XH.Zoov Ntxheb Yaj Nthuav Ntawv Ntshiab.

Ntawv Yos Xuas,24: 1+15-18.

15 Yos Xus hais rau tsoom pej xeem tias:
*Yog nej tsis zoo siab hwm Tswv Ntuj, mas nej xaiv saib, nej xav tsob hwb leej twg?
Nej puas xav tsob hwb, nej cov yawg koob nyob sab dej tim ub, lawv cov dab,los tsob hwb cov dab As Mos teb chaws no, uas tam sim no nej nyob!
*Ntawm kuv thiab kuv tsev neeg mas peb xav hwm Tswv Ntuj. 16Tsoom His Xas Lais teb tias:
-Peb tus Huab Tais Tswv Ntuj yog tus ua kom peb thiab peb cov poj yawm txwv koob tawm ntawm Hais Nkws Tos teb uas yogt lub teb chaws ua qhiav los. Nws yog tus muaj hwj huam, pov hws peb thaum peb hla teb chaws suab puas.
-Peb kuj yuav tsob hwb Huab Tais Tswv Ntuj, Vim nws yog peb tus Tswv Ntuj. Peb yuav muaj lub siab ruaj nreb nyob hauv Tswv Ntuj.

Niaj hnub no kuj zoo sib xws:
Yog peb tsis zoo siab hwm Tswv Ntuj, kuj muaj kev rau peb xaiv xws li:
1-Peb puas yuav xaiv cov dab uas peb poj yawm tau teev tiam los lawd.
2-Los peb yuav xaiv cov dab tsis huv nyob teb chaws no, xws li:
-Tej dab ua neeg khav theeb, muab hlob, dab plees dab yi, dab thov qhov vaj qhov tsev nyiag luag teej luag tug ntawd.
*Los peb yuav rov xaiv Tswv Ntuj dua, uas nws yog tus tsim neeg thiab ib txwm nws xav cawm neeg kom tau txoj hmoov zoo.
- Kev tsob hwb Tswv Ntuj los kev teev dab yeej muaj neeg teev thiab tsob hwb los tau ntau txhiab xyoo, peb kuj paub ob txoj kev no los ntev lawm.
- Hos cov dab tsis huv no yog cov dab xeeb los tshiab, tawm ntawm dab phem lub tswv yim los. Lawv yeej yog covc dab tsis huv tiag. Yog cov dab uas Tswv Ntuj nxtub tshaj, lub caij nyiam no.

Es Fes Xos 5: 21-32.

21 Paj Lug hais tias, Nej yuav rov sib mloog lus, vim nej hwm Leej Pleev. 22 Cov poj niam, nej yuav mloog nej tus txiv zoo li mloog Huab Tais. Vim tus txiv yog tus tswj poj niam. Ib yam li Leej Pleev yog tus tswj lub Koom Txoos. Vim Leej Pleev cawm nws lub cev.
-25 Hos nej cov txiv neej, nej yuav hlub nej cov poj niam ib yam li Leej Pleev uas nws hlub lub Koom Txoos. 26 Leej Pleev ua kom lub Koom Txoos tshiab thiab huv tuaj.
* Paj Lug ntuas cov niam txiv sib hlub xws li lub cim uas Tswv Ntuj hlub lub ntiaj teb neeg.
*Tswv Ntuj zam rau neeg thiab tos ntshis kom peb neeg hloov siab los nyob hauv Tswv Ntuj kev sib haum xeeb, pub rau peb tus ntsuj plig tau ua ib tug ntsuj plig dawb huv.
*Vim tias kev sib hlub thiab kev sib ntxub mas nws ua ke los sib law liag nyob hauv peb lub neej.
Peb tuav ua twb zoo xaiv kom peb tus ntsuj plig muaj txoj sia nyob rau sab kev hwm Ntuj.
-Yog peb xaiv tau yuam kev lawm mas peb tus tsuj plig yuav muaj kev tu siab tas ib sim neej vim nws ntshaw kom muaj txoj sia nyob xws li Tswv Ntuj.

Zam ntawv Moo Zoo,6:60 -69.
*Yes Xus cov thwj tim hnov txog qhov hais tias, yuav noj Yes Xus lub cev thiab haus nws cov ntshav, mas rhiab lawv pob ntseg kawg.
*Yes Xus hais rau lawv tias, tej ntawd dawm nej taw los! 62 Ua li thaum nej yuav pom Leej Neeg tus Tub nws nce mus pem qhov chaw, thaum ub nws nyob, mas nej yuav xav li cas?
63 Yog lub tswv yim ua kom muaj txoj sia, lub cev tsis zoo dab tsi li. Cov lus kuv hais rau nej no, yog lub Tswv Yim thiab txoj sia.
Tab yog nyob hauv nej muaj tej tus tsis ntseeg.
*Cov neeg uas lawv ntseeg tsis tau tias Yes Xus muab nws lub cev thiab cov ntshav los ncawm peb. Mas lawv haj yam ntseeg tsis tau tias, Yes Xus cawm lub ntiaj teb neeg nyob saum ntoo cuam.
-Vim txoj kev ntseeg no zoo tshaj thiab nws tob hee. Mas thiaj li muab peb zaj lus los ua ib lo lus qhia kom meej pem rau peb:
Xws li peb yuav xaiv kev teev dab los pev xaiv kev sib haum xeeb nrog Tswv Ntuj.
-Yes Xus, Leej Pleev nws nyiam peb, nws cawm peb kom peb zoo tuaj, thiaj muab piv tau li ob tug txij nkawm lawv kev sib nyiam sib hlub.
-Leej Pleev yos zoo li peb sawv daws tus txij nkawm muaj lub peev xwm, hwj chim txawj hlub mus li.
Thiab peb yuav ntseeg tias, nws cawm peb nws niaj hnub kho kom peb zoo tuaj, kom tsim nyog muab pub rau Leej Txiv uas nws yog peb tus Tswv Ntuj, peb yog ib tug me nyuam, los ib tug txiv tsev zoo los niam tsev zoo raug Ntuj nyiam.


