TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Thoj Zam tag sim neej hnub tim 13 lub 1 hlis xyoo 2011.
Thoj Zam yog ib tug Hmoob Suav nyob rau lub zos Kwj Deg Txias, nroog Paj Tawg Lag, xeev Yeej Naj, Suav teb. Thoj Zam hais li no : xyoo 1986, kuv mus Khib Meej (Kunming), vim Khib Meej lub Cheeb Koom Txoos Kav Tos Liv muaj kev sib sau sab laj. Xyoo ntawd T.P Nyiaj Pov kuj tuaj tsham ua si txog nroog Khib Meej thiab. Nyob hauv Tswv Qhia tsev, muaj ib tug Txiv Plig Hmoob npe hu ua Tsheej. Txiv Plig Tsheej xub paub Txiv Plig Nyiaj Pov, vim nkawd xub ua phooj ywg lawm. Txiv Plig Tsheej kuj paub kuv thiab nrog kuv sib raug zoo los ntev. Txiv Plig Tsheej thiaj qhia kom T.P Nyiaj Pov los ntsib kuv nyob ntawm lub tsev teev Ntuj uas Pej Ceeb Lwm hom phiaj 92. Tag kis ntawd kwv yees 9 teev tej, peb ib pab neeg uas sib sau ua ke ntawm rooj sab laj los thau duab ua ke. Thaum thau duab tas, ib tug neeg Fab Kis ua ntsej muag luag ntxhi ntsia ntsoov kuv. Tab sis kuv tsis paub yog tus qab hau dab tsi. Nws nthos nkaus kuv txhais tes hu tias : “Koj yog Hmoob lod ?” Kuv teb tias : “Yog kawg”.
Nws kuj nug tias : “Koj paub ntawv Hmoob thiab lod ?”Kuv teb tias : “Kuv paub me ntsis xwb”.
Nws hais ntxiv tias : “Koj puas muaj sij hawm nrog kuv tham pem me ntsis ne ?” Kuv teb tias : “Ib me chim kuv mam los ntsib koj.”
Ces peb ib pab neeg cia li rov qab mus tim lub tsev rooj sab laj mus noj tshais lawm. Lub sij hawm ntawd, kuv xav twj ywm hauv siab tias :
kuv yog ib tug neeg me, vim li cas ib tus neeg Fab Kis yuav kom kuv mus ntsib nws ?
Tus neeg Fab Kis ntawd nws so nyob saum Txiv Plig Kws lub tsev txheej 2. Kuv mem tias T.P Kws yeej yuav tsum paub nws xwb xwb. Kuv thiaj mus nug T.P Kws, T.P Kws qhia rau kuv tias : tus puag ta tuav koj tes, kuv qhia rau koj tias : nws yog T.P Nyiaj Pov. Kuv hnov hais li ntawd, ces kuv kuj zoo siab heev lauj !
Peb ib pab neeg uas sib sau sab laj sawv daws ua ke noj tshais tas, kuv thiaj mus ntsib T.P Nyiaj Pov saum T.P Kws lub tsev txheej 2. Wb 2 leeg zoo siab tham li ub li no. Nws cev rau kuv ib cov ntawv Hmoob. Tab sis, cov ntawv Hmoob no kuv tsis paub. Vim cov kuv paub yog Suav teb cov ntawv Hmoob xwb. Txawm li ntawd los T.P Nyiaj Pov kuj kom kuv txais nws cov ntawv mus xyaum. Nws kuj hais tias yooj yim kawg. Kuv thiaj txais coj los hauv kuv tsev. Txij hnub ntawd los, Txiv Plig Nyiaj Pov kuj xa ntau phau ntawv tuaj rau kuv ntxiv. Kuv xav twj ywm tias : txawm yog ntawv Hmoob los tsis muaj tus qhia, yus ces kuj tsis txawj paub ib zaug li. Tsuas zoo muab khaws tso cia xwb lauj. Tiam sis kuv lub siab kuj nyob tsis kaj. Kuv kuj xav tias luag yog ib tus T.P tawv dawb, luag ntseeg yus yog tus neeg ntse, yeej yuav kawm txawj hom ntawv Hmoob no. Vim tus tsi yus ho tsis xav tswv yim muab kawm kom paub. Yuav mus nrhiav leej twg qhia yus ned ? Xav tas puas tsav yam hauv siab, kuj xav tsis tau lub zoo tswv yim. Muaj ib zaug kuv nrog kuv tus muam vauv thiab ib tug tij laug, tsis nco qab yog mus Khib Meej sab laj ua dab tsi lawm. Hnub ntawd, lawv 2 leeg caw kuv nrog lawv mus ntsib ib tug Hmoob Ham uas nyob hauv lub nroog Khib Meej. Tab sis ua ntej mas kuv twb xub ntsib T.P Kws lawm. Kuv hais rau Txiv Plig Kws tias :
Txiv Plig kuv tsis paub hom ntawv Hmoob no. Tab sis T.P Nyiaj Pov muab cov ntawv no xa ntau phau tuaj rau kuv. Kuv saib mas ib tug txwm ntawv los kuv tsis paub li. Kuv kuj nug tsis tau Txiv Plig Nyiaj Pov moo li thiab. Yog koj ntsib nws, ces koj hais rau nws tias : kom nws txhob xa tuaj lawm. Tsis li mas, yuav nkim tas nws cov ntawv thiab nws cov txiaj xa ntawv, ces khuv xim kawg li. T.P Kws teb kuv tias : “Hom ntawv Hmoob no kawm yooj yim kawg. Kuv twb paub lawm.” Kuv hnov dheev nws hais li ntawd, kuv hais tias : “Txiv Plig Kws, koj puas kam qhia kuv me ntsis maj ?”
Nws teb tias : “Kam kawg los maj.” Tam sim ntawd, nws qhia kuv kwv yees 2 teev. Kuv kuj rau siab ntso kawm, ib chim xwb kuv kawm tas nrho phau me ntawv uas “ XYAUM NYEEM NTAWV HMOOB THOOB TEB” ntawd. Qhov uas yooj yim rau kuv yog kuv xub paub Suav teb cov ntawv Hmoob lawm. Txawm tias tus txwm ntawv txawv, los lub suab kuj tsis txawv peg tsawg. Kuv kuj muab Suav teb cov ntawv Hmoob cim cia rau ib sab. Ces coj los txog tsev kuv niaj hmo nrhiav sij hawm los xyaum. Tab sis kuv niaj hnub ua liaj ua teb, maj tsis yeej los kawm nruab hnub. Tsuas yog hmo ntuj mam xyaum xwb, xyaum xyaum tsaug zog ces cia li pw. Ib lub hlis tom qab, kuv rov saib xyuas tej phau ntawv “DAB NEEG” uas Txiv Plig Nyiaj Pov xa rau kuv. Kuv tshwj zias tej txwm uas yog yeeb lus tseg, kuv puav leej nyeem tau tib si lawm. Muaj ib zaug kuv mus txog Khib Meej, yog zaum 2 uas kuv rov tau ntsib Txiv Plig Nyiaj Pov. Kuv thiaj muab phau ntawv nyeem rau Txiv Plig mloog, Txiv Plig npuaj npuaj kuv xub pwg hais tias : “Kuv pom tseeb tias koj paub ntawv Hmoob zoo lawm.” Vim li ntawd, Txiv Plig Nyiaj Pov nrog kuv ua phooj ywg txog hnub nws tas sim neej. Txij thaum wb sib paub txog nyiam no, nws pab tas kuv puas tsav yam tswv yim. Tseem pab nyiaj txiag rau kuv qhia Suav teb tej tub ntxhais kom txawj nyeem thiab sau ntawv Hmoob. Txiv Plig Nyiaj Pov tas nws ib sim neej nws pab ib ntiaj ntug txhua txhia lub kuj cuab uas muaj Hmoob nyob. Nws zoo tshaj ib tsoom Hmoob tej niam tej txiv. Nws ua ib tug niam thov khawv rau ib tsoom me nyuam thov khawv siv noj siv haus, siv ua hauj lwm li ub li no. Nws niaj xyoo tuaj Suav teb ntsib kuv thiab ib tsoom phooj ywg Hmoob. Nws ua rau luag txhua txhia leej noj pov khawv. Siv kom luag txaus siab, tab sis nws tsis noj pes tsawg. Nws kuj tsis haus yeeb haus cawv, nws siv txiaj txuag txuag rau nws. Nws hais kuv tias :
“Koj kuj yoog xws kuv me ntsis. Vim koj siv txiaj kuj txuag zoo xws kuv, tsis noj zoo peg tsawg.” Txiv Plig Nyiaj Pov kheev nrog kuv ua ke noj haus, vim kuv kuj tsis haus cawv ntau ntau, tab sis kuv ho haus luam yeeb. Nyob Suav teb haus luam yeeb tsis siv txiaj ntau peg tsawg.
Kuv ntsib Txiv Plig Nyiaj Pov nyob Thaib teb 2 zaug. Ua ntej kuv tsis tau mus ntsib nws nyob Thaib teb, mas kuv xav tias nws yog ib tug nto npe lug rau ib ntiaj ntug tsoom Hmoob. Ntshe nws yuav nyob tej tsev zoo nkauj cuag nom tswv tej vaj tse. Tiam sis thaum kuv mus pom kiag ntawm qhov muag, nws tsis muaj ib lub tsev li. Nws nyob 2 me kem tsev uas muaj 3 txheej, tab sis kuj yog nrog luag ntiav nyob xwb, tsis yog nws tug. Nyob hauv nws 2 kem tsev tsis muaj ib lub rooj uas zoo zaum muag nyoos. Nws tej rooj zaum kuj yog tej lub tawv qhawv, tsis tiag dab tsi rau saud li. Kuv nrog Txiv Plig Nyiaj Pov nyob ib hlis ntau, niaj hnub tsuas pom nws zaum tej rooj tawv qhawv ntawd xwb. Zaum ib hnub tsaus ntuj, cuag li taub qab tsis txawj tsaug, tsis txawj mob. Kuv pom nws lub zam zuag ntawd, kuv kuj xav twj ywm hauv kuv siab tias :
“Txiv yuas Txiv ! Ib sim neej koj tsuas muab koj lub hlwb hau thiab lub zog siv tas rau ib tsoom Hmoob. Hlub luag tshaj koj hlub koj. Koj thiaj yog Yes Xus ib tug tseeb thwj tim tiag. Qhov tseeb kuj yog Yes Xus tus zoo phooj ywg. Tsim nyog peb ib tsoom kwv tij Hmoob qhuas txog koj !”
Tsim nyog peb xyaum yoog raws Txiv Plig Nyiaj Pov tus cuj pwm. Yog yuav sau Txiv Plig Nyiaj Pov ib sim neej qhov muaj nqis, mas ceeb laj sau tas. Yuav suav nws cov txiaj ntsim uas ua pub rau Hmoob, kuj ceeb laj suav txhua. Kuv tsuas sau me me txij no xwb. Thov tsoom kwv tij Hmoob uas nej tau pom Txiv Plig Nyiaj Pov lub neej, ho sau rau kuv thiab sawv daws tau saib tau mloog, ua tsaug ntau ntau !

