COV ZAJ NYEEM NRUAB LIS PIAM XYOO I 2022-2023

Tim 28 lub 11 Hlis 2022

Hnub Ob Lis Piam Ib Caij Tos Huab Tais Xyoo ABC Nruab Lis Piam Xyoo I & II
Lectionary: 175

Zaj Nyeem Ib: HX 4: 2-6 (Xyoo A)

2 Hnub ntawd, HUAB TAIS tus ceg yuav muaj hwj chim thiab yuav nto koob meej, lub txiv hauv lub teb chaws yuav ua kom cov His Xas Lais seem tau ntsej muag thiab muaj hwj chim.
3 Tus uas tseem nyob saum Xis Yoos thiab tseem nyob hauv Yes Lus Xas Les yuav tau lub npe hu ua neeg ntshiab: yog tas txhua leej txhua tus uas muaj npe sau tseg tias nws yog neeg nyob tas sim neej hauv Yes Lus Xas Les.
4 Thaum uas Huab Tais lub tswv yim txiav txim ncaj thiab lub tswv yim muab hlawv kom yaj tas mus, ntxuav cov ntxhais Xis Yoos tej kev qias pov tseg tas lawm, thiab yaug cov ntshav uas Yes Lus Xas Les tau ua kom nchuav ploj tas mus lawm,
5 mas HUAB TAIS yuav tsim rau saum txhua qhov chaw huv si saum lub roob Xis Yoos thiab rau saum nws qhov chaw sib txoos ua ke, ib twv huab thaum yav nruab hnub, thiab ib co pa taws nrog ib lub cub tawg cig nplaim pom kev lug thaum hmo ntuj, kom Huab Tais lub hwj chim ua lub kaus roos thiab txuag tas txhua leej:
6 nws yuav ua ntxoov ntxoo roos kom tshav ntuj txhob kub thaum nruab hnub, thiab yuav ua chaw nkaum thiab thaiv kom txhob raug nag xob nag cua.

NPN 122: 1-2, 3-4b, 4cd-5, 6-7, 8-9

Txais: Nej tuaj peb xyiv fab hlo mus pem Huab Tais tsev

Kuv zoo siab vim lawv hais rau kuv tias:.
"Peb yuav nce mus lawm pem Huab Tais tsev.”
Yes Lus Xas Les, nim no, peb txhais taw
twb tau tsuj hauv koj cov rooj loog lawm.

Txais: Nej tuaj peb xyiv fab hlo mus pem Huab Tais tsev

Yes Lus Xas Les raug txhim los zoo li
ib lub Nroog ntom zoo tau xwm yeem.
Cov xeem neeg nce mus pem nws,
Yog Huab Tais cov xeem neeg

Txais: Nej tuaj peb xyiv fab hlo mus pem Huab Tais tsev

Lawv nce mus raws li txoj cai qhia rau His Xas Lais,
Kom tau mus ua tsaug cav txog Huab Tais lub Npe.
Nyob ntawd muaj ib co rooj txiav txim teeb tau tseg,
Yog cov rooj cia rau Das Vis tsev neeg zaum.

Txais: Nej tuaj peb xyiv fab hlo mus pem Huab Tais tsev

Nej thov ntuj kom muaj kev thaj yeeb nyob Yes Lus Xas Les!
Kom cov neeg uas nyiam koj tsuas muaj kev vam meej!
Kom kev thaj yeeb nyob sab hauv koj cov ntsa loog,
Kom kev vam meej nyob hauv koj cov vaj cov tsev.

Txais: Nej tuaj peb xyiv fab hlo mus pem Huab Tais tsev

Vim kuv cov txheeb ze thiab kuv cov phooj ywg,
kuv yuav foom rau koj tias: “Kom kev thaj yeeb nyob hauv koj!”
Vim muaj Huab Tais peb tus Tswv Ntuj lub tsev,
mas kuv yuav thov ntuj rau koj kom koj tau qhov zoo.

Txais: Nej tuaj peb xyiv fab hlo mus pem Huab Tais tsev

As Les Lus yas: NPN 80: 4

Txais: As les lus yas, as les lus yas.

Thov koj tuaj cawm peb mas, Huab Tais, peb tus Tswv Ntuj;
Cia koj lub ntsej muag ci tuaj rau saum peb, kom peb tau txais kev cawm.

Txais: As les lus yas, as les lus yas.

Ntawv Moo Zoo: MT 8: 5-11

5 Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias:
6 "Huab Tais, kuv tus tub txib pw tom tsev, nws tes taw tuag tas, nws mob txom nyem kawg."
7 Yes Xus hais rau nws tias: "Kuv yuav mus kho nws kom zoo."
8 Tus xab txheeb teb tias: "Huab Tais, kuv tsis tsim nyog koj chaws los hauv kuv lub qab ru tsev, tsuav koj hais ib lo lus xwb ces kuv tus tub txib yuav zoo hlo.
9 Vim tias kuv kuj yog ib tug neeg zwm rau tus loj dua kuv, kuv kuj muaj ib co tub rog zwm rau kuv thiab. Yog kuv hais rau ib tug tias: 'Koj mus, ' nws cia li mus; kuv ho hais rau lwm tus tias: 'Koj los,' nws kuj cia li los; kuv hais rau kuv tus tub txib tias: 'Koj ua qhov no,' nws cia li ua."
10 Yes Xus hnov nws hais li ntawd, Yes Xus qhuas kawg. Nws hais rau cov neeg raws nws qab tias: "Kuv hais tseeb rau nej, kuv tsis tau pom ib tug neeg ntseeg npaum li no nyob hauv cov His Xas Lais li.
11 Kuv hais rau nej tias, yuav muaj neeg coob tuaj Toob Fab thiab Xib Fab tuaj zaum nrog Has Nplas Has, His Xas Has thiab Yas Kos lawv noj rooj qav hauv lub Ceeb Tsheej saum ntuj.”

Tim 29 lub 11 Hlis 2022

Hnub Peb Lis Piam Ib Caij Tos Huab Tais Xyoo A B C Nruab Lis Piam Xyoo I & II
Lectionary: 176

Zaj Nyeem Ib: HIS XAIS 11: 1-10

Hnub ntawd,
1 Ib tug ntsuag yuav hlav tuaj ntawm Yes Xes lub hauv paus tuaj, ib tug kaus yuav nthaw ntawm Yes Xes cov cag tuaj, nws yuav tawg paj txi txiv.
2 HUAB TAIS lub Tswv Yim yuav nyob rawv saum nws. Yog ib lub Tswv Yim thoob tsib thiab muaj kev to taub, ib lub Tswv Yim pab xav tom ntej tom qab thiab muaj peev xwm, ib lub Tswv Yim paub txuj thiab hwm HUAB TAIS.
3 Nws kev zoo siab yog kev hwm HUAB TAIS. Nws yuav tsis txiav txim raws li nws qhov muag pom sab nraud, nws yuav tsis xaiv raws li hnov lus moo cua hais.
4 Nws yuav txiav txim ncaj rau cov pluag txom nyem, thiab yuav qhuab ntuas cov neeg me hauv lub teb chaws raws kev haum pheej. Nws yuav siv rab pas ntawm nws lub ncauj los nplawm lub ntiaj teb, thiab siv cov pa ntawm nws di ncauj los tua cov neeg lim hiam.
5 Kev ncaj yog nws txoj siv sia duav, kev pheej xeeb yog nws txoj siv sia ntawm ntsag.
6 Tus hma yuav nrog tus me nyuam yaj nyob ua ke, tus tsov pom txwv yuav nrog tus me nyuam tshis pw ua ke. Tus xyuas nyuj, tus thav tsov ntxhuav, thiab tus tsiaj rog yuav mus ua ke, ib tug me nyuam tub coj lawv kev.
7 Tus nyuj thiab tus dais yuav nog zaub, nkawd cov me nyuam yuav pw ua ke; tus tsov ntxhuav yuav noj quav nyab xws li tus heev nyuj.
8 Tus me nyuam mos yuav ua si ntawm nab raj qhov chaw pw, tus me nyuam me yuav cev tes rau hauv nab muaj taug lub qhov.
9 Yuav tsis muaj ua phem tsis muaj sib ntaus sib tua nyob saum tas lub roob kuv txoj kev ntshiab, vim kev paub HUAB TAIS yuav nyob puv ntiaj teb, ib yam li dej nyob puv lub hiav txwv.
10 Hnub ntawd, Yes Xes tus cag yuav sawv ua ib lub cim rau cov haiv neeg; nws yog tus cov pej kum cuab yuav tuaj nrhiav; nws lub vaj tse yuav nto moo lug.

NPN 72: 1-2, 7-8, 12-13, 17

Txais: (7) Kev ncaj yuav tawg paj thaum lub caij nws ua vaj,
thiab yuav muaj kev thaj yeeb lug tsis txawj kawg.

Tswv Ntuj, pub koj txoj kev txawj txiav txim rau tus vaj,
Thiab pub koj txoj kev ncaj rau vaj ntxwv tus tub;
Nws yuav tswj koj haiv neeg raws kev ncaj
thiab koj cov neeg txom nyem raws kev txiav txim ncaj.

Txais: Kev ncaj yuav tawg paj thaum lub caij nws ua vaj,
thiab yuav muaj kev thaj yeeb lug tsis txawj kawg.

Kev ncaj yuav tawg paj thaum lub caij nws ua vaj,
thiab yuav muaj kev thaj yeeb lug mus txog thaum tsis muaj lub hli ntxiv.
Thov kom nws tswj ib lub hiav txwv mus rau lwm lub hiav txwv,
Thiaj txij ntawm tus niam dej mus txog tim npoo ntiaj teb kawg.

Txais: Kev ncaj yuav tawg paj taum lub caij nws ua vaj,
thiab yuav muaj kev thaj yeeb lug tsis txawj kawg.

Nws yuav cawm tus pluag uas hu txog nws,
thiab yuav npo tus txom nyem uas tsis muaj tus pab.
Nws yuav hlub tus neeg me thiab tus neeg pluag;
Nws yuav cawm cov pluag txoj sia.

Txais: Kev ncaj yuav tawg paj thaum lub caij nws ua vaj,
thiab yuav muaj kev thaj yeeb lug tsis txawj kawg.

Thov kom neeg cav txog nws lub npe mus li;
nws lub npe yuav nyob ntev npaum lub hnub.
Nyob hauv nws, txhua xeem neeg nyob ntiaj teb yuav tau hmoov zoo;
txhua haiv neeg yuav tshaj txog nws txoj kev zoo siab.

Txais: Kev ncaj yuav tawg paj thaum lub caij nws ua vaj,
thiab yuav muaj kev thaj yeeb lug tsis txawj kawg..

As Les Lus Yas

Txais: As les lus yas, as les lus yas.

Ntsia saib, peb tus Huab Tais yuav tuaj nrog nws lub hwj huam;
Nws yuav ua kom nws cov tub txib qhov muag pom kev.

Txais: As les lus yas, As les lus yas

Ntawv Moo Zoo: LK 10: 21-24

21 Yes Xus zoo siab nyob hauv Leej Ntuj Plig Ntshiab, nws hais tias: "Leej Txiv, kuv cav lus zoo txog koj, Huab Tais kav lub ntuj lub teb, vim koj tau zais tej ntawd ntawm cov neeg thoob tsib thiab cov neeg ntse, tiam sis koj ho qhib rau cov neeg me paub. Leej Txiv, vim koj yeej nyiam ua li ntawd.
22 Kuv Txiv tau muab tas ib puas tsav yam rau kuv. Tsis muaj leej twg paub tias Leej Tub yog tus twg, kawg yog Leej Txiv xwb thiaj paub, thiab tsis muaj leej twg paub tias Leej Txiv yog tus twg, kawg yog Leej Tub xwb thiaj paub, thiab tus uas Leej Tub xav qhia rau kom paub."
23 Yes Xus tig los rau nws cov thwj tim, nws hais twj ywm rau lawv tias: "Ob lub qhov muag uas pom tej yam nej pom no tau txoj hmoov zoo!
24 Kuv hais rau nej tias, coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis lawv tsis tau hnov."

Tim 30 lub 11 Hlis 2022

Hnub Plaub Lis Piam Ib Caij Tos Huab Tais Xyoo A Nruab Lis Piam Xyoo I

Yuav Hwm LN As Nres, ua Hauv Paus Xa Lus
Lectionary: 684

Zaj Nyeem Ib: LOS MAS 10: 9-18

Cov kwv tij nkauj muad:
9 Yog nej lub ncauj lees paub tias Yes Xus yog Huab Tais, thiab nej lub siab ntseeg tias Tswv Ntuj tau tsa Yes Xus sawv hauv cov tuag rov los lawm, mas nej yuav txais kev cawm.
10 Vim tus neeg uas muaj lub siab ntseeg mas nws yuav tau txais txoj kev ncaj, thiab tus uas lub ncauj lees paub mas nws yuav tau txais kev cawm.
11 Muaj ntawv sau tseg tias: “Txhua tus neeg uas ntseeg txog nws yuav tsis poob ntsej muag.”
12 Li ntawd, cov Yus Das tsis txawv cov Hes Las li; sawv daws muaj ib tug Huab Tais ua sawv daws tus xwb, nws ua siab dav tas nrho pub rau cov neeg hu txog nws.
13 Vim tias txhua leej uas hu txog Huab Tais lub npe, mas nws yuav tau txais kev cawm.
14 Li ntawd, cov neeg yuav ua cas hu txog tus uas lawv twb tsis tau ntseeg txog? Lawv yuav ua cas ntseeg txog tus uas lawv twb tsis tau hnov hais txog? Lawv yuav ua cas hnov txog yog tsis muaj tus tshaj tawm li?
15 Cov yuav tshaj lub Moo Zoo yuav ua cas mus tshaj yog tsis muaj tus xa lawv mus? Muaj ntawv sau cia li no: “Cov neeg xa lub Moo Zoo, mas lawv ko taw zoo nkauj tas nrho.”
16 Tab sis tsis yog tas sawv daws yuav mloog lub Moo Zoo, vim His Xais hais tias: “Huab Tais, leej twg thiaj mloog cov lus lawv tau hnov ntawm peb?”
17 Li ntawd, kev ntseeg txhawv ntawm qhov neeg hnov los; qhov neeg hnov yog txhawv ntawm Leej Pleev lo lus los.
18 Kuv thiaj nug tias: “Puas yog lawv tsis tau hnov ne?” Tab sis lawv yeej yuav tsum tau hnov lawm xwb, vim tias: “Lawv lub suab twb ntxhe mus thoob ntiaj teb, lawv cov lus twb nrov mus txog tim npoo ntia teb kawg lawm.”

Nkauj Paj Nruag 19: 8, 9, 10, 11

Txais: (10) Huab Tais cov lus txiav txim yog qhov tseeb, txhua lo lus yog lus ncaj.
los: (Zam 6:63) Huab Tais, koj cov lus yog ntsuj plig thiab yog txoj sia.

HUAB TAIS txoj cai zoo txhij txhua,
nws ntxiv siav rau tus ntsuj plig;
HUAB TAIS tus txhooj tsim nyog tso siab rau,
nws ua kom tus neeg ruam thoob tsib tuaj.

Txais: …

HUAB TAIS cov cai lij choj yog cai ncaj
ua kom neeg zoo siab kaj lug.
HUAB TAIS lo lus qhia meej kawg nkaus,
ua kom neeg pom kev.

Txais: …

Kev hwm HUAB TAIS yog kev dawb huv,
kev hwm Huab Tais yuav nyob mus li.
Cov cai HUAB TAIS txiav yog qhov tseeb,
yog cai ncaj ncees tas huv si.

Txais: …

HUAB TAIS cov cai muaj nqes dua kub,
muaj nqes dua ib txhab tseem kub,
qab zib dua tej kua qab zib,
los tej kua zib ntawm daim nas muv.

Txais: …

As Les Lus Yas MT 4: 19

Txais: As les lus yas, as les lus yas.

Huab Tais hais tias: “Nej raws kuv mus,
kuv yuav tsa nej ua cov tub puav neeg.”

Txais: As les lus yas, as les lus yas.

Ntawv Moo Zoo: MT 4: 18-22

18 Yes Xus mus ko taw taug tus ntug dej ntuj Nkas Lis Lais, nws pom ob kwv tij: Xis Moos uas hu ua Pob Zeb, thiab nws tus kwv As Nres. Nkawd tab tom pov vas ntses rau hauv dej ntuj, vim nkawd yog tub puav ntses.
19 Yes Xus hais rau nkawd tias: "Neb los raws kuv mus, kuv yuav tsa neb ua tub puav neeg."
20 Tam sis ntawd, nkawd tso plhuav nkawd cov vas ntses tseg, nkawd raws Yes Xus mus.
21 Yes Xus mus ntxiv, ces nws kuj pom ob kwv tij dua: Yas Kos, uas yog Ntxes Npes Dais tus tub, thiab Zam uas yog Yas Kos tus kwv. Nkawd nyob hauv nkoj nrog nkawd txiv Ntxes Npes Dais, lawv tseem tab tom ntxiv lawv cov vas ntses; Yes Xus hu nkawd.
22 Tam sis ntawd, nkawd tso plhuav nkawd lub nkoj thiab nkawd txiv tseg, nkawd raws Yes Xus mus. *

Tim 1 lub 12 Hlis 2022

Hnub Tsib Lis Piam Ib Caij Tos Huab Tais Xyoo ABC Nruab Lis Piam Xyoo I & II
Lectionary: 178

Zaj Nyeem Ib: HX 26: 1-6

1 Hnub ntawd, nyob Yus Das teb lawv yuav hu zaj nkauj no:
"Peb muaj ib lub tsheej ruaj nreb; nws tsa phab ntsa thiab ntsa zeb los thaiv peb.
2 Nej cia li qhib cov rooj loog mas! Kom haiv neeg muaj siab ncaj nkag los, haiv neeg uas coj txoj kev tseeb.
3 Haiv neeg uas muaj ib lub hom phiaj ruaj khov koj txuag kom nws nyob thaj yeeb; nws nyob thaj yeeb vim nws tso siab rau koj.
4 Nej tso siab rau HUAB TAIS mus li, vim HUAB TAIS yog lub tsua uas yuav nyob ib txhiab ib txhis.
5 Cov nyob saum tej chaw siab nws txo kom lawv qis; lub tsheej uas nyob saum qhov siab, nws ua kom poob rau hauv qhov qis; nws ua kom poob ti av, thiab ua kom vau hlo mus xyaw cov plua av.
6 Nws yuav raug cov neeg txom nyem muab ko taw tsuj rau hauv av thiab raug cov neeg pluag taug kev tsuj mus mus los los."

