HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


PIAV  TXOG   KEV   TXHAUM Empty

Latest topics

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

» Cov Txiv Plig ua tau muaj txiaj ntsim rau Peb Hmoob nyob Los Tsuas, Thaib teb ua ntej & tom qab 1975
by Maiv Tooj 14th November 2022, 10:03 am

Suav neeg tuaj saib, txij hnub 17/09/2010 los mus.


2 posters

    PIAV TXOG KEV TXHAUM

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    PIAV  TXOG   KEV   TXHAUM Empty PIAV TXOG KEV TXHAUM

    Post  Mim 19th February 2016, 5:19 pm

    Nyob zoo rau sawv daws,

    Lub caij no yog Caij 40, yog ib lub caij uas kev cai peb yuav tsum npaj siab mus daws txhaum ua ntej thaum lub Caij Hla. Yog li kuv thiaj muab zaj lus no tuaj tso rau ntawm  no saib puas pab tau peb tus puav to taub txog peb txoj kev ua txhaum.



    KEV  TXHAUM

    Muaj ob hom kev txhaum nyob hauv peb: hom ib yog lub keeb txhaum, hom ob yog yus tus kheej cov txhaum yus ua.

    A.  Lub Keem Txhaum (original sin/peche original).  Peb tau kawm hais tias thaum As Das thiab Es Vas nkawd ua txhaum tsis mloog Tswv Ntuj lus mas qhov txhaum ntawd muaj lub npe hu ua neeg lub keeb txhaum. Thaum Tswv Ntuj tsim As das thiab Es Vas nws tsim nkawd yog neeg dawb huv tsis muaj txhaum. Thaum ntawd nkawd muaj Tswv Ntuj lub txiaj ntsim txoj sia nyob hauv nkawd tus ntsuj plig. Thaum nkawd ua txhaum lub txiaj ntsim ntawd kuj ploj hauv nkawd mus lawm.  Qhov kev txhaum ntawd muab ib lub siab xib mus rau txoj kev tsis nyiam mloog Tswv Ntuj lus los cog rau nkawd lub siab. Ces nkawd muaj txoj kev xav ua raws yus lub siab nyiam thiab ntshaw tsis xav ua raws li Tswv Ntuj nyiam. Peb yog As Das thiab Es Vas nkawd cov xeeb leej xeeb ntxwv ces peb kuj khaws tau nkawd lub keeb txhaum nyob hauv peb thaum peb yug los thiab peb poob rau hauv nkawd txoj kev tsis nyiam mloog Tswv Ntuj lus thiab peb tau nkawd lub siab uas xib mus rau txoj kev xav ua raws yus siab nyiam.

    B. Yus Tus Kheej Cov Txhaum (personal sin/peche personel).   Raws li nyob hauv tsab ntawv Los Mas 7: 15-19, Paj Lug kuj hais txog yus lub siab rub yus mus ua tsis zoo, nws hais li no:  
    “15 Kuv rov tsis to taub tej yam uas kuv niaj hnub ua : yam li, kuv tsis ua qhov kuv xav ua, hos kuv ua qhov kuv ntxub. 16 Tab yog kuv ua tej yam kuv tsis xav ua, tsis kav kuv lees tias Txoj Cai yeej zoo. 17 Hais tau tias tus uas ua qhov phem tsis yog kuv, yog txoj kev txhaum uas nyob txawm hauv kuv ua. 18 Kuv paub zoo tias tsis muaj ib yam zoo nyob txawm hauv kuv, hauv kuv sab uas tsis yog ntsuj plig, vim kuv lub siab yeej xav ua yam zoo, tab sis thaum ua mas tsis yog qhov zoo ,  19 vim tias kuv tsis ua qhov zoo uas kuv xav ua, kuv ua qhov phem uas kuv tsis xav ua. 20 Yog kuv pheej ua tsis tau raws qhov kuv xav,  mas tsis yog kuv ua, yog txoj kev txhaum uas nyob hauv kuv ua.”

    Peb sawv daws los yeej zoo ib yam li Paj Lug hais ntawd thiab, yus twb xav tau txiav txim siab tib si hais tias yuav ua qhov zoo no los tseem ua kiag qhov niag tsis zoo lawm. Vim li cas peb lub siab thiaj coj peb mus ua tej yam tsis zoo zoo li ntawd? Yog vim lub keeb txhaum uas thaum peb yug los yeej nyob hauv peb lawm.  Thaum peb ntxuav plig, lub Cim Ntxuav twb muab lub keeb txhaum hauv peb ntxuav tas mus lawm tiag, tiam sis nws zoo li ib lub txhab qawj nyob hauv yus lub cev, peb muab tshuaj rau los noj tshuaj pab, lub txhab qawj ntawd zoo lawm, tiam sis qhov nqaij ntawd yeej tsis rov du lug li qub li. Nws tsis mob lawm tiag tiam sis tseem tshuav ib lub qhov caws pliav nyob rau ntawd.  Ib yam li ntawd lub keeb txhaum tsis nyob hauv peb lawm tiam sis nws tseem tshuav ib qho caws pliav uas pheej rub peb los tig peb lub siab mus rau qhov tsis zoo. Vim li ntawd peb niaj hnub txawj ua txhaum.


    C. Kev Txhaum yog dab tsi? Kev txhaum yog thaum peb ua tsis raws, los puas hla Tswv Ntuj txoj cai hauv nws cov lus qhia.  Thaud As Das thiab Es Vas nkawd ua txhaum nkawd tsis mloog Tswv Ntuj lus. Zaum no peb los ib yam nkaus, peb ua txhaum thaum peb tsis mloog Tswv Ntuj lus thiab. Thiab peb yog neeg ntseeg Kas Tos Liv, yog peb ua tsis raws los hla Koom Txoos Kas Tos Liv txoj cai uas nws tsa rau peb cov ntseeg taug mas peb kuj ua txhaum thiab.

    D. Yes Xus qhia hais tias muaj ob lo lus qhia loj tshaj uas ntim tau tas nrho Tswv Ntuj 10 lo lus qhia uas nws tau muab rau Mais Xes. Ob lo lus qhia loj ntawd yog nyob hauv cov Ntawv Moo Zoo: Lus Kas 10: 25-27, Mas Tais 22: 35-40, Mas Kos 12: 28-31. Kuj nyob hauv Txoj Cai Ob 6: 4-5 thiab Les Vis 19:18 thiab.  Lub ntsiab yog li no:
    "Koj yuav nyiam Huab Tais, koj tus Tswv Ntuj,
    tas koj siab ntsws, tas koj tus ntsuj plig, tas koj lub zog, tas koj lub tswv yim,
    thiab koj yuav nyiam tus nyob ze koj ib yam li koj nyiam koj.”


    1. Lo lus qhia loj tshaj thib ib hais tias:"Koj yuav nyiam Huab Tais, koj tus Tswv Ntuj, tas koj siab ntsws, tas koj tus ntsuj plig, tas koj lub zog, tas koj lub tswv yim.”
    Peb yuav ua li cas thiaj coj tau raws li ntawd?  Yog yuav coj kom raws li thawj peb lo lus qhia nyob hauv Mais Xes txoj cai.  Xws li:


    Thawj lo lus qhia hais tias: Koj yuav teev Tswv Ntuj ib leeg xwb txhob mus        1 teev lwm yam ntxiv.Yog peb twb los ua neeg ntseeg lawm, peb tsis txhob rov mus teev dab teev qhua, los  teev hauj sam los teev lwm yam ntxiv. Yog thaum peb muaj mob muaj nkeeg, peb thov ntuj hu xib hwb thiab pawg ntseeg tuaj thov ntuj ob zaug peb zaug tsis zoo ces peb tsis tso siab rauTswv Ntuj ntxiv, peb cia li mus hais kom txiv neeb txiv yaig ua neeb saib peb. Ntau zaus mas tus neeg ntseeg yuav hais rau txiv neeb tias nws lawb dab lawm mas kom txiv neeb ua tom nws tsev saib xwb kuj muaj. Tiam sis txawm yuav ua tom lwm tus tsev ua hauv yus tsev los yeej tsis txawv li. Ua neeb yog ua neeb, hais tsis tau tias tsis tau ua. Qhov tsis zoo mas yog vim thaum ua neeb tus txiv neeb txheev kom nws mus taus mus cuag tau dab, mus nrog dab tham. Qhov no tsis haum rau peb txoj kev ntseeg vim peb tsis xav ua raws dab nyiam. Hais txog peb Hmoob txoj kev poob plig hu plig mas yog peb muaj qhov ntshai tsam poob plig ces peb thov xib hwb los txiv plig thov ntuj rau peb los rau peb tus neeg xwb, kom Tswv Ntuj muab ib lub siab loj thiab txoj kev tso siab rau peb. Peb Hmoob muaj tej txoj kev kho neeg thaum ib tug neeg ceeb loj ces ua rau nws tej hlab ntsha los tej leeg los lub hlwb sav tsis zoo pes tsawg lawm, xws li nchos ceeb, khaws ceeb tej. Yog peb xav vam txog ib tug neeg txawj khaws ceeb los nchos ceeb rau peb, mas yog tus neeg ntawd siv tej lo lus uas yog hu txog dab mas peb yuav tsis txhob kom nws ua qhov ntawd rau peb.  Yog nws ua mas nws yuav tsum hais ib co lus thov ntuj rau peb xwb.

