Home
Yog koj tso siab rau Yesxus lub siab ntshiab, nws yuav ua koj siab kaj lug 
  |
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°77
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 30th September 2010, 5:07 am
 1 – Tas tsoom Hmoob huv tib si yog kuv cov tub ki, cov ntseeg thiab cov tsis tau los ntseeg huv tib si. Thaum kuv puv 120 xyoo, kuv vam tias sawv daws yuav nta kuv lub ntees zoo li Hmoob ua rau ib leeg txiv los ib tug laus. Kuv vam tias nej sawv daws yuav thov Ntuj tsis tseg rau kuv. 2 – Kuv kuj tau hais ob peb lo lus rau sawv daws, muab tso rau tim As Mes Lis Kas teb. Txog caij txog nyoog mas lawv yuav muab qhib rau sawv daws hnov. Pontmain, lub 8 hli, tim 15, ntuj 2006. |
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°78
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 30th September 2010, 11:54 pm
|
|
| |||||||||||
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°79
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 2nd October 2010, 3:53 am
Thoj Hwj yog tus hnav tsho dawb.
Roob Nyuj Qus 1957
 | THOJ TSHU HWJ (TXOOJ LIS)LUB NEEJ Thoj Tshu Hwj, tseem muaj lub npe rov tis dua tshiab hu ua Txooj Lis, nyob rau teb chaws Fab Kis. Nws yog tus tub tim 3 ntawm nws txiv Thoj Tsav Ntxaij thiab nws niam Yaj Sua nkawd tsev neeg. Nws yug hnub tim 20/10/1935 nyob hauv lub zos Phuaj Xeeb Neeb, uas nyob ze Roob Nyuj Qus, xeev Moos Loob, hauv teb chaws Los Tsuas. Raws li nws cov muam yau, cov ua kwv ua tij, tau hnov lawv niam hais, mas Txooj Lis yog ib leeg tub siab ntev thiab nyiam zam rau luag tej. |
Ua ib siab mloog tej laus lus.
Xyoo 1950, yog lub xyoo uas Txiv Plig Nyiaj Pov tuaj xyuas Hmoob nyob pem roob. Thaum Txiv Plig Nyiaj Pov txiav siab nrog cov Hmoob nyob Roob Nyuj Qus, cov laus thiaj tau tso Txooj Lis thiab Yaj Txoov Yeeb nkawd mus nrog Txiv Plig nyob, ua Txiv Plig luag, thiab kawm ntawv ntawm Txiv Plig. Lub sij hawm ntawd, Tshu Hwj muaj 16 xyoo. Nkawd zoo tam li Txiv Plig ob tug tub hlob, nkawd yeej pab Txiv Plig ua tej hauj lwm raws li Txiv Plig qhia. Nkawd kuj kawm ntawv Los Tsuas ntawm tus Xib Hwb Los Tsuas uas hu ua Thun. Nkawd kuj qhia lus Hmoob rau Txiv Plig thiab.
Xyoo 1953, Tshu Hwj, Yaj Txoov Yeeb thiab Txiv Plig Nyiaj Pov lawv sawv daws mus sib sau tsim Ntawv Hmoob nrog Dr. Smalley thiab tus Xib Hwb Protestant Burney, nyob hauv lub nroog Moos Loob (Luang Prabang). Txij hnub ntawd los thiaj siv cov Ntawv Hmoob Thoob Teb xws li peb niaj hnub siv no. Tshu Hwj yog ib leeg tub hluas, yeej tsis nrug ntawm nws tus yawm yij thiab Txiv Plig Nyiaj Pov nkawd li.
Tshu Hwj yav hluas mas nws tsis tau mus nrog zeej tsoom tej tub ntxhais hluas ua si thiab ua noj ua haus li tsoom Hmoob lub neej. Vim nws nrog nraim Txiv Plig nyob ua Txiv Plig tej hauj lwm. Li ntawd,Txiv Plig Nyiaj Pov thiaj xa nws mus kawm ntawv Los Tsuas tau 2 xyoos, nyob rau Paksane. Thaum nws rov los tsev, mas yog los kom tau qhia ntawv Los Tsuas, qhia Ntuj kev cai thiab qhia Ntawv Hmoob rau cov me nyuam yaus, cov hluas thiab cov laus.
Ua siab loj, ua lub siab khov kho nyob hauv txoj kev ntseeg Ntuj.
Thaum Ntuj kev cai tuaj txog lub zos Roob Nyuj Qus, tsuas muaj 3 yim Hmoob ntseeg Ntuj xwb : yog Yaj Zam Nob, Thoj Tsav Ntxaij thiab Yaj Tsuj Xyooj. Tab sis tom qab no muaj ntau yim Hmoob tig los Ntseeg Ntuj.
Muaj tej tus hmoob hais tias cov coj Ntuj kev cai mas Nyav yuav noj. Thiab lawv kuj hais tias tsis pub cov neeg ntseeg Ntuj cov tub tuaj yuav peb tej ntxhais. Txoov Yeeb twb nrog Txiv Plig Nyiaj Pov ua ke nraim, los nws niam yeej tsis tso siab rau Txiv Plig, thiab txoj kev cai ntseeg Ntuj uas Txiv Plig coj tuaj. Tej yam no mas cov Hmoob yeej paub txhua, ces lawv ntshai, lawv tsis pom zoo rau cov tub hluas ntseeg Ntuj mus yuav lawv cov ntxhais uas tseem coj qub kev cai. Tshu Hwj tsis qhib ncauj hais dab tsi, tab sis cov lus hem no yeej nyob nraim hauv nws nruab siab. Tiam sis Tshu Hwj tuav rawv nws txoj hauj lwm tshaj Ntuj lus tsis tu ncua, nws ua lub siab loj siab tawv, nws tsis quav ntsej txog tej lus hem ntawd. Cov tub ntxhais hluas Hmoob pom Tshu Hwj tus yam ntxwv, mas lawv ras txog txoj kev paub txuj, paub Ntawv Hmoob, ces lawv tuaj kawm, tuaj ntsia thiab mloog Tshu Hwj.
Tshuj Hwj thiab Yaj Txoov Yeeb nkawd ob leeg nrog Txiv Plig Nyiaj Pov nyob nraim, nkawd qhia thiab nrhiav lub suab teev Ntuj ua lus Hmoob, kom xis Hmoob siab.
Yog thaum Yaj Txoov Yeeb mus xyuas Vaj Qhia rov los lawm, mas Txoov Yeeb niam mam ua ib siab los ntseeg Ntuj.
Tshu Hwj yuav poj niam
Xyoo 1957, Tshu Hwj yuav nws poj niam hu ua Paj xeem Lis nyob lub zos Khaam Khaib, nyob Xeev Khuam, hauv Los Tsuas teb. Nws yog Lis Vaj Lwj ntxhais. Paj tau mus kawm ntawv ntawm cov Leej Phauj nyob Hanoï. Lub zim txwv Tshu Hwj yuav Paj, mas Paj nyuam qhuav khiav tom Cob Tsib teb los tau tsis ntev xwb. Thaum Tshu Hwj mus yuav Paj, mas Tshu Hwj txiv thiab ob peb tug laus nrog Tshu Hwj sawv kev ntawm Roob Nyuj Qus mus ko taw 7 hnub ke thiaj li mus txog lub zos Khaam Khaib.
Paj yog ib tug ntxhais nquag, siab ntev, tsis lam tau lam hais lus, thiab nws kuj tsis yws luag tej. Paj tab lub cuab yim neej zoo, nws kuj ntxiv ntxhua Txiv Plig Nyiaj Pov tej khaub ncaws hnav, thiab tu Txiv Plig tej tsoos teev Ntuj.
Paj lub neej mas nws ua zaub mov rau Txiv Plig Nyiaj Pov, thiab nws tsev neeg, nrog rau cov tub ntxhais uas tuaj kawm ntawv noj.
Xyoo 1959, Tshu Hwj nrog Txiv Plig Nyiaj Pov nyob txwm 8 xyoo, ces Txiv Plig Nyiaj Pov thiab Yaj Txoov Yeeb nkawd tshais chaw mus nyob Xas Niam (Sam Nua). Thiaj li cia Tshu Hwj nrog cov Txiv Plig Is Tas Lis nyob thiab tuav txoj hauj lwm kev ntseeg kom zoo xws li qub.
Yeej muaj cov tub ntxhais tuaj kawm ntawv Hmoob, kawm ntawv Los Tsuas, thiab kawm Ntuj kev cai ntawm Tshuj Hwj yam tsis tu ncua, pab tas pab tuaj.
Cov tub ntxhais tuaj kawm Ntawv ntawm Tshu Hwj muaj li no :
12 leeg tub thiab 8 leej ntxhais, yog cov nyob Roob Nyuj Qus.
2 leeg tub, nyob zos Phas Las Mus.
6 leej tub, nyob Xas Niam(Sam Nua).
5 leeg tub, nyob Fib Xais (Houei Say).
Lub caij ntawd yog cov Txiv Plig Is Tas Lis saib xyuas txij Moos Loob mus rau Los Tsuas qaum teb.
Lub teb chaws tsis thaj yeeb.
Xyoo 1962, lub 5 hlis, mus txog lub 6 hli ntuj, mas cov neeg hauv lub zos Roob Nyuj Qus tshais chaw nyob, vim tsoom tub rog tuaj nyob puv nkaus hauv lub zos. Cov tub rog kuj nyob puv pem tej ncov roob siab. Cov neeg hauv zej zog thiaj txiav siab tsiv los rau hauv nroog Moos Loob.
Tshu Hwj nrog nws poj niam thiab 3 tug me nyuam nrog cov neeg xub los ua ntej. Lawv los nyob ua ib zog rau Nov Viaas. Lub sij hawm ntawd cov Hmoob nyob zos Toj Siab thiab Loos Vais kuj khiav los nyob coob heev rau hauv nroog. Nyob Moos Loob, Tshu Hwj tsis tau ua hauj lwm rau cov Hmoob lawm, vim twb muaj Tsab Nom Yeeb ua tus pab Txiv Plig Paj Zeb (Père Sartor o.m.i.) lawm.
Tshu Hwj tsuas mus qhia ntawv Los Tsuas rau cov me nyuam hauv cov Txiv Plig Is Tas Lis lub tsev kawm ntawv lawm xwb.
Tshu Hwj ua Xib Hwb
Txoj kev khiav rog yog ib yam dhuav siab tshaj plaws.
Xyoo 1962, thaum Tshu Hwj tsiv los rau lub zos Pas Qav, xeev Xais Nyab Npus Lis, mas nyuam qhuav ua tsev tiav xwb, ces twb pib ua lub tsev kawm ntawv thiab tsev teev Ntuj, kom cov me nyuam yaus tau kev kawm Ntuj kev cai thiab kawm ntawv. Niaj lis piam, Tshu Hwj thiab Tsab Nom Yeeb nkawd qhia ntawv rau cov me nyuam Hmoob muaj 20 tawm leej. Nyob hauv lub zos Pas Qav no, mas tsis tau phim ua lub tsev kawm ntawv, vim tsuas nyob tau 6 lub hli xwb. Txawm li ntawd, tsis kav Tshu Hwj yeej zoo siab ua raws li nws txiv Tsav Ntxaij, Txiv Plig Paj Zeb, thiab Yaj Zam Nob, lawv cov laus pom zoo.
Tshu Hwj, muaj me tub me nyuam ib yam li luag tej, tab sis nws tsis muab hlob, nws nrog sawv daws ua kwv ua tij, ua phooj ua ywg. Tshu Hwj kuj nrog cov neeg hauv lub zos mus yos hav zoov, cuab ntses, tua tsiaj qus, coj los txuas pluas rau nws tsev neeg. Tshu Hwj tsis lam tau lam hais lus. Niaj lis piam, cov Hmoob nyob ib ncig ntawm lub zos Pas Qav tuaj xyuas cov Hmoob tshiab uas coj Ntuj kev cai, txawv luag tej. Muaj ib txhia ntshai, ib txhia nyiam.
Xyoo 1963, Tshw Hwj tau tsiv ntawm lub zos Pas Qav los nyob lub zos Huab Xev (Houei Seck) uas nyob tsis deb ntawm lub nroog Xais Nyas Npus Lis. Vim lub zos Pas Qav ua toj roob siab, tsis muaj teb zoo ua noj.
Tshu Hwj yeej ua nraim nws txoj hauj lwm tsis tso tseg, nws tsis nrug ntawm cov me nyuam Hmoob.
Txhua txhua hnub, yav sawv ntxov, nws coj cov me nyuam Hmoob hauv zos mus koom ua Thaj Txi Ntuj. Yav nruab hnub Tshu Hwj qhia ntawv Los Tsuas, qhia xam phaj, xws li ib tug xib hwb. Yav tsaus ntuj thaum noj hmo tas, sawv daws mus teev Ntuj thiab hais saw Mab Liab. Ua li ntawd tas mam los qhia Ntawv Hmoob. Cov twb txawj lawm, mas cia lawv xyaum nyeem ntawv dab neeg, nyeem ntawv Moo Zoo, thiab lwm yam. Cov tseem yau xyaum kawm hauv paus ntawv hmoob. Yeej ua li no txhua txhua hmo.
Xyoo 1966, Tshu Hwj tau txais lus foom hmoov zoo tso cai ntawm Tswv Qhia Lionello Berti (o.m.i.) uas nyob rau Moos Loob, kom Tshu Hwj muaj cai faib lub Cim Yug rau cov neeg ntseeg lub caij uas tsis muaj Leej Choj nyob.
Cov neeg nruab zog kuj muaj kev zoo siab, tsis ua siab yau txog txoj kev ntseeg. Lawv kuj zoo siab rau Tshu Hwj lub luag hauj lwm uas nws qhia rau lawv cov me nyuam. Tshu Hwj lub luag hauj lwm zoo tam li tsob ntoo uas cog tau hlob muaj nplooj, muaj cag tuav, kuj hlav nplooj tshiab, ua rau cov Hmoob nyob tsis deb ntawm nws lub zos, kuj los txais kev ntseeg. Tshu Hwj nrog Txiv Plig Paj Zeb mus xyuas cov neeg ntseeg, nws ua tus qhia lawv vim Txiv Plig Paj Zeb tsis tau paub lus Hmoob meej. Cov Hmoob kuj nyiam Tshu Hwj, ces lawv tso lawv tej tub tej ntxhais tuaj kawm ntawv Los Tsuas, ntawv Hmoob, thiab Ntuj kev cai ntawm Tshu Hwj. Tej no, ua rau cov neeg sab nraud pom tias Tshu Hwj tsis lam ua ib txoj hauj lwm dag nyob hauv lub zos. Nws nyiam Tswv Ntuj txoj cai, nws hlub neeg, nws nrog sawv daws hais lus mos nyoos, Tshu Hwj tsis cem tsis ua tsiv ua nyaum. Me nyuam yaus nyiam thiab nquag tuaj kawm ntawv ntawm nws.
