Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM NRUAB LIS PIAM XYOO I 2016-2017
by Mim Today at 6:53 am

» Sib pab txuag tswv ntuj pab yaj
by Maiv Tooj Today at 6:50 am

» MOO QAIJ QAUG
by Maiv Tooj Today at 6:14 am

» COV ZAJ NYEEM HNUB CHIV XYOO A 2016-2017
by NrhiavTswvNtuj 23rd June 2017, 9:53 am

» XH.Zoov Ntxheb Yaj Nthuav Ntawv Ntshiab.
by Maiv Tooj 23rd June 2017, 8:45 am

» XH. Yaj Zoov Ntxheb lub Tsev THOOB TSIB
by Maiv Tooj 23rd June 2017, 7:58 am

» Txiv Plig Neej Vaj
by Maiv Tooj 21st June 2017, 9:17 am

» Xib Hwb Thoj Xyooj lub neej
by Mim 21st June 2017, 8:55 am

» PIAV LUB XYOO TEEV NTUJ.
by Maiv Tooj 15th June 2017, 10:06 am

» Thov Niam Mab Liab daws pob caus teev li cas.
by Maiv Tooj 15th June 2017, 9:57 am

» Tim khawv tus tub Protestant los ntseeg Catholique .
by Maiv Tooj 15th June 2017, 9:25 am

» LUB CIM DAWS TXHAUM ( Sacrément du pardon )
by Maiv Tooj 15th June 2017, 9:07 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO I 2016-2017

    Share
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 15th June 2017, 7:14 am

    TIM 16 LUB 6 HLI 2017

    Hnub Rau Lis Piam Kaum Nruab Xyoo A Nruab Lis Pian Xyoo I

    Zaj Nyeem Ib: 2 COR 4: 7-15


    Cov kwv tij nkauj muad:
    7 Peb muaj ib thooj pov haum muaj nqis peb nqa nyob hauv tej lub hub av, kom neeg pom tseeb tias, lub hwj huam loj ntawd yog tuaj ntawm Tswv Ntuj tuaj, tsis yog tawm hauv peb los. 8 Luag txiv peb qhov txhia chaw tuaj, tab sis peb tsis raug luag tsuj. Peb tau kev tws, tab sis peb tsis muaj kev yuav tas kev cia siab. 9 Peb raug luag hiam, tab sis Ntuj tsis tso peb pov tseg. Peb raug luag thawb rau hauv pem teb, tab sis luag rhuav tsis tau peb. 10 Peb mus txog qhov twg, peb ris rawv Yes Xus txoj kev txom nyem kev tuag nyob hauv peb lub cev, kom xwv Yes Xus txoj sia tawm tuaj rau sawv daws pom xyeem nyob hauv peb lub cev thiab. 11 Txawm tias peb tseem muaj txoj sia los niaj hnub luag yuav muab peb tua vim Yes Xus, kom xwv Yes Xus txoj sia tawm los rau sawv daws pom xyeem nyob hauv peb lub cev txawj tuag. 12 Li ntawd txoj kev tuag lis nws lub luag hauj lwm nyob hauv peb, hos txoj sia lis nws lub luag hauj lwm nyob hauv nej. 13 Peb muaj txoj kev ntseeg zoo li Ntawv sau tseg tias : ‘Kuv ntseeg, kuv thiaj hais lus.’ Peb los kuj ib yam, peb ntseeg, peb thiaj hais lus. 14 Peb paub tias, tus tsa Huab Tais Yes Xus sawv rov los, nws kuj yuav tsa peb nrog Yes Xus sawv thiab. Thiab nws yuav coj peb nrog nej mus nyob ze ntawm Yes Xus. 15 Tas puas tsav yam no yog tshwm sim los pab nej xwb, kom muaj neeg coob tau txais txiaj ntsim ntau, ces yuav muaj neeg coob ua Ntuj tsaug, kom Tswv Ntuj muaj koob meej.

    NPN: 116: 10-11, 15-16, 17-18


    Txais: (17a) Huab Tais, Kuv yuav cev ib co txim los cav txog koj.
    los: As les lus yas.

    Kuv yeej ntseeg ruaj nreb txawm kuv hais tias:
    “Kuv txom dhau lawm.”
    Nyob hauv kuv txoj kev nyuaj, kuv thiaj hais li no:
    “Txhua leej txhua tus neeg kawg yog neeg dag.”

    Txais: (17a) Huab Tais, Kuv yuav cev ib co txim los cav txog koj.
    los: As les lus yas.

    Huab Tais saib yog ib qho muaj nqes loj
    thaum lub caij cov neeg ntseeg txog nws tas txoj sia.
    Huab Tais, kuv yog koj tus tub txib,
    kuv yog koj tus tub txib tiag, yog koj tus ntxhais txib tus tub,
    koj tau daws cov hlua khi kuv lawm.

    Txais: (17a) Huab Tais, Kuv yuav cev ib co txim los cav txog koj.
    los: As les lus yas.

    Kuv yuav cev ib co txim los cav txog koj,
    kuv yuav tuav txog HUAB TAIS lub npe.
    Kuv yuav pauj kuv lub yeem rau HUAB TAIS
    nyob ntawm tas nws tsoom neeg xub ntiag,

    Txais: (17a) Huab Tais, Kuv yuav cev ib co txim los cav txog koj.
    los: As les lus yas.

    As Les Lus Yas: FLP 2: 15D, 16A

    Txais: As les lus yas, as les lus yas.

    nej yuav yog tej lub teeb ci pom kev kaj lub ntiaj teb,
    nej yuav ceev Lo Lus pub txoj sia kom nyob ruaj nreb.

    Txais: As les lus yas, as les lus yas.

    Ntawv Moo Zoo: MT 5: 27-32

    Yes Xus hais tias:
    27 “Nej tau hnov tej lus qhia tias : ‘Koj yuav tsis txhob deev luag txij luag nkawm.’ 28 Hos kuv, mas kuv hais rau nej : Leej twg ntsia ib tug poj niam vim ntshaw zes nws, tus ntawd twb deev tus poj niam ntawd hauv nruab siab lawm. 29 Yog koj sab qhov muag xis coj koj mus ua txhaum, mas kav tsij muab sab qhov muag ntawd kaus pov tseg deb koj : txhiaj khoov cia ib sab qhov muag puas zoo dua tas koj lub cev poob hauv dab phem teb. 30 Yog koj sab tes xis coj koj mus ua txhaum, kav tsij muab txiav pov tseg deb koj : txhiaj khoov cia tu ib sab tes zoo dua tas koj lub cev poob hauv dab phem teb. 31 Tseem muaj tej lus qhia tias : ‘Leej twg nrauj nws poj niam, yuav tsum muab ib daim ntawv nrauj rau tus poj niam.’ 32 Tab sis, kuv hais rau nej : Tus txiv neej twg nrauj nws poj niam, tus ntawd tso nws poj niam rau luag deev, qhov no tsis yog hais txog tus poj niam uas mus nrog luag ua dev ua npua. Hos leej twg yuav ib tug poj nrauj, mas tus ntawd yog ib tug deev luag txij luag nkawm.”


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 16th June 2017, 6:00 am

    TIM 17 LUB 6 HLI 2017

    Hnub Xya Lis Piam Kaum Nruab Xyoo A Nruab Lis Piam Xyoo I

    Zaj Nyeem Ib: 2 KLN 5: 14-21


    Cov kwj tim nkauj muad:
    14 Leej Pleev txoj kev nyiam txhib peb tas zog, yog thaum twg peb ntseeg tseeb lawm tias ib leeg tuag rau sawv daws , ces kuj yog tias sawv daws tuag tas nrho lawm. 15 Nws yeej tuag pub rau sawv daws tib si, kom cov neeg ciaj txhob ua neej rau lawv tus kheej xwb, tiam sis kom lawv ua neej rau tus uas tau tuag thiab sawv rov los pub rau lawv lawm. 16 Li ntawd, txij nyem no mus, peb yuav tsis txhob saib neeg raws li lub cev nqaij xwb. Tab yog peb tau pom Leej Pleev raws li lub cev nqaij yav tas los lawd, los nyem no, peb tsis pom nws zoo li ntawd lawm. 17 Nyem no, yog leej twg nyob hauv Leej Pleev, mas nws yog ib tug uas Ntuj tsim dua tshiab lawm: tus neeg qub dua mus tas lawm, tus tshiab sawv los nyob rau ntawd. 18 Tas txhua yam no puav leej tuaj ntawm Tswv Ntuj tuaj, nws ua kom peb rov nrog nws sib haum xeeb nyob hauv Leej Pleev, thiab nws muab txoj hauj lwm sau sawv daws los sib haum xeeb rau peb leg. 19 Vim Tswv Ntuj yog tus ua kom lub ntiaj teb neeg nrog nws rov sib haum xeeb nyob hauv Leej Pleev, nws tsis suav neeg cov txhaum rau neeg ris ntxiv lawm; nws muab cov lus muaj kev sib haum xeeb tso rau peb ua cov leg. 20 Ces peb yog Leej Pleev cov tiam lis, yog zoo li Tswv Ntuj siv peb mus qhuab qhia mus txhib neeg. Peb tuav txog Leej Pleev lub npe thov nej tas zog, kom nej cia li nrog Tswv Ntuj rov sib haum xeeb. 21 Tswv Ntuj ua kom tus uas tsis paub txoj kev txhaum, txia ua kev txhaum los pab peb, ces peb hloov tau mus ua Tswv Ntuj txoj kev ncaj nyob hauv nws.