    Thaum peb ua neeg ntseeg lawm, peb thov ntuj tas, txawm yog tsis pom txawv li cas los peb tseem tso siab rauTswv Ntuj, peb tseem yuav mob siab thov ntuj heev dua qhov qub ntxiv xwb, peb tsis rov mus ua zaj qub rau lawm. Thaum peb thov ntuj kawg siab kawg ntsws thiab nrhiav tshuaj txhua yam rau lawm, yog tias tsis zoo, peb yuav tsis txhob  npau taws rauTswvNtuj,peb yuav xav tias yog Tswv Ntuj pom zoo kom peb nyiaj qhov mob ntawd. Tej zaum kuj yog ib qho uas peb tsis xav nyiaj los puas peb nyiaj tsis taus, yeej tsis yooj yim, tiam sis peb yuav tau thov kom Tswv Ntuj muab nws lub txiaj ntsim ntxiv zog rau peb kom peb ua taus siab ntev nyiaj.Muaj ib co leej ntshiab lawv nyiaj mob nees nkaum plaub tsib caug xyoo hauv lawv lub neej los pub rau Tswv Ntuj kom tau them txim txhaum rau yus tus kheej thiab pab them txim txhaum rau lwm leej lwm tus thiab.

    Lub Koom Txoos kuj qhia tias peb yuav tsis txhob ntseeg thiab mus saib saub, saib tes, saib hauj sam.Vim cov neeg ntawd yuav hais tej lo lus rau tswv yim rau yus kom yus ua yus lub neej kom haum li cov lus ntawd. Pivt xwv ib tug txiv neej nws mus saib tes, luag hais rau nws tias, “Koj cov kab tes hais tias koj muaj ob tug niam no laiv.” Ces tus txiv neej ntawd cia li muaj lub tswv yim ntawd nyob rawv rau hauv nws lub hlwb; yog nws ntsib tej tug poj niam ntxim nws siab me ntsis, nws cia li yuav mus thab vim hais tias lawv twb hais rau nws tias nws yuav tsum muaj ob tug poj niam. Tej kev zoo li no tsis yog yuav pab kom tus txiv neej ceev faj rau yus tus kheej, hos yog yuav txhob kom tus txiv neej mus nrhiav txoj kev ntawd taug xwb. Cov lus saub ntawd qhov ntau tsis yogTswv Ntuj lus, yog dab pheml us xwb, dab phem xav rhuav yus thiab xav kom yus poob rau txoj kev ua phem ua txhaum.


    Tseem muaj ntau yam uas rub peb kom peb tso Tswv Ntuj tseg, tsis txhob ntseeg Tswv Ntuj, los puas txhob muab Tswv Ntuj ua qhov tseem ceeb hauv yus lub neej.  Xws li yog txog Hnub Chiv, peb xav tias “Cas hnub no twb yog hnub kuv xav so xav pw kom txaus txaus siab los tseem yuav tau sawv ntxov mus teev ntuj thiab lau, kav liam kuv nkees nkees li cia lwm as thiv tso,” ces yus cia li ncua tsis mus teev ntuj.  Tej zaum zoo li ntawd mas zoo li yog peb muab peb txoj kev nkees ua loj thiab muabTswv Ntuj rau puag tom qab lawm, yus teev yus txoj kev nkees lawm. Qee zaum mas yog yus teev yus txoj hauj lwml os yus txoj kev nrhiav nyiaj nrhiav txiaj, yus yeem mus ua hauj lwm kom tau nyiaj ntau, tsis yeem nkim sij hawm mus teev ntuj, tsis tau dab tsi.

    Lo lus qhia ob hais tias: koj yuav hwm Tswv Ntuj lub npe, tsis txhob siv Tswv Ntuj lub npe mus ua tej yam tsis zoo. Thaum peb hais lus mas peb yuav hais saib taus Tswv Ntuj lub npe, txhob hais lus thuam.  Tsis txhob siv Tswv Ntuj lub npe los cog lus cuav. Xws li muaj ib txhia neeg mas nyiam nyiam tsa tes rau ntuj los twv ntuj cog lus. Lawv hais tej yam lawv ntshai tsam luag tsis ntseeg, ces lawv tsa tes rau ntuj tias lawv tsis dag. Qee zaus lawv twb tsis hais qhov tseeb    2 los lawv tseem twv ntuj li ntawd nrog. Tej yam no tsis yog tej yam zoo ua. Yes Xus qhia hais tias kom peb tsis txhob xyaum twv ntuj li.(Mas Tais 5: 33-37). Thiab nws hais tias yog peb tau cog lus rau Tswv Ntuj lawm los cog lus rau ib tug neeg twg tias yus yuav ua ib yam dab tsi mas yuav tsum tau ua tiag tiag, tsis txhob lam cog lus dag xwb tsis ua raws.      Tseem Muaj ntau yam hais txog Tswv Ntuj uas peb yuav tsum tau hwm thiab. Xws li peb phau Ntawv Ntshiab (Bible) peb yuav tsis txhob lam muab pov dog dig, los txoj Saw Mab Liab los kuj ib yam thiab.

    Lo lus qhia peb hais tias:  koj yuav caiv Hnub Xas Npas Tos koj yuav saib yog ib hnub ntshiab. Hnub xas npas tos yog Hnub Chiv rau peb. Tswv Ntuj muab tsib hnub rau hnub rau peb xav txog peb tus kheej thiab peb tej hauj lwm tej kev txob kev txhawj kev ntshaw, hnub xya nws xav kom peb qee ib hnub los xav txog Tswv ntuj. Hnub ntawd peb yuav tsum muab rau Tswv ntuj tso mam muab rau lwm yam tom qab.  Peb yuav mus teev ntuj tom tsev teev ntuj koom nrog yus pawg ntseeg.  Txoj kev teev ntuj tsis yog zoo rau yus nkaus xwb, yus mus teev ntuj yeej zoo rau yus tsev neeg, yus pawg ntseeg thiab rau ntiaj teb neeg tib si. Mus teev ntuj ua ke yog ib txog kev sib pab sib txhawb hauv peb sawv daws txoj kev ntseeg.  Koom Txoos Kas Tos Liv txoj cai qhia kom peb yuav tsum mus teev ntuj niaj hnub Chiv tsis tu ncua. Yog peb xwb tim nkees tsis mus xwb los yog peb ho teem lwm yam hauj lwm los ua rau hnub ntawd kom txhob tau mus teev ntuj, mas yog peb ua txhaum rau Tswv Ntuj txoj cai ntawd lawm.  Peb kuj yuav tsis txhob ua tej yam hauj lwm hnyav uas tsis phim ua rau hnub ntawd.

    Kuj tseem muaj tej hnub tseem ceeb uas peb yuav tsum tau mus teev ntuj tab txawm tsis yog hnub Chiv, xws li nyob As Mes Lis Kas teb:
    1. Hnub tim 1 lub ib hlis ntuj, yogh nub peb hwm Niam Mab Liab ua Tswv Ntuj Yes Xus leej Niam;
    2. Hnub Yes Xus nce mus saum ntuj: 40 hnub tom qab Yes Xus sawv hauv kev tuag rov los, nws mam nce mus saum ntuj mus zaum ntawm Leej Txiv sab xis lawm;
    3. Hnub tim 15 lub 8 hli, Niam Mab Liab lub cev thiab tus ntsuj plig nce mus saum ntuj. Koom Txoos Kas Tos Liv qhia hais tias, thaum Niam Mab Liab ua neej xaus nyob ntiaj teb no, nws kuj tau tuag, Yes Xus cov thwj tim muab nws lub cev coj mus zwm ntxa tau peb hnub, thaum lawv mus xyuas tsis pom nws lub cev lawm. Ces lawv to taub hais tias yog Yes Xus tau ua kom nws niam lub cev uas tsis lo txhaum sawv rov los thiab nce mus pem ntuj lawm;
    4. Hnub tim 1 lub 11 hlis, yog hnub peb hwm tas ib tsoom leej ntshiab;
    5. Hnub tim 8 lub 12 hlis, yogh nub peb hwm Niam Mab Liab xeeb los tsis lo neeg lub keeb txhaum
    6. Hnub tim 25 lub 12 hlis, yogh nub Yes Xus yug los ua tib neeg.

