| Thoj Tub Xab Roob Nyuj Qus 1954
|
| Paj Vaj, Nong Bone Vientiane 1963
|
| | Yaj Vwj, Lycée Vientiane 1967
|
| Thoj Qua Xab 2007
|
| | Paj, niam Txhiaj Vwj, lub 6 hli 2007
|
| | Txhiaj Vwj Yaj, lub 6 hli 2007
|
Txiv plig Nyiaj Pov lub npe Fab Kis hu ua Yves, Xeem(tsev neeg) BERTRAIS
Tus sau : Thoj Qhua Xab, France
Paj V. Yaj, USA
Txhiaj Vwj Yaj USA
| | | |
Tus sau : Thoj Qhua Xab, France
Paj V. Yaj, USA
Txhiaj Vwj Yaj USA-Txiv Plig Nyiaj Pov yug los lub 7 hli 30, xyoo 1921, hauv lub zos Prinquiau, ze Nantes, Fab Kis teb. Thaum ntawd lub zos Prinquiau muaj txog 1200 leej neeg.
Txiv Plig txiv hu ua Louis Bertrais. Nws niam hu ua Lucie Cochard. Louis Bertrais tau mus ua rog ntiaj teb zaum ib xyoo 1914-1918, thiab raug luag ntes mus nyob txim. Nkawd sib yuav xyoo 1920. Nkawd yug tau 4 leeg tub 4 leeg ntxhais. Ib tug ntxhais tas sim neej lawm. Txiv Plig yog tus hlob ntawm lawv 8 leej me nyuam ntawd.
Thaum Txiv Plig muaj 12 xyoos, Yes Xus tshoj nws siab kom nws xav ua Leej Choj. Txiv Plig piav li no :
« Thaum lub xyoo kawm ntawv yuav xaus, muaj ib hnub, kuv tau hnov Tswv Ntuj lub suab Tshoj kuv siab kom kuv ua Leej Choj… Tab yog zaum no, mas kuv tseem nco ntsoov qhov chaw uas kuv sawv ntsug, thiab kuv hnov Tswv Ntuj lub suab. Yog nyob hauv nruab nrab txoj kev ncaim mus tom tsev teev Ntuj thiab tom tsev kawm ntawv. »
|
« Kuv thiaj mus kawm ntawv 9 xyoos nyob Guerande, Bouguenais, Chantenay thiab Nantes, mus txog lub caij ua tsov rog ntiaj teb zaum ob, yog xyoo 1939. Yes Xus tshoj kuv tas zog kom npaj siab mus tshaj Ntuj lus rau pej kum teb. Kuv thov mus ua Txiv Plig nyob hauv lub koom haum Oblat de Marie Immaculée. Kuv tau mus kawm txuj nyob Pontmain, La Brosse –Montceau thiab Solignac.»
Lub 10 hli xiab 6, xyoo 1946,
Yves Bertrais txais lub Cim Tiag Tes ua Leej Choj.
Nws muaj 25 xyoos.
|
-Tsov rog ntiaj teb nyuam qhuav dua tas nrho, tus thawj tswj lub Koom Haum Oblat txib kom Txiv Plig mus tshaj Ntuj lus nyob Los Tsuas teb. Thaum lub 12 hlis tim 23 xyoo 1947, nws thiaj caij nkoj ntawm Marseille mus rau Saigon. Nyob hauv lub nkoj, muaj 23 tus txiv plig hluas mus tshaj Tswv Ntuj Lo Lus rau cov teb chaws As Xias. Lub nkoj mus 28 hnub ces mus txog Xais Nkoos (Nyab Laj teb).
-Plaub leeg Txiv Plig nrog Txiv Plig Nyiaj Pov mus rau Los Tsuas teb. Lawv caij ib lub tsheb thauj toob xib ua luam mus rau Xas Vas Nas Khej. Lub caij ntawd, cov Cob Tsib thiab cov Fab Kis tab tom sis ntaus rog.
-Txiv Plig Nyiaj Pov lawv mus txog Xas Vas Nas Khej, nws nrog ob tug Txiv Plig hluas thiab ob tug Txiv Plig laus caij ib lub nkoj ua luam nce tus dej Naj Khoom. Lub 2 hlis tim 16, 1948 lawv mus txog Paj Xas (Paksane). Hnub tim 18, lawv mus txog tuam ceeb Vees Cas.