Muab los ntawm Zoo Tswv Zov Yaj.

Daim duab ntawm no yog thawj thawj pab ntxhais Hmoob uas tuaj nrog peb cov leej phauj Hmoob nyob tom Nong Bon, Vees Cas, Nplog Teb. Kuj pom TP Nyiaj Pov sawv puag nram qab thiab. Peb tug thawj leej phauj Hmoob yog:
Phauj Diav Yaj, ntsia hauv daim duab, yog tus nyob phab kawg sab xis, leej nram qab ntawm tus ntaiv;
phauj Rhia Lauj, tus sawv nyob nruab nrab tsawv ntawm TP sab xis;
phauj Mos Xyooj, tus sawv phab laug kawg nram qab ib tug ntxhais tsis hnav Hmoob.
Cov no mas thiaj yog lub hauv paus chiv cov phauj Hmoob thiab cov ntxhais Hmoob nyob Nong Bon tiag tiag. Thaum ntawd phauj Xis tsis tau tuaj nrog lawv nyob li.
Thaum yees daim duab no mas ntshe yog nyob nruab ntawm lub 2 hlis mus rau lub 4 hlis 1962.

Cov ntxhais npe, sab xis mus rau sab laug, ntsia hauv daim duab:
1. Txos Lis, tus sawv ntawm phauj Diav xub ntiag
2. Zuag Vaj
3. Paj Vaj, niam Txhiaj Vwj Yaj
4. Ntxhi Thoj, tus sawv kis nruab nrab nram qab
5. Rhia Vwj
6. Dawb Vaj, niam Xaiv Tuam Xyooj (Zuag Vaj tus niam laus)
7. Txiab(?)…
8. Ib tug nraim lawm nyob ntawm phauj Rhia sab xis, tsis paub yog leej twg
9. Maiv Yaj, niam caub moos Zoov Txhiaj Thoj, Zam Nob Yaj ntxhais
10. Maiv… (tus sawv nram qab niam caub moos Zoov Txhiaj Thoj)
11. Mim Yaj, Tsuj Xyooj ntxhais, TP Cwj Vuam Chiv tus muam.


Daim duab no yog Maiv Yaj(niam caub moos Zoov Txhiaj Thoj) thiab nws cov ntxhais kawm ntawv, yees xyoo 1970 thaum lub 2 hlis 3 hlis ntawd.  Maiv tab tom qhia cov ntxhais xaws khaub ncaws. Lub caij ntawd nws qhia cov ntxhais nyob Nong Bon xaws khaub ncaws, ua noj ua haus thiab tu me tub me nyuam raws li TP Nyiaj Pov lub hom phiaj rau lawv.