    2. Lo lus qhia loj tshaj thib ob hais tias: “Koj yuav nyiam tus nyob ze koj ib yam li koj nyiam koj.

    Peb yuav ua li cas thiaj coj tau raws li ntawd? Yog coj kom tau raws li lo lus qhia thib plaub mus txog kaum nyob hauv Mais Xes txoj cai. Xws li:
    Lo lus qhia plaub hais tias: Koj yuav hwm koj niam koj txiv.Cov me nyuam yuav tau hlub niam hlub txiv, hwm niam hwm txiv thiab mloog tej niam tej txiv lus. Tej ua niam ua txiv los yuav tsum tau hlub tej me nyuam, cob qhia lawv thiab hwm lawv thiab. Peb sawv daws kuj yuav tau hlub thiab hwm tej laus, tu lawv pab lawv thaum lawv ua tsis taus lawm,thiab mloog lawv hais.  Peb sawv daws kuj tseem yuav tau hwm thiab mloog tej ua hlob ua thawj coj, tej ua kws qhuab qhia, tej ua nom ua tswv huv si. Tiam sis yog thaum peb paub hais tias lawv hais tej yam tsis yog los tsis haum peb txoj kev ntseeg mas peb kuj muaj cai yuav hais rau lawv paub thiab tsis ua raws li lawv hais.

    Lo lus qhia tsib hais tias: Koj tsis txhob tua neeg. Muaj ntau yam kev tua neeg:  1) Xws li muab riam muab phom los lwm yam twj tua ib tug neeg, txo nws txoj sia kom tuag. Peb yuav tsis txhob muaj lub siab phem siab nyoos txo lwm tus txoj sia.  2) Thaum ib tug neeg noj yeeb noj tshuaj tuag, los dai tuag, los xuas phom tua yus tus kheej, qhov no kuj yog tua neeg. Tswv Ntuj tsis xav kom peb txo peb txoj sia, vim peb tsis yog tswv nws yog tswv ntawm peb txoj sia, nws yog tus tsim peb los ua neeg.  Txawm peb muaj kev nyuaj siab loj npaum twg, peb yuav thov kom Tswv Ntuj pub nws lub txiaj ntsim rau peb kom peb yeej tau txoj kev xav tuag.
    3) Thaum ib tug poj niam cev xeeb tub lawm, yog nws mus rho me nyuam kuj yog kev tua neeg. Qhov ntau yog vim nws deev hluas muaj me nyuam tsaub, nws tsis xav poob ntsej muag ces nws xav rho tus me nyuam pov tseg twj ywm;  tej   3 zaum kuj tsis yog nws xav rho yog nws tus hluas nraug los puas nws tsev neeg xav kom nws rho kom txhob tau tu;  tej  zaum nws raug luag txhom deev ces nws cia li muaj me nyuam nws tsis xav yuav tus me nyuam;  tej zaum twb tsis yog me nyuam tsaub, tiam sis ob niam txiv tsis xav yuav me nyuam ntxiv xwb. Niaj hnub no txoj kev rho me nyuam yooj yooj yim lawm, tsuav yog yus muaj pob nyiaj mus rau lawv xwb ces lawv yeej ua rau yus.  Tiam sis Tswv Ntuj tsis pub kom peb rho me nyuam, vim tus me nyuam tsis txhaum dab tsi, tus txhaum yog yus xwb.  Yog yus tsis xav muaj me nyuam, tsis txhob tham txhob deev hluas, yog ob niam txiv tsis xav yuav me nyuam ntxiv yuav tsum caiv txaj xwb. Tab txawm yus raug luag mos luag txhom los kawg yuav tsum tau ua siab ntev hlub thiab tu tus me nyuam uas tsis tau ua txhaum.
    4) Kev tso tshuaj kom yus tuag: Nyob hauv txoj kev no muaj ob yam txhaum ua ke, yam uas yus tua yus tus kheej  vim tus neeg ntawd yeej xav tuag nws thiaj zoo siab kom luag tso tshuaj rau nws, thiab kuj muaj qhov kev tua lwm tus neeg, vim tsus tso tshuaj yog tus tua luag.
    5) Kev noj tshuaj los siv twj rau hauv yus lub cev los kev txiav hnyuv kom txhob muaj me nyuam:  lub Koom Txoos Kas Tos Liv qhia hais tias txoj kev sib yuav ua txij ua nkawm lub ntsiab yog kom ob niam txiv sib coj ua neej nyob hauv Tswv Ntuj thiab yog sib yuav los tsim noob neej, yog thaum nkawd siv tej yam los txiav txoj kev tsim noob neej mas tsis raws Tswv Ntuj txoj cai lawm.  Lub Koom Txias qhia kom ob niam txiv yuav xyaum tswj nkawd lub cev thiab muaj kev sib caiv kom txhob muaj me nyuam tuab tuab los coob coob tus tsis taus xwb.
    6) Txoj kev npau taws uas ua kom ib tug neeg ua phem rau lwm tus kuj yog zoo li kev tua neeg me ntsis:  xws li ua kom lwm tus dig muag los lov tes lov taw lov caj dab los raug mob lwm yam.
    7)Kev tua sab ntsuj plig: Thaum yus txhob txwm hais lus thuam lwm tus kom nws poob ntsej muag thiab kom luag tej ntxub nws yog tua neeg sab ntsuj plig; thaum yus hais lus thuam txoj kev ntseeg thiab ua qauv tsis zoo rau lwm tus kawm thiab coj, kom lawv tso lawv txoj kev ntseeg tseg kuj yog tua neeg sab ntsuj plig, vim thaum lawv tsis ntseeg lawm, Tswv Ntuj txoj sia nyob hauv lawv kuj tuag lawm thiab.

    Lo lus qhia rau hais tias: Koj yuav tsis txhob tham hluas los tsis txhob zes luag txij luag nkawm.  Lo lus no qhia no yog hais txog kev ua neeg tsim txiaj dawb huv. Nws qhia hais tias ib tug txiv neej los poj niam muaj txij muaj nkawm lawm yuav tsum tsis txhob mus tham hluas los yog tham lwm leej lwm tus ntxiv. Yog nws ua li ntawd mas nws hla nws tus txiv los tus poj niam lawm, yog ib qho txhaum.  Lo lus no tsis pub tham ib tug neeg uas yog luag txij nkawm thiab kuj tsis pub thamib tug hluas uas tsis tau muaj txij nkawm .  Nyob li ntawm peb Hmoob mas txiv neej muaj cai tham hluas nkauj, tiam sis poj niam tsis muaj cai tham. Yog tus txiv neej mus tham luag poj niam mas yog ib qho txhaum loj heev, tiam sis yog mus tham ib tug hluas nkauj tsis muaj txiv mas nws tsis txhaum dab tsi li.  Tiam sis Tswv Ntuj txoj cai tsisqhia li ntawd, tsis 3kws txiv neej cai. Txawm txiv neej poj niam los tsis muaj caimus tham hluas ib yam.  Lub Koom Txoos kuj qhia tias, tab ib tug hluas xwb, txawm ib tug tub ib tug ntxhais los ib yam, nws yuav xyaum ua neeg tsim txiaj tsis txhob mus deev hluas, vim txoj kev sib dee tsis tau sib yuav ua txij nkawm tsis zoo thiab yog kev txhaum.(Mas Tais 5: 27-30)
    Muaj ntau yam nyob hauv nqe rau no uas peb yuav tsum paub txog tias yog kev txhaum thiab tsis txhob xyaum ua:  xws li nus muag sib dee, tej txiv deev ntxhais tej niam deev tub, poj niam deev poj niam, txiv neej deev txiv neej,  poj niam txiv neej mus deev tsiaj, ib tug neeg rov kov nws tus kheej kom zoo siab, tas puas tsav yam no yog kev tsis tsim txiaj kev txhaum.
    Tsis tas li ntawd xwb peb yog ib tug neeg ntseeg, peb yuav tsis txhob xyaum siv thiab hais tej lus dev lus npua lus phem, tsis txhob saib xyam  saib duab liab qab duab sib dee, vim tej ntawd yog txhob txwm ua los txhib kom neeg lub cev xib mus rau txoj kev tsis tsim txiaj ntawd xwb.  Peb yuav xyuam xim nrhiav kev tsiv deb deb ntawm tej ntawd peb thiaj yuav  taug tau kev tsim txiaj dawb huv.

