus ua ntej, nws nce saum ib tsob ntoo xis kas mos kom tau pom Yes Xus, vim Yes Xus yuav hla ntawd mus.
    5 Thaum Yes Xus los txog ntawm qhov chaw ntawd, nws tsa muag ntsia saud, nws hais tias: "Ntxas Kais, koj nqes los sai sai, vim hnub no kuv yuav tsum mus so hauv koj tsev."
    6 Ces Ntxas Kais nqes nrawm nroos los, nws zoo siab hlo txais Yes Xus.
    7 Sawv daws pom li ntawd, lawv yws yws hais tias: "Nws mus so hauv ib tug neeg txhaum lub tsev lawm!"
    8 Hos Ntxas Kais sawv ntawd, nws hais rau Huab Tais tias: "Huab Tais, kuv yuav muab kuv tej cuab yeej cuab tam ib nrab pub rau cov pluag; yog kuv tau yuam leej twg them ntau tshaj lawm, mas kuv yuav them qhov tshaj plaub npaug pauj rau nws."
    9 Yes Xus hais rau Ntxas Kais tias: "Hnub no, txoj kev cawm los txog hauv lub tsev no lawm, yog vim tus neeg no kuj yog Has Nplas Has ib leeg tub thiab.
    10 Vim Neeg Leej Tub tuaj yog tuaj nrhiav thiab tuaj cawm tus uas ploj lawm."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 16th November 2022, 2:53 am

    Tim 16 lub 11 Hlis 2022

    Hnub plaub Lis Piam Peb Peb Caug Nruab Xyoo ABC Nruab Lis Piam Xyoo II

    Lectionary: 499

    XHLT: LN Margaret nyob Scotland; LN Gertrude, Nkauj Tsim Txiaj

    Zaj Nyeem Ib: QYTN 4: 1-11


    1 Kuv Zam tseem pom ib qho dua: yog ib lub qhov rooj qhib lug rau saum ntuj. Ces lub suab uas thaum xub thawj kuv tau hnov nrov xws li lub hom, nws hais rau kuv tias: “Koj nce los saum no, kuv yuav qhib tej yam uas yuav tshwm sim yav tom qab ntawd rau koj saib .”
    2 Tam sis ntawd, kuv lub tswv yim yuj plaws mus lawm. Ua ciav pom ib lub theej kiab txawb saum ntuj, hos muaj ib tug zaum saum lub theej kiab ntawd.
    3 Tus zaum ntawd nws ci xws li ib co pob zeb pov haum muaj nqes, cov liab thiab cov daj liab. Pom ib tug zaj sawv ci ntsuab xiab li cov pov haum ntsuab vij lub theej kiab.
    4 Nyob ncig lub theej kiab ntawd, muaj dua nees nkaum plaub lub theej kiab ntxiv; muaj nees nkaum plaub tug laus neeg hnav dawb thiab ntoo ib leeg ib lub mom teev kub saum taub hau zaum saum cov theej kiab ntawd.
    5 Muaj kab xob laim ci dawb vog, muaj suab nrov nroo ntws, thiab muaj xob quaj nrov tej rhe tuaj ntawm lub theej kiab tuaj. Muaj xya teg tsau cig cig uas yog Tswv Ntuj xya leej tswv yim, nyob ntawm hauv ntej lub theej kiab,
    6 Nyob ntawm hauv ntej lub theej kiab ntawd, yog zoo li ib lub hiav txwv tsom iav uas pom kev tshab. Nyob hauv plawv lub theej kiab thiab nyob ib ncig lub theej kiab, muaj plaub tug tsiaj, uas muaj ntau ntau lub qhov muag nyob ntawm sab xub ntiag thiab nraum sab nraub qaum.
    7 Thawj tug tsiaj zoo li ib tug tsov ntxhuav; tus ob zoo li ib tug heev nyuj mos; tus peb muaj ib lub ntsej muag xws li tib neeg; tus plaub zoo li ib tug dav tab tom ya.
    8 Plaub tug tsiaj ntawd ib leeg muaj rau txhais tis, thiab muaj qhov muag nyob puv ib ncig sab nraud thiab sab hauv. Lawv hais tsis tseg tas hnub tas hmo tias: “Huab Tais Tswv Ntuj tus muaj hwj huam, nws Ntshiab, Ntshiab, Ntshiab! Nws yog tus ib txwm nyob, tus tab tom nyob, tus tab tom tuaj!”
    9 Thaum twg plaub tug tsiaj ntawd cav txog tus zaum saum lub theej kiab, uas yog tus muaj txoj sia nyob mus li ib txhiab ib txhis, nws lub hwj chim, nws lub meej mom, thiab lawv ua nws tsaug,
    10 mas nees nkaum plaub tug laus neeg khoov pe hauv av ntawm tus zaum saum lub theej kiab xub ntiag, lawv pe hawm tus uas yog tus nyob mus li ib txhiab ib txhis. Lawv muab lawv cov mom teev kub hle pov mus rau ntawm hauv ntej lub theej kiab, lawv qw hais tias:
    11 “Huab Tais peb tus Tswv Ntuj, koj tsim nyog txais lub hwj chim, txoj kev hwm thiab lub hwj huam, vim koj yog tus tau tsim txhua tsav txhua yam; yog vim koj lub siab xav kom muaj, ces txhua tsav txhua yam cia li muaj tuaj thiab cia li tsim tawm los."

    NPN 150: 1B-2, 3-4, 5-6

    Txais: (1b) Ntshiab, ntshiab, Huab Tais ntshiab, Tswv Ntuj muaj hwj huam!

    Nej cav txog Huab Tais nyob hauv nws Kem Tsev Ntshiab ;
    Nej cav txog nws nyob hauv lub ntuj ntsuab uas muaj nws lub zog;
    Nej cav txog nws vim nws cov hauj lwm muaj hwj huam;
    nej cav txog nws vim nws lub meej mom loj tas nrho.

    Txais: (1b) Ntshiab, ntshiab, Huab Tais ntshiab, Tswv Ntuj muaj hwj huam!

    Nej tshuab hom nrov ncha ntws cav txog nws,
    Nej ntaus thaj cheej ntaus nkauj nog ncas cav txog nws,
    Nej ntaus nruas, nej dhia zoo siab cav txog nws;
    Nej qoj hlua thiab tshuab qeej cav txog nws.

    Txais: (1b) Ntshiab, ntshiab, Huab Tais ntshiab, Tswv Ntuj muaj hwj huam!

    Nej ntaus nruas npuaj nrov doog diaj cav txog nws ;
    nej ntaus nruas npuaj nrov ncha ntws cav txog nws.
    Kom txhua tsav txhua yam uas txawj ua pa
    cia li cav txog HUAB TAIS! As les lus yas!

    Txais: (1b) Ntshiab, ntshiab, Huab Tais ntshiab, Tswv Ntuj muaj hwj huam!

    As Les Lus Yas: ZAM 15: 16

    Txais: As les lus yas, as les lus yas.

    Huab Tais hais tias: “kuv tau xaiv nej hauv lub ntiaj teb los,
    kom nej mus thiab nej txi ib co txiv uas yuav nyob ruaj.

    Txais: As les lus yas, as les lus yas.