NPN 118: 1+8-9, 19-21, 25-27a

Txais: (26a) Kom tus tuaj ntawm Huab Tais lub npe tuaj nto koob meej.

Nej ua HUAB TAIS tsaug, vim nws siab zoo,
nws txoj kev khuv leej yuav nyob mus li.
Khiav los nkaum hauv HUAB TAIS zoo dua tso siab rau tib neeg,
Khiav los nkaum hauv HUAB TAIS zoo dua tso siab rau tej nom tswv.

Txais: (26a) Kom tus tuaj ntawm Huab Tais lub npe tuaj nto koob meej.

Nej qhib cov rooj vag mus hauv txoj kev ncaj rau kuv,
kuv yuav chaws mus, kuv yuav mus ua HUAB TAIS tsaug.
Ntawm no yog HUAB TAIS lub rooj vag;
tus neeg siab ncaj yuav tau nkag mus.
Kuv yuav ua koj tsaug, vim koj tau teb kuv, koj yog tus cawm kuv.

Txais: (26a) Kom tus tuaj ntawm Huab Tais lub npe tuaj nto koob meej.

HUAB TAIS, thov koj pub kev cawm rau peb!
HUAB TAIS, thov koj pub kev vam meej rau peb!
Kom tus tuaj ntawm HUAB TAIS lub npe tuaj nto koob meej.
Peb nyob hauv HUAB TAIS tsev foom hmoov zoo rau nej.
HUAB TAIS yog Tswv Ntuj, tus uas pub qhov pom kev rau peb..

Txais: (26a) Kom tus tuaj ntawm Huab Tais lub npe tuaj nto koob meej.

As Les Lus Yas: His Xais 55: 6

Txais: As les lus yas, As les lus yas

Nej nrhiav HUAB TAIS thaum nej tseem nrhiav tau nws;
nej hu nws thaum nws tseem nyob ze.

Txais: As les lus yas, As les lus yas

Zaj Ntawv Moo Zoo: Mas Tais 7: 21, 24-27

Yes Xus hais rau nws cov thwj tim tias:
21 “Tsis yog txhua tus uas hu kuv tias ‘Huab Tais, Huab Tais,’ thiaj yuav tau mus hauv lub Ceeb Tsheej saum ntuj, tiam sis yog tus uas ua raws li kuv Txiv nyob saum ntuj lub siab nyiam.
24 Txhua tus uas mloog kuv cov lus no, thiab ua raws li ntawd, mas nws piv tau rau ib tug neeg xyuam xim uas txhim nws lub tsev rau saum tsua.
25 Thaum los nag hlob, dej sab siv huam, cua tshuab ntsawj lub tsev ntawd, tab sis tsev tsis vau, vim lub tsev cog ruaj rau saum tsua.
26 Hos txhua tus uas hnov kuv cov lus no, tab sis nws tsis ua raws li ntawd, mas nws piv tau rau ib tug neeg tsis muaj tswv yim uas txhim tsev rau saum av xuab zeb.
27 Thaum los nag hlob, dej sab siv huam, cua tshuab ntsawj lub tsev, ces lub tsev vau tas thiab puas tas huv tib si.”

Tim 2 lub 12 Hlis 2022

Thawj Hnub Rau Lis Piam ib Caij Tos Huab Tais Xyoo ABC Nruab Lis Piam Xyoo I
Lectionary: 179

Yuav Hwm LN Francis Xavier, ua Leej Choj

Zaj Nyeem Ib: HX 29: 17-24

Huab Tais Tswv Ntuj hais li no:
17 Puas yog tshuav luv luv lawm xwb, ces Les Npas Nos yuav hloov rov los ua ib lub thaj av cog qoob loo, ces sawv daws yuav saib tias thaj av ntawd yog zoo li ib lub hav zoov?
18 Hnub ntawd, cov neeg lag ntseg yuav hnov cov lus nyob hauv phau ntawv, hos cov dig muag qhov muag yuav dim plaws ntawm qhov dub thiab qhov tsaus, lawv yuav pom kev tuaj.
19 Cov neeg me yuav zoo siab luag ntxhi nyob hauv HUAB TAIS, cov pluag txom nyem yuav dhia hom khaj nyob hauv His Xas Lais tus Ntshiab.
20 Vim tias yuav tsis muaj tus tsim txom neeg lawm, thiab tus saib tsis taus luag yuav ploj mus lawm; tas cov neeg uas nyas ntshis nrhiav ua qhov phem yuav raug muab tshem tawm tas,
21 xws li cov neeg uas hais ib lo lus xwb ua tau kom ib tug neeg yog tus txhaum, lawv yog cov cuab ntxiab ntawm lub rooj loog tos tus tuaj pab nws, ces tus neeg siab ncaj ua tus swb hais tsis tau dab tsi.
22 Vim li ntawd, HUAB TAIS, uas yog Yas Kos tsev neeg tus Tswv Ntuj, tus uas tau txhiv Has Nplas Has, nws hais li no: “Nyem no, Yas Kos yuav tsis txaj muag ntxiv, nws yuav tsis ua ntsej muag daj tseem ntxiv.
23 Thaum Yas Kos cov me nyuam pom kuv cov hauj lwm kuv ob txhais tes ua nyob hauv Yas Kos, mas lawv yuav ua kom kuv lub npe ntshiab, lawv yuav hawm txog Yas Kos tus Ntshiab, thiab lawv yuav ntshai His Xas Lais tus Tswv Ntuj.
24 Cov uas lub tswv yim xav yuam kev yuav kawm kom muaj kev to taub; cov uas pheej pom luag qhov tsis zoo yuav tau mus kawm.

NPN 27: 1, 4, 13-14

Txais: (1a) Huab Tais yog kuv qhov pom kev thiab kuv txoj kev cawm.

Huab Tais yog kuv qhov pom kev thiab kuv txoj kev cawm;
Kuv yuav ntshai leej twg?
Huab Tais yog kuv lub chaw nkaum nyob hauv kuv lub neej,
Kuv yuav tshee vim leej twg?

Txais: (1a) Huab Tais yog kuv qhov pom kev thiab kuv txoj kev cawm.

Kuv tsuas thov ib yam ntawm Huab Tais xwb; qhov kuv nrhiav yog
kom tau nyob hauv Huab Tais tsev niaj hnub hauv kuv lub neej,
Kom kuv tau ntsia ntsoov Huab Tais txoj kev zoo
thiab tau saib ntsoov nws lub tuam tsev.

Txais: (1a) Huab Tais yog kuv qhov pom kev thiab yog kuv txoj kev cawm.

Kuv ntseeg tias kuv yuav tau pom Huab Tais lub siab loj siab dav
nyob hauv cov neeg ciaj sia lub teb chaws.
Nej ua siab loj tos ntsoov Huab Tias mog;
nej ua siab tawv qhawv tos Huab Tais.

Txais: (1a) Huab Tais yog kuv qhov pom kev thiab yog kuv txoj kev cawm.

As Les Lus Yas

Txais: As les lus yas, As les lus yas.

Nej ntsia, peb tus Huab Tais yuav tuaj muaj hwj huam;
Nws yuav ua kom nws cov tub txib qhov muag pom kev.

Txais: As les lus yas, As les lus yas.

Gospel: MT 9: 27-31

27 Thaum Yes Xus mus hla thaj tsam ntawd, muaj ob tug neeg dig muag raws nws qab; nkawd qw qw tias: "Das Vis Leej Tub, thov koj khuv leej wb mas!"
28 Thaum Yes Xus nkag los rau hauv lub tsev lawm, ob tug dig muag los cuag Yes Xus, ces Yes Xus hais rau nkawd tias: "Neb puas ntseeg tias kuv ua tau qhov ntawd?" Nkawd teb tias: “Huab Tais, wb ntseeg.”
29 Ces Yes Xus kov nkawd qhov muag, nws hais tias: "Kom muaj tuaj rau neb raws li neb kev ntseeg."
30 Ces nkawd qhov muag qhib hlo. Yes Xus txwv nkawd nruj nruj tias: "Neb tsis txhob ua kom muaj neeg paub txog qhov no li!"
31 Tab sis thaum nkawd tawm mus lawm, nkawd tshaj txog Yes Xus rau tas cheeb tsam ntawd paub tas huv tib si.

Tim 3 lub 12 Hlis 2022

Thawj Hnub Xya Lis Piam Ib Caij Tos Huab Tais Xyoo ABC Nruab Lis Piam Xyoo I & II
Lectionary: 180

Yuav Hwm LN Francis Xavier, ua Leej Choj

Zaj Nyeem Ib: His Xais 30: 19-21, 23-26

Huab Tais, His Xas Lais tus Ntshiab hais li no:
19 Tsoom neeg ntawm Xis Yoos uas nej nyob Yes Lus Xas Les, nej yuav tsis quaj ntxiv lawm. Huab Tais yuav ua zoo rau nej, thaum nej quaj hu; nws hnov dheev nej lub suab, ces nws yuav teb rau nej.
20 Txawm Huab Tais yuav muab cov mov txhawj xeeb rau nej noj thiab cov dej txom nyem siab rau nej haus los nej tus Xib Hwb yuav tsis tsiv nraim ntawm nej ntxiv, nej qhov muag yuav tau pom nej tus Xib Hwb.
21 Nej pob ntseg yuav hnov ib lub suab nrov ntawm nej nraub qaum tuaj tias: “Ntawm no yog txoj kev uas nej yuav tsum taug,” txawm nej yuav mus rau sab xis los rau sab laug.
23 Nws yuav ua kom nag los ywg cov noob qoob noob loo uas nej tseb rau hauv av. Ces cov nplej uas av yuav txi rau nej yuav qab thiab yuav ntsu kawg nkaus. Hnub ntawd, nej cov tsiaj yuav muaj chaw noj zaub nyob hauv tej lub tiaj nrag dav fo.
24 Cov heev nyuj thiab cov luj uas laij teb yuav noj cov zaub nyom uas yog xuas duav hlau thiab duav nkaug hais rau noj.
25 Nyob saum txhua lub roob siab thiab txhua lub pov roob siab, yuav muaj tej tug dej txhawv muaj dej ntws lug; thaum ntawd yog lub caij muaj sib tua loj ua kom tej pej thuam vau tas.
26 Ces lub hli yuav ci pom kev npaum lub hnub, hos lub hnub yuav ci pom kev tshaj xya npaug ntxiv, npaum li yog xya hnub ci ua ke. Hnub ntawd HUAB TAIS yuav qhwv nws haiv neeg cov qhov txhab thiab yuav kho lawv cov nqaij to uas raug nws nplawm ntuag kom zoo hlo.

NPN 147: 1-2, 3-4, 5-6

Txais: (HX 30:18d) Txhua tus uas tos ntsoov Huab Tais lawv txoj hmoov zoo.

Nej cav txog Huab Tais, vim nws siab zoo;
nej hu nkauj cav txog peb tus Tswv Ntuj, vim nws hlub neeg;
tsim nyog kom peb cav txog nws.
HUAB TAIS rov tsa Yes Lus Xas Les kom sawv;
nws sau His Xas Lais cov neeg tawg tas rov los ua ke.

Txais…

Nws kho cov neeg lwj siab lwj ntsws kom zoo,
thiab nws qhwv lawv tej qhov txhab rau.
Nws suav cov hnub qub saib muaj pes tsawg lub;
nws hu lawv cov npe ib lub zuj zus.

Txais…

Peb tus HUAB TAIS loj thiab muaj hwj huam tas nrho;
nws txoj kev thoob tsib tsis muaj qhov txawj kawg.
HUAB TAIS tsa cov neeg me cai;
nws thawb kom cov siab phem ntog rau hauv av.

Txais…

As Les Lus Yas: His Xais 33: 22

Txais: As les lus yas, As les lus yas

HUAB TAIS yog tus txiav txim rau peb, tus muab txoj cai rau peb;
nws yog peb tus vaj, yog tus yuav cawm peb dim.
.
Txais: As les lus yas, As les lus yas

Zaj Ntawv Moo Zoo: Mas Tais 9: 35-10:1, 5a, 6-8

9: 35 Yes Xus mus ncig txhua cov nroog thiab cov zos huv si, nws qhuab qhia sawv daws nyob hauv lawv cov tsev txoos, nws tshaj lub Moo Zoo txog lub Ceeb Tsheej, thiab nws kho sawv daws tej txiab xeeb thiab tej mob nkeeg zoo tas huv si.
36 Yes Xus pom tsoom neeg coob, nws muaj lub siab qaug lias rau txoj kev hlub lawv, vim lawv sawv daws sab thiab qaug zog zis zoo li ib co yaj tsis muaj tswv saib
37 Yes Xus thiaj hais rau nws cov thwj tim tias: "Qoob loo ntau kawg, tab sis cov tub zog tsawg.
38 Nej thov tus tswv qoob kom nws xa ib co tub zog tuaj sau nws cov qoob."
10: 1 Yes Xus hu nws kaum ob leeg thwj tim kom los ntawm nws. Nws muab hwj huam rau lawv kom lawv ntiab tau dab tsis huv tawm, thiab kho tau txhua yam txiab xeeb thiab txhua yam mob nkeeg kom zoo.
5a Yes Xus xa kaum ob leeg no mus tshaj lub Moo Zoo, nws qhia lawv tias:
6 “Nej mus nrhiav cov yaj ploj hauv tsev neeg His Xas Lais tso.
7 Thaum nej taug kev, nej tshaj tias: ‘Lub Ceeb Tsheej saum ntuj tuaj txog ze lawm.’
8 Nej kho cov mob kom zoo, nej tsa cov tuag kom sawv rov los, nej kho cov mob ruas kom huv tuaj, nej ntiab dab phem kom khiav tawm mus. Nej tau txais dawb, mas nej kuj yuav pub dawb rau luag thiab.”

Tim 5 lub 12 Hlis 2022

Hnub Ob Lis Piam Ob Caij Tos Huab Tais Xyoo ABC Nruab Lis Piam Xyoo I & II
Lectionary: 181

Zaj Nyeem Ib: HIS XAIS 35: 1-10

1 Lub teb chaws suab puam thiab thaj av qhuav yuav dhia hom khaj; lub tiaj hav quav poj yuav zoo siab thiab yuav tawg paj.
2 Zoo li lub paj nws yuav nthaw cos thiab yuav tawg nra paug; nws yuav dhia hom khaj thiab yuav qw zoo siab; Les Npas Nos lub koob meej yuav raug muab rau nws, yog Roob Kas Mes thiab Sas Los lub meej mom; lawv yuav tau pom HUAB TAIS lub hwj chim, peb tus Tswv Ntuj lub meej mom.
3 Nej ua kom cov tuag tes rov muaj zog, kom cov hauv caug ntshaus rov khov tuaj.
4 Nej hais rau cov siab me tias: "Nej ua siab loj, nej txhob ntshai! Ntsia saib, nej tus Tswv Ntuj tuaj lawm; nws tuaj ua kom nej yeej cai; nws nqa txiaj ntsim paj tshab tuaj, nws tuaj cawm nej.
5 Ces cov dig muag ob lub qhov muag yuav rua hlo, cov lag ntseg ob lub pob ntseg yuav qhib plho.
6 Tus neeg ceg tawv yuav dhia nrawm xws tus muas lwj, tus nplaig txhav yuav hu tau nkauj. Dej yuav txhawv tawm hauv cov teb chaws suab puam los, tej tus dej loj yuav ntws tawm hauv cov teb chaws av qhuav los.
7 Thaj av suab puam kub lug yuav hloov ua pas dej, lub teb chaws tshaib dej yuav txhawv dej ntws lug tawm los; thaj chaw uas hma nyob yuav hloov ua hav iav muaj tauj deg thiab muaj ncaug.
8 Nyob ntawd, yuav muaj ib txog kev loj, tis npe hu ua "txoj Kev Ntshiab." Tus neeg tsis huv yuav mus tsis tau saum txoj kev ntawd; yog cia rau cov uas yuav taug txoj kev ntawd xwb; cov neeg tsis muaj tswv yim yuav tsis mus yuam kev tau rau saum txoj kev ntawd.
9 Yuav tsis muaj tsov nyob saum txoj kev ntawd, tsis muaj tej tsiaj qus tsiaj tsiv nyob saud, yuav nrhiav tsis pom li, tsuas yog cov uas tau txais kev cawm xwb thiaj taug txoj kev ntawd.
10 Ces cov neeg uas HUAB TAIS tau txhiv yuav rov qab los, lawv yuav hu nkauj nkag mus hauv Xis Yoos; txoj kev zoo siab mus ib txhiab ib txhis yuav ua mom rau lawv ntoo saum taub hau. Lawv yuav txais kev zoo siab thiab kev luag ntxhi, hos kev tu siab thiab quaj ntsuag yuav ploj ntais mus tas.

NPN 85: 9ab+10, 11-12, 13-14

Txais: (H X 35:4f) Peb tus Tswv Ntuj yuav tuaj cawm peb!

Kuv yuav hnov qhov uas Tswv Ntuj hais;
Huab Tais nws tshaj txog kev thaj yeeb rau nws haiv neeg,
Nws txoj kev cawm los txog ze ze cov hwm nws lawm tiag,
lub hwj chim nyob txawm hauv peb lub teb chaws.