    Lo lus qhia xya hais tias: Koj yuav tsis txhob ua tub sab tub nyiag.Lo lus no qhia kom peb tsis txhob mus txeeb mus txhav luag tug los ua yus tug, kom peb saib taus luag vaj luag tsev, tsis txhob mus muab tsoo muab ua kom puas kom piam. Thaum peb khaws tau luag nyiaj los luag khoom, peb yuav xa rau luag; thaum peb qiv luag nyiaj los luag ib yam khoom siv, peb yuav nco ntsoov ntxiv los xa rov qab. Yog peb tshuav luag nuj nqes, peb yuav them kom tas rau luag. Peb tsis txhob muas tej yam lawv   4 nyiag los muag. Thaum yus luj khoom rau luag tsis txhob luj tsawg rau luag luj tshaj tshaj rau yus. Ib tug tswv ntiav neeg ua hauj lwm yuav tsum them nqi kom haum txoj hauj lwm; tus neeg mus ua zog yuav tsis txhob lam mus nyob dag kom tau nyiaj xwb.  Tej nom tswv yuav tau coj raws qhov ncaj qhov tseeb, tsis txhob txiav txim los ua tsis ncaj vim luag muab nyiaj xiab yus.

    Lo lus qhia Yim hais tias: Koj yuav tsis txhob dag liam rau tus nyob ze koj.  Yuav xyaum hais qhov tseeb tsis txhob dag.  Tsis txhob liam tej yam tsis zoo rau ib tug neeg kom tau kev rhuav nws lub npe kom neeg saib tsis taus nws, ces ua rau yus zoo siab, tsis txhob xyav luag lwm tus lub moo tsis zoo, tsis txhob hais lus xaiv lus ncua.  Tej yam yus twb paub tsis tseeb txhob liam tias yog tus ub tus no ua. Muaj qee zaum yus tseem yuav tau tsis txhob hais tej yam yus paub tawm thiaj tsis rhuav leej twg ntsej muag.

    Lo lus qhia cuaj hais tias: Koj yuav tsis txhob ntshaw lawv tus poj niam. Lo lus no zoo li yog hais rau cov txiv neej ntau. Tiam sis tiam neej peb nyob no tsis yog txiv neej xwb, poj niam coj ib yam txiv neej lawm.  Mas yuav muab hloov hais tias: Koj tsis txhob ntshaw luag tus txij nkawm.Tsis txhob muab yus lub siabmus ntshaw tham los puas txeeb luag tus poj niam los tus txiv li, tsis hais tus txiv neej muaj poj niam los tus tub hluas, tsis hais tus poj niam muaj txiv los tus hluas nkauj, yog tus ntawd muaj tug lawm yuav txiav txim siab tuag nthi txhob thab li.

    Lo lus qhia kaum hais tias: Koj tsis txhob ntshaw luag teej luag tug.  Lo lus no qhia hais tias peb yuav tsis txhob muaj ib lub siab ntshaw xav tau luag tug los ua yus tug li, vim yog thaum twg peb muaj lub siab ntshaw lawm ces peb yuav mus nyiag mus txeeb kom tau los ua peb tug, yog tsis tau ces yuav mus ua kom puas kom piam, kom yus tsis tau los niag tod txhob tau thiab. Lub siab xav li no tsis qhia peb xyaum ua neeg ncaj neeg zoo.


    Last edited by Mim on 20th February 2016, 5:18 am; edited 2 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    PIAV  TXOG   KEV   TXHAUM Empty Re: PIAV TXOG KEV TXHAUM

    Post  Mim 20th February 2016, 5:12 am

    E. Koom Txoos Kas Tos Liv Txoj Cai

    Koom Txoos Kas Tos Liv xav kom peb yuav tsum coj raws Tswv Ntuj 10 lo lus qhia, thiab nws kuj tseem muab 5 nqe lus ntxiv rau peb kom peb yuav tsum coj raws. Tsib nqe no yog yam tsawg tshaj nyob hauv peb txoj kev ntseeg uas peb yuav tsum ua.  Yog peb tsis muaj teeb meem dab tsi khuam tiam sis peb txhob txwm hla ib nqe lus twg mas peb ua ib qho txhaum hnyav. Piv txwv: xws li tim 1 lub 1 hlis, kev cai sawv daws yeej so hauj lwm, peb twb paub tias yog ib hnub peb yuav tsum mus koom thaj txi ntuj, tiam sis peb cia li txiav txim mus ua lwm yam peb txhob txwm tsis mus teev ntuj xwb, peb ua li no ces yog peb ua ib qhov txhaum hnyav lawm. Peb yuav tsum tau mus daws txhaum thiab yuav tsum xyaum coj kom tau. Cov nqe lus nyob hauv Koom Txoos txoj cai yog li no:

    1) Koj yuav tsum mus koom thaj txi ntuj niaj Hnub Chiv thiab tej hnub tseem ceeb uas lub Koom Txoos tau teem tias kom sawv daws yuav tsum mus teev ntuj hnub ntawd, thiab tsis txhob ua hauj lwm hnyav rau hnub ntawd. Rov muab cov hnub nyoog tseem ceeb uas peb yuav tsum mus teev ntuj rau ntawm no:
    .  Hnub tim 1 lub ib hlis ntuj, yog hnub peb hwm Niam Mab Liab ua Tswv Ntuj Yes Xus leej Niam;
    .  Hnub Yes Xus nce mus saum ntuj: 40 hnub tom qab Yes Xus sawv hauv kev tuag rov los, nws mam nce mus saum ntuj mus zaum ntawm Leej Txiv sab xis lawm;
    .  Hnub tim 15 lub 8 hli, Niam Mab Liab lub cev thiab tus ntsuj plig nce mus saum ntuj. Koom Txoos Kas Tos Liv qhia hais tias, thaum Niam Mab Liab ua neej xaus nyob ntiaj teb no, nws kuj tau tuag, Yes Xus cov thwj tim muab nws lub cev coj mus zwm ntxa tau peb hnub, thaum lawv mus xyuas tsis pom nws lub cev lawm. Ces lawv to taub hais tias yog Yes Xus tau ua kom nws niam lub cev uas tsis lo txhaum sawv rov los thiab nce mus pem ntuj lawm;
    .  Hnub tim 1 lub 11 hlis, yog hnub peb hwm tas ib tsoom leej ntshiab;
    .  Hnub tim 8 lub 12 hlis, yog hnub peb hwm Niam Mab Liab xeeb los tsis lo neeg lub keeb txhaum;
    .  Hnub tim 25 lub 12 hlis, yog hnub Yes Xus yug los ua neeg.


    2) Koj yuav tsum mus daws txhaum tsawg kawg nkaus ib xyoos ib zaug. Lub Koom Txoos yeej xav kom peb mus daws txhaum ntau tshaj ntawd, xws li qhov zoo tshaj yog ib hlis ib zaug. Tiam sis nws kuj tso rau peb xaiv thiab nws qhia hais tias qhov tsawg tshaj yog ib xyoos mas yuav tsum mus ib zaug rau thaum lub caij Yes Xus yug los puas thaum lub Caij Hla.

    3) Koj yuav tsum mus txais lub Cim Yug tsawg kawg ib zaug thaum lub Caij Hla. Yog li no thiaj hais tias yog peb tsis mus daws txhaum li thiab tsis mus txais Yes Xus lub Cev li los peb yuav tsum mus daws txhaum ib zaug thaum ua ntej lub Caij Hla thiab mus txais Yes Xus lub Cev thaum txog Hnub Hla. Peb nco ntsoov tias peb yog neeg txhaum, peb yuav tsum xub musdaws txhaum tas tso mam mus txais Yes Xus lub Cev.