Xyoo 1968, yog xyoo uas cov neeg nyob hauv lub zos Huab Xev npaj tsiv mus ua liaj nyob rau lub zos Naj Paas, ze lub nroog Moos Phias. Lub xyoo ntawd, Tshu Hwj tso nws txoj hauj lwm qhia ntawv thiab qhia Ntuj kev cai tseg, cia rau cov Xib Hwb nyob Moos Loob tuaj ua txuas ntxiv mus. Cov Xib Hwb tshiab tseem vam txog Tshu Hwj ua tus coj hu nkauj thiab nyeem Ntawv Ntshiab txhua Hnub Chiv. Nws pab cov Xib Hwb mus txog xyoo 1975.
Tshu Hwj muaj ib lub suab hu nkauj zoo mloog.
Xyoo 1975, Los Tsuas teb tawg, ces sawv daws sib pus los rau teb chaws Thaib. Niaj hnub no cov tub ntxhais uas yav thaud lawv tau kawm ntawv ua ke nyob Roob Nyuj Qus thiab Huab Xev mas sawv daws kuj muaj lub neej zoo.
Nyob hauv lub yeej thoj nam Thaib teb
Nyob hauv lub yeej thoj nam hauv Thaib teb, mas Tshu Hwj pab tsis tau cov Xib Hwb thiab tsoom Hmoob lawm, vim nws yuav tsum saib xyuas nws tsev neeg, uas yog ib tse neeg coob. Tab sis Tshu Hwj kuj ua ib txog hauj lwm muab tshuaj rau cov neeg mob nkeeg hauv lub yeej thoj nam hu ua Naj Nyaus. Ces xyoo 1976 txog 1977, sawv daws tawm mus rau teb chaws Fab Kis lawm.
Nyob rau Fab Kis teb
Teb chaws Fab Kis yog ib lub teb chaws vam meej thiab xis nyob, tab sis txoj kev ua hauj lwm puav leej yog siv txoj kev txawj kev ntse ua ntej. Nws cov tub cov ntxhais loj hlob, tus kawm tau txuj li cas los muaj.
Nyob Faj Kis teb Tshu Hwj tau mus ua hauj lwm saib xyuas cov hav zoov ib ntus ntev loo.
Nyob hauv lub xeev 11, Fab Kis yav qab teb, hauv lub zos Saissac, Tshu Hwj mam li los ua txoj hauj lwm txawb ncej hluav taws xob, ncig Fab Kis teb.
Nyob Fab Kis qab teb, mas cov neeg ntseeg Hmoob thiab cov Txiv Plig tseem pom zoo kom nws saib xyuas cov neeg ntseeg Hmoob, ua nyob Fab Kis qab teb, mus txog hnub nws tawm mus nyob rau teb chaws Nkws Yas. Yog hnub tim 20/09/1989, Tshu Hwj tsiv mus nyob lub zos Kas Kaus, Nkws Yas teb, uas yog nws lub zos kawg.
Nyob Kas Kaus, ua ntej thaum tus Txiv Plig Tshaj Tswv (Père Jacques o.m.i.) uas yog neeg Nyab Laj yuav mus rau Nyab Laj teb, mas Txiv Plig kuj xav kom Tshu Hwj los nrog 2 tug hluas Yaj Nkias Teeb thiab Vaj Ntxoov Nruas nkawd sib pab saib xyuas txoj kev ntseeg rau tsoom Hmoob nyob Kas Kaus (Cacao). Tshu Hwj kuj lees txais los ua ib tug txwj laus thiab tuav nyiaj txiag rau tsoom neeg ntseeg. Nws yog ib tug Xib Hwb laus, Txiv Plig tso siab tias nws yuav nres thiab pab tau 2 tug Xib Hwb hluas. Thaum ntawd, yog lub caij Tub Tsob Hwb Yaj Zoov Ntxheb tau tshais chaw mus nyob rau lwm teb chaws lawm.
Tshu Hwj lub cev raug mob.
Lub 10 hlis xyoo 2007, Tshu Hwj thiab nws poj niam tau mus kho nws tus mob nyob rau teb chaws Fab Kis av loj 7 lub hlis. Tab sis nws tus mob tsis tso nws, ces nkawd thiaj txiav siab rov los tsev. Los nyob tau 2 lub hlis, ces Tshu Hwj tso nws tsev neeg tseg rau hnub tim 25/7/2008, thaum 5 teev, 5 feeb, sawv ntxov.
Ua ntej Tshu Hwj yuav tas txoj sia, nws hais tseg tias kom ua lub ntees raws kev ntseeg rau nws xwb, ib hnub thov Ntuj 3 zaug : sawv ntxov, tav su thiab tsaus ntuj. Tsis txhob ua Hmoob tej kab lis kev cai xyaw rau. Nyob hauv Thsu Hwj lub ntees tuag, mas nws taij kom thov Ntuj pab nws ntau ntau. Nyob hauv Tshu Hwj lub ntees tuag, mas Tshu Hwj tau txais Txiv Tswv Qhia Emmanuel Lafont lo lus foom hmoov zoo. Nws cov tub nyab, ntxhais vauv, npaj tau ib lub ntees zoo. Tus tub hlob tseem ua tau ib zag nkauj ntxuag thaj cheej xa lawv txiv mus cuag Tswv Ntuj.
Nkawd ob niam txiv muaj 7 leej tub, 4 leeg ntxhais. Cov tub nyab, ntxhais vauv thiab cov xeeb ntxwv huv tib si muaj 51 leeg. Ua ntej Tshu Hwj yuav ncaim mus, nws tau hais ib lo lus rau nws poj niam tub se, rau tej niam tej txi, tej neej tej tsa, rau tej txheeb tej ze, tej phooj tej ywg tias :
“Nej nyob, nej sib hlub, nej sib pab, kuv mus lawm.
Peb mam li sib ntsib pem ntuj, kuv mam saib xyuas nej ua neej.”
Tus nthuav Thoj Tshu Hwj lub neej yog :
Thoj Qhua Xab : qhua.xab@gmail.com
Tél. : 05.63.62.79.37
Castres, Fab Kis teb, tim 24/08/2008
Last edited by Maiv Tooj on 3rd May 2011, 3:03 am; edited 1 time in total
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
THOV TSWV NTUJ NROG TXIV PLIG NYIAJ POV TSEV NEEGHawm txog ib tsoom ntseeg sawv daws,
Lub sij hawm no, yog lub caij peb yuav nco txog ib tsoom Leej Ntshiab.
Txiv Plig Nyiaj Pov tsev neeg tau caw peb ib tsoom Hmoob sawv daws mus nrog lawv teev Ntuj nco txog Txiv Plig, rau hnub tim 1 lub 11 hli 2010 nyob Prinqiau, Fab Kis teb.
Yuav npaj raws li nram no :
* 11h00 : Tuaj sib sau hauv lub chav tsev nyob ntawm tsev Teev Ntuj ib sab,
* 11h30 : Noj mov ua ke,
* 13h00 : Mus Teev Ntuj nyob hauv lub tsev "Chapelle", nyob tom roob toj ntxas,
* 14h00 : Mus xyuas TP Nyiaj Pov lub tsev laus. Tom qab nyias mam rov mus nyias tsev.
Vam tias sawv daws yuav tuaj koom tau raws li siab xav.
Yaj Xaiv Tsom
Mim- Tswv Cuab Hmong Catholique
- Messages : 3770
Date d'inscription : 2009-10-16
- Post n°81
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Mim 1st November 2010, 4:32 pm
Tais Tooj,
Ua tsaug koj tuaj tso TP Nyiaj Pov tsev neeg cov lus caw peb sawv daws mus thov ntuj rau nws nyob tom nws lub chaw. Nej cov nyob ze me ntsis nej mus tau los zoo kawg li. Peb cov nyob deb ces peb mam li nrog thov ntuj pab rau TP NYiaj Pov thiab os... Tsim nyog peb sawv daws yuav thov ntuj pab rau nws kawg li, thiab yuav nco nws tej txiaj ntsim os...
Ua tsaug koj tuaj tso TP Nyiaj Pov tsev neeg cov lus caw peb sawv daws mus thov ntuj rau nws nyob tom nws lub chaw. Nej cov nyob ze me ntsis nej mus tau los zoo kawg li. Peb cov nyob deb ces peb mam li nrog thov ntuj pab rau TP NYiaj Pov thiab os... Tsim nyog peb sawv daws yuav thov ntuj pab rau nws kawg li, thiab yuav nco nws tej txiaj ntsim os...
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°82
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 30th November 2010, 9:14 am
Ntawv Hmoob Thoob Teb pib qhia li cas.
Nyob Roob Nyuj Qus Xeev Moos Loob:
Xyoo 1953, Txiv Plig Nyiaj Pov (FatherYes Bertrais) tsi tau cov Ntawv Hmoob Thoob teb. Nws ua tau thawj phau Ntawv Xyaum nyeem Ntawv Hmoob, yog xuas tes sau xwb, vim thaum ntawd nws tseem tssi tau muaj tshuab ntau ntawv.
Xyoo 1954, nws yuav tau ib lub tshuab ntau ntawv thiab ib lub tshuab luam ntawv. Lawv luam thawj phau ntawv Xyaum nyeem Ntawv Hmoob 100 riam.
Thaum tsim tau cov Ntawv Hmoob lawm, thawj thawj tug Xib Hwb qhia ntawv Hmoob yog Thoj Tshu Hwj, ib tug ntawm ob tug tub hluas uas tau nrog Txiv Plig Nyiaj Pov tsim cov ntawv Hmoob thiab yog thawj tug Hmoob uas TP. Nyiaj Pov tuav tes ua sab npais thaum TP. Nyiaj Pov tuaj xyuas Hmoob thawj zaug nyob Roob Nyuj Qus (Thoj Tsav Ntxaij). Thaum ntawd TP. Nyiaj Pov xav tsis xav tias ntshe Hmoob yuav zoo nruag tag npaum ntawd no…
Thaum Thoj Hwj, paub cov Ntawv Hmoob tag lawm, nws kuj mus kawm ntawv Nplog ntxiv thiab. Ces TP. Nyiaj Pov thiaj ua ib lub tsev kawm ntawv rau Roob Nyuj Qus, nruab hnub Thoj Hwj qhia ntawv Nplog tom tsev kawm ntawv rau cov me nyuam, hmo ntuj thaum teev Ntuj tag lawm, cov laus uas xav kawm ntawv, cov hluas, cov ntxhais loj ho mus kawm ntawv Hmoob 1 teev tej hauv TP. Lub tsev. Thawj thawm pab tub kawm ntawv nyob Roob Nyuj Qus yog :
Xib Hwb qhia : Thoj Hwj
Cov tub kawm :
Thoj Qhua Xab, Diav yaj, Mim Thoj (Niam Txoov Yeeb), Ntsum yaj, Phauj Mos Xyooj, Vam Yaj, Nom Swm, XH. Thoj Xyooj, Zoov Ntxheb Yaj, Nom Neeb Thoj.
Tsis ntev tom qab no ces Tswv Qhia Choo Thoj thiab ib tug tub Hmoob Yaj npe hu ua Khais no, nkawd pheej tuaj xauj qhov tsev, yog lawv tawm mus ces ho khiav lawm. Li ntawd Yaj Yeeb thiaj tawm mus ntev tau Tswv Qhia Txwj Choo los yuam kawm ntawv. Ces Tswv Qhia Txwj Choo thiab cia li kawm los mus tsis tso tseg li lawm. Ho tus tub Hmoob Tsab ces khiav dim lawm, nws yeej tsis rov tuaj nrog lawv kawm ntawv kiag li lawm thiab.
Thaum ntawd Tseem hwv Nplog txwv tsis pub kom Hmoob muaj ntau ntawv, kom Hmoob txhob sib xa moo tau rau lawv haiv neeg, vim lawv nyob ntau lub teb chaws sib txawv. Ces cov Hmoob nyob rau Suav teb thiaj muab ntawv Suav los tsim ua ib cov ntawv Hmoob Suav, cov Hmoob Thaib (cov Protestant) thiaj siv txwm ntawv Thaib los ua ntawv Hmoob, cov Hmoob Protestant tsis xav kom muaj teeb meem nrog Tsem hwv ces lawv thiaj tsim cov ntawv Hmoob ua txwm ntawv Nplog kom txhob muaj teeb meem. Cov nyob Cob Tsib teb kuj siv cov txwm ntawv Hmoob raws ntawv Cob Tsib thiab.
Li ntawd thaum xub thawm, nyob tom tsev kawm ntawv Roob Nyuj Qus, thaum txog caij qhia Ntawv Hmoob ces lawv thiaj sau Ntawv Hmoob thiab Ntawv Nplog tib si, yog tias muaj Nplog tuaj ze ntawd ces lawv muab cov phau ntawv Hmoob ntsaw qab rooj kom tag, muab cov ntawv Hmoob tim daim txiag so tsuag tsuag, ces thau cov phau ntawv Nplog los rau saum rooj.
Muaj ib lub caij uas Tseem hwv Nplog ua nyuaj nyuaj mas Txiv Plig Nyiaj Pov sab laj rau Phas Nyas Tub Npis Lis Foom, uas yog tus Tuam Thawj sawv ntiag ntawm Peb Haiv Hmoob. Ces thiaj li tau muab cov ntawv Hmoob Thoob teb nov ua hais tias yog Phas Nyas Tub Npis yog tus tsim tawm los rau nws haiv neeg Hmoob siv sib nug moo thiab khaws txuj. Tsam ces Txiv Plig Nyiaj Pov ho yog neeg fab Kis thiab ces ho muaj teeb meem . Li nov niaj hnub no tseem muaj ib cov Hmoob hu cov Ntawv Thoob teb nov hu ua « Ntawv Phas Nyas ».
Sawv daws kawm tsis tau ntev, txawj sau ntawv zom zaws lawm. Tshwj xeeb yog cov hluas, lawv sau lo puav lus rau tej daim me nyuam ntawv thiab muab cuam rau lwm tus, khaws los nyeem ces luag zom zaws. Ua rau sawv daws muaj siab thiab cia li xav kawm ntawv ntau ntxiv.
Thaum cov zos nyob ib ncig li ib ob hnub ke ntawm Roob Nyuj Qus xws li : Moos Loob Phuas Npas, Pham Las Mus, Phus Xas Nees los yog Phaj Thoob kuj xa lawv cov me nyuam tuaj kawm ntawv thiab.
Thaum lub caij lawv kawm ntawv Hmoob tshiab tshiab ntawd mas lawv hais ib tug zuj zus los sib dhos yam li :
- K …u…ku…Cim V…kuv
- M…u…mu…cim s…mus
- T…o…to…cim m…tom.
Xub hais lub cim UA, cim neutre ua ntej.
Lub hauv paus mas Txiv Plig Nyiaj Pov tsim cov Ntawv Hmoob Las Tees nov los qhia Ntuj Kev Cai, los siv rau kev Ntseeg nkaus xwb. Tab sis thaum cov Hmoob pom tias muaj qab hau heev thiab yus muaj yus ntawv lawm mas yooj yim heev no ces Hmoob cia li muab coj los siv ua kev sib nug moo lawm. Ces muaj cov ntxhais hluas uas tau mus nrog cov Phauj nyob nyob Vees Cam, thaum lawv mus xyuas ib zaj Movie lom zem, lawv kuj sau ntawv piav mus rau cov nyob pem zos, ua rau sawv daws zoo siab nyeem zaj kwv huam uas lawv piav. Cov hluas nyob rau Pham Las Mus kuj sau tej phau paj huam sib hlub, hais txog lub neej kev khwv, kev txom nyem, txuj ci thiab sau tej zaj kwv txhiaj yam uas Hmoob tsis tau muaj dua los.
