COV ZAJ NYEEM NRUAB LIS PIAM XYOO I 2022-2023

Tim     19     lub     5     Hlis     2023

Hnub Rau Lis Piam Rau Caij Hla Xyoo ABC Nruab Lis Piam Xyoo I & II
Lectionary: 295

Zaj Nyeem Ib:   HAUJ LWM 18: 9-18

9 Muaj ib hmos, thaum Paj Lug nyob Kos Lis Nthos, Huab Tais yees tawm tuaj hais rau nws tias:
"Koj tsis txhob ntshai, koj kav tsij hais lus, tsis txhob nyob ntsiag to,
10 vim kuv nrog nraim koj, tsis muaj leej twg yuav ntaus thiab ua phem rau koj tau, vim tias kuv muaj ib pab neeg coob nyob hauv lub tsheej no."
11 Ces Paj Lug thiaj nyob hauv lub tsheej ntawd ib xyoos thiab rau hli. Nws qhia Tswv Ntuj lo lus rau lawv.
12 Tiam sis thaum Nkas Lis Os ua pwm tsav kav lub xeev As Kais, cov Yus Das koom
sawv ntxeev siab rau Paj Lug, lawv coj nws tuaj kom rau lub tsev txiav txim.
13 Lawv hais tias: "Tus neeg no haub zeej tsoom tsis haum raws li txoj cai, kom sawv daws teev Tswv Ntuj."
14 Paj Lug tseem yuav qhib ncauj hais lus, tab sis Nkas Lis Os twb teb ntua rau cov Yus Das tias: "Cov Yus Das, yog nej hais txog kev ua phem lim hiam los kev ua tsis ncaj li cas, mas kuv yuav pab nej hais raws li txoj cai.
15 Tab sis yog nej sib cav hais txog ib txog kev teev hawm thiab tej lub npe, thiab ib txog cai uas yog nej txoj, mas cia nej sib hais nej xwb, kuv tsis kam ua tus txiav txim rau tej yam ntawd."
16 Ces Nkas Lis Os ntiab lawv tawm hauv tsev txiav txim mus.
17 Lawv thiaj ntes tus tswj saib lub tsev txoos hu ua Xos Thes Nes; lawv muab nws ntaus rau cov neeg nyob hauv lub tsev txiav txim ntsia, tiam sis Nkas Lis Os tsis quav ntsej txog tej ntawd li.
18 Paj Lug tseem nyob ib lub sij hawm ntau hnub hauj sim ntxiv, nws thiaj hais rau cov kwv tij tias nws yuav ncaim lawv mus, ces nws nce nkoj mus rau Xis Lias teb; Phis Xis Las thiab As Kis Las nkawd kuj nrog nws mus thiab.
Nyob Xees Qhes, Paj Lug chais nws cov plaub hau, vim nws tau ua ib qho kev cog lus lawm.

NPN   47: 2-3, 4-5, 6-7

Txais: (8a) Tswv Ntuj ua vaj kav tas lub ntiaj teb.
los: Alleluia.

Txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS, tus nyob siab, tus zoo tshaj,
yog tus vaj loj kav tas nrho lub ntiaj teb.

Txais: (8a) Tswv Ntuj ua vaj kav tas lub ntiaj teb.
los: Alleluia.

Nws coj cov haiv neeg los zwm rau peb,
nws tso cov kuj cuab rau hauv peb qab xib taws.
Nws xaiv peb lub cuab tam rau peb,
yog Yas Kos tus nws nyiam lub koob meej.

Txais: (8a) Tswv Ntuj ua vaj kav tas lub ntiaj teb.
los: Alleluia.

Tswv Ntuj nce rau saum nws lub theej kiab, muaj suab zoo siab
HUAB TAIS nce mus, muaj suab hom nrov.
Nej hu nkauj cav txog Tswv Ntuj, nej cav txog nws,
nej hu nkauj cav txog peb tus vaj, nej cav txog nws.

Txais: (8a) Tswv Ntuj ua vaj kav tas lub ntiaj teb.
los: Alleluia.

As Les Lus yas:   LK 24: 46, 26

Txais: As les lus yas, as les lus yas.

Leej Pleev yuav tsum tau raug txom nyem
thiab sawv hauv cov tuag rov los,
ces nws thiaj tau mus rau hauv nws lub hwj chim.

Txais: As les lus yas, as les lus yas.

Ntawv moo Zoo:   ZAM 16: 20-23

Yes Xus hais rau nws cov thwj tim tias:
20 “Kuv hais qhov muaj tseeb tiag rau nej:
Nej yuav quaj thiab nej yuav nyiav, hos lub qab ntuj neeg yuav zoo siab.
Nej yuav tu siab loj, tab sis nej txoj kev tu siab yuav hloov ua kev zoo siab.
21 Thaum ib tug poj niam daws cev, mas nws tau kev mob kev ntsaj, vim txog nws caij lawm.
Tab sis thaum nws yug tau tus me nyuam lawm, mas nws tsis nco zaj mob ntxiv,
vim nws zoo siab tias ib tug me nyuam tau yug los nyob hauv ntiaj teb no lawm.
22 Nej kuj ib yam, nyem no nej tu siab, tab sis kuv yuav rov pom nej dua,
ces nej yuav zoo siab, yuav tsis muaj leej twg tshem tau nej txoj kev zoo siab ntawm nej mus.
23 Hnub ntawd, nej yuav tsis nug kuv txog dab tsi lawm.
Kuv hais qhov muaj tseeb tiag rau nej: Nej tuav txog kuv lub npe thov dab tsi
ntawm Leej Txiv, mas nws yuav muab rau nej.”

Tim     20     lub     5     Hlis     2023

Hnub Xya Lis Piam Rau Caij Hla Xyoo ABC Nruab Lis Piam Xyoo I & II
Lectionary: 296

Yuav Hwm LN Bernardine nyob Siena, ua Leej Choj

Zaj Nyeem Ib:   HAUJ LWM 18: 23-28

23 Paj Lug nyob As Caus Kus ib ntus, ces nws sawv kev, nws mus ncig cov teb chaws Nkas Las Tias
thiab Fis Zias ib qho dhau ib qho zuj zus, mus pab txhawb zog rau cov thwj tim.
24 Muaj ib tug neeg Yus Das hu ua As Pos Los, yug los nyob As Les Xas Nrias, yog neeg txawj hais lus, nws tuaj txog Es Fes Xos; nws yog ib tug kws paub Ntawv Ntshiab zoo.
25 Muaj neeg tau qhia nws kawm txog Huab Tais Txoj Kev; Leej Ntuj Plig ua nws kub siab lug hais lus thiab qhia tej yam raug kawg txog Yes Xus, txawm tias nws tsuas paub Zam lub cim ntxuav xwb.
26 Nws pib qhuab qhia tsis ua xyem xyav li nyob hauv lub tsev Txoos.
Thaum Phis Xis Las thiab As Kis Las nkawd hnov nws cov lus, nkawd coj nws nrog nkawd,
thiab nkawd qhia Tswv Ntuj Txoj Kev rau nws kom meej dua.
27 Thaum nws xav mus As Kais teb, cov kwj tij txhawb nws kom ua siab loj mus.
Lawv sau ib tsab ntawv mus rau cov thwj tim tid kom lawv txais nws. Thaum nws
tuaj txog lawm, nws pab txhawb cov uas tau txais lub txiaj ntsim los ntseeg ntau kawg.
28 Vim nws tsis ntshai tab meeg hais lus tiv cov Yus Das,
nws siv Ntawv Ntshiab los qhia tias Yes Xus yeej yog Leej Pleev tiag.

NPN   47: 2-3, 8-9, 10

Txais: (8a) Tswv Ntuj ua vaj kav tas nrho lub ntiaj teb.
los: As les lus yas.  

Tas txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS tus nyob siab, tus zoo tshaj,
yog tus vaj loj kav tas nrho lub ntiaj teb.

Txais: (8a) Tswv Ntuj ua vaj kav tas nrho lub ntiaj teb.
los: As les lus yas.

Vim tus vaj kav tas nrho lub ntiaj teb yog Tswv Ntuj,
nej cia li hu nkauj cav txog nws.
Tswv Ntuj tswj cov haiv neeg;
Tswv Ntuj zaum saum nws lub theej kiab ntshiab.

Txais: (8a) Tswv Ntuj ua vaj kav tas nrho lub ntiaj teb.
los: As les lus yas.

Cov vaj txheeb hauv txhua haiv neeg tuaj sib sau ua ke
nrog Has Nplas Has tus Tswv Ntuj haiv neeg.
Vim cov saib xyuas lub ntiaj teb yog Tswv Ntuj neeg,
nws yog tus loj tshaj tas nrho.

Txais: (8a) Tswv Ntuj ua vaj kav tas nrho lub ntiaj teb.
los: As les lus yas.

As Les Lus Yas:   ZAM 16: 28

Txais: As les lus yas, as les lus yas.

Kuv tuaj ntawm Leej Txiv tuaj rau hauv lub ntiaj teb,
zaum no kuv yuav tso ntiaj teb tseg thiab rov mus cuag Leej Txiv.

Txais: As les lus yas, as les lus yas.

Ntawv Moo Zoo:   ZAM 16: 23b-28

Yes Xus hais rau nws cov thwj tim tias:
23b “"Kuv hais qhov muaj tseeb tiag rau nej:
Nej tuav txog kuv lub npe thov dab tsi ntawm Leej Txiv, mas nws yuav muab rau nej.
24 Los txog tav no, nej tseem tsis tau tuav txog kuv lub npe thov ib yam dab tsi li.
Nej thov ces nej yuav tau txais, kom nej thiaj yuav muaj kev zoo siab puv npo.
25 Kuv tau siv tej zaj paj lug los hais tej no rau nej. Txog lub caij lawm uas kuv yuav
tsis siv paj lug los hais rau nej ntxiv. Kuv yuav ncaj qha qhia meej txog Leej Txiv rau nej.
26 Txog hnub ntawd, nej yuav tuav txog kuv lub npe los thov.
Kuv tsis hais rau nej tias kuv yuav thov Leej Txiv rau nej.
27 Vim Leej Txiv twb nyiam nej lawm, vim tias nej nyiam kuv,
thiab nej ntseeg tias kuv tuaj ntawm Tswv Ntuj tuaj.
28 Kuv tau tawm ntawm Leej Txiv tuaj thiab kuv tau tuaj nyob hauv lub ntiaj teb no.
Zaum no kuv yuav tso lub ntiaj teb tseg thiab kuv yuav rov mus cuag Leej Txiv dua."

Tim 22 lub 5 Hlis 2023

Hnub Ob Lis Piam Xya Caij Hla Xyoo ABC Nruab Lis Piam Xyoo I & II
Lectionary: 297

XHLT: LN Rita nyob Cascia, ua Leej Phauj

Zaj Nyeem Ib: HAUJ LWM 19: 1-8

1 Thaum As Pos Los nyob Kos Lis Nthos, Paj Lug hla hauv lub teb chaws
nqes mus rau nram Es Fes Xos; nws ntsib ib co thwj tim nyob nrad,
2 nws hais rau lawv tias: "Nej puas tau txais Leej Ntuj Plig Ntshiab thaum nej los ntseeg?"
Lawv teb nws tias: "Peb tsis tau hnov dua tias muaj Leej Ntuj Plig Ntshiab li."
3 Paj Lug thiaj hais tias: "Ua li nej txais lub cim ntxuav zoo li cas?”
Lawv teb tias: "Peb txais Zam lub cim ntxuav."
4 Ces Paj Lug hais rau lawv tias: "Zam ua kab ke ntxuav kom sawv daws los thov txhaum.
Nws hais kom sawv daws ntseeg txog tus yuav lawv nws qab tuaj, uas yog Yes Xus."
5 Thaum lawv hnov cov lus no, mas lawv los txais lub cim ntxuav nyob hauv Huab Tais Yes Xus lub npe.
6 Thaum Paj Lug tsa tes rau saum lawv, mas Leej Ntuj Plig Ntshiab los nyob hauv lawv,
ces lawv hais ib co xeem lus tshiab, thiab lawv ua yaj saub.
7 Pab neeg no tas huv si, muaj kaum ob leeg.
8 Paj Lug nkag mus hauv lub tsev Txoos, nws qhuab qhia tsis ua xyem xyav li tau peb lub hlis,
nws nrog lawv sib tham thiab siv ib cov lus hais txog Tswv Ntuj lub Ceeb Tsheej kom neeg ntseeg nws.

NPN 68: 2-3ab, 4-5acd, 6-7ab

Txais: (33a) Cov ceeb tsheej nyob ntiaj teb, nej cia li hu nkauj cav txog Tswv Ntuj.
los: As les lus yas.

Tswv Ntuj sawv tsees, ces nws cov yeeb ncuab tawg tas sib ncaim tas,
hos cov ntxub nws khiav mus deb ntawm nws xub ntiag.
Xws li cov pa taws txawj yaj tas mus, lawv kuj ploj tas zoo li ntawd,
zoo xws li cov ciab ntab yaj nyob hauv hluav taws.

Txais: (33a) Cov ceeb tsheej nyob ntiaj teb, nej cia li hu nkauj cav txog Tswv Ntuj.
los: As les lus yas.

Tiam sis cov neeg siab ncaj zoo siab, lawv dhia hom khaj
nyob ntawm Tswv Ntuj xub ntiag, lawv zoo siab thiab luag ntxhi.
Nej hu nkauj rau Tswv Ntuj, nej hu nkauj cav txog nws lub npe;
Nws lub npe hu ua HUAB TAIS .

Txais: (33a) Cov ceeb tsheej nyob ntiaj teb, nej cia li hu nkauj cav txog Tswv Ntuj.
los: As les lus yas.

Tus ua txiv rau cov ntsuag nos, tus txheem plaub rau cov poj ntsuam,
Yog tus Tswv Ntuj uas nyob hauv nws lub tsev ntshiab.
Tswv Ntuj pub tsev rau tus neeg raug luag muab ntiab tawm nyob,
nws coj cov neeg raug txim tawm los kom lawv tau ntsib kev vam meej,

Txais: (33a) Cov ceeb tsheej nyob ntiaj teb, nej cia li hu nkauj cav txog Tswv Ntuj.
los: As les lus yas.

As Les Lus Yas: KLX 3: 1

Txais: As les lus yas, as les lus yas.

Yog nej twb tau nrog Leej Pleev sawv rov los lawm,
mas nej cia li nrhiav tej yam nyob txheej saud,
uas yog qhov chaw Leej Pleev zaum rawv ntawm Tswv Ntuj phab xis.

Txais: As les lus yas, as les lus yas.

Ntawv Moo Zoo: ZAM 16: 29-33

29 Yes Xus cov thwj tim hais rau nws tias: "Zaum no koj hais lus ncaj qha, koj tsis siv tej zaj paj lug lawm.
30 Zaum no peb paub tias koj paub tas ib puas tsav yam, tsis tas kom leej twg nug koj txog dab tsi li.
Yog vim li ntawd peb thiaj ntseeg tias koj tuaj ntawm Tswv Ntuj tuaj."
31 Yes Xus teb rau lawv tias: "Zaum no nej ntseeg lawm lod?
32 Yuav txog sij hawm, twb txog sij hawm lawm, uas nej sawv daws yuav tawg tas, nyias yuav mus nyias vaj nyias tsev, nej yuav tso kuv tseg ib leeg. Tab sis kuv tsis nyob kuv ib leeg, vim Leej Txiv nrog kuv nyob.
33 Kuv hais tej no rau nej kom nej tau nyob thaj yeeb hauv kuv. Nej yuav raug txom nyem hauv ntiaj teb no, tab sis nej ua siab loj mog! Kuv twb yeej lub ntiaj teb lawm.”

Tim     23     lub     5     Hlis     2023

Hnub Peb Lis Piam Xya Caij Hla Xyoo ABC Nruab Lis Piam Xyoo I & II
Lectionary: 298

Zaj Nyeem Ib:   HAUJ LWM 20: 17-27

17 Nyob Mis Les Tus, Paj Lug xa neeg mus hu cov txwj laus saib lub Koom Txoos nyob Es Fes Xos tuaj.
18 Thaum lawv tuaj txog, nws hais rau lawv tias: “Nej yeej paub zoo tias kuv ib txwm tau coj zoo li cas
tas lub caij kuv nrog nej nyob, txij hnub kuv ko taw tau tsuj As Xias teb los txog tav no.
19 Kuv tau ua neeg me tas nrho tsob hwb Huab Tais, nrog lub kua muag thiab tej kev txom nyem
uas tuaj raug kuv vim cov Yus Das tuav tswv yim ua phem rau kuv.
20 Kuv tsis tau nrhiav kev dim ib zaug kom txhob tau hais rau nej txog tej yam uas yuav pab tau nej,
los kom txhob tau qhuab qhia nej nyob ntawm sawv daws xub ntiag los nyob hauv nej tej vaj tse li.
21 Kuv tau kub siab ua tim khawv rau cov Yus Das thiab cov Hes Las huv si kom sawv daws
tig los lees txhaum ntawm Tswv Ntuj thiab los ntseeg txog peb tus Huab Tais Yes Xus.
22 Nyem no, Leej Tswv Yim txhib kuv lawm ces kuv yuav tsum mus Yes Lus Xas Les;
kuv yeej tsis paub tias yuav muaj dab tsi tuaj raug kuv nyob ped li.
23 Kuv tsuas paub tias Leej Tswv Yim Ntshiab yeej qhia kuv nyob hauv txhua lub nroog
uas kuv mus tias, saw hlau thiab kev txom nyem tos nrhw kuv xwb.
24 Tiam sis kuv tsis saib tias txoj sia yog qhov tseem ceeb tshaj rau kuv, kuv tsuas xav kom kuv tau
taug kuv txoj kev kom zoo tshaj thiab tau leg cov dej num uas kuv txais ntawm Huab Tais Yes Xus los
kom tiav log xwb, kom tau ua tim khawv txog lub Moo Zoo uas pub Tswv Ntuj lub txiaj ntsim.
25 Nyem no, kuv paub lawm tias, tas nej cov uas kuv tau tuaj xyuas nej, tuaj tshaj
lub Ceeb Tsheej rau nej, mas nej yuav tsis pom kuv lub ntsej muag ib zaug ntxiv lawm.
26 Yog vim li no mas hnub no kuv thiaj qhia tseeb rau nej paub tias,
nej ib tug twg cov ntshav yuav tsis poob los rau kuv ua tus ris,
27 vim kuv tsis tau ntshai tshaj tas nrho qhov uas Tswv Ntuj npaj xav kom nej ua rau nej paub.”

NPN   68: 10-11, 20-21

Txais: (33a) Cov teb chaws muaj vaj kav nyob ntiaj teb, nej cia li hu nkauj rau Tswv Ntuj.
los: As les lus yas.

Tswv Ntuj, koj tso nag ntws lug los ywg koj lub cuab tam,
koj rov ua kom thaj av zoo tuaj, thaum nws tsuag lawm.
Koj cov yaj los nyob hauv thaj av ntawd;
Tswv Ntuj, koj lub siab zoo pub thaj av ntawd rau tus pluag.

Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
los: As les lus yas.

Kom HUAB TAIS nto koob meej hnub dhau hnub!
Nws yog tus ris peb lub nra, Tswv Ntuj tus cawm peb.
Tswv Ntuj yog tus Tswv Ntuj uas cawm peb,
HUAB TAIS, kuv tus Huab Tais yog
tus tswj txoj kev tuag lub rooj vag.

Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
los: As les lus yas.

As Les Lus Yas:   ZAM 14: 16

Txais: As les lus yas, as les lus yas.

Kuv yuav thov Leej Txiv, ces nws yuav xa
dua ib Tug Pab nej los nrog nej nyob mus li.

Txais: As les lus yas, as les lus yas.