Txais: (H X 35:4f) Peb tus Tswv Ntuj yuav tuaj cawm peb!

Kev ua zoo thiab kev tseeb yuav sib ntsib,
kev ncaj thiaj kev thaj Yeeb yuav los sib puag.
Kev Tseeb yuav txhawv tawm hauv ntiaj teb los,
kev ncaj yuav dauv muag ntsia saum ntuj tuaj.

Txais: (H X 35:4f) Peb tus Tswv Ntuj yuav tuaj cawm peb!

HUAB TAIS yuav pub nws cov txiaj ntsim,
peb cov av yuav ntsu qoob loo ntau tshaj qub.
Kev ncaj yuav taug kev mus ua nws ntej,
Kev cawm nyob raws txoj kev nws hneev taw rhawv.

Txais: (H X 35:4f) Peb tus Tswv Ntuj yuav tuaj cawm peb!

As Les Lus Yas

Txais: As les lus yas, as les lus yas.

Nej ntsia tus vaj yuav tuaj, yog tus Huab Tais kav ntiaj teb,
nws yuav daws lub nra uas tsuam peb kom peb nti tsis taus.

Txais: As les lus yas, as les lus yas.

Ntawv Moo Zoo: LK 5: 17-26

17 Muaj ib hnub, thaum Yes Xus tab tom qhia sawv daws, ib cov Fas Lis Xais thiab ib co Kws Txoj Cai tuaj ntawm txhua lub zos hauv xeev Nkas Lis Lais, xeev Yus Das, thiab tuaj Yes Lus Xas Les tuaj, lawv sawv daws zaum nyob ntawd. Huab Tais lub hwj huam ua kom Yes Xus kho tau cov neeg mob zoo kuj nyob hauv nws thiab.
18 Muaj ib pab neeg kwv ib tug tuag ceg saum ib lub txaj tuaj. Lawv nrhiav kev yuav nqa tus tuag ceg mus rau hauv tsev, coj nws mus tso rau ntawm Yes Xus xub ntiag.
19 Tab sis lawv tsis tau kev nqa tus tuag ceg mus rau sab hauv, vim neeg coob dhau. Ces lawv nce mus saum ru tsev, lawv dauv tus tuag ceg pw saum nws lub txaj, nqes ntawm cov kis thwj cib mus rau hauv nruab nrab ntawm Yes Xus xub ntiag.
20 Yes Xus pom tias lawv muaj kev ntseeg, nws hais tias: "Ntawm koj, mas koj cov txhaum daws tas lawm."
21 Ces cov Kws Ntawv Ntshiab thiab cov Fas Lis Xais xav twj ywm hauv lawv siab tias: "Tus neeg ntawd yog leej twg, cas nws thiaj hais ib co lus thuam Ntuj? Leej twg yuav daws txhaum tau? Kawg yog Tswv Ntuj tib leeg xwb."
22 Yes Xus twb paub qhov lawv xav lawm, nws hais rau lawv tias: "Vim li cas nej thiaj xav tej zaj tswv yim li ntawd hauv nej siab ?
23 Lo lus twg yog lo hais yooj yim dua, lo lus tias: 'Koj cov txhaum daws tas lawm,' los yog lo lus tias : 'Koj sawv, koj mus kev ?'
24 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb no,” ces Yes Xus hais rau tus tuag ceg tias: “Kuv hais rau koj: koj sawv, koj nqa koj lub txaj, koj rov mus tsev."
25 Tam sis ntawd, tus tuag ceg sawv tsees los nyob ntawm sawv daws xub ntiag, nws nqa lub txaj uas thaum tuaj nws pw, nws rov mus tsev, nws ke mus ke cav txog Tswv Ntuj.
26 Sawv daws yoob tas, lawv cav txog Tswv Ntuj. Lawv qhuas kawg, lawv hais tias: "Hnub no, peb tau pom tej yam tsis txaus ntseeg li!"

Tim 6 lub 12 Hlis 2022

Hnub Peb Lis Piam Ob Caij Tos Huab Tais Xyoo ABC Nruab Lis Piam Xyoo I & II
Lectionary: 182

XHLT: LN Nicholas, ua Tswv Qhia

Zaj Nyeem Ib: HIS XAIS 40: 1-11

1 Nej tus Tswv Ntuj hais tias: "Nej nplij kuv haiv neeg, nej nplij lawv mas!
2 Nej hais lus mos lus zoo nplig siab rau Yes Lus Xas Les. Nej tshaj rau nws tias nws lub caij nyob txim tiav tas lawm, nws them nws tej txhaum tas lawm, vim nws tau txais kev txom nyem ntawm HUAB TAIS txhais tes yog ob npaug ntawm tas nws cov txhaum lawm."
3 Muaj ib lub suab qw tias: "Nyob hauv cov hav suab puam, nej npaj HUAB TAIS txoj kev mas; nyob hauv cov hav quav poj, nej ua kom muaj ib txog kev loj thiab ncaj rau peb tus Tswv Ntuj.
4 Nej txhub txhua lub hav tob kom siab tuaj, nej ua kom cov roob siab thiab cov pov roob cia li qis tuaj, kom cov av tsis xwm yeem hloov ua av tiaj tus yees, kom tej qhov ntxhab hloov ua hav tiaj.
5 Ces HUAB TAIS lub hwj chim yuav tawm los rau sawv daws pom xyeem; txhua haiv neeg puav leej yuav tau pom ua ke, vim HUAB TAIS lub ncauj tau hais lli ntawd.
6 Muaj iIb lub suab hais tias: "Koj qw mas!" Kuv teb tias: "Kuv yuav qw hais li cas?"
-"Txhua tus muaj lub cev nqaij yog nroj tsuag, lawv qhov zoo nkauj ces zoo li lub paj nyob nruab nrag.
7 Tsob nroj yuav qhuav, lub paj yuav ntsws thaum Huab Tais tshuab pa tuaj rau; li ntawd tib neeg ces yeej yog nroj tsuag.
8 Tsob nroj yuav qhuav, lub paj yuav ntsws, tab sis peb tus Tswv Ntuj lo lus yuav nyob mus li.”
9 Koj nce mus lawm saum lub roob siab mas, tus tub tshaj xo nyob Xis Yoos; koj tsa suab qw kom nrov li nrov tau mog; tus tub tshaj xo nyob Yes Lus Xas Les, koj qw suab kom nrov, tsis txhob ntshai hais rau cov nroog nyob Yus Das tias: ‘Ntawm no yog nej tus Tswv Ntuj!
10 Ntawm no yog HUAB TAIS! Nws tuaj muaj hwj huam, nws txhais npab muaj zog yua tus tswj. Nws nqa paj tshab nrog nws tuaj, nws tus nqe zog nyob ntawm nws xub ntiag.
11. Nws yuav coj nws pab yaj mus noj zaub zoo li ib tug tswv zov yaj; nws sau cov me nyuam yaj rau ntawm nws ob txhais npab, nws nqa lawv nyob hauv nws xub ntiag; nws ua siab ntev saib cov maum yaj uas tseem coj me nyuam.

NPN 96: 1-2, 3+10ac, 11-12, 13

Txais: (HX 40:10ab) Huab Tais peb tus Tswv Ntuj tuaj muaj hwj huam loj.

Nej hu ib zaj nkauj tshiab rau HUAB TAIS;
txhua lub teb chaws, nej hu nkauj rau HUAB TAIS.
Nej hu nkauj rau HUAB TAIS, nej foom lus zoo cav txog nws lub npe;
nej tshaj txog nws txoj kev cawm, hnub dhau hnub.

Txais…

Nej piav txog nws lub hwj chim rau cov haiv neeg,
nej piav txog nws tej hauj lwm txaus qhuas rau txhua hom neeg.
Nej hais rau txhua haiv neeg tias: HUAB TAIS yog vaj ntxwv;
Nws tswj tsoom neeg raws txoj kev ncaj ncees.

Txais…

Kom lub ntuj zoo siab, lub ntiaj teb hom khaj;
kom dej hiav txwv thiab txhua yam nyob hauv tsa suab nrov nroo ntws;
kom cov tiaj nras thiab txhua yam nyob hauv zoo siab luag ntxhi!
Thiab kom txhua tus ntoo hauv tej hav zoov zoo siab.

Txais…

Lawv yuav dhia zoo siab ntawm HUAB TAIS xub ntiag,
vim nws tuaj lawm, nws tuaj kav lub ntiaj teb.
Nws yuav tswj lub ntiaj teb raws txoj kev ncaj ncees,
thiab cov haiv neeg raws kev pheej xeeb.

Txais…

As Les Lus Yas

Txais: As les lus yas, As les lus yas.

Huab Tais lub hnub nyoog tuaj txog ze lawm.
Ntsias saib, nws yuav tuaj cawm peb.

Txais: As les lus yas, As les lus yas

Ntawv Moo Zoo: MT 18: 12-14

Yes Xus hais rau nws cov thwj tim tias:
12 “Nej xav li cas? Yog ib tug neeg muaj ib puas tus yaj, ib tug mus poob zoo lawm, nws puas yuav tsis tso cuaj caum cuaj tug ntawd cia rau saum roob, mus nrhiav tus uas poob zoo lawd?
13 Yog nws nrhiav tau tus poob zoo ntawd mas, kuv hais tseeb rau nej tias nws yuav zoo siab rau tus ntawd tshaj rau cuaj caum cuaj tug uas tsis tau poob zoo.
14 Nej Txiv nyob saum ntuj kuj zoo ib yam li ntawd thiab: nws tsis xav kom ib tug me nyuam me li cov no ploj li.”

Tim 7 lub 12 Hlis 2022

Hnub Plaub Lis Piam Ob Caij Tos Huab Tais Xyoo ABC Nruab Lis Piam Xyoo I & II
Lectionary: 183

Yuav Hwm LN Ambrose, Tswv Qhia thiavb Kws cov Txuj Ntshiab

Zaj Nyeem Ib: His Xais 40: 25-31

25 Tus Ntshiab hais tias: “Nej yuav muab leej twg piv tau rau kuv tias nws loj ib yam li kuv?
26 Nej tsa muag ntsia puag saum tej chaw siab kom nej pom tias leej twg yog tus tau tsim tej ntawd; nws coj lawv tawm los xws li tej pab peeb zeej, nws suav lawv, nws tuav lawv npe hu ib yam zuj zus. Vim nws lub hwj huam loj tas nrho thiab nws lub zog nchav kawg nkaus, yeej tsis muaj ib yam uas yuav tsis muaj nyob ntawd li.
27 Yas Kos, vim li cas koj hais li no, His Xas Lais, vim li cas koj thiaj hais tias: ‘Kuv txoj kev nyob nraim ntawm HUAB TAIS lawm, thiab kuv tus Tswv Ntuj tsis quav ntsej txog tias kuv muaj cai dab tsi li’?
28 Puas yog koj tsis paub, los puas yog koj tsis tau hnov txog? HUAB TAIS yog tus Tswv Ntuj nyob mus li, nws yog tus tsim cov npoo ntiaj teb kawg. Nws tsis qaug zog tsis nkees li. Neeg tsom tsis tau nws txoj txawj kev ntse li.
29 Nws yog tus ntxiv zog rau tus neeg qaug zog, nws ntxiv peev xwm rau tus zog tab.
30 Cov tub hluas tsaus muag thiab qaug zog, cov tiav hluas ntsug mus kev qaug zuj zis, yuav ntog.
31 Tab sis cov neeg uas cia siab rau HUAB TAIS yuav rov muaj zog tuaj, lawv nthuav tis ya siab xws li dav ya, lawv khiav lawv tsis txawj sab, lawv mus kev lawv tsis nkees.

NPN 103: 1-2, 3-4, 8+10

Txais: (1) Kuv tus plig, koj cia li cav txog Huab Tais!

Kuv tus plig, cia li cavlus zoo txog HUAB TAIS;
tas nrho kuv tus kheej, cia li cav txog nws lub npe ntshiab.
Kuv tus plig, cia li cav lus zoo txog HUAB TAISs,
thiab tsis txhob hnov qab tas nws tej txiaj ntsim koob hmoov.

Txais…
.
Nws zam tas nrho koj cov txhaum rau koj,
nws kho tas koj tej mob nkeeg kom zoo.
Nws txhiv koj txoj sia ntawm lub qhov tuag los,
nws muab nws txoj kev ua siab zoo
thiab nws lub siab hlub neeg los rau koj ntoo.

Txais…

HUAB TAIS khuv leej thiab pub txiaj ntsim rau neeg,
nws npau taws qeeb, nws lub siab puv nkaus txoj kev ua zoo.
Nws tsis ua rau peb kom phim peb tej kev txhaum,
nws tsis ua pauj kom phim peb txoj kev ua phem.

Txais…

As Les Lus Yas

Txais: As les lus yas, As les lus yas

Nej ntsia, Huab Tais tuaj cawm nws haiv neeg;
cov uas npaj rawv tos yuav ntsib nws, lawv txoj hmoov zoo.

Txais: As les lus yas, As les lus yas

Ntawv Moo Zoo: Mas Tais 11: 28-30

Yes Xus hais rau pab neeg coob coob tias:
28 “Tas nej sawv daws cov uas nej khwv thiab ris nra hnyav,
nej tuaj cuag kuv mog, kuv yuav cia nej so los siav.
29 Nej txais kuv tus quab mus kwv, nej kawm ntawm kuv,
vim kuv muaj lub siab zoo thiab ua neeg me,
ces nej yuav nrhiav tau chaw so kom los siav rau nej tus plig.
30 Vim kuv tus quab kwv yooj yim, thiab kuv lub nra sib.”

Tim     8     lub     12     Hlis     2022

Hnub Tsib Lis Piam Ob Caij Tos Huab Tais Xyoo A Nruab Lis Piam Xyoo I


Hwm Niam Mab Liab xeeb los tsis lo neeg lub keeb txhaum
Lectionary: 689

Zaj Nyeem Ib:   HAUV PAUS 3: 9-15, 20

Thaum tus txiv neej, As Das, noj lub txiv lawm,
9 HUAB TAIS Tswv Ntuj hu nws tias: "Koj nyob qhov twg?"
10 Tus txiv neej teb tias: "Kuv hnov koj nyob hauv lub vaj, tiam sis kuv ntshai vim kuv liab qab, ces kuv thiaj khiav tsiv nraim lawm."
11 Tswv Ntuj hais ntxiv tias: "Leej twg qhia koj tias koj liab qab? Yog koj noj lub txiv uas kuv txwv tsis pub noj lawm puas yog?"
12 Tus txiv neej teb tias: "Yog tus poj niam uas koj tso nyob ze kuv muab lub txiv saum tus ntoo rau kuv, ces kuv thiaj noj."
13 HUAB TAIS Tswv Ntuj hais rau tus poj niam tias: "Koj ua dab tsi li ntawd?" Tus poj niam teb tias: "Yog niag nab ntxias kuv, kuv thiaj noj."
14 Ces HUAB TAIS Tswv Ntuj hais rau tus nab tias: "Vim koj tau ua li ntawd, koj txoj hmoov yuav phem tshaj ib tsoom tsiaj qus thiab tsiaj nruab nrag. Koj yuav xuas koj lub plab mus kev, thiab koj yuav niaj hnub noj av tas koj sim neej.
15 Kuv yuav ua kom muaj kev ciaj caub nyob ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.

NPN   98: 1, 2-3ab, 3cd-4

Txais: (1) Nej hu ib zaj nkauj tshiab rau Huab Tais, vim nws tau ua tej yam txaus qhuas.

Nej hu ib zaj nkauj tshiab rau Huab Tais,
vim nws tau ua tej yam txaus qhuas;
Nws txhais tes xis tau ua kom nws yeej,
nws txhais npab dawb huv tau ua.

Txais…

HUAB TAIS tau qhia nws txoj kev cawm rau neeg paub;
nws tau ua kom cov haiv neeg pom nws txoj kev ncaj.
Nws rov nco txog nws lub siab zoo thiab nws lub siab pheej xeeb
rau His Xas Lais tsev neeg.

Txais...

Txhua qhov chaw tim cov npoo ntiaj teb kawg tau pom
peb tus Tswv Ntuj txoj kev cawm seej lawm.
Tas cov teb chaws, nej hu nkauj luag ntxhi rau HUAB TAIS;
Cia li seev suab hu nkauj, cia li hu nkauj qhuas nws.

Txais…

Zaj Nyeem Ob:   ES FES XOS 1: 3-6, 11-12

Cov kwv tij nkauj muad:
3 Peb cav lus zoo txog Tswv Ntuj peb tus Huab Tais Yes Xus Pleev Leej Txiv; nws tau foom txhua yam txiaj ntsim koob hmoov nyob saum ntuj pub rau peb nyob hauv Leej pleev.
4 Nws tau xaiv peb nyob hauv Leej Pleev thaum tseem tsis tau tsim lub ntiaj teb los lawm, kom peb ntshiab huv, tsis muaj chaw xyeej rau ntawm nws xub ntiag, nyob hauv txoj kev nyiam.
5 Nws yeej ib txwm xub npaj peb los ua nws cov tub sau ntxhais sau nyob hauv Yes Xus Pleev, raws li nws lub siab nyiam lawm,
6 kom tau cav txog nws lub txiaj ntsim muaj koob meej uas nws pub rau peb nyob hauv leej Zoo Nyiam.
11 Kuj yog nyob hauv nws, peb tau raug xaiv thiab tau txais txoj hmoo raws li tus uas ua kom tas txhua yam muaj tuaj haum li nws lub siab nyiam lub hom phiaj,
12 kom peb ua cov cav txog nws lub koob meej, vim peb yog cov uas xub tau tso siab rau Leej Pleev ua ntej dua cov.

As Les Lus Yas:   LK 1: 28

Txais: As les lus yas, As les lus yas.