    4) Koj yuav tsum ua kev yoo mov caiv nqaij raws li cov sij hawm lub Koom Txoos tau teem. Lub caij 40 yog lub caij peb yuav tsum tau yoo mov caiv nqaij. Muaj ob hnub uas peb yoo mov caiv nqaij tib si, yog Hnub Plaub Txais Tshauv (Ash Wednesday/Mercredi des Cendres) thiag yog Hnub Rau Ntshiab (Good Friday/Vendredi Saint). Dua li ntawd, niaj Hnub Rau hauv lub caij 40, peb yuav tsum caiv nqaij, noj tau nqaij ntses xwb.

    5) Koj yuav tsum tau pab lub Koom Txoos. Lo lus no txhais hais tias peb cov ntseeg yuav tsum tau tso nyiaj tso txiaj pab raws li peb pab tau. Thiab peb kuj yuav  tsum tau siv peb lub sij hawm thiab peb lub dag lub zog los pab lub Koom Txoos raws li peb pab tau thiab.  Xws li peb niaj hnub Chiv yuav tau tso nyiaj rau tsev teev ntuj, vim yog peb sawv daws lub tsev teev ntuj, yog peb sawv daws pawg ntseeg, yog sawv daws pab tsis txaus ces peb yuav nyob tsis taus ua ib pawg li. Peb yuav tsis txhob qia dub thiab khib hais tias peb tso rau tus txiv plig los cov neeg ua hauj lwm siv xwb, vim lawv yeej ua hauj lwm hnyav kawg pab sawv daws. Tsis tas li xwb, thaum peb niaj hnub mus koom thaj txi ntuj twb yog peb siv peb lub sij hawm mus pab mus txhawb lub Koom Txoos lawm.  Yog peb ua tau ntau tshaj ntawd haj yam zoo, xws lis siv sij hawm mus koom yus lub tsev teev ntuj tej kev sab laj tej kev noj kev haus. Peb tsis txhob muab sij hawm mus koom xwb, yog peb muab dag muab zog mus pab leg tej kev sab laj tej kev noj kev haus huv tib si mas haj yam zoo.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    PIAV  TXOG   KEV   TXHAUM Empty Re: PIAV TXOG KEV TXHAUM

    Post  Mim 21st February 2016, 6:24 pm

    F. Kev Haub Kev Ntxias thiab Kev Txhaum

    Peb yuav tsum to taub tias kev haub kev ntxias (temptations) tsis tau yog kev txhaum. Yog peb tsis ua raws thiab tsis mloog txoj kev haub kev ntxias ces peb tsis ua txhaum.  Yog thaum twg peb mloog thiab ua raws txoj kev haub kev ntxias ces thaum ntawd peb ua txhaum. Piv txwv, thaum tus nab hais rau pog Es vas tias: “Puas yog Tswv Ntuj txwv tsis pub neb noj cov txiv ntoo hauv lub vaj li?” Pog Es Vas hais tias: “Nws pub wb noj tas nrho tsuas txwv kiag tib tsob hauv plawv vaj xwb, nws hais tias yog wb noj lub ntawd mas wb yuav tuag no.”  Tus nab hais ntxiv tias: “Tsis muaj li Tswv Ntuj hais, neb yeej tsis tuag li, twb yog nws tsis xav kom neb txawj ntse thiab paub phem paub zoo li Tswv Ntuj xwb, nws thiaj txwv.”  Tus nab cov lus no tsuas yog kev haub ntxias xwb. Nws tsis tau de kiag lub txiv cev rau pog Es Vas yuam kom noj. Yog pog Es Vas mloog Tswv Ntuj lus ces nws yuav tsis kam mloog tus nab, nws yuav tsis kam de lub txiv los noj, ces nws tsis tau ua txhaum. Tiam sis nws lub siab ras dheev xav ua li tus nab hais, xav zoo li Tswv Ntuj, ces nws txawm cev tes loo mus de los  noj thiab muab rau As Das noj thiab. Thaum ntawd nkawd thiaj ua txhaum kiag lawm. Ces tas txhua tsav txhua yam hauv nkawd lub neej thiaj hloov tas nrho lawm.  Yes Xus kuj tau raug kev haub kev ntxias thiab, nws tau raug peb yam kev haub kev ntxias.  Yam ib yog ntxias kom mloog yus lub cev kev tshaib kev nqhis:  Thaum Yes Xus yoo mov tau 40 hnub 40 hmo, nws tshaib tshaib plab heev, dab phem thiaj ntxias nws kom muab pob zeb los txia ua mov kiag ces nws yuav tsis tshaib plab ntxiv. Yam ob yog ntxias kom ua tej yam kom luag qhuas yus cav txog yus: Dab phem kom Yes Xus dhua puag saum ru tsev lawm hauv, vim nws yog Tswv Ntuj mas nws yuav tsis raug mob li, ces yuaua rau neeg qhuas nws. Yam peb yog kev haub ntxias kom xav ua neeg muaj koob nto npe, kom tau ua nom ua tswv: Dab phem kom Yes Xus pe dab phem, ces Yes Xus yuav tau kav tas txhua lub teb chaws hauv ntiaj teb no.  Tiam sis Yes Xus tsis swb rau dab phem kev haub ntxias ib qho li, nws tsis ua raws li dab phem hais, ces nws tsis tau ua txhaum.
    Ntawm peb ne, peb yeej raug kev haub ntxias ib yam li ntawd thiab: Muaj peb yam uas niaj hnub haub ntxias peb:  xws li lub ntiaj teb, peb lub cev thiab peb txoj kev ntshaw, thiab dab phem:


    1) Lub ntiaj teb yog leej twg los yog dab tsi? Lub ntiaj teb qee zaum yog tib neeg, qee zaum kuj yog tej yam. Xws li peb cov muaj tub muaj ntxhais, peb yuav to taub zoo:  tej zaum peb muaj ib tug tub los ib tug ntxhais, thaum nws tseem tsis tau mus poo tau phooj ywg mas nws kuj tsis txawj ua phem, tiam sis txij kiag li nws muaj phooj ywg lawm ces nws cia  li txawj mus tsoo luag vaj luag tsev, mus nyiag luag ub luag no (uas peb Hmoob hu ua mus ua laib). Yam no yog tib neeg haub ntxias yus tus neeg mus ua txhaum.  Peb txhua leej txhua tus yeej yuav tsum ua hauj lwm nrhiav noj nrhiav haus nrhiav nyiaj nrhiav txiaj, yeej yog ib qho zoo. Tiam sis qee zaus, luag muab rau peb xaiv saib peb puas kam ua hauj lwm Hnub Chiv, ces luag yuav them nyiaj ib npaug ntxiv rau yus. Thaum zoo li no yog nyiaj txiag ntxias yus lawm. Yog yus xaiv hais tias, kuv tsis mus teev ntuj kav liam, kuv yuav mus ua hauj lwm kom tau nyiaj ntau, ces yog yus swb rau nyiaj txiag kev ntxias lawm.