    NPN 103: 1-2, 3-4, 9-10, 11-12


    Txais: (8a) Huab Tais muaj siab zoo thiab khuv leej neeg.

    Kuv tus ntsuj plig, koj cav txog HUAB TAIS;
    kuv tej siab ntsws, nej cav txog nws lub npe ntshiab.
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej kev zoo ib qho li.

    Txais: (8a) Huab Tais muaj siab zoo thiab khuv leej neeg.

    Nws tau zam tas koj tej txhaum rau koj,
    nws tau kho tas koj tej kev mob nkeeg zoo.
    Nws tau cawm koj txoj sia ntawm kev puas nstoog,
    nws tau muab nws txoj kev ua siab zoo thiab kev khuv leej rau koj ntoo.

    Txais: (8a) Huab Tais muaj siab zoo thiab khuv leej neeg.

    Nws tsis npau taws tas mus li,
    nws kuj tsis chim tas mus ib txhis.
    Nws tsis nplua peb raws li peb tau ua txhaum,
    nws tsis pauj rau peb raws li peb tau ua phem.

    Txais: (8a) Huab Tais muaj siab zoo thiab khuv leej neeg.

    Siab tshaj li lub ntuj nyob siab saum ntiaj teb,
    nws kuj hlub cov neeg uas hwm nws tshaj npaum li ntawd.
    Deb npaum li sab hnub tuaj nyob deb sab hnub poob,
    nws kuj tau muab peb tej txhaum pov tseg deb ntawm peb npaum li ntawd .

    Txais: (8a) Huab Tais muaj siab zoo thiab khuv leej neeg.

    As Les Lus Yas: NPN 119: 36A, 29B

    Txais: As les lus yas, as les lus yas.

    Tswv Ntuj, koj dib kuv lub siab kom xib mus rau koj cov lij choj,
    thiab koj muab koj Txoj Cai pub ua txiaj ntsim rau kuv.

    Txais: As les lus yas, as les lus yas.

    Ntawv Moo Zoo: MT 5: 33-37

    Yes Xus hais tias:
    33 Nej tseem hnov cov lus qhia rau tej laus thaud tias : Koj tsis txhob twv ntuj, koj yuav pauj yeem raws li cov lus koj tau cog rau Huab Tais. 34 Tab sis kuv hais rau nej, nej tsis txhob twv ntuj ib zaug li; txhob muab lub ntuj los ua tim khawv, vim lub ntuj yog Tswv Ntuj lub theej kiab ; 35 txhob muab lub ntiaj teb los ua tim khawv, vim lub ntiaj teb yog Tswv Ntuj lub rooj tiag taw ; txhob muab Yes Lus Xas Les los ua tim khawv, vim yog tus Tuam Vaj lub Nroog. 36 Txhob muab koj lub taub hau los ua tim khawv, vim koj ua tsis tau kom ib txog plaub hau dawb tuaj los dub tuaj. 37 Nej yuav hais li no : Muaj, ces hais tias muaj ; tsis muaj, ces hais tias tsis muaj. Cov lus hais tshaj, yog tuaj ntawm tus Phem tuaj.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 19th June 2017, 10:28 am

    TIM      19     LUB     6     HLI      2017

    Hnub Ob Lis Piam Kaum Ib Nruab Xyoo A Nruab Lis Piam Xyoo I

    Hwm LN Romuald

    Zaj Nyeem Ib:      2 KLN  6:   1-10


    Paj Lug sau ntawv hais tias:
    1 Vim peb yog cov neeg nrog nej ua hauj lwm, mas peb thov nej, kom nej txhob txais Ntuj lub txiaj ntsim dag. 2 Vim nws hais tias: ‘Thaum zoo caij zoo nyoog, kuv tau teb koj, thaum txog hnub cawm neeg, kuv tau cev tes pab koj.’ Lub sij hawm zoo, yog nyem no, hnub cawm neeg, yog nyem no. 3 Peb tsis pub kom muaj ib tug ntog vim peb, kom txhob muaj ib qho phem nyob hauv peb txoj kab xwm. 4 Txhua yam peb ua, mas peb xav kom sawv daws saib peb yog Tswv Ntuj cov tub ua kab xwm, peb thiaj rub lub siab ntev ntev ua lub siab tus tus ris kev txhawj xeeb, kev nyuaj kev ti, kev ntxhov siab, 5 kev raug luag ntaus, kev raug luag kaw, kev raug luag ntxeev ua ntxhov quav niab, kev sab, kev yoo dab ntub, kev yoo tshaib yoo nqhis; 6 peb thiaj xyaum ua neeg siab dawb siab huv, ua neeg muaj kev txawj kev ntse, ua neeg siab ntev, ua neeg siab zoo, nyob hauv Leej Tswv Yim Ntshiab, nyob hauv txoj kev nyiam kev hlub tseeb, 7 nyob hauv lo lus tseeb, nyob hauv Tswv Ntuj lub hwj huam; peb thiaj siv cov cuab yeej ntawm txoj kev ncaj rau cov nyob sab xis thiab cov nyob sab laug; 8 peb thiaj tau txais koob meej thiab tau txais kev poob ntsej muag, peb nto moo zoo, thiab nto moo phem; luag thiaj saib peb tias yog neeg dag, txawm tias peb hais qhov tseeb xwb, 9 luag saib tias neeg tsis paub peb, tsis kav sawv daws paub peb tib si; luag hais tias peb yuav tuag, tab sis peb muaj txoj sia; luag saib peb tsim nyog raug txim, tab sis peb kuj tsis raug tua; 10 luag xav tias peb tsis kaj siab, tab sis peb zoo siab mus li ; luag saib peb pluag kawg nkaus, tab sis peb ua kom coob leej nplua nuj tuaj ; luag saib peb yog cov neeg tsis muaj dab tsi li, tab sis peb muaj tas ib puas tsav yam ua peb tug.  

    NPN      98:   1, 2B-3AB, 3CD-4

    Txais:    (2a) Huab Tais ua kom sawv daws paub txoh nws txoj kev cawm.  

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis, nws sab npab ntshiab
    tau ua kom nws yeej.

    Txais:    (2a) Huab Tais ua kom sawv daws paub txoh nws txoj kev cawm.

    HUAB TAIS ua kom cov haiv neeg pom nws txoj kev ncaj,  
    Nws rov nco txog nws txoj kev ua zoo rau thiab hlub
    tsev neeg His Xas Lais.

    Txais:    (2a) Huab Tais ua kom sawv daws paub txoh nws txoj kev cawm.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm neeg.
    Tas txhuam teb chaws, nej zoo siab hu nkauj rau HUAB TAIS,
    nej qw suab hu nkauj, nej cav txog nws

    Txais:    (2a) Huab Tais ua kom sawv daws paub txoh nws txoj kev cawm.

    As Les Lus Yas:        119:   105

    Txais:   As les lus yas, as les lus yas.

    Koj lo lus yog ib lub teeb tsom hauv kuv ko taw,
    yog ib qho pom kev kaj kuv txoj kev rau kuv taug.  

    Txais:   As les lus yas, as les lus yas.