    Ntawv Moo Zoo: LK 19: 11-28

    11 Thaum cov neeg tab tom mloog Yes Xus hais lus, nws tseem hais dua ib zag paj lug rau lawv, vim nws tuaj txog ze ze Yes Lus Xas Les lawm, thiab sawv daws xav hais tias Tswv Ntuj lub Ceeb Tsheej yuav tshwm sim los tam sis ntawd.
    12 Yes Xus thiaj hais tias: "Muaj ib tug neeg yog caj ces ua nom, nws mus txais lub hwj huam ua vaj rau nws nyob ib lub teb chaws deb deb, nws mam rov qab los.
    13 Nws hu nws kaum leej tub txib tuaj, nws muab kaum choj nyiag rau lawv, nws hais rau lawv tias: ‘Nej coj mus ua lag ua luam mus txog hnub kuv rov los txog.’
    14 Tab sis cov pej xeem ntxub nws, lawv xa ib pab tiam lis lawv qab mus tshaj tawm tias: ‘Peb tsis xav kom tus neeg no ua peb tus vaj.’
    15 Thaum nws txais lub hwj chim ua vaj lawm, nws rov los txog, nws hu cov tub txib uas nws tau muab nyiaj rau tuaj, kom paub saib nyias lawv nyias ua nyias lag luam tau npaum li cas lawm.
    16 Thawj tug tuaj txog, nws hais tias: ‘Huab Tais, koj choj nyiaj ntxeev tau kaum choj ntxiv lawm.’ Tus vaj hais rau nws tias:
    17 ‘Zoo kawg, tub txib zoo. Vim koj tau muaj lub siab pheej xeeb ua tej yam me me li no, ua li mas koj txais lub hwj chim kav kaum lub nroog.’
    18 Tus ob tuaj txog, nws hais tias: ‘Huab Tais, koj choj nyiaj ntxeev tau tsib choj ntxiv lawm.’
    19 Tus vaj kuj hais rau tus ntawd tias: "Koj thiab, koj yuav tswj tsib lub nroog.’
    20 Hos muaj ib tug tuaj txog, nws hais tias: ‘Huab Tais, qho no yog koj choj nyiaj, kuv tau muab qhwv rau hauv ib daim ntaub cia;
    21 vim kuv ntshai koj, vim tias koj yog ib tug neeg coj nruj, koj khaws xyeem yuav tej uas koj tsis tau coj mus tso kom tau ntxiv, koj sau cov qoob uas koj tsis tau tseb.’
    22 Tus vaj hais rau nws tias: ‘Tub txib phem dab tsi, kuv txiav txim rau koj raws nraim li koj lub ncauj tau hais. Koj twb paub tias kuv yog ib tug neeg coj nruj, kuv khaws xyeem yuav tej uas kuv tsis tau coj mus tso kom tau ntxiv, kuv sau cov qoob uas kuv tsis tau tseb,
    23 vim li cas koj tsis coj kuv choj nyiaj mus tso hauv cov tsev ceev nyiaj? Thaum kuv rov los txog, kuv thiaj tau rho kuv choj nyiag nrog ib qho paj.’
    24 Ces tus vaj hais rau cov neeg nyob ntawd tias: ‘Nej rho nws choj nyiaj ntawm nws mus, nej muab rau tus uas muaj kaum choj.’ Ces lawv hais rau tus vaj tias:
    25 ‘Huab Tais, nws twb muaj kaum choj lawm.’
    26 Tus vaj teb tias: ‘Kuv hais meej rau nej: tus uas muaj lawm, luag yuav pub ntxiv rau nws; hos tus tsis muaj, mas luag tseem yuav muab qhov uas nws muaj tshem mus thiab.
    27 Hos kuv cov yeeb ncuab, uas tsis kam kuv ua lawv tus vaj, nej coj lawv los ntawm no, nej muab lawv txiav caj dab rau ntawm kuv xub ntiag.’”
    28 Thaum Yes Xus hais cov lus ntawd tas, nws sawv kev mus, nws taug kev ua ntej mus rau pem Yes Lus Xas Les lawm.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 16th November 2022, 2:32 pm

    Tim 17 lub 11 Hlis 2022

    Hnub Tsib Lis Piam Peb Caug Peb Nruab Xyoo ABC Nruab Lis Piam Xyoo II

    Lectionary: 500

    Yuav Hwm LN Elizabeth nyob Hungary, ua Leej Phauj

    Zaj Nyeem Ib: QYTN 5: 1-10


    1 Kuv, Zam, pom ib phau ntawv kauv nyob hauv tus zaum saum lub theej kiab txhais tes xis. Phau ntawv no sau sab hauv thiab sab nraud huv si; muaj xya lub thwj pav phau ntawv kaw cia.
    2 Ces kuv pom ib tug Tshiab muaj hwj chim kawg tshaj tawm nrov nrov tias: “Leej twg thiaj tsim nyog qhib phau ntawv no thiab daws cov thwj?”
    3 Tab sis tsis muaj leej twg nyob saum ntuj, nyob ntiaj teb no, los nyob nruab yeeb tsim nyog qhib los saib phau ntawv li.
    4 Ces kuv quaj heev rau qhov tias nrhiav tsis tau ib tug kom tsim nyog qhib los saib phau ntawv li.
    5 Ib tug hauv pab laus neeg thiaj hais rau kuv tias: “Tsis txhob quaj! Tus Tsov Ntxhuav xeem Yus Das, tus Cag hlav ntawm Das Vis tuaj, nws twb yeej lawm, ces nws yuav qhib tau phau ntawv thiab xya lub thwj.”
    6 Ces kuv pom ib tug Yaj sawv ntsug hauv nruab nrab ntawm lub theej kiab thiab plaub tug tsiaj thiab hauv nruab nrab cov laus neeg. Zoo li nws raug luag muab tua lawm; nws tuaj xya tus kub, thiab muaj xya lub qhov muag, uas yog Tswv Ntuj xya leej tswv yim nws xa mus nyob thoob ntiaj teb.
    7 Nws los ces nws txais phau ntawv ntawm tus zaum saum lub theej kiab txhais tes xis.
    8 Thaum tus Yaj txais tau phau ntawv lawm, mas plaub tug tsiaj thiab nees nkaum plaub tug laus neeg txhos caug ntua pe ntawm nws xub ntiag. Lawv ib leeg tuav ib rab nkauj nog ncas thiab ib co tais kub ntim tshuaj tsw qab puv nkaus; cov tshuaj tsw qab no yog cov ntshiab cov zaj thov Ntuj.
    9 Lawv hu ib zag nkauj tshiab tias: “Koj tsim nyog txais phau ntawv thiab qhib nws cov thwj, vim koj raug luag tua, thiab koj tau muab koj cov ntshav los them nqi muas cov nyob hauv tas txhua xeem neeg, txhua xeem lus, txhua haiv neeg thiab txhua lub kuj cuab rau Tswv Ntuj.
    10 Koj tau tsa lawv ua ib lub teb chaws muaj vaj kav, thiab ua co Leej Choj; ces lawv yuav tswj kav lub ntiaj teb.”

    NPN 149: 1b-2, 3-4, 5-6a+9b

    Txais: (QYTN 5: 10) Leej Yaj tau muab peb tsa ua ib lub ceeb tsheej
    muaj leej choj los tsob hwb peb tus Tswv Ntuj.
    los: As les lus yas.

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    Kom His Xas Lais cia li zoo siab nyob hauv tus uas tsim lawv,
    kom Xis Yoos cov me nyuam luag ntxhi nyob hauv lawv tus vaj.

    Txais: (QYTN 5: 10) Leej Yaj tau muab peb tsa ua ib lub ceeb tsheej
    muaj leej choj los tsob hwb peb tus Tswv Ntuj.
    los: As les lus yas.

    Kom lawv ua kev lom zem yoj cev cav txog nws lub npe,
    kom lawv hu nkauj cav txog nws nrog suab nruas suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej ua zam rau cov neeg me hnav.

    Txais: (QYTN 5: 10) Leej Yaj tau muab peb tsa ua ib lub ceeb tsheej
    muaj leej choj los tsob hwb peb tus Tswv Ntuj.
    los: As les lus yas.

    Kom cov muaj lub siab ntseeg hom khaj nyob hauv txoj kev nto koob meej;
    kom lawv hu nkauj zoo siab hauv lawv tej chaw nyob;
    kom lawv lub qa tsuas muaj qw suab cav txog Tswv Ntujj.
    Cov uas ntseeg txog nws lawv lub koob meej yog zoo li no. As les lus yas.

    Txais: (QYTN 5: 10) Leej Yaj tau muab peb tsa ua ib lub ceeb tsheej
    leej choj los tsob hwb peb tus Tswv Ntuj.
    los: As les lus yas.

    As Les Lus Yas: NPN 95: 8

    Txais: As les lus yas, as les lus yas.

    Yog hnub no nej hnov nws lub suab,
    nej tsis txhob cia nej lub siab tawv ncauj.

    Txais: As les lus yas, as les lus yas.

    Ntawv Moo Zoo: LK 19: 41-44

    41 Thaum Yes Xus tuaj yuav txog Yes Lus Xas Les, nws pom lub nroog, nws quaj rau lub nroog,
    42 nws hais tias: "Hnub no, kheev lam koj paub tias yog dab tsi thiaj ua kom muaj kev thaj yeeb mas! Tab sis, nyem no tej ntawd nyob zais ntshis rau koj qhov muag.
    43 Vim tias, yuav muaj ib hnub twg uas koj cov yeeb ncuab yuav tsa ib cov ntsa laj kab vij koj, lawv yuav puav koj, yuav nias qees qhov txhia chaw tuaj rau koj.
    44 Lawv yuav tsoo koj vau tas rau hauv av, thiab tsuj ntiag koj cov me nyuam uas nyob hauv koj. Lawv yuav tsis tseg ib lub pob zeb tshooj ib lub nyob hauv koj li, yog vim koj tsis kam lees lub caij uas Tswv Ntuj tuaj xyuas koj.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 17th November 2022, 3:15 am

    Tim 18 lub 11 Hlis 2022

    Hnub Rau Lis Piam Peb Caug Peb Nruab Xyoo ABC Nruab Lis Piam Xyoo II

    Lectionary: 501

    XHLT: LN Rose Philippine Duchesne;
    Nco Txog Hnub ua Kab Ke Fij ob lub Tuam Tsev Teev Ntuj LN Pob Zeb thiab LN Paj Lug