    2) Hais txog peb lub cev thiab peb lub siab ntshaw:  yog txoj kev tshaib kev nqhis uas txhawv nyob hauv pev lub cev thiab txoj kev ntshaw nyob hauv peb lub siab, ces rub peb kom peb yuav tsum tau mus nrhiav tej yam los ua tej yam kom los daws qhov kev tshaib kev nqhis thiab qhov kev ntshaw ntawd.  Muaj 7 yam kev txhaum loj uas yog peb lub cev thiab peb lub siab ntshaw coj peb ua.  Cov txhaum no hu ua txhaum loj vim lawv yog cov hauv paus uas txawj ncau mus ua lwm yam kev txhaum nrog thiab.
    -- Kev muab hlob (pride/orgueil):  Yus muab yus tsa siab dua lwm tus tas nrho thiab muab luag saib qis qis, tsis hwm tsis saib taus lwm tus.
    -- Kev cuaj khaum kev ntshaw tau ntau dhau kev dhau ca (greed/avarice):  xws li yus twb muaj nyiaj txiag txaus noj txaus haus txaus siv lawm los yeej  tsis txaus yees li tseem xav kom haj yam muaj nyiaj ntau ntxiv xwb; xws li yus twb muaj ris tsho txaus hnav txaus hloov lawm los, pom dheev ib ce txawv yuav tsum yuav kom tau los cia xwb, lob los cia ntau ntau hnav tsis txog los tsuav muaj rau ntawd; xws li ntshaw rooj tog, twj taig, ntshaw khoom siv khoom noj khoom haus kom txaus siv txaus noj txaus haus yeej yog ib qho zoo, tiam sis yog twb siv tsis txog los pheej lam yuav tas zog los cia mas kuj tsis zoo lawm. Ntau zaus tus neeg ntshaw tau ntau ntawd kuj yog neeg qia dub nrog thiab, vim nws yeej tsis kam muab tej nws muaj mus pub rau lwm tus li.
    -- Kev khib luag (envy/envie): xws li yog yus pom ib tug neeg nws muaj hmoov zoo, nws kawm tau ntawv siab muaj hauj lwm zoo, muaj neeg coob nyiam nws qhuas nws, ces yus cia li khib, cia li ntxub nws hais lus tsis zoo txog nws.
    -- Kev chis kev npau taws (anger/colere):  Tej zaum ib tug neeg twg ua ib yam los hais ib lo lus rau yus ces cia li ua rau yus chis thiab npau taws heev heev tam sis ntawd, Hmoob hais tias npau ciaj npau tuag.
    -- Kev nyiam tham hluas deev hluas (lust/luxure)t: Ib tug poj niam los xij ib tug txiv neej los xij uas muab txoj kev tham hluas deev hluas ua qhov loj hauv nws lub neej, yog tsis tau ua qhov ntawd ces nws nyob tsis tswm.
    -- Kev hu dab (gluttony/gourmandise): Ib tug neeg uas noj ntau ntau thiab haus dej haus cawv loj loj noj npaum twg haus npaum twg los tsis txaus yees li.
    -- Kev tub nkeeg ua qhov zoo (sloth/paresse):  Yuav xyaum ua zoo mas tsis yooj yim, yuav tsum nquag, yuav tsum mob siab rau thiab siv zog tiag mas thiaj xyaum tau ua qhov zoo.  Yog yus nkees mob siab rau nkees siv zog ces yus cia li tsum tsis xav xyaum ua zoo.


    3) Dab phem kev ntxias:  Dab phem yog Xas Tas thiab nws cov dab phem uas lawv tuaj ntxias peb kom peb tsis txhob  mloog Tswv Ntuj lus vim lawv tsis xav kom peb tau ua Tswv Ntuj cov me nyuam.  Peb tsis pom lawv tiam sis lawv yeej nyob ncig peb, lawv tuaj ntxhi rau peb lub tswv yim thiab peb lub siab kom xav tau tej yam tsis zoo. Yog yus twb paub tias qhov yus xav no tsis zoo, ces yus yuav tsum txhob xav ntxiv lawm, yuav tsum muab ntiab tawm hauv yus lub tswv yim mus, thiab txhob ua raws qhov ntawd. Pob Zeb qhia nyob hauv nws tsab ntawv ib (1 Pob Zeb 5: 8-9) li no: “Nej yuav tsum txhob qaug cawv, yuav tsum ceev faj zoo. Nej tus yeeb ncuab uas yog dab phem nyob ncig rawv nej zoo li tus tsov nyooj laws nrhiav      neeg dua. Nej yuav tsum tiv nws, yuav tsum nyob ruaj nreb hauv nej txoj kev ntseeg, thiab nco ntsoov tias nej cov kwv tij ua neeg ntseeg nyob thoob ntiaj teb sawv daws yeej tau taug ib txoj kev txom nyem ib yam li nej thiab.”

    Muaj peb yam uas coj peb ua txhaum:  1) tib neeg:  xws li peb muaj ib cov phooj ywg uas tsis ntseeg ntuj, ces peb yuav xyaum lawv, yuav coj li lawv, tsis mus teev ntuj, tsis ntseeg ntuj zuj zus;  thaum yus pom tau li ntawd lawm, yus yuav tsum tau nrhiav kev ncaim cov neeg ntawd zuj zus; 2) tej qhov chaw: Xws li lub tsev mus xyuas niam ntiav, lub chaw twv nyiaj twv txiaj, lub tsev mus haus dej haus cawv, yog peb mus txog hauv tej qhov chaw zoo li no ces peb yeej yuav ua kev txhaum kev tsis zoo xwb, vim yeej yog cov chaw rau neeg ua txhaum; 3) tej yam, xws li tej zaj xyam (movies) liab qab, tej phau ntawv xyuas duab liab qab, tej zaj lus los xyam qhia kev ua phem ua qias.

    Muaj ntau txoj kev coj peb lub siab lub cev xav mus ua txhaum, vim li ntawd Koom Txoos Kas Tos Liv thiaj qhia kom peb yuav tsum caiv peb lub qhov muag txhob mus saib tej yam phem yam qias xws li tej xyam tej duab liab qab, caiv peb lub pob ntseg txhob mloog tej cov nkauj los tej cov lus uas yuav ua kom peb xav mus ua phem; peb kuj yuav tsis txhob nyeem tej phau ntawv uas qhia tej lub tswv yim phem thiab tej lub tswv yim yuam kev tsis haum peb txoj kev ntseeg.


    Last edited by Mim on 25th February 2016, 6:11 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    PIAV  TXOG   KEV   TXHAUM Empty Re: PIAV TXOG KEV TXHAUM

    Post  Mim 22nd February 2016, 6:16 am

    G. Txhaum Hnyav thiab Txhaum Sib.

    Peb ua txhaum rau Tswv Ntuj nyob hauv peb lub tswv yim zaj peb xav (thought/pensee), nyob hauv peb cov lus uas peb hais (words/paroles), nyob hauv tej yam phem uas peb ua (actions), thiab nyob hauv tej yam zoo uas peb tsis ua (omissions). Piv txwv: xws li peb tsis hais tawm tiam sis nyob hauv peb siab peb ntxub ib tug neeg tas siab nrho, qhov no yog ua txhaum nyob hauv yus lub tswv yim zaj yus xav; yog peb hais ib lo lus phem rau ib tug neeg los yog hais lus phem txog ib tug neeg ces yog peb ua txhaum hauv peb lo lus; yog peb haus dej haus cawv qaug, yog peb ua tub sab nyiag ib yam khoom, ces yog peb ua txhaum nyob hauv tej yam peb ua; yog peb nkees peb cia li tsis mus teev ntuj Hnub Chiv, tsis yog muaj mob muaj nkeeg, mas yog peb ua txhaum vim peb tsis ua ib qho zoo uas tsim nyog peb yuav tsum ua.

    Thaum yus tus kheej ua txhaum mas muaj ob yam txhaum, yam ib yog txhaum hnyav, yam ob yog txhaum sib.

    a. Txhaum hnyav (mortal sin/peche mortel):  Txhaum hnyav yog qhov txaus ntshai tshaj, vim nws  tuatau Tswv Ntuj txoj sia los yog lub txiaj ntsim uas nyob hauv yus. Yog peb muab piv rau tej xwm txaus ntshai nyob ntiaj teb, xws li kev ua tsov ua rog, kev dej nyab, kev av qeeg av pob, kev muaj mob loj, mas tej xwm no kuj txaus ntshai kawg li tiam sis tseem tsis txaus ntshai npaum kev ua txhaum hnyav. Vim tias tej xwm txheej loj ntawd tsuas tua tau yus lub cev xwb tua tsis tau yus tus ntsuj plig txoj sia. Txhaum hnyav tua tau Tswv Ntuj txoj sia nyob hauv yus tus ntsuj plig. Yog tsis muaj txoj hmoo yus tuag rau lub caij uas yus muaj txhaum hnyav yus tsis tau mus daws txhaum mas Koom Txoos qhia hais tias peb txoj hmoo tau mus nrog Tswv Ntuj nyob saum ntuj ceeb tsheej muaj tsawg kawg li. Kev ua txhaum hnyav zoo cuag li yog yus ntiab Tswv Ntuj kom mus deb yus, hos yus xaiv dab phem ua yus tus phooj ywg, yog yus tuag lub caij ntawd ces yus kawg yuav mus cuag tus uas yus xaiv xwb.  Vim li ntawd peb yuav tsum tau saib txoj kev daws txhaum tseem ceeb thiab peb yuav tau mob siab thiab nquag mus daws txhaum.