    Ntawv Moo Zoo:       MT  5:   38-42

    Yes Xus hais rau nws cov thwj tim tias:
    38 “Nej hnov tej lus qhia tias : ‘Qhov muag pauj qhov muag, kaus hniav pauj kaus hniav.’ 39 Hos kuv hais rau nej tias: nej tsis txhob nrog tus neeg phem sib cav. Yog leej twg ib ncuav pias rau koj sab plhu xis, tig sab plhu laug rau nws thiab. 40 Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab. 41 Leej twg thov koj xa nws mus ib ncua kev, mas koj nrog nws mus ob ncuas. 42 Leej twg thov koj, mas koj pub rau nws. Leej twg xav txais nyiaj ntawm koj, mas koj txhob tig nraub qaum rau nws.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 19th June 2017, 2:23 pm

    TIM 20 LUB 6 HLI 2017

    Hnub Peb Lis Piam Kaum Ib Nruab Xyoo A Nruab Lis Piam Xyoo I

    Zaj Nyeem Ib: 2 KLN 8: 1-9


    1 Cov kwv tij, peb xav kom nej paub txog lub txiaj ntsim uas Tswv Ntuj pub rau cov Koom Txoos nyob Mas Xes Dos Nias teb. 2 Vim tias lawv raug kev txhawj xeeb loj, tsis kav lawv lub siab puv nkaus kev zoo siab, thiab nyob hauv lawv txoj kev pluag, lawv tseem muaj lub siab dav fo pub paj tshab ntau. 3 Lawv pub raws li lawv muaj, kuv ua pov thawj tau txog, thiab lawv tseem zoo siab hlo pub tshaj qhov lawv muaj thiab. 4 Lawv taij peb tsis tseg, kom peb kheev lawv nrog sawv daws pab cov ntshiab hauv lawv txoj dej num. 5 Lawv tau ua zoo tshaj qhov peb tos ntawm lawv ; lawv xub muab lawv fij rau Huab Tais tso, ces lawv mam pab peb raws li Tswv Ntuj xav kom pab. 6 Vim li ntawd, peb thiaj tau thov Tis Tos, kom nws nrog nej ua qhov hauj lwm zoo ntawd kom tiav, raws li nws twb tau pib ua los lawm. 7 Zaum no nej ua tau zoo heev nyob hauv txhua yam lawm, tsis hais kev ntseeg, los kev hais lus, los kev paub txuj, los kev tau txais peb txoj kev nyiam nej, ua li mas, thov kom nej kuj yuav tsum ua zoo tshaj nyob hauv txoj kev pub paj tshab muaj txiaj ntsim no thiab. 8 Kuv hais li no tsis yog xav yuam nej, kuv tsuas xav hais txog tias, vim luag tej xyiv fab pab tiag, mas kuv xav sim saib nej puas muaj txoj kev nyiam kev hlub tseeb tiag xwb. 9 Nej twb paub lawm tias peb tus Huab Tais Yes Xus Pleev lub siab dav : Nws yog tus nplua nuj, tab sis vim nej mas nws ua kom nws pluag, kom xwv nws txoj kev pluag ua nej nplua nuj tuaj.

    NPN 146: 1B-2, 5-6AB, 6C- 7, 8-9A


    Txais: (1b) Kuv tus plig, koj cav lus zoo txog HUAB TAIS!
    los: As les lus yas.

    Kuv tus plig, koj cav lus zoo txog HUAB TAIS !
    Kuv yuav cav txog HUAB TAIS tas kuv sim neej,
    kuv yuav hu nkauj cav txog kuv tus Tswv Ntuj
    thaum kuv tseem ua neej nyob.

    Txais: (1b) Kuv tus plig, koj cav lus zoo txog HUAB TAIS!
    los: As les lus yas.

    Muaj hmoov zoo yog tus tau Yas Kos tus Tswv Ntuj nres nws,
    Yog tus tso siab rau HUAB TAIS nws tus Tswv Ntuj,
    uas yog tus tswv tsim lub ntuj lub teb,
    tsim dej ntuj thiab ib puas tsav yam nyob hauv dej.

    Txais: (1b) Kuv tus plig, koj cav lus zoo txog HUAB TAIS!
    los: As les lus yas.

    Nws pheej xeeb mus ib txhiab ib txhis;
    cov raug luag quab yuam, nws tsa lawv cai,
    nws pub mov rau cov neeg tshaib noj;
    HUAB TAIS tso cov neeg raug txim kom dim.

    Txais: (1b) Kuv tus plig, koj cav lus zoo txog HUAB TAIS!
    los: As les lus yas.

    HUAB TAIS qhib cov dig muag qhov muag,
    HUAB TAIS tsa cov khoov nkoos kom sawv ntseg,
    HUAB TAIS nyiam cov neeg ncaj,
    HUAB TAIS pov hwm cov pej kum neeg.

    Txais: (1b) Kuv tus plig, koj cav lus zoo txog HUAB TAIS!
    los: As les lus yas.

    As Les Lus yas: ZAM 13: 34

    Txais: As Les Lus Yas.

    Kuv muab ib lo lus qhia tshiab rau nej:
    Nej yuav sib nyiam sib hlub li kuv nyiam thiab hlub nej.

    Txais: As Les Lus Yas.

    Ntawv Moo Zoo: MT 5: 43-48


    Yes Xus hais tias:
    43 "Nej tau hnov tej lus qhia tias : ‘Koj yuav nyiam tus nyob ze koj, koj yuav ntxub koj tus yeeb ncuab.’ 44 Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej ; 45 nej thiaj yog nej Txiv nyob saum ntuj cov tub ; vim tias nej Txiv ua kom lub hnub tawm tuaj ziab cov neeg phem thiab cov neeg zoo, nws ua kom nag los rau cov neeg siab ncaj thiab cov neeg siab nkhaus. 46 Yog nej nyiam cov neeg nyiam nej, mas nej yuav tau koob haum dab tsi ? Tab yog cov sau se, lawv kuj txawj nyiam li ntawd. 47 Yog nej tsuas hais lus hu nej cov kwv tij xwb, mas nej tau ua dab tsi zoo tshaj luag ? Tab yog cov neeg teev pej kum dab los lawv kuj txawj ua li ntawd thiab. 48 Hos nej, mas nej yuav tsum ua neeg zoo tshaj, vim nej Txiv nyob saum ntuj yog tus zoo tshaj.”


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 20th June 2017, 8:40 am

    TIM 21 LUB 6 HLI 2017

    Hnub Plaub Lis Piam Kaum Nruab Xyoo A Nruab Lis Piam Xyoo I

    Hwm LN Aloysius Gonzaga

    Zaj Nyeem Ib: 2 KLN 9: 6-11


    Paj Lug sau ntawv rau cov ntseeg nyob Kos Lis Nthos tias:
    6 “Nej yuav nco ntsoov tias, tus tseb nplej tsawg, nws kuj yuav sau tau tsawg, tus tseb nplej ntau nws kuj yuav sau tau ntau. 7 Nej nyias yuav pub raws li nyias txiav nyob hauv nyias siab. Nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab luag ntxhi pub. 8 Tswv Ntuj muaj hwj huam, nws yuav pub tau tas ib puas tsav yam txiaj ntsim los rau nej, kom txhua lub sij hawm nej muaj tas txhia yam txaus siv, thiab tseem muaj ib co seem txaus pab rau tej yam hauj lwm zoo. 9 Raws li Ntawv sau tseg tias : ‘Nws ua siab dav pub paj tshab, nws pub rau cov pluag ; nws txoj kev ua neeg ncaj yuav nyob mus li.’ 10 Tus uas muab noob qoob noob loo rau tus tswv teb cog, thiab muab mov los yug nws, haj yam yuav muab noob qoob noob loo ntau rau nej, thiab nws yuav ua kom cov qoob txi ntawm nej txoj kev ncaj huam vam ntau tuaj. 11 Ces nej yuav nplua nuj, vim nej txoj kev ua siab dav. Vim nej muaj lub siab dav mas yuav ua rau peb muaj lus ua tsaug nce mus txog Tswv Ntuj.

    NPN 112: 1BC-2, 3-4, 9

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nws muaj hmoov zoo tus uas hwm HUAB TAIS,
    thiab nyiam coj Huab Tais cov lus qhia tas siab tas ntsws.
    Nws caj ces yuav muaj peev xwm nyob ntiaj teb,
    ntuj yuav foom koob hmoov rau caj ces neeg siab ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nyob hauv nws vaj tse muaj kev nplua nuj kev nto moo,
    nws txoj kev ua ncaj yuav nyob mus li.
    Tus neeg ncaj ci hauv qhov tsaus ntuj ua teeb kaj cov neeg ncaj,
    nws khuv leej luag, nws zam rau luag, nws ua haum pheej.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nws tsis qia dub, nws pub ntau rau cov pluag :
    nws txoj kev ua siab dav yuav nyob mus li,
    nws yuav muaj ntsej muag, nws lub koob meej yuav nrov.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    As Les Lus yas: ZAM 14: 23

    Txais: As Les Lus Yas.