Nyob Los Tsuas teb:
Tsim ntawv Hmoob Thoob teb: TP. Nyiaj Pov, Yaj Yeeb, Thwj Hwj.
Thawj tug Xib Hwb qhia ntawv Hmoob: Thoj Hwj
Thawj tug Hmoob tuav Txiv Plig Nyiaj Pov tes ua xab npais: Thoj Tsav Ntxaij, Thoj Hwj txiv.
Thawj tug Xib Hwb qhia Ntuj Kev Cai Catholique: Yaj yeeb
Thawj tug
Thawj tug Hmoob uas tau tuaj Fab Kis teb thiab tuav Txiv Vaj qhia tes: Yaj yeeb
Thawj tug Txiv Plig Hmoob: Tswv Qhia Txwj Choo
Thawj tug Tub Tsob hwb ( Deacon): Xib hwb Yaj Ntsuab Pov.
Thawj tug xib hwb qhia Ntawv Hmoob: Thoj Hwj
Tus ob: Xyooj Thoj, tuaj qhia zos Npam Naj Xees( Npam Naj Vas), Xeev Luam Nab Thas. Tuaj txog zos Npam Naj Vas hnub tim 1 lub 5 hli 1959. Yog ib hnub uas Hmoob caiv zos.
Tus peb: XH. Yaj Zoov Ntxheb.
Tsim ntawv Hmoob Thoob teb: TP. Nyiaj Pov, Yaj Yeeb, Thwj Hwj.
Thawj tug Xib Hwb qhia ntawv Hmoob: Thoj Hwj
Thawj tug Hmoob tuav Txiv Plig Nyiaj Pov tes ua xab npais: Thoj Tsav Ntxaij, Thoj Hwj txiv.
Thawj tug Xib Hwb qhia Ntuj Kev Cai Catholique: Yaj yeeb
Thawj tug
Thawj tug Hmoob uas tau tuaj Fab Kis teb thiab tuav Txiv Vaj qhia tes: Yaj yeeb
Thawj tug Txiv Plig Hmoob: Tswv Qhia Txwj Choo
Thawj tug Tub Tsob hwb ( Deacon): Xib hwb Yaj Ntsuab Pov.
Thawj tug xib hwb qhia Ntawv Hmoob: Thoj Hwj
Tus ob: Xyooj Thoj, tuaj qhia zos Npam Naj Xees( Npam Naj Vas), Xeev Luam Nab Thas. Tuaj txog zos Npam Naj Vas hnub tim 1 lub 5 hli 1959. Yog ib hnub uas Hmoob caiv zos.
Tus peb: XH. Yaj Zoov Ntxheb.
Xyooj thiab Yaj Zoov Ntxheb tuaj qhia ntawv nyob Npam Naj Vas:
Xyooj thiab TP. Vaj Pov tuaj rau lub zos Npam Naj Vas ib lis piam tom qab xwb ces muaj ntau yim Hmoob cia li txiav siab los ua Ntuj Kev Cai, muab xwm kab hlawv tsis teev dab lawm. Thaum cov Hmoob los ua Ntuj Kev Cai coob lawm ces thiaj tsam muaj tsev teev Ntuj, thiab Tsev kawm Ntawv. Nyob Npam Naj Xees mas lawv qhia ntawv Hmoob rau tom tsev kawm ntawv kiag ntag. Nyob teb chaws ped, lawv tsis cais yog tub ntxhais, cov ntxhais los lawv puav leej cia mus kawm ntawv li tej mab tej suav. Xyooj kuj muab ib tug qauv zoo rau cov niam cov txiv kom tso cov ntxhais mus kawm ntawv thiab. Ces cov niam cov txiv kuj tso tub ntxhais tib si mus kawm. Thaum tsa muaj tsev kawm ntawv lawm, Xyooj kuj qhia ntawv Hmoob, ntawv Nplog thiab xam phaj tib si tom tsev kawm ntawv. Thaum lub caij nov mas cov Hmoob Qaum teb, Xeev Luam Nab Thas mas txawj ntawv coob leej heev tsis hais poj niam los txiv neej. Lawv nyeem ntawv mas lawv nyeem seev seev, yam kho siab kawg nkaus.
Tsis ntev tom qab no kuj muaj ib pab tub ntxhais hluas nyob Npam Naj Xees ( Naj Vas) nyob lub Xeev Luang Nam Tha) uas paub ntawv zoo me ntsis kuj tau tuaj kawm ntawv nyob Roob Nyuj Qus thiab xws li :
- Xib Hwb Ntsum Hauj Xyooj
- Nom Phiab Xyooj
- Txos Xyooj
- Tsheej Thoj
- Yeeb Thoj
- Tub Kawm yaj
- Tuam Yaj
Tsis nco qab cov ntxhais npe lawm…
-Tom qab Xyooj Hauj kuj los ua Xib Hwb qhia ntawv nyob rau Pham Dees (Cov Hmoob ntseeg Catholique uas Txiv plig coj khiav thaum Luam Nab Tha tawg, 1962, los nkaum rog rau Pham Dees Thaib teb tau ze ob xyoos mam rov mus nyob Naj Nkos, Nplog teb). XH. Hauj qhia ntawv Hmoob thiab ntawv Nplog tib si nyob rau hauv Tsev Kawm Ntawv. Thaum lub caij ntawd ua neeg thoj nam, tsis muaj dab tsi ua, noj haus yog As Mes Liv Kas ua Tsov Rog pab tuaj pub. Sawv daws nyob xwb ces tag nrho neeg zos yeej sib yaum mus kawm ntawv. Ua rau pawg Hmoob Ntseeg nov paub ntawv Hmoob yuav luag txhua. Ib xyoos ntau tom qab, Txiv Plig ho coj Hmoob los rhawv ib lub zos tshiab nyob rau Naj Nkos, ze Huab Xais, Nplog teb. Thaum nov Txiv Plig kuj rov tsim muaj Tsev Kawm Ntawv nyob hauv zos, qhia ntawv Hmoob thiab ntawv Nplog rau hauv tsev kawm ntawv. Thaum cov sij hawm nov, nyiaj txiag yuav ntawv mem thiab tus Xib Hwb lub nyiaj hli puav leej yog Txiv Plig yog tus thaj tsob tag nrho. Lub sij hawm no yog Xib Hwb Nom Yeeb Tsab yog tus qhia.
Xib Hwb Hauj ces ho mus qhia ntawv rau lub zos Naj Vuaj, yog cov Hmoob Thoj Nam uas raws kev ua tsov rog ntawm As Mes Liv Kas. Tab sis Naj Vuaj cov Hmoob kuj faib ua ob lub zos nyob, lub zos ze tshav dav hlau yog cov Hmoob tseem coj Dab, coj qub kev cai poj yawm txwv koob. Ib lub zos nyob ib nyuag ntu deb thaj tsam li 1 teev kev ko taw, ntawm lub zos ntawd yog cov Hmoob ua Ntuj Kev Cai uas los nram Pham Dees los nyob. Lawv kuj muaj ib lub tsev teev Ntuj me me, niaj hmo noj hmo tag, sawv daws mus teev Ntuj ua ke tag mam rov los pw. Muaj ib lub Tsev kawm ntawv uas xuas nruab ua thiab vov nplooj kav theej, yog Xib Hwb Hauj Xyooj ua tus qhia ntawv Nplog. Thaum nov nws tsis qhia ntawv Hmoob hauv Tsev kawm ntawv lawm, nws qhia ntawv Nplog xwb. Tab sis Ntawv Hmoob lawv kuj sib qhia nyob tom tsev. Thaum lub sij hawm ntawd Hmoob tsuas muaj tib lub Tsev kawm ntawv ntawm Naj Vuaj nkaus xwb, ces cov Hmoob nyob ib cheeb tsam li 3-4 hnub ke (ko taw) kuj tuaj nrog tej txheeb ze nyob Naj Vuaj kawm ntawv.
Thaum peb khiav pem Npam Naj Xees los txog rau Naj Vuaj, lawv twb xub nyob ua ntej lawm, peb los txog yog 1964 thaum lub caij ntuj nag. Yog kuv txiv laus Zoov Ntxheb (kuv niam kuv txiv tus vauv hlob) hnov moo tias kuv txiv raug cov neeg siab tsis ncaj iab hiam, vim peb nyob nruab nrab ntawm cov Nplog Koom Tshas thiab Nplog Ywj Pheej. Ces nws thiaj tuaj nram Veem Cam tuaj tos peb. Nws caij dav hlau ntiav ntawm Vees Cam txog rau Moos Loob, ho caij dav hlau tub rog Moos Loob txog rau Huab Xais. Ces nws mus ib leeg ko taw peb hnub ke hla roob hla hav, nrog hav zoov nuj txeeg thiab lub caij ntuj tsaug thiab mus txog rau Naj Vuaj. Tuaj txog Naj Vuaj ces thiaj tuaj ntsib peb tus yawg laus Txhiaj Tawb tuaj Nras Toj Siab tuaj rau Naj Vuaj. Ces peb tus yawg laus Txhiaj Tawb thiaj li nrog kuv txiv laus Zoov Ntxheb sib ua luag tuaj tsib hnub ke thiaj li tuaj txog rau Npam Naj Xees. Nkawd thiaj tuaj tos peb nyob nyob rau Naj Vuaj, peb los ko taw tsib hnub ke thiab...Lub sij hawm ntawd kuv tseem tsis tau plhis hniav, kuv mus ko taw xwb. Kuv tus niam laus Mim uas hlob kiag kuv, nws ev taus plaub lub ncuav, kuv tus niam hluas Ntsuab mas lawv ev ib chim, txog tej ntu kev tav ces lawv cia nws mus ko taw ib chim. Kuv tus nus Txhaij nyuam qhuav yug kiag xwb, kuv tsis nco qab xyov nws puas tau puv hli, raws li kuv xav mas tseem tsis tau puv hli, vim kuv txiv laus Zoov Ntxheb tuaj txog ntua xwb ces peb tua tus las npua loj noj kiag xwb. Thiab zoo li kuv txiv laus twb tuaj txog lawm kuv niam mam yug me nyuam...
Thaum peb nyob Naj Vuaj, kuv yog thawj tus ntxhais Hmoob uas mus kawm ntawv hauv lub tsev kawm ntawv Hmoob, kuv pom cov me nyuam kawm ntawv yog ib co me nyuam hlua, cov hluas nraug, lawv tuaj cov zos deb deb tuaj, tseem muaj cov tuaj Npam Naj Xees tuaj kawm tib si thiab. Yog cov tub hluas loj loj tiav hluas ntsug tuaj pib kawm ntawv xwb los lawv kuj zoo siab kawg li. Lawv hnav khaub ncaws Hmoob, cov loj lawm ces lawv hnav tsho luv nrog lub tsho dawb sab hauv sia siv liab, cov yau zog hnav tsho ntev dub li tso Suav sia siv tawv xwb tsis sia siv liab (siv paj ntaub). Xib Hwb Ntsum Hauj yog ib tug Xib Hwb muaj nqes heev thiab peb cov Hmoob nyob leb Xeev Luam Nab Thas hwm heev, nws coj tau coob tus mus rau lub neej zoo, txawj lus Fab Kis lus As Mes Liv Kas, tau mus nrog As Mas Liv Kas ua hauj lwm nrov nreeg los yog vim muaj Xib Hwb Ntsum Hauj ua tus qheb sawv daws qhov rooj.
Thoj Qhua Xab teev cov npe:
- Sab laug rau xis : -phauj Luv Thoj, niam Lis Nkaj Teev, TP. Zoov Phooj (Père Zanoni), niam Txhiaj Tsom Xyooj (Yeev thoj) Txhiaj Tsom, Xyooj, Nrhiav Yaj, Thoj Nom Neeb (kuv tij laug) , Mab Yaj, Thoj Xyooj (tus ntoo kaus mom khi txoj hlab ntaub uas nqa
pem Hmoob Luam Naj Thas los, Xyooj Nom Phiab, Tsheej Thoj, Txos Xyooj 3 tug nov yog tuaj Npam Naj Xees Luam Nab Tha tuaj kawm ntawv Roob Nyuj Qus, tus kawg yog TP. Txhiaj Tshaj.
Ntawm no, yog ntawm ntug kev Thaj( Kev Fab Kis=kev tsheb loj) ntawm Roob Nyuj Qus, lub tsev vov vuas yaj them yog ib tug Los Tsuas nyob, thiab ob lub tsev hmoob sab tod, lub pem toj zog yog Tswv Vab Xyooj lub, lub ze nram hav no yog Txhiaj Suav Xyooj lub
Xib Hwb Xyooj lub caij tuaj nyob Npam Naj Xees 1959
Txiv Plig Vaj Pov nrog Xyooj tuaj nyob Npam Naj Xees
Sab laug rau sab xis:
Tus 1: Ntxawm Xyooj
Tus 2: Ntxhi Thoj
Tus 3: Kab yeeb Thoj
Tus 4: Paj Xyooj
Tus 5: Yias Xyooj
Tus 6: Tswb Xyooj
Tus 7: Maiv Xyooj
3 tug sawv qis dua, sab laug rau sab xis:
Tus 1: Paj Thoj
Tus 2: Rhia Vwj
Tus 3: Mab Thoj
Xyooj tuaj mus qhia Ntuj Kev Cai rau cov Hmoob Bam Naj Vas, 1959.
Nov yog lawv xyaum hu nkauj thiab kawm ntawv Hmoob thaum tsaus ntuj,
nyob Bam Naj Vas.
Lub tsev Teev Ntuj thiab Tsev Kawm Ntawv uas XH. Xyooj tuaj ua nyob Bam Naj Vas 1959.
Xib Hwb Zoov Ntxheb tuaj nyob Npam Naj Xees 1961
Tsev teev Ntuj thiab tsev kawm Ntawv Hmoob Pham Dees,
Thaum Luang Nam Tha tawg 1962 ,
Txiv Plig Vaj Pov coj cov Hmoob khiav mus nyob rau Pham Dees Thaib teb 1962-64.