    Muaj peb nqe lus ua kom ib qho txhaum yog txhaum hnyav:
    1) Yam txhaum yus ua ntawd yuav tsum yog ib yam loj los tseem ceeb. Xws li tsis mus teev ntuj Hnub Chiv yog ib yam tseem ceeb, vim yus hla Tswv Ntuj kaum lo lus qhia lawm thiab Koom Txoos txoj cai yeej kom peb yuav tsum mus teev ntuj Hnub Chiv.
    2) Yus yuav tsum paub tias qhov yus ua yog ib qho loj los tseem ceeb. Xws li yog ib tug neeg tsis tau paub tias yus ncua tsis mus teev ntuj Hnub Chiv yog ib yam loj thiab tseem ceeb, mas nws ncua tsis mus kuj tsis yog txhaum loj, tiam sis tus neeg twb paub lawm ncua tsis mus teev ntuj Hnub Chiv mas nws ua txhaum hnyav. Yog tus neeg muaj mob loj mus tsis taus nws thiaj ncua mas nws tsis tau ua txhaum.
    3) Yus yuav tsum txaus siab ua txawm yus twb paub tias yog txhaum hnyav.  Rov hais txog kev mus teev ntuj Hnib Chiv, yog tias yus npaj mus, tiam sis yus lub tsheb tuag lawm, mus tsis taus, ces yus tsis mus. Qhov no tsis yog yus xaiv, tsis yog yus txaus siab tsis mus teev ntuj, ces yus tsis ua txhaum. Tiam sis yog yus nkees es tsis kam sawv mus teev ntuj xwb mas yog yus xaiv ua qhov ntawd, yus txaus siab ua qhov ntawd, ces yus ua ib qho txhaum hnyav.

    Thaum peb paub tias peb tau ua txhaum hnyav lawm mas peb yuav tsum mus daws txhaum kom sai li sai tau, tsis txhob cia ntev vim peb xav kom peb muaj Tswv Ntuj txoj sia nyob hauv peb tas mus li, thiab peb tsis paub 8tias peb lub caij yuav mus cuag Tswv Ntuj yog thaum twg. Thiab yog peb paub tias peb tau ua txhaum hnyav lawm mas peb mus koom thaj txi ntuj peb yuav tsis txhob sawv mus txais Yes Xus lub Cev thiab nws cov Ntshav, peb yuav xub mus daws txham tas tso peb mam mus txais tau. Yog peb muaj ib qho txhaum hnyav mas yuav tsum tau mus daws txhaum ntawm ib tug txiv plig mas Tswv Ntuj thiaj zam rau yus.

    b. Txhaum sib (venial sin/peche venial):  Cov txhaum sib yog tej yam txhaum uas tsis yog tej yam loj loj. Peb cov txhaum sib yeej ua kom Tswv Ntuj txoj sia yau tuaj nyob hauv peb, tiam sis tsis txiav kom tu nrho li qhov txhaum hnyav. Peb yuav tau xyaum tsis txhob ua tej txhaum me ntawd, vim tias yog peb tsis xyaum muab tso tseg ces yuav ciaj ua tej yam uas yus pheej ua kam tas mus li, ces tej zaum tseem coj yus mus ua tej yam txhaum hnyav los muaj.  Cov txhaum sib ntawd peb yuav tau mus daws thiab, tiam sis yog yuscia li tu siab rau yus cov txhaum thaib thov kom Tswv Ntuj zam rau yus xwb los nws kuj yuav zam tau rau yus. Tiam sis qhov zoo tshaj txawm yuav yog txhaum hnyav txhaum sib los yuav tsum tau mus daws txhaum tib si, vim lub Cim Daws txhaum pub Tswv Ntuj cov txiaj ntsim rau peb kom peb muaj peev xwn hloov tau peb tej kev tsis zoo. Peb yuav tau xyaum nyiam thiab hlub Tswv ntuj kom tas peb lub siab lub ntsws, yog thaum twg peb txawj hlub Tswv Ntuj kawg nkaus lawm ces peb yuav tsis xav ua ib yam los ua rau nws tu siab li.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    PIAV  TXOG   KEV   TXHAUM Empty Re: PIAV TXOG KEV TXHAUM

    Post  Mim 23rd February 2016, 6:03 am

    H. Lub Suab Nyob Hauv Peb (Conscience)

    Koom Txoos Kas Tos Liv qhia hais tias peb tib neeg nyias muaj nyias ib lub tswv thiab ib lub suab nyob hauv peb qhia rau peb tias yam twg yog qhov zoo yam twg yog qhov tsis zoo. Txawm ib tug neeg ntseeg ntuj ib tug neeg tsis ntseeg los yeej muaj li ntawd nyob hauv nws. Peb lub siab yeej qhia rau peb tias qhov twg yog qhov zoo qhov twg yog qhov phem thiab, tiam sis yog peb tsis kawm mas peb yuav paub tsis zoo. Vim li ntawd nyob hauv peb Hmoob lub neej mas cov hluas kawm ntawm cov laus kom lawv paub tias qhov twg zoo qhov twg tsis zoo. Nyob hauv peb lub neej ua neeg ntseeg mas peb yuav kawm ntawm peb cov xib hwb thiab cov txiv plig qhia txog txoj kev ntseeg lub ntsiab rau peb, thiab peb yuav tau mus nyeem Phau Ntawv Ntshiab thiab tej ntaub ntawv piav txog Ntawv Ntshiab los piav txog txoj kev ntseeg, ces peb thiaj yuav paub txiav txim tias qhov twg zoo qhov twg tsis zoo. Yog thaum peb ua xyem xyav tsis paub tseeb txog yam twg mas peb yuav tsum tau mu snug xib hwb los txiv plig los ib tug neeg uas paub kev ntseeg zoo.  Yog peb paub ntau yam mas peb lub siab kuj txawj txiav tau tias yam twg zoo yam twg tsis zoo. Ntau zaus peb yuav tau mloog peb lub siab qhia rau peb, thiab yuav tsum ua raws li peb lub siab hais. Peb yeej txawj yuam kev, tiam sis ntau zaus yam uas peb lub siab hais rau peb yog qhov zoo ntau.

    I. Tswv Ntuj lub Txiaj Ntsim/ the Grace of God/la Grace de Dieu

    Muaj ob yam txiaj ntsim uas Tswv Ntuj pub rau peb:  1) lub txiaj ntsim dawb huv, thiab 2) lub txiaj ntsim pab peb xaiv tau qhov zoo los ua.

    1) Tswv Ntuj lub txiaj ntsim dawb huv (sanctifying grace):Peb lub hom phiaj ua neej nyob ntiaj teb no yog nrhiav kom paub Tswv Ntuj, nyiam nws hlub nws tas peb lub siab lub ntsws, thiab tsob hwb nws, kom lwm tiam peb tau nrog Tswv Ntuj nyob saum ntuj mus ib txhis.  Vim peb yog neeg txhaum, peb yuav ua cas thiaj ua tau raws peb lub hom phiaj?  Yog peb siv peb lub zog ntawm peb tus kheej xwb ces yeej ua tsis tau li, tiam sis yog Tswv Ntuj muab nws lub txiaj ntsim pab peb mas peb thiaj li yuav ua tau.

    Peb twb tau kawm txog hais tias thaum Tswv Ntuj tsim As Das thiab Es Vas, nkawd muaj Tswv Ntuj lub txiaj ntsim dawb huv los yog Tswv Ntuj txoj sia nyob hauv nkawd. Tiam sis thaum nkawd ua txhaum, Tswv Ntuj lub txiaj ntsim tsis nyob hauv nkawd ntxiv lawm.  Peb txhua leej txhua tus yug los tsis muaj Tswv Ntuj lub txiaj ntsim dawb huv nyob hauv peb. Tsuas muaj ob tug neeg xwb thiaj yug los muaj Tswv Ntuj lub txiaj ntsim dawb huv, Yog Yes Xus, vim nws yog Tswv Ntuj, nws yeej muaj lub txiaj ntsim dawb huv tas mus li, thiab yog Niam Mab Liab, Tswv Ntuj muab lub txiaj ntsim dawb huv ntawd rau nws txij thaum lub sij hawm nws xeeb kiag los ua neeg nyob hauv nws niam plab lawm.