    Zaj Nyeem Ib: QYTN 10: 8-11


    Zam piav li no:
    8 Lub suab uas kuv tau hnov nrov saum ntuj tuaj rov qab hais rau kuv tias: “Koj mus nqa phau ntawv uas nthuav cia nyob hauv tus Tshiab sawv ntsug saum hiav txwv thiab saum av txhais tes.”
    9 Ces kuv mus txog ntawm tus Tshiab, kuv kom nws muab phau ntawv me me rau kuv. Tus Tshiab hais rau kuv tias: “Koj txais mus, koj muab noj. Phau ntawv yuav qaub koj lub plab, tab sis hauv koj qhov ncauj mas nws yuav qab cuag zib mu.”
    10 Kuv txais phau ntawv me me ntawm tus Tshiab txhais tes los, ces kuv muab noj. Thaum nyob hauv kuv qhov ncauj, mas kuv hnov qab cuag zib mu, tab sis thaum kuv nqos tas mas kuv hnov qaub kuv lub plab kawg li.
    11 Ces nws hais rau kuv tias: “Koj yuav tsum rov qab ua Yaj Saub dua hais txog ntau haiv neeg, ntau lub kuj cuab, ntau xeem lus, thiab ntau tus vaj ntxwv.”

    NPN 119: 14, 24, 72, 103, 111, 131

    Txais: (103a) Lo lus koj tau cog tseg qab zib ua luaj rau kuv qhov ncauj!

    Kuv zoo siab taug txoj kev ua raws li koj lo lus qhia,
    Zoo siab npaum kuv nplua nuj muaj txhij txhua.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Koj cov cai lij choj yog kuv chaw zoo siab,
    Koj cov lus pab tswv yim rau kuv.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Txoj Cai uas tawm hauv koj lub ncauj los,
    muaj nqe rau kuv dua ib txhab nyiaj ib txhab kub.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Cov lus koj tau cog tseg qab zib ua luaj rau kuv tus nplaig,
    qab dua zib ntab zib mu nyob hauv kuv qhov ncauj !

    Txais: (103a) Lo lus koj tau cog tseg qab zib ua luaj rau kuv qhov ncauj!

    Koj cov cai lij choj yog kuv lub cuab tam mus li,
    yog kuv txoj kev zoo siab.

    Txais: (103a) Cov lus koj tau cog tseg qab zib ua luaj rau kuv qhov ncauj!

    Kuv huas pa xyu rua ncauj,
    Vim kuv tshaib nqhis koj cov lus qhia.

    Txais: (103a) Cov lus koj tau cog tseg qab zib ua luaj rau kuv qhov ncauj!

    As Les Lus Yas: Zam 10: 27

    Txais: As les lus yas, as les lus yas.

    Huab Tais hais tias: “Kuv cov yaj mloog kuv lub suab,
    kuv paub kuv cov yaj, kuv cov yaj raws kuv qab nraim.

    Txais: As les lus yas, as les lus yas.

    Ntawv Moo Zoo: LK 19: 45-48

    45 Yes Xus chaws mus hauv lub Tuam Tsev Teev Ntuj, nws ntiab cov neeg muag toob xib tawm,
    46 nws hais rau lawv tias:
    "Ntawv sau hais tias: ‘Kuv lub tsev yog tsev teev Ntuj,
    tab sis nej muab ua ib qho chaw rau tub sab nkaum.’"
    47 Yes Xus niaj hnub qhia nyob hauv lub Tuam Tsev Teev Ntuj; hos cov thawj Leej Choj, cov Kws Ntawv Ntshiab, thiab pej xeem cov thawj coj nrhiav kev muab nws tua.
    48 Tab sis lawv nrhiav tsis tau kev yuav ua raws li lawv xav ua, vim tas tsoom pej xeem mloog nws hais lus mas lawv ntsia dai ncuv rau nws lub qhov ncauj xwb.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 18th November 2022, 6:47 pm

    Tim 19 lub 11 Hlis 2022

    Hnub Xya Lis Piam Peb Caug Peb Nruab Xyoo ABC Nruab Lis Piam Xyoo II

    Lectionary: 502

    Zaj Nyeem Ib: QYTN 11: 4-12

    Kuv Zam hnov ib lub suab hais saum ntuj tuaj rau kuv tias: “Kuv yuav xa kuv ob tug tim khawv tuaj.
    4 Ob tug no yog ob tsob txiv ntoo roj thiab yog ob tug ncej txawb teeb uas sawv ntawm tus Huab Tais kav lub ntiaj teb xub ntiag.
    5 Yog leej twg xav ua phem rau nkawd, mas hluav taws yuav tawm hauv nkawd qhov ncauj los thiab yuav hlawv nkawd cov yeeb ncuab; kom yog leej twg xav ua phem rau nkawd, mas nws kawg yuav tsum raug tuag xwb.
    6 Ob tug no muaj hwj huam kaw tau lub ntuj kom txhob los nag, mus txog hnub nkawd ua yaj saub tas tso. Thiab nkawd kuj muaj hwj huam hloov tau dej los ua ntshav, thiab tso tau tas puas tsav yam mob los raug lub ntiaj teb thaum twg los tau ywj nkawd siab.
    7 Tthaum nkawd ua tim khawv tas lawm, mas tus tsiaj uas tawm hauv lub qhov ntuj tob los, yuav tuaj ua rog rau nkawd; nws yuav yeej nkawd thiab yuav muab nkawd tua.
    8 Nkawd ob lub cev yuav nyob nraum zoov ntawm lub tshav puam hauv lub tsheej loj, uas luag muab hu piv rau Xos Dos Mas, thiab Hais Nkws Tos, nyob ntawm thaj chaw uas nkawd tus Huab Tais kuj tau raug muab dai saum ntoo cuam thiab.
    9 Cov neeg tuaj ntawm ntau haiv neeg, ntau xeem neeg, ntau xeem lus, thiab ntau lub kuj cuab tuaj yuav ntsia ntsoov nkawd ob lub cev li peb hnub thiab ib tog hnub; luag yuav tsis pub coj nkawd ob lub cev mus zwm ntxa li.
    10 Cov neeg nyob ntiaj teb yuav hom khaj vim nkawd thiab yuav zoo siab loj; lawv yuav sib pub paj tshab ib leeg rau ib leeg, vim tias ob tug Yaj Saub no tau ua kom cov neeg nyob ntiaj teb ntxhov siab loj.
    11 Tab sis dhau peb hnub thiab ib tog hnub lawm, mas ib txog pa muaj sia tawm ntawm Tswv Ntuj tuaj nyob hauv nkawd, ces nkawd sawv tsees tau los nyob sawv ntsug saum nkawd ob txhais taw. Cov neeg uas pom nkawd, tau ntshai loj kawg nkaus.
    12 Ces lawv hnov ib lub suab hais nrov nrov saum ntuj tuaj rau nkawd tias: “Neb nce los saum no!” Nkawd thiaj li nce mus rau saum ntuj nyob tauv huab, rau nkawd cov yeeb ncuab qhov muag pom ntsoov.

    NPN 144: 1, 2, 9-10

    Txais: (1) Thov kom HUAB TAIS nto koob meej, nws yog kuv lub tsua!

    Thov kom HUAB TAIS nto koob meej, nws yog kuv lub tsua,
    nws qhia kuv ob txhais tes kom txawj ntaus rog,
    kuv ntiv tes kom txawj ntaus tsam.

    Txais: (1) Thov kom HUAB TAIS nto koob meej, nws yog kuv lub tsua!

    Nws yog tus khuv leej kuv, yog kuv lub yeej ntsa zeb,
    Yog kuv lub loog ruaj nreb, yog tus cawm kuv dim,
    nws yog kuv daim leem phiaj, kuv tso siab rau nws ;
    nws coj kuv cov neeg los zwm rau kuv.

    Txais: (1) Thov kom HUAB TAIS nto koob meej, nws yog kuv lub tsua!

    Tswv Ntuj, kuv yuav hu ib zag nkauj tshiab rau koj,
    Kuv yuav ntaus lub thaj cheej kaum txoj hlua cav txog koj.
    Koj yog tus pub kev yeej rau cov vaj ntxwv,
    Yog tus cawm koj tus tub txib Das Vis ntawm rab ntaj tua neeg.

    Txais: (1) Thov kom HUAB TAIS nto koob meej, nws yog kuv lub tsua!

    As Les Lus Yas: 2 TM 1: 10

    Txais: As les lus yas, as les lus yas.

