COV ZAJ NYEEM NRUAB LIS PIAM XYOO I 2022-2023

Tim 25 lub 1 Hlis 2023

Hnub Plaub Lis Piam Peb Nruab Xyoo A Nruab Lis Piam Xyoo I

Hmoov Nco txog Hnub LN Paj Lug Tig Los Ntseeg
Lectionary: 519

Zaj Nyeem Ib: HAUJ LWM 22: 3-16

3 Paj Lug hais rau cov neeg li no:
"Kuv yog ib tug Yus Das, kuv yug los nyob Tas Xis, Xis Lis Xias teb. Tab sis kuv tuaj hlob nyob hauv lub tsheej no. Nkas Mas Lias yog kuv tus xib hwb, nws qhia kuv kom ua raws nraim peb cov yawg koob Txoj Cai. Mas kuv yeej kub siab lug rau Tswv Ntuj ib yam li nej sawv daws nyem no.
4 Kuv tau hiam Txoj Kev no kom nws ploj mus, kuv tau muab saw hlau los khi poj niam txiv neej huv tib si, thiab coj lawv mus pov rau hauv tsev loj faj.
5 Tus thawj leej choj thiab pab txwj laus tib si puav leej ua tau tim khawv pom kuv ua li ntawd tiag. Kuv tau txais lawv ib co ntawv sau mus rau cov kwv tij nyob Das Mas, ces kuv thiaj sawv kev mus lawm tid, kuv npaj siab mus khi cov nyob Das Mas coj los rau txim nyob Yes Lus Xas Les.
6 Kuv tseem tab tom mus kev, tshuav tsis deb yuav txog Das Mas, thaum ntawd kwv yees tav su lawm, cia li muaj ib qho pom kev ci dawb paug loj loj tuaj saum ntuj tuaj vij kuv.
7 Kuv poob nthav rau hauv av, kuv hnov ib lub suab hais rau kuv tias: 'Xauv, Xauv, vim li cas koj hiam kuv?'
8 Kuv teb tias: ‘Huab Tais, koj yog leej twg?' Ces nws teb kuv tias: 'Kuv yog tus Yes Xus Nas Xas Les uas koj hiam.'
9 Cov neeg nrog kuv kuj pom qhov pom kev ci dawb loj loj thiab, tab sis lawv tsis hnov lub suab hais lus rau kuv.
10 Kuv nug tias: 'Huab Tais, kuv yuav tsum ua dab tsi?' Huab Tais thiaj hais rau kuv tias: 'Koj sawv, koj mus rau Das Mas. Mus txog tod, mas lawv mam qhia rau koj txog tas puas tsav yam Ntuj yeej npaj rau koj lawm kom koj yuav tsum ua.'
11 Thaum ntawd kuv tsis pom kev li, vim qhov pom kev ci loj ntawd fam kuv qhov muag lawm. Kuv cov neeg thiaj tuav kuv tes, coj kuv mus txog Das Mas.
12 Muaj ib tug txiv neej hu ua As Nas Nias, nws yog ib tug neeg hwm Ntuj zoo raws li Txoj Cai; cov Yus Das nyob hauv lub tsheej sawv daws hais lus zoo txog nws.
13 Nws tuaj xyuas kuv, nws tuaj nyob ntawd, ces nws hais tias: 'Xauv, kuv tus kwv, koj rov pom kev mog.' Kuv cia li pom nws tam sim ntawd.
14 Nws hais ntxiv tias: 'Peb cov yawg koob tus Tswv Ntuj yeej tau xub xaiv koj lawm, kom koj paub tias qhov nws lub siab nyiam yog dab tsi, kom koj tau pom tus Siab Ncaj, thiab kom koj tau hnov nws lub suab.
15 Vim tias koj yuav tsum ua nws tim khawv nyob ntawm tas zeej tsoom xub ntiag txog tej yam koj tau pom thiab tau hnov.
16 Ua li mas koj tseem yuav tos dab tsi ntxiv? Koj cia li sawv, koj mus txais lub cim ntxuav kom ntxuav koj cov txhaum pov tseg thiab koj yuav hu txog nws lub npe.' ”

Los: HAUJ LWM 9: 1-22

1 Ntawm Xauv, mas nws tsuas xav ntsoov txog qhov hiam thiab tua Huab Tais cov thwj tim nkaus xwb, ces nws mus cuag tus thawj leej choj.
2 Nws thov kom tus thawj leej choj muab ntawv rau nws nqa mus Das Mas, mus rau cov tsev txoos, hais rau lawv tias yog nws nrhiav tau cov neeg uas npuab Txoj Kev, tsis hais poj niam lost xiv neej li, nws yuav muab lawv khi cab mus lawm pem Yes Lus Xas Les.
3 Thaum nws tab tom taug kev, yuav txog Das Mas, ces ib sij huam, muaj ib qho pom kev ci dawb vog tuaj saum ntuj tuaj ncig nws.
4 Nws ntog rau hauv av, nws hnov ib lub suab hais rau nws tias: "Xauv, Xauv, tim li cas koj hiam kuv?"
5 Xauv teb hais tias: "Huab Tais, koj yog leej twg?" Lub suab hais tias: "Kuv yog Yes Xus, tus uas koj hiam.
6 Koj sawv, koj mus lawm hauv lub nroog. Yuav muaj neeg qhia koj tias koj yuav tsum ua dab tsi."
7 Cov neeg nrog Xauv taug kev, sawv daws nres tas, lawv ntshai kawg hais tsis taus lus li, lawv kuj hnov lub suab thiab, tab sis tsis pom leej twg li.
8 Xauv sawv hauv av los, nws rua qhov muag, tab sis nws tsis pom kev li. Lawv thiaj tuav nws tes coj nws mus hauv lub nroog Das Mas.
9 Nws nyob tau peb hnub, tsis pom kev, tsis noj tsis haus dab tsi li.
10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias: "As Nas Nias." As Nas Nias teb tias: "Huab Tais, kuv nyob ntawm no."
11 Huab Tais hais rau nws tias: "Koj sawv mus, koj mus lawm tom txoj kev hu ua Kev Ncaj, koj mus hauv Yus Das tsev, koj nrhiav ib tug neeg hu ua Xauv nyob Tas Xis tuaj. Tam sim no nws tab tom teev Ntuj.
12 Nws pom ib tug txiv neej hu ua As Nas Nias chaws los tsa tes rau saum nws kom nws rov pom kev tuaj."
13 As Nas Nias teb tias: "Huab Tais, kuv tau hnov ntau leej hais tias tus neeg ntawd ua phem kawg rau koj cov Ntshiab nyob Yes Lus Xas Les no.
14 Nws tuaj ntawm no, vim nws tau cai ntawm cov thawj leej choj tuaj khi cov neeg uas hu txog koj lub npe tas huv tib si."
15 Tab sis Huab Tais hais rau As Nas Nias hais tias: "Koj mus, vim tus neeg ntawd yog ib lub cuab yeej uas kuv xaiv los coj kuv lub Npe mus rau cov neeg teev pej kum dab, rau cov vaj, thiab rau cov tub ki His Xas Lais.
16 Kuv yuav qhia nws tias nws yuav tsum raug tsim txom npaum li cas vim kuv lub Npe."
17 As Nas Nias thiaj mus. Nws chaws mus hauv lub tsev ntawd. Nws tsa tes rau saum Xauv, nws hais tias: "Xauv, kuv tus kwv, yog Huab Tais xa kuv tuaj, yog tus Yes Xus uas tau tawm los rau koj pom tom txoj kev uas koj tuaj. Nws xa kuv tuaj kom koj rov qab pom kev, thiab kom koj tau txais Leej Ntuj Plig Ntshiab puv hauv koj.”
18 Tam sim ntawd muaj tej daim zoo li nplai ntses poob ntawm Xauv qhov muag los, ces nws rov qab pom kev. Lawv ua lub cim ntxuav rau nws tam sis ntawd.
19 Nws noj mov, ces nws rov qab muaj zog tuaj. Nws nrog cov thwj tim nyob ob peb hnub hauv Das Mas.
20 Ces tam sis ntawd nws cia li mus nyob hauv cov tsev Txoos, thiab pib qhuab qhia txog Jesus, nws tshaj tawm tias Yes Xus yog Tswv Ntuj Leej Tub.
21 Tas tsoom neeg uas hnov nws, mas lawv poob siab, lawv hais zom zaws tias: "Tus no tsis yog tus nyob Yes Lus Xas Les, uas tau hiam cov neeg hu txog lub npe ntawd lod? Tsis yog nws twb txhob txwm tuaj ntawm no kom tau ntes lawv, muab lawv khi, thiab cab lawv mus rau cov thawj leej choj xwb lod?"
22 Hos Xauv, mas nws muaj zog zuj zus tuaj. Nws ua rau cov Yus Das nyob Das Mas xav tsis thoob li, vim nws hais lus ua tim khawv qhia tseeb hais tias Yes Xus yog Leej Pleev tiag.

NPN 117: 1BC, 2

Txais: (MK 16:15) Nej mus kom thoob qab ntuj, nej tshaj lub Moo Zoo rau sawv daws.
los: As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais: (MK 16:15) Nej mus kom thoob qab ntuj, nej tshaj lub Moo Zoo rau sawv daws.
los: As les lus yas.

Vim nws lub siab xav ua zoo rau peb nyob ruaj nreb,
HUAB TAIS lub siab pheej xeeb nyob mus ib txhiab ib txhis.

Txais: (MK 16:15) Nej mus kom thoob qab ntuj, nej tshaj lub Moo Zoo rau sawv daws.
los: As les lus yas.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: Kuv yog tus xaiv nej hauv lub ntiaj teb los,
thiab xa nej mus kom nej txi ib co txiv uas nyob ruaj nreb.

Txais: As les lus yas, as les lus yas.

Ntawv Moo Zoo: MK 16: 15-18

15 Yes Xus yees tawm tuaj hais rau nws kaum ib leeg thwj tim tias:
"Nej mus kom thoob lub qab ntuj tas tib si, nej tshaj lub Moo Zoo rau txhua leej txhua tus.
16 Tus twg ntseeg thiab txais lub cim ntxuav, mas nws yuav txais kev cawm,
hos tus twg tsis ntseeg yuav raug txim.
17 Cov cim no yuav nrog nraim cov uas ntseeg:
lawv hu txog kuv lub npe ntiab dab ces dab yuav tawm khiav;
lawv yuav hais tej hom lus tshiab.
18 Lawv yuav tuav tau nab hauv lawv txhais tes, thiab
yog lawv haus tshuaj lom neeg, tshuaj yuav tsis ua xwv txheej rau lawv li;
thaum lawv tsa tes rau saum cov neeg mob, mas cov mob yuav rov zoo hlo."

Tim 26 lub 1 Hlis 2023

Yuav Hwm LN Tis Mos Tes thiab Tis Tos, ob tug Tswv Qhia
Lectionary: 520

Zaj Nyeem Ib: 2 TMT 1: 1-8

1 Kuv, Paj Lug, yog Yes Xus Pleev ib tug Hauv Paus Xa Lus vim Tswv Ntuj tau pom zoo, raws li txoj kev cog lus tias yuav muaj txoj sia nyob hauv Yes Xus Pleev;
2 kuv sau ntawv rau Tis Mos Tes, kuv tus tub zoo nyiam. Thov kom koj tau txais txiaj ntsim, kev khuv leej, thiab kev thaj yeeb tuaj ntawm Leej Txiv Tswv Ntuj thiab ntawm Yes Xus Pleev, peb tus Huab Tais tuaj.
3 Kuv ua Tswv Ntuj tsaug; nws yog tus uas kuv muaj ib lub siab dawb paug tsob hwb raws li kuv cov poj yawm ib txwm ua los; kuv ua nws tsaug vim kuv nco txog koj tas mus li thaum kuv teev ntuj, nruab hnub los hmo ntuj.
4 Kuv nco txog koj tej kua muag poob, kuv lub siab xav pom koj kawg nkaus kom kuv rov zoo siab.
5 Kuv xav txog txoj kev ntseeg ncaj ncees uas koj tau txais, yog txoj xub nyob hauv koj pog Laus Is, thiab nyob hauv koj niam Aws Nis lawm, mas kuv tso siab lug tias nws yeej nyob hauv koj thiab.
6 Yog vim txoj kev ntseeg ntawd, mas kuv thiaj rov hais rau koj kom koj nco ntsoov tshuab taws rau lub txiaj ntsim uas Tswv Ntuj tau tso rau hauv koj hnub kuv tiag tes rau koj, kom rov cig nplaim loj tuaj .
7 Vim Tswv Ntuj tsis tau pub ib lub tswv yim ntshai ntshai rau peb, tiam sis nws pub ib lub tswv yim muaj peej xwm, muaj kev nyiam, thiab tswj tau yus tus kheej.
8 Li ntawd mas koj yuav tsis txhob txaj muag ua tim khawv txog peb tus Huab Tais, los txhob txaj muag vim kuv uas yog tus neeg raug luag khi vim nws. Tiam sis koj yuav nrog kuv nyiaj kev txom nyem los pab lub Moo Zoo nyob hauv Tswv Ntuj lub hwj huam.

Los: TIS TOS 1: 1-5

1 Kuv, Paj Lug, yog Tswv Ntuj ib tug tub qhe thiab Yes Xus Pleev tus Hauv Paus Xa Lus, kom tau txhawb cov neeg uas Tswv Ntuj xaiv lawv txoj kev ntseeg, thiab txhawb txoj kev lees paub qhov tseeb hauv txoj kev hwm Ntuj,
2 kom muaj txoj kev tso siab tias yuav tau txoj sia nyob mus li, raws li Tswv Ntuj tus tsis dag tau cog lus puag thaum ntxov ub, ua ntej muaj lub caij nyoog los lawm.
3 Thaum txog lub caij teem, nws tau hais nws lo lus tawm nyob hauv txoj kev tshaj tawm uas nws tau tso rau kuv ua tus lis, raws li peb tus Tswv Ntuj, tus cawm peb, nws lo lus txib.
4 Kuv sau ntawv tuaj rau Tis Tos, uas yog kuv ib tug tseem tub nyob hauv peb sawv daws txoj kev ntseeg. Thov kom koj tau txais txiaj ntsim thiab kev thaj yeeb tuaj ntawm Leej Txiv Tswv Ntuj, thiab Yes Xus Pleev, peb tus Cawm Seej tuaj.
5 Lub ntsiab ntawm qhov kuv tau tso koj tseg nyob Khes Tas yog li no: yog xav kom koj npaj tej yam tsis tau muaj kom muaj txhij, thiab xav kom koj tsa ib co txwj laus nyob hauv txhua lub nroog, raws li kuv tau hais kom koj ua.

NPN 96: 1-2a, 2b-3, 7-8a, 10

Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.

Nej hu ib zaj nkauj tshiab rau HUAB TAIS,
tas txhua teb chaws, nej hu nkauj rau HUAB TAIS.
Nej hu nkauj rau HUAB TAIS, nej cav txog nws lub npe.

Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.

Nej tshaj txog nws txoj kev cawm neeg, hnub dhau hnub.
Nej piav txog nws lub koob meej rau cov haiv neeg paub,
nej cav txog nws cov hauj lwm loj rau txhua xeem neeg hnov.

Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.

Cov haiv neeg uas los sib koom ua ib cuab, nej muab rau HUAB TAIS,
nej muab lub koob meej thiab lo lus qhuas lus cav rau HUAB TAIS,
nej muab lub koob meej uas phim nws lub npe rau HUAB TAIS!


Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.

Nej hais nyob hauv cov naiv neeg tias: HUAB TAIS yog tus vaj.
Nws tau tsim lub ntiaj teb kom nyob ruaj, muab tshem tsis tau,
nws tswj cov haiv neeg raws txoj kev ncaj.

Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.

Yog xav siv zaj As Les Lus Yas thiab Ntawv Moo Zoo rau hnub no, mus saib nram qab

As Les Lus Yas: LK 4: 18

Txais: As les lus yas, as les lus yas.

Huab Tais xa kuv tuaj coj lub moo zoo mus rau cov pluag
thiab tshaj txoj kev twj lij rau cov neeg nyob hauv tsev loj faj.

Txais: As les lus yas, as les lus yas.

Ntawv Moo Zoo: LK 10: 1-9

1 Dhau tej ntawd lawm, Huab Tais xaiv dua xya caum ob leeg, nws xa lawv mus tej pab ob leeg, ua nws ntej mus rau hauv cov nroog thiab tej qhov chaw uas nws npaj yuav mus.
2 Nws hais rau lawv tias: “Qoob loo zoo sau muaj ntau kawg, tab sis cov tub zog muaj tsawg. Nej thov tus tswv qoob kom nws xa ib co tub zog tuaj sau nws cov qoob.
3 Nej mus, kuv xa nej mus zoo li ib co yaj mus nyob nruab nrab hauv ib cov hma.
4 Nej tsis txhob nqa nas nyiaj, txhob ris hnab, txhob nqa khau, txhob hais lus hu leej twg ntawm kev.
5 Nej chaws mus hauv lub tsev twg, nej xub hais tias: ‘Kom lub tsev no nyob kaj lug!’
6 Yog muaj txoj kev kaj lug ib leeg tub nyob ntawd, mas nej txoj kev kaj lug yuav mus nyob saum nws. Yog tsis muaj, mas nej txoj kev kaj lug yuav rov los rau saum nej.
7 Nej nyob hauv ib lub tsev xwb, nej noj nej haus tej yam uas lawv muab rau nej, vim tus tub zog tsim nyog txais nqi zog. Nej txhob hloov ib lub tsev mus nyob dua lwm lub li.
8 Nej mus hauv lub nroog twg, yog luag txais nej, mas nej noj tej yam uas luag muab rau nej.
9 Nej kho cov neeg mob hauv lub nroog ntawd kom zoo, thiab nej hais rau lawv tias: ‘Tswv Ntuj lub Ceeb Tsheej tuaj txog ze nej lawm.’”

Los: Siv ob zaj nram no, uas yog ob zaj rau
Hnub Tsib Lis Piam Peb Nruab Xyoo A Nruab Lis Piam Xyoo I
Lectionary 320

As Les Lus Yas: NPN 119: 105

Txais: As les lus yas, as les lus yas.

Koj lo lus yog lub teeb tsom rau kuv ko taw,
yog qhov pom kev kaj kuv txoj hau kev.

Txais: As les lus yas, as les lus yas.

Ntawv Moo Zoo: MK 4: 21-25

21 Yes Xus hais rau nws cov thwj tim tias: "Thaum yus taws ib lub teeb nqa los, yus puas muab txawb hauv qab pob tawb los hauv qab txag, tsis muab txawb saum tus ncej teeb li?
22 Vim tsis muaj ib yam zais cia, uas yuav tsis tawm los rau luag pom, tsis muaj ib yam npog cia uas yuav tsis tawm los rau luag paub.
23 Leej twg muaj pob ntseg mloog, mas kom nws yeej meem mloog!"
24 Yes Xus hais rau lawv ntxiv tias: “Nej ceev faj txog tej yam uas nej hnov! Nej xuas lub tawb twg luj rau luag mas lub tawb ntawd yuav raug muab siv rov los luj rau nej, thiab tseem yuav tsuam ntxiv tshaj saud rau nej thiab.
25 Vim tias tus uas twb muaj lawm, Ntuj yuav pub ntxiv rau nws, hos tus tsis muaj, mas Ntuj tseem yuav rho qhov nws muaj tawm mus thiab.”

Tim 27 lub 1 Hlis 2023

Hnub Rau Lis Piam Peb Nruab Xyoo A Nruab Lis Piam Xyoo I
Lectionary: 321

XHLT: LN Angela Merici, Nkauj Tsim Txiaj

Zaj Nyeem Ib: Hes Nplaws 10: 32-39

32 Nej nco ntsoov txog lub caij thaum nej nyuam qhuav txais txoj kev pom kev, thaum ntawd, nej tau nyiaj kev sim siab loj nyob hauv txoj kev txom nyem.
33 Qee zaus nej tau raug luag tab meeg tsawm thiab hiam nej, qee zaus nej tau nrog lwm cov neeg raug tej ntawd ua ke.
34 Nej kuj tau koom siab nrog cov nyob hauv tsev loj faj raug txom nyem, thiab nej tseem zoo siab tias nej raug luag tuaj txeeb nej tej cuab yeej cuab tam mus tas, vim nej paub tias nej muaj ib lub cuab tam zoo tshaj thiab yuav nyob mus li.
35 Ua li mas nej yuav tsis txhob tso nej txoj kev tso siab pov tseg kiag li, vim nws yuav ua kom nej tau txais koob haum loj.
36 Nej yuav tsum ua siab ntev nyiaj ntxiv tsis txhob tso tseg, mas nej thiaj ua tau raws li Tswv Ntuj lub siab nyiam, ces nej yuav tau txais raws li nws tau cog lus.
37 “Vim tias tshuav sij hawm luv luv lawm xwb, ces tus uas yuav tuaj nws yuav tuaj txog, nws yuav tsis ncua ntev li.
38 Hos kuv tus neeg siab ncaj yuav ua neej raws kev ntseeg; tab sis yog nws thim mas kuv yuav tsis zoo siab rau nws.”
39 Ntawm peb mas peb tsis yog cov neeg thim kev ntseeg thiab mus taug kev ploj; peb yog cov neeg uas ntseeg ruaj thiab yuav tau txais txoj sia rau peb tus ntsuj plig.