-Tus Tswv Qhia nyob Vees Cas xa lawv 3 leeg Txiv Plig hluas mus nyob Paksane, kom lawv tau kev kawm lus Los Tsuas thiab tau pab qhia txuj rau ib pab me nyuam npaj kawm ua leej choj. Lub 11 hlis, 1949, cov Txiv Plig uas nyob cheeb Vees Cas tuaj mus sau siab nyob Paksane.
-Tswv Qhia Mazoyer hais rau Txiv Plig Nyiaj Pov tias:
“Koj mus tshaj Ntuj lus nyob Moos Loob.”
-Lub 12 hlis, xyoo 1949, Txiv Plig mus txog Moos Loob. Muaj ib tug tub Los Tsuas kawm ntawv nyob Paksane, nws tsis xav kawm ntxiv, nws nrog Txiv Plig mus nyob pem Moos Loob. Nws hu ua Theung. Lub caij ntawd, nyob Moos Loob muaj ib lub tsev teev Ntuj thiab ib pab ntseeg Cob Tsib nyob ze lub tsev teev Ntuj. Txiv Plig Rouziere thiab Txiv Plig Xis Yoos nkawd nyob Moos Loob. Txiv Plig Xis Yoos nquag mus xyuas cov tub rog Fab Kis nyob Los Tsuas qaum teb. Tib lub zim txwv ntawd, Txiv Plig Soob Leej (Rancoeur) mus tshaj Ntuj lus nyob Xeev Khuam, hauv lub zos Pham Poom.
1
-Thaum Tswv Qhia xa Txiv Plig Nyiaj Pov mus Moos Loob, mas Tswv Qhia tsis tau hais tias kom nws mus tshaj Ntuj lus rau haiv neeg twg thiab mus nyob rau qhov twg. Ces lub 12 hlis xyoo 1949, nws mam caij nees zab mus xyuas cov zej zog nyob ib ncig ntawm Moos Loob. Txiv Plig Rouziere qhia nws tias nyob ntawm txoj kev Moos Loob rau Vees Cas mas muaj tej lub zos Hmoob. Txiv Plig Nyiaj Pov kom Theung ua nws luag mus xyuas cov zos ntawd. Muaj ib hnub nkawd thiaj ua tiag mus ib txoj kev me thiab nce toj heev. Txoj kev me me no nce mus rau saum roob thiab lem nkhaus lem nkhaus. Nkawd thawb ob lub tsheb kauj vab nce toj. Tej tsam nkawd muab ob lub tsheb kauj vab kwv saum xub pwg mus thiaj hla dhau tej ntu kev phem phem. Nkawd mus pw ntawm ib lub zos Los Tsuas. Tag kis rov mus dua, thawb ob lub tsheb kauj vab nce toj mus ntxiv. Mus 5 teev, txog ib lub zos Pub Thawj, tseem rov mus ib chim ntxiv mam txog lub zos Hmoob uas yog Roob Nyuj Qus.
-Mus nyob Roob Nyuj Qus. Txiv Plig Nyiaj Pov piav li no:
“Ua lub Hnub Nyoog Hla tas, kuv sawv kev yuav mus nyob pem zos Hmoob. Yog lub 4 hlis tim 17 xyoo 1950, kuv thov tau ib tug suav los pav pab thauj kuv 4 lub phij xab ntoo, vim nws yuav mus Vees Cas. Thaum nws mus txog ntawm chaw uas yuav nce mus rau Roob Nyuj Qus,
mas kuv kom nws muab kuv cov phij xab thau rau ntawm ntug kev. Kuv mam nce ko taw mus txog Roob Nyuj Qus, mus hauv Yaj Txawj Tswb tsev, nws twb npaj txaj qhuas tib si tos kuv. Nws kom kuv nyob hauv nws tsev ntev li cas los tau. Cov Hmoob hais tias lawv yuav pab kuv ua ib lub tsev rau kuv nyob, tab sis ob peb hnub tso. Kuv tos tau peb hnub, tsis pom lawv ua dab tsi, kuv rov nug lawv, lawv rov hais tias ob peb hnub tso... ntev li peb hlis tej, cov Hmoob thiaj tuaj pab ua tsev rau kuv nyob
2
sab lauj rau xis:
Yaj Txawj Tswb, nws leej nkawm (Yaj Zam Nob niam thiab txiv)
Yaj Mas= Nkaj Mas, Yaj Zam Nob.