    Peb tus Cawm Seej Yes Xus Pleev tau rhuav txoj kev tuag,
    thiab tau ua kom txoj sia ci tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo: LK 20: 27-40

    27 Muaj ob peb tug Xas Dus Kais, uas yog cov hais tias neeg tuag tsis muaj kev sawv rov los, lawv txav los nug Yes Xus,
    28 lawv hais tias: "Xib Hwb, Mais Xes sau cia rau peb tias: Yog leej twg tus kwv tij tuag, tseg poj niam cia tsis tau muaj me nyuam li, mas tus kwv yuav tsum qaws tus poj niam kom tsa tau ib co xeeb leej xeeb ntxwv rau tus kwv tij ntawd no.
    29 Yog tias muaj xya leej kwv tij, thawj tug yuav poj niam, nws tuag tsis tau muaj tub ki li,
    30 mas tus ob,
    31 thiab tus peb kuj yuav tus poj niam ntawd, thiab tas lawv xya leej puav leej ua ib yam li ntawd, lawv tuag tas tsis muaj tub ki li.
    32 Thaum kawg, tus poj niam kuj tuag lawm thiab.
    33 Ua li mas lub zim txwv uas neeg tuag sawv rov los, tus poj niam ntawd yuav yog leej twg poj niam? Vim lawv xya leej tau yuav nws ua poj niam tib si."
    34 Yes Xus thiaj hais rau lawv tias: "Cov tub ki hauv tiam no lawv yuav poj niam thiab yuav txiv.
    35 Tab sis cov uas Ntuj txiav txim tias lawv tsim nyog mus nyob rau tiam tom ntej thiab tsim nyog txais kev sawv hauv cov tuag rov los, mas lawv tsis yuav poj niam thiab tsis yuav txiv ntxiv.
    36 Lawv tsis txawj tuag ntxiv, vim lawv zoo ib yam li cov tshiab, thiab lawv yog Tswv Ntuj cov me nyuam, vim lawv yog cov me nyuam ntawm txoj kev sawv rov los.
    37 Hais txog tias cov tuag yuav sawv rov los, mas Mais Xes twb qhia txog qhov ntawd nyob hauv zaj piav txog tsob pos, thaum nws hu Huab Tais ua Has Nplas Has tus Tswv Ntuj, His Xas Has tus Tswv Ntuj, thiab Yas Kos tus Tswv Ntuj.
    38 Tswv Ntuj tsis yog cov neeg tuag tus Tswv Ntuj, nws yog cov neeg ciaj tus Tswv Ntuj; vim tias rau Tswv Ntuj mas tas sawv daws muaj txoj sia tib si."
    39 Ob peb tug Kws Ntawv Ntshiab thiaj hais tias: "Xib Hwb, koj hais tau zoo kawg."
    40 Vim lawv tsis muaj cuab kav yuav nug Yes Xus txog dab tsi ntxiv.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 19th November 2022, 6:16 pm

    Tim 21 lub 11 Hlis 2022

    Hnub Ob Lis Piam Peb Caug Peb Nruab Xyoo ABC Nruab Lis Piam Xyoo II

    Lectionary: 503

    Yuav Hwm Hnub lawv coj Mab Liab Mud Fij rau lub Tuam Tsev Teev Ntuj

    Zaj Nyeem Ib: QYTN 14: 1-3, 4b-5


    1 Kuv Zam ntsia pom tus Yaj sawv ntsug saum lub roob Xis Yoos, thiab nrog nws, muaj ib puas plaub caug plaub txhiab leej neeg uas lawv muaj nws lub npe thiab nws Txiv lub npe sau rau saum lawv hauv pliaj.
    2 Ces kuv hnov ib lub suab nrov saum ntuj tuaj xws li ib lub suab dej hlob nrov, thiab kuj zoo xws li lub suab xob quaj nrov ib rhe muaj ceem; lub suab kuv hnov kuj nrov zoo li yog ib co tub ntaus thaj cheej tab tom ntaus lawv cov thaj cheej.
    3 Lawv hu ib zag nkauj tshiab nyob ntawm lub theej kiab hauv ntej, thiab nyob ntawm plaub tug tsiaj thiab ntawm cov laus neeg xub ntiag. Tsis muaj leej twg kawm tau zaj nkauj ntawd li, tsuas yog ib puas plaub caug plaub txhiab leej ntawd, uas Ntuj tau txhiv lawv ntawm lub ntiaj teb los thiaj kawm tau.
    4b Cov ntawd yog cov raws nraim Leej Yaj mus tas qhov txhia chaw. Lawv yog cov uas Ntuj txhiv ntawm tsoom tib neeg los ua thawj phaum txiv rau Tswv Ntuj thiab rau Leej Yaj.
    5 Tsis muaj leej twg nrhiav tau ib lo lus dag nyob hauv lawv lub ncauj li, lawv tsis muaj ib qho xyeej hauv lawv li.

    NPN 24: 1bc-2, 3-4ab, 5-6

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Lub ntiaj teb thiab puas tsav yam nyob hauv yog HUAB TAIS li,
    lub sim ceeb thiab cov nyob hauv yog nws tug.
    Vim nws yog tus tsim lub ntiaj teb los txawb rau saum cov hiav txwv
    thiab muab tso rau saum cov dej ntws.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Leej twg thiaj yuav nce tau mus rau saum HUAB TAIS lub roob?
    Los leej twg thiaj yuav mus sawv taus nyob hauv nws thaj chaw ntshiab?
    Yog tus uas txhais tes tsis muaj txhaum, lub siab dawb huv,
    tus uas tsis ntshaw tej yam tsis muaj nqes dab tsi.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Nws yuav txais ib lo lus foom koob hmoov tuaj ntawm HUAB TAIS tuaj. ,
    yog paj tshab tuaj ntawm Tswv Ntuj tus cawm nws tuaj.
    Lawv yuav zoo li no, haiv neeg uas nrhiav Tswv Ntuj,
    cov uas nrhiav Yas Kos tus Tswv Ntuj lub ntsej muag.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    As Les Lus Yas: MT 24: 42a, 44

    Txais: As les lus yas, as les lus yas.

    Nej kav tsij zov hmo mog,
    vim nej tsis paub thaum twg Neeg Leej Tub yuav los.

    Txais: As les lus yas, as les lus yas.

    Ntawv Moo Zoo: LK 21: 1-4

    1 Yes Xus tsa muag ntsia, nws pom ib co neeg nplua nuj tso nyiaj pub rau hauv lub txhab ceev nyiaj.
    2 Nws pom ib tug poj ntsuam pluag pluag tso tau ob lub txiaj me me rau hauv thiab.
    3 Ces nws hais tias: "Kuv hais tseeb rau nej tias, tus poj ntsuam pluag pluag no tso nyiaj ntau tshaj tas lawv sawv daws huv tib si.
    4 Vim tias tas cov neeg ntawd, lawv rho lawv cov nyiaj seem los pub ua paj tshab xwb, hos tus poj ntsuam ntawd mas nws muab raws nws txoj kev pluag, tab sis nws muab tas nrho qhov nws yuav siv muas noj muas haus los tso rau hauv."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 21st November 2022, 3:31 am

    Tim 22 lub 11 Hlis 2022

    Hnub Peb Lis Piam Peb Peb Xyoo ABC Nruab Lis Piam Xyoo II

    Lectionary: 504

    Yuav Hwm LN Cecilia, Nkauj Tsim Txiaj tuag ua Tim Khawv

    Zaj Nyeem Ib: QYTN 14: 14-19


    14 Kuv Zam pom muaj ib twv huab dawb dawb; muaj ib tug zoo xws li Neeg ib leeg tub zaum saum twv huab; nws ntoo ib lub mom teev kub uas yog kub thiab tuav ib rab liag ntse zuag plias ntawm tes.
    15 Muaj dua ib tug tshiab tawm hauv lub Tuam Tsev tuaj; nws qw nrov nrov rau tus zaum saum twv huab tias: “Koj siv koj rab liag mus sau qoob, txog lub caij sau qoob lawm, vim cov qoob loo nyob ntiaj teb siav tas lawm.”
    16 Ces tus zaum saum twv huab fiav sis nws rab liag pov mus rau ntiaj teb, mus hlais cov qoob nyob ntiaj teb tas huv si.
    17 Muaj dua ib tug tshiab tawm hauv lub Tuam Tsev saum ntuj tuaj, nws kuj tuav ib rab liag ntse zuag plias thiab.
    18 Ces muaj lwm tus tshiab ntxiv tawm ntawm lub thaj txi Ntuj los, nws yog tus saib xyuas txog cov hluav taws; nws qw nrov nrov rau tus tshiab tuav rab liag ntse zuag plias tias: “Koj pov koj rab liag ntse zuag plias mus txiav cov ntwg txiv cawv ntawm cov hmab txiv cawv nyob ntiaj teb, vim cov txiv cawv siav lawm.”
    19 Tus tshiab thiaj fiav sis pov rhees nws rab liag mus rau ntiaj teb, mus txiav cov txiv cawv nyob ntiaj teb; ces nws muab coj los cuam pov rau hauv lub tshuab zom txiv ua cawv uas ntim Tswv Ntuj tej kev chim kev npau taws.