Koj nyob kaj lug, Mab Liab, koj tau txiaj ntsim puv siab, Huab Tais Ntuj nrog koj nyob;
koj tau koob tau hmoov tshaj ib tsoom poj niam tib si.

Txais: As les lus yas, As les lus yas.

Zaj Ntawv Moo Zoo:   LUS KAS 1: 26-38

26 Tswv Ntuj xa tus Tshiab Nkas Nplias mus hauv ib lub zos nyob Nkas Lis Lais teb, hu ua Nas Xas Les,
27 mus cuag ib tug ntxhais uas lawv muab qhaib rau ib tug txiv neej hu ua Yos Xes, yog caj ces Das Vis lawm; tus ntxhais lub npe hu ua Mab Liab.
28 Tus Tshiab chaws mus hauv Mab Liab tsev, nws hais rau Mab Liab tias: "Koj nyob kaj lug, tus tau txiaj ntsim puv siab! Huab Tais nrog koj nyob."
29 Mab Liab ua siab nphau npog rau lo lus ntawd; nws xav hauv nruab siab tias lo lus hawm ntawd yog xav hais dab tsi.
30 Tus Tshiab hais rau Mab Liab tias: "Mab Liab, koj tsis txhob ntshai. Tswv Ntuj saib koj ntxim nws siab.
31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus.
32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws zaum.
33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg."
34 Mab Liab hais rau tus Tshiab tias: "Qhov ntawd yuav muaj tuaj zoo li cas? vim kuv tsis paub ib tug txiv neej."
35 Tus Tshiab teb rau Mab Liab tias: "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub.
36 Saib! Es Lis Xas Npes, tus uas txheeb koj, luag hu nws ua pog khab seeb, nws hnub nyoog laus lawm, tab sis nws kuj xeeb tub lawm thiab; lub hlis no, yog lub rau hli rau nws lawm. Vim tias, tsis muaj ib yam uas Tswv Ntuj yuav ua tsis tau."
38 Ces Mab Liab hais tias: "Kuv yog Huab Tais tus ntxhais txib. Kuv xav kom muaj rau kuv raws li koj hais." Ces tus Tshiab thiaj tso Mab Liab tseg.

Tim     9     lub     12     Hlis     2022

Hnub Rau Lis Piam Ob Caij Tos Huab Tais Xyoo ABC Nruab Lis Piam Xyoo I &II
Lectionary: 185

XHLT: LN Juan Diego

Zaj Nyeeem Ib:   HIS XAIS 48: 17-19

17 HUAB TAIS tus cawm koj, His Xas Lais tus Ntshiab, nws hais li no :
"Kuv HUAB TAIS, koj tus Tswv Ntuj, kuv qhia rau koj paub txog yam yuav zoo rau koj,
thiab kuv coj koj mus taug txoj kev uas koj yuav tsum taug.
18 Kheev lam koj mloog kuv cov lus qhia, mas koj txoj kev thaj yeeb yuav zoo li ib tug dej ntws,
thiab koj txoj kev ncaj yuav zoo li cov nplaim dej nyob hauv hiav txwv;
19 koj caj ces yuav zoo li cov suab zeb, cov tawm hauv koj los yuav zoo li cov tsig zeb.
Lawv lub npe yuav tsis raug muab txiav tawm thiab tsis raug muab ua kom ploj ntawm kuv xub ntiag mus li ib txhis.

NPN   1: 1-2, 3, 4+6

Txais: (Zam 8:12) Cov uas mus raws koj, Huab Tais, lawv yuav muaj kev kaj lub neej.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo nyob hauv HUAB TAIS txoj cai,
thiab nws xav ntsoov txog HUAB TAIS txoj cai nruab hnub hmo ntuj.

Txais: (Zam 8:12) Cov uas mus raws koj, Huab Tais, lawv yuav muaj kev kaj lub neej.

Nws zoo puav tam li ib tsob ntoo cog nyob ze cov dej ntws,
nws txi txiv raws caij raws nyoog, thiab nws tej nplooj tsis txawj zeeg li.
Nws ua yam twg tau yam ntawd.

Txais: (Zam 8:12) Cov uas mus raws koj, Huab Tais, lawv yuav muaj kev kaj lub neej.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (Zam 8:12) Cov uas mus raws koj, Huab Tais, lawv yuav muaj kev kaj lub neej.

As Les Lus Yas

Txais: As les lus yas, as les lus yas.

Huab Tais yuav tuaj, nej kav tsij tawm mus ntsib nws mas!
Nws yog tus vaj pub kev thaj yeeb.

Txais: As les lus yas, as les lus yas.

Ntawv Moo Zoo:   MT 11: 16-19

Yes Xus hais rau tsoom sid tias:
16 "Kuv yuav muab tiam neeg no piv rau dab tsi? Tiam neeg no zoo li ib pab me nyuam yaus zaum tom tshav puam; lawv rov sib hu lawv tias:
17 ‘Peb twb tshuab raj rau nej, tiam sis nej tsis dhia li! Peb cuab suab hu nkauj tuag, los nej tsis nyiav li!’
18 Zam tuaj, nws tsis noj mov, tsis haus cawv, lawv hais tias: ‘Nws raug ib tug dab lawm!’
19 Neeg Leej Tub tuaj, nws noj mov haus cawv, lawv hais tias: ‘Saib tus ntawd yog ib tug neeg hu dab thiab quav cawv, nws nrog cov sau se thiab cov neeg txhaum ua phooj ywg!’ Tab sis, kev Thoob Tsib cov hauj lwm twb ua kom kev thoob tsib tau txais kev ncaj ncees lawm.“

Tim 10 lub 12 Hlis 2022

Hnub Xya Lis Piam Ob Caij Tos Huab Tais Xyoo ABC Nruab Lis Piam Xyoo I & II
Lectionary: 186

XHLT: Leej Niam Mab Liab nyob Loreto

Zaj Nyeem Ib: Npes Xis Las 48: 1-4, 9-11a

1 Lub caij ntawd, tus Yaj Saub Es Lias sawv tawm tuaj zoo xws li ib co hluav taws, nws lo lus cig cuag li ib teg tsau.
2 Nws ua kom kev tshaib plab tuaj raug lawv, nws lub siab kub ua kom lawv tuag tas tshuav tsawg tsawg leej lawm xwb.
3 Nws hais Huab Tais lo lus los muab cov dej nag saum ntuj kaw cia. Nws kuj ua kom hluav taws poob los peb zaug thiab.
4 Es Lias, koj muaj hwj chim kawg nkaus nyob hauv koj cov hwj huam yees ntxwv! Leej twg yuav khav tau tias nws loj ib yam li koj?
9 Ib lub khaub zeeg cua hluav taws nqa hlo koj mus lawm, koj caij ib lub tsheb nees hluav taws mus.
10 Muaj ntawv sau tseg tias koj raug xaiv ua tus yuav rov los yav tom ntej, los cheem Tswv Ntuj txoj kev npau ua ntej hnub Huab Tais yuav los; koj yog tus yuav tig cov ua txiv lub siab kom rov los hlub lawv cov tub ki; thiab koj yuav rov tuaj tsa cov xeem Yas Kos kom sawv.
11 Cov tau txoj hmoov zoo yog cov uas tau pom koj, thiab tau nrog koj ntaus phooj ywg.

NPN 80: 2ac+3b, 15-16, 18-19

Txais: (4) HUAB TAIS, thov koj tig peb lub siab kom los npuab koj;
koj pub koj lub ntsej muag rau peb pom, ces peb thiaj yuav txais kev cawm.

Tus tswv zov yaj saib His Xas Lais, thov koj cuab pob ntseg mloog mas.
thov koj zaum saum theej kiab saum cov kes lus npis ci ntsa iab tuaj.
Koj cia li tsa koj lub hwj huam kom tsim dheev los.

Txais…

HUAB TAIS kav ib tsoom tshiab, thov koj
rov dauv muag saum ntuj los saib dua ib zaug ntxiv.
Thov koj los tu tsob txiv cawv no,
los txuag yam uas koj txhais tes xis tau cog cia,
neeg leej tub uas koj tau ua kom muaj zog.

Txais…

Thov koj tuaj pab tus neeg uas yog koj sab tes xis,
tus neeg leej tub uas koj tau ua kom muaj zog.
Ces peb thiaj yuav tsis ncaim mus deb ntawm koj ntxiv lawm.
Thov koj muab txoj sia tshiab rau peb, ces peb yuav hu txog koj lub npe.

Txais…

As Les Lus Yas: LUS KAS 3: 4, 6

Txais: As les lus yas, As les lus yas

Nej npaj txoj kev rau Huab Tais, nej ua kom nws txoj kev ncaj.
ces txhua leej neeg yuav pom Tswv Ntuj txoj kev cawm.

Txais: As les lus yas, As les lus yas

Ntawv Moo Zoo: Mas Tais 17: 9a, 10-13

9a Thaum lawv nqes saum roob los,
10 cov thwj tim nug Yes Xus tias: "Ua cas cov Kws Ntawv Ntshiab hais tias Es Lias yuav xub los ua ntej tso no?"
11 Yes Xus teb tias: "Yeej yog tiag. Es Lias yuav tsum los tso, nws yuav los kho ib puas tsav yam kom zoo tso.
12 Tiam sis kuv hais rau nej tias, Es Lias twb los lawm, tab sis lawv zeem tsis tau nws, lawv ua lwj ua liam rau nws raws lawv lub siab xav. Neeg Leej Tub kuj yuav raug lawv tsim ib yam nkaus."
13 Ces cov thwj tim thiaj to taub tias yog Yes Xus hais txog Zam Ntxuav Plig rau lawv.

Tim 12 lub 12 Hlis 2022

Hnub ObLis Piam Peb Caij Tos Huab Tais Xyoo A Nruab Lis Piam Xyoo I

Hwm Leej Niam Mab Liab Guadalupe
Lectionary: 690A

Zaj Nyeem Ib: Ntxes Kas Lias 2: 14-17

14 “Leej Ntxhais Xis Yoos, koj hu nkauj,thiab koj zoo siab mog! Koj ntsia saib kuv tuaj lawm, kuv yuav tuaj nyob hauv koj;” HUAB TAIS hais li ntawd.
15 Hnub ntawd, ntau haiv neeg yuav mus koom nrog HUAB TAIS; lawv yuav yog nws haiv neeg. Nws yuav tuaj nyob hauv koj, ces koj yuav paub tias tus HUAB TAIS kav tsoom tshiab xa kuv tuaj rau koj.
16 Huab Tais yuav tau txais Yus Das los ua nws tug nyob hauv lub teb chaws ntshiab, thiab nws yuav rov xaiv Yes Lus Xas Les dua..
17 Txhua tus muaj lub cev nqaij, nej yuav nyob ntsiag to ntawm HUAB TAIS xub ntiag mas, vim nws twb tsim dheev sawv tsees hauv nws lub tsev ntshiab los lawm.

Los: Qhib Yav Tom Ntej 11: 19a; 12: 1-6a, 10ab

19a Tswv Ntuj lub tuam tsev nyob saum ntuj qhib plho, ces pom nws lub Xab Cog Lus nyob hauv lub tuam tsev.
12 1 Muaj ib lub cim loj tas nrho tshwm nyob saum ntuj: yog ib tug Poj Niam hnav lub hnub, lub hli nyob hauv nws qab xib taws, thiab nws ntoo ib lub mom teev kub muaj kaum ob lub hnub qub saum nws taub hau.
2 Tus Poj Niam ntawd cev hnyav, ces nws ntsaj mob, vim nws tab tom mob plab yuav daws cev.
3 Tseem muaj dua ib lub cim tshwm tuaj nyob saum ntuj: yog ib tug niag zaj liab ploog loj kawg, nws muaj xya lub taub hau thiab kaum tus kub; xya lub taub hau ntawd ntoo xya lub mom teev kub.
4 Nws tus ko tw cheb kiag cov hnub qub saum ntuj mus tas lawm ib feem peb, thiab muab lawv pov los rau hauv ntiaj teb. Ces tus Zaj mus sawv ntsug ntawm tus poj niam uas tab tom daws cev xub ntiag, npaj yuav nqos tus me nyuam uas tus poj niam yuav yug los.
5 Tus Poj Niam yug tau ib tug me tub: yog tus yuav tuav ib tug cwj hlau los tswj tas txhua haiv neeg. Luag muab tus me nyuam nqa hlo mus rau saum Tswv Ntuj, mus nyob ze ntawm nws lub theej kiab lawm.
6a Hos tus Poj Niam khiav mus nyob hauv teb chaws suab puam, mus nyob hauv qhov chaw uas Tswv Ntuj yeej npaj tseg rau nws lawm.
10ab Ces kuv hnov ib lub suab nrov loj loj hais saum ntuj tuaj tias: “Zaum no, peb tus Tswv Ntuj txoj kev cawm, txoj kev muaj hwj huam thiab txoj kev ua vaj, thiab nws Leej Pleev lub hwj huam tuaj txog lawm.”

NPN: YUS DIS 13: 18bcde, 19

Txais: (15:9d) Koj yog peb haiv neeg lub meej mom uas nyob siab tshaj plaws.

Me ntxhais, thov kom Tswv Ntuj tus Nyob Siab foom hmoov zoo rau koj
ntau tshaj tas ib tsoom poj niam nyob ntiaj teb no;
Kom txhua leej cav lus zoo txog HUAB TAIS Tswv Ntuj
tus tsim lub ntuj thiab lub ntiaj teb.

Txais…

Txoj hauj lwm muaj kev tso siab uas koj tau ua
yuav tsis ploj ntawm tib neeg lub tswv yim ib zaug li,
lawv yuav piav txog Tswv Ntuj lub hwj huam loj.

Txais…

As Les Lus Yas

Txais: As les lus yas, as les lus yas

Leej Ntshiab Mab Liab, koj tau txoj hmoov zoo,
koj yog tus tsim nyog txais txhua yam lus qhuas;
lub Hnub pub txoj kev ncaj tawm ntawm koj tuaj,
nws yog Leej Pleev peb tus Tswv Ntuj.

Txais: As les lus yas, as les lus yas

Ntawv Moo Zoo: Lus Kas 1: 26-38

26 Tswv Ntuj xa tus Tshiab Nkas Nplias mus rau hauv ib lub zos nyob Nkas Lis Lais teb hu ua Naj Xas Les,
27 mus cuag ib tug ntxhais nkauj xwb uas lawv muab qhaib rau ib tug txiv neej hu ua Yos Xes, uas yog caj ces Das Vis lawm; tus nkauj xwb ntawd lub npe hu ua Mab Liab.
28 Tus Tshiab chaws mus hauv Mab Liab tsev, nws hais rau Mab Liab tias: "Koj nyob kaj lug, tus tau txiaj ntsim puv siab! Huab Tais nrog koj nyob."
29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus ntawd yog xav hais dab tsi.
30 Tus Tshiab hais rau nws tias: "Mab Liab, koj tsis txhob ntshai, vim Tswv Ntuj saib koj ntxim nws lub siab.
31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus.
32 Nws yuav yog ib tug loj, luag yuav hu nws ua tus Nyob Siab leej Tub; Huab Tais Tswv Ntuj yuav muab nws txiv Das Vis lub theej kiab rau nws zaum.
33 Nws yuav ua vaj kav Yas Kos tsev neeg tiam dhau tiam; nws txoj kev ua vaj yuav tsis muaj caij kawg."
34 Mab Liab hais rau tus Tshiab tias: "Qhov ntawd yuav muaj tuaj zoo li cas, vim kuv tsis paub ib tug txiv neej li."
35 Tus Tshiab teb rau Mab Liab tias: "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los ntxoov koj. Li ntawd, tus ntshiab yug los yuav hu ua Tswv Ntuj Leej Tub.
36 Saib! Es Lis Xas Npes, tus uas txheeb koj, luag hu nws ua pog khab seeb no, nws hnub nyoog laus lawm, tab sis nws kuj xeeb tub lawm thiab; lub hlis no, yog lub rau hli rau nws lawm. Vim tias, tsis muaj ib yam uas Tswv Ntuj yuav ua tsis tau."
38 Ces Mab Liab hais tias: "Kuv yog Huab Tais tus ntxhais txib. Kuv xav kom muaj tuaj rau kuv raws li koj hais." Ces tus Tshiab tso Mab Liab tseg.

Los: Lus Kas 1: 39-47

39 Mab Liab sawv kev mus, nws maj nrawm nroos mus lawm pem toj siab, mus rau ib lub nroog nyob xeev Yus Das.
40 Nws chaws mus hauv Ntxas Kas Lias tsev, thiab nws tsa suab hu Es Lis Xas Npes.
41 Thaum Es Lis Xas Npes hnov Mab Liab lub suab hu nws, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv nws.
42 Ces Es Lis Xas Npes tsa suab hlo hais nrov nrov tias: "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov.
43 Ua cas Ntuj thiaj pub kom kuv tus Huab Tais leej niam tuaj xyuas kuv?
44 Koj saib, thaum kuv hnov dheev koj lub suab hu nrov txog kuv pob ntseg, tus me nyuam hauv kuv plab dhia zoo siab.
45 Li ntawd, tus uas tau ntseeg tias cov lus Huab Tais hais rau nws yuav tsheej xeeb tau, mas nws txoj hmoov zoo!"
46 Ces Mab Liab hais tias: "Kuv tus plig cav txog Huab Tais lub hwj chim, loj
47 kuv lub tswv yim hom khaj nyob hauv Tswv Ntuj, tus Cawm kuv.”