Roob Nyuj Qus, Nplog teb.-Thaum kuv ua tau tsev lawm, mas cov Hmoob Thoj thiab cov Hmoob Yaj thiaj tso 3 tug me nyuam : Hwj Thoj, Yeeb Yaj thiab Huas Tsab tuaj nrog kuv nyob. Peb tug me nyuam tub no ua zaub rau peb noj, thiab ua kuv luag nyob. Peb sib tham ntau.
3
Kuv muab siab rau kawm lus Hmoob ntawm nkawd. Tau tsev nyob lawm, mas kuv zoo siab.
-Tus tub hluas Los Tsuas hu ua Theung kuj nrog kuv nyob thiab, nws yuav qhia ntawv Los Tsuas rau cov me nyuam.”
-Xyoo 1951 npaj ua HmoobXyoo 1951, mas Zam Nob Yaj, Xaiv Vaj Tsab, thiab Tsav Ntxaij Thoj lawv hais tias lawv xav tis ib lub npe Hmoob rau kuv. Ces lawv tua ib tug npua, hu sawv daws tib si tuaj tis lub npe : ‘Nyiaj Pov” rau kuv.”
-Tsim ntawv Hmoob RPA xyoo 1953Xyoo 1953, Txiv Plig ntsib cov Protestants (As Cas), lawv tuaj qhia kev ntseeg, lawv tsim ib hom ntawv Hmoob. Txiv Plig
4
nrog lawv tham sib haum, ces nws teem ib lub rooj sab laj nyob Moos Loob, yog lub 3 hlis, 1953. Nws coj Yaj Yeeb, Thoj Hwj, nrog nws mus sab laj. Tus xib hwb Protestant Berney, thiab tus kws txuj Dr. Smalley tuaj nrog Txiv Plig lawv sab laj tau 3 hnub. Lawv kho cov ntawv Hmoob raws li ob tog nyiam, lawv sib cog lus tias yuav siv tib hom ntawv Hmoob xwb, tsis hloov. Xyoo 1953 ntawd, Txiv Plig pib qhia Ntawv Hmoob nyob Roob Nyuj Qus. Nws xuas tes sau rau sawv daws kawm.
5
Lauj rau xis:
1- Thoj Hwj= Tshuv Hwj
2- Tsab Huas
3- Xyooj Rwg= Tsuj Rwg
4- Yaj Yeeb= Txoov Yeeb
5- Yaj Mos, nyob Tiaj Mos Hlub tuaj kawm ntawv Roob Nyuj Qus.-Txiv Plig nyob tau 3 xyoos, tsis muaj neeg ntseeg li. Nws tsuas niaj hnub kho mob, qhia ntawv, thiab kawm lus Hmoob xwb.
-Xyoo ntawd mas teb chaws ua tsov ua rog muaj ceem nyob Cob Tsib qaum teb. Ntau yam xwm tshwm tuaj, sawv daws pib ntshai me ntsis, ces tsoom Hmoob thiaj kom Txiv Plig hnav ris tsho Hmoob, coj xauv, ntoo kaus mom hmoob ib yam li ib tug Hmoob kiag.
-Xyoo 1954 thawj pab neeg ntseegPib Xyoo 1954, mas Zam Nob xav kawm kev ntseeg thiab xav kawm ntawv Hmoob. Txiv Plig thiaj xuas tes sau phau ntawv « A.E.T. »
-Lub 8 hli tim 15, yog lub hnub nyoog hawm Niam Mab Liab mus saum ntuj, Txiv Plig Nyiaj Pov ua lub cim ntxuav rau Yaj Zam Nob, Yaj Txawj Tswb, Yaj Yeeb thiab Thoj Hwj.
-Xyoo 1955 rov mus Fab Kis Xyoo 1955 lub caij Hmoob noj peb caug mas Txiv Plig Nyiaj Pov rov mus Fab Kis teb. Txiv Plig coj Yaj Yeeb mus xyuas Fab Kis teb, thiab xyuas Vaj Qhia Pis Yus 12 nyob Los Mas. Ze cim ntuj so 1956, Txiv Plig thiab Yeeb nkawd mam rov los, nkawd yuav tau ib lub tshuab kaw ntoo coj los siv nyob Roob Nyuj Qus.
