TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

**Mim** 17th November 2009, 6:00 pm

Mim: Tswv Cuab Hmong Catholique; Messages : 3609
Date d'inscription : 2009-10-16

Post n°26

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Mim 17th November 2009, 6:00 pm

Maiv Tooj wrote:

Txiv Plig Nyiaj Pov khiav rog nyob Sam Neua.

KEV KHIAV TSOV ROG (1959-1961)
Tus sau: Yaj tshuas Rwg, Fab Kis teb.

Xyoo 1959, Tx.Pl. Nyiaj Pov ncaim lub zos lub teb chaws uas nws tau kawm ntau yam, paub ntau yam, nws tau siv tas nws lub zog los tshaj txoj kev ntseeg, tab tom pib tau zoo. Tx.Pl. Nyiaj Pov tus Txiv Tswv Qhia xa Txiv Plig mus rau ib lub zos hmoob nyob ze ciam teb nyab laj, nyob rau lub xeev Samneua, ua thaum ub cov koom tshaj tau hais haum thiab muab rov rau tus Vaj Ntxwv los tsuas.

Nrog rau leej puav tub tshaj Ntuj lus, Txiv Plig Nyiaj Pov pib ib txoj hauj lwm ua nws muab cia rau qhov chaw siab thiab npaj rawv hauv nws nruab siab tsis ploj li, yog tsim ib lub tsev qhia cov Xib Hwb tshaj Ntuj lus hmoob.

Txiv Plig Nyiaj Pov, nws tsim tau ib lub tsev kawm ua Xib Hwb nyob Samneua, lub sij hawm ntawd lawv muaj li kaum ob leeg tuaj mus kawm, feem coob tseem tsis tau txais lub cim ntxuav, tsuas yog kawm Ntuj kev cai xwb. Thawj thawj zaug uas muaj ua yees siv lub caij ua hmoov Yes Xus yug los, uas yog cov tuaj kawm ua Xib Hwb lawv ua, yog xyoo 1960, ua cav txog Yes Xus yug los.

Hmoov tsis muaj , ib xyoos tom qab xwb, tsov rog sawv loj heev, tsis paub xyov yuav nyob los yuav khiav? Txiv Plig ua xyem xyav tau ib lub hlis, paub tseeb hais tias yeej nyob tsis tau lawm tiag, vim yog nyob ntxiv ces kawg raug ntes xwb. Ces thiaj tso tas txhia tsav puas yam tseg, nrog peb tug tub tshaj Ntuj lus thiab plaub tug tuaj kawm ua Xib Hib khiav mus rau hav zoov, khiav tau peb hnub thiaj mus tshwm rau Pham thib, nyob ntawd muaj ib pab tub rog. Tab sis cov nplog liab puav lawv thiab tua phom loj rau lawv tsis tseg tau peb lus hlis nkaus, lub sij hawm ntawd Txiv Plig Nyiaj Pov thiaj li pib txhais cov Phau ntawv cog lus tshiab, nws xub pib txhais ua ntej yog Paj Lug cov Tsab ntawv los rau phau ntawv Los mas uas hais txog lub koom txoos kwv huam, tsoom ntseeg lub neej kev raug tsim txom. Tsov rog loj zuj zus, ze heev lawm, ntawg ntiag tam sim ntawd yuav tsum rov qab khiav dua ib zaug ntxiv thiab, Txiv Plig xav zoj hais tias zaum no mas ntshai tas li lawm lauj, tas txhia yam yuav poob tas, nws thiaj tau thov ib tug tub rog hmoob muab nws cov ntawv zais cia.

Khiav tau 26 hnub, nruab hnub mus ib hnub, mus tshwm tej lub me nyuam zos hmoob nyob puag pem tej ncov roob, nrog lawv pw ib hmos, tag kis rov qab mus ntxiv, pheej muaj cov zos zoo li ntawd txais lawv txhua txhia hmo thiaj ua rau lawv lub siab loj thiab thiaj tsis txom nyem heev.

Hnub tin 16 lub ob hlis ntuj xyoo 1962 lawv yim leej uas khiav ua ke los ntawd thiaj los tshwm rau Moos Loob, los poob hauv cov Txiv Plig Is Tas Lis, cov Txiv Plig Is Tas Lis txais Txiv Plig Nyiaj Pov nyob hauv lawv, Txiv Plig rov qab nug thiab nrhiav nws cov ntawv ua nws sau nyob Samneua ua yog 3000 daim ntawv txhais hmoob Fab Kis, thiab nws cov ntawv nws txhais cov ntawv ntshiab ntawd saib puas rov qab tau lawm.

Vim Txiv Plig Nyiaj Pov yog ib tug neeg kub siab, thiab tsis qaug zog hlo li, nws thiaj rov qab pib sau dua, tau xya lub hlis nkaus thiaj ua tas phau ntawv txhais lus hmoob-Fab kis ntawd, yog xyoo 1964 phau ntawv uas sawv daws tos ua luaj li no thiaj luam tau tawm, nws muaj 580 phab.

TP. Nyiaj Pov ua tsim vaj tsev nyob Sam Neua

Sam Neua 1959

Sam Neua 1959

Thaum TP Nyiaj Pov khiav Sam Neua ntawd, kuv tseem nco tau zoo li no: Lub caij ntawd peb tseem nyob hauv zos Roob Nyuj Qus, tiam sis tsov rog yeej pib lawm. Hnub ntawd, kuv thiab zoo li ob peb tug me nyuam yaus peb nyob ntawm lub tiaj ua si ntawm peb qaum tsev thiab ntawm hauv ntej tsev teev ntuj, thaum ntawd nruab hnub nrig, cia li pom TP Nyiaj Pov nrog ob peb leeg ntxiv lawv tshwm zom zaws. Peb xav hais tias yog TP rov qab los xyuas peb no mas cav zoo siab kawg thiab... Tiam sis TP mam li piav hais tias yog lawv khiav Nyab Laj, thiab Sam Neua tawg lawm, ces mam paub.
Thaum ntawd tseem ua neej zoo li npau suav xwb, tsis nco qab hais tias xyov TP lawv los nyob tau pes tsawg hnub hauv peb zos xwb; tiam sis kuv xav hais tias phim lawv yuav tsum nyob li ob peb hnub mus rau ib lis piam, vim twb yog TP lub zos uas TP xub xub tuaj nyob. TP nyuam qhuav ncaim mus tau li ib ob xyoos tej xwb. Nyob hauv TP zaj uas nws piav txog lawv khiav mas nws tsis hais txog los tshwm Roob Nyuj Qus li; zoo li nws tsis nco pes tsawg lawm. Tiam sis kuv paub hais tias lawv yeej khiav los tshwm, vim kuv yog tus pom ntsoov TP los txog peb zos; tsis paub hais tias yog xyoo twg li lawm...

Last edited by Mim on 18th November 2009, 3:56 am; edited 1 time in total

**Maiv Tooj** 17th November 2009, 6:31 pm

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°27

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 17th November 2009, 6:31 pm

Npuag Tub wrote:Sister Maiv Tooj,

Ua tsaug rau nws cov duab, zoo kawg li yog nws mus nrhiav tau tej yam duab qub qub li no tuaj tso kuj yog ib lub txiaj ntsim zoo kawg rau hauv peb lub tsev no. Vim muaj ib txhia lawv hais tias lawv nyiam tuaj saib txog tej yam pom txog Hmoob lub neej kev ntseeg thaum ub kawg li. Nws yeej meem mus tshawb fawb tuaj tso ntxiv nawv.

Thov nws tuaj pab xyuas saib muaj tej daim duab saum toj no pheej tsis pom es ua li nws puas paub os?

Nyob zoo XH. Npuag Tub,

Ua tsaug nws cov lus zoo lus txhawb siab. Kuv xav tias Mim thiab Maypajlug nej txawj txawj sau Ntawv Ntshiab Ntawv Thoob Tsib lawm ces cia kuv mus nrhiav keeb kwm Liv Xwm es peb thiaj muaj txhua yam hauv peb lub Tsev nov. Kuv yuav maj mam tshawb nrhiav li kuv yuav muaj peev xwm ua tau. Yog nws ho paub neeg paub txog tej keeb kwm thiab muaj duab no nws pab thov tuaj tso rau peb thiab.

Npaug Tub, es cov duab kuv twb pom tag nrho ne! Yog nws pom qhov twg zoo li tsis pom duab tshwm no nws qhia N° Post seb nws pom pes tsawg daim duab xwb kuv thiaj paub.

mam tuaj tso duab ntxiv

**Npuagtub** 18th November 2009, 2:23 am

Npuagtub

Npuagtub: Tswv Cuab Hmong Catholique; Messages : 1002
Date d'inscription : 2009-08-16
Age : 57
Localisation : Fresno, California, USA.

Post n°28

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Npuagtub 18th November 2009, 2:23 am

Sister Maiv Tooj,

Koj nrhiav tau ib co duab zoo kawg li, yog koj tso tau lawv co npe rau thiab mas ntshai yuav zoo heev, tiam sis kuv paub lawm tias koj tsis paub lawv cov npe koj thiaj li tsis sau rau.

Cov duab kuv lub PC tsis pom mas yog 3 daim nyob rau page 23, 3 daim kawg, txij ntawm daim tus poj niam hlais yeeb mus.saib nws kho puas tau os yog tsis tau los tsis ua li cas.

**Mim** 18th November 2009, 4:15 am

Mim

Mim: Tswv Cuab Hmong Catholique; Messages : 3609
Date d'inscription : 2009-10-16

Post n°29

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Mim 18th November 2009, 4:15 am

Npuag Tub wrote: Sister Maiv Tooj,

Koj nrhiav tau ib co duab zoo kawg li, yog koj tso tau lawv co npe rau thiab mas ntshai yuav zoo heev, tiam sis kuv paub lawm tias koj tsis paub lawv cov npe koj thiaj li tsis sau rau.

Cov duab kuv lub PC tsis pom mas yog 3 daim nyob rau page 23, 3 daim kawg, txij ntawm daim tus poj niam hlais yeeb mus.saib nws kho puas tau os yog tsis tau los tsis ua li cas.

Kuv los tsis pom thiab as... kuv li ho yog plaub daig duab diam, kuv pom tus poj niam hlais yeeb, tiam sis tsis pom daim ua ntej thiab peb daig tom qab. Hos nyob hauv post 19 los kuv tsis pom tas nrho cov duab ua ntej tus txiv neej tuav rab phom Hmoob li.... Thaum ntej kuv xav hais tias yog koj tsis tau tso duab rau no, tiam sis tam sis no kuv rov xyuas los yeej tsis pom li ... Puas yog koj tsis tau tso duab rau los yog tim kuv lub PC tsis pom?.... Thiab tam sis no kuv siv ib lub PC txawv kuv lub pem tsev...cia ib tsam kuv mus saib pem tsev thiab saib ho puas pom thiab los tsis pom li....