Ntawv Moo Zoo:   ZAM 17: 1-11a

1 Yes Xus tsa muag ntsia saum ntuj, nws hais tias: “Txiv, txog sij hawm lawm!
Koj ua kom koj Leej Tub tau hwj chim mas, ces koj Leej Tub yuav ua kom koj tau hwj chim,
2 ib yam li koj tau muab hwj huam rau nws kav tib neeg tas nrho,
kom nws pub txoj sia nyob mus li rau txhua leej uas koj tau muab rau nws.
3 Txoj sia nyob mus li yog li no: Kom lawv paub koj, tus tseem Tswv Ntuj,
thiab paub tus koj tau xa tuaj, Yes Xus Pleev.
4 Kuv tau ua kom koj nto hwj chim nyob ntiaj teb no lawm,
vim kuv tau ua cov hauj lwm uas koj muab rau kuv ua tiav lawm.
5 Txiv, nyem no koj ua kom kuv tau hwj chim nrog koj, tau lub hwj chim
uas kuv ib txwm muaj nrog koj thaum lub sim ceeb tsis tau xeeb los nyob.
6 Kuv tau qhia koj lub npe rau cov neeg uas koj tau rho tawm hauv lub qab ntuj neeg los pub rau kuv
kom lawv paub. Cov neeg no yog koj tug, koj muab lawv pub rau kuv lawm, lawv coj rawv koj lo lus.
7 Nyem no lawv paub lawm tias tas txhua yam uas koj muab rau kuv yog tuaj ntawm koj tuaj.
8 Vim tias cov lus uas koj muab rau kuv, mas kuv muab rau lawv lawm; lawv tau txais koj cov lus
thiab lawv paub tseeb tias kuv tuaj ntawm koj tuaj, thiab lawv ntseeg tias yog koj xa kuv tuaj.
9 Kuv thov koj rau lawv, kuv tsis thov rau lub qab ntuj neeg,
tiam sis kuv thov koj rau cov uas koj muab pub rau kuv, vim lawv yog koj tug.
10 Txhua yam uas yog kuv tug kuj yog koj tug; txhua yam uas yog koj tug, kuj yog kuv tug thiab.
Kuv tau chim nyob hauv lawv lawm.
11 Nyem no kuv yuav tsis nyob hauv lub qab ntuj no ntxiv lawm,
tab sis lawv tseem yuav nyob hauv lub qab ntuj no, hos kuv yuav rov los cuag koj.”

Tim     24     lub     6     Hlis     2023

Hnub Plaub Lis Piam Xya Caij Hla Xyoo ABC Nruab Lis Piam Xyoo I & II
Lectionary: 299

Zaj Nyeem Ib:   HAUJ LWM 20: 28-38

Nyob Mis Les Tus, Paj Lug hais rau cov txwj laus tuaj hauv lub Koom Txoos nyob Es Fes Xos tuaj tias:
28 “Nej yuav muab siab rau saib nej tus kheej, thiab saib tas pab yaj uas Leej Ntuj Plig Ntshiab tau
tsa nej ua cov tswv saib, kom nej coj Tswv Ntuj lub Koom Txoos mus nog zaub,
lub Koom Txoos uas Tswv Ntuj tau muab nws cov roj ntsha los txhiv ua nws tug.
29 Kuv paub ntsoov tias thaum kuv mus lawm, mas yuav muaj ib co hma tsiv tsaim
txeem los nrog nej ua ib pab; lawv yuav tsis txuag pab yaj siav li.
30 Tab yog nyob hauv nej pab neeg kiag, kuj tseem yuav muaj ib co sawv los
hais tej zaj thuam qhov tseeb kom rub tau cov thwj tim mus raws lawv.
31 Ua li mas nej yuav ceev faj tiag, nej yuav nco ntsoov tias tau peb lub xyoos,
nruab hnub hmo ntuj, kuv tau ntuas nej ib tug zuj zus nrog lub kua muag kom nej ceev faj.
32 Nyem no, kuv muab nej txhua tus tso rau Tswv Ntuj saib xyuas thiab tso nej rau hauv nws Lo Lus pub txiaj ntsim uas yuav txhim kho tau nej, thiab yuav pub ib lub cuab tam rau nej nrog cov neeg uas Tswv Ntuj tau qee lawv.
33 Kuv tsis tau ntshaw leej twg thooj nyiaj los thooj kub los tej tsoos tsho li.
34 Nej yeej paub zoo lawm tias yog kuv ob txhais tes no tau khwv los yug kuv thiab kuv cov phooj ywg xwb.
35 Kuv ua txhij ua txhua li ntawd kom tau qhia rau nej tias peb yuav tsum tau siv zog khwv thiaj yuav pab tau cov tsis muaj zog, thiab nej yuav nco ntsoov Huab Tais Yes Xus lo lus uas nws tus kheej tau hais tias: ‘Yog yus pub rau luag, mas yus tau hmoov zoo dua thaum yus tau txais los.’”
36 Thaum Paj Lug hais cov lus no tas, nws txhos caug nrog lawv sawv daws teev Ntuj ua ke.
37 Lawv quaj zom zaws tas tus, lawv mus puag nkaus Paj Lug caj dab, thiab nwj nws.
38 Lawv tu siab tshaj rau lo lus uas nws hais tias lawv yuav tsis rov pom nws ntsej muag ntxiv lawm.
Ces lawv xa Paj Lug mus txog ntua ntawm lub nkoj.

NPN   68: 29-30, 33-35a, 35bc-36ab

Txais: (33a) Ntiaj teb cov teb chaws muaj vaj kav, nej cia li hu nkauj cav txog Tswv Ntuj.
los: As les lus yas.

Tswv Ntuj, thov koj ua kom koj lub hwj huam tawm los,
lub hwj huam uas koj tau siv los pab peb;
Nyob hauv koj lub tuam tsev nyob Yes Lus Xas Les,
kom cov vaj ntxwv nqa paj tshab tuaj cev rau koj.

Txais: (33a) Ntiaj teb cov teb chaws muaj vaj kav, nej cia li hu nkauj cav txog Tswv Ntuj.
los: As les lus yas.

Ntiaj teb cov teb chaws muaj vaj kav, nej hu nkauj rau Tswv Ntuj,
nej hu nkauj cav txog Huab Tais, tus uas caij nees hla saum
cov chaw siab saum cov txheej ntuj thaum ub.
Nej mloog, nws lub suab nrov nroo ntws, lub suab muaj hwj huam hais tias:
“Nej cia li lees paub Tswv Ntuj lub hwj huam!”

Txais: (33a) Ntiaj teb cov teb chaws muaj vaj kav, nej cia li hu nkauj cav txog Tswv Ntuj.
los: As les lus yas.
.
Nws lub hwj xyeej nyob saum His Xas Lais,
nws lub hwj huam nyob saum cov txheej ntuj saud.
Tswv Ntuj, His Xas Lais tus Tswv Ntuj
muaj hwj chim kawg nkaus nyob hauv nws lub tuam tsev.
Nws muab lub hwj huam thiab lub zog rau nws haiv neeg.

Txais: (33a) Ntiaj teb cov teb chaws muaj vaj kav, nej cia li hu nkauj cav txog Tswv Ntuj.
los: As les lus yas.

As Les Lus Yas:   ZAM 17: 17b, 17a

Txais: As les lus yas, as les lus yas.

Huab Tais, koj lo lus yog qhov tseeb,
Thov koj qee peb mus nyob hauv qhov tseeb.

Txais: As les lus yas, as les lus yas.

Ntawv Moo Zoo:   ZAM 17: 11b-19

Yes Xus tsa muag rau saum ntuj, nws thov ntuj li no:
11b Leej Txiv Ntshiab, thov koj txuag lawv nyob hauv koj lub Npe,
cov uas koj tau muab rau kuv, kom xwv lawv yog ib leeg xwb xws li wb yog ib leeg xwb.
12 Thaum kuv tseem nrog lawv nyob, kuv tau txuag lawv cov uas koj muab rau kuv
nyob hauv koj lub Npe, kuv saib lawv nraim, ces tsis muaj ib tug ploj li,
tsuas muaj kev ploj tus tub xwb thiaj ploj, kom muaj tshwm sim raws li Ntawv sau cia.
13 Zaum no kuv yuav rov los cuag koj, kuv hais tej no nyob hauv lub ntiaj teb no,
kom xwv lawv tau nrog kuv koom kuv txoj kev zoo siab puv npo.
14 Kuv tau muab koj lo lus rau lawv, ces lub ntiaj teb thiaj ntxub lawv,
vim lawv tsis yog ntiaj teb tug, ib yam li kuv tsis yog ntiaj teb tug.
15 Kuv tsis thov kom koj rho lawv hauv ntiaj teb mus, kuv thov kom koj txuag lawv ntawm tus Phem xwb.
16 Lawv tsis yog lub ntiaj teb tug ib yam li kuv tsis yog ntiaj teb tug.
17 Thov koj qee lawv mus nyob hauv txoj kev tseeb. Koj lo lus yog qhov tseeb.
18 Ib yam li koj xa kuv los nyob hauv lub ntiaj teb neeg, kuv xa lawv mus nyob hauv lub ntiaj teb neeg thiab.
19 Kuv rov qee kuv los pab lawv, kom xwv lawv raug qee mus nyob hauv qhov tseeb thiab.”

Tim     25     lub     5     Hli     2023

Hnub Tsib Lis Piam Xya Caij Hla Xyoo ABC Nruab Lis Piam Xyoo I & II
Lectionary: 300

XHLT:   LN Norbert; LN Bede, tus neeg bhwm;
          LN Gregory VII, ua Vaj Qhia;
  LN Mary Magdalene de’Pazzi, nkauj tsim txiaj

Zaj Nyeem Ib:   HAUJ LWM 22: 30; 23: 6-11

30 Tus xab txheeb xav paub tseeb tias cov Yus Das liam dab tsi rau Paj Lug tiag,
ces nws tso Paj Lug tawm thiab nws ceeb toom kom cov thawj leej choj thiab tas tsoom txwj laus
Xas Nes Nrees tuaj sib sau. Nws coj Paj Lug nqes los, thiab kom Paj Lug mus sawv ntawm lawv xub ntiag.
23: 6 Paj Lug paub tias cov neeg ntawd muaj ib co yog tog Xas Dus Kais hos ib co yog tog Fas Lis Xais,
ces nws tsa suab hais nrov nrov rau tsoom Xas Nes Nrees tias:
"Cov kwv tij, kuv yog ib tug Fas Lis Xais, kuv yog Fas Lis Xais tub. Kuv raug lus zoo li no
yog vim txoj kev cia siab rau qhov tias cov neeg tuag yuav ciaj rov qab los."
7 Paj Lug hais li no ces cov Fas Lis Xais thiab cov Xas Dus Kais pib sib ceg,
ces pab neeg ntawd faib kiag ua ob tog.
8 Vim cov Xas Dus Kais hais tias tsis muaj kev sawv rov los, tsis muaj cov Tshiab thiab tsis muaj dab li,
hos cov Fas Lis Xais ntseeg txog peb yam ntawd tib si.
9 Sawv daws thiaj sib cav ntsuag qees. Muaj ob peb tug kws ntawv uas yog tog Fas Lis Xais sawv tsees, lawv hais tias: "Peb tsis pom tus neeg ntawd ua ib qho txhaum dab tsi,
tej zaum tsam yog ib tug dab los yog ib tug Tshiab hais lus rau nws xwb?"
10 Lawv haj yam sib cav muaj ceem zuj zus tuaj, ces tus xab txheeb ntshai tsam
lawv muab Paj Lug dua ua daim, nws thiaj kom nws pab tub rog nqes mus
chua Paj Lug ntawm lawv thiab coj nws rov los nyob hauv lub yeej.
11 Hmo tom qab, Huab Tais tuaj xyuas Paj Lug thiab hais rau nws tias:
"Ua siab loj loj mog! Ib yam li koj twb tau ua tim khawv txog kuv nyob Yes Lus Xas Les lawm,
ib yam li ntawd, koj kuj tseem yuav tsum ua tim khawv txog kuv nyob Los Mas thiab."

NPN   16: 1-2a+5, 7-8, 9-10, 11

Txais: (1) Tswv Ntuj, thov koj txuag kuv, koj yog kuv chaw tso siab.
Los: As les lus yas.

Tswv Ntuj, thov koj txuag kuv, vim kuv tuaj khaub zig koj.
Kuv hais rau HUAB TAIS tias: "Koj yog kuv tus Huab Tais!”
HUAB TAIS, kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (1) Tswv Ntuj, thov koj txuag kuv, koj yog kuv chaw tso siab.
Los: As les lus yas.

Kuv cav lus zoo txog HUAB TAIS tus qhia kuv xav tswv yim,
Tab yog hmo ntuj, kuv siab ntsws tseem txhib kuv.
Kuv cia HUAB TAIS nyob ntawm kuv xub ntiag tsis tseg;
muaj nws nyob ntawm kuv sab xis, kuv yuav tsis ntshai.

Txais: (1) Tswv Ntuj, thov koj txuag kuv, koj yog kuv chaw tso siab.
Los: As les lus yas.

Kuv lub siab luag ntxhi, kuv tus plig hom khaj,
kuv lub cev kuj tau nyob nyab xeeb lug,
Vim koj yuav tsis tso kuv tus plig pov tseg rau ntuj txias teb tsaus,
Koj yuav tsis kheev kom tus ntseeg koj paub kev puas kev lwj.

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Koj yuav qhia kom kuv paub txoj kev taug mus txog txoj sia,
txog txoj kev zoo siab puv npo nyob ntawm koj xub ntiag,
txog txoj kev nplig siab nyob ntawm koj sab xis tas mus li.

Txais: (1) Tswv Ntuj, thov koj txuag kuv, koj yog kuv chaw tso siab.
Los: As les lus yas.

As Les Lus Yas:   ZAM 17: 21

Txais: As les lus yas, as les lus yas.

Huab Tais hais tias:
“Leej Txiv, thov kom lawv sawv daws koom ua ib leeg,
ib yam li koj nyob hauv kuv thiab kuv nyob hauv koj,
kom ntiaj teb neeg thiaj ntseeg tias yog koj xa kuv tuaj.”

Txais: As les lus yas, as les lus yas.

Ntawv Moo Zoo:   ZAM 17: 20-26

Yes Xus tsa muag ntsia saum ntuj, nws thov ntuj li no:
20 "Kuv tsis thov koj rau cov no xwb, kuv tseem thov koj
rau cov uas yuav ntseeg txog kuv vim lawv lo lus thiab,
21 kom lawv sawv daws koom ua ib leeg xwb, ib yam li koj, Leej Txiv, nyob hauv kuv thiab
kuv nyob hauv koj, kom lawv nyob hauv wb, ces ntiaj teb neeg thiaj ntseeg tias yog koj xa kuv tuaj.
22 Lub hwj chim uas koj muab rau kuv, mas kuv muab rau lawv lawm,
kom xwv lawv ua ib leeg xwb xws li wb ua ib leeg,
23 kuv nyob hauv lawv thiab koj nyob hauv kuv, kom lawv ua tsheej ib leeg tiav log, ces lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv.
24 Txiv, lawv yog cov uas koj muab pub rau kuv; kuv xav kom kuv nyob qhov twg
mas lawv tau nrog kuv nyob qhov ntawd thiab, kom lawv tau pom kuv lub hwj chim
uas koj muab rau kuv, vim koj tau nyiam kuv txij thaum tsis tau tsim lub sim ceeb los lawm.
25 Kuv Txiv siab ncaj, lub qab ntuj neeg tsis paub koj, tab sis kuv paub koj,
thiab cov no kuj paub lawm tias yog koj xa kuv tuaj.
26 Kuv twb qhia koj lub npe rau lawv paub lawm, kuv tseem yuav qhia kom neeg paub ntxiv,
kom txoj kev nyiam uas koj muab los nyiam kuv nyob hauv lawv, thiab kom kuv nyob hauv lawv."

Tim 26 lub 5 Hlis 2023

Hnub Rau Lis Piam Xya Caij Hla Xyoo ABC Nruab Lis Piam Xyoo I & II
Lectionary: 301

Yuav Hwm: LN Philip Neri, ua Leej Choj

Zaj Nyeem Ib: HAUJ LWM 25: 13b-21

13 Tus vaj As Nqis Pas thiab Npes Les Nis nkawd tuaj txog Xes Ntxas Les, tuaj xyuas Fes Tus.
14 Vim tias nkawd yuav nyob ntau hnub, ces Fes Tus thiaj piav txog Paj Lug rau tus vaj hais tias:
"Nyob ntawm no, muaj ib tug neeg uas Fes Liv tau muab nws kaw cia.
15 Thaum kuv mus Yes Lus Xas Les, cov thawj leej choj thiab cov txwj laus Yus Das
tuaj liam nws rau kuv, lawv hais kom kuv muab txim rau nws.
16 Kuv teb lawv tias cov Los Mas tsis muaj cai yuav cia li muab ib tus neeg tso rau hauv
cov neeg liam nws txhais tes, yuav tsum xub cia nws nrog lawv sib hais tim ntsej tim muag tso,
thiab yuav cia nws tau kev hais lus daws lub txim uas luag liam rau nws tso.
17 Ces thaum cov Yus Das tuaj sib sau nyob ntawm no, kuv tsis ncua sij hawm li;
tag kis tom qab kiag xwb, kuv mus zaum saum lub rooj txiav txim, kuv kom lawv coj tus neeg los.
18 Cov neeg liam rau nws tuaj sawv ncig nws; tiam sis lawv liam tsis tau ib qho phem raws li kuv xav li.
19 Lawv tsuas nrog nws muaj lus sib cav tsis sib haum hais txog lawv txoj kev teev hawm,
thiab hais txog ib tug Yes Xus uas tuag lawm, tab sis Paj Lug hais tias nws tseem muaj txoj sia nyob xwb.
20 Kuv tsis pom qab ua dab tsi rau ib zag sib cav zoo li ntawd, kuv thiaj nug Paj Lug saib
nws puas yeem mus pem Yes Lus Xas Les, ces mam txiav txim txog tej ntawd rau nws nyob ped.
21 Paj Lug tau thov kom kuv muab nws kaw tos txog thaum nws mus tau rau tus Tuam Vaj txiav txim rau nws. Kuv thiaj li tau ceeb toom cia muab Paj Lug kaw mus txog hnub kuv xa nws mus rau Xes Ntxas.”

NPN 103: 1-2, 11-12, 19-20ab

Txais: (19a) Huab Tais tau tsa nws lus theej kiab nyob saum ntuj.
los: As les lus yas.

Kuv tus ntsuj plig, koj cav txog HUAB TAIS;
tas nrho kuv tus kheej, koj cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej txiaj ntsim ib qho li.

Txais: (19a) Huab Tais tau tsa nws lus theej kiab nyob saum ntuj.
los: As les lus yas.

Siab npaum li lub ntuj nyob siab rau saum ntiaj teb,
nws kuj ua zoo rau cov neeg uas hwm nws tshaj npaum li ntawd.
Deb npaum li sab hnub tuaj nyob deb ntawm sab hnub poob,
nws kuj tau muab peb tej txhaum pov tseg deb ntawm peb npaum li ntawd.

Txais: (19a) Huab Tais tau tsa nws lus theej kiab nyob saum ntuj.
los: As les lus yas.

HUAB TAIS tau tsa nws lub theej kiab nyob saum ntuj,
nws ua vaj tswj tas txhua tsav txhua yam.
Nej uas yog nws cov Tshiab, nej cav lus zoo txog HUAB TAIS,
nej yog cov muaj zog loj, nej yog cov ua raws li nws lo lus.

Txais: (19a) Huab Tais tau tsa nws lus theej kiab nyob saum ntuj.
los: As les lus yas.

As Les Lus Yas: ZAM 14: 26

Txais: As les lus yas, as les lus yas.

Leej Tswv Yim Ntshiab yuav qhia tas ib puas tsav yam rau nej,
thiab yuav pab nej rov nco txog tas txhua yam kuv tau hais rau nej.