NPN 37: 3-4, 5-6, 23-24, 39-40

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws
thiab muaj noj nrog kev tso siab.
Nej zoo siab nyob hauv HUAB TAIS,
ces nws yuav pub rau nej raws nej lub siab ntshaw.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Nej muab txoj kev nej taug tso rau HUAB TAIS ua tus saib;
nej tso siab rau nws ces nws yuav pab nej .
Nws yuav ua kom txoj kev ncaj sawv tuaj ziab rau nej xws li qhov pom kev;
ces nej txoj kev yeej luag yuav ci npaum thaum tav su nrig.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

HUAB TAIS ua kom ib tug neeg tshais ruam muaj zog,
thiab HUAB TAIS pom zoo rau txoj kev nws taug.
Txawm nws ntog los nws yuav tsis pw nthi sawv tsis taus,
vim HUAB TAIS txhais tes hwj nws rawv.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Txoj kev cawm cov neeg ncaj tuaj ntawm HUAB TAIS tuaj,
nws yog lawv lub chaw vam khom thaum lawv ntsib kev nyuaj.
HUAB TAIS pab lawv thiab cawm lawv dim,
nws pab lawv dim ntawm tus phem thiab cawm lawv,
vim lawv tuaj vam khom nws.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

As Les Lus Yas: MT 11: 25

Txais: As les lus yas, as les lus yas.

Peb cav txog koj, Leej Txiv, tus Huab Tais kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MK 4: 26-34

26 Yes Xus hais rau tsoom neeg coob tias: “Tswv Ntuj lub Ceeb Tsheej yog zoo li no: Yog zoo li ib tug neeg pov ib co noob rau nruab a lawm;
27 Nws txawm pw los nws sawv, hmo ntuj los nruab hnub, lub noob tuaj kaus thiab hlob, nws tsis paub tias lub noob tuaj kaus thiab hlob zoo li cas li.
28 Av xwb tim cia li txawj xeeb kom txi txiv: xub ua yub tas, ua plab nab, ces nplej txhawv puv hnab.
29 Thaum nplej siav, tus neeg ntawd xuas liag hlais tam sis ntawd, vim txog caij sau qoob lawm.”
30 Yes Xus hais tias: "Peb yuav muab Tswv Ntuj lub Ceeb Tsheej piv rau dab tsi? Thiab peb yuav ua paj lug qhia txog Tswv Ntuj lub Ceeb Tsheej zoo li cas?
31 Nws yog zoo li ib lub noob zaub roj, uas thaum luag muab tseb rau hauv av, mas lub noob ntawd me tshaj lwm cov noob nyob ntiaj teb no.
32 Tab sis thaum tseb tas lawm, lub noob hlav tuaj, nws siab dua lwm cov zaub huv si ; nws ncau tej ceg loj loj, ces tej noog ya saum ntuj tau kev los nkaum hauv nws qhov ntxoov."
33 Yes Xus siv ntau hom paj lug zoo li no los qhia Lo Lus rau lawv, raws li lawv to taub tau.
34 Tsis muaj ib yam uas nws tsis ua paj lug hais rau lawv li. Tiam sis thaum tshuav cov thwj tim nrog nws nyob xwb, mas nws txhais txhua yam tas huv tib si rau lawv.

Tim 28 lub 1 Hlis 2023

Hnub Xya Lis PIam Peb Nruab Xyoo A Nruab Lis Piam Xyoo I
Lectionary: 322

Yuav Hwm LN Tos Mas As Kis Nas, ua Leej Choj thiab Kws cov Txuj Ntshiab

Zaj Nyeem Ib: Hes Nplaws 11: 1-2, 8-19

Cov kwv tij nkauj muad:
1 Txoj kev ntseeg yog qhov zeem tseeb tias peb yuav tau txais yam uas peb cia siab tos, thiab yog qhov ua puav pheej tias yam uas pom tsis tau, yeej muaj tseeb tiag.
2 Txoj kev ntseeg ua kom cov poj yawm txwv koob tau txais ib co lus tim khawv zoo.
8 Yog vim Has Nplas Has ntseeg, mas thaum Ntuj hu nws kom sawv kev mus rau ib lub teb chaws uas nws yuav txais los ua nws lub cuab tam, nws thiaj mloog lus thiab cia li mus, txawm nws twb tsis paub tias nws yuav mus lawm qhov twg tiag.
9 Yog vim Has Nplas Has ntseeg, mas nws thiaj mus nyob hauv thaj av uas Ntuj tau cog lus tias yuav pub rau nws, tiam sis yog zoo li mus rau pej kum teb xwb; nws mus nyob hauv tsev tsam phooj nrog His Xas Has thiab Yas Kos nkawd, uas kuj yog ob tug tau txais cuab tam nyob hauv tib txog kev cog lus.
10 Has Nplas Has tos ntsoov txog ib lub tsheej muaj ib co taw ntsa uas Tswv Ntuj yog tus yuav txhim thiab yuav tsa.
11 Kuj yog vim Xas Las ntseeg, mas tab nws txawm xeeb tsis tau tub thiab hnub nyoog laus lawm, tsis kav nws txais lub zog los chiv kom nws muaj caj ces ntxiv mus, vim nws ntseeg tias tus tau cog lus, yuav ua raws nws lo lus.
12 Vim li ntawd, ib tug tug neeg uas twb yuav txog nws lub caij tuag, tseem yug tau ib co xeeb ntxwv coob npaum li cov hnub qub nyob saum ntuj thiab suav tsis txheeb li cov suab zeb nyob ntawm ntug hiav txwv.
13 Cov neeg ntawd, lawv puav leej tuag nyob hauv txoj kev ntseeg. Lawv tsis tau txais raws li Tswv Ntuj tau cog lus tias yuav pub rau lawv. Tab sis lawv twb tau nyob deb pom thiab zeem txog qhov ntawd lawm; thiab lawv lees paub tias lawv tsuas yog ib co pej kum neeg uas tuaj hla lub ntiaj teb no xwb.
14 Lawv hais lus li no kom qhia txog tias lawv nrhiav ib lub teb chaws uas lawv yuav tau mus nyob ruaj.
15 Yog tias lawv ncoi txog lub teb chaws uas lawv tawm los, mas lawv twb muaj caij rov mus nyob dua lawm.
16 Tab sis lawv ntshaw ib lub teb chaws zoo dua, uas yog lub nyob saum ntuj. Vim li ntawd, Tswv Ntuj tsis txaj muag cia lawv hu nws ua lawv tus Tswv Ntuj; nws yeej npaj ib lub tsheej cia rau lawv lawm.
17 Yog vim Has Nplas Has ntseeg, mas thaum Ntuj sim nws, nws cia li muab His Xas Has txi rau Ntuj. Nws yog tus tau txais txoj kev cog lus, tiam sis nws cia li muab nws tib leeg tub twm zeej txi rau Ntuj.
18 Tus tub ntawd twb yog tus Tswv Ntuj hais txog tias: “Nyob hauv His Xas Has, ib co xeeb leej xeeb ntxwv yuav ris koj lub npe.”
19 Has Nplas Has xav tau tias Tswv Ntuj yeej yuav tsa tau kom tus tuag ciaj rov los. Li ntawd, Has Nplas Has thiaj tau nws tus tub rov los, zoo li yog ib lub cim.

NPN: LK 1: 69-70, 71-72, 73-75

Txais: (68) Peb cav txog Huab Tais, His Xas Lais tus Tswv Ntuj;
nws tuaj nyob hauv nws haiv neeg lawm.

Nws tau tsa ib tug cawm seej muaj hwj huam rau peb,
yug ntawm nws tus tub txib Das Vis tsev neeg los.

Txais: (68) Peb cav txog Huab Tais, His Xas Lais tus Tswv Ntuj;
nws tuaj nyob hauv nws haiv neeg lawm..

Txheej thaum ub, nws siv cov yaj saub nrog peb cog lus tias
nws yuav cawm peb ntawm peb cov txhaum,
thiab ntawm tas cov uas ntxub peb txhais tes.
Nws tau cog lus tias nws yuav khuv leej peb cov yawg koob
thiab nws yuav nco ntsoov nws lo lus nws tau cog.

Txais: (68) Peb cav txog Huab Tais, His Xas Lais tus Tswv Ntuj;
nws tuaj nyob hauv nws haiv neeg lawm..

Tswv Ntuj tau nrog peb tus yawg koob Has Nplas Has cog lus li no:
Nws yuav tso peb dim ntawm peb cov yeeb ncuab cov hlua khi peb,
peb yuav muaj kev twj lij teev hawm nws tsis muaj kev ntshai,
peb yuav ua neeg ntshiab neeg ncaj ncees rau nws pom,
niaj hnub hauv peb lub neej.

Txais: (68) Peb cav txog Huab Tais, His Xas Lais tus Tswv Ntuj;
nws tuaj nyob hauv nws haiv neeg lawm.

As Les Lus Yas: Zam 3: 16

Txais: As les lus yas, as les lus yas.

Tswv Ntuj hlub lub ntiaj teb npaum li no, nws thiaj tso nws tib leeg Tub los,
kom leej twg ntseeg nws, tus ntawd yuav tau txoj siab nyob mus li.

Txais: As les lus yas, as les lus yas.

Ntawv Moo Zoo: MK 4: 35-41

35 Hnub ntawd, thaum tsaus ntuj lawm, Yes Xus hais rau nws cov thwj tim tias: "Peb hla mus lawm sab ntug dej tid."
36 Ces lawv tso tsoom neeg tseg, lawv coj Yes Xus mus, nws cia li mus zoo li ntawd rau hauv nkoj. Kuj muaj lwm cov nkoj nrog nws thiab.
37 Txawm muaj ib nthwv khaub zeeg cua loj kawg sawv tuaj. Dej nphau nphwv los rau hauv nkoj, ces lub nkoj twb puv dej lawm.
38 Yes Xus nyob tom tw nkoj, nws tsaug zog saum ib lub hauv ncoo. Lawv tsa Yes Xus, lawv hais rau nws tias: "Xib Hwb, peb twb yuav tuag, koj tsis quav ntsej li lod?"
39 Yes Xus sawv tsees los, nws txwv cua, thiab nws hais rau dej ntuj tias: "Tswm seeb! Koj nyob twj ywm!" Ces cua tu nrho, txhua yam rov nyob tus yees.
40 Yes Xus hais rau lawv tias: "Ua cas nej ntshai ua luaj? Nej tseem tsis tau ntseeg li lod?"
41 Lawv ntshai kawg, lawv sib tham hais tias: "Tus ntawd yog leej twg? Cas cua thiab dej ntuj mloog nws lus tib si?"

Tim 30 lub 1 Hlis 2023

Hnub Ob Lis Piam Plaub Nruab Xyoo A Nruab Lis Piam Xyoo I
Lectionary: 323

Zaj NYeem Ib: Hes Nplaws 11: 32-40

Cov kwv tij nkauj muad:
32 Kuv yuav hais txog dab tsi ntxiv? Kuv yuav tsis muaj sij hawm piav kom txhij txhua txog Zes Des Oos, Npas Las, Xas Xoos, Zes Faws Tes, Das Vis, Xas Muas thiab cov Yaj Saub li.
33 Tiam sis lawv yog ib co neeg muaj kev ntseeg, mas lawv thiaj ntaus yeej ntau lub teb chaws, thiaj ua tau raws qhov ncaj, thiaj tau txais luag txoj kev cog lus, thiaj kaw tau tsov lub qhov ncauj;
34 lawv thiaj tua tau cov hluav taws uas kub muaj ceem, thiaj maim dhau rab hniav ntaj, thiaj rov muaj zog tuaj txawm tias lawv muaj txiab nkeeg, thiaj muaj siab tawv qhawv ntaus tsam rog, thiab thiaj caum tau kom tsoom pej kum tub rog rov qab tas.
35 Muaj ib co poj niam tau pom lawv cov neeg uas tuag lawm ciaj sawv rov los. Hos muaj ib co neeg yeem cia luag tsim txom lawv, tsis yeem cia luag tso lawv dim, kom lawv tau txais ib txog kev sawv rov los zoo dua.
36 Hos muaj lwm cov txaus siab cia luag thuam thiab luag nplawm, los cia luag khi lawv thiab coj mus kaw hauv tsev loj faj.
37 Muaj ib co raug luag muab pob zeb txawb lawv tuag, raug luag rab kaw txiav lawv tu ob ya, raug ntaj tua lawv tuag; muaj cov khiav rau ub rau no, lawv hnav tawv yaj tawv tshis xwb, lawv yoo tshaib yoo nqhis , raug txom nyem ntsuav, thiab raug luag hiam.
38 Lub ntiaj teb twb tsis tsim nyog txais lawv, los lawv tseem yuav tsum mus nyob hauv tej hav suab puam, pem tej toj roob, hauv tej qhov tsua, thiab tej qhov taub qhov av.
39 Txawm tias tas cov neeg ntawd puav leej nto koob meej zoo vim lawv muaj kev ntseeg, los lawv kuj tsis tau txais raws li txoj kev cog lus.
40 Yog vim tias Tswv Ntuj npaj ib yam zoo tshaj rau peb sawv daws, ua li mas lawv thiaj tsis tau xub txais txoj kev zoo txhij txhua ua ntej peb.

NPN 31: 20, 21, 22, 23, 24

Txais: (25) Tas ib tsoom neeg uas tso siab rau HUAB TAIS, nej cia li ua siab loj.

Huab Tais, koj muaj lub siab zoo tas nrho,
Koj tshwj zias koj txoj kev ua zoo pub rau cov neeg hwm koj,
Koj pub rau txhua leej uas tuaj khaub zig koj,
Koj tab meeg pub kom tej tib neeg pom.

Txais: (25) Tas ib tsoom neeg uas tso siab rau HUAB TAIS, nej cia li ua siab loj.

Koj muab lawv zais rau hauv koj lub xub ntiag,
Kom lawv nyob deb ntawm tej neeg lub siab xav ua phem;
Koj coj lawv mus nraim hauv koj lub chaw nyob,
Kom deb ntawm tus nplaig nkhaus tsawm neeg.

Txais: (25) Tas ib tsoom neeg uas tso siab rau HUAB TAIS, nej cia li ua siab loj.

Kom txhua leej txhua tus cav txog HUAB TAIS,
vim nws tau ua hwj huam loj los khuv leej kuv
nyob hauv ib lub nroog xov ntsa zeb.

Txais: (25) Tas ib tsoom neeg uas tso siab rau HUAB TAIS, nej cia li ua siab loj.

Thaum kuv tau kev nyuaj kev ntxhov, kuv hais tias :
"Kuv nyob deb ntawm qhov koj qhov muag pom."
Tsis kav, koj hnov kuv lub suab thov,
thaum kuv quaj hu txog koj,

Txais: (25) Tas ib tsoom neeg uas tso siab rau HUAB TAIS, nej cia li ua siab loj.

Tas tsoom neeg hwm HUAB TAIS, nej nyiam nws mog!
HUAB TAIS txuag cov uas ntseeg ruaj nreb txog nws,
hos nws nplua tus muab hlob kom ti txha nkaus.

Txais: (25) Tas ib tsoom neeg uas tso siab rau HUAB TAIS, nej cia li ua siab loj.

As Les Lus Yas: LK 7: 16

Txais: As les lus yas, as les lus yas.

Muaj ib tug yaj saub loj sawv los nyob hauv peb,
Tswv Ntuj tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo: MK 5: 1-20

1 Yes Xus thiab nws cov thwj tim mus txog sab ntug dej ntuj tim ub, ntawm cov Ntses Las Xees lub teb chaws.
2 Thaum Yes Xus nqes plhuav saum nkoj los, tam sis ntawd, muaj ib tug neeg raug ib tug dab tsis huv tawm hauv cov toj ntxas tuaj cuag Yes Xus.
3 Nws yeej nyob hauv cov toj ntxas ntawd; tab yog xuas saw hlau los tsis muaj leej twg khi tau nws li lawm,
4 vim ntau zaus los lawm, lawv twb muab saw hlau khi nws, rau cuab rau nws, tsis kav nws ua saw hlau tu tas, ua cuab lov tas, yeej tsis muaj leej twg muaj peev xwm tswj tau nws li.
5 Nruab hnub hmo ntuj, nws nyob hauv cov toj ntxas thiab nyob pem tej roob, nws qw tsis tseg, thiab nws muab pob zeb los tsoo nws.
6 Thaum nws pom Yes Xus tseem nyob deb, nws khiav tuaj tos, nws txhos caug ntua ntawm Yes Xus xub ntiag,
7 ces nws qw nrov nrov tias: “Yes Xus, Tswv Ntuj Nyob Siab Leej Tub, koj xav ua dab tsi rau kuv? Kuv hu txog Tswv Ntuj los thov, koj txhob tsim txom kuv.”
8 Vim Yes Xus hais rau nws tias: "Dab tsis huv, koj tawm ntawm tus neeg no mus!"
9 Ces Yes Xus nug nws tias: "Koj lub npe hu ua li cas?" Nws teb tias: "Kuv lub npe hu ua Npoj, vim peb muaj coob leej."
10 Nws thov Yes Xus heev kawg kom txhob ntiab lawv tawm hauv lub teb chaws mus.
11 Thaum ntawd, muaj ib pab npua coob coob tab tom noj zaub ze saum lub roob.
12 Cov dab tsis huv thov Yes Xus tias: "Thov koj xa peb mus hauv cov npua ntawd, cia kom peb nkag mus hauv cov npua."
13 Yes Xus tso lus rau lawv mus. Ces cov dab tsis huv tawm mus, lawv nkag rau hauv cov npua. Ces pab npua, muaj kwv yees ob txhiab tus, dhia nplawg ntia puag saum tsag rau hauv dej ntuj. Pab npua ntawd tuag tas rau hauv dej ntuj huv si.
14 Cov zov npua tso tes khiav, lawv mus qhia lub moo ntawd rau hauv nroog thiab hauv cov zej zog. Ces neeg tuaj mus xyuas saib muaj xwm zeej dab tsi.
15 Thaum lawv tuaj txog ze ntawm Yes Xus, lawv pom tus neeg raug dab Npoj hnav ris tsho zaum nyob ntawd, thiab nws meej pem lawm, ces lawv ntshai.
16 Cov uas tau pom piav rau lawv txog qhov uas tau tshwm sim tuaj rau tus raug dab thiab rau pab npua.
17 Ces lawv thov Yes Xus kom nws txav mus deb ntawm lawv thaj chaw.
18 Thaum Yes Xus nce mus rau hauv nkoj, tus neeg raug dab thov kom Yes Xus cia nws nrog Yes Xus mus.
19 Tab sis Yes Xus tsis kheev, nws hais rau tus raug dab tias: "Koj rov mus tsev, rov mus nrog koj tsev neeg nyob, koj qhia lawv txog tas txhua yam uas Huab Tais tau ua rau koj thiab qhia txog tias nws tau khuv leej koj li cas."
20 Tus raug dab thiaj rov mus, nws pib tshaj nyob hauv lub cheeb tsam Des Kas Pos Lis, txog tas txhua yam uas Yes Xus tau ua rau nws. Ces sawv daws qhuas kawg.

Tim     31     lub     1     Hlis     2023

Hnub Peb Lis Piam Plaub Nruab Xyoo A Nruab Lis Piam Xyoo I
Lectionary:  324

Yuav Hwm LN John Bosco, ua Leej Choj

Zaj Nyeem Ib:   Hes Nplaws 12: 1-4

Cov kwv tij nkauj muad:
1 Vim tias peb muaj ib co tim khawv coob kawg nyob ua ib tauv huab loj kawg ncig peb, mas peb kuj yuav muab txhua lub nra uas tsuam peb thiab tej kev txhaum uas lo rawv peb xyeeb hlo pov tseg, peb kav tsij peem tas khiav zog mus raws txoj kev sib tw uas nyob ntawm peb hauv ntej.
2 Peb yuav ntsia ntsoov Yes Xus uas yog tus ntaus thawj coj peb nyob hauv txoj kev ntseeg thiab pab peb ntseeg kom mus txog qhov zoo tiav log. Nws pom txoj kev zoo siab yav tom ntej, nws thiaj tuaj yeem nyiaj txoj kev txom nyem saum ntoo cuam, tsis quav ntsej txog txoj kev raug txaj muag, ces nws tau mus zaum saum Tswv Ntuj lub theej kiab ntawm nws sab xis lawm.
3 Nej nco ntsoov tias Yes Xus tau ua tiag nyiaj dhau cov neeg txhaum txoj kev tiv nws loj kawg nkaus, nej thiaj yuav tsis ntaus siab me thiab tsis tag kev cia siab.
4 Nyob hauv nej txoj kev tawm tsam tiv kev txhaum, nej twb tsis tau tau siv zog tiag tiv kom txog thaum nej nqaij ntuag ntshav nrog.

