COV ZAJ NYEEM Hnub Chiv 2021-2022 Xyoo C

Lectionary: 117

Zaj nyeem 1:   THOOB TSIB 18:6-9

6 Tswv Ntuj, peb cov yawg koob twb xub paub txog hmo
uas koj yuav muab cov Hais Nkws Tos tua.
Koj ua kom lawv xub paub vim koj xav pab lawv tso siab
rau cov lus koj cog, koj xav pab lawv ua siab loj.
7 Koj haiv neeg thiaj tos ntshis tias
cov neeg ncaj yuav dim, cov yeeb ncuab yuav ploj.
8 Vim tias koj ib txhij rob caub rau cov ntxub peb,
thiab koj muab koob meej rau peb, koj xaiv peb los ua koj tug.
9 Vim li ntawd tas tsoom tub ki ntshiab thiaj txi Ntuj twj ywm
nyob hauv nyias tsev, thiab lawv koom cog lus tsa
ib txog cai zoo li no: yam li cov ntshiab lawv yuav sib faib
lawv cuab tam, lawv yuav sib pab ris xwv txheej.
Lawv ua ke hu cov yawg koob cov nkauj.

NPN   33:1+12, 18-19, 20-22

Txais: (12b) Haiv neeg uas Huab Tais xaiv los ua nws tug,
lawv txoj hmoov zoo.

Cov neeg siab ncaj, nej cia li zoo siab nyob hauv HUAB TAIS;
tus neeg siab ncaj txoj kev qhuas Huab Tais yeej tsim nyog.
Haiv neeg uas tus Tswv Ntuj yog HUAB TAIS, lawv txoj hmoov zoo,
yog haiv neeg uas nws xaiv ua nws lub cuab tam.

Txais: (12b) Haiv neeg uas Huab Tais xaiv los ua nws tug,
lawv txoj hmoov zoo.

HUAB TAIS lub qhov muag saib ntsoov cov neeg hwm nws,
saib ntsoov cov tso siab rau nws lub siab zoo
tias nws yuav npo lawv dim ntawm kev tuag,
thiab yuav txuag lawv txoj sia thaum muaj tshaib plab.

Txais: (12b) Haiv neeg uas Huab Tais xaiv los ua nws tug,
lawv txoj hmoov zoo.

Peb tus ntsuj plig tos ntsoov HUAB TAIS:
nws yog tus pab peb, nws yog peb daim leem phiaj!
HUAB TAIS, thov kom koj lub siab zoo roos peb
cov uas tso siab lug rau koj!

Txais: (12b) Haiv neeg uas Huab Tais xaiv los ua nws tug,
lawv txoj hmoov zoo.

Zaj nyeem 2:   Hes Nplaws 11:1-2, 8-19

Covb kwv tij nkauj muad:
1 Txoj kev ntseeg yog txoj kev zeem tau meej tias peb yuav txais
yam uas peb cia siab tos. Kev ntseeg ua puav pheej tias
yam uas peb tsis pom, yeej muaj tseeb tiag.
2 Yog txoj kev ntseeg ua kom cov poj yawm txwv koob nto moo zoo.
8 Yog vim Has Nplas Has ntseeg, mas nws thiaj mloog Ntuj hu nws
kom sawv kev mus ib lub teb chaws uas nws yuav txais los
ua nws lub cuab tam. Ces nws sawv kev,
nws tsis paub tias nws yuav mus txog qhov twg.
9 Yog vim Has Nplas Has ntseeg, mas nws thiaj tsiv mus
nyob hauv thaj av uas yog pej kum neeg av, yog thaj av uas
Ntuj cog lus tias yuav pub rau nws. Has Nplas Has ua neej
nyob hauv tsev tsam phooj xws li Is Xas Has thiab Yas Kos.
Nkawd nrog Has Nplas Has txais Tswv Ntuj lo lus cog.
10 Has Nplas Has tos txog lub tsheej muaj taw ntsa
uas Tswv Ntuj yuav txhim thiab yuav tsa.
11 Yog vim Xas Las ntseeg, mas tab nws txawm laus
heev lawm, nws muaj peev xwm xeeb tub. Xas Las ntseeg
tias tus tau cog lus rau nws, yuav tsis fav xeeb.
12 Vim li ntawd, tus neeg uas twb yuav txog nws lub caij
tuag tseem yug tau ib co xeeb ntxwv coob npaum li
cov hnub qub nyob saum ntuj thiab cov suab zeb nyob
ntawm ntug hiav txwv uas suav tsis txheeb.
13 Cov neeg ntawd, thaum lawv tuag, lawv tseem tsis tau
txais txhua yam uas Tswv Ntuj cog lus tias nws yuav pub.
Tab sis yog vim lawv ntseeg, mas lawv nyob deb pom thiab
tshua txog txhua yam ntawd, thiab lawv zeem tseeb tias lawv
tsuas yog ib co pej kum neeg tuaj hla lub ntiaj teb no xwb.
14 Lawv qhia li no kom pom tias
lawv nrhiav ib lub teb chaws nyob.
15 Yog lawv nco txog lub teb chaws uas lawv yug los,
mas lawv tseem muaj caij rov mus nyob lawv qub teb qub chaw.
16 Tab sis lawv tos txog ib lub teb chaws zoo dua, yog lub nyob
saum ntuj. Vim li ntawd Tswv Ntuj tsis txaj muag cia lawv hu nws
ua lawv tus Tswv Ntuj, ces nws npaj ib lub tsheej rau lawv tiag.
17 Yog vim Has Nplas Has ntseeg, mas thaum Tswv Ntuj sim nws,
nws cia li muab Is Xas Has txi rau Ntuj, txawm tias
Is Xas Has yog nws tib leeg tub twm zeej.
18 Is Xa Has twb yog tus yuav txais tej yam uas Tswv Ntuj
cog lus tias yuav pub. Tswv Ntuj twb hais txog Is Xas Has tias:
‘koj yuav muaj ib co xeeb ntxwv tawm ntawm Is Xas Has los.’
19 Has Nplas Has xav tias Tswv Ntuj tsa tau cov neeg tuag kom
ciaj rov los, ces Has Nplas Has yuav rov qab tau nws tus tub.
Zaj hais txog Is Xas Has no yog ib zag paj lug.

Los:   Hes Nplaws 11:1-2, 8-12

Covb kwv tij nkauj muad:
1 Txoj kev ntseeg yog txoj kev zeem tau meej tias peb yuav txais
yam uas peb cia siab tos. Kev ntseeg ua puav pheej tias
yam uas peb tsis pom, yeej muaj tseeb tiag.
2 Yog txoj kev ntseeg ua kom cov poj yawm txwv koob nto moo zoo.
8 Yog vim Has Nplas Has ntseeg, mas nws thiaj mloog Ntuj hu nws
kom sawv kev mus ib lub teb chaws uas nws yuav txais los
ua nws lub cuab tam. Ces nws sawv kev,
nws tsis paub tias nws yuav mus txog qhov twg.
9 Yog vim Has Nplas Has ntseeg, mas nws thiaj tsiv mus
nyob hauv thaj av uas yog pej kum neeg av, yog thaj av uas
Ntuj cog lus tias yuav pub rau nws. Has Nplas Has ua neej
nyob hauv tsev tsam phooj xws li Is Xas Has thiab Yas Kos.
Nkawd nrog Has Nplas Has txais Tswv Ntuj lo lus cog.
10 Has Nplas Has tos txog lub tsheej muaj taw ntsa
uas Tswv Ntuj yuav txhim thiab yuav tsa.
11 Yog vim Xas Las ntseeg, mas tab nws txawm laus heev
lawm, nws muaj peev xwm xeeb tub. Xas Las ntseeg tias
tus tau cog lus rau nws, yuav tsis fav xeeb.
12 Vim li ntawd, tus neeg uas twb yuav txog nws lub caij
tuag tseem yug tau ib co xeeb ntxwv coob npaum li
cov hnub qub nyob saum ntuj thiab cov suab zeb nyob
ntawm ntug hiav txwv uas suav tsis txheeb.

As Les Lus Yas:   Mt 24:42a, 44

Txais:  As les lus yas, as les lus yas.

Nej zov hmo thiab nej npaj kom tiav mog,
vim nej tsis paub hnub twg nej tus Huab Tais yuav los.

Txais:  As les lus yas, as les lus yas.