    Yog leej twg nyiam kuv, nws yuav coj rawv kuv lo lus,
    ces kuv Txiv yuav nyiam nws.
    Kuv Txiv wb yuav tuaj nyob hauv nws.

    Txais: As Les Lus Yas.

    Ntawv Moo Zoo: MT 6: 1-6, 16-18

    Yes Xus hais rau nws cov thwj tim tias:
    1 “Nej ceev faj, tsis txhob ua ncaj nyob ntawm neeg xub ntiag, kom luag qhuas nej xwb. Yog nej ua li ntawd, mas nej yuav tsis txais koob haum ntawm nej Txiv nyob saum ntuj. 2 Thaum koj pub rau luag, koj txhob tshuab hom ua koj ntej xws li cov neeg zoo sab nraud lawv ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm. 3 Hos koj, mas thaum koj pub rau luag, koj txhob cia koj sab tes laug paub qhov uas sab tes xis ua. 4 Li ntawd, tsis muaj neeg paub tias koj tau pub. Ces koj Txiv uas nws pom hauv qhov chaw nraim yuav pauj rau koj.
    5 "Thaum nej teev Ntuj, nej txhob ua li cov neeg zoo sab nraud : lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm. 6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
    16 Thaum nej yoo mov, nej txhob ua ntsej muag ntshaus xws li cov neeg zoo sab nraud : lawv ua ntsej muag mluas mluas, kom luag pom tias yog lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm. 17 Hos koj, mas thaum koj yoo mov, koj yuav pleev tshuaj tsw qab saum taub hau, koj yuav ntxuav muag, 18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv pom hauv qhov chaw nraim yuav pauj rau koj.”


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 21st June 2017, 3:08 pm

    TIM      22     LUB     6     HLI      2017

    Hnub Tsib Lis Piam Kaum Ib Nruab Xyoo A Nruab Lis Piam Xyoo I

    Hwm LN Paulinus nyob Nola, LN John Fisher thiab LN Thomas More

    Zaj Nyeem Ib:       2 KLN  11:   1-11


    Paj Lug sau ntawv rau cov ntseeg nyob Kos Lis Nthos tias:
    1 “Xav kom nej ua siab ntev rau kuv, txawm kuv yuav hais tej yam vwm me ntsis. Kuv yeej paub tias nej yuav ua siab ntev xwb ! 2 Vim tias kuv lub siab khib nej ib yam li Tswv Ntuj khib thiab, vim kuv tau qhaib nej rau ib tug txiv neej xwb; nej yog zoo li ib tug nkauj xwb dawb huv uas kuv muab rau Leej Pleev yuav. 3 Tab sis, kuv ntshai tsam nej ua raws Es Vas uas, nws cia tus nab ntse siab nkhaus ntxias tau nws, ces nej yuav hloov tswv yim, nej yuav tsis tuag siab nthi thiab ua siab dawb paug rau Leej Pleev ntxiv. 4 Yog muaj tej tus tuaj tshaj ib tug Yes Xus txawv tus peb tau tshaj, los yog nej txais dua lwm tus Leej Ntuj Plig txawv tus nej tau txais lawm, los yog nej hnov dua ib lub Moo Zoo txawv lub Moo Zoo nej ib txwm tau txais lawm, mas ntshai tsam nej cia li yuav mloog xwb.
    5 Tab sis kuv xav tias kuv yeej tsis qis dua cov tuam hauv paus xa lus ntawd. 6 Tej zaum kuv tsis tau kawm kom txawj hais lus zoo, tab sis hais txog kev paub txuj, mas kuv yeej paub. Peb ua yam twg, los sawv daws yeej pom tias peb paub txuj. 7 Kuv puas tau ua ib qho yuam kev, vim kuv ua hauj lwm dawb tshaj Tswv Ntuj lub Moo Zoo rau nej, kuv tau txo kom kuv qis, thiab tsa nej rau qhov siab?  8 Kuv tau noj nyiaj hli ntawm lwm cov Koom Txoos, kom kuv tau kev tsob hwb nej. 9 Thaum kuv nrog nej nyob, txawm kuv tsis muaj txaus noj txaus haus, los kuv tsis tau ua ib lub nra rau nej ris, vim muaj ib co kwv tij tuaj Mas Xes Dos Nias teb tuaj tau pab kuv kev noj kev haus. Kuv tau ceev faj kom txhob ua ib lub nra hnyav rau nej, thiab kuv tseem yuav ua li ntawd ntxiv mus. 10 Kuv tuav txog Leej Pleev txoj kev tseeb uas nyob hauv kuv, kuv hais tseeb tias, tsis muaj leej twg yuav txwv tau kuv cov lus uas kuv khav txog kuv me me no nyob As Kas Yas teb li. 11 Yog vim li cas ? Puas yog vim kuv tsis nyiam nej ? Tswv Ntuj yog tus paub tias kuv nyiam nej !

    NPN        111:   1B-2, 3-4, 7-8

    Txais:   (7a) Huab Tais, koj cov hauj lwm yog kev ncaj thiab kev tseeb.  
    los:   As les lus yas.

    Kuv yuav ua HUAB TAIS tsaug tas kuv lub siab lub ntsws
    thaum kuv nrog tsoom neeg siab ncaj koom ua ib pab sau ua ib pawg.
    HUAB TAIS cov hauj lwm loj tas nrho,
    zoo ntxim siab kawg nkaus.

    Txais:   (7a) Huab Tais, koj cov hauj lwm yog kev ncaj thiab kev tseeb.  
    los:   As les lus yas.

    HUAB TAIS cov hauj lwm muaj hwj xyeej thiab muaj hwj chim,
    nws txoj kev ncaj yuav nyob ib txhiab ib txhis.
    Nws nto koob meej lug vim nws cov hwj huam yees ntxwv ;
    HUAB TAIS lub siab hlub neeg, nws nyiam zam txhaum.

    Txais:   (7a) Huab Tais, koj cov hauj lwm yog kev ncaj thiab kev tseeb.  
    los:   As les lus yas.

    Cov hauj lwm nws txhais tes ua yog hauj lwm tseeb thiab ncaj nces.
    Nws cov lus qhuab qhia yog cov lus tsim nyog tso siab rau,
    Yog cov lus yuav nyob ruaj mus li ib txhis,
    xeeb tawm los nyob hauv kev tseeb thiab kev ncaj ncees.

    Txais:   (7a) Huab Tais, koj cov hauj lwm yog kev ncaj thiab kev tseeb.  
    los:   As les lus yas.

    As Les Lus Yas:          LOS MAS  8:   15BC

    Txais:     As les lus yas, as les lus yas.

    Nej tau txais ib lub tswv yim ua tub ki tshiab,
    lub tswv yim ntawd qhia peb hu Tswv Ntuj tias : ‘As Npas ! Txiv !’

    Txais:     As les lus yas, as les lus yas.

    Ntawv Moo Zoo:       MT  6:   7-15

    Yes Xus hais rau nws cov thwj tim tias:
    7 “Thaum nej teev Ntuj, nej txhob ntuas mus ntuas los zoo li cov neeg teev dab; lawv xav tias yog lawv hais lus ntau, mas dab yuav mloog lawv zoo dua. 8 Nej txhob ua zoo li lawv. Vim nej Txiv paub tias qhov twg yog qhov nej yuav tsum muaj, tab yog nej tseem tsis tau thov, nws twb xub paub lawm. 9 Nej yuav teev Ntuj zoo li no : "Peb Txiv nyob saum ntuj, koj lub Npe ntshiab nto moo lug. 10 Koj lub Ceeb Tsheej kom los txog. Kom muaj raws li koj nyiam nyob ntiaj teb no li nyob saum ntuj. 11 Thov koj pub mov txaus peb noj hnub no. 12 Koj zam peb cov nuj nqis rau peb zoo li peb zam rau cov tshuav peb nqi. 13 Koj txhob tso peb raug kev ntxias. Thov koj npo peb dim ntawm kev phem." 14 "Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab. 15 Hos yog nej tsis zam txhaum rau luag, mas nej Txiv kuj yuav tsis zam nej cov txhaum rau nej.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 22nd June 2017, 3:43 pm

    TIM      23     LUB     6     HLI      2017

    Hnub Rau Lis Piam Kaum Ib Nruab Xyoo A Nruab Lis Piam Xyoo I

    Peb ua Kev Hawm Txog Yes Xus Lub Plawv Ntshiab.