Tus Sau: Mim Yaj

Cov ntawv hmoob Las Tees, uas Txiv Plig Nyiaj Pov tsim los rau tsoom Hmoob nyob thoob teb chaws siv no. Thawj lo lus uas Txiv Plig tau hais ib lo lus tseem ceeb rau Tsoom Hmoob tias:
Kuv ua Ntuj tsaug, uas Tswv Ntuj tau xa kuv tuaj rau Haiv Hmoob. Kom tsim tau ib co ntawv Hmoob hais lus meej, rau Haiv Hmoob.
Hais txog txhua hom ntwv, sau tau ua lus hmoob. Tsis hais hom ntawv twg li, tsuav yog hais tau lus Hmoob meej thiab cov ntawv ntawd, haum nrog ntiaj teb cov tshuab ntaus ntawv.
Mas yog ib yam paj tshab zoo cuag li, nws poob saum ntuj los rau Haiv Hmoob. Peb Haiv Hmoob yuav zoo siab thiab qhuas txog yam uas Haiv Hmoob muaj ntawv.
Cov ntawv Hmoob no, zoo thiab twb vam meej, mus thoob teb chaws. Zoo li Hmoob As Mes Lis Kas, Fab Kis, Kas Nas Das, Suav teb, Los Tsuas teb, thaib teb. thiab Nyab Laj teb tib si lawm.
Uas yog cov teb chaws, muaj Hmoob nyob txhua nrho.
Yog kuv tsis yuam kev, mas txij thaum Ntuj tsim teb raug los, muaj 4 cuab ntawv:
A. Ntawv Greek
B. Ntawv Las Tees
C. Ntawv Npas lis
D. Ntawv Suav
Aws Los Pas sab hnub poob, mus rau As Mes Lis Kas cov neeg tawv dawb ntawd lawv siv cuab ntawv Las Tees. Hos Aws Los Pas sab hnub tuaj mus rau As Xias,sab hnub poob lawv siv cuab ntawv Npas Lis.
Suav, Zis Pee, Kaus Lim, Nyab Laj lawv siv cuab ntawv Suav. Yav Ntuj thaum ub Haiv Hmoob kuj siv cuab ntawv Suav ib yam thiab.
Txij li thaum Hmoob thiab Suav sib ua rog los, uas Hmoob swb rau Suav lawm, ces Hmoob tsis muaj ntawv lawm. Thiaj muaj dab neeg hais tias, Hmoob muab ntawv zais rau hauv Hmoob cov txwm paj ntaub.
Los muab Hmoob cov txuj ci tso nrog tej dab qhua los kev cai:
Yam li tej zaj tshoob txiv Xaiv Foom kom, los tej paj ntsha lus taum. Thiab cov lus hais ua lus paj lug los lawm xwb. Hmoob cov txuj ci mas Hmoob kawm thiab cim rau nruab siab ntau xwb.
Hu ua ntawv Hmoob mas nyob Suav teb twb muaj 6 hom ntawv Hmoob uas cov Hmoob nyob Suav teb lawv muaj. Lawv hu ua ntawv Phij nyeej no.
Ib pab sau tuaj rau ib pab los lawv tsis paub li,ib lub xeev muaj ib hom ntawv. Cov ntawv ntawd, puav leej yog pej kum haiv neeg tsim rau Hmoob tais nrho.
Feem ntau kuj yog Haiv neeg tawv dawb, mus tsim rau Hmoob. Xyoo 1980 Txiv Plig Nyiaj Pov mus khaws txuj Hmoob nyob Suav teb.
Nws mas coj cov ntawv Hmoob Las Tees no uas hu ua ntawv Hmoob thoob teb no, mus txog Suav teb. Thawj pab Hmoob nyob Paj tawg Lag tau xub kawm, yog Thoj Zam,Tsab Chij, Xyooj Yob, Seev Yom Tong thiab Tsab Xyaum lawv cov ntawd.
Thaum lawv kawm paub lawm, lawv sau tau ntawv tuaj nug kwv tij. Thiab ua lag luam mus rau txawv teb chaws, ces lawv thiab paub ntiaj teb kev vam meej.
Ces cov kwv tij Hmoob Suav lawv rau siab kawm, nyem no lawv paub cov ntawv Hmoob thoob teb no. Ib yam li cov Hmoob nyob Mis Kuj thiab Fuaj kuj sib nrawg nroos lawm.
Nyob Suav teb feem coob, lawv hu cov ntawv Hmoob Las Tees no. Ua ntawv Hmoob dawb Nyiaj Pov no, Txiv Plig Nyiaj Pov tau tis lub npe hu ua ntawv Hmoob thoob teb no, rau cov ntawv Hmoob Las Tees no, yog xyoo 1984.

Yaj Zoov Ntxheb X.H.
2018

Cov xeev uas xub muaj Hmoob los txais kev ntseeg muaj 3 lub xws li : lub xeev Louang Prabang, lub xeev Sam Neua thiab lub xeev Louang Namtha. Nyob hauv lub xeev Louang Prabang tsuas muaj 11 yim Hmoob los ntseeg xwb. Cov Hmoob nyob ib ncig tsis deb tsis ze ntawd yeej hnov moo ntsoov tias : pab Hmoob ntseeg Ntuj lawv tej tub ki tau mus kawm ntawv thiab paub ntawv zoo kawg. Pab neeg ntseeg lawv vam meej thiab tej tub ki txawj ntse ib yam li tej Mab Sua. Los txog rau xyoo 1962 – 1963 mam li pib muaj yim puav los ntseeg ntxiv.

Nyob lub xeev Sam Neua thiab lub xeev Louang Namtha, muaj cov xwm tos niam txiv vaj Hmoob yuav nqes saum ntuj los tshwm sim. Xyoo 1957, cov Hmoob Sam Neua tab tom sawv ua vaj tos niam txiv vaj Hmoob. Cov thawj neeg sawv ua huab tais tos tus yuav nqes pem ntuj los. Nws ceeb toom kom muab tej yuj twm qaib npua, qaib dawb os dawb thiab dev tua pov tseg kom tas. Cov tsiaj loj muab tua nqa nqaij los ua noj, hos qaib thiab dev yog cov dawb coj mus tua pov tseg. Cov nkauj xwb thiab nraug xwb, mas lawv niaj hnub coj tsiaj mus tua pov tseg, lawv niaj hnub mus noj cov nqaij uas lawv coj mus tua ntawd. Muaj ib hnub, tus sawv tos niam txiv vaj Hmoob tshaj tawm tias : tag kis mas niam txiv vaj Hmoob yuav nqes los rau nram Moos Xaj {Yog lub nroog Sam Neua}. Niam txiv vaj Hmoob, mas nws hnav ib lub tsho suab yi txog ntawm taw, zoo li lub poj tiab. Nws yuav coj ib pluag tooj ntev li 2 dos ntawm duav. Ces muaj ntau tus Hmoob mus tos niam txiv vaj Hmoob nyob rau nram Moos Xaj.