-Lub Tsev Teev Ntuj nyob Roob NyujTxiv plig nqa lub tshuab kaw ntoo los, nws kaw tej daim txiag dav zoo nkauj. Lub 12 hlis 1956, lawv txhim lub tsev teev Ntuj pua txiag, xov av thiab vov vuas hlau. Thaum Tswv Qhia tuaj xyuas cov ntseeg qhib lub tsev teev Ntuj, nws pub ib lub tshuab ntaus ntawv rau Txiv Plig. Txiv Plig thiaj ntaus thawj phau hauv paus Ntawv Hmoob A.E.T. luam ua ntau phau faib rau tsoom Hmoob.
6
-Txij li ntawd los, cov tub ntxhais, cov hluas thiab cov laus nquag tuaj kawm, kom tau xyaum tej nkauj teev Ntuj thiab nyeem His Xais Lais Kwv Huam.
7
Thoj Xab=Qhua Xab, thaum muaj 7-8 Xyoo,
Saib thawj thawj phau ntawv Hmoob qhia Kev Ntseeg. -Tsis tas li ntawd, txiv plig tau xav tias peb tsoom Hmoob yav tom ntej mus, puas yuav yog txiv plig pab nraim xwb, los yog peb cov Hmoob nws yuav tsum muaj nws lub peev xwm pab taus nws haiv neeg Hmoob txog txoj kev ntseeg Ntuj, lawv lub neej thiab txoj kev txawj sib hlub sib pab tiag tiag. Txiv plig thiaj tau txiav siab nws tus kheej, pab cov tub ntxhais Hmoob thawj pab muaj 6 leej tub hluas nyob rau zos Roob Nyuj Qus, npaj kawm ua xib hwb pab txiv plig. Pab 2 thiab pab 3 ua ke huv si yog 9 leeg tub, 6 leej ntxhais hauv lub zos, tau mus kawm rau nram nroog. Nyob rau Paksane thiab Vientiane hauv Los Tsuas teb. Saib lawv puas muaj txoj hmoo los taug tau txoj kev ua leej choj thiab leej phauj.
-Dua li ntawd, txiv plig tseem txais tos cov tub Hmoob ntxiv, uas yog tuaj lwm lub xeev tuaj kawm npaj ua xib hwb, xws li :
-Xeev Xas Niam 6 leej.
-Xeev Huab Xais 6 leej.
-Zos Phuaj Thoos 4 leeg
( xeev Moos Loob ).
-1958 Mus nyob Xas NiamLub 12 hlis, xyoo 1958, Txiv Plig mus pib txoj kev tshaj Ntuj lus nyob xeev Xas Niam. Txiv Plig nyob tau 9 xyoos hauv lub zos Roob Nyuj Qus, tsuas muaj kaum tawm yim neeg ntseeg xwb. Txiv Plig mus txog Xas Niam teb, nyob tau ib xyoos, cov hmoob ib txhij ntseeg coob kawg, muaj 200 tawm leej neeg tuaj teev Ntuj, thiab 120 leej txais lub cim ntxuav, tsis xam cov me nyuam yaus nrog.
-Tswv Qhia hais tias: “Pom ob puas tawm leej Hmoob teev Ntuj ua ke, mas poob siab thiab sov siab tas nrho, tsis tau pom dua ib zaug kiag li.”
-Xyoo 1959, yog xyoo cov txiv plig Is Tas Lis tuaj nyob Moos Loob, muaj ob peb leeg lawv kuj kawm cov ntawv hmoob thiab lus hmoob kom muaj kev yooj yim sib txuas lus nrog cov Hmoob txog txoj kev ntseeg Ntuj.
-1960 teb chaws Xas Niam poob1960, cov Nyab Laj rov qab ntaus tau teb chaws Los Tsuas ntau qhov chaw. Tseem fwv Vees Cas xa 5000 leej tub rog tuaj nyob puv nroog Xas Niam. Lub 8 hli phom nrov tsis tu ncig nroog Xas Niam.
-Cov txiv plig nrog cov tub Puab Yib thiab Pub Thawj kawm ua xib hwb, lawv sawv daws khiav tas.