Ntawv Moo Zoo:   Lk 12:32-48

Yes Xus hais rau nws cov thwj tim tias:
32 Pab me yaj, nej txhob ntshai mog,
vim nej Txiv zoo siab muab lub Ceeb Tsheej rau nej."
33 "Muab nej lub cuab tam muag, nej muab pub rau
cov pluag. Nej tsim tej nas nyiaj tsis txawj qub,
tsim ib txhab kub uas tsis txawj nqig rau
saum ntuj. Nyob saud, tsis muaj
tub sab tuaj ze, tsis muaj kab rws xwv.
34 Vim tias nej txhab kub nyob qhov twg,
nej lub siab kuj yuav nyob qhov ntawd."
35 "Nej sia siv thiab taws teeb
36 zoo li ib co tub txib uas tos lawv tus tswv mus ua tshoob
rov los. Thaum tus tswv rov los txog, nws yuav khob
qhov rooj, ces lawv yuav qhib rau nws tam sis ntawd.
37 Cov tub txib uas thaum tus tswv los txog, nws pom lawv
tseem zov hmo, lawv txoj hmoov zoo. Kuv hais tseeb rau nej,
tus tswv yuav sia siv, yuav kom cov tub txib ntawd zaum
ntawm rooj mov, nws yuav rau mov rau lawv noj.
38 Txawm tias, tus tswv los txog thaum ib tag hmo
los thaum qaib qua, yog nws pom zov hmo zoo li ntawd,
mas cov tub txib txoj hmoov zoo!
39 Nej to taub qhov no zoo mog! Yog tias tus tswv tsev
paub lub sij hawm twg tub sab yuav tuaj,
nws yuav tsis cia tub sab tho qhov tsev.
40 Nej kuj ib yam thiab, nej yuav npaj kom txhij, vim yog lub
sij hawm uas nej tsis nco faj, mas Neeg Leej Tub thiaj yuav tuaj."
41 Ces Pob Zeb hais tias: "Huab Tais, koj hais zaj paj lug no,
puas yog koj hais rau peb, los hais rau sawv daws?"
42 Huab Tais teb hais tias: "Leej twg yog tus tub txib
pheej xeeb thiab xyuam xim, uas tus tswv tsev
yuav tsa nws saib tus tswv cov tub zog,
kom thaum txog caij, nws faib hmoov nplej rau lawv?
43 Yog thaum tus tswv rov los txog, nws pom tus tub txib tab
tom lis nws tej num, mas tus tub txib no txoj hmoov yuav zoo.
44 Kuv hais tseeb rau nej, tus tswv yuav
tsa nws saib tus tswv lub cuab tam tas huv si.
45 Tab sis yog tus tub txib ntawd xav hauv siab tias
'kuv tus Tswv yuav los lig,' ces nws muab tus tswv tej tub txib
ntxhais txib ntaus, nws noj nws haus kom qaug.
46 Tus tub txib no tus tswv yuav los txog hnub uas nws tsis nco
faj, thiab lub sij hawm uas nws tsis paub. Tus tswv yuav ntiab
tus tub txib mus nrog cov tsis hwm Ntuj nyob.
47 Tus tub txib uas nws yeej paub qhov uas tus tswv xav
kom ua, tab sis nws tsis npaj dab tsi li, thiab tsis tau ua
raws li qhov tus tswv xav kom ua, mas tus tub txib ntawd
yuav mag tus tswv rab nplawm ntau teg.
48 Hos tus tub txib uas yeej tsis paub qhov uas tus tswv xav
kom ua, thiab nws kuj tau ua tej yam tsim nyog ntaus,
mas nws yuav mag tus tswv nplawm sib me ntsis.
Tus uas Ntuj tau pub ntau rau, Ntuj yuav taij ntau
rov qab. Tus uas Ntuj tso ntau yam rau nws ceev,
mas Ntuj yuav kom nws xa ntau dua rov qab.

Los:   Lk 12:35-40

35 "Nej sia siv thiab taws teeb
36 zoo li ib co tub txib uas tos lawv tus tswv mus ua tshoob
rov los. Thaum tus tswv rov los txog, nws yuav khob qhov rooj,
ces lawv yuav qhib rau nws tam sis ntawd.
37 Cov tub txib uas thaum tus tswv los txog, nws pom lawv
tseem zov hmo, lawv txoj hmoov zoo. Kuv hais tseeb rau nej,
tus tswv yuav sia siv, yuav kom cov tub txib ntawd zaum
ntawm rooj mov, nws yuav rau mov rau lawv noj.
38 Txawm tias, tus tswv los txog thaum ib tag hmo
los thaum qaib qua, yog nws pom zov hmo zoo li ntawd,
mas cov tub txib txoj hmoov zoo!
39 Nej to taub qhov no zoo mog! Yog tias tus tswv tsev
paub lub sij hawm twg tub sab yuav tuaj,
nws yuav tsis cia tub sab tho qhov tsev.
40 Nej kuj ib yam thiab, nej yuav npaj kom txhij,
vim yog lub sij hawm uas nej tsis nco faj,
mas Neeg Leej Tub thiaj yuav tuaj."

Tim 14/08/2022
COV ZAJ NYEEM HNUB CHIV 20 Nruab Xyoo C
Lectionary: 120

Zaj nyeem 1:   YLM 38: 4-6, 8-10

4 Cov tub nom tub tswv hais rau tus vaj tias:
"Tus neeg ntawd, koj muab nws tua mas!
Vim nws hais ib co lus rau cov tub rog uas tseem nyob
hauv lub nroog thiab rau cov pej xeem ua kom lawv ntaus siab me.
Vim tus neeg ntawd tsis xav nrhiav qhov zoo rau tsoom pej xeem,
nws nrhiav kev txom nyem rau lawv xwb."
5 Tus vaj Xes Des Xias teb tias: "Nws nyob hauv nej xib teg;
tus vaj yeej ua tsis tau dab tsi los txwv nej li."
6 Ces lawv ntes Yes Les Mias, lawv muab nws pov rau hauv
vaj huab tais tus tub hu ua Mas Kis Yas Hus lub qhov tim thaj uas nyob hauv
lub tshav rau cov tub zov keeb. Lawv muab hlua tso nws nqes mus rau
hauv lub qhov tim thaj. Nyob hauv lub qhov tim thaj ntawd tsis muaj dej,
tab sis muaj av nkos, ces Yes Les Mias zom rau hauv cov av nkos.
8 Es Npes Mes Les yog ib tug neeg ua kab xwm hauv tus vaj tsev.
Nws tawm hauv tus vaj lub loog mus hais rau tus vaj tias:
9 "Huab tais aw, cov neeg ntawd ua phem rau tus Yaj Saub Yes Les Mias,
lawv muab nws pov rau hauv lub qhov tim thaj mas nws kawg yuav
tuag tshaib nyob hauv xwb, vim muaj kev tshaib plab,
tsis muaj mov noj nyob hauv lub nroog ntxiv lawm."
10 Ces tus vaj hais rau Es Npes Mes Les tias: "Koj coj peb tug neeg
nyob ntawm no nrog koj, nej mus thau tus yaj saub Yes Les Mias
tawm los cheem nws tseem tsis tau tuag."

NPN   40: 2,3,4,18

Txais:  (14b) HUAB TAIS, tsuag tsuag tuaj pab kuv mas.

Kuv tos, kuv tau tos ntsoov HUAB TAIS,
Ces nws khoov los ze kuv, nws hnov kuv lub suab quaj.

Txais:  (14b) HUAB TAIS, tsuag tsuag tuaj pab kuv mas.

Nws rub kuv tawm hauv lub qhov tuag los,
tawm hauv lub pas av nkos los.
Nws tsa kuv sawv muab kuv ob txhais taw
txawb rau saum pob zeb, nws hwj kuv mus kev.

Txais:  (14b) HUAB TAIS, tsuag tsuag tuaj pab kuv mas.

Nws tso ib zag nkauj tshiab rau hauv kuv lub ncauj,
yog ib zaj nkauj cav txog peb tus Tswv Ntuj.
Coob leej yuav pom, lawv yuav hwm,
yuav tso siab rau HUAB TAIS.

Txais:  (14b) HUAB TAIS, tsuag tsuag tuaj pab kuv mas.

Txawm kuv txom nyem kuv pluag
los HUAB TAIS nco txog kuv,
Kuv tus Tswv Ntuj, koj yog tus pab kuv, tus npo kuv dim;
thov koj txhob ua siab qeeb.

Txais:  (14b) HUAB TAIS, tsuag tsuag tuaj pab kuv mas.

Zaj nyeem 2:   Hes Nplaws 12: 1-4

Cov kwv tij nkauj muam sawv daws:
1 Muaj ib co tim khawv coob kawg zoo cuag li ib twv huab uas
los roos peb, mas peb yuav tsum muab txhua lub nra
thiab muab txoj kev txhaum uas thaiv peb kev xyeeb pov tseg,
peb kav tsij rub lub siab ntev mus khiav taug txoj kev nyuaj
uas nyob ntawm peb hauv ntej.
2 Peb yuav tsa muag ntsia ntsoov Yes Xus tus thawj coj
tsim txoj kev ntseeg, thiab tus ua kom txoj kev ntseeg hlob
tiav log; nws tsis yeem taug txoj kev lom zem nyob ntawm
nws xub ntiag, nws yeem kwv ntoo cuam, tsis ntshai
poob ntsej muag; nyem no nws thiaj zaum ntawm
sab xis ntawm Tswv Ntuj lub theej kiab.
3 Nej yuav xav txog tias Yes Xus raug cov neeg txhaum
tawm tsam nws loj kawg nkaus,
nej thiaj yuav tsis qaug zog tsis ntaus siab me.
4 Nej tseem tsis tau tawm tsam tiv kev txhaum
txog thaum nej nqaij ntuag ntshav nrog.

As Les Lus Yas:   Zam 10: 27

Huab Tais hais tias: Kuv cov yaj mloog kuv lub suab,
kuv paub kuv cov yaj, kuv cov yaj raws nraim kuv mus.