Ib me ntsis txawm muaj ib lub dav hlau ya tuaj, yog Txiv Plig Nyiaj Pov thiab Txiv Plig Soob Leej tawm hauv lub dav hlau los. Hmoob khiav mus tos pom li hais tiag ! Lub caij ntawd, cov Txiv Plig lawv tseem hnav cov tsho tshaj sab ntev zoo li poj tiab. Lawv kuj coj ib tug ntoo cuam ntawm duav. Thaum lawv pom pluaj tooj uas Txiv Plig coj, lawv hais tias yog niam txiv vaj Hmoob lawm tiag lauj ! Nws yuav coj ib pluaj tooj ntev li 2 dos no. Thaum ntawd cov Txiv Plig lawv tseem coj ib tug ntoo cuam tooj daj nrhuv li ntawd thiab. Ces cov Hmoob cia li coj Txiv Plig Nyiaj Pov thiab Txiv Plig Soob Leej lawv mus rau pem Hmoob zos. Lawv ua tsev rau Txiv Plig nkawd nyob. Hmoob cia li txais kev ntseeg coob zuj zus tuaj. Yog xyoo 1957 los txog rau xyoo 1962, ces Sam Neua thiaj pib muaj kev ua tsov rog nyob tsis muaj chaw. Cov neeg khiav ua npoj ntws. Neeg khiav mus nyob rau lub roob tid los lub roob ped, nyob thoob qhov txhia chaw. Peb cov Xib Hwb mus raws lawv qab, mus kho lawv tej mob nkeeg ua ntu zus.
Peb tsis yog tias yuav mus pab cov ntseeg xwb. Ntseeg thiab tsis ntseeg los peb saib li peb yog ib tse Hmoob. Leej twg muaj txiab xeeb mob nkeeg los peb pab tas txhua leej. Xws li lub zos Xoom Xab Nuv uas nyob ntawm txoj kev mus rau Vang Vieng, kuj yog lub Koom Txoos Kav Tos Liv tsim rau cov neeg mob ruas nyob, kom peb thiaj mus pab tau lawv yooj yim.

Nyob Louang Namtha kuj muaj ib tug qauv zoo li nyob Sam Neua thiab. Xyoo 1959, Xib Hwb Thoj Xyooj thiab Txiv Plig Vaj Pov uas yog neeg Is Tas Lias nkawd mus txog pem lub zos Hmoob hu ua Naj Vas, nyob ntawm lub nroog Louang Namtha sab hnub poob. Nyob ntawd muaj ib txoj kev tsheb hla mus rau Thaib teb. Nyob ze lub zos Khab Mub hu ua Naj Xees {Ban Nam Sing}.
Ua ntej thawj ob peb xyoos ntawd, lawv kuj sawv ua huab tais tos niam txiv yuav nqes los thiab. Lawv tau sawv, ces lawv mus ntaus ib lub zos Puab Yib. Thaum lawv ntaus yeej lawd, lawv tau ntes Puab Yib cov qaib npua ris los tsev, lawv coj los tua noj. Lawv zoo siab dhia tos niam txiv vaj Hmoob yuav xa koob hmoov hwj huam los pub rau lawv ! Thaum ntawd lawv hau 2 yiag nqaij ntau kawg, ib yiag nyob pem lub qhov txos, hos ib yiag nyob hauv lub qhov cub. Nqaij siav ces lawv dhia li Hmoob dhia mos caum ncig lub qhov cub, dhia ncig tom hauv plag tib si.
Lawv muaj tus ua huab tais, muaj 2 tug tuam thawj peeb thiab cov zov peeb tib si. Cov thawj neeg ntawd lawv xyaum hais ib co lus Zis Pees xwb. Thaum lawv dhia, ces 2 tug tuam thawj peeb hluas thiab dhia nrawm dua tus huab tais Hmoob. Lawv dhia ncig los txog ntawm lub qhov cub, tus tuam thawj peeb dhia nrawm zog, ces nws dhia txawb ntua sab cav taws nraud lawm. Hos huab tais paj paws los ces yuav tsuj tus tuam thawj peeb pob taws. Huab tais Hmoob txawm dhia txawb ntua saum yav cav taws, ces cav taws ntxeev ua rau huab tais ntog kiag rau hauv yias nqaij nyob hauv qhov cub. Huab tais raug mob kub hnyiab tsis muaj tshuaj kho, nws tau tas sim neej lawm. Lub zos ntawd nres li ntawd tos, lawv tseem niaj hnub tos niam txiv vaj Hmoob tas zog. Zaum no tus uas tseem coj sawv daws yog tus txwj laus neeg kav lub zej zog, nws hu ua Thoj Suav Lwm.
Thaum lub 7 hli xyoo 1959, nws tau tshaj tias : hnub no hais rau zej zog sawv daws paub od ! Lub 7 hli xiab 15, mas sawv daws yuav caiv txhob mus ua teb thiab txhob tawm rooj mus qhov twg nawb ! Niam txiv vaj Hmoov yuav nqes los, sawv daws thiaj yuav pom nawb ! Ces lawv txawm caiv txog kwv yees li 3 teev tav su dua ntawd, Txiv Plig Vaj Pov thiab Xib Hwb Thoj Xyooj nkawd mus txog lawv lub zos. Lawv pom tej yam txawv, xws li lawv tsis tau pom dua Hmoob coj tej lub xauv loj loj uas 3 lub sib tshooj nto plaws caj dab. Thiab lawv kuj pom ib tug neeg loj siab li Fab Kis, neeg loj rog caj ntswm loj, pob ntseg tuab li Hmoob hais kam tias : ntsej luaj ntxuam muag luaj khob, caj ntswm luaj qws txob. Ces lawv txais Txiv Plig thiab Xib Hwb Thoj Xyooj nkawd nyob hauv tus thawj neeg lub tsev. Nws hu lub zos cov tim xyoob sawv daws tuaj sib tham tau 3 hnub ua ke, ces muaj 15 yim Hmoob cia li txiav siab txais kev ntseeg nyob hauv lub zos ntawd. Qhov uas lub zos txiav siab ntseeg Yes Xus lub Moo Zoo, kuj yog tus thawj neeg ntawd coj sawv daws los ntseeg. Thaum kawg lawv nug tias peb los coj kev cai tshiab, peb yuav muaj kev kawm txuj dab tsi ntxiv. Xib Hwb Thoj Xyooj teb rau lawv tias : nyob hauv txoj kev cai tshiab no, muaj kawm 3 hom ntawv. Xws li ntawv Los Tsuas, ntawv Fab Kis thiab ntawv Hmoob. Yog leej twg kawm tiav tas, nws yuav tau nrog tej nom tswv ua laj kam xws li tej Mab Sua thiab. Ces lawv txiav siab ntseeg thiab ua tsev kawm ntawv kiag. Lawv thiaj xa xov rau Txiv Plig Neej Vaj, ces nws tuaj tos kuv nram tsev kawm ntawv nyob Paksane mus ua Xib Hwb nyob pem lub zos Hmoob ntawd. Ces Xib Hwb Thoj Xyooj rov qab los rau Louang Prabang lawm, kuv nrog lawv nyob 3 xyoos ua Xib Hwb qhia kev ntseeg thiab qhia ntawv rau Hmoob rau lawv.