XH.Yaj Txoov Yeeb qhia ntawv Hmoob nyob Sam Neua
- Xyoo 1959 TP. Nyiaj Pov thiab Xib Hwb Yaj Yeeb tau npaj siab mus nyob Xab Niam thiab tsim vaj tsev zoo ua ib lub Tsev Hauv Paus. Thaum lub caij ntawd cov Hmoob Xab Niam Sawv Vaj, ces lawv tos Huab tais Hmoob yuav nqes saum ntuj los, ib xyoos ntawd lawv tsuas coj qaib coj npau mus tua noj, hais kwv txhiaj, seev thiab dhia tos Huab Tais ces lawv tshaib plab heev, lawv thiaj los ua Ntuj Kev Cai coob coob sib law sib liag. Lub sij hawm ntawd TP. Nyiaj Pov tsim cov phau ntawv Hmoob, txhais Ntawv Ntshiab thiab qhia cov tub hluas yuav npaj ua Xib Hwb. Xib Hwb Txoov Yeeb qhia ntawv Hmoob rau cov tub tuaj kawm Xib hwb, ib tug Xib Hwb Puab Yib qhia ntawv Nplog. Xib Hwb txoov Yeeb ib leeg xwb kov tsis yeej, tseem tsua yuav mus qhia Ntuj Kev Cai thiab qhia ntawv rau pem zos Hmoob thiab ces thiaj tau xa ib pab tub hluas tuaj mus kawm nyob Roob Nyuj Qus tau 6 hli xws li:
Vaj Kaus, Maib Thoj, Lauj fav Tswb, Lauj tsu, Muas Tswb, Vaj Laug, Tsab Xov Tshaj.
Lawv mus kawm tiav, rov los Sam Neua tsis ntev xwb ces Sam Neua txawm tawg xyoo 1962. Sawv daws thiaj tso vaj tse toob xib tseg, thoj nam los mus nyob rau Vees Cam.
Yaj yeeb
Xib Hwb Nkaj Teev Lis qhia ntawv Hmoob rau Khej Me, Thaib teb
Xyoo 1964 Xib Hwb Lis Nkaj teev yog thawj tug Xib Hwb tuaj qhia cov ntawv Hmoob Thoob teb rau teb Chaws Thaib. Nws nrog Txiv Plig Tshaj Sawm yog ob tug tuaj tsim lub zos Khej Me xyoo 1964. Nyob Khej me, tsis mauj tsev teev Ntuj, tsis muaj tsev kawm ntawv, lawv teev Ntuj thiab qhia ntawv haus lawv lub tsev nyob xwb. Nws qhia ntawv Hmoob rau cov txais Ntuj Kev Cai, qhov ntau yog kawm thaum tsaus ntuj. Tab sis nruab hnub thiab hnub Saturday kuj muaj neeg tuaj kawm thiab, tuaj tsawg tus qhia tsawg tus li.
Lis Nkaj teev yog thawj tug Hmoob mus tshaj rau Xov Tooj Cua Tseej Maim thiab cov Xib Hwb Thaib uas tuaj nrog lawv kawm ua ke, piav keeb kwm Hmoob kom luag hu Hmoob ua Hmoob es txhob hu ua Miao.
Thawj lub Tsev teev Ntuj thiab qhia Ntawv Hmoob Thoob teb Hmoob Catholique nyob Khej Me, Thaib teb 1964
Niam Xib Hwb Lis Nkaj Teev
Xib Hwb Lis Nkaj Teev, Khej me 1964.
Nizm Xib Hwb Lis Nkaj Teev, Khej Me 1964.
Cov Ntawv Hmoob Thoob Teb nov pib siv ntau zuj zus thaum cov Tub Txuj tuaj kawm ntawv nyob Vees cam, muaj kev sib fim tsim tsa Koom Haum tub txuj. Dua li rov nce ib theem heev tshaj plaws mas yog thaum lub sij hwm teb chaws Nplog tawg 1975 uas Hmoob thoj nam los rau Thaib teb. Los nyob hauv cov yeej thoj Nam tsis muaj dab tsi ua ces sawv daws ho tig los kawm ntawv Hmoob thiab sawv daws sib ncaim ua sab ua sua ces thiaj muab cov Ntawv Hmoob thoob teb nov los ua qhov chaw sib nug moo.
Tseem hwv Nplog tso cai rau Hmoob siv cov Ntawv Hmoob Thoob teb
Kuv nco tsis tshua zoo lawm, zoo li yog xyoo 1974, nyob Los Tsuas teb tau tsim muaj ob hom ntawv Hmoob xws li cov Protestant lawv muab cov txwm ntawv Nplog los ua Ntawv Hmoob. Cov ntseeg Catholique muab cov txwm ntawv Las Tees los ua Ntawv Hmoob. Ces Huab tais Nplog thiab tau muab ob yam ntawv los soj ntsuam xyuas seb yuav xaiv hom ntawv twg rau haiv neeg Hmoob siv, tsis pub kom ib haiv neeg muaj ob hom ntawv, tsam yuav yog ib qho yuav tsim kev kub ntxhov rau lub teb chaws. Ces thiaj tau muab ob hom ntawv Hmoob no los sib hais, cov ntawv Las Tees mas tsim tau muaj ntau phau ntawv, lawv tsis yog sau Ntawv Ntshiab nkaus xwb.
Twb tsim tau ntau phau ntawv xws li :
1- Phau xyaum nyeem ntawv Hmoob, rob luam 4-5 zaug ua ntau riam.
2- Ntawv theev ntiaj teb (Géographie), phau 1, phau 2, phau 3. 400 phab loj.
3- Koom Txoos Liv Xwm (Histoire), phau 1, phau 2, phau 3. 500 phab loj.
4- Qhia tshuaj kho mob, 120 phab.
5- 50 zaj nyeem piav txog lub sim ceeb no, 180 phab
6- Kwv txhiaj 200 phab
7- Tej zaj yees siv ua si, 120 phab
8- Kab tshoob kev kos 180 phab
9- Dab neeg 206 phab
10- Tsa lub neej (qhia cov hluas npaj siab tsa lub neej) 260 phab
11- Paj Cai Vwj sawv ntau rog nyob Los Tsuas teb 1918-21, 35 phab.
12- Txoj kev tu tub ki, 80 phab
13- Tej zaj ua si lom zem 40 phab.
1- Phau xyaum nyeem ntawv Hmoob, rob luam 4-5 zaug ua ntau riam.
2- Ntawv theev ntiaj teb (Géographie), phau 1, phau 2, phau 3. 400 phab loj.
3- Koom Txoos Liv Xwm (Histoire), phau 1, phau 2, phau 3. 500 phab loj.
4- Qhia tshuaj kho mob, 120 phab.
5- 50 zaj nyeem piav txog lub sim ceeb no, 180 phab
6- Kwv txhiaj 200 phab
7- Tej zaj yees siv ua si, 120 phab
8- Kab tshoob kev kos 180 phab
9- Dab neeg 206 phab
10- Tsa lub neej (qhia cov hluas npaj siab tsa lub neej) 260 phab
11- Paj Cai Vwj sawv ntau rog nyob Los Tsuas teb 1918-21, 35 phab.
12- Txoj kev tu tub ki, 80 phab
13- Tej zaj ua si lom zem 40 phab.
Dua li ntawd tseem tau luam ib cov ntawv qhia kev Ntseeg, muaj ze ntawm 15 phau sib txawv. Cov ntawv qhia kev Ntseeg mas yog cov txais Kev Ntseeg thiaj nyeem xwb. Tab sis lwm cov ntawv mas tas tsoom Hmoob paub ntawv lawv sib txeeb, luam tawm npaum li cas kuj tsis paub txaus li. Xyoo 1975 nyob Los Tsuas teb muaj thaj tsam 35 phau ntawv Hmoob RPA nyob Los Tsuas teb. Phau puav muaj 50 phab xwb, ntau phau muaj tshaj 200-300 phab.
Cov ntawv Hmoob uas yog tus txwm ntawv Nplog los ua ces lawv tsuas tsim muaj cov Ntawv vaj Lug Kub nkaus xwb.
Li ntawd thaum xaiv los mus, Tseem hwv Los Tsuas thiaj pom tias cov Ntawv Hmoob Thoob teb siv tau txiaj ntsim ntau heev rau haiv Hmoob, thiaj tau tso cai rau Tsomm Hmoob siv cov ntawv Thoob Teb nov raws txoj cai Tswj Hwm nyob rau Nplog teb.
Piav keeb kwm : Thoj Qhua Xab (Thoj Hwj tus kwv)
Xib hwb Thoj tsav yaj
Maiv Tooj Lis
Tus sau: Maiv Tooj Lis
Lyon, Fab Kis teb,
Tim 1 hlub 12 hlis 2010
Zaj nov, kuv npaj tshwj xeeb rau Txiab Neeb Vaj,
Xib Hwb qhia ntawv nyob Looj Ceeb Academy, Saint Paul, Minessota, USA.
Yaj Yeeb tus hnav dawb,
Thoj Hwj tus hnav Hmoob.
(Sab laug rau xis)
Thoj Tsav Ntxaij, Yaj Zam Nob, Thoj Nom Neeb, T. P. (P. Jean DROUART)
Thoj Qhua Xab, T.P. Nyiaj Pov, Yaj Txoov Yeeb thiab Thoj Tshu Hwj.
Roob Nyuj Qus, xyoo 1954.
Roob Nyuj Qus 1956
– Sab laug rau xis : Yaj Zam Nob Thoj Tshu Hwj (tus hnav hkaub ncaws nplog),
Yaj Txoov Yeeb thiab Thoj Tsav Ntxaij (yog kuv txiv).
Xib Hwb Thoj Hwj yog tus hnav lub tsho khuam thiab tsho dawb.
Roob Nyuj Qus 1956-57
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°83
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 14th December 2010, 6:49 am
| Txiv Plig Nyiaj Pov Koj tuaj tsa Hmoob lub neej sawv Peem tsheej xws lwm haiv neeg Koj yog peb tus cawm seej Uas Tswv Ntuj xa los So Peb Hmoob lub kua muag nrog Tau ntau pua tiam Txij thaum Txiv Yawg peb poob liaj ia Peb yuav thov ua koj tsaug Txiaj ntsim loj kom koj tau...mog! |
Last edited by Maiv Tooj on 31st October 2012, 11:27 am; edited 1 time in total
Mim- Tswv Cuab Hmong Catholique
- Messages : 3770
Date d'inscription : 2009-10-16
- Post n°84
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Mim 17th January 2011, 1:33 pm
Ib tug Hmoob ob peb lo lus piav txog TP Nyiaj Pov cov lus
Daim video no yog hais txog peb cov lus Hmoob. Niaj hnub no, peb twb hais lus Hmoob xyaw lus Mes Lis Kas los lus Fab Kis lawm xwb, tej me nyuam twb tsis pub lo lus "txiv" no lawm, yav tom ntej yuav zoo li cas? Tej zaum yuav zoo li TP Nyiaj Pov hais los tsis paub.
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°85
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 27th January 2011, 1:38 am
Pog Nkias Hwj Yaj,
Yug nyob Moos Loob, Los Tsuas Teb, hnub nyoog ze ntawm 104 xyoos, tau tso peb tseg tim 24.01.2011, North Carolina, Carthage, USA. Yuav nta nws lub ntees rau Fresno, rau thaum lub 2 hlis ntuj xiab nrab hli tom ntej no.Nkias Hwj, Zam Nob tij laug, yog Txawj Tswb Yaj tus tub hlob. Nkias Hwj yog ib tug txiv neeb, ua neeb qab zej thoob hauv zos tsis muaj caij so. Mus ua ib hnub teb los txog sab npaum twg, neeg tuaj zov tos hauv tsev kom mus ua neeb txog qaib qua mam nqes neeb. Thaum maj, neeg tseem tuaj hu tom teb tib si. Ua rau Nkias Hwj nroo ntau zaus txog txoj kev ua neeb : « Kheev lam muaj thim tau dab qhuas, yuav muab thim pov tseg, dhuav txoj kev ua neeb dhau. » Tsis paub xwb, lo lus hais tshwm no yog Tswv Ntuj tshoj Nkias Hwj hais Tswv Ntuj lo lus tseg rau nws tsev neeg thiab cov txheeb cov ze. Hmoov tsis muaj, nws tau tso sawv daws tseg. Ua cas muaj ib hnub, tuaj ib niag « Thaj » tuaj poob hauv Txawj Tswb thiab Zam Nob tsev. Nws txawm hais tias yuav nrog Hmoob nyob : Kawm lus Hmoob, kom Hmoob ua tsev rau nws nyob…Yog li, ib niag seem ib leeg kheej xwb, ua lub tsev loj zog cooj qaib rau nyob xwb nyaj yuav tau. Tiam sis nws tsis kam, yuav tseev kom luaj li Hmoob tsev thiab. Nws yuav tuaj nrog Hmoob nyob : « Yuav tuaj thim dab qhuas » rau Hmoob.
Yuav tsum paub tias Hmoob txais ib niag Thaj hauv Hmoob tsev, pw Hmoob lub txaj qhuas tiag. Tiam sis Hmoob yeej tsis paub txog niag Thaj txoj hauj lwm, xyov nws tuaj ua dab tsi. Niaj tag kis qaib qua, pog Txawj Tswb sawv ua tshais. Niag Thaj sawv los npaj nws tej dab qhuas : « Niaj tag kis ua tsa tes, ua tsa tes saum ntuj, xyov ua dab tsi ! Nyab Kias Hwj, koj yuav tsum sawv ntxov ntxov tuaj xyuas ! » Cov poj niam sab laj pes yaug kom ntiab niag Thaj khiav ; niaj tag kis ua tsa tes, ua tsa tes saum ntuj tsam puas dab vaj dab tsev. Cov txiv neej ua siab ntev twj ywm tsis hais lus. Thaum tsa tau Thaj lub tsev tiav, niag Thaj tawm mus nyob nws lub tsev lawm.
Muaj ib hnub, Zam Nob tau ib tug mob hnyav heev, tso zis daj rhob tsuas nplooj taub xiav tag. Hmoob ua neeb saib pom tias Zam Nob muaj 2 lub lav tuag hos 1 lub lav mob. Leej txi thiab leej tub sab laj kawg nkaus. Leej txi xav zoj tias : « Tsov tom neeb no, ua npaum li ntawd, khwv tas npaum li, pab tsis tau yus tej tub. Yus hlub yus tej tub tas npaum li, ib leeg txawm yuav ploj mus zuj zus, yuav tso yus pov tseg. Muab tej niag dab qhuas, tej niag neeb no thim pov tseg. » Zam Nob tuaj ntsib Thaj : “Yog koj cov dab pab tau kuv zoo rov los, kuv yuav nrauj kuv cov dab qhuas pov tseg, los nrog koj teev koj cov dab.” Thaj muab tshuaj txhaj kho tau Zam Nob dim plaws 2 lub lav tuag thiab lub lav mob, zoo rov los, muaj zog, plhu tshiab. Leej txi thiab leej tub xaus xyoo laus xa qhua neeb mus ncaj nraim tsis tos rov qab los ib zaug ntxiv. Nkawd hais rau sawv daws paub : “Txij zaum no, wb tsis nrog nej ua dab ua qhua, ua neeb ua yaig…Sawv daws tas poj niam txiv neej cov paub tab quaj tas tus, tsis muaj leej twg kam nkawd thim dab qhuas tseg. Wb txiav txim siab tag, yuav phem, phem txij li wb, yuav zoo, zoo txij li wb…” Nkawd yog ob tug Hmoob xub zoo xub ntxuav plig tshaj plaws nyob Roob Nyuj Qus, xyoo 1953, ntawm txiv plig Nyiaj Pov.