Xib Hwb Yaj Zoov Ntxheb.

TOS HUAB TAIS, HNUB CHIV 1 Xyoo C.

Zaj lus hnub no nyob hauv Lus Kas Ntawv Moo Zoo nws yog ib co lus tseem ceeb kawg rau peb.
21:25-28+35-36.
Vim Yes Xus hais tias:
Yuav muaj tej yam hwj huam tshwm sim, nyob saum lub hnub thiab lub hli, thiab cov hnub qub.
Nyob ntiaj teb, cov haiv neeg yuav txhawj kawg. Lawv yuav ntshai cov dej nyob hauv hiav txwv, nrov nroo ntws tuaj.
Tas sawv daws yuav tuag ntshai, Vim tas txhua yam muaj hwj chim nyob saum ntuj yuav ua zog koog.
Leej Neeg tus tub muaj hwj chim hwj huam, yuav tuaj nyob saum cov huab. Tas txhua tus neeg yuav raug tej yam ntawd tib si.
Nej mas nej yuav ceev faj li tus neeg zov hmo. Thiab nej yuav teev Ntuj tsis tseg, kom nej muaj zog, dim ntawd txhua yam yuav tshwm sim tuaj ntawd.

Qhov kawg kom nej tau tuaj sawv ntsug nyob ntawm Leej Neeg tus tub xub ntiag. Lub lis piam dhau los peb tau hnov tias, cov uas lawv tau pom Tswv Ntuj tus tshiab Miv Kas sawv lawv yuav tau kev txhawj xeeb loj. Vim lawv yuav raug ncaim mus tsis tau ua Ntuj me nyuam.

Hnub no peb rov hnov tib los lus txawv tsis deb thiab. Yam li cov tsis tau tuaj sawv ntsug nyob ntawm Leej neeg tus tub xub ntiag mas lawv yuav Tuag ntshai:
Vim lawv yuav tsis tau tawm los sawv ntsug nyob ntawm Leej Neeg tus tub xub ntiag. Lawv yuav tuag ntshai vim lawv tsis tau zov hmo, thiab tsis teev Ntuj.
Lawv ploj mus los sis ncaim mus tas ib sid.

Tswv Ntuj tus Yaj Saub Yes Les Mias tshaj Tswv Ntuj lo lus tseem ceeb tias:
Lub caij ntawd yuav zoo puav tam li lub caij Yes Xus yug los. Yes Xus yog tus kaus hlav nthaw hauv av tuaj raws li Tswv Ntuj lo lus foom hmoov zoo rau lub ntiaj teb neeg.
Txoj kev ntseeg rau neeg, cov tau tuaj sawv nyob ntawm Leej Neeg tus tub xub ntiag, zoo puav tam li cov ntsuag nthaw ntawm lub hauv paus los ncig tus kav. Lawv muaj txoj sia nyob nrog kev ncaj ncees, los ntawm lawv kev teev ntuj tsis tseg.

Ntxiv mus tus hauv paus xa lus Paj Lug hais ntxiv tias:(1Tes xas los nis 3:12 txog4:2.)
Peb niaj hnub yuav xyaum ua ib tug neeg tsis muaj chaw xyeej, Yam li peb yuav rov sib nyiam sib hlub nyob hauv peb thiab tsoom txheeb ze.
Peb ua neej nyob tsis muaj ib tug uas nws tsis nyiam nws tus kheej. Peb dawv daws nyias yeej nyiam nyias tus kheej, nyias thiaj paub tej kev uas luag ua tub qaug rau yus, los tej kev xam khib ntawd. Li ntawd mas peb yuav tig los mus nyiam tsoom txheeb ze. Ib yam li yus rov nyiam yus. Ces tas txhua yam yuav zoo tuaj raws li cov lus Tswv Ntuj foom nqes saum ntuj los.MasNtuj yuav pauj rau peb kom txhua yam rov zoo tuaj kom tsim nyog li lub meej mom thiab nyias tes hauj lwm.


Xib Hwb Yaj Zoov Ntxheb.

TOS HUAB TAIS CHIV 2 C.

Ntawv Npas lws xav qhia peb tias: (5:1- 9.)
Cov neeg ntseeg, los lub Koom Txoos, nyob ntiaj teb no raug xwv txheej ntau yam, nrog kev ntxhov.
Peb yuav nco ntsoov tias, txoj kev peb taug. Yog ib txoj kev tseem ceeb mus tshwm rau Tswv Ntuj lub ceeb tsheej.
Tswv Ntuj lo lus thiaj hais tias:
Lub Koom Txoos, nej cov neeg ntseeg,nej hle nej lub tsho tu siab mus txomn yem!
Nej muab Tswv Ntuj lub hwj chim zoon kauj, los ua tsoos tsho rau nej hnav. Tswv Ntuj txoj kev ncaj ncees yog nej lub tsho tsuj tsho npuag zoo nkauj thiab raug lub zam zoo.
Nej muab tus nyob mus li los ua nej lub koob meej, thiab lub mom rau nej ntoo.
Vim Tswv Ntuj xav muab nej lub meej mom zoo nkauj rau lub qab ntuj neeg pom.
Tswv Ntuj yuav hu nej lub npe mus li tias, yog cov neeg ncaj txoj kev thaj yeeb, Thiab cov neeg hwm Ntuj lub hwj chim.
Cov kwv tij, peb muaj chaw tso siab lug tias, peb lub neej nyob ntiaj teb no, muab xam los mas peb tej kev raug xwv txheej kev txom nyem, raug luag ncauj nplaig lus tsawm, cuag li peb yog ib pab tsiaj raug luag khi , cab xws li ib pab neeg poob poob tsim. Tswj sawv daws lub siab kom tus, txhob hla Tswv Ntuj 10 lo lus qhia. Yog txoj kev mus tshwm rau Ntuj ceeb tsheej.