NPN   22 : 26b-27, 28+30, 31-32

Txais: (27b) Huab Tais, cov uas ntshaw pom koj lawv yuav cav txog koj.

Kuv yuav pauj yeem nyob ntawm cov neeg hwm Huab Tais xub ntiag.
Tus neeg pluag yuav tau noj seem noj so;
cov uas nrhiav HUAB TAIS yuav cav txog nws;
Thov kom nej muaj kev zoo siab nyob mus li!

Txais: (27b) Huab Tais, cov uas ntshaw pom koj lawv yuav cav txog koj.

Tas cov npoo ntiaj teb kawg yuav rov nco txog HUAB TAIS
thiab tig lawv lub siab mus rau nws.
Tas cov xeem neeg hauv cov haiv neeg yuav khoov pe hawm nws.
Tas cov neeg muaj hwj chim nyob ntiaj yuav khoov pe nws.
Tas cov neeg uas mus nyob hauv av lawm yuav khoov pe nws.

Txais: (27b) Huab Tais, cov uas ntshaw pom koj lawv yuav cav txog koj.

Kuv tus plig yuav ciaj sia nyob hauv HUAB TAIS;
kuv cov xeeb leej xeeb ntxwv yuav tsob hwb nws.
Yuav tsum qhia rau tiam neeg tom ntej txog HUAB TAIS
ces lawv thiaj yuav tshaj tawm rau cov tseem yuav yug los
kom lawv paub txog nws txoj kev ua ncaj rau sawv daws.

Txais: (27b) Huab Tais, cov uas ntshaw pom koj lawv yuav cav txog koj.

As Les Lus Yas:   MT 8: 17

Txais: As les lus yas, as les lus yas.

Leej Pleev tau tshem peb tej kev ceg tawv mus
thiab cug nrob qaum ris peb tej kev mob kev ntsaj.

Txais: As les lus yas, as les lus yas.

Ntawv Moo Zoo:   MK 5: 21-43

21 Thaum Yes Xus caij nkoj rov hla dej mus txog sab ntug dej tim ub, muaj ib pab neeg coob tuaj sib sau ntsauv nws, ces nws nyob twj ywm ntawm ntug dej ntuj.
22 Muaj ib tug hauv cov tswj tsev txoos hu ua Yais Los tuaj txog, thaum nws pom Yes Xus, nws txhos caug ntua ntawm Yes Xus ko taw.
23 Nws thov Yes Xus tias: "Kuv tus me ntxhais tshuav txoj sia tsis tau tu xwb, thov koj tuaj tsa tes cawm nws kom nws ciaj."
24 Yes Xus nrog Yais Los mus. Muaj ib pab neeg coob raws nws mus; lawv sawv daws txiv tuaj ti nkaus Yes Xus.
25 Muaj ib tug poj niam tsob ntshav tau kaum ob xyoos lawm.
26 Ntau tus kws tshuaj tau ua kom nws txom nyem kawg. Vim nws tau siv tas nws lub cuab tam los kho tsis tau nws zoo li, nws mob heev zuj zus ntxiv xwb.
27 Nws hnov luag hais txog Yes Xus, ces nws nrog tsoom sid sib txiv tom Yes Xus nraub qaum tuaj. Nws kov Yes Xus lub tsho.
28 Vim nws xav hauv siab tias: "Tsuav yog kuv tau kov nws lub tsho xwb, mas kuv yeej yuav dim."
29 Ces tam sis ntawd, nws qhov tsob ntshav tu nrho, nws hnov nws lub cev zoo hlo, dim ntawm tus mob lawm.
30 Tam sis ntawd, Yes Xus kuj hnov ib lub zog tawm plaws hauv nws mus; ces Yes Xus tig rov los nug pab neeg ntawd tias: "Leej twg kov kuv lub tsho ?"
31 Cov thwj tim hais rau nws tias: "Koj ntsia saib, tas tsoom sid txiv koj txhua sab tuaj, koj tseem hais tias: ‘Leej twg kov kuv ?’ "
32 Yes Xus ntsia ib ncig kom pom tus neeg uas tau kov nws.
33 Ces tus poj niam ntshai thiab tshee na, vim nws paub qhov uas nyuam qhuav tshwm sim nyob hauv nws; nws los txhos caug ntawm Yes Xus ko taw thiab qhia qhov tseeb rau Yes Xus.
34 Yes Xus hais rau nws tias: “Me ntxhais, koj lub siab ntseeg cawm koj lawm. Koj rov mus kaj siab lug, kom koj tus mob zoo hlo mus."
35 Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias: “Koj tus ntxhais twb tuag lawm, koj tseem yuav txob Xib Hwb ua dab tsi?”
36 Tab sis thaum Yes Xus hnov lo lus lawv hais, nws hais rau tus tswj tsev txoos tias: "Koj txhob ntshai, tsuav koj ntseeg xwb."
37 Yes Xus tsis kheev leej twg nrog nws mus li. Nws tsuas cia Pob Zeb, Yas Kos thiab Yas Kos tus kwv Zam nrog nws mus xwb.
38 Thaum lawv tuaj txog tus tswj tsev txoos lub tsev, Yes Xus pom sawv daws ua ntxhov hnyo: ib txhia quaj nyiav, ib txhia quaj qw nrov nrov.
39 Yes Xus los hauv tsev, nws hais rau lawv tias: "Ua cas sawv daws ua ntxhov hnyo thiab quaj zoo li no? Tus me nyuam tsis tuag, nws tsaug zog xwb."
40 Ces lawv luag Yes Xus zom zaws. Tab sis Yes Xus ntiab sawv daws tawm mus nraum zoov, nws tsuas kheev tus me nyuam niam thiab txiv, thiab cov nrog nws tuaj nyob xwb. Nws chaws mus hauv kem uas tus me nyuam pw.
41 Yes Xus tuav tus me nyuam txhais tes, nws hais rau tus me nyuam tias: "Tas lis tas kus," txhais tias: "Me ntxhais, kuv hais rau koj, koj sawv!"
42 Tus me ntxhais sawv tsees tam sis ntawd, nws mus kev, vim nws twb muaj kaum ob xyoos lawm. Thaum ntawd, sawv daws ntshai kawg.
43 Yes Xus txwv lawv heev kom txhob qhia leej twg paub. Ces nws kom lawv muab mov rau tus me ntxhais noj.

Tim 1 lub 2 Hlis 2023

Hnub Plaub Lis Piam Plaub Nruab Xyoo A Nruab Lis Piam Xyoo I
Lectionary: 325

Zaj Nyeem Ib: Hes Nplaws 12: 4-7, 11-15

Cov kwv tij nkauj muad:
4 Nyob hauv nej txoj kev tawm tsam tiv kev txhaum nej twb tsis tau siv zog tiag tiv kom txog thaum nej nqaij ntuag ntshav nrog.
5 Thiab nej kuj tsis nco qab cov lus uas yog hais rau nej xws li hais rau ib co tub ki tias :
“Kuv me tub, koj tsis txhob ntxub Huab Tais txoj kev qhuab qhia nruj thiab koj tsis txhob ntaus siab me thaum nws qhuab ntuas koj.
6 Vim tias tus uas Huab Tais nyiam mas Huab Tais qhuab qhia nws nruj, thiab Huab Tais rau txim rau txhua tus uas nws txais ua nws tus tub.”
7 Nej yuav nyiaj nej tej kev txom nyem xws li yog kev qhuab qhia nej xwb, yog Tswv Ntuj qhuab qhia nej xws li nws cov tub. Puas muaj ib tug tub twg uas nws txiv tsis qhuab qhia nws li?
11 Txhua yam kev qhuab qhia yeej tsis ua kom leej twg zoo siab thaum lub caij tam sis ntawd li, tsuas ua kom chim siab xwb. Tiam sis yav tom qab, mas txoj kev qhuab qhia ntawd mam li yuav txi tau txiv muaj kev thaj yeeb thiab kev ncaj ncees rau cov neeg uas tau txais txoj kev qhuab qhia ntawd.
12 Ua li mas nej kav tsij ua kom ob txhais tes uas muag ncee, thiab ob lub hauv caug uas ntshaus ntsho muaj zog tuaj;
13 nej kav tsij ua kom tej kev nkhaus ncaj tuaj rau nej ob txhais taw taug, kom tus ceg tawv tsis txhob qis ceg ntxiv, nws thiaj li yuav zoo taus sai.
14 Nej yeej meem nrhiav kom tau nrog sawv daws nyob thaj yeeb, thiab yeej meem nrhiav txoj kev ntshiab, vim tias yog leej twg tsis muaj kev ntshiab mas nws yuav pom tsis tau HUAB TAIS.
15 Nej yuav ceev faj kom nej tsis txhob muaj ib tug twg plam tsis tau txais Tswv Ntuj lub txiaj ntsim, thiab kom tsis txhob muaj ib tug cag kev ntsawv siab hlav tshwm tuaj tsim kev kub ntxhov, ces nws yuav kis mus rau coob leej hauv yus pawg neeg.

NPN 103: 1-2, 13-14, 17-18a

Txais: (17) Huab Tais yuav ua siab zoo tas mus li rau cov uas hwm nws.

Kuv tus ntsuj plig, koj cav txog HUAB TAIS;
Kuv tus kheej tas nrho, koj cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej koob hmoov ib qho li.

Txais: (17) Huab Tais yuav ua siab zoo tas mus li rau cov uas hwm nws.

Ib yam li leej txiv hlub nws cov me nyuam,
HUAB TAIS kuj hlub cov uas hwm nws thiab.
Vim nws paub tias nws puab peb los zoo li cas,
nws nco ntsoov tias peb yog plua av plua tshauv..

Txais: (17) Huab Tais yuav ua siab zoo tas mus li rau cov uas hwm nws.

Tiam sis HUAB TAIS yuav ua siab zoo ib txhiab
mus ib txhis rau cov uas hwm nws,
thiab nws yuav ua ncaj rau cov me nyuam tej me nyuam tom qab,
nyob hauv cov uas lawv coj nraim nws cov lus qhia.

Txais: (17) Huab Tais yuav ua siab zoo tas mus li rau cov uas hwm nws.

As Les Lus Yas: Zam 10: 27

Txais: As les lus yas, as les lus yas.

Huab Tais hais tias: “Kuv cov yaj mloog kuv lub suab,
kuv paub kuv cov yaj, kuv cov yaj raws li nraim kuv qab.”

Txais: As les lus yas, as les lus yas.

Ntawv Moo Zoo: MK 6: 1-6a

1 Yes Xus tawm hauv qhov chaw ntawd los, nws rov los txog thaj chaw uas nws nyob hlob, nws cov thwj tim kuj nrog nws los thiab.
2 Thaum txog hnub Xas Npas Tos, Yes Xus mus pib qhia nyob hauv lub tsev txoos. Muaj coob leej hnov nws cov lus, lawv ceeb tas, lawv hais tias: "Nws tau tej ntawd qhov twg los? Leej twg muab lub siab thoob tsib ntawd rau nws, thiab pub kom nws ob txhais tes ua tau cov hwj huam yees ntxwv loj ntawd?
3 Tus ntawd tsis yog tus kws ntoo, uas yog Mab Liab tus tub, thiab yog Yas Kos, Yos Xes, Yus Das thiab Xis Moos lawv tus kwv tij lod? Thiab nws cov muam, tsis yog lawv puav leej nrog peb nyob ua ke ntawm no lod?” Lawv tsis txaus siab rau Yes Xus.
4 Ces Yes Xus hais rau lawv tias: "Ib tug Yaj Saub yeej raug luag hwm, tsuas yog nyob hauv nws lub teb chaws, thiab hauv nws cov txheeb ze thiab nws tsev neeg xwb thiaj tsis muaj neeg hwm nws."
5 Vim li ntawd, Yes Xus ua tsis tau ib yam hwj huam yees ntxwv nyob ntawd li, nws tsuas tsa tes rau tus puav tuag tes tuag taw kom zoo xwb.
6 Nws xav tsis thoob txog qhov tias lawv tsis muaj kev ntseeg li.

Tim 2 lub 2 Hlis 2022

Hnub Tsib Lis Piam Plaub Nruab Xyoo A Nruab Lis Piam Xyoo I

Hmoov Nco txog Niam Mab Liab thiab Yos Xes coj Yes Xus mus fij rau Ntuj
Lectionary: 524

Zaj Nyeem Ib: MAS LAS KIS 3: 1-4

Huab Tais Tswv Ntuj hais tias:
1 “Ntsia saib, kuv xa kuv tus tub tshaj xo mus npaj kev ua kuv ntej.
Ces ib sij huam, tus Huab Tais uas nej nrhiav
yuav los nyob hauv nws lub tuam tsev;
thiab tus tub tshaj xo txog txoj kev cog lus, tus uas nej ntshaw txog,
nws tab tom tuaj lawm.” Tus HUAB TAIS kav Tsoom tshiab hais li ntawd.
2 Tiam sis hnub nws tuaj txog, leej twg thiaj yuav tiv taus?
Leej twg thiaj yuav sawv taus ntseg thaum nws tshwm plaws los?
Vim nws yuav zoo li cov hluav taws nchuav nyiaj,
thiab zoo li cov tshuaj ntxhua khaub ncaws kom dawb.
3 Nws yuav zaum tsaws ua tus nchuav thiab ntxuav nyiaj kom huv;
nws yuav ua kom Les Vis cov tub dawb huv tuaj,
nws yuav nchuav lawv ib yam li nchuav kub thiab nchuav nyiaj,
kom lawv thiaj yuav cev tau thaj txi Ntuj
rau HUAB TAIS nyob hauv txoj kev ncaj.
4 Ces Yus Das thiab Yes Lus Xas Les thaj txi Ntuj
thiaj yuav ntxim HUAB TAIS siab,
ib yam li yav ntuj puag thaum ub,
ib yam li lub caij yav dhau los lawm.

NPN 24: 7, 8, 9, 10

Txais: ( Leej twg yog tus vaj muaj koob meej? Yog HUAB TAIS!

Cov rooj vag, nej tsa nej daim txiag puab saum qhov rooj kom siab,
cov qhov rooj laus, nej tshoom kom siab ntxiv,
kom tus vaj muaj koob meej tau kev nkag los!

Txais: Leej twg yog tus vaj muaj koob meej? Yog HUAB TAIS!

Leej twg yog tus vaj muaj koob meej?
Yog tus HUAB TAIS muaj zog thiab muaj peev xwm,
yog tus HUAB TAIS muaj peev xwm yeej tsam rog.

Txais: Leej twg yog tus vaj muaj koob meej? Yog HUAB TAIS!

Cov rooj vag, nej tsa nej daim txiag puab saum qhov rooj kom siab,
cov qhov rooj laus, nej tshoom kom siab ntxiv,
kom tus vaj muaj koob meej tau kev nkag los!

Txais: Leej twg yog tus vaj muaj koob meej? Yog HUAB TAIS!

Leej twg yog tus vaj muaj koob meej?
Tus HUAB TAIS kav tsoom tshiab,
nws yog tus vaj muaj koob meej.

Txais: Leej twg yog tus vaj muaj koob meej? Yog HUAB TAIS!

Zaj Nyeem Ob: Hes Nplaws 2: 14-18

14 Vim tias ib co me nyuam koom roj ntsha thiab ib ce nqaij xwb, ua li mas Yes Xus kuj koom lawv cov roj ntsha thiab cev nqaij thiab, kom nyob hauv txoj kev tuag, nws rhuav tau tus muaj lub hwj huam ua kom tuag, uas yog tus dab phem,
15 thiab kom nws muab tau kev twj lij rau cov uas zwm rau kev ua qhev tas lawv sim neej, vim txoj kev ntshai kev tuag,.
16 Nws tsis yog tuaj cawm ib co tshiab, nws yog tuaj cawm Has Nplas Has tsoom xeeb ntxwv.
17 Vim li no, nws thiaj yuav tsum yug los kom zoo ib yam li nws cov kwv cov muam, tsis txawv lawv li, kom nws ua tau ib tug Thawj Leej Choj khuv leej neeg thiab tsis fav xeeb nyob ntawm Tswv Ntu xub ntiag, kom nws theej tau tsoom neeg lub txhoj.
18 Vim nws tus kheej tau raug kev sim siab nyob hauv txoj kev txom nyem, mas nws thiaj muaj peev xwm pab tau cov uas raug kev sim siab.

As Les Lus Yas: LK 2: 32

Txais: As les lus yas, as les lus yas. lleluia, alleluia.

Yog qhov pom kev tawm tuaj qhia koj rau cov coj lwm txoj kev ntseeg paub,
thiab yog qhov ua kom koj haiv His Xas Lais tau koob meej.

Txais: As les lus yas, as les lus yas.

Ntawv Moo Zoo: LK 2: 22-40

22 Thaum lub caij yuav ua cov kab ke ntxuav kom huv rau ob niam tub raws li Mais Xes Txoj Cai los txog lawm, Mab Liab thiab Yos Xes coj Yes Xus mus pem Yes Lus Xas Les, kom tau muab nws fij rau Huab Tais,
23 raws li muaj sau tseg nyob hauv Huab Tais Txoj Cai tias: "Txhua tus tub xub qhib leej niam plab yug los, yuav tsum muab qee rau Huab Tais,”
24 thiab yuav tau cev ib co txim raws li muaj hais tseg nyob hauv Huab Tais Txoj Cai tias: “Yuav cev ib nkawg nquab lwb rwg, los ob tug nquab mos.”
25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus txiv neej ntawd yog neeg ncaj thiab nyiam teev ntuj, nws tos ntsoov tus yuav tuaj nplij His Xas Lais; Leej Ntuj Plig Ntshiab nyob saum nws.
26 Leej Ntuj Plig Ntshiab qhia rau nws paub tias nws yuav tsis xub tuag ua ntej nws tau pom Huab Tais tus Pleev tso.
27 Leej Ntuj Plig coj nws tuaj nyob hauv lub Tuam Tsev Teev Ntuj; thaum leej niam thiab leej txiv nkawd coj tus me nyuam Yes Xus tuaj ua cov kab ke raws li Txoj Cai,
28 Xis Mes Oos txais tus me nyuam los rau hauv nws xub ntiag, nws cav lus zoo txog Tswv Ntuj, nws hais tias:
29 “Tus Tswv aw, nyem no koj tso tau
koj tus tub txib mus kaj lug raws li koj tau hais lawm,
30 vim kuv qhov muag twb tau pom
koj txoj kev cawm neeg lawm,
31 uas koj tau npaj nyob ntawm
tas txhua haiv neeg xub ntiag;
32 yog qhov pom kev tawm tuaj qhia koj rau cov neeg coj lwm txoj kev ntseeg paub,
thiab yog qhov ua kom koj haiv His Xas Lais tau koob meej.”
33 Tus me nyuam niam thiab txiv qhuas kawg txog cov lus nkawd tau hnov hais txog nws.
34 Ces Xis Mes Oos foom hmoov zoo rau lawv, thiab nws hais rau Mab Liab, tus me nyuam leej niam tias: "Koj saib mus, tus me nyuam no yuav ua chaw rau ntau leej nyob His Xas Lais ntog thiab ua rau ntau leej sawv los. Nws yuav yog ib lub cim ua kom neeg muaj lus sib cav.
35 Hos ntawm koj, mas ib rab ntaj yuav chob ntsia ntsees koj tus plig, kom xwv tej tswv yim uas coob leej xav tuaj nruab siab tawm los rau neeg paub.”
36 Tseem muaj ib tug yaj saub poj niam, hu ua As Nas, yog Fas Nus Es tus ntxhais, xeem As Sej. Nws hnub nyoog laus lawm. Tom qab lub caij nws ua nkauj xwb nyob, mas nws mus nrog nws tus txiv nyob tau xya xyoo,
37 ces nws ua poj ntsuam los laus li no txog thaum nws muaj yim caum plaub xyoos no lawm. Nws tsis nrug ntawm lub Tuam Tsev Teev Ntuj mus li, nws yoo mov thiab hais cov zaj teev Ntuj los teev hawm Tswv Ntuj nruab hnub hmo ntuj tib si.
38 Tib lub sij hawm ntawd, As Nas kuj tuaj nyob ntawd thiab; nws cav lus zoo txog Tswv Ntuj, thiab nws hais txog tus me nyuam rau txhua leej txhua tus uas tos txog txoj kev yuav txhiv Yes Lus Xas Les.
39 Thaum lawv ua txhua yam raws li Huab Tais Txoj Cai tiav tas lawm, lawv rov mus Nkas Lis Lais teb, hauv lawv lub zos Nas Xas Les.
40 Tus me nyuam mas nws hlob tuaj thiab muaj zog zuj zus, kev thoob tsib nyob puv hauv nws, thiab Tswv Ntuj lub txiaj ntsim nyob saum nws.