Ntawv Moo Zoo:   LK 12: 49-53

Yes Xus hais rau nws cov thwj tim tias:
49 "Kuv coj ib co hluav taws tuaj zes rau lub ntiaj teb,
kuv xav kom cov hluav taws ntawd twb cig cig lawm.
50 Kuv yuav tsum txais ib co kab ke ntxuav,
mas kuv ntxhov siab kawg mus txog hnub uas tej ntawd tiav tas.
51 Nej puas xav tias kuv yuav coj kev thaj yeeb tuaj rau
ntiaj teb no? Kuv hais rau nej, kuv tsis coj kev thaj yeeb tuaj,
kuv coj kev sib ncaim sib cais tuaj.
52 Txij no mus, ib tse neeg muaj tsib leeg yuav muaj sib cais,
peb leeg yuav tiv ob leeg, ob leeg yuav tiv peb leeg,
53 sawv daws yuav sib ncaim, txiv yuav tiv tub, tub yuav tiv txiv,
niam yuav tiv ntxhais, ntxhais yuav tiv niam,
poj yuav tiv nyab, nyab yuav tiv poj."

Tim 21/08/2022

COV ZAJ NYEEM HNUB CHIV 21 Nruab Xyoo C
Lectionary:  123

Zaj nyeem 1:   HX 66: 18-21

Huab Tais hais tias:
18 Kuv tuaj sau txhua lub kuj cuab
thiab txhua xeem lus;
lawv yuav tuaj thiab yuav pom kuv lub hwj chim.
19 Kuv yuav tsa ib lub cim rau hauv lawv;
kuv yuav xa lawv ib cov neeg dim kev tuag mus rau
cov kuj cuab, rau Tas Xis, Pus Tos thiab Lus Dos,
cov neeg uas tua hneev, rau Tus Npas thiab Yas Vas,
rau cov pov txwv nyob deb uas tsis tau hnov
hais txog kuv, tsis tau pom dua kuv lub hwj chim li.
Lawv yuav tshaj kuv lub koob meej rau cov kuj cuab.
20 Lawv yuav coj tas nej tsoom kwv tij huv si nyob hauv
cov kuj cuab rov los ua paj tshab cev rau HUAB TAIS,
tus caij nees kuj muaj, tus caij tsheb plaub lub log los ob
lub log kuj muaj, tus caij luj los caij ntxhuav kuj muaj;
lawv yuav tuaj txog kuv lub roob ntshiab
Yes Lus Xas Les, HUAB TAIS hais li ntawd;
lawv yuav ua raws nkaus li cov His Xas Lais,
yuav cev paj tshab nyob hauv ib co phaj
huv si nyob hauv HUAB TAIS lub tsev.
21 Kuv yuav tsa lawv qee leej
los ua Leej Choj thiab ua Les Vis.

NPN 117: 1bc, 2

Txais: (MK 16:15) Nej mus kom thoob
qab ntuj mus tshaj lub Moo Zoo.
los:       As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais: (Mas Kos 16:15) Nej mus kom thoob
qab ntuj mus tshaj lub Moo Zoo.
los:       As les lus yas.

Vim nws txoj kev ua siab zoo rau peb nyob ruaj nreb,
HUAB TAIS txoj kev pheej xeeb nyob mus li ib txhis.

Txais: (MK 16:15) Nej mus kom thoob
qab ntuj mus tshaj lub Moo Zoo
los:        As les lus yas.

Zaj Nyeem 2:   Hes Nplaws 12: 5-7, 11-13

Cov kwv tij nkauj muad:
5 Nej tsis nco qab lo lus uas Ntuj hais rau nej
xws li hais rau ib co tub ntxhais lawm tias:
“Me tub, koj txhob thuam Huab Tais lo lus qhuab qhia.
Thaum nws cob qhia koj, koj txhob ntaus siab me.
6 Vim tias tus uas Huab Tais nyiam mas Huab Tais
qhuab qhia nws, thiab Huab Tais nplawm tus uas
Huab Tais txais los ua nws tus tub.”
7 Kev raug txom nyem yog ib txog kev qhuab qhia nej.
Tswv Ntuj saib nej yog nws cov tub. Puas muaj
ib tug tub twg uas nws txiv tsis qhuab qhia nws?
11 Txoj kev qhuab qhia yeej tsis ua kom leej twg
zoo siab thaum ntawd, tsuas muaj ua kom
chim siab xwb. Tiam sis yav tom ntej, mas txoj kev
qhuab qhia ntawd yuav txi txiv rau cov neeg
uas raug qhuab qhia kom lawv muaj kev
thaj yeeb nyob hauv txoj kev ncaj.
12 Ua li mas nej kav tsij siv zog tsa nej
ob txhais tes uas tsaug leeg, thiab rov sawv ntseg
saum nej lub hauv caug uas ntshaus raws.
13 Nej yuav ua kom tej kev nkhaus ncaj tuaj
rau nej ob txhais taw, kom tus ceg tawv txhob
mob loj ntxiv, nws thiaj yuav zoo taus.

As Les Lus Yas:   Zam 14: 6

Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau,
yog nws tsis hla ntawm kuv mus.

Ntawv Moo Zoo:   LK 13: 22-30

22 Yes Xus hla hauv cov nroog thiab cov zos,
nws qhia sawv daws, ces nws mus ntxiv rau Yes Lus Xas Les.
23 Muaj ib tug hais rau Yes Xus tias: "Huab Tais,
cov yuav txais kev cawm puas yog cov tsawg?"
Ces Yes Xus hais rau lawv tias:
24 "Nej ua tiag mus hauv lub qhov rooj nqaim mus mog.
Kuv hais rau nej: coob leej yuav nrhiav kev mus
lawm hauv, tab sis lawv yuav tsis muaj zog mus kom tau.
25 Thaum tus tswv tsev sawv los xauv qhov rooj tas lawm,
nej yuav  nyob nraum zoov, nej yuav pib khob qhov rooj thiab
yuav hais tias: 'Huab Tais, koj qhib qhov rooj rau peb mas,'
ces nws yuav teb rau nej tias: 'Kuv tsis paub nej nyob qhov twg tuaj.'
26 Ces nej yuav hais rau nws tias: ‘Peb twb tau noj thiab
haus nyob ntawm koj xub ntiag, hos koj twb tau qhia
sawv daws nyob hauv peb cov tshav puam.’
27 Ces tus tswv tsev yuav hais rau nej tias:
'Kuv tsis paub nej nyob qhov twg tuaj. Nej txav
mus deb kuv, tas nej cov uas tau ua tsis ncaj huv si.
28 Nyob ntawd yuav muaj suab quaj thiab suab tshee na
tom hniav nkawv, thaum nej pom Has Nplas Has, His Xas Has,
Yas Kos, thiab ib tsoom yaj saub nyob hauv Tswv Ntuj
lub Ceeb Tsheej, hos nej yuav raug ntiab mus nyob sab nraud.
29 Luag yuav tuaj Xib Fab thiab Toob Fab tuaj,
tuaj Naj Fab thiab Pej Fab tuaj, sawv daws yuav tuaj
noj rooj qav nyob hauv Tswv Ntuj lub Ceeb Tsheej.
30 Ces muaj ib co neeg tuaj ua luag qab, yuav tau ua ntej,
hos ib co neeg tuaj ua luag ntej yuav tau lawv qab."

Tim 28/08/2022

COV ZAJ NYEEM HNUB CHIV 22 Nruab Xyoo C
Lectionary: 126

Zaj nyeem 1:   NXL 3: 17-18, 20, 28-29

17 Me tub, thaum koj ua koj tes dej num,
koj txhob muab hlob, ces cov neeg uas ntuj xaiv yuav nyiam koj.
18 Koj yim yog tus loj, koj yim yuav nyiam ua tus me,
koj thiaj yuav yog tus neeg xis Huab Tais siab.
20 Vim Huab Tais lub hwj huam loj tas nrho,
thiab yog cov neeg me thiaj cav lus zoo txog nws.
28 Thaum tus neeg muab hlob raug txom nyem
mas tsis muaj tshuaj kho tau nws zoo, vim ib tug
yub phem nrhau cag tob nyob hauv nws lawm.
29 Tus neeg xyuam xim xav ntsoov txog
cov paj lug nyob hauv nruab siab. Tus neeg thoob tsib
ntshaw ib lub pob ntseg qhib lug mloog..

NPN 68: 4-5,6-7,10-11

Txais: (11b) Tswv Ntuj, vim koj lub siab zoo,
Koj tau npaj ib lub tsev rau cov pluag.

Cov neeg siab ncaj zoo siab thiab dhia hom khaj
nyob ntawm Tswv Ntuj xub ntiag; lawv zoo siab luag ntxhi.
Nej hu nkauj rau Tswv Ntuj, nej hu nkauj cav txog nws lub npe;
Nws lub npe yog HUAB TAIS .

Txais: (11b) Tswv Ntuj, vim koj lub siab zoo,
Koj tau npaj ib lub tsev rau cov pluag.

Cov ntsuag nos leej txiv, tus txheem plaub rau cov poj ntsuam,
yog tus Tswv Ntuj uas nyob hauv nws lub tsev ntshiab.
Tswv Ntuj pub tsev rau tus neeg luag muab tso pov tseg nyob,
nws coj cov neeg raug txim tawm los kom tau ntsib kev vam meej.

Txais: (11b) Tswv Ntuj, vim koj lub siab zoo,
Koj tau npaj ib lub tsev rau cov pluag.

