ZAJ PIAV TXOG IB TUG NTXHAIS SUAV

**Mim** 12th January 2017, 1:50 pm

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°1

ZAJ PIAV TXOG IB TUG NTXHAIS SUAV

Post Mim 12th January 2017, 1:50 pm

Hnub no kuv yuav tuaj piav ib zaj hais txog ib tug me ntxhais Suav uas nws tau tuag ua tim khawv vim lub Cim Yug. Yog ib zag uas txaus hlub kawg nkaus li.

Yog nej ho xav mus nyeem ua lus Mes Kas no ces nej taum ob qho ntawm no, lawv sau ntau zaj txog nws tiam sis kuv xaiv ob zaj no:

https://www.americaneedsfatima.org/Conversions/the-little-girl-who-inspired-archbishop-fulton-sheen-s-vow.html
http://www.cardinalkungfoundation.org/ar/LetTheSonShineOut.php

Nram no kuv yuav tsis muab txhais, kuv tsuas muab piav ua lus Hmoob rau peb cov neeg uas tsis paub lus Aas Kiv xwb.

Tsis muaj neeg paub meej hais tias tus me ntxhais Suav no tuag yog xyoo twg kiag.Tiam sis muaj ntau zaj piav tias yog lub caij Suav teb ntxeev ua koom tshas, ze ntawm xyoo 1949 ntawd no. Txawm yuav yog lub caij twg los xij, qhov tseem ceeb yog qhov tias cov nom tswv Suav tsis nyiam cov neeg pej kum thiab ntxub txoj kev ntseeg Yes Xus, ces lawv muab cov neeg pej kum kaw los puas caum tawm lawv teb chaws mus thiab lawv tsim txom cov neeg Suav uas los ntseeg Ntuj lawm.

Lub caij ntawd nyob hauv ib lub zos los tej zaum ib lub nroog, muaj ib tug txiv plig, tej zaum yuav yog ib tug txiv plig tuaj sab Aws Los Pas tuaj, nws saib ib lub tsev teev ntuj nrog tsev kawm ntawv huv tib si. Muaj ib hnub, plaub tug tub rog Suav liab nrog ib tug thawj coj txawm tuaj xyuas lawv. Tus thawj coj tuaj hais lus rau cov me nyuam kawm ntawv tias lawv txoj cai kawm ntawv yuav hloov sai sai no. Ces nws txawm pib mus chua tsuag tsuag tej ntoo cuam tej duab dai ntawm phab ntsa los pov rhees rau saum rooj. Nws nthe nqho yuam kom cov me nyuam muab khaws nqa mus pov tseg ntsaws tom cov tsev quav. Cov me nyuam ntshai tshee na tsis kam nqa li, tiam sis nws nthe lawv tas zog ces lawv kuj ua tiag muab nqa mus pov tseg li tus thawj hais. Tiam sis nyob nram qab kawg muaj ib tug me nyuam ntxhais, 11 xyoos tej, nws tsis sawv tsis ua zog li. Tus thawj coj nthe npau taws dub nciab kom nws cia li nqa ib yam mus, nws tsis teb tsis ua zog li. Ces tus thawj tua ib zag phom ua tej qhov rai iav tawg zom zaws. Cov neeg zej zog hnov, lawv thiaj tuaj xyuas zom zaws. Nws npau taws ceev rau tus me ntxhais ces nws qw tias kom mus coj tus ntxhais ntawd txiv tuaj thiab coj cov neeg zej zog tuaj rau hauv lub tsev teev ntuj.

Thaum neeg tuaj zom zaws rau hauv tsev teev ntuj, cov tub rog muab tus ntxhais leej txiv pav tes ntxeev tis qaib rau nraum nrob qaub cab los rau hauv tsev teev ntuj, muab nws thawb mus nyob rau ntawm qhov chaw txhos caug txais lub Cim Yug. Ces lawv kuj muab tus ntxhais thawb ntiag nchav tsawv los rau ntawd thiab.

Ces tus thawj coj pib hais lus thuam lub Cim Yug rau cov neeg mloog. Nws hais rau lawv tias lawv sawv daws mas qaug cov pej kum neeg quav tas, lawv thiaj ntseeg tias Tswv Ntuj nyob hauv lub Cim Yug, tiam sis tsis muaj tseeb. “Nej yuav pom peb muab cov mov ntawd tsuj los yeej tsis muaj dab tsi tshwm sim li.” Ces nws kom cov tub rog muab lawv cov ntsis phom mus tsoo thiab dawj lub qhov rooj tsev tsam phooj. Tus thawj txawm mus tsawv nkaus lub ntim rau lub Cim Yug, nws muab lub hau tshem kiag tawm thiab muab cov mov Cim Yug nchuav loo w rau hauv pem teb. Nws hais kom cov tub rog los muab tsuj, ces lawv los muab tsuj tsuag tsuag rau cov neeg ntsia. Nws hais rau cov neeg tias: “Nej puas tseem ntseeg tej dab neeg uas nej tus txiv plig hais rau nej mloog thiab?” Ces nws tig hlo mus nug tus me ntxhais leej txiv tias nws puas tseem ntseeg, leej txiv teb tias nws tseem ntseeg, ces nws qw loo kom lawv cab leej txi mus lawm.