Txais: As les lus yas, as les lus yas.

Ntawv Moo Zoo: ZAM 21: 15-19

15 Thaum Yes Xus tawm tuaj rau nws cov thwj tim pom thiab nrog lawv noj tshais tas lawm,
Yes Xus hais rau Xis Moos Pob Zeb tias: "Xis Moos, Zam tus tub, koj puas nyiam kuv dua lawv cov ntawd?" Pob Zeb hais rau nws tias: "Huab Tais, koj yeej paub tias kuv nyiam koj."
Yes Xus hais rau Pob Zeb tias: "Koj coj kuv cov yaj mus nog zaub mog."
16 Yes Xus rov hais zaum ob tias: "Xis Moos, Zam tus tub, koj puas nyiam kuv?" Pob Zeb hais rau Yes Xus tias: "Huab Tais, koj yeej paub tias kuv nyiam koj." Yes Xus hais rau nws tias: "Koj ua tswv saib kuv cov yaj mog."
17 Yes Xus tseem rov hais dua zaum peb rau Pob Zeb tias: "Xis Moos, Zam tus tub, koj puas nyiam kuv?” Pob Zeb mluas kiag tuaj vim Yes Xus hais rau nws zaum peb tias: "Koj puas nyiam kuv?"
Pob Zeb hais rau Yes Xus tias: "Huab Tais, koj paub tas ib puas tsav yam, koj yeej paub tias kuv nyiam koj." Yes Xus hais rau Pob Zeb tias: "Koj coj kuv cov yaj mus nog zaub mog.
18 Kuv hais qhov muaj tseeb tiag rau koj; thaum koj tseem hluas, koj muab koj siv koj sia koj,
koj xav mus qhov twg los koj mus koj. Tiam sis thaum koj laus lawm, koj yuav tsa tes
cia lwm tus kho siv rau koj sia thiab coj koj mus qhov uas koj tsis xav mus."
19 Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj tau koob meej.
Yes Xus hais li tas, nws hais rau Pob Zeb tias: "Koj raws kuv mus.”

Tim     27     lub     5     Hlis     2023

Hnub Xya Lis Piam Xya Caij Hla Xyoo ABC Nruab Lis Piam Xyoo I & II
Lectionary: 302

XHLT:    LN Augustine nyob Canterbury, ua Tswv Qhia

Zaj Nyeem Ib:   HAUJ LWM 28: 16-20, 30-31

16 Thaum peb tuaj txog hauv Los Mas lawm, mas lawv tso cai rau Paj Lug nws nyob nws ib leeg nrog tus tub rog uas zov nws.
17 Peb hnub tom qab, Paj Lug hu cov thawj coj Yus Das kom tuaj. Thaum lawv tuaj txog tas, Paj Lug hais rau lawv tias: "Cov kwv tij, kuv tsis tau ua dab tsi txhaum peb haiv neeg, los txhaum peb cov yawg koob tej kev cai, tsis kav lawv ntes kuv thiab muab kuv cob rau cov Los Mas tias
kuv yog ib tug neeg raug txim nyob Yes Lus Xas Les tuaj.
18 Thaum cov Los Mas tshuaj lus tas, lawv xav tso kuv mus,
vim lawv tsis pom kuv tau ua dab tsi tsim nyog raug lub txim tuag.
19 Tab sis cov Yus Das tsis kam tso kuv, ces kuv thiaj yuav tsum tau thov kom cia Xes Ntxas
ua tus txiav txim rau kuv, txawm tias kuv tsis muaj lus dab tsi phem yuav hais txog kuv haiv neeg.
20 Yog vim li no, mas kuv thiaj xav ntsib nej thiab hais rau nej paub tias,
twb yog vim His Xas Lais txoj kev tso siab, mas kuv thiaj li coj cov saw khi kuv li no."
30 Paj Lug nyob tau ob xyoos nkaus hauv lub tsev nws nyob no.
Nws txais cov neeg uas tuaj xyuas nws tas huv tib si.
31 Nws tshaj txog Tswv Ntuj lub Ceeb Tsheej, thiab qhia txog Huab Tais Yes Xus Pleev,
nyob hauv txoj kev tso siab lug thiab tsis muaj leej twg txwv nws li.

NPN   11: 4, 5+7

Txais: (7b) Huab Tais, cov neeg siab ncaj yuav tau ntsia ntsoov koj lub ntsej muag.
los: As les lus yas.

HUAB TAIS nyob hauv nws lub tuam tsev ntshiab;
HUAB TAIS lub theej kiab yog nyob saum ntuj.
Nws qhov muag saib ntsoov,
nws ntsia tsom ntsoov rau tsoom tib neeg.

Txais: (7b) Huab Tais, cov neeg siab ncaj yuav tau ntsia ntsoov koj lub ntsej muag.
los: As les lus yas.

HUAB TAIS tsom ntsoov tus neeg ncaj thiab tus neeg nkhaus,
nws ntxub tus nyiam kev sib ntaus sib tua.
Vim HUAB TAIS siab ncaj, nws nyiam cov hauj lwm ncaj ncees;
cov neeg siab ncaj yuav tau ntsia ntsoov HUAB TAIS lub ntsej muag

Txais: (7b) Huab Tais, cov neeg siab ncaj yuav tau ntsia ntsoov koj lub ntsej muag.
los: As les lus yas.

As Les Lus Yas:   ZAM 16: 7, 13

Txais: As les lus yas, as les lus yas.

Huab Tais hais tias:
Kuv yuav xa Leej Tswv Yim muaj qhov tseeb tuaj rau nej;
Nws yuav coj nej mus txog txhua yam tseeb.

Txais: As les lus yas, as les lus yas.

Ntawv Moo Zoo:   ZAM 21: 20-25

20 Pob Zeb tig ntsia tom qab, nws pom tus thwj tim uas Yes Xus nyiam tuaj lawv qab,
yog tus uas thaum lawv noj hmo, nws tig mus pheeb rau ntawm Yes Xus hauv siab,
thiab nug tias: “Huab Tais, tus yuav muab koj rau luag yog leej twg?”
21 Pob Zeb pom tus thwj tim ntawd, Pob Zeb hais rau Yes Xus tias: "Huab Tais, tus ntawd ned?"
22 Yes Xus hais rau Pob Zeb tias: "Yog kuv xav kom nws nyob mus txog hnub kuv rov los no
koj ho quav ntsej dab tsi txog? Ntawm koj, mas koj raws kuv mus."
23 Lo lus no thiaj ncha rau hauv cov kwv tij tias: “Tus thwj tim ntawd yuav tsis tuag.”
Tab sis Yes Xus tsis tau hais rau Pob Zeb tias: “Nws yuav tsis tuag”, Yes Xus tsuas tau hais tias:
“Yog kuv xav kom nws nyob txog hnub kuv rov no koj ho quav ntsej dab tsi txog?”xwb.
24 Yog tus thwj tim ntawd ua tim khawv txog tej no thiab yog nws muab sau cia.
Peb paub tias nws cov lus ua tim khawv muaj tseeb.
25 Tseem tshuav ntau yam kawg uas Yes Xus tau ua, yog yuav sau ib yam zuj zus tas huv tib si,
mas kuv xav tias lub ntiaj teb yuav ntim tsis tas cov phau ntawv sau ntawd li.

Tim     29     lub     5     Hlis     2023

Hnub Ob tom qab Hnub Chiv Leej Ntuj Plig Nqes Los

Yuav Hwm Nkauj Tsim Txiaj Mab Liab ua lub Koom Txoos Leej Niam
Lectionary:   572

Zaj Nyeem Ib:   HP 3: 9-15, 20

Thaum As Das noj lub txiv tas lawm,
9 HUAB TAIS Tswv Ntuj hu nws thiab nug nws tias: "Koj nyob qhov twg?"
10 Tus txiv neej teb tias: "Kuv tau hnov koj nyob hauv lub vaj, tiam sis kuv ntshai vim kuv liab qab, ces kuv thiaj khiav tsiv nraim lawm."
11 Tswv Ntuj hais tias: "Leej twg qhia koj tias koj liab qab? Yog koj noj lub txiv uas kuv txwv tsis pub koj noj lawm puas yog?"
12 Tus txiv neej teb tias: "Yog tus poj niam uas koj tso nrog kuv nyob, nws muab lub txiv ntawm tsob ntoo rau kuv, ces kuv thiaj noj."
13 HUAB TAIS Tswv Ntuj hais rau tus poj niam tias: "Koj ua dab tsi li ntawd?" Tus poj niam teb tias: "Yog niag nab ntxias kuv, kuv thiaj noj."
14 Ces HUAB TAIS Tswv Ntuj hais rau tus nab tias: "Vim koj tau ua li no mas koj txoj hmoov yuav phem tshaj tas ib tsoom tsiaj nyeg thiab tas ib tsoom tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej.
15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
20 Tus txiv neej tis npe rau nws poj niam hu ua Es Vas, vim nws yog tas ib tsoom neeg muaj txoj sia leej niam.

Los:      HL 1: 12-14

Thaum Yes Xus nce mus saum ntuj lawm,
12 cov Hauv Paus Xa Lus nqes pem lub roob uas hu ua "Roob Txiv Ntoo Roj" rov los rau Yes Lus Xas Les. Lub roob ntawd nyob ze ze ntawm Yes Lus Xas Les, tsuas deb li ncua kev yus taug hnub Xas Npas Tos xwb.
13 Thaum lawv los txog hauv nroog, lawv nce mus saum chav tsev siab uas yog qhov chaw lawv nyob; muaj Pob Zeb, Yas Kos thiab Zam, As Nres, Fis Lis Pos thiab Tos Mas, Npas Tos Los Mas Yos, Mas Tais, thiab Yas Kos uas yog As Fas Yos tub,  Xis Moos Zes Los Tes thiab Yus Das uas yog Yas Kos tub.
14 Tas lawv cov no sawv daws koom ib lub siab mob siab teev ntuj tsis tseg, nrog rau ib co poj niam, thiab Mab Liab uas yog Yes Xus niam, thiab Yes Xus cov kwv tij.

NPN   87: 1-2, 3+5, 6-7

Txais: (3) Tswv Ntuj lub tsheej, lawv hais tej yam nto koob meej qhuas txog koj!

Nws raug txhim rau saum cov laj roob muaj txoj kev ntshiab;
Huab Tais nyiam Xis Yoos cov rooj vag
tshaj Yas Kos lwm cov tsev tas huv si.

Txais: (3) Tswv Ntuj lub tsheej, lawv hais tej yam nto koob meej qhuas txog koj!

Luag hais tej yam zoo kawg qhuas txog koj, Tswv Ntuj lub tsheej!
Lawv yuav hais txog Xis Yoos tias:
“Tus no thiab txhua tus neeg yug nyob hauv nws.
Tus uas txhim tsa Xis Yoos yog tus Huab Tais nyob siab.”

Txais: (3) Tswv Ntuj lub tsheej, lawv hais tej yam nto koob meej qhuas txog koj!

Lawv yuav sau rau hauv phau ntawv txheeb npe txog
cov haiv neeg tias: "Tus neeg no yug los nyob ntawd."
Tas sawv daws yuav zoo siab yoj cev hu nkauj tias:
"Kuv lub tsev yog nyob hauv koj."

Txais: (3) Tswv Ntuj lub tsheej, lawv hais tej yam nto koob meej qhuas txog koj!

As Les Lus Yas

Txais: As les lus yas, as les lus yas.

Nkauj Tsim Txiaj, koj yuav zoo siab,
koj yog tus yug peb tus Huab Tais;
Lub Koom Txoos Leej Niam, koj tau txoj hmoov zoo,
koj ua kom peb sov siab nyob hauv
koj leej Tub Yes Xus Pleev leej Tswv Yim.

Txais: As les lus yas, as les lus yas.

Ntawv Moo Zoo:   ZAM 19: 25-34

25 Cov sawv nyob ze ntawm Yes Xus tus ntoo cuam yog nws niam thiab nws niam tus niam hluas Mab Liab uas yog Dlos Pas poj niam, thiab Mab Liab Mas Ntas Las.
26 Yes Xus pom nws niam, thiab pom tus thwj tim uas nws nyiam sawv nyob ze, ces nws hais rau nws niam tias: "Niad, tus ntawd yog koj tus tub."
27 Thiab Yes Xus hais rau tus thwj tim tias: "Tus ntawd yog koj niam." Ces txij lub sij hawm ntawd los, tus thwj tim coj Mab Liab mus nyob hauv nws tsev.
28 Ua li ntawd tas, Yes Xus paub tias zaum no ib puas tsav yam tiav tas lawm; kom xwv muaj raws li ntawv sau tseg, nws hais tias: "Kuv nqhis dej."
29 Muaj ib hub kua qaub puv nkaus nyob ntawd. Lawv muab ib thooj rwb tub kua qaub chob rau ib tug ceg ntoo his xos cev mus rau Yes Xus qhov ncauj.
30 Thaum Yes Xus haus qhov kua qaub tas, nws hais tias: "Tiav tas lawm." Ces Yes Xus nyo taub hau, nws txoj pa tu nrho thaum ntawd.
31 Hnub ntawd yog Hnub Npaj, uas yog hnub Xas Npas Tos, mas cov Yus Das tsis xav cia cov tuag lub cev dai saum ntoo cuam hnub ntawd, vim tias hnub Xas Npas Tos ntawd yog ib lub hnub nyoog tseem ceeb. Cov Yus Das thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los.
32 Cov tub rog thiaj tuaj muab thawj tug neeg thiab muab lwm tus neeg uas nrog Yes Xus raug dai saum ntoo cuam ob sab ceg lov.
33 Thaum lawv los txog ntawm Yes Xus, lawv pom nws twb tuag lawm, lawv tsis muab nws ob sab ceg lov,
34 tab sis ib tug tub rog xuas nws rab hmuv nkaug Yes Xus phab tav; tam sis ntawd ib co ntshav thiab ib co dej tawm los.

Tim     30     lub     5     Hlis     2023

Hnub Peb Lis Piam 8 Nruab Xyoo A Nruab Lis Piam Xyoo I
Lectionary:   348

Zaj Nyeem Ib: Npes Xis Las 35: 1-12

1 Ua raws Txoj Cai yog cev ntau thaj txi ntuj; Tus muab siab rau
coj cov lus qhia yog nws cev cov thaj txi Ntuj muaj kev sib koom siab.
2 Tus ua tej yam hauj lwm hlub luag yog nws cev ib co hmoov nplej qab los txi Ntuj;
pub nyiaj rau tus pluag yog ua ib thaj cav txog Tswv Ntuj.
3 Cheem kom yus tsis txhob ua phem yog qhov ntxim Tswv Ntuj siab,
thiab tso txoj kev tsis ncaj tseg yog kev them txim txhaum.
4 Koj tsis txhob mus tes dawb tes npliag rau ntawm Huab Tais xub ntiag,
vim koj yuav tsum cev txhua yam rau nws raws li lo lus qhia kom ua.
5 Tus neeg ncaj cov txim ua kom lub thaj txi Ntuj muaj nqes tuaj,
nws ncho ib co pa tsw qab ntxiag nyob ntawm Tus Nyob Siab xub ntiag.
6 Tus neeg ncaj thaj txi ntuj ntxim Huab Tais siab kawg nkaus, Huab Tais yuav nco ntsoov tas mus li.
7 Nej ua lub siab dav cav txog Huab Tais lub koob meej, thiab tsis txhob qia dub thaum nej cev paj tshab.
8 Niaj zaus koj pub paj tshab mas koj yuav ua ntsej muag luag ntxhi, thiab koj yuav zoo siab hlo thaum koj pub nyiaj txiag
9 Koj yuav pub rau tus Nyob Siab ib yam li nws tau pub rau koj, nrog ib lub siab loj siab dav, raws li koj pub tau.
10 Vim Huab Tais yeej rov ua pauj tas mus li, nws yuav pauj xya npaug rov rau koj.
11 Koj tsis txhob cev ib co txim los xiab Huab Tais, nws yuav tsis txais cov ntawd; koj tsis txhob tso siab rau ib thaj txi ntuj tsis ncaj ncees.
12 Vim nws yog ib tug Tswv Ntuj muaj kev ncaj ncees, nws tsis kws leej twg cai.

NPN   50: 5-6, 7-8, 14+23

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

"Nej sau cov neeg ntseeg kuv tuaj nyob ntawm kuv xub ntiag,
cov uas tau ua thaj txi ntuj nrog kuv cog lus.”
Lub ntuj tshaj nws txoj kev ncaj,
vim tias Tswv Ntuj yog tus txiav txim.

Txais: (23b) Kuv yuav muab Tswv Ntuj lub hwj huam cawm neeg rau tus neeg nca pomj.

“Kuv haiv neeg, nej mloog, kuv yuav hais lus;
His Xas Lais, kuv yuav hais tej yam phem txog koj,
Kuv, Tswv Ntuj, yog koj tus Tswv Ntuj.
Kuv yuav cem koj tsis yog vim koj cov thaj txi Ntuj ;
koj cov tsiaj hlawv txi Ntuj yeej nyob ntawm kuv xub ntiag mus li.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

Koj yuav tsum muab lo lus qhuas los txi rau Tswv Ntuj,
koj yuav tsum pauj koj cov yeem rau tus Nyob Siab.
Leej twg muab lo lus qhuas los txi rau Ntuj, mas nws ua kom kuv tau koob meej;
kuv yuav muab Tswv Ntuj txoj kev cawm neeg rau tus taug txoj kev ncaj pom.

Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

As Les Lus Yas:   Mt 11: 25

Txais: As les lus yas, as les lus yas.

Peb cav txog koj, Leej Txiv, tus Huab Tais kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: Mk 10: 28-31

28 Pob Zeb pib hais rau Yes Xus tias: “Peb tau tso ib puas tsav yam tseg, thiab peb los raws koj.”
29 Yes Xus hais tias: "Kuv hais tseeb rau nej, tsis muaj ib tug neeg uas tau tso vaj tse, los kwv tij nkauj muam, los niam thiab txiv, me tub me nyuam, los liaj teb tseg vim kuv thiab vim lub Moo Zoo,
30 uas yuav tsis tau txais nyem no nyob hauv tiam no, ib puas npaug ntawm tej vaj tse, thiab kwv tij nkauj muam, niam thiab txiv, me tub me nyuam, thiab liaj teb, ntxiv rau kev raug luag hiam, thiab lwm tiam, nws yuav txais txoj sia nyob mus li.
31 Coob leej tuaj ua ntej, yuav nyob tom qab, hos coob leej tuaj tom qab, yuav nyob pem hauv ntej.”

Tim     31     lub     5     Hlis     2023

Hnub Plaub Lis Piam Yim Nruab Xyoo A Nruab Lis Piam Xyoo I

Ua Hmoov Hwm Niam Mab Liab mus saib Es Lis Xas Npes
Lectionary: 572

Zaj Nyeem Ib:   XFN 3: 14-18a

14 Leej me ntxhais Xis Yoos, koj cia li nqua suab qw zoo siab!
Tsoom His Xas Lais, nej cia li hu nkauj luag ntxhi!
Me ntxhais Yes Lus Xas Les,
Koj cia li muab tas koj lub siab dhia hom khaj thiab zoo siab!
15 HUAB TAIS tau muab lo lus txiav txim rau koj tshem mus lawm;
nws tau caum koj cov yeeb ncuab khiav tas mus.
HUAB TAIS , His Xas Lais tus vaj, nws nyob nruab nrab hauv koj,
koj yuav tsis ntshai kev phem dab tsi ntxiv.
16 Hnub ntawd, luag yuav hais li no rau Yes Lus Xas Les tias:
“Xis Yoos, koj txhob ntshai, txhob cia koj ob txhais tes muag luav.
17 HUAB TAIS koj tus Tswv Ntuj nyob nruab nrab hauv koj,
nws yog tus cawm seej muaj hwj huam.
Nws zoo siab loj vim koj; nws kev hlub yuav ua kom koj rov tshiab tuaj.
Nws hu nkauj dhia zoo siab yog vim koj,
18 zoo xws li thaum neeg hu nkauj ua koob tsheej lom zem.”