Tswv Ntuj, koj hliv dej nag nchuav nthwv los ywg koj lub cuab tam;
koj ua kom thaj av quav poj rov zoo tuaj;
koj pab yaj los nyob hauv thaj av ntawd,
Tswv Ntuj, vim koj lub siab zoo muab pub rau tus pluag.

Txais: (11b) Tswv Ntuj, vim koj lub siab zoo,
Koj tau npaj ib lub tsev rau cov pluag

Zaj Nyeem 2:   Hes Nplaws 12:18-19,22-24

Cov kwv tij nkauj muad:
18 Nej tsis tau txav mus ze lub roob uas kov tau,
muaj hluav taws cig liab vog, muaj ib qho dub nciab,
ib qho tsaus ntuj nti, thiab muaj cua daj cua dub,
19 muaj suab hom nrov, muaj suab hais lus nrov nroo ntws.
Ces cov neeg thaum ntawd hnov lub suab tau thov
kom txhob hais lus ntxiv rau lawv lawm.
22 Tab sis nej, mas nej tau txav los ze lub roob Xis Yoos,
ze tus Tswv Ntuj muaj txoj sia lub tsheej, uas yog
lub Yes Lus Xas Les saum ntuj, ze txhiab vam
tus Tshiab uas sib txoos ua ntees lom zem,
23 ze ib tsoom tub hlob uas muaj npe sau nyob saum ntuj,
ze tus Tswv Ntuj txiav txim rau tas lub qab ntuj neeg,
thiab ze cov neeg ncaj cov ntsuj plig uas Ntuj twb
ua kom lawv zoo txhij zoo txhua tas lawm.
24 Thiab nej tau txav los ze Yes Xus uas yog
tus sawv peb chaw cog lus tshiab, thiab ze ib cov ntshav
uas txawj hais lus zoo dua As Npes cov ntshav.

As Les Lus Yas: MT 11: 29ab

Txais: As les lus yas, as les lus yas.

Nej txais kuv tus quab mus kwv, nej kawm ntawm kuv mog,
vim kuv muaj lub siab txo hwj chim ua neeg me.

Txais: As les lus yas, as les lus yas.

Ntawv Moo Zoo:   LK 14: 1, 7-14

1 Muaj ib zaug, hnub Xas Npas Tos,
Yes Xus tuaj noj ib pluag mov nyob hauv cov Fas Lis Xais
ib tug thawj coj tsev. Lawv nyas ntshis Yes Xus.
7 Yes Xus hais ib zag paj lug rau cov neeg tuaj noj mov,
vim nws pom lawv xaiv thawj cov rooj zaum.
Nws hais rau lawv tias:
8 "Thaum luag caw koj mus noj tshoob,
koj tsis txhob mus zaum thawj cov rooj,
tsam luag caw ib tug muaj meej mom dua koj tuaj thiab.
9 Ces tsam tus tswv tsev uas tau caw neb tuaj
lam los hais rau koj tias: 'Koj cia qhov chaw kod rau tus no.'
Ces koj yuav sawv mus zaum lub rooj
puag nram qab, koj yuav tau txaj muag.
10 Thaum luag caw koj, koj yuav mus zaum lub rooj
puag nram qab, kom thaum tus caw koj los txog,
nws hais rau koj tias: 'Npawg, koj nce los pem toj no.'
Ces koj yuav tau ntsej muag nyob ntawm cov neeg
tuaj nrog koj koom rooj qav xub ntiag.
11 Vim tias tus uas nws tsa nws siab,
mas Ntuj yuav txo nws qis, hos tus uas
nws txo nws qis, mas Ntuj yuav tsa nws siab."
12 Yes Xus tseem hais rau tus neeg caw nws tias:
"Thaum koj npaj ib roog su los ib roog hmo,
koj txhob hu koj cov phooj ywg los koj cov kwv tij,
los koj cov neej tsa, thiab cov neeg nplua nuj nyob ze koj.
Tsam lawv ho caw koj thiab pauj koj
rooj nqaij rooj hno rov rau koj
13 Thaum koj ua ib roog qav, mas koj yuav hu cov pluag,
cov tu tes tu taw, cov ceg tawv, cov dig muag.
14 Koj yuav tau hmoov zoo, vim lawv tsis muaj dab tsi pauj
rov rau koj.  Koj yuav tau txais kev pauj,
yog thaum cov neeg siab ncaj yuav sawv rov los."

Tim 04/09/2022

COV ZAJ NYEEM HNUB CHIV 23 Nruab Xyoo C
Lectionary: 129

Zaj nyeem 1: ThT 9: 13-18b

13 Tus neeg twg thiaj yuav paub tau Tswv Ntuj tus nru lus?
Leej twg yuav mem tau qhov uas Huab Tais nyiam ?
14 Leej tib neeg uas txawj tuag, nws zaj tswv yim
yog tswv yim txhawj. Neeg zaj tswv yim tsis ruaj.
15 Neeg lub cev txawj lwj, ua nra hnyav qees
rau neeg tus plig, neeg lub cev zoo li ib lub tsev av
nkos tsuam tus plig uas muaj kev txhawj nyob puv hauv.
16 Peb yuav luag mem tsis tau tias muaj dab tsi nyob ntiaj
teb no. Peb siv siv zog thiaj nrhiav tau tej yam uas
nyob ze ntawm peb txhais tes, ua li mas yog leej twg
thiaj yuav nrhiav tau tej yam uas nyob saum Ntuj?
17 Huab Tais, leej twg yuav paub tau koj lub siab,
yog koj tsis pub kev thoob tsib thiab koj tsis tso
koj lub tswv yim ntshiab tuaj saum ntuj tuaj ?
18 Vim muaj li ntawd, mas cov neeg nyob ntiaj teb no
tej xub ke ncaj tuaj, tib neeg thiaj tau paub tej yam
ntxim koj siab. Kev thoob tsib tau cawm lawv.

NPN 90: 3-4, 5-6, 12-13, 14+17bc

Txais: (1) Nyob hauv txhua tiam, Huab Tais, koj yog peb qhov chaw nkaum.

Koj hloov neeg kom rov mus ua plua av,
koj hais tias: “Me nyuam neeg, nej rov mus.”
Ib txhiab xyoo rau koj zoo li yog nag hmo xwb,
vim nws dhau mus lawm,
los tsuas zoo li ib lub caij zov keeb thaum hmo ntuj xwb.

Txais: (1) Nyob hauv txhua tiam, Huab Tais, koj yog peb qhov chaw nkaum.

Koj ua kom lawv tas thaum nyob nruab dab ntub,
tag kis sawv ntxov lawv zoo li cov nroj tsuag pib hloov:
thaum hnub tuaj nroj tsuag sawv ntsuab xiab,
tiam sis yav tsaus ntuj nws twb ntsws tas nphob tas.

Txais: (1) Nyob hauv txhua tiam, Huab Tais, koj yog peb qhov chaw nkaum.

Thov koj qhia kom peb txawj suav peb cov hnub cov hmo kom zoo,
kom peb txawj muaj kev thoob tsib hauv nruab siab.
HUAB TAIS, thov koj rov qab los mas! Yuav tos koj hov ntev?
Thov koj khuv leej koj cov tub txib mas!

Txais: (1) Nyob hauv txhua tiam, Huab Tais, koj yog peb qhov chaw nkaum.

Sawv ntxov tsees, thov koj muab koj txoj kev khuv leej rau peb kom puv npo,
ces peb yuav qw zoo siab hom khaj txhua hnub hauv peb lub neej.
Thov kom Huab Tais peb tus Tswv Ntuj txoj kev ua siab zoo yog peb tug.
Thov koj ua kom cov hauj lwm peb txhais tes ua vam meej tuaj,
Thov koj ua kom cov hauj lwm peb txhais tes khwv ua vam meej mus!

Txais: (1) Nyob hauv txhua tiam, Huab Tais, koj yog peb qhov chaw nkaum.

Zaj Nyeem 2: FLM 1: 9-10,12-17

9 Vim txoj kev hlub,
thiaj li thov ib yam ntawm koj.
Tus hais lus rau koj yog tus laus neeg Paj Lug,
uas nyem no nws yog Yes Xus Pleev tus neeg raug txim.
10 Kuv thov koj rau kuv tus tub Os Nes Xis Mos,
uas kuv yug nws nyob hauv cov saw hlau.
12 Kuv xa nws rov qab los rau koj;
nws yog kuv nplooj siab.
13 Kuv twb xav cia nws nyob ze kuv, kom nws sawv
koj chaw pab kuv nyob hauv cov saw
hlau uas lub Moo Zoo pub rau kuv.
14 Tab sis, kuv tsis xav ua ib yam uas kuv tsis tau xub
nug koj lus pom zoo tso, kom yam zoo uas koj yuav ua,
tsis yog vim koj raug yuam koj thiaj ua,
hos yog koj yeej zoo siab ua koj xwb.
15 Tos Os Nes Xis Mos tau ncaim ntawm koj mus ib ntus,
los ntshai twb yog vim Ntuj xav kom
koj rov txais nws los nrog koj nyob mus li,
16 tsis yog rov los ua koj ib tug qhev lawm,
tiam sis zoo tshaj ib tug qhev, yog los ua ib tug kwv tij.
Nws yog kuv ib tug kwv uas kuv hlub kawg nkaus,
nws haj yam yuav ua ib tug kwv tij uas koj yuav hlub tshaj
nyob hauv sab nqaij tawv, thiab nyob hauv Huab Tais.
17 Yog koj saib tias kuv yog koj tus phooj ywg zoo,
mas koj yuav txais nws ib yam li txais kuv.

