Dab ntxwg nyug ua kom nej xav txog nej cov txhaum dhau los tsis tseg

Dab ntxwg nyug ua kom nej xav txog nej cov txhaum dhau los tsis tseg


YESXUS : cov me nyuam, nej yuav ua cas nyob tau kaj siab lug, nej cov txhaum nej daws tag dhau los kuv twb zam txim rau nej, nej pheej muab xav los ua kev ntxhov siab? Dab ntxug nyug yog tus ua kom nej xav txog nej cov txhaum dhau los uas nej tau ua thiab yuam kev, dab ntxwg nyug paub nej kev mob siab thiab nws thiaj ua kom nej nyob tsis tswm, ntxhov siab tos.

Qhov yuav pab tau,yuav tsum yog rov zam txim rau yus tus kheej, nej yuav tsum pom nej me tshaj txhua yam , nej yuav tsum pom nej tsis muaj zog dab tsi. Thaum nej ua nej cov txhaum, ziag no kuv twb zam rau nej, nej yuav tsum txais zoo kuv txoj kev zam thiab hais tsis tseg tias Tswv Ntuj twb zam txim rau kuv txhua yam tib si, ziag no kuv tsis muaj dab tsi yuav los tshuam kuv lawm, yav dhau los kuv twb txais kev zam txim. Yesxus nyiam nej tas siab nrho.

Me nyuam nyob hauv koj tus kheej yuav tsum hais li no rau kuv uas yog koj tus Huab Tais : << Yesxus, koj saib kuv tsis muaj zog dab tsi, kuv txoj kev zam txhaum rov rau kuv mas nyuaj kawg nkaus. Kuv yeej paub tias koj zam txim rau kuv lawm, tiam sis yog kuv pheej ntshai tsam kuv daws txhaum tsis zoo. Yesxus, kuv tso kuv txoj sia rau hauv koj xib tes, Koj yog tus paub qhov zoo thiab tsis zoo rau kuv, kuv cev txhua yam kev txhaum kuv tau ua los rau koj kom txhua yam kev txhaum dhau los zam tag nrog txoj kev tuag mus. Thaum dab ntxwg nyug ua kom kuv xav kuv cov txhaum tas li kom kuv txhob kaj siab thaum kuv daws txhaum tas, thov koj pub koj lub hnub ci tuaj ziab txog kuv kom kuv paub nws kev cuab ntxiab rau kuv. Yesxus kuv nyiam koj kawg siab.>>

Nej yuav pom thaum nej hais li ntawv tas, nej lub siab yuav kaj tuaj. Yog tias dab ntxwg nyug tseem rov los thab nej dua kom nej rov nyuaj siab, nej cev nej txoj kev nyuaj siab rau kuv. Kuv Yesxus, kuv yuav txais nej cov kev nyuaj siab, yuav pub txiaj ntsim rau nej. Yog vim nej pub nej lub txiaj ntsim rau kuv, kuv yuav tsuj dab ntxwg nyug.

Kuv tuaj pab nej zam txhaum kom nej txawj zam rau cov ua txhaum rau nej.

Vim nej yog ib tug neeg raug tsim txom, nej mob siab nkawg nkaus, nej raug luag ntxub luag nto, nej mob siab tim cov neeg ua phem rau nej. Kuv cov me nyuam, vim yog nej tsis pom cov txiaj ntsim kuv npaj tos nej, nej thiaj mob ua luaj, cov txiaj ntsim kuv npaj rau nej yog yuav pab txhawb kom nej zam txim tau rau tus ua txhaum rau nej. Yog nej tsis txawj zam txhaum rau cov ua txhaum rau nej, mas nej yuav yog tus mob siab tshaj.

Cov me nyuam uas npaj kev pauj rau nws tus yeeb ncuab, nws yuav nyob mob siab tas mus li, nws tsis muaj hnub kaj siab, Cov me nyuam uas nws nrhiav kev zam txhaum rau nws tus yeeb ncuab, nws yuav nyob kaj siab lug. Cov txiaj ntsim kuv pub rau nej, yog yuav txhawb kom nej tsis txhob qaug rau txoj kev tu siab rau nej tus yeeb ncuab.

Dab ntxwg nyug xav kom nej poob kev tuag mus li, nws niaj hnub tuaj zes nej kom nej npau taws rau nej tus yeeb ncuab, kom nej tsis txhob muaj kev zam txim nyob hauv nej lub siab, nej tsuas paub kev sib ntaus sib tua, kev npau thoj npau chim, kev dag, kev khib, kev pauj, kev tub sab , kev ntxub.

Yog nej tuaj cuag kuv, nej thov txiaj ntsim ntawm kuv rau nej cov yeeb ncuab, nej yuav pom tau tias txawm lawv ua phem rau nej los nej yuav yog tus yeej, vim nej muaj kev hlub puv npo, nej muab kev nyuaj siab los pauv kev kaj siab ntawm kuv.



Me nyuam kuv tuaj muab rau nej pom tias kev hlub tab tom kav lub ntiaj teb , Kuv Yesxus, yog txoj kev hlub tuaj rau nej. Nej hais tias nej nyiam kuv, nyiam kiag tus tab tom ua phem rau nej, yuav tsum ua kuv cov me nyuam muaj kev zam puv npo, kuv yuav nrog nej nyob. Kuv hlub nej, nej nyiam kev hlub, kuv hlub koj kuv tus me nyuam ntxim nyiam. Ua li.