Thaum ntawd txawm muaj ib tug thawj tub rog tshiab tuaj nkag hauv lub tsev teev ntuj. Nws nrog tus thawj coj ntawd nkawd sib tham ib me ntsis tas ces nkawd kom cov neeg rov mus tsev. Cov neeg nyias rov mus nyias tas tseg tus me ntxhais ib leeg tseem sawv ib ntawm qhov chaw txhos caug txais lub Cim Yug. Nws nyob zoo li yoob tas rau ntawd lawm tsis mco qab tias yuav mus tsev li lawm. Cov tub rog muab tus txiv plig mus xauv rau hauv chav tsev ntim thee hauv tsev teev ntuj. Chav ntawd muaj ib lub qhov rai me me uas qhib pom hauv tsev teev ntuj.

Tus txiv plig pheej xauj tsis tseg rau hauv tsev teev ntuj. Tus me ntxhais nws nyob nws li qub tsis nti li. Nws txawm pom ib tug poj niam tseem hluas hluas hnav ib ce tsoos tsho zoo nkauj rhib nkag los; nws luag ntxhi. Nws mus puag nkaus tus me ntxhais, nws hais tias: “Me ntxhais aw, cov txiv neej ntawd tau ua dab tsi rau koj lawm os? Los nrog kuv mus. Koj puas kam los os?” Tus me ntxhais thiaj quaj kiag mus rau tus poj niam ntawd xub ntiag, ces nkawd tawm mus lawm.

Tus txiv plig raug kaw li ntawd nws tsis paub xyov tau pes tsawg hnub li lawm. Tiam sis muaj ib tag kis, nws hnov lub qhov rooj tsev teev ntuj maj mam qhib twj ywm. Nws xauj no ua ciav pom tus me ntxhais Suav maj mam nyiag nkag tuaj mus rau hauv qhov chaw lub thaj txi ntuj. Nws mus txhos caug khoov pe hawm lub Cim Yug. Nws nyob li ntawd thov ntuj ntev loo, tej zaum li ib teev tas, ces nws khoov taub hau mus xuas nplaig yaim ib lub Cim Yug los rau hauv qhov ncauj noj. Peb yuav nco tias lub caij ntawd mas ib tug neeg pej xeem tsis muaj cai xuas tes mus nthos Yes Xus lub Cev los noj, ces nws thiaj yuav tsum xuas nplaig yaim. Nws yaim tau lub Mov lawm, nws mam tsa hau los, nws teev ntuj ib chim tas ces nws mam sawv thiab mam mus lawm.

Tus me ntxhais ntawd niaj tag kis tuaj ua ib yam li ntawd mus txog thaum nws noj tas txhua lub Mov nyob hauv pem teb ntawd. Raws li tej zaj hais mas muaj 32 lub Mov nyob hauv av, ces tus me ntxhais ntawd niaj hnub tuaj kom puv 32 hnub thiaj tas cov Mov ntawd. Tiam sis thaum txog hnub kawg uas nws tuaj noj lub Mov kawg, tus me ntxhais ntawd tseem tab tom txhos caug khawm tes qi muag teev ntuj twj ywm, cas lub qhov rooj tsev teev ntuj cia li qhib plho, txawm hnov ib lub suab qw tawg ntho thiab ib zag phom nrov thooj txhij. Tus txiv plig thiaj mus xauj zoj zeeg saib muaj dab tsi. Nws pom tus me ntxhais ntsej muag daj tag, hos ua tiag peem nkag mus yaim lub Mov kawg los noj txais Yes Xus lub Cev zaum kawg. Tus tub rog kuj los txog ze lawm. Tus me ntxhais yaim tau lub Mov lawm, nws sim sawv los txhos caug thiab khawm tes teev ntuj, tiam sis nws nyob tsis tau li ntawd ces nws ntog kiag ntxeev tiaj, tob hau mus tsoo hauv av nrov toog. Tus me ntxhais thiaj pw tuag li ntawd hauv av. Tus tub rog pom li ntawd, nws xav ib pliag tsis pom qab yuav ua li cas, nws cia li tawm plaws khiav lawm.

Tus txiv plig xauj pom tas tej ntawd tib si, nws poob siab tag thiab tu siab kawg. Nws tseem tab tom xav tsis thoob txog tej ntawd, cas nws lub qhov rooj uas kaw nws, cia li qhib, ces tus tub rog ntawd nkag los hais rau nws tias, nws tawm mus tau lawm. Txiv plig thiaj li nkag loo mus hauv tsev teev ntuj mus xyuas tus me ntxhais uas pw nrom ncee hauv. Nws thiaj txhos caug ze ntawm tus me ntxhais lub cev thiab teev ntuj. Thaum ntawd tus tub rog txav los hais rau txiv plig tias: “Yog tias nyob txhua lub nroog muaj tej tug ntxhais zoo li tus no mas yeej tsis muaj ib tug tub rog yuav kam mus nrog koom tshas tua rog li!”

Tus txiv plig thiaj maj tsuag tsuag ua kab ke thov ntuj me ntsis thiab coj tus me ntxhais lub cev mus zais rau tom toj ntxas. Ces muaj neeg thauj nws mus tso rau tom ciam teb kom nws tau kev khiav tawm hauv Suav teb mus lawm.

Raws lis kuv to taub mas yog tus txiv plig ntawd tau muab zaj no sau cia, tiam sis tsis muaj neeg paub nws npe li, thiab tsis paub yog tshwm sim xyoo twg kiag.