As Les Lus Yas: NPN 119:135

Thov kom koj lub ntsej muag ci tuaj rau saum koj tus tub txib,
thiab thov koj qhia koj cov lij choj rau kuv.

Ntawv Moo Zoo: LK 14:25-33

25 Tej pab neeg coob coob nrog Yes Xus taug kev.
Yes Xus tig los hais rau lawv tias :
"Leej twg los raws kuv, yog nws tsis nyiam kuv dua
nws niam nws txiv, nws poj niam me nyuam, nws cov kwv tij
thiab cov muam, thiab yog nws nyiam nws txoj sia dua kuv,
mas tus ntawd ua tsis tau kuv thwj tim.
27 Leej twg tsis kwv nws tus ntoo cuam
thiab tsis lawv kuv qab, mas nws ua tsis tau kuv thwj tim.
28 Yog nej leej twg xav txhim ib tug pej thuam,
nws yuav tsis xub zaum xam saib yuav siv nyiaj npaum li cas,
thiab ntsuas saib nws puas muaj nyiaj txaus ua kom tiav tso lod?
29 Tsam nws pib txhim cov taw ntsa tas, ho ua tsis tau kom tiav,
ces tas cov neeg pom yuav thuam nws hais tias:
30 ‘Saib tus neeg no pib txhim, ho ua tsis tau kom tiav!’
31 Los ib tug vaj yuav sawv kev mus ua rog ntaus lwm tus vaj,
nws puas yuav tsis xub zaum xam saib nws muaj kaum txhiab leej tub
rog, nws puas yuav tiv tau tus vaj uas coj nees nkaum txhiab leej tuaj?
32 Yog nws paub tias yuav tiv tsis tau, mas thaum lwm
tus vaj tseem tuaj txog deb, nws yuav xa ib pab tiam lis
mus thov kom hais sib haum cia lub teb chaws nyob thaj yeeb.
33 Ib yam li ntawd, yog nej leej twg tsis tso nws lub
cuab tam tseg, mas nws ua tsis tau kuv thwj tim.”

Tim 11/09/2022

COV ZAJ NYEEM HNUB CHIV 24 Nruab Xyoo C
Lectionary: 132

Zaj nyeem 1: Kev Tsiv 32: 7-11, 13-14

7 HUAB TAIS hais rau Mais Xes tias:
"Koj kav tsij nqes mus sai, vim koj haiv neeg
uas koj tau coj tawm ntawm Hais
Nkws Tos teb los, twb ua phem lawm.
8 Lawv tos tsis taus, lawv twb maj ncaim ntawm
txoj kev uas kuv nyuam qhuav qhia kom lawv taug.
Lawv nchuav tau ib tug mlom nyuj rau lawv teev lawm;
lawv pe, thiab lawv tua tsiaj txi tus mlom.
Lawv hais tias: Cov His Xas Lais, nej ntsia,
tus no yog nej tus Tswv Ntuj uas tau coj nej
tawm ntawm Hais Nkws Tos teb los."
9 HUAB TAIS hais ntxiv rau Mais Xes tias:
"Kuv pom tias haiv neeg ntawd yog
ib haiv neeg xwb qwb txhav dhau.
10 Zaum no, koj cia kuv npau taws rau lawv,
kuv yuav muab lawv rhuav pov tseg kom tas,
kuv mam li muab koj mus tsim dua ib haiv neeg loj."
11 Mais Xes ua tib zoo thov nws tus HUAB TAIS
Tswv Ntuj kom Huab Tais zoo siab, nws hais tias:
"HUAB TAIS, vim li cas koj thiaj li npau taws
rau haiv neeg uas koj lub zog loj thiab
koj txhais tes muaj hwj huam tau coj
tawm ntawm Hais Nkws Tos teb los?
13 Thov koj nco ntsoov txog koj cov tub txib
Has Nplas Has, His Xas Has thiab His Xas Lais,
uas koj tau cog lus ruaj rau lawv tias:
‘Kuv yuav ua kom nej cov xeeb ntxwv huam
vam coob npaum li cov hnub qub,
thiab kuv yuav muab lub teb chaws uas kuv tau
hais rau nej, pub rau nej cov xeeb ntxwv,
ua lawv tug mus ib txhis.’"
14 Ces HUAB TAIS thim xav, nws tsis ua phem
rau nws haiv neeg raws li nws tau hais.

NPN 51: 3-4, 12-13, 17+19

Txais: (LK 15:18) Kuv yuav sawv tsees mus cuag kuv txiv.

Tswv Ntuj, thov koj khuv leej kuv, vim koj lub siab zoo;
thov koj so kuv qhov txhaum pov tseg,
vim koj kev hlub loj tas nrho.
Thov koj ntxuav kuv lub txim pov tseg kom tas,
thiab muab kuv qhov txhaum tshem
mus kom kuv dawb huv tuaj.

Txais: Kuv yuav sawv tsees mus cuag kuv txiv.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim
Ntshiab tawm ntawm kuv mus.

Txais: Kuv yuav sawv tsees mus cuag kuv txiv.

HUAB TAIS, thov qhib kuv di ncauj,
ces kuv lub ncauj yuav tshaj koj lub koob meej.
Kuv cov txim txi ntuj, Tswv Ntuj,
yog muaj ib lub siab xav lees txhaum;
muaj ib lub siab xav lees txhaum thiab ua neeg me,
Tswv ntuj, koj yuav tsis thuam.

Txais: Kuv yuav sawv tsees mus cuag kuv txiv.

Zaj Nyeem 2: 1 TMT 1:12-17

Tus zoo nyiad:
12 Kuv ua tsaug rau tus tau ntxiv zog rau kuv,
nws yog peb tus Huab Tais Yes Xus Pleev.
Nws saib kuv yog ib tug neeg nws tso siab tau rau,
ces nws hu kuv los tsob hwb nws.
13 Thaud, kuv yog ib tug neeg thuam Tswv Ntuj
lub npe, ib tug hiam luag, thiab thuam luag.
Kuv tau ua li ntawd vim kuv tsis muaj
kev ntseeg ces kuv tsis paub dab tsi li.
Tiam sis Tswv Ntuj tau zam rau kuv lawm.
14 Nyem no, peb tus Huab Tais lub txiaj ntsim
tau nchuav ntws lug los rau hauv kuv. nrog txoj kev
ntseeg thiab kev nyiam uas nyob hauv Yes Xus Pleev.
15 Lo Lus nram no, yog ib lo lus tsim nyog
peb yuav ntseeg thiab txais los ua peb tug:
Yes Xus Pleev tuaj nyob ntiaj teb no
Kom tau cawm cov neeg txhaum.
Kuv yog thawj tug hauv cov neeg txhaum ntawd.
16 Yes Xus Pleev tau zam rau kuv,
yog vim nws xav muab nws lub siab ntev rau
sawv daws pom, ces nws muab kuv ua ib tug
piv txwv rau cov neeg yuav los ntseeg txog nws
kom lawv tau txoj sia nyob mus li.
17 Thov kom tus Vaj kav txhiab niag tim puas xyoo,
tus Tswv Ntuj tsis txawj tuag, tus nuas eeg pom tsis tau,
tus nws tib leeg yog Tswv Ntuj, kom nws muaj
koob meej nto moo, thiab muaj hwj chim
tas mus li ib txhiab ib txhis. Ua li.

As Les Lus Yas: 2 KLN 5:19

Tswv Ntuj tau ua kom lub ntiaj teb neeg nrog nws
rov sib haum xeeb nyob hauv Leej Pleev;
nws tso cov lus pab kom neeg nrog nws
rov sib haum xeeb rau peb tshaj.