**Maiv Tooj** 18th November 2009, 5:10 am

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°30

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 18th November 2009, 5:10 am

Nyob zoo Mim thiab XH. Npuag Tub,

Wow...! Mim! Nws tseem pom thaum TP. Nyiaj Pov lawv khiav los txog Roob Nyuj Qus thiab lov? Zoo kawg li, yog nws nco tau me ntsis no nws ho muab tham ua puav pheej cia, yog ib qho tim khawv yuav paub txog TP. Nyiaj Pov lub neej. Txiv Plig tsis tshau kam tham tej kev txom nyem thiab nyuaj uas nws tau ntsib los. Tej thaum yus twb paub lawm, nug nws los nws twb tsis kam tham...Vim lawv txia siab hlub peb haiv Hmoob ces lawv xav hais tias ua txhua yam rau peb yog ua rau HTN xwb ces thaum twg lawv peem dim lawv txoj sia lawm xwb ces twb yog ib qho zoo heev rau lawv. Lawv lub neej yog ib qho Mystère.

XH. Npuag Tub,

Ntshe yog kuv tsis nco qab tshem ib cov Frames tso duab es neb thiaj pom cov cadres tab sis tsis muaj duab xwb.
Yam li lub Post
# 18 muaj 13 daim duab
# 19 muaj 12 daim duab
#23 muaj 9 daim duab
#24 muaj 6 daim duab.

Seb neb puas pom npaum li kuv hais nov?

**Npuagtub** 18th November 2009, 5:17 am

Npuagtub

Npuagtub: Tswv Cuab Hmong Catholique; Messages : 1002
Date d'inscription : 2009-08-16
Age : 57
Localisation : Fresno, California, USA.

Post n°31

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Npuagtub 18th November 2009, 5:17 am

Sister Mim,

tej zaum ntshai yog peb ib leeg nyob ib sab ntuj ces thiaj li zoo li no. Ib leeg pom ces lwm tus ho tsis pom lawm thiab no tiag. Kuv lub PC. mas nyob rau page 19 mas ho pom zoo tas huv si li. tsuas tshuav 3 daim nyob hauv page 23 tom qab tus poj niam hlais yeeb xwb.

Sister Mim, tsis tau nug koj es, pem koj nyob peb cov ntseeg catholic muaj hov coob? thiab nej kev mus sib koom ua lub txoos teev ntuj ho zoo li cas, thiab cov neeg ntseeg nej kev coj sawv daws nyob li cas? koj piav puas tau me ntsis rau peb paub ?

Last edited by Npuag Tub on 19th November 2009, 1:20 pm; edited 1 time in total

**Mim** 18th November 2009, 1:12 pm

Mim

Mim: Tswv Cuab Hmong Catholique; Messages : 3609
Date d'inscription : 2009-10-16

Post n°32

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Mim 18th November 2009, 1:12 pm

XH Npuag Tub thiab Tais Tooj,

Tam sis no kuv los saib hauv tsev no cas zoo li kuj pom tas nrho lawm thiab... puas yog tais Tooj muab kho rau lawm los yog tim lub PC nram hauj lwm tsis pom? Tsis paub li tiam sis kuv xyuas kuj pom txhua daim lawm tiag....

XH Npuag Tub, koj xav paub cov npe neeg lod? Kuv kuj paub tsis tag, tiam sis cia kuv mam qhia cov uas kuv paub nawb.

Hauv #18, tus tub hluas nrog TP Nyiaj Pov caij moto yog Yaj Yeeb(Txiv Txoov Yeeb nram Guyane); tus poj niam los tus hluas nkauj tab tom xaws ib lub zoo li lub hnab, kuv saib mas zoo li yog phauj Yi Thoj, tiam sis kuv tsis meej pes tsawg; tus txiv neej qaim ib tug qaib zoo li tab tom hu plig yog txiv Nkias Keem Yaj (Yaj Txhim txiv).

Hauv #19, tus txiv neej tuav rab phom Hmoob yog txiv Zam Muas Yaj (Phauj Diav tus nus); tus poj niam cuam nqaib thiaj ev kawm nqa me nyuam yog tib tug xwb, yog niam ntxawm Soob Tooj Yaj;peb tug poj niam uas ev kawm hla ntawm qhov rooj, tus ua ntej yog niam dab laug Tshu Hwj Thoj; tus ntxhais ev ib kawg kav tsawb zoo li yog ib tug nyob hauv txiv Zam Muas tsev neeg.

Hauv #23, ob tug txiv neej ev kawm thiab nqa phom yog kuv ob tug txiv ntxawm txheeb txheeb: txiv Nchaiv Yias Yaj (tus tig phab tav tuaj), thiab txiv Paj Lis Yaj (tus tig ntsej muag tuaj); tus poj niam Hmoob ntoo ib phiaj siv ceeb nrog phuam paj thiab puag me nyuam yog phauj Tsuj Rwg Xyooj; pab ntxhais uas sawv ib phiaj zoo li tab tom pov pob ntawd yog cov Hmoob Phuaj Thoos (TP Neej Vaj lub zos), tsis yog Hmoob Roob Nyuj Qus. Dua li ntawd kuv tsis paub lawm.

XH Npuag Tub,
nyob ntawm peb no, cov ntseeg Hmoob Kas Tos Liv tsis muaj coob. Peb muaj li nees nkaum yim neeg tej xwb. Muaj li ntawd los hnub Chiv tsuas pom tuaj ib nrab tuaj teev ntuj xwb, tej zaum twb tsis txog ib nrab thiab. Tej hnub uas Hmoob ua kev ncaws pob los yog ua kev lom zem noj peb caug ces pom li ib ob yig nkaus xwb... Xyov li lau!... zoo li koj txawm hais los yus cov neeg tsis muaj kev ntseeg zoo thiab tsis kub siab li... Peb muaj ib tug xib hwb volunteer los pab peb cov Hmoob me ntsis thiab. Tiam sis nws yuav tau mus khwv noj khwv haus ces yeej pab tsis tau li lub siab xav li. Nws kuj tau thov hais tias nws xav mus kawm ntxiv, tiam sis vim nws tsis paub lus Mes Kas zoo, ces txiv plig lawv kuj tsis tau xa nws mus li. Peb cov ntseeg los cav tsis coob coob txaus yuav them ib teg nyiaj rau nws noj thiab, ces peb lam nyob zoo li no xwb tiag... nej thov ntuj thaum twg no, ho thov ntuj rau peb cov ntseeg thiab os nawb...

**Npuagtub** 18th November 2009, 2:12 pm

Npuagtub

Npuagtub: Tswv Cuab Hmong Catholique; Messages : 1002
Date d'inscription : 2009-08-16
Age : 57
Localisation : Fresno, California, USA.

Post n°33

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Npuagtub 18th November 2009, 2:12 pm

Sister Mim,

Wow......! zoo siab kawg li, cov neeg koj hais npe kuv kuj puav leej paub lawv tas huv si thiab. vim kuv kuj loj hlob nyob nrog lawv ua ke los txog rau xyoo teb chaws tawg, ces peb thiaj li tau sib ncaim lawm xwb.

Ua tsaug koj qhia nej cov ntseeg kev coj nyob noj rau kuv thiab, txawm coob thiab tsawg los yeej zoo ib yam qhov tseem ceeb ces yog sawv daws txoj kev xav sib xws, kom sawv daws muaj kev sib hlub sib pab nyob ruaj khov hauv Huab Tais Yes Xus lub npe es thaum muaj txoj kev tsaus ntuj los txog ib yim twg los kom sawv daws ho cev tes tuaj sib pab ua kom yim tau kev txom nyem ntawd lawv lub siab kaj. Ua li nej puas muaj mus teev Ntuj ua lus hmoob thiab?

Nram peb no tej zaum koj yeej paub lawm, peb cov XH. los peb kuj nyais ua nyias hauj lwm los yug tsev neeg ib yam. Peb muaj 5 tug XH. hos ib tug Deacon. Peb muaj ua txoos teev ntuj ua us hmoob ib hlis 2 zaug, peb muaj qhia kev ntseg rau cov me nyuam yuav los txais lub ntxuav,cim yug thiab cim txhab zog thiab rau cov yim neeg los ntseeg tshiab. Peb qhia ua lus hmoob txuam lus meskas, peb qhia rau txhua hnub Saturday thaum 3:OOPM txog rau 6:OOPM.
Tam sis no peb muaj tshaj li 100 yim, thaj tsam li 500 tawm leej, nyob hauv peb pawg mus lub tsev teev ntuj OLV.

Sister Maiv Tooj, koj pom Mim qhov post no ces koj muab cov npe Mim hais no coj mus tso nrog cov duab koj posted es neeg thiaj li paub tias yog leej twg nawv. Ua Tsaug.

**Maiv Tooj** 19th November 2009, 9:37 am

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°34

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 19th November 2009, 9:37 am

Nyob zoo Mim thiab XH. Npuag Tub,

Wow...! Mim aw...! Cas xav tias yog leej twg no es tseem yog kiag cov neeg uas yus paub xwb...Tab sis lawv tsis zoo li cov duab nov tag lawm es thiaj zeem tssi tau xwb...Ua tsaug nws tseem qhia rau peb paub txog thiab.

Mim! es nej daim teb yog daim twg?

Hahahah...! Cas tseem thaij tau nej daim teb khaws cia thiab mas zoo heev.

XH. Npuag tub, kuv twb muab cov npe mus tso rau lawv cov chaw tag lawm.

Ua tsaug rau neb kev txhawb siab.

Niam Yaj Nkias Keem, Roob Nyuj Qus 1954

**Mim** 19th November 2009, 4:52 pm

Mim

Mim: Tswv Cuab Hmong Catholique; Messages : 3609
Date d'inscription : 2009-10-16

Post n°35

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Mim 19th November 2009, 4:52 pm

Tais Tooj,
Kuv lam muab ib co information rau koj txog ntawm cov duab raws li kuv nco tau, txaus muab tso rau los koj ho tso, tsis txaus tso los cia li.

Nyob hauv post #5, Yaj Yeeb yog tus ua ntej, Thoj Hwj yog tus tom qab, tiam sis koj tso ob lub npe tsis ncaj rau ob tug neeg lawm, saib kho puas tau.

Hauv #7, duab cov kawm ua xib hwb nyob Vees Cas, raws li yus ntsia cov duab, pib sab laug tuaj,
tus 1, Yaj Koov Tooj (tus siab) (Yaj Txoov Yeeb tus kwv)
tus 2, Thoj Nom Neeb
tus 3(xauj nram qab tuaj), Lauj Fav Tswb (nyob Lyon)
tus 4(Pem Fav Tswb hauv ntej), Yaj Tswv Nkaub
tus 5, Yaj Vam (Yaj Txoov Yeeb tus kwv, hlob Koov Tooj)
tus 6, ................
tus 7, Lis Nkaj Teev (tus qis), (nyob Fab Kis)

Hauv # 8, Ntxhais Nong Bone (cov hnav Hmoob)
tus 1, (pom ib sab) phauj Npai Muas
tus 2, Yaj Dao tus muam hu ua ...............
tus 3, Mim Yaj, Niam thaj khu Muas Liab (Yaj Dao tus muam)
tus 4, Paj Vaj (nyab Txhiaj Vwj)
tus 5, (tus nyob nram qab), Tswb Xyooj
tus 6, Rhia.....xeem?
tus 7, ........................
tus 8, ........................