TP. Nyiaj Pov thawj pab xib hwb nyob Vees Cas. Nplog teb.

Tswv Ntuj lub txiaj ntsim tuaj txog tsoom Hmoob nyob Los Tsaus teb: saum lub Roob Nyuj Qus, Kiukatiam, Xeev khuam thiab lub Nroog Luang Prabang.

Ib lub sij hawm ntawd, Txiv Plig Soob Leej Ranqeur mus rau sab Xeev Khuam. Hos Txiv Plig Nyiaj Pov Yve Bertrais, tuaj rau sab luang Prabang, nws mus rau saum lub zos toj siab Roob Nyuj Qus (Kiukatiam).

Tsis paub ob pab Hmoob nyob Npab Nas Pham Poom, xub txais kev ntseeg los yog pab nyob Rooj Nyuj Qus. Xub txais kev ntseeg, txog Yes Xus lub Moo Zoo.

1/.Hais txog dab neeg nyob Npab Nas Pham Poom, yog ob kwv tij Hmoob Lis. Uas yog Lis Xyooj Pov thiab Lis Nchaiv Ntxawg, ob yim no xub ntseeg Ntuj?

Los yog Yaj Zam Nob xub ntseeg Ntuj ua ntej?
Muaj dab neeg hais tias:
Muaj ib hnub ces Lis Xyooj Pov muaj ib tug me nyuam mob, Ces nws poj niam mus hais rau Txiv Plig Soob Leej tias: nws tus me nyuam muaj mob lawm, yuav ua li cas rau?

Txiv Plig Soob leej tsis tau paub lus Hmoob zoo, Hmoob los tsis paub lus Los Tsuas zoo thiab. Txiv Plig hais raws li Tswv Ntuj kev hlub, nws hais tias:

Txhob txhawj, Huab Tais Ntuj yeej hlub.
Ntuj yuav pab kom zoo xwb.
Txawm yog muaj mob kho tsis tau los Ntuj yeej nyiam thiab hlub.
Ntuj yuav coj tus Ntsuj plig mus rau txoj kev zoo xwb txhob txhawj!

Neeg tsis sib to taub lus hais kom mus rau sab lus tso siab, Txiv Plig Soob Leej hais tias:
Yog Yes Xus hlub hlub, Yes Xus yuav coj mus nrog Yes Xus nyob.

Ces Hmoob to taub yuam kev tias:
Yes Xus yuav coj mus , ces yuav yog yuav tuag mus xwb lauj!
Ces pab Hmoob txais kev ntseeg nyob Npab Nas Pham Poom lawv cia li thim kev ntseeg Ntuj tas tib si lawm.

Lis Tub Yias ua Phub thene (député). Lis Nkaj Zeb Lis Txos, lawv twb tau mus nrog Txiv Plig Soob Leej nyob kawm ntawv ib yam li Yaj Txoov Yeeb thiab Thoj Tshu Hwj lawv cov nyob rau lub zos Roob Nyuj Qus. Uas tau nrog Txiv Plig Ntiaj Pov nyob thiab tau kawm ntawv.

2/. Nyob rau lub zos Roob Nyuj Qus no, Txiv Plig Nyiaj Pov tau tuaj nrog Hmoob nyob tau 4 xyoo kiag mam li muaj Yaj Zam Nob ib yim los ntseeg txog Yes Xus lub Moo Zoo.

Thaum txiv Plig Nyiaj Pov tuaj txog lub zos Roob Nyuj Qus, Txiv Plig cia li mus so nyob hauv Yaj Txawj Tswb tsev. Nws nrog Yaj Txawj tswb thiab nws tus tub Yaj Zam Nob nyob, Zam Nob nyob zoo li yog phooj ywg sib raug zoo.

Muaj qee lub caij Txiv Plig tsis xis neej, Yaj Zam Nob kuj tau ua neeb saib Txiv Plig. Muaj ib xyoo Yaj Zam Nob mob ua npaws, yog hom mob daj uas mob rau ntawm nws lub tsib.
Yaj Zam Nob mob loj kawg, kev ciaj kev tuag sib npaug. Txiv Plig mus nqa tshuaj tuaj kho nws. ib lub caij ntev loo. Yaj Zam Nob mam rov zoo los.
Yaj Zam Nob yog ib tug txiv neeb, nws ua neeg dav kawg. Nws ua neeb kho tas nrho ib nqaj tog Hmoob nyob toj siab. saum cov zos Hmoob, lub zos Roob Nyuj, pham xab Neeb, Pham qhaum thiab Pam Las Las Mus.
Thaum Zam Nob zoo lawm, nws paub tseeb tias, kev ua neeb tsis yeej kev siv tshuaj. Ces nws txiv siab txais kev ntseeg Ntuj.

‐Xyoo 1954 thawj pab neeg ntseeg
Pib Xyoo 1954, mas Zam Nob xav kawm kev ntseeg thiab xav kawm ntawv Hmoob.

Txiv Plig thiaj xuas tes sau phau ntawv « A.E.T. »
­Lub 8 hli tim 15, yog lub hnub nyoog hawm Niam Mab Liab mus saum ntuj, Txiv Plig Nyiaj Pov ua lub cim ntxuav rau Yaj Zam Nob, Yaj Txawj Tswb, Yaj Yeeb thiab Thoj Hwj.

Thaum Txiv plig yuav tshaj Ntuj lus rau Hmoob, Txiv Plig Nyiaj Pov mus nug Phas Nyas Tub Npis Lis Foom nyob Xeev Khuam nws paub lus Fab Kis tias: Hmoob tus dab loj tshaj Hmoob hu nws lub npe ua li cas?

Tub Npis Lis Foom tau qhia Txiv Plig Nyiaj Pov tias, Hmoob hu ua Ntxwg Nyoog no. Txiv Plig tau Tub Npis Lis Foom lo lus ces Txiv Plig los hais rau Zam Nob thiab tsoom txwj laus neeg tias:
Kuv tuaj nrog nej nyob, mas yog kuv tuaj qhia Ntxwg Nyoog kev cai. Tas nrho pab txwj laus Hmoob muaj: Hmoob Yaj, Hmoob Thoj, Hmoob Xyooj thiab Hmoob Tsab, Hmoob Vwj.
Hmoob hais tias, Txiv Plig, Ntxwg nyoog yog tus dab loj. Nws yog tus dab phem kawg laid! Peb Hmoob mas peb ntshai Ntxwj Nyoog xwb, nws yog tus tso ntaub ploj ntawv tuag los rau Hmoob thiaj tau ploj tau tuag mus ua dab.
Ntxwj Nyoog, mas Hmoob tsis nyiam li lauj!