Los:     LOS MAS 12: 9-16

Cov kwv tij nkauj muad:
9 Nej yuav tsum muaj txoj kev nyiam tseeb tiag,
tuav plig rawv khiav mus deb ntawm qhov phem, tuav rawv qhov zoo kom ruaj nreb.
10 Nej yuav muaj lub siab muag sib nyiam sib hlub xws li ib co kwv tij;
yuav xyaum sib tw kom ib leeg txawj xub hwm ib leeg;
11 yuav muaj lub siab nquag plias tsis txhob ua tus neeg nkees nkees;
yuav muaj lub tswv yim kub lug tsob hwb Huab Tais,
12 yuav zoo siab nyob hauv txoj kev tso siab lug, yuav ua siab ntev nyiaj txoj kev txom nyem, yuav nquag teev Ntuj tsis tso tseg;
13 yuav pab rau cov ntshiab raws li lawv xav tau, yuav xyiv fab txais cov qhua tuaj hauv nej.
14 Nej yuav foom lus zoo rau cov neeg hiam nej, nej foom lus zoo xwb, txhob foom lus phem rau lawv.
15 Nej yuav zoo siab nrog cov neeg muaj kev zoo siab, nej yuav quaj nrog cov neeg tau kev quaj ntsuag.
16 Nej yuav coj tus cwj pwm zoo ib yam ib leeg rau ib leeg, tsis txhob ua neeg muab hlob, tiam sis yuav nrog cov neeg me ntaus phooj ywg; nej tsis txhob rov saib nej thoob tsib dua luag tej.

NPN:    HX 12: 2-3, 4bcd, 5-6

Txais: (6) His Xas Lais tus Loj tus Ntshiab tuaj nyob hauv nej lawm.

Tswv Ntuj yog kuv tus cawm seej,
Kuv tso siab lug kuv tsis txhawj.
Kuv lub zog thiab kuv lub peev xwm yog HUAB TAIS,
Nws yog tus tau cawm kuv.
Nej yuav zoo siab luag ntxhi mus ce dej
Hauv lub qhov dej muaj kev cawm neeg.

Txais: (6) His Xas Lais tus Loj tus Ntshiab tuaj nyob hauv nej lawm.

Nej ua HUAB TAIS tsaug, nej cav txog nws lub npe;
Nej tshaj nws tej hauj lwm loj rau cov haiv neeg paub,
Nej qhia rau lawv tias nws lub npe loj siab tas nrho.

Txais: (6) His Xas Lais tus Loj tus Ntshiab tuaj nyob hauv nej lawm.

Nej hu nkauj qhuas HUAB TAIS txog nws tej hauj lwm muaj hwj chim;
nej coj mus qhia rau tas ntiaj teb paub kom thoob .
Nroog Xis Yoos, koj tsa suab qw zoo siab dhia hom khaj mas,
vim tus loj tas nrho nyob hauv koj yog His Xas Lais tus Ntshiab!

Txais: (6) His Xas Lais tus Loj tus Ntshiab tuaj nyob hauv nej lawm.

As Les Lus Yas:    LK 1: 45

Txais: As les lus yas, as l;es lus yas.

Koj tau hmoov zoo, nkauj tsim txiaj Mab Liab, vim koj ntseeg
tias yuav muaj tuaj raws li Huab Tais tau hais rau koj.

Txais: As les lus yas, as les lus yas.

Ntawv Moo Zoo:    LK 1: 39-56

39 Mab Liab sawv kev mus, nws rau siab ntso maj nroos mus pem toj siab,
mus rau ib lub nroog nyob xeev Yus Das.
40 Nws chaws mus hauv Ntxas Kas Lias tsev, nws tsa suab hu Es Lis Xas Npes.
41 Thaum Es Lis Xas Npes hnov Mab Liab lub suab hu, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes.
42 Ces Es Lis Xas Npes tsa suab hlo hais nrov nrov tias: "Koj tau koob tau hmoov tshaj
ib tsoom poj niam huv tib si, thiab lub txiv hauv koj lub cev tau koob tau hmoov.
43 Ua cas kuv tau txoj hmoov no qhov twg los, kuv tus Huab Tais leej niam thiaj tuaj xyuas kuv?
44 Koj saib, thaum kuv hnov dheev koj lub suab hu nrov txog kuv pob ntseg,
mas tus me nyuam hauv kuv plab dhia zoo siab.
45 Koj tus tau ntseeg tias cov lus Huab Tais hais rau koj yuav tsheej xeeb tuaj, mas koj txoj hmoov zoo!"
46 Ces Mab Liab hais tias: "Kuv tus plig cav txog Huab Tais lub hwj chim loj,
47 kuv lub tswv yim hom khaj nyob hauv Tswv Ntuj, tus Cawm kuv,
48 vim nws tau ua siab zoo dauv muag los ntsia nws tus ntxhais txib tsis muaj tsim.
Txij hnub no mus, txhua tiam neeg yuav hais tias kuv txoj hmoov zoo;
49 vim tus Muaj Hwj Huam tau ua tej yam loj rau kuv, mas kom nws lub npe Ntshiab.
50 Nws lub siab hlub cov neeg hwm nws tiam dhau tiam.
51 Nws tau xyab nws txhais npab muaj zog, nws tau ua kom cov neeg muaj lub siab muab hlob tawg tas.
52 Nws txo cov muaj hwj chim kom poob ntawm lawv lub rooj zaum,
hos nws tsa cov neeg hauv txheej qis kom siab.
53 Nws pub tej yam zoo rau cov neeg tshaib tau noj seem noj so,
hos nws ntiab cov neeg muaj rov qab mus tes qhuav qhawv.
54 Huab Tais tuaj pab nws tus tub txib His Xas Lais,
vim nws nco ntsoov tias nws tau cog lus yuav khuv leej lawv,
55 yog lo lus nws tau cog rau peb cov yawg koob, rau Has Nplas Has
thiab nws tsoom xeeb leej xeeb ntxwv mus ib txhiab ib txhis."
56 Mab Liab nrog Es Lis Xas Npes nyob li peb lub hlis tej, ces nws mam rov mus tsev.

Tim     1     lub     6     Hlis     2023

Hnub Tsib Lis Piam Yim Nruab Xyoo A Nruab Lis Piam Xyoo I
Lectionary: 350

XHLT:    LN Justin, tuag ua Tim KHawv

Zaj Nyeem Ib:    NXL 42: 15-25

15 Nyem no kuv yuav rov nco txog Huab Tais cov hauj lwm,
tej yam kuv tau pom mas kuv yuav piav txog.
Huab Tais hais nws lo lus, ces nws tej hauj lwm cia li tsheej xeeb tuaj;
txhua yam ua raws li nws nyiam, raws li nws tau kom lawv ua.
16 Lub hnub qhov pom kev ci saib tas puas tsav yam,
ces Huab Tais lub hwj chim nyob puv nkaus nws tej hauj lwm.
17 Huab Tais tsis tau muab lub peev xwm rau nws cov Ntshiab
kom lawv piav txog nws tej hauj lwm tsim nyog qhuas tas huv si,
tej uas Huab Tais muaj hwj huam tas nrho tau tsa kom nyob ruaj nreb,
kom tas lub sim ceeb nyob khov kho hauv Huab Tais lub hwj chim.
18 Huab Tais tsom tau hauv tej qab thu tob thiab nkag tau rau hauv neeg nruab siab;
nws txeem mus tau hauv lawv cov tswv yim phem nyob nruab nrog.
Vim tus Nyob Siab muaj kev paub txuj txhij txhua,
thaum nxtov ub, nws twb xub pom cov cim yuav qhia txog cov caij nyoog lawm.
19 Nws qhia kom neeg paub txog yav dhau los lawm thiab yav tom ntej.
Nws qhia tawm txog tej yam zais ntshis uas nyob tob tob.
20 Tsis muaj ib zag tswv yim uas nws yuav paub tsis txog,
tsis muaj ib lo lus uas yuav muab zais tau ntawm nws.
21 Nws ua kom tej yam zoo tas nrho, uas nws lub tswv yim thoob tsib tau tsim los, khiav zoo; nws ib txwm nyob mus li tsis muaj caij pib thiab muaj caij kawg li; tsis muaj ib yam dab tsi uas yuav ntxiv tau rau nws los yuav thau tau tawm ntawm nws mus; tsis tas yuav vam txog lwm tus pab nws xav tswv yim li.
22 Nws cov hauj lwm tas huv tib si zoo nkauj tas nrho,
ci ntsa iab rau qhov muag pom, zoo saib tas nrho rau qhov muag ntsia.
23 Tas puas tsav yam ntawd muaj txoj sia, thiab nyob mus li;
txhua lub sij hawm yuav muaj kev siv, txhua yam mloog lus.
24 Txhua yam muaj txwm, ib qho txawv ib qho,
tsis kav, Huab Tais tsis tau ua ib yam uas yuav tsis sib phim.
25 Txhua yam zoo txaus kom phim lwm yam qhov zoo tshaj.
Leej twg thiaj yuav nkees saib nws lub hwj chim ci ntsa iab?

NPN    33: 2-3, 4-5, 6-7, 8-9

Txais: (6a) Huab Tais lo lus tsim kom lub ntuj tshwm tawm los.

Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws.
Nej hu ib zaj nkauj tshiab rau nws;
Nej qoj cov hlua kom zoo mloog nrog nej cov suab qw zoo siab.

Txais: (6a) Huab Tais lo lus tsim kom lub ntuj tshwm tawm los..

HUAB TAIS lo lus yog lus ncaj,
nws tej hauj lwm yog hauj lwm txaus ntseeg.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (6a) Huab Tais lo lus tsim kom lub ntuj tshwm tawm los..

Huab Tais lo lus tsim kom lub ntuj tshwm tawm los;
nws txoj pa ua kom cov hnub qub tshwm tawm tuaj.
Nws sau cov dej hiav txwv los rau ib lub zoo li plhuaj taub;
nws muab cov dej ntuj tob ntim rau tej lub txhab.

Txais: (6a) Huab Tais lo lus tsim kom lub ntuj tshwm tawm los.

Thov kom tas lub ntiaj teb ntshai HUAB TAIS,
kom tas txhua leej nyob hauv lub qab ntuj hwm nws.
Vim nws hais lus, ces txhua yam tsheej xeeb tuaj;
nws txib, ces txhua yam tshwm tawm tau los.

Txais: (6a) Huab Tais hais lo lus tsim kom lub ntuj tshwm tawm los.

As Les Lus Yas:    Zam 8: 12

Txais: As les lus yas, as les lus yas.

Huab Tais hais tias: Kuv yog lub ntiaj teb qhov pom kev;
leej twg lawv kuv qab yuav muaj txoj kev kaj uas pub txoj sia.

Txais: As les lus yas, as les lus yas.

Ntawv Moo Zoo:    Mk 10: 46-52

46 Thaum Yes Xus nrog nws cov thwj tim thiab ib pab neeg coob tsawv tawm ntawm Yes Lis Kos mus, Npas Tis Mes uas yog Tis Mes tus tub, yog ib tug neeg dig muag, nws zaum thov khawv ntawm ntug kev.
47 Thaum nws hnov tias yog Yes Xus Nas Xas Les tuaj, nws pib qw hu tias: "Yes Xus, Das Vis Leej Tub, thov koj khuv leej kuv mas!"
48 Muaj ntau leej cem nws kom ua twj ywm, tab sis tus dig muag haj yam qw nrov hu tias : "Das Vis Leej Tub, thov koj khuv leej kuv mas."
49 Yes Xus nres, nws hais tias: "Nej hu nws los." Lawv hu tus dig muag tias: "Koj tso siab! Koj sawv mus. Yes Xus hu koj."
50 Ces tus dig muag muab nws lub tsho ntev pov rhees cia, nws sawv tsees thiab mus cuag Yes Xus.
51 Yes Xus hais rau nws tias: "Koj xav kom kuv ua dab tsi rau koj?" Tus dig muag teb rau Yes Xus tias: " Xib Hwb, kuv xav kom kuv rov pom kev!"
52 Yes Xus hais rau nws tias: "Koj mus, koj lub siab ntseeg cawm koj lawm." Tam sis ntawd, tus dig muag rov pom kev tuaj, ces nws taug kev lawv Yes Xus qab mus.

Tim     2     lub     6     Hlis     2023

Hnub Rau Lis Piam Yim Nruab Xyoo A Nruab Lis Piam Xyoo I
Lectionary: 351

Zaj Nyeem ib:    NXL 44: 1, 9-13

1 Nyem no, peb yuav cav txog cov neeg muaj koob meej loj,
thiab peb cov yawg koob, thaum lub caij lawv ua neej nyob.
9 Muaj ib txhia mas tsis muaj leej twg nco txog lawv ntxiv.
Thaum lawv dua mus lawm, mas zoo cuag li
lawv tsis tau yug los ua neeg ib zaug li;
lawv tej me nyuam los kuj ib yam.
10 Tab sis lawv kuj yog ib co neeg siab zoo txawj hlub neeg,
Uas tau ua tej yam hauj lwm hwm Tswv Tswv Ntuj zoo.
11 Lawv txoj kev nplua nuj yuav nyob hauv lawv tsoom xeeb ntxwv,
Thiab lawv lub cuab tam yuav mus rau lawv caj lawv ces.
12 Lawv tsoom xeeb ntxwv coj raws nraim lawv txoj kev cog lus,
lawv tej tub ki los coj ib yam, kom tau hwm lawv.
13 Lawv tsoom xeeb ntxwv yuav nyob mus li ib txhis,
lawv lub koob meej yuav tsis ploj ib zaug li.

NPN    149:1b-2, 3-4, 5-6a+9b

Txais: (4a) Huab Tais zoo siab nyob hauv nws haiv neeg.
los: As les lus yas.

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
Kom His Xas Lais cia li zoo siab nyob hauv tus tau tsim lawv,
kom Xis Yoos cov me nyuam luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas.

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej los ua zam npua cov neeg me.

Txais: (4a) Huab Tais zoo siab nyob hauv nws haiv neeg.
los: As les lus yas.

Kom cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab nyob hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Txhua tus ntseeg txog nws yeej muaj lub koob meej zoo li no. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas.

As Les Lus Yas:    Zam 15:16

Txais: As les lus yas, as les lus yas.

Huab Tais hais tias: Kuv tau xaiv nej hauv lub ntiaj teb los,
kom nej mus thiab nej txi ib co txiv uas yuav nyob ruaj.

Txais: As les lus yas, as les lus yas.

Ntawv Moo Zoo:    Mk 11:11-26

11 Yes Xus mus hauv Yes Lus Xas Les, nws chaws mus hauv lub Tuam Tsev Teev Ntuj, nws ntsia txhua yam nyob ncig nws. Thaum ntawd twb lig lawm, ces nws tawm mus. Nws nrog Pab Kaum Ob leeg mus rau Npes Tas Nias.
12 Hnub tom qab, thaum lawv tawm hauv Npes Tas Nias mus, Yes Xus tshaib plab.
13 Nws tuaj deb ntsia pom ib tsob txiv ncuav pias muaj nplooj, nws mus xyuas saib puas muaj dab tsi. Tab sis thaum nws mus txog ntawm tsob ncuav pias, tsuas muaj nplooj xwb, vim tsis yog lub caij txi txiv.
14 Yes Xus hais rau tsob txiv ncuav pias tias: "Kom txhob muaj neeg tau noj koj tej txiv ib zaug ntxiv li lawm!" Cov thwj tim hnov Yes Xus hais li ntawd.
15 Lawv tuaj txog Yes Lus Xas Les, Yes Xus chaws mus hauv lub Tuam Tsev Teev Ntuj, nws pib ntiab cov tub luam tuaj muag thiab cov tuaj yuav tej yam hauv lub Tuam Tsev Teev Ntuj. Nws ntxeev cov tub pauv nyiaj tej rooj, thiab cov muag nquab tej tog zaum.
16 Nws tsis kheev leej twg nqa toob xib hla hauv lub Tuam Tsev li.
17 Ces Yes Xus qhuab qhia lawv, nws hais rau lawv tias: "Ntawv tsis tau sau tseg tias: ‘Kuv lub tsev yuav hu ua ib lub tsev teev Ntuj rau ib tsoom haiv neeg’ no lod? ‘Tab sis, nej muab kuv lub tsev ua ib qho chaw rau tub sab tuaj nkaum!"
18 Cov thawj leej choj thiab cov kws Ntawv Ntshiab hnov, ces lawv nrhiav saib yuav ua cas muab Yes Xus tua. Tab sis lawv kuj ntshai Yes Xus thiab, vim tas tsoom pej xeem qhuas nws cov lus qhia.
19 Thaum tsaus ntuj, Yes Xus thiab cov thwj tim tawm mus rau sab nroog nraud.
20 Tag kis sawv ntxov ntxov, thaum lawv mus hla ntawd, lawv pom tsob txiv ncuav pias qhuav ti cag lawm.
21 Pob Zeb nco dheev txog, nws hais rau Yes Xus tias: "Xib Hwb, koj saib, tsob txiv ncuav pias uas koj tsawm qhuav tas lawm."
22 Yes Xus teb rau lawv tias: "Nej ntseeg Tswv Ntuj mog.
23 Kuv hais qhov muaj tseeb rau nej, yog leej twg hais rau lub roob no tias: ‘Koj rho koj tawm thiab muab koj pov lawm hauv hiav txwv,’ yog tias tus ntawd tsis ua xyem xyav hauv siab li, thiab nws ntseeg tias qhov nws hais yuav tshwm sim tiag, mas qhov ntawd yuav tshwm sim rau nws tau.
24 Vim li ntawd, kuv thiaj hais rau nej tias, tas puas tsav yam uas thaum nej teev Ntuj nej thov, yog nej ntseeg tias nej twb tau txais lawm, ces nej yeej yuav tau txais xwb.
25 Hos thaum nej tab tom sawv ntsug teev Ntuj, yog nej muaj lus tsis txaus siab rau ib tug twg, mas nej yuav zam rau nws, kom xwv nej Txiv nyob saum ntuj zam nej cov txhaum rau nej thiab.
[26 Yog nej tsis zam mas nej Txiv nyob saum ntuj kuj yuav tsis zam nej cov txhaum rau nej li thiab.]

Tim     3     lub     6     Hlis     2023

Hnub Xya Lis Piam Yim Nruab Xyoo A Nruab Lis Piam Xyoo I
Lectionary: 352

Yuav Hwm: LN Charles Lwanga thc., tuag ua Tim Khawv

Zaj Nyeem Ib:    NXL 51: 12cd-20

12 Kuv ua Huab Tais tsaug thiab cav lus zoo txog nws,
kuv foom kom HUAB TAIS lub npe nto koob meej.
13 Thaum kuv tseem hluas, tseem tsis tau mus ncig teb ncig chaw,
kuv yeej tab meeg nrhiav kev thoob tsib nyob hauv txoj kev teev ntuj lawm.
14 Nyob ntawm hauv ntej lub tuam tsev teev ntuj, kuv tau thov kom kuv tau
kev thoob tsib; kuv yuav nrhiav kev thoob tsib mus kom txog kuv hnub kawg.
15 Nws tawg paj thiab txi txiv zoo li lub txiv cawv uas tsis ntev twb yuav siav,
ces kuv zoo siab hlo nyob hauv nws. Kuv txhais taw mus nrhiav txoj
kev ncaj taug, vim txij kuv yav hluas los, kuv yeej nrhiav kev thoob tsib.
16 Kuv cuab pob ntseg mloog ib pliag, ces kuv tau txais kev thoob tsib lawm,
thiab kuv nrhiav tau kev qhuab qhia kuv zoo kawg nkaus.
17 Kuv txawj ua zoo tuaj nyob hauv kev thoob tsib; li ntawd,
kuv yuav cav txog tus pub kev thoob tsib rau kuv, nws lub koob meej.
18 Kuv tau txiav siab tias kuv yuav coj raws kev thoob tsib. Kuv kub
siab lug nrhiav qhov zoo, ua li mas kuv yuav tsis raug kev txaj muag.
19 Kuv tus plig tau ntaus tsam hnyav thiaj tau txais kev thoob tsib.
Kuv tau mob siab coj kom raws Txoj Cai, kuv tau tsa tes mus rau lub ntuj,
thiab kuv tu siab vim kuv tsis paub ntau yam.
20 kuv tig kuv tus plig mus rau kev thoob tsib,
ces kuv nrhiav tau nws nyob hauv txoj kev dawb huv.