Ntxhais Nong Bone (hnav Nplog)
Leej nram qab:
tus 1, Phauj Xis
tus 2, phauj Paj Yaj (niam Qhua Xab Thoj)
tus 3, Qawm Yaj (kuv tus niam hluas)
tus 4, ...........
tus 5, Kiab Yaj (niam Neej Vaj Lis nyob Orleans) (Yog xav paub cov npe kom zoo thiab kom tas nug tais Kiab)
tus 6, ...........
tus 7, ..........
tus 8, ...........
tus 9, ............
Leej pem hauv hauv ntej:
tus 1, .............
tus 2, Kiab Yaj (Niam Zoov Ntxhais Tsab nyob Guyane)
tus 3, Maiv Vaj (nyab Txhiaj Vwj tus niam hluas)
tus 4, Ntxhi Thoj
tus 5, Ntxheb Xyooj;
tus 6, ...........
tus nram qab Ntxheb Xyooj zoo li yog txiv Zoov Ntxheb tus Npauj los tsis yog?
Cov hauv leej nruab nrab tsis paub ib tug npe li lawm.

Hauv #11,
daim duab thib ib, saib puas kho ua "Yaj Yeeb thiab Thoj hwj" dua;
daim duab thib ob yog pom TP Nyiaj Pov nrog cov Hmoob Zos Roob Nyuj Qus

Hauv #14, daim duab kawg, koj hloov puas tau lawv ob tug me ntxhais npe ua "Mim Yaj thiab Maiv Yaj"? Hahaha!...

Hauv #15, daim duab thib ob pom Tswv Qhia Tes Fas Nos nrog cov Hmoob Roob Nyuj Qus. Pib sab laug tuaj:
Leej nram qab, tus 1, TP Neej Vaj (?)
tus 2, Tswv Qhia
tus 3, Yaj Zam Nob ev ib tug me nyuam
tus 4, Yaj Tsuj Xyooj
Leej pem hauv ntej, tus 1, Yaj Txawj Tswb
tus 2, Xyooj Tsuj Rwg
tus 3, Yaj Yeeb (hnav dawb)
tus 4, Thoj Hwj
tus 5, Yaj Nchaiv Yias

Hauv # 18,
daim duab thib 1, yog thaij pom peb lub zos thiab lub Roob Nyuj Qus (mus nyeem zaj piav nram qab no);
daim Duab thib 2, yog hauv zos Roob Nyuj Qus;
daim duab thib 3-4 TP Nyiaj Pov thiaj Yaj Yeeb caij moto;
daim duab thib 5, nkawd los txog ntawm lub rooj vag nkag mus hauv TP
tsev;
daim duab thib 6, nkawd tab tom cab moto hla rooj vag nkag rau
hauv lawm.
daim duab thib 11 , koj sau "Yaj Nias Keem" thiab "Yaj Ntxhim txiv", ntshai yuav tau kho kom yog ua "Yaj Nkias Keem" thiab "Yaj Txhim txiv," tsam yav tom ntej neeg tsis paub lawm ces nkawd tau lub npe "Nias Keem" thiab "Ntxhim" no os...Hahaha!....

Piav daim duab thib 1:

Tais Tooj e... koj xav paub peb daim teb yog daim twg no lod? Peb daim teb ces pom nyob hauv thawj daim duab os... yog daim uas pom dawb paug muaj ib qho tiaj nyob pem toj, ces ho pom ib qho ntxhab nyob nram qab roob naj...Peb lub zos ces nyob rov phab xis, ntawm qhov uas tiaj zog thiab pom ib co ru tsev dawb dawb, zoo li yog peb lub tsev teev Ntuj thiab TP lub tsev. Peb lub tsev thiab txiv Paj Lis lawv lub tsev ces nyob kiag ntawm tsev teev ntuj sab nrad xwb, peb nyob puab kiag TP lub tsev ua mov. Tiam sis TP cov tsev mas TP xov laj kab pos hlau ncig rau thiab cog ib co paj ntoos rau ntawm laj kab. Daim duab no ntshai yog tuaj puag tim txoj kev luv fais sab roob tim no thaij mus rau peb lub zos sab tid lawm os... Lub roob uas pom ntawd ces yog lub Roob Nyuj Qus ntag los mas... Txoj kev luv fais uas lawv sawv thaij daim duab no ces yog txoj tuaj nram Moos Loos (Luang Prabang) tuaj, nws hla ntawm peb zos no, nyob rau sab xis kiag ntawm daim duab, ces ncig mus sab Roob Nyuj Qus nraud mus dua pem Xeev Khuang thiab Vees Cam lawm. Ntu av ntawm lub taw roob uas lawv nyob thaij duab no mus rau ntawm peb sab ntug zos ntawm sab xis ntawd, uas yog lub taw Roob Nyuj Qus, muaj ib ntus av tiaj dav tsem tsawv. Kuv tsis paub tias yog las thas npas Nplog los yog Mes Kas tuaj tshom ua ib lub me nyuam tshav dav hlau rau cov dav hlau tshuab tuaj tsaws tau.

(Tais Tooj koj rov muab daim duab saud tso rua ntawm no es nej thiaj pom tej kuv piav txog os)

Peb thawj thawj lub qub zog uas yog thawj lub zos TP Nyiaj Pov xub tuaj poob ces nyob ze rau ntawm lub caj qaum roob ntawm sab laug tid uas pom ib nyuag qhov dawb lias tim ntav roob. TP Nyiaj Pov lub tsev nyob kiag rau saum qhov caj qaum roob saud uas ib nyuag tiaj zog lawm. Zoo li tsis pom hauv no.Thaum thaij daim duab no xyov puas muaj neeg nyob pem qub zog lawm, tsis nco li lawm.

Thaum kuv txiv tawm tsev, peb tsev neeg los nyob ntawm lub zos nruab nrab, qhov uas pom ib kab dawb nyob ncaj ncaj nruab nrab ntawm lub ncov roob, pem peb daim qaum teb (qhov teb tiaj), tiam sis nyob rov rau ces kaum sab laug tod; thaum ntawd kuv tseem yau li 3-4 xyoos, peb los nyob lub zos ntawd tau ib ntus, kuv pog lawv nyob lawv tom qub zog. Thaum ntawd peb tseem tsis tau los ntseeg Ntuj. Kuv nco muaj ib tag kis, kuv txiv tab tom laig dab pem hauv plag, muaj ib tug pub thawj uas peb ntiav ua zog zaum ntawm ntug cub. Kuv sawv tsees saum txaj los, ya loo rau hauv yus txiv xub ntiag..."Iv! Iv!..." Pub thawj luag "He.. he.." mam ntsia na has cas tsis yog yus txiv, mam li thim hlo lawm.....Kuv nco nyob nram qab zog muaj ib tsob txiv kab lws siab siab, uas yus me nyuas yaus ntsia plim pliaj ntus puag saud thiaj pom cov txiv, tiam sis kuj muaj neeg mus de tau los noj thiab, xyov tsis nco tias qab li cas lawd.....Peb pib los ntseeg Ntuj peb tseem nyob hauv lub zos no..... Xyov hov ntev tom qab no, cov neeg ntseeg sawv daws txawm sib sau nrog TP Nyiaj Pov nqes los nyob nram tiaj nram no lawm, thiaj li nyob ze kev luv fais dua.

Thaum peb twb tsiv los nyob nram tiaj lawm, peb mam li mus ua cov teb uas pom ntawd. Muaj ib txog kev mus ntawm peb qab tsib taug mus rau tim teb; thaum mus txog tod, ces ncaim ib txog mus rau hauv ib lub me nyuam kwj ha hla ib tug dej txhawv uas txhawv ze ze ntawd mus rau nram qhov teb ntxhab lawm, hos ib txog ces tav saum ib nta mus rau tim qhov tiaj lawm. Tus dej ntawd, cov Hmoob hauv peb zos sawv daws mus ce los haus thiab mus ntxhua khaub ncaws hauv. Thaum peb lub zos tuam tau ciav dej los rau hauv zos lawm, sawv daws thiaj li tsis tshua mus ce lawm xwb. Kuv tseem nco zoo li thaum peb nyuam qhuav los nyob, txoj kev ntawd mas muaj ib ob tsob ntoo txiv cev, hom uas txi txiv hauv cov cag, tej lub luaj nti taw xoo, es liab liab, thaum siav mas noj qab kawg. Thiab muaj ib co me nyuam ntoo tawg paj ncw ncw thiab txi txiv tej niag ceg ntoo ncw ncw mas cav zoo saib kawg li. Tom qab no peb muab nplav toj uas mus lawm hauv tus dej ntawd luaj tib si ua teb, cog txiv duaj rau, cav tau noj thiab. Thaum peb yuav khiav rog, kuv txiv cog tau ib co xyoob mov raj rau ntawd. Hnov hais tias tom qab no Hmoob khiav rog los nyob, Hmoob twb mus txiav txiav ua mov raj noj thiab no, tiam sis tsuas hnov hais xwb.

Pem qhov tiaj tiaj, thaum i peb muab ib qho cog kob swm tshuaj (tea)(the) rau, thiab peb cog tau ob tsob thuv rau nram tw roob, cua tuaj mas nrov "fwv-wv-wv!" "fwv-wv-wv!"... mas kuv nyiam mus nyob mloog kawg li... Nram qhov ntxhab, peb muab ib qho cog kas fes (coffee). Tiam sis thaum ntawd tsis paub coj mus ua luam li, lam cog tau saib xwb. Tiam sis peb yeej haus cov tea ntawd thiab ov. Haus thaum tshiab tshiab ntawd qab txawv cov tom kiab khw... kuv nco zoo li qab dua sub as... Muaj ib ntus thaum peb tuaj tau tsis ntev mas kuv nquag nquag ua npau suav pom peb qhov teb ntawd kawg li tiag....xyov yog nco hwv los ua cas?....

Ntawm kiag peb qab tsib taug mus rau TP lub tsev mov qab tsib taug muaj ib tsob ntoo paj txiv quav nees, thaum tawg paj mas tawg tau tej rev paj loj loj zoo li yog orange los yog liab, nco tsis meej lawm. Muaj ib lub kwj deg ntiav ntiav, tiam sis tsis muaj dej, tsuas muaj thaum los los nag xwb, hla nram tsob qab paj txiv quav nees dua hauv qhov ntxhab zog lawm. Kuv nco zem zuag zoo li muaj ib ntus, TP Nyiaj Pov qhia peb cov Hmoob muab quav nyab npleg los xyaw av nkos puab ua thwj cib los yog ua phab ntsa xov tsev nyob nram tus kwj deg nrad. Tiam sis ntshai peb cov Hmoob tsis nyiam los ua cas, zoo li tsis muaj neeg siv li.... tsuas nco tau zem zuag li ntawd xwb.