Tus hauv paus xa lus Paj Lug hais ntxiv tias: (f.l.p. 1:3-6+8-10.)
Kuv thov Tswv Ntuj kom nej cov neeg ntseeg nyob ntiaj teb no. Los nyob lub nroog no.
Kom nej hlob nyob hauv txoj kev ntseeg. thiab tau ua Leej Pleev lub cev hlob nyob hauv lub nroog no.
Kuv nco txog nej thaum twg mas kuv ua Ntuj tsaug mus li, Kuv zoo siab thov Ntuj rau nej tsis tseg. Vim nej ntseeg, nej nrog Leej Pleev ua tib txog hauj lwm pab tshaj nws lub Moo Zoo. Yog txoj hauj lwm zoo nyob hauv nej, Nej yuav ua kom tiav, pub rau Leej Pleev lub hnub nyoog. Nws yog Tswv Ntuj kev ua tim khawv.rau neeg kev sis nyiam sis hlub.
Kuv thov kom nej txawj nyiam Tswv Ntuj zoo zuj zus, thiab Ntuj zaj txij ci tseem ceeb. Nej thiaj txawj xav thiab xyaum ua neeg siab dawb uas tsis muaj chaw xyeej. Mus txog hnub Leej Pleev los,nej thiaj tau tuaj sawv ntsug nyob ntawm Leej neeg tus tub xub ntiag.

Lus Kas Ntawv Moo Zoo hais ntxiv tias:(3: 1-6.)
Yes Xus nws tuaj cawm peb. Nws xav kom peb npaj siab tos nws tuaj nyob hauv peb.
Tswv Ntuj lo lus thiaj nrov tuaj tias:
Muaj ib lub suab qw nyob teb chaws suab puam tias, nej kho Huab Tais txoj xub ke, nej tshav ncaws nws tej xub ke kom tiaj tus.
Nej txhub av rau cov kwj ha, nej ncaws tej hauv roob kom qis mus. Thoov nws txoj kev kom ncaj, meem tej qhov qawj kom xwm yeem. Mas txhua tus neeg yuav pom tau nws txoj kev cawm.
Huab Tais txoj kev ncaj kev du uas peb yuav kho:
Yog, peb kho peb lub siab, lub ncauj lo lus , tus yam ntxwv tes taw nrog kev ua hauj lwm txhua yam, kom phim kev ncaj ncees, ua neeg thoob tsib tsim nyog sawv ntsug ua lub neej rau saum lub ntiaj teb.


Xib Hwb Yaj Zoov Ntxheb.

Ntawv Xos Fos Nias tais tias: (3:14-18.)
Thaum cov His Xas Lais zwm rau cov yeeb ncuab, ib tug Yaj Saub pab tso siab tias, Tswv Ntuj yuav cawm lawv.
Niaj hnub peb cov neeg ntseeg ua rog tiv kev ua txhaum. Peb kuj yuav tso siab tib yam tias, Tswv Ntuj thiab nws lub KoomTxoos, kuj pab peb tias, peb yuav yeej kev ua txhaum.
Peb cov neeg ntseeg tsim nyog peb yuav zoo siab. Peb lub koob meej loj lawm.Lub txim raug peb, yog kev ua txhaum. Huab Tais muab ntiab tshem tawm lawm. Nyiam no Huab Tais tuaj nyob nruab nrab peb. Peb kev tshais, kev txom nyem tsis muaj ntxiv lawm.
Vim Tswv Ntuj yog thawj tug tub rog nyob hauv txoj kev yeej.Hnub twg peb yeej txoj kev ua txhaum ,mas Tswv Ntuj yuav zoo li tej lub hnub nyoog nqaum paj nqaum nruas zoo siab lom zem mus li.

Tus hauv paus xa lus Paj Lug hais nyob hauv ntawv Fis Lis Pos tias:(4: 4-7.)
Cov neeg ntseeg muab siab rau coj tus yam ntxwv tsim txiaj zoo tiag. Mas lawv yuav pom Huab Tais, vim nws nyob ze lawv.
Ntawm peb, peb kuj yuav zoo siab mus li nyob hauv Huab Tais. Xav kom lub ntiaj teb paub tias nej nyiam ua zoo rau luag, nrog kev teev ntuj tsis tseg. Vim nej yog cov paub Tswv Ntuj kev thaj yeeb nyob hauv Leej Pleev lub tswv yim.