Txiv Plig mam nug tias, tus dab zoo pab Hmoob no, Hmoob nej hu lia cas?

Cov laus neeg hais tias:
Tsis paub tus dab Zoo, Hmoob hais tias, yog Qaum Ntuj yog tus zoo pab Hmoob no xwb. Ces Txiv Plig thiaj tau muab tis npe hu ua Huab Tais Ntuj, kom Hmoob paub. Vim Tej laus pes tsawg tiam los lawm, Hmoob Yeej ib txwm hu ua Qaum Ntuj siab zoo no xwb.
Txij ntawd los, Txiv plig Nyiaj Pov tau qhia rau nws cov Xib Hwb thiab cov neeg ntseeg. Nyob Roob Nyuj Qus hu ua Huab Tais Ntuj li peb hais los txog niaj hnub no.

3/. Yog Leej Ntuj Plig tshoj kom Txiv Plig Nyiaj Pov, tsim ib cov ntawv. Zoo hais lus lus Hmoob kom tau muab Hmoob tej txuj thiab Yes Xus lub Zoo Zoo sau ua lus Hmoob rau Hmoob nyeem thiab sau kom yog lus Hmoob.
Txiv Plig tau muab ntawv Fuaj Kuj los sau ua lus Hmoob los nws txis tus ntawv tsis meej. nws kuj paub cov Christians (Protestants), tsim ib co ntawv Hmoob los ntawm cov tsiaj ntawv Aas kiv los thiab.
Los zoo li tsis zoo siv li, Txiv Plig thiaj hais rau tus As Cas As (Pasteur) Mes lis Kas Berney nyob Xeev Kuam tias:
Peb sib koom kom tsim tau ib co ntawv, zoo sau Hmoob lus. Kom sau tau Tswv Ntuj cov Ntawv Ntshiab, ua lus Hmoob, rau tsoom Hmoob tau nyeem kom lawv paub txog Tswv Ntuj.

Pasteur Berney no paub ib tug kws ntawv (Languistique), yog Dr. Smalley yog ib tug kws txawj tsim ntawv. Nws thiaj pab Txiv Plig Nyiaj Pov nkawd tsim hom ntawv Hmoob Las Tees, Ntawv Hmoob Thoob Teb uas tsoom Hmoob siv niaj hnub no.
Thaum lawv tsim tau cov ntawv no lawd, ob pab neeg cov Hmoob coj Ka Tau Liv thiab cov Hmoob coj Chistian, Protestants, sib cog lus kom txhob hloov siv zoo li no mus li.

Tus zoo siab heev yog Txiv Plig Nyiaj Pov, Txiv Plig kom Zam Nob hais ob zaj kwv txhiaj thiab ob zaj dab neeg. Txiv plig luam tau ua ib phau me nyuam ntawv me me.

Txiv plig txawm xa ob phau mus rau sab Sayaboury, ob phau mus rau sab Luang Nam Tha. ob phau mus rau sab Xeev khuam.
Cov phau ntawv no, mus paug rau cov Xib Hwb Los Tsuas qhia ntawv cov pob ntseg thiab qhov muag. Ces muaj ib txub plaub ntug sawv los loj kawg. Tsis muaj neeg lees paub rau qhov zoo. Txiv Plig yuav rau xa rov mus rau Fuaj Kuj teb, nws tu sia heev, nws thiaj li hais rau Zam Nob paub.
Nws yuav tau rov mus rau nws lub teb chaw, nws khuv leej Zam Nob heev.
Zam Nob tau hais ib lo lus li no: "Lus yog kuv lus, hos ntawv yog koj ntawv."

Zam Nob twb kawm ntawv Hmoob paub nyeem paub sau tib si lawm.
Txij hnub ntawd, los txog lub caij Zam Nob yuav ncaim ntawm lub ntiaj teb no mus. Mas Zam Nob ua tus tsis txawj ntawv tsis paub nyeem ib los li lus nyob hauv ntawv li.

Lub moo plaub ntug no, ncha mus txog Phas Nyas Tub Ntxawg Lis Foom. Nws mus kawm tau ua kws Txiav Txim Lij Choj txheej siab, tiav nyob Fuaj Kuj teb rov los.
Phas Nyas Tub Ntxawg Lis Foom lees tias yog nws lam sau los sim saib puas zoo siv xwb. Vim Hmoob tsis paub ntawv, xav xa xov sib nug moo tsis tau. Tsis tau yog ib zaj tseeb. Ces lub plaub ntug no tuag mus lawm.

4/.Xyoo 1962 Txiv Plig Nyiaj Pov tau los nyob Vees Cas,Phas Nyas Tub Npis Lis Foom tau nce mus ua Huab Tais Los Tsuas ib tug tub tuav xam sab laj nrog Huab Tais (Conseillé du Roi).
Phas Nyas Tub Npis Lis Foom tuaj nyob Vees Cas, Txiv Plig Nyiaj pov thov kom Phas Nyas Tub Npis Lis Foom coj cov ntawv Hmoob las tees no coj mus zwm nyob rau hauv lub Kab Xua Mab Ham Thai (Ministère de l'Interieur) Los Tsuas kom Hmoob thiaj muaj cai siv cov Ntawv Hmoob las tees no nyob Los Tsuas teb. Lub caij nyoog ntawv Général Vaj Pov twb tau ua Nom tub rog loj saib pawg tub rog Phaj 2 nyob sab Xeev Khuam lawm.
Tseem Hwv Los Tsuas tau tso lus kheev, ces peb xub mus sau ntawv xov xwm sib fi txuj nyob hauv Tub Npis Lis Foom tsev, peb niaj hnub mus.

Txiv Plig Nyiaj Pov niaj hnub txhais ntawv Fab Kis hais txog Yes Xus lub Moo Zoo rau cov Xib Hwb kawm. Lawv yuav mus ua tub Tshaj Ntuj Lus nyob rau cov zo Hmoob.

5/. Nyob lub zos Roob Nyuj Qus, Zam Nob yog thawj yim neeg ntseeg Huab Tais Ntuj Yaj Tsuj Xyooj tsis tau faib cuab tawm vaj tse ces nws ntseeg nrog Yaj Zam Nob.
Thoj Tsav Ntxiaj yog yim 3 ntseeg, Yaj Nkias Keem, kuv toj laug, yog yim tim 3 xyoo 1952.

Xyoo 1954 Txiv Plig tau coj kuv, Yaj Zoov Ntxheb, thiab kuv tus kwv hu ua Yaj Faiv Ntxhos mus kawm ntawv nyob rau lub nroog Pahsane. Nyob ntu nruab nrab teb Vees Cas thiab Savanakhet. Paksane yog lub chaw kawm ntawv siab thiab muaj cov Xib hwb thiab cov tub ntawv nyob ntawm chaw.
Yog lub tsev kawm ntawv ua cov tub Los Tsuas kawm tas ces yuav muaj kawm txawv teb chaws. mus kawm ua Txiv Leej choj, los mus kawm kev ua kws kho mob los kawm kev ua nom ua tswv.