Ntawm sab xis ze ntawm daim ntug duab, peb pom zem zuag ib txog kev nce dua ped lawm. Txoj kev ntawd mus txog pem ib lub zos nyob pem ntu uas tiaj zog theem pem toj ped, ces hos tav mus hla pem peb ob lub qub zog mus dua sab roob nraud lawm, mus tshuam kev luv fais sab nraud. Yog txoj kev mus lawm tim Phuaj Xeeb Neeb Phuas Las Mus los tsis sub, mus txog ib qho kev ncaim, muaj ib txog mus rau Xieng Khouang, muaj ib txog mus rau Vees Cam lawm.

Raws li kuv nco mas yog zoo li no. Yog yuav piav xwb mas tseem muaj ntau yam, tiam sis hnub no kuv tsuas hais li no xwb os, ntshai nej twb laj nyeem lawm os....

Last edited by Mim on 20th November 2009, 5:48 am; edited 4 times in total

**Maiv Tooj** 19th November 2009, 6:29 pm

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°36

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 19th November 2009, 6:29 pm

Nyob zoo Mim,

Wow...! me Mim aw...! Cas nws yuav tham cuag li uas tseem yog niaj hnub no...Tham tau kho siab ua luaj li tej me qub neej no. Zoo kawg nkaus, nws txhob hais tias nws tham ntau heev lawm, txhua yam uas nws nco tau yuav yog ib txoj xub ke qheb peb Hmoob qhov muag mus rau txoj kev vam meej. Thaum ub TP. Nyiaj Pov tuaj pom Hmoob nyob toj roob, TP. Yeej paub hais tias nws yuav ua li cas Hmoob thiaj yuav dim ntawm txoj kev khwv. Luag tej coj tsis tau Hmoob nqes mus nyoib tiaj nrag, tab sis TP. Lub hwj xyeej loj, Tswv Ntuj nrog nws, nws thiaj coj tau Hmoob mus nyob rau qhov tiaj, tuam dej thiab muaj kev tsheb los txog zej txog zos kom yooj yim rau lub neeej niaj hnub.

Kuv tau TP. Cov lus sau thaum nws lub caij yuav kawg, nws tsis tshua nco qab hais lus Hmoob lawm, nws sau ua lus Fab Kis lawm xwb. Kuv khoom kuv mam muab txhais los ntxiv rau hauv nov. Tab sis hauj lwm ntau heev, twb yog kuv leej nkawm pab kuv ua ib txhia thiab kuv thiaj ua yeej...Hahhaah...!

Mim, nws khoom no rov tuaj tham txhua yam uas nws nco tau rau peb tau khaws tseg rau tej xeeb leej xeeb ntxwv nawb mog.

Ib tsam los hauj lwm los mam mus kho cov npe duab. Ua tsaug rau nws.

**Mim** 20th November 2009, 11:14 am

Mim

Mim: Tswv Cuab Hmong Catholique; Messages : 3609
Date d'inscription : 2009-10-16

Post n°37

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Mim 20th November 2009, 11:14 am

Tais Tooj,
Ua tsaug koj cov lus zoo rau kuv os.... Nev saib koj tseem paub cov ntxhais Nong Bone zoo tshaj kuv los sad.... Ib co npe kuv tsis paub tseeb koj tseem paub dua. Kuv muab Cib thiab Ntxheb Xyooj nkawd ob lub npe sib pauv lawm, koj tseem pab kuv muab kho rau thiab lwm lub npe uas kuv nco tsis meej koj kho rau, ua koj tsaug os.... lam muab sau cia... ntev ntev lawm ces haj yam yuav tsis nco qab zuj zus xwb....

**Maiv Tooj** 21st November 2009, 5:26 am

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°38

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 21st November 2009, 5:26 am

Mim wrote:Tais Tooj,
Ua tsaug koj cov lus zoo rau kuv os.... Nev saib koj tseem paub cov ntxhais Nong Bone zoo tshaj kuv los sad.... Ib co npe kuv tsis paub tseeb koj tseem paub dua. Kuv muab Cib thiab Ntxheb Xyooj nkawd ob lub npe sib pauv lawm, koj tseem pab kuv muab kho rau thiab lwm lub npe uas kuv nco tsis meej koj kho rau, ua koj tsaug os.... lam muab sau cia... ntev ntev lawm ces haj yam yuav tsis nco qab zuj zus xwb....

Nyob zoo Mim,

Hahahah...! Koj paub ib txhia, kuv paub ib txhia, coj los ua ke ces wb twb nco tau yuav luag tas...Koj tsis nco qab Kiab Xaiv Pov lawm naj...Hahhaah...!

Kuv pheej nrhiav duab ua yaj ua yeeb ces mus rov los lam saib nawb.

Hmoob Thoj Roob Nyuj Qus,
1/ Tus tsis rau khau: Thoj Txooj Zeb ===> XH. Thoj Xyooj ib tug tij laug.
2/ Yaj Nchaiv Yias==> Zoov Txhiaj txiv

Last edited by Maiv Tooj on 4th January 2010, 10:24 am; edited 1 time in total

**Mim** 21st November 2009, 12:14 pm

Mim

Mim: Tswv Cuab Hmong Catholique; Messages : 3609
Date d'inscription : 2009-10-16

Post n°39

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Mim 21st November 2009, 12:14 pm

Hw-m-m..... tus sab xis ntawd ... zoo li muaj ntsis yuav khws li txiv Nchaiv Yias sub nad... xyov puas yog?... tus sab laug... zoo li yuav paub ...ho tsis paub thiab na....

**Maiv Tooj** 21st December 2009, 8:35 am

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°40

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 21st December 2009, 8:35 am

Ua TP. Nyiaj Pov tsaug tau pab Hmoob

Thoj Tsav Ntxaij,
Roo Nyuj Qus, Tim 19 lub 2 hlis 1957

Thoj Tsav Ntxaij& leej nkawm,
Roo Nyuj Qus, Tim 19 lub 2 hlis 1957

Txiv Plig Nyiaj Pov,

Zoo siab ntau, uas txiv plig rov tau tuaj xyuas peb sawv daws cov Hmoob nyob Fab Kis teb. Ua ntej tshaj plaws, yog Txiv Plig rov tuaj xyuas kuv. Kuv yog Thoj Tsav Ntxaij, uas thaum ub yog thawj thawj tug Hmoob uas Txiv Plig tuav tes. Txiv Plig thiaj tau txiav siab nrog Peb cov Hmoob nyob txij hnub tim 17/4/1950 los mus txog niaj hnub no.

Hnub no, yog ib hnub dawb ib hnub hu, uas txwm 1/2 Tiam ( yog 50 xyoo). Txiv Plig Nyiaj pov thiab TP. Neej Vaj nej tseem muaj txoj sia nyob cus plaws rov tuaj ntsib peb dua. Thiab yog ib hnub zoo siab ntau uas rov ua rau Peb tsoom Hmoob nco tsis ploj. Txog lub zij ceeb TP. Nyiaj pov thiab TP. Neej Vaj tau nrog peb cov Hmoob nyob ua ke nyob Los Tsuas teb, rau lub zos Roob Nyuj Qus thiab Phuaj Thoos. Txiv Plig tau ncaim nws tsev neeg thiab lub teb chaws, tuaj coj ib lub neej li Hmoob, yuav Hmoob npe, noj Hmoob qav, hais lus Hmoob.

Qhov tseem ceeb tshaj plaws, Txiv Plig tseem tau coj ntau yam tuaj pab Peb Hmoob, xws li:

- Coj lub Moo Zoo kev ntseeg Ntuj tuaj rau Peb Hmoob thawj zaug.
-Pab tshuaj thiab kev kho mob.
-Qhia thiab txhim kho Hmoob lub neej thiab kev noj kev haus.Tsim ntawv Hmoob thiab khaws Hmoob txuj ua tej phau ntawv rau Hmoob tau siv txog niaj hnub no.
- Tau tsim vaj tsev zoo thiab txais cov tub ntxhais Hmoob nyob kawm ntawv nyob hauv nroog loj.
- Taus txais ntau leej tub ntxhais mus kawm ntawv npaj ua Xib Hwb, ua Leej Choj thiab ua phauj. Kuj muaj tus mus kawm tiav los ua Leej Choj xws li: Txiv Tswv Qhia Thoj Choo. Los tseem muaj tus ua Tub Tsob Hwb, zoo li Yaj Zoov Ntxheb thiab Nyiaj Nkaub nyob rau Guyane.
Tseem muaj cov xib hwb niaj hnub nyiam no pab coj kev ntseeg nyob Fab Kis teb. Puav leej yog cov hluas thaud, Txiv Plig qhia thiab tau pab los mus.

Txij thaum lub teb chaws ntxeev, txiv plig tseem mob siab tsis nrug, tuaj caum xyuas sawv daws rau txhua lub yeej thoj nam Thaib teb raws li txiv plig mus tau. Tseem tau ua ntawv thov coj tau ib pab Hmoob mus nyob rau teb chaws Guyane. Txiv plig kuj nrog nraim pab saib xyuas lawv los tau ib ntus ntev loo. Los tsis tas li ntawd, txiv plig Neej Vaj tseem los pab peb cov nyob rau Fab Kis teb; txiv plig Nyiaj Pov tseem nco txog tsoom neeg Hmoob tus tsis tau hnov dua Tswv Ntuj lub Moo Zoo ib zaug, thiaj tau mus tshaj Ntuj lus nyob rau thaib teb. Txiv Plig twb laus lawm los tseem mob siab tiv qawv txoj kev nyuaj siab, khwv yim pab tshawb nrhiav keeb kwm Hmoob, cov tseem ceeb tshaj plaws zoo li :
1- Phau ntawv txheeb lus
2- Kab ke pam tuag
3- Kab tshoob kev kos
4- Kwv txhiaj
5- Dab neeg
6- Thiab phau ntawv "haiv hmoob liv xwm" uas muaj 566 phab rau zeej tsoom hmoob tau paub lub neej hmoob yog los qhov twg los.

Yog tsis muaj txiv plig, tej zaum txawm peb yuav hnov Ntuj lub Moo Zoo los yeej yuav lig peb lawm ntau.

Peb tsoom ntseeg Hmoob muaj ib lo lus thov qhuas, cav thiab zoo siab kawg nkaus txog txiv plig tej hauj lwm uas tau pab peb Hmoob txhua yam tag nrho, vim txiv plig muaj lub peev xwm hlub peb tsoom Hmoob tiag tiag, uas tsis tau pom muaj leej twg twb xub ho ua dua los lawd. Peb tsoom ntseeg yuav nco ntsoov txiv plig tej txiaj ntsha txiaj ntsig thiab qhia rau tej xeeb leej xeeb ntxwv kom paub txog Tswv Ntuj lub Moo Zoo zoo li, txiv plig tau ua ib tug piv txwv tsis muaj yam piv tau, hais txog ntawm txoj kev hlub peb tsoom Hmoob.

Lo lus kawg. Peb tsoom ntseeg Hmoob los yog tseem coj qub kev cai dab qhuas nyob rau yav Fab Kis qab teb, tau tuaj sib koom hnub no, tsuas muab lo lus qhuav los ua txiv plig Nyiaj Pov thiab txiv plig Neej Vaj neb ib los tsaug xwb, yog tsis muaj neb, tej zaum peb twb tsis paub Ntuj lub Moo Zoo thiab ntshai yuav khaws tsis tau peb tej txuj ci Hmoob ib yam los tseg cia rau tej me tub me nyuam.