    NPN 96: 10, 11-12, 13

    Txais: (13b) Huab Tais tuaj txiav txim rau lub ntiaj teb.

    Nej hais nyob hauv txhua haiv neeg tias: HUAB TAIS yog vaj ntxwv;
    Nws tsim lub ntiaj teb kom nyob ruaj, tshem tsis tau;
    Nws tswj tsoom haiv neeg raws kev ncaj ncees.

    Txais: (13b) Huab Tais tuaj txiav txim rau lub ntiaj teb.

    Kom lub ntuj thiab lub ntiaj teb zoo siab;
    kom dej hiav txwv thiab txhua yam nyob hauv dej qw nroo ntws;
    kom cov tiaj nras thiab txhua yam nyob hauv tiaj luag ntxhi!
    Thiab kom txhua tus ntoo hauv hav zoov hom khaj.

    Txais: (13b) Huab Tais tuaj txiav txim rau lub ntiaj teb.

    Lawv yuav dhia ntawm HUAB TAIS xub ntiag,
    vim nws tuaj txog lawm, nws tuaj kav lub ntiaj teb.
    Nws yuav tswj lub ntiaj teb raws kev ncaj ncees,
    thiab tswj cov haiv neeg raws kev haum pheej.

    Txais: (13b) Huab Tais tuaj txiav txim rau lub ntiaj teb.

    As Les Lus Yas: QYTN 2: 10c

    Txais: As les lus yas, as les lus yas.

    Koj ntseeg ruaj nreb kom txog hnub tuag mog!
    Ces kuv yuav muab txoj sia ua mom teev kub rau koj ntoo.

    Txais: As les lus yas, as les lus yas.

    Ntawv Moo Zoo: LK 21: 5-11

    5 Thaum ntawd, muaj ib txhia hais txog tias lub Tuam Tsev Teev Ntuj txhim tau muaj pob zeb zoo nkauj thiab muaj cov paj tshab ua Ntuj tsaug zoo saib. Ces Yes Xus hais tias:
    6 “Tej uas nej qhov muag pom ntawm no, mas muaj ib hnub yuav tsis seem ib lub pob zeb tseem tshooj ib lub li uas yuav tsis raug muab rhuav kom vau tas.”
    7 Lawv nug Yes Xus tias: “Xib Hwb, thaum twg tej ntawd mam li tshwm sim, thiab yuav muaj lub cim dab tsi thaum tej ntawd yuav tshwm sim tuaj?”
    8 Yes Xus thiaj hais tias: “Nej yuav ceev faj txhob cia luag ua kom nej yuam kev, vim yuav muaj coob leej siv kuv lub npe tuaj, lawv yuav hais tias: ‘Yog kuv,’ thiab yuav hais tias: 'Lub zim txwv twb los txog lawm'. Mas nej txhob mus raws lawv qab.
    9 Thaum nej hnov luag tham txog kev tsov rog thiab kev neeg ua kub ntxhov, mas nej tsis txhob ntshai, vim tias tej ntawd yuav tsum xub tshwm sim tuaj tso, tab sis tsis tau txog lub zim txwv kawg tam sis ntawd.”
    10 Yes Xus tseem hais rau lawv tias: “Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws;
    11 yuav muaj av qeeg loj kawg nkaus, yuav muaj tshaib plab, thiab muaj mob aws nyob ib qho chaws rau lwm qhov chaw; yuav muaj tej yam xwm txaus ntshai kawg, thiab yuav muaj tej lub cim loj tuaj saum ntuj tuaj.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 22nd November 2022, 9:09 am

    Tim 23 lub 11 Hlis 2022

    Hnub plaub Lis Piam Peb Peb Caug Nruab Xyoo ABC Nruab Lis Piam Xyoo II

    Lectionary: 505

    XHLT: LN Miguel Augustin Pro, Leej Choj tuag ua Tim Khawv;
    LN Columban, Txiv Twj Cuab ua Thawj Tswj
    LN Clement I, Vaj Qhia tuag ua Tim Khawv

    Zaj Nyeem Ib: QYTN 15: 1-4


    1 Kuv Zam rov pom dua ib lub cim ntxiv nyob saum ntuj, yog ib lub cim loj thiab txaus qhuas kawg: muaj xya tus Tshiab nqa xya yam mob aws uas yog xya yam kawg yuav muaj tuaj raws li Tswv Ntuj lub siab npau taws ua kom muaj.
    2 Ces kuv pom ib qho zoo li yog lub hiav txwv tsom iav muaj hluav taws xyaw nrog. Cov neeg uas tau yeej tus niagTsiaj, yeej nws tus duab thiab tus zauv txog nws lub npe, mas lawv sawv ntsug saum lub hiav txwv tsom iav ntawd, lawv muaj Tswv Ntuj cov thaj cheej nrog lawv,
    3 ces lawv hu Tswv Ntuj tus tub txib Mais Xes zaj nkauj thiab Leej Yaj zaj nkauj tias:
    “Huab Tais Tswv Ntuj Muaj Hwj Huam, koj cov hauj lwm loj thiaj zoo tas nrho!
    Vaj kav cov haiv neeg, koj tej kev yog kev ncaj thiab kev tseeb.
    4 Huab Tais, leeg twg thiaj yuav tsis hwm koj, thiab tsis cav lus zoo txog koj lub npe?
    Vim koj tib leeg thiaj yog Tus Ntshiab. Tas txhua haiv neeg yuav tuaj pe hawm koj ntaem koj xub ntiag,
    vim koj tau qhia koj cov hauj lwm ncaj rau sawv daws paub.”

    NPN 98: 1, 2-3ab, 7-8, 9

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    yog nws sab npab ntshiab tau ua.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    HUAB TAIS tau qhia kom sawv daws paub txog nws txoj kev cawm,
    nws tau muab nws txoj kev ncaj rau cov kuj cuab pom.
    Nws rov nco txog nws txoj kev ua zoo thiab
    kev ua siab ncaj rau tsev neeg His Xas Lais.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    Kom dej hiav txwv thiab tej yam nyob puv hauv hiav txwv ua nrov nroo ntws,
    Kom lub ntiaj teb thiab tsoom neeg nyob ntiaj teb ua nrov ntsuag qees;
    Kom cov niam dej npuaj teg, kom cov roob nrog lawv qw zoo siab,

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    nyob ntawm HUAB TAIS xub ntiag, vim nws tab tom tuaj,
    nws tuaj tswj kav lub ntiaj teb.
    Nws yuav tswj kav lub qab ntuj neeg raws kev ncaj,
    thiab cov haiv neeg raws kev haum pheej.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    As Les Lus Yas: QYTN 2: 10c

    Txais: As les lus yas, as les lus yas.

    Koj ntseeg ruaj nreb mus txog hnub tuag mog!
    Ces kuv yuav muab txoj sia ua mom kub rau koj ntoo.

    Txais: As les lus yas, as les lus yas.

    Ntawv Moo Zoo: LK 21: 12-19

    Yes Xus hais rau tsoom neeg tias:
    12 “Luag yuav ntes nej thiab yuav hiam nej, luag yuav coj nej mus kom rau cov tsev txoos thiab tsev loj faj. Luag yuav coj nej mus rau ntawm cov vaj ntxwm thiab cov nom tswj xeev xub ntiag vim kuv lub npe.
    13 Tej ntawd yuav yog ib lub zoo sij hawm rau nej ua tim khawv.
    14 Nej nco ntsoov hauv nruab siab tias, nej yuav tsis txhob xub npaj ib co lus teb ua ntej.
    15 Vim kuv kiag yuav muab ib lub ncauj thiab ib txog kev thoob tsib rau nej, ces cov ntxub nej yuav tsis muaj lus teb tau thiab cav tau nej.
    16 Cov yuav muab nej rau luag ntes ces yog nej niam nej txiv, nej cov kwv tij, cov txheeb ze, thiab cov phooj ywg. Luag yuav muab nej ib txhia tua.
    17 Tas sawv daws yuav ntxub nej vim kuv lub npe.
    18 Tab sis tsis muaj ib txoj plaub hau saum nej taub hau yuav ploj.
    19 Nej ua siab ruaj nreb kom tom thawj, ces nej yuav cawm tau nej txoj sia."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 23rd November 2022, 3:34 am