    Zaj Nyeem Ib: TXOJ CAI OB 7: 6-11

    Mais Xes hais rau tsoom pej xeem tias:
    6 “Koj yog ib haiv neeg qee rau HUAB TAIS koj tus Tswv Ntuj ; HUAB TAIS, koj tus Tswv Ntuj tau xaiv koj hauv tas txhua haiv neeg nyob ntiaj teb los ua nws haiv neeg tshwj xeeb. 7 HUAB TAIS lub siab nyob ntawm koj thiab xaiv koj tsis yog vim koj coob dua lwm haiv neeg, rau qhov koj tseem yog ib haiv neeg tsawg dua cov tas tib si. 8 Tab sis, vim HUAB TAIS hlub koj, thiab nws xav ua raws li lo lus uas nws tau cog rau kojj cov yawg koob, nws thiaj siv nws txhais tes muaj zog rho koj tawm ntawm lub teb chaws ua luag qhev los, thiab npo koj tawm ntawm Fas Las Oos, uas yog tus vaj Hais Nkws Tos lub hwj huam. 9 Li no koj yuav tsum paub tias HUAB TAIS koj tus Tswv Ntuj yog tus tseem Tswv Ntuj tiag, yog tus Tswv Ntuj tsis fav xeeb uas nco ntsoov nws lo lus nws tau cog, thiab hlub cov neeg nyiam nws, thiab khaws nws cov lus qhia txheej dhau txheej mus txog txhiab tiam neeg. 10 Tab sis nws rau txim rau tus neeg ntxub nws. Nws ua kom tus neeg ntxub nws tuag sai sai, nws tsis ncua lub txim thiab nws rau txim rau tus tib neeg kiag. 11 Li ntawd, koj yuav coj rawv cov lus qhia, cov kev cai lij choj thiab kab lis kev cai uas kuv ceeb toom rau koj hnub no kom koj coj.”

    NPN        103:   1-2, 3-4, 8+10

    Txais:   (17) Huab Tais ua zoo mus li rau cov uas hwm nws.

    Kuv tus ntsuj plig, koj cav txog HUAB TAIS;
    kuv tej siab ntsws, nej cav txog nws lub npe ntshiab.
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej kev zoo ib qho li.

    Txais:   (17) Huab Tais ua zoo mus li rau cov uas hwm nws.

    Nws tau zam tas koj tej txhaum rau koj,
    nws tau kho tas koj tej kev mob nkeeg zoo.
    Nws tau cawm koj txoj sia ntawm kev puas nstoog,
    nws tau muab nws txoj kev ua siab zoo thiab kev khuv leej rau koj ntoo.

    Txais:   (17) Huab Tais ua zoo mus li rau cov uas hwm nws.

    HUAB TAIS khuv leej thiab hlub neeg,
    nws npau taws qeeb, nws muaj kev hlub loj.
    Nws tsis ua rau peb kom phim peb tej txhaum,
    nws tsis ua pauj kom phim peb txoj kev ua phem.
    Txais:   (17) Huab Tais ua zoo mus li rau cov uas hwm nws.

    Zaj Nyeem Ob:        1 ZAM  4:   7-16

    7 Cov zoo nyiad, peb yuav sib nyiam sib hlub mog ! Vim txoj kev nyiam tuaj ntawm Tswv Ntuj tuaj, ua li mas tus twg nyiam, tus ntawd yug ntawm Tswv Ntuj los, thiab nws paub Tswv Ntuj. 8 Tus tsis nyiam, mas nws tsis paub Tswv Ntuj, vim Tswv Ntuj yog txoj kev nyiam. 9 Tswv Ntuj txoj kev nyiam tawm los rau peb pom xyeem yog li no : Tswv Ntuj xa nws Leej Tub Twm Zeej tuaj nyob ntiaj teb no, kom peb ciaj sia nyob hauv nws. 10 Tswv Ntuj txoj kev nyiam yog li no : tsis yog vim peb nyiam Tswv Ntuj, tiam sis yog vim Tswv Ntuj nyiam peb, ces nws thiaj xa nws Leej Tub tuaj ua nqi txhiv peb ntawm peb cov txhaum.
    11 Cov zoo nyiad, yog Tswv Ntuj twb nyiam peb npaum li ntawd, mas peb kuj yuav tsum sib nyiam sib hlub thiab. 12 Tsis muaj leej twg tau pom Tswv Ntuj ib zaug li. Tiam sis yog peb sib nyiam sib hlub, mas Tswv Ntuj nyob hauv peb, thiab nws txoj kev nyiam hlob tuaj kom zoo txhij zoo txhua nyob hauv peb. 13 Peb paub tias peb nyob hauv Tswv Ntuj, thiab Tswv Ntuj nyob hauv peb yog vim qhov no : yog qhov tias nws pub nws Leej Ntuj Plig rau peb lawm. 14 Ntawm peb, mas peb tau ntsia ntsoov, thiab peb ua tim khawv zeem tias Leej Txiv tau xa Leej Tub tuaj cawm lub qab ntuj neeg tiag. 15 Tus lees tias Yes Xus yog Tswv Ntuj Leej Tub, mas Tswv Ntuj nyob hauv nws, thiab nws nyob hauv Tswv Ntuj. 16 Peb tau saj thiab tau ntseeg  tias Tswv Ntuj nyiam peb tiag. Tswv Ntuj yog txoj kev nyiam : tus twg nyob hauv txoj kev nyiam, mas nws kuj nyob hauv Tswv Ntuj, thiab Tswv Ntuj nyob hauv nws.

    As Les Lus Yas:        MT  11:   29AB

    Txais:     As les lus yas, as les lus yas.

    Huab Tais hais tias, nej txais kuv tus quab mus nej kwv,
    Nej kawm ntawm kuv vim kuv muaj lub siab txo hwj chim ua neeg me.

    Txais:     As les lus yas, as les lus yas.

    Ntawv Moo Zoo:       MT  11:   25-30

    25 Lub caij ntawd, Yes Xus hais tias : "Txiv, kuv qhuas txog koj, Huab Tais kav lub ntuj lub teb, vim koj zais tej yam ntawd ntawm cov neeg thoob tsib thiab cov neeg txawj ntse, koj ho qhib rau cov me nyuam neeg paub. 26 Tseeb tiag, Txiv, koj lub siab yeej nyiam li ntawd. 27 Kuv Txiv muab tas ib puas tsav yam tso rau kuv lawm. Tsis muaj leej twg paub Leej Tub, tsuas kawg Leej Txiv thiaj paub xwb, kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub xwb.
    28 Tas nej sawv daws uas nej khwv thiab ris nra hnyav, nej tuaj cuag kuv mog ! Kuv yuav cia nej so los siav. 29 Nej txais kuv tus quab mus kwv, nej kawm ntawm kuv mog, vim kuv muaj lub siab txo hwj chim thiab ua neeg me; nej tus plig yuav nrhiav tau chaw so los siav. 30 Vim kuv tus quab kwv yooj yim, thiab kuv lub nra sib.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 24th June 2017, 7:48 am

    TIM 24 LUB 6 HLI 2017

    Hnub Xya Lis Piam Kaum Ib Nruab Xyoo A Nruab Lis Piam Xyoo I

    Hwm LN Zam Ntxuav Plig Hnub Yug Los.

    Zaj Nyeem Ib: HIS XAIS 49: 1-6


    1 Cov pov txwv, nej mloog kuv mas ! Cov haiv neeg nyob deb, nej cuab pob ntseg mloog mas ! HUAB TAIS yeej hu kuv txij thaum kuv tseem nyob hauv kuv niam plab lawm, nws yeej hu kuv npe txij thaum kuv tseem nyob hauv kuv niam cev lawm. 2 Nws muab kuv lub ncauj ua ib rab ntaj ntse zuag plias; nws muab kuv zais rau hauv nws txhais tes qhov ntxoov. Nws muab kuv ua ib xib xub vos ntse ntse, muab kuv ntim hauv nws lub raj xub. 3 HUAB TAIS hais rau kuv tias : "His Xas Lais, koj yog kuv tus tub txib, kuv yuav nto koob meej nyob hauv koj." 4 Hos kuv hais tias : "Kuv tau siv zog khwv, tab sis tsis tau dab tsi li, kuv nkim kuv lub zog tas dawb xwb. Tsis kav kuv muaj paj tshab nyob ntawm HUAB TAIS, kuv tus nqi zog yog nyob ntawm kuv tus Tswv Ntuj. 5 Vim nyem no, HUAB TAIS uas yog tus puab kuv nyob hauv kuv niam nrog cev kom kuv ua nws tus tub txib, nws tau hais lawm tias kom kuv coj Yas Kos rov los cuag nws, kom coj His Xas Lais rov los nrog nws ua ke. Ces kuv muaj koob meej nyob ntawm HUAB TAIS xub ntiag, thiab kuv tus Tswv Ntuj yog kuv lub zog." 6 Nws tseem hais tias : "Tsis tsim nyog kom koj yog kuv tus tub txib rov tsa cov xeem Yas Kos kom sawv, thiab coj cov His Xas Lais seem kom rov qab los xwb, kuv tseem xaiv koj kom koj yog lub teeb ci ntsa kaj cov kuj cuab, ces kuv txoj kev cawm thiaj yuav ri mus txog cov npoo ntiaj teb tib si.”