Tim 13 lub 12 Hlis 2022

Hnub Peb Lis Piam Peb Caij Tos Huab Tais Xyoo ABC Nruab Lis Piam Xyoo I & II
Lectionary: 188

Yuav Hwm LN Lucy, Nkauj Tsim Txiaj tuag ua Tim Khawv

Zaj Nyeem Ib: XFN 3: 1-2, 9-13

Huab Tais hais li no tias:
1 “Aub! Hmoov phem rau lub nroog uas ntxeev siab, thiab tsis huv, lub nroog quab yuam neeg!
2 Nws tsis kam mloog lus, tsis txais lo lus qhuab qhia li; nws tsis tso siab rau HUAB TAIS, tsis kam txav los ze nws tus Tswv Ntuj li.
9 Ua li mas kuv yuav hloov thiab ua kom tsoom neeg cov di ncauj dawb huv tuaj, kom lawv sawv daws hu txog HUAB TAIS lub npe, thiab koom ua ib lub siab tsob hwb nws.
10 Nyob sab ntug cov dej Es Caus Pias teb tim ub, cov neeg teev hawm kuv, cov tub ntxhais hauv kuv pab neeg tawg mus nyob, lawv yuav nqa paj tshab tuaj cev rau kuv.
11 Hnub ntawd, nej yuav tsis txaj muag ntxiv txog tej yam uas nej tau ua lawm, txawm tias nej tau ua ntau yam txhaum rau kuv; vim kuv yuav ntiab cov neeg muab hlob kom tawm hauv nej mus, ces nej yuav tsis ua neeg muab hlob nyob saum lub roob kuv txoj kev ntshiab ntxiv.
12 Kuv yuav ua kom yog ib pab neeg txo hwj chim thiab pluag nyob hauv nej, ces lawv yuav nrhiav chaw vam khom nyob hauv HUAB TAIS lub npe:
13 Yog pab His Xas Lais seem. Lawv yuav tsis ua phem, tsis hais lus dag; yuav tsis pom muaj ib tug nplaig hais lus cuav nyob hauv lawv lub ncauj li; thaum lawv mus nog zaub thiab mus muab chaw so, tsis muaj leej twg ua kom lawv ntshai.”

NPN 34: 2-3, 6-7, 17-18, 19+23

Txais: (7a) HUAB TAIS mloog tus pluag lub suab quaj.

Kuv yuav cav lus zoo txog HUAB TAIS txhua lub sij hawm,
lo lus cav txog nws yuav nyob rawv hauv kuv lub ncauj.
Kuv tus plig yuav nto koob meej nyob hauv HUAB TAIS;
cov neeg me hnov, lawv yuav zoo siab.

Txais: (7a) HUAB TAIS mloog tus pluag lub suab quaj.

Nej ntsia ntsoov HUAB TAIS ces nej yuav zoo siab luag ntxhi,
Nej lub ntsej muag yuav tsis liab ploog vim kev txaj muag.
Thaum tus txom nyem quaj hu, HUAB TAIS yuav mloog nws,
Huab Tais yuav cawm nws dim ntawm tas nws tej kev txhawj xeeb.

Txais: (7a) HUAB TAIS mloog tus pluag lub suab quaj.

HUAB TAIS tawm tsam cov neeg ua phem,
nws ua kom ntiaj teb neeg txhob nco qab txog lawv ntxiv.
Thaum cov neeg siab ncaj quaj hu, HUAB TAIS mloog lawv lub suab,
nws npo lawv dim ntawm tas lawv tej kev ntxhov siab.

Txais: (7a) HUAB TAIS mloog tus pluag lub suab quaj.

HUAB TAIS nyob ze ze cov neeg nyuaj siab lwj plawv,
nws cawm cov uas lub siab qaug zog zuj zis.
HUAB TAIS txhiv nws cov tub txib txoj sia;
cov tuaj nkaum hauv HUAB TAIS tsis raug txim ib tug li.

Txais: (7a) HUAB TAIS mloog tus pluag lub suab quaj.

As Les Lus Yas

Txais: As les lus yas, as les lus yas.

Huab Tais, tsuag tsuag tuaj mas, tsis txhob ncua ntev.
Thov koj zam koj haiv neeg tej txhaum rau lawv.

Txais: As les lus yas, as les lus yas.

Ntawv Moo Zoo: MT 21:28-32

Yes Xus hais rau cov thawj leej choj thiab cov txwj laus saib tsoom pej xeem tias:
28 “Nej hais saib, nej xav li cas? Ib tug neeg muaj ob tug tub. Nws mus hais rau thawj tug tias: ‘Me tub, hnub no koj mus ua teb tom lub vaj txiv cawv ov.’
29 Tus tub ntawd teb tias: ‘Kuv tsis mus.’ Tab sis, ib me ntsis, nws thim xav, ces nws cia li mus ua teb lawm.
30 Leej txiv kuj mus hais rau lwm tus tub ib yam li ntawd thiab. Tus tub ntawd teb tias: ‘Txiv, kuv mam li mus.’ Tab sis nws ho tsis mus li.
31 Ob tug tub no, tus twg tau ua raws li leej txiv xav kom ua?” Lawv teb tias: “Yog thawj tug.” Yes Xus hais rau lawv tias: “Kuv hais tseeb rau nej, cov sau se thiab cov niam ntiav yuav xub tau mus hauv Tswv Ntuj lub Ceeb Tsheej dua nej.
32 Vim tias, Zam tuaj qhia txog txoj kev ncaj rau nej, tab sis nej tsis ntseeg nws. Hos cov sau se, thiab cov niam ntiav ntseeg. Nej twb pom li ntawd, los nej kuj tsis hloov siab thiab tsis ntseeg nws tom qab li.”

Tim 14 lub 12 Hlis 2022

Hnub Plaub Lis Piam Peb Caij Tos Huab Tais Xyoo ABC Nruab Lis Piam Xyoo I & II
Lectionary: 189

Yuav Hwm LN Zam Ntoo Cuam (John of the Cross), ua Leej Choj thiab Kws cov Txuj Ntshiab

Zaj Nyeem Ib: HIS XAIS 45:6c-8, 18, 21b-25

HUAB TAIS hais li no tias:
6c “Kuv yog HUAB TAIS, tsis muaj dua lwm tus ntxiv.
7 Kuv puab qhov pom kev thiab kuv tsim qhov tsaus ntuj; kuv ua kom muaj kev noj qab nyob zoo thiab kuv tsim kev txom nyem. Yog kuv, HUAB TAIS, tsim tag txhua yam ntawd.
8 Cov txheej ntuj saud, nej ua kom nag poob los, kom lub ntuj ntsuab tso txoj kev ncaj poob nchuav nthwv los; kom ntiaj teb qhib lug, ces txoj kev cawm yuav tawg paj txi txiv, thiab txoj kev ncaj kuj yuav nthaw kaus tuaj; kuv HUAB TAIS, tau tsim kom muaj li no.
18 HUAB TAIS, tus tsim cov txheej ntuj saud, nws yog Tswv Ntuj, tus puab thiab tsim lub ntiaj teb, nws teeb lub ntiaj teb kom zoo, tsis tsim kom yog ib qho chaw ntxhov nyho, tiam sis yog ib qho chaw neeg nyob tau; nws hais li no: “Kuv yog HUAB TAIS, tsis muaj dua lwm tus ntxiv.
21b Leej twg yog tus tau tshaj txog tej no thaum ntxov lawm, thiab tau xub hais txog tej no yav puag thaum ub los lawm? Tsis yog kuv, HUAB TAIS lod? Vim yeej tsis muaj dua lwm tus Tswv Ntuj dua ntawm kuv lawm; uas yog ib tug Tswv Ntuj ncaj ncees thiab pub kev cawm; tsis muaj dua lwm tus zoo li kuv lawm.
22 Nej cia li tig los cuag kuv mog, cov npoo ntiaj teb kawg, nej thiaj yuav txais kev cawm. Vim kuv yog Tswv Ntuj, tsis muaj dua lwm tus lawm.
23 Kuv tau cog lus rau kuv tus kheej; lo lus tawm ntawm kuv lub ncauj los yog qhov tseeb, yog ib lo lus thim tsis tau, lo tias: ‘Txhua lub hauv caug yuav tsum kim rau kuv, txhua lub ncauj yuav tsum cog lus nyob hauv kuv.’
24 Lawv yuav hais tias: ‘Tsuas yog nyob hauv HUAB TAIS xwb thiaj muaj kev ncaj thiab lub zog. Tas cov uas yav tas los lawv tau npau taws rau Hua Tais, lawv puav leej yuav tuaj cuag nws, nrog kev txaj muag tas nrho.
25 Nyob hauv HUAB TAIS, tas His Xas Lais tsoom xeeb ntxwv yuav txais kev yeej thiab yuav nto koob meej.’”

NPN 85: 9ab+10, 11-12, 13-14

Txais: HX 45:8 Kom cov huab tso tus Siab Ncaj poob los li nag,
thiab kom lub ntiaj teb daim av yug tus Cawm Seej tawm los.

Kuv yuav tau hnov qhov uas Tswv Ntuj tshaj tawm txog;
HUAB TAIS, nws tshaj tawm txog kev thaj yeeb rau nws haiv neeg.
HUAB TAIS txoj kev cawm nyob ze ze cov uas hwm nws lawm,
lub hwj chim yuav los nyob txawm hauv peb lub teb chaws.

Txais: HX 45:8 Kom cov huab tso tus Siab Ncaj poob los li nag,
thiab kom lub ntiaj teb daim av yug tus Cawm Seej tawm los.

Kev ua siab zoo thiab kev tseeb yuav tuaj sib ntsib,
kev ncaj thiab kev thaj yeeb yuav los sib qawg.
Kev tseeb yuav txhawv tawm hauv lub ntiaj teb los,
thiab kev ncaj yuav dauv muag ntsia saum ntuj tuaj

Txais: HX 45:8 Kom cov huab tso tus Siab Ncaj poob los li nag,
thiab kom lub ntiaj teb daim av yug tus Cawm Seej tawm los.

HUAB TAIS yuav pub nws tej txiaj ntsim koob hmoov,
ces peb lub teb chaws yuav ntsu qoob loo.
Kev ncaj yuav taug kev ua nws ntej,
kev cawm yuav taug raws nws tus lw hneev taw.

Txais: HX 45:8 Kom cov huab tso tus Siab Ncaj poob los li nag,
thiab kom lub ntiaj teb daim av yug tus Cawm Seej tawm los.

As Les Lus Yas: HX 40: 9-10

Txais: As les lus yas, as les lus yas.

Nej kav tsij qw suab nrov nrov tshaj lub Moo Zoo tias:
Ntsia saib, peb tus HUAB TAIS Tswv Ntuj tuaj muaj hwj huam loj.

Txais: As les lus yas, as les lus yas.

Ntawv Moo Zoo: LK 7: 18b-23

18b Thaum ntawd Zam hu nws ob leeg thwj tim los,
19 nws xa nkawd kom mus nug Huab Tais tias: "Koj puas yog tus yuav tuaj, los peb tseem yuav tos dua lwm tus?"
20 Thaum ob tug thwj tim tuaj txog ntawm Yes Xus lawm, nkawd hais tias: "Zam Ntxuav Plig xa wb tuaj nug koj tias: "Koj puas yog tus yuav tuaj, los peb tseem yuav tos dua lwm tus?"
21 Lub sij hawm ntawd, Yes Xus tau kho coob leej neeg raug txiab nkeeg, raug mob txom nyem, thiab raug dab phem zoo hlo lawm, thiab nws kuj tau ua kom ntau tus dig muag rov pom kev tuaj.
22 Ces Yes Xus teb rau ob tug ntawd tias: "Neb rov mus hais qhia rau Zam txog qhov neb tau pom thiab tau hnov: Cov dig muag rov pom kev tuaj, cov tuag ceg mus taus kev tuaj, cov mob ruas rov huv tuaj lawm, cov lag ntseg hnov lus tuaj, cov tuag sawv tsees rov los tau, muaj tus xa lub Moo Zoo tuaj txog cov neeg pluag lawm.
23 Tus uas nws tsis muaj kev tsis txaus siab vim kuv, mas nws txoj hmoov zoo."

Tim 15 lub 12 Hlis 2022

Hnub Tsib Lis Piam Peb Caij Tos Huab Tais Xyoo ABC Nruab Lis Piam Xyoo I & II
Lectionary: 190

Zaj Nyeem Ib: HIS XAIS 54: 1-10

1 Tus tsis muaj tub ki tsis yug me nyuam, koj cia li nqua suab zoo siab,
cia li qw nrov nrov, koj tus uas tsis tau mob plab!
Vim tus niam uas tsis muaj txiv muaj tub coob dua tus muaj txiv.
HUAB TAIS hais li ntawd.
2 Koj ua kom koj thaj av tsa tsev tsam phooj dav tuaj mas!
Koj nthuav koj cov ntaub vov tsev kom ntau txhob khuv xim,
koj txuas koj cov hlua kom ntev, koj npuj koj cov tswg kom khov kho.
3 Vim koj yuav coob nchuav ntws mus rau sab xis thiab sab laug;
koj caj ces yuav mus txeeb ib tsoom kuj cuab lub cuab tam los ua lawv tug,
lawv yuav mus nyob puv hauv tej nroog uas luag tau muab tso tseg lawm.
4 Koj tsis txhob ntshai, koj yuav tsis ntsib kev txaj muag,
koj tsis txhob ntaus siab me, koj yuav tsis poob ntsej muag.
Koj yuav tsis nco qab txog txoj kev txaj muag thaum koj yav hluas ntxiv,
koj yuav tsis nco txog txoj kev raug luag saib tsis taus thaum koj ua poj ntsuam ntxiv.
5 Vim koj tus txiv yog tus tsim koj los. Nws lub npe yog tus HUAB TAIS Nyob Siab.
Tus txhiv koj yog His Xas Lais tus Ntshiab, nws hu ua tus Tswv Ntuj kav tas lub ntiaj teb.
6 HUAB TAIS tau hu koj rov los, zoo li tus poj niam uas luag muab tso pov tseg,
uas muaj kev tu siab loj hauv nruab siab; zoo li tus poj niam uas nws yuav thaum hluas
thiab tau muab ntiab khiav mus lawm; koj tus Tswv Ntuj hais li ntawd.
7 Kuv tau tso koj tseg ib nyuag pliag, tab sis kuv lub siab hlub koj heev, kuv rov sau koj los.
8 Kuv tau npau taws heev rau koj, kuv thiaj nraim kuv lub ntsej muag ib nyuag chim,
tab sis kuv lub siab hlub koj mus tas ib txhis, kuv khuv leej koj;
tus HUAB TAIS txhiv koj, nws hais li ntawd.
9 Yog zoo ib yam li thaum lub caij Nos Hes nyob,
kuv tau cog lus tias cov dej nyab Nos Hes yuav tsis nyab ntiaj teb ib zaug ntxiv lawm;
nyem no, kuv cog lus tias kuv yuav tsis npau taws rau koj ntxiv,
los yuav tsis tso cem tsis yws koj ntxiv lawm.
10 Txawm tias cov toj roob txawj txav mus, cov hauv pes txawj ua zog koog,
los kuv lub siab hlub koj yuav tsis nrug deb ntawm koj ib zaug ntxiv,
kuv txoj kev cog lus pub kev thaj yeeb yuav tsis hloov li.
Tus HUAB TAIS uas khuv leej koj nws hais li ntawd.

NPN 30: 2+4, 5-6, 11-12a+13b

Txais: (2a) Kuv yuav cav txog koj, Huab Tais, vim koj tau cawm kuv.

HUAB TAIS kuv yuav cav lus zoo txog koj, vim koj rub kuv sawv los,
koj tsis cia kuv ua yeeb ncuab lub chaw zoo siab.
HUAB TAIS koj rub kuv tus plig tawm hauv ntuj txias teb tsaus los,
kuv tau nrog lawv nqes hauv qhov av, koj txuag kom kuv muaj txoj sia.

Txais: (2a) Kuv yuav cav txog koj, Huab Tais, vim koj tau cawm kuv.

Cov ntseeg HUAB TAIS, nej hu nkauj cav txog nws,
nej ua nws tsaug cav txog nws lub npe ntshiab :
Nws npau taws tsuas npau ib pliag, nws hlub neeg, nws hlub tas ib sid.
Hmo ntuj kua muag poob tsis tu, tab sis kaj ntug tuaj, rov muaj kev zoo siab.

Txais: (2a) Kuv yuav cav txog koj, Huab Tais, vim koj tau cawm kuv.

Thov koj mloog kuv, HUAB TAIS, thov koj khuv leej kuv;
HUAB TAIS, thov koj ua tus pab kuv.
Koj tau muab kuv txoj kev quaj kev nyiav hloov ua kev dhia lom zem,
HUAB TAIS, kuv tus Tswv Ntuj, kuv yuav ua koj tsaug mus li ib txhis.

Txais: (2a) Kuv yuav cav txog koj, Huab Tais, vim koj tau cawm kuv.

As Les Lus Yas: LK 3: 4, 6

Txais: As les lus yas, as les lus yas.

Nej npaj kev rau Huab Tais, nej ua kom nws txoj lw ncaj tuaj:
Ces tas ib tsoom muaj lub cev nqaij yuav pom Tswv Ntuj txoj kev cawm.

Txais: As les lus yas, as les lus yas.

Ntawv Moo Zoo: LK 7: 24-30

24 Thaum ob tug thwj tim Zam xa tuaj rov mus lawm, Yes Xus thiaj pib hais txog Zam rau tsoom sid tias: "Nej tawm mus saib dab tsi hauv teb chaws suab puam? Puas yog nej mus nuam ib tsob tauj raug cua tshuab co ntuj nto?
25 Nej mus xyuas dab tsi? Puas yog mus xyuas ib tug neeg hnav tsoos tsuj tsoos npuag laim txias? Tab sis cov neeg hnav zoo thiab noj qab, mas lawv nyob hauv cov tsev vaj loog rau vaj ntxwv nyob xwb.
26 Ua li nej mus xyuas dab tsi tiag? Puas yog ib tug yaj saub? Muaj tseeb. Kuv hais rau nej, nws tseem loj dua ib tug yaj saub.
27 Nws yog tus uas Ntawv sau tseg tias: ‘Ntsia saib, kuv xa kuv tus tub tshaj xo mus ua koj ntej, nws yuav npaj koj txoj kev rau koj.’
28 Kuv hais rau nej tias: tas cov me nyuam uas yug ntawm tsoom poj niam los, mas tsis muaj ib tug loj dua Zam. Tsis kav tus me tshaj hauv Tswv Ntuj lub Ceeb Tsheej tseem loj dua Zam thiab.”
29 Tas tsoom neeg uas tuaj mloog, tab yog cov neeg sau se uas tau txais kab ke ntxuav ntawm Zam los, sawv daws lees tias Tswv Ntuj yog tus ncaj.
30 Tiam sis cov Fas Lis Xais thiab cov Kws Lij Choj uas lawv tsis kam txais Zam cov kab ke ntxuav, lawv muab Tswv Ntuj lub hom phiaj uas nws npaj rau lawv xyeeb pov tseg.