Los: LK 2: 22-32

22 Thaum lub caij yuav ua cov kab ke ntxuav kom huv rau ob niam tub raws li Mais Xes Txoj Cai los txog lawm, Mab Liab thiab Yos Xes coj Yes Xus mus pem Yes Lus Xas Les, kom tau muab nws fij rau Huab Tais,
23 raws li muaj sau tseg nyob hauv Huab Tais Txoj Cai tias: "Txhua tus tub xub qhib leej niam plab yug los, yuav tsum muab qee rau Huab Tais,”
24 thiab yuav tau cev ib co txim raws li muaj hais tseg nyob hauv Huab Tais Txoj Cai tias: “Yuav cev ib nkawg nquab lwb rwg, los ob tug nquab mos.”
25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus txiv neej ntawd yog neeg ncaj thiab nyiam teev ntuj, nws tos ntsoov tus yuav tuaj nplij His Xas Lais; Leej Ntuj Plig Ntshiab nyob saum nws.
26 Leej Ntuj Plig Ntshiab qhia rau nws paub tias nws yuav tsis xub tuag ua ntej nws tau pom Huab Tais tus Pleev tso.
27 Leej Ntuj Plig coj nws tuaj nyob hauv lub Tuam Tsev Teev Ntuj; thaum leej niam thiab leej txiv nkawd coj tus me nyuam Yes Xus tuaj ua cov kab ke raws li Txoj Cai,
28 Xis Mes Oos txais tus me nyuam los rau hauv nws xub ntiag, nws cav lus zoo txog Tswv Ntuj, nws hais tias:
29 “Tus Tswv aw, nyem no koj tso tau
koj tus tub txib mus kaj lug raws li koj tau hais lawm,
30 vim kuv qhov muag twb tau pom
koj txoj kev cawm neeg lawm,
31 uas koj tau npaj nyob ntawm
tas txhua haiv neeg xub ntiag;
32 yog qhov pom kev tawm tuaj qhia koj rau cov neeg coj lwm txoj kev ntseeg paub,
thiab yog qhov ua kom koj haiv His Xas Lais tau koob meej.”

Tim 3 lub 2 Hlis 2023

Thawj Hnub Rau Lis Piam Plaub Nruab Xyoo A Nruab Lis Piam Xyoo I
Lectionary: 327

XHLT: LN Blase, ua Tswv Qhia thiab ua Tim Khawv; LN Ansgar, ua Tswv Qhia

Zaj Nyeem Ib: Hes Nplaws 13: 1-8

Cov kwv tij nkauj muad:
1 Nej yuav cia txoj kev sib nyiam sib hlub xws li ib pab kwv tij nyob ruaj hauv nej.
2 Nej nco ntsoov txoj kev ua zoo txais tej qhua; vim yog txoj kev txais qhua mas tej tus neeg thiaj tau txais ib co Tshiab tuaj so hauv lawv tsev, lawv twb tsis paub tias yog ib co Tshiab.
3 Nej nco ntsoov txog cov neeg nyob hauv tsev loj faj, ib yam li yog nej nrog lawv kaw ua ke rau hauv ntag. Nej nco ntsoov txog cov raug luag tsim txom xws li yog nej raug thiab, vim nej muaj ib lub cev nqaij li lawv thiab.
4 Nej sawv daws yuav hwm txoj kev ua txij nkawm, nej yuav txuag lub txaj ua txij ua nkawm tsis pub tsuas ib qho phem. Vim Tswv Ntuj yuav txiav txim rau cov ua plees ua yi, thiab cov zes luag txij luag nkawm.
5 Nej yuav tsis txhob cia txoj kev ntshaw nyiaj txiag coj nej, nej muaj li cas mas nej yuav txaus siab yuav li ntawd. Vim Tswv Ntuj tau hais tias: “Kuv yuav tsis khiav ntawm koj mus, los tso koj pov tseg ib zaug li.”
6 Ces peb thiaj tso siab lug hais tias: “Huab Tais yog tus tuaj pab kuv, kuv yuav tsis ntshai li. Leej twg yuav ua tau dab tsi rau kuv?”
7 Nej yuav nco ntsoov txog nej cov thawj coj uas tau tshaj Tswv Ntuj lo lus rau nej. Nej ntsia saib lawv coj lawv lub neej mus xaus zoo li cas, ces nej yoog lawv txoj kev ntseeg mog.
8 Yes Xus Pleev yeej zoo li qub, nag hmo thiab hnub no, thiab tas mus li ib txhiab ib txhis.

NPN 27: 1, 3, 5, 8b-9abc

Txais: (1a) HUAB TAIS yog kuv qhov pom kev thiab yog tus cawm kuv.

HUAB TAIS yog kuv qhov pom kev thiab yog tus cawm kuv,
Kuv yuav ntshai leej twg?
HUAB TAIS yog kuv qhov chaw vam khom hauv kuv lub neej,
kuv yuav ntshai leej twg?

Txais: (1a) HUAB TAIS yog kuv qhov pom kev thiab yog tus cawm kuv.

Txawm muaj ib pab tub rog nyob ntawm kuv hauv ntej,
los kuv lub siab yuav tsis ntshai.
Txawm luag yuav ua ib nthwv rog tawm tsam kuv
los kuv yuav tso siab lug.

Txais: (1a) HUAB TAIS yog kuv qhov pom kev thiab yog tus cawm kuv.

Vim nws yuav muab kuv nkaum rau hauv nws lub tsev,
thaum txog hnub muaj kev kub ntxhov;
nws yuav muab kuv zais rau hauv nws lub tsev tsam phooj,
nws yuav muab kuv tso nyob siab rau saum ib lub tsua.

Txais: (1a) HUAB TAIS yog kuv qhov pom kev thiab yog tus cawm kuv.

HUAB TAIS, kuv nrhiav kom tau nyob ze koj.
Thov txhob muab koj lub ntsej muag zais ntawm kuv,
txhob npau taws txhob ntiab koj tus tub txib.
Koj yog tus pab kuv, txhob ntiab kuv mus deb ntawm koj.

Txais: (1a) HUAB TAIS yog kuv qhov pom kev thiab yog tus cawm kuv.

As Les Lus Yas: LK 8: 15

Txais: As Les Lus Yas, as les lus yas.

Cov tau hmoov zoo yog cov uas muaj ib lub siab dav coj raws li lo lus
thiab lawv txi tau txiv vim lawv mob siab rau tsis tso tseg.

Txais: As Les Lus Yas, as les lus yas..

Ntawv Moo Zoo: MK 6: 14-29

14 Tus vaj Hes Los hnov hais txog Yes Xus, vim Yes Xus lub npe nto moo lug mus rau qhov txhia chaw, thiab luag tej hais tias: "Zam Ntxuav Plig sawv hauv cov tuag rov qab los lawm; vim li ntawd nws thiaj ua tau hwj huam yees ntxwv."
15 Hos ib txhia hais tias: “Nws yog Es Lias.” Lwm cov hais tias: “Yog ib tug nyob hauv cov yaj saub.”
16 Tab sis thaum Hes Los hnov hais txog Yes Xus, nws hais tias: “Yog tus Zam uas kuv tau txiav nws caj dab, nws sawv rov los lawm.”
17 Hes Los yog tus xa neeg mus ntes Zam thiab muab saw hlau khi Zam rau hauv tsev loj faj, tim Hes Los Dias, uas yog Hes Los tij laug Fis Lis Pos tus poj niam, tab sis Hes Los yuav los ua nws poj niam.
18 Ces Zam hais rau Hes Los tias: "Koj tsis muaj cai yuav koj tij laug tus poj niam."
19 Ces Hes Los Dias ntxub Zam tas siab nrho, nws xav muab Zam tua, tab sis nws tua tsis tau,
20 vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces nws txuag Zam. Thaum Hes Los hnov Zam hais lus, mas ua rau nws xav tsis tas li. Tiam sis nws kuj ho nyiam mloog Zam hais lus thiab.
21 Muaj ib lub zoo sij hawm los txog, yog hnub tsuj xeeb Hes Los hnub yug. Nws ua ib roog qav caw cov nom tswv, cov thawj tub rog, thiab cov neeg tseem ceeb hauv xeev Nkas Lis Lais tuaj koom.
22 Thaum ntawd, Hes Los Dias tus ntxhais chaws los dhia seev cev, nws dhia tau ntxim Hes Los thiab cov qhua tuaj koom rooj qav ntawd siab kawg. Ces tus vaj hais rau tus ntxhais tias: "Koj thov saib koj xav yuav dab tsi, kuv yuav muab rau koj."
23 Ces tus vaj cog lus rau tus ntxhais tias: "Koj thov yam twg, mas kuv yuav muab rau koj, tab txawm yuav yog ib nrab ntawm lub teb chaws kuv kav!"
24 Tus ntxhais tawm plaws mus nug nws niam tias: "Kuv yuav thov dab tsi?" Leej niam hais tias: "Zam Ntxuav Plig lub taub hau."
25 Tam sis ntawd, tus ntxhais rov ntsuj los ntawm tus vaj, nws hais tias: "Kuv xav kom tam sis no koj muab Zam Ntxuav Plig lub taub hau tso rau saum ib lub phaj los cev rau kuv."
26 Tus vaj tu siab tas nrho, tab sis vim nws tau cog lus lawm thiab vim muaj cov qhua, nws thiaj tsis xav thim nws lo lus.
27 Ces tus vaj txib ib tug zov keeb tam sis ntawd, kom mus nqa Zam lub taub hau los. Tus zov keeb mus txiav Zam caj dab hauv tsev loj faj.
28 Ces nws nqa Zam lub taub hau txawb hauv ib lub phaj los cev rau tus ntxhais; tus ntxhais muab cev rau nws niam.
29 Zam cov thwj tim hnov li ntawd, ces lawv tuaj coj Zam lub cev mus tso rau hauv ib lub ntxa lawm.

Tim 4 lub 2 Hlis 2023

Thawj Hnub Xya Lis Piam Plaub Nruab Xyoo A Nruab Lis Piam Xytoo I
Lectionary: 328

Zaj Nyeem Ib: Hes Nplaws 13: 15-17, 20-21

Cov kwv tij nkauj muad:
15 Nyob hauv Yes Xus, peb cia li cev ib thaj cav txiaj ntsim rau Tswv Ntuj txhua lub sij hawm; thaj cav txiaj ntsim yog zoo li ib co txiv ntawm cov di ncauj uas lees paub Tswv Ntuj lub npe.
16 Nej yuav tsis txhob hnov qab txoj kev ua zoo rau luag thiab txoj kev muab yam yus muaj faib rau luag, vim Tswv Ntuj nyiam tej txoj kev txi Ntuj zoo li ntawd.
17 Nej yuav mloog nej cov thawj coj lus, thiab yuav ua li lawv hais, vim lawv yog tus saib xyuas nej sab ntsuj plig, uas yog qhov lawv yuav tau lees paub tias saib lawv puas tau ua lost sis tau. Nej yuav tsum ua kom lawv zoo siab ua lawv txoj hauj lwm, tsis txhob yog lam ua nrog kev tu siab xwb; yog lawv lam ua li ntawd xwb mas yuav tsis muaj txiaj ntsim zoo rau nej li.
20 Thov kom tus Tswv Ntuj pub kev thaj yeeb, uas tau tsa tus thawj tswv zov pab yaj, hauv cov tub tuag rov los, nyob hauv cov roj ntsha cog lus nyob mus li,
21 kom nws ua kom nej muaj txhua yam zoo, kom nej thiaj ua tau raws nraim li nws lub siab xav; nej thiaj ua tau yam xis nws siab nyob hauv Yes Xus Pleev, uas yog tus tsim nyog tau txais lub koob meej mus li ib txhiab ib txhis. Ua li.

NPN 23: 1-3a, 3b-4, 5, 6

Txais: (1) Huab Tais yog tus tswv zov yaj saib kuv; kuv yuav tsis tshaib dab tsi li.

HUAB TAIS yog tus tswv zov yaj saib kuv, kuv yuav tsis tshaib dab tsi li.
Nws cia kuv so nyob hauv tej tshav zaub mos ntsuab xiab.
Nws coj kuv mus nyob ze tej tus dej tus yees;
nws ua kom kuv tus ntsuj plig los siav.

Txais: (1) Huab Tais yog tus tswv zov yaj saib kuv; kuv yuav tsis tshaib dab tsi li.

Nws coj kuv mus taug txoj kev ncaj vim nws lub npe.
Txawm kuv taug kev nyob hauv lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab
nrog koj rab pas nplawm thiab rab pas nrig, ua rau kuv muaj siab loj.

Txais: (1) Huab Tais yog tus tswv zov yaj saib kuv; kuv yuav tsis tshaib dab tsi li.

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov.
Koj muab roj pleev kuv taub hau;
kuv lub khob puv phwj yaws.

Txais: (1) Huab Tais yog tus tswv zov yaj saib kuv; kuv yuav tsis tshaib dab tsi li.

Kuv tsuas tau ntsib txoj kev ua siab zoo thiab kev hlub
txhua txhia hnub hauv kuv lub neej xwb.
Ces kuv yuav tau nyob hauv HUAB TAIS tsev
ntev niaj ntau xyoo lawm yav tom ntej.

Txais: (1) Huab Tais yog tus tswv zov yaj saib kuv; kuv yuav tsis tshaib dab tsi li.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub kuv cov yaj, kuv cov yaj raws kuv qab mus.

Txais: As les lus yas, as les lus yas.

Ntawv Moo Zoo: MK 6: 30-34

30 Cov Hauv Paus Xa Lus los sib sau ncig Yes Xus, lawv piav tas puas tsav yam uas lawv tau ua thiab tau qhia.
31 Ces Yes Xus hais rau lawv tias: "Nej los mus rau ib qho chaw xu kev tsis muaj neeg, nej so me ntsis." Vim cov neeg mus mus los los coob coob, ces cov Hauv Paus Xa Lus tsis xyeej ib lub sij hawm noj mov li.
32 Lawv thiaj li caij nkoj mus rau ib qho chaw xu kev tsis muaj neeg.
33 Tsoom sid pom cov Hauv Paus Xa Lus caij nkoj mus lawm; coob leej paub txog qhov ntawd, ces sawv daws khiav ko taw hauv txhua lub nroog tuaj mus rau ntawm qhov chaw. Lawv xub mus txog dua cov thwj tim.
34 Thaum Yes Xus nqes nkoj, nws pom ib pab neeg coob coob, nws lub siab qaug lais hlub lawv, vim lawv zoo li ib co yaj tsis muaj tswv zov; ces Yes Xus pib qhuab qhia lawv txog ntau yam.

Tim 6 lub 2 Hlis 2023

Hnub Ob Lis Piam Tsib Nruab Xyoo A Nruab Lis Piam Xyoo I
Lectionary: 329

Yuav Hwm LN Paj Lug Mis Kis, Leej Choj tuag ua Tim Khawv, thiab cov

Zaj Nyeem Ib: HP 1: 1-19

1 Thaum chiv lub keeb, Tswv Ntuj tsim lub ntuj thiab lub ntiaj teb,
2 mas lub ntiaj teb tseem tsis tau tsheej thiab tsis muaj dab tsi nyob hauv li, muaj qhov tsaus ntuj nti npog lub qhov tob tob xwb, hos Tswv Ntuj lub tswv yim ya yuj saum cov nplaim dej.
3 Ces Tswv Ntuj hais tias: "Kom muaj qhov pom kev." Txawm muaj qhov pom kev tuaj.
4 Tswv Ntuj pom tias qhov pom kev ntawd zoo kawg. Tswv Ntuj cais qhov pom kev ntawm qhov tsaus ntuj.
5 Tswv Ntuj hu qhov pom kev ua "nruab hnub" thiab hu qhov tsaus ntuj ua "hmo ntuj." Txawm muaj tsaus ntuj thiab muaj kaj ntug: yog thawj hnub.
6 Tswv Ntuj hais tias: "Kom muaj ib lub ruv nyob hauv nruab nrab cov dej thiab kom nws quas ib co dej ntawm lwm cov dej". Ces txawm muaj li ntawd tuaj.
7 Tswv Ntuj ua ib lub ruv los quas cov dej nyob hauv qab lub ruv ntawm cov dej nyob saum qaum lub ruv.
8 Tswv Ntuj hu lub ruv ntawd ua "lub ntuj." Txawm muaj tsaus ntuj thiab muaj kaj ntug: yog hnub ob.
9 Tswv Ntuj hais tias: "Kom cov dej uas nyob hauv qab lub ntuj sib sau los nyob ib qho chaw xwb, thiab kom av qhuav tshwm tawm los." Ces txawm muaj li ntawd tuaj.
10 Tswv Ntuj hu cov av qhuav ua "ntiaj teb" thiab hu cov dej sib sau los ua ke ua "hiav txwv." Tswv Ntuj pom tias qhov ntawd zoo kawg.
11 Tswv Ntuj hais tias: "Kom lub ntiaj teb tuaj nroj tsuag ntsuab xiab: kom muaj txhua hom nroj tsuag txawj muaj noob, thiab kom muaj txhua hom ntoo txi txiv, nyias txi nyias hom txiv nyias muaj nyias hom noob nyob ntiaj teb." Ces txawm muaj li ntawd tuaj.
12 Ntiaj teb tuaj txhua yam nroj tsuag, nyias txawj txi nyias hom noob thiab txhua homj ntoo nyias txawj txi nyias hom txiv uas muaj nyias hom noob. Tswv Ntuj pom hais tias qhov ntawd zoo kawg.
13 Txawm muaj tsaus ntuj thiab muaj kaj ntug: yog hnub peb.
14 Tswv Ntuj hais tias: "Kom muaj tej lub pom kev ci ci nyob saum lub qab ntuj ntsuab saud, cia cais nruab hnub thiab hmo ntuj, cia ua tej lub cim kom tau xam caij nyoog, xam hnub xam hmo, thiab suav hnub suav xyoo,
15 kom cov pom kev ntawd ci nyob saum lub qab ntuj ntsuab ua kom ntiaj teb pom kev." Ces txawm muaj li ntawd tuaj.
16 Tswv Ntuj ua ob lub pom kev ci loj dua cov, lub pom kev ci loj dua yog lub kav nruab hnub, lub pom kev ci me dua yog lub kav hmo ntuj; thiab nws ua cov hnub qub.
17 Tswv Ntuj muab lawv txawb puv rau saum lub qab ntuj ntsuab saud kom ci rau ntiaj teb pom kev,
18 cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo kawg.
19 Txawm muaj tsaus ntuj thiab muaj kaj ntug: yog hnub plaub.

NPN 104: 1-2a, 5-6, 10+12, 24+35c

Txais: (31b) Thov kom Huab Tais yuav zoo siab rau nws cov hauj lwm.

Kuv tus ntsuj plig, koj cia li cav txog HUAB TAIS!
HUAB TAIS kuv tus Tswv Ntuj, koj yeej loj tas nrho!
Koj hnav hwj chim thiab koob meej ua tsoos tsho,
koj hnav qhov pom kev ua tsho tshaj sab.

Txais: (31b) Thov kom Huab Tais zoo siab rau nws cov hauj lwm.

Koj txhim lub ntiaj teb kom ruaj rau ntawm nws qhov chaw txawb,
nws yuav txav tsis tau mus li ib txhiab ib txhis.
Koj muab lub hiav txwv ua zoo li ib daim tsoos tsho npog nws;
muaj dej tob siab tshaj tej ncov roob.

Txais: (31b) Thov kom Huab Tais zoo siab rau nws cov hauj lwm.

Koj ua kom muaj dej txhawv ntws raws tej kwj deg
thiab chev ncig raws tej hauv paus roob.
Cov noog ya saum ntuj ua zes nyob ze cov dej,
lawv tsaws saum tej ceg ntoos quaj.

Txais: (31b) Kom Huab Tais zoo siab rau nws cov hauj lwm.