Yes Xus hais nyob hauv Lus Kas ntawv MooZoo tias(3: 10- 18.):
Peb tus Huab Tais Pleev yog ib tug neeg siab ntshiab, nws xav kom peb xyaum ua neeg siab ntsiab. Xyaum nrhiav kev sib hwm thiab pab luag. Xws li cov pab neeg uas lawv tuaj nug Zam Ntxuav Plig.
Zam teb rau lawv tias:
Tus muaj ob lub tsho, yuav faib ib lub rau tus tsis muaj. Tus muaj mov noj kuj yuav ua li ntawd thiab.
Cov nom tswv, yuav txhob kom luag them se tshaj txoj cai txiav.
Cov tub rog txhob lam hiam luag liam tej yam yuam kev. Nej nyiaj hli npaum li cas nej yuav npaum li ntawd.
Tus Huab Tais yuav tuaj yog sawv daws tus. Nws yuav ntxuav nej nyob hauv dej thiab nyob hauv Leej Tswv Yim ntshiab.
Nws yuav ntxhuaj nws lub tshav nplej. Cov nplej qoos nws yuav sau rau hauv txhab, hos cov ua npluag nws yuav muab hlawv rau hauv lub cub tawg tsis txawj tuag los kug mus.
Piv hais tias cov qoos lawv muaj lub ntsiab yug tus ntsuj plig tuaj kaus tau. Cov yog npluag muaj lub ntaws yuav ua kaus tsis muaj lub ntsiab yug kom hlob. Ces nws tsis tsim nuj.

Xib Hwb Yaj Zoov Ntxheb.

Hwm yim neeg ntshiab.(Npes Xis Las 3:3-7+14-17.)

Tus hwm niam hwm txiv, nws mloog Ntuj lus.
Tus hwm nws txiv nws them nws cov txim txhaum.
Tus cav lus zoo txog nws niam nws txiv, nws tau sau ib txhab nyiaj txhab kub tseg.
Tus hwm nws niam nws txiv mws yuav ntsib kev kaj siab lug nyob hauv nws cov me nyuam. Tab yog nws thov dab tsi ntawm Ntuj masNtuj yuav mloog nws.
Cov neeg uas lawv mloog niam thiab txiv lus. Lawv tau mloog Huab tais lus. Cov ntawd Ntuj yuav nco ntsoov txog, thaum lawv muaj kev raug txom nyem. Ces Ntuj yuav zam txhaum rau lawv, lawv cov txhaum yuav yaj ntsis tas.

(Npe Xis Las,3:12-21.)
Tua Hauv Paus Xa lus Paj Lug thiaj hais tias:
Cov neeg nyob ua ib tse , lawv yuav sib nyiam sib hlub. Vim lawv yog cov uas Ntuj xaiv, thiab Tswv Ntuj nyiam. Peb kuj nyob ua ib tse, peb yuav muaj ib lub siab khuv leej luag tej. Peb yuav muaj ib lub siab ntev, txhob ua lus rau lwm tus.
Peb yuav rov sib ris,sib zam. Tswv Ntuj twb ua li ntawd rau peb lawm.
Qhov peb yuav xub nrhiav yog kev nyiam, Tas ib puas tsav yam zoo, lub ntsiab yog kev nyiam ntag.
Peb yuav thov kom Leej Pleev kev thaj yeeb tuaj nyob txawm hauv peb nruab siab.Yog Leej Pleev kev thoob tsib thiaj yuav coj peb nyob hauv kev sib ntuas, nrog peb tej lus thiab tes hauj lwm.
Peb Xub muab Leej Pleev tsa ua tus thawj coj peb lub neej.
Cov poj niam thiaj zoo siab mloog lawv tus txiv lus.
Cov Txiv neej thiaj yuav nyiam lawv cov poj niam, thiab tsis npau taws sai.
Cov me nyuam kuj yuav mloog cov ua niam ua txiv lus. Tiam sis cov ua niam ua txiv txhob qhuab qhia ntau dlau, tsam cov me nyuam tsis qab siab ua dab tsi.
Cov lus hais no Tswv Ntuj twb xub ua li nyawd lawm.

(Lus Kas 2:41-52.)
Thaum Yes Xus muaj 12 xyoos nws mus ua hmoov hla nyob Yes Lus Xas Les. Nws nyob peb hnub hauv lub truam tsev teev Ntuj.
Yes Xus hais rau Mab Liab thiab Yos Xes tias:
Kuv yuav leg kuv txiv tes hawj lawm. Yog txoj hauj lwm nyiam Ntuj thiab mloog Ntuj lus.
Yes Xus mloog cov kws txoj cai, thiab nug lawv txog kev sib hlub, sib nyiam sib mloog nyob hauv ib tse neeg.
Yuav xub muaj kev sib nyiam nyob hauv tsev neeg, sib nyiam nyob hauv ib lub zos, thiaj muaj kev sib nyiam hauv ib lub teb chaws, Kom txoj kev nyiam no loj hlob mus duav lub ntiaj teb. Thiaj tsim nyog rau Tswv Ntuj yog ntiaj teb neeg Leej txiv ua yog tus muaj kev nyiam loj tas nrho muab los nyiam lub ntiaj teb neeg sawv daws. Nws yog tus txawj hlub txawj nyiam, txawj zam rau neeg kom nyob kaj lug thaj yeeb mus ib txhiab ib txhis mus li.




Xib Hwb Yaj Zoov Ntxheb.

HWM YES XUS TAWM TUAJ(His Xais60:1-6. Es Fes Xos 3:2-3+5-6.)