Pog Nkias Hwj yog ib tug tawv, ib tug cam ua tau, ib tug khuv xim dab qhuas Hmoob loj tshaj plaws. Kuv Pog cem kuv txiv thiab tag cov neeg los teev Yes Xus, los hwm Tswv Ntuj, txiav lawv ua dab tu caj tu ces. Muaj ib hnub, nws tus tub Yeeb, Txoov Yeeb, nrog TP Nyiaj Pov tuaj Fab Kis teb. Nws nrog txiv plig mus ntsib txiv Vaj Qhia Pis Yus 12, nyob Los Mas, muab tau ib qho khoom plig rau Yeeb nqa los rau nws niam. Xyoo 1957, pog Nkias Hwj siab ntsws cia li hloov tshiab tag los ntxuav plig ua neeg teev Yes Xus hwm Tswv Ntuj. Txij li Pog los ua neeg ntseeg Tswv Ntuj, tsis yog tus qub neeg lawm, yog ib tug neeg tshiab hloov dua tshiab tag, nquag teev ntuj, ntseeg Tswv Ntuj zoo ruaj thiab khov kawg, tsis ua siab me nyiag kev rov mus thawj txiv neeb li qee leej qee tus Hmoob. Khub los hmoov zoo, Pog tsis muaj mob muaj nkeeg, tsis noj ib lub tshuaj li lwm leej lwm tus neeg laus. Tej kws tshuaj txhua leej sawv daws qhuas. Tsuas yog laus laus tem toob lawm xwb. Xyoo tshiab no, kuv tus niam ntxawm Nchaiv Yias tau tso peb sawv daws tseg tim 8 thiab 9 lub 1 hlis no. Kuv tau mus saib, mus nrog nta nws lub ntsees nyuam qhuav tiav. Kuv thiaj txhob txwm mus saib kuv Pog los tau muaj 10 hnub xwb, twb tsis muaj mob li, nws nyob nws ntsej muag cus plaws, xav tsis txog tias nws yuav ncaim peb sai npaum li zaj npau suav. Huab Tais, thov koj mloog peb lub suab hu koj, pab txais peb Pog nyob ntawm koj xub ntiag nrog peb Yawg thiab ib tsoom poj yawm txwv txoob Hmoob sawv daws.
Cwj Vuam Chiv
Pog Nkias Hwj Yaj
Yaj Nkias Hwj tsev neeg
 |  |
Last edited by Maiv Tooj on 19th February 2011, 2:02 am; edited 1 time in total
Mim- Tswv Cuab Hmong Catholique
- Messages : 3770
Date d'inscription : 2009-10-16
- Post n°86
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Mim 27th January 2011, 7:17 pm
Nyobzoo sawv daws,
Kuv yuav tuaj ntxiv ob peb lo lus txog ntawm kuv pog Nkias Hwj. Lub caij uas peb yawg koob, yawg Txawj Tswb, thiab yawg Zam Nob nkawd los txais kev ntseeg ntawd, kuv yawg twb tuag lawm. Kuv txiv xav xav los txiav dab, ces kuv txiv mus taij kuv pog tias nws xav txiav dab, ces kuv pog tsis kam li. Kuv pog cem cem kuv txiv xwb. Muaj ib zaug kuv txiv rov mus hais pog, ces pog hais tias yog kuv txiv yuav txiav dab, ces tos kom pog tuag tso mam txiav no. Kuv txiv txawm teb pog tias. "Yuav thaum twg koj mam tuag maj?" Thaum ntawd kuv pog thiaj tu tu siab rau kuv txiv tias ua cas yuav hais kom pog tuag... Ces kuv txiv cia li mus txiav dab lawm...Xyov ua cas tsis ntev pes tsawg tom qab xwb, pog thiab txiv Paj Lis lawv ho cia li los txiav dab tas lawm thiab?...
Ua li kuv txiv hais, yog tos pog tuag no ntshai peb twb tseem tsis tau los ntseeg Ntuj li ho... Tiam sis Tswv Ntuj kuj qhia sawv daws lub siab,txawm muaj lo puav lus los sawv daws twb muab tso tseg tas, sawv daws tau los ntseeg Ntuj ntxov ntxov lawm. Peb cov neeg uas xub xub los ntseeg Ntuj ntawd mas peb ho tsis nco qab paub txog qhov tias yuav nyiag mus ua thaj puav neeb ntxiv thiab no...Tom qab no peb mam pom muaj ib co neeg txawj ua li ntawd.
Pog txoj hmoov zoo zoo es pog thiaj nrog peb nyob ntev ntev los txog tav no... Nim no mus ces peb yuav tsis muaj pog nrog luag hu lawm lau...
Kuv yuav tuaj ntxiv ob peb lo lus txog ntawm kuv pog Nkias Hwj. Lub caij uas peb yawg koob, yawg Txawj Tswb, thiab yawg Zam Nob nkawd los txais kev ntseeg ntawd, kuv yawg twb tuag lawm. Kuv txiv xav xav los txiav dab, ces kuv txiv mus taij kuv pog tias nws xav txiav dab, ces kuv pog tsis kam li. Kuv pog cem cem kuv txiv xwb. Muaj ib zaug kuv txiv rov mus hais pog, ces pog hais tias yog kuv txiv yuav txiav dab, ces tos kom pog tuag tso mam txiav no. Kuv txiv txawm teb pog tias. "Yuav thaum twg koj mam tuag maj?" Thaum ntawd kuv pog thiaj tu tu siab rau kuv txiv tias ua cas yuav hais kom pog tuag... Ces kuv txiv cia li mus txiav dab lawm...Xyov ua cas tsis ntev pes tsawg tom qab xwb, pog thiab txiv Paj Lis lawv ho cia li los txiav dab tas lawm thiab?...
Ua li kuv txiv hais, yog tos pog tuag no ntshai peb twb tseem tsis tau los ntseeg Ntuj li ho... Tiam sis Tswv Ntuj kuj qhia sawv daws lub siab,txawm muaj lo puav lus los sawv daws twb muab tso tseg tas, sawv daws tau los ntseeg Ntuj ntxov ntxov lawm. Peb cov neeg uas xub xub los ntseeg Ntuj ntawd mas peb ho tsis nco qab paub txog qhov tias yuav nyiag mus ua thaj puav neeb ntxiv thiab no...Tom qab no peb mam pom muaj ib co neeg txawj ua li ntawd.
Pog txoj hmoov zoo zoo es pog thiaj nrog peb nyob ntev ntev los txog tav no... Nim no mus ces peb yuav tsis muaj pog nrog luag hu lawm lau...
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°87
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 1st February 2011, 8:57 am
Nyob zoo Mim,
Ua tsaug rau nws zaj lus txuas ntxiv. Zoo kawg, nws pog yog ib tug neeg zoo, neeg tseem ceeb. Nws tos kom paub qhov tseeb nws mam ua, thaum nws txiav txim siab lawm, nws tsis hloov siab tsis thim. Nws yog ib tug qauv zoo uas peb sawv daws yuav tau xyaum. Yav thaum ub mas cov neeg los Txiav dab, lawv tsis rov qab mus ua dab ua qhua li, lawv ntseeg tiag tiag li, txawm lawv yog cov txiv neeb loj los lawv yeej tssi rov ua neeb ua dab li. Tab sis tom qab no ib cov neeg, lawv muab lawv tus kheej saib hlob, lawv kawm kev ntseeg tssi tag tsis txaus, lawv cia li Ntxuav Plhig. Thiaj ua rau lawv tsis muaj txoj kev ntseeg zoo, lawv tssi paub lub ntsiab, lub keeb ntawm txoj kev Ntseeg Ntuj. Lawv thiaj ib sab teev Ntuj, ib sab nyiag mus ua dab rau ub rau no, hais tus kheej tias peb ua Ntuj Kev Cai lawm los mus ua neeb tom luag tej tsev tau, kom luag ua neeb saib los tau...Tej nov yog yus tsa yus tus kheej, yus hais yus xwb nyob hauv txoj Kev Ntseeg tiag, tsis tau hais li ntawd.
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°88
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 1st February 2011, 9:55 am
Kuv yog Zam Nob Yaj, thawj tug tau txiav dab. Kuv lub neej, kuv ntsia lub ntuj lub teb. Kaj ntug txoog, sawv tsees los koj saib lub ntuj. Aub! lub ntuj yuav tshav yuav zoo ua noj ua haus.Hais txog dab mas kuv kawm txhua. Dab hauv toj hauv pes, lug tias 9 lub roob 9 tug xeeb toj, 10 lub roob 10 tus xeeb chaw. Qhov loj kawg nkaus mas yog qhov: Muaj ntuj thiab muaj teb thiaj muaj nroj muaj tsuag; thiaj muaj phaj laus thiab phaj hluas. Ntj thiab li muab faib ua nyias caj nyias ces, nyias haiv neeg nyias hais nyias lus.
Kuv kawm txog kev neeb kev tshuaj, kev dab kev qhua; dab vaj dab tsev, txhiaj meej pem xeeb, xwm kab los yeej, ncej cub ncej txos, ncej dab ncej qhua. koj yuav paub tej ntawd tas mas koj thiaj pom qab mus ua neeb kho luag.
Kuv muab ntau nqe tas, thaum kuv tseem coj dab coj qhua, kuv ua neeb ua ntsuj: Coj qaib coj npua coj mus thaiv, txhaws txoj kev tuag. Txheeb tus ntsuj plig ntshai muaj ib tug tub nkeeg yuav mus pw hauv lub qhov ntxa: Muab tus npua coj mus theej txhoj kom tso tau tus plig hauv lub qhov ntxa los. Qhov nov yog kev ua dab ua qhua. Yus ua neeb tas mas yus ho coj los fiv rau dab niam dab txiv. Txiv yug txiv thiaj hlub, thiaj fiv yeem ib tug nyuj dab. Fiv ib tug nyuj rau niam, ib tug rau txiv. Fiv tas tsis zoo ces ho tias: Ntuj tsim teb raug ces cia fiv ib tug dab ntuj lauj, ces ho fiv rau ntuj.
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°89
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 2nd February 2011, 1:48 am
Thaum kuv nyeem txog cov tim khawv kev ntseeg no, kuv pom tau tias cov uas paub kev cai dab qhuas zoo, cov uas lawv paub ntuj kev Cai zoo mas thaum lawv ua dab tsi, lawv ua tag nrho lawv lub siab. Lawv tsis ua xyem xyav.
Cov txiv neeb txiv yaig loj, thaum lawv txiav txim siab los txiav dab, ua Ntuj kev cai lawm, lawv tssi rov mus nyiag ua dab, saib tsawv, ib ruam mus ntseeg Ntuj, ib ruam mus ntseeg dab. Qhov lawv ib ruam mus ib ruam los, vim lawv tsis paub huav paus hauv ntsis zoo, lawv thiaj muaj qhov tsis tag siab. Kuj pab lawv tu siab txog qhov lawv ua ib ruam mus ib ruam los, qhov nov yuav yog ib qho kev plhom sij rau lawv, vim au lieu de pab lawv, yuav yog ib qho rhuav tshem lawv, vim tsis muaj txoj kev ntseeg thiab tso siab txaus thiab tiag tiag rau Tswv ntuj. Lawv tseem mus ntseeg teg yam kev txhaum uas twb paub tseeb tias yuav pab tsis tau lawv, tab sis ntxias lawv mus ua txhaum xwb...
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°90
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 4th February 2011, 3:43 am
 sau tim: 12 juin 2007Xyooj Xaiv Tuam yug tim 15/03/1948 nyob lub zos qab Phij Thuam Roob Nyuj Qus xeev Luang Prabang. Poj niam: Dawb Vaj Yug tim 16-01-1951 nyob rau lub zos Tw Laj xeev Luang Prabang. Los Tsuas teb. |  Xaiv Tuam, Roob Nyuj Qus 1957 |
Xyoo 1950, peb cov hmoob nyob lub zos Qab Phij Thuam tau tsiv los nyob rau lub zos Saum Roob Nyuj Qus (Bane Kiou Ka Cam).
Xyoo 1950 los txog xyoo 1954, kuv yeej tsis tau pom tsis tau paub txog Txiv Plig NYIAJ POV LI, txij xyoo 1955 los, kuv mam pom thiab paub txiv plig NYIAJ POV tseeb Zuj Zus los. Lib sij hawm kuv xeev xwm paub tau txiv plig li no ces txiv plig nws yeej nrog peb cov laus nyob lub zos Roob Nyuj Qus ntawd lawm thiab yeej hnov tej laus hu txiv plig lub npe ua thaj txiv plig Nyiaj Pov no lawm.
kuv kuj tsis paub tseeb xyov txiv plig lub npe hmoob tis thaum twg rau txiv plig los lawm, lub sij hawm uas kuv paub thiab pom txiv plig NYIAJ POV tseeb no. Nws yeej muaj 4 los 5 tug tub hluas hmoob nrog txiv plig NYIAJ Pov nyob kawm ntawm txiv plig.
Kuv txiv ntxawm XYOOJ Tsuj Rwg Rwg, yog ib tug nrog txiv plig NYIAJ POV nyob lub caij ntwad. Dhau xyoo 1955 los, txiv Plig nram ntug kev luv fais ntawm kuv txiv ntxa; Txiv plig Nyiaj Pov kuj tau los ua nws lub tsev nyob sab xis ntawm kuv txiv lub ntxa kwy yees li 100m xwb. Lub sij hawm ntawd, kuj muaj 5 los 6 lim hmoob tsiv nqes los nrog txiv plig NYIAJ Pov nyob ntawd thiab.
Kuv txiv ntxawm XYOOJ TSUJ RWG Yeej tau nrog txiv plig NYIAJ Pov nyob tau kawm kev cai ntseeg ntuj ntawm txiv Plig NYIAJ Pov.
Kuv txiv ntaxwm Tsuj Rwg txhiaj tau mus lawb dab thiab tau mus coj kev cai ntseeg ntuj ntawm txiv Plig NYIAJ Pov.
Xyoo 1957 kuv txiv ntxawm Tsuj Rwg txhiaj coj peb tsev neeg tsiv nqes los caum txiv Plig NYIAJ Pov rau ntawm lub zos ntawd. Kuv txhiaj tau los kawm kev cai ntseeg ntuj nyob lub zos ntawd. Xyoo 1957 ntawd, kuv kuj tau nrog cov me nyuam zej zog niaj hmo mus kawm ntawm hmoob nyob nram txiv plig NYIAJ Pov tsev. Nruab hnub kuv kuj tau mus nrog sawv daws ntawv nplog hauv txiv Plig NYIAJ Pov lub tsev kawm ntawv thiab. Kuv tau kawm li no tau muaj 3 los 4 hlis xwb, cov laus khwv ces kuv kuj tau tso kev kawm ntawv tseg tau ib ntus. Qhov rov niaj hnub tau kawm tsis so tsuas yog xyoo 1958 thiab xyoo 1959 xwb. Xyoo 1958 lub caij ua hmoov hla kuv txhiaj tau ntxuav Plig los ua neeg ntseeg ntuj kev cai nyob rau ntawm lub zos ntawd.