-Txiv Plig Nyiaj Pov thiab cov tub Hmoob kawm ua xib hwb tsis khiav. Lawv nyob kawm thiab teev Ntuj niaj hnub chiv rau tsoom Hmoob. Muaj ib hnub, ib pab ntseeg Hmoob uas yog tub rog tuaj hais tias: “Txiv Plig, ntshai nej yuav tsum tsiv nraim, vim peb pib ua rog nyob tom Pham Thiv tiv cov Nyab Laj. Yog cov Nyab Laj paub tias peb yog neeg ntseeg, thiab peb ua rog tiv lawv, mas lawv yuav ntes nej xwb.” Tus tuaj qhia li ntawd yog Colonel Lis Lauj. Thaum ntawd mas nws tseem hluas, tsis tau ua nom, tsuas yog tub rog xwb.
-Thaum ob peb tug Txiv Plig uas nrog Txiv Plig Nyiaj Pov nyob, hnov tej lus no, lawv txiav siab yuav khiav, tso tas ib puas tsav yam tseg rau hauv tsev. Cov tub kawm ua xib hwb nyias rov mus nyias tsev, tus twg xav nrog Txiv Plig khiav mas nws khiav. Thaum Txiv Plig lawv khiav mas muaj ib co Hmoob pab faus lawv hneev taw, kom Nyab Laj txhob pom txoj kev lawv mus.
-Lis Nkaj Teev coj txiv plig lawv kev mus txog Pham Thiv.Thaum ntawd cov Nyab Laj tshaj paj taub hauv nroog Xas Niam tias, cov Fab Kis khiav lawm, tab sis yuav ntes kom tau coj los ua nqaij liab faib rau cov pej xeem noj txhua txhua yim. Vim muaj Hmoob tuaj qhia rau lawv tias Nyab Laj nyob qhov twg tos cov Fab Kis kev. Lis Nkaj Teev thiaj coj Txiv Plig lawv nkag hauv hav zoov mus xwb. Lawv tsoo hav zoo mus txog Pham Thiv. Nyob Pham Thiv tau 3 hlis, muaj Hmoob kuj tuaj ntsib Txiv Plig lawv, cov Hmoob thiaj coj lawv khiav mus rau Moos Loob. Thaum cov txiv Plig khiav Pham Thiv mus rau Moos Loob mas lawv hnav ris tsho Hmoob. Lawv khiav tau 24 hnub ntawm Pham Thiv thiaj mus txog Moos Loob.
Cov khiav ua ke ntawd muaj tag nrho 13 leeg:
TP. Nyiaj Pov
TP. Du Mont
TP.Lauzon
Lis Nkaj Teev
Lauj Vam Thaiv
Yaj Txoov Yeeb
Niam Yaj Txoov Yeeb
Nais khu Vaj Leej
Nais Koo Tooj Pov Vaj
Los Xyooj
Nais khuv Nplog
...? tshuav ib tug tsis nco qab yog leej twg.
Dhau Pham Thiv los ces Yaj Txoov Yeeb tsis khiav ntxiv lawm, nws los nyob ib lub zos Hmoob, tshuav lawv 11 leeg khiav ntxiv mus txog Moos Loob xwb...
-Lus Hmoob uas kuv tau khaws xyoo 1950 txog xyoo 1961, mas pov tseg tag nrho rau Xas Niam, dim cev qhuav xwb.-Nyob Moos Loob, muaj 2 tug laus thiab 4 tug hluas nrog txiv plig Nyiaj Pov ua phau Ntawv Txheeb Lus Hmoob Fab Kis ( Dictionnaire Hmong - Français ) tau 7 lub hli tsis so, tsis hais nruab hnub hmo ntuj tib si, thiaj sau tiav phau ntawv. Mam tsiv los nyob rau Vees Cas thiab luam tiav phau ntawv ntawd rau xyoo 1964.
-1960 - 1961 nyob Luang Prabang-Vientiane -Xyoo 1961 Txiv Plig Nyiaj Pov thiaj qhib ib lub tsev txais cov tub tuaj kawm ua xib hwb, ib lub txais cov ntxhais tuaj kawm ntawv. Ob lub tsev no puav leej npaj qhib nyob Nong Bone, hauv nroog Vees Cas.
-Tsis ntev, mas neeg tuaj coob, chaw tsis txaus nyob, ces Tswv Qhia zoo siab pab ntiav ib lub tsev loj rau cov kawm ua xib hwb. Txiv Plig lawv thiaj tsiv mus nyob Nas Xais, tsis deb ntawm Nong Bone.