Yes Xus yug los nyob ntiaj teb no, nws lub hnub tawm tuaj ziab rau peb.
Yes Lus xas Les, yog peb los yog tas neeg nyob ntiaj teb.
Tsab ntawv 1-2 no yog Tswv Ntuj lo lus nrov tuaj rau peb neegt ntiaj teb tias:
Yes Lus Xas Les tshav ziab koj lawm, koj lub hnub tawm tuaj. Huab Tais lub hwj chim sawv los nyob hauv koj.
Koj zoo li qhov tsaus ntuj vov lub ntiaj teb, thiab cov huab dub vov lub hiav txwv.
Huab Tais lub hwj chim tawm tuaj ziab koj, ua rau koj pom kev, Yes Lus Xas Les.
Cov Vaj, cov nyiaj cov kub, tas tsoom neeg nyob deb nyob ze tuaj cuag koj.
Zaum no yog Tswv Ntuj lo lus qhuas txog lub ntiaj teb neeg tias:
Neeg ntiaj teb, nej txoj hmoov yuav zoo:
Yes Lus Xas Les, yog peb, Tswv Ntuj yuav qhia tej yam uas txheej thaud tsis tau qhia rau peb. Ntuj yuav qhib peb lub siab kom peb paub thiab pom tej yam npog ua neeg tsis tau pom dua. Yam li Tswv Ntuj yuav ib lub cev neeg tuaj nrog peb nyob. Thiab Tswv Ntuj lo lus tuaj nyob txawm hauv peb nruab siab. Kom neeg paub txog tias Tswv Ntuj siab zoo, thiab txawj hlub neeg.

Thaum Tswv Ntuj lo lus xeeb los ua neeg, mas Ntuj lub hwj chim muaj zog tawm tuaj nyob saum ntuj. Qhia rau ntiaj teb peb meem Vaj sawv tas nrho lub sim ceeb no yim meem teb chaws tuaj pe hawm Tswv Ntuj lo lus.
Nyob hauv peb meem Vaj nrog yim meem teb chaws tau xaiv cov paj tshab zoo tshaj tuaj pe hawm Tswv Ntuj lo lus:
*Cov nyiaj kub, yog ntiaj teb neeg li pov haum.
*Cov txab txiv yoov, yog ntiaj teb li lub hwj chim teev hawm Ntuj.
*Tshuaj tsw qab yog ntiaj teb li kev dawb huv kev ncaj ncees. Yam tsis muaj neeg ntxub
Yog Tswv Ntuj qhia kom neeg xaiv yam zoo tshaj plaws nyob ntiaj teb no los ua paj tshab cev rau Ntuj los lus tseem ceeb no.
Neeg ntiaj teb yog hom zoo tshaj plaws uas Ntuj tsim tseg rau hauv lub simceeb.
Peb yuav ceev peb lub siab lub tswv yim lub cev ntaj ntsug, kom zoo li cov tseem nyiaj tseem kub. Thiab yam dawb huv tsim nyog cev los txi rau Ntuj. Thiab tsis muaj chaw xyeej yam tsis muaj tus ntxub nyob tsw qab ntxiag rau Tswv Ntuj yuav.
Thaum peb ntseeg txog ntuj peb yog cov tseem nyiaj kub. Thaum peb tuaj teev ntuj peb yog cov tseem paj tshab uas Ntuj nyiam. Tsis muaj chaw xyeej lawm..

Xib Hwb Yaj Zoov Ntxheb.

Yes Xus txais lub cim ntxuav( His Xais 42:1-4+6-7.)

*Yes Xus yog Tswv Ntuj tus tub txib. Tswv Ntuj xaiv thiab nres nws.
Tswv ntuj hais tias:
Yog tus kuv xaiv, kuv nyiam dua cov.uas kuv lub tswv yim roos nws. Kom nws coj txoj kev cai tuaj rau sawv daws. Tus txhiav twb lov lawm nws tsis muab txiav pov tseg, tus nplaim teeb cig qauj les los nws tsis muab tshuab. Nws yuav nyob ruaj mus txog hnub txoj kev cai kav thoob lub ntiaj teb. Vim tias cov neeg nyob deb deb tos txog nws cov lus qhia. Tswv Ntuj hu nws mus taug txoj kev ncaj, thiab tuav nws tes, hwj nws.
Kuv qee koj los coj neeg los cog lus, xws li cov neeg dig muag, thiab cov nyob hauv tsev loj faj. Kom tau los raws qhov pom kev, txhob nyob hauv txoj kev tsaus ntuj.
Tswv Ntuj cov lus muaj tseeb npaum no, yog hais rau leej twg?
Peb cov neeg ntseeg txog Yes Xus, ces yog Tswv Ntuj hais rau peb kiag tias:
Nej yog cov uas kuv xaiv, kuv roos nej nyob hauv txoj kev ncaj kom nej coj lub ntiaj teb neeg los cog lus tias kuv txuag nej. Nyob hauv nej tus tauj twb lov lawm los kuv tsis muab txiav pov tseg. Hos tus nplaim teeb cig qauj les los kuv tsis muab tshuab. Kuv yeej hwm nej kom nej ua qhov poom kev rau ntiaj teb neeg cov dig muag, thiab cov nyob hauv tsv loj faj.
Kom lawv tau tawm los nyob hauv qhov pom kev. Txhob nyob hauv qhov tsaus ntuj.
Cov dig muag, yog cov tsis xav paub Tswv Ntuj lawv nyiam txoj kev tsaus ntuj dua txoj kev kaj.
Cov nyob hauv tsev loj faj, yog cov neeg txom nyem txhua tus ua lawv tsis muaj kev tso siab rau Tswv Ntuj. Thiab tsis muaj kev vam khom txog Ntuj kev nyiam kev hlub, uas yuav tau nyob kaj siab lug.
( Hauj lwm10:34-38.)

*Tswv Ntuj Pleev Yes Xus, yam li Nws pub Leej Tswv Yim ntshiab lub hwj huam rau Yes Xus.
Peb ntseeg txog Yes Xus peb muaj chaw tso siab, li Pob Zeb hais:
Leej twg hwm Ntuj thiab mloog nws txoj cai mas nws ua ntxim Tswv Ntuj siab. Tswv Ntuj xa nws kev thaj yeeb tuaj rau ntiaj teb neeg txhua tus. Tus ntseeg yuav pom Tswv Ntuj kev nyiam kev hlub ci lam lug.
(Lus Kas 3;15-16+21-22.)