    Tswv Ntuj lub txiaj ntsim dawb huv nqes los nyob hauv peb tus ntsuj plig yog thaum peb txais lub lub Koom Txoos cov Cim. Xws li thawj zaug peb txais Tswv Ntuj lub txiaj ntsim dawb huv los nyob hauv peb yog thaum peb txais lub Cim Ntxuav. Lub txiaj ntsim ntawd ua kom peb dawb huv thiab kom Tswv Ntuj nyiam peb. Nws ua kom peb yog Tswv Ntuj me nyuam thiab ua kom Leej Ntuj Plig Ntshiab los nyob hauv peb. Lub Cim Txhab Zog ua kom Tswv Ntuj lub txiaj ntsim dawb huv thiab Leej Ntuj Plig haj yam muaj zog nyob hauv peb. Lub Cim Yug ua kom lub txiaj ntsim ntawd haj yam nyob ruaj thiab loj tuaj nyob hauv peb. Tsuas muaj ib yam xwb thiaj ua tau kom lub txiaj ntsim ntawd ploj hauv peb mus, yog kev ua txhaum hnyav. Thaum twg peb mus daws peb qhov txhaum hnyav lawm ces peb rov tau Tswv Ntuj lub txiaj ntsim los nyob hauv peb dua. Lub Cim Pleev Roj thaum muaj mob muaj nkeeg pub lub txiaj ntsim rau peb kom peb lub cev yeej tau tus mob nkeeg, los puas kom peb nyiaj taus tus mob, los tseem pab kom thaum peb ncaim ntiaj teb no mus peb tau kev mus cuag Tswv Ntuj.

    Peb kuj kawm haistias Tswv Ntuj lub txiaj ntsim dawb huv yog Tswv Ntuj txoj sia los nyob hauv peb. Yog peb ntsia lub ntiaj teb, peb pom muaj ntau hom siav, xws li siav nroj tsuag xyoob ntoo, siav tsiaj, thiab siav neeg. Ib tug nroj tsuag muaj sia mas nws tsis ntsws, nws ntsuab xiab thiab nws txawj hlob txawj tawg paj txi txiv. Ib tug tsiaj muaj sia mas nws txawj ua zog mus kev txawj pom txawj hnov txawj quaj txawj zoo siab txawj hlub nws tus me nyuam thiab txawj ncawg nws tus tswv. Ib tug neeg muaj sia nws kuj ua tau tas puas tsav yam ib tug tsiaj ua thiab nws tseem txawj muaj tswv yim xav txwv yim, txawj tsim ub tsim no, txawj hais lus, txawj sib qhia tswv yim, txawj kawm tej yam tshiab txawj xev tej yam tshiab.  Tej nroj tsuag xyoob ntoo, tej tsiaj txhu thiab tib neeg sawv daws puav leej nyob ib ntus xwb, sawv daws txawj tuag tib si. Tiam sis ntawm tib neeg yog peb muaj Tswv Ntuj lub txiaj ntsim dawb huv nyob hauv peb tus ntsuj plig mas peb yuav tau mus nyob saum ntuj mus li. Yog peb tsis muaj Tswv ntuj lub txiaj ntsim dawb huv ces peb yuav tsis tau mus saum ntuj.

    2) Lub txiaj ntsim pab peb xaiv tau qhov zoo ua (actual grace): Yog Tswv Ntuj txoj kev pab peb hnub dhau hnub hauv peb lub neej kom peb xaiv ua qhov zoo thiab zam dhau qhov phem.  Nws yog zoo li ib lub tswv yim txhawv nyob hauv peb ua kom peb ras dheev txog.  Piv txwv: tej zaum yus yog ib tug neeg nyeem tsis kam Ntawv Moo Zoo li, nyob nyob yus cia li xav tau tias ‘ntshai kuv yuav tau xyaum nyeem Ntawv Moo Zoo pob.’ Los tej zaum yus tsis nquag teev ntuj sawv ntxov tsaus ntuj li, nyob nyob yus cia li xav tau tias ‘ntshai kuv yuav tsum tau xyaum teev ntuj thaum tsaus ntuj.’ Tej qhov no yog Tswv Ntuj lub txiaj ntsim qhia yus lub siab txhib kom yus xyaum ua ib yam zoo. Tej zaum muaj ib yam yus yuav tsum ua tiam sis yus tsis pom qab yuav txiav txim siab tias yuav ua li cas li, ces yus thov ntuj kom pab. Muaj ib hnub ib lub tswv yim cia li tawm los nyob hauv yus, ua rau yus paub tias yuav ua li cas. Xws li cov txiv neej, yus muaj phooj ywg coob, tej zaum cov phooj ywg caw yus mus nrog lawv haus dej haus cawv, los puas caw yus kom nrog lawv mus saib niam ntiav. Yog yus lub siab xav tau hais tias ‘kuv yog neeg ntseeg, tsis tsim nyog kuv ua tej ntawm.’ Ces yus hais rau lawv tias ‘Ntshai kuv yuav mus tsis nrog nej.’ Yog thaum ib tug neeg ua tau zoo li no mas yog Tswv Ntuj lub txiaj ntsim pab nws kom nws txhob mus ua kev txhaum. Yog peb nquag teev ntuj mas peb yuav muaj Tswv Ntuj lub txiaj ntsim pab peb mem tau txiav tau qhov zoo ua thiab zam tsis txhob ua qhov phem.


    Last edited by Mim on 23rd February 2016, 10:02 am; edited 1 time in total
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

    PIAV  TXOG   KEV   TXHAUM Empty Re: PIAV TXOG KEV TXHAUM

    Post  Maiv Tooj 23rd February 2016, 9:57 am



    Nyob zoo Mim,

    Ua tsaug ntau rau koj zaj hais txog " kev txhaum " thiab kev mim kom dhau tej txhaum los yog ho txhaum lawm no yuav ua li cas thiaj li yuav dim ntawm kev txhaum. Yog ib zaj ntxaws kawg, yog leej twg ua raws li koj cov lus qhia nov, yuav daws tau ntau yam kev nyuaj hauv nws lub neej thiab tseem yuav daws tau nws tej txhaum los yog kev txhaum ntau yam ntxiv. Dua ntawm lub neej niaj hnub saum yaj no tseem yuav tau Ntuj txiaj ntsim rau lub neej tom ntej thiab.

    Thov ua tsaug rau koj lub laj lim tswv yim thiab dag zog uas koj muab los pab rau tsoom ntseeg sawv daws.
    Thov kom Tswv Ntuj txhais tes tsa rau saum koj, roos thiab tsom kwm koj mus lawm yav tom ntej. Ua li.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    PIAV  TXOG   KEV   TXHAUM Empty Re: PIAV TXOG KEV TXHAUM

    Post  Mim 24th February 2016, 11:16 am

    Nyob zoo tais Tooj,

    Ua koj tsaug os. Twb yog kuv tau sau ib co zaj qhia rau peb ib tug nyab Hmoob Yaj uas tab tom npaj kawm yuav txais lub Cim Ntxuav rau thaum Hmo Hla. Nws tsis paub lus Aas Kiv, ces kuv thiaj sau ua lus Hmoob rau nws. Kuv xav hais tias tej zaum kuj yuav pab peb cov Hmoob rov mus nyeem txog kev txhaum thiab kev daws txhaum, ces kuv thiaj coj tuaj tso rau hauv no os. Tseem muaj ntau zaj piav txog kev ntseeg thiab, tiam sis tsis paub tias peb cov Hmoob uas twb paub ntau lawm puas xav nyeem txog, ces thiaj muab zaj no tuaj ua ntej.
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

    PIAV  TXOG   KEV   TXHAUM Empty Re: PIAV TXOG KEV TXHAUM

    Post  Maiv Tooj 24th February 2016, 3:55 pm



    Nyob zoo Mim,

    Yog koj muaj ntau zaj hais txog kev ntseeg los peb zoo siab kom koj tuaj so rau peb nyeem kom ras xeev. Ntau zaud yog peb mus deb dhau, yuav tig rov qab saib tom qab dua, vim yus mus thiab mus ces twb tsis nco txog lub ntsiab qhov tseem ceeb lawm. Ntau zaud peb yuav xyaum ua me nyuam yaus, ua tus ruam mas peb thiaj li paub, yog peb ua tus ntse tas mus li xwb mas peb tsuas paub qhia luag xwb peb tsis rov qhia peb, peb yuav pom luag qhov phem xwb peb tsis pom peb tej kev ua txhaum, khav theeb los yog ntshaw hwj chim. Yuav rov tig saib qab, kom peb txawj xyaum ua neeg me.

    Yam li Txiv Vaj Qhia Faas Tshes Kus tau hais tias: "Cov ntseeg coj li Fas Lis Xais, kom cuam taws ntshawb rau ntawm lawv ko taw kom lawv ntog xwv lawv thiaj li yuav mus cuag tau Tswv Ntuj."

    Sponsored content


    PIAV  TXOG   KEV   TXHAUM Empty Re: PIAV TXOG KEV TXHAUM

    Post  Sponsored content


      Current date/time is 18th March 2024, 4:04 pm