Tim 16 lub 12 Hlis 2022

Hnub Rau Lis Piam Peb Caij Tos Huab Tais Xyoo ABC Nruab Lis Piam Xyoo I & II
Lectionary: 191

Zaj Nyeem Ib: HIS XAIS 56: 1-3a, 6-8

1 HUAB TAIS hais li no: "Nej coj raws qhov ncaj, nej ua raws qhov yog, vim kuv txoj kev cawm tuaj yuav txog sai sai no, kuv txoj kev ncaj yuav tawm tuaj rau nej pom xyeem tsis ntev no.
2 Tus tau txoj hmoov zoo yog tus neeg coj raws li ntawd, nws nyob khov kho hauv txoj kev ntawd, nws hwm thiab tsis ua txhaum rau hnub xas npas tos, thiab nws cheem nws txhais tes kom txhob ua ib yam hauj lwm phem.
3a Kom tus pej kum neeg uas tau los koom nrog Huab Tais lawm txhob hais tias: 'HUAB TAIS yuav ntiab kuv tawm hauv nws haiv neeg mus xwb!'
6 Cov pej kum neeg uas los koom nrog HUAB TAIS, los tsob hwb nws, nyiam nws lub npe, thiab lawv ciaj ua HUAB TAIS cov tub txib, tas txhua tus uas caiv hnub Xas Npas Tos, thiab lawv nyob khov kho hauv kuv txoj kev cog lus,
7 mas kuv yuav coj lawv mus saum lub roob kuv txoj kev Ntshiab, kuv yuav ua kom lawv zoo siab hlo nyob hauv kuv lub tsev teev hawm. Kuv yuav zoo siab txais lawv cov thaj hlawv tsiaj thiab thaj txi Ntuj nyob saum kuv lub thaj txi Ntuj. Vim kuv lub tsev yuav hu ua txhua haiv neeg lub tsev teev hawm.
8 Tus HUAB TAIS Tswv Ntuj uas rov sau cov His Xas Lais tawg mus lawm los ua ke, nws hais tias : "Kuv yuav sau dua ib co los ntxiv rau nws nrog cov uas kuv twb sau tau lawm."

NPN 67: 2-3, 5, 7-8

Txais: (4) Tswv Ntuj, cia kom tas txhua haiv neeg cav txog koj!

Thov kom Tswv Ntuj hlub peb thiab foom hmoov zoo rau peb,
kom nws ua nws lub ntsej muag ci tuaj rau saum peb,
Kom lub ntiaj teb thiaj yuav paub koj txoj kev,
cov kuj cuab thiaj yuav paub koj txoj kev cawm.

Txais: (4) Tswv Ntuj, cia kom tas txhua haiv neeg cav txog koj!.

Kom cov kuj cuab hom khaj thiab qw zoo siab,
vim koj kav cov haiv neeg raws kev ncaj,
koj ua tus coj cov kuj cuab nyob ntiaj teb.

Txais: (4) Tswv Ntuj, cia kom tas txhua haiv neeg cav txog koj!.

Lub ntiaj teb twb txi txiv lawm:
Tswv Ntuj, peb tus Tswv Ntuj tau foom koob hmoov rau peb lawm.
Thov kom Tswv Ntuj foom lus zoo rau peb,
kom tas cov npoo ntiaj teb kaug hwm nws!

Txais: (4) Tswv Ntuj, cia kom tas txhua haiv neeg cav txog koj!

As Les Lus yas

Txais: As les lus yas, as les lus yas

Huab Tais, koj tuaj mas, coj koj txoj kev thaj yeeb tuaj rau peb
Kom peb muaj ib lub siab puv npo zoo siab luag ntxhi nyob ntawm koj.

Txais: As les lus yas, as les lus yas

Ntawv Moo Zoo: ZAM 5: 33-36

Yes Xus hais rau cov Yus Das tias:
33 “Nej tau xa ib co tub coj xo mus cuag Zam, Zam tau ua tim khawv txog qhov tseeb lawm.
34 Kuv mas kuv tsis txais cov lus ua tim khawv ntawm ib tug neeg, tiam sis kuv hais tej no kom nej tau txais kev cawm.
35 Zam yog ib lub teeb cig cig thiab ci tuaj, nej tau muaj kev zoo siab ib ntus nyob hauv nws qhov pom kev.
36 Tiam sis kuv muaj ib co lus tim khawv loj dua Zam cov. Cov hauj lwm uas Leej Txiv muab rau kuv ua, cov hauj lwm uas kuv niaj hnub ua no rov ua tim khawv txog kuv, tias yog Leej Txiv xa kuv tuaj.”

Tim 17 lub 12 Hlis 2022

Hnub Xya Lis Piam Peb Caij Tos Huab Tais Xyoo ABC Nruab Lis Piam Xyoo I & II
Lectionary: 193

Zaj Nyeem Ib: HAUV PAUS 49: 1a, 2, 8-10

1a Yas Kos hu nws cov tub los, nws hais rau lawv tias :
2 “Nej tuaj sib sau ua ke thiab nej mloog mog; Yas Kos cov tub a, nej mloog His Xas Lais uas yog nej txiv mog.
8 Yus Das, koj cov kwv tij yuav cav txog koj; koj txhais tes yuav ntsiab rawv koj cov yeeb ncuab lub xwb qwb; koj txiv cov tub yuav khoov cev hawm koj.
9 Yus Das yog ib tug me nyuam tsov; me tub, koj mus caum tau nqaij, koj rov los. Nws khooj rau hauv av, nws pw xyab zoo li ib tug tsov, zoo li ib tug maum tsov; leej twg thiaj yuav tsa tau kom nws sawv?
10 Tus cwj ua vaj yuav tsis ncaim ntawm Yus Das mus ib zaug li, rab pas tswj neeg yuav tsis txav tawm ntawm nws ob txhais taw mus, kom txog thaum lawv nqa paj tshab tuaj rau nws, thiab cov haiv neeg los mloog nws lus.

NPN 72: 1-2, 3-4ab, 7-8, 17

Txais: (7) Txoj kev ncaj yuav tawg paj lub caij nws ua vaj,
thiab yuav muaj kev thaj yeeb lug tas mus li ib txhis.

Aub! Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj ntxwv tus tub.
Nws thiaj yuav tswj koj haiv neeg raws kev ncaj
thiab yuav txiav txim haum pheej rau koj cov neeg me.

Txais…

Cov roob siab yuav muab kev thaj yeeb rau tsoom pej xeem,
thiab cov pov roob yuav muab kev ncaj rau lawv.
Nws yuav tuaj cov txom nyem hauv tsoom pej xeem tog
nws yuav cawm cov pluag tej me nyuam.

Txais…

Kev ncaj yuav tawg paj lub caij nws ua vaj,
thiab yuav muaj kev thaj yeeb lug mus txog
thaum tsis muaj lub hli ntxiv.
Kom nws ua tus kav txij ntawm ib lub hiav txwv mus rau lwm lub,
thiab txij ntawm tus niam dej mus txog tim npoo ntiaj teb kawg.

Txais…

Kom nws lub npe nto koob meej lug mus li,
kom nws lub npe nyob ntev npaum lub hnub.
Nyob hauv nws, txhua xeem neeg nyob ntiaj teb
yuav tau txoj hmoov zoo,
txhua haiv neeg yuav tshaj tias nws yog tus muaj kev zoo siab.

Txais..

As Les Lus Yas

Txais: As les lus yas, as les lus yas

Aub! peb tus Tswv Ntuj tus Nyob Siab muaj kev Thoob Tsib,
koj siv lub hwj huam thiab kev hlub los coj txhua yam koj tau tsim los,
thov koj tuaj qhia txoj kev paub txuj rau peb!

Txais: As les lus yas, as les lus yas

Ntawv Moo Zoo: MAS TAIS 1: 1-17

1 Phau ntawv qhia txog Yes Xus Pleev lub keeb; nws yog Das Vis leej tub, yog Has Nplas Has leej tub:
2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij.
3 Yus Das yug Fas Les thiab Zas Las nkawd ntawm Thas Mas los. Fas Les yug Es Xas Los, Es Xas Los yug As Las,
4 As Las yug As Mis Nas Das, As Mis Nas Das yug Nas Soos, Nas Soos yug Xas Moos,
5 Xas Moos yug Npuag Oos , uas nws niam yog Las Has. Npuag Oos yug Os Npes , uas nws niam yog Luv. Os Npes yug Yes Xes.
6 Yes Xes yug tus vaj Das Vis. Vaj Das Vis yug Xas Los Moos, uas nws niam yog Us Lis poj niam.
7 Xas Los Moos yug Los Npuag, Los Npuag yug As Npias, As Npias yug As Xas,
8 As Xas yug Yos Xas Fas, Yos Xas Fas yug Yos Las, Yos Las yug Os Xias,
9 Os Xias yug Yos Thas, Yos Thas yug As Kas, As Kas yug Es Xes Kias,
10 Es Xes Kias yug Mas Nas Xes, Mas Nas Xes yug As Moos, As Moos yug Yos Xias,
11 Yos Xias yug Yes Kos Nias thiab Yes Kos Nias cov kwv tij, thaum lub caij lawv mus raug txim nyob Npas Npis Los.
12 Dhau lub caij raug txim nyob Npas Npis Los lawm, Yes Kos Nias yug Xas Las Thias; Xas Las Thias yug Zos Los Npas Npes.
13 Zos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos.
14 As Ntxos yug Xas Dos, Xas Dos yug As Kis, As Kis yug Es Lis Us,
15 Es Lis Us yug Es Les As Ntxas, Es Les As Ntxas yug Mas Thas, Mas Thas yug Yas Kos,
16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
17 Tas cov tiam neeg huv tib si txij Has Nplas Has los txog Das Vis, muaj kaum plaub tiam; txij Das Vis los txog lub caij raug txim nyob Npas Npis Los, muaj kaum plaub tiam; txij lub caij raug txim nyob Npas Npis Los los txog lub caij Leej Pleev tuaj, muaj kaum plaub tiam.

Tim 19 lub 12 Hlis 2022

Hnub Ob Lis Piam Plaub Caij Tos Huab Huab Tais Xyoo ABC Nruab Lis Piam Xyoo I & II
Lectionary: 195

Zaj Nyeem Ib: TLTT 13: 2-7, 24-25a

2 Muaj ib tug txiv neej, yog xeem Daas, nyob Xos Las, nws hu ua Mas Nos As; nws poj niam yog pog khab seeb tsis tau yug dua me nyuam li.
3 HUAB TAIS tus Tshiab tuaj tshwm sim rau tus poj niam pom thiab hais rau nws tias: "Koj yog pog khab seeb tsis tau yug dua me nyuam li, tab sis koj yuav xeeb me nyuam thiab yuav yug ib tug tub.
4 Txij nyem no mus, koj yuav tau ceev faj, tsis txhob haus cawv txiv ntoo los cawv ntsim li, thiab tsis txhob noj tej yam tsis huv.
5 Koj yuav xeeb me nyuam thiab yuav yug ib tug tub, ces koj yuav tsis pub kom rab chais chwv nws taub hau li. Vim tus me nyuam ntawd, txij nruab thiab los, nws yuav ua Tswv Ntuj ib tug Nas Ntxis. Nws yog tus yuav pib cawm cov His Xas Lais ntawm cov Fis Lis Tis txhais tes."
6 Tus poj niam thiaj mus hais rau nws tus txiv tias: "Tswv Ntuj ib tug neeg tau tuaj hais lus rau kuv, zoo li yogTswv Ntuj ib tug Tshiab, vim nws tus yam ntxwv muaj hwj chim kawg li. Kuv tsis tau nug nws tias nws tuaj qhov twg tuaj. Nws tsis tau qhia nws npe rau kuv paub li thiab.
7 Tab sis nws hais rau kuv tias: ‘Koj yuav xeeb me nyuam, koj yuav yug ib tug tub. Mas koj yuav txhob haus cawv txiv ntoo los cov cawv ntsim li, thiab tsis txhob noj tej yam tsis huv. Vim txij nruab thiab los, koj tus me nyuam yuav ua Tswv Ntuj ib tug Nas Ntxis mus txog hnub tuag!’"
24 Ces tus poj niam txawm yug tau ib tug tub, nws tis npe rau hu ua Xas Xoos. Tus tub hlob zuj zus tuaj thiab HUAB TAIS foom txoj hmoov zoo rau nws.
25 HUAB TAIS lub Tswv Yim tuaj tshoj nws.

NPN 71: 3-4a, 5-6ab, 16-17

Txais: ( Kuv lub ncauj yuav puv nkaus kev qhuas txog koj,
thiab kuv yuav hu nkauj cav txog koj lub koob meej !

Thov koj yog lub tsua rau kuv ua chaw nkaum,
koj ua lub yeej khov kho thaiv kuv,
vim koj yog kuv lub tsua thiab kuv lub yeej ntsa zeb.
Kuv tus Tswv Ntuj, thov koj cawm kuv ntawm tus phem txhais tes.

Txais…

Huab Tais, koj yog kuv lub chaw vam khom,
Tswv Ntuj, koj yog kuv lub chaw cia siab txij thaum hluas los lawm.
Txij thaum kuv yug los, kuv tso siab rau koj ib leeg xwb;
thaum kuv tseem nyob hauv kuv niam plab los,
koj yeej yog kuv lub zog.

Txais…

Kuv yuav qhuas txog HUAB TAIS cov hauj lwm muaj hwj huam;
Tswv Ntuj, kuv yuav piav txog koj txoj tseem kev ncaj ncees.
Tswv Ntuj, koj tau qhuab qhia kuv txij thaum hluas los lawm,
los txog nyem no, kuv tshaj koj cov hauj lwm txaus qhuas.

Txais…

As Les Lus Yas

Txais: As les lus yas, As les lus yas.

Aub! Tus cag hlav ntawm Yes Xes lub hauv paus tuaj,
koj yog lub cim qhia tias Tswv Ntuj hlub tas nrho nws haiv neeg,
thov koj tsuag tsuag tuaj cawm peb tsis txhob ncua ntev!

Txais: As les lus yas, As les lus yas.

Ntawv Moo Zoo: LUS KAS 1: 5-25

5 Lub zim txwv uas Hes Los ua vaj kav Yus Das teb, muaj ib tug Leej Choj hu ua Ntxas Kas Lias, nws yog phiaj Leej Choj As Npias. Nws poj niam hu ua Es Lis Xas Npes, yog As Loos ib tug ntxhais xeeb ntxwv.
6 Nkawd ob niam txiv yog neeg ncaj nyob ntawm Tswv Ntuj xub ntiag. Nkawd ua raws nraim li Huab Tais cov lus qhia thiab tej cai tas huv si, tsis muaj ib qho xyeej li.
7 Nkawd tsis muaj me nyuam, vim Es Lis Xas Npes xeeb tsis tau tub, thiab nkawd hnub nyug los kuj laus lawm.
8 Muaj ib hnub, Ntxas Kas Lias tab tom leg Leej Choj txoj kab xwm nyob ntawm Tswv Ntuj xub ntiag, vim txog lub caij nws phiaj Leej Choj rov leg kab xwm lawm.
9 Lawv rho ntawv raws li cov Leej Choj kev cai ua kam, ces Ntxas Kas Lias raug ua tus chaws mus hlawv xyab hauv Huab Tais Kem Tsev Ntshiab.
10 Lub caij hlawv xyab ntawd, tas tsoom pej xeem teev Ntuj nyob sab nraud.
11 Ces Huab Tais tus Tshiab tawm tuaj sawv ntsug nyob ntawm lub thaj hlawv xyab sab xis rau nws pom.
12 Ntxas Kas Lias pom dheev, nws ua siab nphau npog, nws ntshai kawg.
13 Tab sis tus Tshiab hais rau Ntxas Kas Lias tias: "Ntxas Kas Lias, koj txhob ntshai, vim Tswv Ntuj mloog koj cov lus thov lawm. Koj poj niam Es Lis Xas Npes yuav yug ib tug tub rau koj, koj yuav tis nws npe hu ua Zam.
14 Koj yuav kaj siab thiab zoo siab tas nrho. Thaum nws yug los, coob leej yuav zoo siab thiab.
15 Vim nws yuav yog ib tug loj nyob ntawm Huab Tais xub ntiag. Nws yuav tsis haus cov cawv muab kua txiv ua, tsis haus cov cawv ntsim li. Txij nruab thiab los, Leej Ntuj Plig Ntshiab yuav nyob puv hauv nws.
16 Nws yuav coj coob leej tub ki His Xas Lais rov los cuag Huab Tais, lawv tus Tswv Ntuj.
17 Nws yuav mus ua Huab Tais ntej, nyob hauv Es Lias lub tswv yim thiab lub hwj huam, kom nws coj tau cov ua txiv lub siab tig rov los rau lawv cov me nyuam, thiab coj cov neeg tsis mloog lus kom tig rov los muaj kev to taub raws li cov neeg ncaj, kom nws npaj tau ib haiv neeg tsim nyog txais tos Huab Tais.”
18 Ntxas Kas Lias hais rau tus Tshiab tias: "Yuav ua cas kuv thiaj paub tias yuav muaj raws li ntawd? Vim kuv yog ib tug neeg laus lawm, hos kuv poj niam los kuj muaj hnub nyoog lawm thiab."
19 Tus Tshiab teb tias:"Kuv yog Nkas Nplias, tus sawv nraim ntawm Tswv Ntuj xub ntiag. Nws xa kuv tuaj hais lus rau koj thiab fi tsab xov zoo no rau koj.
20 Nyem no, koj yuav nyob ntsiag to hais tsis tau lus ntxiv, mus txog hnub uas tej xwm ntawd tshwm sim tuaj tas tso, vim tias koj tsis ntseeg kuv cov lus uas yuav tsum tsheej xeeb tuaj thaum txog sij hawm lawm."
21 Tsoom pej xeem nyob tos Ntxas Kas Lias, lawv xav tsis thoob tias vim li cas nws thiaj nyob ntev ua luaj hauv Kem Tsev Ntshiab.
22 Thaum nws tawm los, nws hais tsis tau lus rau lawv, ces lawv to taub tias nyob hauv kem ntshiab nws tau pom ib yam yees tawm tuaj lawm. Nws piav tes rau lawv xwb, nws hais tsis tau lus li.
23 Thaum tas nws lub sij hawm leg kab xwm lawm, ces nws rov mus tsev.
24 Tsis ntev tom qab, Ntxas Kas Lias poj niam Es Lis Xas Npes xeeb tub. Nws nyob tsiv nraim tau tsib lub hlis, nws hais tias:
25 "Huab Tais tau ua tej yam zoo li no rau kuv, thaum txog lub caij nws pom zoo dauv muag los saib kuv, los tshem kuv txoj kev txaj muag rau zeej tsoom mus lawm."