-Lub caij ntawd, cov tub kawm ntawv hauv Vees Cas coob leej tuaj thov chaw pw hauv Txiv Plig tsev, ces lub tsev Nas Xais tsis txaus rau sawv daws nyob.
-Cov txiv plig muaj ib lub tsev seem nyob Simuong. Thaum ub yog ib tug Fab Kis li, thaum nws yuav tuag, nws muab pub rau cov txiv plig. Lub tsev ntawd mas yog ib lub qub tsev kho tsheb dav heev. Tswv Qhia thiaj li pub lub tsev ntawd rau Txiv Plig Nyiaj Pov thiab cov xib hwb Hmoob.
-Lub caij so ntawv, cov tub kawm ntawv nrog pab kho tau 3 hlis. Sawv daws thiaj tau ob peb lub tsev ntawd txaus l00 leej neeg los
nyob. Txiv plig muab lub tsev nyob Simuang ua “Tsev Hauv Paus Tshaj Ntuj Lus”. Cov xib hwb tau kawm txuj hauv lub Tsev Hauv Paus mus txog xyoo 1975, yam li :
- Lub tsev rau cov ntxhais muaj txog li 50 tawm leej.
- Lub tsev rau cov tub xib hwb
muaj txog 30 tawm leej.
- Lub tsev rau cov tub tuaj
kawm txuj hauv Vees Cas
muaj li 70 tawm leej.
-Kuj muaj cov tub ntxhais txog 3, 4 leeg zoo siab los pab txiv plig ntaus ntawv thiab luam huv si. Tus tau ua hauj lwm pab txiv plig ntev thiab ntau heev yog tus ntxhais Yaj Diav uas ua tau 15 lub xyoo txwm nkaus, txog ntawm
txiv plig Nyiaj Pov kev khaws hmoob tej lus, tej txuj thiab kab lis kev cai txhua yam tag nrho 13 yam. Kom xwv muaj leej twg xav paub los thiaj muaj ntawv kawm li teev khaws tseg.
-Nyob hauv Tsev Hauv Paus Simuong mas tau muaj cov hauj lwm tshaj kev ntseeg rau pem roob ntau kawg, tau muaj kev kawm, kev qhia, kev yug tsiaj, thiab cog qoob loo kom tau nrhiav nyiaj los pab yug kev noj haus rau cov xib hwb.
-Xyoo 1961 – 1968, txiv plig tau pab txhawb ib pab tub ntxhais tuaj mus kawm ntawv rau Fab Kis teb.
-Tswv Qhia tau pab nyiaj ntau kom tau them nqi kho tsev, nqi dej taws, tsheb khiav dej num rau lub tsev nyob Simuong. Txiv Plig Nyiaj Pov tus muam Therese ua tus nrhiav nyiaj, thov nyiaj ntawm cov Fab Kis xa mus pab cov xib hwb. Lub Koom Haum Tshaj Ntuj Lus Yes Las Mas kuj tau pub nyiaj ua ob lub tsev pob zeb loj nyob Simuong.
-Xyoo 1973, lub teb chaws sib cog lus tsis ua rog ntxiv. Txiv Plig Nyiaj Pov thiab cov xib hwb npaj yuav muab lub tsev Hauv Paus nyob Vees Cas tshais chaw mus rau lub zos Hav Dej Txhawv, ntawm qaum Moos Kas Xim. Twb mus npaj tsev, npaj teb, kom tau pib tshais chaw ib ob xyoos tom ntej.
-Xyoo 1975, lub 4 hlis, phom nrov ntawm phou Khoun tuaj, suab phom nrov mus txog lub 5 hlis, 1975, lub teb chaws hloov tas nrho.
-Lub 5 hlis tim 20, 1975, cov txiv plig thiab cov xib hwb sib sau sab laj nyob Simuong, lawv sib faib cuab tam, sawv daws thiaj khiav tawm lub teb chaws Los Tsuas.
-Txiv Plig Nyiaj Pov hla dej Naj Khoos mus rau Thaib teb, nws thov ntawv nyob Thaib teb ob xyoos. Xyoo 1979, Tseem Fwv Fab Kis thov nws pab coj ib pab Hmoob mus tsim lub zos Javouhey nyob Guyane. Nws tau nyob Guyane 17 xyoo.