Tus sau:

Thoj Tsav Ntxaij
nrog tsoom ntseeg
thiab tsom kwv tuj neej tsa sawv daws
uas tuaj ua ke ntawm no,
thov ua txiv plig ib los tsaug.

Xov xwm Ntseeg Ntuj Sib Fi Txuj
Lub 7 hli, xyoo 2000

Thoj Tsav Ntxaij & leej nkawm

Last edited by Maiv Tooj on 1st February 2010, 5:56 am; edited 4 times in total

**Mim** 21st December 2009, 12:15 pm

Mim

Mim: Tswv Cuab Hmong Catholique; Messages : 3609
Date d'inscription : 2009-10-16

Post n°41

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Mim 21st December 2009, 12:15 pm

Tais Tooj, cov lus no yeej zoo kawg, thiab tsim nyog muab khaws cia. Tiam sis kuv xav paub tias yog nws hais rau lub sij hawm twg, xyoo twg no nas. Tam sis no lawv twb dua toj tas lawm koj cia li tso zoo li tseem nyuam qhuav hais no xwb na... TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv ) - Page 2 Icon_question

Los yog kuv tsis to taub ne?...

**Maiv Tooj** 21st December 2009, 6:00 pm

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°42

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 21st December 2009, 6:00 pm

Mim wrote:Tais Tooj, cov lus no yeej zoo kawg, thiab tsim nyog muab khaws cia. Tiam sis kuv xav paub tias yog nws hais rau lub sij hawm twg, xyoo twg no nas. Tam sis no lawv twb dua toj tas lawm koj cia li tso zoo li tseem nyuam qhuav hais no xwb na... Los yog kuv tsis to taub ne?...

Hahahah...! Me Mim,

Twb yog nag hmo tsaug tsaug zog es tsis tau sau tsav Xov Xwm lub npe thiab sij hawm xwb. Kuv thiaj tso ib los tias: " Mam txuas ntxiv lwm zaus" no rau. Tsav ntawv nop Thoj Tsav Ntxaij sau thaum lub 7 hli, xyoo 2000, nyob rau Castres, Fab Kis teb. Nws xa rau Hmoob Fab Kis phau Xov Xwm Ntseeg Ntuj Sib Fi Txuj. Kuv khoom mam nrhiav duab tuaj tso rau. Tiag mas zaj nov yuav maj mam tso rau tom qab, tab sis nrhiav tau lawm ces yuav muab khaws cia rau hauv nov tsam ploj lawm.

**Maiv Tooj** 29th December 2009, 12:46 pm

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°43

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 29th December 2009, 12:46 pm

LUB TSEV KAWM UA XIB HWB NYOB VEES CAM

Thaum xyoo kawg 1962, Txiv Plig Nyiaj Pov nyob Vees Cam lawm, Vees Cam yog ib lub tuam nroog saib tas cov ntaub ntawv nyob Los Tsuas teb, Txiv Plig Nyiaj Pov thiaj tsim tau ib lub tsev rau cov tub hluas hmoob, ib lub rau cov ntxhais hmoob uas tuaj pem roob tuaj kawv ntawv rau hauv lub tuam nroog. Qhov loj tshaj yog Txiv Plig Nyiaj Pov tsim tau ib lub tsev kawm Xib Hwb. Yog ib ruam mus lawm tom hauv ntej deb kawg nkaus, yog ib ntus tseem ceeb nyob hauv nws lub neej, uas kav mus txog rau xyoo 1975 uas sawv daws ncaim Los Tsuas teb tuaj tas ib sid.

Lub tsev kawm ua Xib Hwb ntawd, yog ib qhov chaw tiag taw loj rau txoj kev tshaj Ntuj lus, txoj kev qhia ntawv hmoob rau cov hluas, kev pab kho mob kho nkeeg, kev qhia ua noj ua haus, ua liaj ua teb rau cov hmoob.

Lub tsev haus paus Xib Hwb tsim nyob Vees Cam ntawd, nws kuj muaj nws liaj nws teb, muaj kev pab nyiaj txiag tuaj ntawm cov koom haum uas tsis yog nom tswv tsim.

Tsoom Xib Hwb uas tuaj kawm nyob Vees cam ntawd, lawv kawm txhua txhia yam uas tau hais los saum no kom paub, ntxiv rau lwm yam txuj ci thiab, thaum kawm tiav plaub xyoos lawm, muab faib mus nyob nrog tej pab ntseeg pem cov zos hmoob, nyob ob xyoos, cov hluas muaj ntau tus ua yog ib lub sij hawm zoo rau lawv nrhiav txij nrhiav nkawm, thaum nyob ob lus xyoo pem roob tas lawv rov qab los kawm ntxiv ob xyoo hauv tsev hauv paus thiab, yog ob lub xyoo ua kawm ntau yam tshaj tuaj, uas muaj tsib tug xib hwb qhia rau lawv.

Txiv Plig Nyiaj Pov yog tus saib xyuas tej hauj lwm no kom khiav mus zoo, nyob hauv ib lub xyoo twg, Txiv Plig Nyiaj Pov mus ncig xyuas txhua txhia tus Xib Hwb nyob pem roob kom tau ib zaug. Nws txoj hauj lwm nyob vees cam qhov loj yog ua tej ntaub ntawv, nws tsuas so me ntsi noj mov thaum tav su thiab so me ntsis ntxiv xwb ces txaus nws lub siab lawm, nws muab ib tug cai rau cov tub tuaj kawm kom txhua txhia tus yuav tsum sau lawv tej kev kawm kav hnub, tso rau saum rooj txhua txhia hnub, muaj ob tug ntxhais uas muaj lub laj lim plab plaw pab txiv plig muab tej ntawd rov ntaus, siv zog npaum li no xwm yeem nkaus thiaj tsim tau peb plaub caug phau ntawv ua muaj 100 phab txog rau 500 phab sau ntawv ua hmoob rau cov hmoob xwb.

Nws muaj cov ntawv qhia Ntuj kev cai, phau ntaw qhia kho mob, peb phau ntawv qhia txog cov teb chaws nyob ntiaj teb no, ib phau ntawv qhia nyeem cov tsab ntawv hnub chiv, qhia cov sib yuav ua lub cim cog lus, tej ntawv nyeem kom txawj ntse rau yus tus kheej ntxiv, cov ntawv piav txog phau ntawv ntshiab, piav txog kev teev Ntuj, ua thaj txi Ntuj, peb phau ntawv koom txoos kwv huam,...ua ke ntawd kuj muaj cov phau ntawv kab tshoob kev kos, kab ke pam tuag raws hmoob kev cai, muaj phau ntawv txiv xaiv foom kom, muaj kwv txhiaj, dab neeg, etc....cov Xib Hwb khaws thiab sau tej txuj ci ntawd, ob tug ntxhais ntaus ntawv muab ntaus cia, Txiv Plig yog tus kho thiab muab ua kom tsheej phau ntawv tseg.

Tsis tas li ntawd, Txiv Plig Nyiaj Pov txhais tau phau ntawv ntshiab tas nrho, yog phau ntawv cog qub lus thiab tas nrho cov ntawv cog lus tshiab. Yog ib yam uas, ua tau sai kawg nkaus vim hais tias Txiv Plig rov qab tau txais cov ntawv ua thaum ub Txiv Plig tau thov kom tus tub rog hmoob muab zais rau pem qhov tsua pham thib tau plaub lub xyoos nkaus, es Txiv Plig yeej tu siab hais tias ntshai yuav tsis rov tau li lawm.

Yog Txiv Plig Vaj Xwm, uas yog ib tug Txiv Plig as mes lis kas, tau rov qab mus txog rau lub roob Pham Thiv ntawd, uas cov tub rog rov qab txeeb tau, tus tub rog uas Txiv Plig Nyiaj Pov tau thov kom muab Txiv Plig cov ntawv coj mus zais ntawd, rov qab mus nrhiav tau thiab muab rau Txiv Plig Vaj Xwm nqa los rau Vees Cam, cob rau Txiv Plig Nyiaj Pov. Yog ib yam ua ua kom Txiv plig zoo siab tshaj plaws ua kom tau phau ntawv ntshiab sai .

TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv ) - Page 2 Post-348-1182100748_thumb

cov kawm ua xib hwb nyob Vees Cas, raws li yus ntsia cov duab, pib sab laug tuaj,
tus 1, Yaj Koov Tooj (tus siab) (Yaj Txoov Yeeb tus kwv)
tus 2, Thoj Nom Neeb
tus 3(xauj nram qab tuaj), Lauj Fav Tswb (nyob Lyon)
tus 4(Pem Fav Tswb hauv ntej), Yaj Tswv Nkaub
tus 5, Yaj Vam (Yaj Txoov Yeeb tus kwv, hlob Koov Tooj)
tus 6, ................
tus 7, Lis Nkaj Teev (tus qis), (nyob Fab Kis)

TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv ) - Page 2 Post-348-1189366622

TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv ) - Page 2 Post-348-1189366622

Tim Hwb 1966

**Maiv Tooj** 29th December 2009, 12:59 pm

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°44

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 29th December 2009, 12:59 pm

KHIAV ROG LOS RAU THAIB TEB(1975-78)

Twb yog vim luam tej ntawv no tawm ntau heev, muaj Txiv Plig Nyiaj Pov lub npe nyob txhua txhia qhov chaw, ces Tx.Pl. Nyiaj Pov rau ntawm sawv daws lub qhov muag zoo li ib tug kws txuj paub txog hmoob zoo, nyob txhua txhia lub zoos hmoob, sawv daws paub Tx.Pl. Nyiaj Pov lub Npe tas, nws txoj kev muaj koob nto npe ntawd, zoo li ib rab riam ob sab ntse, thaum lub caij cov koom tshaj los tuav lub teb chaws, ua rau kom nws nyob tsis tau hauv lub teb chaws, vim luag sau nws npe cia rau qhov txhia chaw tsis pub nws nyob Los Tsuas teb, li ntawd, Tx.Pl. yuav tau tawm hauv lub teb chaws Los Tsuas, thiab ncaim mus tas ib sid, yuav tsis muaj cai tuaj ntxiv, lawv muaj plaub tug Txiv Plig ua cov Nplog Liab nrhiav ntes, yog lawv nyob ntxiv.

Hais txog ntawm cov Hmoob, txij li tsov rog sawv, uas sawv daws paub los, nws muaj cov Fab kis pab cov hmoob tiv thaiv thaum chiv thawj, ua rog rau cov Nplog Liab, dhau los kuj yog cov as mes lis kas, pab cov hmoob tiv thaiv kom cov Nplog Liab nkag tsis tau rau hauv Los Tsuas teb. Vim peb cov hmoob yog cov neeg nyob pem toj siab ntawm ciam teb.