*Yes Xus yog tus siab ntshiab uas Tswv Ntuj nyiam kawg.
Zam ntxuv plig hais tias, tus muaj zog dua kuv nws lawv kuv qab. Kuv tsis tsim nyog daws nws txoj hlua khi nws nkawm khau.
Nws yuav ntxuav neeg nyob hauv Leej Tswv Yim ntshiab, thiab hauv hluav taws.
Cov neeg ntseeg txog Yes Xus lawv tau txais lub cim ntxuav nyob hauv Tswv Ntuj lub npe. Yog tus Tswv Ntuj muaj zog yeej kev tuag nrog rau kev phem kev tsis zoo txhua yam. Kom yaj ntshis mus. Kom ua tau ib tug neeg dawb huv.
Cov neeg nyob ua xyem xyav, los cov ntseeg thim mus thim los, lawv tseem yog cov neeg nyob hauv qhov tsaus ntuj, los nyob tsev loj faj.
Ib- Lawv tau pom txoj kev kaj, los lawv yeej nyiam nyob hauv txoj kev tsaus ntuj.
Ob-Cov nyob tsev loj faj, yog cov tsis tau hnov txog Tswv Ntuj kev nyiam kev hlub. Los lawv hnov tsis meej, lawv tsis tau muab siab rau mloog kom to taub zoo.
Peb txhob ua cov neeg uas xav tawm hauv tsev loj faj los. Tab sis peb tsis xav nyob hauv kev kaj. Peb nyiam kev tsaus dua kev kaj.
Lub ntsiab lus hnub no Tswv Ntuj hais rau peb sawv daws tias, peb yog cov pab neeg ntawd ntag. Peb yuav ua li cas kom peb yog cov uas Ntuj xaiv,peb thiaj yog tus ua tau ntxim Tswv Ntuj lub siab.

Xib Hwb Yaj Zoov Ntxheb

Es Nras hais tias:
Nej tus Tswv Ntuj saib tias, hnub no yog ib hnub ntshiab.
Nej yuav zoo siab, nej tsis txhob tu siab. Hnub no yog hnub ntshiab uas nej tau hnov Tswv Ntuj lo lus thiab txoj cai. Tswv Ntuj chaw zoo siab yog nej lub loog zeb.
Tus paub Tswv Ntuj thiab nws txoj cai, ntawd twb yog Tswv Ntuj nyiam peb.
Peb yuav sis nyiam sis hlub. Kev nyiam kev hlub yog lub loog zeb uas Dab phem yuav rhuav tsis tau. Vim Tswv Ntuj nyob txawm hauv.
Kev nyiam kev hlub yog tus ncej hlau tuav lub loog zeb. Nws yog tus ncej tuav koos tas nrho Tswv Ntuj 10 lo lus qhia.
Tswv Ntuj 10 lo lus qhia yog tas nrho cov ncej vas tas nrho lub loog zeb no kom ruaj.
Dab phem yuav tso tsis tau los tso nws tej toj taug kom neeg tig los saib yaj ceeb neeg kev ua txhaum:
Yam li kev sib ntxub, kev ua plees ua yi, kev ua tub sab tub nyiag nrog kev tsis hwm Ntuj hwm neeg. Kev ua neej sib cais tsis muaj kev hlub. Muab kev tsaus ntuj los plooj qhov muag, kom tsis pom txog Tswv Ntuj tej txiaj ntsim koob hmoov ua Ntuj pov hwm nws lub neej.

( Kos Lis Nthos.12:12-14+18-21+26-30.)
Lub Koom Txoos yog Yes Xus lub cev hlob. Peb yog Yes Xus tes taw, peb nyias txawv nyias. Tab sis peb ua ke yog Yes Xus lub cev ciaj sia nyob ntiaj teb no.
Vim peb txais tib lub Cim ntxuav nyob hauv tib leeg Tswv Yim, kom peb tau ua Yes Xus lub cev.
Mas tus yog lub Tswv Yim nws tes los nws taw mob mas nws yeej yuav nrhiav tshuaj los qhwv kom zoo xwb. Tej tes taw ntawd thiab lub cev qhov twg dub lub Tswv Yim yuav ntxuav so kom dawb tuaj. Qhov txias nws yuav looj ntaub tuab kom sov, qhov sov nws kuj yuav qhib kom dim pa lim las.
Ua li mas peb sawv daws muaj nqis nyob hauv Yes Xus tas nrho. Peb sib ntxub tsis tau.
Peb saib cov lus nyob hauv daim duab no:
Qhov muag hais tias nws xub pom. Qhov ncauj hais tias, yog nws hais thiaj tau. Tes hais tias, yog tes muab thiaj tau. Taw hais tias, yog taw mus thiaj txog. Plab tsis ua hauj lwm cia plab nws nyob nws sawv daws thiaj tsis khwv. Zaum no plab tsis muaj dab tsi lawm. Plab lau mus. Tas txhua yam tsis muaj zog. Qhov muag rua tsis taus, tes taw tsis muaj zog, pob ntseg tsis hnov lus lawm. Lub tswv Yim tsis xav nrhiav tej yam zoo rau leej twg li. Sawv daws yuav zoo li cas. Puas mus tas nrho tshuav tib lub Tswv Yim nyob xwb.

( Lus Kas.1:1-4+4:14-21.)