    NPN 139: 1B-3, 13-14AB, 14C-15

    Txais: (14) Kuv cav txog koj vim koj puab kuv tau zoo tas nrho.

    HUAB TAIS, koj tsom kuv, koj paub kuv :
    koj paub thaum kuv sawv thiab thaum kuv zaum ;
    koj nyob deb tsom paub tas tej kuv xav.
    Koj saib nraim kuv thaum kuv mus kev los thaum kuv zaum,
    koj paub txhua yam kuv ua.

    Txais: (14) Kuv cav txog koj vim koj puab kuv tau zoo tas nrho.

    Koj yog tus tsim kuv lub tswv yim tej plab plaw ;
    koj xaws kuv ntxiv kuv hauv kuv niam plab.
    Kuv ua koj tsaug, vim koj tes dej num txaus ntshai txaus qhuas :
    koj tsim kuv zoo ua luaj, koj cov dej num zoo tas nrho

    Txais: (14) Kuv cav txog koj vim koj puab kuv tau zoo tas nrho.

    Koj paub kuv tus ntsuj plig txhij txhua thoob plaws.
    koj pom thaum kuv cov pob txha pib tsheej los,
    thaum koj puab kuv nyob hauv qhov chaw nraim,
    thaum koj xaws kuv tsheej zuj zus puag hauv tej nruab a.

    Txais: (14) Kuv cav txog koj vim koj puab kuv tau zoo tas nrho.

    Zaj Nyeem Ob: HAUJ LWM 13: 22-26

    Paj Lug hais lus, nws hais tias:
    22 “Tswv Ntuj muab Xas Ws xyeeb pov tseg, nws thiaj tsa Das Vis ua lawv tus vaj. Tswv Ntuj ua pov thawj txog Das Vis li no: ‘Kuv nrhiav tau Das Vis, Yes Xes tus tub. Nws yog tus neeg ntxim kuv siab, nws yuav ua raws li kuv lub siab xav tas huv si.’ 23 Nyob hauv Das Vis cov xeeb ntxwv, Tswv Ntuj tsa Yes Xus ua tus cawm seej tuaj pab tsoom His Xas Lais, raws li nws tau cog lus lawm. 24 Zam xub tuaj ua ntej Yes Xus, nws tuaj tshaj rau haiv His Xas Lais kom sawv daws txais cov kab ke ntxuav los lees txhaum. 25 Thaum Zam ua nws txoj hauj lwm yuav tiav, nws hais tias : ‘Nej xav hais tias kuv yog leej twg? Kuv tsis yog tus uas nej xav. Tiam sis tus lawv kuv qab, nws twb tuaj lawm; tus ntawd mas kuv tsis tsim nyog daws nws txoj hlua khau.’ 26 Kwv tij, nej cov uas yog Has Nplas Has cov tub, thiab nej cov uas hwm Tswv Ntuj nyob ntawm no, lo lus tshaj txog txoj kev cawm seej no tuaj txog peb lawm.”

    As Les Lus Yas: LK 1: 76

    Txais: As les lus yas, as les lus yas.

    Koj, me tub, luag yuav hu koj ua Leej Nyob Siab tus yaj saub,
    vim koj yuav mus ua Huab Tais ntej, koj yuav npaj nws txoj kev.

    Txais: As les lus yas, as les lus yas.

    Ntawv Moo Zoo: LK 1: 57-66, 80

    57 Thaum txog Es Lis Xas Npes lub caij daws cev, mas nws yug tau ib tug tub. 58 Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes kawg nkaus, mas lawv nrog nws zoo siab. 59 Thaum txog hnub yim, lawv tuaj ua lub cim txiav rau tus me nyuam. Lawv xav tis nws npe hu ua Ntxas Kas Lias raws li nws txiv. 60 Tab sis nws niam hais tias : "Tsis yog. Tus me nyuam yuav hu ua Zam." 61 Lawv hais rau leej niam tias : "Tsis muaj ib tug hauv koj cov txheeb ze hu li ntawd." 62 Ces lawv piav tes rau leej txiv saib nws xav kom lawv tis tus me nyuam npe li cas. 63 Leej txiv kom lawv muab ib daim txiag los, nws sau ntawv tias : " Zam yog nws lub npe." Sawv daws ceeb tas. 64 Tam sis ntawd, leej txiv lub ncauj qhib plho, tus nplaig muag nthas, nws hais tau lus, nws cav txog Tswv Ntuj. 65 Tsoom neeg nyob ze ntawd sawv daws tau ntshai kawg. Hos nyob pem toj siab hauv xeev Yus Das, sawv daws tham txog tej xwm ntawd. 66 Cov uas tau hnov luag tham txog tej xwm no, muab khaws cia rau nruab siab, lawv hais tias : "Tus me nyuam ntawd yuav yog ib tug zoo li cas ?" Huab Tais txhais tes yeej nrog nraim tus me nyuam ntawd tiag.
    80 Tus me nyuam hlob tuaj, nws lub tswv yim muaj zog zuj zus. Nws nyob hauv teb chaws suab puam mus txog hnub nws tawm los rau cov His Xas Lais pom.


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim Yesterday at 4:39 am

    TIM 26 LUB 6 HLI 2017

    Hnub Ob Lis Piam Kaum Ob Nruab Xyoo A Nruab Lis Piam Xyoo I

    Zaj Nyeem Ib: HAUV PAUS 12: 1-9


    1 HUAB TAIS hais rau Has Nplas tias : "Tso koj lub teb chaws, koj tej txheeb ze thiab koj txiv lub vaj tse tseg, koj mus nyob lub teb chaws uas kuv yuav qhia rau koj. 2 Kuv yuav tsa koj ua ib haiv neeg loj, kuv yuav foom hmoov zoo rau koj, thiab yuav ua kom koj lub npe nto moo loj, kom koj nqa txoj hmoov zoo rau txhua tus. 3 Kuv yuav foom hmoov zoo rau cov neeg uas foom hmoov zoo rau koj, kuv yuav foom phem rau cov uas foom phem rau koj. Tas txhua haiv neeg nyob ntiaj teb yuav tau hmoov zoo vim koj.” 4 Ces Has Nplas sawv kev mus raws li HUAB TAIS kom nws mus. Los kuj nrog nws mus thiab. Thaum Has Nplas tsiv hauv Has Laas teb mus, nws muaj xya caum tsib xyoos. 5 Has Nplas coj nws poj niam Xas Lais, thiab nws tus kwv tij tus tub hu ua Los nrog nws mus. Nws sau tas nws lub cuab tam uas nws tau tsim, thiab tas nws cov tub txib tub txuas uas nws tau muas los nyob Has Laas nrog nws mus. Lawv sawv kev mus, ces lawv tuaj txog lub teb chaws Kas Nas Has. 6 Has Nplas mus hla lub teb chaws, nws thiaj mus txog thaj chaw ntshiab hu ua Xis Kes, ntawm qhov chaw uas muaj tus ntoo ntseej Mos Les. Thaum ntawd, cov neeg Kas Nas Has nyob hauv lub teb chaws.
    7 HUAB TAIS tawm los rau Has Nplas pom, thiab hais rau nws tias : "Kuv yuav muab lub teb chaws no pub rau koj tsoom xeeb leej xeeb ntxwv." Ces Has Nplas txhim ib lub thaj txi HUAB TAIS nyob ntawd, vim HUAB TAIS tawm los rau nws pom nyob ntawd. 8 Has Nplas thiaj txav ntawd mus rau pem roob, nyob ntawm sab hnub tuaj ntawm Npes Thes. Nws tsa nws lub tsev tsam phooj rau ntawd, Npes Thes nyob rov sab hnub poob, hos Ais nyob rov sab hnub tuaj. Nyob ntawd nws kuj tsa ib lub thaj txi HUAB TAIS thiab nws teev HUAB TAIS lub npe. 9 Ces Has Nplas maj mam tsiv ua ntu zus ib thaj chaw dhau ib thaj, mus txog lub teb chaws Nes Zes.