HUAB TAIS, koj tej hauj lwm muaj ntau tsav yam kawg li!
Koj txoj kev thoob tsib tsim txhua yam zoo tas nrho;
lub ntiaj teb puv nkaus tej yam koj tau tsim los.
Kuv tus plig, koj cia li cav txog HUAB TAIS! As les lus yas.

Txais: (31b) Kom Huab Tais zoo siab rau nws cov hauj lwm.

As Les Lus Yas: MT 4: 23

Txais: As les lus yas, as les lus yas.

Yes Xus tshaj lub Moo Zoo txog lub Ceeb Tsheej
thiab nws kho txhua yam mob nyob hauv cov neeg zoo hlo.

Txais: As les lus yas, as les lus yas.

Ntawv Moo Zoo: MK 6: 53-56

53 Thaum lawv hla mus dhau sab dej hiav txwv tim ub lawm, Yes Xus thiab nws cov thwj tim tuaj nres ntawm thaj av Nkes Nes Xas Les, ces lawv nres nkoj rau ntawd.
54 Thaum lawv nqes plhuav nkoj los, muaj neeg cim tau Yes Xus tam sis ntawd.
55 Ces lawv khiav mus ncig thoob ib cheeb tsam ntawd, lawv mus kwv cov neeg muaj txiab nkeeg saum tej lub txaj tuaj rau ntawm qhov chaw uas lawv hnov tias Yes Xus nyob.
56 Txhua txhia qhov chaw uas Yes Xus mus, hauv cov zos, cov nroog, los tom tej liaj teb, lawv coj neeg mob tuaj tso rau ntawm tej tshav puam, lawv thov Yes Xus kom nws cia lawv kov nws, tab yog kov nws lub tw tsho xwb los xij. Ces cov neeg uas tau kov Yes Xus puav leej dim ntawm lawv tus mob.

Tim 7 lub 2 Hlis 2023

Hnub Peb Lis Piam Tsib Nruab Xyoo A Nruab Lis Piam Xyoo I
Lectionary: 330

Zaj Nyeem Ib: HP 1: 20—2:4a

20 Tswv Ntuj hais tias: "Kom cov dej muaj tau tej tsiaj muaj sia npau xi nyob rau hauv, thiab kom muaj noog ya nyob saum ntiaj teb saum cov huab cua nyob hauv lub qab ntuj ntsuab." Ces txawm muaj li ntawd tuaj.
21 Ces Tswv Ntuj tsim cov zaj hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyob hauv dej, nyias muaj raws nyias hom; thiab tsim tas cov noog muaj tis, nyias muaj raws nyias hom. Tswv Ntuj pom tias qhov ntawd zoo kawg.
22 Tswv Ntuj foom lus zoo rau lawv tias: "Nej yeej meem yug me nyuam, yeej meem huam vam mus nyob puv cov dej hauv hiav txwv, thiab kom cov noog yeej meem huam vam mus puv ntiaj teb."
23 Txawm muaj tsaus ntuj thiab muaj kaj ntug: yog hnub tsib.
24 Tswv Ntuj hais tias: "Kom lub ntiaj teb txawj muaj txhua yam tsiaj muaj sia, nyias muaj raws nyias hom: tsiaj nyeg, kab ntsaum txawj ua zog, tsiaj qus, nyias muaj raws nyias hom." Ces txawm muaj li ntawd tuaj.
25 Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum txawj nkag kom nyias muaj nyias hom. Tswv Ntuj pom tias qhov ntawd zoo kawg.
26 Tswv Ntuj hais tias: "Cia peb ua tib neeg kom zoo raws li peb tus duab kom zoo xws li peb. Yuav cia lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av.
27 Ces Tswv Ntuj tsim tib neeg zoo raws li nws tus duab; raws li Tswv Ntuj tus duab, nws tau tsim tib neeg; nws tsim nkawd ua txiv neej thiab ua poj niam.
28 Tswv Ntuj foom lus zoo rau nkawd thiab hais rau nkawd tias: "Neb yeej meem yug tub ki, yeej meem huam vam thiab mus nyob puv ntiaj teb, thiab kav ntiaj teb; neb tswj cov ntses nyob hauv hiav txwv, cov noog ya saum ntuj thiab tas puas tsav yam tsiaj uas txawj ua zog nyob ntiaj teb."
29 Tswv Ntuj tseem hais tias: "Kuv muab tas puas tsav yam nroj tsuag muaj noob uas tuaj nyob saum npoo av, thiab kuv muab tas puas tsav yam ntoo txi txiv thiab muaj noob rau neb, tej ntawd yuav yog neb tej txhiam laj txhiam xws.
30 Rau tas cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab tas txhua yam nroj ntsuab rau lawv ua txhiam xws noj." Ces txawm muaj li ntawd tuaj.
31 Tswv Ntuj ntsia tas txhua yam nws tau ua, nws pom txhua yam ntawd zoo kawg nkaus. Txawm muaj tsaus ntuj thiab muaj kaj ntug : yog hnub rau.
2: 1 Lub ntuj thiab lub ntiaj teb yog tsim los zoo li ntawd, thiab tas txhua yam nyob rau hauv.
2 Hnub xya, Tswv Ntuj ua nws txoj num tiav tas lawm; ces hnub xya nws thiaj so, vim nws ua txhua yam tiav tas lawm.
3 Tswv Ntuj foom lus zoo rau hnub xya thiab muab hnub ntawd ua hnub ntshiab, vim nws ua nws txoj num tsim ntuj tsim teb tiav tas ces hnub ntawd nws so.
4a Zaj kwv huam piav txog lub ntuj thiab lub ntiaj teb, thaum ntuj tsim teb raug, mas yog zoo li hais saum no.

NPN 8: 4-5, 6-7, 8-9

Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

Thaum kuv ntsia saum ntuj pom cov hauj lwm koj cov ntiv tes tau tsim,
lub hli thiab cov hnub qub uas koj tau muab txawb rau lawv qhov chaw,
neeg yog dab tsi , koj thiaj quav ntsej txog nws?
Neeg tus tub yog dab tsi koj thiaj hlub txog nws?

Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

Koj tau tsim nws nyob qis me ntsis cov tshiab,
koj tau muab meej mom muab hwj chim rau nws ntoo.
Koj tau tsa nws ua tus kav txhua yam koj txhais tes tsim,
koj muab txhua yam tso rau hauv nws qab xib taws:

Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

Tas nrho tej yaj tej nyuj,
tej tsiaj nyob hauv nruab liaj nruab teb,
cov noog ya saum huab saum cua, cov ntses nyob hauv hiav txwv,
thiab txhua yam ua luam dej raws txoj kev hauv cov hiav txwv.

Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

As Les Lus yas: NPN 119: 36, 29b

Txais: As les lus yas, as les lus yas.

Tswv Ntuj, thov koj rub kuv lub siab kom nyiam koj tej lus qhia,
thiab muab koj txoj cai ua txiaj ntsim pub rau kuv.

Txais: As les lus yas, as les lus yas.

Ntawv Moo Zoo: MK 7: 1-13

1 Cov Fas Lis Xais thiab tus puav Kws Ntawv Ntshiab tuaj Yes Lus Xas Les tuaj, lawv sib sau ntsauv Yes Xus.
2 Lawv pom tus puav thwj tim xuas tes tsis huv noj mov, txhais tias lawv tsis xub ntxuav tes tso,
3 vim tias cov Fas Lis Xais, thiab tas cov Yus Das tib si, mas lawv tsis noj mov yog lawv tsis xub ntxuav tes txog puag pem luj tshib tso, raws nraim li tej laus ib txwm ua los.
4 Thaum lawv mus kav kiab kav khw rov los, yog lawv tsis tau xub ntxuav lawv tso, mas lawv tsis noj mov li. Tseem muaj ntau yam uas cov Yus Das ua raws li txoj kev ib txwm ua kam los, xws li ntxuav khob, ntxuav hub, thiab ntxuav tej phaj tej tais thiab tej txaj noj mov.
5 Vim li ntawd, cov Fas Lis Xais thiab cov kws Ntawv Ntshiab thiaj nug Yes Xus tias: "Ua cas koj cov thwj tim tsis ua raws li tej laus kev cai ib txwm qhia kom ua, lawv cia li xuas tes tsis huv noj mov?"
6 Yes Xus hais rau lawv tias: "His Xais tau hais lus saub raug kawg txog nej cov neeg uas zoo sab nraud xwb; vim ntawv sau tseg tias: ‘Haiv neeg no tsuas hwm kuv ntawm di ncauj xwb, lawv lub siab nyob deb kuv.
7 Lawv lam teev hawm kuv dag xwb, tej kev cai uas lawv qhuab qhia tsuas yog neeg kab ke xwb!’
8 Nej muab Tswv Ntuj lo lus qhia tso pov tseg, nej ho coj rawv neeg txoj cai ib txwm qhia los."
9 Thiab Yes Xus hais ntxiv rau lawv tias: "Nej tshem Tswv Ntuj lo lus qhia pov tseg, hos nej coj nej cov kev cai ib txwm qhia los zoo kawg li.
10 Mais Xes yeej tau qhia tias: ‘Koj yuav hwm koj niam koj txiv,’ thiab tseem qhia tias: ‘Tus tsawm niam tsawm txiv yuav tsum tuag.’
11 Nej mas nej hais tias, yog ib tug neeg hais rau nws niam los nws txiv tias: ‘Qhov kuv yuav muab rau koj, qhov koj yuav tau txais ntawm kuv, mas yog kos npas,’ txhais tias muab qee rau Ntuj lawm,
12 ces nej pub kom nws tsis ua dab tsi ntxiv rau nws niam los nws txiv li.
13 Nej muab nej tej kab ke ib txwm ua los qhia rau luag xwb, ces nej rhuav Tswv Ntuj lo lus li no. Thiab nej tseem ua ntau yam ntxiv zoo li ntawd thiab."

Tim 8 lub 2 Hlis 2023

Hnub Plaub Lis Piam Tsib Nruab Xyoo A Nruab Lis Piam Xyoo I
Lectionary: 331

XHLT: LN Jerome Emiliani, ua Leej Choj; LN Josephine Bakhita, Nkauj tsim txiaj

Zaj Nyeem Ib: HP 2: 4b-9, 15-17

4b Thaum lub caij HUAB TAIS Tswv Ntuj tsim lub ntiaj teb thiab lub ntuj,
5 mas tseem tsis tau muaj ib tug ntoo me tuaj hauv tej teb nyob ntiaj teb li, tsis tau muaj ib tug nroj tsuag hlav tuaj nyob hauv tej nras tiaj li, vim HUAB TAIS Tswv Ntuj tsis tau ua kom nag los rau ntiaj teb, thiab tsis tau muaj tib neeg los cog tej av li.
6 Tab sis muaj dej txia hauv av los ntxaum tas nrho daim npoo av kom noo.
7 Ces HUAB TAIS Tswv Ntuj muab cov hmoov hauv av los puab ua ib tug txiv neej, nws tshuab pa rau hauv tus txiv neej qhov ntswg, ces tus txiv neej ciaj los ua ib tug muaj sia.
8 HUAB TAIS Tswv Ntuj cog tau ib lub vaj nyob Es Dees, nyob sab hnub tuaj. Nws muab tus txiv neej uas nws tau puab tso rau hauv lub vaj ntawd.
9 HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv av tuaj. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo thiab qhov phem kuj tuaj nyob ntawd thiab.
15 HUAB TAIS Tswv Ntuj coj tus txiv neej mus tso rau hauv lub vaj Es Dees, kom nws cog lub vaj thiab tu lub vaj.
16 HUAB TAIS Tswv Ntuj ceeb toom rau tus txiv neej li no tias: "Koj noj tau cov txiv txi ntawm tas txhua tsob ntoo hauv lub vaj no tib si.
17 Tiam sis cov txiv txi ntawm tus ntoo paub qhov zoo thiab qhov phem, mas koj txhob noj. Yog koj noj thaum twg, mas txij thaum ntawd mus koj yuav txawj tuag."

NPN 104: 1-2a, 27-28, 29bc-30

Txais: (1a) Kuv tus plig, koj cia li cav txog HUAB TAIS!

Kuv tus plig, koj cia li cav txog HUAB TAIS!
HUAB TAIS kuv tus Tswv Ntuj, koj yeej loj tas nrho!
Koj hnav hwj chim thiab koob meej ua tsoos tsho,
koj hnav qhov pom kev ua tsho tshaj sab.

Txais: (1a) Kuv tus plig, koj cia li cav txog HUAB TAIS!

Tas txhua yam koj tau tsim los ntsia ntsoov koj,
tias koj yuav pub rau lawv noj thaum txog caij txog nyoog.
Thaum koj muab pub rau lawv, lawv mus sau los cia;
thaum koj qhib koj txhais tes, lawv tau noj tej yam zoo kom tsau npo.

Txais: (1a) Kuv tus ntsuj plig, koj cia li cav txog HUAB TAIS!

Yog koj rho lawv txoj pa, lawv kawg tuag,
thiab yuav rov mus nyob xyaw lawv cov plua av.
Thaum koj xa koj lub tswv yim mus, nws yuav tsim lawv dua,
thiab koj yuav ua kom lub ntiaj teb rov tshiab tuaj.

Txais: (1a) Kuv tus plig, koj cia li cav txog HUAB TAIS!

As Les Lus Yas: Zam 17: 17b, 17a

Txais: As les lus yas, as les lus yas.

Huab Tais, koj lo lus yog qhov tseeb:
thov koj qee zias peb los nyob rau hauv qhov tseeb.

Txais: As les lus yas, as les lus yas.

Ntawv Moo Zoo: MK 7: 14-23

14 Yes Xus rov hu tsoom sid los ntawm nws, ces nws hais rau lawv tias: "Tas nej sawv daws, nej mloog kuv hais, kom nej to taub!
15 Tsis muaj dab tsi nyob sab nraud, uas nkag rau hauv neeg lub cev, yuav ua tau kom neeg tsis huv. Tab sis yog tej yam tawm hauv neeg los ua kom neeg tsis huv.
16 Leej twg muaj pob ntseg mloog, yeej meem mloog.
17 Thaum Yes Xus los hauv tsev thiab nyob nrug deb ntawm tsoom sid lawm, cov thwj tim nug nws txog zaj paj lug ntawd.
18 Ces Yes Xus hais rau lawv tias: "Nej tsis muaj tswv yim to taub li thiab lod? Tias tej yam nyob sab nraum no, thaum nkag rau hauv tib neeg lawm, ua tsis tau kom tib neeg tsis huv lod?
19 Vim tias tej yam ntawd tsis nkag mus rau hauv tib neeg lub siab, tsuas nkag rau hauv plab, tas ces tawm mus rau nraum chaw plob sab lawm xwb.” (Ua li mas Yes Xus qhia tias txhua hom txhiam xws puav leej huv).
20 Yes Xus hais ntxiv tias: "Yam uas tawm hauv tus tib neeg los yog yam ua kom nws tsis huv.
21 Vim tias tej yam uas txhawv hauv tib neeg nruab siab los yog tej yam tswv yim phem, yog kev xav ua plees ua yi, kev ua tub sab tub nyiag, kev tua neeg,
22 kev deev luag txij nkawm, kev cuaj khaum, kev lim hiam, kev ua cuav, kev tab meeg ua phem ua qias, kev ntshaw luag tug, kev thuam Ntuj, kev muab hlob thuam luag, kev ua neeg vwm.
23 Txhua hom kev phem no yog tawm sab hauv los, mas thiaj ua kom neeg tsis huv."

Tim 9 lub 2 Hlis 2023

Hnub Tsib Lis PIam Tsib Nruab Xyoo A Nruab Lis Piam Xyoo I
Lectionary: 332

Zaj Nyeem Ib: HP 2: 18-25

18 HUAB TAIS Tswv Ntuj hais tias: "Tsis zoo cia tus txiv neej nyob ib leeg xwb, kuv yuav ua ib tug pab nws kom phim nws."
19 HUAB TAIS Tswv Ntuj muab av los puab tas puas tsav yam tsiaj nruab nrag thiab tas puas tsav yam noog ya saum ntuj. Nws coj los rau tus txiv neej xyuas saib nws yuav tis npe li cas rau. Txhua yam tsiaj muab sia yuav muaj lub npe raws li tus txiv neej tis rau nws.
20 Tus txiv neej tis npe rau tas txhua hom tsiaj qus, rau cov noog ya saum ntuj, thiab rau tas txhua hom tsiaj nyeg, tiam sis nws nrhiav tsis tau ib tug pab nws kom phim nws li.
21 HUAB TAIS Tswv Ntuj thiaj tso ib tug dab ntub hlob hlob laum tus txiv neej; ces thaum nws tsaug zog lawm, Tswv Ntuj rho nws ib tug tav tawm los, nws muab nqaij los kaw lub qhov rov rau.
22 HUAB TAIS Tswv Ntuj muab tus tav uas nws rho ntawm tus txiv neej los puab ua ib tug poj niam, Tswv Ntuj coj los rau tus txiv neej saib.
23 Tus txiv neej nqua suab hlo tias: "Zaum no, tus no yog tseem txha ntawm kuv txha thiab tseem nqaij ntawm kuv nqaij tiag! Tus no yuav hu ua 'poj niam,' vim nws tawm ntawm txiv neej los!"
24 Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb.
25 Thaum ntawd, tus txiv neej thiab tus poj niam nkawd ob leeg nyob liab qab, tiam sis nkawd tsis paub txaj muag li.

NPN 128: 1-2, 3, 4-5

Txais: (1a) Cov uas hwm Huab Tais lawv tau txoj hmoov zoo.

Nej txoj hmoov zoo, nej cov uas hwm HUAB TAIS,
cov uas nej taug raws nws txoj kev!
Nej yuav tau noj lub txiv uas yog nej ob txhais tes khwv tawm los ,
nej yuav tau hmoov zoo thiab nej yuav txais txiaj ntsim.

Txais: (1a) Cov uas hwm Huab Tais lawv tau txoj hmoov zoo.

Koj tus poj niam yuav zoo li txoj hmab txiv cawv txi ncw ncw
nyob rau hauv koj lub nrog vaj nrog tsev,
koj cov me nyuam yuav zoo li ib co ntsuag ntoo txiv roj
nyob ncig lees koj lub phaj tsum mov.

Txais: (1a) Cov uas hwm Huab Tais lawv tau txoj hmoov zoo.

Li ntawd, tus neeg muaj txoj hmoov zoo
yog tus ntshai HUAB TAIS.
Thov kom HUAB TAIS nyob saum Xis Yoos
foom hmoov zoo rau koj, kom koj tau pom Yes Lus Xas Les
txoj kev vam meej niaj hnub hauv koj lub neej.

Txais: (1a) Cov uas hwm Huab Tais lawv tau txoj hmoov zoo.

As Les Lus Yas: Yas Kos 1: 21bc

Txais: As les lus yas, as les lus yas.

Nej yuav ua neeg me txais lo lus
uas twb muab cog rau hauv nej lawm;
lo lus ntawd thiaj yuav cawm tau nej tus ntsuj plig.

Txais: As les lus yas, as les lus yas.

Ntawv Moo Zoo: MK 7: 24-30

24 Yes Xus sawv kev ntaw mus rau lub xeev Tws Los. Nws mus rau hauv ib lub tsev, nws tsis xav kom muaj neeg paub li, tab sis nws zais tsis tau.
25 Tam sis ntawd, muaj ib tug poj niam uas nws tus ntxhais raug ib tug dab tsis huv, hnov hais txog Yes Xus, ces nws tuaj txhos caug ntua ntawm Yes Xus ko taw.
26 Tus poj niam ntawd yog ib tug neeg Hes Las, yug los nyob lub xeev Xis Lias Fes Nis Xias; nws thov kom Yes Xus ntiab tus dab tawm hauv nws tus ntxhais mus.
27 Yes Xus hais rau nws tias: "Yuav tsum xub cia cov me nyuam noj kom tsau tso, vim tsis phim yuav muab me nyuam cov mov los pov rau cov me nyuam dev noj."
28 Tab sis tus poj niam teb rau Yes Xus tias: “Huab Tais, txawm li ntawd los cov me nyuam dev nyob hauv qab rooj twb tau noj tej tsig mov uas poob ntawm cov me nyuam los thiab.”
29 Ces Yes Xus hais rau tus poj niam tias: "Vim koj tau hais lo lus ntawd, koj rov mus tau lawm; tus dab twb tawm hauv koj tus ntxhais mus lawm."
30 Thaum tus poj niam rov mus txog tsev, nws pom tus me nyuam pw saum txaj, hos tus dab phem twb tawm mus lawm.