    Tim     24     lub     11     Hlis     2022

    Hnub Tsib Lis Piam Peb Caug Peb Nruab Xyoo ABC Nruab Lis Piam Xyoo II

    Lectionary: 506

    Yuav Hwm LN As Nres Hung-Lac, ua Leej Choj, thiab cov nrog nws Tuag ua Tim Khawv

    Cov Zaj Nyeem rau Thanksgiving, mus saib nram qab

    Zaj Nyeem Ib:    QYTN 18: 1-2, 21-23; 19: 1-3, 9a

    18: 1 Kuv, Zam, pom dua ib tug Tshiab nqes saum ntuj los, nws muaj hwj huam loj, nws lub hwj chim ci ntsa iab pom kev rau lub ntiaj teb.
    2 Nws qw ib suab nrov muaj zog tias: “Lub tsheej loj Npas Npis Los poob lawm, poob lawm lau. Nws hloov ua dab phem lub chaw nyob lawm, ua lub nkuaj kaw cov dab tsis huv, ua lub nkuaj kaw txhua hom noog tsis huv, thiab ua lub nkuaj kaw txhua hom tsiaj tsis huv thiab qias neeg.”
    21 Ces ib tug Tshiab muaj zog kawg tsa hlo ib lub pob zeb zoo li ib lub zeb zom loj loj, nws muab cuam loo mus rau hauv dej hiav txwv, nws hais tias: “Ib yam li no, lub tsheej loj Npas Npis Los yuav raug siv zog muab cuam loo pov tseg, ces yuav nrhiav tsis pom ib zaug ntxiv.
    22 Ces yuav tsis hnov cov suab ntaus nkauj nog ncas thiab suab ntaus paj nruag nrov ntxiv, yuav tsis hnov suab raj, suab hom nrov nyob hauv koj ib zaug ntxiv; yuav tsis pom muaj cov kws tes txawj tes nkiag ua tau ntau yam toob xib nyob hauv koj ib zaug ntxiv; yuav tsis hnov zom zeb nrov hauv koj ib zaug ntxiv.
    23 Yuav tsis pom teeb ci nyob hauv koj ib zaug ntxiv; yuav tsis hnov nkauj nyab nraug vauv lub suab sib hu nyob hauv koj ib zaug ntxiv. Vim tias koj cov tub lag tub luam yog cov nom loj nyob ntiaj teb, ces koj txoj kev ua khawv koob thiaj dag kom tas txhua haiv neeg mus yuam kev.”
    19: 1 Dhau tej no lawm, kuv hnov zoo li ib lub suab nrov loj kawg tuaj ntawm ib pab neeg coob coob nyob saum ntuj tuaj, lawv qw tias: “As Les Lus Yas! Txoj kev cawm neeg, lub koob meej, lub hwj huam yog peb tus Tswv Ntuj tug.
    2 Vim nws txoj kev txiav txim yog qhov tseeb thiab qhov ncaj, nws tau txiav txim rau tus Poj Ntiav loj, uas ua kom lub ntiaj qias vim nws txoj kev ua niam ntiav, thiab nws tau ua pauj rau nws cov tub txib cov roj ntsha vim tus poj ntiav lawm.”
    3 Ces pab neeg rov hais zaum ob tias: “As Les Lus Yas! Pa taws yuav ncho ntawm tus Poj Ntiav tuaj mus tas ib txhiab ib txhis!”
    9a Tus Tshiab hais rau kuv tias: “Koj sau li no: ‘Cov tau txoj hmoov zoo yog cov uas raug caw tuaj noj Leej Yaj rooj tshoob rooj hno ‘.”

    NPN    100: 1b-2, 3, 4, 5

    Txais: (QYTN 19:9a) Cov tau txoj hmoov zoo yog cov raug caw mus noj Leej Yaj rooj tshoob rooj hno.

    Txhua lub teb chaws, nej hu nkauj zoo siab rau HUAB TAIS!
    Nej xyiv fab hlo luag ntxhi tsob hwb HUAB TAIS ;
    nej hu nkauj zoo siab chaws los ntawm nws xub ntiag

    Txais: (QYTN 19:9a) Cov tau txoj hmoov zoo yog cov raug caw mus noj Leej Yaj rooj tshoob rooj hno.

    Nej yuav tsum paub tias HUAB TAIS yog Tswv Ntuj.
    Nws tsim peb los, peb yog nws tug,
    peb yog nws haiv neeg, yog pab yaj nws zov.

    Txais: (QYTN 19:9a) Cov tau txoj hmoov zoo yog cov raug caw mus noj Leej Yaj rooj tshoob rooj hno.

    Nej chaws mus hauv nws cov rooj loog, nej ua nws tsaug,
    Nej mus hauv nws cov tshav loog, nej cav txog nws ;
    nej ua nws tsaug, nej foom lus zoo rau nws lub npe.

    (QYTN 19:9a) Cov tau txoj hmoov zoo yog cov raug caw mus noj Leej Yaj rooj tshoob rooj hno.

    Vim HUAB TAIS muaj lub siab zoo,
    nws txoj kev ua siab zoo yuav nyob mus li,
    nws yuav ua siab ncaj rau txhua txhua tiam neeg.

    Txais: (QYTN 19:9a) Cov tau txoj hmoov zoo yog cov raug caw mus noj Leej Yaj rooj tshoob rooj hno.

    As Les Lus Yas:    LK 21: 28

    Txais: As les lus yas, as les lus yas.

    Nej sawv kom ntseg, nej yuav tsa taub hau,
    vim txoj kev txhiv nej los txog ze lawm.

    Txais: As les lus yas, as les lus yas.

    Ntawv Moo Zoo:    LK 21: 20-28

    Yes Xus hais rau nws cov thwj tim tias:
    20 "Thaum nej pom tej pab tub rog tuaj vij Yes Lus Xas Les, mas nej yuav to taub tias Yes Lus Xas Les txoj kev puas ntsoog nyob ze lawm.
    21 Ces cov nyob hauv Yus Das teb kav tsij cia li khiav mus lawm pem roob, cov nyob hauv nroog yuav tsum khiav tawm mus kom deb, hos cov uas nyob tom tej teb txhob mus lawm hauv nroog.
    22 Vim yog lub caij raug txim lawm, uas txhua tsav txhua yam sau tseg yuav tsum tshwm sim tuaj.
    23 Lub caij ntawd, cov poj niam cev hnyav thiab cov uas muaj me nyuam mos noj mis yuav raug txom nyem loj, vim tias yuav muaj xwv txheej phem los raug ntiaj teb, thiab yuav muaj kev npau taws loj rau txim rau haiv neeg no.
    24 Lawv yuav ntog vim raug hniav ntaj tua; thiab luag yuav ntes lawv mus nyob txim rau tas cov kuj cuab  teev pej kum dab, ces cov kuj cuab teev pej kum dab yuav tuaj tsuj Yes Lus Xas Les mus txog hnub uas cov kuj cuab teev pej kum dab lub caij tiav tas lawm.
    25 Yuav muaj ib co cim nyob saum lub hnub, lub hli thiab cov hnub qub; nyob ntiaj teb, cov haiv neeg yuav raug kev txhawj xeeb loj, yuav nyuaj siab kawg nkaus vim yuav hnov dej hiav txwv nrov nroo ntws ntas ntua thiab nphau nphwv tuaj.
    26 Cov neeg yuav ntshai kawg nkaus mus txog qhov tuag, thaum lawv xav txog tej uas yuav tuaj raug lub qab ntuj neeg, vim tej yam muaj hwj huam nyob txheej ntuj saud yuav co ua zog koog.
    27 Ces thaum ntawd, sawv daws yuav pom Neeg Leej Tub muaj hwj huam thiab muaj hwj chim loj kawg nkaus, los saum ib tw huab los.
    28 Thaum tej ntawd pib tshwm sim tuaj, mas nej yuav sawv kom ntseg, nej yuav tsa taub hau siab, vim txoj kev txhiv nej los txog ze ze lawm."


    ******************

    Tim     24     lub     11     Hlis    

    Hnub Tsib Lis Piam 33-34 Nruab Xyoo ABC Nruab Lis Piam Xyoo I & II

    Thanksgiving Day - Hnub Ua Tswv Ntuj Tsaug
    - nyob USA
    Lectionary: 943-947

    Zaj Nyeem Ib:   Npes Xis Las 50: 22-24

    22 Zaum no, nej cav txog tus Tswv Ntuj uas kav tas txhua leej, nws yog tus tau ua tej yam loj tas nrho nyob thoob ntiaj teb, nws yog tus ua kom peb cov hnub nyoog txawj ntev tuaj txij thaum peb tseem nyob hauv leej niam plab los; thiab nws ua rau peb raws li nws txoj kev khuv leej.
    23 Thov kom nws pub kom peb muaj kev zoo siab thiab kom muaj kev thaj yeeb lug nyob His Xas Lais teb, lub caij peb ua neej no mus txog txhiab niag tim puas xyoo.
    24 Thov kom nws pub nws txoj kev khuv leej rau peb thiab kom nws cawm peb hauv peb lub neej.