    NPN 33: 12-13, 18-19, 20+22

    Txais: (12) Haiv neeg Huab Tais xaiv ua nws tug lawv txoj hmoov zoo.

    Haiv neeg uas lawv tus Tswv Ntuj yog HUAB TAIS, lawv txoj hmoov zoo!
    Haiv neeg uas Huab Tais xaiv los ua nws lub cuab tam, lawv txoj hmoov zoo!
    HUAB TAIS nyob txheej ntuj saud dauv muag los ntsia,
    nws pom tas nrho ib tsoom neeg.

    Txais: (12) Haiv neeg Huab Tais xaiv ua nws tug lawv txoj hmoov zoo.

    Ntsias saib HUAB TAIS lub qhov muag saib ntsoov cov neeg hwm nws,
    saib ntsoov cov tso siab rau nws txoj kev hlub
    tias nws yuav npo lawv dim ntawm kev tuag,
    thiab yuav txuag lawv txoj sia thaum muaj kev tshaib plab.

    Txais: (12) Haiv neeg Huab Tais xaiv ua nws tug lawv txoj hmoov zoo.

    Peb tus ntsuj plig tos ntsoov HUAB TAIS:
    nws yog tus pab peb, nws yog peb daim leem phiaj !
    HUAB TAIS, thov kom koj lub siab hlub roos peb,
    vim peb tso siab lug rau koj !

    Txais: (12) Haiv neeg Huab Tais xaiv ua nws tug lawv txoj hmoov zoo.

    As Les Lus Yas: HES NPLAWS 4: 12

    Txais: As les lus yas, as les lus yas.

    Tswv Ntuj lo lus muaj sia thiab ua tau hauj lwm,
    nws txawj tsom tau tej tswv yim thiab tej kev xav hauv neeg nruab siab.

    Txais: As les lus yas, as les lus yas.

    Ntawv Moo Zoo: MT 7: 1-5

    Yes Xus hais rau nws cov thwj tim tias:
    1 “Nej txhob txiav txim, Ntuj thiaj yuav tsis txiav txim rau nej ;
    2 vim tias, nej txiav txim li cas rau luag, Ntuj yuav txiav txim ib yam li ntawd rau nej. Nej luj li cas rau luag, Ntuj kuj yuav luj li ntawd rau nej.
    3 Ua cas koj ntsia tus quav nplej nyob hauv koj tus kwv qhov muag ? Tab sis koj ho tsis pom tus nqaj tse nyob hauv koj qhov muag!
    4 Koj tseem hais rau koj tus kwv tias : ‘Cia kuv rho tus quav nplej hauv koj qhov muag pov tseg,’ tab sis ib tug nqaj twb nyob hauv koj qhov muag !
    5 Neeg zoo sab nraud, koj xub rho tus nqaj hauv koj qhov muag tso, koj thiaj li pom kev rho tus quav nplej hauv koj tus kwv qhov muag.”


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim Yesterday at 6:35 am

    TIM 27 LUB 6 HLI 2017

    Hnub Peb Lis Piam Kaum Ob Nruab Xyoo A Nruab Lis Piam Xyoo I

    Hwm LN Cyril nyob Alexandria

    Zaj Nyeem Ib: HAUV PAUS 13: 2, 5-18


    2 Has Nplas nplua nuj kawg, nws muaj tsiaj txhu, muaj nyiaj thiab muaj kub ntau.
    5 Los, uas nrog Has Nplas mus, nws kuj muaj yaj muaj nyuj thiab muaj tsev tsam phooj ntau. 6 Lub teb chaws tsis txaus sawv daws tsa tsev kom tau nyob ua ke, vim nkawd muaj cuab yeej cuab tam ntau ces tsis tau kev rau sawv daws nyob ua ke ntxiv. 7 Has Nplas cov tub zov tsiaj thiab Los cov tub zov tsiaj kuj tau sib ceg ib cuam. Lub caij ntawd cov neeg Kas Nas Has thiab cov neeg Pes Lis Xis nyob hauv lub teb chaws. 8 Vim li ntawd Has Nplas thiaj hais rau Los tias: "Wb tsis txhob muaj kev tsis sib haum xeeb. Kuv cov tub zov tsiaj thiab koj cov tub zov tsiaj los yuav tsis txhob muaj kev tsis sib haum xeeb, vim wb yog ob txiv tub. 9 Tas nrho lub teb chaws twb qhib lug rau koj. Yog li kuv thov kom koj ncaim kuv mus mog. Yog koj mus sab laug ces kuv yuav mus sab xis ; yog koj mus sab xis, ces kuv yuav mus sab laug." 10 Los tsa muag ntsia, nws pom lub tiaj Yos Las Das yog ib lub tiaj muaj dej nyob qhov txhia chaw mus txog ntua rau Xos As, zoo li HUAB TAIS lub vaj, thiab zoo li teb chaws Hais Nkws Tos; thaum ntawd HUAB TAIS tseem tsis tau rhuav Xos Dos Mas thiab Nkos Mos Las. 11 Los thiaj xaiv lub tiaj Yos Las Das huv si rau nws. Ces nws muab xub ke mus rau sab hnub tuaj. Nkawd thiaj sib ncaim li ntawd. 12 Has Nplas thiaj nyob hauv lub teb chaws Kas Nas Has, hos Los mus nyob hauv cov nroog hauv lub tiaj. Los tsa nws cov tsev tsam phooj nyob thaj tsam ze ntawm Xos Dos Mas. 13 Cov neeg Xos Dos Mas yog ib co neeg phem tas nrho, thiab ua txhaum loj rau HUAB TAIS. 14 Thaum Los ncaim mus lawm, HUAB TAIS hais rau Has Nplas tias : "Koj tsa qhov muag ntsia, txij ntawm qhov koj nyob ko mus rau sab pej thiab sab naj, mus rau toob fab thiab xib fab, 15 tas nrho lub teb chaws uas koj pom ntawd, kuv yuav muab rau koj thiab rau koj tsoom xeeb leej xeeb ntxwv nyob mus li. 16 Kuv yuav ua kom koj cov xeeb leej xeeb ntxwv coob npaum li cov plua av nyob ntiaj teb. Yog neeg suav txheeb cov plua av hauv ntiaj teb mas lawv thiaj yuav suav txheeb koj cov xeeb leej xeeb ntxwv. 17 Koj sawv, koj cia li mus ncig kom txhua thaj av qhov ntev thiab qhov dav, vim kuv yuav muab pub rau koj." 18 Ces Has Nplas tshais nws cov tsev tsam phooj, nws tsiv mus nyob ze cov ntoo Ntseej ntawm Mas Nples, uas nyob Hes Nploos. Nyob ntawd nws txhim ib lub thaj txi HUAB TAIS.

    NPN 15: 2-3A, 3BC-4AB, 5


    Txais: (1) Tus neeg ncaj yuav tau nyob saum Huab Tais lub roob ntshiab.

    Tus uas coj tus yeeb yam tsis muaj chaw xyeej thiab ua ncaj,
    Tus uas xav qhov tseeb nyob nruab siab,
    Thiab nws tsis cia nws tus nplaig hais lus dag.

    Txais: (1) Tus neeg ncaj yuav tau nyob saum Huab Tais lub roob ntshiab.

    Nws tsis ua phem rau luag,
    Nws tsis nrhiav lus rau tus nyob ze nws.
    Nws tsis saib cov neeg phem muaj nqes.
    Nws hwm cov neeg hwm HUAB TAIS.

    Txais: (1) Tus neeg ncaj yuav tau nyob saum Huab Tais lub roob ntshiab.

    Nws qiv nyiaj txiag, nws tsis tsuam paj.
    Nws tsis txais luag cov nyiaj xiab kom muab txim rau tus tsis txhaum.
    Leej twg ua li hais los no, mas nws yuav nyob ruaj nreb.

    Txais: (1) Tus neeg ncaj yuav tau nyob saum Huab Tais lub roob ntshiab.

    As Les Lus yas: ZAM 8: 12

    Txais: As les lus yas, as les lus yas.

    Huab Tais hais tias, kuv yog ntiaj teb neeg qhov pom kev,
    leej twg los raws kuv yuav tau kev pom kev rau nws lub neej.