Los txog rau xyoo 1975 uas cov Nplog Liab los kav lub teb chaws, muaj cov hmoob nyob mus zwm rau cov Liab, muaj cov khiav tawm lwm teb chaws, haj tseem muaj cov khiav nkag hav zoov. cov Nplog Liab thiaj tau liam hais tias, cov Tx.Pl. no yog cov cuab hmoob zog, tiag hmoob ko taw ua rog rau lawv, ces cov Nplog Liab thiaj nrhiav lawv ntes. Tsoom hmoob tawg rog khiav coob heev, txhiab txhiab leej xwb, khiav kom mus tshwm rau thaib teb, tsis paub hais tias yuav ciaj los yuav tuag, laus, hluas, poj niam me nyuam khiav ua ntwv zws los mus rau Thaib teb.

Txiv Plig Nyiaj Pov yog thawj pab Txiv Plig uas khiav tawm teb chaws Los Tsuas tawm rau Thaib Teb. Tsua yog hla ciam teb rau sab tid xwb, Txiv Plig Nyiaj Pov yog ib tus neeg kub siab heev rau nws txoj hauj lwm, nws yeej tseem tsis tso nws cov hauj lwm tseg hlo li, khiav los rau sab Thaib teb, nws thiaj ua phau ntawv xaiv cov zaj nyeem thaum ua lub thaj txi Ntuj, luam nyob Bangkok rau nws cov hmoob ua tseem nyob los tsuas teb, nws thawj txoj kev txhov siab rov tshwm sim tuaj, thiaj rov tsim dua ib lub tsev hauv paus Xib Hwb rau cov hmoob nyob Tseej Maim , yog nyob Thaib qaum teb sab hnub poob. Kuj yog ib txoj hauj lwm ua nws tsim tau zoo lawm, vim niaj hnub tam sim haj tseem muaj lub tsev Xib Hwb ntawd. Lub sij hawm uas nws nyob Tseej Maim ntawd nws haj tseem rov tsim sua ib phau ntawv Ntshiab tshiab thiab, vim thaum pib los txog rau lub sij hawm ntawd, cov ntawv Ntshiab ua ua nyob Los Tsuas teb tsuas ua tej phwb phau me me nyias nyob nyias, tus ntxhais ntaus ntawv Yaj Diav (Bernadette) uas haj tseem nyob los tsuas teb, uas yog ib tug tsab xeeb nrog rau nws lub tswv yim zoo haj tseem muaj cuab kav nrhiav tau kev nqa tag nrho Txiv Plig cov ntawv uas nws txhais tau tas nyob Los Tsuas teb hla dej tuaj rau Txiv Plig nyob Thaib Teb, cov ntawv ntawd nyhav 700 kg.

Diav Yaj, Roob Nyuj Qus 1957

TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv ) - Page 2 Diav10

Phauj Diav Yaj, 2006

Txiv plig Nyiaj Pov kuj haj tseem mus ncig xyuas cov hmoob tawg rog los nyob rau plaub lub yeej tawg rog loj uas cov hmoob , ib txwm los yog ib co neeg twj lij, siab tawv, tiv thaiv lawv lub teb chaws, lawv txoj kev twj lij, yam tsis ntshai tuag hlo li, zaum no ua ib siab tawg los nyob hauv cov yeej Thoj nam sib tsub sib nias, txhiam xwm toob xib nyiaj txiag tso tseg tag nrho rau tim ub, seem txoj sia tuaj nyob rau Thaib teb. Nyob hauv cov yeej tawg rog no, Txiv Plig Nyiaj Pov thiaj rov nrhiav tau plaub pab neeg, khaws peb hmoob tej txuj, tej kab kev cia, zaum no lawv muaj tshuab zom lus thiab tshuab ntaus ntawv lawm.

Nrog rau lub koom haum kev Nrhiav Txuj Fab Kis (Centre National de Recherche Scientifique franÃ§ais) uas tau kos npe cog lus nrog Txiv Plig Nyiaj Pov kav xyoo 1976 mus txog xyoo 1978, ua rau kom nws tau kev nyob thaib teb lub sij hawm ntawd, nws txoj hauj lwm yog khaws hmoob tej kab tshoob kev kos uas lawv siv nyob los tsuas teb. Tiav rau xyoo 1978, phau ntawv no muaj 400 phab ua ob hom lus, lus hmoob thiab lus fab kis, nws txoj kev nrhiav txuj zaum no muaj nqe li ib daim ntawv kawm tawm hauv lub tsev kawm ntawv txheej siab txog txuj ci neeg kev sib fim nyob lub tsev kawm ntawv Sorbonne.

Duab Npis Thoj, Vees Cam.
( Thov ua koj tsaug ntau mog Npis, yog muaj koj lub siab loj, siab dav kuv thiaj tau cov duab no los rau peb saib hnub no.)

Foyer Simuang, yog cov tsev txiv plig ua rau cov tub kawm ntawv hmoob thiab cov tim hwb toj siab nyob kawm ntawv ram Vees Cam. Zaum no muab cob rau Tseem Hwv Los Tsuas lawm. ( thaum ub yog tsev ntoo xwb, nyuam qhuav ua tau 3 lub tsev pob zeb nov tau 3 xyoos xwb ces teb chaws tawg)

Sab kev sib tim ub, TP. Neej Vaj lub tsev
12 hlis 1989

Keeb kwm Ntawv Hmoob Thoob teb ua tawm hauv lub tsev nov los.
Lub tsev qes ntawm TP. Neej Vaj qhov rooj.
Simuang, Vientiane.
Thaum teb chaws nchuav, 1975, Txiv Plig lawv tau muab cov tsev nov cob rau Tseem Hwv Los Tsuas. Tam sim nov lawv muab ua Ministère de la Santé lawm.

Tom txiv plig daim teb Thaj Nkoj,
yug nyuj tso kua mis ,
yug qaib nteg qe thiab yug npua.
Yog thawj lub tsev tu tsiaj nyob Los Tsuas teb.
Tau muaj cob rau Tseem Hwv Los Tsuas lawm thiab.
Lawv tseem yug npua txog niaj hnub no.

Last edited by Maiv Tooj on 6th January 2010, 4:09 am; edited 2 times in total

**Maiv Tooj** 31st December 2009, 8:48 am

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°45

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 31st December 2009, 8:48 am

TP. Nyiaj Pov lub tsev nyob Javouhey, Guyane teb.

KHIAV IB ZAUG NTXIV RAU GUYANNE

Tx.Pl. Nyiaj Pov npaj ua nws daim doctorat

Xyoo 1978 lub cuaj hlis, Tx.Pl. Nyiaj pov rov qab los Paris, los kawm ib xyoos nyob hauv lub tsev kawm ntawv txheej siab Sorbonne, xyoo 1979, cov Nom Tswv Fab kis xav tau Tx.Pl. Nyiaj pov mus saib thiab tsim ib lub zos ob rau cov hmoob tawg rog tuaj nyob Guyanne Fab kis

Tau ob xyoos ua ntej los, yog Txiv Plig Neej Vaj uas yog ib tug tub tshaj Ntuj lus, ib tug Txiv Plig uas tau nyob hauv lub tsev hauv paus Xib Hwb nyob Vees cam thiab. Yog tus tau mus nrog lawv tsim thawj lub zos hmoob nyob hauv plawv hav zoov dub nyob Guyanne, nyob ntawm as mas zos nis hnub tuaj sab qaum teb. Cov hmoob caij nyaj hoom ya 20 000 kis los mev, tsuas so ib zaug nyob Paris xwb. Thaum nyob hauv lub nyaj hoom mas ua cas zoo li ya mus tsis txawj txog li, thaum txog, sawv daws tseem yuav caij tsheb li peb teev ntxiv thiab thiaj txog, tsis tas li ntawd tseem muaj cov neeg nyob hauv lub teb chaws, tuaj qw tom kev hais tias Â« MÃ

os dÃ

ro Â» ( Hmoob khiav tawm mus), tab si vim cov neeg no yog ib co neeg siab tawv, siab ntev, ib txwm keeb los lawv ua yam twg, yeej ua kom mus txog qhov kawg. Cov hmoob tau muab siab rau siv zog tas nrho li, ces lub me nyuam zos Kas Kos (Cacao) thiaj xeeb txawm muaj tau, thiab huam vam, ces lub ntsej muag thaj yeeb thiaj tshwm tau rau niaj hnub tam sim no, ua rau cov neeg ib txwm nyob hauv teb chaws thiaj tso siab rau lawv.

Txiv Plig Nyiaj Pov ua tus xub ntau tswv yim hais txog mus nyob Guyanne puag thaum nws tseem nyob Thaib teb ntawd, thiaj ua ib siab tso nws txoj kev kawm kom tau doctorat pov tseg, mus tsim lub zos hmoob ob nyob rau puag pem ciam teb, qhov chaw hu ua zas vus hes (javouhey), yog txais ib txoj hauj lwm rau nws cov kwv tij hmoob uas, ua ib co neeg thaum nyob thaib teb, qaug zog, tsis muaj txoj xub ke taug, qhib txoj kev dav rau lawv lub neej lawm yav tom ntej. Muaj ib yam tseem ceeb uas pom tau hais tias Tx. Pl. Nyiaj Pov hlub hmoob, coj tau li Ntuj cov lus qhia tiag tiag : tsis hais tus tseem coj qub kev cai, los tus yuav coj hom kev cai twg, Tx.Pl. txais lawv sawv daws tuaj mus tib si, thiab pab sawv daws ib yam nkaus, vim yog hais tias yog lwm tus neeg, mas ntshai nws yuav mus txais nws cov neeg tuaj mus xwb. Tsis hais lub zos twg, Kas Kos los luv zos Zas Vus Hes, Txiv Plig lawv ua zoo ib yam. Peb lub hlis tom qab thaum sawv daws tuaj txhij tas, mam pom tau hais tias 60 feem pua yog cov tseem coj qub kev cai, hos 40 feem pua uas seem ntawd yog cov plos tes tos thiab cov kas tos liv (protestants et catholiques) lub sij hawm ntawd yog xyoo 1979.

Txiv Plig Nyiaj Pov coj thiab qhia lawv tau plaub lub xyoo, pom tau hais tias law mus tau lawv lawm ces, Txiv Plig tso zuj zus rau lawv tuav tas txhia yam.

Txij xyoo 1984, Txiv Plig Nyiaj Pov rov tig los saib nws txoj hauj lawm, yog nws cov ntseeg kav thos liv, xyoo 1986 Txiv Plig Neej Vaj los rau Fab Kis av loj lawm, los ua hauj lwm rau cov hmoob nyob Fab Kis av loj, ces Tx.Pl. Nyiaj Pov yuav tau pab cov ntseeg nyob kas kos thiab. Ces nws thiaj rov qab ua cov ntawv hmoob rau cov hmoob (Qhov ua Tx.Pl. Nyiaj Pov xav hai meej meej yog : ua cov ntawv hmoob rau cov hmoob, tsis yog ua cov ntawv hmoob hais txog hmoob) yog ib txoj hauj lwm nyhav hauj sim, Txiv Plig Nyiaj Pov rov qab nrhiav sawv daws, nrhiav cov txuj hmoob coj los sau, vim peb cov hmoob tawg mus nyob puv ntiaj teb lawm. Rov qhia dua ib co neeg pab nws ua hauj lwm dua tshiab, tej yam hauj lwm no yog lub laj lim plab law ntawm Txiv Plig Nyiaj Pov lub sij hawm nyob zas vus hes.