Tim 10 lub 2 Hlis 2023

Hnub Rau Lis Piam Tsib Nruab Xyoo A Nruab Lis Piam Xyoo I
Lectionary: 333

Yuav Hwm LN Scholastica, Nkauj tsim txiaj

Zaj Nyeem Ib: HAUV PAUS 3: 1-8

1 Tus nab yog tus muaj tswv yim tshaj tas txhua hom tsiaj HUAB TAIS Tswv Ntuj tau tsim los nyob nruab nrag. Nab hais rau tus poj niam tias: "Li ntawd, Tswv Ntuj hais tias kom neb tsis txhob noj ib yam txiv ntoo hauv lub vaj no li no lod?"
2 Tus poj niam teb rau tus nab tias: "Wb noj tau cov txiv txi saum cov ntoo hauv lub vaj no tib si.
3 Tsuas tshwj kiag cov txiv txi saum tsob ntoo nyob hauv nruab nrab lub vaj xwb, Tswv Ntuj hais tias: ‘Neb tsis txhob noj, tsis txhob kov, yog neb noj neb kov, mas neb yuav tuag’ no.”
4 Tus nab teb ntua rau tus poj niam tias: "Neb yeej yuav tsis tuag li.
5 Tiam sis yog vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem xwb."
6 Ces tus poj niam txawm pom hais tias tus ntoo ntawd yeej zoo noj thiab zoo saib kawg, thiab yog tus ntoo yus ntshaw noj kom yus muaj kev thoob tsib. Nws thiaj de zoj lub txiv ntawm tus ntoo los, nws muab noj. Nws kuj muab cev rau nws tus txiv uas nrog nws nyob ntawd; ces tus txiv kuj noj thiab.
7 Nkawd ob leeg qhov muag cia li qhib plho, nkawd paub hais tias nkawd liab qab. Nkawd thiaj muab nplooj ncuav pias los xaws ua tiab rau nkawd npua.
8 Thaum lub caij cua tuaj ntxiag, nkawd hnov HUAB TAIS Tswv Ntuj tshais ruam ncig hauv lub vaj; tus txiv neej thiab nws tus poj niam khiav mus tsiv nraim hauv cov ntoo nyob hauv lub vaj kom HUAB TAIS Tswv Ntuj txhob pom nkawd.

NPN 32: 1-2, 5, 6, 7

Txais: (1a) Cov uas Ntuj zam txhaum rau lawv, mas lawv txoj hmoov zoo.

Tus tau hmoov zoo yog tus uas Ntuj tshem nws qhov yuam kev pov tseg,
yog tus uas Ntuj muab nws qhov txhaum npog rau.
Tus tau hmoov zoo yog tus neeg uas HUAB TAIS tsis suav txim rau nws,
tus uas lub tswv yim tsis muaj ib qho kev siab phem.

Txais: (1a) Cov uas Ntuj zam txhaum rau lawv, mas lawv txoj hmoov zoo.

Kuv lees kuv qhov txhaum rau koj,
kuv tsis muab kuv qhov txhaum npog cia.
Kuv hais tias: “Kuv lees kuv qhov txhaum rau HUAB TAIS,”
ces koj muab kuv lub txim ntawm kuv qhov txhaum tshem tas.

Txais: (1a) Cov uas Ntuj zam txhaum rau lawv, mas lawv txoj hmoov zoo.

Vim li no txhua tus neeg ntseeg yuav tsum teev ntuj
hu txog koj thaum lub caij muaj kev nyuaj siab.
Ces txawm tias dej tob nphau nphwv phwj yaws
los dej yuav tsis nce mus nyab txog nws.

Txais: (1a) Cov uas Ntuj zam txhaum rau lawv, mas lawv txoj hmoov zoo.

Koj yog kuv lub chaw nkaum, koj yuav txuag kuv ntawm txoj kev nyuaj;
koj yuav cia ib co suab qw txog txoj kev cawm twj lij nyob ncig kuv.

Txais: (1a) Cov uas Ntuj zam txhaum rau lawv, mas lawv txoj hmoov zoo.

As Les Lus Yas: HAUJ LWM 16: 14b

Txais: As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo: MK 7: 31-37

31 Yes Xus tso cheeb tsam Tws Los tseg, nws taug txoj kev hla Xis Doos mus rau dej ntuj Nkas Lis Lais, mus rau hauv cheeb tsam Des Kas Pos Lis.
32 Luag coj ib tug neeg lag ntseg, hais lus txhav txhav, tuaj rau Yes Xus, lawv thov kom Yes Xus tsa tes rau saum nws.
33 Yes Xus coj nws tawm ntawm tsoom sid mus rau ib cag tsis muaj neeg, Yes Xus muab nws ntiv tes ntxig rau tus lag ntseg ob lub qhov ntsej, nws nti aub ncaug ces nws muab chwv rau tus neeg ntawd tus nplaig.
34 Yes Xus tsa muag ntsia saum ntuj, nws xyu ib suab, nws hais rau tus lag ntseg tias: "Es fas tas," txhais tias: "Koj qhib los."
35 Tus lag ntseg ob lub qhov ntsej qhib plho tam sis ntawd, hos cov hlua khi nws tus nplaig kuj plam plaws, ces nws hais lus meej log.
36 Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tshaj tawm.
37 Lawv qhuas kawg nkaus, lawv hais tias: "Nws ua tau ib puas tsav yam zoo kawg, nws ua kom tus lag ntseg hnov lus, thiab ua kom tus nplaig txhav hais tau lus."

Tim 11 lub 2 Hlis 2023

Hnub Xya Lis Piam Tsib Nruab Xyoo A Nruab Lis Piam Xyoo I
Lectionary: 334

XHLT: Leej Niam Mab Liab tim Lourdes

Zaj Nyeem Ib: HP 3: 9-24

9 HUAB TAIS Tswv Ntuj hu tus txiv neej hais tias: "Koj nyob qhov twg?"
10 Tus txiv neej teb tias: "Kuv hnov koj nyob hauv lub vaj, kuv ntshai vim kuv liab qab, kuv thiaj khiav tsiv nraim lawm."
11 Tswv Ntuj hais ntxiv tias: "Leej twg qhia koj tias koj liab qab? Yog li koj noj lub txiv ntawm tsob ntoo uas kuv txwv tsis pub koj noj lawm puas yog?"
12 Tus txiv neej teb tias: "Yog tus poj niam uas koj tso nyob ze kuv, nws muab lub txiv ntawm tsob ntoo rau kuv, ces kuv thiaj noj!"
13 HUAB TAIS Tswv Ntuj hais rau tus poj niam tias: "Koj ua dab tsi li ntawd?" Tus poj niam teb tias: "Yog niag nab ntxias kuv, kuv thiaj noj."
14 Ces HUAB TAIS Tswv Ntuj hais rau tus nab hais tias: "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej.
15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
16 Tswv Ntuj hais rau tus poj niam hais tias: "Kuv yuav ua kom koj muaj mob ntau thaum lub caij koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, thiab nws yuav tswj koj."
17 Tswv Ntuj hais rau tus txiv neej hais tias: "Vim koj tau mloog koj tus poj niam lus, koj thiaj noj lub txiv kuv txwv tsis kheev noj, mas av yuav raug foom phem vim koj! Koj yuav siv zog khwv tas koj lub neej koj thiaj tau noj.
18 Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab liaj nruab teb.
19 Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog muab av puab. Koj yog av ces koj yuav rov mus ua av."
20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.
21 HUAB TAIS Tswv Ntuj muab tawv tsiaj los ua tsoos rau tus txiv neej thiab nws poj niam, thiab muab rau nkawd hnav.
22 Ces HUAB TAIS Tswv Ntuj hais tias: "Zaum no tib neeg zoo li peb lawm, nws paub qhov phem thiab qhov zoo lawm. Yuav tsis pub kom nws cev tes mus de tau tsob txiv muaj txoj sia coj los no kom nws muaj txoj sia nyob mus li."
23 HUAB TAIS Tswv Ntuj thiaj kom tib neeg tawm hauv lub vaj Es Dees mus, kom nws mus cog cov av uas muab los puab nws.
24 Tswv Ntuj ntiab tib neeg tawm, nws coj tib neeg mus nyob rau sab hnub tuaj ntawm lub vaj Es Dees; nws tso tus tshiab Kes Lws Npis thiab rab ntaj nplaim taws uas kiv ncig lees, zov txoj kev mus txog tus ntoo muaj txoj sia.

NPN 90: 2, 3-4abc, 5-6, 12-13

Txais: (1) Nyob txhua tiam, Huab Tais, koj yog peb qhov chaw vam khom.

Ua ntej cov roob raug tsim tawm los,
ua ntej lub ntiaj teb thiab tas lub qab ntuj khwb tshwm muaj tuaj,
ib txhis dhau ib txhis los mus, koj yeej yog Tswv Ntuj lawm.

Txais: (1) Nyob txhua tiam, Huab Tais, koj yog peb qhov chaw vam khom.

Koj muab neeg hloov rov mus ua plua av,
koj hais tias: “Me nyuam neeg, nej rov mus ua av.”
Vim tias koj saib ib txhiab xyoo zoo li yog nag hmo xwb,
uas twb dhau los lawm, los tsuas zoo li
ib lub caij zov keeb thaum hmo ntuj xwb.

Txais: (1) Nyob txhua tiam, Huab Tais, koj yog peb qhov chaw vam khom.

Koj ua kom lawv tas sim neej thaum nyob nruab dab ntub,
tag kis sawv ntxov lawv zoo li cov nroj tsuag hloov sai sai:
thaum hnub tuaj nroj tsuag sawv ntsuab xiab,
tiam sis yav tsaus ntuj nws twb ntsws tas tuag tas.

Txais: (1) Nyob txhua tiam, Huab Tais, koj yog peb qhov chaw vam khom.

Thov koj qhia kom peb txawj suav peb cov hnub nyoog raws qhov ncaj,
kom peb txawj muaj kev thoob tsib hauv nruab siab.
HUAB TAIS, thov koj tig rov los mas! Yuav tos hov ntev?
Thov koj khuv leej koj cov tub txib mas!

Txais: (1) Nyob txhua tiam, Huab Tais, koj yog peb qhov chaw vam khom.

As Les Lus Yas: MT 4: 4b

Txais: As les lus yas, as les lus yas.

Neeg tsis kawg muab mov xwb los yug txoj sia,
neeg tseem muab txhua lo lus uas
tawm ntawm Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo: MK 8: 1-10

1 Thaum lub caij ntawd, rov qab muaj dua ib pab neeg coob coob tuaj, lawv tsis muaj dab tsi noj. Yes Xus hu nws cov thwj tim los, nws hais rau lawv tias:
2 "Kuv hlub cov neeg no, vim lawv nrog kuv nyob tau peb hnub lawm, lawv tsis muaj dab tsi noj.
3 Yog kuv cia lawv yoo tshaib rov mus tsev, mas lawv yuav tsaus muag tom tog kev, vim lawv ib txhia tuaj deb deb tuaj."
4 Cov thwj tim teb rau Yes Xus tias: "Qhov chaw no yog chaw twj cuab xwb, leej twg yuav muab tau mov qhov twg los kom txaus rau lawv noj kom tsau?”
5 Ces Yes Xus nug lawv tias: "Nej muaj pes tsawg lub ncuav mov?" Lawv hais tias: "Xya lub."
6 Yes Xus hais kom tsoom sid zaum hauv av. Nws tuav xya lub ncuav mov, nws ua Ntuj tsaug, nws muab cov ncuav mov ntais, muab cev rau cov thwj tim kom nqa mus faib; ces cov thwj tim nqa mus faib rau pab neeg noj.
7 Lawv kuj muaj ob peb tug me nyuam ntses thiab. Yes Xus foom hmoov zoo rau cov ntses tas, nws kom lawv nqa mus faib rau sawv daws noj thiab.
8 Lawv sawv daws tau noj tsau plab npo, lawv khaws cov seem tau xya tawb.
9 Cov neeg ntawd kwv yees muaj plaub txhiab leej. Ces Yes Xus kom lawv rov mus tsev.
10 Tam sis ntawd nws nrog nws cov thwj tim nce mus rau hauv nkoj, ces nws mus rau thaj tsam Das Mas Nus Thas lawm.

Tim 13 lub 2 Hlis 2023

Hnub Ob Lis Piam Rau Nruab Xyoo A Nruab Lis Piam Xyoo I
Lectionary: 335

Zaj Nyeem Ib: HP 4: 1-15, 25

1 As Das paub nws poj niam Es Vas, ces Es Vas xeeb tub thiab yug tau Kas Ees; nws hais tias: "Kuv tau ib tug tub ntawm HUAB TAIS los."
2 Nws kuj yug tau As Npes, Kas Ees tus kwv thiab. As Npes hlob los ua ib tug tub yug tsiaj hos Kas Ees ncaws av cog qoob cog loo.
3 Tom qab no, Kas Ees muab nws cov qoob los txi rau HUAB TAIS.
4 Hos As Npes, nws kuj muab thawj tus me nyuam uas nws cov tsiaj yug tau, los txi rau Ntuj nrog lawv cov roj huv tib si thiab. HUAB TAIS zoo siab txais As Npes thiab nws cov txim.
5 Tab sis HUAB TAIS tsis zoo siab txais Kas Ees thiab nws cov txim, ces Kas Ees npau taws kawg nkaus thiab ua ntsej muag poob tas
6 HUAB TAIS hais rau Kas Ees tias: "Vim li cas koj thiaj npau taws thiab ua ntsej muag poob tas li ko?
7 Yog koj ua qhov zoo mas koj yeej yuav rov tsa taus koj lub ntsej muag xwb. Hos yog koj tsis ua qhov zoo ces txoj kev txhaum nyob rawv ntawm koj qhov rooj, zoo li tus tsiaj nyas nrhw koj, nws xav ntsiab kom tau koj. Tiam sis yog koj xav mas koj yuav yeej tau nws."
8 Tab sis Kas Ees hais rau nws tus kwv As Npes tias: "Wb mus lawm tom teb." Thaum nkawd mus txog tom teb lawm, Kas Ees txawm sawv tsees mos ntiag nws tus kwv, muab tus kwv tua.
9 HUAB TAIS nug Kas Ees tias: "Koj tus kwv As Npes nyob qhov twg?" Kas Ees teb tias: "Kuv tsis paub; kuv puas yog tus zov rawv kuv tus kwv?"
10 HUAB TAIS hais rau nws tias: "Koj tau ua dab tsi? Koj tus kwv cov ntshav quaj qw hauv av tuaj rau kuv!
11 Li ntawd, zaum no koj yuav tau hmoov phem nyob saum thaj av uas tau rua ncauj cug koj tus kwv cov ntshav uas yog koj txhais tes tau muab txo.
12 Thaum koj ua teb, av yuav tsis ntsu qoob rau koj ntxiv; koj yuav khiav tsiv nraim thiab ua neeg loj leeb ncig ntiaj teb."
13 Kas Ees hais rau HUAB TAIS tias: "Kuv lub txim hnyav dhau, kuv ris tsis taus lawm.
14 Ntsia saib, hnub no koj ntiab kuv tawm ntawm thaj av mus, kuv yuav tsum khiav mus deb ntawm koj lub ntsej muag, thiab kuv yuav ua neeg thoj nam loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb!"
15 HUAB TAIS hais rau nws tias: "Yuav tsis muaj li ntawd; yog leej twg tua Kas Ees mas yuav muaj tus pab ua pauj rau Kas Ees xya zaus." Ces HUAB TAIS ntaus ib lub cim rau Kas Ees kom leej twg ntsib nws txhob muab nws tua.
25 As Das rov paub nws poj niam dua, ces nws poj niam yug tau ib tug tub ntxiv; nws poj niam tis npe rau hu ua Xes Thes, nws hais tias: "Tswv Ntuj pub dua ib tug tub rau kuv los pauv As Npes chaw, vim Kas Ees muab nws tua lawm."

NPN 50: 1+8, 16bc-17, 20-21

Txais: (14a) Qhov nej yuav cev rau Tswv Ntuj yog ib thaj cav txog nws.

HUAB TAIS Tswv Ntuj tau hais lus thiab ceeb toom rau lub ntiaj teb,
txij thaum lub hnub tawm tuaj mus txog thaum lub hnub poob qho tias:
“Tsis yog vim nej cov thaj txi ntuj kuv thiaj tau cem nej,
vim nej cov thaj hlawv tsiaj txi ntuj nyob ntawm kuv xub ntiag mus li.”

Txais: (14a) Qhov nej yuav cev rau Tswv Ntuj yog ib thaj cav txog nws.

“Vim li cas nej qog kuv cov kev cai lij choj
thiab lees kuv txoj kev cog lus ntawm nej lub ncauj,
tiam sis nej ntxub txoj kev coj nruj raws kuv txoj cai
thiab muab kuv cov lus pov tseg rau nraum nej nrob qaum?

Txais: (14a) Qhov nej yuav cev rau Tswv Ntuj yog ib thaj cav txog nws.

“Nej zaum tsaws hais lus phem txog nej tus kwv tij,
nej xyav lus moo cua phem txog nej niam tus tub.
Thaum nej ua tej yam zoo li no, kuv puas yuav tsum ua ntsej lag muag dig?
Los nej puas xav tias kuv zoo li nej thiab?
Kuv yuav cem nej thiab yuav piav nej lub txim kom nej qhov muag pom.

Txais: (14a) Qhov nej yuav cev rau Tswv Ntuj yog ib thaj cav txog nws.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: Kuv yog txoj kev, qhov tseeb thiab txoj sia,
tsis muaj leej twg mus cuag tau Leej Txiv, yog nws tsis mus ntawm kuv mus.

Txais: As les lus yas, as les lus yas

Ntawv Moo Zoo: MK 8: 11-13

11 Cov Fas Lis Xais tawm tuaj, lawv pib nrog Yes Xus sib cav. Lawv xav sim Yes Xus, ces lawv taij kom Yes Xus ua ib lub cim tawm saum ntuj los.
12 Yes Xus xyu ib suab tawm puag hauv nws lub tswv yim tuaj, nws hais tias: "Tim li cas tiam neeg no thiaj taij ib lub cim? Kuv hais tseeb rau nej tias, yuav tsis muaj ib lub cim rau tiam neeg no pom."
13 Ces Yes Xus tso lawv tseg, nws rov nce nkoj thiab sawv kev mus rau sab ntug dej tim ub.

Tim 14 lub 2 Hlis 2023

Hnub Peb Lis Piam Rau Nruab Xyoo A Nruab Lis Piam Xyoo I
Lectionary: 336

Yuav Hwm LN Cyril thiab Methodius

Zaj Nyeem Ib: HP 6: 5-8; 7: 1-5, 10

6: 5 HUAB TAIS pom hais tias nyob ntiaj teb, neeg siab nkhaus tas nrho, thiab neeg lub siab tsuas xav txog qhov phem tas mus li xwb.
6 HUAB TAIS thiaj khuv xim hais tias cas nws tau tsim neeg los nyob ntiaj teb lawm, thiab nws tu siab heev.
7 Ces HUAB TAIS hais tias: "Kuv yuav muab cov neeg uas kuv tau tsim ntawd rhuav kom ploj tas saum daim npoo av, tsis hais neeg, los tsiaj nyeg, kab ntsaum los noog ya saum ntuj huv tib si, vim kuv khuv xim tias kuv tau tsim lawv los."
8 Tiam sis Nos Hes yog ib tug neeg zoo raws li HUAB TAIS pom.
7: 1 HUAB TAIS hais rau Nos Hes tias: "Koj nkag mus hauv lub nkoj, koj thiab tas nrho koj tsev neeg, vim nyob hauv tiam neeg no, kuv pom koj thiaj li ncaj ncees xwb.
2 Ntawm tas nrho cov tsiaj huv, koj yuav coj xya nkawm nrog koj, tus txiv nrog tus maum; ntawm cov tsiaj tsis huv, koj yuav coj ib nkawg, ib tug txiv thiab ib tug maum.
3 Hos cov noog ya saum ntuj, koj coj xya nkawm, ib tug lau nrog tus poj, kom tau ua noob rau saum cov npoo av saum tas ntiaj teb.
4 Tshuav xya hnub ntxiv xwb kuv yuav tso nag los nyab ntiaj teb plaub caug hnub plaub caug hmo, kuv yuav rhuav tas puas tsav yam muaj sia kuv tau tsim los kom ploj ntais saum daim npoo av mus."
5 Nos Hes ua tas puas tsav yam raws li HUAB TAIS kom nws ua.
10 Ces thaum puv xya hnub lawm, txawm muaj dej huam loj los nyab ntiaj teb.

NPN 29: 1a+2, 3ac-4, 3b+c-10

Txais: (11b) Huab Tais yuav foom kev thaj yeeb rau nws haiv neeg.

Nej muab rau HUAB TAIS, nej uas yog Tswv Ntuj cov tub,
nej muab rau HUAB TAIS lub koob meej thiab lo lus qhuas,
nej muab rau HUAB TAIS lub koob meej kom phim nws lub npe;
nej hnav ib co tsoos ntshiab mus pe hawm HUAB TAIS.