    NPN   145: 2-3, 4-5, 6-7, 8-9, 10-11

    Txais: (1) Kuv yuav cav txog koj lub npe mus li, Huab Tais.

    Kuv yuav niaj hnub cav txog koj lub koob meej,
    kuv yuav cav lus zoo txog koj lub npe mus li ib txhiab ib txhis.
    HUAB TAIS loj tas nrho, tsim nyog cav txog nws ;
    nws loj tas nrho, neeg ntsuam tsis tau.

    Txais: (1) Kuv yuav cav txog koj lub npe mus li, Huab Tais.

    Txheej dhau txheej yuav qhuas txog koj tej hauj lwm,
    Lawv yuav tshaj koj txoj kev muaj hwj huam loj.
    Lawv yuav piav txog koj lub hwj chim ci ntsa iab,
    thiab hais txog koj cov dej num zoo tas nrho.

    Txais: (1) Kuv yuav cav txog koj lub npe mus li, Huab Tais.

    Neeg yuav piav txog koj tej hauj lwm muaj hwj huam txaus ntshai,
    lawv yuav hais txog koj lub hwj chim loj kawg nkaus.
    Lawv yuav tshaj txog koj lub koob meej tias koj muaj siab zoo tas nrho,
    thiab yuav zoo siab qw ntsuag qees cav txog koj lub siab ncaj.

    Txais: (1) Kuv yuav cav txog koj lub npe mus li, Huab Tais.

    HUAB TAIS lub siab hlub thiab khuv leej neeg,
    nws npau taws qeeb, nws lub siab zoo tas nrho.
    HUAB TAIS ua siab zoo rau txhua leej txhua tus,
    nws lub siab khuv leej tas txhua yam nws tau tsim los.

    Txais: (1) Kuv yuav cav txog koj lub npe mus li, Huab Tais.

    HUAB TAIS, cia kom koj cov hauj lwm txhua yam ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim,
    thiab cav txog koj lub hwj huam.

    Txais: (1) Kuv yuav cav txog koj lub npe mus li, Huab Tais.

    Zaj Nyeem Ob:  1 KLN 1: 3-9

    Cov kwv tij nkauj muad,
    3 Thov kom nej tau txais txiaj ntsim thiab kev thaj yeeb tuaj ntawm Tswv Ntuj peb leej Txiv  thiab ntawm Huab Tais Yes Xus Pleev tuaj.
    4 Kuv ua kuv tus Tswv Ntuj tsaug tas mus li txog nej, rau Tswv Ntuj lub txiaj ntsim uas nej tau txais nyob hauv Yes Xus Pleev,
    5 kom nyob hauv nws, nej nplua nuj nyob hauv txhua yam, ces nej txawj hais lus txog txhua yam thiab paub txhua yam txuj.
    6 Txoj kev ua tim khawv txog Leej Pleev twb tau cog ruaj khov kho nyob hauv nej lawm,
    7 ces nej tsis tshuav ib lub txiaj ntsim pab sab ntsuj plig uas nej tsis tau txais li, thaum lub caij uas nej tseem nyob tos ntsoov peb tus Huab Tais Yes Xus Pleev yuav tshwm sim los no.
    8 Nws yuav ua kom nej ntseeg ruaj nreb mus txog qhov kawg, ces hnub uas peb tus Huab Tais Yes Xus Pleev rov los txog, mas tsis muaj ib qho xyeej nyob hauv nej li.
    9 Tswv Ntuj yog tus pheej xeeb, nws tau hu nej kom los nrog nws Leej Tub, peb tus Huab Tais Yes Xus Pleev muaj kev sib raug zoo.

    As Les Lus Yas:   1 TXLN 5: 18

    Txais: As les lus yas, as les lus yas.

    Nyob hauv txhua yam tuaj raug nej, mas nej yuav ua tsaug tas mus li,
    Vim Tswv Ntuj lub siab yeej xav kom nej ua li ntawd nyob hauv Yes Xus Pleev.

    Txais: As les lus yas, as les lus yas.

    Ntawv Moo Zoo:   LK 17: 11-19

    11 Thaum Yes Xus taug kev mus ntxiv rau Yes Lus Xas Les, mas nws hla hauv xeev Xas Mas Lias thiab xeev Nkas Lis Lais.
    12 Thaum nws tab tom yuav mus rau hauv ib lub zos, muaj kaum tus mob ruas tuaj ntsib nws, lawv nres deb ntawm nws.
    13 Lawv tsa suab hais nrov nrov rau nws tias: "Xib Hwb Yes Xus, thov koj khuv leej peb mas!"
    14 Thaum Yes Xus pom lawv, nws hais rau lawv tias: “Nej mus thws nej lub cev rau cov Leej Choj saib." Thaum lawv tab tom mus, lawv lub cev cia li huv tuaj.
    15 Muaj ib tug hauv pab ntawd pom tias nws lub cev zoo lawm, nws tig hlo rov qab los, nws tsa suab nrov nrov cav txog Tswv Ntuj.
    16 Nws khoov ti av pe ntawm Yes Xus ko taw, nws ua Yes Xus tsaug. Nws yog ib tug neeg Xas Mas Lias.
    17 Yes Xus thiaj tsa ncauj teb tias: “Tsis yog muaj kaum leej rov huv tuaj lawm lod? Tshuav cuaj leeg ne, dua qhov twg lawm?
    18 Ua cas tsuas muaj tus qhua no xwb thiaj rov los ua tsaug cav txog Tswv Ntuj?"
    19 Ces Yes Xus hais rau nws tias: "Koj sawv, koj mus, koj lub siab ntseeg cawm tau koj lawm."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 24th November 2022, 6:52 am

    Tim 25 lub 11 Hlis 2022

    Hnub Rau Lis Piam Peb Caug Peb Nruab Xyoo ABC Nruab Lis Piam Xyoo II

    Lectionary: 507

    XHLT: LN Catherine nyob Alexandria, Nkauj Tsim Txiaj tuag ua Tim Khawv

    Zaj Nyeem Ib: QYTN 20: 1-4, 11-21:2


    1 Kuv, Zam, pom ib tug Tshiab nqes saum ntuj los, nws tuav tus yawm sij qhib lub Qhov Ntuj tob, thiab tuav ib txog saw hlau loj loj ntawm tes.
    2 Nws nthos nkaus tus zaj, uas yog tus nab txheej thaud, thiab yog tus Dab Phem los yog Xas Tas. Nws muab khi nkaus cia kom txog ib txhiab xyoo.
    3 Nws muab tus zaj nrom sis rau hauv lub qhov ntuj tob tob, nws kaw nkaus rau, muab xauv kom ruaj ruaj, kom tus zaj tsis tau kev tawm mus ntxias cov haiv neeg ntxiv, mus txog hnub puv ib txhiab xyoo lawm. Tom qab ntawd, mas tus zaj yuav raug muab tso tawm rov los li ib ntus tsis ntev.
    4 Ces kuv pom ib co theej kiab. Cov neeg uas zaum saum cov theej kiab ntawd tau txais txoj cai ua tus txiav txim. Kuv tseem pom cov neeg uas raug luag txiav caj dab lawv cov ntsuj plig thiab, vim lawv ua tim khawv txog Yes Xus thiab txog Tswv Ntuj lo lus; lawv yog cov uas tsis tau teev hawm tus tsiaj los nws tus duab, thiab tsis tau txais tus tsiaj lub cim rau saum lawv hauv pliaj los saum lawv txhais tes. Lawv rov muaj txoj sia tuaj, ces lawv nrog Leej Pleev ua vaj ib txhiab xyoo.
    11 Kuv tseem pom ib lub theej kiab loj kawg, dawb paug, thiab pom tus zaum saum lub theej kiab. Lub ntiaj teb thiab lub ntuj khiav mus deb ntawm nws lub ntsej muag, ces tsis muaj chaw rau lub ntiaj teb thiab lub ntuj lawm.
    12 Ces kuv pom cov tuag, cov neeg muaj npe, thiab cov neeg me huv tib si, sawv ntsug nyob ntawm lub theej kiab hauv ntej. Lawv nthuav tej phau ntawv rau ntawd; ces lawv tseem nthuav dua ib phau ntxiv, yog phau ntawv txoj sia. Tas ib tsoom neeg tuag raug txiav txim raws li muaj sau tseg rau hauv cov phau ntawv ntawd, raws li cov hauj lwm uas lawv tau ua.
    13 Lub hiav txwv xa cov tuag uas nyob hauv nws tawm los; txoj Kev Tuag thiab Tub Tuag Teb kuj xa cov tuag uas nyob hauv lawv rov los thiab. Lawv nyias raug txiav txim raws li nyias cov hauj lwm.
    14 Ces txoj Kev Tuag thiab Tub Tuag Teb raug muab cuam pov rau hauv lub pas hluav taws; lub pas hluav taws no yog txoj kev tuag zaum ob.
    15 Tus twg lub npe tsis pom sau nyob hauv phau ntawv txoj sia, mas nws raug muab pov rau hauv lub pas hluav taws ntawd.
    21: 1 Ces kuv pom ib lub ntuj tshiab thiab ib lub ntiaj teb tshiab. Lub ntuj qub thiab lub ntiaj teb qub dua tas lawm, hiav txwv kuj tsis muaj ntxiv lawm.
    2 Kuv kuj pom lub Nroog Ntshiab, uas yog lub Yes Lus Xas Les tshiab, nqes saum ntuj, saum Tswv Ntuj los; nws hnav zam xws li ib tug nkauj nyab tshiab ntim zam sees tos nraug vauv.