Xyoo 1959 lub caij luaj teb ntvov ntoo, txig Plig NYIAJ Pov thiab YAJ TXOOV Yeeb lawv txhiaj tau tsiv ntawm RoobNyuj Qus mus nyob rau teb chaws XAB NUAM lawm, cia zos Roob Nyuj Qus rau cov txiv plig Italie tuaj kav thiab tuaj nyob. Lub sij hawm ntawd yog txiv Plig TXHIAJ TSHAJ (Sactor) thiab txiv Plig ZOOV PHOOJ nkawd tuaj hloov txiv Plig NYIAJ Pov nyob ntawm lub zos ntawd xyoo 1959 lub 8 hli nrab, Txiv plig TXHIAJ TSHAJ thiab txiv plig ZOOV PHOOJ nkawd txhiaj tau xa YAJ Tswv Nkaub thiab Kuv wb mus kawm ntawv rau nram lub tsev kawm ntawv Séminaire Parsane qab Ventiane.
Xyoo 1959 lub 9 hlis mus txog rau xyoo 1963 lub 7 hli kuv tau kawm ntawv nyob hauv lub tsev Séminaire Paksane.
Xyoo 1962 txiv plig NYIAJ Pov tau los nyob Ventiane ntawm Nong Bone ntug Thad Luang . Kuv kuj tau los nram Paksane los so Vacance hauv txiv Plig tsev. Kuv tau ncaim txiv plig NYIAJ Pov mus uas tsis tau kev sib ntsib txij xyoo 1963 lub 7 hli mus txog xyoo 1967 lub 5 hlis, kuv mam rov tuaj nrog txiv plig nyob Ventiane.
Kuv poj niam yug tim 16 / 01 / 1951 nyob rau lub zos Tw Laj xeev Luang Prabang.
Xyoo 1962 thiab 1963, kuv poj niam kuj tau tuaj kawm ntawv nyob Ventiane. Tau tuaj nrog phauj Xis lawv nyob rau Nong Bone thiab. Kuv poj nian yeej paub thiab pom txiv Plig NYIAJ Pov thaum kuv poj niam tseem me los thiab. Wb ob niam txiv yeej paub txiv Plig NYIAJ Pov ntev los lawm.
Xyoo 1967 xb ob niam txiv tau rov tuaj nrog txiv Plig NYIAJ Pov nyob Ventiane ntawm Simuang.
Kuv poj niam wb tau ua hauj lwm pab txiv Plig NYIAJ Pov nyob Ventiane los txog rau xyoo 1975 wb txhiaj tau ncaim txiv plig NYIAJ Pov li 4 xyoos.
Xyoo 1979 lub 6 hli txiv Plig NYIAJ Pov mam rov tuaj nrhiav tau wb ob niam txiv nyob rau ntawm Vib Nais teb chaws thaib.
Txiv Plig NYIAJ Pov tau txais ib txog hauj lwm zoo heev ntawm tseem hwv fab kis hais txog yuav ib pab hmoob mus tsim lub neej tshiab nyob rau teb chaws Guyane Française. Txiv Plig NYIAJ Pov txhiaj tau tuaj kom kuv nrog txiv Plig NYIAJ Pov xam phaj ib cav hmoob nyob hauv lub zos Vib Nais mus rau Guyane teb.
Tim 30/10/1979 kuv tsev neeg nrog rau 5 yig hmoob. Peb tau sawv kev hauv Vib Nais mus rau Bang Kok.
Tim 7/11/1979 peb 5 yig hmoob Vib Nais nrog rau 4 yig hmoob nyob rau Nam Yao tau sawv Bang kok mus rau Guyane Française.
Tim 10/11/1979 peb 9 yig hmoob tau mus txog rau lub zoov nuj txeeg uas tseem hwv fab kis xav kom peb mus nyob. Txhua ib los ob lis piam twg yeej muaj cov hmoob lawv peb qab tuaj ntxiv peb. sawv daws tau tuaj txoos nyob ua ke ciaj ua ib zog kwv yees muaj li 5 los 6 pua leej. Tseem hwv txais npaum li ua ntej.
Nyob guyane kuv kuj tau pab txiv plig NYIAJ Pov coj tsoom hmoob tsim lub zos thiab pus hmoob ua noj haus lub neej tshiab rau teb chaws Guyane, lub zos txiv Plig NYIAJ Pov wb nyob ntawd yog lub zos hmoob thib ob lawm (Javouhey). Kuv kuj nrog txiv Plig NYIAJ Pov nyob Javouhev txij tim 10/11/1979 los txog rau tim 25/08/1983. Tim 26/08/1983 kuv tsev neeg tau tig rov los rau fab kis av loj. Txhiaj tau tso txiv Plig NYIAJ Pov nrog cov hmoob nyob rau teb chaws Guyanne. Txiv Plig NYIAJ Pov wb tau sib ncaim txij hnub ntawd los txog lub zij ceeb uas kuv tau teev tawm no. Txiv plig wb txhiaj tsis tau nyob ua kev li yav tag los.
Peb tssom hmoob feem coob nej yeej tsis tau pom los paub txiv plig NYIAJ Pov, feem tsawg txhiaj paub pom txiv plig xwb.
Peb sawv daws yuav nco ntsoov txog txiv Plig NYIAJ Pov lub txiaj ntsim. Txiv Plig NYIAJ Pov yog tus tau nrhiav kev qhib peb hmoob lub qhov muag. Txiv plig yob tus tsim cov ntawv hmoob rau peb haiv hmoob kawm. Niaj hnub no txiv Plig NYIAJ Pov cav ntawv sawv daws yeej siv puv txhia lub teb chaws uas muaj hmoob nyob. Peb sawv yuav nco ntsoov thov tswv ntuj pab txiv Plig kom txiv Plig NYIAJ Pov noj qab nyob zoo. Thov ntuj pov hwm txiv plig kom txiv plig nrog peb sawv daws ntev li ntev tau.
Kuv yog XYOO Xaiv Tuam !
Kuv yeej zeem tseeb thiab paub txog txiv Plig NYIAJ Pov zoo li kuv tau nqua ppiav lo no.
Tswv Ntuj nrog txiv Plig NYIAJ Pov hiab peb tsoom hmoon nyob.
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°91
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 5th February 2011, 11:26 am
 Kuv yog Phauj Xis, Kuv npe hu ua Phauj Xis (Carmen), kuv yug lub 5 hlis xyoo 1936, nyob Cherbrooke, Canada teb. Kuv niam thiab kuv txiv muaj 7 tus me nyuam, kuv yog tus 6. Kuv tau nrog cov ntxhais Hmoob nyob tau 13 xyoo rau lub tsev Noom Npos, Vees Cam Los Tsuas teb, |  |
kuv nyob Canada.
Kuv tau nrog cov ntxhais Hmoob
nyob tau 13 xyoo rau
Los Tsuas teb,
hauv lub nroog Vees Cam.
Cov uas tau nrog kuv
nyob thiab tau kawm ntawv
ntawm kuv yog cov ntxhais uas
tau tuaj nyob Vees Cam hauv
lub tsev Nong Bone.
Lub Tsev Nong Bone yog TP. Nyiaj Pov lub tswv yim tsim muaj. Nws xav npaj ib civ ntxhais Hmoob tuaj kawm ntawv thiab kawm kev ntseeg, kom yav tom ntej:
1- Xav npaj cov ntxhais uas xaiv lub neej Tab seeb, ua phauj los pab lub Koom Txoos.
2- Npaj ib cov ntxhais Hmoob kom paub kev ntseeg zoo rov mus nyob hauv lawv tej zos, yuav pab qhia kev ntseeg rau cov me nyuam hauv lawv zos.
3- Lub tsev Nong Bone yuav ua ib qho chaw rau tsoom ntxhais Hmoob tau kev kawm txuj ci xws li cov tub.
Cov ntxhais uas tau nyob hauv peb tsev Nong Bone mas lawv tau kawm tu vaj tu tsev raws li cov neeg nyob hauv nroog, kawm ua mov ua zaub, kawm ua paj ntaub. Ib qho ntawm peb qhia cov ntxhais yog muab faib ua tej pab 5-6 leej. Muaj ib tug hlob ua tus niam laus saib cov yau. Cov ntxhais faib ua tej pab no sib hloo kawm, sib hloo tu vaj tu tsev, ntxhua khaub ncaws raws li lub hnub uas faib rau lawv.
Tej yam hauj lwm uas tej pab ua muaj raws li nram no:
-Npaj tej zaj seev cev thiab nkauj txais xyoo tshiab. Lub Caij Tos Huab Tais : Npaj tej zaj nkauj, tej yam yees siv thiab tsoos tsho rau hmo hwm Yes Xus yug los.
Cov ntxhais uas tau tuaj nyob hauv peb lub Tsev Nong Bone txij xyoo 1962 txog 1975, muaj ze ntawm 150 leej. Ib txhia tau nyob ntev xyoo ib txhia tau nyob ib xyoos.
Nej coob leej tau thov kom kuv piav me ntsis txog kuv lub neej. Kuv yuav qhia rau nej tias kuv yog leej twg thiab vim li cas kuv saib lub tsev txais cov ntxhais Hmoob nyob Nong Bone.
Kuv npe hu ua"Carmen", kuv yug lub 5 hlis xyoo 1936, nyob Cherbrooke, Canada teb. Kuv niam thiab kuv txiv muaj 7 tus me nyuam, kuv yog tus 6.
Xyoo 1950: Kuv mus kawm hauv ib lub tsev qhia txuj ua xib hwb qhia ntawv. Yog hom tsev uas luag txais yus noj thiab pw hauv, kawm ob xyoos ces kawm tiav lawm.
Xyoo 1952 thiab 1953:
Kuv muaj 16 xyoo, kuv pib ua xiv hwb qhia ntawv rau ib pab me nyuam.
Xyoo 1954:
Kuv nyob hauv tsev pab kuv niam vim nws ib sij mob ib zaug. Kuv ua mov ua zaub tus vaj tu tsev, ntxhua khaub ncaws tej….
Xyoo 1957, lub 9 hlis:
Kuv mus ua Phauj hauv lub Koom Txoos Leej Phauj Oblate. Thaum ntawd kuv muaj 21 xyoos. Kuv qhia ntawv trau 4 hlis ces kuv mus ua hauj lwm hauv ib lub tsev Sau Siab.
Muaj neeg tuaj Sau Siab tsis tseg: tej pab tuaj sau siab 3-4 hnub, tej pab tuaj sau siab ob hnub, tej pab tuaj sau siab ib lis piam. Cov neeg tuaj sau siab, ua tej pab yog cov Tub Kamw Ntawv, tej pab yog cov Tub npaj kawm ua Leej Choj, tej pab yog cov Txiv Plig, lub tsev sau siab ntawd nyob pem cov roob qaum Montreal, yog ib qho chaw zoo nkauj thiab zoo saib heev.
Peb muaj 6 leej Phauj, peb yog cov tu vaj tu tsev, ntxuav tais diav, tu rooj hauv chav noj mov, kho txaj chaw pw. Niaj lis piam muaj txog 40 leej mus rau 100 leej , mas yeej muaj hauj lwm ua ntau tas li.
Xyoo 1959: Kuv thov cov tswj kom lawv xa kuv mus ua hauj lwm nyob lwm teb chaws. Ib xyoo tom qab, yog xyoo 1961, lawv teb rau kuv tias kuv puas xav mus Los Tsuas teb. Kuv zoo siab mus, tab sis kuv txhawj me ntsis vim lub teb chaws ua tsov ua rog.
Xyoo 1961, hnub tim 9 lub 12 hlis ntuj kuv mus txog Loos Tsuas teb. Kuv mus kawm lus Nplog nyob Paksane 6 hli. Lub 7 hli, kuv mus nyob Vees Cas, kuv qhia me ntsis ntawv rau peb tug ntxhais Hmoob. Yog Phauj Diav, Phauj Mos, Phauj Rhia. Thaum lub nroog Xeev Khuam tsis tau tawg, Txiv Plig Nyiaj Pov tau xa lawv peb leeg no mus kawm ntawv nyob hauv cov Phauj Dawb lub tsev pem Xeev Khuam.
Sab lauj rau xis:
1 Rhia Lauj
2 Phauj Xis
3 TP. Nyiaj Pov
4 Mos Xyooj
5 Diav Yaj
Xyoo 1962, lub 12 hlis: Txiv Plig Parent tuaj Canada teb tuaj xyuas peb nyob Los Tsuas teb. Txiv Plig Parent yog tus tsim koom haum Leej Phauj Oblate. Nws yog tus saib peb.
Txiv Plig Parent pom zoo kuv mus kawm lus Hmoob thiab ua hauj lwm rau cov ntxhais Hmoob ces TP. Nyiaj Pov thiaj li pib qhia ntawv thiab qhia lus Hmoob rau kuv.
Txiv Plig thiab peb tug ntxhais hlob tis npe Hmoob “Phauj Xis” rau kuv.
Vees Cam 1972
30 XYOO TOM QAB, FAB KIS TEB LUB 9HLIS 2006
Xyoo 1963, lub 12 hlis: Txiv Plig Nyiaj Pov, Xib Hwb Txoov Yeeb thiab nws niam lawv coj kuv mus xyuas Hmoob cov zos thawj zaug. Yog lub zos Pas Qav, nyob Sayabury.
Txij xyoo 1963, kuv pib qhia ntawv rau cov ntxhais Hmoob nyob Nong Bone.
Xyoo 1965: Cov ntxhais tuaj coob heev, chaw tsis txaus rau lawv pw. Peb thiaj sab laj ua ib lub tsev ntxiv, txuas chav trsev nij mov , ua dua ib lub tsev ua mov tshiab. Yog Txiv Plig Tswv Tuam (Lynde) pab ntiav neeg ua lub tsev . Peb thiaj ua tau ob lub tsev txaus 40 leej nyob.
Txij xyoo 1965 mas muaj ib cov ntxhais yau coob thiab ib cov ntxhais hlob uas tuaj pem zos Hmoob tuaj txog tsis tau paub ntawv li, peb thiaj npaj kom lawv kamw ntawv hauv tsev, peb ntiav ib tug xib hwb Los Tsuas qhia lawv.
Hos cov yau thiab cov nrab uas paub ntawv me ntsis, mas lawv mus kawm hauv Koom Txoos Kas Tos Liv cov tsev qhia ntawv.
Peb tug ntxhais hlob, Phauj Diav, Phauj Mos thiab Phauj Rhia lawv mus nrog cov xib hywb kawm Kev Ntseeg tom cov xib hwb lub tsev.
Txij xyoo 1965 mus, mas pib muaj Hmoob tuaj kho mob nyob Vees Cas coob zuj zus, ib txhia tuaj so hauv peb tsev. Txhua zaus kuv yuav tsum coj lawv mus cuag cov kws kho mob Fab Kis, vim lawv tsis paub lus. Tej tug poj niam thiab tej tug ntxhais tuaj kho mob, cov kws kho mob yuav kom lawv nyob ntev kho lawv tus mob, mas thaum ntawd lawv nrog peb nyob. Ntau zaus kuv txhaj tshuaj, yuav tshuaj thiab muab tshuaj rau lawv nyob Nong Bone.