Ntawv Moo Zoo: LK 15:1-32

1 Tas cov neeg sau se thiab cov neeg txhaum
txav los ze Yes Xus, kom tau mloog nws hais lus.
2 Cov Fas Lis Xais thiab cov Kws Ntawv Ntshiab
pib nroo zom zaws tias: "Tus neeg ntawd txais cov
neeg txhaum, nws tseem nrog lawv noj mov thiab!"
3 Ces Yes Xus thiaj hais zaj paj lug no rau lawv:
4 "Puas muaj leej twg nyov hauv nej
yog nws muaj ib puas tus yaj, tab sis ib tug ploj lawm,
nws yuav tsis tso cuaj caum cuaj tus yaj tseg
rau tom hav quav poj, nws mus nrhiav
kom tau tus uas poob zoo lawd?
5 Thaum nws nrhiav tau tus yaj poob zoo lawd, nws
muab kwv saum xwb pwg, nws zoo siab tas nrho.
6 Thaum nws rov los txog tsev, nws nqua hu
nws cov phooj ywg thiab cov nyob ze nws tuaj,
nws hais rau lawv tias: 'Nej nrog kuv zoo siab, vim
kuv nrhiav tau kuv tus yaj poob zoo lawm.'
7 Kuv hais rau nej tias, thaum ib tug neeg txhaum
hloov siab los lees txhaum, mas nyob saum ntuj
yuav muaj kev zoo siab loj dua kev zoo siab rau
cuaj caum cuaj leeg siab ncaj uas tsis tas
yuav hloov siab los lees txhaum.”
8 Los tus poj niam twg uas muaj kaum lub txiaj nyiag,
yog ib lub poob lawm, mas nws puas yuav tsis
taws teeb cheb tsev, ua tib zoo nrhiav kom
tau nws lub txiaj nyiag ntawd?
9 Thaum nws nrhiav tau lawm, nws nqua hu
nws cov phooj ywg thiab cov nyob ze nws tuaj,
nws hais tias: ‘Nej nrog kuv zoo siab mas!
Vim kuv nrhiav tau lub txiaj nyiag uas poob lawm.
10 Kuv hais rau nej tias, thaum ib tug neeg txhaum
hloov siab, mas muaj kev zoo siab nyob hauv
Tswv Ntuj tsoom Tshiab ib yam li ntawd thiab.”
11 Yes Xus tseem hais tias: “Ib tug neeg muaj ob tug tub.
12 Tus tub ntxawg hais rau nws txiv tias:
'Txiv, koj muab koj lub cuab tam feem
uas yog kuv tug faib rau kuv.' Ces leej txiv thiaj muab
lub cuab tam faib rau nws ob tug tub.
13 Ob peb hnub tom qab, tus tub ntxawg sau feem uas
yog nws tug tas huv si, nws khiav mus rau ib lub teb
chaws nyob deb. Nyob ntawd nws muab nws lub
cuab tam phob vim nws coj ib lub neej tsis tsim txiaj.
14 Thaum nws muab nws lub cuab tam phob tas huv
si lawm, ces lub teb chaws tshaib plab loj.
Nws pib paub txoj kev yoo tshaib yoo nqhis.
15 Nws thiaj mus ua zog hauv ib tug neeg nyob txawm lub
teb chaws ntawd. Luag kom nws mus zov npua tom teb.
16 Nws ntshaw noj cov qos uas npua noj kom tsau
nws plab kawg, tab sis tsis muaj neeg pub rau nws noj li.
17 Nws lub siab mam li ras dheev tias: 'Pes tsawg leej
tub zog nyob hauv kuv txiv tsev tau mov noj seem noj so,
hos kuv nyob tuag tshaib ntuas ntawm no?
18 Kuv yuav mus cuag kuv txiv, kuv yuav hais rau nws tias:
Txiv, kuv tau ua txhaum rau Ntuj thiab rau koj lawm.
19 Kuv tsis tsim nyog koj hu kuv ua koj tus tub ntxiv.
Thov koj saib kuv ib yam li koj ib tug tub zog.'
20 Tus tub ntxawg thiaj sawv kev rov los cuag nws txiv.
Thaum tus tub tseem los txog deb, nws txiv twb
pom nws lawm. Leej txiv hlub kawg, nws khiav
mus puag nkaus tus tub caj dab,
thiab nwj nws tub tub ntev loo.
21 Tus tub hais rau leej txiv tias: 'Txiv, kuv tau ua txhaum
rau Ntuj thiab rau koj lawm. Kuv tsis tsim
nyog koj hu kuv ua koj tus tub ntxiv.'
22 Tab sis leej txiv hais rau cov tub txib tias:
'Nej tsuag tsuag mus nqa lub tsho zoo nkauj tshaj los
ntawm no, nej muab rau nws hnav, nej muab
ib nti nplhaib los ntxig nws ntiv tes, thiab
ib nkawg khau los ntxig nws ko taw.
23 Nej cab tus xyuas nyuj rog los tua; peb noj, peb ua lom zem.
24 Vim tias kuv tus tub no tuag lawm, nyem no nws ciaj
rov los. Nws ploj lawm, nyem no rov nrhiav tau nws dua.'
Ces lawv sawv daws noj haus lom zem.
25 Thaum ntawd, tus tub hlob tseem nyob tom teb.
Thaum nws rov los yuav txog tsev, nws hnov suab paj
nruag thiab suab dhia seev cev nrov ntsuag qees.
26 Nws hu ib tug tub txib kom tawm mus cuag nws,
nws nug tias lub suab ntawd yog dab tsi.
27 Tus tub txib hais rau nws tias: 'Yog koj tus kwv
rov qab los tsev, ces koj txiv tua tus xyuas nyuj rog,
vim nws tau koj tus kwv rov los, noj qab nyob zoo lawm.'
28 Ces tus tub hlob npau taws, nws tsis kam los hauv
tsev. Leej txiv tawm tuaj thov kom nws los hauv tsev.
29 Tab sis tus tub hlob teb rau nws txiv tias:
'Saib, kuv lis koj tej hauj lwm cuag li ib tug qhev
tau npaum no xyoo, kuv tsis tau hla koj ib lo lus li,
koj twb tsis muab ib tug me nyuam tshis pub kuv ib zaug,
kom tau nrog kuv cov phooj ywg noj ib pluag lom zem.
30 Hos koj niag tub ntawd, mus nrog cov niam ntiav
muab koj lub cuab tam nqos tas, thaum nws rov
los tsev, koj tua tus xyuas nyuj rog rau nws!'
31 Ces leej txiv hais rau tus tub hlob tias:
'Me tub, koj ib txwm nrog kuv nyob. Ib puas tsav
yam uas yog kuv tug, mas kuj yog koj tug.
32 Tab sis, peb yuav tsum noj ib roog qav thiab ua lom zem,
vim koj tus kwv no tuag lawm, zaum no nws ciaj rov los,
nws ploj lawm, nyem no nrhiav tau nws rov los lawm."

Los: LK 15:1-10

1 Tas cov neeg sau se thiab cov neeg txhaum
txav los ze Yes Xus, kom tau mloog nws hais lus.
2 Cov Fas Lis Xais thiab cov Kws Ntawv Ntshiab
pib nroo zom zaws tias: "Tus neeg ntawd txais cov
neeg txhaum, nws tseem nrog lawv noj mov thiab!"
3 Ces Yes Xus thiaj hais zaj paj lug no rau lawv:
4 "Puas muaj leej twg nyov hauv nej
yog nws muaj ib puas tus yaj, tab sis ib tug ploj lawm,
nws yuav tsis tso cuaj caum cuaj tus yaj tseg
rau tom hav quav poj, nws mus nrhiav
kom tau tus uas poob zoo lawd?
5 Thaum nws nrhiav tau tus yaj poob zoo lawd, nws
muab kwv saum xwb pwg, nws zoo siab tas nrho.
6 Thaum nws rov los txog tsev, nws nqua hu
nws cov phooj ywg thiab cov nyob ze nws tuaj,
nws hais rau lawv tias: 'Nej nrog kuv zoo siab, vim
kuv nrhiav tau kuv tus yaj poob zoo lawm.'
7 Kuv hais rau nej tias, thaum ib tug neeg txhaum
hloov siab los lees txhaum, mas nyob saum ntuj
yuav muaj kev zoo siab loj dua kev zoo siab rau
cuaj caum cuaj leeg siab ncaj uas tsis tas
yuav hloov siab los lees txhaum.”
8 Los tus poj niam twg uas muaj kaum lub txiaj nyiag,
yog ib lub poob lawm, mas nws puas yuav tsis
taws teeb cheb tsev, ua tib zoo nrhiav kom
tau nws lub txiaj nyiag ntawd?
9 Thaum nws nrhiav tau lawm, nws nqua hu
nws cov phooj ywg thiab cov nyob ze nws tuaj,
nws hais tias: ‘Nej nrog kuv zoo siab mas!
Vim kuv nrhiav tau lub txiaj nyiag uas poob lawm.
10 Kuv hais rau nej tias, thaum ib tug neeg txhaum
hloov siab, mas muaj kev zoo siab nyob hauv
Tswv Ntuj tsoom Tshiab ib yam li ntawd thiab.”

Tim 04/09/2022

COV ZAJ NYEEM HNUB CHIV 25
Nruab Xyoo C
Lectionary: 135

Zaj nyeem 1: As Mos 8: 4-7

4 Nej cov uas tsuj ntiag cov txom nyem
thiab xav ua kom cov neeg me nyob hauv lub
teb chaws ploj mus, nej mloog kuv hais mog!
5 Nej hais tias: "Thaum twg lub hli xiab mam dua?
Kom peb tau muag peb tej khoom noj!
Thaum twg hnub Xas Npas Tos mam dua?
Kom peb tau muab peb cov hmoov nplej los muag.
Peb yuav xuas lub kawm tsis txwm tawv los yeem,
yuav muab lub txiaj me los ntaus nqe loj, yuav xuas
rab teev loj tsis txwm choj los luj, kom tau noj luag.
6 Peb yuav muab nyiaj los muas cov neeg tsis muaj zog,
yuav muab ib nkawm khau khiab los muas cov neeg pluag.
Tab yog cov tsig txhuv los peb yuav sau nqe tib si."
7 HUAB TAIS tuav txog Yas Kos lub siab khav
theeb los cog lus tias: Kuv yuav nco ntsoov
mus li txog tej yam uas lawv tau ua.

NPN 113: 1-2,4-6,7-8

Txais: (1a,7b) Nej cav txog tus Huab Tais
uas tsa tus pluag los rau qhov siab.

HUAB TAIS cov tub txib, nej cav txog nws,
nej cav txog HUAB TAIS lub npe mog.
Kom HUAB TAIS lub npe nto moo lug,
nyem no mus txog txhiab niag tim puas xyoo.