- Niaj xyoo, txiv plig Nyiaj pov yeej mus xyuas cov Hmoob thoj nam nyob Thaib teb thiab cov Hmoob nyob Suav qab teb.
-Xyoo 1978, tus kws txuj Koos Dos tau pom zoo thiab zoo siab, thov qhuas txog txiv plig Nyiaj Pov tej hauj lwm ntawm haiv Hmoob. Nws tau tawm ib daim ntawv cob zeem rau txiv plig Nyiaj Pov « Daim Ntawv Tim Khawv Rheeb Txuj Txheej Siab txog Haiv Neeg » (Diplôme des Hautes Etudes en Sciences Sociales)
-Xyoo 1984, tau muaj plaub tsib leeg Hmoob nyob rau Nkws Yas nrog txiv plig tsa tau lub Koom Haum Khaws Txuj Hmoob.
-Txiv plig Nyiaj Pov ke ua hauj lwm pab khaws Hmoob tej txuj, ke mob siab nraim qhia Ntuj kev cai rau sawv daws, rau cov tub ntxhais hluas, kom muaj kev xyaum kawm ua tus coj, los pab qhia kev ntseeg rau cov Hmoob. Tsis ntev xyoo, txog rau xyoo 1993 thaum lub 3 hlis ntuj tim 7 thiab 21, Tswv Qhia François Morvan tau pub lub cim tiag tes tsa 2 tug tsob hwb Hmoob nyob rau Nkws Yas, yog Yaj Zoov Ntxheb thiab Hawj Nyiaj Nkaub. Nkawd ob leeg muaj cai los nres
ib txheej hauj lwm lis kev ntseeg pab cov leej choj rau tsoom ntseeg nyob rau zos Cacao thiab Javouhey.
8
- Xyoo 1994 yuav xaus, Txiv Plig Nyiaj Pov thiab Yaj Chiv nkawd pib kaw lus rau cov roj hmab, xa mus tshaj kev ntseeg hauv xov tooj cua Radio Veritas, nyob Philippine teb. Lub tshaj xov xa Yes Xus lub Moo Zoo mus rau cov Hmoob nyob Suav teb, Cob Tsib teb, Los Tsuas teb thiab Thaib teb. Yaj Chiv thiab Txiv Plig nkawd kaw roj hmab tshaj Ntuj lus tau 3 xyoos, ces nkawd muab tshais chaw mus nyob kiag rau Philippines teb, kom tau kev ua hauj lwm yooj yim. Peb xyoos tom qab, kuj tsis tau raws li siab xav, vim nyob Philippine tsis muaj ib tug Hmoob nyob li. Thaum xyoo 2000, Txiv Plig thiaj li tshais tsev hauv paus xov tooj cua los nyob Lomsak, Thaib teb. Lub tsev hauv paus xov tooj cua txoj hauj lwm yog npaj cov zaj kom txaus tshaj xo 7 hnub, ib hnub twg tshaj txog 30 fiab, rau tsoom Hmoob uas paub lus Hmoob Dawb thiab lus Hmoob Ntsuab.
- Thoj Txwj Choo tau lees txais leg Tswv Qhia lub luag hauj lwm rau thaum lub 5 hlis xyoo 1999 nyob rau Moos Loob, Los Tsuas teb.
9
-Txiv plig Nyiaj Pov xav paub txog Hmoob keeb kwm, nws thiaj thiab ua phau ntawv « Haiv Hmoob Liv Xwm », yog hais txog haiv Hmoob lub neej nyob rau Suav teb, yav ntuj qub qab thaum ub. Txiv Plig tau ua siv zog nroos nrog rau tus kws txuj Hmoob Suav, Vwj Zoov Tsheej, Yaj Ntxoov Yias thiab 6 leej Hmoob ua ke tau 6 lub xyoo tsis so thiaj tiav phau ntawv rau xyoo 1997.
-Lus nug
Txiv plig Nyiaj Pov yog ib tug neeg Fab Kis uas tau yug los nyob rau Fab Kis teb, yog nws lub teb chaws, uas lawv yog ib haiv neeg muaj kev vam meej los lawm ntev ntev xyoo. Cas nws tuaj yeem muab nws lub meej mom, txoj kev tau zoo nrog nws lub teb chaws tso tseg, tuaj mus nrog tsoom Hmoob nyob ua neej tsis muaj tug ntaub tug ntawv siv, tsuas nrog liaj nrog teb thiab tej tsiaj txhu nyob txom nyem rau tej toj roob hauv pes....