Tim 20 lub 12 Hlis

Hnub Peb Lis Piam Plaub Caij Tos Huab Huab Tais Xyoo ABC Nruab Lis Piam Xyoo I & II
Lectionary: 196

Zaj Nyeem Ib: HX 7: 10-14

10 HUAB TAIS hais lus rau As Kas, nws hais tias:
11 "Koj thov koj tus HUAB TAIS Tswv Ntuj kom nws muab ib lub cim rau koj; Koj xav kom tawm nyob puag hauv qab ntuj txias teb tsaus, los puas nyob siab puag saum ntuj los tau."
12 As Kas hais tias: "Kuv yuav tsis thov. Kuv yuav tsis sim HUAB TAIS."
13 Ces His Xais hais tias: "Das Vis tsev neeg, nej mloog mas! Nej ua kom tej tib neeg ceeb laj tas nrho, los tsis txaus nej siab! Nej tseem yuav ua kom Tswv Ntuj ceeb laj thiab.
14 Vim li ntawd, Huab Tais yuav pub ib lub cim rau nej. Ntsia saib! Tus nkauj tsim txiaj yuav xeeb tub. Nws yuav yug ib tug tub. Nws yuav tis npe rau nws tus tub hu ua Es Mas Nus Es.

NPN 24: 1-2, 3-4ab, 5-6

Txais: (7c+10b) Nej cia Huab Tais chaws los; nws yog tus Vaj nto koob meej.

Lub ntiaj teb thiab txhua yam uas nyob hauv yog HUAB TAIS li,
Lub qab ntuj khwb thiab tas tsoom neeg nyob hauv yog HUAB TAIS tug.
Vim HUAB TAIS yog tus tsim lub ntiaj teb rau saum dej hiav txwv,
thiab teeb lub ntiaj teb kom ruaj rau saum cov niam dej.

Txais: (7c+10b) Nej cia Huab Tais chaws los; nws yog tus Vaj nto koob meej.

Leej twg yuav nce tau mus rau saum HUAB TAIS lub roob?
Leej twg yuav sawv taus nyob hauv nws thaj chaw ntshiab?
Yog tus neeg siab dawb siab huv, uas txhais tes tsis lo txhaum,
tus uas tsis ntshaw txog tej yam tsis muaj nqes,

Txais: (7c+10b) Nej cia Huab Tais chaws los; nws yog tus Vaj nto koob meej.

Nws yuav tau txais HUAB TAIS lo lus foom hmoov zoo,
yog paj tshab tuaj ntawm Tswv Ntuj tus cawm nws tuaj
Haiv neeg uas nrhiav Tswv Ntuj, lawv zoo li ntawd,
Lawv nrhiav Yas Kos tus Tswv Ntuj lub ntsej muag.

Txais: (7c+10b) Nej cia Huab Tais chaws los; nws yog tus Vaj nto koob meej.

As Les Lus Yas

Txais: As les lus yas, as les lus yas.

Aub! Das Vis tus yawm sij, uas qhib cov rooj vag
mus lawm hauv Tswv Ntuj lub Ceeb Tsheej nyob mus li,
thov koj tuaj tso cov neeg uas raug kaw nyob hauv kev tsaus ntuj.

Txais: As les lus yas, as les lus yas.

Ntawv Moo Zoo: LK 1: 26-38

26 Thaum muaj rau hli lawm, Tswv Ntuj xa tus Tshiab Nkas Nplias mus rau hauv ib lub zos nyob Nkas Lis Lais teb hu ua Naj Xas Les,
27 mus cuag ib tug ntxhais nkauj xwb uas lawv tau muab qhaib rau ib tug txiv neej hu ua Yos Xes, yog caj ces Das Vis lawm; tus nkauj xwb ntawd lub npe hu ua Mab Liab.
28 Tus Tshiab chaws mus hauv Mab Liab tsev, nws hais rau Mab Liab tias: "Koj nyob kaj lug, tus tau txiaj ntsim puv siab! Huab Tais nrog koj nyob."
29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus ntawd yog xav hais dab tsi.
Tus Tshiab hais rau nws tias: "Mab Liab, koj tsis txhob ntshai, vim Tswv Ntuj saib koj ntxim nws lub siab.
31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus.
32 Nws yuav yog ib tug loj, luag yuav hu nws ua tus Nyob Siab leej Tub; Huab Tais Tswv Ntuj yuav muab nws txiv Das Vis lub theej kiab rau nws zaum.
33 Nws yuav ua vaj kav Yas Kos tsev neeg tiam dhau tiam; nws txoj kev ua vaj yuav tsis muaj caij kawg."
34 Mab Liab hais rau tus Tshiab tias: "Qhov ntawd yuav muaj tuaj zoo li cas, vim kuv tsis paub ib tug txiv neej li?"
35 Tus Tshiab teb rau Mab Liab tias: "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub.
36 Saib! Es Lis Xas Npes, tus uas txheeb koj, luag hu nws ua pog khab seeb no, nws hnub nyoog laus lawm, tab sis nws kuj xeeb tub lawm thiab; lub hlis no, yog lub rau hli rau nws lawm.
37 Vim tias, tsis muaj ib yam uas Tswv Ntuj yuav ua tsis tau."
38 Ces Mab Liab hais tias: "Kuv yog Huab Tais tus ntxhais txib. Kuv xav kom muaj tuaj rau kuv raws li koj hais." Ces tus Tshiab tso Mab Liab tseg.

Tim     21     lub     12     Hlis    2022

Hnub Plaub Lis Piam PlaubCaij Tos Huab Tais Xyoo ABC Nruab Lis Piam Xyoo I & II    
Lectionary: 197

XHLT: LN Pob Zeb Canisius, ua Leej Choj thiab Kws cov Txuj Ntshiab

Zaj Nyeem Ib:   Kwv Txhiaj 2: 8-14

8   Mloog kuv tus hlub lub suab!
    Ntsia saib, nws tuaj lawm! Nws dhia hla toj roob hauv pes tuaj,
    nws dhia plhaw hla tej pov roob khiav tuaj.
9   Kuv tus hlub zoo puav tam li tus kauv, los tus thav muas lwj.
    Ntsia saib! Nws tuaj sawv nraum peb lub ntsa loog.
    Nws ntsia nraum qhov rai tuaj,
    nws xauj nraum cov ntxaij ntsia ntsoov tuaj.
10 Kuv tus hlub tsa suab hais rau kuv tias:
    "Koj sawv tsees mas, kuv tus me ntxim hlub,
    kuv tus neeg zoo, tawm tuaj mas!
11 Koj saib, lub caij ntuj no twb dhau lawm,
    nag twb tu thiab dua tas lawm.
12 Paj twb tawg puv tas teb chaws;
    yog lub caij mus txo tej ceg hmab txiv cawv lawm.
    Twb hnov tus nquab tsug pib quaj hauv peb lub teb chaws lawm.
13 Cov txiv cev pib ua cos ntsuab vog,
    cov hmab txiv cawv tawg paj tsw qab ntxiag.
    Sawv tsees los mas, kuv tus me ntxim hlub,
    kuv tus neeg zoo, tawm tuaj mas!
14 Kuv me nkauj nquab, koj nkaum hauv tej kis zeb saum tsua,
    hauv cov qhov nraim hauv tej phab zeb phab tsua.
    Tawm tuaj rau kuv pom yuad! Pub kuv hnov koj lub suab mas!
    Vim koj lub suab zoo mloog,
    thiab koj lub ntsej muag zoo ntxim nyiam kawg li.”

Los:   XFN 3: 14-18a

14 Leej me ntxhais Xis Yoos aw, koj cia li qw zoo siab mog!
Tsoom His Xas Lais, nej kav tsij hu nkauj luag ntxhi mas!
    Me ntxhais Yes Lus Xas Les, koj cia li muab tas
koj lub siab los dhia zoo siab hom khaj mog!
15 HUAB TAIS tau tshem koj lub txim mus lawm,
nws tau ntiab koj cov yeeb ncuab kom rov qab tas.
    Huab Tais, His Xas Lais tus Vaj tuaj nyob nruab nrab hauv koj lawm,
koj yuav tsis ntshai kev raug xwv txheej ntxiv.
16 Hnub ntawd, luag yuav hais rau Yes Lus Xas Les tias:
“Xis Yoos, koj txhob ntshai mog, koj txhob ntaus siab me kiag li.
17 HUAB TAIS koj tus Tswv Ntuj nyob nruab nrab hauv koj;
nws yog tus muaj hwj huam cawm neeg.
    Nws zoo siab heev rau koj,
     nws kev hlub yuav ua kom koj rov tshiab tuaj.
Nws yuav hu nkauj zoo siab luag ntxhi yog vim koj,
18a xws li ib tug neeg hu nkauj hauv cov ntees lom zem.”

NPN   33: 2-3, 11-12, 20-21

Txais: (1a,3a) Cov neeg ncaj, nej cia li zoo siab nyob hauv Huab Tais!
Nej hu ib zaj nkauj tshiab rau nws.

Nej ntaus nkauj nog ncas ua HUAB TAIS tsaug.
Nej ntaus nkauj nog ncas kaum txoj hlua cav txog nws!
Nej hu ib zaj nkauj tshiab rau nws,
nej ua tib zoo qoj cov hlua ncas nrog suab qw zoo siab.

Txais: (1a,3a) Cov neeg ncaj, nej cia li zoo siab nyob hauv Huab Tais!
Nej hu ib zaj nkauj tshiab rau nws.

Tej yam HUAB TAIS npaj yuav nyob mus li,
Yam nws lub siab xav ua yuav nyob txheej dhau txheej.
Haiv neeg uas tus Tswv Ntuj yog HUAB TAIS, lawv txoj hmoov zoo,
lawv yog cov neeg Huab Tais tau xaiv los ua nws lub cuab tam.

Txais: (1a,3a) Cov neeg ncaj, nej cia li zoo siab nyob hauv Huab Tais!
Nej hu ib zaj nkauj tshiab rau nws.

Peb tus ntsuj plig tos ntsoov HUAB TAIS:
nws yog tus pab peb, nws yog daim leem phiaj thaiv peb.
Vim peb kev zoo siab yog nyob hauv nws,
peb chaw tso siab yog nyob hauv nws lub npe ntshiab.

Txais: (1a,3a) Cov neeg ncaj, nej cia li zoo siab nyob hauv Huab Tais!
Nej hu ib zaj nkauj tshiab rau nws.

As Les Lus yas

Txais: As les lus yas, as les lus yas.

Aub! Es Mas Nus Es, koj yog peb tus Vaj, tus muab Txoj Cai rau peb,
thov koj tuaj cawm peb, Huab Tais peb tus Tswv Ntuj!

Txais: As kles lus yas, as les lus yas.

Ntawv Moo Zoo:   LK 1: 39-45

39 Tau ob peb hnub tom qab, Mab Liab sawv kev mus; nws rau siab ntso mus pem toj siab, mus rau ib lub nroog nyob xeev Yus Das.
40 Nws chaws mus hauv Ntxas Kas Lias tsev, nws tsa suab hu Es Lis Xas Npes.
41 Thaum Es Lis Xas Npes hnov Mab Liab lub suab hu, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes,
42 ces Es Lis Xas Npes tsa suab hlo hais nrov nrov tias: "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov.
43 Yog ua cas thiaj muaj li no rau kuv, cas kuv tus Huab Tais leej niam thiaj tuaj xyuas kuv?
44 Koj saib, thaum kuv hnov dheev koj lub suab hu nrov txog kuv pob ntseg, mas tus me nyuam hauv kuv plab dhia zoo siab.
45 Tus uas tau ntseeg tias cov lus Huab Tais hais rau nws yuav tsheej xeeb tau, mas nws txoj hmoov zoo."

Tim 22 lub 12 Hlis 2022

Hnub Tsib Lis Piam Plaub Caij Tos Huab Tais Xyoo ABC Nruab Lis Piam Xyoo I & II
Lectionary: 198

Zaj Nyeem Ib: 1 XAS MUAS 1:24-28

24 Thaum tus me nyuam Xas Muas cais mis lawm, As Nas coj tus me nyuam nrog ib tug heev nyuj muaj peb xyoos, ib tawb hmoov nplej thiab ib hnab tawv cawv, mus fij rau Ntuj hauv HUAB TAIS lub tuam tsev uas nyob Xis Laus; tus me nyuam tseem me me.
25 Thaum nws txiv muab tus heev nyuj tua txi ntuj tas ces nws niam As Nas coj nws mus cuag Es Lias.
26 As Nas hais tias: "Yawg Hlob, kuv thov txim ntawm koj! Tseeb ib yam li koj muaj txoj sia, kuv yog tus poj niam uas tau txhos caug nyob ze koj ntawm no thov HUAB TAIS.
27 Tus me nyuam no yog tus uas kuv tau teev ntuj thov, ces HUAB TAIS tau muab nws rau kuv raws li kuv tau thov.
28 Mas nyem no kuv xav muab nws fij rau HUAB TAIS, kom tas nws sim neej, nws yog tus raug muab qee rau HUAB TAIS."
Ces nws niam muab nws tso tseg rau Huab Tais nyob ntawd.

NPN: 1 XAS MUAS 2: 1, 4-5, 6-7, 8abcd

Txais: (1a) Kuv lub siab hom khaj nyob hauv Huab Tais, tus Cawm kuv

Kuv lub siab hom khaj nyob hauv HUAB TAIS,
kuv lub zog loj tuaj nyob hauv kuv tus Tswv Ntuj.
Kuv qhib ncauj hais lus tsis txuag kuv cov yeeb ncuab,
kuv zoo siab vim kuv muaj kev yeej lawm.

Txais…

Cov neeg muaj hwj chim rab hneev dam tas,
hos tus muag luav txais lub zog los sia ntawm duav.
Cov neeg ib txwm muaj noj yuav tsum mus ua zog thiaj tau noj,
hos cov uas thaud tshaib plab tau noj seem noj so.
Tus poj khab seeb yug tau xya leej tub,
hos tus muaj tub coob ua neeg qaug zog zuj zis.

Txais…

HUAB TAIS ua kom txawj tuag thiab ua kom muaj sia tuaj;
nws muab pov rau ntuj txias teb tsaus,
nws rub kom sawv tau rov los.
HUAB TAIS ua kom pluag thiab ua kom muaj,
Nws txo kom qis, thiab nws muab tsa rau qhov siab.

Txais…

Nws tsa cov neeg pluag hauv plua tshauv los,
nws rub cov txom nyem tawm hauv qhov chaw qias los,
kom lawv tau nrog cov nom tswv zaum,
kom tau muab ib lub rooj zaum nto koob meej rau lawv ua lawv tug.

Txais…

As Les Lus Yas

Txais: As les lus yas, as les lus yas

Aub! Tus Vaj kav tas txhia haiv neeg
thiab lub pob zeb txheem lub Koom Txoos,
thov koj tuaj cawm tib neeg uas koj tau muab av los puab mas!

Txais: As les lus yas, as les lus yas

Ntawv Moo Zoo: LUS KAS 1: 46-56

46 Mab Liab hais tias:
"Kuv tus plig cav txog Huab Tais lub hwj chim loj,
47 kuv lub tswv yim hom khaj nyob hauv Tswv Ntuj, tus Cawm kuv,
48 vim nws tau dauv muag los ntsia nws tus ntxhais txib tsis muaj tsim.
Vim li ntawd, txij no mus, txhua tiam neeg
yuav hais tias kuv txoj hmoov zoo;
49 vim tus Muaj Hwj Huam tau ua tej yam loj rau kuv,
nws lub npe Ntshiab.
50 Nws lub siab khuv keej cov neeg uas hwm nws tiam dhau tiam.
51 Nws sab npab nthuav nws lub zog rau sawv daws pom.
Cov neeg uas lub siab muab hlob, HuabTais ua kom lawv tawg tas.
52 Huab Tais nchuav cov muaj hwj chim
kom poob ntawm lawv lub theej kiab,
nws tsa cov neeg me kom siab.
53 Nws pub tej yam zoo rau cov neeg tshaib noj seem noj so,
hos nws ntiab cov neeg muaj rov qab mus tes qhuav.
54 HuabTais tuaj pab nws tus tub txib His Xas Lais,
vim nws nco ntsoov tias nws tau cog lus yuav khuv leej neeg,
55 yog lo lus nws tau cog rau peb cov yawg koob,
rau Has Nplas Has thiab nws cov xeeb ntxwv
mus tas ib txhiab ib txhis."
56 Mab Liab nrog Es Lis Xas Npes nyob peb lub hlis tej,
ces nws mam rov mus tsev lawm.