Txais: (1a,7b) Nej cav txog tus Huab Tais
uas tsa tus pluag los rau qhov siab.

HUAB TAIS nyob siab tshaj ib tsoom kuj cuab,
nws lub hwj chim nyob siab dua cov txheej ntuj saud.
Leej twg thiaj zoo li HUAB TAIS peb tus Tswv Ntuj,
uas nws zaum saum nws lub theej kiab nyob stxheej iab
thiab nws dauv muag los ntsia lub ntuj
thiab lub ntiaj teb nyob txheej qis hauv?

Txais: (1a,7b) Nej cav txog tus Huab Tais
uas tsa tus pluag los rau qhov siab.

Nws tsa tus pluag sawv hauv plua av los,
nws rub tus txom nyem tawm hauv qhov qias los
kom los zaum nrog cov tub huab tais,
cov tub huab tais hauv nws haiv neeg.

Txais: (1a,7b) Nej cav txog tus Huab Tais
uas tsa tus pluag los rau qhov siab.

Zaj Nyeem 2: 1 TMT 2: 1-8

Tus zoo nyiad:
1 Ua ntej tshaj cov, kuv xav kom
nej thov Ntuj, hais tej zaj teev Ntuj, thiab hais
tej zaj ua Ntuj tsaug rau tas ib zeej tsoom,
2 rau cov ua vaj thiab cov muaj cai tswj luag tej,
kom peb tau kev coj ib lub neej nyob nyab xeeb thiab
tiaj tus nyob hauv txoj kev hwm Ntuj thiab muaj tsim.
3 Qhov no thiaj yog qhov zoo thiab xis tus
Tswv Ntuj uas cawm peb lub siab.
4 Nws xav kom tas zeej tsoom tau txais
kev cawm thiab tau kev paub txog qhov tseeb.
5 Vim muaj tib tug Tswv Ntuj xwb. Thiab kuj muaj tib tug cev
lus xwb, ntawm Tswv Ntuj rau tib neeg thiab Ntawm
tib neeg rau Tswv; yog Yes Xus Pleev, uas yog tib neeg.
6 Nws tau muab nws los ua nqi txhiv peb sawv daws.
Thaum txog lub caij teem, nws tau ua
tim khawv zeem tseeb txog qhov ntawd.
7 Vim qhov ntawd, kuv thiaj raug xaiv los ua tus tshaj moo
thiab tus Hauv Paus Xa Lus. Kuv hais lus tseeb, kuv tsis dag.
Kuv yog tus xib hwb qhia cov neeg teev pej kum dab,
kom lawv paub txoj kev ntseeg thiab paub qhov tseeb.
8 Li ntawd, kuv xav kom nyob tas qhov txhia chaw,
sawv daws yuav tsum teev Ntuj, tsa tes dawb
huv hwm Ntuj, tsis muaj kev npau taws,
tsis muaj lus sib cav sib ceg li.

As Les Lus Yas: 2 KLN 8: 9

Peb tus Huab Tais Yes Xus Pleev yog tus nplua nuj,
tab sis nws yeem ua tus pluag, kom xwv nws
txoj kev pluag ua tau nej nplua nuj tuaj.

Ntawv Moo Zoo: LK 16: 1-13

1 Yes Xus hais rau cov thwj tim tias:
"Muaj ib tug neeg nplua nuj, uas muaj ib tug tim xyoob
xam txiaj. Luag qhia nws tias tus tim xyoob
muab nws tej nyiaj txiag siv lwj siv liam tsis txuag li.
2 Tus tswv hu tus tim xyoob tuaj, nws hais rau tus tim
xyoob tias: ‘Kuv hnov hais dab tsi li ntawd txog koj?
Koj sau ntawv qhia saib koj siv kuv tej nyiaj txiag li cas.
Vim koj yuav tsis tau ua kuv tus xam txiaj ntxiv.’
3 Tus tim xyoob xav zoj rau nruab siab tias:
‘Kuv yuav ua dab tsi, vim kuv tus tswv tshem
txoj hauj lwm xam txiaj ntawm kuv mus lawm?
Mus ncaws teb? Kuv tsis muaj zog.
Mus thov khawv? Kuv kuj txaj muag.
4 Kuv paub kuv yuav ua dab tsi, kom thaum
luag tshem txoj hauj lwm xam txiaj ntawm kuv lawm
kiag, muaj neeg yuav txais kuv mus nyob hauv lawv tsev.’
5 Ces tus tim xyoob hu cov neeg tshuav nqi ntawm
tus tswv ib tug zuj zus tuaj. Nws hais rau thawj tug tias:
‘Koj tshuav nuj nqi ntawm kuv tus tswv npaum li cas?’
6 Tus tshuav nqi teb tias: ‘Ib puas hub roj.’
Tus tim xyoob hais rau nws tias: 'Muab koj daim ntawv
tshuav nqi los, koj zaum, koj sau sai sai tias tsib caug hub.'
7 Tus tim xyoob hais rau lwm tus tias: ‘Koj ne, koj tshuav nqi
pes tsawg?’ Nws hais tias: ‘Ib puas phawv nplej mov mog.’
Tus tim xyoob hais rau nws tias: 'Muab koj daim
ntawv tshuav nqi los, koj sau ua yim caum phawv.'
8 Ces tus tswv qhuas tus tim xyoob siab tsis ncaj
uas txawj ua neeg xyuam xim ntawd. Vim tias lub ntiaj
no cov tub txawj ua neeg xyuam xim thaum lawv
nrog lawv phaj neeg, dua kev kaj cov tub.
9 Kuv hais rau nej tias: ‘Nej kav tsij siv tej nyiaj txiag
tsis ncaj ncees ntawd los ua kom nej muaj phooj ywg,
Ces thaum nej nyiaj tas lawm, lawv thiaj yuav txais
nej mus nyob hauv cov tsev tsam phooj nyob mus li mas.
10 Leej twg pheej xeeb thaum nws saib tej yam me me,
nws kuj pheej xeeb thaum nws saib ib yam loj thiab.
Leej twg ua tsis ncaj thaum nws saib tej yam me me,
nws kuj ua tsis ncaj thaum nws saib tej yam loj thiabj.
11 Yog nej twb tsis pheej xeeb thaum nej saib cov
nyiaj txiag tsis ncaj ncees, mas leej twg yuav
muab yam zoo yam tseeb rau nej saib?
12 Thaum nej saib yam uas yog luag tug,
yog nej ua tsis ncaj, mas leej twg yuav
muab yam uas yog nej tug rau nej tuav?
13 Tsis muaj ib tug tub txib uas yuav tsob hwb ob tug
tswv tau. Nws yuav ntxub ib tug nyiam lwm tus,
los yuav npuab ib tug, thuam lwm tus. Nej yuav ua
Tswv Ntuj tub txib thiab nyiaj txiag tub txib tsis tau."

COV ZAJ NYEEM HNUB CHIV TIM 26/09/2022
Chiv 26 Nruab Xyoo C

Zaj nyeem Ib As Moos 6, 1a.4-7.
1 Cov neeg uas lawv tau nyob dawb huv nyob Xis Yoos
thiab cov uas lawv tau nyob tiaj nyob tus saum cov roob Xas Mas Lias
mas lawv yuav raug txoj hmoov phem.
4 Lawv pw saum tej lub txaj kaus ntxhw, lawv zaum tej lub rooj zooj.
Lawv ntes cov me nyuam yaj hauv lawv pab yaj los noj.
Lawv muab cov me nyuam nyuj kaw los noj.
5 Lawv ke qw ke ntau thaj cheej, lawv tsim tej paj nruag los ua si.
6 lawv haus dej haus cawv puv ntim.
Lawv muab tshuaj tsw qab los pleev lawv tej npab tej ceg.
Tab txawm lawv pom His Xas Lais teb yuav ploj los lawv tsis quav ntsej rau.
7 Vim li ntawd mas nyem no lawv yuav ua sawv daws ntej mus nyob txim pej kum teb.
Dhau lub caij lawv da hauv lawv tej kev haus cawv qaug lawm!




Zaj Nyeem Ob  1 Tis Mos Tes 6, 11-16
Paj Lug ntuas Tis Mos Tes.
11 Ntawm koj, mas koj yog Tswv Ntuj
tus neeg, koj txav mus deb ntawm tej
ntawd tib si. Koj xyaum mus taug txoj
kev ncaj, kev hwm Ntuj, kev ntseeg, kev
nyiam, kev tij lim, kev hlub luag mos nyoos.
12 Koj ntaus ntsug rog zoo los pab kev
ntseeg. Koj yuav txeeb tau txoj sia nyob
mus li : Ntuj hu koj los txais txoj sia
ntawd. Thiab yog vim koj xav tau txoj
sia nyob mus li, ces koj thiaj ua zaj zeem
kev ntseeg zoo nkauj rau cov tim khawv
pom. 13 Kuv tuav txog Tswv Ntuj lub
npe, uas nws pub txoj sia rau txhua tsav
txhua yam thiab tuav txog Yes Xus Pleev
lub npe, uas nws tau hais lo lus zeem
tseeb zoo nkauj, nyob ntawm Poos Xyus
Pis Las Tos xub ntiag. 14 Koj coj lo lus
qhia zoo, txhob ua ib yam tsis huv, txhob
muaj chaw xyeej. Koj ua li ntawd mus
txog hnub peb tus Huab Tais Yes Xus
Pleev yuav tawm los rau pom xyeem.
15 Thaum txog lub caij teem, tus yuav ua
kom Yes Xus tawm los, yog tus Huab
Tais nto koob meej, tus Vaj kav tas tsoom
vaj, tus Huab Tais kav tas tsoom huab
tais, 16 yog tus muaj txoj sia tsis txawj
tuag ua nws tug, yog tus nyob txawm
saum qhov pom kev, uas neeg mus tsis
tau, yog tus uas leej tib neeg tsis tau
pom dua, thiab pom tsis tau.
Kev nto koob meej thiab kev muaj hwj
huam yog nws tug mus ib txhiab ib txhis ! Ua li !