NPN    19: 8, 9, 10, 11

Txais: (9ab) Huab Tais txoj cai ua kom neeg muaj kev zoo siab.

HUAB TAIS txoj cai zoo tas nrho,
nws ntxiv siav rau yus tus ntsuj plig;
HUAB TAIS tus txhooj tsim nyog tso siab rau,
nws ua kom tus neeg ruam thoob tsib tuaj.

Txais: (9ab) Huab Tais txoj cai ua kom neeg muaj kev zoo siab.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus qhia meej kawg nkaus,
ua kom qhov muag pom kev.

Txais: (9ab) Huab Tais txoj cai ua kom neeg muaj kev zoo siab..

Txoj kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov cai nws txiav yog lus tseeb,
Txhua lo lus nws txiav yog qhov ncaj.

Txais: (9ab) Huab Tais txoj cai ua kom neeg muaj kev zoo siab.

Nws cov cai nws txiav muaj nqes dua kub,
muaj nqes dua ib txhab tseem kub,
qab zib dua cov kua zib,
los cov zib mu ntawm daim nas muv.

Txais: (9ab) Huab Tais txoj cai ua kom neeg muaj kev zoo siab.

As Les Lus Yas:    KLX 3: 16a, 17c

Txais: As les lus yas, as les lus yas.

Nej cia Leej Pleev lo lus nyob puv nplua mias hauv nej;
Nej ua Leej Txiv Tswv Ntuj tsaug nyob hauv nws.

Txais: As les lus yas, as les lus yas.

Ntawv Moo Zoo:    Mk 11: 27-33

27 Yes Xus thiab nws cov thwj tim rov qab los hauv Yes Lus Xas Les dua. Nws mus mus los los hauv lub Tuam Tsev Teev Ntuj, ces cov thawj leej choj, cov kws Ntawv Ntshiab thiab cov txwj laus tuaj cuag nws.
28 Lawv hais rau nws tias: "Koj tau cai qhov twg los, koj thiaj ua tej ntawd? Los leej twg muab cai rau koj kom ua tej ntawd?"
29 Yes Xus teb rau lawv tias: "Kuv kuj yuav nug nej ib los thiab. Nej teb kuv, kuv mam li qhia nej tias kuv tau cai ntawm leej twg los ua tej ntawd:
30 Zam lub cim ntxuav puas tuaj saum ntuj tuaj los tuaj ntawm neeg tuaj? Nej teb kuv saib."
31 Ces lawv sib tham tias: "Yog peb hais tias: 'Tuaj saum ntuj tuaj,' nws yuav hais tias: 'Ua cas nej tsis ntseeg nws?'
32 Yog peb teb tias: ‘Tuaj ntawm neeg tuaj’ ne?” Lawv kuj ntshai tsoom sid, vim tas sawv daws saib Zam yog ib tug yaj saub tiag.
33 Ces lawv teb rau Yes Xus tias: "Peb tsis paub." Yes Xus thiaj hais rau lawv tias: "Kuv kuj yuav tsis qhia nej tias kuv tau cai ntawm leej twg los ua tej ntawd thiab."

Tim      5     lub     6     Hli     2023

Hnub Ob Lis Piam Cuaj Nruab Xyoo A Nruab Lis Piam Xyoo I
Lectionary: 353

Yuam Hwm LN Boniface, Tswv Qhia tuag ua Tim Khawv

Zaj Nyeem Ib:   TOS NPIS 1: 3, 2: 1-8

3 Kuv, Tos Npis, tau ua neej raws txoj kev tseeb thiab kev ncaj tas kuv sid. Kuv tau ua ntau yam hauj lwm muaj kev hlub pab rau kuv cov kwv tij thiab rau kuv haiv neeg uas nrog kuv nyob txim nyob Nis Nis Vas, As Xis Lias teb.
2: 1b Thaum txog peb lub Hmoov Tsib Caug Hnub, uas tseem hu ua lub Hmoov cov Lis Piam, lawv npaj tau ib roog qav qab qab rau kuv noj; kuv tab tom qhau cev ntawm rooj yuav noj mov.
2 Lawv rau tau rooj thiab nqa tau ntau yam zaub mov los txawb rau ntawm kuv xub ntiag, ces kuv hais rau kuv tus tub Tos Npias tias: “Me tub, koj mus nrhiav nyob hauv peb cov kwv tij nyob txim nyob Nis Nis Vas saib puas muaj ib tug pluag uas nws tseem muaj lub siab nco ntsoov txog Tswv Ntuj; koj coj nws los nrog kuv noj kuv pluas mov. Me tub, kuv yuav nyob ntawm no tos koj rov los."
3 Tos Npias thiaj mus nrhiav ib tug neeg pluag nyob hauv peb cov kwv tij lawm. Tab sis ib me ntsis nws rov los, nws hais tias: "Txiv!" Kuv teb tias: "Dab tsi os, me tub?" Nws hais tias: "Txiv, lawv nyuam qhuav muab peb ib tug neeg tua tuag, lawv muab nws zawm caj dab tuag, thiab muab nws coj tuaj pov rau ntawm lub tshav kiab, nws lub cev tseem nyob ntawd."
4 Ces kuv sawv tsees tam sid, tso plhuav kuv pluas mov tseg tsis saj li. Kuv mus nkaus hlo tus neeg tuag kwv tom tshav kiab los, kuv muab zais rau hauv ib kem tsev tos kom lub hnub poob qho tso, kuv mam coj mus faus.
5 Thaum kuv rov los tsev, kuv mus ntxuav cev tas, kuv mam los noj kuv pluas mov ntxuag kua muag.
6 Kuv nco txog tus Yaj Saub As Mos cov lus saub uas nws hais rau Npes Thes tias:
"Nej tej hnub nyoog ua koob tsheej yuav hloov ua hnub nyoog ntoo xyom, nej tej suab hu nkauj yuav hloov ua suab nyiav."
7 Ces kuv quaj. Thaum hnub poob qho lawm, kuv tawm mus khawb tau ib lub qhov ntxa, kuv muab tus tuag faus rau hauv.
8 Cov neeg nyob ze kuv luag luag kuv , lawv hais tias: "Saib! Nws yeej tsis ntshai li tiag! Zaum tas los luag tau nrhiav nws tua vim tib zaj no xwb, ces nws twb khiav yuav luag tsis dim. Nyem no, nws tseem rov qab nyiag faus cov neeg tuag dua!"

NPN   112: 1b-2, 3b-4, 5-6

Txais: (1b) Tus neeg hwm Huab Tais nws txoj hmoov zoo.
los: As les lus yas.

Nws muaj hmoov zoo, tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj peev xwm nyob ntiaj teb,
Ntuj yuav foom koob hmoov rau caj ces neeg siab ncaj.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Nws txoj kev ncaj yuav nyob ruaj nreb mus li.
Qhov pom kev ci sawv hauv qhov tsaus ntuj tuaj
ua lub teeb kaj cov neeg siab ncaj;
nws muaj lub siab zoo, khuv leej luag, thiab ua ncaj.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Tus neeg txawj hlub luag thiab qiv rau luag nws txoj hmoov zoo.
Nws tswj nws tej nyiaj txiag raws kev ncaj.
Tus neeg ncaj yuav nyob ruaj nreb tshem tsis tau,
sawv daws yuav nco ntsoov txog nws mus li

Txais: (1b) Tus neeg hwm Huab Tais nws txoj hmoov zoo.
los: As les lus yas.

As Les Lus Yas:   QYTN 1: 5ab

Txais: As les lus yas, as les lus yas.

yes Xus Pleev, koj yog tus tim khawv tseeb,
koj yog thawj tus yug ntawm txoj kev tuag los.
Koj tau hlub peb thiab thiab muab koj roj ntsha
los txhiv peb dim ntawm peb cov txhaum.

Txais: As les lus yas, as les lus yas.

Ntawv Moo Zoo:   MK 12: 1-12

1 Yes Xus pib hais tej zaj paj lug li no rau cov thawj leej choj, cov thoob xwm ntawv thiab cov  txwj laus: "Muaj ib tug neeg cog tau ib daim teb txiv cawv, nws xov laj kab ncig, nws txaug ib lub zeb tsuam cawv, thiab nws txhim ib lub sam thiaj siab siab rau ntawd. Nws ntiav ib co tub tu txiv cawv ua cov zov nws daim teb, ces nws tawm rooj mus kev deb lawm.
2 Thaum txog caij, nws xa ib tug tub txib mus cuag cov zov teb, kom lawv muab ib feem ntawm cov txiv cawv rau nws.
3 Tab sis lawv nthos nkaus tus tub txib, muab nws ntaus tas, kom nws rov qab mus tes dawb tes npliag.
4 Tus tswv teb xa dua ib tug tub txib mus; cov tub zov teb kuj ntaus nws taub hau thiab ua tej yam saib tsis taus nws li.
5 Tus tswv teb rov xa dua ib tug tub txib mus thiab; lawv muab tus tub txib ntawd tua. Lawv kuj ua ib yam li ntawd rau ntau tus tub txib ntxiv, lawv muab ib co ntaus, muab ib co tua.
6 Tus tswv teb tseem tshuav ib tug neeg ntxiv, yog nws tus tub uas nws nyiam. Nws xa nws tus tub mus tom qab, nws xav tias: ‘Lawv yuav hwm kuv tus tub.’
7 Tab sis, cov tub zov teb sib tham tias: ‘Tus ntawd yog tus yuav txais lub cuab tam. Tsuag tsuag! Peb muab nws tua, lub cuab tam thiaj yuav yog peb tug.’
8 Ces lawv nthos nkaus nws, muab nws tua thiab coj nws mus pov tseg rau nraum ntug teb.
9 Yog li no, tus tswv teb txiv cawv yuav ua dab tsi? Nws yuav los, nws yuav muab cov zov teb tua, thiab yuav muab daim teb txiv cawv rau lwm cov neeg zov.
10 Nej tsis tau nyeem cov lus no hauv Ntawv lod?
‘Lub pob zeb uas cov txhim tsev muab pov tseg, hloov ua lub pob zeb txheem tsev.
11 Qhov ntawd, yog Huab Tais ua thiaj tau, yog ib yam zoo kawg rau peb qhov muag pom?’”
12 Lawv to taub tias Yes Xus zaj paj lug no yog hais rau lawv, ces lawv nrhiav kev ntes Yes Xus, tab sis lawv ntshai tsoom sid. Ces lawv tso Yes Xus tseg, lawv rov mus lawm.

Tim      6     lub     6     Hli     2023

Hnub Peb Lis Piam Cuaj Nruab Xyoo A Nruab Lis Piam Xyoo I
Lectionary: 354

XHLT:    LN Norbert, ua Tswv Qhia

Zaj Nyeem Ib:    TOS NPIS 2: 9-14

9 Hmo ua Hmoov Tsib Caug Hnub, kuv mus faus tuag los, kuv da dej tas, ces kuv mus nraum kuv lub tshav loog, kuv mus pw ze ntawm lub phab ntsa loog; kuv tsis npog ntsej muag li, vim sov sov.
10 Kuv tsis paub tias nyob ncaj saum qhov kuv pw, muaj ib co noog ua zes rau saum phab ntsa. Txawm muaj ib co quav noog poob nthav sov so los rau hauv kuv ob lub qhov muag. Kuv qhov muag thiaj hlav tej daim dawb dawb los plooj rau tas. Kuv coj mus rau cov kws tshuaj kho; tab sis lawv yim muab lawv cov tshuaj rau mas yim haj yam mob loj tuaj xwb, ces thaum kawg kuv cia li tsis pom kev lawm. Kuv tsis pom kev li ntawd tau plaub xyoos, kuv cov kwv tij nrog kuv tu siab kawg. As His Kas tu kuv tau ob xyoos ces nws mus dua Es Lis Mais teb lawm.
11 Thaum ntawd kuv poj niam As Nas thiaj mus nrhiav zog ua, nws nrhiav tau txoj hauj lwm ntos ntaub uas yog hauj lwm poj niam.
12 Thaum ntos tau lawm nws xa mus rau cov tswv ces lawv them nyiaj rau nws. Thaum lub caij ntuj no, hnub tim 7 lub peb hlis, kuv poj niam ntos tiav ib tug ntaub, nws muab xa mus rau cov tswv. Lawv them nyiaj rau nws thiab lawv tseem pub tau ib tug tshis mos rau nws coj los tua noj.
13 Thaum nws nkag los hauv tsev, tus tshis txawm pib quaj. Kuv hu kuv poj niam tias: "Tus tshis ntawd los qhov twg los? Tej zaum ntshai yog nyiag los xwb mas coj rov mus rau nws tus tswv. Peb tsis muaj cai noj tej yam nyiag los."
14 Kuv poj niam hais tias: "Yog lawv pub rau kuv, ntxiv kuv tus nqi zog xwb!" Kuv tsis ntseeg, kuv kom kuv poj niam cab rov mus rau cov tswv, kuv npau taws heev rau kuv poj niam. Ces kuv poj niam teb tias: "Koj tej kev niaj hnub pub rau luag dua twg lawd? Koj tej kev niaj hnub ua zoo rau luag dua twg tas lawd? Sawv daws paub ntsoov tias koj zoo li no twb yog vim koj tej kev ua zoo ntag los mas."

NPN    112: 1-2, 7-8, 9

Txais: (7c) Tus neeg ncaj lub siab nyob ruaj nreb, tso siab lug rau Huab Tais.
los: As les lus yas.

Tus muaj hmoov zoo yog tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj peev xwm nyob ntiaj teb;
caj ces neeg siab ncaj yuav tau txoj hmoov zooj.

Txais: (7bc) Tus neeg ncaj lub siab nyob ruaj nreb, tso siab lug rau Huab Tais.
los: As les lus yas.

Nws tsis ntshai hnov ib tsab xov phem;
nws lub siab nyob ruaj nreb, tso siab lug rau HUAB TAIS.
Nws lub siab nyob khob kho, nws tsis txhawj,
nws yuav tsa hau siab mus saib nws cov yeeb ncuab.

Txais: (7bc) Tus neeg ncaj lub siab nyob ruaj nreb, tso siab lug rau Huab Tais.
los: As les lus yas.

Nws muaj siab dav fo pub rau cov pluag :
nws txoj kev ua siab loj siab dav yuav nyob mus li,
nws yuav tau ntsej muag thiab nto koob meej.

Txais: (7bc) Tus neeg ncaj lub siab nyob ruaj nreb, tso siab lug rau Huab Tais.
los: As les lus yas.

As Les Lus Yas:    EFX 1: 17-18

Txais: As les lus yas, as les lus yas.

Thov kom peb tus Huab Tais Yes Xus Pleev leej Txiv
tso qhov pom kev tuaj kaj peb
cov qhov muag hauv nruab siab,
kom peb paub txog tias txoj kev tso siab
uas peb muaj vim nws hu peb yog dab tsi.

Txais: As les lus yas, as les lus yas.

Ntawv Moo Zoo:    MK 12: 13-17

13 Muaj ob peb tug Fas Lis Xais thiab Hes Los Dias raug luag xa tuaj lem Yes Xus kom nws hais lus yuam kev.
14 Lawv tuaj txog, lawv hais rau Yes Xus tias: "Xib Hwb, peb paub tias koj yog ib tug neeg hais qhov tseeb, thiab koj tsis txhawj txog leej twg cov lus uas lawv hais txog koj. Koj tsis saib tib neeg lub ntsej muag hais lus, tiam sis koj qhia Tswv Ntuj txoj kev raws qhov tseeb xwb. Ua li them se rau Xes Ntxas puas haum txoj cai los tsis haum? Peb puas yuav tsum them se los tsis them?"
15 Yes Xus twb paub tias lawv lub siab nkhaus, ces nws hais rau lawv tias: "Ua cas nej xav sim kuv? Muab ib lub txiaj nyiag los rau kuv xyuas saib."
16 Lawv muab ib lub txiaj nyiag los, Yes Xus thiaj hais rau lawv tias: "Tus duab no thiab cov npe ntawv hauv no yog leej twg li?" Lawv hais rau Yes Xus tias: "Yog Xes Ntxas li."
17 Ces Yes Xus hais rau lawv tias: "Yam twg yog Xes Ntxas tug, ces nej muab rov rau Xes Ntxas, yam twg yog Tswv Ntuj tug, mas nej muab rov rau Tswv Ntuj." Ces lawv ceeb tas rau nws cov lus.