Tus sau: Yaj Tshuas Rwg

TP. NYiaj Pov tab tom ua hauj lwm ntawm lub rooj ntawv nyob Javouhey

Lub zos Javouhey, Nkws Yas

Teb zaub Javouhey

Last edited by Maiv Tooj on 31st December 2009, 10:00 am; edited 1 time in total

**Maiv Tooj** 31st December 2009, 9:43 am

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°46

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 31st December 2009, 9:43 am

Xyoo 1984, tsa lub Koom Haum Khaws Hmoob Txuj.

Niaj xyoo kuv mus xyuas cov yeej thoj nam nyob Thaim Kuj. Kuv pom tias cov Ntawv Hmoob Thoob Teb ri mus tiag.

Xyoo 1982 los 1983, cov Hmoob kawm ntawv pib yws tias:

-Peb kawm ntawv Hmoob, tab sis cov phau ntawv nyeem ho muaj tsis txaus.

Xyoo 1984, tus tswj cov tsev kawm ntawv ESF hais rau kuv tias :

-xyoo 1976, 1977, 1978, koj tau khaws cov txuj Hmoob. Koj tau npaj kom muaj 4 pab neeg Hmoob nyob hauv 4 lub yeej loj ( Vib Nais, Noom Khais, Chieng Kham thiab Nab Nyaus) kom lawv tau kev khaws cov txuj Hmoob. Koj tau muab cov tshuab kaw lus, cov tshuab ntaus ntawv, cov kas xev thiab ib me ntsis nyiaj pab lawv. Koj muaj 10 tawm kis lus ntawv khaws cov txuj Hmoob. Xav thov koj muab cov ntawv ntawd los ua tej phau, muab luam tawm ntau txhiab phau, ces peb thiaj yuav muaj ntawv txaus faib rau tsoom Hmoob.

Hnov lo lus ntawd tas, mas kuv yuav tsum nrhiav nyiaj los pab cov neeg yuav ua cov phau ntawv Hmoob, thiab los luam ntawv kom txaus. Kuv mus piav tej teeb meem ntawd rau tus Tiam Lis Vaj Qhia Martino (Catholic Ambasssador) uas nyob Bangkok. Nws teb tias: "koj ua xam phaj saib yuav tsum muaj nyiaj npaum li cas thiaj ua tau cov hauj lwm ntawd. Kuv yuav sawv koj chaw thov cov Koom Haum muaj nyiaj nyob pej kum teb kom lawv xa nyiaj tuaj. Tos kuv ua li ntawd, yog vim lub Koom Txoos Kav Tos Liv xav pab cov Hmoob thoj nam nyob Thaim Kuj. Kuj yuav zoo pab tas ib haiv Hmoob thiab."

Ces kuv ua li nws hais, plaub tsib leeg Hmoob nyob Nkws Yas nrog kuv tsim lub Koom Haum Khaws Hmoob Txuj. Peb yuav cov twj zoo luam ntawv. Xyoo 1985, peb luam tawm thawj phau ntawv. Txij ntawd los tau luam cov phau ntawv no:

Phau Xyaum Nyeem Ntawv Hmoob 70 phab. 20x15 cm.

Kab Tshoob Kev Kos. Phau ib. 133 phab. 19x13 cm.

Keeb Kwm Hmoob Raws Tsev Koom Haum Vib Nais. 170 phab. 19x13 cm.

Dab Neeg. Phau ib. 202 phab. 19x13 cm.

Xyum Nyeem Ntawv Hmoob Ntsuab. 38 phab. 21x15 cm.

Cim Xeeb Haav Txiv Daw Nyob Suav Teb. 90 phab. 19x13 cm.

Kab ke Pam Tuag. Phau ib. Cov zaj. 700 phab. 19x13 cm.

Kab Ke Pam Tuag. Cov txheej txheem. 500 phab. 19x13 cm.

Dab Neeg. Phau ob. 200 phab. 19x13 cm.

Dab Neeg. Phau peb. 175 phab. 19x13 cm.

Hmoob Nyob Paj Tawg Teb. 200 phab. 19x13 cm.

Kwv Txhiaj. Phau ib. 222 phab. 19x13 cm.

Kab Tshoob Kev Kos. Liaj lwg tus cag txuj, rhwv mws tus cog peev. 580 phab. 26x19 cm.

Tseem tshuav 4 phau ntawv uas twb khaws tiav lawm, tsis ntev yuav luam tawm. Tej phau ntawd tib si, phau twg kuj luam tawm 4.000 daim. Ua kom muaj Ntawv Hmoob Thoob Teb tas txhia teb chaws uas muaj Hmoob nyob.

Tsev khaws txuj ci hmoob Javouhey

Cov Ntawv Hmoob Thoob Teb ri mus nyob hauv cov teb chaws uas Hmoob tsiv mus nyob.

Xyoo 1975, cov Hmoob thoj nam, cov xub tsiv mus lwm lub teb chaws yog cov mus nyob Mis Kuj. Nyem no muaj txog 100.000 leej Hmoob nyob ntawd. Cov xeev uas muaj Hmoob coob tshaj yog California, Wisconsin, thiab Minesota.

Cov Hmoob nyob Mis Kuj, lawv tsim ntau lub Koom Haum. Tej lub Koom Haum ntawd, lawv niaj xyoo luam tawm ib co ntawv Sib Fi Xov lawv puav leej siv cov Ntawv Hmoob Thoob Teb. Cov Hmoob Ntsuab (Mong Volunteer Literacy) kuj luam cov ntawv sib fi xov hu ua "Txooj Moob". Lawv kuj luam tej phau ntawv muaj 40-60 phab tej, xws li cov "Lug Nruag".

Tus sau: TP. Nyiaj Pov.1991

TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv ) - Page 2 14299067

Yeej thoj Nam Vib Nais

Yeej Thoj Nam Noom Khais, 1975-1979.

Yeej Thoj Nam Chieng Kham,

Yeej Thoj Nam Nab Nyaus,

**Maiv Tooj** 4th January 2010, 11:49 am

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°47

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 4th January 2010, 11:49 am

HAIV HMOOB HMONG MAGAZINE

Tshuav lwm cov Koom Haum los tej lub Koom Txoos uas kuv paub tsis zoo, lawv pib luam tawm ib co ntawv sib fi xov, tab sis kuv tsis paub tias lawv puas ua xwm yeem ntev xyoo.

Qee thaj tsam lawv qhib tej lub tsev qhia cov Ntawv Hmoob Thoob Teb rau tsoom Hmoob. Qee zaus yog tej lub Koom Haum qhib tsev, qee zaum yog tseem hwv pab qhib tsev.

Tej tus kws txuj Mis Kuj tsim tej phau ntawv nthuav cov txuj Hmoob. Muaj tej lub tuam tsev qhia txuj xws li University of Minnesota uas lawv qhib cha qhia lus Hmoob rau cov pej kum neeg uas muaj lub siab xav kawm. Tseem hwv Mis Kuj muaj neeg pab cov thoj nam Hmoob: cov neeg ntawd tus puav kawm lus Hmoob, lawv puav leej siv cov Ntawv Hmoob Thoob Teb.

Raws li kuv hnov los kuv pom, cov neeg ntseeg Yes Xus luam ntawv Hmoob ntau hauj sim nyob Mis Kuj, thiab lawv ua xwm yeem tshaj tau ntev xyoo los lawm. Cov Kav Tos Liv, peb hlis ib zaug lawv luam tawm cov ntawv hu ua: "Tsim Neej Tshiabe thiab lawv tseem luam lwm cov ntawv ntxiv.

Cov Plos Tes Taas, lawv luam tawm "Txuj Moo Tshab" thiab ntawv Bible.

Nyob Kas Nas Das. Cov Hmoob nyob tsis coob, tsis kav tseem hwv pab lawv zoo heev, lawv qhib ib lub tsev qhia ntawv Hmoob thiab pab luam ntawv Hmoob.

Nyob Fuaj Kuj. Muaj txog 12,000 leej Hmoob thiab 1,400 leej ntxiv nyob Nkws Yas. Ib lub Koom Haum luam ntawv sib fi xov hu ua "Ntawv Tshuaj Xov". Tseem muaj ib lub Koom Haum nyob nram qab teb uas nws luam ib cov ntawv sib fi xov. Cov ntseeg Yes Xus Kav Tos Liv luam ib co ntawv sib fi xov hua ua: "Ntseeg Ntuj Sib Fi Txuj". Ib co kws txuj Fuaj Kuj tshuaj xwm txog Hmoob tej txuj lawv tsuas siv Ntawv Hmoob Thoob Teb xwb.

Nyob hauv Fuaj Kuj, lub xeev Nkws Yas me tshaj sawv daws thiab nws nyob xu kev kawg, tab sis nws luam ntawv Hmoob ntau tshaj. Peb hlis ib zaug luam ib hom ntawv sib fi xov hu ua "Liaj Luv Chaw Tsaws." Tsab Chij uas nyob Paj Tawg nws xa ib co ntawv hu ua "Paj Huab" rau peb muab tso nyob hauv cov ntawv "Liaj Luv Chaw Tsaws." Lub Koom Haum "Khaws Hmoob Txuj" uas lub hauv paus yog nyob Nkws Yas, lawv luam cov ntawv uas tau hais saum no. Nkws Yas tseem luam tej phau ntawv nthuav kev ntseeg Yes Xus ua kom Ntawv Hmoob Thoob Teb ri mus tas txhia teb chaws uas muaj Hmoob. Yog tej phaj ntawv uas muaj txog 200 phab los 500 phab, qhia ib cov txuj tob hauj sim.

Nyob Aus Thas Lias Teb, cov Hmoob kuj coob npaum li nyob Kas Nas Das Teb, tab sis lawv kuj muaj tej tus Hmoob nquag luam tej phau ntawv xa rau tsoom Hmoob nyeem ua si. Cov Hmoob tsiv mus nyob pej kum teb li ntawd lawv xav sib fi xov, lawv siv cov kas xev ntau. Tab sis ntau txhiab leej kuj siv cov Ntawv Hmoob Thoob Teb los sau sib fim, ua kom nyem no cov ntawv Hmoob uas sawv daws siv ntau tshaj thiab yooj yim tshaj yog cov Ntawv Hmoob Thoob Teb.

12. Txij xyoo 1985 los, cov Ntawv Hmoob Thoob Teb ri mus txog Tsoob Kuj (Suav teb).

Ib txwm, peb cov Hmoob nyob Xov Tshoj paub tias muaj Hmoob coob tshaj nyob Tsoob Kuj. Tab sis tsis tau kev sib fim. Xav mus xyuas cov Hmoob Suav Teb tas siab. Tab sis ib ntus ntev tseem hwv Suav tsis kam txais cov pej kum neeg tuaj xyuas.