Txais: (11b) Huab Tais yuav foom kev thaj yeeb rau nws haiv neeg.

HUAB TAIS lub suab nyob saum cov dej,
HUAB TAIS nyob saum cov dej loj dav tas nrho.
HUAB TAIS lub suab muaj hwj huam,
HUAB TAIS lub suab muaj hwj chim.

Txais: (11b) Huab Tais yuav foom kev thaj yeeb rau nws haiv neeg.

Tus Tswv Ntuj muaj koob meej ua xob quaj nrov nroo ntws,
nyob hauv nws lub tuam tsev sawv daws hais tias, “Nto koob meej!”
HUAB TAIS zaum saum theej kiab saum toj cov dej nyab,
HUAB TAIS zaum saum theej kiab ua vaj mus tas ib txhis.

Txais: (11b) Huab Tais yuav foom kev thaj yeeb rau nws haiv neeg.

As Les Lus Yas: ZAM 14: 23

Txais: As les lus yas, as les lus yas.

Huab Tais hais tias: Tus twg nyiam kuv, mas nws yuav khaws kuv lo lus,
ces kuv Txiv yuav nyiam nws, thiab peb yuav tuaj nyob hauv nws.

Txais: As les lus yas, as les lus yas.

Ntawv Moo Zoo: MK 8: 14-21

14 Cov thwj tim tsis nco qab ntim mov, ces lawv tsuas muaj ib lub ncuav mov nyob hauv nkoj xwb.
15 Thaum ntawd, Yes Xus qhia lawv zoo li no: "Nej yuav xyuam xim, nej yuav ceev faj txog cov poov xab Fas Lis Xais thiab cov poov xab Hes Los."
16 Ces cov thwj tim txawm sib tham tias yog vim lawv tsis muaj mov, nws thiaj hais li ntawd.
17 Yes Xus paub qhov lawv xav, ces Yes Xus hais rau lawv tias: "Ua cas nej thiaj sib tham tias yog vim nej tsis muaj mov? Nej tseem tsis tau to taub thiab tsis nkag siab li lod? Puas yog nej lub siab qhwv dhau lawm?
18 Puas yog nej muaj qhov muag los nej tsis pom li, nej muaj pob ntseg los nej tsis hnov li? Nej puas nco qab lawm tias,
19 thaum kuv ntais tsib lub ncuav mov rau tsib txhiab leej noj, nej khaws tau pes tsawg tawb mov seem mas?" Cov thwj tim teb tias: "Kaum ob tawb."
20 “Thiab zaum uas kuv ntais xya lub ncuav mov rau plaub txhiab leej noj ne, nej khaws tau pes tsawg tawb mov seem?" Lawv hais tias : "Xya tawb."
21 Ces Yes Xus hais rau lawv tias "Nej tseem tsis tau to taub li thiab lod?"

Tim 15 lub 2 Hlis 2023

Hnub Plaub Lis Piam Rau Nruab Xyoo A Nruab Lis Piam Xyoo ILectionary: 337

Zaj Nyeem Ib: HP 8: 6-13, 20-22

6 Thaum tas plaub caug hnub lawm, Nos Hes qhib lub qhov rai uas nws tau ua rau lub nkoj,
7 nws tso tus uab lag tawm mus; uab lag ya mus ya los mus txog thaum dej qhuav hauv ntiaj teb lawm.
8 Nos Hes kuj tso ib tug nquab tawm ntawm nws mus xyuas saib dej puas tau nqhuab tas saum daim npoo av thiab.
9 Tiam sis tus nquab nrhiav tsis tau chaw txawb nws ob txhais ko taw, ces nquab ya rov los rau ntawm nws ntawm lub nkoj, vim dej tseem nyab cov av hauv ntiaj teb thoob plaws. Nos Hes thiaj li xyab tes mus txais tus nquab coj los rau ntawm nws hauv lub nkoj.
10 Nws tos tau xya hnub ntxiv, nws rov qab tso tus nquab tawm ntawm lub nkoj mus dua.
11 Thaum tsaus ntuj, nquab ya rov los, ua ciav ntawm nws kaus ncauj muaj ib daig nplooj txiv ntoo roj uas tus nquab nyuam qhuav de los. Ces Nos Hes paub tias dej nqig lawm.
12 Nws rov tos tau xya hnub ntxiv, nws mam rov tso tus nquab tawm mus dua. Tus nquab tsis rov los ntawm nws ntxiv lawm.
13 Ces yog xyoo rau pua ib hauv Nos Hes lub neej, thaum lub ib hlis hnub xiab ib, dej thiaj qhuav tas hauv ntiaj teb lawm. Nos Hes thiaj yaws lub ruv npog lub nkoj, nws ntsia ua ciav pom lub ntiaj teb cov npoo av qhuav tas lawm.
20 Ces Nos Hes tsa ib lub thaj txi ntuj rau Huab Tais. Nws muab txhua yam tsiaj huv thiab txhua yam noog huv los hlawv txi rau Ntuj saum lub thaj.
21 Thaum Huab Tais hnia cov pa ncho tsw qab, Huab Tais hais rau hauv nws nruab siab hais tias tias: "Kuv yuav tsis foom lus phem rau av vim tib neeg ib zaug ntxiv lawm, vim tias neeg lub siab yeej xeeb tau phem puag thaum yau los. Thiab kuv yuav tsis ua kom txhua yam muaj sia tu noob li kuv tau ua no ib zaug ntxiv.”
22 Tsuav yog tseem muaj lub ntiaj teb, mas yeej yuav muaj caij cog qoob thiab caij sau qoob, yuav muaj txias thiab muaj kub, yuav muaj caij sov thiab caij no, yuav muaj nruab hnub thiab muaj hmo ntuj tas mus li tsis tu."

NPN 116: 12-13, 14-15, 18-19

Txais: (17a) Huab Tais, kuv yuav cev ib thaj txi ntuj cav txog koj.
los: As les lus yas.

Kuv yuav muab dab tsi los pauj rau Huab Tais
rau tas ib puas tsav yam zoo uas nws tau ua rau kuv ?
Kuv yuav cev lub ntim cawm neeg rau nws,
kuv yuav tuav txog HUAB TAIS lub npe hu txog nws

Txais: (17a) Huab Tais, kuv yuav cev ib thaj txi ntuj cav txog koj.
los: As les lus yas.

Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag.
HUAB TAIS saib cov ntseeg nws
txoj kev tuag muaj nqes tas nrho.

Txais: (17a) Huab Tais, kuv yuav cev ib thaj txi ntuj cav txog koj.
los: As les lus yas.

Kuv yuav pauj kuv lub yeem rau HUAB TAIS
nyob ntawm nws haiv neeg xub ntiag,
nyob ntawm cov tshav loog hauv HUAB TAIS tsev,
nyob hauv nruab nrab koj, Yes Lus Xas Les.
.
Txais: (17a) Huab Tais, kuv yuav cev ib thaj txi ntuj cav txog koj.
los: As les lus yas.

As Les Lus Yas: EFX 1: 17-18

Txais: As les lus yas, as les lus yas.

Thov kom peb tus Huab Tais Yes Xus Pleev leej Txiv
qhib peb lub qhov muag hauv peb lub siab kom pom kev,
kom peb thiaj paub txog tias peb txoj kev tso siab yog dab tsi
thaum peb mloog Tswv Ntuj hu peb.

Txais: As les lus yas, as les lus yas.

Ntawv Moo Zoo: MK 8: 22-26

22 Thaum Yes Xus thiab nws cov thwj tim tuaj txog Npes Xais Das, lawv coj ib tug neeg dig muag tuaj rau Yes Xus, lawv thov kom Yes Xus plhws tus dig muag.
23 Yes Xus tuav tus dig muag tes, thiab coj nws tawm mus rau sab zos nraud. Yes Xus muab nws aub ncaug pleev tus dig muag ob lub qhov muag, ces nws tsa tes rau saum tus dig muag. Yes Xus nug nws tias: "Koj puas pom dab tsi ?"
24 Tus dig muag tsa muag saib, nws teb tias: "Kuv pom ib co neeg zoo li ib co ntoo mus mus kev."
25 Yes Xus rov qab tsa tes rau saum tus dig muag ob lub qhov muag dua, ces tus dig muag pom kev tseeb tuaj, nws zoo lawm; nws pom ib puas tsav yam meej kawg tuaj.
26 Yes Xus thiaj kom nws rov mus tsev, Yes Xus hais rau nws tias: "Koj tsis txhob nkag mus hauv lub zos li."

Tim     16     lub     2     Hlis     2023

Hnub Tsib Lis Piam Rau Nruab Xyoo A Nruab Lis Piam Xyoo I
Lectionary:  338

Zaj Nyeem Ib:   HP 9: 1-13

1 Tswv Ntuj foom hmoov zoo rau Nos Hes thiab rau nws cov tub, nws hais rau lawv tias: "Nej yeej meem tsim noob, yeej meem huam vam mus nyob puv lub ntiaj teb.
2 Tas puas tsav yam tsiaj hauv ntiaj teb, puas tsav yam noog ya saum ntuj, puas tsav yam tsiaj nkag hauv av thiab puas tsav yam ntses hauv hiav txwv yuav hwm nej ntshai nej. Lawv nyob hauv nej lub xib teg tas huv si.
3 Txhua yam txawj ua zog thiab muaj sia yog txhiam xws rau nej noj, ib yam li cov nroj ntsuab los kuj yog thiab; kuv muab txhua yam tas tib siv rau nej.
4 Tshuav ib yam xwb: yam nqaij uas tseem muaj txoj sia, uas yog nws cov ntshav , mas nej yuav tsis txhob noj.
5 Vim hais tias, kuv yuav nug txog nej txhua tus cov ntshav uas yog nej txoj sia. Kuv yuav nug ntawm tas tsoom tsiaj tib si thiab ntawm tib neeg; kuv yuav nug txhua tus tib neeg txog lwm tus cov ntshav; kuv yuav nug txog tus neeg txoj sia.
6 Yog leej twg txo tib neeg cov ntshav, mas nws kuj yuav raug tib neeg txo nws cov ntshav thiab. Vim hais tias Tswv Ntuj tau tsim neeg los zoo xws li nws tus ntsuj duab.
7 Ntawm nej, mas nej yeej meem tsim noob, yeej meem huam vam, yeej meem mus ncig thoob ntiaj teb thiab huam vam puv ntiaj teb."
8 Tswv Ntuj hais rau Nos Hes thiab rau nws cov tub uas nrog nws nyob tias:
9 "Ntawm no, kuv nrog nej cog lus, nrog nej thiab nej caj ces yuav los tom qab nej cog lus,
10 thiab nrog txhua yam muaj txoj sia nyob nrog nej cog lus, nrog cov noog, cov tsiaj nyeg, txhua tsav txhua hom tsiaj hauv ntiaj teb uas tau nrog nej tawm hauv lub nkoj los, cog lus.
11 Kuv cog lus rau nej tias: Tas puas tsav yam muaj sia yuav tsis raug dej nyab muab rhuav kom tu noob ib zaug ntxiv. Yuav tsis muaj dej los nyab thiab rhuav ntiaj teb ib zaug ntxiv."
12 Tswv Ntuj hais tias: "Ntawm no yog lub cim qhia rau cov tiam neeg tom ntej mus li tias kuv tau nrog nej cog lus thiab nrog tas puas tsav yam muaj sia uas nrog nej nyob cog lus.
13 Kuv ua zaj sawv rau saum cov huab ; nws yuav ua lub cim nco txog tias kuv thiab lub ntiaj teb tau cog lus cia lawm.

NPN   102: 16-18, 19-21, 29+22-23

Txais: (20b) Huab Tais nyob saum ntuj dauv muag ntsia rau lub ntiaj teb.

HUAB TAIS, txhua haiv neeg yuav hwm koj lub npe,
tas cov vaj nyob ntiaj teb yuav ntshai koj lub hwj chim,
Vim thaum HUAB TAIS rov txhim Xis Yoos,
sawv daws yuav pom nws nyob hauv nws lub hwj chim;
nws yuav tig los mloog cov neeg txom nyem tej lus thov,
nws yuav tsis thuam lawv zaj teev ntuj.

Txais: (20b) Huab Tais nyob saum ntuj dauv muag ntsia rau lub ntiaj teb

Nej sau tej no cia rau phaj tub ki yuav los yav tom ntej paub,
cov tiam neeg HUAB TAIS yuav tsim thiaj yuav cav txog nws tias:
“HUAB TAIS nyob siab saum nws lub tsev ntshiab dauv muag los saib;
HUAB TAIS nyob saum txheej ntuj siab ntsia ntiaj teb,
Kom tau mloog cov neeg nyob txim lub suab ntsaj,
kom tau tso cov yuav raug tua dim kev tuag.”

Txais: (20b) Huab Tais nyob saum ntuj dauv muag ntsia rau lub ntiaj teb

Koj cov tub txib tej me nyuam yuav nyob ruaj nreb,
lawv cov xeeb ntxwv yuav nyob ntawm koj xub ntiag mus li.
Kom sawv daws tshaj HUAB TAIS lub npe nyob saum Xis Yoos,
thiab cav lus zoo txog nws nyob Yes Lus Xas Les;
thaum ntawd cov haiv neeg yuav sib sau los nyob ua ke,
cov ceeb tsheej yuav sib txoos los tsob hwb HUAB TAIS.

Txais: (20b) Huab Tais nyob saum ntuj dauv muag ntsia rau lub ntiaj teb

As Les Lus Yas:   ZAM 6: 63c, 68c

Txais: As les lus yas, as les lus yas.

Huab Tais, koj cov lus yog tswv yim thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo:   MK 8: 27-33

27 Yes Xus thiab nws cov thwj tim mus rau hauv cov zos nyob thaj tsam Xes Ntxas Les Fis Lis Pos. Thaum lawv tseem taug kev, Yes Xus nug nws cov thwj tim: "Luag tej hais tias kuv yog leej twg?"
28 Cov thwj tim teb tias: "Lawv hais tias koj yog Zam Ntxuav Plig, hos ib txhia hais tias koj yog Es Lias, ib txhia hais tias koj yog ib tug hauv cov yaj saub."
29 Yes Xus nug lawv tias: "Nej ne, nej hais tias kuv yog leej twg?" Pob Zeb teb rau Yes Xus tias: "Koj yog Leej Pleev."
30 Ces Yes Xus txwv lawv kom txhob hais txog nws rau leej twg li.
31 Yes Xus pib qhia cov thwj tim hais tias: "Neeg Leej Tub yuav tsum raug txom nyem loj kawg nkaus. Cov txwj laus, cov thawj leej choj thiab cov thoob xwm yuav tsis kam lees nws; luag yuav muab nws tua; peb hnub tom qab, nws yuav sawv rov los.”
32 Yes Xus tab meeg hais txog tej ntawd tsis zais li. Pob Zeb txawm rub Yes Xus los ntawm nws, ces Pob Zeb pib yws Yes Xus.
33 Tab sis Yes Xus tig los ntsia nws cov thwj tim, nws cem Pob Zeb hnyav ncawv tias: "Xas Tas, koj mus nyob nram kuv qab! Vim koj tsis xav tswv yim li Tswv Ntuj xav, koj xav li neeg xav xwb.”

Tim 17 lub 2 Hlis 2023

Hnub Rau Lis Piam Rau Nruab Xyoo A Nruab Lis Piam Xyoo I
Lectionary: 339

Zaj Nyeem Ib: HP 11: 1-9

1 Thaum ntawd, tas ntiaj teb sawv daws hais ib xeem lus thiab siv ib co lus xwb.
2 Thaum lawv tsiv sab toob fab los, lawv los nrhiav tau ib lub tiaj nyob hauv teb chaws Sis Nes As, ces lawv los nyob ntawd.
3 Lawv ib leeg hais rau ib leeg tias: "Tuaj peb puab thwj cib, peb muab ci hauv hluav taws kom tawv!" Ces lawv siv cov thwj cib ntawd los pauv cov pob zeb txhim tsev thiab siv roj hmab dub los pauv cov hmoov xuab zeb thiab xis maas do xyaw dej ua cov leem thwj cib.
4 Ces lawv hais tias: "Tuaj peb txhim ib lub nroog rau peb thiab ib tug pej thuam kom lub ntsis siab siab mus txog puag saum ntuj, ces peb lub npe thiaj yuav nrov; tsis li ntawd ces ntshai peb yuav sib tawg mus nyob thoob ntiaj teb xwb."
5 HUAB TAIS nqes los xyuas lub nroog thiab tus pej thuam uas neeg tau tsa sawv.
6 Ces HUAB TAIS hais tias: "Ntsia saib, lawv yog ib haiv neeg xwb, thiab hais ib xeem lus xwb; qhov no tsuas yog qhov lawv nyuam qhuav pib ua xwb, txij no mus yog lawv xav ua dab tsi thaum twg ces yuav tsis muaj ib yam uas lawv yuav ua tsis tau lawm.
7 Mus, peb sim nqes mus xyuas saib; peb yuav ua kom lawv hais lus sib txawv, ces lawv yuav tsis sib to taub ntxiv lawm."
8 Ces HUAB TAIS ua kom lawv sib tawg mus nyob thoob ntiaj teb ces lawv tso tseg tsis txhim lub nroog ntxiv.
9 Vim li ntawd lub nroog thiaj hu ua nroog Npas Npes, vim yog nyob ntawd HUAB TAIS ua kom tas ntiaj teb neeg hais lus tsis sib to taub ntxiv; thiab yog nyob ntawd, HUAB TAIS ua kom neeg tawg mus nyob txhua qhov chaw saum daim npoo av thoob ntiaj teb.

NPN 33: 10-11, 12-13, 14-15

Txais: (12) Haiv neeg uas Huab Tais xaiv ua nws tug lawv tau txoj hmoov zoo.

HUAB TAIS rhuav cov hauj lwm tsoom kuj cuab npaj ua,
nws ua kom cov haiv neeg zaj tswv yim mus tsis taus.
Cov hauj lwm uas HUAB TAIS npaj lawv nyob ruaj mus li,
zaj nws xav tau hauv nruab siab nyob txheej dhau txheej.

Txais: (12) Haiv neeg uas Huab Tais xaiv ua nws tug lawv tau txoj hmoov zoo.

Tau hmoov zoo yog haiv neeg uas Tswv Ntuj ua lawv tus HUAB TAIS,
yog haiv neeg uas nws xaiv los ua nws lub cuab tam.
HUAB TAIS nyob txheej ntuj saud dauv muag los ntsia,
nws pom tas ib tsoom neeg huv tib si.

Txais: (12) Haiv neeg uas Huab Tais xaiv ua nws tug lawv tau txoj hmoov zoo.

Nws zaum saum nws lub theej kiab saib,
nws pom tas ib tsoom neeg nyob ntiaj teb.
Nws yog tus puab txhua leej txhua tus lub siab,
nws to taub txhua txoj hauj lwm neeg ua.

Txais: (12) Haiv neeg uas Huab Tais xaiv ua nws tug lawv tau txoj hmoov zoo.

As Les Lus Yas: ZAM 15: 15b

Txais: As les lus yas, as les lus yas.

Huab Tais hais tias: Kuv hu nej ua phooj ywg, vim kuv tau qhia
rau nej paub tas ib puas tsav yam uas kuv hnov ntawm Leej Txiv los.

Txais: As les lus yas, as les lus yas.

Ntawv Moo Zoo: MK 8: 34—9: 1

34 Yes Xus hu tsoom sid thiab nws cov thwj tim los, nws hais rau lawv tias: "Yog leej twg xav los raws kuv, nws yuav tsum tsis txhob xav txog nws tus kheej, nws yuav kwv nws tus ntoo cuam, thiab yuav lawv kuv qab.
35 Vim yog leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv thiab vim lub Moo Zoo, mas nws yuav cawm nws txoj sia.
36 Yuav muaj qab hau dab tsi rau ib tug neeg, yog nws txeeb tau lub qab ntuj no tas tib si los ua nws tug, tab sis nws ua nws txoj sia ploj?
37 Tus neeg ntawd yuav muab dab tsi los pauv thiaj tau nws txoj sia ?
38 Tus twg txaj muag lees kuv thiab kuv cov lus nyob hauv tiam neeg fav xeeb thiab muaj txhaum no, mas Neeg Leej Tub kuj yuav txaj muag lees tus ntawd thaum nws rov los muaj nws Txiv lub hwj chim, nrog tsoom tshiab ntshiab.”
9: 1 Yes Xus kuj tseem hais rau lawv tias: "Kuv hais tseeb rau nej: Cov neeg nyob ntawm no, ib txhia yuav tsis xub saj kev tuag ua ntej lawv tau pom Tswv Ntuj lub Ceeb Tsheej los txog muaj lub hwj huam tso.”