Tim     7     lub     6     Hli     2023

Hnub Plaub Lis Piam Cuaj Nruab Xyoo A Nruab Lis Piam Xyoo I
Lectionary: 355

Zaj Nyeem Ib:    TOS NPIS 3: 1-11, 16-17a

1 Ces kuv, Tos Npis, tu siab loj tas nrho, kuv nroo thiab kuv quaj, kuv thiaj pib hais zaj teev Ntuj no ntxuag lub kua muag tias:
2 "HUAB TAIS, koj yog tus siab ncaj, koj ua qhov twg yog qhov ncaj. Koj tej kev tsuas yog kev pub txiaj ntsim thiab qhov tseeb xwb; koj yog tus txiav txim rau lub qab ntuj neeg.
3 Ua li mas, thov koj nco txog kuv, Huab Tais, thov koj tig koj lub ntsej muag hlub neeg los saib kuv. Koj tsis txhob rau txim rau kuv vim kuv tej kev txhaum los tej kev yuam kev, los vim kuv cov yawg koob tej kev yuam kev, vim peb tau ua txhaum rau koj lawm.
4 Peb tau hla koj cov lus qhia, ces koj tau tso peb rau luag tuaj lwg, rau luag tuaj cab peb mus ua qhev, thiab rau luag tuaj tua; koj cia peb raug luag hais, raug luag thuam thiab muab ua ib tug piv txwv luag tau siv los cem piv zias rau, nyob hauv tas cov haiv neeg uas koj cia peb tawg mus nyob xyaw.
5 Nyem no, koj tej kev txiav txim rau kuv muaj ntau thiab yog qhov tseeb; koj tsub txim rau kuv ris vim kuv tej kev txhaum thiab kuv cov yawg koob tej kev txhaum, vim peb tsis tau coj koj cov lus qhia, peb tsis tau ua raws qhov tseeb nyob ntawm koj xub ntiag.
6 Ces zaum no, thov koj ua rau kuv raws li koj nyiam. Thov koj hais kom kuv tus ntsuj plig nce mus cuag koj, kom kuv tau ncaim ntiaj teb no mus, thiab rov mus ua av. Yog kuv tuag mas zoo dua kuv ciaj nyob, vim kuv tau hnov lawv lam tau lam cem kuv, ces tu kuv siab loj tas nrho. Huab Tais, thov koj hais kom kuv cia li tawm plaws ntawm txoj kev txom nyem no mus nyob lub teb chaws kuv yuav so mus li. Thov koj tsis txhob fee ntsej muag rau kuv, vim kuv tuag zoo dua cia kuv ua neej raug txom nyem loj npaum no, thiab cia kuv hnov luag cem kuv.”
7 Tib hnub ntawd, nyob Es Npas Tas Nas, Mes Dias teb, Xas Las, uas yog Las Nkus Es tus ntxhais, kuj raug nws txiv ib tug ntxhais txib cem nws thiab.
8 Vim tias lawv twb muab nws pub tshoob rau xya tus txiv lawm, tab sis tus dab phem As Mos Des uas yog tus phem tshaj plaws hauv cov dab phem, muab nws cov txiv tua tuag ib tug zuj zus tas tib si, tsis pub lawv tau nrog Xas Las pw ua niam txiv raws tus kev cai li. Ces tus ntxhais txib tseem hais tias: "Twb yog koj muab koj cov txiv tua tas xwb! Koj kam yuav xya tus txiv diam, koj tsis tau muaj kev zoo siab nrog ib tug li!
9 Ua cas koj thiaj ntaus peb? Yog vim koj cov txiv tuag tas lawm lod? Koj kuj caum lawv qab xwb! Kom peb tsis txhob tau pom koj ib tug tub los ib tug ntxhais li!"
10 Hnub ntawd, Xas Las tu siab loj kawg li, nws quaj; nws nce mus saum nws txiv chav pw, nws npaj tias nws yuav mus dai tuag nyob saud. Tab sis nws ho xav tau tias: "Tsam luag tej yuav hais lus tub qaug kuv txiv, lawv yuav hais tias: 'Koj muaj ib tug nyuag ntxhais rau koj hlub xwb, nws tseem dai tuag lawm thiab, vim nws txoj hmoov phem!' Kuv tsis xav ua kom kuv txiv tu tu siab thaum nws yav laus no mus txog hnub nws tuag kiag. Ntshai zoo dua kom kuv txhob dai tuag, tiam sis kuv yuav thov HUAB TAIS ua kom kuv tuag, kom kuv thiaj tsis tau hnov luag tej thuam kuv ntxiv."
11 Tam sis ntawd, Xas Las tsa tes tig mus rau ntawm qhov rais, nws thov Ntuj tias: "HUAB TAIS, kuv tus Tswv Ntuj tus khuv leej neeg, thov kom koj nto koob meej, kom koj lub npe nto koob meej mus li. Thov kom koj nto koob meej nyob hauv koj tej hauj lwm mus li!”
16 Thaum ntawd, Tos Npis thiab Xas Las nkawd ob zag thov ntuj ua ib txhij nrov mus txog ntawm Tswv Ntuj muaj hwj chim lub xub ntiag.
17a Ces tus tshiab Las Fais thiaj raug xa tuaj kho nkawd ob leeg: Nws tuaj laws tej yam dawb dawb nyob hauv Tos Npis qhov muag kom nws rov pom Tswv Ntuj lub hnub ci pom kev dua; thiab nws tuaj muab Las Nkus Es tus ntxhais Xas Las txis rau Tos Npis tus tub Tos Npias ua poj niam, thiab nws ntiab tus dab As Mos Des uas phem tshaj tawm ntawm Xas Las mus.

NPN    25: 2-3, 4-5ab, 6+7bc, 8-9

Txais: (1) Huab Tais, kuv tsa kuv tus ntsuj plig tuaj rau koj.

Kuv tso siab rau koj, thov koj tsis txhob cia kuv poob ntsej muag,
txhob pub kom kuv cov yeeb ncuab muaj kev zoo siab vim kuv.
Cov neeg tso siab rau koj, tsis muaj ib tug yuav poob ntsej muag,
hos cov neeg ntxeev siab rau txoj kev ntseeg yuav poob ntsej muag.

Txais: (1) Huab Tais, kuv tsa kuv tus ntsuj plig tuaj rau koj.

Huab Tais, thov ua kom kuv paub koj tej kev,
thov qhia koj tej kev rau kuv taug,
coj kuv mus raws koj txoj kev tseeb thiab qhia rau kuv kawm,
vim koj yog Tswv Ntuj, tus cawm kuv.

Txais: (1) Huab Tais, kuv tsa kuv tus ntsuj plig tuaj rau koj.

Huab Tais, thov koj nco ntsoov tias koj yeej ib txwm
muaj lub siab hlub, thiab lub siab zoo txij puag thaum ub los lawm.
Vim koj lub siab zoo, thov koj nco txog kuv
nyob hauv koj txoj kev ua zoo, Huab Tais.

Txais: (1) Huab Tais, kuv tsa kuv tus ntsuj plig tuaj rau koj.

Huab Tais yog tus zoo tus siab ncaj,
nws qhia txoj kev zoo rau tus neeg txhaum taug.
Nws coj tus neeg me mus raws txoj kev ncaj,
nws qhia nws txoj kev rau tus neeg me taug.

Txais: (1) Huab Tais, kuv tsa kuv tus ntsuj plig tuaj rau koj.

As Les Lus Yas:    ZAM 11: 25a, 26

Txais: As les lus yas, as les lus yas.

Huab Tais hais tias: Kuv yog txoj kev sawv rov los thiab txoj sia,
leej twg ntseeg txog kuv yuav tsis tuag ib zaug li.

Txais: As les lus yas, as les lus yas.

Ntawv Moo Zoo:    MK 12: 18-27

18 Ib co xas dus kais tuaj cuag Yes Xus. Lawv yog cov uas hais tias neeg tuag yuav tsis sawv rov los li. Lawv nug Yes Xus tias:
19 "Xib Hwb, Mais Xes sau cia rau peb tias: ‘Yog leej twg ib tug kwv tij tuag tseg poj niam cia, tsis tau muaj me nyuam, mas tus kwv yuav tsum qaws tus niam tij kom tsa tau tus kwv tij ntawd caj ces sawv.’
20 Zaum no, muaj xya leej kwv tij. Thawj tug yuav poj niam, nws tuag, tsis tau muaj tub ki.
21 Tus ob qaws tus niam tij ntawd, nws kuj tuag tsis tau muaj tub ki li thiab; tus peb kuj ua ib yam li ntawd.
22 Ces lawv xya leej kwv tij ntawd puav leej ua ib yam tsis muaj tub ki cia li. Thaum kawg tus poj niam kuj tuag thiab.
23 Thaum txog caij neeg lub cev sawv rov los, lawv yuav sawv rov los, ua li mas tus poj niam ntawd yuav yog leej twg tus? Vim lawv xya tus kwv tij puav leej tau yuav nws ua poj niam."
24 Yes Xus hais rau lawv tias: "Puas yog vim nej tsis paub Ntawv Ntshiab thiab tsis paub Tswv Ntuj lub hwj huam, nej thiaj xav yuam kev?
25 Vim tias, thaum neeg lub cev sawv hauv cov tuag los, mas sawv daws yuav tsis yuav poj niam tsis yuav txiv, sawv daws yuav zoo li cov Tshiab nyob saum ntuj.
26 Hais txog ntawm cov tuag yuav sawv rov los, mas nej puas tau nyeem nyob hauv Mais Xes phau Ntawv, zaj piav txog tsob pos, uas Tswv Ntuj hais rau Mais Xes tias: ‘Kuv yog Has Nplas Has tus Tswv Ntuj, His Xas Has tus Tswv Ntuj, thiab Yas Kos tus Tswv Ntuj’?
27 Nws tsis yog cov tuag tus Tswv Ntuj, nws yog cov neeg ciaj tus Tswv Ntuj. Nej yuam kev lawm deb."

Tim     8     lub     6     Hli     2023

Hnub Tsib Lis Piam Cuaj Nruab Xyoo A Nruab Lis Piam Xyoo I
Lectionary: 356

Zaj Nyeem Ib:    TOS NPIS 6:10-11; 7:1bcde, 9-17; 8:4-9a

6: 10 Thaum tus tshiab Las Fais thiab Tos Npias mus txog Mes Dias teb lawm thiab mus yuav txog Es Npas Tas Nas,
11 tus tshiab hais rau tus hluas tias: “Tus kwv Tos Npias.” Nws teb tias: “Kuv nyob ntawm no.” Tus tshiab hais tias: “Hmo no wb yuav mus pw hauv Las Nkes tsev; nws yog koj ib tug txheeb ze. Nws muaj ib tug ntxhais hu ua Xas Las.”
7: 1bcde Ces nws coj tus hluas mus tom Las Nkes tsev; nkawd pom Las Nkes zaum ntawm lub rooj vag ntawm nws lub ntsa vaj. Nkawd xub hu nws. Nws teb nkawd tias: “Nyob zoo rau neb thiab os ob tug kwv tij! Thov kom neb tsuas ntsib kev noj qab haus huv os, los tsev mas!” Ces nws coj nkawd los hauv nws tsev.
9 Las Nkes ntes ib tug laug yaj hauv nws pab yaj los tua, nws ua ib pluag mov txais nkawd zoo. Thaum nkawd da dej ntxuav cev tas, nkawd los noj mov, Tos Npias hais rau Las Fais tias: "Tij laug As Ntxas Lias, thov koj pab kuv mus thov Las Nkes kom nws muab kuv tus muam Xas Las rau kuv yuav os.”
10 Las Nkes hnov tus hluas cov lus no, Las Nkes hais rau nws tias: "Hmo no koj noj mov haus dej kom txaus txaus thiab ua kev lom zem tso mog, vim cav tsis muaj leej twg muaj cai yuav yuav kuv tus ntxhais Xas Las npaum li koj li os, tus kwv. Txawm li cas los kuv yeej muab tsis tau nws rau lwm tus li, vim koj twb yog tus txheeb ze kuv tshaj lawm. Tiam sis, me tub, kuv yuav hais qhov tseeb rau koj.
11 Kuv twb nrhiav nyob hauv peb cov kwv tij txheeb ze xya tus txiv rau nws lawm. Tab sis cov txiv ntawd puav leej tuag tas tib si thawj hmo thaum lawv nyuam qhuav nkag kiag mus rau nws chav pw xwb. Ua li mas nyem no koj kav tsij rau siab noj thiab haus tso mog. HUAB TAIS yeej yuav pub nws lub txiaj ntsim thiab nws txoj kev kaj lug rau neb xwb." Tos Npias txawm teb tias: "Kuv yuav tsis kam noj tsis kam haus dab tsi li, yog koj tsis xub cog lus tias koj yuav muab yam uas yog kuv tug rau kuv tso." Las Nkes thiaj teb tias: “Cia ua li koj nyiam mas, vim raws Mais Xes txoj Cai ces nws yeej yog koj tug, lub ntuj yeej txiav kom muab nws rau koj. Ces kuv muab koj tus muam cob rau koj. Txij no mus koj yog nws tus nus thiab nws yog koj tus muam. Nws yog koj tug txij hnub no mus li lawm mog. Tus Tswv saum lub ntuj yeej yuav pub txoj hmoov zoo rau neb hmo no, thiab yuav muab nws lub txiaj ntsim thiab kev kaj siab lug rau neb xwb os.”
12 Ces Las Nkes hu nws tus ntxhais Xas Las los, nws muab tus ntxhais txhais tes cob rau Tos Npias, nws hais tias: "Kuv muab kuv tus ntxhais rau koj raws li txoj cai qhia; raws li sau tseg rau hauv Mais Xes phau ntawv ces nws yeej yog koj poj niam lawm. Koj yuav nws, koj coj nws mus kom txog koj txiv tsev mog. Thov kom tus Tswv saum lub ntuj tsuas pub kev kaj siab thiab kev vam meej rau neb xwb mog!"
13 Las Nkes hu nws poj niam kom muab ib kauj ntawv los rau nws sau. Nws poj niam nqa ntawv los, ces Las Nkes thiaj sau ntawv cog lus sib yuav cia tias: Nws muab nws tus ntxhais Xas Las rau Tos Npias yuav ua poj niam raws li Mais Xes txoj cai; nws ntaus thwj rau daim ntawv tib si.
14 Ua li ntawd tas sawv daws thiaj mam noj mov haus dej haus cawv.
15 Ces Las Nkes hu nws poj niam Es Nas los thiab hais tias: "Koj niad, koj npaj chav tsev tod, koj coj wb tus ntxhais mus pw hauv."
16 Es Nas mus kho tau chaw raws li nws tus txiv hais, ces nws los coj nws tus ntxhais mus pw. Nws quaj quaj rau tus ntxhais tas, nws so kua muag thiab nws hais tias:
17 "Kuv me ntxhais, koj tso siab mog! Tswv Ntuj yeej yuav hloov koj txoj kev tu siab los ua kev zoo siab xwb mog! Ua siab loj loj!" Ces leej niam tawm los.
8: 4 Thaum tus ntxhais niam thiab txiv tawm hauv chav pw mus thiab kaw qhov rooj rau lawm, Tos Npias sawv tsees saum txaj los, nws hais rau Xas Las tias: "Leej muad, koj sawv os! Wb ob leeg yuav tsum teev Ntuj tso, wb yuav thov kom HUAB TAIS pub nws lub txiaj ntsim pab wb thiab kom nws pov hwm wb."
5 Ces Xas Las sawv thiab nkawd ob leeg teev Ntuj thov kom Tswv Ntuj pov hwm nkawd. Tos Npias thiaj pib hais tias: "Peb cov yawg koob tus Tswv Ntuj, thov kom koj nto koob meej, thiab kom koj lub npe ntoo koob meej mus txheej dhau txheej! Kom cov txheej ntuj saud thiab tas txhua tsav yam koj tau tsim los cav txog koj lub koob meej mus txheej dhau txheej.
6 Koj yog tus tsim As Das, koj yog tus tsim Es Vas, nws poj niam, kom ua tus pab nws tus txhawb nws, ces caj ces tib neeg thiaj yug ntawm nkawd ob leeg los. Koj yog tus hais tias: 'Yuav tsis txhob cia txiv neej nws nyob nws ib leeg, peb yuav tsim ib tug los pab nws kom zoo li nws.'
7 Nyem no kuv yuav kuv tus muam no, tsis yog kuv yuav los ua si. Kuv yuav vim kuv muaj lub siab dawb paug rau nws tiag. Thov koj hlub nws thiab hlub kuv, thiab thov koj pub kom wb ua wb lub neej laus nkoos ua ke!"
8 Nkawd ob leeg ua ke teb tias: "Ua li! Ua li!"
9 Ces nkawd mam mus pw hmo ntawd ib hmos.

NPN   128: 1-2, 3, 4-5

Txais: (1a) Cov uas hwm Huab Tais lawv tau txoj hmoov zoo.

Nej cov uas hwm HUAB TAIS, nej txoj hmoov zoo,
nej cov uas taug raws nws txoj kev!
Vim nej yuav tau noj lub txiv ntawm nej tes hauj lwm,
nej yuav tau hmoov zoo thiab nws yuav ua zoo rau nej.

Txais: (1a) Cov uas hwm Huab Tais lawv tau txoj hmoov zoo.

Koj tus poj niam yuav zoo li ib txoj hmab txi txiv
ncw ncw nyob rau hauv koj tej kaum vaj kaum tsev,
koj cov me nyuam yuav zoo li ib co ntoo txiv roj
uas nyob ncig lees koj lub phaj tsum mov.

Txais: (1a) Cov uas hwm Huab Tais lawv tau txoj hmoov zoo.

Nej saib, tus neeg muaj txoj hmoov zoo
mas nws yog tus hwm HUAB TAIS.
Kom HUAB TAIS nyob saum roob Xis Yoos foom koob hmoov rau nej,
ces nej yuav tau pom Yes Lus Xas Les vam meej niaj hnub hauv nej lub neej.

Txais: (1a) Cov uas hwm Huab Tais lawv tau txoj hmoov zoo.

As Les Lus Yas:    2 TMT 1: 10

Txais: As les lus yas, as les lus yas.

Yes Xus Pleev peb tus Cawm seej tau rhuav txoj kev tuag pov tseg
thiab ua kom txoj sia tshwm tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo:    MK 12: 28-34

28 Ib tug kws Ntawv Ntshiab txav los nug Yes Xus tias: "Nyob hauv cov lus qhia tas huv tib si, lo lus qhia twg yog thawj lo lus qhia?"
29 Yes Xus teb rau nws tias: "Thawj lo lus qhia yog lo lus no: ‘His Xas Lais, koj mloog mog! Peb tus Huab Tais Tswv Ntuj tib leeg xwb yog Huab Tais.
30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.’
31 Lo lus qhia ob yog lo lus no: ‘Koj yuav nyiam tus nyob ze koj ib yam li koj nyiam koj.’ Tsis muaj lwm lo lus qhia loj dua ob lo lus no lawm."
32 Tus kws Ntawv Ntshiab hais rau Yes Xus tias: "Koj hais raug kawg, Xib Hwb, koj tau hais qhov tseeb tias: Tsuas muaj ib tug xwb, tsis muaj dua lwm tus dhau ntawm nws lawm;
33 thiab kom nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab kom nyiam tus nyob ze yus ib yam li yus nyiam yus, qhov ntawd zoo tshaj tej tsiaj hlawv thiab tej thaj txi Ntuj huv tib si."
34 Yes Xus pom tias tus kws Ntawv Ntshiab cov lus teb muaj kev to taub zoo, ces nws hais rau tus kws Ntawv Ntshiab tias: "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus ntxiv.

Tim     9     lub     6     Hli     2023

Hnub Rau Lis Piam Cuaj Xyoo A Nruab Lis Piam Xyoo I
Lectionary: 357

Zaj Nyeem Ib:  TOS NPIS 11: 5-17

5 As Nas zaum ntsia ntsoov txoj xub ke uas nws tus tub yuav rov los.
6 Thaum nws pom dheev tias yog nws tus tub, nws hais rau leej txiv tias: "Koj tus tub nrog tus ua nws luag los txog lawm!"
7 Thaum nkawd los tsis tau txog ntawm nws txiv, Las Fais hais rau Tos Npias tias: "Kuv hais tseeb rau koj tias koj txiv qhov muag yuav rov pom kev tuaj.
8 Koj yuav muab lub tsib ntses los pleev nws qhov muag. Cov tshuaj ntawd yuav tom thiab yuav ua kom txheej dawb dawb tawg thiab nti tawm los. Ces koj txiv yuav tsis dig muag ntxiv, nws yuav rov qab pom kev tuaj."
9 Tos Npias niam khiav khiav tuaj puag lias nws tus tub caj dab, nws hais tias: "Me tub, nyem no, kuv rov tau pom koj lawm kuv tuag kuj tau lawm!" Ces nws niam quaj quaj.
10 Tos Npis sawv tuaj, nws maub xuas kev dawm ub dawm no hla dhau lub qhov rooj vag tuaj thiab. Tos Npias taug kev los ntsib nws txiv.
11 Nws nqa lub tsib ntses ntawm tes; nws tshuab pa rau nws txiv qhov muag thiab nws tuav nws txiv ruaj ruaj, nws hais tias: "Txiv, koj txhob ntshai!" Ces nws muab lub tsib ntses pleev nws txiv qhov muag; cov tshuaj tom nws txiv qhov muag; nws tos ib me ntsis,
12 nws mam li xuas nws ob txhais tes mus nti daim tawv dawb dawb ntawm nws txiv ob lub kaum muag los.
13 Tos Npis thiaj cev tes mus puag lias nws tus tub caj dab, thiab nws quaj, nws hais tias: "Me tub, kuv rov pom koj lawm os, koj yog kuv ob lub qhov muag qhov pom kev!"
14 Tos Npis thiaj thov Ntuj tias:
"Thov kom Tswv Ntuj nto meej nto moo!
Kom nws lub npe loj tas nrho nto meej nto moo!
Kom nws cov tshiab nto meej nto moo!
Kom nws lub npe loj tas nrho nto meej nto moo mus tiam dhau tiam!
15 Vim yog nws tau muab kev txom nyem rau kuv, thiab nws kuj tau khuv leej kuv. Nyem no, kuv thiaj tau rov pom kuv tus tub Tos Npias lawm tiag!"
Tos Npias nkag mus rau hauv tsev, nws zoo siab, nws thiaj tsa suab nrov nrov cav txog Tswv Ntuj. Thiab nws tham qhia rau nws txiv tias: Nws tau mus zoo, thiab nws nqa tau cov nyiaj los lawm; nws twb yuav tau poj niam lawm thiab, nws yuav Las Nkes tus ntxhais hu ua Xas Las; tus nyab tseem lawv nws qab los txog tsis deb ntawm cov rooj loog Nis Nis Vas lawm.
16 Ces Tos Npis sawv tsees mus tos nws tus nyab nyob ntawm cov rooj loog Nis Nis Vas. Nws cav txog Tswv Ntuj vim nws zoo siab. Thaum cov neeg nyob Nis Nis Vas pom tsis muaj neeg tuav nws tes mus kev thiab pom nws rov muaj zog zoo li thaum ub lawm, mas lawv poob siab kawg.
17 Tos Npis tshaj rau lawv tias yog Tswv Ntuj tau hlub nws thiab rov qhib nws qhov muag lawm. Ces Tos Npis mus txog ntawm Xas Las, uas yog nws tus tub Tos Npias poj niam, nws foom lus zoo rau Xas Las tias: "Me ntxhais, kuv zoo siab tos txais koj! Kom koj tus Tswv Ntuj nto koob meej, vim nws tau tso koj los nrog peb nyob! Thov kom koj niam thiab koj txiv tau txoj hmoov zoo thiab kom kuv tus tub Tos Npias thiab koj, neb tau txoj hmoov zoo mog, Me ntxhais! Koj los nyob hauv koj tsev, thov kom koj tau txoj hmoov zoo thiab kev zoo siab mog! Los tsev, me ntxhais!"
Ces hnub ntawd, tas cov neeg Yus Das nyob Nis Nis Vas zoo siab.