Cov ntxhais nyob Nong Bone kuj tau sib pab mus xyuas cov Hmoob tuaj pw tom tsev kho mob nyob Vees Cas. Peb cov ntxhais faib ua tej pab 3 leeg xa mov xa zaub mus rau lawv noj, saib xyuas kom lawv tau kev tham luv Hmoob thiab pab lawv tej chaw siv.Peb pab cov Hmoob tuaj Toj siab tuaj kho mob zoo li no.
Tau nyiaj txiag qhov twg los them nuj nqes:
Muaj ntau pab neeg thiab coob leej neeg tau pab nyiaj kom peb tau txaus them nqe vaj nqe tsev thiab muas noj muas haus rau sawv daws.
1- Thawj tus uas tau pab ntev xyoo yog Tswv Qhia Loosdreght, nyob Vees Cas txij xyoo 1962 txog rau 1975.
2- 2-Lub Koom Haum txhawb kev ntseeg nyob Rom.
3- 3- Txiv Plig Vaj xwm tau thov cov ntseeg nyob As Mes Liv Kas teb, nws nqa nyiaj los rau peb.
4- Cov ntxhais uas tau nyob Nong Bone niam thiab txiv kuj tau pab nqi noj haus thiab nqi kawm ntawv.
5- Kuv txiv tau muab nws ib thaj av muag, ces nws xa nyiaj tuaj pab peb.
6- Txiv Plig Nyiaj Pov tus muam ua tus nrhiav nyiaj nyob Fab Kis teb, nws xa tuaj pab cov tub thiab cov ntxhais.
7- Lub Koom Haum Leej Phauj Oblates.
8- Thaum kuv rov mus Canada teb, mas kuv mus thov hauv cov tsev teev Ntuj, ces sawv daws pub txaus kuv them nuj them bqe li ob xyoos tej.
9- Thaum cov ntxhais sib pab ua paj ntaub thiab ua tej tus me nyuam roj hmab hnav Hmoob xa mus muag, kuj tau me ntsis nyiaj los pab peb lub tsev thiab.
10- Muaj ib lub Koom Haum nyob Austria hu ua “Ladies of Austria” tau pab peb cov hauj lwm xaws tshuab.
11- Ib pab poj niam As Mes Liv Kas tau pab 5 lub tshuab xaws khaub ncaws rau peb thiab yam puav ntaub xov rau cov hauj lwm xaws tshuab.
Cov ntxhais thaum ub tau nrog Phauj Xis nyob Vees Cam.
Lub 7hli xiab 3 xyoo 2004. St. Paul MN. USA
Vim muaj ntau leej tau cev tes pab peb, mas peb thiaj ua tau ntau yam. Kuv tsis tau hais qhia nej paub txog tej no, zaum no txog caij uas sawv daws yuav tsum paub txog txhua yam.
Xyoo 1967, lub 5 hlis: Kuv rov mus so nyob Canada ob peb hlis. Kuv mus txog rau Canada tau 3 lis piam, peb ua tshe poob qab ke. Raug kuv tus txha caj qaum ntawm duav lov 5 voj, lawv muab kuv cam zeb sib (plâtre) txij caj dab txog nram ntsag 4 lub hlias nkaus. Thaum tsis cam zeb sib lawm mas kuv yuav tsum hnav ib lub tsho zawm uas muaj ib cov pas hlau txheem kuv lub duav. Kuv maj mam ua tej hauj lwm sib sib tau ib xyoos.
Xyoo 1968: Kuv rov qab mus Nong Bone, rov mus ua kuv tej qub hauj lwm li yav thaud.
Kuv kuj qhia kev noj qab haus huv rau cov ntxhais uas kawm xaws khaub ncaws. Vim peb npaj kom yav tom ntej cov ntxhais no tau mus qhia lwm cov nyob hauv cov zos Hmoob.
Xyoo 1969: Txij xyoo 1969 mus txog rau 1975 mas txhua hnub yav sawv ntxov peb qhia xaws khaub ncaws rau ib pab ntxhais , yav noj sus tas peb qhia xaws khaub ncaws rau ib pab poj niam ( yog cov niam xib hwb), muaj ib tug xib hwb qhia ob pab ntawd.
Xyoo 1971, lub 3 hlis: Kuv rov mus nyob rau Canada ob peb lub hlis. Lub 9 hlis kuv rov qab mus nyob Nong Bone, rov ua tej hauj lwm li qub, kuv ua cov hauj lwm li piav los saum no txog xyoo 1975.
Xyoo 1975, lub 5 hlis: Lub teb chaws poob ces cov ntxhais rov mus tsev yuav luag tas, tshuav 4-5 leeg tseem nyob, lawv tos nrhiav kev tawm rau Thaib teb.
Kuv nyob tu lub tsev, tu tej ntaub ntawv, muab tej yam pov tseg. Thaum tshua kuv ib leeg nyob Nong Bone lawm xwb, mas kuv mus nrhiav seb leej twg los pab neeg twg xav yuav peb cov rooj tog, txaj chaw pw thiab txee. Kuv thiaj muab tej ntawd pub tib si rau lub Tsev Qhia Kho Mob Si Sa Van Vong ( Yog lub Hoos Mom 150 lub txaj niaj hnub no 2010).
Thaum lawv tsis pub kuv nyob ntxiv lawm mas kuv thiaj tawm Los Tsuas teb lub 8 hli 1975 mus nyob rau Chieng Mai, Thaib teb. Muaj ob peb tug ntxhais Hmoob nrog kuv nyob.
Txiv Plig Nyiaj pov kuj nyob Chieng Mai thiab, kuj muab ob peb tug tub kawm ua xib hwb nrog Txiv Plig nyob ua ke. Ntawm kuv, kuv yuav tsum tawm Thaib teb mus thov ntawv tsis tseg, kuv tsuas tau nyob 20 hnub sib law nyob Chieng Mai xwb. Txiv Plig Nyiaj Pov kuj tib yam thiab, nws tssi tau ntawv nyob Thaib teb, nws yuav tsum mus mus los los rau Fab Kis teb, rau Singapour, thov ntawv nyob Thaib teb.
Cov ntxhais thiab cov tub uas nyob Chieng Maim muaj chaw ntxhov siab ntau, vim lawv tsis paub tias lawv tsev neeg khiav mus rau qhov twg tag lawm. Lawv tsis qab siab ua dab tsi li.
Xyoo 1976, lub 3 hli: Kuv rov los nyob Canada teb. Kuv saib ib lub tsev uas cov phauj muaj mob thiab cov phauj laus nyob. Kuv ua hauj lwm hauv lub tsev ntawd tau ib xyoos .
Xyoo 1977: Thaul lub 9hlis, kuv kawm txog Tswv Ntuj kho neeg lub tswv yim (théologie) nyob Ottawa ib xyoos.
Xyoo 1978: Kuv kawm ua ib tug Psychoterapist, nyob Ottawa ob xyoos.
Xyoo 1980: Kuv ua txoj hauj lwm Psycotérapist (psycothérapeute) nyob Sherbrooke, yog lub zos kuv yug los.
Xyoo 1985: Kuv rov kawm dua ib xyoos ntxiv.
Txij xyoo 1980 mus txog xyoo 1985 mas kuv kawm ntawv hmo ntuj thiab kawm week-end.
Txij xyoo 1986 los txog tav no, mas kuv niaj hnub ua txoj hauj lwm psycoterapist li qub. Zaum no kuv ua hauj lwm tsawg zuj zus. Lwm xyoo mas kuv yuav ua hauj lwm 2-3 teev rau ib lis piam xwb.
Thaum kuv nrog cov ntxhais Hmoob nyob, kuv tau kawm ntau yam ntawm lawv, lawv tau pab kuv ua ntau txoj hauj lwm tiav.
Kuv xav hais ua tsaug rau nej txhua tus ntxhais uas tau tso siab rau kuv thizab tau nrog lwm cov ntxhais uas tau tuaj nyob Nong Bone.
Kuv nco ntsoov peb tug ntxhais hlob uas tau pab kuv ntau xyoo: yog Diav Yaj, Rhia Lauj, Mos Xyooj. Yog tssi muaj lawv peb leeg no pab kuv, mas peb yuav ua tsis tau txhua yam uas peb tau muaj nyob Nong Bone. Tseem muaj lwm cov ntxhais uas tau nyob ntev xyoo nyob Nong Bone, lawv tau pab kuv tuav xam txog peb tej hauj lwm, pab ua kom cov ntxhais nyob Nong Bone muaj kev lom zem, kom lawv tau kawm kev ntseeg thiab tau klev kawm ntawv. Kuv saib lawv txoj kev pab kuv muaj nqes kawg.
Kawg no kuv thov ua nej sawv daws tsaug uas nej tau nco txog kuv, tau siv nyiaj siv txiaj thiab tau npaj caij nyoog caw kuv tuaj ntsib nej, pom nej sawv daws hmo no. Kuv zoo siab kawg nkaus, kuv thov ua Tswv Ntuj tsaug vim nws tau pub txoj sia ntev rau peb txhua txhua tus tau rov tuaj sib ntsib dua. Kuv nco txog nej cov ntxhais Hmoob uas kuv tau nrog nyob tau nrog haus ua ke. Nej yuav hauv kuv lub siab lub ntsws mus tas ib sim. Kuv tau tuaj qhia txoj kev vam meej rau nej, tab sis nej ho qhia haiv Hmoob lub neej thiab lub siab rau kuv.
Hmo no kuv pom nej coob coob tus tau lub neej zoo lawm, kuv nrog nej zoo siab, kuv qhuas txog nej.
Kuv thov kom nej txhob hnov qab txog tswv Ntuj txoj kev hlub uas nws muab pub rau nej.
Tus sau: Phauj Xis
Tim 10 lub 5 hlis 2004
Tim 10 lub 5 hlis 2004
Last edited by Maiv Tooj on 16th August 2011, 9:20 am; edited 2 times in total
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°92
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 12th April 2011, 6:11 am
TP.Nyiaj Pov muab nws lub neej txi rau Ntuj txhawb Hmoob lub neej tsim nuj.MP4
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°95
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 5th February 2012, 2:12 am
TP.Nyiaj Pov, 3 tug kws txuj Tsim Ntawv Hmoob 28 June 1997.MP4
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°96
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 13th April 2012, 12:54 am
Hawm txog cov tiam lis thiab ib tsoom niam txiv kwv tij phooj ywg,
Hnub no, zoo siab tuaj ntsib nej yog vim tias Txiv Plig Nyiaj Pov tau ncaim peb txwm 5 lub xyoo rau xyoo 2012 no.
Aumônerie Kav Tov Liv Fab Kis Teb koom siab nrog TP Nyiaj Pov tsev neeg npaj ib lub caij tos peb cov Hmoob tuaj mus sib sau nyob Prinquiau, hnub tim 2 thiab 3 lub 6 hli ntuj (invitation ci-jointe).
Hais txog txaj chaw pw thiab zaub mov :
1- Chaw pw : peb thov tau 50 lub txaj pw hauv lub tsev ntiav “La Ducherais” ( ze ze ntawm zos Prinquiau).
Yog nej leej twg txaus siab tuaj so hauv lub tsev ntiav, thov nej ceeb toom sau nej npe qhia tuaj rau T.P Cwj Vuam Chiv los Xaiv Tsom Yaj ua ntej xiab 10 lub 5 hlis 2012. Vim peb yuav tsum hom chaw kom meej rau luag raws luag txoj cai.
Tus nqe ib leeg yog 27 € (Pw 1 hmo thiab noj 1 pluag tshais).
2- Zaub mov : Hmo xiab 2 tsaus ntuj, qhov yooj yim rau sawv daws peb nyias npaj nyias hmo tuaj noj ua ke ntawm chaw.
Thaum noj hmo tas, yuav muaj zov hmo sib fim ua ke nrog tsev neeg Bertrais, lawv yuav los piav TP Niaj Pov lub neej rau peb Hmoob.
Yog tias leej twg muaj txuj xav nthuav ua kev lom zem zov hmo, thov qhia nej npe tuaj ua ntej.
Hnub chiv, pej sawv daws yuav teev hawm txog peb Txiv Tswv Ntuj, nco txog TP Nyiaj Pov thiab ua Ntuj tsaug.
Vam tias sawv daws yuav tuaj koom tau raws li siab xav.
__
L'Aumônerie Catholique des Hmong de France s'associe à la famille Bertrais pour célébrer, le week-end des 2 et 3 juin 2012 à Prinquiau (44), une messe à l'occasion du 5eme anniversaire du décès du Père Yves Bertrais.
Vous trouverez sur l'annonce en pièce jointe, le détail du programme prévu pour ce temps de rencontre.
Pour faciliter votre déplacement, nous avons demandé 50 lits au domaine de la Ducherais ( à quelques kilomètres seulement de Prinquiau ). Si vous désirez bénéficier de cet hébergement, nous vous remercions de vous faire connaître auprès du Père Antoine ou Yaj Xaiv Tsom.
Le coût par personne pour la nuitée avec le petit déjeuner est de 27€.
La clôture des inscriptions est fixée au 10 mai 2012. La liste sera ensuite transmise au directeur de l'établissement.
Pour le repas du samedi soir, nous mettrons en commun le panier que chacun aura pris le soin de préparer.
Enfin, dans le cas où quelqu'un souhaiterait intervenir pour partager une attention particulière avec l'assemblée (chant, poème,...), il serait souhaitable de nous en faire part à l'avance. Ceci afin de nous permettre de l'intégrer au programme.
Nous nous remercions pour votre compréhension, et pour la diffusion que vous ferez de cette information auprès de vos communautés respectives.
Nous serons heureux de vous retrouver à Prinquiau pour ce temps fort. En attendant, nous restons à votre écoute pour toute précision complémentaire.
Fraternellement,
Père Antoine YANG
YAJ Xaiv Tsom
Aumônerie des Hmong Catholiques de France
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°97
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 11th May 2012, 9:42 am
Huab Xev, Sayaboury, Nplog teb 1964. Thaum mus teev Ntuj tag.
Tom hauv ntej lauj rau xis:
1- Tsom Thoj,
2-Nyiaj Teem Yaj,
3-Ntaj Yaj (Paj Lis),
4-Yaj txhiaj,
5-Suav Nus yaj,
6-Tswv Kaus Xyooj,
7-Txoov Neeb Thoj,
8-Ntsuab Riam Yaj,
9-Nkaj Nus Yaj,
10-Paj Nus Yaj,
11- Nkias Teeb yaj,
12-Ntxhoo Lug Thoj,
13-...?
14-...?
Nraum nraub qaum:
1-...?
2-...?
3-...?
4-...?
5-...?
6-Mos Yaj (Zam Muas),
7- Maim Thoj(Niam Faiv Ntxhos)
8-Kab Yeeb yaj(niam Tswv Lauj)
9-Xw Yaj(niam Vaj Thaiv Thoj)
10-Paj Yaj(niam Qhua Xab)
11-Zuag Vaj(niam Ntxoov Kim Yaj)
12-Qawm Yaj(Tsuj Xyooj)
13- ...?
14-Maib Thoj(niam Liaj Tsheem)
15-See Thoj(niam Tswv Nkaub)
16-Tshaus Thoj(niam Nkaj Teev)
17-Paj Xyooj.