    NPN 84: 3, 4, 5-6a+8a

    Txais: (QYTN 21:3b) Ntawm no, Tswv Ntuj nrog nws haiv neeg nyob.

    Kuv tus plig ntshaw qhuav siab qhawv
    txog HUAB TAIS cov tshav loog.
    Kuv lub siab lub cev quaj qw hu
    txog tus Tswv Ntuj muaj txoj sia.

    Txais: (QYTN 21:3b) Ntawm no, Tswv Ntuj nrog nws haiv neeg nyob.

    Tab cov me noog liaj nrhiav tau chaw nyob,
    noog luv nrhiav tau zes puag nws cov me nyuam
    ntawm koj cov thaj txi ntuj, HUAB TAIS kav tsoom tshiab,
    kuv tus vaj, kuv tus Tswv Ntuj!

    Txais: (QYTN 21:3b) Ntawm no, Tswv Ntuj nrog nws haiv neeg nyob.

    Cov neeg nyob hauv koj tsev lawv txoj hmoov zoo :
    lawv tau kev cav txog koj mus li tsis tseg.
    Cov neeg uas tau koj ua lawv lub zog, lawv txoj hmoov zoo.
    Lawv yim mus lawv lub zog yim loj tuaj.

    Txais: (QYTN 21:3b) Ntawm no, Tswv Ntuj nrog nws haiv neeg nyob.

    As Les Lus Yas: LK 21: 28

    Txais: As les lus yas, as les lus yas.

    Nej yuav sawv kom ntseg, nej yuav tsa taub hau siab,
    Vim txoj kev txhiv nej los txog ze ze lawm.

    Txais: As les lus yas, as les lus yas.

    Ntawv Moo Zoo: LK 21: 29-33

    29 Yes Xus hais ib zag paj lug rau nws cov thwj tim tias:
    "Nej ntsia tsob txiv ncuav pias thiab tas lwm cov ntoo huv tib si.
    30 Thaum lawv cov cos nplooj pib nthuav, mas nej pom thiab nej to taub tias ntuj sov los yuav txog.
    31 Ib yam li ntawd, thaum nej pom tej xwm ntawd tshwm sim tuaj, mas nej yuav paub tias Tswv Ntuj lub Ceeb Tsheej los txog ze lawm.
    32 Kuv hais tseeb rau nej tias, tiam neeg no yuav tsis dua mus, mus txog thaum tas ib puas tsav yam ntawd xub tshwm sim tuaj tso.
    33 Lub ntuj thiab lub ntiaj teb yuav dua mus, tab sis kuv cov lus yuav tsis dua.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3548
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 24th November 2022, 9:06 pm

    Tim 26 lub 11 Hlis 2022

    Hnub Xya Lis Piam Peb Caug Peb Nruab Xyoo ABC Nruab Lis Piam Xyoo II

    Lectionary: 508

    Zaj Nyeem Ib: QYTN 22: 1-7

    Zam sau tias:
    1 Tus Tshiab qhia tus dej muaj txoj sia rau kuv pom, dej mas ntshiab ci cuag tsom iav; nws txhawv ntawm Tswv Ntuj thiab Leej Yaj lub theej kiab los.
    2 Nyob hauv plawv ntawm lub tshav puam hauv lub nroog thiab ntawm kis nruab nrab ces dej sab tid thiab ces dej sab no, tuaj tus ntoo pub txoj sia; uas nws txi kaum ob lub txiv, ib hlis txi ib lub. Cov nplooj ntawm tsob ntoo zoo tshuaj kho cov haiv neeg.
    3 Tas txhua yam kev foom phem yuav tsis muaj ntxiv. Tswv Ntuj thiab Leej Yaj lub theej kiab yuav nyob hauv lub nroog; ces Tswv Ntuj cov tub txib yuav teev hawm nws.
    4 Lawv yuav ntsia ntsoov Tswv Ntuj lub ntsej muag; Tswv Ntuj lub npe yuav sau rau saum lawv hauv pliaj.
    5 Yuav tsis muaj hmo ntuj ntxiv; lawv tsis tas yuav siv lub teeb qhov pom kev los lub hnub qhov pom kev ntxiv lawm, vim Huab Tais Tswv Ntuj yuav ci pom kev nrig rau lawv. Lawv yuav ua vaj nyob mus li txheej dhau txheej.
    6 Ces tus Tshiab hais rau kuv tias: “Cov lus no yog lus txaus ntseeg thiab lus tseeb. Huab Tais, uas yog tus Tswv Ntuj uas tau tshoj cov Yaj Saub lub tswv yim, nws tau xa nws tus Tshiab tuaj qhia kom nws cov tub txib paub txog cov xwm uas yuav tshwm sim tuaj tsis ntev tom ntej no.
    7 Ntsia saib! Kuv twb yuav los sai sai. Tus tau txoj hmoov zoo yog tus khaws cov lus saub qhia txog yav tom ntej uas nyob hauv phau ntawv no.”

    NPN 95: 1-2, 3-5, 6-7ab

    Txais: (1 KLN 16: 22b, QYTN 22: 20c) Marana tha! Kav tsij los mas, Huab Tais Yes Xus!

    Nej tuaj! Peb qw nkauj zoo siab rau HUAB TAIS,
    peb cav txog lub Tsua uas cawm peb ;
    Peb txav los ntawm nws xub ntiag, peb ua nws tsaug,
    peb nqua suab hu tej xaj nkauj cav txog nws.

    Txais: Marana tha! Kav tsij los mas, Huab Tais Yes Xus!

    Vim HUAB TAIS yog tus Tswv Ntuj loj,
    thiab tus vaj loj nyob siab dua tas txhua tus tswv ntuj.
    Nyob hauv nws txhais tes, nws tuav lub ntiaj teb qhov tob;
    Tej ncov roob siab yog nws li;
    Cov hiav txwv yog nws tug, vim nws yog tus tsim,
    tej thaj av qhuav yog nws li, yog nws ob txhais tes puab.

    Txais: Marana tha! Kav tsij los mas, Huab Tais Yes Xus!

    Nej chaws los! Peb khoov cev pe hawm nws;
    peb txhos caug pe tus HUAB TAIS uas tsim peb los.
    Vim nws yog peb tus Tswv Ntuj, peb yog nws haiv neeg
    nws zov nraim, yog pab yaj uas nws coj rawv.

    Txais: Marana tha! Kav tsij los mas, Huab Tais Yes Xus!

    As Les Lus Yas: LK 21: 36

    Txais: As les lus yas, as les lus yas.

    Nej yuav ceev faj nraim txhua lub sij hawm thiab yuav thov ntuj,
    kom nej thiaj muaj zog sawv taus ntseg ntawm Neeg Leej Tub xub ntiag.

    Txais: As les lus yas, as les lus yas.

    Ntawv Moo Zoo: LK 21: 34-36

    Yes Xus hais rau nws cov thwj tim tias:
    34 “Nej yuav ceev faj nraim txog nej tus kheej mog, kom nej lub siab tsis txhob qaug rau txoj kev lom lom vab vab, thiab kev luab dej luab cawv, thiab rau lub neej tej kev txob kev txhawj, tsam thaum nej tsis faj txog, lub zim txwv ntawd poob nthav los rau saum nej
    35 xws li ib lub vas los cuab nej. Vim tias lub zim txwv ntawd yuav los raug txhua leej txhua tus uas nyob saum tas ntiaj teb daim npoo av.
    36 Nej yuav tsum ceev faj nraim txhua lub sij hawm, thiab yuav thov Ntuj kom nej thiaj muaj zog hla dhau ib puas tsav yam xwm txheej uas yuav tshwm sim tuaj, thiab nej thiaj yuav sawv taus ntseg nyob ntawm Neeg Leej Tub xub ntiag."

    Sponsored content


    COV ZAJ NYEEM NRUAB LIS PIAM XYOO II 2021-2022 - Page 13 Empty Re: COV ZAJ NYEEM NRUAB LIS PIAM XYOO II 2021-2022

    Post  Sponsored content


      Current date/time is 28th November 2022, 9:47 am