NPN   146: 1b-2, 6c-7, 8-9a, 9bc-10

Txais: (1b) Kuv tus plig, koj cav lus zoo txog HUAB TAIS mog!
los: As les lus yas.

Kuv tus plig, koj cav lus zoo txog HUAB TAIS mog!
Kuv yuav cav txog HUAB TAIS tas kuv sim neej,
kuv yuav hu nkauj cav txog kuv tus Tswv Ntuj
thaum kuv tseem muaj txoj sia nyob.

Txais: (1b) Kuv tus plig, koj cav lus zoo txog HUAB TAIS mog!
los: As les lus yas.

Huab Tais pheej xeeb mus ib txhiab ib txhis;
nws muab kev ncaj rau cov raug luag quab yuam,
nws pub mov rau cov neeg tshaib noj.
HUAB TAIS tso cov neeg raug txim kom lawv dim

Txais: (1b) Kuv tus plig, koj cav lus zoo txog HUAB TAIS mog!
los: As les lus yas.

HUAB TAIS qhib cov dig muag qhov muag,
HUAB TAIS tsa cov khoov nkoos kom sawv ntseg,
HUAB TAIS nyiam cov neeg ncaj.
HUAB TAIS pov hwm cov pej kum neeg .

Txais: (1b) Kuv tus plig, koj cav lus zoo txog HUAB TAIS !mog
los: As les lus yas.

Nws txhawb tus ntsuag nos thiab tus poj ntsuam,
nws txiav tus neeg siab phem txoj hau kev.
HUAB TAIS yuav ua vaj mus li; Xis Yoos,koj tus Tswv Ntuj
yuav ua vaj mus txheej dhau txheej ! As les lus yas!

Txais: (1b) Kuv tus plig, koj cav lus zoo txog HUAB TAIS mog!
los: As les lus yas.

As Les Lus Yas:  ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As les lus yas, as les lus yas.

Ntawv Moo Zoo:  MK 12: 35-37

35 Thaum Yes Xus qhia nyob hauv lub Tuam Tsev Teev Ntuj, nws hais tias: "Vim li cas cov kws Ntawv Ntshiab thiaj hais tias Leej Pleev yog Das Vis leej tub ?
36 Hos Das Vis tau Leej Ntuj Plig tshoj nws kom nws hais cov lus no tias: ‘Huab Tais hais rau kuv tus Huab Tais tias: Koj zaum ntawm kuv phab xis, mus txog hnub kuv muab koj cov yeeb ncuab tso rau hauv koj qab xib taws.’
37 Das Vis twb hu Leej Pleev ua ‘Huab Tais’, ua cas Leej Pleev ho yog Das Vis leej tub thiab?" tsoom neeg coob zoo siab mloog Yes Xus cov lus no.

Tim     10     lub     6     Hli     2023

Hnub Xya Lis Piam Cuaj Nruab Xyoo A Nruuab Lis Piam Xyoo I
Lectionary: 358

Zaj Nyeem Ib:    TOS NPIS 12: 1, 5-15, 20

1 Thaum lawv los ua pluas noj hauv tsev tas lawm, Tos Npis hu nws tus tub Tos Npias los, thiab hais rau nws tias: "Me tub, koj yuav nco ntsoov muab nqe zog rau tus ua koj luag mus, koj yuav muab tshaj tus nqi uas peb tau hais tseg."
5 Tos Npias hu Las Fais tus ua nws luag los, thiab hais rau nws tias: "Koj yuav ib nrab ntawm tej yam uas koj tau thauj los ua koj tus nqi zog, thiab koj rov mus siab kaj lug mog!"
6 Ces Las Fais coj nkawd ob txiv tub mus rau ntawm ib qho chaw xu me ntsis, nws hais rau nkawd tias: "Neb cav txog Tswv Ntuj mog, neb ua nws tsaug nyob ntawm tsoom neeg ciaj xub ntiag rau tej yam zoo nws tau ua rau neb; neb qhuas txog nws thiab hu nkauj cav txog nws lub npe. Neb tshaj rau txhua leej neeg paub txog nws tej hauj lwm raws li tsim nyog ua; neb tsis txhob nkees ua nws tsaug li mog.
7 Yeej phim yuav tsum nrog tus vaj zais nws tej lus npog cia, tiam sis Tswv Ntuj tej hauj lwm mas yuav tsum muab qhia thiab tshaj tawm rau sawv daws paub. Neb ua nws tsaug kom tsim nyog mog. Neb ua qhov zoo ces yuav tsis muaj qhov phem tuaj raug neb li.
8 Txoj kev teev ntuj nrog kev yoo mov thiab txoj kev pub rau luag nrog kev ncaj ncees muaj nqes dua ua neeg nplua nuj nyob hauv kev ua txhaum. Xyaum pub rau luag mas muaj nqes dua khaws ib niag pob kub cia.
9 Txoj kev pub rau luag cawm yus ntawm txoj kev tuag thiab ntxuav yus tej txhaum tas huv si pov tseg. Cov neeg pub rau luag yuav ua neej nyob ntev laus nkoos.
10 Cov neeg ua txhaum thiab ua qhov phem, yog lawv rov ua yeeb ncuab rau lawv tus kheej.
11 Kuv yuav qhia qhov tseeb rau neb, yuav tsis zais ib yam dab tsi li. Kuv twb hais rau neb lawm tias yog ib qho zoo kom yus nrog tus vaj khaws nws tej lus npog cia, tiam sis kuj yog ib qho zoo kom yus muab Tswv Ntuj tej hauj lwm qhia thiab tshaj tawm rau sawv daws paub raws txoj kev tsim nyog ua rau Tswv Ntuj.
12 Kuv hais rau neb paub tias, thaum koj Tos Npis thiab koj tus nyab Xas Las neb tau thov Ntuj, mas kuv yog tus tau cev thiab tau nyeem neb zaj thov nyob ntawm Huab Tais muaj hwj chim xub ntiag; thaum twg koj mus faus cov neeg tuag los kuv kuj ua ib yam li ntawd thiab.
13 Thaum koj tsis ua xyem xyav, koj cia li tso diav plhuav sawv tsees mus faus ib tug neeg tuag, los kuv kuj raug xa tuaj sim koj siab.
14 Thiab nyem no los yog Tswv Ntuj xa kuv tuaj kho koj thiab koj tus nyab Xas Las kom zoo hlo.
15 Kuv yog Las Fais, yog ib tug ntawm xya leej Tshiab uas chaws mus tsob hwb Tswv Ntuj nyob hauv nws lub hwj chim.
20 Yog li, nej yuav cav txog Huab Tais nyob ntiaj teb no thiab ua Tswv Ntuj tsaug mog. Kuv yuav nce rov mus cuag tus uas tau xa kuv tuaj. Nej muab tas puas tsav yam uas tshwm sim rau nej sau cia.”  Ces Las Fais nce mus lawm.

NPN:    Tos Npis 13: 2, 6efgh, 7, 8

Txais: (1b) Peb cav txog Tswv Ntuj tus uas nyob mus li.

Nws nplua neeg tas ces nws ho khuv leej neeg;
nws ua kom neeg poob lawm puag dab nriag teb,
thiab nws kuj npo neeg puag hauv lub qhov ntuj tob tawm los.
Tsis muaj leej twg yuav khiav dim tau ntawm nws txhais tes.

Txais: (1b) Peb cav txog Tswv Ntuj tus uas nyob mus li.

Nej yuav saib tas puas tsav yam nws tau ua rau nej,
ces nej tsa suab nrov nrov cav txog nws.
Nej cav lus zoo txog tus Huab Tais muaj kev ncaj ncees,
thiab nej qhuas txog tus Vaj kav cov tiam neeg.

Txais: (1b) Peb cav txog Tswv Ntuj tus uas nyob mus li.

Hauv lub teb chaws kuv mus nyob txim, kuv cav txog Huab Tais,
thiab kuv qhia txog nws lub hwj huam thiab hwj chim
Rau ib haiv neeg txhaum paub.

Txais: (1b) Peb cav txog Tswv Ntuj tus uas nyob mus li.

Tas nej cov uas nws tau xaiv, nej cav txog Huab tais,
tas nej sawv daws cia li cav txog nws lub hwj chim.
Nej qee tej hnub los ua kev zoo siab thiab nej cav txog nws.

Txais: (1b) Peb cav txog Tswv Ntuj tus uas nyob mus li.

As Les Lus yas:    MT 5: 3

Txais: As les lus yas, as les lus yas.

Cov pluag hauv nruab siab lawv txoj hmoov zoo,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv moo Zoo:    MK 12: 38-44

38 Thaum Yes Xus qhia sawv daws, nws hais tias: "Nej yuav ceev faj txog cov kws Ntawv Ntshiab. Lawv nyiam hnav tej lub tsho ntev ntev ua zam mus kev piav yeev rau ub rau no, kom luag hawm lawv tom tej tshav puam.
39 Lawv nyiam zaum cov rooj kim txwv pem hauv ntej hauv cov tsev txoos, thiab thawj cov rooj zaum thaum muaj noj muaj haus.
40 Lawv muab cov poj ntsuam tej vaj tej tse nqos tas, ces lawv ua txuj hais tej zaj teev ntuj ntev ntev los npog tej ntawd. Lawv yuav raug txiav txim hnyav kawg nkaus."
41 Yes Xus mus zaum ncaj rau lub txhab ceev nyiaj sab tid, thiab nws ntsia zeej tsoom tso nyiaj rau hauv lub txhab. Cov nplua nuj coob leej tso nyiaj ntau rau hauv.
42 Muaj ib tug poj ntsuam pluag pluag tuaj tso ob lub nyuag txiaj toog me me, tsis muaj nqis ntau li.
43 Ces Yes Xus hu nws cov thwj tim los ze nws, nws hais rau lawv tias: "Kuv hais tseeb rau nej, tus poj ntsuam pluag pluag no, tau tso nyiaj ntau dua cov uas tuaj tso nyiaj rau hauv lub txhab ceev nyiaj tas huv tib si.
44 Vim tas cov neeg tso nyiaj ntawd, rho lawv tej nyiaj seem mus tso xwb, hos tus poj ntsuam no rho nyiaj hauv nws txoj kev pluag los tso, nws rho tas nrho qhov nws muaj, qhov uas nws yuav siv los yug nws txoj sia, los tso rau hauv."

Tim     12     lub     6     Hli     2023

Hnub Ob Lis Piam Kaum Nruab Xyoo A Nruab Lis Piam Xyoo I
Lectionary: 359

Zaj Nyeem Ib:   2 KLN 1: 1-7

1 Kuv, Paj Lug, uas yog Yes Xus Pleev ib tug Hauv Paus Xa Lus vim Tswv ntuj pom zoo, nrog tus kwv Tis Mos Tes, sau ntawv rau Tswv Ntuj lub Koom Txoos nyob Kos Lis Nthos thiab rau tas cov ntshiab nyob As Kas Yas teb tib si.
2 Thov kom Tswv Ntuj peb Leej Txiv thiab Huab Tais Yes Xus Pleev pub txiaj ntsim thiab kev thaj yeeb rau nej.
3 Peb cav lus zoo txog peb tus Huab Tais Yes Xus Pleev tus Tswv Ntuj  thiab nws leej Txiv, uas yog Leej Txiv tus khuv leej neeg thiab  yog tus Tswv Ntuj txawj nplij sawv daws lub siab tas nrho.
4 Nws nplij peb nyob hauv peb txhua txoj kev txom nyem, kom peb txawj nplij luag tej nyob hauv lawv txoj kev txom nyem thiab, raws li peb twb tau txais Tswv Ntuj txoj kev nplig peb siab lawm.
5 Vim tias, Leej Pleev raug txom nyem loj kawg nkaus pub rau peb, li ntawd mas nyob hauv Leej Pleev, txoj kev nplig siab kuj txhawv ntws lug los nplij peb thiab.
6 Yog peb raug txom nyem mas yog raug kom nej tau txais kev nplig siab thiab kev cawm. Yog peb tau txais kev nplig siab, mas kuj yog txais kom nej tau txais kev nplig siab thiab, ces nej thiaj yuav ua siab ntev ris tej kev txom nyem uas peb ris thiab.
7 Peb muaj kev tso siab lug ruaj nreb hais txog nej, vim peb paub tias nej twb nrog peb ris kev txom nyem, mas nej kuj yuav nrog peb txais kev nplig siab thiab.

NPN   34: 2-3, 4-5, 6-7, 8-9

Txais: (9a) Nej saj ces nej yuav pom tias Huab Tais lub siab zoo.

Kuv yuav cav txog HUAB TAIS txhua lub sij hawm;
lo lus qhuas txog nws yuav nyob rawv ntawm kuv lub ncauj.
kom kuv tus plig nrhiav koob meej nyob hauv HUAB TAIS;
tus neeg me yuav hnov txog kuv thiab yuav zoo siab.

Txais: (9a) Nej saj ces nej yuav pom Huab Tais lub siab zoo.

Nej nrog kuv cav txog HUAB TAIS lub koob meej,
peb sawv daws ua ke qhuas nws lub npe.
Thaum kuv nrhiav HUAB TAIS, nws tau teb kuv,
thiab tau cawm kuv dim ntawm kuv tej kev ntshai.

Txais: (9a) Nej saj ces nej yuav pom tias Huab Tais lub siab zoo.

Nej vam txog nws ces nej yuav zoo siab luag ntxhi,
nej ntsej muag yuav tsis liab vim nej tau txaj muag.
Thaum tug neeg pluag hu, HUAB TAIS hnov,
thiab yuav cawm nws ntawm tas nws tej kev nyuaj.

Txais: (9a) Nej saj ces nej yuav pom tias Huab Tais lub siab zoo.

HUAB TAIS tus tshiab tsa tsev tsam phooj nyob ncig
cov neeg hwm HUAB TAIS, nws cawm lawv dim.
Nej saj ces nej yuav pom tias HUAB TAIS lub siab zoo npaum li cas.
Hmoov zoo rau tus muab HUAB TAIS ua nws lub chaw vam khom!

Txais: (9a) Nej saj ces nej yuav pom tias Huab Tais lub siab zoo.

As Les Lus Yas:   MT 5: 12a

Txais: As les lus yas, as les lus yas.

Nej yuav zoo siab thiab hom khaj,
vim nej yuav tau txais koob haum loj nyob saum ntuj.

Txais: As les lus yas, as les lus yas.

Ntawv Moo Zoo:   MT 5: 1-12

1 Yes Xus pom neeg coob coob tuaj, nws nce mus saum lub roob, nws zaum, ces nws cov thwj tim txav los ze nws.
2 Yes Xus thiaj tsa ncauj qhia lawv hais tias :
3 "Cov tau txoj hmoov zoo, yog cov pluag hauv nruab siab, vim lub Ceeb Tsheej saum ntuj yog lawv li.
4 Cov tau txoj hmoov zoo, yog cov quaj ntsuag, vim yuav muaj tus nplij lawv.
5 Cov tau txoj hmoov zoo, yog cov ua neeg me, vim lawv yuav txais lub ntiaj teb los ua lawv tug.
6 Cov tau txoj hmoov zoo, yog cov tshaib thiab nqhis txog txoj kev ncaj, vim yuav muaj tus daws lawv qhov nqhis.
7 Cov tau txoj hmoov zoo, yog cov khuv leej luag, vim yuav muaj tus khuv leej lawv.
8 Cov tau txoj hmoov zoo, yog cov muaj lub siab dawb siab huv, vim lawv yuav pom Tswv Ntuj.
9 Cov tau txoj hmoov zoo, yog cov tsim kev thaj yeeb, vim luag yuav hu lawv ua Tswv Ntuj cov tub.
10 Cov tau txoj hmoov zoo, yog cov raug luag hiam vim txoj kev ncaj, vim lub Ceeb Tsheej saum ntuj yog lawv tug.
11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo.
12 Nej yuav zoo siab thiab yuav hom khaj mog, vim nej yuav tau txais koob haum loj nyob saum ntuj; luag kuj tau hiam cov yaj saub tuaj ua nej ntej zoo li ntawd thiab.”

Tim     13     lub     6     Hlis     2023

Hnub Peb Lis Piam Kaum Nruab Xyoo B Nruab Lis Piam Xyoo I
Lectionary: 360

Yuav Hwm  LN Anthony nyob Padua, ua Leej Choj thiab Kws cov Txuj Ntshiab

Zaj NYeem Ib:   2 KLN 1: 18-22

Cov kwv tij nkauj muad:
18 Kuv tuav txog Tswv Ntuj los hais tseeb rau nej tias, peb cov lus peb hais rau nej tsis ib txhij hais tias ‘tau’ thiab ‘tsis tau.’
19 Vim tias Tswv Ntuj Leej Tub Yes Xus Pleev, uas Xis Vas Nus thiab Tis Mos Tes thiab kuv peb tau tshaj rau nej paub, mas nws tsis muaj ‘tau’ thiab ‘tsis tau’ nyob hauv nws, tsuas muaj ‘tau’ nyob hauv nws xwb.
20 Tas nrho Tswv Ntuj cov lus nws tau cog txhua lo muaj qhov “tau” huv tib si nyob hauv Yes Xus; thiab kuj yog nrog Yes Xus, peb thiaj hais lo lus tias ‘Ua li’ rau Tswv Ntuj los cav txog nws lub koob meej.
21 Tus uas ua kom peb nrog nej nyob ruaj nreb hauv Leej Pleev, thiab tau pleev roj rau peb, yog Tswv Ntuj.
22 Nws yog tus tau muab nws lub thwj los ntaus cim rau peb, thiab yog tus tau tso Leej Ntuj Plig los nyob hauv peb nrub siab , ua thawj yam ntawm txhua yam nws cog lus yuav muab rau peb .

NPN   119: 129, 130, 131, 132, 133, 135

Txais: (135a) Huab Tais, cia koj lub ntsej muag ci tuaj rau kuv mas.

Koj tej txhooj koj tau txiav zoo tas nrho,
vim li no kuv thiaj coj raws li ntawd.

Txais: (135a) Huab Tais, cia koj lub ntsej muag ci tuaj rau kuv mas.

Koj cov lus tawm tuaj ci kom pom kev,
ces ua kom cov neeg me txawj to taub.

Txais: (135a) Huab Tais, cia koj lub ntsej muag ci tuaj rau kuv mas.