Mus rau Thaib teb, Fuaj Kuj, Mes Kuj, los kas Nas Das.
Xyoo 1957 Txiv Plig Nyiaj Pov hloov chaw mus nyob rau Sam Neua. Nyov Sam Neua muaj cov teeb meem Hmoob Sawv Vaj, hais txog Huab Tais yuav nqes pem ntuj los. Vim Hmoob toj siab hnov tej Nom Tswv co politiciens, hais txog tus Huab Tais Los Tsuas Tshiab yuav los (Huab Tais laus nyuam qhuav tuag ces yuav tsa tus Vaj Ntxwv Nplog tshiab). Hmoob ntaus nqe tias yog Huab Tais tshiab yuav nqes pem Ntuj los pab Hmoob. Ces Hmoob tos Hmoob tus Huab Tais.
Thaum lawv hnov cov xov uas cov neeg ntseeg Ntuj tuaj hais txog tus Huab Tais nyob pem Ntuj yuav nqes los las lawv ntseeg sai sai.
Txiv Plig Nyiaj Pov mus tau peb hlis xwb twb muaj ntau yim Hmoob ntseeg Txog Yes Xus lub Moo Zoo. Puav leej yog cov thawj neeg xub ntseeg. cov tsis tau ntseeg los lawv puav leej ua phooj ywg nrog rau cov Txiv Plig zoo.

6/. Xyoo 1959. Txiv Plig Nyiaj Pov hloov mus rau Sam Neua lawm. Sab Luang Prabang mus rau Sayaboury, Louang Nam Tha yog cov Txi Leej Choj Italie tuaj saib.

Xyoo 1959 ntawd, Txiv Plig Vaj Pov lub npe Italia yog Yiji Sion thiab Xib Hwb Thoj Xyooj mus saib lub zos Hmoob muaj lub npe hu ua zos Na vaas nyob rau Mab teb. ntawm xeev Luang Na Tha.
Lub teb chaws no tsoom Hmoob tseem kub siab lug tos Niam Txiv Vaj Hmoob yuav nqes pem Ntuj los tib yam. lawv twb tos tau ob peb xyoos lawm. Lawv tus Niam txiv tos, Huab Tais Hmoob ntawd tau tas sim neej mus lawm.
Los lawv lub siab tseem tsos mus li, muaj ib hnub tus thawj neeg hu ua Thoj Suav Lwm no, nws txawm tshaj tias: Hnub no, yog hnub xiab 15.
Hais rau sawv daws, peb yuav tau caiv, Niam Txiv Vaj Hmoob yuav nqes los. Hmoob sawv daws, tas zej zog caiv tsis tawm rooj mus ua qoob loo lawv nyob hauv tsev.
Tav su hnub qaij li peb teev Xib Hwb Thoj Xyooj thiab Txiv Plig vaj Pob yog neeg Italie, txawm mus txog lawv lub zos. ncaj qha nug thiab mus so rau tus thawj neeg ntawd lub tsev.

Hmoob nug tias neb tuaj dab tsi ?
Xib Hwb Xyooj teb tias, peb tuaj qhia kev cai tshiab, lawv thiaj nug tias, Nej cov kev cai tshiab yog qhia txog dab tsi?
Nws teb tias, peb tuaj qhia Ntuj kev cai hais txog tus Huab Tias Ntuj nyob saum ntuj, Nws leej tub Yes Xus lwb yug los ua neeg tau ntau txhiab xyoo lawm. Nws lub Moo Zoo nyuam qhuav tuaj txog Los Tsuas teb no tsis tau ntev.
Tej Mab Sua nyob tiaj nrag nram tej nroog luag paub tas lawm. Tshuav peb tsoom Hmoob nyob toj siab tsis tau paub txog xwb. Wb tuaj qhia nws cov kev ntseeg.
Ces nkawd nrog Hmoob tham tau peb hnub xwb, twb muaj 15 yim Hmoob npaj txais kev ntseeg muab npe rau kawd. Lawv cia li mus ua tsev rau nkawd nyob.
Txiv Plig Vaj Pov xa xov rov los txog rau lub Zos Roob Nyuj Qus tias: Muaj neeg ntseeg Hmoob xav kawm ntawv heev, peb tsis muaj Xib Hwb paub qhia ob yam ua ke xws li yuav qhia ntawv thiab kev ntseeg ua ke.
7/.Txiv Plig Neej Vaj René Charrier nws cia li tuaj tos kuv, Yaj Zoov Ntxheb, nram lub tsev kawm txuj ua Leej Choj Pak Sane los mus ua Xib Hwb qhia Hmoob rau zos Npam Naj Xees, sab Luang Nam Tha Mab teb. Yog lu 7 hli 1959 kuv mus txog lawv lub zos. Mus txog los los nag thiab muaj av nkos nyam zaw xwb, vim cov Mab thiab Hmoob lawv muaj nyuj twm, npua thiab tshis coob. qhov twg los muaj av nkos vim cov tsiaj ntawd coob mus mus los los tuav qhov av ntau.
Kuv mus txog lawv twb yeej ua lub tsev kawm ntawv tiav tas lawm. Kaj ntug xwb ces cov Hmoob paub tias kuv tuaj txog lawm, ces lawv twb tuaj nyob puv tse tas.
Peb sib fim ib pliag ntawd xwb ces kuv cia li pib qhia ntawv rau cov Hmoob nyob lub zos Npam Naj Xees ntawd mus. Xyooj nrog kuv nyob peb lub hlis ces nws rov los rau sab Luang Prabang lawm.

Kuv ua ob txoj hauj lwm ua ke tau peb lub xyoo, tsoom Hmoob lawv mus rhawv dua ib lub zos tshiab nyob ze txoj kev tsheb uas muaj chaw ua teb thiab yuav ua liaj los muaj tib si.
Muaj ib tug dej ntws lis muaj tej che dej kuj muaj chaw tiaj zoo ua liaj, tej toj roob los muaj chaw zoo ua teb peg ua qoob lo zoo thiab.
Hmoob nyuam qhuav los rhawv lub zos ntawd tau ib xyoos xwb. ces lub teb chaws kub tuaj, muaj tsov rog los ntawm cov Noob Huab Tais sib txeeb ua tus Tswv kav teb chaws Los Tsuas.
Tsoom hmoob nyob thaj tsam ntawd thiaj li nyob tsis taus, lawv tsis nyiam tog los Tsuas Liab (communiste). Yog tog txeeb teb chaws, ces tsoom hmoob lawv tau khiav ua neeg thoj nam tsiv mus sab Houei Say nyob ze Thaib sab qaum teb ntawd.
Kuv rov los tsev rau sab Luang Prabang, los txog lub teb chaws kuj kub tuaj, lub zos Roob Nyuj Hmoob nyob tsis taus lawm. Muaj tub rog Los Tsuas tuaj nyob puv Hmoob tej zej zog.
Tsoom kwv tij hmoob nyob Roob Nyuj Qus, lawv tau hloov chaw mus nyob rau sab Sayaboury. Kuv los nrog Txiv Plig Nyiaj Povnyob Vees Cas yog xyoo 1962.