-Kev xav
Lub sij hawm uas txiv plig tuaj cog lub neej nrog Hmoob nyob, yuav ua rau ib txhia neeg pom thiab muaj lo lus xav tias : « Puas yog txiv plig Nyiaj Pov tsis muaj txoj hmoo zoo los ua cas, yuav tuaj mus nrog Hmoob nyob li no… » .-Muaj ib zaug nws tau hais rau Txhiaj Vwj Yaj tias :
« Kuv xav ua ib tug Hmoob, tab sis mas xyov Hmoob puas kam txais kuv los ua ib tug Hmoob.» -Tsis muaj leej twg yuav txiav txim meej tau rau tib neeg lub hom phiaj txoj kev xav, kev ntshaw thiab txoj kev hlub. Vim qee zaus, txoj ke ntxeem txom nyem kuj txawj rais tshwm sim tau los ua ib txoj kev zoo rau lwm leej lwm tus, los yog rau ib haiv neeg.
-Txiv plig Nyiaj Pov, nws tau ua raws nraim li Huab Tais Yes Xus tau hais tseg, thiab nws nco ntsoov lo lus nrov hauv nws nruab siab thaum nws muaj 12 xyoos uas tseem niaj hnub kawm ntawv.-Txiv Plig Nyiaj Pov tau nthuav Huab Tais Yes Xus lo lus rau ib txhia Hmoob tau hnov :
-Txog txoj ke Thoob Tsib
-Txog txoj Kev Hlub Neeg
-Txog Kev Zam Txim rau luag.
-Txiv plig Nyiaj Pov tau muab nws lub neej los pab Hmoob yam tsis ntshai nkim nws lub zog dawb tag do, nws tsis khuv xim nkim nws lub neej, tsis hais saum kev nrhiav nyiaj txiag pab, kev khwv nruab hnub hmo ntuj nrog nyiaj tshaib yoo nqhis, yoo dab ntub zias, nrog xav tswv yim txhua fab thiab mob siab ua tas siab ntsws nws txoj hauj lwm kom tau los pab rau tsoom Hmoob.
-Thov kom peb tsoom Hmoob nco ntsoov tias, txiv plig Nyiaj Pov tau ua txhua yam raws nraim Huab Tais Yes Xus txoj ke, ntawm nws lub siab xav yog tsoom Hmoob.-Xyoo 2006Cov Hmoob tuaj yuav luag txhua txhia lub xeev hauv Fab Kis teb tuaj sib txoos khi nws tes nyob rau lub nroog Orléans, thaum lub 4 hlis ntuj tim 23, xyoo 2006. Pom nws lub ntsej muag nrog lub cev sab heev, nws lub zog
ntaug lawm ntau, tab sis nws lub siab nrog lub tswv yim tseem liab khiav hais txog nws txoj hauj lwm uas nyob rau tim Thaib teb. Nws tau hais lus ntau yam, tab sis muaj ib lo lus tseem ceeb dua ntais hais tias :
« Nej tsoom Hmoob yuav tsum sib hlub tiag tiag, mas zoo xwb… » .- Tsim nyog peb tsoom Hmoob yuav zoo siab nco txog yav ntuj qub qab, uas tau nrog Txiv Plig Nyiaj Pov nyob ua ke 50 xyoo dhau los. -Txiv plig Nyiaj Pov tau tas sim neej rau Fab Kis teb, hnub tim
27-05-2007 thaum 8 teev sawv ntxov. Nws tus phooj ywg THOJ Tsav Ntxaij, tau ncaim nws mus ua ntej 8 hnub xwb, nyob rau Castres.
10
(Sab laug rau xis)
Thoj Tsav Ntxaij, Yaj Zam Nob, Thoj Nom Neeb, T. P. (P. Jean DROUART)
Thoj Qhua Xab, T.P. Nyiaj Pov, Yaj Txoov Yeeb thiab Thoj Tshu Hwj.
Roob Nyuj Qus, xyoo 1954.
Home
Yog koj tso siab rau Yesxus lub siab ntshiab, nws yuav ua koj siab kaj lug 