    Txais: As les lus yas, as les lus yas.

    Ntawv Moo Zoo: MT 7: 6, 12-14

    Yes Xus hais rau nws cov thwj tim tias:
    6 "Nej txhob muab tej yam ntshiab pub rau dev noj, nej txhob muab nej cov hlaws npliag deg pov rau ntawm npua xub ntiag, tsam npua muab tsuj ntiag thiab npua tig rov los dua nej.
    12 "Txhua yam nej xav kom luag ua rau nej mas nej yuav xub ua rau luag tso. Txoj Cai thiab cov Yaj Saub yog li ntawd.
    13 “Nej chaws ntawm lub qhov rooj nqaim mus lawm hauv. Vim lub qhov rooj dav thiab txoj kev dav yog txoj yuav coj mus rau lub qhov tuag; muaj coob leej taug txoj kev ntawd.
    14 Hos lub qhov rooj nqaim thiab txoj kev ti thiaj yog txoj coj mus rau txoj sia; muaj tsawg leej nrhiav tau txoj kev ntawd taug.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1860
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim Today at 6:53 am

    TIM 28 LUB 6 HLI 2017

    Hnub Plaub Lis Piam kaum Ob Nruab Xyoo A Nruab Lis Piam Xyoo I

    Hwm LN Irenaeus, Tswv Qhia tuag kwv yees xyoo 202 A.D. Muaj ib txhia hwm nws tuag ua Tim Khawv.

    Zaj Nyeem Ib: HP 15: 1-12, 17-18


    1 Thaum tej xwm no dhau tas lawm, HUAB TAIS yees tawm los hais lus rau Has Nplas tias : "Koj txhob ntshai mog, Has Nplas! Kuv yog daim leem phiaj thaiv koj. koj yuav txais koob haum loj kawg nkaus." 2 Has Nplas teb tias : "HUAB TAIS Tswv Ntuj, koj yuav muab dab tsi pub rau kuv ? Kuv twb yuav dua, kuv tsis muaj tub ki li; tus yuav txais kuv lub cuab tam ces yog kuv tus tub txib tus tub Es Lis Xej nyob Das Mas Kus xwb." 3 Has Nplas hais ntxiv tias : "Koj tsis pub kom kuv muaj ib tsob noob li ces ib tug tub txib uas yug hauv kuv tsev yuav los txais kuv lub cuab tam." 4 HUAB TAIS lo lus nrov tam sid tuaj rau Has Nplas tias : "Tus ntawd yuav tsis yog tus los txais koj lub cuab tam, tus yuav txais koj lub cuab tam yog koj ib tug tub uas yog tseem koj roj ntsha tiag." 5 HUAB TAIS coj Has Nplas mus nraum zoov thiab hais rau nws tias : "Koj tsa muag ntsia saum ntuj thiab suav cov hnub qub saib koj suav puas txheeb." Ces nws hais tias : "Koj cov xeeb ntxwv yuav coob npaum li ntawd."
    6 Has Nplas ntseeg HUAB TAIS, ces HUAB TAIS muab Has Nplas lub siab ntseeg suav ua kev ncaj rau Has Nplas. 7 HUAB TAIS hais rau nws tias : "Kuv yog tus HUAB TAIS uas tau coj koj tawm hauv cov neeg Kas Ntes lub teb chaws Uj los mus nyob lub teb chaws no, uas kuv yuav muab rau koj ua koj tug." 8 Has Nplas teb tias : "HUAB TAIS Tswv Ntuj, kuv yuav ua cas paub tias kuv tau lub teb chaws ua kuv tug ?" 9 HUAB TAIS hais rau nws tias : "Koj mus coj ib tug xyuas nyuj muaj peb xyoos, ib tug nkauj tshis muaj peb xyoos, ib tug thav yaj muaj peb xyoos, ib tug nkauj nquab thiab ib tug me nyuam lau nquab los rau kuv tso." 10 Has Nplas coj cov tsiaj raws li hais los. Nws muab cov tsiaj phua nruab nrab, nws muab ob sab teeb sib npuab ua ke, tiam sis nws tsis phua cov noog. 11 Dav yuj plaws ya ntxiag los noj cov tsiaj, tab sis Has Nplas nplawm kom dav khiav. 12 Thaum lub hnub tab tom poob qho, Has Nplas cia li looj hlias, thiab muaj ib qho tsaus ntuj txaus ntshai kawg los laum Has Nplas.
    17 Thaum lub hnub poob qho lawm thiab tsaus ntuj lawm, ces muaj ib lub qhov txos ncho pa lug thiab ib teg tsau cig cig los hla ntawm cov sab nqaij kis nruab nrab. 18 Hnub ntawd, HUAB TAIS nrog Has Nplas cog lus li no : "Kuv muab lub teb chaws no rau koj tsoom xeeb ntxwv ua lawv tug, txij lub vos hav dej txawj qhuav nyob Hais Nkws Tos teb mus txog ntua tus Dej Loj Aws Fas Tes.”

    NPN 105: 1-2, 3-4, 6-7, 8-9

    Txais: (8a) Huab Tais nco ntsoov nws lo lus nws tau cog mus ib txhis.
    los: As les lus yas.

    Nej ua HUAB TAIS tsaug, nej hu txog nws lub npe,
    nej qhia nws cov hauj lwm loj rau cov haiv neeg paub.
    Nej seev nkauj rau HUAB TAIS, nej hu nkauj cav txog nws ;
    nej piav txog nws cov hwj huam yees ntxwv tas tib si.

    Txais: (8a) Huab Tais nco ntsoov nws lo lus nws tau cog mus ib txhis.
    los: As les lus yas.

    Nej nrhiav koob meej rau nej nyob hauv nws lub npe,
    cov uas muaj lub siab nrhiav Huab Tais, nej cia li zoo siab!
    Nej nrhiav HUAB TAIS thiab nws lub zog,
    nej nrhiav tsob hwb nws tsis tseg.

    Txais: (8a) Huab Tais nco ntsoov nws lo lus nws tau cog mus ib txhis.
    los: As les lus yas.

    Nej, Has Nplas Has tsoom xeeb ntxwv, uas yog Huab Tais cov tub txib,
    Nej, Yas Kos cov tub, uas yog cov Huab Tais tau xaiv,
    Nws, HUAB TAIS yog peb tus Tswv Ntuj,
    Nws tej cai tswj tas qhov txhia chaw hauv lub ntiaj teb.

    Txais: (8a) Huab Tais nco ntsoov nws lo lus nws tau cog mus ib txhis.
    los: As les lus yas.

    Nws nco ntsoov mus li cov lus nws cog cia,
    yog ib co lus cog ruaj rau txhiab tiam tub ki.
    Yog cov lus nws tau nrog Has Nplas Has cog,
    thiab nws tau rov zeem tseeb rau His Xas Has.

    Txais: (8a) Huab Tais nco ntsoov nws lo lus nws tau cog mus ib txhis.
    los: As les lus yas.

    As Les Lus Yas: ZAM 15: 4A, 5B

    Txais: As les lus yas, as les lus yas.

    Nej yuav nyob ruaj hauv kuv ib yam li kuv nyob hauv nej;
    leej twg nyob ruaj hauv kuv nws yuav txi txiv ncw.

    Txais: As les lus yas, as les lus yas.

    Ntawv Moo Zoo: MT 7: 15-20

    Yes Xus hais rau nws cov thwj tim tias:
    15 “Nej ceev faj txog cov yaj saub cuav, lawv txia ua ib co yaj tuaj cuag nej, tab sis nyob sab hauv, lawv yog ib co hma nrhiav ncauj. 16 Nej ntsia lub txiv lawv txi, ces nej yuav paub lawv. Luag puas de txiv cawv saum ib tsob pos, los de txiv ncuav pias saum ib tsob nrhab ? 17 Li ntawd, tus ntoo zoo txi ib co txiv zoo, hos tus ntoo lwj txi ib co txiv phem. 18 Tsob ntoo zoo txi tsis tau txiv phem, hos tsob ntoo lwj los kuj txi tsis tau txiv zoo. 19 Tsob ntoo twg tsis txi txiv zoo, luag yuav muab ntov mus pov hlawv. 20 Li ntawd, thaum nej pom lawv cov txiv, ces nej yuav paub lawv.”



    Sponsored content

    Re: COV ZAJ NYEEM NRUAB LIS PIAM XYOO I 2016-2017

    Post  Sponsored content


      Current date/time is 27th June 2017, 2:44 pm