Ob tug Xib Hwb: 1-Thoj Tshw Hwj, 2-Nom Yeeb tsab
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°98
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 30th May 2012, 5:49 am
Txiv plig Nyiaj Pov Hmoob tus cawm seej.
1-Ntawm no mus-------------------------kuv thov los sau
Muab xa rau-----------------------------Txiv Plig Nyiaj Pov
Raws li hnov-----------------------------Tswv Ntuj leej tub
Koj muaj lub----------------------------me zoo txiaj ntsim
2-Lub hwj chim--------------------------- haiv neeg twj lij
Koj npaj txhij--------------------------lub keeb puam chiv
Niam thiab txiv------------------------------tau tu koj hlob
Yug los nyob---------------------------Tswv Ntuj xub ntiag
3-Muaj tseeb tiag----------------------koj kaum ob xyoos
Ua koom txoos--------------------thiab nyiam Tswv Ntuj
Koj npaj txuj-------------------------tuaj qhia peb Hmoob
Nyob pem roob---------------------muaj coob muaj ntau
4-Koj hais rau-------------------------txhua leej txhua tus
Kom nthuav mus---------------kawm txawj kawm ntse
Nyob ua ke--------------------------------tsis cem tsis khib
Leej tub txib--------------------------------siab loj siab dav
5-Txaj chaw lav------------------------------sib faib rau pw
Raws txoj lw----------------------------ntawm Vaj Yes Xus
Tub cev lus---------------------------tshaj Tswv Ntuj Moo
Nqes lis loo------------------------------theej peb lub txim
6-Thiaj khiav dim-------------------------tus me ntsuj plig
Yuav zuag tig-------------------------thaum nws tuaj txog
Teb chaws nplog---------------------rau thaum lub xyoo
Suav pib loo---------------------ib cuaj tsib ntxaiv (1950)
7-Ntsib Hmoob haiv------------------neej pluag ploj plus
Roob Nyuj Qus-----------------------tuaj nrog cawm haiv
Huab tais xaiv----------------------------txiv plig Nyiaj Pov
Plaub hlis rov---------------------------hnub tim kaum xya
8-hnov moo ncha---------------------Tswv Ntuj hlub peb
Txawm nyob deb------------------txhob poob kua muag
Kev sib cuag--------------------------pem ntuj ceeb tsheej
muab xam txheej------------------------ib cuaj plaub yim
9-Txiv Plig fim-------------------------tuam ceeb Vees Cas
Hmoob txuj ras----------------------------los yog muaj koj
Yuav tau soj--------------------------------koj lub zim txwv
Tus neeg khwv-----------------------kev muaj txiaj ntsim
10-Tau txheej txhim---------------------kho txoj kev ncaj
Tswv Ntuj tshaj-----------------------------leej me tub txib
Koj npaj pib------------------------------los yug dua tshiab
Kua muag iab-------------------kom Hmoob txhob muaj
11-Txoj kev quaj----------------kom Hmoob txhob ntsib
Yam tsob dib------------------------------cab hmab puv toj
Yuav nco koj------------------------------tej me txiaj ntsim
Mus ib sim------------------------------tsis muaj hnub ploj
12-Thov kom koj--------------------------tau mus nyob ze
Zaum ua ke----------------------------nrog Huab Tais Ntuj
Koj teeg txuj---------------------------kom nws nthuav loj
Rov los coj-----------------------------peb ib tsoom ntseeg
13-Tus zoo neeg--------------------------mus zoo koj mog
Thov nco txog-----------------------peb ib tsoom Hmoob
Pem toj roob-------------------------------lub zej zos txhua
Peb yeej tshua---------------------------txiv plig Nyiaj Pov
14-Peb yuav thov-----------------------Tswv Ntuj rau koj
Txiaj ntsim loj----------------------------kom koj tau txais
Yuav zuag hais--------------------------tej lus ntos txheeb
Pib chiv keeb------------------tsim ntaub ntawv Hmoob
15-Muab tseb thoob---------------rau Hmoob qab ntuj
Teeg Hmoob txuj------------------thiab txeeg Hmoob ci
Sawv tuaj ntxhi--------------------------ua tus cawm seej
Pab Hmoob neej----------------------nyob rau Los Tsuas
16-Lus qhuab ntuas-----------------qhia Hmoob yaj sab
Tuaj nrog pab--------------------------qhia txuj ntau yam
Pib nthuav tham----------------------txog ntawv las tees
Muab cob ntsees-------------------los ua Hmoob ntawv
Coj sau sawv-------------------------hais Hmoob lus meej
17-Hmoob txhua leej----------tuaj kawm nchuav ntws
Sawv coj plws---------------------hlub tsev neeg Hmoob
Nyob pem roob---------------------------los yog nram tiaj
Kev tsim txiaj----------------------nthuav los txhawb nqa
18-Thiaj tau xa------------------------ntau leej tub kawm
Li tau tawm----------------------------------tuaj Fab Kis teb
Daim av deb-----------------------------nyob ntuj Aws Luv
Raws li kuv --------------------------paub qhov tseeb tiag
19-Hmoob pib kiag----------------------tau tuaj kawm deb
Fab kis teb-----------------------------------nws yog Yaj Tsab
Yog thawj pab------------------------------Nyiaj Pov xa tuaj
Hmoob thiaj muaj----------------------txoj hau kev kawm
20-Li tau tawm-----------------------tuaj txawv teb chaws
Laj txheej ntxaws--------------------Hmoob pom kev deb
Raws ntiaj teb-------------------------------txoj kev ua neej
Hmoob txhua leej-------------------------thiaj li hwm nws
21-Txoj kev plws----------------txhawb nqa Hmoob neej
Muaj ntau leej-------------------------------los koom ua ke
Nrhiav lub npe------------------------------los rau kom zoo
Hmoob tis loo---------------------------nws npe Nyiaj Pov
22-Sawv los thov--------------------Tswv Ntuj txoj hmoo
Kom pov loo-------------------------------tsev neeg yaj sab
Nyob kab ntsab---------------------------kom kaj siab nrig
Tawm tuaj ncig------------------------xyuas txhua lub zos
23-Hmoob txais tos---------------------nws txoj kev hlub
Ntuj tau pub------------------------------Txiv Plig tus kheej
Los qhia meej----------------------------txoj kev cai tshiab
Hmoob toj siab-----------------------------tau Ntuj lus zoo
24-Nyob muaj hmoo----------------muaj txiag nplua nuj
Kev tshav ntuj------------------------Hmoob pom kev dav
Lub ntuj tshav----------------------rau Hmoob lawm ntau
Lub neej dhau-------------------------yeej muaj tseeb tiag
25-Neej kaj liag-------------------------vim muaj tus tswv
Txoj kev khwv-----------------------kom neej Hmoob zoo
Nyob nto moo-------------------------raws neeg ntiaj teb
Nws thiaj ntxheb-----------------nrhiav hauv kev tawm
26-Txoj kev kawm-----------------------------luag li txuj ci
Sib pab ntxhi--------------------kom Hmoob txawj txhua
Kev ua qhua----------------------------txawj koom ua pab
Nyob yaj sab------------------------muaj tsev teev hawm
27-Qhia Hmoob kawm------------------Tswv Ntuj tej lus
Paub coj mus----------------------------thov kev zam txim
Kom peb dim----------------------txoj kev txhaum txheej
Nrog muaj neej------------------------mus sib haum xeeb
28-Nyob thaj yeeb--------------------------mus tag ib sim
Koj txiaj ntsim----------------------------yuav nto moo lug
Hauv txhua tus ---------------------neeg Hmoob lub siab
Nyob ib txhiab----------------------------tsis ploj tsis qaug
29-Thov ua tsaug----------------------leej twg hnov txog
Thov ho nrog-------------------kuv muab ntos txheeb
Yam uas tseeb-----------------------Nyiaj Pov tau tsim
Tej txiaj ntsim--------------------nws tau pab Hmoob
30-Peb feem coob---------------------yeej to taub meej
Nws tus kheej------------------tsim tau Hmoob ntawv
Tsa Hmoob sawv-------------------nrog muaj neej zoo
Coj Hmoob loo---------------------tuaj rau ntuj tshiab
31-Kev kaj siab--------------------------Fab Kis Av Me
Nyob ua ke------------------------------tau noj tau hnav
Muaj tsheb tsav-----------------------muaj liaj teb zoo
Nyob nto moo-------------------------neej kab siab lug
32-Hmoob muaj tug-----------------nrog luag ua neej
Nyob peem tsheej----------------muaj suab muaj npe
Tho txoj ke------------------------rau Hmoob tau taug
Ua nws tsaug---------------------------tsis tag tsis kawg
33-Txawm txoj yawg------------------tso lub ntiaj teb
Hais txog peb--------------------ib tsoom neeg Hmoob
Tuav lub koob -------------------------coj lub npe mus
Peb txhua tus-----------------------------ua neej tos koj
34-Rov los coj--------------------pawg ib txwm ntseeg
Koj pab neeg-------------------------nws ib txwm hlub
Ntuj tau pub-----------------------------koj ua leej txiv
Coj peb ntxiv------------------------rau neej pem suab
35-Tswv Ntuj muab-----------txoj hmoov dua tshiab
Los cog siab-------------------------ua Hmoob leej txiv
Rov los chiv-----------------------------yug dua ib zaug
Kom hmoov raug---------------------los hlub peb dua
36-Txog kev tshua--------------------peb nco koj tshaj
Nyob saum yaj-------------------------tos koj txhua tus
Koj ncaim mus---------------------tso hmoov roos peb
Hmoob ntiaj teb----------------------noj qab nyob zoo
Txhiab pua xyoo----------tseem nyob tos koj…mog ! TP.NyiajPov
Tus sau: Maiv Tooj,
Fab Kis teb. Lub 6 hli 2007.
Tus kho thiab ntxiv: Vaj Nruas,
Radio HmongWord, Wisconsin, USA.
Tim : 26-05-2012
Maiv Tooj- Tswv Cuab Hmong Catholique
- Messages : 5544
Date d'inscription : 2009-08-18
- Post n°99
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Maiv Tooj 12th March 2013, 5:39 am
TP NYIAJ POV-PEB YUAV NCO KOJ MUS IB SIM
Mas Lias- Tuaj Tshiab
- Messages : 57
Date d'inscription : 2012-03-09
Tim Khawv Nco Txog Txiv Plig NyiajPov
Xyoo 2007 thaum lub 6 hlis, thaum Txiv Plig NyiajPov tuag, tsis muaj neeg xa xov rau peb li. Peb yeej tsis paub tias muaj xum dab tsi li.
Nyob, nyob muaj ib hnub, hnub ntawd yog hnub zuj hlis (samedi) yav tsaus ntuj ; txawm muaj ib tsab xov tooj nrov tuaj rau kuv tias TxivPlig NyiajPov tau tas sim neej lawm, lawv muab coj los pam nyob rau Orléans.
Thaum kuv hnov dleev li ntawd, kuv lub siab poob nthav, tsis paub xav zaj twg li. Kuv txawm khob kiag xov tooj mus rau kuv tus txiv kom los, es yuav npaj mus xyuas TxivPlig. Kuv tus txiv los txog ntua, peb thiaj npaj zoj zeeg sawv kev tuaj yog 6 teev yav tsaus ntuj, tuaj mus txog pem Orléans yog 1 teev 30 fiab ib tag hmo.
Thaum peb tuaj txog ntua, nqis kiag tsheb, kuv txawm mus hais nyob zoo rau cov neeg uas kuv paub tsuag tsuag tas nrho, kuv nkag kiag mus hauv tsev, txawm nug cov poj niam nyob ze ntawd tias: kuv mus xyuas TxivPlig puas tau, thiab kuv xav thov ntuj rau nws?
Lawv teb kuv tias: tau kawg! Thiab koj taws ib tug tswm ciab nqa mus rau los tau!
Kuv thiaj nqa kiag ib tug tsum ciab mus txog ntua, kuv txhos caug kiag ntawm lub hleb ib sab, kuv hais li no:
"TxivPlig NyiajPov, kuv ib txwm tsis tau pom dua koj li, tab sis kuv xeev xwm los kuv yeej hnov ntsoov koj lub npe; koj los yeej tsis tau paub kuv thiab kuv tsev neeg. Hnub no koj tau ncaim peb tsoom hmoob mus, mas kuv tuaj ua koj tsaug. Vim muaj koj, koj tau tsim ntawv los rau peb, zaum no peb hmoob tau tawg teb chaws, peb thiaj muaj ntawv los sau sib nug moo. Yog tsis muaj koj los tsim cov ntawv hmoob no rau peb, ntshe peb hmoob yuav nyuaj sib nug tau moo. Mas ua koj tsaug ntau ntau TP. Koj ib sim neej, koj muab los ua hauj lwm pub rau peb hmoob, pab peb hmoob, Ntuj txoj hauj lwm, koj twb kiav tas rau peb lawm, kuv ua Ntuj tsaug thiab ua koj tsaug, thov kom peb txiv Tswv Ntuj txais koj mus nyob saum nws lub ceeb ntsheej.
Niam MabLiab thov koj nrog kuv thov peb txiv Tswv Ntuj rau peb tus TP NyiajPov no, kom Peb txiv TswvNtuj txais nws mus, vim nws hlub peb tsoom hmoob tiag."
Thaum kuv thov ntuj li no tas, kuv tseem tab tom teev zaj "Peb txiv Nyob saum Ntuj", kuv ib ce tshee na txias vaug sau tau hau thoob ib ce mus rau nram ro taw.
Kuv lub siab nyob kaj lug, paub tau tias TP NyiajPov mus ua ib tug Leej Ntshiab lawm.
Ua rau kuv zoo siab hlo rov los tsev.
Sponsored content
- Post n°101
Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
Sponsored content
Similar topics
» TP.TSHAJ SAWM THIAB TP. NYIAJ POV. XYOO 2005 ( Nias ntawm no saib txuas ntxiv )
» Saib Video T.P Nyiaj Pov thaum nws tseem muaj txoj sia nrog peb nyob Fab Kis Teb ( Niam ntawm no saib txuas ntxiv )
» Hmoob & Tsov Rog Fab Kis 1950-54 ( Saib duab nias ntawm no )
» Hmoob Roob Nyuj Qus 1956-57 ( Saib duab nias ntawm no)
» TXIV PLIG NYIAJ POV LUB NTEES
» Saib Video T.P Nyiaj Pov thaum nws tseem muaj txoj sia nrog peb nyob Fab Kis Teb ( Niam ntawm no saib txuas ntxiv )
» Hmoob & Tsov Rog Fab Kis 1950-54 ( Saib duab nias ntawm no )
» Hmoob Roob Nyuj Qus 1956-57 ( Saib duab nias ntawm no)
» TXIV PLIG NYIAJ POV LUB NTEES
Niam Mab Liab
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.Tshiab Mis Kas Ees
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.NtawvXamNyoog2017_18_B.
Ntawv Xam Nyoog xyoo B : 2017-2018
KEV KAWM
Qhia Ntuj kev cai tus sau Maiv Tooj
Ntuj kev cai lub ntsiab nias hauv no
|
KEEB KWM
NKAUJ TEEV NTUJ
KOOM TXOOS
CAW LOS NYEEM NTAWV