Xyoo 1982, ib tug Hmoob Los Tsuas thoj nam nyob Thaim Kuj nws txiav siab txawm mus nyob Suav Teb, vim nws poj niam yog ib tug Suav: tus Hmoob ntawd hu ua Yaj Ntxoov Yias. Muaj ze ntawm 500 leej Hmoob Los Tsuas nrog nws mus Suav Teb. Tseem hwv Suav txais lawv los nyob Mongla, Yeej Naj.

Yaj Ntxoov Yias pib sau tej tsab ntawv tuaj thov kom kuv tuaj xyuas nws. Xyoo 1984 lub 8 hli kuv thiaj tuaj. Wb sib ntsib nyob khib Meej. Kuv muab 5 phau ntawv Hmoob rau ib lub Koom Haum Suav Khaws Txuj (The institute for Southeast Asian Studies) uas nyob ze ntawm lub tuam tsev qhia txuj nyob Khib Meej. Kuv hais rau cov tub Koom Haum Khaws Txuj ntawd tias, â€œyog lawv xav vam txog ib tug neeg txawj nyeem cov ntawv kuv muab rau lawv, mas kom lawv vam txog Yaj Ntxoov Yias tuaj qhia cov Ntawv Hmoob Thoob Teb Nyob Khib Meej.â€

Xyoo 1985, lawv hu Yaj Ntxoov Yias tuaj qhia Ntawv Hmoob Thoob Teb nyob Khib Meej. Lub 3 hlis, lub 4 hlis thiab lub 5 hlis. Nyob hauv cov neeg nrog Ntxoov Yias kawm muaj 3 leeg los 4 leeg Hmoob tuaj ntawm Paj Tawg Teb tuaj. Lawv kawm cov Ntawv Hmoob Thoob Teb no tau sai kawg, vim yog lawv xeem lus tiag. Ces lub 8 hli xyoo 1985, kuv tau txais thawj tsab ntawv uas yog ib tug Hmoob nyob Tsoob Kuj (Suab teb) sau tuaj txog kuv tsev nyob Nkws Yas: yog Seev Yom Too sau tuaj. Hnub tim 5 lub 8 hli xyoo 1985, kuv tau sau ib tsab ntawv teb rau nws: yog thawj tsab ntawv uas kuv xa mus rau ib tug Hmoob Tsoob Kuj. Ntshe yog thawj tsab ntawv Hmoob uas cov Hmoob nyob Suav Teb tau txais ntawm cov Hmoog nyob Xov Tshoj. Tos tsis ntev, Tsab Chij thiab Yaj Som Looj uas nyob Paj Tawg nkawd kuj sau ntawv tuaj thiab.

Xyoo 1986, lub 8 hli, hnub tim 12, 13 thiab 14. Tsab Chij, Yaj Som Looj Thiab Seev Yom Too, peb sib ntsib thawj zaug nyob Khib Meem. Txij ntawd los peb coob leej niaj xyoo rov sib ntsib nyob Khib Meej. Nyem no, ntshe muaj ze txog ntawm 100 leej Hmoob Tsoob Kuj sau ntawv tuaj rau peb lub Koom Haum uas nyob Nkws Yas. Leej puav kuj tsim tej phau ntawv khaws cov txuj Hmoob nyob Tsoob Kuj, lub Koom Haum Khaws Hmoob Txuj muab los luam thiab faib rau cov Hmoob nyeem nyob Xov Tshoj. Vam tias tsis ntsev yuav luam ntawv Hmoob nyob Tsoob Kuj thiab.

Xyoo 1987, tsab ntawv â€œLiaj Luv Chaw Tsawsâ€ nyob Nkws Yas tshaj cov Hmoob Tsoob Kuj lawv chaw nyob Paj Tawg Teb rau sawv daws paub nyob Mis Kuj thiab Fuaj Kuj thiab Thaim Kuj. Txij ntawd los, cov Hmoob Paj Tawg Teb txais ntawv ntau tuaj ntawm pej kum teb tuaj.

Cov Hmoob sib ncaim nyob tas ntiaj teb tau kev nrog cov Hmoob Tsoob Kuj sib fi xov zoo lawm. Yog vim mauj cov ntawv Hmoob Thoob Teb ri mus nyob Tsoob Kuj thiab tau kev sib fi xov li ntawd.

Nyob Paj tawg, tseem hwv Suav muaj ib lub tsev tswj kev qhia ntawv rau tsoom pej xeem Hmoob nyob thaj tsam ntawd.

Hawv cov xeem Tsoob Kuj uas Hmoob nyob coob, tseem hwv Suav tsim tej lub tsev tswj kev qhia ntawv rau tsoom pej xeem Hmoob. Ces muaj ntau txhiab leej Hmoob Tsoob Kuj uas lawv nyeem tau ib co ntawv Hmoob. Cov ntawv Hmoob uas lawv siv yog ib co ntawv los ntawm cov ntawv Pinyin los. Tsuas yog nyob Tsoob Kuj thiab muaj neeg siv hom ntawv Hmoob Pinyin xwb.

Tseem muaj ib qho li no thiab : cov Hmoob nyob Tsoob Kuj faib ua ntau pab hais lus sib txawv lawm ntau. Ib tug Hmoob nyob Kim Tawg ntsib ib tug Hmoob nyob Kim Tsawb los nyob Huj Naj mas lawv yuav tsum siv lus Suav thiaj tau tsim peb hom ntawv Hmoob pinyin, kom zoo sau lus Hmoob nyob Suav qab teb, tsis tau kev tsim ib co ntawv zoo siv rau tas haiv Hmoob nyob Tsoob Kuj. Khuv xim tas nrho! Tab txawm li cas, tsoom Hmoob paub ib hom ntawv Hmoob coob zuj zus.

Hais txog cov Ntawv Hmoob Thoob Teb, nyob Yeej Naj lawv rau siab sib qhia, vim lawv xav kom tau nrog cov Hmoob sab nraud tau kev sib xa ntawv, sib paub txuj. Thiab cov Hmoob uas nyob As Xias los cov tsiv mus nyob ntuj deb lawv ntshaw muaj phooj ywg Hmoob Tsoob Kuj. Ob xyoo no, tsis hais cov Koom Haum nyob Mis Kuj los nyob Fuaj Kuj los Nyob Kas Nas Das, nyob hauv lawv cov ntawv sib fi xov, lawv puav leej zoo siab luam tawm tej zaj piav txog tsoom Hmoob uas nyob Tsoob Kuj. Vim sawv daws nco ntsoov tias lub hauv paus Hmoob yog nyob Tsoob Kuj.

13. Vim li cas cov Ntawv Hmoob Thoob Teb tau ri mus deb?

Vim cov txwm ntawv Los Mas yeej ri mus puav tas ntiaj teb.

Vim yus nrhiav cov tshuab zoo ntaus cov ntawv Hmoob Thoob Teb mas tsis nyuaj dab tsi li, twb muaj nyob puv tas ntiaj teb.

Vim cov Ntawv Hmoob Thoob Teb zoo sau lus Hmoob Dawb, Hmoob Ntsuab kom meej tiag.

Vim cov pib siv cov Ntawv Hmoob ThoobTeb lawv siab ntev siab tawv. Lawv nias qees leg dej num tau 40 tawm xyoo los lawm.

Vim haiv Hmoob raug tej xwm ua kom Hmoob tshais chaw ntau zaus mus nyob ntau lub teb chaws.

Vim muaj ib co neeg tau pab nrhiav nyiaj tsim thiab luam ntau phau ntawv zoo faib rau cov Hmoob nyiam kawm ntawv thiab nyiam nyeem ntawv.

Vim tau 15 xyoos los lawm muaj ntau pab Hmoob nyob ntau lub teb chaws kub siab nrhiav peev thiab tuaj yeem siv zog ua tej hom ntawv zoo xa mus rau tsoom Hmoob nyeem.

Vim ntuj qhib tej txoj xub ke zoo rau tas haiv Hmoob nyob hauv lub qab ntuj khwb kom sib fim tau ntau zuj zus tuaj.

**Maiv Tooj** 4th January 2010, 12:14 pm

Maiv Tooj

Maiv Tooj: Tswv Cuab Hmong Catholique; Messages : 5519
Date d'inscription : 2009-08-18

Post n°48

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Maiv Tooj 4th January 2010, 12:14 pm

TP. Nyiaj Pov cov lus xa rau Yaj Som Looj nyob Tuam Tshoj.

Yaj Som Looj,

Thaum koj tau thov kuv piav tias Ntawv Hmoob sawv los thiab ri mus zoo li cas puas yog vim koj xav paub tas txhua yam uas kuv nyuam qhuav piav saum no?
Kuv tau rau siab teb rau koj cov lus nug.
Kuv vam tias kuv tsis tau nkim zim txwv dag, vim muaj lwm cov Hmoob xav paub qhov koj nug ntawd thiab.

Kuv tsuas ntshai tib qho xwb: Yam li tej zaud kuv tsis nco qab piav txog yam ub yam no, los tsis nco qab hais txog tus ub tus no uas nws tau ua hauj lwm loj los pab kom muaj Ntawv Hmoob RPA.

Qhov kawg, kuv thov kom Ntuj pub nws tej txiaj ntsim rau tas Haiv Hmoob nyob ntiaj teb: Kom sawv daws nyob kaj siab lug hauv txoj kev sib haum xeeb.

TP. Nyiaj Pov. 1991

TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv ) - Page 2 Post-317

TP. Nyiaj Pov thiab Yaj Yeeb

1959 Thauj lub tshuab kaw ntoo Fab Kis teb mus txog rau Sam Neua

Last edited by Maiv Tooj on 4th January 2010, 9:19 pm; edited 1 time in total

**Mim** 4th January 2010, 1:45 pm

Mim

Mim: Tswv Cuab Hmong Catholique; Messages : 3609
Date d'inscription : 2009-10-16

Post n°49

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Mim 4th January 2010, 1:45 pm

Tais Tooj,

Kuj tsis zoo kom kuv yuav los cuam tshuam ntawm no.... Tiam sis yog kuv muaj ib lo lus xav nug tias, nyob saum daim duab saud, kuv tsis pom TP Nyiaj Pov, tiam sis ho muaj nws npe rau hauv qab, es yog lawv yeej tso li ntawd los yog koj tso?... Tus neeg tawv dawb nrawd twb tsis yog TP Nyiaj Pov ne?....

**Npuagtub** 4th January 2010, 3:17 pm

Npuagtub

Npuagtub: Tswv Cuab Hmong Catholique; Messages : 1002
Date d'inscription : 2009-08-16
Age : 57
Localisation : Fresno, California, USA.

Post n°50

Re: TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )

Post Npuagtub 4th January 2010, 3:17 pm

Sister Mt,

Yog li Mim hais lawm os, ntshai nws lub tsom iav txog caij pauv lub tshiab lawm po ? Tso dag xwb txhob xav li cas.

Daim duab nws tso saum toj no tsis muaj TP. Nyiaj Pov nyob nrog lawv. Tus yawg tawv dawb ntawd tsis yog TP. Nyiaj Pov.