Tim 23 lub 12 Hlis 2022

Hnub Rau Lis Piam Plaub Caij Tos Huab Tais Xyoo ABC Nruab Lis Piam Xyoo I & II
Lectionary: 199

XHLT: LN John nyob Kanty, ua Leej Choj

Zaj Nyeem Ib: MLK 3: 1-4, 23-24

Huab Tais Tswv Ntuj hais li no:
1 “Kuv yuav xa kuv tus tub tshaj xov mus kho kev ua kuv ntej.
Ces ib sij huam, tus Huab Tais uas nej nrhiav yuav chaws los hauv nws lub tuam tsev, yog tus tub tshaj txog txoj kev cog lus uas nej ntshaw. Saib, nws tuaj txog ntawd lawm!" Tus HUAB TAIS kav tsoom tshiab hais li ntawd.
2 “Leej twg thiaj yuav tiv taus hnub nws tuaj txog? Leej twg thiaj yuav sawv taus ntseg thaum nws tawm plaws los? Vim nws yuav zoo li cov hluav taws nchuav nyiaj nchuav kub, thiab zoo li cov tshuaj ntxhua xov kom dawb.
3 Nws yuav zaum ua tus nchuav nyiaj thiab ua kom nyiaj dawb tuaj.
Nws yuav ua kom Les Vis cov tub huv tuaj, thiab yuav muab lawv nchuav xws li nchuav nyiaj thiab nchuav kub, kom lawv ua tau cov tub
cev thaj txi ntuj rau HUAB TAIS raws txoj kev tseem ceeb.
4 Ces HUAB TAIS yuav pom zoo txais Yus Das thiab Yes Lus Xas Les cov thaj txi Ntuj, ib yam li txheej thaum ub, thaum lub caij dhau los lawd.
23 Ntsia saib, kuv yuav xa tus yaj saub Es Lias tuaj rau nej, ua ntej hnub
HUAB TAIS yuav tuaj, uas yog ib hnub loj thiab txaus ntshai kawg nkaus.
24 Nws yuav rub tau cov ua niam ua txiv lub siab rov mus hlub lawv cov tub cov ntxhais, thiab cov tub cov ntxhais lub siab rov mus hlub lawv niam lawv txiv, tsis li ntawd ces kuv yuav tsum tau tso kev puas tsuaj puas ntsoog tuaj raug lub ntiaj teb.”

NPN 25: 4-5ab, 8-9, 10+14

Txais: (LK 21:28) Nej tsa taub hau ntsia mas,
ces nej yuav pom tias nej txoj kev dim nyob ze ze lawm.

HUAB TAIS, thov koj ua kom kuv paub koj tej kev,
thov qhia koj tej kev rau kuv kawm.
Coj kuv mus taug koj txoj kev tseeb, thiab thov qhia rau kuv,
vim koj yog Tswv Ntuj tus cawm kuv.

Txais…

HUAB TAIS yog tus siab zoo thiab siab ncaj,
nws qhia cov neeg txhaum rov los taug txoj kev zoo.
nws coj cov neeg me mus rau txoj kev ncaj,
nws qhia nws txoj kev rau cov neeg me paub.

Txais…

Tas HUAB TAIS tej kev yog kev ua siab zoo thiab ua siab ncaj
rau cov neeg coj rawv nws txoj kev cog lus thiab nws txoj cai.
Cov neeg hwm HUAB TAIS thiaj yog nws cov phooj ywg,
thiab nws txoj kev cog lus yog txoj kev qhuab qhia lawv.

Txais…

As Les Lus Yas

Txais: As les lus yas, as les lus yas

Aub! Tus ua vaj kav tas txhua haiv neeg
thiab lub pob zeb txheem lub Koom Txoos,
thov koj tuaj cawm tib neeg uas koj tau muab av los puab mas!

Txais: As les lus yas, as les lus yas

Ntawv Moo Zoo: LK 1: 57-66

57 Thaum txog lub caij Es Lis Xas Npes daws cev lawm, nws yug tau ib tug tub.
58 Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes kawg nkaus, lawv nrog nws zoo siab.
59 Thaum txog hnub yim, lawv tuaj ua lub cim txiav tawv rau tus me nyuam, lawv xav tis nws npe raws li nws txiv Ntxas Kas Lias lub npe.
60 Tiam sis nws niam hais tias: "Tsis yog. Tus me nyuam yuav hu ua Zam."
61 Lawv hais rau leej niam tias: "Tsis muaj ib tug hauv neb cov txheeb ze hu li ntawd li."
62 Ces lawv piav tes rau leej txiv saib nws xav kom lawv tis tus me nyuam npe li cas.
63 Leej txiv kom lawv muab ib daim txiag sau ntawv los, nws sau tias: "Nws lub npe hu ua Zam." Sawv daws ceeb tas.
64 Tam sis ntawd, leej txiv lub ncauj qhib plho, tus nplaig muag nthas, ces nws hais tau lus, thiab cav txog Tswv Ntuj.
65 Tsoom neeg nyob ze nkawd sawv daws tau ntshai kawg. Hos nyob pem toj siab hauv xeev Yus Das, sawv daws tham zom zaws txog tej xwm ntawd.
66 Cov uas tau hnov luag tham txog tej xwm no, muab khaws cia rau nruab siab, lawv hais tias: "Tus me nyuam ntawd yuav yog ib tug zoo li cas? Vim Huab Tais txhais tes yeej nrog nraim tus me nyuam ntawd tiag.”

Tim 24 lub 12 Hlis 2022

Hnub Xya Lis Piam Plaub Caij Tos Huab Tais Xyoo ABC Nruab Lis Piam Xyoo I & II

Mis Xas sawv ntxov rau Caij Tos Huab Tais.
Lectionary: 200

Zaj Nyeem Ib: 2 XM 7: 1-5, 8b-12, 14a, 16

1 Thaum vaj Das Vis tshais los nyob hauv nws lub tsev lawm thiab HUAB TAIS pub kom nws tau so tsis muaj kev tawm tsam nrog nws cov yeeb ncuab nyob ib ncig ntawm nws lawm,
2 mas nws hais rau tus yaj saub Nas Taas tias: "Koj ntsia saib! kuv nyob hauv ib lub tsev ntoo thwj suab, hos Tswv Ntuj lub Xab Cog Lus nyob hauv ib lub Tsev Tsam Phooj xwb!"
3 Nas Taas teb rau tus vaj tias: "Koj mus ua raws li koj lub siab xav los mas, vim HUAB TAIS yeej nrog nraim koj."
4 Tiam sis hmo ntawd, HUAB TAIS hais lus rau Nas Taas tias:
5 "Koj mus hais rau kuv tus tub txib Das Vis li no: ‘HUAB TAIS hais tias: Koj puas yog tus yuav txhim ib lub tsev rau kuv nyob?
8b Kuv yog tus tau rho koj tawm hauv cov tshav zaub thiab hauv txoj kev tu tsiaj los tsa ua tus tswj kuv haiv neeg His Xas Lais.
9 Koj mus txog twg kuv tau nrog koj nraim, thiab tau rhuav tshem koj cov yeeb ncuab ntawm koj hauv ntej tas tib si. Kuv yuav ua kom koj muaj koob nto npe ib yam li cov neeg tseem ceeb nyob hauv ntiaj teb.
10 Kuv yuav qee ib thaj av rau kuv haiv His Xas Lais nyob; kuv yuav coj lawv mus cog rau ntawd kom lawv nyob muaj chaw, ces lawv yuav tsis ntsib kev nyuaj siab ntxiv; cov neeg phem yuav tsis tsuj lawv ntxiv xws li yav dhau los lawm,
11 xws li lub caij txij thaum kuv xub tau tsa ib co txwj laus txiav txim los tswj kuv haiv His Xas Lais lawm.
Ces kuv yuav cia koj tau so, tsis raug koj cov yeeb ncuab ua phem rau koj ntxiv. HUAB TAIS tseem qhia ntxiv rau koj tias, nws yuav tsa ib tsev neeg rau koj.
12 Thaum koj lub neej dua lawm, thiab koj mus so nrog koj cov poj yawm txwv koob lawm, kuv yuav tsa koj ib tug xeeb ntxwv sawv lawv koj qab los; nws yuav tawm ntawm koj roj koj ntshav los, thiab kuv yuav tsa nws ua vaj kom nyob ruaj nreb.
14a Kuv yuav yog nws txiv, nws yuav yog kuv ib leeg tub.
16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag; koj lub theej kiab yuav nyob ruaj nreb mus ib txhis."

NPN 89: 2-3, 4-5, 27+29

Txais: (2) Kuv yuav hu nkauj mus li cav txog HUAB TAIS lub siab zoo.

Kuv yuav hu nkauj mus li cav txog HUAB TAIS tej kev ua zoo,
kuv lub ncauj yuav tshaj txog koj txoj kev ua siab ncaj
rau txhua tiam neeg paub.
Vim koj tau hais tias: “Kuv txoj kev ua siab zoo yuav nyob ruaj mus li;”
nyob saum ntuj koj tau cog koj txoj kev ua siab ncaj kom nyob ruaj nreb.

Txais…

“Kuv tau cog lus nrog tus kuv tau xaiv,
kuv tau cog lus ruaj rau Das Vis kuv tus tub txib tias:
kuv yuav nres koj caj ces kom nyob ruaj nreb mus li,
thiab yuav tsa koj lub theej kiab kom nyob tiam dhau tiam,”

Txais…

“Nws yuav hais rau kuv tias, ‘Koj yog kuv txiv,
kuv tus Tswv Ntuj, kuv lub tsua, kuv tus cawm seej.’
Kuv yuav ua siab zoo rau nws mus tas ib txhis,
thiab kuv txoj kev nrog nws cog lus yuav nyob ruaj nreb.”

Txais…

As Les Lus Yas

Txais: As les lus yas, as les lus yas

Aub! Qhov Kaj Ntug ci ntsa iab,
Qhov pom kev ci ntsa paug mus li, lub hnub muaj kev ncaj ncees,
thov koj tuaj ci kaj cov neeg uas nyob hauv kev tsaus ntuj
thiab hauv txoj kev tuag tus duab ntxoov ntxoo.

Txais: As les lus yas, as les lus yas

Ntawv Moo Zoo: LK 1: 67-79

67 Ces Ntxas Kas Lias, uas yog tus me nyuam leej txiv, muaj Leej Ntuj Plig Ntshiab nyob puv hauv nws, nws thiaj ua yaj saub hais tias:
68 "Kom Huab Tais, His Xas Lais tus Tswv Ntuj nto koob meej,
vim nws tau tuaj xyuas nws haiv neeg thiab tuaj txhiv lawv lawm.
69 Nws tau tsa ib tug Cawm Seej muaj zog rau peb lawm,
uas yug los nyob hauv nws tus tub txib Das Vis tsev neeg,
70 raws li nws tau kom nws cov yaj saub ntshiab ib txwm hais txheej thaud los tias:
71 Nws cog lus yuav cawm peb ntawm peb cov yeeb ncuab, thiab ntawm cov neeg ntxub peb txhais tes.
72 Nws tau cog lus tias yuav khuv leej peb cov yawg koob, thiab yuav nco ntsoov txog nws txoj kev cog lus ntshiab,
73 uas yog lo lus nws tau cog rau peb txiv Has Nplas Has tias :
74 Nws yuav cawm peb dim ntawm peb cov yeeb ncuab txhais tes, kom peb tau kev twj lij tsis ntshai pe hawm nws,
75 tau kev ua neeg ntshiab thiab neeg ncaj nyob ntawm nws xub ntiag tas peb sid.
76 Hos koj, me tub, luag yuav hu koj ua Leej Nyob Siab tus yaj saub; vim koj yuav mus ua Huab Tais ntej, koj yuav npaj nws txoj kev.
77 Koj yuav qhia nws haiv neeg kom lawv paub txog txoj kev cawm, uas yog los ntawm txoj kev lawv tau txais kev zam lawv cov txhaum los.
78 Vim peb tus Tswv Ntuj muaj lub siab mos siab muag khuv leej peb, ces kev kaj ntug saum txheej siab yuav tawm tuaj rau peb,
79 yuav ci tuaj kaj cov neeg zaum nyob hauv qhov tsaus ntuj thiab nyob hauv kev tuag tus duab ntxoov ntxoo; nws yuav coj peb txhais taw kom mus taug txoj kev thaj yeeb."

Tim      26       lub      12       Hlis     2022    

Caij Yes Xus Yug - Hnub Ob Hauv Thawj Yim Hnub Yes Xus Yug Los

Hwm Leej Ntshiab Tes Fas Nos (Stephen), Thawj tus Tuag Ua tim Khawv
Lectionary: 696

Zaj Nyeem Ib:       HAUJ LWM  6:   8-10; 7:54-59

6:  8 Tes Fas Nos yog ib tug neeg muaj txiaj ntsim thiab muaj hwj chim puv npo. Nws ua ib co hwj huam yees ntxwv thiab ib co cim loj kawg nyob hauv tsoom pej xeem.
9 Ces muaj ib co neeg tuaj ntawm lub tsev txoos hu ua Cov Tau Txais Kev Twj Lij lub tsev txoos tuaj; lawv yog ib co neeg nyob Xis Les Nas, nyob As Les Xaas Nrias, nyob Xis Lis Xias, thiab nyob As Xias tuaj.
10 Lawv txav los nrog Tes Fas Nos sib cav, tab sis lawv tsis muaj peev xwm cav yeej nws, vim nws muaj kev thoob tsib thiab muaj Leej Tswv Yim qhia nws hais lus.
7:  54 Thaum lawv hnov nws cov lus, mas lawv npau taws ceev kawg thiab lawv zim hniav zaig rau nws xwb.
55 Tiam sis Leej Ntuj Plig Ntshiab nyob puv hauv nws lub siab, ces nws tsa muag ntsia ntsoov rau saum ntuj, nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis.
56 Nws hais tias: "Kuv pom lub ntuj qhib los, thiab pom Neeg Leej Tub sawv ntsug ntawm Tswv Ntuj sab xis."
57 Tiam sis cov neeg ntawd cia li nthe nrov nrov, lawv pos pob ntseg thiab sawv daws ua ib tsaug khiav mus rau ntawm Tes Fas Nos.
58 Lawv thawb Tes Fas Nos mus rau sab nroog nraud, ces lawv txawb pob zeb tua nws. Cov ua tim khawv tso lawv tej khaub ncaws rau ntawm ib tug tub hluas hu ua Xauv ko taw.
59 Thaum lawv tab tom txawb pob zeb rau Tes Fas Nos mas nws thov Ntuj li no tias : "Huab Tais Yes Xus, thov koj txais kuv tus ntsuj plig."

NPN  31: 3cd-4, 6+8ab, 16bc+17

Txais: (6) Huab Tais, kuv tso kuv tus ntsuj plig
rau hauv koj txhais tes.

Thov koj ua kuv lub tsua rau kuv tau chaw nkaum,
ua ib lub loog ruaj khov thaiv kuv.
Koj yog kuv lub tsua thiab kuv lub ntsa loog zeb;
vim koj saib koj lub npe, koj yuav coj kuv kev
thiab qhia kev rau kuv taug.

Txais…

Kuv muab kuv tus ntsuj plig tso rau hauv koj ob txhais tes;
HUAB TAIS, tus Tswv Ntuj pheej xeeb, koj yeej yuav txhiv kuv;
Kuv yuav zoo siab thiab luag ntxhi vim koj txoj kev khuv leej.

Txais…

Thov koj cawm kuv dim ntawm kuv cov yeeb ncuab
thiab cov tsim txom kuv txhais tes.
Thov cia koj lub ntsej muag ci hob tuaj rau saum koj tus tub txib;
thov cawm kuv vim koj muaj lub siab zoo.

Txais…

As Les Lus Yas:       NPN 118: 26a, 27a

Txais: As les lus yas, As les lus yas

Kom tus uas tuaj ntawm Huab Tais lub npe tuaj nto koob meej;
HUAB TAIS yog Tswv Ntuj, nws muab txoj kev pom kev rau peb lawm.

Txais: As les lus yas, As les lus yas

Ntawv Moo Zoo:       MT  10:   17-22

Yes Xus hais rau nws cov thwj tim tias:
17 "Nej ceev faj txog tib neeg, vim lawv yuav mus kom nej rau cov rooj txwj laus txiav txim, thiab yuav nplawm nej nyob hauv cov tsev txoos.
18 Luag yuav coj nej mus rau cov nom thiab cov vaj vim kuv, kom nej tau ua tim khawv txog kuv nyob ntawm cov nom tswv thiab cov teev pej kum dab xub ntiag.
19 Thaum lawv coj nej mus rau luag, mas nej tsis txhob txhawj tias yuav hais li cas thiab yuav teb dab tsi. Thaum txog sij hawm, mas nej mam li yuav tau txais cov lus uas nej yuav hais.
20 Vim tsis yog nej yuav hais lus, yog nej Txiv leej Tswv Yim yuav hais tawm hauv nej los.
21 Kwv tij yuav muab kwv tij muag rau luag tua, thiab leej txiv yuav muab nws tus me nyuam muag rau luag tua; tej me nyuam yuav sawv tiv niam thiab txiv, thiab yuav muab nkawd rau luag tua.
22 Sawv daws yuav ntxub nej vim kuv lub npe, tab sis, leej twg ua siab ntev nyiaj mus txog qhov kawg, mas nws yuav txais kev cawm."