Kuv huas pa laws rua ncauj hlo,
Vim kuv tshaib koj cov lus qhia.

Txais: (135a) Huab Tais, cia koj lub ntsej muag ci tuaj rau kuv mas.

Thov koj tig los saib kuv thiab khuv leej kuv,
ib yam li koj tig los rau cov neeg nyiam koj lub npe.

Txais: (135a) Huab Tais, cia koj lub ntsej muag ci tuaj rau kuv mas.

Thov koj hwj kuv txhais taw kom taug raws nraim li koj cov lus cog,
txhob kheev kom kev txhaum tuaj tswj tau kuv.

Txais: (135a) Huab Tais, cia koj lub ntsej muag ci tuaj rau kuv mas.

Thov cia koj lub ntsej muag ci tuaj rau saum koj tus tub txib
thiab qhia koj cov kev cai lij choj rau kuv paub.

Txais: (135a) Huab Tais, cia koj lub ntsej muag ci tuaj rau kuv mas.

As Les Lus Yas:   MT 5: 16

Txais: As les lus yas, as les lus yas.

Nej cia nej qhov pom kev ci nyob ntawm zeej tsoom xub ntiag,
kom lawv pom nej cov dej num zoo, ces lawv yuav cav txog nej Txiv nyob saum ntuj.

Txais: As les lus yas, as les lus yas.

Ntawv Moo Zoo:   MT 5: 13-16

Yes Xus haisrau nws cov thwj tim  tias:
13 "Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov daw tuaj? Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb.
14 "Nej yog qhov pom kev ci rau lub ntiaj teb. Ib lub nroog txhim rau saum ncov roob, yuav muab zais tsis tau.
15 Hos, luag kuj tsis taws teeb coj mus khwb rau hauv qab pob tawb, luag muab txawb rau saum tus ncej teeb, lub teeb thiaj ci rau tas cov neeg nyob hauv tsev pom kev.
16 Li ntawd, nej qhov pom kev yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj.

Tim 14 lub 6 Hli 2023

Hnub Plaub Lis Piam Kaum Nruab Xyoo A Nruab Lis Piam Xyoo I
Lectionary: 361

Zaj Nyeem Ib: 2 KLN 3: 4-11

Cov kwv tij nkauj muad:
4 Peb muaj kev tso siab loj tas nrho rau Tswv Ntuj nyob hauv Leej Pleev.
5 Tsis yog vim tias peb tus kheej muaj peev xwm ua tau tej yam uas peb yuav khav tau tias yog peb ua tawm los, tiam sis peb lub peev xwm yog tuaj ntawm Tswv Ntuj tuaj.
6 Nws yog tus pub kom peb muaj peev xwm ua tau txoj kab xwm tshaj txoj kev cog lus tshiab, uas tsis yog ib txog kev cog lus nyob hauv ntaub ntawv, tiam sis yog ib txog kev cog lus nyob hauv Leej Ntuj Plig, vim tias lo lus hauv ntaub ntawv ua kom tuag, hos Leej Ntuj Plig ua kom ciaj sia.
7 Yog tias txoj kab xwm hais txog kev tuag hauv ntaub ntawv uas muab txaug rau saum cov txiag zeb twb muaj hwj chim loj, ua tau kom cov tub ki His Xas Lais ntsia tsis taus Mais Xes lub ntsej muag vim nws lub ntsej muag muaj hwj chim, txawm tias yog ib lub hwj chim kav tsis ntev,
8 mas txoj kab xwm hais txog Leej Ntuj Plig haj yam yuav tsum muaj hwj chim loj tshaj ntawd.
9 Yog tias txoj kab xwm muab txim rau neeg twb muaj hwj chim, mas txoj kab xwm muab kev ncaj ncees haj yam yuav muaj hwj chim loj tshaj.
10 Li ntawd txoj kab xwm uas thaud muaj hwj chim, nyem no tsis muaj hwj chim dab tsi, vim txoj kab xwm tshiab lub hwj chim loj tshaj lawm.
11 Vim tias yog yam uas yuav dua sai twb muaj hwj chim, mas yam uas yuav nyob mus li, haj yam yuav tsum muaj hwj chim loj tshaj.

NPN 99: 5, 6, 7, 8, 9

Txais: (9c) Huab Tais peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj;
nej pe hawm nws ntawm nws lub rooj tiag taw!
Nws yeej ntshiab tiag!

Txais: (9c) Huab Tais peb tus Tswv Ntuj yog tus ntshiab.

Mais Xes thiab As Loos yog ob tug nyob hauv nws tsoom leej choj,
Xas Muas yog ib tug nyob hauv cov uas hu txog nws lub npe;
thaum lawv hu txog HUAB TAIS, nws teb lawv.

Txais: (9c) Huab Tais peb tus Tswv Ntuj yog tus ntshiab.

HUAB TAIS nyob hauv tus ncej huab nrog lawv tham;
Lawv hnov nws tej lij choj thiab txoj cai nws muab rau lawv.

Txais: (9c) Huab Tais peb tus Tswv Ntuj yog tus ntshiab.

HUAB TAIS, peb tus Tswv Ntuj, koj teb lawv,
koj yog ib tug Tswv Ntuj ua siab ntev zam rau lawv,
tab sis koj rau txim rau lawv vim lawv cov txhaum.

Txais: (9c) Huab Tais peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj ;
nej pe hawm nws nyob saum lub roob nws txoj kev ntshiab,
vim HUAB TAIS peb tus Tswv Ntuj ntshiab tiag !

Txais: (9c) Huab Tais peb tus Tswv Ntuj yog tus ntshiab.

As Les Lus Yas: NPN 25: 4b, 5a

Txais: As les lus yas, as les lus yas.

Kuv tus Tswv Ntuj, thov koj qhia koj txoj kev rau kuv taug,
thiab coj kuv mus nyob hauv koj txoj kev tseeb.

Txais: As les lus yas, as les lus yas.

Ntawv Moo Zoo: MT 5: 17-19

Yes Xus hais rau nws cov thwj tim tias:
17 “Nej txhob xav tias kuv tuaj rhuav Txoj Cai thiab cov Yaj Saub; kuv tsis yog tuaj rhuav, kuv tuaj qhia ntxiv kom thoob xwb.
18 Kuv hais qhov muaj tseeb rau nej tias: mus txog thaum lub ntuj lub teb dua, yuav tsis muaj ib tug txwm ntawv, los ib lub cim ntawv me me hauv Txoj Cai yuav ploj, tas ib puas tsav yam nyob hauv yuav tsum tshwm sim tuaj tso.
19 Li ntawd yog leej twg hla ib txog cai me me nyob hauv cov lus qhia, thiab qhia kom lwm tusj coj xws li nws, mas luag yuav hu nws ua tus me tshaj cov nyob hauv lub Ceeb Tsheej saum ntuj. Hos tus ua raws Txoj Cai tas huv si, thiab nws qhia kom lwm tus coj li ntawd, mas luag yuavhu nws ua tus loj tshaj nyob hauv lub Ceeb Tsheej saum ntuj.”

Tim     15     lub     6     Hli     2023

Hnub Tsib Lis Piam Kaum Nruab Xyoo A Nruab Lis Piam Xyoo I
Lectionary: 362

Zaj Nyeem Ib:   2 KLN 3: 15—4: 1, 3-6

Cov kwv tij nkauj muad:
15 Los txog niaj hnub no, thaum lawv nyeem Mais Xes cov ntawv, mas muaj ib daig ntaub pheej npog rawv cov His Xas Lais lub siab.
16 Tiam sis yog thaum twg ib tug neeg tig los hwm Huab Tais, mas daim ntaub ntawd raug muab tshem tawm mus.
17 Vim Huab Tais yog Leej Tswv Yim,  ces yog Huab Tais leej Tswv Yim nyob qhov twg, mas kev twj lij kuj nyob qhov ntawd thiab.
18 Peb sawv daws cov uas ntsej muag tsis npog ntaub lawm, peb zoo li daim iav uas pom Huab Tais lub hwj chim ci nyob hauv; ces peb hloov mus ua daim duab ntawd, uas txais hwj chim tas los txais hwj chim dua tuaj ntawm Huab Tais uas yog Leej Tswv Yim tuaj.
4: 1 Li ntawd, tos peb tau txais txoj kab xwm no ua, los yog vim Tswv Ntuj khuv leej peb, ces peb tsis ntaus siab me li.
3 Txawm tias, peb lub Moo Zoo muaj ib qho npog, los tsuas yog npog rau cov neeg uas mus taug txoj kev ploj xwb.
4 Lawv yog cov neeg tsis ntseeg, uas tus dab kav tiam neeg no ua kom lawv lub tswv yim tsis pom kev, ces lawv thiaj tsis pom lub Moo Zoo qhia txog Leej Pleev lub hwj chim ci tawm tuaj, Leej Pleev uas yog Tswv Ntuj tus duab.
5 Peb tsis yog rov tshaj txog peb tus kheej, hos peb tshaj txog Yes Xus Pleev uas yog Huab Tais. Ntawm peb, mas peb tsuas ua nej tub txib, vim Yes Xus xwb.
6 Tus Tswv Ntuj uas tau hais tias: ‘Kom qhov pom kev ci hauv qhov tsaus ntuj tuaj,’ mas nws yog tus ci nyob hauv peb nruab siab, thiaj ua kom qhov pom kev ntawm kev paub txog Tswv Ntuj lub hwj chim, uas nyob saum Leej Pleev lub ntsej muag, ci hob tawm tuaj.

NPN   85: 9ab+10, 11-12, 13-14

Txais: (10b) HUAB TAIS lub hwj chim yuav nyob txawm hauv peb lub teb chaws.

Kuv yuav hnov yam uas Tswv Ntuj tshaj tawm;
Huab Tais, nws tshaj tawm txog kev thaj yeeb rau nws haiv neeg.
Nws txoj kev cawm nyob ze ze cov neeg hwm nws lawm,
lub hwj chim yuav nyob txawm hauv peb lub teb chaws.

Txais: (10b) HUAB TAIS lub hwj chim yuav nyob txawm hauv peb lub teb chaws.

Kev ua siab zoo thiab kev tseeb yuav los sib ntsib,
kev ncaj ncees thiab kev thaj yeeb yuav los sib qawg.
Kev tseeb yuav txhawv tawm hauv lub ntiaj teb los,
kev ncaj ncees yuav dauv muag ntsia saum ntuj tuaj.

Txais: (10b) HUAB TAIS lub hwj chim yuav nyob txawm hauv peb lub teb chaws.

HUAB TAIS yuav pub nws tej koob hmoov,
ces peb thaj av yuav ntsu qoob ntsu loo tuaj.
Kev ncaj ncees yuav taug kev ua nws ntej,
kev cawm yuav taug kev raws nws cov hneev taw.

Txais: (10b) HUAB TAIS lub hwj chim yuav nyob txawm hauv peb lub teb chaws.

As Les Lus Yas:   Zam 13: 34

Txais: As les lus yas, as les lus yas.

Kuv muab ib lo lus qhia tshiab rau nej:
Nej yuav ib leeg hlub ib leeg raws li kuv tau hlub nej.

Txais: As les lus yas, as les lus yas.

Ntawv Moo Zoo:   MT 5: 20-26

Yes Xus hais rau nws cov thwj tim tias:
20 "Kuv hais rau nej tias: Yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv lub Ceeb Tsheej saum ntuj.
21 "Nej tau hnov cov lus qhia rau cov laus thaud tias: ‘Koj tsis txhob tua neeg; tus twg tua neeg, nws yuav mus raug txiav txim ntawm rooj hais plaub.’
22 Hos kuv hais rau nej tias: Leej twg npau taws rau nws tus kwv tij, mas nws yuav mus raug txiav txim ntawm rooj hais plaub. Yog nws hais rau nws tus kwv tij tias: ‘Niag ruam’, mas nws yuav mus raug txiav txim ntawm lub rooj txwj laus Xas Nes Nrees. Yog nws hais rau nws tus kwv tij tias: ‘Niag vwm’, mas nws yuav mus raug txiav txim nyob hauv dab phem cov hluav taws.
23 Li ntawd, thaum koj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj ib qho tsis zoo rau koj lawm,
24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov los cev koj cov txim.
25 Koj kav tsij nrog koj tus yeeb ncuab hais kom haum sai sai, thaum koj tseem nrog nws ua ke taug kev, ntshai tsam nws coj koj mus kom rau tus nom txiav txim, ces nom txiav txim muab koj cob rau tub ceev xwm, ces luag muab koj kaw rau hauv tsev loj faj.
26 Kuv hais tseeb rau koj tias, koj yuav tawm tsis tau hauv tsev loj faj los, mus txog thaum koj them kom tas txog npib kawg tso.”

Tim      16     lub     6     Hli     2023

Hnub Rau Lis Piam Kaum Nruab Xyoo A Nruab Lis Piam Xyoo I

Ua Hmoov Hwm Yes Xus Lub Plawv Ntshiab.
Lectionary: 170

Zaj Nyeem Ib:   TXOJ CAI OB 7: 6-11

Mais Xes hais rau haiv neeg His Xas Lais tias:
6 “Nej yog ib haiv neeg qee rau HUAB TAIS nej tus Tswv Ntuj; HUAB TAIS, nej tus Tswv Ntuj tau xaiv nej hauv tas txhua haiv neeg nyob ntiaj teb los ua nws haiv neeg tshwj xeeb.
7 HUAB TAIS lub siab nyob ntawm nej thiab xaiv nej, tsis yog vim nej coob dua lwm haiv neeg, rau qhov nej yog ib haiv neeg tsawg dua cov tas tib si.
8 Tab sis yog vim HUAB TAIS hlub nej, thiab nws xav ua raws li lo lus nws tau cog rau nej cov yawg koob, nws thiaj siv nws txhais tes muaj zog rho nej tawm ntawm lub teb chaws nej ua luag qhev los, thiab npo nej dim ntawm Fas Las Oos, tus vaj Hais Nkws Tos txhais tes los.
9 Li no nej yuav tsum paub tias HUAB TAIS, nej tus Tswv Ntuj, yog tus tseem Tswv Ntuj tiag, yog tus Tswv Ntuj tsis fav xeeb uas nco ntsoov nws lo lus nws tau cog, mus txog txhiab tiam neeg, thiab nws hlub cov neeg nyiam nws, thiab khaws nws cov lus qhia.
10 Tab sis nws rau txim pauj rau cov neeg ntxub nws; nws ua kom tus neeg ntxub nws puas ntsoog mus, nws tsis ncua lub txim, nws rau txim rau tus tib neeg kiag.
11 Li ntawd, nej yuav tsum coj rawv cov lus qhia, cov kev cai thiab tej lij choj uas kuv ceeb toom rau nej hnub no kom nej coj.”

NPN    103: 1-2, 3-4, 8+10

Txais:   (17) Huab Tais ua zoo tas mus li rau cov uas hwm nws.

Kuv tus ntsuj plig, koj cav txog HUAB TAIS mas;
kuv tej siab ntsws, nej cav txog nws lub npe ntshiab mog.
Kuv tus ntsuj plig, koj cav txog HUAB TAIS,
koj tsis txhob hnov qab nws tej kev ua zoo ib qho li.

Txais:   (17) Huab Tais ua zoo tas mus li rau cov uas hwm nws.

Nws tau zam tas koj tej txhaum rau koj,
nws tau kho tas koj tej kev mob nkeeg kom zoo hlo.
Nws tau cawm koj txoj sia ntawm kev puas nstoog,
nws tau muab nws txoj kev ua zoo thiab kev khuv leej rau koj ntoo.

Txais:   (17) Huab Tais ua zoo tas mus li rau cov uas hwm nws.

HUAB TAIS khuv leej thiab hlub neeg,
nws npau taws qeeb, nws muaj kev hlub loj.
Nws tsis ua rau peb kom phim peb tej kev txhaum,
nws tsis ua pauj rau peb kom phim peb tej kev ua phem.

Txais:   (17) Huab Tais ua zoo tas mus li rau cov uas hwm nws.

Zaj Nyeem Ob:    1 ZAM  4: 7-16

7 Cov zoo nyiad, peb yuav sib nyiam sib hlub mog, vim txoj kev nyiam yog tuaj ntawm Tswv Ntuj tuaj, ua li mas tus twg nyiam, tus ntawd yug ntawm Tswv Ntuj los, thiab nws paub Tswv Ntuj.
8 Tus tsis nyiam, mas nws tsis paub Tswv Ntuj, vim Tswv Ntuj yog txoj kev nyiam.
9 Tswv Ntuj txoj kev nyiam tawm los rau peb pom xyeem zoo li no : Tswv Ntuj xa nws Leej Tub Twm Zeej tuaj nyob ntiaj teb no, kom peb ciaj sia nyob hauv nws.
10 Txoj kev nyiam yog zoo li no: tsis yog vim peb nyiam Tswv Ntuj, tiam sis yog vim Tswv Ntuj nyiam peb, ces nws thiaj xa nws Leej Tub tuaj ua nqi txhiv peb ntawm peb cov txhaum.
11 Cov zoo nyiad, yog Tswv Ntuj twb nyiam peb npaum li ntawd, mas peb kuj yuav tsum sib nyiam sib hlub thiab.    
12 Tsis muaj leej twg tau pom dua Tswv Ntuj ib zaug li. Tiam sis yog peb sib nyiam sib hlub, mas Tswv Ntuj nyob hauv peb, thiab nws txoj kev nyiam yuav hlob tuaj kom zoo tiav log nyob hauv peb.
13 Peb paub tias peb nyob hauv Tswv Ntuj, thiab Tswv Ntuj nyob hauv peb yog vim qhov no: yog qhov tias nws pub nws Leej Ntuj Plig rau peb lawm.
14 Ntawm peb, mas peb tau ntsia ntsoov, thiab peb ua tim khawv zeem tias Leej Txiv tau xa Leej Tub tuaj cawm lub qab ntuj neeg tiag.
15 Tus lees tias Yes Xus yog Tswv Ntuj Leej Tub, mas Tswv Ntuj nyob hauv nws, thiab nws nyob hauv Tswv Ntuj.
16 Peb mas peb tau paub thiab tau ntseeg tias Tswv Ntuj nyiam peb tiag. Tswv Ntuj yog txoj kev nyiam: tus twg nyob hauv txoj kev nyiam, mas nws nyob hauv Tswv Ntuj, thiab Tswv Ntuj nyob hauv nws.

As Les Lus Yas:     MT  11: 29ab

Txais:     As les lus yas, as les lus yas.

Huab Tais hais tias: Nej txais kuv tus quab mus nej kwv,
Nej kawm ntawm kuv, vim kuv muaj lub siab txo hwj chim thiab ua neeg me.

Txais:     As les lus yas, as les lus yas.

Ntawv Moo Zoo:     MT  11: 25-30

25 Lub caij ntawd, Yes Xus tsa ncauj hais tias: "Txiv, kuv qhuas txog koj, Huab Tais kav lub ntuj lub teb, vim koj zais tej yam ntawd ntawm cov neeg thoob tsib thiab cov neeg txawj ntse, koj ho muab qhib rau cov neeg me paub.
26 Muaj tiag, Txiv, koj lub siab yeej nyiam li ntawd.
27 Kuv Txiv muab tas ib puas tsav yam tso rau kuv lawm. Tsis muaj leej twg paub Leej Tub, tsuas kawg Leej Txiv thiaj paub xwb, kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau nws kom paub xwb.
28 Tas nej sawv daws uas nej khwv thiab ris nra hnyav, nej tuaj cuag kuv mog! Kuv yuav cia nej so los siav.
29 Nej txais kuv tus quab mus kwv, nej kawm ntawm kuv mog, vim kuv muaj lub siab txo hwj chim thiab ua neeg me; nej tus plig yuav nrhiav tau chaw so los siav.
30 Vim kuv tus quab kwv yooj yim, thiab kuv lub nra sib.”