Peb yuav zoo siab li Lus Kas nws khaws Yes Xus cov lus uas Cov Hauv Paus Xa Lus ua tim khawv thiab ua Lo Lus tus tub txib tshaj mus kom thoob lub qab ntuj no. Kom sawv daws pom tias, Huab Tais lub tswv Yim nyob saum peb. Yog Huab Tais qee peb los ua nws tug. Huab Tais yog tus Pleev peb, Yam li nws tsa peb ua Vaj. Ua Leej Choj. Ua Yaj Saub. Huab Tais xa peb mus tshaj lub Moo Zoo rau cov neeg pluag.
Nws xa peb mus ceeb toom rau cov neeg dig muag tias lawv yuav pom kev. Thiab cov neeg raug luag hiam tias, lawv yuav dim. Vim tias Tswv Ntuj muaj txiaj ntsim ntau yuav pub rau sawv daws.
Thaum Yes Xus nthuav Tswv Ntuj lo lus nws tau hais meej tias. Zaj lus nej hnov hnub no nws tsheej xeeb tau lawm.
Tswv Ntuj twb yeej xub ua tas rau peb lawm. Zaum no tshuav qhov tias, peb puas lees yuav thiab txais los ua peb tug lawm xwb.


Xib Hwb Yaj Zoov Ntxheb

Yes Les Mias 1:4-5+17-19.
*Cov neeg ua Yaj Saub lawv yuav tsum qhuab qhia tsoom sid. Ntau zaus tsoom sid yuav ntxub lawv.
Tab sis Tswv Ntuj lub zog nres lawv.
*Tswv Ntuj lo lus nrov tuaj zoo li no:
Thaum loj tsis tau xeeb los, kuv twb paub koj lawm.
Kuv qee koj los ua kuv tus yaj saub qhia cov haiv neeg. Hnub no kuv tsa koj ua lub loog zeb, muaj ncej hlau khov li ntsa tooj xov tiv thiav, cov ua Vaj txheeb, cov Leej Choj, thiab cov pej xeem.
Cov ntxub Tswv Ntuj yuav tsis yeej koj. Vim kuv yog Tswv Ntuj yuav nrog koj nyob.
*Tswv Ntuj lo lus no, xav qhia peb tias:
Cov neeg ntseeg txhu tus yuav rau siab qhia luag tej uas, yog peb cov txheeb ze.
-Yuav qhia li cas? Yuav ua lub siab ntev, txhob tu siab uas yus niaj hnub ris kev iab kev khwv. Thov Ntuj pab luag. Kom Ntuj lub txiaj ntsim ntawm kev hlub loj hlob txawj qhib sawv daws tej qhov muag. Siab ntsws, kom sawv daws paub Tswv Ntuj kev nyiam kev hlub. Txawj tso siab rau txhua yam uas Tswv Ntuj tau nres thiab pov hwm yav tas los lawm.

(Kos Lis Nthos.12:31+13:1-13.)
*Tus hauv paus xa lus Paj Lug thiaj hais tias:
Yam twg yog yam muaj nqis dua cov, nyob saum ntuj thiab nyob ntiaj teb no?
-Txoj kev nyiam yog yam muaj nqis dua cov.
Tab yog tus neeg txawj hais tas ntiaj teb cov xeem lus, los, paub Ntuj cov tshiab cov xeem lus tas nrho, los nws txawj nrog cov neeg tuag sib txuas lus tau.
-Nws tsis muaj lub siab nyiam mas nws zoo li lub tswb tooj, los lub nruas npuaj nrov nca nca xwb. Nws yog Yaj ntshis tsis muaj dab tsi li.
-Tus muaj lub siab txawj nyiam cog rau nws nruab siab, mas nws txawj ua siab ntev. Tsis xam khib. Tsis khav theeb thiab muab hlob.
Nws tsis ua tub qaug leej twg. Tsis npau taws los cib nyeej.
-Nws tsua xav pom kom sawv daws ua ncaj ncees. Nws ntseeg sawv daws thiab tso siab rau sawv daws. Nws txoj kev nyiam yuav nyob ruaj nreb tsis txawj dua ntais li.
Yog peb muaj kev ntseeg thiab kev nyiam zoo li no, mas tiam no, peb yuav pom Tswv Ntuj zoo li pom tus duab nyob hauv ib daim iav. Lwm tiam peb yuav pom xyeem ntawm qhoiv muag. Peb yuav paub Tswv Ntuj li nws paub peb.
Kev nyiam yog yam loj tshaj, txhua yam nrhau ntawm kev nyiam los.

(Lus Kas 4:20-30.)
*Lus Kas ntawv Moo Zoo hais ntxiv tias:
-Yes Xus cov lus xis cov neeg tsis muab hlob. Tab sis cov neeg tsis xav tig los yuav lub siab tshiab, mas lawv tsis xav hnov Yes Xus lub Moo Zoo.
-Y,X,Kuv hais tiag rau nej! Tsis muaj ib tug Yaj Saub uas luag yuav txais nws zoo nyob hauv nws lub zos.
-Lub caij Es Lis nyob, Ntuj qhuav tau 3 xyoos thiab 6 lub hli. Lub teb chaws raug kev tshaib tas tib si. Muaj ntau tus poj ntsuam nyob His Xas Lais teb, Tsis kav Tswv Ntuj tsis xa Es Lis mus pab cov poj ntsuam ntawd. Ntuj xa Es Lis mus pab ib tug poj ntsuam, Vaim kuj tub teb puag tim Xis Doos teb.
-Lub caij Es Lis Xais nyob, muaj ntau leej mob ruas, nyob His Xas Lais teb. Tsis muaj ib tug rov huv tuaj. Tsuas yog ib tug pej kum neeg hu ua Nas Maas, yog neeg Xis Lias thiaj huv tuaj.
- Peb saib Yes Xus lo lus no saib yog hais txog leej twg! Peb yog cov ntseeg txog Yes Xus, peb ho tsis tso siab rau Yes Xus. Peb mus tso siab rau co saub sawv tim roob tauj. Los cov txiv muam saib yaig. Lawv txuas lus tau rau dab thiab cov neeg tuag. Tiam sis lawv txoj kev nyiam tsis muaj zog. Lawv muaj cuab tam ntau tshaj koj. Los lawv tseem kom koj pab lawv, kom lawv tau zoo tshaj sawv daws. Peb yuav tig peb los nyob ncaj qhov ua xis Tswv Ntuj lub siab.
Cov ntsiab lus hnub no raug peb siab vim peb xyaum ua neeg me tsis muab hlob.