Lus Kas Ntawv Moo Zoo: 16, 19-31
Tus nplua nuj tsis hlub tus pluag.
19 "Muaj ib tug neeg nplua nuj, nws
hnav ntaub tsuj liab tsam xem thiab ntaub
pag mos. Nws niaj hnub noj tej rooj qav zoo kawg.
20 Muaj ib tug pluag hu ua Las Ntxas
Los, nws ib ce mob kiav txhab tas, nws
pw ze ntawm tus nplua nuj lub rooj loog.
21 Las Ntxas Los ntshaw noj tej yam
poob ntawm tus nplua nuj lub rooj mov
kom tsau nws plab... Dev tseem tuaj yaim
nws tej qhov txhab thiab. 22 Muaj ib
hnub, tus pluag tuag, cov Tshiab tuaj nqa
nws mus rau hauv Has Nplas Has xub
ntiag. Tus nplua nuj kuj tuag thiab, luag
muab nws coj mus faus.
23 Tus nplua nuj nyob hauv ntuj txias
teb tsaus, nws txom nyem loj kawg. Nws
tsa muag ntsia pom Has Nplas Has nyob
deb thiab pom Las Ntxas Los nyob hauv
nws xub ntiag. 24 Nws hu nrov tias :
Txiv Has Nplas Has, thov koj khuv leej
kuv, thov koj xa Las Ntxas Los tuaj muab
nws ntsis ntiv tes tub dej rau kuv tus
nplaig kom txias, vim kuv raug tsim txom
nyob hauv cov hluav taws no. Tab sis
Has Nplas Has hais tias : 25 Kuv tub, koj
nco ntsoov tias thaum ua neej nyob koj
tau txais koj cov nyiaj txiag, hos Las
Ntxas Los tau txais kev mob. Zaum no
Las Ntxas Los txais kev nplij nyob ntawm
no, hos koj raug tsim txom. 26 Thiab tsis
tag li ntawd : muaj ib lub qhov ntuj tob
kawg kem peb rau ntawm nej, kom cov
uas xav hla ntawm peb rau tim nej hla tsis
tau, thiab kom cov nyob tim nej txhob hla tau los rau tim no.
27 Ces tus nplua nuj hais tias :
"Txiv, kuv thov koj xa Las Ntxas Los
mus hauv kuv txiv tsev, 28 vim kuv muaj
tsib tug kwv tij, kom Las Ntxas Los mus
ua pov thawj qhia lawv, kom lawv tsis
txhob tuaj nyob hauv qhov chaw raug tsim txom no.”
29 Ces Has Nplas Has hais tias :
“Lawv muaj Mais Xes thiab cov Yaj
Saub. Cia lawv mloog Mais Xes thiab cov Yaj Saub qhia.
30 Tab sis tus nplua nuj hais tias :
“Txiv Has Nplas Has, yog tias ib tug hauv
cov tuag mus cuag lawv, mas lawv yuav hloov siab.
31 Tab sis Has Nplas Has hais rau nws tias :
“Yog lawv tsis mloog Mais Xes thiab cov
Yaj Saub, mas tab yog ib tug sawv hauv
cov tuag mus qhia lawv, lawv kuj yuav tsis ntseeg nws.”

zaj Nyeem Ib: Qheb yav tom ntej 7, 2-4.9-14
2 Kuv pom dua ib tug Tshiab tawm sab
Toob Fab tuaj ; nws nqa tus Tswv Ntuj
muaj txoj sia lub thwj. Nws hu ib suab
nrov nrov rau plaub tug Tshiab uas tau
txais txoj hauj lwm tso xwv txheej rau lub ntiaj teb tias :
3 “Nej txhob rawm tso xwv txheej mus
rau lub ntiaj teb, lub hiav txwv, thiab tej
me ntoo. Tos peb ntaus cim rau saum
Tswv Ntuj cov tub txib hauv pliaj tso.”
4 Ces kuv hnov lawv ntaus cim rau
npaum no leej : ib puas plaub caug plaub
txhiab leej nyob hauv tas nrho cov xeem His Xas Lais.

9 Dhau tej ntawd tas lawm, ces kuv pom
ib pab neeg coob coob suav tsis txheeb ;
muaj tas txhua teb chaws, txhua haiv
neeg, txhua xeem lus. Lawv sawv ntsug
ze ntawm lub theej kiab, nyob ntawm
Leej Yaj xub ntiag. Lawv hnav tsho
dawb ntev, thiab tuav tej rev nplooj
ntawm tes. 10 Lawv qw nrov muaj ceem tias :
“Kev yeej yog peb tus Tswv Ntuj uas nws
zaum saum lub theej kiab tug, thiab yog Leej Yaj tug !”
11 Ces tas tsoom Tshiab uas sawv ncig
lub theej kiab, ncig cov Laus thiab plaub
Leeg Muaj Txoj Sia, lawv txhos caug,
ntsej muag khoov ti av pe Tswv Ntuj.
12 Lawv hais tias :
“Lo Lus cav, lub hwj chim, kev thoob
tsib, kev ua tsaug, kev nto koob meej,
kev muaj hwj huam thiab muaj zog yog
peb tus Tswv Ntuj tug, mus tas ib txhiab ib txhis ! Ua li.”
13 Ib tug Laus txawm hais rau kuv tias :
“Cov neeg uas hnav tsho dawb ntev
ntawd yog leej twg ? Lawv tuaj qhov twg tuaj ?”

14 Kuv teb tias : “Huab Tais, yog koj thiaj paub.”
Nws rov hais tias : “Lawv yog cov uas hla dhau txoj kev raug
luag hiam hnyav los. Lawv tau ntxhua
lawv cov tsho ntev, thiab muab raus Leej
Yaj cov ntshav kom dawb.




Zaj Nyeem Ob: 1 Zam tsab ntawv 3, 1-3
Nej yog Tswv Ntuj cov me nyuam.
1 Nej ntsia saib, Leej Txiv txoj kev
nyiam peb loj tas npaum no : yam li
peb hu ua Tswv Ntuj cov me nyuam, peb
yog Tswv Ntuj cov me nyuam tiag ! Lub
ntiaj teb neeg tsis paub peb, vim ntiaj teb
neeg tsis paub Leej Txiv.
2 Cov zoo nyiam, nyem no, peb yog
Tswv Ntuj cov me nyuam. Qhov uas yav
tom ntej peb yuav plhis mus zoo li cas,
tseem tsis tau tawm los rau qhov muag
pom xyeem. Peb paub tias, thaum Leej
Pleev yuav tawm los rau qhov muag pom
xyeem, mas peb yuav zoo li Nws, vim
nws zoo li cas, mas peb yuav pom Nws zoo li ntawd.

Mas Tais Ntawv Moo Zoo: 5, 1-12a
Txoj Hmoov zoo.
1 Yes Xus pom neeg coob coob
tuaj, nws nce mus saum lub roob.
Nws zaum. Cov thwj tim txav los ze Yes
Xus. 2 Ces Yes Xus tsa ncauj qhia lawv hais tias :
3 "Cov tau txoj hmoov zoo, yog cov
pluag hauv nruab siab, vim Ntuj lub Ceeb Tsheej yog lawv li.
4 Cov tau txoj hmoov zoo, yog cov siab
zoo, vim lawv yuav txais lub ntiaj teb los ua lawv tug.
5 Cov tau txoj hmoov zoo, yog cov quaj
ntsuag, vim Ntuj yuav nplij lawv. 6 Cov
tau txoj hmoov zoo, yog cov tshaib thiab
nqhis txoj kev ncaj, vim Ntuj yuav daws lawv qhov nqhis.
7 Cov tau txoj hmoov zoo, yog cov hlub
luag tej, vim Ntuj yuav hlub lawv.
8 Cov tau txoj hmoov zoo, yog cov siab
huv, vim lawv yuav pom Tswv Ntuj.
9 Cov tau txoj hmoov zoo, yog cov tsim
kev thaj yeeb, vim Ntuj yuav hu lawv ua
Tswv Ntuj cov me nyuam.
10 Cov tau txoj hmoov zoo, yog cov raug
luag hiam vim txoj kev ncaj, Ntuj lub
Ceeb Tsheej yog lawv tug.
11 Thaum luag thuam nej, hiam nej, thiab
liam ntau yam phem rau nej vim kuv, mas
nej txoj hmoov zoo.
12 Nej zoo siab thiab nej hom khaj mog,
vim nej yuav tau txais koob haum loj nyob
saum ntuj. Cov yaj saub ua nej ntej, kuj
raug luag hiam zoo li ntawd thiab.