8/. Txiv Plig Nyiaj Pov khiav pem Sam neua los, tsis muaj chaw nyob. Txiv Plig los tsa tau ib lub tsev qhia cov Tub Ntxhais hluas Hmoob xyaum ua ib pab tub ntxhais mus tshaj Ntuj Lus, rau cov zos Hmoob.
Tsoom Hmoob nyob toj siab lawv tej zej zog nyob ze rau tog Los Tsuas Liab ntxeev siab tuaj Nyab Laj Cob Tsib tog pab ntxeev teb chaws.
Ces txov Txiv Plig mus nyob tsis tau Hmoob tej zej zog lawm. Tsoom tub ntxhais Hmoob kawm tiav ua tub tshaj Ntuj Lus lawv tis npe hu ua Xib hwb rau cov mus qhia Ntuj Kev Cai.
Ces yog cov Xib Hwb ntawd mus tshaj Ntuj Lus thiab pab tsoom Hmoob xyuas lawv Hmoob tej kev mob nkeeg. Kev cog qoob loo thiab kev qhia txuj rau Hmoob tej tub ki txhua yam.

Mas cov Xib hwb lawv thiaj yuav tau kawm txuj kom muaj peb hom txuj pab tau txhua fab xws li:
a.Lawv kawm ua ib tug Xib Hwb tshaj kev ntseeg Ntuj nthuav Yes Xus lub Moo Zoo rau tsoom Hmoob nyob toj Siab kom Hmoob pau txog Tswv Ntuj.
b. Cov Xib Hwb lawv yuav kawm txoj kev kho mob nkeeg kom pab tau cov Hmoob, muaj sab foob khaub thuas, mob plab dias hau. Faib tshuaj rau cov zej zog Hmoob ib ncig ntawm nws nyob txhua lub zos.
c. Cov Xib Hwb lawv yuav tau kawm kev cog qoob loo, kom pab tau cov laus ua qoob loo. Yuav paub ntau yam noob qoog loo thiab paub tshuaj tua kab noj qoob, paub siv chiv rau qoob loo, kom qoob zoo. Vim tias tsoom Hmoob tseem yog cov neeg ua qoob lo los yug ncauj yug los, yog feem ntau.
d. cov Xib Hwb yuav tau kawm txuj kom ua tau ib tug xib hwb qhia ntawv rau cov me nyuam Hmoob txheej qes nyob hauv lub zos lawv nyob.
Thaum cov me nyuam Hmoob loj hlob los lawv thiaj mus kawm tau txuj nrog tej neeg nyob rau cov nroog loj uas muaj zoo kws qhia txuj.

Xyoo 1962 Kuv tuaj nyob rau Vees cas, kuv qhia ntawv rau cov tub ntxhais uas tuaj kwm nyob hauv lub tsev kawm txuj qhia ua tub tshaj Ntuj Lus.
Yav sawv ntxo 8 teev tog 11 teev, kuv qhia pab tub.
2 teev mus txog 5 teev kuv mus qhia pab ntxhais.

Lub cai so ntawv kuv cov cov hluas peb mus tshaj kev ntseeg Ntuj nyob rau Roob Kub Twm thiab sab Phu Nyawj, muaj ntau lub zos hmoob.
Xa cov Xib Hwb mus tshaj Ntuj Lus thiab qhia ntawv los mus faib tshuaj kho mob nkeeg rau Hmoob, peb mus txais Hmoob tej tub tuaj kawm ntawv ua tub Tshaj Ntuj lus.
Cov Xib hwb lawv yog ib pab neeg coj zoo muaj kev sib tso siab. Tus yau mloog tus hlob, cov Xib hwv yog ib pab neeg nto moo zoog muaj koob meej kawg.
Cov Xib Hwb thiab tsoom niam zej txiv zos kuj sib raug zoo li yog ib pab kwv tij. Noj sib hlub haus sib ce nyob tsis muaj xaiv muaj lus.

9/. Xyoo 1966 Txiv Plig Tshaj Sawm tuaj thov Txiv Plig Nyiaj Pov thiab coj kuv tshaj Ntuj lus rau Thaib teb. Txiv Plig Tshaj Sawm nyob rau lub nroog Oudonthani. Nws tau coj kuv mus ncig lub Roob Hooj Kav, muaj muaj 4 lub zos Hmoob loj nyob: Peb mus rau lub zos Thab Npawj, zos Paj Nyab, zos Khij Thaub, zos Roob Nploj thiab Khej Me.

Kuv tau mus nyob li peb lub hlis, kuv rov los rau Vee Cas. Nws rov tuaj tos kuv mus zaum ob dua thiab. Nws mas xaiv lub zos Khej Me ces nws mus tsa tsev nyob rau ntawd.
Thawj tus me nyuam Hmoob uas kuv mus tos tuaj kawm ua tub tshaj Ntuj Lus yog Lis Nom Npis nws tuaj nyob rau Mes Kuj teb lawm.
Vaj Kuam uas raug tub Sab tua lawd, nws kawm tau ua tub tshaj Ntuj Lus zoo kawg. Hmoob txuj ci kev pab zej zog txhua yam li tau piav los lawv nws tau kawm tiav tas.
Nws muaj ib lub suab hais tau Zaj Tshoob txiv xaiv foom kom hu nkauj zoo kawg.
Pab kawg uas kuv tau rov mus tos tuaj yog Yaj Toog, Lis Tsheej, Yaj Rwg. Yog pab kawg nkaus qab no pab no lawv kawm txog qhov kawg uas lub teb chaws los tsuas muaj kev kub ntxhov yuav poob mus ua koom tshas. Lawv mam rov los rau Thaib teb Ces cov Xib Hwb tau khiav ua neeg thoj nam rau Thaib teb tas.

10/. Kuv yog Txiv Plig Nyiaj Pov tus Xib Hwb uas ua hauj lwm ntau rau tsoom Hmoob nyob Los Tsuas teb, Thaib teb Fab Kis teb teb, Nkws Yas thiab Mes Kuj teb.
Xyoo 1975 kuv ua neeg thoj Nam nyob hauv cov yeej tawg rog, kuv tshaj Ntuj Lus nyob hauv lub yeej ib yam li Yes Xus cov Thwj Tim nyob hauv tej tsev loj faj.

xyoo 1977 Kuv tau tsiv mus nyob Nkws Yas teb tau 28 xyoo txog xyoo 2004 kuv tsiv los nyob rau Mes Kuj teb ntawm lub nroog Sacramento.
Lub Koom Txoos Kav Tos Liv nyob Sacramento txais kuv ua Xib Hwb.
hnub kuv sau zaj lus no kuv lub hnub nyug muaj 79 xyoos thiab 5 lub hli lawm.

Sau nyob Sacramento
Tim22/7/2019.
Yaj Zoov Ntxheb.