Xib Hwb Yaj Zoov Ntxheb

(ntawv phau tsib 26:4-10.)
Ntawv phau tsib hais tias:
Niaj xyoo, koj yuav cev ib qho paj tshab rau koj tus Leej Choj uas nws yogTswv Ntuj tus tub txib.
-Koj yuav hais cov lus no rau koj tus Tswv Ntuj tias:
Kuv txiv yog ib tug neeg nyob tsis ruaj chaw. Peb ua neeg thoj nam poob hauv kev txom nyem.
Peb thiaj hu txog peb cov yawg koob tus Tswv Ntuj, uas yog tus xeeb teb xeeb chaw.
Tswv Ntuj, koj hnov peb lub suab. Koj paub peb txoj kev txom nyem, kev khwv. Tswv Ntuj koj yog tus pab peb,koj coj peb kev tuaj nyob teb chaws no.
Peb muaj noj muaj haus ntws sis laub sis lug los tsis tu ncua. Kuv nqa qhov paj tshab no tuaj cev rau koj. Kuv pe koj yog peb tus Tswv Ntuj.
-Tas nrho peb cov neeg ntseeg txawm ua txoj kab xwm twg los peb yuav tau cev ib qho paj tshab rau Tswv Ntuj. Kom tau pab Tswv Ntuj cov tub txib ua nws tej hauj lwm. Kom nws muaj zog ua tau ib tug neeg twj lij. Txhob tau mus thov mov noj ncig lub zej zog.

( Los Mas 10:8-13.)
Thaum koj ntseeg txog Tswv Ntuj tiag. Koj xav ua zoo rau Tswv Ntuj. Tab yog koj ua tsis tau li lub siab xav, los Tswv Ntuj yeej cawm koj.
Vim lo lus no:
-Tswv Ntuj lo lus nyob ze koj. Tswv Ntuj lo lus nyob hauv koj nruab siab thiab nyob hauv koj lub qhov ncauj. Tswv Ntuj lo lus yog txoj kev ntseeg uas koj tshaj tawm. Koj di ncauj lees tias Yes Xus yog Huab Tais. Thiab koj ntseeg tias, Tswv Ntuj tsa Yes Xus sawv rov los. Mas koj tau txais kev cawm.
Vim ntawv hais tias:
Tus ntseeg txog Huab Tais mas nws yuav tsis ntsib kev txaj muag. Thiab leej twg hu txog Huab Tais lub npe, nws yuav ntsib kev cawm.

( Lus Kas 4:1-13.)
Thaum Yes Xus sawv kev mus tshaj Ntuj lus, Yes Xus raug dab phem ntxias Yes Xus. Peb kuj niaj hnub raug dab phem ntxias tib yam li ntawd. Peb tsis txhob xav tias, Yes Xus qhia ib co kev cai nyuaj dhau rau peb. Peb yuav tsom saib txoj kev dab phem ntxias Yes Xus peb zaug ntawd zoo li cas.
_Dab phem tsuas ntxias xwb, dab phem tsis tau yuam kom Yes Xus ua li dab phem xav.
Nyob hauv peb lub neej los Ntuj kuj tsis pub kom dab yuam tau peb tib yam li ntawd.
_Dab phem tsuas ntxias koj, zoo li nws muab ob daim iav rau koj saib, saib koj yuav xaiv diam twg xwb. Yog koj xaiv tau daim ntsuab ces koj ua tau qhov zoo, hos koj xaiv tau daim liab ces koj tau ua kev txhaum lawm. Koj hais tsis tau tias yog dab phem ntxias koj mas koj thiaj ua li ntawd. Koj ua plaub los koj yuav tsis yeej dab phem li. Dab phem ntxias tiag tab sis dab phem tsis tau yuam koj. Yog koj xaiv koj xwb. Ces koj ua koj li txhaum.
Thaum peb yuam kev lawd mas yog los ntawm peb kev khav theeb. Peb xav ua kom txaus luag qhuas, ces peb tau ua yam tsis yog qhov tseeb.
Peb lub siab tsis muaj zog, mas peb yuab vam txog Yes Xus pab nres peb lub siab lub zog. Peb thiaj yuav xaiv tau yam xis Tswv Ntuj lub siab.
Leej twg thiaj yuav hais tau ib qho tseeb los!...
Hmo luag yuav ntes Yes Xus.nws mus thov Ntuj,Yes Xus hais tias:
Txiv Lub ntim no hla mus deb ntawm no puas tau? Tiam sis koj ua li koj xav, Txhob ua li kuv xav.
Yog peb raug dab tsi los peb yuav zoo siab txais. Vam txog Ntuj pab peb ua lub siab loj kom peb nres tau tej kev iab kev khwv ntawd.


Xib Hwb Yaj Zoov Ntxheb