Tim 18 lub 2 Hlis 2023

Hnub Xya Lis Piam Rau Nruab Xyoo A Nruab Lis Piam Xyoo I
Lectionary: 340

Zaj Nyeem Ib: HES NPLAWS 11: 1-7

Cov kwv tij:
1 Txoj kev ntseeg yog ib qho kev cog lus tias peb yuav txais yam peb tso siab lug tos, nws yog qhov zeem tseeb tias yam peb tsis pom yeej muaj tseeb tiag.
2 Txoj kev ntseeg yog qhov ua kom cov poj yawm txwv koob thaud tau txais txoj kev lees paub tias lawv yog neeg zoo.
3 Nyob hauv txoj kev ntseeg, peb to taub tias yog Tswv Ntuj lo lus tau teeb lub sim ceeb kom txua yam nyias nyob muaj nyias chaw. Li ntawd, tej yam uas pom tau yog tawm ntawm tej yam uas pom tsis tau tuaj.
4 Yog vim txoj kev ntseeg, mas As Npes thiaj cev ib thaj txi Ntuj muaj nqis dua Kas Ees thaj rau Tswv Ntuj; yog vim kev ntseeg, nws thiaj tau txais kev zeem tseeb tias nws yog neeg ncaj, Tswv Ntuj thiaj lees txais nws cov paj tshab; thiab yog vim kev ntseeg, mas txawm As Npes tuag lawm los nws tseem hais lus qees.
5 Yog vim txoj kev ntseeg, mas Hes Nov thiaj cia li nce mus saum ntuj lawm, nws tsis ntsib txoj kev tuag li; neeg nrhiav tsis tau nws ntxiv, vim Tswv Ntuj coj nws mus saum ntuj lawm. Thaum nws tseem tsis tau mus saum ntuj mas nws tau txais kev lees paub tias nws yog ib tug neeg ntxim Tswv Ntuj siab.
6 Yog neeg tsis muaj txoj kev ntseeg, mas neeg ua ntxim Tswv Ntuj siab tsis tau. Vim tus neeg uas txav mus ze ntawm Tswv Ntuj, mas nws yuav tsum ntseeg tias muaj Tswv Ntuj tiag, thiab yuav tsum ntseeg tias Tswv Ntuj pub paj tshab rau cov neeg nrhiav nws.
7 Yog vim kev ntseeg, mas thaum Tswv Ntuj qhia txog tej yam uas tseem tsis tau pom tshwm tuaj rau Nos Hes paub, Nos Hes hwm Tswv Ntuj zoo, nws txua ib lub nkoj kom tau cawm nws tsev neeg. Yog vim kev ntseeg mas Nos Hes muab txim rau lub qab ntuj neeg, thiab yog vim kev ntseeg mas nws tau txais txoj kev ncaj los ua nws lub cuab tam.

NPN 145: 2-3, 4-5, 10-11

Txais: (1) Huab Tais, kuv yuav cav txog koj lub npe mus li.

Kuv yuav niaj hnub cav txog koj,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws kawg nkaus;
nws loj tas nrho, neeg ntsuas tsis tau.

Txais: (1) Huab Tais, kuv yuav cav txog koj lub npe mus li.

Txheej dhau txheej yuav qhuas txog koj tej hauj lwm,
Lawv yuav tshaj koj txoj kev muaj hwj huam rau neeg paub.
Lawv yuav hais txog koj lub hwj xyeej muaj hwj chim loj ci ntsa iab.
Lawv yuav piav txog koj cov dej num tsim nyog qhuas.

Txais: (1) Huab Tais, kuv yuav cav txog koj lub npe mus li.

HUAB TAIS, cia kom koj cov hauj lwm txhua yam ua koj tsaug,
thiab cia kom cov neeg nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (1) Huab Tais, kuv yuav cav txog koj lub npe mus li.

As Les Lus Yas: MK 9: 7

Txais: As les lus yas, as les lus yas.

Lub ntuj qhib plho ces Leej Txiv lub suab nrov nroo ntws tias :
"Tus no yog kuv Leej Tub uas kuv nyiam, nej mloog nws mog."

Txais: As les lus yas, as les lus yas.

Ntawv Moo Zoo: MK 9: 2-13

2 Tau rau hnub tom qab, Yes Xus hu Pob Zeb, Yas Kos, thiab Zam mus rau ib qho, ces nws coj lawv nce mus rau saum ib lub roob siab, lawv nkaus xwb. Ces nws ib ce hloov tas rau ntawm lawv xub ntiag.
3 Nws cov ris tsho cia li ci hob dawb paug, nyob ntiaj teb no tsis muaj neeg muaj tshuaj yuav ntxhua tau kom dawb li ntawd.
4 Es Lias nrog Mais Xes tawm los rau lawv pom, nkawd nrog Yes Xus tham.
5 Ces Pob Zeb tsa suab hais rau Yes Xus tias: "Xib Hwb, peb nyob ntawm no mas zoo kawg li. Cia peb ua peb lub tsev tsam phooj: ib lub rau koj, ib lub rau Mais Xes, ib lub rau Es Lias."
6 Pob Zeb tsis paub tias nws hais dab tsi, vim lawv ntshai kawg.
7 Ces muaj ib twv huab los ntxoov lawv, thiab ib lub suab nrov hauv twv huab tuaj tias: "Tus no yog kuv Leej Tub uas kuv nyiam; nej mloog nws mog."
8 Ib sij huam, lawv ntsia ib ncig tsis pom leej twg li, tsuas pom Yes Xus tib leeg nrog lawv nyob xwb.
9 Thaum lawv tab tom nqes pem roob los, Yes Xus txwv lawv kom txhob piav txog qhov lawv pom ntawd rau leej twg li, yuav tsum tos kom Neeg Leej Tub sawv hauv cov tuag rov los tso.
10 Peb leeg thwj tim ua raws li lo lus txwv ntawd, tab sis lawv sib nug lawv tias: "Sawv hauv cov tuag rov los" yog txhais li cas?
11 Ces lawv nug Yes Xus tias: “Vim li cas cov kws Ntawv Ntshiab hais tias Es Lias yuav tsum xub los tso?”
12 Yes Xus thiaj hais rau lawv tias: “Muaj tiag, Es Lias yuav tsum xub los tso, thiab nws yuav kho tas puas tsav yam kom zoo. Thiab ntawv kuj sau hais li cas txog Neeg Leej Tub? Tias nws yuav tsum raug txom nyem loj, thiab yuav raug luag saib tsis taus.
13 Tiam sis kuv hais rau nej tias Es Lias twb los lawm, tab sis lawv ua rau nws ywj lawv siab nyiam, raws nraim li Ntawv xub sau txog nws lawm.”

Tim 20 lub 2 Hlis 2023

Hnub Ob Lis Piam Xya Nruab Xyoo A Nruab Lis Piam Xyoo I
Lectionary: 341

Zaj Nyeem Ib: NPES XIS LAS 1: 1-10

1 Txhua txoj kev thoob tsib tuaj ntawm HUAB TAIS tuaj, thiab nrog HUAB TAIS nyob tas mus li ib txhis.
2 Cov suab puam hauv hiav txwv, cov teev dej nag, cov hnub cov hmo uas nyob mus li, leej twg thiaj yuav suav txheeb?
3 Lub ntuj siab li cas, lub ntiaj teb dav li cas, qab tiv txwv tob li cas, leej twg thiaj yuav soj ntsuam tau?
4 Ntuj tsim kev thoob tsib ua ntej txhua tsav txhua yam, thiab lub tswv yim ntse xyuam xim yeej ib txwm nyob ib txhiab ib txhis los lawm
5 Tswv Ntuj lo lus nyob puag saum qhov chaw siab yog lub hauv paus txhawv kev thoob tsib, nws tej kev yuav nyob mus li tsis txawj kawg.
6 Ntuj puas tau qhia kev thoob tsib tus cag rau leej twg paub? Kev thoob tsib cov nru lus tob, leej twg thiaj paub txog?
7 Ntuj puas tau qhia kev thoob tsib cov txuj ci rau leej twg paub? Leej twg thiaj to taub txog nws ntau txoj ntau hom kev?
8 Tsuas muaj ib tug xwb thiaj thoob tsib, uas tsim nyog sawv daws hwm; nws zaum saum nws lub theej kiab. Yog Huab Tais.
9 Nws yog tus tau tsim kev thoob tsib; nws pom tau, nws ntsuas tau kev thoob tsib; thiab nws nchuav kev thoob tsib rau hauv nws cov hauj lwm tas tib si,
10 thiab rau hauv txhua tus muaj txoj sia raws li nws lub siab dav pom zoo; Huab Tais muab kev thoob tsib nchuav lug pub rau cov neeg nyiam nws.

NPN 93: 1ab, 1cd-2, 5

Txais: (1a) HUAB TAIS ua vaj, nws hnav hwj chim muaj tsim kawg li.
los: As les lus yas.

Huab Tais ua vaj, nws hnav hwj chim ci ntsa iab,
Nws hnav lub tsho muaj zog thiab sia siv khov kho.

Txais: (1a) HUAB TAIS ua vaj, nws hnav hwj chim muaj tsim kawg li
los: As les lus yas.

Nws tsim Lub ntiaj teb nyob ruaj nreb, txav tsis tau chaw.
Koj lub theej kiab yeej nyob ruaj khov kho txij puag thaum ub los;
Huab Tais, koj yeej ib txwm nyob txhiab niag tim puas xyoo mus li.

Txais: (1a) HUAB TAIS ua vaj, nws hnav hwj chim muaj tsim kawg li.
los: As les lus yas.

Koj cov cai lij choj yeej tsim nyog tso siab rau.
Huab Tais, txoj kev ntshiab tsab koj lub tsev
kom zoo nkauj mus li lawm yav tom ntej.

Txais: (1a) HUAB TAIS ua vaj, nws hnav hwj chim muaj tsim kawg li.
los: As les lus yas.

As Les Lus Yas: 2 TMT 1: 10

Txais: As les lus yas, as les lus yas.

Peb tus Cawm Seej Yes Xus Pleev tau rhuav txoj kev tuag pov tseg,
thiab tau ua kom txoj sia ci tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo: MK 9: 14-29

14 Thaum Yes Xus nrog Pob Zeb, Yas Kos thiab Zam lawv nqes saum roob rov los txog ntawm lwm cov thwj tim, lawv pom ib pab neeg coob coob nyob ncig cov thwj tim, thiab ib co kws Ntawv Ntshiab nrog cov thwj tim sib cav.
15 Tam sis ntawd, tas tsoom sid pom Yes Xus, lawv ceeb tas, lawv khiav tuaj ntawm Yes Xus, thiab tuaj hu nws.
16 Ces Yes Xus nug lawv tias : "Nej nrog lawv sib cav txog dab tsi?"
17 Muaj ib tug hauv pab neeg ntawd teb rau Yes Xus tias: "Xib Hwb, kuv coj kuv tus tub tuaj rau koj, nws raug ib tug dab nplaig txhav.
18 Thaum twg tus dab nkag rau hauv nws, mas dab muab nws thawb rau pem teb, ces tus tub ua npuas ncauj, nws zom hniav, thiab ib ce txhav tas. Kuv thov koj cov thwj tim kom lawv ntiab tus dab ntawd, tab sis lawv tsis muaj peev xwm yuav ntiab tau."
19 Yes Xus teb rau lawv tias: "Tiam neeg tsis muaj kev ntseeg, kuv yuav nrog nej nyob txog thaum twg? Kuv yuav ua tiag nyiaj nej mus txog thaum twg? Nej coj tus tub los rau kuv saib."
20 Ces lawv coj nws los rau Yes Xus. Thaum tus dab pom dheev Yes Xus, dab muab tus me nyuam tsim txom, ces tus me nyuam ntog rau hauv pem teb, nws dov mus dov los nyob hauv av, thiab ua npuas ncauj nto plaws.
21 Yes Xus nug leej txiv tias: "Nws raug qhov ntawd tau hov ntev los lawm?" Leej txiv teb tias: "Txij thaum yau los lawm.
22 Muaj ntau zaus dab muab nws thawb rau hauv hluav taws los rau hauv dej kom tuag. Yog koj pab tau, thov koj pab peb, thov koj khuv leej peb."
23 Yes Xus teb tias: "Yog koj pab tau!... Tus twg ntseeg, mas yeej ua tau txhua yam pab rau nws xwb."
24 Tam sis ntawd, tus me nyuam txiv hais nrov nrov tias: "Kuv ntseeg! Thov koj pab kom kuv ntseeg, yog kuv tsis muaj kev ntseeg!"
25 Yes Xus pom muaj neeg tuaj ntsauv coob coob, ces nws cem niag dab tsis huv tias: "Dab nplaig txhav, dab lag ntseg, kuv hais koj, koj cia li tawm hauv tus me nyuam no mus, txhob rov los nkag hauv nws ib zaug ntxiv li."
26 Tus dab nthe nrov nrov, nws muab tus me nyuam nchos lwj nchos liam, ces nws tawm mus. Tus me nyuam nyob nrom ncee li tsis muaj sia lawm. Coob leej hais tias: ‘Nws tuag lawm!’
27 Tab sis, Yes Xus tuav nws tes, tsa nws sawv, ces tus me nyuam sawv tsees los thiab nws sawv ntsug kiag.
28 Thaum Yes Xus nkag los hauv tsev lawm, nws cov thwj tim nug nws twj ywm tias: "Vim li cas peb ntiab tsis tau tus dab ntawd?"
29 Yes Xus hais rau lawv tias: "Hom dab ntawd, tsuas yog txoj kev teev Ntuj xwb thiaj ntiab tau."

Tim     21     lub     2     Hlis     2023

Hnub Peb Lis Piam Xya Nruab Xyoo A Nruab Lis Piam Xyoo I
Lectionary:   342

Yuav Hwm LN Peter Damian, ua Tswv Qhia thiab Kws cov Txuj Ntshiab

Zaj Nyeem Ib:   NPES XIS LAS 2: 1-11

1 Me tub, yog koj xav los tsob hwb Huab Tais, mas koj yuav npaj koj tus plig kom txawj tiv yeej kev ntxias.
2 Koj yuav ua neeg siab ncaj thiab ua siab tawv qhawv. Thaum txog lub caij raug kev nyuaj, koj tsis txhob lam taus lam ua dog dig.
3 Koj nyob ruaj nreb ntawm Huab Tais, tsis txhob txav deb ntawm nws, ces thaum txog koj hnub kawg, Huab Tais yuav tsa koj rau qhov siab.
4 Tas puas tsav yam uas tuaj raug koj, mas koj txais mog! Thaum koj raug kev txom nyem kev poob ntsej muag, mas koj ua siab ntev nyiaj.
5 Vim tias luag nchuav kub nyob hauv hluav taws kom huv tuaj, hos cov neeg uas Ntuj xaiv, mas Ntuj nchuav lawv nyob hauv txoj kev poob ntsej muag.
6 Koj tso siab lug rau Huab Tais, nws yuav tuaj pab koj. Koj taug twj ywm txoj kev ncaj, koj tso siab plhuav rau Huab Tais.
7 Nej cov uas hwm Huab Tais, nej vam txog nws lub siab khuv leej neeg mog. Nej tsis txhob ncaim ntawm nws mus, yog ncaim ces nej kawg ntog.
8 Nej cov uas hwm Huab Tais, nej tso siab rau nws mog, ces nej yeej yuav txais koob haum xwb.
9 Nej cov uas hwm Huab Tais, nej vam ntsoov tias nej yeej yuav tau txais nws cov paj tshab, txais txoj kev zoo siab mus li, thiab txais nws txoj kev khuv leej.
10 Nej xav txog cov phaj neeg uas dua tas lawd saib, nyob hauv cov neeg tso siab rau Huab Tais, puas muaj leej twg tsis tau txais raws li nws tos tos? Cov hwm Huab Tais, puas muaj ib tug uas Huab Tais tso nws pov tseg? Los puas muaj ib tug tau thov Huab Tais, tab sis Huab Tais tsis teb nws li?
11 Vim Huab Tais hlub thiab khuv leej neeg, nws zam txhaum rau lawv thiab cawm lawv thaum lawv raug txom nyem.

NPN   37: 3-4, 18-19, 27-28, 39-40

Txais: (5) Nej muab nej txoj sia cob rau Huab Tais, nws yeej yuav pab nej.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws
thiab yuav muaj noj muaj haus tsis tau kev txhawj.
Nej zoo siab nyob hauv HUAB TAIS,
ces nws yuav pub rau nej raws nej lub siab ntshaw.

Txais: (5) Nej muab nej txoj sia cob rau Huab Tais, nws yeej yuav pab nej.

HUAB TAIS paub cov coj ncaj txoj kev ua neej,
lawv lub cuab tam yuav nyob mus li.
Lub caij txom nyem lawv yuav tsis poob ntsej muag,
lub caij muaj kev tshaib plab, lawv yuav tau noj tsau.

Txais: (5) Nej muab nej txoj sia cob rau Huab Tais, nws yeej yuav pab nej.

Nej tso txoj kev phem tseg mus ua qhov zoo,
ces nej yuav nyob ruaj nreb mus li.
Vim HUAB TAIS nyiam txoj kev ncaj,
nws tsis tso cov neeg ntseeg txog txog nws pov tseg.

Txais: (5) Nej muab nej txoj sia cob rau Huab Tais, nws yeej yuav pab nej.

Txoj kev cawm cov neeg ncaj tuaj ntawm HUAB TAIS tuaj,
nws yog lawv lub chaw nkaum thaum lawv ntsib kev nyuaj.
HUAB TAIS pab lawv thiab tso lawv dim,
nws tso lawv dim ntawm tus phem thiab cawm lawv,
vim lawv tuaj nkaum hauv nws.

Txais: (5) Nej muab nej txoj sia cob rau Huab Tais, nws yeej yuav pab nej.

As Les Lus Yas:   NKAS LAS TIAS 6: 14

Txais: As les lus yas, as les lus yas.

Thov kom kuv tsis txhob khav ib zaug li, yog yuav khav ces khav
nyob hauv peb tus Huab Tais Yes Xus Pleev tus ntoo cuam xwb ,
vim nyob saum tus ntoo cuam nws muab lub ntiaj teb ntsia
dai rau ntawm kuv thiab muab kuv ntsia dai rau lub ntiaj teb.

Txais: As les lus yas, as les lus yas.

Ntawv Moo Zoo:   MK 9: 30-37

30 Yes Xus thiab nws cov thwj tim tawm qhov chaw ntawd mus; lawv hla hauv lub xeev Nkas Lis Lais, tiam sis Yes Xus tsis xav kom muaj neeg paub li.
31 Vim nws qhia rau nws cov thwj tim tias: "Luag yuav muab Neeg Leej Tub muag rau hauv tsoom neeg txhais tes. Ces lawv yuav muab nws tua. Thaum nws tuag tas lawm, peb hnub tom qab, nws yuav sawv rov los."
32 Cov thwj tim tsis to taub lo lus ntawd, tab sis lawv ntshai nug Yes Xus.
33 Ces lawv mus txog Kas Fas Naus. Thaum lawv mus hauv tsev lawm, Yes Xus nug lawv tias: "Nej sib cav txog dab tsi nyob tom kev?"
34 Lawv nyob ntsiag to, vim nyob tom kev, lawv sib cav tias leej twg yog tus loj dua cov.
35 Yes Xus zaum, nws hu Pab Kaum Ob los, nws hais rau lawv tias: "Leej twg xav ua tus thawj, mas nws yuav ua tus tuaj tom qab sawv daws, thiab yuav ua sawv daws tus tub txib."
36 Ces Yes Xus coj ib tug me nyuam los sawv hauv nruab nrab lawv, nws puag tus me nyuam, ces nws hais rau lawv tias:
37 "Leej twg txais ib tug me nyuam yaus zoo li tus no vim kuv lub npe, mas yog nws txais kuv. Thiab leej twg txais kuv, mas tsis yog nws txais kuv, yog nws txais Tus xa kuv tuaj."

Tag Kis twb yog Hnub Plaub Txais Tshauv lawm. Yog thawj hnub hauv lub caij 40, peb yuav tsum caiv nqaoj thiab yoo mov, tsuas noj li ib pluag kom txhob tshaib dhau xwb.

Yog ib txog kev coj peb xyaum tswj peb lub cev tej kev tshaib kev nrhis, kev xav, thiab kuj yog ib txog kev qhia kom peb txawj tswj peb lub siab lub tswv yim, thiab txoj kev ntshaw'

Thov kom Leev Tswv Yim Ntshiab los tshoj peb thiab ntxiv zog rau peb kom peb yeej peb lub cev thiab lub siab lub tswv yim tej kev xav kev ntshaw. Ua li.